Tsuas Yog Khetos Ntawm Tiam Kawg Nkaus Xwb Mas Thiaj Yuav Muab Tau Txoj Kev Mus Rau Txoj Sia Ntev Dhawv Mus Ib Txhis Rau Tib Neeg

Txoj kev muaj sia nyob tsis yog ib yam uas leej twg los yuav muaj tau, los sis tsis yog ib yam uas leej twg los yuav khwv tau yam yooj yim. Qhov no vim yog txoj sia tsuas los tau ntawm Vajtswv los nkaus xwb, ces hais tau hais tias, tsuas yog Vajtswv Tus Kheej kiag xwb thiaj li muaj lub ntsiab tseem ceeb ntawm txoj sia, thiab tsuas yog Vajtswv Tus Kheej nkaus xwb thiaj li muaj txoj kev muaj sia nyob. Thiab yog li ntawd tsuas yog Vajtswv nkaus xwb thiaj yog lub hauv paus keeb cag ntawm txoj sia, thiab tus dej txhawv ntawm cov uas pub txoj sia uas ntws tsis paub tu. Txij thaum uas Nws tsim tau lub ntiaj teb los, Vajtswv tau ua hauj lwm ntau heev txog ntawm kev loj hlob ntawm yam muaj sia, tau ua hauj lwm ntau los muab txoj sia rau tib neeg, thiab tau them tus nqi siab heev es kom tib neeg tau txais txoj sia. Qhov no vim yog Vajtswv Tus Kheej yog txoj sia ntev dhawv mus ib txhis, thiab Vajtswv Tus Kheej yog txoj kev uas tib neeg raug tsa ciaj rov los. Vajtswv yeej tsis tau ploj ntawm tib neeg lub siab mus li, thiab Nws nrog tib neeg nyob ua ke txhua lub sij hawm. Nws yog lub zog txhawb tib neeg kev ua neej nyob, tus cag ntawm tib neeg lub neej txoj sia, thiab txoj kev muaj nplua mias tso rau tib neeg lub neej txoj sia tom qab yug lawm. Nws ua kom tib neeg rov yug dua tshiab, thiab pab kom lawv ua tau lub neej khov kho hauv lawv lub luag hauj lwm. Ua tsaug rau Nws lub hwj chim thiab Nws lub zog txhawb txoj sia yam tus nplaim taws uas tsis txawj tuag, es tib neeg thiaj tau ua neej nyob ib tiam dhau ib tiam, thoob plaws uas lub hwj chim ntawm Vajtswv txoj sia yog lub ntsiab tseem ceeb ntawm tib neeg lub neej txoj sia, thiab rau qhov uas Vajtswv tau them ib tug nqi uas tsis muaj ib tug neeg twg yuav tau them li. Lub zog ntawm Vajtswv txoj sia yeej kov yeej txhua lub zog, tshaj qhov ntawd, nws tseem loj tshaj txhua lub zog tib si. Nws txoj sia muaj ntev dhawv mus ib txhis, Nws lub hwj chim loj tshaj plaws, thiab lub zog ntawm Nws txoj sia mas tsis muaj ib tug twg uas raug tsim tawm los sis ib lub zog yeeb ncuab twg uas yuav muaj peev xwm kov yeej li. Lub zog ntawm Vajtswv txoj sia yeej muaj nyob thiab ci ntsa iab tsis hais lub sij hawm twg los sis qhov chaw twg li. Tej zaum mas ceeb tsheej thiab ntiaj teb yuav muaj kev hloov ntau heev, tab sis Vajtswv txoj sia yuav nyob li qub mus ib txhis. Txhua yam yuav dhau mus, tab sis Vajtswv txoj sia yuav nyob li qub, vim Vajtswv yog lub hauv paus ntawm kev tshwm sim muaj txhua yam thiab yog tus cag ntawm lawv qhov kev tshwm sim muaj. Tib neeg txoj sia tshwm sim los ntawm Vajtswv, qhov uas muaj ceeb tsheej los vim yog Vajtswv thiab qhov uas ntiaj teb tshwm sim los yog ncau los ntawm lub hwj chim ntawm Vajtswv txoj sia. Tsis muaj ib yam dab tsi uas muaj txoj sia uas yuav nce tau mus siab tshaj Vajtswv lub hwj chim kav, thiab tsis muaj ib yam dab tsi uas muaj lub dag zog es yuav khiav dhau thaj chaw ntawm Vajtswv lub hwj chim li. Nyob rau qhov no, tsis hais lawv yuav yog leej twg li, txhua tus yuav tsum tau nyoo nyob hauv qab kev tswj fwm ntawm Vajtswv, txhua leej yuav tsum ua neej nyob hauv qab kev txib ntawm Vajtswv, thiab tsis muaj leej twg yuav khiav dim nws ob txhais tes li.

Tej zaum tam sim no koj ntshaw kom tau txoj sia, los sis tej zaum koj ntshaw kom tau qhov tseeb. Txawm yog li cas los xij, koj xav nrhiav Vajtswv, nrhiav tus Vajtswv uas koj vam khom tau, thiab tus uas muaj peev xwm muab txoj sia ntev dhawv mus ib txhis rau koj. Yog koj xav kom tau txoj sia ntev dhawv mus ib txhis, koj yuav tsum xub to taub txog lub hauv paus keeb cag ntawm txoj sia ntev dhawv mus ib txhis thiab yuav tsum xub paub ua ntej hais tias Vajtswv nyob qhov twg. Kuv twb tau hais lawm hais tias tsuas yog Vajtswv nkaus xwb mas thiaj yog txoj sia uas hloov tsis tau li, thiab tsuas yog Vajtswv nkaus xwb mas thiaj li muaj txoj kev muaj sia nyob. Vim Nws txoj sia tsis txawj hloov li, yog li ntawd, nws thiaj yog txoj sia ntev dhawv mus ib txhis; vim Vajtswv tib leeg nkaus xwb thiaj yog txoj kev muaj sia nyob, Vajtswv Tus Kheej kiag thiaj yog txoj kev ntawm txoj sia ntev dhawv mus ib txhis. Yog li ntawd, koj yuav tsum xub to taub hais tias Vajtswv nyob qhov twg, thiab yuav ua li cas es thiaj yuav tau nws txoj kev ntawm txoj sia ntev dhawv mus ib txhis no. Tam sim no cia peb los sib koom muab ob nqe lus tseem ceeb no sib cais coj los tham.

Yog koj yeej xav tau txoj kev mus rau txoj sia ntev dhawv mus ib txhis tiag, thiab yog koj muaj siab tiag tiag rau koj qhov kev nrhiav nws, ces ua ntej tshaj plaws ces teb lo lus nug no: Vajtswv nyob qhov twg hnub no? Tej zaum koj yuav teb hais tias, “Vajtswv nyob saum ntuj ceeb tsheej, muaj tseeb—Nws yeej tsis nyob hauv koj lub tsev, los Nws puas nyob?” Tej zaum koj yuav hais tias Vajtswv ces yeej pom meej hais tias nyob nrog txhua yam li. Los sis koj yuav hais tias Vajtswv nyob hauv txhua tus neeg lub siab, los sis hais tias Vajtswv nyob rau sab ntsuj plig. Kuv tsis yog yuav tsis lees ib qho no kiag li, tab sis Kuv yuav muab nqe lus no tham kom meej zog. Nws tsis yog ib qho uas yog tas nrho los hais tias Vajtswv nyob rau hauv tib neeg lub siab, tab sis nws kuj tsis yog ib qho uas yuam kev tas nrho thiab. Qhov no mas vim yog, nyob rau hauv cov ntseeg Vajtswv, muaj cov mas lawv txoj kev ntseeg yog qho tseeb hos ib co mas lawv txoj kev ntseeg yog qhov cuav, muaj ib co mas Vajtswv yeej pom zoo rau hos muaj ib co mas Nws tsis pom zoo rau, muaj ib co mas ua rau Nws txaus siab hos ib co mas ua rau Nws ntxub, thiab muaj ib co mas Nws muab kho kom zoo tag nrho hos muaj ib co mas Nws muab tshem tawm. Thiab yog li ntawd Kuv thiaj hais tias Vajtswv yeej nyob hauv tib neeg lub siab tab sis tsuas yog tsawg leej xwb, thiab cov neeg ntawd mas yeej yog cov uas ntseeg Vajtswv tiag tiag li, cov uas Vajtswv pom zoo, cov uas Nws txaus siab rau, thiab cov uas Nws muab kho kom zoo tag nrho. Lawv yog cov uas Vajtswv coj. Vim lawv mas yog Vajtswv coj, lawv yog cov neeg uas twb tau hnov thiab pom Vajtswv txoj kev ntawm txoj sia ntev dhawv mus ib txhis lawm. Cov uas lawv txoj kev ntseeg Vajtswv yog cuav xwb, cov uas Vajtswv tsis pom zoo rau, cov uas Vajtswv ntxub, cov uas Vajtswv muab tshem tawm—lawv ces yeej yuav raug Vajtswv tsis txais yuav, yuav raug nyob yam tsis muaj txoj kev muaj sia nyob, thiab yuav raug nyob yam tsis paub hais tias Vajtswv nyob qhov twg li. Qhov txawv ntawd, mas cov uas muaj Vajtswv nyob rau hauv lawv lub siab paub hais tias Vajtswv nyob qhov twg. Lawv yog cov neeg uas Vajtswv muab txoj kev ntawm txoj sia ntev dhawv mus ib txhis cob rau, thiab lawv yog cov uas lawv Vajtswv qab. Tam sim no koj puas paub hais tias Vajtswv nyob qhov twg? Vajtswv ces nyob rau hauv tib neeg lub siab thiab nyob ntawm tib neeg ib sab tib si. Nws tsis yog nyob hauv sab ntsuj plig nkaus xwb, thiab tshaj txhua yam tib si, tab sis tshaj ntawd tseem nyob hauv lub ntiaj teb uas muaj tib neeg nyob. Thiab yog li ntawd thaum tiam kawg los txog ces tau muab tej txheej txheem ntawm Vajtswv tes hauj lwm coj mus rau qhov chaw tshiab. Vajtswv yeej muaj kev tswj fwm kav txhua yam nyob hauv qab ntuj khwb no, thiab nws yog qhov chaw vam khom rau tib neeg nyob hauv lawv lub siab, thiab tshaj qhov ntawd, nws yeej nrog tib neeg nyob. Tsuas yog tib txog kev no xwb es Nws thiaj li coj tau txoj kev muaj sia nyob los rau tib neeg, thiab coj tib neeg los mus rau txoj kev ciaj. Vajtswv tau los rau hauv ntiaj teb no, thiab nrog tib neeg nyob ua ke, es kom tib neeg thiaj tau txoj kev muaj sia nyob, es kom tib neeg thiaj tshwm sim muaj nyob. Nyob rau tib lub sij hawm ntawd, Vajtswv yeej tau txib tau khaiv txhua yam nyob hauv lub qab ntuj khwb no, es kom lawv muaj kev koom tes nrog Nws txoj kev tswj fwm tuav tib neeg. Thiab yog li ntawd, yog koj tsuas lees paub txoj kev qhuab qhia uas hais tias Vajtswv nyob saum ntuj ceeb tsheej thiab nyob hauv tib neeg lub siab nkaus xwb, tab sis tsis lees paub qhov tseeb hais tias yeej muaj Vajtswv nrog tib neeg nyob, ces koj yuav tsis tau txoj sia, thiab yuav tsis muaj hnub tau txoj kev ntawm qhov tseeb.

Vajtswv Tus Kheej yog txoj sia, thiab qhov tseeb, thiab Nws txoj sia thiab qhov tseeb tshwm sim nyob ua ke. Cov uas tsis muaj peev xwm tau txais qhov tseeb ces yuav tsis muaj hnub tau txais txoj sia. Yog tsis muaj qhov kev qhia kev coj, kev txhawb nqa, thiab kev pab cuam ntawm qhov tseeb, koj ces tsuas tau tej tus ntawv, cov lus qhuab qhia, thiab, tshaj tag nrho ntawd, kev tuag nkaus xwb. Vajtswv txoj sia yeej muaj nyob tas mus li, thiab Nws qhov tseeb thiab txoj sia tshwm sim nyob ua ke. Yog koj nrhiav tsis tau lub hauv paus ntawm qhov tseeb, ces koj yuav tsis tau txais tej zaub mov yug txoj sia; yog koj tsis tau txais kev pab cuam ntawm txoj sia, ces koj yuav tsis muaj qhov tseeb tiag tiag li, thiab yog dhau ntawm kev khwv yees xav thiab kev xav phem lawm, ces tag nrho koj lub cev ces tsis muaj dab tsi li tsuas yog nqaij tawv nkaus xwb—koj cev nyuag nqaij tsw phem nkaus xwb. Yuav tsum paub hais tias tej lus hauv phau ntawv mas tsis raug suav hais tias yog txoj sia, tej lus teev tseg hauv keeb kwm yuav muab coj los qhuas ua qhov tseeb tsis tau, thiab tej kev cai yav tag los yuav muab coj los siv ua cov lus uas hnov Vajtswv hais tam sim no tsis tau. Tsuas yog cov uas Vajtswv hais kiag thaum Nws los rau ntiaj teb no thiab nyob nrog tib neeg kiag mas thiaj yog qhov tseeb, txoj sia, Vajtswv lub siab nyiam, thiab Nws qhov kev ua hauj lwm tam sim no. Yog koj muab tej lus teev tseg uas Vajtswv hais puag thaum ub coj los siv rau tam sim no, qhov ntawd yuav ua rau koj yog ib tug neeg kawm txog tej khoom qub xwb, thiab qhov kev zoo tshaj plaws uas siv los piav txog koj ces yog ib tug neeg paub txog tej qub txeeg qub teg hauv keeb kwm xwb. Qhov ntawd vim yog koj pheej ntseeg tej qub lw ntawm tes hauj lwm uas Vajtswv tau ua yav dhau los, tsuas ntseeg Vajtswv tus duab ntxoo thaum Nws ua hauj lwm nrog tib neeg yav dhau los, thiab tsuas ntseeg txoj kev uas Vajtswv muab tseg rau Nws cov ntseeg yav dhau los xwb. Koj tsis ntseeg txoj xub ke ntawm Vajtswv tes hauj lwm hnub no, tsis ntseeg Vajtswv lub ntsej muag uas muaj yeej koob ci ntsa iab hnub no, thiab tsis ntseeg txoj kev ntawm qhov tseeb uas Vajtswv hais qhia hnub no. Thiab yog li ntawd koj ces yeej cam tsis dhau qhov uas koj yog ib tug neeg npau suav nruab hnub uas yeej ncav tsis cuag qhov muaj tseeb li. Yog tam sim no koj tseem tuav rawv tej lus uas tsis muaj peev xwm muab tau txoj sia rau tib neeg, ces koj yog ib daig ntoo lwj[a] uas tsis muaj kev cia siab dab tsi li, vim koj yog ib tug uas ntseeg lub tswv yim qub loj dhau heev lawm, tawv ncauj dhau heev lawm, siab twm xeeb heev lawm!

Vajtswv rais los muaj cev nqaij daim tawv ces hu ua Khetos, thiab tus Khetos uas muaj peev xwm muab tau qhov tseeb rau neeg ces hu ua Vajtswv. Yeej tsis muaj dab tsi tshaj qhov no li, vim Nws muaj lub ntsiab tseem ceeb ntawm Vajtswv, thiab muaj Vajtswv tus moj yam, thiab qhov kev txawj ntse nyob rau hauv Nws tej hauj lwm, uas tib neeg yeej tsis muaj li. Cov uas hu lawv tus kheej ua Khetos, tab sis ua tsis tau Vajtswv txoj hauj lwm, yog cov dag noj dag haus xwb. Khetos mas tsis lam yog tus uas Vajtswv tshwm sim los ua kiag nyob rau hauv ntiaj teb no nkaus xwb, tab sis tseem yog cev nqaij daim tawv uas Vajtswv siv thaum uas nws ua Nws tes hauj lwm kom tiav hlo nyob nrog tib neeg. Lub cev no mas tsis muaj ib tug neeg twg uas yuav los hloov tau li, tab sis yog ib lub cev uas yeej ris tau Vajtswv tes hauj lwm hauv ntiaj teb, thiab qhia tau txog Vajtswv tus moj yam, thiab sawv cev Vajtswv tau zoo heev, thiab muab txoj sia rau tib neeg. Tsis yog tam sim no los yeej yog lwm hnub, cov uas ua txuj dag hais tias yog Khetos yeej yuav poob tsag, vim txawm hais tias lawv dag hais tias lawv yog Khetos, los lawv yeej tsis muaj lub ntsiab tseem ceeb ntawm Khetos ib qho li. Thiab yog li ntawd Kuv thiaj hais tias qhov tseeb txog Khetos ntawd yeej tsis muaj ib tug neeg twg yuav muab tshab txhais tau li, tab sis tsuas yog raug teb thiab txiav txim siab los ntawm Vajtswv Tus Kheej xwb. Nyob rau txoj kev no, yog koj yeej xav nrhiav txoj kev muaj sia nyob tiag tiag, koj yuav tsum xub lees paub nws rau qhov kev los rau lub ntiaj teb uas Vajtswv ua tes hauj lwm pub txoj kev muaj sia nyob rau tib neeg, thiab koj yuav tsum lees paub nws yog nyob rau thaum tiam kawg uas Nws los rau lub ntiaj teb los muab txoj kev muaj sia nyob pub rau tib neeg. Qhov no tsis yog yav tag los lawm; nws tab tom tshwm sim tam sim no.

Khetos ntawm tiam kawg ntawd nqa txoj sia los, thiab nqa txoj kev ntawm qhov tseeb uas ruaj khov thiab kav mus ib txhis ntawd los. Qhov tseeb no yog txoj kev uas tib neeg tau txoj sia, thiab nws yog tib txoj kev uas tib neeg yuav paub Vajtswv thiab tau txais kev pom zoo los ntawm Vajtswv. Yog koj tsis nrhiav txoj kev muaj sia nyob uas Khetos muab thaum tiam kawg ntawd, ces koj yeej yuav tsis tau txais kev pom zoo los ntawm Yexus ib zaug li, thiab yeej yuav tsis muaj hnub tsim nyog tau nkag rau hauv lub rooj vag ntawm vaj loog ceeb tsheej, vim koj yog ib tug moj zeej thiab neeg raug txim ntawm keeb kwm xwb. Cov uas raug khoo los ntawm kev cai, tus npe ntawv, thiab raug keeb kwm xauv ko taw cia ces yuav tsis tau txoj sia los sis tsis tau txoj kev muaj sia nyob uas tsis paub kawg. Qhov no mas vim yog tag nrho qhov lawv muaj ces tsuas yog tej nyuag dej nro uas lawv tuav rawv tseg los tau ntau txhiab xyoo uas tsis yog cov dej cawm siav uas txhawv ntawm lub zwm txwv los. Cov uas tsis tau txais cov dej cawm siav ces tsuas yog lub niag cev tuag, yog Ntxwgnyoog tej nyuag khoom ua si, thiab yog tub ki ntawm dab teb mus ib txhis xwb. Yog li ntawd, yuav ua cas es lawv thiaj yuav pom Vajtswv? Yog koj pheej xav tuav rawv yav tag los, tsuas sawv nres twj ywm tuav txhua yam cia kom zoo li qub, thiab tsis kam hloov qhov uas muaj tam sim no thiab muab keeb kwm tso pov tseg, ces tsis yog koj pheej yuav tawm tsam Vajtswv tas zog li los? Cov txheej txheem ntawm Vajtswv tes hauj lwm mas dav thiab loj heev li, zoo ib yam li nthwv dej nphau npog thiab nthwv xob nroo nrov deeg daws—tab sis koj tseem zaum twj ywm nyob tos kev puas tsuaj, khawm rawv koj txoj kev ruam thiab tsis ua ib qho dab tsi li. Nyob rau qhov no, yuav ua cas es thiaj yuav xam tau hais tias koj yog ib tug uas taug tus Me Nyuam Yaj tus hneev taw mas? Yuav ua cas es koj thiaj yuav ua pov thawj hais tias tus Vajtswv uas koj cia siab rau ntawd yog ib tug Vajtswv uas tshiab tas li xwb es yeej tsis txawj qub li? Thiab yuav ua cas es cov lus hauv koj phau ntawv daj ntawd thiaj li yuav coj tau koj hla mus rau tiam tshiab? Yuav ua cas es thiaj yuav coj tau koj mus nrhiav tej kauj ruam ntawm Vajtswv tes hauj lwm? Thiab yuav ua cas es thiaj coj tau koj mus rau saum ceeb tsheej? Qhov koj tuav ntawm koj txhais tes tsuas yog tus ntawv uas muab tau kev kaj siab ib nyuag pliag rau koj xwb, tsis yog tej qhov tseeb uas yuav muaj cuab kav muab tau txoj sia rau koj. Cov tej nqe Vajluskub koj nyeem tsuas pab tsim kho tau koj tus nplaig xwb, thiab tsis yog cov lus txawj ntse uas yuav pab tau kom koj paub tib neej lub neej txoj sia, haj yam tsis yog txoj kev uas yuav coj tau koj mus rau qhov kev zoo tag nrho. Qhov uas zoo tsis sib xws no tseem tsis ua kom koj tig rov los xav txog koj tus kheej thiab los? Qhov ntawd tsis ua rau koj ras txog tej lus to taub nyuaj nyob rau hauv thiab los? Koj puas muaj peev xwm coj tau koj tus kheej mus saum ceeb tsheej mus ntsib Vajtswv? Yog hais tias Vajtswv tsis los, koj puas yuav coj tau koj tus kheej mus rau saum ceeb tsheej mus ntsib txoj kev zoo siab li tsev neeg nrog rau Vajtswv? Koj puas tseem npau suav toog tam sim no mas? Yog li ntawd, Kuv xav hais kom koj tsis txhob npau suav toog lawm thiab tig los saib tus uas tab tom ua hauj lwm tam sim no—saib kom pom hais tias leej twg tab tom ua tes hauj lwm cawm tib neeg nyob rau tiam kawg. Yog koj tsis ua li, koj yuav tsis muaj hnub tau txais qhov tseeb, thiab yuav tsis tau txoj sia.

Cov uas xav tau txoj sia yam tsis vam khom qhov tseeb uas Khetos hais ces yog cov neeg ua txaus luag tshaj plaws hauv lub ntiaj teb no, thiab cov uas tsis lees txais txoj kev muaj sia nyob uas Khetos muab rau ces yog cov poob zoo rau hauv kev xav lawm xwb. Thiab yog li ces Kuv thiaj hais tias cov uas tsis txais yuav Khetos ntawm tiam kawg ces yuav raug Vajtswv ntxub mus ib txhis. Khetos yog tib neeg lub rooj vag nkag mus rau hauv lub nceeg vaj thaum tiam kawg, thiab tsis muaj ib tug twg uas yuav lug kev hla Nws tau li. Tsis muaj leej twg yuav raug Vajtswv muab kho kom zoo tag nrho tau li tshwj tsis yog los ntawm Khetos. Koj ntseeg Vajtswv, ces yog li koj yuav tsum txais yuav Nws cov lus thiab yoog raws Nws txoj kev. Koj yuav tsis muaj cuab kav xav txog qhov kom tau txais koob hmoov nkaus xwb rau lub sij hawm uas twb tsis muaj cuab kav lees yuav qhov tseeb thiab qhov kev muab txoj sia. Khetos los thaum tiam kawg es cov uas ntseeg nws tiag tiag thiaj li tau txais txoj sia. Nws tes hauj lwm yog yuav muab tiam qub xaus thiab nkag mus rau tiam tshiab, thiab nws tes hauj lwm yog txoj kev uas cov yuav nkag mus rau tiam tshiab yuav tsum tau taug. Yog koj tsis muaj peev xwm yuav lees paub Nws thiab tseem ho cem, saib tsis taus, los sis tsim txom Nws, ces koj yuav raug hlawv mus ib txhis thiab yuav tsis tau nkag rau Vajtswv lub nceeg vaj. Vim tus Khetos no mas Nws Tus Kheej ces yog kiag qhov kev qhia tawm txog tus Vajntsujplig, qhov kev qhia tawm txog Vajtswv, Tus uas Vajtswv tso siab rau los ua Nws tes hauj lwm hauv ntiaj teb. Thiab yog li Kuv thiaj hais tias yog koj tsis muaj peev xwm txais yuav tag nrho tej uas Khetos ua thaum tiam kawg ntawd, ces yog koj saib tsis taus tus Vajntsujplig. Qhov kev rau txim rau cov uas saib tsis taus tus Vajntsujplig ces sawv daws yeej pom tseeb kawg. Kuv kuj qhia koj hais tias yog koj tawm tsam Khetos thaum tiam kawg ntawd, yog koj tsis lees Khetos thaum tiam kawg yam saib tsis tau Nws li, yuav tsis muaj leej twg los ris koj lub txim li. Dhau ntawd mus, txij hnub no mus lawm tom ntej ces koj yuav tsis muaj ib lub cib fim ntxiv kom tau txais Vajtswv qhov kev pom zoo lawm; txawm hais tias koj yuav sib zog npaum li cas los theej txhoj rau koj tus kheej, los koj yeej yuav tsis muaj hnub pom Vajtswv lub ntsej muag li. Vim qhov koj tawm tsam ntawd tsis yog ib tug tib neeg, qhov koj cem ntiab tawm ntawd tsis yog ib yam muaj sia me me, tab sis yog Khetos. Koj puas paub hais tias lub txim ntawm qhov no yuav yog dab tsi? Koj yuav tsis yog ua yuam kev ib qho me me xwb, tab sis ua txhaum ib lub txim loj kawg nkaus. Kuv hais qhia sawv daws kom tsis txhob lam zim kaus hniav rau qhov tseeb, los sis lam tau lam cem, vim tsuas yog qhov tseeb xwb mas thiaj muab tau txoj sia rau koj, thiab yeej tsis muaj dab tsi hlo li tsuas yog qhov tseeb nkaus xwb thiaj li yuav pub koj rov yug dua tshiab thiab pom Vajtswv lub ntsej muag dua ib zaug ntxiv.

Lus taw qhia:

a. Ib daig ntoo lwj: Suav ib lo lus paj lug, txhais tias “tsis muaj dab tsi yuav pab tau lawm.”

Qhov Dhau Los: Koj Puas Paub? Vajtswv Tau Ua Ib Yam Loj Tshaj Plaws Nrog Rau Tib Neeg

Ntxiv Mus: Npaj Txoj Kev Ua Zoo Kom Txaus Nkaus Rau Koj Txoj Hau Kev Kawg

Tej kev puas tsuaj tab tom tshwm sim ib yam zuj zus tuaj. Tus Tswv twb los rau hauv qhov kev zais npog ua ntej txoj kev txom nyem loj tshaj plaws lawm. Koj puas paub tias yuav tos txais Nws li cas? Txhob me siab hu rau peb los nrhiav qhov kev tos txais no.

Cov Ntsiab Lus Uas Zoo Sib Thooj

Tshooj 5

Thaum Vajtswv hais tej lus txib tib neeg uas nyuaj rau lawv yuav los piav txog, thiab thaum Nws cov lus tsoo ncaj qha rau hauv tib neeg lub...

Qhov Kho Kev Teeb Txhua Yam

  • Cov ntawv
  • Cov Ntsiab Lus Tom Qab

Ib Xim Nkaus Xwb

Cov Ntsiab Lus Tom Qab

Tus Ntawv

Tus Ntawv Luaj Li Cas

Kev Sib Nrug Ntawm Tej Kab Ntawv

Kev Sib Nrug Ntawm Tej Kab Ntawv

Nplooj Ntawv Qhov Dav

Cov Ntsiab Lus

Tshawb Nrhiav

  • Tshawb Nrhiav Lo Lus No
  • Tshawb Nrhiav Phau Ntawv No