I. Qhov Twg Loj Dua: Vajtswv, los sis phau Vajluskub? Dab Tsi Yog txoj Kev Sib Cuam Tshuam Ntawm Vajtswv thiab phau Vajluskub?

1. Tau ntau xyoo lawm, tib neeg txoj kev qub ntawm txoj kev ntseeg (hais txog Kev Ntseeg Vajtswv, ib txog ntawm peb txoj kev ntseeg loj nyob hauv ntiaj teb) ces tsuas yog nyeem Vajluskub; kev ncaim ntawm Vajluskub ces tsis yog kev ntseeg tus Tswv, kev ncaim ntawm Vajluskub ces yog kev tawm ntawm txoj kev ntseeg thiab kev txhaum ntawm txoj kev ntseeg, thiab txawm hais tias tib neeg yuav nyeem lwm phau ntawv, los lub hauv paus tseem ntsiab ntawm cov phau ntawv no yuav tsum yog kev piav txog phau Vajluskub. Qhov ntawd ces hais tau hais tias, yog koj ntseeg tus Tswv, ces koj yuav tsum nyeem Vajluskub, thiab nyob rau sab nraud ntawm phau Vajluskub ces koj yuav tsum tsis txhob pe hawm ib phau ntawv twg uas tsis cuam tshuam txog Vajluskub. Yog koj ua li, ces koj tab tom ntxeev siab rau Vajtswv. Txij kiag puag thaum muaj phau Vajluskub los, tib neeg txoj kev ntseeg tus Tswv ces yog txoj kev ntseeg phau Vajluskub. Tsis yog yuav hais tias tib neeg ntseeg tus Tswv, hos nws tseem yog qhov zoo dua uas hais tias lawv ntseeg phau Vajluskub; yog yuav hais tias lawv twb pib nyeem Vajluskub lawm, hos nws tseem yog qhov zoo dua hais tias lawv twb pib ntseeg Vajluskub lawm; thiab tsis yog yuav hais tias lawv tau rov qab los rau ntawm tus Tswv lub xub ntiag lawm, hos nws tseem yog qhov zoo dua hais tias tias lawv twb rov los rau ntawm Vajluskub lub xub ntiag lawm. Nyob rau txoj kev ua li no, tib neeg pe hawm phau Vajluskub cuag nkaus li nws yog Vajtswv, cuag li nws yog lawv roj ntsha, thiab plam nws ces cuag nkaus li plam lawv txoj sia. Tib neeg pom phau Vajluskub siab npaum nkaus li Vajtswv, thiab tseem muaj ib co uas pom nws siab tshaj Vajtswv lawm thiab. Yog tib neeg tsis muaj Vajntsujplig tes hauj lwm, yog tib neeg tsis hnov Vajtswv lawm, lawv yeej tseem ua neej tau mus ntxiv—tab sis thaum lawv xiam phau Vajluskub lawm, los sis xiam tej tshooj thiab tej nqe uas nrov npe heev, ces nws zoo li lawv xiam kiag lawv txoj sia lawm. Thiab yog li ntawd, thaum uas tib neeg ntseeg kiag tus Tswv lawm ces lawv pib nyeem phau Vajluskub, thiab nco kom tau phau Vajluskub rau hauv siab, thiab yog lawv yim nco ntau Vajluskub ntau npaum li cas, ces qho no ua tau pov thawj qhia hais tias lawv hlub tus Tswv thiab muaj kev ntseeg loj npaum li ntawd. Cov uas tau nyeem Vajluskub thiab piav tau rau lwm tus ces puav leej yog cov kwv tij thiab cov nkauj muam zoo tag nrho. Tag nrho npaum no lub xyoo, tib neeg txoj kev ntseeg thiab txoj kev ua siab ncaj rau Vajtswv ces yog ntsuas raws li qhov uas seb lawv to taub Vajluskub txog qhov twg. Tib neeg feem coob tsis to taub hais tias vim li cas lawv thiaj yuav tsum tau ntseeg Vajtswv, los sis yuav ntseeg Vajtswv li cas, thiab tsis ua dab tsi li tab sis tsuas nrhiav yam qi muag nti kom tau tej pov thawj los twv tej tshooj hauv Vajluskub xwb. Tib neeg yeej tsis nrhiav txoj xub kev ntawm Vajntsujplig tes hauj lwm li; tag mus li, lawv tsis ua dab tsi li tab sis tsuas rau siab ntso kawm thiab tshuaj xyuas Vajluskub xwb, thiab tsis muaj leej twg li uas yuav nrhiav tau Vajntsujplig tes hauj lwm tshiab zog nyob sab nraud ntawm phau Vajluskub li. Tsis muaj leej twg uas yuav tau ncaim ntawm phau Vajluskub, los sis yuav tau luag ua li ntawd li. Tib neeg tau kawm Vajluskub los tau npaum li no xyoo, lawv tau muab tau tej lub tshab txhais ntau yam, thiab tau ua hauj lwm ntau heev li; lawv kuj muaj ntau yam kev xav uas sib txawv txog Vajluskub thiab, uas lawv sib cam tsis paub kawg, ces thiaj li muaj ntau tshaj li ob txhiab pab ntseeg uas sib txawv uas muaj tshwm sim los txog niaj hnub no. Tag nrho lawv mas tsuas xav nrhiav tej qho kev piav tshwj xeeb, los sis ntau yam lus zais tob nyob rau hauv Vajluskub, lawv xav tshawb xyuas nws, nrhiav kom tau nws nyob rau sab tom qab ntawm Yehauvas tes hauj lwm nyob rau hauv Yixayee, los sis sab tom qab ntawm Yexus tes hauj lwm nyob rau hauv Yudias, los sis ntau qhov lus zais tob uas tsis muaj neeg paub li. Tib neeg txoj kev txav zemus rau Vajluskub yog ib qho kev ntshaw tshaj plaws thiab kev ntseeg, thiab tsis muaj leej twg yuav muaj cuab kav piav tau kom meej txog zaj dab neeg sab hauv los sis lub tseem ntsiab ntawm phau Vajluskub. Yog li ntawd, niaj hnub no tib neeg thiaj tseem muaj ib qho kev xav tsis thoob uas piav tsis tau rau leej twg li thaum uas hais txog Vajluskub, thiab lawv tseem haj yam vwm rau nws, thiab haj yam muaj kev ntseeg rau nws ntau ntxiv. Niaj hnub no, txhua tus xav nrhiav cov lus qhia txog yav tom ntej txog tes hauj lwm ntawm tiam kawg nyob rau hauv Vajluskub, lawv xav tshawb kom pom seb Vajtswv ua tes hauj lwm dab tsi nyob rau tiam kawg, thiab muaj tej cim dab tsi txog tiam kawg. Nyob rau txoj kev ua no, lawv txoj kev pe hawm phau Vajluskub mas muaj ceem kawg nkaus, thiab thaum haj yam ze rau tiam kawg lawm, ces lawv haj yam muaj kev ntseeg yam qi muag nti rau tej lus qhia txog yav tom ntej ntawm phau Vajluskub, yog thaum hais txog kiag tiam kawg. Nrog tej kev ntseeg yam qi muag nti nyob rau hauv phau Vajluskub zoo li ntawd, nrog txoj kev ntseeg phau Vajluskub li ntawd, ces lawv tsis muaj txoj kev ntshaw yuav nrhiav Vajntsujplig tes hauj lwm li. Nyob rau hauv tib neeg tej kev xav phem, lawv xav hais tias tsuas yog phau Vajluskub xwb mas thiaj li yuav coj tau Vajntsujplig tes hauj lwm los; tsuas yog nyob rau hauv Vajluskub nkaus xwb mas lawv thiaj li nrhiav tau Vajtswv tej hneev taw; tsuas yog nyob rau hauv Vajluskub nkaus xwb mas thiaj muaj tej lus zais tob ntawm Vajtswv tes hauj lwm zais rau hauv; tsuas yog phau Vajluskub nkaus xwb—tsis yog lwm phau ntawv los sis lwm tus neeg—mas thiaj li qhia tau kom meej txog txhua yam ntawm Vajtswv thiab tag nrho Nws tes hauj lwm xwb; phau Vajluskub muaj cuab kav coj tau tes hauj lwm ntawm ntuj ceeb tsheej los rau ntiaj teb; thiab phau Vajluskub muaj cuab kav pib tau thiab xaus tau tej tiam. Nrog rau tej kev xav phem no, tib neeg tsis muaj kev xav yuav nrhiav Vajntsujplig tes hauj lwm. Yog li ntawd, tsis hais phau Vajluskub yuav pab tau tib neeg npaum li cas yav tag los, nws tau rais los mus ua ib qho tav kev rau Vajtswv tes hauj lwm zaum kawg kiag no. Yog tsis muaj phau Vajluskub, los tib neeg yeej muaj cuab kav nrhiav tau Vajtswv tej hneev taw los ntawm lwm yam, tab sis niaj hnub no, Nws tej hneev taw rau muab kaw tseg los ntawm phau Vajluskub lawm, thiab yuav muab Nws tes hauj lwm zaum kawg kiag no ncua ntxiv mus kom ntev mas nyuaj tshaj li ob npaug kiag, thiab yog ib qho kev peem nce toj xwb. Qhov no ces tag nrho yog vim tej tshooj thiab tej nyuag lus hais uas nrov npe nyob rau hauv phau Vajluskub, nrog rau ntau yam lus qhia txog yav tom ntej uas muaj nyob rau hauv Vajluskub. Phau Vajluskub tau rais los ua ib tug mlom nyob rau hauv tib neeg lub siab lawm, nws tau rais los ua ib qho txhiaj txhais nyob rau hauv lawv lub hlwb lawm thiab ces lawv cia li tsis muaj peev xwm ntseeg hais tias Vajtswv yeej muaj peev xwm ua hauj lwm tau rau sab nraudntawm phau Vajluskub, lawv haj yam tsis muaj cuab kav ntseeg tau hais tias yuav ncaim tau ntawm phau Vajluskub mus pib dua ib qho tshiab. Qhov no ces yog qhov uas tib neeg yeej xav tsis tau li; lawv ntseeg tsis tau nws li, thiab lawv xav tsis txog nws hlo li. Phau Vajluskub tau rais los ua ib yam uas thaiv kev loj kawg nkaus rau tib neeg txoj kev lees txais Vajtswv tes hauj lwm tshiab, thiab ib qho nyuab rau Vajtswv txoj kev ua kom tes hauj lwm tshiab no nthuav dav tuaj.

Xaiv tawm los ntawm “Hais Txog Phau Vajluskub (1)” nyob hauv Txoj Lus Tshwm Hauv Lub Cev Nqaij Daim Tawv

2. Niaj hnub no, tib neeg ntseeg hais tias phau Vajluskub yog Vajtswv, thiab hais tias Vajtswv yog phau Vajluskub. Yog li ntawd, ib yam nkaus li thiab, lawv ntseeg hais tias tag nrho cov lus hauv phau Vajluskub thiaj yog tib co lus uas Vajtswv hais nkaus xwb, thiab hais tias tag nrho tej lus ntawd yog Vajtswv hais. Cov uas ntseeg Vajtswv tseem xav hais tias, txawm hais tias tag nrho rau-caum-rau phau ntawv hauv phau Vajluskub Qub thiab Tshiab ntawd yog tib neeg sau, los lawv puav leej yog tau txais kev tshoov siab los ntawm Vajtswv tib si, thiab ib co lus teev tseg ntawm tej lus hais tawm ntawm Vajntsujplig. Qhov no yog kev to taub yuam kev ntawm tib neeg, thiab nws tsis sib dhos raws li tej qhov tseeb lawm. Qhov tseeb, dhau ntawm cov ntawv txog cov lus qhia txog yav tom ntej lawm, feem ntau ntawm Vajluskub Qub ces yog tej lus teev txog keeb kwm. Ib txhia ntawm cov ntawv ntawm phau Vajluskub Tshiab los yog ntawm tib neeg tej kev ntsib kev pom los, thiab ib txhia yog los ntawm kev qhuab qhia ntawm Vajntsujplig los; Povlauj cov ntawv, muab piv txwv, tshwm los ntawm tes hauj lwm ntawm ib tug tib neeg, tag nrho lawv ces puav leej yog qhov tshwm sim los ntawm Vajntsujplig qhov kev qhuab qhia, thiab tej ntawd ces yog sau rau cov pawg ntseeg, thiab tej lus ntuas thiab lus txhawb siab rau cov kwv tij thiab cov nkauj muam ntawm cov pawg ntseeg. Cov ntawd tsis yog cov lus uas Vajntsujplig hais—Povlauj tsis muaj peev xwm yuav hais tau lus sawv cev Vajntsujplig, thiab nws kuj tsis yog ib tug xib fwb cev Vajtswv lus, nws haj yam tsis pom tej yog toog uas Yauhas pom thiab. Nws cov ntawv ces yog sau rau cov pawg ntseeg ntawm Efexau, Filadefia, Kalatia, thiab lwm cov pawg ntseeg. … Yog tib neeg pom Povlauj cov ntawv los sis cov lus uas hais tawm ntawm Vajntsujplig, thiab pe hawm lawv li Vajtswv, ces tsuas hais tau hais tias lawv mas tsis txawj saib qhov yog los tsis yog li. Yog yuav muab hais nchav zog, ces qhov no tseem tsis yog kev thuam txoj kev ntseeg thiab lod? Ib tug tib neeg yuav hais lus sawv cev Vajtswv tau li cas? Thiab ua cas tib neeg ho nyo hau rau tej lus teev tseg ntawm nws cov ntawv thiab rau cov lus nws hais cuag nkaus li lawv yog ib phau ntawv dawb huv, los sis ib phau ntawv qaum ntuj? Vajtswv tej lus puas yuav muaj ib tug neeg lam tau lam muab coj los hais tau mas? Ib tug tib neeg yuav ua cas hais lus sawv cev Vajtswv tau mas?

Xaiv tawm los ntawm “Hais Txog Phau Vajluskub (3)” nyob hauv Txoj Lus Tshwm Hauv Lub Cev Nqaij Daim Tawv

3. Yeej tseem muaj coob tshaj thiab uas ntseeg hais tias txawm Vajtswv tes hauj lwm tshiab yuav yog dab tsi los xij, nws yuav tsum tau muaj pov thawj los ntawm cov lus zuag cev lus txog yav tom ntej, thiab nyob rau txhua txhua theem ntawm qhov hauj lwm ntawd, tag nrho cov uas caum Nws uas muaj ib lub siab “tiag” yuav tsum tau pom cov lus qhia tshwm; tsis li ntawd, ces qhov hauj lwm ntawd yeej tsis yog Vajtswv qhov hauj lwm li. Nws twb yeej yog ib qho tsis yooj yim rau tib neeg los paub Vajtswv lawm. Tseem yuav coj tib neeg lub siab ruam thiab nws tus yam ntxwv ntxeev siab ntawm kev saib tus kheej tseem ceeb thiab kev qhuas tus kheej ntawd los ntxiv thiab, ces nws thiaj li ua ib qho haj yam nyuab rau nws los txais yuav Vajtswv tes hauj lwm tshiab. Tib neeg tsis ua twb zoo xav kom thoob rau Vajtswv tes hauj lwm tshiab, los sis tsis kam txo hwj chim lees nws, tsis li ntawd xwb hos, nws tseem muaj tus yam ntxwv muab hlob thaum uas nws tseem tos lus qhia tshwm thiab lus coj kev los ntawm Vajtswv. Qhov no tsis yog tus cwj pwm ntawm cov ntxeev siab thiab tawm tsam Vajtswv thiab los? Cov neeg zoo li ntawd es yuav ua cas thiaj tau txais Vajtswv qhov kev pom zoo mas?

Xaiv tawm los ntawm “Tus Tib Neeg Uas Twb Tau Kem Ciam Rau Vajtswv Nyob Rau Hauv Nws Qhov Kev Xav Lawm Ho Yuav Tau Txais Vajtswv Txoj Kev Qhia Tshwm Tau Li Cas?” nyob hauv Txoj Lus Tshwm Hauv Lub Cev Nqaij Daim Tawv

4. Nyob rau thaum lub sij hawm ntawm Yexus, Yexus coj cov neeg Yudais thiab tag nrho cov uas raws Nws raws li qhov uas Vajntsujplig ua hauj lwm nyob rau hauv Nws rau lub sij hawm ntawd. Nws tsis muab phau Vajluskub coj los ua qhov hauv paus keeb cag rau tej yam uas Nws ua, tab sis hais lus raws li Nws tes hauj lwm; Nws tsis quav ntsej txog qhov uas Vajluskub hais, los sis Nws tsis nrhiav hauv Vajluskub kom tau ib txoj kev los coj Nws cov ntseeg. Txij kiag thaum Nws pib ua tes dej num los mus, Nws tshaj tawm txoj kev ntawm kev hloov siab lees txim—ib lo lus uas yeej tsis tau muaj teev tseg rau hauv tej lus qhia txog yav tom ntej ntawm phau Vajluskub Qub li. Tsis yog hais tias Nws tsis ua raws li Vajluskub nkaus xwb, tab sis Nws kuj tseem coj ib txoj kev tshiab, thiab ua tes hauj lwm tshiab. Nws yeej tsis hais lus piv rau Vajluskub lub sij hawm Nws qhuab qhia li. Nyob rau thaum Tiam Muaj Kev Cai, yeej tsis tau muaj leej twg uas muaj peev xwm ua tau Nws tej txuj ci phim hwj txog kev kho tej neeg mob kom zoo thiab ntiab dab tawm li. Yog li ntawd, ib yam nkaus li thiab, Nws tes hauj lwm, Nws tej kev qhuab qhia, thiab txoj kev muaj cai thiab lub hwj chim ntawm Nws tej lus ces yeej mus deb tshaj txhua tus neeg nyob rau Tiam Muaj Kev Cai. Yexus tsuas yog ua Nws tes hauj lwm uas tshiab dua xwb, thiab txawm hais tias muaj neeg coob tus siv Vajluskub los cem Nws—thiab tseem siv phau Vajluskub Qub los muab Nws ntsia kiag rau saum tus ntoo khaub lig—los Nws tes hauj lwm yeej dhau phau Vajluskub Qub lawm; yog hais tias tsis zoo li no, vim li cas tib neeg ho muab Nws ntsia rau saum tus ntoo khaub lig? Tsis yog qhov uas tsis muaj ib yam dab tsi nyob hauv phau Vajluskub Qub uas hais txog Nws tej kev qhuab qhia, thiab Nws lub peev xwm kho cov neeg mob kom zoo thiab ntiab tau dab tawm lod? Nws tes hauj lwm ces yog ua los coj ib txoj kev tshiab, nws tsis yog txhob txwm npaj los sib tawm tsam nrog phau Vajluskub, los sis txhob txwm rhuav tshem phau Vajluskub Qub. Nws tsuas los ua Nws tes hauj lwm qhuab qhia, los coj tes hauj lwm tshiab los rau cov uas ntshaw txog thiab nrhiav Nws xwb. Nws tsis yog los piav txog Vajluskub Qub los sis los txhawb nqa nws tes hauj lwm. Nws tes hauj lwm tsis yog ua kom cia Tiam Muaj Kev Cai loj hlob ntxiv mus, vim Nws tes hauj lwm tsis tau ua twb zoo xav txog qhov uas seb nws puas muaj phau Vajluskub ua nws lub hauv paus keeb cag; Yexus tsuas los ua Nws tes hauj lwm uas Nws tsim nyog ua xwb. Yog li ntawd, Nws tsis piav txog tej lus qhia txog yav tom ntej ntawm phau Vajluskub Qub, los sis Nws tsis ua hauj lwm raws li tej lus ntawm Vajlubkub Qub Tiam Muaj Kev Cai. Nws tsis quav ntsej txog tej uas Vajluskub Qub hais, Nws tsis txhawj txog qhov uas seb nws puas yuav pom zoo nrog Nws tes hauj lwm los tsis pom zoo, thiab tsis txhawj txog tej uas lwm tus yuav paub txog Nws tes hauj lawm los tsis paub li, los sis lawv yuav cem nws li cas li. Nws tsuas rau siab ntso ua tes hauj lwm uas Nws tsim nyog ua nkaus xwb, txawm hais tias coob tus neeg yuav siv tej lus qhia txog yav tom ntej ntawm cov xib fwb cev Vajtswv lus hauv Vajluskub Qub los cem Nws los xij. Rau tib neeg, ces nws zoo li Nws tes hauj lwm tsis muaj hauv paus hauv ntsis li, thiab muaj ntau yam uas tsis sib dhos nrog rau tej lus teev tseg hauv Vajluskub Qub. Qhov no tsis yog tib neeg qhov kev ua yuam kev lod? Ua puas tsim nyog muab kev qhuab qhia coj los siv rau Vajtswv tes hauj lwm? Thiab Vajtswv tseem yuav tau ua raws nraim li tej lus qhia ua ntej ntawm cov xib fwv cev Vajtswv lus thiab lod? Thaum kawg, qhov twg loj dua: Vajtswv los sis Vajluskub? Vajtswv tseem yuav tsum tau ua hauj lwm raws nraim li Vajluskub thiab lod? Puas yog hais tias Vajtswv yeej tsis muaj cai hla dhau Vajluskub li no mas? Vajtswv yeej ncaim tsis tau Vajluskub thiab ua lwm yam hauj lwm li lod? Vim li cas Yexus thiab Nws cov thwj tim ho tsis ua raws li tej kev cai Xanpatau li mas? Yog Nws tseem yuav tau caiv raws li kev cai Xanpatau thiab xyaum ua raws nraim li tej kev cai ntawm Vajluskub Qub, vim li cas Yexus ho tsis khaws tej kev cai Xanpatau tom qab Nws los lawm, tab sis ho ntxuav ko taw, qhwv tob hau, ntais ncuav, thiab hais cawv mas? Tsis yog tej no yeej tsis muaj nyob rau hauv tej kev cai hauv Vajluskub Qub li lod? Yog Yexus hwm phau Vajluskub Qub, vim li cas Nws ho tsis ua raws li tej kev qhuab qhia no mas? Koj yuav tsum paub qhov twg los ua ntej, Vajtswv los sis phau Vajluskub! Twb yog tus Tswv ntawm hnub Xanpatau lawm, ua Nws tseem tsis yog tus Tswv ntawm phau Vajluskub thiab lod?

… Yog li ntawd, Nws hais tias: “Tsis txhob xav hais tias Kuv los rhuav tshem txoj kev cai, los sis cov xib fwb cev Vajtswv lus: Kuv tsis yog los rhuav tshem, tab sis los ua kom tiav.” Yog li ntawd, raws li tej uas Nws tau ua tiav hlo, ntau qhov kev qhuab qhia raug rhuav tshem nrog rau. Nyob rau ntawm hnub Xanpatau ces thaum Nws coj cov thwj tim mus hla ntawm lub hav noob qoob, lawv de thiab noj cov noob qoob; Nws tsis caiv raws li kev cai Xanpatau thiab hais tias “Neeg Leej Tub yog tus Tswv txawm yog hnub xanpatau kiag los xij.” Nyob rau lub sij hawm ntawd, raws li tej kev cai ntawm cov neeg Yixayee, ces leej twg los xij uas tsis caiv raws li kev cai Xanpatau ces yuav raug xuas pob zeb txawb kom tuag. Yexus, txawm li ntawd los xij, yeej tsis nkag mus rau lub tuam tsev los sis caiv raws li kev cai Xanpautau, thiab Nws tes hauj lwm tsis yog Yehauvas ua tiav nyob rau thaum lub sij hawm thaum Vajluskub Qub. Yog li ntawd, tes hauj lwm uas Yexus uas tiav thiaj li tshaj txoj cai ntawm Vajluskub Qub lawm, nws siab dua nws, thiab tsis yog ua raws li nws. Nyob rau Tiam Hmoov Hlub, Yexus tsis ua hauj lwm raws li txoj cai ntawm Vajluskub Qub, thiab twb tau tsis ua raws li cov kev qhuab qhia ntawd lawm. Tab sis cov neeg Yixayee tseem tuav rawv phau Vajluskub ruaj ruaj thiab cem Yexus—qhov no tsis yog kev tsis lees txais Yexus tes hauj lwm lod? Niaj hnub no, lub ntiaj teb ntawm fab kev ntseeg kuj tseem tuav rawv phau Vajluskub ruaj ruaj, thiab ib txhia neeg hais tias, “Phau Vajluskub yog ib phau ntawv dawb huv, thiab nws yuav tsum raug nyeem.” Ib txhia hais tias, “Vajtswv tes hauj lwm mas yuav tsum tau tuav rawv mus ib txhis, phau Vajluskub Qub yog Vajtswv txoj kev cog lus rau cov neeg Yixayee, thiab yuav muab rhuav tshem tsis tau, thiab kev cai Xanpatau mas yuav tsum ua raws!” Lawv tseem tsis txaus luag thiab lod? Vim li cas Yexus ho tsis ua raws li kev cai Xanpatau mas? Nws tab tom ua kev txhaum lod? Leej twg thiaj li yuav to taub tej yam no kom thoob mas?

Xaiv tawm los ntawm “Hais Txog Phau Vajluskub (1)” nyob hauv Txoj Lus Tshwm Hauv Lub Cev Nqaij Daim Tawv

5. Yexus cov lus thiab tes hauj lwm nyob rau lub sij hawm ntawd mas tsis tuav qhov kev qhuab qhia, thiab Nws tsis ua Nws tes hauj lwm raws li tes hauj hauj lwm ntawm txoj kev cai ntawm Vajluskub Qub. Nws yog ua raws li tes hauj lwm uas tsim nyog ua nyob rau Tiam Hmoov Hlub. Nws siv zog ua raws li tes hauj lwm uas Nws coj los, raws li Nws tus kheej qhov phiaj xwm, thiab raws li Nws tes hauj lwm qhuab qhia; Nws tsis ua hauj lwm raws li txoj cai ntawm Vajluskub Qub. Tsis muaj ib yam dab tsi li uas Nws ua es yuav yoog raws txoj cai ntawm Vajluskub Qub li, thiab Nws tsis tau los ua hauj lwm kom tej lus ntawm cov xib fwb cev Vajtswv lus ntawd tshwm sim tuaj. Ib theem twg ntawm Vajtswv tes hauj lwm mas tsis yog sib zog ntsos ua kom tej lus qhia txog yam tom ntej ntawm cov xib fwb cev Vajtswv lus yav puag thaum ub ntawd tshwm sim tuaj, thiab Nws tsis tau los kom yoog raws nraim li tej kev qhuab qhia los sis sib zog ntsos ua kom tej lus qhia txog yav tom ntej ntawm cov xib fwb cev Vajtswv lus yav thaum ub ntawm tshwm sim tuaj. Tab sis Nws tej kev ua kuj tsis cuam tshuam rau tej lus qhia txog yav tom ntej ntawm cov xib fwb cev Vajtswv lus yav thaum ub ntawd thiab, los sis lawv kuj tsis nphav txog tes hauj lwm uas Nws tau ua tiav dhau los lawm thiab. Qhov zoo ntawm Nws tes hauj lwm ces yog tsis ua raws li ib txoj kev qhuab qhia twg, thiab tsuas yog ua tes hauj lwm uas Nws Tus Kheej tsim nyog ua xwb. Nws tsis yog ib tug xib fwb cev Vajtswv lus los sis ib tug neeg pom yav tom ntej, tab sis yog ib tug neeg ua, tus uas los ua tes hauj lwm uas Nws tsim nyog ua tiag tiag, thiab Nws los pib Nws tiam tshiab thiab ua Nws tes hauj lwm tshiab. Muaj tseeb, thaum Yexus los ua Nws tes hauj lwm, Nws kuj tau ua rau ntau lo lus uas cov xib fwb cev Vajtswv lus hauv Vajluskub Qub tau hais tseg ntawd tshwm sim tuaj thiab. Ces tes hauj lwm niaj hnub no los yeej ua rau ib co lus qhia txog yav tom ntej ntawm cov xib fwb cev Vajtswv lus puag thaum ub nyob rau hauv Vajluskub Qub ntawd tshwm sim tuaj ib yam nkaus li thiab. Nws tsuas yog hais tias Kuv tsis tsa “phau ntawv teev xwm txheej raws xyoo xim daj qub” ntawd nkaus xwb, ces tas li ntawd xwb. Vim yeej tseem muaj hauj lwm ntau uas Kuv yuav tsum tau ua, yeej tseem muaj lus ntau uas Kuv yuav tsum tau hais rau nej, thiab tes hauj lwm no thiab tej lus no ces yeej tseem ceeb tshaj kev piav tej zaj lus hauv Vajluskub, vim tes hauj lwm zoo li ntawd ces tsis tseem ceeb heev los sis tsis muaj nuj nqis ntau rau nej, thiab pab tsis tau nej, los sis hloov tsis tau nej. Kuv npaj siab yuav ua tes hauj lwm tshiab mas tsis yog yuav ua kom ib zaj lus twg hauv Vajluskub tshwm sim tuaj. Yog hais tias Vajtswv los rau hauv ntiaj teb es tsuas yog los ua kom tej lus ntawm cov xib fwb cev Vajtswv lus puag thaum ub hauv Vajluskub tshwm sim tuaj xwb, ces leej twg loj dua mas, tus Vajtswv uas yug los ua neeg los yog cov xib fwb cev Vajtswv lus puag thaum ub mas? Thaum kawg, ua cov xib fwb cev Vajtswv lus coj Vajtswv, los sis Vajtswv yog tus coj cov xib fwb cev Vajtswv lus mas? Koj yuav piav tej lus no li cas?

Xaiv tawm los ntawm “Hais Txog Lub Npe thiab Lub Koob Meej” nyob hauv Txoj Lus Tshwm Hauv Lub Cev Nqaij Daim Tawv

6. Vajtswv tes hauj lwm mas yeej khiav mus rau tom ntej tas mus li xwb, thiab txawm hais tias lub hom phiaj ntawm Nws tes hauj lwm tsis hloov, los qhov txheej txheem uas Nws ua hauj lwm ntawd yeej hloov mus tag li, ces txhais tau hais tias cov uas ntseeg Vajtswv los yeej hloov mus tas li thiab. Vajtswv ua hauj lwm ntau npaum li cas, ces tib neeg qhov kev paub txog Vajtswv muaj ntxaws npaum li ntawd. Tej kev hloov uas zoo ib yam kuj muaj tshwm sim nyob rau hauv tib neeg tus yam ntxwv uas los ntawm Vajtswv tes hauj lwm los thiab. Txawm li cas los xij, vim yog Vajtswv tes hauj lwm mas hloov mus los tag li ces cov uas tsis paub Vajntsujplig tes hauj lwm thiab cov neeg ruam qauj uas tsis paub qhov tseeb thiaj li pib tig tawm tsam Vajtswv. Vajtswv tes hauj lwm yeej ib txwm tsis yoog raws tib neeg txoj kev xav, vim Nws tes hauj lwm mas yeej tshiab tas li xwb thiab tsis muaj qub li, thiab Nws yeej tsis rov mus ua tej qub hauj lwm li, tab sis tsuas nias qees mus lawm tom ntej nrog rau tes hauj lwm uas nws yeej tsis tau ua dua los nkaus xwb. Raws li qhov uas Vajtswv tsis rov qab ua Nws tes hauj lwm dua, thiab tib neeg mas yeej siv tes hauj lwm Nws ua yav tag los txiav txim rau Vajtswv tes hauj lwm tam sim no yam tsis muaj hloov hlo li, nws thiaj li ua ib qho nyuab heev li rau Vajtswv los ua tej qib duas ntawm nws tes hauj lwm nyob rau tiam tshiab. Tib neeg mas muaj ntau qhov nyuab dhau heev lawm! Nws txoj kev xav mas xav nkaus li cov laus thaum ub xwb! Tsis muaj leej twg paub Vajtswv tes hauj lwm, tab sis txhua tus mas kem ciam rau tas zog li. Thaum nws ncaim Vajtswv, ces tib neeg plam txoj sia, qhov tseeb, thiab Vajtswv tej koob hmoov, tab sis nws yeej tsis kam lees txais txoj sia los sis qhov tseeb li, haj yam tsis tas hais txog tej koob hmoov loj dua uas Vajtswv muab pub rau neeg ntiaj teb li. Txhua tus tib neeg yeej xav kom tau Vajtswv, tab sis tsis muaj peev xwm yuav ua siab ntev taus rau tej yam kev hloov hauv Vajtswv tes hauj lwm. Cov uas tsis kam txais yuav Vajtswv tes hauj lwm tshiab ntseeg hais tias Vajtswv tes hauj lwm mas hloov tsis tau li, hais tias nws yuav nyob twj ywm li qub mus tag ib txhis. Nyob rau hauv lawv qhov kev ntseeg, tag nrho qhov uas yuav siv los ua kom tau kev cawm dim mus ib txhis los ntawm Vajtswv ces yog ua raws li nws txoj cai, thiab yog hais tias lawv hloov siab lees txim thiab lees lawv tej kev txhaum, ces yeej zoo txaus rau Vajtswv siab xav lawm. Lawv xav hais tias Vajtswv ces tsuas ua tau tus Vajtswv hauv qab txoj cai thiab tus Vajtswv uas raug ntsia rau saum tus ntoo khaub lig rau tib neeg xwb; nws kuj yog lawv qhov kev xav thiab uas hais tias Vajtswv mas yuav tsum tsis txhob tshaj phau Vajluskub. Nws yog kiag tej kev xav li no ntag uas muab lawv xauv taw kiag khov kho rau txoj cai qub thiab muab lawv ntsia kiag rau tej cai tuag lawm xwb.

Xaiv tawm los ntawm “Tus Tib Neeg Uas Twb Tau Kem Ciam Rau Vajtswv Nyob Rau Hauv Nws Qhov Kev Xav Lawm Ho Yuav Tau Txais Vajtswv Txoj Kev Qhia Tshwm Tau Li Cas?” nyob hauv Txoj Lus Tshwm Hauv Lub Cev Nqaij Daim Tawv

7. Tag nrho cov neeg Yudai yeej nyeem Vajluskub Qub thiab paub txog Yaxaya cov lus zuag cev lus hais tias muaj ib tug me nyuam tub yuav los yug nyob rau hauv ib lub dab nyuj. Tom qab ntawd, lawv yeej paub tag tej lus zuag cev lus no tib si, vim li cas lawv tseem qho tsim txom Yexus? Tsis yog tim lawv tus moj yam ntxeev siab thiab tsis paub txog Vajntsujplig tes hauj lwm los? Lub sij hawm ntawd, cov Falixai ntseeg hais tias Yexus tes hauj lwm mas txawv qhov lawv paub txog tus me nyuam tub ntawm cov lus zuag cev lus ntawd, thiab cov neeg niaj hnub no tsis txais yuav Vajtswv vim tej hauj lwm ntawm tus Vajtswv uas yug los ua neeg ntawd zoo tsis thooj li qhov Vajluskub hais. Tsis yog tus moj yam ntawm lawv txoj kev ntxeev siab rau Vajtswv yeej zoo tib yam los? Koj txais yuav puas tau, yam tsis muaj lus nug hlo li, tag nrho tes hauj lwm ntawm tus Vajntsujplig? Yog hais tias nws yeej yog tes hauj lwm ntawm Vajntsujplig, ces yeej yog tus dej ntws uas yog lawm, thiab koj yuav tsum txais yuav nws yam tsis muaj ib qho uas yuav tsis ntseeg hlo li; you tsis txhob xaiv qee yam txais yuav nkaus xwb. Yog tias koj muab tau kev to taub tob los ntawm Vajtswv los thiab ua twb zoo ceev faj rau Nws, ces qhov no tsis yog qhov tsis hu rau lod? Koj tsis tas yuav mus nrhiav tej pov thawj tim khawv los ntawm Vajluskub li, yog hais tias nws yog tes hauj lwm ntawd Vajntsujplig, ces koj yuav tsum txais yuav xwb, vim koj ntseeg Vajtswv ces cawm Vajtswv, thiab koj yuav tsum tsis txhob tshawb xyuas Nws. Koj yuav tsum tsis txhob nrhiav pov thawj tim khawv ntawm Kuv ntxiv los mus ua pov thawj hais tias Kuv yog koj tus Vajtswv, tab sis yuav tsum muaj peev xwm los thoob tsib hais tias seb Kuv puas muaj txiaj ntsim rau koj—qhov no yog qhov uas tseem ceeb tshaj plaws. Txawm hais tias koj nrhiav tau tej pov thawj uas yeej cam tsis dhau kiag li nyob rau hauv Vajluskub, los nws yeej coj tsis tau koj los rau Kuv lub xub ntiag yam puv npo. Koj tsuas yog lam ua neej nyob rau sab hauv Vajlubkub tus laj kab xwb, thiab tsis yog hauv Kuv lub xub ntiag; phau Vajluskub pab tsis tau kom koj paub Kuv, los sis ua tsis tau kom koj txoj kev hlub rau Kuv ntawd muaj tob tshaj ntxiv. … Vajtswv tes hauj lwm nyob rau ib tiam twg mas yeej muaj tus ciaj ciam uas pom tseeb heev; Nws tsuas ua tes hauj lwm ntawm tiam ntawd xwb thiab ib txwm tsis ua theem tom ntej ntawm tes hauj lwm ntawd ua ntej li. Tsuas yog ua li ntawd nkaus xwb mas Nws tes hauj lwm ntawm tej tiam ntawd thiaj li yuav muab coj tau los rau tom hauv ntej. Yexus tsuas hais txog phiaj xwm qhia ntawm tiam kawg xwb, hais txog qhov uas yuav ua siab ntev li cas thiab yuav ua li cas es thiaj yuav raug cawm dim, hais txog yuav hloov siab lees txim thiab lees txais kev txhaum li cas, thiab hais txog yuav kwv tus ntoo khaub lig thiab tiv kev txom nyem li cas; Nws yeej tsis hais txog qhov uas yuav ua li cas es tib neeg nyob rau tiam kawg thiaj yuav nkag tau los, los sis tsis hais txog qhov uas tib neeg yuav ua li cas es thiaj yuav ua tau haum Vajtswv lub siab nyiam. Thaum zoo li ntawd, nws tsis yog ib qho txaus luag uas yuav mus tshawb hauv Vajluskub txog Vajtswv tes hauj lwm ntawm tiam kawg thiab los? Koj ho yuav tau dab tsi los ntawm qhov uas lam tuav phau Vajluskub? Puas yog ib tug neeg tshab txhais Vajluskub los sis ib tug neeg qhia Vajtswv txoj lus, uas yuav muaj cuab kav pom tes hauj lwm hnub no ua ntej?

Xaiv tawm los ntawm “Tus Tib Neeg Uas Twb Tau Kem Ciam Rau Vajtswv Nyob Rau Hauv Nws Qhov Kev Xav Lawm Ho Yuav Tau Txais Vajtswv Txoj Kev Qhia Tshwm Tau Li Cas?” nyob hauv Txoj Lus Tshwm Hauv Lub Cev Nqaij Daim Tawv

8. Cov Falixai uas yog neeg Yudai siv Mauxe txoj kev cai los teem txim rau Yexus. Lawv tsis nrhiav kev sib raug zoo nrog rau tus Yexus uas nyob rau lub sij hawm ntawd, tab sis mas tsuas rau siab ntso ua raws tej kev cai ntawd nruj npaum nkaus li txhua tus ntawv uas tau sau tseg, txog ntua qhov uas—tom qab nog txim rau Nws hais tias tsis ua raws cov kev cai hauv Vajluskub Qub thiab tsis yog tus Mexiyas—lawv muab Yexus tus uas tsis muaj kev txhaum ntawd ntsia kiag rau saum tus ntoo khaub lig. Lawv tus moj yam tseeb yog dab tsi? Tsis yog qhov uas lawv tsis nrhiav kev sib raug zoo nrog qhov tseeb los? Lawv mas mob siab tshaj plaws rau txhua lo lus hauv Vajluskub ces tsis quav ntsej txog qhov Kuv siab nyiam los sis tej kauj ruam thiab tej kev ua Kuv tes hauj lwm. Lawv tsis yog cov neeg uas nrhiav qhov tseeb, tab sis tsuas yog cov neeg uas tuav tej lus ruaj ruaj xwb; lawv tsis yog cov neeg ntseeg Vajtswv, tab sis tsuas yog cov neeg ntseeg Valuskub xwb. Qhov tseem ceeb tshaj, lawv yog cov dev zov phau Vajluskub xwb. Yuav kom tiv thaiv tau lawv qhov kev txaus siab rau phau Vajluskub, los mus txhawb nqa lub meej mom ntawm Vajluskub, thiab tiv thaiv Vajluskub lub koob npe zoo, lawv ua mus txog qhov uas muab tus Yexus uas muaj lub siab hlub tshua sawv daws ntawd ntsia kiag rau saum tus ntoo khaub lig. Qhov no lawv tsuas lam ua los tiv thaiv Vajluskub xwb, thiab ua los mus tuav lub meej mom ntawm txhua lo lus hauv Vajluskub uas nyob hauv neeg lub siab xwb. Yog li ntawd lawv yeem muab lawv lub neej yav pem suab thiab kev theej txhoj daws kev txhaum tso pov tseg es los nog txim rau Yexus, tus uas tsis ua raws li tej lus qhuab qhia hauv Vajluskub, rau lub qhov tuag. Lawv tsis yog qhev rau txhua lo lus hauv Vajluskub thiab los?

Thiab ua li cov neeg niaj hnub no ne? Khetos tau los nthuav tawm qhov tseeb, tab sis lawv yeem muab Nws ntiab tawm hauv lub ntiaj teb no es kom lawv thiaj li tau kev mus rau ntuj ceeb tsheej thiab tau txais kev hlub. Lawv yeem tsis lees paub qhov tseeb uas tshwm sim los ntawd es thiaj li tiv thaiv tau lawv txoj kev nyiam Vajluskub, thiab lawv yeem rov qab muab tus Khetos uas los muaj cev nqaij daim tawv ntawd ntsia rau saum ntoo khaub lig dua thiab es kom thiaj li paub meej hais tias phau Vajluskub yuav muaj nyob mus ib txhis. … Tib neeg nrhiav kev sib raug zoo nrog rau tej lus thiab kev sib raug zoo nrog rau Vajluskub, tab sis tsis muaj ib tug uas yuav los rau ntawm Kuv xub ntiag los nrhiav kev sib raug zoo nrog rau qhov tseeb. Tib neeg ntsia Kuv rau puag saum ntuj ceeb tsheej thiab mob siab txhawj xeeb tias muaj Kuv nyob saum ntuj ceeb tsheej, tab sis tsis muaj leej twg quav ntsej txog Kuv ntawm cev nqaij daim tawv, vim Kuv tus uas nrog tib neeg nyob ua ke ntawd yeej tsis tseem ceeb dab tsi li. Cov uas tsuas nrhiav kev sib raug zoo nrog rau cov lus hauv Vajluskub thiab cov uas nrhiav kev sib raug zoo nrog rau ib tug Vajtswv uas pom tsis tseeb mas yog ib qho laj ntsia tshaj plaws rau Kuv. Qhov no mas vim yog tej uas lawv teev hawm ntawd tsuas yog tej lus tsis ciaj sia xwb, thiab ib tug Vajtswv uas muaj peev xwm muab tej yam muaj nqis uas qhia tsis tau ntawd rau lawv; tus lawv teev hawm ntawd yog ib tug Vajtswv uas yuav muab Nws tus kheej pw kiag rau hauv tib neeg lub xib teg—ib tug Vajtswv uas tsis muaj nyob qhov twg li. Dab tsi, yog li ntawd nas, es cov neeg zoo li ntawd thiaj yuav tau txais los ntawm Kuv? Tib neeg mas qis dhau heev lawm rau tej lus. Cov uas tawm tsam Kuv, cov uas taij thov Kuv tsis tseg tsis tu, cov uas tsis nyiam qhov tseeb kiag, cov uas tig ntxeev siab rau Kuv—yuav ua li cas lawv thiaj muaj kev sib raug zoo nrog Kuv tau mas?

Xaiv tawm los ntawm “Koj Yuav Tsum Nrhiav Txoj Hau Kev Kom Sib Raug Zoo Nrog Rau Khetos” nyob hauv Txoj Lus Tshwm Hauv Lub Cev Nqaij Daim Tawv

9. Yeej muaj cov uas hais tias lawv yog cov muaj kev sib raug zoo nrog Kuv, tab sis cov neeg zoo li ntawd tseem pheej teev hawm tej mlom uas pom tsis meej. Txawm hais tias lawv lees paub Kuv lub npe hais tias yeej dawb huv los, lawv taug ib txoj kev uas khiav mus tsis thooj li Kuv, thiab lawv tej lus mas muaj kev khav theeb thiab kev ruaj siab rau lawv tus kheej puv nkaus nyob rau hauv xwb. Qhov no mas yog vim, nyob rau hauv tus cag, lawv sawv daws puav leej tawm tsam Kuv thiab tsis muaj kev sib raug zoo nrog Kuv. Txhua txhua hnub, lawv nrhiav Kuv tej lw nyob hauv Vajluskub thiab lam tau lam nrhiav tej nqe lus uas “zoo nyeem” uas lawv muab nyeem tsis paub xaus thiab muab hais tias yog tej nqe tej nqe Vajluskub. Lawv tsis paub tias yuav ua cas thiaj muaj kev sib raug zoo nrog Kuv los sis kev tawm tsam Kuv ho yuav zoo li cas. Lawv tsuas lam nyeem tej nqe Vajluskub li tej neeg dig muag xwb. Nyob rau hauv phau Vajluskub, lawv muab ib tug Vajtswv uas pom tsis tseeb kaw cia rau hauv, tus uas lawv yeej tsis tau pom dua li, thiab yeej tsis muaj cuab kav yuav pom tau li, thiab muab thau tawm coj los saib rau thaum lawv muaj sij hawm. Lawv ntseeg qhov uas muaj Kuv raws li qhov uas Vajluskub hais xwb, thiab lawv muab Kuv tso sib txig sib luag nrog phau Vajluskub; yog tsis muaj phau Vajluskub ces tsis muaj Kuv, thiab tsis muaj Kuv ces tsis muaj phau Vajluskub. Lawv tsis quav ntsej txog qhov uas muaj Kuv thiab tej yam Kuv ua li, tab sis ho rau siab ntso thiab kub siab lug kawm txhua lo lus hauv Vajluskub. Muaj coob tus haj tseem ntseeg hais tias kom Kuv txhob ua tej yam uas Kuv xav ua li yog hais tias Vajluskub tsis tau hais tseg ua ntej. Lawv muab Vajluskub saib tseem ceeb dhau heev lawm. Nws hais tau hais tias lawv saib tej lus thiab tej yam qhia tawm ntawd tseem ceeb dhau heev lawm, txog ntua qhov uas lawv siv tej nqe lus hauv Vajluskub los ntsuas txhua lo lus Kuv hais thiab los cem thuam Kuv. Qhov lawv nrhiav ntawd tsis yog txoj kev sib raug zoo nrog Kuv, los sis qhov uas yuav ua kom muaj kev sib raug zoo nrog qhov tseeb, tab sis tsuas yog qhov ua kom muaj kev sib raug zoo nrog cov lus ntawm phau Vajluskub, thiab lawv ntseeg, yam tsis muaj ib qho zam tau li, hais tias tej yam uas tsis yoog raws Vajluskub ces yeej tsis yog Kuv tes hauj lwm. Cov neeg ntawd tsis yog cov Falixai cov xeeb leej xeeb ntxwv uas paub lawv tes dej num lod?

Xaiv tawm los ntawm “Koj Yuav Tsum Nrhiav Txoj Hau Kev Kom Sib Raug Zoo Nrog Rau Khetos” nyob hauv Txoj Lus Tshwm Hauv Lub Cev Nqaij Daim Tawv

10. Cov uas tsuas quav ntsej txog cov lus hauv Vajluskub thiab cov uas tsis quav ntsej txog qhov tseeb los sis tsis nrhiav Kuv tej hneev taw—lawv tawm tsam Kuv, vim lawv muab Kuv kem ciam raws li Vajluskub hais, muab Kuv kaw cia nyob rau hauv Vajluskub, thiab tau thuam Kuv loj kawg kiag. Cov neeg zoo li ntawd yuav los tau rau ntawm Kuv lub xub ntiag li cas? Lawv tsis quav ntsej txog Kuv tej kev ua zoo, los sis Kuv siab nyiam, los sis qhov tseeb, tab sis ho mob siab rau tej lus—tej lus uas tua kom tuag. Cov neeg zoo li ntawd ho yuav sib raug zoo nrog Kuv tau li cas?

Xaiv tawm los ntawm “Koj Yuav Tsum Nrhiav Txoj Hau Kev Kom Sib Raug Zoo Nrog Rau Khetos” nyob hauv Txoj Lus Tshwm Hauv Lub Cev Nqaij Daim Tawv

11. Phau Vajluskub yog ib co lus teev tseg txog keeb kwm ntawm Vajtswv tes hauj lwm nyob rau hauv Yixayee, thiab sau ua ntaub ntawv txog ntau qhov lus qhia txog yav tom ntej ntawm cov xib fwb cev Vajtswv lus txheej thaum ub nrog rau ib co lus hais tawm ntawm Yehauvas nyob rau hauv Nws tes hauj lwm rau lub sij hawm ntawd. Yog li ntawd, tib neeg sawv dawv thiaj li saib phau ntawv no dawb huv (vim Vajtswv yeej dawb huv thiab loj). Muaj tseeb, qhov no tag nrho yog qhov tshwm sim tau los ntawm lawv txoj kev hwm rau Yehauvas thiab lawv txoj kev hlub rau Vajtswv. Tib neeg tsuas hais txog phau ntawv no li no vim tej Vajtswv tsim ntawd mas hwm thiab hlub lawv tus Tswv Tsim heev, thiab haj tseem muaj cov uas hu phau ntawv no ua ntuj ceeb tsheej phau ntawv thiab. Qhov tseeg, ces nws tsuas yog tib neeg ib co lus teev tseg xwb. Nws tsis yog Yehauvas tus kheej kiag tis npe rau, los sis tsis yog Yehauvas tus kheej kiag uas coj qhia nws qhov kev tsim. Muab ua lwm yam lus hais, ces tus sau phau ntawv no tsis yog Vajtswv, tab sis yog tib neeg xwb. Phau Vajluskub Dawb Huv ces tsuas yog ib lub npe ntawv uas txaus hwm uas yog tib neeg tis rau xwb. Lub npe ntawv no tsis yog txiav txim siab los ntawm Yehauvas thiab Yexus tom qab Nkawd tau sib tham ua ke tag lawm; nws tsis yog ib qho dab tsi uas yuav tshaj tib neeg lub tswv yim li. Vim phau ntawv no tsis yog sau los ntawm Yehauvas, haj yam tsis yog sau los ntawm Yexus thiab. Tab sis, nws yog tej lus piav uas muab los ntawm coob tus xib fwb cev Vajtswv lus, thwj tim thiab cov neeg pom txheej thaum ub xwb, uas yog ntau tiam neeg tom qab no muab coj los tso ua ke ua ib phau ntawv txog tej lus sau tseg txheej thaum ub uas, rau tib neeg, ces zoo li dawb huv tshaj plaws, yog ib phau ntawv uas lawv ntseeg hais tias muaj ntau qhov lus zais tob uas xav tsis tawm thiab nyob tob heev li uas tos ntsoov cia tej tiam neeg yav tom ntej los muab qhib xyuas.

Xaiv tawm los ntawm “Hais Txog Phau Vajluskub (4)” nyob hauv Txoj Lus Tshwm Hauv Lub Cev Nqaij Daim Tawv

12. Phau Vajluskub Qub yog tes hauj lwm ntawm Vajtswv nyob rau thaum Tiam Muaj Kev Cai. Phau Vajluskub Qub ntawm phau Vajluskub ces teev muaj tag nrho tes hauj lwm ntawm Yehauvas nyob rau lub sij hawm thaum Tiam Muaj Kev Cai thiab Nws tes hauj lwm tsim txhua yam. Tag nrho nws ces teev muaj tes hauj lwm uas Yehauvas ua, thiab thaum kawg ces nws kuj xaus tej lus qhia txog Yehauvas tes hauj lwm nrog rau Malakhi Phau Ntawv. Phau Vajluskub Qub teev muaj ob qho hauj lwm uas Vajtswv ua: Ib qho ces yog tes hauj lwm tsim txhua yam, thiab ib qho ces yog kev tsim cov kev cai. Ob qho puav leej yog Yehauvas ua tag nrho. Tiam Muaj Kev Cai sawv cev rau tes hauj lwm hauv lub npe ntawm Vajtswv Yehauvas; nws yog tag nrho tes hauj lwm uas qhov tseem ceeb ces yog ua nyob hauv lub npe ntawm Yehauvas. Yog li ntawd, phau Vajluskub Qub teev tseg tes hauj lwm ntawm Yehauvas, thiab phau Vajluskub Tshiab teev tseg tes hauj lwm ntawm Yexus, tes hauj lwm uas qhov tseem ceeb ces yog ua nyob rau hauv lub npe ntawm Yexus. Qhov tseem ceeb ntawm Yexus lub npe thiab tes hauj lwm Nws ua ces feem ntau yog teev muaj nyob rau hauv phau Vajluskub Tshiab. Nyob rau hauv Vajluskub Qub Tiam Muaj Kev Cai, Yehauvas tsim tsa lub tuam tsev thiab lub thaj nyob rau hauv Yixayee, Nws coj cov neeg Yixayee lub neej nyob rau hauv ntiaj teb, ua pov thawj qhia hais tias lawv yog Nws cov neeg xaiv tseg, thawj pab neeg uas Nws xaiv nyob rau hauv ntiaj teb thiab cov uas ua raws Nws tus kheej lub siab, thawj pab neeg uas Nws tau coj kiag. Kaum ob pab neeg ntawm Yixayee yog Yehauvas thawj cov xaiv tseg, thiab yog li ntawd Nws thiaj li ua hauj rau ntawm lawv, los txog ntua rau thaum tes hauj lwm ntawm Yehauvas rau Tiam Muaj Kev Cai xaus kiag. Theem thib ob ntawm tes hauj lwm ces yog tes hauj lwm ntawm Tiam Hmoov Hlub ntawm phau Vajluskub Tshiab, thiab nws yog ua nyob rau hauv cov neeg Yudais, nyob rau hauv ib pab ntawm kaum ob pab neeg ntawm Yixayee. Tus ciaj ciam ntawm tes hauj lwm no mas me dua vim Yexus yog tus Vajtswv uas rais los muaj cev nqaij daim tawv. Yexus tsuas ua hauj lwm thoob plaws daim av ntawm Yudia xwb, thiab tsuas ua tes hauj lwm peb-thiab-ib-nrab xyoo xwb; yog li ntawd, tej uas raug teev tseg rau hauv Vajluskub Tshiab mas tseem nrug deb qhov uas yuav muajtshaj tes hauj lwm uas teev tseg rau hauv Vajluskub Qub. Tes hauj lwm ntawm Yexus ntawm Tiam Hmoov Hlub ces feem ntau yog teev tseg rau hauv Plaub Txoj Moo Zoo. Txoj kev taug uas cov neeg ntawm Tiam Hmoov Hlub taug ces yog qhov ntawm txoj kev hloov uas ntiav tshaj plaws ntawm lawv tus moj yam ntawm lub neej txoj sia, feem ntau ces yog muab teev tseg nyob rau hauv cov ntawv xa mus rau lwm tus.

Xaiv tawm los ntawm “Hais Txog Phau Vajluskub (1)” nyob hauv Txoj Lus Tshwm Hauv Lub Cev Nqaij Daim Tawv

13. Cov ntawv ntawm txoj moo zoo ntawm phau Vajluskub Tshiab ces yog sau teev tseg nees nkaum rau peb caug xyoo tom qab uas Yexus twb raug ntsia rau saum tus ntoo khaub lig lawm. Ua ntej ntawd, cov neeg ntawm Yixayee tsuas nyeem phau Vajluskub Qub xwb. Qhov ntawd ces hais tias, thaum pib ntawm Tiam Hmoov Hlub ces tib neeg tsuas nyeem phau Vajluskub Qub xwb. Phau Vajluskub Tshiab tsuas tshwm sim nyob rau Tiam Hmoov Hlub xwb. Phau Vajluskub Tshiab tsis muaj nyob rau lub sij hawm uas Yexus ua tes hauj lwm; cov neeg tom qab uas Nws raug tsa ciaj sawv rov los lawm thiab nce mus rau saum ntuj ceeb tsheej lawm mam li teev Nws tes hauj lwm tseg. Tsuas yog tom qab ntawd xwb mas thiaj li muaj Plaub Txoj Moo Zoo, ntxiv rau qhov ntawd ces kuj muaj Povlauj thiab Petus nkawd cov ntawv, nrog rau phau Ntawv Qhia Tshwm. Ntev tshaj peb puas xyoo tom qab uas Yexus tau nce mus raum ntuj ceeb tsheej lawm, cov neeg tiam tom qab mam li muab cov ntaub ntawv no khaws coj los xaiv tso ua ke, thiab tsuas yog thaum ntawd xwb mas thiaj li muaj phau Vajluskub Tshiab ntawm phau Vajluskub. Tsuas yog tom qab uas tes hauj lwm raug ua tiav hlo lawm xwb mas thiaj li muaj phau Vajluskub Tshiab; nws yeej tsis muaj nyob ua ntej ntawd. … Tej uas lawv teev tseg, nws tuaj yeem hais tau hais tias, yog raws li lawv theem kev kawm thiab tib neeg lub peev xwm. Tej uas lawv teev tseg ces yog tib neeg tej kev ntsib kev pom xwb, thiab lawv nyias muaj nyias kev teev tseg thiab kev paub, thiab nyias teev nyias sib txawv. Yog li ntawd, yog koj pe hawm phau Vajluskub li Vajtswv ces koj tsis paub dab tsi kiag thiab ruam kawg nkaus!

Xaiv tawm los ntawm “Hais Txog Phau Vajluskub (3)” nyob hauv Txoj Lus Tshwm Hauv Lub Cev Nqaij Daim Tawv

14. Tej yam uas teev tseg rau hauv Vajluskub mas muaj tsis tag; lawv tsis muaj cuab kav yuav sawv cev tau rau tes hauj lwm ntawm Vajtswv tag nrho. Plaub Txoj Moo Zoo muaj tsawg tshaj li ib puas tshooj ua ke, uas yog sau txog ib co xwm txheej uas muaj ciaj ciam kawg, xws li Yexus cem foom tsob txiv cev, Petus peb qho kev tsis lees tus Tswv, Yexus tshwm los rau cov thwj tim tom qab Nws qhov kev raug ntsia rau saum ntoo khaub lig thiab ciaj sawv rov los, kev qhia txog kev yoo mov, kev qhia txog kev thov Vajtswv, kev qhia txog kev sib nrauj, kev yug thiab kev taug caj ces ntawm Yexus, Yexus qhov kev tsa cov thwj tim, thiab lwm yam ntxiv mus. Txawm li cas los xij, tib neeg muab tej ntawd saib li tej khoom muaj nqis, tseem muab tes hauj lwm niaj hnub no coj los piv rau tej ntawd thiab. Lawv tseem ntseeg hais tias tag nrho tes hauj lwm Yexus ua nyob rau hauv Nws lub neej mas tsuas muaj ntau npaum li ntawd xwb, cuag li Vajtswv ces tsuas muaj cuab kav ua tau ntau npaum li no xwb thiab tsis muaj dab tsi tshaj li. Qhov no tseem tsis yog tsis muaj qab hau li thiab lod?

Xaiv tawm los ntawm “Lus Zais Tob ntawm Kev Yug Los Ua Neeg (1)” nyob hauv Txoj Lus Tshwm Hauv Lub Cev Nqaij Daim Tawv

15. Nyob rau hauv kev nyeem phau Vajluskub ces tib neeg kuj yuav tau ntau txoj hau kev ntawm txoj sia uas nrhiav tsis tau nyob rau hauv lwm phau ntawv li. Tej hau kev no yog tej hau kev ntawm txoj sia ntawm Vajntsujplig tes hauj lwm uas cov xib fwb cev Vajtswv lus thiab cov thwj tim nyob rau tej tiam dhau los lawm tau ntsib tau pom, thiab muaj ntau lo lus mas muaj nuj nqis heev, thiab muaj cuab kav muab tau tej uas tib neeg xav tau rau lawv. Yog li ntawd, tib neeg sawv daws thiaj li nyiam nyeem phau Vajluskub. Vim muaj ntau yam zais cia rau hauv phau Vajluskub, ces tib neeg tej kev xav rau nws thiaj litsis zoo li tej kev xav rau lwm yam ntawv sau tseg los ntawm cov thawj coj tseem ceeb ntawm fab kev ntseeg. Phau Vajluskub yog ib co lus teev tseg thiab ib co lus khaws tseg txog tej kev ntsib kev pom thiab kev paub ntawm cov neeg uas tau ua dej num rau Yehauvas thiab Yexus nyob rau hauv tiam qub thiab tiam tshiab, thiab kom tej tiam tom qab thiaj li muaj tau txais ntau yam kev tig ras to taub, kev paub tseeb, thiab tej kev xyaum ua los ntawm nws. Qhov laj thawj uas vim li cas phau Vajluskub ho nyob siab dua lwm yam ntawv sau tseg ntawm lwm tus neeg tseem ceeb rau fab kev ntseeg ces yog vim tag nrho lawv tej ntawv sau tseg yog rub hauv phau Vajluskub los, lawv tej kev ntsib kev pom tag nrho los hauv phau Vajluskub los, thiab lawv sawv daws ces piav txog phau Vajluskub xwb. Thiab yog li ntawd, txawm hais tias tib neeg yuav tau kev pab cuam los ntawm cov ntawv ntawm lwm tus neeg tseem ceeb rau fab kev ntseeg, los lawv tseem pe hawm phau Vajluskub, vim zoo li nws siab dua thiab tob dua tej ntawd! Txawm hais tias phau Vajluskub muab ib co ntawv ntawm tej lus ntawm txoj sia coj los ua ke, xws li Povlauj cov ntawv thiab Petus cov ntawv, thiab txawm hais tias tib neeg muaj cuab kav tau txais kev pab cuam thiab raug pab los ntawm cov ntawv no, los cov ntawv no yeej tseem dhau caij nyoog lawm, lawv tseem yog tiam qub tug, thiab tsis hais lawv yuav zoo npaum li cas li, lawv tsuas zoo siv rau ib lub caij nyoog xwb, thiab tsis yog yuav kav mus ib txhis. Vim Vajtswv tes hauj lwm mas yeej loj hlob tas mus li, thiab nws tsis muaj cuab kav yuav cia li nres rau lub sij hawm ntawm Povlauj thiab Petus xwb, los sis tsuas nyob tas mus li rau hauv Tiam Hmoov Hlub uas Yexus raug ntsia rau saum tus ntoo khaub lig nkaus xwb. Thiab yog li ntawd, cov ntawv no ces tsuas zoo siv rau Tiam Hmoov Hlub xwb, tsis yog rau Tiam Vajtswv Los Kav ntawm tiam kawg. Lawv tsuas pab cuam tau rau cov ntseeg ntawm Tiam Hmoov Hlub xwb, tsis yog rau cov neeg dawb huv ntawm Tiam Vajtswv Los Kav, thiab tsis hais lawv yuav zoo npaum li cas li, lawv yeej tseem yuav qub rau lub caij nyoog lawm. Nws yeej zoo ib yam li no rau Yehauvas tes hauj lwm tsim txhua yam los sis Nws tes hauj lwm nyob rau hauv Yixayee: Tsis hais tes hauj lwm no yuav tseem ceeb npaum li cas li, nws yeej tseem qub rau lub caij nyoog lawm, thiab lub caij nyoog yeej yuav los txog thaum uas nws dhau mus lawm. Vajtswv tes hauj lwm los kuj zoo ib yam li no thiab: Nws yeej tseem ceeb kawg, tab sis nws yuav muaj ib lub sij hawm uas nws yuav xaus thiab; nws yuav nyob tag mus li rau hauv tes hauj lwm tsim txhua yam tsis tau, los sis nyob nrog rau tes hauj lwm raug ntsia rau saum tus ntoo khaub lig. Tsis hais tes hauj lwm raug ntsia rau saum tus ntoo khaub lig yuav txaus ntseeg npaum li cas li, tsis hais nws yuav ua tau zoo npaum li cas rau txoj kev tua yeej Ntxwgnyoog li, tes hauj lwm, ces thaum kawg, yeej tseem yog tes hauj lwm, thiab tej tiam ntawd, ces thaum kawg, yeej tseem yog tej tiam xwb; tes hauj lwm tsis muaj cuab kav yuav nyob rau tib qho hauv paus keeb cag tas mus li, los sis sij hawm los yeej tsis muaj qhov yuav tsis hloov mus li, vim yog muaj kev tsim txhua yam thiab thiaj li yuav tsum muaj hnub xaus. Qhov no yeej zam tsis dhau li! Yog li ntawd, niaj hnub no tej lus ntawm txoj sia nyob rau hauv phau Vajluskub Tshiab—cov ntawv sau ntawm cov thwj tim, thiab Plaub Txoj Moo Zoo—tau rais los ua ib cov ntawv keeb kwm lawm xwb, lawv tau rais los ua tej phau ntawv teev tej xwm txheej raws ciaj nyoog lawm xwb, thiab yuav ua cas es tej phau ntawv teev tej xwm txheej raws caij nyoog thiaj li yuav coj tau tib neeg mus rau tiam tshiab? Tsis hais tej phau ntawv teev tej xwm txheej raws caij nyoog no yuav muaj cuab kav npaum li cas los muab tau txoj sia rau tib neeg, tsis hais lawv yuav muaj cuab kav npaum li cas los coj tib neeg los rau tus ntoo khaub lig li, lawv tseem tsis yog qub rau lub caij nyoog lawm thiab lod? Lawv tseem tsis tau poob nqi thiab lod?

Xaiv tawm los ntawm “Hais Txog Phau Vajluskub (4)” nyob hauv Txoj Lus Tshwm Hauv Lub Cev Nqaij Daim Tawv

16. Phau Vajluskub tsis yog dab tsi tshaj ib co lus teev tseg txoj keeb kwm ntawm Vajtswv tes hauj lwm, thiab ib co lus tim khawv rau thawj ob theem ntawm Vajtswv tes hauj lwm, thiab uas nws tsis muab ib qho kev to taub txog tej hom phiaj ntawm Vajtswv tes hauj lwm rau koj li. Txhua tus uas tau nyeem phau Vajluskub lawm ces yeej paub hais tias nws teev txog ob theem ntawm Vajtswv tes hauj lwm nyob rau Tiam Muaj Kev Cai thiab Tiam Hmoov Hlub. Phau Vajluskub Qub teev tseg txog qhov keeb kwm ntawm Yixayee thiab Yehauvas tes hauj lwm txij puag thaum ntuj tsim teb raug los txog ntua rau thaum kawg ntawm Tiam Muaj Kev Cai. Phau Vajluskub Tshiab teev tseg txog Yexus tes hauj lwm nyob rau hauv ntiaj teb, uas yog nyob rau hauv Plaub Txoj Moo Zoo, nrog rau tes hauj lwm ntawm Povlauj—tej no tseem tsis yog tej lus teev txog keeb kwm thiab lod? Muaj tej yam nyob rau yav tag coj los rau tam sim no ces yeej ua rau lawv yog keeb kwm lawm, thiab tsis hais lawv yuav muaj tseeb los muaj tiag npaum li cas li, lawv yeej tseem yog keeb kwm—thiab keeb kwm mas hais tsis tau txog qhov tam sim no, vim Vajtswv tsis tig saib rov qab rau hauv keeb kwm lawm! Thiab yog li ntawd, yog koj tsuas to taub phau Vajluskub xwb, thiab tsis to taub dab tsi txog tes hauj lwm uas Vajtswv npaj siab ua niaj hnub no, thiab yog koj ntseeg Vajtswv tab sis tsis nrhiav Vajntsujplig tes hauj lwm, ces koj tsis to taub hais tias kev nrhiav Vajtswv yog txhais tau li cas. Yog koj nyeem phau Vajluskub kom kawm tau qhov keeb kwm ntawm Yixayee, tshawb fawb txog qhov keeb kwm ntawm Vajtswv qhov kev tsim tag nrho lub ntuj thiab lub ntiaj teb, ces koj tsis ntseeg Vajtswv. Tab sis niaj hnub no, vim koj ntseeg Vajtswv, thiab caum nrhiav txoj sia, vim koj nrhiav kev paub Vajtswv, thiab tsis nrhiav tej niag ntaub ntawv uas tsis muaj sia thiab tej kev qhuab qhia los sis ib qho kev to taub txog keeb kwm xwb, ces koj yuav tsum nrhiav Vajtswv txoj kev xav ntawm niaj hnub no, thiab koj yuav tsum nrhiav txoj xub ke ntawm Vajntsujplig tes hauj lwm. Yog koj yog ib tug kws paub txog tej khoom qub ces koj nyeem phau Vajluskub los tau—tab sis koj tsis yog, koj yog ib tug ntawm cov ntseeg Vajtswv, thiab koj yuav tsum tau nrhiav Vajtswv txoj kev xav niaj hnub no.

Xaiv tawm los ntawm “Hais Txog Phau Vajluskub (4)” nyob hauv Txoj Lus Tshwm Hauv Lub Cev Nqaij Daim Tawv

17. Yog koj xav pom tes hauj lwm ntawm Tiam Muaj Kev Cai, thiab xav pom seb cov neeg Yixayee taug Yehauvas txoj kev li cas, ces koj yuav tsum nyeem phau Vajluskub Qub; yog koj xav to taub tes hauj lwm ntawm Tiam Hmoov Hlub, ces koj yuav tsum nyeem phau Vajluskub Tshiab. Tab sis koj ho yuav pom tes hauj lwm ntawm tiam kawg tau li cas? Koj yuav tsum lees txais txoj kev coj ntawm tus Vajtswv niaj hnub no, thiab to taub qhov tseeb txog tes hauj lwm niaj hnub no, vim qhov no yog tes hauj lwm tshiab, thiab tsis tau muaj leej twg teev nws tseg rau hauv Vajluskub li. Niaj hnub no, Vajtswv tau rais los muaj cev nqaij daim tawm lawm thiab tau xaiv lwm cov xaiv tseg nyob rau hauv Suav Teb lawm. Vajtswv ua hauj lwm nyob rau hauv cov neeg no, Nws ua txuas ntxiv mus rau Nws tes hauj lwm hauv ntiaj teb, thiab txuas ntxiv rau tes hauj lwm ntawm Tiam Hmoov Hlub. Tes hauj lwm niaj hnub no ces yog ib txoj kev uas tib neeg yeej tsis tau taug dua li, thiab ib txoj kev uas tsis muaj leej twg yuav tau pom dua li. Nws yog tes hauj lwm uas yeej tsis tau raug ua dua li—nws yog Vajtswv tes hauj lwm uas tshiab tshaj plaws nyob rau hauv ntiaj teb. Yog li ntawd, tes hauj lwm uas yeej tsis tau raug ua dua ces tsis yog keeb kwm, vim tam sim no yog tam sim no, thiab tseem tsis tau rais mus ua yav tag los. Tib neeg tsis paub hais tias Vajtswv twb tau ua tes hauj lwm loj dua, tshiab dua nyob rau hauv ntiaj teb, thiab nyob rau sab nraud ntawm Yixayee, hais tias nws twb tau mus dhau deb tshaj ntawm tus ciaj ciam ntawm Yixayee lawm, thiab tau dhau qhov uas tej xib fwb cev Vajtswv lus tej lus qhia txog yav tom ntej lawm, thiab tes hauj lwm tshiab dua uas dhau mus tshaj ntawm Yixayee mus lawm, thiab tes hauj lwm uas tib neeg tsis muaj peev xwm yuav xav tau los sis pom tau hauv nruab siab li. Vajluskub yuav ua cas ntim tau tej lus teev tseg uas qhia meej npaum li ntawd mas? Leej twg thiaj yuav teev tau txhua txhua qhov ntawm tes hauj lwm niaj hnub no, yam tsis muaj ib qho tu ncua li, ua ntej ntawd mas? Leej twg thiaj yuav teev tau tes hauj lwm uas loj tshaj, ntse tshaj uas tsis ua raws tej kab lig kev cai, nyob rau hauv phau ntawv qub qub tuaj pwm taws mas? Tes hauj lwm niaj hnub no tsis yog keeb kwm, thiab zoo li ntawd, ces yog koj xav taug txoj kev tshiab ntawm niaj hnub no, ces koj yuav tsum ncaim ntawm phau Vajluskub, koj yuav tsum mus kom dhau deb tshaj cov ntawv ntawm tej lus qhia txog yav tom ntej los sis keeb kwm nyob rau hauv phau Vajluskub. Tsuas yog thaum ntawd xwb mas koj thiaj li yuav muaj cuab kav taug tau txoj kev tshiab kom yog, thiab tsuas yog thaum ntawd xwb mas koj thiaj li yuav muaj cuab kav to taub qhov tseeb txog thaj chaw tshiab thiab tes hauj lwm tshiab. Koj yuav tsum to taub vim li cas, niaj hnub no, koj thiaj raug hais kom tsis txhob nyeem phau Vajluskub lawm, vim li cas ho muaj ib qho hauj lwm uas tsis nyob rau hauv Vajluskub, vim li cas Vajtswv ho tsis nrhiav txoj hau kev tshiab, muaj tej ntsiab lus ntau dua coj los xyaum ua nyob rau hauv Vajluskub, thiab vim li cas ho muaj qhov hauj lwm uas loj tshaj nyob rau sab nraud ntawm phau Vajluskub. Tag nrho tej no yog tej uas nej yuav tsum to taub.

Xaiv tawm los ntawm “Hais Txog Phau Vajluskub (1)” nyob hauv Txoj Lus Tshwm Hauv Lub Cev Nqaij Daim Tawv

18. Rau Vajtswv, nws raug tso cai los muaj ib txoj kev pib tshiab ntau heev ntawm tes dej num tshiab uas Nws xav ua thiab cov lus tshiab uas Nws xav hais. Thaum Nws pib ua qee yam tshiab, Nws tsis hais txog Nws tes dej num qub yav dhau los lawm los sis cov tseem yuav ua txuas mus ntxiv. Vim hais tias Vajtswv muaj Nws cov hauv paus ntsiab lus rau hauv Nws tes dej num, thaum Nws xav pib tes dej num tshiab, yog thaum Nws xav coj tib neej ntiaj teb nkag los rau ib theem tshiab ntawm Nws tes dej num, thiab thaum Nws tes dej num yuav nkag mus rau ib ntu siab dua. Yog cov neeg ua txuas mus ntxiv raws li cov lus hais qub los sis cov cai qub los sis tseem tuav tej yam qub ntawd txuas mus ntxiv, Nws yuav tsis nco qab los sis pom zoo rau qhov ntawd. Qhov no yog vim hais tias Nws twb coj tes dej num tshiab los, thiab tau nkag mus rau ntu tshiab ntawm Nws tes dej num lawm. Thaum Nws pib tes dej num tshiab, Nws tshwm sim los rau tib neeg ntiaj teb nrog ib tug duab tshiab, los ntawm ib ces kawm tshiab, thiab nyob hauv ib txoj kev tshiab uas raug ua tiav hlo kom cov neeg tuaj yeem pom cov yeeb yam sib txawv ntawm Nws tus moj yam thiab yam uas Nws muaj thiab yog. Qhov no yog ib ntawm Nws cov hom phiaj hauv Nws tes dej num tshiab. Vajtswv tsis tuav tej yam qub los sis tsis taug txoj kev pua zoo uas raug caij tsuj; thaum Nws ua thiab hais, Nws tsis txwv txiav raws li cov neeg pheej xav hauv lub hlwb. Hauv Vajtswv, txhua yam yog ywj pheej thiab ywj siab, thiab tsis muaj kev txwv txiav li, tsis muaj kev cuam tshuam li—yam uas Nws coj los rau tib neeg ntiaj teb yog kev ywj pheej thiab kev ywj siab. Nws yog ib tug Vajtswv uas muaj sia nyob, ib tug Vajtswv uas tseem tseem, muaj tseeb. Nws tsis yog ib tug roj hmab puab los sis av nplaum puab, thiab Nws yeej txawv tag nrho tej mlom uas cov neeg hwm thiab pe hawm. Nws muaj sia nyob thiab mus los tau, thiab yam uas Nws cov lus thiab tes dej num coj los rau tib neeg ntiaj teb tag nrho yog qhov muaj peev xwm loj hlob thiab duab ci pom kev, tag nrho kev ywj pheej thiab kev ywj siab, vim hais tias Nws tuav qhov tseeb, qhov muaj peev xwm loj hlob, thiab txoj kev taug—tsis muaj dab tsi cuam tshuam Nws rau hauv Nws tes dej num.

Xaiv tawm los ntawm “Vajtswv Tes Dej Num, Vajtswv Tus Moj Yam, thiab Vajtswv Tus Kheej III” nyob hauv Txoj Lus Tshwm Hauv Lub Cev Nqaij Daim Tawv

19. Yexus hais tias Yehauvas tes hauj lwm tau poob qab nyob rau Tiam Hmoov Hlub lawm, ib yam nkaus li qhov Kuv hais hnub no, hais tias Yexus tes hauj lwm kuj tau poob qab lawm thiab. Yog hais tias tsuas muaj Tiam Muaj Kev Cai nkaus xwb thiab tsis muaj Tiam Hmoov Hlub, ces Yexus yeej tsis raug ntsia saum ntoo khaub lig li thiab yuav txhiv tsis tau neeg ntiaj teb tag nrho rov qab. Yog hais tias tsuas muaj Tiam Muaj Kev Cai nkaus xwb, ua neeg ntiaj teb puas yuav los tau deb npaum li hnub no? Keeb kwm mus rau yav tom ntej, thiab ua li keeb kwm tsim ntuj txoj cai rau Vajtswv tes hauj lwm los? Ua qhov no tsis yog ib qho kev qhia kom pom txog Nws kev cawm tib neeg thoob plaws lub qab ntuj khwb no los? Keeb kwm mus rau yav tom ntej, thiab Vajtswv tes hauj lwm los ib yam nkaus li ntawd thiab. Vajtswv txoj kev xav mas yeej hloov mus tas li. Nws yuav nyob tsis tau rau ib qib ntawm qhov hauj lwm kom ntev txog rau txhiab xyoo, vim ib yam li qhov uas sawv daws paub, Vajtswv mas yeej tshiab tas li xwb thiab yeej tsis qub li, thiab Nws pheej yuav ua tsis tau tej hauj lwm zoo li kev raug ntsia rau saum ntoo khaub lig, muab ntsia rau saum tus ntoo khaub lig ib zaug, ob zaug, peb zaug…. Qhov no yog qhov kev xav ntawm ib tug neeg ruam heev. Vajtswv tsis ua tib yam hauj lwm tas mus li xwb; Nws tes hauj lwm mas hloov mus tas li thiab tshiab tas li xwb, ntau ib yam nkaus li qhov uas Kuv hais cov lus tshiab rau nej thiab ua tes hauj lwm tshiab txhua hnub. Qhov no yog tes hauj lwm Kuv ua, thiab qhov uas yog tus yawm sij ces yog cov lus “tshiab” thiab “zoo yam xav tsis thoob li.”

Xaiv tawm los ntawm “Tus Tib Neeg Uas Twb Tau Kem Ciam Rau Vajtswv Nyob Rau Hauv Nws Qhov Kev Xav Lawm Ho Yuav Tau Txais Vajtswv Txoj Kev Qhia Tshwm Tau Li Cas?” nyob hauv Txoj Lus Tshwm Hauv Lub Cev Nqaij Daim Tawv

20. Vim muaj ib txoj kev uas siab dua lawm, vim li cas tseem ho yuav kawm txog txoj kev ua qis dua thiab dua caij nyoog tag lawm? Vim twb muaj tej lus hais tawm uas tshiab dua lawm, thiab tej hauj lwm tshiab dua lawm, vim li cas tseem pheej ua neej nrog rau tej lus teev txog tej keeb kwm qub? Cov lus hais tawm tshiab muaj cuab kav yuav pab cuam tau rau koj, uas ua pov thawj qhia tau hais tias qhov no yog tes hauj lwm tshiab; tej ntaub ntawv teev tseg qub tsis muaj cuab kav yuav ua tau kom koj txaus siab hlo, ua kom tau tej yam uas koj xav tau tam sim no rau koj, ces ua tau pov thawj qhia hais tias lawv tsuas yog keeb kwm xwb, thiab tsis yog tes hauj lwm ntawm no thiab lus sij hawm no. Txoj kev siab tshaj plaws ces yog tes hauj lwm uas tshiab tshaj plaws, thiab nrog rau tes hauj lwm uas tshiab tshaj plaws, ces tsis tas hais txoj kev ntawm yav tag los yuav siab npaum li cas li, nws yeej tsuas tseem yog keeb kwm ntawm tib neeg txoj kev rov xav txog xwb, thiab tsis hais nws qhov nuj nqis yuav zoo li cas thaum muab piv rau li, nws yeej tsuas tseem yog txoj kev qub xwb. Txawm hais tias nws yuav raug muab sau teev tseg nyob rau hauv “phau ntawv dawb huv,” los txoj kev qub yeej tseem yog keeb kwm xwb; txawm hais tias tsis muaj lus teev tseg nyob rau hauv “phau ntawv dawb huv,” los txoj kev tshiab ces yog qhov ntawm no thiab tam sim no. Txoj kev no yuav cawm tau koj, thiab txoj kev no yuav hloov tau koj, vim qhov no yog tes hauj lwm ntawm Vajntsujplig.

Xaiv tawm los ntawm “Hais Txog Phau Vajluskub (1)” nyob hauv Txoj Lus Tshwm Hauv Lub Cev Nqaij Daim Tawv

21. Vajtswv Tus Kheej yog txoj sia, thiab qhov tseeb, thiab Nws txoj sia thiab qhov tseeb tshwm sim nyob ua ke. Cov uas tsis muaj peev xwm tau txais qhov tseeb ces yuav tsis muaj hnub tau txais txoj sia. Yog tsis muaj qhov kev qhia kev coj, kev txhawb nqa, thiab kev pab cuam ntawm qhov tseeb, koj ces tsuas tau tej tus ntawv, cov lus qhuab qhia, thiab, tshaj tag nrho ntawd, kev tuag nkaus xwb. Vajtswv txoj sia yeej muaj nyob tas mus li, thiab Nws qhov tseeb thiab txoj sia tshwm sim nyob ua ke. Yog koj nrhiav tsis tau lub hauv paus ntawm qhov tseeb, ces koj yuav tsis tau txais tej zaub mov yug txoj sia; yog koj tsis tau txais kev pab cuam ntawm txoj sia, ces koj yuav tsis muaj qhov tseeb tiag tiag li, thiab yog dhau ntawm kev khwv yees xav thiab kev xav phem lawm, ces tag nrho koj lub cev ces tsis muaj dab tsi li tsuas yog nqaij tawv nkaus xwb—koj cev nyuag nqaij tsw phem nkaus xwb. Yuav tsum paub hais tias tej lus hauv phau ntawv mas tsis raug suav hais tias yog txoj sia, tej lus teev tseg hauv keeb kwm yuav muab coj los qhuas ua qhov tseeb tsis tau, thiab tej kev cai yav tag los yuav muab coj los siv ua cov lus uas hnov Vajtswv hais tam sim no tsis tau. Tsuas yog cov uas Vajtswv hais kiag thaum Nws los rau ntiaj teb no thiab nyob nrog tib neeg kiag mas thiaj yog qhov tseeb, txoj sia, Vajtswv lub siab nyiam, thiab Nws qhov kev ua hauj lwm tam sim no. Yog koj muab tej lus teev tseg uas Vajtswv hais puag thaum ub coj los siv rau tam sim no, qhov ntawd yuav ua rau koj yog ib tug neeg kawm txog tej khoom qub xwb, thiab qhov kev zoo tshaj plaws uas siv los piav txog koj ces yog ib tug neeg paub txog tej qub txeeg qub teg hauv keeb kwm xwb. Qhov ntawd vim yog koj pheej ntseeg tej qub lw ntawm tes hauj lwm uas Vajtswv tau ua yav dhau los, tsuas ntseeg Vajtswv tus duab ntxoo thaum Nws ua hauj lwm nrog tib neeg yav dhau los, thiab tsuas ntseeg txoj kev uas Vajtswv muab tseg rau Nws cov ntseeg yav dhau los xwb. Koj tsis ntseeg txoj xub ke ntawm Vajtswv tes hauj lwm hnub no, tsis ntseeg Vajtswv lub ntsej muag uas muaj yeej koob ci ntsa iab hnub no, thiab tsis ntseeg txoj kev ntawm qhov tseeb uas Vajtswv hais qhia hnub no. Thiab yog li ntawd koj ces yeej cam tsis dhau qhov uas koj yog ib tug neeg npau suav nruab hnub uas yeej ncav tsis cuag qhov muaj tseeb li. Yog tam sim no koj tseem tuav rawv tej lus uas tsis muaj peev xwm muab tau txoj sia rau tib neeg, ces koj yog ib daig ntoo lwj[a] uas tsis muaj kev cia siab dab tsi li, vim koj yog ib tug uas ntseeg lub tswv yim qub loj dhau heev lawm, tawv ncauj dhau heev lawm, siab twm xeeb heev lawm!

Xaiv tawm los ntawm “Tsuas Yog Khetos Ntawm Tiam Kawg Nkaus Xwb Mas Thiaj Yuav Muab Tau Txoj Kev Mus Rau Txoj Sia Ntev Dhawv Mus Ib Txhis Rau Tib Neeg” nyob hauv Txoj Lus Tshwm Hauv Lub Cev Nqaij Daim Tawv

22. Khetos ntawm tiam kawg ntawd nqa txoj sia los, thiab nqa txoj kev ntawm qhov tseeb uas ruaj khov thiab kav mus ib txhis ntawd los. Qhov tseeb no yog txoj kev uas tib neeg tau txoj sia, thiab nws yog tib txoj kev uas tib neeg yuav paub Vajtswv thiab tau txais kev pom zoo los ntawm Vajtswv. Yog koj tsis nrhiav txoj kev muaj sia nyob uas Khetos muab thaum tiam kawg ntawd, ces koj yeej yuav tsis tau txais kev pom zoo los ntawm Yexus ib zaug li, thiab yeej yuav tsis muaj hnub tsim nyog tau nkag rau hauv lub rooj vag ntawm vaj loog ceeb tsheej, vim koj yog ib tug moj zeej thiab neeg raug txim ntawm keeb kwm xwb. Cov uas raug khoo los ntawm kev cai, tus npe ntawv, thiab raug keeb kwm xauv ko taw cia ces yuav tsis tau txoj sia los sis tsis tau txoj kev muaj sia nyob uas tsis paub kawg. Qhov no mas vim yog tag nrho qhov lawv muaj ces tsuas yog tej nyuag dej nro uas lawv tuav rawv tseg los tau ntau txhiab xyoo uas tsis yog cov dej cawm siav uas txhawv ntawm lub zwm txwv los. Cov uas tsis tau txais cov dej cawm siav ces tsuas yog lub niag cev tuag, yog Ntxwgnyoog tej nyuag khoom ua si, thiab yog tub ki ntawm dab teb mus ib txhis xwb. Yog li ntawd, yuav ua cas es lawv thiaj yuav pom Vajtswv? Yog koj pheej xav tuav rawv yav tag los, tsuas sawv nres twj ywm tuav txhua yam cia kom zoo li qub, thiab tsis kam hloov qhov uas muaj tam sim no thiab muab keeb kwm tso pov tseg, ces tsis yog koj pheej yuav tawm tsam Vajtswv tas zog li los? Cov txheej txheem ntawm Vajtswv tes hauj lwm mas dav thiab loj heev li, zoo ib yam li nthwv dej nphau npog thiab nthwv xob nroo nrov deeg daws—tab sis koj tseem zaum twj ywm nyob tos kev puas tsuaj, khawm rawv koj txoj kev ruam thiab tsis ua ib qho dab tsi li. Nyob rau qhov no, yuav ua cas es thiaj yuav xam tau hais tias koj yog ib tug uas taug tus Me Nyuam Yaj tus hneev taw mas? Yuav ua cas es koj thiaj yuav ua pov thawj hais tias tus Vajtswv uas koj cia siab rau ntawd yog ib tug Vajtswv uas tshiab tas li xwb es yeej tsis txawj qub li? Thiab yuav ua cas es cov lus hauv koj phau ntawv daj ntawd thiaj li yuav coj tau koj hla mus rau tiam tshiab? Yuav ua cas es thiaj yuav coj tau koj mus nrhiav tej kauj ruam ntawm Vajtswv tes hauj lwm? Thiab yuav ua cas es thiaj coj tau koj mus rau saum ceeb tsheej? Qhov koj tuav ntawm koj txhais tes tsuas yog tus ntawv uas muab tau kev kaj siab ib nyuag pliag rau koj xwb, tsis yog tej qhov tseeb uas yuav muaj cuab kav muab tau txoj sia rau koj. Cov tej nqe Vajluskub koj nyeem tsuas pab tsim kho tau koj tus nplaig xwb, thiab tsis yog cov lus txawj ntse uas yuav pab tau kom koj paub tib neej lub neej txoj sia, haj yam tsis yog txoj kev uas yuav coj tau koj mus rau qhov kev zoo tag nrho. Qhov uas zoo tsis sib xws no tseem tsis ua kom koj tig rov los xav txog koj tus kheej thiab los? Qhov ntawd tsis ua rau koj ras txog tej lus to taub nyuaj nyob rau hauv thiab los? Koj puas muaj peev xwm coj tau koj tus kheej mus saum ceeb tsheej mus ntsib Vajtswv? Yog hais tias Vajtswv tsis los, koj puas yuav coj tau koj tus kheej mus rau saum ceeb tsheej mus ntsib txoj kev zoo siab li tsev neeg nrog rau Vajtswv? Koj puas tseem npau suav toog tam sim no mas? Yog li ntawd, Kuv xav hais kom koj tsis txhob npau suav toog lawm thiab tig los saib tus uas tab tom ua hauj lwm tam sim no—saib kom pom hais tias leej twg tab tom ua tes hauj lwm cawm tib neeg nyob rau tiam kawg. Yog koj tsis ua li, koj yuav tsis muaj hnub tau txais qhov tseeb, thiab yuav tsis tau txoj sia.

Xaiv tawm los ntawm “Tsuas Yog Khetos Ntawm Tiam Kawg Nkaus Xwb Mas Thiaj Yuav Muab Tau Txoj Kev Mus Rau Txoj Sia Ntev Dhawv Mus Ib Txhis Rau Tib Neeg” nyob hauv Txoj Lus Tshwm Hauv Lub Cev Nqaij Daim Tawv

23. Yog nej siv nej tej kev xav phem los ntsuas thiab kem ciam rau Vajtswv, ib yam li tias Vajtswv yog ib tug mlom uas xuas av nplaum puab uas tsis txhawj hloov, thiab yog nej kem ciam rau Vajtswv raws li lub vaj voog xov nyob hauv Vajluskub thiab muab Nws kaw rau hauv tus ciam ntawm tes hauj lwm, ces qhov no yog pov thawj qhia hais tias nej tau nog txim rau Vajtswv. Vim cov neeg Yudais nyob rau lub sij hawm hauv Vajluskub Qub muab Vajtswv ua ib tug mlom uas tsis txawj txav uas lawv muaj nyob rau hauv lawv lub siab xwb, cuag li Vajtswv ces tsuas hu tau hais tias yog tus Mexiyas xwb, thiab tsuas yog tus uas hu ua Mexiyas xwb thiaj yog Vajtswv, thiab vim yog neeg ntiaj teb tiam thiab pe hawm Vajtswv li Nws yog ib tug mlom uas xuas av nplaum puab (tsis ciaj sia), lawv muab tus Yexus rau lub sij hawm ntawd ntsia rau saum ntoo khaub lig, rau txim rau Nws kom tuag—tus Yexus uas tsis muaj kev txhaum ntawd thiaj li raug rau txim rau kom tuag. Vajtswv yog tus dawb huv tsis muaj kev txhaum txim, tab sis tib neeg tseem tsis zam Nws, thiab cam qees rau txim kom Nws tuag, thiab yog li ntawd Yexus thiaj raug ntsia rau saum ntoo khaub lig. Tib neeg yeej ib txwm ntseeg hais tias Vajtswv yeej tsis txawj hloov, thiab tshab txhais Nws raws li lub hauv paus teev tseg ntawm ib phau ntawv, phau Vajluskub, cuag li tib neeg yeej muaj ib txoj kev to taub uas zoo tshaj plaws txog Vajtswv tej kev tswj, cuag li tib neeg yeej tuav tag nrho tej uas Vajtswv ua ntawd rau hauv lawv lub xib teg. Tib neeg mas ruam kawg nkaus, khav theeb kawg nkaus, thiab tag nrho lawv yeej txawj hais lus dag tshaj plaws li. Tsis hais koj paub ntau npaum li cas txog Vajtswv li, Kuv tseem hais tias koj tsis paub Vajtswv, hais tias koj yog ib tug uas tawm tsam Vajtswv tshaj plaws, thiab koj tau cem Vajtswv, vim koj tsis muaj peev xwm txaus nkaus yuav ua tau raws li tes dej num ntawm Vajtswv, thiab taug txoj kev mus kom raug Vajtswv muab kho kom zoo tag nrho.

Xaiv tawm los ntawm “Cov Lim Hiam Yeej Yuav Raug Rau Txim Tseeb Tseeb” nyob hauv Txoj Lus Tshwm Hauv Lub Cev Nqaij Daim Tawv

24. Hos hais txog tej zeem muag ntawm tes hauj lwm nyob rau tag nrho txoj kev npaj cawm tib neeg rau-txhiab-xyoo, ces tsis muaj leej twg yuav muaj peev xwm paub tob los sis to taub txog li, thiab tej zeem muag no yeej tseem yog lus txhiaj txhais xwb. Nyob rau tiam kawg, tsuas yog tes hauj lwm ntawm txoj lus thiaj li raug ua lawm xwb es kom thiaj li coj tau Tiam Vajtswv Los Kav los, tab sis nws tsis yog sawv ces rau tag nrho txhua tiam. Tiam kawg ces tsis yog dab tsi tshaj li lub sij hawm kawg thiab tsis tshaj li Tiam Vajtswv Los Kav, thiab nws tsis sawv cev rau Tiam Hmoov Hlub los sis Tiam Muaj Kev Cai. Nws tsuas yog hais tias, nyob rau thaum tiam kawg, tag nrho tes hauj lwm nyob rau hauv txoj kev npaj cawm tib neeg rau-txhiab-xyoo raug muab coj los nthuav tawm rau nej. Qhov no yog qhov kev nthuav tawm txog qhov lus zais tob. Yam lus zais tob no yog tej yam uas tsis muaj ib tug tib neeg twg yuav nthuav tawm tau li. Tsis hais tib neeg yuav to taub Vajluskub zoo npaum li cas li, nws yeej tseem tsis yog dab tsi tshaj li ib co lus xwb, vim tib neeg tsis to taub txog lub ntsiab ntawm phau Vajluskub. Nyob rau kev nyeem Vajluskub, ces tib neeg tsuas to taub tej qhov tseeb xwb, piav tau tej co lus, los sis muab tej nqe lus thiab tej tshooj uas nrov npe coj los soj ntsuam xyuas li ub li no xwb, tab sis lawv yuav tsis muaj peev xwv daws tau lub ntsiab lus uas muaj nyob rau hauv tej lus ntawd, vim tag nrho tej tib neeg pom ces yog tej niag lus tuag xwb, tsis yog tej ntu duab ntawm tes hauj lwm ntawm Yehauvas thiab ntawm Yexus, thiab tib neeg tsis muaj kev yuav nthuav tawm tau qhov lus zais tob ntawm tes hauj lwm no. Yog li ntawd, qhov lus zais tob ntawm txoj kev npaj cawm tib neeg rau-txhiab-xyoo thiaj li yog qhov lus zais tob uas loj tshaj plaws li, qhov uas rau muab zais tob tshaj plaws thiab tag nrho ces tib neeg yeej xav tsis tawm kiag li. Tsis muaj leej twg yuav to taub Vajtswv txoj kev xav tau ncaj qha li, tshwj tsis yog hais tias Vajtswv Nws Tus Kheej kiag piav thiab nthuav tawm nws rau tib neeg xwb; tsis li ntawd, ces tej yam no yeej yuav nyob ua tej lub zais tob uas raug muab kaw tseg mus ib txhis. Kav liam cov nyob rau hauv lub ntiaj teb fab kev ntseeg; yog nej tsis tau raug qhia kom paub hnub no, ces nej yeej yuav tsis to taub nws tib yam thiab. Tes hauj lwm ntawm rau txhiab xyoo no mas tseem muaj lus zais tob ntau tshaj tag nrho tej lus qhia txog yav tom ntej ntawm cov xib fwb cev Vajtswv lus thiab. Nws yog qhov lus zais tob uas loj tshaj plaws txij puag thaum ntuj tsim teb raug los txog ntua tam sim no, thiab tsis muaj ib tug ntawm cov xib fwb cev Vajtswv lus thoob plaws txhua tiam uas yuav muaj peev xwm xav tau tawm li, vim qhov lus zais tob no mas tsuas yuav raug muab nthuav tawm nyob rau tiam kawg thiab yeej tsis tau raug muab nthuav tawm ua ntej li. Yog nej muaj peev xwm to taub qhov lus zais tob no, thiab yog nej muaj peev xwm lees txais nws tag nrho, ces tag nrho cov neeg uas coj kev ntseeg nruj nruj ntawd yuav swb tag nrho rau qhov lus zais tob no. Tsuas yog qhov no xwb thiaj li yog tej zeem muag loj tshaj plaws; nws yog qhov uas tib neeg ntshaw kom to taub tshaj plaws li tab sis nws kuj yog qhov uas ua rau lawv paub tsis meej tshaj plaws li thiab.

Xaiv tawm los ntawm “Lus Zais Tob ntawm Kev Yug Los Ua Neeg (4)” nyob hauv Txoj Lus Tshwm Hauv Lub Cev Nqaij Daim Tawv

Lus taw qhia:

a. Ib daig ntoo lwj: Suav ib lo lus paj lug, txhais tias “tsis muaj dab tsi yuav pab tau lawm.”

Qhov Dhau Los: Vajpebleeg Puas Tshwm Sim Muaj Tiag?

Ntxiv Mus: II. Nyob rau ntawm Qhov Tseeb ntawm qhov Kev Yug Los Ua Neeg

Tej kev puas tsuaj tab tom tshwm sim ib yam zuj zus tuaj. Tus Tswv twb los rau hauv qhov kev zais npog ua ntej txoj kev txom nyem loj tshaj plaws lawm. Koj puas paub tias yuav tos txais Nws li cas? Txhob me siab hu rau peb los nrhiav qhov kev tos txais no.

Cov Ntsiab Lus Uas Zoo Sib Thooj

Tshooj 26

Leej twg tau nyob rau hauv Kuv lub tsev? Leej twg tau sawv txhawm rau Kuv? Leej twg tau raug tsim txom sawv Kuv cev? Leej twg tau cog nws...

Qhov Kho Kev Teeb Txhua Yam

  • Cov ntawv
  • Cov Ntsiab Lus Tom Qab

Ib Xim Nkaus Xwb

Cov Ntsiab Lus Tom Qab

Tus Ntawv

Tus Ntawv Luaj Li Cas

Kev Sib Nrug Ntawm Tej Kab Ntawv

Kev Sib Nrug Ntawm Tej Kab Ntawv

Nplooj Ntawv Qhov Dav

Cov Ntsiab Lus

Tshawb Nrhiav

  • Tshawb Nrhiav Lo Lus No
  • Tshawb Nrhiav Phau Ntawv No