00:00 00:00
00:00
00:00

Tiam qub twb dhau lawm, thiab tiam tshiab twb los lawm. Ib xyoos dhau ib xyoos thiab ib hnub dhau ib hnub, Vajtswv tau ua hauj lwm tiav ntau heev lawm. Nws tau los rau hauv ntiaj teb no thiab tom qab ntawd rov ncaim mus lawm. Lub vaj vog no tau rov ncig mus los li qub tau ntau tiam neeg lawm. Niaj hnub no, Vajtswv yeej tseem ua nws tes hauj lwm uas nws yuav tsum tau ua ntawd ib yam nkaus li yav dhau los, tes hauj lwm uas Nws tseem ua tsis tau tiav, vim los txog niaj hnub no Nws yeej tseem tsis tau so li. Txij puag thaum chiv keeb los txog niaj hnub no, Vajtswv tau ua hauj lwm ntau heev tiav lawm. Tab sis koj puas paub hais tias niaj hnub no mas Vajtswv tseem ua hauj lwm ntau tshaj yav tag los, thiab Nws cov hauj lwm mas haj yam zoo dua yav tag los lawm thiab? Qhov no yog qhov uas Kuv hais tias Vajtswv tau ua ib yam zoo tshaj plaws nrog rau tib neeg. Tag nrho Vajtswv tes hauj lwm mas yeej tseem ceeb heev, txawm yog rau tib neeg los sis rau Vajtswv, vim txhua qhov ntawm Nws tes hauj lwm ces yeej yog ua rau tib neeg xwb.

Vim Vajtswv tes hauj lwm mas tsis muaj cuab kav pom los sis tuav tau—ntiaj teb haj yam tsis pom—nws yog ib qho zoo tshaj plaws tau li cas? Dab tsi yog yam uas muab xam tau hais tias zoo tshaj plaws? Qhov tseeb, yeej tsis muaj leej twg yuav tsis lees qhov ntawd tau li, hauj lwm dab tsi los yog Vajtswv ua, ces yeej xam tau hais tias zoo, tab sis vim li cas peb ho hais tias li no rau tes hauj lwm uas Vajtswv ua hnub no? Thaum Kuv hais tias Vajtswv tau ua ib yam zoo tshaj plaws, qhov no ces yeej ntseeg tau hais tias muaj ntau yam to taub nyuab uas tib neeg yeej tseem tsis tau to taub li. Cia peb hais txog tej ntawd tam sim no seb.

Yexus yug los rau hauv ib lub dab nyuj nyob rau tiam uas tsis pub cia qhov muaj Nws nyob, tab sis txawm li ntawd los, ntiaj teb yeej thaiv tsis tau Nws txoj kev, thiab Nws nrog tib neeg nyob tau peb caug peb xyoos hauv Vajtswv txoj kev saib xyuas. Nyob tau npaum ntawd lub xyoo hauv lub neej, Nws tau ntsib tau pom ntiaj teb txoj kev chim siab thiab tau saj txoj kev txom nyem nyuaj siab nyob rau lub ntiaj teb no. Nws tau ris hlo lub nra uas raug ntsia rau saum tus ntoo khaub lig los mus txhiv tag nrho neeg ntiaj teb. Nws txhiv tau tag nrho cov neeg muaj txim txhaum uas tau nyob rau hauv Ntxwgnyoog thaj chaw tswj fwm, thiab thaum kawg, Nws lub cev uas tau sawv hauv qhov tuag rov los ntawd tau rov qab mus rau Nws qhov chaw so lawm. Tam sim no Vajtswv tes hauj lwm tshiab tau pib lawm, thiab nws kuj yog qhov pib ntawm ib tiam tshiab. Vajtswv tau coj cov uas tau raug txhiv dim los rau hauv Nws lub tsev los pib Nws tes hauj lwm kev cawm tshiab. Lub sij hawm no, tes hauj lwm cawm dim mas ntxaws dua cov nyob rau yav dhau los lawm. Nws tsis yog Vajntsujplig ua hauj lwm nyob rau hauv tib neeg kom ua rau nws hloov nws tus kheej, los sis nws tsis yog Yexus lub cev yuav tshwm sim nrog tib neeg los ua txoj hauj lwm no, thiab qhov tsawg tshaj mas yog tes hauj lwm no yog siv lwm yam los ua. Tab sis, nws yog tus Vajtswv tus uas yug los ua neeg los ua qhov hauj lwm thiab Nws Tus Kheej los qhia ua kiag. Nws ua li no mas thiaj yuav coj tau tib neeg los mus rau hauv tes hauj lwm tshiab. Qhov no tseem tsis yog ib qho zoo tshaj plaws los? Vajtswv tsis ua tes hauj lwm no los ntawm ib qho ntawm tib neeg ntiaj teb li los sis siv tej yam li Vajtswv tej lus qhia txog yav tom ntej; tab sis, Vajtswv Tus Kheej ua kiag. Ib txhia yuav hais tias qhov no tsis yog ib qho zoo tshaj plaws thiab hais tias muab tsis tau kev zoo siab los rau tib neeg. Tab sis Kuv hais rau koj hais tias Vajtswv tes hauj lwm tsis lam yog qhov no xwb, tab sis yog tej yam loj tshaj thiab ntau tshaj ntxiv.

Lub sij hawm no ncig los, Vajtswv tsis yog los ua hauj lwm nyob rau hauv lub cev sab ntsujplig, tab sis nyob rau hauv ib tug neeg dog dig li sawv daws. Tshaj ntawd ntxiv, nws kuj tsis yog Vajtswv lub cev uas yug dua tshiab zaum ob xwb, nws kuj tseem yog qhov uas Vajtswv rov los kiag rau hauv cev nqaij daim tawv. Nws yog ib cev nqaij daim tawv li tej tib neeg sawv daws muaj xwb. Koj tsis muaj cuab kav yuav pom tau ib yam dab tsi uas ua rau nws zoo txawv lwm tus, tab sis koj yuav tau txais tej qho tseeb uas tsis tau hnov dua los ntawm Nws. Lub cev uas zoo li tsis tseem ceeb no yog yam tshwm sim tag nrho tej lus muaj tseeb los ntawm Vajtswv, ua Vajtswv tes hauj lwm nyob rau tiam kawg, thiab qhia tawm tag nrho Vajtswv tus moj yam rau tib neeg kom to taub. Koj tseem tsis xav pom tus Vajtswv saum ceeb tsheej heev li los? Koj tseem tsis xav to taub tus Vajtswv saum ceeb tsheej heev li los? Koj tseem tsis xav pom tib neeg txoj hau kev kawg heev li los? Nws yuav qhia tag nrho tej lus zais no—tej lus zais uas tsis tau muaj ib tug tib neeg yuav muaj peev xwm qhia tau koj li, thiab Nws kuj tseem yuav qhia koj txog qhov tseeb ua koj tsis to taub. Nws yog koj lub rooj vag nkag mus rau hauv lub nceeg vaj, thiab koj tus neeg coj kev nkag mus rau tiam tshiab. Lub cev nqaij daim tawv zoo li sawv daws li ntawd mas muaj ntau yam to taub nyuab uas yeej tsis muaj leej twg to taub txog li. Tej yam nws ua mas yuav txawv heev rau koj li, tab sis tag nrho lub hom phiaj ntawm tes hauj lwm Nws ua ces yeej txaus cia koj pom hais tias Nws tsis yog ib lub cev dog dig li qhov ua neeg ntseeg. Vim nws sawv cev Vajtswv txoj kev xav thiab txoj kev saib xyuas uas Vajtswv muaj rau tib neeg rau tiam kawg. Txawm hais tias koj tsis hnov Nws cov lus uas zoo li ua rau lub ntuj thiab lub ntiaj teb co qig txoog, txawm hais tias koj pom tsis tau Nws ob lub qhov muag cuag nplaim taws cig, thiab txawm hais tias koj tsis tuaj yeem txais txoj kev qhuab qhia ntawm tus pas hlau, txawm li ntawd los xij, koj yeej hnov los ntawm Nws cov lus hais tias Vajtswv yeej npau taws heev thiab paub hais tias Vajtswv yeej muab kev hlub tshua rau tib neeg ntiaj teb; koj muaj cuab kav pom Vajtswv tus moj yam ncaj ncees thiab Nws txoj kev ntse, thiab, tshaj ntawd, pom meej Vajtswv txoj kev txhawj xeeb rau tag nrho neeg ntiaj teb. Vajtswv tes hauj lwm nyob rau tiam kawg ces yog yuav cia kom tib neeg pom tus Vajtswv saum ntuj ceeb tsheej nyob nrog tib neeg hauv ntiaj teb, thiab ua kom tib neeg paub, mloog lus, hwm, thiab hlub Vajtswv. Qhov no yog qhov uas Nws tau rov qab los rau lub cev nqaij daim tawv zaum thib ob. Txawm hais tias qhov tib neeg pom hnub no yeej yog ib tug Vajtswv uas zoo ib yam nkaus li tib neeg, ib tug Vajtswv uas muaj qhov ntswg thiab qhov muag, thiab ib tug Vajtswv uas tsis zoo ntsej zoo muag kawg kiag li, nyob rau thaum kawg, Vajtswv yuav ua kom koj pom hais tias yog tsis muaj tus neeg no, ntuj ceeb tsheej thiab ntiaj teb yuav hloov pauv ntau heev li; yog tsis muaj tus neeg no, lub ntuj yuav tsaus, lub ntiaj teb yuav poob mus rau kev kub ntxhov, thiab tag nrho neeg ntiaj teb yuav ua neej nyob nrog kev tuag tshaib tuag nqhis thiab kev mob kev nkeeg sib kis loj kawg nkaus. Nws yuav ua kom nej pom hais tias yog Vajtswv tus yug dua tshiab tsis los cawm nej rau thaum tiam kawg, ces Vajtswv yeej muab tag nrho tej neeg ntiaj teb rhuav tshem mus rau hauv dab teb ntev los lawm; yog tsis muaj lub cev nqaij daim tawv no, ces nej yeej yuav tau ua tus neeg txhaum-loj mus ib txhis, thiab nej yuav yog lub niag cev tuag mus ib txhis xwb. Nej yuav tsum paub hais tias yog tsis muaj lub cev nqaij daim tawv no, tag nrho neeg ntiaj teb yuav zam tsis dhau kev puas ntsoog li thiab yuav pom tau hais tias yuav khiav tsis dim qhov kev rau txim hnyav tshaj uas Vajtswv rau txim rau neeg ntiaj teb nyob rau tiam kawg. Yog lub cev nqaij daim tawv zoo li neeg dog dig no tsis yug los, ces nej tag nrho yuav tau nyob rau qhov uas nej thov kev ciaj los ciaj tsis taus thiab thov kev tuag los tuag tsis taus; yog tsis muaj lub cev no, ces nej yuav tsis muaj peev xwm tau qhov tseeb thiab los rau ntawm Vajtswv xub ntiag lub xwm txwv hnub no, tab sis txawv qhov ntawd, ces nej yuav raug Vajtswv rau txim rau vim nej tej kev txhaum loj. Nej puas paub hais tias yog Vajtswv tsis rov qab los rau hauv lub cev nqaij daim tawv, tsis muaj leej twg yuav muaj lub cib fim raug cawm dim hlo li; thiab yog tsis rov los rau lub cev nqaij daim tawv, ces Vajtswv yeej xub muab tiam qub thaum i tso tseg ntev los lawm? Qhov nov zoo li no, nej puas tseem muaj cuab kav tsis txais yuav tus Vajtswv los yug dua tshiab zaum ob thiab? Vim nej twb tau txais txiaj ntsim ntau heev los ntawm tus neeg dog dig no, vim li cas nej ho tsis lees txais Nws?

Vajtswv tes hauj lwm yog ib yam uas koj tsis muaj cuab kav yuav nkag siab tau. Yog koj tuav tsis tau kom khov hais tias koj qhov kev xaiv yog qhov yog, los sis koj tsis paub hais tias ua Vajtswv tes hauj lwm puas yuav ua tau kom tiav hlo, ces vim li cas ho tsis sim koj txoj hmoo thiab saib seb tus neeg dog dig no puas yuav pab tau koj ntau, thiab seb Vajtswv puas yuav ua tau tes hauj lwm zoo tshaj plaws tiag? Txawm li cas los xij, Kuv yuav tsum qhia koj hais tias lub sij hawm thaum Nau-a nyob ntawd, tib neeg tau noj thiab haus, sib yuav thiab ua tshoob ua kos txog qhov uas Vajtswv ntsia tsis taus lawm, yog li ntawd Nws thiaj li tso dej nyab loj los rhuav tshem neeg ntiaj teb, tseg kiag Nau-a tsev neeg muaj yim leej ntawd thiab tej nas noog thiab tsiaj qus xwb. Nyob rau tiam kawg, txawm li cas los xij, cov uas Vajtswv tseg ces tsuas yog cov uas yeej ua lub siab ncaj rau Nws los txog thaum kawg kiag xwb. Txawm hais tias ob tiam ntawd puav leej muaj kev coj tsis ncaj uas Vajtswv yeej ntsia tsis taus li, thiab tib neeg ntawm ob tiam ntawd mas qias vuab tsuab heev thiab tsis kam lees tias Vajtswv yog lawv tus Tswv, Vajtswv tsuas rhuav tshem cov neeg nyob rau Nau-a lub sij hawm nkaus xwb. Neeg ntiaj teb nyob rau ob tiam ntawd tsim kev nyuaj siab loj kawg nkaus rau Vajtswv, tab sis Vajtswv tseem ua siab ntev rau cov tib neeg thaum tiam kawg los txog tam sim no. Vim li cas ho zoo li no? Nej puas tau xav hais tias yog vim li cas? Yog nej yeej tsis paub tiag tiag, ces cia Kuv qhia rau nej. Qhov laj thawj uas Vajtswv muaj peev xwm muab hmoov hlub rau neeg nyob rau thaum tiam kawg ntawd mas tsis yog lawv ua qias vuab tsuab tsawg dua li cov neeg thaum Nau-a tiam, los sis lawv tau muaj kev hloov siab lees txim rau Vajtswv, haj yam tsis yog qhov uas tej cuab yeej ci tshiab nyob rau tiam kawg ntawd zoo dhau heev lawm es Vajtswv thiaj li coj tsis tau Nws Tus Kheej los rhuav tshem lawv. Tab sis, nws yog qhov hais tias Vajtswv tshuav hauj lwm ua nyob rau hauv ib pawg neeg nyob rau tiam kawg, thiab Vajtswv xav cia Nws Tus Kheej ua tes hauj lwm no rau nws lub cev los yug dua tshiab ntawd. Dhau ntawd mus, Vajtswv yuav xaiv ib co ntawm pab neeg no los ua cov neeg rau Nws qhov kev cawm dim thiab qhov tawg paj txi txiv ntawm Nws txoj kev npaj cawm neeg ntiaj teb, thiab coj cov neeg no mus rau tiam tom ntej. Yog li ntawd, tsis hais yuav muaj dab tsi li, tus nqi uas Vajtswv them no ces tag nrho yog npaj rau tes hauj lwm uas Nws lub cev yug dua tshiab ntawd yuav ua rau tiam kawg. Qhov uas nej tau los txog rau hnub no ces ua tsaug rau lub cev nqaij daim tawv no. Nws yog vim Vajtswv nyob rau hauv lub cev es nej thiaj muaj lub cib fim yuav dim. Tag nrho tej hmoov zoo no tau los ntawm tus neeg dog dig no. Tsis yog qhov no nkaus xwb, tab sis thaum kawg, txhua lub teb chaws yuav teev hawm tus neeg dog dig no, nrog rau ua tsaug rau thiab mloog lus tus neeg tsis tseem ceeb no hais, vim nws yog qhov tseeb, txoj sia, thiab txoj kev nws coj los ntawd cawm tau tag nrho neeg ntiaj teb, daws kev tsis sib haum xeeb ntawm tib neeg thiab Vajtswv, ua kom ncua kev deb ntawm nkawd luv zog, thiab qhib kev sib txuas ntawm Vajtswv thiab tib neeg txoj kev xav. Nws kuj yog tus uas tsim tau lub meej mom loj tshaj rau Vajtswv. Ib tug neeg dog dig zoo li no tseem tsis muaj nqi txaus rau koj txoj kev ntseeg siab thiab kev qhuas thiab los? Ib lub cev dog dig li no puas tsim nyog yuav hu tau ua Khetos? Ib tug neeg dog dig zoo li ntawd tsis tsim nyog ntawm Vajtswv kev nthuav tawm rau tib neeg pom thiab los? Tus neeg zoo li ntawd, tus uas zam neeg ntiaj teb ntawm txoj kev puas tsuaj, tsis tsim nyog tau txais nej txoj kev hlub thiab kev ntshaw tuav Nws tseg los? Yog nej tsis kam txais lo lus tseeb hais tawm hauv Nws lub qhov ncauj los thiab ntxub qhov uas muaj Nws nyob nrog nej, ces nej ho yuav zoo li cas rau thaum kawg mas?

Tag nrho Vajtswv tes hauj lwm thaum tiam kawg yog ua tau tiav hlo los ntawm tus neeg dog dig no. Nws yuav muab txhua yam rau koj, thiab ntau yam ntxiv, Nws yuav muaj cuab kav txiav txim rau txhua yam txog ntawm koj. Ib tug neeg zoo li ntawd puas yuav zoo li qhov nej ntseeg hais tias Nws yog: ib tug neeg dog dig kawg es tsis muaj nuj nqis txaus yuav hais txog? Puas yog Nws qhov tseeb ntawd tseem muaj tsis txaus yuav ua kom nej ntseeg los? Yam ua tim khawv ntawm Nws tej kev ua los tseem tsis txaus ua kom nej ntseeg thiab los? Los sis puas yog txoj kev uas Nws coj los ntawd tsis muaj nqis txaus rau nej taug mus mas? Thaum txhua yam tau muab hais tag thiab ua tiav lawm, dab tsi yog qhov uas ua rau nej ntxub Nws thiab muab nws ntiab tawm mus thiab zam tsis ntsib Nws? Nws yog tus neeg uas qhia kom pom qhov tseeb, nws yog tus neeg uas muab qhov tseeb los, thiab nws yog tus neeg uas muab txoj kev rau nej taug. Tsis yog nej tseem nrhiav tsis tau cov kev taug ntawm Vajtswv tes hauj lwm nyob rau hauv qhov tseeb no li los? Yog tsis muaj Yexus tes hauj lwm, neeg ntiaj teb yuav nqis tsis tau saum tus ntoo khaub lig los, tab sis yog tsis muaj tus los yug tshiab hnub no, cov uas tau nqis saum tus ntoo khaub lig los yuav tsis tau txais Vajtswv qhov kev pom zoo los sis nkag mus rau hauv tiam tshiab. Yog tsis muaj tus neeg dog dig no los, nej yuav tsis muaj hnub yuav muaj lub cib fim los pom Vajtswv lub ntsej muag, los sis nej yeej tsis tsim nyog pom, vim nej tag nrho zoo li tej khoom uas twb tsim nyog muab rhuav pov tseg ntev los lawm. Vim yog qhov kev yug dua tshiab zaum ob ntawm Vajtswv, Vajtswv thiaj tau zam txim rau nej thiab muaj kev hlub tshua rau nej. Tsis hais dab tsi li, cov lus uas Kuv yuav tsum muab tso tseg rau nej rau thaum kawg ces yeej tseem yog cov no: Tus neeg dog dig no, tus uas yog Vajtswv los yug dua tshiab, mas tseem ceeb heev rau nej. Qhov no yog yam loj kawg nkaus ua Vajtswv tau tsim tib neeg tiav lawm.

Nyeem ntxiv

Cov Ntsiab Lus Tham Ntau Ntxiv