Tus Vajtswv yug los ua neeg nyob tsis tau nrog tib neeg mus ib txhis vim tias Vajtswv muaj lwm yam hauj lwm ntau ua. Nws raug khi tsis tau rau hauv cev nqaij daim tawv; Nws yuav tsum plhis cev nqaij daim tawv mus ua tes dej num uas Nws yuav tsum ua, txawm tias Nws ua tes dej num ntawd hauv tus duab ntawm cev nqaij daim tawv. Thaum Vajtswv los rau hauv ntiaj teb, Nws tsis tos kom txog rau thaum Nws muaj lub cev uas ib tug tib neeg dog dig yuav tsum muaj ua ntej tuag thiab ncaim tib neeg mus. Tsis tseem ceeb tias Nws cev nqaij daim tawv laus li cas lawm, thaum Nws tes dej num tiav lawm, Nws ncaim tib neeg mus lawm. Tsis muaj ib yam dab tsi uas zoo li hnub nyoog rau Nws, Nws tsis suav Nws cov hnub raws li tib neeg txoj sia ntev los luv; dua ntawd, Nws xaus Nws txoj sia rau hauv cev nqaij daim tawv raws li tej kauj ruam ntawm Nws tes dej num xwb. Tej zaum yuav muaj ib co uas xav tias, Vajtswv hauv qhov los rau hauv cev nqaij daim tawv, yuav tsum laus mus rau ib qib, yuav loj hlob mus ua ib tug neeg tiav txiv, txog qhov laus, thiab tsuas ncaim rau thaum lub cev ntawd tsis ua hauj lwm lawm xwb. Qhov no yog tib neeg txoj kev xav; Vajtswv tsis ua hauj lwm li no. Nws tsuas los rau hauv cev nqaij daim tawv los ua tes dej num uas Nws yuav tsum ua xwb, thiab tsis yog los ua ib tug tib neeg dog dig lub neej ntawm qhov yug muaj niam muaj txiv, loj hlob, tsim ib tse neeg thiab pib ib txoj hauj lwm, muaj thiab tu me tub me nyuam, los sis ntsib lub neej tej kev phem kev tsis zoo—txhua yam ntawm tej uas ib tug tib neeg dog dig ua. Thaum Vajtswv los rau hauv ntiaj teb, qhov no yog Vajtswv tus Ntsujplig muab tso rau saum cev nqaij daim tawv, los rau hauv cev nqaij daim tawv, tab sis Vajtswv tsis ua lub neej ntawm ib tug tib neeg dog dig. Nws tsuas los ua ib qho hauv Nws kev npaj cawm neeg ntiaj teb kom tiav xwb. Tom qab ntawd Nws yuav ncaim tib neeg mus. Thaum Nws los rau hauv cev nqaij daim tawv, Vajtswv tus Ntsujplig tsis ua kom kev ua neej ntawm cev nqaij daim tawv zoo tshaj plaws. Dua li ntawd, nyob rau ib lub sij hawm uas Vajtswv tau pib npaj, lub hwj huaj saum ntuj mus ua hauj lwm kiag. Ces, tom qab ua txhua yam uas Nws yuav tsum ua thiab ua Nws tes hauj lwm tshaj tawm tiav log lawm, tes dej num ntawm Vajtswv tus Ntsujplig nyob rau theem no thiaj li tiav, uas yog nyob rau theem uas tus Vajtswv yug los ua neeg lub neej kuj xaus thiab, txawm tias Nws lub cev uas yog cev nqaij tawv tau tag ntawm qhov ib sim neej lawm kuj xij. Ntawd hais tau tias, txawm theem ntawm txoj sia hauv lub cev uas yog nqaij tawv txog thaum twg los xij, nws nyob ntev li cas rau hauv ntiaj teb los xij, txhua yam yog txiav txim siab los ntawm tus Ntsujplig tes dej num. Nws tsis muaj feem xyuam dab tsi nrog qhov tib neeg suav tias yog kev ua neej. Muab Yexus ua ib qho piv txwv. Nws ua neej nyob hauv cev nqaij daim tawv tau peb caug-peb xyoos ntau. Nyob rau hauv qhov muaj sia ntev ntawm tib neeg lub cev, Nws yuav tsum tsis tau tuag rau thaum muaj hnub nyoog li ntawd, thiab Nws yuav tsis tau ncaim mus. Tab sis qhov no tsis yog qhov txhawj xeeb rau Vajtswv tus Ntsujplig. Nws tes dej num ua tiav lawm, nyob rau theem no lub cev thiaj raug coj mus lawm, yaj ntshis nrog tus Ntsujplig lawm. Qhov no yog lub hauv paus ntsiab lus los ntawm qhov uas Vajtswv ua hauj lwm hauv cev nqaij daim tawv. Thiab yog li, muab hais kom nruj, kev ua noob neej ntawm tus Vajtswv yug los ua neeg tsis yog qhov tseem ceeb tshaj. Rov hais dua, Nws los rau hauv ntiaj teb tsis yog los ua lub neej ntawm ib tug tib neeg uas muaj sia. Nws tsis xub rhawv ib lub neej uas yog tib neeg dog dig lub ces mam pib ua hauj lwm. Dua ntawd, tsuav yog Nws yug los rau hauv ib tse neeg dog dig xwb, Nws yeej muaj peev xwm ua tau tes dej num saum ntuj, tes dej num uas tsis tau raug dub tsuas los ntawm tib neeg tej kev xav, uas tsis yog cev nqaij, uas tsis xyaum raws li tej kev coj noj coj ua ntawm lub zej zog los sis koom nrog tib neeg tej kev xav los sis tej kev xav phem, thiab, tseem ceeb dua ntawd, tsis koom nrog tib neeg lub tswv yim rau kev ua neej hauv ntiaj teb. Qhov no yog tes dej num uas Vajtswv yug los ua neeg npaj los ua, thiab nws kuj yog qhov tseem ceeb uas muaj qab hau ntawm Nws qhov kev yug los ua neeg. Vajtswv los rau hauv cev nqaij daim tawv tseem ceeb yog los ua ib theem ntawm tes dej num uas yuav tsum ua kom tiav rau hauv cev nqaij daim tawv, yam tsis tas yuav mus rau lwm qhov txheej txheem, thiab, rau txoj kev paub ntawm ib tug tib neeg dog dig, Nws tsis muaj tej ntawd. Tes dej num uas Vajtswv yug los ua neeg cev nqaij daim tawv yuav tsum ua ntawd tsis muaj tib neeg dog dig tej kev paub nyob rau hauv. Yog li Vajtswv los rau hauv cev nqaij daim tawv los ua tes dej num uas Nws yuav tsum tau ua kom tiav hauv cev nqaij daim tawv. Cov seem ntawd tsis muaj feem dab tsi txog Nws; Nws tsis tas mus kom thoob tej txheej txheem me me uas ntau heev. Thaum Nws tes dej num tiav lawm, qhov tseem ceeb ntawm Nws qhov kev yug los ua neeg kuj xaus lawm thiab. Qhov ua theem no tiav txhais tias tes dej num uas Nws yuav tsum ua hauv cev nqaij daim tawv tau ua tiav lawm, thiab tes hauj lwm tshaj tawm ntawm Nws cev nqaij daim tawv tiav lawm. Tab sis Nws ua tsis tau hauj lwm hauv cev nqaij daim tawv mus ib txhis. Nws yuav tsum txav mus rau lwm qhov chaw mus ua hauj lwm, ib qho chaw sab nraum cev nqaij daim tawv. Tsuas yog li no xwb Nws tes dej num thiaj ua tau puv ntoob, thiab nce mus rau qhov ua hloov tau zoo. Vajtswv ua hauj lwm raws li Nws txoj kev npaj thaum xub thawj. Yam hauj lwm dab tsi uas Nws yuav tsum ua thiab yam hauj lwm dab tsi uas Nws tau ua tiav lawm, Nws paub tseeb npaum li lub xib teg ntawm Nws txhais tes. Vajtswv coj txhua tus tib neeg mus taug ib txoj kev uas Nws twb tau npaj lawm. Tsis muaj leej twg yuav khiav dim qhov no. Tsuas yog cov uas caum raws txoj kev taw qhia ntawm Vajtswv tus Ntsujplig xwb thiaj yuav muaj peev xwm nkag mus rau qhov chaw so. Tej zaum nws yuav muaj tias, tes dej num tom qab ntawd, nws yuav tsis yog Vajtswv hais lus hauv cev nqaij daim tawv los coj tib neeg lawm, tab sis ib tug Ntsujplig uas muaj lub cev kov tau los coj tib neeg lub neej. Tsuas yog thaum ntawd xwb tib neeg thiaj muaj peev xwm kov kiag tau Vajtswv, saib rau Vajtswv, thiab nkag tau zoo dua mus rau qhov tseeb tiag uas Vajtswv cheem tsum, xwv kom thiaj raug ua kom zoo tshaj plaws los ntawm tus Vajtswv uas muaj tiag. Qhov no yog tes dej num uas Vajtswv npaj los ua kom tiav, thiab qhov Nws tau npaj ntev los lawm. Los ntawm qhov no, nej txhua tus yuav tsum pom txoj kev uas nej yuav tsum taug!

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Qhov Txawv uas Tseem Ceeb Ntawm tus Vajtswv Yug Los Ua Neeg thiab cov Tib Neeg uas Vajtswv Siv