1

Tus tseem Vajtswv uas muaj hwj chim loj kawg nkaus, tus Vajntxwv uas zaum saum lub zwm txwv, tswj kav tag nrho lub qab ntuj khwb, tim ntsej muag rau ntau ntau haiv neeg thiab ntau ntau tus tib neeg, thiab Vajtswv lub koob meej ci thoob plaws lub ntiaj teb. Txhua yam uas muaj sia nyob rau hauv lub qab ntuj khwb thiab mus txog lub qab ntuj kawg yuav pom. Tej roob, tej dej, tej pas dej, tej av, tej hiav txwv, thiab txhua yam uas muaj sia tau qhib lawv cov daim ntaub nyob hauv qhov kaj ntawm tus tseem Vajtswv lub ntsej muag lawm, thiab lawv rov qab muaj txoj sia, cuag nkaus li tsim ntawm npau suav los, cuag nkaus li lawv yog tej kaus uas hlav hauv av tuaj! Au! Tus tseem Vajtswv uas tsuas muaj tib tug xwb tshwm los rau cov tib neeg hauv ntiaj teb pom. Leej twg thiaj li muaj cuab kav tawm tsam Nws? Txhua tus ntshai tshee hnyo xwb. Txhua tus lees yuav tiag tiag, thiab txhua tus thov kev zam txim tas li. Ntau ntau tus tib neeg txo caug rau ntawm Nws lub xub ntiag, thiab ntau ntau lub qhov ncauj pe hawm Nws!

2

Tej av loj thiab tej hiav txwv, tej roob, tej dej, thiab txhua yam qhuas Nws tsis paub kawg li! Cov cua sov so, nrog rau cov pa ntawm lub caij nplooj ntoos hlav, coj cov nag tshauv uas los tsis tu hauv lub caij nplooj ntoos hlav los. Tej kwj ha uas ntws nto thiab cov neeg coob coob los zoo ib yam, puav leej muaj kev tu siab thiab kev xyiv fab puv npo, los kua muag rau txoj kev tshuav nuj nqis thiab kev cem yus tus kheej. Tej dej, tej pas dej, tej nthwv dej hiav txwv, tej nthwv dej puav leej hu nkauj, qhuas tus tseem Vajtswv lub npe dawb huv! Lub suab qhuas nrov ncha meej heev! Yam qub uas raug Ntxwgnyoog muab ua qias vuab tsuab ntawd—txhua yam yuav hloov dua tshiab thiab hloov pauv thiab yuav nkag mus rau qhov chaw tshiab tag nrho li lawm…

3

Qhov no yog lub raj xyu dawb huv, thiab lub raj xyu no twb pib nrov lawm! Cia li mloog lub raj xyu ntawd. Lub suab uas zoo mloog heev ntawd yog cov lus hais tawm ntawm lub zwm txwv los. Lub suab ntawd tshaj tawm rau txhua haiv neeg thiab txhua tus tib neeg hais tias lub sij hawm twb los txog lawm, qhov kawg ntawm tiam kawg nyob rau ntawm no lawm, Kuv txoj kev npaj tswj hwm tib neeg twb tiav lawm, Kuv lub nceeg vaj twb tab meeg tshwm sim los rau hauv ntiaj teb, thiab cov nceeg vaj hauv lub ntiaj teb tau dhau los ua Kuv uas yog Vajtswv lub nceeg vaj lawm. Kuv xya lub raj xyu nrov ntawm lub zwm txwv tuaj, mas tej yam zoo kawg nkaus yuav tshwm sim! Kuv xyiv fab saib Kuv cov neeg uas muaj peev xwm hnov Kuv lub suab thiab tuaj ntawm txhua haiv neeg thiab txhua lub teb chaws tuaj sib sau ua ke. Cov tib neeg coob coob, uas lub qhov ncauj ib txwm hais txog tus tseem Vajtswv, mas qhuas thiab dhia tsis tso tseg li! Lawv ua tim khawv rau lub ntiaj teb, thiab lub suab ntawm lawv cov lus tim khawv rau tus tseem Vajtswv mas zoo li lub suab xob ntawm ntau cov dej. Cov tib neeg coob coob yuav sib txiv nkag mus rau hauv Kuv lub nceeg vaj.

los ntawm Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus Hais nyob rau thaum Pib, Tshooj 36