Kev raug ua kom zoo tiav log los ntawm Vajtswv tsis tuaj yeem ua tau los ntawm kev noj thiab kev haus Vajtswv tej lus xwb. Qhov kev ua zoo li ntawd yog los ntawm kev pom ib sab xwb, nws yog yam uas me heev, thiab txwv tib neeg rau ib qho kev xav uas nqaim heev. Yog li ntawd, tib neeg thiaj tu ncua kev loj hlob nyob rau sab ntsujplig uas lawv tsim nyog tau. Yog nej xav tau kev ua kom zoo tiav log los ntawm Vajtswv, nej yuav tsum kawm paub tias yuav ua li cas rau txhua yam xwm txheej, thiab yuav tsum txais txoj kev qhuab qhia txhua yam uas tshwm sim rau nej. Tsis hais nws yog yam zoo los sis yam phem, nws yuav coj txiaj ntsig los rau nej, nws yuav tsis coj nej mus rau qhov phem xwb. Txawm li cas los xij, koj yuav tsum muaj peev xwm xav txog txhua yam thaum koj sawv ntawm Vajtswv ib sab, thiab txhob tsom xav txog los sis kawm txog tej uas los ntawm tib neeg txoj kev xav (qhov no yuav ua ib qho chaw yuam kev rau koj). Yog tias koj tau ua li no, ces koj lub siab yuav puv npo cov nra nyob rau hauv koj lub neej; koj yuav ua neej nyob hauv qhov kaj ntawm Vajtswv lub ntsej muag tas mus li, yuav tsis hloov siab yooj yim rau koj txoj kev xyaum. Cov tib neeg zoo li no yuav muaj ib lub neej lawm yav tom ntej zoo. Muaj ntau lub cib fim uas yuav tau raug ua kom zoo tiav log los ntawm Vajtswv. Txhua yam nws yog nyob rau ntawm seb nej puas yog tus tib neeg hlub Vajtswv tiag, thiab puas yog nej txiav txim siab cia rau Vajtswv ua tus ua kom zoo tiav log rau nej, kom Vajtswv muab tau kiag, thiab txais yuav Nws tej koob hmoov thiab tej qub txeeg qub teg. Kev txhim kho xwb yeej tsis txaus; nej yuav tsum muaj kev paub dav, tsis yog li ntawd nej yeej yuav yuam kev rau ntawm nej tej kev xyaum. Vajtswv yeej txaus siab hlo muab nej txhua leej txhua tus ua kom zoo tiav log. Raws li tam sim no, txawm tias tib neeg feem coob twb tau txais yuav Vajtswv tes dej num los ntev lawm, los lawv tsuas txwv lawv tus kheej nyob rau hauv Vajtswv txoj kev tshav ntuj xwb, thiab tsuas txaus siab cia rau Vajtswv muab kev nplij siab me me rau ntawm cev nqaij daim tawv, lawv tseem tsis tau txaus siab los txais yuav kom ntau ntxiv, thiab kom siab tshaj ntawd, kom tshwm sim tuaj. Qhov no qhia tau tias tib neeg lub siab tseem ib txwm nyob sab nraud. Txawm tias tib neeg txoj hauj lwm, nws txoj kev pab cuam, thiab nws lub siab hlub Vajtswv tseem muaj qee qhov kev tsis dawb huv, yog muab ntsuas ntawm nws lub tseem ntsiab thiab nws tej kev xav, tib neeg tseem nrhiav kev thaj yeeb thiab kev lom zem nyob rau sab cev nqaij daim tawv tas li, tsis quav ntsej ib yam dab tsi tseem ceeb tiag thiab lub hom phiaj ntawm txoj kev Vajtswv muab tib neeg ua kom zoo tiav log. Thiab yog li ntawd, tib neeg lub neej feem ntau tseem phem thiab liam sim. Lawv lub neej yeej tsis tau hloov ib qho me me li; lawv tsis saib txoj kev ntseeg Vajtswv li yog ib yam tseem ceeb, cuag nkaus li lawv tsuas tuav txoj kev ntseeg kom lwm tus pom, kom dhau mus thiab tsis xyuam xim dab tsi, nyob nrog kev ua neej yam tsis muaj hom phiaj li. Tsuas muaj tsis pes tsawg leej thiaj li muaj peev xwm nrhiav kev nkag mus rau Vajtswv txoj lus rau txhua yam, tau txais ntau yam thiab pluaj nuj dua, rais los ua cov tib neeg uas muaj nyiaj tshaj plaws nyob rau hauv Vajtswv lub tsev nyob rau niaj hnub no, thiab tau txais Vajtswv tej koob hmoov ntxiv ntau heev. Yog koj nrhiav kev raug ua kom zoo tiav log los ntawm Vajtswv rau txhua yam, thiab muaj peev xwm tau txais qhov uas Vajtswv tau cog lus tseg rau hauv lub ntiaj teb, yog koj nrhiav kev kom tau kev paub los ntawm Vajtswv rau txhua yam thiab tsis txhob cia lub xyoo dhau mus dawb dawb, qhov no thiaj yog hau kev zoo rau koj taug mus. Tsuas yog li no koj thiaj yuav tsim nyog thiab muaj peev xwm tau txais kev ua kom zoo tiav log los ntawm Vajtswv xwb. Koj puas yog ib tug uas nrhiav kev ua kom zoo tiav log los ntawm Vajtswv? Koj puas yog ib tug uas mob siab kub lug rau txhua yam? Koj puas muaj tus ntsujplig ntawm txoj kev hlub rau Vajtswv zoo ib yam li Petus muaj? Koj puas muaj lub siab hlub Vajtswv zoo ib yam li Yexus muaj? Koj tau muaj txoj kev ntseeg Yexus los ntau lub xyoo lawm; koj puas tau pom tias Yexus hlub Vajtswv li cas? Tus koj ntseeg ntawd nws puas yog Yexus tiag? Koj ntseeg tus Vajtswv uas muaj qab hau hnub no; koj puas tau pom dua tus Vajtswv uas muaj qab hau ntawm sab cev nqaij daim tawv hlub tus Vajtswv saum ntuj ceeb tsheej li cas? Koj muaj kev ntseeg Tswv Yexus Khetos; ntawd yog vim Yexus txoj kev raug ntsia rau saum ntoo khaub lig nws txhawm rau kev txhiv noob neej thiab tej txuj ci tseem ceeb uas Nws tau ua ntawd yog qhov tseeb uas txhua leej txais yuav tau. Tiam sis kev ntseeg ntawm tib neeg tsis yog los ntawm kev txawj ntse thiab kev nkag siab tseeb ntawm Yexus Khetos. Koj tsuas ntseeg Yexus lub npe xwb, tab sis koj tsis ntseeg ntawm Nws tus Ntsujplig, vim tias koj tsis quav ntsej rau qhov seb Yexus hlub Vajtswv li cas. Koj txoj kev ntseeg Vajtswv tsis muaj kev txawj ntse kiag li. Txawm hais tias koj ntseeg Yexus los tau ntau lub xyoo lawm los, koj yeej tsis paub yuav hlub Vajtswv li cas. Qhov no tsis ua rau koj yog ib tug neeg ruam tshaj plaws nyob rau hauv lub ntiaj teb no lod? Qhov no yog pov thawj tias ntau lub xyoo los no, cov zaub mov uas koj tau noj ntawm Tswv Yexus Khetos tsis muaj qab hau dab tsi li. Nws tsis yog Kuv tsis nyiam cov neeg zoo li no xwb, tiam sis Kuv ntseeg tias tus Tswv Yexus Khetos—tus uas koj hwm—kuj yuav tsis nyiam lawv ib yam li ntawd thiab. Cov neeg zoo li no yuav tau txais kev ua kom zoo tiav log tau li cas? Koj ntsej muag tsis liab tsis rhuav plhu lod? Koj tsis txaj muag lod? Koj puas tseem muaj ntsej muag mus ntsib koj tus Tswv Yexus Khetos? Nej txhua tus puas nkag siab txog lub ntsiab lus ntawm qhov Kuv tau hais no?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Cov Lus Cog Tseg rau Cov uas Twb Zoo Tiav Log Lawm