Tag nrho txhua tus tib neeg xav pom Yexus lub ntsej muag tseeb, thiab txhua tus xav nrog Nws ua ke. Kuv tsis xav tias yuav muaj ib tug kwv tij los sis ib tug muam twg uas yuav hais tias lawv tsis xav pom los sis nrog Yexus nyob li. Ua ntej nej yuav tau pom Yexus—ua ntej nej yuav tau pom tus Vajtswv uas los yug ua tib neeg—tej zaum nej yuav xav ntau yam, piv txwv li, hais txog qhov uas Yexus ntsej muag zoo li cas, Nws tus cwj pwm hais lus zoo li cas, Nws txoj kev ua neej zoo li cas, thiab lwm yam ntxiv mus. Tab sis thaum nej tau pom Nws tiag lawm, nej txoj kev xav yuav pauv mus tam sim ntawd. Vim li cas ho zoo li no? Nej puas xav paub thiab? Tsis txhob lam saib tsis taus tib neeg txoj kev xav, yeej muaj tseeb—tab sis tshaj qhov ntawd, lub ntsiab tseeb ntawm Khetos tib neeg yeej tsis muaj peev xwm hloov tau li. Nej xav hais tias Khetos tsis txawj tuag los sis txawj ntse heev, tab sis tsis muaj leej twg yuav xav hais tias Nws yog ib tug neeg uas muaj lub ntsiab tseeb uas muaj hwj huaj qaum ntuj xwb. Zoo li ntawd, coob tus uas ua hnub ua hmo xav pom Vajtswv ces yog Vajtswv cov yeeb ncuab tiag, thiab tsis muaj kev sib raug zoo nrog rau Nws. Qhov no tseem tsis yog ib qho uas tib neeg yuam kev thiab los? Txawm tam sim no los nej tseem xav tias nej txoj kev ntseeg thiab txoj kev ua siab ncaj xwb ces yeej ua kom nej muaj nqis txaus yuav los pom Khetos lub ntsej muag, tab sis Kuv ntuas nej kom nej yuav tsum npaj ntau yam uas muaj qab hau rau ntawm nej tus kheej! Vim yav tag los, tam sim no, thiab yav tom ntej, coob tus uas los ntsib Khetos twb ua tsis tau los sis yuav ua tsis tau li ntawd; tag nrho lawv sawv daws yuav ua nkaus li cov Falixais. Qhov nej ua tsis tau ntawd ne yog vim dab tsi? Nws vim yog kiag nej qhov kev xav rau ib tug Vajtswv uas nyob chaw siab thiab tsim nyog tau txais kev qhuas. Tab sis qhov tseeb tsis yog li qhov tib neeg ntshaw. Tsis yog tias Khetos tsis nyob chaw siab xwb, tab sis Nws mas tseem me heev; Nws tsis yog tib neeg xwb, tab sis Nws tseem yog ib tug tib neeg dog dig thiab xwb; tsis yog Nws nce tau mus rau saum ntuj xwb, tab sis Nws yeej twb mus mus los los hauv lub ntiaj teb no tsis tau ywj siab thiab. Thiab vim muaj li no, ces tib neeg thiaj li saib Nws li lawv saib ib tug tib neeg dog dig xwb; lawv lam tau lam saib Nws li ib tug neeg dog dig thaum lub sij hawm uas lawv nrog Nws, thiab hais lus ua dog ua dig rau Nws, tag nrho rau lub sij hawm uas tseem pheej tos kom tus “Khetos tseeb” nqis los. Nej saib tus Khetos uas twb los txog lawm li ib tug neeg dog dig, thiab Nws tej lus zoo li ib tug neeg dog dig tej xwb. Yog vim li no, nej thiaj tseem tsis tau txais ib yam dab tsi los ntawm Khetos, thiab tseem tau nthuav nej qhov kev phem tawm rau qhov chaw kaj.

Ua ntej thaum yuav tau ntsib Khetos, tej zaum koj ntseeg hais tias koj tus moj yam twb raug hloov dua lawm, hais tias koj yog ib tug ntseeg uas muaj lub siab ncaj rau Khetos, hais tias tsis muaj leej twg yuav tsim nyog tau txais Khetos tej koob hmoov tshaj koj—thiab qhov ntawd, tau taug ntau txoj kev, ua hauj lwm ntau yam, thiab ua tau ntau yam tawg paj txi txiv, koj mas thiaj li yog ib tug ntawm cov tib neeg uas thaum kawg yuav tau txais lub kaus mom kub. Tab sis muaj ib qho tseeb uas tej zaum koj tsis tau paub: Tus moj yam qias vuab tsuab ntawm tib neeg thiab lawv qhov kev ntxeev siab thiab kev tawm tsam raug nthuav tawm thaum nws pom Khetos, thiab nws qhov kev ntxeev siab thiab kev tawm tsam uas raug nthuav tawm thaum lub sij hawm ntawd mas haj yam raug nthuav tawm tag nrho thiab tsis tshuav ib yam dab tsi li. Vim rau qhov Khetos yog neeg Leej Tub—ib tug Tub ntawm tib neeg uas muaj tus yam ntxwv zoo li lwm tus—ces tib neeg thiaj li tsis hwm los sis saib taus Nws. Nws yog vim Vajtswv nyob rau hauv cev nqaij daim tawv uas muab tib neeg txoj kev ntxeev siab nthuav tawm tag nrho thiab pom meej kawg nkaus. Yog li ntawd Kuv thiaj hais tias qhov uas Khetos los ntawd ces tau muab tag nrho tib neeg tej kev ntxeev siab nthuav tawm tag nrho thiab tau muab tib neeg tus yam ntxwv qhib kom pom meej meej kiag. Qhov no hu hais tias “ntxias tsov nqis saum roob los” thiab “ntxias kom hma tawm hauv qhov tuaj.” Koj puas kam hais tias koj yeej ua siab ncaj rau Vajtswv mas? Koj puas kam hais tias koj yeej zwm rau Vajtswv tag nrho li mas? Koj puas kam hais tias koj yeej tsis ntxeev siab li? Ib txhia yuav hais tias: “Thaum twg Vajtswv muab kuv tso rau ib qho chaw tshiab, kuv yuav yoog raws yam tsis nroo ib los li, thiab dhau ntawd mus kuv yuav tsis xav phem rau Vajtswv.” Ib co yuav hais tias: “Vajtswv txawm yuav txib kuv ua dab tsi los xij, kuv yuav ua kom kawg nkaus kuv lub peev xwm thiab yeej yuav tsis lam tau lam ua kom dhau xwb.” Yog li ntawd, Kuv nug nej tias: Nej puas yuav sib raug zoo nrog Khetos thaum uas nej nrog Nws nyob ua ke? Thiab nej yuav sib raug zoo nrog rau Nws ntev li cas? Ib hnub? Ob hnub? Ib teev? Ob teev? Tej zaum nej txoj kev ntseeg yeej txaus qhuas lawm, tab sis nej txoj kev ntseeg uas nyob ruaj khov ntawd mas tsis muaj txaus. Thaum uas koj nrog Khetos nyob tiag tiag lawm, koj txoj kev qhuas tias koj tus kheej coj ncaj thiab txoj kev saib koj tus kheej tseem ceeb ntawd yuav nthuav tawm los ntawm koj cov lus thiab tej kev ua, ib qho zuj zus, thiab koj tej kev ntshaw uas khav theeb heev, koj lub siab uas tsis mloog lus thiab txoj kev tsis txaus siab ntawd kuj yuav cia li nthuav tawm tuaj thiab. Thaum kawg, koj qhov kev khav theeb yuav muaj ntau tshaj tuaj, kom txog rau thaum uas koj tsis haum nrog Khetos npaum li dej thiab hluav taws, thiab tom qab ntawd koj tus yam ntxwv yuav raug nthuav tawm tag nrho. Nyob rau lub sij hawm ntawd, koj txoj kev xav phem yuav muab zais tsis tau ntxiv lawm, koj tej lus cem lus yws, tib si, yuav maj mam tawm tuaj, thiab koj tus yam ntxwv tib neeg uas raug txo qis lawm ntau ntawd yuav raug nthuav tawm tag nrho. Txog thaum ntawd kiag, txawm li cas los xij, koj yeej tseem tsis kam lees paub koj tus kheej qhov kev ntxeev siab, tseem ntseeg hais tias ib tug Khetos zoo li tus no mas tsis yooj yim rau tib neeg txais yuav, hais tias Nws mas coj nruj rau tib neeg heev lawm, thiab hais tias koj yeej yuav nyoo mloog hais tag nrho yog hais tias Nws yog ib tug Khetos uas zoo dua. Nej ntseeg tias nej txoj kev ntxeev siab ntawd yog ib qho tsim nyog lawm, hais tias nej tsuas ntxeev siab tawm tsam Nws thaum Nws muab nej thawb mus deb dhau heev lawm xwb. Tsis muaj ib zaug uas nej yuav xav hais tias nej tsis saib Khetos zoo li Vajtswv, hais tias nej yeej tsis muaj lub siab yuav zwm rau Nws li. Tsis tag li ntawd xwb, koj tseem cam qees kom Khetos ua raws nraim li koj tus kheej tej kev xav, thiab tam sim thaum uas Nws ua ib yam twg uas tsis zoo li koj tus kheej txoj kev xav, koj ntseeg hais tias Nws tsis yog Vajtswv tab sis tsuas yog ib tug tib neeg xwb. Yeej tsis muaj coob tus ntawm nej uas tau sib cav nrog Nws li no kiag lod? Nws yog leej twg tiag, txog thaum kawg uas yog tus nej ntseeg? Thiab nej nrhiav txoj kev twg tiag?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Cov Tsis Sib Raug Zoo Nrog Khetos Yog Vajtswv Cov Yeeb Ncuab Tiag