Ib yam li qhov Kuv tau hais, cov uas coj raws Kuv yeej muaj coob leej tiam sis cov uas hlub Kuv tiag muaj tsawg xwb. Tej zaum ib txhia yuav hais tias, “Kuv puas yuav them tus nqi ntau npaum li ntawd yog tias kuv tsis hlub Koj? Kuv puas yuav raws qab los tav li no yog tias kuv tsis hlub Koj?” Muaj tseeb tias, koj yeej muaj ntau qhov laj thawj, thiab koj txoj kev hlub tej zaum yeej zoo heev, tiam sis dab tsi yog qhov tseem ceeb ntawm koj txoj kev hlub uas muab rau Kuv? Lo lus uas hu ua “Kev hlub,” yog hais txog ib txoj kev hlub tshua uas dawb huv thiab tsis muaj chaw thuam, qhov koj siv koj lub siab los hlub, los xav tawm, thiab los ua tib zoo xav. Hauv txoj kev hlub yeej tsis muaj tus yam ntxwv, tsis muaj yam dab tsi los thaiv tau, thiab tsis muaj qhov sib nrug deb. Hauv txoj kev hlub yeej tsis muaj kev ua xyem xyav, tsis muaj qhov txawj dag, thiab tsis muaj kev txawj ntxias li. Hauv txoj kev hlub yeej tsis muaj kev sib pauv los sis tsis muaj qhov ua kom tsis zoo li. Yog koj hlub, ces koj yuav tsis ntxias dag, tsis yws, tsis ntxeev siab, tsis tig tawm tsam, tsis yuam, los sis tsis nrhiav kom tau tej yam los sis tsis ua tej yam kom tau los. Yog tias koj hlub tiag, ces koj yuav zoo siab hlo muab koj tus kheej, yuav zoo siab tiv txoj kev txom nyem, koj yuav sib raug zoo nrog Kuv, koj yuav tso tseg txhua yam uas koj muaj rau Kuv, koj yuav tso tseg tag nrho koj tsev neeg, koj lub neej tom ntej, koj txoj kev hluas, thiab koj txoj kev txij nkawm. Yog tias tsis yog li no ces, koj txoj kev hlub yuav tsis yog kev hlub hlo li, tiam sis tsuas yog kev ntxias dag thiab kev ntxeev siab xwb! Koj txoj kev hlub yog yam kev hlub twg? Nws puas yog txoj kev hlub tiag? Los sis kev hlub cuav? Koj tau tso tseg ntau npaum li cas? Koj tau muab ntau npaum li cas fij rau Kuv? Kuv tau txais kev hlub ntau npaum li cas los ntawm koj? Koj puas paub txog? Nej lub siab mas puv ntoob nrog tej kev ua phem, kev ntxeev siab, thiab kev dag ntxias xwb—thiab zoo li no es, nej txoj kev hlub yuav dawb huv npaum li cas no? Nej xav tias nej yeej tau tso pov tseg ntau yam rau Kuv lawm; nej xav tias nej txoj kev hlub uas muab rau Kuv yeej txaus heev lawm. Tiam sis yog vim li cas es nej cov lus thiab kev nqis tes ua ho ib txwm yog kev ntxeev siab thiab dag ntxias mas? Nej raws Kuv qab, tiam sis nej ho tsis lees paub Kuv txoj lus. Qhov no puas hais tau tias yog kev hlub? Nej raws Kuv qab, tiam sis tom qab ntawd muab Kuv tso tseg. Qhov no puas hais tau tias yog kev hlub? Nej raws Kuv qab, tiam sis nej ho tsis ntseeg Kuv. Qhov no puas hais tau tias yog kev hlub? Nej raws Kuv qab, tiam sis nej ho tsis tuaj yeem lees txais tias muaj Kuv. Qhov no puas hais tau tias yog kev hlub? Nej raws Kuv qab, tiam sis nej ho tsis hwm Kuv raws li qhov uas Kuv yog leej twg, thiab tig qhov twg los nej ua qhov nyuaj rau Kuv. Qhov no puas hais tau tias yog kev hlub? Nej raws Kuv qab, tiam sis nej ho ntxias Kuv thiab dag Kuv nyob rau hauv txhua yam. Qhov no puas hais tau tias yog kev hlub? Nej raws Kuv qab, tiam sis nej ho tsis hwm Kuv. Qhov no puas hais tau tias yog kev hlub? Nej tawm tsam Kuv nyob rau hauv txhua qhov thiab txhua yam. Tag nrho tej no puas hais tau tias yog kev hlub? Nej yeej tau mob siab rau ntau txaus tiag, tiam sis nej ib txwm tsis tau xyaum ua raws li qhov Kuv xav kom nej ua. Qhov no puas hais tau tias yog kev hlub? Ua tib zoo saib pom tau tias tsis muaj ib qho me me kev hlub uas nej muab rau Kuv li. Tom qab ntawm kev ua hauj lwm ntau lub xyoo thiab tag nrho txhua cov lus uas Kuv tau muab rau nej, nej tau txais ntau npaum li cas tiag? Qhov no tsis tsim nyog muab tig rov ua tib zoo saib thiab los? Kuv ceeb toom rau nej tias: Cov uas Kuv hu los nrog Kuv tsis yog cov uas ib txwm tsis muaj kev ua siab tsis ncaj; tiam sis cov uas Kuv xaiv yog cov uas hlub Kuv tiag tiag. Yog li ntawd, nej yuav tsum ceev faj txog nej cov lus thiab cov kev coj kev ua, thiab ntsuam xyuas nej txoj kev npaj siab thiab kev xav es kom ntseeg tau tias tej ntawd tsis hla dhau txoj kab ciam. Nyob rau thaum tiam kawg, ua txhua yam kom zoo tshaj plaws los muab nej txoj kev hlub rau Kuv, nyob tsam Kuv txoj kev chim siab ho ploj tsis taus ntawm nej mus!

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Muaj Coob Leej Raug Hu, tiam sis Muaj Tsawg Leej Thiaj Li Raug Xaiv Xwb