Tus cwj pwm uas tsis zwm rau Kuv ntawd yeej yog kev ntxeev siab tag nrho. Tus cwj pwm uas coj tsis ncaj rau Kuv yog kev ntxeev siab. Kev coj tsis ncaj rau Kuv thiab txawj ntxias dag Kuv yog kev ntxeev siab. Kev muaj lub siab xav phem ntau yam thiab kev nthuav qhia tej ntawd tawm mus rau txhua qhov txhia chaw yog kev ntxeev siab. Kev tsis muaj peev xwm tuav tau Kuv tej lus tim khawv thiab tej kev xav zoo yog kev ntxeev siab. Kev dag ntxias ua lub ntsej muag luag ntxhi rau thaum nyob deb ntawm Kuv hauv lub siab yog kev ntxeev siab. Tag nrho tej kev coj ua zoo li no yog kev ntxeev siab uas nej ib txwm yeej muaj peev xwm ua tau, thiab yeej muaj nyob rau ntawm nej. Yeej tsis muaj nej leej twg xav tias qhov no yog teeb meem, tiam sis Kuv tsis xav li ntawd. Kuv tsis xav tias tib neeg txoj kev ntxeev siab rau Kuv yog ib yam me me xwb, thiab Kuv yeej yuav tsis tso nws tseg. Niaj hnub tam sim no, thaum Kuv tseem ua tes dej num rau ntawm nej sawv daws, nej coj zoo li no—yog hnub ntawd los txog tsis muaj leej twg saib xyuas nej lawm, nej puas kam tsis txhob ua li tej neeg phem uas tau tshaj tawm tias lawv tus kheej yog cov vaj ntxwv kav rau saum lawv tus kheej tej toj roob hauv pes me me thiab los? Thaum qhov ntawd tshwm sim rau nej ces yuav tsim muaj kev puas tsuaj loj heev, leej twg yuav tuaj tu kom du lug tom qab nej? Nej xav tias kev ntxeev siab qee yam ntawd tsuas yog qee zaus xwb, tsis yog nej tus cwj pwm uas yuav muaj mus li, thiab tsis tsim nyog coj los hais kom nruj npaum li ntawd, hais cuag li ntawd kom ua rau nej mob siab. Yog nej xav tiag tiag li no lawm, ces nej tseem tsis tau txawj xav. Kev xav li ntawd yog qhov ua piv txwv thiab tus qauv ntawm kev ntxeev siab. Tib neeg tus yeeb yam yog lawv txoj sia; nws yog txoj kev cai uas lawv siv kom muaj txoj sia nyob, thiab lawv tsis muaj peev xwm hloov tau nws. Muab tus yeeb yam ntawm kev ntxeev siab coj los ua ib qho piv txwv. Yog koj muaj peev xwm ua qee yam ntxeev siab rau ib tug kwv tij neej tsa los sis ib tug phooj ywg, ces ua pov thawj tau tias nws yog ib feem ntawm koj lub neej txoj sia thiab tus yeeb yam no yeej los nrog thaum yug koj lawm. Qee yam zoo li no yeej tsis muaj leej twg yuav tsis kam lees. Piv txwv li, yog ib tug neeg zoo siab rau yam nws nyiag los ntawm lwm tus, ces qhov kev zoo siab ntawm txoj kev nyiag no yog ib feem ntawm lawv lub neej txoj sia, txawm tias lawv tsuas nyiag qee zaus thiab qee zaus yeej tsis nyiag los xij. Txawm tias lawv yuav nyiag los yog tsis nyiag los xij, nws tsis muaj peev xwm ua pov thawj tau tias lawv txoj kev nyiag ntawd yog ib hom cwj pwm. Qhov tseeb tiag, nws ua pov thawj tau tias lawv txoj kev nyiag yog ib feem ntawm lawv lub neej txoj sia—uas yog lawv tus yeeb yam. Ib txhia yuav nug tias: Vim qhov ntawd yog lawv tus yeeb yam, vim li cas thaum lawv pom tej yam zoo zoo, qee lub sij hawm lawv ho tsis nyiag tej ntawd? Teb tau yooj yim xwb. Muaj ntau qhov laj thawj uas ua rau lawv tsis nyiag. Lawv yuav tsis nyiag tej yam no vim tias nws loj dhau lawm thiab muaj neeg saib ntsoov, los sis vim tsis zoo caij zoo nyoog rau nyiag, los sis vim tias tej yam ntawd muaj nqi siab heev, muaj neeg saib nruj heev, los sis tej zaum lawv twb ho tsis nyiam tej yam khoom ntawd, los sis twb tsis paub tias yuav siv tej khoom ntawd tau li cas, thiab ntau yam zoo li dhau los ntawd. Tag nrho tej laj thawj no yog qhov uas ntxim yuav muaj li ntawd. Tab sis txawm yuav yog li cas los xij, txawm tias lawv yuav nyiag los sis tsis nyiag los xij, nws yeej tsis muaj peev xwm ua pov thawj tau tias txoj kev xav no tsuas yog tshwm sim rau thaum lub sij hawm ntawd xwb, zoo li ib ntsais muag xwb. Rov qab qees, nws yog ib feem ntawm lawv tus yeeb yam uas hloov pauv kom zoo tau nyuaj. Cov tib neeg zoo li no yeej tsis txaus siab rau qhov nyiag tib zaug xwb; tej kev xav zoo li no ua rau xav tau lwm tus li los ua yus tus kheej li thaum lawv pom tej yam zoo, los sis muaj caij nyoog yuav nyiag tau. Vim yog zoo li no Kuv thiaj hais tias lub hauv paus ntawm txoj kev xav no tsis yog yam uas yuav xyaum ua tau rau qee lub sij hawm xwb, tab sis nws yeej nyob rau hauv tib neeg tus kheej tus yeeb yam lawm.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Ib Qho Teeb Meem Loj Heev: Kev Ntxeev Siab (1)