1

Txoj sia uas Vajtswv pub rau tib neeg ntawd yeej tsis muaj hnub kawg, yeej tsis raug lub cev nqaij daim tawv, lub sij hawm, los sis qhov chaw twg txwv tau li. Qhov no yog qhov lus zais tob ntawm txoj sia uas Vajtswv pub rau tib neeg, thiab ua pov thawj qhia tias txoj sia yog los ntawm Nws los. Txawm hais tias coob leej tsis ntseeg tias tib neeg txoj sia yog los ntawm Vajtswv los los xij, tib neeg khiav tsis dhau qhov uas xyiv fab rau txhua yam uas los ntawm Vajtswv los, txawm lawv yuav ntseeg los sis tsis lees paub tias muaj Nws los xij. Yog muaj ib hnub es Vajtswv hloov Nws lub siab kiag tam sid thiab xav muab txhua yam uas muaj nyob hauv lub ntiaj teb sau rov qab thiab muab txoj sia uas Nws tau muab pub rau ntawd rho rov qab, ces txhua yam yuav tsis muaj ntxiv lawm.

2

Vajtswv siv Nws txoj sia los yug txhua yam, cov muaj sia thiab cov tsis muaj sia tib si, ua kom txhua yam nyob muaj paus muaj ntsis los ntawm Nws lub hwj chim thiab qhov muaj cai. Qhov no yog ib qho muaj tseeb uas tsis muaj leej twg xav txog los sis nkag siab tau li, thiab tej qhov muaj tseeb uas nkag siab tsis tau no yog qhov kev tshwm sim uas pom tau meej txog, thiab yog lus tim khawv rau Vajtswv txoj sia lub zog. Tam sim no cia Kuv qhia koj ib qho lus zais cia: Qhov loj ntawm Vajtswv txoj sia thiab lub hwj chim ntawm Nws txoj sia mas tsis muaj ib tug neeg uas raug tsim tawm los twg yuav pom tshab tau li. Nws yeej zoo li no tam sim no, zoo li ntawd nyob rau yav dhau los, thiab nws yuav zoo li no nyob rau lub sij hawm yuav los tom ntej no.

3

Qhov lus zais cia ob uas Kuv yuav qhia yog li no: Lub hauv paus ntawm txoj sia rau txhua yam uas raug tsim tawm los mas yog los ntawm Vajtswv los; txawm lawv yuav txawv npaum li cas hauv tus yam ntxwv ntawm txoj sia los sis tus qauv ntawm txoj sia, thiab txawm koj yog yam muaj sia zoo li cas los xij, tsis muaj ib tug raug tsim tawm los twg es tuaj yeem tig tawm tsam txoj kev ntawm txoj sia uas Vajtswv tau teeb tsa tseg. Txawm li cas los xij, txhua yam uas Kuv xav kom tib neeg to taub ces yog qhov no: Yog tsis muaj Vajtswv txoj kev saib xyuas, kev tiv thaiv, thiab kev pub, ces tib neeg yuav tsis tau txais txhua yam uas lawv tsim nyog tau txais, txawm lawv yuav rau siab npaum li cas los sis siv zog npaum li cas los xij. Yog tsis muaj qhov yug txoj sia los ntawm Vajtswv los, ces tib neeg yuav poob qhov muaj nqis ntawm txoj kev ua neej nyob thiab lub ntsiab ntawm txoj sia.

los ntawm Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Yog lub Hauv Paus ntawm Tib Neeg Txoj Sia