1

Txoj kev ntawm txoj sia tsis yog ib yam uas leej twg muaj tau, thiab tsis yog ib yam uas txhua tus tib neeg yuav tau yooj yim. Qhov no yog vim hais tias txoj sia tsuas los ntawm Vajtswv los xwb. Tsuas yog Vajtswv Tus Kheej xwb thiaj li muaj lub ntsiab tseeb ntawm txoj sia, thiab tsuas yog Vajtswv Tus Kheej xwb thiaj li muaj txoj kev ntawm txoj sia. Yog li ntawd tsuas yog Vajtswv xwb thiaj li yog lub hauv paus ntawm txoj sia, thiab yog lub qhov dej ciaj ntawm txoj sia uas ntws tsis tu li. Txij li thaum tsim lub ntiaj teb los, Vajtswv tau ua hauj lwm ntau heev uas muaj txoj sia lub zog nyob hauv, Nws tau ua hauj lwm ntau heev uas coj txoj sia los rau tib neeg, thiab Nws tau them tus nqi ntau heev kom tib neeg tau txais txoj sia. Qhov no yog vim Vajtswv Tus Kheej yog txoj sia nyob mus ib txhis, thiab Vajtswv Tus Kheej yog txoj kev uas tib neeg sawv hauv qhov tuag rov qab los tau.

2

Vajtswv yeej ib txwm nyob hauv tib neeg lub siab, thiab Nws nyob hauv tib neeg nruab nrab txhua lub sij hawm. Nws yog lub zog rau tib neeg txoj kev ua neej, yog lub hauv paus rau tib neeg txoj kev ciaj sia, thiab yog lub hauv paus nplua mias rau tib neeg txoj kev ciaj sia tom qab yug los. Nws ua rau tib neeg rov muaj txoj sia, thiab ua rau lawv ua neej nyob tawv qhawv nyob rau hauv yus tus kheej txhua lub luag hauj lwm. Vam khom rau Nws lub hwj chim thiab Nws txoj sia lub zog uas tua tsis tau li, tib neeg tau ua neej nyob ib tiam dhau ib tiam, hos Vajtswv txoj sia lub hwj chim yeej ib txwm txhawb nqa nyob hauv tib neeg nruab nrab, thiab Vajtswv tau them tus nqi uas tsis muaj ib tug tib neeg dog dig twg tau them dua li.

3

Vajtswv txoj sia lub zog kov yeej tau txhua lub zog; tseem tshaj ntawd, nws hla dhau txhua lub zog. Nws txoj sia nyob mus ib txhis, Nws lub hwj chim loj kawg nkaus, thiab tsis muaj ib yam uas raug tsim los sis yeeb ncuab lub zog twg yuav kov yeej tau Nws txoj sia lub zog li. Vajtswv txoj sia lub zog yeej nyob thiab ci ntsa iab tsis hais lub sij hawm twg los sis qhov chaw twg. Saum ntuj thiab ntiaj teb tej zaum yuav hloov pauv loj heev, tiam sis Vajtswv txoj sia yeej nyob mus ib txhis tsis hloov li. Txhua yam tej zaum yuav dhau mus, tiam sis Vajtswv txoj sia yuav tseem nyob. Qhov no yog vim Vajtswv yog lub hauv paus ntawm txhua yam txoj kev ciaj sia, thiab yog lub hauv paus uas txhua yam vam khom rau kom ciaj sia.

los ntawm Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Khetos ntawm Tiam Kawg Nkaus Xwb Mas Thiaj Yuav Muab Tau Txoj Kev ntawm Txoj Sia Ntev Dhawv Mus Ib Txhis Rau Tib Neeg