1

Tag nrho Vajtswv cov lus yog qhov tseeb,

thiab txhua yam Nws hais thiab ua yog qhov ncaj ncees.

Thaum raug txiav txim los ntawm Nws cov lus,

peb yuav tsum tshawb nrhiav qhov tseeb.

Vim peb lees paub hais tias peb muaj tus moj yam qias vuab tsuab,

peb haj yam yuav tsum nyoo zwm rau Vajtswv qhov kev txiav txim.

Tsuas yog thaum yaug tau peb tej moj yam qias vuab tsuab dawb huv lawm xwb mas

peb thiaj li yuav ua tau raws li Nws tej kev npaj siab.

Peb muab peb tej kev xav phem thiab tej kev xav hauv nruab siab tso tseg,

es saib rau Vajtswv thiab xyaum ua raws li qhov tseeb.

Peb txhawb peb txoj kev txiav txim siab los xyaum Petus, es ua tim khawv kom nrov heev.

Cia peb tsa peb lub suab thiab hu nkauj: Tsuas yog Vajtswv xwb thiaj zoo tshaj plaws!

Peb yuav qhuas Vajtswv txoj kev dawb huv thiab txoj kev ncaj ncees mus ib txhis!

2

Tau ntsib tau pom txoj kev txiav txim ntawm Vajtswv cov lus,

ces kuv tau pom hais tias Ntxwgnyoog muab kuv ua qias vuab tsuab tob npaum li cas.

Kuv khav theeb, khav txiv, nkhaus, thiab txawj dag;

kuv tsis muaj ib qho zoo li tib neeg hlo li.

Tom qab lees txais txoj kev txiav txim lawm thiab los paub kuv tus kheej,

kuv tau hloov siab lees txim lawm tiag tiag.

Tau saj Vajtswv tus moj yam, uas tsis zam rau ib qho kev ua txhaum hlo li,

ces kuv muaj kev hwm Nws kawg siab kawg ntsws nkaus.

Nws txoj kev hlub loj kawg nkaus ntawd mas muab zais tuaj tom qab ntawm

Nws txoj kev txiav txim thiab kev rau txim.

Thaum ntxeev siab tawm tsam cev nqaij daim tawv thiab xyaum ua raws li qhov tseeb,

kuv hnov nyob ze zog rau ntawm Vajtswv lawm.

Cia peb tsa peb lub suab thiab hu nkauj: Tsuas yog Vajtswv xwb thiaj zoo tshaj plaws!

Peb yuav qhuas Vajtswv txoj kev dawb huv thiab txoj kev ncaj ncees mus ib txhis!

3

Thaum kev tsim txom, kev ceeb laj txom nyem, thiab kev sim siab los raug,

peb yuav tsum tuav peb tej lus tim khawv khov kho los qhuas Vajtswv.

Txawm nyob rau hauv txoj kev ciaj los txoj kev tuag los xij,

cov neeg uas raug tsim tawm los yuav tsum zwm rau Nws lub hwj chim kav.

Qhov kev raug kev txom nyem loj thiab tiv kev mob kev ntsaj ntawd,

ua rau peb ntxub Ntxwgnyoog kawg siab kawg ntsws,

thiab haj yam hnov tau Vajtswv txoj kev ntxim hlub tuaj.

Muab peb txoj sia tiv kev phom sij los ua kom Ntxwgnyoog txaj muag,

peb ua tau tus tim khawv yeej kiag.

Qhov kev txom nyem me me, ua yog ib nyuag ntu xwb,

ces yog qhov uas peb muab pauv qhov tseeb thiab txoj sia.

Txhua yam uas Vajtswv hais thiab ua yog kev hlub xwb;

peb txoj kev ntseeg qhov no mas ruaj khov thiab tsis muaj qhov ua xyem xyav li.

Cia peb tsa peb lub suab thiab hu nkauj: Tsuas yog Vajtswv xwb thiaj zoo tshaj plaws!

Peb yuav qhuas Vajtswv txoj kev dawb huv thiab txoj kev ncaj ncees mus ib txhis!

los ntawm Raws Tus Me Nyuam Yaj Qab thiab Hu Cov Nkauj Tshiab