1

Txoj kev xyaum ua uas yooj yim tshaj plaws ntawm txoj kev caum qhov tseeb ces yog qhov tias koj yuav tsum lees txais txhua yam los ntawm Vajtswv los thiab ua raws li txhua yam. Qhov ntawd yog ib kis. Hos lwm kis mas yog qhov tias thaum hais txog koj tes dej num thiab tej luag hauj lwm, thiab, muab hais kom dav zog, tes hauj lwm uas Vajtswv muab rau koj ua thiab qee tes hauj lwm tseem ceeb uas Vajtswv muab faib rau koj, koj yuav tsum them tus nqi tas li. Txawm qhov ntawd yuav nyuaj npaum li cas los xij—txawm koj yuav tau siv zog ua hauj lwm, txawm muaj kev tsim txom los raug rau koj, los sis txawm yuav ua rau muaj kev phom sij rau koj txoj sia los xij—koj yuav tsum tsis txhob khuv xim tus nqi, tiam sis yuav tsum muab koj lub siab ncaj fij rau thiab ua raws li ntawd mus kom txog hnub tuag. Qhov no yog ib qho kev qhia tshwm uas pom tau meej tiag tiag, kev fij tiag tiag, thiab kev xyaum ua raws tseeb ntawm txoj kev caum qhov tseeb. Yog tias tib neeg muaj lub siab ntshaw, muaj kev txiav txim siab, thiab muaj kev ntseeg txog txoj kev caum qhov tseeb—yog tias lawv muaj lub zog no nyob rau hauv lawv lub siab—yog li ntawd tsis muaj ib yam dab tsi uas los raug rau lawv es nyuaj. Qhov uas txhawj xeeb yog qee tus tib neeg tsis muaj kev ntseeg.

2

Thaum kawg, nyob rau theem no ntawm tes hauj lwm uas nyob rau tiam kawg, Vajtswv qhia txhua kis ntawm qhov tseeb meej meej rau tib neeg uas lawv yuav tsum xyaum ua. Yuav kom tib neeg caum qhov tseeb nyob rau lub sij hawm no ntawm qhov ntsib qhov pom Vajtswv tes hauj lwm mas tsis yog ua kom nyuaj rau lawv; tiam sis nws yog ib yam uas lawv muaj peev xwm ua tau. Ib qho mas yog, Vajtswv qhov kev cheem tsum no mas yeej tsim nyog kawg nkaus lawm; hos lwm qhov mas yog, tib neeg muaj yam uas txaus thiab lub hauv paus uas txaus los caum qhov tseeb. Yog thaum kawg es ib tug neeg twg tseem tsis tau txais qhov tseeb thiab, ces qhov ntawd yog vim tus tib neeg ntawd tej teeb meem hnyav dhau lawm xwb. Tus neeg zoo li no tsim nyog raug qhov kev rau txim uas nws tsim nyog raug, qhov ua tau los uas nws tsim nyog tau, txoj kev tuag uas nws tsim nyog ntsib lawm. Nws tsis tsim nyog tau txais kev khuv leej. Rau Vajtswv mas, tsis muaj tej lo lus xws li kev khuv leej los sis kev hlub tshua rau tib neeg li. Nws txiav txim rau qhov ua tau los uas ib tug neeg yuav tsum muaj, thiab txiav txim tias lub neej no thiab lub ntiaj teb yuav los tom ntej no yuav zoo li cas rau ib tug neeg, raws li Nws tus moj yam, nrog rau tej kev cai thiab tej cai tswj uas Nws tau tsim, Nws tej kev cheem tsum rau tib neeg, thiab seb tus neeg ntawd muaj qhov kev qhia tshwm uas pom tau meej dab tsi. Nws yooj yim npaum li ntawd xwb.

3

Vajtswv tsis quav ntsej tias yuav muaj pes tsawg leej yuav ciaj sia nyob, los sis yuav muaj pes tsawg leej yuav raug rhuav tshem thiab raug rau txim rau thaum kawg. Qhov no qhia li cas rau nej? Qhov no qhia rau nej tias Vajtswv tsis tau teem tseg tias yuav muaj pes tsawg leej thiab koj siv zog rau qhov ntawd tau. Vajtswv hais lus thiab ua hauj lwm li Nws ua tam sim no; Nws coj ncaj rau txhua tus neeg thiab muab lub hwv tsam txaus rau txhua tus. Nws muab lub hwv tsam txaus, thiab muab hmoov hlub txaus, thiab muab Nws cov lus txaus, thiab Nws tes hauj lwm, thiab Nws txoj kev hlub tshua thiab kev ua siab ntev txaus rau koj. Nws coj ncaj rau txhua tus neeg. Yog koj caum qhov tseeb, thiab tau pib taug txoj kev raws Vajtswv qab, thiab yog, txawm koj yuav tiv kev txom nyem loj npaum li cas los sis ntsib kev nyuaj ntau npaum li cas los xij, koj yeej lees txais tau qhov tseeb, thiab koj tus moj yam qias vuab tsuab raug yaug kom dawb huv lawm, ces koj yuav dim. Yog koj ua tau tim khawv rau Vajtswv thiab los ua ib tug neeg uas raug tsim tawm los uas ua raws li tus qauv, ib tug tswv ntawm txhua yam uas ua raws li tus qauv, ces koj yuav ciaj sia nyob.

los ntawm Txoj Lus, Phau 6. Hais Txog Qhov Kev Caum Qhov Tseeb. Vim Li Cas Tib Neeg Thiaj Li Yuav Tsum Caum Qhov Tseeb