Kuv tus txiv thiab kuv tau lees txais Vajtswv Tus Uas Muaj Hwj Chim Loj Kawg Nkaus tes hauj lwm ntawm tiam kawg nyob rau lub Tsib Hlis xyoo 2012. Wb yeej nyeem Vajtswv cov lus thiab hu nkauj qhuas Vajtswv ua ke txhua lub sij hawm, es kuv yeej zoo siab thiab txaus siab heev li. Tsis ntev xwb, ces kuv txawm tau tuav ib teg dej num hauv pawg ntseeg thiab kuv nquag mus koom tej kev sib txoos ua ke thiab qhia txoj moo zoo lawm. Kuv tus txiv mas yeej txhawb kuv heev li. Tab sis tom qab ntawd, kuv tsev neeg txawm pib tsis pub kuv xyaum kuv txoj kev ntseeg vim yog Tsoom Fwv Koom Tsham Suav txoj kev caij tsuj, ces wb lub neej uas sib haum xeeb ib zaug ntawd thiaj li tawg ua sab ua sua lawm.

Muaj ib hnub, kuv tus tij laug hlob hlob hu tuaj rau wb hais tias nws tau pom nyob rau hauv xov xwm hais tias tsoom fwv mas rhuav tshem cov ntseeg Vajtswv Tus Uas Muaj Hwj Chim Loj Kawg Nkaus hnyav heev li, thiab rau txim rau lawv kiag thaum ntes tau lawv. Nws thiaj li hais tias, “Yog tias ib tug neeg twg yog ib tug ntseeg, ces lawv tiam neeg nyob rau yav tom ntej ntawd yuav raug cuam tshuam thiab. Lawv cov me nyuam los yuav tsis tau mus kawm ntawv qib siab lawm, ces lawv tej kev cia siab rau tes hauj lwm los sis lub neej zoo rau yav tom ntej yuav ploj mus. Neb xyaum txoj kev ntseeg no mus tsis tau ntxiv lawm.” Thaum kuv tus txiv hnov li no, nws thiaj li hais tias: “Txoj kev ntseeg yog ib qho zoo, tab sis Tsoom Fwv Koom Tsham tab tom ntes cov ntseeg cuag li vwm xwb. Txawm yog wb cov me nyuam lub neej yav tom ntej los yuav raug cuam tshuam thiab. Kuv tsis xav xyaum txoj kev ntseeg no mus ntxiv lawm, thiab koj yuav tsum txhob mus koom tej kev sib txoos ua ke lawm. Yog tias koj xav raws Vajtswv qab, ces cia li ua twj ywm hauv tsev xwb.” Kuv thiaj li teb tias, “Kuv puas tseem hu tau tias yog ib tug ntseeg thiab kawm kom paub qhov tseeb yog tias kuv tsis mus khoom tej kev sib txoos ua ke? Nyob hauv peb txoj kev ntseeg mas, peb caum raws qhov tseeb—qhov ntawd thiaj li yog txoj hau kev yog hauv lub neej. Kuv mus koom tsis tau tej kev sib txoos ua ke.” Thaum pom tias kuv tsis hloov kev xav li, ces nws thiaj li muab ib lub tog khuab teeb thiab ib lub teeb taws ntawm tes tsoo kiag vim kev npau. Hnub tom ntej ntawd, ces nws los tim nws lub tsev kawm ntawv los tsev ces txawm hais rau kuv tias, “Hnub no peb muaj ib lub rooj sib tham nyob rau tim tsev kawm ntawv. Pawg Thawj Sab Laj tau tshaj ib tsab ntawv raws li txoj cai hais tias cov ntseeg Vajtswv Tus Uas Muaj Hwj Chim Loj Kawg Nkaus yog cov ua txhaum cai, thiab yog cov hom phiaj ntawm lub teb chaws ib txoj kev rhuav tshem uas loj. Tsis pub cov xib fwb qhia ntawv thiab lawv tsev neeg muaj ib txoj kev ntseeg li, thiab yog pom leeg twg muaj kev ntseeg ces yuav raug ntiab tawm thiab tua npe tawm tsis pub ua hauj lwm lawm. Yuav tsis pub lawv tej xeeb leej xeeb ntxwv mus kawm rau hauv tsev kawm ntawv qib siab—tsis muaj tsev kawm ntawv yuav lees txais lawv. Koj xyaum koj txoj kev ntseeg mus tsis tau ntxiv lawm. Yog tias muaj tus paub thiab muab koj qhia tawm, ces kuv yuav poob kuv tes hauj lwm thiab wb cov me nyuam lub neeg yav tom ntej yuav raug kev txom nyem. Nws yuav ua rau peb tsev neeg puas tsuaj.” Thaum hnov nws hais li no, ces kuv thiaj li xav tias: Peb tim tsum kuv tus txiv cov nyiaj hli los them peb tsev neeg tej nuj nqis. Yog tias nws raug hlawv vim yog kuv txoj kev ntseeg tiag tiag, ces peb yuav ua neej nyob li cas? Thiab wb cov me nyuam yuav tsis ntxub kuv lod yog tias lawv mus kawm tsis tau rau lub tsev kawm ntawv qib siab los sis nrhiav tsis tau ib txoj hauj lwm? Tej kev xav no mas ua rau kuv chim siab tiag tiag li, yog li kuv thiaj li thov Vajtswv hauv kuv lub siab, thov kom Nws coj kuv kev kom to taub Nws txoj kev xav. Kuv thiaj li xav txog ib co ntawm Vajtswv cov lus tom qab kuv thov Vajtswv tag lawm: “Tib neeg txoj hmoo ces yog Vajtswv ob txhais tes tswj. Koj tsis muaj peev xwm yuav tswj tau koj tus kheej: Txawm hais tias tib neeg mas yeej tsuas maj nroos thiab ua ub ua no rau lawv tus kheej tag mus li xwb, los lawv yeej tsis muaj peev xwm yuav tswj tau lawv tus kheej li. Yog koj muaj cuab kav paub tau koj tus kheej tej yam uas yuav tshwm sim tom ntej, yog koj muaj cuab kav tswj tau koj tus kheej txoj hmoo, es ua koj puas tseem yuav yog ib tug uas raug tsim tawm mas?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Rov Tsim Kho Tib Neeg lub Neej Raws Li Ib Txwm Muaj thiab Coj Lawv mus rau ib Txoj Hau Kev Kawg Uas Zoo Kawg Nkaus). Thaum ua tib zoo xav txog qhov no, ces kuv pom tau tias tib neeg txoj hmoo mas puav leej yog nyob rau hauv Vajtswv ob txhais tes xwb. Txawm kuv tus txiv yuav muaj txoj hauj lwm dab tsi thiab wb cov me nyuam muaj lub neej yav tom ntej zoo li cas los xij yog nyob rau ntawm Vajtswv txoj kev tswj xwb—tej yam ntawd tsis yog nyob rau ntawm tib neeg. Kuv tsis tuaj yeem tso kuv txoj kev ntseeg tseg los tiv thaiv lawv tej hauj lwm los sis lub neej yav tom ntej. Kuv yeej npaj txhij los muab peb lub neej yav tom ntej tso rau hauv Vajtswv ob txhais tes thiab zwm rau Nws tej kev coj kev qhia lawm. Tom qab ntawd kuv thiaj li tsis txhawj xeeb, thiab kuv thiaj li pheej mus koom tej kev sib txoos ua ke thiab ua kuv tes dej num li qub lawm.

Ces muaj ib hnub nyob rau lub Xya Hli xyoo 2013 ntawd, kuv thiaj li raug ntes nrog ob peb tug viv ncaus thaum peb nyob hauv ib lub rooj sib txoos ua ke. Hmo ntawd, kuv raug Tuam Thawj Tshaus nug nyob rau ntawm tub ceev xwm lub chaws ua hauj lwm, tus uas yuam kom paub tias, “Leej twg hloov koj? Leej twg yog koj pawg ntseeg tus thawj coj?” Kuv tsis teb li. Ces nws thiaj li hais ntxiv tias, “Koj tus txiv yog kuv tus xib fwb qhia ntawv. Qhia kom tag txog ntawm pawg ntseeg rau kuv ces kuv cia koj rov mus tsev tau, xam tias koj tus txiv yog kuv tus xib fwb qhia ntawv.” Kuv thiaj li paub tias qhov no yog ib qho ntawm Ntxwgnyoog tej kev dag tas zog los ua kom kuv ntxeev siab rau tej nus thiab tej viv ncaus thiab ntxeev siab rau Vajtswv—Kuv yuav ntseeg qhov ntawd tsis tau. Kuv thiaj li thov Vajtswv twj ywm zaum ua ntu zus, thov kom Nws saib xyuas kuv thiab pab ua kom kuv sawv khov kho. Tom qab ntawd, ces kuv cia li tsis quav ntsej Tuam Thawj Tshaus lawm, txawm nws nug kuv li cas los xij. Thaum kawg nws thiaj li coj kuv rov mus rau chav ceev cia lawm. Tag kis tom qab ntawd, txawm muaj ib tug tub ceev xwm ntawm Lub Chaw Ua Hauj Lwm Tuav Kev Ruaj Ntseg Rau Pej Xeem hauv zos tuaj nug kuv. Kuv zoo siab heev uas pom tias nws yog kuv tus txheeb ze. Thaum pom tias yog kuv xwb, ces nws ua ob lub qhov muag txhwj nyos thiab hais taw tes nkis rau kuv tias, “Xav tsis txog li! Koj yog ib tug ntseeg lod? Koj pib ntseeg thaum twg los lawm? Leej twg hloov koj?” Kuv tsis quav ntsej nws li. Nws thiaj li hais lwm yam thuam Vajtswv, thiab tom qab ntawd hais ntxiv tias, “Tsoom fwv twb tshaj cov ntaub ntawv tawm los ntev lawm hais tias yog pom leej twg ntseeg Vajtswv Tus Uas Muaj Hwj Chim Loj Kawg Nkaus, ces yuav raug kev txom nyem mus peb tiam neeg no ne. Koj tus tub hlob nyuam qhuav kawm ntawv tiav qib siab thiab tab tom nrhiav hauj lwm ua, thiab koj tus tub yau tab tom yuav mus kawm ntawv qib siab. Koj yuav tsum xav txog koj cov me nyuam lub neej yav tom ntej. Tsoom Fwv Koom Tsham mas muaj hwj chim heev—qhov tuav rawv txoj kev ntseeg ntawd ces zoo li ib lub qe uas sim tsoo ib lub pob zeb ntag. Koj yuav tsum muab qhov no tso tseg!” Thaum hnov txhua yam no lawm, ces kuv thiaj li xav tias qhov xyaum ua raws kuv txoj kev ntseeg ntawd mus ntxiv mas yeej cuam tshuam rau kuv ob tug tub lub neej yav tom ntej xwb xwb li. Kuv tau them nyiaj rau nkawv txoj kev kawm ntau heev lawm—tsis yog txhua lub xyoo los no tej roj ntsha, tej hws, thiab tej kua muag yuav tsis muaj txiaj ntsig li lod yog tias thaum kawg nkawv nrhiav tsis tau hauj lwm ua li? Qhov no yog ib txoj kev xav uas ua rau kuv nyuaj siab heev. Kuv thiaj li thov Vajtswv, thov kom Nws saib xyuas kuv lub siab thiab coj kuv kev los to taub txog Nws txoj kev xav, kom paub txog qhov kuv tsim nyog ua. Ces sob lus uas los ntawm Vajtswv cov lus lo no thiaj li tshwm los rau hauv kuv lub siab. “Txij thaum koj yug quaj quaj los rau hauv lub ntiaj teb no, koj pib ua koj tes num kom tiav. Vim Vajtswv txoj kev npaj thiab Nws txoj kev tsa, koj ua koj lub luag hauj lwm thiab pib koj lub neej mus. Txawm koj yav tag los zoo li cas, thiab txawm koj txoj kev mus tom ntej zoo li cas los, yeej tsis muaj ib tug twg muaj cuab kav khiav dhau tej kev coj kev taw qhia thiab tej kev npaj ntawm Ntuj Ceeb Tsheej, thiab tsis muaj ib tug twg tswj tau lawv tus kheej txoj hmoo, rau qhov tsuas yog Nws uas yog tus kav tag nrho txhua yam xwb mas thiaj muaj peev xwm ua tau tes hauj lwm ntawd. … Tib neeg lub siab thiab tus ntsujplig raug muab tuav cia rau hauv Vajtswv txhais tes, txhua yam ntawm nws lub neej yeej raug saib ntsoov los ntawm Vajtswv. Txawm tias koj yuav ntseeg qhov no los sis tsis ntseeg kuj xij, ib yam twg thiab txhua yam, tsis hais ciaj los sis tuag, yuav hloov, pauv, ua dua tshiab, thiab yaj ntshis mus raws li Vajtswv tej kev xav. Qhov no yog txoj kev uas Vajtswv tswj fwm tag nrho txhua yam” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Yog lub Hauv Paus ntawm Tib Neeg Txoj Sia). Vim Vajtswv cov lus, kuv thiaj li pom tau tias txhua yam yeej yog nyob rau hauv Nws ob txhais tes tiag tiag li, yog li tsis yog qhov ntawd xam muaj kuv ob tug tub lub neej yav tom ntej thiab txoj hmoo tib si thiab lod? Ib tug neeg yuav raug kev txom nyem npaum li cas rau hauv lub neej thiab lawv ua hom hauj lwm dab tsi los puav leej raug Vajtswv teev tseg ua ntej lawm. Kuv yuav txhawj txog tej ntawd tsis tau. Thiab txawm ib tug neeg txoj kev kawm thiab tes hauj lwm zoo npaum li cas los xij, qhov ntawd tsis txhais tias lawv yuav muaj lub neej yav tom ntej thiab txoj hmoo zoo. Yog tsis muaj kev ntseeg, tsis lees txais Vajtswv txoj kev cawm dim, ces ib tug neeg yeej yuav cia li tuag rau tej kev puas tsuaj thaum tej kev puas tsuaj ntawd los, thiab lawv yuav tsis muaj lub neej yav tom ntej los tham txog li. Qhov los nyob rau ntawm Vajtswv xub ntiag thiab raug Vajtswv cawm dim ntawd mas thiaj li yog tib txoj hau kev kom muaj lub neej yav tom ntej thiab lub hom phiaj tiag tiag xwb. Yog li kuv thiaj li hais rau kuv tus txheeb ze tias, “Txawm kuv ob tug tub lub neej yav tom ntej yuav zoo li cas los yog nkawv txoj hmoo—nws tsis yog nyob rau ntawm ib tug neeg twg li, kuv ntseeg Vajtswv thiab caum raws qhov tseeb. Qhov no yog txoj hau kev yog thiab kuv txaus siab rau qhov ntawd tag nrho lawm. Txhob pheej muab tswv yim rau kuv lawm!” Nws tsis teb li thaum nws pom tias kuv txiav txim siab khov kho rau kuv txoj kev ntseeg lawm. Lawv cia kuv nyob rau ntawd tau ib hnub thiab ib hmo, ces muab kuv xa rov los tsev lawm.

Kiag thaum kuv los txog, ces kuv tus txiv tsawv nkaus ib lub tog khuab teeb thiab tab tom yuav muab lub tog ntawd ntaus kuv, tab sis wb tus tub hlob ho los cheem nws lawm. Kuv tus txiv thiaj li cem kuv hais tias, “Vim koj txoj kev ntseeg xwb, kuv thiaj li poob ntsej muag tag li lawm, thiab tsis sai ces qeeb wb ob tug tub lub neej yav tom ntej yuav raug koj rhuav. Yog tias koj pheej tuav txoj kev ntseeg no, ces kuv yuav ntaus kom koj tuag!” Thaum pom nws muaj tus yam ntxwv ntawd, ces kuv thiaj li xav rau kuv tus kheej tias yog ib yam twg cuam tshuam rau nws tej kev ntshaws thiab lub suab npe, ces nws yuav hem tias yuav ntaus kuv. Qhov ntawd yuav yog txoj kev hlub ntawm ib niam txiv tau li cas? Lub sij hawm ntawd kuv tus niam hluas nyob rau ntawm wb tsev thiab, ces kuv tus niam hluas thiaj li hais tias, “Koj cia li tso koj txoj kev ntseeg tseg tsis tau lod? Yog koj pheej ua li no, ces koj yuav rhuav koj ob tug tub lub neej yav tom ntej!” Kuv thiaj li hais rau lawv tias, “Txhua yam kuv ua yog mus koom tej kev sib txoos ua ke thiab nyeem Vajtswv cov lus xwb. Qhov no yog txoj hau kev yog uas yuav tsum taug rau hauv lub neej—kuv tsis tau ua dab tsi txhaum. Qhov ntawd yuav cuam tshuam kuv cov me nyuam lub neej tom ntej tau li cas? Nws yog Tsoom Fwv Koom Tsham uas caij tsuj cov ntseeg thiab rub ntau tiam neeg ntawm lawv tsev neeg mus rau qhov ntawd ntag. Yog wb cov me nyuam nrhiav tsis tau hauj lwm rau yav tom ntej, qhov ntawd yog vim Tsoom Fwv Koom Tsham xwb. Vim li cas koj thiaj li qhia tsis tau qhov yog los ntawm qhov tsis yog li?” Ces kuv tus nus yau thiaj li hu tuaj rau kuv tus txiv hais tias, “Yog tias kuv tus muam pheej ua raws li txoj kev ntseeg ntawd, ces cia li ua kom nws ob txhais ceg dam kiag xwb. Ces mam saib seb nws yuav mus rau tej kev sib txoos ua ke ntawd li cas.” Thiab kuv tus nyab yau hais nchav heev li tias, “Ntaus kom nws tuag kiag yog tias nws pheej ua li ntawd. Peb tsev neeg sab mas yuav tsis rau txim rau koj.” Kuv lub siab txias tag li. Kuv xav tias ntshe kuv tsev neeg yuav to taub txog kuv no. Kuv yeej tsis xav tias lawv yuav mloog Tsoom Fwv Koom Tsham lus li, tias lawv yuav tsis muaj siab ntsws tsuas tiv thaiv lawv tus kheej tej kev ntshaw xwb, thiab yeej tsis quav ntsej tias txawm kuv ciaj los tuag los xij li tsuas txwv kuv kom txhob xyaum ua raws kuv txoj kev ntseeg xwb. Lawv txoj kev ua neej nyob rau qhov twg? Hnub tom qab ntawd los kuv tus nus hlob hu tuaj rau kuv tus txiv thiab hais tias, “Yog tias kuv tus muam pheej tuav nws txoj kev ntseeg, ces peb yuav txiav txoj kev sib txheeb nrog nws. Kuv yuav txhawb koj yog tias koj xav nrauj. Txhob cia dab tsi rau nws li thiab muab nws ncaws tawm. Saib seb tom qab ntawd nws yuav ua neej li cas.” Tham tsam li yav tav su ntawd ces kuv tus txheeb ze thiaj li caij ib lub tsheb tub ceev xwm tuaj thiab hais rau kuv tus txiv tias, “Saib kuv tus muam nawb, txhob cia nws pheej ntseeg lawm! Qhov ntseeg Vajtswv Tus Uas Muaj Hwj Chim Loj Kawg Nkaus ntawd yuav muaj yam tsis zoo cuam tshuam rau peb tiam neeg tom ntej. Yog tias nws ntseeg mus ntxiv, ces koj yuav raug rho tawm hauj lwm, koj tus tub hlob yuav nrhiav tsis tau hauj lwm ua, koj tus tub yau yuav tsis tau mus kawm rau ib lub tsev kawm ntawv twg li, thiab yuav ua rau tag nrho koj tsev neeg raug kev puas tsuaj.” Kuv tus txiv thiaj li hais rau kuv tias, “Txhawm rau wb cov me nyuam thiab tsev neeg no, ces hnub no koj yuav tsum saib koj tus txheeb ze ob lub qhov muag thiab hais rau nws tias koj yuav tso koj txoj kev ntseeg tseg.” Kuv thiaj li hais rau nws tias, “Qhov caum raws Vajtswv qab yog ib qho yog thiab tsim nyog lawm. Kuv yuav tsis tso kuv txoj kev ntseeg tseg li.” Thaum pom tias nws ua tsis tau kom kuv hloov kev xav, ces nws thiaj li hais npau taws npleev tias, “Yog tias koj pheej tuav rawv kev ntseeg Vajtswv thiab koj tsis quav ntsej wb cov me nyuam lub neej tom ntej li, ces kuv yuav tsum tau muab koj nrauj xwb.” Nws thiaj li muab ib daim ntawv sib nrauj los thiab hais kom kuv kos npe rau daim ntawv ntawd. Daim ntawv ntawd sau hais tias kuv yuav tawm mus, tsis coj ib yam dab tsi nrog kuv mus li. Kuv thiaj li xav tias: Wb ob leeg tau siv zog ua hauj lwm heev los tsim tsa wb lub tsev—kuv yuav nyob li cas yog tias kuv tawm tes dawb tes npliag xwb? Tab sis tom qab ntawd kuv thiaj li rov xav txog qhov uas Vajtswv twb txiav txim tias ib tug neeg twg yuav raug kev txom nyem ntau npaum li cas rau hauv lawv lub neej, thiab txawm li cas los xij, kuv yuav tso tsis tau kev ntseeg Vajtswv tseg li, tab sis kuv yuav tsum caum raws qhov tseeb mus ntxiv. Kuv nyuam qhuav yuav kos npe xwb, ces tom qab ntawd kuv tus txiv pom tias kuv tsis npaj siab tso tseg li, yog li nws thiaj li hais tias, “Ces cia wb txhob sib nrauj lawm. Yog tias koj xav yog ib tug ntseeg, ces kuv yeej txwv tsis tau koj. Cia li ua mus ntxiv.” Nws hais li ntawd xwb, tab sis qhov tseeb tiag, nws haj yam tswj kuv heev zuj zus tuaj. Nyob hauv tsev mas nws tsis pub kuv hais lo lus tias “Vajtswv” li thiab nws ntaus kuv txhua zaus uas kuv hais tej yam nws tsis nyiam. Nws tsis mus ncig so ua si thaum so hauj lwm li es tsuas nyob hauv tsev zov kuv lawm xwb. Thaum nws pom kuv nyeem Vajtswv cov lus mas nws yuav ntsiab nkaus phau ntawv ntawm kuv mus lawm, thiab hais tias, “Yog kuv tseem pom li no ib zaug ntxiv thiab, ces kuv yuav muab phau ntawv ntawm Vajtswv cov lus no hlawv!” Tau ib ntus, kuv tsis mus koom tsis tau tej kev sib txoos ua ke, muaj tsis tau kev sib cuag nrog tej nus thiab tej viv ncaus, los sis nyeem tsis tau Vajtswv cov lus hauv tsev li.

Muaj ib hmo kuv tau nyiag nkag mus rau hauv wb chav pw mus nyeem Vajtswv cov lus thaum kuv tus txiv cia li nkag kiag los hais yam tsiv heev tias, “Koj tseem muaj cuab kav nyeem li ntawd thiab! Yog tias koj raug ntes dua, ces kuv txoj hauj lwm thiab wb cov me nyuam lub neej yav tom ntej kawg tag li! Tsoom Fwv Koom Tsham yeej muaj peev xwm ua tau txhua yam.” Kuv thiaj li hais rau nws tias, “Kuv tsuas nyeem Vajtswv cov lus xwb. Qhov ntawd yuav cuam tshuam koj thiab wb ob tug tub lub neej yav tom ntej tau li cas?” Poob siab tag li, nws khiav kiag los muab ob txhais tes khawm nkaus kuv lub caj dab, zawm kiag thiab hais tias, “Kuv cia li muab koj zawm caj dab xwb ces nws tiav lawm.” Kuv tsis muaj zog txaus nti kom kuv tus kheej dim thiab kuv hais tsis tau ib lo lus li. Nws yeej tsis tso tseg mus txog ntua thaum kuv tsis ua pa thiab ntis tsis taus li lawm. Kuv huas pa laws thiab mob siab heev li. Kuv xav tias qhov yog ib tug ntseeg nyob hauv Teb Chaws Suav, qhov taug txoj hau kev yog, mas yog ib qho nyuaj dhau lawm. Kuv raug Tsoom Fwv Koom Tsham ntes, kuv tsev neeg tav kuv txoj hau kev, kuv ua tsis tau ib teg dej num mus ntxiv lawm, thiab tam sim no kuv haj tseem raug txwv qhov kuv muaj cai nyeem Vajtswv cov lus lawm thiab. Hauv kuv lub neej tseem tshuav txiaj ntsig dab tsi? Kuv hnov zoo li kuv tuag ntshe yuav zoo dua. Kuv thiaj li ntsiab nkaus kuv tus txiv daim hniav chais hwj txwv, npaj suam kuv ob txhais dab teg, tua tus kheej. Ces zaj lus no ntawm Vajtswv cov lus cia li tswm los rau hauv kuv lub siab: “Niaj hnub no, tib neeg feem ntau tsis muaj qhov kev paub ntawd. Lawv ntseeg tias kev txom nyem yog ib yam tsis muaj nuj nqis dab tsi, lawv raug ntiaj teb muab tso tseg, lawv lub neej hauv cuab yim neej muaj teeb meem, lawv tsis tau txais kev hlub los ntawm Vajtswv, thiab lawv lub neej yav tom ntej mas tsaus ntuj nti xwb. Kev txom nyem ntawm qee leej mas mus txog rau theem kawg, thiab lawv txoj kev xav tig mus rau kev tuag. Qhov no tsis yog kev hlub tiag rau Vajtswv; cov neeg zoo li no yog neeg tais caus, lawv tsis muaj kev mob siab rau li, lawv yog neeg qaug zog thiab tsis muaj hwj chim dab tsis li! Vajtswv xav kom tib neeg hlub Nws, tab sis tib neeg yim hlub Nws ntau npaum li cas, tib neeg yim huab ntsib kev txom nyem ntau npaum li ntawd, thiab tib neeg yim hlub Nws ntau npaum li cas, tib neeg yuav ntsib kev sim siab ntau npaum li ntawd. … Vim yog li ntawd, nyob rau lub sij hawm kawg nej yuav tsum ua tim khawv rau Vajtswv. Tsis hais nej txoj kev txom nyem yuav loj npaum li cas, koj tsim nyog taug kev mus kom txog thaum kawg, thiab kom kawg koj tus pa, koj yuav tsum ncaj ncees rau Vajtswv thiab ntawm Vajtswv txoj kev hlub tshua; tsuas yog qhov no xwb thiaj yog kev hlub Vajtswv tiag tiag, thiab tsuas yog qhov no xwb thiaj yog qhov kev ua tim khawv muaj zog thiab zoo kawg nkaus” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Kev Sim Siab Uas Mob Heev Xwb Thiaj Muaj Peev Xwm Paub Txog Vajtswv Txoj Kev Zoo Ntxim Hlub). Tom thawj Vajtswv cov lus ua rau kuv ras xeev los ncav sij hawm, yog li kuv thiaj li tsis ua qhov ruam ruam li ntawd lawm. Kuv xav muab kuv tus kheej tua vim yog kuv nyuaj siab thiab raug tsim txom, tiv tsis tau txoj caij tsuj. Cas kuv tais caus ua luaj li. Kuv tsis muaj kev ntseeg thiab lus tim khawv kiag li. Vajtswv cia siab tias tib neeg yuav tsis plam lawv txoj kev ntseeg Nws thaum lawv raug kev nyuaj thiab ua tau tim khawv rau Nws. Yog tias kuv tuag lawm kuv yuav ua tim khawv tau li cas? Tsis yog kuv yuav ua rau Ntxwgnyoog luag xwb lod? Thaum paub li no lawm, ces kuv thiaj li txiav txim siab tias txawm kuv tus txiv thiab tej txheeb ze tsim txom kuv li cas los xij, txawm kuv yuav raug kev txom nyem npaum li cas los xij, tsuav yog kuv tseem muaj txoj pa xwb, ces kuv yuav ua kuv lub neej kom zoo thiab ua raws li Vajtswv mus kom txog ntua thaum kawg. Tab sis vim yog kuv raug tub ceev xwm soj ntsuam thiab raug kuv tsev neeg txwv tom qab kuv raug ntes tag lawm, ces kuv tsis muaj peev xwm ua lub neej kom tsim nyog rau ntawm pawg ntseeg los tau peb lub xyoos lawm. Kuv yuav tsum tau nyiag khiav mus rau tom kuv txiv tsev mus nyiag nyeem Vajtswv cov lus nyob rau tod. Ces nyob rau lub caij ntuj sov ntawm xyoo 2016 ntawd, thaum kawg kuv thiaj li cuag tau tej nus thiab tej viv ncaus, thiab muaj peev xwm rov los pib lub neej ntawm pawg ntseeg thiab ua ib teg dej num dua lawm.

Kuv tus txiv pheej tsim txom kuv tau ntau lub xyoo dhau los no. Kuv nco tau tias muaj ib zaug tom qab kuv rov los tom rooj sib txoos ua ke los txog tsev, ces nws tau coj kuv mus rau tim kuv tus nus hlob tsev, qhov chaw uas kuv ob tug nus thiab nkawv ob tug poj niam tab tom nyob tos—lawv txhua tus mas ntsia kuv txhwj nyos. Kuv thiaj li paub tias lawv yuav sim los yuam kom kuv tso kuv txoj kev ntseeg tseg dua, yog li kuv thiaj li thov Vajtswv twj ywm, thov kom Vajtswv coj kuv kev kom txawm lawv ua li cas rau kuv los xij, kuv yuav tsis raug lawv txwv. Kuv tus nus hlob thiaj li ntsia ntsoov kuv thiab hais tias, “Tsoom Fwv Koom Tsham yeej tsis ntseeg tias muaj Vajtswv. Nws tau caij tsuj cov kev ntseeg los tau ntau lub xyoo no lawm thiab tsis muaj leej twg yuav hloov tau qhov ntawd li. Qhov ntseeg Vajtswv nyob rau hauv Tsoom Fwv txoj kev tswj ces yuav ua rau koj raug ntes, thiab cov seem ntawm tsev neeg yuav raug cuam tshuam ib yam thiab. Tsis yog koj tsuas yog nrhiav teeb meem xwb lod?” Kuv tus txiv hluas txawm hais ntxiv tias, “Kuv tus tub los tau mus sib tws nkag mus kawm ntawv qib siab thiab yuav tsum tau sau cov ntaub ntawv tshuaj xyuas keeb kwm ntawm sab kev nom kev tswv, thiab lawv nug txog cov neeg hauv tsev uas ntseeg ntawm sab kab lis kev cai ntseeg. Tub ceev xwm tshawb pom koj cov ntaub ntawv teev tseg txog kev ntseeg Vajtswv Tus Uas Muaj Hwj Chim Loj Kawg Nkaus ces lawv txawm tsis pub kuv tus tub dhau txoj kev sib tws. Kuv yuav tsum tau siv kuv tej kev sib raug zoo thiab xa phaj tshab mus rau cov neeg ntawd—nws siv zog heev li, es kuv tus tub thiaj li nyuam qhuav dhau txoj kev sib tws ntawd xwb. Nyob hauv Teb Chaw Suav mas, yog leej twg ntseeg Vajtswv ces tag nrho lawv tsev neeg yuav raug rub mus rau qhov ntawd thiab. Koj yuav tsum tau tso koj txoj kev ntseeg tseg nawb!” Ces kuv tus nus yau thiaj li thov kuv tias, “Me muam, koj ua tib zoo xav rau peb tsev neeg, rau koj ob tug tub lub neej yav tom ntej puas tau? Txhob ntseeg Vajtswv lawm! Yuav muaj dab tsi tshwm sim yog tias koj tso koj txoj kev ntseeg tseg? Qov ntawd yuav tua koj lod?” Yog li kuv thiaj li hais rau lawv tias, “Nej puas paub tias ‘lub neej yav tom ntej’ thiab ‘txoj hmoo’ txhais tau li cas? Nej puas xav tias qhov muaj ib txoj hauj lwm zoo, muaj zaub mov noj thiab khaub ncaws hnav zoo ces yog muaj ib lub neej yav tom ntej zoo lawm no mas? Tam sim no tej kev puas tsuaj tab tom loj zuj zus tuaj thiab leej twg tsis yog tus ntseeg ces yuav tuag rau tej kev puas tsuaj ntawd. Tsuas yog cov uas ntseeg Vajtswv xwb thiaj li muaj txoj sia nyob xwb, thiab tsuas yog lawv xwb thiaj li muaj lub neej yav tom ntej thiab txoj hmoo zoo.” Ces kuv tus txiv thiaj li teb tias, “Kuv tsis paub tias yuav muaj dab tsi tshwm sim rau tom qab ntawd—kuv tsuas pom qhov nyob kiag rau ntawm kuv xub ntiag xwb. Qhov no yog Tsoom Fwv Koom Tsham tsab cai tam sim no—yog tias koj yog ib tug ntseeg, ces lawv yuav ntes koj, tshem koj txoj hauj lwm tawm, thiab koj tsev neeg yuav raug cuam tshuam thiab. Los tau ntau lub xyoo no tsis muaj leej twg muaj peev xwm hloov lawv tsab cai no li, thiab lawv muaj zog tshaj peb lawm! Cia li tso koj txoj kev ntseeg tseg xwb! Qhov no yog nyob rau ntawm sawv daws xub ntiag, cia li hais tias koj mam tso tseg no.” Kiag thaum nws hais tag lawm, ces sawv daws thiaj li pib hais zom zaws, hias kom kuv txhob ntseeg Vajtswv mus ntxiv lawm. Peb keev muaj ib tsev neeg loj, zoo siab, tab sis Tsoom Fwv Koom Tsham txoj kev caij tsuj tau ua rau txhua yam ntxhov hnyo lawm. Kuv tus txiv mas yeej ntaus kuv thiab nthe kuv tas li, thiab wb yee tsis muaj ib hnub kaj siab li. Thaum twg es qhov no thiaj mam li xaus? Kuv thiaj li chim siab zuj zus tuaj, yog li kuv thiaj li thov Vajtswv thiab tom qab ntawd xav txog zaj lus no ntawm Nws cov lus. “Koj yuav tsum raug kev txom nyem rau qhov tseeb, koj yuav tsum muab koj tus kheej rau qhov tseeb, koj yuav tsum tiv kev poob ntsej muag rau qhov tseeb, thiab yog yuav kom tau qhov tseeb ntau dua ces koj yuav tsum muaj kev txom nyem kom ntau. Qhov no yog qhov uas koj tsim nyog ua. Koj yuav tsum tsis txhob muab qhov tseeb cuam pov tseg es tsuav kom tau lub neej thaj yeeb lug nrog tsev neeg xwb, thiab koj yuav tsum tsis txhob poob koj lub meej mom thiab txoj kev ncaj ncees rau tej qho kev zoo siab ib nyuag pliag xwb. Koj yuav tsum nrhiav tag nrho tej uas zoo nkauj thiab zoo, thiab koj yuav tsum nrhiav ib txoj kev hauv lub neej uas muaj qab hau dua. Yog koj ua lub neej qias vuab tsuab, thiab tsis nrhiav ib qho hom phiaj li, tsis yog koj nkim koj lub neej los? Koj yuav tau dab tsi los ntawm ib lub neej zoo li ntawd? Koj yuav tsum muab tag nrho tej kev kaj siab ntawm cev nqaij daim tawv tso pov tseg es kom tau ib qho tseeb, thiab yuav tsum tsis txhob muab tag nrho qhov tseeb cuam pov tseg es kom tau ib qho kev kaj siab me me nkaus xwb. Cov neeg zoo li no ces yeej tsis muaj kev ncaj ncees thiab lub meej mom li; qhov uas muaj lawv nyob ntawd ces tsis muaj nuj nqis dab tsi li!” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Petus Qhov Kev Ntsib Kev Pom: Nws Qhov Kev Paub txog Kev Qhuab Ntuas thiab Kev Txiav Txim). Vajtswv cov lus pab kuv to taub Nws txoj kev xav. Kuv thiaj li txaus siab caum raws Vajtswv qab thiab ua kuv tes dej num lawm—kuv taug txoj kev caum raws qhov tseeb lawm. Ho kuv tsev neeg caum raws nyiaj txiag thiab lub suab npe lawm. Peb nyias taug nyias txoj kev lawm, ces thiaj li zam dhau qhov peb tsev neeg yuav sib faib kev. Kuv yuav tsum tau lees txais txoj kev txom nyem ntawd kom tau txais qhov tseeb. Muaj lub ntsiab nyob rau hauv qhov ntawd. Kuv tsis tuaj yeem tso kuv txoj kev ntseeg tseg vim kuv tsev neeg xwb. Yog li kuv thiaj li hais rau lawv tias, “Kuv ntseeg tias Vajtswv Tus Uas Muaj Hwj Chim Loj Kawg Nkaus yog tus tseem Vajtswv, yog tus Cawm Seej uas los cawm tib neeg ntag. Yeej tsis muaj hnub kuv yuav tso kuv txoj kev ntseeg tseg li!” Lawv txhua tus cia li ntsia kuv thiab, thaum pom tias lawv yuav hloov tsis tau kuv lub siab, ces lawv thiaj li tawm mus lawm.

Muaj ib hmos thaum kuv rov los tim rooj sib txoos ua ke los txog tsev, ces kuv tus txiv zaum tug niag qaij nkas rau ntawm ib lub rooj, qaug cawv thiab quaj. Nws hais tias, “Koj tawm mus rau tej kev sib txoos ua ke txhua hnub kiag. Yog tias koj raug ntes dua ces tsis muaj leej twg qhia tau tias thaum twg peb lub tsev yuav raug kev puas tsuaj yog vim koj.” Ces nws thiaj li muab lub rooj ntawd thawb ntxeev yam npau taws npleev, ib sab tes ntsiab nkaus kuv cov khaub ncaws, ces muab lwm sab tes npuaj kuv. Ua ntej kuv yuav huas taus pa, ces nws twb siv zog npuaj kuv vau mus rau hauv chav dej lawm, siv zog ntaus kuv lub taub hau heev, thiab hais nyaum heev tias, “Tso koj txoj kev ntseeg tseg nawb! Hmo no kuv npaj txhij los muab txhua yam tso tseg lawm—kuv yuav ntaus kom koj tuag. Li cas los xij, koj tus kheej tsev neeg los yeej tsis quav ntsej tias koj cia los tuag li.” Kuv kiv taub hau thiab kuv pom kev tsis tseeb vim raug ntaus. Nws thiaj li muab kuv cab saum cov theem ntaiv thiab muab kuv thawb nqis los, hais tias, “Yog tias koj ntog mus es koj tuag lawm, ces kuv yuav cia li coj koj lub cev mus hlawv thiab muab koj cov hmoov pov rau hauv dej xwb.” Kuv ntshai heev li thaum kuv hnov nws hais li ntawd—ces kuv thiaj li thov Vajtswv zaum tag zaum thiab. Ua tsaug rau Vajtswv txoj kev tiv thaiv, xaws nkoos kawg kiag kuv thiaj li ntsiab tau ib txoj hlua ntawm tus ntaiv lawm, uas cawm kuv dim los ntawm txoj kev ntog raws cov theem ntaiv ntawd. Ces wb tus tub yau thiaj li los hais rau kuv tus txiv tias, “Puas yog koj qaug cawv lawm no? Niam twb tsis tau ua dab tsi txhaum rau nws txoj kev ntseeg li ne. Vim li cas koj thiaj li ntaus nws?” Nws thiaj li teb tias, “Kuv tsis xav ntaus nws li, tab sis yog tias nws raug ntes dua, ces koj thiab koj tus tij laug kawg tag li no lawm xwb. Kuv tsis muaj kev xaiv lawm ne.” Muaj kuv tus tub nyob rawv ntawm kuv ib sab, ces nws thiaj li tsis muaj cuab kav ntaus kuv ntxiv lawm, tab sis cia li khaws nkaus ib lub rooj uas yog iav los tsoo phab ntsa, ua rau tag nrho chav ntawd muaj iav tawg puv nkaus. Tom qab ntawd, ces kuv thiaj li nyeem qhov no hauv Vajtswv cov lus: “Cov ntseeg thiab cov tsis ntseeg ces tsis sib haum; tsis li ntawd xwb, lawv tseem sib tawm tsam ib leeg rau ib leeg thiab” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv thiab Tib Neeg Yuav Nkag Mus So Ua Ke). Kuv xav li ntawd tag, ces paub rau hauv kuv lub siab tias txawm kuv tus txiv ntseeg Vajtswv rau thaum xub pib los xij, nws tsuas xav kom tau txais koob hmoov xwb es tsis yog ib tug ntseeg tiag li. Thaum nws hnov tias qhov muaj kev ntseeg yuav cuam tshuam rau nws thiab wb ob tug tub tej kev cia siab rau yav tom ntej, ces nws thiaj li hloov kev xav kiag lawm. Nws tsis yog tsuas tso nws txoj kev ntseeg tseg xwb, tab sis pheej tas zog txwv tsis pub kuv ntseeg Vajtswv thiab. Thaum nws txwv tsis tau kuv lawm, ces nws thiaj li ua nruj ua tsiv rau kuv. Nws saib kuv zoo li yog ib tug yeeb ncuab vim kuv txoj kev ntseeg cuam tshuam rau nws tus kheej tej kev ntshaws lawm xwb. Kuv pom tias hauv lub ntsiab tseeb, ces kuv tus txiv ntxub qhov tseeb thiab ntxub Vajtswv. Nws thiaj li ua raws li Tsoom Fwv Koom Tsham los tiv thaiv nws tus kheej lub neej; nws thiaj li caum raws lub neej yav tom ntej thiab tej kev ntshaws ntawm lub ntiaj teb lawm. Hos kuv ntseeg Vajtswv thiab caum raws qhov tseeb, taug txoj kev yog hauv lub neej lawm—wb nyias taug nyias txoj kev lawm. Kuv tus txiv thiab cov seem ntawm tsev neeg thiaj li tsim txom kuv li ntawd vim yog kuv txoj kev ntseeg ces qhia rau kuv meej meej tias lawv muaj tus yeeb yam thiab lub ntsiab tseeb phem, tias lawv tawm tsam Vajtswv. Kuv tus txiv tau mus koom tej kev sib txoos ua ke thiab paub tias Vajtswv Tus Uas Muaj Hwj Chim Loj Kawg Nkaus yog tus tseem Vajtswv lawm. Hos kuv cov txheeb ze ces, kuv twb qhia txoj moo zoo rau lawv thiab nyeem Vajtswv cov lus ntau tsawv rau lawv lawm. Lawv tsis muaj leej twg los ua cov ntseeg li, thiab kiag thaum kuv txoj kev ntseeg cuam tshuam rau lawv tej kev ntshaw, ces lawv pom zoo nrog Tsoom Fwv Koom Tsham tsim txom kuv thiab tham txog qhov txiav kev sib txheeb nrog kuv. Lawv yog hom neeg uas zoo li cas? Lawv puav leej yog Ntxwgnyoog cov tub qhev, tuaj Tsoom Fwv Koom Tsham tog, ua hauj lwm tawm tsam Vajtswv. Tam sim no Vajtswv tau los ua lub cev nqaij daim tawv lawm thiab tab tom nthuav ntau qhov tseeb tawm, qhia tshwm txog tus yeeb yam thiab lub ntsiab tseeb ntawm txhua hom neeg, uas qhia rau kuv tias kuv tau taug txoj kev uas txawv kuv tsev neeg lawm—cov ntseeg thiab cov tsis ntseeg yog cov hom neeg sib txawv. Kuv thiaj li tsis hnov raug txwv heev lawm thaum kuv paub txhua yam ntawd tag thiab muaj ib qho kev kaj siab lawm.

Tom qab ntawd kuv thiaj li nyeem zaj lus no hauv Vajtswv cov lus. “Tau ntau txhiab xyoo los lawm uas qhov no yog daim av ntawm txoj kev qias neeg. Nws yog ib qho dub tsuas yam tiv tsis tau kiag li, muaj kev txom nyem loj kawg kiag, dab poj ntxoog mas khiav vig voog qhov txhia chaw, txawj ntxias thiab txawj dag, hais lus iab liam yam tsis muaj laj thawj, ua lim hiam thiab siab phem, tsuj kiag lub niag nroog dab poj ntxoog no thiab cia nws muaj tej niag cev tuag pov pawg lug rau ntawm tej; tus ntxhiab tsw lwj mas puv nkaus daim av thiab nthuav tawm puv nkaus tej huab cua, thiab nws raug zov zoo kawg kiag. Leej twg thiaj pom lub ntiaj teb uas dhau lub qab ntuj ntsuab? Tus dab phem ntawd muab tib neeg lub cev pav ntxeev tis qaib ruaj heev, nws npog nws ob lub qhov muag, thiab muab nws ob daim di ncauj lo khov kho. Tus vaj ntxwv ntawm cov dab tau rhuav tshem qhov ub qhov no los tau ntau txhiab xyoo lawm, los txog ntua rau niaj hnub no, thaum nws tseem zov lub nroog dab no zoo zoo, cuag li nws yog ib lub tsev huab tais rau cov dab uas tsis muaj leej twg yuav nkag mus tau rau li; pab dev zov tsev no, nyob rau tib lub sij hawm ntawd, ntsia qhov muag ci quv tuaj xwb, ntshai rwg tsam Vajtswv tos lawv tsis nco qab ces muab lawv so tawm du lug, tsis cia lawv muaj ib lub chaw rau kev thaj yeeb thiab kev zoo siab li. Cov neeg ntawm ib lub nroog dab zoo li no es yuav ua cas thiaj yuav muaj hnub pom Vajtswv mas? Lawv puas tau nyiam qhov paub zoo thiab kev ntxim hlub ntawm Vajtswv dua li mas? Lawv ho muaj kev txaus siab dab tsi rau tej xwm txheej ntawm tib neeg lub ntiaj teb? Leej twg ntawm lawv ho muaj cuab kav to taub Vajtswv txoj kev xav uas maj nroos ntawd? Tos li ntawd, ces, Vajtswv uas yug los ua neeg tseem nkaum tag nrho: Nyob rau ib lub meem xeeb coj tsaus ntuj nti li lub no, uas cov dab mas siab phem thiab lim hiam heev, yuav ua cas es tus vaj ntxwv ntawm cov dab, tus uas tua neeg yam tsis ntsais muag li, yuav zam tau cia kom muaj ib tug Vajtswv uas txaus hlub, siab zoo, thiab dawb huv ntawd nyob? Nws yuav ua cas npuaj teg thiab qw txais tos qhov kev los txog ntawm Vajtswv? Cov niag qhev no! Lawv pauj kev zoo siab nrog kev ntxub, lawv twb pib saib Vajtswv li yog ib tug yeeb ncuab los ntev lawm, lawv tsim txom Vajtswv, lawv yog cov niag mab qus phem tshaj plaws li, lawv yeej tsis muaj ib qho kev saib taus Vajtswv me me hlo li, lawv huab noj huab haus thiab ua tub sab tub nyiag, lawv plam tag nrho tej kev txawj xav, lawv tawm tsam tag nrho txhua yam kev txawj xav, thiab lawv ntxias cov neeg dawb huv mus rau txoj kev ruam. Tej poj koob yawm txwv ntawm cov neeg txheej thaum ub? Cov thawj coj uas ntxim hlub tshaj? Lawv tag nrho yeej tawm tsam Vajtswv! Lawv tej kev cuam tshuam ua rau tag nrho cov nyob hauv qab ntuj raug tso tseg rau hauv ib qho xwm txheej ntawm txoj kev tsaus ntuj thiab kev kub ntxhov. Kev ywj pheej fab kev ntseeg? Tej cai yam raug cai thiab tej uas pej xeem xav tau? Tag nrho tej no ces yog kev ntxias dag los npog kev txhaum xwb!” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tes Hauj Lwm thiab Kev To Taub (8)). Vajtswv cov lus mas muaj qab hau tshaj. Tsoom Fwv Koom Tsham uas muaj lub hwj chim yog Ntxwgnyoog, tus dab phem uas muaj lub hwj chim lawm. Nws ntxub Vajtswv, tsis nyiam qhov Vajtswv yuav los thiab uv tsis taus qhov tib neeg muaj kev ntseeg thiab caum raws Vajtswv qab. Nws xav yog tib qhov uas tib neeg caum raws qab thiab pe hawm xwb. Tsoom Fwv Koom Tsham ua txuj yoj tus chij muaj kev ywj pheej ntawm txoj kev ntseeg, tab sis caij tsuj thiab nyiag ntes cov ntseeg hnyav heev, thiab cuam tshuam ntau tiam neeg ntawm cov ntseeg tsev neeg. Nws haj tseem tsim tej lus paj lus cua thiab tej lus dag los ua kom cov tib neeg uas tsis paub qhov tseeb to taub yuam kev thiab, los ua kom cov neeg Suav sawv los tawm tsam cov neeg ntseeg. Muaj ntau tus neeg raug Tsoom Fwv Koom Tsham Suav ntxias thiab siv, ces lawv thiaj li pom zoo nrog nws qhov tsis lees thiab tawm tsam Vajtswv, thiab caij tsuj cov ntseeg. Lawv txhua tus yuav ntsib lawv txoj kev tuag nrog Tsoom Fwv Koom Tsham—lawv yuav raug Vajtswv rhuav tshem. Peb keev muaj ib tse neeg uas muaj kev zoo siab, tab sis vim yog Tsoom Fwv Koom Tsham txoj kev caij tsuj thiab tej kev ntes, ces kuv cov txheeb ze thiaj li txhawj tias kuv txoj kev ntseeg yuav cuam tshuam rau lawv tes hauj lwm thiab lawv cov me nyuam lub neej yav tom ntej, yog li lawv thiaj li tsim txom kuv thiab los ua Ntxwgnyoog tej cuab yeej lawm. Kuv thiaj li pom meej meej txog Tsoom Fwv Koom Tsham lub ntsiab tseeb phem uas ntxub qhov tseeb thiab Vajtswv lawm, thiab kuv kuj pom tias tsuas yog Vajtswv xwb thiaj li muaj txoj kev hlub tib neeg tiag. Nws yog Vajtswv cov lus uas coj kuv kev los ua ntu zus, muab txoj kev ntseeg rau kuv, cia kuv los to taub txog qhov tseeb thiab pom txog Ntxwgnyoog tej kev dag. Kuv tus txiv tseem tas zog tav kuv txoj kev ntseeg thiab, tab sis kuv tsis thim rov qab vim nws ntxiv lawm. Kuv yuav mus rau tej kev sib txoos ua ke thiab ua kuv tes dej num mus ntxiv, thiab kuv haj tseem ruaj siab rau kuv txoj kev txiav txim siab caum raws Vajtswv qab tshaj qub. Kuv ua Vajtswv tsaug tawm plaws hauv kuv lub siab los!