Kuv tes hauj lwm hauv pawg ntseeg yog ua yeej yaj duab. Nyob rau qhov tsim yeeb yaj duab ntawd, thaum kuv muaj cov hauj lwm nyuaj, mas yuav tsum tau sim txhua ntu thiab kho tas li, thiab muaj ntau yam ua tsis tau. Thaum kuv pom kuv cov nus thiab cov viv ncaus cov hauj lwm mas yooj yim heev, thiab pom tias lawv ua tau hauj lwm ntau dua, kuv thiaj li xav hais tias, “Kuv cov hauj lwm mas yuav tsum tau siv thev nos los ntsis siab, kuv yuav tsum tau siv sij hawm xav, nrhiav ntaub ntawv thiab kawm, thiab qhov tsim yeeb yaj duab ntawd mas ntev heev. Yog cov hauj lwm ntawd yooj yim zog, ces ntshe twb tsis muaj teeb meem ntau. Kuv tsuas cheem tsum paub qee yam tswv yim thiab tej kev txawj uas yooj yim xwb, thiab qhov tsim yeej yaj duab ntawd los kuj yuav luv dua thiab, uas yuav ua rau cov hauj lwm ntawd tsis tshua muaj teeb meem.” Tom qab ntawd, nyob rau hauv kuv tej dej num, kuv ua tib zoo muab tum seb cov hauj lwm twg nyuaj thiab cov hauj lwm twg yooj yim ces mam li txiav txim siab seb yuav ua qhov twg. Muaj ib zaug, kuv xaiv ib txoj hauj lwm uas yooj yim los ua, es cia cov nyuaj rau kuv cov nus thiab cov viv ncaus ua. Thaum kuv pom qhov kuv cov nus thiab cov viv ncaus pom zoo lawm, ces kuv tsis tshua kaj siab tias: “Tsis yog kuv cia li thim rov qab thaum ntsib tej kev nyuaj lod?” Tiam sis tom qab ntawd kuv ho xav hais tias, “Cov hauj lwm nyuaj mas siv kuv lub sij hawm thiab dag zog ntau heev, thiab cov hauj lwm ntawd mas siv hlwb ntau heev, yog li ntawd qhov zoo tshaj plaws rau kuv ces yog xaiv cov hauj lwm yooj yim xwb.” Tom qab ntawd, kuv xav tias tseem muaj ib qho teeb meem nyob rau hauv kuv cov hauj lwm uas yuav tau kho, tiam sis kuv tsis xav siv zog ua hauj lwm los hloov pauv qhov teeb meem ntawd, thiab kuv pom hais tias kuv cov nus thiab cov viv ncaus tsis pom ib qho teeb meem li, yog li ntawd kuv thiaj li tsis hloov pauv qhov teeb meem ntawd thiab cia qhov teeb meem ntawd dhau mus lawm. Qee zaus, thaum kuv muaj teeb meem mas, kuv tsuas xav txog qhov teeb meem ntawd me ntsis xwb, ces tom qab ntawd kuv mus nug kuv cov nus thiab cov viv ncaus lawm. Kuv xav hais tias qhov no daws tau qhov teeb meem ntawd sai dua es thiaj li tsis ua rau kuv sab, yog li ntawd nws yog ib qho uas ua tau kuv tej hauj lwm tag yooj yim heev. Tiam sis thaum kuv ua li no, kuv xav yws kuv tus kheej xwb. Tseeb tiag ces qee lo lus nug mas yeej yooj yim, thiab kuv siv zog me ntsis xwb yeej teb tau tej lus nug ntawd lawm, thiab qhov mus nug kuv cov nus thiab cov viv ncaus ntawd mas tseem cuam tshuam lawv tej dej num thiab, tiam sis kuv tsis tig xav txog los sis ua txhua yam kom to taub kuv tus kheej li. Yog li ntawd, hom kev dag ntxias no thiaj li dhau los ua qhov uas kuv ua kuv tej dej num lawm.

Ib qho ntxiv rau qhov ua yeeb yaj duab ntawd, kuv yuav tsum tau coj kuv cov nus thiab cov viv ncaus los kawm thiab ua kom txhua tus tej kev txawj ntawd zoo tuaj, yog li ntawd kuv yuav tsum tau ua hauj lwm kom ntau dua li ib txwm ua lawm. Tsis yog kuv tsuas yuav tsum tau kawm tej kev txawj xwb, kuv yuav tsum nrhiav ntaub ntawv thiab npaj qhia raws li qhov uas kuv cov nus thiab cov viv ncaus cheem tsum thiab. Txhua yam ntawd zoo li ib txoj hauj lwm uas nyuaj thiab sab heev. Tom qab ntawd, kuv txawm pib xav txog seb kuv yuav ua li cas thiaj li txuag tau sij hawm thiab thiaj li tsis sab sab lawm, ces kuv txawm txiav txim siab xa cov kev qhia mus rau kuv cov nus thiab cov viv ncaus. Ua li ntawd, cov nus thiab cov viv ncaus thiaj li yuav kawm tau thiab kuv thiaj li yuav tsis tau siv sij hawm nrhiav ntaub ntawv lawm. Kuv yim xav, ces kuv yim xav tias tsis muaj ib lub tswv yim zoo tshaj no lawm. Ib ntus tom qab ntawd, kuv cov nus thiab cov viv ncaus hais tias cov kev qhia ntawd daws tsis tau lawv tej teeb meem. Nyob rau lub sij hawm ntawd, kuv thov txim me ntsis, yog li ntawd vim tsis muaj lwm txoj kev xaiv lawm, kuv thiaj li nrhiav tau qee yam ntaub ntawv los qhia txhua tus kom yooj yim, thiab kuv xav hais tias, “Kuv twb npaj tej kev qhia rau txhua tus lawm, ces kuv txoj hauj lwm tiav lawm.” Tsis ntev ntawd ua ntej peb tus thawj coj ntawm pab pawg hais tias, “Tsis ntev los no muaj qee yam teeb meem nyob rau hauv ib daim yeeb yaj duab, thiaj li ua rau nce qib qeeb lawm.” Thaum kuv hnov li ntawd, kuv tsis tig xav txog los sis ua txhua yam kom to taub kuv tus kheej li, thiab kuv xav hais tias tes dej num no tsis yog yuav tsum tau raug kev txom nyem thiab tiv kev txom nyem xwb, yuav tsum tau ris tej yam uas ua tau yuam kev lawm thiab, yog li ntawd kuv haj yam tsis xav tau tes dej num no lawm. Muaj ib hnub, kuv tus thawj coj tuaj ntsib kuv thiab muab kuv nthuav tawm vim qhov lam ua kuv tej dej num kom dhau thiab txawj dag nyob rau hauv kuv tej dej num, thiab qhuab qhia kuv, hais tias yog tsis hloov pauv txhua yam, ces kuv yuav raug rho tawm. Thaum kuv hnov kuv tus thawj coj hais li ntawd, txawm kuv lees hais tias kuv lam ua kuv tej dej num kom dhau xwb los xij, kuv tsis muaj qhov lees txim hloov dua siab tshiab li. Thaum kuv xav txog tej kev nyuaj thiab tej teeb meem uas kuv yuav tau ntsib nyob rau yav tom ntej nyob rau hauv kuv tej dej num, mas kuv tsis xav ua tes dej num no ntxiv li lawm. Kuv xav hloov mus rau ib teg dej num ua yooj yim dua. Hnub tom qab ntawd, kuv thiaj li mus ntsib kuv tus thawj coj thiab hais tias, “Kuv tsis muaj peev xwm ua tes dej num no. Kuv xav hloov mus rau lwm tes dej num.” Nws thiaj li qhuab qhia kuv tom qab hnov li ntawd lawm, hais tias, “Koj yeej ua tsis tau tes dej num no tiag tiag li lod? Koj puas tau sim ua tiag tiag mas? Koj zam kom dhau tes hauj lwm uas nyuaj, koj pheej lam ua kom dhau thiab ua tib zoo ntxias dag, thiab koj muaj kev ua neej tsis zoo. Hais txog cov cwj pwm ntawd, koj yeej tsis muaj peev xwm ua tau tes dej num no tiag tiag li.” Thaum kuv hnov kuv tus thawj coj hais li no lawm mas, mloog zoo li kuv lub siab poob nthav lawm. Thaum rov qab los txog ntawm qhov chaw ua yeeb yaj duab lawm, kuv pom lwm tus viv ncaus khwv heev rau lawv tej dej num, tiam sis kuv twb raug rho tawm thiab poob kuv tej dej num lawm, thiab kuv tu siab heev lawm. Kuv yeej tsis tau xav tias kuv yuav poob kuv tes dej num kiag li. Tiam sis tom qab ntawd kuv txawm xav hais tias, “Vajtswv tuav lub hwj chim kav tag nrho txhua yam. Qhov kuv raug rho tawm ntawd yog los ntawm Vajtswv tus moj yam ncaj ncees. Kuv yuav tsum tau mloog lus thiab tig xav txog kuv tus kheej.” Ntau hnub tom qab ntawd, qhov uas kuv tus thawj coj muab kuv rho tawm ntawd pheej tshwm tas li rau hauv kuv lub siab zoo li ib zaj yeeb yaj duab. Thaum kuv xav txog qhov tus thawj coj hais ntawd, mas kuv nyuaj siab, tshwj xeeb yog qhov kuv tus thawj coj hais tias kuv muaj kev ua neej tsis zoo. Kuv tsis paub yuav tig xav txog los sis paub kuv tus kheej li cas li lawm, yog li ntawd thaum kuv mob siab, kuv thiaj li thov Vajtswv thov kom Nws coj kuv kev es thiaj li to taub kuv tus kheej.

Tom qab ntawd, kuv pom ib zaj lus nyob rau hauv Vajtswv txoj lus uas hais tias, “Nws yog qee yam uas nyob rau hauv tus moj yam qias vuab tsuab uas saib xyuas tej hauj lwm yam tsis mob siab thiab tsis leg lub luag hauj lwm li: Nws yog txoj kev dag ntxias uas tib neeg pheej hais txog ntag. Nyob rau hauv txhua yam uas lawv ua mas, lawv ua mus txog qhov uas hais tias ‘qhov ntawd tab tom yog lawm’ thiab ‘yuav luag yog ntag’; nws yog ib tug cwj pwm uas ‘tej zaum,’ ‘qee zaum’ xwb, thiab tau ‘plaub-tawm-ntawm-tsib’ qho xwb los tau lawm; lawv ua hauj lwm ua dog ua dig xwb, ua tau me me xwb los txaus siab lawm, thiab yeej txaus siab rau lawv txoj kev dag ntxias; lawv yeej tsis pom ib qho tseem ceeb rau hauv qhov kev saib xyuas tej hauj lwm tiag tiag li los sis qhov ua tib zoo ua li, thiab lawv haj yam tsis pom qhov yuav nrhiav qhov tseeb tej hauv paus ntsiab lus li. Qhov no tsis yog ib yam uas nyob rau hauv tus moj yam qias vuab tsuab lov? Nws puas yog ib txoj kev qhia tshwm tseeb txog txoj kev ua neej? Nws tsis yog. Qhov muab qhov ntawd hu ua kev khav theeb ces yeej yog lawm, thiab qhov muab qhov ntawd hu ua kev nyiam qhov tsis zoo los kuj tsim nyog ib yam nkaus lawm thiab—tiam sis yog yuav muab qhov ntawd hu kom yog yog kiag mas, tib lo lus uas phim hu tshaj plaws ces yog ‘dag ntxias’ xwb. Tib neeg feem coob mas yeej muaj kev dag ntxias nyob rau hauv lawv, tsuas yog nyias muaj nyias qhov txawv lawm xwb. Nyob rau hauv txhua yam mas, lawv tsuas xav lam tau lam ua thiab lam ua kom dhau xwb, thiab muaj ib tug ntxhiab ntawm txoj kev dag ntxias nyob rau hauv txhua yam uas lawv ua. Lawv coj tsis ncaj rau lwm tus thaum lawv ua tau, ua kom yooj yooj yim thaum lawv muaj peev xwm ua tau, txuag sij hawm thaum lawv txuag tau. Lawv xav rau lawv tus kheej tias, ‘Yog li ntawd kuv yuav zam dhau kom tsis txhob raug muab nthuav tawm, thiab tsis tsim teeb meem, thiab kuv tsis raug hais kom leg lub luag hauj lwm xwb, ces kuv thiaj li tuaj yeem ua kom dhau qhov no. Kuv tsis tas ua hauj lwm kom zoo li, qhov ntawd mas muaj teeb meem ntau dhau lawm.’ Cov tib neeg zoo li no tsis tau kawm ib yam dab tsi kom txawj tshaj lij li, thiab lawv tsis siv lawv tus kheej los sis tsis kam raug kev txom nyem thiab tsis kam tiv kev txom nyem rau hauv lawv tej kev kawm. Lawv tsuas yog xav tham txog qhov ntiav ntiav ntawm ib lub ncauj lus xwb ces tom qab ntawd ces lawv qhuas lawv tus kheej tias lawv tshaj lij heev txog lub ncauj lus ntawd lawm, uas ntseeg hais tias lawv twb tau kawm paub txhua yam uas tsim nyog paub lawm, ces tom qab ntawd lawv vam khom rau lub ncauj lus no kom dhau xwb. Qhov no tsis yog ib tug cwj pwm uas tib neeg coj rau lwm tus tib neeg, tej xwm txheej los sis txhua yam lod? Nws puas yog ib tug cwj pwm zoo? Nws yeej tsis yog li. Muab hais kom yooj yim ces, nws tsuas yog ‘lam ua kom dhau xwb.’ Tej kev dag ntxias zoo li no mas yeej muaj nyob rau hauv txhua tus tib neeg ntiaj teb uas qias vuab tsuab. Cov tib neeg uas muaj kev dag ntxias mas yeej xav thiab coj tus cwj pwm ‘lam ua kom dhau xwb’ rau txhua yam uas lawv ua. Cov tib neeg zoo li ntawd puas yuav ua lawv tes dej num kom zoo mas? Tsis tau li. Lawv puas ua txhua yam mus raws li lub hauv paus ntsiab lus mas? Haj yam ua tsis tau li” (Txoj Lus, Phau 4. Kev Nthuav Tawm Cov Tawm Tsam Khetos. Yam Yim: Lawv Yuav Ua Kom Lwm Tus Mloog Lawv Lus Nkaus Xwb, Tsis Yog Qhov Tseeb los sis Vajtswv li (Ntu Ob)). “Yus yuav qhia tau qhov txawv ntawm cov tib neeg zoo thiab cov tib neeg siab phem li cas? Saib lawv tus cwj pwm thiab tej kev ua lawv tej dej num, thiab saib seb lawv ua txhua yam li cas thiab coj li cas thaum muaj teeb meem tuaj. Cov tib neeg uas muaj kev coj ncaj thiab muaj meej mom mas yeej ua tib zoo ua, ua tib zoo xav, thiab mob siab rau tej lawv ua, thiab lawv txaus siab hlo tiv kev txom nyem. Cov tib neeg uas tsis muaj kev coj ncaj thiab tsis muaj meej mom mas yeej tsis quav ntsej thiab lam tau lam ua tej uas lawv ua, yeej dag tas li, yeej xav lam tau lam ua kom dhau xwb. Txawm lawv kawm dab tsi los xij, lawv tsis mob siab kawm, lawv tsis muaj peev xwm kawm, thiab txawm lawv siv sij hawm ntau npaum li cas kawm los xij, lawv yeej tseem tsis paub dab tsi li. Cov tib neeg no yog cov uas muaj tus cwj pwm qis qis” (Txoj Lus, Phau 4. Kev Nthuav Tawm Cov Tawm Tsam Khetos. Yam Yim: Lawv Yuav Ua Kom Lwm Tus Mloog Lawv Lus Nkaus Xwb, Tsis Yog Qhov Tseeb los sis Vajtswv li (Ntu Ob)). Vajtswv cov lus mas nkaug kuv lub siab heev, tshwj xeeb yog Nws cov lus uas hais tias, “Lawv coj tsis ncaj rau lwm tus thaum lawv ua tau, ua kom yooj yooj yim thaum lawv muaj peev xwm ua tau,” “tsis muaj cwj pwm thiab lub meej mom,” thiab “uas muaj tus cwj pwm qis qis.” Cov lus ntawd muab kuv tus yam ntxwv qhia tshwm kiag ntag. Kuv thiaj li paub hais tias qhov no yog kiag qhov kuv ua kuv tej dej num ntag. Txhua yam uas kuv ua kuv tsuas lam ua kom dhau, thiab tsuas ua tej yam kom txog ib tug qauv uas siv tau xwb. Kuv xav kuv tej kev ntshaw ntawm sab cev nqaij daim tawv nyob rau hauv txhua yam, nrhiav kev kom zam dhau txoj kev raug txom nyem, thiab yeej tsis xav txog seb yuav ua kuv tej dej num kom zoo li cas li. Vim xav kom tau zoo ntawm sab cev nqaij daim ntawd, thiab kom zam dhau txoj kev raug txom nyem thiab kev tiv kev txom nyem, es kuv thiaj li pheej xaiv los ua cov hauj lwm uas yooj yim dua xwb. Nyob rau hauv tus txheej txheem ntawm qhov tsim yeeb yaj duab ntawd, tab txawm thaum kuv pom teeb meem thiab qhov uas yuav tau tsim kho los xij, tsuav tsis muaj leej twg pom tej teeb meem ntawd xwb, ces kuv cia tej teeb meem ntawd nyob li ntawd. We yuav tsum tau kawm tej kev txawj, tiam sis kuv xav hais tias qhov coj kuv cov nus thiab cov viv ncaus los kawm tej kev txawj ntawd mas sab heev. Yog li ntawd vim yog txhawm rau kuv txoj kev tau zoo ntawm sab cev nqaij daim tawv, kuv thiaj li siv tej tswv yim dag thiab ntxias los ua kom kuv cov nus thiab cov viv ncaus kawm tau los ntawm lawv tus kheej, Uas txhais tau hais tias yeej tsim kho tsis tau lawv tej kev txawj li, ua rau ua tsis tau lawv tej dej num zoo, thiab ua rau tes hauj lwm ntawd nce qib qeeb. Txhua qhov hauv kuv tej dej num mas, kuv siv tej tswv yim dag thiab dag ntxias xwb, kuv yeej tsis ua tib zoo xav txog pawg ntseeg tes hauj lwm los sis qhov yuav ua kuv tej dej num kom zoo li cas li. Kuv tsis muaj kev ua neej kiag li! Kuv twm xeeb, ntxim ntxub, thiab muaj tus cwj pwm tsis zoo kiag li. Thaum kuv xav txog tej no, kuv tu siab heev thiab paub tiasmuaj kev txhaum lawm.

Tom qab ntawd, kuv nyeem Vajtswv txoj lus uas hais tias, “Nyob nraum daim tawv, ib txhia neeg mas yeej zoo li tsis muaj ib qho teeb meem loj rau tag nrho lub sij hawm uas lawv ua lawv tej dej num li. Lawv yeej tsis tau ua dab tsi phem phem li; lawv tsis tsim kev tab kaum los sis kev thab plaub, los sis taug cov tawm tsam khetos txoj kev xwb. Nyob rau hauv qhov kev ua lawv tej dej num, lawv yeej tsis muaj ib qho yuam kev los sis teeb meem loj txog lub hauv paus ntsiab lus uas tshwm sim tuaj li, tab sis, yam niag tsis ras txog hlo li, nyuam qhuav tau ob peb xyoos xwb lawv twb raug muab nthuav tawm tias tsis lees txais qhov tseeb kiag li, tias yog ib tug ntawm cov tsis ntseeg lawm. Vim li cas ho zoo li no? Lwm tus mas tsis pom ib qho teeb meem hlo li, tab sis Vajtswv mas tshawb xyuas puag hauv cov tib neeg no nruab siab kom meej, thiab Nws yeej pom qhov teeb meem ntawd. Lawv yeej ib txwm lam ua kom dhau xwb thiab yeej tsis lees txim hloov dua siab tshiab ntawm qhov ua lawv tej dej num li. Thaum sij hawm dhau mus, lawv cia li raug muab nthuav tawm lawm. Qhov tsis lees txim hloov dua siab tshiab ntawd txhais li cas? Nws txhais tau hais tias txawm lawv twb ua lawv tej dej num txhua lub sij hawm lawm los xij, lawv yeej ib txwm coj tus cwj pwm tsis zoo rau tej dej num ntawd, ib tug cwj pwm uas tsis xyuam xim thiab lam ua kom dhau xwb, ib tug cwj pwm tsis paub txob paub txhawj, thiab lawv yeej tsis txawj xav li, haj yam tsis muab kom tag nrho lawv lub siab los ua lawv tej dej num li. Tej zaum mas lawv tsuas siv zog me ntsis xwb, tab sis lawv tsuas lam ua kom zoo li twb ua lawm xwb. Lawv yeej tsis ua lawv tej dej num kom kawg lawv lub siab kawg lub ntsws li, ces lawv tej kev ua txhaum thiaj li tsis muaj chaw kawg li. Raws li Vajtswv pom mas, lawv yeej tsis tau lees txim hloov siab tshiab li; lawv yeej ib txwm lam ua kom dhau xwb, thiab yeej tsis muaj ib qho kev hloov nyob rau hauv lawv li—qhov ntawd ces yog, lawv tsis tso qhov kev phem ntawm lawv txhais tes tseg thiab hloov siab lees txim rau Nws hlo li. Vajtswv tsis pom lawv hauv tus cwj pwm ntawm txoj kev hloov siab lees txim li, thiab Nws tsis pom ib qho kev tig hloov rov qab nyob rau hauv lawv tus cwj pwm li. Lawv mas rau siab ntso rau lawv tej dej num thiab Vajtswv cov lus txib nrog ib tug cwj pwm thiab ib txoj kab ke zoo li ntawd. Thoob plaws, yeej tsis muaj kev hloov pauv nyob rau hauv tus moj yam uas tawv ncauj, tsis mloog lus no li, thiab, tshaj qhov ntawd, mas lawv yeej tsis hnov zoo li tshuav Vajtswv nqi li, yeej tsis xav hais tias lawv txoj kev lam ua dog ua dig ntawd yog ib qho kev txhaum, ib qho kev ua phem li. Nyob hauv lawv lub siab, yeej tsis muaj ib qho kev tshuav nuj tshuav nqi li, tsis muaj kev txhaum, tsis muaj kev cem-tus kheej, thiab haj yam tsis muaj kev iab liam-tus kheej li. Thiab, thaum sij hawm tau dhau mus lawm, Vajtswv pom hais tias hom neeg no ces cawm tsis tau lawm. Tsis hais Vajtswv yuav hais li cas li, thiab tsis hais lawv yuav hnov pes tsawg qhov lus qhuab qhia los sis lawv yuav to taub qhov tseeb npaum li cas li, yeej tsis txhawb lawv lub siab li thiab lawv tus cwj pwm yeej tsis hloov los sis tig rov qab li. Vajtswv pom qhov no ces Nws thiaj li hais tias: ‘Tsis muaj kev cia siab rau tus neeg no lawm. Tsis muaj ib yam dab tsi Kuv hais es yuav txhawb tau lawv lub siab li, thiab tsis muaj ib yam dab tsi Kuv hais es yuav tig tau lawv rov qab li. Yeej tsis muaj ib txoj hau kev twg yuav hloov pauv tau lawv li lawm. Tus neeg no tsis zoo tsim nyog ua lawv tes dej num lawm, thiab lawv tsis tsim nyog ua hauj lwm nyob hauv Kuv lub tsev.’ Vim li cas Vajtswv thiaj hais li no? Nws yog vim thaum lawv ua lawv tes dej num thiab ua hauj lwm mas lawv pheej lam ua kom dhau xwb. Txawm lawv yuav raug qhuab qhia thiab txawm yuav uv thiab ua siab ntev rau lawv ntau npaum li cas lawm los xij, qhov ntawd yeej tsis muaj dab tsi tshwm sim thiab ua tsis tau kom lawv hloov siab lees txim los sis hloov pauv kiag li. Nws yeej ua tsis tau kom lawv ua lawv tes dej num kom zoo, nws yeej ua tsis tau kom lawv taug txoj kev uas nrhiav qhov tseeb li. Yog li ntawd tus neeg no ces cawm tsis tau lawm. Thaum Vajtswv txiav txim siab hais tias ib tug neeg mas cawm tsis tau lawm, ces Nws puas tseem yuav tuav tus neeg no khov khov tseg mas? Nws yuav tsis tuav lawm. Vajtswv yuav cia lawv mus” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). “Qhov koj xav li cas txog Vajtswv cov lus txib ntawd mas tseem ceeb heev, thiab qhov no yog ib qho loj heev. Yog koj tsis tuaj yeem ua yam uas Vajtswv tau muab tso rau tib neeg ua lawm ntawd kom tiav, ces koj tsis tsim nyog ua neej nyob rau hauv Nws xub ntiag lawm thiab koj yuav tsum raug rau txim. Nws yeej zoo thiab ncaj ncees lawm tias tib neeg yuav tsum ua kom Vajtswv cov lus txib uas tau muab tso rau lawv lawm ntawd kom tiav hlo. Qhov no yog tib neeg lub luag hauj lwm tseem ceeb tshaj plaws, thiab tseem ceeb npaum nkaus li lawv txoj sia. Yog koj tsis mob siab ua Vajtswv cov lus txib, ces koj tab tom ntxeev siab rau Nws rau yam uas phem tshaj plaws. Hauv qhov no, koj yog tus neeg ntxim tu siab tshaj Yudas lawm thiab, thiab yuav tsum raug foom phem” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Yuav Paub Tib Neeg Tus Yeeb Yam Li Cas). Kuv nyeem Vajtswv txoj lus tas zog li. Kuv thiaj li ras dheev hais tias yav dhau los, txawm nyob rau sab nraud zoo li ua kuv tej dej num los xij, hauv kuv lub siab, kuv ntxeev siab rau Vajtswv lawm. Nyob rau hauv kuv tej dej num, kuv tsuas xav txog kuv tej kev ntshaw ntawm sab cev nqaij daim tawv thiab zam kom txhob raug kev txom nyem xwb, thiab kuv lam ua ua kom dhau uas yog siv tej tswv yim dag thiab ntxias dag xwb. Tab txawm thaum kuv ua tau kuv tes hauj lwm zoo dua los xij, kuv tsis ua li, vim kuv xav hais tias txawm ua tsis tau tes hauj lwm ntawd kom zoo zoo los xij, yam tsawg kawg tsuav yog ua tiav xwb, ces qhov ntawd yeej txaus lawm. Kuv yeej tsis saib qhov teeb meem ntawm qhov kuv tus kheej lam ua kom dhau ntawd kom tseem ceeb li, thiab kuv yeej tsis tig xav txog los sis ua txhua yam kom to taub kuv tus kheej li. Tom qab ntawd, kuv tus thawj coj thiaj li muab kuv nthuav tawm thiab ceeb toom rau kuv, tiam sis kuv tsis muaj qhov lees txim hloov dua siab tshiab ib qho me me li, tseem xav txog kuv tej kev ntshaw ntawm sab cev nqaij daim tawv xwb. Thaum kuv xav txog qhov yuav tsum tau siv zog ua kuv tes dej num thiab tiv kev txom nyem ntawd, ces kuv txawm tsis xav ua tes dej num ntawd ntxiv li lawm. Vim li cas kuv thiaj li txhav thiab tawv ncauj ua luaj li? Kuv tsuas xav txog kuv tej kev ntshaw ntawm sab cev nqaij daim tawv xwb, tsis nrhiav qhov tseeb los sis tig xav txog kuv tus kheej li, thiab pheej tawm tsam Vajtswv yam tawv ncauj ntshuav. Kuv mas ntxeev siab heev li! Tsis yog kuv ua tsis tau kuv tej dej num kom zoo xwb, kuv haj tseem lam tau lam ua los dag Vajtswv, thiab haj tseem tsis kam txais yuav kuv tes dej num lawm thiab. Qhov no tsis yog ib txoj kev ntxeev siab rau Vajtswv lod? Vajtswv tus moj yam ncaj ncees tsis zam kev ua txhaum li, thiab Vajtswv tsis nyiam txhua yam uas kuv tau ua lawm ntawd kiag li. Qhov kuv raug rho tawm ntawd qhia txog Vajtswv txoj kev ncaj ncees. Thaum kuv ras dheev li no lawm, kuv thiaj li ntshai me ntsis. Kuv kuj tu siab rau txoj kev ua tej yam uas ua rau Vajtswv mob siab thiab. Kuv lam ua kom dhau li no tsis tau mus ntxiv lawm. Kuv yuav tsum tau lees txim hloov dua siab tshiab thiab hloov pauv.

Tom qab ntawd, kuv nrog kuv cov nus thiab cov viv ncaus qhia txoj moo zoo. Vim kuv tsis paub tej hauv paus ntsiab lus thiab tsis txawj nrog tib neeg tham, thiaj li zoo li tes dej num ntawd mas nyuaj nyuaj li, thiab kuv tsis xav siv zog ua hauj lwm los sis tiv kev txom nyem dua lawm. Tiam sis kuv xav txog kuv tus cwj pwm uas lam tau lam ua rau kuv tes dej num yav tas los, ces kuv thiaj li paub hais tias kuv tsis tsim nyog khiav thaum kuv ntsib teeb meem li yav tas los lawm. Thaum kuv paub li ntawd lawm, kuv zoo siab me ntsis.

Tom qab ntawd, kuv kuj tig xav txog kuv tus kheej thiab, thiab xav paub tias vim li cas kuv thiaj li xav thim rov qab thaum kuv tes dej num muaj teeb meem. Tus yeeb yam uas tswj kuv thaum qhov ntawd tshwm sim yog dab tsi? Tom qab ntawd, kuv saib ib daim yeeb yaj duab uas nyeem txog Vajtswv txoj lus. Vajtswv Tus Uas Muaj Hwj Chim Loj Kawg Nkaus hais tias, “Hnub no, koj tsis ntseeg cov lus Kuv hais, thiab koj tsis mob siab mloog li; thaum lub sij hawm los txog kom muab tes hauj lwm no nthuav tawm thiab koj pom tag nrho nws lawm, koj yuav khuv xim, thiab nyob rau lub sij hawm ntawd ces koj yuav yoob tag. Yeej muaj tej koob hmoov, tab sis koj tsis paub siv tej koob hmoov ntawd, thiab yeej muaj qhov tseeb, tab sis koj tsis nrhiav nws. Tsis yog koj coj tej kev zoo tsis txaus ntawd los rau koj tus kheej xwb lod? Hnub no, txawm hais tias kauj ruam tom ntej ntawm Vajtswv tes hauj lwm tseem tsis tau pib, los yeej tsis muaj dab tsi ntxiv txog tej lus txib rau koj thiab tej yam uas yuav kom koj coj mus ua neej. Tseem muaj hauj lwm ntau heev, thiab muaj ntau qhov tseeb heev; ua tej ntawd yeej tsis muaj nuj nqis tsim nyog koj yuav tsum paub li lod? Ua Vajtswv txoj kev qhuab ntuas thiab kev txiav txim tsis muaj cuab kav yuav tsa tau koj tus ntsujplig kom sawv li lod? Vajtswv qhov kev qhuab ntuas thiab kev txiav txim tseem tsis muaj peev xwm ua rau koj ntxub koj tus kheej thiab lod? Koj puas txaus siab nyob hauv qab Ntxwgnyoog txoj kev haub ntxias, nrog kev thaj yeeb thiab kev xyiv fab, thiab ib qho kev tau zoo me me rau cev nqaij daim tawv? Koj tsis yog tus qis tshaj plaws ntawm tag nrho sawv daws lod? Tsis muaj leej twg yuav ruam tshaj cov uas tau pom kev cawm dim lawm tab sis tsis nrhiav kev kom muab tau nws li; cov no yog cov neeg uas ntshaw lawv tus kheej rau cev nqaij daim tawv thiab nyiam Ntxwgnyoog. Koj cia siab hais tias koj txoj kev ntseeg Vajtswv yuav tsis muaj ib qho kev sib tw los sis kev ceeb laj txom nyem loj li, los sis ib qho kev txom nyem me me li. Koj tsuas nrhiav tej yam uas tsis muaj nuj nqis nkaus xwb, thiab koj tsis muab ib qho nuj nqis dab tsi rau lub neej txoj sia li, tab sis tsuas muab koj tej kev xav uas luam thuam heev ntawd tso ua ntej qhov tseeb nkaus xwb. Koj mas tsis muaj ib qho nuj nqis kiag li! Koj ua neej nyob li ib tug npua—tseem yuav muaj dab tsi txawv ntawm koj, thiab tej npua thiab tej dev? Ua tsis yog cov uas tsis nrhiav qhov tseeb, thiab tsuas hlub cev nqaij daim tawv xwb, tag nrho tsis yog tej tsiaj nyaum xwb lod? Ua cov tuag lawm uas tsis muaj ntsujplig ntawd tag nrho tsis yog tej niag cev tuag mus taus kev xwb lod? … Kuv muab tib neeg lub neej tiag tiag pub rau koj, tab sis koj tseem tsis nrhiav thiab. Koj ces puas yog tsis txawv ib tug npua los sis ib tug dev li mas? Npua yeej tsis nrhiav tib neeg lub neej li, lawv yeej tsis nrhiav kev kom raug yaug kom dawb huv li, thiab lawv yeej tsis to taub hais tias lub neej txoj sia yog dab tsi li. Txhua hnub, tom qab noj tsau npo lawm, lawv tsuas tsaug zog nkaus xwb. Kuv tau muab txoj kev tiag rau koj, tab sis koj tseem muab tsis tau nws thiab: Koj ces plhws tes qhuav xwb. Koj puas kam ua li no ntxiv mus rau lub neej no, lub neej ntawm ib tug npua? Dab tsi ho tseem ceeb rau cov neeg zoo li ntawd muaj txoj sia nyob mas? Koj lub neej mas ntxim ntxub heev thiab qias lwj liam dhau heev lawm, koj nyob nrog kev qias neeg thiab kev plees kev yi, thiab koj tsis nrhiav ib lub hom phiaj dab tsi li; ua koj lub neej tsis yog lub uas qias lwj liam tshaj plaws lod? Koj puas muaj lub siab tawv txaus yuav ntsia Vajtswv mas? Yog koj pheej coj li no mus ntxiv xwb, ces puas yog koj yuav tsis tau dab tsi li mas? Txoj kev tiag twb muab rau koj lawm, tab sis qhov uas seb koj puas yuav muab tau nws mas nyob ntawm koj tus kheej txoj kev nrhiav xwb” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Petus Qhov Kev Ntsib Kev Pom: Nws Qhov Kev Paub txog Kev Qhuab Ntuas thiab Kev Txiav Txim). Vajtswv txhua lo lus nug mas nkaug kuv lub siab, thiab kuv mloog mas zoo li kuv tshuav Vajtswv nqi ntau heev. Kuv xav txog qhov tus Vajtswv uas yug los ua neeg nthuav tawm ntau qhov tseeb los saib xyuas peb thiab pab peb, kom peb thiaj li tau txais qhov tseeb, tso peb tus moj yam qias vuab tsuab tseg, thiab muaj lub hwv tsam tau dim. Qhov no yog Vajtswv txoj koob hmoov uas loj tshaj plaws rau noob neej. Tus ntse tiag tiag yuav saib lub hwv tsam uas tau ua Vajtswv tes hauj lwm ntawd muaj nqis, thiab siv lawv lub sij hawm los caum qhov tseeb, ua tej dej num ntawm ib tug neeg uas raug tsim tawm los kom tiav, hloov pauv tus moj yam ntawm lawv lub neej txoj sia thaum ua lawv tej dej num, thiab thaum kawg to taub qhov tseeb thiab raug Vajtswv cawm tau tiag tiag. Tiam sis tus dig muag thiab tsis paub dab tsi mas siv zog rau txoj kev xyiv fab ntawm sab cev nqaij daim tawv thiab ua kom nyob taus xwb, thiab lawv tsis siv zog ua hauj lwm los caum qhov tseeb li. Lawv lam ua kom dhau thiab siv me ntsis dag zog los ua lawv tej dej num xwb, thiab txawm lawv yuav ntseeg ntev npaum li cas los xij, lawv yeej tsis to taub qhov tseeb, tsis hloov pauv tus moj yam ntawm lawv lub neej txoj sia li, thiab thaum kawg ces thiaj li raug Vajtswv muab ntiab tawm mus lawm. Kuv xav txog kuv tus kheej. Kuv tsis yog kiag hom tib neeg uas tsis paub dab tsi no lod? Tej tswv yim phem zoo li “Ua neej ywj siab” thiab “Tub nkeeg los nws muaj nws koob hmoov” yog tej hauv paus ntsiab lus uas kuv ua neej raws. Txhua txhua hnub kuv ua li qub, lam ua hauj lwm kom nyob taus, thiab cia yus tus kheej tau zoo rau ntawm sab cev nqaij daim tawv xwb. Kuv ntseeg Vajtswv los tau ntau lub xyoo lawm yam tsis caum qhov tseeb los sis mob siab txog qhov hloov pauv kuv lub neej txoj sia tus moj yam li thiab seb kuv tej dej num puas mus raws li Vajtswv tej kev npaj siab li. Kuv txoj kev xyiv fab ntawm sab cev nqaij daim tawv mas tseem ceeb rau kuv dua li qhov tseeb, yog li ntawd thaum twg uas kuv yuav tsum tau raug kev txom nyem los sis tiv kev txom nyem nyob rau hauv kuv tej dej num, ces kuv lam ua kom dhau thiab tig mus siv tej tswv yim dag thiab dag ntxias lawm xwb, ua rau kuv tej dej num tsis tau txiaj ntsim thiab ua rau pawg ntseeg tes hauj lwm qeeb. Thiab tab txawm zoo li ntawd los, kuv tsis hnov tu siab los sis tsis hnov txhaum li. Qhov kuv cia yus tus kheej tau zoo ntawd ua rau kuv ua phem, tsis quav ntsej los tsim kho, thiab tsis txawj xav li. Tsis yog kuv nkim kuv lub neej txoj sia xwb lod? Thaum kawg kuv thiaj li pom hais tias cov kuab lom phem no yog tej kev nkag siab yuam kev uas Ntxwgnyoog siv los dag tib neeg. Tej kev nkag siab yuam kev no ua rau tib neeg caum kev tau zoo, tsis nrhiav kev tsimkho, ua phem, thiab thaum kawg tuag rau hauv txoj kev tsis paub dab tsi li. Qhov kuv poob kuv tes dej num no yog tim kuv tus kheej xwb. Kuv tub nkeeg dhau lawm, kuv tsis mob siab rau kuv tus kheej tus cwj pwm, thiab kuv tsis tsim nyog txhua tus tso siab rau, uas qias kuv cov nus thiab cov viv ncaus thiab ua rau Vajtswv tsis nyiam kuv kiag li. Nyob rau yav tas los mas, kuv xav hais tias tej dej num uas yuav tsum tau ua kom zoo thiab ntau txoj hauj lwm ntawd mas zoo ib yam nkaus li txoj kev txom nyem ntag. Tiam sis qhov no tsis yog kev txom nyem rau kuv tej dej num kiag li. Tseeb tiag, kuv tus yeeb yam mas tub nkeeg thiab twm xeeb dhau lawm, thiab kuv txhawj txog lub cev nqaij daim tawv dhau lawm. Txawm peb yuav tsum tau raug kev txom nyem thiab tiv kev txom nyem thaum muaj tej kev nyuaj nyob rau hauv peb tej dej num los xij, tej no puav leej yog tej uas peb tiv taus, vim Vajtswv yeej tsis muab tej nra uas peb ris tsis taus rau peb li. Los ntawm tej kev nyuaj no, kuv tus moj yam qias vuab tsuab thiab tej kev tu ncua thiaj li raug muab nthuav tawm, uas ua rau kuv paub kuv tus kheej, nrhiav qhov tseeb los daws tej teeb meem ntawd, thiab hloov pauv tus moj yam ntawm kuv lub neej txoj sia. Nyob rau tib lub sij hawm ntawd, kuv kawm paub los vam khom rau Nws thaum ntsib tej kev nyuaj, thiab muaj txoj kev ntseeg tiag. Nyob rau yav tas los mas, kuv tsis paub dab tsi, dig muag, thiab tsis to taub Vajtswv txoj kev npaj siab li. Kuv plam ntau lub hwv tsam uas tau txais qhov tseeb thiab raug Vajtswv ua kom zoog tiav log lawm, thiab kuv cia lub sij hawm uas zoo kawg nkaus no dhau mus yam tsis muaj qab hau dab tsi li. Txawm kuv muaj kev tau zoo ntawm sab cev nqaij daim tawv, thiab tsis raug kev txom nyem los sis tsis tiv kev txom nyem los xij, kuv tsis muaj qhov tseeb qhov muaj tiag thiab daws tsis tau kuv tus moj yam qias vuab tsuab li, kuv ua tsis tau tej num uas nyob rau hauv kuv tej dej num kom zoo tuaj ntxiv li, kuv ua rau pawg ntseeg tes hauj lwm qeeb, thiab kuv ua rau qias Vajtswv. Yog kuv pheej ua neej yam paub tsis meej zoo li no txuas ntxiv mus, ces thaum kawg kuv yeej yuav plam Vajtswv txoj kev cawm dim xwb xwb li. Thaum ras txog txhua yam no lawm, kuv thiaj li lees txim hloov dua siab tshiab, kuv tsis nyiam kuv tus kheej kiag li, thiab kuv tsis xav ua lub neej zoo li ntawd mus ntxiv lawm.

Muaj ib hnub, thaum kuv tab tom pe hawm, kuv nyeem lwm zaj lus ntawm Vajtswv txoj lus. “Kev tshawb nrhiav nyob rau hnub no yog txhawm rau kev tsim lub hauv paus rau tes dej num tom ntej, kom Vajtswv thiaj siv koj thiab koj thiaj tuaj yeem ua tim khawv tau rau Nws. Yog koj muab qhov no ua koj lub hom phiaj ntawm koj txoj kev tshawb nrhiav, koj yuav muaj cuab kav tau txais tus Vajntsujplig Dawb Huv. Koj yim tsa koj lub hom phiaj siab npaum li cas nyob rau ntawm txoj kev tshawb nrhiav, ces koj yim huab taus txais kev ua kom zoo tshaj plaws. Koj yim tshawb nrhiav qhov tseeb npaum li cas, ces tus Vajntsujplig Dawb Huv yim huab ua hauj lwm rau koj npaum li ntawd. Koj yim siv zog tshawb nrhiav npaum li cas, koj yim huab tau txais ntau npaum li ntawd. Tus Vajntsujplig Dawb Huv ua tib neeg kom zoo tshaj plaws raws nraim li qhov nyob hauv lawv tus yam ntxwv. Muaj qee tus tib neeg hais tias lawv tsis txaus siab cia lawv tus kheej rau Vajtswv siv los sis raug ua kom zoo tshaj plaws los ntawm Nws, vim lawv tsuas xav kom lawv lub cev tau nyob nyab xeeb thiab tsis raug kev txom nyem. Muaj qee tus tib neeg tsis txaus siab nkag mus rau lub nceeg vaj tab sis ho txaus siab nkag mus rau hauv lub qhov ntuj tob tsis muaj chaw tws. Yog li ntawd, Vajtswv kuj yuav ua raws li koj qhov kev ntshaw. Qhov twg yog yam uas koj tshawb nrhiav, Vajtswv yuav ua kom nws tshwm sim tuaj. Yog li ntawd yam uas koj tab tom tshawb nrhiav tam sim no yog dab tsi? Puas yog kev raug ua kom zoo tshaj plaws? Koj tej kev ua thiab tej yam ntxwv tam sim no puas yog txhawm rau kev raug ua kom zoo tshaj plaws los ntawm Vajtswv thiab caum cuag Nws? Koj yuav tsum ntsuas koj tus kheej tas li nyob rau hauv koj lub neej txhua hnub. Yog koj muab tag nrho koj lub siab rau txoj kev tshawb nrhiav ntawm ib lub hom phiaj, Vajtswv yeej yuav ua kom koj zoo tshaj plaws. Ntawd yog txoj hau kev ntawm tus Vajntsujplig Dawb Huv. Txoj hau kev coj ntawm tus Vajntsujplig Dawb Huv rau tib neeg yog los ntawm lawv qhov kev tshawb nrhiav. Yog koj yim nqhis txoj kev raug ua kom zoo tshaj plaws thiab caum cuag Vajtswv npaum li cas, tus Vajntsujplig Dawb Huv yim yuav ua hauj lwm nyob rau ntawm koj npaum li ntawd. Koj yim poob ntawm txoj kev tshawb nrhiav npaum li cas, qhov tsis zoo thiab thaub qab ntawm koj yuav muaj ntau tuaj npaum li ntawd, koj yim tsis pub lub cib fim rau tus Vajntsujplig Dawb Huv ua hauj lwm; thaum lub sij hawm dhau mus, tus Vajntsujplig Dawb Huv yuav tso koj tseg. Koj puas xav tau txais kev ua kom zoo tshaj plaws los ntawm Vajtswv? Koj puas xav caum cuag Vajtswv? Koj puas xav raug siv los ntawm Vajtswv? Nej tsim nyog yuav tsum ua txhua yam txhawm rau kev raug ua kom zoo tshaj plaws, raug caum cuag, thiab raug siv los ntawm Vajtswv, kom lub qab ntuj khwb thiab txhua yam tuaj yeem pom Vajtswv tej kev ua ntawd tshwm sim nyob rau hauv nej. Nej yog tus tswv ntawm txhua yam, thiab nyob nruab rab ntawm txhua yam, nej yuav ua rau Vajtswv zoo siab rau cov lus tim khawv thiab lub yeeb koob los ntawm nej—qhov no yog pov thawj qhia tau tias nej yog tus tib neeg tau txais koob hmoov ntau tshaj plaws ntawm txhua tiam!” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Cov Tib Neeg Uas Tus Yam Ntxwv Tau Hloov Pauv Lawm Yog Cov Uas Tau Paub Txog Qhov Muaj Tiag Ntawm Vajtswv Cov Lus Lawm). “Koj yuav tsum raug kev txom nyem rau qhov tseeb, koj yuav tsum muab koj tus kheej rau qhov tseeb, koj yuav tsum tiv kev poob ntsej muag rau qhov tseeb, thiab yog yuav kom tau qhov tseeb ntau dua ces koj yuav tsum muaj kev txom nyem kom ntau. Qhov no yog qhov uas koj tsim nyog ua. Koj yuav tsum tsis txhob muab qhov tseeb cuam pov tseg es tsuav kom tau lub neej thaj yeeb lug nrog tsev neeg xwb, thiab koj yuav tsum tsis txhob poob koj lub meej mom kom mus tag ib sim neej thiab txoj kev ncaj ncees rau tej qho kev zoo siab ib nyuag pliag xwb. Koj yuav tsum nrhiav tag nrho tej uas zoo nkauj thiab zoo, thiab koj yuav tsum nrhiav ib txoj kev hauv lub neej uas muaj qab hau dua. Yog koj ua lub neej qias vuab tsuab, thiab tsis nrhiav ib qho hom phiaj li, tsis yog koj nkim koj lub neej los? Koj yuav tau dab tsi los ntawm ib lub neej zoo li ntawd? Koj yuav tsum muab tag nrho tej kev kaj siab ntawm cev nqaij daim tawv tso pov tseg es kom tau ib qho tseeb, thiab yuav tsum tsis txhob muab tag nrho qhov tseeb cuam pov tseg es kom tau ib qho kev kaj siab me me nkaus xwb. Cov neeg zoo li no ces yeej tsis muaj kev ncaj ncees thiab lub meej mom li; qhov uas muaj lawv nyob ntawd ces tsis muaj nuj nqis dab tsi li!” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Petus Qhov Kev Ntsib Kev Pom: Nws Qhov Kev Paub txog Kev Qhuab Ntuas thiab Kev Txiav Txim). Kuv to taub los ntawm Vajtswv txoj lus los hais tias: Yuav kom tau txais qhov tseeb nyob rau hauv peb tej dej num mas, peb yuav tsum tau tig tawm tsam cev nqaij daim tawv es xyaum ua raws li qhov tseeb, ces tom qab ntawd Vajtswv thiaj li yuav ua kom peb zoo tiav log. Qhov no yog txoj kev ua neej nyob uas muaj qab hau thiab muaj nqis tshaj plaws. Yog peb tso qhov tseeb tseg txhawm rau txoj kev tau zoo ntawm sab cev nqaij daim tawv uas nyob ib ntus xwb, ces peb yuav ua neej nyob tsis muaj meej mom, plam Vajntsujplig tes hauj lwm, thiab thaum kawg raug Vajtswv muab ntiab tawm thiab plam peb lub hwv tsam tau txais txoj kev cawm dim. Kuv kuj kawm paub hais tias yuav kom daws tau qhov teeb meem ntawm qhov cia yus tus kheej tau zoo ntawm sab cev nqaij daim tawv mas, peb yuav tsum muaj lub siab uas caum qhov tseeb, tig xav txog peb tus kheej tas li thaum muaj tej yam tshwm sim, mob siab siv peb lub zog rau peb tej dej num, thiab thaum peb ntsib tej kev nyuaj, thiaj li tsis xav txog cev nqaij daim tawv, tig tawm tsam peb tus kheej tseg, es tiv thaiv pawg ntseeg tes hauj lwm. Qhov no yog qhov tau txais Vajntsujplig txoj kev coj qhia thiab tes hauj lwm. Thaum kuv paub txog tej no lawm, kuv lub siab thiaj li kaj lug lawm, thiab kuv cog lus hais tias kuv yuav tig tawm tsam cev nqaij daim tawv thiab siv tag nrho kuv lub zog los ua kuv tej dej num.

Tom qab ntawd, kuv nco ntsoov xav txog qhov yuav tshaj tawm txoj moo zoo ntawd kom zoo li cas. Thaum kuv paub tej hauv paus ntsiab lus tsis meej, kuv nug kuv cov nus thiab cov viv ncaus, thiab kuv npaj sij hawm los nrog txhua tus kawm. Tom qab ntawd, thaum muaj ntau yam uas yuav tsum tau ua kom tiav los tshaj tawm txoj moo zoo, kuv mloog zoo li tej ntawd tsis nyuaj ntxiv li lawm. Tiam sis, kuv mloog zoo li tej ntawd yog tej uas kuv yuav tsum tau ua thiab yog kuv lub luab hauj lwm lawm xwb. Txawm txhua hnub kuv khwv heev los xij, kuv hnov txhawb zog heev.

Muaj ib hnub, kuv tus thawj coj tuaj ntsib kuv thiab hais kom kuv rov qab mus ua yeeb yaj duab dua yam xav tsis txog li. Thaum kuv hnov qhov xov no lawm, kuv zoo siab heev. Kuv nco tau qhov kuv quav ntsej txog lub cev nqaij daim tawv, thiab lam ua kuv tej dej num kom dhau nyob rau yav dhau los li cas, mas kuv mloog zoo li tshuav Vajtswv nuj nqis. Kuv kho tsis tau kuv tej kev ua txhaum nyob rau yav dhau los lawm, yog li ntawd tam sim no kuv tsuas pauj tau Vajtswv txoj kev hlub rov qab nyob rau hauv kuv tej dej num lawm xwb. Tom qab ntawd, thaum kuv ntsib tej kev nyuaj nyob rau hauv kuv tej dej num, kuv nco ntsoov thov Vajtswv thiab xav seb yuav daws tej teeb meem ntawd li cas. Muaj ib zaug, muaj ib qho ntawm kuv cov hauj lwm tawm los tsis tshua zoo, thiab tus thawj coj pab pawg thiab tus thawj saib xyuas ntawd tsis paub xyov yuav kho qhov ntawd li cas. Kuv los kuj daig rau hauv txoj kev nyuaj lawm thiab tsis paub xyov yuav pib kho qhov ntawd li cas li thiab. Kuv thiaj li xav hais tias, “Yog kuv sim kho qhov ntawd tas li, siv kuv lub sij hawm, thiab kho qhov no, kuv tsis paub xyov kuv puas yuav muaj peev xwm kho qhov ntawd kom yog, yog li ntawd tej zaum tsim nyog cia lwm tus kho qhov no.” Kuv thaij li ras dheev hais tias tej kev xav ntawd yog kuv tab tom sim zam kom dhau txoj kev nyuaj dua lawm, yog li ntawd kuv thiaj li maj nroos los thov Vajtsw. Kuv nco tau Vajtswv cov lus uas hais tias, “Thaum muaj ib teg dej num los poob rau koj kawm, thiab muab tes dej num ntawd tso rau koj ua lawm, tsis txhob xav txog qhov seb yuav zam kom dhau tej kev nyuaj ntawd li cas li; yog muaj qee yam uas daws nyuaj, tsis txhob muab qhov kev nyuaj ntawd tso tseg es tsis quav ntsej qhov kev nyuaj ntawd. Koj yuav tsum tab meeg daws qhov kev nyuaj ntawd. Koj yuav tsum nco ntsoov txhua lub sij hawm hais tias Vajtswv nrog nraim tib neeg, thiab lawv tsuas yuav tsum thov Vajtswv thiab nrhiav Nws nkaus xwb yog lawv muaj ib qho kev nyuaj dab tsi, thiab tias nyob ntawm Vajtswv mas, tsis muaj dab tsi nyuaj li. Koj yuav tsum muaj txoj kev ntseeg no” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Vajtswv txoj lus ua rau kuv muaj ib txoj kev xyaum ua raws lawm. Txawm peb yuav ntsib teeb meem thiab kev nyuaj dab tsi nyob rau hauv peb tej dej num los xij, peb yuav tsum vam khom rau Vajtswv los nrhiav kev daws tej teeb meem ntawd. Peb yuav tsum tsis txhob ua txhua yam los zam kom dhau tej kev nyuaj los sis khiav ntawm peb tej dej num mus vim kev txom nyem ntawm sab cev nqaij daim tawv xwb. Ua li ntawd yog kev ntxeev siab thiab kev coj tsis ncaj rau Vajtswv. Thaum kuv ras dheev li no lawm, kuv thiaj li cog lus rau kuv tus kheej hais tias zaum no, kuv yuav vam khom rau Vajtswv, tig tawm tsam cev nqaij daim tawv, thiab ua hauj lwm los kho qhov ntawd. Yog li ntawd kuv thiaj li ua siab txias txias thiab kho qhov ntawd tag los kho dua, ces thaum kawg thiaj li kho tau lawm. Tom qab saib daim yeeb yaj duab ntawd lawm, txhua tus xav hais tias zoo thiab tsis muaj lus hais li lawm. Tom qab xyaum ua li no lawm, kuv lub siab thiaj li thaj yeeb thiab kaj siab lug lawm. Kuv xav hais tias qhov tiv kev txom nyem nyob rau hauv kuv tej dej num ntawd yeej yog ib txoj koob hmoov los ntawm Vajtswv los tiag tiag li Ua Vajtswv tsaug!