Nyob rau lub Yim Hli xyoo 2021, kuv tau ywg dej rau cov los ntseeg tshiab hauv pawg ntseeg. Ib ntus tom qab ntawd, kuv pom hais tias ib tug los tshiab muaj ib tug moj yam khav theeb, pheej ua raws li nws tus kheej tej tswv yim xwb, thiab ua tsis tau hauj lwm zoo nrog nws cov nus thiab cov viv ncaus li. Thaum lwm tus muab nws tej teeb meem qhia tawm mas, nws tsis kam lees txais qhov ntawd, cav kom muaj yeej muaj swb li, thiab txiav txim thiab teem txim rau tib neeg nyob tom lawv nraub qaum, ua rau lwm tus mloog zoo li raug nws txwv thiab cuam tshuam pawg ntseeg tes hauj lwm. Raws li tej hauv paus ntsiab lus mas, nws tsis phim ua tes dej num no, thiab kuv tsim nyog qhia nws thiab muab nws rho tawm ntawm nws tes dej num mus. Tiam sis nyob rau lub sij hawm ntawd mas, kuv tab tom muaj qee qhov teeb meem. Qhov ntawd yog qhov kuv ua thawj coj thawj zaug, kuv yeej tsis tau qhia leej twg txog lub ncauj lus no li, thiab kuv tsis paub xyov yuav qhia li cas, tiam sis kuv kuj tsis xav nug tus thawj saib xyuas li thiab vim kuv ntshai tsam nws yuav xav hais tias kuv tsis muaj peev xwm paub qhov no, pom tej uas kuv ua tsis tau zoo tseeb tseeb, ces yuav tsis saib kuv muaj nqis los sis tsis cob qhia kuv ntxiv lawm. Kuv kuj xav hais tias tus los tshiab no yog neeg Fabkis, tiam sis kuv tsis tshua txawj hais lus Fabkis thiab, yog li ntawd yog kuv tsis to taub tus los tshiab ntawd cov lus, los sis kuv piav qhia tsis tau qhov uas kuv xav hais ntawd, ces tus los tshiab ntawd yuav muaj tej kev xav phem thiab thim rov qab, ces kuv yuav tau ris qhov ntawd. Kuv tus kheej thiaj li xav mus xav los, ces thaum kawg txawm muab qhov ntawd tso rau tus Nus Kaus, uas yog tus thawj coj ntawm tus los tshiab ntawd pawg ntseeg saib xyuas lawm. Kuv haj tseem nrhiav tau ib txoj kev los daws thiab, hais tias qhov no yog kev cob qhia rau tus Nus Kaus, qhia nws tias nws tus kheej yuav daws teeb meem li cas. Tiam sis tom qab ntawd, vim tus Nus Kaus tsis hais kom meej meej rau thaum qhia, es tus los tshiab ntawd thiaj li thim rov qab thiab tsis ntseeg lawm. Vim li no, tus Nus Kaus thiaj li ntxhov siab heev. Nws hais tias nws qhia tau ruam dhau lawm. Nyob rau lub sij hawm ntawd, kuv tsis qhia rau nws kom los soj ntsuam kuv qhov teeb meem li. Kuv qhia nws cuag nkaus li tsis muaj dab tsi tshwm sim thiab cia li hla tej uas nws ua yuam kev li lawm. Kuv tsis nthuav kuv qhov xwm txheej tiag tiag ntawd tawm thiab cia nws xav yuam kev hais tias kuv tuaj yeem daws tau teeb meem.

Ob peb hnub tom qab ntawd, nyob rau hauv ib lub rooj sib tham, peb tus thawj coj hais tias ib co neeg ua hauj lwm saib xyuas ntawd tsis mob siab ua lawv tej dej num li. Lawv tus kheej tsis daws teeb meem li, tiam sis ho kom tus thawj coj uas los tshiab ntawd daws, ua rau daws tsis tau tej teeb meem ntawd thiab ua rau cov los tshiab tawm ntawm pawg ntseeg mus lawm. Thaum kuv hnov tus thawj coj ntawd muab kuv qhov teeb meem qhia tawm ncaj qha, kuv cia li txaj muag kiag tam sim ntawd. Kuv txaj muag heev li. Kuv xav hais tias, “Cov thawj saib xyuas thiab cov neeg ua hauj lwm saib xyuas ntawm txhua pawg ntseeg puav leej tuaj rau ntawm no. Tam sim no txhua tus yuav xav li cas rau kuv? Lawv txhua tus yuav tsum xav hais tias kuv mas tso siab tsis tau rau kiag li.” Thaum tus thawj coj hais tag lawm, nws hais kom txhua tus hais lus. Kuv xav hais tias, “Tus thawj coj ntawd hais lus ncaj rau ntawm no dhau lawm, thiab kuv yog tus neeg ua txhaum. Yog kuv tsis nquag qhia tam sim no, qhov ntawd yuav tsis zoo li kuv tsis muaj ib tug cwj pwm uas lees txais kev qhuab qhia li lod? Qhov ntawd yeej yuav ua rau kuv tus thawj coj tsis nyiam kiag li.” Yuav kom kuv lub ntsej muag rov qab zoo li qub mas, kuv yuav tsum qhia ua ntej, thiab hais ua lub suab quaj dhi hais tias, “Kuv tu siab heev uas kuv cia qee yam zoo li no tshwm sim. Tam sim no kuv pom hais tias kuv yog ib tug neeg uas tsis leg lub luag hauj lwm li.” Tom qab qhia tawm “kev lees paub” txog kuv tus kheej lawm, kuv txawm pib piav qhia txog kuv tus kheej, hais tias, “Thaum xub thawj, kuv tiv ib txoj kev txom nyem loj heev kom thiaj li paub tus los tshiab ntawd tej kev nyuaj, thiab kuv ua tib zoo qhia nws txog Vajtswv txoj lus, tiam sis vim kuv tsis muaj kev paub ua hauj lwm, thiab vim tsis paub lus, es kuv thiaj li hais kom tus thawj coj los tshiab mus ntawd saib xyuas qhov ntawd xwb. Kuv tsis xav txog qhov teeb meem ntawm qhov ua li no, uas yog qhov ua rau tus los tshiab ntawd thim rov qab lawm.” Tom qab sib tham tag lawm, muaj ib tug viv ncaus xa ib tsab xov tuaj rau kuv hais ncaj qha hais tias, “Koj lub suab hais lus mos dhau lawm. Nws zoo li txhob txwm hais lawm xwb. Nws meem txom heev. Nws zoo li koj twb paub lawm tias koj ua tsis yog lawm, ces koj xav kom peb tsis txhob cem koj xwb.” Thaum kuv nyeem tsab xov ntawd, kuv lub ntsej muag kub lug tam sim ntawd vim txaj muag. Mloog zoo li raug ntes tau thaum tab tom siv tswv yim dag. Qhov ntawd mas txaj muag kawg li. Tom qab ntawd, tus viv ncaus ntawd cov lus nyob rawv hauv kuv lub siab. Nws muab kuv tej teeb meem qhia tawm ncaj qha, yog li ntawd yuav tsum muaj Vajtswv txoj kev npaj siab txhawb qhov ntawd xwb. Kuv tsim nyog ua tib zoo tig xav kom to taub. Thaum tig xav, kuv thiaj li ras dheev hais tias thaum twg kuv ua qee yam yuam kev thiab raug qhuab qhia mas, kuv pheej nquag lees kuv tej teeb meem ces tom qab ntawd kuv ua ib lub suab uas tu siab thiab ntxhov siab los nthuav kuv tej kev nyuaj tiag tiag ntawd tawm kom txhua tus thiaj li khuv leej thiab to taub, kom txhua tus thiaj li yuav zam txim rau kuv thiab tsis kom kuv ris qhov ntawd ntxiv lawm. Nws kuj ua kom lwm tus xav hais tias kuv tuaj yeem lees txais kev qhuab qhia, es kom ua rau lawv nyiam kuv thiab. Tom qab tig xav txog qhov no lawm, kuv thiaj li ras dheev hais tias nyob rau hauv kuv cov lus mas muaj ntau lub tswv yim dag heev. Tom qab ntawd, kuv nrhiav ntau qhov ntawm Vajtswv txoj lus txog qhov teeb meem no coj los siv thiab xyaum ua raws.

Muaj ib hnub, kuv nco txog qhov Vajtswv thiab Ntxwgnyoog sib tham nyob rau hauv Vajluskub. “Thiab Yehauvas hais rau Ntxwgnyoog tias, Koj mus qhov twg los? Ces Ntxwgnyoog txawm teb Yehauvas, thiab hais tias, Mus ncig ntuj ncig teb los xwb, thiab mus nce toj nqis taug hauv lub ntiaj teb los xwb” (Yauj 1:7). Ces kuv nyeem qhov Vajtswv soj ntsuam txog qhov Ntxwgnyoog hais lus, uas hais tias, “Ntxwgnyoog cov lus muaj ib tug yam ntxwv phem: Qhov Ntxwgnyoog hais ntawd ua rau koj khawb koj lub taub hau, tsis tuaj yeem paub lub ntsiab ntawm nws cov lus. Qee zaum mas Ntxwgnyoog muaj kev txhawb siab thiaj li txhob txwm hais lus, thiab qee zaum mas yog raug tswj hwm los ntawm nws tus yeeb yam, cov lus zoo li no thooj txhij tshwm thiab tawm ncaj qha hauv Ntxwgnyoog lub qhov ncauj tuaj. Ntxwgnyoog tsis siv sij hawm kom ntev los luj cov lus ntawd li; tiam sis, cia li hais kiag cov lus ntawd yam tsis ua twb zoo xav li. Thaum Vajtswv nug tias Ntxwgnyoog mus qhov twg los, ces Ntxwgnyoog txawm teb ob peb lo lus uas tsis meej xwb. Koj yeej xav tsis thoob, yeej tsis paub xyov Ntxwgnyoog los qhov twg los tiag tiag li. Puas muaj nej leej twg hais lus zoo li no? Txoj kev hais li no yuav hais li cas? (Nws yog cov lus uas ua ob siab thiab tsis muaj lo lus teb meej meej.) Peb yuav siv cov lus zoo li cas los qhia txog txoj kev hais lus zoo li no? Cov lus hloov thiab cov lus dag. Piv txwv tias ib tug neeg twg tsis xav qhia rau lwm tus paub tias nag hmo lawv ua dab tsi. Koj nug lawv tias: ‘Kuv pom koj nag hmo. Koj tau mus qhov twg?’ Lawv tsis qhia koj ncaj qha tias lawv mus qhov twg. Tiam sis, lawv hais tias: ‘Nag hmo yog hnub dab tsi. Cas yuav sab ua luaj li!’ Lawv puas teb koj lo lus nug? Lawv teb los ma, tiam sis lawv tsis teb li qhov koj xav tau. No yog ‘txoj kev ntse’ nyob hauv tib neeg txoj kev hais lus cuav. Koj yuav tsis tuaj yeem paub tias lawv hais li ntawd yog txhais li cas, thiab tsis paub txog lub ntsiab los sis lub hom phiaj ntawm lawv cov lus. Koj tsis paub yam uas lawv xav zam kom dhau vim tias hauv lawv lub siab lawv muaj lawv zaj—qhov no yog txawj ntxias. Puas muaj ib tug twg ntawm nej cov ko uas kuj hais lus li no thiab? (Muaj.) Yog li nej lub hom phiaj yog dab tsi? Puas yog qee zaum hais los tiv thaiv koj tus kheej txoj kev nyiam, qee zaum los tuav koj tus kheej txoj kev khav theeb, txoj hauj lwm, thiab tus duab, los tiv thaiv txoj kev zais ntawm koj lub neej ntiag tug xwb? Txawm yuav yog hom phiaj twg los xij, koj tsuas tiv thaiv qhov koj nyiam, thiab nrog rau qhov koj yuav tau txiaj ntsig. Qhov no tsis yog tib neeg tus yeeb yam lov? Txhua tus uas muaj ib tug yeeb yam zoo li no ces yog tsis yog Ntxwgnyoog tsev neeg ces yeej yog txheeb ze rau Ntxwgnyoog ntag. Peb tuaj yeem hais tau li no, los tsis tau? Kev hais lus feem ntau, txoj kev uas hais qhia meej meej no yog ib qho ntxim ntxub thiab khav theeb” (Txoj Lus, Phau 2. Hais Txog Qhov Kev Paub Vajtswv. Vajtswv Tus Kheej, tus Uas Tsuas Yog Tib Tug Xwb IV). Yav tas los, thaum kuv nyeem qhov Vajtswv soj ntsuam uas hais tias Ntxwgnyoog hais cov lus hloov thiab cov lus dag ntawd, ces kuv pheej xav hais tias tus tib neeg uas tuaj yeem siv tej tswv yim no mas yog ib tug tib neeg uas txawj ntxias thiab txawj dag heev. Tiam sis thaum kuv rov qab nyeem qhov ntawd dua, ces kuv txawm ras dheev hais tias kuv kuj tau muab tej no qhia tshwm thiab nthuav tawm lawm thiab. Thaum tus thawj coj ntawd muab kuv nthuav tawm rau ntawm kuv cov nus thiab cov viv ncaus lub xub ntiag, nyob rau sab nraud mas kuv lam lees txais qhov ntawd thiab lees hais tias kuv tsis leg lub luag hauj lwm xwb, tiam sis kuv yeej tsis lees txais qhov ntawd kiag li, thiab kuv haj tseem tsis xav tias yuam kev thiab. Kuv twb tsis ua tes dej num no los tau ntev lawm, yog li ntawd kuv thiaj li xav hais tias kuv tej teeb meem ntawd mas yog tej uas zam txim tau. Vim li cas nws thiaj li muab kuv nthuav tawm ncaj qha rau ntawm lub rooj sib tham ntawd, yam tsis txuag kuv lub ntsej muag ib qho me me li? Tom qab ntawd, txhua tus yeej xav hais tias kuv mas tso siab tsis tau rau thiab tsis leg lub luag hauj lwm xwb xwb li. Thaum kuv ntxhov siab, kuv kuj xav hais tias yog kuv tsis hais txog qhov xwm txheej ntawd, ces txhua tus yuav xav hais tias kuv tsis lees txais kev qhuab qhia kiag li thiab tias kuv tsis to taub kuv tus kheej tej teeb meem, yog li ntawd lawv yuav haj yam tsis nyiam kuv. Yuav kom kuv lub ntsej muag rov qab zoo li qub mas, kuv yuav tsum nquag lees qhov kuv ua yuam kev, thiab hais lus ua ib lub suab mos mos txhob txwm quaj dhi kom thiaj li qhia rau txhua tus hais tias kuv twb paub tias kuv ua yuam kev, tias kuv paub hais tias kuv ua txhaum thiab tu siab lawm, thiab tias kuv cia siab hais tias lawv yuav tsis cem kuv ntxiv lawm. Kuv xav nthuav tawm hais tias kuv tuaj yeem kho tej uas kuv ua yuam kev thiab lees txais qhov tseeb. Nyob rau saum daim tawv mas, saib zoo li kuv paub kuv tus kheej, tiam sis tseeb tiag kuv siv lub tswv yim no los kaw lwm tus tib neeg lub qhov ncauj xwb. Kuv tsis xav kom tus thawj coj pheej tham txog kuv tej teeb meem los sis kom kus ris tej teeb meem ntawd. Qhov no yog kuv txoj kev npaj siab tiag tiag. Thaum kuv tig xav txog qhov no lawm, kuv thiaj li pom hais tias kuv phem thiab txawj ntxias npaum li Ntxwgnyoog ntag. Tag nrho kuv cov lus puav leej muaj tej tswv yim dag los ntxias dag tib neeg. Kuv ua kuv tes dej num yam tsis leg lub luag hauj lwm li ces thiaj li raug thawj coj ntawd tuav npe thaum kuv muaj ib qho teeb meem. Kuv tsis yog tsis lees txim hloov dua siab tshiab xwb, tiam sis yog los tiv thaiv kuv lub ntsej muag thiab lub meej mom, kuv ua txuj paub kuv tus kheej nyob rau ntawm lwm tus lub xub ntiag, kom lawv thiaj li yuav xav hais tias kuv yog ib tug neeg uas tuaj yeem lees txais qhov tseeb. Kuv mas txawj dag thiab txawj ntxias tiag tiag li. Qhov hais lus qhib siab lug thiab qhov paub txog yus tus kheej ntawd mas txhais tau hais tias yog ib txoj kev qhia kom pom meej txog txoj kev xyaum ua raws li qhov tseeb, tiam sis kuv txoj kev lees txim thiab txoj kev lees paub ntawd muaj tej tswv yim dag thiab tej kev dag ntxias. Nyob rau saum daim tawv mas, kuv tham txog kuv txoj kev paub kuv tus kheej, tiam sis tseeb tiag, yog kuv tiv thaiv kuv tus kheej thiab zam kom dhau lub luag hauj lwm xwb. Kuv mas txawj zais heev li!

Muaj ib hnub, kuv pom lwm zaj lus ntawm Vajtswv txoj lus uas muab tib neeg tus moj yam phem nthuav tawm. Vajtswv hais tias: “Kev dag yeej pom nyob rau sab nraud: Qee tus neeg tham tej uas tsis tseem ceeb los sis siv hom lus nyuaj nyuaj xwb, kom thiaj li tsis muaj leej twg nyeem tau qhov lawv tab tom xav ntawd. Qhov ntawd yog kev dag. Tus yam ntxwv tseem ceeb ntawm txoj kev phem yog dab tsi? Yog qhov hais tias lawv cov lus mas zoo li zoo heev, thiab nyob rau saum daim tawv mas zoo li txhua yam yog heev. Zoo li tsis muaj ib qho teeb meem li, thiab zoo li txhua yam mas zoo heev nyob rau txhua fab. Thaum lawv ua ib yam dab tsi mas, koj tsis pom lawv siv ib qho kev phem hlo li, thiab nyob rau sab nraud mas, tsis muaj ib qho uas tsis zoo los sis txhaum li, es lawv thiaj li ua tau raws li lawv lub hom phiaj. Lawv ua txhua yam yam zais ntshis xwb. Cov tawm tsam khetos dag tib neeg li no. Cov tib neeg thiab tej yam uas zoo li no mas yog yam uas paub nyuaj tshaj plaws. Qee tus tib neeg mas yeej hais yam yog, siv cov lus zoo los daws li ub li no, thiab siv qee lo lus qhuab qhia, siv paj lug, los sis siv tej kev ua uas mus raws li tib neeg txoj kev hlub los dag tib neeg. Lawv hais ib yam hos ua ib yam lawm kom tau raws li lawv lub hom phiaj uas zais ntshis. Qhov no yog txoj kev phem, tab sis tib neeg feem coob suav hais tias cov cwj pwm no yog txawj dag xwb. Tib neeg tsis muaj kev to taub thiab kev soj ntsuam txog txoj kev phem ntawd. Tseeb tiag, txoj kev phem mas yeej paub nyuaj dua li txoj kev dag vim txoj kev phem ntawd zais tob dua, thiab txoj kev phem ntawd tej tswv yim thiab tej kev ua mas nyuaj dua. Yog ib tug tib neeg twg muaj ib tug moj yam uas txawj dag nyob rau hauv nws lawm mas, feem ntau, lwm tus nrog nws sib tham li ob los sis peb hnub xwb yeej qhia tau nws txoj kev dag lawm, los sis lawv yeej paub qhov nthuav tawm txog nws tus moj yam uas txawj dag uas nyob rau hauv tus tib neeg ntawd tej kev ua thiab cov lus lawm. Txawm li cas los xij, piv txwv hais tias tus tib neeg ntawd mas phem: Qhov no tsis yog ib yam uas siv li ob los sis peb hnub xwb ces txawm siv paub lawm, vim hais tias yog tsis muaj ib qho xwm txheej tseem ceeb twg los sis ib qho xwm txheej uas tshwj xeeb twg tshwm sim rau ib lub sij hawm luv luv li, ces yeej tsis yooj yim paub ib yam dab tsi los ntawm qhov mloog tus tib neeg ntawd tham li. Tus tib neeg ntawd ib txwm hais thiab ua qhov yog, thiab hais cov lus qhuab qhia uas yog ib qho tag ib qho tuaj xwb. Tom qab nrog tus tib neeg ntawd sib tham li ob peb hnub lawm, tej zaum koj yuav xav hais tias tus tib neeg no mas zoo heev, muaj peev xwm tso txhua yam tseg thiab siv nws tus kheej, muaj kev to taub ntawm sab ntsujplig, muaj ib lub siab hlub Vajtswv, thiab muaj lub siab uas txawj xav thiab muaj ntsiab nyob rau hauv qhov nws ua. Tab sis tom qab tus tib neeg ntawd daws ob peb qho teeb meem lawm, koj pom hais tias nws cov lus thiab tej kev ua mas sib xyaws pes daws nrog ntau yam heev, uas muaj ntau txoj kev npaj siab uas phem heev. Koj mam li paub hais tias tus tib neeg no mas coj tsis ncaj tab sis txawj dag—yog ib qho phem. Tus tib neeg ntawd pheej siv cov lus yog thiab tej kab lus zoo uas mus raws li qhov tseeb thiab muaj tib neeg txoj kev hlub los nrog tib neeg sib tham. Ib qho mas, tus tib neeg ntawd tsim tsa nws tus kheej, hos lwm qhov mas, nws dag lwm tus kom tau lub koob meej thiab lub meej mom rau ntawm tib neeg xwb. Cov tib neeg zoo li no mas txawj dag heev, thiab thaum lawv tau lub hwj chim thiab lub meej mom lawm mas, lawv tuaj yeem dag thiab rhuav ntau tus tib neeg. Cov tib neeg uas muaj cov moj yam phem mas phom sij heev” (Txoj Lus, Phau 4. Kev Nthuav Tawm Cov Tawm Tsam Khetos. Yam Tsib: Lawv Dag, Ntxias, Hem, thiab Tswj Tib Neeg). Vajtswv txoj lus nthuav tawm hais tias tus cwj pwm tseem ceeb ntawm cov tib neeg uas muaj tus moj yam phem ntawd mas yog qhov hais tias lawv mas zais ntshis xwb. Yuav kom zais tau lawv tej kev npaj siab kom lwm tus txhob paub mas, lawv yuav tsum tau siv cov lus yog, thiab tej tswv yim uas nyob rau sab nraud mas saib zoo li yog tej hauv paus ntsiab lus los ua kom tiav lawv txoj kev txhawb siab uas zais ntshis ntawd tas li. Kuv xav txog tej uas kuv tau ua lawm ces mam li ras dheev hais tias nws yog tib lub tswv yim dag xwb: Kuv daws tsis tau tus los tshiab ntawd tej teeb meem, yog li ntawd yuav kom zais tau kuv lub siab tseeb kom tus thawj saib xyuas kuv txhob pom mas, kuv yuav tsum muab qhov teeb meem ntawd mus rau tus thawj coj los tshiab daws. Kuv haj tseem hais tias tim ub tim no yam khav theeb ntxhias hais tias: Qhov no yog ib qho kev cob qhia rau tus Nus Kaus, qhia nws tias nws tus kheej yuav daws tej teeb meem no li cas. Nyob rau thaum kawg, nws ua tsis tau qhov ntawd zoo, ces kuv thiaj li pab nws saib xyuas tej uas nws ua yuam kev lawm. Kuv tsis yog muab tsis tau kuv tus yam ntxwv tiag tiag los nthuav tawm xwb, kuv haj tseem sim ua kom tau ntsej muag nyob rau ntawm nws lub xub ntiag kom nws xav hais tias kuv txawj saib xyuas tej teeb meem no thiab. Thaum kuv tus thawj coj muab kuv nthuav tawm ntawd, yuav kom kuv lub ntsej muag rov qab zoo li qub nyob rau hauv txhua tus lub siab mas, kuv yuav tsum nquag lees tej uas kuv ua yuam kev lawm los kaw lwm tus tib neeg lub qhov ncauj, thiab haj tseem siv ib lub suab quaj dhi los ua kom txhua tus khuv leej thiab to taub thiab thiab ua kom lawv xav hais tias kuv yog ib tug neeg uas tuaj yeem lees txais qhov tseeb, paub kuv tus kheej, thiab muaj ib tug cwj pwm uas lees txim hloov dua siab tshiab. Ua li ntawd, lawv thiaj li yuav tsis kom kuv ris qhov teeb meem ntawd ntxiv lawm. Tom qab siv Vajtswv cov lus los xav txog kuv cov lus thiab tej kev ua lawm, kuv pom hais tias kuv phem tiag tiag li. Kuv siv cov lus uas ntxim haum mus raws li tib neeg tej kev xav thiab qhov tseeb los npog kuv tus kheej tej kev npaj siab uas ntxim ntxub, thiab los dag cov nus thiab cov viv ncaus, kuv yog ib tug neeg uas phem thiab txawj dag heev. Thaum kuv pom Vajtswv txoj lus nthuav tawm hais tias tib neeg mas phem heev, ces kuv yeej tsis muab Vajtswv txoj lus coj los siv rau kuv tus kheej li lawm, kuv xav hais tias kuv tsis yog ib tug neeg zoo li ntawd, tiam sis thaum kuv qhov xwm txheej muab kuv nthuav tawm, thiab tom qab tig xav raws li Vajtswv txoj lus lawm, ces thaum kawg kuv thiaj li paub me ntsis txog kuv tus moj yam phem lawm.

Tom qab ntawd, kuv pheej tig xav txuas ntxiv. Kuv mam li ras dheev hais tias kuv muab kuv tus moj yam phem qhia tshwm nyob rau hauv ntau yam heev. Kuv nco hais tias, tsis ntev ua ntej ntawd, tus thawj saib xyuas hais kom kuv muab txoj hauj lwm ntawd rau Viv Ncaus Malinas ua thiab cia nws ua hloov kuv. Thaum kuv hnov qhov kev npaj no, kuv tag kev cia siab lawm. Kuv twb saib xyuas tes hauj lwm no ib leeg los tau li ob xyoos tawm lawm, thiab kuv xav hais tias yeej tsis muaj leej twg tuaj yeem hloov kuv qhov chaw nyob rau tes dej num no li. Kuv tsis xav tias yuav muab tes dej num no rau lwm tus ua li. Kuv xav nug tus thawj saib xyuas ntawd seb kuv saib xyuas puas tau tes dej num ntawd txuas ntxiv lawm, tiam sis kuv ntshai tsam tus thawj saib xyuas ntawd yuav xav hais tias kuv ntshaw dhau lawm thiab tsis tsim nyog, yog li ntawd kuv thiaj li tsis hais ib yam dab tsi li. Nyob rau sab nrauv mas, kuv mloog lus heev, tiam sis thaum kuv muab tes hauj lwm ntawd rau nws ua lawm, kuv siv lub sij hawm thaum tus thawj saib xyuas thiab Malinas nyob ntawd los txhob txwm hais txog qee yam tseem ceeb kom ntxaws ntxaws txog tes hauj lwm no. Kuv xav kom nkawv pom txoj kev paub thiab tej hauv paus ntsiab lus uas kuv tau kawm paub nyob rau hauv txoj kev ua tes dej num no tias ob peb lub lim tiam xwb yeej kawm paub tsis tau li, kom seb tus thawj saib xyuas puas yuav cia kuv ua tes dej num no txuas ntxiv mus. Yeej paub tseeb lawm hais tias, tom qab muab tes dej num ntawd rau lawv ua lawm, tus thawj saib xyuas yuav nug kuv seb kuv puas kam xyaum cob qhia Malinas kom ntev me ntsis. Kuv zoo siab heev uas hnov qhov no. Txawm kuv tsis muaj peev xwm saib xyuas tes hauj lwm ntawd txuas ntxiv los xij, yam kuv hais ntawd twb mus raws li lub hom phiaj lawm. Tom qab ntawd, thaum Malinas muaj teeb meem thiab kev nyuaj nyob rau huav nws tes dej num, nws tuaj cuag kuv, tuaj kom kuv tshuaj xyuas thiab txiav txim rau tej ntawd, thiab kuj hais kom kuv xyuas txhua qhov hauj lwm thiab. Qhov kev ua li no, kuv rov qab txeeb lub hwj chim los rau hauv kuv tus kheej ob txhais tes twj ywm lawm. Thaum rov qab tig saib kuv tus cwj pwm nyob rau lub sij hawm ntawd mas, kuv yeej tsis xav kom nws hloov kuv qhov chaw li, tiam sis vim yog xav kom tus thawj saib xyuas ntawd tsis txhob xav hais tias kuv khav theeb thiab tsis tsim nyog, kuv thiaj li siv lub cib fim ntawd los muab txoj hauj lwm ntawd rau lawv ua kom qhia tau kuv txoj kev zoo siab hlo muab. Ces tos paub xwb, tus thawj saib xyuas ntawd twb pom zoo rau kuv lawm. Kuv thiaj li tau txais thiab tuav lub hwj chim yam raug kev raug cai thiab zais tau kuv tus kheej tej kev npaj siab “yam ntse heev.” Kuv yim tig xav txog kuv tus cwj pwm, ces kuv yim ntshai xwb. Kuv yuav luag tsis ntseeg hais tias cas kuv yuav yog ib tug tib neeg zoo li no li.

Tom qab ntawd, kuv nyeem ob zaj lus ntawm Vajtswv cov lus uas muab cov tawm tsam Khetos tus moj yam phem nthuav tawm ces thiaj li ua rau kuv muaj kev paub qee yam txog kuv tus kheej lawm. Vajtswv Tus Uas Muaj Hwj Chim Loj Kawg Nkaus hais tias: “Cov tawm tsam khetos txoj kev phem mas muaj ib tug yam ntxwv uas pom tau yooj yim heev, yog li ntawd Kuv mam li qhia nej txog qhov zais ntshis ntawm tus yam ntxwv ntawd: Nyob rau hauv lawv txoj kev hais lus thiab txoj kev ua los zoo ib yam nkaus thiab, koj yeej tsis to taub txog tej uas nyob hauv lawv nruab siab los sis pom mus rau hauv lawv lub siab li. Thaum lawv hais lus rau koj mas, lawv ob lub qhov muag dauv mus dauv los, thiab koj yeej qhia tsis tau hais tias lawv tab tom siv kom kev dag twg li. Tej thaum lawv ua rau koj xav tias lawv mas siab ncaj los sis ua siab dawb paug, tab sis tsis yog li no—koj yeej tsis pom tias lawv zoo li cas li. Koj muaj ib qho kev xav nyob hauv koj lub siab, ib qho kev paub zem zuag tias zoo li muaj ib qho uas yeej xav tsis tawm nyob rau hauv lawv txoj kev xav hlo li, ib qho tob tob uas piav qhia tsis tau tias lawv txawj dag heev” (Txoj Lus, Phau 4. Kev Nthuav Tawm Cov Tawm Tsam Khetos. Yam Xya: Lawv Yog Neeg Phem, Lim Hiam, thiab Txawj Dag (Ntu Ob)). “Qhov ‘txawj dag’ ntawm no txhais hais tias txawj ntxias thiab txawj ntxias dag heev, thiab qhov no hais txog tus cwj pwm tsis zoo. Qhov tsis zoo no yog hais txog qhov zais tob tob thiab hais txog tus tib neeg dog dig uas nkag siab nyuaj, tus uas tsis pom yam uas cov tib neeg zoo li no xav los sis ua. Muab ua lwm lo lus hais ces, tej tswv yim, tej kev muaj siab, thiab tej kev pib ntawm hom tib neeg no tej kev ua mas to taub nyuaj heev, thiab qee zaus mas lawv kuj muaj tus cwj pwm coj tsis ncaj thiab zais ntshis thiab. Muab hais kom luv luv ces, muaj ib lo lus uas piav qhia tau qhov uas pom tseeb thiab tus yam ntxwv tseeb ntawm ib tug tib neeg txoj kev txawj dag, uas yog ‘tsis muaj qhov qhib siab lug,’ es thiaj li ua rau lwm tus piav qhia tsis tau thiab tsis nkag siab txog tus tib neeg ntawd. Cov tawm tsam khetos tej kev ua mas muaj tus yam ntxwv no—qhov ntawd yog, thaum koj ras thiab paub hais tias lawv tej kev npaj siab ua qee yam ntawd mas tsis yog ua ncaj qha, ces koj yuav ntshai heev, tiam sis ib ntus los sis qee yam mas, koj tseem tsis pom tias lawv tej kev muaj siab thiab tej kev npaj siab ntawd zoo li cas, ces koj cia li xav tias lawv tej kev ua ntawd mas yog txawj dag heev xwb. Vim li cas lawv thiaj li ua rau koj xav li no? Ib qho mas, yog vim tsis muaj leej twg paub txog yam lawv hais los sis ua ntawd. Hos lwm qhov mas yog qhov hais tias lawv pheej tham mus tham los, dag koj, thaum kawg ua rau koj paub tsis tseeb tias lawv zaj lus twg tseeb thiab zaj twg cuav, thiab lawv cov lus yog txhais li cas tiag tiag. Thaum lawv dag, koj xav hais tias qhov ntawd yog qhov tseeb; koj tsis paub tias zaj lus twg tseeb los sis zaj twg cuav li, ces koj thiaj li pheej xav hais tias koj raug dag thiab raug ntxias lawm. Vim li cas thiaj li muaj qhov kev xav no? Vim hais tias cov tib neeg zoo li no yeej tsis ua yam qhib siab lug li; koj yeej tsis pom yam lawv ua los sis yam lawv khwv heev rau ntawd tseeb li, thiaj li ua rau koj ua xyem xyav rau lawv. Thaum kawg, koj pom thiaj li hais tias lawv tus moj yam mas txawj dag, txawj ntxias, thiab kuj phem thiab” (Txoj Lus, Phau 4. Kev Nthuav Tawm Cov Tawm Tsam Khetos. Yam Rau: Lawv Coj Ntau Yam Phem, Lawv Tsis Muaj Qab Hau Dab Tsi thiab Siv Hwj Chim Tswj, Lawv Yeej Tsis Qhia Rau Lwm Tus Li, thiab Lawv Yuam Kom Lwm Tus Mloog Lawv Lus). Vajtswv cov lus muab cov tawm tsam Khetos tus moj yam phem tshaj plaws nthuav tawm. Yeej ib txwm muaj ib txoj kev txhawb siab uas zais ntshis nyob rau hauv yam uas lawv hais thiab ua, uas ua rau tsis muaj leej twg to taub lawv kiag li. Yuav kom ua tiav lawv lub hom phiaj mas, lawv pheej siv tej tswv yim haub ntxias thiab txawj dag los dag thiab ntxias dag tib neeg. Lawv ua kom txhua tus txhob to taub kiag li, kom thiaj li tsis muaj leej twg paub tias lawv cov lus yog tseeb los cuav. Kuv pom hais tias kuv tus cwj pwm mas txawj dag ib yam nkaus li ib tug tawm tsam Khetos ntag. Kuv yeej ib txwm muaj tej kev npaj siab uas zais ntshis nyob rau hauv kuv cov lus thiab tej kev ua. Thaum kuv muaj ib qho kev nyuaj nyob rau hauv kuv tes dej num, kuv xav nyuaj heev los nrhiav kev zam kom dhau qhov kev nyuaj ntawd, thiab kuj ua txhua yam los thaiv kuv lub siab tiag tiag kom tus thawj saib xyuas kuv ntawd tsis txhob pom thiab. Thaum kuv tus thawj coj muab tej teeb meem uas nyob rau hauv kuv tes dej num ntawd nthuav tawm, yam uas kuv xav txog ces yog seb yuav ua li cas kom tib neeg thiaj li xav hais tias kuv yog ib tug neeg uas lees txais qhov tseeb, thiab nyob tib lub sij hawm ntawd, kuv ua txhua yam los zam kom dhau kuv lub luag hauj lwm. Thaum kuv xav txeeb lub hwj chim thiab ceev kuv txoj hauj lwm lawm, ces yam uas kuv xav txog ces yog seb yuav tsis muab kuv tej kev ntshaw nthuav tawm li cas, thiab seb yuav ua li cas kom tus thawj saib xyuas ntawd cia kuv tuav tes hauj lwm ntawd thiab ua tus txiav txim siab xwb. Thaum twg uas muaj ib yam dab tsi cuam tshuam rau kuv lub koob lub npe thiab lub meej mom lawm, ces yam uas kuv xav txog ces yog qhov tias yuav zais kuv tus kheej thiab ntxias dag lwm tus li cas nkaus xwb. Tshwj xeeb yog thaum nyob rau ntawm cov thawj coj thiab cov thawj saib xyuas lub xub ntiag, kuv ua tib zoo xav txog txhua lo lus ua ntej kuv hais, tias cov lus twg thiaj li yuav ua tau kuv lub hom phiaj tiav thiab zais tau kuv tej kev xav tiag tiag. Qhov no yog tus tawm tsam Khetos tus moj yam! Thaum kuv tig xav txog qhov no, kuv ntshai me ntsis. Vajtswv cheem tsum kom peb ua tib neeg coj ncaj thiab hais qhov peb xav tiag tiag, nrog rau txoj kev qias vuab tsuab uas peb nthuav tawm, yam peb tsis to taub thiab yam peb ua tsis tau huv si. Tiam sis txhua yam uas kuv xav txog ces yog seb yuav zais kuv tus kheej li cas, yuav ua kom tib neeg hwm kuv li cas, thiab yuav ua kom kuv tau ntsej muag li cas xwb. Txhua yam kuv ua puav leej yog npaj, zais, thiab dag, thiab txhua yam uas kuv qhia tshwm ces yog Ntxwgnyoog tus moj yam uas txawj dag thiab lim hiam xwb. Thaum kuv ras dheev li no lawm, ces kuv xav txog ib qho zuj zus. Kuv rov qab xav txog thaum kuv tseem yau. Kuv niam qhia kuv hais tias “Tus nees ceev tsis tas yuav nplawm, lub nruas nrov tsis tas siv ob tug pa hnyav,” yog li ntawd kuv thiaj li pheej siv zog ua ib “tug nees ceev” thiab “lub nruas nrov,” thiab ua ib tug me nyuam “mloog lus” uas coj zoo. Yog kuv ua qee yam yuam kev, kuv lees qhov ntawd kiag tam sim ntawd yam tsis tas yuav qhia li. Kuv niam kuv txiv tsis tshua cem los sis qhuab qhia kuv thaum yog ib tug me nyuam yaus, yog li ntawd kuv thiaj li xav hais tias kuv yeej zam tau ntau yam kev txom nyem los ntawm qhov ua ib tug neeg ntse thiab lees tej uas kuv ua yuam kev. Piv txwv li, yog kuv xeem tsis tau ntawv, yuav kom kuv niam kuv txiv txhob cem los sis txhob rau txim rau kuv mas, ua ntej nkawv hais lus, kuv twb pib quaj lawm, thiab kuv tus kheej ua txuj ua tus ntxim ntxim hlub thiab tsis muaj leej twg pab li, vim kuv paub tias kuv niam kuv txiv siab tsis kheev thaum kuv quaj lawm. Nkawv ntshai tsam kuv tiv tsis taus kev nyuaj siab ntxiv lawm, yog li ntawd nkawv thiaj li tsis cem kuv ntxiv lawm. Tiam sis, nkawv nplij kuv siab. Txhua zaus uas kuv quaj thiab ua txuj ua tus ntxim ntxim hlub mas, kuv tsis raug kuv niam kuv txiv cem li. Kuv txoj kev xav kom lwm tus hwm kuv tus kheej yeej tseem nyob li qub, thiab kuv zam kom dhau lub luag hauj lwm uas kuv tsim nyog ua. Tom qab ntseeg Vajtswv lawm, los kuv yeej tseem ua li no. Thaum kuv ua tsis tau kuv tes dej num zoo thiab yuav tsum tau leg lub luag hauj lwm, ces kuv siv tej tswv yim dag, ua txuj ua tus ntxim ntxim hlub, thiab cam kuv zaj los npog kuv tus cwj pwm uas tsis xyuam xim thiab tsis leg lub luag hauj lwm nyob rau hauv kuv tes dej num kom thiaj li tsis muaj leej twg yuav qhuab qhia kuv li. Kuv pom hais tias txoj kev ua neej raws li tej tswv yim phem txhawm rau tej kev sib khom hauv lub ntiaj teb no mas yuav ua rau kuv txawj ntxias thiab txawj dag tuaj. Kuv pheej yuav saib ntsoov seb feem coob mus txoj kev twg, kawm kom paub ntau lub tswv yim dag uas txawj zais, thiab ua kom kuv tus kheej yog ib tug Ntxwgnyoog ciaj sia nyob. Qhov uas txaus ntshai tshaj plaws yog qhov hais tias tej tswv yim dag thiab kev coj tsis ncaj ntawd mloog zoo li yog tej yam dog dig rau kuv lawm xwb. Yog cov nus thiab cov viv ncaus tsis tau hais kom kuv nco thiab muab kuv qhia tshwm, ces ntshe kuv yuav tsis muaj kev paub ib qho me me los sis paub txaj muag kiag li. Kuv nco tau Vajtswv txoj lus uas hais tias, “Vajtswv cawm cov tib neeg coj ncaj, thiab cov uas Nws xav tau rau Nws lub nceeg vaj ntawd yog cov tib neeg coj ncaj xwb. Yog koj muaj peev xwm dag thiab ntxias dag, ces koj yog ib tug tib neeg txawj ntxias dag, nkhaus, thiab txawj ntxias; koj tsis yog ib tug neeg coj ncaj. Yog koj tsis yog ib tug tib neeg coj ncaj, ces yuav tsis muaj hwv tsam uas Vajtswv yuav cawm koj, thiab tej zaum koj yuav tsis dim” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Lub Hauv Paus Kev Xyaum Ua Raws Yooj Yim Tshaj Plaws ntawm Kev Ua ib Tug Neeg Ncaj Ncees). “Yog koj cov lus hais ua paj lug hais tias yog tim ub tim no thiab hais tej yam tsis muaj qab hau kom zoo mloog xwb, ces Kuv hais rau koj tias koj yog tus uas ntxub tsis nyiam muab qhov tseeb coj los xyaum ua. Yog koj muaj ntau qhov lus zais uas koj tsis xav qhia, yog koj tsis nyiam nthuav tag nrho koj tej lus zais ntawd tawm—koj tej kev nyuaj siab—rau lwm tus pom es kom nrhiav tau txoj kev kaj, ces Kuv hais tias koj yog ib tug uas yuav tsis tau txais kev cawm dim yooj yim, thiab ib tug uas yuav tawm tsis tau ntawm txoj kev tsaus ntuj yooj yim kiag li” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Peb Qhov Lus Ceeb Toom). Vim Vajtswv txoj lus, peb thiaj li pom tau hais tias Vajtswv ntxub thiab tsis nyiam cov tib neeg txawj dag kiag li. Cov tib neeg txawj dag mas muaj ntau yam tsaus ntuj nti nyob rau hauv lawv lub siab. Lawv cov lus thiab tej kev ua mas dag thiab ntxias dag tas li xwb, thiab lawv yeej tsis xyaum ua raws li Vajtswv txoj lus li. Txawm lawv yuav ntseeg Vajtswv los tau pes tsawg xyoo lawm los xij, lawv tus moj yam qias vuab tsuab yeej yuav tsis muaj hnub hloov pauv, thiab yeej yuav tsis muaj hnub tau txais kev cawm dim li. Thaum kuv ras dheev txog qhov no lawm, kuv pom hais tias kuv nyob rau hauv qhov phom sij tiag tiag li lawm! Kuv thiaj li thov Vajtswv hais tias kuv xav lees txim hloov dua siab tshiab, thiab thov kom Vajtswv coj kuv kev thiab pab kuv hloov pauv tiag tiag.

Muaj ib hnub, kuv nyeem nyob rau hauv Vajtswv txoj lus uas hais tias, “Ua ib tug neeg ncaj ncees; thov Vajtswv tshem koj txoj kev dag ntxias hauv koj lub siab mus. Ntxuav koj tus kheej kom dawb huv los ntawm kev thov Vajtswv txhua lub sij hawm, thiab kom raug txhawb los ntawm Vajtswv tus Ntsujplig los ntawm kev thov Vajtswv, thiab koj tus moj yam yuav maj mam hloov” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hais Txog Kev Xyaum Thov Vajtswv). “Koj yuav tsum nrhiav qhov tseeb los daws txhua yam teeb meem uas tshwm sim tuaj, txawm tias nws yuav yog dab tsi los xij, thiab tsis txhob npog koj tus kheej los sis looj lub ntsej muag cuav rau lwm tus pom. Koj tej kev ua tsis tau zoo, koj tej kev tu ncua, koj tej kev txhaum, koj tus moj yam qias vuab tsuab—cia li qhib tej ntawd kom tag nrho, thiab sib qhia txog tej ntawd kom tag nrho. Tsis txhob muab tej ntawd khaws cia rau hauv nruab siab. Kev xyaum kom paub los qhib koj tus kheej li cas ntawd yog thawj kauj ruam mus rau txoj kev to taub txog lub neej txoj sia, thiab nws yog thawj qhov teeb meem, uas yog qhov kov yeej nyuaj tshaj plaws. Thaum koj kov yeej qhov ntawd lawm, ces kev to taub txog qhov tseeb yooj yim lawm. Qhov ua kauj ruam no qhia txog dab tsi? Nws txhais hais tias koj qhib siab lug thiab qhia txhua yam uas koj muaj, qhov zoo los sis qhov phem, yam uas zoo los sis yam uas phem; nthuav koj tus kheej kom tag nrho rau lwm tus thiab rau Vajtswv pom; tsis txhob zais ib yam dab tsi los ntawm Vajtswv, tsis txhob npog ib yam dab tsi, tsis txhob ua ib yam dab tsi cuav, txav deb ntawm kev dag thiab kev dag ntxias, thiab ua tus neeg qhib siab lug thiab ncaj ncees rau lwm tus tib neeg ib yam nkaus thiab. Ua li no, ces yog koj nyob rau hauv txoj kev kaj lawm, thiab tsis yog hais tias Vajtswv yuav tshawb xyuas koj kom meej xwb, tiam sis lwm tus tib neeg los kuj yuav muaj peev xwm pom tias koj ua muaj hauv paus ntsiab lus thiab muaj ib qib uas pom tseeb ib yam nkaus thiab. Koj tsis tas siv ib lub tswv yim twg los tiv thaiv koj lub koob lub npe, tus yam ntxwv, thiab lub meej mom, thiab koj tsis tas npog los sis xav zais koj tej kev ua yuam kev li. Koj tsis tas mob siab rau tej uas tsis muaj qab hau no li. Yog koj tso tau tej no tseg, ces koj yuav kaj siab heev, koj yuav ua neej nyob tau yam tsis muaj sawv hlau khi los sis tsis muaj kev mob siab, thiab koj yuav ua neej nyob rau hauv txoj kev kaj. Kev xyaum kom paub los qhib siab lug hais tawm thaum koj qhia ntawd yog thawj kauj ruam los to taub txog lub neej txoj sia. Txuas ntxiv, koj yuav tsum xyaum kom paub txheeb xyuas koj tej kev xav thiab tej kev ua kom pom txog qhov tsis yog thiab qhov Vajtswv tsis nyiam, thiab koj yuav tsum tau muab tej ntawd thim rov qab tam sim ntawd thiab kho kom lawv zoo. Lub hom phiaj ntawm kev txhim kho tej ntawd kom zoo yog dab tsi? Nws yog kev lees yuav thiab lees paub qhov tseeb, hos muab tej uas nyob rau hauv koj uas yog Ntxwgnyoog tug ntawd tshem tawm mus es muab qhov tseeb los hloov tej ntawd chaw. Yav tas los, koj ua txhua yam mus raws li koj tus moj yam txawj dag uas yog dag thiab txawj dag xwb; koj xav tias koj ua tsis tau dab tsi li yog tsis dag. Tam sis no uas koj to taub qhov tseeb, thiab ntxub Ntxwgnyoog tej kev ua txhua yam lawm, ces koj thiaj li tsis ua li ntawd mus ntxiv lawm, koj ua nrog txoj kev xav ncaj ncces, kev dawb huv, thiab kev mloog hais. Yog hais tias koj tsis npog ib yam dab tsi, yog hais tias koj tsis ua kom pom meej, ib txoj kev ua txuj, los sis npog txhua yam, yog hais tias koj muab koj tus kheej nthuav tawm tag nrho rau cov kwv tij thiab cov nkauj muam, tsis zais koj tej tswv yim thiab tej kev xav hauv nruab siab, tiam sis ho cia rau lwm tus pom koj tus cwj pwm ncaj ncees, ces qhov tseeb yuav maj mam nrhau cag nyob rau hauv koj, nws yuav tawg paj thiab txi txiv, nws yuav muaj txiaj ntsim, ib qho zuj zus. Yog hais tias koj lub siab ncaj ncees zuj zus, thiab tig mus rau Vajtswv zuj zus, thiab yog hais tias koj paub tiv thaiv tej kev ntshaw ntawm Vajtswv lub tuam tsev thaum koj ua koj tes dej num, thiab koj nyuaj siab thaum koj tiv thaiv tsis tau tej kev ntshaw no, ces qhov no ua pov thawj qhia hais tias qhov tseeb twb tau tshwm sim nyob rau hauv koj, thiab twb tau dhau los ua koj lub neej txoj sia lawm” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Vajtswv cov lus hais raug kuv siab heev. Tseeb tiag Vajtswv txoj kev cheem tsum mas yooj yooj yim xwb. Nws yog qhov kom peb hais lus thiab ua lub siab dawb paug thiab coj ncaj, kom nyob rau hauv peb lus siab mas, peb tsis muaj kev dag, thiab tsis muaj kev zais los sis kev ua tsis ncaj li, kom peb muaj ib lub siab coj ncaj rau Vajtswv, thiab kom peb coj ncaj rau lwm tus xwb. Yog peb tau ua qee yam yuam kev thiab dag lawm, ces peb yuav tsum tau lees qhov ntawd thiab tig xav txog peb tus kheej, thiab lees txais qhov tseeb los ntawm tus cwj pwm tiag tiag. Tsuas yog ua li no xwb mas thiaj li yuav maj mam daws tau peb tus moj yam phem. Thaum qee tus nus thiab viv ncaus raug qhuab qhia mas, txawm lawv txaj muag nyob rau lub sij hawm ntawd los xij, lawv tuaj yeem lees txais thiab mloog lus. Tom qab ntawd, lawv tuaj yeem nrhiav qhov tseeb, tig xav txog lawv tus kheej, thiab nrhiav qhov uas ua rau lawv ua tsis tau ntawd. Thaum lub sij hawm dhau mus, lawv haj yam nce qib tuaj, haj yam ua tau lawv tej dej num zoo, thiab lawv muaj Vajtswv txoj kev coj qhia thiab tej koob hmoov. Tiam sis nyob rau ntawm kuv mas, yuav kom tuav tau kuv tus kheej lub ntsej muag thiab lub meej mom mas, kuv yuav tsum siv txhua txoj kev los zam kom dhau kuv tej luag hauj lwm thiab zam qhov raug qhuab qhia, thiab kuv xav tias kuv ua txhua yam yam ntse heev lawm. Thaum kawg kuv tau dab tsi? Tom qab ntseeg Vajtswv los tau ntau xyoo lawm, kuv tus moj yam ntawm lub neej txoj sia yeej tsis tau hloov pauv li. Kuv yeej tseem txawj ntxias, txawj dag, phem, thiab twm xeeb heev. Kuv ua kuv tes dej num yam tsis to taub tej hauv paus ntsiab lus thiab tsis paub tias yuav daws teeb meem li cas li. Thaum kawg kuv mam li ras dheev hais tias qhov siv tej tswv yim dag los zam kom dhau lub luag hauj lwm thiab zam qhov raug qhuab qhia ntawd, tseeb tiag yog kuv tab tom tsis kam txais yuav Vajtswv txoj kev cawm dim thiab rhuav tshem kuv lub hwv tsam uas tau los txais qhov tseeb xwb. Thiab txhua zaus uas kuv siv tej tswv yim dag los khiav kom dim lub luag hauj lwm ntawd, kuv yuav tsum tau xav nyuaj heev seb yuav hais li cas thiab yuav daws li cas. Tej zaum kuv tuaj yeem khiav dim ib zaug, tiam sis lwm zaus muaj kev rhuav tshem kuv lub koob lub npe thiab lub ntsej muag lawm, ces kuv yuav tsum tau xav txog lwm lub tswv yim los dag tib neeg ntxiv. Txoj kev ua neej raws li tus yam ntxwv uas txawj dag thiab coj tsis ncaj txhua hnub ntawd mas sab kawg li, Vajtswv ntxub thiab tsis nyiam qhov kev ua neej li ntawd kiag li, thiab nyob rau thaum kawg, ntshe kuv yuav rhuav tshem kuv lub hwv tsam uas tau txais qhov tseeb thiab dim ntawd xwb. Qhov no tsis yog ntse kiag li. Qhov no yog khav theeb thiab ruam xwb. Thaum kuv ras dheev txog qhov no lawm, kuv kub siab xav los daws kuv tus moj yam uas txawj dag thiab lim hiam thiab los ua ib tug neeg coj ncaj.

Tom qab ntawd, kuv mam li paub hais tias tus Nus Kaus tseem tsis tau paub kuv tej kev txhawb siab ntxim ntxub uas hais kom nws mus qhia tus los tshiab ntawd. Yog kuv tsis qhib siab lug qhia rau nws, ces ntshe nws yuav tsis muaj kev thoob tsib to nrog txog kuv li, mtshe tseem hwm kuv, thiab ntshe tseem muaj tus yam ntxwv xav phem thiab xav hais tias nws ua tsis tau tes hauj lwm ntawd. Yog li ntawd, kuv thiaj li mus ntsib tus Nus Kaus, mus qhib siab lug qhia rau nws txog kuv tej kev txhawb siab uas xa nws mus qhia tus los tshiab ntawd, thiab qhia nws qhov kuv kawm tau los ntawm qhov teeb meem no. Kuv kuj hais tias feem ntau yog tim kuv xwb thiab tias kuv twm xeeb thiab ntxim ntxub heev. Vim xav tiv thaiv kuv tus kheej lub ntsej muag thiab tej kev ntshaw, kuv thiaj li dag nws thiab kom nws leg lub luag hauj lwm ntawd. Ces, nws txawm qhib siab lug qhia rau kuv txog nws txoj kev tig xav txog nws tus kheej, kev paub, thiab tej uas tau txais nyob rau hauv qhov teeb meem no. Tom qab hnov nws tej lus qhia lawm, ces kuv kaj siab lawm ntau. Kuv paub tseeb tseeb hais tias tsuas yog xyaum ua raws li qhov tseeb thiab kev ua ib tug neeg coj ncaj xwb mas peb thiaj li yuav muaj kev thaj yeeb nyab xeeb. Tom qab ntawd, kuv tus thawj saib xyuas thiaj li npaj ib lub rooj sib tham los tham txog tej kev ua yuam kev nyob rau hauv peb tes hauj lwm. Lub hli ntawd kuv ua tsis tau zoo kiag li. Kuv paub meej meej hais tias nyob rau lub rooj sib txoos ua ke no Vajtswv yuav saib kuv txhua lo lus thiab dej num kom meej seb kuv ua li cas, seb kuv puas yuav rov qab mus rau kuv tej tswv yim dag qub thiab dag los tiv thaiv kuv lub ntsej muag thiab lub meej mom thiab npog thiab zais tej uas kuv ua tsis tau zoo thiab tej teeb meem, los sis seb kuv puas yuav muab kuv tej teeb meem nthuav tawm, hais lus yam qhib siab lug, thiab ua ib tug neeg coj ncaj. Kuv qhia kuv tus kheej kom xyaum ua raws li qhov tseeb, tab txawm yog qhov tseeb ntawd ua rau kuv poob ntsej muag los xij. Yog li ntawd, kuv thiaj li qhib siab lug qhia txog qhov kuv lam ua kom dhau thiab siv tej tswv yim dag nyob rau hauv kuv tes hauj lwm nyob rau ntu no li cas, thiab hais tias kuv yuav qhia txog tej uas kuv ua yuam kev thiab tej teeb meem, hloov pauv tus cwj pwm uas kuv coj rau kuv tes dej num, thiab sim ua kom zoo ntxiv. Tom qab tej lus qhia no lawm, kuv hnov kaj siab lawm ntau, thiab kuv muaj qhov txaus siab hlo thiab kev txhawb siab los ua kuv tes dej num kom zoo lawm. Tom qab kuv hais tag lawm, kuv cov nus thiab cov viv ncaus tsis saib tsis taus kuv lawm. Tiam sis, lawv tham txog qee txoj kev ntawm qhov xyaum los ua peb tej dej num kom zoo xwb. Kuv tau txais txiaj ntsim ntau heev los ntawm lawv tej lus qhia, thiab kuj kawm paub ntau txoj kev los hloov pauv tej uas kuv ua yuam kev ntxiv. Tom qab ntawd, kuv xyaum ua raws li cov kev no, ces kuv maj mam ua tau kuv tes hauj lwm zoo zuj zus lawm. Thaum kuv pom qhov no, kuv ua tsaug ntau ntau rau Vajtswv.

Los ntawm qhov kev ntsib kev pom no, kuv thiaj li paub tseeb tseeb hais tias txawm peb yuav ua dab tsi yuam kev los sis peb yuav nthuav txoj kev qias vuab tsuab dab tsi tawm nyob rau hauv peb tej dej num los xij, tsuav peb tuaj yeem ua siab txias txias fim tej ntawd, qhib peb lub siab, thiab nrhiav qhov tseeb xwb, ces tsis yog tias yuav tsis muaj leej twg saib tsis taus peb xwb, peb kuj tuaj yeem tig xav txog peb tus kheej thiab ua tau peb tej dej num kom zoo dua tuaj thiab. Kuv kuj paub tseeb tseeb thiab hais tias tsuas yog cov uas xyaum ua raws li qhov tseeb thiab yog cov tib neeg coj ncaj xwb mas thiaj li muaj suab npe thiab meej mom, thiab tsuas yog lawv xwb thiaj li kaj siab thiab tsis ntxhov siab.