1 Tau yug los ua ib tug tib neeg, Koj tau tiv cua tiv nag ntau heev li. Koj txo hwj chim thiab nkaum twj ywm hauv noob neej; tsis muaj leej twg paub Koj li. Koj txiav txim thiab nthuav tawm noob neej txoj kev qias vuab tsuab tob heev; Koj rau txim rau kuv txoj kev tsis ncaj ncees thiab txoj kev ntxeev siab. Txawm hais tias kuv raug kev txom nyem thiab kev lim kom dawb huv, los kuv tus moj yam qias vuab tsuab yeej raug yaug huv si lawm. Kuv yeej tau khav theeb thiab khav tias tus kheej yeej ncaj ncees, thiab siab hlob heev thiab txaus ntxub heev rau qhov uas kuv siv yuav ua kom tau tej yam dab tsi rov los rau kuv tej kev txuas ncauj txuas lus nrog Koj; kuv mas yeej xav kom tau tej koob hmoov ntawm ntuj ceeb tsheej lub nceeg vaj tas mus li los pauv rau kuv lub dag zog thiab tej kev txom nyem. Qhov ntawd yog hom kev txawj xav los sis laj thawj dab tsi mas? Kuv xav hais tias ua zoo me ntsis xwb ces kuv yuav muaj cuab kav ua tau haum Koj txoj kev xav, thiab tseem ntshaw kom tau nkag mus rau ntuj ceeb tsheej lub nceeg vaj thiab. Qias vuab tsuab tob kawg, kuv mas muaj tej moj yam phem puv npo. Yog hais tias kuv tsis tau lees txais Koj qhov kev txiav txim, ces qhov kuv tau los yuav yog dab tsi mas?

2 Koj qhov kev txiav txim tau yaug kuv huv si; Koj tes hauj lwm tau hloov kuv lawm thiab muaj ib txoj sia tiag tiag rau kuv. Ua cas kuv thiaj yuav tsis ris Koj tus txiaj ntsig nyob rau hauv qhov kawg hauv kuv lub siab? Txawm hais tias kuv yeej tseem tim tsum kev muab kuv tej kev ntxeev siab thiab kev tsis ncaj ncees yaug tawm kom huv si, los kuv twb pom koj tej yam ntxwv uas txaus hlub ntawd lawm. Tsis hais kuv yuav ntsib tej kev sim siab loj npaum li cas li, kuv yuav tsis muaj hnub ncaim Koj mus li. Nyob rau yav tag los, kuv ua txhua yam rau kuv tus kheej, thiab kuv yeej tsis tau hlub Koj li. Kuv ua rau koj raug mob thiab coj txoj kev mob los rau Koj. Leej twg thiaj paub hais tias Koj los pes tsawg lub kua muag lawm? Xav txog Koj txoj kev hlub rau kuv, ces kuv haj yam ntxub tus moj yam qias vuab tsuab no ntxiv. Kuv xav caum nrhiav qhov tseeb los nplij Koj lub siab! Nws yog Koj tus uas tau cawm kuv; yog tsis muaj Koj qhov kev txiav txim, kuv yuav tsis nyob rau ntawm no hnub no. Kuv tau txais kev kaj siab nyob rau hauv Koj qhov hmoov hlub loj kawg nkaus; nws yeej yog vim Koj txoj kev hlub thiab kev tshua tiag tiag li. Au Vajtswv, nws yog Koj tus uas tau cawm kuv. Pom hais tias Koj tus moj yam yeej ncaj ncees tiag, kuv hlub Koj tawm plaws hauv kuv lub siab tuaj. Au Vajtswv, nws yog Koj tus uas tau cawm kuv. Kuv yuav ua tsaug thiab qhuas Koj txoj kev hlub tas mus li!