Vajtswv Tej Lus Txhua Hnub  Nqe Lus Uas Xaiv Tawm Los 374

Vajtswv Tus Uas Muaj Hwj Chim Loj Kawg Nkaus, yog lub taub hau ntawm txhua yam, siv Nws lub hwj chim huab tais los ntawm Nws lub zwm txwv. Nws kav tag nrho lub qab ntuj khwb thiab txhua yam, thiab Nws yog tus coj peb thoob plaws lub ntiaj teb. Peb yuav tsum txav los ze Nws txhua lub sij hawm, thiab los cuag Nws ntsiag to, tsis txhob plam ib lub sij hawm kiag li, thiab cov lus qhia rau peb kawm txhua lub sij hawm. Txhua yam, los ntawm ib puag ncig uas nyob ib ncig ntawm tib neeg, xwm txheej thiab txhua yam, tag nrho muaj nyob yog los ntawm kev tso cai ntawm Nws lub zwm txwv. Tsis txhob cia tej kev chim kev yws tshwm sim rau koj lub siab ntxhov, tsis li ntawd Vajtswv yuav tsis muab Nws txoj hmoov hlub rau koj. Thaum kev mob nkeeg tshwm los, qhov no yog Vajtswv txoj kev hlub, thiab yog Nws lub siab nyiam. Txawm hais tias koj lub cev yuav ntsib kev txom nyem me ntsis los, tsis txhob mloog Ntxwgnyoog tej tswv yim. Cia li qhuas Vajtswv thaum muaj kev mob nkeeg thiab zoo siab rau Vajtswv thaum koj qhuas Nws. Tsis txhob poob siab thaum muaj mob nkeeg, rau siab nrhiav tas los nrhiav dua thiab tsis txhob tso tseg, ces Vajtswv yuav qhia kom koj paub qhov tseeb thiab qhia koj. Yauj txoj kev ntseeg zoo lis cas? Vajtswv Tus Uas Muaj Hwj Chim Loj Kawg Nkaus yog tag nrho cov kws kho mob loj uas muaj hwj chim! Mus nyob rau hauv kev mob nkeeg ces yog mus kom muaj mob, tiam sis mus nyob rau hauv tus ntsujplig yog mus kom zoo. Yog thaum twg koj tseem ua taus pa, Vajtswv yuav tsis cia koj tuag.

Peb muaj txoj sia uas sawv rov qab los ntawm Khetos nyob hauv peb. Yam ntseeg tsis tau kiag, peb tsis muaj kev ntseeg nyob ntawm Vajtswv lub xub ntiag: Li ntawd los Vajtswv yuav tso kev ntseeg tseeb los nyob hauv peb. Qab zib tseeb tiag yog Vajtswv txoj lus! Vajtswv txoj lus yog tshuaj kuab muaj tsuas! Nws ua rau tsoom dab thiab Ntxwgnyoog txaj muag! Khaws Vajtswv txoj lus yuav pab tau peb. Nws txoj lus yuav cawm peb lub siab sai heev! Nws ntiab txhua yam tawm tag nrho thiab teeb tsa txhua yam kom muaj kev thaj yeeb nyab xeeb. Kev ntseeg zoo li ib ya cav tuam ua tus choj: Cov uas tuav rawv txoj sia yuav hla nyuaj heev, tiam sis cov neeg uas npaj txhij fij lawv tus kheej tuaj yeem hla dhau mus, ruaj siab rau txhais ko taw thiab tsis txhawj. Yog tias tib neeg txaj muag thiab muaj txoj kev xav ntshai, nws yog vim Ntxwgnyoog tau dag ntxias lawv lawm, ntshai tias peb yuav hla tus choj ntawm txoj kev ntseeg mus cuag Vajtswv. Ntxwgnyoog ua txhua yam kom xa tau nws tej kev xav los rau peb. Peb yuav tsum thov Vajtswv txhua lub sij hawm qhia peb kom paub qhov tseeb ntawm Nws txoj kev kaj, cia li cia siab rau Vajtswv txhua lub sij hawm los ntxuav Ntxwgnyoog cov tshuaj lom nyob hauv peb, peb sab ntsujplig cia li xyaum txav los ze Vajtswv txhua lub sij hawm, thiab cia Vajtswv ua tus kav peb tag nrho.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 6

Vajtswv Tej Lus Txhua Hnub  Nqe Lus Uas Xaiv Tawm Los 375

Thaum tib neeg tsis muaj kev paub tob txog tej uas tshwm sim rau lawv, thiab tsis paub ua yam uas tsim nyog ntawd, qhov uas lawv yuav tsum xub xub ua yog dab tsi? Lawv yuav tsum xub xub thov Vajtswv; thov Vajtswv ua ntej tso. Kev thov Vajtswv qhia txog dab tsi? Qhia hais tias koj muaj lub siab ncaj ncees, tias koj muaj lub siab hwm Vajtswv, thiab tias koj paub nrhiav Vajtswv, ua pov thawj qhia hais tias koj muab Vajtswv saib ua qhov tseem ceeb tshaj plaws txhua yam huv si. Thaum Vajtswv nyob rau hauv koj lub siab thiab muaj ib qho chaw nyob rau hauv koj lub siab lawm, thiab thaum koj muaj peev xwm zwm rau Vajtswv lawm, ces koj yog ib tug Ntseeg Vajtswv uas muaj lub siab ncaj ncees lawm. Muaj ntau tus ntseeg uas laus lawm uas txhos caug thov Vajtswv nyob rau ntawm tib lub sij hawm thiab tib qho chaw txhua hnub li. Ib zaug twg mas lawv txhos caug li ib los sis ob teev, tiam sis txawm lawv txhos caug zoo li no los tau pes tsawg xyoo lawm los xij, yeej daws tsis tau lawv tej teeb meem ntawm txoj kev txhaum li. Cia peb muab qhov kev thov Vajtswv ntawm sab kev lis kev cai ntseeg uas puas muaj nuj nqis los tsis muaj ntawd tso tseg tso. Yam tsawg kawg cov kwv tij thiab cov muam uas laus lawm no muaj lub siab ncaj ncees me ntsis. Lawv ua tau zoo dua cov hluas hais txog qhov no. Yog koj xav ua neej nyob rau ntawm Vajtswv lub xub ntiag thiab tau ntsib tau pom Vajtswv tes hauj lwm, ces qhov uas koj yuav tsum xub ua ua ntej tshaj plaws thaum muaj ib yam dab tsi tshwm sim rau koj ntawd yog thov Vajtswv ntag. Kev thov Vajtswv tsis yog ib qho kev hais cov sob lus uas yus nco yam tsis muaj qab hau dab tsi, es tsis muaj dab tsi ntxiv lawm; ua li no ces koj yuav mus tsis txog twg. Koj yuav tsum tau xyaum thov los ntawm koj lub siab. Tej zaum koj yuav thov Vajtswv zoo li no li yim los sis kaum zaus yam tsis muaj dab tsi tshwm sim li los xij, tiam sis tsis txhob poob siab: Koj yuav tsum xyaum mus li. Thov Vajtswv ua ntej thaum muaj ib yam dab tsi tshwm sim rau koj. Qhia rau Vajtswv ua ntej thiab cia Nws saib xyuas. Qhia rau Vajtswv ua ntej thiab cia Nws saib xyuas. Cia Vajtswv pab koj, cia Nws coj koj kev thiab qhia txoj hauv kev rau koj. Qhov no yuav ua pov thawj qhia hais tias koj muaj lub siab hwm Vajtswv thiab tias koj muab Vajtswv saib tseem ceeb tshaj txhua yam huv si. Thaum muaj ib yam dab tsi tshwm sim rau koj los sis koj ntsib qee qhov kev nyuaj thiab koj xav phem, thiab npau taws, ces qhov no yog ib qho kev qhia kom pom tseeb txog qhov tsis muaj Vajtswv nyob rau hauv koj lub siab thiab qhov koj tsis hwm Vajtswv. Txawm koj yuav ntsib tej kev nyuaj dab tsi nyob rau hauv lub neej tiag tiag los xij, koj yuav tsum los rau ntawm Vajtswv lub xub ntiag. Thawj qhov uas yuav tsum tau ua ces yog txhos caug thov Vajtswv ntag. Qhov no yog qhov tseem ceeb tshaj plaws. Kev thov Vajtswv qhia hais tias Vajtswv muaj ib qho chaw nyob rau hauv koj lub siab. Thaum koj muaj teeb meem, qhov cia siab rau Vajtswv thiab qhov thov Nws thiab qhov nrhiav los ntawm Nws ntawd qhia hais tias koj muaj lub siab uas hwm Vajtswv; koj yuav tsis ua li no yog Vajtswv tsis nyob rau hauv koj lub siab. Ib txhia tib neeg hais tias, “Kuv thov Vajtswv, tiam sis Vajtswv tseem tsis tau qhia kuv li!” Hais li ntawd mas tsis yog lawm. Koj yuav tsum xub saib seb qhov kev npaj siab uas nyob tom qab qhov koj thov Vajtswv ntawd puas yog tso. Yog koj yeej nrhiav qhov tseeb tiag tiag thiab thov Vajtswv tas li, ces yeej yuav muaj ib qho uas Vajtswv qhia koj thiab ua rau koj to taub xwb. Txawm yuav yog dab tsi los xij, Vajtswv yuav ua kom koj to taub. Yog Vajtswv tsis qhia koj, koj tus kheej yeej yuav tsis muaj peev xwm to taub li. Txawm koj muaj lub hwj chim to taub thiab tsis muaj thiab txawm koj yuav muaj lub peev xwm zoo li cas los xij, muaj qee yam uas tib neeg txoj kev xav yeej xav tsis txog li. Thaum koj to taub lawm, qhov ntawd puas yog los ntawm koj txoj kev xav? Raws li Vajtswv tej kev npaj siab thiab Vajntsujplig Dawb Huv tes hauj lwm mas, yog Vajntsujplig Dawb Huv tsis qhia koj, ces koj yuav nrhiav tsis pom tus uas paub li. Koj tsuas paub thaum Vajtswv Tus Kheej qhia koj tias txhais li cas xwb. Yog li ntawd, thauj qhov uas yuav tsum tau ua ua ntej tshaj plaws thaum muaj ib yam dab tsi tshwm sim rau koj ntawd ces yog thov Vajtswv ntag. Thaum koj thov Vajtswv, koj yuav tsum nthuav koj tej kev xav, tej kev xam pom thiab tus cwj pwm uas coj rau Vajtswv ntawd tawm, thiab nrhiav qhov tseeb los ntawm Nws, los ntawm txoj kev xav ua raws; qhov no yog qhov uas tib neeg yuav tsum xyaum ua. Koj yuav tsis tau txais ib qho txiaj ntsim li yog koj tsuas lam ua kom dhau xwb, thiab tom qab ntawd koj yuav tsum tsis txhob yws hais tias Vajntsujplig Dawb Huv tsis tau qhia koj. Kuv pom ib txhia tib neeg mas tsuas coj raws li tej kev cai ntawm txoj kab lis kev cai ntseeg thiab ua raws li tej dej num ntawm txoj kab lis kev cai ntseeg ntawd nyob rau hauv lawv txoj kev ntseeg Vajtswv xwb. Nyob rau hauv lawv lub siab yeej tsis muaj ib qho chaw rau Nws nyob kiag li; lawv haj tseem tsis lees paub Vajntsujplig Dawb Huv tes hauj lwm thiab. Lawv tsis thov Vajtswv los sis tsis nyeem Vajtswv cov lus li. Lawv tsuas yog pheej mus sib koom ua ke xwb tsis muaj dab tsi ntxiv li. Qhov no puas yog kev ntseeg Vajtswv? Lawv ntseeg li lawv ntseeg mus, tiam sis tsis muaj Vajtswv nyob rau hauv lawv txoj kev ntseeg. Vajtswv tsis nyob rau hauv lawv lub siab, lawv tsis xav thov Vajtswv ntxiv lawm, thiab lawv tsis xav nyeem Vajtswv cov lus ntxiv li lawm. Yog li tsis yog lawv dhau los ua cov tsis ntseeg lawm lod? Muaj ib txhia thawj coj thiab cov neeg ua hauj lwm mas pheej saib xyuas lwm yam hauj lwm xwb. Lawv yeej tsis mob siab rau txoj kev to taub lub neej txoj sia li tiam sis saib lwm yam hauj lwm yam li yog lawv txoj hauj lwm tseem ceeb. Lawv tsuas yog cov thawj tswj txoj hauj lwm lawm xwb yeej tsis ua ib qho hauj lwm uas tseem ceeb ntawm cov thawj coj thiab cov neeg ua hauj lwm li. Vim li ntawd, tom qab ntseeg Vajtswv tau nees nkaum peb caug xyoo lawm los, lawv tsis muaj ib lo lus qhia txog lawv txoj kev paub txog lub neej thiab lawv tsis muaj kev paub tseeb txog Vajtswv li. Lawv tsuas hais tau ob peb lo lus thiab ob peb qho kev qhuab qhia xwb. Yog li ntawd tsis yog lawv dhau mus ua cov thawj coj cuav lawm lod? Qhov no yog vim hais tias nyob rau hauv lawv txoj kev ntseeg Vajtswv, mas lawv tsis mob siab rau ua lawv tej dej num uas tsim nyog los sis tsis caum qhov tseeb. Qhov tsuas vam khom rau yus txoj kev to taub txog qee cov lus thiab qee qhov kev qhuab qhia ntawd xwb yuav daws tsis tau ib yam dab tsi li. Lawv yws Vajtswv kiag thaum lawv raug sim, raug kev puas tsuaj, los sis muaj mob. Lawv tsis muaj ib qho kev paub tseeb txog lawv tus kheej, thiab lawv tsis muaj tej lus tim khawv uas hais txog kev paub kiag li. Qhov no qhia tau hais tias lawv tsis tau caum qhov tseeb nyob rau ntau lub xyoo uas lawv tau ntseeg Vajtswv los no, tias lawv tus kheej tsuas khwv heev rau yam uas nyob sab nraud xwb, yog li ntawd thiaj li ua rau lawv tus kheej puas tsuaj. Txawm tib neeg yuav ntseeg Vajtswv tau pes tsawg xyoo los xij, yam tsawg kawg lawv yuav tsum los to taub qee qhov tseeb yog lawv xav paub tseeb tias lawv yuav tsis ntog, tsis ua kev phem, los sis raug muab tshem tawm mus. Yam tsawg kawg qhov no yog qhov uas lawv yuav tsum npaj kom muaj. Ib txhia tib neeg mas tsis tshua kub siab li thaum lawv mloog lus qhuab qhia thiab tsis ua tib zoo xav txog Vajtswv cov lus li. Txawm yuav muaj dab tsi tshwm sim rau lawv los xij lawv tsis nrhiav qhov tseeb li. Lawv tsuas yog txaus siab rau qhov kev to taub cov lus thiab cov kev qhuab qhia ntawd xwb, lawv xav hais tias lawv twb tau txais qhov tseeb lawm. Ces thaum muaj ib qho kev sim siab tuaj lawm, lawv tsis muaj kev paub kiag li, thiab lawv lub siab puv npo tej kev tsis txaus siab thiab tej lus yws uas lawv tsis muaj cuab kav hais tawm kom nrov xwb, txawm tias lawv xav hais los xij. Cov tib neeg uas zoo li no tsis yog txaus hlub dhau lawm lod? Ntau tus tib neeg mas pheej lam taus lam ua lawv tes dej num xwb. Lawv tsis thim xav los sis tsis ua txhua yam kom to taub lawv tus kheej thaum lawv raug qhuab qhia li. Lawv pheej cam tas li xwb, yog li ntawd lawv txoj kev phem thiaj li tshwm tuaj rau ntau txoj kev uas sib txawv, thiab lawv thiaj li raug muab nthuav tawm thiab raug muab tshem tawm mus, tsis muaj peev xwm paub txog lawv tus kheej mus txog hnub kawg li. Yog li qhov lawv to taub tej kev qhuab qhia ntawd muaj qab hau dab tsi? Tsis muaj qab hau kiag li. Txawm tib neeg yuav ntseeg Vajtswv tau pes tsawg xyoo los xij, qhov tsuas to taub thiab muaj peev xwm hais lus qhuab qhia ntawd xwb yeej tsis muaj txiaj ntsim li. Lawv tsis tau txais qhov tseeb tiam sis mus yuam kev lawm. Yog li ntawd, thaum muaj ib yam dab tsi tshwm sim rau koj es koj thov Vajtswv, tshawb nrhiav Nws tej kev npaj siab ntawd, qhov tseem ceeb ces yog to taub txog qhov tseeb xwb yog yuav daws kom tau qhov teeb meem ntawd. Qhov no yog txoj kev yog, thiab koj yuav tsum xyaum ua li no tas li.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Nyob Rau Hauv Kev Ntseeg Vajtswv Mas, Qhov Tau Txais Qhov Tseeb Yog Qhov Tseeb Ceeb Tshaj Plaws

Vajtswv Tej Lus Txhua Hnub  Nqe Lus Uas Xaiv Tawm Los 376

Lub tswv yim uas zoo tshaj plaws yog cia siab rau Vajtswv thiab vam khom rau Vajtswv hauv txhua yam. Cov tib neeg dog dig tsis paub qhov no. Txhua tus tib neeg puav leej xav hais tias qhov mus koom tej kev sib txoos ua ke kom ntau ntxiv, mloog kev qhuab qhia kom ntau ntxiv, nrog lawv cov kwv tij thiab cov muam kawm kom ntau ntxiv, tso ntau yam tseg kom ntau ntxiv, txom nyem kom ntau ntxiv, thiab tiv kev txom nyem kom ntau ntxiv ntawd yuav ua rau lawv tau txais Vajtswv txoj kev pom zoo thiab kev cawm dim no. Lawv xav hais tias qhov xyaum ua li no mas yog ib lub tswv yim uas zoo tshaj plaws lawm, tiam sis lawv tsis quav ntsej txog qhov uas tseem ceeb tshaj plaws lawm uas yog: kev cia siab rau Vajtswv thiab vam khom rau Vajtswv. Lawv saib noob neej txoj kev txawj ntse me me ntawd yam li yog ib lub tswv yim, thiab tsis quav ntsej txog qhov uas tib neeg ua tau zoo tshaj plaws li. Qhov no yog ib qho yuam kev lawm. Txawm yuav to taub qhov tseeb ntau npaum li cas los xij, yus yuav ua tiav pes tsawg tes dej num, yus yuav tau ntsib tau pom ntau npaum li cas thaum ua tej dej num ntawd tiav, yus tus yeeb yam yuav loj los me, los sis yus yuav nyob rau thaj chaw zoo li cas, qhov yus tsis muaj tsis tau kiag li ces yog qhov uas yus yuav tsum cia sia rau Vajtswv thiab vam khom Nws rau txhua yam uas yus ua. Qhov no yog yam tswv yim uas zoo tshaj plaws. Vim li cas Kuv thiaj hais tias qhov no yog lub tswv yim uas zoo tshaj plaws? Txawm hais tias yus tau los to taub txog qee qhov tseeb lawm los xij, nws puas yuav ua tau yog hais tias yus tsis vam khom rau Vajtswv? Ib txhia tib neeg mas twb ntseeg Vajtswv los tau ntau lub xyoo, thiab lawv twb raug ntau txoj kev sim siab, muaj qee qhov kev ntsib kev pom uas muaj qab hau, to taub qee qhov tseeb, thiab muaj qee qhov kev paub uas muaj qab hau txog qhov tseeb lawm, tab sis lawv tsis paub yuav vam khom Vajtswv li cas, los sis lawv tsis to taub yuav cia sia rau thiab vam khom rau Nws li cas. Cov neeg zoo li ntawd puas muaj tswv yim mas? Lawv yog cov ruam tshaj ntawm cov neeg, thiab yog hom uas xav hais tias lawv ntse kawg; lawv tsis hwm Vajtswv thiab zam kev phem li. Ib txhia neeg hais tias, “Kuv to taub ntau qhov tseeb thiab muaj qhov muaj tiag ntawm qhov tseeb. Nws yog ib qho uas siv tau rau kev ua ub ua no raws li qhov yog thiab tsis yog. Kuv muaj lub siab ncaj rau Vajtswv, thiab kuv paub tias yuav txav los ze Nws li cas. Qhov uas kuv xyaum ua raws li qhov tseeb thaum muaj tej yam los raug rau kuv ntawd tsis tau txaus lod? Tsis tas yuav thov Vajtswv los sis cia siab rau Vajtswv li.” Qhov xyaum ua raws li qhov tseeb yeej yog lawm, tiam sis muaj ntau lub sij hawm thiab ntau qhov xwm txheej uas tib neeg tsis paub xyov tham txog qhov tseeb thiab tej hauv paus ntsiab lus ntawm qhov tseeb twg li. Tag nrho cov uas muaj kev ntsib kev pom tiag yeej paub txog qhov no. Piv txwv, thaum koj ntsib qee yam teeb meem, tej zaum koj yuav tsis paub tias qhov tseeb twg uas hais txog qhov teeb meem no, los sis qhov tseeb uas ntsig txog qhov teeb meem no yuav tsim nyog muab xyaum ua los sis siv li cas. Koj yuav ua li cas rau tej lub sij hawm zoo li no? Txawm tias koj yuav muaj tej kev ntsib kev pom uas muaj qab hau npaum li cas los xij, koj tsis muaj cuab kav to taub tej hauv paus ntsiab lus ntawm qhov tseeb rau txhua qhov xwm txheej. Txawm tias koj twb ntseeg Vajtswv los tau ntev npaum li cas lawm los xij, koj tau ntsib tau pom pes tshawm yam los xij, thiab koj tau ntsib pes tsawg qhov kev qhuab qhia, kev qhuab ntuas los sis kev raug txim lawm los xij, tab txawm yog koj to taub qhov tseeb los xij, koj puas muaj cuab kav hais tias koj yog qhov tseeb? Koj puas muaj cuab kav hais tias yog lub hauv paus keeb cag ntawm qhov tseeb? Ib txhia neeg hais tias, “Kuv yeej nco tau hauv siab tag nrho tej lus hais thiab tej nqe lus uas nrov npe hauv phau ntawv, Txoj Lus Tshwm Sim Hauv Cev Nqaij Daim Tawv lawm; kuv tsis tas yuav vam khom Vajtswv los sis cia siab rau Nws lawm. Thaum lub sij hawm los txog, kuv yuav tsis ua li cas li rau qhov kev vam khom Vajtswv cov lus no.” Cov lus uas koj tau nco rau hauv nruab siab ces tsuas nyob ruaj nres rau ib qho chaw xwb, tab sis ib cheeb tsam uas koj ntsib—nrog rau koj tus yam ntxwv—mas txav mus los tas li. Koj muaj peev xwm hais tau cov lus qhuab qhia, tiam sis ua tsis tau dab tsi rau cov lus ntawd thaum muaj qee yam tshwm sim rau koj, uas ua pov thawj qhia tau hais tias koj tsis to taub qhov tseeb. Txawm koj yuav txawj hais cov lus qhuab qhia ntawd npaum li cas los xij, qhov no tsis txhais hais tias koj to taub qhov tseeb, thiab haj yam tsis txhais hais tias koj muaj peev xwm xyaum ua raws li qhov tseeb lawm. Yog li ntawd, muaj ib qho kev kawm tseem ceeb heev uas yuav tau kawm nyob rau ntawm no. Thiab qhov kev kawm no yog dab tsi? Nws yog qhov hais tias tib neeg yuav tsum cia siab rau Vajtswv rau tag nrho txhua yam, thiab hais tias ua li ntawd, ces lawv ua tau ib qho kev vam khom rau Vajtswv. Tsuas yog vam khom rau Vajtswv nkaus xwb mas thiaj muaj ib txoj kev taug thiab muaj Vajntsujplig tes hauj lwm. Tsis li ntawd, koj muaj peev xwm ua ib yam dab tsi kom yog thiab tsis txhaum qhov tseeb, tab sis yog koj tsis vam khom Vajtswv, ces koj tej kev ua ntawd tsuas yog tib neeg tej kev ua zoo xwb, thiab ua tsis tau kom haum Vajtswv siab li. Vim tib neeg muaj kev to taub ntiav heev txog qhov tseeb, lawv thiaj li hom ua raws li tej kev cai thiab tuav khov khov tej rau tej lus ntawm tej kev qhuab qhia uas siv tib qho tseeb thaum ntsib ntau yam xwm txheej sib txawv. Tej zaum lawv kuj yuav ua tau ntau yam uas yoog raws cov hauv paus ntsiab lus ntawm qhov tseeb, tab sis Vajtswv txoj kev coj mas yuav tsis pom nyob rau hauv qhov no, los sis yuav tsis pom Vajntsujplig tes hauj lwm ib yam nkaus li thiab. Muaj ib qho teeb meem loj nyob ntawm no, uas yog qhov uas tib neeg ua ub ua no raws li lawv qhov kev ntsib kev pom thiab tej kev cai uas lawv to taub, thiab raws li tib neeg qee yam kev xav hauv nruab siab xwb. Qhov thov tau Vajtswv tiag tiag thiab cia siab rau Vajtswv thiab vam khom rau Nws tiag tiag nyob rau hauv txhua yam uas lawv ua ntawd mas nyuaj. Tab txawm yog yus to taub Vajtswv lub siab nyiam los, qhov yuav ua kom tau raws li qhov Vajtswv coj kev, thiab raws li tej hauv paus ntsiab lus ntawm qhov tseeb mas nyuaj. Vim qhov laj thawj no, Kuv thiaj hais tias lub tswv yim zoo tshaj plaws ces yog cia sia rau Vajtswv thiab vam khom Nws nyob rau hauv txhua yam.

Tib neeg yuav xyaum cia siab rau Vajtswv thiab vam khom rau Vajtswv nyob rau hauv txhua yam tau li cas? Ib txhia tib neeg hais tias, “Kuv tseem hluas, kuv lub siab me, thiab kuv nyuam qhuav ntseeg Vajtswv tau ib ntus xwb. Kuv tsis paub xyov yuav xyaum cia siab rau Vajtswv thiab vam khom rau Vajtswv tau li cas thaum muaj qee yam tshwm sim.” Qhov no puas yog ib qho teeb meem? Muaj ntau yam kev nyuaj nyob rau hauv txoj kev ntseeg Vajtswv, thiab koj yuav tsum tau raug ntau qhov kev ceeb laj txom nyem, kev sim siab, thiab kev mob siab. Txhua yam no puav leej cheem tsum kev cia siab rau Vajtswv thiab kev vam khom rau Vajtswv kom thiaj li yuav mus dhau tej sij hawm nyuaj ntawd. Yog koj xyaum cia siab rau Vajtswv thiab vam khom rau Vajtswv tsis tau, ces koj yuav tsis muaj peev xwm mus dhau tej kev nyuaj ntawd, thiab koj yuav tsis muaj peev xwm raws Vajtswv qab. Kev cia siab rau Vajtswv thiab kev vam khom rau Vajtswv mas tsis yog ib txoj kev qhuab qhia uas tsis muaj dab tsi li, los sis nws tsis yog ib co lus hais mus hais los rau txoj kev ntseeg Vajtswv xwb. Tiam sis, nws yog ib qho tseeb uas tseem ceeb, ib qho tseeb uas koj yuav tsum muaj los ntseeg thiab raws Vajtswv qab. Ib txhia tib neeg hais tias, “Kev cia siab rau Vajtswv thiab kev vam khom rau Vajtswv ntawd tsuas siv thaum muaj ib qho xwm txheej loj tshwm sim xwb. Piv txwv li, koj tsuas yog yuav tsum tau cia siab rau Vajtswv thiab vam khom rau Vajtswv thaum ntsib tej kev ceeb laj txom nyem, kev sim siab, raug ntes, thiab kev tsim txom, los sis thaum koj ntsib tej kev nyuaj nyob rau hauv koj tej dej num, los sis thaum koj raug qhuab qhia thiab raug qhuab ntuas xwb. Tsis tas yuav cia siab rau Vajtswv thiab vam khom rau Vajtswv txog tej teeb meem uas tsis tseem ceeb ntawm yus tus kheej lub neej li, vim Vajtswv tsis quav ntsej txog tej ntawd.” Cov lus no puas yog? Yeej tsis yog li. Muaj ib qho yuam kev nyob rau ntawm no. Nws yog ib qho uas yuav tsum tau cia siab rau Vajtswv nyob rau hauv tej teeb meem loj, tiam sis koj puas saib xyuas tau tej yam uas tsis tseem ceeb thiab tej teeb meem me me uas nyob rau hauv lub neej yog tsis muaj tej hauv paus ntsiab lus li? Hais txog tej teeb meem xws li kev hnav khaub ncaws thiab kev noj haus, koj ua puas tau yog tsis muaj tej hauv paus ntsiab lus? Yeej tsis tau li. Hais txog qhov koj saib xyuas tib neeg thiab teeb meem ne? Yeej tsis tau li thiab. Tab txawm nyob rau hauv lub neej txhua hnub thiab tej teeb meem uas tsis tseem ceeb los xij, yam tsawg kawg koj yuav tsum muaj tej hauv paus ntsiab lus kom muaj peev xwm ua neej zoo nkaus li tib neeg. Tej teeb meem uas ntsig txog tej hauv paus ntsiab lus ntawd yog tej teeb meem uas ntsig txog qhov tseeb. Tib neeg tus kheej puas daws tau tej teeb meem ntawd? Yeej daws tsis tau li. Yog li ntawd, koj yuav tsum cia siab rau Vajtswv thiab vam khom rau Vajtswv. Tsuas yog thaum koj tau txais Vajtswv txoj kev qhuab qhia thiab to taub qhov tseeb lawm xwb mas thiaj li yuav daws tau tej teeb meem uas tsis tseem ceeb no. Yog koj tsis cia siab rau Vajtswv thiab vam khom rau Vajtswv, ces koj xav tias yuav daws tau tej teeb meem uas ntsig txog tej hauv paus ntsiab lus ntawd no lod? Yeej tsis yooj yim li. Nws yeej hais tau tias nyob rau hauv txhua yam uas tib neeg pom tsis tseeb thiab qhov uas cheem tsum kom tib neeg nrhiav qhov tseeb ntawd, lawv yuav tsum cia siab rau Vajtswv thiab vam khom rau Vajtswv. Txawm qhov teeb meem uas yuav tsum tau siv qhov tseeb los daws ntawd yuav loj los sis me npaum li cas los xij yuav tsum tau cia siab rau Vajtswv thiab vam khom rau Vajtswv. Qhov no yog ib qho kev cheem tsum. Tab txawm yog tib neeg to taub qhov tseeb thiab lawv tus kheej daws tau tej teeb meem ntawd los xij, tej kev to taub thiab tej kev daws teeb meem no muaj tsawg tsawg thiab ntiav ntiav xwb. Yog tib neeg tsis cia siab rau Vajtswv thiab vam khom rau Vajtswv, ces lawv txoj kev to taub yeej yuav tsis tob li. Piv txwv li, yog koj mob hnub no, es qhov ntawd cuam tshuam rau txoj kev ua koj tes dej num, ces koj yuav tsum tau thov Vajtswv txog qhov teeb meem no hais tias, “Vajtswv, hnub no kuv tsis tshua xis neej, kuv noj tsis tau mov, thiab qhov no cuam tshuam rau txoj kev ua kuv tes dej num lawm. Kuv yuav tsum tau saib kuv tus kheej kom meej. Qhov kuv mob ntawd yog vim li cas tiag tiag? Puas yog kuv raug Vajtswv qhuab qhia vim tsis ncaj ncees rau kuv tes dej num? Vajtswv, kuv thov kom Koj qhia kuv thiab coj kuv kev.” Nej yuav tsum quaj thov li no. Qhov no yog kev cia siab rau Vajtswv. Txawm li cas los xij, thaum koj cia siab rau Vajtswv, koj cia li ua raws li tej qauv thiab ua raws li tej kev cai xwb tsis tau. Yog koj tsis nrhiav qhov tseeb los daws tej teeb meem ntawd, koj yuav ua rau txhua yam qeeb. Tom qab koj thov Vajtswv thiab cia siab rau Vajtswv lawm, koj yuav tsum ua koj lub neej nyob li koj tsim nyog ua kom tes dej num uas yog koj tes uas yuav tau ua ntawd txhob qeeb. Yog koj mob, koj yuav tsum mus ntsib kws kho mob, thiab qhov no yog qhov tsim nyog lawm. Nyob rau tib lub sij hawm ntawd, koj yuav tsum thov Vajtswv, tig xav txog koj tus kheej, thiab nrhiav qhov tseeb los daws qhov teeb meem ntawd. Tsuas yog qhov xyaum ua zoo li no xwb thiaj li tsim nyog. Hais txog tej yam mas, yog tib neeg paub ua tej ntawd zoo lawm, ces lawv yuav tsum ua tej ntawd. Qhov no yog qhov tib neeg yuav tsum koom tes. Txawm li cas los xij, qhov seb txoj kev ntshaw thiab lub hom phiaj puas tiav tag nrho nyob rau hauv tej no ntawd yog nyob ntawm txoj kev cia siab rau Vajtswv thiab kev vam khom rau Vajtswv xwb. Nyob rau hauv tej teeb meem uas tib neeg tus kheej pom tsis tseeb thiab saib xyuas tsis tau zoo ntawd, lawv txhua tus yuav tsum cia siab rau Vajtswv thiab nrhiav qhov tseeb los daws tej teeb meem ntawd ntxiv. Lub peev xwm ua tau qhov no yog qhov cov tib neeg uas muaj txoj kev ua neej yuav tsum muaj. Muaj ntau yam uas yuav tsum tau kawm kom paub nyob rau hauv txoj kev cia siab rau Vajtswv. Nyob rau hauv tus txheej txheem uas cia siab rau Vajtswv ntawd mas, tej zaum koj yuav tau txais Vajntsujplig txoj kev qhuab qhia, thiab koj yuav muaj ib txoj kev, los sis yog tias Vajtswv txoj lus los rau koj, ces koj yuav paub koom tes, los sis tej zaum Vajtswv yuav npaj qee yam xwm txheej rau koj kawm kom paub, uas yog qhov muaj Vajtswv tej kev npaj siab uas zoo nyob rau hauv. Nyob rau hauv tus txheej txheem uas cia siab rau Vajtswv ntawd mas, koj yuav pom Vajtswv txoj kev coj qhia thiab kev ua thawj coj, thiab tej no yuav pab koj kawm kom paub ntau yam thiab muaj ib txoj kev to taub txog Vajtswv zoo dua. Qhov no yog qhov txiaj ntsim ntawm kev cia siab rau Vajtswv. Yog li ntawd, kev cia siab rau Vajtswv thiaj li yog ib qho kev kawm uas cov raws Vajtswv qab yuav tsum tau kawm tas li, thiab nws yog ib yam uas lawv yeej yuav paub tsis tag ib sim neej li. Muaj ntau tus tib neeg uas muaj kev paub tsawg heev thiab tsis pom Vajtswv tej kev ua li, yog li ntawd lawv thiaj li xav hais tias, “Muaj ntau yam me me uas kuv tus kheej yeej ua tau thiab yog yam uas kuv tsis tas yuav cia siab rau Vajtswv li.” Qhov no tsis yog lawm. Tej yam me me yuav coj mus rau yam loj ntag, thiab Vajtswv lub siab nyiam zais nyob rau hauv tej yam me me no. Muaj ntau tus tib neeg tsis quav ntsej txog tej yam me me, yog vim li ntawd, lawv thiaj li pom tias lawv tus kheej muaj tej yam tsis zoo loj heev vim tej yam me me ntawd xwb. Cov uas hwm Vajtswv tiag tiag mas, tsis hais yam loj thiab me li, yeej yuav cia siab rau Vajtswv, thov Vajtswv, muab txhua yam tso rau Vajtswv, thiab tom qab ntawd saib seb Vajtswv yuav coj thiab coj lawv kev li cas xwb. Thaum koj paub li no lawm, ces koj thiaj li yuav muaj peev xwm cia siab rau Vajtswv txog txhua yam, thiab koj yim paub qhov no, ces koj yim xav hais tias qhov kev cia siab rau Vajtswv txog txhua yam ntawd mas muaj qab hau heev. Thaum koj cia siab rau Vajtswv txog ib yam dab tsi lawm, Vajtswv yuav tsis ua rau koj paub, yuav tsis muab lub ntsiab kom meej, los sis haj yam tsis qhia kom meej rau koj li, tiam sis Nws yuav ua kom koj to taub ib lub tswv yim uas paub tseeb txog qhov xwm txheej ntawd, thiab qhov no yog Vajtswv siv lwm txoj hau kev txawv los coj koj kev thiab qhia ib txoj kev rau koj. Yog koj paub thiab to taub qhov no, koj yuav tau txiaj ntsim. Tej zaum koj yuav tsis to taub ib yam dab tsi nyob rau thaum ntawd, tiam sis koj yuav tsum thov Vajtswv thiab cia siab rau Vajtswv txuas ntxiv. Qhov no tsis muaj dab tsi txhaum li, thiab sai sai ntawd los sis tom qab ntawd yuav muaj tus qhia kom koj paub. Qhov kev xyaum ua raws li no tsis tau txhais hais tias ua raws li tej kev cai. Tiam sis, nws yog ua raws li tej kev cheem tsum ntawm tus ntsujplig, thiab nws yog qhov uas tib neeg tsim nyog xyaum ua raws. Tej zaum koj yuav tsis tau txais kev qhuab qhia thiab kev coj qhia txhua zaus uas koj thov Vajtswv thiab cia siab rau Vajtswv, tiam sis tib neeg yuav tsum xyaum ua raws li no, thiab yog lawv xav kom to taub qhov tseeb, ces lawv yuav tsum xyaum ua raws li no. Qhov no yog tus yam ntxwv uas ib txwm muaj ntawm lub neej thiab lub siab, thiab tsuas yog ua li no xwb tib neeg thiaj li tuav tau txoj kev sib raug zoo nrog Vajtswv li ib txwm muaj, kom lawv lub siab thiaj li nyob ze Vajtswv. Yog li ntawd thiaj li hais tau hais tias qhov kev cia siab rau Vajtswv ntawd yog ib txoj kev nrog Vajtswv sib txuas lus li ib txwm muaj nyob rau hauv tib neeg lub siab. Tsis hais txog qhov seb koj puas tau txais Vajtswv txoj kev qhuab qhia thiab kev coj qhia li, koj yuav tsum thov Vajtswv thiab cia siab rau Vajtswv rau hauv txhua yam xwb. Qhov no kuj yog ib txoj kev los nyob rau ntawm Vajtswv lub xub ntiag uas zam tsis dhau li thiab. Thaum tib neeg ntseeg Vajtswv thiab raws Vajtswv qab, lawv yuav tsum muaj lub siab uas cia siab rau Vajtswv tas li. Qhov no yog lub siab uas cov tib neeg muaj txoj kev ua neej yuav tsum muaj. Tej thaum, qhov kev cia siab au Vajtswv ntawd tsis tau txhais tias yog qhov kev thov kom Vajtswv ua qee yam uas yog siv cov lus tshwj xeeb, los sis qhov kev thov Nws rau kev coj qhia tshwj xeeb los sis kev tiv thaiv. Feem ntau, nws yog thaum tib neeg ntsib qee qhov teeb meem, ces lawv muaj peev xwm hu rau Nws yam ua siab dawb paug. Yog li, qhov Vajtswv tab tom ua rau thaum tib neeg hu rau Nws ntawd yog dab tsi? Thaum ib tug neeg lub siab dhia tig toog thiab lawv muaj qhov kev xav no: “Au Vajtswv, kuv tus kheej ua tsis tau qhov no, kuv tsis paub tias yuav ua qhov ntawd li cas, thiab kuv hnov qaug zog thiab xav phem…,” thaum txoj kev xav no tshwm tuaj rau hauv lawv lawm, Vajtswv puas paub txog qhov no? Thaum txoj kev xav no tshum tuaj rau hauv tib neeg lawm, lawv puas muaj lub siab dawb paug lawm? Thaum lawv hu rau Vajtswv yam ua siab dawb paug li no lawm, Vajtswv puas lees pab lawv? Qhov tseeb txawm tias lawv tsis hais ib lo lus li los xij, lawv qhia lub siab dawb paug, ces yog li ces Vajtswv lees pab lawv. Thaum ib tug twg ntsib ib qho kev nyuaj siab dab tsi, thaum lawv tsis muaj leej twg tig rau li, thiab thaum lawv hnov tshwj xeeb tias tsis muaj kev pab lawm, ces lawv tsuas tso lawv qhov kev cia siab rau Vajtswv lawm xwb. Lawv cov lus thov zoo li cas? Tus yam ntxwv hauv lawv lub siab lub ntsws yog dab tsi? Lawv puas muaj lub siab dawb paug? Puas muaj ib qho kev txhaum nrog rau thaum lub sij hawm ntawd? Nws tsuas yog thaum koj tso siab rau Vajtswv zoo li txoj xov kawg uas koj tuav tseg, cia siab tias Nws yuav pab koj, tias koj lub siab mas dawb paug. Txawm koj tsis tau hais ntau los xij, koj lub siab twb dhia tig toog lawm. Qhov ntawd yog, koj muab koj lub siab dawb paug rau Vajtswv, thiab Vajtswv mloog. Thaum Vajtswv mloog, Nws pom koj tej kev nyuaj, thiab Nws yuav qhia koj, coj koj kev, thiab pab koj. Thaum twg tib neeg lub siab thiaj li mam dawb paug? Thaum tib neeg cia siab rau Vajtswv thiab thaum tsis muaj kev tawm li lawm mas mam li ua siab dawb paug. Qhov tseem ceeb tshaj plaws uas yuav tsum tau muaj nyob rau hauv txoj kev cia siab rau Vajtswv ntawd yog ib lub siab dawb paug. Koj yuav tsum muaj ib tug yam ntxwv uas cheem tsum Vajtswv tiag tiag. Qhov ntawd hais tau hais tias, yam tsawg kawg tib neeg lub siab yuav tsum dawb paug, tsis lam tau lam ua; lawv yuav tsum tsis txhob yog hais ntawm lawv lub qhov ncauj xwb tiam sis tsis yog hauv lawv lub siab. Yog koj tsuas lam hais lus rau Vajtswv xwb, tiam sis koj tsis cia siab li, thiab qhov koj hais ntawd txhais hais tias, “Kuv tus kheej twb muaj tej kev npaj lawm, yog li ntawd Vajtswv, kuv tsuas qhia rau Koj paub xwb. Kuv yuav ua raws li tej kev npaj ntawd txawm Koj yuav pom zoo thiab tsis pom zoo los xij. Kuv tsuas ua kom dhau tej hauj lwm ntawd xwb,” ces qhov no txhais hais tias muaj teeb meem. Koj tab tom dag thiab ua si nrog Vajtswv, thiab qhov no kuj yog ib txoj kev nthuav tawm txog txoj kev tsis hwm Vajtswv thiab. Tom qab qhov no lawm Vajtswv yuav ua li cas rau koj? Vajtswv yuav tsis quav ntsej koj thiab muab koj tso tseg, thiab koj yuav poob ntsej muag heev. Yog koj tsis nquag nrhiav Vajtswv thiab tsis siv zog rau qhov tseeb, ces koj yuav raug muab ntiab tawm mus.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Kev Ntseeg Vajtwv Yuav Tsum Pib Los Ntawm Qhov Pom Tshab Plaws Tej Ncauj Ke Phem hauv lub Ntiaj Teb

Vajtswv Tej Lus Txhua Hnub  Nqe Lus Uas Xaiv Tawm Los 377

Qhov tseeb yog txoj sia ntawm Vajtswv Tus Kheej kiag; qhov ntawd sawv cev Nws tus moj yam, Nws lub ntsiab tseeb, thiab yam uas Nws muaj thiab yam uas yog Nws. Yog koj hais tias qhov muaj qee qhov kev ntsib kev pom thiab kev paub lawm, ces yog koj muaj qhov tseeb lawm no, yog li ntawd koj puas tau muaj txoj kev dawb huv? Vim li cas koj thiaj li tseem muaj kev qias vuab tsuab? Vim li cas koj thiaj li tsis paub hom tib neeg uas sib txawv? Vim li cas koj thiaj li ua tsis tau tim khawv rau Vajtswv? Tab txawm yog koj to taub qee qhov tseeb los xij, koj puas sawv cev tau rau Vajtswv? Koj puas ua neej tau raws li Vajtswv tus moj yam? Tej zaum koj yuav muaj qee qhov kev ntsib kev pom thiab kev paub txog ib kis uas tseem ceeb ntawm qhov tseeb, thiab tej zaum koj yuav muaj peev xwm hais tau lus zoo me ntsis tuaj, tiam sis yam uas koj pab cuam tau rau tib neeg mas muaj tsawg heev thiab kav tsis ntev li. Qhov no yog vim koj txoj kev to taub thiab txoj kev kaj uas koj muaj ntawd tsis sawv cev rau lub ntsiab tseeb ntawm qhov tseeb, thiab nws tsis sawv cev rau tag nrho qhov tseeb. Nws tsuas yog sawv cev rau ib sab los sis ib kis me me ntawm qhov tseeb xwb, nws tsuas yog ib theem uas tib neeg ua tau xwb, thiab nws tseem nyob deb ntawm lub ntsiab tseeb ntawm qhov tseeb. Txoj kev kaj, kev qhuab qhia, kev ntsib kev pom, thiab kev paub me ntsis no yeej hloov tsis tau qhov tseeb qhov chaw li. Tab txawm yog txhua tus tib neeg muaj qee qhov kev paub ib qho tseeb, thiab muab tag nrho lawv tej kev ntsib kev pom thiab kev paub ntawd coj los tso ua ke los xij, nws yeej tseem yuav tsis zoo npaum ib kab lus ntawm qhov tseeb no lub ntsiab tseeb kom tag nrho li. Raws li qhov uas tau hais yav tag los, “Kuv muab qhov no sib sau nrog rau ib qho tseeb rau tib neeg lub ntiaj teb: Nyob nrog rau tib neeg, yeej tsis muaj ib tug uas hlub Kuv li.” Sob lus no yog qhov tseeb, yog lub ntsiab tseeb ntawm txoj sia, yog ib yam uas tob heev, thiab yog Vajtswv Tus Kheej ib qho kev nthuav tawm ntag. Tom qab tau paub los tau peb xyoo lawm, tej zaum koj yuav muaj ib txoj kev to taub me ntsis, thiab tom qab xya los sis yim xyoo lawm, tej zaum koj yuav muaj ib txoj kev to taub me ntsis ntxiv tuaj, tiam sis qhov kev to taub no yeej sawv cev tsis tau rau qhov tseeb no li. Tom qab ob xyoos lawm, tej zaum lwm tus yuav muaj kev to taub me ntsis, los sis to taub me ntsis ntxiv tom qab kaum xyoo lawm, los sis haj tseem muaj ib txoj kev to taub siab dua tom qab ib tiam neeg lawm thiab, tiam sis neb ob txoj kev to taub uas muab coj los tso ua ke ntawd los yeej tseem sawv cev tsis tau rau qhov tseeb no li thiab. Txawm neb ob leeg yuav muaj kev paub tob, kev kaj, kev ntsib kev pom, los sis kev paub ntau npaum li cas coj los tso ua ke los xij, nws yeej sawv cev tsis tau rau qhov tseeb no li. Qhov ntawd hais tau hais tias, noob neej txoj sia yog noob neej txoj sia xwb, thiab txawm koj txoj kev paub mus raws li qhov tseeb, raws li Vajtswv lub siab nyiam, los sis raws li Vajtswv tej kev cheem tsum npaum li cas los xij, nws yeej sawv cev tsis tau rau qhov tseeb ntawd li. Qhov hais tias tib neeg muaj qhov tseeb ntawd txhais hais tias tib neeg yeej to taub qhov tseeb ntawd tiag tiag, ua neej raws li tej uas muaj tiag ntawm Vajtswv txoj lus, muaj qee qhov kev paub txog Vajtswv tiag, thiab tuaj yeem txhawb thiab ua tim khawv rau Vajtswv. Txawm li cas los xij, hais tsis tau hais tias tib neeg twb muaj qhov tseeb lawm, vim qhov tseeb mas tob heev. Ib kab lus ntawm Vajtswv txoj lus xwb tuaj yeem siv tag tib neeg ib sim neej thiaj li paub, thiab tab txawm tom qab ntau tiam neeg uas twb paub lawm, los sis ntau txhiab xyoo lawm los xij, yeej tsis tau paub tag nrho ib kab lus ntawm Vajtswv txoj lus li. Qhov no pom tseeb tseeb hais tias tus txheej txheem ntawm txoj kev to taub qhov tseeb thiab paub Vajtswv ntawd yeej tsis muaj hnub kawg li, thiab pom hais tias ib tiam neeg twg tib neeg tsuas to taub txog qhov tseeb ntau npaum li cas ntawm txoj kev ntsib kev pom ntawd xwb. Ib txhia tib neeg hais tias lawv muaj qhov tseeb kiag thaum lawv to taub lub ntsiab lus qub ntawm Vajtswv txoj lus lawm. Puas yog qhov no tsis muaj qab hau li? Hais txog txoj kev kaj thiab kev paub ntawd mas, muaj ib qho uas tob. Qhov muaj tiag ntawm qhov tseeb uas ib tug tib neeg tuaj yeem to taub txog nyob rau hauv ib tiam neeg ntawm txoj kev ntseeg ntawd mas tsawg heev. Yog li ntawd, qhov koj muaj qee qhov kev paub thiab txoj kev kaj ntawd tsis tau txhais hais tias koj muaj qhov muaj tiag ntawm qhov tseeb lawm. Qhov tseem ceeb uas koj yuav tsum saib yog qhov tias seb txoj kev kaj thiab txoj kev paub no puas hais txog lub ntsiab tseeb ntawm qhov tseeb. Qhov no yog qhov tseem ceeb tshaj plaws. Ib txhia tib neeg xav hais tias lawv muaj qhov tseeb thaum lawv pab qhia tau los sis muaj kev to taub me ntsis lawm. Qhov no ua rau lawv zoo siab, yog li ntawd lawv thiaj li khav theeb khav txiv. Tseeb tiag, lawv tseem nyob deb ntawm qhov kev to taub txog qhov muaj tiag ntawm qhov tseeb. Tib neeg tuaj yeem muaj qhov tseeb dab tsi? Cov tib neeg uas muaj qhov tseeb puas tuaj yeem ntog twg los tau thiab qhov twg los tau? Thaum tib neeg muaj qhov tseeb lawm, ua li cas lawv ho tseem tawm tsam Vajtswv thiab ntxeev siab rau Vajtswv thiab? Yog koj hais tias koj muaj qhov tseeb, qhov ntawd ua pov thawj qhia hais tias muaj Khetos txoj sia nyob rau hauv koj—ces qhov ntawd txaus ntshai heev! Koj dhau los ua tus Tswv, koj dhau los ua Khetos lawm lod? Qhov no yog ib co lus uas ruam heev, thiab yog tib neeg hais nkaus xwb; nws muaj noob neej tej kev xav phem thiab tej kev xav hauv nruab siab, thiab tsis yog ib txoj hauj lwm uas siv tau rau Vajtswv.

Thaum tib neeg to taub qhov tseeb, thiab nyob nrog nws ua lawv txoj sia, txoj sia no yog hais txog dab tsi? Nws txhais hais tias qhov tseeb kav tag nrho hauv lawv lub siab, nws txhais hais tias lawv muaj peev xwm los ua neej raws li Vajtswv cov lus, nws txhais hais tias lawv muaj kev paub tiag tiag txog Vajtswv cov lus thiab ib qho kev to taub tiag tiag txog qhov tseeb. Thaum tib neeg muaj txoj sia tshiab no nyob rau hauv lawv lawm, ces txhua yam puav leej ua tau tag nrho los ntawm qhov xyaum ua raws thiab paub Vajtswv cov lus. Qhov ntawd yog tsim nyob rau hauv lub hauv paus ntawm qhov tseeb ntawm Vajtswv cov lus, thiab muab tau tej ntawd los ntawm lawv txoj kev ua neej nyob rau hauv sab uas muaj qhov tseeb. Txhua yam uas tib neeg lub neej muaj ces yog lawv txoj kev paub thiab tau ntsib tau pom txog qhov tseeb, thiab muaj qhov no ua lub hauv paus, ces yeej tsis dhau tus ciaj ciam ntawd li; nov yog lub neej uas hais txog thaum hais txog kev muab tau txoj sia ntawm qhov tseeb. Kev muaj peev xwm los ua neej raws li qhov tseeb ntawm Vajtswv cov lus, mas nws tsis yog qhov uas txoj sia ntawm qhov tseeb nyob rau hauv tib neeg, los sis tsis yog qhov uas yog lawv muaj qhov tseeb ua lawv txoj sia, ces tib neeg rais mus ua qhov tseeb, thiab lawv txoj sia nruab nrog rais mus ua txoj sia ntawm qhov tseeb; haj yam hais tsis tau hais tias koj yog txoj sia ntawm qhov tseeb thiab. Txog thaum kawg, lawv txoj sia yeej tseem yog txoj sia ntawm ib tug tib neeg xwb. Yog koj muaj peev xwm ua neej raws li Vajtswv cov lus thiab muaj kev paub txog qhov tseeb, thiab yog qhov kev to taub no tuaj cag nyob rau hauv koj lawm, nws dhau los ua koj lub neej, thiab qhov tseeb uas koj tau txais los ntawm qhov kev tau ntsib tau pom ntawd dhau los ua lub hauv paus ntawm qhov koj muaj txoj sia nyob lawm, thiab yog koj ua neej raws li Vajtswv cov lus no, ces tsis muaj leej twg hloov tau qhov no li, thiab Ntxwgnyoog dag los sis ua tsis tau rau koj qias vuab tsuab lawm, ces koj thiaj li yuav tau txais txoj sia ntawm qhov tseeb. Qhov ntawd yog qhov hais tias, koj lub neej tsuas muaj qhov tseeb xwb, txhais hais tias yog koj txoj kev to taub, kev ntsib kev pom, thiab kev paub tob txog qhov tseeb, thiab txawm koj yuav ua dab tsi los xij, koj yuav ua neej raws li tej no, thiab koj yuav tsis ua dhau tus ciaj ciam ntawm tej no li. Qhov no yog qhov txhais hais tias muaj qhov muaj tiag ntawm qhov tseeb, thiab cov tib neeg zoo li no yog cov tib neeg uas thaum kawg Vajtswv xav muab kom tau los ntawm Nws tes hauj lwm. Tiam sis tsis hais tib neeg yuav to taub qhov tseeb zoo npaum li cas li, lawv lub ntsiab tseeb yeej tseem yog qhov ntawm noob neej, thiab yeej muab piv tsis tau rau lub ntsiab tseeb ntawm Vajtswv li. Vim lawv qhov kev ntsib kev pom qhov tseeb yeej muaj mus ib txhis li, thiab vim lawv yuav tsis muaj hnub uas ua lub neej tau mus tag nrho li qhov tseeb, thiab lawv tsuas ua neej tau raws li qhov tseeb uas me tshaj plaws uas tib neeg muaj tau, yog li ces yuav ua li cas es lawv thiaj li yuav tig tau mus ua Vajtswv mas? … Yog hais tias koj muaj ib qho kev ntsib kev pom me me nrog rau Vajtswv cov lus, thiab ua neej raws nraim li txoj kev paub tseeb thiab txoj kev paub txog qhov tseeb, ces Vajtswv cov lus yuav maj mam rais los ua koj txoj sia. Txawm li cas los xij, koj yeej tseem tsis muaj peev xwm hais tau hais tias qhov tseeb yog koj txoj sia los sis hais tias qhov uas koj tab tom hais tawm yog qhov tseeb; yog qhov ntawd yog koj txoj kev xav, ces koj yuam kev lawm. Yog koj tsuas muaj me ntsis kev ntsib kev pom nrog ib kis tshwj xeeb ntawm qhov tseeb xwb, ces qhov no nkaus xwb puas yuav sawv cev tau rau koj tias muaj qhov tseeb lawm mas? Qhov noj puas tuaj yeem raug muab xam tau tias muaj qhov tseeb lawm? Koj puas muaj peev xwm piav txog qhov tseeb kom ntxaws ntxaws mas? Koj puas muaj peev xwm tshawb nrhiav tau Vajtswv tus moj yam, thiab yam Vajtswv muaj thiab yog, los ntawm qhov tseeb mas? Yog ua tsis tau tej no, ces qhov no ua pov thawj qhia tau hais tias qhov tsuas tau ntsib tau pom ib kis tseem ceeb ntawm qhov tseeb xwb suav tsis tau hais tias to taub qhov tseeb, los sis paub Vajtswv tiag tiag, thiab haj yam hais tsis tau hais tias muaj qhov tseeb lawm. Txhua leej txhua tus yeej tau ntsib tau pom nrog rau tib qho thiab tib tug ciaj ciam ntawm qhov tseeb nkaus xwb; qhov uas tau ntsib tau pom nws kiag nyob rau hauv koj tus ciaj ciam uas muaj chaw kawg, koj tsis muaj peev xwm kov tau tag nrho qhov tseeb ntau tiag tiag. Tib neeg puas muaj peev xwm ua neej mus raws li lub ntsiab qub thaum chiv keeb ntawm qhov tseeb? Koj qhov kev paub kev pom me me ntawd yuav muaj npaum li cas? Tsuas yog ib lub xuab zeb nyob rau ntawm ntug hiav txwv xwb; ib teev dej me me nyob rau hauv hiav txwv. Yog li ntawd, tsis hais qhov kev paub ntawd thiab tej kev xav uas koj tau los ntawm tej kev ntsib kev pom ntawd yuav muaj nuj nqis npaum li cas li, lawv yeej tseem tsis muaj cuab kav muab suav tau ua qhov tseeb li. Tsuas hais tau hais tias tej ntawd mus raws li qhov tseeb xwb. Qhov tseeb yog los ntawm Vajtswv los, thiab lub ntsiab lus sab hauv thiab qhov muaj tiag ntawm qhov tseeb ntawd muab ntau yam npog uas tsis muaj leej twg tuaj yeem nkag siab los sis ua pov thawj qhia tau li. Tsuav koj muaj ib txoj kev to taub txog qhov tseeb thiab Vajtswv tiag tiag xwb, ces koj yuav to taub qee qhov tseeb lawm, tsis muaj leej twg yuav muaj peev xwm ua pov thawj qhia tau tej kev to taub tiag tiag no li, thiab tej lus tim khawv uas muaj qhov muaj tiag ntawm qhov tseeb ntawd yuav nyob mus ib txhis li. Vajtswv qhuas cov uas muaj qhov muaj tiag ntawm qhov tseeb. Tsuav koj caum qhov tseeb, thiab koj tuaj yeem vam khom rau Vajtswv kom paub Vajtswv cov lus thiab lees txais tau qhov tseeb los ua koj lub neej xwb ces txawm koj yuav nyob rau cheeb tsam twg los xij, koj yuav muaj ib txoj kev, muaj txoj sia nyob, thiab Vajtswv yuav pom zoo rau koj. Tab txawm qhov me me uas tib neeg tau txais ntawd mus raws li qhov tseeb los xij, hais tsis tau hais tias qhov no yog qhov tseeb, thiab haj yam hais tsis tau hais tias lawv twb tau txais qhov tseeb lawm. Txoj kev kaj me me uas tib neeg tau txais ntawd tsuas yog haum rau lawv tus kheej los sis lwm tus uas nyob rau hauv tus ciaj ciam ntawd xwb, tab sis yuav tsis haum nyob rau hauv ib tug ciaj ciam txawv. Tsis hais ib tug neeg twg qhov kev to taub yuav tob npaum li cas li, nws yeej tseem muaj tsawg tsawg xwb, thiab lawv qhov kev ntsib kev pom mas yuav tsis muaj peev xwm mus txog qhov tob ntawm tus ciaj ciam ntawm qhov tseeb li. Ib tug neeg qhov kev pom meej thiab ib tug neeg qhov kev to taub ces yuav tsis muaj hnub piv tau rau qhov tseeb li.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb

Vajtswv Tej Lus Txhua Hnub  Nqe Lus Uas Xaiv Tawm Los 378

Yog koj xav xyaum ua raws thiab to taub qhov tseeb, ces ua ntej shaj koj yuav tsum xub nrhiav qhov tseeb thaum tej yam tshwm sim rau koj nyob rau hauv koj lub neej txhua hnub. Qhov ntawd yog, koj yuav tsum saib txhua yam kom mus raws li Vajtswv cov lus thiab qhov tseeb; thaum koj to taub lub ntsiab tseeb ntawm qhov teeb meem no meej lawm, ces koj yuav paub tias yuav xyaum ua raws li qhov tseeb tej hauv paus ntsiab lus li cas. Thiab yog koj yeej ib txwm saib txhua yam mus raws li Vajtswv cov lus, ces koj yuav muaj peev xwm pom Vajtswv txhais tes—Vajtswv tej kev ua—nyob rau hauv txhua yam uas tshwm sim nyob ib puag ncig koj. Txawm yuav muaj dab tsi tshwm sim nyob ib puag ncig lawv los xij, ib txhia tib neeg xav hais tias qhov ntawd tsis muaj dab tsi cuam tshuam txog lawv txoj kev ntseeg Vajtswv los sis qhov tseeb li; lawv tsuas ua raws li lawv tus kheej tus yam ntxwv, ua raws li Ntxwgnyoog tej tswv yim xwb. Lawv kawm puas tau tej zaj lus qhia zoo li no? Yeej kawm tsis tau kiag li. Vim li no es thiaj li muaj ntau tus tib neeg uas twb ntseeg Vajtswv los tau kaum los sis nees nkaum xyoo lawm los tseem tsis to taub txog qhov tseeb los sis lub neej txoj sia li. Lawv tsis muaj peev xwm koom nrog Vajtswv nyob rau hauv lawv lub neej txhua hnub, los sis txhua yam uas yuav tshwm sim nyob ib puag ncig lawv raws li Vajtswv cov lus, yog li ntawd thaum twg ib yam dab tsi tshwm sim rau lawv, lawv qhia tsis tau tias qhov ntawd yog dab tsi tiag tiag, thiab lawv tsis muaj peev xwm daws qhov ntawd raws li qhov tseeb tej hauv paus ntsiab lus. Cov tib neeg zoo li no tsis muaj kev to taub lub neej txoj sia. Yog li ntawd, cov tib neeg zoo li no tsis to taub qhov tseeb txog lub neej txoj sia. Ib txhia tib neeg mas tsuas koom siab thaum lawv nyeem Vajtswv cov lus nyob rau hauv kev pe hawm xwb; nyob rau tej lub sij hawm zoo li no mas, lawv muaj peev xwm hais me ntsis txog kev paub, tiam sis lawv siv Vajtswv cov lus ua tsis tau ib yam dab tsi uas tshwm sim rau lawv hauv lub neej tiag tiag li, los sis lawv tsis paub xyov yuav xyaum ua raws li qhov tseeb li cas li, yog li ntawd lawv thiaj li xav hais tias txhua yam uas tshwm sim nyob rau hauv lawv lub neej txhua hnub ntawd tsis muaj kev cuam tshuam rau qhov tseeb, tsis muaj kev sib raug zoo nrog Vajtswv cov lus li. Nyob rau hauv lawv txoj kev ntseeg Vajtswv mas, cuag nkaus li lawv saib Vajtswv cov lus thiab qhov tseeb yam li yog ib qho chaw uas muaj kev paub, yam li nrauj kiag tawm ntawm lawv lub neej txhua hnub thiab cai tawm kiag ntawm lawv tej kev xav txog txhua yam, lawv tej hom phiaj ntawm lub neej, thiab lawv tej kev caum lub neej li lawm. Txoj kev ntseeg Vajtswv uas zoo li no ne ho zoo li cas? Lawv puas yuav muaj peev xwm to taub qhov tseeb thiab to taub qhov muaj tiag? Thaum lawv ntseeg Vajtswv li no lawm, lawv puas yog ib tug uas raws Vajtswv qab? Lawv tsis yog ib tug uas ntseeg Vajtswv tiag tiag, lawv haj yam tsis yog ib tug uas raws Vajtswv qab li thiab. Tag nrho tej teeb meem uas nyob rau hauv lawv lub neej txhua hnub—nrog rau txhua yam uas ntsig txog tsev neeg, kev sib yuav, hauj lwm, los sis lawv tej kev cia siab ntawd—lawv pom tias tsis muaj kev cuam tshuam rau qhov tseeb li, yog li ntawd lawv thiaj li sim siv noob neej tej tswv yim los daws tej ntawd. Qhov ua li no, lawv yeej yuav tsis tau txais qhov tseeb, yeej yuav tsis muaj peev xwm to taub tias qhov Vajtswv xav ua kom tiav nyob rau hauv tib neeg ntawd yog dab tsi, thiab qhov txiaj ntsim uas Nws xav ua kom tiav nyob rau hauv lawv. Vajtswv nthuav qhov tseeb tawm los cawm tau tib neeg, los yaug lawv tus moj yam qias vuab tsuab kom dawb huv thiab hloov lawv tus moj yam qias vuab tsuab, tiam sis lawv tsis paub tias tsuas yog lawv lees txais thiab caum qhov tseeb xwb mas lawv thiaj li yuav muaj peev xwm daws tau lawv tus kheej tus moj yam uas qias vuab tsuab; lawv tsis paub tias tsuas yog thaum lawv paub thiab xyaum ua raws li Vajtswv cov lus nyob rau hauv lawv lub neej txhua hnub lawm xwb mas lawv thiaj li yuav tau txais qhov tseeb li. Cov tib neeg zoo li no tsis yog ruam thiab tsis paub dab tsi li lod? Lawv tsis yog cov tib neeg uas ruam thiab txaus luag tshaj plaws lod? Ib txhia tib neeg mas yeej tsis tau caum qhov tseeb nyob rau hauv lawv txoj kev ntseeg Vajtswv li. Lawv xav hais tias kev ntseeg Vajtswv ces yog mus koom kev pe hawm, kev thov Vajtswv, kev hu nkauj qhuas Vajtswv, kev nyeem Vajtswv cov lus; lawv saib txoj kev ua kev cai ntawm sab kev lis kev cai ntseeg tseem ceeb xwb, thiab lawv tsis xyaum ua raws los sis tsis paub Vajtswv cov lus li. Qhov no yog qhov cov tib neeg ntawm sab kev lis kev cai ntseeg ntawd ntseeg Vajtswv. Thiab thaum tib neeg saib tej yam tseem ceeb npaum li txoj kev ntseeg Vajtswv npaum li txoj kev ntseeg ntawm sab kev lis kev cai ntseeg lawm no, lawv tsis yog cov tsis ntseeg cov lod? Lawv tsis yog cov tsis ntseeg lod? Qhov caum qhov tseeb ntawd mas cheem tsum kom paub ntau tus txheej txheem heev. Muaj ib sab mas yooj yim, thiab kuj muaj ib sab mas nyuaj. Muab hais yooj yim tias, peb tsim nyog tshawb nrhiav qhov tseeb thiab xyaum ua raws thiab ntsib Vajtswv cov lus hauv txhua yam uas tshwm sim puag ncig peb. Kiag thaum koj pib ua qhov no, koj yuav pom ntau thiab ntau ntxiv tias koj cheem tsum muab kom tau thiab caum raws qhov tseeb npaum li cas hauv koj txoj kev ntseeg Vajtswv, thiab tias qhov tseeb mas muaj qab hau heev thiab qhov tseeb yog txoj sia. Vajtswv cawm noob neej kom noob neej thiaj li tau txais qhov tseeb li txoj sia. Txhua tus noob neej uas raug tsim tawm los ntawd yuav tsum lees txais qhov tseeb li txoj sia, tsis yog cov uas ua dej num, cov uas yog thawj coj thiab cov neeg ua hauj lwm, los sis cov ua dej num rau Vajtswv xwb. Vajtswv cov lus taw ncaj qha rau txhua tus noob neej, thiab Vajtswv hais lus rau txhua tus noob neej. Yog li ntawd, txhua tus neeg uas raug tsim tawm los thiab txhua tus noob neej yuav tsum lees txais Vajtswv cov lus thiab qhov tseeb, nrhiav qhov tseeb hauv txhua yam, thiab tom qab ntawd xyaum ua raws li qhov tseeb tej hauv paus ntsiab lus kom lawv thiaj li muaj peev xwm xyaum ua qhov tseeb thiab zwm rau qhov tseeb. Yog hais tias tsuas yog cov thawj coj thiab cov neeg ua hauj lwm thiaj li yuav tsum tau xyaum ua raws li qhov tseeb xwb, ces qhov no yuav cov nyom rau Vajtswv txoj kev npaj siab kiag li lawm, vim qhov tseeb uas Vajtswv nthuav tawm ntawd yog rau txhua tus noob neej, thiab qhov tseeb uas raug muab nthuav tawm ntawd yog txhawm rau lub hom phiaj uas cawm noob neej, tsis yog cawm ob peb tug tib neeg xwb. Yog zoo li no, ces cov lus uas Vajtswv nthuav tawm ntawd tsuas muaj nqis me ntsis xwb. Tam sim no koj puas tau muaj ib txoj kev los caum raws qhov tseeb? Qhov ua ntej tshaj uas yuav tsum muab los xyaum ua thaum caum raws qhov tseeb yog dab tsi? Ua ntej tshaj txhua yam, koj yuav tsum siv sij hawm kom ntau los noj thiab haus Vajtswv cov lus thiab mloog tej lus qhuab qhia thiab kev sib qhia. Thaum koj ntsib ib qho teeb meem, taij thov thiab tshawb nrhiav ntxiv. Thaum nej tau npaj nej tus kheej txhij nrog rau ntau qhov tseeb lawm, thaum nej loj hlob sai, thiab muaj tus yeeb yam lawm, nej yuav muaj cuab kav ua ib teg dej num, ua ib txoj dej num me me, thiab yuav muaj peev xwm mus dhau qee qhov kev sim siab thiab kev ntxias dag. Lub sij hawm ntawd, nej yuav hnov tias nej tau to taub tiag tiag lawm thiab muab tau qee qhov tseeb lawm, thiab nej yuav paub tias cov lus uas Vajtswv hais ntawd puav leej yog qhov tseeb, tias cov lus ntawd yog tej qhov tseeb uas cheem tsum tshaj plaws rau txoj kev cawm cov tib neeg ntiaj teb qias vuab tsuab kom dim, thiab tias cov lus ntawd puav leej yog qhov tseeb ntawm lub neej txoj sia uas tus Tswv Tsim uas tsuas yog tib tug xwb muab los.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Qhov Tseem Ceeb ntawm Kev Caum Raws qhov Tseeb thiab txoj Kev ntawm Kev Caum Raws

Vajtswv Tej Lus Txhua Hnub  Nqe Lus Uas Xaiv Tawm Los 379

Yog tib neeg xav kom raug cawm dim thaum lawv ntseeg Vajtswv ntawd, ces qhov tseem ceeb yog qhov seb lawv puas muaj ib lub siab uas hwm Vajtswv los sis tsis muaj, seb Vajtswv puas muaj ib qho chaw nyob hauv lawv lub siab los sis tsis muaj, seb lawv puas muaj peev xwm ua neej nyob rau ntawm Vajtswv lub xub ntiag thiab tuav txoj kev sib raug zoo nrog Vajtswv li ib txwm los sis tsis muaj peev xwm xwb. Qhov tseem ceeb ces yog qhov seb tib neeg puas muaj peev xwm xyaum ua raws qhov tseeb, thiab muaj qhov mloog Vajtswv lus los sis tsis muaj xwb. Tej no yog txoj kev thiab tus yam ntxwv uas yuav raug cawm dim. Yog koj lub siab tsis muaj peev xwm ua neej nyob rau ntawm Vajtswv lub xub ntiag, yog koj tsis nquag thov Vajtswv thiab kawm los ntawm Vajtswv, thiab tsis muaj txoj kev sib raug zoo nrog Vajtswv li ib txwm muaj, ces koj yeej yuav tsis raug cawm dim li, vim rau qhov koj twb thaiv txoj kev uas mus tau txoj kev cawm dim lawm. Yog koj tsis muaj ib txoj kev sib raug zoo nrog Vajtswv li, ces koj twb mus txog qhov kawg lawm. Yog Vajtswv tsis nyob rau hauv koj lub siab, ces qhov hais tias koj muaj kev ntseeg ntawd tsis muaj qab hau li, tsuas yog ntseeg Vajtswv kom muaj npe xwb. Txawm koj yuav muaj peev xwm hais tau tej lus ntawm txoj kev qhuab qhia ntau npaum li cas, koj raug kev txom nyem npaum li cas rau koj txoj kev ntseeg Vajtswv, los sis koj muaj peev xwm npaum li cas los xij; yog tsis muaj Vajtswv nyob hauv koj lub siab, thiab koj tsis hwm Vajtswv, ces txawm koj yuav ntseeg Vajtswv li cas los xij. Vajtswv yuav hais tias, “Koj uas yog tus neeg ua phem, cia li khiav ntawm Kuv mus.” Koj yuav raug muab cais mus ua ib tug neeg ua phem. Koj yuav tsis muaj kev sib raug zoo nrog Vajtswv lawm; Nws yuav tsis yog koj tus Tswv los sis yog koj tus Vajtswv lawm. Tab txawm yog koj lees paub hais tias Vajtswv kav tag nrho txhua yam, thiab lees paub hais tias Nws yog tus Tswv Tsim los xij, koj tsis pe hawm Nws, thiab tsis zwm rau Nws lub hwj chim kav li. Koj raws Ntxwgnyoog thiab cov dab phem qab; tsuas yog Ntxwgnyoog thiab cov dab phem xwb thiaj li yog koj tus tswv. Yog, hauv txhua yam, koj tso siab rau koj tus kheej, thiab ua raws li koj tus kheej lub siab nyiam, yog koj tso siab hais tias koj txoj moo nyob rau hauv koj tus kheej ob txhais tes xwb, ces qhov koj ntseeg ntawd yog koj tus kheej xwb. Tab txawm yog koj hais tias koj ntseeg thiab lees paub Vajtswv los xij, Vajtswv tsis lees paub koj. Koj tsis muaj kev sib raug zoo nrog Vajtswv li, yog li ntawd thaum kawg koj yeej yuav raug Nws ntxub thiab tsis kam txais yuav, raug Nws rau txim, thiab raug Nws muab ntiab tawm mus; Vajtswv tsis cawm cov tib neeg zoo li koj. Cov tib neeg uas ntseeg Vajtswv tiag tiag yog cov uas lees txais Nws ua tus Cawm Seej, cov uas lees txais hais tias Nws yog qhov tseeb, yog txoj kev, thiab yog txoj sia. Lawv muaj peev xwm ua siab dawb paug muab lawv tus kheej fij rau Nws thiab ua tes dej num ntawm ib tug neeg uas raug tsim tawm los; lawv paub Vajtswv tes hauj lwm, lawv xyaum ua raws li Nws cov lus thiab qhov tseeb, thiab lawv taug txoj kev uas caum qhov tseeb. Lawv yog cov tib neeg uas ua raws li Vajtswv lub hwj chim kav thiab tej kev npaj, thiab ua raws li Nws lub siab nyiam. Tsuas yog thaum tib neeg muaj txoj kev ntseeg Vajtswv zoo li no lawm xwb mas lawv thiaj li yuav dim; yog tsis li ntawd, ces lawv yuav raug teem txim. Qhov tib neeg muaj txoj kev xav kom muaj tseeb thaum lawv ntseeg Vajtswv ntawd txais yuav puas tau? Nyob rau hauv lawv txoj kev ntseeg Vajtswv ntawd, tib neeg puas tuaj yeem txais tau qhov tseeb thaum lawv tseem pheej tuav rawv rau lawv tus kheej tej kev xav phem uas pom tsis meej, thiab tej kev xav hauv nruab siab uas paub tsis meej? Yeej tsis tuaj yeem li. Thaum tib neeg ntseeg Vajtswv, lawv yuav tsum lees txais qhov tseeb, ntseeg Nws li Nws hais, thiab ua raws li Nws tej kev coj kev qhia thiab tej kev npaj; tsuas yog thaum ntawd xwb lawv thiaj li yuav tau txais txoj kev cawm dim. Dhau ntawm qhov no mus lawm ces tsis muaj lwm txoj kev lawm—txawm koj yuav ua dab tsi los xij, koj yuav tsum tsis txhob muaj ib txoj kev xav kom muaj tseeb li. Kev qhia txog lub ncauj lus no mas tseem ceeb heev rau tib neeg, tsis yog lod? Qhov no yog ib qho ua kom nej to taub.

Tam sim no uas nej twb hnov cov xov no lawm, nej tsim nyog to taub qhov tseeb thiab paub meej tias txoj kev cawm dim ntawd cheem tsum dab tsi lawm. Qhov tib neeg nyiam, qhov lawv siv zog rau, qhov lawv mob siab rau—tej no tsis muaj ib yam tseem ceeb li. Qhov tseem ceeb tshaj plaws ces yog lees txais qhov tseeb xwb. Nyob rau hauv qhov kev tshuaj xyuas kawg ntawd, pom hais tias qhov muaj peev xwm txais tau qhov tseeb mas yog qhov tseem ceeb tshaj plaws, thiab tias qhov uas ua rau koj hwm Vajtswv thiab ntxub dab phem ntawd yog txoj kev yog lawm. Yog koj twb ntseeg Vajtswv los tau ntau lub xyoo thiab yeej ib txwm tsom ntsoov rau txoj kev caum txhua yam uas tsis muaj dab tsi ntsig txog qhov tseeb li, ces koj txoj kev ntseeg tsis muaj dab tsi cuam tshuam rau qhov tseeb, thiab tsis muaj dab tsi cuam tshuam rau Vajtswv li. Tej zaum koj yuav hais tias ntseeg thiab lees paub Vajtswv, tiam sis Vajtswv tsis yog koj tus Tswv, Nws tsis yog koj tus Vajtswv, koj tsis lees tias Vajtswv tswj koj txoj hmoo, koj tsis zwm rau txhua yam uas Vajtswv npaj rau koj, koj tsis lees paub qhov muaj tseeb hais tias Vajtswv yog qhov tseeb—txawm yog qhov twg los koj txoj kev cia siab rau txoj kev cawm dim ntawd twb raug liam sim lawm; yog koj tsis tuaj yeem taug txoj kev uas caum qhov tseeb, ces koj taug txoj kev uas raug kev puas tsuaj ntag. Yog hais tias txhua yam uas koj caum, tsom ntsoov rau, thov txog, thiab thov rau ntawd yog mus raws li Vajtswv cov lus, thiab raws li qhov Vajtswv hais, thiab yog koj muaj ib txoj kev paub zuj zus tias koj ua raws li tus Tswv Tsim hais, thiab pe hawm tus Tswv Tsim, thiab xav hais tias Vajtswv yog koj tus Tswv, koj tus Vajtswv zuj zus, yog koj zoo siab zuj zus ua raws li txhua yam uas Vajtswv qhia thiab npaj rau koj zuj zus, thiab koj txoj kev sib raug zoo nrog Vajtswv zoo dua tuaj, thiab haj tseem zoo dua qub lawm thiab, thiab yog koj txoj kev hlub Vajtswv haj tseem dawb huv dua qub lawm thiab thiab muaj tseeb, ces koj txoj kev tsis txaus siab thiab kev to taub yuam kev txog Vajtswv, thiab koj tej kev ntshaw Vajtswv uas tsis muaj qab hau ntawd yuav muaj tsawg zuj zus lawm, thiab koj yuav muaj txoj kev hwm Vajtswv thiab ntxub dab phem nkaus lawm xwb, uas txhais tau hais tias koj twb taug txoj kev uas mus tau kev cawm dim lawm. Txawm hais tias qhov taug txoj kev mus tau kev cawm dim ntawd yog los ntawm Vajtswv txoj kev qhuab ntuas, kev qhuab qhia, kev saib xyuas, kev txiav txim, thiab kev rau txim, thiab tej no ua rau koj mob siab heev los xij, qhov no yog Vajtswv txoj kev hlub koj. Yog, thaum koj ntseeg Vajtswv, koj tsuas caum kom tau koob hmoov, thiab tsuas caum lub meej mom, lub koob lub npe thiab txiaj ntsim xwb, thiab yeej tsis raug qhuab ntuas, los sis raug qhuab qhia thiab raug saib xyuas, los sis raug txiav txim thiab raug rau txim li, ces txawm koj yuav muaj ib lub neej uas yooj yim los xij, koj lub siab yim nyob deb ntawm Vajtswv, koj yuav plam txoj kev sib raug zoo nrog Vajtswv uas zoo li ib txwm muaj lawm, thiab koj kuj yuav tsis kam lees txais Vajtswv txoj kev tshawb xyuas kom meej thiab; koj yuav xav ua koj tus thawj coj xwb—uas ua pov thawj qhia hais tias txoj kev uas koj taug ntawd tsis yog txoj kev yog lawm. Yog koj tau paub Vajtswv tes hauj lwm ib ntus lawm thiab muaj ib txoj kev paub zuj zus txog qhov noob neej qias vuab tsuab tob npaum li cas, thiab nyiam tawm tsam Vajtswv heev lawm, thiab yog koj ntxhov siab tias nyob tsam muaj ib hnub koj ua qee yam uas tawm tsam Vajtswv, thiab ntshai tsam tias koj yuav ua txhaum rau Vajtswv, thiab raug Nws muab tso tseg, thiab xav hais tias tsis muaj ib yam dab tsi uas txaus ntshai dua li qhov tawm tsam Vajtswv li lawm, ces koj thiaj li yuav muaj ib lub siab uas hwm Vajtswv. Koj yuav hnov hais tias thaum tib neeg ntseeg Vajtswv, lawv yuav tsum tsis txhob ncaim ntawm Vajtswv mus; yog lawv ncaim ntawm Vajtswv mus, yog lawv ncaim ntawm Vajtswv txoj kev qhuab ntuas, thiab ntawm Vajtswv txoj kev txiav txim thiab kev rau txim mus lawm, ces qhov no npaum nkaus li plam Vajtswv txoj kev tiv thaiv thiab kev saib xyuas, plam Vajtswv tej koob hmoov, thiab tib neeg ces tag li ntawd lawm xwb; lawv tsuas yuav phem dua qub lawm xwb, lawv yuav zoo ib yam li cov tib neeg ntawm txoj kev lis kev cai ntseeg, uas yeej tseem yuav tawm tsam Vajtswv thaum lawv ntseeg Vajtswv—yog li ntawd qhov no, lawv yuav dhau los ua cov tawm tsam Khetos lawm. Yog koj ras txog qhov no, ces koj yuav thov Vajtswv hais tias, “Au Vajtswv! Thov txiav txim rau kuv thiab rau txim rau kuv. Txhua yam uas kuv ua, kuv thov kom Koj saib kuv. Yog kuv ua ib yam dab tsi uas txhaum rau qhov tseeb thiab txhaum rau Koj lub siab nyiam lawm, thov Koj txiav txim rau kuv thiab rau txim rau kuv tiag tiag—kuv nyob tsis tau yog tsis muaj Koj txoj kev txiav txim thiab kev rau txim.” Qhov no yog txoj kev yog uas tib neeg tsim nyog taug nyob rau hauv lawv txoj kev ntseeg Vajtswv. Yog li ntawd ntsuas raws li tus qauv no: Nej puas muaj cuab kav hais tias nej taug tau txoj kev mus tau kev cawm dim lawm? Nej yeej tsis muaj cuab kav li, vim nej tseem tsis tau dhau los ua ib tug ntawm cov uas caum qhov tseeb, hauv ntau yam, nej tsis nrhiav qhov tseeb, thiab nej tsis muaj peev xwm lees txais thiab zwm rau qhov raug qhuab ntuas thiab raug qhuab qhia—uas ua pov thawj qhia hais tias nej tseem tshuav deb heev mam li mus taug tau txoj kev mus tau kev cawm dim. Qhov taug txoj kev mus tau kev cawm dim ntawd puas yooj yim yog koj tsis yog ib tug neeg uas caum qhov tseeb? Tseeb tiag, yeej tsis yooj yim li. Yog tib neeg tsis tau raug Vajtswv txoj kev txiav txim thiab kev rau txim, yog lawv tsis tau raug Vajtswv txoj kev qhuab ntuas, kev rau txim, kev saib xyuas thiab kev qhuab qhia, ces qhov lawv yuav dhau los ua ib tug neeg uas caum qhov tseeb ntawd mas tsis yooj yim, vim li ntawd qhov lawv yuav taug tau txoj kev mus tau kev cawm dim ntawd thiaj li nyuaj heev. Yog tom qab hnov tsab xov no lawm, es koj paub tias qhov ntawd yog qhov tseeb, tiam sis koj tseem tsis taug txoj kev caum raws qhov tseeb thiab ua kom tau txais txoj kev cawm dim, thiab koj tsis pom tias qhov no yog ib qho tseem ceeb, thiab xav hais tias tsis ntev ntawd, yuav muaj ib hnub uas koj yuav los taug txoj kev ntawd—tsis maj—yog koj tsis ntxhov siab txog qhov no—ces hom kev xav no yog kev xav dab tsi? Thaum koj muaj ib txoj kev xav zoo li no, ces yog koj muaj teeb meem lawm, thiab qhov koj yuav taug tau txoj kev mus tau kev cawm dim ntawd mas nyuaj heev. Yog li ntawd koj yuav tsum daws li cas kom thiaj li muaj peev xwm taug tau txoj kev no? Koj yuav tsum hais tias, “Au! Tam sim no kuv tseem tsis tau taug txoj kev mus tau kev cawm dim li—qhov no mas phom sij heev! Vajtswv hais tias tib neeg yuav tsum nyob rau ntawm Nws lub xub ntiag txhua lub sij hawm, thiab yuav tsum thov Vajtswv ntxiv, thiab tias lawv lub siab yuav tsum nyob kaj siab lug, thiab tsis txhob lam tau lam ua—yog li ntawd kuv yuav tsum pib muab txhua yam no coj los xyaum ua raws kiag tam sim no.” Qhov xyaum ua li no yog nkag mus rau txoj kev ntseeg Vajtswv uas yog lawm; yooj yim npaum li ntawd. Hom tib neeg twg yog cov uas hnov Vajtswv cov lus tag es tom qab ntawd muab cov lus ntawd coj los xyaum ua raws? Lawv puas yog tib neeg zoo? Lawv yog mas—lawv yog cov tib neeg uas nyiam qhov tseeb ntag. Lawv yog hom tib neeg dab tsi yog tias, tom qab hnov Vajtswv cov lus lawm, lawv tseem tsis paub, tsis quav ntsej, muaj lub siab tawv—yog lawv saib Vajtswv cov lus tsis rau nqi, thiab ua ntsej lag muag dig rau cov lus ntawd? Tsis yog lawv paub tsis meej lod? Tib neeg ib txwm nug tias puas muaj ib txoj kev uas dim sai sai thaum lawv ntseeg Vajtswv. Kuv qhia nej hais tias tsis muaj, thiab tom qab ntawd kuv qhia nej txog txoj kev yooj yim no, tiam sis tom qab hnov txog txoj kev no lawm los nej yeej tsis muab txoj kev no coj los xyaum ua raws—vim qhov tsis paub txog qhov zoo thaum nej hnov txoj kev ntawd. Cov tib neeg zoo li no puas yuav dim? Tab txawm yog muaj qee qhov kev cia siab rau lawv los xij, qhov ntawd tsis zoo; kev cawm dim yuav nyuaj heev. Tej zaum yuav muaj ib hnub thaum lawv pw tsaug zog sawv los, thaum lawv xav txog lawv tus kheej hais tias: “Kuv tsis hluas ntxiv lawm, thiab kuv tsis tau ua raws li kuv tej dej num kom zoo thaum kuv ntseeg Vajtswv los tau npaum li no lub xyoo. Vajtswv tim tsum kom tib neeg nyob rau ntawm Nws lub xub ntiag txhua lub sij hawm, tiam sis kuv tsis tau nyob rau ntawm Vajtswv lub xub ntiag li. Kuv yuav tsum maj nrawm nroos thov Vajtswv.” Yog lawv paub hauv lawv lub siab thiab pib ua lawv tej dej num kom zoo, ces nws tseem tsis tau lig dhau. Tiam sis tsis txhob cia nws lig dhau lawm; yog nej tos kom txog thaum nej muaj xya caum los sis yim caum xyoo, thiab nej lub cev twb ua tsis tau, thiab nej twb tsis muaj ib lub zog li lawm, es mam los caum qhov tseeb ces nws yuav tsis lig dhau lawm lod? Yog nej siv lub sij hawm uas zoo tshaj plaws ntawm nej lub neej rau tej yam uas tsis muaj nuj nqis, thiab thaum kawg tso tseg los sis plam txoj kev caum qhov tseeb, uas yog qhov tseem ceeb tshaj txhua yam huv si, qhov no tsis yog ruam tshaj plaws lod? Puas muaj ib yam dab tsi ruam tshaj? Muaj ntau tus tib neeg uas paub txog txoj kev tseeb zoo heev tiam sis tseem tos kom txog lub neej yav tom ntej es mam li lees txais thiab caum txoj kev tseeb ntawd—lawv puav leej yog cov neeg ruam. Lawv tsis paub tias txoj kev caum qhov tseeb ntawd mas siv dag zog li kaum tawm xyoo ua ntej lawv tau txais txoj sia. Yog lawv plam lub sij hawm zoo tshaj plaws uas los tau txoj kev cawm dim lawm, es mam li tu siab ces lig dhau lawm!

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Tsuas Yog Hwm Vajtswv Xwb Mas Tib Neeg Thiaj Li Yuav Taug Tau Txoj Kev Mus Tau Kev Cawm Dim

Vajtswv Tej Lus Txhua Hnub  Nqe Lus Uas Xaiv Tawm Los 380

Ua ib tug thawj coj pawg ntseeg mas koj tsis lam kawm kom paub siv qhov tseeb los daws teeb meem xwb, koj kuj yuav tau kawm kom paub thiab cob cov tib neeg muaj peev xwm thiab, cov uas koj yuav tsum txhob khib los sis txhob caij tsuj. Qhov xyaum ua li no mas thiaj li muaj txiaj ntsim rau pawg ntseeg tes hauj lwm. Yog koj cob qhia tau ob peb tug neeg nrhiav qhov tseeb los koom tes nrog koj es ua txhua tes hauj lwm tau zoo, thiab nyob rau thaum kawg, nej txhua tus muaj cov lus tim khawv uas hais txog txoj kev ntsib kev pom, ces koj thiaj li yog ib tug thawj coj los sis ib tug neeg ua hauj lwm uas tsim nyog. Yog hais tias koj muaj peev xwm saib xyuas txhua yam mus raws li cov hauv paus ntsiab lus, ces koj thiaj li ua raws li koj lub siab uas ncaj ncees. Muaj ib txhia mas pheej ntshai tias tsam lwm tus zoo dua lawv los sis siab dua lawv, tias tsam lwm tus yuav raug qhuas ho lawv ces raug saib tsis taus, ces qhov no thiaj li ua rau lawv tawm tsam thiab tsis xam txog lwm tus. Qhov no tsis yog ib kis ntawm txoj kev xam khib ntawm cov tib neeg muaj peev xwm lod? Qhov ntawd tsis yog twm xeeb thiab ntxim ntxub lod? Hom moj yam no yog dab tsi? Nws yog tus moj yam uas siab phem! Cov uas tsuas xav txog lawv tus kheej tej kev ntshaw xwb, cov uas tsuas ua tau zoo raws lawv tus kheej tej kev ntshaw nkaus xwb, es tsis xav txog lwm tus los sis ua tib zoo xav txog tej kev ntshaw ntawm Vajtswv lub tsev li, es muaj ib tug moj yam phem, ces Vajtswv tsis muaj kev hlub rau lawv li. Yog koj yeej muaj peev xwm tiag tiag txog qhov ua tib zoo xav txog Vajtswv tej kev npaj siab, ces koj yuav muaj peev xwm coj ncaj ncees rau lwm tus tib neeg thiab. Yog koj qhuas ib tug neeg zoo thiab cia lawv muaj kev cob qhia thiab ua tau ib teg dej num, es ntxiv ib tug neeg uas muaj peev xwm rau hauv Vajtswv lub tsev, ces qhov ntawd tsis yog yuav ua rau koj tes hauj lwm yooj yim dua lod? Ces koj yuav tsis ua lub siab ncaj ncees rau koj tes dej num lod? Qhov ntawd yog ib qho kev ua zoo rau ntawm Vajtswv lub xub ntiag; qhov ntawd yog kev txawj xav thiab lub ntsiab uas cov ua thawj coj yuav tsum muaj. Cov uas muaj peev xwm muab qhov tseeb coj los xyaum ua raws ntawd tuaj yeem lees txais Vajtswv txoj kev tshawb xyuas kom meej nyob rau hauv yam uas lawv ua. Thaum koj lees txais Vajtswv txoj kev tshawb xyuas kom meej lawm, ces koj lub siab thiaj li yuav to taub txhua yam yog. Yog koj tsuas lam ua kom lwm tus pom xwb, pheej xav kom tau lwm tus txoj kev qhuas thiab kev hwm, tab sis koj tsis lees txais Vajtswv txoj kev tshawb xyuas li, ces Vajtswv puas tseem nyob hauv koj lub siab mas? Cov tib neeg zoo li ntawd tsis muaj kev hwm rau Vajtswv li. Txhob ua tej yam rau koj tus kheej qhov txiaj ntsim tas li xwb thiab txhob xav xwm yeem txog koj tus kheej tej kev ntshaw xwb; txhob xam txog tib neeg tej kev ntshaw, thiab txhob xav rau koj tus kheej txoj kev khav theeb, kev muaj suab npe, thiab lub meej mom. Koj yuav tsum xub ua tib zoo xav txog tej kev ntshaw ntawm Vajtswv lub tsev, thiab muab tej ntawd ua yam uas yuav tau xub ua ua ntej tso. Koj yuav tsum xav txog Vajtswv tej kev npaj siab thiab pib los ntawm qhov ua twb zoo xav seb puas muaj kev tsis dawb huv nyob rau hauv txoj kev ua koj tes dej num los tsis muaj, seb koj puas ua lub siab ncaj ncees ua koj tej luag hauj lwm kom tiav, thiab seb puas muab koj tej tag nrho, thiab seb koj puas xav kom kawg lub siab txog koj tes dej num thiab txog pawg ntseeg tes hauj lwm los tsis xav. Koj yuav tsum ua tib zoo xav txog tej no. Yog xav txog tej no tas li thiab paub txog tej no, ces nws yuav yooj yim rau koj ua koj tes dej num kom tau zoo dua. Yog koj muaj rab peev xwm tsis zoo, yog koj txoj kev ntsib kev pom ntiav, los sis yog koj ua rau hauv koj txoj dej num tsis tau zoo, ces tej zaum yuav muaj qee yam ua tsis raug los sis ua tsis tau zoo txaus rau hauv koj txoj dej num, thiab tej zaum koj yuav tsis tau txiaj ntsim zoo—tab sis koj twb ua li qhov koj ua tau zoo tshaj plaws lawm. Koj tsis txaus siab rau koj tej kev ntshaw uas twm xeeb los sis tej kev nyiam. Tab sis, koj ho ua tib zoo xav txog pawg ntseeg tes hauj lwm thiab tej kev ntshaw ntawm Vajtswv lub tsev tas li. Tab txawm koj ua tsis tau txiaj ntsim zoo nyob rau hauv koj tes dej num los xij, koj lub siab twb tus lawm; yog, tshaj qhov no, koj nrhiav tau qhov tseeb los daws tej teeb meem uas nyob rau hauv koj tes dej num, ces koj yuav ua tau raws li tus qauv hauv txoj kev ua koj tes dej num, thiab nyob rau tib lub sij hawm ntawd, koj yuav muaj peev xwm to taub qhov tseeb qhov muaj tiag. Qhov no yog qhov uas txhais hais tias muaj lus tim khawv.

Ib txhia tib neeg ntseeg Vajtswv tab sis tsis caum qhov tseeb li. Lawv ib txwm ua neej raws lub cev nqaij daim tawv, ntshaw kev tau zoo ntawm sab cev nqaij daim tawv, yeej tuav rawv rau lawv tus kheej tej kev ntshaw uas twm xeeb tas li xwb. Txawm tias lawv ntseeg Vajtswv los tau pes tsawg xyoo lawm los xij, lawv yeej yuav tsis muaj hnub to taub qhov tseeb qhov muaj tiag li. Qhov no yog lub cim ntawm qhov coj txoj kev txaj muag los rau Vajtswv ntag. Koj hais tias, “Kuv twb tsis tau ua ib yam dab tsi los tawm tsam Vajtswv li. Ua li cas kuv ho coj kev txaj muag los rau Nws?” Tag nrho koj tej tswv yim thiab tej kev xav mas puav leej phem. Tej kev npaj siab, tej hom phiaj, thiab tej kev txhawb siab ntsws uas txhawb yam koj ua, thiab qhov tshwm sim los ntawm koj tej kev ua ntawd mas yeej ua rau Ntxwgnyoog txaus siab, ua rau koj yog nws qhov kev tso dag ua si, thiab cia nws tau txais qee yam ntawm koj. Koj tsis tau ua tim khawv li ib tug Ntseeg Vajtswv tsim nyog ua li. Koj yog Ntxwgnyoog tug. Koj coj kev txaj muag los rau Vajtswv lub npe rau hauv txhua yam thiab koj tsis muaj lus tim khawv dab tsi tseeb li. Vajtswv puas yuav nco tej uas koj tau ua lawm? Thaum kawg, cov lus xaus uas Vajtswv hais rau koj tej kev ua, tus cwj pwm, thiab tej dej num uas koj tau ua lawm ntawd yog dab tsi? Puas yog qee yam tsis tas yuav tsum tau los ntawm qhov ntawd los, qee hom lus hais? Hauv phau Vajluskub, tus Tswv Yexus hais tias, “Coob leej yuav hais rau Kuv rau hnub ntawd tias, tus Tswv, tus Tswv, peb tsis tau tuav Koj lub npe tshaj tawm los, thiab tuav Koj lub npe ntiab dab tawm los, thiab tuav Koj lub npe ua ntau yam hauj lwm phim hwj los? Thiab thaum ntawd Kuv yuav hais meej rau lawv tias, Kuv yeej tsis paub nej li: cia li khiav ntawm Kuv mus, nej cov uas ua hauj lwm lim hiam” (Mathai 7:22–23). Vim li cas tus Tswv Yexus thiaj li hais li no? Vim li cas coob tus ntawm cov neeg uas qhuab qhia, ntiab cov dab phem tawm, thiab ua ntau yam txuj ci tseem ceeb hauv tus Tswv lub npe thiaj li rais los ua cov neeg ua phem lawm? Qhov ntawd yog vim hais tias lawv tsis lees txais qhov tseeb uas Tswv Yexus nthuav tawm, lawv tsis ua raws li Nws cov lus txib, thiab nyob hauv lawv lub siab lawv tsis muaj qhov nyiam qhov tseeb li. Lawv tsuas xav muab lawv tes hauj lwm uas lawv ua los lawm, tej kev txom nyem uas lawv tau tiv lawm, thiab tej khoom fij uas muab rau tus Tswv ntawd pauv cov koob hmoov ntawm lub nceeg vaj saum ntuj ceeb tsheej xwb. Nyob rau qhov no, yog lawv sim los sib khom nrog Vajtswv, thiab yog lawv siv Vajtswv thiab ntxias dag Vajtswv xwb, yog li es Tswv Yexus thiaj li dhuav lawv, ntxub lawv, thiab muab lawv teem txim tias yog cov neeg ua phem. Niaj hnub no, tib neeg tab tom lees txais txoj kev txiav txim thiab kev rau txim ntawm Vajtswv cov lus, tab sis ib txhia tseem caum raws lub koob lub npe thiab lub meej mom, thiab pheej xav cais lawv tus kheej, pheej xav ua cov thawj coj thiab cov neeg ua hauj lwm es kom thiaj li tau lub koob lub npe thiab lub meej mom xwb. Txawm tias lawv sawv daws hais tias lawv ntseeg Vajtswv thiab raws Vajtswv qab, thiab lawv tso tseg thiab fij rau Vajtswv los xij, lawv ua lawv tej dej num kom tau koob meej, tau tshaj thawj, thiab tau meej mom xwb, thiab lawv pheej muaj tus kheej tej kev dag. Lawv tsis zwm los sis tsis ua lub siab ncaj rau Vajtswv li, lawv ua phem mus mus los los yam tsis tig xav txog lawv tus kheej kiag li, ces yog li ntawd lawv thiaj li rais los ua cov neeg ua phem lawm. Vajtswv tsis nyiam cov neeg ua phem no kiag li, thiab Vajtswv tsis cawm lawv. Tus qauv ntawm qhov ib tug neeg ua thiab tus cwj pwm uas tau txais kev txiav txim tias zoo los sis phem ntawd yog dab tsi? Qhov ntawd yog qhov seb lawv, hauv lawv tej kev xav, tej kev nthuav tawm, thiab tej kev ua, puas muaj lus tim khawv txog qhov muaj qhov tseeb coj los xyaum ua raws thiab txog qhov kev ua neej raws qhov muaj tiag ntawm qhov tseeb los sis tsis muaj xwb. Yog koj tsis muaj qhov muaj tiag no los sis ua neej raws li qhov no, ces yeej paub tseeb tias, koj yog ib tug ua phem. Vajtswv hais li cas txog cov uas ua phem? Rau Vajtswv mas, koj tej kev xav thiab tej kev ua sab nraud tsis ua tim khawv rau Nws li, los sis tej ntawd tsis ua rau Ntxwgnyoog txaj muag thiab tsis ua kom kov yeej Ntxwgnyoog li; tab sis, tej ntawd coj kev txaj muag los rau Nws xwb, thiab tej ntawd muaj tej cim ntawm qhov tsis muaj kev hwm uas koj coj los rau Nws. Koj tsis hais lus tim khawv rau Vajtswv, koj tsis muab koj tus kheej fij rau Vajtswv, los sis koj tsis ua koj tej luag hauj lwm thiab tej uas yuav tsum tau ua ntawd kom tiav rau Vajtswv li, tab sis, koj ua rau koj tus kheej qhov txiaj ntsim xwb. Qhov hais tias “rau koj tus kheej qhov txiaj ntsim” ntawd txhais li cas? Yog muab hais kom yog kiag ces, qhov ntawd txhais tias yog rau Ntxwgnyoog qhov txiaj ntsim xwb. Yog li ntawd, thaum kawg, Vajtswv yuav hais tias, “Cia li khiav ntawm Kuv mus, nej cov uas ua hauj lwm lim hiam.” Raws li qhov Vajtswv pom mas, koj tej kev ua ntawd yuav tsis muab saib li yog tej kev ua zoo li, yuav muab tej ntawd xam tias yog ua kev phem xwb. Tsis yog tias tej ntawd yuav tsis tau txais Vajtswv qhov kev pom zoo xwb—tej ntawd tseem yuav raug teem txim thiab. Ib tug tib neeg cia siab kom tau txais dab tsi los ntawm ib txoj kev ntseeg Vajtswv zoo li no los? Thaum kawg txoj kev ntseeg zoo li no yuav tsis muaj qab hau li lod?

Rau txhua tus uas ua ib teg dej num ntawd mas, txawm tias lawv txoj kev to taub txog qhov tseeb yuav tob los sis ntiav npaum li cas los xij, txoj hau kev uas yooj yim tshaj plaws los xyaum kom to taub qhov tseeb qhov muaj tiag mas yog xav txog tej kev ntshaw ntawm Vajtswv lub tsev hauv txhua yam, thiab tso yus tej kev ntshaw uas twm xeeb, tus kheej tej kev npaj siab, tej kev txhawb siab ntsws, kev khav theeb, thiab lub meej mom tseg. Muab tej kev ntshaw ntawm Vajtswv lub tsev tso ua ntej tshaj plaws—qhov no yog qhov tsawg kawg nkaus uas yus yuav tsum tau ua. Yog ib tug neeg uas ua ib teg dej num haj tseem ua tsis tau ntau li no thiab, ces yuav ua li cas hais tau tias lawv ua lawv tes dej num? Qhov ntawd tsis yog ua yus tes dej num. Koj yuav tsum xub xav txog tej kev ntshaw ntawm Vajtswv lub tsev ua ntej tso, ua tib zoo xav txog Vajtswv tej kev npaj siab, thiab ua tib zoo xav txog pawg ntseeg tes hauj lwm. Muab tej no tso ua ntej thiab saib kom tseem ceeb tshaj plaws; tsuas yog tom qab ntawd nkaus xwb koj thiaj li tuaj yeem xav txog txoj kev ruaj ntawm koj lub meej mom los sis seb lwm tus ho saib koj zoo li cas. Nej tsis xav tias qhov no yuav ua tau yooj yim dua thaum nej muab nws faib ua ob kauj ruam thiab sib cog lus rau qee yam lod? Yog koj xyaum ua li no mus ib ntus, ces koj mam li paub tias qhov ua kom tau zoo raws Vajtswv ntawd yeej tsis yog ib yam nyuaj kiag li. Tshaj ntawd, koj yuav tsum muaj peev xwm ua kom tau koj lub luag hauj lwm kom tiav, ua koj yam uas yuav tau ua thiab tes dej num, thiab tso koj tej kev ntshaw uas twm xeeb, tej kev npaj siab, thiab tej kev txhawb siab ntsws tseg; koj tsim nyog ua tib zoo xav txog Vajtswv tej kev npaj siab, thiab muab tej kev ntshaw ntawm Vajtswv lub tsev, pawg ntseeg tes dej num, thiab tes dej num uas koj yuav tsum ua ntawd tso ua ntej tso. Ces tom qab paub qhov no mus ib ntus lawm, koj mam li paub tias qhov no yog ib txoj hau kev zoo los nplig koj tus kheej. Nws yog kev ua neej nyob ncaj ncees thiab siab dawb paug, thiab tsis yog ua ib tug neeg tsis muaj paus ntsis los sis tsis muaj ib qho zoo li; qhov ntawd yog ua neej nyob ncaj ncees thiab ntxim hwm dua li qhov ntxim ntxub, tsis muaj paus ntsis, thiab ib tug neeg uas tsis muaj qab hau dab tsi li. Koj mam li paub tias qhov no yog yam uas ib tug neeg tsim nyog ua thiab tus yam ntxwv uas lawv tsim nyog ua neej raws. Ib qho zuj zus, koj tej kev ntshaw uas ua kom koj tus kheej txaus siab ntawd thiaj li yuav muaj tsawg zuj zus mus. Kiag tam sim no, txawm tias nej twb ntseeg Vajtswv los tau ntev npaum li cas lawm los xij, nej txoj kev to taub, txoj kev nthuav tawm, thiab txoj kev paub txog tej lus qhia uas hais txog txoj kev nrhiav qhov tseeb, kev xyaum ua raws li qhov tseeb, thiab kev to taub qhov muaj tiag ntawm qhov tseeb ntawd mas tsis tob li, thiab nej tsis muaj kev paub txog los sis kev nthuav tawm txog tej ntawd, yog li nej thiaj li hais tsis tau lus tim khawv kom tseeb. Tam sim no kuv twb tau qhia rau nej txog qhov yooj yim no lawm: Pib los ntawm qhov kev xyaum ua li no, thiab thaum nej tau ua li no mus ib ntus lawm, ces tus yam ntxwv uas nyob hauv nej mam li pib hloov yam koj tsis paub txog li. Qhov ntawd yuav hloov los ntawm tus yam ntxwv uas tsis paub meej, uas yog tus uas nej tsis nyiam qhov ntseeg Vajtswv kiag li los sis dhuav qhov ntseeg Vajtswv ntawd dhau lawm, mus rau tus yam ntxwv uas nej xav tias qhov ntseeg Vajtswv thiab qhov ua ib tug neeg coj ncaj ntawd mas yog qhov zoo, thiab yog qhov uas nej nyiam ua ib tug neeg coj ncaj thiab xav tias muaj qab hau thiab muaj kev txhawb rau hauv txoj kev ua neej zoo li no. Koj yuav ruaj siab, kaj siab, thiab muaj kev xyiv fab nyob rau hauv koj lub siab. Koj tus yam ntxwv yuav zoo li ntawd ntag. Qhov ntawd yog qhov tau los ntawm txoj kev tso koj tus kheej tej kev npaj siab, tej kev nyiam, thiab tej kev ntshaw uas twm xeeb tseg los. Qhov ntawd yog qhov txiaj ntsim ntag. Qhov no yog ib feem ntawm qhov tib neeg koom tes thiab yog ib feem ntawm Vajntsujplig tes hauj lwm. Vajntsujplig yuav tsis ua hauj lwm yog tib neeg tsis koom tes.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Tshem Yus Tus Moj Yam Qias Vuab Tsuab Tawm Xwb Thiaj Li Tau Txais Kev Ywj Pheej thiab Kev Dim

Vajtswv Tej Lus Txhua Hnub  Nqe Lus Uas Xaiv Tawm Los 381

Nej paub dab tsi txog tej kev hloov pauv hauv tus moj yam? Tej ntsiab tseem ceeb ntawm tej kev hloov pauv hauv tus moj yam thiab tej kev hloov pauv hauv tus cwj pwm mas sib txawv, thiab tej kev hloov pauv hauv qhov xyaum ua raws mas kuj sib txawv thiab—tej ntawd puav leej sib txawv rau hauv lub ntsiab tseem ceeb. Cov neeg feem ntau muab kev mob siab tshwj xeeb rau tus cwj pwm hauv lawv qhov kev ntseeg Vajtswv, vim muaj kev hloov pauv tiag tshwm sim rau hauv lawv tus cwj pwm. Tom qab lawv pib los ntseeg Vajtswv lawm, lawv txawm tsum tsis haus luam yeeb thiab tsis haus cawv lawm, thiab lawv tsis nrog lwm tus sib cav ntxiv lawm, xum los xyaum ua siab ntev thaum lawv raug kev txom nyem. Lawv hloov pauv qee yam ntawm tus cwj pwm lawm. Ib txhia tib neeg xav hais tias thaum lawv ntseeg Vajtswv lawm ces lawv to taub qhov tseeb los ntawm qhov nyeem Vajtswv txoj lus lawm, lawv twb paub Vajntsujplig tes hauj lwm, thiab lawv twb muaj txoj kev xyiv fab tseeb nyob rau hauv lawv lub siab lawm, ua rau txhawb tau lawv zog heev, thiab tsis muaj dab tsi li uas lawv yuav tsis tuaj yeem muab pov tseg tau los sis yuav thev tsis taus txoj kev txom nyem tau. Txawm li cas los xij, tom qab ntseeg tau yim, kaum, los sis haj tseem nees nkaus los sis peb caug xyoo lawm, vim hais hais tias tsis muaj qhov hloov pauv rau hauv lawv lub neej txoj sia tus moj yam li, lawv kawg kev thiaj li tig rov qab nkag los rau hauv tej qub kev; lawv txoj kev khav theeb thiab kev lim hiam loj hlob ntxiv tuaj, lawv pib sib tw rau lub hwj chim thiab nyiaj txiag, lawv xav muab tej nyiaj txiag los ntawm pawg ntseeg, lawv khib cov uas siv Vajtswv lub tsev kom muaj txiaj ntsim rau lawv. Lawv dhau los ua cov cab thiab cov kab mob nyob rau hauv Vajtswv lub tsev lawm, thiab ib txhia haj tseem raug muab qhia tshwm thiab ntiab tawm yam li cov thawj coj cuav thiab cov tawm tsam Khetos thiab. Thiab tej yam muaj tseeb tiag zoo li no muaj dab tsi los ua pov thawj? Kev hloov pauv ntawm tus cwj pwm nkaus xwb yeej tsis ruaj khov li; yog tsis muaj kev hloov pauv rau hauv tib neeg lub neej txoj sia tus moj yam, ces tsis qeeb los sai, lawv yuav qhia lawv tus kheej tiag tiag tawm. Qhov no yog vim hais tias lub hauv paus ntawm tej kev hloov pauv hauv lawv tus cwj pwm yog kev ntseeg kawg siab kawg ntsws, thiab ua ke nrog qee tes dej num ntawm tus Vajntsujplig rau thaum lub sij hawm no, nws yooj yim heev rau lawv dhau los ntseeg kawg siab kawg ntsws los sis tsuas lam ua rau pom txog kev siab zoo rau ib nyuag ntu luv luv xwb. Raws li cov tsis ntseeg hais, “Kev ua zoo ib zaug xwb yeej yooj yim; qhov nyuaj ces yog kev ua zoo kom mus tag sim neej.” Vim li cas tib neeg thiaj li tsis muaj peev xwm ua tej num zoo kom mus tag lawv lub neej txoj sia? Vim tib neeg yeej ib txwm lim hiam, ua siab twm xeeb, thiab qias vuab tsuab. Lawv tus cwj pwm raug tswj ncaj qha los ntawm lawv tus yeeb yam; txawm lawv tus yeeb yam yuav zoo li cas los xij, tus cwj pwm uas lawv coj ntawd los yeej zoo ib yam nkaus li ntawd thiab, thiab tsuas yog qhov ntawd xwb thiaj cia li nthuav tawm txog lawv tus yeeb yam. Tej yam uas yog yam cuav yeej tsis muaj peev xwm nyob ntev. Thaum Vajtswv leg tes dej num cawm tib neeg, nws tsis yog kho kom tib neeg muaj tus cwj pwm zoo—lub hom phiaj ntawm Vajtswv tes dej num yog yuav tsum hloov kom tau tib neeg tus moj yam, ua kom lawv rov qab yug dua tshiab rau hauv cov tib neeg tshiab. Vajtswv txoj kev txiav txim, kev rau txim, tej kev sim siab, thiab kev lim tib neeg kom dawb huv tag nrho txhua yam no yog hloov lawv tus moj yam kom lawv ua tau tiav hlo los zwm rau thiab fij rau Vajtswv, thiab los pe hawm Nws raws li qhov ib txwm muaj. Qhov no yog lub hom phiaj ntawm Vajtswv tes dej num. Kev coj tus cwj pwm zoo tsis zoo ib yam li kev zwm rau Vajtswv, yog muab piv rau Khetos mas tsawg heev li. Kev hloov pauv tus cwj pwm yog nce raws txoj lus qhia thiab qhov yug los muaj kev ntseeg kawg siab kawg ntsws; lawv tsis yog nce raws qhov paub tseeb ntawm Vajtswv los sis qhov tseeb, lawv vam khom tsawg heev los ntawm tus Vajntsujplig txoj kev coj lawv kev. Txawm tias muaj qee zaus thaum muaj qee yam uas tib neeg ua ntawd yog tus Vajntsujplig qhia los sis coj kev los xij, qhov no tsis yog ib qho kev nthuav tawm txog lawv lub neej txoj sia. Lawv tseem tsis tau to taub txog qhov muaj tiag ntawm qhov tseeb, thiab lawv lub neej txoj sia tus moj yam yeej tseem tsis tau hloov pauv kiag li. Txawm ib tug neeg yuav coj nws tus cwj pwm zoo li cas los xij, qhov ntawd ua pov thawj qhia tsis tau tias lawv mloog Vajtswv lus los sis tias lawv xyaum ua raws qhov tseeb. Kev hloov pauv tus cwj pwm tsis yog kev hloov pauv lub neej txoj sia tus moj yam thiab tej ntawd tsis tuaj yeem suav tias yog kev nthuav tawm txog tib neeg lub neej txoj sia tiag.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb

Vajtswv Tej Lus Txhua Hnub  Nqe Lus Uas Xaiv Tawm Los 382

Yog ib tug tib neeg muaj ntau tus cwj pwm zoo, qhov ntawd tsis tau txhais hais tias tus tib neeg ntawd muaj qhov muaj tiag ntawm qhov tseeb lawm. Tsuas yog xyaum ua raws li qhov tseeb thiab ua raws li tej hauv paus ntsiab lus xwb mas koj thiaj li yuav muaj qhov muaj tiag ntawm qhov tseeb. Tsuas yog ntshai Vajtswv thiab zam kev phem xwb mas koj thiaj li yuav muaj qhov muaj tiag ntawm qhov tseeb. Ib txhia tib neeg mas kub siab lug, hais tau tej lus qhuab qhia, ua raws li tej kev cai, thiab ua ntau yam kev ua zoo, tiam sis txhua yam uas hais tau txog lawv ces yog qhov hais tias lawv muaj me ntsis kev ua neeg xwb. Cov uas hais tau tej lus qhuab qhia thiab pheej ua raws li tej kev cai ntawd yeej xyaum ua raws li qhov tseeb tsis tau li. Txawm yam uas lawv hais ntawd yog thiab mloog zoo li tsis muaj teeb meem li los xij, lawv tsis muaj dab tsi hais txog lub ntsiab tseeb ntawm qhov tseeb li. Yog li ntawd, txawm qee tus tib neeg yuav hais tau tej lus qhuab qhia ntawd ntau npaum li cas los xij, qhov ntawd tsis tau txhais hais tias lawv to taub qhov tseeb lawm, thiab txawm lawv to taub tej lus qhuab qhia ntawd ntau npaum li cas los xij, lawv yeej daws tsis tau ib qho teeb meem li. Cov kws tshawb fawb txog sab kev ntseeg puav leej piav qhia tau phau Vajluskub, tiam sis nyob rau thaum kawg, lawv txhua tus puav leej ntog tag, vim lawv tsis lees txais tag nrho qhov tseeb uas Vajtswv tau nthuav tawm. Cov tib neeg uas muaj ib qho hloov pauv hauv lawv tus moj yam yeej sib txawv; lawv muaj kev to taub qhov tseeb, lawv ntsia pom deb tau tag nrho tej teeb meem, lawv paub tias yuav leg li cas kom haum raws Vajtswv siab nyiam, yuav leg li cas thiaj haum raws li lub hauv paus ntsiab lus ntawm qhov tseeb, thiab yuav leg li cas thiaj ua tau zoo raws Vajtswv, thiab lawv to taub tus yeeb yam ntawm txoj kev lwj liam uas lawv ua rau pom. Thaum lawv tus kheej tej tswv yim thiab tej kev xav phem raug qhia tshwm lawm, lawv tuaj yeem ntsia pom deb thiab tso cev nqaij daim tawv tseg. Qhov no raug nthuav tawm li cas txog kev hloov pauv hauv tus moj yam. Qhov tseem ceeb uas qhia kom pom meej txog cov tib neeg uas muaj kev hloov pauv ib qho hauv tus moj yam yog lawv yuav tsum to taub qhov tseeb kom meej, thiab thaum ua raws tej yam, lawv muab qhov tseeb coj los xyaum ua raws kom raug zoo thiab lawv txhob ua rau pom txoj kev lwj liam tas li. Feem ntau, cov uas lawv tus moj yam tau hloov pauv lawm yeej yog kev muaj qab hau thiab kev xam pom deb tshwj xeeb, thiab vim lawv txoj kev to taub ntawm qhov tseeb, lawv thiaj tsis ua rau pom ntau txog kev qhuas tias yus tus kheej coj ncaj los sis kev khav theeb. Lawv tuaj yeem pom tshab thiab xam pom mus deb heev ntawm txoj kev lwj liam uas tau qhia tshwm rau hauv lawv, kom thiaj tsis ua rau lawv muaj kev khav theeb. Lawv tuaj yeem muaj qhov ntsuas kev nkag siab txog yam uas tib neeg tau hloov pauv, txog qhov yuav coj li cas thiaj muaj laj thawj, txog qhov yuav ua tes hauj lwm li cas, txog yam uas tsim nyog hais thiab yam uas tsis tsim nyog hais, thiab txog yam uas tsim nyog hais thiab yam uas tsim nyog ua rau cov tib neeg. Yog li ntawd, cov tib neeg uas lawv tej moj yam tau hloov pauv lawm yeej muaj qab hau tsim nyog tiag, thiab tsuas yog cov tib neeg zoo li no xwb thiaj li yuav ua neej zoo nkaus li tib neeg tiag tiag. Vim hais tias lawv to taub qhov tseeb, lawv muaj peev xwm hais thiab pom tej yam mus raws li qhov tseeb, thiab lawv yog lub hauv paus ntsiab lus rau txhua yam uas lawv ua; lawv tsis yog yam raug cob mus rau kev haub ntxias ntawm ib tug neeg twg, ib lub ntsiab twg, los sis ib yam khoom twg, thiab lawv sawv daws puav leej muaj lawv tus kheej txoj kev xam pom thiab tuaj yeem tuav lub hauv paus ntsiab lus ntawm qhov tseeb tau. Lawv tus moj yam ruaj ntseg, lawv tsis ua siab kub los sis ua siab txias, thiab txawm tias lawv tej xwm txheej yuav yog dab tsi los xij, lawv to taub lawv lub luag hauj lwm zoo tias yuav ua li cas thiab yuav coj li cas thiaj haum rau Vajtswv siab nyiam. Cov uas lawv tus moj yam yeej hloov pauv tiag tiag lawm tsis tas npaj ua yam uas yuav ua rau lawv tus kheej zoo saib raws sab nraum daim tawv; lawv muab tau qhov zoo nyob sab hauv nruab siab rau yam uas lawv yuav ua tau zoo raws Vajtswv. Yog li, thaum saib raws sab nrauv, zoo li lawv tsis kub siab hlo li los sis tsis tau ua ib yam tseem ceeb dab tsi tiav hlo li, tab sis txhua yam uas lawv ua muaj txiaj ntsig, muaj nuj nqis, thiab ua tau tshwm sim los tiag. Cov uas tus moj yam tau hloov pauv yeej pom tiag tias muaj ntau qhov muaj tiag ntawm qhov tseeb, thiab tuaj yeem lees qhov no los ntawm lawv txoj kev xav rau txhua yam thiab lawv lub hauv paus ntsiab lus ntawm tej kev coj ua. Cov uas tsis tau txais qhov tseeb ces yeej tsis tau hloov pauv tau tus moj yam ntawm lub neej txoj sia ib qho kiag li. Qhov hloov pauv tus moj yam ntawd yog hloov tau li cas kiag? Tib neeg twb raug Ntxwgnyoog muab ua qias vuab tsuab dhau lawm, ces lawv txhua tus puav leej tawm tsam Vajtswv, thiab lawv txhua tus puav leej muaj tus yeeb yam tawm tsam Vajtswv. Vajtswv cawm tib neeg los ntawm qhov muab cov uas muaj tus yeeb yam tawm tsam Vajtswv thiab cov uas tawm tsam tau Vajtswv ntawd tig los ua cov uas mloog lus thiab hwm Vajtswv. Qhov no yog qhov txhais hais tias yog ib tug tib neeg uas nws tus moj yam tau hloov pauv lawm. Txawm ib tug tib neeg yuav qias vuab tsuab npaum li cas los sis txawm lawv yuav muaj pes tsawg tus moj yam qias vuab tsuab los xij, tsuav lawv lees txais tau qhov tseeb, lees txais tau Vajtswv txoj kev txiav txim thiab kev rau txim, thiab lees txais tau tej kev sim siab thiab tej kev lim tib neeg kom dawb huv xwb, ces lawv yuav muaj ib txoj kev to taub tseeb txog Vajtswv, thiab nyob rau tib lub sij hawm ntawd lawv yuav muaj peev xwm pom tseeb tseeb txog lawv tus kheej tus yeeb yam thiab lub ntsiab tseeb. Thaum lawv paub lawv tus kheej tiag tiag lawm, ces lawv yuav muaj peev xwm ntxub lawv tus kheej thiab Ntxwgnyoog, lawv yuav txaus siab hlo tso Ntxwgnyoog tseg, thiab mloog Vajtswv lus nkaus xwb. Thaum ib tug tib neeg muaj txoj kev txiav txim siab no lawm, mas lawv thiaj li caum tau qhov tseeb. Yog tib neeg muaj txoj kev paub tseeb txog Vajtswv, yog lawv tus moj yam phem raug ntxuav dawb huv, thiab Vajtswv cov lus tuaj cag nyob rau hauv lawv, thiab tau dhau los ua lawv lub neej txoj sia thiab ua lub hauv paus ntawm qhov lawv muaj txoj sia nyob, yog lawv ua neej raws li Vajtswv cov lus, thiab hloov pauv tag nrho thiab ua cov tib neeg tshiab lawm—ces qhov no suav hais tias yog kev hloov pauv lawv lub neej txoj sia tus moj yam lawm. Ib txoj kev hloov pauv rau hauv tus moj yam tsis tau txhais hais tias yuav muaj ib txoj kev ua neej paub tab thiab kev ua neeg zoo, los sis nws tsis txhais hais tias tib neeg tej moj yam sab nraud mas txo hwj chim dua yav dhau los, uas lawv keev khav theeb tiam sis tam sim no tuaj yeem sib txuas lus muaj qab hau lawm, los sis tias qhov lawv keev tsis mloog leej twg hais ntawd tam sim no tuaj yeem mloog lwm tus hais lawm; tej yam hloov pauv sab nrauv zoo li no tsis tuaj yeem hais tau tias yog kev hloov tus moj yam. Qhov tseeb, kev hloov tus moj yam yuav tsum muaj tej kev nthuav tawm zoo li no, tab sis feem tseem ceeb tshaj plaws ces yog hloov sab hauv lawv lub neej txoj sia. Qhov no yog hloov pauv tag nrho vim Vajtswv cov lus thiab qhov tseeb twb tau tuaj cag nyob rau hauv lawv, kav lawv, thiab dhau los ua lawv lub neej txoj sia lawm. Lawv tej kev xav txog txhua yam los kuj puav leej hloov pauv lawm thiab. Lawv tuaj yeem pom ncaj qha txog yam uas tab tom tshwm sim nyob rau hauv lub ntiaj teb thiab tshwm sim rau tib neeg ntiaj teb, qhov Ntxwgnyoog ua rau noob neej ntiaj teb qias vuab tsuab li cas, qhov tus zaj loj liab ploog tawm tsam Vajtswv li cas, thiab tus zaj loj liab ploog ntawd lub ntsiab tseeb. Lawv tuaj yeem ntxub tus zaj loj liab ploog thiab Ntxwgnyoog hauv lawv lub siab, thiab lawv tuaj yeem tig tau tag nrho los caum raws Vajtswv qab. Qhov no txhais hais tias lawv lub neej txoj sia tus moj yam twb hloov pauv lawm, thiab Vajtswv twb muab tau lawv lawm. Kev hloov pauv lub neej txoj sia tus moj yam yog txoj kev hloov pauv uas tseem ceeb heev, hos kev hloov pauv tus cwj pwm yog ib qho ntiav ntiav xwb. Tsuas yog cov uas hloov pauv tau lub neej txoj sia tus moj yam lawm xwb thiaj li yog cov uas tau txais qhov tseeb, thiab tsuas yog lawv xwb thiaj raug Vajtswv muab tau.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb

Vajtswv Tej Lus Txhua Hnub  Nqe Lus Uas Xaiv Tawm Los 383

Kev hloov pauv hauv yus tus moj yam tsis yog ib qho hloov hauv tus cwj pwm, los sis tsis yog lom txwm hloov rau sab nraud los sis tsuas txawv txav ib ntus uas tshwm sim los ntawm kev mob siab rau xwb. Txawm tej kev hloov pauv no yuav zoo npaum li cas los xij, tej kev hloov pauv no yeej hloov tsis tau tej kev hloov pauv tus moj yam ntawm lub neej txoj sia qhov chaw li, vim tej kev hloov pauv sab nraud no mas noob neej lub zog yeej ua tau li, tiam sis tej kev hloov pauv tus moj yam ntawm lub neej txoj sia ntawd mas yus tus kheej lub zog xwb yeej ua tsis tau li. Qhov raug Vajtswv txoj kev txiav txim, kev rau txim, tej kev sim siab, thiab kev lim tib neeg kom dawb huv ntawd mas yeej cheem tsum kom thiaj li ua tiav qhov no, nrog rau Vajntsujplig txoj kev ua kom zoo tiav log. Txawm cov tib neeg uas ntseeg Vajtswv coj tau qee tus cwj pwm zoo los xij, lawv yeej tsis muaj ib tug mloog Vajtswv lus tiag tiag, hlub Vajtswv tiag tiag, los sis ua tau raws li Vajtswv lub siab nyiam li. Qhov no yog li cas? Nws yog vim qhov no cheem tsum ib qho kev hloov pauv rau hauv tus moj yam ntawm lub neej txoj sia, thiab ib qho kev hloov pauv tus cwj pwm xwb mas yeej tsis txaus li. Ib qho kev hloov pauv tus moj yam ntawd txhais hais tias koj muaj kev paub thiab tau ntsib tau pom txog qhov tseeb lawm, thiab tias qhov tseeb twb dhau los ua koj lub neej txoj sia lawm, tias qhov tseeb ntawd coj tau kev thiab tswj koj lub neej txoj sia thiab txhua yam ntawm koj. Qhov no yog ib qho kev hloov pauv koj tus moj yam ntawm lub neej txoj sia ntag. Tsuag yog cov tib neeguas muaj qhov tseeb yam li lawv lub neej txoj sia ntawd xwb thiaj li yog cov uas twb hloov pauv tus moj yam lawm. Yav dhau los, tej zaum yuav muaj qee qhov tseeb uas koj muab coj los xyaum ua raws tsis tau thaum koj to taub qhov tseeb ntawd, tiam sis tam sim no koj xyaum ua tau txhua kis ntawm qhov tseeb uas koj to taub yam tsis muaj teeb meem los sis nyuaj hlo li. Thaum koj xyaum ua raws li qhov tseeb, koj yuav pom hais tias koj tus khee jmuaj kev kaj siab thiab kev zoo siab puv npo, tiam sis yog koj xyaum ua tsis tau raws li qhov tseeb, ces koj hnov mob siab thiab meem txom koj lub siab uas zoo. Koj yeej xyaum ua tau raws li qhov tseeb nyob rau hauv txhua yam, ua neej raws li Vajtswv cov lus, thiab muaj ib lub hauv paus rau kev ua neej. Qhov no txhais hais tias koj tus moj yam twb hloov pauv lawm. Tam sim no koj tso tau koj tej kev xav phem thiab tej kev xav hauv nruab siab, koj tej kev nyiam ntawm sab cev nqaij daim tawv thiab tej kev caum, thiab tej uas koj tso tsis tau tseg nyob rau yav dhau los ntawd tseg yam yooj yim heev li lawm. Koj xav hais tias Vajtswv cov lus yeej zoo tiag tiag, thiab tias qhov kev xyaum ua raws li qhov tseeb ntawd yog yam zoo tshaj plaws uas yuav tsum tau ua. Qhov no txhais hais tias koj tus moj yam twb hloov pauv lawm. Ib qho kev hloov pauv tus moj yam mas ntxim zoo li yooj yim heev, tiam sis tseeb tiag nws yog ib tug txheej txheem uas muaj ntau yam kev paub heev. Nyob rau lub caij no mas, tib neeg yuav tsum tau raug kev txom nyem ntau yam, lawv yuav tsum tau kov kom yeej lawv tus kheej lub cev thiab tso txoj kev ntshaw ntawm lawv lub cev tseg, lawv kuj yuav tsum tau raug kev txiav txim, kev rau txim, kev qhuab qhia, kev qhuab ntuas, tej kev sim siab, thiab kev lim tib neeg kom dawb huv thiab, thiab lawv kuj yuav tsum tau ntsib tau pom ntau yam uas ua tsis tau, ntog, tej kev nyuaj siab, thiab tej kev tsim txom uas nyob rau hauv lawv lub siab thiab. Tsuas yog tom qab tej kev ntsib kev pom no lawm xwb mas tib neeg thiaj li yuav muaj qee qhov kev to taub txog lawv tus kheej tus yeeb yam, tiam sis qee qhov kev to taub ntawd ua tsis tau kom hloov pauv tau tag nrho tam sim ntawd; lawv yuav tsum tau ntsib tau pom kom ntev heev ua ntej mas thaum kawg lawv tus kheej thiaj li yuav muaj peev xwm tso tau lawv tus moj yam qias vuab tsuab ib qho zuj zus tseg. Nws yog vim li no es thiaj li siv sij hawm los hloov pauv yus tus moj yam tag ib sim neej li. Piv txwv li, yog koj ib qho kev qias vuab tsuab tawm hauv ib qho teeb meem lawm, ces koj puas xyaum ua tau raws li qhov tseeb kiag tam sim ntawd thaum koj ras dheev txog qhov teeb meem ntawd? Koj yeej ua tsis tau li. Nyob rau theem ntawm qhov kev to taub no, lwm tus qhuab qhia koj thiab qhuab ntuas koj, thiab dhau ntawd ces koj ib puag ncig yuam koj thiab nias lub zog qee kom koj nqis tes ua mus raws li tej hauv paus ntsiab lus ntawm qhov ntseeb. Muaj qee zaus, koj yeej tseem tsis lees ua li ntawd, thiab koj hais rau koj tus kheej hais tias, “Kuv yuav tsum tau ua tej hauv paus ntsiab lus ntawm qhov tseeb li no lod? Vim li cas kuv thiaj li ua tsis tau li qhov kuv xav tau? Vim li cas thiaj li pheej hais kom kuv xyaum ua raws li qhov tseeb xwb? Kuv tsis xav ua qhov no, kuv nkees ua qhov no lawm!” Qhov paub Vajtswv txoj lus ntawd mas yuav tsum tau ntsib tus txheej txheem li hauv qab no: hloov ntawm qhov kev tsis kam xyaum ua raws li qhov tseeb los txaus siab hlo xyaum ua raws li qhov tseeb; hloov los ntawm txoj kev xav phem thiab tsis muaj peev xwm los muaj zog thiab lub peev xwm uas tso tau lub cev nqaij daim tawv tseg. Thaum tib neeg muaj ib txoj kev paub zoo li no thiab tom qab ntawd raug qee yam kev sim siab, kev lim tib neeg kom dawb huv, thiab thaum kawg los to taub Vajtswv lub siab nyiam thiab qee qhov tseeb lawm, ces lawv thiaj li muaj kev zoo siab qee yam thiab txaus siab nqis tes ua mus raws li tej hauv paus ntsiab lus ntawm qhov tseeb. Thaum xub thawj, tib neeg tsis tau xyaum ua raws qhov tseeb. Mob siab puv npo rau yus tej dej num ib yam li qhov ua piv txwv tias: Koj muaj qee qhov kev to taub puv npo txog koj tej dej num thiab tau fij rau Vajtswv lawm, thiab koj kuj muaj qee qhov kev to taub txog ntawm qhov tseeb thiab, tab sis thaum twg koj mam li muaj peev xwm fij kom tag nrho koj tus kheej rau Vajtswv? Thaum twg koj mam li tuaj yeem ua kom muaj tiav rau koj tej dej num rau hauv lub npe thiab txoj kev ua? Qhov no yuav cheem tsum ib qho txheej txheem. Thaum txog qhov txheej txheem no, koj tuaj yeem ntsib kev txom nyem nyuaj siab heev. Ib txhia tib neeg yuav qhuab ntuas koj, thiab lwm tus yuav thuam koj. Txhua tus tej qhov muag saib ntsoov koj, soj ntsuam koj, thiab tsuas yog dhau qhov ntawd lawm xwb koj thiaj li yuav pib paub tias koj nyob rau qhov tsis yog lawm thiab tias koj yog ib tug ua tau tsis zoo, tias qhov tsis muaj kev fij puv npo ntawm koj tes dej num yog tsis lees txais tsis tau, thiab tias koj yuav tsum txhob saib tsis taus los sis ua raws daim tawv xwb! Vajntsujpig yuav qhia kom koj paub los sab hauv los, thiab thuam koj thaum koj ua ib qho yuam kev lawm. Thaum txog qhov txheej txheem no, koj yuav los to taub qee yam txog koj tus kheej, thiab yuav paub tias koj muaj tej kev tsis dawb huv ntau dhau lawm, zais tej kev txhawb siab ntsws rau tus kheej ntau heev lawm, thiab muaj ntau yam kev ntshaw tsis dawb huv ntau heev thaum ua koj tej dej num kom muaj tiav. Thaum koj to taub lub ntsiab tseem ceeb ntawm tej yam no lawm, es yog tias koj yeej muaj peev xwm los rau ntawm Vajtswv xub ntiag los thov Vajtswv thiab muaj txoj kev lees txim hloov dua siab tshiab tiag tiag, ces koj thiaj li raug yaug tej yam qias vuab tsuab no kom dawb huv tuaj. Yog, hauv tus xeeb ceem no, koj keev nrhiav qhov tseeb los daws koj tus kheej tej teeb meem muaj qab hau, koj yuav maj mam rhais ruam mus rau txoj kev yog ntawm txoj kev ntseeg; koj yuav pib muaj tej kev ntsib kev pom ntawm lub neej txoj sia uas tseeb, thiab yuav maj mam pib ntxuav koj tus moj yam qias vuab tsuab kom dawb huv. Koj tus moj yam qias vuab tsuab yim raug ua kom dawb huv ntau npaum li cas, ces koj txoj sia tus moj yam yim yuav hloov pauv ntau npaum li ntawd.

Txawm tam sim no muaj ntau tus tib neeg tab tom ua lawv tej dej num los xij, hauv lub ntsiab tseeb, muaj pes tsawg tus tib neeg uas lam ua lawv tej dej num kom dhau xwb? Muaj pes tsawg tus tib neeg thiaj li lees txais tau qhov tseeb thiab ua lawv tej dej num kom mus raws li tej hauv paus ntsiab lus ntawm qhov tseeb? Muaj pes tsawg tus tib neeg ua lawv tej dej num mus raws li Vajtswv tej kev cheem tsum tom qab lawv tus moj yam hloov pauv lawm? Qhov saib tej no kom meej ntxiv ntawd, koj yuav muaj peev xwm paub hais tias koj puas phim ua koj tes dej num kom tiav, thiab koj kuj yuav muaj peev xwm pom tseeb tseeb hais tias koj tus moj yam puas tau hloov pauv thiab. Kev hloov pauv tau rau hauv yus tus moj yam mas tsis yog qhov yooj yim; nws tsis txhais tau tias tsuav yog muaj ib qho me me hloov rau hauv tus cwj pwm lawm xwb, ces yuav tau txais qee qhov kev paub ntawm qhov tseeb, kev muaj peev xwm tham txog ib qho me me ntawm yus txoj kev ntsib kev pom nrog txhua feem ntawm qhov tseeb, los sis muaj qee qhov kev hloov pauv los sis dhau los tsis mloog lus me me tom qab raug qhuab ntuas lawm. Tej yam no tsis muaj kev hloov pauv rau hauv yus txoj sia tus moj yam li. Vim li cas Kuv thiaj li hais li no? Txawm tias tej zaum koj tseem tsis muab qhov tseeb coj los xyaum ua raws tiag tiag. Tej zaum vim hais tias koj nyob rau hauv ib cheeb tsam puag ncig uas tsim nyog li ib ntus, thiab qhov xwm txheej ntawd pom zoo, los sis koj tej xwm txheej tam sim no tau yuam koj lawm, koj thiaj ua li no. Ntxiv ntawd, thaum koj zoo siab, thaum koj muaj tus yam ntxwv zoo, thiab thaum koj muaj Vajntsujplig tes hauj lwm lawm, ces koj yeej xyaum ua tau raws li qhov tseeb. Tiam sis muab xav hais tias koj tab tom raug ib txoj kev sim siab, thaum koj tab tom raug kev txom nyem zoo li Yauj nyob rau hauv koj tej kev sim siab ntawd, los sis tias koj raug txoj kev sim siab ntawm txoj kev tuag. Thaum qhov no los txog, koj puas tseem muaj peev xwm xyaum ua raws li qhov tseeb thiab tuav tej lus tim khawv kom khov kho? Koj puas hais tau qee yam li Petus hais tias, “Tab txawm yog kuv yuav tuag tom qab paub Koj lawm los xij, yog ua cas kuv thiaj li yuav tsis txaus siab thiab zoo siab hlo?” Petus saib dab tsi muaj nqis? Qhov Petus saib muaj nqis ntawd yog kev mloog lus, thiab nws saib txoj kev paub Vajtswv ntawd li yog qhov tseem ceeb tshaj plaws, yog li ntawd nws thiaj li muaj peev xwm mloog lus mus txog ntua hnub tuag. Kev hloov pauv hauv tus moj yam tsis tshwm sim tau rau hauv ib hmo xwb; nws siv tag nrho ib sim neej los ua mas thiaj li yuav ua tiav. Kev to taub qhov tseeb mas yooj yim me ntsis, tab sis kev muaj peev xwm los xyaum ua raws qhov tseeb hauv ntau qhov xwm txheej sib txawv mas nyuaj. Vim li cas tib neeg thiaj li pheej muaj teeb meem txog qhov muab qhov tseeb coj los xyaum ua raws? Tseeb tiag, tej kev nyuaj no puav leej muaj feem cuam tshuam ncaj qha rau tib neeg tus moj yam qias vuab tsuab, thiab tej kev nyuaj ntawd puav leej yog tej kev cuam tshuam uas los ntawm tus moj yam qias vuab tsuab los. Yog li ntawd, koj yuav tsum raug kev txom nyem ntau heev thiab tiv kev txom nyem mas thiaj li muaj peev xwm muab qhov tseeb ntawd coj los xyaum ua raws. Yog koj tsis muaj tus moj yam qias vuab tsuab, ces koj yuav tsum tsis tau raug kev txom nyem thiab tiv kev txom nyem los xyaum ua raws li qhov tseeb li. Qhov no tsis yog qhov tseeb tseeb lod? Tej thaum nws zoo nkaus li koj yeej muab qhov tseeb coj los xyaum ua raws lawm, tab sis hauv qhov muaj tseeb, tus yeeb yam ntawm koj tej kev nqis tes ua tsis qhia tias koj tab tom ua li ntawd. Nyob rau txoj kev caum raws Vajtswv qab ntawd mas, tib neeg coob leej muaj peev xwm tso tau lawv tsev neeg thiab tej hauj lwm tseg thiab ua kom muaj tiav rau lawv tej dej num, thiab yog li lawv thiaj li ntseeg tias lawv tab tom xyaum ua raws qhov tseeb lawm. Txawm li cas los xij, lawv yeej tsis muaj peev xwm hais lus tim khawv txog txoj kev ntsib kev pom tiag tiag li. Qhov no yog tim dab tsi lawm tiag tiag? Yog muab lawv ntsuas raws li tib neeg tej kev xav phem mas, zoo li lawv tab tom xyaum ua raws li qhov tseeb ntag, tiam sis Vajtswv tsis paub tias qhov lawv tab tom xyaum ua raws ntawd yog qhov tseeb. Yog txhua yam koj ua ntawd muaj koj tus kheej tej kev txhawb siab nyob tom qab tej yam ntawd uas tsis dawb huv, ces koj yuav tsis ua raws li tej hauv paus ntsiab lus, thiab hais tsis tau hais tias koj xyaum ua raws li qhov tseeb lawm; qhov no tsuas yog ib hom cwj pwm ua xwb. Hais cov lus nruj, tej zaum koj hom kev coj no yuav raug Vajtswv teem txim; yuav tsis raug Nws qhuas los sis hais lus zoo rau li. Thaum paub qhov no mus txog ntua lub ntsiab tseeb thiab lub hauv paus cag lawm, ces pom tias koj yog ib tug uas ua phem, thiab koj tus cwj pwm sab nraud no mas yeej tawm tsam Vajtswv xwb. Saib sab nraud los, koj yeej tsis tau cuam tshuam los sis tsis tau tsim teeb meem dab tsi thiab koj tsis tau ua dab tsi puas tiag tiag. Nws zoo li ntxim muaj laj thawj thiab ntxim muaj qab hau, tiam sis nyob rau sab hauv mas, muaj tib neeg tej kev qias thiab kev npaj siab ua phem, thiab muaj lub ntsiab tseem ceeb ntawm qhov ua phem thiab tawm tsam Vajtswv. Yog li ntawd, koj yuav tsum tshuaj xyuas seb puas muaj ib qho hloov rau hauv koj tus moj yam thiab seb koj puas muab qhov tseeb coj los xyaum ua raws los ntawm kev siv Vajtswv cov lus, thiab kev saib tej kev txhawb siab ntsws uas txhawb koj tus kheej tej kev nqis tes ua. Nws tsis yog nyob rau ntawm seb koj tej kev nqis tes ua ntawd puas yoog raws li tib neeg tej kev xav hauv nruab siab thiab tib neeg tej kev xav, los sis tej ntawd yuav haum los sis tsis haum raws li koj qhov kev nyiam; tej yam zoo li no tsis tseem ceeb. Feem ntau, nws nyob ntawm Vajtswv cov lus hais tias koj puas ua tau yoog raws los sis tsis tau yoog raws Vajtswv txoj kev xav, txawm tias koj tej kev nqis tes ua yuav muaj los sis tsis muaj qhov muaj tiag ntawm qhov tseeb, thiab txawm tias lawv yuav ua tau los sis tsis tau Nws tej kev cheem tsum thiab tej qauv los xij. Tsuas yog ntsuas koj tus kheej piv rau Vajtswv tej kev cheem tsum nkaus xwb thiaj li raug. Kev hloov pauv hauv tus moj yam thiab kev muab qhov tseeb coj los xyaum ua raws yeej tsis yooj yim thiab yooj yim li tib neeg xav hauv nruab siab li. Tam sim no nej puas to taub qhov no? Nej puas muaj ib qho kev ntsib kev pom zoo li no? Thaum tham txog ib qho teeb meem lub ntsiab tseem ceeb, tej zaum nej yuav tsis to taub nws; nej txoj kev to taub qhov tseeb tsuas yog sab nraum daim tawv xwb. Nej khiav mus los tas hnub, suav txij thaum sawv ntxov txog ntua thaum tsaus ntuj, sawv ntxov ntxov thiab mus pw lig, tiam sis nej ua tsis tau kev hloov pauv rau hauv nej txoj sia tus moj yam li, thiab nej tsis tuaj yeem nkag siab txog txoj kev hloov pauv ntawm tus moj yam li. Qhov no txhais tau tias nej txoj kev to taub qhov tseeb tseem ntiav heev, puas yog? Txawm tias nej tau ntseeg Vajtswv los ntev npaum li cas lawm los xij, tej zaum nej yuav tsis paub txog lub ntsiab tseem ceeb thiab tej yam tob ntsig txog txoj kev hloov pauv hauv tus moj yam. Nws puas tuaj yeem hais tau tias koj tus moj yam raug hloov lawm? Nej puas paub tias Vajtswv qhuas nej los tsis qhuas? Qhov tsawg kawg nkaus, koj yuav hnov tus Vajntsujplig qhia kev thiab qhia koj thiab ua dej num rau hauv koj thaum koj tab tom ua kom muaj tiav hlo rau koj tej dej num, kev ua ib txoj dej num rau hauv Vajtswv lub tsev, los sis raws li txoj dej num dav dav. Koj txoj kev coj yuav haum raws li Vajtswv cov lus, thiab thaum koj tau txais ib theem ntawm kev ntsib kev pom lawm, koj yuav hnov tias yam koj tau ua yav dhau los yeej tsim nyog lawm. Txawm li cas los xij, yog tom qab tau txais kev ntsib kev pom rau ib lub sij hawm lawm, koj yuav hnov tias qee yam uas koj tau ua yav dhau los tsis tsim nyog, thiab koj tsis txaus siab rau tej ntawd li, thiab xav tias tej uas tej ntawd tsis mus raws li qhov tseeb li, ces qhov no ua pov thawj qhia tau tias txhua yam koj tau ua yog kev tawm tsam Vajtswv. Nws ua pov thawj qhia tias koj txoj kev ua dej num puv npo kev ntxeev siab, kev tawm tsam, thiab tib neeg tej kev nqis tes ua, thiab tias koj yeej hloov pauv tsis tau tus moj yam tiag tiag li.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Yam Yuav Tsum Tau Paub Txog Kev Hloov Pauv Yus Tus Moj Yam

Vajtswv Tej Lus Txhua Hnub  Nqe Lus Uas Xaiv Tawm Los 384

Hauv qhov kev ntsuas seb tib neeg puas tuaj yeem mloog Vajtswv lus los sis tsis mloog, yam tseem ceeb uas yuav tau saib yog xyuas seb puas yog yam lawv ntshaw luam thuam los ntawm Vajtswv los, thiab seb lawv puas muaj tej kev txhawb siab zais npog los sis tsis muaj. Yog tib neeg pheej thov ntau yam xav tau tas li los ntawm Vajtswv, nws ua pov thawj qhia tau tias lawv tsis mloog Nws lus. Txawm tias yuav tshwm sim dab tsi rau koj los xij, yog koj tsis tuaj yeem txais nws tau los ntawm Vajtswv los, tsis tuaj yeem nrhiav qhov tseeb, tsuas hais tas li los ntawm koj tus kheej txoj kev muaj qab hau thiab xav tas li tias koj mas yeej yog tas li lawm, thiab haj tseem muaj peev xwm txog qhov tsis ntseeg tias Vajtswv yog qhov tseeb thiab ncaj ncces, ces koj yuav ntsib teeb meem. Cov neeg zoo li no yog cov khav theeb thiab ntxeev siab rau Vajtswv tshaj plaws. Cov tib neeg uas xav thov ntau yam xav tau tas li ntawm Vajtswv yeej tsis mloog Nws lus kiag li. Yog koj xav thov ntau yam xav tau ntawm Vajtswv, qhov no ua pov thawj qhia tau tias koj tab tom tsim ib qho kev rhuav tshem Vajtswv, tias koj tab tom xaiv koj tus kheej tej kev xav, thiab ua mus raws li koj tus kheej tej kev xav. Hauv qhov no, koj ntxeev siab rau Vajtswv, thiab tsis muaj kev mloog lus. Kev thov ntau yam xav tau ntawm Vajtswv yog kev tsis txawj xav; yog koj ntseeg tias Nws yog Vajtswv tiag tiag, ces koj yuav tsis muaj cuab kav thov ntau yam xav tau ntawm Nws, los sis koj yeej tsis tsim nyog thov ntau yam xav tau ntawm Nws li, txawm tias tej ntawd yuav yog yam muaj qab hau los sis tsis muaj qab hau los xij. Yog koj muaj txoj kev ntseeg Vajtswv tseeb, thiab ntseeg tias Nws yog Vajtswv, ces koj yuav tsis muaj kev xaiv tab sis pe hawm thiab mloog Nws lus xwb. Cov tib neeg niaj hnub tam sim no tsis yog tsuas ua raws lawv tus kheej tej kev xaiv xwb, lawv haj tseem hais kom Vajtswv ua raws li lawv tus kheej txoj kev xav thiab. Tsis yog lawv tsuas tsis xaiv los mloog Vajtswv lus xwb, lawv haj tseem hais kom Vajtswv mloog lawv lus thiab. Tsis yog qhov no tsis muaj qab hau li lod? Yog li ntawd, yog tsis muaj kev ntseeg tseeb nyob rau hauv tib neeg, tsis muaj txoj kev ntseeg tiag, ces lawv yeej tsis tuaj yeem tau txais Vajtswv txoj kev qhua li. Thaum tib neeg muaj peev xwm thov ntau yam xav tau kom tsawg dua ntawm Vajtswv, lawv txoj kev ntseeg tseeb thiab lawv txoj kev mloog lus yuav loj hlob, thiab lawv txoj kev xav muaj qab hau kuj yuav rais los zoo li qhov ib txwm muaj. Feem ntau ntawm kis uas tib neeg yim muaj qab hau tsawg, lawv yim yuav tau muab kev qhia qhov tseeb ntau, lawv yim yuav tau sib hais nyuaj ntxiv. Tsis yog lawv muaj ntau yam kev xav tau nkaus xwb, tab sis lawv kuj xav tau npaum li ib mais kev thaum muab li ib yas tes xwb. Thaum ua tau zoo raws li ib yam lawm, ces lawv thov lwm yam xav tau ntxiv, lawv yuav tsum ua kom tau zoo raws li txhua feem, thiab yog lawv ua tsis tau, lawv pib yws, thiab tso lawv tus kheej tseg yam li tsis muaj kev cia siab li. Tom qab ntawd lawv mam hnov tshuav nuj nqi thiab khuv xim, thiab lawv mam li quaj los kua muag iab, thiab xav tuag. Yam siv rau hauv qhov ntawd yog dab tsi? Tsis yog qhov no tsis muaj qab hau li lod? Yuav tsum tau daws tej teeb meem no rau thaum lub hauv paus. Yog koj muaj ib tug moj yam qias vuab tsuab es tsis daws tus moj yam ntawd, thiab yog koj nias qee tos kom txog thaum koj ntsib teeb meem los sis ua kom muaj kev puas tsuaj es mam li daws, ces koj yuav them li cas rau qhov uas poob lawm no? Qhov no tsis yog ib qho kev xav me me tom qab ntawd lod? Yog li ntawd, yuav kom daws tau qhov teeb meem ntawm tus moj yam qias vuab tsuab ntawd tiav log mas, koj yuav tsum nrhiav qhov tseeb los daws qhov teeb meem ntawd thaum nws xub tshwm sim tuaj. Koj yuav tsum daws tus moj yam qias vuab tsuab uas nyob rau theem tab tom loj hlob, kom paub tseeb tias yuav tsis ua yuam kev thiab tiv thaiv tej teeb meem rau yav tom ntej. Yog ib tug moj yam qias vuab tsuab nrhau cag thiab rais los ua yus tej kev xav los sis kev xam pom lawm, ces qhov ntawd yuav muaj peev xwm ua rau ib tug neeg ua phem tau. Yog li ntawd, lub hom phiaj tseem ceeb ntawm kev tig xav txog yus tus kheej thiab kev paub yus tus kheej ntawd yog los nrhiav cov moj yam qias vuab tsuab, ces maj nroos nrhiav qhov tseeb los daws tej ntawd. Koj yuav tsum paub seb yam dab tsi nyob hauv koj tus yeeb yam, yam koj nyiam, yam koj nrhiav, thiab yam koj xav ua kom tau. Koj yuav tsum txheeb xyuas tej yam no mus raws li Vajtswv cov lus los saib seb tej ntawd puas mus raws li Vajtswv txoj kev xav, thiab saib seb vim li cas tej ntawd thiaj li muaj qhov tsis raug lawm. Thaum koj to taub tej no lawm, koj yuav tsum siv laj thawj los daws qhov teeb meem txawv txawv ntawd, uas hais tau tias, qhov teeb meem ntawd tsis muaj qab hau. Qhov no tsis yog teeb meem ntawm ib tug moj yam qias vuab tsuab xwb, tab sis yog kev tsis muaj qab hau. Tshwj xeeb mas thaum xav txog tib neeg tej kev ntshaw, cov tib neeg uas muaj kev ntshaw dhau heev lawm yuav rais los tsis muaj qab hau. Qhov no yog ib qho teeb meem kev puas siab puas ntsws, thiab qhov no kuj yog tib neeg txoj kev Qaug Zog thiab. Ib txhia tib neeg xav tias lawv muaj peev xwm thiab kev txawj ntse, thiab lawv ib txwm xav ua cov thawj coj uas zoo tshaj tas li, yog li lawv thiaj li thov kom Vajtswv siv lawv. Yog Vajtswv tsis siv lawv, ces lawv hais tias, “Ua cas Vajtswv thiaj li tsis nyiam kuv? Vajtswv, yog Koj siv kuv mus ua qee yam tseem ceeb, ces kuv cog lus tias kuv yuav fij rau Koj!” Hom kev xav no puas yog lawm? Nws yog ib yam zoo uas muab fij rau Vajtswv, tab sis tsis muaj kev txhawb siab los txhawb kom muab lawv txoj kev txaus siab fij rau Vajtswv. Qhov lawv nyiam tiag tiag ces yog lub meej mom xwb, thiab qhov no yog yam uas lawv mob siab rau tshaj. Yog tib neeg mloog lus tiag tiag, ces lawv yeej raws tau Vajtswv qab kom kawg siab kawg ntsws yam tsis txog qhov Vajtswv yuav siv los sis tsis siv lawv li, thiab lawv fij tau rau Vajtswv yam tsis xav tias lawv yuav muaj los sis tsis muaj lub meej mom li. Tsuas yog cov neeg no xwb thiaj li xam tias muaj qab hau thiab mloog Vajtswv lus. Nws yog qhov zoo thaum tib neeg txaus siab hlo fij rau Vajtswv, thiab Vajtswv txaus siab hlo siv cov neeg zoo li no, tab sis yog lawv tsis npaj kom muaj qhov tseeb, ces tsis muaj hnub Vajtswv yuav siv lawv li. Yog tib neeg txaus siab mob siab ntso rau qhov tseeb thiab koom tes, ces yuav tsum muaj ib theem kev npaj. Tsuas yog tom qab tib neeg to taub qhov tseeb thiab tuaj yeem mloog Vajtswv lus tiag tiag lawm xwb mas Vajtswv thiaj li siv lawv raws li txheej txheem. Tsis muaj theem kev xyaum ua no tsis tau li. Niaj hnub no cov thawj coj thiab cov neeg ua hauj lwm mas puav leej nyob rau theem kev xyaum no. Tom qab lawv muaj kev ntsib kev kom rau lub neej txoj sia thiab ua tau raws li lub hauv paus ntsiab lus lawm, ces lawv thiaj li tsim nyog raug Vajtswv siv.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Tib Neeg Thov Ntau Yam Xav Tau ntawm Vajtswv Heev Lawm

Vajtswv Tej Lus Txhua Hnub  Nqe Lus Uas Xaiv Tawm Los 385

Tib tug cwj pwm uas ib tug uas raug tsim tawm los tsim nyog muaj rau tus Tswv Tsim ces yog kev mloog lus, ib qho kev mloog lus uas tsis muaj ib yam dab tsi los pauv li. Qhov no yog qee yam uas ib txhia tib neeg tam sim no yuav tsis kam lees txais. Qhov no vim hais tias tib neeg tus yeeb yam mas me heev thiab lawv tsis muaj qhov muaj tiag ntawm qhov tseeb li. Yog tias, thaum Vajtswv ua tej yam tsis mus raws li koj tej kev xav phem, koj ris qhov muab Vajtswv tshab txhais yuam kev—haj tseem ris qhov tsis mloog Vajtswv lus thiab, thiab tig koj nraub qaum rau Nws—ces koj tseem nyob deb ntawm qhov uas muaj peev xwm mloog Vajtswv lus. Thaum uas tib neeg tau txais kev puab cuam thiab kev ywg dej los ntawm Vajtswv txoj lus, tib neeg ces qhov tseeb tiag yog rau siab rau ib lub hom phiaj nkaus xwb. Uas yog qhov uas thaum kawg ces kom muaj peev xwm zwm tau tag nrho rau Vajtswv yam tsis muaj ib qho dab tsi pauv li—nyob rau qhov uas, koj, tus raug tsim tawm los no, yuav tsum ua kom tau raws li tus qauv quag cheem tsum. Muaj ntau lub sij hawm thaum Vajtswv txhob txwm ua tej yam uas tsis haum raws li koj tej kev xav phem, thiab txhob txwm ua tej yam uas tawm tsam koj tej kev ntshaw, thiab tej zaum haj tseem zoo li tsis haum raws qhov tseeb thiab, thiab tawm tsam noob neej tej kev xav, thiab tawm tsam koj; tej zaum tej no yuav ua rau koj lees txais nyuaj, tej zaum koj yuav tsis muaj peev xwm to taub tej ntawd li, thiab txawm koj yuav txheeb xyuas tej ntawd npaum li cas los xij, koj yuav xav hais tias tej ntawd tsis yog thiab tej zaum koj yuav tsis muaj peev xwm lees txais tej ntawd, koj yuav xav hais tias tsis tsim nyog Vajtswv ua li no—tiam sis tseeb tiag, Vajtswv txhob txwm ua li no ntag. Yog li ntawd Vajtswv lub hom phiaj uas ua tej no yog dab tsi? Nws yog los sim thiab muab koj qhia tshwm, saib seb koj puas muaj peev xwm nrhiav qhov tseeb los sis tsis muaj, seb koj puas muaj txoj kev mloog Vajtswv lus tseeb los sis tsis muaj. Tsis txhob nrhiav lub hauv paus txog txhua yam uas Vajtswv ua thiab nug, thiab tsis txhob nug tias vim li cas. Qhov sim los sib cam nrog Vajtswv ntawd tsis muaj qab hau li. Koj tsuas yog yuav tsum lees paub hais tias Vajtswv yog qhov tseeb thiab cia li mloog lus nkaus xwb. Koj tsuas yog yuav tsum lees paub hais tias Vajtswv yog koj tus Tswv Tsim thiab koj tus Vajtswv xwb. Qhov no siab dua txhua qhov kev sib cam, siab dua txoj kev ntse ntawm lub ntiaj teb, siab dua txhua tus noob neej txoj kev coj ncaj ncees, kev paub tab paub cai, kev txawj ntse, tswv yim, los sis kab lis kev cai qub lawm—haj tseem siab dua noob neej tej kev txawj xav, noob neej txoj kev ncaj ncees, thiab noob neej txoj kev hlub lawm thiab. Nws siab tshaj txhua yam huv si. Yog qhov no tsis meej rau koj, ces yeej yuav muaj ib hnub twg uas yuav muaj qee yam tshwm sim rau koj thiab ua rau koj poob. Yam tsawg kawg mas, koj yeej yuav ntxeev siab rau Vajtswv thiab taug ib txoj kev uas tsis zoo li qub lawm; yog thaum koj muaj peev xwm lees txim hloov dua siab tshiab, thiab lees paub Vajtswv txoj kev zoo ntxim hlub, thiab lees paub qhov tseem ceeb ntawm Vajtswv tes hauj lwm uas nyob hauv koj lawm, ces koj yeej tseem yuav muaj kev cia siab txog txoj kev cawm dim—tiam sis yog koj poob vim yog qhov no xwb thiab tsis muaj peev xwm nce rov qab los li, ces koj tsis muaj kev cia siab li lawm. Txawm Vajtswv yuav txiav txim, rau txim, los sis foom tsis zoo rau tib neeg los xij, tej no puav leej yog los cawm lawv nkaus xwb, yog li ntawd lawv tsis tas yuav ntshai. Koj tsim nyog ntshai dab tsi? Koj yuav tsum ntshai qhov Vajtswv hais tias, “Kuv ntxub thiab tsis kam txais yuav koj.” Yog Vajtswv hais li no, ces koj raug teeb meem lawm ntag: Qhov no txhais hais tias Vajtswv yuav tsis cawm koj lawm, kom koj tsis muaj kev cia siab txog txoj kev cawm dim li lawm. Yog li ntawd, qhov lees txais Vajtswv tes hauj lwm ntawd mas, tib neeg yuav tsum to taub Vajtswv lub siab nyiam. Txhua yam uas koj ua, tsis txhob nrhiav qhov tsis tseem ceeb thaum hais txog Vajtswv cov lus uas hais tias, “Txoj kev txiav txim thiab kev rau txim ntawd mas tsis ua li cas, tiam sis txoj kev teem txim, kev foom tsis zoo, kev puas ntsoog mas tsis zoo—qhov no tsis txhais hais tias kuv ces tag li no lawm xwb lod? Qhov tseem ceeb ntawm qhov yog Vajtswv ib tug neeg uas raug tsim tawm los ntawd yog dab tsi? Yog li ntawd, kuv yuav tsis ua tus neeg ntawd, thiab Koj yuav tsis yog kuv tus Vajtswv ntxiv lawm.” Yog koj tsis kam txais yuav Vajtswv thiab tsis tuav koj tej lus tim khawv kom khov kho, ces Vajtswv yeej yuav tsis kam txais yuav koj kiag li. Nej puas paub li no? Txawm tib neeg twb ntseeg Vajtswv los tau ntev npaum li cas lawm, txawm lawv twb tau taug ntau txoj kev npaum li cas lawm, lawv twb ua tau hauj lwm ntau npaum li cas lawm, los sis lawv twb tau ua ntau teg dej num npaum li cas lawm los xij, txhua yam uas lawv tau ua nyob rau lub sij hawm no yog txoj kev npaj rau ib qho xwb. Qhov ntawd yog dab tsi? Lawv tau npaj los kom thaum kawg muaj kev mloog Vajtswv lus nkaus xwb, kev mloog lus yam tsis muaj dab tsi txwv li. “Yam tsis muaj dab tsi txwv li” txhais li cas? Nws txhais hais tias koj tsis muaj kev cam li, thiab tsis hais ib yam dab tsi txog koj tus kheej lub hom phiaj li, nws txhais hais tias koj tsis hais ub hais no yam tsis tseem ceeb li; koj yog Vajtswv ib tug neeg uas raug tsim tawm los xwb, koj tsis tsim nyog ua li no. Thaum koj hais ub hais no rau Vajtswv, koj to taub yuam kev lawm, thiab thaum koj sim sib cam nrog Vajtswv—koj to taub yuam kev dua lawm thiab. Tsis txhob nrog Vajtswv sib cav, tsis txhob pheej xav seb yog vim li cas, tsis txhob pheej ua kom to taub es koj mam li mloog lus, thiab yog koj tsis to taub ces tsis mloog lus. Thaum koj ua li no, ces koj to taub yuam kev lawm, yog li ntawd koj thiaj li tsis mloog Vajtswv lus kiag li; tsuas yog kev mloog lus xwb thiaj li yog qhov zoo thiab tsim nyog. Cov uas nrhiav kom paub qhov tseeb mam li mloog Vajtswv lus ntawd puas yog cov tib neeg uas mloog Vajtswv lus tiag tiag? Koj puas saib Vajtswv li yog Vajtswv? Koj puas pe hawm Vajtswv li yog tus Tswv Tsim? Yog koj tsis pe hawm li ntawd, ces Vajtswv tsis lees paub koj. Qhov koj yuav tsum tau ua kom thiaj li muaj txoj kev mloog Vajtswv lus tiag tiag thiab yam tsis muaj dab tsi txwv li ntawd yog dab tsi? Thiab koj yuav tsum tau ua li cas? Muaj ib yam uas yog qhov tib neeg yuav tsum lees txais Vajtswv txoj kev txiav txim thiab kev rau txim, lawv yuav tsum lees txais qhov kev raug qhuab qhia thiab raug qhuab ntuas. Ntxiv ntawd, lawv yuav tsum lees txais Vajtswv cov lus txib, lawv yuav tsum caum qhov tseeb thaum lawv ua lawv tes dej num, lawv yuav tsum to taub ntau kis ntawm qhov tseeb uas ntsig txog kev to taub qhov tseeb txog lub neej txoj sia, thiab muaj kev to taub txog Vajtswv lub siab nyiam. Qee zaus, qhov no dhau tib neeg lub peev xwm lawm, thiab lawv tsis muaj lub hwj chim uas nkag siab kom to taub txog qhov tseeb, thiab tsuas to taub me ntsis thaum lwm tus qhia rau lawv los sis kawm los ntawm ntau yam xwm txheej uas Vajtswv tsim xwb. Tiam sis koj yuav tsum paub hais tias koj yuav tsum muaj ib lub siab uas mloog Vajtswv lus, koj yuav tsum tsis txhob sim sib cam nrog Vajtswv los sis nrhiav kom paub qhov tseeb; txhua yam uas Vajtswv ua yeej yog yam uas yuav tsum tau ua kom tiav lawm, vim Nws yog tus Tswv Tsim; koj yog Vajtswv ib tug neeg uas raug tsim tawm los xwb, yog li ntawd koj yuav tsum muaj ib tug cwj pwm uas mloog lus, thiab yuav tsum tsis txhob pheej nug qhov laj thawj los sis hais ub hais no. Yog koj haj tseem tsis muaj qhov tseem ceeb tshaj plaws uas yog tus cwj pwm mloog lus, thiab haj tseem ua xyem xyav thiab ceev faj txog Vajtswv thiab, los sis xav hauv koj lub siab hais tias, “Kuv yuav tsum saib seb Vajtswv puas yuav cawm kuv tiag tiag, seb Vajtswv puas ncaj ncees tiag tiag tso. Txhua tus hais tias Vajtswv yog txoj kev hlub—yog li ntawd, kuv yuav tsum saib seb puas muaj kev hlub nyob rau hauv yam Vajtswv ua rau kuv, seb qhov ntawd puas yog txoj kev hlub tiag tiag tso,” yog koj pheej saib kom meej seb yam Vajtswv ua ntawd puas mus raws li koj tej kev xav phem thiab tej uas tib neeg nyiam, los sis yam uas koj ntseeg hais tias yog qhov tseeb xwb, ces koj to taub yuam kev lawm, thiab koj yuav muaj teeb meem xws li: Koj yuav ua txhaum rau Vajtswv tus moj yam. Qhov tseeb uas muaj kev mloog lus mas yog qhov tseem ceeb, thiab yeej tsis muaj ib qho tseeb uas tsuas sau ob peb sob lus xwb ces txawm siv tag li ntawd lawm thiab meej heev li lawm; tej ntawd puav leej ntsig txog tib neeg tus yam ntxwv thiab txoj kev qias vuab tsuab ntau yam. Kev to taub qhov tseeb txog qhov muaj tiag ntawm qhov tseeb ntawd mas ib los sis ob xyoos—los sis peb los sis tsib xyoos los yeej tsis tuaj yeem to taub li. Qhov ntawd yuav tsum yog paub ntau yam, raug ntau qhov kev txiav txim thiab kev rau txim ntawm Vajtswv cov lus, raug ntau qhov kev qhuab qhia thiab kev qhuab ntuas, thiab thaum kawg muaj lub peev xwm los xyaum ua raws li qhov tseeb. Tsuas yog thaum ntawd xwb mas txoj kev caum qhov tseeb thiaj li yuav ua tau zoo, thiab tsuas yog thaum ntawd xwb mas tib neeg thiaj li yuav muaj qhov muaj tiag ntawm qhov tseeb. Tsuas yog cov uas muaj qhov muaj tiag ntawm qhov tseeb xwb thiaj li yog cov uas muaj txoj kev ntsib kev pom tiag tiag.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb

Vajtswv Tej Lus Txhua Hnub  Nqe Lus Uas Xaiv Tawm Los 386

Thaum tau ntsib tau pom Vajtswv tes hauj lwm lawm, txawm koj yuav ua tsis tau, ntog, raug qhuab qhia, raug qhuab ntuas, los sis raug muab qhia tshwm pes tsawg zaus los xij, tej no tsis yog tej yam phem. Txawm koj yuav raug cov thawj coj, cov neeg ua hauj lwm, los sis koj cov kwv tij los sis cov muam qhuab qhia los sis raug qhuab ntuas li cas los xij, tej no puav leej yog tej yam zoo. Koj yuav tsum nco ntsoov qhov no hais tias: Txawm koj yuav raug kev txom nyem npaum li cas los xij, koj yeej yuav tau txais txiaj ntsim tiag tiag. Txhua tus uas muaj kev ntsib kev pom yeej ua tau pov thawj rau qhov no. Txawm yuav zoo li cas los xij, qhov raug qhuab qhia, raug qhuab ntuas, los sis raug muab qhia tshwm ntawd yeej ib txwm yog qhov zoo. Nws tsis yog ib qho kev teem txim. Nws yog Vajtswv txoj kev cawm dim thiab lub cib fim zoo tshaj plaws rau koj los paub koj tus kheej. Nws coj tau ib qho kev pauv cias los rau hauv koj qhov kev ntsib kev hloov pauv los rau koj qhov kev ntsib kev pom hauv lub neej. Yog tsis muaj nws, koj yuav tsis muaj lub cib fim, tus yam ntxwv, los sis tsis muaj qhov xwm txheej kom muaj peev xwm mus txog ib qho kev to taub qhov tseeb ntawm koj txoj kev qias vuab tsuab. Yog koj to taub qhov tseeb tiag tiag thiab muaj peev xwm dig tau tej yam qias vuab tsuab uas zais nyob rau hauv koj nruab siab tawm tuaj, yog koj paub cais tej ntawd kom meej meej, ces qhov ntawd yog ib qho zoo, qhov no twb daws tau ib qho teeb meem loj ntawm kev to taub qhov tseeb txog lub neej txoj sia lawm, thiab yog ib qho txiaj ntsim loj rau txoj kev hloov pauv tus moj yam. Kev rais los muaj cuab kav paub koj tus kheej tiag tiag yog qhov cib fim zoo tshaj plaws rau koj los tsim kho koj tus kheej thiab ua ib tug neeg tshiab. Thaum uas koj paub koj tus kheej lawm tiag tiag, koj yuav muaj cuab kav pom hais tias thaum qhov tseeb rais los ua yus txoj sia lawm, nws yog ib qho muaj nuj nqis heev tiag tiag li, thiab koj yuav nqhis qhov tseeb, xyaum ua raws qhov tseeb, thiab to taub qhov muaj tiag ntawm qhov tseeb. Qhov no yog ib qho zoo heev! Yog koj muaj peev xwm tuav nkaus lub cib fim no no thiab ua tiag rov tig los ua twb zoo saib koj tus kheej thiab paub koj tus kheej tiag tiag thaum uas koj swb los sis ntog lawm, ces nyob rau hauv tej yam tsis zoo thiab qhov kev qaug zog ntawd, koj yuav muaj cuab kav sawv tsees rov los. Thaum koj tau hla tus taw rooj no lawm, ces koj yuav muaj cuab kav hla ib kauj ruam loj mus lawm tom ntej thiab to taub qhov muaj tiag ntawm qhov tseeb.

Yog koj ntseeg Vajtswv lub hwj chim kav, ces koj yuav tsum ntseeg hais tias tej kev tshwm sim txhua hnub, tsis hais zoo los phem, mas tsis yog lam nyob lam tshwm sim xwb. Tsis yog ib tug neeg twg txhob txwm ua nyuab rau koj los sis tsom ntsoov koj xwb; qhov no ces puav leej yog Vajtswv npaj tseg thiab qhia ua los lawm. Vim li cas Vajtswv thiaj li muaj kev coj kev qhia tag nrho tej yam li no? Nws tsis yog yuav nthuav tawm koj seb koj yog leej twg los sis muab koj qhia tshwm thiab muab koj ntiab tawm mus; kev qhia tshwm koj ntawd tsis yog lub hom phiaj kawg. Lub hom phiaj yog yuav ua kom koj zoo tiav log thiab cawm koj. Vajtswv ua kom koj zoo tiav log li cas? Thiab Nws cawm kom koj dim li cas? Nws pib los ntawm qhov ua kom koj paub txog koj tus kheej tus moj yam qias vuab tsuab, thiab los ntawm qhov ua kom koj paub koj tus yeeb yam thiab lub ntsiab tseeb, tej yam koj ua tsis tau zoo, thiab txog tej yam koj tsis muaj. Tsuas yog paub tej yam no thiab muaj kev to taub meej txog lawv xwb mas koj thiaj li muaj peev xwm nrhiav tau qhov tseeb thiab maj mam muab koj tus moj yam qias vuab tsuab ntawd tshem pom tseg tau. Qhov no yog Vajtswv muab ib lub cib fim rau koj. Qhov no yog Vajtswv txoj kev khuv leej. Koj yuav tsum paub hais tias yuav txeeb kiag lub cib fim no li cas. Koj yuav tsum tsis txhob tawm tsam Vajtswv, tsoo taub hau nrog Vajtswv, los sis to taub Nws yuam kev. Muab hais kiag ces, thaum ntsib tib neeg, teeb meem, thiab tej yam uas Vajtswv npaj rau ib ncig ntawm koj, tsis txhob xav tas mus li hais tias cas txhua yam yuav tsis zoo li qhov koj xav kom lawv zoo li; tsis txhob xav khiav kom dim lawv tas mus li los sis cem tas mus li thiab to taub yuam kev Vajtswv. Yog koj pheej ua li tej no tas mus li xwb, ces tsis yog koj tau ntsib tau pom Vajtswv tes hauj lwm, thiab qhov ntawd yuav ua ib qho nyuab rau koj los to taub qhov muaj tiag ntawm qhov tseeb. Thaum twg los xij uas koj ntsib tej yam koj tsis to taub tag nrho, thaum ua muaj ib qho teeb meem tshwm sim tuaj, koj yuav tsum xyaum nyoo. Koj yuav tsum pib los rau ntawm Vajtswv xub ntiag thiab thov Vajtswv kom ntau ntxiv. Ua li ntawd, ua ntej koj paub nws, muaj ib qho kev txawv txav yuav tshwm sim rau koj tus yam ntxwv nruab nrog, thiab koj yuav muaj peev xwm nrhiav qhov tseeb los daws koj qhov teeb meem. Zoo li ntawd, koj yuav muaj peev xwm tau ntsib tau pom Vajtswv tes hauj lwm. Thaum qhov no tshwm sim, qhov muaj tiag ntawm qhov tseeb yuav tshwm sim nyob rau hauv koj, thiab qhov no yog qhov uas koj yuav nce qib thiab mus dhau qhov kev pauv hloov no thiab muaj qhov muaj tiag ntawm qhov tseeb no, koj kuj yuav muaj tus yeeb yam, thiab muaj tus yeeb yam ntawd ces yog muaj txoj sia. Yog ib tug twg pheej ua neej nyob raws li ib tug moj yam phem qias vuab tsuab xwb, ces tsis hais lawv yuav kub siab los sis muaj dag zog loj npaum li cas li, lawv yeej tseem tsis tau raug xam tau hais tias muaj tus yeeb yam, los sis txoj sia. Vajtswv yeej ua hauj lwm rau hauv txhua tus tib neeg, thiab tsis hais Nws yuav siv txoj kab ke twg, hom neeg twg, tej teeb meem twg, thiab yam twg li uas Nws siv nyob rau hauv Nws qhov kev ua hauj lwm, los sis Nws tej lus muaj lub suab zoo li cas li, Nws tsuas muaj ib lub hom phiaj kawg xwb: cawm koj. Thiab Nws cawm koj dim li cas? Nws hloov pauv koj hloov. Yog li ntawd ua cas koj thiaj yuav tsis raug kev txom nyem ib qho me me li mas? Koj yeej yuav raug kev txom nyem hos. Qhov kev txom nyem no mas kuj muaj ntau yam. Thaum xub thawj mas, tib neeg yuav tsum raug kev txom nyem thaum lawv lees txais txoj kev txiav txim thiab kev rau txim ntawm Vajtswv cov lus. Thaum Vajtswv cov lus hnyav dhau lawm thiab hais meej heev thiab tib neeg muab Vajtswv txhab txhais yuam kev—thiab haj tseem muaj tej kev xav phem thiab—ces qhov ntawd kuj ua rau mob siab thiab. Qee zaus Vajtswv tsa kom muaj ib qho xwm txheej nyob puag ncig tib neeg los muab lawv txoj kev qias vuab tsuab qhia tshwm, los ua kom lawv tig xav txog thiab paub lawv tus kheej, ces thaum ntawd lawv kuj yuav raug kev txom nyem me ntsis thiab. Qee zaum, thaum lawv raug qhuab qhia, raug qhuab ntuas, thiab raug muab qhia tshwm ncaj qha, mas tib neeg yuav tsum raug kev txom nyem. Qhov ntawd cuag nkaus li lawv raug phais—yog tsis muaj kev txom nyem li, ces tsis muaj qhov ua tau zoo li. Yog txhua zaus uas koj raug qhuab qhia thiab raug qhuab ntuas, thiab txhua zaus uas koj raug ib qho xwm txheej muab nthuav tawm tag nrho, mas qhov ntawd ua rau koj muaj kev xav thiab ua rau koj muaj zog, ces los ntawm tus txheej txheem no koj thiaj li yuav to taub txog qhov muaj tiag ntawm qhov tseeb, thiab yuav muaj lub meej mom tseem ceeb. Yog hais tias txhua zaus es koj raug muab cob rau kev raug qhuab ntuas thiab raug qhuab qhia thiab rau kev raug ib qho xwm txheej muab qhia tshwm, es koj tsis hnov mob los sis xeeb txob dab tsi li, thiab tsis hnov dab tsi hlo li, thiab yog hais tias koj tsis los rau ntawm Vajtswv xub ntiag los nrhiav Nws txoj kev xav, tsis thov Vajtswv los sis tsis nrhiav qhov tseeb li, ces koj yog ib tug niag uas loog tag lawm tiag tiag! Vajtswv tsis ua hauj lwm rau hauv koj thaum koj lub siab tsis paub dab tsi li, thiab thaum lub siab ntawd tsis xav dab tsi li. Nws yuav hais tias, “Tus neeg no mas loog dhau heev lawm, thiab tau raug ua qias vuab tsuab tob dhau heev lawm. Txawm Kuv yuav qhuab qhia nws, qhuab ntuas nws, los sis pheej tshuaj xyuas nws npaum li cas los, Kuv yeej tseem tsis muaj peev xwm tig tau nws lub siab los sis tsa tau nws tus ntsuj plig thiab. Tus neeg no yuav raug teeb meem; yuav cawm nws tsis tau yooj yim kiag li.” Yog Vajtswv npaj qee qhov chaws ib puag ncig, qee tus neeg, qee yam xwm txheej, thiab qee yam rau koj, yog Nws qhuab ntuas thiab qhuab qhia koj thiab yog koj kawv tau tej kev kawm los ntawm qhov no, yog koj tau kawm los rau ntawm Vajtswv xub ntiag, kawm nrhiav qhov tseeb, thiab, yam tsis nco paub txog li, raug qhia kom tig ras to taub thiab qhia kom paub qhov tseeb thiab muab tau qhov tseeb, yog hais tias koj tau ntsib tau pom ib qho kev hloov nyob rau ib puag ncig, txais phaj tshab, thiab muaj kev nce qib, yog hais tias koj pib muaj ib qho kev nkag siab txog Vajtswv txoj kev xav thiab koj tsum tsis yws ntxiv lawm, ces tej no txhais tau hais tias koj sawv tau khov kho nyob rau hauv tej kev sim siab ntawm tej cheeb tsam puag ncig no lawm, thiab tau tiv taus tej kev sim ntawd lawm. Zoo li no, koj thiaj yuav mus dhau qhov kev sim siab loj no. Vajtswv yuav hais li cas txog cov neeg uas tiv taus txoj kev sim siab loj ntawd? Vajtswv yuav hais tias lawv muaj ib lub siab tseeb tiag tiag thiab tuaj yeem tiv taus hom kev txom nyem zoo li no thiab tias, nyob tob rau hauv lawv lub siab mas, lawv nyiam qhov tseeb thiab xav koom tau txais qhov tseeb. Yog tias Vajtswv muaj hom kev tshuaj xyuas txog koj no, koj tsis yog ib tug neeg uas muaj tus yeeb yam lov? Koj tsis muaj lub neej txoj sia lov? Thiab lub neej txoj sia no ho ua tau tiav li cas? Nws puas yog Vajtswv muab los? Vajtswv pab koj ntau txoj kev thiab siv ntau tus tib neeg, ntau yam, thiab ntau yam khoom siv los cob qhia koj. Qhov no mas cuag nkaus li Vajtswv tus kheej muab zaub mov thiab dej haus rau koj ntag, nws tus kheej xa zaub xa mov rau koj noj koj haus kom koj thiaj li txaus siab thiab xyiv fab; tsuas yog thaum ntawd xwb koj thiaj li loj hlob thiab sawv khov kho. Qhov no yog qhov uas koj yuav tsum paub thiab nkag siab tej no; qhov no yog qhov los rau txhua yam uas los ntawm Vajtswv los. Qhov no yog hom tswv yim thiab cwj pwm uas koj yuav tsum muaj, thiab koj yuav tsum kawm kom paub nrhiav qhov tseeb. Koj yuav tsum tsis txhob pheej nrhiav yam uas ua rau tshwm sim sab nraud xwb los sis liam rau lwm tus rau koj tej teeb meem los sis nrhiav kev txhaum rau tib neeg; koj yuav tsum muaj ib txoj kev to taub meej txog Vajtswv lub siab nyiam. Nyob rau sab nraud mas, tej zaum ib txhia tib neeg yuav zoo li muaj kev xav txog koj los sis saib tsis taus koj, tiam sis koj yuav tsum tsis txhob saib li ntawd. Yog tias koj saib tej yam los ntawm hom kev xav no, ces yam uas koj yuav ua ces tsuas yog nrhiav kev zam nkaus xwb, ces koj yuav tsis muaj peev xwm ua tau ib yam dab tsi tiav li. Koj yuav tsum saib tej ntawd kom muaj hom phiaj thiab lees txais txhua yam no ntawm Vajtswv los. Thaum koj saib txhua yam no li no lawm, ces qhov ntawd yuav yooj yim rau koj ua raws li Vajtswv tes hauj lwm, thiab koj yuav muaj peev xwm los nrhiav qhov tseeb thiab nkag siab Vajtswv txoj kev xav. Thaum kho tau koj txoj kev xam pom thiab tus yam ntxwv hauv siab lawm, koj yuav muaj peev xwm tau txais qhov tseeb. Yog li, vim li cas koj thiaj li tsis ua li ntawd mas? Vim li cas koj thiaj li tawm tsam? Yog tias koj tsum tsis tawm tsam, ces koj yuav tau txais qhov tseeb. Yog tias koj tawm tsam, koj yuav tsis tau txais ib yam dab tsi li, thiab koj kuj yuav ua rau mob Vajtswv siab thiab ua rau Nws tag kev cia siab. Vim li cas Vajtswv thiaj li yuav tag kev cia siab? Vim koj tsis lees txais qhov tseeb, ces koj tsis muaj kev cia siab rau txoj kev cawm dim, thiab Vajtswv tsis muaj peev xwm muab tau koj, yog li ntawd yog ua li cas Nws thiaj li yuav tsis tag kev cia siab? Thaum koj tsis lees txais qhov tseeb, ces qhov no yog ib qho uas muab cov zaub mov uas Vajtswv tus kheej tau muab rau koj ntawd thawb pov tseg ntag. Koj hais tias koj tsis tshaib plab thiab tias koj tsis cheem tsum tais mov ntawd; Vajtswv ua txhua yam los txhawb koj tas zog kom noj, tiam sis koj yeej tseem tsis xav tau tais mov ntawd li. Koj yeem mus tshaib plab ntsuav. Koj xav tias koj txaus siab lawm, tiam sis tseeb tiag, koj twb tsis muaj ib yam dab tsi li. Cov tib neeg zoo li no mas tsis muaj kev txawj xav kiag li, thiab qhuas tias lawv tus kheej mas coj ncaj heev li; tseeb tiag, lawv tsis paub ib yam zoo thaum lawv pom yam ntawd li, lawv yog cov tib neeg uas txom nyem thiab txaus hlub tshaj plaws.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Yuav Kom Tau Txais Qhov Tseeb Mas, Yus Yuav Tsum Kawm Los Ntawm Tib Neeg, Tej Xwm Txheej, thiab Tej Yam Nyob Ze Yus

Vajtswv Tej Lus Txhua Hnub  Nqe Lus Uas Xaiv Tawm Los 387

Hauv lawv tes dej num, cov thawj coj ntawm pawg ntseeg thiab cov ua dej num yuav tsum tau mob siab rau ob lub hauv paus ntsiab lus no: Ib yog kom ua lawv tes dej num kom raws nraim li cov keeb laj fai uas ceev tseg cia los ntawm tes dej num tej kev npaj, tsis txhob yuam cai rau cov ntsiab ntawd thiab txhob tso lawv tes dej num rau ntawm ib qho dab tsi uas lawv xav los sis rau ntawm ib qho twg ntawm lawv tej tswv yim li. Txhua yam lawv ua, lawv tsim nyog qhia tawm kev txhawj xeeb rau pawg ntseeg tes hauj lwm, thiab ib txwm muab tej kev ntshaw ntawm Vajtswv lub tsev tso ua ntej. Ib yam ntxiv—thiab qhov no tseem ceeb tshaj—yog tias hauv txhua yam, lawv yuav tsum tsom ntsoov rau kev caum raws tus Vajntsujplig Dawb Huv txoj kev taw qhia thiab ua txhua yam raws li Vajtswv cov lus kom nruj. Yog tias lawv tseem muaj cuab kav tawm tsam tus Vajntsujplig Dawb Huv txoj kev taw qhia, los sis yog lawv tsis ua raws li lawv tus kheej cov tswv yim thiab ua txhua yam raws nraim li koj tus kheej txoj kev xav, ces lawv tej kev ua yuav suav tau tias yog ib qho tawm tsam Vajtswv loj tshaj plaws. Qhov tig lawv lub nrab qaum rau kev qhuab qhia thiab kev taw qhia ntawm tus Vajntsujplig Dawb Huv tas li mas tsuas yuav coj mus rau ib txoj kev tws xwb. Yog tias lawv plam tes dej num ntawm tus Vajntsujplig Dawb Huv lawm, ces lawv yuav tsis muaj cuab kav ua dej num; thiab txawm tias lawv yuav tswj mus ua tau dej num los, lawv yuav ua tsis tiav. Muaj ob lub ntsiab lus tseem ceeb uas cov thawj coj thiab cov neeg ua dej num yuav tsum ua raws thaum tab tom ua dej num: Ib yog ua lawv tes dej num kom raws nraim li tej kev npaj hauj lwm uas los saum tus Nyob Saud los, nrog rau qhov ua kom raws cov keeb laj fai uas tau teeb cia los ntawm tus Nyob Saud; thiab lwm qhov ces yog los caum raws qhov kev taw qhia ntawm tus Vajntsujplig Dawb Huv uas nyob hauv lawv. Thaum nkag siab txog ob lub hauv paus ntsiab lus no lawm, ces lawv thiaj li yuav tsis ua yuam kev lawm. Nej txoj kev paub txog qhov ua pawg ntseeg tes hauj lwm mas tseem tsawg heev, thiab thaum nej ua hauj lwm, nej tus kheej tej tswv yim ua rau tes dej num ntawd tsis dawb huv lawm. Qee zaum, nej yuav tsis to taub kev qhuab qhia los sis kev taw qhia uas nyob hauv nej uas yog los ntawm tus Vajntsujplig Dawb Huv los; qee lub sij hawm, zoo li nej kuj to taub nws thiab, tiam sis nej pheej tsis quav ntsej nws tas li. Koj ib txwm xav los sis txiav txim raws li tib neeg tus xeeb ceem, ua zoo li koj xav tias tsim nyog xwb, tsis muaj kev xav txog rau tus Vajntsujplig Dawb Huv cov kev xav kiag li. Koj uas koj tes dej num raws nraim li koj tus kheej tej tswv yim, muab kev qhuab qhia uas los ntawm tus Vajntsujplig los tso cia rau ib sab. Cov xwm txheej zoo li no mas tshwm sim tuaj tas li. Kev taw qhia sab hauv siab uas los ntawm tus Vajntsujplig Dawb Huv los mas yeej tsis tshaj li ntuj tsim kiag li; qhov tseeb, nws tsuas yog yam dog dig xwb. Ntawd yog, qhov tob tob hauv koj lub siab, koj paub tias qhov no yog ib txoj hau kev tsim nyog rau kev ua, thiab tias nws yog txoj hau kev zoo tshaj plaws. Qhov kev xav no yeej pom meej tseeb heev lawm; nws tsis los ntawm txoj kev ua tib zoo xav los, thiab qee zaum koj tsis to taub tseeb tias vim li cas koj tsim nyog ua li no. Qhov no feem ntau yog kev qhuab qhia ntawm tus Vajntsujplig Dawb Huv xwb. Qhov no pheej tshwm sim tas li rau cov tib neeg uas muaj kev paub. Vajntsujplig Dawb Huv coj koj ua yam uas tsim nyog tshaj plaws. Nws tsis yog qee yam uas koj xav txog, tiam sis nws yog ib txoj kev xav hauv koj lub siab uas ua rau koj ras dheev hais tias qhov no yog txoj kev ua uas zoo tshaj plaws, thiab koj nyiam ua li ntawd yam tsis paub tias xyov yog vim li cas li. Tej zaum qhov no los ntawm Vajntsujplig Dawb Huv los. Ib tug tus kheej cov tswv yim feem ntau tawm los ntawm kev xav thiab ua tib zoo xav, thiab puav leej tsis dawb huv los ntawm tus kheej tej kev xav; lawv tsuas xav txog yam uas muaj txiaj ntsim thiab muaj nuj nqis rau lawv xwb; txhua txoj dej num uas tib neeg txiav txim siab ua ntawd puav leej muaj tej no nyob rau hauv. Txawm li cas los xij, kev taw qhia uas los ntawm tus Vajntsujplig Dawb Huv los yeej tsis muaj tej kev tsis dawb huv li ntawd li. Nws yog yam tseem ceeb uas yuav tsum mob siab rau txoj kev taw qhia los sis kev qhuab qhia uas los ntawm tus Vajtsujplig Dawb Huv los; tshwj xeeb tshaj yog nyob rau hauv cov ntsiab uas tseem ceeb, koj yuav tsum tau ceev faj zoo kom thiaj li to taub nws. Cov tib neeg uas nyiam siv lawv cov hlwb, thiab cov uas nyiam ua raws li lawv tus kheej cov tswv yim, feem ntau yog cov muaj cib fim yuav plam qhov kev taw qhia los sis kev qhuab qhia ntawd. Cov thawj coj thiab cov neeg ua hauj lwm zoo mas yog cov tib neeg uas muaj tus Vajntsujpli Dawb Huv tes hauj lwm, cov uas mob siab ua tus Vajntsujplig Dawb Huv tes hauj lwm rau txhua lub sij hawm, cov uas mloog tus Vajntsujplig Dawb Huv lus, ntshai Vajtswv, mob siab rau Vajtswv lub siab nyiam, thiab caum raws qhov tseeb yam tsis nkees kiag li. Yuav kom ua rau Vajtswv txaus siab thiab ua tim khawv rau Nws kom zoo, mas koj yuav tsum tig xav txog tej uas txhawb koj siab thiab tej kev tsis dawb huv nyob rau hauv txoj kev ua koj tes dej num, ces tom qab ntawd sim saib seb tes dej num raug txhawb siab los ntawm tib neeg tej tswv yim ntau npaum li cas, muaj kev qhuab qhia los ntawm tus Vajntsujplig Dawb Huv ntau npaum li cas, thiab mus raws li Vajtswv cov lus ntau npaum li cas. Koj yuav tsum, thiab hauv txhua qhov xwm txheej, tig xav seb koj cov lus thiab cov kev ua ntawd puas mus raws li qhov tseeb tas li. Qhov xyaum ua raws nyob hauv tus cwj pwm no tas li thiaj li yuav muab tau koj tso rau hauv txoj kev yog ntawm kev ua dej num rau Vajtswv. Qhov ntawd mas cheem tsum kom muaj qhov muaj tiag ntawm qhov tseeb kom ua tau dej num rau Vajtswv kom mus raws li Nws tej kev npaj siab. Tsuas yog tom qab lawv to taub qhov tseeb lawm xwb mas tib neeg thiaj li yuav muaj lub peev xwm thoob tsib to nrog thiab paub yam uas tawm los ntawm lawv tus kheej cov tswv yim los thiab yam uas tawm los ntawm tej kev txhawb tib neeg lub siab los. Lawv muaj cuab kav paub tau tib neeg qhov tsis dawb huv, nrog rau qhov seb kev ua raws nraim qhov tseeb yog dab tsi tiag. Tsuas yog tom qab lawv thoob tsib to nrog lawm xwb mas lawv thiaj li paub tseeb tias lawv tuaj yeem muab tau qhov tseeb coj los xyaum ua raws thiab ua raws li Vajtswv lub siab nyiam tag nrho. Yog tsis to taub qhov tseeb, nws tsis yooj yim rau tib neeg xyaum ua raws kom nkag siab. Ib tug neeg ruam tej zaum ntseeg Vajtswv tag nrho nws lub neej yam tsis paub tias kev muab nws tus kheej qhov qias vuab tsuab nthuav tawm txhais tau li cas los sis kev tawm tsam Vajtswv txhais tau li cas, vim nws tsis to taub qhov tseeb; qhov kev xav ntawd yeej tsis muaj nyob hauv nws lub siab kiag li. Qhov tseeb no nyob dhau ntawm qhov cov tib neeg muaj peev xwm qis no yuav ncav cuag lawm; txawm koj yuav muab nws los sib qhia nrog rau lawv npaum li cas los, lawv kuj tseem tsis to taub li thiab. Cov tib neeg zoo li no mas ruam. Hauv lawv txoj kev ntseeg, cov tib neeg ruam tsis tuaj yeem hais lus tim khawv rau Vajtswv tau; lawv tsuas tuaj yeem ua dej num tau me ntsis xwb. Yog cov thawj coj thiab cov neeg ua hauj lwm ua lawv tej dej num zoo, ces lawv lub peev xwm thiaj li yuav tsis phem heev. Yam tsawg kawg mas, lawv yuav tsum to taub tej yam ntawm sab ntsujplig thiab txais tej yam uas dawb huv, kom lawv thiaj li to taub qhov tseeb thiab xyaum ua raws li qhov tseeb tau yooj yim. Ib txhia tib neeg txoj kev paub mas ntiav heev, yog li ntawd muaj qee zaus lawv thiaj li muaj tej kev to taub yuam kev txog qhov tseeb, ces tom qab ntawd lawv thiaj li pheej ua yuam kev tas li. Thaum lawv muaj tej kev to taub yuam kev lawm, ces lawv tsis tsim nyog xyaum ua raws li qhov tseeb lawm. Thaum lawv muaj tej kev to taub yuam kev txog qhov tseeb lawm, ces lawv yeej yuav ua raws li tej kev cai xwb, thiab thaum lawv ua raws li tej kev cai lawm, ces nws yuav ua yuam kev tau yooj yim heev, thiab lawv tsis tsim nyog xyaum ua raws li qhov tseeb lawm. Thaum muaj tej kev to taub yuam kev lawm, ces kuj raug cov tawm tsam Khetos dag thiab siv tau yooj yim heev thiab. Yog li ntawd, tej kev to taub yuam kev ntawd thiaj li ua tau ntau yam yuam kev. Vim yog li ntawd, tsis yog lawv tsuas ua tsis tau lawv tej dej num kom zoo xwb, lawv kuj yuav ua yuam kev tau yooj yim heev thiab, uas ua rau cov neeg Vajtswv xaiv txoj kev to taub lub neej txoj sia puas tsuaj. Tus neeg uas ua lawv tes dej num zoo li no muaj nuj nqis dab tsi? Lawv cia li dhau los ua ib tug neeg uas tab kaum thiab cuam tshuam pawg ntseeg tes hauj lwm li lawm. Yog li ntawd yuav tsum tau kawm los ntawm tej uas ua tsis tau no. Yuav kom ua tiav tes hauj lwm uas Vajtswv muab los mas, cov thawj coj thiab cov neeg ua hauj lwm yuav tsum to taub ob lub hauv paus ntsiab lus no: Yus yuav tsum ua tes hauj lwm uas tus Nyob Saud npaj los kom nruj heev, thiab yuav tsum mob siab thiab ua raws li Vajntsujplig Dawb Huv tej kev coj kev kom mus raws li Vajtswv txoj lus. Tsuas yog thaum tau nkag siab ob lub hauv paus ntsiab lus no lawm xwb mas yus tes dej num thiaj li tuaj yeem ua tau zoo thiab Vajtswv thiaj li yuav txaus siab.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb

Vajtswv Tej Lus Txhua Hnub  Nqe Lus Uas Xaiv Tawm Los 388

Petus nrhiav kom paub nws tus kheej thiab pom yam uas tau nthuav tawm rau hauv nws los ntawm txoj kev tsim kho kom zoo ntawm Vajtswv cov lus thiab nyob rau hauv ntau yam kev sim siab uas Vajtswv tau muab rau nws lawm. Thaum nws tau los to taub nws tus kheej tiag tiag lawm, Petus thiaj li mam paub tseeb tias tib neeg lwj liam tob npaum li cas, lawv tsis muaj nuj nqis npaum li cas thiab tsis tsim nyog yuav los ua Vajtswv tes dej num lawm, thiab tias lawv tsis tsim nyog ua lub neej nyob rau ntawm Vajtswv xub ntiag li lawm. Dhau ntawd Petus thiaj li los txhos caug rau ntawm Vajtswv xub ntiag. Thaum tau ntsib tau pom ntau heev lawm, thaum kawg Petus thiaj li xav hais tias, “Qhov paub Vajtswv yog yam muaj nqis tshaj plaws! Yog kuv tag sim neej ua ntej paub Nws lawm, ntshe nws yuav yog ib qho khuv xim heev. Qhov paub Vajtswv yog yam tseem ceeb tshaj plaws, yog yam muaj txiaj ntsim tshaj plaws. Yog tib neeg tsis paub Vajtswv, ces lawv tsis tsim nyog ua neej, yeej zoo ib yam nkaus li tej tsiaj xwb, thiab tsis muaj lub neej txoj sia li.” Thaum Petus txoj kev ntsib kev pom los txog rau theem no lawm, nws tau los paub rau nws tus kheej tus yeeb yam thiab nws twb muaj kev to taub zoo txog tus yeeb yam ntawd lawm. Txawm tias tej zaum nws yuav tsis tuaj yeem piav qhia nws tau meej meej ib yam li cov tib neeg niaj hnub tam sim no, Petus twb los txog tus yam ntxwv no tiag tiag lawm. Yog li ntawd, qhov taug txoj kev uas caum qhov tseeb thiab tau txais kev zoo tiav log los ntawm Vajtswv tej kev cheem tsum paub yus tus kheej tus yeeb yam los hauv Vajtswv cov lus hais los, thiab nkag siab ntau kis ntawm yus tus yeeb yam thiab muab piav qhia ua cov lus tau raug zoo, kev hais meej meej thiab hais yooj yim. Tsuas yog qhov no nkaus xwb thiaj li yuav paub koj tus kheej tseeb, thiab tsuas yog ua li no xwb mas koj thiaj li yuav ua tau qhov tau los ntawm Vajtswv tej kev cheem tsum. Yog koj txoj kev paub tseem tsis tau mus txog theem no, tab sis koj tshaj tawm tias yeej paub koj tus kheej thiab hais tias twb muab tau lub neej txoj sia lawm, ces tseem tsis yog koj hais lus khav theeb los? Koj tsis paub koj tus kheej, los sis koj tsis paub qhov uas koj los nyob rau ntawm Vajtswv xub ntiag yog dab tsi, txawm tias koj yeej ua tau zoo raws li cov qauv ntawm kev ua tib neeg lawm los xij, los sis tseem muaj tej yam phem nyob rau hauv koj ntau npaum li cas. Koj tseem tsis paub meej tias koj yog leej twg tug, thiab koj tseem tsis paub yus tus kheej ib qho li—yog li koj tuaj yeem muaj kev muaj qab hau los rau ntawm Vajtswv xub ntiag tau li cas? Thaum Petus tab tom caum raws lub neej txoj sia, nws tau tsom ntsoov rau kev to taub nws tus kheej thiab hloov nws tus moj yam los ntawm nws tej kev sim siab, thiab nws tau mob siab ntso ua kom paub Vajtswv. Nyob rau thaum kawg, nws xav tias “Tib neeg yuav tsum nrhiav ib qho kev to taub ntawm Vajtswv rau hauv lub neej txoj sia; kev paub Nws yog ib yam tseem ceeb tshaj plaws. Yog kuv tsis paub Vajtswv, ces kuv tsis tuaj yeem so tau kaj siab lug thaum kuv tuag. Thaum kuv paub Nws lawm, yog Vajtswv kom kuv tuag, ces kuv yeej yuav txaus siab hlo. Kuv yuav tsis yws ib qho me me kiag li, thiab tag nrho kuv lub neej txoj sia yuav ua tau puv npo lawm.” Petus tsis tuaj yeem muab tau kev to taub ntawm theem no los sis tsis tuaj yeem mus txog theem no kiag tom qab nws tau pib ntseeg Vajtswv; tiam sis nws raug ntau yam kev sim siab uas loj kawg. Nws txoj kev ntsib kev pom tau mus txog rau ib theem, thiab nws to taub nws tus kheej tiav hlo lawm, ua ntej nws yuav xav tau qhov muaj nqis ntawm kev paub Vajtswv. Yog li ntawd, txoj kev uas Petus taug ntawd yog txoj kev uas caum qhov tseeb, thiab yog ib txoj uas tau txais txoj sia thiab ntawm qhov raug ua kom tau zoo tiav log. Qhov no yog tus xeeb ceem ntawm nws qhov kev xyaum ua raws tshwj xeeb uas tau xub tsom ntsoov rau.

Nyob rau hauv nej txoj kev ntseeg Vajtswv, tam sim no nej taug txoj kev twg? Yog nej tsis nrhiav txoj sia, kev to taub txog koj tus kheej, thiab kev paub txog Vajtswv zoo ib yam li Petus, ces koj yeej tsis yog tab tom taug Petus txoj kev li. Niaj hnub no, cov neeg feem coob nyob rau hauv hom yam ntxwv no: Kom tau txais cov koob hmoov, kuv yuav tsum muab kuv tus kheej fij rau Vajtswv thiab them ib tug nqi rau Nws. Kom tau txais cov koob hmoov, kuv yuav tsum tso txhua yam tseg txhawm rau Vajtswv; kuv yuav tsum ua kom tiav yam uas Nws tau muab tso rau kuv lawm, thiab kuv yuav tsum ua kuv tes dej num kom tau zoo. Tus yam ntxwv no yog raug tswj los ntawm kev npaj kom tau txais cov koob hmoov, uas yog ib qho piv txwv ntawm kev muab yus tus kheej fij rau Vajtswv tag nrho rau lub hom phiaj ntawm kev tau txais cov phaj tshab los ntawm Nws thiab tau txais ib lub kaus mom vaj ntxwv. Cov tib neeg zoo li no tsis muaj qhov tseeb nyob rau hauv lawv lub siab, thiab yeej paub tseeb tias lawv txoj kev to taub tsuas muaj ob peb lo lus ntawm txoj kev qhuab qhia uas lawv khav rau txhua qhov txhia chaw uas lawv mus xwb. Lawv txoj yog txoj kev ntawm Povlauj. Txoj kev ntseeg ntawm cov neeg zoo li no yog ib qho kev sib zog ntso ua xwm yeem, thiab hauv qhov tob lawv xav tias lawv yim ua ntau npaum li cas, nws yim ua pov thawj qhia tias lawv coj ncaj ncees rau Vajtswv ntau npaum li ntawd; tias lawv yim ua ntau npaum li cas, Nws yim txaus siab tau ntau npaum li ntawd; thiab tias lawv yim ua ntau npaum li cas, lawv yim tsim nyog tau txais lub kaus mom vaj ntxwv rau ntawm Vajtswv xub ntiag ntau npaum li ntawd, thiab tej koob hmoov uas lawv yuav tau txais ntawd yim loj npaum li ntawd. Lawv xav tias yog lawv tuaj yeem nyiaj taus kev txom nyem, tshaj qhia, thiab tuag rau Khetos, yog lawv tuaj yeem muab lawv tus kheej txoj sia txhiv, thiab yog lawv tuaj yeem ua tiav hlo tag nrho tej dej num uas Vajtswv tau muab tso rau lawv lawm, ces lawv yuav yog cov uas tau txais koob hmoov ntau tshaj plaws, thiab lawv yuav tau txais cov kaus mom vaj ntxwv xwb xwb li. Qhov no yog kiag li yam uas Povlauj tau xav rau hauv nruab siab lawm thiab yam uas nws tau nrhiav ntag. Qhov no yog kiag txoj kev uas nws tau taug lawm, thiab nws nyob rau hauv txoj kev coj qhia ntawm tej kev xav zoo li no uas nws tau ua dej num los tiam Vajtswv. Tej kev xav thiab tej kev npaj siab no tsis yog los ntawm ib tug yeeb yam phem los lov? Nws zoo ib yam li cov tib neeg ntiaj teb, cov uas ntseeg tias thaum nyob rau hauv lub ntiaj teb lawv yuav tsum caum raws txoj kev ntse, thiab tias tom qab tau txais txoj kev ntse ntawd lawm lawv thiaj li tuaj yeem sawv siab tshaj rau ntawm cov tib neeg coob coob, dhau los ua tej nom tswv, thiab muaj meej mom. Lawv xav tias thaum lawv muaj meej mom lawm, lawv tuaj yeem paub lawv tej kev ntshaw thiab coj lawv tej lag luam thiab tsev neeg xyaum ua kom mus rau ib qib kev vam meej uas zoo. Tsis yog tag nrho cov tsis ntseeg taug txoj kev no lov? Cov uas raug tswj los ntawm tus yeeb yam phem no tsuas tuaj yeem ua tau zoo ib yam li Povlauj rau hauv lawv txoj kev ntseeg xwb. Lawv xav hais tias: “Kuv yuav tsum muab txhua yam tshem tawm txhawm rau qhov muab kuv tus kheej fij rau Vajtswv. Kuv yuav tsum coj ncaj ncees rau ntawm Vajtswv xub ntiag, kom thaum kawg, kuv thiaj li yuav tau txais nqi zog zoo thiab cov kaus mom vaj ntxwv uas zoo.” Qhov no yog tib hom cwj pwm uas cov tib neeg ntiaj teb caum raws tej khoom ntiaj teb. Lawv yeej tsis sib txawv kiag li, thiab lawv zwm rau tib tug yeeb yam xwb. Thaum tib neeg muaj hom yeeb yam phem no lawm, tawm mus sab nraum lub ntiaj teb, lawv yuav nrhiav kom tau txais txoj kev paub, kev kawm, lub meej mom, thiab kom sawv siab tshaj rau ntawm cov neeg coob coob. Yog lawv ntseeg Vajtswv, ces lawv yeej yuav nrhiav kom tau txais lub kaus mom vaj ntxwv thiab tej koob hmoov uas zoo. Yog tib neeg tsis caum qhov tseeb thaum lawv ntseeg Vajtswv, ces lawv yeej yuav taug txoj kev no xwb xwb li. Qhov no yog ib qho muaj tseeb uas hloov tsis tau, nws yog ib txoj kev cai uas ntuj tsim los yeej muaj lawm. Txoj kev uas cov tib neeg uas tsis caum qhov tseeb ntawd taug mas tsis zoo ib yam li Petus txoj kiag li. Txoj kev twg uas tam sim no nej txhua tus taug mus? Txawm tias koj tsis npaj taug Povlauj txoj kev los xij, koj tus yeeb yam yeej raug tswj kom koj taug txoj kev no lawm, thiab koj tab tom mus raws txoj kev ntawd txawm tias koj tus kheej tsis yeem los xij. Txawm tias koj xav cev taw rau Petus txoj kev los xij, yog koj tsis paub meej tias yuav ua li ntawd li cas, ces koj yuav taug tau Povlauj txoj kev yam xav tsis txog: Qhov no yog qhov muaj tseeb ntawm qhov xwm txheej no. Niaj hnub no yus yuav tsum taug kom tau raws nraim Petus txoj kev li cas? Yog koj tsis muaj peev xwm qhia tau qhov txawv ntawm Petus thiab Povlauj, los sis yog koj tsis swm tej ntawd ib qho li, ces txawm koj tshaj tawm tias koj twb taug Petus txoj kev ntau heev lawm los xij, koj tej lus no tsuas yog qhuav qhawv xwb. Ua ntej tshaj plaws, koj yuav tsum tau paub lub tswv yim ntawm Petus txoj kev kom meej tias yog dab tsi thiab Povlauj txoj kev yog dab tsi tso. Tsuas yog thaum koj to taub tseeb tiag tiag tias Petus txoj kev yog txoj kev uas caum lub neej txoj sia, thiab tsuas yog ib txoj kev mus rau kev zoo tiav log nkaus xwb, mas koj thiaj li yuav muaj peev xwm taug tau Petus txoj kev, caum li nws caum, thiab xyaum ua raws li tej hauv paus ntsiab lus uas nws xyaum ua raws lawm. Yog koj tsis to taub Petus txoj kev, ces txoj kev uas koj taug yog kiag li Povlauj txoj kev ntag, vim nws tsis muaj lwm txoj kev rau koj lawm; koj yuav tsis muaj kev xaiv nyob rau qhov no li. Cov tib neeg uas tsis to taub qhov tseeb thiab cov uas tsis muaj peev xwm caum qhov tseeb ntawd mas yuav taug Petus txoj kev nyuaj heev, tab txawm yog lawv twb muaj kev txiav txim siab lawm los xij. Nws tuaj yeem hais tau tias yog Vajtswv txoj hmoov hlub thiab txoj kev txhawb uas tam sim no Nws tau nthuav tawm txoj kev cawm dim thiab kev zoo tiav log rau nej lawm. Nws yog tus uas coj nej kev mus rau ntawm Petus txoj kev. Yog tsis muaj Vajtswv txoj kev coj qhia thiab kev qhuab qhia, yuav tsis muaj leej twg tuaj yeem taug Petus txoj kev tau, thiab tsuas muaj Povlauj tib txoj kev rau taug lawm xwb, kev caum raws Povlauj tej hneev taw mus rau txoj kev puas ntsoog. Thaum ntawd, Povlauj yeej tsis hnov tias nws yog yam tsis raug uas taug mus rau txoj kev ntawd; nws tau ntseeg puv npo tias yeej yog txoj kev raug lawm. Nws tsis tau txais qhov tseeb, thiab tshwj xeeb ces nws tsis muaj ib qho hloov pauv rau hauv tus moj yam li. Nws tau ntseeg nws tus kheej ntau dhau heev lawm, thiab hnov tias yeej tsis muaj ib qho teeb meem me me nyob rau hauv txoj kev ntseeg li ntawd. Nws mus txuas ntxiv tom ntej, yam ruaj siab hlo thiab muaj kev ntseeg yus tus kheej tshaj plaws. Thaum kawg, nws yeej tsis paub nws tej kev xav li lawm. Nws tseem xav li ntawd rau nws tias qhov ua lub neej nyob ntawd yog ua rau Khetos. Raws li qhov ntawd, Povlauj thiaj tau taug txoj kev ntawd mus txog thaum kawg kiag, thiab thaum txog lub sij hawm lawm nws thiaj li raug rau txim thaum kawg, thiaj li tag nws txoj sia lawm. Povlauj txoj kev tsis muaj feem los paub nws tus kheej, tsis muaj ib qho kev nrhiav los hloov pauv rau hauv tus moj yam me me hlo li. Nws yeej tsis tshuaj xyuas nws tus kheej tus yeeb yam, los sis nws muab tsis tau ib qho kev paub tias yam uas yog nws yog dab tsi. Nws tsuas paub tias nws yog tus thawj ua txhaum rau Yexus. Tab sis nws yeej tsis muaj ib qho kev to taub me me txog nws tus kheej tus yeeb yam li, thiab tom qab ua tiav nws txoj dej num lawm, Povlauj xav tias nws ua neej nyob li Khetos thiab yuav tau phaj tshab. Txoj dej num uas Povlauj ua tsuas yog tiam rau Vajtswv nkaus xwb. Vim Povlauj tus kheej, txawm nws tau txais qee yam kev nthuav tawm los ntawm tus Vajntsujplig los xij, nws yeej tsis tau txais qhov tseeb los sis txoj sia kiag li. Yog li ntawd nws thiaj li tsis raug Vajtswv cawm. Tab sis nws raug Vajtswv rau txim. Vim li cas thiaj hais tau tias Petus txoj kev yog txoj kev mus rau qhov zoo tiav log? Nws vim hais tias, hauv Petus qhov kev xyaum ua raws, nws tau npaj tshwj xeeb rau lub neej txoj sia, nrhiav kom paub Vajtswv, thiab paub nws tus kheej. Los ntawm nws txoj kev ntsib kev pom ntawm Vajtswv txoj dej num, nws tau los paub nws tus kheej lawm, muab tau ib qho kev to taub ntawm tib neeg tej yam ntxwv lwj liam, tau kawm txog nws tus kheej tej kev tsis muaj txaus, thiab tau nrhiav pom yam muaj nqis tshaj plaws uas tib neeg yuav tsum caum raws. Nws muaj peev xwm hlub Vajtswv tiag tiag, nws tau kawm paub tias yuav pauj Vajtswv rov qab li cas, nws muab tau qee yam tseeb, thiab nws muaj qhov muaj tseeb uas Vajtswv cheem tsum. Los ntawm tag nrho txhua yam uas Petus tau hais rau thaum nws tej kev sim siab, tuaj yeem pom tau tias nws yog ib tug uas to taub Vajtswv tshaj plaws. Vim hais tias nws tau los to taub qhov tseeb ntau heev los ntawm Vajtswv cov lus los, nws txoj kev thiaj li kaj zuj zus tuaj ntxiv lawm, thiab ua tau raws nraim li Vajtswv txoj kev xav ntau zuj zus. Yog Petus tsis muaj qhov tseeb no, ces txoj kev uas nws taug ntawd yeej tsis yog kiag li lawm.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Yuav Taug Petus Txoj Kev Li Cas

Vajtswv Tej Lus Txhua Hnub  Nqe Lus Uas Xaiv Tawm Los 389

Petus muaj lub siab ncaj rau Kuv tau ntau lub xyoo, tab sis nws yeej tsis yws los sis tsis cem dab tsi li; txawm yog Yauj kiag los yeej tsis nrog nws sib txig sib luag li, thiab, thoob plaws txhua tiam, cov neeg dawb huv tag nrho yeej caum tsis cuag Petus li. Nws tsis yog nrhiav kev paub Kuv xwb, tab sis kuj tseem los paub Kuv rau lub sij hawm thaum Ntxwgnyoog tab tom siv nws tej tswv yim ntxias dag. Qhov no coj Petus los ua dej num rau Kuv tau ntau lub xyoo, yeej ib txwm ua raws nraim li Kuv txoj kev xav, thiab yog vim li no, nws thiaj li tsis raug Ntxwgnyoog ntxias siv tau li. Petus rub tej kev kawm tawm los ntawm Yauj txoj kev ntseeg, tab sis kuj pom meej meej txog tej yam uas Yauj ua tsis tau thiab. Txawm hais tias Yauj yeej muaj txoj kev ntseeg loj, los nws tsis muaj txoj kev paub txog tej xwm txheej nyob rau sab yeeb ceeb, yog li ntawd nws tau hais ntau lo lus uas tsis yog raws li qhov uas muaj tiag; qhov no qhia tau hais tias Yauj qhov kev paub mas ntiav ntiav xwb thiab tsis muaj cuab kav yuav raug tsim kho kom zoo tiav log. Yog li ntawd, Petus thiaj ib txwm tsi ntsees rau kev nrhiav kom tau ib qho kev to taub txog tus ntsujplig, thiab ib txwm ua twb zoo saib tej kev sib hloov mus los nyob rau sab yeeb ceeb. Qhov tau los ntawd, ces yog qhov uas nws tsis yog muaj cuab kav paub tseeb txog tej yam ntawm Kuv txoj kev ntshaw nkaus xwb, tab sis kuj muaj kev paub me me txog Ntxwgnyoog tej tswv yim ntxias dag thiab. Yog vim ntawm qhov no, nws qhov kev paub txog Kuv thiaj li loj hlob tuaj mus ntau tshaj txhua tus neeg li thoob plawg txhua tiam.

Los ntawm Petus qhov kev ntsib kev pom, nws yeej tsis yog ib qho nyuab kom pom hais tias yog tib neeg xav paub Kuv, lawv yuav tsum tsi ntsees rau kev ua twb zoo xav nyob rau hauv lawv tej ntsujplig. Kuv tsis hais kom koj “tseg” ib qho npaum li cas rau Kuv nyob rau sab nraud; qhov no yog qhov kev txhawj txog thib ob lawm. Yog koj tsis paub Kuv, ces tag nrho txoj kev ntseeg, kev hlub, thiab kev ua siab ncaj uas koj hais txog ces tsuas yog tej nyuag duab cuav ntis qhov muag xwb; lawv tsuas yog tej nyuag lus piav pem me me uas tsis tseem ceeb xwb, thiab koj ces yeej yuav rais mus ua ib tug uas tsuas lam khav txiv ntawm Kuv xub ntiag xwb tab sis twb tsis paub nws tus kheej li. Zoo li ntawd, koj yuav rov qab mag Ntxwgnyoog rooj ntxiab dua thiab tsis muaj peev xwm yuav nti dim koj tus kheej li; koj yuav rais mus ua ib tug tub ntawm txoj kev raug txim thiab ib daim phiaj rau kev rhuav pov tseg. Txawm li cas los xij, yog koj yog ib tug neeg uas nyob txias to thiab tsis quav ntsej txog Kuv tej lus, ces koj yeej tawm tsam Kuv tiag tiag li. Qhov no muaj tseeb laiv, thiab koj yuav ua tau zoo yog los saib ntawm lub rooj vag mus rau hauv sab yeeb ceeb los saib cov ntsujplig coob coob thiab sib txawv uas raug Kuv qhuab ntuas. Lawv tus twg, thaum ntsib Kuv tej lus, es tsis nyob twj ywm, tsis quav ntsej txog dab tsi li, thiab tsis kam txais yuav li? Lawv tus twg uas tsis sim nrhiav kev txhaum rau Kuv tej lus li? Lawv tus twg uas yuav tsis npaj nrhiav kom pom tej yam tsis zoo nyob rau hauv Kuv tej lus li? Lawv tus twg uas tsis siv Kuv cov lus ua “riam phom tiv thaiv” coj los mus “tiv thaiv” lawv tus kheej li? Lawv tsis siv tej ntsiab lus ntawm Kuv cov lus coj los ua ib txoj kev los paub Kuv, tab sis tsuas lam siv ua khoom ua si coj los ua si xwb. Nyob rau qhov no, ua tseem tsis yog lawv tawm tsam Kuv ncaj qha thiab lod? Leej twg yog Kuv tej lus? Leej twg yog Kuv tus Ntsujplig? Kuv tau nug nej tej lus nug no ntau zaus heev lawm, tab sis nej puas tau teb tau kom siab zog thiab to taub kom meej txog tej ntawd li mas? Nej puas tau paub txog tej ntawd tiag tiag mas? Kuv rov ceeb toom rau nej ib zaug ntxiv tias: Yog nej tsis paub Kuv cov lus, los sis tsis lees txais lawv, los sis tsis muab lawv coj los xyaum ua raws, ces nej yuav rais mus ua tej daim phiaj rau Kuv txoj kev qhuab ntuas yam zam tsis dhau hlo li! Nej yuav rais mus ua ib tug neeg raug Ntxwgnyoog tsim txom xwb xwb li!

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 8

Vajtswv Tej Lus Txhua Hnub  Nqe Lus Uas Xaiv Tawm Los 390

Txawm hais tias muaj neeg coob tus ntseeg Vajtswv, los tsawg tus xwb thiaj li to taub hais tias txoj kev ntseeg Vajtswv yog txhais li cas, thiab lawv yuav tsum tau coj li cas kiag es thiaj li haum raws li Vajtswv tej kev npaj siab. Qhov no yog vim tias, txawm hais tias neeg yeej paub txog lo lus “Vajtswv” thiab kab lus xws li “tes hauj lwm ntawm Vajtswv,” los lawv tsis paub Vajtswv, thiab lawv haj yam tsis paub Nws tes hauj lwm. Tsis tas xav li, tom qab ntawd, tag nrho cov uas tsis paub Vajtswv ntawd ces thiaj li feeb tsis meej rau lawv qhov kev ntseeg Nws. Neeg tsis saib qhov kev ntseeg Vajtswv tseem ceeb, thiab tag nrho qhov no mas yog vim ntseeg Vajtswv mas yog ib qho lawv tsis swm li, txawv tshaj plaws rau lawv li. Nyob rau qhov no, lawv thiaj ua tsis tau li qhov Vajtswv txib. Muab ua lwm yam lus hais, yog neeg tsis paub Vajtswv, thiab tsis paub Nws tes hauj lwm, ces lawv yeej tsis zoo rau Vajtswv siv li, thiab lawv haj yam yuav ua tsis tau kom haum raws li Vajtswv txoj kev xav li. “Kev ntseeg Vajtswv” txhais tau hais tias ntseeg hais tias muaj ib tug Vajtswv; qhov no yog qhov ntsiab lus uas yooj yim tshaj plaws txog kev ntseeg Vajtswv. Qhov tshaj ntawd, qhov kev ntseeg hais tias muaj ib tug Vajtswv tsis yog ib yam nkaus li qhov kev ntseeg Vajtswv tiag tiag; tab sis, nws yog ib yam kev ntseeg yooj yooj yim uas muaj lub tseem ntsiab zais tob rau sab kev ntseeg. Kev ntseeg Vajtswv tiag tiag mas txhais tau li nram no: Nyob rau qhov hauv paus keeb cag ntawm qhov kev ntseeg hais tias Vajtswv muaj hwj chim kav tag nrho txhua yam, yus tau ntsib tau pom Nws tej lus thiab tes hauj lwm, ntxuav yus tej moj yam uas qias vuab tsuab kom dawb huv, ua kom haum li Vajtswv txoj kev xav, thiab los paub Vajtswv. Tsuas yog tib txog kev taug ntawm hom zoo li no xwb mas thiaj li hu tau hais tias “kev ntseeg Vajtswv.” Tab sis neeg mas ho pom hais tias kev ntseeg Vajtswv yog ib qho yooj yim thiab tej yam ua si xwb. Cov neeg uas ntseeg Vajtswv li no ces tau plam qhov uas ntseeg Vajtswv txhais tau li cas tiag ntawd lawm, thiab txawm hais tias lawv ntseeg mus ntxiv kom txog qhov kawg kiag, los lawv yeej yuav tsis muaj hnub tau txais Vajtswv qhov kev pom zoo li, vim lawv taug txoj kev tsis yog lawm. Niaj hnub no los yeej tseem muaj cov uas ntseeg Vajtswv raws li hauv tej ntaub ntawv thiab hauv tej kev qhuab qhia uas tsis muaj dab tsi li. Lawv tsis paub hais tias lawv twb tsis muaj lub ntsiab tseem ceeb ntawm txoj kev ntseeg Vajtswv li, thiab lawv tsis muaj cuab kav yuav tau txais Vajtswv qhov kev pom zoo li. Tab sis lawv tseem thov Vajtswv kom tau koob hmoov rau kev ruaj ntseg thiab kom tau hmoov hlub txaus. Cia li tsum, ua lub siab nyob ntsiag to, thiab nug peb tus kheej: Ua qhov kev ntseeg Vajtswv puas yog qhov yooj yim tshaj plaws nyob hauv ntiaj teb? Puas yog qhov kev ntseeg Vajtswv ces tsis muaj nuj nqis dab tsi tshaj qhov uas tau txais hmoov hlub ntau los ntawm Vajtswv xwb? Cov neeg uas ntseeg Vajtswv yam tsis paub Nws li los sis cov uas ntseeg Vajtswv thiab tseem ho tawm tsam Nws thiab es puas yuav muaj cuab kav ua tau kom haum raws li Vajtswv txoj kev xav?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Zaj Lus Ua Ntej

Vajtswv Tej Lus Txhua Hnub  Nqe Lus Uas Xaiv Tawm Los 391

Nws yog yam dab tsi uas tib neeg tau txais txij thaum nws xub pib ntseeg Vajtswv los? Yam koj paub txog Vajtswv yog dab tsi? Koj tau hloov ntau npaum li cas vim yog ntawm koj txoj kev ntseeg Vajtswv? Niaj hnub no, nej txhua leej paub tias tib neeg txoj kev ntseeg Vajtswv tsis yog ib txoj kev cawm dim ntawm tus ntsuj thiab kev noj qab nyob zoo ntawm cev nqaij daim tawv, tsis yog yuav pab ua rau nws lub neej zoo ntxiv los ntawm kev hlub Vajtswv, thiab kev ntseeg li ntawd. Raws li nws yog tus sawv cev tam, yog koj hlub Vajtswv txhawm rau txoj kev noj qab nyob zoo ntawm cev nqaij daim tawv los sis ua rau muaj kev txaus siab ib pliag xwb, ces txawm tias, thaum kawg, koj txoj kev hlub Vajtswv los txog rau kis hlub kawg siab kawg ntsws thiab koj tsis thov dab tsi ntxiv li lawm, txoj kev hlub uas koj nrhiav no tseem yog ib txoj kev hlub cuav thiab tsis ua rau Vajtswv txaus siab. Cov uas siv kev hlub rau Vajtswv los txhawm rau txoj kev pab txhawb lawv lub neej uas tsis meej tseeb thiab pab ntxiv rau hauv lawv lub siab yog hom neeg uas xav kom lub neej muaj kev yooj yim, tsis yog cov uas nrhiav kev hlub Vajtswv tiag. Yam kev hlub zoo li no yog raug yuam, nws yog kev nrhiav kom txaus siab txaus ntsws xwb thiab Vajtswv tsis xav tau tej ntawd. Yog li ntawd, koj hom kev hlub yog dab tsi? Koj hlub Vajtswv ua dab tsi? Tam sim no muaj txoj tseem kev hlub rau Vajtswv ntau npaum li cas nyob hauv koj? Kev hlub ntawm feem coob ntawm nej cov ko yog zoo li hom uas tau hais dhau los ntawd. Hom kev hlub zoo li no tsuas ua raws li yam tshwm sim tam sim no xwb; nws tsis tuaj yeem hloov pauv tau, los sis nws tsis tuaj yeem nrhau taus cag rau hauv tib neeg. Hom kev hlub zoo li no tsuas zoo li ib lub paj uas tab tom tawg nthuav thiab cia li qhuav mus yam tsis txi txiv li. Muab hais ua lwm lo lus, tom qab koj tau hlub Vajtswv ib zaug raws li hais los no lawm, yog tsis muaj leej twg ntaus thawj coj kev rau koj mus rau yav tom ntej, ces koj yuav mus tsis tau. Yog koj tsuas hlub tau Vajtswv rau thaum lub sij hawm muaj kev hlub rau Vajtswv xwb tab sis tom qab ntawd tseem tsis tau hloov pauv tus moj yam hauv koj lub neej li, ces koj yeej tseem tsis muaj peev xwm khiav dim tawm ntawm txoj kev haub ntxias ntawm txoj kev tsaus ntuj, koj tseem yuav tsis muaj peev xwm phoom kom dim Ntxwgnyoog tej xov hlau khi thiab nws li kev dag ntxias. Yeej tsis muaj leej twg uas zoo li no yuav raug muab tau los ntawm Vajtswv; nyob rau thaum kawg, lawv tus ntsujplig, tus ntsuj, thiab lub cev ntaj ntsug yeej tseem yog Ntxwgnyoog li. Yeej tsis muaj kev poob siab dab tsi txog qhov no. Txhua tus neeg uas tsis muaj peev xwm muab tau los ntawm Vajtswv yuav rov qab mus rau lawv lub neej qub, ntawd yog, rov mus rau ntawm Ntxwgnyoog, thiab yuav nqis mus rau hauv lub pas hluav taws thiab leej faj los txais yuav kauj ruam tom ntej ntawm Vajtswv txoj kev rau txim. Cov uas raug Vajtswv muab tau yog cov uas ntxeev siab tawm tsam Ntxwgnyoog thiab khiav tawm ntawm nws lub hwj chim. Lawv yog cov neeg pej xeem raug raws cai ntawm lub teb chaws. Qhov no yog kev xeeb txawm cov neeg ntawm lub teb chaws. Koj puas txaus siab los ua hom tib neeg zoo li no? Koj puas txaus siab kom raug muab tau los ntawm Vajtswv? Koj puas txaus siab khiav tawm ntawm Ntxwgnyoog lub hwj chim thiab tig rov qab mus rau Vajtswv? Tam sim no koj puas yog Ntxwgnyoog li los sis koj puas yog cov neeg pej xeem raug raws cai ntawm lub teb chaws? Yeej pom muaj tseeb txog tej no lawm, thiab tsis tas yuav piav qhia ntxiv lawm.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Yam Kev Xam Pom Uas Cov Neeg Ntseeg Yuav Tau Tuav Tseg

Vajtswv Tej Lus Txhua Hnub  Nqe Lus Uas Xaiv Tawm Los 392

Yav thaum ub, coob leej ntau tus tau tshawb nrhiav txog yam lawv xav tau thiab txoj kev xav, lawv thiaj tshawb nrhiav kev cia siab los ntawm lawv tus kheej. Tam sim no cia peb muab cov teeb meem zoo li no tso rau ib sab; yam uas yog qhov tseem ceeb tam sim no yog los nrhiav ib txoj hau kev ntawm txoj kev xyaum uas yuav muaj peev xwm ua rau nej txhua tus tuav ib tug yam ntxwv zoo rau ntawm Vajtswv xub ntiag thiab phoom dim ntawm lub kauj xov hlau ntawm Ntxwgnyoog txoj kev haub ntxias, kom tej zaum Vajtswv thiaj li muab tau koj, thiab ua lub neej nyob rau hauv lub ntiaj teb raws li Vajtswv thov rau koj. Tsuas yog txoj hau kev no xwb mas koj thiaj li ua tau raws li Vajtswv tej kev npaj siab. Coob leej ntau tus ntseeg Vajtswv, tab sis yeej tsis paub tias Vajtswv xav tau dab tsi los sis tsis paub tias Ntxwgnyoog xav tau dab tsi. Lawv ntseeg rau yam tsis meej pem, tsuas ua mus raws li sawv daws siab xav xwb, thiab yeej tsis muaj ib lub neej tiag ntawm tus Ntseeg Vajtswv; ntxiv rau qhov no, lawv tus kheej yeej ib txwm tsis muaj kev sib raug zoo, haj yam muaj kev sib raug zoo tsawg nrog Vajtswv. Los ntawm qhov hais los no thiaj pom tau tias tej kev nyuaj thiab kev coj tsis zoo ntawm tib neeg, thiab lwm yam cuam tshuam rau Vajtswv lub siab nyiam mas muaj ntau. Qhov no yeej muaj pov thawj txaus tias tib neeg tseem tsis tau taug mus rau txoj kev yog ntawm txoj kev ntseeg Vajtswv, los sis tseem nkag tsis tau mus rau hauv lub neej tiag ntawm tus tib neeg. Yog li qhov uas taug mus rau txoj kev yog ntawm txoj kev ntseeg Vajtswv yog txhais li cas? Qhov taug mus rau txoj kev yog txhais tias koj ua lub siab nyob ntsiag to rau ntawm Vajtswv xub ntiag txhua lub sij hawm thiab zoo siab xyiv fab rau txoj kev koom nrog Vajtswv, maj mam kawm kom paub txog yam uas tib neeg tsis muaj thiab maj mam kawm kom tau kev paub Vajtswv tob dua qub. Los ntawm kev ua li no, koj tus ntsujplig yuav muaj kev nkag siab zoo tshiab thiab kev qhuab qhia tshiab txhua hnub; koj txoj kev ntshaw loj hlob, koj nrhiav mus rau qhov tseeb, thiab txhua hnub muaj ib txoj kev kaj tshiab thiab kev to taub tshiab. Kev ua raws li txoj kev no, koj yuav maj mam phoom dim ntawm Ntxwgnyoog txoj kev haub ntxias thiab loj hlob zuj zus rau hauv koj lub neej. Cov tib neeg zoo li no tau taug mus rau txoj kev yog lawm. Tshuaj ntsuam koj tus kheej tej kev paub thiab saib txoj kev uas koj tau caum koj txoj kev ntseeg ntawd kom meej: Thaum koj muab tej no piv rau yam uas tau hais los saum toj no lawm, koj puas pom tias koj nyob rau txoj kev yog mas? Yam dab tsi ua rau koj phoom dim los ntawm Ntxwgnyoog lub kauj hlau khi thiab los ntawm Ntxwgnyoog txoj kev haub ntxias? Yog tias koj tseem tsis tau mus taug rau txoj kev yog, ces koj txoj hlua khi nrog Ntxwgnyoog tseem tsis tau raug txiav. Kev ua li kis hais los no, koj txoj kev nrhiav los hlub Vajtswv puas coj koj mus cuag ib txoj kev hlub tiag, ua tau ib lub siab, thiab muaj kev dawb huv? Koj hais tias koj txoj kev hlub rau Vajtswv yeej tsis ua ywj fab ywj fwj thiab tuaj nruab siab, tab sis koj tseem tsis tau phoom dim ntawm Ntxwgnyoog lub kauj hlau khi. Koj puas tau sim ua ib yam phem ntawm Vajtswv? Yog koj xav ua kom tau tus yam ntxwv uas muaj kev hlub tiag rau Vajtswv, thiab koj xav kom raug muab tau los ntawm Vajtswv thiab raug muab suav rau hauv cov neeg pej xeem ntawm lub teb chaws, ces ua ntej tshaj plaws koj yuav tsum npaj koj tus kheej taug txoj kev yog ntawm txoj kev ntseeg Vajtswv.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Yam Kev Xam Pom Uas Cov Neeg Ntseeg Yuav Tau Tuav Tseg

Vajtswv Tej Lus Txhua Hnub  Nqe Lus Uas Xaiv Tawm Los 393

Qhov teeb meem uas nquag tshwm sim rau txhua tus neeg yog lawv to taub txog qhov tseeb tab sis tsis tuaj yeem coj mus xyaum ua. Qhov no vim tias, ib qho yog, vim lawv tsis kam them tus nqi, thiab lwm qhov, vim tias lawv tsis thoob tsib txaus; lawv tsis muaj peev xwm pom ntau qhov kev nyuaj ntawm lub neej txhua hnub li qhov uas muaj tej kev nyuaj ntawd tiag, thiab tsis paub xyaum ua kom raug. Vim tias tib neeg cov kev paub dhau los qis heev, lawv lub peev xwm tsawg dhau, thiab qib kev to taub qhov tseeb muaj chaw kawg, lawv tsis muaj txoj hau kev los daws cov kev nyuaj uas lawv ntsib hauv lawv lub neej txhua hnub. Lawv tsuas ntseeg Vajtswv hauv lo lus xwb, thiab tsis muaj peev xwm coj tau Vajtswv los nyob rau hauv lawv txoj kev ua neej nyob txhua hnub. Ntawd hais tau tias, Vajtswv yog Vajtswv, lub neej yog lub neej, thiab nws yog zoo nkaus li yog tib neeg tsis muaj txoj kev sib raug zoo nrog Vajtswv nyob rau hauv lawv lub neej. Ntawd yog yam uas txhua tus xav. Qhov tseeb tiag, qhov ntseeg Vajtswv li ntawd mas Nws yuav muab tsis tau tib neeg thiab ua tsis tau kom tib neeg zoo tiav log. Qhov tseeb tiag, tsis yog hais tias Vajtswv txoj lus tsis qhia kom pom txhua, tab sis vim tib neeg lub peev xwm nkag siab tsis zoo txaus kiag li xwb. Ib tug tib neeg twg yeej hais tau tias yuav luag tsis muaj ib tug tib neeg twg ua raws nraim li Vajtswv tej kev ntshaw thaum xub thawj; tiam sis, lawv txoj kev ntseeg Vajtswv yog mus raws li lawv tus kheej tej kev ntshaw, tej kev xav phem ntawm sab kev ntseeg uas lawv ntseeg nyob rau yav dhau los, thiab lawv tus kheej txoj kev ua. Muaj tsawg tus uas tau hloov dua siab tshiab raws txoj kev txais yuav ntawm Vajtswv txoj lus thiab pib ua raws li Nws tej kev npaj siab. Tiam sis, lawv yeej tseem nyob rau hauv lawv cov kev ntseeg uas yuam kev rhuav. Thaum tib neeg pib ntseeg Vajtswv, lawv ua li ntawd raws li tej cai ib txwm muaj ntawm txoj kev ntseeg, thiab lawv ua neej nyob thiab cuam tshuam nrog lwm tus raws li lawv tus kheej lub tswv yim ntawm txoj kev ua neej nyob hauv lub ntiaj teb. Ib tug twg yuav hais tau tias muaj li no rau cuaj leeg ntawm kaum leej tib neeg. Muaj tsawg tus thiaj li tsim dua lwm txoj kev npaj thiab hloov mus rau txoj kev tshiab tom qab pib ntseeg Vajtswv lawm. Noob neej ua tsis tau hauv kev txiav txim tias Vajtswv txoj lus yog qhov tseeb, los sis, khaws nws ua qhov tseeb, kom coj mus xyaum ua.

Muab txoj kev ntseeg Yexus los ua piv txwv. Txawm hais tias ib tug neeg twg nyuam qhuav pib ntseeg los sis twb tau ntseeg los ntev lawm, txhua tus tsuas yog siv cov peev xwm uas lawv muaj thiab qhia tej txuj ci uas lawv muaj xwb. Tib neeg tsuas ntxiv “kev ntseeg Vajtswv,” uas yog peb lo lus, rau hauv lawv lub neej li ib txwm, tiam sis tsis muaj kev hloov pauv lawv tus cwj pwm, thiab lawv txoj kev ntseeg Vajtswv tsis loj hlob me ntsis tuaj li. Lawv txoj kev nrhiav caum tsis kub tsis txias. Lawv tsis tau hais tias lawv yuav muab lawv txoj kev ntseeg tso tseg, tab sis lawv kuj tsis tau muab txhua yam fij rau Vajtswv. Lawv yeej tsis tau hlub Vajtswv los sis zwm rau Nws tiag tiag li. Lawv txoj kev ntseeg Vajtswv yog sib xyaws ntawm qhov tseeb thiab qhov cuav, lawv tau mus cuag nws nrog ib sab qhov muag rua thiab ib sab qhov muag qi, thiab tsis mob siab xyaum lawv txoj kev ntseeg. Lawv tseem nyob rau txoj kev tsis paub qhov meej tseeb txuas ntxiv mus, thiab cia li tuag nrog txoj kev tuag uas tsis thoob tsib. Dab tsi yog lub ntsiab tseem ceeb ntawm tag nrho cov teeb meem ntawd? Niaj hnub no, yuav kom los ntseeg hauv tus Vajtswv uas muaj qab hau, koj yuav tsum taug txoj kev kom yog. Yog koj ntseeg Vajtswv, koj yuav tsum tsis txhob yog nrhiav tej koob hmoov nkaus xwb, tiam sis hlub Vajtswv thiab paub Vajtswv. Los ntawm Nws txoj kev tshoov siab qhuab qhia, los ntawm koj tus kheej txoj kev nrhiav, koj noj thiab haus tau Nws txoj lus, txhim kho ib txoj kev nkag siab tiag ntawm Vajtswv, thiab muaj ib txoj kev hlub tiag rau Vajtswv uas tawm hauv koj nruab siab los. Muab ua lwm lo lus hais ces, thaum koj txoj kev hlub uas muab rau Vajtswv yog qhov tseeb tiag, thiab tsis muaj leej twg tuaj yeem rhuav tshem los sis txiav txoj kev ntawm koj txoj kev hlub uas muab rau Nws lawm, ces lub sij hawm no koj nyob rau hauv koj txoj kev ntseeg uas tseeb tiag rau Vajtswv lawm. Qhov no ua pov thawj tias koj yog Vajtswv li, rau qhov koj lub siab yog Vajtswv tug lawm thiab tsis muaj ib yam dab tsi yuav los txeeb tau koj mus lawm. Los ntawm koj txoj kev paub dhau los, los ntawm tus nqi uas koj raug them, thiab los ntawm Vajtswv tes hauj lwm, koj muaj peev xwm tsim kom muaj txoj kev hlub uas tsis muaj qhov zais rau Vajtswv—thiab thaum koj ua li no, koj yuav tau txais kev ywj pheej dim los ntawm Dab Ntxwgnyoog thiab yuav los nyob hauv qhov kaj ntawm Vajtswv txoj lus. Tsuas yog thaum koj tawm tau los ntawm txoj kev haub ntxias ntawm txoj kev tsaus ntuj ces thiaj tuaj yeem hais tau tias koj tau Vajtswv lawm. Hauv koj txoj kev ntseeg Vajtswv, koj yuav tsum sim nrhiav lub hom phiaj no. Nov yog tes dej num ntawm nej txhua tus. Yuav tsum tsis muaj ib tug twg ntawm nej cov txaus siab rau tej xwm txheej tam sim no. Koj ua tsis tau ob siab rau Vajtswv tes dej num, los sis koj saib tsis tau nws tsis rau nqi. Koj yuav tsum xav txog Vajtswv kom tag nrho lub siab hwm thiab txhua lub sij hawm, thiab ua txhua yam rau Nws. Thiab thaum twg koj hais lus los sis nqis tes ua, koj yuav tsum uas raws li Vajtswv txoj kev nyiam ua ntej. Tsuas yog ua li ntawd xwb mas koj thiaj li ua tau raws nraim li Vajtswv tej kev npaj siab.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Koj Yuav Tsum Ua Lub Neej rau Qhov Tseeb Vim Koj Ntseeg Vajtswv

Vajtswv Tej Lus Txhua Hnub  Nqe Lus Uas Xaiv Tawm Los 394

Hauv lawv txoj kev ntseeg Vajtswv, tib neeg qhov kev ua txhaum loj tshaj yog lawv tsuas ntseeg hauv lo lus xwb, thiab Vajtswv tsis nyob hauv lawv lub neej txhua hnub. Muaj tseeb tiag tias, txhua tus neeg ntseeg tias muaj Vajtswv, tiam sis Vajtswv tsis yog ib feem ntawm lawv lub neej txhua hnub. Tib neeg tej qhov ncauj hais ntau yam lus thov rau Vajtswv, tab sis Vajtswv muaj chaw me me nyob hauv lawv tej siab xwb, thiab yog li Vajtswv thiaj pheej sim lawv tag los rov sim dua. Nws yog vim hais tias tib neeg tsis dawb huv ces Vajtswv tsis muaj lwm txoj kev tab sis sim lawv, kom lawv thiaj raug txaj muag thiab los paub txog lawv tus kheej thaum lub sij hawm muaj cov kev sim siab no. Yog tias tsis yog li ntawd ces, noob neej yuav dhau los ua cov xeeb ntxwv ntawm tus thawj tub txib saum qaum ntuj, thiab dhau los ua tus neeg siab tsis ncaj. Nyob rau hauv tus txheej txheem ntawm lawv txoj kev ntseeg Vajtswv, ib tug neeg zuj zus tau muab ntau yam ntawm lawv tus kheej cov kev xav tau thiab cov hom phiaj tso tseg raws li Vajtswv txoj kev ntxuav kom dawb huv. Yog tias tsis yog li ntawd ces, Vajtswv yuav tsis tuaj yeem siv tau ib tug tib neeg twg li, thiab tsis muaj hau kev ua txoj hauj lwm uas Nws yuav tsum tau ua hauv tib neeg. Vajtswv xub ntxuav tib neeg kom dawb huv, thiab los ntawm tus txheej txheem no, lawv yuav los paub txog lawv tus kheej thiab Vajtswv yuav hloov pauv lawv. Tsuas yog thaum ntawd xwb Vajtswv thiaj li ua hauj lwm tag Nws lub neej rau lawv, thiab tsuas yog ua li ntawd xwb lawv lub siab thiaj li tig tau tag nrho los rau Vajtswv. Thiab yog li no ces Kuv hais tias, txoj kev ntseeg Vajtswv tsis yooj yim npaum li qhov tib neeg hais. Li Vajtswv pom mas, yog tias koj tsuas yog muaj kev paub xwb tiam sis tsis muaj Nws txoj lus los ua lub neej, thiab yog tias koj tsuas yog paub txij li koj qhov kev paub xwb tab sis tsis tuaj yeem xyaum qhov tseeb tau los sis ua lub neej raws li Vajtswv txoj lus, ces qhov no yog pov thawj tias koj tseem tsis tau muaj lub siab hlub Vajtswv, thiab nws qhia tias koj lub siab tsis zwm rau Vajtswv. Ib tug tib neeg muaj peev xwm los paub txog Vajtswv los ntawm txoj kev ntseeg Nws: Nov yog lub hom phiaj kawg, thiab lub hom phiaj ntawm tib neeg txoj kev raws qab. Koj yuav tsum siv zog ua lub neej raws li Vajtswv tej lus kom lawv thiaj li yuav tawg paj txi txiv rau hauv koj txoj kev xyaum. Yog tias koj tsuas muaj kev paub los ntawm tej lus qhuab qhia xwb, ces koj txoj kev ntseeg Vajtswv yuav tsis muaj qab hau. Tsuas yog tias yog koj tau xyaum thiab ua lub neej raws li Vajtswv txoj lus xwb koj txoj kev ntseeg thiaj raug xam tias tiav log thiab ua raws li Vajtswv tej kev npaj siab. Nyob rau hauv txoj kev no, ntau tus neeg tuaj yeem hais ntau yam kev paub, tab sis nyob rau lub sij hawm thaum lawv tas sim neej, hauv lawv lub qhov muag muaj kua muag teev yees, thiab lawv ntxub lawv tus kheej vim tau nkim tag nrho ib tiam neej thiab lub neej nyob laus nkoos yam tsis muaj qab ntxhiab dab tsi. Lawv tsuas yog to taub cov lus qhuab qhia xwb, tiam sis tsis tuaj yeem muab qhov tseeb coj los xyaum ua los sis ua tim khawv rau Vajtswv tau; qhov tseeb, lawv tsuas khiav mus qhov ub thiab qhov no, khwv npaum li tus muv, thiab tsuas yog nyob saum ntug ntawm txoj kev tuag ces thaum kawg lawv thiaj pom tias lawv tsis muaj pov thawj tseeb dab tsi, tias lawv tsis paub txog Vajtswv li. Thiab qhov no tseem tsis tau yog lig dhau lawm lod? Vim li cas koj thiaj tsis cheem lub hnub cia thiab raws qhov tseeb uas koj nyiam? Vim li cas thiaj pheej tos kom txog tag kis tso? Yog tias nyob hauv lub neej koj tsis peem kom tau qhov tseeb los sis nrhiav kom tau nws, nws puas yog tias koj xav kom koj khuv xim rau thaum lub sij hawm koj nqus ib pas tsis nto lawm? Yog tias zoo li ntawd, ua li cas ho ntseeg Vajtswv? Qhov tseeb tiag, muaj ntau yam uas tib neeg tuaj yeem muab qhov tseeb coj los xyaum ua tau thiab ua rau Vajtswv txaus siab yog tias lawv siv zog me ntsis xwb. Nws tsuas yog vim hais tias tib neeg tej siab tau raug cov dab tswj uas ua rau lawv tsis tuaj yeem coj ua pub rau Vajtswv, thiab niaj hnub maj rawm nroos mus ua tas li txhawm rau lawv cev nqaij daim tawv xwb, ces thaum kawg yuav tsis tau dab tsi li. Vim lub ntsiab no, tib neeg thiaj raug txom nyem los ntawm cov teeb meem thiab kev nyuab yam tsis tu ncua. Tej no tsis yog kev tsim txom los ntawm Dab Ntxwgnyoog lod? Qhov no tsis yog kev liam sim ntawm sab nqaij tawv lod? Koj yuav tsum tsis txhob sim dag Vajtswv los ntawm kev plhe ncauj. Zoo dua, koj yuav tsum coj ua kom tshwm sim muaj tseeb. Tsis txhob dag yus tus kheej—yuav muaj lub ntsiab dab tsi? Koj yuav tau txais txiaj ntsig dab tsi los ntawm kev ua neej nyob rau koj cev nqaij daim tawv thiab peem kom tau tshaj thawj thiab tau lub koob meej?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Koj Yuav Tsum Ua Lub Neej rau Qhov Tseeb Vim Koj Ntseeg Vajtswv

Vajtswv Tej Lus Txhua Hnub  Nqe Lus Uas Xaiv Tawm Los 395

Tam sim no, nej yuav tsum caum qhov dhau los ua Vajtswv cov neeg, thiab yuav tsum pib kev to taub qhov tseeb tag nrho mus rau txoj kev yog. Kev yuav los ua Vajtswv cov neeg txhais hais tias kev paub meej txog Tiam Lub Nceeg Vaj. Hnub no, nej tau pib muaj kev paub meej txog qhov kev cob qhia ntawm lub teb chaws lawm tiag, ces nej lub neej yav tom ntej yuav tsum tsis txhob ua neeg tub nkeeg thiab ua dog ua dig ib yam li nej tau ua yav dhau los lawm; kev ua neej zoo li txoj kev no, nws yuav tsis tuaj yeem ua tau raws li tus qauv uas Vajtswv tau cheem tsum kom ua. Yog tias koj tsis xav tias yog ib qho kev uas maj rawm li, ces qhov no qhia tau tias koj tsis muaj lub siab xav tsim kho koj tus kheej li, koj txoj kev caum yog sib chab sib chaws thiab tsis meej pem, thiab koj tsis muaj peev xwm ua kom tau txaus li Vajtswv tej kev npaj siab. Kev paub meej txoj kev cob qhia ntawm lub teb chaws txhais hais tias pib ua lub neej yam li Vajtswv cov neeg—koj puas txaus siab hlo txais txoj kev cob qhia zoo li no? Koj puas txaus siab hlo muaj txoj kev maj rawm li? Koj puas txaus siab hlo ua neej nyob raws li Vajtswv txoj kev qhuab qhia? Koj puas txaus siab hlo ua neej nyob raws li Vajtswv txoj kev rau txim? Thaum Vajtswv cov lus los rau koj thiab sim koj, koj yuav ua li cas? Thiab koj yuav ua li cas thaum ntsib txhua yam tseeb? Nyob rau yav dhau los, koj txoj kev mob siab rau tsis yog kev ua neej; hnub no, koj yuav tsum tsom ntsoov rau kev paub meej txog lub neej qhov muaj tiag, thiab caum kev hloov pauv koj tus yam ntxwv ntawm lub neej. Qhov no yog qhov uas yuav tsum tau ua kom tiav los ntawm cov neeg uas nyob hauv lub teb chaws. Txhua tus uas yog Vajtswv cov neeg yuav tsum muaj lub neej, lawv yuav tsum lees txais txoj kev cob qhia ntawm lub teb chaws, thiab caum kev hloov pauv lawv tus yam ntxwv ntawm lub neej. Qhov no yog yam uas Vajtswv cheem tsum kom cov tib neeg ntawm lub teb chaws ua.

Vajtswv txoj kev cheem tsum kom cov tib neeg ntawm lub teb chaws ua muaj raws li nram qab no:

1. Lawv yuav tsum lees txais yuav Vajtswv cov lus txib. Qhov no yog txhawm rau hais tias, lawv yuav tsum lees txais yuav txhua lo lus uas hais hauv Vajtswv txoj hauj lwm thaum lub sij hawm kawg.

2. Lawv yuav tsum muaj kev paub meej txog kev cob qhia ntawm lub teb chaws.

3. Lawv yuav tsum caum qhov cia Vajtswv tshoov lawv lub siab. Thaum koj lub siab tau tig tag nrho los cuag Vajtswv lawm, thiab koj muaj lub neej sab ntsujplig li ib txwm muaj lawm, koj yuav ua lub neej nyob hauv sab ntsujplig ntawm txoj kev ywj pheej, uas txhais tau tias koj yuav ua neej nyob hauv txoj kev saib xyuas thiab kev tiv thaiv los ntawm Vajtswv txoj kev hlub. Tsuas yog thaum koj ua neej nyob hauv Vajtswv txoj kev saib xyuas thiab kev tiv thaiv lawm xwb koj thiaj li yuav yog Vajtswv li.

4. Lawv yuav tsum tau raug Vajtswv muab tau.

5. Lawv yuav tsum dhau los ua ib txoj kev qhia meej txog Vajtswv lub yeeb koob rau hauv ntiaj teb.

Tsib lub ntsiab lus no yog Kuv cov lus txib rau nej. Kuv cov lus yog hais rau Vajtswv cov neeg, yog tias koj tsis txaus siab txais yuav cov lus txib no, Kuv yuav tsis yuam koj—tiam sis yog tias koj lees txais yuav cov lus no tiag tiag, ces koj yuav muaj peev xwm ua kom tau li Vajtswv lub siab nyiam. Hnub no, nej pib lees txais yuav Vajtswv cov lus txib lawm, thiab ua kom dhau los ua cov tib neeg ntawm lub teb chaws thiab ua kom tiav cov qauv uas cheem tsum kom cov tib neeg ntawm lub teb chaws yuav tsum tau ua. Qhov no yog thawj theem ntawm kev to taub qhov tseeb. Yog tias koj xav ua kom tau li Vajtswv lub siab nyiam tiag tiag, ces koj yuav tsum lees txais yuav tsib nqe lus txib no, thiab yog tias koj muaj peev xwm ua tiav cov lus no, koj yuav ua tau haum raws li Vajtswv tej kev npaj siab thiab Vajtswv yuav siv koj kom zoo tshaj plaws li. Yam tseem ceeb hnub no yog kev paub meej txog txoj kev cob qhia ntawm lub teb chaws. Kev to taub qhov tseeb txog txoj kev cob qhia ntawm lub teb chaws cuam tshuam nrog rau lub neej sab ntsujplig. Yav dhau los, tsis muaj kev hais txog lub neej ntawm sab ntsujplig li, tiam sis hnub no, thaum koj pib muaj kev to taub qhov tseeb txog txoj kev cob qhia ntawm lub teb chaws lawm, koj paub qhov tseeb txog lub neej sab ntsujplig lawm.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Paub Vajtswv Txoj Hauj Lwm Uas Tshiab Tshaj Plaws thiab Raws Nws Tej Hneev Taw

Vajtswv Tej Lus Txhua Hnub  Nqe Lus Uas Xaiv Tawm Los 396

Lub neej ntawm sab ntsujplig yog lub neej zoo li cas? Lub neej sab ntsujplig yog lub uas koj lub siab tau tig tag nrho rau Vajtswv, thiab muaj peev xwm paub txog Vajtswv txoj kev hlub. Nws yog lub uas koj ua neej nyob hauv Vajtswv cov lus, thiab tsis muaj ib yam dab tsi kav koj lub siab ntxiv li lawm, thiab koj yuav muaj peev xwm ua tau raws li Vajtswv tej kev npaj siab hnub no, thiab Vajntsujplig Dawb Huv txoj kev kaj yuav coj koj hnub no kom koj ua tau koj lub luag hauj lwm. Lub neej uas nyob nruab nrab ntawm tib neeg thiab Vajtswv zoo li no yog lub neej ntawm sab ntsujplig. Yog tias hnub no koj tsis muaj peev xwm ua raws li txoj kev kaj, ces txoj kev sib nrug deb tau tshwm los quas koj txoj kev sib raug zoo nrog Vajtswv lawm—tej zaum nws kuj yuav nyuaj heev—thiab koj yuav tsis muaj lub neej ntawm sab ntsujplig uas ib txwm muaj lawm. Txoj kev sib raug zoo nrog Vajtswv yog txoj uas tsim tsa rau saum lub hauv paus ntawm txoj kev lees txais yuav Vajtswv cov lus hnub no. Koj puas muaj lub neej ntawm sab ntsujplig uas ib txwm muaj? Koj puas muaj txoj kev sib raug zoo nrog Vajtswv li uas koj ib txwm muaj? Koj puas yog qee tus neeg uas ua raws li Vajntsujplig Dawb Huv tes hauj lwm? Yog tias koj muaj peev xwm ua raws li txoj kev kaj ntawm Vajntsujplig Dawb Huv hnub no, thiab tuaj yeem nkag siab txog Vajtswv tej kev npaj siab nyob rau hauv Nws cov lus, thiab paub qhov tseeb txog cov lus no, ces koj yog tus neeg uas yoog raws li Vajntsujplig Dawb Huv. Yog tias koj tsis yoog raws li Vajntsujplig Dawb Huv, ces koj yuav tsis ua xyem xyav rau qee tus uas tsis caum qhov tseeb kiag li. Tus Vajntsujplig Dawb Huv tsis muaj lub sij hawm ua hauj lwm rau cov neeg uas tsis muaj lub siab xav tsim kho lawv tus kheej, thiab vim li ntawd, cov neeg zoo li no thiaj tsis muaj peev xwm koom lawv lub zog, thiab ib txwm phem. Hnub no, koj puas yoog raws li Vajntsujplig Dawb Huv? Koj puas nyob hauv Vajntsujplig Dawb Huv txoj kev yoog? Puas yog koj tshwm sim los ntawm tus yam ntxwv uas phem? Txhua tus uas ntseeg Vajtswv cov lus, tus uas coj Vajtswv txoj hauj lwm ua lub hauv paus, thiab ua raws li Vajntsujplig Dawb Huv txoj kev kaj hnub no—lawv sawv daws puav leej yoog raws li Vajntsujplig Dawb Huv. Yog tias koj ntseeg hais tias Vajtswv cov lus muaj tseeb thiab yog heev li lawm, thiab yog tias koj ntseeg Vajtswv cov lus txawm Nws hais li cas los xij, ces koj yog tus uas caum kev to taub qhov tseeb txog Vajtswv txoj hauj lwm, thiab koj ua tau txaus li Vajtswv tej kev npaj siab no.

Yuav kom nkag tau mus rau hauv Vajntsujplig txoj kev ntws mas, koj yuav tsum muaj ib txoj kev sib raug zoo nrog Vajtswv li ib txwm muaj, thiab koj yuav tsum xub muab koj tus yam ntxwv uas tsis zoo tso tseg. Ib txhia tib neeg mas yeej ib txwm ua raws li cov neeg coob coob xwb, thiab lawv lub siab txav deb ntawm Vajtswv dhau lawm; cov tib neeg zoo li no tsis muaj lub siab ntshaw los kho lawv tus kheej kom zoo, thiab cov qauv uas lawv caum ntawd mas qes dhau lawm. Tsuas yog txoj kev caum qhov hlub Vajtswv thiab qhov uas Vajtswv muab tau xwb thiaj li yog Vajtswv txoj kev npaj siab. Muaj cov tib neeg uas tsuas siv lawv lub siab uas txawj xav los pauj Vajtswv txoj kev hlub xwb, tiam sis qhov no ua tsis tau raws li Vajtswv tej kev npaj siab; cov qauv uas koj caum ntawd yim siab, ces qhov ntawd yim yuav mus raws li Vajtswv tej kev npaj siab. Tam li yog tus tib neeg zoo li sawv daws, thiab tam li yog tus tib neeg uas nrhiav txoj kev los hlub Vajtswv, qhov nkag mus rau hauv lub nceeg vaj thiab dhau los ua Vajtswv cov neeg thiaj li yog nej lub neej yav tom ntej tiag tiag, thiab yog ib lub neej uas muaj nqis thiab muaj qab hau tshaj plaws; tsis muaj leej twg tau koob hmoov ntau tshaj nej lawm. Vim li cas Kuv thiaj li hais li no? Vim cov uas tsis ntseeg Vajtswv ua neej nyob txhawm rau lub cev nqaij daim tawv, thiab lawv ua neej nyob txhawm rau Ntxwgnyoog xwb, tiam sis niaj hnub no nej ua neej nyob txhawm rau Vajtswv, thiab ua neej nyob los ua raws li Vajtswv lub siab nyiam. Vim li ntawd Kuv thiaj li hais tias nej lub neej muaj qab hau tshaj plaws. Tsuas yog pawg neeg no, cov uas Vajtswv tau xaiv tseg lawm, thiaj li muaj peev xwm ua ib lub neej uas muaj qab hau tshaj plaws xwb: Tsis muaj lwm tus nyob hauv ntiaj teb no uas muaj peev xwm ua ib lub neej uas muaj nqis thiab muaj qab hau zoo li nej li lawm. Vim nej raug xaiv los ntawm Vajtswv lawm, thiab raug txhawb tsa los ntawm Vajtswv lawm, thiab, tshaj ntawd ntxiv, yog vim Vajtswv txoj kev hlub, es nej thiaj li nkag siab lub neej tiag tiag, thiab paub ua lub neej raws li txoj kev uas muaj nuj nqis tshaj plaws. Qhov no tsis yog vim tias nej txoj kev caum zoo, tiam sis vim yog Vajtswv txoj hmoov hlub; Vajtswv yog tus uas qhib nej ob lub qhov muag ntawm sab ntsujplig, thiab Vajtswv tus Ntsujplig yog tus uas tau txhawb nej lub siab, muab txoj hmoo zoo rau nej los rau ntawm Nws xub ntiag. Yog tias Vajtswv tus Ntsujplig tsis tau qhia nej, ces nej yuav tsis muaj peev xwm pom tias Vajtswv zoo npaum li cas, thiab nws yuav yog ib qho nyuaj rau nej los hlub Vajtswv. Nws yog vim tias Vajtswv tus Ntsujplig tau tshoov tib neeg lub siab kom lawv lub siab tau tig rov los cuag Vajtswv tag nrho. Qee zaum, thaum nej muaj kev zoo siab rau Vajtswv cov lus, nej lub siab tau raug tshoov, ces nej xav tias nej tsis tuaj yeem pab tau dab tsi tiam sis tsuas yog hlub Vajtswv xwb, tias nej muaj lub zog loj nyob hauv nej, thiab tsis muaj ib yam dab tsi uas nej tsis tuaj yeem muab tso pov tseg li. Yog tias koj xav li no, ces Vajtswv tus Ntsujplig tau tshoov koj lub siab lawm, thiab koj lub siab tau tig tag nrho los cuag Vajtswv lawm, ces koj yuav thov Vajtswv thiab hais tias: “Au Vajtswv! Peb yeej yog tau raug npaj tseg thiab tau raug xaiv los ntawm Koj lawm tiag. Koj lub yeeb koob ua rau kuv muaj kev kaj siab, thiab ua rau kuv zoo siab tias kuv yog ib tug ntawm Koj cov neeg. Kuv yuav siv txhua yam thiab muab txhua yam los ua kom tau li Koj lub siab nyiam, thiab yuav siv tag nrho kuv txhua lub sij hawm, thiab tag nrho lub neej uas kuv muaj, rau Koj.” Thaum koj thov Vajtswv zoo li no, yuav muaj txoj kev hlub uas tsis paub kawg thiab kev zwm tseeb rau Vajtswv hauv koj lub siab. Koj puas txeev muaj txoj kev paub zoo li no dua li? Yog tias tib neeg raug Vajtswv tus Ntsujplig tshoov siab tas mus li, ces lawv yuav txaus siab hlo muab lawv tus kheej fij rau Vajtswv thaum lawv thov Vajtswv tias: “Au Vajtswv! Kuv xav kom pom hnub uas Koj muaj yeeb koob, thiab kuv xav kom tau ua neej nyob rau Koj—tsis muaj ib yam dab tsi uas tsim nyog los sis muaj nuj nqis tshaj li uas ua neej nyob txhawm rau Koj lawm, thiab kuv tsis muaj ib txoj kev xav me me uas yuav ua neej rau Ntxwgnyoog thiab rau sab nqaij tawv hlo li. Koj tsa kuv sawv los ntawm qhov pab kuv muaj peev xwm ua neej nyob rau Koj hnub no.” Thaum koj tau thov Vajtswv li no lawm, koj yuav xav tias koj pab tsis tau dab tsi tiam sis tsuas muab tau koj lub siab rau Vajtswv xwb, tias koj yuav tsum tau muaj Vajtswv, thiab kom koj ntxub qhov tuag yam uas koj tsis tau muaj Vajtswv thaum koj tseem ciaj sia nyob. Qhov muaj kev thov Vajtswv zoo li no, nws yuav ua rau koj muaj lub zog tsis txawj nkees li, thiab koj yuav tsis paub tias nws los qhov twg los; nyob hauv koj lub siab yuav muaj lub zog uas tsis txawj tag, thiab koj yuav muaj ib txoj kev txawj xav tias Vajtswv yog tus muaj kev hlub heev, thiab Nws tsim nyog tau txais kev hlub. Qhov no yog thaum uas koj raug Vajtswv tshoov siab lawm. Txhua tus neeg uas tau muaj txoj kev paub no tau raug Vajtswv tshoov siab lawm. Rau qhov cov neeg uas raug Vajtswv tshoov siab tas li, yeej muaj kev hloov pauv hauv lawv lub neej, lawv muaj peev xwm txiav txim siab thiab txaus siab hlo txais yuav Vajtswv tiag tiag, lawv lub siab hlub Vajtswv yuav muaj zog heev li, thiab lawv lub siab tau tig tag nrho los rau Vajtswv. Lawv tsis hais txog tsev neeg, lub ntiaj teb, cov kev ntxias, los sis lawv lub neej yav tom ntej, thiab lawv zoo siab hlo muab lawv lub neej fij rau Vajtswv. Txhua tus neeg uas tau raug Vajtswv tus Ntsujplig tshoov siab yog cov neeg uas caum qhov tseeb, thiab cov uas muaj kev cia siab tias yuav raug Vajtswv ua kom zoo tshaj plaws.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Paub Vajtswv Txoj Hauj Lwm Uas Tshiab Tshaj Plaws thiab Raws Nws Tej Hneev Taw

Vajtswv Tej Lus Txhua Hnub  Nqe Lus Uas Xaiv Tawm Los 397

Qhov tseem ceeb tshaj plaws hauv kev ntseeg Vajtswv yog txhua yam yuav tsum tau ua raws li Vajtswv cov lus hnub no: Txawm hais tias koj tab tom caum kev to taub lub neej txoj sia los sis kev ua kom tau txaus Vajtswv tej kev npaj siab los xij, txhua yam yuav tsum nyob hauv Vajtswv cov lus hnub no. Yog tias yam uas koj qhia txog thiab nrhiav kom nkag tau mus rau ntawd tsis yog nyob hauv Vajtswv cov lus hnub no, ces koj yog ib tug neeg tsis paub Vajtswv cov lus li, thiab tsis muaj tes hauj lwm ntawm Vajntsujplig Dawb Huv kiag li. Yam uas Vajtswv xav tau yog cov neeg uas ua raws li Nws cov hneev taw. Txawm hais tias yam uas koj nkag siab yav dhau los yuav zoo thiab dawb huv npaum li cas los xij, Vajtswv tsis xav tau tej ntawd, thiab yog tias koj tsis muaj peev xwm muab tej ntawd tso pov tseg, ces tej ntawd yuav yog ib txoj kev cuam tshuam uas nyuaj tshaj plaws rau koj lub neej yav tom ntej. Txhua tus neeg uas muaj peev xwm ua raws li txoj kev kaj ntawm Vajntsujplig Dawb Huv niaj hnub no yog cov tau koob hmoov. Cov tib neeg tiam yav dhau los los kuj ua raws li Vajtswv cov hneev taw thiab, txawm li ntawd los lawv tsis tuaj yeem ua kom los txog rau niaj hnub nim no; qhov no yog txoj koob hmoov rau cov neeg thaum lub sij hawm kawg. Cov tib neeg uas tuaj yeem ua raws li tes hauj lwm ntawm Vajntsujplig Dawb Huv, thiab cov uas muaj peev xwm ua raws li Vajtswv cov hneev taw, xws li tias Vajtswv coj lawv mus qhov twg los lawv mus tib si—cov no yog cov neeg uas tau txais koob hmoov los ntawm Vajtswv. Cov tib neeg uas tsis ua raws li tes hauj lwm ntawm Vajntsujplig Dawb Huv tsis tau paub qhov tseeb txog txoj hauj lwm ntawm Vajtswv cov lus, thiab txawm hais tias lawv yuav ua dej num ntau npaum li cas, los sis lawv yuav raug tsim txom hnyav npaum li cas, los sis lawv khiav txoj dej num ntau npaum li cas los, tsis muaj ib yam dab tsi yog ua rau Vajtswv, thiab Nws yuav tsis pom zoo rau lawv li. Hnub no, txhua tus uas ua raws li Vajtswv cov lus niaj hnub no yog cov yoog raws li Vajntsujplig Dawb Huv; cov tib neeg uas tsis paub txog Vajtswv cov lus niaj hnub no yog cov tsis yoog raws li Vajntsujplig Dawb Huv, thiab cov neeg zoo li no Vajtswv tsis pom zoo rau li. Tes dej num uas ncaim ntawm Vajntsujplig Dawb Huv cov lus hais lawm ces yog tes dej num ntawm sab nqaij tawv, thiab yog cov kev xav phem, thiab nws tsis muaj peev xwm ua tau raws li Vajtswv tej kev npaj siab. Yog tias tib neeg ua neej nyob nrog rau cov kev xav phem ntawm kev lig kev cai ntseeg xwb, ces lawv tsis muaj peev xwm yuav ua tau ib yam dab tsi kom haum raws li Vajtswv tej kev npaj siab li, thiab txawm hais tias lawv ua dej num rau Vajtswv los xij, lawv ua dej num raws li lawv txoj kev xav thiab cov kev xav phem, thiab tsis muaj peev xwm ua dej num tau raws li Vajtswv tej kev npaj siab kiag li. Cov tib neeg uas tsis muaj peev xwm ua raws li tes hauj lwm ntawm Vajntsujplig Dawb Huv tsis nkag siab txog Vajtswv tej kev npaj siab, thiab cov tib neeg uas tsis nkag siab txog Vajtswv tej kev npaj siab ntawd tsis tuaj yeem ua dej num tau rau Vajtswv. Vajtswv xav tau tes dej num uas ua kom haum raws li Nws tej kev npaj siab; Nws tsis xav tau tes dej num uas yog ntawm cov kev xav phem thiab sab nqaij tawv. Yog tias tib neeg tsis muaj peev xwm ua raws li cov kauj ruam ntawm Vajntsujplig Dawb Huv txoj hauj lwm, ces lawv ua neej nyob nrog cov kev xav phem. Tes dej num ntawm cov tib neeg zoo li no tab kaum thiab cuam tshuam, thiab tes dej num zoo li no tsis mus raws li Vajtswv lub siab nyiam. Yog li cov tib neeg uas tsis muaj peev xwm ua raws li Vajtswv cov hneev taw tsis muaj peev xwm ua tau dej num rau Vajtswv; cov tib neeg uas tsis muaj peev xwm ua raws li Vajtswv cov hneev taw feem ntau yeej tawm tsam Vajtswv, thiab tsis muaj peev xwm ua tau haum nrog Vajtswv. “Qhov ua raws li Vajntsujplig Dawb Huv tes hauj lwm” txhais tau hais tias muaj kev nkag siab txog Vajtswv tej kev npaj siab hnub no, muaj peev xwm ua raws li Vajtswv txoj kev cheem tsum kom ua niaj hnub no, muaj peev xwm zwm rau thiab ua raws li Vajtswv hais hnub no, thiab muaj kev paub meej raws li cov lus hais tshiab ntawm Vajtswv. Tsuas yog qhov no xwb thiaj li yog tus neeg uas ua tes hauj lwm ntawm Vajntsujplig Dawb Huv thiab yoog raws li Vajntsujplig Dawb Huv. Cov tib neeg zoo li no tsis yog tias tsuas muaj peev xwm tau txais Vajtswv lo lus qhuas thiab kev pom Vajtswv xwb, tiam sis kuj tuaj yeem paub txog Vajtswv tus yam ntxwv los ntawm Vajtswv txoj hauj lwm tshiab thiab, thiab tuaj yeem paub txog tib neeg cov kev xav phem thiab kev ntxeev siab, thiab tib neeg tus yeeb yam thiab lub ntsiab tseem ceeb, los ntawm Nws txoj hauj lwm tshiab; deb tshaj ntawd ntxiv, lawv muaj peev xwm maj mam hloov pauv lawv tus yam ntxwv kom tiav rau lub sij hawm ua lawv tes dej num. Tsuas yog cov tib neeg zoo li no xwb thiaj li yog cov uas tau txais Vajtswv, thiab cov uas nrhiav tau txoj tseem kev tseeb tiag. Cov tib neeg uas raug rhuav tshem los ntawm Vajntsujplig Dawb Huv tes hauj lwm lawm yog cov neeg uas tsis muaj peev xwm ua raws li Vajtswv txoj hauj lwm tshiab, thiab tawm tsam txoj hauj lwm tshiab ntawm Vajtswv. Tias cov tib neeg uas zoo li no tawm tsam Vajtswv vim hais tias Vajtswv tau ua tiav txoj hauj lwm tshiab lawm, thiab vim tias Vajtswv tus yam ntxwv tsis zoo ib yam li lawv cov kev xav phem—vim qhov ntawm no, lawv thiaj li tawm tsam Vajtswv thiab txiav txim rau Vajtswv, uas ua rau Vajtswv ntxub ntxaug lawv. Muaj kev paub txog Vajtswv txoj hauj lwm tshiab tsis yog ib qho yooj yim, tiam sis yog tias tib neeg muaj lub siab ua raws li Vajtswv txoj hauj lwm thiab nrhiav Vajtswv txoj hauj lwm, ces lawv yuav muaj lub sij hawm pom Vajtswv, thiab yuav muaj lub sij hawm tau txais txoj kev pab coj tshiab ntawm Vajntsujplig Dawb Huv. Cov tib neeg uas txhob txwm tawm tsam Vajtswv txoj hauj lwm tsis tuaj yeem tau txais Vajntsujplig Dawb Huv txoj kev qhuab qhia los sis Vajtswv txoj kev pab. Yog li, txawm hais tias tib neeg yuav tau txais Vajtswv txoj hauj lwm thiab tsis tau los yog nyob ntawm Vajtswv txoj hmoov hlub xwb, nws nyob ntawm lawv txoj kev caum, thiab nws nyob ntawm lawv cov kev npaj siab xwb.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Paub Vajtswv Txoj Hauj Lwm Uas Tshiab Tshaj Plaws thiab Raws Nws Tej Hneev Taw

Vajtswv Tej Lus Txhua Hnub  Nqe Lus Uas Xaiv Tawm Los 398

Txhua tus tib neeg uas muaj peev xwm ua raws li Vajntsujplig Dawb Huv cov lus hais niaj hnub no yog cov tau txais koob hmoov. Nws tsis tseem ceeb tias lawv txeev zoo li cas yav dhau los, los sis Vajntsujplig Dawb Huv txeev ua hauj lwm li cas rau lawv yav dhau los—cov neeg uas tau txais txoj hauj lwm tshiab ntawm Vajtswv yog cov tau txais koob hmoov ntau tshaj plaws, thiab cov neeg uas tsis tuaj yeem ua raws li txoj hauj lwm tshiab hnub no raug rhuav tshem mus lawm. Vajtswv xav tau cov uas muaj peev xwm lees txais yuav txoj kev kaj tshiab, thiab Nws xav tau cov neeg uas lees txais yuav thiab paub txog Nws txoj hauj lwm tshiab. Vim li cas nws thiaj li hais tias koj yuav tsum yog tus nkauj xwb dawb huv? Ib tug nkauj xwb dawb huv muaj peev xwm nrhiav Vajntsujplig Dawb Huv tes hauj lwm thiab to taub txog tej yam tshiab, thiab ntau tshaj ntawd, muaj peev xwm muab cov kev xav phem qub tso tseg, thiab ua raws li Vajtswv txoj hauj lwm tshiab hnub no. Pab pawg neeg no, uas tau lees txais yuav txoj hauj lwm tshiab tshaj plaws ntawm hnub no, yog cov tau raug Vajtswv npaj tseg ua ntej lawv tiam lawm, thiab yog cov tib neeg uas tau txais koob hmoov ntau tshaj plaws. Nej hnov Vajtswv lub suab ncaj qha, thiab pom Vajtswv qhov kev tshwm sim, thiab yog li ntawd, thoob plaws lub ntuj thiab lub ntiaj teb, thiab thoob plaws txhua txhua tiam, tsis muaj leej twg tau txais koob hmoov ntau dua nej li, pab pawg neeg no li. Txhua yam no yog vim Vajtswv txoj hauj lwm, vim yog Vajtswv txoj kev npaj tseg cia ua ntej thiab kev xaiv, thiab vim yog Vajtswv txoj kev hlub xwb; yog tias Vajtswv tsis hais lus thiab hais Nws cov lus, koj tus yam ntxwv puas yuav zoo li niaj hnub no? Yog li, thov kom Vajtswv tau yeeb koob thiab raug qhuas, rau qhov txhua yam no yog vim tias Vajtswv tsa nej sawv. Muaj txhua yam no rau hauv lub siab lawm, koj puas tseem yuav ua phem thiab? Koj lub zog puas tseem tsis tuaj yeem sawv tau thiab?

Tias niaj hnub no koj muaj peev xwm lees txais kev txiav txim, kev rau txim, raug nplawm, thiab kev tsim kho kom zoo ntawm Vajtswv cov lus, thiab, ntau tshaj ntawd ntxiv, muaj peev xwm lees txais Vajtswv cov lus txib, uas Vajtswv tau npaj tseg ua ntej ntau tiam lawm, thiab yog li ntawd koj yuav tsum tsis txhob ntxhov siab heev heev thaum koj raug rau txim. Tsis muaj leej twg tuaj yeem tshem tau txoj hauj lwm hauv nej tawm mus, thiab cov koob hmoov uas tau muab rau nej lawm, thiab tsis muaj leej twg tuaj yeem muab txhua yam uas twb tau muab rau nej lawm tshem tawm mus. Cov neeg ntawm txoj kev ntseeg tsis pub muaj ib qho kev sib piv nrog nej li. Nej tsis muaj kev paub zoo zoo txog phau Vajluskub, thiab tsis npaj kom muaj tej kev qhuab qhia ntawm sab kev ntseeg, tab sis vim yog Vajtswv tau ua hauj lwm nyob rau hauv nej, nej tau txais ntau tshaj txhua leej txhua tus ntawm txhua txhua tiam—thiab yog li qhov no yog nej txoj koob hmoov uas loj tshaj plaws. Vim qhov no, nej yuav tsum mob siab tshaj rau Vajtswv, thiab haj yam ncaj ncees tshaj rau Vajtswv. Vim Vajtswv tsa koj sawv, koj yuav tsum txhawb koj lub zog, thiab yuav tsum npaj koj lub siab los lees txais yuav Vajtswv cov lus txib. Koj yuav tsum sawv khov kho rau ntawm qhov chaw uas Vajtswv tau muab rau koj lawm, ua kom dhau los ua Vajtswv cov tib neeg lees txais txoj kev cob qhia ntawm lub teb chaws, kom Vajtswv muab tau koj thiab thaum kawg los ua tus pov thawj uas zoo kawg nkaus rau Vajtswv. Koj puas muaj cov kev txiav txim siab no? Yog tias koj muaj tau cov kev txiav txim siab zoo li no lawm, ces thaum kawg koj paub tseeb tias Vajtswv yeej yuav muab tau koj xwb xwb li, thiab koj yuav dhau los ua ib tug pov thawj uas zoo kawg nkaus rau Vajtswv. Koj yuav tsum nkag siab tias lub luag hauj lwm ntawm cov lus txib yog kom raug Vajtswv muab kom tau thiab dhau los ua ib tug pov thawj uas zoo kawg nkaus rau Vajtswv xwb. Qhov no yog Vajtswv txoj kev npaj siab.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Paub Vajtswv Txoj Hauj Lwm Uas Tshiab Tshaj Plaws thiab Raws Nws Tej Hneev Taw

Vajtswv Tej Lus Txhua Hnub  Nqe Lus Uas Xaiv Tawm Los 399

Cov lus ntawm Vajntsujplig Dawb Huv hnub no yog lub zog ntawm Vajntsujplig Dawb Huv tes hauj lwm, thiab ntawm Vajntsujplig Dawb Huv txoj kev qhuab qhia tib neeg txuas ntxiv mus rau qhov lub sij hawm no yog txoj kev ua Vajntsujplig Dawb Huv tes hauj lwm. Thiab txoj kev ua Vajntsujplig Dawb Huv tes hauj lwm hnub no yog dab tsi? Nws yog kev ua thawj coj ntawm tib neeg los ua Vajtswv txoj hauj lwm hnub no, thiab mus rau lub neej sab ntsujplig li ib txwm muaj. Muaj plaub tsib kauj ruam los to taub qhov tseeb txog ib lub neej sab ntsujplig li ib txwm muaj:

1. Ua ntej tshaj plaws, koj yuav tsum qhib koj lub siab rau Vajtswv cov lus. Koj yuav tsum tsis txhob caum Vajtswv cov lus yav dhau los, thiab tsis txhob kawm cov lus ntawd thiab piv cov lus ntawd rau cov lus tam sim no. Tiam sis, koj yuav tsum qhib koj lub siab rau Vajtswv cov lus niaj hnub tam sim no. Yog tias muaj cov tib neeg uas tseem xav nyeem Vajtswv cov lus, cov phau ntawv sab ntsujplig, los sis lwm yam kev qhuab qhia yav dhau los, thiab tus uas tsis ua raws li Vajntsujplig Dawb Huv cov lus niaj hnub no, ces lawv yog cov neeg uas ruam tshaj plaws li; Vajtswv ntxub cov neeg zoo li no. Yog tias koj txaus siab hlo lees txais yuav txoj kev kaj ntawm Vajntsujplig Dawb Huv hnub no, ces qhib koj lub siab tag nrho rau Vajtswv cov lus hais hnub no. Qhov no yog thawj yam uas koj yuav tsum ua kom tiav.

2. Koj yuav tsum thov Vajtswv los ntawm lub hauv paus ntawm Vajtswv cov lus hais hnub no, paub qhov tseeb txog Vajtswv cov lus thiab nrog Vajtswv sib tham, thiab txiav txim siab rau ntawm Vajtswv xub ntiag, ua cov qauv uas koj xav caum kom tiav.

3. Koj yuav tsum caum qhov to taub kom tob txog qhov tseeb ntawm lub hauv paus ntawm Vajntsujplig Dawb Huv tes hauj lwm hnub no. Tsis txhob tuav rawv cov lus hais uas qub qub lawm thiab tej zaj lus qhia yav dhau los lawm.

4. Koj yuav tsum tshawb nrhiav kom Vajntsujplig Dawb Huv tshoov koj siab, thiab paub qhov tseeb txog Vajtswv cov lus.

5. Koj yuav tsum caum qhov to taub txog txoj kev uas Vajntsujplig Dawb Huv taug niaj hnub no.

Thiab koj yuav nrhiav li cas kom Vajntsujplig Dawb Huv tshoov koj siab? Qhov tseem ceeb tshaj ces yog nyob rau hauv Vajtswv cov lus niaj hnub no xwb, thiab thov los ntawm lub hauv paus ntawm Vajtswv cov kev cheem tsum. Qhov muaj kev thov Vajtswv raws li txoj kev no, ces Vajntsujplig Dawb Huv yeej yuav tshoov koj siab xwb xwb li. Yog tias koj tsis nrhiav tus cag ntawm lub hauv paus ntawm cov lus uas tau hais los ntawm Vajtswv hnub no, ces qhov no tsis tawg paj txi txiv dab tsi li. Koj yuav tsum thov, thiab hais tias: “Au Vajtswv! Kuv tawm tsam Koj, thiab kuv tshuav Koj nqi ntau heev; kuv mas ntxeev siab heev li, thiab yeej tsis muaj peev xwm ua rau Koj txaus siab li. Au Vajtswv, kuv xav kom Koj cawm kuv, kuv xav ua hauj lwm rau Koj mus kom txog ntua hnub kawg, kuv xav tuag rau Koj. Koj txiav txim rau kuv thiab rau txim rau kuv, thiab kuv tsis muaj lus yws kiag li; kuv tawm tsam Koj thiab kuv tsim nyog tuag, kom txhua tus neeg pom Koj tus yam ntxwv ncaj ncees nyob hauv kuv txoj kev tuag.” Thaum koj thov tawm hauv koj nruab siab tuaj raws txoj kev no lawm, Vajtswv yuav hnov koj, thiab yuav coj koj; yog tias koj tsis thov los ntawm lub hauv paus ntawm Vajntsujplig Dawb Huv cov lus hnub no, ces Vajntsujplig Dawb Huv tsis muaj txoj kev uas yuav tshoov tau koj lub siab kiag li. Yog tias koj thov raws li Vajtswv tej kev npaj siab, thiab raws li qhov uas Vajtswv xav ua hnub no, koj yuav hais tias: “Au Vajtswv! Kuv xav lees txais Koj cov lus txib thiab ua ncaj ncees rau Koj cov lus txib, thiab kuv txaus siab hlo muab tag nrho kuv lub neej fij rau Koj lub yeeb koob, kom txhua yam uas kuv ua tuaj yeem ncav cuag cov qauv ntawm Vajtswv cov neeg. Thov kom Koj tshoov kuv lub siab. Kuv xav kom Koj tus Ntsujplig qhia kuv mus li, kom txhua yam uas kuv ua coj tau kev txaj muag los rau Ntxwgnyoog, kom thaum kawg Koj muab tau kuv.” Yog tias koj thov raws txoj kev no, txoj uas pib hauv Vajtswv tej kev npaj siab, ces Vajntsujplig Dawb Huv yuav ua dej num rau hauv koj xwb xwb li. Nws tsis tseem ceeb tias koj cov lus thov yuav muaj pes tsawg lo—yam uas yog tus ywm sij ces yog tias koj ua tau raws li Vajtswv tej kev npaj siab los tsis tau xwb. Tej zaum nej txhua tus puav leej tau ntsib txoj kev zoo li nram qab no lawm: Qee zaum, thaum sib koom ua ke thov Vajtswv, lub zog ntawm Vajntsujplig Dawb Huv tes hauj lwm mus txog qhov siab tshaj plaws ntawm lawv cov lus thov, ua rau txhua tus neeg muaj zog sawv. Qee tus neeg quaj heev thiab los kua muag thaum thov Vajtswv, kov yeej kev tu siab rau Vajtswv, thiab qee leej tib neeg qhia lawv txoj kev txiav txim siab, thiab cog lus. Xws li yog qhov txiaj ntsig uas ua tiav los ntawm Vajntsujplig Dawb Huv tes hauj lwm. Hnub no, nws yog ib hnub tseem ceeb uas txhua leej txhua tus nchuav lawv lub siab rau hauv Vajtswv cov lus. Tsis txhob mob siab rau cov lus uas tau hais yav dhau los lawm; yog tias koj tseem tuav rawv yam uas tau tshwm sim yav dhau los lawm xwb, ces Vajntsujplig Dawb Huv yuav tsis ua hauj lwm nyob rau hauv koj. Koj puas pom tias qhov no tseem ceeb npaum li cas?

Hnub no nej puas paub txog txoj kev uas Vajntsujplig Dawb Huv tau taug? Plaub tsib lub ntsiab lus saum toj saud yog yam uas Vajntsujplig Dawb Huv yuav tsum ua kom tiav rau hnub no thiab yav tom ntej; cov ntsiab lus ntawd yog txoj kev uas Vajntsujplig Dawb Huv tau taug, thiab yog txoj kev uas tib neeg yuav tsum tau caum. Hauv koj txoj kev to taub lub neej txoj sia, yam tsawg kawg koj yuav tsum nchuav koj lub siab rau hauv Vajtswv cov lus, thiab muaj peev xwm lees txais txoj kev txiav txim thiab kev rau txim los ntawm Vajtswv cov lus; koj lub siab yuav tsum xav tau Vajtswv, koj yuav tsum caum qhov to taub kom tob txog qhov tseeb, thiab cov hom phiaj uas Vajtswv cheem tsum kom ua. Thaum koj muaj lub zog no lawm, ces nws qhia tias Vajtswv tau tshoov koj siab lawm, thiab koj lub siab tau pib tig los cuag Vajtswv lawm.

Thawj thawj kauj ruam ntawm kev to taub txog lub neej txoj sia yog nchuav tag nrho koj lub siab rau hauv Vajtswv cov lus, thiab kauj ruam ob yog txais yuav txoj kev uas raug Vajntsujplig Dawb Huv tshoov siab. Ua kom tiav kev lees txais yuav txoj kev uas raug Vajntsujplig Dawb Huv tshoov siab muaj txiaj ntsig dab tsi? Nws yog kom muaj peev xwm ntshaw, nrhiav thiab tshawb nrhiav qhov tseeb uas tob dua qub, thiab kom muaj peev xwm koom tes nrog Vajtswv mus rau qhov zoo. Hnub no, koj koom tes nrog Vajtswv, uas yog txhawm rau hais tias muaj ib lub hom phiaj rau koj txoj kev caum, rau koj cov lus thov, thiab rau koj txoj kev qhia Vajtswv cov lus, thiab koj ua koj lub luag hauj lwm raws nraim li Vajtswv cov kev cheem tsum kom ua—tsuas yog qhov no xwb thiaj li yog kev koom tes nrog Vajtswv. Yog tias koj tsuas hais txog kev cia kom Vajtswv ua xwb, tiam sis tsis ua ib yam dab tsi li, tsis hais kev thov Vajtswv los sis kev nrhiav Vajtswv, ces qhov no puas tuaj yeem hu tau tias kev koom tes? Yog tias koj tsis muaj tus cwj pwm ntawm kev koom tes nyob rau hauv koj li, thiab tu ncua txoj kev cob qhia rau kev to taub qhov tseeb uas muaj ib lub hom phiaj, ces koj tab tom tsis koom tes. Ib txhia neeg hais tias: “Txhua yam nyob ntawm Vajtswv txoj kev npaj tseg, txhua yam yog tau ua los ntawm Vajtswv Tus Kheej; yog hais tias Vajtswv tsis tau ua, ces tib neeg yuav ua li cas ua tau?” Vajtswv txoj hauj lwm yeej ib txwm nyob li qub, thiab tsis yog ib qho hwj huaj me me uas tshwm qhov twg los kiag li, thiab nws tsuas yog los ntawm koj txoj kev nquag nrhiav uas Vajntsujplig Dawb Huv ua hauj lwm xwb, rau qhov Vajtswv tsis quab yuam tib neeg—koj yuav tsum muab sij hawm rau Vajtswv ua hauj lwm, thiab yog tias koj tsis caum los sis tsis to taub, thiab yog tias hauv koj lub siab tsis muaj ib qho kev ntshaw me me li, ces Vajtswv tsis muaj lub caij nyoog yuav ua tau hauj lwm. Koj yuav nrhiav kom tau Vajtswv los tshoov koj lub siab los ntawm txoj kev twg? Los ntawm kev thov Vajtswv, thiab los ze zog rau ntawm Vajtswv. Tiam sis qhov tseem ceeb tshaj plaws, nco ntsoov tias, nws yuav tsum los ntawm lub hauv paus ntawm cov lus uas tau hais los ntawm Vajtswv lawm. Thaum koj raug Vajtswv tshoov siab tas li, koj tsis raug cev nqaij tawv txwv lawm: Tus txiv, tus poj niam, me nyuam thiab nyiaj txiag—txhua yam no tsis muaj peev xwm khi tau koj, thiab koj tsuas xav caum qhov tseeb thiab ua neej nyob rau ntawm Vajtswv xub ntiag xwb. Lub sij hawm no, koj yuav yog ib tug neeg uas ua neej nyob muaj kev ywj pheej ntawm sab ntsujplig.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Paub Vajtswv Txoj Hauj Lwm Uas Tshiab Tshaj Plaws thiab Raws Nws Tej Hneev Taw

Vajtswv Tej Lus Txhua Hnub  Nqe Lus Uas Xaiv Tawm Los 400

Vajtswv tau txiav txim siab khov kho los muab tib neeg kho kom muaj txhua yam, thiab tsis hais Nws yuav hais rau fab twg tuaj li, tag nrho tej no ces yeej puav leej yog ua kom tib neeg zoo tiav log xwb. Cov lus uas hais los ntawm tus Ntsujplig tuaj mas nyuab heev rau neeg to taub; lawv tsis muaj tej hau kev uas yuav nrhiav tau txoj kev los xyaum coj, vim lawv muaj peev xwm to taub tsawg heev. Vajtswv tej hauj lwm mas ua tau ntau yam sib txawv tshwm sim, thiab thaum nce tej kauj ruam ntawm tes hauj lwm ces Nws muaj Nws lub hom phiaj. Tshaj qhov ntawd, nws yog ib qho tseem ceeb heev uas Nws yuav tau hais lus los ntawm ntau fab uas sib txawv, vim yuav tsum ua li ntawd mas Nws thiaj kho tau kom tib neeg zoo tiav log. Yog hais tias Nws tsuas hais Nws lub suab tawm ntawm tus Ntsujplig xwb, ces yuav tsis muaj txoj hau kev ua kom theem no ntawm Vajtswv tej hauj lwm tiav hlo li. Los ntawm lub suab lus uas Nws hais, koj muaj cuab kav pom hais tias Nws yeej rau siab ntso ua kom pawg neeg no muaj txhua yam tiav hlo. Yog li ntawd dab tsi yog thawj kauj ruam rau cov uas xav kom raug muab tsim kho kom zoo tiav log? Tshaj txhua yam tib si, koj yuav tsum paub Vajtswv tes hauj lwm. Hnub no, ib txog hau kev tshiab twb pib nyob rau hauv Vajtswv tes hauj lwm lawm; tiam no twb pib hloov mus lawm, Vajtswv qhov kev ua hauj lwm los yeej hloov mus lawm, thiab tus yeeb yam hais lus ntawm Vajtswv los yeej hloov tib si lawm. Hnub no, tsis yog txoj hau kev ntawm Nws tes hauj lwm tau hloov lawm xwb, tab sis tiam ntawm tes hauj lwm los yeej tau hloov lawm thiab. Tam sim no yog Tiam Lub Nceeg Vaj lawm. Nws yog tiam ntawm Vajtswv tus uas muaj kev hlub. Nws yog ib qho poov saj rau Tiam Lub Nceeg Vaj Ib Txhiab Xyoo—uas yeej tseem yog Tiam Txoj Lus tib yam nkaus, thiab yog tiam uas Vajtswv siv ntau yam kev hais lus los kho kom tib neeg zoo tiav log, thiab hais lus los ntawm ntau fab los pub txhua yam rau tib neeg. Thaum nkag kiag mus rau hauv Tiam Lub Nceeg Vaj Ib Txhiab Xyoo lawm, ces Vajtswv yuav pib siv tej lus los ua kom tib neeg zoo tiav log, cia tib neeg los to taub lub neej qhov muaj tiag thiab coj lawv mus rau txoj kev yog. Qhov tau ntsib tau pom ntau theem ntawm Vajtswv tes hauj lwm lawm, tib neeg tau pom hais tias Vajtswv tes hauj lwm mas tsis yog yuav nyob twj ywm tsis txawj hloov li, tab sis yeej loj hlob thiab mus tob yam tsis tso tseg li. Tom qab uas neeg tau ntsib tau pom qhov ntawd ntev lawm, tes hauj lwm tau kiv ncig vaj voog mus los tas mus li, hloov tas los hloov dua tshiab tas mus li. Txawm nws yuav hloov mus li cas los xij, nws yeej tsis txav tawm ntawm Vajtswv lub hom phiaj uas yuav coj kev cawm dim los rau neeg ntiaj teb. Txawm yuav muaj kaum txhiab qhov kev hloov pauv, los nws yeej tsis plam ntawm nws lub hom phiaj thaum xub thawj mus li. Tsis hais txoj hau kev ua hauj lwm ntawm Vajtswv tes hauj lwm yuav hloov, tes hauj lwm no yeej tsis tawm ntawm qhov tseeb los sis ntawm txoj sia mus li. Kev hloov pauv ntawm kev ua hauj lwm mas tsuas yog muaj ib qho kev hloov pauv ntawm qhov uas seb yuav ua yam twg ua ntej yam twg lawv qab xwb, thiab qhov kev xav uas Vajtswv siv hais lus; nws tsis muaj dab tsi hloov hauv lub hom phiaj loj ntawm Vajtswv tes hauj lwm li. Kev hloov hauv Vajtswv lub suab lus thiab Nws qhov kev ua hauj lwm mas yuav tsum muaj es thiaj li ua tau ib qho tiav hlo. Ib qho kev hloov hauv lub suab lus tsis tau txhais hais tias muaj kev hloov nyob rau hauv lub hom phiaj los sis qhov keeb laj fai ntawm tes hauj lwm. Cov neeg ntseeg Vajtswv mas qhov loj yog yuav nrhiav kev ciaj; yog koj ntseeg Vajtswv tab sis ho tsis nrhiav kev ciaj los sis nrhiav qhov tseeb los sis nrhiav kev paub txog Vajtswv, ces qhov no tsis yog ib qho kev ntseeg Vajtswv! Thiab nws puas yog ib qho muaj tseeb uas yuav nrhiav kev nkag mus rau lub teb chaws mus ua vaj ntxwv? Nrhiav tau kev hlub tseeb rau Vajtswv los ntawm kev nrhiav kev ciaj—tsuas yog qhov no xwb thiaj li yog qhov muaj tiag; qhov kev nrhiav thiab kev xyaum ua raws qhov tseeb—tag nrho tej no thiaj li yog qhov muaj tiag. Nyeem Vajtswv tej lus, thiab ntsib kiag pom kiag tej lus no, ces koj yuav to taub txog txoj kev paub Vajtswv nyob rau tej kev ntsib kev pom tiag tiag no, thiab qhov no yog qhov txhais hais tias nrhiav tiag tiag.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tiam Lub Nceeg Vaj Yog Tiam Txoj Lus

Vajtswv Tej Lus Txhua Hnub  Nqe Lus Uas Xaiv Tawm Los 401

Tam sim no yog Tiam Lub Nceeg Vaj. Qhov uas seb koj puas tau nkag los rau tiam tshiab no mas nyob ntawm qhov seb koj puas tau nkag mus rau qhov tseeb ntawm Vajtswv tej lus, nyob rau qhov uas seb Nws tej lus puas tau rais los ua koj lub neej qhov muaj tiag. Vajtswv tej lus tau raug muab qhia kom txhua tus paub es kom, thaum kawg, tag nrho sawv daws thiaj li nyob rau hauv lub ntiaj teb ntawm Vajtswv tej lus, thiab Nws cov lus yuav qhia kom txhua tus paub thiab kom to taub meej sab hauv nruab siab tuaj. Yog hais tias, nyob rau lub sij hawm no, koj tsis quav ntsej nyeem Vajtswv tej lus, thiab tsis muaj siab rau Nws tej lus, ces qhov no qhia tau hais tias koj tus yam ntxwv ntawd tsis yog lawm. Yog hais tias koj tsis muaj cuab kav yuav nkag tau mus rau Tiam Txoj Lus, ces tus Vajntsujplig tsis ua hauj lwm nyob rau hauv koj; yog koj tau nkag los mus rau tiam no, Nws yuav ua Nws tes hauj lwm. Koj yuav ua li cas thaum pib ntawm Tiam Txoj Lus es thiaj yuav tau txais tes hauj lwm ntawm tus Vajntsujplig? Nyob rau tiam no, thiab nyob rau ntawm nej sawv daws, Vajtswv yuav ua kom tiav qhov tseeb nram qab no: hais tias txhua tus neeg yuav tsum ua raws li Vajtswv tej lus, yuav tsum muaj cuab kav muab qhov tseeb coj los mus xyaum ua, thiab yuav tsum hlub Vajtswv tiag tiag li; hais tias txhua tus neeg yuav tsum siv Vajtswv tej lus los ua qhov tseem ntsiab hauv paus thiab ua lawv qhov tseeb, thiab yuav tsum muaj lub siab hwm Vajtswv; thiab hais tias, qhov uas lawv muab Vajtswv tej lus coj los xyaum ua raws ntawd, tib neeg thiaj li yuav muaj hwj chim loj cuag vaj ntxwv ua ke nrog Vajtswv. Qhov no yog tes hauj lwm uas Vajtswv yuav ua kom tiav hlo. Koj yuav cia li nyob yam tsis nyeem Vajtswv tej lus li puas tau? Hnub no, muaj coob tus uas xav hais tias lawv yeej tsis muaj cuab kav yuav nyob dhau ib hnub los sis ob hnub es tsis nyeem Nws tej lus li. Lawv yuav tsum tau nyeem Nws tej lus txhua txhua hnub, thiab yog tsis muaj sij hawm, mloog xwb los yeej tau lawm thiab. Qhov no yog qhov kev xav uas tus Vajntsujplig muab rau neeg, thiab nws yog txoj kev uas Nws pib muab lawv hloov. Qhov ntawd yog, Nws siv cov lus tswj fwm neeg, es kom lawv thiaj li muaj cuab kav nkag tau los mus rau qhov tseeb ntawm Vajtswv tej lus. Yog hais tias, tom qab ib hnub uas tsis tau noj thiab haus Vajtswv tej lus, koj hnov zoo li muaj kev tsaus ntuj thiab nqhis dej, thiab thev tsis taus li, qhov no qhia tau hais tias koj raug tus Vajntsujplig muab hloov lawm, thiab hais tias Nws yeej tsis tau tig khiav ntawm koj mus li. Yog li ntawd, koj yog ib tug uas nyob rau hauv tus me nyuam dej ntws no. Txawm li cas los xij, yog hais tias tom qab li ib hnub los sis ob hnub uas tsis tau noj thiab haus Vajtswv tej lus lawm, es koj tsis hnov dab tsi li, yog koj tsis muaj ib qho nqhis li, thiab zoo li tsis hloov ib qho li, ces qhov no qhia tau hais tias tus Vajntsujplig tau tig tawm ntawm koj mus lawm. Yog li ces, qhov no ntaus nqi tau hais tias muaj qee yam tsis zoo nyob rau hauv koj lawm; koj tsis tau nkag tau mus rau hauv Tiam Txoj Lus, thiab koj yog ib tug ntawm cov uas poob qab lawm. Vajtswv siv cov lus los kav cov neeg; koj yuav kaj siab yog hais tias koj tau noj thiab haus Vajtswv tej lus, thiab yog koj tsis tau, ces koj tsis muaj kev taug li. Vajtswv tej lus rais los ua neeg tej zaub mov, thiab lub zog uas txhawb lawv. Vajluskub hais tias “Tib neeg yuav tsis ua neej nyob tau los ntawm kev noj cov ncuav ci nkaus xwb, tab sis los ntawm txhua lo lus hais tawm los ntawm Vajtswv lub qhov ncauj los” (Mathai 4:4). Hnub no, Vajtswv yuav muab nws tes hauj lwm ua kom tiav hlo, thiab Nws muab qhov tseeb hauv nej ua kom tiav hlo. Yog ua li cas es yav tag los, neeg yeej tsis nyeem Vajtswv tej lus tau ntau hnub thiab tab sis tseem muaj cuab kav noj thiab ua hauj lwm li qub, tab sis tam sim no ho tsis zoo li ntawd lawm? Nyob rau tiam no, Vajtswv feem ntau siv cov lus los tswj hwm txhua yam. Tib neeg raug Vajtswv cov lus txiav txim thiab ua kom zoo tiav log, thiab thaum kawg thiaj li raug cov lus no coj mus rau hauv lub nceeg vaj. Tsuas yog Vajtswv cov lus xwb thiaj li yug tau tib neeg txoj sia, thiab tsuas yog Vajtswv cov lus xwb thiaj li muab tau qhov kaj thiab txoj kev xyaum ua rau tib neeg, tshwj xeeb mas yog nyob rau Tiam Lub Nceeg Vaj. Tsuav koj tsis yuam kev ntawm qhov muaj tiag ntawm Vajtswv cov lus, qhov noj thiab haus Nws cov lus txhua hnub mus xwb, ces Vajtswv yuav ua kom koj zoo tiav log.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tiam Lub Nceeg Vaj Yog Tiam Txoj Lus

Vajtswv Tej Lus Txhua Hnub  Nqe Lus Uas Xaiv Tawm Los 402

Kev nrhiav lub neej txoj sia tsis yog ib yam uas yuav maj tau; kev loj hlob ntawm lub neej txoj sia mas tsis yog yuav tshwm sim tau rau ib hnub los sib ob hnub xwb. Vajtswv tes hauj lwm mas yeej zoo li tej ib txwm muaj thiab ib txwm ua tau, thiab muaj ib qho txheej txheem uas txhua yam yuav tsum tau ua raws. Nws siv sij hawm peb caug-peb xyoos ntau rau tus Yexus uas los yug ua neeg ntawd thiaj li ua tiav Nws txoj hauj lwm uas raug ntsia rau saum ntoo khaub lig ntawd—yog li qhov twg ntawm kev ntxuav kom tib neeg dawb huv thiab kev hloov nws lub neej, yog qhov hauj lwm uas nyuab tshaj plaws? Nws tsis yog ib qho yooj yim los muab ib tug neeg dog dig los coj thiab ua kom tshwm sim zoo li Vajtswv. Qhov no mas yeej zoo li ntawd tiag rau cov neeg uas yug nyob rau hauv tus zaj loj liab ploog lub teb chaws, cov uas muaj peev xwm tsawg thiab yuav tsum siv sij hawm ntev rau Vajtswv tej lus thiab tes hauj lwm. Yog li ntawd tsis txhob ua siab luv tos saib seb tej yam tshwm sim thaum kawg ntawd. Koj yuav tsum xub npaj rau tej kev noj thiab kev haus Vajtswv tej lus, thiab sib zog me ntsis rau Vajtswv tej lus. Thaum koj nyeem Nws tej lus tag lawm, koj yuav tsum muaj cuab kav muab cov lus ntawd coj los xyaum siv ua raws kiag, nrhiav tas zog ntxiv rau tej kev paub, kev to taub, kev thoob tsib, thiab kev ntse ntawm Vajtswv tej lus. Los ntawm qhov no, koj yuav hloov tau yam koj tsis nco ras txog li. Yog koj muaj cuab kav muab tej yam xws li kev noj kev haus Vajtswv tej lus, kev nyeem tej ntawd, kev paub tej ntawd, kev ntsib kev pom tej ntawd, thiab kev xyaum ua raws tej ntawd coj los ua koj qhov tseem ntsiab kev coj kev xav, ces koj yuav dhau los paub tab yam koj tsis ras txog li. Yeej muaj cov hais tias lawv tsis muaj peev xwm yuav muab Vajtswv tej lus coj los xyaum coj xyaum ua li txawm yog tom qab uas nyeem tag lawm los xij. Koj maj dab tsi? Thaum koj loj hlob txaus lawm, koj yuav muaj cuab kav muab Nws tej lus coj los xyaum coj xyaum ua tau. Ib tug me nyuam plaub los sis tsib xyoos puas yuav txawj hais tias lawv txhawb nqa los sis hwm hawm tsis tau lawv niam lawv txiv mas? Koj yuav tsum paub tias koj qhov kev loj hlob tam sim no zoo li cas xwb. Xyaum coj xyaum ua tej uas koj xyaum coj xyaum ua tau xwb, thiab yuav tsum zam tsis txhob ua ib tug neeg uas tab kaum los sis rhuav txoj kev tswj ntawm Vajtswv. Cia li noj thiab haus Vajtswv tej lus xwb, thiab muab qhov ntawd ua koj qhov keeb laj fai txij tam sim no mus. Tsis txhob txhawj, rau lub sij hawm no, hais tias xyov Vajtswv puas yuav muaj peev xwm muab koj tsim kho kom muaj txhua yam. Tsis txhob xuas nrhiav qhov ntawd tam sim no. Tsuas noj thiab haus Vajtswv tej lus thaum cov lus ntawd los rau koj, ces Vajtswv yeej yuav muab koj tsim kho kom muaj txhua yam xwb li. Txawm li cas los xij, nws yeej muaj ib qho tseem ntsiab hais tias koj yuav tsum noj thiab haus Nws tej lus li cas. Tsis txhob lam tau lam ua yam li tej neeg dig muag. Qhov noj thiab haus Vajtswv tej lus, ib qho thiab mas, nrhiav cov lus uas koj tsim nyog yuav tsum paub—qhov ntawd yog, cov uas muaj feem xyuam rau tej zeem muag—thiab ntxiv ntawd, ces nrhiav tej uas koj tsim nyog yuav tsum muab coj los xyaum ua raws tiag—qhov ntawd yog, qhov uas koj tsim nyog yuav tsum nkag mus rau. Ib qho mas yog kev paub, thiab ib qho mas yog kev nkag mus rau. Thaum uas koj tuav tau ob qho tib si—thaum uas koj tuav tau qhov uas koj tsim nyog paub thiab qhov uas koj tsim nyog xyaum ua—ces koj yeej yuav paub noj thiab haus Vajtswv tej lus xwb.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tiam Lub Nceeg Vaj Yog Tiam Txoj Lus

Vajtswv Tej Lus Txhua Hnub  Nqe Lus Uas Xaiv Tawm Los 403

Txij no lawm yav tom ntej, hais txog Vajtswv tej lus mas yuav tsum yog koj qhov tseem ntsiab kev coj kev ntseeg uas koj yuav tsum hais txog. Raws li ib txwm mas, thaum nej los ua ke, nej yuav tsum sib koom sib tham txog Vajtswv tej lus, muab Vajtswv tej lus ua lub ntsiab lus ntawm nej qhov kev sib cev ncauj cev lus, tham txog tej uas nej paub txog tej lus no, nej muab tej no coj los xyaum coj xyaum ua li cas, thiab seb tus Vajntsujplig ua hauj lwm li cas. Thaum uas koj tseem tham txog Vajtswv tej lus, tus Vajntsujplig yuav ci ntsa kom koj pom kev. Yuav kom ua tau lub ntiaj teb ntawm Vajtswv tej lus mas yuav tsum muaj tib neeg txoj kev koom tes. Yog koj tsis nkag los rau qhov no, Vajtswv yuav tsis muaj kev ua hauj lwm; yog koj kaw koj lub qhov ncauj twj ywm thiab tsis tham txog Nws cov lus, Nws yuav tsis muaj kev ci ntsa kom koj pom kev. Thaum uas koj tsis muaj dab tsi khuam, tham txog Vajtswv tej lus, thiab tsis txhob lam sib tham dog dig yam tsis muaj qab hau! Cia koj lub neej txoj sia kom muaj Vajtswv tej lus nyob puv npo rau hauv—thaum ntawd mas koj thiaj yuav ua tau ib tug uas muaj lub siab ntseeg tiag tiag. Nws tsis yog ib qho tseem ceeb txawm koj qhov kev sib tham sib raug zoo ntawd yuav yog ib qho ntiav ntiav sab nraud xwb los xij. Yog tsis muaj qhov ntiav ntiav ces yeej tsis muaj qhov tob tob li. Nws yuav tsum muaj ib qho txheej txheem. Los ntawm koj qhov kev xyaum ntawd, koj yuav tuav tau qhov kev ci ntsa kom pom kev ntawm tus Vajntsujplig los rau koj, thiab to taub hais tias yuav noj thiab haus Vajtswv tej lus li cas thiaj yuav yog qhov yog. Tom qab ib ncua kev soj ntsuam xyuas lawm, koj yuav nkag mus rau hauv qhov tseeb ntawm Vajtswv tej lus. Tsuas yog thaum koj yeej qhau siab hlo los koom tes lawm mas koj thiaj li yuav muaj cuab kav tau txais tes hauj lwm ntawm tus Vajntsujplig.

Ntawm qhov tseem ntsiab ntawm kev noj thiab kev haus Vajtswv tej lus, mas ib qho ces yog hais txog kev paub, thiab ib qho ces hais txog kev nkag mus rau hauv. Cov lus twg yog cov uas koj tsim nyog yuav tsum los paub? Koj yuav tsum los paub cov lus uas hais txog tej zeem muag (xws li, cov uas hais txog tiam twg uas Vajtswv tes hauj lwm twb tau nkag los mus rau lawm, dab tsi yog qhov uas Vajtswv ua kom tiav tam sim no, kev yug los ua neeg yog dab tsi, thiab ntxiv mus; tag nrho tej no yog hais txog tej zeem muag). Txoj kev uas tib neeg yuav tsum nkag mus rau txhais tau li cas? Qhov no yog hais txog Vajtswv tej lus uas tib neeg yuav tsum muab coj los xyaum ua raws thiab nkag mus rau. Cov saum toj no yog ob yam ntawm kev noj thiab kev haus Vajtswv tej lus. Txij no mus, noj thiab haus Vajtswv tej lus li no. Yog koj yeej to taub meej txog Nws cov lus hais txog tej zeem muag lawm, ces tsis tas yuav nyeem tag mus li los yeej tau. Qhov tseem ceeb ua ntej tshaj plaws ces yog noj thiab haus tej lus uas hais txog kev nkag mus rau hauv, xws li yuav tig koj lub siab mus rau Vajtswv li cas, yuav ua cas muab koj lub siab ua kom nyob ntsiag to ntawm Vajtswv lub xub ntiag, thiab yuav tig tawm tsam lub cev nqaij daim tawv tau li cas. Tej no yog tej yam uas koj yuav tau muab coj los xyaum ua. Yog tsis muaj kev paub txog hais tias yuav noj thiab haus Vajtswv tej lus li cas, ces yuav muaj tsis tau txoj kev sib koom tiag hlo li. Thaum koj paub noj thiab haus Nws tej lus lawm, thaum koj tuav nkaus tau hais tias tus yawm sij yog dab tsi lawm, kev sib koom yuav yog ib qho yooj yim, thiab txawm yuav muaj teeb meem dab tsi tshwm sim los, koj yeej yuav muaj cuab kav sib koom tau thiab to taub qhov tseeb. Yog hais tias, thaum sib koom nrog Vajtswv tej lus, koj tsis tau qhov tseeb, ces koj tuav tsis tau tus yawm sij, ces qhia tau kom pom hais tias koj tsis paub yuav noj thiab haus Vajtswv tej lus li cas. Ib txhia neeg mas yuav pom tau hais tias nyeem Vajtswv tej lus mas dhuav dhau heev lawm, ces qhov ntawd tsis yog ib qho yam ntxwv zoo li tej uas ib txwm muaj. Qhov uas ib txwm muaj mas yog qhov uas yeej tsis nkees nyeem Vajtswv tej lus li, yeej nqhis tej ntawd tas mus li xwb, thiab yeej pom tau hais tias Vajtswv tej lus mas tsuas muaj qhov zoo nkaus xwb. Qhov no yog qhov uas ib tug neeg twg nkag tau mus noj thiab haus Vajtswv tej lus tiag tiag li. Thaum uas koj xav tau hais tias Vajtswv tej lus mas ua raws tau yooj yim heev thiab yog kiag qhov uas tib neeg yuav tsum nkag mus rau; thaum uas koj xav hais tias Nws tej lus mas yeej pab tau thiab muaj txiaj ntsim heev rau tib neeg, thiab tej lus ntawd yog qhov pab cuam rau tib neeg txoj sia—ces yog tus Vajntsujplig muab qhov kev xav no rau koj, thiab nws yog tus Vajntsujplig uas hloov koj. Qhov no ua pov thawj tau hais tias tus Vajntsujplig yeej ua hauj lwm nyob rau hauv koj thiab hais tias Vajtswv yeej tseem tsis tau tig tawm ntawm koj mus. Ib txhia neeg, pom hais tias Vajtswv mas yeej hais lus tas mus li, ces cia li dhuav Nws tej lus, thiab xav hais tias lawv txawm yuav nyeem thiab tsis nyeem Nws tej lus los yeej tsis muaj dab tsi li—ces qhov ntawd tsis yog tus yam ntxwv uas ib txwm muaj. Lawv tsis muaj ib lub siab uas yuav nqhis kev nkag mus rau qhov tseeb, thiab cov neeg zoo li ntawd ces yeej tsis nqhis los sis muab kev tsim kho kom zoo tag nrho ntawd saib tseem ceeb li. Thaum twg los xij uas koj pom tau hais tias koj tsis nqhis Vajtswv tej lus lawm, ces qhov no qhia tau hais tias koj tsis nyob rau qhov yam ntxwv uas ib txwm muaj lawm. Nyob rau yav dhau los, mas qhov uas seb Vajtswv puas tau tig tawm ntawm koj mus ces yeej ntsuas tau kom paub meej los ntawm qhov uas seb koj lub siab puas nyob tus, thiab seb koj puas muaj kev xyiv fab. Tam sim no tus yawm sij ces yog qhov uas seb koj puas nqhis Vajtswv tej lus, seb Nws tej lus puas yog koj qhov tseeb, seb koj puas ua siab ncaj rau, thiab seb koj puas muaj peev xwm ua txhua yam uas koj ua tau rau Vajtswv. Ua lwm yam hais ces, tib neeg yuav raug txiav txim los ntawm qhov tseeb ntawm Vajtswv tej lus. Vajtswv hais Nws cov lus ncaj qha rau neeg ntiaj teb tag nrho tib si. Yog koj kam nyeem tej ntawd, Nws yuav qhia kom koj paub meej, tab sis yog koj tsis kam, ces Nws yuav tsis qhia. Vajtswv qhia kom cov uas tshaib thiab nqhis txoj kev ncaj ncees paub kom meej, thiab Nws qhia kom cov nrhiav Nws paub kom meej. Ib txhia hais tias Vajtswv yeej tsis qhia kom lawv paub meej li txawm yog tom qab uas lawv nyeem Nws tej lus los xij. Tab sis koj ho nyeem Nws tej lus li cas? Yog koj nyeem Nws tej lus li ib tug neeg caij nees saib tej paj hmab paj ntoos xwb, thiab tsis saib qhov tseeb kom tseem ceeb, ces Vajtswv yuav ua cas qhia kom koj paub meej tau mas? Ib tug neeg uas twb tsis saib Vajtswv tej lus muaj nuj nqis es Nws yuav ua cas muab tus neeg ntawd ua kom zoo tiav log tau mas? Yog koj tsis saib Vajtswv tej lus muaj nuj nqis, ces koj yuav tsis tau qhov tseeb thiab qhov muaj tiag. Yog koj saib Nws tej lus muaj nuj nqis, ces koj yuav muaj cuab kav muab qhov tseeb coj los xyaum ua raws tau, thiab tsuas yog thaum ntawd xwb mas koj thiaj li yuav muaj tau qhov tseeb uas muaj tiag. Qhov no yog qhov uas koj yuav tsum tau noj thiab haus Vajtswv tej lus txhua lub sij hawm, txawm hais tias koj yuav khoom thiab tsis khoom los xij, txawm hais tias tej xwm txheej ntawd yuav phem thiab zoo los xij, thiab txawm hais tias koj yuav raug sim thiab tsis raug los xij. Tag nrho txhua yam, Vajtswv tej lus yog qhov tseem ntsiab hauv paus ntawm qhov uas muaj tib neeg. Tsis muaj ib tug twg uas yuav tig tawm ntawm Nws tej lus mus tau li, tab sis yuav tsum noj Nws tej lus li qhov uas lawv noj zaub mov ib hnub peb pluag. Kev raug tsim kho kom zoo tshaj plaws thiab kev raug muab tau los ntawm Vajtswv puas yooj yim npaum li ntawd? Txawm koj yuav to taub tam sim no thiab tsis to taub los xij, thiab koj txawm yuav pom meej txog Vajtswv tes hauj lwm thiab tsis pom los xij, koj yuav tsum noj thiab haus Vajtswv tej lus kom ntau li ntau tau. Qhov no yog kev xub npaj nkag mus rau. Tom qab nyeem Vajtswv tej lus tag lawm, maj nroos coj mus xyaum ua qhov uas koj yuav nkag mus rau hauv, thiab muab lub tsam thawj uas koj nkag tsis tau ntawd xyeeb zog rau ib sab. Tej zaum muaj ntau lo ntawm Vajtswv tej lus uas koj yuav tsis to taub thaum xub thawj, tab sis tom qab ob peb lub hlis, los tej zaum mas tseem yog ib xyoos, koj yuav to taub. Ua cas ho zoo li no? Nws yog vim tias Vajtswv ua tsis tau kom tib neeg zoo tiav log rau ib hnub los ob hnub xwb. Feem ntau mas, thaum koj nyeem Nws tej lus, tej zaum koj yuav tsis to taub tam sim ntawd. Nyob rau lub sij hawm ntawd, tej zaum mas tej ntawd tsuas zoo li tej ntawv sau dog dig xwb; koj yuav tsum tau ntsib tau pom tej ntawd kom ntev tsawv ua ntej koj yuav to taub. Vajtswv tau hais ntau heev, koj yuav tsum mob siab tshaj plaws los noj thiab haus Nws tej lus, thiab tom qab ntawd, koj yeej tsis ras txog li, koj yuav los to taub, thiab koj yeej tsis ras txog li, tus Vajntsujplig yuav qhia kom koj paub meej. Thaum tus Vajntsujplig qhia kom tib neeg pom meej, mas feem ntau ces tib neeg yeej tsis paub txog li. Nws ua kom koj pom thiab coj qhia koj thaum koj nqhis thiab nrhiav. Qhov tseem ntsiab uas tus Vajntsujplig ua hauj lwm ntawd mas nyob ncig ntawm Vajtswv tej lus uas koj noj thiab koj haus. Tag nrho cov uas saib Vajtswv tej lus tsis muaj nuj nqis thiab muaj tus cwj pwm txawv rau Nws tej lus ntawd tas mus li xwb—ntseeg, nyob rau hauv lawv qhov kev xav tsis meej pem ntawd, hais tias txawm lawv yuav nyeem thiab tsis nyeem los yeej tsis ua cas li—ces yog cov uas tsis tau qhov muaj tseeb. Tus Vajntsujplig tes hauj lwm thiab Nws qhov kev qhuab qhia ntawd yeej tsis pom muaj nyob rau hauv ib tug neeg zoo li ntawd li. Cov neeg zoo li no mas tsuas lam yoog ntws raws xwb, neeg ua txuj dag uas tsis muaj ib qho peev xwm tiag, zoo li tus yawg Naku-au hauv phau paj lug.^[a]

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tiam Lub Nceeg Vaj Yog Tiam Txoj Lus

Lus taw qhia:

a. Cov lus sau thaum xub thawj tsis muaj kab lus “hauv phau paj lug.”

Vajtswv Tej Lus Txhua Hnub  Nqe Lus Uas Xaiv Tawm Los 404

Thaum uas Vajtswv tej lus tawm los, koj yuav tsum txais yuav tam sim ntawd, thiab muab noj thiab haus kiag. Txawm koj yuav to taub ntau thiab tsawg npaum li cas los xij, qhov kev xav uas koj yuav tsum muaj ces yog qhov hais tias koj yuav tsum maj nroos noj thiab haus, kom paub, thiab muab coj mus xyaum ua raws Nws cov lus. Nov yog tej yam uas koj yuav tsum muaj cuab kav ua tau. Tsis txhob xav txog qhov uas seb koj lub siab yuav zoo li cas; tsuas tsom ntsoov qhov noj thiab haus Nws tej lus xwb. Qhov no yog qhov uas tib neeg yuav tsum koom tes nrog. Koj txoj sia sab ntsujplig yeej rau siab ntso yuav nkag mus rau qhov tseeb ntawm kev noj thiab kev haus Vajtswv tej lus thiab muab tej ntawd coj mus xyaum ua raws. Nws tsis yog koj txoj hauj lwm yuav mus tsom ntsoov rau lwm yam hlo li. Cov thawj coj ntawm pawg ntseeg yuav tsum muaj peev xwm coj tau lawv tej kwv tij thiab nkauj muam es kom lawv txawj noj thiab haus Vajtswv tej lus. Qhov no yog tes dej num ntawm txhua tus thawj coj hauv pawg ntseeg. Txawm lawv yuav hluas los laus, tag nrho sawv daws yuav tsum saib kev noj thiab kev haus Vajtswv tej lus ua qhov tseem ceeb thiab yuav tsum muaj Vajtswv tej lus nyob rau hauv lawv lub siab. Nkag los rau hauv qhov muaj tseeb txhais tau hais tias nkag los rau hauv Tiam Lub Nceeg Vaj. Hnub no, neeg feem coob xav hais tias lawv yuav ua tsis taus neeg nyob yog tsis tau noj thiab haus Vajtswv tej lus, thiab xav hais tias Nws tej lus yog yam tshiab tshiab tsis hais yog lub sij hawm twg li. Qhov no txhais tau hais tias lawv tab tom pib tau txoj kev yog lawm. Vajtswv siv tej lus los ua Nws tes hauj lwm thiab pab cuam rau tib neeg. Thaum txhua tus ntshaw thiab nqhis Vajtswv tej lus, neeg ntiaj teb yuav nkag mus rau lub ntiaj teb ntawm Nws tej lus.

Vajtswv tau hais ntau heev. Koj ho paub ntau npaum li cas lawm? Koj ho nkag tau rau npaum li cas lawm? Yog ib tug thawj coj ntawm pawg ntseeg tsis tau coj lawv tej kwv tij thiab nkauj muam nkag mus rau qhov tseeb ntawm Vajtswv tej lus, ces lawv tau muab lawv tes dej num tso tseg, thiab yuav ua tsis tau lawv tes dej num kom tiav hlo! Tsis hais koj txoj kev to taub ntawd txawm yuav tob los ntiav li cas li, tsis hais theem ntawm koj txoj kev nkag siab ntau los tsawg li, koj yuav tsum paub noj thiab haus Nws tej lus, koj yuav tsum mloog Nws cov lus kom zoo, thiab to taub qhov tseem ceeb thiab qhov tim tsum ntawm kev noj thiab kev haus tej ntawd. Vajtswv tau hais ntau heev lawm, yog koj tsis noj thiab haus Nws tej lus, los sis sim nrhiav, los sis muab Nws tej lus coj los xyaum ua raws, qhov no ces hu tsis tau hais tias ntseeg Vajtswv. Vim koj ntseeg Vajtswv, ces koj yuav tsum noj thiab haus Nws tej lus, ntsib thiab pom Nws tej lus, thiab ua raws Nws tej lus. Tsuas yog qhov no xwb thiaj hu tau hais tias kev ntseeg Vajtswv! Yog koj hais tias koj ntseeg Vajtswv nrog koj lub qhov ncauj xwb thiab tab sis tsis muaj cuab kav muab Nws tej lus coj los xyaum ua raws los sis tsim kom muaj ib qho tseeb, qhov no tsis yog hais tias ntseeg Vajtswv. Tab sis, nws tsuas yog “tas zog noj koj cov ncuav ci kom tsau plab” xwb. Tsuas hais txog tej lus tim khawv ntiav ntiav xwb, tej yam siv tsis tau, thiab tej yam dog dig, yeej tsis muaj ib qhov tseeb me me hlo li: tej no ua tsis tau kev ntseeg Vajtswv, thiab koj yeej tseem tsis paub txog txoj kev ntseeg Vajtswv uas yog hlo li. Vim li cas es koj thiaj li tsim nyog yuav tsum noj thiab haus Vajtswv tej lus kom ntau li ntau tau? Yog koj tsis noj thiab haus Nws tej lus tab sis tsuas nrhiav kev nce mus rau ceeb tsheej xwb, qhov ntawd puas yog ntseeg Vajtswv mas? Thawj kauj ruam uas tus neeg ntseeg Vajtswv yuav tsum tau ua yog dab tsi? Vajtswv ho siv txoj kev twg los tsim kho kom tib neeg zoo tiav log? Koj puas yuav muaj cuab kav raug muab tsim kho kom zoo tiav log yam tsis noj thiab tsis haus Vajtswv tej lus li mas? Koj puas yuav raug xam hais tias yog ib tug neeg ntawm lub nceeg vaj yog tsis muaj Vajtswv tej lus ua koj qhov tseeb? Kev ntseeg Vajtswv txhais tau li cas tiag mas? Cov ntseeg Vajtswv, mas yam tsawg, yuav tsum coj kom zoo rau sab nraud; qhov tseem ceeb tshaj mas yuav tsum muaj Vajtswv tej lus tuav rawv. Tsis hais yuav muaj dab tsi li, koj yeej tsis muaj peev xwm yuav khiav tawm ntawm Nws txoj lus mus tau li. Kev paub Vajtswv thiab ua raws li Nws tej kev xav ces yeej ua tau nyob rau hauv Nws tej lus. Nyob rau yav tom ntej, txhua lub teb chaws, txhua pab pawg ntseeg, txhua txoj kev ntseeg thiab txhua thaj chaw yuav raug ntaus yeej los ntawm Vajtswv tej lus. Vajtswv yuav hais ncaj qha, thiab tag nrho cov neeg yuav tuav Vajtswv tej lus rau hauv lawv txhais tes, thiab ua li no, ces neeg ntiaj teb yuav raug tsim kho kom zoo tiav log. Nyob rau sab hauv los sis nyob rau sab nraud, Vajtswv tej lus yuav hlav nthuav tawm thoob plaws: Neeg ntiaj teb yuav hais Vajtswv tej lus nrog lawv lub qhov ncauj, xyaum ua raws li Vajtswv tej lus, thiab khaws Vajtswv tej lus cia sab hauv, raug tsau rau hauv Vajtswv tej lus tag nrho sab hauv thiab sab nraud tib si. Ua li ntawd ces neeg ntiaj teb thiaj yuav raug tsim kho kom zoo tiav log. Cov uas ua tau raws li Vajtswv tej kev xav thiab muaj cuab kav ua tim khawv tau rau Nws, cov no yog cov neeg uas muaj Vajtswv tej lus ua lawv qhov tseeb.

Nkag los mus rau Tiam Txoj Lus—Tiam Lub Nceeg Vaj Ib Txhiab Xyoo—yog tes hauj lwm uas tab tom ua kom tiav hnub no. Txij no mus, xyaum sib tham sib qhia txog Vajtswv tej lus. Tsuas yog kev noj thiab kev haus nrog rau kev ntsib kev pom Vajtswv tej lus xwb mas koj thiaj yuav muaj cuab kav ua tau raws li Vajtswv tej lus. Koj yuav tsum tsim kom muaj tej kev ntsib kev pom uas yeej muaj peev xwm ua tau ntawd mas thiaj li yuav hais tau lwm tus ntseeg li ntawd. Yog koj tsis muaj peev xwm ua tau raws li qhov tseeb ntawm Vajtswv tej lus, yuav tsis muaj leej twg ntseeg li! Tag nrho cov uas Vajtswv siv mas muaj peev xwm ua tau raws li qhov tseeb ntawm Vajtswv tej lus. Yog koj ua tsis tau kom muaj qhov tseeb no thiab ua tim khawv rau Vajtswv, qhov no qhia kom pom tau hais tias tus Vajntsujplig tsis tau ua hauj lwm rau hauv koj, thiab koj tseem tsis tau raug muab tsim kho kom zoo tiav log. Qhov no yog qhov tseem ceeb ntawm Vajtswv tej lus. Koj puas muaj ib lub siab uas nqhis Vajtswv tej lus? Cov uas nqhis Vajtswv tej lus ces nqhis qhov tseeb, thiab tsuas yog cov neeg zoo li no thiaj tau txais koob hmoov ntawm Vajtswv xwb. Nyob rau yav tom ntej, yuav muaj lus ntau heev uas Vajtswv yuav hais rau tag nrho txhua txoj kev ntseeg thiab txhua pab pawg ntseeg. Nws xub hais ua ntej thiab hais Nws lub suab rau nej es ua kom nej muaj txhua yam tiav hlo ua ntej uas yuav mus hais ntxiv thiab hais Nws lub suab nrov rau Lwm Haiv Neeg kom ntaus yeej tag nrho lawv. Nyob rau hauv Nws cov lus ntawd, tag nrho sawv daws yuav ntseeg tag nrho tiag tiag li. Nyob rau hauv Vajtswv tej lus thiab Nws cov lus qhia tshwm, tib neeg tus yam ntxwv coj tsis ncaj yuav muaj tsawg zuj zus, nws yuav tau lub ntsej muag thiab lub cev zoo li ib tug tib neeg, thiab nws tus yam ntxwv tig tawm tsam ntawd yuav muaj tsawg zuj zus. Cov lus ua hauj lwm rau tib neeg yam muaj hwj chim kav thiab kov yeej tib neeg nyob rau hauv Vajtswv tus duab ci. Tes hauj lwm uas Vajtswv ua rau tiam tam sim no, nrog rau qhov chaw tig ntawm Nws tes hauj lwm, ces yeej muaj nyob rau hauv Nws tej lus. Yog tias koj tsis nyeem Nws cov lus, ces koj yuav tsis to taub dab tsi li. Nyob hauv koj tus kheej qhov kev noj thiab kev haus Nws tej lus, thiab nyob rau hauv kev sib qhia nrog rau koj cov kwv tij thiab cov nkauj muam thiab koj qhov kev ntsib kev pom tiag, koj yuav tau txais kev paub puv npo txog Vajtswv tej lus. Tsuas yog thaum ntawd xwb mas koj thiaj yuav ua tau raws li lawv qhov tseeb.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tiam Lub Nceeg Vaj Yog Tiam Txoj Lus

Vajtswv Tej Lus Txhua Hnub  Nqe Lus Uas Xaiv Tawm Los 405

Kuv twb tau hais dua lawm hais tias “Tag nrho cov uas tsom ntsoov saib tej cim thiab tej hwj huaj txawv txawv yuav raug tso pov tseg; lawv tsis yog cov uas yuav raug tsim kho kom zoo tshaj plaws.” Kuv tau hais lus ntau heev, tab sis tib neeg tseem tsis paub ib qho me me txog tes hauj lwm no li, thiab, tau los txog qhov nov, es neeg tseem nug txog tej cim thiab tej hwj huaj txawv txawv. Koj qhov kev ntseeg Vajtswv es tsis muaj dab tsi tshaj qhov kev nrhiav tej cim thiab tej hwj huaj txawv txawv, los sis yog yuav ua kom tau txoj sia? Yexus kuj hais lus ntau, thiab muaj ib co mas yeej tseem tsis tau muaj tiav. Koj hais puas tau hais tias Yexus tsis yog Vajtswv mas? Vajtswv ua pov thawj hais tias Nws yog Khetos thiab Leej Tub uas Vajtswv hlub tshaj plaws. Koj tsis lees qhov no puas tau mas? Hnub no, Vajtswv tsuas hais lus xwb, thiab yog koj tsis paub qhov no kom thoob, ces koj sawv tsis tau khov kho. Koj puas ntseeg Nws vim Nws yog Vajtswv, los sis puas yog koj ntseeg Nws raws li qhov uas seb Nws cov lus puas muaj tiav xwb mas? Koj puas ntseeg tej cim thiab tej hwj huaj txawv txawv, los sis koj puas ntseeg Vajtswv? Hnub no, Nws tsis ua kom koj pom tej cim thiab tej hwj huaj txawv txawv—ua Nws puas yog Vajtswv tiag? Yog cov lus Nws hais tsis tau tshwm sim, ua Nws puas yog Vajtswv tiag mas? Qhov tseem ntsiab ntawm Vajtswv ces yog qhia tau los ntawm qhov uas seb cov lus Nws hais puas muaj tiav xwb los? Vim li cas es ib txhia neeg pheej yuav tos kom txog thaum uas Vajtswv cov lus muaj tiav ua ntej ces lawv mam ntseeg Nws? Qhov no tsis txhais hais tias lawv tsis paub Nws los? Tag nrho cov uas muaj qhov kev xav phem li ntawd ces yog cov uas tsis lees paub Vajtswv. Lawv siv kev xav phem los ntsuas Vajtswv; yog Vajtswv cov lus muaj tiav, ces lawv ntseeg Nws, thiab yog tsis muaj tiav, ces lawv tsis ntseeg Nws; thiab lawv pheej nrhiav tej cim thiab tej hwj huaj txawv txawv tas mus li xwb. Cov neeg no tseem tsis yog cov Falixais rau tiam teb chaws vam meej no thiab los? Qhov uas seb koj puas yuav sawv tau khov kho ntawd mas nyob ntawm qhov uas koj puas paub tus Vajtswv uas muaj tiag—qhov no tseem ceeb heev! Yog Vajtswv txoj lus yim tshwm sim muaj tiag nyob rau hauv koj, ces koj haj yam paub Vajtswv qhov uas tshwm sim kiag, thiab koj yuav muaj cuab kav sawv tau khov dua rau lub sij hawm raug sim siab. Koj yim tsom ntsoov rau qhov pom tej cim thiab tej hwj huaj txawv txawv, koj yim muaj peev xwm sawv khov kho tsawg, thiab koj yuav ntog thaum raug kev sim siab. Tej cim thiab tej hwj huaj txawv txawv ces tsis yog lub hauv paus keeb cag; tsuas yog Vajtswv qhov uas tshwm sim kiag xwb mas thiaj yog txoj sia. Ib txhia neeg mas tsis paub txog qhov tshwm sim los ntawm Vajtswv tes hauj lwm. Lawv siv lawv lub sij hawm txhua hnub rau kev feeb tsis meej, tsis nrhiav kev paub txog Vajtswv tes hauj lwm. Lub hom phiaj ntawm tej lawv nrhiav ces tsuas yog yuav kom Vajtswv ua kom tej lawv xav tau ntawd muaj tiav xwb, thiab tsuas yog thaum ntawd xwb mas lawv thiaj li yuav ntseeg tiag tiag. Lawv hais tias lawv yuav nrhiav txoj sia yog hais tias Vajtswv cov lus muaj tiav, tab sis yog hais tias Nws cov lus tsis muaj tiav, ces lawv yeej tsis muaj hnub yuav nrhiav txoj sia li. Tib neeg xav hais tias ntseeg Vajtswv ces yog nrhiav kev saib tej nyuag cim thiab tej hwj huaj txawv txawv thiab nrhiav kev nce mus saum ceeb tsheej thiab lub ceeb tsheej thib peb. Tsis muaj leej twg hais tias lawv qhov kev ntseeg Vajtswv ces yog kev nrhiav kev to taub qhov tseeb txog qhov muaj tiag, kev nrhiav txoj sia, thiab kev nrhiav qhov kom Vajtswv muab tau. Kev nrhiav tej yam no ho muaj nuj nqis dab tsi thiab? Cov uas tsis nrhiav kev paub Vajtswv thiab Vajtswv qhov kev txaus siab ces yog cov uas tsis ntseeg Vajtswv; lawv yog cov uas saib tsis taus Vajtswv!

Tam sim no nej puas to taub hais tias txoj kev ntseeg Vajtswv yog dab tsi? Ua kev ntseeg Vajtswv puas yog kev saib tej cim thiab tej hwj huaj txawv txawv? Puas yog kev nce mus saum ceeb tsheej? Kev ntseeg Vajtswv mas tsis yog ib qho yooj yim me ntsis kiag li. Tej niag txheej txheem kev ntseeg ntawd yuav tsum tau muab ntxuav pov tseg; nrhiav kev kho tej neeg mob thiab ntiab dab tawm, kev tsom ntsoov rau tej cim thiab tej hwj huaj txawv txawv, txeeb tau Vajtswv tej kev hlub kom tau ntau, kev thaj yeeb thiab kev zoo siab, nrhiav cib fim zoo thiab kev tau zoo rau lub cev nqaij daim tawv—tej no yog txheej txheem kev ntseeg thiab tej txheej txheem kev ntseeg ntawd yog hom kev ntseeg uas pom tsis meej. Kev ntseeg Vajtswv tiag hnub no yog dab tsi? Nws yog kev txais yuav Vajtswv txoj lus los ua koj txoj sia qhov muaj tiag thiab kev paub Vajtswv los ntawm Nws txoj lus es kom muaj ib txog kev hlub tiag rau Nws. Hais kom meej: Ntseeg Vajtswv es kom koj thiaj li zwm rau Vajtswv, hlub Vajtswv, thiab ua tes dej num uas tsim nyog ib tug uasraug tsim tawm los yuav tsum tau ua kom tiav. Qhov nov yog lub hom phiaj ntawm kev ntseeg Vajtswv. Koj yuav tsum kawm kom tau ib qho kev paub txog Vajtswv qhov kev ntxim hlub, paub txog qhov uas Vajtswv tsim nyob tau txais kev hwm hawm npaum li cas, paub txog qhov uas, nyob rau hauv cov uas raug Nws tsim tawm los ntawd, Vajtswv ua tes hauj lwm ntawm kev cawm dim thiab tsim kho kom tib neeg kom zoo tshaj plaws li cas—tej no yog cov tseem ntsiab uas tseem ceeb ntawm koj qhov kev ntseeg Vajtswv. Ntseeg Vajtswv ces yog kiag qhov uas hloov ntawm lub neej ntawm cev nqaij daim tawv mus rau lub neej uas hlub Vajtswv; hloov ntawm qhov ua neej qias vuab tsuab mus rau qhov ua neej ntawm Vajtswv cov lus; nws yog qhov kev tawm hauv Ntxwgnyoog lub hwj chim los thiab nyob rau hauv qab txoj kev saib xyuas thiab kev tiv thaiv ntawm Vajtswv; nws yog qhov uas muaj cuab kav zwm tau rau Vajtswv es txhob zwm rau lub cev nqaij daim tawv; nws yog qhov uas cia Vajtswv los muab kom tau tag nrho koj lub siab, cia Vajtswv muab koj ua kom zoo tshaj plaws li, thiab tso koj tus kheej tawm ntawm tus moj yam phem qias vuab tsuab. Ntseeg Vajtswv ces qhov tseem ceeb yog cia kom Vajtswv lub hwj chim loj thiab lub yeej koob tshwm sim rau hauv koj, es kom koj thiaj li ua tau raws li Vajtswv siab nyiam, thiab ua kom Vajtswv qhov phiaj xwm tiav hlo, thiab muaj peev xwm hais lus tim khawv rau Vajtswv tau ntawm Ntxwgnyoog xub ntiag. Ntseeg Vajtswv yuav tsum tsis txhob yog nyob ncig qhov kev xav pom tej nyuag cim thiab tej hwj huaj txawv txawv, los sis tsis yog yuav npaj rau cev nqaij daim tawv nkaus xwb. Nws yuav tsum yog kev nrhiav kev paub Vajtswv, thiab kev muaj peev xwm zwm rau Vajtswv, thiab, ib yam nkaus li Petus, zwm rau Nws mus kom txog thaum yus tuag kiag. Tej no yog tej hom phiaj tseem ceeb ntawm kev ntseeg Vajtswv. Yus noj thiab haus Vajtswv txoj lus kom paub Vajtswv thiab ua tau rau Nws txaus siab. Qhov noj thiab haus Vajtswv txoj lus muab kev paub loj dua txog Vajtswv rau koj, mas tsuas yog tom qab ntawd mas koj thiaj li yuav zwm rau Nws xwb. Yuav tsum yog muaj kev paub Vajtswv mas koj thiaj li yuav hlub tau Nws, thiab qhov no yog lub hom phiaj uas tib neeg yuav tsum muaj nyob rau hauv kev ntseeg Vajtswv. Yog hais tias, nyob rau hauv koj qhov kev ntseeg Vajtswv ntawd, koj pheej tsuas muaj nrhiav kom pom tej cim thiab tej hwj huaj txawv txawv nkaus xwb, ces qhov kev xav ntawm qhov kev ntseeg Vajtswv zoo li no yuam kev lawm. Kev ntseeg Vajtswv ces qhov tseem ceeb yog kev txais yuav Vajtswv txoj lus coj los ua lub neej qhov muaj tiag. Vajtswv lub hom phiaj mas tsuas ua tau los ntawm qhov uas muab Vajtswv cov lus los ntawm Nws lub qhov ncauj coj los xyaum ua raws kiag nyob rau hauv koj tus kheej. Nyob rau hauv kev ntseeg Vajtswv, tib neeg yuav tsum rau siab ntso kom raug Vajtswv muab tsim kho kom zoo tshaj plaws, kom muaj cuab kav nyoo zwm tau rau Vajtswv, thiab kom muaj kev zwm rau Vajtswv tag nrho. Yog koj muaj cuab kav zwm Vajtswv yam tsis cav tsis yws kiag li, ua tib zoo xav txog Vajtswv tej kev npaj siab, ua kom tau lub koob meej li Petus, thiab coj tau tus yam ntxwv li Petus hais txog Vajtswv, ces qhov ntawd yog thaum uas koj yeej ua tau tiav hlo rau qhov kev ntseeg Vajtswv lawm, thiab nws yuav qhia tau hais tias Vajtswv muab tau koj lawm tiag.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Txoj Lus Ua Tau Txhua Yam