Vajtswv Tej Lus Tseem Ceeb:

Kuv tes hauj lwm ces tsuas ntev txog rau txhiab xyoo xwb, thiab Kuv cog lus hais tias tus phem txoj kev tswj tag nrho tib neeg ces yeej yuav tsis ntev tshaj li rau txhiab xyoo thiab. Yog li ntawd, tam sim no ces lub sij hawm tag lawm. Kuv yuav tsis ua txuas ntxiv mus los sis theem kom ntev ntxiv lawm: Nyob rau tiam kawg Kuv yuav tua kom Ntxwgnyoog swb tag nrho, Kuv yuav muab tag nrho Kuv tej yeeb koob rov los, thiab Kuv yuav rov muab tag nrho cov ntsujplig uas yog Kuv tug nyob rau ntiaj teb ntawd rov qab los kom cov ntsujplig uas ntxhov ntxhov siab ntawd thiaj li khiav tawm tau hauv lub hiav txwv ntawm txoj kev txoj kev raug tsim txom ntawd, thiab yog li ntawd yuav xaus tag nrho Kuv tes hauj lwm hauv ntiaj teb. Txij hnub no mus lawm tom ntej, Kuv yuav tsis muaj hnub rov rais los muaj cev nqaij daim tawv nyob hauv ntiaj teb ib zaug ntxiv lawm, thiab Kuv tus Ntsujplig uas tswj txhua yam yuav tsis muaj hnub rov qab ua hauj lwm nyob rau ntiaj teb ntxiv lawm. Kuv tsuas ua ib yam nyob rau hauv ntiaj teb nkaus xwb: Kuv yuav rov tsim dua noob neej tshiab, ib co noob neej uas dawb huv thiab yog Kuv lub nroog uas muaj lub siab ncaj nyob rau hauv ntiaj teb. Tab sis paub hais tias Kuv yuav tsis rhuav tshem tag nrho lub ntiaj teb, los sis Kuv yuav tsis rhuav tshem tag nrho noob neej. Kuv yuav tseg ib feem uas seem ntawd—ib feem peb uas hlub Kuv thiab tau raug Kuv txeeb tau tag nrho lawm, thiab Kuv yuav ua kom ib feem peb no tawg paj txi txiv thiab huam vam nyob rau hauv ntiaj teb ib yam nkaus li cov neeg Yixayee nyob rau hauv txoj kev cai, yug zaub yug mov rau lawv nrog rau muab yaj thiab nyuj twm ntau heev thiab tag nrho tej kev nplua nuj ntawm ntiaj teb. Cov noob neej no yuav nyob nrog Kuv mus ib txhis, tab sis lawv yuav tsis yog cov noob neej uas qias ntxim ntxub li niaj hnub no lawm, tab sis yuav yog ib co noob neej uas yog ib pab ntawm cov uas tau raug Kuv muab tau lawm. Cov noob neej ntawd yuav tsis raug puas tsuaj, thab, los sis puav ncig los ntawm Ntxwgnyoog lawm, thiab yuav yog ib co noob neej uas tseem muaj nyob rau ntiaj teb tom qab Kuv tau tua yeej Ntxwgnyoog lawm xwb. Lawv yog cov noob neej uas niaj hnub no tau raug Kuv txeeb tau lawm thiab tau txais Kuv qhov kev cog lus lawm. Thiab yog li ntawd, cov noob neej uas tau raug txeeb tau nyob rau tiam kawg ces kuj yog cov noob neej uas yuav raug zam kom dim thiab yuav tau txais Kuv tej koob hmoov mus tag ib txhis. Nws yuav yog tib qho pov thawj txog Kuv qhov kev tua yeej Ntxwgnyoog xwb, thiab tib cov uas txeeb tau los ntawm Kuv qhov kev sib ntaus sib tua nrog Ntxwgnyoog. Cov txeeb tau ntawm kev ua rog los no yog Kuv cawm los ntawm Ntxwgnyoog lub hwj chim, thiab tsuas yog tib co khov ua thooj thiab cov tawg paj txi txiv ntawm Kuv txoj kev npaj cawm tib neeg rau-txhiab-xyoo.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsis Muaj Leej Twg uas Muaj Cev Nqaij Daim Tawv Yuav Khiav Dim Tau Hnub ntawm Txoj Kev Npau Taws

Cov uas caum Vajtswv tiag mas yeej muaj peev xwm txheem taus rau txoj kev sim ntawm lawv tes hauj lwm, hos cov uas tsis caum Vajtswv tiag mas yeej tsis muaj peev xwm yuav txheem taus txhua yam kev sim siab ntawm Vajtswv. Tsis yog tam sim no ces yeej yog lwm hnub xwb uas lawv yuav raug ntiab tawm, thaum uas cov kov yeej yuav tau nyob rau hauv lub nceeg vaj. Qhov uas seb tib neeg puas nrhiav Vajtswv tiag ntawd ces ntsuas tau los ntawm tej kev sim ntawm lawv tes hauj lwm, qhov ntawd yog, ua los ntawm Vajtswv tej kev sim siab, thiab tsis muaj ib yam dab tsi cuam tshuam txog tib neeg tus kheej qhov kev txiav txim siab. Vajtswv tsis yog yuav cia li lam tau lam tsis txais yuav ib tug neeg twg raws nws siab nyiam; txhua yam uas Nws ua ces yeej ua tau kom tib neeg ntseeg txaus nkaus li. Nws tsis ua tej yam uas kom tib neeg tsis pom li, los sis tej yam hauj lwm uas yuav ua tsis tau kom neeg ntseeg li. Qhov uas seb tib neeg txoj kev ntseeg ntawd yuav muaj tseeb los tsis tseeb ntawd ces yog muaj pov thawj los ntawm qhov tseeb xwb thiab tib neeg yuav txiav txim siab tsis tau. Nqe lus “nplej muab ua tsis tau txhauv, thiab txhauv muab ua tsis tau nplej” yeej muaj tseeb tiag. Tag nrho cov uas hlub Vajtswv ces thaum kawg yuav tau nyob rau hauv lub nceeg vaj, thiab Vajtswv yuav tsis ua phem rau ib tug neeg twg uas yeej hlub Nws tiag. Ntsuas raws li lawv tes hauj lwm thiab tej lus tim khawv uas sib txawv ntawd, mas cov kov yeej nyob rau hauv lub nceeg vaj ces yuav tau ua pov thawj los sis cov ntseeg, thiab tag nrho cov uas yeej nyob rau thaum lub sij hawm uas muaj kev ceeb laj txom nyem loj ntawd yuav tau ua pov thawj nyob rau hauv lub nceeg vaj. Pab pov thawj ntawd yuav raug tsim tsa thaum uas tes hauj lwm ntawm txoj moo zoo nyob hauv lub qab ntuj khwb no los xaus lawm. Thaum lub sij hawm ntawd los txog, tej uas tib neeg tsim nyog ua ntawd yuav raug ua nyob rau hauv lawv tes dej num nyob hauv Vajtswv lub nceeg vaj, thiab hauv lawv qhov kev nrog Vajtswv nyob ua ke kiag hauv lub nceeg vaj. Nyob rau hauv pab pov thawj ntawd yuav muaj cov thawj pov thawj thiab cov pov thawj, thiab cov seem ces yuav ua Vajtswv cov tub thiab Vajtswv cov neeg. Tag nrho tej no mas yuav tau los ntawm lawv tej lus tim khawv rau Vajtswv thaum uas muaj kev ceeb laj kev txom nyem loj ntawd; tej ntawd tsis yog tej koob npe uas Vajtswv cia li lam muab raws siab nyiam. Thaum uas tib neeg tej meej mom ntawd raug tsim tsa tiav lawm, ces Vajtswv tes hauj lwm yuav xaus, vim txhua tus twb raug cais tso raws li lawv hom thiab muab tso rov qab rau lawv tes dej num qub lawm, thiab qhov no yog qhov ntaus cim ntawm Vajtswv tes hauj lawm uas muab ua tiav hlo lawm, nws yog qhov tau los ntawm Vajtswv tes hauj lwm thiab tib neeg qhov kev xyaum ua, thiab nws yog qhov khov ua ib thooj tawm los ntawm cov zeem muag ntawm Vajtswv tes hauj lwm thiab tib neeg txoj kev koom tes. Nyob rau thaum kawg, tib neeg yuav nrhiav tau chaw nyob hauv Vajtswv lub nceeg vaj, thiab Vajtswv, los ib yam nkaus li thiab, yuav rov mus rau Nws qhov chaw nyob los mus so. Qhov no yuav yog qhov tshwm sim thaum kawg ntawm 6,000 xyoo ntawm kev koom tes ntawm Vajtswv thiab tib neeg.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Tes Hauj Lwm thiab Tib Neeg Qhov Kev Xyaum Ua

Ziag no koj puas tau nkag siab txog tias txoj kev txiav txim yog dab tsi thiab qhov tseeb yog dab tsi? Yog tias koj nkag siab, ces Kuv thov koj kom ua raws li txoj kev txiav txim yam mloog lus hlo, tsis li ntawd koj yuav tsis muaj lub cib fim uas Vajtswv yuav pom zoo li los sis raug Nws coj los rau hauv Nws lub teb chaws li. Cov neeg uas tsuas lees txais txoj kev txiav txim xwb tab sis tsis muaj hnub yuav raug ntxuav kom dawb huv, uas yog cov neeg khiav tawm ntawm tes dej num ntawm txoj kev txiav txim, yuav raug tshem mus thiab raug Vajtswv ntiab tawm mus ib txhis li. Lawv tej kev txhaum muaj txim ntau heev, thiab phem tshaj cov Falixais li lawm, vim lawv tau ntxeev siab rau Vajtswv thiab tawm tsam Vajtswv. Cov neeg zoo li no uas haj tseem tsis tsim nyog los ua hauj lwm ntawd yuav tau txais kev rau txim hnyav dua, txoj kev rau txim uas yog, ntau tshaj, ntev mus li ib txhis. Vajtswv yuav tsis tseg txhua tus neeg ntxeev siab uas txawm tias yav dhau los tau npuab siab los ntawm cov lus tab sis tom qab ho tau ntxeev siab rau Nws. Cov neeg xws li cov no yuav tsum tau txais kev ua pauj los ntawm kev rau txim ntawm tus plig, tus ntsuj, thiab lub cev. Qhov no tsis yog ib qho kev qhia meej ntawm txoj kev xav ncaj ncees ntawm Vajtswv los? Nov tsis yog Vajtswv lub ntsiab los txiav txim rau tib neeg, thiab qhia tawm txog tib neeg los? Vajtswv pom zoo muab txhua tus uas ua txhua hom kev phem thaum ncua sij hawm ua txoj kev txiav txim mus rau qhov chaw uas muaj cov ntsujplig phem, thiab cia cov ntsujplig phem no ua kom lawv lub cev nqaij puas ntsoog raws li qhov lawv xav tau, thiab cov neeg ntawd lub cev tshwm pob txha tsw lwj ntxiag. Ntawd yog lawv li kev raug ua pauj uas tsim nyog. Vajtswv sau cia rau hauv lawv phau ntawv ceev tseg txhua yam kev txhaum ntawm cov neeg ntseeg cuav uas tsis muab siab npuab, cov thwj tim cuav, thiab cov neeg ua dej num cuav; tom qab ntawd, thaum txog lub sij hawm zoo lawm, Nws muab lawv cuam mus rau hauv cov ntsujplig qias, kom cov ntsujplig qias no noj lawv lub cev kom tag huv si raws li lawv lub siab nyiam, kom lawv thiaj li tsis los yug dua tshiab thiab tsis pom qhov kaj ntxiv lawm. Cov neeg ntsej muag ncaj siab nkhaus uas ua dej num pab ib ntus tab sis tsis muaj peev xwm ua lub siab ntev npuab siab mus txog hnub kawg yog raug suav los ntawm Vajtswv tias yog cov phem, yog li ntawd lawv thiaj li yuav poob mus ua ke nrog rau cov phem thiab mus ua ib feem ntawm lawv cov neeg phem; thaum kawg, Vajtswv yuav rhuav tshem lawv. Vajtswv muab cais rau ib sab thiab tsis quav ntsej txog cov neeg uas ib txwm tsis tau npuab siab rau Khetos los sis yeej tsis tau siv lawv lub dag zog los pab ua ib yam dab tsi li, thiab txog thaum hloov lub caij nyoog Nws yuav muab lawv rhuav tshem tag nrho txhua tus. Lawv yuav tsis muaj nyob rau lub ntiaj teb mus ntxiv li lawm, haj yam tsis muaj feem nkag mus rau hauv Vajtswv lub teb chaws. Cov uas ib txwm yeej tsis muaj lub siab dawb paug rau Vajtswv, tab sis raug yuam lam los cuag Nws thaum ntsib kev nyuaj siab, raug suav nrog cov neeg uas ua dej num rau Nws cov neeg. Tsuas yog qee pab neeg tsawg tsawg ntawm cov neeg zoo li no thiaj yuav dim xwb, hos feem coob yuav puas tsuaj nrog cov uas tes hauj lwm tsis mus raws li tus qauv quag li. Thaum kawg, Vajtswv yuav coj mus rau hauv Nws lub teb chaws tag nrho cov uas muaj lub siab zoo ib yam li Vajtswv, cov tib neeg thiab Vajtswv cov me nyuam, thiab cov uas Vajtswv tau xaiv los ua pov thawj. Lawv yuav yog cov thawj lim ntawm Vajtswv tes dej num. Cov neeg uas tsis tuaj yeem raug cais tawm hauv pab pawg uas raug teev tseg los ntawm Vajtswv, lawv yuav raug suav nrog cov tsis ntseeg Vajtswv, thiab nej tuaj yeem xam pom yam tseeb tseeb tias lawv tej kev tshwm sim yuav zoo li cas. Kuv twb hais rau nej txhua yam uas Kuv yuav tsum hais lawm; txoj kev uas nej xaiv yeej yog nej txoj kev xaiv nkaus xwb. Yam uas nej yuav tsum to taub yog qhov no: Vajtswv tes hauj lwm yeej tsis tos ib tug neeg twg uas raws tsis tau Nws qab, thiab Vajtswv tus moj yam ncaj ncees yeej tsis muaj kev hlub tshua rau ib tug neeg twg li.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Ua tes Hauj lwm ntawm Txoj Kev Txiav Txim Nrog Qhov Tseeb

Cov uas tsuas xav txog lawv cev nqaij daim tawv thiab cov uas xyiv fab kaj siab lug nkaus xwb; cov uas zoo li ntseeg tab sis tsis ntseeg tiag tiag; cov uas tau koom rau hauv yam tshuaj phem thiab khawv koob; cov uas tsis xaiv ntsej xaiv muag, hais lus luam thuam thiab qias neeg; cov uas nyiag tej khoom fij rau Yehauvas thiab txhua yam uas Nws muaj; cov uas nyiam tej nyiaj xiab; cov uas npau suav toog tab sis xav mus saum ntuj ceeb tsheej; cov uas khav theeb thiab tsab ntse, cov uas tsuas mob siab rau tus kheej lub koob npe thiab txoj hmoov xwb; cov uas qhia tawm cov lus tsis raug raws li qhov muaj tiag; cov uas thuam Vajtswv Tus Kheej; cov uas tsis ua dab tsi li tab sis tsim tej kev txiav txim tawm tsam thiab hais lus phem rau Vajtswv Tus Kheej; cov uas sib sau ua ke thiab nrhiav kev ywj pheej; cov uas tsa lawv tus kheej siab tshaj Vajtswv; cov neeg hluas uas tsis paub qab hau dab tsi, cov neeg ib nrab neej thiab cov txiv neej thiab cov poj niam laus uas mag ntxiab; cov txiv neej thiab cov poj niam uas xyiv fab rau tus kheej lub koob npe thiab txoj hmoov thiab caum raws tus kheej lub meej mom rau ntawm lwm cov neeg; cov tib neeg uas tsis paub tu siab rau qhov ua txhaum uas mag ntxiab rau txoj kev txhaum—tsis yog lawv, tag nrho lawv, dhau ntawm txoj kev cawm dim mus lawm los? Kev tso cai, kev txhaum, tshuaj phem, khawv koob, kev thuam, thiab cov lus hais tsis tsim nyog puav leej tsim kev tsis thaj yeeb rau ntawm nej; thiab qhov tseeb thiab cov lus ntawm lub neej raug tsuj rau ntawm nej, thiab cov lus dawb huv raug tsuas dub tsis huv rau ntawm nej lawm. Nej yog Lwm Haiv Neeg, o wv nrog txoj kev qias neeg thiab kev tsis mloog lus! Nej qhov ua tau thaum kawg yuav yog dab tsi? Cov uas hlub cev nqaij daim tawv, cov uas ua khawv koob ntawm cev nqaij daim tawv tuaj yeem ua tau li cas, thiab cov mag ntxiab rau hauv txoj kev txhaum tseem muaj cuab kav ua lub neej mus txuas ntxiv tau! Koj tsis paub tias cov tib neeg zoo li nej cov ntawm ko yog cov kas ua dhau ntawm txoj kev cawm dim mus lawm los? Dab tsi ua rau koj xav tau qhov no thiab qhov ntawd? Los txog tam sim no, tseem tsis muaj ib qho hloov pauv me me rau hauv cov uas tsis hlub qhov tseeb thiab tsuas hlub cev nqaij daim tawv xwb—cov tib neeg zoo li no yuav raug cawm dim tau li cas? Cov uas tsis hlub txoj hau kev ntawm txoj sia, cov uas tsis txhawb tsa Vajtswv thiab hais lus tim khawv rau Nws, cov uas npaj rau tej txiaj ntsim ntawm lawv tus kheej lub meej mom, cov uas tau qhuas lawv tus kheej—lawv tseem tsis yog cov zoo tib yam, li niaj hnub no los? Yam muaj nqis rau hauv kev cawm lawm yog dab tsi? Txawm tias koj yuav raug cawm los sis tsis raug cawm los xij nyob rau ntawm qhov laus npaum li cas lawm los sis koj tau ua dej num los tau pes tsawg xyoo lawm, thiab tsawg heev nws thiaj li nce raws li tej kev ntseeg siab uas koj tau tsim dhau los. Tab sis, nws nce raws li qhov koj caum raws seb tawg los sis tsis tawg paj txi txiv. Koj yuav tsum paub tias cov uas raug cawm yog “cov ntoo” uas txi txiv, tsis yog cov ntoo uas nplooj ntsuab xwb xiab thiab tawg paj ntau heev tiam sis tsis muaj ib lub txiv hlo li. Txawm tias koj twb siv ntau lub xyoo ntoj ncig mus raws tej kev, qhov tseem ceeb ntawd yog dab tsi? Koj qhov lus tim khawv nyob rau qhov twg lawm? Koj qhov kev hwm rau Vajtswv tseem tsawg dua koj txoj kev hlub rau koj tus kheej thiab koj txoj kev ntshaw ua plees ua yi—hom neeg no tsis yog ib hom neeg phem los? Lawv yuav ua tau ib tug qauv piv txwv thiab tus qauv rau txoj kev cawm dim tau li cas? Koj tus yeeb yam yeej kho tsis tau lawm, koj ntxeev siab heev dhau lawm, koj dhau ntawm txoj kev cawm dim mus lawm! Cov neeg zoo li no tsis yog cov yuav raug muab ntiab tawm mus los? Lub sij hawm thaum Kuv txoj dej num raug ua tiav tsis yog lub sij hawm los txog ntawm koj tiam kawg los? Kuv ua txoj dej num tau ntau heev lawm thiab tau hais ntau cov lus rau ntawm nej lawm—muaj ntau npaum li cas ntawm tej ntawd uas tau nkag rau hauv koj ob lub pob ntseg tiag tiag lawm? Koj tau mloog nws lus ntau npaum li cas lawm? Thaum Kuv txoj dej num xaus, qhov ntawd yuav yog thaum lub sij hawm koj tsum qhov tawm tsam Kuv, thaum koj tsum qhov sawv tawm tsam Kuv lawm. Thaum Kuv ua dej num, nej nqis tes tawm tsam Kuv tas li; nej yeej tsis yeem nrog Kuv cov lus li. Kuv ua Kuv txoj dej num, thiab koj tsis ua koj tus kheej “txoj dej num,” tsim lub nceeg vaj me me rau nej tus kheej. Nej tsis muaj dab tsi tab sis tsuas yog ib pab hma thiab dev xwb, ua txhua yam tsis haum xeeb rau Kuv! Koj tseem niaj hnub rub cov uas muab lawv txoj kev hlub nkag los rau hauv koj xub ntiag—nej txoj kev hwm nyob qhov twg lawm? Txhua yam uas nej ua yog txawj dag! Koj tsis muaj kev mloog lus los sis kev hwm li, thiab txhua yam uas koj ua yog txawj dag thiab thuam xwb! Cov tib neeg zoo li no puas raug cawm? Cov txiv neej uas nyiam ua plees ua yi tsis raws kev raws cai ib txwm xav ntxias tej niam ntiav los rau lawv tus kheej txoj kev lom zem xyiv fab tas li. Kuv yuav tsis cawm cov dab phem nyiam ua plees ua yi zoo li no kiag li. Kuv ntxub nej cov dab phem qias neeg, thiab nej txoj kev plees kev yi thiab kev ua niam ntiav yuav raug yuj rau hauv dab tuag teb. Yam uas nej yuav tsum tau hais rau nej tus kheej yog dab tsi? Nej cov dab phem qias neeg thiab cov ntsujplig phem yog yam ntxim ntxub! Nej ntxim ntxub ua luaj! Cov tsis muaj qab hau zoo li no yuav raug cawm tau li cas? Lawv cov mag ntxiab rau hauv txoj kev txhaum lawm puas tseem raug cawm dim? Niaj hnub no, qhov tseeb no, txoj hau kev no, thiab txoj sia no tsis muaj qhov ntxim siab rau nej; tab sis, nej pheej nyiam rau kev txhaum; rau nyiaj txiag; rau kev sawv siab, suab npe thiab muab tau; rau tej kev lom zem xyiv fab ntawm cev nqaij daim tawv; rau cov txiv neej zoo nraug thiab cov poj niam ntxim nyiam. Tej yam zoo uas ua rau nej nkag mus tau rau hauv Kuv lub teb chaws yog dab tsi? Nej tus duab tseem loj dua Vajtswv tus lawm thiab, nej lub meej mom tseem siab dua Vajtswv lub lawm thiab, tsis tau hais txog nej lub meej mom rau ntawm cov tib neeg—nej dhau los ua ib tug mlom uas tib neeg pe hawm lawm. Koj tsis yog thawj tug tub txib saum qaum ntuj los? Thaum tib neeg tej yam ua tau los raug nthuav tawm, nws kuj yog thaum txoj dej num ntawm kev cawm dim twb los ze rau qhov kawg lawm, coob leej ntawm nej cov ko yuav yog lub cev tuag uas dhau ntawm txoj kev cawm dim mus lawm thiab yuav tsum raug muab ntiab tawm mus. Thaum lub sij hawm kev cawm dim, Kuv yeej siab zoo thiab coj zoo rau txhua tus tib neeg. Thaum txoj dej num xaus, tej yam ua tau los ntawm cov hom neeg sib txawv yuav raug nthuav tawm, thiab nyob rau lub sij hawm ntawd, Kuv yuav tsis ua siab zoo thiab ua zoo ntxiv lawm, vim tej ua tib neeg ua tau los ntawd twb raug muab nthuav tawm lawm, thiab txhua leej yuav raug faib mus raws li lawv hom, thiab yuav tsis muaj txiaj ntsim dab tsi rau hauv kev ua kev cawm dim lawm, vim hais tias tiam ntawm kev cawm dim yuav tau dhau lawm, thiab, thaum tau dhau mus lawm, ces nws yuav tsis tig rov qab los lawm.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Kev Xyaum Ua Raws (7)

Thaum lub ntiaj teb qub tseem muaj nyob, Kuv yuav pov Kuv txoj kev npau taws los rau txhua lub teb chaws thiab tshaj tawm tej kev cai tswj fwm uas muab tshaj tawm rau tag nrho lub qab ntuj khwb, thiab leej twg ua txhaum tej kev cai tswj fwm ntawd yuav raug rau txim:

Thaum Kuv hais lus rau tag nrho lub qab ntuj khwb, txhua tus tib neeg hnov Kuv lub suab, qhov ntawd uas yog, txhua tus tib neeg pom tag nrho tej hauj lwm uas Kuv tau ua thoob plaws lub qab ntuj khwb. Cov uas tawm tsam Kuv tej kev npaj siab, qhov ntawd hais tau hais tias, cov uas tawm tsam Kuv los ntawm tib neeg tej kev ua xwb ces yuav poob mus rau hauv Kuv txoj kev rau txim. Kuv yuav hloov tej hnub qub ntau ntau saum ntuj ntawd kom tshiab; vim yog Kuv, lub hnub thiab lub hli thiaj li yuav raug hloov kom tshiab, lub ntuj yuav tsis zoo li qub lawm; thiab txhua yam hauv ntiaj teb yuav raug hloov kom tshiab—yuav ua tau tag nrho tej no kom tiav vim yog Kuv cov lus. Txhua lub teb chaws hauv lub qab ntuj khwb yuav raug muab faib dua tshiab thiab raug hloov los ntawm Kuv lub nceeg vaj, kom tej teb chaws hauv ntiaj teb thiaj li yuav ploj mus ib txhis, thiab tsuas muaj lub nceeg vaj uas pe hawm Kuv lawm xwb; tag nrho tej teb chaws hauv ntiaj teb yuav raug rhuav tshem thiab tsis muaj nyob mus ntxiv lawm. Hais txog cov tib neeg nyob rau hauv lub qab ntuj khwb, tag nrho cov uas yog cov dab phem yuav raug muab rhuav tshem kom tag. Tag nrho cov uas pe hawm Ntxwgnyoog yuav poob mus rau hauv Kuv lub cub tawg kub—qhov ntawd yog, tshwj kiag cov uas tam sim no yoog raws xwb, tag nrho yuav raug mus ua tshauv. Thaum Kuv rau txim rau txhua tus neeg, ces cov zej zog ntawm sab kab lis kev cai ntseeg yuav, nyob rau ntau theem, rov qab los rau Kuv lub nceeg vaj, thiab raug txeeb tau los ntawm Kuv tej hauj lwm, vim lawv yuav tau pom tias “tus Dawb Huv uas caij ib tuav huab dawb” twb los txog lawm. Txhua tus tib neeg yuav raug muab cais mus raws li lawv hom, thiab yuav tau txais ntau yam kev rau txim uas phim rau lawv tej kev ua; tag nrho cov uas tau tawm tsam Kuv lawm yuav puas tsuaj, thiab hais txog cov uas lawv tej hauj lwm hauv ntiaj teb tsis cuam tshuam rau Kuv ntawd, lawv yuav, vim yog tej uas lawv tau ua lawm, nyob hauv lub ntiaj teb mus ntxiv uas yog nyob rau hauv kev tswj hwm ntawm Kuv cov tub thiab Kuv cov neeg. Kuv yuav tshwm los rau tag nrho tej teb chaws thiab tag nrho tej tib neeg, thiab Kuv yuav nthuav Kuv lub suab tawm rau hauv lub ntiaj teb, tshaj tawm txog qhov ua Kuv tes hauj lwm loj tiav lawm, cia txhua tus tib neeg pom qhov no los ntawm lawv tus kheej lub qhov muag kiag.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 26

Tam sim no Kuv tab tom nrog Kuv cov tib neeg taug kev thiab Kuv nrog lawv nyob. Niaj hnub tam sim no, cov uas hlub Kuv tiag tiag ntawd—cov tib neeg zoo li no tau koob hmoov. Cov uas zwm rau Kuv yog cov tau koob hmoov, lawv yuav nyob rau hauv Kuv lub nceeg vaj. Cov uas paub Kuv yog cov tau koob hmoov, lawv yuav muaj hwj chim nyob rau hauv Kuv lub nceeg vaj. Cov uas caum Kuv yog cov tau koob hmoov, lawv yuav khiav dim ntawm Ntxwgnyoog tej hlua khi thiab tau txais Kuv tej koob hmoov. Cov uas muaj peev xwm ntxeev siab tawm tsam lawv tus kheej yog cov tau koob hmoov, Kuv yuav tau tswj kav lawv thiab tau txais ntau yam hauv Kuv lub nceeg vaj. Cov uas ua hauj lwm khwv heev rau Kuv Kuv yuav nco ntsoov, cov uas muab lawv tus kheej fij rau Kuv Kuv yuav txais yuav, thiab cov uas fij rau Kuv Kuv yuav muab yam uas ua rau lawv muaj kev xyiv fab rau lawv. Cov uas xyiv fab rau Kuv cov lus Kuv yuav foom koob hmoov rau; lawv yuav yog cov ncej tsev uas txheem tus nqaj yees hauv Kuv lub nceeg vaj, lawv yuav muaj kev xyiv fab heev nyob rau hauv Kuv lub tuam tsev, thiab tsis muaj leej twg yuav piv tau lawv li. Nej puas txeev tau txais tej koob hmoov uas twb npaj tseg rau nej lawm? Nej puas txeev tshawb nrhiav tej lus cog tseg uas tau cog tseg rau nej lawm? Nej yuav dim ntawm qhov txoj kev tsaus ntuj lub hwj chim nyem caj dab ntawd los ntawm Kuv qhov kev kaj txoj kev coj kev. Thaum nyob rau hauv txoj kev tsaus ntuj, nej yuav tsum txhob tso txoj kev kaj qhov kev coj kev tseg. Nej yuav yog tus tswv ntawm txhua yam. Nej yuav yog cov muaj yeej nyob rau ntawm Ntxwgnyoog lub xub ntiag. Thaum tus zaj loj liab ploog lub teb chaws poob, nej yuav sawv tsees hauv cov neeg coob coob los ua tim khawv qhia txog Kuv txoj kev muaj yeej. Nej yuav tsum sawv khov kho thiab txhob ua ywj fab ywj fwj rau hauv daim av Xinis. Vim txoj kev txom nyem uas nej tau nyiaj ntawd, nej yuav tau txais Kuv tej koob hmoov, thiab nej yuav ua rau Kuv lub koob meej ci ntsa iab mus thoob plaws hauv lub qab ntuj khwb.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 19

Sawv tsees los thiab koom tes nrog Kuv! Kuv yeej yuav tsis ua phem rau tus uas ua siab dawb paug muab lawv tus kheej fij rau Kuv. Raws li rau cov neeg uas mob siab rau Kuv tiag, Kuv yuav muab tag nrho Kuv cov koob hmoov rau koj. Muab tej yam ntawm koj tus kheej rau Kuv! Koj noj dab tsi, koj hnav dab tsi, thiab koj yav tom ntej yog txhua yam uas nyob hauv Kuv ob txhais tes; Kuv yuav npaj txhua yam kom zoo, kom koj tau muaj kev lom zem tsis paub kawg, uas koj yuav tsis siv li. Qhov no vim tias Kuv tau hais tias, “Rau cov neeg uas txaus siab them nqi rau Kuv tiag, Kuv yuav muab koob hmoov zoo rau koj ntau heev.” Txhua txoj koob hmoov yuav los rau txhua tus neeg uas muab nws tus kheej fij rau Kuv.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 70

Txhua yam uas Kuv tau npaj rau nej—ntawd yog, yam khoom muaj nqis uas muaj txiaj ntsig thoob plaws ntiaj teb—yuav raug muab rau nej. Tam sim no, nej tsis muaj peev xwm paub los sis tsis xav txog txhua yam ntawm no, thiab tsis muaj leej twg tau txaus siab lawv ua ntej dhau los li. Thaum cov koob hmoov no los rau nej, nej yuav zoo siab tsis muaj qhov kawg—tab sis tsis txhob hnov qab tias cov no yog tag nrho vim yog Kuv lub hwj chim, Kuv tes dej num, Kuv li kev ncaj ncees, thiab, ntau ntxiv yog, Kuv lub meej mom. (Kuv yuav ua siab zoo rau cov uas Kuv xaiv ua siab zoo rau, thiab Kuv yuav muaj lub siab hlub tshua cov uas Kuv xaiv los ua lub siab hlub tshua rau.) Lub sij hawm ntawd, nej yuav tsis muaj niam muaj txiv, thiab yuav tsis muaj kev txheeb ze koom roj koom ntshav. Nej txhua tus yog cov neeg uas Kuv hlub, Kuv cov tub uas Kuv hlub. Txij hnub ntawd mus, tsis muaj leej twg yuav twv yuav thuam nej. Nws yuav yog ib lub sij hawm rau nej los loj hlob mus ua neeg laus, thiab yog ib lub sij hawm uas nej kav lub teb chaws nrog tus pas hlau! Leej twg muaj cuab kav cuam tshuam Kuv cov tub uas Kuv hlub? Leej twg muaj cuab kav tawm tsam lawv? Txhua tus yuav hwm Kuv cov tub uas Kuv hlub, vim tias Leej Txiv tau txais lub yeeb koob lawm. Txhua yam uas tsis muaj leej twg tuaj yeem xav txog yuav tshwm sim ntawm nej ob lub qhov muag; lawv yuav tsis muaj qhov kawg, tsis tag, thiab tsis paub xaus li. Tshuav tsis ntev, nej yuav tsis tas yuav ziab tshav los ntawm lub hnub los sis tiv cua sov uas tsim txom ntxiv lawm, los sis nej yuav tsis tau tiv qhov txias los sis tiv nag, daus, los sis cua ntxiv lawm. Qhov no vim tias Kuv hlub nej, thiab nws yuav yog ib lub ntiaj teb ntawm Kuv txoj kev hlub. Kuv yuav muab rau nej txhua yam uas nej xav tau, thiab Kuv yuav npaj rau nej txhua yam uas nej yuav tsum tau. Leej twg muaj cuab kav twv tias Kuv tsis ncaj ncees? Kuv yuav tua nej pov tseg tam sim ntawd, vim tias Kuv tau hais ua ntej tias Kuv txoj kev npau taws (tawm tsam cov phem) yuav nyob mus ib txhis, thiab Kuv yuav tsis tso ib qho me me li. Txawm li cas los xij, Kuv txoj kev hlub (rau Kuv cov tub uas Kuv hlub) tseem yuav nyob mus tag ib txhis; Kuv yuav tsis thim nws rov qab kom tsawg.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 84

Thaum kev txeeb tau ntawd raug ua tiav hlo lawm, tib neeg yuav raug coj los mus rau hauv ib lub ntiaj teb zoo nkauj heev. Lub neej no mas, muaj tseeb tiag, kuj tseem yuav nyob rau hauv ntiaj teb no thiab, tab sis nws yuav tsis zoo li tib neeg lub neej tam sim no lawm. Nws yog lub neej uas noob neej yuav muaj tom qab uas noob neej raug txeeb tau lawm, nws yuav yog ib qho kev pib dua tshiab rau tib neeg nyob rau hauv ntiaj teb no, thiab qhov uas noob neej yuav muaj lub neej zoo li ntawd ces yog qhov pov thawj qhia hais tias noob neeb tau nkag mus rau ib lub teb chaws tshiab thiab zoo nkauj heev li. Nws yog qhov pib ntawm tib neeg lub neej thiab Vajtswv nyob rau hauv ntiaj teb no. Cov lus ua ntej txog ib lub neej zoo nkauj npaum li ntawd mas yuav tsum yog hais tias, tom qab uas tib neeg tau raug ntxuav kom dawb huv thiab raug txeeb tau lawm, lawv yuav zwm kiag rau tus Tswv Tsim. Thiab yog li ntawd, kev txeeb tau ces yog theem kawg ntawm Vajtswv tes hauj lwm ua ntej noob neej yuav nkag mus rau txoj hau kev kawg uas zoo kawg nkaus. Lub neej zoo li ntawd yog tib neeg lub neej yav pem suab nyob rau hauv lub ntiaj teb, yog lub neej uas zoo nkauj tshaj plaws nyob rau hauv ntiaj teb, yog lub neej uas tib neeg tos ntsoov, yog lub neej uas tib neeg yeej tsis tau muaj dua nyob hauv keeb kwm mtawm lub ntiaj teb li. Qhov ntawd yog qhov txiaj ntsig ntawm 6,000 xyoo ntawm tes hauj lwm tswj; qhov ntawd yog qhov uas noob neej ntshaw tshaj plaws li, thiab kuj yog Vajtswv qhov kev cog lus rau tib neeg thiab. Tiam sis qhov kev cog lus no yuav tsis tshwm sim kiag tam sim ntawd: Tib neeg mas tsuas nkag tau mus rau qhov chaw kawg yav pem suab tom qab uas tes hauj lwm ntawm tiam kawg raug ua tiav tag thiab lawv raug txeeb tau tag nrho lawm xwb, qhov ntawd ces yog, thaum uas Ntxwgnyoog tau swb tag nrho lawm. Tom qab uas tib neeg raug lim kom dawb huv lawm, lawv yuav tsis muaj tus yam ntxwv xeeb txawm txhaum lawm, vim Vajtswv tua yeej Ntxwgnyoog lawm, txhais tau hais tias yuav tsis muaj kev cuam tshuam los ntawm tej yeeb ncuab lub zog hlo li lawm uas yuav los tawm tsam tau tib neeg cev nqaij daim tawv. Thiab yog li ntawd ces tib neeg yuav dim plaws, thiab dawb huv—lawv yuav nkag tau mus rau txoj sia ntev dhawv mus ib txhis.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Rov Tsim Kho Tib Neeg lub Neej Raws Li Ib Txwm Muaj thiab Coj Lawv mus rau ib Txoj Hau Kev Kawg Uas Zoo Kawg Nkaus

Thaum uas tib neeg tau raug tsim kho kom rov zoo nkaus li qub thaum xub thawj lawm, thiab thaum lawv nyias ua nyias tes dej num tiav hlo lawm, nyob rau lawv tus kheej qhov chaws uas yog thiab kam zwm ua raws txhua yam ntawm Vajtswv txoj kev npaj, Vajtswv yuav muab tau ib pab neeg nyob hauv ntiaj teb uas pe hawm Nws, thiab Nws kuj yuav rhawv tau ib lub nceeg vaj nyob hauv ntiaj teb uas pe hawm Nws. Nws yuav kov yeej mus ib txhiab ib txhis nyob rau hauv ntiaj teb, thiab tag nrho cov uas tawm tsam Nws yuav puas tsuaj mus tag ib txhiab ib txhis. Qhov no ces yuav rov tsim kho Nws qhov kev npaj siab rau kev tsim noob neej thaum xub thawj kom rov zoo li qub; nws yuav rov tsim kho Nws txoj kev npaj siab ntawm kev tsim txhua yam kom rov zoo li qub, thiab nws kuj yuav rov tsim kho Nws lub hwj chim kav ntiaj teb kom rov zoo li qub, nyob rau hauv txhua yam, thiab nyob rau hauv Nws cov yeeb ncuab. Tej no yuav yog tej cim ntawm Nws qhov kev kov yeej tag nrho. Yog li ntawd noob neej yuav nkag mus so thiab pib ib lub neej uas nyob rau txoj kev uas yog. Vajtswv kuj yuav nkag mus so mus tag ib txhis nrog rau noob neej thiab pib ib lub neej mus ib txhiab ib txhis uas muab faib rau Nws Tus Kheej thiab tib neeg. Tej kev phem kev qias thiab kev tsis mloog lus nyob rau hauv ntiaj teb yuav ploj mus, thiab tag nrho tej kev quaj kev nyiav yuav ploj tag nrho mus, thiab txhua yam nyob rau hauv lub ntiaj teb no uas tawm tsam Vajtswv yuav tsis muaj nyob ntxiv mus lawm. Tsuas yog Vajtswv thiab cov neeg uas Nws tau coj kev cawm dim los rau thiaj li yuav muaj nyob lawm xwb; tsuas yog tej uas Nws tsim tawm thiaj yuav muaj nyob lawm xwb.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv thiab Tib Neeg Yuav Nkag Mus So Ua Ke

Tsuas yog cov uas hlub Vajtswv xwb thiaj li muaj peev xwm ua tau tim khawv rau Vajtswv, tsuas yog lawv xwb thiaj li yog Vajtswv cov tim khawv, tsuas yog lawv xwb thiaj li yog cov uas Vajtswv foom koob hmoov rau, thiab tsuas yog lawv xwb thiaj li muaj peev xwm tau txais Vajtswv tej lus cog tseg. Cov uas hlub Vajtswv yog Vajtswv cov neeg paub siab; lawv yog cov tib neeg uas Vajtswv hlub, thiab lawv tuaj yeem xyiv fab rau tej koob hmoov nrog Vajtswv ua ke. Tsuas yog cov tib neeg zoo li no xwb thiaj li yuav nyob mus ib txhiab ib txhis, thiab tsuas yog lawv xwb thiaj li yuav nyob hauv Vajtswv txoj kev saib xyuas thiab kev tiv thaiv mus ib txhis. Vajtswv yog tus rau tib neeg hlub, thiab Nws tsim nyog rau txhua tus tib neeg txoj kev hlub, tiam sis tsis yog txhua tus tib neeg muaj peev xwm hlub Vajtswv, thiab tsis yog txhua tus tib neeg ua tau tim khawv rau Vajtswv thiab nrog Vajtswv tuav hwj chim. Vim lawv muaj peev xwm ua tim khawv rau Vajtswv thiab muab tag nrho lawv lub zog fij rau Vajtswv tes hauj lwm, cov uas hlub Vajtswv tiag tiag tuaj yeem mus txhua qhov nyob hauv qab ntuj es tsis muaj leej twg muaj cuab kav tawm tsam lawv, thiab lawv tuaj yeem tuav hwj chim hauv ntiaj teb thiab kav Vajtswv cov neeg tag nrho. Cov tib neeg no los thoob ntiaj teb los ua ke. Lawv yog cov tib neeg uas los thoob ntiaj teb los uas hais ntau hom lus thiab muaj ntau hom tawv nqaij uas sib txawv, tiam sis lub ntsiab ntawm lawv txoj kev ua neej nyob yog tib yam xwb; lawv txhua tus muaj lub siab hlub Vajtswv, lawv txhua tus ua tib qho lus tim khawv, thiab muaj tib qho kev txiav txim siab, thiab tib qho kev ntshaw. Cov uas hlub Vajtswv tuaj yeem mus yam ywj siab thoob plaws lub ntiaj teb, thiab cov uas ua tim khawv rau Vajtswv tuaj yeem mus cig thoob plaws lub qab ntuj khwb. Vajtswv hlub cov tib neeg no, Vajtswv foom koob hmoov rau lawv, thiab lawv yuav nyob hauv Nws qhov kaj mus ib txhis.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Cov Uas Hlub Vajtswv Yuav Nyob Hauv Nws Txoj Kev Kaj Mus Ib Txhis

Cov tib neeg uas Vajtswv xav ua kom lawv zoo tiav log yuav tau txais Nws tej koob hmoov thiab qub txeeg qub teg. Ntawd yog, lawv muab qhov Vajtswv muaj ces yog li ntawd nws cia li dhau los ua yam uas lawv muaj; lawv muaj tag nrho Vajtswv cov lus nyob rau ntawm lawv; Vajtswv muaj dab tsi, nej muaj peev xwm tau txais txhua yam raws nraim li ntawd, thiab yog li ua neej kom raws nraim qhov tseeb. Qhov no yog hom tib neeg uas raug ua kom zoo tiav log los ntawm Vajtswv thiab yog tus uas muab tau los ntawm Vajtswv. Tsuas yog qee tus tib neeg zoo li no xwb thiaj tsim nyog tau txais cov koob hmoov uas Vajtswv muab:

1. Txais tau tag nrho Vajtswv txoj kev hlub.

2. Ua txhua yam raws nraim li Vajtswv tej kev npaj siab.

3. Txais tau kev coj ntawm Vajtswv, ua neej nyob rau hauv qhov kaj ntawm Vajtswv, thiab txais tau txoj kev qhuab qhia ntawm Vajtswv.

4. Ua neej nyob hauv ntiaj teb raws nraim tus duab uas Vajtswv hlub; hlub Vajtswv tseeb tiag ib yam li Petus hlub, raug ntsia rau saum ntoo khaub lig rau Vajtswv thiab tuag this rau Vajtswv txoj kev hlub; thiaj muaj yeeb koob ib yam li Pestus.

5. Tau txais kev hlub, kev hwm, thiab kev qhuas los ntawm txhua leej txhua tus uas nyob hauv ntiaj teb.

6. Kov yeej txhua yam rau txoj kev ua qhev ntawm kev tuag thiab Ntuj Tawg, tsis cia kom Ntxwgnyoog muaj sij hawm los ua nws txoj hauj lwm, cia Vajtswv ua tus kav, ua neej nyob nrog ib tug ntsujplig tshiab thiab cus, thiab tsis qaug zog.

7. Muaj kev zoo siab xyiv fab tshaj plaws thiab muaj siab kub lug txhua lub sij hawm thoob plaws ntawm lub neej, zoo tam li ib tug uas pom txog hnub Vajtswv lub koob meej uas los yuav txog.

8. Yeej lub yeeb koob nrog Vajtswv ua ke thiab muaj lub ntsej muag zoo ib yam li Vajtswv cov neeg dawb huv.

9. Ua tus neeg uas Vajtswv hlub nyob hauv ntiaj teb, ntawd yog, tus tub uas Vajtswv hlub.

10. Hloov tus qauv thiab nrog Vajtswv nce mus rau saum lub ntuj ceeb tsheej txheej peb thiab mus kom dhau sab cev nqaij daim tawv.

Tsuas yog cov tib neeg uas tuaj yeem tau txais Vajtswv cov koob hmoov xwb thiaj li raug ua kom zoo tiav log thiab raug muab tau los ntawm Vajtswv. Koj puas tau txais dab tsi nyob rau lub sij hawm tam sim no? Vajtswv tau ua kom koj zoo tiav log txog qeb twg lawm? Vajtswv tsis ua dog dig rau txoj kev ua ib tug tib neeg twg kom zoo tiav log; Nws kev ua kom tib neeg zoo tiav log ntawd yog yam muaj kab ke, thiab pom meej, pom tau qhov txiaj ntsim. Nws tsis yog, raws li tib neeg xav, tias tsuas yog nws muaj txoj kev ntseeg Vajtswv xwb, ces nws yuav muaj peev xwm raug ua kom zoo tiav log tau thiab raug muab tau los ntawm Vajtswv, thiab nws tuaj yeem tau txais Vajtswv tej koob hmoov thiab tej qub txeeg qub teg hauv lub ntiaj teb no. Tej yam zoo li no yog yam uas nyuab heev—tsis hais dab tsi txog txoj kev pauv tib neeg tus qauv. Tam sim no, yam tseem ceeb tshaj uas nej yuav tsum nrhiav yog kev raug ua kom zoo tiav log los ntawm Vajtswv rau txhua yam, thiab kev raug ua kom zoo tiav log los ntawm Vajtswv uas dhau los ntawm tib neeg txhua tus, tej teeb meem, thiab txhua yam uas nej ntsib, kom yam zoo yoog li Vajtswv yuav muaj nyob rau ntawm nej ntau tshaj ntxiv. Nej yuav tsum txais yuav Vajtswv tej qub txeeg qub teg hauv ntiaj teb ua ntej tso; tom qab ntawd nej thiaj yuav tsim nyog tau txais kom ntau tshaj ntxiv, thiab zoo tshaj ntxiv, cov koob hmoov los ntawm Vajtswv. Tag nrho tej no yog txhua yam uas nej yuav tsum nrhiav, thiab nej yuav tsum nkag siab ua ntej tshaj plaws txhua yam.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Cov Lus Cog Tseg rau Cov uas Twb Raug Ua Kom Zoo Tiav Log Lawm