Vajtswv Tej Lus Tseem Ceeb:

Kev hloov pauv hauv tus moj yam feem ntau yog hais txog txoj kev hloov pauv ntawm ib tug neeg tus yeeb yam. Tej yam ntawm ib tug neeg tus yeeb yam ntsia tsis pom los ntawm cov cwj pwm sab nraud los. Tej ntawd ntsig txog ncaj qha rau yam muaj nqis thiab qhov tseem ceeb ntawm tus tib neeg ntawd txoj kev muaj nyob, rau tus tib neeg ntawd txoj kev xam pom txog lub neej txoj sia thiab lawv yam uas muaj nqis, tej ntawd muaj feem xyuam rau tej uas nyob tob tob hauv lawv lub siab, thiab lawv lub ntsiab tseem ceeb. Yog ib tug neeg tsis tuaj yeem lees txais qhov tseeb, ces lawv yuav tsis muaj kev hloov pauv rau hauv tej yam ntxwv no li. Tsuas yog los ntawm kev ntsib kev pom Vajtswv txoj dej num, muaj kev to taub qhov tseeb puv npo, hloov tau yus tej muaj nqis thiab yus tej kev xam pom rau ntawm kev muaj nyob thiab txoj sia, yoog yus tej kev xam pom txog tej yam kom haum nrog rau Vajtswv txoj lus, thiab muaj peev xwm zwm rau thiab fij rau Vajtswv tau tiav hlo nkaus xwb, thiaj li tuaj yeem hais tau tias yus tus moj yam tau hloov pauv lawm. Tam sim no kiag, tej zaum zoo li koj muaj kev mob siab rau qee yam thiab tiv taus thaum ntsib qhov nyuaj thaum ua koj tes dej num, tej zaum koj muaj peev xwm ua txoj dej num rau tej kev npaj los ntawm tus Nyob Saud, los sis tej zaum koj muaj peev xwm rau qhov chaw uas tau hais kom koj mus. Nyob rau sab nraud mas, tej zaum nws yuav zoo li koj ntxim mloog lus thiab, tab sis thaum muaj qee yam tshwm sim es tsis mus raws li koj tej kev xav phem lawm, mas koj txoj kev ntxeev siab txawm tawm tuaj ntag. Piv txwv li, koj tsis zwm rau txoj kev raug qhuab ntuas thiab qhuab qhia, thiab koj haj yam tsis kam zwm thaum muaj kev puas tsuaj los; nyob rau hauv koj tus kheej mas koj haj tseem liam rau Vajtswv thiab. Yog li ntawd, qhov kev mloog lus thiab hloov pauv me me uas nyob rau sab nraud ntawd tsuas yog ib qho hloov pauv me me hauv tus cwj pwm xwb. Muaj ib qho kev hloov pauv me me xwb, tab sis qhov no tsis muaj txaus kom suav tau tias yog kev hloov pauv ntawm koj tus moj yam. Tej zaum koj yuav muaj peev xwm khiav mus raws ntau txoj kev tau, ntsib kev txom nyem ntau yam, thiab tiv taus txoj kev txaj muag tau zoo tshaj; koj yuav hnov nyob ze heev rau ntawm Vajtswv, thiab tus Vajntsujplig yuav ua qee txoj dej num rau ntawm koj. Txawm li cas los xij, thaum Vajtswv hais kom koj ua qee yam uas tsis yoog raws li koj tej kev xav phem, koj tseem tsis zwm rau, tab sis, koj yuav nrhiav qhov thov txim, ntxeev siab thiab tawm tsam Vajtswv, thiab nyob rau ntau lub sij hawm mas haj tseem nug thiab tawm tsam Nws rov qab thiab. Qhov no yuav yog ib qho teeb meem loj! Nws yuav qhia tias koj tseem muaj ib tug yeeb yam uas tawm tsam Vajtswv, tias koj tsis to taub qhov tseeb tiag tiag, thiab tias koj tsis muaj kev hloov pauv hauv koj tus moj yam ntawm lub neej txoj sia kiag li.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Yam Yuav Tsum Tau Paub Txog Kev Hloov Pauv Yus Tus Moj Yam

Yog ib tug tib neeg muaj ntau tus cwj pwm zoo, qhov ntawd tsis tau txhais hais tias tus tib neeg ntawd muaj qhov muaj tiag ntawm qhov tseeb lawm. Tsuas yog xyaum ua raws li qhov tseeb thiab ua raws li tej hauv paus ntsiab lus xwb mas koj thiaj li yuav muaj qhov muaj tiag ntawm qhov tseeb. Tsuas yog ntshai Vajtswv thiab zam kev phem xwb mas koj thiaj li yuav muaj qhov muaj tiag ntawm qhov tseeb. Ib txhia tib neeg mas kub siab lug, hais tau tej lus qhuab qhia, ua raws li tej kev cai, thiab ua ntau yam kev ua zoo, tiam sis txhua yam uas hais tau txog lawv ces yog qhov hais tias lawv muaj me ntsis kev ua neeg xwb. Cov uas hais tau tej lus qhuab qhia thiab pheej ua raws li tej kev cai ntawd yeej xyaum ua raws li qhov tseeb tsis tau li. Txawm yam uas lawv hais ntawd yog thiab mloog zoo li tsis muaj teeb meem li los xij, lawv tsis muaj dab tsi hais txog lub ntsiab tseeb ntawm qhov tseeb li. Yog li ntawd, txawm qee tus tib neeg yuav hais tau tej lus qhuab qhia ntawd ntau npaum li cas los xij, qhov ntawd tsis tau txhais hais tias lawv to taub qhov tseeb lawm, thiab txawm lawv to taub tej lus qhuab qhia ntawd ntau npaum li cas los xij, lawv yeej daws tsis tau ib qho teeb meem li. Cov kws tshawb fawb txog sab kev ntseeg puav leej piav qhia tau phau Vajluskub, tiam sis nyob rau thaum kawg, lawv txhua tus puav leej ntog tag, vim lawv tsis lees txais tag nrho qhov tseeb uas Vajtswv tau nthuav tawm. Cov tib neeg uas muaj ib qho hloov pauv hauv lawv tus moj yam yeej sib txawv; lawv muaj kev to taub qhov tseeb, lawv ntsia pom deb tau tag nrho tej teeb meem, lawv paub tias yuav leg li cas kom haum raws Vajtswv siab nyiam, yuav leg li cas thiaj haum raws li lub hauv paus ntsiab lus ntawm qhov tseeb, thiab yuav leg li cas thiaj ua tau zoo raws Vajtswv, thiab lawv to taub tus yeeb yam ntawm txoj kev lwj liam uas lawv ua rau pom. Thaum lawv tus kheej tej tswv yim thiab tej kev xav phem raug qhia tshwm lawm, lawv tuaj yeem ntsia pom deb thiab tso cev nqaij daim tawv tseg. Qhov no raug nthuav tawm li cas txog kev hloov pauv hauv tus moj yam. Qhov tseem ceeb uas qhia kom pom meej txog cov tib neeg uas muaj kev hloov pauv ib qho hauv tus moj yam yog lawv yuav tsum to taub qhov tseeb kom meej, thiab thaum ua raws tej yam, lawv muab qhov tseeb coj los xyaum ua raws kom raug zoo thiab lawv txhob ua rau pom txoj kev lwj liam tas li. Feem ntau, cov uas lawv tus moj yam tau hloov pauv lawm yeej yog kev muaj qab hau thiab kev xam pom deb tshwj xeeb, thiab vim lawv txoj kev to taub ntawm qhov tseeb, lawv thiaj tsis ua rau pom ntau txog kev qhuas tias yus tus kheej coj ncaj los sis kev khav theeb. Lawv tuaj yeem pom tshab thiab xam pom mus deb heev ntawm txoj kev lwj liam uas tau qhia tshwm rau hauv lawv, kom thiaj tsis ua rau lawv muaj kev khav theeb. Lawv tuaj yeem muaj qhov ntsuas kev nkag siab txog yam uas tib neeg tau hloov pauv, txog qhov yuav coj li cas thiaj muaj laj thawj, txog qhov yuav ua tes hauj lwm li cas, txog yam uas tsim nyog hais thiab yam uas tsis tsim nyog hais, thiab txog yam uas tsim nyog hais thiab yam uas tsim nyog ua rau cov tib neeg. Yog li ntawd, cov tib neeg uas lawv tej moj yam tau hloov pauv lawm yeej muaj qab hau tsim nyog tiag, thiab tsuas yog cov tib neeg zoo li no xwb thiaj li yuav ua neej zoo nkaus li tib neeg tiag tiag. Vim hais tias lawv to taub qhov tseeb, lawv muaj peev xwm hais thiab pom tej yam mus raws li qhov tseeb, thiab lawv yog lub hauv paus ntsiab lus rau txhua yam uas lawv ua; lawv tsis yog yam raug cob mus rau kev haub ntxias ntawm ib tug neeg twg, ib lub ntsiab twg, los sis ib yam khoom twg, thiab lawv sawv daws puav leej muaj lawv tus kheej txoj kev xam pom thiab tuaj yeem tuav lub hauv paus ntsiab lus ntawm qhov tseeb tau. Lawv tus moj yam ruaj ntseg, lawv tsis ua siab kub los sis ua siab txias, thiab txawm tias lawv tej xwm txheej yuav yog dab tsi los xij, lawv to taub lawv lub luag hauj lwm zoo tias yuav ua li cas thiab yuav coj li cas thiaj haum rau Vajtswv siab nyiam. Cov uas lawv tus moj yam yeej hloov pauv tiag tiag lawm tsis tas npaj ua yam uas yuav ua rau lawv tus kheej zoo saib raws sab nraum daim tawv; lawv muab tau qhov zoo nyob sab hauv nruab siab rau yam uas lawv yuav ua tau zoo raws Vajtswv. Yog li, thaum saib raws sab nrauv, zoo li lawv tsis kub siab hlo li los sis tsis tau ua ib yam tseem ceeb dab tsi tiav hlo li, tab sis txhua yam uas lawv ua muaj txiaj ntsig, muaj nuj nqis, thiab ua tau tshwm sim los tiag. Cov uas tus moj yam tau hloov pauv yeej pom tiag tias muaj ntau qhov muaj tiag ntawm qhov tseeb, thiab tuaj yeem lees qhov no los ntawm lawv txoj kev xav rau txhua yam thiab lawv lub hauv paus ntsiab lus ntawm tej kev coj ua. Cov uas tsis tau txais qhov tseeb ces yeej tsis tau hloov pauv tau tus moj yam ntawm lub neej txoj sia ib qho kiag li. Qhov hloov pauv tus moj yam ntawd yog hloov tau li cas kiag? Tib neeg twb raug Ntxwgnyoog muab ua qias vuab tsuab dhau lawm, ces lawv txhua tus puav leej tawm tsam Vajtswv, thiab lawv txhua tus puav leej muaj tus yeeb yam tawm tsam Vajtswv. Vajtswv cawm tib neeg los ntawm qhov muab cov uas muaj tus yeeb yam tawm tsam Vajtswv thiab cov uas tawm tsam tau Vajtswv ntawd tig los ua cov uas mloog lus thiab hwm Vajtswv. Qhov no yog qhov txhais hais tias yog ib tug tib neeg uas nws tus moj yam tau hloov pauv lawm. Txawm ib tug tib neeg yuav qias vuab tsuab npaum li cas los sis txawm lawv yuav muaj pes tsawg tus moj yam qias vuab tsuab los xij, tsuav lawv lees txais tau qhov tseeb, lees txais tau Vajtswv txoj kev txiav txim thiab kev rau txim, thiab lees txais tau tej kev sim siab thiab tej kev lim tib neeg kom dawb huv xwb, ces lawv yuav muaj ib txoj kev to taub tseeb txog Vajtswv, thiab nyob rau tib lub sij hawm ntawd lawv yuav muaj peev xwm pom tseeb tseeb txog lawv tus kheej tus yeeb yam thiab lub ntsiab tseeb. Thaum lawv paub lawv tus kheej tiag tiag lawm, ces lawv yuav muaj peev xwm ntxub lawv tus kheej thiab Ntxwgnyoog, lawv yuav txaus siab hlo tso Ntxwgnyoog tseg, thiab mloog Vajtswv lus nkaus xwb. Thaum ib tug tib neeg muaj txoj kev txiav txim siab no lawm, mas lawv thiaj li caum tau qhov tseeb. Yog tib neeg muaj txoj kev paub tseeb txog Vajtswv, yog lawv tus moj yam phem raug ntxuav dawb huv, thiab Vajtswv cov lus tuaj cag nyob rau hauv lawv, thiab tau dhau los ua lawv lub neej txoj sia thiab ua lub hauv paus ntawm qhov lawv muaj txoj sia nyob, yog lawv ua neej raws li Vajtswv cov lus, thiab hloov pauv tag nrho thiab ua cov tib neeg tshiab lawm—ces qhov no suav hais tias yog kev hloov pauv lawv lub neej txoj sia tus moj yam lawm. Ib txoj kev hloov pauv rau hauv tus moj yam tsis tau txhais hais tias yuav muaj ib txoj kev ua neej paub tab thiab kev ua neeg zoo, los sis nws tsis txhais hais tias tib neeg tej moj yam sab nraud mas txo hwj chim dua yav dhau los, uas lawv keev khav theeb tiam sis tam sim no tuaj yeem sib txuas lus muaj qab hau lawm, los sis tias qhov lawv keev tsis mloog leej twg hais ntawd tam sim no tuaj yeem mloog lwm tus hais lawm; tej yam hloov pauv sab nrauv zoo li no tsis tuaj yeem hais tau tias yog kev hloov tus moj yam. Qhov tseeb, kev hloov tus moj yam yuav tsum muaj tej kev nthuav tawm zoo li no, tab sis feem tseem ceeb tshaj plaws ces yog hloov sab hauv lawv lub neej txoj sia. Qhov no yog hloov pauv tag nrho vim Vajtswv cov lus thiab qhov tseeb twb tau tuaj cag nyob rau hauv lawv, kav lawv, thiab dhau los ua lawv lub neej txoj sia lawm. Lawv tej kev xav txog txhua yam los kuj puav leej hloov pauv lawm thiab. Lawv tuaj yeem pom ncaj qha txog yam uas tab tom tshwm sim nyob rau hauv lub ntiaj teb thiab tshwm sim rau tib neeg ntiaj teb, qhov Ntxwgnyoog ua rau noob neej ntiaj teb qias vuab tsuab li cas, qhov tus zaj loj liab ploog tawm tsam Vajtswv li cas, thiab tus zaj loj liab ploog ntawd lub ntsiab tseeb. Lawv tuaj yeem ntxub tus zaj loj liab ploog thiab Ntxwgnyoog hauv lawv lub siab, thiab lawv tuaj yeem tig tau tag nrho los caum raws Vajtswv qab. Qhov no txhais hais tias lawv lub neej txoj sia tus moj yam twb hloov pauv lawm, thiab Vajtswv twb muab tau lawv lawm. Kev hloov pauv lub neej txoj sia tus moj yam yog txoj kev hloov pauv uas tseem ceeb heev, hos kev hloov pauv tus cwj pwm yog ib qho ntiav ntiav xwb. Tsuas yog cov uas hloov pauv tau lub neej txoj sia tus moj yam lawm xwb thiaj li yog cov uas tau txais qhov tseeb, thiab tsuas yog lawv xwb thiaj raug Vajtswv muab tau.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb

Hauv txoj kev lis kev cai ntseeg, ntau tus tib neeg raug tsim txom loj heev hauv lawv lub neej: Lawv txo lawv lub cev thiab kwv lawv tus ntoo khaub lig, thiab lawv yeej tseem raug tsim txom thiab nyiaj tiv mus txawm hais tias yuav ze rau txoj kev tuag los xij! Muaj ib txhia tseem tau yoo mov thaum sawv ntxov ntawm lawv txoj kev tuag thiab. Tag nrho lawv lub neej lawv tsis lees lawv tus kheej tej zaub mov thiab khaub ncaws zoo, tsuas yog tsom ntsoov rau kev tsim txom nkaus xwb. Lawv muaj peev xwm txo lawv lub cev thiab tso txoj kev ntshaw ntawm lawv sab cev nqaij daim tawv tseg. Lawv lub siab nyiaj tiv kev tsim txom yog ib qho tsim nyog qhuas. Tiam sis lawv txoj kev xav, lawv cov kev xav phem, lawv tus cwj pwm kev xav, thiab qhov tseeb tiag lawv tus yeeb yam qub, tseem tsis tau raug rhuav tshem ib qho me me li. Lawv tu ncua kev paub tseeb ntawm lawv tus kheej. Lawv txoj kev xam pom ntawm Vajtswv mas yog ib qho qub kev cai ntawm ib ib tug Vajtswv uas pom tsis meej. Lawv txoj kev txiav txim siab los raug tsim txom rau Vajtswv yog los ntawm lawv txoj kev mob siab thiab tus cwj pwm zoo ntawm lawv txoj kev ua neej los. Txawm hais tias lawv ntseeg Vajtswv, lawv tsis nkag siab Nws los sis tsis paub txog Nws lub siab nyiam li. Lawv tsuas yog lam ua hauj lwm thiab raug tsim txom qi muag nti rau Vajtswv xwb. Lawv saib kev thoob tsib to nrog tsis muaj nuj nqis dab tsi, tsuas yog quav ntsej me ntsis txog tias yuav ua li cas lawv txoj dej num thiaj li yuav ua tiav raws li Vajtswv lub siab nyiam xwb, thiab tsawg dua li lawv ceev faj txog ntawm qhov yuav ua li cas thiaj li ua tiav txoj kev paub ntawm Vajtswv. Tus Vajtswv uas lawv ua dej num rau tsis yog tus Vajtswv uas nyob hauv Nws tus yam ntxwv xeeb txawm, tiam sis yog ib tug Vajtswv uas lawv tau xav nyob rau hauv nruab siab, ib tug Vajtswv uas lawv tsuas tau hnov txog, los sis tus uas lawv tsuas tau nyeem ua dab neeg nyob rau hauv tej ntawv sau xwb. Ces lawv mam li siv lawv cov kev xav uas zoo thiab kev ntseeg los raug tsim txom rau Vajtswv thiab lees ua Vajtswv txoj hauj lwm uas Vajtswv xav ua. Lawv txoj kev ua dej num poob qis heev, cov kev uas dej num li ntawd yeej tsis muaj ib txoj muaj peev xwm ua tau dej num raws li Vajtswv lub siab nyiam kiag li. Txawm hais tias lawv yuav raug tsim txom hnyav npaum li cas los xij, lawv txoj kev vam qub ntawm kev ua dej num thiab lawv txoj kev xam pom ntawm Vajtswv tseem tsis tau hloov li, vim lawv tseem tsis tau ntsib Vajtswv txoj kev txiav txim, kev rau txim, kev lim tib neeg kom dawb huv thiab kev ua kom zoo tshaj plaws, thiab tsis muaj leej twg coj lawv siv qhov tseeb. Tab txawm hais tias lawv ntseeg Yexus uas yog tus Cawm Seej los xij, lawv yeej tsis muaj ib tug tau pom tus Cawm Seej kiag li. Lawv tsuas paub Nws los ntawm lub koob meej thiab hnov los xwb. Raws li qhov tshwm sim, lawv txoj kev ua dej num pom tau tias tsis zoo tshaj li txoj kev ua dej num uas tsis muaj hauv paus hauv ntsis uas qi muag nti, zoo ib yam li ib tug neeg dig muag uas ua dej num rau nws txiv kiag ntag. Thaum kawg, txoj kev ua dej num zoo li no puas tuaj yeem ua tiav tau ib yam dab tsi? Thiab leej twg thiaj li yuav pom zoo rau nws? Txij thaum pib mus txog thaum xaus, lawv txoj kev ua dej num yeej tseem nyob li qub li ib txwm; lawv tsuas yog txais cov kev kawm uas tib neeg-ua xwb thiab lub hauv paus uas lawv txoj kev ua dej num cog rau yog nyob rau hauv lawv cov yeeb yam thiab lawv tus kheej cov kev nyiam nkaus xwb. Qhov no yuav coj tau yam phaj tshab dab tsi los? Tab txawm Petus, tus uas tau pom Yexus kiag los, twb tsis paub yuav ua dej num raws li Vajtswv lub siab nyiam li cas; nws tsuas yog los paub qhov no thaum kawg, thaum nws twb laus lawm xwb. Qhov no hais li cas txog cov tib neeg dig muag uas tsis tau ntsib dua ib qho me me ntawm kev raug rhuav tshem los sis ntawm kev raug qhuab qhia, thiab cov uas tsis muaj ib tug coj lawv li? Tsis yog hais tias txoj kev ua dej num ntawm nej coob tus hnub no zoo ib yam li cov tib neeg dig muag no thiab lov? Txhua tus uas tsis tau txais kev txiav txim, tsis tau txais kev qhuab qhia thiab kev rhuav tshem, thiab cov uas tsis tau hloov pauv li—puas yog lawv tsis tau raug kov yeej tag nrho? Cov tib neeg zoo li no muaj nuj nqis dab tsi? Yog tias koj txoj kev xav, koj txoj kev paub ntawm lub neej, thiab koj txoj kev paub txog Vajtswv qhia tias tsis muaj ib txoj kev hloov pauv tshiab thiab koj yeej tsis tau txais ib yam dab tsi tiag tiag li, ces koj yeej yuav ua tsis tiav ib yam dab tsi zoo hauv koj txoj kev ua dej num kiag li! Yog tsis muaj ib lub zeem muag thiab ib txoj kev paub tshiab txog Vajtswv txoj hauj lwm, koj tsis raug txeeb tau. Koj txoj kev raws Vajtswv qab yuav zoo li cov neeg uas raug kev tsim txom thiab yoo mov: uas muaj nqis me me xwb! Nws yog qhov tseeb vim tias muaj ib co lus tim khawv me ntsis txog yam uas lawv ua uas Kuv hais tias lawv txoj kev ua dej num tsis muaj qab hau! Thoob plaws hauv lawv lub neej, cov tib neeg ntawd raug kev txom nyem thiab siv sij hawm nyob rau hauv nkuaj; lawv yeej ib txwm ua siab ntev, hlub, thiab lawv ib txwm kwv tus ntoo khaub lig, lawv raug saib tsis taus thiab raug tsis lees paub los ntawm lub ntiaj teb, lawv ntsib txhua yam kev txom nyem, thiab txawm hais tias lawv mloog lus mus txog ntua thaum kawg los, lawv yeej tseem tsis tau raug kov yeej li, thiab tsis tuaj yeem hais lus tim khawv kom raug kov yeej kiag li. Lawv tau raug ib txoj kev tsim txom loj heev, tiam sis sab hauv lawv tsis paub Vajtswv hlo li. Tsis muaj lawv ib txoj kev xav qub, cov kev xav phem qub, cov kev xyaum ua raws li tej kev lis kev cai qub, kev paub uas tib neeg-tsim, thiab tej tswv yim noob neej tau raug rhuav tshem li. Tsis muaj ib qho kev paub tshiab me me nyob rau hauv lawv kiag li. Tsis muaj ib qho me me ntawm lawv txoj kev paub txog Vajtswv yog tseeb los tsis yog li. Lawv tau nkag siab yuam kev txog Vajtswv lub siab nyiam lawm. Qhov no puas yog ua dej num rau Vajtswv? Txawm koj txoj kev paub txog Vajtswv yav dhau los zoo li cas los xij, yog tias nws tseem zoo li qub rau hnub no thiab koj tas zog cog lub hauv paus ntawm koj txoj kev paub txog Vajtswv rau hauv koj tus kheej cov kev xav phem thiab cov tswv yim txawm tias Vajtswv yuav ua dab tsis los xij, uas yog hais tau tias yog tias koj tsis muaj yam tshiab, txoj kev paub tseeb txog Vajtswv thiab yog tias koj tsis paub Vajtswv tus yam ntxwv thiab tus moj yam tseeb, yog tias koj txoj kev paub txog Vajtswv tseem raug coj los ntawm kev ua neeg phem, txoj kev xav tsis tseeb thiab tseem yug raws li noob neej txoj kev xav thiab cov kev xav phem, ces koj tseem tsis tau raug kov yeej. Tag nrho ntau cov lus uas tam sim no Kuv hais rau koj no yog los qhia kom koj paub, kom muaj txoj kev paub no uas coj koj mus rau ib txoj kev paub uas tshiab dua thiab meej dua; cov lus no kuj yog los rhuav tshem tej kev xav phem qub thiab txoj kev paub qub uas nyob hauv koj tawm, kom koj thiaj li yuav muaj kev paub tshiab. Yog tias koj noj thiab haus Kuv cov lus tiag tiag, ces koj txoj kev paub yuav hloov pauv ntau heev. Tsuav yog koj noj thiab haus Vajtswv cov lus thiab muaj ib lub siab mloog lus xwb, ces koj txoj kev vam yuav raug txais rov qab. Tsuav yog koj muaj peev xwm los txais cov kev rau txim uas rov qab raug dua, koj txoj kev xav hauv siab qub yuav maj mam hloov pauv. Tsuav yog koj txoj kev xav hauv siab qub tau raug hloov pauv tag nrho dua tshiab lawm xwb, koj txoj kev xyaum ua kuj yuav hloov pauv mus raws li thiab. Nyob rau hauv txoj kev no, koj txoj kev ua dej num yuav nce zuj zus mus rau-lub hom phiaj, yuav nce zuj zus los muaj peev xwm ua raws li Vajtswv lub siab nyiam. Yog tias koj tuaj yeem hloov pauv koj lub neej, koj txoj kev paub txog noob neej lub neej, thiab koj cov kev xav phem txog Vajtswv, ces koj tus yeeb yam yuav maj mam ploj mus. Qhov no, thiab tsis muaj ib yam dab tsi luv ntawm qhov no, yog qhov txiaj ntsig tau los thaum Vajtswv kov yeej tib neeg, nws yog txoj kev hloov pauv uas tshwm sim hauv tib neeg. Yog tias, hauv koj txoj kev ntseeg Vajtswv, txhua yam uas koj paub txog yog kev txo koj lub cev thiab kev nyiaj tiv thiab kev tsim txom, thiab koj tsis paub seb qhov ntawd yog los sis tsis yog, tsawg dua li tias yog vim rau leej twg nws thiaj tau ua tiav li ntawd, ces yuav ua li cas txoj kev xyaum ua zoo li no thiaj li yuav coj mus rau kev hloov pauv tau?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Nyob Sab Hauv Qhov Tseeb ntawm Kev Kov Yeej (3)

Muaj qee tus neeg mas uas feem ntau tsuas hais ntawm lub qhov ncauj txog qhov lawv tshuav Vajtswv nqi xwb; lawv siv lawv lub sij hawm los xav rau tej kev txhawj xeeb, xav ua kom luag qhuas thiab ua txuj ua li lawv txaus hlub heev xwb! Cas yuav ntxim ntxub ua luaj li! Yog koj nug lawv hais tias, “Koj puas tuaj yeem qhia kuv txog qhov uas koj tshuav Vajtswv nqi nas?” ces lawv yuav hais tsis tau ib lo lus li. Yog koj ua siab ncaj ncees rau Vajtswv, ces tsis txhob tham rau sab nraud txog qhov ntawd xwb; tiam sis, qhia koj txoj kev hlub rau Vajtswv kiag los ntawm txoj kev uas xyaum ua li ntawd kiag, thiab thov Nws los ntawm lub siab tseeb. Cov neeg uas cia li nrog Vajtswv hais ntawm lub qhov ncauj thiab lam tau lam ua kom dhau xwb ces puav leej yog cov neeg hais lus zoo tab sis siab phem! Qee tus neeg hais txog qhov tshuav Vajtswv nqi txhua zaus thaum lawv thov Vajtswv, thiab pib quaj txhua zaus thaum lawv thov Vajtswv, tab txawm tsis yog Vajntsujplig txhawb los xij li. Cov neeg zoo li no mas raug tej kev lis kev cai ntseeg dab qhuas thiab tej kev xav nkag rau lawm; lawv ua neejraws li tej kab lis kev cai dab qhuas thiab kev xav phem zoo li ntawd, pheej ntseeg tias tej kev ua li ntawd mas ua rau Vajtswv zoo siab thiab tias Nws nyiam tej kua muag uas zoo los sis tu siab ua ntiav ntiav li ntawd. Yuav muaj dab tsi zoo los ntawm cov neeg ruam no los? Yuav kom qhia tau txoj kev txo hwj chim, ib txhia thiaj li ua txuj hais lus mos lus muag rau ntawm lwm tus lub xub ntiag. Ib txhia yog txhob txwm ua qhev thaum nyob rau ntawm lwm tus neeg lub xub ntiag, ua zoo li cov me nyuam yaj uas tsis muaj ib lub zog li. Qhov no puas ib tug xeeb ceem uas phim rau cov neeg ntawm lub nceeg vaj? Cov neeg ntawm lub nceeg vaj yuav tsum muaj lub neej zoo thiab nyob ywj pheej, dawb huv thiab qhib siab lug, coj ncaj thiab ntxim hlub, thiab ua neej nyob hauv txoj kev ywj pheej. Lawv yuav tsum muaj kev ncaj ncees thiab meej mom thiab muaj peev xwm tuav tej lus tim khawv kom khov kho txawm lawv mus qhov twg los xij li; Vajtswv thiab tib neeg yeej hlub cov tib neeg uas zoo li no. Cov neeg uas tseem tsis tau paub txoj kev ntseeg mas muaj ntau qhov kev xyaum ua nyob rau sab nraud dhau lawm; lawv yuav tsum raug qhuab qhia thiab raug txom nyem ib tus ua ntej tso. Cov neeg uas muaj kev ntseeg Vajtswv nyob rau hauv nruab siab mas muab cais tsis tau rau sab nraud kom lwm tus txhob pom, tab sis lawv tej kev coj ua thiab tej hauj lwm tsim nyog qhuas. Tsuas yog cov neeg zoo li no xwb thiaj li suav tau tias ua lub neej raws li Vajtswv txoj lus. Yog koj tshaj tawm txoj moo zoo txhua hnub mus rau ntau tus neeg es vam tias yuav coj tau lawv rau txoj kev cawm dim, tab sis thaum kawg tseem ua neej raws li tej kev cai thiab tej kev qhuab qhia, ces koj yuav coj tsis tau koob meej los rau Vajtswv. Cov neeg zoo li no yog cov thawj coj ntawm sab kab lis kev cai ntseeg xwb, thiab yog cov neeg ncauj lus zoo tab sis siab phem. Thaum twg cov neeg ntawm sab kab lis kev cai ntseeg ntawd tuaj sib sau, lawv yuav nug hais tias, “Tus viv ncaus, ob peb hnub no koj puas nyob zoo?” Tej zaum nws yuav teb hais tias, “Kuv xav tias kuv tshuav Vajtswv ib qho nqi, thiab tias kuv ua tsis tau kom tau zoo raws li Nws tej kev npaj siab.” Muaj dua lwm tus yuav hais tias, “Kuv los ib yam thiab uas xav tias tshuav Vajtswv nqi thiab tias kuv tsis muaj peem xwm ua kom tau zoo raws li Nws siab.” Ob peb sob lus no thiab cov lus no xwb twb nthuav qhov phem tob hauv lawv tawm lawm; cov lus zoo li no mas tsis ntxim nyiam kiag li, thiab txob siab heev li. Tus yam ntxwv ntawm cov neeg zoo li no mas tawm tsam Vajtswv. Cov neeg uas tsom ntsoov rau qhov muaj tiag ntawd yeej tham txog txhua yam uas nyob hauv lawv lub siab, thiab qhib lawv lub siab rau txoj kev sib qhia. Lawv tsis koom ua ib qho kev dag cuav, tsis ua kom pom kev ua hauj lwm tsis muaj nuj nqis los sis tsis muaj kev lom zem. Lawv yeej ib txwm ua ncaj nraim, thiab tsis ceev tej kev cai hauv ntiaj teb. Qee tus neeg muaj ib lub ntsej muag zoo rau sab nraud, mus txog ntua qhov uas tsis muaj qab hau li lawm. Thaum ib tug neeg hu nkauj, lawv txawm pib seev cev, haj tseem tsis paub txog tias cov mov nyob hauv lawv cov lauj kaub twb kub hnyiab tag lawm. Cov neeg zoo li no mas tsis zoo los sis tsis ntxim hwm, thiab lawv tsis muaj nqis hlo li. Txhua yam no yog tej kev qhia tshwm kom pom tau meej txog ib qho uas tsis muaj qhov muaj tiag. Thaum qee leej neeg paub txog tej yam ntawm sab ntsujplig, txawm hais tias lawv tsis hais txog Vajtswv los xij, lawv tseem muaj kev hlub rau Nws tob heev. Koj txoj kev xav uas tshuav Vajtswv nqi yeej ua tsis tau li cas rau lwm tus neeg; koj yog tus tshuav Vajtswv nqi, tsis yog lwm tus. Dab tsi muaj nuj nqi rau koj uas koj pheej hais li no rau lwm tus? Koj yuav tsum tau saib qhov tseem ceeb saib puas muaj tiag, tsis yog saib ntawm sab cev nqaij daim tawv sab nraud xwb. Tib neeg tej kev coj zoo sab nrauv sawv cev rau dab tsi? Lawv sawv cev rau lub cev nqaij daim tawv. Thiab tej kev ua sab nrauv, txawm yog cov uas zoo tshaj plaws los, yeej tsis sawv cev rau txoj sia; lawv tsuas qhia tau txog koj tus kheej tus yam ntxwv xwb. Tib neeg tej kev ua sab nrauv yeej ua tsis tau kom tau raws li Vajtswv tej kev npaj siab. Koj yuav hais txog qhov koj tshuav nuj nqis rau Vajtswv tsis tu ncua, tab sis koj tsis tuaj yeem pab lwm tus lub neej los yog txhawb kom lawv muaj lub siab hlub Vajtswv. Koj ntseeg tias cov kev coj li ntawm koj ko yuav ua rau Vajtswv zoo siab no lov? Koj xav tias nws yog Vajtswv txoj kev npaj siab uas ua kom koj ua li no, thiab tias koj tej kev ua ntawd yeej mus raws li sab kev ntseeg lawm, tab sis qhov tseeb, txhua yam tsis muaj nuj nqis kiag li! Koj ntseeg tias yam ua rau koj txaus siab thiab yam koj txaus siab ua yog yam ncaj ncees uas ua rau Vajtswv zoo siab. Yam koj nyiam puas sawv cev tau rau Vajtswv? Tib neeg tus cwj pwm puas tuaj yeem sawv cev rau Vajtswv tau? Qhov twg haum koj ces yog qhov uas Vajtswv ntxub tshaj, thiab koj tus cwj pwm yog cov uas Vajtswv ntxub ntxaug. Yog tias koj xav tias koj tshuav nqi, ces cia li mus thov Vajtswv; tsis tas yuav hais qhia rau lwm tus paub li. Yog tias koj tsis thov Vajtswv, thiab xav kom lawv mloog koj tus kheej hais rau ntawm lwm tus lub xub ntiag xwb, qhov no puas yuav ua tau kom txaus li Vajtswv tej kev npaj siab? Yog koj tej kev ua ib txwm yog rau sab nrauv xwb, ces qhov ntawd qhia tau tias koj yog tus neeg uas siab ploj las thiab tsuas muaj qhov pom sab nrauv xwb. Cov neeg uas tsuas muaj tej kev coj zoo sab nrauv xwb tiam sis tsis muaj qhov muaj tiag, lawv yog neeg zoo li cas? Lawv yog cov Falixais uas ua txuj ua neeg ncaj ncees, thiab yog cov neeg tseem ceeb ntawm kev ntseeg! Yog nej tsis muab nej tej kev ua sab nrauv tso tseg, thiab hloov pauv tsis tau, ces nej txoj kev ua txuj ua neeg ncaj ncees yuav muaj ntau zuj zus tuaj. Nej txoj kev ua txuj ua neeg ncaj ncees ntau npaum twg, nej haj yam yuav tawm tsam Vajtswv ntau npaum ntawd. Thaum kawg, cov neeg zoo li ntawd yeej yuav raug muab pov tseg!

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hauv Txoj Kev Ntseeg, Yus Yuav Tsum Tsom Ntsoov rau Qhov Tseeb—Qhov Koom Tes Nrog Txoj Kev Lig Kev Cai Ntseeg Mas Tsis Yog Txoj Kev Ntseeg