Vajtswv Tej Lus Tseem Ceeb:

Tes hauj lwm ntawm ib tug neeg ua hauj lwm uas yeej muaj txhua yam tsim nyog ntawd mas thiaj yuav coj tau neeg los rau txoj kev yog thiab muab tau kev to taub qhov tseeb ntau tshaj rau lawv. Nws tes hauj lwm muaj cuab kav coj tau neeg los rau ntawm Vajtswv xub ntiag. Ntxiv qhov ntawd, tes hauj lwm uas nws ua mas zoo sib txawv ntawm ib tug neeg mus rau ib tug neeg thiab tsis raug txwv txiav los ntawm tej cai, muab kev tso dim thiab kev ywj pheej rau tib neeg, thiab muab qhov peev xwm maj mam loj hlob hauv lub neej thiab muaj kev to taub tob txog qhov tseeb rau lawv. Tes hauj lwm ntawm ib tug neeg uas tsis muaj tej yam tsim nyog mas poob qab deb heev lawm. Nws tej hauj lwm mas ruam kawg li. Nws tsuas muaj cuab kav coj tau neeg los rau hauv tej kev cai xwb, thiab tej uas nws txib cov neeg ntawd mas yeej tsis sib txawv ntawm ib tug neeg dhau ib tug neeg li; nws tsis ua hauj lwm raws li tej uas cov neeg ntawd xav tau. Nyob rau hauv hom hauj lwm zoo li no, mas muaj kev cai ntau dhau heev lawm thiab muaj tej kev qhuab qhia ntau dhau heev lawm, thiab nws tsis muaj cuab kav yuav coj tau tib neeg mus rau qhov muaj tiag, los sis mus rau qhov kev xyaum ua li ib txwm muaj rau hauv qhov kev loj hlob hauv lub neej. Nws tsuas muaj cuab kav pab tau kom neeg yoog raws li ob peb txog cai uas tsis muaj nuj nqis dab tsi li xwb. Txoj kev coj zoo li ntawd mas muaj cuab kav coj tau neeg kom yuam kev xwb. Nws coj koj kom mus zoo li nws; nws muaj cuab kav coj tau koj mus rau qhov uas nws muaj thiab yog. Yuav kom cov caum pom tau hais tias seb cov coj puas yog cov uas muaj tej yam tsim nyog, ces tus yawm sij ntawd ces yog saib ntawm txoj kev uas lawv coj mus rau thiab qhov uas tshwm sim los ntawm lawv tes hauj lwm, thiab saib seb cov caum puas tau txais tej hauv paus ntsiab lus raws li qhov tseeb, thiab seb lawv puas tau txais kev xyaum ua kom haum rau lawv txoj kev hloov. Koj yuav tsum saib qhov txawv ntawm tej hauj lwm uas sib txawv ntawm tej hom neeg uas sib txawv; koj yuav tsum tsis txhob ua ib tug neeg caum uas ruam ruam. Qhov no mas tseem ceeb rau tib neeg qhov kev to taub. Yog koj tsis muaj peev xwm pom qhov txawv ntawm qhov uas seb tus neeg twg qhov kev coj muaj ib txog kev thiab tus twg ho tsis muaj, koj yuav raug dab yooj yim heev. Tag nrho tej no mas muaj tej yam cuam tshuam ncaj qha rau koj tus kheej lub neej.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Tes Hauj Lwm thiab Tib Neeg Tes Hauj Lwm

Koj yuav tsum muaj kev to taub txog ntau tus yam ntxwv uas tib neeg yuav muaj rau thaum tus Vajntsujplig Dawb Huv ua num rau hauv lawv. Tshwj xeeb, cov uas ua dej num rau Vajtswv yuav tsum haj yam muaj ib txoj kev to taub txog ntawm ntau tus yam ntxwv los ntawm tej yam ntxwv no. Yog koj tsuas tham txog ntau yam ntawm tej kev ntsib kev pom los yog tej kev nrhiav kom tau kev to taub qhov tseeb xwb, ces nws qhia tau tias koj txoj kev ntsib kev pom tsuas yog ib-sab xwb. Yog tsis paub koj tus yam ntxwv tseeb thiab tsis to taub qhov tseeb tej hauv paus ntsiab lus, ces yuav tsis muaj hnub yuav hloov tau tus moj yam li. Yog tsis paub txog tej hauv paus ntsiab lus ntawm tus Vajntsujplig tes hauj lwm los yog to taub txog tej kev tawg paj txi txiv ntawm tes hauj lwm ntawd, ces nws yuav nyuaj heev rau koj los paub txog tes hauj lwm ntawm cov ntsujplig phem. Koj yuav tsum qhia cov ntsujplig phem tes hauj lwm kom tshwm tuaj, nrog rau tib neeg tej kev xav phem, thiab ua tib zoo saib ncaj nraim mus rau lub ntsiab ntawm qhov teeb meem ntawd; koj yuav tsum tau muab ntau yam cais tawm ntawm tib neeg tej kev xyaum ua thiab tej teeb meem uas tej zaum lawv muaj nyob rau hauv lawv txoj kev ntseeg Vajtswv, kom lawv thiaj li ras txog tej ntawd. Qhov tsawg tshaj plaws, koj yuav tsum tsis txhob ua kom lawv xav phem los yog nyob twj ywm. Txawm li cas los xij, koj yuav tsum to taub tej yam xwm txheej uas nyuab heev rau tib neeg feem coob, koj yuav tsum tsis txhob soj ntsuam txog los yog “sim qhia ib tug npua los hu nkauj”; qhov ntawd yog tus cwj pwm ruam kawg nkaus li. Yuav los daws tau ntau yam kev nyuaj siab uas tib neeg tau raug, ua ntej tshaj plaws, koj yuav tsum to taub tej kev txawv txav ntawm tej hauj lwm ntawm tus Vajntsujplig Dawb Huv; koj yuav tsum to taub tias tus Vajntsujplig Dawb Huv ua dej num rau rau cov tib neeg sib txawv li cas tiag, koj yuav tsum muaj txoj kev to taub txog tej kev nyuaj siab uas tib neeg tau raug thiab lawv tej kev tu ncua, thiab koj yuav tsum pom kom tshab plaws rau lub ntsiab ntawm qhov teeb meem ntawd thiab mus kom txog kiag nws tus cag, tsis txhob nrug los yog ua ib yam dab tsi yuam kev li. Tsuas yog tus tib neeg zoo li no xwb thiaj li tsim nyog los ua dej num rau Vajtswv.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Yam Uas Ib Tug Tswv Yug Yaj Zoo Yuav Tsum Npaj Kom Muaj

Cov uas ua dej num rau Vajtswv yuav tsum yog tus mob siab rau Vajtswv, lawv yuav tsum ua kom haum Vajtswv siab, thiab tuaj yeem ua neeg zoo rau Vajtswv. Txawm koj ua rau sab hauv los sis ua rau sab nrauv los xij, koj muaj peev xwm tau txais kev xyiv fab ntawm Vajtswv rau ntawm Vajtswv xub ntiag, koj muaj peev xwm sawv ruaj nrees rau ntawm Vajtswv xub ntiag, thiab tsis hais lwm tus neeg yuav saib koj zoo li cas los xij peem, koj ib txwm taug txoj kev uas koj yuav tsum taug, thiab saib xyuas Vajtswv lub nra kom zoo. Tsuas yog cov neeg zoo li no xwb thiaj li yog tus mob siab rau Vajtswv. Vajtswv cov neeg mob siab ntawd muaj peev xwm ua dej num rau Nws tau ncaj qha yog vim tias lawv tau txais Vajtswv cov lus txib thiab Vajtswv lub nra tseem ceeb, lawv muaj peev xwm ua kom Vajtswv lub siab yog lawv tus kheej lub, thiab ua rau Vajtswv lub nra los yog lawv li, thiab lawv tsis xav txog lawv lub neej yav pem suab: Txawm tias thaum lawv tsis muaj kev cia siab, thiab tsis tau txais dab tsi li lawm los, lawv yuav ntseeg Vajtswv los ntawm ib lub siab hlub Vajtswv mus li. Thiab yog li ntawd, hom neeg no yog Vajtswv tus phooj ywg uas sib raug zoo. Vajtswv cov phooj ywg uas sib raug zoo ntawd kuj yog Nws cov neeg uas ntseeg siab thiab; tsuas yog Vajtswv cov neeg uas ntseeg siab xwb thiaj li qhia tau Nws txoj kev ntshaw, thiab Nws txoj kev xav, thiab txawm hais tias lawv lub cev nqaij tawv yuav mob thiab tsis muaj zog los, lawv muaj peev xwm thev dhau qhov mob thiab tso qhov uas lawv nyiam ua kom haum Vajtswv siab. Vajtswv muab lub nra hnyav ntau ntxiv rau cov neeg zoo li ntawd, thiab uas Vajtswv xav ua kom tau tawm los ntawm cov neeg ntawd yog lawv cov lus tim khawv. Yog li, cov neeg no tau ua haum Vajtswv siab, lawv yog Vajtswv cov tub qhe uas ua raws li Nws tej kev npaj siab, thiab tsuas yog cov neeg zoo li no xwb thiaj tuaj yeem tswj kav ua ke nrog Vajtswv tau.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Yuav Ua Li Cas Ua Dej Num Kom Haum Raws Li Vajtswv Tej Kev Npaj Siab

Lawv tej mas yeej ib txwm yog tus cwj pwm uas siab phem rau Vajtswv txoj dej num tshiab; lawv yeej tsis muaj ib qho kev xav zwm me me li, los sis lawv yeej tsis zoo siab hlo zwm los sis txo lawv tus kheej lub hwj chim li. Lawv tsa lawv tus kheej siab rau ntawm lwm tus xub ntiag thiab yeej tsis kam zwm rau leej twg li. Rau ntawm Vajtswv xub ntiag, lawv suav lawv tus kheej tias yog cov qhia txoj lus zoo tshaj plaws, cov uas txawj ua dej num tshaj plaws rau lwm tus. Lawv yeej tsis muaj “tej khoom uas muaj nqis” uas yog lawv li pov tseg li, tab sis saib tej ntawd li yog tsev neeg tej khoom muaj nqis rau txoj kev pe hawm, rau txoj kev qhia lwm tus, thiab lawv siv tej ntawd mus piav qhia rau cov ruam uas hwm lawv. Qhov tseeb yeej muaj ib co tib neeg zoo li no nyob hauv pawg ntseeg. Nws hais tau tias lawv yog “cov siab tawv uas tsis muaj leej twg kov yeej,” ib tiam tag ib tiam tuaj uas tuaj so rau hauv Vajtswv lub tuam tsev. Lawv muab txoj kev qhia txoj lus (txoj lus qhia kev ntseeg) los ua lawv tes dej num uas tseem ceeb tshaj plaws. Xyoo tag xyoo tuaj, tiam tag tiam tuaj, lawv muaj zog zis mus qhia yuam qee lawv tes dej num uas “dawb huv thiab zam tsis tau.” Tsis muaj leej twg ruaj siab tuav lawv; tsis muaj ib tug tib neeg uas ruaj siab hlo kam hais lawv. Lawv rais los ua “vajntxwv” nyob rau hauv Vajtswv lub tsev, khiav tsa ceg cos tsim txom lwm tus ib tiam mus rau ib tiam.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Cov Uas Mloog Vajtswv Lus Nrog ib Lub Siab Tseeb Ces Vajtswv Yuav Tsum Muab Tau Xwb Xwb Li

Tes hauj lwm nyob rau hauv tib neeg lub siab mas yooj yim rau tib neeg ua kom tiav heev lawm. Cov xib fwb thiab cov thawj coj nyob rau sab kev ntseeg, piv txwv, vam khom rau lawv tej peev xwm tshwj xeeb thiab txoj dej num los ua lawv tes hauj lwm xwb. Cov neeg uas caum lawv los tau ntev lawm mas yuav raug lawv tej kev txawj ntawd kis rau thiab yuav raug tej yam uas yog lawv kiag ntawd haub ntxias tau. Lawv tsom ntsees rau tib neeg tej kev txawj, tej peev xwm thiab kev paub, thiab lawv yuav mob siab rau tej yam tshaj ntuj tsim thiab tej kev qhuab qhia tob tob uas tsis muaj tseeb (muaj tseeb, tej kev qhuab qhia tob tob no yeej tsis muaj cuab kav ua tau li). Lawv tsis tsom ntsees rau qhov kev hloov hauv tib neeg tus moj yam, tab sis tsuas yog tsom ntsees rau kev cob qhia tib neeg mus qhuab qhia thiab ua hauj lwm, tsim kho tib neeg txoj kev paub thiab lawv tej kev qhuab qhia sab kev ntseeg uas muaj ntau heev xwb. Lawv tsis tsom ntsees rau qhov uas seb tib neeg tus moj yam hloov ntau npaum li cas los sis tsis tsom ntsees rau qhov uas seb tib neeg to taub qhov tseeb ntau npaum li cas. Lawv tsis txhawj xeeb lawv tus kheej txog tib neeg lub ntsiab tseeb, thiab haj yam tsis npaj kom paub txog tib neeg tej yam ntxwv uas zoo li ib txwm muaj thiab txawv tshaj li ib txwm muaj li. Lawv tsis hais dab tsi los txo tib neeg tej kev xav phem li, los sis lawv yeej tsis nthuav tawm txog lawv tej kev xav phem, haj yam tsis qhuab qhia tib neeg txog tej yam uas lawv tsis muaj txaus los sis tej kev qias vuab tsuab li. Cov neeg feem coob uas caum lawv ces tsuas siv lawv tej kev txawj los ua dej num xwb, thiab tag nrho tej uas lawv tso tawm ces tsuas yog kev xav phem sab kev ntseeg thiab tej tswv yim sab kev ntseeg nkaus xwb, uas yeej tsis chwv raug nrog qhov muaj tseeb hlo li thiab tsis muaj peev xwm yuav pub tau txoj sia rau tib neeg li. Qhov tseeb, lub ntsiab tseeb ntawm lawv tes hauj lwm ces tsuas yog yug txoj kev txawj kom loj hlob, tsis siv dab tsi hlo li los yug ib tug neeg kom loj hlob mus ua ib tug tub kawm tiav kev qhuab qhia uas muaj peev xwm uas tom qab ntawd yuav mus ua hauj lwm thiab mus coj neeg.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Tes Hauj Lwm thiab Tib Neeg Tes Hauj Lwm

Kev ua dej num rau Vajtswv tsis yog ib txoj hauj lwm yooj yim. Cov uas muaj tus yam ntxwv tsis ncaj ncees uas yeej tseem tsis hloov yuav ua dej num tsis tau rau Vajtswv. Yog koj tus yam ntxwv tsis tau raug txiav txim thiab qhuab ntuas los ntawm Vajtswv cov lus, ces koj tus yam ntxwv tseem sawv cev rau Ntxwgnyoog, uas ua pov thawj tias koj ua dej num rau Vajtswv tawm ntawm koj tus kheej tej kev npaj siab uas zoo xwb, hais tias koj txoj kev ua dej num yog raws li koj tus yeeb yam phem. Koj ua dej num rau Vajtswv nrog rau koj tus xeeb ceem, thiab raws li koj tus kheej siab nyiam. Dab tsi ntxiv, koj ib txwm xav tias tej yam uas koj txaus siab hlo ua ntawd yog qhov ntxim Vajtswv siab, thiab hais tias tej yam uas koj tsis xav ua ntawd yog yam qias rau Vajtswv; koj ua hauj lwm tag nrho raws li koj tus kheej siab nyiam. Qhov no puas hu tau hais tias yog kev ua dej num rau Vajtswv? Thaum kawg, koj tus moj yam ntawm lub neej yuav tsis hloov ib qho me me li; tiam sis, koj txoj kev ua dej num yuav ua rau koj haj yam tawv ncauj, yog li ces koj tus yam ntxwv qias vuab tsuab yuav haj yam ruaj khov tuaj, thiab vim li ntawd, yuav muaj tej kev cai uas hais txog txog kev ua dej num rau Vajtswv uas feem ntau ua raws li koj tus kheej tus cwj pwm, thiab tej kev paub uas los ntawm koj txoj kev ua dej num raws li koj tus yam ntxwv ntawd nyog rau hauv koj. Cov no yog cov kev paub thiab kev kawm tau los ntawm ib tug tib neeg. Nws yog tib neeg lub tswv yim rau tej kev sib khom nrog lub ntiaj teb. Cov tib neeg zoo li no yeej muab hu tau ua cov neeg Falixais thiab cov coj kev cai dab qhuas. Yog lawv tsis tsim los thiab tsis lees txim hloov dua siab tshiab, ces tom qab ntawd lawv yuav hloov los ua cov khetos cuav thiab cov tawm tsam khetos uas dag tib neeg nyob rau lub sij hawm kawg. Cov khetos cuav thiab cov tawm tsam khetos uas tau hais txog yuav tshwm sim los ntawm cov neeg no. Yog tias cov ua dej num rau Vajtswv ua raws li lawv tus cwj pwm thiab ua raws li lawv lub siab nyiam, lawv yuav raug rhuav tshem lub sij hawm twg los tau. Cov neeg uas ua tau ntau xyoo dhau los lawm ntawd tau ua dej num rau Vajtswv kom deev tau lwm tus lub siab, kom qhuab qhia tau lawv thiab txwv tau lawv, thiab kom sawv tau rau saum qhov chaw siab—thiab cov uas tsis lees txim hloov dua siab tshiab, tsis lees lawv tej kev txhaum, tsis tso tej txiaj ntsig ntawm lub meej mom tseg—cov neeg no yuav ntog rau ntawm Vajtswv lub xub ntiag. Lawv yog cov zoo tib yam li Povlauj, hais tias lawv yog cov tuaj ua ntej thiab khav theeb txog lawv cov txuj ci. Vajtswv yuav tsis ua kom cov neeg zoo li no zoo tiav log li. Cov dej num zoo li no tab kaum Vajtswv tes dej num. Tib neeg ib txwm tuav txoj qub. Lawv tuav rawv tej kev xav ntawm yav dhau los, rau txhua yam los ntawm lub sij hawm uas twb dhau mus lawm. Qhov no yog ib qho teeb meem loj rau lawv tes dej num. Yog hais tias koj tsis tuaj yeem muab tej ntawd pov tseg li, tej no yuav khawm ceev ceev rau tag nrho koj lub neej. Txawm koj khiav mus los ua hauj lwm ua rau koj ob txhais ceg lov los yog koj lub nraub qaum dam, txawm hais tias koj tuag rau hauv koj txoj kev ua dej num rau Vajtswv los xij, Vajtswv yuav tsis pom zoo rau koj ib qho me me li. Qhov txawv ces yog li no: Nws yuav hais tias koj yog ib tug neeg ua phem.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Kev Teem Hawm Sab Kev Ntseeg Yuav Tsum Raug Kev Tshem Tawm

Vim li cas tib neeg feem coob tau siv dag siv zog ntau los nyeem Vajtswv cov lus, tiam sis tsuas yog muaj kev paub xwb thiab tsis tuaj yeem hais dab tsi txog ib txoj kev tseeb tiag tom qab ntawd li? Koj puas xav tias muaj kev paub ces yog muaj qhov tseeb? Qhov ntawd tsis yog ib qho kev xav uas tsis meej pem lov? Koj mas muaj peev xwm hais txog kev paub ntau kis npaum li cov xuab zeb ntawm ntug hiav txwv, txawm li ntawd los yeej tsis muaj ib lo lus muaj txoj kev tseeb kiag li. Tsis yog koj tab tom ua li no los dag tib neeg lov? Tsis yog koj tab tom ua ib qho yeeb yam uas tsis muaj dab tsi, uas tsis muaj lub ntsiab lus los pab txhawb nws lov? Tag nrho cov cwj pwm zoo li no yog rhuav tshem tib neeg! Tej zaj lus qhia yim siab thiab nws yim tu ncua qhov muaj tseeb, ces nws yim tsis muaj peev xwm coj tib neeg los rau qhov tseeb. Tej zaj lus qhia yim siab, ces nws yim ua rau koj tsis mloog lus thiab tawm tsam Vajtswv. Tsis txhob quav ntsej txog tej zaj lus qhia ntawm sab ntsujplig—nws tsis muaj qab hau dab tsi li! Ib txhia tib neeg twb tau tham txog tej zaj lus qhia ntawm sab ntsujplig los tau ntau caum xyoo lawm, thiab lawv tau ntseeg txoj kev ntseeg ntawm sab ntsujplig loj heev lawm, tiam sis thaum kawg, lawv yeej tseem tsis to taub qhov tseeb qhov muaj tiag li. Vim lawv tsis tau xyaum ua raws los sis tau ntsib tau pom Vajtswv cov lus li, lawv tsis muaj tej hauv paus ntsiab lus los sis txoj hau kev xyaum ua raws. Cov tib neeg zoo li no yog cov uas lawv tus kheej tsis muaj qhov tseeb qhov muaj tiag, yog li ntawd lawv yuav ua li cas coj tau lwm tus tib neeg los rau txoj kev yog ntawm txoj kev ntseeg Vajtswv? Lawv tsuas coj tau tib neeg mus yuam kev xwb. Qhov no tsis phom sij rau lwm tus thiab rau lawv tus kheej lod? Yam tsawg kawg nkaus mas, koj yuav tsum muaj peev xwm daws tau tej teeb meem tiag tiag uas nyob rau ntawm koj xub ntiag. Qhov ntawd hais tau tias, koj yuav tsum muaj peev xwm xyaum ua raws thiab paub Vajtswv cov lus, thiab muab qhov tseeb coj los xyaum ua raws. Tsuas yog qhov no xwb thiaj li yog kev mloog Vajtswv lus. Tsuas yog thaum koj to taub qhov tseeb txog lub neej txoj sia lawm xwb mas koj thiaj li tsim nyog los ua hauj lwm rau Vajtswv, thiab tsuas yog thaum muab koj fij rau Vajtswv yam ua siab dawb paug lawm xwb mas Vajtswv thiaj li yuav pom zoo rau koj. Tsis txhob hais lus loj loj thiab tham txog tej zaj lus qhia uas tsis txaus ntseeg; qhov no tsis tseeb. Txoj kev qhia txog tej zaj lus qhia ntawm sab ntsujplig los ua kom tib neeg qhuas koj ntawd tsis yog ua tim khawv rau Vajtswv, tiam sis tsuas yog kev khav koj tus kheej xwb. Nws yeej tsis muaj txiaj ntsim rau tib neeg thiab tsis txhawb lawv li, thiab coj tau lawv mus pe hawm tej zaj lus qhia ntawm sab ntsujplig yam yooj yim heev thiab tsis tsom ntsoov rau txoj kev xyaum ua raws qhov tseeb li—qhov no tsis yog kev coj tib neeg mus yuam kev lod? Qhov pheej ua li no yuav ua rau muaj tej zaj lus qhia uas tsis muaj qab hau thiab tej kev cai uas yuav txwv thiab ntxias tib neeg tshwm tuaj ntau heev; nws yog yam txaj muag tiag tiag li.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsom Ntsoov rau Qhov Muaj Tseeb Ntxiv

Leej twg tsis to taub lub hom phiaj ntawm Vajtswv tes hauj lwm ces yog tus uas tawm tsam Nws, thiab txawm yog tus uas tau to taub lub hom phiaj ntawm Vajtswv tes hauj lwm lawm tab sis tsis nrhiav kev ua kom Vajtswv txaus siab ces haj tseem suav tau tias yog ib tug tawm tsam Vajtswv thiab. Muaj ib txhia nyeem Vajluskub hauv tej tsev teev hawm uas loj kawg nkaus thiab qog cov lus ntawd tas hnub, tab sis tsis muaj ib tug twg ntawm lawv cov ntawd to taub lub hom phiaj ntawm Vajtswv tes hauj lwm li. Tsis muaj ib tug twg ntawm lawv cov ntawd muaj peev xwm paub txog Vajtswv; thiab haj yam tsis muaj ib tug ntawm lawv cov ntawd ua raws li Vajtswv tej kev npaj siab. Lawv txhua tus tsis tsim nqi dab tsi li, yog neeg phem, txhua tus sawv siab qhuab ntuas “Vajtswv.” Lawv yog cov tib neeg uas kwv rawv Vajtswv tus chij tiam sis tseem txhob txwm tawm tsam Vajtswv, lawv yog cov uas kwv lub npe tias ntseeg Vajtswv thaum noj tib neeg cev nqaij daim tawv thiab haus tib neeg cov ntshav. Tag nrho cov tib neeg zoo li no yog cov dab phem uas nqos tib neeg tus ntsuj, cov thawj dab uas txhob txwm cuam tshuam cov uas xav taug mus rau txoj kev yog, thiab dawm thaiv cov uas nrhiav Vajtswv. Tej zaum mas lawv yuav zoo li “muaj lub cev zoo khov kho,” tab sis cov uas caum raws lawv yuav ua cas paub tau tias lawv ces twb yog kiag cov tawm tsam khetos uas coj tib neeg tawm tsam Vajtswv ntag? Cov caum raws lawv yuav ua cas paub tau tias lawv yog cov dab phem ciaj sia uas rau siab ntso nqos tib neeg tej ntsuj?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Txhua Tus Tib Neeg Uas Tsis Paub Vajtswv Yog Cov Tib Neeg Uas Tawm Tsam Vajtswv