Tej Nqe Vajluskub Uas Siv Ua Tej Lus Hais Txog:

“Vim li cas nej ho ua txhaum rau Vajtswv txoj kev cai los ntawm nej tej kab lig kev cai thiab? Vim Vajtswv tau nkaw lus lawm, hais tias, Hwm koj txiv thiab koj niam: thiab, Tus uas hais lus phem rau nws txiv los sis nws niam, ces cia nws raug txim tuag. Tab sis nej hais tias, Leej twg los xij uas hais rau nws txiv los sis nws niam tias, Nws yog ib qho khoom pub uas neb tau los ntawm kuv; Thiab tsis hwm nws txiv thiab nws niam, ces nws yuav dim. Yog li ntawd nej tau ua rau Vajtswv txoj kev cai tsis muaj qab hau los ntawm nej tej kab lig kev cai. Nej cov uas yog neeg ncauj lus zoo tab sis siab phem, Yaxaya twb hais ua lus faj lem txog nej lawm, hais tias, Cov neeg no los ze Kuv nrog lawv lub qhov ncauj xwb, thiab hawm Kuv nrog lawv ob daim di ncauj xwb; tab sis lawv lub siab mas nyob deb ntawm Kuv. Tab sis lawv pe hawm Kuv yam tsis muaj txiaj ntsim dab tsi, muab tej kev cai coj los qhia ua tej lus nkaw rau tib neeg” (Mathai 15:3–9).

“Muab kev puas tsuaj rau nej, cov kws sau ntawv, cov Falixais, cov neeg ncauj lus zoo siab phem! Vim nej kaw lub nceeg vaj saum ntuj ceeb tsheej rau tib neeg lawm: vim nej tus kheej yuav tsis tau nkag mus, los sis nej yeej txwv cov uas yuav nkag mus rau hauv tib si. Muab kev puas tsuaj rau nej, cov kws sau ntawv, cov Falixais, cov neeg ncauj lus zoo siab phem! Vim nej rhuav tshem cov poj ntsuam tej tsev, thiab ua txuj thov Vajtswv ntev ntev: yog li ntawd nej yuav raug cem loj tshaj.

“Muab kev puas tsuaj rau nej, cov kws sau ntawv, cov Falixais, cov neeg ncauj lus zoo siab phem! Vim nej ncig lub hiav txwv thiab daim av mus muab ib tug neeg hloov nws txoj kev ntseeg, thiab thaum nws ua tau li ntawd lawm, nej muab nws ua ib tug me nyuam rau ntuj tawg tshaj nej tus kheej lawm ob npaug” (Mathai 23:15).

“Muab kev puas tsuaj rau nej, nej cov neeg dig muag uas coj kev, uas hais tias, Leej twg los xij uas tuav lub tuam tsev cog lus twv, ces nws tsis muaj qab hau dab tsi; tab sis leej twg los xij uas tuav cov kub ntawm lub tuam tsev cog lus twv, ces nws yog ib tug neeg tiv nqi! Nej cov neeg ruam thiab dig muag: yam twg loj dua, cov kub, los sis lub tuam tsev uas ua rau cov kub ntawd dawb huv? Thiab, Leej twg los xij uas tuav lub thaj cog lus twv, ces nws tsis muaj qab hau dab tsi; tab sis leej twg los xij uas tuav qhov khoom pub saum lub thaj cog lus twv, ces yog nws ua txhaum lawm. Nej cov neeg ruam thiab dig muag: yam twg loj dua, qhov khoom pub, los sis lub thaj uas ua kom qhov khoom pub ntawd dawb huv? Yog li ntawd leej twg los xij uas tuav lub thaj cog lus twv, kuj yog tuav lub thaj, thiab tuav tag nrho cov khoom uas nyob saud. Thiab leej twg los xij uas tuav lub tuam tsev cog lus twv, kuj yog tuav lub tuam tsev, thiab tuav Nws uas nyob rau hauv. Thiab tus uas tuav lub ntuj ceeb tsheej cog lus twv, kuj yog tuav Vajtswv lub zwm txwv, thiab Nws uas zaum rau saud cog lus twv.

“Muab kev puas tsuaj rau nej, cov kws sau ntawv thiab cov Falixai, cov neeg ncauj lus zoo tab sis siab phem! Vim nej them ib feem kaum ntawm cov pum hub thiab xyab txob thiab qhiav daj, thiab tau hla kiag tej uas tseem ceeb dua ntawm txoj kev cai, kev txiav txim, kev hlub tshua, thiab kev ntseeg lawm: tej no nej tsim nyog ua, thiab tsis txhob tso ib qho tsis ua li. Nej cov neeg dig muag uas coj kev, uas tshwj kiag ib niag yoov cia, tab sis ho nqos kiag ib tug niag ntxhuav lawm.

“Muab kev puas tsuaj rau nej, cov kws sau ntawv thiab cov Falixais, cov neeg ncauj lus zoo tab sis siab phem! Vim nej ntxuav sab nraum lub khob thiab lub phaj xwb, tab sis sab hauv mas muaj kev ua siab hlob thiab kev ntshaw puv nkaus. Nej cov neeg Falixai uas dig muag, ua ntej tshaj xub ntxuav sab hauv lub khob thiab lub phaj tso, ces sab nraum lub khob thiab lub phaj kuj yuav huv tib si lawm.

“Tab sis muab kev puas tsuaj rau nej lau, cov kws sau ntawv thiab cov Falixai, cov neeg dag! Vim nej zoo li lub qhov zeb faus tuag xim dawb, uas sab nraud mas zoo li zoo nkauj heev li, tab sis sab hauv mas muaj tej neeg tuag tej pob txha puv nkaus xwb, thiab tej yam tsis huv tag nrho. Txawm hais tias sab nraud mas zoo li nej yeej ncaj ncees rau tib neeg, tab sis sab hauv mas nej muaj kev txawj dag thiab kev phem puv nkaus xwb.

“Muab kev puas tsuaj rau nej, cov kws sau ntawv thiab cov Falixai, cov neeg ncauj lus zoo tab sis siab phem! Vim nej tsim tej ntxa rau cov xib fwb cev lus, thiab tsim kho cov lag zeb rooj ntxas rau cov neeg ncaj ncees kom zoo, Thiab hais tias, Yog tias peb nyob rau tiam ntawm peb tej poj koob yawm txwv nyob, mas peb yuav tsis nrog lawv koom tua cov xib fwb cev lus ntawd li. Vim li cas nej ho ua tim khawv rau nej tus kheej, tias nej yog cov me nyuam ntawm lawv cov uas tua cov xib fwb cev lus ntawd. Yog li ces nej cia li mus ua kom nej tej poj koob yam txwv tej kev phem ntawd puv nkaus. Nej uas yog cov niag nab, nej uas yog tiam ntawm cov niag nab muaj taug, nej yuav khiav dim txoj kev rau txim ntawm ntuj tawg tau li cas? Vim li cas, saib mas, Kuv txib cov xib fwb cev lus, cov neeg txawj ntse, thiab cov kws sau ntawv tuaj rau nej: thiab nej muab ib txhia tua thiab muab ntsia rau saum tus ntoo khaub lig; thiab nej muab ib txhia nplawm rau hauv nej tej tsev pe hawm, thiab muab lawv tsim txom ib lub zos mus rau ib lub zos: Tias cov ntsav ntawm tag nrho cov neeg ncaj ncees uas tau nrog rau hauv lub ntiaj teb lawm, pib txij ntawm Anpee uas yog neeg ncaj ncees cov ntshav mus rau cov ntshav ntawm Xakhaliya uas yog Npalakhiya tus tub, tus uas nej muab tua rau ntawm lub tuam tsev thiab lub thaj kis nruab nrab ntawd yuav los rau saum nej. Kuv hais tseeb rau nej tias, tag nrho tej no yuav los rau tiam no” (Mathai 23:13–36).

Vajtswv Tej Lus Tseem Ceeb:

Nej puas xav paub lub hauv paus keeb cag ntawm qhov uas vim li cas cov Falixais thiaj li tawm tsam Yexus mas? Nej puas xav paub lub ntsiab tseeb ntawm cov Falixais? Lawv ces muaj tej kev xav tsis raws li qhov tseeb puv npo txog tus Mexiyas. Tshaj qhov ntawd, lawv tsuas ntseeg hais tias tus Mexiyas yuav los, tab sis tsis caum txoj sia qhov tseeb. Thiab yog li ntawd, txawm yog niaj hnub no kiag los lawv tseem tos ntsoov tus Mexiyas, vim lawv tsis muaj ib qho kev paub txog txoj kev ntawm lub neej txoj sia li, thiab tsis paub hais tias txoj kev ntawm qhov tseeb yog dab tsi. Yuav ua cas, nej hais nas, es cov neeg ruam, tawv ncauj thiab tsis paub tab li ntawd thiaj yuav tau txais Vajtswv tej koob hmoov mas? Yuav ua cas lawv thiaj yuav pom tus Mexiyas? Lawv tawm tsam Yexus vim lawv tsis paub txoj xub ke ntawm Vajntsujplig tes hauj lwm, vim lawv tsis paub txoj hau kev ntawm qhov tseeb uas Yexus tau hais txog, thiab, tshaj qhov ntawd, vim lawv tsis to taub tus Mexiyas. Thiab vim lawv tsis tau pom dua tus Mexiyas li thiab yeej tsis tau koom tus Mexiyas li, lawv thiaj ua yuam kev rau qhov uas tsuas lam tuav rawv tus Mexiyas lub npe rau thaum uas tab tom siv txhua yam los tawm tsam lub ntsiab tseeb ntawm tus Mexiyas xwb. Cov Falixais nyob rau hauv lub ntsiab tseeb ces tawv ncauj, khav theeb, thiab tsis ua raws li qhov tseeb. Lub hauv paus ntsiab lus ntawm lawv txoj kev ntseeg Vajtswv ces yog: Tsis hais Koj tej kev qhuab qhia yuav tob npaum li cas, tsis hais Koj lub hwj chim yuav siab npaum li cas li, Koj yeej tsis yog Khetos tshwj tsis yog hais tias Koj raug hu ua tus Mexiyas. Txoj kev ntseeg no tseem tsis yog tej yam txawv heev thiab txaus luag heev thiab lod?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Thaum Lub Sij Hawm Koj Pom Yexus Lub Cev Sab Ntsujplig, Vajtswv Yuav Tsim Lub Ntuj thiab Lub Ntiaj Teb Tshiab Lawm

Tus tib neeg uas raug txoj kev qias vuab tsuab ces mag Ntxwgnyoog rooj ntxiab lawm; lawv txhua tus puav leej nyob rau hauv lub cev nqaij daim tawv, nyob rau hauv tej kev ntshaw kom txhua yam mas yog lawv tus kheej li nkaus xwb, thiab yeej tsis muaj ib tug ntawm lawv kiag li uas yuav sib raug zoo nrog Kuv. Yeej muaj cov uas hais tias lawv yog cov muaj kev sib raug zoo nrog Kuv, tab sis cov neeg zoo li ntawd tseem pheej teev hawm tej mlom uas pom tsis meej. Txawm hais tias lawv lees paub Kuv lub npe hais tias yeej dawb huv los, lawv taug ib txoj kev uas khiav mus tsis thooj li Kuv, thiab lawv tej lus mas muaj kev khav theeb thiab kev ruaj siab rau lawv tus kheej puv nkaus nyob rau hauv xwb. Qhov no yog vim, lawv sawv daws yeej ib txwm tawm tsam Kuv thiab tsis muaj kev sib raug zoo nrog Kuv. Txhua txhua hnub, lawv nrhiav Kuv tej lw nyob hauv Vajluskub thiab lam tau lam nrhiav tej nqe lus uas “zoo nyeem” uas lawv muab nyeem tsis paub xaus thiab muab hais tias yog tej nqe Vajluskub. Lawv tsis paub tias yuav ua cas thiaj muaj kev sib raug zoo nrog Kuv los sis kev tawm tsam Kuv ho yuav zoo li cas. Lawv tsuas lam nyeem tej nqe Vajluskub yam dig muag ntsuav xwb. Lawv kos ciam rau tus vajtswv uas pom tsis meej uas lawv tsis tau pom thiab tsis tuaj yeem pom ntawd raws li qhov phau Vajluskub txwv, thiab muab thau tawm coj los saib rau thaum lawv muaj sij hawm. Lawv ntseeg qhov uas muaj Kuv raws li qhov uas Vajluskub hais xwb, thiab lawv muab Kuv tso sib txig sib luag nrog phau Vajluskub; yog tsis muaj phau Vajluskub ces tsis muaj Kuv, thiab tsis muaj Kuv ces tsis muaj phau Vajluskub. Lawv tsis quav ntsej txog qhov uas muaj Kuv thiab tej yam Kuv ua li, tab sis ho rau siab ntso thiab kub siab lug kawm txhua lo lus hauv Vajluskub. Muaj coob tus haj tseem ntseeg hais tias kom Kuv txhob ua tej yam uas Kuv xav ua li yog hais tias Vajluskub tsis tau hais tseg ua ntej. Lawv muab Vajluskub saib tseem ceeb dhau heev lawm. Nws hais tau hais tias lawv saib tej lus uas ncaj ncaj ntawd tseem ceeb dhau heev lawm, txog ntua qhov uas lawv siv tej nqe lus hauv Vajluskub los ntsuas txhua lo lus Kuv hais thiab los cem thuam Kuv. Qhov lawv nrhiav ntawd tsis yog txoj kev sib raug zoo nrog Kuv, los sis qhov uas yuav ua kom muaj kev sib raug zoo nrog qhov tseeb, tab sis tsuas yog qhov ua kom muaj kev sib raug zoo nrog cov lus ntawm phau Vajluskub, thiab lawv ntseeg, yam tsis muaj ib qho zam tau li, hais tias tej yam uas tsis yoog raws Vajluskub ces yeej tsis yog Kuv tes hauj lwm. Cov neeg ntawd tsis yog cov Falixais cov xeeb leej xeeb ntxwv uas paub lawv tes dej num lod? Cov Falixais uas yog neeg Yudai siv Mauxes txoj kev cai los teem txim rau Yexus. Lawv tsis nrhiav kev sib raug zoo nrog rau tus Yexus uas nyob rau lub sij hawm ntawd, tab sis ua raws txhua nqe cai ntawm txoj cai nruj heev—tom qab nog txim rau Nws hais tias tsis ua raws cov kev cai hauv Vajluskub Qub thiab tsis yog tus Mexiyas lawm—lawv muab Yexus tus uas tsis muaj kev txhaum ntawd ntsia kiag rau saum tus ntoo khaub lig. Lawv lub tseem ntsiab yog dab tsi? Tsis yog qhov uas lawv tsis nrhiav kev sib raug zoo nrog qhov tseeb los? Lawv mas mob siab tshaj plaws rau txhua lo lus hauv Vajluskub ces tsis quav ntsej txog Kuv tej kev xav los sis tej kauj ruam thiab tej kev ua Kuv tes hauj lwm. Lawv tsis yog cov neeg uas nrhiav qhov tseeb, tab sis tsuas yog cov neeg uas tuav tej lus ruaj ruaj xwb; lawv tsis yog cov neeg ntseeg Vajtswv, tab sis tsuas yog cov neeg ntseeg Vajluskub xwb. Qhov tseem ceeb tshaj, lawv yog cov dev zov phau Vajluskub xwb. Yuav kom tiv thaiv tau lawv qhov kev txaus siab rau phau Vajluskub, los mus txhawb nqa lub meej mom ntawm Vajluskub, thiab tiv thaiv Vajluskub lub koob npe zoo, lawv ua mus txog qhov uas muab tus Yexus uas muaj lub siab hlub tshua sawv daws ntawd ntsia kiag rau saum tus ntoo khaub lig. Qhov no lawv tsuas lam ua los tiv thaiv Vajluskub xwb, thiab ua los mus tuav lub meej mom ntawm txhua lo lus hauv Vajluskub uas nyob hauv neeg lub siab xwb. Yog li ntawd lawv yeem muab lawv lub neej yav pem suab thiab kev theej txhoj daws kev txhaum tso pov tseg es los nog txim rau Yexus, tus uas tsis ua raws li tej lus qhuab qhia hauv Vajluskub, rau lub qhov tuag. Lawv tsis yog qhev rau txhua lo lus hauv Vajluskub thiab los?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Koj Yuav Tsum Nrhiav Txoj Hau Kev Kom Sib Raug Zoo Nrog Rau Khetos

Cov Falixais Qhov Kev Txiav Txim rau Yexus

Mk 3:21–22  Thiab thaum Nws cov phooj ywg hnov txog nws, lawv tawm mus saib Nws: vim lawv tau hais tias, Nws nyob ntawm Nws Tus Kheej ib sab. Thiab cov kws sau ntawv uas nqis pem Yeluxalees los hais tias, Nws raug dab Npe-eexenpu lawm, thiab Nws siv tus thawj dab los ntiab cov dab tawm xwb.

Yexus Qhov Kev Yws rau cov Falixais

Mth 12:31–32  Vim li cas Kuv thiaj hais rau nej, Tag nrho txhua yam kev txhaum thiab kev hais lus thuam yuav raug muab zam tau rau tib neeg: tab sis kev hais lus thuam tus Vajntsujplig yuav tsis raug zam tau rau tib neeg li. Thiab leej twg los xij uas hais ib lo lus tawm tsam Neeg Leej Tub, nws yuav zam tau rau nws: tab sis leej twg los xij uas hais lus tawm tsam Vajntsujplig, nws yuav zam tsis tau rau nws, tsis hais hauv lub ntiaj teb no, los sis hauv lub ntiaj teb uas tseem yuav los tib si.

…………

Hauv phau Vajluskub, cov Falixais qhov kev ntaus nqi ntawm Yexus Tus Kheej thiab tej yam uas Nws tau ua yog: “… lawv tau hais tias, Nws nyob ntawm Nws Tus Kheej ib sab. … Nws raug dab Npe-eexenpu lawm, thiab Nws siv tus thawj dab los ntiab cov dab tawm xwb” (Mk 3:21–22). Cov kws sau ntawv qhov thiab cov Falixais qhov kev txiav txim ntawm tus Tswv Yexus tsis yog lawv xyaum los ntawm lwm tus cov lus, thiab tsis yog kev kwv yees yam tsis muaj qab hau—nws yog cov lus xaus uas lawv tau kos txog tus Tswv Yexus los ntawm yam uas lawv tau pom thiab tau hnov ntawm Nws tej kev ua xwb. Txawm tias lawv cov lus xaus raug tsim los kom pom meej rau hauv lub npe ntawm kev ncaj ncees thiab tshwm los rau tib neeg pom tias nws raug tshuaj xyuas tau zoo lawm, qhov kev khav theeb uas lawv tau txiav txim rau tus Tswv Yexus yeej yog qhov lawv yuav ua kom tau nyuaj. Txoj kev vwm ntawm lawv qhov ntxub rau tus Tswv Yexus raug qhia tshwm txog lawv tus kheej tej kev xav muab hlob lim liam thiab lawv txoj kev ua phem qias vuab tsuab, nrog rau lawv tus yeeb yam kev xav phem uas lawv tau tawm tsam Vajtswv. Tag nrho tej yam uas lawv tau hais rau hauv lawv qhov kev txiav txim ntawm tus Tswv Yexus raug tsav los ntawm lawv tej kev xav muab hlob lim hiam, kev xam khib, thiab tus yeeb yam ntxim ntxub thiab phem ntawm lawv txoj kev ua yeeb ncuab rau Vajtswv thiab qhov tseeb. Lawv tsis ntsuam xyuas lub hauv paus ntawm tus Tswv Yexus tej kev ua, los sis lawv tsis ntsuam xyuas lub ntsiab tseem ceeb ntawm yam uas Nws tau hais los sis tau ua lawm. Feem ntau, qis qhov muag ua, hauv tus yam ntxwv thab plaub, thiab los ntawm qhov txob txwm ua phem, lawv tau tawm tsam thiab rhuav tshem yam uas Nws tau ua tiav lawm. Lawv tseem mus deb txog qhov lom txwm rhuav tshem Nws tus Ntsujplig, ntawd yog, tus Vajntsujplig uas yog Vajtswv tus Ntsujplig. Qhov no yog yam uas lawv txhais lub ntsiab thaum lawv hais tias, “Nws nyob ntawm Nws Tus Kheej ib sab,” “dab Npe-eexenpu,” thiab “tus thawj dab.” Ntawd hais tau tias, lawv hais tias Vajtswv tus Ntsujplig yog tus thawj dab Npe-eexenpu thiab tus tub vajntxwv ntawm cov dab phem. Lawv tau coj tus yeeb yam vwm rau tes dej num ntawm Vajtswv tus Ntsujplig uas yug los ua neeg, uas tau hnav Nws Tus Kheej rau hauv cev nqaij daim tawv. Lawv tsis yog thuam Vajtswv tus Ntsujplig li tus thawj dab Npe-eexenpu thiab tus tub vajntxwv ntawm cov dab phem nkaus xwb, tab sis kuj tau rau txim rau Vajtswv tes dej num thiab tau rau txim thiab tau thuam tus Tswv Yexus Khetos tib si. Lub ntsiab tseem ceeb ntawm lawv txoj kev tawm tsam thiab kev thuam Vajtswv yeej zoo raws nraim li lub ntsiab tseem ceeb ntawm txoj kev tawm tsam thiab kev thuam uas Ntxwgnyoog thiab cov dab phem tau ua rau Vajtswv. Lawv tsis yog sawv cev rau cov tib neeg lwj liam nkaus xwb, tab sis lawv tseem yog Ntxwgnyoog cov pab pawg thiab. Lawv yog ib txoj kev siv rau Ntxwgnyoog rau hauv tib neeg ntiaj teb, thiab lawv yog Ntxwgnyoog cov neeg koom tuav tswv yim thiab cov qhev. Lub ntsiab tseem ceeb ntawm lawv txoj kev thuam thiab lawv qhov tsis lees txais yuav tus Tswv Yexus Khetos yog lawv qhov sib kov nrog Vajtswv rau lub meej mom, lawv qhov tawm tsam nrog Vajtswv, thiab lawv qhov sim Vajtswv siab tsis paub kawg. Lub ntsiab tseem ceeb ntawm lawv txoj kev tawm tsam rau Vajtswv thiab lawv tus cwj pwm ntawm txoj kev ua yeeb ncuab rau Nws, nrog rau lawv tej lus thiab lawv tej kev xav, yeej tau thuam thiab chim siab ncaj qha rau Vajtswv tus Ntsujplig. Yog li ntawd, Vajtswv thiaj tau txiav txim kom tsim nyog raws li yam uas lawv tau hais thiab tau ua, thiab Vajtswv thiaj tau txiav txim lawv qhov kev ua uas yog kev txhaum ntawm txoj kev thuam rau tus Vajntsujplig. Yuav zam txim tsis tau txoj kev txhaum no rau hauv ob lub ntiaj teb ntawm lub ntiaj teb no thiab lub ntiaj teb yuav los tom ntej, raws li tau tshwm sim rau hauv zaj nram qab no ntawm tej nqe Vajluskub: “Kev hais lus thuam tus Vajntsujplig yuav tsis raug zam tau rau tib neeg li,” thiab, “leej twg los xij uas hais lus tawm tsam Vajntsujplig, nws yuav zam tsis tau rau nws, tsis hais hauv lub ntiaj teb no, los sis hauv lub ntiaj teb uas tseem yuav los tib si.”

—Txoj Lus, Phau 2. Hais Txog Qhov Kev Paub Vajtswv. Vajtswv Tes Hauj Lwm, Vajtswv Tus Moj Yam, thiab Vajtswv Tus Kheej III

Yav dhau los, cov Falixais yog ib pab neeg uas luag hwm nyob rau hauv lub teb chaws Yixayee, yog li ntawd vim li cas tam sim no lub npe ntawd thiaj li dhau los ua ib lub cim lawm? Qhov no yog vim cov Falixais tau dhau los ua tus sawv cev rau ib hom neeg lawm. Hom neeg no tus yam ntxwv yog dab tsi? Lawv txawj dag, txawj npog, txawj ua txuj; lawv ua txuj zoo li cov neeg muaj meej mom, dawb huv, ncaj ncees, thiab coj ncaj heev, thiab tej lus uas lawv qw ntawd mas zoo heev, tiam sis thaum kawg, lawv tsis xyaum ua raws li qhov tseeb ib qho me me li. Lawv muaj tus cwj pwm zoo li cas? Lawv nyeem vajluskub thiab qhuab qhia; lawv qhia lwm tus kom tuav txoj kev cai thiab tej kev cai tswj, es tsis txhob tawm tsam Vajtswv. Tag nrho tej no yog tus cwj pwm zoo. Txhua yam uas lawv hais mas zoo heev, tiam sis, thaum lwm tus tig nraub qaum mus lawm mas, lawv nyiag tej khoom fij ntsiag to lawm. Tswv Yexus thiaj li hais tias lawv “uas tshwj kiag ib niag yoov cia, tab sis ho nqos kiag ib tug niag ntxhuav lawm” (Mathai 23:24). Qhov no txhais hais tias tag nrho lawv tus cwj pwm zoo li zoo nyob sab nraud—lawv qw tej lus ua kom luag pom, lawv hais tej tswv yim uas siab, thiab lawv cov lus zoo heev, tiam sis lawv tej kev ua mas ntxhov quav niab, thiab tawm tsam Vajtswv tag nrho li. Lawv tus cwj pwm sab nraud mas puav leej yog ua txuj, dag ntxias xwb; nyob hauv lawv lub siab mas, lawv tsis nyiam qhov tseeb ib qho me me li, thiab tsis nyiam tej yam uas zoo li. Lawv tsis nyiam qhov tseeb, tsis nyiam tej yam uas zoo, thiab tsis nyiam txhua yam uas los ntawm Vajtswv los kiag li. Lawv nyiam dab tsi? Lawv puas nyiam kev coj ncaj thiab kev ncaj ncees? (Tsis nyiam.) Koj qhia tau li cas tias lawv tsis nyiam tej no? (Tswv Yexus tshaj tawm txoj moo zoo txog lub nceeg vaj saum ntuj ceeb tsheej, uas lawv tsis yog tsuas tsis kam lees txais xwb, tiam sis lawv kuj teem txim rau thiab.) Yog lawv tsis teem txim rau txoj moo zoo ntawd no, puas yuav qhia tau? Tsis tau. Tswv Yexus txoj kev tshwm los thiab tes hauj lwm tau muab tag nrho cov Falixais ntawd nthuav tawm, thiab tsuas yog los ntawm lawv txoj kev teem txim thiab kev tawm tsam Tswv Yexus xwb es lwm tus thiaj li pom tau lawv txoj kev hais lus zoo tiam sis siab phem. Yog tsis yog vim Tswv Yexus txoj kev tshwm los thiab tes hauj lwm, ces yeej tsis muaj leej twg yuav paub txog cov Falixais li, thiab yog tib neeg tsuas saib cov Falixais tus cwj pwm sab nraud xwb, ces haj tseem yuav ua rau lawv ntshaw thiab. Tsis yog qhov uas cov Falixais siv tus cwj pwm zoo uas cuav los ua kom tib neeg ntseeg lawv ntawd yog qhov tsis muaj siab dawb paug thiab dag ntxias xwb lod? Cov neeg uas dag ntxias zoo li no puas nyiam tau qhov tseeb? Lawv yeej nyiam tsis tau kiag li. Lub hom phiaj tom qab lawv tej kev qhia txog tus cwj pwm zoo ntawd yog dab tsi? Ib qho mas yog los dag ntxias tib neeg. Lwm qho mas yog los dag tib neeg kom yeej lawv lub siab, kom tib neeg thiaj li saib lawv siab thiab hwm lawv. Thiab qhov kawg mas yog lawv xav kom tau nqi zog. Yog ib qho kev dag loj ua luaj li! Tej no puas yog tej uas txawj ntxias dag? Cov neeg zoo li no puas nyiam kev coj ncaj thiab kev ncaj ncees? Lawv yeej tsis nyiam kiag li. Qhov lawv nyiam ces yog lub meej mom, lub koob npe thiab qhov tau txais txiaj ntsim, thiab qhov lawv xav tau yog ib qho nqi zog thiab ib lub kaus mom kub xwb. Lawv yeej tsis xyaum ua raws li cov lus uas Vajtswv qhia tib neeg li, thiab lawv yeej tsis ua neej raws li qhov tseeb qhov muaj tiag ib qho me me li. Lawv txhua tus puav leej yog zais lawv tus kheej los ntawm tus cwj pwm zoo, thiab dag ntxias kom yeej tib neeg lub siab los ntawm lawv txoj kev hais lus zoo tiam sis siab phem kom lawv tus kheej tuav tau lub meej mom thiab lub koob npe ruaj, es lawv mam li siv los nrhiav nyiaj txiag thiab khwv noj khwv haus xwb. Qhov ntawd tsis ntxim ntxub lod? Vim tag nrho lawv tus cwj pwm no, koj pom tau tias, nyob hauv lawv lub ntsiab tseeb, lawv tsis nyiam qhov tseeb, vim lawv yeej tsis xyaum ua raws li qhov tseeb li. Muaj dab tsi uas qhia tias lawv tsis xyaum ua raws li qhov tseeb? Qhov loj tshaj plaws ntawm txhua yam: tias Tswv Yexus los ua tes hauj lwm ntawm kev txhiv dim, thiab tias tag nrho cov lus uas Tswv Yexus hais yog qhov tseeb thiab muaj cai. Cov Falixais ua li cas rau qhov no xwb? Txawm lawv lees paub tias Tswv Yexus cov lus muaj cai thiab muaj hwj chim los, tsis yog lawv tsis lees txais cov lus ntawd xwb, tiam sis lawv kuj teem txim rau thiab hais lus tuam mom cov lus ntawd thiab. Qhov ntawd yog ua li cas? Nws yog vim lawv tsis nyiam qhov tseeb, thiab nyob hauv lawv lub siab, lawv tsis nyiam qhov tseeb kiag li thiab ntxub qhov tseeb. Lawv lees paub tias Tswv Yexus hais txhua yam yog, tias Nws cov lus muaj cai thiab muaj hwj chim, tias Nws tsis yuam kev ib qho li, thiab tias lawv tsis muaj ib qho dab tsi los tawm tsam Nws li. Tiam sis lawv xav teem txim rau Tswv Yexus, yog li ntawd lawv thiaj li sib tham thiab sib koom tes ua phem yam zais ntshis, thiab hais tias, “Muab nws ntsia rau saum ntoo khaub lig. Yog nws nyob ces peb tsis nyob, yog peb nyob ces nws tsis nyob,” thiab qhov no yog qhov uas cov Falixais tawm tsam Tswv Yexus ntag. Lub sij hawm ntawd mas tsis muaj leej twg to taub qhov tseeb, thiab tsis muaj leej twg muaj peev xwm paub tias Tswv Yexus yog tus Vajtswv uas yug los ua neeg. Txawm li ntawd los, los ntawm tib neeg txoj kev xam pom, Tswv Yexus tau nthuav ntau qhov tseeb tawm, ntiab dab, thiab kho cov neeg mob zoo. Nws tau ua ntau yam txuj ci tseem ceeb, muab tsib lub ncuav thiab ob tug ntses pub rau 5,000 leej noj, ua ntau yam dej num zoo, thiab muab ntau yam hmoov hlub rau tib neeg. Muaj cov neeg zoo thiab ncaj ncees zoo li no tsawg heev, yog li ntawd vim li cas cov Falixais thiaj li xav teem txim rau Tswv Yexus? Vim li cas lawv thiaj li txiav txim siab muab Nws ntsia rau saum ntoo khaub lig? Qhov uas lawv kom yeem tso ib tug neeg ua txhaum es tsis txhob tso Tswv Yexus ntawd qhia tau tias cov Falixais ntawm lub ntiaj teb ntawm sab kab lis kev cais ntseeg ntawd phem thiab lim hiam npaum li cas. Lawv lim hiam heev li! Qhov txawv ntawm lub ntsej muag phem uas cov Falixais nthuav tawm, thiab lawv txoj kev ua siab zoo uas ua txuj sab nraud ntawd mas txawv heev, uas ntau tus tib neeg tsis tuaj yeem paub qhov twg yog qhov tseeb thiab qhov twg yog qhov cuav, tiam sis Tswv Yexus txoj kev tshwm los thiab tes hauj lwm tau muab lawv nthuav tawm tag nrho. Feem ntau mas cov Falixais zais lawv tus kheej zoo heev thiab sab nraud zoo li muaj lub siab hwm Vajtswv heev, uas tsis muaj leej twg yuav xav tias lawv yuav tawm tsam thiab tsim txom Tswv Yexus yam lim hiam npaum li ntawd. Yog tias tej uas muaj tseeb tsis tau raug muab nthuav tawm, ces yeej tsis muaj leej twg yuav pom tshab lawv li.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb

Qhov kev qhia tshwm tseem ceeb ntawm cov Falixais txoj kev ua ntsej muag ncaj siab nkaus yog dab tsi? Lawv tsuas yog nyeem phau Vajluskub xwb tiam sis tsis nrhiav qhov tseeb li. Thaum lawv nyeem Vajtswv cov lus, lawv tsis thov Vajtswv los sis tsis nrhiav li; tiam sis, lawv kawm Vajtswv cov lus, lawv kawm yam Vajtswv hais thiab ua, thiab yog li thiaj li muab Nws cov lus tig los ua ib hom kev tshawb xav, los ua ib txoj kev qhuab qhia uas lawv qhia rau lwm tus xwb. Qhov no yog qhov kev nyeem Vajtswv cov lus. Yog li vim li cas lawv thiaj li ua li ntawd? Qhov lawv nyeem ntawd yog dab tsi? Raws li lawv pom mas, cov no tsis yog Vajtswv cov lus, cov no tsis yog Vajtswv tej kev nthuav tawm, haj yam tsis yog qhov tseeb, tiam sis tsuas yog ib txoj kev kawm qib siab xwb. Txoj kev kawm qib siab zoo li no, raws li lawv pom mas, yuav tsum muab coj mus rau lwm tus, yuav tsum muab tshaj tawm, thiab tsuas yog qhov no xwb thiaj li yog txoj kev tshaj tawm Vajtswv txoj kev thiab txoj moo zoo. Qhov no yog qhov lawv hu ua “kev tshaj tawm,” thiab cov lus qhuab qhia uas lawv tshaj tawm yog kev kawm txog sab kev ntseeg.

… Cov Falixais saib kev kawm txog sab kev ntseeg thiab kev tshawb xav uas lawv tau kawm tiav ua ib hom kev paub, li ib yam cuab yeej rau txoj kev teem txim tib neeg thiab kev ntsuas seb lawv puas yog los sis tsis yog. Lawv haj tseem siv qhov ntawd rau tus Tswv Yexus thiab—qhov ntawd yog qhov uas tus Tswv Yexus raug teem txim. Lawv txoj kev ntsuam xyuas txog tib neeg, thiab txoj kev lawv saib tib neeg, yeej tsis tau ua raws li cov tib neeg ntawd lub ntsiab tseeb li, los sis seb yam cov tib neeg ntawd hais yog los sis tsis yog li, haj yam tsis ua raws li lub hauv paus los sis qhov pib ntawm cov tib neeg ntawd cov lus. Lawv tsuas yog teem txim thiab ntsuas tib neeg raws li cov lus tawv qhawv thiab tej kev qhuab qhia uas lawv tau kawm tiav lawm xwb. Yog li ntawd, tab txawm cov Falixais no paub lawm tias yam uas tus Tswv Yexus ua tsis yog ib txoj kev txhaum, thiab tsis txhaum txoj cai los xij, lawv yeej tseem teem txim rau Nws, vim hais tias yam tus Tswv Yexus tau hais zoo li tsis haum nrog rau txoj kev paub thiab txoj kev kawm qib siab uas lawv tau kawm tiav thiab txoj kev tshawb xav txog sab kev ntseeg uas lawv tau piav qhia. Thiab cov Falixais yeej tsis tso qhov lawv tuav cov lus thiab tej kab lus ntawd kom xoob li, lawv tuav rawv rau txoj kev paub no thiab yeej tsis tso qhov no tseg. Tib qho tshwm sim nyob rau thaum kawg yog dab tsi xwb? Lawv yuav tsis lees paub tias tus Tswv Yexus yog tus Mexiyas uas yuav los, los sis tias muaj qhov tseeb nyob rau hauv yam tus Tswv Yexus tau hais lawm, haj yam tsis lees paub tias yam tus Tswv Yexus tau ua lawm yog ua raws li qhov tseeb. Lawv nrhiav qee yam kev hloov pauv uas tsis muaj pov thawj los teem txim rau tus Tswv Yexus—tiam sis qhov tseeb, nyob hauv lawv lub siab, lawv puas paub tias cov kev txhaum uas lawv teem txim rau Nws no yog lawm? Lawv paub kawg. Yog li vim li cas lawv thiaj li tseem teem txim rau Nws li no? (Lawv tsis xav ntseeg tias tus Vajtswv uas siab thiab muaj hwj chim loj kawg nkaus hauv lawv lub siab tuaj yeem yog tus Tswv Yexus, tus yam ntxwv ntawm ib tug Neeg Leej Tub dog dig no.) Lawv tsis xav lees txais yuav qhov tseeb no. Thiab tus yeeb yam ntawm qhov lawv tsis kam lees txais yuav qhov no yog dab tsi? Tsis muaj qee yam uas lam ua txuj los sib cam nrog Vajtswv txog qhov no xwb lov? Qhov lawv hais mas yog qhov tias, “Vajtswv puas tuaj yeem ua tau li ntawd? Yog tias Vajtswv yug los ua neeg lawm, Nws yuav tsum yug los ntawm caj ces tseem ceeb. Dab tsi ntxiv thiab, Nws yuav tsum lees txais yuav cov xib fwb uas qhia Vajtswv txoj kev cai thiab cov Falixais cov lus qhia, kawm txoj kev paub no, thiab nyeem Vajluskub kom ntau. Tsuas yog tom qab Nws muaj txoj kev paub no lawm xwb Nws thiaj li tuaj yeem ris tau lub npe ntawm ‘kev yug los ua neeg.’” Lawv ntseeg hais tias, qhov ib, Koj tsis tsim nyog npaum li ntawd, yog li Koj tsis yog Vajtswv; qhov ob, yog tsis muaj txoj kev paub no Koj tsis tuaj yeem ua tau Vajtswv tes hauj lwm, haj yam tsis tuaj yeem ua tau Vajtswv; qhov peb, Koj tsis tuaj yeem ua hauj lwm nyob rau sab nraum lub tuam tsev—tam sim no Koj tsis nyob rau hauv lub tuam tsev, Koj pheej nrog cov neeg txhaum nyob ua ke xwb, yog li ntawd tes hauj lwm uas Koj ua dhau tus ciaj ciam ntawm Vajtswv tes hauj lwm lawm. Lub hauv paus ntawm lawv txoj kev teem txim los qhov twg los? Los ntawm phau Vajluskub los, los ntawm tib neeg lub siab los, thiab los ntawm txoj kev kawm txog sab kev ntseeg uas lawv tau txais los. Vim hais tias lawv muaj tej kev xav phem, tej kev xav hauv nruab siab, thiab kev paub, lawv ntseeg tias qhov kev paub no yog qhov yog, yog qhov tseeb, yog lub hauv paus, thiab Vajtswv tsis lam cia li rhuav tshem tej no ib sim neej li. Lawv puas tau nrhiav qhov tseeb? Lawv tsis tau nrhiav. Yam uas lawv nrhiav yog lawv tus kheej tej kev xav phem thiab tej kev xav hauv nruab siab, thiab lawv tus kheej tej kev ntsib kev pom xwb, thiab lawv sim siv tej no los tshab txhais txog Vajtswv thiab txiav txim siab seb Nws puas yog los sis tsis yog. Qhov tshwm sim thaum kawg ntawm qhov no yog dab tsi? Lawv teem txim rau Vajtswv tes hauj lwm thiab muab Nws ntsia rau saum tus ntoo khaub lig.

—Txoj Lus, Phau 3. Kev Nthuav Tawm Cov Tawm Tsam Khetos. Yam Xya: Lawv Yog Neeg Phem, Lim Hiam, thiab Txawj Dag (Ntu Peb)