Ua ib tug ntseeg Vajtswv mas, koj yuav tsum tsis txhob hwm leej twg li tsuas yog hwm Nws rau txhua yam xwb, thiab muaj cuab kav ua raws nraim li Nws tej kev npaj siab rau hauv txhua yam. Txawm li cas los, txawm txhua tus yeej to taub zaj lus no los, vim ntawm qhov muaj ntau yam kev nyuaj siab rau tib neeg—vim yog tib neeg qhov kev tsis paub tab, tsis paub qab hau, thiab kev qias vuab tsuab, piv txwv li—ntau qhov tseeb no, uas yog yam uas pom meej thiab yog qhov yooj yim tshaj huv si, los lawv twb ua tim khawv tsis tau rau lawv, ces yog li ntawd, ua ntej nej qhov kawg yuav dhau los nyob ruaj li lub pob zeb, Kuv yuav tsum xub qhia nej ob peb yam uas tseem ceeb tshaj plaws rau nej tso. Ua ntej Kuv hais mus ntxiv, nej yuav tsum xub to taub qhov no tso: Cov lus Kuv hais yog qhov tseeb uas hais ncaj nraim rau tib neeg txhua tus; cov lus no tsis yog hais rau ib tug tib neeg los sis ib hom tib neeg twg xwb. Yog li ntawd, nej yuav tsum tau ua tib zoo xav txog qhov nkag siab Kuv cov lus los ntawm lub ntsiab ntawm qhov tseeb, thiab yuav tsum muaj ib tug cwj pwm mloog nyob nruab nrab thiab ua siab dawb paug; tsis txhob hla ib lo lus los sis ib qho tseeb uas Kuv hais li, thiab tsis txhob muab Kuv cov lus saib tsis muaj qab hau. Hauv nej lub neej, Kuv pom tias nej tau ua ntau yam uas tsis raws li qhov tseeb, thiab yog li Kuv thov kom nej rais los ua cov tub qhe rau ntawm qhov tseeb, kom nej tsis txhob ua qhev rau txoj kev lim hiam thiab kev phem, thiab nej tsis txhob muab qhov tseeb tsuj los sis ua rau ib ces kaum ntawm Vajtswv lub tsev tsis huv. Ntawm no yog cov lus Kuv ceeb toom rau nej. Kuv yuav hais txog lub ncauj lug uas nyob ntawm tes tam sim no.

Ua ntej tshaj, yog txhawm rau nej txoj hmoo mas, nej yuav tsum nrhiav Vajtswv txoj kev pom zoo tso. Qhov no yog hais tias, vim nej paub tias nej yog ib tug tswv cuab ntawm Vajtswv lub tsev, ces nej tsim nyog yuav tau muaj lub siab tus rau Vajtswv thiab ua kom Nws txaus siab rau hauv txhua yam. Nej yuav tsum, muab ua lwm lo lus hais, muaj lub hauv paus ntsiab lus rau txhua yam uas nej nqis tes ua thiab ua raws li qhov tseeb uas nyob rau hauv. Yog hais tias qhov no dhau ntawm koj lawm, ces koj yuav tsum raug Vajtswv muab ntiab tawm ces txhua tus tib neeg yuav tsis lees txais koj. Thaum nej poob tau rau tej qhov kev nyuaj li no lawm, ces yuav tsis muaj peev xwm suav nej nrog cov uas nyob hauv Vajtswv lub tsev lawm, uas yog kiag tej uas Vajtswv tsis pom zoo ntag.

Qhov ob, nej yuav tsum tau paub tias Vajtswv nyiam cov uas coj ncaj. Hauv lub ntsiab tseeb mas, Vajtswv yeej ncaj ncees, thiab yog li no Nws cov lus yeej ib txwm tso siab tau rau; Nws tej kev ua, ntau tshaj no, yog yam tsis muaj chaw thuam thiab tsis muaj lus nug li, twb vim yog li no Vajtswv thiaj li nyiam cov uas coj ncaj rau Nws xwb. Kev coj ncaj txhais tias muab nej lub siab rau Vajtswv, ua siab tseeb tiag tiag rau Vajtswv rau hauv txhua yam, qhib siab hlo rau Nws rau hauv txhua yam, tsis txhob zais tej uas muaj tseeb, tsis txhob sim dag cov nyob siab saud thiab cov nyob hauv qab koj, thiab tsis txhob ua tej yam uas ntxim li haum Vajtswv siab xwb. Muab hais kom luv luv ces, kev coj ncaj yog ua kom dawb huv rau txhua yam hauv nej tej kev ua thiab cov lus, thiab tsis txhob dag Vajtswv los sis dag tib neeg li. Qhov Kuv hais no mas yooj yim kawg li, tiam sis rau nej mas nyuaj ob npaug. Coob tus tib neeg yeem poob mus rau hauv ntuj tawg heev dua li hais lus tseeb thiab coj ncaj. Tos Kuv ho muab lwm yam kev saib xyuas tseg cia nyob tos cov neeg coj tsis ncaj os. Tseeb tiag, Kuv yeej paub meej meej tias nyuaj rau nej ua tau ib tug neeg coj ncaj npaum li cas. Vim tias nej txhua tus mas ntse kawg, txawj muab pas ntsuas los ntsuas tib neeg kawg li, qhov no ua rau Kuv tes hauj lwm yooj yim dua lawm. Thiab vim nej ib leeg puag ib leeg tej kev nraim nkoos rau hauv nej xub ntiag, yog li ces, Kuv yuav xa nej, ib tug zuj zug, mus rau hauv kev puas tsuaj kom raug hluav taws “cob qhia,” tom qab ntawd nej thiaj li dhau los muaj txoj kev ntseeg ruaj khov rau hauv Kuv cov lus. Thaum kawg, Kuv yuav yuam nej lub qhov ncauj kom hais cov lus uas hais tias “Vajtswv yog ib tug Vajtswv uas ncaj ncees,” qhov ntawd yog qhov nej yuav tau ntaus nej hauv siab thiab tu siab hais tias, “Kev txawj dag yog tib neeg lub siab!” Nej tus yam ntxwv ntawm txoj kev xav rau lub sij hawm no yog dab tsi? Kuv pom tias nej yuav tsis muaj yeej yog zoo li tam sim no xwb. Thiab nej haj yam yuav “paub nyuaj thiab nkag siab nyuaj” tshaj li tam sim no. Nyob ntawm Vajtswv xub ntiag mas, muaj ib txhia tib neeg hnav zoo thiab coj zoo, lawv uv kev mob kom zoo li muaj tus “cwj pwm zoo,” tiam sis lawv tsis npog lawv cov kaus thiab muab rau tes khawb tab meeg rau ntawm tus Ntsujplig lub xub ntiag. Nej puas yuav suav cov neeg no nrog rau cov coj ncaj thiab? Yog tias koj yog ib tug neeg hais lus zoo tiam sis siab nkhaus, ib tug uas txawj rau seem “cog kev phooj ywg,” ces Kuv hais tias koj yeej yog ib tug uas twb sim ua kom Vajtswv tsis muaj qab hau lawm. Yog koj cov lus hais ua paj lug hais tias yog tim ub tim no thiab hais tej yam tsis muaj qab hau kom zoo mloog xwb, ces Kuv hais rau koj tias koj yog tus uas ntxub tsis nyiam muab qhov tseeb coj los xyaum ua. Yog koj muaj ntau qhov lus zais uas koj tsis xav qhia, yog koj tsis nyiam nthuav tag nrho koj tej lus zais ntawd tawm—koj tej kev nyuaj siab—rau lwm tus pom es kom nrhiav tau txoj kev kaj, ces Kuv hais tias koj yog ib tug uas yuav tsis tau txais kev cawm dim yooj yim, thiab ib tug uas yuav tawm tsis tau ntawm txoj kev tsaus ntuj yooj yim kiag li. Yog hais tias qhov nrhiav txoj kev ntawm qhov tseeb ua rau koj zoo siab, ces koj yuav yog ib tug uas nyob rau hauv qhov kaj mus li. Yog hais tias koj zoo siab heev los ua ib tug ua dej num rau hauv Vajtswv lub tsev, ua num nquag plias thiab muaj txoj kev xav uas ntshai rwg, pub tsis tu ncua thiab yeej tsis yuav rov qab li, ces Kuv hais tias koj yog ib tug dawb huv uas siab ncaj, vim tias koj tsis nrhiav nqi zog thiab tsuas yog ua ib tug neeg coj ncaj nkaus xwb. Yog hais tias koj txaus siab hlo ua tus qhia siab, yog hais tias koj zoo siab hlo siv txhua yam uas koj muaj, yog hais tias koj muaj peev xwm muab koj lub neej fij rau Vajtswv thiab tuav koj tej lus tim khawv khov kho, yog hais tias koj coj ncaj mus txog qhov uas koj tsuas paub ua kom txaus Vajtswv siab xwb es koj tsis xav txog koj tus kheej los sis muab ib yam dab tsi rau koj tus kheej li, ces Kuv hais tias tus neeg zoo li ntawd yuav loj hlob rau hauv qhov kaj thiab cov uas yuav tau nyob mus ib txhis rau hauv lub nceeg vaj. Koj yuav tsum paub tias seb puas muaj kev ntseeg tseeb thiab kev ua siab ncaj nyob hauv koj, seb puas muaj ib qho teev tseg tias koj raug kev tsim txom rau Vajtswv, thiab seb koj puas muab tag nrho koj tus kheej zwm rau Vajtswv. Yog tias koj tsis muaj tej no, ces nyob hauv koj tseem muaj txoj kev ntxeev siab, kev txawj dag, kev xav tau ntau, thiab kev yws taus. Thaum koj lub siab tseem nyob deb ntawm qhov coj ncaj, ces koj tseem tsis tau txais tau qhov meej mom los ntawm Vajtswv los thiab koj tseem tsis tau nyob hauv qhov kaj dua li. Txoj hmoo ntawm ib tug yuav zoo li cas nyob rau thaum kawg ntawd yog nyob ntawm qhov seb lawv puas coj ncaj thiab puas muaj lub siab liab li ntshav, thiab seb lawv puas muaj lub siab dawb paug. Yog tias koj yog tus uas coj tsis ncaj kiag li, yog tus uas muaj lub siab ntshaw qhov phem, yog tus uas muaj lub siab tsis huv, ces kom koj paub tseeb tias thaum kawg koj yuav xaus rau qhov chaw uas cov tib neeg raug rau txim raws li tej uas twb muab sau tseg cia li koj txoj hmoo lawm. Yog koj hais tias koj yog tus tib neeg coj ncaj heev, tiam sis koj yeej tsis tswj kom ua raws li qhov tseeb los sis hais lo lus tseeb li, ces puas yog koj tseem tab tom tos Vajtswv ua tus muab nqi zog rau koj? Puas yog koj tseem vam kom Vajtswv saib koj zoo tam li tus neeg ntxim nyiam rau ntawm Nws lub qhov muag? Txoj kev xav li no puas luab sab dhau lawm thiab? Koj dag Vajtswv rau hauv txhua yam; Vajtswv lub tsev yuav ua cas txais tos tus zoo li koj, tus uas ob txhais tes tsis huv?

Qhov peb uas Kuv xav muab qhia rau nej yog li no: Txhua tus neeg, nyob rau ntawm txoj kev ua lawv lub neej ntawm txoj kev ntseeg Vajtswv, tau ua tej yam tawm tsam thiab dag Vajtswv lawm. Tej uas ua tsis yog no tsis tas muab teev tseg li vim yog ib qho kev txhaum, tiam sis muaj qee yam mas zam txim tsis tau rau li; vim muaj ntau yam num uas txhaum tej kev cai tswj fwm lawm, yog yam uas tawm tsam Vajtswv tus moj yam. Ntau leej uas txhawj xeeb txog lawv tus kheej txoj hmoo ntawd yuav nug seb cov num no yog dab tsi. Nej yuav tsum paub tias nej yog neeg tawv ncauj thiab khav theeb li ib txwm muaj los, thiab tsis kam ua raws li tej uas muaj tseeb li. Twb vim yog li no, Kuv thiaj li qhia rau nej me ntsis thiab me ntsis tom qab uas nej rov los tsom nej tus kheej lawm. Kuv txhawb kom nej to taub zoo dua qub txog cov txheej txheem ntawm tej kev cai tswj fwm, thiab mob siab ua kom paub Vajtswv tus moj yam. Tsis yog li ntawd, ces nej yuav ceeb laj kaw nej lub qhov ncauj, nej tus nplaig yuav khab seeb nplawm ua lub suab siab siab hais lus, thiab Vajtswv twb pom tias qhov nej tsis ceev faj ntawd twb yog tawm tsam Vajtswv tus moj yam thiab yuav poob mus rau hauv qhov tsaus ntuj, yuav plam qhov muaj tus Vajntsujplig thiab qhov kaj. Rau qhov nej tsis muaj qauv rau nej tej kev ua, rau qhov koj ua thiab hais tej uas tsis tsim nyog hais, koj yuav tau txais kev teem txim raws li qhov tsim nyog. Koj yuav tau paub tias txawm koj tsis muaj qauv rau tej lus thiab yam koj ua los, Vajtswv muaj qauv siab rau ob yam no. Qhov laj thawj uas koj tau txais kev teem txim ntawd vim yog koj tawm tsam Vajtswv, tsis yog tawm tsam ib tug tib neeg. Yog hais tias, nyob hauv koj lub neej es koj tau ua ntau yam uas tawm tsam Vajtswv tus moj yam lawm, ces koj yeej yuav raug khi kom dhau los ua ib tug me nyuam rau hauv ntuj tawg. Rau ntawm tib neeg mas, nws zoo li tias koj tau ua me ntsis num uas txawv ntawm qhov tseeb lawm, thiab tsis muaj dab tsi tshaj ntawd li. Txawm li cas los xij, koj puas ras txog tias raws li Vajtswv pom mas, koj twb yog tus uas tsis muaj kev txhaum lawm? Vim koj tau ua txhaum Vajtswv tej kev cai tswj fwm tshaj li ib zaug lawm thiab, tshaj ntawd, tsis muaj ib qho cim qhia tias yuav lees txim hloov dua siab tshiab li, ces tsis muaj lwm txoj hau kev lawm tiam sis koj yuav raug muab pov mus rau hauv ntuj tawg, uas yog qhov uas Vajtswv rau txim rau tib neeg lawm xwb. Muaj ib co tib neeg uas tsis coob, thaum tab tom raws Vajtswv qab, tau ua qee yam uas txhaum cov hauv paus ntshiab lus, tiam sis tom qab raug qhuab qhia thiab tau txais kev cob qhia lawm, lawv pom tseeb zuj zus txog lawv tus kheej tej kev uas coj tsis ncaj, tom qab ntawd thiaj nkag tau ntawm txoj kab kev tiag, thiab lawv muaj lub hauv paus zoo los txog niaj hnub no. Cov tib neeg zoo li no yog cov tseem nyob rau thaum kawg. Txawm li ntawd los, nws yog qhov coj ncaj uas Kuv nrhiav; yog tias koj yog ib tug neeg coj ncaj thiab yog ib tug uas ua raws li tus qauv, ces koj tso siab tau rau ntawm Vajtswv. Yog hais tias hauv koj tej kev ua tsis tawm tsam Vajtswv tus moj yam, thiab nrhiav Vajtswv tej kev npaj siab, thiab muaj ib lub siab uas paub ntshai Vajtswv, ces koj txoj kev ntseeg yuav ncav cuag mus rau qib uas tsim nyog lawm. Leej twg tsis ntshai Vajtswv thiab tsis muaj ib lub siab uas ntshai ntshee hna mas yeej yuav ua txhaum Vajtswv tej kev cai tswj fwm xwb xwb li. Muaj coob leej muaj lub siab kub lug tiam Vajtswv tiam sis tsis muaj kev to taub txog tej kev cai tswj fwm, ces tseem haj yam tsis paub ib qho dab tsi txog lub ntsiab ntawm Nws txoj lus. Yog li ntawd, lawv tej kev npaj siab uas zoo, muaj ntau zaus lawv tseem mus ua tej yam uas cuam tshuam Vajtswv txoj kev cawm tib neeg thiab. Qhov uas heev tshaj no, lawv raug muab pov rau sab nraud, kom txhob muaj lub caij los raws Nws qab ntxiv, thiab muab pov rau hauv ntuj tawg, ces tag nrho tej uas muaj feem koom nrog Vajtswv lub tsev ntawd xaus mus huv si lawm. Cov tib neeg no ua hauj lwm hauv Vajtswv lub tsev los ntawm lawv lub zog ntawm lawv tej kev tsis paub tab, kev xav ua zoo, thiab xaus rau ntawm qhov ua rau Vajtswv tus moj yam chim. Tib neeg coj lawv tej kev ua num rau tej nom tswv thiab tej tswv tuaj rau hauv Vajtswv lub tsev thiab muab tej ntawd coj los siv, xav tias lawv yeej muab tau coj los siv yam yooj yim es tsis tau siv zog rau ntawm no li. Lawv tsis tau pom tias Vajtswv tsis muaj tus moj yam zoo li tus me nyuam yaj, tiam sis zoo li tus tsov ntxhuav. Yog li ntawd, cov uas tau koom nrog Vajtswv thaum xub thawj los txuas tsis tau nrog Nws lawm, vim Vajtswv lub siab tsis zoo li tib neeg lub. Tsuas yog tom qab koj to taub ntau qhov tseeb lawm xwb mas koj thiaj li muaj peev xwm los paub Vajtswv tag mus li. Qhov kev paub no tsis yog muab los ntawm cov lus thiab cov lus qhuab qhia tiam sis yeej muab siv tau li tej khoom muaj nqis uas yog qhov koj to taub zoo txog txoj kev tso siab lug rau Vajtswv, thiab yog qhov pov thawj qhia hais tias Nws txaus siab rau koj. Yog koj tsis muaj qhov muaj tiag ntawm txoj kev paub thiab tsis npaj raws li qhov tseeb, ces koj qhov kev kub siab ua num tsuas muaj peev xwm coj tau Vajtswv txoj kev ntxub thiab kev tsis nyiam los rau koj nkaus xwb. Txog tam sim no ces koj twv tau lawm tias kev ntseeg Vajtswv tsis thooj li qhov mus kawm txog txoj kev ntseeg kiag li!

Txawm tias cov lus Kuv ceeb toom rau nej no luv luv xwb los, txhua yam uas Kuv piav puav leej yog yam uas tsis muaj nyob rau hauv nej kiag li. Nej tsim nyog paub tias yam Kuv hais tam sim no yog txhawm rau Kuv tes hauj lwm kawg uas ua nrog tib neeg, uas yog txhawm rau txoj kev txiav txim qhov kawg ntawm tib neeg. Kuv tsis ntshaw ua tes hauj lwm ntau tshaj no uas tsis muaj hom phiaj dab tsi, thiab Kuv tsis ntshaw coj cov tib neeg uas tsis muaj kev vam zoo li tus ntoo lwj mus ntxiv lawm, haj yam tsis yog los coj cov uas muaj lub siab zais ntshis uas muaj tej kev npaj siab ua phem. Tej zaum muaj ib hnub twg nej yuav to taub tej kev npaj siab uas txhawb Kuv cov lus thiab tej kev pab uas Kuv tau ua rau tib neeg ntiaj teb lawm. Tej zaum muaj ib hnub nej yuav paub txog cov lus qhia uas ua rau nej muaj cuab kav txiav txim siab rau nej tus kheej txoj kev xaus.