Txawm tias cov lus no tsis muaj tag nrho Vajtswv tej kev nthuav tawm los xij, cov lus no yeej muaj txaus rau cov tib neeg los ua kom tau tiav hlo cov hom phiaj ntawm txoj kev paub Vajtswv thiab kev hloov pauv ib qho hauv tus moj yam lawm. Tej zaum muaj qee leej xav tias, vim Vajtswv tes hauj lwm nyob rau hauv teb chaws Suav av loj tau xaus lawm, ces qhov no ua pov thawj qhia tau tias Nws twb hais tawm tag nrho cov lus uas Nws yuav tsum hais tawm lawm, thiab tias tej zaum Nws yuav tsis muaj dab tsi tshiab hais lawm, vim Vajtswv tsuas muaj peev xwm hais tau cov lus no xwb. Tshaj qhov no lawm, muaj cov uas ntseeg tias Txoj Lus Tshwm Hauv Lub Cev Nqaij Daim Tawv muaj tag nrho Vajtswv tej kev nthuav tawm rau hauv Tiam Lub Nceeg Vaj, thiab tias kev tau txais phau ntawv no ces zoo npaum nkaus li kev tau txais Vajtswv txhua yam, los sis tias phau ntawv no yuav coj tib neeg mus rau yav tom ntej ib yam nkaus li phau Vajluskub. Kuv ntseeg tias cov uas tuav tej kev xam pom zoo li no tsis muaj nyob rau hauv pawg neeg tsawg xwb, vim hais tias tib neeg ib txwm nyiam siv tej kev txwv rau Vajtswv. Txawm tias lawv txhua tus tshaj tawm tias Vajtswv yog tus muaj hwj huaj uas loj tsis muaj chaw kawg thiab paub txhua yam los xij, lawv tus yeeb yam tseem ua kom nws yooj yim rau lawv los txwv Vajtswv rau hauv qee yam. Txhua tus tab tom los paub Vajtswv, tab sis tib lub sij hawm no txhua tus kuj tawm tsam thiab txwv Nws ib yam nkaus thiab.

Nyuam qhua pib Vajtswv tes hauj lwm nyob hauv Tiam Lub Nceeg Vaj xwb. Tag nrho Vajtswv tej lus hais tawm uas muaj nyob rau hauv phau ntawv no mas tsom ntsoov mus rau cov uas caum raws Nws qab rau thaum lub sij hawm ntawd, thiab tej lus hais no tsuas yog ib feem ntawm Nws tej kev nthuav tawm uas tau raug tsim nyob rau hauv Nws qhov kev yug los ua neeg tam sim no; tej lus hais no tsis sawv cev rau Vajtswv txhua yam. Tshaj qhov no lawm, nws tsis tuaj yeem hais tau tias nws paub tag nrho txog tes hauj lwm uas Vajtswv yuav ua thaum tseem nyob rau hauv qhov kev yug los ua neeg no. Vajtswv yuav tsi ntsees Nws cov lus rau ntawm ntau haiv neeg thiab tej keeb kwm, thiab Nws yuav kov yeej tag nrho tib neeg thiab muab tiam qub xaus. Vim yog zoo li ntawd, Nws tuaj yeem xaus tag nrho txhua yam tau li cas tom qab tsuas nthuav tawm ib feem me me txog Nws cov lus xwb? Nws pom tau yooj yim tias Nws tes hauj lwm raug muab faib ua ntau lub sij hawm caij nyoog uas sib txawv thiab ntau theem sib txawv; Nws tab tom ua hauj lwm mus raws li Nws txoj kev npaj thiab nthuav tawm Nws cov lus mus raws li Nws cov kauj ruam. Tib neeg yuav ua li cas tuaj yeem piav tau Vajtswv qhov hwj huaj uas loj tsis muaj chaw kawg thiab lub tswv yim? Qhov tseeb uas Kuv xav piav qhia rau ntawm no ces yog li no: Yam uas Vajtswv yog thiab muaj yog yam muaj mus tag ib txhis thiab tsis muaj chaw kawg. Vajtswv yog lub hauv paus ntawm txoj sia thiab txhua tsam yam; tsis muaj ib yam raug tsim tawm los muaj peev xwm piav tau txog Nws li. Thaum kawg, Kuv yuav tsum ceeb toom rau txhua tus txuas ntxiv tias: Txhob txwv Vajtswv rau hauv tej phau ntawv, rau hauv cov lus, los sis hauv Nws cov lus hais tawm dhau los ntxiv dua li lawm. Nws tsuas muaj ib lo lus los piav qhia txog tus xeeb ceem ntawm Vajtswv tes hauj lwm xwb: tshiab. Nws tsis nyiam taug tej qub kev los sis rov qab ua Nws tes hauj lwm dua; tshaj qhov no lawm, Nws tsis xav kom tib neeg pe hawm Nws los ntawm qhov muab Nws txwv rau hauv qee tus ciaj ciam. Qhov no yog Vajtswv tus moj yam.