384. Qhov ob, nej yuav tsum tau paub tias Vajtswv nyiam cov uas coj ncaj. Hauv lub ntsiab tseeb mas, Vajtswv yeej ncaj ncees, thiab yog li no Nws cov lus yeej ib txwm tso siab tau rau; Nws tej kev ua, ntau tshaj no, yog yam tsis muaj chaw thuam thiab tsis muaj lus nug li, twb vim yog li no Vajtswv thiaj li nyiam cov uas coj ncaj rau Nws xwb. Kev coj ncaj txhais tias muab nej lub siab rau Vajtswv, ua siab tseeb tiag tiag rau Vajtswv rau hauv txhua yam, qhib siab hlo rau Nws rau hauv txhua yam, tsis txhob zais tej uas muaj tseeb, tsis txhob sim dag cov nyob siab saud thiab cov nyob hauv qab koj, thiab tsis txhob ua tej yam uas ntxim li haum Vajtswv siab xwb. Muab hais kom luv luv ces, kev coj ncaj yog ua kom dawb huv rau txhua yam hauv nej tej kev ua thiab cov lus, thiab tsis txhob dag Vajtswv los sis dag tib neeg li. Qhov Kuv hais no mas yooj yim kawg li, tiam sis rau nej mas nyuaj ob npaug. Coob tus tib neeg yeem poob mus rau hauv ntuj tawg heev dua li hais lus tseeb thiab coj ncaj. Tos Kuv ho muaj lwm yam tseg rau cov uas tsis ncaj ncees ntawd. Tseeb tiag, Kuv yeej paub meej meej tias nyuaj rau nej ua tau ib tug neeg coj ncaj npaum li cas. Vim tias nej txhua tus mas ntse kawg, txawj muab pas ntsuas los ntsuas tib neeg kawg li, qhov no ua rau Kuv tes hauj lwm yooj yim dua lawm. Thiab vim nej ib leeg puag ib leeg tej kev nraim nkoos rau hauv nej xub ntiag, yog li ces, Kuv yuav xa nej, ib tug zuj zus, mus rau hauv kev puas tsuaj kom raug hluav taws “cob qhia,” tom qab ntawd nej thiaj li dhau los muaj txoj kev ntseeg ruaj khov rau hauv Kuv cov lus. Thaum kawg, Kuv yuav yuam nej lub qhov ncauj kom hais cov lus uas hais tias “Vajtswv yog ib tug Vajtswv uas ncaj ncees,” qhov ntawd yog qhov nej yuav tau ntaus nej hauv siab thiab tu siab hais tias, “Kev txawj dag yog tib neeg lub siab!” Nej tus yam ntxwv ntawm txoj kev xav rau lub sij hawm no yog dab tsi? Kuv pom tias nej yuav tsis muaj yeej yog zoo li tam sim no xwb. Thiab nej haj yam yuav “paub nyuaj thiab nkag siab nyuaj” tshaj li tam sim no. Nyob ntawm Vajtswv xub ntiag mas, muaj ib txhia tib neeg hnav zoo thiab coj zoo, lawv uv kev mob kom zoo li muaj tus “cwj pwm zoo,” tiam sis lawv tsis npog lawv cov kaus thiab muab rau tes khawb tab meeg rau ntawm tus Ntsujplig lub xub ntiag. Nej puas yuav suav cov neeg no nrog rau cov coj ncaj thiab? Yog tias koj yog ib tug neeg hais lus zoo tiam sis siab nkhaus, ib tug uas txawj rau seem “cog kev phooj ywg,” ces Kuv hais tias koj yeej yog ib tug uas twb sim ua kom Vajtswv tsis muaj qab hau lawm. Yog koj cov lus hais ua paj lug hais tias yog tim ub tim no thiab hais tej yam tsis muaj qab hau kom zoo mloog xwb, ces Kuv hais rau koj tias koj yog tus uas ntxub tsis nyiam muab qhov tseeb coj los xyaum ua. Yog koj muaj ntau qhov lus zais uas koj tsis xav qhia, yog koj tsis nyiam nthuav tag nrho koj tej lus zais ntawd tawm—koj tej kev nyuaj siab—rau lwm tus pom es kom nrhiav tau txoj kev kaj, ces Kuv hais tias koj yog ib tug uas yuav tsis tau txais kev cawm dim yooj yim, thiab ib tug uas yuav tawm tsis tau ntawm txoj kev tsaus ntuj yooj yim kiag li. Yog hais tias qhov nrhiav txoj kev ntawm qhov tseeb ua rau koj zoo siab, ces koj yuav yog ib tug uas nyob rau hauv qhov kaj mus li. Yog hais tias koj zoo siab heev los ua ib tug ua dej num rau hauv Vajtswv lub tsev, ua num nquag plias thiab muaj txoj kev xav uas ntshai rwg, pub tsis tu ncua thiab yeej tsis yuav rov qab li, ces Kuv hais tias koj yog ib tug dawb huv uas siab ncaj, vim tias koj tsis nrhiav nqi zog thiab tsuas yog ua ib tug neeg coj ncaj nkaus xwb. Yog hais tias koj txaus siab hlo ua tus qhia siab, yog hais tias koj zoo siab hlo siv txhua yam uas koj muaj, yog hais tias koj muaj peev xwm muab koj lub neej fij rau Vajtswv thiab tuav koj tej lus tim khawv khov kho, yog hais tias koj coj ncaj mus txog qhov uas koj tsuas paub ua kom txaus Vajtswv siab xwb es koj tsis xav txog koj tus kheej los sis muab ib yam dab tsi rau koj tus kheej li, ces Kuv hais tias tus neeg zoo li ntawd yuav loj hlob rau hauv qhov kaj thiab cov uas yuav tau nyob mus ib txhis rau hauv lub nceeg vaj.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Peb Qho Lus Ceeb Toom

385. Kuv zoo siab rau cov uas tsis muaj qhov kev tsis tshua ntseeg lwm tus, thiab Kuv nyiam cov uas npaj txij zog txais yuav qhov tseeb; Kuv qhia txoj kev saib xyuas zoo rau ob hom tib neeg no, rau qhov nyob hauv Kuv ob lub qhov muag pom mas lawv yog cov tib neeg siab ncaj. Yog tias koj txawj dag, ces koj yuav raug zov thiab tsis tshua ntseeg lwm tus neeg thiab tej xwm txheej, thiab yog li koj txoj kev ntseeg Kuv yuav raug tsim tsa rau saum ib lub hauv paus ntawm txoj kev tsis tshua ntseeg lwm tus. Kuv yeej tsis txeev lees paub txoj kev ntseeg zoo li no li. Qhov tsis muaj txoj kev ntseeg tseeb, koj haj yam tsis muaj txoj tseem kev hlub kiag li. Thiab yog tias koj ntseeg qhov tsis tshua ntseeg rau Vajtswv thiab lam tau lam hais txog Nws raws siab nyiam xwb, ces koj yog, yam tsis muaj lus nug dab tsi li, tus uas txawj dag tshaj ntawm txhua tus tib neeg huv si. Koj lam tau lam hais seb Vajtswv ua puas tau zoo li tib neeg xwb: ua txhaum loj uas zam txim tsis tau, muaj tus cwj pwm tsis tseem ceeb, tsis muaj kev ua ncaj nrab thiab laj thawj, tsis muaj qhov paub ntawm txoj kev ncaj ncees, ua siab swb rau txoj kev npaj ua lim hiam, txawj ntxias dag thiab txawj dag, txaus siab rau txoj kev phem thiab kev tsaus ntuj, thiab ntau yam ntxiv. Nws tsis yog qhov laj thawj tias tib neeg tsis muaj tej kev xav zoo li no vim yog lawv tsis muaj txoj kev paub Vajtswv me me li los? Txoj kev ntseeg zoo li no tsis muaj dab tsi luv tshaj txoj kev txhaum! Tseem muaj tej txhia uas ntseeg tias cov uas ua rau Kuv zoo siab ces yog cov uas hais lus mos lus tuaj pos thiab ua txuj, thiab tias cov uas tsis muaj kev paub zoo li no yuav tsis raug caw los rau hauv Vajtswv lub tsev thiab yuav tsis tau lawv qhov chaw nyob rau hauv. Qhov no tsuas yog tib qho kev paub uas nej tau txais tom qab ntau lub xyoo no los lawm xwb? Qhov no puas yog yam nej muab tau? Thiab nej txoj kev paub txog Kuv tsis nres rau ntawm txoj kev to taub yuam kev no xwb; qhov tseem phem tshaj mas yog nej txoj kev thuam Vajtswv tus Ntsujplig thiab kev hais lus phem rau Ntuj Ceeb Tsheej. Qhov no yog qhov vim li cas Kuv thiaj hais tias txoj kev ntseeg zoo li nej txoj no tsuas yuav ua rau nej txav kom deb ntawm Kuv mus dua thiab ua ib qho chaw loj tawm tsam Kuv xwb.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Paub Tus Vajtswv hauv Ntiaj Teb Li Cas

386. Niaj hnub tam sim no, cov neeg feem coob ntshai heev tsis kam nqis tes ua rau ntawm Vajtswv xub ntiag li; hos koj dag Nws cev nqaij daim tawv, koj dag tsis tau Nws tus Ntsujplig li. Ib yam uas tsis muaj peev xwm tiv tau Vajtswv txoj kev tshawb xyuas kom meej yog yam tsis haum nrog qhov tseeb, thiab yuav tsum raug muab tshem tso rau ib sab; qhov ua lwm yam ces yog ua ib txoj kev txhaum tawm tsam Vajtswv. Yog li, koj yuav tsum tso koj lub siab rau ntawm Vajtswv xub ntiag txhua lub sij hawm, thaum koj thov Vajtswv, thaum koj hais lus thiab sib qhia siab nrog koj cov kwv tij thiab cov muam, thiab thaum koj ua koj tes dej num thiab thaum koj tawm mus ua koj tes dej num. Thaum koj ua tiav log koj lub luag hauj lwm, Vajtswv nyob nrog koj, thiab thaum koj xav tias raug lawm thiab yog tes dej num ntawm Vajtswv lub tsev, Nws yuav lees txais txhua yam uas koj ua; koj yuav tsum ua lub siab dawb paug los lis koj tus kheej lub luag hauj lwm tiag tiag. Thaum koj thov Vajtswv, yog koj muaj ib lub siab hlub Vajtswv thiab nrhiav Vajtswv txoj kev saib xyuas, kev tiv thaiv thiab kev tshawb xyuas kom meej, yog tej no yog koj txoj kev xav, koj qhov kev thov Vajtswv yuav muaj txiaj ntsig zoo. Piv txwv, thaum koj thov Vajtswv rau ntawm cov rooj sab laj, yog koj qhib koj lub siab thiab thov rau Vajtswv thiab qhia rau Nws txog yam nyob hauv koj lub siab uas txhob hais txog yam cuav, ces koj qhov kev thov Vajtswv yuav muaj txiaj ntsig zoo. …

Yog ib tug neeg ntseeg Vajtswv txhais tias txhua yam koj ua yuav tsum coj los tso rau ntawm Nws xub ntiag thiab cia saib xyuas raws li Nws txoj kev tshawb xyuas kom meej. Yog yam koj muaj peev xwm coj los tso rau ntawm Vajtswv tus Ntsujplig xub ntiag tab sis tsis yog tso rau ntawm Vajtswv cev nqaij daim tawv xub ntiag, qhov no qhia tau tias koj tsis tau raug tshawb xyuas kom meej los ntawm Nws tus Ntsujplig. Leej twg yog Vajtswv tus Ntsujplig? Leej twg yog tus neeg uas Vajtswv ua tim khawv rau? Nkawv tsis yog ib leej thiab tib tug xwb los? Feem coob pom Nkawv cais ua ob leeg, ntseeg tias Vajtswv tus Ntsujplig yog Vajtswv tus Ntsujplig, thiab tus neeg uas Vajtswv ua tim khawv rau yog ib tug tib neeg xwb. Tab sis koj tsis tau ua yuam kev lod? Tus neeg no ua tes dej num sawv cev rau leej twg? Cov neeg uas tsis paub Vajtswv uas yug los ua neeg yeej tsis muaj kev to taub sab ntsujplig. Vajtswv tus Ntsujplig thiab Nws qhov yug los ua neeg muaj cev nqaij daim tawv yog ib tug xwb, vim hais tias Vajtswv tus Ntsujplig tau tshwm sim raws li cev nqaij daim tawv. Yog tus neeg no ua siab phem rau koj, Vajtswv tus Ntsujplig puas yog tus siab zoo? Puas yog koj feeb tsis meej los? Niaj hnub tam sim no, cov neeg uas tsis kam lees txhua yam ntawm Vajtswv txoj kev tshawb xyuas kom meej yuav tsis muaj peev xwm tau txais Nws txoj kev pom zoo li, thiab cov neeg uas tsis paub Vajtswv uas yug los ua neeg yuav tsis muaj peev xwm yog tus neeg ua tau zoo tshaj plaws. Saib txhua yam koj ua, thiab saib seb nws puas raug coj los tso rau ntawm Vajtswv xub ntiag. Yog koj tsis muaj peev xwm nqa txhua yam koj ua coj los tso rau ntawm Vajtswv xub ntiag, qhov no qhia tau tias koj yog ib tug ua phem. Cov neeg ua phem puas muaj peev xwm raug ua neeg zoo tshaj plaws tau? Txhua yam koj ua, txhua yam kev nqis tes ua, txhua yam kev xav, thiab txhua yam kev coj ua yuav tsum nqa coj los tso rau ntawm Vajtswv xub ntiag. Kev niaj hnub ua neej sab ntsujplig ntawm koj—koj txoj kev thov Vajtswv, koj qhov txav los ze rau Vajtswv, koj qhov kev noj thiab kev haus Vajtswv cov lus, koj qhov kev sib qhia siab nrog koj cov kwv tij thiab cov muam, thiab koj lub neej hauv pawg ntseeg—thiab koj qhov kev sib koom tes ua dej num ntawd yuav tsum muab coj los tso rau ntawm Vajtswv xub ntiag rau Nws txoj kev tshawb xyuas kom meej. Nws yog yam kev xyaum ua uas yuav pab koj ua tiav loj hlob rau hauv lub neej. Txheej txheem ntawm kev lees txais Vajtswv txoj kev tshawb xyuas kom meej yog txheej txeem ntawm kev ua kom dawb huv. Koj yim kam lees txais Vajtswv txoj kev tshawb xyuas kom meej ntau npaum li cas, koj yim raug ua kom dawb huv ntau npaum li ntawd thiab koj yim ua raws li Vajtswv tej kev npaj siab ntau npaum li ntawd, yog li koj yuav tsis raug yaum nkag los rau kev qaug dej qaug cawv, thiab koj lub siab yuav nyob hauv Nws lub xub ntiag. Koj yim kam lees txais Nws txoj kev tshawb xyuas kom meej ntau npaum li cas, yim ua rau Ntxwgnyoog muaj kev txaj muag thiab koj yim muaj rab peev xwm ntxeev siab tawm tsam lub cev nqaij daim tawv ntau npaum li ntawd. Yog li, kev lees txais Vajtswv txoj kev tshawb xyuas kom meej yog ib txoj kev uas cov tib neeg yuav tsum tau xyaum ua raws. Txawm tias koj yuav ua dab tsi los xij, tab txawm yog thaum sib qhia nrog koj cov kwv tij thiab cov muam los xij, koj coj tau koj tej kev ua los tso rau ntawm Vajtswv xub ntiag es nrhiav Nws txoj kev tshawb xyuas kom meej thiab mob siab zwm rau Vajtswv Tus Kheej; qhov no yuav ua rau koj xyaum ua tau ntau qhov zoo. Yog koj nqa txhua yam koj ua coj los tso rau ntawm Vajtswv xub ntiag thiab kam lees txais Vajtswv txoj kev tshawb xyuas kom meej koj thiaj li yog tus neeg uas ua neej nyob rau hauv Vajtswv lub xub ntiag tau.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Ua Cov Uas Raws Li Nws Tej Kev Npaj Siab Kom Zoo Tiav Log

387. Thaum qee leej tib neeg hnov tias yuav kom ua tau ib tug neeg ncaj ncees, nws yuav tsum qheb thiab nthuav nws tus kheej tag nrho, lawv hais tias, “Kev coj ncaj ncees yog ib yam nyuaj. Kuv puas yuav tsum qhia txhua yam kuv xav rau lwm tus? Qhia yam zoo tseem tsis tau txaus thiab lov? Kuv tsis cheem tsum qhia rau lwm tus txog kuv sab tsis zoo los sis sab qias vuab tsuab, los tsis cheem tsum qhia thiab?” Yog tias koj tsis qhia lwm tus txog tej no, thiab tsis qheb hlo koj tus kheej, ces koj yeej yuav tsis paub koj tus kheej li; koj yuav tsis paub tias koj yog hom zoo li cas, thiab lwm tus tib neeg yuav tsis muaj cuab kav tso siab rau koj li. Nov yog qhov tseeb. Yog koj xav kom lwm tus tso siab rau koj, ces ua ntej tshaj plaws koj yuav tsum coj ncaj ncees. Yuav kom ua tau ib tug neeg ncaj ncees, koj yuav tsum xub qhib koj lub siab ua ntej kom txhua tus neeg tuaj yeem saib pom nws, pom txhua yam uas koj tab tom xav, thiab tig ntsia koj lub ntsej muag tiag ib pliag; koj yuav tsum txhob sim ua cuav tsab los sis npog koj tus kheej kom xws li yog neeg zoo. Tsuas yog ua li ntawd nkaus xwb tib neeg thiaj li tso siab rau koj thiab xam tias koj yog neeg ncaj ncees. Qhov no yog lub hauv paus xyaum ua raws, thiab yog yam yuav tsum muaj ua ntej, ntawm kev ua ib tug neeg ncaj ncees. Koj ib txwm ua txuj, ib txwm lom txwm ua kom yog kev dawb huv, kev muaj txiaj ntsim, kev zoo thiab lom txwm coj tej qauv zoo tshaj. Koj tsis cia tib neeg pom koj txoj kev lwj liam thiab koj tej kev ua tsis tau. Koj muab ib tug duab cuav rau tib neeg kom lawv ntseeg tias koj yog neeg coj ncaj, zoo tshaj, qhuas yus tus kheej-tias muab kev fij tuag nti, tsis xaiv ntsej muag, thiab tsis qia dub. Qhov no tsis yog kev ntxias dag thiab kev cuav lod? Txhob muab coj los xyaum ua ib qho cuav, thiab txhob muab koj tus kheej npog; dua ntawd, qhib koj tus kheej thiab koj lub siab rau lwm tus pom. Yog koj tuaj yeem qhib koj lub siab rau lwm tus pom, thiab qhib tag nrho koj tej kev xav thiab tej kev npaj ua—tag nrho ntawm sab zoo thiab sab phem—ces koj tseem tsis yog neeg ncaj ncees los? Yog koj tuaj yeem qhib koj tus kheej lub siab rau lwm tus pom, ces Vajtswv, los ib yam nkaus, yuav pom koj thiab hais tias, “Koj twb qhib koj tus kheej lub siab rau lwm tus pom lawm, thiab yog li koj yeej yog tus coj ncaj ncees los rau ntawm Kuv xub ntiag lawm, tau ib yam nkaus.” Yog koj tsuas qhib koj tus kheej lub siab rau Vajtswv nkaus xwb thaum lwm tus tib neeg tsis pom, thiab ib txwm ua txuj ua kom yog tus zoo tshaj thiab muaj txiaj ntsim los sis ntxim zoo li yog tus coj ncaj ncees thiab tsis qia dub thaum nyob rau hauv lawv txoj kev sib koom, ces Vajtswv yuav xav thiab hais dab tsi? Nws yuav hais tias, “Koj yog tus neeg txawj dag tiag tiag; koj yog tus neeg hais lus zoo siab nkhaus thiab siab nqaim tiag tiag li; thiab koj tsis yog ib tug neeg ncaj ncees li.” Yog li Vajtswv yuav txiav txim rau koj. Yog koj xav ua ib tug neeg ncaj ncees, ces txawm koj yuav nyob rau ntawm Vajtswv los sis lwm tus tib neeg lub xub ntiag thaum twg los xij, koj yuav tsum muaj peev xwm muaj ib lub siab uas dawb paug thiab qhib lug txog yam uas koj tuaj yeem qhia tau kom pom tseeb, thiab txog tej lus hauv koj lub siab. Qhov no puas ua tau yooj yim? Nws cheem tsum ib lub caij nyoog ntawm lub sij hawm ntawm kev xyaum ua nrog rau qhov nquag thov Vajtswv. Nej yuav tsum xyaum hais lus kom yooj yim thiab qhib siab lug tawm hauv lub tuaj rau hauv txhua yam. Nrog rau hom kev xyaum no, nej thiaj li nce qib tau. Yog nej ntsib ib qho kev nyuaj loj, nej yuav tsum thov Vajtswv thiab nrhiav qhov tseeb; nej yuav tau ua rog rau hauv nej lub siab thiab kov kom yeej cev nqaij daim tawv, kom mus txog thaum nej muab qhov tseeb coj los xyaum ua. Kev cob qhia koj tus kheej zoo li ntawd, ib qho me ntsis zuj zus, koj lub siab yuav maj mam qhib zuj zus, thiab koj mam li qhib siab ntau zuj zus, thiab yam koj hais thiab ua yuav ua tau los yuav sib txawv dua yav dhau los. Koj tej kev dag thiab coj tsis ncaj yuav muaj tsawg dua, ces koj thiaj li yuav muaj peev xwm los nyob tau ntawm Vajtswv xub ntiag. Tom qab ntawd koj thiaj li yuav ua tau ib tug neeg coj ncaj.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Lub Hauv Paus Kev Xyaum Ua Raws Yooj Yim Tshaj Plaws ntawm Kev Ua ib Tug Neeg Ncaj Ncees

388. Nej txoj hau kev kawg thiab nej txoj hmoo yog qhov tseem ceeb rau nej—ob yam ntawd yog txoj kev txhawj xeeb loj. Nej ntseeg tias, yog tias nej tsis ua tib zoo ua txhua yam, ces qhov ntawd yuav txhais tau hais tias nej yuav tsis muaj ib qho chaw xaus, tias nej tau rhuav tshem nej tus kheej txoj hmoo lawm. Tiam sis nws puas tau tshwm sim rau nej tias cov neeg uas siv dag zog yog vim lawv tab tom rau siab ntso ua raws li txoj hau kev kawg yam tsis muaj nqis? Cov kev siv zog zoo li no tsis yog qhov tseeb—lawv dag nyiag thiab ntxias dag xwb. Yog tias qhov ntawd yog qhov teeb meem, ces cov uas ua hauj lwm uas yog vim lawv txoj hau kev kawg yog qhov pib ntawm lawv txoj kev swb rau thaum kawg, rau qhov ib tug neeg ua tsis tiav kev ntseeg Vajtswv yog raug dag ntxias lawm. Kuv tau hais yav dhau los lawm hais tias Kuv tsis nyiam kom raug qhuas los sis raug txhawb, los sis muaj kev txhawb siab. Kuv nyiam cov tib neeg ncaj ncees los fim nrog Kuv qhov tseeb thiab Kuv cov kev cia siab xwb. Tshaj ntawd ntxiv, Kuv nyiam thaum tib neeg muaj peev xwm qhia tau kev saib xyuas zoo tshaj plaws thiab kev txiav txim siab rau Kuv lub siab xwb, thiab thaum lawv tseem muaj peev xwm muab txhua yam tso tseg vim yog Kuv. Tsuas yog txoj hau kev no xwb Kuv lub siab thiaj li yuav nyob kaj lug.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Ntawm Lub Hom Phiaj

389. Tsuas yog cov tib neeg uas nrhiav los ua neeg ncaj ncees nkaus xwb mas lawv thiaj li paub tias lawv qias vuab tsuab tob npaum li cas, seb lawv puas muaj ib qho zoo li tib neeg tiag tiag los tsis muaj, thiab seb lawv puas ntsuas lawv tus kheej kom meej los sis puas pom qhov lawv tsis muaj txaus los tsis pom. Tsuas yog thaum lawv tab tom xyaum txoj kev ncaj ncees nkaus xwb lawv thiaj li dhau los ras tias lawv hais qhia dag ntau npaum li cas thiab lawv qhov txawj dag thiab coj tsis ncaj ncees yuav zais npog tob npaum li cas. Tsuas yog thaum muaj kev ntsib pom ntawm kev xyaum ua raws kev ncaj ncees nkaus xwb tib neeg thiaj li maj mam los paub qhov tseeb ntawm lawv tus kheej txoj kev qias vuab tsuab thiab paub lawv tus kheej tus yeeb yam lub ntsiab tseeb, thiab tsuas yog thaum ntawd xwb mas lawv tej moj yam qias vuab tsuab thiaj li raug ntxuav kom dawb huv. Tsuas yog lub hauv paus ntawm lawv tej moj yam lwj liam raug ntxuav kom dawb huv xwm yeem lawm xwb thiaj li yuav yog cov tib neeg uas muaj peev xwm muab tau qhov tseeb. Siv koj lub sij hawm kom ntsib pom cov lus no. Vajtswv tsis ua cov neeg uas txawj dag kom zoo tiav log. Yog koj lub siab tsis ncaj ncees—yog koj tsis yog ib tug neeg ncaj ncees—ces Vajtswv yeej yuav muab tsis tau koj li. Ib yam nkaus, koj yuav tsis muab tau qhov tseeb, thiab kuj yuav tsis muaj peev xwm muab tau Vajtswv li thiab. Nws txhais li cas yog tias koj muab tsis tau Vajtswv? Yog tias koj muab tsis tau Vajtswv thiab tsis tau to taub qhov tseeb, ces koj yuav tsis paub Vajtswv, yog li ntawd yuav tsis muaj txoj hau kev uas koj yuav nrog tau Vajtswv sib raug zoo, ces koj yuav yog Vajtswv tus yeeb ncuab. Yog tias koj tsis sib raug zoo nrog Vajtswv, ces Vajtswv tsis yog koj tus Vajtswv; thiab yog tias Vajtswv tsis yog koj tus Vajtswv, ces koj yuav tsis dim. Yog tias koj tsis nrhiav kom tau txais kev cawm dim no, vim li cas koj ho ntseeg Vajtswv? Yog koj tsis tuaj yeem tau txais kev cawm dim, koj yuav yog tus yeeb ncuab iab ntawm Vajtswv mus tag ib txhiab ib txhis, thiab koj qhov ua tau los yuav raug teev tseg. Yog li ntawd, yog tib neeg xav kom raug cawm dim, ces lawv yuav tsum pib ua neeg ncaj ncees. Thaum kawg, cov uas Vajtswv muab tau ntawd muaj ib lub cim ntaus rau. Nej puas paub txog qhov no yog dab tsi? Nws raug sau rau hauv Kev Qhia Tshwm, rau hauv phau Vajluskub tias: “Thiab nyob hauv lawv lub qhov ncauj tsis pom muaj lus dag li; lawv tsis muaj chaw thuam li” (Qhia Tshwm 14:5). “Lawv” yog leej twg? Lawv yog cov uas raug cawm dim, raug ua tau zoo tiav log thiab Vajtswv muab tau. Vajtswv piav qhia txog cov neeg no li cas? Tej cwj pwm thiab tej kev nthuav tawm ntawm lawv txoj kev coj yog dab tsi? Lawv tsis muaj chaw thuam li. Lawv tsis hais lus dag li. Tej zaum nej txhua tus yeej to taub thiab nkag siab hais tias tsis hais lus dag yog txhais tau li cas: Nws txhais tias yog kev ncaj ncees. Qhov hais tias “tsis muaj chaw thuam li” ntawd hais txog dab tsi? Qhov ntawd txhais hais tias tsis ua kev phem. Yog li ntawd no qhov tsis ua kev phem ntawd yog vim dab tsi? Yeej yuav tsum yog vim txoj kev hwm Vajtswv xwb. Yog li ntawd, qhov tsis muaj chaw thuam ntawd yog txhais hais tias hwm Vajtswv thiab zam kev phem. Vajtswv pom tus uas tsis muaj chaw thuam ntawd yog tus zoo li cas? Raws li Vajtswv pom mas, tsuas yog cov uas hwm Vajtswv thiab zam kev phem xwb thiaj li yog cov uas zoo tiav log; yog li ntawd, cov tib neeg uas tsis muaj chaw thuam ntawd yog cov uas hwm Vajtswv thiab zam kev phem, thiab tsuas yog cov uas zoo tiav log xwb mas thiaj li yog cov uas tsis muaj chaw thuam. Yeej yog li no.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Rau Yam Ua Tau Tshwm Sim Tiag ntawm Lub Neej Kev Loj Hlob

390. Koj yuav tsum paub tias seb puas muaj kev ntseeg tseeb thiab kev ua siab ncaj nyob hauv koj, seb puas muaj ib qho teev tseg tias koj raug kev tsim txom rau Vajtswv, thiab seb koj puas muab tag nrho koj tus kheej zwm rau Vajtswv. Yog tias koj tsis muaj tej no, ces nyob hauv koj tseem muaj txoj kev ntxeev siab, kev txawj dag, kev xav tau ntau, thiab kev yws taus. Thaum koj lub siab tseem nyob deb ntawm qhov coj ncaj, ces koj tseem tsis tau txais tau qhov meej mom los ntawm Vajtswv los thiab koj tseem tsis tau nyob hauv qhov kaj dua li. Txoj hmoo ntawm ib tug yuav zoo li cas nyob rau thaum kawg ntawd yog nyob ntawm qhov seb lawv puas coj ncaj thiab puas muaj lub siab liab li ntshav, thiab seb lawv puas muaj lub siab dawb paug. Yog tias koj yog tus uas coj tsis ncaj kiag li, yog tus uas muaj lub siab ntshaw qhov phem, yog tus uas muaj lub siab tsis huv, ces kom koj paub tseeb tias thaum kawg koj yuav xaus rau qhov chaw uas cov tib neeg raug rau txim raws li tej uas twb muab sau tseg cia li koj txoj hmoo lawm. Yog koj hais tias koj yog tus tib neeg coj ncaj heev, tiam sis koj yeej tsis tswj kom ua raws li qhov tseeb los sis hais lo lus tseeb li, ces puas yog koj tseem tab tom tos Vajtswv ua tus muab nqi zog rau koj? Puas yog koj tseem vam kom Vajtswv saib koj zoo tam li tus neeg ntxim nyiam rau ntawm Nws lub qhov muag? Txoj kev xav li no puas luab sab dhau lawm thiab? Koj dag Vajtswv rau hauv txhua yam; Vajtswv lub tsev yuav ua cas txais tos tus zoo li koj, tus uas ob txhais tes tsis huv?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Peb Qho Lus Ceeb Toom