Vajtswv Tej Lus Tseem Ceeb:

Qhov “kev yug los ua neeg” yog Vajtswv qhov kev tshwm sim rau hauv lub cev nqaij daim tawv; Vajtswv ua hauj lwm nrog cov tib neeg ntiaj teb uas raug tsim tawm los rau hauv tus yam ntxwv ntawm lub cev nqaij daim tawv. Yog li ntawd vim Nws yog Vajtswv qhov kev yug los ua neeg, Nws thiaj li yuav tsum ua lub cev nqaij daim tawv ua ntej tso, lub cev nqaij daim tawv nrog kev ua neej; qhov no yog qhov tseem ceeb tshaj uas yuav tsum tau muaj. Tseeb tiag, qhov tseem ceeb ntawm Vajtswv qhov kev yug los ua neeg yog qhov tias Vajtswv ua neej nyob thiab ua hauj lwm hauv lub cev nqaij daim tawv, tias Vajtswv hauv Nws lub ntsiab tseem ceeb kiag rais los ua lub cev nqaij daim tawv, rais los ua ib tug tib neeg. Nws lub neej yog los ua neeg thiab tes dej num muab faib tau ua ob theem. Thawj theem yog lub neej uas Nws ua neej nyob ua ntej ua Nws tes hauj lwm. Nws ua neej nyob hauv ib tsev neeg dog dig, hauv kev ua neej tag nrho, ua raws li tej kev coj ncaj ncees uas ib txwm muaj thiab tej kev cai ntawm tib neeg lub neej, nrog rau tej kev cheem tsum ntawm tib neeg (zaub mov, ris tsho, pw, chaw nyob), tib neeg tej kev qaug zog, tib neeg tej kev xav. Muab ua lwm lo lus hais, nyob rau thawj theem no Nws ua neej nyob tsis muaj hwj chim qaum ntuj li, muaj kev ua neej tag nrho xwb, koom rau txhua yam ntawm tib neeg tej hauj lwm. Theem ob yog lub neej uas Nws ua neej nyob tom qab pib ua Nws tes hauj lwm. Nws tseem nyob hauv kev ua neeg dog dig nrog ib lub plhaub tib neeg li ib txwm, tsis qhia cim sab nraud ntawm qhov tshaj ntuj tsim li. Tab sis Nws tsuas ua neej nyob txhawm tag nrho rau Nws tes hauj lwm xwb, thiab nyob rau lub sij hawm no Nws txoj kev ua neej muaj puv ntoob kom los txhawb tau tes dej num ntawm Nws lub hwj chim qaum ntuj, rau qhov thaum ntawd Nws txoj kev ua neej tau loj hlob tiav los txog rau theem ntawm qhov muaj peev xwm los ua Nws tes hauj lwm lawm. Yog li, theem ob ntawm Nws lub neej no yog los ua Nws tes hauj lwm hauv Nws txoj kev ua neej, thaum ntawd nws yog ib lub neej ntawm kev ua neej thiab yog lub hwj chim qaum ntuj tag nrho huv si. Qhov laj thawj hais tias vim li cas, nyob rau thawj theem ntawm Nws lub neej, Nws ua neej nyob rau hauv kev ua neeg dog dig tag nrho yog qhov tias Nws kev ua neeg tseem tsis tau muaj peev xwm los tuav tag nrho ntawm tes dej num uas muaj hwj chim qaum ntuj, tseem tsis tau hlob tiav; tsuas yog tom qab Nws kev ua neeg loj hlob tiav, rais los muaj peev xwm kwv Nws tes hauj lwm tshaj tawm xwb, ces Nws thiaj npaj txog qhov ua tes hauj lwm tshaj tawm uas Nws yuav tsum tau ua. Vim Nws yog lub cev nqaij daim tawv, Nws thiaj li yuav tsum tau loj hlob thiab paub tab. Yog li ntawd, thawj theem ntawm Nws lub neej yog qhov kev ua neej, hos nyob rau theem ob, Nws txoj kev ua neeg muaj peev xwm ntawm qhov ua Nws tes dej num thiab ua Nws tes hauj lwm tshaj tawm, ces yog li ntawd lub neej uas tus Vajtswv yug los ua neeg ua neej nyob rau hauv Nws tes hauj lwm tshaj tawm ntawd yog ib qho ntawm txoj kev ua neeg thiab yog lub hwj chim qaum ntuj tag nrho. Yog tias, txij thaum lub sij hawm ntawm qhov yug Nws los, tus Vajtswv yug los ua neeg pib Nws tes hauj lwm raws kev raws cais, ua tej cim uas siab tshaj piav tsis tau thiab tej txuj ci phim hwj, ces Nws yuav tsis muaj lub ntsiab tseem ceeb uas yog nqaij tawv. Yog li ntawd, Nws muaj txoj kev ua neeg vim yog Nws lub ntsiab tseeb ntawm cev nqaij daim tawv; yeej tsis muaj lub cev nqaij daim tawv tau yog tsis muaj kev ua neeg, thiab ib tug tib neeg uas tsis muaj kev ua neeg tsis yog ib tug tib neeg. Nyob rau txoj kev no, kev ua neeg ntawm Vajtswv lub cev nqaij daim tawv yeej yog ib yam khoom uas ib txwm muaj los ntawm Vajtswv lub cev nqaij daim tawv uas yug los ua neeg. Qhov hais tias “thaum Vajtswv rais los ua lub cev nqaij daim tawv Nws tsuas muaj lub hwj chim qaum ntuj xwb, thiab tsis muaj kev ua neeg kiag li,” ntawd yog lus thuam, rau qhov kab lus no yeej tsis muaj nyob, thiab txhaum lub hauv paus ntsiab lus ntawm kev yug los ua neeg. Txawm yog tom qab Nws pib ua Nws tes hauj lwm tshaj tawm lawm los xij, Nws yeej tseem nyob hauv Nws lub hwj chim qaum ntuj nrog tib neeg daim plhaub sab nraud thaum Nws ua Nws tes dej num; nws tsuas yog tias nyob rau lub sij hawm ntawd, Nws txoj kev ua neeg ua dej num rau lub hom phiaj ntawm qhov tso cai rau Nws lub hwj chim qaum ntuj los ua tes dej num hauv lub cev nqaij daim tawv xwb. Tus neeg ua hauj lwm yog lub hwj chim qaum ntuj uas nyob hauv Nws qhov kev ua neeg. Nws lub hwj chim qaum ntuj, tsis yog Nws qhov kev ua neeg, tab tom ua hauj lwm, tiam sis lub hwj chim qaum ntuj no nyob nraim nkoos rau hauv Nws qhov kev ua neeg lawm; nyob hauv lub ntsiab tseeb mas, Nws tes hauj lwm yeej yog ua tiav los ntawm Nws lub hwj chim qaum ntuj tag nrho xwb, tsis yog los ntawm Nws qhov kev ua neeg. Tab sis tus neeg ua hauj lwm ntawm tes dej num yog Nws lub cev nqaij daim tawv. Ib tug yeej hais tau tias Nws kuj yog ib tug tib neeg thiab kuj yog Vajtswv thiab, rau qhov Vajtswv rais los ua ib tug Vajtswv uas ua neej nyob rau hauv lub cev nqaij daim tawv; Nws muaj ib lub plhaub tib neeg thiab ib lub ntsiab tseem ceeb uas yog tib neeg, thiab tshaj ntawd ntxiv Nws kuj muaj Vajtswv lub ntsiab tseem ceeb thiab. Vim Nws yog ib tug tib neeg uas muab lub ntsiab tseem tseem ceeb ntawm Vajtswv, Nws nyob siab tshaj txhua tus tib neeg uas tsim los, siab tshaj txhua tus tib neeg uas muaj cuab kav ua tau Vajtswv tes dej num. Thiab yog li, ntawm cov uas muaj tib neeg lub plhaub zoo li Nws li, ntawm tag nrho cov uas muaj kev ua neeg, tsuas yog Nws xwb thiaj yog tus Vajtswv Tus Kheej yug los ua neeg—tag nrho lwm cov puas leej yog tib neeg uas tsim los. Txawm tias lawv txhua tus muaj kev ua neeg los xij, cov tib neeg uas tsim los ntawd tsis muaj dab tsi li tab sis tsuas muaj kev ua neeg xwb, hos Vajtswv yug los ua neeg mas txawv: Hauv Nws lub cev nqaij daim tawv Nws tsis yog tsuas muaj kev ua neeg xwb tab sis, qhov tseem ceeb tshaj plaws ntawd, yog muaj lub hwj chim qaum ntuj. Nws qhov kev ua neeg yeej pom tau nyob sab nraum qhov kev tshwm sim ntawm Nws lub cev nqaij daim tawv thiab hauv Nws lub neej txhua hnub, tab sis Nws lub hwj chim qaum ntuj mas pom nyuab. Vim tias Nws lub hwj him qaum ntuj tsuas nthuav tawm rau thaum Nws muaj kev ua neeg xwb, thiab tsis zoo tshaj ntuj tsim li qhov tib neeg xav tias nws yog, nws nyuab heev rau tib neeg pom. Txawm niaj hnub no kiag los, tib neeg yeej muaj kev to taub nyuab txog lub ntsiab tseem ceeb tiag ntawm Vajtswv yug los ua neeg. Txawm yog tom qab Kuv twb tau hais txog nws ntev loo lawm los xij, Kuv yeej xav tias nws yeej tseem yog ib qho tsis to taub yooj yim rau feem ntau ntawm nej cov ko. Qhov tseeb, qhov xwm no mas yooj yim xwb: Vim Vajtswv rais los ua lub cev nqaij daim tawv, Nws lub ntsiab tseem ceeb yog ib qho sib ntxiv ntawm kev ua neeg thiab lub hwj chim qaum ntuj. Qhov sib ntxiv no yog hu ua Vajtswv Tus Kheej, Vajtswv Tus Kheej nyob hauv ntiaj teb.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Lub Ntsiab Tseeb Ntawm Lub Cev Nqaij Daim Tawv Uas Vajtswv Muaj

Tus Vajtswv uas yug los ua neeg ces hu ua Khetos, thiab Khetos yog lub cev nqaij daim tawv uas Vajtswv tus Ntsujplig hnav. Lub cev nqaij daim tawv no tsis zoo li ib tug tib neeg uas yog lub cev muaj cev nqaij daim tawv. Qhov txawv ces yog vim Khetos yog qhov kev yug los ua neeg ntawm tus Ntsujplig, tsis yog los ntawm nqaij tawv los. Nws muaj ob yam uas yog kev ua neeg thiab lub hwj chim qaum ntuj. Nws lub hwj chim qaum ntuj mas tsis muaj ib tug neeg twg muaj li. Nws kev ua neej txhawb tag nrho Nws txhua yam kev coj kev ua nyob rau hauv lub cev nqaij daim tawv, thaum lub sij hawm uas Nws lub hwj chim qaum ntuj ua tes hauj lwm ntawm Vajtswv Tus Kheej kiag. Txawm yuav yog Nws kev ua neeg los sis lub hwj chim qaum ntuj, ob qho puav leej zwm rau Leej Txiv saum ntuj ceeb tsheej lub siab nyiam. Lub ntsiab tseeb ntawm Khetos ces yog tus Ntsujplig, qhov ntawd yog, lub hwj chim qaum ntuj. Yog li ntawd, Nws lub ntsiab tseeb ces yog Vajtswv Tus Kheej kiag; lub ntsiab tseeb no yuav tsis tab kaum Nws tus kheej tes hauj lwm, thiab Nws yeej ua tsis tau ib yam dab tsi uas yuav rov rhuav Nws tus kheej tes hauj lwm, los sis Nws yeej yuav tsis hais ib lo lus tawm tsam Nws tus kheej lub siab nyiam li. Yog li ntawd, tus Vajtswv uas yug los ua neeg yeej yuav tsis muaj hnub ua ib teg hauj lwm uas yuav tab kaum Nws tus kheej qhov kev cawm tib neeg li. Qhov ntawd yog qhov uas sawv daws yuav tsum tau to taub.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Lub Ntsiab Tseeb Ces Yog Kev Mloog Lus Raws Leej Txiv Saum Ntuj Ceeb Tsheej Txoj Kev Xav

Nws tus uas yog tus Vajtswv uas yug los ua neeg ntawd mas yuav muaj lub ntsiab tseem ceeb li Vajtswv, thiab Nws tus uas yog tus Vajtswv uas yug los ua neeg yuav muaj yam tshwm sim kom pom li Vajtswv. Vim Vajtswv rais los muaj cev nqaij daim tawv, Nws yuav coj tes hauj lwm Nws npaj siab yuav ua los, thiab vim Vajtswv rais los muaj cev nqaij daim tawv, Nws yuav nthuav qhov uas Nws yog ntawd tawm, thiab yuav muaj peev xwm coj qhov tseeb los rau tib neeg, muab txoj sia pub rau lawv thiab taw qhia txoj kev rau lawv. Lub cev nqaij daim tawv uas tsis muaj lub ntsiab tseem ceeb ntawm Vajtswv ces yeej tsis yog tus Vajtswv uas yug los ua neeg tiag tiag li; ntawm qhov no mas yeej muaj tseeb li ntawd. Yog tib neeg npaj siab tshawb xyuas nws puas yog tus Vajtswv uas yug los ua neeg lub cev nqaij daim tawv, ces lawv yuav tsum ua kom paub tseeb los ntawm tus moj yam uas Nws nthuav tawm thiab tej lus uas Nws hais. Ces hais tau hais tias, yuav kom paub meej hais tias seb qhov ntawd puas yog Vajtswv lub cev nqaij daim tawv uas Nws yug los rau los tsis yog, thiab seb qhov ntawd puas yog txoj kev tseeb los tsis yog, yus yuav tsum tau muab cais tawm ntawm lub hauv paus ntawm Nws lub ntsiab tseem ceeb. Thiab yog li ntawd, qhov txiav txim siab tias seb nws puas yog lub cev nqaij daim tawv ntawm tus Vajtswv uas yug los ua neeg ntawd, mas qhov tseem ceeb yog nyob rau hauv Nws lub ntsiab tseem ceeb (Nws tes hauj lwm, Nws tej lus hais tawm, Nws tus moj yam, thiab lwm yam ntxiv), tsis nyob rau ntawm qhov uas zoo li cas nyob sab nraud. Yog tib neeg tsuas tshawb xyuas Nws lub ntsej muag sab nraud kom meej xwb, es tsis quav ntsej Nws lub ntsiab tseeb li, ces qhov no qhia hais tias tib neeg tsis nkag siab thiab tsis paub dab tsi li.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Zaj Lus Ua Ntej

Qhov tseem ceeb ntawm kev yug los ua neeg yog qhov tias ib tug dog dig, ib tug tib neeg ua tes dej num ntawm Vajtswv Tus Kheej; ntawd yog, tias Vajtswv ua Nws tes dej num uas muaj hwj chim qaum ntuj hauv txoj kev ua neeg thiab yog li thiaj kov yeej Ntxwgnyoog. Kev yug los ua neeg txhais tias Vajtswv tus Ntsujplig rais los ua ib lub cev nqaij daim tawv, ntawd yog, Vajtswv rais los ua lub cev nqaij daim tawv; tes dej num uas lub cev nqaij daim tawv ua yog tes dej num ntawm tus Ntsujplig, uas yog qhov raug paub nyob rau hauv lub cev nqaij daim tawv, raug nthuav tawm los ntawm lub cev nqaij daim tawv. Tsis muaj leej twg li tsuas yog Vajtswv lub cev nqaij daim tawv xwb thiaj muaj cuab kav ua tau tes hauj lwm tshaj tawm ntawm tus Vajtswv yug los ua neeg tiav log; ntawd yog, tsuas yog Vajtswv lub cev nqaij daim tawv yug los ua neeg xwb, qhov kev ua neej no—thiab tsis muaj leej twg lawm—muaj cuab kav nthuav tawm tau tes dej num uas muaj hwj chim qaum ntuj. Yog li, nyob rau Nws qhov los thawj zaug, Vajtswv tsis muaj kev ua neej ua ntej muaj hnub nyoog nees nkaum cuaj xyoos—yog tias sai li sai tau thaum Nws yug los Nws muaj cuab kav ua tau tej txuj ci tseem ceeb, yog tias sai li sai tau thaum Nws kawm paub hais lus Nws muaj cuab kav hais tau hom lus saum ntuj ceeb tsheej, yog tias lub sij hawm Nws cev taw rau saum lub ntiaj teb thawj zaug Nws muaj cuab kav nkag siab txhua yam teeb meem hauv ntiaj teb, paub txhua tus tib neeg tej kev xav thiab tej kev xav tau—ib tug tib neeg zoo li no tsis muaj cuab kav hu tau tias yog ib tug tib neeg dog dig, thiab lub cev nqaij daim tawv zoo li no tsis muaj cuab kav hu tau tias yog lub cev nqaij daim tawv tib neeg. Yog tias qhov no muaj li no rau Khetos, ces lub ntsiab thiab lub ntsiab tseem ceeb ntawm Vajtswv kev yug los ua neeg yuav poob mus lawm. Qhov uas Nws muaj txoj kev ua neej qhia tau tias Nws yog Vajtswv yug los ua neeg hauv lub cev nqaij daim tawv; qhov tseeb uas Nws tau nkag rau hauv tus txheej txheem txoj kev loj hlob li tib neeg ntawd kom haj yam qhia meej tias Nws yog ib lub cev nqaij daim tawv li ib txwm; ntxiv rau qhov ntawd, Nws tes dej num qhia tau meej txaus tias Nws yog Vajtswv Txoj Lus, Vajtswv tus Ntsujplig, rais los ua lub cev nqaij daim tawv. Vajtswv rais los ua lub cev nqaij daim tawv vim yog ntawm tej kev cheem tsum ntawm Nws tes dej num; muab ua lwm lo lus hais, theem no ntawm tes dej num yuav tsum ua kom tiav rau hauv lub cev nqaij daim tawv, nws yuav tsum ua rau hauv kev ua neej. Qhov no yog qhov tseem ceeb uas yuav tsum tau muaj rau “Txoj Lus rais los ua lub cev nqaij daim tawv,” rau “Txoj Lus tshwm hauv lub cev nqaij daim tawv,” thiab nws yog zaj keeb kwm tseeb uas nyob tom qab Vajtswv kev yug los ua neeg ob zaug.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Lub Ntsiab Tseeb Ntawm Lub Cev Nqaij Daim Tawv Uas Vajtswv Muaj

Tes hauj lwm thiab qhov kev hais qhia kom pom txog Khetos qhia txog Nws lub ntsiab tseeb. Nws muaj cuab kav siv lub siab tiag tiag uas Vajtswv muab rau Nws coj los ua kom tiav hlo. Nws yeej muaj cuab kav siv lub siab tiag tiag los pe hawm Vajtswv saum ceeb tsheej, thiab siv ib lub siab tiag tiag yuav ua kom haum li Leej Txiv Vajtswv lub siab nyiam. Tag nrho tej no mas yog los ntawm Nws lub ntsiab tseeb los xwb. Thiab yog li qhov kev nthuav tawm tiag txog Nws ntawd los yeej puav leej yog los ntawm Nws lub ntsiab tseeb los thiab; qhov laj thawj Kuv hu qhov no ua Nws qhov “kev nthuav tawm tiag” mas yog vim Nws qho kev nthuav tawm no tsis yog ib qho xyaum tom tej los, los sis tsis yog kawm tawm ntawm tib neeg los, los sis tsis yog siv sij hawm ntau xyoo cog tau li tib neeg cog qoob loos. Nws tsis tau kawm tej ntawd los sis muab Nws Tus Kheej hnav tej ntawd; tab sis, yeej muaj nyob rau hauv Nws lawm. Tej zaum tib neeg yuav tsis lees Nws tes hauj lwm, Nws qhov kev hais qhia kom pom rau tib neeg, Nws kev ua neeg, thiab tag nrho Nws lub neej txoj sia ntawm Nws kev ua neej, tab sis tsis muaj leej twg yuav tsis lees tau hais tias Nws muaj lub siab pe hawm Vajtswv saum ceeb tsheej tiag; tsis muaj leej twg yuav tsis lees tau hais tias Nws los ua kom muaj tiav raws li Leej Txiv saum ntuj ceeb tsheej lub siab nyiam, thiab tsis muaj leej twg yuav tsis lees tau tias Nws muaj lub siab dawb paug rau qhov Nws nrhiav Leej Txiv Vajtswv. Txawm hais tias Nws tus duab yuav tsis zoo ntshia, Nws tej lus zoo li tsis muaj kuab luaj twg, thiab Nws tes hauj lwm tsis yog qhov uas ua kom ntiaj teb thiab lub ntuj co qig txoog li qhov tib neeg xav, los Nws yeej yog Khetos tiag, tus uas muaj lub siab tiag los ua kom muaj tiav haum Leej Txiv saum ceeb tsheej lub siab nyiam, zwm hlo rau Leej Txiv saum ntuj ceeb tsheej, thiab mloog lus txog qhov tuag kiag. Qhov no mas vim yog Nws lub ntsiab tseeb yeej yog lub ntsiab tseeb ntawm Khetos. Qhov tseeb no mas yog ib qho nyuab heev rau tib neeg ntseeg, tab sis nws yog ib qho muaj tseeb. Thaum uas Khetos tes hauj lwm qhuab qhia raug ua muaj tiav hlo lawm, tib neeg yuav muaj cuab kav pom los ntawm Nws tes hauj lwm hais tias Nws tus moj yam thiab Nws tus kheej ces yeej sawv cev kiag rau Vajtswv saum ntuj ceeb tsheej tus moj yam thiab Nws tus kheej ntag. Thaum ntawd, ces sau tag nrho Nws tej hauj lwm ua ke ces yeej qhia meej tau hais tias Nws ces yeej yog lub cev nqaij daim tawv uas tshwm sim los ntawm Txoj Lus tiag, thiab tsis zoo ib yam nkaus li tej tib neeg uas muaj nqaij muaj ntshav.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Lub Ntsiab Tseeb Ces Yog Kev Mloog Lus Raws Leej Txiv Saum Ntuj Ceeb Tsheej Txoj Kev Xav

Zaum no, Vajtswv tsis yog los ua hauj lwm nyob rau hauv lub cev ntawm sab ntsujplig, tab sis nyob rau hauv ib tug neeg dog dig li sawv daws. Tshaj ntawd ntxiv, nws yog Vajtswv lub cev ntawm qhov yug los ua neeg zaum ob, thiab nws kuj tseem yog qhov uas Vajtswv rov los kiag rau hauv cev nqaij daim tawv. Nws yog ib cev nqaij daim tawv li tej tib neeg sawv daws muaj xwb. Thaum saib rau Nws ntawd, koj tsis pom ib yam dab tsi uas ua rau Nws zoo txawv lwm tus, tab sis koj yuav tau txais tej qho tseeb uas tsis tau hnov dua los ntawm Nws. Tsuas yog lub cev uas zoo li tsis tseem ceeb no yog qhov tshwm sim tag nrho ntawm Vajtswv cov lus uas hais txog qhov tseeb, uas yog tus ua Vajtswv tes hauj lwm nyob rau tiam kawg, thiab kuj yog qhov kev hais qhia kom pom uas tib neeg to taub tag nrho Vajtswv tus moj yam. Koj tseem tsis xav pom tus Vajtswv saum ceeb tsheej heev li los? Koj tseem tsis xav to taub tus Vajtswv saum ceeb tsheej heev li los? Koj tseem tsis xav pom tib neeg txoj hau kev kawg heev li los? Nws yuav qhia tag nrho tej lus zais no—tej lus zais uas tsis tau muaj ib tug tib neeg keev muaj peev xwm qhia tau koj li—thiab Nws kuj tseem yuav qhia qhov tseeb uas koj tsis to taub rau koj. Nws yog koj lub rooj vag mus rau lub nceeg vaj, thiab koj tus neeg coj kev mus rau tiam tshiab. Lub cev nqaij daim tawv uas zoo li sawv daws no mas muaj ntau qhov lus zais tob uas tib neeg to taub nyuab. Nws tej kev ua mas txawv heev rau koj li, tab sis tag nrho lub hom phiaj ntawm tes hauj lwm uas Nws ua ntawd ces yeej txaus los pab kom koj pom hais tias Nws tsis yog ib lub cev dog dig li qhov uas neeg ntseeg ntawd, vim Nws sawv cev rau Vajtswv tej kev npaj siab nyob rau tiam kawg, thiab Vajtswv txoj kev saib xyuas tib neeg nyob rau tiam kawg. Txawm hais tias koj tsis hnov Nws cov lus uas zoo li ua rau lub ntuj thiab lub ntiaj teb co qig txoog, txawm hais tias koj pom tsis tau Nws ob lub qhov muag cuag nplaim taws cig, thiab txawm hais tias koj tsis tuaj yeem txais txoj kev qhuab qhia ntawm tus pas hlau, txawm li ntawd los xij, koj yeej hnov los ntawm Nws cov lus hais tias Vajtswv mas yeej npau taws heev thiab paub hais tias Vajtswv yeej qhia txoj kev hlub tshua rau tib neeg ntiaj teb, thiab pom Vajtswv tus moj yam ncaj ncees thiab Nws txoj kev ntse, thiab, haj yam ntau tshaj ntawd yog ua tsaug rau Vajtswv txoj kev txhawj xeeb rau txhua tus neeg ntiaj teb. Vajtswv tes hauj lwm nyob rau tiam kawg ces yog cia kom tib neeg pom tus Vajtswv saum ntuj ceeb tsheej nyob nrog tib neeg hauv ntiaj teb, thiab ua kom tib neeg paub, zwm rau, ntshai, thiab hlub Vajtswv. Qhov no yog qhov uas Nws tau rov qab los rau lub cev nqaij daim tawv zaum thib ob. Txawm hais tias qhov tib neeg pom hnub no yeej yog ib tug Vajtswv uas zoo ib yam nkaus li tib neeg, ib tug Vajtswv uas muaj qhov ntswg thiab qhov muag, thiab ib tug Vajtswv uas tsis tshwj xeeb kiag li, nyob rau thaum kawg, Vajtswv yuav qhia nej hais tias yog tsis muaj tus neeg no, ces lub ntuj thiab lub ntiaj teb yuav hloov pauv ntau heev; yog tsis muaj tus neeg no, lub ntuj yuav tsaus, lub ntiaj teb yuav poob mus rau kev kub ntxhov, thiab tag nrho neeg ntiaj teb yuav ua neej nyob nrog kev tuag tshaib tuag nqhis thiab kev mob kev nkeeg sib kis loj kawg nkaus. Nws yuav qhia nej hais tias yog tus Vajtswv uas yug los ua neeg ntawm tiam kawg tsis los cawm nej, ces Vajtswv yeej muab tag nrho tej neeg ntiaj teb rhuav tshem mus rau hauv ntuj tawg ntev los lawm; yog tsis muaj lub cev nqaij daim tawv no, ces nej yeej yuav tau ua tus neeg txhaum-loj mus ib txhis, thiab nej yuav yog lub niag cev tuag mus ib txhis xwb. Nej yuav tsum paub hais tias yog tsis muaj lub cev nqaij daim tawv no, ces qhov tib neeg ntiaj teb yuav khiav dim ib qho kev puas ntsoog, thiab qhov yuav khiav dim qhov kev rau txim hnyav uas Vajtswv rau txim rau neeg ntiaj teb nyob rau tiam kawg ntawd yuav tsis muaj hnub ua tau li. Yog lub cev nqaij daim tawv zoo li neeg dog dig no tsis yug los, ces nej tag nrho yuav tau nyob rau qhov uas nej thov kev ciaj los ciaj tsis taus thiab thov kom tuag los tuag tsis taus; yog tsis muaj lub cev no, ces nej yuav tsis muaj peev xwm tau qhov tseeb thiab los rau ntawm Vajtswv xub ntiag lub zwm txwv hnub no, tab sis txawv qhov ntawd, ces nej yuav raug Vajtswv rau txim rau vim nej tej kev txhaum loj. Nej puas paub hais tias yog Vajtswv tsis rov qab los rau hauv lub cev nqaij daim tawv, tsis muaj leej twg yuav muaj lub cib fim raug cawm dim hlo li; thiab yog tsis rov los rau lub cev nqaij daim tawv, ces Vajtswv yeej xub muab tiam qub thaum i xaus ntev los lawm? Qhov nov zoo li no, nej puas tseem yuav tsis txais yuav Vajtswv qhov kev yug los ua neeg zaum ob thiab? Vim nej twb tau txais tej txiaj ntsim loj heev los ntawm tus tib neeg dog dig no los lawm, vim li cas nej ho tsis lees txais Nws?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Koj Puas Paub? Vajtswv Tau Ua ib Yam Loj Tshaj Plaws Nrog Rau Tib Neeg

Thaum kawg, txhua lub teb chaws yuav pe hawm tus neeg dog dig no, nrog rau qhov ua tsaug rau thiab zwm rau tus neeg tsis tseem ceeb no, vim nws yog qhov tseeb, txoj sia, thiab txoj kev Nws coj los ntawd cawm tau tag nrho neeg ntiaj teb, daws kev tsis sib haum xeeb ntawm tib neeg thiab Vajtswv, ua kom ncua kev deb ntawm nkawd luv zog, thiab qhib kev sib txuas ntawm Vajtswv thiab tib neeg txoj kev xav. Nws kuj yog tus uas tsim tau lub meej mom loj tshaj rau Vajtswv. Ib tug neeg dog dig zoo li no tseem tsis muaj nqi txaus rau koj txoj kev ntseeg siab thiab kev qhuas thiab los? Ib lub cev dog dig li no puas tsim nyog yuav hu tau ua Khetos? Ib tug neeg dog dig zoo li ntawd tsis tsim nyog ntawm Vajtswv kev nthuav tawm rau tib neeg pom thiab los? Tus neeg zoo li ntawd, tus uas zam neeg ntiaj teb ntawm txoj kev puas tsuaj, tsis tsim nyog tau txais nej txoj kev hlub thiab kev ntshaw tuav Nws tseg los? Yog nej tsis kam txais lo lus tseeb hais tawm hauv Nws lub qhov ncauj los thiab ntxub qhov uas muaj Nws nyob nrog nej, ces nej ho yuav zoo li cas rau thaum kawg mas?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Koj Puas Paub? Vajtswv Tau Ua ib Yam Loj Tshaj Plaws Nrog Rau Tib Neeg