Tej Nqe Vajluskub Uas Siv Ua Tej Lus Hais Txog:

“Vim Vajtswv tau nkaw lus lawm, hais tias, Hwm koj txiv thiab koj niam: thiab, Tus uas hais lus phem rau nws txiv los sis nws niam, ces cia nws raug txim tuag. Tab sis nej hais tias, Leej twg los xij uas hais rau nws txiv los sis nws niam tias, Nws yog ib qho khoom pub uas neb tau los ntawm kuv; Thiab tsis hwm nws txiv thiab nws niam, ces nws yuav dim. Yog li ntawd nej tau ua rau Vajtswv txoj kev cai tsis muaj qab hau los ntawm nej tej kab lig kev cai. Nej cov uas yog neeg ncauj lus zoo tab sis siab phem, Yaxaya twb hais ua lus faj lem txog nej lawm, hais tias, Cov neeg no los ze Kuv nrog lawv lub qhov ncauj xwb, thiab hawm Kuv nrog lawv ob daim di ncauj xwb; tab sis lawv lub siab mas nyob deb ntawm Kuv. Tab sis lawv pe hawm Kuv yam tsis muaj txiaj ntsim dab tsi, muab tej kev cai coj los qhia ua tej lus nkaw rau tib neeg” (Mathai 15:4–9).

“Tsis yog txhua tus uas hais rau Kuv tias, tus Tswv, tus Tswv, es yuav nkag tau mus rau hauv lub teb chaws saum ntuj ceeb tsheej; tiam tsis nws uas ua raws li Kuv Leej Txiv uas nyob saum ntuj ceeb tsheej lub siab nyiam. Coob leej yuav hais rau Kuv rau hnub ntawd tias, tus Tswv, tus Tswv, peb tsis tau tuav Koj lub npe tshaj tawm los, thiab tuav Koj lub npe ntiab dab tawm los, thiab tuav Koj lub npe ua ntau yam hauj lwm phim hwj los? Thiab thaum ntawd Kuv yuav hais meej rau lawv tias, Kuv yeej tsis paub nej li: cia li khiav ntawm Kuv mus, nej cov uas ua hauj lwm lim hiam” (Mathai 7:21–23).

Vajtswv Tej Lus Tseem Ceeb:

Qhov phiaj ntsuas uas tib neeg siv coj los txiav txim rau lwm tus tib neeg mas yog nyob rau ntawm lawv tus cwj pwm, cov uas lawv tej kev ua ntawd zoo ces yog cov ncaj ncees, hos cov uas lawv tus cwj pwm ntxim ntxub ces yog cov lim hiam. Qhov ntsuas uas Vajtswv siv los txiav txim rau tib neeg ces yog nyob ntawm qhov uas seb lawv lub ntsiab tseem ceeb puas kam zwm rau Nws los tsis nyoo; tus uas kam zwm rau Vajtswv ces yog tus neeg ncaj ncees, hos tus uas tsis nyoo ces yog ib tug yeeb ncuab thiab ib tug neeg lim hiam, tsis hais tus neeg no tus cwj pwm yuav zoo los phem thiab tsis hais seb lawv tej lus yuav yog los tsis yog. Ib txhia neeg mas xav siv kev ua zoo coj los ua kom tau ib txoj hau kev kawg zoo rau yav tom ntej, thiab ib co neeg mas xav siv lus zoo coj los muab kom tau ib txoj hau kev kawg zoo. Txhua tus ntseeg yuam kev hais tias Vajtswv txiav txim siab rau qhov ua neeg tau tom qab uas saib lawv tej cwj pwm los sis tom qab uas mloog lawv tej lus; yog li ntawd, muaj neeg coob uas xav khaws xyeem qhov no coj los dag Vajtswv kom muab tej kev nyiam ib pliag ntshis ntawd rau lawv. Nyob rau yav tom ntej, cov neeg uas yuav dim nyob rau tus yam ntxwv ntawm qhov kev so mas sawv daws yuav tsum raug tiv kev txom nyem loj thiab tseem yuav tau ua tim khawv rau Vajtswv thiab; lawv sawv daws yuav tsum tau ua lawv tes dej num tiav hlo lawm thiab yog cov uas yeej txhob txwm kam zwm rau Vajtswv. Cov uas tsuas lam xav siv lub cib fim no los ua dej num es npaj siab ntsoov zam kom dim txhob tau xyaum ua raws qhov tseeb ntawd yuav pub cia nyob. Vajtswv muaj qhov phiaj ntsuas kom phim rau qhov kev npaj qhov tshwm sim los rau txhua txhua tus neeg; Nws tsis yog lam txiav txim siab raws li ib tug neeg tej lus thiab tej kev ua, los sis Nws txiav txim siab raws li qhov uas seb tus neeg ntawd ho coj li cas nyob rau ib ncua sij hawm nkaus xwb. Nws yuav tsis txo kom txim tsawg rau tej uas ib tug neeg lim hiam ua vim yog lawv qhov kev ua dej num rau Nws yav tag los, los sis Nws yuav tsis zam ib tug ntawm txoj kev tuag vim nws muaj ib qho kev siv ib zaug rau Vajtswv lawm. Tsis muaj leej twg yuav zam dhau kev pauj kev txhaum rau lawv tej kev lim hiam, thiab tsis muaj leej twg yuav npog tau lawv tej cwj pwm phem thiab kom zam dhau kev tsim txom ntawm qhov kev rhuav pov tseg li. Yog neeg muaj cuab kav ua tau lawv tus kheej tes dej num, nws txhais tau hais tias lawv yeej muaj lub siab ncaj rau Vajtswv mus ib txhis thiab tsis nrhiav phaj tshab, tsis hais lawv yuav tau txais koob hmoov los sis tau hmoov phem li. Yog neeg tsuas lam ua siab ncaj rau Vajtswv thaum lawv tau txais koob hmoov xwb tab sis plam lawv qhov kev ua siab ncaj ntawd thaum lawv tsis pom muaj koob hmoov, thiab yog hais tias, nyob rau thaum kawg, lawv yeej tseem tsis muaj cuab kav yuav ua tim khawv rau Vajtswv los sis ua tes dej num uas yog lawv tes dej num kom tiav, ces lawv yeej tseem yuav raug ua daim phiaj rau kev puas ntsoog txawm hais tias lawv twb yeej tau ua dej num yam muaj lub siab ncaj rau Vajtswv lawm los xij. Muab hais luv luv ces, cov neeg lim hiam yuav tsis dim mus ib txhis, los sis lawv yuav nkag tsis tau mus so; tsuas yog cov ncaj ncees xwb mas thiaj yog cov tswv ntawm qhov kev so.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv thiab Tib Neeg Yuav Nkag Mus So Ua Ke

Qhov tseem ceeb tshaj plaws hauv kev ntseeg Vajtswv yog txhua yam yuav tsum tau ua raws li Vajtswv cov lus hnub no: Txawm hais tias koj tab tom caum kev to taub lub neej txoj sia los sis kev ua kom tau txaus Vajtswv tej kev npaj siab los xij, txhua yam yuav tsum nyob hauv Vajtswv cov lus hnub no. Yog tias yam uas koj qhia txog thiab nrhiav kom nkag tau mus rau ntawd tsis yog nyob hauv Vajtswv cov lus hnub no, ces koj yog ib tug neeg tsis paub Vajtswv cov lus li, thiab tsis muaj tes hauj lwm ntawm Vajntsujplig Dawb Huv kiag li. Yam uas Vajtswv xav tau yog cov neeg uas ua raws li Nws cov hneev taw. Txawm hais tias yam uas koj nkag siab yav dhau los yuav zoo thiab dawb huv npaum li cas los xij, Vajtswv tsis xav tau tej ntawd, thiab yog tias koj tsis muaj peev xwm muab tej ntawd tso pov tseg, ces tej ntawd yuav yog ib txoj kev cuam tshuam uas nyuaj tshaj plaws rau koj lub neej yav tom ntej. Txhua tus neeg uas muaj peev xwm ua raws li txoj kev kaj ntawm Vajntsujplig Dawb Huv niaj hnub no yog cov tau koob hmoov. Cov tib neeg tiam yav dhau los los kuj ua raws li Vajtswv cov hneev taw thiab, txawm li ntawd los lawv tsis tuaj yeem ua kom los txog rau niaj hnub nim no; qhov no yog txoj koob hmoov rau cov neeg thaum lub sij hawm kawg. Cov tib neeg uas tuaj yeem ua raws li tes hauj lwm ntawm Vajntsujplig Dawb Huv, thiab cov uas muaj peev xwm ua raws li Vajtswv cov hneev taw, xws li tias Vajtswv coj lawv mus qhov twg los lawv mus tib si—cov no yog cov neeg uas tau txais koob hmoov los ntawm Vajtswv. Cov tib neeg uas tsis ua raws li tes hauj lwm ntawm Vajntsujplig Dawb Huv tsis tau paub qhov tseeb txog txoj hauj lwm ntawm Vajtswv cov lus, thiab txawm hais tias lawv yuav ua dej num ntau npaum li cas, los sis lawv yuav raug tsim txom hnyav npaum li cas, los sis lawv khiav txoj dej num ntau npaum li cas los, tsis muaj ib yam dab tsi yog ua rau Vajtswv, thiab Nws yuav tsis pom zoo rau lawv li. Hnub no, txhua tus uas ua raws li Vajtswv cov lus niaj hnub no yog cov yoog raws li Vajntsujplig Dawb Huv; cov tib neeg uas tsis paub txog Vajtswv cov lus niaj hnub no yog cov tsis yoog raws li Vajntsujplig Dawb Huv, thiab cov neeg zoo li no Vajtswv tsis pom zoo rau li. Tes dej num uas ncaim ntawm Vajntsujplig Dawb Huv cov lus hais lawm ces yog tes dej num ntawm sab nqaij tawv, thiab yog cov kev xav phem, thiab nws tsis muaj peev xwm ua tau raws li Vajtswv tej kev npaj siab. Yog tias tib neeg ua neej nyob nrog rau cov kev xav phem ntawm kev lig kev cai ntseeg xwb, ces lawv tsis muaj peev xwm yuav ua tau ib yam dab tsi kom haum raws li Vajtswv tej kev npaj siab li, thiab txawm hais tias lawv ua dej num rau Vajtswv los xij, lawv ua dej num raws li lawv txoj kev xav thiab cov kev xav phem, thiab tsis muaj peev xwm ua dej num tau raws li Vajtswv tej kev npaj siab kiag li. Cov tib neeg uas tsis muaj peev xwm ua raws li tes hauj lwm ntawm Vajntsujplig Dawb Huv tsis nkag siab txog Vajtswv tej kev npaj siab, thiab cov tib neeg uas tsis nkag siab txog Vajtswv tej kev npaj siab ntawd tsis tuaj yeem ua dej num tau rau Vajtswv. Vajtswv xav tau tes dej num uas ua kom haum raws li Nws tej kev npaj siab; Nws tsis xav tau tes dej num uas yog ntawm cov kev xav phem thiab sab nqaij tawv. Yog tias tib neeg tsis muaj peev xwm ua raws li cov kauj ruam ntawm Vajntsujplig Dawb Huv txoj hauj lwm, ces lawv ua neej nyob nrog cov kev xav phem. Tes dej num ntawm cov tib neeg zoo li no tab kaum thiab cuam tshuam, thiab tes dej num zoo li no tsis mus raws li Vajtswv lub siab nyiam. Yog li cov tib neeg uas tsis muaj peev xwm ua raws li Vajtswv cov hneev taw tsis muaj peev xwm ua tau dej num rau Vajtswv; cov tib neeg uas tsis muaj peev xwm ua raws li Vajtswv cov hneev taw feem ntau yeej tawm tsam Vajtswv, thiab tsis muaj peev xwm ua tau haum nrog Vajtswv. “Qhov ua raws li Vajntsujplig Dawb Huv tes hauj lwm” txhais tau hais tias muaj kev nkag siab txog Vajtswv tej kev npaj siab hnub no, muaj peev xwm ua raws li Vajtswv txoj kev cheem tsum kom ua niaj hnub no, muaj peev xwm zwm rau thiab ua raws li Vajtswv hais hnub no, thiab muaj kev paub meej raws li cov lus hais tshiab ntawm Vajtswv. Tsuas yog qhov no xwb thiaj li yog tus neeg uas ua tes hauj lwm ntawm Vajntsujplig Dawb Huv thiab yoog raws li Vajntsujplig Dawb Huv. Cov tib neeg zoo li no tsis yog tias tsuas muaj peev xwm tau txais Vajtswv lo lus qhuas thiab kev pom Vajtswv xwb, tiam sis kuj tuaj yeem paub txog Vajtswv tus yam ntxwv los ntawm Vajtswv txoj hauj lwm tshiab thiab, thiab tuaj yeem paub txog tib neeg cov kev xav phem thiab kev ntxeev siab, thiab tib neeg tus yeeb yam thiab lub ntsiab tseem ceeb, los ntawm Nws txoj hauj lwm tshiab; deb tshaj ntawd ntxiv, lawv muaj peev xwm maj mam hloov pauv lawv tus yam ntxwv kom tiav rau lub sij hawm ua lawv tes dej num. Tsuas yog cov tib neeg zoo li no xwb thiaj li yog cov uas tau txais Vajtswv, thiab cov uas nrhiav tau txoj tseem kev tseeb tiag. Cov tib neeg uas raug rhuav tshem los ntawm Vajntsujplig Dawb Huv tes hauj lwm lawm yog cov neeg uas tsis muaj peev xwm ua raws li Vajtswv txoj hauj lwm tshiab, thiab tawm tsam txoj hauj lwm tshiab ntawm Vajtswv. Tias cov tib neeg uas zoo li no tawm tsam Vajtswv vim hais tias Vajtswv tau ua tiav txoj hauj lwm tshiab lawm, thiab vim tias Vajtswv tus yam ntxwv tsis zoo ib yam li lawv cov kev xav phem—vim qhov ntawm no, lawv thiaj li tawm tsam Vajtswv thiab txiav txim rau Vajtswv, uas ua rau Vajtswv ntxub ntxaug lawv. Muaj kev paub txog Vajtswv txoj hauj lwm tshiab tsis yog ib qho yooj yim, tiam sis yog tias tib neeg muaj lub siab ua raws li Vajtswv txoj hauj lwm thiab nrhiav Vajtswv txoj hauj lwm, ces lawv yuav muaj lub sij hawm pom Vajtswv, thiab yuav muaj lub sij hawm tau txais txoj kev pab coj tshiab ntawm Vajntsujplig Dawb Huv. Cov tib neeg uas txhob txwm tawm tsam Vajtswv txoj hauj lwm tsis tuaj yeem tau txais Vajntsujplig Dawb Huv txoj kev qhuab qhia los sis Vajtswv txoj kev pab. Yog li, txawm hais tias tib neeg yuav tau txais Vajtswv txoj hauj lwm thiab tsis tau los yog nyob ntawm Vajtswv txoj hmoov hlub xwb, nws nyob ntawm lawv txoj kev caum, thiab nws nyob ntawm lawv cov kev npaj siab xwb.

Txhua tus tib neeg uas muaj peev xwm ua raws li Vajntsujplig Dawb Huv cov lus hais niaj hnub no yog cov tau txais koob hmoov. Nws tsis tseem ceeb tias lawv txeev zoo li cas yav dhau los, los sis Vajntsujplig Dawb Huv txeev ua hauj lwm li cas rau lawv yav dhau los—cov neeg uas tau txais txoj hauj lwm tshiab ntawm Vajtswv yog cov tau txais koob hmoov ntau tshaj plaws, thiab cov neeg uas tsis tuaj yeem ua raws li txoj hauj lwm tshiab hnub no raug rhuav tshem mus lawm.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Paub Vajtswv Txoj Hauj Lwm Uas Tshiab Tshaj Plaws thiab Raws Nws Tej Hneev Taw

Nyob rau txhua theem ntawm Vajtswv tes hauj lwm mas kuj muaj tej yam sib phim uas tib neeg yuav tsum tau ua thiab. Tag nrho cov uas yoog raws Vajntsujplig Dawb Huv ces yeej muaj tus Vajntsujplig Dawb Huv thiab nws tej kev qhuab ntuas, thiab cov uas tsis yoog raws Vajntsujplig Dawb Huv ces nyob hauv qab kev tswj fwm ntawm Ntxwgnyoog, thiab tsis muaj Vajntsujplig Dawb Huv tes hauj lwm ib qho li. Cov neeg uas yoog raws Vajntsujplig Dawb Huv yog cov uas txais yuav Vajtswv tes hauj lwm tshiab, thiab cov uas koom tes rau hauv Vajtswv tes hauj lwm tshiab. Yog cov uas yoog raws los sis ntws raws ntawd tsis muaj peev xwm koom tes tau, thiab tsis muaj peev xwm muab qhov tseeb coj mus xyaum ua raws li Vajtswv hais nyob rau lub sij hawm no, ces lawv yuav raug qhuab ntuas, thiab qhov phem tshaj ces yog yuav raug tus Vajntsujplig Dawb Huv muab tso pov tseg. Cov uas txais yuav tus Vajntsujplig Dawb Huv tes hauj lwm tshiab, ces yuav yoog tau raws tus Vajntsujplig Dawb Huv, thiab lawv yuav tau txais kev saib xyuas thiab kev tiv thaiv los ntawm tus Vajntsujplig Dawb Huv. Cov uas txaus siab hlo muab qhov tseeb coj los xyaum ua ces yuav tau txais kev qhuab ntuas los ntawm tus Vajntsujplig Dawb Huv, thiab cov uas tsis txaus siab muab qhov tseeb coj los xyaum ua ces yuav raug tus Vajntsujplig Dawb Huv qhuab ntuas, thiab cov zaum tseem yuav raug txim thiab. Tsis hais lawv yuav yog hom neeg twg li, yog hais tias lawv yoog tau raws tus Vajntsujplig Dawb Huv, Vajtswv yuav lees saib xyuas tag nrho cov uas txais yuav Nws tes hauj lwm tshiab rau Nws lub npe. Cov uas qhuas Nws lub npe thiab txaus siab muab Nws cov lus coj los xyaum ua yuav tau txais Nws tej koob hmoov; cov uas tsis mloog Nws hais thiab tsis muab Nws cov lus coj los xyaum ua yuav tau txais Nws qhov kev rau txim. Cov neeg uas yoog raws tus Vajntsujplig Dawb Huv yog cov uas txais yuav tes hauj lwm tshiab, thiab vim lawv tau txais yuav tes hauj lwm tshiab, lawv yuav tsum koom tes raws li qhov tsim nyog nrog rau Vajtswv, thiab yuav tsum tsis txhob ua neeg ntxeev siab uas tsis ua lawv tes dej num. Qhov no yog tib qho uas Vajtswv yuav kom tib neeg ua xwb. Tsis zoo li ntawd rau cov neeg uas tsis txais yuav tes hauj lwm tshiab: Lawv tsis yoog raws tus Vajntsujplig Dawb Huv, thiab tej lus qhuab ntuas thiab lus cem ntawm tus Vajntsujplig Dawb Huv ces yuav tsis raug rau lawv. Tag hnub nrho, cov neeg no nyob twj ywm hauv lawv lub cev xwb, lawv nyob hauv lawv lub siab, thiab tag nrho tej lawv ua ces tsuas yog ua raws nraim li tej kev qhuab qhia uas tshwm sim los ntawm lawv tus kheej lub hlwb tej kev ntsuam xyuas thiab kev tshawb fawb xwb. Qhov no tsis yog qhov uas tus Vajntsujplig Dawb Huv tes hauj lwm tshiab yuav kom ua, haj yam tsis yog kev koom tes nrog Vajtswv thiab. Cov ua tsis txais yuav Vajtswv tes hauj lwm tshiab ces yuav plam tsis tau nyob ntawm Vajtswv xub ntiag, thiab, tshaj qhov ntawd, tsis tau Vajtswv tej koob hmoov thiab kev tiv thaiv. Feem ntau ntawm lawv tej lus thiab tej kev ua ces tsuas yog tuav rawv rau tej uas Vajntsujplig Dawb Huv tes hauj lwm yav tag los kom lawv ua xwb; tej ntawd yog kev qhuab qhia xwb, tsis yog qhov tseeb. Tej kev qhuab qhia thiab kev cai ntawd tsuas txaus coj los ua pov thawj qhia hais tias tej kev sib sau ua ke ntawm cov neeg no tsis yog dab tsi tab sis tsuas yog kev ntseeg xwb; lawv tsis yog cov xaiv tseg, los sis yog tej daim phiaj ntawm Vajtswv tes hauj lwm. Qhov kev koom txoos ntawm tag nrho lawv ntawd ces tsuas ua tau ib qho kev sib sau loj ntawm kev ntseeg xwb, thiab hu tsis tau ua ib pawg ntseeg. Qhov no yog ib qho tseeb uas hloov tsis tau. Lawv tsis muaj Vajntsujplig Dawb Huv tes hauj lwm tshiab; tej lawv ua mas zoo li tsw qab rau txoj kev ntseeg, tej lawv khaws los ua neej mas zoo li muaj txhij txhua kawg rau kev ntseeg; lawv tsis muaj tus Vajntsujplig Dawb Huv nrog lawv nyob thiab tsis muaj Nws tes hauj lwm, tsis tas hais txog qhov uas lawv yuav tsim nyog tau txais tej lus qhuab ntuas los sis kev tig ras to taub los ntawm Vajntsujplig Dawb Huv li. Cov neeg no tsuas yog tej cev tuag uas tsis muaj sia xwb, thiab yog tej niag kas uas tsis muaj ntsujplig xwb. Lawv tsis paub txog tib neeg tej kev ntxeev siab thiab kev tawm tsam, tsis paub txog tag nrho tib neeg tej kev ua phem, lawv haj yam tsis paub txog Vajtswv tes hauj lwm thiab Vajtswv lub siab nyiam tam sim no. Lawv sawv daws mas tsis paub li, yog neeg dog dig, thiab yog cov niag kua av qias neeg uas tsis tsim nyog hu ua cov ntseeg! Tsis muaj ib yam dab tsi lawv ua es yuav tseem ceeb rau Vajtswv qhov kev cawm tib neeg li, haj yam tsis muaj cuab kav yuav rhuav tau Vajtswv tej kev npaj li. Lawv tej lus thiab tej kev ua mas qias neeg heev, rhuav plhu dhau heev lawm, thiab yeej tsis tsim nyog hais txog li. Tsis muaj ib yam dab tsi uas cov tsis yoog raws Vajntsujplig Dawb Huv no ua es yuav muaj ib yam dab tsi cuam tshuam rau hauv Vajntsujplig Dawb Huv tes hauj lwm tshiab li. Yog vim li no, tsis hais lawv ua dab tsi li, lawv yeej tsis muaj tej lus qhuab ntuas ntawm Vajntsujplig Dawb Huv, thiab, tshaj qhov ntawd, tsis tau qhov kev tig ras to taub los ntawm Vajntsujplig Dawb Huv li. Vim lawv sawv daws yog cov neeg uas tsis nyiam qhov tseeb li, thiab yog cov uas Vajntsujplig Dawb Huv ntxub thiab tsis kam txais yuav. Lawv hu ua cov neeg ua phem vim lawv tsuas ua neej raws li lawv lub cev ntshaw xwb thiab ua txhua yam uas lawv nyiam rau Vajtswv ntsia ntsoov. Thaum uas Vajtswv ua hauj lwm, lawv txhob txwm ua siab phem rau Nws, thiab khiav mus rau qhov uas Nws tsis nyob xwb. Tib neeg qhov kev tsis koom tes nrog Vajtswv ces yeej yog qhov kev ntxeev siab loj tshaj plaws li lawm, ces puas tsim nyog cov neeg uas txhob txwm khiav mus rau qhov uas tsis yog Vajtswv sab ntawd tau txais lawv tej kev raug txim kom tsim nyog thiab mas?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Tes Hauj Lwm thiab Tib Neeg Qhov Kev Xyaum Ua

Cov neeg Yudais uas yog cov Falixais, cov pov thawj hlob, thiab cov xib fwb qhia Vajtswv txoj kev cai uas nyob rau Tiam Muaj Kev Cai ntawd Lawv ntseeg Vajtswv ntawm lub npe, tiam sis lawv tig lawv lub nraub qaum rau Nws txoj kev lawm, thiab haj tseem muab tus Vajtswv uas yug los ua neeg ntawd ntsia rau saum tus ntoo khaub lig thiab. Yog li, Vajtswv puas pom zoo rau lawv txoj kev ntseeg? (Tsis pom zoo.) Vajtswv twb txiav txim tias lawv yog cov tib neeg ntseeg cov Yudais txoj kev ntseeg, uas yog cov tswv cuab ntawm pab pawg ntawm sab kab lis kev cai ntseeg lawm. Thiab ib yam nkaus li ntawd Vajtswv pom cov tib neeg uas niaj hnub no ntseeg Yexus ntawd li yog cov tswv cuab rau ntawm pab pawg ntawm sab kab lis kev cai ntseeg thiab, tias Nws tsis lees paub lawv li yog cov tswv cuab ntawm Nws pawg ntseeg los sis tias yog cov ntseeg Nws li. Vim li cas Vajtswv thiaj li teem txim rau lub ntiaj teb ntawm sab kab lis kev cai ntseeg li ntawd? Vim hais tias tag nrho cov tswv cuab ntawm cov pab pawg ntawm sab kab lis kev cai ntseeg ntawd, tshwj xeeb yog cov thawj coj qib siab ntawm ntau pab ntseeg, tsis muaj ib lub siab hwm Vajtswv li, thiab lawv tsis yog cov ua raws li Vajtswv lub siab nyiam. Lawv puav leej yog cov tsis ntseeg xwb. Lawv tsis ntseeg txoj kev yug los ua neeg, haj yam tsis lees txais qhov tseeb li thiab. Lawv yeej tsis nrhiav, tsis nug, tsis saib kom meej, los sis tsis lees txais Vajtswv tes hauj lwm nyob rau tiam kawg los sis qhov tseeb uas Nws nthuav tawm li, tiam sis cia li ncaj qha mus teem txim thiab hais lus tuam mom tes hauj lwm ntawm Vajtswv txoj kev yug los ua neeg nyob rau tiam kawg xwb. Tib neeg yeej pom tau qhov no tseeb tseeb hais tias tej zaum lawv tsuas ntseeg ntawm lub npe xwb, tiam sis Vajtswv tsis lees paub tias lawv yog cov ntseeg Nws; Nws hais tias lawv yog cov neeg ua phem, hais tias tej uas lawv ua ntawd tsis muaj ib qho kev ntsig txog Nws txoj kev cawm tib neeg li, tias lawv yog cov tsis ntseeg uas tsis nyob rau hauv Nws cov lus. Yog nej ntseeg Vajtswv li nej ntseeg tam sim no no, puas yuav muaj hnub uas nej dhau mus ua cov ntseeg ntawm sab kab lis kev cai ntseeg thiab? Txoj kev ntseeg Vajtswv nyob rau hauv txoj kab lis kev cai ntseeg ntawd yuav tsis tau txais kev cawm dim—qhov no yog vim li cas kiag? Yog nej qhia tsis tau hais tias yog vim li cas, ces qhia tau hais tias nej tsis to taub qhov tseeb thiab Vajtswv tej kev npaj siab ib qho me me li. Qhov tu siab tshaj plaws uas tuaj yeem tshwm sim rau txoj kev ntseeg Vajtswv mas yog txoj kev ntseeg ntawd dhau mus ua txoj kab lis kev cai ntseeg uas raug Vajtswv muab tshem tawm lawm xwb. Qhov no yog ib yam uas tib neeg xav tsis txog, thiab cov uas tsis to taub qhov tseeb ntawd yeej tsis pom qhov teeb meem no kom tseeb tseeb li. Qhia Kuv seb, thaum Vajswv pom hais tias ib pawg ntseeg uas twb muaj nyob los tau ntau xyoo lawm es cia li maj mam hloov mus ua ib txoj kab lis kev cai ntseeg thiab dhau mus ua ib pab ntseeg lawm no, cov tib neeg uas nyob rau hauv pawg ntseeg ntawd puas yog cov uas tau txais Vajtswv txoj kev cawm dim? Lawv puas yog cov tswv cuab ntawm Nws tsev neeg? (Tsis yog.) Lawv tsis yog. Cov tib neeg uas lub npe ntseeg tus Vajtswv tseeb no taug txoj kev twg, es Nws thiaj suav hais tias lawv yog cov tib neeg ntawm sab kab lis kev cai ntseeg? Txoj kev uas lawv taug ntawd yog txoj uas lawv ris lub npe hais tias ntseeg Vajtswv no xwb tiam sis yeej tsis taug Nws txoj kev li; txoj kev ntawd yog txoj uas lawv ntseeg Nws tiam sis tsis pe hawm Nws, thiab haj tseem muab Nws tso tseg thiab; txoj kev ntawd yog txoj uas lawv hais tias lawv ntseeg Vajtswv tiam sis tawm tsam Nws, tsuas lam ntseeg Vajtswv lub npe, ntseeg tus Vajtswv tseeb xwb, tiam sis pe hawm Ntxwgnyoog thiab cov dab phem, thiab raus tes rau hauv tib neeg tej kev ua hauj lwm, thiab tsim tsa tib neeg lub nceeg vaj kom muaj kev ywj pheej. Ntawd yog txoj kev lawv taug. Thaum saib rau txoj kev lawv taug ntawd, mas pom tau tseeb hais tias lawv yog ib co tsis ntseeg, yog ib pab neeg tsis zoo uas tawm tsam khetos, yog ib pab Ntxwgnyoog thiab cov dab phem uas sawv los tawm tsam Vajtswv thiab tab kaum Nws tes hauj lwm kiag ntag. Ntawd yog lub ntsiab tseeb ntawm lub ntiaj teb ntawm sab kab lis kev cai ntseeg. Ib pab tib neeg uas zoo li no puas muaj ib yam dab tsi cuam tshuam rau Vajtswv txoj kev npaj cawm tib neeg li? (Tsis muaj.) Txawm cov ntseeg Vajtswv yuav coob npaum li cas los xij, thaum Vajtswv suav hais tias lawv txoj kev ntseeg yog ib pab ntseeg los sis ib pab pawg lawm, ces Vajtswv kuj suav hais tias lawv yog cov uas cawm tsis tau lawm thiab. Vim li cas kuv thiaj li hais li no? Ib pab pawg uas tsis muaj Vajtswv tes hauj lwm los sis txoj kev coj qhia uas tsis zwm rau Nws los sis tsis pe hawm Nws kiag li ntawd tej zaum tsuas lam ntseeg Vajtswv xwb, tiam sis cov uas lawv raws qab thiab mloog lus yog cov pov thawj thiab cov txwj laug ntawm txoj kab lis kev cai ntseeg xwb, thiab cov pov thawj thiab cov txwj laug ntawm txoj kab lis kev cai ntseeg ntawd yog cov uas muaj lub ntsiab phem thiab ntsej muag ncaj siab nkhaus ntag. Yog li ntawd, yam uas cov tib neeg ntawd raws qab thiab mloog lus ntawd yog cov Ntxwgnyoog thiab cov dab phem xwb. Nyob rau hauv lawv lub siab mas, lawv xyaum ua raws li txoj kev ntseeg Vajtswv, tiam sis tseeb tiag, lawv raug tib neeg tswj, raug tib neeg coj qhia thiab kav xwb. Yog li ntawd, nyob rau hauv cov ntsiab lus tseem ceeb mas, yam uas lawv raws qab thiab mloog lus ntawd yog Ntxwgnyoog, thiab cov dab phem, thiab cov hwj chim phem uas tawm tsam Vajtswv, thiab Vajtswv cov yeeb ncuab ntag. Vajtswv puas yuav cawm ib pab neeg tsis zoo zoo li no? (Tsis cawm.) Vim li cas thiaj li tsis cawm? Cov tib neeg zoo li no puas muaj peev xwm lees txim hloov dua siab tshiab? Tsis muaj; lawv yuav tsis lees txim hloov dua siab tshiab li. Lawv raus tes rau hauv tib neeg tej kev ua hauj lwm thiab tib neeg tej kev ua lag luam uas nyob hauv lub npe ntseeg Vajtswv, tawm tsam Vajtswv txoj kev npaj cawm tib neeg, uas thaum kawg Vajtswv yuav ntxub ntxaug lawv. Yuav tsis muaj hnub uas Vajtswv yuav cawm cov tib neeg no li; lawv tsis muaj peev xwm lees txim hloov dua siab tshiab, thiab thaum Ntxwgnyoog coj lawv mus lawm, Vajtswv muab lawv cob rau nws. Qhov seb tib neeg txoj kev ntseeg Vajtswv puas yuav ua tau raws li Nws txoj kev pom zoo ntawd puas yog nyob ntawm qhov tus tib neeg ntawd ntseeg tau ntev xyoo los tsis ntev? Qhov ntawd puas yog nyob ntawm tej kev cai dab qhuas uas tib neeg coj los sis tej kev cai tswj uas tib neeg tuav rawv ntawd? Vajtswv puas saib rau tej uas tib neeg ua? Nws puas saib tias lawv coob npaum li cas? (Tsis saib.) Yog li, Nws saib rau dab tsi xwb? Thaum Vajtswv xaiv tau ib pab tib neeg lawm, qhov Nws ntsuas seb puas cawm tau lawv, seb Nws puas yuav cawm lawv ntawd yog ntsuas raws li dab tsi? Qhov ntawd yog ntsuas raws li qhov seb lawv puas tuaj yeem lees txais qhov tseeb; qhov ntawd yog ntsuas raws li txoj kev uas lawv taug. Txawm Vajtswv tsis tau qhia ntau qhov tseeb rau tib neeg nyob rau Tiam Hmoov Hlub li Nws qhia tam sim no, thiab txawm tsis tau qhia ntau qhov tseeb ntawd kom ntxaws ntxaws los xij, thaum ntawd Nws yeej tseem muaj peev xwm ua tau kom tib neeg zoo tiav log, thiab tseem muaj cov tib neeg uas tuaj yeem cawm tau. Yog li ntawd, yog cov tib neeg uas nyob rau tiam tam sim no, cov uas tau hnov ntau qhov tseeb thiab cov uas to taub Vajtswv lub siab nyiam lawm, tsis tuaj yeem taug Nws txoj kev los sis tsis tuaj yeem pib taug txoj kev uas mus tau kev cawm dim no, thaum kawg qhov tshwm sim rau lawv yuav zoo li cas? Qhov tshwm sim rau lawv thaum kawg ntawd yuav zoo tib yam nkaus li qhov tshwm sim rau cov ntseeg Txoj Kev Ntseeg Vajtswv thiab Txoj Kev Ntseeg Yudais ntag—zoo ib yam li cov ntawd, lawv yuav tsis dim. Qhov no yog Vajtswv tus moj yam ncaj ncees. Txawm koj twb hnov tej lus qhuab qhia pes tsawg zaj los sis koj twb to taub qhov tseeb ntau npaum li cas lawm los tsis tseem ceeb—yog thaum kawg es koj tseem raws tib neeg qab, yog koj tseem raws Ntxwgnyoog qab, thiab koj tsis muaj peev xwm taug Vajtswv txoj kev, thiab tsis hwm Nws thiab zam kev phem, ces cov tib neeg zoo li no yog cov uas Vajtswv ntxub ntxaug. Cov tib neeg uas nyob rau hauv txoj kab lis kev cai ntseeg no mas tej zaum yuav muaj peev xwm mus tshaj tawm txoj kev paub txog Vajluskub ntau heev, thiab tej zaum lawv yuav to taub qee qhov kev qhuab qhia ntawm sab ntsujplig thiab, tiam sis lawv ua tsis tau raws li Vajtswv tes hauj lwm, los sis xyaum ua tsis tau thiab tsis paub Nws cov lus, los sis pe hawm Nws tiag tiag, thiab lawv yeej tsis hwm Nws thiab zam kev phem li. Lawv txhua tus yog cov ntsej muag ncaj siab nkhaus, tsis yog cov tib neeg uas zwm rau Vajtswv tiag tiag. Raws li Vajtswv pom mas, cov tib neeg zoo li no suav hais tias yog ib pab ntseeg cov, yog ib pab tib neeg cov, yog ib pab neeg tsis zoo cov, yog Ntxwgnyoog qhov chaw nyob xwb. Muab hais kom tag lus ces, lawv yog Ntxwgnyoog pab neeg tsis zoo, yog cov tawm tsam khetos lub nceeg vaj xwb, ces Vajtswv thiaj li ntxub ntxaug lawv tag nrho.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Tsuas Yog Hwm Vajtswv Xwb Mas Tib Neeg Thiaj Li Yuav Taug Tau Txoj Kev Mus Tau Kev Cawm Dim

Cov uas xav tau txoj sia yam tsis vam khom qhov tseeb uas Khetos hais ces yog cov neeg uas txaus luag tshaj plaws hauv lub ntiaj teb no, thiab cov uas tsis lees txais txoj kev muaj sia nyob uas Khetos muab rau ces yog cov poob zoo rau hauv kev xav lawm xwb. Thiab yog li ces Kuv thiaj hais tias cov uas tsis txais yuav Khetos ntawm tiam kawg ces yuav raug Vajtswv tsis nyiam kiag li mus ib txhis. Khetos yog tib neeg lub rooj vag nkag mus rau hauv lub nceeg vaj nyob rau tiam kawg, thiab tsis muaj ib tug twg uas yuav hla dhau Nws tau li. Tsis muaj leej twg yuav raug Vajtswv muab kho kom zoo tiav log tau li tshwj tsis yog los ntawm Khetos. Koj ntseeg Vajtswv, ces yog li koj yuav tsum txais yuav Nws cov lus thiab ua raws li Nws Txoj Lus. Tsis txhob tsuas xav txog qhov kom tau txais koob hmoov nkaus xwb es twb tsis muaj peev xwm lees txais qhov tseeb thiab qhov kev muab txoj sia. Khetos los rau tiam kawg kom Nws muab txoj sia rau txhua tus uas muaj lub siab dawb paug ntseeg Nws. Qhov muaj tes hauj lwm no yog yuav muab tiam qub xaus thiab nkag mus rau tiam tshiab, thiab tes hauj lwm no yog txoj kev uas cov yuav nkag mus rau tiam tshiab yuav tsum tau taug. Yog koj tsis lees paub Khetos thiab tseem teem txim rau, hais lus thuam, los sis tsim txom Nws, ces koj yuav raug hlawv mus ib txhis thiab yuav tsis tau nkag mus rau Vajtswv lub nceeg vaj. Vim li no tus Khetos no mas Nws Tus Kheej ces yog kiag qhov kev qhia tawm txog tus Vajntsujplig, qhov kev qhia tawm txog Vajtswv, Tus uas Vajtswv tso siab rau los ua Nws tes hauj lwm hauv ntiaj teb, yog li Kuv thiaj hais tias yog koj tsis muaj peev xwm txais yuav tag nrho tej uas tus Khetos ntawm tiam kawg ua ntawd, ces yog koj hais lus tuam mom tus Vajntsujplig. Qhov kev ua pauj rau cov uas hais lus tuam mom tus Vajntsujplig ntawd yog yam uas yog thiab pom tseeb rau txhua tus huv si. Kuv kuj qhia koj li no hais tias: Yog koj tawm tsam tus Khetos ntawm tiam kawg ntawd, yog koj tsis kam lees yuav tus Khetos ntawm tiam kawg, ces yuav tsis muaj leej twg muaj cuab kav los ris koj lub txim rau qhov no li. Dhau ntawd mus, txij theem ntawd no mus lawm tom ntej ces koj yuav tsis muaj ib lub cib fim ntxiv kom tau txais Vajtswv qhov kev pom zoo lawm; txawm hais tias koj xav los theej txhoj rau koj tus kheej los xij, koj yuav tsis muaj peev xwm pom Vajtswv lub ntsej muag dua ntxiv lawm. Qhov no vim qhov koj tab tom tawm tsam ntawd tsis yog ib tug tib neeg, qhov koj tab tom tsis kam txais yuav ntawd tsis yog ib tug neeg uas tsis tseem ceeb, tab sis yog Khetos. Koj puas paub hais tias lub txim ntawm qhov no yog dab tsi? Koj tsis yog ua yuam kev ib qho me me xwb, tab sis ua txhaum ib lub txim loj kawg nkaus. Yog li ntawd Kuv hais qhia txhua tus neeg kom txhob lam zim nej cov kaus hniav thiab txhob lam yoj nej cov kaus tes kaus taw, los sis lam tau lam cem rau qhov tseeb, vim tsuas yog qhov tseeb xwb mas thiaj muab tau txoj sia rau koj, thiab yeej tsis muaj dab tsi hlo li tsuas yog qhov tseeb nkaus xwb thiaj li yuav ua rau koj rov yug dua tshiab thiab pom Vajtswv lub ntsej muag dua ib zaug ntxiv.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Khetos ntawm Tiam Kawg Nkaus Xwb Mas Thiaj Yuav Muab Tau Txoj Kev ntawm Txoj Sia Ntev Dhawv Mus Ib Txhis Rau Tib Neeg