Vajtswv Tej Lus Tseem Ceeb:

Thaum uas tag nrho cov tib neeg sawv daws raug ua kom muaj txhua yam thiab txhua lub teb chaws hauv ntiaj teb rais los ua Khetos lub nceeg vaj lawm, ces nws yuav yog lub sij hawm thaum xob nroo xya suab. Hnub no yog ib kauj ruam mus rau theem ntawd; qhov kev nias qees lawm tom ntej twb raug muab tso mus rau hnub ntawd lawm. Qhov no yog Vajtswv qhov phiaj xwm, thiab sai sai tom ntej no nws yuav tshwm sim los tiag li. Txawm li cas los xij, Vajtswv twb ua tiav txhua yam uas Nws tau hais tawm lawm. Yog li ntawd, nws yeej pom tau meej meej hais tias cov teb chaws hauv ntiaj teb ces tsuas yog cov tsev vaj ntxwv ntawm tej hav xuab zeb xwb, vau vig voog los thaum tej ntwv dej siab nyab los ze: Hnub kawg yeej yuav tshwm sim xwb xwb li, thiab tus zaj loj liab ploog yuav vau hlo rau hauv Vajtswv txoj lus. Yuav kom ua tau Nws qhov phiaj xwm tiav hlo, ces cov tub txib qaum ntuj tau nqis los rau hauv ntiaj teb, ua kom kawg lawv qhov peev xwm los ua kom tau zoo raws Vajtswv siab. Tus Vajtswv uas yug los ua neeg Nws Tus Kheej tau txhij tub rog nris nroos mus rau ntawm tshav rog mus ua rog rau tus yeeb ncuab. Qhov kev yug los ua neeg tshwm sim nyob rau thaj chaw twg los xij qhov ntawd yog qhov uas tus yeeb ncuab raug rhuav tshem tag nrho. Suav Teb yuav yog thawj lub uas raug rhuav tshem tag nrho; nws yuav raug ua kom puas ntsoog tag nrho los ntawm Vajtswv txhais tes. Vajtswv yuav tsis tseg ib tug ciaj sia nyob rau ntawd hlo li. Qhov pov thawj qhia txog tus zaj loj liab ploog qhov kev puas tsuaj zuj zus ces yeej muaj nyob rau hauv qhov kev laus zuj zus ntawm cov neeg; qhov no mas yeej pom meej thiab txhua tus yeej ntsia pom tib si. Qhov kev laus zuj zus ntawm cov neeg yog ib qho cim ntawm tus yeeb ncuab txoj kev tuag. Qhov no yog ib qho me me ntawm qhov kev piav txog hais tias “sib tw” txhais tau li cas.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Kev txhais lub ntsiab ntawm Cov Lus Zais Tob ntawm “Vajtswv Cov Lus rau Tag Nrho Lub Qab Ntuj Khwb”, Tshooj 10

Txhua yam yuav raug ua tiav los ntawm Kuv cov lus; tsis muaj ib tug tib neeg twg yuav koom tau, thiab tsis muaj ib tug tib neeg twg tuaj yeem ua tau txoj hauj lwm uas Kuv yuav ua. Kuv yuav so tej huab cua ntawm txhua daim av kom huv thiab rhuav tshem txhua txoj kev ntawm cov dab phem hauv ntiaj teb no mus. Kuv twb tau pib lawm, thiab Kuv yuav pib ua thawj kauj ruam ntawm Kuv txoj hauj lwm ntawm kev rau txim uas nyob rau hauv qhov chaw nyob ntawm tus zaj loj liab ploog. Yog li nws tuaj yeem pom tau tias Kuv txoj kev rau txim twb tau poob rau lub qab ntuj khwb tag nrho lawm, thiab tias tus zaj loj liab ploog thiab tag nrho txhua hom ntsujplig uas tsis dawb huv yuav tsis muaj hwj chim khiav dim Kuv txoj kev rau txim kiag li, vim tias Kuv ntsia ntsoov mus rau txhua daim av. Thaum Kuv txoj hauj lwm hauv ntiaj teb tiav lawm, thaum ntawd yog, thaum lub sij hawm kev txiav txim los txog qhov kawg, Kuv yuav tab meeg rau txim rau tus zaj loj liab ploog ntag. Kuv cov tib neeg yeej yuav pom Kuv txoj kev rau txim ncaj ncees rau tus zaj loj liab ploog tiag tiag li, yeej yuav muaj kev qhuas vim yog Kuv txoj kev ncaj ncees, thiab yeej yuav qhuas Kuv lub npe dawb huv mus ib txhis vim yog Kuv txoj kev ncaj ncees. Yog li ntawd nej yuav tab meeg ua nej lub luag hauj lwm thiab yuav tab meeg qhuas Kuv mus thoob plaws txhua daim av, mus ib txhiab thiab ib txhis li!

Thaum lub sij hawm kev txiav txim nce mus txog nws lub ncov lawm, Kuv yuav tsis maj rawm los xaus Kuv txoj hauj lwm, tiam sis yuav muab tso rau hauv nws qhov pov thawj ntawm lub sij hawm kev rau txim thiab tso cai rau Kuv cov tib neeg txhua tus kom tau pom qhov pov thawj no; nyob hauv qhov no yuav txi tau txiv zoo dua. Qhov pov thawj no yog lub ntsiab los ntawm qhov uas Kuv rau txim rau tus zaj loj liab ploog, thiab Kuv yuav ua rau Kuv cov tib neeg pom nws nrog lawv ob lub qhov muag kiag kom lawv thiaj li yuav paub ntxiv txog Kuv tus yam ntxwv. Thaum lub sij hawm uas Kuv cov tib neeg zoo siab xyiv fab rau Kuv yog thaum uas tus zaj loj liab ploog tau raug rau txim lawm xwb. Kev ua rau cov tib neeg ntawm tus zaj loj liab ploog sawv los thiab tawm tsam nws yog Kuv txoj kev npaj tseg lawm, thiab qhov no yog txoj hau kev uas Kuv ua kom Kuv cov tib neeg zoo tshaj plaws, thiab nws yog ib lub sij hawm zoo heev rau Kuv cov tib neeg txhua tus tau loj hlob rau hauv lub neej. … Hnub no, Kuv nce ua ke nrog tib neeg mus rau hauv lub sij hawm kev rau txim, nrog nws tawm mus ua ke. Kuv tab tom ua Kuv txoj hauj lwm, uas hais tau tias, Kuv ntaus Kuv tus pas nrig rau hauv tib neeg thiab nws poob los rau cov tib neeg ntxeev siab. Hauv tib neeg ob lub qhov muag, Kuv tus pas nrig zoo li muaj tej hwj chim tshwj xeeb: Nws los rau txhua tus uas yog Kuv cov yeeb ncuab thiab yeej tsis tseg lawv kiag li; nyob rau hauv txhua tus uas tawm tsam Kuv, tus pas nrig ua nws txoj hauj lwm uas ib txwm muaj nyob; txhua tus uas nyob rau hauv Kuv ob txhais tes ua lawv lub luag hauj lwm raws li Kuv lub hom phiaj, thiab lawv yeej tsis tau tawm tsam Kuv txoj kev xav los sis tau hloov pauv lawv lub siab kiag li. Raws li qhov tshwm sim, tej dej yuav nqov, tej roob yuav vau, tej dej loj yuav tawg los ua dej me, tib neeg yuav tau hloov pauv dua tshiab, lub hnub yuav tsaus zuj zus, lub hli yuav tsaus, tib neeg yuav tsis muaj hnub ua neej nyob thaj yeeb ntxiv lawm, yuav tsis muaj sij hawm muaj kev ywj pheej nyob rau hauv daim av ntxiv lawm, lub ntuj yuav tsis nyob tiaj tus yees thiab nyob ntsiag to li qub ntxiv lawm, thiab yuav nyiaj tiv tsis taus li lawm. Txhua yam yuav raug hloov dua tshiab thiab yuav rov kho lawv lub hauv paus qhov kev tshwm sim. Txhua tsev neeg hauv lub ntiaj teb yuav raug muab sib cais kom tag, thiab txhua haiv neeg hauv lub ntiaj teb yuav raug cais nyias mus nyias; hnub uas yuav rov los sib koom ntawm tus txiv thiab tus poj niam yuav raug ploj mus, leej niam thiab leej tub yuav tsis sib ntsib ib zaug ntxiv li lawm, leej txiv thiab leej ntxhais yeej yuav tsis los ua ke ib zaug ntxiv li lawm. Txhua yam uas txeev muaj nyob hauv ntiaj teb yuav raug Kuv muab rhuav tshem mus.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 28

Nyob rau hauv Nws tes hauj lwm zaum kawg ntawm kev xaus rau ib tiam, Vajtswv tus moj yam ces yog tus ntawm txoj kev qhuab ntuas thiab kev txiav txim, nyob rau qhov uas Nws nthuav tawm tag nrho tej uas tsis ncaj ncees, es thiaj li txiav txim tau txhua tus neeg rau sawv daws pom, thiab ua kom cov uas ua siab dawb paug hlub Nws ntawd zoo tiav log. Tsuas yog ib tug moj yam zoo li no xwb thiaj li coj tau ib tiam los rau qhov xaus. Tiam kawg twb los txog lawm. Txhua yam raug muab cais mus raws li lawv hom, thiab muab faib mus rau ntau pab raws li lawv txoj kev zoo. Qhov no yog kiag lub sij hawm thaum uas Vajtswv muab tib neeg qhov kawg thiab lawv txoj hau kev kawg nthuav tawm. Yog tib neeg tsis tau raug kev rau txim thiab kev txiav txim, ces yuav tsis muaj kev los muab lawv tej kev ntxeev siab thiab kev tsis ncaj ncees qhia tshwm. Tsuas yog los ntawm kev rau txim thiab kev txiav txim xwb mas qhov kawg ntawm txhua yam thiaj li yuav raug muab nthuav tawm. Tib neeg tsuas qhia qhov tseeb thaum lawv raug rau txim thiab raug txiav txim xwb. Cov phem yuav raug tso nrog cov phem, cov zoo nrog cov zoo, thiab txhua tus tib neeg yuav raug cais tawm mus raws li lawv hom. Vim kev rau txim thiab kev txiav txim, es qhov kawg ntawm txhua yam yuav raug muab nthuav tawm, es kom cov phem thiaj li raug rau txim rau thiab cov zoo thiaj li tau xais phaj tshab, thiab txhua tus tib neeg yuav ua raws li Vajtswv txoj kev tswj fwm. Tag nrho tes hauj lwm no mas yuav tsum ua tiav los ntawm kev qhuab ntuas thiab kev txiav txim uas ncaj ncees. Vim tib neeg tej kev qias vuab tsuab tau nce mus txog qhov siab tshaj plaws lawm thiab lawv txoj kev ntxeev siab mas phem tshaj plaws lawm, tsuas yog Vajtswv tus moj yam ncaj ncees xwb, qhov uas feem ntau yog qhov kev sib sau ua ke ntawm kev qhuab ntuas thiab kev txiav txim thiab raug muab nthuav tawm nyob rau tiam kawg, thiaj li hloov tau tib neeg tag nrho thiab ua tau kom lawv muaj txhua yam, thiab muab tus phem nthuav tawm, thiab txhua tus uas tsis ncaj ncees yuav raug rau txim hnyav heev. Yog li ntawd, ib tug moj yam zoo li tus no thiaj li ntxaum tag nrho nrog rau qhov tseem ceeb ntawm tiam no. Vajtswv tus moj yam thiaj li raug muab nthuav tawm thiab muab qhia txhawm rau tes hauj lwm ntawm ib tiam tshiab twg. Nws tsis yog hais tias Vajtswv nthuav tawm Nws tus moj yam raws li siab xav thiab yam tsis muaj qab hau li. Piv txwv hais tias, nyob rau tiam kawg ntawm qhov muab tib neeg qhov kawg ntawd nthuav tawm, Vajtswv tseem hlub tib neeg los ntawm txoj kev hlub tsua thiab txoj kev ua siab dawb siab zoo yam tsis muaj chaw kawg li, thiab hlub lawv ntxiv mus tas zog li, tsis muab lawv cob rau txoj kev txiav txim uas ncaj ncees tab sis tseem ho zam rau lawv, ua siab ntev rau lawv, thiab zam txim rau lawv, thiab tshem txim tawm rau lawv txawm lawv tej kev txhaum yuav loj npaum li cas los xij li, es tsis muaj ib qho kev txiav txim uas tsis ncaj ncees rau lawv li. Yog li ntawd thaum twg es Vajtswv qhov kev cawm tib neeg thiaj li yuav muab coj los rau qhov chaw xaus? Thaum twg es ib tug moj yam zoo li no thiaj yuav muaj cuab kav coj tau tib neeg mus rau noob neej txoj hau kev kawg uas zoo tsim nyog? Muab ib tug neeg txiav txim uas muaj kev hlub rau tib neeg tas li, ib tug neeg txiav txim uas muaj lub ntsej muag siab dawb siab zoo thiab muaj lub siab mos siab muag coj los ua piv txwv. Nws hlub tib neeg txawm tias lawv tau ua txhaum dab tsi lawm los xij, thiab nws yeej hlub thiab ua siab ntev rau lawv txawm lawv yog leej twg los xij li. Nyob rau qhov xwm txheej ntawd, thaum twg nws thiaj li yuav muaj cuab kav txiav txim tau kom ncaj ncees mas? Nyob rau thaum tiam kawg, tsuas yog txoj kev txiav txim uas ncaj ncees xwb thiaj li yuav cais tau tib neeg kom mus raws li lawv hom thiab coj tau lawv mus rau ib qho chaw tshiab. Nyob rau txoj kev no, tag nrho ib tiam thiaj li yuav muab coj los rau qhov chaw xaus tau los ntawm Vajtswv tus moj yam ncaj ncees ntawm kev txiav txim thiab kev qhuab ntuas.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Lub Zeem Muag ntawm Vajtswv Tes Hauj Lwm (3)

Txhua yam kev puas tsuaj yuav los raug, ib qhozuj zus; txhua lub teb chaws thiab txhua qhov chaw yuav ntsib kev puas tsuaj: Kab mob sib kis, kev tshaib kev nqhis, dej nyab, ntuj qhuav teb nkig, thiab av qeeg muaj nyob txhua qhov chaw. Tej kev puas tsuaj no tsis yog tshwm sim rau ib los sis ob qhov chaw xwb, thiab yuav tsis tag nyob hauv ib los sis ob hnub xwb; tiam sis, tej kev puas tsuaj no yuav nthuav dav zuj zus mus rau ntau qhov chaw, thiab phem zuj zus. Nyob rau lub sij hawm no, txhua yam kab mob sib kis ntawm tej kab yuav tshwm sim ib qho zuj zus tuaj, thiab qhov uas tib neeg noj tib neeg yuav tshwm sim txhua qhov chaw. Qhov no yog Kuv txoj kev txiav txim rau ntau ntau lub teb chaws thiab ntau ntau tus neeg.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 65

Nws yeej hais tau hais tias tag nrho cov lus hais tawm hnub no mas qhia txog tej xwm txheej yav tom ntej; tej lus hais tawm no yog qhov uas Vajtswv ua tej kev npaj rau kauj ruam tom ntej ntawm Nws tes hauj lwm. Vajtswv twb ua yuav luag tiav Nws tes hauj lwm nyob rau hauv cov neeg ntawm pawg ntseeg lawm, thiab tom qab ntawd Nws yuav tshwm los rau ntawm tib neeg sawv daws nrog rau txoj kev npau taws. Ua li Vajtswv hais, “Kuv yuav ua kom cov tib neeg hauv ntiaj teb lees paub tej Kuv ua, thiab Kuv tej kev ua yuav raug muab coj los nthuav qhia rau ntawm ‘lub rooj txiav txim,’ es kom cov neeg thoob ntiaj teb thiaj lees paub, tus uas sawv daws yuav tsum nyoo.” Koj puas pom dab tsi nyob rau hauv cov lus no? Nyob rau hauv no ces yog cov ntsiab lus luv luv ntawm qhov ntxiv mus ntawm Vajtswv tes hauj lwm. Ua ntej tshaj plaws, Vajtswv yuav ua kom tag nrho cov dev zov tsev uas tuav hwj chim tsheej tswj kom ntseeg yam ua siab dawb paug thiab Nws yuav ua kom lawv thim rov qab ntawm lub sam thiaj ntawm keeb kwm yam txaus siab hlo, kom tsis txhob sib txeeb meej mom ntxiv lawm, thiab kom tsis txhob siv tswv yim ntxias dag thiab npaj tswv yim ua phem ntxiv lawm. Tes hauj lwm no mas yuav tsum yog ua tawm hauv Vajtswv los, uas yog tsim kom muaj ntau yam kev puas ntsoog hauv ntiaj teb. Tab sis nws tsis yog qhov uas Vajtswv tsis tshwm los. Nyob rau lub sij hawm no, tus zaj loj liab ploog lub teb chaws yeej tseem yog ib daim av ntawm txoj kev phem kev qias, thiab yog li ntawd Vajtswv thiaj li yuav tsis tshwm los, tab sis yuav tshwm nyob rau hauv qhov kev rau txim. Qhov ntawd yog Vajtswv tus moj yam ncaj ncees, uas tsis muaj ib tug twg yuav khiav dim li. Nyob rau lub sij hawm ntawd, tag nrho cov uas nyob rau tus zaj loj liab ploog lub teb chaws yuav ntsib kev puas ntsoog, uas raws li ib txwm muaj ces kuj suav tag nrho lub nceeg vaj hauv ntiaj teb (pawg ntseeg) tib si thiab. Qhov no yog kiag lub sij hawm uas qhov tseeb yuav tawm los, thiab yog li ces tib neeg sawv daws thiaj tau ntsib tau pom, thiab tsis muaj ib tug twg yuav khiav dim li. Qhov no ces twb yeej xub raug Vajtswv xaiv cia lawm. Nws yog kiag qhov uas vim yog kauj ruam no ntawm tes hauj lawm uas Vajtswv hais tias, “Tam sim no yog lub sij hawm ua tej phiaj xwm loj lawm.” Vim hais tias, nyob rau yav tom ntej, yuav tsis muaj ib pawg ntseeg twg nyob rau hauv ntiaj teb lawm, thiab vim muaj tej kev puas ntsoog loj, tib neeg tsuas yuav muaj peev xwm xav txog qhov nyob kiag ntawm lawv xub ntiag xwb, thiab yuav tsis nco xav txog lwm yam li lawm, thiab nws yuav yog ib qho nyuab rau lawv los xyiv fab hlo rau Vajtswv nyob rau hauv tej kev puas ntsoog loj ntawd. Yog li ntawd, tib neeg thiaj raug hais kom hlub Vajtswv kawg siab kawg ntsws nyob rau lub sij hawm zoo zoo li no, es kom lawv thiaj li tsis plam lub cib fim. Thaum qhov tseeb no los dhau lawm, Vajtswv yuav tua yeej tag nrho tus zaj loj liab ploog lawm, thiab yog li ntawd ces tes hauj lwm ntawm Vajtswv cov neeg tej lus tim khawv kuj yuav los xaus lawm thiab; tom qab ntawd, Vajtswv yuav pib kauj ruam tom ntej ntawm tes hauj lwm, tsim kev puas ntsoog rau tus zaj loj liab ploog lub teb chaws, thiab thaum kawg ces muab cov neeg thoob plaws lub qab ntuj khwb ntsia rov quav rau saum tus ntoo khaub lig, tom qab ntawd ces Nws yuav muab noob neej sawv daws rhuav tshem kom tu noob nrho—tej no ces yog tej kauj ruam nyob rau yav tom ntej ntawm Vajtswv tes hauj lwm.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Kev txhais lub ntsiab ntawm Cov Lus Zais Tob ntawm “Vajtswv Cov Lus rau Tag Nrho Lub Qab Ntuj Khwb”, Tshooj 42

Thaum Vajtswv tso plhuav Nws qhov kev npau taws tawm, ces tag nrho lub ntiaj teb yuav tau ntsib tau pom txhua yam kev puas ntsoog tshwm sim los, xws li ib lub roob tawg. Sawv nyob siab rau saum ntuj, ces yeej pom tau hais tias nyob hauv ntiaj teb, txhua yam kev puas tsuaj twb los ze rau tag nrho noob neej lawm, ib hnub los ze zuj zus. Nyob qhov siab saib los, ces lub ntiaj teb yeej muaj ntau qhov duab zoo li tej uas tshwm sim ua ntej yuav muaj ib qho av qeeg. Kua hluav taws ntws tsis muaj chaw nres, kua zeb kua hlau ntws sis laub sis lug, tej toj roob hauv pes txav tag, thiab ib qho duab ci txias to ntsais pluj plias rau txhua txhia qhov chaw. Tag nrho lub ntiaj teb tau tog mus rau hauv cov hluav taws lawm. Qhov no yog daim duab ntawm qhov uas Vajtswv tso Nws txoj kev npau taws tawm, thiab nws yog lub sij hawm ntawm Nws txoj txiav txim lawm. Tag nrho cov uas muaj cev nqaij daim tawv thiab roj ntsha yuav tsis muaj peev xwm khiav dim li. Yog li ntawd, tsis tas yuav siv tsov rog ntawm ib lub teb chaws rau ib lub teb chaws thiab kev tsis sib haum ntawm tib neeg los rhuav tshem tag nrho lub ntiaj teb li; tab sis, lub ntiaj teb yuav “xyiv fab hlo yam nco meej meej rau nws tus kheej” nyob rau hauv lub me nyuam txaj ntawm Vajtswv txoj kev rau txim. Tsis muaj leej twg yuav muaj peev xwm khiav dim li; txhua leej txhua tus yuav tsum mus kom dhau qhov kev sim siab no, ib tug zuj zus. Tom qab ntawd, tag nrho lub qab ntuj khwb yuav rov ci ntsa paug los ntawm tus duab ci uas dawb huv thiab tag nrho noob neej yuav rov pib dua ib lub neej tshiab. Thiab Vajtswv yuav so rau sab saum lub qab ntuj khwb thiab foom koob hmoov rau noob neej txhua hnub.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Kev txhais lub ntsiab ntawm Cov Lus Zais Tob ntawm “Vajtswv Cov Lus rau Tag Nrho Lub Qab Ntuj Khwb”, Tshooj 18

Tag nrho noob neej ntshaw pom Kuv lub ntsej muag, tab sis thaum Kuv nqis kiag ua tus neeg los rau hauv ntiaj teb, lawv sawv daws tsis nyiam qhov Kuv los txog ntawd li, thiab lawv muab qhov kaj qhov kev los txog ntawd ntiab tawm, cuag nkaus li Kuv yog tib neeg tus yeeb ncuab nyob rau saum ntuj ceeb tsheej. Tib neeg hu Kuv nrog ib qho kaj uas tiv thaiv lawv nyob rau hauv lawv ob lub qhov muag, thiab nyob cus plaws tag mus li xwb, ntshai rwg hais tias tsam Kuv lam muaj lwm yam phiaj xwm rau lawv. Vim tib neeg saib Kuv zoo li ib tug phooj ywg uas tsis sib swm li, lawv hnov zoo li Kuv zais qhov kev npaj siab tua lawv yam tsis xaiv leej twg hlo li. Nyob rau hauv tib neeg ob lub qhov muag, Kuv yog ib tug yeeb ncuab loj kawg nkaus. Qhov tau saj Kuv qhov kev sov nyob rau hauv txoj kev puas ntsoog lawm, txawm li ntawd los tib neeg yeej tseem tsis paub txog Kuv txoj kev hlub li, thiab tseem cais Kuv tawm thiab tawm tsam Kuv. Tsis yog hais tias yuav saib siab rau lawv tus yam ntxwv es tig tawm tsam lawv hos, Kuv tseem muab tib neeg qhwv kiag kom sov so rau hauv xub ntiag, muaj qhov qab zib rau lawv noj tsau npo, thiab muab tej zaub mov zoo rau hauv lawv plab. Tab sis, thaum Kuv qhov kev chim npau taws ua rau tej toj roob hauv pes thiab tej niam dej co qig txoog, ces Kuv yuav tsis, vim tib neeg txoj kev tais caus, muab ntau yam kev pab cuam pub rau lawv ntxiv lawm. Nyob rau lub sij hawm no, Kuv yuav haj yam chim, tsis pub ib lub cib fim rau tag nrho txhua yam muaj sia los hloov siab lees txim thiab, muab tag nrho tej kev cia siab rau tib neeg tsoo pov tseg kiag, Kuv yuav faib tawm kev rau txim pauj kev txhaum uas lawv tsim nyog tau txais kawg nkaus. Nyob rau lub sij hawm no, xob nthe thiab xov laim cig liab vog thiab nrov ntig ntwg, zoo nkaus li tej nthwv dej hiav txwv nphau npog rau kev chim, zoo nkaus li kaum tawm txhiab lub roob nphau vig voog los. Vim lawv qhov kev ntxeev siab, tib neeg thiaj raug qhau los ntawm qhov xob nthe thiab xov laim, thiab lwm cov uas raug tsim tawm los raug rhuav tshem tag nrho nyob rau hauv qhov tawg ntsoog ntxaws los ntawm qhov xob nthe thiab xob laim, thiab tag nrho lub qab ntuj khwb poob kiag mus rau qhov kev kub ntxhov, thiab tej uas raug tsim tawm los tsis muaj peev xwm muab tau txoj sia txoj pa thaum pib ntawd rov qab li. Cov noob neej coob heev tsis muaj peev xwm khiav dim lub suab xob nthe; nyob rau hauv qhov xob laim liab vog ntawd, tib neeg, ib pab dhau ib pab, ntog vig voog mus rau hauv nthwv dej ntws ceev, rau tej nthw dej ceev ceev uas ntws saum roob los muab kuav kiag mus lawm. Tam sim ntawd, ces “tib neeg” lub ntiaj teb los sib ntsib kiag nyob rau qhov chaw ntawm tib neeg “txoj hau kev kawg.” Tej cev tuag mas ntab zom zaws saum nplaim dej hiav txwv. Tag nrho noob neej khiav tawm dev ntawm Kuv vim Kuv txoj kev npau taws, vim tib neeg tau ua txhaum rau lub ntsiab tseeb ntawm Kuv tus Ntsujplig, thiab lawv txoj kev ntxeev siab tau ua txhaum rau Kuv lawm. Tab sis, nyob rau tej chaw uas tsis muaj dej, lwm pab neeg tseem xyiv fab hlo, nyob rau hauv tej suab luag thiab suab nkauj, rau tej lus cog tseg uas Kuv tau muab rau lawv.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 17

Thaum lub ntiaj teb qub tseem muaj nyob, Kuv yuav pov Kuv txoj kev npau taws los rau txhua lub teb chaws thiab tshaj tawm tej kev cai tswj fwm uas muab tshaj tawm rau tag nrho lub qab ntuj khwb, thiab leej twg ua txhaum tej kev cai tswj fwm ntawd yuav raug rau txim:

Thaum Kuv hais lus rau tag nrho lub qab ntuj khwb, txhua tus tib neeg hnov Kuv lub suab, qhov ntawd uas yog, txhua tus tib neeg pom tag nrho tej hauj lwm uas Kuv tau ua thoob plaws lub qab ntuj khwb. Cov uas tawm tsam Kuv tej kev npaj siab, qhov ntawd hais tau hais tias, cov uas tawm tsam Kuv los ntawm tib neeg tej kev ua xwb ces yuav poob mus rau hauv Kuv txoj kev rau txim. Kuv yuav hloov tej hnub qub ntau ntau saum ntuj ntawd kom tshiab; vim yog Kuv, lub hnub thiab lub hli thiaj li yuav raug hloov kom tshiab, lub ntuj yuav tsis zoo li qub lawm; thiab txhua yam hauv ntiaj teb yuav raug hloov kom tshiab—yuav ua tau tag nrho tej no kom tiav vim yog Kuv cov lus. Txhua lub teb chaws hauv lub qab ntuj khwb yuav raug muab faib dua tshiab thiab raug hloov los ntawm Kuv lub nceeg vaj, kom tej teb chaws hauv ntiaj teb thiaj li yuav ploj mus ib txhis, thiab tsuas muaj lub nceeg vaj uas pe hawm Kuv lawm xwb; tag nrho tej teb chaws hauv ntiaj teb yuav raug rhuav tshem thiab tsis muaj nyob mus ntxiv lawm. Hais txog cov tib neeg nyob rau hauv lub qab ntuj khwb, tag nrho cov uas yog cov dab phem yuav raug muab rhuav tshem kom tag. Tag nrho cov uas pe hawm Ntxwgnyoog yuav poob mus rau hauv Kuv lub cub tawg kub—qhov ntawd yog, tshwj kiag cov uas tam sim no yoog raws xwb, tag nrho yuav raug mus ua tshauv. Thaum Kuv rau txim rau txhua tus neeg, ces cov zej zog ntawm sab kab lis kev cai ntseeg yuav, nyob rau ntau theem, rov qab los rau Kuv lub nceeg vaj, thiab raug txeeb tau los ntawm Kuv tej hauj lwm, vim lawv yuav tau pom tias “tus Dawb Huv uas caij ib tuav huab dawb” twb los txog lawm. Txhua tus tib neeg yuav raug muab cais mus raws li lawv hom, thiab yuav tau txais ntau yam kev rau txim uas phim rau lawv tej kev ua; tag nrho cov uas tau tawm tsam Kuv lawm yuav puas tsuaj, thiab hais txog cov uas lawv tej hauj lwm hauv ntiaj teb tsis cuam tshuam rau Kuv ntawd, lawv yuav, vim yog tej uas lawv tau ua lawm, nyob hauv lub ntiaj teb mus ntxiv uas yog nyob rau hauv kev tswj hwm ntawm Kuv cov tub thiab Kuv cov neeg. Kuv yuav tshwm los rau tag nrho tej teb chaws thiab tag nrho tej tib neeg, thiab Kuv yuav nthuav Kuv lub suab tawm rau hauv lub ntiaj teb, tshaj tawm txog qhov ua Kuv tes hauj lwm loj tiav lawm, cia txhua tus tib neeg pom qhov no los ntawm lawv tus kheej lub qhov muag kiag.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 26