Nyob rau peb qhov kev sib txoos ua ke zaum tas los ntawd mas peb tau sib qhia txog cov thawj coj thiab cov neeg ua hauj lwm lub luag hauj lwm kaum ib. Peb tau sib qhia txog lub luag hauj lwm uas cov thawj coj thiab cov neeg ua hauj lwm yuav tsum ua kom tiav thiab tes hauj lwm uas lawv yuav tsum ua nyob hauv kev saib xyuas cov khoom fij. Cov thawj coj thiab cov neeg ua hauj lwm yuav tsum ua tes hauj lwm dab tsi nyob rau hauv kev saib xyuas cov khoom fij? (Thawj tes hauj lwm yog saib xyuas cov khoom fij. Qhov ob yog tshuaj xyuas cov ntaub ntawv nyiaj txiag. Qhov peb yog taug qab, tshawb xyuas, thiab tshuaj xyuas seb ntau yam kev siv nyiaj puas mus raws li tej hauv paus ntsiab lus. Yuav tsum tshuaj xyuas kom nruj, thiab yuav tsum tau txwv nruj rau tej kev siv nyiaj uas tsis tsim nyog. Qhov zoo tshaj plaws yog tiv thaiv kom tsis txhob muaj kev siv ua dog ua dig thiab kev nkim pov tseg ua ntej tej no tshwm sim. Yog tej no twb tshwm sim lawm, yuav tsum kom cov neeg uas ua txhaum ntawd ris. Tsis yog tsuas muab lus ceeb toom xwb, tiam sis kuj yuav tsum tau kom them rov qab thiab.) Feem ntau ces yog tej ntawd. Qhov tseem ceeb yog saib xyuas tej ntawd, thiab tom qab ntawd tshuaj xyuas cov nyiaj txiag, thiab tom qab ntawd, taug qab thiab tshuaj xyuas tej kev siv nyiaj, thiab siv cov nyiaj ntawd kom yog. Tom qab qhia txog lub luag hauj lwm kaum ib tag lawm, tam sim no tib neeg muaj ib qho kev to taub thiab kev paub uas yog txog cov khoom fij, thiab lawv kuj paub txog tes hauj lwm uas cov thawj coj thiab cov neeg ua hauj lwm yuav tsum ua los saib xyuas cov khoom fij, nrog rau qhov uas cov thawj coj cuav ua tes hauj lwm no li cas, thiab lawv tej cwj pwm ntxaws ntxaws thaum ua tes hauj lwm no. Txawm peb txoj kev sib qhia yog hais txog cov thawj coj thiab cov neeg ua hauj lwm tej luag hauj lwm los sis hais txog ntau yam cwj pwm ntawm cov thawj coj cuav los xij, thiab txawm yog kev sib qhia txog tej yam uas zoo los sis kev nthuav tawm ntawm tej yam uas tsis zoo los xij, lub hom phiaj tseem ceeb yog kom tib neeg to taub tias yuav ua tes hauj lwm saib xyuas cov khoom fij kom zoo li cas, thiab yuav tshem tawm tej kev ua uas tsis tsim nyog nyob hauv kev saib xyuas, kev siv nyiaj, thiab kev faib cov khoom fij li cas. Tag nrho cov neeg Vajtswv xaiv tseg—txawm lawv puas yog cov thawj coj los sis cov neeg ua hauj lwm los—yuav tsum ua lawv lub luag hauj lwm kom tiav nyob hauv kev saib xyuas cov khoom fij. Yog li, lub luag hauj lwm no yog dab tsi? Qhov ntawd yog saib xyuas thiab qhia tawm tej teeb meem uas pom kom ncav sij hawm—uas yog, ua tes hauj lwm saib xyuas thiab qhia tawm. Tsis txhob xav tias “kev saib xyuas cov khoom fij yog cov thawj coj thiab cov neeg ua hauj lwm lub luag hauj lwm thiab tsis muaj feem xyuam dab tsi rau peb cov neeg ntseeg dog dig.” Qhov kev xam pom no tsis yog lawm. Vim tib neeg twb to taub tej qhov tseeb no lawm, lawv yuav tsum ua lawv lub luag hauj lwm kom tiav. Rau tej teeb meem uas cov thawj coj thiab cov neeg ua hauj lwm tsis muaj peev xwm txheeb pom, los sis rau tej qhov chaw uas tsis pom, tej qhov chaw uas tsis yooj yim txheeb pom, yog leej twg pom muaj teeb meem txog qhov tsis tsim nyog los sis tej teeb meem uas ua txhaum rau tej hauv paus ntsiab lus hauv qhov kev saib xyuas, kev faib, thiab kev siv cov khoom fij, lawv yuav tsum qhia tawm tej no rau cov thawj coj thiab cov neeg ua hauj lwm kom ncav sij hawm, kom thiaj li paub tseeb tias muaj kev saib xyuas uas tsim nyog, kev siv uas tsim nyog, thiab kev faib cov khoom fij uas tsim nyog. Qhov no yog txhua tus neeg Vajtswv xaiv tseg lub luag hauj lwm.

Yam Kaum Ob: Txheeb Ntau Hom Tib Neeg, Xwm Txheej, thiab Yam Khoom uas Tab Kaum thiab Cuam Tshuam Vajtswv Tes Hauj Lwm thiab Qhov Raws Qib Raws Duas uas Ib Txwm Muaj ntawm Pawg Ntseeg Kom Ncav Sij Hawm thiab Kom Yog; Cheem thiab Txwv Lawv, thiab Hloov Txhua Yam Kom Zoo Dua; Tsis Tas Li Ntawd Xwb, Qhia Qhov Tseeb Kom Cov Neeg Vajtswv Xaiv Tseg Thiaj Li Paub Cais Tej Yam Zoo Li No thiab Kawm Paub Los Ntawm Tej Yam Zoo Li No (Ntu Ib)

Tam sim no qhia tag lub luag hauj lwm yam kaum ib lawm, peb sib qhia ntxiv txog cov thawj coj thiab cov neeg ua hauj lwm tej luag hauj lwm yam kaum ob: “Txheeb ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg kom ncav sij hawm thiab kom yog; cheem thiab txwv lawv, thiab hloov txhua yam kom zoo dua; tsis tas li ntawd xwb, qhia qhov tseeb kom cov neeg Vajtswv xaiv tseg thiaj li paub cais tej yam zoo li no thiab kawm paub los ntawm tej yam zoo li no.” Lub ntsiab tseem ceeb ntawm lub luag hauj lwm no yog dab tsi? Tseem ceeb yog hais txog qhov cheem tsum kom cov thawj coj thiab cov neeg ua hauj lwm daws ntau hom tib neeg, xwm txheej, thiab yam khoom nyob rau hauv pawg ntseeg—nrog rau ntau yam teeb meem—uas tab kaum, cuam tshuam, thiab ua puas tsuaj rau qhov raws qib raws duas uas ib txwm muaj ntawm pawg ntseeg. Cov thawj coj thiab cov neeg ua hauj lwm yuav tsum xub to taub dab tsi thiaj li yuav daws tau tej teeb meem no kom zoo, ua lawv tej luag hauj lwm kom tiav, thiab ua tes hauj lwm no kom zoo? Lub luag hauj lwm no yog “txheeb ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg kom ncav sij hawm thiab kom yog”; qhov no yog tus ciaj ciam ntawm tes hauj lwm no. Thaum muaj ib lub hom phiaj thiab ib tug ciaj ciam lawm, ces thiaj li paub meej tias yuav tsum daws tej teeb meem twg, thiab tes hauj lwm thiab tej luag hauj lwm twg uas xav kom cov thawj coj thiab cov neeg ua hauj lwm ua. Nyob rau lub luag hauj lwm kaum ob, qhov kev cheem tsum tseem ceeb rau cov thawj coj thiab cov neeg ua hauj lwm yog dab tsi? Qhov ntawd yog cheem thiab txwv ntau hom tib neeg, xwm txheej, thiab yam khoom uas ua rau muaj kev tab kaum thiab kev cuam tshuam, thiab hloov txhua yam kom zoo dua, thiab tib lub sij hawm ntawd qhia qhov tseeb kom cov neeg Vajtswv xaiv tseg thiaj li muaj kev paub cais tej yam zoo li no thiab kawm paub los ntawm tej yam zoo li no. Qhov yuav tsum muaj ua ntej yog dab tsi? Yog koj pom ntau hom tib neeg, xwm txheej, thiab yam khoom uas tab kaum, cuam tshuam, thiab ua puas tsuaj rau qhov raws qib raws duas ntawm pawg ntseeg tiam sis xav tias tej no tsis yog teeb meem, ces muaj teeb meem lawm. Qhov no qhia tau hais tias koj tsis muaj peev xwm pom tshab txog lub ntsiab tseeb ntawm qhov teeb meem, uas yog, pom tsis tshab txog qhov kev phom sij uas kev tab kaum thiab kev cuam tshuam lub neej hauv pawg ntseeg tuaj yeem coj tau los rau pawg ntseeg tes hauj lwm, thiab tej qhov tshwm sim los thiab kev cuam tshuam uas tej zaum yuav muaj rau txoj kev nkag mus rau hauv lub neej txoj sia ntawm cov neeg Vajtswv xaiv tseg. Cov thawj coj thiab cov neeg ua hauj lwm zoo li no puas tseem yuav ua tau pawg ntseeg tes hauj lwm kom zoo? Lawv puas yuav daws tau tej teeb meem thiab hloov txhua yam kom zoo dua? (Tsis tau.) Yog li lub ntsiab tseem ceeb uas yuav tsum qhia nyob ntawm no yog dab tsi? Qhov ntawd yog qhov uas yuav tsum xub to taub qhov tseeb tej hauv paus ntsiab lus xwb mas cov thawj coj thiab cov neeg ua hauj lwm thiaj li yuav pom tshab txog lub ntsiab tseeb ntawm ntau yam teeb meem thiab daws tau ntau yam teeb meem tiag tiag kom muaj txiaj ntsig. Cov thawj coj thiab cov neeg ua hauj lwm yuav ua tes hauj lwm hauv pawg ntseeg kom zoo mas yuav tsum xub paub tias tej teeb meem twg uas nquag tshwm tuaj hauv pawg ntseeg tes hauj lwm. Tom qab ntawd, lawv yuav tsum to taub, paub cais, thiab txiav txim kom yog txog lub ntsiab xeeb txawm ntawm tej teeb meem uas tshwm tuaj ntawd, seb tej ntawd puas cuam tshuam rau pawg ntseeg tes hauj lwm thiab qhov raws qib raws duas ntawm lub neej hauv pawg ntseeg, thiab seb tej ntawd puas yog lub ntsiab xeeb txawm uas tab kaum thiab cuam tshuam tes hauj lwm hauv pawg ntseeg. Qhov no yog ib qho teeb meem tseem ceeb heev uas cov thawj coj thiab cov neeg ua hauj lwm yuav tsum xub to taub. Tsuas yog tom qab to taub qhov no lawm xwb mas thiaj li yuav muaj peev xwm daws tau tej teeb meem no kom zoo, thiab thiaj li muaj peev xwm “cheem thiab txwv lawv, thiab hloov txhua yam kom zoo dua” raws li tau hais hauv lub luag hauj lwm kaum ob. Muab hais kom luv luv, ua ntej yuav daws ib qho teeb meem, koj yuav tsum xub to taub tias qhov teeb meem ntawd nyob qhov twg, tej yam ntxwv thiab tej xwm txheej uas muaj feem xyuam ntawd yog dab tsi, lub ntsiab xeeb txawm ntawm qhov teeb meem ntawd yog dab tsi, qhov teeb meem ntawd hnyav npaum li cas, yuav soj ntsuam thiab paub cais li cas, thiab yuav xyaum ua raws kom yog li cas. Qhov no yog qhov uas cov thawj coj thiab cov neeg ua hauj lwm yuav tsum xub to taub. Vim cov thawj coj thiab cov neeg ua hauj lwm yuav tsum to taub tej teeb meem no, cia peb los sib qhia txog tej teeb meem no los ntawm ntau kis kom ntxaws ntxaws, kom cov thawj coj thiab cov neeg ua hauj lwm thiab cov neeg Vajtswv xaiv tseg puav leej to taub tias yuav tim ntsej tim muag nrog tej teeb meem no li cas thaum tej teeb meem no tshwm sim, yuav muab tej teeb meem no coj los piv rau Vajtswv cov lus li cas, thiab yuav siv qhov tseeb tej hauv paus ntsiab lus los daws tej teeb meem no li cas. Ua li no, thaum cov thawj coj thiab cov neeg ua hauj lwm ntsib tej kev nyuaj uas lawv daws tsis tau, tag nrho cov neeg Vajtswv xaiv tseg tuaj yeem nrog lawv tim ntsej tim muag nrog tej ntawd ua ke thiab nrhiav qhov tseeb los daws, thiab thaum ntsib tej teeb meem ntawm kev tab kaum thiab kev cuam tshuam nyob hauv pawg ntseeg tes hauj lwm, txhua tus tuaj yeem sawv los cheem thiab txwv tej teeb meem ntawd. Nyob rau tib lub sij hawm ntawd, rau cov tib neeg thiab tej xwm txheej uas tsis zoo, lawv tuaj yeem coj los soj ntsuam, paub cais, thiab txiav txim tab meeg, kom ua rau tej teeb meem no raug cheem, raug txwv, thiab raug rhuav tshem ntawm lub paus hauv mus. Yog li ntawd cia peb pib sib qhia txog tej teeb meem uas muaj tiag tshaj plaws mus.

Ntau Hom Tib Neeg, Xwm Txheej, thiab Yam Khoom Uas Tab Kaum thiab Cuam Tshuam Lub Neej Hauv Pawg Ntseeg

Yuav txheeb tau tej teeb meem uas tab kaum thiab cuam tshuam Vajtswv tes hauj lwm thiab qhov raws qib raws duas ntawm pawg ntseeg, mas cov thawj coj thiab cov neeg ua hauj lwm yuav tsum pib los ntawm qhov twg? Lawv yuav tsum pib los ntawm qhov tshawb xyuas lub neej hauv pawg ntseeg kom nrhiav tau tej teeb meem no. Puas yog nej txhua tus paub me ntsis txog tej teeb meem twg uas nquag tshwm tuaj nyob rau hauv lub neej hauv pawg ntseeg uas lub ntsiab xeeb txawm yog ua rau muaj kev tab kaum thiab kev cuam tshuam? Txawm muaj tib neeg coob npaum li cas nyob hauv ib lub pawg ntseeg los, yeej yuav muaj tib neeg tsis tsawg uas yuav tab kaum thiab cuam tshuam tes hauj lwm hauv pawg ntseeg. Tej kev ua uas tab kaum thiab cuam tshuam uas nej paub txog ntawd muaj dab tsi? (Thaum sib qhia txog qhov tseeb hauv kev sib txoos ua ke mas pheej tham dhau ntawm lub ncauj lus mus lawm tas li, yam tsis tsom ntsoov rau ntawm tej teeb meem tseem ceeb.) (Ntxiv ntawd pheej hais cov lus thiab cov kev qhuab qhia tas li.) Thaum sib qhia qhov tseeb mas tham dhau ntawm lub ncauj lus mus lawm. Piv txwv li, thaum lwm tus tab tom sib qhia txog yuav ua siab ncaj hauv yus tes dej num li cas, lawv yuav tham txog yuav saib xyuas lawv tus txiv (los sis tus poj niam) thiab cov me nyuam kom zoo li cas. Thaum lwm tus sib qhia txog qhov ua siab ncaj hauv kev ua yus tes dej num ntawd mas yog ua kom Vajtswv txaus siab thiab zwm rau Nws, lawv tham txog qhov ua siab ncaj hauv kev ua yus tes dej num ntawd mas yog ua kom yus tsev neeg thiab cov neeg uas yus hlub ntawd tau koob hmoov. Qhov no tsis yog tham dhau ntawm lub ncauj lus lawm lod? (Yog.) Yog koj tsis txiav lawv lus, lawv yuav hais mus tsis paub kawg li. Yog koj txwv lawv, lawv yuav npau taws, thiab yuav npau taws heev vim txoj kev txaj muag, yog li ntawd thiaj li ua rau lawv tus cwj pwm phem ntawd haj yam phem zuj zus ntxiv. Vim li ntawd, qhov teeb meem no, raws li lub ntsiab xeeb txawm mas yog nyob ntawm qib uas tab kaum thiab cuam tshuam, lub ntsiab xeeb txawm mas hnyav heev. Txawm hais tias thaum sib qhia qhov tseeb es tham dhau ntawm lub ncauj lus mus ntawd yog ib qho teeb meem uas nquag tshwm sim los, raws li qhov muaj tiag lawm, qhov ntawd tuaj yeem tab kaum thiab cuam tshuam lub neej hauv pawg ntseeg. Qhov no yog thawj qhov teeb meem. Hais txog qhov ob, “hais cov lus thiab cov kev qhuab qhia,” qhov no puas suav tau tias yog ib qho kev tab kaum thiab kev cuam tshuam ntawd mas yuav tsum saib seb qhov xwm txheej ntawd hnyav npaum li cas. Ib txhia tib neeg hais cov lus thiab cov kev qhuab qhia vim lawv tsis muaj qhov tseeb qhov muaj tiag; kiag thaum lawv qhib qhov ncauj tham, ces puav leej yog cov lus thiab cov kev qhuab qhia xwb, tsuas yog tej tswv yim uas khoob lug xwb. Txawm li cas los xij, lawv lub hom phiaj tsis yog los coj lwm tus mus yuam kev thiab ua kom lwm tus hwm lawv. Los ntawm kev txwv thiab kev ntuas kom txhob ua, lawv yuav muaj kev paub txog lawv tus kheej, thiab tom qab ntawd, lawv yuav hais cov lus thiab cov kev qhuab qhia tsawg dua, thiab lawv yuav tsis tab kaum cov kwv tij thiab cov muam txoj kev nkag mus rau hauv lub neej txoj sia ntxiv lawm. Qhov no tsis suav tias yog ib qho kev tab kaum thiab kev cuam tshuam. Txawm li cas los xij, cov uas muaj lub hom phiaj xav coj lwm tus mus yuam kev es txhob txwm hais cov lus thiab cov kev qhuab qhia ntawd, tab txawm lawv yeej paub zoo tias yam uas lawv hais ntawd yog cov lus thiab cov kev qhuab qhia los lawv tseem ua li ntawd. Lawv lub hom phiaj thaum ua qhov no yog kom lwm tus hwm lawv; lawv xav ntxias tib neeg los rau ntawm lawv sab thiab coj lawv mus yuam kev, thiab txeeb lub meej mom. Qhov no mas hnyav heev raws li lub ntsiab xeeb txawm. Qhov no mas txawv raws li lub ntsiab xeeb txawm ntawm qhov uas tsuas muaj peev xwm hais cov lus thiab cov kev qhuab qhia vim tsis to taub qhov tseeb. Qhov kev coj zoo li no suav tias yog ib qho kev tab kaum thiab kev cuam tshuam. Ntau hom tib neeg, xwm txheej, thiab yam khoom uas ua rau muaj kev tab kaum thiab kev cuam tshuam nyob rau lub neej hauv pawg ntseeg mas muaj nyob txhua qhov chaw. Tej ntawd tsis yog muaj tej teeb meem xws li hais cov lus thiab cov kev qhuab qhia los sis tham dhau ntawm lub ncauj lus mus xwb. Tseem muaj lwm yam dab tsi ntxiv? (Kev tsim pab tsim pawg, kev tsim kev sib cais, thiab kev ua rau lwm tus qaug zog.) (Kuj muaj txoj kev tso tej kev xav tsis zoo tawm, thiab kev tsim teeb meem thiab kev pheej thab tib neeg tas li thiab.) (Thaum ib txhia tib neeg muaj tej kev xav phem txog Vajtswv lub tsev tej kev npaj tes hauj lwm, lawv tshaj tawm tej kev xav phem no thiab tso lawv tej kev xav tsis zoo tawm, ua rau lwm tus muaj tej kev xav phem rau tej kev npaj tes hauj lwm ntawd thiab.) Tej yam ntawd yeej suav tau tias yog kev tab kaum thiab kev cuam tshuam. Kev tsim pab tsim pawg yog ib qho, kev tsim kev sib cais yog lwm qhov, nrog rau kev tsim txom thiab kev tawm tsam tib neeg, kev tshaj tawm tej kev xav phem, kev tso tej kev xav tsis zoo tawm, kev tshaj tawm cov lus xaiv uas tsis muaj tseeb, thiab kev txeeb lub meej mom—tag nrho tej no puav leej yog kev tab kaum thiab kev cuam tshuam. Tej teeb meem no mas muaj lub ntsiab xeeb txawm uas hnyav tshaj qhov tham dhau ntawm lub ncauj lus mus thaum sib qhia qhov tseeb. Kuj muaj ib qho teeb meem uas muaj feem xyuam txog kev xaiv tsa thiab. Hom teeb meem twg uas tshwm sim thaum lub sij hawm xaiv tsa uas muaj feem xyuam txog kev tab kaum thiab kev cuam tshuam? Piv txwv li, muaj tej kev tawm suab uas tsis ncaj—kev cog lus tias yuav muab txiaj ntsim kom tau cov suab rau tus kheej. Qhov no yog ib txoj kev los ua kom qhov kev xaiv tsa ntawd puas tsuaj. Thiab tej kev ua uas zais ntshis—nrog tib neeg tham txog lawv tej kev xav nyob tom qab kom ntxias lawv los rau yus sab, coj kom lawv mus yuam kev, thiab ua kom lawv pov ntawv rau koj. Tej no puav leej yog tej teeb meem uas tshwm sim thaum lub sij hawm xaiv tsa. Tej no suav tias yog kev tab kaum thiab kev cuam tshuam tsis yog lod? (Yog.) Tej teeb meem no raug hu ua ke tias yog kev ua txhaum rau tej hauv paus ntsiab lus ntawm kev xaiv tsa. Lwm qho teeb meem ces yog tham txog tsev neeg tej xwm txheej, tsim kev sib raug zoo ntawm tus kheej, thiab saib xyuas tej hauj lwm ntiag tug. Ib tug neeg twg tej zaum yuav tuaj koom kev sib txoos ua ke rau tej yam no—tsis yog tuaj kom to taub qhov tseeb los sis sib qhia Vajtswv cov lus, tiam sis yog tuaj saib xyuas tej hauj lwm ntiag tug. Qhov teeb meem zoo li no puas hnyav? (Hnyav.) Qhov ntawd kuj txaus suav tias yog kev tab kaum thiab kev cuam tshuam thiab.

Tam sim no, cia peb los xaus lus txog ntau yam teeb meem ntawm kev tab kaum thiab kev cuam tshuam uas tshwm tuaj nyob rau lub neej hauv pawg ntseeg: Qhov ib, thaum qhia qhov tseeb pheej tham dhau ntawm lub ncauj lus mus lawm tas li; qhov ob, hais cov lus thiab cov kev qhuab qhia los coj tib neeg mus yuam kev thiab ua rau lawv qhuas; qhov peb, tham txog tsev neeg tej xwm txheej, tsim kev sib raug zoo ntawm tus kheej, thiab saib xyuas tej hauj lwm ntiag tug; qhov plaub, kev tsim pab tsim pawg; qhov tsib, kev txeeb lub meej mom; qhov rau, kev tsim kev sib cais; qhov xya, tawm tsam thiab tsim txom tib neeg; qhov yim, tshaj tawm tej kev xav phem; qhov cuaj, tso tej kev xav tsis zoo tawm; qhov kaum, kev tshaj tawm tej lus xaiv uas tsis muaj tseeb; thiab qhov kaum ib, kev ua txhaum rau tej hauv paus ntsiab lus ntawm kev xaiv tsa. Tag nrho muaj kaum ib qhov. Kaum ib qhov kev qhia tshwm uas pom tau meej no yog tej teeb meem ntawm kev tab kaum thiab kev cuam tshuam uas nquag tshwm sim nyob rau lub neej hauv pawg ntseeg. Thaum ua lub neej hauv pawg ntseeg, yog tej teeb meem no tshwm sim, ces tsim nyog rau cov thawj coj thiab cov neeg ua hauj lwm sawv los es cheem, txwv, thiab tsis txhob cia tej teeb meem ntawd loj hlob yam tsis muaj kev tswj. Yog cov thawj coj thiab cov neeg ua hauj lwm txwv tsis tau tej teeb meem ntawd, ces txhua tus kwv tij thiab nkauj muam yuav tsum koom ua ke los txwv tej teeb meem ntawd. Yog tus neeg uas muaj feem xyuam ntawd tsis muaj kev ua neeg uas phem, thiab tsis yog txhob txwm ua kev tab kaum thiab kev cuam tshuam tiam sis tsuas yog tsis to taub qhov tseeb xwb, tuaj yeem pab thiab txhawb lawv los ntawm kev qhia qhov tseeb. Yog tus neeg uas ua kev tab kaum thiab kev cuam tshuam ntawd yog tib neeg phem, thiab qhov xwm txheej ntawd tsis hnyav, ces yuav tsum cheem thiab txwv lawv tej kev tab kaum thiab kev cuam tshuam los ntawm kev sib qhia thiab kev nthuav tawm. Yog lawv txaus siab hlo lees txim hloov dua siab tshiab, thiab tsis hais los sis tsis ua tej yam uas ua rau muaj kev tab kaum thiab kev cuam tshuam ntxiv lawm, txaus siab hlo los ua tus tswv cuab uas tsis tseem ceeb tshaj plaws nyob hauv pawg ntseeg, tuaj yeem mloog hais thiab mloog lus zoo, thiab ua txhua yam uas pawg ntseeg npaj, lees txais tej kev txwv uas cov kwv tij thiab cov muam tau teev tseg, ces lawv tuaj yeem nyob rau hauv pawg ntseeg ib ntus. Tiam sis yog lawv tsis lees txais thiab tig tawm tsam thiab ua yeeb ncuab rau feem coob, ces yuav tsum tau ua raws li theem ob—ntsaig lawv tawm mus. Txoj kev ua no puas tsim nyog? (Tsim nyog.)

I. Thaum Qhia Qhov Tseeb Pheej Tham Dhau Ntawm lub Ncauj Lus Mus Lawm Tas Li

Tam sim no, peb yuav sib qhia txog ntau hom tib neeg, xwm txheej, thiab yam khoom uas tshwm sim nyob rau lub neej hauv pawg ntseeg uas muaj lub ntsiab xeeb txawm ua rau muaj kev tab kaum thiab kev cuam tshuam. Qhov ib ntawm tej teeb meem no yog thaum sib qhia qhov tseeb pheej tham dhau ntawm lub ncauj lus mus lawm tas li. Yuav txiav txim rau qhov tham dhau ntawm lub ncauj lus mus thaum sib qhia qhov tseeb ntawd li cas? Peb yuav ua li cas thiaj li pom tshab txog cov lus sib qhia uas tham dhau ntawm lub ncauj lus mus lawm? Thaum nej sib qhia qhov tseeb puas yog pheej tham dhau ntawm lub ncauj lus mus lawm tas li? (Yog.) Ua li qhov teeb meem no yuav tsum txog qib twg lub ntsiab xeeb txawm ntawm qhov teeb meem thiaj li suav tias yog kev tab kaum thiab kev cuam tshuam? Yog txhua qhov uas tham dhau ntawm lub ncauj lus mus thaum sib qhia qhov tseeb puav leej raug txiav txim tias yog kev tab kaum thiab kev cuam tshuam, ces tsis yog yav tom ntej tib neeg yuav ntshai hais lus los sis sib qhia nyob rau lub neej hauv pawg ntseeg lod? Thiab yog tib neeg ntshai sib qhia, qhov ntawd tsis yog txhais hais tias lawv pom tsis tshab txog qhov teeb meem ntawd lod? (Yog.) Yog li ntawd, thaum txiav txim kom yog lawm tias thaum sib qhia qhov tseeb hom kev tham dhau ntawm lub ncauj lus mus twg thiaj li ua rau muaj kev tab kaum thiab kev cuam tshuam, ces tib neeg feem coob yuav dim ntawm lawv tej kev txwv los lawm. Vim nej twb tham dhau ntawm lub ncauj lus mus lawm tab txawm yog thaum sib tham dog dig xwb los, ces qhov ua li ntawd thaum sib qhia qhov tseeb mas haj yam nquag muaj tshwm sim. Yog li ntawd, tsim nyog qhia txog qhov no kom meej meej, kom nej thiaj li tsis raug txwv lawm. Tsis txhob cia kev ntshai tsam tham dhau ntawm lub ncauj lus mus thiab ua rau muaj kev tab kaum thiab kev cuam tshuam es txwv koj kom tsis txhob hais lus thiab ua rau koj tsis kam qhia tab txawm yog koj muaj kev paub los xij, los sis—thaum koj xav sib qhia ntawd—es yuam kom koj xub xav tias: “Yam uas kuv xav hais no puas muaj feem xyuam txog lub ntsiab lus? Nws puas dhau ntawm lub ncauj lus mus lawm? Kuv yuav tsum sau thiab npaj kuv tej kev xav ua ntej hais lus, thiab tom qab ntawd ua raws li qhov tau npaj ntawd kom kuv thiaj li tsis tham dhau ntawm lub ncauj lus mus, txawm yuav muaj dab tsi tshwm sim los xij. Yog kuv tham dhau ntawm lub ncauj lus mus lawm, qhov ntawd yuav tsis muaj txiaj ntsim rau leej twg thiab yuav nkim lub sij hawm muaj nqis ntawm kev sib txoos ua ke, cuam tshuam rau cov kwv tij thiab cov muam txoj kev to taub qhov tseeb. Thiab yog hnyav mas, haj tseem tab kaum thiab cuam tshuam rau lub neej hauv pawg ntseeg thiab.” Yog li yuav tsum saib qhov teeb meem ntawm kev tham dhau ntawm lub ncauj lus mus li cas? Ua ntej, yuav tsum xav seb qhov tham dhau ntawm lub ncauj lus mus ntawd puas muaj txiaj ntsim rau cov kwv tij thiab cov muam, thiab tom qab ntawd yuav tsum pom kom meej tias qhov tham dhau ntawm lub ncauj lus mus ntawd muaj qhov tshwm sim dab tsi los rau lub neej hauv pawg ntseeg. Ua li no, thiaj li pom meej tias qhov tham dhau ntawm lub ncauj lus mus ntawd tsis yog ib qho teeb meem me me; yog nyob rau hauv cov xwm txheej uas hnyav, mas haj tseem ua rau muaj kev tab kaum thiab kev cuam tshuam rau lub neej hauv pawg ntseeg thiab pawg ntseeg tes hauj lwm thiab. Muab hais tias, nyob rau ntawm ib lub ncauj lus twg, koj nrhiav ib nqe Vajtswv cov lus los sib qhia txog koj txoj kev paub thiab kev to taub; los sis nyob rau ntawm ib lub ncauj lus twg, koj sib qhia txog txoj kev paub uas koj tau txais, tej qhov tseeb uas koj to taub, thiab Vajtswv tej kev npaj siab uas koj to taub los ntawm ib yam dab tsi uas koj tau ntsib tau pom; los sis muab hais tias koj txoj kev sib qhia txog ib lub ncauj lus twg mas ntev me ntsis, thiab koj qhia tau tsis meej npaum li cas, koj pheej hais cov lus rov qab ob peb zaug—nyob rau hauv cov xwm txheej no, puas yog koj tham dhau ntawm lub ncauj lus mus lawm? Tej no puav leej tsis suav tias yog tham dhau ntawm lub ncauj lus mus. Yog li qhov tham dhau ntawm lub ncauj lus mus yog dab tsi? Qhov tham dhau ntawm lub ncauj lus mus ntawd yog thaum yam uas koj hais ntawd tsis muaj los sis tsis tshua muaj feem xyuam txog lub ncauj lus ntawm qhov kev sib qhia, thaum qhov ntawd tsuas yog kev tham txog tej yam sab nraud xwb, thiab tsis muaj txiaj ntsim rau tib neeg ib qho li. Qhov ntawd yog qhov tham dhau ntawm lub ncauj lus mus tag nrho. Tam sim no, cia peb los tham txog tias qhov ua rau muaj kev tab kaum thiab kev cuam tshuam yog dab tsi. Nyob hauv qhov xwm txheej ntawm kev tham dhau ntawm lub ncauj lus mus thaum sib qhia qhov tseeb ntawd, hom lus thiab cwj pwm twg uas suav tias yog kev tab kaum thiab kev cuam tshuam? Lub ntsiab tseeb ntawm qhov teeb meem nyob ntawm no yog dab tsi? Qhov tham dhau ntawm lub ncauj lus mus lawm no ua rau muaj kev tab kaum thiab kev cuam tshuam raws li lub ntsiab xeeb txawm li cas? Qhov no tsis tsim nyog sib qhia lod? Thaum qhia txog qhov no lawm, tsis yog nej yuav to taub tias qhov tham dhau ntawm lub ncauj lus mus txhais li cas lawm lod? (Yog.) Yog li ntawd nej teb qhov lus nug no. (Thaum ib tug neeg twg txoj kev sib qhia yog hais txog tej ncauj lus uas tsis muaj feem xyuam txog qhov tseeb—piv txwv li, kev tham pem dog dig thiab kev tham txog tsev neeg tej xwm txheej, thiab kev sib tham txog tej yam uas muaj feem xyuam txog tej kev ntiaj teb uas cuam tshuam tib neeg lub siab, tsis ua kom lawv nyob ntsiag to rau ntawm Vajtswv lub xub ntiag thiab ua tib zoo xav txog Nws cov lus—txoj kev sib qhia ntawd tau dhau ntawm lub ncauj lus mus lawm.) Qhov ntawd hais txog pes tsawg lub ntsiab tseem ceeb? (Ib qho yog cov ncauj lus uas tsis muaj feem xyuam txog qhov tseeb.) Qhov no yog ib lub ntsiab uas tseem ceeb heev: qhov tsis muaj feem xyuam txog qhov tseeb. Ib qho ces yog kev tham pem dog dig thiab kev tham txog tsev neeg tej xwm txheej. Lwm qhov ces yog kev hais txog txoj kab lis kev cai qub, txog tib neeg txoj kev xav txog kev ua zoo, thiab txog tej yam uas tib neeg xav tias muaj nuj nqis cuag nkaus li tej ntawd yog qhov tseeb. Qhov no yog ib qho teeb meem ntawm kev nkag siab uas tsis tseeb; tag nrho tej no tsis muaj feem xyuam txog qhov tseeb li. Piv txwv li, Vajtswv cov lus hais tias, “Cov hluas yuav tsum tsis txhob tsis muaj kev cia siab.” Ib tug neeg twg qhia tias, “Txij thaum ub los mas, cov neeg tshaj lij yeej tau tshwm sim los thaum lawv tseem hluas,” los sis “Lub hnub nyoog yeej txwv tsis tau lub zeem muag li.” Los sis, thaum koj tham txog yuav hwm Vajtswv li cas, lawv qhia tias: “Muaj ib tug vajtswv nyob ze saum koj taub hau”; “Thaum tib neeg ua, Lub Ntuj yeej saib ntsoov”; “Yog koj muaj ib lub siab txawj xav uas dawb huv, koj tsis tas yuav ntshai tsam dab los khob koj lub qhov rooj”; los sis “Yus lub siab yuav tsum tig mus rau txoj kev ua zoo.” Qhov no tsis yog tham dhau ntawm lub ncauj lus mus lawm lod? Cov lus no tsis yog tsis muaj feem xyuam txog qhov tseeb lod? Cov lus no yog dab tsi? (Ntxwgnyoog tej tswv yim.) Tej lus ntawd yog ntxwgnyoog tej tswv yim, thiab kuj yog txoj kab lis kev cai qub ntawm ib haiv neeg twg thiab. Thawj qhov kev qhia tshwm uas pom tau meej ntawm qhov tham dhau ntawm lub ncauj lus mus yog thaum lub ncauj lus uas hais ntawd tsis muaj feem xyuam txog qhov tseeb; qhov ntawd yog thaum ib tug neeg twg hais tej tswv yim thiab tej kev xav uas cov ib txwm tsis ntseeg xav tias yog thiab siab, thiab yuam muab tej ntawd txuas rau qhov tseeb. Qhov ntawd yog tham dhau ntawm lub ncauj lus mus lawm. Lub ncauj lus uas tsis muaj feem xyuam txog qhov tseeb—qhov kev qhia tshwm uas pom tau meej no tsim nyog yooj yim to taub. Qhov kev qhia tshwm uas pom tau meej ob yog thaum cov ncauj lus uas tham ntawd cuam tshuam tib neeg lub siab. Thaum sib txoos ua ke mas tsis sib qhia txog qhov tseeb, thiab yam uas sib qhia ntawd yog kev paub, kev kawm, tswv yim, thiab kev cai lij choj, los sis tej xwm txheej hauv lub zej zog thiab ntau yam kev sib raug zoo ntawm tib neeg uas ntxhov thiab nyuaj, ces qhov ntawd cuam tshuam tib neeg lub siab. Qhov no yog thaum ib tug neeg twg qhia txog tej teeb meem uas tsis cuam tshuam txog qhov tseeb hlo li thiab tsis muaj dab tsi cuam tshuam rau qhov tseeb ntawd kiag li cuag nkaus li tej ntawd yog qhov tseeb. Qhov no ua rau lwm tus lub siab ntxhov, thiab thaum lawv mloog, lawv txoj kev xav hloov los ntawm kev sib qhia qhov tseeb mus rau tej xwm txheej sab nraud. Cov tib neeg no muaj kev coj li cas thaum ntawd? Lawv pib tsom ntsoov rau kev paub thiab kev kawm. Kev cuam tshuam tib neeg lub siab ntawd raws li lub ntsiab xeeb txawm mas yog ib yam uas hnyav. Qhov kev qhia tshwm uas pom tau meej peb yog thaum cov ncauj lus uas tham ntawd ua rau tib neeg to taub Vajtswv yuam kev, uas ua rau tsis pom meej txog tej zeem muag. Ib txhia tib neeg lawv tus kheej tsis tshua paub meej txog qhov tseeb, tiam sis lawv xav ua txuj tias lawv paub meej thiab to taub. Yog li ntawd, thaum lawv sib qhia qhov tseeb, lawv muab qee cov kev qhuab qhia uas tob ntxiv rau hauv yam uas lawv hais, muab cov kev qhuab qhia ntawm sab kab lis kev cai ntseeg uas lawv tau hnov thiab to taub ntawd sib xyaw ua ke, hais lus yam tsis muaj hauv paus hauv ntsis thiab hais lus tshaj qhov muaj tiag. Tom qab mloog lawv hais lawm, tib neeg pom tsis meej txog tej zeem muag; lawv tsis paub tias tus neeg ntawd xav tham txog qhov tseeb twg tiag. Lawv yim mloog, lawv yim feeb tsis meej thiab lawv txoj kev ntseeg Vajtswv yim tsawg zuj zus, thiab lawv haj tseem muaj kev to taub Vajtswv yuam kev thiab. Tib neeg tsis yog tsis to taub qhov tseeb tom qab mloog cov lus no xwb—lawv lub siab haj tseem feeb tsis meej lawm. Qhov ntawd muaj ib qho tshwm sim los uas tsis zoo. Qhov no yog qhov uas los ntawm qhov tham dhau ntawm lub ncauj lus los.

Thaum sib qhia txog qhov tseeb es tham dhau ntawm lub ncauj lus ntawd mus lawm mas tshwm sim muaj ob peb yam kev qhia tshwm, thiab txhua qhov ntawm ob peb yam kev qhia tshwm no raws li lub ntsiab xeeb txawm mas ua rau muaj ib qho kev cuam tshuam rau tib neeg txoj kev nkag mus rau hauv lub neej txoj sia. Thaum tib neeg mloog txoj kev sib qhia zoo li no, lawv tsis yog tsis muaj ib txoj kev to taub meej txog qhov tseeb thiab ib txoj kev xyaum ua xwb, tiam sis ua rau lawv lub siab feeb tsis meej lawm, lawv haj yam tsis pom txog qhov tseeb ntawd meej, thiab lawv kuj muaj qee qhov kev to taub yuam kev thiab kev to taub uas cuav thiab. Qhov no yog qhov kev cuam tshuam thiab qhov tshwm sim los tsis zoo rau tib neeg ntawm qhov tham dhau ntawm lub ncauj lus mus thaum sib qhia qhov tseeb. Txhua qhov ntawm peb qho kev qhia tshwm uas pom tau meej no mas raws li lub ntsiab xeeb txawm mas hnyav heev. Piv txwv li, thawj qhov kev qhia tshwm uas pom tau meej yog “lub ncauj lus uas hais ntawd tsis muaj feem xyuam txog qhov tseeb.” Hais tej yam uas zoo li yog tiam sis tsis yog, thiab qhov coj tej yam uas yog ntxwgnyoog li, xws li tib neeg txoj kev paub, lub tswv yim, tej kev xav, txoj kab lis kev cai qub, thiab paj lug uas nto moo ntawm cov neeg nto moo, los tshaj tawm thiab soj ntsuam hauv pawg ntseeg, siv lub cib fim sib qhia qhov tseeb los coj tib neeg mus yuam kev, ua rau muaj kev cuam tshuam rau lawv. Qhov no mas muaj lub ntsiab xeeb txawm uas hnyav heev. Yog ib tug neeg uas muaj kev paub cais mloog txoj kev sib qhia zoo li no, lawv yuav hais tias, “Yam uas koj hais ntawd tsis yog; qhov ntawd tsis yog qhov tseeb. Yam uas koj hais txog ntawd yog txoj kev coj uas ua zoo thiab cov paj lug uas cov ib txwm tsis ntseeg xav tias zoo. Tej ntawd yog cov yeej ib txwm tsis ntseeg ntawd tej tswv yim txog qhov yuav coj lawv tus kheej thiab ua neej nyob hauv ntiaj teb li cas, uas yeej tsis muaj feem cuam tshuam rau qhov tseeb kiag li.” Txawm li cas los xij, ib txhia tib neeg tsis muaj kev paub cais, thiab thaum lawv hnov tej lus cuav no lawm, lawv haj tseem ua raws li tej ntawd thiab, thiab ua raws li tej ntawd yam li tej ntawd yog qhov tseeb. Yog cov thawj coj thiab cov neeg ua hauj lwm tsis cheem thiab txwv qhov no nyob rau tej lub sij hawm zoo li no, yog lawv tsis sib qhia txog qhov ntawd thiab soj ntsuam qhov ntawd kom tib neeg tau txais kev paub cais, ces qee tus neeg Vajtswv xaiv tseg tej zaum yuav raug coj mus yuam kev tau. Tej qhov tshwm sim los ntawm qhov raug coj mus yuam kev ntawd yog dab tsi? Lawv yuav ntseeg tias tej yam uas cov neeg nto moo ntawm lub ntiaj teb uas ib txwm tsis ntseeg tshaj tawm, uas tib neeg xav tias yog, zoo, thiab tob, xws li cov paj lug ntawm cov neeg dog dig thiab cov neeg nto moo tej lus qhia thiab tej kev xav txog kev coj tus kheej, puav leej yog thiab tias tej ntawd yog qhov tseeb, ib yam li Vajtswv cov lus yog qhov tseeb thiab. Lawv tsis raug coj mus yuam kev lawm lod? Saib sab nraud mas, zoo li lawv tab tom sib qhia qhov tseeb, tiam sis qhov tseeb tiag, qhov ntawd sib xyaw nrog tib neeg ib txhia tswv yim thiab Ntxwgnyoog tej tswv yim uas coj mus yuam kev, thiab qhov no pom tau meej tias ua rau muaj kev cuam tshuam rau tib neeg. Yog ib tug neeg twg coj tib neeg mus yuam kev los ntawm qhov muab Ntxwgnyoog lub tswv yim thiab tib neeg txoj kev paub coj los ua qhov tseeb, ces cov thawj coj thiab cov neeg ua hauj lwm yuav tsum nthuav tawm thiab soj ntsuam qhov teeb meem ntawd, kom cov kwv tij thiab cov muam thiaj li muaj kev paub cais thiab to taub tias qhov tseeb tiag tiag yog dab tsi. Qhov no yog tes hauj lwm uas cov thawj coj thiab cov neeg ua hauj lwm yuav tsum ua. Qhov kev qhia tshwm uas pom tau meej ob yog “cuam tshuam tib neeg lub siab.” Ib txhia tib neeg pheej siv lub hwv tsam qhia qhov tseeb los hais txog tej yam uas zoo li yog tiam sis ho tsis yog, txhawb nqa tib neeg txoj kev paub, kev kawm, kev txawj, thiab peev xwm. Lawv kuj hais txog cov qauv ntawm txoj kev ua zoo, txoj kab lis kev cai qub, thiab ntau yam ntxiv thiab. Lawv muab tej yam uas los ntawm Ntxwgnyoog los no coj los ua tej yam uas zoo, ua qhov tseeb, es coj tib neeg mus rau txoj kev ntseeg yuam kev tias tej no yog tej uas yuav tsum tau txhawb nqa, tshaj tawm thiab qhuas nyob rau hauv pawg ntseeg, kom txhua tus ua raws, ua rau muaj ib qho kev nce ntxiv ntawm tej lus cuav thiab tej kev qhuab qhia uas yuam kev, uas zoo li yog tiam sis ho tsis yog, nyob rau hauv tib neeg lub siab, thiab ua rau tib neeg lub siab ntxhov thiab ua rau lawv tsis paub yuav tig qhov twg, tsis paub tias qhov tseeb tiag tiag yog dab tsi, los sis thaum ntsib tej teeb meem es yuav xyaum ua raws kom yog li cas, los sis taug txoj kev twg thiaj li yog. Qhov no ua rau lawv lub siab poob mus rau hauv txoj kev tsaus ntuj nti. Qhov no yog qhov ua tau los ntawm qhov tshaj tawm tej kev qhuab qhia uas yuam kev thiab tej lus cuav los coj kom tib neeg mus yuam kev. Hais txog qhov kev qhia tshwm uas pom tau meej peb, ces peb yuav tsis sib qhia kom ntxaws ntxaws lawm. Muab hais kom luv luv tias, cov lus uas tham dhau ntawm lub ncauj lus mus ntawd muaj qee qhov muaj feem xyuam txog kev paub, qee qhov muaj feem xyuam txog tib neeg tej kev xav phem, thiab qee qhov muaj feem xyuam txog cov cwj pwm uas zoo ntawm sab kev coj ncaj, thiab lwm yam ntxiv. Tiam sis tsis muaj ib qho ntawm tej no muaj feem xyuam txog qhov tseeb—tag nrho tej no cov nyom nrog qhov tseeb. Yog li ntawd, thaum tej teeb meem no tshwm sim, cov thawj coj thiab cov neeg ua hauj lwm yuav tsum cheem thiab txwv tej teeb meem ntawd. Yog tom qab mloog ib tug neeg twg sib qhia lawm, tib neeg tsis yog tsis muaj kev pom meej txog qhov tseeb hauv lub siab xwb, tiam sis tseem raug cuam tshuam thiab, lawv lub siab uas ib txwm pom meej ntawd ua rau feeb tsis meej lawm, tsis paub xyov yuav xyaum ua raws kom tsim nyog li cas, ces txoj kev sib qhia ntawm tus tib neeg zoo li no yuav tsum raug cheem thiab txwv. Piv txwv li, nyob hauv lawv txoj kev sib qhia txog qhov tseeb uas ntsig txog txoj kev ua neeg uas ib txwm muaj, ib txhia tib neeg hais tias: “Yam uas Vajtswv nyiam tshaj plaws nyob hauv txoj kev ua neeg uas ib txwm muaj ntawd mas yog tib neeg muaj peev xwm tiv taus kev txom nyem, tsis txhob ntshaw kev xyiv fab los sis kev tau zoo ntawm lub cev nqaij daim tawv, tso tej zaub mov qab tseg, tsis txhob xyiv fab rau yam uas yus tsim nyog tau xyiv fab los sis yam uas Vajtswv tau npaj tseg, es muaj peev xwm ntxeev siab tawm tsam tej kev ntshaw ntawm lub cev nqaij daim tawv no tau, txwv txhua yam kev ntshaw ntawm sab cev nqaij daim tawv tau, kov yeej yus lub cev, thiab tsis txhob cia lub cev nqaij daim tawv ua ywj siab. Yog li ntawd, thaum hmo ntuj thaum koj xav pw, koj yuav tsum ntxeev siab tawm tsam lub cev nqaij daim tawv. Yog koj ua tsis tau, koj yuav tsum nrhiav hau kev los tswj. Koj yim muaj kev txiav txim siab ntxeev siab tawm tsam lub cev nqaij daim tawv ntau npaum li cas, thiab koj yim ntxeev siab tawm tsam lub cev nqaij daim tawv ntau npaum li cas, yim ua pov thawj qhia tias koj muaj tej kev qhia tshwm uas pom tau meej ntawm kev xyaum ua raws qhov tseeb thiab kev ua siab ncaj rau Vajtswv ntau npaum li ntawd. Kuv xav tias qhov kev qhia tshwm uas pom tau meej tshaj plaws ntawm txoj kev ua neeg uas ib txwm muaj—thiab yog qhov uas yuav tsum tau txhawb nqa tshaj plaws—yog kev kov kom yeej yus lub cev, kev ntxeev siab tawm tsam tej kev ntshaw ntawm sab cev nqaij daim tawv, tsis ntshaw kev tau zoo ntawm lub cev nqaij daim tawv, thiab nyob hauv sab kev xyiv fab rau tej khoom yuav tsum tau txuag siv. Koj yim txuag siv ntau npaum li cas, cov koob hmoov uas khaws tau hauv lub nceeg vaj saum ntuj ceeb tsheej yim loj npaum li ntawd.” Puas zoo li cov lus no mas zoo kawg li? Puas muaj ib qho yuam kev nyob hauv cov lus ntawd? Yog ntsuas raws li tib neeg lub laj thawj, tej tswv yim, thiab tej kev xav phem mas, cov lus no yuav raug lees txais tau nyob rau hauv txhua pab pawg ntawm sab kab lis kev cai ntseeg los sis pab pawg hauv lub zej zog; txhua tus yuav tsa ntiv tes xoo rau lawv los qhia txoj kev pom zoo thiab hais tias yam uas lawv hais ntawd yog lawm, tias lawv txoj kev ntseeg ntawd zoo thiab yog. Tsis muaj ib txhia tib neeg nyob rau hauv pawg ntseeg uas ntseeg qhov no ib yam nkaus lod? Yog ntsuas raws li tib neeg tej kev xav phem, tag nrho cov lus no puav leej yog—cov lus ntawd yog rau qhov twg? Tej zaum ib txhia yuav hais tias, “Vajtswv yeej nyiam cov tib neeg zoo li ntawd. Qhov ntawd kuj yog lub neej uas Nws txuag thiab.” Qhov no tsis yog tib neeg txoj kev xav phem lod? Tib neeg muaj hom kev xav phem no, yog li ntawd yog ib tug neeg twg yuav qhia zoo li no tiag, qhov ntawd tsis yog yeej ua raws li feem coob tej kev xav phem lawm lod? (Yog.) Thaum tib neeg lees txais hom kev xav phem no, tsis yog lawv pom zoo nrog tus neeg ntawd txoj kev xam pom lod? Thaum koj pom zoo nrog thiab lees txais tus neeg ntawd txoj kev xam pom lawm, tsis yog koj pom zoo nrog lawv tej kev ua lawm lod? Tsis yog koj yuav sim xyaum ua raws li lawv lod? Thiab thaum koj muaj peev xwm ua tau lawm, ces thaum txoj kev uas koj taug, koj txoj kev xyaum ua yuav tsis ruaj khov lawm lod? Qhov ruaj khov ntawd txhais li cas? Qhov ntawd txhais hais tias koj tau txiav txim siab tias koj yuav ua thiab xyaum ua raws li ntawd. Vim koj ntseeg hauv koj lub siab tias Vajtswv hlub cov tib neeg zoo li ntawd thiab nyiam koj ua li no, tias tsuas yog ua li no xwb mas koj thiaj li tuaj yeem yog ib tug neeg uas Vajtswv lees txais, yog ib tug neeg uas tuaj yeem nkag mus rau hauv lub nceeg vaj saum ntuj ceeb tsheej thiab tau koob hmoov nyob saum ntuj ceeb tsheej, uas muaj ib qho chaw kawg uas zoo, ces koj thiaj li txiav txim siab ua li no. Thaum koj txiav txim siab ua li no, koj lub siab tsis yog twb raug cuam tshuam thiab raug coj mus yuam kev los ntawm hom kev xav thiab kev xam pom no lawm lod? Qhov no yog ib qho tseeb; qhov no yog qhov tshwm sim los. Koj lub siab raug cuam tshuam lawm, thiab koj twb tsis paub txog li. Tseem muaj lwm qhov teeb meem nyob ntawm no thiab: Thaum koj lub siab raug ua kom loog thiab raug cuam tshuam los ntawm tej kev xav thiab kev xam pom zoo li no lawm, tsis yog koj yuav pom tsis meej txog Vajtswv tej kev npaj siab thiab tej kev cheem tsum lawm lod? Tsis yog koj yuav muaj kev to taub Vajtswv yuam kev, thiab nyob deb ntawm Nws lawm lod? Qhov no tsis qhia tias koj pom tsis meej txog tej zeem muag lod? Ua tib zoo xav txog qhov ntawd: Thaum koj raug coj yuam kev los ntawm qee qhov kev xav los sis kev xam pom uas tib neeg pom tias yog tiam sis yuam kev, koj lub siab tsis raug cuam tshuam lawm lod? Thaum ntawd tej zeem muag nyob hauv koj lub siab puas tseem pom tau meej lawm? (Tsis tau lawm.) Yog li, koj txoj kev paub txog Vajtswv puas yog los sis qhov ntawd yog ib qho kev to taub yuam kev? Pom tau meej tias, qhov ntawd yog ib qho kev to taub yuam kev. Yog li, yam uas koj to taub thiab yam uas koj ntseeg tias yog ntawd puas yog qhov tseeb tiag tiag? Qhov ntawd tsis yog lawm—qhov ntawd cov nyom Vajtswv cov lus, qhov tseeb, tawm tsam tej no lawm. Yog li ntawd, hom kev tham dhau ntawm lub ncauj lus mus thaum sib qhia qhov tseeb no yeej ua rau muaj kev cuam tshuam rau tib neeg lub siab tiag. Vim tias qhov tham dhau ntawm lub ncauj lus mus no ua rau muaj kev cuam tshuam loj npaum li ntawd rau tib neeg lub siab, puas tuaj yeem hais tau tias qhov ntawd ua rau muaj kev tab kaum Vajtswv tes hauj lwm? Qhov ntawd coj tib neeg mus rau hauv tej kev xav phem thiab mus rau hauv Ntxwgnyoog lub tswv yim thiab txoj kev xav lawm, yog li ntawd qhov ntawd tsis rub tib neeg tawm ntawm Vajtswv lub xub ntiag mus lod? Thaum tib neeg to taub Vajtswv yuam kev, thaum lawv tsis to taub Nws tej kev npaj siab thiab xyaum ua tsis tau raws li Nws tej kev npaj siab thiab tej kev cheem tsum, tiam sis xyaum ua raws li Ntxwgnyoog txoj kev xav thiab tib neeg tej kev xav phem, lawv yuav nyob ze Vajtswv dua los sis nyob deb ntawm Nws dua? (Lawv yuav nyob deb ntawm Nws dua.) Lawv yuav nyob deb ntawm Nws dua. Yog li, puas tsim nyog txwv txoj kev sib qhia txog hom ncauj lus no thaum lub sij hawm sib txoos ua ke? (Tsim nyog.) Vim lub ntsiab xeeb txawm ntawm hom kev tham dhau ntawm lub ncauj lus mus no yog kev cuam tshuam rau tib neeg, yog li ntawd yuav tsum tau txwv tiag. Yog tsis cheem thiab txwv qhov no, yuav muaj ib txhia tib neeg ruam feeb tsis meej uas lub peev xwm tsis zoo thiab loog—tshwj xeeb tshaj yog cov neeg tsis muaj kev to taub ntawm sab ntsujplig—yuav xyaum raws thiab raws tus neeg uas tham dhau ntawm lub ncauj lus mus ntawd qab. Lub sij hawm no cov thawj coj thiab cov neeg ua hauj lwm yuav tsum sawv los cheem qhov ntawd kom ncav sij hawm. Lawv yuav tsum tsis txhob cia tus neeg ntawd pheej tham dhau ntawm lub ncauj lus mus ntxiv; lawv yuav tsum tsis txhob cia lub ncauj lus ntawm tus neeg ntawd txoj kev sib qhia los coj tib neeg mus yuam kev ntau ntxiv thiab cuam tshuam tib neeg lub siab ntau ntxiv. Qhov no yog ib lub luag hauj lwm uas cov thawj coj thiab cov neeg ua hauj lwm yuav tsum ua kom tiav, yog ib txoj hauj lwm uas lawv yuav tsum ua.

Peb txoj kev sib qhia txog lub ntsiab lus uas tham dhau ntawm lub ncauj lus mus thaum sib qhia qhov tseeb ntawd muaj li no xwb. Txuas ntxiv no, peb yuav muab zuaj zog los hais txog seb qhov ib tug yuav tsum tham dhau ntawm lub ncauj lus mus deb npaum li cas hauv txoj kev sib qhia txog qhov tseeb thiab cov ncauj lus twg uas qhia es lub ntsiab xeeb txawm thiaj li tsim nyog suav tias yog kev tab kaum thiab kev cuam tshuam. Qee hom kev tham dhau ntawm lub ncauj lus mus mas pom meej: Thaum ib tug neeg twg tham dhau ntawm lub ncauj lus mus tag nrho lawm, thaum lawv pib tham pem dog dig los sis tham txog tsev neeg tej xwm txheej, qhov ntawd yooj yim paub cais. Piv txwv li, thaum txhua tus sib qhia txog qhov seb yuav ua lawv tes dej num li cas ntawd, tej zaum ib tug neeg twg yuav qhia txog lawv qhov keeb kwm uas “muaj koob meej” ntawd, tham txog tej yam zoo uas lawv tau ua los sis lawv tau pab cov kwv tij thiab cov muam li cas, thiab lwm yam ntxiv. Tsis muaj leej twg xav mloog qhov no, thiab lawv yim mloog ces lawv yim tsis nyiam kiag li, mus txog thaum lawv tsis quav ntsej tus neeg ntawd lawm. Tus neeg ntawd yuav pom tias txaj muag. Tsuav feem coob muaj peev xwm paub cais tus neeg no xwb, ces tus neeg no yuav tsis tham ntxiv lawm. Rau hom kev tham dhau ntawm lub ncauj lus mus no tsis tas to taub qhov tseeb ntau los yeej paub cais tau. Kev tham pem dog dig, kev tham txog tsev neeg tej xwm txheej, kev qhuas yus tus kheej, kev khav txog yus tus kheej, thiab kev siv lub hwv tsam ntawm lub ncauj lus ntawm txoj kev sib qhia los hais txog yus qhov keeb kwm uas “muaj koob meej” ntawd—hom kev tham dhau ntawm lub ncauj lus mus no mas yooj yim paub cais. Qhov no feem ntau tsis ua rau muaj kev cuam tshuam ntau npaum li cas, vim tib neeg feem coob tsis nyiam tej yam zoo li no kiag li thiab tsis txaus siab mloog tej ntawd, thiab paub tias lawv tab tom khav thiab tsis yog sib qhia qhov tseeb, tias lawv tau tham dhau ntawm lub ncauj lus mus lawm. Tej zaum pab pawg ntawd yuav tsis ua rau lawv txaj muag kiag thaum lawv pib hais lus, tiam sis thaum lawv hais ntev zuj zus, tib neeg tsis nyiam kiag li thiab tsis txaus siab mloog ntxiv lawm, thiab xav tias yuav zoo dua yog lawv nyeem Vajtswv cov lus ntawm lawv tus kheej. Yog tus neeg ntawd tseem hais ntxiv, lawv yuav sawv thiab tawm mus. Thaum tus neeg ntawd pom tias tej xwm txheej tau hloov lawm thiab tias lawv tab tom ua rau lawv tus kheej txaj muag, lawv yuav tsis hais lus ntxiv lawm. Hom kev tham dhau ntawm lub ncauj lus mus twg uas twb muaj kev cuam tshuam tsis zoo rau tib neeg lawm, tiam sis tib neeg tseem pom tsis tshab tias yog ib yam uas tsis zoo, thiab tseem muab cov ntsiab lus uas dhau ntawm lub ncauj lus ntawd ua qhov tseeb thiab ua tib zoo mloog? Hom kev tham dhau ntawm lub ncauj lus mus no ua tau rau muaj kev cuam tshuam rau tib neeg, thiab yus yuav tsum muaj kev paub cais txog tej xwm txheej zoo li no. Muab ib qho piv txwv txog hom kev tham dhau ntawm lub ncauj lus mus no. (Thaum ib tug neeg twg tsis tig xav txog lawv tus kheej tom qab raug ntuas lawm, tiam sis tsuas tsom ntsoov hais qhov yog thiab qhov tsis yog ntawm qhov teeb meem ntawd xwb, qhov ntawd ua rau txhua tus lub siab paub tsis tseeb. Qhov no tsis yog ua rau tib neeg tsis tsim muaj kev paub cais xwb; tiam sis tib neeg xav tias yam uas tus neeg no hais ntawd mas mus raws li qhov tseeb, thiab tias lawv hais yog lawm. Qhov no ua rau txhua tus nyob rau lawv sab.) Lawv ua txuj siv lub hwv tsam sib qhia txog yuav lees txais kev raug ntuas li cas, lawv tiv thaiv thiab qhia tias lawv tsis txhaum, ua rau tib neeg xav tias lawv raug ntuas yam tsis ncaj ncees, ua kom tib neeg nyob rau lawv sab thiab khuv leej lawv, thiab ntxiv ntawd, ua rau tib neeg qhuas lawv tias lawv muaj peev xwm zwm rau thiab lees txais kev raug ntuas nyob hauv cov xwm txheej zoo li no. Qhov no yog coj tib neeg mus yuam kev; yog ib qho txhob txwm ua uas muaj kev npaj siab tham tawm ntawm lub ncauj lus mus, uas tsis yog tsuas ua rau cov neeg mloog tsis muaj peev xwm zwm rau thaum ntsib kev raug ntuas, thiab tsis muaj peev xwm lees txais kev raug ntuas thiab tig xav txog thiab paub lawv tus kheej xwb, tiam sis tseem ua rau lawv thaiv thiab tawm tsam kev raug ntuas. Qhov kev sib qhia zoo li no tsis pab tib neeg to taub lub ntsiab tseem ceeb ntawm kev raug ntuas, tib neeg yuav tsum coj tus cwj pwm uas yog li cas rau thaum ntsib kev raug ntuas, yuav lees txais qhov ntawd li cas, thiab yuav xyaum ua raws li cas. Tiam sis, qhov ntawd coj tib neeg mus xaiv lwm txoj kev los daws kev raug ntuas, ib txoj kev uas tsis yog kev xyaum ua raws qhov tseeb thiab tsis yog kev ua raws li qhov tseeb tej hauv paus ntsiab lus, tiam sis yog ib txoj kev uas ua rau tib neeg haj yam txawj dag ntxias ntxiv. Txoj kev sib qhia zoo li no coj tib neeg mus yuam kev lawm. Qhov tham dhau ntawm lub ncauj lus mus thaum sib qhia qhov tseeb ntawd yog ib hom teeb meem uas tshwm sim nyob rau lub neej hauv pawg ntseeg. Yog hom teeb meem no mus txog theem ntawm kev tab kaum thiab kev cuam tshuam, ces cov thawj coj thiab cov neeg ua hauj lwm yuav tsum sawv los cheem thiab txwv, sib qhia thiab soj ntsuam, kom feem coob muaj kev paub cais, kawm paub los ntawm qhov kev ntsib kev pom ntawd, thiab kawm paub ib qho.

II. Hais Cov Lus thiab Cov Kev Qhuab Qhia Los Coj Tib Neeg Mus Yuam Kev thiab Ua Rau Lawv Qhuas

Qhov kev qhia tshwm uas pom tau meej ob ntawm ntau hom tib neeg, xwm txheej, thiab yam khoom uas ua rau muaj kev tab kaum thiab kev cuam tshuam nyob rau lub neej hauv pawg ntseeg uas yog thaum tib neeg hais cov lus thiab cov kev qhuab qhia los coj tib neeg mus yuam kev thiab kom lawv qhuas. Raws li ib txwm mas, tej zaum tib neeg feem coob yuav hais qee cov lus thiab cov kev qhuab qhia. Tib neeg feem coob yeej tau ua li no lawm. Peb yuav tsum saib qhov ib tug neeg hais cov lus thiab cov kev qhuab qhia uas ib txwm muaj ntawd tias yog vim tus tib neeg ntawd lub siab ntseeg me thiab tsis to taub qhov tseeb. Tsuav lawv tsis siv sij hawm ntau dhau, tsis txhob txwm ua, tsis txeeb hais lus ib leeg xwb, tsis yog kom txhua tus cia lawv hais raws li lawv lub siab nyiam, tsis cheem tsum kom txhua tus mloog lawv, thiab tsis coj lwm tus mus yuam kev thiab sim ua kom lwm tus qhuas lawv, ces qhov ntawd tsis suav tias yog ib qho kev tab kaum los sis kev cuam tshuam. Vim tib neeg feem coob tsis muaj qhov tseeb qhov muaj tiag, qhov hais cov lus thiab cov kev qhuab qhia ntawd yog ib qho uas nquag pom heev. Qhov hais yam tsis tshua tsim nyog me ntsis ntawd mas, yog yam uas zam txim tau; yeej zam tau thiab tsis tas yuav muab xam tias hnyav heev. Txawm li cas los xij, muaj ib qho uas tsis xam nrog, uas yog thaum tus neeg uas hais cov lus thiab cov kev qhuab qhia ntawd txhob txwm ua. Yam uas lawv txhob txwm ua ntawd yog dab tsi? Qhov ntawd tsis yog txhob txwm hais cov lus thiab cov kev qhuab qhia, vim lawv kuj tsis muaj qhov tseeb qhov muaj tiag thiab. Lawv tej kev ua, xws li hais cov lus thiab cov kev qhuab qhia, qw cov lus qw, thiab tham txog tej tswv yim, yeej zoo ib yam li lwm tus thiab. Txawm li cas los xij, muaj ib qho mas txawv: Thaum lawv hais cov lus thiab cov kev qhuab qhia, lawv pheej xav kom lwm tus qhuas lawv, thiab muab lawv tus kheej piv rau cov thawj coj thiab cov neeg ua hauj lwm thiab piv rau cov uas caum qhov tseeb. Qhov uas tsis tsim nyog tshaj ntawd mas, txawm lawv yuav hais dab tsi los sis hais li cas los xij, lawv lub hom phiaj yog ntxias tib neeg los rau lawv sab, los coj tib neeg lub siab mus yuam kev, tag nrho yog kom lwm tus qhuas lawv xwb. Lub hom phiaj uas nrhiav kom lwm tus qhuas ntawd yog dab tsi? Lawv ntshaw kom muaj lub meej mom thiab muaj koob meej nyob hauv tib neeg lub siab, kom dhau los ua ib tug neeg uas zoo tshaj plaws los sis ib tug thawj coj nyob rau hauv pab pawg neeg, kom dhau los ua ib tug neeg uas txawv dua los sis tsis yog neeg dog dig, kom dhau los ua ib tug neeg tshwj xeeb, ib tug neeg uas cov lus muaj hwj chim. Qhov xwm txheej no mas txawv ntawm qhov uas nquag pom ntawm tib neeg uas hais cov lus thiab cov kev qhuab qhia thiab suav tias yog ib qho kev tab kaum thiab kev cuam tshuam. Cov tib neeg no txawv ntawm cov uas hais cov lus thiab cov kev qhuab qhia uas ib txwm pom ntawd li cas? Qhov ntawd yog lawv pheej xav hais tas li; yog muaj cib fim ces lawv yeej yuav hais. Tsuav muaj ib qho kev sib txoos ua ke los sis ib pab neeg tuaj sib sau ua ke—tsuav muaj cov neeg mloog xwb—lawv yuav hais, lawv muaj ib txoj kev ntshaw uas muaj zog tshwj xeeb los ua li ntawd. Lawv lub hom phiaj thaum hais ntawd tsis yog los qhia lawv tej kev xav hauv nruab siab, tej uas lawv tau txais, kev ntsib kev pom, kev to taub, los sis kev pom tshab rau cov kwv tij thiab cov muam los txhawb kom tib neeg muaj txoj kev to taub qhov tseeb los sis ib txoj kev xyaum ua raws qhov tseeb. Tiam sis, lawv lub hom phiaj yog siv lub cib fim uas hais cov kev qhuab qhia ntawd los khav lawv tus kheej, kom lwm tus paub tias lawv txawj ntse npaum li cas, los qhia tias lawv muaj tswv yim, muaj kev paub, thiab muaj kev kawm, nyob siab dua cov tib neeg dog dig. Lawv xav kom lwm tus paub tias lawv yog ib tug tib neeg uas muaj peev xwm, tsis yog tus neeg dog dig. Lawv xav kom txhua tus tig mus cuag lawv thiab nug lawv txog txhua yam teeb meem. Txawm muaj teeb meem dab tsi hauv pawg ntseeg los sis muaj kev nyuaj dab tsi uas cov kwv tij thiab cov muam ntsib, lawv xav ua thawj tug neeg uas lwm tus xav txog; lawv xav kom lwm tus ua tsis tau ib yam dab tsi yog tsis muaj lawv, kom lwm tus tsis kam saib xyuas ib yam dab tsi yog tsis muaj lawv, es txhua tus tos lawv cov lus txib. Qhov no yog qhov tshwm sim los uas lawv xav tau. Lawv lub hom phiaj thaum hais cov lus thiab cov kev qhuab qhia yog los ntxias thiab tswj tib neeg. Rau lawv mas, qhov hais cov lus thiab cov kev qhuab qhia tsuas yog ib txoj hau kev, ib txoj kev ua xwb; tsis yog vim lawv tsis to taub qhov tseeb es thiaj li hais cov lus thiab cov kev qhuab qhia, tiam sis los ntawm qhov ua li ntawd, lawv lub hom phiaj yog ua kom tib neeg qhuas lawv hauv siab tuaj, hwm lawv, thiab haj tseem ntshai lawv, es raug lawv txwv thiab tswj. Hom kev hais cov lus thiab cov kev qhuab qhia zoo li no thiaj li suav tias yog ib qho kev tab kaum thiab kev cuam tshuam. Nyob rau lub neej hauv pawg ntseeg, cov tib neeg zoo li no yuav tsum raug txwv, thiab qhov kev coj uas hais cov lus thiab cov kev qhuab qhia no kuj yuav tsum raug cheem thiab, tsis txhob cia ua mus ntxiv yam tsis muaj kev txwv. Tej zaum ib txhia yuav hais tias, “Cov tib neeg zoo li no yuav tsum raug txwv; yog li ntawd puas tseem muab cib fim rau lawv hais lus thiab?” Raws li kev ncaj ncees mas, muab cib fim rau lawv hais lus tau, tiam sis kiag thaum lawv rov qab mus ua lawv tus cwj pwm qub uas khav lawv tus kheej, uas lawv qhov kev ntshaw yuav rov qab tshwm tuaj dua ntawd, yuav tsum txiav lawv cov lus tam sim ntawd, kom lawv thiaj li meej pem thiab txias. Yog lawv pheej khav lawv tus kheej zoo li no, thiab lawv qhov kev xav ua tseem pheej tshwm tuaj tas li, thiab lawv tej kev ntshaw mas nyuaj rau qhov yuav txwv ces yuav tsum ua li cas? Yuav tsum txwv lawv kiag thiab tsis txhob cia lawv hais lus. Yog tsis muaj leej twg xav mloog lawv thaum lawv hais lus, thiab lawv lub suab thiab tus yam ntxwv, thiab qhov pom nyob hauv lawv ob lub qhov muag, thiab lawv tej kev piav tes ua rau txhua tus dhuav mloog thiab dhuav saib, ces qhov ntawd yog ib qho teeb meem uas hnyav. Qhov ntawd mus txog rau theem uas txhua tus tsis nyiam kiag li lawm. Cov tib neeg zoo li no, uas ua ib tug neeg lwj liam nyob rau hauv pawg ntseeg ntawd, tsis tsim nyog nqis saum sam thiaj lod? Txog lub sij hawm uas lawv yuav tsum nqis saum sam thiaj lawm. Qhov ntawd tsis txhais hais tias lawv tau ua dej num txhawb tag lawm lod? Thaum lawv ua dej num txhawb txog qhov kawg kiag lawm yuav tsum ua li cas? Yuav tsum muab lawv tshem tawm mus. Kiag thaum lawv pib hais lus, ces yeej yog cov lus qub qub ntawd xwb, uas txwv los yeej cheem tsis tau li. Txhua tus dhuav mloog lawv cov lus lawm. Lawv lub ntsej muag phem, lub ntsej muag Ntxwgnyoog thiab dab phem ntawd, ces los pom meej lawm. Cov no yog hom tib neeg dab tsi? Lawv yog cov tawm tsam khetos. Yog muab lawv ntsaig tawm mus ntxov dhau lawm, ces tib neeg feem coob yuav muaj tej kev xav phem thiab tsis lees txais nyob hauv lub siab, es yuav hais tias, “Vajtswv lub tsev tsis muaj kev hlub, ntsaig ib tug neeg tawm mus yam tsis muab ib lub sij hawm soj ntsuam lawv li, tsis tseg ib lub cib fim twg rau lawv lees txim hloov dua siab tshiab li. Lawv tsuas hais ob peb lo lus ntawm cov neeg tsis paub xwb, nthuav tawm tus moj yam qias vuab tsuab me ntsis xwb, thiab khav theeb me ntsis xwb, tiam sis lawv tej kev npaj siab tsis phem. Qhov ua rau lawv zoo li no mas tsis ncaj ncees.” Txawm li cas los xij, thaum feem coob paub cais thiab pom tshab txog lub ntsiab tseeb ntawm cov tib neeg phem lawm, es tseem cia cov tib neeg phem zoo li no ua lawv tej kev ua phem yam tsis muaj kev tswj, ua kev tab kaum, thiab kev cuam tshuam hauv pawg ntseeg ntxiv mus ntawd puas tsim nyog? (Tsis tsim nyog.) Qhov ntawd tsis ncaj ncees rau txhua tus kwv tij thiab nkauj muam. Nyob hauv tej xwm txheej zoo li no, qhov ntsaig lawv tawm mus ntawd mas yog kev daws tau qhov teeb meem. Thaum lawv ua dej num txhawb txog qhov kawg kiag lawm thiab feem coob paub cais lawv lawm, thaum ntawd koj ntsaig lawv tawm mus los tib neeg feem coob yuav tsis muaj lus tawm tsam—lawv yuav tsis yws los sis to taub Vajtswv yuam kev lawm. Yog tseem muaj cov tib neeg uas tiv thaiv lawv, koj tuaj yeem hais tias: “Tus tib neeg ntawd tau ua ntau yam kev phem nyob rau hauv pawg ntseeg. Lawv raug cais tias yog ib tug tawm tsam khetos thiab raug ntsaig tawm mus lawm. Tiam sis koj tseem khuv leej lawv heev; koj tseem xav txog tej lawv ua zoo rau koj, thiab tuaj tiv thaiv lawv. Koj qhov kev xav hauv siab hnyav dhau lawm, thiab koj tsis muaj tej hauv paus ntsiab lus kiag li. Tej qhov tshwm sim los ntawm qhov no yog dab tsi? Lawv pab koj me ntsis xwb, thiab koj hnov qab tsis tau; txawm lawv yuav hais dab tsi los xij, koj ua tib zoo yoog raws, xav pauj rov qab rau lawv tas li. Tam sim no lawv raug ntsaig tawm mus lawm. Koj xav nrog lawv mus lod? Yog koj xav raug ntsaig tawm mus ib yam nkaus, ces cia li ua li ntawd.” Txoj kev daws qhov xwm txheej no puas tsim nyog? Txog theem no, qhov ntawd tsim nyog lawm. Yog cov tib neeg zoo li no pheej hais cov lus thiab cov kev qhuab qhia tas li los coj kom lwm tus mus yuam kev, cuam tshuam tib neeg kom raug kev txom nyem heev uas lawv tsis xav tuaj koom kev sib txoos ua ke mus ntxiv lawm, qhov no tsis yog vim cov thawj coj thiab cov neeg ua hauj lwm loog thiab ruam, tsis muaj kev paub cais thiab tsis muaj peev xwm daws cov tib neeg no kom ncav sij hawm lod? Qhov no yog ib qho kev tsis muaj peev xwm ua lawv tes hauj lwm, yog ib qho tsis ua lawv tej luag hauj lwm kom tiav.

Txog tam sim no, tib neeg feem coob muaj kev paub cais me ntsis txog cov tawm tsam khetos uas hais cov lus thiab cov kev qhuab qhia. Tshwj tsis yog lawv tsis ua kom lwm tus pom xwb, kiag thaum lawv ua kom lwm tus pom, qhia tshwm kom meej txaus nyob rau ntau txoj kev, thiab lawv ntau yam kev qhia tshwm uas pom tau meej ntawd txaus kom tib neeg cais tau tias lawv yog cov tawm tsam khetos lawm, ces yuav tsum tsis txhob ncua sij hawm los sis ua ywj fab ywj fwj ntxiv lawm. Yuav tsum txwv thiab cais lawv tawm tam sim ntawd. Yog lawv kev ua dej num txhawb tsis muaj nuj nqis ntxiv lawm, ces yuav tsum ntsaig lawv tawm mus tam sim ntawd. Cov tawm tsam khetos uas ntsej muag ncaj siab nkhaus, hais cov lus thiab cov kev qhuab qhia no mas yooj yim los paub cais, vim cov tib neeg zoo li no yeej pom meej tias yog cov tawm tsam khetos. Tsuas yog hais tias hom tawm tsam khetos no pheej xav coj tib neeg mus yuam kev los ntawm qhov siv lub cib fim uas hais cov lus thiab cov kev qhuab qhia ntawd, los ua kom tiav lawv lub hom phiaj uas yuav tuav hwj chim xwb. Qhov no yog ib txoj kev uas cov tawm tsam khetos qhia tshwm, thiab qhov ntawd yooj yim los paub cais. Lub ncauj lus no yav tas los twb tau qhia ntau txaus lawm, yog li ntawd yuav tsis muab piav ntxaws ntxaws nyob rau ntawm no lawm. Muab hais kom luv luv tias, cov thawj coj thiab cov neeg ua hauj lwm yuav tsum ua tib zoo saib xyuas cov tib neeg zoo li no, to taub thiab paub txog lawv tej kev txav mus los, tej kev xav, thiab tej kev xam pom, nrog rau lawv tej kev npaj thiab tej kev ua, thiab tej lus yuam kev uas lawv tshaj tawm kom ncav sij hawm thiab kom yog, thiab daws lawv kom ncav sij hawm raws li ntawd. Qhov no yog ib lub luag hauj lwm ntawm cov thawj coj thiab cov neeg ua hauj lwm. Yog li ntawd, yam tsawg kawg, cov thawj coj thiab cov neeg ua hauj lwm yuav tsum muaj kev ntse ntawm sab ntsujplig thiab muaj lub hlwb uas ua tib zoo xav nyob rau hauv tes hauj lwm no, tsis txhob loog thiab ruam. Yog ib tug tawm tsam khetos coj ntau tus tib neeg mus yuam kev los ntawm qhov hais cov lus thiab cov kev qhuab qhia thaum lub sij hawm sib txoos ua ke, thiab cov thawj coj pawg ntseeg tseem tsis paub tias lawv yog ib tug tawm tsam khetos thiab tsis muaj peev xwm nthuav tawm thiab daws lawv kom ncav sij hawm, qhov no yog ib qho kev tsis ua lawv tej luag hauj lwm kom tiav. Yog ntau tus tib neeg twb raug cov tawm tsam khetos coj mus yuam kev lawm, thiab lawv pom tias kev sib txoos ua ke tsis muaj qab hau yog tsis tau hnov cov tawm tsam khetos hais cov lus thiab cov kev qhuab qhia, ces yog li ntawd lawv thiaj li tsis xav tuaj koom kev sib txoos ua ke, los sis haj tseem tsis xav noj thiab haus Vajtswv cov lus thiab mloog tej lus qhuab qhia lawm, es xav mloog cov tawm tsam khetos qhuab qhia dua—yog cov thawj coj pawg ntseeg tsuas paub txog qhov phem ntawm qhov xwm txheej thiab pib ua hauj lwm thiab hloov txhua yam thaum tib neeg raug coj mus yuam kev thiab raug tswj los ntawm cov tawm tsam khetos mus txog theem no lawm—qhov no yuav ua rau muaj kev qeeb loj heev! Ntau tus neeg Vajtswv xaiv tseg txoj kev nkag mus rau lub neej txoj sia yuav raug cuam tshuam vim qhov loog thiab ruam ntawm cov thawj coj cuav zoo li no. Thaum cov tawm tsam khetos raug soj ntsuam, raug cais, thiab raug ntsaig tawm mus ntawd, tej zaum ib txhia tib neeg yuav raug coj mus yuam kev thiab raws lawv qab. Tej zaum ib txhia haj tseem yuav hais tias, “Yog koj ntsaig lawv tawm mus, peb yuav tsis ntseeg Vajtswv ntxiv lawm. Yog koj kom lawv tawm mus, ces peb txhua tus yuav tawm mus!” Txog rau theem no, ces pom meej tag nrho tias cov thawj coj pawg ntseeg no tsis ua ib teg hauj lwm tiag tiag hlo li, qhov no yog ib qho kev tsis ua lawv tej luag hauj lwm kom tiav uas hnyav heev.

Nyob rau lub neej hauv pawg ntseeg, thawj yam uas cov thawj coj thiab cov neeg ua hauj lwm yuav tsum ua yog paub meej txog ntau hom tib neeg tus yam ntxwv. Lawv yuav tsum ua tib zoo soj ntsuam thiab to taub tias txhua tus tswv cuab ntawm pawg ntseeg taug txoj kev twg thiab lawv tus moj yam lub ntsiab tseeb los ntawm qhov nrog lawv sib cuag, thiab nrhiav tau thiab txheeb tau kom ncav sij hawm thiab kom yog tias leej twg tab tom taug tus tawm tsam khetos txoj kev thiab leej twg muaj ib tug tawm tsam khetos lub ntsiab tseeb. Tom qab ntawd, lawv yuav tsum tsom ntsoov rau cov tib neeg no, ua tib zoo saib xyuas lawv, thiab nkag siab thiab to taub txog tej kev xam pom thiab tej lus uas lawv tshaj tawm ntawd kom sai, thiab seb tej kev ua uas lawv tab tom npaj yuav ua tam sim no yog dab tsi. Thaum lawv xav coj tib neeg mus yuam kev thiab ntxias thiab tswj tib neeg, cov thawj coj thiab cov neeg ua hauj lwm yuav tsum sawv los cheem lawv kom sai li sai tau, es tsis txhob nyob tos xwb. Yog koj tos kom txog thaum Vajtswv nthuav lawv tawm, los sis kom txog thaum cov kwv tij thiab cov muam raug coj mus yuam kev los sis cov kwv tij thiab cov muam muaj kev to taub thiab kev paub cais lawv lawm mam li nthuav tawm cov tawm tsam khetos ntawd, ces qhov ntawd yuav ua rau qeeb lawm. Yog li ntawd, nyob hauv kev ceev faj cov tawm tsam khetos, cov thawj coj thiab cov neeg ua hauj lwm yuav tsum xub pib nqis tes ua ntej thiab npaj ua ntej. Thawj kauj ruam yog txhawb thiab cob qhia cov uas coj ncaj ncees me ntsis thiab muaj peev xwm caum qhov tseeb; qhov ntawd yog, ywg dej thiab muab kev pab kom zoo rau cov uas ua tus coj nyob rau hauv ntau yam ntawm tes hauj lwm, thiab cob qhia lawv kom ua cov ncej nyob rau hauv pawg ntseeg. Tsuas yog ua li no xwb mas ntau yam ntawm tes hauj lwm hauv pawg ntseeg thiaj li yuav mus tau zoo thiab tsis muaj kev tab kaum, thiab tes hauj lwm tshaj tawm txoj moo zoo thiaj li yuav nthuav dav mus ntxiv tau. Txawm tes hauj lwm twg los, yog tsis muaj ib tug thawj coj zoo, ces tes hauj lwm ntawd yuav nyuaj heev rau qhov yuav ua kom tiav. Qhov kev qhia tshwm uas pom tau meej tseem ceeb ntawm cov tawm tsam khetos txoj kev tawm tsam Vajtswv yog los coj cov neeg Vajtswv xaiv tseg mus yuam kev kom raws lawv qab txhawm rau tab kaum thiab cuam tshuam txhua tes hauj lwm hauv Vajtswv lub tsev. Nyob hauv ib pawg ntseeg, thawj yam uas cov tawm tsam khetos yuav ua yog ua phem rau cov uas paub txog kev ncaj ncees thiab cov uas ua tus coj nyob rau hauv ntau yam ntawm tes hauj lwm. Lawv ntxias cov uas lawv coj tau mus yuam kev thiab tswj tau los rau lawv sab, thiab liam, cuab, thiab muab cov uas lawv coj mus yuam kev tsis tau los sis tswj tsis tau ntawd rhuav tshem, thiab thaum kawg muab lawv ntsaig tawm mus. Qhov no pua kev rau cov tawm tsam khetos los tswj pawg ntseeg. Lawv xub muab ob peb tug neeg tseem ceeb uas muaj peev xwm caum qhov tseeb ntawd rhuav tshem ua ntej; feem coob ntawm cov uas seem yog cov uas cua tshuab sab twg qaij sab ntawd. Tom qab ntawd, lawv los saib xyuas cov thawj coj thiab cov neeg ua hauj lwm tshwj xeeb ces yuav yooj yim dua lawm. Yog tsis muaj kev koom tes thiab kev pab los ntawm cov uas caum qhov tseeb, cov thawj coj thiab cov neeg ua hauj lwm yeej zoo li tab tom ua tsov rog ib leeg yam tsis muaj kev pab. Koj nyob rau hauv qhov kaj, hos cov tawm tsam khetos nkaum nyob rau hauv qhov tsaus ntuj, npaj txhij yuav los ua kev tawm tsam yam zais ntshis, liam, cuab, thiab hais lus phem rau koj txhua lub sij hawm, ntaus kom koj ntog rau hauv av kom koj sawv tsis taus. Tom qab ntawd cov tawm tsam khetos nrhiav neeg los muab koj tsuj ntxiv thaum koj ntog rau hauv av, ua rau koj poob siab thiab tag kev cia siab tag nrho li lawm. Yog li ntawd, yog cov uas caum qhov tseeb tsis koom tes ua ke los tawm tsam mas yuav nyuaj heev los daws qhov teeb meem ntawm cov tawm tsam khetos ntawd kom tiav hlo. Nyob rau lub neej hauv pawg ntseeg, thawj yam uas cov thawj coj thiab cov neeg ua hauj lwm yuav tsum ua mas yog tiv thaiv qhov raws qib raws duas li ib txwm muaj ntawm pawg ntseeg. Tsuav muaj cov tib neeg phem uas taug cov tawm tsam khetos txoj kev no nyob, ces lub neej hauv pawg ntseeg yuav tsis muaj txiaj ntsig zoo, ces yuav tsis yooj yim nkag mus rau txoj kev uas yog, thiab tib neeg feem coob pheej raug cuam tshuam. Yog li ntawd, qhov nrhiav pom, qhov nkag siab, qhov to taub, thiab qhov tuav tau meej cov tib neeg phem, cov tawm tsam khetos, thiab cov uas taug cov tawm tsam khetos txoj kev ntawd mas yog thawj tes hauj lwm thiab tes hauj lwm uas tseem ceeb tshaj plaws rau cov thawj coj thiab cov neeg ua hauj lwm thaum hais txog lub neej hauv pawg ntseeg. Tsuas yog los ntawm kev txwv los sis ntsaig cov tib neeg no tawm mus xwb mas thiaj li yuav tiv thaiv tau qhov raws qib raws duas li ib txwm muaj ntawm lub neej hauv pawg ntseeg. Yog lawv tsis raug txwv thiab cia lawv ua raws siab nyiam yam tsis muaj kev tswj thiab ua rau muaj kev cuam tshuam, ces ntau yam ntawm pawg ntseeg tes hauj lwm yuav nres mus tsis taus. Vim tib neeg feem coob tsis muaj kev paub cais rau lawv thiab tsis muaj peev xwm pom tshab txog lawv lub ntsiab tseeb, thiab haj tseem raug cuam tshuam thiab raug coj mus yuam kev los ntawm lawv ntau yam kev xav thiab kev xam pom uas yuam kev, qhov ntawd yuav nyuaj rau cov neeg Vajtswv xaiv tseg kom nkag mus rau txoj kev yog thiab nkag mus rau hauv qhov tseeb qhov muaj tiag ntawm lub neej hauv pawg ntseeg. Yog nyob rau ib ntus no, lub neej hauv pawg ntseeg zoo li ib txwm, cov neeg Vajtswv xaiv tseg tau txais txiaj ntsim thiab nce qib nyob rau hauv kev noj thiab haus Vajtswv cov lus thiab sib qhia txog qhov tseeb, thiab thaum kawg lawv muaj kev nkag mus rau hauv lub neej txoj sia me ntsis thiab muaj qhov tseeb qhov muaj tiag me ntsis, tiam sis lawv raug coj mus yuam kev thiab raug cuam tshuam los ntawm cov tawm tsam khetos uas hais cov lus thiab cov kev qhuab qhia, ces tsis yog lawv poob qhov kev nkag siab uas yog thiab kev to taub tiag tiag uas lawv nyuam qhuav tau txais ntawd xwb, lawv haj tseem lees txais ntau yam kev qhuab qhia uas yuam kev thiab tej lus cuav—lawv rov qab tsis meej pem ceev heev lawm thiab, zoo li cov neeg nquam nkoj uas raug dej tshoob rov qab kiag thaum lawv tsum tsis nquam nkoj lawm, uas ua rau muaj teeb meem heev. Tib neeg kev loj hlob ntawm lub neej txoj sia mas tsis yooj yim li; ntau xyoo mam li pom kev nce qib me ntsis, nce qib qeeb heev. Qhov ntawd nyuaj rau tib neeg kom tau txais lub siab ntseeg me ntsis uas lawv muaj ntawd—tsis yooj yim tau txais. Los ntawm txoj kev coj mus yuam kev thiab kev cuam tshuam ntawm cov tawm tsam khetos, qhov kev nkag siab me me uas tib neeg muaj ntawd thiaj li poob lawm. Qhov uas phem tshaj ntawd yog tom qab txoj kev cuam tshuam los ntawm Ntxwgnyoog thiab cov tawm tsam khetos lawm, tib neeg muaj ntau yam ntawm Ntxwgnyoog lub tswv yim, Ntxwgnyoog tej kev npaj ua phem thiab kev dag ntxias, thiab cov tshuaj lom uas Ntxwgnyoog muab cog rau hauv lawv puv npo. Tej yam no tsis yog tsis cia tib neeg paub thiab zwm rau Vajtswv xwb, tiam sis qhov txawv ntawd yog, ua rau tib neeg muaj tej kev xav phem thiab kev to taub txog Vajtswv yuam kev, thiab txav deb ntawm Nws mus lawm, ua rau tib neeg tej moj yam qias vuab tsuab haj yam hnyav dua, haj yam ua rau lawv ntxeev siab rau Vajtswv ntxiv. Tej qhov tshwm sim los ntawm qhov no mas hnyav heev. Qhia Kuv seb, thaum ntsib tej qhov tshwm sim los uas hnyav zoo li no, puas tsim nyog cheem thiab txwv cov uas siv cov lus thiab cov kev qhuab qhia los coj tib neeg mus yuam kev? Qhov no tsis yog ib teg hauj lwm tseem ceeb uas cov thawj coj pawg ntseeg yuav tsum ua lod? (Yog.) Yog li ntawd, kev txwv cov tib neeg phem thiab cov tsis ntseeg mas yog ib teg hauj lwm tseem ceeb rau pawg ntseeg. Ib txhia hais tias, “Kuv tsis muaj kev paub cais. Kuv tsis paub yuav ua li cas.” Tseeb tiag, tsuav koj muaj lub siab xav, ua tib zoo soj ntsuam, thiab pheej tshuaj xyuas tib neeg tej kev npaj siab thiab tej kev txhawb siab xwb, koj yuav maj mam muaj kev paub cais lawm. Cov tsis ntseeg thiab cov tib neeg phem no, kiag thaum lawv qhia lawv tus kheej tawm, muaj lawv tus kheej tej kev npaj siab thiab tej kev txhawb siab, tag nrho tej no puav leej yog ua kom tib neeg qhuas thiab pe hawm lawv, thiab ua kom tib neeg mloog yam uas lawv hais xwb. Yog koj tuaj yeem pom lawv tej kev npaj siab thiab tej kev txhawb siab, qhov no yog muaj kev paub cais me ntsis lawm. Yog koj tsis paub meej, koj tuaj yeem sib qhia txog qhov no nrog qee tus tib neeg uas to taub qhov tseeb dua me ntsis. Thaum sib qhia, rau ib qho mas, koj tuaj yeem txiav txim siab los ntawm qhov tseeb uas txhua tus to taub thiab ntau yam pov thawj tiag tiag uas tau to taub lawm ntawd. Rau lwm qho mas, koj tuaj yeem—los ntawm Vajtswv txoj kev qhia thiab kev coj thiab qhov kaj uas Vajtswv muab thaum sib qhia ntawd—paub kom tseeb txog qhov xwm txheej no, paub tseeb tias tus tib neeg uas tab tom tham txog ntawd puas yog ib tug tawm tsam khetos tiag tiag thiab seb lawv puas yog ib tug neeg uas yuav tsum raug txwv tiag tiag. Los ntawm kev sib qhia, yog txhua tus tau txais kev paub tseeb thiab pom zoo ua ke, hais tias tus tib neeg no yeej yog ib tug tawm tsam khetos uas yuav tsum raug txwv tiag tiag—tom qab muaj kev pom zoo nrog cov kwv tij thiab cov muam thiab txhua tus muaj ib qho kev xam pom ua ke lawm—kauj ruam tom ntej rau cov thawj coj thiab cov neeg ua hauj lwm yog daws thiab ntsaig tus tib neeg no tawm mus raws li qhov tseeb tej hauv paus ntsiab lus kom sai li sai tau. Qhov no yog lub hauv paus ntsiab lus. Thaum tib neeg to taub lub hauv paus ntsiab lus no lawm, lawv yuav tsum ua tes hauj lwm tiag tiag, uas txhais hais tias ua lawv lub luag hauj lwm kom tiav thiab ua siab ncaj. Kev to taub tej hauv paus ntsiab lus tsis yog rau txoj kev tshaj tawm los sis rau txoj kev ua kom puv koj lub taub hau, tiam sis yog kom siv tej ntawd rau tes hauj lwm tiag tiag ntawm koj tes dej num. Nyob hauv tes hauj lwm tiag tiag ntawd mas, txoj kev to taub tej hauv paus ntsiab lus pab kom koj ua koj tej luag hauj lwm thiab tej uas yuav tsum tau ua ntawd kom tiav zoo dua thiab kom tiav hlo. Yog li ntawd, qhov no kuj yog ib feem ntawm cov thawj coj thiab cov neeg ua hauj lwm tes hauj lwm. Txhawm rau tiv thaiv qhov raws qib raws duas li ib txwm ntawm lub neej hauv pawg ntseeg thiab pab cov kwv tij thiab cov muam ua lub neej hauv pawg ntseeg li ib txwm thiab nkag mus rau hauv txhua qhov tseeb uas Vajtswv cheem tsum, thaum cov tawm tsam khetos uas hais cov lus thiab cov kev qhuab qhia tshwm sim, cov thawj coj thiab cov neeg ua hauj lwm yuav tsum yog thawj tus uas sawv los cheem thiab txwv lawv. Rau cov tawm tsam khetos uas hais cov lus thiab cov kev qhuab qhia ntawd, tsis yog txwv lawv vim lawv hais ob peb yam lus yuam kev xwb. Yog txoj kev soj ntsuam ntev los sis cov lus teb ntawm feem coob thiab lawv cov kev qhia tshwm uas pom tau meej uas ntxaws ntxaws ntawd txaus los txiav txim tias lawv yeej yog hom tawm tsam khetos tiag tiag lawm, ces cov thawj coj thiab cov neeg ua hauj lwm yuav tsum tawm los cheem thiab txwv lawv, thiab yuav tsum tsis txhob cia lawv ua mus ntxiv yam tsis muaj kev txwv. Qhov cia rau lawv ua raws siab nyiam ntawd yog tib yam li qhov cia cov dab phem, cov Ntxwgnyoog, cov ntsujplig tsis huv, thiab cov ntsujplig phem los ua phem yam tsis muaj kev tswj nyob rau hauv pawg ntseeg, ces txhais hais tias cov thawj coj thiab cov neeg ua hauj lwm zoo li no tsis ua lawv tej luag hauj lwm, raws li qhov tseeb tiag yog ua hauj lwm rau Ntxwgnyoog. Txoj kev sib qhia txog hom teeb meem ob uas hais txog kev tab kaum thiab kev cuam tshuam ntawm lub neej hauv pawg ntseeg tam sim no xaus lawm.

III. Tham Txog Tsev Neeg Tej Xwm Txheej, Tsim Kev Sib Raug Zoo ntawm Tus Kheej, thiab Saib Xyuas Tej Hauj Lwm Ntiag Tug

Ntxiv no, cia peb los sib qhia txog qhov teeb meem peb: tham txog tsev neeg tej xwm txheej, tsim kev sib raug zoo ntawm tus kheej, thiab saib xyuas tej hauj lwm ntiag tug. Tej teeb meem uas nyob hauv qhov teeb meem peb no, uas peb yuav hais txog hauv peb txoj kev sib qhia, yeej pom meej tias tsis tsim nyog tshwm sim nyob rau lub neej hauv pawg ntseeg. Thaum ua lub neej hauv pawg ntseeg, tib neeg tuaj noj thiab haus Vajtswv cov lus, sib qhia Vajtswv cov lus, sib qhia qhov tseeb, thiab sib qhia lawv cov lus tim khawv uas hais txog txoj kev ntsib kev pom ntawm tus kheej, thiab tib lub sij hawm ntawd kuj nrhiav Vajtswv tej kev npaj siab thiab nrhiav txoj kev to taub qhov tseeb thiab. Yog li ntawd, tej teeb meem xws li tham txog tsev neeg tej xwm txheej, tsim kev sib raug zoo ntawm tus kheej, thiab saib xyuas tej hauj lwm ntiag tug nyob rau lub neej hauv pawg ntseeg ntawd puas tsim nyog raug cheem thiab txwv? (Tsim nyog.) Ib txhia tib neeg hais tias, “Kev sib nug moo xwb tsis tau thiab lod? Yog ob tug neeg sib raug zoo me ntsis thiab twb sib paub lawm, thiab nkawd sib ntsib thaum koom lub neej hauv pawg ntseeg es tham me ntsis, qhov ntawd puas yog tham txog tsev neeg tej xwm txheej? Qhov no puas tsim nyog raug txwv thiab?” Qhov teeb meem peb no puas yog hais txog tej hom teeb meem no? (Tsis yog.) Pom meej tias, tsis yog. Yog tias tej kev sib nug moo uas yooj yim thiab paub cai los yuav raug txwv, ces tib neeg yuav ntshai hais lus thaum lawv sib ntsib nyob rau yav tom ntej. Qhov teeb meem uas peb—tham txog tsev neeg tej xwm txheej, tsim kev sib raug zoo ntawm tus kheej, thiab saib xyuas tej hauj lwm ntiag tug—txawm tsuas muaj peb kab lus no xwb, tiam sis tej teeb meem uas cov lus no sawv cev rau ntawd tsis yog kev sib nug moo los sis kev sib tham uas yooj yim thiab muaj kev paub cai. Tej ntawd yog tej kev ua phem uas tuaj yeem tab kaum, cuam tshuam, thiab ua puas tsuaj rau lub neej hauv pawg ntseeg. Vim tej ntawd ua rau muaj kev tab kaum thiab kev cuam tshuam, thiaj li tsim nyog muab tej ntawd los sib qhia. Tsim nyog sib qhia txog dab tsi? Ces yog sib qhia tias tej teeb meem twg, tej lus twg uas tib neeg hais, tej yam twg uas lawv ua, thiab txoj kev hais lus, cov cwj pwm, thiab txoj kev coj twg ntawm tib neeg es tuaj yeem mus txog theem uas tab kaum thiab cuam tshuam pawg ntseeg tes hauj lwm. Cia peb los tham txog ib txhia piv txwv tiag tiag kom pom tias tej teeb meem no puas hnyav, seb tej ntawd puas ua rau muaj kev tab kaum thiab kev cuam tshuam, thiab seb puas tsim nyog cheem thiab txwv tej ntawd.

Nyob rau lub neej hauv pawg ntseeg, ib txhia tib neeg pheej tham txog tej yam me me hauv tsev neeg thiab lawv tus kheej tej kev xav phem thiab tej tswv yim yam li tej ntawd yog lub ntsiab lus tseem ceeb rau kev sib tham. Nws hais tias: “Lub zej zog tam sim no mas tsaus ntuj dhau; qhov uas nrog cov tsis ntseeg sib raug zoo thiab nrog lawv ua neej nyob ntawd mas sab dhau. Cov ib txwm tsis ntseeg muaj peev xwm ua tau txhua yam; yeej tiv tsis taus tiag tiag!” Tom qab ntawd ib txhia kwv tij thiab nkauj muam hais tias, “Peb ntseeg Vajtswv lawm; txawm peb yuav ntsib dab tsi los xij, peb yuav tsum muaj peev xwm paub cais thiab nrhiav qhov tseeb thiab tej kev xyaum ua raws. Yog koj ua neej zoo li no, koj yuav tsis hnov sab lawm.” Tiam sis nws hais tias, “Vajtswv txoj lus yog qhov tseeb tiam sis tsis yog tshuaj kho txhua yam mob. Kuv txhawj tias tsam kuv tus txiv muaj hluas nkauj, thiab yeej muaj tseeb li ntawd—nws nrhiav tau ib tug uas hluas dua thiab zoo nkauj dua kuv. Kuv yuav ua neej nyob li cas?” Tham mus tham los li no, nws pib quaj tu siab. Nws qhov kev hais lus zoo li no ua rau ib txhia muaj kev tu siab. Ib txhia uas koom nws txoj kev nyuaj siab ntawd cia li haum nrog nws tam sim ntawd thiab pib sib tham nyob ntawd kiag. Nyob rau ob teev uas sib txoos ua ke ntawd, nws tham ntxaws txog qhov uas nws thiab nws tus txiv sib cav tom qab nws tus txiv muaj hluas nkauj, qhov uas nws xav txog tej hau kev los muab nkawd cov khoom muaj nqis uas koom ua ke tshem mus, qhov uas nws mus nrog ib tug kws lij choj tham kom tsis txhob poob peev tom qab sib nrauj, thiab lwm yam ntxiv. Qhov no puas yog hom ntsiab lus uas tsim nyog muab los tham nyob rau lub neej hauv pawg ntseeg? (Tsis yog.) Yog tias tsis tau daws koj tej xwm txheej hauv tsev neeg thiab koj tsis muaj siab tuaj koom tej kev sib txoos ua ke, ces qhov zoo tshaj plaws tsis txhob tuaj. Pawg ntseeg qhov chaw sib txoos ua ke tsis yog ib qho chaw rau koj tuaj tso koj tus kheej tej kev chim siab tawm, thiab tsis yog rau kev tham txog tsev neeg tej xwm txheej. Yog koj ntsib kev nyuaj nyob tom tsev thiab koj tsis xav kom raug khi, raug txwv, los sis raug thaiv, thiab koj xav nrhiav qhov tseeb kom to taub Vajtswv txoj kev npaj siab, thiab xav tso tag nrho tej no tseg, ces koj tuaj yeem sib qhia luv luv txog koj tej teeb meem ntawd thaum lub sij hawm sib txoos ua ke kom cov kwv tij thiab cov muam sib qhia qhov tseeb los pab koj. Qhov no tuaj yeem pab koj to taub Vajtswv txoj kev npaj siab thiab muaj zog, tsis raug tej teeb meem no txwv, tawm hauv kev xav tsis zoo thiab kev qaug zog los, thiab xaiv txoj kev uas yog thiab haum rau koj tshaj plaws. Qhov no yog qhov uas koj tsim nyog sib qhia txog. Txawm li cas los xij, yog koj coj tej yam me me uas xeeb txob hauv koj tsev tuaj rau hauv lub neej hauv pawg ntseeg tuaj tso tawm thiab tshaj tawm txog, thiab tib neeg feem coob, vim txoj kev txaj muag, tsis cheem los sis tsis txiav koj cov lus, tiam sis tsuas ua siab ntev thiab yuam kom lawv tus kheej mloog koj hais txog tej yam me me uas xeeb txob no, qhov no puas tsim nyog? Qhov no puas yog qhia tawm txoj kev hlub? Puas yog kev ua siab ntev thiab thev taus? Koj txoj kev coj no twb ua rau muaj kev cuam tshuam rau lub neej hauv pawg ntseeg lawm. Leej twg raug kev txom nyem los ntawm qhov no? Yog cov neeg Vajtswv xaiv tseg. Tshwj xeeb tshaj yog nyob rau hauv qhov xwm txheej ntawm Teb Chaws Suav av loj, uas txoj kev sib txoos ua ke mas tsis yooj yim thiab cov ntseeg yuav tsum tau nkaum txhua qhov chaw, haj tseem yuav tsum tau teem sij hawm ua ntej—yog muaj leej twg tso tag nrho tej yam me me uas xeeb txob no tawm ntawm qhov chaw sib txoos ua ke kom txhua tus mloog thiab tawm tswv yim, qhov no puas tsim nyog? Tib neeg feem coob tuaj koom kev sib txoos ua ke kom to taub qhov tseeb thiab Vajtswv tej kev npaj siab, tsis yog tuaj mloog tej yam me me uas xeeb txob no, tsis yog tuaj mloog koj tham txog tsev neeg tej xwm txheej. Ib txhia tib neeg hais tias, “Kuv tsis muaj lwm tus uas kuv sib raug zoo nrog, yog li ntawd qhov uas nrog cov kwv tij thiab cov muam tham txog tej ntawd puas txhaum dab tsi?” Koj tham txog tej ntawd tau, tiam sis lub sij hawm yog qhov tseem ceeb. Yog dhau ntawm lub sij hawm sib txoos ua ke, tsuav yog lwm tus txaus siab mloog, koj tuaj yeem tham txog tej ntawd; qhov ntawd yog koj txoj kev ywj pheej, thiab Vajtswv lub tsev yuav tsis txwv koj. Txawm li cas los xij, tam sim no qhov chaw thiab lub sij hawm uas koj xaiv los tham txog tej yam zoo li no tsis yog lawm. Qhov no yog nyob rau lub neej hauv pawg ntseeg, thaum lub sij hawm sib txoos ua ke, thiab koj txoj kev tham tsis paub kawg txog tej yam hauv tsev neeg ntawd pheej cuam tshuam cov kwv tij thiab cov nkauj muam thiab tsim nyog raug txwv. Qhov no tsis yog ib txoj cai tswj lod? Qhov no yeej yog ib txoj cai tswj tiag. Qhov tsis to taub tej cai ntawd mas txais yuav tsis tau, vim qhov ntawd tuaj yeem ua rau muaj kev ua yam tsis muaj laj thawj thiab cuam tshuam lwm tus. Tej cwj pwm, kev hais lus, thiab kev coj uas ua rau muaj kev cuam tshuam ntawd tsim nyog raug txwv; qhov no yog cov thawj coj thiab cov neeg ua hauj lwm lub luag hauj lwm, nrog rau txhua tus kwv tij thiab nkauj muam lub luag hauj lwm. Ib txhia tib neeg feem ntau tsis tshua muaj lus sib qhia thaum sib txoos ua ke, tiam sis thaum twg muaj teeb meem tshwm sim hauv lawv tsev neeg lub neej, lawv tso tej yam me me uas xeeb txob no tawm los kom lwm tus mloog. Lwm tus puas muaj luag hauj lwm yuav tsum mloog? Lawv puas muaj luag hauj lwm txiav txim rau qhov yog thiab qhov tsis yog rau koj? Lawv tsis muaj tej luag hauj lwm zoo li no. Tej yam ntawd yog koj tej hauj lwm ntiag tug, thiab koj yuav tsum saib xyuas tej ntawd ntawm koj tus kheej; koj tsis tsim nyog tham txog koj tej hauj lwm ntiag tug thaum lub sij hawm sib txoos ua ke. Qhov no yog tsis haum raws li kev cai thiab tsis tsim nyog, thiab txoj kev coj zoo li no yuav tsum raug txwv.

Ib txhia tib neeg cov me nyuam mus kawm ntawv qib siab, ces lawv txawm pib txhawj txog lawv cov me nyuam tej kev cia siab rau yav tom ntej, thiaj li nrhiav kev nrhiav neeg pab rau lawv, ces pheej xav tas li hais tias, “Peb tsev neeg tsis muaj leej twg ua nom ua tswv li; kuv tus tub yuav nrhiav tau hauj lwm dab tsi ua tom qab kawm tiav tsev kawm qib siab? Nws lub neej yav tom ntej yuav zoo li cas? Nws puas yuav yug tau kuv thaum kuv laus? Kuv yuav tsum nrhiav ib txoj kev kom paub tseeb tias nws muaj ib txoj hauj lwm zoo ua tom qab kawm tiav.” Thaum tuaj koom kev sib txoos ua ke, lawv hais tias, “Kuv tus tub mloog lus heev. Tsis yog nws txhawb nqa kuv txoj kev ntseeg Vajtswv xwb, tiam sis nws kuj xav ntseeg tom qab kawm tiav hauv tsev kawm qib siab thiab. Txawm li cas los xij, muaj ib yam yog, txawm peb yuav ntseeg Vajtswv los, peb tseem yuav tsum tau nrhiav noj nrhiav haus, puas yog? Kuv tsis paub tias nws yuav nrhiav tau hauj lwm dab tsi ua tom qab kawm tiav. Tam sim no hauj lwm dab tsi thiaj li tau nyiaj hli zoo? Tus Nkauj Muam, kuv hnov tias koj tus txiv yog ib tug thawj saib xyuas. Nws puas muaj hau kev pab tau? Kuv tus tub muaj kev kawm, nws tau pom ntau paub ntau, nws muaj peev xwm zoo dua kuv, thiab nws txawj siv khoos phis tawj; nws tuaj yeem ua dej num hauv Vajtswv lub tsev nyob rau yav tom ntej. Tiam sis tam sim no, yuav tau muab qhov uas nrhiav ib txoj hauj lwm ntawd daws ua ntej tso; yuav nyuaj rau nws yog nws nrhiav tsis tau ib txoj hauj lwm ua.” Txhua zaus lawv tuaj koom kev sib txoos ua ke, lawv nqa tej teeb meem no tuaj tham, thiab pheej tham tsis paub kawg li lawm. Lawv saib seb leej twg yuav muaj kev khuv leej rau lawv thiab tom qab ntawd nrhiav kev tsim kev sib raug zoo nrog cov neeg ntawd. Thaum sib txoos ua ke ntawd, lawv sim txav kom ze rau cov neeg ntawd, ua raws li cov neeg ntawd nyiam, thiab haj tseem muab khoom pub thiab, qee zaus nqa zaub mov qab los sis yuav tej khoom me me rau cov neeg ntawd. Qhov no tsis yog tsim kev sib raug zoo ntawm ntiag tug thiab tsim lub hauv paus lod? Lub hom phiaj ntawm kev tsim lub hauv paus yog dab tsi? Qhov ntawd yog siv lwm tus los saib xyuas yus tej hauj lwm ntiag tug, kom ua tiav yus tus kheej lub hom phiaj. Thaum lub sij hawm sib txoos ua ke, lawv tsis txaus siab mloog cov kwv tij thiab cov muam sib qhia lawv cov lus tim khawv uas hais txog txoj kev ntsib kev pom, lawv tsis quav ntsej txawm Vajtswv lub tsev npaj tes hauj lwm dab tsi rau lawv, thiab lawv tsis txaus siab mloog cov kwv tij thiab cov muam uas pab thiab qhia lawv txog lawv tus yam ntxwv. Lawv tsuas kub siab tshwj xeeb txog lawv tus tub qhov kev nrhiav hauj lwm, tham tsis paub kawg txog qhov ntawd. Lawv tsis yog tsuas hais rau txhua tus uas lawv ntsib xwb tiam sis kuj hais thaum lub sij hawm sib txoos ua ke thiab. Muab hais kom luv luv tias, lawv muab siab tshwj xeeb rau qhov ntawd thiab siv zog ntau heev rau qhov ntawd. Txhua qhov kev sib txoos ua ke mas, lawv yuav tsum siv qee lub sij hawm ntawm cov kwv tij thiab cov muam los tham txog qhov no. Txawm thaum sib qhia lawv tus kheej tej kev ntsib kev pom los, lawv tsis hnov qab hais txog qhov ntawd, hais lus mus txog thaum txhua tus siab tsis ntev thiab qias lawm, uas tib neeg feem coob tseem xav tias qhov cheem lawv mas txaj muag dhau lawm. Txog theem no, cov thawj coj thiab cov neeg ua hauj lwm yuav tsum ua lawv lub luag hauj lwm kom tiav thiab txwv lawv, hais tias, “Txhua tus paub txog koj qhov xwm txheej lawm. Yog muaj cov kwv tij thiab cov muam twg txaus siab pab, qhov ntawd yog txoj kev sib raug zoo ntawm nej tus kheej. Yog lwm tus tsis txaus siab pab, koj yuav tsum tsis txhob yuam lawv. Kev pab koj tus tub nrhiav hauj lwm tsis yog cov kwv tij thiab cov muam teg num los sis lub luag hauj lwm; qhov ntawd yog koj li hauj lwm ntiag tug thiab tsis tsim nyog siv cov kwv tij thiab cov muam lub sij hawm muaj nqis uas noj thiab haus Vajtswv cov lus thiab sib qhia qhov tseeb. Tsis txhob cuam tshuam lwm tus txoj kev noj thiab haus Vajtswv cov lus los ntawm kev tham txog koj tus kheej tej hauj lwm ntiag tug. Tom qab kev sib txoos ua ke, koj tuaj yeem nrog leej twg tham los tau raws li koj xav, nrhiav kev pab los ntawm leej twg los tau raws li koj xav, tiam sis tsis txhob siv lub sij hawm sib txoos ua ke los tham txog qhov ntawd. Kev siv lub sij hawm sib txoos ua ke los saib xyuas tej hauj lwm ntiag tug ntawd mas yog tsis muaj laj thawj thiab ntxim txaj muag; qhov ntawd yog ib qho kev qhia tshwm uas pom tau meej txog kev cuam tshuam lub neej hauv pawg ntseeg. Qhov no yuav tsum xaus rau ntawm no.” Qhov no yog qhov uas cov thawj coj thiab cov neeg ua hauj lwm yuav tsum ua.

Thaum lub sij hawm sib txoos ua ke, qee tus poj niam laus pom tias cov ntxhais hluas nyob rau hauv cov tsev neeg txais tos ntawd zoo nkauj, coj ncaj ncees, thiab ntseeg Vajtswv tiag tiag thiab caum qhov tseeb, yog li ntawd lawv thiaj li nyiam thiab xav kom cov ntxhais hluas no los ua lawv cov nyab. Lawv tsis yog tsuas hais qhov no tas li thaum sib txoos ua ke xwb tiam sis kuj muab kev pab me me thiab kev saib xyuas tshwj xeeb rau cov ntxhais hluas txhua zaus lawv tuaj koom kev sib txoos ua ke thiab. Txawm thaum cov ntxhais hluas tsis pom zoo los, lawv pheej yuam thiab thab cov ntxhais hluas tas li, tsis tso tseg li. Lawv yog cov neeg zoo li cas? Lawv tsis yog cov neeg uas muaj tus cwj pwm qis lod? Pom tias lawv txhua tus yog cov muam koom ib txoj kev ntseeg, feem coob tsuas yog sib qhia Vajtswv tej kev npaj siab thiab Nws cov lus los daws tej teeb meem no xwb. Txawm li cas los xij, ib txhia tib neeg tsis muaj lub siab txawj xav, qhov laj thawj, thiab kev paub txog tus kheej, muaj kev ntshaw ntawm tus kheej loj dhau, thiab xav ua kom tiav txhua yam kev ntshaw uas twm xeeb yam tsis hnov txaj muag li. Yog li ntawd, ib txhia tib neeg thiaj li yog cov uas raug tsim txom thiab hnov tsis xis nyob thaum lub sij hawm sib txoos ua ke. Qhov no tsis yog ua rau muaj kev cuam tshuam rau lwm tus lod? Nyob rau hauv tej xwm txheej zoo li no yuav tsum ua li cas? Cov thawj coj pawg ntseeg yuav tsum sawv los txwv thiab tshem tawm hom teeb meem no ntawm lub neej hauv pawg ntseeg thiab nyob nruab nrab ntawm cov kwv tij thiab cov muam. Tsis tas li ntawd xwb, ib txhia tib neeg coj txhua hom kev xav hauv siab tuaj rau tom tej kev sib txoos ua ke—lawv tus tub tsis hwm niam txiv, lawv tus nyab pheej nqa khoom mus rau tom nws niam nws txiv tsev, kev tsis sib haum xeeb ntawm niam pog thiab nyab…. Lawv tham txog tej yam me me uas xeeb txob no nyob rau hauv txhua qhov kev sib txoos ua ke, thaum yws ntawd lawv xub hais tias: “Txhua yam uas Vajtswv hais mas yeej muaj tseeb; tam sim no noob neej qias vuab tsuab dhau lawm! Saib seb kuv tus tub thiab tus nyab mas, tsis muaj lub siab txawj xav, tsis muaj qhov laj thawj—qhov no yog qhov tsis muaj kev ua neeg uas Vajtswv hais txog, lawv haj tseem phem tshaj tsiaj. Txawm cov me nyuam yaj los tseem paub txhos caug thaum noj mis, tiam sis kuv tus tub hnov qab nws niam thaum nws muaj poj niam lawm!” Txhua zaus lawv tuaj koom tej kev sib txoos ua ke mas, lawv yeej hais cov lus yws no. Kuj muaj cov tib neeg uas thaum tuaj koom kev sib txoos ua ke, es tham txog tej teeb meem hauv lawv cov tuam txhab—leej twg ua hauj lwm tau zoo thiab tau nyiaj ntxiv ntau dua; leej twg yuav tau nce qib rau lub hlis tom ntej, hos lawv tsis muaj kev cia siab; leej twg hnav khaub ncaws zoo tshaj plaws thiab yuav khoom muaj npe nrov ntau tshaj plaws; leej twg tau yuav ib tug txiv nplua nuj…. Rau cov uas ntseeg Vajtswv los tau ntev es muaj qee lub hauv paus lawm mas, lawv tsis xav hnov qhov tham zoo li no thiab qias tej ntawd. Txawm li cas los xij, ib txhia ntseeg tshiab, cov uas tseem tsis tau tsim muaj ib lub hauv paus los sis tsis tau muaj kev nyiam hauv Vajtswv cov lus, pom tias tej ntsiab lus zoo li no mas txaus nyiam, ntseeg tias lawv nrhiav tau ib qho chaw los tham thiab tsim kev sib raug zoo ntawm ntiag tug lawm. Nyob rau tej kev sib txoos ua ke ntawd, lawv sib tham mus mus los los, thiab ob tug neeg maj mam pom tias nkawd sib haum thiab tsim tau kev sib raug zoo, yog li ntawd thiaj li tsim tau ib txoj kev sib raug zoo ntiag tug. Qhov chaw sib txoos ua ke tau dhau los ua ib qho chaw rau kev ua lag luam mus los, ib qho chaw rau tib neeg los koom nrog kev tham tsis muaj qab hau, tsim kev sib raug zoo ntawm tus kheej, sib tham kev lag luam, thiab koom nrog kev ua lag luam. Tej teeb meem no yog tej uas cov thawj coj thiab cov neeg ua hauj lwm tsim nyog txheeb kom ncav sij hawm thiab cheem.

Ib txhia tib neeg tuaj koom kev sib txoos ua ke vim xav nrhiav ib txoj hauj lwm zoo rau lawv tus kheej, hos ib txhia yog los pab kom lawv tus txiv raug txhawb, ho ib txhia yog tuaj nrhiav hauj lwm zoo rau lawv cov me nyuam, ib txhia yog tuaj kom yuav tau cov khoom luv nqi. Lwm tus tuaj nrhiav ib tug thawj kws kho mob zoo rau cov neeg mob hauv lawv tsev neeg yam tsis tas yuav muab khoom plig ntau. Muab hais luv luv tias, cov tsis ntseeg uas tsis caum qhov tseeb thiab muaj tej kev npaj siab uas zais ntshis no, pom tias lub sij hawm sib txoos ua ke hauv pawg ntseeg yog lub sij hawm zoo tshaj plaws los tsim kev sib raug zoo ntawm tus kheej thiab saib xyuas lawv tej hauj lwm ntiag tug. Feem ntau, siv lub npe tias sib qhia Vajtswv cov lus los sis paub txog lub ntiaj teb uas lim hiam no thiab lub ntsiab tseeb ntawm noob neej uas qias vuab tsuab no, lawv muab lawv tus kheej tej kev nyuaj thiab tej xwm txheej uas lawv xav tham txog los hais, thaum kawg maj mam nthuav lawv tej kev ntshaw twm xeeb uas zais ntshis thiab tej yam ntiag tug uas lawv xav ua kom tiav ntawd tawm los. Lawv nthuav lawv tus kheej tej kev npaj siab tawm, thiab ua rau lwm tus ntseeg yuam kev tias lawv tab tom ntsib kev nyuaj, qhia tias txhua tus yuav tsum qhia txoj kev hlub thiab pab lawv yam dawb paug thiab yam tsis xav tau dab tsi rov qab los li. Lawv siv lub npe uas ntseeg Vajtswv los siv ntau yam qhov khoob, nyob rau hauv cov chaw sib txoos ua ke nrhiav cov phooj ywg uas lawv xav tsim kev phooj ywg thiab cov uas tuaj yeem ua tau tej yam rau lawv. Ib txhia xav nrhiav yuav ib lub tsheb ntawm tus nqi sab hauv, nrhiav rau ntawm cov kwv tij thiab cov nkauj muam seb leej twg ua hauj lwm hauv ib lub chaw muag tsheb los sis tus uas muaj kev sib raug zoo nrog tus tswv ntawm ib lub chaw muag tsheb. Thaum lawv nrhiav tau lawv lub hom phiaj lawm, lawv txav los, txav kom ze rau cov neeg ntawd thiab tsim kev sib raug zoo. Yog tus tib neeg ntawd nyiam nyeem Vajtswv cov lus, lawv pheej mus rau ntawm tus neeg ntawd tsev es nyeem Vajtswv cov lus ua ke, thiab nyob rau hauv tej kev sib txoos ua ke lawv zaum ib sab ntawm cov neeg ntawd thiab sib pauv kev sib hu. Tom qab ntawd lawv pib nqis tes ua, txiav txim siab tsis tso tseg kom txog thaum lawv lub hom phiaj ua tiav. Tag nrho tej no yog tej teeb meem uas pheej tshwm sim nyob rau hauv pawg ntseeg thiab nyob nruab nrab ntawm cov tib neeg tas li. Yog tej teeb meem no tshwm sim nyob rau hauv cov chaw sib txoos ua ke thiab thaum lub sij hawm sib txoos ua ke, qhov tseeb tiag, tej ntawd cia li yuav ua rau muaj kev tab kaum thiab kev cuam tshuam rau lub neej hauv pawg ntseeg, cuam tshuam rau lub neej hauv pawg ntseeg. Yog ib lub pawg ntseeg tsis muaj lub neej hauv pawg ntseeg los tau ntev, ces pawg ntseeg ntawd dhau los ua ib pab pawg ntawm lub zej zog, yog ib qho chaw rau kev ua lag luam, ib qho chaw rau kev tsim kev sib raug zoo ntawm tus kheej, siv kev sib raug zoo los nrhiav kev pab, thiab saib xyuas tej hauj lwm ntiag tug. Lub ntsiab xeeb txawm ntawm qhov chaw no hloov, thiab qhov tshwm sim los ntawm qhov no yog dab tsi? Yam tsawg tshaj plaws, qhov ntawd ua rau plam lub neej hauv pawg ntseeg, uas txhais tau tias poob lub sij hawm muaj nqis uas siv los nyeem thov Vajtswv cov lus nrog cov kwv tij thiab cov muam thiab to taub qhov tseeb lawm. Tsis tas li ntawd xwb, qhov tseem ceeb tshaj plaws, ua rau poob lub cib fim uas muaj nqis rau Vajntsujplig los ua hauj lwm, los qhia tib neeg kom to taub qhov tseeb. Tag nrho tej no ua rau tib neeg txoj kev nkag mus rau hauv lub neej txoj sia raug kev puas tsuaj. Yog li ntawd, rau cov neeg Vajtswv xaiv tseg qhov txiaj ntsim thiab txoj kev nkag mus rau hauv lub neej txoj sia, thiab txhawm rau ris lub luag hauj lwm rau txhua tus lub neej txoj sia, nws yog ib qho uas yuav tsum cheem thiab txwv hom tib neeg zoo li no; qhov no yog tes hauj lwm uas cov thawj coj thiab cov neeg ua hauj lwm yuav tsum ua. Muaj tseeb tias, yog cov kwv tij thiab cov muam dog dig tuaj yeem pom tshab cov tib neeg no thiab lawv tej kev ua, lawv kuj yuav tsum sawv los tsis lees txais thiab hais tias “tsis” rau cov tib neeg ntawd. Tshwj xeeb tshaj yog thaum ua lub neej hauv pawg ntseeg, uas yog lub sij hawm tseem ceeb tshaj plaws rau tib neeg, yog muaj leej twg siv lub sij hawm sib txoos ua ke los tham thiab saib xyuas tej yam no, cov kwv tij thiab cov muam muaj cai tsis quav ntsej lawv, thiab haj yam muaj cai cheem thiab tsis lees txais tej yam zoo li no. Qhov ua li no puas yog? (Yog.) Ib txhia tib neeg xav tias Vajtswv lub tsev ua li no yog ib qho uas tsis muaj kev hlub kev tshua rau tib neeg li. Kev hlub kev tshua rau tib neeg ntawd puas yog kev ua neeg li ib txwm muaj? Kev hlub kev tshua rau tib neeg ntawd puas mus raws li qhov tseeb? Yog koj muaj kev hlub kev tshua rau tib neeg thiab siv lub sij hawm sib txoos ua ke saib xyuas koj tej hauj lwm ntiag tug, haj tseem ua kom tib neeg feem coob nrog thiab txhawb koj, ua tau koj lub hom phiaj ntawm qhov saib xyuas koj tej hauj lwm ntiag tug, thiab cuam tshuam qhov raws qib raws duas li ib txwm muaj ntawm cov neeg Vajtswv xaiv tseg txoj kev nyeem Vajtswv cov lus thiab sib qhia qhov tseeb, thiab ua rau lawv poob lub sij hawm muaj nqis no, qhov no puas ncaj ncees rau lawv? Qhov no puas mus raws li qhov muaj kev hlub kev tshua rau tib neeg? Qhov no yog txoj kev uas tsis muaj kev ua neeg thiab tsis muaj kev ncaj ncees tshaj plaws, thiab tib neeg yuav tsum sawv los thuam qhov ntawd. Yog cov thawj coj thiab cov neeg ua hauj lwm yog cov uas hais tsis taus, tsis muaj txiaj ntsim, thiab tsis muaj peev xwm cheem thiab txwv tej kev ua zoo li no kom sai, tsis ua tes hauj lwm tiag tiag, ces cov kwv tij thiab cov nkauj muam uas muaj ib qho kev paub txog kev ncaj ncees yuav tsum koom siab los txwv txoj kev coj zoo li no thiab qhov xwm txheej no kom tsis txhob nthuav mus rau hauv pawg ntseeg. Yog koj tsis xav poob lub sij hawm muaj nqis rau kev nyeem Vajtswv cov lus thiab sib qhia qhov tseeb, tsis xav kom koj txoj kev nkag mus rau hauv lub neej txoj sia raug cuam tshuam thiab raug kev puas tsuaj, ua rau koj lub cib fim tau txais kev cawm dim puas tsuaj, ces koj yuav tsum sawv los tsis lees txais, cheem, thiab txwv tej qhov tshwm sim no. Qhov ua li no yog tsim nyog thiab mus raws li Vajtswv tej kev npaj siab. Ib txhia ntawm nej txaj muag ua li ntawd; tej zaum koj yuav txaj muag, tiam sis cov tib neeg lim hiam tsis txaj muag li. Lawv muaj lub siab tawv los siv koj lub sij hawm sib txoos ua ke uas muaj nqis: lub sij hawm rau Vajntsujplig ua hauj lwm thiab rau Vajtswv qhia koj kom paub. Yog koj xav tias qhov tsis lees txais ntawd txaj muag, ces koj tsim nyog tau txais qhov kev puas tsuaj rau koj lub neej txoj sia lawm! Yog koj txaus siab muab txoj kev hlub rau cov Ntxwgnyoog, cov dab phem, thiab cov tsis ntseeg, muab kev pab rau lawv, muab koj tus kheej fij rau lwm tus es tsis quav ntsej tej hauv paus ntsiab lus, ces koj yuav liam leej twg rau qhov kev puas tsuaj rau koj lub neej txoj sia? Yog li ntawd, txhua qhov xwm txheej ntawm qhov kev tsim kev sib raug zoo ntawm tus kheej thiab saib xyuas tej hauj lwm ntiag tug yuav tsum muab tshem tawm kom tag nrho ntawm lub neej hauv pawg ntseeg mus. Yog muaj leej twg pheej ua raws li lawv tus kheej txoj kev xwb, thiab pheej tham txog lawv tsev neeg tej xwm txheej, koom nrog kev tham tsis muaj qab hau, saib xyuas tej hauj lwm ntiag tug, los sis nrhiav hauj lwm thiab nrhiav tus khub sib hlub rau lwm tus rau thaum sib txoos ua ke, ua li no nrhiav ntau yam laj thawj los siv lub sij hawm no, ces yuav tsum saib xyuas tus neeg zoo li no li cas? Ua ntej, yuav tsum cheem lawv; yog lawv tseem tsis mloog, ces yuav tsum tau cais tawm thiab muab kev txwv. Yog lawv tseem ua rau muaj kev cuam tshuam nyob tom qab, txav ze rau txhua tus uas lawv ua tau thiab thab cov kwv tij thiab cov muam lub neej ib txwm rau txhua qhov chaw, ces yuav tsum ntsaig lawv tawm mus thiab tsis txhob suav tias lawv yog cov kwv tij los sis cov muam. Lawv tsis tsim nyog ua lub neej hauv pawg ntseeg thiab tsis tsim nyog tuaj koom kev sib txoos ua ke. Cov tib neeg zoo li no tsim nyog raug txwv thiab raug tsis lees txais. Tes hauj lwm no, tseeb tiag, kuj yog ib teg hauj lwm tseem ceeb uas cov thawj coj thiab cov neeg ua hauj lwm txhua theem yuav tsum ua. Thaum tej yam thiab tej xwm txheej zoo li no tshwm sim tuaj, cov thawj coj thiab cov neeg ua hauj lwm yuav tsum yog thawj tug uas sawv los thiab cheem tej ntawd. Koj yuav tsum cheem tej ntawd li cas? Koj yuav tsum hais rau lawv tias, “Koj puas paub tias koj txoj kev coj no twb ua rau muaj kev tab kaum thiab kev cuam tshuam rau lub neej hauv pawg ntseeg lawm? Qhov no yog ib yam uas txhua tus kwv tij thiab nkauj muam pom tias tsis nyiam kiag li thiab ntxub, thiab qhov ntawd kuj raug Vajtswv teem txim thiab. Koj tsim nyog tsum txoj kev coj no. Yog koj tsis mloog lus ntuas thiab pheej ua raws li koj tus kheej txoj kev xwb, ces yuav nres koj lub neej hauv pawg ntseeg, koj cov phau Vajtswv cov lus yuav raug muab sau rov qab, thiab pawg ntseeg yuav tsis lees paub koj ntxiv lawm!” Muaj tseeb tias, muaj ib txhia tib neeg uas yog vim lawv lub siab ntseeg tseem me thiab tsis to taub qhov tseeb, tej zaum qee zaus yuav tham txog tsev neeg tej xwm txheej, tsim kev sib raug zoo nrog ib tug neeg twg, los sis saib xyuas qee qhov hauj lwm me me, thiab qhov xwm txheej ntawd tsis loj heev. Qhov no puas tau? (Tau.) Nyob rau hauv cov xwm txheej uas tsis tau ua rau muaj kev cuam tshuam rau txhua tus, cov kwv tij thiab cov muam ib leeg pab thiab qhia tawm txoj kev hlub me ntsis rau ib leeg ntawd yog ib qho uas lees txais tau. Tiam sis peb tab tom sib qhia txog dab tsi? Qhov ntawd yog thaum tej kev coj thiab tej kev ua zoo li no twb ua rau muaj kev tab kaum thiab kev cuam tshuam rau lub neej hauv pawg ntseeg li ib txwm muaj ntawd lawm; nyob rau hauv tej xwm txheej zoo li no, cov uas muaj feem xyuam ntawd yuav tsum raug cheem thiab txwv. Peb yuav tsum tsis txhob cia lawv tab kaum thiab cuam tshuam lub neej hauv pawg ntseeg txuas ntxiv. Qhov kev ua li no mas muaj txiaj ntsim rau cov kwv tij thiab cov muam txoj kev nkag mus rau hauv lub neej txoj sia. Ib txhia tib neeg nthuav tawm tej kev coj zoo li no, tiam sis qhov xwm txheej tsis hnyav thiab tsis tau ua rau muaj kev tab kaum thiab kev cuam tshuam; qhov ntawd tsuas yog kev sib raug zoo li ib txwm nyob nruab nrab ntawm cov kwv tij thiab cov muam, sib pab thiab sib nug txog tej yam li ib txwm xwb, los sis nug txog kev paub dog dig uas tus kheej tsis to taub. Tsuav qhov ntawd tsis siv lub sij hawm sib txoos ua ke thiab tsuav ob tog pom zoo thiab txaus siab yam tsis sib yuam, thiab yog kev sib raug zoo uas nyob hauv qhov ciaj ciam ntawm kev ua neeg li ib txwm muaj, ces qhov ntawd yog ib qho uas tso cai thiab pawg ntseeg yuav tsis txwv. Txawm li cas los tsuas muaj ib yam xwb: Yog leej twg txoj kev hais lus thiab tej kev ua yam raws siab nyiam nyob rau lub neej hauv pawg ntseeg ua rau muaj kev thab plaub los sis kev cuam tshuam rau cov kwv tij thiab cov nkauj muam, thiab ib txhia tib neeg tsis nyiam qhov no kiag li thiab qhia tawm lawv tej kev tsis pom zoo, ces cov thawj coj thiab cov neeg ua hauj lwm yuav tsum sawv los daws qhov teeb meem no. Los sis, yog lwm tus twb tau qhia tawm txog ib tug neeg twg lawm, tias tus neeg no tsis sib qhia Vajtswv cov lus thaum lub sij hawm sib txoos ua ke tiam sis pheej tham txog lawv tsev neeg tej xwm txheej thiab tsim kev sib raug zoo ntawm tus kheej, saib qhov chaw sib txoos ua ke yam li ib qho chaw rau kev tsim kev sib raug zoo ntawm tus kheej thiab saib xyuas tej hauj lwm ntiag tug, thov kev pab los ntawm lwm tus thiab siv txhua tus uas lawv tuaj yeem siv tau; thiab hais tias tus neeg no muaj tus cwj pwm qis, twm xeeb, siab nqaim, thiab qias, thiab tsis caum qhov tseeb tiam sis nrhiav kev tau txiaj ntsim rau txhua qhov chaw, nrhiav ntau lub cib fim kom lawv tus kheej tau cov txiaj ntsim, ces tus neeg zoo li no yuav tsum raug muab cais tawm.

Ib txhia tib neeg siv qee cov kwv tij thiab cov muam uas nplua nuj thiab muaj hwj chim los ua tej yam rau lawv, thiab yog lawv tej kev thov tsis raug teb rov qab, lawv yuav txiav txim rau cov kwv tij thiab cov muam ntawd nyob tom qab tas li, hais tias cov tib neeg no tsis muaj kev hlub thiab tsis yog cov ntseeg tiag tiag, thiab haj tseem xav muab lawv qhia tawm thiab. Nej puas tau ntsib cov tib neeg zoo li no? Cov tib neeg zoo li no puas tsim nyog raug daws? Thaum ntsib tej xwm txheej zoo li no, yuav tsum ua li cas? Cov thawj coj thiab cov neeg ua hauj lwm yuav tsum sawv los saib xyuas qhov teeb meem, ua raws li tej hauv paus ntsiab lus, kom paub tseeb tias cov kwv tij thiab cov muam tsis raug cuam tshuam. Qhov uas ib tug twg tsis ua ib yam dab tsi rau lawv ntawd txhaum lod? Qhov tsis kam pab lawv puas yog cuag nkaus li tsis xyaum ua raws qhov tseeb los sis tsis muaj kev hlub rau Vajtswv? (Tsis yog.) Qhov seb puas pab ib tug neeg twg ntawd yog cov kwv tij thiab cov muam lawv tus kheej txoj kev ywj pheej; lawv muaj cai xaiv. Vajtswv lub tsev tsis tau teev tseg tias cov kwv tij thiab cov muam yuav tsum sib pab daws tej kev nyuaj ntawm tsev neeg nyob rau lub neej hauv pawg ntseeg. Lub neej hauv pawg ntseeg tsis yog ib qho chaw rau kev daws tej teeb meem ntawm tsev neeg, tiam sis yog ib qho chaw sib txoos ua ke rau kev noj thiab haus Vajtswv cov lus thiab loj hlob hauv lub neej txoj sia. Ib txhia tib neeg siv lub neej hauv pawg ntseeg los daws lawv tus kheej tej teeb meem—qhov no coj tau qhov tshwm sim dab tsi los? Qhov ntawd tsis cuam tshuam rau cov neeg Vajtswv xaiv tseg txoj kev noj thiab haus Vajtswv txoj lus thiab npaj qhov tseeb lod? Tej teeb meem ntawm yus tus kheej lub neej tuaj yeem nrhiav cov kwv tij thiab cov muam daws ntawm ntiag tug; tsis tas yuav coj tej ntawd tuaj daws ntawm lub neej hauv pawg ntseeg. Thaum kev saib xyuas tej hauj lwm ntiag tug ntawd cuam tshuam rau cov neeg Vajtswv xaiv tseg ua lub neej hauv pawg ntseeg ces txhua tus tsim nyog paub tias qhov tshwm sim los yog dab tsi. Thaum cov thawj coj thiab cov neeg ua hauj lwm pom tej yam zoo li no, lawv yuav tsum sawv los daws tej ntawd. Lawv yuav tsum tiv thaiv cov uas nyob hauv pawg ntseeg uas ua tau lawv tej dej num li ib txwm, tiv thaiv cov uas caum qhov tseeb tiag tiag, txwv cov tib neeg phem, thiab txwv tsis pub lawv ua tiav lawv tej hom phiaj. Qhov no yog cov thawj coj thiab cov neeg ua hauj lwm lub luag hauj lwm. Yuav tsum muaj kev paub cais kom meej txog qhov yuav coj rau tej xwm txheej ib txwm muaj ntawm qhov teeb meem peb li cas, tej kev qhia tshwm uas pom tau meej twg uas yog lub ntsiab xeeb txawm los sis qhov xwm txheej uas loj, thiab hom twg thiab cov kev qhia tshwm uas pom tau meej twg uas ua rau muaj kev tab kaum thiab kev cuam tshuam. Thaum muab qhov loj ntawm ib qho xwm txheej ntawd cais meej lawm, es yuav tsum muab qhov ntawd daws raws li nws lub ntsiab xeeb txawm. Qhov no yog ib yam uas cov thawj coj thiab cov neeg ua hauj lwm yuav tsum to taub, thiab kuj yog ib yam uas txhua tus yuav tsum to taub thiab.

IV. Kev Tsim Pab Tsim Pawg

Qhov kev qhia tshwm uas pom tau meej plaub txog kev tab kaum thiab kev cuam tshuam lub neej hauv pawg ntseeg yog kev tsim pab tsim pawg, uas muaj lub ntsiab xeeb txawm hnyav heev. Tej kev coj twg uas suav tias yog kev tsim pab tsim pawg? Yog ob tug tib neeg uas ntseeg Vajtswv tau ntev ib yam, lub hnub nyoog, xwm txheej hauv tsev neeg, kev nyiam, tus cwj pwm, thiab lwm yam kuj zoo sib xws thiab, thiab nkawd sib haum xeeb dua me ntsis, pheej zaum ua ke thaum lub sij hawm sib txoos ua ke tas li, thiab sib raug zoo dua me ntsis, qhov no puas suav tias yog kev tsim pab tsim pawg? (Tsis suav.) Qhov no yog ib qho uas tshwm sim tas li ntawm txoj kev sib raug zoo ntawm tib neeg uas ib txwm muaj, uas tsis ua rau muaj kev cuam tshuam rau lwm tus; yog li ntawd, tsis suav tias yog kev tsim pab tsim pawg. Yog li, kev tsim pab tsim pawg, raws li tau hais nyob ntawm no, yog hais txog dab tsi? Piv txwv li, muaj tsib tug kwv tij thiab nkauj muam uas tuaj sib txoos ua ke, peb tug yog neeg ua hauj lwm hauv nroog thiab ob tug yog neeg ua liaj ua teb nyob toj siab. Peb tug neeg ua hauj lwm hauv nroog ntawd pheej nyob ua ke, tham txog tias lub neej nyob hauv nroog mas zoo dua thiab nyob pem toj siab mas tsis zoo dua li cas, cov tib neeg tsis muaj kev kawm, tsis muaj kev pom dav, thiab tsis paub kev paub cai. Lawv saib tsis taus cov neeg nyob pem toj siab, pheej hais lus saib tsis taus rau ob tug neeg nyob pem toj siab ntawd, uas tom qab ntawd nkawd hnov tias chim siab thiab xav tawm tsam lawv, hais tias cov neeg hauv nroog mas siab nqaim thiab xam txhua yam me me, hos cov neeg pem toj siab mas siab dav. Thaum lub sij hawm sib txoos ua ke, lawv yeej tham tsis haum li, pheej ua rau muaj kev sib cav thiab kev sib ceg uas tsis tsim nyog. Tsib tug no puas sib raug zoo yam sib haum xeeb? Lawv puas koom ua ke nyob rau hauv Vajtswv txoj lus? Lawv puas sib haum? (Tsis sib haum.) Thaum cov neeg hauv nroog pheej hais tias “peb cov neeg hauv nroog” thiab cov neeg pem toj siab pheej hais tias “peb cov neeg pem toj siab,” lawv tab tom ua dab tsi? (Kev tsim pab tsim pawg.) Qhov no yog qhov teeb meem plaub uas peb yuav sib qhia txog: kev tsim pab tsim pawg. Tus cwj pwm tsim pab tsim pawg no txhais hais tias tsim ua tej pab thiab ua tej pawg. Qhov tsim ntau pab pawg, cov neeg uas sib cais ua pab, thiab lwm cov pab pawg me raws li cheeb tsam, raws li kev khwv nyiaj txiag, thiab theem neeg hauv zej zog, nrog rau tej kev xam pom uas tsis sib xws, suav tias yog kev tsim pab tsim pawg. Txawm leej twg yog tus thawj coj cov pab pawg no los xij, nyob rau hauv pawg ntseeg, qhov kev tsim ntau pab thiab ntau pawg uas tsis sib xws, thiab qhov kev tsim cov pab pawg uas tsis sib haum, puav leej yog tej kev tshwm sim ntawm kev tsim pab tsim pawg. Nyob rau qee qhov chaw, ib tsev neeg loj tag nrho ntseeg Vajtswv, thiab nyob rau ntawm ib qho chaw sib txoos ua ke, dhau ntawm ob tug neeg uas muaj xeem txawv lawm, ces cov tshuav ntawd puav leej yog lawv tsev neeg xwb. Tsev neeg no thiaj li tsim ua ib pawg los sis ib pab, ua rau ob tug neeg uas lub xeem txawv ntawd dhau los ua neeg sab nraud. Txawm leej twg hauv tsev neeg no ntsib teeb meem dab tsi los sis raug ntuas, yog ib tug neeg hais lus yws, ces cov tshuav ntawd kuj nrog yws thiab. Yog leej twg ua txhaum tej hauv paus ntsiab lus, lwm tus yuav pab npog thiab zais lawv tej kev ua, txwv tsis pub leej twg nthuav tawm lawv; tab txawm yog hais txog qhov teeb meem no me ntsis xwb los yeej tsis tau, tsis tas yuav hais txog kev ntuas li. Qhov no yog teeb meem dab tsi? Koj puas paub cais? Thaum cov neeg hauv tsev neeg no tuaj sib txoos ua ke, qhov ntawd zoo li lawv txhua tus hu ib zaj nkauj thiab ua ib lub siab, saib seb cua tshuab mus rau qhov twg thiab mloog seb lwm tus hais li cas ua ntej lawv yuav hais lus. Yog tus thawj coj pab pawg ntawd muaj ib qho kev xam pom twg, txhua tus kuj ua raws li ntawd, thiab lwm tus tsis kam ua rau lawv chim los sis tsis kam tawm suab tawm tsam. Qhov kev tshwm sim ntawm qhov no nyob rau hauv lub neej hauv pawg ntseeg puas yog ua rau muaj kev tab kaum thiab kev cuam tshuam rau qhov raws qib raws duas li ib txwm ntawm pawg ntseeg? Thaum lub sij hawm sib txoos ua ke, cov tib neeg ntawm pab pawg no txiav txim siab seb yuav noj thiab haus Vajtswv cov lus nqe twg, thiab txhua tus yuav tsum mloog; txawm yog cov thawj coj pawg ntseeg los yuav tsum tau tseg ntsej muag rau lawv thiab tsis muaj cuab kav tawm tsam. Lawv tshaj tawm tias leej twg tsim nyog raug xaiv tsa ua cov thawj coj thiab cov neeg ua hauj lwm, thiab cov thawj coj pawg ntseeg yuav tsum saib lawv lub tswv yim tias yog qhov tseem ceeb tshaj plaws thiab tsis txhob tsis quav ntsej. Nyob rau tib lub sij hawm ntawd, lawv nrhiav cov “neeg muaj peev xwm” tsis tu ncua, rub cov uas yuav mloog lawv lus, cov uas lawv ntseeg siab tau, thiab cov uas muaj txiaj ntsim rau lawv los rau hauv lawv pab pawg los siv rau pab pawg tej hom phiaj, es nthuav lawv lub hwj chim mus kom dav yam tsis tu ncua. Pab pawg no muaj hom phiaj xav tswj lub neej hauv pawg ntseeg; tus thawj coj pab pawg ntawd xav tswj pawg ntseeg. Pab pawg no muaj hwj chim loj heev; lawv koom siab ua ke los ua tej yam nyob rau hauv pawg ntseeg. Txawm muaj dab tsi tshwm sim nyob rau hauv pawg ntseeg los, lawv xav koom nrog. Lwm tus yuav tsum saib lawv lub ntsej muag ua ntej yuav hais lus los sis saib xyuas qee yam, mus txog rau theem uas cov ntsiab lus rau kev noj thiab haus ntawm txhua qhov kev sib txoos ua ke ntawd yuav tsum ua raws li lawv tej kev npaj thiab tej kev ntshaw. Txawm yog cov thawj coj pawg ntseeg xav ua ib yam dab tsi los, cov thawj coj yuav tsum tau xub nug lawv tej tswv yim thiab mloog lawv tej kev xav. Feem coob ntawm cov kwv tij thiab cov muam raug lawv tswj, thiab ntau yam ntawm pawg ntseeg tes hauj lwm kuj nyob hauv lawv txoj kev tswj thiab. Cov tib neeg uas tsim pab tsim pawg no tab kaum thiab cuam tshuam lub neej hauv pawg ntseeg thiab pawg ntseeg tes hauj lwm hnyav heev. Qhov teeb meem no puas loj? Tej kev ua no puas tsim nyog raug txwv? Tej no puas tsim nyog raug daws? Cov thawj coj ntawm cov pab pawg no yuav tsum raug txwv thiab ntsaig tawm mus los sis ntiab tawm, hos cov neeg ruam feeb tsis meej uas raws lawv qab yam dig muag ntawd yuav tsum xub tau txais kev sib qhia thiab kev pab. Yog lawv tsis lees txim hloov dua siab tshiab los sis tsis hloov, ces yuav tsum muab lawv txwv. Tsis txhob txuag lawv ib qho li!

Kev tsim pab tsim pawg yog dab tsi—qhov no puas yooj yim to taub? Yog ib tug neeg muab ib qho teeb meem los hais es muaj ob peb tug neeg pom zoo nrog lawv, qhov ntawd puas suav tias yog kev tsim pab tsim pawg? (Tsis yog.) Yog ib txhia kwv tij thiab nkauj muam, uas muaj lub nra thiab paub txog kev ncaj ncees dua me ntsis, hu lwm tus los koom nrog lawv ua kom tiav ib tes hauj lwm tseem ceeb, los sis yog, txhawm rau qhov tau txais txiaj ntsig nyob rau hauv txoj kev sib txoos ua ke thiab muaj peev xwm to taub qhov tseeb thiab Vajtswv tej kev npaj siab nyob rau ntawm ib lub ncauj lus tseem ceeb, lawv coj txhua tus hauv txoj kev sib qhia, thiab txhua tus ua raws li lawv txoj kev xav thaum sib qhia thiab nyeem thov Vajtswv cov lus, qhov no puas suav tias yog kev tsim pab tsim pawg? (Tsis suav.) Nyob hauv pawg ntseeg, cov tib neeg twg uas nyiam tsim pab tsim pawg? Txoj kev coj zoo li cas uas suav tias yog kev tsim pab pawg? (Ob peb tug tib neeg sib pab npog thiab ib leeg ua raws li ib leeg lub siab nyiam, los sis khib thiab sib cav sib ceg, uas tag nrho tej no tab kaum thiab cuam tshuam rau tes hauj lwm ntawm pawg ntseeg—qhov no yog kev tsim pab tsim pawg.) Qhov no yog ib qho. Lub ntsiab tseem ceeb ntawm no yog dab tsi? Kev sib pab npog thiab ib leeg ua raws li ib leeg lub siab nyiam ua rau muaj kev tab kaum thiab kev cuam tshuam; paub tias qhov ua ib yam dab tsi ntawd tsis yog thiab tsis mus raws li qhov tseeb tej hauv paus ntsiab lus, tiam sis tseem txhob txwm zais qhov ntawd, sib cav los thaiv, thiab tsis qhia qhov tseeb, xum ua rau pawg ntseeg tes hauj lwm thiab Vajtswv lub tsev tej txiaj ntsim raug puas tsuaj kom tiv thaiv tau ib tug neeg twg lub ntsej muag thiab lub meej mom, thiab pab npog cov uas ua phem thiab ua rau muaj kev tab kaum thiab kev cuam tshuam los ntawm kev muag Vajtswv lub tsev tej txiaj ntsim—qhov no yog kev tsim pab tsim pawg. Lwm qhov ces yog kev ntxias thiab haub tib neeg los koom tes tawm tsam Vajtswv lub tsev tej kev npaj. Qhov no lub ntsiab xeeb txawm mas hnyav, qhov ntawd kuj yog ib hom kev tab kaum thiab kev cuam tshuam Vajtswv tes hauj lwm thiab qhov raws qib raws duas li ib txwm ntawm pawg ntseeg thiab. Lub hom phiaj tseem ceeb ntawm kev tsim pab tsim pawg yog dab tsi? Qhov ntawd yog los tswj pawg ntseeg thiab los tswj cov neeg Vajtswv xaiv tseg.

Kuj muaj ib hom kev tsim pab tsim pawg uas muaj feem xyuam txog cov tib neeg uas hais lus zoo mloog kom yuav tau ntau hom tib neeg lub siab los tuaj lawv sab thiab. Saib sab nraud mas, zoo li txhua tus nyob rau hauv cov pab pawg zoo li no hais lus tau ywj pheej thiab nthuav lawv tus kheej tej kev xam pom tawm tau. Txawm li cas los xij, los ntawm qhov saib tej txiaj ntsig thaum kawg, koj yuav pom tau tias tseeb tiag lawv tab tom ua raws li qhov uas ib tug neeg hais—tus neeg ntawd yog tus taw lawv kev. Yog li ntawd, tus neeg ntawd rub lwm tus los tuaj lawv sab li cas? Lawv saib seb leej twg uas lawv tuaj yeem rub tau thiab leej twg uas yooj yim rub, thiab lawv muab tej txiaj ntsim me me rau cov neeg ntawd, muab kev pab uas muaj kev hlub me ntsis rau cov neeg ntawd. Tom qab ntawd lawv nrhiav ntaub ntawv txog cov neeg ntawd, nrhiav seb cov neeg ntawd nyiam dab tsi, nyiam hais lus li cas, cov neeg ntawd tus cwj pwm, thiab cov neeg ntawd tej kev nyiam. Nyob rau tib lub sij hawm ntawd, lawv nquag pom zoo nrog cov neeg ntawd thaum sib tham kom yuav tau cov neeg ntawd lub siab, thiab thaum kawg, lawv maj mam “hloov” cov neeg ntawd lub siab ib qho me ntsis, ua rau cov neeg ntawd nkag mus rau hauv lawv qhov kev sib cais ua pab ntawd thiab koom nrog lawv pab pawg yam tsis paub txog. Feem ntau hais tias, kev hais lus zoo mloog kom yuav tau tib neeg lub siab kom tau cov neeg ntawd los rau lawv sab ntawd yog ib txoj kev uas mos muag heev, qhov ntawd puv npo nrog “kev hlub tshua ntawm tib neeg,” thiab muaj txiaj ntsig heev. Piv txwv li, yog ib tug neeg twg nquag qhia kev hlub rau lwm tus, pom zoo nrog thaum sib tham, thiab qhia kev to taub thiab kev thev taus, tus neeg ntawd yuav muaj ib qho kev xav zoo rau lawv thiab yuav txav ze rau lawv yam tsis paub txog, thiab tom qab ntawd yuav raug coj mus rau hauv lawv lub hwj chim. Nyob rau hauv cov xwm txheej twg uas cov pab pawg thiab cov neeg uas sib cais ua pab zoo li no thiaj li ua hauj lwm? Kiag thaum ib tug ntawm lawv cov neeg uas dig muag raws lawv qab ntawd raug nthuav tawm, xav tias raug ua tsis ncaj ncees rau, los sis muaj ib yam dab tsi los sis ib tug neeg sab nraud ntawm lawv pab pawg los cuam tshuam los sis ua puas tsuaj rau lawv tej txiaj ntsim, lub meej mom, los sis lub suab npe, hom neeg no yuav sawv los pab hais lus rau lawv, sib tw rau lawv tej txiaj ntsim thiab tej cai—qhov no yog qhov lawv tsim pab tsim pawg. Ob hom kev tsim pab tsim pawg uas pom meej yog kev sib pab npog thiab ib leeg ua raws li ib leeg lub siab nyiam, thiab kev koom tes tawm tsam. Txawm li cas los xij, qhov kev tsim pab tsim pawg los ntawm kev hais lus zoo mloog kom yuav tau tib neeg lub siab ntawd tsis muaj zog npaum li ob hom uas nyuam qhuav hais txog ntawd, thiab cov tswv cuab ntawm cov pab pawg zoo li no feem ntau nyob rau hauv pawg ntseeg saib tsis tawm. Tiam sis thaum txog sij hawm rau tib neeg xaiv, kom muaj ib qho kev sawv ruaj uas meej, cov neeg uas sib cais ua pab zoo li no yuav pom meej heev. Piv txwv li, yog tus thawj coj pab pawg ntawd hais tias ib tug thawj coj pawg ntseeg twg muaj peev xwm, cov neeg raws lawv qab yuav cia li muab ntau yam piv txwv qhia txog qhov tus thawj coj ntawd qhia tshwm lub peev xwm no. Yog tus thawj coj pab pawg ntawd hais tias tus thawj coj pawg ntseeg ntawd tsis muaj peev xwm ua hauj lwm, lub peev xwm tsis zoo, thiab muaj kev ua neeg tsis zoo, lwm cov tswv cuab yuav hais raws li ntawd, hais txog qhov uas tus thawj coj pawg ntseeg ntawd tsis muaj peev xwm li cas, lawv tsis muaj peev xwm sib qhia qhov tseeb li cas, lawv hais cov lus thiab cov kev qhuab qhia li cas, thiab lawv yuav hais tias txhua tus yuav tsum xaiv tus neeg uas yog los hloov chaw. Qhov no yog ib hom kev sib cais ua pab ua pawg uas pom tsis tau. Txawm hais tias lawv tsis tab meeg tawm los txeeb hwj chim thiab tswj tib neeg nyob rau hauv pawg ntseeg los, muaj ib lub hwj chim uas pom tsis tau nyob rau hauv cov neeg uas sib cais ua pab thiab cov pab pawg zoo li no uas tswj lub neej hauv pawg ntseeg thiab qhov raws qib raws duas ntawm pawg ntseeg. Qhov no yog ib hom kev tsim pab tsim pawg uas txaus ntshai dua thiab zais ntshis dua. Dhau ntawm ob qho xwm txheej ntawm qhov kev tsim kev sib cais ua pab ua pawg uas yooj yim paub cais uas tau hais dhau los ntawd, yog tej teeb meem uas cov thawj coj hauv pawg ntseeg yuav tsum daws, hom kev tsim pab tsim pawg uas zais ntshis no yog ib qho teeb meem uas cov thawj coj pawg ntseeg haj yam yuav tsum daws thiab saib xyuas. Lawv yuav tsum ua qhov no li cas? Lawv yuav tsum hais ncaj qha rau tus thawj coj pab pawg ntawd los ntawm kev sib qhia. Vim li cas thiaj li tsom ntsoov rau kev sib qhia nrog tus thawj coj pab pawg no ua ntej? Saib sab nraud mas, zoo li cov tswv cuab ntawm cov neeg uas sib cais ua pab zoo li no tsis raug leej twg tswj, tiam sis tseeb tiag lawm, lawv txhua tus paub tob tob hauv lawv lub siab tias lawv mloog leej twg lus, thiab txaus siab mloog tus neeg ntawd lus. Yog li ntawd, tus uas lawv pe hawm thiab tswj lawv ntawd yuav tsum raug daws thiab saib xyuas, thiab yuav tsum tau sib qhia txog qhov tseeb rau tus neeg ntawd kom lawv to taub lub ntsiab xeeb txawm ntawm lawv tej kev ua. Txawm hais tias tus thawj coj pab pawg ntawd tej zaum yuav tsis tab meeg tawm tsam Vajtswv lub tsev los sis qw tawm tsam cov thawj coj los xij, lawv tswj cov tib neeg no txoj cai hais lus, lawv tej kev xav, tej kev xam pom, thiab txoj kev uas lawv taug. Lawv yog ib tug tawm tsam khetos uas zais ntshis. Cov tib neeg zoo li no yuav tsum raug txheeb tawm los, tom qab ntawd cais thiab soj ntsuam lawv. Yog lawv tsis lees txim hloov dua siab tshiab, ces yuav tsum txwv thiab cais lawv tawm. Tom qab ntawd, tsim nyog tshawb xyuas rau txhua tus ntawm lawv cov tswv cuab ua kom pom tias leej twg hauv lawv yog tib hom neeg zoo li ntawd. Ua ntej tshaj, muab cov tib neeg no faib, thiab tom qab ntawd sib qhia nrog cov neeg ruam feeb tsis meej uas ntshai, tais caus, thiab tau raug coj mus yuam kev lawm ntawd. Yog lawv tuaj yeem lees txim hloov dua siab tshiab thiab tso tseg qhov raws tus tawm tsam khetos ntawd qab, tuaj yeem cia lawv nyob hauv pawg ntseeg; yog tsis tso tseg, ces lawv yuav tsum raug cais tawm. Qhov ua li no puas tsim nyog? (Tsim nyog.) Qhov kev tshwm sim no puas muaj nyob rau hauv pawg ntseeg? Hom teeb meem no puas tsim nyog raug daws? (Tsim nyog raug daws.) Vim li cas thiaj li tsim nyog raug daws? Txij li thaum Vajtswv lub tsev pib tshaj tawm txoj moo zoo, cov tawm tsam khetos tej hwj chim mas muaj nyob txhua qhov chaw hauv lub neej hauv pawg ntseeg, thiab ntau tus neeg Vajtswv xaiv tseg raug cuam tshuam, raug txwv, los sis raug tswj los ntawm cov hwj chim no hauv ntau theem uas sib txawv. Thaum twg cov tib neeg no hais lus los sis ua dab tsi, lawv tsis nyob rau hauv ib qho xwm txheej uas ywj pheej thiab tso dim, tiam sis raug haub, raug cuam tshuam, raug tswj, thiab raug kaw los ntawm tej kev xav thiab tej kev xam pom ntawm qee tus tib neeg. Cov tib neeg no hnov tias raug yuam kom hais lus thiab ua tej yam raws li qee txoj kev; yog lawv tsis ua, lawv txhawj xeeb thiab ntshai tsam yuav tau ris tej qhov ua tau los uas tshwm sim tuaj. Qhov no tsis yog cuam tshuam lub neej hauv pawg ntseeg lod? Qhov no puas yog ib qho kev qhia tshwm uas pom tau meej ntawm lub neej hauv pawg ntseeg uas ib txwm muaj? (Tsis yog.) Lub neej hauv pawg ntseeg zoo li no tsis yog qhov raws qib raws duas uas ib txwm muaj tiam sis raug tswj los ntawm cov tib neeg phem. Tsuav cov tib neeg phem tuav hwj chim nyob rau hauv pawg ntseeg xwb, ces qhov ntawd tsis yog Vajtswv txoj lus los sis qhov tseeb kav lawm. Cov thawj coj, cov neeg ua hauj lwm, thiab cov kwv tij thiab cov muam uas to taub qhov tseeb yuav raug tsim txom. Ib lub pawg ntseeg zoo li no yog ib lub uas raug tswj los ntawm cov tawm tsam khetos tej hwj chim. Qhov no kuj yog ib qho teeb meem thiab kev tshwm sim uas Vajtswv tes hauj lwm thiab qhov raws qib raws duas li ib txwm muaj ntawm pawg ntseeg raug tab kaum thiab cuam tshuam, cov thawj coj thiab cov neeg ua hauj lwm yuav tsum daws thiab saib xyuas. Ib txhia tib neeg uas nyob hauv pab pawg ntawm ib tug tawm tsam khetos ntshai tsam poob kev ntseeg siab ntawm lawv pab pawg, poob lawv cov neeg txhawb nqa, poob phooj ywg, tsis muaj kev txhawb pab thaum muaj kev tim tsum, thiab lwm yam. Yog li ntawd, lawv siv zog ua lawv qhov zoo tshaj plaws kom nyob tau hauv pab pawg ntawd. Qhov xwm txheej no puas yog hnyav heev? Puas yog tsim nyog raug daws? (Tsim nyog.) Thaum hom xwm txheej no tshwm sim nyob rau hauv pawg ntseeg, tib neeg feem coob puas paub txog? Tib neeg feem coob puas paub cais? Ib txhia tib neeg raug tswj los ntawm ib tug neeg twg yam tsis paub txog, lawv pheej yuav tsum ua raws li tus neeg ntawd tej kev xav thiab tej kev xam pom, tus neeg ntawd cov lus hais thiab tej kev ua, tus neeg ntawd tej kev qhia tas li, thiab lawv ntshai hais “tsis,” ntshai tawm tsam tus neeg ntawd, thiab haj tseem yuav tsum tau ua txuj ncaws hau pom zoo thiab luag nyav thaum tus neeg ntawd hais lus, vim ntshai tsam ua rau lawv chim. Puas muaj tej xwm txheej zoo li no? Qhov teeb meem uas yuav tsum tau daws nyob ntawm no yog dab tsi? Cov thawj coj pawg ntseeg yuav tsum daws thiab saib xyuas tus thawj coj pab pawg uas yog tus tawm tsam khetos ntawd uas muaj peev xwm coj mus yuam kev thiab tswj lwm tus ntawd. Ua ntej, lawv yuav tsum sib qhia qhov tseeb kom tib neeg feem coob muaj peev xwm paub cais tus tawm tsam khetos no, tom qab ntawd txwv tus tawm tsam khetos ntawd tus kheej. Yog tus tawm tsam khetos tsis lees txim hloov dua siab tshiab, ces tus tawm tsam khetos ntawd yuav tsum raug ntsaig tawm mus kom sai li sai tau txhawm rau tiv thaiv kom lawv tsis txhob cuam tshuam qhov raws qib raws duas li ib txwm ntawm pawg ntseeg txuas ntxiv.

Muab hais kom luv luv tias, nyob rau lub neej hauv pawg ntseeg uas ib txwm muaj mas, cov kwv tij thiab cov muam yuav tsum muaj peev xwm sib qhia Vajtswv cov lus tau yam ywj pheej thiab tso dim, sib qhia txog lawv tus kheej tej kev pom, tej kev to taub thiab kev ntsib kev pom, thiab tej kev nyuaj. Tseeb tiag lawm, lawv kuj yuav tsum muaj cai los tawm tswv yim, thuam, thiab nthuav tawm txhua yam kev ua ntawm cov thawj coj thiab cov neeg ua hauj lwm uas ua txhaum rau tej hauv paus ntsiab lus, thiab tib lub sij hawm ntawd muaj cai los pab thiab qhia. Txhua yam no tsim nyog ywj pheej, thiab txhua yam no tsim nyog yog li ib txwm muaj; tej no yuav tsum tsis txhob raug tswj los ntawm ib tug neeg twg, uas ua rau cov neeg Vajtswv xaiv tseg raug txwv—qhov ntawd yuav tsis yog lub neej hauv pawg ntseeg uas ib txwm muaj. Vajtswv lub tsev muaj tej kev cheem tsum, tej kev cai tswj, thiab tej hauv paus ntsiab lus rau qhov uas cov kwv tij thiab cov nkauj muam yuav tsum hais lus, ua tej yam, thiab coj lawv tus cwj pwm li cas thiab lawv yuav tsum tsim txoj kev sib raug zoo ntawm tib neeg uas ib txwm muaj nyob rau lub neej hauv pawg ntseeg li cas, thiab lwm yam ntxiv, thiab tej no tsis yog txiav txim siab los ntawm ib tug neeg twg. Thaum cov kwv tij thiab cov muam ua ib yam dab tsi, lawv tsis tas yuav saib ib tug neeg twg lub ntsej muag, lawv tsis tas yuav ua raws li ib tug neeg twg tej lus txib los sis raug txwv los ntawm ib tug neeg twg. Tsis muaj leej twg tsim nyog ua tus taw kev los sis tus tsav nkoj; tib yam uas tuaj yeem muab tau txoj xub ke ntawd mas yog Vajtswv txoj lus, qhov tseeb. Yog li ntawd, yam uas cov neeg Vajtswv xaiv tseg yuav tsum ua raws yog Vajtswv txoj lus, qhov tseeb, thiab tej hauv paus ntsiab lus ntawm kev sib qhia qhov tseeb thaum lub sij hawm sib txoos ua ke. Yog koj pheej raug txwv los ntawm lwm tus neeg, pheej saib lawv lub ntsej muag, thiab thaum koj pom lawv lub ntsej muag tsis zoo siab los sis lub ntsej muag ntshaus ntsho ces tsis kam hais lus ntxiv lawm, yog koj pheej raug txwv los ntawm tus neeg ntawd thaum sib qhia txog Vajtswv cov lus thiab txog koj tus kheej tej kev to taub ntawm kev ntsib kev pom, pheej hnov tias raug txwv, tsis muaj peev xwm ua raws li qhov tseeb tej hauv paus ntsiab lus, thiab yog tus neeg ntawd cov lus, qhov saib pom, kev nthuav tawm ntawm lub ntsej muag, lub suab hais lus, thiab tej lus hem uas zais nyob rau hauv lawv cov lus ntawd pheej khi koj tas li, ces koj tab tom raug tswj nyob rau hauv ib pab pawg uas tus neeg no coj lawm. Qhov no ces muaj teeb meem lawm; qhov no tsis yog lub neej hauv pawg ntseeg, tiam sis yog lub neej ntawm ib pab pawg uas raug tswj los ntawm ib tug tawm tsam khetos. Thaum hais txog hom teeb meem no, cov thawj coj thiab cov neeg ua hauj lwm yuav tsum sawv los daws, thiab cov kwv tij thiab cov muam kuj muaj lub luag hauj lwm thiab txoj cai los tiv thaiv qhov raws qib raws duas li ib txwm muaj ntawm pawg ntseeg. Cov uas tab kaum thiab cuam tshuam lub neej hauv pawg ntseeg, tshwj xeeb tshaj yog cov uas tsim pab tsim pawg thiab xav tswj pawg ntseeg, yuav tsum raug cheem, nthuav tawm, thiab soj ntsuam, ua kom txhua tus muaj peev xwm paub cais thiab pom tshab txog lub ntsiab tseeb ntawm qhov teeb meem, uas yog kev xav tsim ib lub nceeg vaj rau lawv tus kheej. Pawg ntseeg tsis tso cai rau qhov kev tsim pab tsim pawg thiab kev faib pawg ntseeg rau ib qho laj thawj twg li. Piv txwv li, kev faib mus ua ntau pab pawg raws li qhov lawv yog leej twg thiab lub meej mom nyob hauv zej zog, cheeb tsam, los sis pab pawg ntawm sab kab lis kev cai ntseeg, los sis kev faib ua ntau pab pawg raws li theem ntawm txoj kev kawm, kev nplua nuj, haiv neeg thiab kob ntawm tawv nqaij, thiab ntau yam ntxiv—tag nrho tej no puav leej ua txhaum rau qhov tseeb tej hauv paus ntsiab lus thiab yuav tsum tsis txhob tshwm sim nyob rau hauv pawg ntseeg. Txawm yuav siv qhov laj thawj twg los faib tib neeg rau hauv cov theem, qib, pab pawg, thiab cov neeg uas sib cais ua pab no los xij, qhov ntawd yuav tab kaum thiab cuam tshuam rau pawg ntseeg tes hauj lwm thiab qhov raws qib raws duas ntawm lub neej hauv pawg ntseeg uas ib txwm muaj, thiab qhov ntawd yog ib qho teeb meem uas cov thawj coj thiab cov neeg ua hauj lwm yuav tsum daws kom sai. Muab hais kom luv luv ces, txawm tib neeg sib faib mus rau hauv qhov sib cais ua pab ua pawg, cov pab pawg, los sis ntau pab pawg los xij, yog lawv tsim tau ib lub zog loj mus txog ib theem twg, thiab lawv ua rau muaj kev cuam tshuam rau pawg ntseeg tes hauj lwm thiab qhov raws qib raws duas ntawm lub neej hauv pawg ntseeg, lawv yuav tsum raug cheem thiab txwv. Yog cov tswv cuab ntawm cov neeg uas sib cais ua pab zoo li no tsis mloog cov lus ntuas, ces tuaj yeem muab cov neeg ua phem no cais tawm thiab ntsaig tawm mus. Kev daws tej teeb meem no kuj yog ib feem ntawm tes hauj lwm thiab tej luag hauj lwm uas cov thawj coj thiab cov neeg ua hauj lwm yuav tsum ua. Yog li, nyob ntawm no qhov uas yuav tsum to taub ntawd yog dab tsi? Qhov ntawd yog qhov uas thaum qee tus tib neeg tau tsim tej lub hwj chim nyob rau hauv pawg ntseeg, thiab muaj peev xwm tawm tsam thiab cov nyom pawg ntseeg cov thawj coj, pawg ntseeg tes hauj lwm, thiab Vajtswv cov lus, thiab muaj peev xwm cuam tshuam thiab ua puas tsuaj rau qhov raws qib raws duas ntawm lub neej hauv pawg ntseeg uas ib txwm muaj, tej kev coj, tej kev qhia tshwm uas pom tau meej, thiab xwm txheej zoo li no yuav tsum raug txwv thiab daws kom sai. Tsis cais raws li cov tib neeg coob los tsawg thaum hais txog qhov kev tsim pab tsim pawg. Yog ob tug tib neeg sib raug zoo thiab tsis ua rau muaj kev cuam tshuam rau pawg ntseeg, tsis tas yuav mus quav ntsej. Txawm li cas los xij, kiag thaum lawv pib ua rau muaj kev cuam tshuam thiab tsim ib lub hwj chim txhawm rau tswj pawg ntseeg, cov tib neeg no yuav tsum raug cheem thiab txwv. Yog lawv tsis lees txim hloov dua siab tshiab, lawv yuav tsum raug ntsaig tawm mus kom ncav sij hawm los sis ntiab tawm kom ncav sij hawm. Qhov no yog lub hauv paus ntsiab lus.

Lub Tsib Hlis Hnub Tim 22, Xyoo 2021