Tau ntau txhiab xyoo lawm, tib neeg tau tos ntsoov kom pom qhov kev rov los ntawm tus Cawm Seej. Tib neeg tau tos ntsoov kom pom Yexus uas yog tus Cawm Seej caij ib tauv huab dawb thaum Nws nqis los, ua tus neeg kiag, nrog rau cov uas tau tos yam qaug zog ntsuav thiab ntshaw pom Nws los tau txhiab txhiab xyoo lawm. Tib neeg kuj tseem tau tos ntsoov kom tus Cawm Seej rov los thiab los nyob ua ke nrog lawv; qhov ntawd ces yog, tos ntsoov Yexus uas yog tus Cawm Seej, tus uas raug cais tawm ntawm tib neeg mus tau txhiab txhiab xyoo lawm, kom rov los, thiab rov qab los ua tes dej num ntawm kev txhiv dim uas Nws ua nrog cov neeg Yudais dua ib zaug ntxiv, kom muaj kev khuv leej thiab kev hlub rau tib neeg, kom zam txim rau tej kev txhaum ntawm tib neeg thiab ris tej kev txhaum ntawm tib neeg, thiab tseem ris tag nrho tib neeg tej kev ua txhaum thiab tso tib neeg dim ntawm txoj kev txhaum. Qhov uas tib neeg tos ntsoov ces yog kom Yexus uas yog tus Cawm Seej zoo ib yam nkaus li qhov dhau los lawm—ib tug Cawm Seej uas ntxim hlub, siab dawb siab zoo, thiab muaj tej yam tsis ruaj khov, tus uas tsis npau taws rau tib neeg li, thiab tus uas tsis cem tib neeg li, tab sis yog tus uas zam txim thiab muab tag nrho tib neeg tej kev txhaum, thiab tus uas tseem yuav, ua li yav dhau los, tuag saum tus ntoo khaub lig rau tib neeg. Txij thaum Yexus ncaim lawm, cov thwj tim uas raws Nws qab, nrog rau tag nrho cov neeg dawb huv uas raug cawm nyob rau hauv Nws lub npe, tau tos yam qaug zog ntsuav thiab tos ntsoov Nws. Tag nrho cov uas raug cawm los ntawm Yexus Khetos txoj hmoov hlub nyob rau thaum Tiam Hmoov Hlub tau tos ntsoov hnub zoo siab tshaj plaws nyob rau hauv tiam kawg uas Yexus uas yog tus Cawm Seej nqis los saum ib thooj huab dawb los tshwm sim rau tag nrho cov tib neeg. Muaj tseeb, qhov no kuj yog sawv daws qhov kev ntshaw rau tag nrho cov uas tau lees txais lub npe ntawm Yexus uas yog tus Cawm Seej hnub no. Txhua tus nyob rau hauv lub qab ntuj khwb no uas paub txog qhov kev cawm dim ntawm Yexus uas yog tus Cawm Seej tau tos ntsoov yam tag kev cia siab kawg rau Yexus Khetos kom tshwm plaws los txog kiag los ua kom tej lus Nws hais thaum tseem nyob rau hauv ntiaj teb kom tshwm sim: “Kuv yuav los txog li thaum Kuv ncaim mus.” Tib neeg ntseeg hais tias, tom qab qhov kev raug ntsia rau saum ntoo khaub lig thiab qhov kev ciaj sawv rov los lawm, ces Yexus rov mus saum ntuj ceeb tsheej caij ib tauv huab dawb mus rau saum Nws qhov chaw nyob rau ntawm Tus Siab Tshaj Plaws sab tes xis lawm. Zoo ib yam nkaus li ntawd, Yexus yuav nqis los dua rau saum ib tauv huab dawb (tauv huab no mas yog hais txog tauv huab uas Yexus caij thaum Nws rov mus rau saum ntuj ceeb tsheej), los rau ntawm cov uas tos ntsoov Nws yam tag kev cia siab kawg tau txhiab txhiab xyoo lawm, thiab Nws yuav muaj lub ntsej muag zoo li thiab hnav cov ris tsho ntawm cov neeg Yudais. Tom qab tshwm sim rau tib neeg lawm, Nws yuav muab zaub mov pub rau lawv, thiab ua kom cov dej pub txoj sia txhawv tsuag yaws tuaj rau lawv, thiab yuav nrog tib neeg nyob, muaj txoj hmoov hlub puv npo thiab muaj kev hlub puv npo, pom meej thiab muaj tseeb. Tag nrho tej kev xav phem no yog tej uas tib neeg ntseeg. Tab sis Yexus uas yog tus Cawm Seej tsis ua li no; Nws ua qhov txawv li fab ntxeev kiag ntawm qhov uas tib neeg xav. Nws tsis los rau cov uas ntshaw Nws txoj kev rov los ntawd, thiab Nws tsis tshwm sim rau tag nrho tib neeg thaum uas caij tauv huab dawb los. Nws twb los txog lawm, tab sis tib neeg tsis paub, thiab nyob yam tsis paub dab tsi li. Tib neeg tsuas lam tos Nws yam tsis muaj hom phiaj dab tsi li xwb, tsis ras txog hais tias Nws twb caij ib tauv “huab dawb” (tauv huab ces yog Nws tus Ntsujplig, Nws tej lus, tag nrho Nws tus moj yam thiab tag nrho tej uas Nws yog), thiab tam sim no twb nyob nrog ib pab neeg kov yeej uas Nws yuav tsim kom muaj rau tiam kawg. Tib neeg tsis paub qhov no: Txawm tus Cawm Seej Yexus dawb huv yuav muaj kev nyiam thiab kev hlub rau tib neeg loj npaum li cas, los Nws yuav ua cas ua tau hauj lwm nyob rau hauv tej “tuam tsev” uas muaj tej kev qhias thiab tej ntsujplig tsis dawb huv nyob rau? Txawm hais tias tib neeg yuav tos ntsoov Nws txoj kev rov qab los, los yuav ua cas Nws thiaj tshwm sim tau rau cov uas noj tej nqaij ntawm tej yam tsis ncaj ncees, haus tej ntshav ntawm tej yam tsis ncaj ncees, thiab hnav tej ris tsho ntawm tej yam uas tsis ncaj ncees, cov uas ntseeg Nws tab sis tsis paub Nws, thiab tsuas muaj khuj Nws tas mus li xwb? Tib neeg tsuas paub hais tias Yexus uas yog tus Cawm Seej mas muaj kev hlub puv npo thiab muaj kev khuv leej phwj yaws xwb, thiab Nws yog qhov kev theej txhoj rau kev txhaum, uas muaj kev txhiv dim puv npo xwb. Txawm li cas los xij, tib neeg tsis paub hais tias Nws yog Vajtswv Tus Kheej kiag, tus uas muaj kev ncaj ncees, lub hwj chim loj, kev npau taws, thiab kev txiav txim puv phwj yaws, muaj lub hwj chim thiab muaj meej mom puv npo. Yog li ntawd, txawm hais tias tib neeg yeej ntshaw yam kub siab lug thiab nqhis txoj kev rov los ntawm tus Txhiv Dim, thiab txawm lawv tej lus thov yuav ua rau “Ntuj Ceeb Tsheej,” txav zog, los Yexus uas yog tus Cawm Seej yeej tsis tshwm sim rau cov uas ntseeg Nws tab sis tsis paub Nws li.

“Yehauvas” yog lub npe uas Kuv siv nyob rau thaum Kuv tes hauj lwm nyob hauv Yixayee, thiab nws txhais tau hais tias tus Vajtswv ntawm cov neeg Yixayee (Vajtswv cov neeg xaiv tseg) uas muaj cuab kav hlub tib neeg, foom phem tib neeg, thiab coj lub neej ntawm tib neeg; tus Vajtswv uas muaj hwj chim loj heev thiab muaj tswv yim puv npo. “Yexus” yog Emanu-ee, uas txhais hais tias tus theej txhoj rau kev txhaum uas muaj txoj kev hlub puv npo, muaj txoj kev khuv leej puv npo, thiab tus uas txhiv tib neeg. Nws ua tes hauj lwm ntawm Tiam Hmoov Hlub, thiab Nws sawv cev rau Tiam Hmoov Hlub, thiab tsuas sawv cev tau rau ib qho ntawm tes hauj lwm cawm tib neeg xwb. Qhov ntawd ces hais tias, tsuas yog Yehauvas xwb thiaj yog tus Vajtswv ntawm cov neeg xaiv tseg ntawm Yixayee, Anplahas tus Vajtswv, Yiha tus Vajtswv, Yakhauj tus Vajtswv, Mauxe tus Vajtswv, thiab tus Vajtswv rau tag nrho cov neeg ntawm Yixayee. Thiab yog li ntawd, nyob rau tiam tam sim no, tag nrho cov neeg Yixayee, uas tsis yog cov neeg Yudais, pe hawm Yehauvas. Lawv fij Nws nyob rau saum lub thaj thiab tiam Nws nyob rau hauv lub tuam tsev thaum hnav cov pov thawj tej tsoos tsho. Qhov lawv cia siab ces yog qhov kev rov tshwm sim dua ntawm Yehauvas. Tsuas yog Yexus xwb thiaj yog tus Txhiv Dim tag nrho noob neej, thiab Nws yog qhov theej txhoj rau kev txhaum uas txhiv noob neej los ntawm txoj kev txhaum. Ces hais tau hais tias, lub npe Yexus yog los ntawm Tiam Hmoov Hlub los thiab tshwm sim los vim yog tes hauj lwm txhiv dim nyob rau hauv Tiam Hmoov Hlub. Lub npe Yexus yog tshwm sim los cia cov neeg ntawm Tiam Hmoov Hlub kom rau rov yug dua tshiab thiab raug cawm tau, thiab yog ib lub npe tshwj xeeb rau qhov kev cawm dim ntawm tag nrho noob neej. Yog li ntawd, lub npe Yexus sawv cev rau tes hauj lwm ntawm kev cawm dim, thiab qhia txog Tiam Hmoov Hlub. Lub npe Yehauvas yog ib lub npe tshwj xeeb rau cov neeg ntawm Yixayee uas nyob rau hauv txoj kev cai. Nyob rau ib tiam twg thiab ib theem twg ntawm tes hauj lwm, Kuv lub npe tsis yog tsis muaj qab hau, tab sis muaj qhov kev sawv cev uas tseem ceeb heev: Ib lub npe twg sawv cev rau ib tiam. “Yehauvas” sawv cev rau Tiam Muaj Kev Cai thiab yog lub meej mom loj uas cov neeg Yixayee muab hu ua tus Vajtswv uas lawv pe hawm. “Yexus” sawv cev rau Tiam Hmoov Hlub, thiab yog lub npe ntawm tus Vajtswv rau tag nrho cov uas raug txhiv dim nyob rau thaum Tiam Hmoov Hlub. Yog tib neeg tseem tos ntsoov qhov kev rov los ntawm Yexus uas yog tus Cawm Seej nyob rau thaum tiam kawg, thiab tseem xav kom Nws los muaj lub ntsej muag zoo nkaus li thaum Nws muaj nyob rau hauv Yudias, ces tag nrho txoj kev npaj cawm tib neeg rau-txhiab-xyoo yuav nres nyob rau Tiam Txhiv Dim lawm, thiab yuav muaj mus tsis tau dhau deb tshaj ntawd lawm. Tiam kawg, dhau ntxiv mus, yuav tsis muaj hnub los txog, thiab tiam ntawd yuav tsis muaj hnub muab coj los xaus li. Qhov no vim yog Yexus uas yog tus Cawm Seej ces tsuas muaj rau noob neej txoj kev txhiv dim thiab txoj kev cawm dim nkaus xwb. Kuv tsuas siv lub npe Yexus rau tag nrho cov neeg muaj kev txhaum nyob rau Tiam Hmoov Hlub, tab sis nws tsis yog lub npe uas Kuv yuav coj tag nrho noob neej los rau ib qho chaw xaus. Txawm hais tias Yehauvas, Yexus, thiab tus Mexiyas tag nrho yeej sawv cev rau Kuv tus Ntsujplig, tej npe no tsuas qhia txog tej tiam uas sib txawv ntawm Kuv qhov kev npaj cawm tib neeg xwb, thiab tsis sawv cev Kuv nyob rau tag nrho txhua yam ntawm Kuv. Tej npe uas cov tib neeg hauv ntiaj teb hu Kuv mas yuav piav tsis tau kom ntxaws ntxaws txog tag nrho Kuv tus moj yam thiab tag nrho txhua yam uas Kuv yog. Lawv tsuas yog tej npe sib txawv uas Kuv raug hu nyob rau tej tiam sib txawv xwb. Thiab yog li ntawd, thaum tiam kawg—tiam ntawm hnub kawg—los txog, ces Kuv lub npe yuav hloov dua. Kuv yuav tsis hu ua Yehauvas, los sis Yexus, haj yam tsis hu ua tus Mexiyas lawm—Kuv yuav raug hu ua Vajtswv Tus Kheej Uas Muaj Hwj Chim Loj Kawg Nkaus, thiab nyob rau hauv lub npe no ces Kuv yuav coj tag nrho tiam no mus rau qhov chaw xaus. Muaj ib zaug Kuv twb raug hu ua Yehauvas lawm. Kuv kuj raug hu ua tus Mexiyas, thiab tib neeg kuj hu Kuv ib zaug ua Yexus uas yog tus Cawm Seej nrog rau txoj kev hlub thiab kev hwm lawm. Hnub no, txawm li cas los xij, Kuv tsis yog tus Yehauvas los sis Yexus uas tib neeg paub rau yav tag dhau los lawm; Kuv yog tus Vajtswv uas tau rov los rau tiam kawg, tus Vajtswv uas yuav coj tiam no mus rau qhov chaw xaus. Kuv yog tus Vajtswv Tus Kheej kiag uas sawv los ntawm qhov kawg ntawm lub ntiaj teb los, muaj txhij tag nrho Kuv tus moj yam, thiab muaj lub hwj chim, meej mom thiab yeeb koob puv npo. Tib neeg yeej tsis tau nrog Kuv sib txuas ncauj txuas lus li, tsis tau paub Kuv dua li, thiab yeej ib txwm tsis paub txog Kuv tus moj yam. Txij puag thaum tsim lub ntiaj teb los txog ntua niaj hnub no, tsis tau muaj ib tug neeg tau pom Kuv li. Ntawm no yog tus Vajtswv uas tshwm sim rau tib neeg pom nyob rau tiam kawg tab sis nkaum nyob rau hauv cov tib neeg. Nws nyob nrog tib neeg, tseeb thiab tiag, zoo li lub hnub uas kub lug thiab tus nplaim taws cig liab vog, muaj hwj chim txaus nkaus thiab muaj hwj chim puv npo. Tsis muaj ib tug neeg twg los sis ib yam dab tsi uas yuav tsis raug Kuv tej lus txiav txim rau li, thiab tsis muaj ib tug neeg twg los sis ib yam dab tsi uas yuav tsis raug lim kom dawb huv los ntawm qhov kev kub hnyiab ntawm hluav taws li. Thaum kawg, txhua haiv neeg yuav tau txais koob hmoov vim Kuv tej lus, thiab kuj yuav raug tsoo ua tej daim mos mos vim yog Kuv tej lus. Nyob rau hauv txoj kev no, tag nrho cov tib neeg nyob rau tiam kawg yuav pom hais tias Kuv yog tus Cawm Seej uas tau rov qab los lawm, thiab hais tias Kuv yog Vajtswv Tus Uas Muaj Hwj Chim Loj Kawg Nkaus uas txeeb tau tag nrho noob neej. Thiab tag nrho sawv daws yuav pom hais tias Kuv yeej yog qhov khoom fij rau kev txhaum rau tib neeg ib zaug dhau los lawm, tab sis nyob rau tiam kawg Kuv kuj yuav rais mus ua cov nplaim taws ntawm lub hnub thiab kub tag nrho txhua yam, nrog rau lub Hnub ntawm txoj kev ncaj ncees uas nthuav tawm tag nrho txhua yam. Qhov no yog Kuv tes hauj lwm nyob rau tiam kawg. Kuv siv lub npe no thiab muaj tus moj yam no ces kom tag nrho tib neeg thiaj li pom hais tias Kuv yog ib tug Vajtswv uas ncaj ncees, lub hnub uas kub lug, tus nplaim taws uas cig liab vog, thiab kom tag nrho sawv daws thiaj li tau pe hawm Kuv, tib tug Vajtswv tseeb, thiab kom lawv thiaj li pom Kuv lub ntsej muag tseeb: Kuv tsis yog tus Vajtswv rau cov neeg Yixayee xwb, thiab Kuv tsis yog tus Txhiv Dim nkaus xwb, Kuv yog tus Vajtswv rau tag nrho tej uas raug tsim tawm los thoob plaws saum ntuj thiab ntiaj teb thiab hiav txwv.

Yog tus Cawm Seej los txog nyob rau thaum tiam kawg thiab tseem hu ua Yexus, thiab twb yug los ib zaug rau hauv Yudias lawm thiab ua Nws tes hauj lwm rau qhov ntawd, ces qhov no yuav yog pov thawj qhia hais tias Kuv tsuas tsim cov neeg ntawm Yixayee nkaus xwb thiab tsuas txhiv cov neeg ntawm Yixayee xwb, thiab Kuv tsis muaj dab tsi nrog Lwm Haiv Neeg li. Qhov no tseem tsis sib txawv nrog Kuv tej lus hais tias “Kuv yog tus Tswv uas tsim lub ntuj thiab lub ntiaj teb thiab tag nrho txhua yam” thiab lod? Kuv ncaim Yudias thiab ua Kuv tes hauj lwm nrog rau Lwm Haiv Neeg vim Kuv tsis yog Vajtswv rau cov neeg ntawm Yixayee nkaus xwb, tab sis yog Vajtswv rau tag nrho txhua yam uas raug tsim tawm los. Kuv tshwm sim nrog rau Lwm Haiv Neeg nyob rau tiam kawg vim Kuv tsis yog Yehauvas nkaus xwb, tus Vajtswv ntawm cov neeg ntawm Yixayee nkaus xwb, tab sis, tshaj qhov ntawd, vim Kuv yog tus Tswv Tsim ntawm tag nrho cov Kuv cov xaiv tseg nyob rau Lwm Haiv Neeg. Tsis yog Kuv tsim Yixayee, Iyiv, thiab Lenpanoo nkaus xwb, tab sis tag nrho Lwm Haiv Neeg dhau ntawm Yixayee mus tib si. Vim qhov no, Kuv yog tus Tswv rau tag nrho txhua yam uas raug tsim tawm los. Kuv tsuas siv Yixayee ua qhov chaw pib rau Kuv tes hauj lwm xwb, siv Yudias thiab Kalilai uas qhov chaw khov rau Kuv tes hauj lwm txhiv dim, thiab tam sim no Kuv siv Lwm Haiv Neeg los ua qhov chaw tiag taw uas Kuv yuav coj tag nrho tiam no los rau ib qho chaw xaus. Kuv ua ob theem hauj lwm nyob rau Yixayee lawm (ob theem no ntawm tes hauj lwm ces yog Tiam Muaj Kev Cai thiab Tiam Hmoov Hlub), thiab Kuv twb tau ua ob theem dhau zog ntawm tes hauj lwm (Tiam Hmoov Hlub thiab Tiam Lub Nceeg Vaj) thoob plaws daim av uas dhau ntawm Yixayee mus lawm. Nyob rau Lwm Haiv Neeg ntawd, Kuv yuav ua qhov kev txeeb tau, thiab thiaj li xaus kiag tiam no. Yog tib neeg tseem pheej hu Kuv uas Yexus Khetos tas mus li, tab sis tsis paub hais tias Kuv twb pib ib tiam tshiab nyob rau tiam kawg lawm thiab twb tau pib dua ib teg hauj lwm tshiab lawm, thiab yog tib neeg tseem pheej tos tas zog ntxiv yam tag siab tag ntsws hlo rau txoj kev rov los ntawm Yexus uas yog tus Cawm Seej xwb, ces Kuv yuav hu cov neeg zoo li no ua cov uas tsis ntseeg Kuv; lawv yog cov neeg uas tsis paub Kuv, thiab lawv txoj kev ntseeg Kuv ces yog cuav xwb. Cov neeg zoo li ntawd puas yuav muaj cuab kav pom kiag qhov uas Yexus uas yog tus Cawm Seej rov los saum ntuj ceeb tsheej los txog mas? Qhov lawv tos tsis yog qhov Kuv los txog, tab sis yog qhov kev los txog ntawm tus Vajntxwv ntawm cov neeg Yudais xwb. Lawv tsis ntshaw kom Kuv los muab lub ntiaj teb qub uas tsis dawb huv no rhuav tshem kom tu noob, tab sis tsuas tos ntsoov Yexus qhov kev rov los zaum ob xwb, ces kom lawv raug txhiv dim xwb. Lawv npaj siab tos Yexus rov los txhiv tag nrho noob neej ib zaug ntxiv tawm ntawm daim av dub tsuas thiab tsis ncaj ncees no xwb. Cov neeg zoo li ntawd yuav ua cas ua tau Kuv tes hauj lwm kom tiav hlo nyob rau tiam kawg mas? Tib neeg txoj kev ntshaw tsis haum nrog qhov kev ua kom tej Kuv xav tau tiav hlo los sis tsis haum rau qhov kev ua kom Kuv tes hauj lwm tiav hlo, vim tib neeg tsuas qhuas thiab khaws tes hauj lwm uas Kuv tau ua tiav ua ntej xwb, thiab tsis paub txog hais tias Kuv yog Vajtswv Tus Kheej kiag uas tsuas muaj tshiab tas li xwb thiab tsis muaj qub li. Tib neeg tsuas paub hais tias Kuv yog Yehauvas, thiab Yexus, thiab tsis quav ntsej hais tias Kuv yog Tus ntawm tiam kawg uas yuav coj noob neej mus rau ib qho chaw xaus. Tag nrho tej uas tib neeg ntshaw thiab paub ces los ntawm lawv tus kheej tej kev xav phem los xwb, thiab tsuas yog tej yam uas lawv pom kiag ntawm lawv ob lub qhov muag nkaus xwb. Nws tsis ncaj kab nrog rau tes hauj lwm Kuv ua, tab sis tsis sib haum nrog rau nws. Yog Kuv tes hauj lwm ntawm no raug ua raws li tib neeg tej tswv yim xwb, ces thaum twg nws mam li xaus mas? Thaum twg tib neeg thiaj li tau nkag mus so? Thiab Kuv yuav ua cas nkag tau mus rau hnub xya, hnub Xanpatau? Kuv ua hauj lwm raws nraim li Kuv qhov kev npaj thiab raws nraim li Kuv lub hom phiaj xwb—tsis yog raws nraim li txoj kev npaj siab ntawm tib neeg.