Muaj ntau yam uas Kuv cia siab tias nej yuav ua kom tiav, tab sis tsis yog txhua yam uas nej ua, tsis yog txhua yam uas hais txog nej lub neej, es yuav muaj peev xwm ua tau tej uas Kuv hais ntawd kom tiav, yog li ntawd Kuv tsis muaj kev xaiv lawm es thiaj li piav lub ntsiab thiab qhia ncaj qha rau nej txog Kuv tej kev npaj siab. Muab hais tias nej txoj kev thoob tsib to nrog tsis zoo thiab nej txoj kev nco txiaj ntsig los kuj tsis zoo thiab, ces nej thiaj li yuav luag tsis paub txog Kuv tus moj yam thiab lub ntsiab tseeb—yog li ntawd nws yog ib qho xwm ceev heev uas Kuv yuav tau qhia nej txog tej no. Txawm koj to taub ntau npaum li cas nyob rau yav tas los, tsis hais txawm koj xav to taub cov teeb meem no los tsis xav los xij, Kuv tseem yuav tsum tau qhia cov teeb meem no rau nej kom ntxaws ntxaws. Tsis yog nej tsis paub tag nrho cov teeb meem no xwb, tab sis nej tsis muaj kev to taub, tsis muaj kev paub txog lub ntsiab uas muaj nyob rau hauv cov teeb meem no ntau pes tsawg thiab. Muaj nej coob tus tsuas muaj qee qhov kev to taub ntiav ntiav, thiab muaj ib nrab thiab ib qho kev to taub tsis tag txog qhov ntawd xwb. Qhov pab kom nej xyaum ua tau raws li qhov tseeb kom zoo dua—qhov xyaum kom tau raws li Kuv cov lus kom zoo dua ntawd—Kuv xav tias ob yam no yog qhov teeb meem uas nej yuav tsum xub paub txog ua ntej tso thiab yog qhov tseem ceeb tshaj plaws. Yog tsis li ntawd, ces nej txoj kev ntseeg tseem tsis meej, tseem phem, thiab tseem raug txoj kab lis kev cai ntseeg khi li qub. Yog tias koj tsis to taub Vajtswv tus moj yam, ces yuav yog ib qho uas koj ua tsis tau tes hauj lwm uas koj tsim nyog ua rau Nws. Yog tias koj tsis paub Vajtswv lub ntsiab tseeb, ces yuav yog ib qho uas koj tsis muaj kev ntshai thiab kev hwm Nws; tiam sis, tsuas yuav muaj lus yws yam qaug zog zis thiab hais lus dag yam tsis quav ntsej li xwb, thiab tshaj ntawd ntxiv, tseem hais tej lus tuam mom uas thim tsis tau li thiab. Txawm tias qhov to taub Vajtswv tus moj yam ntawd yeej tseem ceeb kawg li, thiab yuav tsum txhob saib tsis taus qhov paub Vajtswv lub ntsiab tseeb ntawd los, yeej tsis muaj leej twg keev muab ua tib zoo saib kom meej los sis tshawb mus rau tej teeb meem no li. Yeej pom tseeb tias nej txhua tus tau muab tej cai tswj fwm uas Kuv tau muab ntawd tso tseg lawm. Yog tias nej tsis to taub Vajtswv tus moj yam, ces nej yeej yuav ua txhaum rau Nws tus moj yam xwb xwb li. Qhov ua txhaum rau Nws tus moj yam ntawd ces zoo ib yam li qhov thab ua kom Vajtswv Tus Kheej npau taws, txawm yog qhov twg los xij thaum kawg tej uas koj ua ntawd yuav yog ib qho txhaum rau tej kev cai tswj fwm. Tam sim no koj yuav tsum paub tias thaum koj paub Vajtswv lub ntsiab tseeb lawm, ces kuj tib yam thiab uas koj tuaj yeem to taub Nws tus moj yam lawm thiab—thiab thaum koj to taub Nws tus moj yam lawm, ces kuj tib yam thiab uas koj twb to taub tej kev cai tswj fwm lawm. Tsis tas hais li, yam uas muaj nyob rau hauv tej kev cai tswj fwm ntawd yeej yog hais txog Vajtswv tus moj yam thiab, tab sis tsis yog txhua yam ntawm Nws tus moj yam ntawd es yeej muab nthuav tawm rau hauv tej kev cai tswj fwm ntawd lawm; yog li ntawd, nej yuav tsum mus ib kauj ruam kom deb zog mus rau txoj kev uas tsim kho nej txoj kev to taub txog Vajtswv tus moj yam ntawd.

Kuv hais lus rau nej hnub no mas tsis zoo li txoj kev sib tham uas ib txwm hais lawm, kom thiaj li ua rau nej ua tib zoo los mloog Kuv cov lus thiab, tshaj ntawd ntxiv, ua tib zoo xav txog cov lus ntawd. Qhov Kuv hais li no yog txhais tias nej tsis mob siab heev rau cov lus uas Kuv tau hais lawm ntawd. Nej haj yam tsis txaus siab hlo los ua tib zoo xav txog Vajtswv tus moj yam thiab; yuav luag tsis muaj leej twg mob siab rau tus moj yam ntawd. Vim li no Kuv thiaj hais tias nej txoj kev ntseeg mas yog hais lus loj tsab ntse xwb. Txawm yog tam sim no kiag los, tsis muaj ib tug ntawm nej cov ko tau mob siab rau nej txoj kev qaug zog zis li. Nej tau ua rau Kuv tu siab tom qab txhua qhov kev mob siab uas Kuv tau tiv rau nej lawm. Vim li no nej thiaj li tsis muaj kev fwm Vajtswv thiab nej lub neej thiaj li tsis muaj qhov tseeb. Cov tib neeg zoo li no yuav muab suav tias yog cov neeg dawb huv tau li cas? Txoj kev cai saum Ntuj Ceeb Tsheej yuav tsis zam rau ib yam zoo li no kiag li! Vim nej muaj kev to taub txog qhov no tsawg heev, Kuv thiaj li tsis muaj kev xaiv lawm tab sis yuav tsum tau qhia kom ntau ntxiv.

Vajtswv tus moj yam mas yog ib lub ntsiab uas zoo li txawv heev rau txhua tus thiab yog, tshaj ntawd ntxiv, ib yam uas tsis yooj yim rau txhua tus lees txais, rau qhov Nws tus moj yam tsis zoo li tib neeg tus yam ntxwv. Kuj ib yam thiab, Vajtswv nws yeej muaj Nws tej kev xav txog txoj kev xyiv fab, kev npau taws, kev tu siab, thiab kev zoo siab, tab sis tej kev xav no mas txawv tib neeg tej lawm. Vajtswv yog yam uas Nws yog thiab Nws muaj yam uas Nws muaj. Txhua yam uas Nws hais qhia thiab nthuav tawm ntawd yog tej uas sawv cev rau Nws lub ntsiab tseeb thiab qhov uas Nws yog leej twg tiag. Yam Nws yog thiab yam Nws muaj, nrog rau Nws lub ntsiab tseeb thiab qhov uas yog leej twg tiag ntawd yog tej yam uas ib tug tib neeg twg muab hloov pauv tsis tau li. Nws tus moj yam pov puag Nws txoj kev hlub rau tib neeg ntiaj teb, nplig tib neeg ntiaj teb, ntxub tib neeg ntiaj teb, thiab tshaj ntawd ntxiv, yog ib txoj kev to taub txog tib neeg ntiaj teb zoo heev. Txawm li cas los xij, tib neeg tus yam ntxwv mas tej zaum yuav ruaj siab hlo, muaj zog zis, los sis tsis muaj kev xav li. Vajtswv tus moj yam yog ib yam uas yog tus Muaj Hwj Chim Kav txhua yam thiab txhua tus neeg uas muaj sia nyob tug, txhua yam yog tus Tswv li xwb. Nws tus moj yam sawv cev rau txoj kev hwm, rau lub fwj chim, rau lub meej mom, rau txoj kev zoo, thiab tseem ceeb tshaj txhua yam, rau lub meej mom uas siab tshaj. Nws tus moj yam yog lub cim ntawm txoj kev muaj cai, lub cim ntawm txhua yam uas ncaj ncees, lub cim ntawm txhua yam uas zoo nkauj thiab zoo. Tshaj ntawd ntxiv, tus moj yam ntawd yog lub cim ntawm Nws uas yog tus tsis muaj leej twg muaj peev xwm kov yeej los sis txoj kev tsaus ntuj thiab txhua tus yeeb ncuab lub zog kov tsis yeej, thiab yog ib lub cim ntawm Nws uas yog tus tsis muaj ib tug neeg raug tsim tawm los twg ua txhaum rau tau (thiab Nws yuav tsis zam txim rau txoj kev ua txhaum). Nws tus moj yam yog lub cim ntawm lub fwj chim uas siab tshaj plaws. Tsis muaj ib tug tib neeg twg los sis cov tib neeg twg cuam tshuam tau los sis tej zaum yuav cuam tshuam tau Nws tes hauj lwm los sis Nws tus moj yam li. Tab sis tib neeg tus yam ntxwv mas tsuas zoo dua tsiaj tus me ntsis xwb. Tib neeg tus kheej tsis muaj cai, tsis muaj cai tswj hwm, thiab tsis muaj peev xwm ua kom siab tshaj nws tus kheej lawm, tab sis nyob hauv nws lub ntsiab tseeb mas yog ib tug uas ntshai txhua tus tib neeg, txhua qhov xwm txheej, thiab txhua yam khoom. Vajtswv muaj kev xyiv fab vim muaj txoj kev ncaj ncees thiab muaj txoj kev kaj tshwm los, vim yog txoj kev puas tsuaj ntawm txoj kev tsaus ntuj thiab kev phem. Nws zoo siab rau qhov tau coj txoj kev kaj thiab ib lub neej zoo los rau tib neeg ntiaj teb; Nws txoj kev xyiv fab ntawd yog ib txoj kev xyiv fab uas ncaj ncees, yog ib lub cim ntawm qhov muaj txhua yam zoo thiab, tshaj ntawd ntxiv, yog ib lub cim ntawm txoj kev vam zoo rau yav tom ntej. Qhov Vajtswv npau taws ntawd yog vim muaj txoj kev rhuav tshem thiab kev cuam tshuam uas tsis ncaj ncees los raug rau Nws cov tib neeg ntiaj teb, vim tias muaj kev phem thiab txoj kev tsaus ntuj, vim tias muaj tej uas muab qhov tseeb ntiab tawm, thiab phem tshaj ntawd, vim tias muaj tej uas tawm tsam yam zoo thiab zoo nkauj. Nws txoj kev npau taws yog ib lub cim uas tag nrho txhua yam phem tsis muaj nyob mus ntxiv lawm, thiab tseem ceeb tshaj ntawd, nws yog ib lub cim ntawm Nws txoj kev dawb huv. Nws txoj kev tu siab ntawd yog vim tib neeg ntiaj teb xwb, vim lawv yog cov Nws muaj kev cia siab rau tab sis lawv tau poob rau hauv txoj kev tsaus ntuj lawm, vim hais tias tes hauj lwm uas Nws ua rau tib neeg ntawd tsis mus raws li Nws tej kev npaj siab, thiab vim hais tias cov tib neeg ntiaj teb uas Nws hlub no tsis yog txhua tus nyob tau rau hauv qhov kaj. Nws tu siab rau cov tib neeg ntiaj teb uas dawb huv, rau cov tib neeg coj ncaj tab sis mas tsis paub dab tsi li, thiab rau cov tib neeg zoo tab sis nws tus kheej tsis muaj kev xam pom li. Nws txoj kev tu siab yog ib lub cim ntawm Nws txoj kev zoo thiab ntawm Nws txoj kev hlub tshua, ib lub cim ntawm qhov zoo nkauj thiab ntawm txoj kev ua siab zoo. Tseeb tiag, Nws txoj kev zoo siab yog los ntawm txoj kev kov yeej Nws tej yeeb ncuab thiab tau tib neeg txoj kev ntseeg uas zoo lawm. Ntau tshaj qhov no, txoj kev zoo siab no yog muaj los ntawm qhov muab yeeb ncuab tej hwj chim ntiab tawm thiab ua puas tsuaj, thiab vim hais tias tib neeg ntiaj teb tau txais ib lub neej zoo thiab thaj yeeb lug lawm. Vajtswv txoj kev zoo siab mas tsis thooj li tib neeg txoj kev xyiv fab; tab sis, nws yog txoj kev xav ntawm qhov sau tej txiv hmab txiv ntoo uas zoo los ua ke, ib txoj kev xav uas zoo tshaj li txoj kev xyiv fab lawm thiab. Nws txoj kev zoo siab yog ib lub cim ntawm qhov tib neeg ntiaj teb tsoo dim plaws txoj kev txom nyem txij lub sij hawm no mus rau tom ntej, thiab yog ib lub cim ntawm qhov tib neeg ntiaj teb nkag mus rau ib lub ntiaj teb uas muaj qhov kaj. Qhov txawv mas yog qhov tias muaj tib neeg ntiaj teb tej kev xav yog vim lawv tus kheej tej kev ntshaw xwb, tsis yog vim txoj kev ncaj ncees, qhov kaj, los sis yam uas zoo nkauj, thiab txhua yam haj yam tsis yog vim txoj hmoov hlub uas Ntuj Ceej Tsheej muab. Tib neeg ntiaj teb tej kev xav mas yog kev twm xeeb thiab yog lub ntiaj teb ntawm txoj kev tsaus ntuj xwb. Tsis muaj lawv nyob rau hauv Vajtswv lub siab nyiam, haj yam tsis muaj lawv nyob rau hauv Vajtswv lub hom phiaj, ces yog li ntawd thiaj li ua tsis tau ib los pa los hais txog tib neeg thiab Vajtswv li. Vajtswv yeej siab tshaj mus ib txhis thiab yeej ib txwm ntxim fwm, hos tib neeg ntiaj teb ces yeej tsis ncaj ncees mus ib txhis, tsis tsim nqi mus ib txhis. Qhov no yog vim hais tias Vajtswv yeej muab Nws Tus Kheej xyeem thiab fij rau tib neeg ntiaj teb mus ib txhis lawm; txawm li cas los xij, tib neeg tsuas muab thiab siv zog rau nws tus kheej mus ib txhis xwb. Vajtswv yeej tiv kev mob siab rau tib neeg ntiaj teb txoj kev muaj sia nyob mus ib txhis, tab sis tib neeg yeej tsis muab ib yam dab tsi pub txhawm rau qhov kaj los sis rau txoj kev ncaj ncees li. Txawm yog tias muaj ib lub sij hawm es tib neeg siv zog los xij, qhov ntawd yeej sawv tsis tau kom khov kho li, vim tib neeg lub zog yeej ib txwm yog ua txhawm rau lawv tus kheej xwb tsis yog rau lwm tus. Tib neeg yeej ib txwm twm xeeb, hos Vajtswv yeej tsis twm xeeb mus ib txhis. Vajtswv yog lub hauv paus ntawm txhua yam uas ncaj ncees, zoo, thiab zoo nkauj, hos tib neeg yog tus uas ua kom muaj thiab ua kom txhua yam tsis zoo thiab phem tshwm tuaj xwb. Vajtswv yeej yuav tsis hloov Nws lub ntsiab tseeb ntawm txoj kev ncaj ncees thiab qhov zoo nkauj li, tab sis nyob rau txhua lub sij hawm thiab txhua qhov xwm txheej mas tib neeg yeej muaj peev xwm zoo thaum hais txog qhov ntxeev siab rau txoj kev ncaj ncees thiab qhov txav deb ntawm Vajtswv mus.

Txhua sob lus uas Kuv tau hais lawm no yeej muaj Vajtswv tus moj yam nyob rau hauv. Nej yuav tsum los ua tib zoo xav txog Kuv tej lus es nej thiaj li yuav tau txais txiaj ntsim ntau los ntawm cov lus ntawd los. Vajtswv lub ntsiab tseeb mas yeej to taub nyuaj, tab sis Kuv ntseeg tias yam tshawj kawg los nej txhua tus yeej muaj tej lub tswv yim ntsig txog Vajtswv tus moj yam lawm. Yog li ntawd, Kuv cia siab tias nej yuav muaj ntau yam los qhia rau Kuv kom pom txog tej uas koj tau ua lawm es tsis txhaum rau Vajtswv tus moj yam. Ces thaum ntawd Kuv thiaj li yuav ruaj siab tau. Piv txwv tias, xav txog Vajtswv rau hauv koj siab txhua lub sij hawm. Thaum koj ua, ua kom raws nraim li Nws tej lus. Nrhiav Nws tej kev npaj siab rau hauv txhua yam, thiab txav deb ntawm qhov ua saib tsis taus thiab tsis fwm Vajtswv. Koj yuav tsum haj yam tsis txhob muab Vajtswv tso tuaj tom qab ntawm koj txoj kev xav es kom tsis muaj lub neej yav pem suab nyob hauv koj lub siab. Yog tias koj tsis ua li no, ces koj yuav ua txhaum rau Vajtswv tus moj yam. Ib zaug dua ntxiv thiab, piv txwv tias koj yeej tsis tau hais lus tuam mom los sis yws tawm tsam Vajtswv tag koj sim neej, thiab ib zaug dua ntxiv, piv txwv tias koj muaj peev xwm ua txhua yam uas Nws tau muab tso rau koj ua thiab kuj ua raws li Nws tej lus tau zoo tag koj sim neej, ces koj yuav zam dhau txoj kev ua txhaum rau tej cai tswj fwm. Piv txwv tias, yog tias koj keev tau hais lawm tias, “Vim li cas kuv tsis xav tias Nws yog Vajtswv?” “Kuv xav tias tej lus no tsis muaj dab tsi ntau tshaj li Vajntsujplig txoj kev qhia,” “Nyob rau hauv kuv txoj kev xav mas, tsis yog txhua yam uas Vajtswv ua es yuav yog,” “Vajtswv txoj kev ua neej yeej tsis siab tshaj kuv txoj,” “Vajtswv tej lus tsis txaus ntseeg yooj yim,” los sis lwm yam lus uas txiav txim zoo li no, ces Kuv nqua hu rau koj mus lees txim thiab lees koj tej kev txhaum es lees txim hloov dua siab kom heev dua. Yog tsis li ntawd, ces koj yuav tsis muaj feem tau txais kev zam txim, rau qhov koj tsis yog ua txhaum rau tib neeg xwb, tab sis yog ua txhaum rau Vajtswv Tus Kheej ntag. Tej zaum koj yuav ntseeg tias koj txiav txim rau ib tug tib neeg, tab sis Vajtswv tus Ntsujplig tsis xav li ntawd. Koj qhov tsis fwm Nws lub cev nqaij daim tawv ntawd ces zoo tib yam li qhov tsis fwm Nws ntag. Vim muaj li no, koj tsis tau ua txhaum rau Vajtswv tus moj yam lod? Koj yuav tsum nco ntsoov tias txhua yam uas Vajtswv tus Ntsujplig ua lawm ntawd yog ua los tiv thaiv Nws tes hauj lwm hauv cev nqaij daim tawv thiab ua kom tes hauj lwm no tiav zoo. Yog tias koj tsis quav ntsej qhov no, ces Kuv hais tias koj yog ib tug uas yuav tsis muaj peev xwm ntseeg Vajtswv. Rau qhov koj tau thab kom Vajtswv npau taws, yog li ces Nws yuav tau siv txoj kev rau txim kom phim los ua ib zaj lus qhia koj.

Qhov los paub Vajtswv lub ntsiab tseeb ntawd tsis yog ib yam tsis tseem ceeb. Koj yuav tsum to taub Nws tus moj yam. Ua li no es koj thiaj li yuav maj mam los paub Vajtswv lub ntsiab tseeb yam tsis nco txog li. Thaum koj muaj txoj kev paub no lawm, ces koj yuav pom tias koj tus kheej muaj tus yam ntxwv siab dua thiab zoo dua lawm. Nyob rau thaum kawg, koj yuav txaj muag rau koj tus ntsuj uas nraim nkoos, thiab, phem tshaj ntawd, yuav xav tias tsis muaj ib qho chaw rau koj nraim koj txoj kev txaj muag li. Nyob rau lub sij hawm ntawd, koj tus cwj pwm uas ua txhaum rau Vajtswv tus moj yam ntawd yuav muaj tsawg zuj zus tuaj, ces koj lub siab yuav txav ze zuj zus mus rau Vajtswv lub, ces muaj ib txoj kev hlub Nws yuav maj mam loj hlob nyob hauv koj lub siab. Qhov no yog ib lub cim ntawm qhov tib neeg ntiaj teb muaj ib tug yam ntxwv zoo. Tab sis nej tsis tau tau muaj qhov no. Vim nej txhua tus maj nroos mus ua txhua yam txhawm rau nej txoj hmoo xwb, es leej twg thiaj li muaj qhov xav mus paub Vajtswv lub ntsiab tseeb? Yog tias muaj qhov no mus ntxiv, nej yuav ua txhaum rau tej kev cai tswj fwm yam tsis paub txog li, rau qhov nej to taub me me txog Vajtswv tus moj yam xwb. Yog li ntawd yam nej ua tam sim no ntawd tsis yog pua ib lub hauv paus rau nej tej kev txhaum rau Vajtswv tus moj yam lod? Qhov Kuv hais kom nej to taub Vajtswv tus moj yam ntawd mas yeej tsis txawv ntawm Kuv tes hauj lwm li. Rau qhov yog hais tias nej ua txhaum tej kev cai tswj fwm tas li, leej twg ntawm nej cov ko thiaj li yuav khiav dim txoj kev rau txim? Ces tag nrho Kuv tes hauj lwm yuav tsis muaj qab hau li lod? Yog li ntawd, Kuv tseem hais tias, ntxiv rau qhov kev tshuaj xyuas nej tus kheej tus cwj pwm ntawd, nej yuav tsum ceev faj rau tej kauj ruam uas nej rhais. Qhov no yog qhov kev cheem tsum uas siab dua uas Kuv twb hais kom nej ua lawm, ces Kuv cia siab tias nej txhua tus yuav muab qhov no coj los ua tib zoo xav thiab muab qhov no ua qhov tseem ceeb tshaj plaws rau nej. Yog muaj ib hnub los txog rau thaum tej uas nej ua ntawd ua rau Kuv npau taws pes vog, ces tej teeb meem ntawd yuav yog nej li nkaus xwb es ua tib zoo xav, tsam ces tsis muaj leej twg los sawv nej chaw ris txoj kev rau txim ntawd.