Nyob rau tiam kawg, Vajtswv txoj kev hlub uas hlub tib neeg ntiaj teb ntawd tshwm nyob rau qhov twg hauv Nws qhov kev tshwm sim thiab tes hauj lwm? Koj tuaj yeem pom los ntawm qhov kev ntsib kev pom txhua txhua kauj ruam ntawm tes hauj lwm no. Nyob rau hauv txhua kauj ruam ntawm Vajtswv tes hauj lwm mas Nws hais lus muaj qee lub tswv yim, muaj qee lo lus hais tseg txog yav tom ntej, thiab nthuav qee qhov tseeb thiab Nws tus moj yam tawm, thiab tib neeg teb rau tej ntawd tag nrho. Tib neeg teb li cas? Lawv tsis muaj leej twg zwm rau Vajtswv, thiab lawv tsis muaj leej twg rau siab ntso caum qhov tseeb los sis txaus siab hlo lees txais Nws tes hauj lwm li. Lawv txhua tus puav leej xav phem thiab tawm tsam, ua yeeb ncuab, tsis kam txais yuav, thiab tsis lees txais. Txawm li cas los xij, Vajtswv yeej ua Nws tes hauj lwm tas li, thiab Nws txoj kev hlub tib neeg ntawd tsis hloov li. Txawm tib neeg tus cwj pwm yuav zoo li cas, txawm lawv tsis lees paub los sis tsis kam txais yuav los sis tsis kam hloov ib qho me me li los xij, Vajtswv txoj kev hlub tsis hloov li, yeej tsis muaj dab tsi tab kaum txhua kauj ruam ntawm Nws tes hauj lwm li. Nov yog ib qho kev qhia kom pom tseeb txog Nws txoj kev hlub tib neeg. Thiab, txhua zaus uas Vajtswv ua tiav ib kauj ruam ntawm tes hauj lwm mas, txawm tib neeg yuav coj tus cwj pwm zoo li cas los xij, Nws txoj kev hlub lawv tsis hloov li; Nws yeej tseem ua Nws tes hauj lwm txuas ntxiv thiab cawm tib neeg txuas ntxiv. Nyob rau hauv txhua kauj ruam ntawm tes hauj lwm uas nyob rau yav tom ntej mas, Vajtswv cov lus uas txiav txim rau tib neeg thiab muab tib neeg nthuav tawm ntawd yuav tob dua thiab tseeb dua, thiab ncaj rau lawv tus yam ntxwv tam sim ntawd dua. Nws yuav hais tej yam uas ua rau tib neeg nkag siab zoo txog Nws thiab paub Nws, to taub zoo thiab tuav tau Nws tej kev npaj siab, thiab tib neeg yuav pom hais tias Nws tseem hlub tib neeg ntiaj teb. Tab txawm tib neeg yeej ib txwm teb yam tsis zoo los sis tawm tsam, tab txawm lawv ua li no nyob rau txhua txhua kauj ruam ntawm tes hauj lwm los xij, Vajtswv yeej ib txwm hais lus thiab ua hauj lwm txuas ntxiv, thiab niaj hnub no los Nws txoj kev hlub tib neeg yeej tsis tau hloov li. Yog li ntawd, tag nrho tej hauj lwm uas Vajtswv ua rau tib neeg ntiaj teb ces yog kev hlub xwb, qhov ntawd yeej muaj tseeb. Ib txhia tib neeg hais tias, “Yog puav leej yog kev hlub xwb no, vim li cas Vajtswv thiaj li txiav txim thiab rau txim rau tib neeg cuag nkaus li Nws ntxub lawv? Yog ua cas Nws thiaj li cia tib neeg raug txoj kev sim siab uas nyuaj ua luaj li?” Qhov ntawd yog lawm, txhua yam uas Vajtswv muaj rau tib neeg ntiaj teb ces yog kev hlub xwb! Vajtswv txoj kev rau txim thiab kev txiav txim rau tib neeg txoj kev ntxeev siab ntawd mas yog ua kom tib neeg to taub qhov tseeb, ua kom lawv lees txim hloov dua siab tshiab thiab tig rov qab los, thiab ua rau lawv paub Nws tus moj yam kom lawv thiaj li hwm thiab zwm rau Nws xwb. Txawm ib txhia tib neeg tseem muaj qee qhov kev tawm tsam los xij, Vajtswv tsis tau so qhov Nws siv zog los cawm tib neeg ib qho me me li, thiab Nws tsis tau tso lawv tseg li. Qhov no yog qhov uas yog Vajtswv txoj kev hlub uas loj heev.

Nyob rau lub sij hawm uas sim cov tib neeg ua Vajtswv tes dej num siab ntawd, mas muaj ntau tus tib neeg xav phem thiab chim siab hais tias lawv quaj rau lub ntuj thiab lub ntiaj teb, thiab haj tseem quaj tawm tsam thiab, xav hais tias, “Yog ua cas kuv thiaj li dhau los ua ib tug neeg ua Vajtswv tes dej num uas tom qab kuv twb ntseeg Vajtswv tau ntau lub xyoo thiab raug kev txom nyem ntau heev lawm? Qhov no tsis yog qhov kuv xav tau!” Tib neeg tsis txaus siab thiab tsis to taub, tiam sis Vajtswv to taub lawv, yog li ntawd qhov no tsis yog kev hlub lod? Vajtswv txoj kev hlub mas muaj ib txoj kev to taub txog tib neeg, ib txoj kev nkag siab tob txog lawv lub ntsiab tseeb, thiab ib txoj kev to taub zoo heev txog lawv. Nws hlub yam tsis muaj kev tsis meej pem, kev ua txuj, los sis kev cuav li. Nws txoj kev hlub yeej muaj tseeb tiag tiag. Txawm koj yuav muaj tej uas ua tsis tau zoo thiab tu ncua kev paub los sis kev to taub nyob rau qhov twg los xij, Nws muaj kev hlub tshua txog koj, Nws hlub koj, thiab Nws tshoov koj lub siab tas li. Txawm cov tib neeg uas ua Vajtswv tes dej num ntawd yuav tsis kam los sis tsis txaus siab los xij, Vajtswv yeej tsis tso tib neeg tseg li vim lawv txoj kev qias vuab tsuab thiab txoj kev ntxeev siab. Nws hais lus tas li, pab cuam tib neeg, txhawb lawv, thiab siv li ob peb lub hlis los muab lawv tsim kho kom zoo, muab lawv txoj kev qias vuab tsuab nthuav tawm thiab ua kom lawv paub txog lawv tus yam ntxwv uas tsis zoo. Vajtswv puas hlub tib neeg nyob rau peb lub hlis no? Yog Nws tsis hlub, Nws yeej yuav tsis mob siab rau koj li. Ib txhia tib neeg raug tshem tawm mus thaum sim ua cov neeg ua Vajtswv tes dej num, thiab cov tib neeg ntawd yeej yog cov tsis ntseeg tiag tiag. Lawv xav phem kiag thaum lawv hnov hais tias lawv yog cov neeg ua Vajtswv tes dej num xwb, thiab tom qab ob peb lub hlis xwb lawv ua tsis taus li lawm. Koj tsis kam ua ib tug neeg ua Vajtswv tes dej num, thiab koj tsis kam raug kev txom nyem nyob rau hauv qhov raws Vajtswv qab, tiam sis thaum muaj neeg qhia koj hais tias yuav tau koob hmoov no mas, koj zoo siab thiab haj tseem txaus siab heev thiab. Yog Vajtswv tsis muaj kev hlub es tsuas muaj txoj kev ntxub thiab pom txoj kev qias vuab tsuab uas zoo li no nthuav tawm nyob rau hauv tib neeg xwb, ces tsim nyog muab lawv tshem tawm mus lawm. Qhov kev tsim kho kom zoo li peb lub hlis ntawd yeej tsis ntev kiag li. Vim li cas Kuv thiaj li hais tias tsis ntev kiag li? Vim peb lub hlis no thiaj li yog lub sij hawm uas tib neeg nyiaj taus xwb. Yog haj tseem ntev me ntsis thiab, mas ntshe tib neeg yeej yuav nyiaj tsis taus li. Txawm yog tib neeg hu cov nkauj qhuas Vajtswv, koom kev pe hawm, thiab kawm tas li los xij, lawv yeej yuav sawv tsis tau kom khov kho los ntawm qhov muaj kev xyiv fab rau tej ntawd xwb. Vim li ntawd Vajtswv thiaj li ua kom tib neeg los ua Nws cov neeg thaum ntxov, thiab qhov no kuj muaj Vajtswv txoj kev hlub thiab. Vajtswv siv Nws lub siab thiab txoj kev hlub los hloov tib neeg thiab tuav tib neeg, thiab qhov no kuj yog ib qho kev qhia kom pom tseeb txog txoj kev hlub thiab. Peb kuj tuaj yeem pom Vajtswv txoj kev hlub nyob rau lub sij hawm no thiab. Nws yeej tsis ncua ib hnub li, Nws hais lus kiag tam sid thaum txog sij hawm Nws hais lus lawm. Yog Nws ncua li ob peb lub hlis, ces ib txhia tib neeg yuav maj mam thim rov qab. Qhov no yog qhov Nws ua hauj lwm raws li tib neeg tus yam ntxwv tiag tiag, yam tsis ncua los sis tsis nres li. Vajtswv mob siab rau txhua tus heev, thiab thaum Nws tab tom cawm tib neeg ntawd, Vajtswv saib xyuas lawv kom mus txog thaum kawg. Tiam sis ib txhia tib neeg tsis paub daws teeb meem los sis tsis muaj kev txiav txim siab yog li ntawd lawv tus kheej thiaj li thim rov qab lawm. Ua ntej lawv tawm mus, mas Vajntsujplig Dawb Huv tshoov ib txhia tib neeg lub siab kom lawv nyob, tsuas yog muab lawv tso tseg thaum ceev tsis tau lawv cia lawm xwb. Vajtswv hlub tib neeg heev, tiam sis tib neeg tsis tsim nyog tau txais Nws txoj kev hlub. Hos ib txhia tib neeg uas tau thim rov qab uas Nws hlub tsis tau ntxiv lawm ntawd, mas Vajtswv txoj kev hlub lawv tig los ua kev ntxub thiab Nws tsis muaj dab tsi cuam tshuam rau cov tib neeg uas zoo li lawv ntxiv li lawm. Hos hais txog cov kauj ruam thiab lub sij hawm ntawm Vajtswv tes hauj lwm uas, ib kauj ruam twg siv sij hawm ntev npaum li cas, ib kauj ruam twg hais lus ntau npaum li cas, ib kauj ruam twg siv lub suab thiab kev hais lus li cas, thiab siv qhov tseeb twg los ua kom tib neeg to taub ntawd, mas tag nrho tej no puav leej muaj Vajtswv tej kev npaj siab uas zoo thiab tej kev siv zog ua, thiab tej no puav leej yog Nws tej kev teeb tseg thiab tej kev npaj uas yog lawm. Vajtswv yeej ib txwm nthuav qhov tseeb tawm, siv Nws lub tswv yim los coj kev thiab coj tib neeg ntiaj teb, pab thiab ua dej num rau tib neeg, pub zaub mov me me rau tib neeg ib qho zuj zus, thiab tuav lawv tes coj lawv los txog rau niaj hnub no. Tus uas muaj qhov kev ntsib kev pom no mas tam sim no yeej muaj qee qhov kev paub txog qhov Vajtswv ua ntawd lawm thiab yeej hais tau cov lus tim khawv uas hais txog txoj kev ntsib kev pom lawm. Tus txheej txheem uas ua ib kauj ruam zuj zus no lawv yeej tseem nco tau, thiab txoj kev hlub uas nyob rau hauv tus txheej txheem no mas hais tsis tau ua lo lus li. Vajtswv txoj kev hlub tib neeg mas tob heev uas tib neeg yuav tsis muaj peev xwm nkag siab tau tag nrho los sis muab ua lo lus hais tawm kom meej meej li. Peb pom tau los ntawm lub sij hawm uas Vajtswv ua hauj lwm hais tias Nws txoj kev hlub tib neeg mas tob npaum li cas. Nws ua tib zoo saib xyuas txhua yam me me, tsis pub txoj kev tsim kho kom zoo ntawd tsim kho ntxiv lawm, ntshai tsam tib neeg yuav thim rov qab thiab tawm ntawm Nws mus vim tsim kho ntev dhau lawm. Nws txoj kev hlub tuav tib neeg ruaj heev tsis so ib pliag li. Thiab, Vajtswv tau tswj kav txhua kauj ruam ntawm tes hauj lwm uas rau txim thiab txiav txim ntawd zoo heev lawm. Yog Nws ntxiv ib lub tswv yim ntxiv, mas tib neeg yuav xav hais tias Nws dag thiab ntxias lawv xwb, ces lawv yeej yuav thim rov qab thaum lawv zoo tsis txaus. Yog li ntawd tom qab qhov kev tsim kho kom zoo ntawd li peb lub hlis lawm, Vajtswv rov hais dua kom cov neeg ua Vajtswv tes dej num ntawd los ua Nws cov neeg, yog li ntawd txhua tus tib neeg thiaj li zoo siab. Lawv zoo siab heev kua muag ntws si thaum lawv pom hais tias Vajtswv mas ntse thiab zoo npaum li cas. Tom qab qhov kev tsim kho kom zoo ntawd li ntau lub hli lawm, tib neeg mam li ntseeg tiag tiag hais tias lawv yeej yog cov neeg ua Vajtswv tes dej num xwb. Lawv xav hais tias, “Peb tsis muaj lub hom phiaj zoo. Vajtswv tsis xav tau peb ntxiv lawm. Peb tsis muaj kev cia siab li lawm.” Nyob rau lub sij hawm ntawd, yog Kuv hais tias kuv yuav tsis cia tib neeg tuag, mas yuav tsis muaj leej twg ntseeg Kuv li. Lawv xav hais tias yog Vajtswv twb hais lawm, mas yuav tsum yog ib qho uas muaj tseeb xwb. Txawm li cas los xij, tom qab peb lub hlis ntawd Kuv nthuav dua lwm tshooj lus tawm thiab muab txoj kev uas sim cov neeg ua Vajtswv tes dej num siab ntawd xaus mus lawm. Txawm tib neeg tus yam ntxwv raug Ntxwgnyoog muab ua qias vuab tsuab lawm los xij, qee zaus tib neeg yeej tsis paub dab tsi li, zoo li cov me nyuam yaus xwb. Vim li cas thiaj li hais tias Vajtswv pom tib neeg yeej ib txwm zoo li cov me nyuam yaus xwb? Raws li tib neeg pom mas, zoo li txhua tus tib neeg puav leej qias vuab tsuab thiab tsis ncaj ncees, tiam sis raws li Vajtswv pom mas, tib neeg yeej ib txwm yog me nyuam yaus xwb, thiab lawv puav leej ruam thiab tsis paub dab tsi li. Yog li ntawd, Vajtswv tsis saib tib neeg yam li lawv yog cov yeeb ncuab tiam sis yam li yog cov uas Nws yuav cawm thiab Nws yuav hlub xwb.

Vajtswv txoj kev hlub tib neeg tsis yog cia li muab txoj hmoov hlub los sis hais lus foom koob hmoov los sis tej yam uas tib neeg xav hnov li lawv xav hauv nruab siab ntawd rau lawv xwb. Txoj kev hlub ntawd yog los nthuav qhov tseeb tawm thiab ntxuav tib neeg txoj kev qias vuab tsuab kom dawb huv, cawm lawv kom dim ntawm Ntxwgnyoog txoj kev haub ntxias, thiab ua kom lawv tsim nyog tau txais Nws tej koob hmoov thiab Nws lo lus cog tseg. Qhov ntawd yog Vajtswv txoj kev hlub tseeb. Vajtswv muab tib neeg txoj kev qias vuab tsuab nthuav tawm, txiav txim, thiab hais cov lus uas yeej tsis xav txog lawv tej kev xav li los thuam lawv. Cov lus no haj tseem chob lawv lub siab thiab ua rau lawv mob siab thiab. Cov lus uas txiav txim mas muaj qee lo zoo li thuam tib neeg los sis foom tsis zoo rau lawv cuag nkaus li Vajtswv ntxub lawv heev li, tiam sis txhua yam ntawd puav leej muaj lub ntsiab tiag tiag. Qhov ntawd yeej mus raws li qhov muaj tseeb tiag tiag, thiab tsis yog tshaj dhau lawm. Vajtswv hais raws li tib neeg lub ntsiab tseeb uas qias vuab tsuab xwb, yog li ntawd tib neeg yuav tsum tau ntsib tau pom qhov no li ib ntus mas thiaj li yuav paub. Lub hom phiaj uas Vajtswv hais tej no yog los hloov tib neeg thiab cawm lawv xwb. Tsuas yog Vajtswv hais lus zoo li no xwb mas Nws thiaj li yuav tau tej txiaj ntsim uas zoo tshaj plaws. Koj yuav tsum pom hais tias tej uas Vajtswv siv zog ua ntawd yog los cawm tib neeg xwb thiab tej ntawd puav leej muaj Nws txoj kev hlub. Tsis hais koj saib lub tswv yim ntawm Vajtswv tes hauj lwm los sis txhua kauj ruam thiab tej kev ua ntawm tes hauj lwm ntawd li, lub sij hawm, los sis Nws tej kev teeb tseg thiab tej kev npaj uas yog ntawd, puav leej muaj Nws txoj kev hlub. Ntawm no yog ib qho piv txwv. Txhua leej niam thiab leej txiv puav leej hlub lawv cov me nyuam, thiab lawv puav leej siv zog ua hauj lwm kom pom cov me nyuam ntawd taug txoj kev yog. Thaum lawv pom tej uas tsis zoo nyob rau hauv lawv cov me nyuam, mas lawv txhawj tsam cov me nyuam ntawd yuav tsis mloog hais thiab yuav tsis hloov yog lawv hais lus zoo zoo xwb, tiam sis lawv kuj txhawj tsam lawv yuav ua rau mob lawv tus kheej thiab yog lawv hais lus nyaum dhau lawm ces cov me nyuam ntawd yuav tiv tsis taus. Lawv tuaj yeem xav txog qhov no los ntawm lawv cov me nyuam txoj kev xav uas puav leej yog txoj kev hlub xwb, yog li ntawd lawv thiaj li siv zog rau qhov no heev. Txhua tus uas yog me nyuam yaus tej zaum yuav tau ntsib tau pom lawv niam lawv txiv txoj kev hlub. Txoj kev hlub tsis yog kev ua siab mos siab muag thiab kev xav xwb tiam sis yog kev rau txim kom nruj thiab. Vajtswv txoj kev cawm tib neeg mas haj yam muaj kev hlub thiab cawm los ntawm txoj kev hlub xwb, vim li ntawd Nws thiaj li ua kom zoo tshaj plaws los cawm tus tib neeg uas qias vuab tsuab. Nws tsis lam taus lam ua ib yam dab tsi es cia li tso tseg li ntawd, tiam sis Nws npaj kom yog, hais lus thiab ua hauj lwm ib kauj ruam zuj zus. Nyob rau hauv lub sij hawm thiab qhov chaw, hauv lub suab thiab txoj kev uas Nws hais lus, thiab tes hauj lwm uas Nws ua ntawd..., mas koj hais tau hais tias txhua yam ntawm tej no puav leej nthuav tawm txog Nws txoj kev hlub xwb thiab txhua qhov puav leej qhia hais tias Nws txoj kev hlub tib neeg mas tsis muaj hnub kawg thiab ntsuas tsis tau li. Cov neeg ua Vajtswv tes dej num ntawd thaum raug kev sim siab mas muaj ntau tus tib neeg hais lus tawm tsam los sis yws qee yam, tiam sis Vajtswv tsis muab qhov no los tawm tsam tib neeg, thiab tsis rau txim rau lawv ib tug twg vim qhov no. Vim Nws hlub tib neeg, Nws thiaj li ua siab ntev rau txhua yam. Yog Vajtswv tsis muaj kev hlub es tsuas muaj kev ntxub xwb, ces ntshe Nws twb teem txim rau txhua tus ntev los lawm. Vim Nws muaj kev hlub, Vajtswv tsis xav txog tej yam tsis zoo, Nws ua siab ntev rau tib neeg, Nws tuaj yeem to taub lawv tej kev nyuaj, thiab txhua yam uas Nws ua yog ua los ntawm txoj kev hlub xwb. Tsuas yog Vajtswv xwb thiaj li to taub tib neeg, thiab tab txawm koj los twb tsis to taub koj tus kheej. Ua tib zoo xav rov qab seb, qhov ntawd tsis muaj tseeb lod? Ib txhia tib neeg yws li ub li no thaum lawv raug tej kev sim siab. Tib neeg chim siab yam tsis muaj dab tsi, thiab lawv ua neej tau koob hmoov tiam sis twb tsis paub li. Tsis muaj leej twg paub tias Vajtswv yuav tsum tau raug kev txom nyem ntau npaum li cas thaum nqis saum ntuj los rau hauv ntiaj teb li. Vajtswv zoo kawg nkaus; qhov Nws los ua ib tug tib neeg, los ua ib tug neeg tsis tseem ceeb, ib tug neeg txo hwj chim, ib tug neeg uas raug rhuav ntsej muag ntawd, Nws raug kev txom nyem ntau npaum li cas! Nov yog ib qho piv txwv los ntawm lub ntiaj teb. Tus huab tais uas zoo mas hlub nws cov pej xeem li nws hlub nws tus kheej cov me nyuam. Yuav kom txo tau txoj kev txom nyem ntawm cov tib neeg dog dig mas, nws yuav tsum tau mus nrog lawv nyob hnav khaub ncaws li ib tug neeg dog dig mus soj ntsuam kom to taub lawv tej kev txom nyem. Txo nws lub meej mom, qhov txo lub hwj chim rau ib tug tib neeg dog dig lub meej mom ntawd mas yog ib qho uas rhuav tshej muag heev. Nws yuav tsum tau ua neej zoo li ib tug tib neeg dog dig, kom cov tib neeg uas tsis paub tias nws yog huab tais ntawd thiaj li yuav ua rau nws li nws yog ib tug tib neeg dog dig. Muaj ntau yam kev phom sij nyob rau ntawm tib neeg, tsis muaj leej twg paub tias muaj pes tsawg leej nrhiav kev tua huab tais los sis txeeb lub hwj chim, yog li ntawd nws yuav tsum tau ceev faj ntxiv thaum nws mus nrog cov pej xeem nyob kom to taub lawv qhov xwm txheej ntawd. Yog nws yuav tsum tsis txhob raug kev txom nyem zoo li no raws li nws lub meej mom thiab txoj hauj lwm tiag tiag no, nws yuav ua li cas ua tau? Nws tsuas xav ua ib tug huab tais zoo thiab ua kom tau ib yam dab tsi tiav rau cov tib neeg dog dig xwb. Vajtswv xav cawm tib neeg kom dim tiag tiag nyob rau tiam kawg, thiab Nws muaj peev xwm muab tib neeg nthuav tawm thiab txiav txim li no nyob rau niaj hnub no vim Nws txoj kev npaj cawm tib neeg twb los txog rau theem no lawm. Vajtswv cawm tib neeg vim Nws hlub tib neeg. Vim Nws hlub tib neeg thiab txoj kev hlub ua rau Nws mob siab thiab muaj siab es Nws thiaj li los ua cev nqaij daim tawv thiab nkag mus rau hauv dab lub qhov mus cawm tib neeg. Vajtswv muaj peev xwm ua tau li no vim Nws hlub tib neeg. Qhov Vajtswv raug rhuav ntsej muag loj heev uas los ua cev nqaij daim tawv los cawm cov tib neeg uas qias vuab tsuab no mas ua tau pov thawj qhia hais tias Nws txoj kev hlub mas loj heev. Nyob rau ntawm Vajtswv cov lus, mas muaj kev qhuab ntuas, kev nplij siab, kev txhawb zog, kev ua siab dav, thiab kev ua siab ntev; thiab ntau tshaj ntawd tseem muaj txoj kev txiav txim, kev rau txim, kev foom tsis zoo, kev nthuav tawm tab meeg, thiab cov lus cog tseg uas zoo heev thiab. Txawm yuav yog qhov twg los xij, puav leej yog ua los ntawm txoj kev hlub xwb, thiab qhov no yog lub ntsiab tseeb ntawm Nws tes hauj lwm. Hnub no nej txhua tus muaj qee qhov kev paub txog Nws txoj kev hlub lawm, tiam sis tsis tshua tob heev. Tib neeg txoj kev xav hauv nruab siab mas sib xyaw rau hauv qhov kev paub no, thiab qhov koj tuaj yeem paub txog Nws txoj kev hlub ntawd mas tsis muaj ntau. Tom qab thaum nej zoo li ntawd tau ob peb xyoos ntxiv lawm, nej yuav paub hais tias txoj kev hlub no tob thiab loj npaum li cas, tias tib neeg cov lus piav qhia tsis tau npaum li cas. Thaum tib neeg paub txog Vajtswv txoj kev hlub, ces lawv muaj lub siab hlub Vajtswv lawm. Yog tib neeg tsis muaj lub siab hlub Vajtswv no, lawv yuav ua li cas pauj Nws txoj kev hlub? Tab txawm yog koj muab koj txoj sia fij kiag los, koj yeej tseem yuav pauj tsis tau Vajtswv txoj kev hlub li. Thaum rov qab dhau ob peb xyoos ntxiv lawm, nej mam li paub hais tias Vajtswv txoj kev hlub yog dab tsi. Ces thaum nej tig saib rov qab txog tej ntawd thiab tej uas pom tseeb nyob rau hauv nej tam sim no, nej yuav khuv xim tshaj plaws, thiab nej yuav los txhos caug rau ntawm Vajtswv lub xub ntiag. Vim li cas niaj hnub no tib neeg feem coob raws Vajtswv qab ti heev thiab kub siab heev li? Vim lawv paub txog Vajtswv txoj kev hlub thiab lawv pom hais tias Vajtswv tes hauj lwm yog los cawm tib neeg. Sim xav seb, Vajtswv tes hauj lwm mas raws sij hawm tiag tiag li, ua ib kauj ruam mus rau ib kauj ruam yam tsis ncua li. Vim li cas Nws thiaj li tsis ncua? Vim yog cawm tib neeg. Nws cawm tib neeg kom ntau li ntau tau, thiab Nws tsis kam cia tus tib neeg uas tuaj yeem cawm tau ntawd plam mus li, tiam sis tib neeg lawv tus kheej tsis quav ntsej txog lawv txoj hmoo. Yog li ntawd, tib neeg thiaj li tsis paub tias tus uas hlub lawv tshaj plaws nyob rau hauv lub ntiaj teb no yog leej twg. Koj twb tsis hlub koj tus kheej thiab koj twb tsis paub mob siab los sis saib koj tus kheej txoj sia kom muaj nqis li, tsuas yog Vajtswv thiaj li hlub tib neeg tshaj plaws xwb. Tsuas yog ob peb tug tib neeg thiaj li tau ntsib tau pom Vajtswv txoj kev hlub xwb, tiam sis feem coob yeej tseem tsis tau ntsib tsis tau pom li. Lawv ntseeg hais tias qhov hlub lawv tus kheej ntawd mas tso siab tau dua, tiam sis lawv yuav tsum muaj ib txoj kev to taub kom tseeb dua txog hom kev hlub uas lawv hlub lawv tus kheej ntawd. Tib neeg cawm puas tau lawv tus kheej los ntawm qhov hlub lawv tus kheej? Tsuas yog Vajtswv txoj kev hlub xwb thiaj li cawm tau tib neeg, qhov ntawd thiaj li yog txoj kev hlub tseeb xwb, thiab koj yuav maj mam los paub tias txoj kev hlub tseeb yog dab tsi tom qab ntawd. Yog Vajtswv tsis los ua cev nqaij daim tawv los ua hauj lwm thiab coj tib neeg kev tim ntsej tim muag, nrog lawv sib tham nruab hnub hmo ntuj thiab nrog lawv nyob ua ke, ces yeej yuav tsis yooj yim rau lawv los paub Vajtswv txoj kev hlub kiag li. Yog Vajtswv tsis los ua cev nqaij daim tawv thiab nthuav qhov tseeb tawm kom ntau heev, ces tib neeg yeej yuav tsis paub Nws, thiab tsis muaj leej twg yuav paub txog Nws txoj kev hlub li.

Vajtswv thiab tib neeg tsis zoo tib yam thiab nyias nyob nyias ib sab ntuj. Tib neeg tsis muaj peev xwm to taub Vajtswv cov lus, thiab haj yam tsis paub Nws tej kev xav. Tsuas yog Vajtswv thiaj li to taub tib neeg xwb, hos lawv tsis to taub Nws li. Tsuas yog los ua cev nqaij daim tawv thiab los ua tib neeg zoo ib yam (zoo ib yam) thiab nyiaj txoj kev rhuav ntsej muag loj heev thiab txoj kev mob siab los cawm tib neeg xwb mas Vajtswv thiaj li yuav ua tau rau lawv to taub thiab paub Nws tes hauj lwm. Vim li cas Vajtswv thiaj li tsis tso qhov cawm tib neeg ntawd tseg li? Tsis yog vim Nws hlub tib neeg lod? Nws pom tib neeg raug Ntxwgnyoog muab ua qias vuab tsuab lawm yog li ntawd Nws thiaj li tso lawv mus los sis tso lawv tseg tsis tau. Vim li no Nws thiaj li muaj ib txoj kev npaj cawm tib neeg. Yog Vajtswv rhuav tshem tib neeg kiag thaum Nws npau taws li tib neeg xav hauv nruab siab, ces Nws tsis tas yuav nyiaj txoj kev txom nyem zoo li no los cawm lawv li Nws cawm niaj hnub no li. Qhov ntawd kuj qhia kom pom tseeb txog Vajtswv txoj kev raug txom nyem uas tom qab los ua cev nqaij daim tawv uas nthuav Nws txoj kev hlub tawm ntawd thiab. Tsuas yog thaum ntawd xwb tib neeg thiaj li yuav pom Nws txoj kev hlub ib qho zuj zus thiab txhua tus tib neeg thiaj li yuav paub tag nrho. Yog tsis muaj hom hauj lwm zoo li no nyob rau niaj hnub no, ces tib neeg tsuas paub hais tias muaj ib tug Vajtswv nyob rau saum ntuj thiab tias Nws hlub tib neeg no xwb. Qhov ntawd tsuas yog kev qhuab qhia xwb, thiab tib neeg yeej yuav tsis tau ntsib tau pom Vajtswv txoj kev hlub tseeb li. Tsuas yog los ntawm tes hauj lwm uas Vajtswv ua nyob rau hauv lub cev nqaij daim tawv xwb mas tib neeg thiaj li yuav muaj ib txoj kev to taub tseeb txog Nws. Qhov kev to taub no tsis yog ib qho uas pom tsis meej los sis tsis muaj dab tsi los sis tsuas yog ib co lus qhuab qhia xwb tiam sis yog ib qho uas ruaj khov thiab muaj tseeb, vim txoj kev hlub uas Vajtswv muab rau tib neeg ntawd muaj txiaj ntsim heev. Nws tsuas ua tau tes hauj lwm no tiav nyob rau hauv lub cev nqaij daim tawv xwb, hos tsis tuaj yeem ua tau tiav los ntawm tus Ntsujplig. Txoj kev hlub uas Yexus muab rau tib neeg ntawd loj npaum li cas? Nws raug ntsia rau saum tus ntoo Khaublig los cawm tib neeg, ua ib qho khoom theej lawv lub txhoj mus ib txhis. Nws los ua tes dej num uas txhiv tib neeg kom dim txog rau thaum Nws raug ntsia rau saum tus ntoo khaub lig. Txoj kev hlub no loj heev. Vajtswv tes hauj lwm mas loj heev. Muaj ntau tus tib neeg uas pheej muaj qee qhov kev xav phem txog qhov Vajtswv los ua cev nqaij daim tawv ntawd, yog li ntawd qhov no yog qhov lawv yuam kev. Vim li cas koj thiaj li pheej muaj tej kev xav phem no? Yog tsis muaj Vajtswv los ua cev nqaij daim tawv, ces tib neeg txoj kev ntseeg Vajtswv tsuas yog cov lus qhuav qhuav xwb, tsis muaj dab tsi thiab tsis muaj tseeb li, thiab txawm lawv muaj kev ntseeg los lawv yeej tseem yuav raug rhuav tshem nyob rau thaum kawg! Vajtswv txoj kev hlub tib neeg mas feem ntau tshwm nyob rau hauv tes hauj lwm uas Nws ua nyob rau hauv lub cev nqaij daim tawv, hauv txoj kev cawm tib neeg, hauv txoj kev nrog tib neeg sib tham tim ntsej tim muag, thiab txoj kev nrog lawv nyob tim ntsej tim muag kiag. Tsis muaj qhov nrug deb ib qho me me li, thiab tsis muaj qhov ua txuj li; nws yog tiag tiag ntag. Qhov Nws cawm tib neeg li ntawd thiab qhov Nws muaj peev xwm los ua cev nqaij daim tawv thiab siv ntau lub xyoo uas txom nyem siab ntsws nrog tib neeg nyob rau hauv lub ntiaj teb no ntawd puav leej yog vim Nws txoj kev hlub thiab kev hlub tshua txog tib neeg xwb. Vajtswv txoj kev hlub tib neeg mas txawm tib neeg zoo li cas los yeej hlub li thiab tsis tim tsum ib yam dab tsi li. Nws tau txais dab tsi ntawm lawv rov qab los? Tib neeg tsis mob siab rau Vajtswv. Leej twg thiaj li saib Vajtswv yam li yog Vajtswv? Tib neeg twb tsis nplij Vajtswv lub siab ib qho me me li, thiab Nws twb tseem tsis tau txais txoj kev hlub tseeb los ntawm tib neeg los txog rau niaj hnub no li. Vajtswv pub thiab pab yam siab dawb paug tas li xwb, tiam sis tib neeg tseem tsis txaus siab thiab pheej thov Nws txoj hmoov hlub thiab tej koob hmoov. Tib neeg mas nyuaj thiab ua rau muaj teeb meem heev! Txawm li cas los xij, tsis ntev xwb yuav txog hnub uas Vajtswv tes hauj lwm yuav tau txais txiaj ntsim lawm thiab cov neeg uas Vajtswv xaiv feem coob yuav ua tsaug tawm hauv lawv lub siab tuaj tiag tiag. Cov uas tau ntsib tau pom qhov no ntev lawm yeej paub qhov no. Tej zaum tib neeg yuav tsis paub xav, tiam sis lawv yeej tseem yog tib neeg thiab tsis yog yam uas tsis muaj sia. Cov uas tsis tau ntsib tau pom Vajtswv tes hauj lwm ntawd yuav tsis nkag siab txog tej no. Lawv tsuas lees paub hais tias txhua qhov tseeb uas Vajtswv tau muab nthuav tawm no mas yog lawm xwb, tiam sis lawv tsis muaj ib txoj kev to taub tob tob vim lawv tsis tau ntsib tsis tau pom.

Vajtswv ua hauj lwm tau ntau xyoo nyob rau hauv lub cev nqaij daim tawv thiab tau hais ntau yam uas suav tsis txheeb li. Vajtswv pib los ntawm qhov sim cov tib neeg uas ua Vajtswv tes dej num siab ces tom qab ntawd hais lus tseg txog yav tom ntej thiab pib tes dej num ntawm kev txiav txim thiab kev rau txim, ces mam li siv txoj kev sim siab uas nyuaj tshaj plaws los tsim kho tib neeg kom zoo. Tom qab ntawd Nws coj tib neeg los rau txoj kev uas yog ntawm txoj kev ntseeg Nws. Vajtswv hais lus thiab muab txhua qhov tseeb rau tib neeg, tawm tsam txhua yam ntawm tib neeg tej kev xav phem. Ces Nws muab kev cia siab rau tib neeg me ntsis kom lawv thiaj li pom hais tias muaj kev cia siab nyob rau tom ntej, uas yog Vajtswv thiab tib neeg yuav tau nkag mus rau hauv ib qho chaw uas zoo ua ke. Tab txawm tes hauj lwm no puav leej yog ua raws li Vajtswv txoj kev npaj xwb los xij, puav leej yog ua raws li tej uas tib neeg tim tsum xwb. Tsis yog nyob nyob es cia li lam taus lam ua; Vajtswv siv Nws lub tswv yim los ua tag nrho tes hauj lwm no. Yog vim Vajtswv muaj kev hlub es Nws thiaj li siv tswv yim los kho cov tib neeg qias vuab tsuab no tiag tiag zoo li no. Nws tsis lam cia li ua si nrog tib neeg zoo li no. Raws li Vajtswv lub suab thiab kev hais lus mas, qee zaus Nws txiav txim thiab rau txim rau tib neeg los sis sim tib neeg, qee zaus qee qhov kev hais lus ua rau tib neeg raug kev sim siab thiab kev tsim txom, thiab qee zaus Nws hais ib lub suab lus uas ua rau lawv muaj kev ywj pheej thiab ua rau lawv muaj kev kaj siab. Nws xav ntau thiab ua tib zoo xav txog tib neeg tiag tiag li. Tab txawm tib neeg yog cov neeg uas raug tsim tawm los, thiab txhua tus puav leej raug Ntxwgnyoog muab ua qias vuab tsuab tag, thiab tab txawm tib neeg tsis muaj nuj nqis, zoo li cov khoom seem uas tsis muaj nqis, thiab lawv tus yeeb yam yeej zoo li ntawd los xij, Nws tsis ua rau tib neeg raws li lawv lub ntsiab tseeb thiab tsis ua rau tib neeg raws li txoj kev ua pauj uas lawv tsim nyog tau txais. Tej zaum Nws txoj kev hais lus yuav nyaum, tiam sis Nws ua siab ntev, ua siab dav, thiab hlub tshua tib neeg tas li li. Tib neeg yuav tsum maj mam thiab ua tib zoo xav txog qhov no! Yog Vajtswv tsis ua sab dav, hlub tshua, thiab muab txoj hmoov hlub rau tib neeg no, Nws hais puas tau tej no los cawm lawv? Vim li cas Nws tsis cia li teem txim rau lawv xwb? Tab txawm li ntawd los tib neeg twb tseem tsis paub Vajtswv txoj kev hlub li. Lawv mas ruam thiab tsis paub dab tsi dhau lawm! Nyob rau hauv tib neeg lub ntsiab tseeb mas tsis muaj kev hlub li. Lawv tsis paub tias kev hlub yog dab tsi, thiab lawv tsis paub tias vim li cas Vajtswv thiaj ua li no. Thaum tib neeg tsis tau ntsib tsis tau pom Vajtswv txoj kev hlub, mas lawv tsuas xav hais tias Vajtswv tes hauj lwm no mas zoo heev, tias tes hauj lwm no muaj txiaj ntsim rau tib neeg, thiab tias tes hauj lwm no hloov tau tib neeg xwb, tiam sis tsis muaj ib tug tib neeg xav hais tias “Vajtswv tes hauj lwm mas zoo heev, Nws tes hauj lwm mas muaj nuj nqis heev! Vajtswv txoj kev hlub tib neeg mas tob heev. Nws yeej tsis ua rau tib neeg zoo li lawv qias neeg li!” Tib neeg tsis tau ua rau Vajtswv li yog Vajtswv, tiam sis Vajtswv tau ua rau tib neeg li yog tib neeg. Tsis yog li ntawd lod? Vajtswv hais tias koj yog ib tug tsiaj nyaum, tiam sis Nws tsis tau ua rau koj li yog ib tug tsiaj nyaum. Yog Vajtswv ua rau koj li yog ib tug tsiaj nyaum no, Nws puas tseem muab tau qhov tseeb rau koj? Nws puas tseem yuav raug kev txom nyem ntau heev los cawm koj? Ib txhia tib neeg mas npau taws heev hais tias, “Vajtswv hais tias kuv tsis muaj nuj nqis. Kuv txaj muag ua neej nyob txuas ntxiv dhau lawm.” Tib neeg tsis to taub Vajtswv tej kev npaj siab li. Tuaj yeem hais tau hais tias tej zaum koj tsis tau ntsib tsis tau pom lub tswv yim thiab qhov kev siv zog ntawm Vajtswv tes hauj lwm tob heev nyob rau hauv koj lub neej. Tiam sis txawm koj qhov kev ntsib kev pom ntawd yuav tob thiab yuav ntiav npaum li cas los xij, tsuav thaum kawg koj to taub txoj kev hlub ntawd thiab muaj kev paub me ntsis xwb, ces qhov ntawd txaus lawm. Vajtswv tseem hais kom tib neeg to taub qhov tseeb, mob siab rau txoj kev hloov lawv tus moj yam, thiab kom lawv txoj kev to taub txog qhov tseeb txog lub siab ncaj ncees, kev zwm rau, thiab txoj kev hlub Vajtswv hauv lawv lub siab ntawd kom tob zuj zus. Yog tib neeg siv los sis raug kev txom nyem me ntsis xwb, mas lawv yuav xav hais tias lawv tau pab ntau heev li lawm thiab tam sim no tsim nyog los nyob rau ntawm Vajtswv lub xub ntiag lawm, thiab yog lawv pab me ntsis ntxiv, mas lawv yuav muaj plhus txog qhov lawv tsim nyog ntawd, yam tsis hais txog qhov, lawv tsis ruaj siab thiab tsis txaus siab nyob rau sab hauv li. Tib neeg muaj txoj kev hlub li cas? Tib neeg muaj txoj kev hlub zoo li cas? Vajtswv puas tau txais txoj kev hlub tseeb los ntawm tib neeg? Puas yog Nws tsis tsim nyog tib neeg hlub?

Lub caij ntuj no, 1999