Ib qho ntawm txoj kev paub txog Khetos lub ntsiab tseeb ntawd mas yog los cais tus Khetos hauv lub cev nqaij daim tawv tawm ntawm cov tib neeg uas qias vuab tsuab, los saib thiab zwm rau tus Vajtswv hauv lub cev nqaij daim tawv ntawd yam li Nws yog tus Vajtswv uas muaj tiag. Hos lwm qhov mas yog qhov hais tias koj kuj yuav tsum pom tus Vajtswv hauv lub cev nqaij daim tawv ntawd ua hauj lwm kiag, nthuav tawm qhov tseeb kiag, thiab nrog tib neeg nyob kiag thiab. Koj yuav tsum pom qhov Nws ntxuav tib neeg kom dawb huv thiab cawm tib neeg li cas, qhov Nws tsis yog ib tug cev lus, ib tug tub txib, los sis ib tug uas cev cov lus hais tseg txog yav tom ntej los sis ib tug tib neeg tsis tseem ceeb uas Vajtswv xa los ntawd li cas tiam sis yog tus Vajtswv hauv lub cev nqaij daim tawv, yog Khetos, thiab yog Vajtswv Tus Kheej ntag. Txawm lub cev nqaij daim tawv no yog ib lub cev tib neeg xwb los xij, Nws yog ib tug tib neeg dog dig uas muaj lub hwj chim qaum ntuj. Kev paub txog lub hwj chim qaum ntuj ntawm lub cev nqaij daim tawv no mas tseem ceeb heev, yam tsawg kawg koj yuav tsum muaj peev xwm siv tej uas muaj tseeb uas koj pom los qhia txog Khetos lub hwj chim qaum ntuj. Yuav kom paub Khetos lub hwj chim qaum ntuj mas, koj yuav tsum noj thiab haus Vajtswv cov lus, tau ntsib tau pom Nws tes hauj lwm, thiab paub Nws tus moj yam. Kev paub txog lub ntsiab tseeb ntawm tus Vajtswv hauv lub cev nqaij daim tawv ntawd mas muaj qhov ua rau tib neeg paub tseeb tias Vajtswv yeej tau los ua cev nqaij daim tawv lawm tiag tiag thiab tias lub cev nqaij daim tawv no yeej yog Vajtswv tiag tiag. Tsuas yog zoo li no xwb mas tib neeg thiaj li muaj txoj kev ntseeg Vajtswv uas tseeb thiab txoj kev zwm rau uas tseeb thiab txoj kev hlub tseeb, thiab tsuas yog thaum paub li no lawm xwb mas koj thiaj li ua tau pov thawj qhia hais tias koj muaj ib txoj kev to taub txog Vajtswv lub ntsiab tseeb.

Niaj hnub no, tib neeg tsis muaj txoj kev paub txog Khetos tiag tiag. Lawv nyeem Vajtswv cov lus thiab lees hais tias cov lus ntawd yog qhov tseeb thiab txoj kev nthuav tawm ntawm Vajntsujplig Dawb Huv hos tsis quav ntsej txog lub cev nqaij daim tawv li. Lawv tsis paub tias qhov pib ntawm lub cev nqaij daim tawv ntawd yog dab tsi los sis lub cev nqaij daim tawv thiab tus Ntsujplig muaj kev sib cuam tshuam li cas. Ntau tus tib neeg ntseeg hais tias lub cev nqaij daim tawv ntawd yog los hais lus, tias yog siv Nws los hais lus thiab los ua hauj lwm thiab tias qhov no yog Nws txoj hauj lwm. Lawv ntseeg hais tias lub cev nqaij daim tawv ntawd hais lus thaum Nws muaj kev xav thiab Nws tes hauj lwm tiav thaum Nws ua tag lawm, cuag nkaus li Nws yog ib tug xa xov. Yog ib tug tib neeg twg ntseeg li no, ces qhov lawv lees paub thiab ntseeg ntawd tsis yog tus Vajtswv hauv lub cev nqaij daim tawv los sis Khetos tiam sis yog ib tug tib neeg uas zoo li ib tug cev lus xwb. Ib txhia tib neeg kuj xav hais tias, “Khetos yog ib tug tib neeg, thiab txawm tus Vajtswv hauv lub cev nqaij daim tawv lub ntsiab tseeb yuav zoo li cas los sis Vajtswv tus moj yam uas Nws nthuav tawm ntawd yuav zoo li cas los xij, Nws yeej sawv cev tsis tau rau tus Vajtswv saum ntuj ceeb tsheej los sis tus Tswv Tsim uas kav tag nrho lub qab ntuj khwb thiab ib puas tsav yam li. Yog hais tias Nws yog tus Vajtswv hauv lub cev nqaij daim tawv thiab tus Vajtswv saum ntuj ceeb tsheej uas los rau hauv lub ntiaj teb no no, vim li cas Nws thiaj li tsis muaj ib qho txuj ci tseem ceeb uas tshaj ntuj tsim li? Yog Nws muaj hwj chim no vim li cas Nws thiaj li tsis rhuav tshem tus zaj loj liab ploog?” Cov uas hais tej lus no mas tsis muaj kev to taub sab ntsujplig. Lawv tsis to taub tias qhov Vajtswv los ua cev nqaij daim tawv ntawd yog dab tsi, mas tsis tas yuav hais txog txoj kev cawm tib neeg ntawm Vajtswv tes hauj lwm hauv lub cev nqaij daim tawv, leej twg yog cov Nws yuav cawm, Nws nthuav dab tsi tawm, los sis yam uas tib neeg tsim nyog paub ntawd li. Lub ntsiab tseeb ntawm tus Vajtswv hauv lub cev nqaij daim tawv mas yog Vajtswv lub ntsiab tseeb, thiab tus Vajtswv hauv lub cev nqaij daim tawv ntawd ua tau txhua yam rau Vajtswv. Tus Vajtswv hauv lub cev nqaij daim tawv ntawd yog Vajtswv Tus Kheej ntag, thiab Nws ua tau txhua yam li Nws xav ua. Txawm li cas los xij, Vajtswv los ua cev nqaij daim tawv zaum no yog los ua theem hauj lwm kawg nyob rau hauv Nws txoj kev cawm tib neeg, thiab tes hauj lwm ntawd tsis muaj dab tsi cuam tshuam rau qhov kav tag nrho ib puas tsav yam los sis qhov kav tag nrho txhua haiv neeg. Tes hauj lwm ntawd tsis cuam tshuam rau tej ntawd kiag li. Yog li ntawd, yam uas koj yuav tsum paub ntawd yog yam uas tib neeg yuav ntsib thiab tuaj yeem to taub nyob rau theem hauj lwm no, lub ntsiab tseeb ntawm theem hauj lwm no, yam uas Khetos muaj thiab yam uas yog Khetos thiab txoj kev nthuav tawm txog Nws tus moj yam. Qhov uas Khetos nthuav tawm ntawd puas yog Vajtswv lub ntsiab tseeb? Qhov ntawd puas yog Vajtswv tus moj yam? Yog lawm. Tiam sis qhov no puas yog txhua yam? Kuv qhia rau nej tam sim no hais tias, qhov no tsis yog txhua yam. Qhov no tsuas yog ib feem me me thiab tsawg tsawg xwb, tsuas yog yam uas tib neeg lub qhov muag tuaj yeem pom xwb, yam uas lawv tuaj yeem kov tau, thiab yam uas lawv lub siab tuaj yeem to taub thaum Vajtswv los ua cev nqaij daim tawv xwb. Qhov no tsis yog txhua yam, thiab qhov no tsuas yog tes hauj lwm uas ua tiav nyob rau hauv Vajtswv txoj kev npaj xwb.

Yuav ua li cas thiaj li piav qhia tau txog tus Vajtswv hauv lub cev nqaij daim tawv kom meej tshaj plaws? Muab hais yooj yooj yim hais tias, qhov ntawd txhais hais tias Vajtswv los ua neeg nyob rau hauv lub ntiaj teb, Vajtswv tus Ntsujplig hnav lub cev nqaij daim tawv zoo li ib tug tib neeg dog dig. Yog Vajtswv tus Ntsujplig nyob rau hauv lub cev nqaij daim tawv no, Nws puas tseem nyob rau lwm qhov thiab? Nyob. Vajtswv kav tag nrho lub qab ntuj khwb thiab ib puas tsav yam, thiab tag nrho hauv lub qab ntuj khwb no tsuas muaj tib tug Vajtswv kav xwb. Nws muaj hwj chim loj kawg nkaus, thiab tam sim no Nws los ua cev nqaij daim tawv thiab nqis los rau hauv lub ntiaj teb lawm. Nws tsis zoo li tib neeg xav hauv nruab siab txog Nws hais tias, yog Nws los ua cev nqaij daim tawv thiab ua hauj lwm nyob rau hauv lub ntiaj teb ces yuav tsis thab lwm qhov lawm. Yav tas los Kuv nug ib tug muam hais tias, “Tam sim no Vajtswv ua lub cev nqaij daim tawv nyob rau hauv lub ntiaj teb no lawm, puas tseem muaj ib tug Vajtswv nyob rau saum ntuj thiab?” Nws xav ib pliag thiab hais tias, “Tsuas muaj tib tug Vajtswv xwb yog tam sim no Nws nyob rau hauv lub ntiaj teb lawm, ces tsis muaj Vajtswv nyob rau saum ntuj ceeb tsheej lawm.” Qhov no rov qab tsis yog dua lawm. Vajtswv kav tag nrho lub qab ntuj khwb thiab ib puas tsav yam thiab Vajtswv yog Ntsujplig, txawm Nws nyob rau hauv lub ntiaj teb no los yeej tseem kav tag nrho ib puas tsav yam uas nyob rau saum ntuj ceeb tsheej thiab ua Nws tes hauj lwm nyob rau hauv lub ntiaj teb no. Kuv txawm nug hais tias, “Qhov ntawd puas txhais tau hais tias qee zaus Vajtswv tus Ntsujplig kuj tawm mus thiab?” Nws xav ib pliag thiab hais tias, “Tej zaum tus Ntsujplig yuav tsum tau tawm mus thiab qee zaus ntshe lub cev nqaij daim tawv tsis paub dab tsi li. Tus Ntsujplig tawm mus thaum lub cev nqaij daim tawv nyob li qub, thiab tus Ntsujplig rov qab los thaum lub cev yuav hais lus. Tej zaum tus Ntsujplig mus ua lwm yam thaum lub cev tsaug zog lawm tiam sis thaum lub cev sawv mam li rov qab los nrog lub cev hais lus thiab ua hauj lwm ua ke. Yog tsis muaj hauj lwm ua, ces tej zaum lub cev tsuas ua tej dej num dog dig li tib neeg thiab coj zoo li cov tib neeg dog dig xwb.” Qhov no yog qhov ntau tus tib neeg xav. Muaj lwm tus uas txhawj hais tias, “Kuv tsis paub xyov yuav muab Vajtswv cov nyiaj faib li cas, cia li muab rau lwm tus twj ywm xwb no puas tau?” Tib neeg lub siab mas nyuaj tiag tiag li. Cov tib neeg uas muaj lub siab phem ntawd cia siab tias yuav caum qhov tseeb tau li cas? Muab hais luv luv hais tias, qhov paub Vajtswv lub ntsiab tseeb uas los ua cev nqaij daim tawv thiab paub Nws tus moj yam kom paub Vajtswv ntawd mas tsis yog ib qho yooj yooj yim kiag li. Thaum Vajtswv ua hauj lwm nyob rau hauv lub cev nqaij daim tawv ntawd, yam koj raug thiab ntsib ntawd yog yam uas koj yuav tsum paub, thiab koj yuav tsum tsis txhob lam cia li kwv yees phem phem txog tej uas koj kov tsis tau ntawd. Piv txwv li, “Tom qab Vajtswv lub cev nqaij daim tawv ncaim mus lawm, Vajtswv yuav tshwm los ua Nws tes hauj lwm dua li cas? Nws puas tseem yuav los ntsib peb hauv ntiaj teb?” Niaj hnub no tib neeg feem coob mob siab rau tej uas nyob rau sab nraud no xwb, thiab lawv tsis raus tes rau Khetos lub ntsiab tseeb kiag li; tseeb tiag qhov to taub tej ntawd tsis muaj txiaj ntsim dab tsi li. Muaj qee yam uas koj tsis tas yuav to taub, thiab koj yuav to taub tej ntawd thaum txog lub sij hawm lawm. Txawm koj to taub tej no thiab tsis to taub los tsis tseem ceeb, thiab tej no tsis muaj kev cuam tshuam rau tib neeg txoj kev ntseeg tus Vajtswv hauv lub cev nqaij daim tawv, txoj kev ntseeg Khetos, los sis txoj kev raws Khetos qab ib qho me me li. Tej no kuj tsis muaj kev cuam tshuam rau tib neeg txoj kev caum qhov tseeb los sis txoj kev ua lawv tes dej num kom zoo ib qho me me li thiab, thiab tej no yuav tsis ua rau koj muaj kev ntseeg tuaj yog koj paub tej no. Yav tag los cov cev lus tau ua ntau yam cim thiab tej txuj ci uas xav tsis thoob, tiam sis tib neeg tau txais dab tsi? Txhua yam no yog ua kom tib neeg lees paub hais tias muaj Vajtswv no xwb. Txawm lawv ua tau tej txuj ci tseem ceeb ntau npaum li cas los xij cov cev lus ntawd tsis yog Vajtswv vim cov cev lus ntawd tsis muaj lub ntsiab tseeb ntawm Vajtswv. Tus Vajtswv hauv lub cev nqaij daim tawv yeej tseem yog Vajtswv yam tsis ua ib qho txuj ci tseem ceeb li vim Nws muaj Vajtswv lub ntsiab tseeb. Qhov Nws tsis ua tej cim thiab tej txuj ci uas xav tsis thoob ntawd tsis tau txhais hais tias Nws ua tsis tau tej ntawd. Qhov Nws cov lus ua tau txhua yam tiav ntawd haj yam muaj hwj chim loj tshaj li qhov ua tej cim thiab tej txuj ci uas xav tsis thoob ntawd lawm; qhov ntawd haj yam yog ib qho txuj ci tseem ceeb uas loj dua. Txoj kev caum kom paub Vajtswv lub ntsiab tseeb thiab tus moj yam ntawd mas tseem ceeb heev, nws muaj txiaj ntsim rau nej txoj kev to taub lub neej txoj sia heev, thiab qhov no yog txoj kev ntseeg Vajtswv uas yog lawm.

Nej yuav tsum paub hais tias thaum Vajtswv ua hauj lwm nyob rau hauv lub cev nqaij daim tawv ntawd, mas yog thaum uas tib neeg tuaj yeem ntsib thiab pom yam uas Vajtswv muaj thiab yam uas yog Vajtswv, Nws lub ntsiab tseeb, thiab Nws tus moj yam ntau tshaj plaws. Nws yog lub cib fim uas zoo tshaj plaws los paub Vajtswv. Qhov kev paub txog Vajtswv tej kev ua thiab Nws tus moj yam uas tib neeg hais txog yav dhau los ntawd—qhov ntawd mas nyuaj vim lawv tsis muaj kev nkag tau mus rau Nws. Thaum Mauxe pom Yehauvas tshwm rau nws puag thaum ub ntawd, nws tsuas pom qee yam uas Yehauvas ua xwb. Nws muaj kev paub txog Vajtswv ntau npaum li cas? Ntau dua li tib neeg paub niaj hnub no lod? Muaj qab hau dua li qhov tib neeg paub niaj hnub no lod? Yeej tsis muaj. Vajtswv nthuav Nws tes hauj lwm ntau yam tawm thaum Nws ua hauj lwm nyob rau hauv lub teb chaws Yixayees. Ntau tus tib neeg pom Yehauvas ua tej cim thiab tej txuj ci tseem ceeb, thiab ib txhia haj tseem pom Yehaucas lub nraub qaum thiab. Ntau tus tib neeg kuj pom cov tub txib saum ntuj thiab. Tiam sis thaum kawg muaj pes tsawg tus tib neeg uas los paub Vajtswv? Tsawg heev! Tseeb tiag yeej tsis muaj leej twg paub Vajtswv tiag tiag li. Tsuas yog cov tib neeg ntawm tiam kawg thiaj li muaj kev paub txog Vajtswv ntau thaum lawv ntsib lawv pom Nws tes hauj lwm thaum Nws nyob rau hauv lub cev nqaij daim tawv xwb, vim Vajtswv qhia tib neeg tim ntsej tim muag tias Nws ua tes hauj lwm dab tsi, lub hom phiaj ntawm Nws tes hauj lwm ntawd yog dab tsi, Nws tej kev npaj siab yog dab tsi, tus cwj pwm uas Nws coj rau tib neeg yog zoo li cas, tib neeg tej yam ntxwv thiab lub ntsiab tseeb uas Ntxwgnyoog muab ua qias vuab tsuab ntawd yog dab tsi, thiab ntau yam ntxiv. Tsuas yog los ntawm cov lus uas nthuav tawm no xwb mas tib neeg thiaj li yuav pom hais tias Vajtswv mas yeej muaj qab hau thiab muaj tiag npaum li no, tias Nws yeej muaj tej kev npaj siab no rau tib neeg tiag tiag, thiab tias Nws yeej muaj tus moj yam no tiag tiag. Nws tej hauj lwm mas zoo tiag tiag, Nws lub tswv yim mas tob npaum li no, thiab Nws txoj kev hlub tshua tib neeg ntiaj teb mas muaj tseeb npaum li no. Tag nrho cov lus uas Vajtswv tau hais no yog ua tim khawv rau Nws tes hauj lwm, Nws txoj kev hlub thiab tus moj yam, thiab Nws tej kev ua xwb. Peb tau ntsib tau pom tej no ua ntej los ntawm qhov tau ntsib tau pom Vajtswv tes hauj lwm. Cov lus uas Vajtswv hais mas muaj qab hau thiab muaj tseeb heev. Tib neeg pom hais tias Vajtswv txoj kev hlub thiab kev ua siab ntev rau tib neeg ntawd mas tsis muaj hnub kawg li. Vajtswv qhov kev npaj siab los cawm tib neeg mas pom tseeb nyob rau hauv Nws tes hauj lwm thiab cov lus uas Nws hais, kom tib neeg thiaj li tau saj tej ntawd tiag tiag. Yog li ntawd, qhov kev paub txog lub ntsiab tseeb ntawm qhov Vajtswv los ua cev nqaij daim tawv ntawd mas tsuas tuaj yeem paub nyob rau lub sij hawm uas Vajtswv ua hauj lwm nyob rau hauv lub cev nqaij daim tawv xwb, thiab txhua yam uas koj to taub uas tsis yog nyob rau lub sij hawm no ces tsis muaj qab hau li. Tom qab Vajtswv ua Nws tes hauj lwm hauv lub cev nqaij daim tawv tiav thiab tawm mus lawm, ces Nws tes hauj lwm yuav tsis muaj qab hau rau koj li tam sim no lawm thaum koj sim ua kom tau ntsib tau pom tes hauj lwm ntawd. Qhov no yog vim koj tuaj yeem pom thiab kov tau Vajtswv tes hauj lwm nyob rau hauv lub cev nqaij daim tawv niaj hnub no. Vajtswv kuj ua Nws tes hauj lwm tim ntsej tim muag nrog tib neeg tas li thiab, thiab lawv tau ntsib tau pom tias Nws hais lus li cas thiab Nws ua hauj lwm li cas kiag lawm. Qhov Petus tau ntsib tau pom nyob rau lub sij hawm ntawd tsis muaj tseeb npaum qhov nej tau ntsib tau pom niaj hnub no. Petus raws Yexus qab thiab tau ntsib tau pom tias Vajtswv muaj qab hau thiab ntxim hlub heev nyob rau lub sij hawm uas Nws ua hauj lwm nyob rau hauv lub teb chaws Yudas ntawd, tiam sis thaum ntawd Petus lub siab me thiab yam uas nws tau ntsib tau pom ntawd mas ntiav ntiav xwb. Tom qab Yexus ncaim mus lawm, Petus rov qab ua tib zoo xav thiab sim Nws cov lus, ces Petus mam li to taub tob ntxiv thiab tau txais ntau ntxiv. Nyob rau lub sij hawm uas Yexus ua hauj lwm ntawd Nws kuj nthuav qee yam tawm txog yam uas Vajtswv muaj thiab yam uas yog Vajtswv, Nws lub siab zoo uas muaj kev hlub, Nws txoj kev hlub tshua, Nws txoj kev cawm tib neeg, thiab Nws txoj kev ua siab ntev uas tsis muaj hnub kawg thiab txoj hmoov hlub uas muaj rau lawv thiab. Cov tib neeg uas raws Nws qab puag thaum ub ntawd tau ntsib tau pom qee yam ntawm tej no, hos cov tib neeg uas los tom qab no tsis tau ntsib tsis tau pom tej no kom tob npaum li cov tib neeg puag thaum ub. Thiab, thaum Vajntsujplig Dawb Huv tshoov tib neeg lub siab los thov Vajtswv kom to taub Nws tej kev npaj siab ntawd, yam uas lawv tau ntsib tau pom nyob rau lub sij hawm ntawd mas pom tsis meej thiab tsis tseeb li. Nws yog lub sij hawm uas to taub nyuaj, thiab tsis muaj leej twg tuaj yeem paub tseeb hais tias lawv txoj kev to taub ntawd yog li. Yog li ntawd, thaum Petus raug ntes thiab raug kaw kiag lawm, qee tus tib neeg haj tseem sim xav seb yuav tso nws tawm li cas thiab. Tseeb tiag lawm, Yexus qhov kev npaj siab nyob rau lub sij hawm ntawd yog kom Petus raug ntsia rau saum tus ntoo khaub lig ua nws zaj lus tim khawv zaum kawg. Txoj kev uas nws taug twb mus txog qhov kawg lawm, yog li ntawd Vajtswv thiaj li npaj kom nws ua tim khawv li no kom nws thiaj li yuav tau ib qho chaw zoo. Nov yog txoj kev uas Petus taug. Thaum Petus mus txog qhov kawg ntawm nws txoj kev lawm, nws tseem tsis to taub Yexus qhov kev npaj siab tiag tiag. Nws tsuas to taub tias Yexus txhais li cas thaum Yexus qhia rau nws xwb. Yog li ntawd, yog koj xav to taub Vajtswv lub ntsiab tseeb, yuav tsum ua kom to taub thaum Vajtswv nyob rau hauv lub cev nqaij daim tawv mas thiaj li yog qhov muaj txiaj ntsim tshaj plaws. Koj tuaj yeem pom, kov tau, hnov, thiab paub tob. Yog koj sim ua kom ntsib kom pom thiab rov qab tig saib txog qhov Vajntsujplig Dawb Huv ua hauj lwm li cas tom qab Vajtswv tes hauj lwm hauv lub cev nqaij daim tawv tiav lawm, ces qhov koj ntsib koj pom ntawd yuav tsis tob, thiab yam uas koj to taub ntawd yuav tiav tiav xwb. Nyob rau lub sij hawm ntawd Nws tsuas tsim kho tau tib neeg tus moj yam qias vuab tsuab kom zoo xwb. Thaum tsim kho tau zoo lawm, ces tib neeg yuav muaj peev xwm to taub me ntsis ntxiv txog qhov tseeb thiab siv qhov tseeb uas lawv tau txais ntawd los ua lub hauv paus rau lawv lub neej, hloov tus moj yam qias vuab tsuab uas nyob rau hauv lawv ntawd. Tiam sis txawm koj yuav nrhiav kev los hlub thiab los paub Vajtswv npaum li cas los xij, koj yeej yuav tsis paub npaum li ntawd. Tib neeg tsis muaj kev paub ntau, thiab txoj kev paub ntawd tsis muaj txiaj ntsim npaum li txoj kev paub Vajtswv los ntawm qhov kev ntsib kev pom Vajtswv tes hauj lwm nyob rau hauv lub cev nqaij daim tawv. Vajtswv tau nthuav ntau qhov tseeb tawm heev thaum Nws nyob rau hauv lub cev nqaij daim tawv, thiab ntau tus tib neeg pom tiam sis tsis to taub thiab hnov tiam sis tsis paub. Cov no yog cov tib neeg uas tsis muaj kev to taub txog sab ntsujplig thiab yog cov tib neeg uas tsis muaj kev xav. Tib neeg tsis muaj lub siab uas txawj xav los sis qhov tsim nyog, thiab lawv tsis paub tias Vajtswv hlub thiab ua siab ntev rau tib neeg npaum li cas. Tib neeg tsis paub dab tsi li lawv tsuas muaj qee qhov kev to taub thiab pib nkag mus rau hauv txoj kev yog thaum Vajtswv tes hauj lwm tiav lawm xwb.

Khetos lub ntsiab tseeb yog dab tsi? Nyob rau ntawm tib neeg mas, Khetos lub ntsiab tseeb yog kev hlub. Hos cov uas raws Nws qab ntawd, mas lub ntsiab tseeb ntawd yog ib txoj kev hlub uas tsis muaj hnub kawg li. Yog Nws tsis muaj kev hlub los sis kev hlub tshua, ces tib neeg yuav tsis muaj peev xwm raws Nws qab los txog rau tam sim no. Ib txhia tib neeg hais tias, “Tiam sis Vajtswv kuj ncaj ncees thiab.” Yeej muaj tseeb uas Vajtswv ncaj ncees, tiam sis hais txog Nws tus moj yam, mas Nws txoj kev ncaj ncees feem ntau yog nthuav tawm los ntawm Nws txoj kev ntxub tib neeg tus moj yam qias vuab tsuab, Nws txoj kev foom tsis zoo rau cov dab phem thiab Ntxwgnyoog, thiab Nws txoj kev uas tsis cia leej twg tawm tsam Nws tus moj yam li. Yog li ntawd Nws txoj kev ncaj ncees puas muaj kev hlub? Yog li, Nws txoj kev txiav txim rau tib neeg txoj kev qias vuab tsuab thiab txoj kev ntxuav tib neeg txoj kev qias vuab tsuab kom dawb huv ntawd tsis yog kev hlub lod? Vim txoj kev cawm tib neeg, Vajtswv thiaj li tau ua siab ntev nyiaj txoj kev rhuav tshej muag loj heev. Qhov no tsis yog kev hlub lod? Yog li ntawd, kuv yuav hais ncaj ncaj rau nej hais tias: Nyob rau hauv tes hauj lwm uas Vajtswv ua rau tib neeg thaum nyob rau hauv lub cev nqaij daim tawv ntawd, mas yam uas pom tseeb thiab tseem ceeb tshaj plaws nyob rau hauv Nws lub ntsiab tseeb ces yog kev hlub xwb; nws yog txoj kev ua siab ntev uas tsis muaj hnub kawg li. Yog hais tias tsis yog vim txoj kev hlub es zoo li nej xav hauv nruab siab hais tias Vajtswv nyiam txo tib neeg thaum Nws nyiam los sis rau txim, foom tsis zoo, txiav txim, thiab qhuab ntuas tus uas Nws ntxub, mas qhov ntawd yuav hnyav dhau lawm! Yog Nws npau taws rau ib tug tib neeg twg, tus tib neeg ntawd yuav ntshai tshee hnyo thiab sawv tsis tau rau ntawm Nws lub xub ntiag li.... Qhov no tsuas yog ib qho uas Vajtswv tus moj yam nthuav tawm xwb. Nws lub hom phiaj thaum kawg yeej tseem yog txoj kev cawm dim, thiab Nws txoj kev hlub muaj nyob rau txhua tus moj yam uas Nws nthuav tawm. Tam sim no rov qab tig xav seb, dab tsi uas Vajtswv nthuav tawm ntau tshaj plaws nyob rau lub sij hawm uas Nws ua hauj lwm nyob rau hauv lub cev nqaij daim tawv ntawd? Qhov ntawd yog kev hlub, qhov ntawd yog kev ua siab ntev. Kev ua siab ntev yog dab tsi? Kev ua siab ntev yog kev muaj kev hlub tshua vim muaj kev hlub nyob rau hauv. Vajtswv muaj kev hlub tshua txog tib neeg vim Nws muaj kev hlub, thiab txoj kev hlub ntawd puav leej yog los cawm tib neeg xwb. Nws zoo ib yam li ib nkawm niam txiv uas sib hlub heev es ib leeg cia li tsis pom ib leeg tej kev uas ua tsis tau zoo thiab tej kev txhaum li lawm. Koj tuaj yeem nyiaj taus thaum koj tus txij nkawm ua rau koj npau taws, thiab txhua yam no yog los ntawm lub hauv paus ntawm txoj kev hlub nkaus xwb. Yog hais tias sib ntxub, ces koj yuav tsis muaj tus cwj pwm no los sis nthuav tej no tawm, thiab yuav tsis muaj qhov zoo li no. Yog Vajtswv tsuas muaj txoj kev ntxub thiab kev npau taws los sis tsuas txiav txim thiab rau txim yam tsis muaj kev hlub li xwb, ces yuav tsis muaj qhov xwm txheej li nej pom tam sim no, thiab ntshe nej coob tus twb muaj teeb meem lawm. Vajtswv puas tseem yuav muaj peev xwm muab qhov tseeb rau nej? Kiag thaum tes dej num ntawm kev txiav txim thiab kev rau txim tiav lawm, cov tib neeg uas tsis lees txais qhov tseeb ib qho me me li ntawd yuav raug foom tsis zoo. Tab txawm yog lawv tsis tuag kiag tam sim ntawd los lawv yuav muaj mob, tsis muaj zog, vwm, dig muag, thiab raug cov ntsujplig phem thiab cov dab phem qias neeg muab tsuj. Lawv yuav tsis zoo li tam sim no lawm. Yog li ntawd, nej tau txais Vajtswv txoj kev hlub thiab Nws txoj kev ua siab ntev, kev hlub tshua, thiab lub siab zoo uas muaj kev hlub ntau heev. Tiam sis tib neeg tsis xav dab tsi txog qhov no li, lawv ntseeg hais tias, “Qhov no yog qhov Vajtswv tsim nyog rau tib neeg. Vajtswv kuj muaj txoj kev ncaj ncees thiab kev npau taws thiab, thiab peb tsis tshua tau ntsib tau pom tej no!” Koj twb tau ntsib tau pom tej no lawm tiag tiag lod? Yog koj ntsib koj pom, ces ntshe koj twb tuag lawm. Niaj hnub no tib neeg yuav nyob rau qhov twg? Vajtswv txoj kev ntxub, kev npau taws, thiab kev ncaj ncees puav leej yog nthuav tawm los ntawm lub hauv paus uas xav coj txoj kev cawm dim los rau cov tib neeg no xwb. Tus moj yam no kuj muaj Vajtswv txoj kev hlub thiab kev hlub tshua nrog rau Nws txoj kev ua siab ntev ntev thiab. Txoj kev ntxub no ua rau muaj ib qho kev paub hais tias tsis muaj lwm txoj kev xaiv lawm, thiab txoj kev ntxub no muaj qhov kev txhawj xeeb uas tsis muaj qhov kawg thiab kev cia siab rau tib neeg! Vajtswv txoj kev ntxub yog ntxub tib neeg txoj kev qias vuab tsuab thiab tib neeg txoj kev ntxeev siab thiab txoj kev txhaum xwb. Txoj kev ntxub ntawd yog ntxub mus rau ib sab xwb thiab yog ntxub los ntawm lub hauv paus uas yog txoj kev hlub. Vim muaj kev hlub es thiaj li muaj txoj kev ntxub. Vajtswv txoj kev ntxub tib neeg mas txawv Nws txoj kev ntxub Ntxwgnyoog vim Vajtswv cawm tib neeg tiam sis tsis cawm Ntxwgnyoog. Vajtswv tus moj yam ncaj ncees yeej ib txwm muaj nyob rau ntawd. Kev npau taws, kev ncaj ncees, thiab kev txiav txim yeej ib txwm muaj nyob rau ntawd; tej no tsis muaj nyob rau ntawd thaum Nws ua tej no rau tib neeg xwb. Nov yog Vajtswv tus moj yam uas tab txawm tib neeg los twb pom lawm, thiab lawv tsuas paub hais tias Vajtswv txoj kev ncaj ncees zoo li no tom qab lawv kawm paub lawm xwb. Tseeb tiag lawm, tsis hais Vajtswv qhia txoj kev ncaj ncees, kev muaj hwj chim, los sis kev npau taws, los sis tsis hais Nws ua txhua yam hauj lwm los cawm tib neeg li, tej ntawd puav leej yog vim txoj kev hlub xwb. Ib txhia tib neeg hais tias, “Yog li ntawd Nws coj kev hlub ntau npaum li cas los?” Tsis yog qhov hais tias ntau npaum li cas; Qhov uas Nws coj los ntawd mas yog txoj kev hlub ib puas feem pua. Yog Nws coj tsawg tsawg los xwb, ces yuav cawm tsis tau tib neeg. Vajtswv tau muab tag nrho Nws txoj kev hlub rau tib neeg lawm. Vim li cas Vajtswv thiaj li los ua cev nqaij daim tawv? Twb muaj lus hais tseg ua ntej lawm hais tias Vajtswv tsis txuag dag zog los cawm tib neeg li, thiab qhov Nws los ua cev nqaij daim tawv ntawd vim yog Nws txoj kev hlub xwb. Qhov no qhia rau nej hais tias tib neeg txoj kev ntxeev siab rau Vajtswv mas loj heev, thiab tias tib neeg twb tshaj qhov cawm tau lawm, uas yog vim li ntawd es Vajtswv thiaj li yuav tsum tau los ua cev nqaij daim tawv muab Nws Tus Kheej fij rau tib neeg. Vajtswv tau muab tag nrho Nws txoj kev hlub. Yog Nws tsis hlub tib neeg, Nws yuav tsis los ua cev nqaij daim tawv. Vajtswv tuaj yeem ua xob nthe puag saum ntuj tuaj, nthuav Nws lub hwj chim thiab txoj kev npau taws tawm ncaj qha tuaj, ces tib neeg yuav ntog rau hauv av. Vajtswv tsis tas yuav raug teeb meem, tiv kev txom nyem, los sis raug txoj kev rhuav ntsej muag zoo li no nyob rau hauv lub cev nqaij daim tawv li. Qhov no yog ib qho piv txwv uas pom tseeb heev. Nws yeem raug kev mob siab, kev rhuav tshej muag, kev muab tso tseg, thiab kev tsim txom los cawm tib neeg. Tab txawm nyob rau hauv ib qho chaw uas ua yeeb ncuab zoo li no los, Nws yeej tseem los cawm tib neeg thiab. Qhov no tsis yog txoj kev hlub uas loj tshaj plaws lod? Yog Vajtswv tsuas ncaj ncees xwb thiab Nws ntxub tib neeg tsis muaj hnub kawg li, ces Nws yuav tsis los ua cev nqaij daim tawv los ua Nws tes hauj lwm li. Nws cia li tos kom txog thaum tib neeg qias vuab tsuab heev lawm ces mam li muab lawv rhuav tshem tag nrho kom tag kiag huv si mus xwb. Yog vim Vajtswv hlub tib neeg thiab vim Nws muaj txoj kev hlub tib neeg heev es Nws thiaj li los ua cev nqaij daim tawv los cawm cov tib neeg uas qias vuab tsuab tshaj plaws no. Tom qab raug Vajtswv txoj kev txiav txim thiab kev rau txim thiab kawm paub txog lawv tus yam ntxwv lawm, ntau tus tib neeg hais tias, “Kuv ces tag li no lawm. Kuv yeej yuav tsis dim li.” Tsuas yog thaum koj ntseeg hais tias koj yeej yuav tsis dim li lawm mas koj thiaj li paub hais tias Vajtswv muaj lub siab ntev thiab txoj kev hlub rau tib neeg tiag tiag xwb! Tib neeg yuav ua li cas yog tsis muaj Vajtswv txoj kev hlub? Vajtswv yeej tseem hais lus rau nej tab txawm tib neeg tus yam ntxwv twb qias vuab tsuab heev lawm. Thaum twg nej nug ib lo lus nug mas Nws maj nroos los teb, ntshai tsam tib neeg yuav tsis to taub los sis lawv yuav mus yuam kev los sis mus tshaj dhau lawm. Los ntawm tag nrho tej no nej tseem tsis to taub hais tias Vajtswv txoj kev hlub tib neeg loj npaum li cas thiab lod?

Niaj hnub no ntau tus tib neeg tab tom soj ntsuam hais tias, “Tam sim no Nws tes hauj lwm twb tiav lawm vim li cas tus Vajtswv hauv lub cev nqaij daim tawv ntawd tseem nyob rau hauv lub ntiaj teb? Puas yog tseem muaj dua lwm theem hauj lwm thiab? Vim li cas ho tsis maj nroos mus ua theem hauj lwm tom ntej?” Nyob rau hauv qhov no muaj lub ntsiab. Tom qab tus Vajtswv hauv lub cev nqaij daim tawv hais ntau lo lus lawm, muaj dab tsi tshwm sim rau hauv tib neeg? Tib neeg tsuas tau hnov thiab nco tau Nws cov lus xwb tiam sis tsis to taub txog cov lus ntawd ntau, thiab lawv tsis tau hloov tiag tiag. Tam sim no mas nej yeej tseem tsis tau pom qhov tseeb ntau, yog li ntawd tsis tas nug txog qhov to taub txog qhov muaj tiag li. Qhov Vajtswv los ua cev nqaij daim tawv los ua hauj lwm thiab hais ntau lo lus heev ntawd, nej xav hais tias Nws lub hom phiaj yog dab tsi? Qhov tshwm sim thaum kawg yog dab tsi? Yog tam sim no Nws pib theem hauj lwm tom ntej es cia cov tib neeg no ua li lawv tus kheej lub siab nyiam, ces txog ib nrab ke xwb lawv muab tes hauj lwm ntawd tso tseg lawm. Vajtswv tes hauj lwm hauv lub cev nqaij daim tawv yuav tsum ua kom tiav tag nrho ob theem los cawm tib neeg tiag tiag. Zoo ib yam li nyob rau Tiam Hmoov Hlub, uas Yexus los, thiab siv li peb caug peb lub xyoos thiab ib nrab xyoo txij thaum Nws yug los txog rau thaum Nws raug ntsia rau saum tus ntoo khaub lig thiab nce mus rau saum ntuj ceeb tsheej lawm. Qhov no tsis yog ib lub sij hawm ntev raws li ib tug tib neeg dog dig lub sim neej, tiam sis nws tsis yog ib lub sij hawm luv rau Vajtswv lub sij hawm hauv ntiaj teb thiab! Peb caug peb xyoos thiab ib nrab xyoo mas yog lub sij hawm uas txom nyem siab ntsws heev! Tus Vajtswv hauv lub cev nqaij daim tawv ntawd muaj Vajtswv lub ntsiab tseeb thiab tus moj yam thiab nyob nrog cov tib neeg qias vuab tsuab tau peb caug peb xyoos thiab ib nrab xyoo, mas nws yog ib qho uas txom nyem siab ntsws heev. Txawm tib neeg ua zoo rau Nws thiab tsis zoo los sis txawm Nws muaj ib qho chaw nkaum tshav nkaum nag thiab tsis muaj los xij, tag nrho tej no, tab txawm yog Nws lub cev tsis tau nyiaj txoj kev txom nyem ntawm sab cev nqaij daim tawv ntau los xij, qhov nrog tib neeg nyob ua ke ntawd yog ib qho uas txom nyem siab ntsws heev rau Vajtswv vim Vajtswv thiab tib neeg tsis zoo ib yam! Piv txwv li, yog tib neeg nrog npua nyob tag hnub, mas lawv yuav txom nyem heev tom qab ntawd vim npua thiab tib neeg tsis zoo ib yam. Hom lus uas tib neeg nrog npua tham tau ntawd yog lus dab tsi? Tib neeg nrog npua nyob yam tsis muaj kev txom nyem tau li cas? Tab txawm ib nkawm niam txiv kiag los twb sib ntxub yog nkawv ib leeg tsis haum ib leeg tiag tiag. Vajtswv lub sij hawm peb caug peb xyoos thiab ib nrab xyoo uas ua lub cev nqaij daim tawv nyob rau hauv lub ntiaj teb ntawd mas yog ib qho uas txom nyem siab ntsws heev, thiab tsis muaj leej twg to taub Nws li. Tib neeg haj tseem xav hais tias, “Tus Vajtswv hauv lub cev nqaij daim tawv ntawd tuaj yeem ua tau thiab hais tau yam uas Nws xav ua thiab xav hais, thiab Nws muaj tib neeg coob raws Nws qab. Nws muaj kev txom nyem dab tsi? Nws tsuas yog tsis muaj ib qho chaw nkaum tshav nkaum nag thiab Nws lub cev nqaij daim tawv nyiaj kev mob thiab kev txom nyem me ntsis xwb. Qhov ntawd zoo li tsis mob heev!” Yeej muaj tseeb tias tej kev mob no yog tej yam uas tib neeg tiv taus thiab nyiaj taus, thiab tus Vajtswv hauv lub cev nqaij daim tawv yeej yuav zam tsis dhau tej no. Nws kuj nyiaj taus tej no thiab, thiab tej no tsis yog ib qho kev txom nyem loj rau Nws. Txoj kev txom nyem uas Nws nyiaj ces feem ntau yog nrog tus tib neeg uas qias vuab tshuab tshaj plaws nyob ua ke, nyiaj txoj kev txob thuam, txoj kev saib tsis taus, txoj kev txiav txim, thiab kev rau txim los ntawm txhua hom neeg nrog rau qhov raug cov dab phem muab caum thiab tsis kam txais yuav thiab kev ua yeeb ncuab los ntawm lub ntiaj teb ntawm sab kev lis kev cai ntseeg, kev ua rau muaj kiav txhab rau hauv tus ntsujplig uas tsis muaj leej twg yuav kho tau. Nws yog ib qho uas txom nyem siab ntsws heev. Nws ua siab ntev heev los cawm cov tib neeg uas qias vuab tsuab, txawm Nws muaj kiav txhab los Nws hlub tib neeg, thiab qhov no yog tes hauj lwm uas txom nyem siab ntsws tshaj plaws. Tib neeg txoj kev tawm tsam uas lim hiam, kev thuam thiab kev hais lus phem, txoj kev iab liam cuav, kev tsim txom, thiab lawv txoj kev caum thiab kev tua neeg ntawd ua rau Vajtswv lub cev nqaij daim tawv ua tes hauj lwm no phom sij heev rau Nws Tus Kheej. Leej twg thiaj li to taub Nws thaum Nws raug tej kev mob no, thiab leej twg thiaj li nplij tau Nws lub siab? Tib neeg tsuas kub siab me ntsis xwb, thiab lawv kuj yws los sis ua rau Nws yam tsis quav ntsej thiab tsis mob siab rau li thiab. Nws tsis raug kev txom nyem vim qhov no tau li cas? Nws hnov mob Nws lub siab heev. Ob peb qho kev nplij siab puas tuaj yeem nplij tau qhov kev puas tsuaj uas tib neeg ua rau Vajtswv ntawd? Koj xav hais tias qhov kev noj qab hnav zoo ntawd yog kev zoo siab no lod? Qhov kev xav no mas ruam heev! Tus Tswv Yexus ua Nws tes hauj lwm nyob rau hauv lub ntiaj teb thiab ua neej nyob tau peb caug peb xyoos thiab ib nrab xyoo, Nws tsuas yog dim tom qab Nws raug ntsia rau saum tus ntoo khaub lig, sawv hauv qhov tuag rov qab los, thiab tshwm rau tib neeg pom tau plaub caug hnub, thiab muab Nws txoj kev ua neej nyob nrog tib neeg uas txom nyem siab ntsws ntawd xaus kiag mus lawm xwb. Tiam sis Vajtswv lub siab yeej tseem mob li qub vim txhawj txog qhov kawg ntawm tib neeg. Qhov mob no yeej tsis muaj leej twg to taub los sis nyiaj taus li. Tus Tswv Yexus raug ntsia rau saum tus ntoo Khaub lig los ris tag nrho txhua tus tib neeg tej kev txhaum kom tib neeg thiaj li yuav tau txais txoj kev cawm dim. Nws txhiv tib neeg tawm ntawm Ntxwgnyoog ob txhais tes los ntawm qhov Nws raug ntsia rau saum tus ntoo khaub lig, thiab tom qab Nws ua tau Nws tes dej num ntawm kev txhiv dim tiav tag nrho lawm xwb mas Nws thiaj li muab tau Nws txoj kev ua neej nyob rau hauv lub ntiaj teb no uas txom nyem siab ntsws ntawd xaus mus. Thaum tag nrho Nws tes hauj lwm tiav lawm, Nws yeej tsis ncua ib hnub li. Nws tsuas yog tshwm rau tib neeg pom kom txhua tus thiaj li paub hais tias Vajtswv yeej ua tau tes dej num ntawm kev txhiv tib neeg thiab ua tau Nws txoj kev npaj uas nyob rau hauv lub cev nqaij daim tawv ntawd tiav lawm tiag. Nws yuav tsis ncaim mus yog tseem tshuav ib qho hauj lwm me me ua tsis tau tiav. Nyob rau Tiam Hmoov Hlub ntawd, Yexus hais tas li hais tias, “Kuv lub sij hawm tseem tsis tau los txog.” Qhov Nws lub sij hawm tseem tsis tau los txog ntawd txhais hais tias Nws tes hauj lwm tseem tsis tau txog qhov kawg. Qhov ntawd hais tau hais tias, Vajtswv tes hauj lwm hauv lub cev nqaij daim tawv ntawd tsis yog tsuas yog mus thiab taug kev ib qho chaw mus rau ib qho chaw, hais lus, saib pawg ntseeg lub neej kom meej, thiab hais txhua yam uas yuav tsum tau hais li tib neeg xav hauv nruab siab xwb. Tom qab tus Vajtswv hauv lub cev nqaij daim tawv ua Nws tes hauj lwm tiav thiab hais txhua yam no lawm, Nws tseem yuav tsum tau tos tej uas yuav tshwm sim los thiab tej txiaj ntsim uas yuav tshwm sim los raws li qhov Nws tau hais ntawd lawm thiab saib seb tib neeg yuav zoo li cas tom qab tau txais txoj kev cawm dim lawm. Tsis yog li no lod? Nws puas yuav cia li muab tes hauj lwm no tso tseg tom qab tiv txhua yam kev txom nyem uas nyuaj heev lawm? Nws yuav tsum ua li ntawd mus kom txog thaum kawg, thiab tsuas yog thaum tau txiaj ntsim lawm xwb mas Nws thiaj li yuav kaj siab mus ua kauj ruam hauj lwm tom ntej. Vajtswv tes hauj lwm thiab Nws txoj kev npaj cawm tib neeg yog yam tshwj xeeb uas tsuas yog Nws xwb thiaj li ua tau. Cov tib neeg uas raws Nws qab ntawd thaum kawg dhau los ua cov tib neeg zoo li cas, cov uas dim ntawd thaum kawg dhau los ua cov zoo li cas, muaj pes tsawg leej ua raws li Nws tej kev npaj siab, muaj pes tsawg leej hlub Nws tiag tiag, muaj pes tsawg leej paub Nws tiag tiag, muaj pes tsawg leej muab lawv tus kheej cob rau Nws, thiab muaj pes tsawg leej pe hawm Nws tiag tiag—tag nrho cov lus nug no yuav tsum muaj ib qho txiaj ntsim. Tsis yog hais tias “Thaum Vajtswv tes hauj lwm hauv lub ntiaj teb no tiav lawm, ces Nws tsim nyog xyiv fab rau Nws Tus Kheej. Nws nyob tau ywj siab thiab kaj siab!” li tib neeg xav hauv nruab siab. Yuav tsum paub li no hais tias: Tsis tau nyob ywj siab thiab kaj siab kiag li, txom nyem siab ntsws heev! Ib txhia tib neeg tsis to taub thiab xav hais tias, “Yog Vajtswv twb ua Nws tes hauj lwm hauv lub cev nqaij daim tawv tiav thiab tsis hais lus ntxiv lawm no, qhov ntawd puas yog txhais hais tias Nws tus Ntsujplig tawm mus lawm?” Vim li ntawd, lawv thiaj li pib ua xyem xyav rau Vajtswv. Kuj muaj ib txhia uas hais tias, “Tom qab Vajtswv ua Nws tes hauj lwm uas nyob rau hauv lub cev nqaij daim tawv tiav thiab hais lus tag lawm, Nws yuav tsum tau tos lod?” Nws yuav tsum tau tos. Vajtswv tes hauj lwm uas nyob rau hauv lub cev nqaij daim tawv ntawd muaj ib tug ciaj ciam uas tseem ceeb. Nws tsis zoo li tib neeg xav hauv nruab siab hais tias thaum tes hauj lwm tiav ces tag li ntawd lawm thiab Vajntsujplig Dawb Huv ua xwb ces tau lawm. Nws tsis yog li ntawd. Muaj tej yam uas lub cev nqaij daim tawv yuav tsum tau coj kev thiab daws. Tsis muaj leej twg ua tau tej no li, thiab qhov no kuj yog lub ntsiab ntawm Vajtswv tes hauj lwm uas nyob rau hauv lub cev nqaij daim tawv thiab. Nej puas to taub qhov no? Yav dhau los Kuv tau hais rau ib txhia tib neeg yam npau taws heev hais tias, “Nrog nej ua ke mas nyuaj siab tshaj.” Ib txhia tib neeg teb hais tias, “Yog Koj tsis xav nrog peb ua ke, vim li cas Koj thiaj li nyob ntawm no tos?” Qhov no yog Vajtswv txoj kev hlub tib neeg! Vajtswv puas tuaj yeem nyiaj los txog rau tam sim no yog tsis muaj kev hlub? Qee zaus Nws npau taws thiab hais lus hnyav hnyav, tiam sis Nws tsis txo Nws tes hauj lwm li. Nws tsis plam ib kauj ruam li. Nws yuav tsis tsum txoj kev ua tes hauj lwm uas yuav tsum tau ua kom tiav thiab txoj kev hais cov lus uas yuav tsum tau hais li. Nws ua thiab hais txhua yam uas yuav tsum tau ua thiab hais. Ib txhia tib neeg hais tias, “Vim li cas tam sim no Vajtswv thiaj li hais lus tsawg dua li Nws hais yav tas los lawm?” Vim hais tias cov kauj ruam ntawm tes hauj lwm ntawd twb tiav tag lawm, thiab tsuas tos kauj ruam kawg lawm xwb. Kuv tsuas yog ua tes hauj lwm uas coj kev xwb, thiab Kuv Tus Kheej yuav tsum ua txhua yam li Kuv ua tau. Vim li cas Kuv thiaj li pheej noj tsis qab nyob tsis zoo nyob rau ntu kawg no tas li xwb? Qhov no kuj yog ib qho uas muaj txiaj ntsim heev, koj puas paub. Qhov no yog los ris tib neeg tus mob thiab kev mob qee yam. Tej zaum tus Vajtswv hauv lub cev nqaij daim tawv yuav raug qee tus mob thiab kev mob, tiam sis txhua yam no yog los ib theem zuj zus. Tes hauj lwm uas tsis tas yuav ua kom tiav ntawd raug tej kev mob kev nkeeg ntawm lub cev nqaij daim tawv txwv lawm yog li ntawd thiaj li ua tsis tiav; lub cev nqaij daim tawv yuav tsum raug kev txom nyem me ntsis thaum lub sij hawm los txog. Yog tsis muaj ntau qhov kev txwv, ces Nws yuav xav hais lus rau tib neeg ntxiv thiab pab lawv ntxiv tas li, vim Nws tab tom ua tes dej num ntawm kev cawm dim. Qhov uas tus Vajtswv hauv lub cev nqaij daim tawv tes hauj lwm nthuav tawm thaum pib mus txog thaum xaus ntawd puav leej yog Vajtswv txoj kev hlub xwb. Lub ntsiab tseeb ntawm Nws tes hauj lwm ces yog kev hlub, thiab Nws muab txhua yam thiab tag nrho tej uas Nws muaj rau tib neeg.

Lub caij ntuj no, 1999