Tej Nqe Vajluskub Uas Siv Ua Tej Lus Hais Txog:

“Lawv yog cov thawj coj uas dig muag ntawm cov dig muag. Thiab yog hais tias tus dig muag coj tus dig muag kev, ces nkawv ob leeg yeej yuav poob rau hauv kwj deg xwb” (Mathai 15:14).

“Vim rau qhov cov thawj coj ntawm cov tib neeg no ua rau lawv ua txhaum; thiab cov uas raug cov thawj coj ntawd coj los kuj raug rhuav tshem thiab” (Yaxaya 9:16).

“Kuv cov neeg raug puas tsuaj tag vim yog tsis muaj kev txawj ntse” (Hauxeya 4:6).

Vajtswv Tej Lus Tseem Ceeb:

Nej puas xav paub lub hauv paus keeb cag ntawm qhov uas vim li cas cov Falixais thiaj li tawm tsam Yexus mas? Nej puas xav paub lub ntsiab tseeb ntawm cov Falixais? Lawv ces muaj tej kev xav tsis raws li qhov tseeb puv npo txog tus Mexiyas. Tshaj qhov ntawd, lawv tsuas ntseeg hais tias tus Mexiyas yuav los, tab sis tsis caum txoj sia qhov tseeb. Thiab yog li ntawd, txawm yog niaj hnub no kiag los lawv tseem tos ntsoov tus Mexiyas, vim lawv tsis muaj ib qho kev paub txog txoj kev ntawm lub neej txoj sia li, thiab tsis paub hais tias txoj kev ntawm qhov tseeb yog dab tsi. Yuav ua cas, nej hais nas, es cov neeg ruam, tawv ncauj thiab tsis paub tab li ntawd thiaj yuav tau txais Vajtswv tej koob hmoov mas? Yuav ua cas lawv thiaj yuav pom tus Mexiyas? Lawv tawm tsam Yexus vim lawv tsis paub txoj xub ke ntawm Vajntsujplig tes hauj lwm, vim lawv tsis paub txoj hau kev ntawm qhov tseeb uas Yexus tau hais txog, thiab, tshaj qhov ntawd, vim lawv tsis to taub tus Mexiyas. Thiab vim lawv tsis tau pom dua tus Mexiyas li thiab yeej tsis tau koom tus Mexiyas li, lawv thiaj ua yuam kev rau qhov uas tsuas lam tuav rawv tus Mexiyas lub npe rau thaum uas tab tom siv txhua yam los tawm tsam lub ntsiab tseeb ntawm tus Mexiyas xwb. Cov Falixais nyob rau hauv lub ntsiab tseeb ces tawv ncauj, khav theeb, thiab tsis ua raws li qhov tseeb. Lub hauv paus ntsiab lus ntawm lawv txoj kev ntseeg Vajtswv ces yog: Tsis hais Koj tej kev qhuab qhia yuav tob npaum li cas, tsis hais Koj lub hwj chim yuav siab npaum li cas li, Koj yeej tsis yog Khetos tshwj tsis yog hais tias Koj raug hu ua tus Mexiyas. Txoj kev ntseeg no tseem tsis yog tej yam txawv heev thiab txaus luag heev thiab lod? Cia Kuv nug nej ntxiv tias: Nws tsis yog ib qho yooj yim heev rau nej ua tej qho yuam kev li cov Falixais thaum ub thiab lod, yog hais tias nej twb tsis muaj ib qho kev to taub me me txog Yexus li nas? Koj puas muaj peev xwm pom txoj kev ntawm qhov tseeb? Koj puas yuav lav tau tiag tiag hais tias koj yuav tsis tawm tsam Khetos? Koj puas yuav muaj peev xwm ua raws li tes hauj lwm ntawm Vajntsujplig? Yog koj tsis paub hais tias xyov koj puas yuav tawm tsam Khetos, ces Kuv hais tias koj twb nyob ze ze rau txoj kev tuag lawm. Tag nrho cov uas tsis paub tus Mexiyas ces yeej muaj cuab kav tawm tsam Yexus, tsis lees txais Yexus, hais lus cem Nws. Cov neeg uas tsis to taub Yexus ces yeej muaj cuab kav tsis lees txais Nws thiab cem thuam Nws. Tshaj qhov ntawd, lawv yeej muaj cuab kav pom qhov kev rov qab los ntawm Yexus ua qhov kev dag txog Ntxwgnyoog, thiab muaj neeg coob dua yuav cem Yexus qhov kev rov qab los rau lub cev nqaij daim tawv. Tag nrho tej no tseem tsis ua rau nej ntshai thiab lod? Qhov nej ntsib yuav yog kev saib tsis taus txoj kev ntseeg rau Vajntsujplig, txoj kev rhuav tshem Vajntsujplig tej lus rau tej pawg ntseeg, thiab thuam tsis lees txais tag nrho tej uas Yexus nthuav tawm. Nej yuav tau txais dab tsi los ntawm Yexus yog nej tseem pheej feeb tsis meej? Nej yuav ua cas to taub txog Yexus tes hauj lwm thaum Nws rov qab los rau hauv lub cev nqaij daim tawv nyob saum ib tauv huab dawb, yog hais tias nej tseem pheej tawv qhawv tsis kam lees paub nej tej kev ua yuam kev ntawd? Kuv qhia nej li no tias: Cov tib neeg uas tsis lees txais qhov tseeb, tiam sis ho qi muag nti tos ntsoov qhov Yexus rov qab los saum cov huab dawb los, ces yeej yuav hais lus tuam mom tus Vajntsujplig xwb xwb li, thiab lawv yog pawg uas yuav raug rhuav tshem.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Thaum Lub Sij Hawm Koj Pom Yexus Lub Cev Sab Ntsujplig, Vajtswv Yuav Tsim Lub Ntuj thiab Lub Ntiaj Teb Tshiab Lawm

Saib cov thawj coj ntawm txhua txoj kev ntseeg thiab txhua pab ntseeg—lawv puav leej khav theeb thiab qhuas tias lawv tus kheej coj ncaj, thiab lawv tej kev tshab txhais phau Vajluskub ntawd mas tsis muaj lub ntsiab thiab ua raws li lawv tus kheej tej kev xav phem thiab tej kev xav hauv nruab siab xwb. Lawv puav leej vam khom rau tej kev txawj ntse thiab kev paub los ua lawv tes hauj lwm xwb. Yog lawv qhia tsis tau kiag li no, tib neeg puas yuav caum lawv qab? Qhov tseeb tiag, lawv yeej muaj qee yam kev paub thiab muaj peev xwm qhia qee yam lus qhuab qhia, los sis lawv paub tias yuav ua li cas thiaj li kov yeej lwm tus neeg, thiab siv qee lub tswv yim dag. Lawv siv tej no los ntxias dag tib neeg thiab coj tib neeg los rau ntawm lawv tus kheej xub ntiag. Feem ntau mas, cov neeg ntawd ntseeg Vajtswv, tab sis qhov tseeb tiag, lawv caum cov thawj coj no qab xwb. Thaum lawv ntsib ib tug uas qhia txoj kev tseeb, lawv ib txhia hais tias, “Peb yuav tsum tau sab laj rau peb tus thawj coj txog txoj kev ntseeg ntawd.” Saib seb tib neeg puas tim tsum tau kev pom zoo thiab kev tso cai los ntawm lwm tus thaum hais txog txoj kev ntseeg Vajtswv thiab lees txais txoj kev tseeb—qhov no tsis yog ib qho teeb meem lod? Yog li ces cov thawj coj ntawd yuav rais los ua neeg zoo li cas? Lawv yuav tsis rais los ua cov Falixais, cov yug yaj cuav, cov tawm tsam khetos, thiab cov dawm tib neeg txoj kev lees txais txoj kev tseeb lod? Cov tib neeg zoo li no ces zoo tib yam nkaus li Povlauj ntag. … Nyob rau yav dhau los, Vajtswv coj tsis nruj rau tib neeg, txawm lawv txoj kev ntseeg Nws ntawd yeej yog tseeb los sis yog cuav, txawm lawv raws lwm tus qab, los sis tsis caum qhov tseeb los xij li, vim Nws twb txiav txim siab ua ntej lawm tias, nyob rau theem kawg, tag nrho cov uas Nws tau npaj tseg ua ntej thiab cov uas Nws xaiv tseg lawm ntawd yuav tsum los rau ntawm Nws xub ntiag es los lees txais Nws txoj kev txiav txim. Yog hais tias, tom qab lees txais Vajtswv tes hauj lwm ntawm tiam kawg lawm, tib neeg tseem pheej pe hawm thiab caum lwm tus qab, yog lawv tsis caum qhov tseeb tab sis tseem caum tej koob hmoov thiab lub kaus mom vaj ntxwv xwb, ces qhov no yeej zam txim tsis tau kiag li. Cov tib neeg zoo li no yuav xaus mus zoo ib yam li Povlauj ntag.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb

Qee tus neeg tsis zoo siab rau qhov tseeb, haj yam tsis zoo siab rau kev txiav txim. Dua ntawd, lawv zoo siab rau lub hwj chim thiab kev nplua nuj; cov neeg no raug hu ua cov neeg nrhiav lub hwj chim. Lawv tsuas tshawb nrhiav cov kev ntseeg dab qhuas nyob hauv lub ntiaj teb no uas muaj hwj chim, thiab lawv tsuas tshawb rau cov xib fwb thiab cov qhuab qhia uas tuaj ntawm tej tsev kawm kev cob qhia tuaj xwb. Txawm hais tias lawv tau lees txais txoj hau kev ntawm qhov tseeb los, lawv tsuas yog tus neeg uas ntseeg-ib nrab xwb; lawv tsis muaj peev xwm muab tag nrho lawv lub siab thiab txoj kev xav, lawv lub qhov ncauj hais tej lus txog qhov siv lawv tus kheej rau Vajtswv, tab sis lawv lub qhov muag tsom mus rau cov xib fwb thiab cov thawj qhuab qhia xwb, thiab lawv tsis saib rau Khetos ib muag li. Lawv lub siab yog tsi ntsees rau lub koob meej, kev muaj hmoo, thiab yeeb koob. Lawv yeej tsis ntseeg li hais tias tus neeg me me zoo li no yuav muaj peev xwm kov yeej ntau tus neeg, thiab tus neeg dog dig zoo li no yuav muaj peev xwm ua rau tib neeg zoo tiav log tau. Lawv yeej tsis ntseeg li hais tias cov neeg dog dig hauv cov hmoov av thiab cov plua tshauv no yog cov neeg uas Vajtswv tau xaiv tseg. Lawv ntseeg tias yog cov neeg zoo li no yog cov hom phiaj ntawm Vajtswv txoj kev cawm dim, ces lub ntuj thiab daim av no yuav tig ntxeev tiaj, thiab txhua tus neeg yuav luag lawv tus kheej li yog tso dag. Lawv ntseeg hais tias yog Vajtswv xaiv kho tej neeg dog dig zoo li ntawd kom zoo tiav log, ces cov neeg tseem ceeb kuj yuav yog Vajtswv Tus Kheej kiag lawm. Lawv tej kev xav tau raug tsuas nrog txoj kev tsis ntseeg lawm; ntau tshaj qhov tsis ntseeg, lawv tsuas yog cov tsiaj uas phem heev xwb. Rau qhov lawv tsuas saib txoj kev muaj koob npe, meej mom, thiab muaj hwj chim tseem ceeb xwb, thiab lawv tsuas hwm pab neeg coob thiab cov ntseeg dab qhuas xwb. Lawv tsis muaj qhov saib me me rau cov uas Khetos coj li; lawv tsuas yog cov niag neeg rov taw tuam ntuj uas tau tig nraub qaum rau Khetos, rau qhov tseeb, thiab rau txoj sia xwb.

Qhov uas koj qhuas tsis yog Khetos txoj kev txo hwj chim, tab sis yog cov neeg yug yaj cuav uas sawv zoo nkauj txoj xwb. Koj tsis tau txais txoj kev ntxim hlub los yog lub tswv yim ntawm Khetos, tab sis tau los ntawm cov nyiam ywj pheej uas qaug quav txoj kev txaus siab nrog tej kev phem kev qias hauv lub ntiaj teb no. Koj xav luag rau qhov uas Khetos txom nyem tsis muaj chaw yuav tso Nws lub taub hau, tab sis koj qhuas cov cev tuag uas nrhiav tej khoom uas muab fij thiab ua lub neej nyob nrog txoj kev quav cawv. Koj tsis txaus siab hlo raug kev txom nyem ua ke nrog Khetos, tab sis koj zoo siab muab koj tus kheej koom nrog cov neeg tawm tsam khetos, txawm tias lawv pub tsuas yog rau sab nqaij tawv, lo lus, thiab kev tswj hwm rau koj xwb los xij. Txawm tam sim no kiag los, koj lub siab tseem tig mus rau lawv, mus rau lawv lub koob npe, mus rau lawv lub meej mom, mus rau lawv lub hwj chim. Thiab koj tseem muaj tus cwj pwm uas pom tias Khetos tes hauj lwm mas ua nyuaj heev thiab tsis kam lees txais tes hauj lwm ntawd li. Vim li no Kuv thiaj hais tias koj tsis muaj kev ntseeg kom paub txog Khetos. Lub ntsiab uas koj tau caum raws Nws los txog hnub no tsuas yog vim hais tias koj tsis muaj lwm txoj kev xaiv lawm xwb. Cov duab uas tsim nuj yuav nyob hauv koj lub siab mus ib txhis; koj tsis tuaj yeem hnov qab lawv txhua lo lus thiab tes hauj lwm, los sis lawv cov lus haub ntxias thiab sab tes. Lawv yog cov zoo tshaj plaws thiab yog cov uas siab tawv nyob hauv nej lub siab mus ib txhis. Tiam sis qhov no tsis zoo li ntawd rau Khetos nyob rau niaj hnub no. Nws tsis tseem ceeb hauv koj lub siab mus ib txhis, thiab tsis tsim nyog tau txais txoj kev ntshai mus ib txhis li. Vim Nws yog neeg dog dig dhau, muaj hwj chim tsawg dhau, thiab tsis muaj koob meej dab tsi li.

Nyob rau hauv kis no, Kuv hais tias txhua tus neeg uas tsis saib qhov tseeb muaj nqis yog cov neeg tsis ntseeg Vajtswv thiab cov rov taw tuam ntuj rau qhov tseeb. Cov tib neeg zoo li no yeej tsis tau txais kev pom zoo los ntawm Khetos. Tam sim no koj puas tau paub tias muaj kev tsis ntseeg ntau npaum li cas nyob hauv koj, thiab koj tau tawm tsam Khetos ntau npaum li cas? Kuv ntuas koj li no: Vim tias koj tau xaiv taug txoj kev rau qhov tseeb, ces koj yuav tsum muab koj tus kheej lub siab kom tag nrho; tsis txhob ua xyem xyav los sis ntseeg ib nrab xwb. Koj yuav tsum nkag siab tias Vajtswv tsis yog ntiaj teb thiab ib tug tib neeg twg tus, tab sis yog rau txhua tus neeg uas ntseeg Nws, txhua tus uas pe hawm Nws, thiab txhua tus uas mob siab thiab rau siab ntseeg Nws tus.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Koj Puas Yog ib Tug Ntseeg Vajtswv Tiag?

Ib qho kev dag ntxias me me xwb ua rau cov neeg uas tsis muaj kev thoob tsib to nrog raug kev puas ntsoog los ntawm cov neeg phem txhais tes, lawv yuav raug cov neeg phem coj mus yuam kev, tsis rov qab los li lawm. Thiab lawv tsim nyog tau txais tej yam zoo li no, vim tias lawv tsis nyiam qhov tseeb, vim tias lawv tsis muaj peev xwm tuaj qhov tseeb tog, vim tias lawv caum raws cov tib neeg phem qab thiab tuaj cov tib neeg phem tog, thiab vim tias lawv koom siab nrog cov neeg phem tawm tsam Vajtswv. Lawv paub zoo heev tias yam uas cov tib neeg phem no ua tawm yog kev phem xwb, txawm li ntawd los lawv tseem ua rau lawv lub siab tawv thiab tig nraub qaum rau qhov tseeb mus caum raws lawv qab. Tsis yog tias cov tib neeg uas tsis xyaum ua raws li qhov tseeb tiam sis tsim kev puas ntsoog thiab kev ntxub ntxaug puav leej ua kev phem lov? Txawm hais tias muaj qee leej hauv lawv coj lawv tus kheej li vaj ntxwv thiab cov uas caum raws lawv qab, tsis yog tias lawv tus yeeb yam tawm tsam-Vajtswv puav leej zoo ib yam lov? Lawv yuav muab dab tsi coj los hais tias Vajtswv tsis cawm lawv? Lawv yuav muab dab tsi coj los hais tias Vajtswv tsis ncaj ncees? Nws tsis yog tias lawv tus kheej txoj kev phem tab tom rhuav tshem lawv lov? Nws tsis yog tias lawv tus kheej txoj kev ntxeev siab tab tom cab lawv mus rau ntuj tawg lov? Cov tib neeg uas xyaum ua raws li qhov tseeb, thaum kawg, yuav raug cawm dim thiab yuav raug ua zoo tiav log vim qhov tseeb. Cov tib neeg uas tsis xyaum ua raws li qhov tseeb, thaum kawg, yuav coj kev puas ntsoog los rau lawv tus kheej los vim qhov tseeb. Cov no yog qhov kawg uas tos ntsoov cov neeg uas xyaum ua raws li qhov tseeb thiab cov tsis ua.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Kev Ceeb Toom rau Cov Neeg Uas Tsis Xyaum Ua Raws Li Qhov Tseeb

Nws yuav yog ib qho zoo heev rau cov tib neeg uas hais tias lawv caum raws Vajtswv qab los qhib lawv ob lub qhov muag thiab los saib zoo zoo kom pom meej tias leej twg yog tus lawv ntseeg tiag: Nws puas yog Vajtswv tiag tiag uas koj ntseeg, los sis Ntxwgnyoog? Yog tias koj paub tias yam uas koj ntseeg tsis yog Vajtswv, tiam sis yog koj tus kheej cov mlom xwb, ces nws yuav zoo tshaj yog tias koj tsis txhob lees ua ib tug ntseeg thaum xub thawj. Yog tias koj yeej tsis paub tus uas koj ntseeg tiag tiag li, ces, ib zaug ntxiv, nws yuav zoo tshaj yog tias koj tsis txhob lees ua ib tug ntseeg thaum xub thawj. Hais li no yog kev txob thuam! Tsis muaj leej twg tab tom quab yuam koj los ntseeg Vajtswv. Tsis txhob hais tias nej ntseeg Kuv; Kuv tau txais cov hais lus li no txaus heev lawm, thiab tsis xav kom rov qab hnov dua ntxiv, vim tias yam uas nej ntseeg yog cov mlom uas nyob hauv nej lub siab thiab cov kev sib thab plaub uas nyob hauv nej xwb. Cov neeg uas co lawv lub taub hau thaum lawv hnov qhov tseeb, hos luag ntxhi thaum lawv hnov tham txog kev tuag, puav leej yog Ntxwgnyoog cov qe, thiab lawv yog cov uas yuav raug tshem tawm mus. Muaj coob leej hauv pawg ntseeg tsis muaj kev thoob tsib to nrog txog. Thaum muaj tej yam kev dag ntxias tshwm sim, lawv cia li tuaj Ntxwgnyoog tog; lawv haj tseem ua txhaum thaum lawv raug hu ua Ntxwgnyoog cov tub txib thiab. Txawm hais tias tib neeg yuav hais tias lawv tsis muaj kev thoob tsib to nrog los, lawv tas zog tuaj sab tsis muaj qhov tseeb tog xwb, lawv yeej tsis txeev tuaj qhov tseeb tog thaum lub sij hawm tseem ceeb li, lawv yeej ib txwm tsis sawv los thiab sib cav rau qhov tseeb li. Lawv puas yog tu ncua kev thoob tsib to nrog tiag tiag? Vim li cas lawv thiaj li yuav tuaj Ntxwgnyoog tog yam yooj yim uas luaj li? Vim li cas lawv thiaj li tsis hais ib lo lus uas ncaj ncees thiaj ntxim muaj qab hau los pab txhawb qhov tseeb li? Puas yog qhov xwm txheej no tau sawv tshwm sim los raws li qhov txiaj ntsig ntawm lawv txoj kev tsis meej pem tam sim no? Tib neeg yim huab tsis muaj kev thoob tsib to nrog, ces tib neeg yim huab tsis muaj peev xwm tuaj qhov tseeb tog. Qhov no qhia tau li cas? Nws tsis qhia tias cov tib neeg uas tsis muaj kev thoob tsib to nrog nyiam kev phem no lov? Nws tsis qhia tias lawv yog Ntxwgnyoog cov qe uas ncaj ncees rau nws no lov? Vim li cas lawv thiaj li muaj peev xwm tuaj Ntxwgnyoog tog thiab hais nws lus? Lawv txhua txhua lo lus thiab dej num, txoj kev nthuav tawm ntawm lawv lub ntsej muag, txhua yam ua tau pov thawj txaus lawm tias lawv tsis yog cov neeg uas nyiam qhov tseeb; tiam sis, lawv yog cov neeg uas ntxub qhov tseeb. Lawv tuaj yeem tuaj Ntxwgnyoog tog xwb twb ua pov thawj txaus lawm tias Ntxwgnyoog hlub cov me nyuam dab uas siv lawv txoj sia los tawm tsam rau Ntxwgnyoog no heev. Tag nrho cov kev tseeb no tseem tsis meej thiab lov? Yog tias koj yog tus neeg uas nyiam qhov tseeb tiag, vim li cas koj ho tsis fwm cov neeg uas ua raws li qhov tseeb, thiab vim li cas koj thiaj li ua raws li cov neeg uas tsis ua raws qhov tseeb tam sim ntawd thaum koj saib lawv tib muag xwb? Qhov teeb meem no yog dab tsi? Kuv tsis quav ntsej hais tias txawm koj muaj kev thoob tsib to nrog los tsis muaj. Kuv tsis quav ntsej hais tias koj tau them ib tug nqi kim npaum li cas. Kuv tsis quav ntsej hais tias koj lub zog loj npaum li cas, thiab Kuv tsis quav ntsej hais tias txawm koj yuav yog tus neeg uas sib thab plaub hauv pawg ntseeg los sis tus thawj coj uas nqa-tus chij. Yog tias koj lub zog loj, ces qhov no tsuas yog kev pab los ntawm Ntxwgnyoog lub zog xwb. Yog tias koj lub suab npe nrov heev, ces ntawd tsuas yog vim tias muaj neeg coob coob nyob puag ncig koj uas tsis xyaum ua raws li qhov tseeb. Yog tias koj tseem tsis tau raug rho tawm, ces vim yog tias tam sim no tsis tau yog lub sij hawn rho tawm xwb; tiam sis, nws yog lub sij hawm tshem tawm. Tsis tas yuav maj muab koj rho tawm tam sim no. Kuv tab tom nyob tos hnub uas Kuv yuav rau txim rau koj tom qab uas koj raug tshem tawm mus lawm. Txhua tus neeg uas tsis xyaum ua raws li qhov tseeb yuav raug tshem tawm mus!

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Kev Ceeb Toom rau Cov Neeg Uas Tsis Xyaum Ua Raws Li Qhov Tseeb

Txawm cov ntseeg Vajtswv yuav coob npaum li cas los xij, thaum Vajtswv suav hais tias lawv txoj kev ntseeg yog ib pab ntseeg los sis ib pab pawg lawm, ces Vajtswv kuj suav hais tias lawv yog cov uas cawm tsis tau lawm thiab. Vim li cas kuv thiaj li hais li no? Ib pab pawg uas tsis muaj Vajtswv tes hauj lwm los sis txoj kev coj qhia uas tsis zwm rau Nws los sis tsis pe hawm Nws kiag li ntawd tej zaum tsuas lam ntseeg Vajtswv xwb, tiam sis cov uas lawv raws qab thiab mloog lus yog cov pov thawj thiab cov txwj laug ntawm txoj kab lis kev cai ntseeg xwb, thiab cov pov thawj thiab cov txwj laug ntawm txoj kab lis kev cai ntseeg ntawd yog cov uas muaj lub ntsiab phem thiab ntsej muag ncaj siab nkhaus ntag. Yog li ntawd, yam uas cov tib neeg ntawd raws qab thiab mloog lus ntawd yog cov Ntxwgnyoog thiab cov dab phem xwb. Nyob rau hauv lawv lub siab mas, lawv xyaum ua raws li txoj kev ntseeg Vajtswv, tiam sis tseeb tiag, lawv raug tib neeg tswj, raug tib neeg coj qhia thiab kav xwb. Yog li ntawd, nyob rau hauv cov ntsiab lus tseem ceeb mas, yam uas lawv raws qab thiab mloog lus ntawd yog Ntxwgnyoog, thiab cov dab phem, thiab cov hwj chim phem uas tawm tsam Vajtswv, thiab Vajtswv cov yeeb ncuab ntag. Vajtswv puas yuav cawm ib pab neeg tsis zoo zoo li no? (Tsis cawm.) Vim li cas thiaj li tsis cawm? Cov tib neeg zoo li no puas muaj peev xwm lees txim hloov dua siab tshiab? Tsis muaj; lawv yuav tsis lees txim hloov dua siab tshiab li. Lawv raus tes rau hauv tib neeg tej kev ua hauj lwm thiab tib neeg tej kev ua lag luam uas nyob hauv lub npe ntseeg Vajtswv, tawm tsam Vajtswv txoj kev npaj cawm tib neeg, uas thaum kawg Vajtswv yuav ntxub ntxaug lawv. Yuav tsis muaj hnub uas Vajtswv yuav cawm cov tib neeg no li; lawv tsis muaj peev xwm lees txim hloov dua siab tshiab, thiab thaum Ntxwgnyoog coj lawv mus lawm, Vajtswv muab lawv cob rau nws. Qhov seb tib neeg txoj kev ntseeg Vajtswv puas yuav ua tau raws li Nws txoj kev pom zoo ntawd puas yog nyob ntawm qhov tus tib neeg ntawd ntseeg tau ntev xyoo los tsis ntev? Qhov ntawd puas yog nyob ntawm tej kev cai dab qhuas uas tib neeg coj los sis tej kev cai tswj uas tib neeg tuav rawv ntawd? Vajtswv puas saib rau tej uas tib neeg ua? Nws puas saib tias lawv coob npaum li cas? (Tsis saib.) Yog li, Nws saib rau dab tsi xwb? Thaum Vajtswv xaiv tau ib pab tib neeg lawm, qhov Nws ntsuas seb puas cawm tau lawv, seb Nws puas yuav cawm lawv ntawd yog ntsuas raws li dab tsi? Qhov ntawd yog ntsuas raws li qhov seb lawv puas tuaj yeem lees txais qhov tseeb; qhov ntawd yog ntsuas raws li txoj kev uas lawv taug. … Txawm koj twb hnov tej lus qhuab qhia pes tsawg zaj los sis koj twb to taub qhov tseeb ntau npaum li cas lawm los tsis tseem ceeb—yog thaum kawg es koj tseem raws tib neeg qab, yog koj tseem raws Ntxwgnyoog qab, thiab koj tsis muaj peev xwm taug Vajtswv txoj kev, thiab tsis hwm Nws thiab zam kev phem, ces cov tib neeg zoo li no yog cov uas Vajtswv ntxub ntxaug. Cov tib neeg uas nyob rau hauv txoj kab lis kev cai ntseeg no mas tej zaum yuav muaj peev xwm mus tshaj tawm txoj kev paub txog Vajluskub ntau heev, thiab tej zaum lawv yuav to taub qee qhov kev qhuab qhia ntawm sab ntsujplig thiab, tiam sis lawv ua tsis tau raws li Vajtswv tes hauj lwm, los sis xyaum ua tsis tau thiab tsis paub Nws cov lus, los sis pe hawm Nws tiag tiag, thiab lawv yeej tsis hwm Nws thiab zam kev phem li. Lawv txhua tus yog cov ntsej muag ncaj siab nkhaus, tsis yog cov tib neeg uas zwm rau Vajtswv tiag tiag. Raws li Vajtswv pom mas, cov tib neeg zoo li no suav hais tias yog ib pab ntseeg cov, yog ib pab tib neeg cov, yog ib pab neeg tsis zoo cov, yog Ntxwgnyoog qhov chaw nyob xwb. Muab hais kom tag lus ces, lawv yog Ntxwgnyoog pab neeg tsis zoo, yog cov tawm tsam khetos lub nceeg vaj xwb, ces Vajtswv thiaj li ntxub ntxaug lawv tag nrho.

—Txoj Lus, Phau 3. Tej Kev Sib Tham ntawm Khetos ntawm Tiam Kawg. Tsuas Yog Hwm Vajtswv Xwb Mas Tib Neeg Thiaj Li Yuav Taug Tau Txoj Kev Mus Tau Kev Cawm Dim

Cov ua tsis txais yuav Vajtswv tes hauj lwm tshiab ces yuav plam tsis tau nyob ntawm Vajtswv xub ntiag, thiab, tshaj qhov ntawd, tsis tau Vajtswv tej koob hmoov thiab kev tiv thaiv. Feem ntau ntawm lawv tej lus thiab tej kev ua ces tsuas yog tuav rawv rau tej uas Vajntsujplig Dawb Huv tes hauj lwm yav tag los kom lawv ua xwb; tej ntawd yog kev qhuab qhia xwb, tsis yog qhov tseeb. Tej kev qhuab qhia thiab kev cai ntawd tsuas txaus coj los ua pov thawj qhia hais tias tej kev sib sau ua ke ntawm cov neeg no tsis yog dab tsi tab sis tsuas yog kev ntseeg xwb; lawv tsis yog cov xaiv tseg, los sis yog tej daim phiaj ntawm Vajtswv tes hauj lwm. Qhov kev koom txoos ntawm tag nrho lawv ntawd ces tsuas ua tau ib qho kev sib sau loj ntawm kev ntseeg xwb, thiab hu tsis tau ua ib pawg ntseeg. Qhov no yog ib qho tseeb uas hloov tsis tau. Lawv tsis muaj Vajntsujplig Dawb Huv tes hauj lwm tshiab; tej lawv ua mas zoo li tsw qab rau txoj kev ntseeg, tej lawv khaws los ua neej mas zoo li muaj txhij txhua kawg rau kev ntseeg; lawv tsis muaj tus Vajntsujplig Dawb Huv nrog lawv nyob thiab tsis muaj Nws tes hauj lwm, tsis tas hais txog qhov uas lawv yuav tsim nyog tau txais tej lus qhuab ntuas los sis kev tig ras to taub los ntawm Vajntsujplig Dawb Huv li. Cov neeg no tsuas yog tej cev tuag uas tsis muaj sia xwb, thiab yog tej niag kas uas tsis muaj ntsujplig xwb. Lawv tsis paub txog tib neeg tej kev ntxeev siab thiab kev tawm tsam, tsis paub txog tag nrho tib neeg tej kev ua phem, lawv haj yam tsis paub txog Vajtswv tes hauj lwm thiab Vajtswv lub siab nyiam tam sim no. Lawv sawv daws mas tsis paub li, yog neeg dog dig, thiab yog cov niag kua av qias neeg uas tsis tsim nyog hu ua cov ntseeg! Tsis muaj ib yam dab tsi lawv ua es yuav tseem ceeb rau Vajtswv qhov kev cawm tib neeg li, haj yam tsis muaj cuab kav yuav rhuav tau Vajtswv tej kev npaj li. Lawv tej lus thiab tej kev ua mas qias neeg heev, rhuav plhu dhau heev lawm, thiab yeej tsis tsim nyog hais txog li. Tsis muaj ib yam dab tsi uas cov tsis yoog raws Vajntsujplig Dawb Huv no ua es yuav muaj ib yam dab tsi cuam tshuam rau hauv Vajntsujplig Dawb Huv tes hauj lwm tshiab li. Yog vim li no, tsis hais lawv ua dab tsi li, lawv yeej tsis muaj tej lus qhuab ntuas ntawm Vajntsujplig Dawb Huv, thiab, tshaj qhov ntawd, tsis tau qhov kev tig ras to taub los ntawm Vajntsujplig Dawb Huv li. Vim lawv sawv daws yog cov neeg uas tsis nyiam qhov tseeb li, thiab yog cov uas Vajntsujplig Dawb Huv ntxub thiab tsis kam txais yuav. Lawv hu ua cov neeg ua phem vim lawv tsuas ua neej raws li lawv lub cev ntshaw xwb thiab ua txhua yam uas lawv nyiam rau Vajtswv ntsia ntsoov. Thaum uas Vajtswv ua hauj lwm, lawv txhob txwm ua siab phem rau Nws, thiab khiav mus rau qhov uas Nws tsis nyob xwb. Tib neeg qhov kev tsis koom tes nrog Vajtswv ces yeej yog qhov kev ntxeev siab loj tshaj plaws li lawm, ces puas tsim nyog cov neeg uas txhob txwm khiav mus rau qhov uas tsis yog Vajtswv sab ntawd tau txais lawv tej kev raug txim kom tsim nyog thiab mas?

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Tes Hauj Lwm thiab Tib Neeg Qhov Kev Xyaum Ua

Cov uas xav tau txoj sia yam tsis vam khom qhov tseeb uas Khetos hais ces yog cov neeg uas txaus luag tshaj plaws hauv lub ntiaj teb no, thiab cov uas tsis lees txais txoj kev muaj sia nyob uas Khetos muab rau ces yog cov poob zoo rau hauv kev xav lawm xwb. Thiab yog li ces Kuv thiaj hais tias cov uas tsis txais yuav Khetos ntawm tiam kawg ces yuav raug Vajtswv tsis nyiam kiag li mus ib txhis. Khetos yog tib neeg lub rooj vag nkag mus rau hauv lub nceeg vaj nyob rau tiam kawg, thiab tsis muaj ib tug twg uas yuav hla dhau Nws tau li. Tsis muaj leej twg yuav raug Vajtswv muab kho kom zoo tiav log tau li tshwj tsis yog los ntawm Khetos. Koj ntseeg Vajtswv, ces yog li koj yuav tsum txais yuav Nws cov lus thiab ua raws li Nws Txoj Lus. Tsis txhob tsuas xav txog qhov kom tau txais koob hmoov nkaus xwb es twb tsis muaj peev xwm lees txais qhov tseeb thiab qhov kev muab txoj sia. Khetos los rau tiam kawg kom Nws muab txoj sia rau txhua tus uas muaj lub siab dawb paug ntseeg Nws. Qhov muaj tes hauj lwm no yog yuav muab tiam qub xaus thiab nkag mus rau tiam tshiab, thiab tes hauj lwm no yog txoj kev uas cov yuav nkag mus rau tiam tshiab yuav tsum tau taug. Yog koj tsis lees paub Khetos thiab tseem teem txim rau, hais lus thuam, los sis tsim txom Nws, ces koj yuav raug hlawv mus ib txhis thiab yuav tsis tau nkag mus rau Vajtswv lub nceeg vaj. Vim li no tus Khetos no mas Nws Tus Kheej ces yog kiag qhov kev qhia tawm txog tus Vajntsujplig, qhov kev qhia tawm txog Vajtswv, Tus uas Vajtswv tso siab rau los ua Nws tes hauj lwm hauv ntiaj teb, yog li Kuv thiaj hais tias yog koj tsis muaj peev xwm txais yuav tag nrho tej uas tus Khetos ntawm tiam kawg ua ntawd, ces yog koj hais lus tuam mom tus Vajntsujplig. Qhov kev ua pauj rau cov uas hais lus tuam mom tus Vajntsujplig ntawd yog yam uas yog thiab pom tseeb rau txhua tus huv si. Kuv kuj qhia koj li no hais tias: Yog koj tawm tsam tus Khetos ntawm tiam kawg ntawd, yog koj tsis kam lees yuav tus Khetos ntawm tiam kawg, ces yuav tsis muaj leej twg muaj cuab kav los ris koj lub txim rau qhov no li. Dhau ntawd mus, txij theem ntawd no mus lawm tom ntej ces koj yuav tsis muaj ib lub cib fim ntxiv kom tau txais Vajtswv qhov kev pom zoo lawm; txawm hais tias koj xav los theej txhoj rau koj tus kheej los xij, koj yuav tsis muaj peev xwm pom Vajtswv lub ntsej muag dua ntxiv lawm. Qhov no vim qhov koj tab tom tawm tsam ntawd tsis yog ib tug tib neeg, qhov koj tab tom tsis kam txais yuav ntawd tsis yog ib tug neeg uas tsis tseem ceeb, tab sis yog Khetos. Koj puas paub hais tias lub txim ntawm qhov no yog dab tsi? Koj tsis yog ua yuam kev ib qho me me xwb, tab sis ua txhaum ib lub txim loj kawg nkaus. Yog li ntawd Kuv hais qhia txhua tus neeg kom txhob lam zim nej cov kaus hniav thiab txhob lam yoj nej cov kaus tes kaus taw, los sis lam tau lam cem rau qhov tseeb, vim tsuas yog qhov tseeb xwb mas thiaj muab tau txoj sia rau koj, thiab yeej tsis muaj dab tsi hlo li tsuas yog qhov tseeb nkaus xwb thiaj li yuav ua rau koj rov yug dua tshiab thiab pom Vajtswv lub ntsej muag dua ib zaug ntxiv.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Khetos ntawm Tiam Kawg Nkaus Xwb Mas Thiaj Yuav Muab Tau Txoj Kev ntawm Txoj Sia Ntev Dhawv Mus Ib Txhis Rau Tib Neeg