3. Ib txhia tib neeg tau lees paub hais tias Vajtswv Tus Uas Muaj Hwj Chim Loj Kawg Nkaus yog qhov tus Tswv Yexus rov qab los, tiam sis vim yog lawv ntshai tsam raug ntes thiab raug tsim tsom los ntawm Tsoom Fwv Koom Tsham Suav thiab raug cov xib fwb thiab cov txwj laug ntawm tej zej zog ntawm sab kev lig kev cai ntseeg hem, es lawv thiaj li tsis muaj cuab kav lees txais yuav txoj kev tseeb. Qhov kawg ntawm cov tib neeg zoo li no yuav zoo li cas?
Tej Nqe Vajluskub Uas Siv Ua Tej Lus Hais Txog:
“Tiam sis tus uas ntshai, thiab tsis ntseeg, qias vuab tsuab, thiab cov neeg tua neeg, thiab cov neeg ua nkauj ua nraug, thiab cov neeg ua khawv koob, thiab cov neeg pe hawm mlom, thiab txhua tus neeg dag, yuav muaj feem nyob rau hauv lub pas uas muaj hluav taws kub thiab leej faj: uas yog txoj kev tuag zaum ob” (Qhia Tshwm 21:8).
“Rau qhov leej twg los xij uas yuav cawm nws txoj sia ces yuav plam txoj sia: thiab leej twg los xij uas yuav plam nws txoj sia rau Kuv ces yuav nrhiav tau txoj sia” (Mathai 16:25).
“Yog li ntawd tus uas lees yuav Kuv rau ntawm tib neeg lub xub ntiag, ces Kuv los kuj yuav lees yuav tus ntawd rau ntawm Kuv Leej Txiv uas nyob saum ntuj ceeb tsheej lub xub ntiag thiab. Tiam sis tus uas tsis lees yuav Kuv rau ntawm tib neeg lub xub ntiag, ces Kuv los kuj yuav tsis lees yuav tus ntawd rau ntawm Kuv Leej Txiv uas nyob saum ntuj ceeb tsheej lub xub ntiag thiab” (Mathai 10:32–33).
“Thiab tus uas tsis kwv nws tus ntoo khaub lig, thiab raws Kuv qab los, ces ua tsis tau Kuv tus thwj tim” (Luka 14:27).
Vajtswv Tej Lus Tseem Ceeb:
Nej tsis paub xyov Vajtswv yog dab tsi, nej tsis paub xyov Khetos yog dab tsi, nej tsis paub xyov yuav hwm Yehauvas li cas, nej tsis paub yuav to taub tes hauj lwm ntawm Vajntsujplig li cas, thiab nej tsis paub yuav qhia qhov sib txawv ntawm tes hauj lwm ntawm Vajtswv Tus Kheej kiag thiab tib neeg txoj kev dag li cas. Nej tsuas paub cem txhua lo lus ntawm qhov tseeb uas Vajtswv hais tawm uas tsis yoog raws li nej tus kheej txoj kev xav nkaus xwb. Koj txoj kev txo hwj chim nyob qhov twg? Koj txoj kev zwm nyob qhov twg? Koj txoj kev ua siab ncaj nyob qhov twg? Koj tus cwj pwm uas nrhiav qhov tseeb nyob qhov twg? Koj lub siab hwm Vajtswv nyob qhov twg? Kuv qhia rau nej, cov uas ntseeg Vajtswv vim tej txuj ci tseem ceeb xwb ces yeej yog pawg uas yuav raug rhuav tshem tiag tiag li. Cov uas tsis muaj cuab kav lees txais Yexus cov lus uas tau rov los rau lub cev nqaij daim tawv lawm ces yog caj ces ntawm dab teb, cov xeeb leej xeeb ntxwv ntawm tus thawj tub txib, pawg uas yuav raug muab rhuav tshem mus ib txhis. Tej zaum ntau tus tib neeg yuav tsis quav ntsej txog yam uas Kuv hais, tiam sis Kuv tseem xav qhia rau txhua tus uas hu ua cov neeg dawb huv uas raws Yexus qab hais tias, thaum nej ob lub qhov muag pom kiag Yexus nqis saum ntuj los rau saum ib tauv huab dawb lawm, qhov no yuav yog lub sij hawm uas Lub Hnub ntawm txoj kev ncaj ncees tab meeg tshwm los rau sawv daws pom. Tej zaum lub sij hawm ntawd yuav yog ib lub sij hawm uas koj zoo siab heev. Txawm li cas los xij, koj yuav tsum paub hais tias lub sij hawm thaum koj pom Yexus nqis saum ntuj los ntawd kuj yuav yog lub sij hawm uas koj mus rau hauv dab teb mus raug rau txim thiab, yog lub sij hawm uas tshaj tawm hais tias Vajtswv txoj kev npaj tswj hwm twb xaus lawm, thiab yog thaum uas Vajtswv muab nqi zog rau cov neeg zoo hos rau txim rau cov neeg phem. Rau qhov Vajtswv txoj kev txiav txim yuav tag ua ntej tib neeg pom tej cim, thaum uas tsuas muaj kev nthuav qhov tseeb tawm lawm xwb. Cov uas lees txais qhov tseeb thiab tsis nrhiav tej cim, thiab raug ntxuav dawb huv lawm, yuav raug coj los rau ntawm Vajtswv lub zwm txwv thiab nkag mus rau hauv Tus Tswv Tsim lub xub ntiag. Tsuas yog cov uas pheej ntseeg hais tias “Tus Yexus uas tsis caij ib tauv huab dawb ces yog tus khetos cuav” xwb thiaj li yuav raug rau txim mus ib txhis, rau qhov lawv tsuas ntseeg tus Yexus uas ua tej cim xwb, tiam sis tsis lees paub tus Yexus uas muab txoj kev txiav txim hnyav nthuav tawm thiab muab txoj sia thiab txoj kev tseeb tso tawm. Yog li ntawd tsuas muaj tias Yexus mam saib xyuas lawv thaum Nws tab meeg rov qab los saum ib tauv huab dawb los xwb. Lawv ces tawv ncauj dhau heev lawm, ntseeg lawv tus kheej loj dhau heev lawm, khav theeb dhau heev lawm. Cov neeg uas qias neeg zoo li ntawd yuav ua cas tau phaj tshab los ntawm Yexus mas?
—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Thaum Lub Sij Hawm Koj Pom Yexus Lub Cev Sab Ntsujplig, Vajtswv Yuav Tsim Lub Ntuj thiab Lub Ntiaj Teb Tshiab Lawm
Khetos ntawm tiam kawg ntawd nqa txoj sia los, thiab nqa txoj kev ntawm qhov tseeb uas ruaj khov thiab kav mus ib txhis ntawd los. Qhov tseeb no yog txoj kev uas tib neeg tau txoj sia, thiab nws yog tib txoj kev uas tib neeg yuav paub Vajtswv thiab tau txais kev pom zoo los ntawm Vajtswv. Yog koj tsis nrhiav txoj kev muaj sia nyob uas Khetos muab thaum tiam kawg ntawd, ces koj yeej yuav tsis tau txais kev pom zoo los ntawm Yexus ib zaug li, thiab yeej yuav tsis muaj hnub tsim nyog tau nkag rau hauv lub rooj vag ntawm vaj loog ceeb tsheej, vim koj yog ib tug moj zeej thiab neeg raug txim ntawm keeb kwm xwb. Cov uas raug tswj los ntawm tej kev cai, los ntawm tej lus, thiab raug keeb kwm tej saw hlau khi cia ces yuav tsis muaj hnub tau txoj sia los sis tau txoj kev muaj sia nyob uas tsis paub kawg. Qhov no mas vim yog tag nrho qhov lawv muaj ces tsuas yog tej nyuag dej nro uas lawv tuav rawv tseg los tau ntau txhiab xyoo uas tsis yog cov dej cawm siav uas txhawv ntawm lub zwm txwv los. Cov uas tsis tau txais cov dej cawm siav ces tsuas yog lub niag cev tuag, yog Ntxwgnyoog tej nyuag khoom ua si, thiab yog tub ki ntawm dab teb mus ib txhis xwb. Yog li ntawd, yuav ua cas es lawv thiaj yuav pom Vajtswv? Koj tsuas nrhiav los tuav rawv rau yav tag los, sawv twj ywm es tuav txhua yam cia kom zoo li qub xwb, es tsis nrhiav los hloov qhov uas muaj tam sim no thiab muab keeb kwm tso pov tseg, yog li ntawd tsis yog koj pheej yuav tawm tsam Vajtswv tas li lod? Cov kauj ruam ntawm Vajtswv tes hauj lwm mas dav thiab loj heev li, zoo ib yam li nthwv dej nphau npog thiab nthwv xob nroo nrov deeg daws—tab sis koj tseem zaum twj ywm nyob tos kev puas tsuaj, khawm rawv koj txoj kev ruam thiab tsis ua ib qho dab tsi li. Nyob rau qhov no, yuav ua cas es thiaj yuav xam tau hais tias koj yog ib tug uas taug tus Me Nyuam Yaj tus hneev taw mas? Yuav ua cas es koj thiaj yuav ua pov thawj hais tias tus Vajtswv uas koj cia siab rau ntawd yog ib tug Vajtswv uas tshiab tas li xwb es yeej tsis txawj qub li? Thiab yuav ua cas es cov lus hauv koj phau ntawv daj ntawd thiaj li yuav coj tau koj hla mus rau tiam tshiab? Yuav ua cas es thiaj yuav coj tau koj mus nrhiav tej kauj ruam ntawm Vajtswv tes hauj lwm? Thiab yuav ua cas es thiaj coj tau koj mus rau saum ceeb tsheej? Qhov koj tuav ntawm koj txhais tes ces tsuas yog tej lus uas muab tau kev kaj siab ib nyuag pliag rau koj xwb, tsis yog tej qhov tseeb uas yuav muaj cuab kav muab tau txoj sia rau koj. Tej lus ntawm tej nqe Vajluskub uas koj nyeem ntawd tsuas pab tsim kho tau koj tus nplaig xwb, thiab tsis yog cov lus ntawm lub tswv yim uas pab tau kom koj paub tib neeg lub neej txoj sia, haj yam tsis yog txoj kev uas coj tau koj mus rau qhov kev ua kom zoo tiav log. Qhov uas zoo tsis sib xws no tseem tsis ua kom koj tig rov los xav txog koj tus kheej thiab los? Qhov ntawd tsis ua rau koj ras txog tej lus to taub nyuaj nyob rau hauv thiab los? Koj puas muaj peev xwm coj tau koj tus kheej mus saum ceeb tsheej mus ntsib Vajtswv? Yog hais tias Vajtswv tsis los, koj puas yuav coj tau koj tus kheej mus rau saum ceeb tsheej mus ntsib txoj kev zoo siab li tsev neeg nrog rau Vajtswv? Koj puas tseem npau suav toog tam sim no mas? Yog li ntawd, Kuv xav hais kom koj tsis txhob npau suav toog lawm thiab tig los saib tus uas tab tom ua hauj lwm tam sim no—saib kom pom hais tias leej twg tab tom ua tes hauj lwm cawm tib neeg nyob rau tiam kawg. Yog koj tsis ua li, koj yuav tsis muaj hnub tau txais qhov tseeb, thiab yuav tsis tau txoj sia.
—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Khetos ntawm Tiam Kawg Nkaus Xwb Mas Thiaj Yuav Muab Tau Txoj Kev ntawm Txoj Sia Ntev Dhawv Mus Ib Txhis Rau Tib Neeg
Cov uas xav tau txoj sia yam tsis vam khom qhov tseeb uas Khetos hais ces yog cov neeg uas txaus luag tshaj plaws hauv lub ntiaj teb no, thiab cov uas tsis lees txais txoj kev muaj sia nyob uas Khetos muab rau ces yog cov poob zoo rau hauv kev xav lawm xwb. Thiab yog li ces Kuv thiaj hais tias cov uas tsis txais yuav Khetos ntawm tiam kawg ces yuav raug Vajtswv tsis nyiam kiag li mus ib txhis. Khetos yog tib neeg lub rooj vag nkag mus rau hauv lub nceeg vaj nyob rau tiam kawg, thiab tsis muaj ib tug twg uas yuav hla dhau Nws tau li. Tsis muaj leej twg yuav raug Vajtswv muab kho kom zoo tiav log tau li tshwj tsis yog los ntawm Khetos. Koj ntseeg Vajtswv, ces yog li koj yuav tsum txais yuav Nws cov lus thiab ua raws li Nws Txoj Lus. Tsis txhob tsuas xav txog qhov kom tau txais koob hmoov nkaus xwb es twb tsis muaj peev xwm lees txais qhov tseeb thiab qhov kev muab txoj sia. Khetos los rau tiam kawg kom Nws muab txoj sia rau txhua tus uas muaj lub siab dawb paug ntseeg Nws. Qhov muaj tes hauj lwm no yog yuav muab tiam qub xaus thiab nkag mus rau tiam tshiab, thiab tes hauj lwm no yog txoj kev uas cov yuav nkag mus rau tiam tshiab yuav tsum tau taug. Yog koj tsis lees paub Khetos thiab tseem teem txim rau, hais lus thuam, los sis tsim txom Nws, ces koj yuav raug hlawv mus ib txhis thiab yuav tsis tau nkag mus rau Vajtswv lub nceeg vaj. Vim li no tus Khetos no mas Nws Tus Kheej ces yog kiag qhov kev qhia tawm txog tus Vajntsujplig, qhov kev qhia tawm txog Vajtswv, Tus uas Vajtswv tso siab rau los ua Nws tes hauj lwm hauv ntiaj teb, yog li Kuv thiaj hais tias yog koj tsis muaj peev xwm txais yuav tag nrho tej uas tus Khetos ntawm tiam kawg ua ntawd, ces yog koj hais lus tuam mom tus Vajntsujplig. Qhov kev ua pauj rau cov uas hais lus tuam mom tus Vajntsujplig ntawd yog yam uas yog thiab pom tseeb rau txhua tus huv si. Kuv kuj qhia koj li no hais tias: Yog koj tawm tsam tus Khetos ntawm tiam kawg ntawd, yog koj tsis kam lees yuav tus Khetos ntawm tiam kawg, ces yuav tsis muaj leej twg muaj cuab kav los ris koj lub txim rau qhov no li. Dhau ntawd mus, txij theem ntawd no mus lawm tom ntej ces koj yuav tsis muaj ib lub cib fim ntxiv kom tau txais Vajtswv qhov kev pom zoo lawm; txawm hais tias koj xav los theej txhoj rau koj tus kheej los xij, koj yuav tsis muaj peev xwm pom Vajtswv lub ntsej muag dua ntxiv lawm. Qhov no vim qhov koj tab tom tawm tsam ntawd tsis yog ib tug tib neeg, qhov koj tab tom tsis kam txais yuav ntawd tsis yog ib tug neeg uas tsis tseem ceeb, tab sis yog Khetos. Koj puas paub hais tias lub txim ntawm qhov no yog dab tsi? Koj tsis yog ua yuam kev ib qho me me xwb, tab sis ua txhaum ib lub txim loj kawg nkaus. Yog li ntawd Kuv hais qhia txhua tus neeg kom txhob lam zim nej cov kaus hniav thiab txhob lam yoj nej cov kaus tes kaus taw, los sis lam tau lam cem rau qhov tseeb, vim tsuas yog qhov tseeb xwb mas thiaj muab tau txoj sia rau koj, thiab yeej tsis muaj dab tsi hlo li tsuas yog qhov tseeb nkaus xwb thiaj li yuav ua rau koj rov yug dua tshiab thiab pom Vajtswv lub ntsej muag dua ib zaug ntxiv.
—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Khetos ntawm Tiam Kawg Nkaus Xwb Mas Thiaj Yuav Muab Tau Txoj Kev ntawm Txoj Sia Ntev Dhawv Mus Ib Txhis Rau Tib Neeg
Ziag no koj puas tau nkag siab txog tias txoj kev txiav txim yog dab tsi thiab qhov tseeb yog dab tsi? Yog tias koj nkag siab, ces Kuv thov koj kom ua raws li txoj kev txiav txim yam mloog lus hlo, tsis li ntawd koj yuav tsis muaj lub cib fim uas Vajtswv yuav pom zoo li los sis raug Nws coj los rau hauv Nws lub teb chaws li. Cov neeg uas tsuas lees txais txoj kev txiav txim xwb tab sis tsis muaj hnub yuav raug ntxuav kom dawb huv, uas yog cov neeg khiav tawm ntawm tes dej num ntawm txoj kev txiav txim, yuav raug tshem mus thiab raug Vajtswv ntiab tawm mus ib txhis li. Lawv tej kev txhaum muaj txim ntau heev, thiab phem tshaj cov Falixais li lawm, vim lawv tau ntxeev siab rau Vajtswv thiab tawm tsam Vajtswv. Cov neeg zoo li no uas haj tseem tsis tsim nyog los ua hauj lwm ntawd yuav tau txais kev rau txim hnyav dua, txoj kev rau txim uas yog, ntau tshaj, ntev mus li ib txhis. Vajtswv yuav tsis tseg txhua tus neeg ntxeev siab uas txawm tias yav dhau los tau npuab siab los ntawm cov lus tab sis tom qab ho tau ntxeev siab rau Nws. Cov neeg xws li cov no yuav tsum tau txais kev ua pauj los ntawm kev rau txim ntawm tus plig, tus ntsuj, thiab lub cev. Qhov no tsis yog ib qho kev qhia meej ntawm txoj kev xav ncaj ncees ntawm Vajtswv los? Nov tsis yog Vajtswv lub ntsiab los txiav txim rau tib neeg, thiab qhia tawm txog tib neeg los? Vajtswv pom zoo muab txhua tus uas ua txhua hom kev phem thaum ncua sij hawm ua txoj kev txiav txim mus rau qhov chaw uas muaj cov ntsujplig phem, thiab cia cov ntsujplig phem no ua kom lawv lub cev nqaij puas ntsoog raws li qhov lawv xav tau, thiab cov neeg ntawd lub cev tshwm pob txha tsw lwj ntxiag. Ntawd yog lawv li kev raug ua pauj uas tsim nyog. Vajtswv sau cia rau hauv lawv phau ntawv ceev tseg txhua yam kev txhaum ntawm cov neeg ntseeg cuav uas tsis muab siab npuab, cov thwj tim cuav, thiab cov neeg ua dej num cuav; tom qab ntawd, thaum txog lub sij hawm zoo lawm, Nws muab lawv cuam mus rau hauv cov ntsujplig qias, kom cov ntsujplig qias no noj lawv lub cev kom tag huv si raws li lawv lub siab nyiam, kom lawv thiaj li tsis los yug dua tshiab thiab tsis pom qhov kaj ntxiv lawm. Cov neeg ntsej muag ncaj siab nkhaus uas ua dej num pab ib ntus tab sis tsis muaj peev xwm ua lub siab ntev npuab siab mus txog hnub kawg yog raug suav los ntawm Vajtswv tias yog cov phem, yog li ntawd lawv thiaj li yuav poob mus ua ke nrog rau cov phem thiab mus ua ib feem ntawm lawv cov neeg phem; thaum kawg, Vajtswv yuav rhuav tshem lawv. Vajtswv muab cais rau ib sab thiab tsis quav ntsej txog cov neeg uas ib txwm tsis tau npuab siab rau Khetos los sis yeej tsis tau siv lawv lub dag zog los pab ua ib yam dab tsi li, thiab txog thaum hloov lub caij nyoog Nws yuav muab lawv rhuav tshem tag nrho txhua tus. Lawv yuav tsis muaj nyob rau lub ntiaj teb mus ntxiv li lawm, haj yam tsis muaj feem nkag mus rau hauv Vajtswv lub teb chaws. Cov uas ib txwm yeej tsis muaj lub siab dawb paug rau Vajtswv, tab sis raug yuam lam los cuag Nws thaum ntsib kev nyuaj siab, raug suav nrog cov neeg uas ua dej num rau Nws cov neeg. Tsuas yog qee pab neeg tsawg tsawg ntawm cov neeg zoo li no thiaj yuav dim xwb, hos feem coob yuav puas tsuaj nrog cov uas tes hauj lwm tsis mus raws li tus qauv quag li. Thaum kawg, Vajtswv yuav coj mus rau hauv Nws lub teb chaws tag nrho cov uas muaj lub siab zoo ib yam li Vajtswv, cov tib neeg thiab Vajtswv cov me nyuam, thiab cov uas Vajtswv tau xaiv los ua pov thawj. Lawv yuav yog cov thawj lim ntawm Vajtswv tes dej num. Cov neeg uas tsis tuaj yeem raug cais tawm hauv pab pawg uas raug teev tseg los ntawm Vajtswv, lawv yuav raug suav nrog cov tsis ntseeg Vajtswv, thiab nej tuaj yeem xam pom yam tseeb tseeb tias lawv tej kev tshwm sim yuav zoo li cas. Kuv twb hais rau nej txhua yam uas Kuv yuav tsum hais lawm; txoj kev uas nej xaiv yeej yog nej txoj kev xaiv nkaus xwb. Yam uas nej yuav tsum to taub yog qhov no: Vajtswv tes hauj lwm yeej tsis tos ib tug neeg twg uas raws tsis tau Nws qab, thiab Vajtswv tus moj yam ncaj ncees yeej tsis muaj kev hlub tshua rau ib tug neeg twg li.
—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Ua tes Hauj lwm ntawm Txoj Kev Txiav Txim Nrog Qhov Tseeb
