Sau los ntawm Yim Leej, Teb Chaws Suav

Muaj ib hnub nyob rau lub Kaum Ob Hlis Ntuj xyoo 2002 kwv yees li 4 teev tsaus ntuj, thaum kuv tab tom sawv ntawm ntug kev hu xov tooj, kuv cia li raug tsawv nkaus plaub hau thiab ob sab caj npab tom nrab qaum tuaj, thiab tos kuv nco xwb, kuv twb raug ncaws tom ib sab tuaj lawm. Kuv txheem tsis tau kuv tus kheej li lawm kuv thiaj li ntog ntsawm av mob heev. Ntau tus tib neeg cia li siv zog muab kuv qhau kiag rau hauv av, uas muab kuv lub ntsej muag sib zog nias teem nkaus rau hauv av thiab muab kuv ob sab tes xauv ntxeev tis qaib. Lawv muab kuv tsa sawv hauv av los, ces muab kuv cab mus rau hauv ib lub tsheb. Ces kuv mam li paub hais tias kuv raug tub ceev xwm ntes lawm. Lawv txoj kev lim hiam mas sawv daws yeej paub, thiab kuv nco txog cov kwv tij thiab cov nkauj muam txoj kev raug tsim txom uas phem heev tom qab lawv raug ntes lawm. Kuv ntxhov siab thiab ntshai heev, thiab txhawj tsam kuv yuav tsis muaj peev xwm tiv taus txoj kev tsim txom ces kuv cia li dhau mus ua ib tug Yudas lawm. Kuv thov Vajtswv tas li thaum tseem caij tsheb, thov kom Nws muab txoj kev ntseeg thiab lub zog rau kuv es kom kuv thiaj li ua tau tim khawv, thiab tsis swb rau Ntxwgnyoog li.

Tub ceev xwm coj kuv ncaj nraim mus rau ib lub tsev tos qhua me me uas yog qhov chaw lawv muab kuv hle tsho thiab khau, hle kuv txoj siv sia, thiab kom kuv xuas taw liab sawv rau ntawm qhov plag tsev uas txias txias tas zog. Muaj tub ceev xwm coob heev nyob rau hauv chav ntawd thiab muaj qee tus muab kuv yees duab. Ces lawv ib tug txawm thau tau ib co yeeb yaj duab uas muaj kuv thiab ib tug kwv tij uas nyob rau tom ib lub tuam txhab ceev nyiaj thaum tab tom xa nyiaj, thiab nug kom paub seb cov nyiaj ntawd los qhov twg los, xa mus rau leej twg, thiab cov tib neeg ntawd nyob qhov twg. Kuv ceeb tag li—kuv ras dheev hais tias cov tub ceev xwm no tsis yog tsuas soj thiab taug kuv qab tau li ib los sis ob hnub lawm xwb, thiab muaj tub ceev xwm coob heev nyob rau hnub ntawd, ces kuv pom tias lawv yuav tsis tso kuv mus yooj yooj yim. Qhov kev xav no mas txaus ntshai heev, ces kuv thiaj li tas zog thov Vajtswv ntsiag to. Kuv xav txog ib co ntawm Nws cov lus uas hais tias: “Tsis txhob ntshai; nrog Kuv txoj kev pab txhawb, leej twg tuaj yeem thaiv txoj kev no? Nco ntsoov qhov no! Tsis txhob hnov qab! Txhua yam uas tshwm sim yog los ntawm Kuv txoj kev xav zoo, thiab txhua yam nyob hauv qab Kuv qhov kev soj ntsuam. Koj puas tuaj yeem ua raws li Kuv cov lus hauv txhua yam koj hais thiab ua? Thaum kev sim siab ntawm hluav taws los txog koj, koj puas yuav txhos caug thiab hu ma? Los yog koj yuav caws, tsis muaj peev xwm txav mus rau tom hauv ntej li?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 10). Kuv tsis tshua ntshai heev lawm thaum paub tias kuv muaj Vajtswv nrog kuv ua tus txhawb kuv lawm, thiab kuv paub hais tias Vajtswv tau tso cai kom kuv raug ntes, tias Nws siv qhov xwm txheej no los sim seb kuv puas muaj kev ntseeg thiab kev mob siab rau Nws. Kuv tsis tuaj yeem ua kom Vajtswv poob ntsej muag, tiam sis kuv yuav tsum tau vam khom rau Nws los ua tim khawv thiab ua kom Ntxwgnyoog txaj muag. Kuv txiav txim siab twj ywm hais tias txawm tub ceev xwm yuav tsim txom kuv li cas, tab txawm yog hais tias ua kom kuv tuag kiag los xij, kuv yeej muag tsis tau tej khoom fij rau Vajtswv ntawd, yeej tsis ua ib tug Yudas kiag li! Thaum kuv tsis hais ib lo lus li, ces ib tug tub ceev xwm txawm siv zog xuas ncuav pias rau kuv ntau zaus thiab nug kom paub seb peb tus thawj coj pawg ntseeg yog leej twg, pawg ntseeg cov nyiaj txiag muab khaws cia rau qhov twg, thiab tus tib neeg uas nrog kuv xa nyiaj ntawd yog leej twg. Nws xuas ncuav pias rau kuv ntxiv thaum kuv tsis teb, ces thaum nws ob txhais tes pib mob lawm, nws txawm khaws kuv nkawm khau los thiab siv ob sab luj taws los ntaus kuv lub qhov ncauj. Kuv lub qhov ncauj txawm pib o sai heev thiab qee tus hniav ua ua zog lawm. Ntshav ntws sis ntawm kuv ob ceg kaum ncauj los. Lawv tsim txom kuv tau li ib teev tawm ces mam li tso tseg me ntsis. Lawv pib sib hloov ua ob leeg ob leeg los saib kuv, kom kuv sawv ntsug tas li, yeej tsis cia kuv pw li. Kuv sawv li ntawd tau peb hnub peb hmo. Tom qab ntawd kuv mam li paub tias qhov ntawd yog ib lub tswv yim tsim txom uas hu ua “ua kom tus dav sab” uas tub ceev xwm nquag siv nyob rau hauv tej kev nug, uas lawv ua kom tus tib neeg ntawd sawv txhob tau tsaug zog mus txog ntua thaum nws tiv tsis taus lawm, ces mam li nug nws thaum nws feeb tsis tshua meej lawm. Lawv siv lub tswv yim no los ua kom tib neeg ntxeev siab rau Vajtswv. Tag nrho kuv lub cev mob thoob plaws yam tiv tsis taus li lawm thiab kuv sab cev nqaij daim tawv thiab txoj kev xav mas nkees heev. Tab txawm kuv sawv ntsug los kuv yeej tsaug zog taus li, tiam sis thaum lub sij hawm kuv ncaws nruj nris ntawd, ib tug tub ceev xwm txawm siv siv zog xuas ncuav pias rau kuv, siv siv zog ncaws kuv, los sis cia li qw kiag rau ntawm kuv lub pob ntseg kom kuv thiaj li yuav ntshai tsis tsaug zog lawm. Kuv mloog zoo li kuv lub siab yuav dhia tawm li. Qee zaus kuv feeb meej, qee zaus kuv feeb tsis meej, thiab kuv tsis paub xyov qhov no yog lub neej tiag tiag los yog npau suav xwb. Kuv kev txom nyem heev thiab mloog zoo li kuv tiv tsis taus ntxiv li lawm, ntshai tsam tias yog lawv pheej tsim txom li ntawd mus ntxiv, ntshe kuv yuav cia li dhau los ua ib tug neeg ruam los sis ib tug neeg puas siab puas ntsws. Kuv thiaj li thov Vajtswv hauv kuv lub siab, thov kom Nws kom muaj kev ntseeg thiab lub zog los ua tim khawv rau Nws.

Muaj ib tag kis, ob peb tug tub ceev xwm tuaj nug kuv. Lawv hais tias, “Tsis txhob xav hais tias yog koj tsis hais ib lo lus li ces koj yuav cia li dim qhov no mus yooj yooj yim nawb. Thaum koj twb nyob ntawm no lawm, mas koj yuav tsum tau teb peb cov lus nug kom meej xwb xwb li! Qhia koj qhov tseeb hais tias, peb twb raws koj qab los tau ntau lub hli lawm. Peb siv lub koob tsom saum nruab ntug los ntes koj es peb thiaj li paub txog txhua qhov chaw uas koj mus. Qhov hais kom koj lees txim no yog peb muab ib lub cib fim rau koj xwb. Koj muaj ntau tus npawb xov tooj uas sib txawv thiab tau hu nyob rau ntau qhov chaw uas sib txawv. Koj yuav tsum yog ib tug thawj coj, puas yog?” Ces lawv txawm thau kiag ib daim ntawv teev txog txhua tsab xov tooj uas kuv hu uas ntev dua li ib mev, thiab hais kom kuv qhia lawv seb txhua tsab xov tooj ntawd yog sib tham txog dab tsi. Kuv ceeb tag li—yog tub ceev xwm twb paub ntau npaum li ntawd txog kuv thiab xav hais tias kuv yog ib tug thawj coj lawm no mas ntshe, xyov lawv yuav tsim txom kuv li cas txij ntawm no mus li lau! Kuv tsis tau pw tau li plaub los sis tsib hnub thiab twb hnov zoo li kuv tiv tsis taus mus ntxiv li lawm. Yav dhau los kuv hnov hais tias yog koj tsis pw li xya los sis yim hnub sib law liag, ces koj cia li tuag twj ywm lawm xwb. Kuv xav paub tias kuv puas yuav tuag rau ntawd yog lawv pheej ua rau kuv tsis tau pw. Ces txawm me siab me ntsis, kuv thiaj li thov Vajtswv ceev ceev hais tias: “Vajtswv, kuv lub cev nqaij daim tawv tsis muaj zog thiab kuv ntshai tsam kuv tsis muaj peev xwm tiv taus qhov no, tiam sis kuv tsis xav ntxeev siab rau Koj los sis muab cov kwv tij thiab cov nkauj muam muag tawm. Thov kev ntseeg thiab lub zog rau kuv.” Tom qab kuv thov Vajtswv lawm, ib co ntawm Vajtswv cov lus tau los rau hauv kuv lub siab hais tais: “Kev ntseeg zoo li ib ya cav tuam ua tus choj: Cov uas tuav rawv txoj sia yuav hla nyuaj heev, tiam sis cov neeg uas npaj txhij fij lawv tus kheej tuaj yeem hla dhau mus, ruaj siab rau txhais ko taw thiab tsis txhawj. Yog tias tib neeg txaj muag thiab muaj txoj kev xav ntshai, nws yog vim Ntxwgnyoog tau dag ntxias lawv lawm, ntshai tias peb yuav hla tus choj ntawm txoj kev ntseeg mus cuag Vajtswv” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 6). Nws cov lus tsa kuv sawv—tsis yog kuv txoj sia thiab txoj kev tuag puav leej nyob rau hauv Vajtswv ob txhais tes lod? Yog Vajtswv tsis cia kuv tuag, ces Ntxwgnyoog yeej ua tsis tau ib yam dab tsi rau kuv li. Kuv tsis muaj kev ntseeg Vajtswv; kuv siab me thiab qaug zog vim kuv ntshai tuag. Thaum xav li no lawm ua rau kuv siab txias me ntsis thiab kuv tsis ntshai heev lawm. Thaum pom tias kuv tseem nyob ntsiag to xwb, ces cov tub ceev xwm ntawd ib tug txawm cia li xa tib nrig rau kuv lub taub hau—kuv pom ntau lub hnub qub thiab tag nrho kuv lub cev loog tag huv si, cuag nkaus li kuv raug hluav taws xob hlawv. Kuv yuav luag ntog. Lwm tus tub ceev xwm muab ib tug pa ntoo ziab khaub ncaws los sib sib zog txheem kuv lub pob tsaig. Mob dhau lawm, kuv thiaj li nug lawv hais tias, “Kuv txoj kev ntseeg Vajtswv ua txhaum txoj kev cai twg? Lub teb chaws txoj kev cai tswj hwm yeej hais meej meej lawm hais tias tsoom pej xeem muaj kev ywj pheej txog txoj kev ntseeg. Vim li cas nej thiaj li yuav muab kuv ntaus kom tuag li? Puas muaj ib txoj cai twg nyob rau hauv daim av no li?” Lawv ib tug txawm hais tias, “Kev cai hauv daim av no lod? Kev cai yog dab tsi? Kev cai yog Pawg Koom Tsham! Tam sim no koj nyob rau hauv peb ob txhais tes lawm, yog koj tsis qhia peb yam peb xav paub, ces tsis tas yuav xav tias yuav tau tawm ntawm no mus yam ciaj sia li.” Kuv xeev siab thiab npau taws heev uas pom tias lawv lim hiam thiab tsis paub txaj muag npaum li cas, thiab tsis teb lawv ntxiv lawm.

Muaj ib hnub ob peb tug tub ceev xwm hais rau kuv yam nyaum heev hais tias, “Peb muaj peb tej kev los ua kom koj rua koj lub qhov ncauj lawm. Txawm nws yuav tshwm sim sai sai no los sis tsis ntev no los xij tsuas yog tsis paub lub sij hawm xwb. Qhov tsis kam hais lus ntawd tsuas ua kom raug kev txom nyem ntxiv xwb. Yog li ntawd koj yog ib tug dav uas tawv heev lod? Koj puas paub tias ua li cas dav thiaj li sab? Koj yuav tsum ua siab ntev, tiam sis thaum lub sij hawm los txog lawm, ces tus dav ntawd yeej yuav zoo thiab mloog lus….” Kuv twb raug tsim txom mus txog ntua qhov uas kuv to taub tsis meej thiab kuv tsis paub xyov kuv yuav tiv tau pes tsawg hnub ntxiv li lawm. Yam uas kuv ua tau ces yog los yuam kuv tus kheej kom ceev faj thiab ua kom zoo tshaj plaws los tswj txoj kev to taub kom meej lawm xwb. Kuv thov thiab hu Vajtswv tas zog li. Ces kuv nco txog qhov no los ntawm Vajtswv cov lus los: “Kuv tes hauj lwm ntawm pab pawg tib neeg ntawm tiam kawg yog ib txoj hauj lwm uas tsis tau muaj dua los li, yog li ntawd, kom Kuv lub yeeb koob thiaj li yuav nrov thoob plaws saum nruab ntug, txhua tus tib neeg yuav tsum raug kev txom nyem zaum kawg rau Kuv. Koj puas to taub Kuv lub siab nyiam? Qhov no yog txoj kev cheem tsum kawg uas Kuv tsim rau tib neeg, uas hais tau tias, Kuv cia siab tias txhua tus tib neeg ua tau tim khawv khov kho, nrov heev rau Kuv nyob rau ntawm tus zaj loj liab ploog lub xub ntiag, tias lawv muab tau lawv tus kheej fij rau Kuv ua zaum kawg, thiab ua Kuv tej kev cheem tsum kom tiav ua qhov piv txwv kawg. Nej puas ua tau qhov no tiag tiag? Nej tsis muaj peev xwm ua tau zoo raws Kuv lub siab yav dhau los—nej puas tsoo tau tus qauv no kom tawg nyob rau hauv qhov piv txwv kawg? Kuv muab lub hwv tsam rau tib neeg thim xav; Kuv cia lawv ua twb zoo xav ua ntej teb Kuv ua zaum kawg—ua li no puas txhaum? Kuv tos tib neeg lo lus teb, Kuv tos ntsoov lawv ‘tsab ntawv teb’ xwb—nej puas muaj txoj kev ntseeg los ua Kuv tej kev cheem tsum kom tiav?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 34). Vajtswv cov lus pab kuv pom hais tias Nws tau tso cai rau tus zaj loj liab ploog ntawd los ntes thiab tsim txom kuv los ua kom kuv txoj kev ntseeg thiab kev mob siab zoo tiav log. Nws kuj yog muab ib lub hwv tsam rau kuv los ua tim khawv rau Vajtswv nyob rau ntawm Ntxwgnyoog lub xub ntiag thiab. Vajtswv soj ntsuam kuv txhua lo lus thiab txoj kev ua—kuv yuav tsum tau vam khom rau Vajtswv thiab hais lus tim khawv rau Nws. Qhov kev xav no ua rau kuv txoj kev ntseeg thiab lub zog rov muaj zog li qub, thiab kuv hnov to taub meej lawm ntau, tsis zoo li tsaug zog, thiab muaj zog tuaj lawm. Ob peb tug tub ceev xwm sawv ntawm ib sab ntawd ib leeg hais rau ib leeg hais tias, “Tus txiv neej no mas yog ib yam uas xav tsis thoob li. Tom qab twb tau npaum li no hnub uas tsis tau pw lawm los nws tseem muaj zog heev li, tiam sis peb kaum ob leeg twb sab heev li lawm.” Kuv paub hais tias qhov ntawd yog Vajtswv txoj kev hlub tshua thiab kev tiv thaiv kuv xwb, kuv ua Vajtswv tsaug tawm hauv kuv lub siab tuaj.

Tom qab ntawd, lawv yuam kom kuv sawv li zaum ywb. Twb tau xya hnub xya hmo uas tsis tau pw thiab tsis tshua tau zaub mov noj lawm, kuv tau lub zog rau qhov ntawd qhov twg los? Nws tsis siv sij hawm ntev li ua ntej kuv tiv tsis taus thiab kuv cia li ntog rau hauv av lawm. Lawv rub kuv rov qab los zaum ywb dua ntxiv. Tsis muaj zog li lawm tiag tiag, ces kuv thiaj li ntog ob zaug thiab tom qab ntawd zaum tsis taus ywb li lawm. Ces lawv hais kom kuv txhos caug tig xub ntiag rau lawv. Kuv chim heev thiab xav rau kuv tus kheej hais tias: “Kuv tsuas txhos caug pe hawm Vajtswv xwb, thiab kuv yeej yuav tsis txhos caug rau ntawm nej cov nyuag ntsej muag dab ntawm ko lub xub ntiag li.” Thaum kuv ua tawv qhawv tsis kam, ces lawv ob leeg txawm los tuav kuv ob txhais caj npab yam npau taws heev thiab ncaws kuv ob sab ceg yuam kom kuv txhos caug. Los kuv tseem tsis txhos caug li thiab, yog li ntawd lawv thiaj li tsuj kuv ob sab plab hlaub, sib sib zog tsuj heev. Nws mob mob heev ua rau kuv tawm hws lug thoob ib ce. Nws mloog zoo li txoj kev tuag tseem yuav zoo dua ntawd. Lawv tsim txom kuv li ntawd tau khwv yees li ib teev, ua rau kuv ob sab plab hlaub doog ntsuab xiab thiab o o, thiab tom qab ntawd kuv thiaj li mus kev ceg tawv pluav tau ntev heev.

Twb tau yim hnub lawm los lawv yeej tseem tsis tau pub kuv pw li thiab. Kuv cia li pom pos pos huab, ua ib tug npaws siab heev thiab kuv ob lub pob ntseg nrov nrov lawm. Kuv hnov tsis tseeb thiab kuv pom ib qho ua ob qho lawm—kuv cia li yuav tsaus muag yog kuv mus li ib feeb yam tsis tau raug ntaus li. Nws tseem los daus sab nraud, tiam sis tub ceev xwm muab kuv pheeb rau ntawm chav da dej thiab muab cov dej txias txias los ntov rau saum kuv lub taub hau; thaum lub sij hawm lawv tso tseg lawm ces kuv cia li ntog rau hauv pem teb lawm. Zaum no kuv feeb meej, tiam sis lwm zaus feeb tsis meej lawm. Kuv siab ntsws puas tag li lawm thiab kuv lub cev los kuj tsis muaj zog ib yam nkaus li lawm thiab. Qhov kev xav uas kuv tsis paub tias xyov thaum twg lub sij hawm uas txaus ntshai yuav los ze ntawd ua rau kuv lub siab qaug, thiab kuv haj tseem tsis xav noj mov li thiab.

Hnub cuaj thaum yav tsaus ntuj, muaj ib tug neeg tuaj uas zoo li ib tug thawj coj. Nws taw tes rau ntawm ib lub txaj thiab hais tias, “Cia li qhia kuv seb cov nyiaj ntawd tuaj qhov twg tuaj, tus txiv neej uas nrog koj xa nyiaj ntawd yog leej twg, thiab tus thawj coj yog leej twg. Yog kuv hais ib lo lus xwb ces koj yeej yuav tau da dej thiab pw, ces peb yuav coj koj mus tsev.” Kuv lub cev sab heev uas kuv tiv tsis taus li lawm thiab kuv twb ntog rau hauv av ntau zaus lawm. Kuv mloog zoo li kuv tuag thaum twg los tau li yog kuv tsis tau pw. Kuv xav rau kuv tus kheej hais tias, “Tej zaum kuv hais tau qee yam uas tsis tshua tseem ceeb? Yog zoo li no mus ntxiv, ces tab txawm yog kuv tsis raug ntaus kom tuag los, kuv yeej yuav tuag los ntawm qhov sab los sis qhov tsis tau pw li!” Tiam sis tom qab ntawd kuv ras dheev kiag tam sid hais tias qhov ntawd yuav ua rau kuv yog ib tug Yusdas. Ces kuv thiaj li thov Vajtswv twj ywm ceev ceev hais tias: “Vajtswv! Kuv tiv tsis taus ntxiv li lawm. Thov muab kev ntseeg thiab lub zog rau kuv. Kuv xav ua tim khawv thiab ua kom Ntxwgnyoog txaj muag.” Thaum tab tom thov Vajtswv, kuv nco txog qee yam los ntawm Vajtswv cov lus los: “Nyob rau lub sij hawm kawg nej yuav tsum ua tim khawv rau Vajtswv. Tsis hais nej txoj kev txom nyem yuav loj npaum li cas, koj tsim nyog taug kev mus kom txog thaum kawg, thiab kom kawg koj tus pa, koj yuav tsum ncaj ncees rau Vajtswv thiab ntawm Vajtswv txoj kev hlub tshua; tsuas yog qhov no xwb thiaj yog kev hlub Vajtswv tiag tiag, thiab tsuas yog qhov no xwb thiaj yog qhov kev ua tim khawv muaj zog thiab zoo kawg nkaus” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Kev Sim Siab Uas Mob Heev Xwb Thiaj Muaj Peev Xwm Paub Txog Vajtswv Txoj Kev Zoo Ntxim Hlub). Vajtswv cov lus hais kom kuv nco hais tias qhov no yog kiag thaum uas kuv yuav tsum tau ua tim khawv rau Vajtswv ntag, thiab qhov ntawd cheem tsum kom muaj peev xwm los raug kev txom nyem thiab qhia txoj kev mob siab rau Vajtswv. Tiam sis kuv tsis xav raug kev txom nyem, thiab kuv haj tseem xav txog qhov muab tej kev ntshaw ntawm Vajtswv lub tsev tso tseg kom txuag tau kuv tus kheej txoj sia xwb. Kuv mas twm xeeb thiab ntxim ntxub heev—qhov ntawd yuav ua li cas muaj taus ib txoj kev ua neej? Zaj lus tim khawv ntawd zoo li cas? Qhov kev xav no rov qab ua kom kuv txoj kev ntseeg thiab lub zog zoo li qub. Kuv paub hais tias tab txawm yog qhov ntawd ua rau kuv txoj sia tu kiag los xij, kuv yeej yuav tsum tau ua tim khawv thiab ua kom tau zoo raws Vajtswv. Yog li ntawd, kuv thiaj li tseem tsis hais ib lo lus tawm li. Thaum pom qhov no lawm, tus txiv neej uas zoo li ib tug thawj coj ntawd txawm hais rau cov tub ceev xwm kom saib ntsoov kuv hais tias, “Saib nws kom zoo. Txhob pub nws pw li, txhob pub kom txog ntua thaum nws hais lus.” Ces nws txawm tig tawm mus lawm.

Hnub kaum thaum tav su, tub ceev xwm ntes tau ntau tus muam. Lawv xav muab cov muam ntawd cais nug thiab vim lawv tsis muaj tib neeg txaus los saib kuv, ces hmo ntawd kuv thiaj li tau pw. Thaum sawv ntxov nyob rau hnub tom ntej, ib tug thawj tub ceev xwm xeem Cai hais tias, “Peb tau mus rau tom koj tsev lawm. Koj niam twb laus lawm thiab nws tsis noj qab nyob tsis zoo lawm, ntxiv nttawd nws tseem yuav tsum tau saib xyuas koj ob tug me nyuam thiab. Lawv lub neej mas nyuaj heev​. Koj poj niam tsis nyob tsev lawm, koj cov me nyuam tseem me, thiab lawv cheem tsum lawv niam lawv txiv txoj kev saib xyuas thiab lawv nco koj heev. Muaj ntau yam nyuaj rau koj tsev neeg heev li. Peb xav hais tias peb yuav muab lub hwv tsam no ntxiv rau koj, thiab koj cia li yuav ntshe yuav zoo dua. Nag hmo peb ntes tau ob peb tug tib neeg ntxiv lawm thiab, yog li ntawd cia li qhia kuv seb lawv leej twg yog tus thawj coj, tus uas tuav nyiaj txiag thiab lawv nyob rau qhov twg, ces kuv yuav tso koj mus tam sim no ntag. Koj yuav tau mus tsev thiab mus nrog koj tsev neeg nyob ua ke dua, thiab peb pab tau koj nrhiav ib txoj hauj lwm zoo uas nyob rau cheeb tsam ntawd kom koj saib xyuas tau lawv.” Kuv tauv tsis taus kuv lub kua muag li thaum kuv hnov nws hais li no, thiab kuv mob siab, qaug zog heev. Kuv niam thiab cov me nyuam kev txom nyem heev tiam sis kuv tsis muaj hau kev mus pab lawv li. Kuv mloog zoo li kuv tshuav lawv nqi tiag tiag li. Nyob rau lub sij hawm ntawd kuv mam ras dheev hais tias kuv ua lub neej nyob rau hauv tej kev xav ntawm lub cev nqaij daim tawv xwb, yog li ntawd kuv thiaj li thov Vajtswv ceev ceev thiab thov kom Nws coj kuv kev thiab saib xyuas kuv lub siab. Ces kuv nco txog qhov no los ntawm Vajtswv cov lus los: “Nyob rau txhua lub sij hawm, Kuv cov neeg yuav tsum ceev faj tej tswv yim ntxias dag ntawm Ntxwgnyoog, zov lub rooj vag ntawm Kuv lub tsev rau Kuv; … ces koj zam dhau tsis txhob poob mus rau Ntxwgnyoog rooj ntxiab, uas thaum ntawd ces lig dhau heev lawm rau tej kev tu siab khuv xim” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 3). Vajtswv cov lus tau rov qab hais kom kuv nco dua hais tias qhov no yog ib qho ntawm Ntxwgnyoog tej kev sim siab ntag. Ntxwgnyoog tab tom siv kuv tej kev xav los sim kuv siab kom ntxeev siab rau Vajtswv thiab muab cov kwv tij thiab cov nkauj muam muag tawm kom tub ceev xwm thiaj li nyiag tau Vajtswv tej khoom fij thiab ua rau cov neeg uas Vajtswv xaiv tseg mob siab. Kuv tsis tuaj yeem poob rau Ntxwgnyoog lub tswv yim dag, thiab kuv yeej yuav tsis muab lawv muag tawm li, es tom qab ntawd ua neej nrog ib txoj kev txaj muag mus li. Tsis ntev tom qab ntawd, lawv coj cov muam ib tug zuj zus los kom kuv qhia seb lawv yog leej twg, kom lawv tig puag ncig kom kuv thiaj li pom lawv tseeb tseeb. Kuv ua laim muag ntsia, mas kuv pom peb tug tub ceev xwm saib ntsoov seb kuv ua li cas, yog li ntawd kuv thiaj li thov Vajtswv, thov kom Nws saib xyuas kuv kom kuv tsis txhob ntxeev siab rau cov nkauj muam ntawd. Kuv mloog zoo li siab txias heev, kuv ntsia lawv yam tsis ua ib yam dab tsi thiab maj mam co kuv lub taub hau rau lawv txhua tus xwb. Tus Thawj Tub Ceev Xwm Cai npuaj kuv yam npau taws heev thiab qw hais tias, “Kuv tsis ntseeg tias koj tsis paub lawv ib tug hlo li. Sim cia koj raug rau txim 10 hnub ntxiv soj, es mam li saib seb koj coj li cas?” Ces lawv pheej nug kuv tas zog txog qhov pawg ntseeg cov nyiaj txiag muab cia rau qhov twg thiab tus thawj coj yog leej twg. Kuv tsis hais lus, yog li ntawd lawv thiaj li pheej tsim txom kuv nruab hnub hmo ntuj, tsis cia kuv pw kiag li. Lawv ib tug muab kuv npuaj, ncaws kuv ob sab plab hlaub, sib sib zog rub cov plaub hau saum kuv ob lub ntso, los sis tuav kuv ob sab pob ntseg qw nrov nrov thaum uas kuv ncaws nruj nris. Txhua zaus uas lawv pom qhov kuv ntshai thiab mob thaum kuv ras dheev los mas lawv luag tsis taus li. Kuv nyuaj siab heev, thiab tsis paub xyov kuv yuav tiv taus lub neej uas phem tshaj txoj kev tuag ntawd mus ntev npaum li cas ntxiv. Tshwj xeeb yog thaum kuv xav txog qhov tub ceev xwm hais tias sij hawm tsis txawj tag rau qhov “ua kom tus dav sab” li, tias lub sij hawm ntawd tsuas tag rau thaum tus tib neeg ntawd lees txim lawm xwb, ua rau kuv haj yam qaug zog.

Nyob rau hnub nees nkaum uas lawv tsim txom kuv ntawd, kuv pom hais tias tsis muaj ib lub cim qhia tias tub ceev xwm yuav tsum li, tiam sis kuv twb mus txog qhov kuv lub cev tiv tsis taus li lawm. Txhua zaus uas kuv ntog rau hauv pem teb mas kuv twb tsis muaj zog sawv rov qab los los sis twb rua tsis taus kuv ob lub qhov muag li lawm. Qhov kuv feeb meej txawm tsis meej zuj zus lawm thiab haj tseem ua pa nyuaj thiab. Kuv mloog zoo li kuv yuav tuag thaum twg los tsis paub li, thiab kuv ntshai heev. Kuv hnov ib tug tub ceev xwm nthe hais tias, “Txawm peb yuav muab tus neeg tawv zoo li koj ko ntaus tuag los yeej tsis ua li cas li! Peb cia li muab koj faus rau qhov twg los tau thiab yeej tsis muaj leej twg yuav paub li.” Ua rau kuv siab ntsws tawg tag thaum kuv hnov li ntawd. Kuv niam, kuv poj niam, thiab cov me nyuam yuav ua li cas yog kuv raug ntaus tuag lawm? Kuv niam yog ib tug neeg laus lawm thiab nws muaj teeb meem rau lub plawv thiab muaj ntshav siab. Yog kuv tuag lawm nws yuav tsis tag li ntawd lod? Thiab qhov ntawd yuav ua rau kuv poj niam mob siab npaum li cas? Kuv cov me nyuam tseem me heev—lawv yuav ua li cas? Kuv pheej xav tsis tau li ntawd tsis tau lawm. Kuv mloog zoo li muaj ib yam dab tsi daig nyob rau hauv kuv caj pas thiab kua muag ntws sis los rau ntawm kuv lub ntsej muag. Kiag thaum kuv qhov mob thiab qhov kev qaug zog mus txog rau ib theem lawm, ces kuv txawm hnov ib tug tub ceev xwm hais tias, “Cia li qhia rau peb seb koj twb tau nyob rau qhov twg los lawm es peb yuav muab qhov no xaus! Yog tsis li ntawd, peb yuav xaus tsis tau. Peb tsis xav nrog koj nyob lig lig thiab raug kev txom nyem nyob rau ntawm no txhua hnub lawm.” Kuv xav rau kuv tus kheej hais tias, “Yog kuv tsis qhia lawv ib yam dab tsi rau hmo no li, ces kuv yeej tsis xav tias kuv yuav muaj peev xwm mus dhau qhov no. Tej zaum kuv yeej hais tau qee yam uas tsis tseem ceeb. Tus muam laus zog uas txais tos kuv ntawd tsuas yog ib tug ntseeg dog dig xwb thiab tsis tshua paub txog pawg ntseeg. Qhov lees hais tias kuv nyob rau hauv nws lub tsev ntawd tej zaum yuav tsis ua rau pawg ntseeg puas tsuaj npaum li cas. Tsis tas li ntawd xwb, txij li thaum kuv raug ntes los twb tau 20 hnub lawm, yog li ntawd tag nrho cov ntawv uas hais txog Vajtswv cov lus nyob rau hauv nws lub tsev ntawd ntshe twb raug tshem tawm mus lawm. Yog lawv nrhiav tsis tau ib qho pov thawj ntawm nws txoj kev ntseeg, nyaj lawv yuav tsis ua li cas rau ib tug poj niam laus ne?” Kuv tsis thov Vajtswv tom qab qhov no tshwm sim rau kuv lawm, ces thaum tub ceev xwm muab ib daim ntawv kos qhia cov chaw nyob cheeb tsam ib puag ncig ntawm tus muam uas txais tos kuv ntawd lub tsev coj los qhia rau kuv, ces kuv txawm qhia lawv hais tias yog lub twg lawm. Kiag thaum cov lus tawm hauv kuv lub qhov ncauj tuaj lawm, kuv txawm tsim dheev kiag tag nrho, tsis tsaug zog li lawm, thiab hauv kuv lub siab mas tsaus ntuj nti xwb. Kuv mam li paub tias kuv twb yog ib tug Yudas thiab ua txhaum rau Vajtswv tus moj yam lawm. Kuv ntshai heev thiab ruam tag, xav ntsoov qhov kev ua txhaum ntawd thiab tu siab heev. Yog ua li cas kuv thiaj ua tau ib tug Yudas, muab tus muam ntawd muag tawm lawm? Ces cov tub ceev xwm ntawd ib tug txawm nug hais tias, “Cov nyiaj txiag yog muab khaws cia rau lub tsev twg lawm? Leej twg yog tus thawj coj? Cov ntawv luam tawm txog Vajtswv cov lus nyob qhov twg?” Lawv ib tug txawm ncaws kuv thaum kuv tsis qhia lawv dab tsi ntxiv lawm. Tiam sis nyob rau theem ntawd, qhov mob ntawm lub cev tsis tseem ceeb lawm. Qhov mob hauv kuv lub siab mob tshaj qhov mob ntawm kuv lub cev ib puas npaug. Nws cuag nkaus li kuv raug nkaug rau hauv nruab siab, thiab kuv xav kom kuv tig tau sij hawm rov qab heev es thim yam uas kuv nyuam qhuav hais ntawd rov qab, tiam sis nws lig dhau lawm. Kuv nyob ntsiag to cuag nkaus li kuv tau poob plig lawm. Thaum pom tias lawv yuav tsis tau ib yam dab tsi los ntawm kuv los li lawm ces lawv txawm muab kuv hloov mus rau ib lub tsev kaw neeg lawm.

Nyob rau hauv lub tsev kaw neeg, muaj ib tug tub ceev xwm uas zov lub tsev kaw neeg ntawd kom kuv hle khaub ncaws liab qab ploog es yuav saib kom meej thiab muab kuv yees duab rau sawv daws pom. Kuv twb tsis tau ntxuav muag los sis txhuam hniav los tau 20 hnub lawm, mas kuv tsw phem heev. Thiab nyob rau lub caij ntuj no uas huab cua txias txog kwv yees li 10 oos xam uas qis dua lub ntxaiv los, lawv tsis muab dej sov rau kuv li, tiam sis tsuas cia kuv xuas dej txias ntxhuav xwb. Vim kuv sab heev txog ntua qhov uas cia li ntog thiab tsis muaj zog hais lus li lawm, ces tus tub ceev xwm uas zov lub tsev kaw neeg ntawd txawm ncaws kuv hauv siab thaum nws xav hais tias kuv teb yau dhau lawm thaum lawv hu. Nws mob heev mloog zoo li tag nrho kuv tej plab hnyuv siab ntsws raug muab hloov chaw tag li lawm, thiab nws ua rau kuv siv sij hawm li ib pliag mam li ua taus pa dua. Lawv kuj tau kom kuv hais tej kev cai ntawm lub tsev kaw neeg ntawd thiab, thiab kuv yuav tsum tau so tej plag tsev thiab ntxuav cov chav dej yog kuv hais tsis tau tej kev cai ntawd kom yog yog. Muaj tej uas tawg pleb thoob plaws kuv ob sab tes uas los ntshav yooj yim heev, thiab txhua txhua hmo kuv yuav tsum tau sawv ntawm txaj los saib li ob teev. Kuv tiv taus txhua yam mob ntawm lub cev, tiam sis txij li thaum kuv muab tus muam uas laus zog ntawd muag tawm lawm, kuv mloog zoo li kuv tau ua txhaum tas li, mloog zoo li kuv tshuav Vajtswv thiab tshuav nws nqi. Kuv zam tsis tau txim rau kuv tus kheej li. Tus muam laus zog ntawd tau tsis quav ntsej txog nws tus kheej txoj kev nyab xeeb es tuaj coj kuv mus rau hauv nws tsev, tiam sis kuv ntxeev siab rau nws kom tiv thaiv tau kuv tus kheej xwb. Kuv tsis muaj ib qho kev ua neej kiag li! Vajtswv cov lus no ua rau kuv tu siab heev: “Rau cov uas yeej tsis muaj lub siab ncaj ib qho me me rau Kuv rau lub sij hawm muaj kev txom nyem loj no hlo li, Kuv yuav tsis ua siab hlub tshua ntxiv lawm, rau qhov Kuv txoj kev hlub tshua no tsuas rub tau ntev npaum li no xwb. Ntxiv ntawd mus, Kuv yeej tsis muaj kev nyiam ib qho hlo li rau cov uas tau ntxeev siab ib zaug rau Kuv lawm, Kuv haj yam tsis nyiam ua ke nrog cov uas tau muab lawv cov phooj ywg txoj kev ntshaw muag tawm. Qhov no yog Kuv tus moj yam, tsis hais tus neeg ntawd yuav yog leej twg los xij. Kuv yuav tsum tau qhia qhov no rau nej: Tus uas tau tsoo Kuv lub siab kom tawg lawm ces yuav tsis tau txais kev zam ntxim los ntawm Kuv ua zaum thib ob lawm, thiab tus uas tau ua siab ncaj rau Kuv ces yuav tau nyob hauv Kuv lub siab mus ib txhis” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Npaj Txoj Kev Ua Zoo Kom Txaus Nkaus rau Koj Txoj Hau Kev Kawg). Vajtswv cov lus ntawm txoj kev txiav txim thiab kev rau txim zoo li ib rab riam uas nkaug rau hauv nruab siab, thiab ua rau kuv haj yam hais tias tim kuv lub siab, zoo li kuv tsis muaj lub meej mom mus fim Vajtswv li lawm. Kuv paub zoo hais tias Vajtswv tus moj yam mas dawb huv thiab ncaj ncees thiab tsis zam noob neej txoj kev ua txhaum li, tias Nws ntxub cov uas siv cov kwv tij thiab cov nkauj muam los tiv thaiv lawv tus kheej, thiab cov uas tsuas xav cawm lawv tus kheej xwb. Kuv tau muab tus muam ntawd muag tawm lawm, ces kuv cia li dhau los ua ib tug Yudas uas txaj muag heev li lawm. Qhov ntawd mas ua rau Vajtswv mob siab heev thiab yog qhov phem tshaj plaws rau Nws. Thaum xav txog qhov no mas zoo li muab kuv lub siab phua ua ob sab, thiab kuv pw tsis tsaug zog ib hmos nkaus li. Kuv mob siab thiab hnov muaj kev txhaum.

Tus Thawj Tub Ceev Xwm Cai tuaj rau ntawm lub tsev kaw neeg ob zaug ntxiv tuaj nug kuv seb pawg ntseeg cov nyiaj txiag nyob rau qhov twg thiab kuv tau qhia txoj moo zoo rau leej twg lawm. Muaj ib zaug, nws nqa ob tug muam cov duab tuaj rau kuv qhia seb yog leej twg, thiab ceeb toom rau kuv hais tias yog kuv tsis qhia qhov tseeb, nws yuav ua kom kuv raug kaw rau hauv tsev laj cuj. Yav dhau los, kuv tsuas xav cawm kuv tus kheej lub caj dab xwb, es kuv thiaj li tau muab tus muam ntawd muag tawm lawm thiab ua rau mob Vajtswv lub siab heev. Qhov raug rau txim thiab raug xa mus rau hauv dab teb ntawd ntshe twb tsis txaus li. Zaum no, tab txawm yog kuv raug txiav txim tua pov tseg, tab txawm yog kuv tuag los xij, kuv yeej yuav tsis qhia ib yam dab tsi ntxiv li lawm. Yog li ntawd kuv thiaj li hais kiag hais tias, “Tsis paub nkawv!” Ces tus Thawj Tub Ceev Xwm Khai thiaj li hais khov kho hais tias, “Ua tib zoo saib mas! Xav tso es mam li teb.” Kuv rov hais dua tiag tiag hais tias, “Tsis paub nkawv!” Thaum pom kuv txoj kev txiav txim siab lawm, lwm tus tub ceev xwm txawm xuas ob ncuav pias rau kuv, ua rau kuv lub ntsej muag mob kub lug. Tiam sis zaum no kuv ho kaj siab lug.

Tom qab ntawd, kuv rov tib xav txog tej laj thawj uas kuv tsis ua ntawd. Ib feem ntawm qhov ntawd mas yog kuv xav txog kuv tej kev raug ntes ntawd dhau lawm, yog li ntawd thaum tub ceev xwm tsim txom kuv thiab ua phom sij rau kuv txoj sia, kuv tso tsis tau kuv niam, cov me nyuam, thiab kuv poj niam tseg, ntshai tsam lawv yuav tsis muaj peev xwm ua neej mus ntxiv yog kuv tuag lawm, tsis muaj peev xwm tiv tej lus xaiv lus ncua ntawd. Kuv ntxeev siab rau Vajtswv thiab muab tus muam ntawd muag tawm vim kuv tej kev xav txog lub cev nqaij daim tawv xwb, thiab dhau los ua ib tug Yudas uas ntxeev siab, uas txaj muag tshaj plaws li. Kuv yeej tsis muaj txhua yam kev ua neej tiag tiag li. Tseeb tiag, kuv tsev neeg txoj hmoo yog nyob tag nrho rau hauv Vajtswv ob txhais tes lawm, thiab txawm lawv yuav raug kev tsim txom thiab kev mob hauv lub neej txoj sia ntau npaum li cas los xij Vajtswv twb txiav txim siab rau tej ntawd lawm. Tab txawm yog kuv tsis tuag es kuv tuaj nyeem nyob rau ntawm lawv ib sab los, kuv yeej tsis muaj ib txoj hau kev los hloov pauv tau qhov uas lawv yeej yuav raug kev txom nyem li. Kuv tsis pom qhov no es kuv thiaj li raug kuv tej kev xav tswj—nws yog ib qho ruam kawg li. Hos lwm kis ntawm qhov no ces yog qhov hais tias kuv tsis to taub tag nrho qhov tseem ceeb ntawm txoj kev tuag. Kuv tsis muaj peev xwm tso lub neej txoj sia tseg, uas txhais tau hais tias kuv tsis muaj txoj tseem tseem kev ntseeg Vajtswv ib qho me me li. Thaum kuv raug tsim txom sab heev tau nees nkaum hnub lawm, qhov uas kuv feeb meej ntawd txawm feeb tsis meej zuj zus, kuv ua pa nyuaj nyuaj, thiab kuv mloog zoo li kuv tuag thaum twg los tsis paub li lawm. Kuv ntshai heev, ntshai tsam kuv lub sij hawm twb los txog lawm. Kuv xav txog tag nrho cov neeg dawb huv uas nyob rau txhua txhua tiam uas ua hauj lwm los tshaj tawm tus Tswv txoj moo zoo. Ib txhia raug xuas pob zeb ntaus tuag, ib txhia raug txiav caj dab, ib txhia raug ntsia rau saum tus ntoo khaub lig. Lawv txhua tus puav leej raug tsim txom txhawm txoj kev ncaj ncees thiab lawv txoj kev tuag puav leej yog tej lus tim khawv txog txoj kev kov yeej Ntxwgnyoog, uas ua rau Ntxwgnyoog poob ntsej muag, thiab ua rau Vajtswv nco txog lawv. Lawv cev nqaij daim tawv tuag, tiam sis lawv tus ntsujplig nyob rau hauv Vajtswv ob txhais tes lawm. Kuv xav txog qhov Tswv Yexus hais tias, “Rau qhov leej twg los xij uas yuav cawm nws txoj sia ces yuav plam txoj sia: thiab leej twg los xij uas yuav plam nws txoj sia rau Kuv ces yuav nrhiav tau txoj sia” (Mathai 16:25). Kuv raug ntes thiab raug tsim txom vim yog kuv txoj kev ntseeg, uas yog raug kev tsim txom txhawm rau txoj kev ncaj ncees. Yog tub ceev xwm tau ntaus kuv mus kom txog ntua qhov uas tuag tes tuag taw los sis tuag kiag lawm, qhov ntawd yuav yog ib qho uas muaj yeej koob heev. Thaum xav li no ua rau kuv muaj ib txoj kev kaj siab tiag tiag, ces kuv thiaj li txiav txim siab hais tias tom qab ntawd txawm kuv yuav raug kev txom nyem npaum li cas, tab txawm yog kuv yuav tsum tau muab kuv txoj sia rau qhov ntawd kiag los xij, kuv yuav ua tim nkawv rau Vajtswv los txhiv kuv txoj kev ua txhaum yav dhau los, thiab yeej yuav tsis ua neej txaj muag zoo li no txuas mus ntxiv lawm.

Thaum lub Ib Hlis Ntuj yuav luag tag uas xyoo 2003 los txog ntawd, kuv twb raug ntes yuav luag tau li ob lub hli lawm. Kuv poob tshaj li 30 phaus lawm, thiab thaum lawv cia cov neeg raug txim tawm mus sab nraud kom tau cua me ntsis ntawd, kuv tsuas ncig tau ob peb lwm ntawm qab khav ces kuv huas pa yuav lawm xwb. Kuv mas qaug qheb heev li ces cov nom tswv thiaj li ntshai tsam kuv tuag rau hauv lawv ob txhais tes, yog li ntawd thaum kawg lawv thiaj li txiav txim rau kuv 18 lub hli uas raug kaw nyob rau sab nraum tsev laj cuj xwb. Tom qab kuv tawm lawm, kuv yuav tsum tau hu rau Qhov Chaw Ua Hauj Lwm Saib Xyuas Kev Ruaj Ntseg Rau Pej Xeem ob zaug tuaj ib lub hlis thiab qhia txog kuv tej chaw nyob, thiab qhia rau lawv txog kuv txoj kev xav txhua txhua peb lub hlis twg. Tom qab kuv mus txog tsev lawm, kuv txhua tsev neeg uas tsis ntseeg thiab cov phooj ywg tuaj ua pab ua pawg tuaj tawm tsam kuv thiab cem kuv. Qhov ntawd mas phem heev li. Nyob rau hauv tsev laj cuj kuv twb raug tus zaj loj liab ploog tsim txom tshuav tuag lawm xwb, es tam sim no uas kuv rov qab los txog tsev lawm los kuv tseem yuav tsum tau zam kuv tsev neeg tej kev to taub yuam kev thiab. Yam uas kuv ua tau ces yog nqos lub tshuaj iab iab ntawd xwb. Tom qab ntawd, kuv mam li paub hais tias tom qab kuv raug ntes lawm, tub ceev xwm tau tuaj tshawb kuv lub tsev thiab lawv dag kuv tsev neeg hais tias kuv tau tawm mus koom tes rau tej kev dag nyiaj dag txiaj kom tau nyiaj lawm. Kuv npau taws heev. Tub ceev xwm ntes thiab tsim txom kuv, yuam kuv mus ua ib tug Yudas thiab muab ib tug muam muag tawm lawm, haj tseem hais tej lus dag los ua kom muaj teeb meem thiab ua rau kuv tsev neeg tsis lees paub kuv thiab. Tag nrho txhua yam ntawm kuv tus kheej ntxub Pawg nyuag dab Koom Tsham ntawd tshaj plaws li!

Tsis ntev tom qab ntawd ces tub ceev xwm rov qab tuaj raws kuv qab dua lawm thiab, yog li ntawd kuv yuav tsum tau khiav. Kuv dhau los ua tus neeg uas lawv xav ntes tiam sis khiav nkaum lawm. Kuv yuav tsum siv tej npe cuav los ua tej hauj lwm txawv txawv, muaj tsev tiam sis kuv rov qab los tsis tau li lawm. Kuv kuj tsis muaj kev sib txuas lus nrog rau pawg ntseeg li lawm thiab. Qhov raug tub ceev xwm caum, raug kuv tsev neeg tsis kam txais yuav, thiab haj tseem ua neej tsis tau li ib lub neej ntawm pawg ntseeg lawm thiab mas yog ib qho ua rau kuv mob siab heev. Qhov xwm txheej uas ua ib tug Yudas thiab muab tus muam ntawd muag tawm mas zoo li ib lub cim nyob rau hauv kuv lub siab. Kuv pheej xav zoo li tias kuv tau ua ib qho kev txhaum uas yeej zam tsis tau txim rau li lawm, tias kuv txoj kev ntseeg twb los txog qhov kawg lawm thiab kuv yuav tsis muaj ib lub hwv tsam uas yuav dim ntxiv li lawm. Tej kev xav no ua rau kuv muaj kev txom nyem thiab hnov tsis muaj zog li.

Kuv rov qab muaj kev sib txuas lus nrog pawg ntseeg nyob rau lub Tsib Hlis Ntuj xyoo 2008 thiab rov qab ua ib teg dej num dua lawm. Tom qab ntawd kuv nyeem qhov no nyob rau hauv Vajtswv cov lus: “Txhua tus tib neeg uas tau raug zwm rau kev kov yeej los ntawm Vajtswv cov lus yuav muaj qhov hwj tsam txaus rau kev cawm dim; Vajtswv txoj kev cawm dim ntawm txhua tus tib neeg no yuav qhia Nws lub siab dawb zoo uas loj tshaj plaws. Hauv lwm lo lus, lawv yuav raug nthuav tawm txog lub siab ntev uas loj tshaj plaws. Tsuas yog tib neeg thim ntawm txoj kev uas tsis yog lawm rov qab los xwb, thiab tsuas yog lawv tuaj yeem hloov siab lees txim xwb, Vajtswv yuav muab ntau qhov hwj tsam rau lawv kom tau txais Nws txoj kev cawm dim” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Koj Yuav Tsum Muab Txoj Koob Hmoov ntawm Lub Meej Mom Tso Rau Ib Sab thiab Nkag Siab Txog Vajtswv Lub Siab Nyiam los Coj Kev Cawm Dim los rau Tib Neeg). “Vajtswv txoj kev coj rau txhua tus neeg mas yog saib raws li tej xwm txheej tiag ntawm tus neeg ntawd tej xwm txheej thiab keeb kwm yav dhau los rau thaum lub sij hawm ntawd, nrog rau tus neeg ntawd tej kev ua thiab tus cwj pwm thiab lawv tus yeeb yam lub ntsiab tseeb. Vajtswv yeej tsis ua txhaum rau ib tug twg li. Qhov no yog ib sab ntawm Vajtswv txoj kev ncaj ncees. Piv txwv li, Evas raug tus nab ntxias kom noj lub txiv los ntawm tsob ntoo uas paub qhov zoo qhov phem, tab sis Yehauvas tsis tau cem nws tsuas hais tias, ‘Kuv twb hais rau koj kom txhob noj lub txiv ntoo ntawd lawm, yog li ntawd vim li cas koj ho tseem noj thiab? Koj yuav tsum muaj kev thoob tsib to nrog; koj yuav tsum paub tias tus nab tsuas hais lus los ntxias koj xwb.’ Yehauvas tsis tau cem Evas li ntawd. Vim tib neeg yog tej uas Vajtswv tsim tawm los, Nws paub tias lawv tej uas muaj thaum nruab thiab los lawm ntawd yog dab tsi thiab tej uas muaj thaum nruab thiab los lawm ntawd muaj peev xwm ua tau dab tsi, tib neeg muaj peev xwm tswj lawv tus kheej mus txog theem twg, thiab tib neeg mus tau deb npaum li cas xwb. Vajtswv paub tag nrho tej no meej heev. Vajtswv txoj kev coj rau ib tug neeg mas tsis yooj yim npaum li tib neeg xav. Thaum Nws tus cwj pwm coj rau ib tug neeg yog ib qho kev ntxub los sis kev tsis nyiam, los sis thaum hais txog qhov tus neeg no hais rau ib qho xwm txheej twg, Nws muaj kev to taub zoo txog lawv tus yam ntxwv. Qhov no vim yog Vajtswv tshawb xyuas tib neeg lub siab thiab lub ntsiab tseeb kom meej. Tib neeg ib txwm xav tias, ‘Vajtswv tsuas muaj Nws lub hwj huaj qaum ntuj xwb. Nws ncaj ncees thiab Nws yeej tsis pub tib neeg ua txhaum tau li. Nws tsis xav txog tib neeg tej kev nyuaj los sis muab Nws tus kheej tso rau hauv tib neeg qhov chaw. Yog ib tug neeg tawm tsam Vajtswv, Nws yuav rau txim rau lawv.’ Tsis yog li ntawd kiag li. Yog tias qhov ntawd yog qhov uas ib tug neeg twg to taub Nws txoj kev ncaj ncees, Nws tes hauj lwm, thiab Nws txoj kev saib tib neeg, ces lawv ua yuam kev loj heev lawm. Vajtswv txoj kev txiav txim siab rau txhua tus neeg qhov tshwm sim los mas tsis saib raws li tib neeg tej kev xav phem thiab tej kev xav hauv nruab siab, tab sis yog raws li Vajtswv tus moj yam ncaj ncees. Nws yuav pauj rau txhua tus neeg raws li tej uas lawv tau ua lawm. Vajtswv ncaj ncees, thiab tsis ntev xwb, Nws yeej yuav ua kom txhua tus tib neeg ntseeg tag nrho xwb xwb li” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Qhov nyeem cov lus uas los ntawm Vajtswv los no ua rau kuv tauv tsis tau kuv lub kua muag li. Kuv zoo li ib tug me nyuam uas tau ua yuam kev loj heev thiab tsis tau luag rov qab mus tsev li lawm, ces thaum kawg rov qab mus rau ntawm nws niam lub xub ntiag tom qab uas ua loj leeb nyob rau hauv lub ntiaj teb tau ntau xyoo lawm. Kuv hnov txoj kev zoo ntawm Vajtswv lub ntsiab tseeb tiag tiag li. Kuv muab tus muam ntawd muag tawm thiab ntxeev siab rau Vajtswv, yog li ntawd kuv tsim nyog raug rau txim, tiam sis Vajtswv tsis ua rau kuv raws li kuv txoj kev ua txhaum. Nws muab ib lub hwv tsam rau kuv los lees txim hloov dua siab tshiab. Kuv pom tau hais tias Vajtswv tus moj yam tsis yog tsuas muaj kev txiav txim thiab kev npau taws xwb, tiam sis kuj muaj kev hlub tshua thiab kev zam thiab. Vajtswv coj zoo tiag tiag nyob rau hauv Nws txoj kev ua rau tib neeg. Nws tsis txwv lawv raws li lawv tej kev ua txhaum, tiam sis yog raws li tus yeeb yam thiab lub ntsiab ntawm lawv tej kev ua, thiab lawv lub siab nyob rau lub sij hawm ntawd xwb. Yog ib tug neeg twg ntxeev siab vim noob neej txoj kev qaug zog, tiam sis lawv tsis tau tsis lees paub thiab ntxeev siab rau Vajtswv los ntawm lawv lub siab thiab tom qab qhov kev ua txhaum ntawd lawm lawv tseem lees txim hloov dua siab tshiab tau rau Vajtswv, ces Vajtswv yeej tseem zam txim tau rau lawv thiab cia lawv muaj dua ib lub hwv tsam ntxiv. Kuv pom hais tias Vajtswv tus moj yam mas ncaj ncees npaum li cas. Vajtswv ntxub tib neeg ntiaj teb txoj kev qias vuab tsuab thiab tej kev ntxeev siab, tiam sis Nws tseem ua txhua yam li Nws ua tau los cawm peb thiab. Qhov no ua rau kuv ris Vajtswv txiaj ntsim thiab kuv haj yam mloog zoo li kuv tshuav Nws nqi ntxiv. Kuv tau ua rau Vajtswv mob siab ntau dhau lawm mas kuv xav xuas ncuav pias rau kuv tus kheej heev. Kuv txiav txim siab hais tias txawm yam yuav tshwm sim rau kuv zoo li cas los xij, kuv yuav saib lub hwv tsam uas los ntawm Vajtswv los no kom muaj nqis, nrhiav qhov tseeb, thiab ua kuv tes dej num los pauj Vajtswv txoj kev hlub.

Tom qab raug Tsoom Fwv Koom Tsham Suav txoj kev tsim txom uas phem heev lawm, kuv pom nws lub ntsiab tseeb uas phem thiab lub ntsej muag phem uas ntxub thiab tawm tsam Vajtswv txhua kis li lawm. Kuv ntxub Ntxwgnyoog tshaj plaws li lawm! Kuv tus kheej kuj tau ntsib tau pom hais tias Vajtswv tes hauj lwm uas los cawm tib neeg ntiaj teb mas muaj qab hau thiab ntse heev—Nws siv tus zaj loj liab ploog los ua kom kuv txoj kev ntseeg thiab kev mob siab zoo tiav log, ua rau kuv muaj qee qhov kev to taub txog Vajtswv tus moj yam ncaj ncees thiab pom qhov muaj cai thiab lub hwj chim ntawm Vajtswv cov lus. Tag nrho qhov kev ntsib kev pom no tau qhia kuv hais tias kev nyuaj thiab tej kev sim siab yog Vajtswv txoj koob hmoov rau kuv, thiab qhov ntawd kuj yog Nws txoj kev hlub thiab kev cawm dim thiab! Txawm kuv yuav ntsib hom kev caij tsuj los sis tej kev nyuaj dab tsi nyob rau yav tom ntej los xij, kuv twb txiav txim siab los raws Vajtswv qab kom mus txog ntua thaum kawg lawm!