Nqe Lus Uas Xaiv Tawm Los 85

Nej tej lus thov Vajtswv puas muaj tej hauv paus ntsiab lus? Nej thov Vajtswv thaum raug tej xwm txheej zoo li cas? Tej ntsiab lus ntawm nej cov lus thov yog dab tsi? Tib neeg feem coob thov Vajtswv thaum lawv raug kev txom nyem hais tias: “Au Vajtswv, kuv raug kev txom nyem, kuv thov Koj pab kuv.” Qhov ntawd yog thawj qhov uas lawv hais. Qhov pheej hais tias koj raug kev txom nyem thaum koj thov Vajtswv ntawd puas yog ib qho zoo? (Tsis yog.) Vim li cas thiaj li tsis zoo? Thiab yog tias tsis zoo no, vim li cas nej tseem thov li ntawd? Qhov no qhia tau hais tias nej tsis paub thov Vajtswv, los sis tsis paub tias thaum ib tug neeg los rau ntawm Vajtswv xub lub ntiag lawm yuav tsum hais thiab nrhiav dab tsi. Yam uas nej paub ces yog thaum nej raug kev txom nyem me ntsis thiab tu siab lawm ces thov Vajtswv hais tias, “Au Vajtswv, kuv raug kev txom nyem! Kuv nyuaj siab heev, thov pab kuv.” Nov yog tus neeg uas nyuam qhuav pib ntseeg Vajtswv tej lus thov xwb. Nov yog ib tug me nyuam mos tej lus thov. Yog ib tug neeg twg ntseeg Vajtswv tau ntau xyoo lawm es tseem thov li no xwb, mas yog ib qho teeb meem loj heev. Qhov no qhia tau hais tias lawv tseem yog ib tug me nyuam mos uas tsis tau loj hlob hauv lub neej. Txhua tus uas ntseeg Vajtswv tiam sis tsis paub tias yuav ua Nws tes hauj lwm li cas ces yog cov neeg uas tsis tau loj hlob nyob rau hauv lub neej thiab yog cov uas tseem tsis tau nkag mus rau hauv txoj kev ntseeg Vajtswv uas yog. Yog tib neeg yog ib tug tib neeg uas txawj xav tiag tiag, mas lawv yuav tsum xav seb yuav ua Vajtswv tes hauj lwm li cas, nrog rau qhov yuav noj thiab yuav haus Nws tej lus li cas, thiab yuav ua thiab xyaum ua tej lus ntawd li cas. Vajtswv tej lus mus txog qhov twg, tib neeg yuav tsum ua kom mus txog qhov ntawd; tib neeg yuav tsum ua raws li Nws tej lus kom mus txog qhov chaw ntawd. Yog tib neeg tuaj yeem xyaum ua thiab ua raws li Vajtswv tej lus li no, ces lawv yuav ntsib teeb meem ntau yam, thiab lawv yuav cia li nrhiav qhov tseeb los ntawm Vajtswv los daws tej teeb meem ntawd xwb. Yog tib neeg pheej thov Vajtswv thiab nrhiav qhov tseeb los daws lawv tej yam nyuaj li no, ces yog lawv tab tom ua Vajtswv tes hauj lwm ntag. Qhov pheej daws lawv tej teeb meem ntawd, yuav ua rau lawv tej kev nyuaj tsawg zuj zus, thiab lawv yuav maj mam to taub qhov tseeb, thiab tau txais kev paub txog Vajtswv tes hauj lwm. Lawv yuav paub tias lawv yuav tsum koom tes nrog Vajtswv li cas, nrog rau qhov yuav zwm rau Nws tes hauj lwm li cas. Qhov ntawd yog qhov txhais hais tias nkag mus rau hauv txoj kev ntseeg Vajtswv uas yog. Qee tus neeg uas ntseeg Vajtswv tsis paub tias yuav ua Nws tes hauj lwm li cas. Lawv pheej feeb tsis meej—lawv nyeem Vajtswv tej lus, tiam sis tsis ua tib zoo xav txog tej lus ntawd; lawv mloog tej lus qhuab qhia, tiam sis tsis kawm; ces thaum muaj tej yam los raug rau lawv, lawv tsis paub nrhiav qhov tseeb, thiab lawv tsis paub tias yuav to taub Vajtswv tej kev npaj siab li cas, thiab lawv tsis paub tus cwj pwm uas lawv yuav tsum coj los sis lawv yuav tsum koom tes li cas. Lawv tsis to taub tej no. Lawv yog cov neeg uas tsis paub txog tej no, thiab lawv tsis muaj kev to taub sab ntsuj plig. Txawm muaj teeb meem dab tsi los raug rau lawv, los lawv yeej tsis thov Vajtswv thiab nrhiav qhov tseeb li, thiab hauv lawv nruab siab lawv yeej tsis vam khom rau Vajtswv los sis cia siab rau Vajtswv tiag tiag li. Lawv tsuas hais tias, “Au Vajtswv, kuv raug kev txom nyem. Au Vajtswv, kuv raug kev txom nyem.” Lawv pheej hais lo lus no mus txog rau thaum tib neeg dhuav thiab qias thaum hnov lo lus no. Nej feem coob thov li ntawd, puas yog? (Yog.) Los ntawm tib neeg tej lus thov, yus pom tau hais tias lawv txaus hlub npaum li cas! Koj tsuas nrhiav Vajtswv thaum koj raug kev txom nyem xwb. Thaum koj tsis raug kev txom nyem los sis tsis muaj teeb meem dab tsi, koj tsis xav tau Vajtswv, thiab koj tsis xav vam khom rau Nws li. Koj tsuas xav ua li koj nyiam xwb. Tsis yog koj zoo li no lod? (Yog.) Thaum tib neeg feem coob raug txoj kev txiav txim thiab kev rau txim ntawm Vajtswv tej lus, thiab lawv raug tej lus ntawd qhuab qhia, thiab tom qab ntawd lawv thim xav txog lawv tus kheej thiab ua txhua yam kom paub lawv tus kheej ntawd, lawv thov li cas? Lawv sawv daws hais tib yam nkaus xwb uas hais tias, “Au Vajtswv, kuv raug kev txom nyem. Au Vajtswv, kuv raug kev txom nyem.” Cov lus ntawd tsis ua rau koj hnov qias lod? (Ua.) Nyob rau hauv tib neeg lub siab mas qhuav nkig nkuav xwb—cas lawv yuav txaus hlub ua luaj! Txhua zaus lawv thov Vajtswv, lawv hais tib co lus qub uas yooj yim xwb, tsis muaj ib lo lus uas tawm hauv lub siab los li. Lawv tsis nrhiav qhov tseeb thiab lawv tsis xav daws lawv tej teeb meem. Hom kev thov ntawd yog hom kev thov zoo li cas? Qhov teeb meem yog dab tsi thaum tib neeg hais tsis tau tej lus tawm hauv lub siab tuaj thaum thov Vajtswv thiab tsis paub tias tej uas lawv tu ncua ntawd yog dab tsi? Thaum koj los rau ntawm Vajtswv lub xub ntiag koj tsis tim tsum kom Nws qhia koj txog ib yam dab tsi li lod? Koj tsis tim tsum kev ntseeg, los sis lub zog, los sis Vajtswv ua koj tus txhawb tom qab lod? Koj puas haj yam tsis tim tsum kom Vajtswv qhia koj thiab coj koj kev mus taug txoj kev tom ntej? Koj tsis tim tsum kom to taub qhov tseeb los daws tej teeb meem uas muaj nyob rau hauv koj lod? Koj tsis tim tsum Vajtswv txoj kev qhuab ntuas thiab kev rau txim, los sis Nws txoj kev coj kev lod? Tib yam uas koj tim tsum ntawm Vajtswv puas yog kom Nws pab koj dim ntawm koj txoj kev txom nyem xwb? Koj yeej tsis hnov hauv koj lub siab tias koj tu ncua ntau yam tiag tiag li lod? Qhov tsis paub thov Vajtswv tsis yog ib qho teeb meem me; qhov ntawd qhia tau hais tias koj tsis paub yuav ua Vajtswv tes hauj lwm li cas, qhov ntawd qhia tau hais tias koj tsis tau coj Vajtswv tej lus los siv rau hauv lub neej tiag tiag, thiab koj tsis tshua muaj kev nrog Vajtswv sib txuas lus tiag tiag nyob rau hauv koj lub neej. Koj yeej tsis tau tsim kom muaj hom kev sib raug zoo nrog Vajtswv uas yuav tsum muaj nyob rau ntawm Vajtswv thiab cov raws Nws qab los sis nyob rau ntawm cov uas raug tsim tawm los thiab tus Tswv Tsim lawv. Thaum ntsib ib qho teeb meem, koj ua raws li koj tus kheej tej kev kwv yees, tej kev xav phem, tej kev xav, txoj kev paub, tej txuj ci thiab peev xwm, thiab tej moj yam qias vuab tsuab. Koj tsis muaj dab tsi cuam tshuam rau Vajtswv li, yog li ntawd thaum koj los rau ntawm Nws lub xub ntiag, feem ntau koj thiaj li tsis muaj dab tsi hais. Nov yog qhov uas txaus tu siab tshaj plaws ntawm cov tib neeg uas ntseeg Vajtswv! Yog ib qho uas txaus hlub heev! Nyob rau hauv lawv tus ntsujplig, tib neeg qhuav nkig nkuav thiab loog tag lawm. Lawv tsis hnov dab tsi li lawm thaum hais txog sab ntsujplig hauv lub neej, thiab lawv tsis muaj kev to taub txog tej ntawd li lawm, yog li ntawd thaum lawv los rau ntawm Vajtswv lub xub ntiag, lawv thiaj li tsis muaj dab tsi hais. Txawm koj yuav pom tias koj tus kheej nyob rau qhov xwm txheej dab tsi, txawm koj yuav ntsib kev kub ntxhov dab tsi, thiab txawm koj yuav ntsib kev txom nyem dab tsi los xij, yog koj hais tsis tau lus rau ntawm Vajtswv lub xub ntiag, ces koj txoj kev ntseeg Nws tsis yog tseem muaj lus nug lod? Qhov no tsis yog qhov uas txaus hlub tib neeg heev lod?

Vim li cas tib neeg thiaj li yuav tsum thov Vajtswv? Kev thov Vajtswv thiaj li yog tib txoj kev uas tib neeg hwm Vajtswv thiab vam khom rau Nws xwb. Yog tsis muaj kev thov Vajtswv, ces tsis tas nug txog tej no li; kev vam khom rau Vajtswv thiab kev hwm Nws yog ua los ntawm kev thov Vajtswv. Tus uas ntseeg Vajtswv tiam sis tsis thov Nws li puas tau txais Vajntsujplig Dawb Huv txoj kev qhuab qhia thiab kev qhia kom paub qhov tseeb? Lawv puas tau txais Vajtswv tes hauj lwm thiab txoj kev coj kev? Yog koj tsis muab koj tej kev nyuaj tso rau Vajtswv thiab tsis thov Nws thiab tsis nrhiav qhov tseeb, Nws yuav daws tej kev nyuaj ntawd li cas? Nws yuav coj koj kev los raws Nws qab mus rau txoj kev tom ntej li cas? Nws yuav cawm koj kom dim ntawm koj tus moj yam qias vuab tsuab li cas? Yeej hais tau hais tias kev ntseeg Vajtswv uas tsis muaj kev thov Vajtswv ces tsis yog kev ntseeg Vajtswv tiag tiag. Txoj kev sib raug zoo uas ib txwm muaj nyob rau ntawm tib neeg thiab Vajtswv ntawd yuav tsum tau tsim los ntawm kev thov Vajtswv, thiab yuav tsum tau tuav rawv los ntawm kev thov Vajtswv. Kev thov Vajtswv yog lub cim ntawm tib neeg txoj kev ntseeg Vajtswv; qhov tib neeg puas thov Vajtswv tiag tiag ntawd thiaj li yog tus qauv uas los sim seb tus tib neeg ntawd txoj kev nrog Vajtswv sib raug zoo puas zoo li ib txwm muaj xwb. Tsuav yog tib neeg hais tej lus uas tawm hauv lub siab tuaj thaum thov Vajtswv, thiab tsuav yog tib neeg tuaj yeem nrhiav qhov tseeb thaum thov Vajtswv xwb, ces lawv yuav tau txais Vajntsujplig Dawb Huv tes hauj lwm, thiab qhov no qhia tau hais tias lawv muaj ib txoj kev nrog Vajtswv sib raug zoo uas ib txwm muaj. Yog tib neeg tsis tshua thov Vajtswv thiab hais tsis tau tej lus tawm hauv lub siab tuaj, yog lawv pheej zais rau Vajtswv, ces qhov ntawd qhia tau hais tias lawv txoj kev nrog Vajtswv sib raug zoo tsis yog li ib txwm muaj. Thiab yog tib neeg tsis thov Vajtswv kiag li, ces qhov ntawd qhia tau hais tias lawv tsis muaj kev nrog Vajtswv sib raug zoo li. Yog tib neeg txawj thov Vajtswv thiab mus raws li Vajtswv tej kev npaj siab, ces lawv yuav muaj peev xwm zwm rau Nws thiab lawv yog tus uas Vajtswv hlub; cov uas pheej thov Vajtswv tiag tiag yog cov tib neeg coj ncaj thiab muaj txoj kev hlub Vajtswv. Yog li ntawd, txhua tus uas ntseeg Vajtswv, tiam sis tsis thov Nws ntawd, tsis muaj txoj nrog Vajtswv sib raug zoo uas ib txwm muaj. Lawv sawv daws nyob deb ntawm Vajtswv, thiab lawv yog cov uas ntxeev siab thiab tawm tsam Nws. Cov tib neeg uas tsis thov Vajtswv feem coob yog cov uas tsis nyiam qhov tseeb thiab cov uas tsis nrhiav qhov tseeb, thiab cov uas tsis nyiam qhov tseeb thiab tsis nrhiav qhov tseeb ntawd thov tsis tau Vajtswv tiag tiag. Txawm lawv muaj tej kev nyuaj dab tsi los, lawv tsis thov Vajtswv, thiab thaum lawv thov Vajtswv, lawv tsuas xav siv Vajtswv los muab lawv tej kev nyuaj thiab kev txom nyem tshem tawm mus xwb. Lawv tsis quav ntsej txog Vajtswv tej kev npaj siab, thiab lawv tsis tshawb nrhiav nyob rau hauv lawv tej kev nyuaj txog tej kis ntawm qhov tseeb uas lawv tsim nyog to taub thiab nkag mus rau hauv li. Cov tib neeg zoo li no tsis ntshaw qhov tseeb thiab tsis muaj kev ntseeg Vajtswv tiag tiag—lub ntsiab tseeb mas, lawv yog cov tsis ntseeg. Yog ib tug ntseeg Vajtswv lawm, koj yuav tsum thov Vajtswv thiab nrhiav qhov tseeb nyob rau hauv txhua yam. Txawm koj yuav tsis hnov kiag tam sid tom qab thov Vajtswv tag lawm hais tias koj lub siab kaj tuaj los sis tias koj tau txais ib txoj hauv kev xyaum ua lawm los xij, tos Vajtswv, thiab thaum koj tos ntawd, nyeem Vajtswv tej lus thiab nrhiav qhov tseeb. Thaum koj noj thiab haus Vajtswv tej lus los sis mloog lus qhuab qhia thiab kev sib qhia, mob siab rau qhov muab koj tej teeb meem los ua tib zoo xav thiab nrhiav. Yog koj koom tes tiag tiag li no, tej zaum tib ntsais muag xwb koj yuav muaj kev nkag siab thaum koj tab tom xav txog Vajtswv tej lus los sis mloog lus qhuab qhia thiab kev sib qhia ntawd. Los sis tej zaum koj ntsib qee qhov teeb meem, es qhov teeb meem ntawd txhawb koj lub siab, ua rau koj nrhiav lo lus teb los teb lo lus nug uas koj tab tom nrhiav lus teb ntawd. Qhov no tsis yog Vajtswv txoj kev coj kev thiab Nws txoj kev npaj lov? Yog li ntawd, kev thov Vajtswv tiag tiag Vajtswv yeej yuav teb, tiam sis qhov Vajtswv yuav teb no tsis yog ib yam uas koj yuav tau txais kiag tom qab thov Vajtswv tag lawm. Qhov ntawd siv sij hawm, thiab tib neeg yuav tsum koom tes thiab xyaum ua. Koj hais tsis tau hais tias thaum twg Vajntsujplig Dawb Huv mam li qhia koj thiab teb koj. Nov yog tus txheej txheem ntawm txoj kev nrhiav qhov tseeb thiab kev to taub qhov tseeb, thiab yog txoj kev uas tib neeg loj hlob nyob rau hauv lub neej. Tom qab ntseeg Vajtswv tau ntau xyoo lawm, nej tseem yuav tsum tau rov pib kawm thov Vajtswv dua tag nrho thiab. Nej tseem tsis tau paub thov Vajtswv, yog li ntawd thaum nej ntsib ib qho teeb meem, nej tsuas yog qw tej lo thiab txiav txim siab los sis yws rau Vajtswv thiab hais txog tej uas nej tsis txaus siab, hais qhov nej txom nyem li cas, los sis yog tsis hais li ntawd ces hais qhov nej tus kheej tsim nyog thiab daws nej tus kheej xwb. Tej no yog tej uas muaj nyob rau hauv nej lub siab, tos nej nim nkag mus rau hauv qhov tseeb qeeb ua luaj. Nej tab tom mus yuam kev lawm. Nej tsis paub tias yuav tshawb nrhiav qhov tseeb li cas, thiab qhov hais tias yog ntseeg Vajtswv li no ces txaus rau nej los txais txoj kev cawm dim lawm ntawd mas hais nyuaj.

Nqe Lus Uas Xaiv Tawm Los 87

Yog hais tias, kiag tam sim no es nej tseem tsis tau paub qhov kev xav thiab tej hauv paus ntsiab lus ntawm txoj kev ua ib tug neeg dawb huv thiab, ces qhov no ua pov thawj qhia tias nej txoj kev to taub lub neej txoj sia ntawd tseem ntiav dhau lawm, thiab qhia tias nej tseem tsis tau to taub qhov tseeb. Hauv nej tus cwj pwm thiab txoj kev coj ua uas ib txwm muaj, thiab qhov chaw uas nej nyob txhua hnub ntawd, nej yuav tsum ua tib zoo xav, ib leeg qhia ib leeg, ib leeg txhawb ib leeg lub zog, ib leeg hais rau ib leeg kom nco, ib leeg pab thiab saib xyuas ib leeg, thiab ib leeg txhawb thiab pub rau ib leeg. Yuav tsum muaj tej hauv paus ntsiab lus rau cov kwv tij thiab cov muam tias yuav sib txuas lus li cas. Tsis txhob pheej saib ntsoov rau lwm tus tej kev ua txhaum xwb, tiam sis koj yuav tsum tshuaj xyuas koj tus kheej tsis tseg, tom qab ntawd lees rau lwm tus tib neeg tias koj tau ua dab tsi lawm es ua rau muaj kev cuam tshuam los sis ua phem rau lawv, ces xyaum qhib koj lub siab es sib qhia. Ua li no es nej thiaj li muaj kev sib to taub. Tsis tas li ntawd, txawm tias muaj dab tsi los raug koj los xij, koj yuav tsum saib txhua yam kom mus raws li Vajtswv cov lus. Yog tias tib neeg muaj peev xwm to taub qhov tseeb tej hauv paus ntsiab lus thiab nrhiav ib txoj kev xyaum ua, ces lawv yuav koom tau ua ib lub siab lub ntsws xwb, thiab txoj kev sib raug zoo ntawm cov kwv tij thiab cov muam yuav zoo li qhov ib txwm muaj, lawv yuav tsis tsis quav ntsej, tsis tsis kub siab, thiab tsis siab phem li cov tsis ntseeg Vajtswv, ces lawv yuav tso lawv txoj kev xav txog txoj kev tsis sib ntseeg siab tseg. Cov kwv tij thiab cov muam ib leeg yuav sib raug zoo rau ib leeg dua; lawv ib leeg yuav muaj peev xwm txhawb thiab hlub ib leeg; yuav muaj txoj kev txawj xav zoo nyob rau hauv lawv lub siab, thiab lawv ib leeg yuav muaj peev xwm zam txim rau ib leeg thiab ib leeg muaj kev khuv leej rau ib leeg, thiab lawv ib leeg yuav txhawb thiab pab ib leeg, ib leeg tsis cais ib leeg, ib leeg tsis khib ib leeg, tsis muab lawv tus kheej piv rau lwm tus, thiab ib leeg tsis nyiag ntshis sib tw thiab ua tsis ncaj rau ib leeg. Tib neeg yuav ua li cas ua tau lawv tej dej num yog tias lawv zoo li cov tsis ntseeg Vajtswv xwb? Qhov no tsis yog yuav cuam tshuam rau lawv txoj kev to taub lub neej txoj sia xwb, tab sis nws kuj yuav phom sij thiab raug rau lwm tus thiab. Piv txwv li, tej zaum koj yuav npau taws thaum muaj neeg saib koj yuam kev, los sis thaum lawv hais ib yam dab tsi uas tsis raws li koj lub siab nyiam, thiab thaum lwm tus ua ib yam dab tsi uas ua rau koj xam tsis pom qhov sib txawv ntawm koj tus kheej, ces tej zaum koj yuav chim siab rau lawv, thiab xeeb txob thiab tsis zoo siab, thiab xav ntsoov txoj kev kho koj lub koob npe kom rov zoo li qub. Tshwj xeeb tshaj mas yog tej poj niam thiab tej tib neeg hluas uas tsis muaj peev xwm kov yeej qhov no. Lawv ib txwm tsis kaj siab txog tej kev sib cav thiab kev tsis pom zoo me me, ua raws siab nyiam, thiab ua lub neej muaj tus yam ntxwv tsis zoo. Lawv tsis kam thov Vajtswv los sis noj thiab haus Vajtswv txoj lus, uas muaj feem xyuam ntsig txog lawv txoj kev to taub lub neej txoj sia. Thaum tib neeg ua neej nyob raws li lawv tej moj yam qias vuab tsuab lawm mas, qhov ntawd yuav nyuaj heev rau lawv los muaj kev kaj siab rau ntawm Vajtswv lub xub ntiag, thiab qhov ntawd mas nyuaj heev rau lawv los xyaum ua raws li qhov tseeb thiab ua neej raws li Vajtswv tej lus. Yuav kom tau los nyob rau ntawm Vajtswv lub xub ntiag mas, koj yuav tsum xub kawm kom paub tias yuav xav txog koj tus kheej thiab paub koj tus kheej li cas, thiab thov Vajtswv tiag tiag, ces tom qab ntawd koj yuav tsum kawm kom paub tias yuav koom nrog cov kwv tij thiab cov muam li cas. Nej ib leeg yuav tsum ua siab ntev rau ib leeg, ib leeg khuv leej ib leeg, thiab muaj peev xwm saib seb lwm tus lub zog thiab qhov zoo yog dab tsi—koj yuav tsum kawm kom paub lees txais lwm tus txoj kev xav thiab tej yam uas yog. Tsis txhob ua li koj tus kheej lub siab nyiam xwb, tsis txhob muaj qhov lub siab xav tau thiab kev ntshaw es pheej xav tias koj zoo dua lwm tus, thiab tseem xav tias koj tus kheej yog ib tug neeg zoo, yuav kom lwm tus neeg ua raws li koj hais, kom mloog koj lus, hwm koj, txhawb koj nkaus xwb—qhov no yog kev tsis ncaj ncees. Yog hais tias tsis kho yus tus moj yam khav theeb, ces qhov no yuav muaj feem nrog rau qhov lub siab xav tau thiab kev ntshaw, qhov no yuav ua rau muaj kev tsis ncaj ncees tau yooj yim. Yog li ntawd, cov uas tsis tuaj yeem lees txais qhov tseeb thiab tsis xav txog lawv tus kheej thiab tsis paub lawv tus kheej ntawd mas phom sij heev li. Lawv ib txwm muaj qhov lub siab xav tau, ib txwm xav ua neeg zoo thiab neeg tshaj lij xwb—qhov no yog kev tsis ncaj ncees, qhov no yog kev khav theeb heev. Lawv tsis muaj qab hau li, lawv tsis yog cov neeg zoo, lawv yog cov neeg tsis ncaj ncees, thiab lawv yog cov niag dab xwb. Vim raug tej moj yam khav theeb tswj lawm, ces nyob hauv lawv lub siab lawv thiaj li saib tsis taus lwm tus, xav tias lwm tus mas tsis tseem ceeb thiab tsis paub dab tsi li. Lawv tsis paub qhov lwm tus ua tau zoo tiam sis tsuas paub zoo txog qhov lwm tus ua tsis tau zoo xwb; nyob hauv lawv lub siab mas lawv ntxub lwm tus, ces lawv thiaj li tshaj tawm thiab saib tsis taus tej kev ua tsis tau zoo no rau txhua fab, ua rau lwm tus mob siab thiab chim siab, thiab thaum kawg ua rau lwm tus mloog lawv lus thiab mloog lawv hais, los sis kom ntshai thiab khiav nkaum lawv. Thaum muaj ib txoj kev sib raug zoo zoo li no tshwm sim los sis muaj nyob rau ntawm tib neeg lawm, qhov no puas yog qhov nej xav pom? Nej puas lees txais tau qhov ntawd? (Lees txais tsis tau.) Piv txwv tias koj loj siab dua thiab zoo nraug dua lwm tus, es ua rau qee tus neeg hwm koj. Yog li ntawd, thiaj li ua rau koj zoo siab heev rau koj tus kheej ces tom qab ntawd txawm saib tsis taus cov uas qig taub dua thiab tsis zoo nraug. Muaj hom moj yam dab tsi tshwm sim hauv qhov no? Ib txhia tib neeg mas saib cov uas tsis tshua zoo nraug, cov uas qig taub me ntsis, thiab cov uas ruam me ntsis thiab qeeb me ntsis ntawd qis qis, saib tsis taus, thiab haj tseem hais tej lus ua rov ua rais los thuam lawv thiab. Qhov saib tib neeg li no puas tsim nyog? Qhov no puas yog ib qho kev qhia tshwm ntawm txoj kev ua neeg? Yeej tsis yog kiag li. Yog li ntawd, txoj kev zoo tshaj los daws qhov xwm txheej zoo li no yog dab tsi? (Tsis txhob thuam lwm tus qhov lawv ua tsis tau zoo, thiab hwm lwm tus.) Qhov no yog ib lub hauv paus ntsiab lus. Zoo li nej muaj kev to taub txog qhov no lawm. Yog li ntawd, Vajtswv saib tib neeg zoo li cas? Vajtswv tsis quav ntsej txog tias tib neeg zoo li cas, txawm lawv yuav siab los sis qig taub los xij. Tab sis, Nws saib seb lawv lub siab puas zoo, seb lawv puas nyiam qhov tseeb, thiab seb lawv puas hlub Nws thiab zwm rau Nws xwb. Vajtswv coj Nws tus cwj pwm zoo li no rau tib neeg. Yog tias tib neeg kuj ua tau li no thiab, ces lawv yuav muaj peev xwm coj tau rau lwm tus kom ncaj, thiab ua raws li qhov tseeb cov hauv paus ntsiab lus. Ua ntej tshaj plaws, peb yuav tsum to taub Vajtswv tej kev npaj siab, thiab paub tias Vajtswv coj li cas rau tib neeg, ces peb los kuj thiaj li yuav muaj ib lub hauv paus ntsiab lus thiab txoj kev rau txoj kev coj tus cwj pwm rau lwm tus tib neeg thiab. Muab hais kom dav dav ces, tib neeg txhua tus yeej muaj lub siab hlob. Thaum lawv tau txais ob peb lo lus qhuas, ces lawv zoo siab me ntsis rau lawv tus kheej, lawv thiaj li luag thiab taug kev plim pliaj ntus xwb. Nov yog ib qho kev nthuav tawm txog Ntxwgnyoog tus moj yam. Yog tias lawv tseem txiav txim thiab saib tsis taus lwm tus thiab, ces qhov no yog hom moj yam dab tsi? Qhov no yog ib tug moj yam qias neeg, khav theeb, thiab siab phem. Yog tias tib neeg tsis paub thiab tsis pom txoj kev qias neeg ntawm txoj kev ua neej nyob nrog lawv cov moj yam qias vuab tsuab ntawd, ces yuav nyuaj rau lawv los muab cov moj yam qias vuab tsuab ntawd tso tseg, ces lawv ua tsis tau lub neej zoo li tib neeg.

Nqe Lus Uas Xaiv Tawm Los 90

Vim li cas Vajtswv thiaj cheem tsum kom tib neeg paub Nws? Vim li cas Nws thiaj cheem tsum kom tib neeg paub lawv tus kheej? Lub hom phiaj ntawm qhov paub txog yus tus kheej yog dab tsi? Qhov txiaj ntsim uas xav tau ntawd yog dab tsi? Thiab lub hom phiaj ntawm qhov paub Vajtswv yog dab tsi? Los ntawm qhov paub Vajtswv ntawd yuav ua rau tib neeg tau txais txiaj ntsim dab tsi? Nej puas tau xav txog tej lus nug no? Vajtswv siv ntau txoj hau kev los ua kom tib neeg paub lawv tus kheej. Nws tau npaj txhua qhov xwm txheej rau tib neeg los muab lawv txoj kev qias vuab tsuab qhia tshwm, es kom lawv paub lawv tus kheej txoj kev nce qib los ntawm txoj kev paub. Txawm tias yog qhov kev qhia tshwm sim ntawm Vajtswv cov lus los sis Nws txoj kev txiav txim thiab kev rau txim los, nej puas to taub tias Vajtswv lub hom phiaj loj ntawm qhov Vajtswv ua tes hauj lwm no yog dab tsi? Vajtswv lub hom phiaj loj uas ua Nws tes hauj lwm li no yog cia kom txhua tus uas paub Nws tes hauj lwm ntawd paub tias tib neeg yog dab tsi. Thiab “qhov paub tias tib neeg yog dab tsi,” qhov no cuam tshuam txog dab tsi? Nws cuam tshuam txog qhov cia kom tib neeg paub txog tias lawv yog leej twg tiag thiab paub lawv lub meej mom, lawv tes hauj lwm thiab lawv lub luag hauj lwm. Qhov ntawd txhais tau tias cia kom koj paub tias qhov ua tib neeg ntawd txhais li cas, cia kom koj to taub tias koj yog leej twg. Qhov no yog Vajtswv lub hom phiaj loj uas ua kom tib neeg paub txog lawv tus kheej. Yog li ntawd vim li cas Vajtswv thiaj li tim tsum kom tib neeg paub Nws? Qhov no yog txoj hmoov hlub tshwj xeeb uas Vajtswv muab pub rau noob neej, vim yog los ntawm qhov paub txog Vajtswv ntawd, tib neeg thiaj li to taub ntau qhov tseeb thiab pom tshab ntau cov lus zais tob. Tib neeg tau txais ntau yam los ntawm qhov paub Vajtswv. Thaum tib neeg paub Vajtswv mas, lawv kawm paub txog txoj kev ua neej raws txoj hau kev uas muaj qab hau tshaj plaws, yog li ntawd qhov ua kom tib neeg los caum txoj kev paub txog Vajtswv ntawd yog Vajtswv txoj kev hlub loj tshaj plaws, txoj koob hmoov loj tshaj plaws. Thiab Vajtswv muaj ntau txoj hau kev los ua kom tib neeg paub txog Nws, qhov tseem ceeb tshaj plaws ces yog txoj kev txiav txim thiab kev rau txim, kev coj qhia, thiab kev muab Nws cov lus. Tseeb tiag, Nws kuj ua kom tib neeg paub Nws tus moj yam los ntawm txoj kev raug txiav txim thiab kev rau txim—qhov no yog ib txoj kev luv luv ntawm qhov paub Vajtswv xwb. Dab tsi yog qhov txiaj ntsim loj uas tib neeg tau txais los ntawm qhov pom thiab paub txog Vajtswv tus moj yam? Qhov ntawd yog ua kom tib neeg paub tias Vajtswv yog leej twg, Nws lub ntsiab tseeb yog dab tsi, qhov Nws yog leej twg tiag tiag thiab lub meej mom yog dab tsi, txhua yam uas Vajtswv muaj thiab qhov uas yog Vajtswv ntawd yog dab tsi, thiab Nws tus moj yam yog dab tsi. Qhov ntawd yog ua kom txhua tus tib neeg pom meej tias lawv yog cov raug tsim tawm los, tias tsuas yog Vajtswv xwb thiaj li yog tus Tswv Tsim, thiab cov uas raug tsim tawm los ntawd yuav tsum zwm rau tus Tswv Tsim li cas. Los ntawm qhov paub tag nrho tej no, tib neeg txoj kev ua neej thiaj li yuav kaj lug. Thaum tib neeg paub lawv tus kheej tiag tiag lawm, lawv tseem yuav tsis tuaj yeem maj mam tso lawv txoj kev ntshaw thiab ntau yam kev npaj siab uas tsis ncaj ncees tseg thiab lod? (Yog.) Yog li lawv puas tuaj yeem mus txog rau theem uas lawv muaj peev xwm muab txhua yam tso tseg? Qhov no mas nyob ntawm tus neeg ntawd xwb. Ib tug neeg tsuas yuav tuaj yeem tso tau lawv tej kev ntshaw thiab ntau yam kev tim tsum ntawm Vajtswv tseg rau thaum, los ntawm Vajtswv tes hauj lwm, lawv tau txais ib txoj kev paub txog Vajtswv thiab tau txais ib txoj kev paub tseeb thiab lo lus tshab txhais ntawm Vajtswv lub ntsiab tseeb, qhov Nws yog leej twg tiag tiag, thiab lub meej mom lawm xwb. Tsuas yog hom tib neeg no xwb, zoo li Petus, thiaj li tuaj yeem qhia lawv lub siab lub ntsws thiab txoj kev ntshaw los hlub Vajtswv tawm hauv lawv lub siab tuaj, thiab muab Vajtswv txoj kev hlub coj mus xyaum ua. Yog li ntawd, qhov paub Vajtswv thiab paub txog yus tus kheej ntawd—tsis muaj peev xwm yuav hnov qab tau. Koj hais tias koj xav hlub Vajtswv, tiam sis koj puas paub yuav hlub Nws li cas yog tias koj tsis to taub Nws? Feem dab tsi ntawm Nws es yog qhov ntxim nyiam? Nws qhov ntxim nyiam tshaj plaws ntawd yog dab tsi? Yog tias koj tsis paub qhov no, ces koj hlub tsis tau Nws. Koj yuav tsis muaj peev xwm hlub Vajtswv, txawm tias koj xav hlub los xij, thiab tej zaum koj haj tseem yuav muaj cov kev xav phem txog Nws thiab muaj kev ntxeev siab tshwm sim nyob rau hauv koj yam tsis paub txog, uas yuav ua rau muaj kev xav tsis zoo. Hom neeg zoo li no puas yuav tau txais Vajtswv txoj kev pom zoo? Lawv yuav tsis tau txais. Thaum muaj ib tug neeg tsis paub Vajtswv es haj tseem hais tias lawv hlub Nws thiab, ces qhov hu ua “kev hlub” no tsuas yog lub tswv yim los ntawm tib neeg thiab txoj kev xav uas tsis muaj qab hau dab tsi hlo li xwb. Qhov ntawd tsis yog tshwm sim los ntawm ib txoj kev paub txog Vajtswv los, thiab qhov ntawd tsis muaj qab hau rau Vajtswv kiag li. Tam sim no nej puas pom tias kuv hais dab tsi txog ob yam no? (Pom.) Yog li ntawd vim li cas nej ho tsis muaj peev xwm hais qhov no tam sim no? Qhov no ua pov thawj qhia tias nej txoj kev paub txog nej tus kheej hauv txoj kev paub tiag tiag ntawd tsis meej, thiab tias nej tsis muaj txoj kev paub txog Vajtswv tiag tiag. Nej puas paub qhov teeb meem ntawm no yog dab tsi? (Peb nrhiav tsis tau tau txoj hau kev xyaum ua uas yog. Peb tsis tuaj yeem nkag mus thooj txhij rau txoj kev paub Vajtswv thiab paub peb tus kheej. Peb tsuas yog tsuas tsom ntsoov rau txoj kev nkag mus rau ib qho ua ntej xwb, yog li peb lub neej thiaj tsis muaj kev loj hlob.) Vim tias qhov no yog nej tus yam ntxwv tam sim no, es nej tus yeeb yam ho zoo li cas? Puas yog tsis paub tab? Tsis yog nej nyob deb ntawm Vajtswv txoj kev cheem tsum thiab tus qauv thaum hais qhov paub nej tus kheej? Yam tsawg kawg nkaus, nej yeej tseem tso tsis tau nej tus kheej tej kev ntshaw thiab tej kev xav tseg. Nej txoj kev zwm rau Vajtswv puas mus raws li qhov tseeb? Nej puas muaj peev xwm paub seb Vajtswv puas muaj ib lub meej mom dab tsi nyob rau hauv nej lub siab li? Muaj ntau tus tib neeg uas tam sim no haj tseem nug seb Vajtswv qhov kev yug los ua neeg ntawd yog tib neeg los yog Vajtswv; lawv muaj ob qho kev ntseeg, ib pliag ntseeg tus Vajtswv uas nyob rau hauv lub ntiaj teb, ib pliag ntseeg tus Vajtswv pom tsis meej uas nyob saum ntuj. Thiab muaj qee leej haj tseem nug txog Vajtswv lub ntsiab tseeb thiab, uas hais tias, “Tus Vajtswv uas yug los ua neeg thiab tus Vajtswv nyob saum ntuj ntawd yuav yog tib tug Vajtswv tau li cas? Yog tias Nws yog Vajtswv tiag tiag no, vim li cas Nws ho tsis ua tej txuj ci tseem ceeb thiab tej cim?” Qhov no qhia tias nej tsis muaj ib txoj kev to taub txog ntawm sab ntsujplig kiag li. Qhov zoo li ntawd mas yog nej tus yeeb yam uas ntxub Vajtswv es txawm hais ntau npaum li cas los nej thiaj li tseem tsis to taub. Tam sim no nej tsuas lees paub tias Vajtswv tau yug los ua cev nqaij daim tawv lawm xwb, nej tsuas lees paub qhov tseeb uas tus Vajtswv yug los ua neeg nthuav tawm lawm xwb; tiam sis nej tsis muaj kev paub ntau npaum li cas thaum hais txog Vajtswv lub ntsiab tseeb, qhov yog leej twg tiag tiag, thiab lub meej mom. Nej yeej hais tau rau hauv nej lub siab tias txoj kev paub no tsis muaj dab tsi li, tsis yog lod? (Yog.) Thiab qhov no yeej muab ua pov thawj qhia tau tseeb tias: Ua ntej kuv qhia txog tej zoo li ntawd ntawm qhov tseeb uas yog Vajtswv lub ntsiab tseeb los sis Vajtswv lub siab nyiam, koj xav tias koj txoj kev paub txog Vajtswv mas tob heev lawm, thiab koj xav tias koj txoj kev ntseeg Vajtswv mas khov kho thiab tsis ua ywj fab ywj fwj lawm. Tab sis thaum kuv qhia nej txog qhov tseeb uas yog Vajtswv Tus Kheej, Vajtswv tus moj yam, thiab Vajtswv lub ntsiab tseeb mas, cov lus thiab cov ntsiab lus no ua rau muaj kev tawm tsam loj nyob rau hauv nej lub siab. Qhov kev tawm tsam no kub heev, thiab ua rau nej lees txais tau nyuaj, ua rau muaj kev cov nyom nrog tus Vajtswv uas nej tau xav nyob hauv nej lub siab lawm. Qhov no tsis yog ib qho muaj tseeb lod? (Yog kawg.) Yog li ntawd, thaum kuv hais tej yam uas nej tsis tau hnov dua los, nej yuav hnov tias lees txais tau nyuaj kawg rau thaum xub thawj, zoo li tias nej tsis to taub tias kuv hais dab tsi li. Qhov no ua pov thawj qhia tias nej lub siab me dhau lawm, me dhau lawm es nej thiaj li tsis tuaj yeem to taub Vajtswv cov lus los sis saib cov lus ntawd kom muaj nqi. Nej yuav tsum tau paub kom ntau xyoo ntxiv mas nej thiaj yuav to taub.

Nqe Lus Uas Xaiv Tawm Los 94

Muaj qee tus neeg uas nyuam qhuav los ntseeg Vajtswv uas pheej xav phem thiab qaug zog. Qhov no yog vim lawv tsis to taub qhov tseeb, lawv lub siab tseem me dhau lawm, thiab lawv tsis muaj kev to taub txog ntau qhov tseeb uas hais txog txoj kev ntseeg Vajtswv li. Yog li ntawd lawv ntseeg tias lawv tus kheej lub peev xwm tsis zoo, tsis muaj peev xwm cuag luag, muaj ntau yam kev yuaj—uas ua rau lawv xav mus rau qhov phem, thiab haj tseem ua rau lawv yeem swb hais tias: Lawv txiav txim siab tso tseg, tsis caum qhov tseeb ntxiv lawm. Lawv tshem lawv tus kheej tawm xwb. Qhov lawv xav ces yog, “Txawm li cas los xij, Vajtswv yuav tsis pom zoo rau kuv txoj kev ntseeg Nws. Vajtswv kuj tsis nyiam kuv thiab. Thiab kuv tsis muaj sij hawm ntau mus koom tej kev sib txoos ua ke. Kuv tsev neeg lub neej mas nyuaj thiab kuv yuav tsum tau mus khwv nyiaj,” thiab ntau yam ntxiv. Tej no puav leej dhau los ua tej laj thawj uas ua rau lawv mus koom tsis tau tej kev sib txoos ua ke. Yog koj tsis maj mus nrhiav kom paub tias muaj dab tsi tshwm sim, ces tej zaum koj yuav lam tau lam txiav txim rau lawv tias lawv tsis nyiam qhov tseeb, thiab tsis yog tus uas ntseeg Vajtswv tiag tiag, los sis koj yuav txiav txim rau lawv tias lawv ntshaw tej kev tau zoo rau cev nqaij daim tawv, caum lub ntiaj teb thiab tso tsis tau tej yam ntawm lub ntiaj teb tseg—thiab vim li no, koj yuav muab lawv tso tseg. Qhov no puas haum raws li qhov tseeb tej hauv paus ntsiab lus? Tej laj thawj no puas sawv cev rau lawv tus yeeb yam lub ntsiab tseeb tiag tiag? Tseeb tiag, vim yog lawv tej kev nyuaj thiab tej yam uas khi lawv es lawv thiaj li xav phem; yog koj daws tau tej teeb meem no, ces lawv yuav tsis xav phem npaum kiag li, thiab yuav muaj peev xwm raws Vajtswv qab. Thaum lawv qaug zog thiab xav phem lawm, lawv xav tau tib neeg txoj kev txhawb. Yog koj pab lawv, lawv yuav sawv tau rov los. Tiam sis yog koj tsis quav ntsej lawv, ces qhov ntawd yuav ua rau lawv tso tseg yooj yim vim qhov kev xav phem ntawd. Qhov no yog nyob rau ntawm qhov seb cov neeg uas ua pawg ntseeg tes hauj lwm ntawd puas muaj kev hlub, seb lawv puas ris lub nra no xwb. Qhov uas qee tus neeg tsis tshua tuaj koom tej kev sib txoos ua ke ntawd tsis txhais hais tias lawv tsis ntseeg Vajtswv tiag tiag, tsis yog txhais tias lawv tsis nyiam qhov tseeb, tsis txhais hais tias lawv ntshaw tej kev lom zem ntawm cev nqaij daim tawv, thiab tso tsis tau lawv tsev neeg thiab tes hauj lwm tseg—thiab yuaav tsum haj yam tsis txhob txiav txim rau lawv tias yog cov uas muaj lub siab mos dhau los sis nyiam nyiaj txiag. Tsuas yog qhov hais tias xav rau hauv tej no xwb, ces tib neeg lub siab thiab tej kev ntshaw mas yeej sib txawv lawm. Qee tus neeg nyiam qhov tseeb, thiab muaj peev xwm caum qhov tseeb; lawv txaus siab hlo raug kev txom nyem kom tso tau tej no tseg. Qee tus neeg muaj kev ntseeg me me, thiab thaum raug tej kev nyuaj hauv lub neej tiag tiag ces lawv tsis muaj zog, thiab kov tsis yeej tej ntawd lawm. Yog tsis muaj leej twg pab los sis txhawb lawv li, ces lawv yuav yeem swb thiab tso lawv tus kheej tseg; thaum zoo li ntawd lawm, lawv tim tsum tib neeg txoj kev txhawb, kev saib xyuas, thiab kev pab. Tshwj yog tias lawv yog ib tug tsis ntseeg, tsis nyiam qhov tseeb, thiab tsis yog ib tug neeg zoo—txawm yog qhov tawg los yuav tsis quav ntsej lawv. Yog lawv yog tus uas ntseeg Vajtswv tiag tiag, thiab tsis tshua mus koom tej kev sib txoos ua ke vim muaj qee qhov kev nyuaj tiag tiag xwb, ces yuav tsum tsis txhob muab lawv tso tseg, tiam sis yuav tsum muab kev hlub los pab thiab txhawb. Yog lawv yog ib tug neeg zoo, thiab muaj lub peev xwm nkag siab, thiab muaj peev xwm zoo, ces lawv haj yam tsim nyog tau txais kev pab thiab kev txhawb ntxiv.