Nqe Lus Uas Xaiv Tawm Los 72

Cov uas ua cov thawj coj yuav tsum tsis txhob mob siab ua hauj lwm ntau dhau lawm los sis pheej mob siab rau lawv tus kheej lub meej mom tas li xwb, thiab lawv yuav tsum tsis txhob muab lawv tus kheej saib siab, es tom qab ntawd mam li xav txhua txoj hauv kev li ua tau los daws txhua tus neeg tej teeb meem kom txhua tus paub hais tias: “Kuv yog tus thawj coj, kuv muaj txoj hauj lwm no, lub meej mom no, thiab kuv kuj muaj lub peev xwm no, qhov kev txawj no thiab. Thiab vim kuv coj tau koj, kuv kuj pub tau rau koj thiab.” Qhov lawv hais tau cov lus zoo li no mas yuav ua rau muaj teeb meem. Qhov hais li no ua rau muaj teeb meem tau li cas? Yog txoj hauv kev uas koj mus rau tom ntej ntawd tsis yog thiab yog koj tsis muaj tej hauv paus ntsiab lus thaum ua koj tej hauj lwm, ces txhua yam koj ua yeej yuav tsis yog thiab yuav ua rau muaj qhov yuam kev. Yog qhov koj muaj siab ntawd tsis yog, ces txhua yam uas koj ua yuav tsis yog. Mob siab rau txoj kev nrhiav qhov tseeb, kev to taub qhov tseeb, kev to taub lub ntsiab tseeb ntawm qhov tseeb ntawm tej yog toog, thiab kev paub tej hauv paus ntsiab lus rau sab no—qhov ntawd thiaj li yog. Tsuav koj tsis ua dhau tej ciaj ciam no thaum muaj tej yam los raug rau koj, los sis thaum koj tab tom daws teeb meem xwb, ces koj yuav pab tau lwm tus thiab daws tau lawv tej kev nyuaj siab, thiab koj yuav yog ib tug uas tsim nyog ua thawj coj. Txawm li cas los xij, yog koj tsuas to taub qee cov lus qhuab qhia, thiab yog koj tsuas npaj kom koj tus kheej muaj cov lus qhuab qhia ntawd, mloog lus qhuab qhia kom ntau ntxiv, thiab paub ob peb lo lus ntxiv kom coj tau, thiab yog koj tsuas hais ob peb lo lus qhuab qhia thiab ob peb lo lus thaum sim daws tib neeg tej teeb meem xwb, ces yuav daws tsis tau lawv tej teeb meem ib qho li, ces yog koj tsis muaj qhov uas ua tau ib tug thawj coj, thiab koj tsuas yog ib lub khauj khaum duab uas tsis muaj duab li. Hom thawj coj no yog hom thawj coj dab tsi? (Hom thawj coj cuav.) Nov yog ib tug thawj coj cuav. Koj ua tsis tau txoj hauj lwm tiag. Tab txawm tsis muaj leej twg muab tus thawj coj cuav ntawd qhia tshwm thiab qhia tawm los xij, cov neeg Vajtswv xaiv tseg lub neej hauv pawg ntseeg yuav tsis vam meej li, yuav muaj teeb meem ntau zuj zus tuaj, ces tus thawj coj cuav ntawd yuav tsum tau ris lub txim thiab raug muab yuam kom nqis hauj lwm. Yog hais tias koj yog ib tug thawj coj cuav, ces txawm koj qib hauj lwm yuav siab npaum li cas los xij, koj yeej tseem yog ib tug thawj coj cuav. Tam sim no, txawm koj ua tau txoj hauj lwm tiag thiab tsis tau, thiab txawm koj yog ib tug thawj coj cuav thiab tsis yog los xij—tej no tsis yog tej uas tseem ceeb tshaj plaws. Yog li ntawd, qhov uas tseem ceeb tshaj plaws yog dab tsi? Tam sim no koj yuav tsum nrawm nroos los tshawb nrhiav qhov tseeb thiab mob siab rau kev to taub lub neej txoj sia. Thaum koj muaj kev to taub lub neej txoj sia, hloov koj tus moj yam, to taub Vajtswv tej kev npaj siab, thiab muaj peev xwm daws tau koj tus kheej tej yam txwv uas tsis yog lawm, ces yuav yooj yim rau koj daws lwm tus tib neeg tej teeb meem. Thaum koj to taub qhov tseeb thiab nkag mus rau hauv qhov tseeb qhov muaj tiag lawm, koj puas tseem yuav ntshai tsam koj daws tsis tau lwm tus tej teeb meem? Koj yuav tsis tas txhawj txog tias koj coj puas tau zoo lawm. Yog koj muaj qhov tseeb qhov muaj tiag lawm, koj yuav cia li ua tau koj tes dej num zoo thiab daws tau tej teeb meem tiag tiag lawm xwb. Koj yuav tsum to taub qhov no kom zoo. Yog koj tsis to taub qhov no kom zoo, es pheej xav tsom kwm koj lub meej mom ua thawj coj, thiab tsim kom muaj koj tus duab zoo nyob rau hauv cov neeg Vajtswv xaiv tseg lub siab xwb, ces qhov koj npaj siab ntawd tsis yog lawm, thiab koj yuav cia li txaj muag thiab ua tsis tau. Yog koj yog ib tug tib neeg uas nyiam qhov tseeb thiab yog tus uas mob siab rau nws tus kheej txoj kev to taub lub neej txoj sia, thiab koj muab tib neeg tej hom phiaj, tej kev ntshaw, thiab tej kev tshawb nrhiav uas yuam kev ntawd tso tseg, thiab tsis raug tej no quaj yuam los sis khi lawm, ces koj yuav muaj peev xwm tshawb nrhiav qhov tseeb, thiab koj yuav cia li to taub txhua sab ntawm qhov tseeb zuj zus mus lawm. Ua li no, koj yuav pab tau lwm tus yam yooj yim thiab koj yuav tsis muaj kev nyuaj siab thaum pab lwm tus ntawd. Yog li ntawd, koj yuav tsum tsis txhob tsom kwm koj lub meej mom. Lub meej mom ntawd yog ib lub khauj khaum duab uas tsis muaj duab xwb. Lub meej mom ntawd tsis muaj qab hau dab tsi li. Lub meej mom ntawd yuav tsis coj ib qho txiaj ntsim dab tsi los rau koj, thiab lub meej mom ntawd kuj yuav tsis pab koj kom to taub qhov tseeb li thiab. Tsis tas li ntawd xwb, lub meej mom ntawd tuaj yeem dag tau koj mus ua ntau yam yuam kev, thiab lub meej mom ntawd kuj tuaj yeem ua rau koj mus yuam kev thiab. Rau qhov lub meej mom yog ib rooj ntxiab uas cuab cov tib neeg qias vuab tsuab. Tiam sis tsis muaj leej twg zam tau qhov teeb meem no li, sawv daws yeej yuav tsum tau hla kom dhau qhov teeb meem no, tsuas yog nyob ntawm seb koj yuav daws qhov teeb meem no li cas xwb. Yog koj siv tib neeg tej hauv kev los daws qhov teeb meem no, koj yuav tswj tsis tau koj tus kheej los sis ntxeev siab tsis tau rau koj tus kheej. Tsuas yog siv qhov tseeb los daws qhov no xwb mas thiaj li tau. Qhov tseeb daws tau qhov kev nyuaj siab no. Yog koj tuaj yeem tshawb nrhiav qhov tseeb, koj yuav daws tau qhov teeb meem no ntawm lub hauv paus. Yog koj siv tsis tau qhov tseeb los daws qhov kev nyuaj siab no, yog koj tsuas lam tswj koj tus kheej thiab ntxeev siab rau tej yam—ntxeev siab rau koj tej kev xav, koj tej kev ua, koj tej tswv yim, thiab pheej tsuas yog ntxeev siab li no xwb no—txoj kev ua li no yog txoj kev ua dab tsi? Nov yog ib txoj kev ua uas tsis zoo thiab nyob twj ywm xwb. Koj yuav tsum siv tej hauv kev uas zoo los daws qhov teeb meem ntawd, qhov ntawd yog, koj yuav tsum siv qhov tseeb los daws qhov teeb meem ntawd, thiab to taub qhov no kom zoo. Ua ntej tshaj plaws saib mus rau ntau txoj kev uas cov tawm tsam Khetos thiab cov thawj coj cuav ntawd siv los nrhiav lub koob lub npe, txiaj ntsim, thiab lub meej mom thiab tiv thaiv lawv txoj kev khav theeb khav txiv tso. Tom qab pom tej ntawd tseeb tseeb lawm, koj yuav xav hais tias: “Au, cas yuav txaj muag ua luaj, txaj muag tiag tiag li! Kuv puas siv tej kev ua ntawd thiab?” Ces, koj yuav pib thim xav txog koj tus kheej thiab tsis ntev koj yuav paub hais tias: “Au, kuv kuj siv tej kev ua ntawd ntau yam thiab, kuv yeej tsis txawv cov tawm tsam Khetos thiab cov thawj coj cuav ntawd npaum li cas li.” Koj yuav muaj qee qhov kev tu siab hauv koj lub siab, thiab hais tias, “Kuv yuav tiv thaiv kuv lub meej mom thiab nthuav txoj kev txaj muag no tawm tsis tau mus ntxiv lawm,” thiab yuav txiav txim siab los muab qhov no ua ib qho kev kawm. Tsis txhob mob siab rau qhov seb lwm tus puas hwm koj, seb koj daws tau teeb meem ntau npaum li cas rau lwm tus tib neeg, seb tib neeg mloog koj hais los tsis mloog, los sis muaj pes tsawg leej tib neeg muaj ib qho chaw rau koj nyob rau hauv lawv lub siab. Yog tej yam zoo li no pheej nyob hauv koj lub siab tas li, ces koj yuav nyob tsis tus thiab raug cuam tshuam, thiab koj yuav tsis tshua muaj sij hawm los tshawb nrhiav qhov tseeb. Koj twb siv koj lub zog uas tsis muaj zog thiab koj lub sij hawm uas muaj nuj nqis ntawd los caum koj tej hom phiaj thiab tej kev ntshaw txog lub koob lub npe, tej txiaj ntsim, thiab lub meej mom lawm. Vim li ntawd, koj thiaj li tsis tau tau txais qhov tseeb thiab txoj sia. Txawm koj tau txais lub meej mom thiab tau raws li koj tej hom phiaj thiab tej kev ntshaw lawm los xij, koj tseem tsis tau muaj kev to taub lub neej txoj sia thiab koj poob Vajntsujplig Dawb Huv tes hauj lwm lawm. Qhov tshwm sim kawg ntawm qhov no yuav yog dab tsi? Koj yuav raug muab tshem tawm mus thiab raug rau txim. Vim li cas qhov no thiaj li tshwm sim? Koj xaiv txoj kev yuam kev lawm. Yog koj mus txog rau Povlauj qib lawm, ces thaum kawg koj yuav raug rau txim. Tiam sis yog koj tseem tsis tau mus txog rau Povlauj qib, es koj thim rov qab los ncav sij hawm, ces tseem muaj qhov uas yuav txhiv tau koj, thiab tseem muaj kev cia siab tias yuav dim.

Txawm cov ntseeg Vajtswv yuav muaj teeb meem dab tsi los xij, txawm tej teeb meem ntawd yuav yog txoj kev caum lub meej mom, lub koob lub npe, txiaj ntsim, thiab kev muaj txiag nplua nuj, los sis txoj kev uas ua kom tau raws li yus tus kheej tej hom phiaj thiab tej kev ntshaw, txawm yuav yog qhov twg los xij li, txhua yam teeb meem mas yuav tsum yog tshawb nrhiav qhov tseeb los daws xwb. Tsis muaj ib qho teeb meem uas yuav hla dhau qhov tseeb li. Tsis muaj ib yam dab tsi uas yuav cais tau tawm ntawm qhov tseeb li. Kiag thaum tib neeg ncaim ntawm qhov tseeb nyob rau hauv lawv txoj kev ntseeg Vajtswv lawm, ces lawv txoj kev ntseeg tsis muaj dab tsi li lawm. Txoj kev tshawb nrhiav lwm yam ntawd tsis muaj qab hau li lawm. Qee tus tib neeg tsuas yog txaus siab ua tej dej num uas raug siab thiab muaj koob meej, ua kom lwm tus hwm lawv thiab khib lawv xwb. Qhov no puas muaj qab hau dab tsi li? Qhov no tsis yog qhov uas koj tau txais thaum kawg, thiab tsis yog koj qhov nqi zog kawg, thiab yeej tsis yog qhov kawg ntawm koj. Yog li ntawd, txawm koj ua tes dej num dab tsi los xij, nws tsuas yog ib ntus xwb, nws tsis nyob mus ib txhis. Qhov no tsis yog ib qho kev pom zoo uas Vajtswv tau pom zoo rau koj, thiab tsis yog ib qho nqi zog uas Nws tau muab rau koj lawm. Thaum kawg, qhov uas tib neeg yuav tau txais txoj kev cawm dim thiab tsis tau ntawd tsis yog nyob ntawm seb lawv ua tes dej num dab tsi, tiam sis yog nyob ntawm qhov seb lawv puas to taub qhov tseeb thiab puas tau txais qhov tseeb, thiab nyob ntawm qhov seb thaum kawg lawv puas zwm tau rau ntawm Vajtswv tag nrho, muab lawv tus kheej tso rau ntawm txoj kev hlub tshua ntawm Nws txoj kev coj kev qhia, tsis xav txog lawv lub neej yav tom ntej thiab txoj hmoo li lawm, thiab ua ib tug tib neeg raug tsim tawm los uas tsim nyog xwb. Vajtswv ncaj ncees thiab dawb huv, yog li ntawd cov qauv no yog cov qauv uas Nws siv los ntsuas txhua tus tib neeg ntiaj teb. Cov qauv no hloov tsis tau, thiab koj yuav tsum nco ntsoov qhov no. Muab cov qauv no sau cia rau hauv koj lub siab kom ruaj khov, thiab tsis txhob xav txog qhov nrhiav lwm txoj hauv kev los tshawb nrhiav yam uas tsis muaj tseeb li lawm. Cov kev cheem tsum thiab cov qauv uas Vajtswv muaj rau txhua tus uas xav kom tau txais txoj kev cawm dim ntawd mas yeej tsis hloov mus ib txhis li. Tej ntawd yuav zoo li ntawd mus li txawm koj yuav yog leej twg los xij. Koj tsuas yog tau txais txoj kev cawm dim los ntawm qhov ntseeg Vajtswv raws li Vajtswv cov kev cheem tsum thiab cov qauv xwb. Yog koj nrhiav lwm txoj hauv kev los tshawb nrhiav yam uas pom tsis tseeb, thiab xav hauv nruab siab hais tias koj yuav tau txais txoj kev cawm dim los ntawm txoj moo xwb, ces koj yog tus uas tawm tsam Vajtswv thiab ntxeev siab rau Vajtswv lawm, thiab koj yeej yuav raug Vajtswv foom tsis zoo thiab rau txim xwb xwb li.

Nqe Lus Uas Xaiv Tawm Los 73

Yuav kom cov thawj coj thiab cov neeg ua hauj lwm ua tau lawv tej dej num zoo thiab ua tau tes hauj lwm uas Vajtswv tau muab rau lawv ua lawm ntawd kom zoo mas, lawv yuav tsum xub to taub Vajtswv tej kev npaj siab ua ntej thiab tsis txhob mob siab rau qhov loj los sis qhov ntau ntawm lawv tes hauj lwm ntawd xwb. Tiam sis lawv yuav tsum mob siab rau qhov seb lawv puas muaj kev to taub lub neej txoj sia los tsis muaj thiab hloov lawv tus moj yam lost sis hloov. Qhov no yog qhov uas Vajtswv cheem tsum ntawm cov thawj coj thiab cov neeg ua hauj lwm. Tam sim no nej puas to taub tiag tiag txog kev hloov yus tus moj yam? Kev hloov tus moj yam txhais li cas? Nej puas paub qhov txawv ntawm kev hloov tus cwj pwm thiab kev hloov tus moj yam? Tus yam ntxwv twg thiaj li suav tau hais tias yog kev hloov yus lub neej tus moj yam, thiab tus yam ntxwv twg thiaj li yog kev hloov tus cwj pwm sab nraud xwb? Qhov txawv ntawm kev hloov yus tus cwj pwm sab nraud thiab kev hloov yus lub neej sab hauv yog dab tsi? Nej qhia puas tau qhov txawv? Nej pom qee tus neeg uas muaj lub siab kub siab lug, khiav rau ub rau no thiab siv sij hawm rau pawg ntseeg, ces nej hais tias: “Nws tus moj yam hloov lawm!” Nej pom ib tug neeg tso nws tsev neeg los sis nws tes hauj lwm tseg, ces nej hais tias: “Nws tus moj yam hloov lawm!” Nej xav hais tias yog nws tus moj yam tsis tau hloov, nws yeej yuav tsis muaj peev xwm tso tau tej ntawd tseg li. Nej feem coob yeej xav li ntawd, tiam sis qhov kev xav no puas yog? Qee tus neeg haj yam ruam dua; thaum lawv pom ib tug neeg twg tso nws tsev neeg los sis nws tes hauj lwm tseg lawm, mas lawv hais tias: “Tus tib neeg no hlub Vajtswv tiag tiag!” Hnub no, nej hais tias tus tib neeg no hlub Vajtswv, tag kis nej hais tias lwm tus hlub Vajtswv. Yog nej pom ib tug neeg twg tshaj tawm Vajtswv txoj lus tsis txawj tag li, mas nej hais tias: “Tus tib neeg no paub Vajtswv. Nws tau txais qhov tseeb lawm. Yog nws tsis paub Vajtswv, nws puas yuav muaj lus ntau npaum li ntawd los hais?” Tsis yog nej xav li ntawd lod? Yeej muaj tseeb, nej feem coob yeej pom tib neeg thiab txhua yam li no. Nej pheej muab lub kaus mom vajntxwv rau lwm tus thiab qhuas lawv. Hnub no nej muab ib lub kaus mom vajntxwv rau ib tug tib neeg vim nws hlub Vajtswv, tag kis nej muab ib lub kaus mom vajntxwv rau lwm tus tib neeg vim nws paub Vajtswv, vim nws ua siab ncaj ncees rau Vajtswv. Nej “txawj” muab kaus mom vajntxwv rau lwm tus heev. Txhua hnub, nej muab lub kaus vajntxwv rau lwm tus thiab qhuas lawv, uas ua rau lawv raug kev puas tsuaj, tiam sis nej tseem zoo siab rau qhov ua li ntawd thiab. Thaum nej qhuas lwm tus li no nej ua rau lawv khav theeb. Cov uas raug qhuas li no xav hauv lawv tus kheej tias, “Kuv hloov lawm, kuv yuav tau txais ib lub kaus mom vajntxwv, kuv yeej yuav tau nkag mus rau hauv lub nceeg vaj saum ntuj ceeb tsheej xwb!” Qhov phem tshaj ntawd yog, muaj qee leej, zoo li Povlauj, uas pheej tham txog qhov lawv tau raug kev txom nyem npaum li cas thiab lawv tau ua tim khawv ntau npaum li cas. Lawv qhuas lawv tus kheej thiab hais lus raws li lawv tus kheej tej kev xav phem thiab tej yam uas lawv nyiam, tsis ua tib zoo xav txog Vajtswv tej kev npaj siab ib qho me me li. Lawv qhia lwm tus kom xyaum lawv txawm yog twb paub tseeb hais tias lawv tus kheej tej moj yam tsis tau hloov li, vim li ntawd, cov uas ntseeg Vajtswv tiam sis tsis muaj kev paub cais qhov zoo qhov phem—thiab tshwj xeeb yog cov uas pe hawm lawv—thiaj li raug kev puas tsuaj thiab raug coj mus yuam kev. Lawv tseem tsis tau pib taug txoj kev yog ntawm txoj kev ntseeg Vajtswv, tsuas yog siv lawv tus kheej thiab raug kev txom nyem rau Vajtswv los ntawm lub siab kub siab lug xwb. Lawv tsuas yog raug ntes thiab raug kaw yam tsis tau ntxeev siab rau ib yam dab tsi los sis tsis tau dhau los ua ib tug Yudas li—yog li ntawd lawv xav hais tias lawv tuav tau lawv tej lus tim khawv khov kho thiab tsim nyog nkag mus rau hauv lub nceeg vaj saum ntuj ceeb tsheej lawm. Lawv saib qhov kev paub me ntsis no yam li yog ib zaj lus tim khawv thiab muab mus khav qhia rau txhua qhov chaw. Qhov no tsis yog qhia lawv tus kheej tawm los dag tib neeg lod? Muaj ntau tus neeg hais hom “lus tim khawv” no, thiab muaj pes tsawg leej tib neeg tau raug coj mus yuam kev lawm? Qhov uas muab cov tib neeg zoo li no saib yam li yog cov uas kov yeej lawm ntawd tsis yog ib qho ruam lod? Koj puas paub tias Vajtswv pom tib neeg li cas? Koj puas paub meej tias tus uas kov yeej ntawd yog leej twg tiag tiag? Qhov ua tim khawv cuav li no raug Vajtswv foom tsis zoo lawm. Nej tau ua tej kev phem zoo li no ntau npaum li cas lawm? Nej muab tsis tau txoj sia rau lwm tus, thiab nej soj ntsuam tsis tau lwm tus tej yam ntxwv. Nej tsuas yog muab tau lub kaus mom vajntxwv rau tib neeg xwb, vim li ntawd, thiaj li ua rau lawv puas tsuaj. Koj tsis paub tias tus neeg qias vuab tsuab ris tsis tau qhov kev qhuas lod? Yog tsis muaj leej twg qhuas lawv, lawv twb khav theeb kawg nkaus, lawv twb tsa taub ntswg siab siab lawm. Tiam sis yog tib neeg qhuas lawv, lawv tsis tuag sai dua lod? Nej tsis paub tias kev hlub Vajtswv, kev paub Vajtswv, kev muab yus tus kheej fij rau Vajtswv tiag tiag ntawd yog dab tsi. Nej tsis to taub tej no ib qho li. Nej saib yam sab nraud xwb ces nej txiav txim rau lwm tus, muab kaus mom vajntxwv rau lawv thiab qhuas lawv, yog li ntawd nej thiaj li coj ntau tus tib neeg mus yuam kev thiab ua rau lawv puas tsuaj—thiab nej pheej ua li no tas li. Vim nej qhuas li no, ntau tus tib neeg thiaj li tau mus yuam kev thiab ntog lawm. Tab txawm lawv sawv tau rov qab los los, lawv twb ncua txoj kev loj hlob hauv lawv lub neej ntau heev lawm, thiab twb plam ntau yam lawm. Tam sim no feem coob tseem tsis tau nyob rau hauv txoj kev yog hauv lawv txoj kev ntseeg Vajtswv thiab tshawb nrhiav tsis tau qhov tseeb, thiab tsuas paub lawv tus kheej me ntsis xwb. Yog lawv raug qhuas li no, lawv yuav txaus siab rau lawv tus kheej, nyob twj ywm, thiab tsis xav hloov, lawv xav hais tias lawv twb nyob rau hauv txoj kev yog hauv lawv txoj kev ntseeg Vajtswv lawm, thiab xav tias lawv twb muaj qhov tseeb qhov muaj tiag me ntsis lawm. Lawv yuav muaj lub siab tawv hais lus, cem tib neeg nyob rau hauv pawg ntseeg, thiab ua zoo li ib tug thawj coj uas siv hwj chim. Qhov ua hauj lwm li no tsis yog koj ua rau tib neeg puas tsuaj thiab rhuav tshem lawv xwb lod? Hom tib neeg twg thiaj li hlub Vajtswv? Cov uas hlub Vajtswv yuav tsum zoo li Petus, lawv yuav tsum raug muab ua kom zoo tiav log, thiab lawv yuav tsum raws Vajtswv qab kom mus txog thaum kawg ntawm txoj kev mas thiaj li yog hlub Vajtswv. Vajtswv soj ntsuam qhov tob ntawm tib neeg lub siab, thiab tsuas yog Vajtswv xwb thiaj li txiav txim tau tias leej twg hlub Nws. Tib neeg yeej pom qhov no tsis tseeb, yog li ntawd lawv yuav ua li cas txiav txim tau rau lwm tus? Tsuas yog Vajtswv xwb thiaj li paub tias cov tib neeg twg hlub Nws tiag tiag. Tab txawm yog lawv muaj lub siab hlub Vajtswv los, lawv tsis muaj cuab kav hais tias lawv tus kheej yog cov neeg hlub Vajtswv. Vajtswv hais tias Petus yog ib tug neeg hlub Vajtswv, tiam sis Petus nws tus kheej yeej tsis tau hais tias nws yog ib tug neeg hlub Vajtswv li. Yog li ntawd, kev hlub Vajtswv puas yog ib yam uas tib neeg los lam tau lam khav txog? Kev hlub Vajtswv yog tib neeg tes dej num, yog li ntawd tsis tsim nyog pib khav thaum koj lub siab muaj kev hlub Vajtswv me ntsis xwb. Yog koj tus kheej tsis yog ib tug neeg hlub Vajtswv tiam sis koj tseem qhuas lwm tus tias yog cov neeg hlub Vajtswv mas haj yam tsis tsim nyog. Qhov no yog neeg vwm. Tsuas yog Vajtswv xwb thiaj li paub tias leej twg yog tus neeg hlub Vajtswv, thiab hais tau tias leej twg yog tus neeg hlub Vajtswv. Yog cov lus no tawm ntawm ib tug tib neeg twg lub qhov ncauj los, ces tus tib neeg ntawd hais yuam kev lawm. Koj tab tom txeeb Vajtswv qhov chaw, npuaj teg rau tib neeg thiab qhuas lawv—qhov no yog ua sawv cev rau leej twg? Vajtswv yeej tsis qhuas tib neeg, thiab tsis npuaj teg rau lawm li. Tom qab ua rau Petus muaj txhua yam lawm, Vajtswv tsis tau siv nws los ua ib tug qauv zoo mus txog rau thaum Nws ua tes hauj lwm ntawm tiam kawg. Lub sij hawm ntawd, Nws yeej tsis tau hais cov lus uas hais tias: “Petus hlub Vajtswv” no rau lwm tus li. Nws tsuas hais tej yam zoo li no thaum Nws ua theem hauj lwm no xwb, uas yog muab nws tsa los ua ib tug qauv zoo thiab ib qho piv rau cov uas raug Vajtswv txoj kev txiav txim thiab tshawb nrhiav los hlub Nws nyob rau tiam kawg. Txhua yam uas Vajtswv ua yeej muaj qab hau. Qhov tib neeg lam taus lam hais tias tus tib neeg ntawd yog ib tug tib neeg hlub Vajtswv mas ruam heev! Qhov no ruam dhau lawm. Qhov ib, cov tib neeg zoo li no xav yuam kev lawm. Qhov ob, qhov no tsis yog ib yam uas tib neeg txiav txim tau rau. Qhov qhuas lwm tus ntawd txhais li cas? Qhov ntawd txhais hais tias yog kev dag, kev ntxias, thiab kev ua kom lwm tus puas tsuaj xwb. Qhov peb, raws li qhov kev qhuas ntawd ua tau mas, tus cwj pwm zoo li no tsis yog tsuas coj tsis tau lwm tus mus rau txoj kev yog xwb, tiam sis kuj tseem cuam tshuam lawv txoj kev to taub lub neej txoj sia thiab ua rau lawv lub neej puas tsuaj thiab. Yog koj pheej hais tias tus tib neeg ntawd hlub Vajtswv, muaj peev xwm tso tau tej yam tseg, thiab muaj lub siab ncaj ncees rau Vajtswv no, sawv daws yuav tsis xyaum tus tib neeg ntawd tej kev ua sab nraud lod? Tsis yog koj tsis coj lwm tus mus rau txoj kev yog xwb, tiam sis koj kuj tseem coj tib neeg feem coob mus mob siab rau tej kev ua sab nraud thiab, uas lawv tsuas vam khom rau tej kev xyaum ua uas nyob rau sab nraud no los pauv lub kaus mom vajntxwv lawm xwb, taug Povlauj txoj kev yam ras tsis txog li lawm. Tsis yog li no lod? Thaum koj hais cov lus no, koj puas ras txog cov teeb meem no? Koj hais txog dab tsi? Koj ua txoj hauj lwm dab tsi? Koj cov lus ua tau dab tsi? Thaum kawg cov lus ntawd coj lwm tus mus taug txoj kev twg? Puas tsuaj npaum li cas? Muaj txim loj heev thaum tib neeg ua hauj lwm li no.

Ib txhia thawj coj thiab cov neeg ua hauj lwm hauv pawg ntseeg tham tsis tau txog lawv tej kev ntsib kev pom thiab cov lus tim khawv, thiab siv tsis tau qhov tseeb los daws teeb meem. Lawv pheej ua tim khawv txog qhov lawv tau raug kev txom nyem li cas, lawv tau lees txais qhov raug qhuab qhia li cas, lawv tsis poob siab txawm lawv muaj ntau yam kev tsis txaus siab li cas, thiab qhov lawv pheej ua lawv tej dej num li cas. Lawv pheej ua tim khawv rau lawv tus kheej, tsim tsa lawv tus kheej, thiab ua kom cov neeg Vajtswv xaiv qhuas lawv, hwm lawv, thiab cia siab rau lawv zoo li Povlauj xwb. Tsis tas li ntawd, thaum cov tib neeg zoo li no pom qee tus neeg uas txawj hais lus thiab txawj hais tej lus qhuab qhia zoo thiab txawj qhuab qhia, mas lawv qhuas tus tib neeg ntawd, thiab lawv qhuas thiab npuaj teg rau cov thawj coj thiab cov neeg ua hauj lwm uas zoo li Povlauj ntawd, qhov ua li no lawv ua rau lwm tus nyiam lawv. Tsis yog lawv ua tsis tau tes hauj lwm uas txhawb thiab pab kom zoo xwb, tiam sis lawv kuj ua tes hauj lwm uas rhuav tshem thiab cuam tshuam uas coj lwm tus mus taug Povlauj txoj kev thiab. Thaum lawv ua li ntawd, lawv xav yuam kev hais tias lawv tus kheej muaj peev xwm thiab yog cov thawj coj zoo, thiab lawv xav tau nqi zog ntawm Vajtswv. Nej feem coob tsis zoo li no lod? Raws li nej txoj kev ua tam sim no uas tsuas yog cuab pob ntseg mloog lus thiab cov lus qhuab qhia, thiab pheej ntuas tib neeg tas li xwb no, nej coj puas tau tib neeg mus rau txoj kev yog? Thaum kawg qhov no yuav coj lawv mus rau txoj kev twg? Qhov no yuav tsis coj lawv txhua tus mus rau Povlauj txoj kev lod? Kuv pom tias yog li no, qhov no tsis yog muab hais tshaj dhau. Hais tau hais tias nej txhua tus yog cov thawj coj zoo li Povlauj, coj tib neeg mus rau Povlauj txoj kev. Nej puas tseem xav tau ib lub kaus mom vajntxwv twg thiab? Yog nej tsis raug thuam ces twb yog nej muaj hmoo lawm. Raws li nej tej kev ua mas, nej txhua tus twb dhau los ua cov tib neeg uas tawm tsam Vajtswv, ua dej num rau Vajtswv tiam sis tseem tawm tsam Vajtswv, thiab nej txawj tab kaum Nws tes hauj lwm heev li lawm. Yog nej taug hom kev no mus ntxiv, thaum kawg nej yuav yog cov tswv yug yaj cuav, cov neeg ua hauj lwm cuav, cov thawj coj cuav, thiab cov tawm tsam Khetos. Tam sim no yog lub sij hawm xyaum mus nyob rau hauv lub Nceeg Vaj lawm. Yog nej tsis siv zog rau qhov tseeb thiab tsuas mob siab rau tes hauj lwm xwb, ces tos nco nej twb taug Povlauj txoj kev lawm. Tsis tas li ntawd xwb, nej yuav coj ib pab tib neeg uas zoo li Povlauj nrog nej thiab. Thaum ntawd nej yuav tsis dhau los ua tus uas tawm tsam Vajtswv thiab tab kaum Nws tes hauj lwm lod? Yog li ntawd, yog ib tug tib neeg uas ua dej num rau Vajtswv ua tsis tau tim khawv rau Nws, los sis coj tsis tau cov neeg uas Nws xaiv mus rau txoj kev yog, ces tus tib neeg ntawd yog tus uas tawm tsam Vajtswv. Tsuas muaj ob txoj kev no xwb. Petus txoj kev yog txoj kev uas tshawb nrhiav qhov tseeb thiab thaum kawg nws txoj kev ntseeg tiav lawm. Povlauj txoj kev yog txoj kev uas tsis tshawb nrhiav qhov tseeb, thiab tsuas yog siv zog kom tau koob hmoov thiab nqi zog xwb. Qhov ntawd yog ib txoj kev uas ua tsis tiav. Niaj hnub no, cov uas taug Petus txoj kev uas ua tau tiav ntawd mas muaj tsawg heev, hos cov uas taug Povlauj txoj kev uas ua tsis tiav ntawd mas muaj coob heev. Yog nej cov uas ua cov thawj coj thiab ua cov neeg ua hauj lwm tsis caum qhov tseeb txij thaum pib mus txog rau thaum xaus, nej txhua tus yuav dhau los ua cov thawj coj cuav thiab cov neeg ua hauj lwm cuav, thiab nej txhua tus yuav yog cov tawm tsam Khetos, thiab cov neeg phem uas tawm tsam Vajtswv. Yog nej hloov mus rau txoj kev yog txij tam sim no mus thiab taug Petus txoj kev tiag tiag, ces nej yeej tseem yuav dhau los ua cov thawj coj zoo thiab cov neeg ua hauj lwm zoo uas Vajtswv pom zoo rau. Yog nej tsis nrhiav kom raug muab ua kom zoo tiav log thiab tsis nkag mus rau hauv qhov muaj tiag ntawm Vajtswv txoj lus, ces nej nyob rau qhov phom sij lawm. Xav txog nej txoj kev ruam thiab txoj kev tsis paub dab tsi, nej txoj kev ntsib kev pom uas ntiav ntiav thiab tsis txaus, nej lub siab me, thiab nej txoj kev tsis paub tab mas, tib qho uas yuav tau ua ces yog qhia qhov tseeb rau nej kom ntau ntxiv, kom nej thiaj li to taub xwb, tiam sis qhov nej yuav tau txais qhov tseeb thiab tsis tau ntawd yog nyob ntawm nej tus kheej txoj kev tshawb nrhiav. Vim niaj hnub no txawv thaum Petus thiab Povlauj lawv deb heev lawm. Lub sij hawm ntawd, Yexus tseem tsis tau ua tes hauj lwm uas txiav txim rau tib neeg, rau txim rau tib neeg, los sis hloov tib neeg tus moj yam. Niaj hnub no, tus Vajtswv uas yug los ua neeg ntawd tau hais qhov tseeb meej heev li lawm. Yog tib neeg tseem taug Povlauj txoj kev thiab, ces qhov ntawd qhia tau hais tias lawv nkag siab yuam kev lawm, thiab haj yam qhia tau hais tias lawv tus yam ntxwv phem heev, thiab lawv tus moj yam khav theeb heev zoo ib yam li Povlauj thiab. Lub sij hawm ntawd txawv niaj hnub no, thiab qhov xwm txheej txawv. Niaj hnub no, Vajtswv txoj lus meej thiab tseeb heev; cuag nkaus li Nws cev Nws txhais tes los qhia koj thiab coj koj kev, yog li ntawd yeej zam txim tsis tau li yog koj tseem taug txoj kev yuam kev lawm thiab. Tsis tas li ntawd xwb, niaj hnub no, muaj ob tug qauv zoo li Petus thiab Povlauj, ib tug zoo hos ib tug phem, ib tug ua qhov qauv zoo hos ib tug ua qhov ceeb toom. Yog koj taug txoj kev yuam kev, ces qhov ntawd txhais hais tias koj xaiv yuam kev lawm, thiab koj phem heev. Koj liam tsis tau rau leej twg tsuas liam tau rau koj tus kheej xwb. Tsuas yog tus uas muaj qhov tseeb qhov muaj tiag thiaj li coj tau lwm tus nkag mus rau qhov tseeb qhov muaj tiag, tiam sis tus uas tsis muaj qhov tseeb qhov muaj tiag tsuas coj tau lwm tus mus yuam kev xwb.

Nqe Lus Uas Xaiv Tawm Los 76

Nyob hauv pawg ntseeg, hom neeg twg yog tus uas khav theeb tshaj plaws? Lawv txoj kev khav theeb qhia tshwm meej li cas? Lawv txoj kev khav theeb nthuav tawm meej tshaj plaws nyob rau tej yam twg? Nej puas muaj kev thoob tsib txog qhov no? Cov neeg uas khav theeb tshaj plaws nyob rau hauv pawg ntseeg tiag tiag mas yog cov neeg phem thiab cov tawm tsam khetos. Lawv txoj kev khav theeb ntawd mas siab tshaj cov neeg dog dig txoj lawm deb heev, haj tseem mus txog theem uas tsis muaj qab hau li lawm thiab. Nyob rau yam twg es pom tau yooj yim tshaj plaws? Thaum lawv raug qhuab qhia es lawv tus moj yam khav theeb raug muab qhia tshwm meej tshaj plaws. Txawm cov tawm tsam khetos no yuav ua phem loj npaum li cas los xij, yog ib tug twg qhuab qhia lawv, lawv yuav npau taws thiab hais tias: “Koj yog leej twg es yuav los thuam kuv thiab qhuab ntuas kuv? Koj coj tau pes tsawg tus neeg? Koj qhia puas tau tej lus qhuab qhia? Koj qhia puas tau qhov tseeb? Yog koj ua kuv tes hauj lwm no, koj yeej yuav ua tsis tau zoo npaum li kuv!” Qhov no zoo li cas rau nej? Lawv puas muaj tus cwj pwm lees txais qhov tseeb ib qho me me li? Yog nej raug qhuab qhia zoo li no, ces qhov ntawd muaj teeb meem lawm ntag. Qhov ntawd ua pov thawj tias nej tsis muaj ib qho tseeb qhov muaj tiag li, thiab nej lub neej txoj sia tus moj yam yeej tsis tau hloov kiag li. Ib tug neeg laus uas qias vuab tsuab heev zoo li no puas ua tau ib tug thawj coj los sis ib tug neeg ua hauj lwm? Lawv ua puas tau tes dej num uas ua dej num rau Vajtswv ntawd? Yeej ua tsis tau li, vim cov neeg zoo li no yeej tsis tsim nyog ua cov thawj coj los sis ua cov neeg ua hauj lwm hlo li. Yuav kom ua ib tug thawj coj los sis ib tug neeg ua hauj lwm mas, qhov tsawg kawg nkaus, yus yuav tsum muaj txoj kev ntsib kev pom tiag me ntsis, to taub qee qhov tseeb, muaj qee qhov muaj tiag, thiab muaj qhov mloog hais ua lub hauv paus ua ntej tshaj plaws tso, uas hais tau tias, qhov tsawg kawg nkaus, yus yuav tsum muaj peev xwm lees txais qhov raug qhuab qhia tso—tsuas yog hom neeg zoo li no thiaj li tsim nyog ua ib tug thawj coj los sis ib tug neeg ua hauj lwm xwb. Yog ib tug neeg twg tsis muaj ib qho tseeb qhov muaj tiag kiag li, thiab lawv tseem cav thiab tawm tsam thaum lawv raug qhuab qhia, thiab tsis lees txais qhov tseeb hlo li, ces yog ib tug neeg zoo li no ua dej num rau Vajtswv no, nej xav tias yuav muaj dab tsi tshwm sim? Yeej tsis muaj qhov ua xyem xyav tias lawv yuav tawm tsam Vajtswv li; lawv yuav tsis xyaum ua raws li qhov tseeb, txawm lawv ua hom hauj lwm twg los xij, thiab lawv haj yam tsis ua txhua yam kom mus raws li cov hauv paus ntsiab lus li thiab. Yog li ntawd, yog cov neeg uas tsis muaj ib qho tseeb qhov muaj tiag los tuav lub luag hauj lwm ntawm cov thawj coj los sis cov neeg ua hauj lwm, ces lawv yeej yuav taug cov tawm tsam khetos txoj kev, thiab tawm tsam Vajtswv xwb xwb li. Vim li cas thiaj li muaj ntau tus thawj coj thiab cov neeg ua hauj lwm raug muab nthuav tawm tom qab ua lawv tej dej num me ntsis xwb? Vim yog lawv tsis caum qhov tseeb, tab sis lawv nrhiav suab npe, txiaj ntsig, thiab lub meej mom xwb, ces yog vim li ntawd, lawv thiaj li cia li taug cov tawm tsam khetos txoj kev lawm. Hais txog qhov neej txhawj txog ntawd mas, yog tias muab ib pawg ntseeg rau nej saib xyuas es tsis muaj leej twg los tshuaj xyuas nej ntev li rau lub hlis, ces thaum kawg nej yeej yuav taug txoj kev yuam kev thiab ua raws li nej lub siab nyiam lawm. Yog tias muab nej tus kheej tej kev dag tso rau nej ntev li ib lub xyoos lawm, ces thaum kawg nej yuav coj lwm tus neeg mus yuam kev, thiab lawv txhua tus tsuas tsom rau txoj kev hais cov lus thiab cov lus qhuab qhia thiab sib piv tias leej twg zoo dua leej twg xwb. Yog tias muab nej tus kheej tej kev dag tso rau nej ntev li ob xyoos, ces nej yuav coj tib neeg los rau ntawm nej xub ntiag, ces tib neeg yuav mloog nej lus es tsis mloog Vajtswv lus lawm, ces qhov ua li no pawg ntseeg yuav poob qis thiab dhau los rau ntawm sab kab lis kev cai ntseeg lawm xwb. Vim li cas thiaj li zoo li no? Nej puas tau xav txog lo lus nug no dua li? Ib tug neeg yuav taug txoj kev twg thaum lawv coj pawg ntseeg li no lawm? Taug cov tawm tsam khetos txoj kev lawm. Nej puas yuav zoo li no? Tam sim no nej to taub qhov tseeb me ntsis lawm ua nej yuav muab pab tib neeg mus tau ntev npaum li cas? Nej puas coj tau tib neeg mus rau txoj kev ntseeg Vajtswv uas yog? Yog tias cov uas Vajtswv xaiv tseg nug ntau lo lus nug no, nej puas teb tau tej lus nug ntawd los ntawm qhov qhia txog qhov tseeb raws li Vajtswv cov lus? Yog tias koj tsis to taub qhov tseeb, thiab txhua yam koj ua ntawd tsuas yog qhia qee cov lus thiab cov lus qhuab qhia xwb, ces tom qab mloog koj ob peb zaug lawm, tib neeg yeej yuav dhuav, thiab thaum koj pheej qhia cov lus thiab cov lus qhuab qhia li ntawd txuas mus ntxiv, ces lawv yuav tsis nyiam, vim yeej paub tej ntawd lawm—yog li ntawd, vim li cas pheej yuav qhia tej ntawd txuas mus ntxiv? Yog koj yog ib tug neeg uas muaj laj thawj, koj yuav tsum tso tseg txhob qhia cov lus qhuab qhia ntawd rau lwm tus neeg, koj yuav tsum txhob nyob saud qhuab ntuas tib neeg, koj yuav tsum sawv kom sib txhig sib luag ib yam li lwm tus, thiab koj yuav tsum noj, haus, thiab nrog lawv saj Vajtswv cov lus ua ke. Cov no yog tag nrho tej kev qhia tshwm meej txog cov neeg uas muaj laj thawj. Cov uas khav theeb thiab qhuas tias lawv tus kheej coj ncaj tshwj xeeb ntawd mas yuav poob lawv qhov laj thawj mus yooj yim, thiab yuav qhia cov lus thiab cov lus qhuab qhia rau lwm tus mus ntxiv, los sis lawv pheej muaj plhus ntsuav nrhiav thiab kawm tej kev ntseeg ntawm sab ntsuj plig kom tob ntxiv xwb, ces yog vim li no thiaj li dhau los ua cov neeg uas dag ntxias lwm tus. Qhov ua li no yog kev tawm tsam Vajtswv. Yog tias koj pheej qhia li no mus ntxiv, koj puas paub meej tias lub txim yuav yog dab tsi? Koj puas paub meej tias koj yuav coj tib neeg mus rau qhov twg? Tus yeeb yam ntawm qhov teeb meem no yog dab tsi, thaum koj taug cov tawm tsam khetos txoj kev, coj tib neeg los rau ntawm koj xub ntiag, thiab ua kom lawv pe hawm thiab mloog koj lus? Tsis yog koj nrog Vajtswv sib tw vim cov uas Nws xaiv tseg lod? Qhov no yog coj cov neeg uas xav ntseeg Vajtswv thaum chiv thawj, kom rov qab los rau ntawm Vajtswv, thiab caum cuag Vajtswv, ua kom lawv mloog koj lus thiab ua raws li koj hais, thiab ua kom lawv saib koj zoo li yog Vajtswv. Ces lub txim ntawm qhov no yuav yog dab tsi? Cov neeg ntseeg Vajtswv thaum chiv thawj no yog kom thiaj li dim, tab sis thaum kawg raug koj dag ntxias—tsis yog lawv yuav tsis dim xwb, lawv kuj yuav raug kev puas tsuaj thiab raug rhuav tshem thiab. Vim ua li no es koj thiaj li coj tib neeg mus yuam kev, koj ua rau lawv puas tsuaj loj heev, koj rhuav tshem cov uas ntseeg Vajtswv. Koj tau ua txhaum rau dab si? Koj yuav pauj tej ntawd tau li cas? Koj dag cov ntseeg tshiab kom los rau ntawm koj ob txhais tes, koj muab lawv ua koj cov me nyuam yaj, lawv puav leej mloog koj lus, lawv puav leej raws koj qab, thiab nyob hauv koj lub siab, koj thiaj li pheej xav tias: “Tam sim no kuv muaj hwj chim lawm; so li ntawd coob tus tib neeg thiaj li mloog kuv lus, thiab pawg ntseeg yeej leg hauj lwm rau kuv lawm.” Tus yeeb yam ntxeev siab uas nyob hauv tib neeg no ua rau koj muab Vajtswv tig mus ua ib tug neeg uas tsis muaj hwj chim dab tsi li, ces tom qab ntawd koj tus kheej txawm tsim qee hom kev ntseeg los sis qee pab ntseeg lawm. Ntau txoj kev ntseeg thiab ntau pab ntseeg tshwm tuaj tau li cas? Tej ntawd tshwm tuaj raws li txoj kev no ntag. Saib cov thawj coj ntawm txhua txoj kev ntseeg thiab txhua pab ntseeg—lawv puav leej khav theeb thiab qhuas tias lawv tus kheej coj ncaj, thiab lawv tej kev tshab txhais phau Vajluskub ntawd mas tsis muaj lub ntsiab thiab ua raws li lawv tus kheej tej kev xav phem thiab tej kev xav hauv nruab siab xwb. Lawv puav leej vam khom rau tej kev txawj ntse thiab kev paub los ua lawv tes hauj lwm xwb. Yog lawv qhia tsis tau kiag li no, tib neeg puas yuav caum lawv qab? Qhov tseeb tiag, lawv yeej muaj qee yam kev paub thiab muaj peev xwm qhia qee yam lus qhuab qhia, los sis lawv paub tias yuav ua li cas thiaj li kov yeej lwm tus neeg, thiab siv qee lub tswv yim dag. Lawv siv tej no los ntxias dag tib neeg thiab coj tib neeg los rau ntawm lawv tus kheej xub ntiag. Feem ntau mas, cov neeg ntawd ntseeg Vajtswv, tab sis qhov tseeb tiag, lawv caum cov thawj coj no qab xwb. Thaum lawv ntsib ib tug uas qhia txoj kev tseeb, lawv ib txhia hais tias, “Peb yuav tsum tau sab laj rau peb tus thawj coj txog txoj kev ntseeg ntawd.” Saib seb tib neeg puas tim tsum tau kev pom zoo thiab kev tso cai los ntawm lwm tus thaum hais txog txoj kev ntseeg Vajtswv thiab lees txais txoj kev tseeb—qhov no tsis yog ib qho teeb meem lod? Yog li ces cov thawj coj ntawd yuav rais los ua neeg zoo li cas? Lawv yuav tsis rais los ua cov Falixais, cov yug yaj cuav, cov tawm tsam khetos, thiab cov dawm tib neeg txoj kev lees txais txoj kev tseeb lod? Cov tib neeg zoo li no ces zoo tib yam nkaus li Povlauj ntag. Vim li cas kuv thiaj li hais li ntawd? Tau muab Povlauj ntau tsab ntawv sau cia rau hauv phau Vajluskub thiab twb tau muab tseb los tau ob txhiab xyoo lawm. Thoob plaws hauv Tiam Hmoov Hlub ntawd, cov uas ntseeg tus Tswv nquag nyeem Povlauj cov lus thiab muab tej lus ntawd los ua lawv tus qauv coj—tiv kev txom nyem, tswj yus tus kheej lub cev, thiab thaum kawg tau txais lub kaus mom vaj ntxwv ntawm txoj kev ncaj ncees… Tib neeg puav leej ntseeg Vajtswv raws li Povlauj cov lus thiab cov lus qhuab qhia ntawd. Tshaj txhiab xyoo lawm, muaj tib neeg coob leej heev tau xyaum li Povlauj, pe hawm nws, thiab raws nws qab. Lawv tau muab Povlauj cov lus saib zoo li yog vajluskub, lawv tau muab Povlauj cov lus los hloov Tswv Yexus cov lus, ces thiaj li tsis xyaum ua raws li Vajtswv cov lus lawm. Qhov no tsis yog ib qho yuam kev lov? Qhov no yog ib qho yuam kev loj heev. Nyob rau Tiam Hmoov Hlub ntawd tib neeg to taub Vajtswv tej kev npaj siab ntau npaum li cas? Txawm li cas los xij, cov uas raws Yexus qab rau thaum lub sij hawm ntawd mas tsuas muaj feem tsawg xwb, thiab cov uas paub Nws mas haj yam muaj tsawg dua—tab txawm Nws cov thwj tim los yeej tsis paub Nws tseeb li. Yog tib neeg pom ib qho kev kaj me me nyob hauv phau Vajluskub xwb, ces tsis txhob muab xam tias qhov ntawd sawv cev rau Vajtswv tej kev npaj siab, thiab haj yam tseem tsis txhob muab ib qho kev qhuab qhia me me ntawd xav tias yog kev paub txog Vajtswv. Tib neeg puav leej khav theeb thiab khav txiv, thiab lawv tsis muaj Vajtswv nyob hauv lawv lub siab li. Thaum lawv to taub ob peb qho lus qhuab qhia lawm xwb, lawv tus kheej txawm pib nrhiav kev tawm lawm, es thiaj li ua rau muaj kev tsim ntau pab ntseeg. Nyob rau hauv Tiam Hmoov Hlub mas, Vajtswv yeej tsis coj nruj rau tib neeg kiag li. Txhua txoj kev ntseeg thiab txhua pab ntseeg Yexus lub npe ntawd yeej muaj Vajntsujplig qee tes hauj lwm; tsuav yog tsis muaj cov ntsujplig phem ua hauj lwm nyob rau hauv pab ntseeg ntawd xwb, ces Vajntsujplig yuav ua hauj lwm rau pawg ntseeg twg los yeej tau, yog li ntawd cov tib neeg feem coob thiaj li xyiv fab rau Vajtswv txoj hmoov hlub. Nyob rau yav dhau los, Vajtswv coj tsis nruj rau tib neeg, txawm lawv txoj kev ntseeg Nws ntawd yeej yog tseeb los sis yog cuav, txawm lawv raws lwm tus qab, los sis tsis caum qhov tseeb los xij li, vim Nws twb txiav txim siab ua ntej lawm tias, nyob rau theem kawg, tag nrho cov uas Nws tau npaj tseg ua ntej thiab cov uas Nws xaiv tseg lawm ntawd yuav tsum los rau ntawm Nws xub ntiag es los lees txais Nws txoj kev txiav txim. Yog hais tias, tom qab lees txais Vajtswv tes hauj lwm ntawm tiam kawg lawm, tib neeg tseem pheej pe hawm thiab caum lwm tus qab, yog lawv tsis caum qhov tseeb tab sis tseem caum tej koob hmoov thiab lub kaus mom vaj ntxwv xwb, ces qhov no yeej zam txim tsis tau kiag li. Cov tib neeg zoo li no yuav xaus mus zoo ib yam li Povlauj ntag. Vim li cas kuv thiaj li pheej siv Povlauj thiab Petus los ua ob tug qauv? Ob tug no yog ob txoj kev. Cov ntseeg Vajtswv ces yog taug Petus txoj kev los sis taug Povlauj txoj kev. Tsuas muaj ob txoj kev no xwb. Txawm koj yog ib tug caum qab los sis yog ib tug thawj coj los xij, nws yeej zoo ib yam nkaus xwb. Yog koj taug tsis tau Petus txoj kev, ces yog koj taug Povlauj txoj kev ntag. Qhov no zam tsis dhau li; tsis muaj txoj kev peb lawm. Cov uas tsis to taub Vajtswv tej kev npaj siab, cov uas tsis paub Vajtswv, cov uas tsis nrhiav kom to taub qhov tseeb, thiab cov uas zwm tsis tau rau Vajtswv hlo li, ces thaum kawg yeej yuav tsum xaus mus zoo ib yam li Povlauj ntag. Yog koj tsis nrhiav kom paub Vajtswv, los sis kom to taub Vajtswv tej kev npaj siab, thiab koj tsuas mob siab kom hais tau cov lus thiab cov lus qhuab qhia, thiab qhia tej kev ntseeg ntawd sab ntsujplig xwb, ces koj tsuas tuaj yeem tawm tsam thiab ntxeev siab rau Vajtswv xwb, vim tib neeg tus yeeb yam yeej tawm tsam Vajtswv. Tej uas tsis mus raws li qhov tseeb yeej xeeb txawm los ntawm tib neeg lub siab nyiam los lawm. Qhov twg los xij uas xeeb txawm los ntawm tib neeg lub siab nyiam los, txawm tib neeg pom tias qhov ntawd zoo los sis phem los xij li, yeej yog tab kaum Vajtswv tes hauj lwm lawm. Ib txhia tib neeg xav tias tab txawm lawv tsis ua raws li qhov tseeb nyob rau qee yam los xij, lawv yeej tsis ua phem los sis tsis tawm tsam Vajtswv. Qhov no puas yog? Yog koj tsis ua raws li qhov tseeb, ces yog koj ua txhaum rau qhov tseeb kiag lawm ntag, thiab qhov ua txhaum rau qhov tseeb ntawd ces yog kiag qhov tawm tsam Vajtswv lawm ntag; tsuas yog ib theem txawv ntawm qhov loj los sis me xwb. Txawm yog koj tsis raug suav tias yog ib tug neeg uas tawm tsam Vajtswv los xij, Vajtswv yeej yuav tsis pom zoo rau koj, vim koj tsis xyaum ua raws li qhov tseeb, thiab koj tsuas ua tej yam uas tsis muaj feem xyuam rau qhov tseeb li, thiab tsuas ua raws li koj tus kheej lub siab nyiam xwb. Txawm yog cov uas tsis caum qhov tseeb ntawd tsis ua phem los xij, lawv puas muaj peev xwm muab lawv tus moj yam qias vuab tsuab tso tseg? Yog lawv tus kheej muab tsis tau lawv tus moj yam qias vuab tsuab tshem tawm mus, ces lawv tseem ua neej nyob raws li tus moj yam qias vuab tsuab ntawd. Txawm yog lawv tsis ua ib yam dab tsi los tawm tsam Vajtswv los xij, lawv yuav zwm tsis tau rau Vajtswv li, thiab Vajtswv yuav tsis pom zoo rau cov neeg zoo li no.