Vim Li Cas Thiaj Li Yuav Tsum Paub Cais Cov Thawj Coj Cuav

Tam sim no uas peb twb sib qhia txog ntau yam kev qhia tshwm uas pom tau meej txog cov tawm tsam khetos tag lawm, ces hnub no peb yuav sib qhia txog ib lub ncauj lug tshiab—uas yog ntau yam kev qhia tshwm uas pom tau meej txog cov thawj coj cuav. Ntseeg Vajtswv los tau ntau lub xyoo no, nej tau ntsib ntau yam kev qhia tshwm uas pom tau meej thiab tej kev ua ntawm cov thawj coj cuav lawm. Nyob rau hauv tus txheej txheem uas Vajtswv lub tsev muab cov thawj coj cuav ntawm txhua theem rho tawm ntawd, tib neeg feem coob tau muaj kev paub cais tsis ntau los tsawg txog cov thawj coj cuav ntawd lawm; qhov ntawd yog, tib neeg feem coob muaj kev to taub me ntsis txog qee yam kev qhia tshwm uas pom tau meej uas meej txog cov thawj coj cuav lawm. Tiam sis txawm nej yuav nkag siab li cas los sis to taub ntau npaum li cas los xij, thaum kawg tej ntawd tsis tau yog ib txoj kev to taub uas muaj qib muaj duas los sis tsis tau meej txaus. Thaum xaiv tsa hauv pawg ntseeg, ntau tus tib neeg tsis to taub tej hauv paus ntsiab lus ntawm txoj kev xaiv cov thawj coj, tsis paub tias yuav tsum xaiv hom tib neeg twg los ua thawj coj thiab hom tib neeg twg, thaum ua thawj coj lawm, thiaj li coj tau cov kwv tij thiab cov muam nkag mus rau hauv qhov muaj tiag ntawm Vajtswv cov lus, thiab thiaj li yog ib tug thawj coj uas tsim nyog. Lawv tsis tshua to taub los sis tsis paub meej txog tej no. Haj tseem muaj ib txhia tib neeg uas tsis meej pem thiab tsis muaj kev paub cais uas tab meeg xaiv cov thawj coj cuav thaum xaiv tsa, es tseem xaiv tus uas zoo li ib tug thawj coj cuav es ua ntsej lag muag dig rau tus uas tsim nyog tiag tiag thiab tuaj yeem ua tau ib tug thawj coj, uas muaj ib tug thawj coj lub peev xwm thiab kev ua neeg. Cov uas yeej tsis muaj lub peev xwm thiab kev ua neeg los ua thawj coj mas raug xaiv vim lawv kub siab los sis muaj qee tus cwj pwm zoo rau sab nraud, thiab vim lawv haum raws li tib neeg tej kev xav phem ntawm qhov hais tias yog “tus zoo,” hos cov uas muaj txhua yam uas tsim nyog los coj tiag tiag ntawd yeej tsis raug xaiv li. Cov uas nrhiav kev ua kom nto moo thiab siv lawv tus kheej yam kub siab lug—tiam sis tsis muaj peev xwm ua hauj lwm kiag li—pheej tshwm nyob rau txhua qhov chaw, saib mas zoo li nquag heev, thiab tib neeg feem coob yuav xav hais tias hom tib neeg zoo li no mas thiaj li tsim nyog thiab yuav tsum raug xaiv. Vim li ntawd, tom qab cov tib neeg zoo li no raug xaiv lawm, lawv ris tsis tau ib teg hauj lwm li. Lawv haj tseem ua tsis tau raws li tus Nyob Suav tej kev npaj hauj lwm, thiab tsis paub tias yuav ua li cas thiab. Txawm lawv pheej kub siab lug ua hauj lwm yam khwv heev los xij, tom qab coj tau ib ntus lawm es tsis muaj kev txhim kho thiab tsis muaj kev nce qib ib qho me me nyob rau hauv pawg ntseeg tes hauj lwm li, thiab pheej muaj tej xwm txheej tshwm sim uas ua rau pawg ntseeg tes hauj lwm ntxhov quav niab los sis tib neeg tsis sib koom siab, vim yog cov tib neeg phem cuam tshuam los sis sib txeeb lub hwj chim. Tej no yog tej uas tshwm los ntawm cov thawj coj cuav tes hauj lwm los. Tom qab ib tug thawj coj cuav raug xaiv lawm, tsis yog cov kwv tij thiab cov muam txoj kev nkag mus rau hauv lub neej txoj sia yuav raug cuam tshuam thiab puas tsuaj xwb, tiam sis tib lub sij hawm ntawd ntau yam hauj lwm hauv pawg ntseeg yuav raug cuam tshuam yam tsis zoo kiag li thiab, ua rau txoj kev tshaj tawm txoj moo zoo thiaj li ua tsis tau zoo los sis kom muaj txiaj ntsig. Ib feem ntawm qhov no yog ib qho teeb meem los ntawm tus thawj coj cuav ntawd tus kheej, tiam sis kuj yog ib feem uas ntsig txog rau cov uas xaiv lawv thiab. Yog koj tsis to taub qhov tseeb tej hauv paus ntsiab lus, tsis muaj kev thoob tsib to nrog, thiab dig muag thiab pom tsis tshab tib neeg es thaum kawg koj xaiv ib tug thawj coj cuav, ces koj tsis yog tsuas ua rau koj tus kheej thiab lwm tus puas tsuaj xwb, tiam sis pawg ntseeg tes hauj lwm los kuj raug kev puas tsuaj thiab. Qhov no yog qhov kev cuam tshuam thiab kev puas tsuaj uas cov thawj coj cuav ua rau cov neeg Vajtswv xaiv tseg txoj kev nkag mus rau hauv lub neej txoj sia thiab pawg ntseeg tes hauj lwm. Yog li ntawd, peb yuav tsum paub cais thiab suav ntau yam kev qhia tshwm uas pom tau meej txog cov thawj coj cuav, thiab raws li lub hauv paus ntawd Kuv mam li pab kom nej to taub tias tus cwj pwm twg uas ib tug thawj coj uas tsim nyog yuav tsum qhia tawm, thiab tes hauj lwm twg uas lawv yuav tsum ua, thiab tus ciaj ciam hauv lawv tej luag hauj lwm yog dab tsi kiag. Lub ncauj lug ntawm kev paub cais cov thawj coj cuav ntawd mas tseem ceeb heev, vim nws ntsig txog pawg ntseeg tes hauj lwm, ntsig txog txhua tus ntawm cov neeg Vajtswv xaiv tseg kev nkag mus rau hauv lub neej txoj sia, thiab tshwj xeeb tshaj mas yog ntsig txog qhov xwm txheej nce qib ntawm txhua tes dej num. Tej zaum qee tus yuav hais tias: “Kuv tsis npaj siab los koom rau kev xaiv tsa, thiab kuv tsis muaj ib qho kev xav los sis ntshaw los ua ib tug thawj coj los sis ib tug neeg ua hauj lwm. Kuv paub kuv tus kheej, thiab qhov ua ib tug ntseeg dog dig xwb txaus lawm, yog li ntawd kis ntawm qhov tseeb tej hauv paus ntsiab lus no tsis muaj dab tsi cuam tshuam txog kuv li. Yog kuv xav mloog, ces kuv mam li mloog qee yam uas ntsig txog kuv tus kheej kev nkag mus rau hauv lub neej txoj sia thiab txoj kev cawm dim. Ntau yam kev qhia tshwm uas pom tau meej txog cov thawj coj cuav thiab qhov tseeb uas ntsig txog rau ntawd mas tsis muaj feem txog kuv tus kheej kev nkag mus rau hauv lub neej txoj sia, yog li ntawd kuv tsis tas yuav mloog, los sis kuv tuaj yeem mloog yam tsis mob siab los sis mloog yam tsis tag siab xwb thiab tsuas ua kom dhau tus txheej txheem ntawd yam tsis muab tso rau hauv siab.” Qhov no puas yog ib tug cwj pwm zoo? (Tsis yog, qhov no tsis yog.) Lwm tus hais tias: “Kuv tsis muaj kev ntshaw, thiab tsis xav los sib tw ua thawj coj. Txij thaum kuv yog me nyuam yaus los, kuv yeej tsis tau npaj siab los ua ib tug nom los sis nyob siab tshaj lwm tus, kuv tsuas nyiam ua ib tug tib neeg zoo li sawv daws, ib tug neeg dog dig xwb. Kuv xav ua ib tug raws qab txij thaum kuv pib ntseeg Vajtswv los lawm. Kuv nyiam ua raws li lwm tus tej lus txib, thiab lawv hais kom kuv ua dab tsi los kuv yeej ua li ntawd. Ua hom tib neeg zoo li no mas yooj yim heev! Kuv tsuas yog ib tug tib neeg yooj yim uas tsis xav txhawj los sis ris nra xwb, yog li ntawd kuv tsis tas yuav mloog tej no, thiab kuv tsis xav mloog.” Qhov kev xam pom no puas yog los tsis yog? (Qhov kev xam pom no tsis yog lawm.) Qhov tsis yog ntawd yog dab tsi? (Txawm lawv tsis xav ua ib tug thawj coj los xij, yog lawv tsis to taub kis ntawm qhov tseeb no thiab tsis paub cais cov thawj coj cuav ces, thaum xaiv tsa, tej zaum lawv yeej yuav xaiv ib tug thawj coj cuav, uas yuav cuam tshuam rau pawg ntseeg tes hauj lwm thiab cov neeg Vajtswv xaiv tseg kev nkag mus rau hauv lub neej txoj sia.) Qhov no yog ib kis. Puas muaj lwm yam lawm? (Qhov teeb meem ntawm cov thawj coj cuav ntawd mas yeej muaj nyob rau hauv peb txhua tus, thiab peb yuav tsum tshawb xyuas, tig xav txog, thiab to taub peb tus kheej.) (Yog peb tsis paub cais cov thawj coj cuav ces thaum peb twb raug dag lawm los peb yuav tsis paub, thiab peb tus kheej lub neej txoj sia yuav raug kev puas tsuaj.) (Hom kev xam pom zoo li no yog ib qho kev qhia tshwm uas pom tau meej txog qhov uas tsis caum qhov tseeb. Qhov ua ib tug thawj coj nyob rau hauv Vajtswv lub tsev mas tsis zoo ib yam li qhov muaj kev ntshaw thiab xav ua ib tug nom nyob rau hauv lub ntiaj teb. Qhov ua ib tug thawj coj mas yog los caum qhov tseeb kom zoo dua, los ris ib lub nra rau pawg ntseeg tes hauj lwm, thiab los ua tib zoo xav txog Vajtswv tej kev npaj siab. Qhov no yog siv zog mus rau ntawm qhov tseeb.) (Ua ib tug ntawm cov neeg Vajtswv xaiv tseg mas, peb muaj ib qho uas yuav tsum tau ua thiab ib lub luag hauj lwm los muab cov thawj coj cuav qhia tawm. Yog peb tsis paub cais cov thawj coj cuav, ces peb yuav cia lawv ib tug los tuav lub hwj chim thiab cuam tshuam rau pawg ntseeg tes hauj lwm.) Qhov ntawd yog pes tsawg kis? (Tsib kis.) Txhua kis ntawm tsib kis no puav leej yog thiab meej heev. Qhov soj ntsuam lub ntsiab tseeb ntawm qhov teeb meem no mus raws li qhov kev xam pom txog hom tib neeg uas kuv nyuam qhuav hais txog ntawd mas, yeej yog tsib kis no ntag. Txawm koj xav los sis tsis xav ua ib tug thawj coj los xij, ua ib tug ntawm cov neeg Vajtswv xaiv tseg koj yuav tsum ua tus saib xyuas rau cov thawj coj thiab cov neeg ua hauj lwm. Vajtswv lub tsev los yog koj lub tsev thiab, thiab ib tug thawj coj ces zoo li ib tug saib xyuas lub tsev. Yog lawv tswj tsis tau zoo, ces koj kuj yuav raug cuam tshuam thiab raug txuam nrog thiab, yog li ntawd koj muaj ib lub luag hauj lwm thiab ib qho uas yuav tsum tau ua los saib xyuas lawv txhua tes hauj lwm.

Ib Qho Kev Piav Luv Luv Txog Kaum Tsib Lub Luag Hauj Lwm ntawm Cov Thawj Coj thiab Cov Neeg Ua Hauj Lwm

Qhov paub cais cov thawj coj cuav mas tsis nyuaj, vim hom tib neeg zoo li no tsis yog tsis muaj nyob rau hauv pawg ntseeg; lawv twb muaj txij thaum muaj cov thawj coj hauv pawg ntseeg thiab pawg ntseeg tes hauj lwm los lawm. Lawv lub peev xwm thiab lawv lub peev xwm nkag siab, lawv tus yam ntxwv thiab txoj kev uas lawv xaiv ntawd puav leej muaj ntau yam kev qhia tshwm uas pom tau meej uas meej heev. Ua ntej yuav soj ntsuam tej kev qhia tshwm uas pom tau meej uas meej heev no, peb yuav tsum xub to taub seb cov thawj coj thiab cov neeg ua hauj lwm tej luag hauj lwm yog dab tsi tso, thiab tseem ceeb seb muaj tes hauj lwm tshwj xeeb dab tsi nyob rau hauv kiag. Tsuas yog cov uas muaj peev xwm ua tau tej hauj lwm tshwj xeeb no zoo xwb mas thiaj li yog cov thawj coj thiab cov neeg ua hauj lwm uas tsim nyog; cov uas ua tsis tau tes hauj lwm no yog cov thawj coj cuav. Tej zaum tib neeg feem coob tseem tsis tau muaj ib txoj kev los paub cais cov thawj coj cuav, tuav tsis tau tej hauv paus ntsiab lus ntawm theem pib, thiab tsis paub tias yuav tsum paub cais kis twg es thiaj li yog qhov tseem ceeb tshaj plaws. Hnub no, cia peb xub sib qhia kom muaj kab muaj ke txog qhov seb cov thawj coj thiab cov neeg ua hauj lwm tej luag hauj lwm yog dab tsi kiag, es muab tej ntawd teev ib qho zuj zus kom txhua tus paub meej. Tom qab to taub tej hauv paus ntsiab lus no lawm, thaum rov qab xaiv cov thawj coj thiab cov neeg ua hauj lwm dua, nej yuav muaj ib tug qauv es muab los ntsuas seb yuav xaiv li cas kiag thiab leej twg kiag thiaj li yog tus neeg tsim nyog uas yuav raug xaiv. Yog li ntawd, cia peb xub teev cov thawj coj thiab cov neeg ua hauj lwm tej luag hauj lwm tso.

Cov thawj coj thiab cov neeg ua hauj lwm tej luag hauj lwm:

1. Coj tib neeg los noj thiab haus Vajtswv cov lus thiab to taub cov lus ntawd, thiab los nkag rau hauv qhov muaj tiag ntawm Vajtswv cov lus.

2. Kom paub txog txhua hom tib neeg tej yam ntxwv, thiab daws ntau qhov kev nyuaj uas ntsig txog txoj kev to taub lub neej txoj sia uas lawv ntsib nyob rau hauv lawv lub neej tiag tiag.

3. Qhia qhov tseeb tej hauv paus ntsiab lus uas tsim nyog to taub kom ua tau txhua tes dej num kom yog.

4. Paub tej xwm txheej ntawm cov saib xyuas tes hauj lwm uas sib txawv thiab cov neeg ua hauj lwm uas saib xyuas ntau txoj hauj lwm tseem ceeb, thiab hloov tej dej num uas muab rau lawv ua ntawd kom ncav sij hawm los sis muab lawv rho tawm mus yog tias tim tsum, kom thiaj li tiv thaiv tau los sis txo tau cov kev puas tsuaj uas tsim los ntawm qhov siv cov tib neeg uas tsis tsim nyog ntawd, thiab kom paub tseeb hais tias tes hauj lwm mus tau zoo thiab nce qib zoo.

5. Ua kom muaj kev nkag siab thiab kev to taub tshiab tas li txog qhov xwm txheej thiab qhov kev nce qib ntawm txhua tes hauj lwm, thiab kom muaj peev xwm daws tau tej teeb meem ntawd kom ncav sij hawm, kho tej uas yuam kev kom yog, thiab kho tej uas tsis zoo hauv tes hauj lwm ntawd kom zoo kom tes hauj lwm ntawd thiaj li yuav mus tau zoo.

6. Txhawb thiab cob qhia txhua tus uas muaj peev xwm uas tsim nyog kom txhua tus uas caum qhov tseeb ntawd thiaj li muaj lub cib fim los xyaum thiab nkag mus rau hauv qhov tseeb qhov muaj tiag kom sai li sai tau.

7. Muab tib neeg faib thiab siv txhua hom tib neeg uas sib txawv kom tsim nyog raws li lawv txoj kev ua neej thiab qhov lawv ua tau zoo kom thiaj li muab lawv tso tau rau qhov uas lawv ua tau zoo.

8. Qhia tawm thiab nrhiav kev los daws tej yam uas paub tsis meej thiab tej kev nyuaj uas ntsib nyob rau hauv tes hauj lwm ntawd kom ncav sij hawm.

9. Sib txuas lus, tshaj tawm, thiab ua tej kev npaj tes hauj lwm ntawm Vajtswv lub tsev kom raws li tej kev cheem tsum ntawm Vajtswv lub tsev, coj qhia, saib xyuas, thiab txhawb, thiab tshuaj xyuas thiab taug qab txog qhov xwm txheej ntawm qhov lawv ua ntawd.

10. Saib xyuas kom yog thiab faib ntau yam khoom siv ntawm Vajtswv lub tsev kom tsim nyog (xws li cov phau ntawv, ntau yam khoom siv, nplej, thiab lwm yam ntxiv), thiab tshuaj xyuas, tu, thiab kho tas li kom thiaj li tsis tshua muaj kev puas tsuaj thiab nkim pov tseg; thiab kuj txwv tsis pub cov tib neeg phem los txeeb tej khoom ntawd thiab.

11. Xaiv cov tib neeg vam khom tau uas lawv txoj kev ua neej mus raws li tus qauv tshwj xeeb yog rau tes hauj lwm uas sau npe, suav, thiab saib xyuas cov khoom fij; tshuaj xyuas thiab tshawb xyuas cov khoom xa tuaj thiab cov khoom xa tawm tas li kom thiaj li txheeb tau yam uas muab siv ua dog ua dig los sis yam uas nkim pov tseg, thiab tej kev siv nyiaj uas tsis tsim nyog ntawd kom ncav sij hawm, kom thiaj li txheeb tau ncav sij hawm—txwv tej yam uas zoo li no thiab hais kom them rov qab los kom tsim nyog; tsis tas li ntawd xwb, ua txhua yam los tiv thaiv cov khoom fij ntawd kom tsis txhob poob mus rau hauv cov tib neeg phem ob txhais tes thiab raug coj mus ua lawv tug.

12. Txheeb ntau hom tib neeg, xwm txheej, thiab txhua yam uas tab kaum thiab cuam tshuam Vajtswv tes hauj lwm thiab qhov raws qib raws duas ntawm pawg ntseeg kom ncav sij hawm thiab kom yog; cheem thiab txwv lawv, thiab hloov txhua yam; tsis tas li ntawd xwb, qhia qhov tseeb kom cov neeg Vajtswv xaiv thiaj li paub cais tej yam zoo li no thiab kawm paub los ntawm tej yam zoo li no.

13. Tiv thaiv cov neeg Vajtswv xaiv kom tsis txhob raug cov tawm tsam khetos cuam tshuam, dag, tswj, thiab rhuav tshem yam phem heev, thiab pab kom lawv paub cov tawm tsam khetos thiab muab cov tawm tsam khetos ntawd tshem tawm ntawm lawv lub siab mus.

14. Paub kom ncav sij hawm, thiab tom qab ntawd muab txhua tus tib neeg phem thiab cov tawm tsam khetos tshem tawm los sis ntiab tawm.

15. Tiv thaiv txhua hom tib neeg ua hauj lwm uas tseem ceeb, tiv thaiv lawv kom tsis txhob raug lub ntiaj teb sab nraud cuam tshuam, thiab tsom kwm kom lawv muaj kev nyab xeeb kom thiaj li paub tseeb tias tej hauj lwm tseem ceeb yeej ua mus tau zoo raws qib raws duas.

Cov thawj coj thiab cov neeg ua hauj lwm tej luag hauj lwm tau muab suav ua kaum tsib yam, thiab peb yuav sib qhia raws li tej no. Cia peb xub saib txhua tes hauj lwm nyob rau hauv kaum tsib yam no tso. Thawj peb yam yog hais txog qhov teeb meem uas tib neeg to taub qhov tseeb, thiab kev nkag mus rau hauv lub neej txoj sia. Qhov no yog tes hauj lwm ua ntej tshaj plaws uas cov thawj coj thiab cov neeg ua hauj lwm yuav tsum ua, thiab yog ib hom ntawm cov hauj lwm loj. Ua ib tug thawj coj los sis ib tug neeg ua hauj lwm mas, yam tsawg kawg koj yuav tsum muaj peev xwm ua tau tej hauj lwm no, muaj hom peev xwm no, muaj hom nra no, thiab muaj peev xwm ris tau lub luag hauj lwm no. Tej no yog tej uas tseem ceeb tshaj plaws uas koj yuav tsum muaj. Cov thawj coj thiab cov neeg ua hauj lwm yuav tsum muaj peev xwm qhia txog Vajtswv cov lus, nrhiav ib txoj kev xyaum ua los ntawm cov lus ntawd, coj tib neeg kev kom to taub Vajtswv cov lus, thiab coj tib neeg kom tau ntsib tau pom thiab nkag mus rau hauv Vajtswv cov lus nyob hauv lub neej tiag tiag thiab kom muaj peev xwm coj cov lus ntawd mus rau hauv lub neej tiag tiag, siv cov lus ntawd los daws ntau yam teeb meem los sis tej kev nyuaj uas ntsib nyob rau hauv lub neej tiag tiag thiab nyob rau hauv tus txheej txheem ntawm txoj kev ua lawv tes dej num. Yog cov neeg Vajtswv xaiv tseg muaj tej teeb meem uas tim tsum kom muaj ib tug thawj coj los sis ib tug neeg ua hauj lwm los daws, tiam sis tus thawj coj los sis tus neeg ua hauj lwm ntawd siv tsis tau qhov tseeb los daws tej teeb meem ntawd, ces tus thawj coj los sis tus neeg ua hauj lwm ntawd siv tsis tau dab tsi li, tab txawm yog tes hauj lwm ntawm theem pib tshaj plaws los twb tsis muaj peev xwm ua tau li. Hom thawj coj los sis hom neeg ua hauj lwm no mas tsis tsim nyog. Yam plaub thiab yam tsib yog ntsig txog ntau yam hauj lwm hauv pawg ntseeg thiab cov saib xyuas ntawm ntau yam hauj lwm ntawd. Yog cov thawj coj thiab cov neeg ua hauj lwm tsis saib xyuas cov neeg saib xyuas kom zoo, ces pawg ntseeg tes hauj lwm yuav tsis mus raws qib raws duas los sis yuav raug cov tib neeg phem cuam tshuam, qhov no yuav cuam tshuam rau cov txiaj ntsig thiab kev nce qib ntawm tes hauj lwm, thiab tej zaum tes hauj lwm ntawd yuav liam sim thiab. Yog li ntawd, tes hauj lwm plaub thiab tsib kuj yog tej uas ib tug thawj coj uas tsim nyog yuav tsum ua kom zoo thiab. Yam rau thiab xya yog hais txog kev txhawb, kev cob qhia, thiab kev siv txhua hom tib neeg. Lub hauv paus ntsiab lus ntawm kev siv tib neeg yog los siv txhua tus kom mus raws li qhov uas lawv ua tau zoo tshaj, es kom txhua hom tib neeg thiaj li ua tau lawv tes dej num tsuav yog lawv txoj kev ua neeg tsim nyog thiab lawv ua tau raws li tej qauv uas Vajtswv lub tsev cheem tsum. Qhov ntawd yog, cia kom txhua hom tib neeg muaj peev xwm ua tau tej dej num uas tsim nyog; tsis tas yuav yuam kom ntses mus nyob rau saum nruab nquab, los sis yuam kom npua ya, tsuav yog ib tug neeg twg haum rau ib teg hauj lwm, ua tau zoo, thiab muaj peev xwm xwb ces txaus lawm. Tsis tas li ntawd, muaj qee tes hauj lwm mas cuam tshuam txog tej yam kev txawj, tej yam kev tshwj xeeb, thiab tej zaum ib txhia tib neeg yuav txawj ua tej ntawd tiam sis yeej tsis tau ua dua tes hauj lwm nyob rau sab ntawd li, thiab lawv tsis to taub tej hauv paus ntsiab lus uas muaj feem xyuam txog tej ntawd li. Rau cov tib neeg no mas, yog lawv haum rau tus qauv ntawm kev txhawb thiab kev cob qhia nyob rau hauv Vajtswv lub tsev, ces yuav tsum muab ib lub cib fim rau lawv thiab txhawb thiab cob qhia lawv, kom lawv thiaj li kawm tau. Ua li no, ntau yam hauj lwm nyob rau hauv Vajtswv lub tsev thiaj li muaj cov tib neeg uas tsim nyog los ua ntxiv, thiab thiaj li tsis muaj chaw seem thaum pawg ntseeg tim tsum tib neeg rau ntau yam hauj lwm. Tej no yog teeb meem ntawm ob qho kev txhawb thiab kev cob qhia tib neeg, thiab kev siv tib neeg ntawd. Cia peb saib yam yim thiab cuaj: Ob yam no yog hais txog tus cwj pwm uas cov thawj coj thiab cov neeg ua hauj lwm coj rau tes hauj lwm, qhov ntawd yog, seb lawv puas ua tau lawv tej luag hauj lwm kom tiav, puas muaj kev ua siab ncaj, thiab puas muaj peev xwm ua tau hauj lwm zoo nyob rau hauv lawv txoj kev coj rau Vajtswv tej kev cheem tsum thiab tej kev npaj ntawm Vajtswv lub tsev thiab thaum ntsib tej kev nyuaj nyob rau hauv tes hauj lwm. Yam kaum thiab kaum ib yog hais txog tej hauv paus ntsiab lus ntawm txoj saib xyuas tej khoom fij thiab txhua hom khoom nyob rau hauv Vajtswv lub tsev. Ib sab ntawm ob yam no mas yog hais txog tib neeg lub peev xwm thiab kev muaj peev xwm ua hauj lwm, hos lwm sab mas yog hais txog tej teeb meem ntawm kev ua neeg, seb ib tug neeg twg puas muaj kev ua siab ncaj, thiab seb lawv puas ua tau lawv tej luag hauj lwm kom tiav. Ntxiv no cia peb saib yam kaum ob, kaum peb, thiab kaum plaub, uas yog hais txog qee qhov xwm txheej tshwj xeeb uas tshwm sim nyob rau hauv pawg ntseeg—piv txwv li, yog ib tug neeg twg tab kaum thiab cuam tshuam, thiab ua rau lub neej pawg ntseeg uas ib txwm muaj ntawd ntxhov quav niab. Tseeb tiag, qhov loj tshaj plaws mas yog qhov uas cov tawm tsam khetos tshwm los los sis lwm hom tib neeg uas yuav tsum muab rho tawm los sis ntiab tawm. Yuav ua li cas rau hom tib neeg zoo li no, thiab ua raws li tej hauv paus ntsiab lus twg, qhov no kuj yog tes hauj lwm nyob rau hauv tus ciaj ciam ntawm cov thawj coj thiab cov neeg ua hauj lwm lub luag hauj lwm thiab. Qhov muaj peev xwm pom tau tej teeb meem kom ncav sij hawm, thiab, thaum koj pom hais tias ib tug neeg twg ua kom tab kaum thiab cuam tshuam, muaj peev xwm txwv kom ncav sij hawm, saib xyuas, thiab daws qhov no kom ncav sij hawm, thiab ua kom paub tseeb tias pawg ntseeg tes hauj lwm thiab lub neej pawg ntseeg tsis raug cuam tshuam—tej no yog tej teeb meem uas peb yam no hais txog. Yam kawg yog hais txog qhov teeb meem ntawm kev nyab xeeb ntawm txhua hom neeg ua hauj lwm uas tseem ceeb, nrog rau teeb meem ntawm seb txhua yam hauj lwm tseem ceeb puas muaj kev ruaj ntseg. Tes hauj lwm nce qib tau thaum cov neeg ua hauj lwm muaj kev nyab xeeb, tiam sis yog muaj teeb meem los sis muaj tej kev phom sij uas nraim nkoos tshwm tuaj rau cov neeg ua hauj lwm txoj kev nyab xeeb ces qhov tes hauj lwm puas mus tau ntxiv los sis tsis tau ntawd yuav yog ib qho teeb meem. Cia peb rov qab saib seb tag nrho muaj pes tsawg hom hauj lwm loj. Yam ib, yam ob, thiab yam peb yog nyob rau hauv hom hauj lwm ib: tib neeg txoj kev nkag mus rau hauv lub neej txoj sia. Yam plaub thiab tsib yog nyob rau hauv hom hauj lwm ob: ntau yam hauj lwm hauv pawg ntseeg thiab cov saib xyuas ntau yam hauj lwm ntawd. Yam rau thiab xya yog nyob rau hauv hom peb: kev siv, kev cob qhia, thiab kev txhawb txhua hom tib neeg. Yam yim thiab cuaj yog nyob rau hauv hom plaub: tej kev npaj hauj lwm ntawm Vajtswv lub tsev thiab tej kev nyuaj nyob hauv tes hauj lwm. Yam kaum thiab kaum ib yog nyob rau hauv hom tsib: tej khoom fij thiab tej khoom ntawm Vajtswv lub tsev. Yam kaum ob, kaum peb, thiab kaum plaub yog nyob rau hauv hom rau: tej xwm txheej tshwj xeeb uas tshwm sim nyob rau hauv pawg ntseeg. Yam kaum tsib yog nyob rau hauv hom xya: pawg ntseeg tes hauj lwm tseem ceeb thiab kev nyab xeeb ntawm cov neeg ua hauj lwm. Muaj tag nrho xya hom hauj lwm, uas ntsig txog kaum tsib yam. Xya hom hauj lwm no yog nyob rau hauv tus ciaj ciam ntawm cov thawj coj thiab cov neeg ua hauj lwm lub luag hauj lwm, thiab yog ib feem ntawm lawv txoj hauj lwm. Ua ib tug thawj coj los sis ib tug neeg ua hauj lwm mas, koj tej hauj lwm theem pib tshaj plaws yog xya hom no, thiab xya hom hauj lwm no yog tus ciaj ciam ntawm tej kev cheem tsum hauv Vajtswv lub tsev rau ib tug thawj coj los sis ib tug neeg ua hauj lwm. Yog peb xav ntsuas seb ib tug thawj coj puas ua tau ib tes hauj lwm zoo, seb lawv puas muaj peev xwm ua hauj lwm, seb lawv puas muaj lub peev xwm los ua ib tug thawj coj, thiab seb lawv puas tsim nyog ua ib tug thawj coj, peb yuav tsum siv xya hom hauj lwm no. Thaum to taub tej no lawm, uas yog raws li xya hom hauj lwm loj no, ces peb mam li qhia thiab soj ntsuam tej kev qhia tshwm uas pom tau meej thiab tej kev ua ntawm cov thawj coj cuav ib qho zuj zus, nrog rau tej lawv tau ua thaum lub sij hawm lawv ua ib tug thawj coj ntawd uas ua pov thawj qhia hais tias lawv yog cov thawj coj cuav es tsis yog cov uas tsim nyog. Thaum ntsuas raws li xya hom hauj lwm no lawm ces yeej muaj pov thawj tseeb, thiab yeej muaj qhov ncaj ncees thiab tsim nyog heev. Qhia Kuv seb, peb puas tsim nyog sib qhia xya hom hauj lwm no ib qho zuj zus, los sis kaum tsib yam? Txoj kev twg thiaj li zoo dua? (Sib qhia txog kaum tsib yam ib qho zuj zus.) Qhov ntawd haum rau qhov nej nyiam—yim ntxaws ces yim zoo, puas yog? Ntxiv no, peb yuav pib txoj kev sib qhia txog ntau yam kev qhia tshwm uas pom tau meej ntawm cov thawj coj cuav.

Yam Ib: Coj Tib Neeg los Noj thiab Haus Vajtswv Cov Lus thiab To Taub Cov Lus ntawd, thiab los Nkag Rau Hauv Qhov Muaj Tiag ntawm Vajtswv Cov Lus

Cov Thawj Coj Cuav Tsis Muaj Peev Xwm thiab Lub Peev Xwm uas Nkag Siab Vajtswv Cov Lus

Ib tug thawj coj cuav yog dab tsi? Tseeb tiag, nws yog ib tug neeg uas ua tsis tau tes hauj lwm tiag, yog ib tug uas tsis quav ntsej txog lawv tej dej num li yog ib tug thawj coj. Lawv yeej tsis ua ib tes hauj lwm tiag tiag los sis tseem ceeb li; lawv tsuas saib xyuas qee yam hauj lwm dav dav thiab qee tes hauj lwm ntiav ntiav xwb, uas yog tej yam uas tsis muaj dab tsi cuam tshuam rau kev nkag mus rau hauv lub neej txoj sia los sis qhov tseeb li. Txawm lawv ua tes hauj lwm no ntau npaum li cas los xij, qhov ua tes hauj lwm no yeej tsis muaj qab hau dab tsi li. Vim li ntawd thiaj Ii muab cov thawj coj zoo li no teem ua cov cuav. Yog li ntawd yuav ua li cas thiaj li paub cais kiag tias ib tug neeg twg yog ib tug thawj coj cuav? Tam sim no cia peb pib txoj kev soj ntsuam. Ua ntej tshaj yuav tsum paub meej hais tias thawj lub luag hauj lwm ntawm ib tug thawj coj los sis ib tug neeg ua hauj lwm ntawd yog los coj lwm tus los noj thiab haus Vajtswv cov lus thiab qhia qhov tseeb kom lwm tus thiaj li yuav to taub qhov tseeb ntawd thiab nkag mus rau hauv qhov tseeb qhov muaj tiag. Qhov no yog tus qauv tseem ceeb tshaj plaws uas siv los ntsuam xyuas seb ib tug thawj coj puas yog tus tseeb los sis tus cuav. Saib seb lawv puas coj tau lwm tus los noj thiab haus Vajtswv cov lus thiab to taub qhov tseeb, thiab seb lawv puas siv tau qhov tseeb los daws teeb meem. Qhov ntawd yog tib tug qauv uas siv los ntsuam xyuas seb ib tug thawj coj los sis ib tug neeg ua hauj lwm puas muaj peev xwm thiab lub peev xwm nkag siab Vajtswv cov lus, thiab seb lawv puas coj tau cov neeg Vajtswv xaiv tseg nkag mus rau hauv qhov tseeb qhov muaj tiag. Yog ib tug thawj coj los sis ib tug neeg ua hauj lwm muaj peev xwm nkag siab Vajtswv cov lus yog thiab to taub qhov tseeb, ces lawv yuav tsum daws tej kev xav phem thiab tej kev xav hauv nruab siab uas tib neeg muaj txog txoj kev ntseeg Vajtswv raws li Vajtswv cov lus, thiab pab tib neeg kom to taub qhov muaj tiag ntawm Vajtswv tes hauj lwm. Lawv kuj yuav tsum daws tej kev nyuaj tiag uas cov neeg Vajtswv xaiv tseg ntsib raws li Nws cov lus thiab, tshwj xeeb mas yog thaum hais txog tej kev xam pom yuam kev uas lawv muaj nyob rau hauv txoj kev ntseeg los sis tej kev to taub yuam kev uas lawv muaj txog kev ua ib teg dej num. Lawv kuj yuav tsum siv Vajtswv cov lus los daws tej teeb meem uas tshwm sim uas pom tau meej thaum tib neeg raug ntau yam kev sim siab thiab kev ceeb laj txom nyem, thiab muaj peev xwm los coj cov neeg Vajtswv xaiv tseg kom to taub thiab xyaum ua raws qhov tseeb, thiab nkag mus rau hauv qhov muaj tiag ntawm Nws txoj lus. Tib lub sij hawm ntawd, lawv yuav tsum soj ntsuam tib neeg ntau tus moj yam qias vuab tsuab raws li tej yam ntxwv qias vuab tsuab uas muab nthuav tawm nyob rau hauv Vajtswv cov lus, kom cov neeg Vajtswv xaiv tseg thiaj li pom hais tias tej no yam twg raug rau lawv, kom muaj kev paub txog lawv tus kheej thiab ntxub thiab ntxeev siab rau Ntxwgnyoog, kom thiaj li pab tau cov neeg Vajtswv xaiv tseg los tuav lawv tej lus tim khawv khov kho, kom kov yeej Ntxwgnyoog, thiab muab yeeb koob rau Vajtswv thaum raug txhua hom kev sim siab. Qhov no yog tes hauj lwm uas cov thawj coj thiab cov neeg ua hauj lwm yuav tsum ua. Nws yog pawg ntseeg tes hauj lwm uas theem pib tshaj plaws, tseem ceeb tshaj plaws, thiab tseem ntsiab tshaj plaws. Yog cov tib neeg uas ua thawj coj muaj peev xwm nkag siab Vajtswv cov lus thiab muaj peev xwm los to taub qhov tseeb, ces tsis yog tias lawv tuaj yeem to taub Vajtswv cov lus thiab nkag mus rau hauv qhov muaj tiag ntawm cov lus ntawd xwb, lawv kuj yuav tuaj yeem coj kev, coj, thiab pab cov neeg uas lawv coj kom to taub Vajtswv cov lus thiab nkag mus rau hauv qhov muaj tiag ntawm cov lus ntawd thiab. Tiam sis lub peev xwm nkag siab Vajtswv cov lus thiab to taub qhov tseeb ntawd yog kiag qhov uas cov thawj coj cuav tsis muaj ntag. Lawv tsis to taub Vajtswv cov lus, lawv tsis paub tej moj yam qias vuab tsuab uas tib neeg nthuav tawm nyob rau ntau yam xwm txheej sib txawv uas raug muab qhia tshwm nyob rau hauv Nws cov lus, los sis tus yam ntxwv twg ua rau muaj kev tawm tsam, kev yws, thiab kev ntxeev siab rau Vajtswv, thiab ntau yam ntxiv. Cov thawj coj cuav tsis muaj peev xwm tig xav txog lawv tus kheej los sis muab Vajtswv cov lus ntsuas lawv tus kheej, lawv tsuas to taub tej lus qhuab qhia me ntsis thiab ob peb txoj kev cai tswj los ntawm lub ntsiab ncaj ncaj ntawm Vajtswv cov lus xwb. Thaum lawv qhia lwm tus, lawv tsuas hais qee lo ntawm Nws cov lus uas lawv nco tau xwb, ces txawm piav tej lus ntawd lub ntsiab ncaj ncaj lawm. Thiab los ntawm qhov ntawd, lawv txawm xav hais tias lawv tab tom qhia qhov tseeb thiab ua tes hauj lwm tiag. Yog ib tug neeg twg nyeem tau thiab hais tau Vajtswv cov lus uas lawv nco tau zoo li lawv, ces lawv yuav xav hais tias tus ntawd yog ib tug neeg uas nyiam thiab to taub qhov tseeb. Ib tug thawj coj cuav tsuas to taub lub ntsiab ncaj ncaj ntawm Vajtswv cov lus xwb; lawv yeej tsis to taub qhov tseeb ntawm Vajtswv cov lus kiag li, yog li ntawd lawv thiaj li tsis muaj peev xwm tham txog lawv txoj kev paub ntawm kev ntsib kev pom txog cov lus ntawd. Cov thawj coj cuav tsis muaj lub peev xwm nkag siab Vajtswv cov lus; lawv tsuas to taub tau lub ntsiab ntiav ntiav ntawm cov lus ntawd xwb, tiam sis ntseeg hais tias qhov ntawd yog nkag siab Nws cov lus thiab to taub qhov tseeb lawm. Nyob rau hauv lub neej txhua hnub mas lawv pheej txhais lub ntsiab ncaj ncaj ntawm Vajtswv cov lus los qhia thiab pab lwm tus, ntseeg hais tias qhov ua li ntawd yog ua hauj lwm, thiab hais tias yog lawv tab tom coj tib neeg los noj thiab haus Vajtswv cov lus thiab nkag mus rau hauv qhov muaj tiag ntawm cov lus ntawd. Tseeb tiag ces txawm cov thawj coj cuav ntawd qhia lwm tus li no txog Vajtswv cov lus tas li los xij, lawv yeej daws tsis tau tej teeb meem tiag tiag ib qho me me li, ces cov neeg Vajtswv xaiv tseg thiaj li tsis muaj peev xwm xyaum ua raws los sis ntsib pom Nws cov lus li. Txawm lawv mus koom tej kev sib txoos ua ke los sis noj thiab haus Vajtswv cov lus npaum li cas los xij, lawv yeej tseem tsis to taub qhov tseeb, thiab tsis muaj kev nkag mus rau hauv lub neej txoj sia, thiab lawv tsis muaj leej twg muaj peev xwm tham txog lawv txoj kev paub ntawm kev ntsib kev pom li. Txawm yog muaj cov tib neeg phem thiab cov tsis ntseeg ua rau muaj kev cuam tshuam nyob rau hauv pawg ntseeg los xij, tsis muaj leej twg muaj peev xwm paub cais txog cov neeg ntawd li. Thaum ib tug thawj coj cuav pom ib tug tsis ntseeg los sis ib tug neeg phem ua rau muaj kev cuam tshuam, lawv tsis siv kev paub cais, tiam sis muab lawv txoj kev hlub thiab tej lus ntuas rau lawv, hais kom lwm tus ua siab dav thiab ua siab ntev rau lawv, zam rau cov tib neeg no ua rau muaj kev cuam tshuam nyob rau hauv pawg ntseeg txuas ntxiv. Qhov no ua rau txhua yam ntawm pawg ntseeg tes hauj lwm tsis tawg paj txi txiv li. Qhov no yog qhov tshwm sim los ntawm ib tug thawj coj cuav qhov kev tsis ua tes hauj lwm tiag. Cov thawj coj cuav siv tsis tau qhov tseeb los daws teeb meem, uas yeej txaus muab los ua pov thawj qhia hais tias lawv tsis muaj qhov tseeb qhov muaj tiag. Thaum lawv hais lus mas, lawv tsuas hais cov lus thiab tej kev qhuab qhia xwb, thiab txhua yam uas lawv qhia kom lwm tus los xyaum ua raws ntawd yog tej kev qhuab qhia thiab tej kev cai tswj xwb. Piv txwv li, thaum ib tug neeg twg muaj kev to taub yuam kev txog Vajtswv mas, cov thawj coj cuav ntawd yuav hais rau lawv tias, “Vajtswv cov lus twb hais tag nrho qhov no lawm: Txawm Vajtswv ua dab tsi los xij, puav leej yog tib neeg txoj kev cawm dim, yog txoj kev hlub xwb. Saib seb Nws cov lus mas meej heev li. Ua li cas koj ho tseem nkag siab yuam kev txog Nws?” Qhov no yog hom kev qhia uas cov thawj coj cuav muab rau tib neeg. Lawv hais cov lus thiab tej kev qhuab qhia los txhawb tib neeg, txwv tib neeg, thiab ua kom lawv ua raws li tej kev cai tswj. Qhov no mas tsis muaj txiaj ntsig ib qho me me li, thiab daws tsis tau ib qho teeb meem li. Cov thawj coj cuav tsuas hais tau cov lus thiab tej kev qhuab qhia los coj tib neeg kev xwb, uas ua rau cov tib neeg ntawd xav tias qhov muaj peev xwm hais tau tej kev qhuab qhia ntawd txhais tau hais tias lawv nkag mus rau hauv qhov tseeb qhov muaj tiag lawm. Tiam sis thaum muaj ib qho kev nyuaj los raug rau lawv, lawv tsis paub tias yuav xyaum ua raws li cas, tsis muaj txoj hau kev, thiab tag nrho cov lus thiab tej kev qhuab qhia uas lawv to taub ntawd poob mus rau ib sab lawm. Qhov no qhia tau dab tsi? Qhov no qhia tau hais tias qhov to taub tej kev qhuab qhia ntawd tsis muaj qab hau los sis tsis muaj nuj nqis kiag li. Tib yam uas cov thawj coj cuav to taub ces yog kev qhuab qhia xwb. Lawv qhia tsis tau qhov tseeb los daws teeb meem li; lawv tej kev ua mas tsis muaj hauv paus ntsiab lus li, thiab nyob rau hauv lawv lub neej mas lawv tsuas ua raws li qee txoj kev cai tswj uas lawv xav tias zoo xwb. Cov tib neeg zoo li no tsis muaj qhov tseeb qhov muaj tiag. Vim li ntawd, thaum cov thawj coj cuav coj tib neeg los noj thiab haus Vajtswv cov lus, thiaj li tsis muaj txiaj ntsig tiag tiag li. Lawv tsuas muaj peev xwm ua kom tib neeg to taub lub ntsiab ncaj ncaj ntawm Vajtswv cov lus xwb, thiab pab tsis tau lawv kom tau txais kev tig ras to taub los ntawm Vajtswv cov lus los sis to taub tias lawv muaj hom moj yam qias vuab tsuab twg. Cov thawj coj cuav tsis to taub tias tib neeg tej yam ntxwv yog dab tsi los sis tus moj yam lub ntsiab tseeb uas tib neeg nthuav tawm rau thaum ntsib ib qho xwm txheej twg, Vajtswv cov lus twg uas yuav tsum tau muab siv los daws tej yam ntxwv yuam kev thiab tej moj yam qias vuab tsuab no, seb Vajtswv cov lus hais li cas txog rau tej ntawd, tej kev cheem tsum thiab tej hauv paus ntsiab lus ntawm Vajtswv cov lus, los sis qhov tseeb uas nyob rau hauv. Cov thawj coj cuav tsis to taub dab tsi txog qhov tseeb qhov muaj tiag li. Lawv tsuas qhia tib neeg los ntawm qhov hais tias, “Noj thiab haus Vajtswv cov lus kom ntau ntxiv. Muaj qhov tseeb nyob rau hauv cov lus ntawd. Koj yuav to taub thaum koj tau nyeem Nws cov lus ntau ntxiv lawm. Yog koj tsis to taub qee lo ntawm cov lus ntawd, koj yuav tsum thov Vajtswv, nrhiav, thiab ua tib zoo xav txog cov lus ntawd kom ntau ntxiv.” Qhov no yog qhov lawv qhuab ntuas tib neeg, thiab lawv daws tsis tau teeb meem los ntawm qhov ua li ntawd li. Txawm leej twg ntsib ib qho teeb meem es los nrhiav ntawm lawv los xij, lawv yeej hais tib yam xwb. Tom qab ntawd, tus neeg ntawd yeej tseem tsis paub lawv tus kheej thiab yeej tseem tsis to taub qhov tseeb. Lawv daws tsis tau lawv tus kheej tej teeb meem tiag tiag, los sis tsis to taub tias lawv yuav tsum xyaum ua raws Vajtswv cov lus li cas, ces lawv tsuas ua raws li lub ntsiab ncaj ncaj ntawm Vajtswv cov lus thiab tej kev cai tswj xwb. Thaum hais txog qhov tseeb tej hauv paus ntsiab lus ntawm kev xyaum ua raws li Vajtswv cov lus los sis qhov muaj tiag twg uas lawv yuav tsum to taub ntawd, lawv yeej tseem tsis to taub li thiab. Qhov no yog tej uas los ntawm cov thawj coj cuav tes hauj lwm los: tsis muaj ib qho txiaj ntsig tiag tiag li.

Vajtswv cheem tsum kom tib neeg hnav khaub ncaws kom zoo thiab tsim nyog, nrog rau tus cwj pwm coj zoo ntawm cov neeg dawb huv. “Zoo thiab tsim nyog, nrog rau tus cwj pwm coj zoo ntawm cov neeg dawb huv”—muaj tag nrho kaum rau lo lus, tiam sis nej puas to taub hais tias cov lus no txhais li cas? (Peb txhua tus paub raws li kev qhuab qhia tias, Vajtswv cheem tsum kom tib neeg hnav khaub ncaws kom zoo thiab tsim nyog, nrog rau tus cwj pwm coj zoo ntawm cov neeg dawb huv, tiam sis thaum peb tus kheej hnav khaub ncaws ntawd peb tsis paub yuav ntsuas li cas tias cov twg zoo los sis tsim nyog.) Qhov no cuam tshuam txog qhov teeb meem ntawm qhov seb puas to taub qhov tseeb los tsis to taub. Yog koj ntsuas tsis tau qhov no, ces qhov ntawd ua pov thawj qhia tias koj tsis to taub Vajtswv cov lus. Yog li ntawd, qhov to taub Vajtswv cov lus ntawd txhais li cas? Qhov ntawd txhais hais tias to taub tej qauv rau kev hnav kom zoo thiab tsim nyog li qhov uas Vajtswv hais txog los sis, hais kom meej dua, yog cov kob ntawm cov khaub ncaws thiab hom khaub ncaws. Cov kob thiab hom twg thiaj li zoo thiab tsim nyog? Cov uas muaj peev xwm nkag siab qhov tseeb paub tias cov twg zoo thiab tsim nyog, thiab cov twg txawv txawv. Txawm qee cov khaub ncaws zoo thiab tsim nyog los xij, cov ntawd yog hom qub lawm. Vajtswv tsis nyiam tej uas qub lawm, thiab Nws tsis hais kom tib neeg xyaum ua raws li tej hom yav dhau los los sis ua cov Falixais uas hais lus zoo tiam sis siab phem. Qhov uas Vajtswv hais tias “zoo thiab tsim nyog” ntawd yog qhov muaj ib qho zoo nkaus li tib neeg, zoo li muaj meej mom, zoo nkauj, thiab muaj tus yam ntxwv zoo. Vajtswv tsis hais kom tib neeg hnav cov khaub ncaws txawv txawv, los sis hnav cov khaub ncaws uas khaub hlab hnyo zoo li ib tug neeg pluag, tiam sis Nws hais kom tib neeg hnav kom zoo thiab tsim nyog, nrog rau tus cwj pwm coj zoo ntawm cov neeg dawb huv. Qhov no yog cov tib neeg dog dig txoj kev nkag siab. Tiam sis tom qab hnov qhov no lawm, ib tug thawj coj cuav txawm kub siab heev, ces thiaj li hais tias: “Vajtswv cov lus qhia rau peb txog qhov uas yuav hnav li cas. ‘Zoo thiab tsim nyog, nrog rau tus cwj pwm coj zoo ntawm cov neeg dawb huv’—yog peb khaws kaum rau lo lus no ces yog peb muab lub yeeb koob rau Vajtswv lawm, tsis ua rau Nws txaj muag, thiab yuav yog cov tib neeg uas cov tsis ntseeg hwm heev. Yog li ntawd, qhov zoo thiab tsim nyog ntawd yog dab tsi? Qhov ntawd yog qhov koj yuav tsum hais lus thiab ua kom zoo nkaus li tib neeg, thiab yuav tsum muaj ib tug cwj pwm coj zoo ntawm cov neeg dawb huv. Thaum hais txog cov neeg dawb huv ntawd, feem ntau yog peb hais txog cov neeg dawb huv puag thaum ub. Yog peb xav muaj tus cwj pwm coj zoo ntawm cov neeg dawb huv ces peb yuav tsum xyaum ua raws li hom khaub ncaws ntawm cov neeg dawb huv puag thaum ub, tiam sis yog koj hnav cov khaub ncaws puag thaum ub mus taug kev mus los ces tib neeg yuav xav hais tias koj vwm lawm. Qhov no tsis haum raws li lub hauv paus ntsiab lus ntawm kev muab lub yeeb koob rau Vajtswv, tiam sis peb nrhiav tau qee qhov pov thawj ntawm cov khaub ncaws uas cov neeg dawb huv hnav nyob rau lub sij hawm tsis ntev los no. Nees nkaum peb caug tawm lub xyoo dhau los tib neeg zej zog tej kev coj ua zoo dua. Tib neeg coj yooj yim dua, thiab hnav khaub ncaws tsis tshua tawm pom nqaij thiab tsim nyog dua. Yog koj hnav raws li tus qauv no ces koj yuav zoo thiab tsim nyog, thiab muaj tus cwj pwm coj zoo ntawm cov neeg dawb huv. Qhov no yog txoj kev xyaum ua raws.” Thaum pom tias cov tib neeg nyob rau xyoo 1970 tawm thiab 1980 tawm ntawd hnav cov tsho dawb thiab cov ris xiav, nws thiaj li qhia rau cov kwv tij thiab cov muam hais tias, “Kuv tau pom qhov kaj nyob rau hauv Vajtswv cov lus lawm. Cov tib neeg nyob rau xyoo 70 tawm thiab 80 tawm ntawd mas hnav cov khaub ncaws uas tsim nyog thiab yooj yim heev. Hais tsis tau tias lawv muaj meej mom, tiam sis zoo li mus raws li tej kev cheem tsum ntawm Vajtswv txoj lus dua, yog li ntawd peb yuav hnav kom raws li tus qauv no.” Tus thawj coj ntawd ua tus coj txhua tus los hnav tej no, ces txhua tus thiaj li xav tias zoo, tsim nyog thiab yooj yim heev. Tus thawj coj ntawd hais tias: “Vajtswv hais kom tsis txhob hnav cov khaub ncaws txawv txawv. Ua ntej tshaj plaws, cov khawm ntawm lub tsho yuav tsum khawm kom txog saum caj dab, thiab tag nrho cov khawm ntawm lub dab tes tsho ntawd kuj yuav tsum khawm kom khov kho thiab. Yuav tsum tsis txhob pub lub dab teg tshwm, yuav tsum muab lub tsho ntsaws rau hauv, thiab txhua qhov yuav tsum muab npog kom ntom nti, kom tsis txhob pom lub hauv siab los sis nraub qaum li. Saib seb qhov ntawd zoo thiab tsim nyog npaum li cas! Qhov no tsis zoo thiab tsis tsim nyog, thiab tsis haum raws li tus cwj pwm coj zoo ntawm cov neeg dawb huv, raws li Vajtswv cheem tsum lod?” Tus thawj coj ntawd nyiam tshwj xeeb cov khaub ncaws uas nws tab tom hnav thaum lub sij hawm ntawd, thiab tib lub sij hawm ntawd nws cheem tsum kom lwm tus hnav li ntawd thiab tias, “Nej cov khaub ncaws mas tshiab dhau lawm, nrov dhau lawm. Tej ntawd ua rau Vajtswv txaj muag, thiab Nws tsis nyiam tej ntawd. Txhua tus, maj nrawm nroos los hnav yam uas kuv tab tom hnav, kom zoo ib yam li kuv!” Cov tib neeg uas tsis muaj kev paub cais ces ua raws li ntawd, nrhiav thiab hnav ib ce khaub ncaws uas hu tias zoo thiab tsim nyog uas mus raws li tus cwj pwm coj zoo ntawm cov neeg dawb huv, thiab tib neeg feem coob haj tseem xav tias zoo thiab. Tiam sis nyob hauv lawv lub siab mas ib txhia tib neeg tsis nyiam tej yam qub no kiag li, thiab xav tias qhov ua li no mas tsis tsim nyog lawm, thiab qhov kev to taub Vajtswv cov lus li no mas yog qhov tsis tseeb. Cov tib neeg no, txawm tsis muaj peev xwm hais kom meej tias qhov mloog tus thawj coj cov lus ntawd yog los tsis yog thiab tsis kam txiav txim siab los xij, lawv xav tias tsis txhob ua raws li cov neeg feem coob yam nqi muag nti. Lawv ntseeg hais tias qhov uas tus thawj coj hais ntawd tsis yog tag nrho, ces lawv thiaj li tsis ua raws li ntawd. Tsuas yog cov tib neeg ruam, cov tib neeg uas tsis muaj peev xwm nkag siab Vajtswv cov lus, lawv tus kheej tsis nyeem Vajtswv cov lus xwb thiaj li ua raws li txhua yam uas tus thawj coj cuav hais, thiab txawm kom lawv ua dab tsi los xij lawv yeej ua txhua yam raws li ntawd. Lawv raws tus thawj coj cuav ntawd qab thiab qog raws li nws, hnav khaub ncaws ib yam nkaus li nws thaum lawv tawm rooj. Thaum twg lawv tawm rooj mus ntawm ib pab neeg mas, lawv zoo siab heev, xav tias “Peb ntseeg Vajtswv Tus Uas Muaj Hwj Chim Loj Kawg Nkaus, thiab muaj tus cwj pwm coj zoo ntawm cov neeg dawb huv ntau heev nyob rau hauv kuv cev khaub ncaws. Nej hnav dab tsi? Cas yuav ci ua luaj, cas yuav tshiab ua luaj, cas yuav phem qias ua luaj! Saib peb seb, peb tsis nthuav ib yam dab tsi tawm li!” Lawv xav hais tias lawv mas nim zoo heev li. Tus thawj coj cuav ntawd tsis yog tsis paub tias qhov no yog ib qho kev txhais Vajtswv cov lus yuam kev lawm xwb, tiam sis tseeb tiag nws xav hais tias nws tab tom xyaum ua raws li Vajtswv cov lus thiab nkag mus rau hauv qhov tseeb qhov muaj tiag ntawm cov lus ntawd lawm. Qhov no yog qhov uas cov thawj coj cuav ua. Txawm yog Vajtswv tej kev cheem tsum rau tib neeg uas yooj yim tshaj plaws thiab to taub yooj yim tshaj plaws xwb los, cov thawj coj cuav yeej to taub tsis tau tias Vajtswv cov lus, tej qauv uas cov lus ntawd cheem tsum, los sis tej hauv paus ntsiab lus ntawd yog hais txog dab tsi. Yog li ntawd lawv puas tuaj yeem to taub qhov uas Vajtswv hais txog tib neeg ntiaj teb tus moj yam qias vuab tsuab, los sis txhua hom tib neeg tej yam ntxwv? Lawv puas paub tias qhov tseeb ntawm no yog dab tsi kiag? Yeej tsis paub li.

Cov thawj coj cuav tsis muaj lub peev xwm nkag siab Vajtswv cov lus; lawv tsuas paub lub ntsiab sau cia ntawm Vajtswv cov lus tias Vajtswv hais dab tsi xwb tiam sis tsis to taub tias Vajtswv cov lus nthuav tawm qhov tseeb dab tsi, Vajtswv cheem tsum kom tib neeg ua dab tsi, los sis qhov tseeb tej hauv paus ntsiab lus uas tib neeg yuav tsum to taub ntawd yog dab tsi. Yog li ntawd, thaum lawv qhia Vajtswv cov lus, lawv tsuas yog muab tej lus ntawd txhais raws li cov lus sau cia thiab muab qee txoj kev cai tswj, thiab qee txoj cai rau tib neeg ua raws xwb, lawv siv tej no los ua pov thawj qhia hais tias lawv kuj to taub Vajtswv cov lus thiab tau ua hauj lwm lawm. Ib txhia thawj coj cuav haj tseem xav hais tias Vajtswv cov lus twb qhia meej lawm, tsuas yog tib neeg pheej tsis noj thiab haus cov lus ntawd los sis tsis siv zog xwb. Thaum pom tias txhua tus yeej muaj phau ntawv uas hais txog Vajtswv cov lus ntawm tes lawm, ces lawv suav hais tias qhov coj tib neeg noj thiab haus Vajtswv cov lus ntawd mas yog ib qho uas tsis tsim nyog ua xwb. Vim li ntawd, thaum lawv pom tej teeb meem thaum sib sau ua ke los sis thaum ua lawv tej dej num, lawv tsuas yog xa qee nqe lus uas xaiv tawm los ntawm Vajtswv cov lus rau tib neeg, qhia rau lawv tej yam xws li tias, “Nyeem nqe Vajtswv cov lus no”; “Nyeem nqe Vajtswv cov lus ntawd”; los sis “Vajtswv cov lus hais li no txog sab no, thiab hais li ntawd txog sab ntawd.” Lawv tsuas yog xa tej nqe lus uas xaiv tawm los ntawm Vajtswv cov lus rau tib neeg xwb, es siv ib txoj kev txhawb kom tib neeg nyeem Vajtswv cov lus, ces ntseeg hais tias qhov no yog coj tib neeg noj thiab haus Vajtswv cov lus thiab hais tias lawv tab tom ua ib tug thawj coj lub luag hauj lwm kom tiav. Tom qab pom cov lus no lawm, tib neeg hais tias, “Kuv kuj tau nyeem Vajtswv cov lus no lawm thiab; puas yog koj nrhiav cov lus no rau kuv mas yog ib qho tsis tsim nyog ua xwb lod? Txawm li cas los xij, cov thawj coj cuav xav hais tias, “Yog kuv tsis xa cov lus no rau koj, koj yuav nrhiav tsis tau tias cov lus no nyob rau tshooj twg los sis nplooj twg. Koj twb tsis paub tias Vajtswv hais cov lus no nyob rau qhov xwm txheej twg li. Ua ib tug thawj coj, kuv yuav tsum saib xyuas lub luag hauj lwm no, xa Vajtswv cov lus rau koj txhua lub sij hawm, txhua qhov chaw.” Ib txhia thawj coj cuav, vim lawv lub siab hlub, haj tseem xa kaum mus rau nees nkaum nqe Vajtswv cov lus rau ib tug twg nyob rau ib hnub, los qhia txog txoj kev ua siab ncaj rau lawv tes hauj lwm thiab lawv txoj kev txiav txim siab los coj tib neeg mus rau hauv qhov muaj tiag ntawm Vajtswv cov lus. Vajtswv cov lus no muab xa rau tib neeg lawm, tiam sis lawv tej teeb meem puas raug daws? Lawv puas ua tau lub luag hauj lwm uas ib tug thawj coj yuav tsum ua kom tiav? Feem ntau, lawv tsis ua lub luag hauj lwm no, vim cov lus no yog tib neeg to taub tau ntawm lawv tus kheej lawm ces, lawv yuav tsis tim tsum ib tug thawj coj lawm. Cov nqe lus ntawm Vajtswv cov lus uas cov thawj coj cuav xa ntawd tseeb tiag mas cov neeg uas pheej nyeem Vajtswv cov lus yeej paub zoo lawm, tiam sis yam tib neeg tsis muaj yog dab tsi? Lawv tej kev nyuaj thiab tej teeb meem yog dab tsi? Tej ntawd yog, thaum tej teeb meem uas muaj feem xyuam txog tej qhov tseeb, thaum ntsib tej kev nyuaj, tib neeg saib tsis tshab lub ntsiab tseeb ntawm tej teeb meem ntawd, tsis paub tias yuav pib daws qhov twg, thiab tsis paub tias yuav nkag mus rau hauv tej qhov tseeb no li cas—thiab cov thawj coj cuav kuj tsis paub ib yam nkaus. Yog li, lawv puas tau ua lawv lub luag hauj lwm kom tiav nyob rau hauv qhov teeb meem no? Lawv puas muaj peev xwm ua tau tes hauj lwm ntawm kev coj? Pom meej tias, lawv tsis tau ua lub luag hauj lwm no kom tiav. Piv txwv li, thaum tib neeg nyeem txog qhov ua ib tug neeg coj ncaj nyob rau hauv Vajtswv cov lus, ib tug thawj coj cuav, vim lawv tsis paub tias yuav noj thiab haus Vajtswv cov lus li cas thiab tsis muaj peev xwm nkag siab thiab to taub qhov tseeb, lawv yuav hais tias: “Vajtswv tej kev cheem tsum tsis siab. Vajtswv hais kom peb ua cov neeg coj ncaj, thiab qhov ua neeg coj ncaj txhais hais tias hais lus tseeb. Tsis yog Vajtswv cov lus twb hais tag nrho lawm lod: ‘Tab sis cia koj tej kev cev ncauj cev lus kom zoo li, Yog, ces yog; Tsis yog, ces tsis yog’ (Mathai 5:37). Vajtswv cov lus hais meej heev li! Cia li hais yam uas koj xav hauv siab xwb; qhov ntawd yooj yim heev! Vim li cas koj ho ua tsis tau? Vajtswv txoj lus yog qhov tseeb, peb yuav tsum xyaum ua raws. Qhov tsis xyaum ua raws yog kev ntxeev siab, thiab Vajtswv puas cawm cov uas ntxeev siab rau Nws? Nws tsis cawm.” Thaum hnov li no, tib neeg teb tias, “Txhua yam uas koj hais yeej yog, tiam sis peb tseem tsis paub tias yuav ua neeg coj ncaj li cas. Vim muaj ntau zaus, kev hais lus dag yog ib yam uas tswj tsis tau, los sis yog ib yam uas tib neeg ua thaum lawv tsis muaj lwm txoj kev xaiv, thiab muaj ib qho laj thawj rau qhov ntawd. Yuav daws qhov no li cas?” Tus thawj coj cuav yuav hais li cas? “Qhov no tsis yooj yim daws lod? Tsis yog Vajtswv cov lus twb qhia meej lawm lod? Qhov ua ib tug neeg coj ncaj tsuas zoo li ua ib tug me nyuam yaus xwb; qhov ntawd yooj yim heev li! Txawm koj hnub nyoog laus li cas los xij, koj ua tsis tau li ib tug me nyuam yaus lod? Cia li saib seb cov me nyuam yaus coj li cas.” Tus mloog xav tias: “Tus cwj pwm tseem ceeb ntawm ib tug me nyuam yaus yog qhov ua siab dawb paug thiab muaj zog, dhia ua si, tsis paub tab, thiab tsis to taub ntau yam. Vim tus thawj coj twb hais li ntawd lawm, ces kuv yuav ua li ntawd.” Hnub tom qab, tus tib neeg uas muaj peb caug los sis plaub caug xyoo thiaj li muab nws cov plaub hau ntos ua ob tug, coj ib tug khiab plaub hau thiab ob peb tus khawm plaub hau uas muaj xim paj yeeb, hnav ib lub tsho, nkawm khau, thiab thom khwm uas muaj xim paj yeeb, hnav ib ce paj yeeb tag nrho. Pom li no, tus thawj coj hais tias, “Yog lawm! Mus kev kom zoo li ib tug me nyuam yaus, dhia ua si. Hais lus yam siab dawb paug zoo li ib tug me nyuam yaus, nrog ob lub qhov muag uas tsis muaj kev phem, thiab lub ntsej muag luag ntxhi—qhov no tsis yog rov qab rau ib tug me nyuam yaus tus cwj pwm lod? Qhov no yog tus cwj pwm ntawm ib tug neeg coj ncaj!” Tus thawj coj mas zoo siab heev, hos lwm tus pom qhov no hais tias yog ruam, txawv heev. Tus thawj coj cuav no tsis yog daws tsis tau teeb meem xwb tiam sis yeej tsis paub nrhiav qhov tseeb tej hauv paus ntsiab lus kiag li, muab tib neeg coj mus rau txoj kev uas yuam kev. Txawm yog qhov tseeb uas yooj yim tshaj plaws ntawm qhov ua ib tug neeg coj ncaj xwb los xij, tus thawj coj cuav tsis paub yuav nkag siab li cas kom raug thiab kom yog, lam tau lam ua raws tej kev cai tswj, nkag siab nkhaus ua rau cov uas hnov tej ntawd xeev siab xav ntuav xwb. Qhov no yog qhov uas cov thawj coj cuav ua.

Cov thawj coj cuav nkag siab Vajtswv cov lus muaj ntau yam ntau tsav, muaj txhua yam kev xam pom uas txawv txawv. Lawv siv qhov uas hais tias xyaum ua thiab ua raws li Vajtswv cov lus, yuam kom lwm tus lees txais thiab ua raws li lawv txoj kev nkag siab. Muab hais luv luv, hom tib neeg zoo li cov thawj coj cuav no feem ntau muaj kev nkag siab Vajtswv cov lus ntiav thiab nkhaus. Siv ib lo lus ntawm sab ntsujplig los hais, ces peb yuav hais tias lawv “tsis muaj kev to taub txog sab ntsujplig.” Lawv tsis yog tsuas nkag siab Vajtswv cov lus nkhaus xwb, tiam sis lawv pheej yuam kom lwm tus ua raws li tej kev qhuab qhia thiab tej kev cai tswj uas nkhaus no ib yam nkaus li lawv thiab. Tib lub sij hawm ntawd, lawv siv txoj kev to taub nkhaus ntawd los teem txim rau cov uas muaj kev to taub qhov tseeb uas yog. Cov thawj coj cuav uas tsis muaj kev to taub txog sab ntsujplig no, lawv tsis tshawb fawb thiab soj ntsuam Vajtswv cov lus zoo li cov tawm tsam Khetos ua. Nyob rau sab nraud mas, zoo li lawv coj rau Vajtswv cov lus nrog ib tug cwj pwm uas mloog lus los noj thiab haus thiab lees txais. Txawm li cas los xij, vim lawv peev xwm tsis zoo thiab tsis muaj lub peev xwm nkag siab Vajtswv cov lus, lawv thiaj li saib Vajtswv cov lus zoo li yog ib phau ntawv kawm xwb, ntseeg hais tias Vajtswv cov lus ua raws li lub laj thawj uas “ib ntxiv ib yog ob, ob ntxiv ob yog plaub.” Lawv tsis paub tias Vajtswv cov lus yog qhov tseeb, thiab qhov yuav nkag mus rau hauv qhov muaj tiag ntawm Vajtswv cov lus, yuav tsum to taub tias tej qhov tseeb uas hais nyob rau hauv Vajtswv cov lus ntawd yog hais txog dab tsi, thiab tej yam ntxwv thiab tej ntsiab lus uas qhov tseeb ntawd muaj feem xyuam txog yog dab tsi. Thaum lwm tus nkag siab Vajtswv cov lus yam meej thiab muaj tiag, lawv suav hais tias qhov ntawd ntiav thiab tsis tsim nyog mloog, lawv hais tias, “Kuv to taub tag nrho lawm, kuv paub txhua yam. Yam uas koj hais ntawd Vajtswv cov lus twb qhia meej meej lawm, ua cas koj tseem yuav hais ua dab tsi?” Tseeb tiag, lawv tsis paub tias yam uas lwm tus hais ntawd muaj feem xyuam txog tej ntsiab lus tshwj xeeb ntawm qhov tseeb uas nyob hauv Vajtswv cov lus. Vim cov thawj coj cuav no tsis muaj kev to taub txog sab ntsujplig thiab tsis muaj lub peev xwm nkag siab Vajtswv cov lus, lawv thiaj li xav hais tias txhua qhov tseeb yeej zoo ib yam nkaus xwb, tsis muaj qhov sib txawv tshwj xeeb nyob hauv tej teeb meem uas qhov tseeb ntawd hais txog; lawv ntseeg hais tias txawm yog muab tej no los hais tag hais dua los xij, yeej yog tib qho teeb meem xwb. Qhov kev ntseeg li no qhia tau hais tias muaj ib qho teeb meem loj, thiab tej ntawd txiav txim tias cov neeg zoo li no yeej tsis muaj hnub to taub qhov tseeb li.

Cov Thawj Coj Cuav Coj Tsis Tau Tib Neeg Nkag Mus Rau Hauv Qhov Tseeb Qhov Muaj Tiag

Tam sim no, muaj ib txhia tib neeg uas muaj peev xwm zoo thiab muaj lub peev xwm nkag siab twb muaj qee qhov kev ntsib kev pom thiab kev nkag mus rau hauv Vajtswv cov lus ntawm lub hauv paus thiab muaj qee qhov tseeb qhov muaj tiag lawm, tiam sis lawv tim tsum kev coj qhia thiab kev coj uas tshwj xeeb dua kom lawv txoj kev nkag mus thiaj li yuav meej thiab ntxaws dua. Tsuas yog cov thawj coj cuav xwb thiaj li tsis to taub tej ntsiab lus ntxaws thiab tshwj xeeb ntawm qhov tseeb ntawd tias yog hais txog dab tsi los sis vim li cas thiaj hais li ntawd, lawv xav tias qhov ua li ntawd yog ua kom txhua yam nyuaj yam tsis tsim nyog los sis ua si nrog tej lus ntawd xwb. Lawv tsis to taub los sis tsis paub tias yuav nkag siab los sis muaj kev ntsib pom rau tej kis uas muaj feem xyuam txog qhov tseeb ntawd li cas. Yog li ntawd, yam uas lawv ua tom qab los ua tus thawj coj lawm ces tsuas yog coj tib neeg noj thiab haus Vajtswv cov lus uas sib qhia tas li ntawd xwb, ces mam li hais txog qee cov kev qhuab qhia, thiab xaus lus txog qee txoj kev xyaum ua uas raws li tej kev cai tswj xwb, thiab yam uas tib neeg tau txais los ntawm lawv ces tsuas yog qee lo lus ntawm sab ntsujplig uas ntiav ntiav thiab tej lus thiab tej kev qhuab qhia, tej kev cai tswj, thiab tej lus qw uas hais tas li ntawd xwb. Rau cov uas los ntseeg tshiab, tej zaum cov thawj coj cuav cov lus qhuab qhia ntawd kuj txaus rau lawv nyob ntxiv li ib los sis ob xyoos, tiam sis tom qab ib los sis ob xyoos, cov uas to taub qee qhov tseeb yuav pib paub cais cov thawj coj cuav tej lus hais thiab tej kev ua lawm. Hos cov uas yeej tsis muaj lub peev xwm nkag siab, txawm cov thawj coj cuav yuav qhuab qhia li cas los xij, lawv tsis muaj kev paub thiab tsis muaj kev ras txog dab tsi li, thiab tsis paub tias yam uas cov thawj coj no tab tom tham ntawd tsuas yog tej lus thiab tej kev qhuab qhia xwb, thiab yam uas lawv to taub ntawd tsuas yog qee lub tswv yim uas tsis muaj ntsiab, thiab tej lus qw, thiab tej kev cai tswj xwb, uas tsis yog qhov tseeb kiag li. Raws li tej kev qhia tshwm uas pom tau meej no, cov thawj coj cuav puas ua tau lub luag hauj lwm uas “coj tib neeg noj thiab haus Vajtswv cov lus thiab to taub cov lus ntawd, thiab nkag mus rau hauv qhov muaj tiag ntawm Vajtswv cov lus” ntawd kom tiav? Lawv puas ua tau lub luag hauj lwm no? Lawv ua puas tau lawv tej luag hauj lwm kom tiav? (Tsis tau.) Vim li cas lawv thiaj li ua tsis tau? Qhov teeb meem tseem ceeb yog dab tsi? (Hom tib neeg no tsis muaj kev to taub txog sab ntsujplig thiab nkag siab tsis tau qhov tseeb.) Lawv tsis muaj kev to taub txog sab ntsujplig thiab nkag siab tsis tau qhov tseeb, tiam sis lawv tseem xav coj lwm tus—qhov no yeej tsis muaj hnub yuav ua tau li! Qhov cia siab tias cov thawj coj cuav yuav coj tib neeg to taub Vajtswv cov lus thiab nkag mus rau hauv qhov muaj tiag ntawm Vajtswv cov lus ntawd mas zoo li mus muab hnub qub saum ntuj—uas yeej yuav tsis muaj hnub ua tau li! Muab qhov ua ib tug neeg coj ncaj los ua piv txwv: Vajtswv cov lus hais txog qhov no mas yooj yim heev, tsuas yog ob peb lo lus xwb, tsis nyuaj li. Txhua tus uas muaj kev kawm me ntsis yeej paub tias cov lus no txhais li cas. Tiam sis cov thawj coj cuav, ua pov thawj kom qhia tau hais tias lawv muaj peev xwm ua tau tes hauj lwm no thiab coj tau tib neeg, ces lawv thiaj li piav ntxiv raws li lub hauv paus ntawm Vajtswv cov lus tias: “Qhov tseem ceeb ntawm Vajtswv qhov kev cheem tsum kom tib neeg ua tus neeg coj ncaj ntawd yog dab tsi? Qhov ua ib tug neeg coj ncaj ntawd yog qhov uas Vajtswv nyiam. Cov tsis ntseeg puav leej coj tsis ncaj, thiab yeej tsis hais lus tseeb, thiab tej uas lawv hais puav leej yog lus dag thiab lus ntxias xwb; tag nrho lub ntiaj teb puv npo kev dag xwb. Yog li ntawd, thawj yam uas Vajtswv cheem tsum thaum Nws los niaj hnub no yog kom tib neeg ua neeg coj ncaj. Yog koj tsis yog ib tug neeg coj ncaj, ces Vajtswv yuav tsis hlub koj; thiab yog koj tsis yog ib tug neeg coj ncaj, ces koj yuav tsis raug cawm dim, thiab koj yuav nkag mus tsis tau hauv lub nceeg vaj; thiab yog koj tsis yog ib tug neeg coj ncaj, ces koj yuav xyaum ua tsis tau raws qhov tseeb, thiab koj yeej yog ib tug neeg txawj dag; yog koj tsis yog ib tug neeg coj ncaj, ces koj tsis tsim nyog ua ib tug neeg uas raug tsim tawm los li.” Tam sim no nej puas to taub hais tias yuav ua tus neeg coj ncaj li cas? (Tsis to taub.) Tom qab mloog tag cov lus ntawd, yeej tseem tsis paub meej li. Cov los ntseeg tshiab, thaum hnov li no, ces xav hais tias cov lus no mas zoo heev, yog ib co lus uas lawv tsis tau hnov dua hauv nees nkaum los sis peb caug xyoo uas nyob hauv cov kab lis kev cai ntseeg. Ib txhia haj tseem hais tias, “Cov lus no muaj zog heev, txhua lo lus tsim nyog hais ‘Amees.’ Zaj lus qhuab qhia no zoo tiag tiag, yeej yog ib zaj lus qhuab qhia ntawm Tiam Lub Nceeg Vaj tiag tiag li!” Cov thawj coj cuav hais txuas ntxiv tias: “Vajtswv hais kom peb ua cov neeg coj ncaj, yog li ntawd peb puas yog cov neeg coj ncaj?” Ib txhia ua tib zoo xav txog qhov no: “Vim Vajtswv hais kom peb ua cov neeg coj ncaj, qhov ntawd txhais hais tias peb tseem tsis yog cov neeg coj ncaj.” Ib txhia nyob twj ywm, es xav hauv siab tias: “Kuv xav tias kuv yog ib tug neeg uas tsis txawj dag. Kuv yeej tsis nrog lwm tus sib ntaus, thiab thaum ua lag luam, kuv tsis kam dag leej twg li. Qee zaus, yog kuv tau txais txiaj ntsim tsis ncaj ncees me ntsis, kuv haj tseem pw tsis tsaug zog yav hmo ntuj thiab. Kuv puas yog ib tug neeg coj ncaj? Kuv xav tias kuv yog ib tug neeg uas tsis txawj dag, thiab qhov ntawd tsis yog txhais tib yam tias kuv yog ib tug neeg coj ncaj lod?” Lwm tus hais tias, “Kuv yeej ib txwm tsis txawj hais lus dag. Kuv lub ntsej muag liab ploog yog thaum twg kuv hais ib yam dab tsi uas tsis muaj tseeb, yog li ntawd kuv yuav tsum yog ib tug neeg coj ncaj xwb, puas yog?” Cov thawj coj cuav hais ntxiv tias, “Txawm koj yog ib tug neeg coj ncaj los tsis yog los xij, vim Vajtswv txoj lus hais kom peb ua neeg coj ncaj, ces koj yuav tsum tau ua ib tug neeg coj ncaj. Yog koj ua raws li Vajtswv cov lus, ces koj yuav yog ib tug neeg coj ncaj. Ces koj yuav dim ntawm txoj kev txawj dag, thiab dim ntawm Ntxwgnyoog lub zog tsaus ntuj lawm. Thaum koj dhau los ua ib tug neeg coj ncaj, ces koj nkag mus rau hauv qhov tseeb qhov muaj tiag lawm, thiab ua tau koj tej dej num kom tiav, thiab zwm rau Vajtswv lawm.” Tam sim no nej puas to taub tias yuav ua tus neeg coj ncaj li cas? (Tsis to taub.) Tiam sis, muaj ib txhia zoo siab heev: “Cov lus no muaj zog heev. Amees! Txhua lo lus yeej yog. Yeej tsis muaj ib lo twg uas hais ncaj qha ntawm Vajtswv cov lus los, tiam sis puav leej yog kev nkag siab los ntawm Vajtswv cov lus xwb. Qhov kev nkag siab no mas zoo heev li! Vim li cas kuv thiaj li nkag siab tsis tau zoo li no? Saib mas tus thawj coj no yeej tsim nyog tau lub npe no tiag, nws yeej yog ib tug uas yug los ua tus coj tiag tiag li!” Cov tib neeg uas muaj peev xwm thiab ntse ua tib zoo xav tom qab hnov li no tias: “Koj tseem tsis tau piav tias ib tug neeg coj ncaj yog dab tsi. Yuav ua ib tug neeg coj ncaj li cas kiag?” Cov thawj coj cuav hais txuas ntxiv tias: “Qhov ua ib tug neeg coj ncaj txhais hais tias tsis hais lus dag. Piv txwv li, yog koj txeev ua kev nkauj kev nraug yav dhau los, ces koj thov Vajtswv thiab lees txim tias koj tau ua pes tsawg zaus, thiab nrog leej twg. Yog koj xav tias Vajtswv yog tus pom tsis tau los sis kov tsis tau, ces koj yuav tsum lees rau tus thawj coj, qhia txhua yam kom meej. Kev lees ncaj ncaj yog yam tsawg kawg nkaus uas ib tug neeg coj ncaj yuav tsum muaj. Tsis tas li ntawd, qhov no yog hais txog qhov hais tawm hauv koj lub siab tuaj, es tsis txhob hais ib yam lus dag ntxias dab tsi rau hauv li. Koj xav li cas txog txhua yam, koj muaj tej kev npaj siab dab tsi, nthuav tawm tej kev qias vuab tsuab dab tsi, thiab hauv koj lub siab ntxub leej twg los sis tau foom phem rau leej twg, koj xav ua phem los sis npaj siab ua phem rau leej twg—koj yuav tsum tau lees rau cov tib neeg ntawd tag nrho. Qhov ua li no, koj yuav qhib siab lug thiab ncaj ncees, thiab ua neej nyob rau hauv qhov kaj. Qhov no txhais hais tias yog ua ib tug neeg coj ncaj. Ib tug neeg coj ncaj yuav tsum tso lawv tus kheej tseg; lawv yuav tsum muaj peev xwm qhia tawm thiab soj ntsuam tej yam uas phem thiab tsaus ntuj tshaj plaws hauv lawv lub siab.” Thaum hnov tej no, tam sim no nej puas to taub tias yuav ua tus neeg coj ncaj li cas? (Tseem tsis to taub.) Txawm mloog tag los xij, tsuas yog to taub tej kev qhuab qhia xwb, yeej tsis yog tej kev xyaum ua raws uas meej li. Nrog txoj kev nkag siab Vajtswv cov lus uas zoo li no, cov thawj coj cuav coj tib neeg noj thiab haus Vajtswv cov lus li no, thiab lawv kuj qhia li no, lawv xav tias lawv to taub Vajtswv cov lus tshaj plaws, muaj lub peev xwm nkag siab Vajtswv cov lus, thiab coj tau tib neeg mus rau hauv qhov muaj tiag ntawm Vajtswv cov lus. Qhov tseeb tiag, yam uas lawv nkag siab thiab qhia ntawd puav leej yog tej kev qhuab qhia thiab tej lus qw xwb, yeej tsis muaj ib qho kev pab me me rau cov uas xav nrhiav qhov tseeb qhov muaj tiag thiab to taub qhov tseeb tej hauv paus ntsiab lus. Tiam sis, cov thawj coj cuav ntseeg hais tias lawv muaj lub peev xwm nkag siab zoo heev, muaj tej kev pom tshwj xeeb rau hauv Vajtswv cov lus, thiab zoo tshaj cov tib neeg dog dig. Lawv mus tham tej kev qhuab qhia thiab tej lus qw no thoob plaws txhua qhov, thiab haj tseem nrog lwm tus sib piv, feem ntau siv tej kev qhuab qhia thiab tej lus qw no los sib cav, thiab haj tseem pheej siv tej no los qhuab ntuas, yim ntsis, txiav txim, thiab teem txim rau tib neeg. Lawv xav hais tias qhov ua li no, yog lawv tab tom ua hauj lwm, coj Vajtswv cov lus los rau hauv lub neej tiag tiag, thiab siv Vajtswv cov lus. Qhov no tsis yog ib qho teeb meem uas nyuaj lod? Cov thawj coj cuav to taub tsis tau Vajtswv cov lus, lawv coj tsis tau tib neeg mus rau hauv qhov muaj tiag ntawm Vajtswv cov lus. Tom qab nyeem Vajtswv cov lus tag, lawv tsuas qhia tau qee cov lus thiab tej kev qhuab qhia xwb, tiam sis lawv tseem mus qhuab qhia thiab khav txog tej ntawd thoob plaws txhua qhov. Tseeb tiag, txawm li cas los xij, lawv tsis to taub ib qho qhov tseeb twg hauv Vajtswv cov lus li. Piv txwv li, lawv tsis to taub qee lo lus ntawm sab ntsujplig uas zoo sib xws los sis qee cov lus hais uas zoo sib xws, thiab lawv tsis paub qhov sib txawv ntawm tej ntawd los sis yuav siv tej ntawd li cas rau tej xwm txheej muaj tiag. Dhau ntawm qhov ua raws tej kev cai tswj thiab hais tej lus thiab tej kev qhuab qhia lawm ces, lawv tsis muaj ib qho kev nkag siab tiag tiag rau Vajtswv cov lus thiab tsis xyaum ua raws li cov lus ntawd tiag tiag li. Yog li ntawd, paub meej lawm tias cov thawj coj cuav tus kheej tsis to taub qhov tseeb, thiab tsis muaj peev xwm coj tib neeg kom to taub Vajtswv cov lus thiab nkag mus rau hauv qhov tseeb qhov muaj tiag. Peb siv qhov piv txwv ntawm qhov ua ib tug neeg coj ncaj los qhia txog kis no lawm. Cov thawj coj cuav, vim tsis paub tias yuav nkag siab qhov tseeb ntawm qhov ua ib tug neeg coj ncaj li cas, lawv thiaj li hais tej lus thiab tej kev qhuab qhia thiab tej lus qw, los dag cov neeg ruam thiab cov neeg feeb tsis meej uas tsis muaj kev to taub txog sab ntsujplig, es ua rau lawv tsis paub txoj hau kev lawm. Tom qab mloog tej lus thiab tej kev qhuab qhia no tag, lawv haj tseem pe hawm cov thawj coj cuav tshwj xeeb thiab, tom qab raws cov thawj coj cuav tau ntau xyoo, thaum kawg txawm yog tej qhov tseeb ntawm lub hauv paus xwb los twb tsis to taub li, tsis muaj kev nkag mus rau hauv tej ntawd kiag li. Peb yuav xaus qhov kev qhia txog yam no ntawm no xwb.

Yam Ob: Kom paub txog txhua hom tib neeg tej yam ntxwv, thiab daws ntau qhov kev nyuaj uas ntsig txog txoj kev to taub lub neej txoj sia uas lawv ntsib nyob rau hauv lawv lub neej tiag tiag (Ntu Ib)

Cov Thawj Coj Cuav Saib Tsis Tshab Txhua Hom Tib Neeg Tus Yam Ntxwv

Cov thawj coj thiab cov neeg ua hauj lwm tej luag hauj lwm yam thib ob yog Kom paub txog txhua hom tib neeg tej yam ntxwv, thiab daws ntau qhov kev nyuaj uas ntsig txog txoj kev to taub lub neej txoj sia uas lawv ntsib nyob rau hauv lawv lub neej tiag tiag. Cov thawj coj cuav ua tes hauj lwm no li cas? Lawv puas muaj peev xwm ua tau tes hauj lwm no? Cia peb los soj ntsuam qhov no. Qhov paub txog txhua hom tib neeg tej yam ntxwv—qhov no ua kom tiav tau raws li lub hauv paus dab tsi? Qhov ntawd yog ua kom tiav tau raws li lub hauv paus ntawm kev to taub Vajtswv cov lus uas nthuav tawm tej moj yam qias vuab tsuab thiab tej ntsiab tseeb ntawm ntau hom tib neeg. Yuav kom to taub tej yam ntxwv ntawm ntau hom tib neeg, yuav tsum xub to taub Vajtswv cov lus uas nthuav tawm ntau tus yam ntxwv, tej moj yam qias vuab tsuab, thiab tej ntsiab tseeb uas qias vuab tsuab ntawm tib neeg, thiab muaj peev xwm coj los piv rau lawv tus kheej. Hom moj yam uas Vajtswv nthuav tawm ntawd yog hais txog hom tib neeg twg, lawv txoj kev ua neeg zoo li cas, lawv muaj hom kev qhia tshwm uas pom tau meej thiab kev nthuav tawm dab tsi, thiab lawv tus cwj pwm coj rau Vajtswv, rau Vajtswv cov lus, thiab rau lawv tes dej num yog dab tsi; tej yam ntxwv no yuav tsum muab piv rau Vajtswv cov lus, thiab qhov ua li no, thiaj li muaj peev xwm paub txog tej yam ntxwv ntawm ntau hom tib neeg. Yog li ntawd, qhov paub txog tej yam ntxwv ntawm ntau hom tib neeg ces ua ntej tshaj plaws yog los ntawm lub hauv paus ntawm kev to taub Vajtswv cov lus thiab muaj lub peev xwm nkag siab Vajtswv cov lus. Cov thawj coj cuav tsis muaj lub peev xwm nkag siab Vajtswv cov lus, yog li ntawd lawv puas to taub tej qhov tseeb uas nyuaj txog ntau hom tib neeg uas Vajtswv cov lus nthuav tawm, nrog rau ntau tus yam ntxwv thiab tej ntsiab tseeb uas qias vuab tsuab uas raug nthuav tawm? (Tsis to taub.) Lawv tsis to taub, tsis paub txog tej kev sib raug zoo uas cuam tshuam txog tej no, thiab tsis paub tej qhov tseeb uas cuam tshuam txog tej no. Vim lawv tsis muaj lub peev xwm nkag siab Vajtswv cov lus, qhov to taub tej yam ntxwv ntawm ntau hom tib neeg—qhov teeb meem uas tseem ceeb heev no—yog ib tes hauj lwm uas mob hlwb thiab nyuaj heev rau cov thawj coj cuav.

Cov thawj coj cuav paub txog txhua hom tib neeg tej yam ntxwv li cas? Lawv xav tias, “Tus tib neeg no kub siab, tus ntawd siab me, tus no tu cev thiab hnav tsoos tsho zoo, tus ntawd muaj kev ntseeg me….” Lawv tsuas saib tej yam uas pom sab nraud xwb, tiam sis tus tib neeg ntawd tus cwj pwm coj rau Vajtswv cov lus thiab qhov tseeb zoo li cas tiag tiag, thiab tus yam ntxwv xeeb txawm lub ntsiab tseeb yog dab tsi tiag tiag, lawv tsis paub li. Piv txwv li, ib tug tib neeg muaj kev ntseeg tseeb thiab muaj lub zog ua lawv tes dej num, tiam sis lawv tsev neeg tej kev nyuaj thiab tej yam uas los khi ua rau cuam tshuam lawv tej dej num tsis tau txais txiaj ntsim; thaum cov thawj coj cuav pom li no, cia li lam tau lam muab npe rau lawv, hais tias, “Tus tib neeg no yog ib tug tsis ntseeg. Khiav tsis dim ntawm lawv tsev neeg. Lawv pheej xav txog lawv cov me nyuam xwb. Lawv muaj nyiaj khaws cia hauv tsev tiam sis tsis muab fij. Yog li ntawd tus tib neeg no teeb meem ntau heev, thiab yav tom ntej yuav siv tsis tau rau tej hauj lwm tseem ceeb.” Tseeb tiag, tus tib neeg no qhov teeb meem tsis loj; tsuas yog vim lawv ntseeg Vajtswv sij hawm luv thiab muaj kev to taub qhov tseeb ntiav heev es lawv thiaj li saib tsis tshab txog ntau yam xwb. Lawv tsis paub tias yuav coj li cas rau tsev neeg thiab cov me nyuam, los sis yuav saib xyuas tej cuab yeej cuab tam li cas. Lawv tseem nyob rau lub sij hawm thov Vajtswv thiab nrhiav, thiab tseem nrhiav tsis tau tej hauv paus ntsiab lus thiab txoj kev xyaum ua uas yog xwb. Lawv muaj lub siab xav xyaum ua raws li qhov tseeb, tiam sis thaum ntsib tej kev khi ntawm tsev neeg thiab tej kev nyuaj, lawv qaug zog me ntsis li ib ntus thiab tsis tshua mob siab ua lawv tes dej num xwb. Txawm li cas los xij, lawv tuaj yeem rau siab ntso ua tes hauj lwm uas pawg ntseeg muab rau lawv ua kom tiav, uas yog ib yam uas cov tib neeg feem coob ua tsis tau. Yog txiav txim raws li lawv lub peev xwm, kev ua neeg, thiab tus cwj pwm uas coj rau qhov tseeb mas, lawv yog ib tug neeg zoo. Tiam sis cov thawj coj cuav tsis pom li no vim lawv tsis to taub Vajtswv cov lus thiab tsis paub siv Vajtswv cov lus los ua ib tus qauv ntsuas seb ib tug tib neeg tus yam ntxwv xeeb txawm lub ntsiab tseeb yog dab tsi, los sis seb tej yam ntxwv uas ib tug tib neeg muaj ntawd yog vim lawv tus yam ntxwv xeeb txawm lub ntsiab tseeb los sis yog kev qaug zog ib ntus, los sis yog ib qho teeb meem ntawm lub siab ntseeg; lawv ntsuas tsis tau tej no. Tej kev nyuaj uas hom tib neeg no ntsib yog tej uas tshwm sim nyob rau hauv lub neej tiag tiag thiab muaj feem xyuam txog kev nkag mus rau hauv lub neej txoj sia—cov thawj coj cuav puas daws tau hom teeb meem no? Lawv puas daws tau cov tib neeg no tej kev nyuaj? (Tsis tau.) Vim cov thawj coj cuav tsis paub txog tej yam ntxwv ntawm ntau hom tib neeg kom meej thiab cais tsis tau qhov zoo thiab qhov phem ntawm ntau hom tib neeg tus yam ntxwv xeeb txawm lub ntsiab tseeb kom meej, es lawv thiaj li daws tsis tau tej kev nyuaj thiab tej teeb meem ntawm ntau hom tib neeg kom meej thiab. Qhov txawv, lawv suav cov uas, tsuas yog vam khom rau kev kub siab, tuaj yeem khiav mus los muab tus kheej fij, tiv kev txom nyem, thiab them tus nqi, tiam sis peev xwm tsis zoo thiab tsis muaj lub peev xwm nkag siab, tias yog cov hom phiaj tseem ceeb rau kev cob qhia, thiab thaum cov tib neeg no ntsib kev nyuaj lawv sib qhia los daws tej kev nyuaj ntawd. Tiam sis cov uas yeej muaj peev xwm tiag thiab kev ua neeg zoo, thaum lawv ntsib tej kev nyuaj thiab qaug zog me ntsis, cov thawj coj cuav daws thiab ua li cas rau lawv xwb? Thaum cov tib neeg no ntsib tej kev nyuaj thiab tsuas yog qaug zog me ntsis xwb, raws li qhov xwm txheej ntawd, ces lawv yuav tsum tau txais kev txhawb thiab kev pab; yuav tsum qhia Vajtswv tej kev npaj siab rau lawv—yuav tsum tsis txhob muab lawv tso tseg kiag li, thiab haj yam tsis txhob txiav txim rau lawv. Tiam sis cov thawj coj cuav daws li cas? Lawv hais tias, “Vajtswv tes hauj lwm twb mus txog theem twg lawm, es koj tseem tso tsis tau koj tus txiv, tso tsis tau koj cov me nyuam; koj haj tseem cia koj cov me nyuam mus kawm ntawv qib siab thiab caum tej kev cia siab. Tej kev puas tsuaj loj zuj zus tuaj, es puas tseem muaj tej kev cia siab nyob rau hauv lub ntiaj teb no? Koj tus kheej lub neej txoj sia xwb twb saib xyuas tsis tau lawm, koj yuav ua li cas quav ntsej txog tej ntawd tau? Vajtswv tes hauj lwm yuav xaus lawm, lub sij hawm ceev heev li! Yog koj tsis muab koj tus kheej fij tag nrho, koj puas tseem hu tau tias yog ib tug neeg uas raug tsim tawm los? Koj puas tseem yog tib neeg?” Qhov no puas yog cov tib neeg no tej kev nyuaj tiag tiag? (Tsis yog.) Qhov uas cov tib neeg no qaug zog me ntsis thaum lawv ntsib tej kev nyuaj tsuas yog vim lawv lub siab ntseeg tseem me xwb, tsis yog vim lawv tsis nyiam qhov tseeb los sis tsis kam ua lawv tes dej num. Yog li ntawd, tej uas cov thawj coj cuav hais ntawd tsis haum rau lawv tej yam ntxwv li; pom meej meej hais tias yog ib qho kev lam tau lam muab npe rau lawv xwb, uas tsis to taub lub ntsiab tseem ceeb ntawm lawv tej yam ntxwv, thiab tsis to taub tias lawv tab tom xav dab tsi tiag, lawv yog hom tib neeg twg, thiab yuav tsum tau coj thiab pab lawv daws lawv tej kev nyuaj ntawd li cas. Cov thawj coj cuav tsis paub tias yuav daws tej teeb meem no li cas. Yog li, thaum tshwm sim tej teeb meem zoo li no tuaj yuav tsum daws li cas? Koj tuaj yeem hais tias, “Qhov teeb meem uas koj tab tom ntsib no yog ib qho teeb meem uas ntau tus tib neeg ntsib thiab. Cov uas tuaj yeem tso lawv tsev neeg tseg tiag tiag thiab muab lawv tus kheej fij tag nrho rau Vajtswv ntawd yeej tsis yog tias ua raws li lub siab kub ib pliag ntshis xwb, tiam sis lawv twb npaj ntev los lawm. Ib qho yog, lawv to taub qhov tseeb txaus lawm thiab yeej muaj kev txiav txim siab khiav dim ntawm lawv tsev neeg, muab lawv tus kheej fij tag nrho rau hauv Vajtswv lub tsev, thiab lawv tuaj yeem lav tau tias yuav tsis khuv xim tom qab—lawv twb xav txog txhua yam no lawm. Tsis tas li ntawd, nyob rau lub sij hawm no, lawv kuj thov Vajtswv kom npaj thiab qhib ib txoj hau kev mus tom ntej rau lawv, tib lub sij hawm ntawd npaj lawv tus kheej nrog qhov tseeb txuas ntxiv, kom lawv tus kheej to taub ntau qhov tseeb ntxiv, thiab muaj kev ntseeg ntau ntxiv rau qhov tso txhua yam tseg kom muab tau lawv tus kheej fij tag nrho rau Vajtswv. Qhov no tim tsum sij hawm, kev thov Vajtswv, thiab tseeb tiag, tim tsum Vajtswv txoj kev coj thiab tej kev npaj. Yog koj muaj kev txiav txim siab li no, tsis txhob maj. Koj thov Vajtswv thiab nyob twj ywm tos, thiab Vajtswv yuav npaj rau koj. Yog koj tej lus thov thiab koj tej kev txiav txim siab mus raws li Vajtswv tej kev npaj siab thiab tau txais Vajtswv txoj kev pom zoo, yog tias koj twb npaj txhij lawm thiab txawm Vajtswv yuav ua dab tsi los xij koj yuav zwm rau thiab tsis muaj kev khuv xim li, ces Vajtswv yeej yuav qhib ib txoj hauv kev rau koj xwb xwb li. Nyob rau lub sij hawm no, yam uas tib neeg yuav tsum ua yog npaj thiab tos; tib qho uas lawv ua tau ces yog npaj lawv tus kheej nrog qhov tseeb, to taub Vajtswv tej kev npaj siab, thiab kom lawv lub siab ntseeg loj hlob zuj zus tuaj. Thaum Vajtswv tsim ntau yam xwm txheej los, yog koj tuaj yeem xaiv los zwm rau Vajtswv lub hwj chim kav thiab tej kev npaj yam tsis muaj kev yws li, qhov no yog muaj lub siab ntseeg—txawm Vajtswv yuav ua dab tsi los sis npaj li cas los xij, koj yuav muaj peev xwm zwm rau lawm.” Nej xav li cas txog hom kev coj no? (Zoo.) Hauv ib kis yog, koj ua tiav koj lub luag hauj lwm, pab tib neeg to taub Vajtswv tej kev npaj siab lawm; tib lub sij hawm ntawd, koj tsis yuam kom lawv ua dhau lawv lub peev xwm, tiam sis saib raws li lawv qhov xwm txheej tiag tiag los coj rau lawv. Qhov no tsis yog siv Vajtswv cov lus los daws teeb meem lod? Nws tsis yog daws tej kev nyuaj uas tib neeg ntsib hauv lub neej tiag tiag raws li lawv tej yam ntxwv lod? (Yog.)

Nyob rau hauv lawv txoj kev ua lawv tej dej num, ib txhia tib neeg ib txwm ua dog ua dig thiab tsis muaj kev lav ris, lawv ib txwm coj tus cwj pwm nom tswv, thiab khav theeb, qhuas tias yus tus kheej coj ncaj, thiab sib koom tes tsis tau nrog lwm tus li, thiab lawv ua rau pawg ntseeg tes hauj lwm puas tsuaj yam tsis muaj ib qho kev hnov txhaum me me li. Ib tug thawj coj cuav, thaum pom qhov xwm txheej zoo li no, ces pib los daws thiab kho qhov teeb meem ntawd, nws hais tias, “Tus neeg no yog ib tug tseem ceeb heev nyob rau hauv tes hauj lwm no. Zoo li tsis muaj leej twg uas tsim nyog los hloov nws chaw lawm, yog li ntawd peb yuav tsum sib qhia nrog nws kom daws tau nws tej kev nyuaj.” Thaum tab tom qhia, tus thawj coj cuav ntawd pom tias tus neeg no yeej tsis xav ua nws tes dej num kiag li. Nws xav caum ntiaj teb, ua hauj lwm khwv nyiaj thiab ua neej kom zoo xwb, thiab nws xav tias qhov kom nws ua nws tes dej num ntawd mas yog ib qho uas thov ntau dhau rau nws lawm. Nws xav tias qhov ua nws tes dej num nyob rau hauv Vajtswv lub tsev ntawd txhais hais tias tsis muaj sij hawm so txhua hnub li, tsis yog tsuas ua rau tsev neeg lub neej raug rhuav xwb tiam sis kuj ua rau tsis muaj peev xwm tuav tau kev sib raug zoo nrog tsev neeg cov tswv cuab, thiab tias yog nws ua txhaum tej hauv paus ntsiab lus thaum ua nws tes dej num ces nws yuav tau raug ntuas thiab. Nws xav tias lub neej zoo li ntawd mas nyuaj dhau lawm thiab nws tsis xav ua neej zoo li ntawd. Qhov teeb meem no yeej pom meej heev: Nws tus cwj pwm qhia tau hais tias nws yog ib tug tsis ntseeg. Tiam sis tus thawj coj cuav ntawd yuav daws qhov teeb meem no li cas? Tus thawj coj cuav ntawd xav hais tias, “Tus neeg no yog ib tug neeg muaj peev xwm nyob ntawm cov tsis ntseeg; yeej tsis yooj yim nrhiav tau ib tug neeg zoo li nws. Nws tus yam ntxwv muaj teeb meem lawm; kuv yuav tsum tau maj nroos muab tes hauj lwm uas kuv tab tom ua uas ua rau kuv tsis khoom tshaj plaws tso tseg es mus sib qhia nrog nws kom pab tau nws daws qhov teeb meem ntawd. Yuav daws li cas? Vajtswv cov lus muaj hwj chim tshaj plaws; ua ntej, kuv yuav nyeem ob peb nqe Vajtswv cov lus rau nws mloog kom daws tau qhov uas nws tsis kam ua nws tes dej num ntawd.” Tus thawj coj cuav ntawd hais rau nws tias, “Tam sim no tej kev puas tsuaj los lawm, tib neeg ua tsis tau neej zoo ntxiv lawm. Koj tseem xav ua hauj lwm khwv nyiaj thiab ua ib lub neej kaj siab nrog tsev neeg, tiam sis tsis ntev no xwb tag nrho lub ntiaj teb yuav ntxhov quav niab, thiab yuav tsis muaj tsev neeg kaj siab ntxiv lawm. Koj pom tsis tshab tej no thiab lod? Koj yuav tsum thov Vajtswv kom ntau ntxiv. Thov Vajtswv yuav ua rau koj muaj kev ntseeg. Koj kuj yuav tsum noj thiab haus Vajtswv cov lus ntxiv. Tom qab noj thiab haus Vajtswv cov lus ob peb zaug lawm, koj qhov teeb meem yuav daws tau.” Ces, nws thiaj li nrhiav tsib los sis kaum nqe Vajtswv cov lus los nyeem thiab qhia rau tus neeg ntawd. Tus neeg ntawd teb hais tias, “Tsis txhob qhia lawm. Kuv to taub tag nrho Vajtswv cov lus no lawm; kuv kawm ntawv siab tshaj koj. Tsis txhob muaj plhus.” Qhia tag ib hnub los yeej daws tsis tau ib qho teeb meem li. Tus thawj coj cuav ntawd xav hauv nws siab hais tias, “Kuv twb ua hauj lwm hauv pawg ntseeg los tau ntau xyoo lawm; kuv tsis ntseeg hais tias kuv daws tsis tau koj qhov teeb meem.” Thaum tsaus ntuj, nws maj nroos qhia txuas ntxiv hais tias, “Koj yuav tsum hlub thiab pe hawm Vajtswv! Koj muaj kev cia siab los ua ib tug neeg uas raug tsim tawm los uas zoo tsim nyog. Tes dej num no los yam tsis yooj yim li; koj yuav tsum saib lub cib fim no kom muaj nqis, vim yog koj plam lub cib fim no lawm, ces yuav tsis muaj dua ib lub cib fim li no ntxiv lawm. Koj lub peev xwm thiab tej yam uas koj muaj los zoo npaum li no, yog koj tsis ua koj tes dej num no tsis yog ib qho uas khuv xim lod? Ib tug neeg uas muaj peev xwm zoo li koj mas yuav tsum raug txhawb thiab siv nyob rau hauv Vajtswv lub tsev; koj muaj kev cia siab loj heev nyob rau ntawm no!” Tus neeg ntawd hais tias, “Tsis txhob hais lawm. Yog koj kom kuv ua kuv tes dej num, ces kuv tus cwj pwm yeej zoo li qub xwb. Yog tsis pub kuv ua, kuv yuav tawm mus tam sim ntawd. Tsis yog kuv thov nyob ntawm no!” Tus thawj coj cuav hais npaum li cas los yeej hais tsis yeej tus neeg no thiab daws tsis tau nws qhov teeb meem li. Yog vim li cas? Qhov ntawd yog vim lawv pom tsis tshab tias tus neeg no lub ntsiab tseeb ntawm qhov teeb meem yog dab tsi. Tus neeg no, thaum ua nws tes dej num, nws xav ua dog ua dig ces yeej ua dog ua dig, nws xav dag ces yeej dag, thiab yog nws xav ua kom dhau cai xwb ces nws yeej ua li ntawd; txawm nws ua tes hauj lwm dab tsi los xij, nws yeej tsis muaj kev lav ris li. Nws tsis kam siv zog me ntsis ntxiv los sis hais ob peb lo lus ntxiv los daws qee qhov teeb meem li, vim nws xav tias nyuaj thiab meem txom. Nws paub meej meej tias yuav ua nws tes dej num li cas es thiaj li tsim nyog thiab yuav ua li cas es thiaj li haum tiam sis nws tsis kam xyaum ua li ntawd. Tiam sis, nws tseem ua nws tes dej num nyob rau hauv Vajtswv lub tsev. Lub ntsiab tiag tiag ntawm qhov teeb meem no yog dab tsi? Qhov teeb meem ntawm no yog dab tsi? (Nws los vim qhov npaj siab kom tau txais koob hmoov thiab khom lag luam xwb.) Nws los nrog txoj kev cia siab zoo li no; cov neeg zoo li no hu ua cov neeg nrhiav cib fim. Lawv hais tias, “Kuv hnov tias lub ntiaj teb yuav kawg sai sai no, hnub kawg los txog lawm, yog li ntawd kuv tsis tas yuav mus ua hauj lwm ntxiv lawm; kuv twb khwv tau nyiaj txaus lawm. Kuv xub mus rau hauv Vajtswv lub tsev noj dawb thiab tuav ib qho chaw rau kuv tus kheej tso, kom yav tom ntej kuv thiaj li muaj kev cia siab tau txais koob hmoov.” Saib los ntawm nws tus cwj pwm thiab kev npaj siab thaum ua nws tes dej num, nws txoj kev ntseeg Vajtswv yog kev nrhiav cib fim; nws los rau hauv Vajtswv lub tsev yog los noj dawb xwb, tsis yog los ntawm txoj kev ntseeg tiag tiag. Nws tus cwj pwm thaum ua nws tes dej num mas saib tsis taus tshwj xeeb. Yuav kom siv tau nws mas, pawg ntseeg yuav tsum tau hais zoo zoo thiab nrog nws sib tham kom pom zoo, tiam sis nws tseem tsis ua kom zoo thiab. Ib tug neeg uas twb tsis muaj lub siab txawj xav li puas ua tau nws tes dej num tiag tiag? Nws tsuas yog koom nrog kev nrhiav cib fim thiab kev noj dawb xwb, nws yog ib tug tsis ntseeg. Thaum saib lub ntsiab tiag tiag ntawm ob kis ntawm qhov teeb meem no, thaum los daws qhov teeb meem no, tus thawj coj cuav ntawd puas to taub lub ntsiab tseeb ntawm qhov teeb meem ntawd? (Tsis to taub.) Vim nws pom tsis tshab txog lub ntsiab tseeb ntawm qhov teeb meem, nws tseem saib tus neeg no yam li yog ib tug ntseeg tiag tiag, tsuas yog tsis to taub qhov tseeb, muaj lub siab ntseeg tseem me, qaug zog ib ntus thiab tim tsum kev txhawb nqa xwb. Los ntawm tej kev xam pom no, nws sim los qhia thiab pab, tiam sis tsuas raug hais rau hais tias, “Tsis txhob hais lawm. Tej kev qhuab qhia uas koj hais ntawd tsis muaj qab hau li. Kuv paub tag nrho tej ntawd lawm, kuv to taub ntau tshaj koj. Koj to taub pes tsawg yam kev qhuab qhia tiag tiag? Koj kawm ntawv siab npaum li cas? Kuv nyeem ntawv ntau tshaj li tej mov uas koj noj lawm!” Nws tus yam txwv xeeb txawm raug qhia tshwm lawm, puas yog? Tus thawj coj cuav ntawd tseem ntseeg hais tias nws tus kheej tab tom ua hauj lwm, nws tsis paub hais tias tus tib neeg no tseeb tiag yog ib tug tsis ntseeg xwb. Thaum cov tsis ntseeg ua lawv tes dej num nyob rau hauv Vajtswv lub tsev, tab txawm yog lawv siv zog ua hauj lwm rau xwb los yeej ua tsis tau kom tsim nyog. Cov neeg zoo li no puas tsim nyog ceev cia? (Tsis tsim nyog.) Yog li ntawd, lub hauv paus ntsiab lus rau kev daws hom tib neeg zoo li no hauv Vajtswv lub tsev ces yog: Lawv muaj peev xwm siv zog ua hauj lwm rau thiab txaus siab ua, ces ceev lawv cia; yog lawv tsis txaus siab ua, ces muab lawv tshem tawm mus kom sai, tsis txhob hais kom lawv nyob los sis txhawb lawv. Tus thawj coj cuav ntawd puas paub lub hauv paus ntsiab lus no? Nws tsis paub. Nws coj rau cov neeg tuag yam li yog cov neeg ciaj, pub mov rau lawv noj thiab muab dej rau lawv haus; qhov ntawd tsis yog ruam lod? Cov thawj coj cuav yeej ua tej yam ruam ruam li ntawd.

Cov Thawj Coj Cuav Yeej Daws Tsis Tau Tej Kev Nyuaj thiab Tej Teeb Meem uas Tib Neeg Ntsib nyob rau hauv Lawv Txoj Kev Nkag Mus Rau Hauv Lub Neej Txoj Sia

Nyob rau ntau yam xwm txheej, thaum ntau tus neeg nthuav tawm ntau tus yam ntxwv thiab tej kev qhia tshwm uas pom tau meej uas sib txawv, cov thawj coj cuav yeej ib txwm tsis to taub lub ntsiab tseeb ntawm tej kev nthuav tawm no thiab daws tsis tau tej teeb meem uas tshwm sim los ntawm tej ntawd li. Vim lawv tsis to taub qhov tseeb, lawv thiaj li lam tau lam muab npe rau tib neeg yam yuam kev thiab ua raws siab nyiam yam tsis quav ntsej tej cai, lawv xav yuam kev tias cov uas qaug zog li ib ntus los sis xav phem qee zaus ntawd yog cov tsis ntseeg thiab cov uas ntxeev siab rau Vajtswv. Hos cov tsis ntseeg uas nyob sab nraud muaj qee yam peev xwm, uas ua tau tes hauj lwm yooj yim thiab siv tau zog me ntsis ntawd, mas lawv suav hais tias yog cov tseem ceeb uas yuav tsum tau txhawb nqa. Cov neeg no txaj muag los hais ncaj ncaj tias lawv tsis kam ua lawv tes dej num, tiam sis cov thawj coj cuav pom tsis tshab qhov ntawd thiab pheej hais kom lawv nyob. Cov thawj coj cuav tsuas ua tej yam ruam ruam xwb; cov neeg phem cuam tshuam pawg ntseeg, tiam sis lawv tseem ua ntsej lag muag dig rau qhov ntawd thiab tsis daws qhov teeb meem ntawd li. Qhov no tsis yog ua tej yam raws siab nyiam yam tsis quav ntsej tej cai lod? Cov thawj coj cuav txoj kev ua tej yam raws siab nyiam yam tsis quav ntsej tej cai ntawd tshwm sim los tau li cas? Lawv tsis muaj lub peev xwm nkag siab Vajtswv cov lus thiab tsis to taub qhov tseeb, yog li ntawd thaum ntsib ntau yam xwm txheej, lawv thiaj li siv tej kev qhuab qhia uas ntiav tshaj plaws uas lawv to taub ntawd, lawv siv tag siv dua tej ntawd thaum kawg tsuas ua rau muaj kev tab kaum thiab kev cuam tshuam xwb. Feem ntau, tsis yog lawv tsuas daws tsis tau tej kev nyuaj uas tib neeg ntsib nyob rau hauv txoj kev nkag mus rau hauv lub neej txoj sia xwb thiab tsis yog tsuas txhawb nqa tsis tau tib neeg kom muaj zog los ntawm txoj kev qaug zog xwb, tiam sis lawv kuj ua rau tib neeg muaj tej kev xav phem thiab nkag siab yuam kev txog Vajtswv, ua rau lawv xav tias pawg ntseeg tab tom haub ntxias lawv los ua dej num txhawb kom tau txais txiaj ntsim los ntawm lawv, cuag nkaus li Vajtswv lub tsev tsis muaj cov neeg muaj peev xwm thiab nrhiav tsis tau cov neeg uas haum. Qhov no yog qhov tsis zoo uas tshwm sim los ntawm cov thawj coj cuav tes hauj lwm. Qhov no tshwm sim los li cas? (Cov thawj coj cuav nkag siab tsis tau qhov tseeb, tsis to taub qhov tseeb, thiab thaum lawv ntsib tej xwm txheej, lawv tsuas siv tej kev cai tswj xwb.) Lawv nkag siab tsis tau qhov tseeb, lawv tsuas muaj peev xwm nco tau qee cov lus thiab cov lus hais uas hloov pauv tsis tau xwb. Lawv tsis muaj ib qho kev to taub los ntawm kev ntsib kev pom thiab kev paub ntawm qhov tseeb li. Yog li ntawd, thaum kawg thaum tej teeb meem tshwm sim tuaj lawm, lawv tsuas hais tau ob peb lo lus qhuav qhuav tias: “Hlub Vajtswv”; “Ua tus neeg coj ncaj”; “Mloog lus thiab zwm rau thaum ntsib tej xwm txheej”; “Ua koj tes dej num kom zoo”; “Koj yuav tsum ua siab ncaj”; “Koj yuav tsum tig tawm tsam lub cev nqaij daim tawv”; “Koj yuav tsum muab koj tus kheej fij rau Vajtswv.” Lawv siv tej kev qhuab qhia uas tsis muaj dab tsi li, tej lus qw, thiab cov lus uas zoo mloog no los npog rau lawv tus kheej, thiab kuj qhia rau lwm tus thiab, vam tias yuav hloov tau thiab muaj ib qho kev cuam tshuam zoo rau lawv—tiam sis tej ntawd tsis muaj txiaj ntsim dab tsi, thiab hloov tsis tau ib yam dab tsi li. Yog li ntawd, cov thawj coj cuav ua tsis tau ib tes hauj lwm dab tsi li. Txawm yog tej kev nyuaj uas cov neeg Vajtswv xaiv tseg ntsib nyob rau hauv txoj kev nkag mus rau hauv lub neej txoj sia los lawv twb daws tsis tau, yog li lawv yuav ua li cas ua tau ib tes hauj lwm zoo los coj pawg ntseeg?

Thaum tib neeg raug ntau yam kev nyuaj nyob rau hauv lub neej tiag tiag thiab tsis paub tias yuav ntsib li cas, los sis yuav xyaum ua raws qhov tseeb li cas, lawv yuav tsum nrhiav qhov tseeb nyob rau hauv Vajtswv cov lus los daws tej teeb meem ntawd. Yog ib tug neeg uas muaj lub siab ntseeg tseem me tsis paub tias yuav nrhiav qhov tseeb hauv Vajtswv cov lus li cas, los sis yuav nrhiav Vajtswv cov lus uas muaj feem ntsig txog ntawd li cas, ces lawv yuav tsum nrhiav cov uas to taub qhov tseeb los qhia kom daws tau qhov teeb meem ntawd, thiab tib lub sij hawm ntawd kuj xyaum kom paub tias yuav nrhiav Vajtswv cov lus uas muaj feem ntsig txog ntawd li cas thiab yuav nkag siab qhov tseeb li cas. Qhov no txhais hais tias nrhiav nyob rau hauv Vajtswv cov lus seb tej hauv paus ntsiab lus thiab cov qauv uas Vajtswv cheem tsum ntawd yog dab tsi, Vajtswv txhais qhov teeb meem no li cas thiab Nws cheem tsum dab tsi txog qhov teeb meem no, thiab seb puas muaj tej yam uas piav qhia kom meej meej. Yog Vajtswv cov lus uas hais txog lub ncauj lus no yooj yim me ntsis, tsuas yog qhia txog tej hauv paus ntsiab lus xwb es tsis muab tej piv txwv kom meej meej, ces koj yuav tsum kawm kom paub ua tib zoo xav. Yog koj xav tsis tawm, ces nrhiav ntau tus neeg los nrog sib qhia, sib qhia nyob rau hauv tej kev sib sau ua ke, thiab maj mam tshawb nrhiav nyob rau hauv tus txheej txheem ntawm kev ua koj tes dej num, kom tau txais kev qhia thiab kev paub tseeb, thiab yog li ntawd maj mam los to taub tias lub ntsiab tseeb ntawm qhov teeb meem ntawd yog dab tsi. Thaum kawg, nkag mus raws li tej hauv paus ntsiab lus ntawm Vajtswv cov lus kom thiaj li daws tau tej kev nyuaj no. Piv txwv li, ib txhia tib neeg tub nkeeg thiab yeej tsis muaj zog ua lawv tes dej num li; tiam sis hais txog kev noj, kev haus, thiab kev lom zem, ces lawv zoo siab thiab muaj zog heev, cuag nkaus li cia li muaj zog tuaj tam sid. Cov thawj coj cuav daws tej teeb meem zoo li no li cas? Lawv kuj muaj ib txoj hauv kev thiab: lawv muab ntau yam hauj lwm rau cov neeg no, kom lawv tsis txhob muaj sij hawm los nyob dawb. Txoj hauv kev ua li no puas daws tau qhov teeb meem no? Ib txhia tib neeg txawm yog muab tes hauj lwm me me rau lawv xwb los twb tsis kam ua; lawv tsuas xav noj dawb xwb, lawv xav tias yog tsis ua ib qho hauj lwm li mas zoo tshaj! Qhov teeb meem ntawm cov neeg uas tub nkeeg heev ntawd yog dab tsi? Qhov ntawd ntsig txog lawv tus yam ntxwv xeeb txawm lub ntsiab tseeb, ntsig txog seb lawv puas nyiam tej yam uas zoo, thiab kuj ntsig txog lawv tej kev nyiam thiab tej kev caum. Muaj ib txhia tib neeg uas muaj peev xwm me ntsis; yog lawv tsuas yog cov ntseeg dog dig xwb es tsis muab lub nra rau lawv, ces lawv tsis muaj zog los ua lawv tes hauj lwm thiab tsis muaj kev xav ua li. Txawm li cas los xij, yog hais tias, muab lub nra ua ib tug saib xyuas rau lawv raws li lawv lub peev xwm thiab tes dej num uas lawv ua tau, pub kom lawv muaj ib lub npe thiab ris qee yam hauj lwm, ces lawv txoj kev xav ua hauj lwm ntawd yuav tshwm sim tuaj. Qee zaus, thaum lawv tsis muaj kev lav ris nyob rau hauv lawv tes hauj lwm los sis tub nkeeg, lawv tuaj yeem raug ntuas; qee zaus, lawv tuaj yeem tau txais qee qhov kev txhawb nqa thiab kev qhuas. Yog li ntawd, hom neeg uas, nyiam ntsej muag, nyiam lub meej mom, thiab nyiam raug qhuas no, tau txais lub zog uas los ua lawv tes dej num lawm. Thaum lawv xav tub nkeeg, lawv xav tias, “Vim rau lub meej mom, vim rau lub nra uas kuv ris, kuv yuav tsum ua kom zoo.” Qhov ua li no, qhov kev tub nkeeg ntawm hom neeg no tuaj yeem raug daws ib feem. Thaum cov thawj coj cuav ntsib tej hom teeb meem uas ntsig txog kev ua neeg los sis tej yam ntxwv uas cuam tshuam txog kev nkag mus rau hauv lub neej txoj sia uas tshwm sim nyob rau hauv tus txheej txheem ntawm kev ua dej num, lawv pom tias tej ntawd nyuaj heev thiab tsis yooj yim daws tau. Lawv tsis paub tias yuav daws tej yam ntxwv thiab tej teeb meem no li cas, los sis yuav siv Vajtswv cov lus twg los daws kom thiaj li raug. Feem ntau, lawv txoj kev ua yog txhawb los sis ntxias kom tib neeg ua tib zoo ua; yog kev txhawb thiab kev hais zoo zoo siv tsis tau lawm, ces lawv mam li npau taws thiab ntuas. Yog kev ntuas siv tsis tau lawm, ces lawv nyeem ob peb nqe Vajtswv cov lus hnyav hnyav los ceeb toom, kom tib neeg paub tias lawv yuav tsum coj lawv tus kheej kom zoo. Yog qhov ntawd tseem tsis tau txiaj ntsig thiab, ces lawv txoj hauv kev kawg yog npaj kom tib neeg los saib xyuas thiab tswj lawv. Lawv tsuas muaj ob peb txoj hauv kev no xwb, thiab yog tej ntawd siv tsis tau lawm, ces lawv tsis muaj kev xaiv lawm.

Muab hais luv luv tias, txawm cov thawj coj cuav yuav ntsib teeb meem dab tsi nyob rau hauv lawv tes hauj lwm los xij, lawv yeej pom tsis tshab lub ntsiab tseeb ntawm qhov teeb meem ntawd, lawv pom tias nyuaj heev los to taub tej yam ntxwv thiab tej keeb kwm tseeb ntawm ntau tus tib neeg, thiab lawv haj yam pom tsis tshab tias lub hauv paus ntawm qhov teeb meem ntawd nyob rau qhov twg los sis yuav pib qhov twg los daws kom thiaj haum tshaj plaws. Lawv tsis muaj tej hauv paus ntsiab lus thiab tej hau kev los daws tej teeb meem, yog li ntawd cov thawj coj cuav ua lawv tes hauj lwm daws tsis tau ntau yam teeb meem uas muaj tiag. Lawv tsuas muaj peev xwm tshaj tawm qee yam kev qhuab qhia, qw qee cov lus, ua raws li qee cov kev cai tswj, thiab ua kom dhau cai xwb. Cov tib neeg uas zoo li no yuav ua li cas thiaj li tsim nyog ua tus coj ntawm pawg ntseeg tes hauj lwm? Txawm lawv yuav xyaum npaum li cas los sis ntseeg ntau xyoo ntxiv los xij, lawv yeej tsis tsim nyog ua tus coj ntawm pawg ntseeg tes hauj lwm li. Nej puas tau ntsib tej piv txwv zoo li no dua? (Nyob rau hauv peb pawg ntseeg, muaj ib tug neeg uas ua dej num tos txais uas pheej hais tej lus txiav txim thiab tawm tsam, ua rau cuam tshuam peb kev ua dej num thiab ua rau muaj kev tab kaum thiab kev cuam tshuam. Tom qab peb qhia qhov no rau tus thawj coj lawm, nws tsuas pheej hais kom peb paub peb tus kheej thiab zwm rau qhov xwm txheej uas Vajtswv npaj, yam tsis daws qhov teeb meem uas muaj tiag li, ua rau pawg ntseeg tes hauj lwm raug cuam tshuam. Tsuas yog tom qab hloov tus thawj coj lawm qhov teeb meem thiaj li daws tau.) Qhov no yog ib qho kev qhia tshwm uas pom tau meej ntawm cov thawj coj cuav. Hom thawj coj cuav no mas muaj ntau heev: thaum lawv ntsib ib tug neeg phem los sis ib tug tawm tsam khetos lawv cais tsis tau, lawv thiaj qhia rau lwm tus kom ua siab ntev thiab ua siab dav, kom kawm paub los ntawm qhov kev ntsib kev pom ntawd, thiab kom ua raws tus neeg phem los sis tus tawm tsam khetos ntawd. Lawv tsis cais cov tawm tsam khetos los sis cov neeg phem ntawd, thiab lawv tsis ua dab tsi txog cov tib neeg ntawd li. Tom qab qhia ntau heev txog tej uas cov tawm tsam khetos qhia tshwm uas pom tau meej, tam sim no txhua tus uas to taub qhov tseeb yuav tsum paub cais txog tej ntawd ib txhia lawm. Tiam sis hom neeg zoo li cov thawj coj cuav ntawd puas muaj peev xwm nrhiav tau seb qhov kev qhia twg phim rau ib tug tawm tsam khetos tus cwj pwm? Lawv puas paub cais cov tawm tsam khetos? (Tsis paub.) Thiab qhov tau los uas lawv tsis muaj peev xwm paub cais cov tawm tsam khetos ntawd yog dab tsi? Tej zaum ib tug tawm tsam khetos yuav txeeb tau lub hwj chim ntawm lawv, lawv yuav cia tus tawm tsam khetos ntawd tswj pawg ntseeg, thiab thaum kawg, cia rau tus tawm tsam khetos ntawd tsim tsa lub nceeg vaj ywj pheej raws nws siab nyiam. Yog lawv cais tsis tau ib tug tawm tsam khetos, lawv yeej yuav tsis saib ib tug tawm tsam khetos yam li yog lawv tus yeeb ncuab thiab los nthuav tawm, cais, thiab tsis lees txais; yog lawv tsis paub cais ib tug tawm tsam khetos, ces lawv yuav coj rau ib tug tawm tsam khetos yam li yog cov kwv tij los sis cov muam, nrog kev ua siab ntev thiab kev ua siab dav, uas ua rau tus tawm tsam khetos ntawd los muaj hwj chim thiab tswj nyob rau hauv pawg ntseeg. Yog li ntawd, tej uas tau los ntawm qhov tsis muaj peev xwm cais cov tawm tsam khetos ntawd mas yog tej yam uas phem heev, phem tshaj qhov xav tau. Cov thawj coj cuav tsis to taub qhov tseeb; lawv cais tsis tau lub ntsiab tseeb ntawm ntau hom neeg. Txhua yam uas lawv ua yog tshaj tawm cov lus thiab tej kev qhuab qhia thiab siv tej kev cai tswj xwb, lawv muab kev hlub rau txhua tus, cia kom txhua tus lees txim hloov dua siab tshiab, thiab muab cib fim rau txhua tus, txawm tus neeg ntawd yog leej twg los xij. Qhov no tsis yog tej kev ua ntawm cov xib fwb ntawm sab kev lis kev cai ntseeg lod? Qhov no tsis yog tej kev ua ntawm cov Falixais lod? Cov thawj coj cuav, thaum ntsib cov tawm tsam khetos, feem ntau lawv xaiv los zam kev rau, haj tseem nrhiav ib qho laj thawj los hais tias qhov no yog coj rau lwm tus nrog kev hlub. Paub meej tias ib tug neeg twg muaj teeb meem thiab yog ib tug tawm tsam khetos, lawv tsis kam ntsib los sis tsis muaj lub siab tawv los cais thiab nthuav tawm; qhov no yog kiag qhov uas cov thawj coj cuav ua. Txawm yog qee cov kwv tij thiab cov muam twb cais tau tias tus neeg ntawd yog neeg phem los sis yog ib tug tawm tsam khetos los xij, cov thawj coj cuav tseem hais tias, “Peb tsis tuaj yeem txiav txim los sis teem txim rau lwm tus yooj yim. Tus neeg ntawd kub siab heev los muab nws tus kheej fij thiab txaus siab hlo them tus nqi—nws tsis yog ib tug tawm tsam khetos los sis ib tug neeg phem li. Tsuas yog vim ib tug neeg hais ob peb lo lus hnyav hnyav xwb hais tsis tau tias lawv yog neeg phem, puas yog?” Cov thawj coj cuav saib tsis pom tib neeg lub ntsiab tseeb, thiab lawv saib tsis pom tej uas tau los ntawm cov tawm tsam khetos tej kev ua, lawv tseem hais txog kev hlub, kev ua siab dav, thiab kev ua siab ntev rau cov tawm tsam khetos, haj tseem txhawb cov tawm tsam khetos kom tig xav, paub lawv tus kheej, thiab kom lees txim hloov dua siab tshiab tiag tiag. Txawm ib tug tawm tsam khetos yuav paub nws tus kheej li cas los xij, nws tus yam txwv xeeb txawm puas hloov tau? Nws puas muaj peev xwm paub nws tus kheej tiag tiag? Yeej tsis paub kiag li. Txawm cov tawm tsam khetos yuav zoo li tso tau qee yam tseg thiab muab lawv tus kheej fij me ntsis nyob rau sab nraud los xij, nyob hauv lawv nruab siab lawv muaj tej kev ntshaw thiab tej kev npaj loj heev. Qhov uas cov thawj coj cuav pom tsis tshab hom neeg zoo li cov tawm tsam khetos no yog vim cov thawj coj cuav tsis to taub qhov tseeb, thiab lawv tsis paub cais ntau hom neeg. Lawv pom tsis tshab tus yam txwv xeeb txawm lub ntsiab tseeb ntawm ntau hom neeg, thiab lawv tsis paub tias yuav coj los sis daws li cas rau ntau hom neeg. Thaum lawv pom lwm tus nthuav tawm cov tawm tsam khetos, lawv tsis kam koom nrog, thiab lawv haj yam ntshai los saib xyuas cov tawm tsam khetos, ntshai tsam raug ua pauj yog lawv ua txhaum rau cov tawm tsam khetos. Lawv txoj hauv kev ua rau cov tawm tsam khetos ces tsuas yog tshaj tawm tej kev qhuab qhia thiab tej lus ntuas xwb. Dhau ntawm qhov tsis paub cais cov neeg phem thiab cov tawm tsam khetos lawm, cov thawj coj cuav kuj daws tsis tau ntau yam teeb meem uas muaj nyob rau ntawm cov neeg Vajtswv xaiv tseg thiab. Qhov no ua pov thawj qhia hais tias cov thawj coj cuav tsis muaj kev to taub qhov tseeb kiag li; lawv tsis muaj peev xwm daws tau tej teeb meem uas muaj tiag thiab yeej coj tsis tau cov neeg Vajtswv xaiv tseg nkag mus rau hauv qhov tseeb qhov muaj tiag li. Txawm cov thawj coj cuav yuav hais dab tsi los sis ua dab tsi los xij, koj yeej tsis hnov ib lo lus pom kev uas los ntawm Vajntsujplig txoj kev qhia los li, thiab haj yam tsis pom tias lawv muaj qhov tseeb qhov muaj tiag twg li. Yog li ntawd, cov thawj coj cuav tsis muaj txiaj ntsim los sis kev pab rau tib neeg txoj kev nkag mus rau hauv lub neej txoj sia li; tes hauj lwm me me uas lawv ua ces yog tshaj tawm cov lus thiab tej kev qhuab qhia, qw tej lus, thiab ua kom dhau cai xwb. Lawv yeej ua tsis tau lub luag hauj lwm uas ib tug thawj coj yuav tsum ua kom tiav kiag li.

Hnub no peb sib qhia txog ntawm no xwb. Sib ntsib dua!

Lub Ib Hlis Hnub Tim 9, Xyoo 2021