Cia peb xub rov saib cov ntsiab lus tseem ceeb ntawm peb qhov kev sib qhia thaum sib txoos ua ke zaum tas los ntawd tso. (Zaum tas los, Koj tau teev kaum tsib lub luag hauj lwm ntawm cov thawj coj thiab cov neeg ua hauj lwm, thiab tseem ceeb yog qhia txog ob yam xub thawj: Thawj yam yog coj tib neeg noj thiab haus Vajtswv cov lus thiab to taub cov lus ntawd, thiab nkag mus rau hauv qhov muaj tiag ntawm Vajtswv cov lus; yam ob yog kom paub txog txhua hom tib neeg tej yam ntxwv, thiab daws ntau qhov kev nyuaj uas ntsig txog txoj kev nkag mus rau hauv lub neej txoj sia uas lawv ntsib nyob rau hauv lawv lub neej tiag tiag. Saib raws li ob yam no, Koj tau soj ntsuam tej yam uas cov thawj coj cuav qhia tshwm uas pom tau meej.) Nej puas tau ua tib zoo xav txog tias yog nej yog ib tug thawj coj no, nej yuav ua tau lub luag hauj lwm twg ntawm ob yam no? Muaj ntau tus neeg pheej xav tias lawv muaj peev xwm, muaj tswv yim, thiab muaj lub nra, yog li ntawd lawv thiaj li xav sib tw los ua thawj coj, thiab tsis xav ua cov ntseeg dog dig. Yog li ntawd, xub saib seb koj puas ua tau ob lub luag hauj lwm no, thiab yam twg koj muaj lub peev xwm ua tau zoo dua, thiab ris tau tso. Tam sim no cia txhob tham txog seb koj puas muaj peev xwm ua thawj coj, los sis puas muaj lub peev xwm ua hauj lwm thiab puas muaj lub nra, cia xub saib seb koj puas ua tau ob lub luag hauj lwm no kom zoo. Nej puas tau ua tib zoo xav txog lo lus nug no? Tej zaum qee tus yuav hais tias, “Kuv tsis npaj siab yuav ua ib tug thawj coj, yog li ntawd vim li cas kuv thiaj li yuav xav txog tej ntawd? Kuv tsuas yog yuav tsum ua kuv tes hauj lwm kom zoo xwb—lo lus nug no tsis muaj dab tsi cuam tshuam txog kuv li. Nyob hauv lub neej no, kuv yeej tsis xav ua ib tug thawj coj, thiab kuv yeej tsis xav ris ib tug thawj coj los sis ib tug neeg ua hauj lwm tej luag hauj lwm li, yog li ntawd kuv yeej tsis tas yuav xav txog tej lus nug zoo li no li.” Cov lus no puas yog? (Tsis yog.) Txawm koj tsis xav ua ib tug thawj coj los xij, puas yog koj yuav tsum paub tias tus neeg uas coj koj ntawd ua ob lub luag hauj lwm no zoo li cas, seb lawv puas ua tiav lawv tej luag hauj lwm, seb lawv puas muaj peev xwm, thiab tej peev xwm ua tau, thiab muaj lub nra, thiab seb lawv puas ua tau raws li ob yam kev cheem tsum no? Yog koj tsis to taub los sis pom tsis tshab tej no, thiab lawv muab koj coj mus rau hauv ib lub qhov taub lawm, koj puas yuav paub? Yog koj tsuas raws lawv qab yam tsis meej pem thiab yog ib tug neeg ruam feeb tsis meej xwb, yog koj tsis paub tias lawv yog ib tug thawj coj cuav, los sis tias lawv tab tom coj koj mus yuam kev los sis coj koj mus qhov twg, ces koj yuav nyob rau qhov chaw phom sij. Vim koj tsis to taub txog cov thawj coj thiab cov neeg ua hauj lwm tej luag hauj lwm, thiab koj tsis muaj kev paub cais cov thawj coj cuav, koj yuav raws lawv qab yam tsis meej pem, thiab ua txhua yam uas lawv hais kom koj ua, thiab tsis paub tias yam uas lawv qhia rau koj ntawd puas mus raws li qhov tseeb hauv Vajtswv cov lus, los sis seb tej ntawd puas yog qhov muaj tiag. Koj yuav xav tias vim lawv kub siab, vim lawv khiav mus los thiab ua hauj lwm hnyav txij thaum kaj ntug mus txog tsaus ntuj thiab muaj peev xwm them tus nqi, thiab vim thaum muaj ib tug neeg muaj kev nyuaj, lawv cev tes mus pab, thiab tsis tau tsis quav ntsej, ces hais tias lawv yog ib tug thawj coj uas tsim nyog lawm. Koj tsis paub tias cov thawj coj cuav tsis muaj lub peev xwm nkag siab Vajtswv cov lus, txawm lawv ua hauj lwm ntev npaum li cas los xij, lawv yeej tsis to taub Vajtswv tej kev npaj siab los sis tsis paub tias Vajtswv tej kev cheem tsum yog dab tsi, lawv haj tseem tsis paub cais tias tej kev qhuab qhia yog dab tsi thiab qhov tseeb qhov muaj tiag yog dab tsi thiab, lawv tsis paub tias yuav nkag siab Vajtswv cov lus thiab qhov tseeb kom yog li cas, thiab lawv tsis paub tias yuav noj thiab haus Vajtswv cov lus li cas—qhov no ua rau pom tseeb hais tias lawv yog cov thawj coj cuav. Tes hauj lwm uas cov thawj coj cuav ua yeej tsis tau txiaj ntsig dab tsi li. Lawv sib qhia nrog koj thiab tsuas lam ua kom dhau xwb, tiam sis lawv tsis paub meej tias koj tus yam ntxwv zoo li cas, koj ntsib kev nyuaj dab tsi, thiab seb puas tau daws cov teeb meem ntawd tiag tiag, thiab koj tus kheej los kuj tsis paub tej ntawd thiab. Sab nraud mas, lawv tau nyeem Vajtswv cov lus thiab sib qhia qhov tseeb nrog koj, tiam sis koj tseem nyob hauv ib tug yam ntxwv yuam kev uas tsis muaj kev hloov pauv li. Txawm koj ntsib kev nyuaj dab tsi los xij, zoo li lawv tau ua lawv tej luag hauj lwm lawm, tiam sis lawv qhov kev qhia los sis kev pab yeej daws tsis tau koj tej kev nyuaj ib qho li, thiab tej teeb meem yeej nyob li qub. Cov thawj coj zoo li no puas yog cov uas tsim nyog? (Tsis yog.) Yog li ntawd, koj yuav tsum to taub qhov tseeb twg thiaj li cais tau tej no? Koj yuav tsum to taub tias cov thawj coj thiab cov neeg ua hauj lwm puas ua txhua tes hauj lwm thiab daws txhua qhov teeb meem raws li tej kev cheem tsum ntawm Vajtswv cov lus, seb txhua lo lus uas lawv hais puas muaj qhov muaj tiag thiab puas sib haum rau qhov tseeb ntawm Vajtswv cov lus. Tsis tas li ntawd, koj yuav tsum to taub tias, thaum koj ntsib ntau yam kev nyuaj, lawv txoj kev daws teeb meem puas coj koj kom to taub Vajtswv cov lus thiab tau txais ib txoj kev xyaum ua, los sis lawv tsuas hais qee cov lus thiab tej kev qhuab qhia, qw tej lus, los sis hais lus qhuab ntuas rau koj xwb. Ib txhia thawj coj thiab cov neeg ua hauj lwm nyiam pab tib neeg los ntawm kev txhawb, ib txhia los ntawm kev txhawb zog, thiab ib txhia los ntawm kev qhia tshwm, kev cem, thiab kev ntuas. Txawm lawv siv txoj kev twg los xij, yog tias tej ntawd coj tau koj nkag mus rau hauv qhov tseeb qhov muaj tiag, daws tau koj tej kev nyuaj tiag tiag, ua rau koj to taub tias Vajtswv tej kev npaj siab yog dab tsi thiab qhov no thiaj li pab kom koj paub koj tus kheej thiab nrhiav tau ib txoj kev xyaum ua, ces yav tom ntej thaum koj ntsib tej yam zoo sib xws, koj yuav muaj ib txoj kev taug lawm. Yog li ntawd, lub hauv paus qauv los ntsuas seb ib tug thawj coj los sis ib tug neeg ua hauj lwm puas tsim nyog ces yog seb lawv puas siv tau qhov tseeb los daws tib neeg tej teeb meem thiab tej kev nyuaj, ua rau lawv to taub qhov tseeb thiab tau txais ib txoj kev xyaum ua.

Zaum tas los, peb tau sib qhia kwv yees li thawj yam thiab yam ob ntawm cov thawj coj thiab cov neeg ua hauj lwm tej luag hauj lwm, thiab peb tau soj ntsuam qee yam uas cov thawj coj cuav qhia tshwm uas pom tau meej uas ntsig txog ob lub luag hauj lwm no. Qhov tseem ceeb uas lawv qhia tshwm uas pom tau meej ces yog kev nkag siab Vajtswv cov lus ntiav ntiav thiab nyob saum daim tawv xwb thiab tsis to taub qhov tseeb. Pom tseeb tias vim li ntawd lawv thiaj li coj tsis tau lwm tus kom to taub Vajtswv cov lus thiab to taub Nws tej kev npaj siab. Thaum tib neeg ntsib kev nyuaj, cov thawj coj cuav siv tsis tau lawv tus kheej txoj kev paub los ntawm kev ntsib kev pom los coj cov tib neeg ntawd kom to taub qhov tseeb thiab nkag mus rau hauv qhov muaj tiag, kom lawv thiaj li muaj ib txoj kev taug, thiab kuj pab tsis tau kom lawv tig xav txog thiab paub lawv tus kheej nyob rau hauv ntau yam kev nyuaj, thiab kom daws cov kev nyuaj no nyob rau tib lub sij hawm ntawd. Yog li ntawd hnub no, cia peb xub sib qhia txog tej kev nyuaj ntawm kev nkag mus rau hauv lub neej txoj sia yog dab tsi, thiab tej kev nyuaj uas ntsig txog kev nkag mus rau hauv lub neej txoj sia uas tib neeg nquag ntsib hauv lawv lub neej txhua hnub yog muaj dab tsi. Cia peb muab tej no zuaj zog los hais kom meej meej. Qhov no puas tsim nyog qhia? (Tsim nyog.) Tam sim no nej xav paub me ntsis txog rau cov ncauj lus uas ntsig txog kev nkag mus rau hauv lub neej txoj sia lawm, puas yog? Thaum kuv pib nrog nej sib txuas lus thiab tham nrog nej, txawm hais dab tsi los xij, nej mas loog thiab ruam tag, qeeb, thiab teb qeeb. Zoo li nej tsis to taub dab tsi li, thiab tsis muaj lub siab ntseeg dab tsi li, tsis tas hais txog kev nkag mus rau hauv lub neej txoj sia. Tam sim no, thaum peb tham txog tej yam uas ntsig txog kev hloov pauv tus moj yam ntawm lub neej txoj sia, nej feem coob kuj xav paub rau lub ncauj lus no, thiab muaj ib co kev xav thiab teb rau tej ntawd lawm. Qhov no yog ib qho uas zoo. Yog nej tsis ua nej tej dej num, nej puas yuav tau txais tej no? (Tsis tau.) Qhov no yog Vajtswv txoj hmoov hlub; puav leej yog Nws txoj kev hlub uas pub tshwj xeeb xwb.

Yam Ob: Kom Paub Txog Txhua Hom Tib Neeg Tej Yam Ntxwv, Thiab Daws Ntau Qhov Kev Nyuaj uas Ntsig Txog Txoj Kev Nkag Mus Rau Hauv Lub Neej Txoj Sia uas Lawv Ntsib Nyob Rau Hauv Lawv Lub Neej Tiag Tiag (Ntu Ob)

Yim Yam Kev Nyuaj Ntawm Txoj Kev Nkag Mus Rau Hauv Lub Neej Txoj Sia

I. Tej Kev Nyuaj Uas Ntsig Txog Kev Ua Yus Tes Dej Num

Hais txog tej kev nyuaj ntawm txoj kev nkag mus rau hauv lub neej txoj sia, cia peb xub saib kom dav dua txog tej kev nyuaj uas ntsig txog kev ua yus tej dej num. Thaum koj ntsib teeb meem nyob hauv kev ua koj tej dej num uas ntsig txog kev xyaum ua raws qhov tseeb, thiab koj saib xyuas tsis tau qee yam kom mus raws li tej hauv paus ntsiab lus, qhov no tsis yog ib qho kev nyuaj ntawm txoj kev nkag mus rau hauv lub neej txoj sia lod? (Yog.) Hais yooj yim tias, thaum ua yus tej dej num tej ntawd yog ntau tus yam ntxwv, tswv yim, kev xam pom, thiab qee txoj kev xav tsis yog uas tshwm sim. Yog li ntawd, muaj tej kev nyuaj tshwj xeeb twg nyob hauv qhov no? Piv txwv li, thaum ua yus tej dej num pheej xav ua dog ua dig, ua yam ntse ntsuav, thiab tub nkeeg—qhov no tsis yog ib tus yam ntxwv uas pheej tshwm tuaj thiab qhia tshwm thaum ua yus tej dej num lod? Tseem tsis rau siab ua yus tes hauj lwm, thiab thaum ua yus tes dej num pheej nrog lwm tus sib piv, saib qhov chaw ua tes dej num yam li yog ib qho chaw ua si los sis chaw sib tw, thiab thaum ua yus tes dej num ces xav txog kev nrhiav ib “tus qauv”, es hais hauv siab tias: “Kuv yuav saib seb leej twg zoo dua kuv thiab leej twg yuav txhawb tau kuv lub siab sib tw, ces kuv yuav sib tw nrog lawv, sib tw thiab sib piv nrog lawv, kom pom tias thaum ua lawv tes dej num leej twg ua tau txiaj ntsig zoo dua thiab ua hauj lwm tau zoo dua, thiab leej twg ua rau tib neeg nyiam dua.” Tseem muaj qhov uas to taub tej hauv paus ntsiab lus rau kev ua yus tes dej num lawm tiam sis tsis xav ua raws li tej ntawd, los sis tsis xav ua raws li qhov tseeb hauv Vajtswv cov lus los sis tej kev cheem tsum ntawm Vajtswv lub tsev, thiab pheej nyiam muab yus tus kheej tej kev nyiam los xyaw rau hauv kev ua yus tes dej num, hais tias, “Kuv nyiam ua li no, kuv nyiam ua li ntawd; kuv txaus siab ua li no, kuv xav ua li ntawd.” Qhov no yog kev ua raws siab, pheej xav ua raws li yus tus kheej lub siab nyiam, thiab xav ua li cas ces ua li ntawd raws li yus tus kheej tej kev nyiam, ua ntsej lag muag dig rau txhua yam kev cheem tsum ntawm Vajtswv lub tsev, thiab nyiam khiav tawm ntawm txoj kev yog. Tej no tsis yog tej uas tib neeg feem coob qhia tshwm uas pom tau meej thaum ua lawv tej dej num lod? Pom tseeb tias, tag nrho tej teeb meem no ntsig txog tej kev nyuaj ntawm kev ua yus tes dej num. Thov caw hais ntxiv. (Thaum ua yus tes dej num koom tes kom sib haum xeeb nrog lwm tus tsis tau, thiab pheej txiav txim siab ntawm yus ib leeg xwb.) Qhov no kuj suav tias yog ib qho kev nyuaj thiab. Thaum ua yus tes dej num koom tes kom sib haum xeeb nrog lwm tus tsis tau, thiab pheej txiav txim siab ntawm yus ib leeg xwb thiab ua tus txiav txim siab thaum kawg; thaum ntsib teeb meem xav txo hwj chim los nrhiav thiab mloog lwm tus tej kev xav, tiam sis ua tsis tau li ntawd li, thiab tsis xis nyob thaum uas sim ua li ntawd—qhov no yog ib qho teeb meem. (Thaum ua ib teg dej num pheej tiv thaiv yus tus kheej tej txiaj ntsim, ua neeg twm xeeb thiab qias, thiab yeej paub tias yuav daws li cas thaum tej teeb meem ntawd tshwm sim, tiam sis xav tias qhov ntawd tsis muaj dab tsi cuam tshuam txog yus tus kheej, ntshai ris lub txim yog ua yuam kev, thiab vim li ntawd tsis kam tawm los ua ntej.) Thaum pom teeb meem los tsis daws qhov teeb meem ntawd li, xav tias tsis cuam tshuam txog yus tus kheej, thiab tsis quav ntsej tej teeb meem ntawd li—qhov no kuj suav tias yog tsis ua siab ncaj rau yus tes dej num thiab. Txawm koj puas yog tus saib xyuas tes hauj lwm los tsis yog, yog koj muaj peev xwm pom tshab thiab daws tau qhov teeb meem, ces koj yuav tsum ua lub luag hauj lwm no. Qhov no yog koj tes dej num thiab yog koj lub luag hauj lwm. Yog tus saib xyuas daws tau qhov teeb meem ntawd, koj tsis tas yuav ua dab tsi, tiam sis yog lawv daws tsis tau, ces koj yuav tsum tawm los daws qhov teeb meem ntawd. Tsis txhob faib tej teeb meem raws li ciaj ciam ntawm leej twg lub luag hauj lwm—qhov no yog tsis ua siab ncaj rau Vajtswv. Puas muaj lwm yam ntxiv? (Thaum ua yus tes dej num tsuas vam khom rau yus lub tswv yim thiab tej khoom pub los ua hauj lwm xwb, thiab tsis nrhiav qhov tseeb.) Muaj ntau tus neeg uas zoo li no. Lawv pheej xav tias lawv muaj tswv yim thiab peev xwm, thiab lawv tsis quav ntsej txhua yam uas los raug rau lawv li; lawv tsis nrhiav qhov tseeb kiag li, thiab ua raws li lawv tus kheej lub siab nyiam xwb, thiab vim li ntawd, lawv ua tsis tau ib tes dej num kom zoo li. Tag nrho tej no yog tej kev nyuaj uas tib neeg ntsib thaum ua lawv tej dej num.

II. Tej Teeb Meem Uas Ntsig Txog Qhov Ib Tug Tib Neeg Coj Li Cas Rau Nws Yav Tom Ntej thiab Txoj Hmoo

Qhov ib tug tib neeg coj li cas rau nws yav tom ntej thiab txoj hmoo ntawd kuj yog ib qho teeb meem loj uas ntsig txog txoj kev nkag mus rau hauv lub neej txoj sia. Ib txhia tib neeg txaus siab them tus nqi yog lawv ntseeg tias lawv muaj kev cia siab tias yuav dim, thiab lawv xav phem yog lawv xav tias tsis muaj kev cia siab. Yog Vajtswv lub tsev tsis txhawb thiab cob qhia lawv, lawv tsis kam them tus nqi, thiab lawv ua lawv tej dej num los ntawm qhov lam ua kom dhau yam tsis muaj kev saib xyuas li. Txawm lawv ua dab tsi los xij, lawv pheej xav txog lawv yav tom ntej thiab txoj hmoo, nug lawv tus kheej tias, “Kuv puas muaj ib qho chaw kawg uas zoo tiag? Hauv Vajtswv tej lus cog tseg puas tau hais txog tej yav tom ntej thiab qhov chaw kawg ntawm ib tug neeg zoo li kuv no yog dab tsi?” Yog lawv nrhiav tsis tau ib lo lus teb uas meej, lawv tsis muaj lub siab kub siab los ua dab tsi li. Yog Vajtswv lub tsev txhawb nqa thiab cob qhia lawv, ces lawv muaj zog heev, thiab lawv nquag ua txhua yam heev. Txawm li cas los xij, yog lawv ua tsis tau lawv tes dej num kom zoo thiab raug rho tawm, lawv xav phem kiag tam sim ntawd thiab lawv tso lawv tes dej num tseg, tso txhua qhov kev cia siab tseg. Thaum raug ntuas, lawv xav tias, “Puas yog Vajtswv tsis nyiam kuv lawm? Yog li ntawd, Nws yuav tsum tau hais ua ntej, tsis txhob tab kaum kuv txoj kev caum lub ntiaj teb!” Yog lawv raug rho tawm, lawv xav tias, “Tsis yog lawv saib tsis taus kuv lod? Leej twg qhia tawm txog kuv? Puas yog kuv raug tshem tawm lawm? Yog tias zoo li ntawd, lawv yuav tsum tau hais ua ntej!” Tsis tas li ntawd, lawv lub siab puv npo nrog kev ua lag luam, kev xav kom muab, thiab tej kev thov uas tsis tsim nyog rau Vajtswv. Txawm pawg ntseeg npaj kom lawv ua dab tsi los xij, lawv xav tias yuav tsum muaj tej yav tom ntej zoo thiab ib txoj hmoo zoo, nrog rau Vajtswv tej koob hmoov ua ntej tso lawv mam li ua. Yam tsawg kawg nkaus, yuav tsum muaj tus cwj pwm zoo thiab lub ntsej muag zoo rau lawv, thiab tau txais kev pom zoo los ntawm lwm tus, qhov no yog tej yam uas yuav tsum muaj ua ntej lawv mam li lees txais thiab zwm rau. Tej no tsis yog tej yam qhia tshwm uas pom tau meej tias lawv coj li cas rau lawv yav tom ntej thiab txoj hmoo lod? Nej hais ntxiv rau tej no. (Yog muaj qhov yuam kev los sis teeb meem tshwm sim thaum ua lawv tej dej num thiab lawv raug ntuas, lawv yws Vajtswv thiab thaiv Nws; lawv ntshai tsam raug nthuav tawm thiab raug tshem tawm, thiab pheej tseg ib txoj kev tawm rau lawv tus kheej.) Ntshai tsam raug nthuav tawm thiab raug tshem tawm, thiab pheej tseg ib txoj kev tawm rau lawv tus kheej—tej no kuj yog tej yam qhia tshwm uas pom tau meej tias lawv coj li cas rau lawv yav tom ntej thiab txoj hmoo. (Thaum ib tug neeg pom tias Vajtswv cov lus uas qhia tshwm thiab txiav txim raug rau lawv, los sis thaum lawv raug ntuas ua rau txaj muag, lawv xaus lus tias lawv yog cov tib neeg ruam feeb tsis meej, yog ib tug dab phem thiab ib tug Ntxwgnyoog, thiab tias lawv lees txais tsis tau qhov tseeb. Lawv txiav txim tias lawv tsis muaj kev cia siab tias yuav dim thiab xav phem.) Thaum hais txog lawv yav tom ntej thiab txoj hmoo, tib neeg tso tsis tau lawv tus kheej tej kev npaj siab thiab tej kev ntshaw tseg kom tag nrho. Lawv pheej saib tej no yog tej yam tseem ceeb tshaj plaws thiab mus caum raws, es xav tias tej no yog lub zog txhawb thiab qhov yuav tsum muaj ua ntej txhua yam uas lawv caum. Thaum lawv ntsib kev txiav txim, kev rau txim, tej kev sim siab, kev lim kom dawb huv, los sis raug nthuav tawm, los sis lawv ntsib tej xwm txheej phom sij, lawv xav kiag tam sim ntawd tias, “Puas yog Vajtswv tsis xav tau kuv lawm? Puas yog Nws ntxub ntxaug kuv lawm? Lub suab uas Nws hais lus rau kuv mas hnyav heev li; puas yog Nws tsis xav cawm kuv lawm? Puas yog Nws xav tshem kuv tawm? Yog Nws xav tshem kuv tawm, Nws yuav tsum hais kom sai li sai tau, thaum kuv tseem hluas, kom tsis txhob tab kaum kuv qhov kev caum lub ntiaj teb.” Qhov no ua rau lawv muaj kev xav phem, kev tawv ncauj, kev tawm tsam, thiab tsis rau siab ua. Tej no yog qee tus yam ntxwv thiab tej yam qhia tshwm uas pom tau meej uas ntsig txog qhov tib neeg coj li cas rau lawv yav tom ntej thiab txoj hmoo. Qhov no yog ib qho kev nyuaj loj uas ntsig txog txoj kev nkag mus rau hauv lub neej txoj sia.

III. Tej Kev Nyuaj Uas Ntsig Txog Kev Sib Raug Zoo Ntawm Tib Neeg

Cia peb saib lwm kis—kev sib raug zoo ntawm tib neeg. Qhov no kuj yog ib qho kev nyuaj loj uas ntsig txog txoj kev nkag mus rau hauv lub neej txoj sia. Koj yuav coj li cas rau cov neeg uas koj tsis nyiam, cov neeg uas lawv tej kev xav txawv koj tej, cov neeg uas koj swm, koj cov txheeb ze los sis cov uas tau ua siab zoo rau koj, thiab cov neeg uas pheej ceeb toom koj ncav sij hawm, thiab hais lus tseeb rau koj, thiab pab koj, thiab seb koj puas coj ncaj ncees rau txhua tus tib neeg, ntxiv rau qhov koj yuav xyaum ua li cas thaum muaj kev sib cav nrog lwm tus, nrog rau kev sib khib thiab kev tsis sib haum uas tshwm sim hauv nej, thiab nej tsis muaj kev sib raug zoo, los sis haj tseem koom tes tsis tau kom sib haum xeeb nyob hauv tus txheej txheem uas ua nej tej dej num thiab—tej no yog qee tus yam ntxwv thiab tej yam qhia tshwm uas pom tau meej uas ntsig txog kev sib raug zoo ntawm tib neeg. Puas muaj lwm yam ntxiv? (Ua cov tib neeg uas ua kom lwm tus zoo siab thiab thaum pom lwm tus tej teeb meem tsis kam hais, vim ntshai tsam ua rau lawv chim.) Qhov no yog ib tus yam ntxwv uas tshwm sim thaum uas ib tug neeg ntshai ua rau lwm tus chim. (Tseem muaj qhov yuav coj li cas rau cov thawj coj thiab cov neeg ua hauj lwm, thiab cov uas muaj hwj chim thiab meej mom.) Koj yuav coj li cas rau cov thawj coj thiab cov neeg ua hauj lwm, los sis cov neeg uas muaj hwj chim thiab meej mom—yog qhuas kom lawv nyiam thiab hais lus txhawb tsa lawv rau tej yam uas tsis muaj tseeb, los sis coj rau lawv kom yog—qhov no yog ib qho ntxaws ntxaws uas qhia tshwm uas pom tau meej tias koj coj li cas rau cov uas muaj hwj chim thiab muaj meej mom. Qhov no yog kwv yees tej kev nyuaj ntawm kev sib raug zoo ntawm tib neeg.

IV. Tej Teeb Meem Uas Ntsig Txog Tib Neeg Tej Kev Xav Hauv Siab

Cia peb tham me ntsis txog tib neeg tej kev xav hauv siab. Tej teeb meem dab tsi uas ntsig txog tej kev xav hauv siab? Ua ntej yog koj ntsuas koj tus kheej cov neeg hauv tsev neeg li cas, thiab koj ua li cas rau tej yam uas lawv ua. “Tej yam uas lawv ua” ntawm no yeej suav nrog thaum lawv tab kaum thiab cuam tshuam pawg ntseeg tes hauj lwm, thaum lawv txiav txim rau tib neeg tom qab lawv nraub qaum, thaum lawv ua qee yam uas cov tsis ntseeg ua, thiab lwm yam. Koj puas ua tau ncaj ncees rau tej no? Thaum koj yuav tsum sau ib qho kev ntsuas txog cov neeg hauv koj tsev neeg, koj puas ua tau li ntawd yam ncaj ncees thiab raws li qhov tseeb, es muab koj tus kheej tej kev xav hauv siab tso tseg? Qhov no ntsig txog qhov koj yuav ua li cas rau cov neeg hauv koj tsev neeg. Tsis tas li ntawd, koj puas muaj tej kev xav hauv siab rau cov uas sib haum los sis cov uas tau pab koj yav dhau los? Koj puas tuaj yeem saib lawv tej kev ua thiab tus cwj pwm yam ncaj ncees, raws li qhov tseeb, thiab yog? Yog lawv tab kaum thiab cuam tshuam pawg ntseeg tes hauj lwm, koj puas yuav muaj peev xwm qhia tawm los sis qhia tshwm lawv kom sai sai tom qab koj paub txog tej ntawd? Tsis tas li ntawd, koj puas muaj tej kev xav hauv siab rau cov uas nyob ze koj, los sis cov uas muaj tej kev nyiam zoo sib xws nrog koj? Koj puas muaj ib qho kev ntsuas, kev txhais, thiab txoj kev daws uas raws li qhov tseeb thiab ncaj ncees rau lawv tej kev ua thiab tus cwj pwm? Piv txwv tias cov neeg no, uas muaj kev sib txuas kev xav hauv siab nrog koj ntawd, raug pawg ntseeg saib xyuas raws li tej hauv paus ntsiab lus, thiab qhov tshwm sim los ntawd tsis mus raws li koj tus kheej tej kev xav phem—koj yuav ua li cas rau qhov no? Koj puas yuav tuaj yeem mloog lus? Koj puas yuav nrog lawv sib cuag yam tsis meej pem, thiab koj puas yuav raug lawv dag thiab haj tseem raug lawv haub kom nrhiav lus daws rau lawv, ua pov thawj tias lawv yog, thiab tiv thaiv lawv yam zais ntshis thiab? Koj puas yuav pab thiab fij tus kheej ris txim rau cov uas tau pab koj, thaum tsis quav ntsej qhov tseeb tej hauv paus ntsiab lus thiab tsis quav ntsej tej txiaj ntsim ntawm Vajtswv lub tsev? Tej no tsis yog ntau yam teeb meem uas ntsig txog tej kev xav hauv siab lod? Ib txhia tib neeg hais tias, “Tej kev xav hauv siab tsis yog tsuas ntsig txog cov txheeb ze thiab cov neeg hauv tsev neeg xwb lod? Tsis yog tias tej kev xav hauv siab tsuas yog rau koj niam koj txiv, cov kwv tij thiab cov muam, thiab lwm tus hauv tsev neeg xwb lod?” Tsis yog, tej kev xav hauv siab suav nrog ntau yam neeg. Tsis txhob hais txog qhov ntsuas lawv tus kheej cov neeg hauv tsev neeg kom ncaj ncees—haj tseem muaj ib txhia tib neeg ntsuas tsis tau lawv pab phooj ywg thiab cov phooj ywg zoo kom ncaj ncees thiab, lawv ntxeev lus tseeb thaum hais txog cov neeg no. Piv txwv li, yog lawv tus phooj ywg tsis rau siab ua nws tes hauj lwm thiab pheej ua tej yam tsis ncaj thiab lim hiam hauv nws tes dej num, lawv yuav piav tias nws nyiam ua si heev, thiab hais tias nws txoj kev ua neeg tseem yau thiab tsis tau ruaj khov. Hauv cov lus no puas muaj tej kev xav hauv siab? Qhov no yog hais lus uas muaj tej kev xav hauv siab. Yog ib tug neeg uas tsis sib raug zoo nrog lawv tsis saib xyuas lawv tes hauj lwm thiab ua tej yam tsis ncaj thiab phem, lawv yuav hais tej yam hnyav dua txog lawv, thiab tej zaum haj tseem yuav teem txim rau lawv. Qhov no tsis yog ib qho kev qhia tshwm uas pom tau meej txog qhov hais lus thiab kev ua uas raws li tej kev xav hauv siab lod? Cov tib neeg uas ua neej raws li lawv tej kev xav hauv siab puas muaj kev ncaj ncees? Lawv puas coj ncaj? (Tsis coj ncaj.) Cov neeg uas hais lus raws li lawv tej kev xav hauv siab yog muaj teeb meem dab tsi? Vim li cas lawv thiaj li coj tsis tau kom ncaj ncees rau lwm tus? Vim li cas lawv thiaj li tsis hais lus kom raws li qhov tseeb tej hauv paus ntsiab lus? Cov neeg hais lus yog siab tsis ncaj thiab yeej tsis hais raws li qhov tseeb ntawd yog cov neeg lim hiam. Thaum ib tug neeg hais lus tsis ua ncaj ncees, pheej hais lus raws li tej kev xav hauv siab thiab txhawm rau tus kheej, thiab tsis ua raws li qhov tseeb tej hauv paus ntsiab lus, tsis xav txog Vajtswv lub tsev tes hauj lwm, thiab tsuas tiv thaiv tus kheej tej kev xav hauv siab, lub koob npe, tej txiaj ntsim, thiab lub meej mom—qhov no yog tus yam ntxwv ntawm cov tawm tsam khetos. Nov yog qhov uas cov tawm tsam khetos hais lus; txhua yam uas lawv hais lim hiam, cuam tshuam, thiab tab kaum. Cov tib neeg uas ua neej nyob hauv tej kev nyiam thiab tej txiaj ntsim ntawm cev nqaij daim tawv ces yog cov ua neej nyob hauv lawv tej kev xav hauv siab. Cov tib neeg uas ua neej raws li lawv tej kev xav hauv siab yog cov uas tsis lees txais qhov tseeb los sis tsis xyaum ua raws qhov tseeb kiag li. Cov uas hais lus thiab ua raws li lawv tej kev xav hauv siab ntawd lawv yeej tsis muaj qhov tseeb qhov muaj tiag kiag li. Yog cov neeg zoo li no los ua cov thawj coj, lawv yeej yog cov thawj coj cuav los sis cov tawm tsam khetos xwb. Lawv tsis yog tsuas ua tsis tau hauj lwm kom muaj tiag xwb, lawv kuj ua ntau yam kev phem thiab. Lawv yeej yuav raug tshem tawm thiab raug rau txim.

V. Tej Teeb Meem Uas Ntsig Txog Kev Ntshaw Kev Tau Zoo Rau Lub Cev Nqaij Daim Tawv

Tej kev ntshaw kev tau zoo rau lub cev nqaij daim tawv ntawd kuj yog ib qho teeb meem uas loj heev thiab. Nej xav tias tej kev qhia tshwm uas pom tau meej txog tej kev ntshaw kev tau zoo rau lub cev nqaij daim tawv ntawd muaj dab tsi xwb? Raws li tej nej pom nyob hauv nej tej kev ntsib kev pom ntawd, muaj tej piv txwv dab tsi? Qhov txaus siab rau tej txiaj ntsim los ntawm lub meej mom ntawd puas suav? (Suav.) Muaj dab tsi ntxiv thiab? (Thaum ua yus tej dej num nyiam ua cov hauj lwm yooj yim dua li cov hauj lwm nyuaj, thiab pheej xav xaiv tes hauj lwm sib sib xwb.) Thaum ua ib teg dej num mas, tib neeg pheej xaiv tes hauj lwm sib sib xwb, tes hauj lwm uas tsis sab, thiab tej uas yuav tsis tau tiv tshav tiv nag rau sab nraud. Qhov no yog xaiv cov hauj lwm yooj yim thiab zam tej hauj lwm nyuaj, thiab qhov ntawd yog ib qho qhia tshwm uas pom tau meej txog tej kev ntshaw kom lub cev nqaij daim tawv tau zoo. Tshuav dab tsi ntxiv thiab? (Thaum lawv tes dej num nyuaj me ntsis, sab me ntsis, thaum ntsig txog qhov yuav tau tiv kev txom nyem ces lawv pheej muaj kev yws.) (Xav ntsoov rau tej khoom noj thiab khaub ncaws hnav, thiab tej kev tau zoo rau cev nqaij daim tawv xwb.) Tej no puav leej yog tej kev qhia tshwm uas pom tau meej txog tej kev ntshaw kom lub cev nqaij daim tawv tau zoo. Thaum ib tug neeg zoo li ntawd pom ib tes hauj lwm nyuaj heev los sis phom sij, ces lawv txawm muab txoj hauj lwm ntawd pov rau lwm tus neeg; lawv tus kheej tsuas ua tes hauj lwm uas yooj yooj yim xwb, thiab lawv hle ub hle no, hais tias lawv mas tsis muaj peev xwm zoo txaus, hais tias lawv tsis muaj lub peev xwm ua hauj lwm, ces thiaj li ris tsis tau tes dej num no—qhov tseeb tiag ces, vim lawv ntshaw kom lub cev nqaij daim tawv tau zoo xwb. Txawm lawv ua tes hauj lwm dab tsi los sis ua tes dej num dab tsi los xij, lawv tsis xav tiv kev txom nyem li. Yog hais rau lawv hais tias thaum lawv ua hauj lwm tag lawm yuav muaj nqaij npuas rau lawv noj no mas, lawv ua sai thiab ua zoo heev, thiab koj tsis tas yuav txhib lawv, yuam lawv, los sis saib ntsoov lawv li; tiam sis yog tsis muaj nqaij npuas rau lawv noj, thiab lawv yuav tsum tau ua lawv tes dej num kom dhau sij hawm mas, lawv laug sij hawm, thiab nrhiav txhua yam los hais tias tim ub tim no thiab hais li ub li no los ncua tes hauj lwm ntawd, thiab tom qab ua tes hauj lwm ntawd li ib pliag lawm mas, lawv hais tias, “Kuv kiv taub hau, kuv txhais ceg loog, kuv sab heev lawm! Kuv lub cev mob thoob plaws li, kuv so ib pliag puas tau?” Qhov no yog teeb meem dab tsi? Lawv ntshaw tej kev tau zoo rau lub cev nqaij daim tawv. Kuj tseem muaj thaum tib neeg ua lawv tes dej num pheej nroo txog kev nyuaj, lawv tsis xav siv zog, thaum muaj sij hawm me ntsis ces so, tham pem, los sis nyob xwb thiab koom kev lom zem. Thiab thaum tes hauj lwm ntau tuaj es ua rau rhuav lawv txoj kev ua neej ib txwm ntawm lawv lub neej, lawv tsis zoo siab thiab tsis txaus siab kiag li. Lawv hais ub hais no thiab yws, thiab lawv ua dog ua dig rau lawv tes dej num. Qhov no tsis yog tej kev ntshaw kev tau zoo rau lub cev nqaij daim tawv lod? Piv txwv li, ib txhia poj niam yuav kom txuag tau lawv lub cev mas, lawv yuav tsum tau qoj ib ce thiab pw kom zoo nkauj txhua hnub raws lub sij hawm uas teem tseg. Txawm li cas los xij, kiag thaum tes hauj lwm ntau tuaj thiab rhuav lawv cov kev ua txhua hnub lawm, lawv tsis zoo siab, thiaj li hais tias, “Qhov no tsis tau; ua txoj hauj lwm no mas tab kaum ntau yam dhau lawm. Kuv cia txoj hauj lwm no cuam tshuam kuv tus kheej tej hauj lwm tsis tau. Kuv yuav tsis quav ntsej txhua tus uas los txhib kuv ntawd; kuv yuav ua raws li kuv tus kheej lub sij hawm xwb. Thaum txog lub sij hawm nyom tes nyom taws, ces kuv yuav nyom tes nyom taws. Thaum txog lub sij hawm pw kom zoo nkauj, ces kuv yuav pw kom zoo nkauj. Kuv yuav ua tej no txuas ntxiv ib yam li kuv ua yav dhau los lawm. Kuv tsis ruam thiab tsis siv zog ua hauj lwm li nej. Ob peb xyoos ntxiv xwb, nej yuav dhau mus ua cov poj niam laus uas tsis zoo nkauj, nej lub cev yuav tsis zoo li qub, thiab nej yuav tsis yuag ntxiv lawm. Tsis muaj leej twg yuav xav ntsia nej, thiab nej tus kheej yuav tsis muaj ib qho kev ntseeg siab nyob rau hauv lub neej li lawm.” Vim kom tau raws li lawv lub cev nqaij daim tawv tej kev xyiv fab, kom zoo nkauj, kom lwm tus nyiam, thiab ua neej kom muaj kev ntseeg siab ntxiv, txawm lawv tej dej num yuav ntau npaum li cas los xij, lawv yeej tsis kam muab tej kev xyiv fab thiab tej uas lawv nyiam ntawm lub cev nqaij daim tawv ntawd tso tseg li. Qhov no yog ua raws li tej kev tau zoo ntawm lub cev nqaij daim tawv. Ib txhia hais tias, “Vajtswv ntxhov siab, peb yuav tsum ua tib zoo xav txog Vajtswv tej kev npaj siab.” Tiam sis cov poj niam no hais tias, “Kuv tsis pom tias Vajtswv ntxhov siab li; tsuav kuv tsis ntxhov siab xwb ces yeej tau lawm. Yog kuv ua tib zoo xav txog Vajtswv tej kev npaj siab no, leej twg yuav xav txog kuv tej kev npaj siab?” Cov poj niam uas zoo li no puas muaj kev ua neeg li? Lawv tsis yog cov dab phem lod? Kuj muaj qee tus tib neeg uas txawm lawv tes hauj lwm yuav ntau thiab maj npaum li cas los xij, lawv yuav tsis cia tes hauj lwm ntawd cuam tshuam rau lawv qhov kev tu cev thiab hnav tsoos tsho. Txhua hnub mas lawv siv sij hawm ntau heev los pleev ntsej muag, thiab lawv nco tau zoo heev cuag nco lawv qhov chaw nyob tias txhua hnub yuav hnav cov khaub ncaws twg kom phim rau nkawm khau twg, thiab thaum twg mam li ua kom zoo nkauj thiab zuaj ib ce, yam tsis muaj qhov tsis meej pem txog tej yam no li. Txawm li cas los xij, thaum hais txog qhov lawv to taub qhov tseeb ntau npaum li cas, qhov tseeb twg uas lawv tseem tsis to taub los sis tsis tau nkag mus rau, ua yam dab tsi uas lawv tseem ua dog ua dig thiab tsis muaj lub siab ncaj, tus moj yam qias vuab tsuab dab tsi uas lawv qhia tshwm, thiab lwm yam teeb meem uas ntsig txog qhov tseeb uas muaj feem xyuam rau txoj kev nkag mus rau hauv lub neej txoj sia ntawd mas, lawv tsis paub ib yam dab tsi txog tej no kiag li. Thaum nug txog tej no mas, lawv tsis paub dab tsi kiag li. Tiam sis, thaum hais txog tej ncauj lus uas ntsig txog tej kev zoo siab ntawm lub cev nqaij daim tawv—kev noj, kev haus, thiab kev lom zem mas—lawv tuaj yeem tham tsis paub xaus, yeej cheem tsis tau lawv li. Txawm pawg ntseeg tes hauj lwm yuav ntau npaum li cas los sis lawv tej dej num yuav ntau npaum li cas los xij, yeej rhuav tsis tau lawv cov kev ua txhua hnub thiab qhov xwm txheej ntawm lawv lub neej li. Lawv ua tib zoo saib xyuas txhua yam me me ntawm lub neej hauv lub cev nqaij daim tawv thiab tswj tej ntawd zoo heev, lawv coj nruj thiab ua tiag tiag. Tiam sis, thaum ua tej hauj lwm ntawm Vajtswv lub tsev mas, txawm qhov teeb meem ntawd yuav loj npaum li cas thiab txawm yog tias cuam tshuam txog qhov kev nyab xeeb ntawm cov kwv tij thiab cov muam los xij, lawv ua tes hauj lwm ntawd yam tsis xyuam xim li. Lawv twb tsis quav ntsej tej yam uas muaj feem xyuam txog Vajtswv cov lus txib los sis tes dej num uas lawv yuav tsum ua li. Lawv tsis muaj kev saib xyuas me me li. Qhov no tsis yog ua raws li tej kev tau zoo ntawm lub cev nqaij daim tawv lod? Cov tib neeg uas ua raws li tej kev tau zoo ntawm lub cev nqaij daim tawv ntawd puas tsim nyog ua ib tes dej num? Kiag thaum ib tug tib neeg twg hais txog qhov ua lawv tes dej num, los sis hais txog qhov tiv kev txom nyem thiab them tus nqi ntawd mas, lawv co lawv lub taub hau tsis nres li. Lawv muaj teeb meem ntau dhau, puv nkaus kev yws, thiab puv npo kev xav phem xwb. Cov tib neeg zoo li no mas tsis muaj nqis, lawv tsis tsim nyog ua lawv tes dej num, thiab tsim nyog muab tshem tawm mus. Txog tej kev ntshaw kev tau zoo rau lub cev nqaij daim tawv no, cia peb muab xaus rau ntawm no.

VI. Tej Kev Nyuaj Uas Ntsig Txog Kev Paub Yus Tus Kheej

Kev paub yus tus kheej yog qhov tseem ceeb tshaj plaws ntawm txoj kev nkag mus rau hauv lub neej txoj sia. Tiam sis cov tib neeg feem coob, vim lawv tsis nyiam qhov tseeb los sis tsis caum qhov tseeb, kev paub lawv tus kheej thiaj li ua qhov kev nyuaj loj tshaj plaws rau lawv. Yog li ntawd, yeej paub tseeb tias cov uas tsis nyiam qhov tseeb yeej tsis paub lawv tus kheej tiag. Kev paub yus tus kheej muaj tej kis dab tsi xwb? Thawj kis yog paub tej moj yam qias vuab tsuab uas qhia tshwm hauv yus cov lus thiab tej kev ua ntawd yog dab tsi. Qee zaus, nws yog kev khav theeb, lwm zaus nws yog kev txawj dag, los sis tej zaum yog kev lim hiam, kev tsis kam hloov, los sis kev ntxeev siab, thiab lwm yam. Dhau li ntawd, thaum muaj ib yam dab tsi los raug rau ib tug neeg, lawv yuav tsum saib lawv tus kheej kom meej kom pom tias lawv puas muaj tej kev npaj siab los sis tej kev txhawb siab uas tsis mus raws li qhov tseeb. Lawv kuj yuav tsum saib kom meej seb puas muaj ib yam dab tsi hauv lawv cov lus los sis tej kev ua uas tawm tsam los sis ntxeev siab rau Vajtswv. Tshwj xeeb tshaj yog, lawv yuav tsum saib kom meej seb thaum hais txog lawv tes dej num lawv puas muaj lub nra thiab puas ua siab ncaj, seb lawv puas muab lawv tus kheej fij rau Vajtswv tiag tiag, thiab seb lawv puas yog ua lag luam los sis ua dog ua dig. Kev paub yus tus kheej kuj txhais tau tias seb ib tug neeg puas muaj tej kev xav phem thiab tej kev xav hauv nruab siab, tej kev thov uas ntau dhau, los sis tej kev nkag siab yuam kev thiab tej kev yws txog Vajtswv, thiab seb ib tug neeg puas muaj lub siab xav zwm rau. Qhov no txhais tau hais tias seb ib tug neeg puas muaj peev xwm nrhiav qhov tseeb, lees txais los ntawm Vajtswv los thiab muaj lub siab zwm rau Vajtswv thaum muaj tej yam tshwm sim, tib neeg, tej xwm txheej, thiab tej yam khoom uas Nws tswj hwm. Qhov no txhais tau hais tias seb ib tug neeg puas muaj lub siab txawj xav thiab laj thawj thiab seb ib tug neeg puas nyiam qhov tseeb. Nws txhais tau tias seb ib tug neeg puas zwm rau los sis sim sib cav thaum muaj tej yam los raug rau lawv, thiab seb ib tug neeg yuav ua li cas rau tej teeb meem no thiab seb lawv puas vam khom rau lawv tej kev xav phem los sis tej kev xav hauv nruab siab los sis yog nrhiav qhov tseeb. Tag nrho tej no yog qhov ciaj ciam hauv kev paub yus tus kheej. Ib tug neeg yuav tsum tig xav txog seb lawv puas nyiam qhov tseeb thiab seb puas muaj kev ntseeg tiag rau Vajtswv raws li tus cwj pwm uas lawv muaj rau ntau yam xwm txheej thiab tib neeg, tej xwm txheej, thiab tej yam khoom. Yog ib tug neeg los paub lawv tus moj yam qias vuab tsuab thiab pom tias lawv qhov kev ntxeev siab rau Vajtswv loj npaum li cas, ces yog lawv loj hlob lawm. Tsis tas li ntawd, thaum hais txog tej yam uas ntsig txog qhov lawv coj rau Vajtswv, ib tug neeg yuav tsum tig xav txog seb lawv puas muaj tej kev xav phem, kev hwm, los sis kev zwm rau hauv qhov lawv coj rau Vajtswv lub npe thiab kev yug los ua neeg, thiab tshwj xeeb tshaj yog lawv tus cwj pwm rau qhov tseeb yog dab tsi. Ib tug neeg kuj yuav tsum paub tej uas lawv muaj tsis txaus, lawv lub siab ntseeg, thiab seb lawv puas muaj qhov tseeb qhov muaj tiag, thiab seb qhov lawv caum thiab txoj kev uas lawv taug puas yog thiab puas mus raws li Vajtswv tej kev npaj siab. Tej no yog txhua yam uas tib neeg yuav tsum paub. Muab hais luv luv tias, ntau yam kev paub yus tus kheej tshwj xeeb muaj raws li nram qab no: kev paub seb ib tug neeg lub peev xwm siab los sis qis, kev paub txog ib tug neeg tus yam ntxwv, kev paub txog tej kev npaj siab thiab tej kev txhawb siab uas ib tug neeg muaj hauv lawv tej kev ua, kev paub txog tus moj yam qias vuab tsuab thiab tus yam ntxwv xeeb txawm lub ntsiab tseeb uas ib tug neeg qhia tshwm, kev paub txog ib tug neeg tej kev nyiam thiab tej kev caum, kev paub txog txoj kev uas ib tug neeg taug, kev paub txog ib tug neeg tej kev xam pom txog tej yam, kev paub txog ib tug neeg txoj kev xam pom txog lub neej txoj sia thiab yam uas muaj nqis, thiab kev paub txog ib tug neeg tus cwj pwm coj rau Vajtswv thiab qhov tseeb. Kev paub yus tus kheej qhov tseem ceeb yog muaj tej no.

VII. Ntau Yam Kev Qhia Tshwm Uas Pom Tau Meej uas Tib Neeg Coj rau Vajtswv

Cov ntsiab lus tom ntej uas hais txog txoj kev nkag mus rau hauv lub neej txoj sia ces yog ntau yam kev qhia tshwm uas pom tau meej uas tib neeg coj rau Vajtswv. Piv txwv li, muaj tej kev xav phem txog Vajtswv, muaj kev nkag siab yuam kev txog Nws thiab muaj kev thaiv Nws, thov tej yam uas tsis tsim nyog ntawm Nws, pheej xav zam Nws, tsis nyiam cov lus uas Nws hais, thiab pheej xav tshawb xyuas Nws kom meej. Tseem muaj qhov pom tsis tshab los sis paub tsis tau Vajtswv lub hwj chim uas loj kawg nkaus, thiab pheej muaj ib tug cwj pwm ua xyem xyav rau Vajtswv lub hwj chim kav, tej kev npaj, thiab lub hwj chim, thiab tsis muaj kev paub txog tej no kiag li. Tsis tas li ntawd, tsis yog tsis zam los sis tsis lees paub tej lus phem thiab tej lus thuam uas cov tsis ntseeg thiab lub ntiaj teb hais rau Vajtswv xwb, tiam sis tseem xav nug seb tej ntawd puas muaj tseeb los sis puas yog qhov tseeb. Qhov no tsis yog ua xyem xyav rau Vajtswv lod? Dhau ntawm tej kev qhia tshwm uas pom tau meej no lawm, puas muaj lwm yam ntxiv? (Tsis ntseeg siab rau Vajtswv thiab sim Vajtswv.) (Sim ua zoo kom Vajtswv nyiam.) (Tsis xav lees txais Vajtswv qhov kev tshawb xyuas kom meej.) Muaj qhov tsis xav lees txais Vajtswv txoj kev tshawb xyuas kom meej tib lub sij hawm ntawd ua xyem xyav txog qhov Vajtswv tshawb xyuas tib neeg lub siab kom meej uas tob tshaj plaws. (Kuj muaj qhov tawm tsam Vajtswv thiab.) Qhov no kuj yog ib qho kev qhia tshwm uas pom tau meej uas tawm tsam Vajtswv thiab qw tawm tsam Nws thiab. Muaj qhov siv ib tug cwj pwm uas tsis mob siab thiab saib tsis taus los coj rau Vajtswv, los nrog Nws sib tham thiab nrog Nws sib raug zoo. Puas muaj lwm yam ntxiv? (Ua dog ua dig rau Vajtswv thiab dag Nws.) (Yws Vajtswv.) Yeej tsis muaj qhov uas zwm rau los sis nrhiav qhov tseeb thaum ntsib teeb meem li, thiab pheej cav rau yus tus kheej thiab yws. (Tseem muaj qhov txiav txim thiab hais lus thuam Vajtswv thiab.) (Nrog Vajtswv sib txeeb lub meej mom.) (Nrog Vajtswv ua lag luam thiab siv Nws kom tau txiaj ntsim.) (Tsis lees paub Vajtswv, muab Vajtswv tso tseg, thiab ntxeev siab rau Vajtswv.) Tej no puav leej yog tej teeb meem tseem ceeb; tej teeb meem no yog ntau tus yam ntxwv thiab tej moj yam qias vuab tsuab uas tshwm sim hauv tib neeg qhov kev coj rau Vajtswv. Tej no yog lub hauv paus txog ntau yam kev qhia tshwm uas pom tau meej ntawm qhov tib neeg coj rau Vajtswv.

VIII. Tus Cwj Pwm thiab Ntau Yam Kev Qhia Tshwm Uas Pom Tau Meej uas Tib Neeg Coj rau Qhov Tseeb

Lwm kis ntawm cov ntsiab lus txog kev nkag mus rau hauv lub neej txoj sia yog qhov tib neeg coj rau qhov tseeb li cas. Muaj tej kev qhia tshwm uas pom tau meej dab tsi nyob rau hauv kis no? Muaj qhov coj rau qhov tseeb li ib lub tswv yim los sis lus qw, ib txoj kev cai tswj, los sis peev txheej rau kev noj nyob hauv pawg ntseeg thiab xyiv fab rau tej ntxiaj ntsim ntawm lub meej mom. Thov caw hais ntxiv. (Coj rau qhov tseeb ib yam li yog kev txhawb ntawm sab ntsujplig.) Muaj qhov coj rau qhov tseeb ib yam li yog kev txhawb ntawm sab ntsujplig kom tau raws li yus sab ntsujplig tej kev cheem tsum. (Tsis lees txais qhov tseeb thiab tsis nyiam kiag li.) Qhov no yog ib tug cwj pwm coj rau qhov tseeb. (Xav hais tias Vajtswv cov lus yog los qhia tshwm lwm tus xwb, tias cov lus ntawd tsis cuam tshuam txog yus tus kheej, thiab saib yus tus kheej li yog tus tswv ntawm qhov tseeb.) Koj piav txog qhov kev qhia tshwm uas pom tau meej no haum kawg li. Cov tib neeg uas muaj qhov kev qhia tshwm uas pom tau meej no ntseeg hais tias lawv to taub tej qhov tseeb uas Vajtswv hais tag nrho lawm, thiab hais tias tib neeg tej moj yam qias vuab tsuab thiab lub ntsiab tseeb uas Nws qhia tshwm ntawd mas yog hais txog lwm tus xwb, tsis yog hais txog lawv. Lawv saib lawv tus kheej ib yam li yog tus tswv ntawm qhov tseeb, pheej siv Vajtswv cov lus mus qhuab ntuas lwm tus, cuag nkaus li lawv tus kheej tsis muaj tus moj yam qias vuab tsuab, uas twb yog lub cev ntawm qhov tseeb thiab yog tus cev lus rau qhov tseeb lawm. Lawv yog qhov khoom seem txheej dab tsi? Lawv xav ua lub cev ntawm qhov tseeb—lawv tsis zoo li Povlauj lod? Povlauj tsis lees paub tias Tswv Yexus yog Khetos thiab yog Vajtswv; nws tus kheej xav ua Khetos thiab ua Vajtswv Leej Tub. Cov tib neeg no zoo li Povlauj, lawv yog tib hom li nws, lawv yog cov tawm tsam khetos. Puas muaj lwm yam ntxiv? (Coj rau Vajtswv cov lus ib yam li yog ib tug tib neeg dog dig cov lus, es tsis coj mus xyaum ua yam li yog qhov tseeb, thiab muaj ib tug cwj pwm uas saib tsis taus thiab ua dog ua dig rau Vajtswv cov lus.) Coj rau Vajtswv cov lus yam li tsis yog qhov tseeb uas yuav tsum lees txais thiab xyaum ua, tiam sis coj rau cov lus ntawd ib yam li yog tib neeg cov lus—qhov no yog ib qho. (Muab Vajtswv cov lus txuas rau tej tswv yim thiab tej kev xav ntawm cov tsis ntseeg.) Muaj qhov muab Vajtswv cov lus txuas rau tej tswv yim, coj rau Vajtswv cov lus ib yam li yog tej yam khoom tso saib xwb los sis tej lus uas tsis muaj dab tsi li tib lub sij hawm ntawd saib cov neeg nto moo thiab cov neeg tseem ceeb tej lus nto moo tias yog qhov tseeb, thiab coj rau kev txawj ntse, kab lis kev cai qub, thiab tej kev coj noj coj ua tias yog qhov tseeb thiab muab los hloov Vajtswv cov lus. Cov tib neeg uas qhia tawm qhov kev qhia tshwm uas pom tau meej no hais tas li thaum ntsib tej xwm txheej txog qhov xav xyaum ua raws qhov tseeb thiab ua tim khawv thiab tshaj tawm Vajtswv cov lus, tiam sis nyob hauv lawv lub siab mas, lawv qhuas cov neeg nto moo thiab cov neeg tseem ceeb ntawm lub ntiaj teb, thiab haj tseem pe hawm Npaus Koos uas yog nyob rau lub sij hawm Xooj thaum ub ntawd, hais tias, “Nws yeej yog ib tug kws txiav txim uas nruj thiab ncaj ncees tiag tiag. Nws yeej tsis tau txiav txim tsis ncaj ncees li, yeej tsis tau muaj ib qho kev txiav txim tsis ncaj ncees los ntawm nws ob txhais tes li, los sis tsis muaj ib tug ntsujplig twg raug tua los ntawm nws rab riam tua neeg li!” Qhov no tsis yog qhov pe hawm thiab qhuas ib tug neeg nto moo thiab ib tug neeg txawj ntse lod? Qhov sim muab cov neeg nto moo tej lus thiab tej kev ua los ua qhov tseeb ntawd yog hais lus phem rau qhov tseeb thiab hais lus thuam qhov tseeb! Nyob hauv pawg ntseeg, cov tib neeg zoo li no yeej hais txog qhov xav xyaum ua raws qhov tseeb thiab tshaj tawm Vajtswv cov lus tas li, tiam sis tej uas lawv xav hauv lawv lub siab thiab hais tas li ntawd tsuas yog tej lus piv txwv thiab tej paj lug xwb, uas lawv hais tawm los yam uas txawj thiab npliag heev. Tej no yeej nyob ntawm lawv daim di ncauj tas li thiab hais tawm los yooj yim heev. Lawv yeej tsis tau hais ib lo lus txog lawv qhov kev to taub ntawm kev ntsib kev pom txog Vajtswv cov lus li, thiab haj yam tsis tau hais tias Vajtswv cov lus twg yog tus qauv los sis lub hauv paus rau lawv tej kev ua thiab txoj kev coj li. Txhua yam uas lawv hais tawm yog lus cuav xwb, xws li, “Ib tug neeg nyob qhov twg ces nws tso nws lub npe rau qhov ntawd, ib yam ib tug noog os qej qawg quaj thaum nws ya” “Kev txiav txim tuag ces tsis muaj dab tsi tiam sis tsuas yog ua kom raug txiav taub hau xwb,” “Yeej ib txwm muaj qee yam uas ntxim ntxub txog cov neeg uas txaus hlub,” “Ua ib yam dab tsi los yuav tsum tseg qee qhov chaw rau koj tus kheej,” “Txawm kuv tsis tau ua tau dab tsi los, kuv twb tau tiv kev txom nyem lawm; yog tsis yog kev txom nyem, ces yog kev sab,” “Tsis txhob hlawv tus choj tom qab hla dhau tus dej lawm; tsis txhob tua tus nees luav tom qab tshem lub zeb zom lawm,” “Rau txim rau ib tug kom hnyav los ua ib qho piv txwv rau lwm tus, muab lawv ua ib qho lus ceeb toom rau lwm tus,” thiab “Cov nom tswv tshiab mas kub siab ua kom lwm tus nyiam,” hos lwm yam ces—tsis muaj ib yam dab tsi uas lawv hais es yog qhov tseeb li. Ib txhia tib neeg yuav nco cov kws sau paj huam niaj hnub no tej lus thiab haj tseem muab cov lus ntawd sau rau hauv qhov chaw sau lus xam pom hauv Vajtswv lub tsev cov yeeb yaj kiab. Qhov no tsis yog ib qho kev qhia tshwm uas pom tau meej ntawm qhov tsis muaj kev to taub txog sab ntsujplig lod? Cov lus ntawd puas yog qhov tseeb? Cov lus ntawd puas cuam tshuam txog qhov tseeb? Ib txhia tib neeg pheej hais tej yam xws li “Muaj ib tug vajtswv nyob ze saum koj taub hau,” thiab “Qhov zoo thiab qhov phem yuav raug them rov qab nyob rau thaum kawg; qhov ntawd tsuas yog tos lub sij hawm xwb.” Cov lus hais no puas yog qhov tseeb? (Tsis yog.) Cov lus no los qhov twg los? Cov lus no puas muaj nyob rau hauv Vajtswv cov lus? Cov lus no los ntawm kab lis kev cai ntseeg Hauj Sam los thiab tsis muaj dab tsi cuam tshuam txog kev ntseeg Vajtswv li. Txawm li ntawd los xij, tib neeg pheej muab tej ntawd los txuas rau qhov tseeb; qhov no yog ib qho kev qhia tshwm uas pom tau meej ntawm qhov tsis muaj kev to taub txog sab ntsujplig. Ib txhia tib neeg muaj kev txiav txim siab me ntsis xav muab lawv tus kheej fij rau Vajtswv, thiab lawv hais tias, “Vajtswv lub tsev tau txhawb kuv, Vajtswv tau txhawb nqa kuv, yog li ntawd kuv yuav tsum ua raws li lo lus hais tias, ‘Tus neeg uas luag hwm yuav fij nws txoj sia rau cov uas to taub nws.’” Koj tsis yog ib tug neeg uas luag hwm, thiab Vajtswv tsis tau hais kom koj fij koj txoj sia. Puas tsim nyog muaj lub siab tawv zoo li no thaum ua dej num? Koj ua neej nyob koj twb ua tsis tau koj tej dej num kom tiav, yog koj tuag lawm es puas tseem muaj kev cia siab tias koj yuav ua tau? Thaum ntawd koj yuav ua koj tej dej num li cas? Lwm tus hais tias, “Kuv yug los yeej ua siab ncaj, kuv yog ib tug neeg siab tawv thiab kub siab lug. Kuv nyiam fij txhua yam rau kuv cov phooj ywg. Nrog rau Vajtswv los kuj ib yam nkaus thiab: Vim Vajtswv tau xaiv, txhawb, thiab txhawb nqa kuv, kuv yuav tsum pauj Vajtswv txoj hmoov hlub rov qab. Kuv yeej yuav fij txhua yam rau Vajtswv, txawm tias tuag los xij!” Qhov no puas yog qhov tseeb? (Tsis yog.) Vajtswv tau hais ntau lo lus, es ua li cas lawv tsis nco ib lo li? Txhua lub sij hawm, yam uas lawv sib qhia tsuas yog: “Tsis tas yuav hais lwm yam. Tus neeg uas luag hwm yuav fij nws txoj sia rau cov uas to taub nws, thiab ib tug neeg yuav tsum fij txhua yam rau nws cov phooj ywg thiab ua siab ncaj.” Txawm yog lo lus tias “pauj Vajtswv txoj kev hlub” xwb los lawv twb hais tsis tau tawm. Tom qab mloog tej lus qhuab qhia thiab nyeem Vajtswv cov lus tau ntau xyoo, lawv tsis paub ib qho qhov tseeb li, thiab txawm yog ob peb lo lus ntawm sab ntsujplig xwb los lawv twb hais tsis tau—qhov no yog lawv txoj kev to taub thiab kev txhais txog qhov tseeb hauv lawv nruab siab. Qhia Kuv seb, qhov no puas txaus khuv leej? Qhov no puas txaus luag? Qhov no tsis yog ib qho kev qhia tshwm uas pom tau meej ntawm qhov tsis muaj kev to taub txog sab ntsujplig lod? Tom qab mloog ntau zaj lus qhuab qhia, lawv tsis to taub qhov tseeb thiab tsis paub tias qhov tseeb yog dab tsi, tiam sis lawv tseem siv cov lus dab, lus cuav, lus tsis muaj qab hau, thiab lus txaus luag tshaj plaws ntawd los hloov qhov tseeb. Tsis yog lawv txoj kev xav thiab kev nkag siab hauv lawv nruab siab zoo li no xwb, lawv tseem pheej tshaj tawm thiab qhia qhov no rau lwm tus, ua kom lwm tus muaj kev nkag siab zoo ib yam li lawv. Qhov no tsis yog zoo li coj lub ntsiab uas ua rau muaj kev tab kaum thiab kev cuam tshuam lod? Zoo li cov tib neeg uas tsis to taub qhov tseeb thiab tsis muaj kev to taub txog sab ntsujplig no mas phom sij heev, lawv muaj peev xwm ua rau muaj kev tab kaum thiab kev cuam tshuam thiab ua tej yam uas tsis muaj qab hau thiab tsis muaj tseeb tau txhua lub sij hawm thiab txhua qhov chaw. Muaj lwm yam kev qhia tshwm uas pom tau meej dab tsi ntxiv txog qhov uas tib neeg coj rau qhov tseeb? (Saib tsis taus qhov tseeb, tsuas lees txais tej uas haum yus tus kheej tej kev xav phem xwb, thiab tsis lees txais thiab tsis kam xyaum ua tej uas tsis haum yus tus kheej tej kev xav phem.) Tsuas lees txais thiab xyaum ua tej uas haum yus tus kheej tej kev xav phem xwb thiab tawm tsam thiab teem txim rau txhua yam uas tsis haum yus tus kheej tej kev xav phem—qhov no yog ib tug cwj pwm. (Tsis ntseeg hais tias qhov tseeb kho tau yus tus moj yam qias vuab tsuab los sis hloov tau yus tus kheej.) Tsis lees paub los sis tsis ntseeg qhov tseeb los kuj yog ib tus cwj pwm thiab. Lwm qhov kev qhia tshwm uas pom tau meej ces yog ib tug neeg tus cwj pwm thiab kev xam pom rau qhov tseeb hloov raws li kev xav hauv siab, qhov chaw nyob, thiab tej kev xav tsis zoo. Rau cov tib neeg no mas, ib hnub twg uas lawv zoo siab thiab xyiv fab heev mas, lawv xav tias, “Qhov tseeb zoo tshaj plaws li! Qhov tseeb yog qhov muaj tiag ntawm txhua yam uas zoo, yog yam uas tsim nyog rau noob neej xyaum ua thiab tshaj tawm tshaj plaws.” Thaum lawv tsis zoo siab, lawv xav tias, “Qhov tseeb yog dab tsi? Kev xyaum ua qhov tseeb muaj txiaj ntsim dab tsi? Qhov ntawd khwv tau nyiaj lod? Qhov tseeb hloov tau dab tsi? Yuav muaj dab tsi tshwm sim yog koj xyaum ua qhov tseeb? Kuv yuav tsis xyaum ua—qhov ntawd yuav txawv li cas?” Lawv tus yam ntxwv xeeb txawm dab tshwm los lawm. Cov kev qhia tshwm uas pom tau meej no yog cov moj yam thiab ntau tus yam ntxwv uas tib neeg nthuav tawm hauv qhov uas lawv coj rau qhov tseeb. Tseem muaj lwm yam kev qhia tshwm uas pom tau meej tshwj xeeb dab tsi ntxiv? (Tsis saib Vajtswv cov lus li yog qhov tseeb los sis txoj sia tiam sis soj ntsuam thiab tshawb xyuas kom meej xwb.) Muaj qhov los cuag Vajtswv cov lus nrog ib tug cwj pwm tshawb fawb, pheej soj ntsuam thiab tshawb xyuas qhov tseeb kom meej raws li yus txoj kev paub xwb, uas yeej tsis muaj ib tug cwj pwm ntawm kev lees txais thiab zwm rau li. Cov no yog tej kev nyuaj uas tsis ntau los tsawg nyob rau hauv tib neeg txoj kev coj rau qhov tseeb uas tuaj yeem muab txhais thiab muab zuaj zog los ua tau cov ntsiab lus.

Muaj tag nrho yim sab hauv peb cov ntsiab lus uas hais txog tej kev nyuaj ntawm kev nkag mus rau hauv lub neej txoj sia, thiab tej ntawd yog cov kev nyuaj tseem ceeb uas cuam tshuam txog kev nkag mus rau hauv lub neej txoj sia thiab qhov tau txais kev cawm dim. Tus yam ntxwv thiab tus moj yam uas tib neeg nthuav tawm nyob rau hauv yim sab no puav leej raug qhia tshwm hauv Vajtswv cov lus; Vajtswv tau teem tej kev cheem tsum rau tib neeg thiab taw txoj kev xyaum ua rau lawv. Yog tib neeg siv zog rau Vajtswv cov lus, muaj ib tug cwj pwm mob siab tiag, ib tus cwj pwm uas ntshaw, thiab muaj lub nra rau lawv tus kheej txoj kev nkag mus rau hauv lub neej txoj sia, ces nyob rau hauv Vajtswv cov lus, lawv yuav nrhiav tau tej qhov tseeb uas muaj feem xyuam los daws yim hom teeb meem no, thiab muaj tej txoj kev xyaum ua ntawm txhua yam teeb meem ntawd. Yeej tsis muaj ib qho twg ntawm tej teeb meem ntawd yog tej kev nyuaj uas daws tsis tau los sis yog ib yam zais tob twg. Txawm li cas los xij, yog koj tsis muaj ib lub nra rau koj tus kheej txoj kev nkag mus rau hauv lub neej txoj sia kiag li, thiab tsis quav ntsej qhov tseeb los sis qhov kev hloov koj tus moj yam kiag li, ces txawm Vajtswv cov lus yuav meej thiab yog npaum li cas los xij, cov lus ntawd tsuas yog tej ntawv sau thiab tej kev qhuab qhia rau koj xwb. Yog koj tsis caum los sis xyaum ua raws qhov tseeb, ces txawm koj yuav muaj teeb meem dab tsi los xij, koj yuav nrhiav tsis tau ib txoj kev daws, uas yuav ua rau nyuaj heev rau koj kom tau txais kev cawm dim. Tej zaum koj yuav nyob rau theem ntawm kev ua ib tug neeg siv zog ua hauj lwm mus ib txhis; tej zaum koj yuav nyob rau theem ntawm qhov tsis tau txais kev cawm dim thiab raug Vajtswv ntxub ntxaug thiab tshem tawm mus ib txhis.

Cov Kev Cuam Tshuam Tsis Zoo thiab Tej Qhov Tshwm Sim Los ntawm Cov Thawj Coj Cuav Tes Hauj Lwm

Thaum hais txog txhua yam kev nyuaj uas tib neeg ntsib nyob hauv lawv txoj kev nkag mus rau hauv lub neej txoj sia, cov thawj coj cuav ua li cas? Thaum tib neeg ntsib ib hom yam ntxwv twg uas poob rau hauv ib qho ntawm yim hom kev nyuaj no, cov thawj coj cuav puas paub cais, thiab siv Vajtswv cov lus thiab lawv tus kheej qhov kev paub los ntawm kev ntsib kev pom los daws cov tib neeg no tej teeb meem? Tu siab kawg, thaum tib neeg ntsib tej kev nyuaj, cov thawj coj cuav no tsuas yog siv zog ua qee yam sab nraud xwb, tsuas hais tej lus ntiav ntiav, tsis raug ntsiab, thiab tsis muaj feem xyuam uas tsis muaj dab tsi cuam tshuam txog lawv tus moj yam thiab tej kev nyuaj tiag tiag los daws lawv tej teeb meem xwb. Piv txwv li, cov thawj coj cuav pheej hais tias, “Koj ces yog tsis nyiam qhov tseeb xwb!” Qhov no yog qhov uas lawv daws tib neeg tej kev nyuaj tiag tiag thiab txiav txim rau lawv lub ntsiab tseeb. Txawm yog ib qho teeb meem me me los sis ib tug yam ntxwv xwb los lawv pab tsis tau tib neeg nrhiav cov lus teb hauv Vajtswv cov lus li, thiab lawv daws tsis tau tej ntawd los ntawm kev sib qhia qhov tseeb li. Tiam sis, lawv hais tej lus qhuab qhia thiab tsis muaj feem xyuam, los sis lawv muab qhov teeb meem me los ua ib qho loj loj kom muab tib neeg txiav txim tuag ib zaug yam tsis pub lawv muaj lub cib fim los hloov siab lees txim. Qhov tseeb tiag, yog ib tug neeg muaj lub peev xwm nkag siab Vajtswv cov lus thiab muaj kev to taub txog sab ntsujplig, lawv yuav tuaj yeem nrhiav tau Vajtswv qhov kev qhia tshwm txog yim yam ntawm tus yam ntxwv no hauv Nws cov lus, qhov no tsis nyuaj. Txawm li cas los xij, vim cov thawj coj cuav tsis muaj kev to taub txog sab ntsujplig, peev xwm tsis zoo, thiab tsis muaj lub peev xwm nkag siab, ntxiv rau qhov muaj tseeb tias qee leej ntawm lawv tsuas yog kub siab, xav ua, ntsej muag ncaj siab nkhaus, thiab ua txuj ua neeg sab ntsujplig, lawv yeej daws tsis tau lwm tus tib neeg tej teeb meem kiag li. Thaum hais txog ntau yam teeb meem uas tib neeg ntsib, cov thawj coj cuav yuav ntuas lawv hais tias, “Vajtswv tes hauj lwm twb los txog qib no lawm; ua li cas koj tseem khib thiab sib cav nrog lwm tus? Koj muaj sij hawm rau qhov ntawd lod? Sib tw vim qhov ntawd muaj qab hau dab tsi? Koj tsis sib tw txog qhov ntawd ho yuav ua li cas?” “Vajtswv tes hauj lwm twb los txog qib no lawm, tiam sis koj tseem muaj kev xav hauv siab heev, thiab koj tso tsis tau tseg li. Tsis ntev los sai, tej kev xav hauv siab no yuav yog qhov uas ua rau koj tuag!” “Vajtswv tes hauj lwm twb los txog qib no lawm, yog li ntawd ua li cas koj tseem txhawj txog zaub mov thiab khaub ncaws hnav ua luaj? Koj tsis tau hnav ib daim tiab ho yuav ua li cas? Koj tsis tau yuav ib nkawm khau tawv ho yuav ua li cas? Koj yuav tsum siv siab xav ntxiv txog Vajtswv cov lus thiab koj tes dej num!” “Thaum muaj ib yam dab tsi los raug rau koj, thov Vajtswv ntau ntxiv. Txawm tias dab tsi los raug rau koj los xij, muaj ib qho kev kawm ces yog: kawm paub zwm rau Vajtswv thiab to taub Nws lub hwj chim kav thiab kev npaj.” Cov lus ntuas no puas daws tau tej teeb meem tiag tiag? Yeej daws tsis tau kiag li. Yog tsis li ntawd ces lawv yuav hais tias, “Tib neeg raug Ntxwgnyoog ua rau qias vuab tsuab tob heev lawm. Qhov koj muaj kev xav hauv siab, tsis yog koj ntxeev siab rau Vajtswv lod? Qhov koj tsis paub koj tus kheej, tsis yog koj ntxeev siab rau Vajtswv lod?” Txawm tias qhov teeb meem dab tsi los, cov thawj coj cuav tsis paub yuav qhia qhov tseeb li cas los soj ntsuam ib tug neeg lub ntsiab tseeb los sis tus yam ntxwv, lawv pom tsis tshab tias tib neeg tus yam ntxwv tshwm los li cas, es tom qab ntawd, saib raws li lawv tus yam ntxwv, sib qhia qhov tseeb los daws lawv tej teeb meem, muab kev pab thiab kev pub uas tsim nyog. Tiam sis, lawv pheej hais tib yam lus tias: “Hlub Vajtswv! Siv zog ua koj tej dej num, koj yuav tsum ua siab ncaj rau Vajtswv, thiab thov Vajtswv ntau ntxiv thaum koj ntsib teeb meem!” “Txhua yam nyob hauv Vajtswv lub hwj chim kav thiab kev npaj. Txhua yam nyob hauv Vajtswv ob txhais tes!” “Yog koj tsis nrhiav qhov tseeb, ces yeej tsis tau. Koj yuav tsum nyeem Vajtswv cov lus kom ntau ntxiv. Vajtswv cov lus qhia txhua yam meej lawm, tiam sis tsuas yog tib neeg tsis nyiam qhov tseeb xwb!” “Tej kev puas ntsoog los ze, qhov kawg ntawm txhua yam los ze lawm, thiab Vajtswv tes hauj lwm tab tom yuav xaus, tiam sis koj tsis txhawj. Tib neeg tseem tshuav pes tsawg hnub xwb? Vajtswv lub nceeg vaj twb los txog lawm!” Cov thawj coj cuav tsuas hais tej lus uas tsis raug ntsiab no xwb, yeej tsis txheeb xyuas thiab soj ntsuam ntau yam teeb meem, los sis muab kev pub tiag tiag rau tib neeg los sis muab kev pab rau tib neeg li. Lawv tsuas yog nrhiav ob peb nqe Vajtswv cov lus rau tib neeg nyeem, los sis lawv hais cov lus ntuas uas tsis muaj feem xyuam los ua dog ua dig rau lawv kom dhau xwb. Thaum kawg muaj dab tsi tshwm sim? Nyob hauv qhov raug ua phem ntawm cov thawj coj cuav, tib neeg tsis yog tsuas tsis paub lawv tus kheej tus moj yam qias vuab tsuab xwb, lawv kuj tsis paub tias lawv tus kheej tus yam ntxwv zoo li cas, lawv yog hom neeg zoo li cas, thiab lawv muaj tus yam ntxwv xeeb txawm lub ntsiab tseeb dab tsi; lawv tsis paub meej tias lawv tus kheej peev xwm zoo li cas, seb lawv puas muaj lub peev xwm nkag siab, los sis lawv tab tom taug txoj kev twg. Lawv tseem tuav rawv tej yam hauv ntiaj teb thiab tej yam uas nrov uas lawv nyiam thiab saib muaj nqis hauv lawv lub siab, thiab tsis muaj leej twg pab lawv to taub, soj ntsuam, thiab txheeb xyuas tej yam no. Tej no yog qhov tshwm sim los ntawm cov thawj coj cuav tes hauj lwm. Thaum muaj teeb meem tshwm tuaj, lawv cem tib neeg, lam tau lam teem txim thiab iab liam tib neeg, los sis lawv muab cov lus ntuas thiab tej zaj lus qhia uas tsis raug lub ntsiab rau tib neeg, los sis lawv siv Vajtswv cov lus los piv yam yuam qees thiab tsis yog. Cov uas mloog xav tias, “Kuv xav tias kuv to taub, tiam sis kuj zoo li tsis to taub—zoo li kuv yuav to taub qhov lawv hais, tiam sis kuj zoo li tsis to taub thiab. Yog ua li cas? Txhua yam uas tus thawj coj hais yog lawm, tiam sis ua li cas kuv tshem tsis tau qhov teeb meem no hauv kuv lub siab? Ua li cas kuv nrhiav tsis tau kev daws qhov kev nyuaj no li? Ua li cas kuv tseem xav li no thiab xav ua tej no? Ua li cas kuv to taub tsis tau tias lub ntsiab tseeb thiab lub hauv paus ntawm qhov teeb meem no nyob qhov twg? Tus thawj coj hais tias kuv tsis nyiam qhov tseeb, thiab kuv lees tias kuv tsis nyiam, tiam sis ua li cas kuv tawm tsis tau ntawm tus yam ntxwv no?” Cov thawj coj no puas muaj txiaj ntsig dab tsi? Txawm tias lawv tau hais lus thiab ua hauj lwm los xij, tej ntawd yog ib qho ntxhov quav niab, thiab tej ntawd tsis muaj txiaj ntsig raws li qhov tsim nyog muaj. Lawv ua tsis tau kom tib neeg to taub Vajtswv tej kev npaj siab, ntsuas lawv tus kheej rau Vajtswv cov lus, to taub lawv tus yam ntxwv kom meej, los sis daws lawv tus kheej tej kev nyuaj. Hais txog cov neeg uas tawv ncauj, tsis paub txaj muag uas tsis lees txais qhov tseeb kiag li no, thaum lawv hnov cov thawj coj no ua tib zoo ua siab ntev ntuas lawv, lawv hnov qias siab heev li. Nyob rau tib lub sij hawm ntawd, lawv xyaum hais raws cov lus uas cov thawj coj no hais—tom qab cov thawj coj hais thawj ntu tag, cov tib neeg no tuaj yeem txuas ntxiv rau ntu tom ntej, thiab lawv twb uv tsis taus ntxov lawm, hais tias, “Tsis txhob hais ntxiv lawm. Kuv twb to taub txhua yam uas koj tab tom hais lawm. Yog koj hais ntxiv, kuv yuav xeev siab thiab xav ntuav!” Cov thawj coj hais ntxiv tias, “Koj ces yog tsis nyiam qhov tseeb xwb. Yog koj nyiam qhov tseeb, ces koj yuav to taub txhua yam uas kuv hais.” Lawv teb hais tias, “Tsis hais kuv nyiam qhov tseeb los sis tsis nyiam, koj twb rov hais cov lus no ntau zaus lawm, tsis muaj ib yam tshiab nyob hauv cov lus ntawd li, thiab kuv mloog cov lus ntawd dhuav lawm!” Cov thawj coj cuav ua hauj lwm li no, ua raws nraim li tej kev cai tswj thiab tuav rawv rau tej kab lus, yeej daws tsis tau tib neeg tej kev nyuaj tiag tiag li. Yog ib tug neeg muaj tej kev xav phem txog Vajtswv, cov thawj coj cuav hais tias tus neeg ntawd tsis paub lawv tus kheej. Yog ib tug neeg muaj kev ua neeg tsis zoo, tsis paub nrog tib neeg sib raug zoo, thiab tsis muaj kev sib raug zoo nrog lwm tus li ib txwm, cov thawj coj cuav hais tias lawv thiab tus neeg ntawd ob leeg puav leej txhaum, qhuab ntuas ob leeg, muab liam rau ob leeg, hais tias, “Tau lawm, neb ob leeg sib npaug lawm. Peb yuav tsum ua ncaj ncees thiab tsim nyog hauv peb tej kev ua, coj rau txhua tus kom sib npaug tsis xaiv leej twg ntsej muag. Tus twg hais lus muaj laj thawj yog tus nyiam qhov tseeb, hos cov uas hais lus tsis muaj laj thawj ces yav tom ntej yuav tsum kaw lawv lub qhov ncauj, hais lus kom tsawg thiab ua hauj lwm kom ntau. Tus twg hais ib yam dab tsi uas yog ces yuav tsum tau mloog kom ntau dua.” Qhov no puas yog kev daws teeb meem? Qhov no puas yog kev ua hauj lwm? Qhov no tsis yog ntxias me nyuam yaus thiab dag tib neeg xwb lod? Cov thawj coj cuav mas tej zaum zoo li lawv nquag ua hauj lwm heev, tiam sis lawv daws tsis tau leej twg tej teeb meem li. Lawv tes hauj lwm muaj txiaj ntsig npaum li cas? Tej ntawd tsis muaj nuj nqis thiab tsis muaj qab hau kiag li! Tej no yog tej kev ua ntawm cov tsis ntseeg xwb.

Nyob rau hauv qhov kev ntsib kev pom ntawm tib neeg txoj kev ntseeg Vajtswv, lawv pheej ntsib qee yam kev nyuaj, thiab cov thawj coj cuav daws tsis tau ib qho li. Cov thawj coj cuav haj tseem daws tsis tau qee yam kev nyuaj uas pom tseeb uas daws tau los ntawm ob peb lo lus xwb, thiab lawv kuj ua kom tej ntawd loj heev thiab ua kom qhov teeb meem me me dhau los ua ib qho loj. Ib txhia tib neeg mas tsis yog neeg phem, tsuas yog hais tias lub ntsiab ntawm lawv txoj kev ua neeg ntawd, lawv tsis tshua paub cai, tsis to taub tej kev cai uas yooj yim, thiab coj tus cwj pwm qias me ntsis xwb. Cov thawj coj cuav muab tej teeb meem me no los ua ib qho loj, kom cov kwv tij thiab cov muam los sib tham txog tej ntawd, thuam tej ntawd, thiab teem txim rau tej ntawd, tag nrho tej no lub hom phiaj yog kom cov tib neeg ntawd nco ntsoov, kom lawv tsis kam ua li ntawd ntxiv lawm. Qhov no puas tsim nyog? Qhov no puas yog ib txoj hau kev daws teeb meem? Qhov ntawd puas yog siv qhov tseeb los daws teeb meem? (Tsis yog.) Tsuav tsis muaj teeb meem loj hauv ib tug neeg txoj kev ua neeg, thiab tus neeg ntawd tsis yog neeg phem thiab tuaj yeem muab lawv tus kheej fij tiag tiag, ces, nyob hauv tej xwm txheej uas lawv lees txais, nws txaus los ua hauj lwm ntxiv rau lawv, muab cov lus ceeb toom, kev pab, kev sib qhia, thiab kev txhawb rau lawv. Yog tib neeg pheej coj tus cwj pwm zoo li no, ces yog lawv muaj teeb meem nrog lawv tus yam ntxwv los sis muaj ib tug moj yam lim hiam, ces kev ntuas thiab kev qhuab ntuas kom hnyav yog qhov uas yuav tsum ua. Yog lawv tsis kam lees txais qhov no, ces lawv yuav tsum nres lawv tes dej num, los sis lawv yuav tsum raug ntsaig tawm mus. Cov thawj coj cuav pom tsis tshab qhov no, thiab lawv yuav tsis ua li no; thaum lawv ntsib cov neeg phem zoo li no, lawv saib lawv yam li yog cov kwv tij thiab cov muam, es muab kev pab thiab kev txhawb rau lawv. Qhov no puas yog ua hauj lwm? Qhov no puas yog siv qhov tseeb los daws teeb meem? (Tsis yog.) Cov thawj coj cuav tes hauj lwm mas tsis muaj qab hau, me nyuam yaus, thiab txaus luag, thiab tsis muaj ib yam dab tsi txog tej ntawd uas haum rau Vajtswv tej kev npaj siab li. Nyob hauv txhua yam uas lawv ua, koj pom tias lawv yog cov neeg tsis paub, lawv tsis muaj kev to taub txog sab ntsujplig, thiab lam tau lam ua yam tsis muaj hauv paus ntsiab lus li. Ib yam nkaus li ntawd, lawv pom tsis tshab los sis paub tsis meej txog ntau yam kev nyuaj uas tib neeg ntsib nyob rau hauv lawv txoj kev nkag mus rau hauv lub neej txoj sia. Vim li ntawd, lawv tej kev xyaum daws teeb meem saib zoo li tsis txawj, ruam, thiab zoo li cov neeg tsis paub. Cov uas lees txais lawv txoj kev pab los kuj hnov tias tsis xis nyob thiab meem txom. Sij hawm dhau mus, ib txhia haj tseem poob kev ntseeg, hais tias, “Tus thawj coj twb sib qhia nrog kuv ntau zaus lawm, yog li ntawd ua li cas kuv tsis tau hloov? Ua li cas kuv pheej rov qab ua dua? Puas yog kuv txoj kev ua neeg phem heev, thiab kuv tsis tuaj yeem raug cawm dim lawm?” Ib txhia haj tseem muaj kev ua xyem xyav, hais tias, “Puas yog muaj dab tsi tsis yog rau kuv tus ntsujplig? Puas yog cov ntsujplig phem tab tom ua hauj lwm hauv kuv? Puas yog Vajtswv yuav tsis cawm kuv? Qhov ntawd tsis yog txhais tau hais tias kuv tsis muaj kev cia siab lawm no lod?” Tej no yog tej uas tau los ntawm cov thawj coj cuav tes hauj lwm. Nyob hauv lawv tes hauj lwm, lawv tsis paub qhov twg yog qhov twg, thiab lawv ua yam uas txaus luag, tsis muaj qab hau, ruam, thiab tsis txawj, uas thaum kawg ua rau ntau yam kev nyuaj uas ib txhia tib neeg uas caum qhov tseeb tiag tiag ntsib ntawd tsis raug daws kom ncav sij hawm. Qhov no, ua rau muaj kev xav tsis zoo thiab kev qaug zog tshwm sim hauv cov tib neeg ntawd, nrog rau qee qhov kev xav phem thiab kev nkag siab yuam kev txog Vajtswv thiab Nws tes hauj lwm. Lawv hais tias, “Kuv twb nyeem Vajtswv cov lus ntau heev lawm, yog li ntawd ua li cas kuv qhov teeb meem daws tsis tau li? Vajtswv cov lus puas cawm tau thiab hloov tau tib neeg tiag tiag?” Lawv lub siab pib muaj kev ua xyem xyav, thiab lawv poob rau hauv qhov uas tsis meej pem lawm. Yog li ntawd, thaum cov thawj coj cuav ua hauj lwm, lawv ua tsis tau ntau yam txiaj ntsig zoo, tiam sis lawv ua rau muaj ntau yam tsis zoo tshwm sim. Lawv tes hauj lwm tsis yog tshem tsis tau tib neeg tej kev xav phem, kev ua xyem xyav, thiab kev txiav txim txog Vajtswv xwb, qhov txawv ces yog, qhov ntawd ua rau lawv tej kev nkag siab yuam kev thiab kev ceev faj txog Vajtswv ntau ntxiv. Txawm tias tom qab ntseeg tau ntau xyoo, cov tib neeg no tej teeb meem tseem tsis tau raug daws. Thaum lawv raug cov thawj coj cuav ntxias dag thiab coj yuam kev, lawv tej kev nkag siab yuam kev thiab kev ceev faj txog Vajtswv tob zuj zus tuaj. Yog li no, lawv puas tau txais kev nkag mus rau hauv lub neej txoj sia?

Cov thawj coj cuav txoj kev to taub txog tej yam zoo xws li qhov tseeb thiab tib neeg txoj kev hloov tus moj yam tuaj yeem cuam tshuam rau ntau tus tib neeg tej kev xam pom thiab tej cwj pwm rau tej yam zoo. Thaum cov thawj coj cuav tsis ua hauj lwm qhov ntawd kuj yog ib qho—kiag thaum lawv pib ua hauj lwm, ces tej kev ua yuam kev tshwm sim thiab tej qhov ua tau los uas tsis zoo los kuj tshwm sim thiab. Ib qho huab cua uas tsis tsim nyog muaj tshwm sim hauv cov pawg ntseeg no, uas yog, qee cov lus hais uas yuam kev thiab tsis muaj qab hau pheej tshwm sim, thiab cov tib neeg nyob ntawd tsis to taub tej lo lus ntawm sab ntsujplig uas pheej hais nyob rau hauv Vajtswv cov lus los sis tsis paub yuav siv li cas, hos cov uas hu ua tej lo lus ntawm sab ntsujplig thiab tej lus hais uas cov thawj coj cuav no pheej hais ntawd mas nthuav dav thoob plaws cov pawg ntseeg no. Qhov cuam tshuam uas tej no muaj rau tib neeg mas tsis yog me me li: Tej no tsis yog tsuas pab tsis tau tib neeg kom tau txais ib txoj kev paub uas muaj tiag thiab yog txog Vajtswv cov lus thiab qhov tseeb, los sis ua kom lawv nrhiav tau ib txoj kev xyaum ua uas yog nyob rau hauv Nws cov lus xwb, tiam sis, tej no ua rau tib neeg muaj ib txoj kev paub uas tsis tseeb, lub tswv yim, thiab kev qhuab qhia rau qhov tseeb, thiab nyob rau tib lub sij hawm ntawd, tej no ua rau tib neeg tsis meej pem txog txoj kev xyaum ua. Qhov ua li no, cov thawj coj cuav cuam tshuam rau tib neeg txoj kev pom thiab cuam tshuam rau lawv txoj kev nkag siab uas yog rau qhov tseeb. Cov thawj coj cuav ua tej no ua rau muaj kev cuam tshuam dab tsi? Lawv ua lub luag hauj lwm dab tsi? Thaum uas txiav txim rau lawv tias yog cov uas cuam tshuam thiab tab kaum mas tej zaum yuav tshaj zog lawm, hos qhov hu lawv tias yog cov neeg txaus luag uas khiav mus thoob plaws txhua qhov mas tsis yog ib qho tshaj kiag li. Thaum Kuv nyuam qhuav pib theem hauj lwm no, Kuv tau ntsib qee tus neeg, thiab thaum Kuv tab tom mloog lawv tham, ib tug ntawm lawv nug txog ib tug neeg qhov xwm txheej, thiab ib tug neeg cia li hais tawm cov lus tias, “Lawv twb kub hnyiab ua tshauv lawm.” Thaum Kuv nug hais tias, “Kub hnyiab ua tshauv? Qhov ntawd txhais li cas?” lawv teb hais tias, “Qhov raug kub hnyiab ua tshauv txhais tau hais tias ib tug neeg ntawd twb raug rho tawm thiab tej zaum tsis ntseeg lawm.” Kuv hais tias, “Qhov no yog ib lo lus uas lim hiam heev—nws tsis pub tus neeg ntawd muaj chaw nyob li. Kuv puas tau hais dua lo lus no? Ua li cas kuv tsis paub txog lo lus no li? Kuv yeej tsis tau txiav txim rau leej twg li no, los sis hais tias yog ib tug neeg tsis ua lawv tes dej num los sis tawm ntawm Vajtswv mus lawm, es lawv ‘raug kub hnyiab ua tshauv’ lawm. Lo lus no los qhov twg los?” Tom qab ntawd, kuv mam paub tias lo lus no los ntawm ib tug ntseeg uas laus lawm, ib tug laus paub ntawv uas khav theeb. Nws kawm ntawv siab, twb ntseeg Vajtswv los tau ntev lawm, thiab nws muaj kev ntseeg los ntev lawm. Thaum nws hais lo lus no, pab neeg feeb tsis meej ntawd tsis muaj kev paub cais thiab kawm raws nws, thiab lo lus ntawd dhau los ua ib lo lus siv dav. Nej xav tias lo lus no puas yog? Lo lus no puas muaj lub hauv paus? Lo lus no puas raug? (Tsis yog, lo lus ntawd tsis raug lawm.) Peb yuav tsum coj li cas rau lo lus ntawd? Puas tsim nyog cia lo lus ntawd nyob rau hauv pawg ntseeg? (Tsis tsim nyog.) Qhov ntawd yuav tsum raug qhia tshwm thiab thuam, thiab daws los ntawm nws lub hauv paus. Tom qab ntawd, los ntawm kev thuam thiab kev soj ntsuam, cov neeg feeb tsis meej ntawd tsis kam hais ntxiv lawm, tiam sis ob peb tug neeg uas tsis paub qhov muaj tseeb ntawd tej zaum tseem siv lo lus ntawd nyob tom qab ntsiag to. Cov tib neeg ntawd xav tias qhov ntawd yog ib lo lus ntawm sab ntsujplig heev uas los ntawm ib tug “neeg nto moo” thiab ntseeg tias lo lus ntawd yuav tsum tau siv mus ntxiv. Nej cov thawj coj puas tau ua tej yam zoo li no? Lawv puas cuam tshuam tsis zoo rau nej txoj kev nkag mus rau hauv lub neej txoj sia, kev hloov tus moj yam, los sis txoj kev uas nej taug? (Yav tas los, thaum tshaj tawm txoj moo zoo, muaj ib tug thawj coj cuav hais tias, “Vajtswv kov yeej peb los ntawm kev txiav txim thiab kev rau txim, yog li ntawd thaum peb tshaj tawm txoj moo zoo rau cov neeg ntawm sab kab lis kev cai ntseeg, peb yuav tsum hais lus kom hnyav rau lawv, thiab qhuab ntuas lawv; tsuas yog thaum ntawd xwb mas lawv thiaj li yuav raug kov yeej.”) Cov lus hais no mloog mas zoo li tsim nyog, tiam sis nws puas mus raws li qhov tseeb tej hauv paus ntsiab lus? Vajtswv puas tau qhia kom tib neeg ua li no? Vajtswv txoj lus puas hais tias, “Thaum tshaj tawm txoj moo zoo kom dav, koj yuav tsum sawv es siv ib rab pas hlau los kav tib neeg, siv kev txiav txim thiab kev rau txim los tshaj tawm txoj moo zoo kom dav”? (Tsis tau.) Yog li ntawd, cov lus hais no los qhov twg los? Pom tseeb tias, cov lus hais ntawd yog ib lub tswv yim ntawm ib tug thawj coj cuav uas tsis muaj kev to taub txog sab ntsujplig xav hauv nws lub taub hau tawm los xwb. Ntawm sab nraud mas, cov lus hais no saib zoo li tsis muaj teeb meem: “Tag nrho tib neeg ntiaj teb yuav tsum lees txais Vajtswv txoj kev txiav txim thiab kev rau txim. Yog lawv lees txais tsis tau txoj kev txiav txim thiab kev rau txim ncaj qha los ntawm Vajtswv cov lus, es lawv lees txais tsis tau qhov ntawd los ntawm lwm txoj kev lod? Txawm li cas los xij, qhov ntawd yog qhov txiaj ntsig uas Vajtswv cov lus yuav tsum ua kom tiav—kov yeej tag nrho tib neeg ntiaj teb. Lawv ntxov lees txais qhov no tsis yog zoo dua lees txais tom qab lod? Ua ntej Vajtswv ua, peb yuav ua qhov kev tiv thaiv no, kom tib neeg thiaj li muaj ib hom kev tiv thaiv. Ces thaum Vajtswv txiav txim thiab rau txim rau lawv tiag tiag, cov tib neeg ntawd yuav tsis ntxeev siab rau, tawm tsam, los sis ntxeev siab rau Vajtswv lawm. Qhov no yuav tiv thaiv kom Vajtswv lub siab tsis txhob raug mob. Qhov ntawd tsis yog ib qho zoo lod?” Ntawm sab nraud mas, txhua lo lus zoo li puav leej yog, thiab raws li kev qhuab qhia mas qhov ntawd zoo li mus raws li qhov laj thawj. Txawm li cas los xij, qhov no puas yog ib qho qhov tseeb lub hauv paus ntsiab lus? Vajtswv lub tsev muaj tej kev cai tswj hwm dab tsi rau kev tshaj tawm txoj moo zoo? Nws cheem tsum kom tib neeg ua li no lod? (Tsis tau.) Yog li ntawd, lub tswv yim no tsis muaj tseeb, thiab tus neeg uas hais lub tswv yim ces yog ib tug thawj coj cuav.

Cov thawj coj cuav pheej ua txuj ua neeg sab ntsujplig, hais tej lus tsis tseeb uas zoo li yog tiag los dag ntxias thiab coj tib neeg yuam kev. Txawm hais tias tej lus tsis tseeb no mloog yuav zoo li tsis muaj teeb meem nyob rau sab nraud los xij, tej lus ntawd muaj ib qho cuam tshuam tsis zoo rau tib neeg txoj kev nkag mus rau hauv lub neej txoj sia, cuam tshuam, dag ntxias, thiab tab kaum tib neeg taug txoj kev caum qhov tseeb. Vim yog tej lus uas ua txuj ua neeg sab ntsujplig no, muaj ib txhia tib neeg pib ua xyem xyav thiab tawm tsam Vajtswv cov lus, lawv muaj tej kev xav phem tshwm tuaj, thiab haj tseem to taub yuam kev txog Vajtswv thiab ceev faj Vajtswv, ces lawv thiaj li txav deb ntawm Nws lawm. Qhov no yog qhov cuam tshuam uas cov thawj coj cuav tej lus uas ua txuj ua neeg sab ntsujplig ntawd coj los rau tib neeg. Thaum cov tswv cuab ntawm ib lub pawg ntseeg raug ib tug thawj coj cuav dag ntxias thiab cuam tshuam, lub pawg ntseeg ntawd dhau los ua ib txoj kab lis kev cai ntseeg, zoo ib yam li Kev Ntseeg Khixatia los sis Kev Ntseeg Kav Tos Liv, uas tib neeg tsuas yog ua raws li tib neeg tej lus hais thiab tej lus qhia xwb. Lawv txhua tus puav leej pe hawm Povlauj tej lus qhia, haj tseem txog qhov uas siv nws cov lus los hloov Tswv Yexus cov lus thiab, tiam sis tsis ua raws li Vajtswv txoj kev. Vim li ntawd, lawv txhua tus dhau los ua cov Falixais uas ntsej muag ncaj siab nkhaus thiab cov tawm tsam khetos. Yog li ntawd, lawv raug Vajtswv foom phem thiab teem txim. Cov thawj coj cuav zoo ib yam li Povlauj lawv tsa lawv tus kheej thiab ua tim khawv rau lawv tus kheej, lawv dag ntxias thiab cuam tshuam tib neeg. Lawv coj tib neeg mus yuam kev thiab mus rau hauv tej kev cai dab qhuas ntawm sab kab lis kev cai ntseeg, thiab txoj hau kev uas cov tib neeg no ntseeg Vajtswv mas zoo ib yam li cov ntseeg ntawm sab kab lis kev cai ntseeg, uas ua rau lawv nkag mus rau hauv txoj kev yog ntawm lawv txoj kev ntseeg Vajtswv qeeb lawm. Cov thawj coj cuav pheej dag ntxias thiab cuam tshuam tib neeg, ces cov tib neeg ntawd thiaj li tshwm muaj ntau lub tswv yim thiab lus hais uas ua txuj ua neeg sab ntsujplig. Cov tswv yim, cov lus hais, thiab cov kev coj no mas tawm tsam qhov tseeb tag nrho, thiab tsis muaj feem xyuam dab tsi txog qhov tseeb hlo li. Tiam sis nyob hauv qab txoj kev dag ntxias thiab coj tib neeg yuam kev ntawm cov thawj coj cuav, lawv muab tej no tam ua tej yam zoo, tam ua qhov tseeb. Lawv ntseeg yuam kev tias tej no yog qhov tseeb, thiab xav tias tsuav yog lawv ntseeg tej no hauv lawv lub siab thiab hais tau zoo, thiab tsuav yog sawv daws pom zoo rau tej ntawd xwb, ces lawv tau qhov tseeb lawm. Vim raug tej kev xav thiab tej kev xam pom no coj yuam kev, tsis yog tias tib neeg to taub tsis tau qhov tseeb xwb, tiam sis lawv kuj tsis tuaj yeem xyaum ua raws los sis ntsib pom Vajtswv cov lus, thiab haj yam nkag tsis tau mus rau hauv qhov tseeb qhov muaj tiag. Qhov txawv ces yog, lawv txav deb ntawm Vajtswv cov lus mus zuj zus thiab haj yam nyob deb ntawm qhov kev nkag mus rau hauv qhov tseeb qhov muaj tiag. Thaum mloog sab nraud mas, cov thawj coj cuav cov lus hais thiab cov lus qw tsis yuam kev dab tsi, cov lus ntawd puav leej yog tag nrho. Vim li cas es lawv thiaj li ua tsis tau txiaj ntsig dab tsi li? Qhov no yog vim tias qhov uas cov thawj coj cuav to taub thiab nkag siab ntawd mas ntiav dhau lawm. Qhov ntawd yog tag nrho tej yam ntawm kev qhuab qhia, uas tsis muaj feem xyuam txog qhov tseeb qhov muaj tiag hauv Vajtswv cov lus, Vajtswv tej kev cheem tsum los sis Nws tej kev npaj siab li. Qhov tseeb tiag tag nrho tej kev qhuab qhia uas cov thawj coj cuav tham ntawd mas nyob deb ntawm qhov tseeb qhov muaj tiag—muab hais kom meej ces yog, tej ntawd tsis muaj dab tsi cuam tshuam txog qhov tseeb, thiab haj yam tsis muaj dab tsi cuam tshuam txog Vajtswv cov lus. Yog li ntawd, thaum cov thawj coj cuav pheej tham cov lus thiab cov kev qhuab qhia no, qhov ntawd cuam tshuam txog dab tsi? Vim li cas lawv thiaj li ib txwm nkag tsis tau mus rau hauv qhov tseeb qhov muaj tiag li? Qhov no muaj kev cuam tshuam ncaj qha rau cov thawj coj cuav lub peev xwm. Qhov ntawd yeej paub tseeb tseeb hais tias cov thawj coj cuav peev xwm tsis zoo thiab tsis muaj lub peev xwm nkag siab qhov tseeb. Txawm hais tias lawv ntseeg Vajtswv tau ntau xyoo npaum li cas los xij, lawv yuav tsis to taub qhov tseeb los sis tsis muaj kev nkag mus rau hauv lub neej txoj sia, thiab kuj hais tau tias txawm lawv ntseeg Vajtswv tau ntau xyoo npaum li cas los xij, qhov ntawd yuav tsis yooj yim rau lawv nkag mus rau hauv qhov tseeb qhov muaj tiag. Yog ib tug thawj coj cuav tsis raug rho tawm, thiab cia nws ua thawj coj mus ntxiv, ces qhov ua tau los ntawd yuav zoo li cas? Lawv txoj kev coj ntawd yuav coj tib neeg ntau ntxiv mus rau hauv tej kev cai dab qhuas ntawm sab kab lis kev cai ntseeg thiab mus rau hauv tej kev cai tswj, mus rau hauv cov lus thiab cov kev qhuab qhia, thiab mus rau hauv tej kev xav phem thiab tej kev xav hauv nruab siab uas tsis muaj tseeb. Muab piv rau cov tawm tsam khetos, cov thawj coj cuav tsis coj tib neeg los rau ntawm lawv xub ntiag los sis mus rau ntawm Ntxwgnyoog xub ntiag, tiam sis yog lawv coj tsis tau cov neeg Vajtswv xaiv tseg mus rau hauv qhov tseeb qhov muaj tiag ntawm Nws cov lus, cov neeg Vajtswv xaiv tseg ntawd puas yuav tau txais Nws txoj kev cawm dim? Lawv puas tuaj yeem raug Vajtswv ua kom zoo tiav log? Yeej tsis tau kiag li. Yog cov neeg Vajtswv xaiv tseg nkag tsis tau mus rau hauv qhov tseeb qhov muaj tiag, es lawv tsis yog tseem nyob hauv Ntxwgnyoog txoj kev tswj hwm lod? Tsis yog tias lawv tseem yog cov neeg phem qias uas raug tswj hauv Ntxwgnyoog txoj kev tswj hwm lod? Qhov no tsis tau txhais hais tias cov thawj coj cuav coj lawv mus rau txoj kev puas tsuaj lod? Yog vim li ntawd cov thawj coj cuav thiab cov tawm tsam khetos cov txiaj ntsig ntawm lawv tes hauj lwm mas yeej zoo sib xws. Puav leej ua tsis tau kom cov neeg Vajtswv xaiv tseg to taub qhov tseeb, nkag mus rau hauv qhov muaj tiag, thiab tau txais kev cawm dim. Puav leej yog ua phem rau cov neeg Vajtswv xaiv tseg thiab coj lawv mus rau kev puas tsuaj. Tej uas ua tau los ntawd mas yeej zoo ib yam nkaus ntag.

Tej lus qhia yuam kev thiab tej lus qhia tsis tseeb ntawm cov thawj coj cuav muaj dab tsi? Dhau mus nej mam li muab sau los xaus ua ke ntawm nej tus kheej. Kuv tso tes hauj lwm no rau nej, saib seb nej puas paub cais tej ntawd. Cov thawj coj uas nyob ib puag ncig nej puas muaj cov uas hais qee cov lus uas yog sab ntsujplig los sis haum tib neeg siab, thiab nyob rau sab nraud mas, zoo li yog thiab mus raws li qhov tseeb tiam sis yug tsis tau koj txoj kev nkag mus rau hauv lub neej txoj sia thiab daws tsis tau koj tej teeb meem tiag tiag? Yog koj tsis muaj kev paub cais txog cov lus no thiab tseem muab cov lus no saib muaj nqis thiab khaws cia rau hauv siab, cia cov lus ntawd kav koj thiab coj koj txhua lub sij hawm, thiab cuam tshuam koj tej kev xav thiab txoj kev coj txhua lub sij hawm, ces qhov ua tau los ntawm qhov no mas tsis yog tias hnyav heev lod? (Yog.) Yog li ntawd nws tseem ceeb heev rau nej mus khawb lub hauv paus ntawm tej teeb meem no, mus nrhiav seb tej yam twg yog tej lus qhia yuam kev thiab tej lus qhia tsis tseeb uas ua tau kom tib neeg poob qis mus txog qhov uas lawv txoj kev ntseeg Vajtswv dhau los ua kev ntseeg ntawm sab kab lis kev cai ntseeg, ua rau lawv tawm tsam Vajtswv thiab raug Vajtswv tso tseg. Piv txwv li, muaj ib tug neeg hais tias, “Tsis txhob siv zog mus ua ib tug thawj coj. Yog koj raug rho tawm los sis raug tshem tawm tom qab ua ib tug thawj coj lawm, ces tab txawm yog ib lub cib fim los ua ib tug ntseeg dog dig xwb los koj twb tsis muaj lawm.” Hom lus hais no puas yog ib qho lus qhia yuam kev thiab lus qhia tsis tseeb ntawm cov thawj coj cuav? (Yog.) Puas yog? Yuav tsum muab cov thawj coj cuav tej lus qhia yuam kev thiab tej lus qhia tsis tseeb ntawd cais tawm ntawm cov tawm tsam khetos tej; tsis txhob muab sib xyaws ua ke. Tus neeg ntawd hais tej lus ntawd yog txhais li cas? Tej kev npaj siab uas zais nyob hauv cov lus no yog dab tsi? Puas muaj qee yam zais ntshis nyob rau hauv tej lus ntawd? Pom tseeb tias, tej lus ntawd muaj ib lub tswv yim phem uas los ntxias kom tib neeg yuam kev, tej lus ntawd txhais hais tias lwm tus tib neeg yuav tsum zam qhov siv zog los ua thawj coj, tias qhov ua thawj coj ntawd mas yuav muaj qhov ua tau los tsis zoo. Lawv lub hom phiaj ntawm qhov hais li no yog ua kom tib neeg tso tseg txoj kev xav los ua ib tug thawj coj kom tsis txhob muaj leej twg nrog lawv sib tw rau lub koob meej thiab lub meej mom, yog li ntawd lawv thiaj li yuav kaj siab lug ua ib tug thawj coj mus li. Nyob rau tib lub sij hawm ntawd, lawv kuj qhia rau tib neeg hais tias, “Qhov no yog qhov uas vajtswv lub tsev coj rau cov thawj coj thiab cov neeg ua hauj lwm, vajtswv lub tsev txhawb tsa koj thaum tim tsum thiab thaum tsis tim tsum lawm, ces yuav ncaws koj mus rau theem qis tshaj plaws, es tab txawm lub cib fim los ua ib tug ntseeg dog dig xwb los koj twb tsis muaj lawm.” Lub ntsiab xeeb txawm ntawm cov lus no yog dab tsi? (Kev tuam mom Vajtswv.) Hom neeg twg uas hais lus tuam mom Vajtswv? (Ib tug tawm tsam khetos.) Nyob hauv cov lus no, muaj ob qho kev npaj siab phem uas ua tau kom muaj ob qho kev tshwm sim los: Ib qho yog qhia rau lwm tus kom tsis txhob sib tw rau lub meej mom kiag li, uas ua kom lawv tus kheej lub meej mom ruaj khov; lwm qhov yog ua kom koj to taub yuam kev txog Vajtswv, es txhob ntseeg Vajtswv lawm thiab pib ntseeg lawv. Qhov no yog hom tawm tsam khetos uas pom tseeb tshaj plaws. Saib mas nej tsis muaj lub peev xwm nkag siab; yav tas los Kuv tau hais txog tej piv txwv ntawm kis no lawm. Tsis yog tias nej tsis mob siab thiab tsis nco qab zoo xwb, nej lub peev xwm nkag siab kuj tsis zoo thiab. Ib tug tawm tsam khetos uas pom tseeb li no nej haj tseem cais tsis tau thiab. Cov thawj coj cuav puas yuav hais tej lus zoo li ntawd? Lawv puas yuav ntxias tib neeg yuam kev thiab tawm tsam Vajtswv yam txhob txwm thiab ua qhib lug? (Tsis ua.) Txawm hais tias tej yam uas cov thawj coj cuav hais thiab ua ntawd tej zaum yuav zoo li tsis muaj teeb meem nyob rau sab nraud los xij, lawv tes hauj lwm tsis muaj hauv paus ntsiab lus thiab ua tsis tau txiaj ntsig. Cov thawj coj cuav daws tsis tau cov tib neeg tej teeb meem dab tsi li, coj tsis tau lawv mus rau hauv txoj kev yog ntawm txoj kev ntseeg Vajtswv, los sis coj tsis tau lawv los rau ntawm Vajtswv xub ntiag. Txhua yam uas lawv hais puav leej yog, lawv yeej rau siab ntso ua lawv tes hauj lwm, lawv muaj kev kub siab thiab kev mob siab, thiab nyob rau sab nraud mas zoo li lawv muaj kev ntseeg, muaj kev txiav txim siab, thiab txaus siab hlo tiv kev txom nyem thiab them tus nqi. Tsis tas li ntawd, zoo li lawv muaj kev ua siab ntev heev thiab muaj peev xwm thev taus txhua yam kev sab thiab kev nyuaj. Qhov ntawd tsuas yog lawv peev xwm thiab lub peev xwm nkag siab tsis zoo, thiab lawv tsis muaj kev nkag siab qhov tseeb uas yog li. Lawv yuav daws qhov tsis muaj peev xwm nkag siab no li cas? Lawv siv tej kev cai tswj thiab tej kev qhuab qhia, nrog rau tej tswv yim ntawm sab ntsujplig uas lawv pheej tham ntawd, los daws qhov teeb meem no. Tom qab ob peb xyoos nyob hauv lawv txoj kev coj, txhua yam kev qhuab qhia, tej kev cai tswj, thiab tej kev coj sab nraud tshwm sim los nyob hauv tib neeg nruab nrab. Tib neeg ua raws li tej kev qhuab qhia, tej kev cai tswj, thiab tej kev coj no, thiab ntseeg tias lawv tab tom xyaum ua raws qhov tseeb thiab nkag mus rau hauv qhov tseeb qhov muaj tiag, tiam sis qhov tseeb tiag, lawv tseem nyob deb ntawm qhov tseeb qhov muaj tiag heev! Thaum tib neeg lub siab puv nkaus, raug kav, thiab raug coj los ntawm tej no lawm, ces kev daws qhov teeb meem no mas nyuaj heev. Yuav tsum tau soj ntsuam thiab tshuaj xyuas kom meej txhua yam ntawd ib qho zuj zus kom tib neeg to taub tej ntawd. Tom qab ntawd, yuav tsum qhia tib neeg tias qhov tseeb yog dab tsi, tej kev qhuab qhia, tej lus qw, thiab tej kev cai tswj yog dab tsi, thiab qhov kev nkag siab qhov tseeb uas yog, tej lus hais uas yog, thiab qhov tseeb tej hauv paus ntsiab lus yog dab tsi. Tag nrho tej no yuav tsum tau daws ib qho zuj zus; yog tsis li ntawd, ces cov uas coj tus cwj pwm zoo, ua raws li kev cai, thiab caum sab ntsujplig yuav raug cov thawj coj cuav coj yuam kev thiab ua rau puas tsuaj. Cov tib neeg no sab nraud mas muaj kev hwm, tuaj yeem tiv kev txom nyem thiab them tus nqi, thiab tuaj yeem thov Vajtswv thaum muaj tej yam los raug rau lawv. Txawm li cas los xij, zoo ib yam li cov neeg ntawm sab kab lis kev cai ntseeg, thaum Vajtswv rov los lawm, tsis muaj leej twg paub Nws, tsis muaj leej twg lees paub tias Vajtswv rov ua tes hauj lwm tshiab lawm, thiab lawv txhua tus tawm tsam Nws. Qhov no yog vim li cas? Qhov ntawd yog vim cov thawj coj cuav thiab cov tawm tsam khetos tau ntxias lawv yuam kev—lawv tau ua phem thiab ua rau ntau tus ntseeg Vajtswv tiag tiag puas tsuaj.

Cov thawj coj cuav tsuas tham cov lus thiab cov kev qhuab qhia xwb—qhov uas lawv ua kom tib neeg to taub ntawd tsuas yog kev qhuab qhia xwb es tsis yog qhov tseeb, thiab yam uas lawv ua kom tib neeg pom ntawd tsuas yog kev ua txuj ua neeg sab ntsujplig xwb. Qhov ua tau los ntawm qhov tham cov lus thiab cov kev qhuab qhia ntawd yog dab tsi? Kev ua txuj ua neeg sab ntsujplig, kev to taub cuav, kev paub cuav, kev xyaum ua cuav, thiab kev ua raws cuav—tag nrho tej ntawd puav leej yog cuav. Qhov “cuav” no los li cas los? Qhov ntawd vim yog cov thawj coj cuav txoj kev nkag siab txog qhov tseeb mas nkhaus, tsis dav, thiab ntiav, thiab lawv tsis nkag siab lub ntsiab tseeb ntawm qhov tseeb kiag li. Cov thawj coj cuav coj ntau yam kev cai tswj, cov lus thiab cov kev qhuab qhia, nrog rau qee cov lus qw thiab tej tswv yim los rau tib neeg. Cov tib neeg ntawd yeej tsis to taub Vajtswv tej kev npaj siab tiag tiag li, thiab thaum lawv ntsib ntau yam teeb meem nyuaj thiab sib xyaws, lawv tsis paub yuav daws thiab ua li cas rau tej teeb meem ntawd, los sis yuav ua li cas thiaj li to taub Vajtswv tej kev npaj siab. Cov tib neeg uas zoo li no puas los tau rau ntawm Vajtswv lub xub ntiag? Lawv puas lees txais tau Vajtswv thiab tsis tawm tsam Nws lawm? Tsis tau, lawv ua tsis tau. Yog li ntawd, qhov ntawd tseem ceeb heev thiab tsim nyog rau nej los muab tej lus qhia yuam kev thiab tej lus qhia tsis tseeb ntawm cov thawj coj cuav ntawd sau los xaus ua ke thiab los cais tej ntawd. Thaum muab sau los xaus ua ke ntawd, mas tseem ceeb heev uas yuav tsum tau muab cais tawm ntawm tej lus tsis tseeb uas cov tawm tsam khetos siv los ntxias tib neeg yuam kev ntawd. Hais txog cov thawj coj thiab cov neeg ua hauj lwm lub luag hauj lwm yam ob—kom paub txog txhua hom tib neeg tej yam ntxwv, thiab daws ntau qhov kev nyuaj uas ntsig txog txoj kev nkag mus rau hauv lub neej txoj sia uas lawv ntsib nyob rau hauv lawv lub neej tiag tiag—peb yuav xaus peb txoj kev sib qhia txog kev soj ntsuam ntau yam kev ua ntawm cov thawj coj cuav thiab cov thawj coj cuav lub ntsiab tseeb ntawm tej teeb meem rau ntawm no.

Yam Peb: Qhia Qhov Tseeb Tej Hauv Paus Ntsiab Lus uas Tsim Nyog To Taub Kom Ua Tau Txhua Tes Dej Num Kom Yog (Ntu Ib)

Cov Thawj Coj Cuav Tsuas Hais Tau Cov Lus thiab Cov Kev Qhuab Qhia Los Ntuas Tib Neeg Xwb

Txuas ntxiv no, peb yuav sib qhia txog cov thawj coj thiab cov neeg ua hauj lwm lub luag hauj lwm yam peb—qhia qhov tseeb tej hauv paus ntsiab lus uas tsim nyog to taub kom ua tau txhua tes dej num kom yog. Qhov no yog cov thawj coj thiab cov neeg ua hauj lwm tes hauj lwm tseem ceeb thiab yog lub hauv paus, thiab peb yuav qhia thiab soj ntsuam tej kev qhia tshwm uas pom tau meej ntawm cov thawj coj cuav raws li lub luag hauj lwm no. Ib tug thawj coj los sis ib tug neeg ua hauj lwm puas tuaj yeem qhia kom meej txog qhov tseeb tej hauv paus ntsiab lus uas tib neeg yuav tsum to taub kom ua tau lawv tej dej num zoo ntawd mas yog qhov nthuav tawm tau zoo tshaj plaws seb lawv puas muaj qhov tseeb qhov muaj tiag, thiab qhov ntawd yog qhov tseem ceeb uas los txiav txim seb lawv puas ua tau hauj lwm uas muaj tiag kom zoo. Tam sim no, cia peb saib seb cov thawj coj cuav ua tes hauj lwm no li cas. Ib tug yam ntxwv ntawm cov thawj coj cuav yog lawv tsis muaj peev xwm piav kom tshab los sis qhia kom meej txog tej teeb meem uas ntsig txog qhov tseeb tej hauv paus ntsiab lus. Yog muaj ib tug neeg nrhiav kev pab ntawm lawv, lawv tsuas qhia tau tej lus tsis muaj ntsiab thiab tej kev qhuab qhia xwb. Thaum ntsib tej teeb meem uas tim tsum kev daws, lawv pheej teb ib co lus zoo li no tias, “Nej txhua tus puav leej yog cov kws tshaj lij hauv kev ua tes dej num no. Yog nej muaj teeb meem, nej yuav tsum nrhiav hau kev daws ntawm nej tus kheej. Tsis txhob nug kuv; kuv tsis yog ib tug kws tshaj lij, thiab kuv tsis to taub. Nej daws ntawm nej tus kheej.” Ib txhia tib neeg teb hais tias, “Vim peb daws tsis tau qhov teeb meem peb thiaj li nug koj; yog peb daws tau ces peb yuav tsis nug koj lawm. Peb tsis to taub qhov teeb meem no uas ntsig txog qhov tseeb tej hauv paus ntsiab lus.” Cov thawj coj cuav teb hais tias, “Tsis yog tias kuv twb qhia tej hauv paus ntsiab lus rau nej lawm lod? Ua nej tej dej num kom zoo, thiab tsis txhob tsim kev tab kaum los sis kev cuam tshuam. Nej tseem nug dab tsi? Tsim nyog daws li cas ces daws li ntawd! Vajtswv cov lus twb hais lawm: Muab Vajtswv lub tsev tej txiaj ntsim tso ua ntej.” Cov tib neeg ntawd tsis to taub kiag li, xav hais tias, “Qhov no tsis yog ib txoj hau kev daws qhov teeb meem!” Qhov no yog qhov uas cov thawj coj cuav coj rau tes hauj lwm; lawv tsuas yog tshuaj xyuas tes hauj lwm, lam ua kom dhau xwb, thiab yeej tsis daws teeb meem kiag li. Txawm hais tias tib neeg nug txog tej teeb meem dab tsi los xij, cov thawj coj cuav qhia lawv kom nrhiav qhov tseeb ntawm lawv tus kheej. Cov thawj coj cuav kuj pheej nug tib neeg hais tias, “Nej puas muaj teeb meem? Nej txoj kev nkag mus rau hauv lub neej txoj sia zoo li cas lawm? Nej puas ua nej tej dej num yam ua dog ua dig?” Cov tib neeg ntawd teb hais tias, “Qee zaus, kuv pom kuv tus kheej muaj ib tus yam ntxwv uas ua dog ua dig, thiab los ntawm kev thov Vajtswv, kuv daws tau thiab hloov tau kuv tus kheej, tiam sis kuv tseem tsis to taub qhov tseeb tej hauv paus ntsiab lus ntawm kev ua kuv tes dej num.” Cov thawj coj cuav hais tias, “Tsis yog kuv twb sib qhia tej hauv paus ntsiab lus meej meej nrog koj nyob rau qhov kev sib txoos ua ke zaum tas los lawm lod? Kuv haj tseem muab ob peb nqe Vajtswv cov lus rau koj thiab. Tam sim no puas yog koj tsim nyog to taub lawm?” Qhov tseeb tiag, tej kev qhuab qhia lawv puav leej to taub lawm, tiam sis lawv tseem daws tsis tau lawv tej teeb meem li. Cov thawj coj cuav haj tseem hais tej lus zoo nrov nrov tias, “Vim li cas koj thiaj li daws tsis tau? Tsuas yog koj tsis tau ua tib zoo nyeem Vajtswv cov lus xwb. Yog koj thov Vajtswv ntau thiab nyeem Vajtswv cov lus ntau, ces koj txhua yam teeb meem yuav daws tau lawm. Nej yuav tsum kawm paub sib tham thiab nrhiav ib txoj hau kev ua ke, ces thaum kawg nej tej teeb meem thiaj li yuav raug daws. Hais txog tej teeb meem kev txawj qib siab ntawd mas, tsis txhob nug kuv; kuv lub luag hauj lwm yog tshuaj xyuas tes hauj lwm xwb. Kuv ua tiav kuv tes hauj lwm lawm, thiab qhov seem uas ntsig txog tej kev txawj qib siab ntawd mas, kuv tsis to taub.” Cov thawj coj cuav pheej siv tej laj thawj thiab tej kev hais zam xws li “Kuv tsis to taub, kuv yeej tsis tau kawm qhov ntawd, kuv tsis yog ib tug kws tshaj lij” los hais kom dhau thiab zam tej lus nug. Tej zaum yuav zoo li lawv mas txo hwj chim heev; txawm li cas los xij, qhov no qhia tawm ib qho teeb meem loj ntawm cov thawj coj cuav—lawv tsis muaj ib qho kev to taub txog tej teeb meem uas ntsig txog kev paub qib siab hauv cov kev ua hauj lwm, lawv hnov tsis muaj peev xwm thiab zoo li txaj muag thiab poob ntsej muag heev. Ces lawv ua li cas? Lawv tsuas nrhiav ob peb nqe Vajtswv cov lus los sib qhia nrog sawv daws thaum sib txoos ua ke, tham txog qee yam kev qhuab qhia los ntuas tib neeg xwb. Cov thawj coj uas muaj lub siab zoo me ntsis yuav qhia kev txhawj xeeb rau tib neeg thiab qee zaus nug lawv hais tias, “Ib ntus no nej puas ntsib tej kev nyuaj hauv nej lub neej? Nej puas muaj khaub ncaws txaus hnav? Puas muaj leej twg hauv nej uas coj tsis zoo?” Yog sawv daws hais tias tsis muaj tej teeb meem ntawd, lawv teb hais tias, “Yog li ntawd tsis muaj teeb meem dab tsi lawm. Ces nej ua nej tes hauj lwm mus ntxiv; kuv tseem muaj lwm yam hauj lwm yuav mus ua,” ces maj nroos tawm mus lawm, ntshai tsam tib neeg nug tej lus nug thiab hais kom lawv daws, es ua rau lawv poob ntsej muag. Qhov no yog qhov uas cov thawj coj cuav ua hauj lwm—lawv daws tsis tau ib qho teeb meem uas muaj tiag li. Lawv yuav ua tes hauj lwm ntawm pawg ntseeg kom zoo tau li cas? Vim li ntawd, qhov sib sau los ua ke ntawm tej teeb meem uas tsis tau daws ntawd thaum kawg cuam tshuam tes hauj lwm ntawm pawg ntseeg. Qhov no yog ib tug yam ntxwv thiab kev qhia tshwm uas pom tau meej ntawm qhov uas cov thawj coj cuav ua hauj lwm.

Nyob rau hauv lawv tes hauj lwm, cov thawj coj cuav tsuas yog mob siab rau kev qhuab qhia xwb, thiab lawv nyiam hais cov lus thiab cov kev qhuab qhia, thiab hais tej lus los ntuas thiab nplig tib neeg tshaj plaws, xav hais tias tsuav yog lawv ua kom tib neeg muaj zog thiab tsis khoom rau hauv kev ua lawv tej dej num xwb, ces qhov ntawd cuag li lawv tau ua hauj lwm zoo lawm. Tsis tas li ntawd, cov thawj coj cuav mob siab rau kev saib xyuas qhov xwm txheej ntawm txhua tus lub neej txhua hnub. Lawv pheej nug tib neeg seb lawv puas ntsib tej kev nyuaj hauv lub neej, thiab yog leej twg muaj kev nyuaj tiag, lawv txaus siab hlo pab daws tej kev nyuaj no. Lawv ua rau lawv tus kheej tsis khoom rau tej hauj lwm dav dav no, qee zaus haj tseem noj mov tsis raws sij hawm, thiab feem ntau pw lig thiab sawv ntxov. Raws li lawv txoj kev tsis khoom thiab kev ua hauj lwm hnyav no, vim li cas tej teeb meem hauv tes hauj lwm ntawm pawg ntseeg thiab tej kev nyuaj uas cov neeg Vajtswv xaiv tseg ntsib hauv kev ua lawv tej dej num ntawd tseem daws tsis tau? Qhov no yog vim cov thawj coj cuav yeej piav tsis tau meej txog qhov tseeb tej hauv paus ntsiab lus uas ntsig txog kev ua dej num. Cov lus thiab cov kev qhuab qhia, thiab tej lus ntuas uas lawv hais ntawd mas yeej tsis muaj txiaj ntsig kiag li thiab daws tsis tau tej teeb meem tiag tiag hlo li. Txawm tias lawv hais ntau npaum li cas los sis tsis khoom los sis sab npaum li cas los xij, pawg ntseeg tes hauj lwm yeej tsis nce qib li. Txawm hais tias saib sab nraud mas zoo li lawv txhua tus tab tom ua lawv tej dej num los xij, tiam sis lawv ua tsis tau txais ntau yam txiaj ntsig uas muaj tiag, vim cov thawj coj cuav tsis tuaj yeem qhia txog qhov tseeb tej hauv paus ntsiab lus uas ntsig txog kev ua dej num, los sis tsis tuaj yeem siv qhov tseeb los daws tej teeb meem uas muaj tiag—vim li ntawd lawv thiaj li daws tsis tau ntau yam teeb meem uas muaj nyob hauv kev ua dej num. Piv txwv li, Vajtswv lub tsev cheem tsum luam tej phau ntawv ntawm Vajtswv cov lus, thiab ib tug thawj coj yuav tsum tau xaiv ob tug neeg los saib xyuas tes hauj lwm no. Cov qauv rau kev xaiv tib neeg yog dab tsi? Lawv txoj kev ua neeg yuav tsum zoo, yuav tsum ntseeg siab tau, thiab tuaj yeem tiv kev pheej hmoo. Tom qab xaiv tau tib neeg lawm, tus thawj coj no hais rau nkawd hais tias, “Hnub no, kuv tau hu neb los muab ib qho hauj lwm rau neb: Vajtswv lub tsev muaj ib phau ntawv uas cheem tsum luam, thiab neb yuav tsum nrhiav kom tau ib lub tuam txhab luam ntawv, thiab tom qab cov ntawv luam tau lawm, neb yuav tsum faib cov ntawv ntawd rau cov neeg Vajtswv xaiv tseg kom sai, kom lawv thiaj li tau noj thiab haus Vajtswv cov lus yam ncav sij hawm. Neb puas muaj kev txiav txim siab ua kom tiav tes hauj lwm no? Neb puas txaus siab hlo ris lub luag hauj lwm no thiab tiv qhov kev pheej hmoo no?” Ob tug neeg ntawd ntseeg tias qhov no yog Vajtswv txhawb tsa nkawd, yog li ntawd nkawd thiaj li hais tias txaus siab. Tus thawj coj nug nkawd ntxiv hais tias, “Neb puas muaj kev txiav txim siab los ua kom tiav Vajtswv cov lus txib? Neb puas txaus siab hlo cog lus?” Ob tug neeg ntawd thiaj li cog lus hais tias, “Yog wb ua tsis tau kom tiav Vajtswv cov lus txib thiab ua rau tes hauj lwm no puas tsuaj lawm, ua rau tes hauj lwm ntawm Vajtswv lub tsev raug kev puas tsuaj, ces thov kom wb raug xob laim thiab xob nroo los saum ntuj los. Amees!” Tus thawj coj hais tias, “Tsis tas li ntawd, peb yuav tsum sib qhia txog qhov tseeb. Tam sim no hauv kev ua tes hauj lwm no puas yog neb tab tom ua lag luam? Puas yog neb raug hais kom ua hauj lwm li ib tug neeg raug ntiav ua zog?” Ob tug neeg ntawd teb hais tias, “Tsis yog, qhov no yog wb tes dej num.” Tus thawj coj hais tias, “Vim qhov ntawd yog neb tes dej num, neb yuav tsum pauj Vajtswv txoj kev hlub. Neb tsis tuaj yeem ua rau Vajtswv chim siab los sis ua rau Nws txhawj xeeb. Qhov txaus siab hlo tiv kev pheej hmoo xwb tsis txaus; neb yuav tsum ua neb tes dej num nrog kev ua siab ncaj. Thaum neb ntsib teeb meem, neb yuav tsum thov Vajtswv kom ntau thiab ua ke sib tham. Tsis txhob ua raws li yus siab nyiam los sis txiav txim ua ntawm yus tus kheej xwb. Vim li cas kuv thiaj li kom neb ob leeg sib koom tes? Qhov ntawd yog kom neb thiaj li sib tham tau thaum muaj teeb meem tshwm sim, kom qhov ntawd yooj yim rau neb ua. Yog neb tsis tuaj yeem pom zoo ib yam, ces thov Vajtswv. Nyias yuav tsum tso nyias tus kheej tej lub tswv yim, thiab tsuas ua thaum neb twb pom zoo ua ke lawm xwb. Kuv cia siab tias neb ob leeg yuav ua tiav tes hauj lwm no kom zoo!” Thaum kawg, tus thawj coj no nrhiav tau ib nqe Vajtswv cov lus txog kev ua yus tes dej num kom zoo, thiab peb leeg ntawd nyeem thov Vajtswv nqe lus ntawd ob peb zaug. Ua li ntawd ces suav tias txoj hauj lwm no twb muab cob rau nkawd lawm, thiab tus thawj coj lub luag hauj lwm los kuj suav tias twb ua tiav lawm thiab. Tus thawj coj txoj kev ua tes hauj lwm no zoo li cas? Tus thawj coj txaus siab heev, ob tug neeg ntawd los kuj txaus siab heev thiab. Cov neeg nyob ib sab saib hais tias, “Tus thawj coj no paub ob peb yam tiag tiag txog qhov ua hauj lwm kom tiav; lawv txoj kev hais lus mas npaj tau zoo thiab muaj hauv paus hauv ntsis kawg, thiab nws ua tej yam raws ib kauj ruam zuj zus. Ua ntej, nws muab tes hauj lwm no fais rau ob tug ntawd, tom qab ntawd nws daws nkawd tej teeb meem uas cuam tshuam txog kev xav thiab kev xam pom, thiab thaum kawg, nws hais qee cov lus hnyav, kom nkawd cog lus thiab tsa tes cog lus. Nws yeej ua tes hauj lwm no yam muaj txheej txheem, thiab nws yeej tsim nyog tau lub npe thawj coj—nws muaj kev ntsib kev pom thiab ris ib lub nra.” Thaum kawg, tus thawj coj hais rau nkawd hais tias, “Nco ntsoov qhov no: Luam ntawv tsis yog ib tes hauj lwm yooj yim, qhov ntawd tsis yog ib yam uas ib tug neeg dog dig ua tau. Tes hauj lwm no tsis yog kuv los sis Vajtswv lub tsev muab tso rau neb; tes hauj lwm no yog ib cov lus txib los ntawm Vajtswv. Neb yuav tsum tsis txhob ua rau Nws tag kev cia siab. Tsuav neb ua tiav tes hauj lwm no kom zoo, neb lub neej txoj sia yuav loj hlob, thiab neb yuav muaj qhov muaj tiag.” Raws li lub tswv yim mas, cov lus no tsis muaj ib qho teeb meem ntawm hauv paus ntsiab lus; cov lus no ntau los sis tsawg yuav raug suav tias yog. Yog li ntawd, cia peb tshuaj xyuas kom meej qhov teeb meem no thiab saib seb qhov “cuav” ntawm tus thawj coj cuav no qhov kev qhia tshwm uas pom tau meej nyob qhov twg. Tus thawj coj puas tau muab ib qho lus qhia txog ntau yam teeb meem kom ntxaws ntxaws, xws li tej kev txawj qib siab thiab sab thev naus laus ntsis uas ntsig txog tes hauj lwm no? Nws puas tau qhia txog qhov tseeb tej hauv paus ntsiab lus kom meej los sis tej qauv uas cheem tsum kom meej? (Tsis tau.) Nws tsuas hais qee cov lus qhuav qhawv thiab tsis muaj qab hau xwb—cov lus uas tib neeg nquag hais, cov lus uas tsis tseem ceeb. Vim yog tus thawj coj tus kheej kiag hais thiab muab lus qhia, tib neeg pom cov lus no tias tseem ceeb dua li ib txwm, tiam sis qhov tseeb tiag, tej ntawd yog ib co lus tsis tseem ceeb thiab tsis muaj txiaj ntsig rau kev daws tej teeb meem uas muaj tiag uas ntsig txog kev luam ntawv kiag li. Yog li ntawd, tej yam meej meej uas ntsig txog kev luam ntawv ntawd muaj dab tsi? Peb yuav tsum sib tham txog tej ntawd thiab saib seb tes hauj lwm uas tus thawj coj no ua puas yog yam uas ib tug thawj coj cuav ua.

Ua ntej tshaj mas, kev luam ntawv cuam tshuam txog kev muab cov ntawv tso rau qhov chaw, thiab tom qab ntawd muaj kev nyeem es kho cov ntawv ntawd, teeb cov ntsiab lus thiab cov ntawv tseem ceeb, nrog rau qhov hnyav ntawv daim ntawv, cov kob, thiab qhov zoo ntawm cov ntawv. Kuj muaj daim plhaub khwb thiab, seb nws yuav tsum yog muag los sis tawv, thiab tus qauv, kob, duab, thiab hom ntawv rau lub plhaub khwb. Thaum kawg, muaj qhov muab coj los lo ua ke thiab, seb yuav siv kua nplaum los sis siv xov xaws. Tag nrho cov no yog tej teeb meem uas nyob rau hauv ciaj ciam ntawm kev luam ntawv. Tus thawj coj puas tau sib tham txog tej no? (Tsis tau.) Lwm qhov teeb meem ces yog nrhiav ib lub tuam txhab luam ntawv: seb cov tshuab luam ntawv thiab cov tshuab uas muab lo ua ke ntawd puas yog cov tshiab, qhov zoo ntawm kev luam ntawv thiab qhov muab los lo ua ke ntawd zoo li cas, thiab tus nqi—nws tsis tsim nyog muab lus qhia rau tag nrho tej no, nrog rau tej hauv paus ntsiab lus thiab tus ciaj ciam lod? Yog tus thawj coj hais tias, “Kuv tsis to taub tej no; cia li nrhiav yam twg los tau,” nws puas yuav yog ib tug thawj coj uas muaj txiaj ntsig? Cov lus tsis tseem ceeb uas nws hais ntawd puas sawv cev tau rau ntau yam teeb meem ntxaws ntxaws uas ntsig txog kev luam ntawv? (Tsis tau.) Tiam sis, tus thawj coj cuav no ntseeg tias qhov ntawd sawv cev tau. Nws xav tias, “Kuv twb tau sib qhia ntau yam qhov tseeb lawm, thiab kuv twb tau qhia nkawd tag nrho tej hauv paus ntsiab lus lawm. Nkawd tsim nyog to taub tej no lawm!” Qhov “tsim nyog” no yog lub laj thawj thiab txoj kev daws teeb meem ntawm tus thawj coj cuav no. Thaum kawg, thaum luam tau cov phau ntawv lawm, vim daim ntawv tsis zoo thiab nyias dhau, es cov ntawv tshwm rau ob sab, uas ua rau nyuaj heev rau cov neeg laus thiab cov uas tsis pom kev zoo nyeem cov phau ntawv ntawd. Kuj muaj qhov teeb meem ntawm kauj ruam kawg thiab, uas yog qhov muab coj los lo ua ke—seb qhov muab coj los lo ua ke ntawd puas zoo raws li tus qauv los tsis zoo raws ntawd cuam tshuam rau qhov zoo tag nrho thiab qhov kav ntev ntawm ib phau ntawv. Vim tus thawj coj tsis muab lus qhia, thiab cov uas ua tes hauj lwm no tsis muaj cov hauv paus ntsiab lus thiab kev ntsib kev pom, thiab ntxiv qhov kev tsis muaj kev ris lub luag hauj lwm lam tau lam txo nqi, lub tuam txhab luam ntawv ua hauj lwm ua dog ua dig thiab siv cov ntaub ntawv tsis zoo kom txhob poob peev xwb, thiab thaum kawg thaum muab cov phau ntawv faib mus rau cov kwv tij thiab cov muam tau ob lub hlis xwb cov phau ntawv ntawd twb pib tev lawm. Cov plhaub npog thiab cov nplooj ntawv poob lawm, thiab tag nrho txoj hauj lwm luam ntawv ua nkim dawb xwb. Leej twg yog tus ris qhov no? Yog ib tug neeg yuav raug ris no, lub txim nyob ncaj nraim rau ntawm ob tug neeg uas saib xyuas qhov luam ntawv ntawd, thiab lwm lub txim yuav mus rau tus thawj coj cuav. Tus thawj coj cuav haj tseem muaj ib qho kev hais daws hais tias: “Tes hauj lwm no ua tsis tau zoo nej tsis txhob tias yog tim kuv; kuv los kuj tsis to taub thiab! Kuv tsis tau luam ntawv dua, thiab kuv tsis muaj ib lub tuam txhab luam ntawv. Kuv yuav paub txog tej no tau li cas?” Qhov kev hais daws no puas siv tau? Ua ib tug thawj coj, tes hauj lwm no nyob rau hauv ciaj ciam ntawm koj tej luag hauj lwm. Txawm tias qhov ntawd yog ntsig txog cov kev txawj qib siab, cov hauj lwm sab thev naus laus ntsis, ib hom kev paub, los sis ntsig txog qhov tseeb, koj tsis tas yuav to taub txhua feem ntawm qhov ntawd, tiam sis koj puas tau siv zog los kawm txog yam uas koj tsis paub? Koj puas tau ua kom tiav koj tej luag hauj lwm yam mob siab thiab ua tib zoo saib xyuas? Ib txhia tib neeg hais tias, “Kuv xav ua kom tiav kuv tej luag hauj lwm, tiam sis kuv los kuj tsis to taub qhov no thiab. Txawm tias kuv yuav siv zog kawm npaum li cas, los kuv yeej kawm tsis tau li!” Qhov no txhais tau hais tias, koj tsis yog ib tug thawj coj uas raws li tus qauv; koj yog ib tug thawj coj cuav tiag tiag. Cov kwv tij thiab cov muam muaj kev yws me ntsis vim qhov tsis zoo ntawm cov phau ntawv, hais tias, “Txawm hais tias cov phau ntawv no peb tsis tau them nyiaj, los cov ntawv no mas tsis zoo dhau lawm! Tus thawj coj no ua nws lub luag hauj lwm li cas? Nws ua tes hauj lwm no li cas?” Thaum tus thawj coj hnov qhov no, nws teb hais tias, “Nej yws tau kuv rau qhov ntawd lod? Kuv tsis yog tus qhib lub tuam txhab luam ntawv, thiab kuv tsis muaj cai txiav txim. Tsis tas li ntawd, qhov no tsis yog txuag nyiaj rau Vajtswv lub tsev lod? Qhov txuag nyiaj rau Vajtswv lub tsev ntawd txhaum lod?” Tus thawj coj cov lus puav leej yog, cov lus ntawd tsis muaj qhov yuam kev; tus thawj coj tsis tas yuav ris lub txim ntawm kev cai lij choj. Txawm li cas los xij, muaj ib qho teeb meem, uas yog cov nyiaj siv rau kev luam ntawv ntawd nkim dawb lawm. Cov phau ntawv uas faib rau cov kwv tij thiab cov muam ntawd ob lub hlis xwb pib ntuag thiab poob cov nplooj ntawv. Leej twg yuav ris lub txim no? Qhov no tsis yog tus thawj coj lub luag hauj lwm lod? Qhov no tshwm sim nyob rau hauv ciaj ciam ntawm koj tes hauj lwm, thaum lub sij hawm uas koj ua ib tug thawj coj, yog li ntawd koj tsis tsim nyog ris lod? Koj yuav tsum ris lub txim; koj khiav tsis dim koj lub luag hauj lwm li! Ib txhia tib neeg haj tseem yuav hais lus tsis muaj laj thawj hais tias, “Kuv tsis tau ua tes hauj lwm no dua. Ib tes hauj lwm uas kuv tsis tau ua dua li es tsis pub kuv ua yuam kev me ntsis li lod?” Raws li cov lus no xwb, koj tsis tsim nyog rau tes hauj lwm no, thiab koj yuav tsum raug rho tawm. Koj tsis tsim nyog ua ib tug thawj coj; koj yog ib tug thawj coj cuav tiag tiag. Hais ntau cov lus uas zoo mloog, tiam sis tsis ua ib qho hauj lwm tiag tiag li—qhov no yog qhov kev qhia tshwm uas pom tau meej tshaj plaws ntawm ib tug thawj coj cuav.

Ib txhia thawj coj cuav tsis muaj peev xwm ua txhua yam hauj lwm tiag tiag kom zoo thiab ruaj kom muaj hauv paus hauv ntsis. Lawv tsuas ua tau qee yam hauj lwm dav dav xwb, ces lawv ntseeg tias lawv tsim nyog ua thawj coj lawm, tias lawv zoo kawg nkaus, thiab lawv pheej khav hais tias, “Kuv yuav tsum txhawj txhua yam hauv pawg ntseeg, thiab kuv yuav tsum daws txhua yam teeb meem. Yog pawg ntseeg tsis muaj kuv puas yuav tau? Yog kuv tsis coj kev sib txoos rau nej, tsis yog tias nej yuav tawg ua sab ua sua tag lawm lod? Yog kuv tsis saib xyuas thiab pab tiv thaiv tes hauj lwm ua yeeb yaj kiab, ces tsis yog tias pheej yuav muaj tib neeg cuam tshuam lod? Tes hauj lwm ua yeeb yaj kiab puas yuav mus tau zoo? Txawm hais tias kuv tsis yog kws tshaj lij txog tes hauj lwm ua nkauj qhuas Vajtswv, tiam sis yog kuv tsis tuaj tshuaj xyuas nej tes hauj lwm, txhawb nqa nej, thiab npaj tej kev sib txoos ua ke rau nej no, nej puas yuav ua tau cov nkauj qhuas Vajtswv ntawd? Nej yuav siv sij hawm ntev npaum li cas mam li to taub?” Tej lus hais no tej zaum yuav zoo li muaj laj thawj thiab yog, tiam sis yog koj ua tib zoo saib, ntau yam kev txawj qib siab uas cov thawj coj cuav no saib xyuas ntawd nce qib zoo li cas? Lawv puas qhia tau qhov tseeb tej hauv paus ntsiab lus kom meej? (Tsis tau.) Muaj ib zaug, ib pab pawg ua yeeb yaj kiab tau nrhiav txog qhov teeb meem ntawm cov kob ntawm cov khaub ncaws hnav. Lawv yees tau ob peb daim duab, thiab thaj chaw tom qab thiab cov neeg hauv cov duab mas sib txawv, tiam sis cov kob ntawm cov khaub ncaws hnav mas yeej yog ib hom kob xwb—cov kob ntawd puav leej yog kob hmoov tshauv thiab daj li av xwb. Kuv nug hais tias, “Ua li cas lawm? Vim li cas lawv hnav cov kob no?” Lawv hais tias cov kob no yog npaj siab xaiv, tias lawv siv zog thiab rau siab heev mus nrhiav tau tom khw los. Kuv hais tias, “Vim li cas nej thiaj li xaiv cov kob no? Tus Nyob Saud puas tau muab lus qhia txog qhov ntawd? Tsis yog tias tus Nyob Saud qhia kom nej siv ntau hom kob, thiab kom cov kob saib tsim txiaj thiab tsim nyog lod? Ua li cas thiaj li muaj qhov tshwm tuaj no?” Thaum kawg, tom qab nug, ib txhia tib neeg hais tias, “Lwm hom kob saib tsis zoo li tsim txiaj thiab tsim nyog txaus, los sis tsis zoo li tej uas cov ntseeg Vajtswv hnav los sis tsis zoo li cov neeg dawb huv hnav. Tsuas yog hom kob no xwb thiaj li zoo ib yam li cov ntseeg tsim nyog hnav. Yog li ntawd, sawv daws muaj kev pom zoo tias hnav cov khaub ncaws hom kob no yog qhov ua rau Vajtswv tau yeeb koob tshaj plaws thiab sawv cev rau tus yam ntxwv ntawm Vajtswv lub tsev tau zoo tshaj plaws.” Kuv hais tias, “Kuv yeej tsis tau hais kom nej txhua tus hnav cov khaub ncaws hauv cov kob no li. Muaj ntau cov kob uas saib tsim txiaj thiab tsim nyog. Xav seb tus duab zaj sawv uas Vajtswv tsim los ua ib lub cim ntawm Nws lo lus cog tseg nrog noob neej ntawd mas zoo nkauj npaum li cas. Muaj liab, txiv kab ntxwv, daj, ntsuab, xiav, xiav tsaus, ntshav—txhua yam kob puav leej muaj, tsuas yog tsis muaj cov kob uas nej hnav xwb. Vim li cas nej thiaj li xaiv cov kob ntawd?” Lawv tus thawj coj puas tau ua tes hauj lwm tiag tiag ntawm kev tshuaj xyuas txog tej teeb meem no kom meej? Kuv muaj cuab kav hais tias nws yeej tsis tau ua kiag li. Yog tus thawj coj muaj kev nkag siab yog thiab to taub txog qhov tseeb thiab Vajtswv tej kev cheem tsum tiag tiag, cov tswv cuab ntawm pab pawg ua yeeb yaj kiab yuav tsis xaiv cov khaub ncaws zoo li no thiab nug tus Nyob Saud txog tej ntawd. Qhov teeb meem ntawm cov khaub ncaws ntawd yeej daws tau nyob rau theem qis dua, tiam sis tus thawj coj cuav daws tsis tau qhov teeb meem ntawd. Tiam sis, nws tseem tsis txaj muag es nug tus Nyob Saud txog qhov ntawd. Ib tug neeg zoo li no puas tsim nyog raug ntuas? Tus thawj coj cuav no haj tseem daws tsis tau qhov teeb meem yooj yim tshaj plaws no thiab—nws muaj txiaj ntsig dab tsi? Koj tsuas yog ib qho khoom seem txheej xwb! Hais kom koj ua rau Vajtswv tau yeeb koob thiab ua tim khawv rau Nws, tiam sis thaum kawg koj ua rau Vajtswv poob ntsej muag xwb. Koj tsis yog to taub ntau yam lod? Tsis yog koj hais tau ntau yam kev paub thiab tej kev qhuab qhia lod? Yog li ntawd vim li cas tag nrho tej kev qhuab qhia ntawd thiab tag nrho cov kev paub ntawd tsis muaj txiaj ntsig nyob rau hauv qhov teeb meem no li? Ua li cas koj haj tseem daws tsis tau thiab tshuaj xyuas tsis tau txog qhov teeb meem ntawm cov khaub ncaws hnav ntawd? Ua ib tug thawj coj koj puas ua tau qhov txiaj ntsig uas koj tsim nyog ua lawm? Ua ib tug thawj coj koj puas tau ua tiav lub luag hauj lwm uas koj tsim nyog ua lawm? Qhov no yog ib qho kev qhia tshwm uas pom tau meej ntawm ib tug thawj coj cuav. Nyob hauv txhua tes hauj lwm ntxaws ntxaws, cov thawj coj cuav puav leej tsis to taub tej hauv paus ntsiab lus li. Lawv tsis muaj peev xwm muab kev kho kom yog thiab kev daws teeb meem kom ncav sij hawm txog txoj kev nkag siab yuam kev txog qhov tseeb, thiab ua tsis tau kom tib neeg nrhiav tau txoj xub ke thiab ib txoj hau kev los ntawm qhov no. Cov thawj coj cuav tsuas hais cov lus thiab cov kev qhuab qhia thiab qw tej lus xwb; lawv ua tsis tau ib qho hauj lwm uas ntxaws ntxaws twg li.

Cov Thawj Coj Cuav Tsis Ua Tes Hauj Lwm Tiag Tiag Los Sis Tsis Ua Txoj Hauj Lwm Uas Lawv Tsim Nyog Ua

Muaj ib txhia thawj coj cuav ua tsis tau tej hauj lwm tiag tiag li, tiam sis lawv ua qee yam hauj lwm dog dig uas tsis tseem ceeb, thiab xav hais tias qhov no yog ua tes hauj lwm tiag tiag lawm, hais tias qhov ntawd nyob hauv lawv lub luag hauj lwm. Tsis tas li ntawd, lawv ua tej hauj lwm no yam mob siab heev thiab siv zog tiag tiag, ua kom muaj hauv paus hauv ntsis heev. Piv txwv li, muaj ib tug neeg hauv pawg ntseeg uas yav tas los ua ib tug kws ua ncuav. Muaj ib hnub, nws txiav txim siab los ntawm nws lub siab zoo hais tias nws yuav tsum ci ncuav rau Kuv, thiab npaj yuav ua li ntawd yam tsis qhia rau Kuv paub. Nws nug nws cov thawj coj seb puas ua tau, thiab lawv hais tias, “Mus ua mas. Yog qab, peb mam li muab rau Vajtswv. Yog tsis qab, peb sawv daws mam li noj.” Nws tau txais kev tso cai los ntawm cov thawj coj lawm, uas ua rau tes hauj lwm no raug cai thiab tsim nyog, yog li ntawd nws thiaj li nrawm nroos muab cov khoom los sib xyaws thiab ci ib cub, thiab hais tias, “Kuv tsis paub tias puas yuav qab, los sis puas yuav ua rau Vajtswv txaus siab, los sis puas yuav haum Nws ncauj.” Cov thawj coj teb hais tias, “Tsis ua li cas. Peb mam li fij peb lub sij hawm thiab kev noj qab nyob zoo me ntsis, thiab tiv kev pheej hmoo me ntsis rau Vajtswv. Peb mam li saj ua ntej thiab tshuaj xyuas rau Vajtswv. Yog tias tsis qab tiag tiag es peb muab rau Vajtswv noj, Nws yuav chim thiab tag kev cia siab rau peb heev. Yog li ntawd, ua cov thawj coj, peb muaj lub luag hauj lwm thiab txoj hauj lwm los tshuaj xyuas txog qhov no. Qhov no yog kev ua hauj lwm tiag tiag.” Tom qab ntawd, txhua tus coj pab pawg uas muaj “lub siab ris lub luag hauj lwm” me ntsis puav leej saj cov ncuav ntawd. Tom qab saj tag, lawv tau ntsuas hais tias, “Cub no hluav taws kub dhau, qhov kub siab dhau lawm, thiab noj lawm yuav ua rau kub sab hauv—kuj iab me ntsis thiab. Tsis tau! Peb yuav tsum muaj tus cwj pwm ris lub luag hauj lwm thiab ci dua ib cub ntxiv los saj dua!” Tom qab saj cub no lawm, lawv hais tias, “Cub no tau lawm. Nws muaj qhov qab li kua mis nyeem, ib qho qab li qe, thiab muaj noob tsib muaj thiab. Tsim nyog yog kws ua ncuav tiag tiag! Vim muaj ntau heev, thiab Vajtswv ib leeg xwb noj tsis tag, cia peb muab 10 los sis 20 daim tso rau hauv ib lub hwj, thiab muab rau Vajtswv saj ua qauv. Yog Vajtswv pom tias qab, peb mam li ci kom ntau ntxiv.” Lawv muab ib hwj rau Kuv, thiab Kuv saj ob lub. Kuv xav tias noj ua si los yeej tau, tiam sis muab noj ua mov tsis tau, yog li ntawd Kuv thiaj li tsis noj lawm. Ib txhia haj tseem xav tias yog ib tug neeg hauv Vajtswv lub tsev ua, tias muaj kev hlub, kev ua siab ncaj, thiab kev hwm puv npo, thiab muaj nuj nqis heev txawm tias tsuas qab dog dig xwb. Tom qab ntawd, Kuv muab lub hwj ncuav ntawd xa rov qab lawm. Kuv tsis nyiam tej yam zoo li no thiab Kuv tsis muaj qhov qab los noj tej ntawd. Tsis tas li ntawd, yog Kuv xav noj ncuav, Kuv mus yuav tau tom khw, muaj ntau hom qab li cas los muaj thiab tuaj ntawm ntau lub teb chaws tuaj thiab tsis tas siv nyiaj ntau. Tom qab ntawd, Kuv hais rau lawv tias, “Kuv txais nej lub dej siab lawm, tiam sis thov tsis txhob ua rau Kuv ntxiv lawm. Kuv tsis noj, thiab yog Kuv xav noj, Kuv tus kheej mam li mus yuav. Yog tias tim tsum tiag, ces mam li ua thaum Kuv hais kom koj ua; yog Kuv tsis hais kom koj ua, ces koj tsis tas yuav ci ntxiv lawm.” Cov lus no puas yooj yim to taub? Yog lawv coj zoo thiab mloog lus, lawv yuav nco ntsoov Kuv cov lus thiab tsis ua ntxiv lawm. Thaum Vajtswv hais lus, yog ces yog, tsis yog ces tsis yog, thiab “tsis txhob ua” ces txhais hais tias “tsis txhob ua.” Tiam sis, tom qab ib ntus dhau mus, lawv xa ob hwj ncuav tuaj rau Kuv ntxiv. Kuv hais rau lawv tias, “Kuv tsis tau qhia rau nej hais tias tsis txhob ua ntxiv lawm lod?” Lawv teb hais tias, “Cov no txawv cov dhau los.” Kuv teb tias, “Txawm tias txawv los, yeej tseem yog ncuav. Tsis tas yuav ua ncuav kiag li. Kuv tsis yog lam hais—yog Kuv xav noj, Kuv mam li qhia rau nej. Koj tsis to taub lus tib neeg lod? Tsis txhob ua ntxiv lawm.” Nej puas to taub cov lus no? (To taub.) Tiam sis ua cas tus neeg uas ua cov ncuav ntawd pheej hnov qab tas li? Yog nws cov thawj coj saib xyuas tau nws, tsis koom tes nrog nws los sis txhawb nws ua qhov no, thiab txwv nws tam sim ntawd, tus neeg ua ncuav ntawd puas tseem yuav muaj cuab kav ua lawm? Yam tsawg kawg mas, nws yuav tsis ua yam qhib lug thiab tsis paub txaj muag li ntawd lawm. Yog li ntawd, cov thawj coj ntawd ua tau dab tsi nyob rau hauv qhov xwm txheej no? Lawv tswj xyuas txhua yam ntxaws ntxaws, raus tes rau hauv txhua yam, thiab ua tus tshuaj xyuas sawv cev rau Kuv. Lawv muaj “lub siab hlub” loj uas hais tsis tau ua lus li. Qhov no puas yog tes hauj lwm uas lawv tsim nyog ua? Tsis muaj lus qhia kom ua li no nyob hauv Vajtswv lub tsev cov hauv paus ntsiab lus ua hauj lwm, thiab Kuv tsis tau tso tes hauj lwm no rau lawv; qhov ntawd yog tib neeg pib xwb, Kuv tsis tau cheem tsum kom ua. Yog li vim li cas cov thawj coj no thiaj li ua tes hauj lwm no yam kub siab ua luaj? Qhov no yog ib qho kev qhia tshwm uas pom tau meej ntawm cov thawj coj cuav: tsis ua txoj hauj lwm uas lawv tsim nyog ua. Muaj ntau tes hauj lwm hauv pawg ntseeg uas tim tsum lawv mus taug qab, tshuaj xyuas, thiab txhawb, thiab muaj teeb meem tiag tiag ntau heev uas tim tsum lawv daws los ntawm kev sib qhia qhov tseeb, tiam sis lawv tsis ua ib qho hauj lwm ntawd li. Tiam sis, lawv khoom txaus los saj ncuav rau Kuv hauv chav ua mov. Nyob hauv qhov no, lawv mob siab heev thiab siv zog heev. Qhov no tsis yog qhov uas cov thawj coj cuav ua lod? Qhov ntawd tsis yog twb qias heev lawm lod? Kuv xav tsis txog tias, tom qab ib ntus dhau mus, qhov teeb meem no yuav rov tshwm tuaj dua. Tus neeg uas ua cov ncuav ntawd xav pib ua ncuav rau Kuv dua. Kuv thiaj li hais kiag rau ib tug thawj coj tias, “Koj mus daws qhov no. Koj yuav tsum piav qhov no rau nws kom meej. Yog nws tseem ua dua, Kuv yuav nrhiav koj kom ris!” Muaj ntau tes hauj lwm uas yuav tsum ua hauv pawg ntseeg, ib tes hauj lwm twg yeej yuav ua rau lawv tsis khoom ib ntus. Vim li cas lawv thiaj li khoom ua luaj? Lawv tuaj ntawm no yug lawv tus kheej kom rog los sis tuaj tham pem ua si xwb? Qhov no tsis yog qhov chaw rau tej ntawd. Tom qab ntawd, tsis muaj xov xwm txog qhov teeb meem no ntxiv lawm. Thaum Kuv muab lo lus qhia ntawd tas, tus thawj coj tsis tau qhia dab tsi ntxiv li. Txawm li cas los xij, tsis muaj leej twg xa cov ncuav me me ntawd rau Kuv ntxiv lawm, uas ua rau Kuv lub siab kaj kawg li. Saib los ntawm qhov xwm txheej no, peb puas hais tau tias cov thawj coj no tsis ua txoj hauj lwm uas lawv tsim nyog ua? (Yog.) Qhov teeb meem no tseem tsis tau loj npaum li cas; tseem muaj lwm yam uas loj dua no thiab.

Kuv pheej mus saib qee lub pawg ntseeg, es ntsib cov thawj coj, muab lus qhia txog qee yam hauj lwm, thiab daws qee qhov teeb meem. Qee zaus, Kuv yuav tsum noj su hauv cov pawg ntseeg no, uas ua rau muaj lus nug hais tias leej twg yuav ua mov noj. Cov thawj coj no muaj lub siab ris lub luag hauj lwm heev uas lawv xaiv tau ib tug neeg uas nws tias nws yog kws ua mov. Kuv hais tias, “Nws puas yog kws ua mov los tsis tseem ceeb; qhov tseem ceeb yog Kuv nyiam zaub mov yooj yim xwb. Kuv nyiam noj cov zaub mov raws li nws tus ntxhiab tsw tiag tiag. Cov zaub mov yuav tsum tsis txhob qab ntsev dhau, tsis txhob muaj roj dhau, los sis tsis txhob muab daw dhau. Thaum caij ntuj no, Kuv yuav tsum noj tej yam uas sov. Tsis tas li ntawd, cov zaub mov yuav tsum ua kom siav, tsis txhob nyoos, thiab plab zom tau yooj yim.” Kuv tsis tau qhia tej hauv paus ntsiab lus no kom meej lod? Tej no puas yooj yim ua tau? Tej no yeej yooj yim nco thiab yooj yim ua tau. Ib tug niam tsev uas ua mov tau peb mus rau tsib xyoos yeej yuav to taub tej hauv paus ntsiab lus no thiab ua tau raws li ntawd. Yog li ntawd, tsis tim tsum kom nrhiav ib tug kws ua mov los ua Kuv pluas mov; ib tug neeg uas ua tau tej zaub mov hauv tsev noj xwb los yeej txaus lawm. Tiam sis, cov thawj coj no muaj “lub siab hlub” loj uas lawv yuav tsum nrhiav kom tau ib tug “kws ua mov” los ua mov thaum lawv txais tos Kuv. Ua ntej tus kws ua mov ua rau Kuv noj tiag tiag, cov thawj coj yuav tsum tau tshuaj xyuas ua ntej. Lawv tshuaj xyuas li cas? Lawv kom tus kws ua zaub mov ua ib co ncuav hau thiab ib co kua mi, thiab kom nws ua ib co zaub kib thiab. Tag nrho cov thawj coj thiab cov coj pab pawg tau saj, thiab lawv pom tias txhua tais zaub yeej qab heev. Thaum kawg, lawv thiaj li hais kom tus kws ua mov ntawd los ua hauj lwm ua mov rau Kuv noj. Tsis hais txog qhov tshwm sim los uas cov thawj coj saj zoo li cas thiab lub ntsiab xeeb txawm ntawm cov teeb meem uas muaj, cia peb xub tham txog cov zaub mov uas tus kws ua mov no ua tso. Thawj zaug Kuv mus, tus kws ua mov kib ob peb tais zaub, thiab sawv daws yeej txaus siab heev. Zaum ob, tus kws ua mov ua ib co ncuav hau. Tom qab noj thawj lub, Kuv hnov tias muaj qee yam tsis yog—nws ntsim me ntsis. Lwm tus uas nyob ib ncig Kuv kuj hais tias cov ncuav hau ntawd ntsim me ntsis, thiab hnov tias lawv tus nplaig pib o lawm. Tiam sis, vim cov ncuav hau yog cov zaub mov tseem ceeb xwb, Kuv yuav tsum noj kom tag txawm tias ntsim los xij. Tsis pom kua txob nyob ntawm cov khoom ntim sab hauv, yog li ntawd Kuv tsis quav ntsej tias dab tsi ua rau ntsim thiab cia li noj tag lawm. Qhov tshwm sim ces yog, Kuv lub cev pib ua xua hmo ntawd. Ntau qhov ntawm Kuv lub cev pib khaus tsis tseg, thiab Kuv yuav tsum khawb tas li; Kuv khawb Kuv tus kheej mus txog thaum tawm ntshav mam li zoo me ntsis. Kuv khaus li ntawd tau peb hnub mam li maj mam zoo tuaj. Tom qab qhov ua xua no, Kuv mam li ras tau tias yeej yog rau hwj txob rau hauv cov ncuav hau ntawd lawm; yog tsis li ntawd, ces yuav tsis ntsim ua luaj li ntawd. Kuv twb qhia lawv tias tsis txhob tso tej yam uas ntsim xws li hwj txob vim Kuv noj tsis tau. Tiam sis, lawv rau ntau heev kom haum lawv ncauj, uas ntau tshaj qhov ib txwm rau; muaj qhov ntsim thaum noj cov ncuav hau ntawd. Tus kws ua mov tsis paub rau txuj lom kom sib haum thaum ua mov, nws rau hwj txob ntau dhau ua rau neeg noj lawm ua xua. Tom qab ntawd, Kuv hais rau nws tias, “Tsis txhob tso cov khoom ntsim ntawd ntxiv lawm. Kuv noj tsis tau. Yog koj muaj kev ua neeg tiag, tsis txhob ua li ntawd ntxiv. Yog koj ua rau koj tus kheej noj, Kuv yeej tsis txwv yam uas koj noj. Tiam sis, yog koj ua rau Kuv noj, ces tsis txhob rau kiag li. Es ua raws li cov qauv uas Kuv hais.” Nws puas ua tau li ntawd? Cov thawj coj tsis yog yuav tsum tau saib xyuas tes hauj lwm no lod? Tu siab uas tsis muaj leej twg quav ntsej li, thiab lawv tsis ua ib qho hauj lwm uas lawv tsim nyog ua li. Muaj ib zaug, thaum tus kws ua mov yuav pib ua mov dua, nws nqa hwj txob los yuav rau rau hauv tais zaub, thiab muaj ib tug neeg nyob ze ntawd pom thiab txwv nws. Nyob rau hauv lawv txoj kev tswj xyuas uas nruj, nws thiaj li tsis tau lub cib fim rau. Cov thawj coj daws tsis tau ib qho teeb meem me me li no li—yog li ntawd lawv ua tau dab tsi? Thaum tus kws ua mov ntawd ua mov mas, lawv kub siab lug mus saj. Muaj ob peb leeg mus saj. Qhov ntawd tsuas yog ib pluag mov hauv tsev li ib txwm xwb; muaj dab tsi tsim nyog saj? Nej puav leej yog cov kws paub zaub mov lod? Nej puas cia li to taub txhua yam tom qab los ua thawj coj lawm? Nej puas to taub tej hauv paus ntsiab lus ntawm kev noj qab haus huv? Vajtswv lub tsev puas tau npaj kom nej ua qhov no? Thaum twg Kuv muab los sis tso txoj hauj lwm rau nej los saj zaub mov sawv cev rau Kuv lawm? Nej tsis muaj laj thawj hlo li, nej tsis paub txaj muag li! Leej twg uas paub txaj muag me ntsis yuav tsis ua tej yam uas qhib lug, qias, thiab tsis muaj laj thawj zoo li no. Qhov ntawd qhia tau hais tias cov neeg no tsis paub txaj muag li—lawv saj zaub mov rau Kuv! Nej tsis ua raws los sis tsis ua kom tiav ib qho ntawm tej hauv paus ntsiab lus uas Kuv qhia rau nej li. Yam twg qab rau nej thiab haum nej ncauj, ces nej kom tus kws ua mov ua yam ntawd. Qhov ntawd puas yog ua rau Kuv noj? Qhov ntawd tsis yog ua rau nej tus kheej noj xwb lod? Nej ua thawj coj puas yog ua li no? Nrhiav txhua lub cib fim los ua kom tau txiaj ntsim, nrhiav qhov khoob los ua kom tau txiaj ntsim, thiab sim los ua kom Kuv nyiam nej—yog nej xav ua kom Kuv nyiam nej, ces nej tsis txhob ua phem rau Kuv! Qhov no tsis yog tsis muaj kev paub cai lod? Qhov ntawd tsis yog muaj lub siab tsis ncaj lod? Lawv tsis paub txaj muag thiab muaj lub siab tsis ncaj, tiam sis lawv tseem xav tias lawv muaj kev ua siab ncaj heev! Tej yam uas lawv ua no puas muaj ib qho yog yam uas cov thawj coj tsim nyog ua tiag tiag? (Tsis muaj.) Tsis muaj ib yam uas lawv ua es muaj tus qauv li. Lawv twb tsis paub tias cov zaub mov twg zoo rau kev noj qab haus huv los sis cov twg tsis zoo, tiam sis lawv xav tias lawv tuaj yeem tuaj ntawm no thiab ua tus kws saib kev noj qab haus huv thiab kws paub zaub mov rau Kuv! Leej twg teev tseg tias nej yuav tsum tshuaj xyuas thaum ua mov rau Kuv noj? Pawg ntseeg puas muaj txoj cai no? Vajtswv lub tsev puas tau npaj li no? Muaj ntau qhov ua tsis txhij txhua tshwm nyob rau hauv ntau yam ntawm pawg ntseeg tes hauj lwm, muaj ntau tus neeg to taub Vajtswv yuam kev thiab tsis to taub qhov tseeb kiag li, tiam sis nej tsis daws tej ntawd li. Tiam sis, nej muab nej lub zog tso rau hauv qhov chaw me me xws li chav ua mov, ua tiav nej lub “luag hauj lwm.” Nej yog cov thawj coj cuav tiag tiag, nej yog cov neeg ntsej muag ncaj siab nkhaus! Nej nyob ntawm Kuv xub ntiag tshuaj xyuas tej yam—nej to taub dab tsi? Nej puas tau nug Kuv lawm? Nej hais ntawd yog nej lub tswv yim los sis yog Kuv lub tswv yim? Yog nej hais Kuv lub tswv yim, thiab Kuv tau hais kom nej tshaj mus, ces qhov uas nej ua ntawd yog lawm. Qhov ntawd yuav yog nej lub luag hauj lwm. Yog nej hais nej lub tswv yim thiab tsis yog Kuv lub tswv yim, thiab nej tseem yuam lwm tus kom mloog thiab lees txais, qhov no yog lub ntsiab xeeb txawm dab tsi? Qhia Kuv seb, Kuv puas yuav tsis qias rau qhov no? Kuv nyob kiag ntawd, thiab lawv tsis nug Kuv ib los li tias Kuv noj dab tsi los sis Kuv cheem tsum dab tsi—lawv tsuas txiav txim siab yam tsis tau kev pom zoo los ntawm Kuv, thiab muab lus txib tom qab Kuv nraub qaum raws li lawv lub siab nyiam. Lawv puas yog sim sawv cev rau Kuv? Qhov no yog cov thawj coj cuav lam tau lam ua yam tsis quav ntsej tej cai, ua txuj muaj sab ntsujplig, ua txuj xav txog Vajtswv lub nra, thiab ua txuj to taub qhov tseeb, thiab tsuas ua tej yam ntsej muag ncaj siab nkhaus xwb. Qhov no tsis yog tshaj dhau lawm lod? Qhov ntawd tsis yog twb qias thiab ntxim ntxub heev lawm lod? (Yog.) Nej puas tau muaj kev paub? Nej kawm puas tau tej yam kev qhia los ntawm qhov no? Tej yam no ib qho qias tshaj ib qho, thiab tseem muaj lwm qhov uas qias dua.

Xyoo no lub caij ntuj no, muaj ib tug neeg lub siab zoo tau yuav ib lub tsho tiv no “zoo nkauj” uas ua los ntawm cov plaub noog os dej rau Kuv. Qhov zoo nkauj ntawm lub tsho ntawd tsis yog nyob ntawm cov kob los sis tus qauv ntawm lub tsho tiam sis yog nyob ntawm qhov nws kim heev thiab zoo heev; nws yog ib yam khoom uas muaj nuj nqis. Muaj ib lo lus hais nyob rau hauv cov tsis ntseeg tias, “Ib tug plaub noog os dej xa tuaj ntawm ib txhiab mais kev deb: qhov khoom plig tej zaum yuav me, tiam sis txoj kev xav ntawd tob heev.” Lub tsho no tsis yog tsuas muaj txoj kev xav nrog nws xwb, tiam sis nws yeej kim heev tiag. Ua ntej pom lub tsho loj, Kuv twb hnov hais tias nws zoo nkauj thiab yog lub liab lawm, uas muaj tus qauv zoo, thiab thaum kov mas hnov tias tuab. Kuv twb hnov txog qhov ntawd lawm, yog li ntawd yeej yuav tsum muaj qee leej twb pom yam khoom ntawd tiag tiag lawm—qhov ntawd yog, muaj coob tus neeg twb pom lub tsho lawm, muab ntsuas kwv yees, thiab soj ntsuam zoo zoo, thiab hais tej lus xws li, “Kuv paub hom no,” “Cov kob zoo, lub tsho zoo nkauj heev!” “Tom qab koj saib tag, muab los rau kuv saib,” thiab cia li zoo li ntawd cov xov xwm thiaj li nrov mus. Kuv tsis paub tias siv sij hawm ntev npaum li cas cov xov xwm no thiaj li los txog Kuv pob ntseg, thiab Kuv thiaj li paub me ntsis txog qhov ntawd. Nej puas pom qhov teeb meem nyob hauv no? Thaum Kuv tseem tsis tau pom lub tsho ntawd, nws twb raug ntau tus neeg pom, es muab xa mus xa los, thiab muab nthuav rau sawv daws saib lawm. Qhov no tsis yog ib qho teeb meem lod? Tib neeg puas tuaj yeem lam tau lam saib, kov, thiab muab Kuv tej khoom nthuav rau sawv daws saib? (Tsis tuaj yeem.) Leej twg tej khoom uas tuaj yeem cia tib neeg lam tau lam kov thiab saib? (Tsis muaj leej twg xav kom qhov no muaj tshwm, thiab tsis muaj leej twg tsim nyog ua li no.) Yog li ntawd, Kuv li khoom tsis yog haj yam yuav tsum txwv tsis pub kov lod? Ib txhia hais tias, “Vim li cas thiaj li yuav tsum txwv tsis pub kov? Koj yog ib tug neeg uas sawv daws paub. Cov neeg nto moo thiab cov neeg muaj suab npe lawv lub neej ntiag tug tsis yog ib txwm raug nthuav qhib lug lod? Qhov chaw lawv ntaus pob, qhov chaw lawv mus ua kom zoo nkauj, cov neeg uas lawv nrog sib cuag, hom khaub ncaws uas lawv hnav—tej no tsis yog ib txwm raug nthuav qhib lug lod? Vim li cas Koj li ho tsis nthuav qhib lug ma?” Kuv puas yog ib tug neeg nto moo? Kuv tsis yog ib tug neeg nto moo, thiab koj tsis yog tus neeg txhawb nqa Kuv. Koj yog leej twg? Koj yog ib tug neeg dog dig, ib tug neeg uas raug tsim tawm los, thiab ib tug tib neeg uas qias vuab tsuab. Kuv yog leej twg? (Vajtswv.) Kuv tsis yog ib tug neeg uas sawv daws paub; Kuv tsis muaj lub luag hauj lwm los nthuav txhua yam rau koj, los tshaj tawm txhua yam rau koj, los sis qhia rau koj paub txog txhua yam. Yog li ntawd, vim li cas koj thiaj li kov Kuv li khoom? Qhov ua li ntawd tsis yog qias lod? Kuv puas tau muab txoj hauj lwm rau koj los saib thiab tshuaj xyuas Kuv qhov khoom no? Tsis tau. Tiam sis muaj qee leej muaj cuab kav nqa qhov khoom ntawd thiab lam tau lam saib yam tsis paub txaj muag li no, thiab haj tseem muab xa mus xa los thiab. Leej twg muab cai rau koj muab qhov khoom ntawd xa mus xa los? Qhov no puas yog koj lub luag hauj lwm? Yog koj tsis ntseeg Vajtswv, ces wb yog neeg txawv ntsej muag. Vim koj ntseeg Vajtswv Kuv thiaj li paub tias koj yog leej twg, tiam sis Kuv tsis paub tias koj tsev neeg, lub neej txhua hnub, los sis tej nyiaj txiag zoo li cas, thiab Kuv yeej tsis xav paub. Wb puas sib swm? Kuv tsis yog koj tus phooj ywg zoo, tus phooj ywg, los sis tus phooj yoog koom ua hauj lwm. Wb tsis sib swm, thiab wb tseem tsis tau mus txog qib uas Kuv li khoom txhua yam yuav tsum qhib rau koj saib. Koj puas yuav cia Kuv saib tag nrho koj tej khoom, thiab muab tso rau sawv daws saib thiab kov? Txawm yog thaum koj yuav ib yam dab tsi tom khw los tsev, los tseem yuav tsum tau ntxuav ntau zaus tua kab mob! Tej yam uas lwm tus lam tau lam kov tsis yog qias lod? Puas yog koj tsis saib koj tus kheej li ib tug neeg sab nraud? Leej twg muab txoj hauj lwm rau koj mus tshawb xyuas Kuv lub tsho? Kuv puas ntseeg tau koj siab? Koj puas tau ntxuav koj txhais tes kom huv ua ntej lam tau lam kov Kuv lub tsho? Kuv puas yuav tsis qias rau koj? Koj puas paub meej txog qhov no? Vim li cas koj thiaj li tsis paub txaj muag ua luaj? Koj tsis muaj laj thawj hlo li! Koj ntseeg Vajtswv tau ntau xyoo thiab mloog ntau zaj lus qhuab qhia lawm; ua cas koj tsis muaj ib qho laj thawj me me li? Lam tau lam qhib cov khoom fij uas yog Vajtswv li, lam tau lam kov Nws cov khaub ncaws, tej yam uas yog Nws li—qhov no yog teeb meem dab tsi? Thaum Kuv pom tias cov hnab ntawm cov khoom no raug qhib thiab muab pov tseg lawm, Kuv yuav tsis npau taws tau li cas? Kuv qias rau tej yam no, thiab Kuv ntxub cov neeg no. Kuv tsis xav pom lawv ntxiv lawm, thiab Kuv yeej tsis xav nrog cov neeg uas piv tsis tau npua thiab dev no sib cuag lawm! Nco ntsoov, txhua tus neeg muaj lawv lub meej mom, thiab Kuv haj yam muaj ntau dua. Tsis txhob raus tes rau tej yam uas yog Kuv li; yog tsis li ntawd, Kuv yuav ntxub thiab qias koj!

Nyob sab nraud saib mas, cov thawj coj cuav tsis ua tej yam phem loj los sis tsis yog cov neeg phem lim hiam tiag tiag. Txawm li cas los xij, lawv qhov uas ntxim ntxub tshaj plaws ces yog lawv pom muaj tes hauj lwm tiag tiag uas yuav tsum ua tiam sis lawv tsis ua, lawv paub zoo tias lawv daws tsis tau tej teeb meem tiam sis lawv tsis nrhiav qhov tseeb, lawv pom cov neeg phem tsim kev cuam tshuam tiam sis lawv tsis daws cov neeg ntawd, thiab tiam sis lawv tsuas saib xyuas cov hauj lwm dog dig sab nraud xwb. Lawv saib xyuas nruj heev thiab tswj nruj heev rau tej teeb meem me me thiab tej yam uas tsis tseem ceeb, tiam sis lawv tsis ua ib qho hauj lwm uas muaj feem xyuam rau txoj kev nkag mus rau hauv lub neej txoj sia ntawm cov neeg uas Vajtswv xaiv tseg, los sis tsis quav ntsej txog ntau yam teeb meem uas tawm tsam qhov tseeb tej hauv paus ntsiab lus. Tiam sis, lawv tsuas ua tes hauj lwm uas tsis muaj feem xyuam txog qhov tseeb xwb. Cov no yog cov thawj coj cuav tiag tiag. Cov thawj coj cuav tsis paub dab tsi txog qhov tseeb tej hauv paus ntsiab lus uas muaj nyob hauv ntau yam ntawm pawg ntseeg tes hauj lwm. Yog muab ntsuas raws li tej hauv paus ntsiab lus thiab cov qauv ntawm cov thawj coj thiab cov neeg ua hauj lwm, ces cov thawj coj cuav yog cov neeg ruam thiab cov neeg tsis paub dab tsi. Txawm hais tias tej teeb meem uas tshwm sim hauv pawg ntseeg tes hauj lwm yuav loj npaum li cas los xij, cov thawj coj cuav twb tsis pom los sis daws tsis tau txawm tias tej ntawd tshwm sim ntawm lawv qhov muag los xij, thiab tus Nyob Saud yuav tsum los daws cov teeb meem ntawd ntawm Nws tus kheej. Cov neeg no tsis yog cov thawj coj cuav lod? (Yog.) Lawv yeej yog cov thawj coj cuav tiag tiag. Piv txwv li, hauv pawg ntseeg tes hauj lwm uas ntsig txog ntaub ntawv, cov phau ntawv twg yuav tsum tau kho thiab cov phau ntawv twg yuav tsum tau txhais—tej no yog pawg ntseeg tej hauj lwm tseem ceeb. Puas muaj tej hauv paus ntsiab lus txog kev kho thiab kev txhais cov ntawv ntawd? Tes hauj lwm no yeej muaj tej hauv paus ntsiab lus tiag tiag, nws yog ib qho uas siv tej hauv paus ntsiab lus heev, thiab nws yeej tim tsum muaj kev sib qhia thiab kev coj kom meej meej; tiam sis cov thawj coj cuav ua tsis tau tes hauj lwm no. Thaum lawv pom cov kwv tij thiab cov muam tsis khoom rau hauv lawv tej dej num, lawv ua txuj hais tias, “Tes hauj lwm uas ntsig txog ntaub ntawv thiab tes hauj lwm txhais lus mas tseem ceeb heev. Nej yuav tsum muab nej lub siab tso rau hauv kev ua tes hauj lwm no kom zoo, thiab kuv yuav daws txhua qhov teeb meem uas nej ntsib.” Thaum ib tug neeg hais ib qho teeb meem tiag tiag tuaj, cov thawj coj cuav no hais tias, “Kuv tsis to taub qhov teeb meem no. Kuv yog ib tug tsis paub txog kev txhais lus txawv teb chaws. Nej thov Vajtswv thiab nrhiav ntawm Nws.” Thaum ib tug neeg hais lwm qhov teeb meem tuaj, nug hais tias, “Peb nrhiav tsis tau cov neeg uas haum los txhais qee hom lus, peb yuav tsum ua li cas txog qhov no?” cov thawj coj cuav teb hais tias, “Kuv yog ib tug tsis paub txog qhov teeb meem no. Nej daws ntawm nej tus kheej.” Qhov hais li no puas daws tau qhov teeb meem? Lawv hais ub hais no los daws thiab npog qhov muaj tseeb uas lawv tsis ua lawv tes hauj lwm, hais tias, “Kuv yog ib tug tsis paub; kuv thiaj li tsis to taub tes hauj lwm no,” thiab vim li ntawd thiaj li tsis daws qhov teeb meem uas lawv tsim nyog daws ntawd. Qhov no yog txoj hau kev uas cov thawj coj cuav ua hauj lwm. Thaum ib tug neeg nug ib lo lus nug, cov thawj coj cuav hais tias, “Thov Vajtswv thiab nrhiav ntawm Nws; kuv tsis to taub tes hauj lwm no, tiam sis nej to taub.” Qhov no zoo li txo hwj chim, vim lawv lees tias lawv tsis muaj peev xwm thiab tsis to taub tes hauj lwm no, tiam sis qhov tseeb tiag, lawv ua tsis tau tes hauj lwm ntawm kev ua thawj coj kiag li. Tseeb tiag, qhov ua ib tug thawj coj tsis tau txhais hais tias nws yuav tsum to taub txhua yam kev txawj qib siab, tiam sis nws yuav tsum qhia qhov tseeb tej hauv paus ntsiab lus uas tsim nyog los daws tej teeb meem kom meej, tsis hais tej teeb meem ntawd ntsig txog hom kev txawj qib siab twg los xij. Tsuav tib neeg to taub qhov tseeb tej hauv paus ntsiab lus xwb, ces cov teeb meem tuaj yeem daws tau raws li qhov ntawd. Cov thawj coj cuav siv qhov “Kuv yog ib tug tsis paub txog qhov no; kuv tsis to taub txoj kev txawj qib siab no” los ua ib qho laj thawj los zam kev qhia qhov tseeb tej hauv paus ntsiab lus rau kev daws teeb meem. Qhov no ces yog tsis ua hauj lwm tiag tiag. Yog cov thawj coj cuav pheej siv qhov “Kuv yog ib tug tsis paub txog qhov no; kuv tsis to taub txoj kev txawj qib siab no” los ua ib qho laj thawj los zam kev daws teeb meem, ces lawv tsis tsim nyog rau tes hauj lwm ua thawj coj. Qhov zoo tshaj plaws uas lawv yuav tsum ua ces yog tso hauj lwm thiab cia lwm tus los hloov lawv qhov chaw. Tiam sis cov thawj coj cuav puas muaj qhov laj thawj no? Lawv puas yuav tso hauj lwm? Lawv yuav tsis tso. Lawv haj tseem xav tias, “Vim li cas lawv thiaj hais tias kuv tsis ua hauj lwm li? Kuv coj cov kev sib txoos ua ke txhua hnub, thiab kuv tsis khoom txog qhov uas kuv noj mov tsis raws sij hawm, thiab kuv pw tsawg dua lawm. Leej twg hais tias cov teeb meem tsis raug daws? Kuv nrog lawv sib txoos ua ke thiab sib qhia nrog lawv, thiab kuv nrhiav Vajtswv cov lus rau lawv lawm.” Piv txwv li koj nug lawv tias, “Muaj ib tug hais tias lawv nrhiav tsis tau cov neeg txhais lus uas haum rau qee hom lus. Koj daws qhov teeb meem meej meej no li cas?” Lawv yuav hais tias, “Kuv qhia lawv tias kuv tsis to taub qhov kev txawj qib siab, thiab kom lawv sib tham thiab daws ntawm lawv tus kheej.” Koj nug lawv ntxiv tias, “Qhov teeb meem no ntsig txog kev siv cov khoom fij thiab kev nce qib ntawm pawg ntseeg tes hauj lwm. Lawv txiav txim siab tsis tau ntawm lawv tus kheej, lawv tim tsum koj txiav txim siab thiab nrhiav qhov tseeb tej hauv paus ntsiab lus los daws qhov ntawd. Koj puas tau ua qhov no?” Lawv yuav teb tias: “Kuv tsis tau ua qhov twg? Kuv tsis tau ua rau ib qho hauj lwm twg qeeb li. Yog tsis muaj leej twg txhais hom lus ntawd, ces kom lawv txhais lwm hom lus xwb!” Koj saib seb, cov thawj coj cuav ua tsis tau hauj lwm tiag tiag thiab tseem muab ntau yam kev hais daws. Nws yeej tsis paub txaj muag thiab qias tiag tiag li! Koj lub peev xwm tsis zoo, koj tsis to taub ib qho kev txawj qib siab li, thiab koj tsis muaj kev nkag siab txog qhov tseeb tej hauv paus ntsiab lus uas muaj nyob hauv txhua yam ntawm tes hauj lwm meej meej—es muaj koj ua ib tug thawj coj ho muaj txiaj ntsig dab tsi? Koj tsuas yog ib tug neeg ruam thiab neeg tsis muaj qab hau xwb! Vim koj ua tsis tau ib qho hauj lwm tiag tiag li, vim li cas koj tseem ua ib tug thawj coj pawg ntseeg? Koj tsis muaj laj thawj li. Vim koj tsis paub koj tus kheej, koj yuav tsum mloog cov lus tawm tswv yim ntawm cov neeg uas Vajtswv xaiv tseg thiab ntsuas seb koj puas ua tau raws li cov qauv ntawm kev ua ib tug thawj coj. Tiam sis, cov thawj coj cuav tsis xav txog tej no li. Txawm tias pawg ntseeg tes hauj lwm tau qeeb ntau npaum li cas, thiab muaj kev cuam tshuam ntau npaum li cas rau txoj kev nkag mus rau hauv lub neej txoj sia ntawm cov neeg Vajtswv xaiv tseg thaum lub sij hawm lawv ua dej num li yog thawj coj ntau xyoo ntawd los xij, lawv yeej tsis quav ntsej li. Qhov no yog lub ntsej muag phem ntawm cov thawj coj cuav tiag tiag.

Nej xav seb qhov cov thawj coj thiab cov neeg ua hauj lwm ua lawv tes hauj lwm ntawd—puas mus raws li qhov Kuv nyuam qhuav qhia rau nej ntawd? Puas muaj cov uas tsis ua hauj lwm tiag tiag, thiab koj puas paub cais tias lawv yog cov thawj coj cuav lawm? Yog koj cais tau tias lawv yog cov thawj coj cuav, ces txij hnub no mus koj yuav tsum tsis txhob saib lawv tam li cov thawj coj lawm; koj yuav tsum coj rau lawv li lwm tus neeg dog dig xwb. Qhov no yog lub hauv paus ntsiab lus ntawm txoj kev xyaum ua raws uas yog. Tej zaum qee leej yuav xav tias, “Qhov no puas txhais hais tias cais lawv, saib tsis taus lawv, los sis tsis lees txais lawv vim lawv yog cov thawj coj cuav?” Tsis yog, tsis txhais li ntawd. Lawv ua tsis tau hauj lwm tiag tiag, thiab lawv tsuas hais tau cov lus thiab cov kev qhuab qhia thiab tej lo lus tsis muaj ntsiab los zam thiab ua dog ua dig rau koj xwb. Qhov no qhia koj ib qho tseeb tias, lawv tsis yog koj cov thawj coj. Koj tsis tas yuav nug lawv cov kev qhia rau txhua qhov teeb meem los sis kev nyuaj uas koj ntsib hauv koj tes hauj lwm. Yog tias tim tsum, ces nej hla tau lawv los ntawm qhov qhia rau tus Nyob Saud thiab nug tus Nyob Saud seb yuav daws li cas. Kuv twb qhia txoj kev xyaum ua raws rau nej lawm, tiam sis yuav ua li cas yog nyob ntawm nej. Kuv yeej tsis tau hais tias txhua tus thawj coj yog Vajtswv teem tseg, tias koj yuav tsum mloog thiab zwm rau lawv, thiab tias koj yuav tsum mloog lawv txawm koj cais tau tias lawv yog cov thawj coj cuav los xij. Kuv yeej tsis tau qhia koj li ntawd. Yam uas Kuv tab tom qhia tam sim no yog yuav paub cais cov thawj coj cuav li cas. Thaum koj paub cais tias ib tug neeg yog thawj coj cuav, koj lees txais thiab zwm tau rau yam uas lawv hais yog thiab mus raws li qhov tseeb. Tiam sis, yog lawv daws tsis tau teeb meem, thiab lawv zam thiab ua dog ua dig rau koj, ua rau tes hauj lwm qeeb, ces koj tsis tas yuav lees txais lawv txoj kev coj. Yog nej tus kheej paub txog tej hauv paus ntsiab lus, ces nej yuav tsum ua raws li tej hauv paus ntsiab lus ntawd. Yog nej tsis paub txog, paub tsis meej, los sis tsis paub tseeb txog tej hauv paus ntsiab lus, ces nej yuav tsum nrhiav qhov tseeb thiab sib tham nrog lwm tus los daws qhov teeb meem. Yog nej tseem txiav txim siab tsis tau tom qab sib tham lawm, ces qhia qhov teeb meem rau tus Nyob Saud thiab nug tus Nyob Saud txog qhov teeb meem ntawd. Tej no puav leej yog txoj hau kev los daws teeb meem uas zoo—tsis muaj kev nyuaj uas daws tsis tau li.

Hnub no peb qhov kev sib qhia los xaus rau ntawm no. Sib ntsib dua!

Lub Ib Hlis Hnub Tim 16, Xyoo 2021