Yam Kaum Ob: Txheeb Ntau Hom Tib Neeg, Xwm Txheej, thiab Yam Khoom uas Tab Kaum thiab Cuam Tshuam Vajtswv Tes Hauj Lwm thiab Qhov Raws Qib Raws Duas uas Ib Txwm Muaj ntawm Pawg Ntseeg Kom Ncav Sij Hawm thiab Kom Yog; Cheem thiab Txwv Lawv, thiab Hloov Txhua Yam Kom Zoo Dua; Tsis Tas Li Ntawd Xwb, Qhia Qhov Tseeb Kom Cov Neeg Vajtswv Xaiv Tseg Thiaj Li Paub Cais Tej Yam Zoo Li No thiab Kawm Paub Los Ntawm Tej Yam Zoo Li No (Ntu Tsib)

Ntau Hom Tib Neeg, Xwm Txheej, thiab Yam Khoom Uas Tab Kaum thiab Cuam Tshuam Lub Neej Hauv Pawg Ntseeg

IX. Tso Tej Kev Xav Tsis Zoo Tawm

Hnub no, peb txuas ntxiv peb txoj kev sib qhia txog cov thawj coj thiab cov neeg ua hauj lwm lub luag hauj lwm kaum ob: “Txheeb ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg kom ncav sij hawm thiab kom yog; cheem thiab txwv lawv, thiab hloov txhua yam kom zoo dua; tsis tas li ntawd xwb, qhia qhov tseeb kom cov neeg Vajtswv xaiv tseg thiaj li paub cais tej yam zoo li no thiab kawm paub los ntawm tej yam zoo li no.” Hais txog ntau hom kev tab kaum thiab kev cuam tshuam uas tshwm tuaj nyob rau hauv lub neej hauv pawg ntseeg, zaum tas los ntawd peb tau sib qhia txog qhov yim—tshaj tawm tej kev xav phem—thiab hnub no peb yuav sib qhia txog qhov cuaj—tso tej kev xav tsis zoo tawm. Qhov tso tej kev xav tsis zoo tawm mas kuj yog ib qho uas pheej hnov nyob rau hauv lub neej txhua hnub tas li thiab. Ib yam nkaus li ntawd, tej kev ua los sis tej lus hais ntawm qhov tso tej kev xav tsis zoo tawm ntawd kuj yuav tsum raug txwv thiab cheem thaum tej ntawd tshwm tuaj nyob rau hauv lub neej hauv pawg ntseeg, vim qhov tso tej kev xav tsis zoo tawm ntawd tsis txhawb tau leej twg li; tiam sis, qhov ntawd cuam tshuam, tab kaum, thiab ua rau tib neeg raug kev puas tsuaj xwb. Yog li ntawd, qhov tso tej kev xav tsis zoo tawm ntawd mas yog ib yam uas tsis zoo, uas muaj lub ntsiab xeeb txawm zoo ib yam nkaus li lwm yam kev coj, kev ua, thiab tej lus hais uas cuam tshuam lub neej hauv pawg ntseeg; qhov ntawd kuj cuam tshuam tau tib neeg thiab ua rau coj qee yam tsis zoo los thiab. Tsis muaj leej twg txhawb tau lwm tus los sis coj tau txiaj ntsim los rau lwm tus los ntawm qhov tso tej kev xav tsis zoo tawm; tsuas coj tau qee yam tsis zoo los thiab kuj tuaj yeem cuam tshuam tib neeg txoj kev ua lawv tej dej num li ib txwm ua thiab. Yog li ntawd, thaum qhov tso tej kev xav tsis zoo tawm tshwm tuaj nyob rau hauv pawg ntseeg, qhov ntawd kuj yuav tsum raug cheem thiab txwv ib yam nkaus, tsis yog tso cai los sis txhawb nqa.

A. Qhov Tso Tej Kev Xav Tsis Zoo Tawm Yog Dab Tsi

Ua ntej tshaj cia peb los saib seb yuav tsum to taub thiab paub cais qhov tso tej kev xav tsis zoo tawm ntawd li cas. Peb yuav tsum paub cais qhov tso tej kev xav tsis zoo tawm ntawd li cas? Tib neeg tej lus hais thiab tej kev qhia tshwm uas pom tau meej twg yog cov uas tso tej kev xav tsis zoo tawm? Ua ntej tshaj plaws, qhov kev xav tsis zoo uas tib neeg tso tawm ntawd tsis yog yam uas zoo, qhov ntawd yog ib yam tsis zoo uas sib cov nyom nrog qhov tseeb, thiab yog ib yam uas tsim tawm los ntawm lawv tus moj yam qias vuab tsuab. Qhov muaj ib tus moj yam qias vuab tsuab ua rau muaj kev nyuaj nyob rau hauv txoj kev xyaum ua raws li qhov tseeb thiab kev zwm rau Vajtswv—thiab vim yog tej kev nyuaj no, tej kev xav tsis zoo thiab lwm yam uas tsis zoo thiaj li raug nthuav tawm nyob rau hauv tib neeg. Tej no tsim muaj nyob rau hauv qhov xwm txheej uas tib neeg xyaum ua raws qhov tseeb; tej no yog tej kev xav thiab tej kev xam pom uas cuam tshuam thiab tab kaum tib neeg thaum lawv xyaum ua raws qhov tseeb, thiab puav leej yog tej yam uas tsis zoo tag nrho. Txawm hais tias tej kev xav tsis zoo thiab tej kev xam pom no yuav mloog zoo li mus raws li tib neeg tej kev xav phem thiab tsim nyog npaum li cas los xij, tej ntawd tsis yog los ntawm txoj kev to taub ntawm Vajtswv cov lus, thiab haj yam tsis yog kev paub ntawm kev ntsib kev pom txog Vajtswv cov lus. Tiam sis, tej ntawd tsim los ntawm tib neeg lub hlwb, thiab tsis mus raws li qhov tseeb kiag li. Yog li ntawd, tej ntawd yog tej yam ntawm kev xav tsis zoo, yog tej yam uas tsis zoo. Txoj kev npaj siab ntawm cov tib neeg uas tso tej kev xav tsis zoo tawm ntawd mas yog los nrhiav ntau yam laj thawj sab nraud rau qhov uas lawv tsis xyaum ua raws qhov tseeb, kom thiaj li tau txais lwm tus txoj kev khuv leej thiab kev to taub. Raws li ntau theem sib txawv mas, tej lus hais uas tsis zoo no cuam tshuam thiab rhuav tshem tib neeg txoj kev kub siab nyob rau hauv txoj kev xyaum ua raws qhov tseeb, thiab haj tseem cheem tau ntau tus tib neeg kom txhob xyaum ua raws qhov tseeb thiab. Tej qhov tshwm sim los thiab tej kev cuam tshuam uas tsis zoo no ua rau tej no haj yam tsim nyog raug muab cais tias yog yam uas tsis zoo, tawm tsam Vajtswv, thiab ua yeeb ncuab rau qhov tseeb tag nrho. Ib txhia tib neeg pom tsis tshab txog lub ntsiab tseeb ntawm txoj kev xav tsis zoo, thiab xav tias qhov pheej xav tsis zoo ntawd yog ib yam uas ib txwm muaj xwb, thiab tias tsis muaj kev cuam tshuam loj rau tib neeg txoj kev caum qhov tseeb. Txoj kev xav no tsis yog lawm; tseeb tiag mas, qhov ntawd muaj kev cuam tshuam loj heev, thiab yog ib tug neeg twg txoj kev xav tsis zoo ntawd hnyav dhau qhov lawv tus kheej ris taus, mas qhov ntawd yooj yim ua rau muaj kev ntxeev siab. Qhov tshwm sim los uas txaus ntshai no yog tshwm sim los ntawm txoj kev xav tsis zoo ntag. Yog li ntawd tsim nyog paub cais thiab to taub qhov tso tej kev xav tsis zoo tawm ntawd li cas? Muab hais yooj yim tias, qhov tso tej kev xav tsis zoo tawm ntawd yog qhov coj tib neeg mus yuam kev thiab thaiv tsis pub lawv xyaum ua raws qhov tseeb; qhov ntawd yog qhov siv tej tswv yim muag muag, siv tej yam uas saib zoo li ib txwm muaj, los coj tib neeg mus yuam kev thiab ua rau lawv dawm ntog. Qhov no puas yog ua phem rau lawv? Qhov ntawd yeej yog ua phem rau lawv tiag tiag. Yog li ntawd, qhov tso tej kev xav tsis zoo tawm ntawd yog ib yam uas tsis zoo, qhov ntawd raug Vajtswv teem txim; qhov no yog txoj kev piav uas yooj yim tshaj plaws txog qhov tso tej kev xav tsis zoo tawm. Yog li qhov uas tsis zoo ntawm qhov tso tej kev xav tsis zoo tawm ntawd yog dab tsi tiag? Tej yam twg uas yog yam tsis zoo, thiab ua tau rau muaj kev cuam tshuam tsis zoo rau tib neeg, thiab ua rau muaj kev cuam tshuam thiab kev puas tsuaj rau lub neej hauv pawg ntseeg? Kev xav tsis zoo ntawd muaj dab tsi nyob hauv? Yog tib neeg muaj ib txoj kev nkag siab uas yog txog Vajtswv cov lus, es cov lus uas lawv sib qhia ntawd puas yuav muaj qhov kev xav tsis zoo nyob rau hauv? Yog tib neeg muaj ib tug cwj pwm ntawm txoj kev zwm rau tiag tiag rau tej xwm txheej uas Vajtswv tau teeb tsa rau lawv, ces lawv txoj kev paub txog tej xwm txheej no puas yuav muaj ib qho kev xav tsis zoo nyob rau hauv? Thaum lawv muab lawv txoj kev paub ntawm kev ntsib kev pom los sib qhia nrog txhua tus, qhov ntawd puas yuav muaj ib qho kev xav tsis zoo twg nyob rau hauv? Yeej tsis muaj kiag li. Hais txog txhua yam uas tshwm sim nyob rau hauv pawg ntseeg los sis nyob ib puag ncig lawv, yog tib neeg muaj peev xwm lees txais tau ntawm Vajtswv los, muaj txoj kev daws uas yog, thiab tuaj yeem muaj ib tug cwj pwm ntawm txoj kev nrhiav thiab kev zwm rau, ces lawv txoj kev paub, kev to taub, thiab kev ntsib kev pom txog yam uas tshwm sim ntawd puas yuav muaj ib qho kev xav tsis zoo nyob rau hauv? (Tsis muaj.) Yeej yuav tsis muaj kiag li. Yog li saib raws li tej no, kev xav tsis zoo ntawd yog dab tsi tiag? Yuav to taub kev xav tsis zoo li cas? Kev xav tsis zoo ntawd tsis yog muaj tej yam ntawm lub ntsiab xeeb txawm xws li—tib neeg txoj kev tsis mloog lus, kev tsis txaus siab, kev yws, thiab kev chim siab lod? Tej xwm txheej uas hnyav dua ntawm txoj kev xav tsis zoo ntawd mas kuj muaj kev tsis lees txais, kev tawm tsam, thiab haj tseem muaj kev qw nrov nrov thiab. Kev tso tawm tej lus uas muaj tej yam no nyob rau hauv tuaj yeem raug cais tias yog qhov tso tej kev xav tsis zoo tawm. Yog li saib raws li tej kev qhia tshwm uas pom tau meej no, thaum ib tug neeg tso tej kev xav tsis zoo tawm ntawd, nyob rau hauv lawv lub siab puas tseem muaj kev zwm rau Vajtswv? Yeej tsis muaj kiag li. Puas muaj qhov kev txaus siab hlo los ntxeev siab tawm tsam lub cev nqaij daim tawv thiab daws lawv txoj kev xav tsis zoo? Tsis muaj—tsuas muaj kev tsis lees txais, kev ntxeev siab, thiab kev tawm tsam xwb. Yog tib neeg lub siab muaj tej yam no puv npo—yog lawv lub siab raug tej yam tsis zoo no tswj hwm lawm—ces qhov no yuav tsim txoj kev tsis lees txais, kev ntxeev siab, thiab kev tawm tsam rau Vajtswv. Thiab yog hais tias zoo li no, lawv puas tseem yuav muaj peev xwm xyaum ua raws qhov tseeb thiab zwm rau Vajtswv? Lawv yuav ua tsis tau; txhua yam uas yuav tshwm sim ces yog lawv yuav nyob deb ntawm Vajtswv, thiab haj yam xav tsis zoo ntxiv, thiab tej zaum haj tseem yuav ua xyem xyav, tsis lees paub, thiab ntxeev siab rau Vajtswv thiab. Qhov no tsis phom sij lod? Txhua tus uas pheej xav tsis zoo tas li puav leej muaj peev xwm tso tej kev xav tsis zoo tawm, thiab qhov tso tej kev xav tsis zoo tawm ntawd yog qhov tawm tsam thiab tsis lees paub Vajtswv; yog li ntawd, cov tib neeg uas pheej tso tej kev xav tsis zoo tawm tas li ntawd yuav ntxeev siab rau Vajtswv thiab tso Nws tseg tau txhua lub sij hawm los sis txhua qhov chaw.

Saib raws li lub ntsiab ntawm lo lus “kev xav tsis zoo” ntawd, thaum ib tug neeg xav tsis zoo, lawv txoj kev xav poob mus rau hauv ib qho xwm txheej uas qis heev thiab lawv muaj ib lub siab uas tsis zoo. Lawv lub siab muaj tej yam tsis zoo puv npo, lawv tsis muaj ib tug cwj pwm uas nquag plias nce qib thiab siv zog mus tom ntej, thiab lawv tsis muaj txoj kev koom tes thiab kev nrhiav uas nquag plias li; tshaj qhov ntawd, lawv tsis muaj kev mloog lus yam txaus siab hlo, tiam sis lawv muaj ib lub siab uas nyuaj siab heev. Ib lub siab uas nyuaj siab ntawd sawv cev rau dab tsi? Qhov ntawd puas sawv cev rau tej yam uas zoo ntawm kev ua neeg? Puas sawv cev rau qhov muaj lub siab txawj xav thiab laj thawj? Puas sawv cev rau qhov ua neej nyob muaj meej mom, ua neej nyob hauv kev ua neeg lub meej mom? (Tsis sawv cev.) Yog qhov ntawd tsis sawv cev rau tej yam uas zoo no, nws sawv cev rau dab tsi? Qhov ntawd puas sawv cev tau rau qhov tsis muaj kev ntseeg tiag tiag rau Vajtswv, nrog rau qhov tsis muaj kev txiav txim siab thiab lub siab xav los caum qhov tseeb thiab nce qib yam nquag plias? Qhov ntawd puas sawv cev tau rau ib qho kev tsis txaus siab heev thiab kev nyuaj to taub txog tib neeg qhov xwm txheej thiab tej kev nyuaj tam sim no, thiab qhov tsis txaus siab hlo lees txais tej uas muaj tseeb tam sim no? Qhov ntawd puas sawv cev tau rau ib qho xwm txheej uas yus lub siab muaj kev tsis mloog lus puv npo, ib qho kev ntshaw los tawm tsam, thiab ib qho kev ntshaw los khiav dim thiab hloov qhov xwm txheej tam sim no? (Tau.) Tej no yog tej yam ntxwv uas tib neeg nthuav tawm thaum lawv ntsib qhov xwm txheej tam sim no los ntawm txoj kev xav tsis zoo. Muab hais luv luv tias, txawm yuav yog li cas los xij, thaum tib neeg xav tsis zoo, lawv txoj kev tsis txaus siab rau qhov xwm txheej tam sim no thiab rau yam uas Vajtswv npaj ntawd tsis yog yooj yim ib yam li qhov uas tsuas muaj kev to taub yuam kev, tsis to taub, tsis nkag siab, los sis tsis muaj peev xwm ntsib pom xwb. Qhov tsis nkag siab ntawd tej zaum yog ib qho teeb meem ntawm lub peev xwm los sis lub sij hawm, uas yog ib qho kev qhia tshwm uas pom tau meej uas ib txwm muaj ntawm kev ua neeg. Qhov tsis muaj peev xwm ntsib pom tau ntawd tej zaum kuj yog vim qee yam laj thawj sab nraud, tiam sis tej no tsis raug suav tias yog tej yam tsis zoo. Ib txhia tib neeg kuj tsis muaj peev xwm ntsib pom tau thiab, tiam sis thaum ntsib tej yam uas lawv tsis to taub los sis pom tsis tshab, los sis tej yam uas lawv tsis muaj peev xwm nkag siab los sis ntsib pom tau, lawv yuav thov Vajtswv thiab nrhiav Nws txoj kev npaj siab, tos Vajtswv txoj kev qhia thiab kev qhia kom paub tseeb, thiab nquag nrhiav ntawm lwm tus thiab sib qhia nrog lwm tus. Txawm li cas los xij, ib txhia tib neeg mas txawv; lawv tsis muaj tej kev xyaum ua raws no, thiab lawv tsis muaj tus cwj pwm zoo li no. Tsis yog tos, nrhiav, los sis nrhiav ib tug neeg los sib qhia nrog, tiam sis lawv tsim muaj tej kev to taub yuam kev hauv lawv lub siab, xav tias tej yam thiab tej xwm txheej uas lawv ntsib ntawd tsis mus raws li lawv tej kev ntshaw, kev nyiam, los sis tej kev xav hauv nruab siab, vim li ntawd thiaj li ua rau muaj kev tsis mloog lus, kev tsis txaus siab, kev tsis lees txais, kev yws, kev tawm tsam, kev qw nrov nrov, thiab lwm yam uas tsis zoo uas zoo li no. Thaum tsim muaj tej yam uas tsis zoo no lawm, lawv tsis quav ntsej txog tej ntawd, thiab lawv tsis los rau ntawm Vajtswv lub xub ntiag thov Vajtswv thiab ua tib zoo xav kom tau txais kev paub txog lawv tus kheej tus yam ntxwv thiab txoj kev qias vuab tsuab. Lawv tsis nyeem Vajtswv cov lus los nrhiav Vajtswv txoj kev npaj siab los sis siv Vajtswv cov lus los daws tej teeb meem, haj yam tsis nrhiav ntawm lwm tus thiab sib qhia nrog lwm tus. Tiam sis, lawv hais tuav rawv tias yam uas lawv ntseeg ntawd yog thiab raug lawm, khaws kev tsis mloog lus thiab kev tsis txaus siab cia rau hauv lawv lub siab, thiab poob rau hauv tej kev xav tsis zoo. Thaum daig rau hauv tej kev xav no lawm, tej zaum lawv yuav muaj peev xwm khaws tej ntawd cia rau hauv nruab siab thiab tiv taus ib los sis ob hnub, tiam sis ntev mus, yuav muaj ntau yam tshwm sim nyob rau hauv lawv lub hlwb, nrog rau tib neeg tej kev xav phem thiab tej kev xav hauv nruab siab, tib neeg tej kev coj ncaj thiab kev ua zoo, tib neeg txoj kab lis kev cai, kev cai qub, thiab kev paub, thiab ntau yam ntxiv. Lawv siv tej no los ntsuas, xam, thiab to taub tej teeb meem uas lawv ntsib, ua rau lawv poob mus rau hauv Ntxwgnyoog lub vas tag nrho, yog li ntawd thiaj li ua rau muaj ntau tus yam ntxwv ntawm kev tsis txaus siab thiab kev tsis mloog lus. Los ntawm tej yam ntxwv qias vuab tsuab no, ntau lub tswv yim thiab kev xam pom uas yuam kev thiaj li tshwm sim los, thiab nyob rau hauv lawv lub siab, tswj tsis tau tej yam tsis zoo no ntxiv lawm. Lawv thiaj li nrhiav lub cib fim los nchuav thiab tso tej no tawm. Thaum lawv lub siab muaj kev xav tsis zoo puv npo, lawv puas yuav hais tias, “Muaj tej yam tsis zoo nyob hauv kuv puv npo; kuv yuav tsum tsis txhob lam tau lam hais lus, kom kuv thiaj li tsis ua phem rau lwm tus. Yog kuv xav hais thiab nyiaj tsis tau lawm, kuv yuav hais rau sab phab ntsa, los sis tham nrog ib yam dab tsi uas tsis to taub neeg cov lus”? Lawv puas muaj lub siab zoo los ua li no? (Tsis muaj.) Ua li lawv ua li cas? Lawv nrhiav lub cib fim kom muaj cov neeg mloog los lees txais lawv tej kev xam pom, tej lus hais, thiab tej kev xav tsis zoo, siv qhov no los nchuav lawv ntau yam kev xav tsis zoo xws li kev tsis txaus siab, kev tsis mloog lus, thiab kev chim siab tawm hauv lawv lub siab. Lawv ntseeg tias lub sij hawm ua lub neej hauv pawg ntseeg yog lub sij hawm zoo tshaj plaws los nchuav tawm, thiab yog ib lub cib fim zoo los nchuav lawv txoj kev xav tsis zoo, kev tsis txaus siab, thiab kev tsis mloog lus tawm vim muaj ntau tus neeg mloog thiab lawv cov lus tuaj yeem cuam tshuam lwm tus kom xav tsis zoo thiab ua rau muaj tej qhov tshwm sim tsis zoo rau pawg ntseeg tes hauj lwm. Muaj tseeb tias, cov uas tso tej kev xav tsis zoo tawm ntawd kuj nyiaj tsis taus nyob rau tom qab lawm thiab; lawv pheej yuav nchuav lawv tej lus hais tsis zoo ntawd tawm. Thaum tsis muaj neeg ntau los mloog lawv tso tawm mas, lawv tsis muaj zog hais li, tiam sis thaum txhua tus tuaj sib sau ua ke, lawv haj yam muaj zog hais. Saib raws li tej kev xav, tej yam ntxwv, thiab lwm yam ntawm cov uas tso tej kev xav tsis zoo tawm ntawd mas, lawv lub hom phiaj tsis yog los pab tib neeg to taub qhov tseeb, pom tshab qhov muaj tseeb yog dab tsi, daws tej kev to taub yuam kev los sis kev ua xyem xyav txog Vajtswv, paub lawv tus kheej thiab lawv tus kheej lub ntsiab tseeb uas qias vuab tsuab, los sis daws lawv tej teeb meem ntawm kev ntxeev siab thiab kev qias vuab tsuab kom lawv thiaj li tsis ntxeev siab rau Vajtswv los sis tawm tsam Nws tiam sis zwm rau Nws. Lawv tej hom phiaj tseem ceeb muaj ob yam xwb: Yam ib ces, lawv tso tej kev xav tsis zoo tawm los nchuav lawv tus kheej tej kev xav hauv siab tawm; lwm kis mas, lawv lub hom phiaj yog los rub tib neeg ntau ntxiv nrog lawv mus rau hauv kev xav tsis zoo thiab mus rau hauv rooj ntxiab ntawm kev tawm tsam thiab qw nrov nrov tawm tsam Vajtswv. Yog li ntawd, qhov kev ua uas tso tej kev xav tsis zoo tawm ntawd yuav tsum raug cheem kiag nyob rau hauv lub neej hauv pawg ntseeg.

B. Ntau Yam Kev Qhia Tshwm Uas Pom Tau Meej thiab Tus Yam Ntxwv ntawm Cov Tib Neeg Uas Tso Tej Kev Xav Tsis Zoo Tawm

1 Kev Tso Tej Kev Xav Tsis Zoo Tawm Thaum Tsis Txaus Siab Txog Qhov Raug Rho Tawm

Tej kev xav hauv siab thiab tej kev qhia tshwm uas pom tau meej ntawm txoj kev xav tsis zoo mas feem ntau yog tej no xwb. Tom qab Kuv tau qhia txog tej no lawm, tib neeg yuav tsum muab tej no los ntsuas rau lawv tus kheej thiab saib seb lawv tej kev coj twg, tej lus hais twg, thiab tej hau kev twg nyob rau hauv lub neej tiag tiag ntawd yog cov uas tso tej kev xav tsis zoo tawm, thiab tej yam twg ua rau lawv poob mus rau hauv txoj kev xav tsis zoo, es ua rau tso tej kev xav tsis zoo ntawd tawm. Qhia Kuv seb, nyob rau hauv tej xwm txheej uas ib txwm muaj, tej xwm txheej twg ua rau tib neeg xav tsis zoo? Tej yam ntxwv uas nquag pom ntawm txoj kev xav tsis zoo ntawd yog dab tsi? (Thaum ib tug neeg twg raug rho tawm los sis thaum lawv raug ntuas, lawv yuav tshwm muaj qee txoj kev xav tsis zoo nyob rau hauv lawv lub siab.) Qhov raug rho tawm yog ib qho xwm txheej, qhov raug ntuas yog lwm qhov. Vim li cas qhov raug rho tawm ntawd thiaj li ua rau muaj kev xav uas tsis zoo? (Ib txhia tib neeg, tom qab raug rho tawm lawm, tsis muaj kev paub txog lawv tus kheej thiab xav tias yog lawv lub meej mom ua rau lawv puas tsuaj. Tom qab ntawd lawv hais tias, “Koj yim nce siab, ces koj yim poob sab xwb,” hais qee yam kev xam pom tsis zoo. Lawv tsis muaj ib txoj kev to taub uas yog txog qhov raug rho tawm ntawd; lawv muaj kev tsis mloog lus nyob rau hauv lawv lub siab.) Nyob rau hauv lawv, muaj kev tsis mloog lus thiab kev tsis txaus siab, uas yog tej kev xav hauv siab uas tsis zoo. Lawv puas yws? (Yws. Lawv xav tias lawv tau tiv kev txom nyem thiab them tus nqi lawm, ib txwm ua hauj lwm hnyav yam tsis tau txais ib yam dab tsi zoo rov qab li, tiam sis tseem raug rho tawm lawm thiab. Yog li ntawd lawv hais tias, “Kev ua ib tug thawj coj mas nyuaj heev; leej twg ua thawj coj ces tus ntawd tsis muaj hmoo. Thaum kawg txhua tus puav leej raug rho tawm.”) Kev tshaj tawm tej lus hais no yog qhov tso tej kev xav tsis zoo tawm. Yog lawv tsuas tsis mloog lus thiab tsis txaus siab xwb tiam sis tsis tshaj tawm, qhov ntawd tseem tsis tau suav tias yog qhov tso tej kev xav tsis zoo tawm. Yog los ntawm kev tsis mloog lus thiab kev tsis txaus siab es maj mam tshwm sim muaj ib lub siab xav yws, thiab lawv tsis lees paub qhov muaj tseeb tias lawv lub peev xwm tsis zoo thiab ua tsis tau txoj hauj lwm ntawd, thiab tom qab ntawd lawv pib cav lawv tej laj thawj uas nkhaus, thaum cav ntawd, tsim ntau hom lus hais, kev xam pom, kev hais ub hais no, tej laj thawj, kev piav qhia, kev hais daws thiab ntau yam ntxiv, ces qhov hais tej hom lus no suav tias yog qhov tso tej kev xav tsis zoo tawm ntag. Ib txhia thawj coj cuav, uas raug tshem tawm vim tsis ua hauj lwm tiag tiag, muaj kev tsis mloog lus thiab kev tsis txaus siab nyob hauv lawv lub siab, tsis muaj ib qho kev zwm rau hlo li; lawv pheej xav tias, “Cia saib seb leej twg muaj peev xwm los hloov tau kuv qhov chaw ua thawj coj. Lwm tus tsis zoo tshaj kuv; yog kuv ua tsis tau tes hauj lwm no, lawv los kuj ua tsis tau thiab!” Qhov ua rau lawv tsis mloog lus ntawd yog dab tsi? Lawv xav tias lawv lub peev xwm tsis phem thiab lawv tau ua hauj lwm ntau lawm, yog li ntawd vim li cas lawv thiaj li raug rho tawm? Tej no yog cov thawj coj cuav tej kev xav hauv nruab siab. Lawv tsis thim xav kom paub lawv tus kheej thiab saib seb lawv puas tau ua tes hauj lwm tiag tiag, seb lawv tau daws pes tsawg qhov teeb meem tiag tiag, los sis seb puas yog qhov muaj tseeb uas lawv tau ua rau pawg ntseeg tes hauj lwm nres mus tsis taus. Lawv tsis tshua xav txog tej yam no li. Lawv tsis xav tias qhov teeb meem yog lawv tsis muaj qhov tseeb qhov muaj tiag thiab pom tsis tshab tej teeb meem; tiam sis, lawv ntseeg hais tias vim lawv twb ua hauj lwm ntau heev lawm, lawv tsis tsim nyog raug txiav txim tias yog ib tug thawj coj cuav. Qhov no yog lub laj thawj tseem ceeb rau lawv txoj kev tsis mloog lus thiab kev tsis txaus siab. Lawv pheej xav tias: “Kuv twb ua kuv tej dej num tau ntau xyoo lawm, sawv ntxov thiab pw lig txhua hnub yog txhawm rau leej twg? Tom qab ntseeg Vajtswv lawm, kuv twb tso kuv tsev neeg tseg, tso kuv txoj hauj lwm tseg, thiab haj tseem pheej hmoo tsam raug ntes thiab raug kaw hauv nkuaj los ua kuv tej dej num thiab. Kuv twb tiv kev txom nyem ntau npaum li cas lawm! Thiab tam sim no lawv hais tias kuv tsis ua tes hauj lwm tiag tiag es cia li rho kuv tawm—qhov ntawd tsis ncaj ncees kiag li! Txawm hais tias kuv tsis tau ua tiav ib yam dab tsi los xij, kuv twb tiv kev txom nyem lawm; yog tsis yog kev txom nyem, los yeej yog kev sab lawm! Nrog rau kuv lub peev xwm thiab kev muaj cuab kav them tus nqi hauv kuv tes hauj lwm, yog kuv tseem raug suav hais tias ua tsis tau raws li tus qauv thiab raug rho tawm, ces kuv xav hais tias yeej tsis tshua muaj cov thawj coj twg uas ua tau raws li tus qauv li!” Puas yog lawv tab tom tso tej kev xav tsis zoo tawm los ntawm qhov hais cov lus no? Puas muaj ib kab lus nyob hauv cov lus no uas qhia tias muaj txoj kev zwm rau? Puas muaj ib qho me me uas qhia tias xav nrhiav qhov tseeb? Puas muaj ib qho tig xav txog tus kheej, xws li, “Lawv hais tias kuv tes hauj lwm tsis tau raws li tus qauv, yog li ntawd kuv tsis zoo nyob rau qhov twg tiag? Tes hauj lwm tiag tiag twg uas kuv tsis tau ua? Kuv muaj cov kev qhia tshwm uas pom tau meej ntawm ib tug thawj coj cuav twg?” Lawv puas tau tig xav txog lawv tus kheej zoo li no? (Tsis tau.) Yog li, lub ntsiab xeeb txawm ntawm cov lus uas lawv hais no yog dab tsi? Puas yog lawv tab tom yws? Puas yog lawv tab tom hais daws lawv tus kheej? Lawv lub hom phiaj ntawm kev hais daws lawv tus kheej ntawd yog dab tsi? Tsis yog kom tau txais tib neeg txoj kev khuv leej thiab kev to taub lod? Lawv tsis xav kom muaj neeg ntau ntxiv tuaj tiv thaiv lawv, los quaj ntsuag txog qhov tsis ncaj ncees uas lawv tau raug ntawd lod? (Yog.) Yog li ntawd lawv tab tom qw tawm tsam leej twg? Lawv tsis tab tom cav nrog Vajtswv thiab qw tawm tsam Vajtswv lod? (Yog.) Lawv cov lus hais ntawd yog yws Vajtswv, tawm tsam Vajtswv. Lawv lub siab muaj puv nkaus tej lus yws, txoj kev tawm tsam thiab kev ntxeev siab. Tsis tas li ntawd xwb, tiam sis los ntawm qhov tso tej kev xav tsis zoo ntawd tawm, lawv lub hom phiaj yog ua kom muaj neeg ntau ntxiv los to taub lawv, khuv leej lawv, thiab ua kom muaj neeg ntau ntxiv muaj kev xav tsis zoo ib yam nkaus li lawv, ua kom muaj neeg ntau ntxiv muaj tej lus yws, kev tsis lees txais, thiab kev tawm tsam Vajtswv, los sis qw tawm tsam Nws, ib yam nkaus li lawv. Lawv tso tej kev xav tsis zoo tawm tsis yog kom ua tiav raws li lub hom phiaj no lod? Lawv lub hom phiaj tsuas yog kom muaj neeg ntau ntxiv paub txog qhov uas lawv hu ua qhov muaj tseeb ntawm qhov xwm txheej ntawd thiab ua kom lwm tus ntseeg hais tias lawv raug ua tsis ncaj ncees rau, tias yam uas lawv tau ua ntawd yog lawm, tias lawv tsis tsim nyog raug rho tawm, thiab tias qhov rho lawv tawm ntawd mas yog ib qho kev ua yuam kev; lawv xav kom muaj neeg ntau ntxiv tuaj tiv thaiv lawv. Los ntawm qhov no, lawv cia siab tias yuav tau lawv lub ntsej muag, lub meej mom, thiab lub koob npe rov qab los. Txhua tus thawj coj cuav thiab cov tawm tsam khetos, tom qab raug rho tawm lawm, puav leej tso tej kev xav tsis zoo tawm zoo li no los kom tau txais tib neeg txoj kev khuv leej. Tsis muaj ib tug ntawm lawv uas tuaj yeem tig xav txog thiab los paub lawv tus kheej, lees lawv tej kev ua yuam kev, los sis qhia txog txoj kev tu siab thiab kev lees txim hloov dua siab tshiab tiag tiag. Qhov muaj tseeb no ua pov thawj qhia hais tias cov thawj coj cuav thiab cov tawm tsam khetos puav leej yog cov tib neeg uas tsis nyiam qhov tseeb, thiab tsis lees txais qhov tseeb hlo li. Yog li ntawd, tom qab raug nthuav tawm thiab raug tshem tawm lawm, lawv tsis muaj peev xwm paub lawv tus kheej los ntawm qhov tseeb thiab Vajtswv cov lus. Tsis muaj leej twg pom lawv qhia txog txoj kev tu siab los sis muaj kev paub txog lawv tus kheej tiag tiag, thiab tsis muaj leej twg pom lawv qhia txog txoj kev lees txim hloov dua siab tshiab tiag tiag li. Zoo li lawv yuav tsis muaj hnub paub txog lawv tus kheej los sis lees lawv tej kev ua yuam kev li. Saib los ntawm qhov muaj tseeb no, qhov rho cov thawj coj cuav thiab cov tawm tsam khetos tawm ntawd mas tsim nyog tag nrho thiab tsis yog qhov tsis ncaj ncees hlo li. Raws li qhov uas lawv tsis tig xav txog thiab tsis paub lawv tus kheej hlo li, nrog rau qhov uas lawv tsis muaj txoj kev tu siab kiag li ntawd, yeej pom tau meej hais tias lawv tus moj yam tawm tsam khetos ntawd hnyav heev, thiab tias lawv tsis nyiam qhov tseeb hlo li.

Ib txhia thawj coj cuav, tom qab raug rho tawm lawm, tsis lees lawv tej kev ua yuam kev hlo li, thiab lawv kuj tsis nrhiav qhov tseeb los sis tig xav txog thiab paub lawv tus kheej thiab. Lawv tsis muaj lub siab los sis tus cwj pwm ntawm kev zwm rau ib qho me me li. Tiam sis, lawv to taub Vajtswv yuam kev thiab yws hais tias Vajtswv ua tsis ncaj ncees rau lawv, xav tag lub hlwb los nrhiav ntau yam kev hais ub hais no thiab laj thawj los hais daws thiab tiv thaiv lawv tus kheej. Ib txhia haj tseem hais tias, “Yav tas los kuv yeej tsis xav ua ib tug thawj coj vim kuv paub hais tias qhov ntawd yog ib txoj hauj lwm nyuaj. Yog koj ua tau zoo, koj tsis tau txais nqi zog, thiab yog koj ua tsis tau zoo, koj raug rho tawm thiab dhau los ua neeg npe phem, raug cov kwv tij thiab cov muam tsis lees txais, thiab tsis tshuav ntsej muag hlo li. Tom qab ntawd yuav ua li cas muaj ntsej muag mus ntsib tib neeg? Tam sim no uas kuv raug rho tawm lawm, kuv haj yam ntseeg tiag tiag hais tias qhov ua ib tug thawj coj los sis ib tug neeg ua hauj lwm ntawd mas tsis yooj yim; qhov ntawd yog ib txoj hauj lwm uas nyuaj thiab tsis muaj neeg ua tsaug!” Cov lus uas hais tias “qhov ua ib tug thawj coj los sis ib tug neeg ua hauj lwm yog ib txoj hauj lwm uas nyuaj thiab tsis muaj neeg ua tsaug” ntawd txhais li cas? Puas muaj ib qho kev npaj siab los nrhiav qhov tseeb uas raug qhia tawm nyob ntawm no? Qhov no yog qhov uas lawv tau pib ntxub qhov muaj tseeb uas hais tias Vajtswv lub tsev tau npaj kom lawv ua ib tug thawj coj los sis ib tug neeg ua hauj lwm, thiab tam sim no lawv tab tom siv hom lus zoo li no los coj lwm tus mus yuam kev, tsis yog lod? (Yog.) Cov lus no coj tau tej qhov tshwm sim los dab tsi? Tib neeg feem coob lub siab, kev xav, thiab lawv txoj kev to taub thiab kev nkag siab txog qhov xwm txheej no yuav raug cuam tshuam thiab coj qee yam tsis zoo los ntawm cov lus no. Qhov no yog qhov tshwm sim los uas txoj kev tso tej kev xav tsis zoo tawm ntawd coj los rau tib neeg. Piv txwv li, yog koj tsis yog ib tug thawj coj thiab koj hnov qhov no, koj yuav poob siab, xav hais tias, “Qhov ntawd muaj tseeb tiag! Kuv yuav tsum tsis txhob raug xaiv ua ib tug thawj coj. Yog kuv raug xaiv, kuv yuav tsum maj nroos nrhiav txhua yam laj thawj thiab hais ub hais no los tsis lees txais. Kuv yuav hais tias kuv lub peev xwm tsis zoo thiab ua tsis tau tes hauj lwm ntawd.” Ib txhia uas yog cov thawj coj los kuj raug cuam tshuam los ntawm cov lus no thiab, xav hais tias, “Txaus ntshai ua luaj li! Yav tom ntej kuv puas yuav ntsib qhov kawg zoo ib yam li lawv thiab? Yog tias tej yam yuav tshwm sim los zoo li ntawd, kuv yeej yuav tsis ua ib tug thawj coj kiag li.” Tej kev xav tsis zoo thiab cov lus hais tsis zoo no puas yog cuam tshuam tib neeg lawm? Tej ntawd qhia pom tseeb tias ua rau muaj kev cuam tshuam lawm. Tsis hais tus neeg ntawd yog leej twg, txawm lawv lub peev xwm zoo los sis lub peev xwm tsis zoo los xij, thaum lawv hnov cov lus no, lawv yuav cia li lees txais cov lus ntawd ua ntej yam tsis paub txog, thiab cov lus no yuav nyob rau ib qho chaw tseem ceeb hauv lawv lub siab, thiab cuam tshuam lawv tsis ntau los tsawg. Tej qhov tshwm sim los ntawm qhov raug cuam tshuam ntawd yog dab tsi? Tib neeg feem coob yuav tsis muaj peev xwm coj kom yog rau qhov xwm txheej ntawm kev ua ib tug thawj coj thiab kev raug rho tawm ntawm kev ua thawj coj, thiab lawv yuav tsis muaj ib tug cwj pwm ntawm kev zwm rau. Tiam sis, lawv yuav muaj ib lub siab uas to taub yuam kev thiab ceev faj Vajtswv tas li, lawv yuav tsim muaj cov kev xav tsis zoo txog qhov teeb meem no, thiab tshwj xeeb mas lawv yuav xav ntau thiab ntshai heev thaum hais txog qhov teeb meem no. Thaum tib neeg qhia tawm cov cwj pwm no, tsis yog lawv poob rau hauv Ntxwgnyoog txoj kev dag ntxias thiab kev coj mus yuam kev lod? Pom tseeb hais tias lawv tau raug coj mus yuam kev thiab raug cuam tshuam los ntawm cov tib neeg uas tso tej kev xav tsis zoo tawm. Vim tej yam ntawm cov tib neeg uas tso tej kev xav tsis zoo tawm ntawd yog los ntawm tib neeg cov moj yam qias vuab tsuab thiab los ntawm Ntxwgnyoog los, thiab vim tej ntawd tsis yog ib txoj kev to taub txog qhov tseeb los sis cov kev paub ntawm kev ntsib kev pom uas tau los ntawm kev zwm rau cov xwm txheej uas Vajtswv teeb tsa, es cov uas hnov tej ntawd thiaj li raug cuam tshuam yam tsis ntau los tsawg. Qhov kev xav tsis zoo uas tib neeg tso tawm ntawd ua rau muaj qee qhov kev cuam tshuam tsis zoo rau txhua tus. Ib txhia uas nquag plias nrhiav qhov tseeb yuav raug ua phem tsawg dua. Lwm tus, uas tsis muaj lub zog tiv thaiv hlo li, yeej yuav raug cuam tshuam thiab raug ua phem rau loj heev, txawm tias lawv paub hais tias cov lus ntawd tsis yog los xij. Txawm Vajtswv yuav hais li cas, Nws yuav qhia txog qhov xwm txheej ntawd li cas, los sis Nws muaj tej kev cheem tsum dab tsi, lawv tsis quav ntsej txhua yam no li thiab ho cia li nco ntsoov cov lus ntawm cov uas tso tej kev xav tsis zoo tawm ntawd, ib txwm ceeb toom rau lawv tus kheej kom tsis txhob tso kev ceev faj tseg, cuag nkaus li cov lus hais tsis zoo no yog lawv lub kaus tiv thaiv, lawv daim phiaj tiv thaiv. Txawm Vajtswv yuav hais li cas, lawv tsis tuaj yeem tso lawv txoj kev ceev faj thiab kev to taub yuam kev tseg. Cov tib neeg no, uas tsis muaj kev nkag mus rau hauv qhov tseeb los sis Vajtswv cov lus, thiab tsis to taub qhov tseeb qhov muaj tiag, tsis muaj kev paub cais txog cov lus hais tsis zoo no, thiab tsis muaj lub zog tiv thaiv rau tej ntawd. Thaum kawg lawv raug txwv thiab raug khi los ntawm cov lus hais tsis zoo no, thiab lees txais tsis tau Vajtswv cov lus ntxiv lawm. Lawv tsis tau raug ua phem los ntawm qhov no lod? Lawv tau raug ua phem mus txog theem twg? Lawv tsis tuaj yeem lees txais los sis to taub Vajtswv cov lus tiam sis ho saib cov lus hais tsis zoo, cov lus ntawm kev tsis txaus siab, kev tsis mloog lus, thiab kev yws uas cov tib neeg tso tawm ntawd tias yog tej yam zoo, saib tej ntawd tias yog lawv tus kheej cov lus qhia kom nco ntsoov rau hauv lawv lub siab, thiab siv cov lus ntawd los coj lawv lub neej, los tawm tsam Vajtswv thiab tsis kam mloog Nws cov lus. Tsis yog lawv poob rau hauv Ntxwgnyoog lub vas lod? (Yog.) Cov tib neeg no cia li poob rau hauv Ntxwgnyoog lub vas yam tsis paub txog, thiab lawv raug Ntxwgnyoog ntes mus lawm. Cov lus hais tsis zoo uas cov tib neeg no tso tawm txog ib qho xwm txheej uas yooj yooj yim xws li kev raug rho tawm ntawm ib txoj hauj lwm ntawd es muaj kev cuam tshuam loj npaum no rau lwm tus. Qhov no muaj ib lub hauv paus: Cov uas lees txais cov lus hais tsis zoo no twb muaj puv nkaus tej kev xav phem thiab tej kev xav hauv nruab siab—thiab haj tseem muaj qee qhov kev to taub yuam kev thiab kev ceev faj—txog kev ua ib tug thawj coj lawm. Txawm hais tias cov kev to taub yuam kev thiab kev ceev faj no tsis tau tsim muaj tag nrho hauv lawv lub siab los xij, tom qab hnov cov lus hais tsis zoo no, lawv haj yam ntseeg tiag tiag hais tias lawv txoj kev ceev faj thiab kev to taub yuam kev ntawd yog lawm; lawv xav hais tias lawv haj yam muaj laj thawj ntau ntxiv los ntseeg hais tias qhov ua ib tug thawj coj ntawd coj tau kev txom nyem ntau heev los thiab tsis muaj ntau yam zoo, thiab tias lawv yuav tsum tsis txhob ua ib tug thawj coj los sis ib tug neeg ua hauj lwm kiag li kom thiaj li zam tau kev raug rho tawm thiab raug tsis lees txais vim ua yuam kev. Qhov no tsis yog lawv raug coj mus yuam kev thiab raug cuam tshuam tag nrho los ntawm cov uas tso tej kev xav tsis zoo tawm lod? Tsuas yog cov lus hais tsis zoo ntawm ib tug neeg uas raug rho tawm ntawd tso tawm, nrog rau lawv cov kev xav ntawm kev tsis mloog lus thiab kev tsis txaus siab, es tuaj yeem ua rau muaj kev cuam tshuam thiab kev puas tsuaj loj npaum li no rau tib neeg. Nej xav li cas—cov kev xav tsis zoo uas tib neeg tso tawm ntawd muaj puv nkaus rau ib qho pa ntawm txoj kev tuag, qhov ntawd puas yog ib qho teeb meem hnyav? (Yog, qhov ntawd hnyav heev.) Dab tsi ua rau qhov ntawd hnyav ua luaj li? Qhov ntawd yog qhov hais tias nws haum rau tib neeg txoj kev ceev faj thiab kev to taub yuam kev rau Vajtswv uas faus cag tob heev, thiab kuj qhia txog tib neeg tej yam ntxwv ntawm qhov to taub yuam kev txog Vajtswv thiab kev ua xyem xyav rau Vajtswv, nrog rau lawv tus cwj pwm coj sab hauv rau Nws thiab. Yog li ntawd, cov lus hais ntawm cov uas tso tej kev xav tsis zoo tawm tau tshaj tawm ntawd ntaus ncaj qha rau tib neeg qhov chaw tsis muaj zog tshaj plaws, thiab tib neeg lees txais tej ntawd tag nrho, poob rau hauv Ntxwgnyoog lub vas tag nrho uas lawv tso tsis tau lawv tus kheej kom dim. Qhov no yog ib yam zoo los sis ib yam phem? (Ib yam phem.) Tej qhov tshwm sim los ntawm qhov no yog dab tsi? (Ua rau tib neeg ntxeev siab rau Vajtswv.) (Qhov ntawd ua rau tib neeg ceev faj thiab to taub Vajtswv yuam kev, nyob deb ntawm Vajtswv hauv lawv lub siab, coj rau lawv tej dej num yam xav tsis zoo, thiab ntshai lees txais cov lus txib tseem ceeb. Lawv tsuas txaus siab rau qhov ua tej dej num dog dig xwb thiab yog li ntawd thiaj li plam ntau lub cib fim uas yuav raug ua kom zoo tiav log.) Cov tib neeg zoo li no puas yuav raug cawm dim tau? (Tsis tau.)

Ob txhiab xyoo dhau los Povlauj tau muab ntau txoj kev xam pom nthuav tawm thiab sau ntau tsab ntawv. Nyob hauv cov ntawv ntawd, nws tau hais ntau yam qhov kev yuam kev. Vim tib neeg tsis muaj kev paub cais, cov uas nyeem phau Vajluskub nyob rau ob txhiab xyoo dhau los no feem ntau tau lees txais Povlauj tej kev xav thiab tej kev xam pom tib lub sij hawm ntawd muab Tswv Yexus cov lus tso tseg, tsis lees txais tej qhov tseeb uas los ntawm Vajtswv los. Cov uas lees txais Povlauj tej kev xav thiab tej kev xam pom puas los tau rau ntawm Vajtswv lub xub ntiag? Lawv puas lees txais tau Nws cov lus? (Tsis tau.) Yog tias lawv lees txais tsis tau Vajtswv cov lus, lawv puas yuav saib tau tias Vajtswv yog Vajtswv? (Tsis tau.) Thaum Vajtswv los txog thiab sawv rau ntawm lawv lub xub ntiag, lawv puas tuaj yeem paub Vajtswv? Lawv puas lees txais tau Nws ua lawv tus Vajtswv thiab tus Tswv? (Tsis tau.) Vim li cas lawv thiaj li tsis tau? Povlauj tej kev xav thiab tej kev xam pom uas yuam kev ntawd tau puv nkaus hauv tib neeg lub siab, tsim muaj ntau yam kev xav thiab cov lus hais. Thaum tib neeg siv tej no los ntsuas Vajtswv, Nws tes hauj lwm, Nws cov lus, Nws tus moj yam, thiab Nws tus cwj pwm rau tib neeg, lawv tsis yog cov noob neej qias vuab tsuab uas dog dig, uas yooj yim ntxiv lawm, tiam sis sawv tawm tsam Vajtswv, tshawb xyuas thiab soj ntsuam Nws, thiab dhau los ua yeeb ncuab rau Nws. Vajtswv puas cawm cov tib neeg zoo li no? (Tsis cawm.) Yog tias Vajtswv tsis cawm lawv, lawv puas tseem yuav muaj lub cib fim tau txais kev cawm dim? Vajtswv txoj kev npaj tseg ua ntej thiab kev xaiv tau muab ib lub cib fim rau tib neeg, tiam sis yog tias tom qab Vajtswv txoj kev npaj tseg ua ntej thiab kev xaiv lawm, txoj kev uas tib neeg xaiv ntawd yog txoj uas raws Povlauj qab, lub cib fim rau kev cawm dim no puas tseem muaj? Ib txhia tib neeg hais tias, “Kuv tau raug Vajtswv npaj tseg ua ntej thiab xaiv lawm, yog li ntawd kuv twb nyob hauv qhov chaw nyab xeeb lawm. Kuv yeej yuav raug cawm dim xwb xwb.” Cov lus no puas muaj tseeb? Qhov raug Vajtswv npaj tseg ua ntej thiab xaiv ntawd txhais li cas? Qhov ntawd txhais hais tias koj tau dhau los ua ib tug neeg uas muaj feem tau txais kev cawm dim, tiam sis qhov seb koj puas yuav raug cawm dim ntawd mas yog nyob ntawm seb koj caum tau zoo npaum li cas thiab seb koj xaiv txoj kev puas yog. Puas yog tias txhua tus neeg uas muaj feem ntawd yuav raug xaiv thiab raug cawm dim thaum kawg? Tsis yog. Ib yam nkaus li ntawd, yog tib neeg lees txais cov kev xav, xws li kev tsis mloog lus, kev tsis txaus siab, thiab kev yws, los sis cov lus hais, tej kev xav, thiab tej kev xam pom uas cov tso tej kev xav tsis zoo tawm ntawd nthuav tawm, thiab lawv lub siab muaj puv nkaus thiab raug tswj los ntawm tej yam tsis zoo no, qhov no tsis qhia hais tias lawv tsuas pom zoo me ntsis xwb—qhov ntawd txhais hais tias lawv lees txais tej ntawd tag nrho thiab xav ua neej nyob raws li tej yam no. Thaum tib neeg ua neej nyob raws li tej yam tsis zoo no, lawv txoj kev sib raug zoo nrog Vajtswv dhau los ua dab tsi? Qhov ntawd dhau los ua ib txoj kev sib raug zoo uas tawm tsam. Tsis yog txoj kev sib raug zoo ntawm tus Tswv Tsim thiab cov neeg uas raug tsim tawm los, los sis txoj kev sib raug zoo ntawm Vajtswv thiab noob neej uas qias vuab tsuab, thiab haj yam tsis yog txoj kev sib raug zoo ntawm Vajtswv thiab cov uas tau txais kev cawm dim li. Tiam sis, qhov ntawd dhau los ua txoj kev sib raug zoo ntawm Vajtswv thiab Ntxwgnyoog, ntawm Vajtswv thiab Nws cov yeeb ncuab. Yog li ntawd, seb tib neeg puas tuaj yeem tau txais kev cawm dim ntawd dhau los ua ib lub cim nug, ib qho uas tsis paub. Cov lus tsis zoo uas cov neeg raug rho tawm tso tawm ntawd muaj puv nkaus tej lus yws, kev to taub yuam kev, kev hais daws, thiab kev tiv thaiv tus kheej; lawv haj tseem hais qee yam uas coj tib neeg mus yuam kev thiab rub tib neeg los rau lawv sab. Tom qab hnov cov lus no, tib neeg tsim muaj kev to taub yuam kev thiab kev ceev faj rau Vajtswv, thiab haj tseem nyob deb ntawm Nws thiab tsis lees txais Nws hauv lawv lub siab thiab. Yog li ntawd, thaum cov tib neeg zoo li no tab tom tso tej kev xav tsis zoo tawm, yuav tsum txwv thiab cheem lawv tam sid. Qhov uas lawv tsis muaj peev xwm lees txais cov xwm txheej uas lawv ntsib los ntawm Vajtswv los, nrhiav qhov tseeb, thiab zwm rau Vajtswv ntawd yog lawv tus kheej qhov teeb meem, thiab yuav tsum tsis txhob cia lawv cuam tshuam lwm tus. Yog tias lawv tsis tuaj yeem lees txais qhov ntawd, cia lawv maj mam xav kom dhau thiab daws qhov ntawd. Tiam sis yog tias lawv tso tej kev xav tsis zoo tawm thiab cuam tshuam lwm tus txoj kev nkag mus rau hauv li ib txwm, yuav tsum txwv thiab cheem lawv kom ncav sij hawm. Yog tias txwv tsis tau lawv thiab lawv tseem tso tej kev xav tsis zoo tawm los coj tib neeg mus yuam kev thiab rub tib neeg los rau lawv sab, ces yuav tsum ntsaig lawv tawm mus tam sid. Yuav tsum tsis txhob cia lawv mus cuam tshuam lub neej hauv pawg ntseeg ntxiv.

2. Kev Tso Tej Kev Xav Tsis Zoo Tawm Thaum Tsis Lees Txais Kev Ntuas

Kuj muaj lwm qhov xwm txheej uas tib neeg yooj yim tso tej kev xav tsis zoo tawm: Thaum lawv ntsib kev raug ntuas thiab lees txais tsis tau qee cov lus ntuas ntawd, lawv yuav muaj kev tsis mloog lus, kev tsis txaus siab, thiab kev yws nyob hauv lawv lub siab, thiab qee zaus haj tseem xav tias lawv raug ua tsis ncaj ncees rau thiab. Lawv ntseeg tias muaj ib qho kev tsis ncaj ncees: “Vim li cas thiaj li tsis cia kuv piav qhia los sis hais kom meej txog kuv tus kheej? Vim li cas thiaj li pheej ntuas kuv tas li?” Cov tib neeg no pheej tso tej kev xav tsis zoo twg tawm? Lawv kuj nrhiav laj thawj los hais daws thiab tiv thaiv lawv tus kheej ib yam nkaus thiab. Tsis yog soj ntsuam, ua kom rov qab zoo, los sis kho lawv tej kev ua yuam kev, tiam sis lawv tseem cav lawv zaj xwb, tseem hais tej yam xws li hais tias vim li cas lawv thiaj li ua tsis tau ib yam dab tsi zoo, cov laj thawj nyob tom qab ntawd, tej laj thawj thiab tej xwm txheej sab nraud yog dab tsi, thiab lawv tsis tau txhob txwm ua li ntawd; lawv siv cov laj thawj no los hais daws thiab tiv thaiv lawv tus kheej kom ua tiav lawv lub hom phiaj ntawm qhov tsis lees txais kev ntuas. Cov tib neeg no tsis lees paub tias kev ntuas lawv ntawd yog lawm, thiab lawv tshuaj xyuas qhov xwm txheej raug ntuas ntawd nrog ntau tus tib neeg, sim piav qhia qhov teeb meem kom meej nyob rau ntawm txhua tus xub ntiag. Lawv haj tseem tshaj tawm tej tswv yim xws li: “Kev ntuas li no yuav ua rau tib neeg qaug zog ua lawv tej dej num. Yuav tsis muaj leej twg txaus siab ua lawv tej dej num ntxiv lawm. Tib neeg tsis paub xyov yuav ua li cas mus ntxiv thiab tsis muaj ib txoj kev xyaum ua raws lawm.” Haj tseem muaj qee tus tib neeg uas, saib sab nraud mas, sib qhia txog qhov lawv lees txais qhov raug ntuas ntawd li cas, tiam sis qhov tseeb tiag, lawv tab tom siv kev sib qhia los hais daws thiab tiv thaiv lawv tus kheej, ua kom muaj neeg ntau ntxiv ntseeg tias Vajtswv lub tsev coj rau tib neeg yam tsis xav txog tib neeg tej kev xav hauv siab kiag li, thiab tias tab txawm yog ib qho kev ua yuam kev me me los tuaj yeem ua rau raug ntuas. Cov uas nyiam tso tej kev xav tsis zoo tawm mas yeej tsis tig xav txog lawv tus kheej li. Txawm thaum ntsib kev ntuas los, lawv tsis tig xav txog lub ntsiab xeeb txawm ntawm lawv tej kev ua yuam kev yog dab tsi los sis dab tsi ua rau muaj tej ntawd. Lawv tsis soj ntsuam cov teeb meem no tiam sis pheej cav, hais daws thiab tiv thaiv lawv tus kheej xwb. Ib txhia tib neeg haj tseem hais tias, “Ua ntej kuv raug ntuas mas, kuv hnov muaj ib txoj kev taug. Tiam sis thaum kuv raug ntuas lawm, kuv cia li paub tsis meej lawm. Kuv tsis paub xyov yuav xyaum ua raws li cas los sis yuav ntseeg Vajtswv li cas ntxiv lawm, thiab kuv pom tsis tau txoj kev mus rau tom ntej.” Lawv kuj qhia lwm tus tias, “Nej yuav tsum ua tib zoo ceev faj kom tsis txhob raug ntuas; qhov ntawd mob dhau, zoo li tev ib txheej tawv nqaij tawm lawm. Tsis txhob taug kuv txoj kev qub. Saib seb kuv dhau los zoo li cas tom qab raug ntuas lawm. Kuv daig rau ntawd, mus tsis tau rau tom ntej los sis rov qab tsis tau; tsis muaj ib yam dab tsi uas kuv ua yog li!” Cov lus no puas yog? Puas muaj teeb meem dab tsi hauv cov lus no? (Muaj. Lawv tab tom hais daws lawv tus kheej thiab cav, hais tias lawv tsis tau ua ib yam dab tsi txhaum li.) Qhov kev hais daws thiab kev cav no tau tshaj tawm cov ntsiab lus dab tsi? (Lawv tab tom hais tias qhov Vajtswv lub tsev ntuas tib neeg ntawd mas ua tsis yog lawm.) Ib txhia tib neeg hais tias, “Ua ntej raug ntuas mas, kuv hnov muaj ib txoj kev taug, tiam sis tom qab raug ntuas lawm, kuv tsis paub xyov yuav ua li cas li lawm.” Vim li cas lawv thiaj li tsis paub yuav ua li cas tom qab raug ntuas lawm? Qhov laj thawj rau qhov no yog dab tsi? (Thaum ntsib kev ntuas, lawv tsis lees txais qhov tseeb los sis tsis paub lawv tus kheej. Lawv muaj qee yam kev xav phem thiab tsis nrhiav qhov tseeb los daws tej ntawd. Qhov no ua rau lawv tsis muaj ib txoj kev taug. Lawv tsis nrhiav qhov laj thawj nyob hauv lawv tus kheej hos, lawv tseem hais rov qab qees, tias qhov raug ntuas ntawd ua rau lawv plam lawv txoj kev lawm.) Qhov no tsis yog kev liam rov qab lod? Qhov ntawd zoo li qhov hais tias, “Yam uas kuv ua ntawd mus raws li tej hauv paus ntsiab lus, tiam sis koj qhov kev ntuas kuv ntawd ua rau pom tseeb tias koj tsis cia kuv saib xyuas tej yam kom mus raws li tej hauv paus ntsiab lus. Yog li, kuv yuav xyaum ua raws li cas nyob rau yav tom ntej?” Qhov no yog lub ntsiab lus ntawm cov lus uas cov tib neeg no hais. Puas yog lawv tab tom lees txais qhov kev raug ntuas ntawd? Lawv puas lees txais qhov muaj tseeb tias lawv tau ua yuam kev? (Tsis lees txais.) Cov lus hais no tsis yog txhais hais tias lawv paub tias yuav lam tau lam ua tej yam phem li cas, tiam sis thaum raug ntuas thiab hais kom ua raws li tej hauv paus ntsiab lus, lawv tsis paub yuav ua li cas thiab paub tsis meej lawm lod? (Yog.) Yog li, yav dhau los lawv ua tej yam li cas? Thaum ib tug neeg raug ntuas, puas yog vim lawv tsis ua raws li tej hauv paus ntsiab lus? (Yog.) Lawv ua tej yam phem yam tsis muaj kev tswj, tsis nrhiav qhov tseeb, thiab tsis ua tej yam raws li tej hauv paus ntsiab lus los sis Vajtswv lub tsev tej kev cai tswj, yog li ntawd lawv thiaj li raug ntuas. Lub hom phiaj ntawm kev ntuas yog los pab kom tib neeg nrhiav tau qhov tseeb thiab ua raws li tej hauv paus ntsiab lus, los tiv thaiv kom lawv txhob ua tej yam phem yam tsis muaj kev tswj ntxiv lawm. Txawm li cas los xij, thaum raug ntuas lawm, cov tib neeg ntawd hais tias lawv tsis paub yuav ua li cas los sis yuav xyaum ua raws li cas ntxiv lawm—cov lus no puas muaj ib qho kev paub txog tus kheej li? (Tsis muaj.) Lawv tsis muaj kev npaj siab los paub lawv tus kheej los sis nrhiav qhov tseeb. Tiam sis, cov lus no lub ntsiab yog hais tias: “Yav dhau los kuv ua kuv tej dej num tau zoo heev, tiam sis txij thaum koj ntuas kuv, koj tau ua rau kuv tej kev xav ntxhov quav niab thiab ua rau kuv txoj kev ua kuv tej dej num paub tsis meej lawm. Tam sim no kuv txoj kev xav tsis zoo li ib txwm lawm, thiab kuv tsis txiav txim siab nrawm los sis siab tsis loj li yav dhau los lawm, Kuv tsis siab tawv li qub lawm, thiab qhov no puav leej yog vim raug ntuas xwb. Txij thaum kuv raug ntuas, kuv lub siab raug mob tob heev. Yog li, kuv yuav tsum qhia lwm tus kom ceev faj heev thaum ua lawv tej dej num. Lawv yuav tsum tsis txhob nthuav lawv tej kev tsis zoo tawm los sis ua yuam kev; yog lawv ua yuam kev, lawv yuav raug ntuas, thiab tom qab ntawd lawv yuav dhau los ua neeg tais caus thiab poob lub zog uas lawv txeev muaj ntawd lawm. Lawv lub siab tawv yuav raug txo qis heev, thiab lawv lub siab tawv uas tseem hluas ntxhias thiab txoj kev ntshaw uas lawv ua txhua yam kom tau ntawd yuav ploj mus, ua rau lawv dhau los ua neeg tsis muaj peev xwm, ntshai ub ntshai no, thiab xav hais tias tsis muaj ib yam dab tsi uas lawv ua ntawd yog li. Lawv yuav tsis hnov Vajtswv nrog lawv nyob hauv lawv lub siab ntxiv lawm, thiab yuav xav tias nyob deb ntawm Nws zuj zus. Tab txawm thov Vajtswv thiab hu rau Vajtswv los yuav zoo li tsis muaj lus teb. Lawv yuav xav tias lawv tsis muaj lub zog, kev zoo siab, thiab qhov ntxim hlub ib yam li qub lawm, thiab haj tseem yuav pib saib tsis taus lawv tus kheej lawm thiab.” Cov lus no puas yog cov lus hauv siab uas ib tug neeg uas muaj kev ntsib kev pom sib qhia? Cov lus no puas muaj tseeb? Cov lus no puas tsim kho los sis muaj txiaj ntsim rau tib neeg? Qhov no tsis yog tej uas ntxeev qhov muaj tseeb xwb lod? (Yog, cov lus no yeej tsis muaj qab hau kiag li.) Lawv hais tias, “Tsis txhob taug kuv tej hneev taw los sis rov taug kuv txoj kev qub! Nej pom kuv zoo li coj zoo heev tam sim no, tiam sis qhov tseeb tiag kuv tsuas yog ntshai tom qab qhov kev ntuas ntawd xwb thiab tsis muaj kev ywj pheej thiab dim zoo li yav tas los lawm.” Cov lus no muaj kev cuam tshuam li cas rau cov uas mloog? (Cov lus no ua rau tib neeg haj yam thaiv lawv tus kheej ntawm Vajtswv, ua rau lawv ua tej yam ceev faj vim ntshai tsam raug ntuas.) Cov lus no muaj hom kev cuam tshuam uas tsis zoo li no. Tom qab hnov qhov no, cov tib neeg yuav xav tias, “Yeej yog li ntawd tiag! Ua tsis xyuam xim me ntsis xwb ces koj raug ntuas lawm—koj yeej ua tsis tau ib yam dab tsi los tiv thaiv qhov ntawd li! Vim li cas qhov ua tej dej num hauv Vajtswv lub tsev thiaj li nyuaj ua luaj? Pheej hais txog qhov tseeb tej hauv paus ntsiab lus tas li—qhov ntawd yeej nyuaj tiag tiag! Qhov ua ib lub neej uas yooj yim thiab ruaj khov ntawd tsis tau lod? Qhov ntawd tsis yog ib qho kev cheem tsum uas siab los sis ib qho kev cia siab uas loj, tiam sis vim li cas thiaj li nyuaj ua kom tau ua luaj? Kuv yeej cia siab tias kuv yuav tsis raug ntuas. Kuv yog ib tug neeg tais caus heev; raws li ib txwm mas, thaum tib neeg ntsia ntsoov kuv thiab hais lus nrov nrov, kuv lub siab pib dhia ceev ceev. Yog kuv ntsib kev ntuas tiag tiag thiab cov lus ntawd hnyav npaum li ntawd, soj ntsuam tej uas muaj tseeb zoo li ntawd, kuv yuav tiv taus li cas? Qhov ntawd tsis ua rau kuv ua npau suav phem lod? Txhua tus hais tias kev ntuas mas zoo, tiam sis kuv tsis pom tias qhov ntawd zoo li cas li. Tus neeg ntawd tsis yog raug qhov ntawd ua rau ntshai lod? Yog kuv raug ntuas, kuv los yeej yuav ntshai thiab.” Qhov no tsis yog qhov kev cuam tshuam uas tshwm sim los ntawm cov lus ntawm cov uas tso tej kev xav tsis zoo tawm lod? Qhov kev cuam tshuam no puas yog qhov zoo los sis qhov tsis zoo? (Qhov tsis zoo.) Cov lus hais tsis zoo no tuaj yeem ua kev puas tsuaj loj heev rau cov uas txaus siab hlo caum qhov tseeb! Yog li, qhia Kuv seb, cov uas pheej tso tej kev xav tsis zoo tawm thiab tshaj tawm txoj kev tuag ntawd puas yog Ntxwgnyoog cov tub qhe? Lawv puas yog cov tib neeg uas cuam tshuam pawg ntseeg tes hauj lwm? (Yog.)

Ib txhia tib neeg ua raws li lawv tus kheej tej tswv yim thiab ua txhaum tej hauv paus ntsiab lus. Tom qab raug ntuas lawm, lawv xav tias txawm ua hauj lwm hnyav thiab them tus nqi los xij, lawv tseem raug ntuas thiab, yog li ntawd lawv lub siab thiaj li puv npo nrog txoj kev tsis mloog lus, thiab lawv tsis lees txais qhov raug nthuav tawm los sis kev soj ntsuam. Lawv ntseeg hais tias Vajtswv tsis ncaj ncees thiab Vajtswv lub tsev tsis ncaj ncees rau lawv, vim ib tug neeg uas muaj peev xwm zoo li lawv, uas tiv kev txom nyem ntau heev thiab them tus nqi siab heev, tsis raug Vajtswv lub tsev qhuas thiab haj tseem raug ntuas thiab. Los ntawm lawv txoj kev tsis mloog lus ntawd thiaj li tshwm muaj kev yws, thiab lawv yuav tso lawv tej kev xav tsis zoo tawm: “Raws li kuv pom mas, tsis muaj ib yam dab tsi nyuaj dua qhov ntseeg vajtswv; qhov ntawd yeej nyuaj tiag tiag los txais qee cov koob hmoov thiab xyiv fab rau txoj hmoov hlub me ntsis. Kuv tau them tus nqi siab npaum li ntawd, tiam sis kuv raug ntuas vim ua ib yam tsis zoo xwb. Yog ib tug neeg zoo li kuv ua tsis tau tes hauj lwm no, leej twg yuav ua tau? Tsis yog tias vajtswv ncaj ncees lod? Vim li cas kuv thiaj li tsis muaj peev xwm paub txog nws txoj kev ncaj ncees? Ua li cas vajtswv txoj kev ncaj ncees thiaj li tsis mus raws li tib neeg tej kev xav phem li?” Lawv tsis soj ntsuam yam uas lawv tau ua uas ua txhaum tej hauv paus ntsiab lus los sis tej moj yam qias vuab tsuab twg uas lawv tau nthuav tawm. Tsis yog lawv tsuas tsis muaj ib qho kev tu siab los sis kev zwm rau kiag li xwb—lawv haj tseem txiav txim thiab tawm tsam yam qhib lug thiab. Tom qab hnov lawv hais cov lus zoo li no, tib neeg feem coob pib muaj kev khuv leej rau lawv me ntsis thiab raug lawv cuam tshuam: “Yeej muaj tseeb tiag, tsis yog lod? Lawv twb ntseeg Vajtswv tau nees nkaum xyoo lawm los tseem ntsib kev ntuas zoo li no thiab. Yog ib tug neeg uas ntseeg tau nees nkaum xyoo lawm es twb tsis paub tseeb tias puas tau txais kev cawm dim, ces cov tib neeg zoo li peb haj yam tsis muaj kev cia siab lawm.” Tsis yog lawv raug tshuaj lom lawm lod? Thaum tso tej kev xav tsis zoo tawm lawm, cov tshuaj lom tau raug tseb mus lawm, zoo li ib lub noob uas cog rau hauv tib neeg lub siab, tuaj cag, tuaj kaus, tawg paj, thiab txi txiv nyob hauv lawv lub hlwb. Yam tsis paub txog, lawv raug tshuaj lom lawm, thiab nyob hauv lawv tshwm sim kev tawm tsam thiab kev yws txog Vajtswv. Thaum cov tib neeg ntawd raug ntuas lawm, lawv dhau los ua neeg tsis mloog Vajtswv lus thiab tsis txaus siab rau qhov uas Vajtswv lub tsev daws lawv ntawd. Tsis yog lawv tsis muaj ib tug cwj pwm uas lees txim hloov dua siab tshiab thiab lees txhaum xwb, lawv tseem cav, hais daws, thiab tiv thaiv lawv tus kheej. Lawv qhia rau txhua qhov chaw tias lawv tau tiv kev txom nyem ntau npaum li cas, lawv tau ua hauj lwm dab tsi, thiab lawv tau ua tej dej num dab tsi nyob rau hauv ntau xyoo ntawm lawv txoj kev ntseeg, thiab tias tam sim no tsis yog lawv tau txais nqi zog, lawv ho ntsib kev ntuas. Tsis yog lawv tsuas tsis paub txog lawv tus kheej txoj kev qias vuab tsuab thiab tej kev ua yuam kev uas lawv tau ua los ntawm qhov raug ntuas xwb, tiam sis lawv haj tseem tshaj tawm lub tswv yim tias txoj kev uas Vajtswv lub tsev tau coj rau lawv ntawd tsis ncaj ncees thiab tsis muaj laj thawj li, tias lawv yuav tsum tsis txhob raug coj rau zoo li ntawd, thiab tias yog lawv raug ua li ntawd, ces Vajtswv tsis ncaj ncees. Qhov laj thawj uas lawv tso tej kev xav tsis zoo no tawm yog vim lawv lees txais tsis tau kev ntuas los sis qhov muaj tseeb tias lawv tau ua yuam kev, thiab haj yam tsis lees txais los sis lees paub qhov muaj tseeb tias lawv tau ua rau cov kwv tij thiab cov nkauj muam txoj kev nkag mus rau hauv lub neej txoj sia thiab pawg ntseeg tes hauj lwm raug kev puas tsuaj. Lawv ntseeg hais tias lawv tau ua yog lawm, thiab tias Vajtswv lub tsev thiaj li yog tus ua yuam kev uas ntuas lawv. Los ntawm qhov tso tej kev xav tsis zoo tawm ntawd, mas yog lawv xav qhia rau tib neeg hais tias Vajtswv lub tsev coj rau tib neeg tsis ncaj ncees: Thaum ib tug neeg ua yuam kev, Vajtswv lub tsev yuav tuav qhov txhaum ntawd tawm tsam lawv, tuav nkaus qhov teeb meem no thiab ntuas lawv yam tsis muaj kev hlub tshua li, mus txog rau theem uas lawv dhau los ua neeg mloog lus thiab xav hais tias lawv tsis tau ua ib yam txiaj ntsig dab tsi li, uas tsis muaj leej twg pe hawm lawv ntxiv lawm, tsis txaus siab rau lawv tus kheej ntxiv lawm, thiab tsis muaj cuab kav thov cov nqi zog ntawm Vajtswv ntxiv lawm—tsuas yog thaum ntawd xwb Vajtswv lub tsev thiaj li yuav ua tau tiav lub hom phiaj. Lawv lub hom phiaj ntawm kev tso tej kev xav tsis zoo no tawm yog los ua kom muaj neeg ntau ntxiv los tiv thaiv lawv, los ua kom muaj neeg ntau ntxiv to taub “qhov muaj tseeb ntawm qhov xwm txheej” thiab kom pom tias lawv tau tiv kev txom nyem ntau npaum li cas nyob rau hauv ntau xyoo ntawm lawv txoj kev ntseeg Vajtswv, lawv tej txiaj ntsig ntawd tseem ceeb npaum li cas thiab lawv tsim nyog npaum li cas, thiab lawv yog ib tug ntseeg uas muaj kev paub dhau los ntau npaum li cas. Nrog rau qhov no, lawv xav kom lwm tus los sawv rau lawv sab los koom tes tawm tsam Vajtswv lub tsev tej kev cai tswj thiab kev ntuas uas Vajtswv lub tsev tau ua rau lawv. Qhov no tsis yog muaj lub ntsiab xeeb txawm uas rub tib neeg los rau lawv sab lod? (Yog.) Lawv lub hom phiaj ntawm qhov tso tej kev xav tsis zoo tawm zoo li no yog los rub tib neeg los rau lawv sab thiab coj tib neeg mus yuam kev, thiab lawv cuam tshuam pawg ntseeg tes hauj lwm los tso lawv txoj kev chim siab tawm. Txawm hais tias thaum kawg qhov ntawd muaj kev cuam tshuam li cas rau tib neeg thaum lawv tau tso lawv txoj kev xav tsis zoo tawm los xij, qhov kev cuam tshuam thiab qhov tshwm sim los yog tib neeg raug coj mus yuam kev thiab raug cuam tshuam, raug ua phem rau. Qhov ntawd tsis tsim kho. Qhov ntawd yog ib qho kev cuam tshuam uas tsis zoo.

Thaum tib neeg ntsib kev ntuas, tej no feem ntau yog cov kev xav tsis zoo uas lawv tso tawm. Lawv lees txais tsis tau kev ntuas thiab tsis txaus siab thiab tsis mloog lus hauv lawv lub siab, lees txais tsis tau qhov ntawd ntawm Vajtswv los. Lawv thawj qhov kev teb rov qab tsis yog los nrhiav qhov tseeb txog kev ntuas thiab los tig xav txog, paub, thiab soj ntsuam lawv tus kheej, los saib seb lawv tau ua yuam kev dab tsi tiag tiag, seb lawv tej kev ua puas mus raws li tej hauv paus ntsiab lus, vim li cas Vajtswv lub tsev thiaj li ntuas lawv, thiab seb qhov uas lawv raug coj rau zoo li no puas yog vim kev chim siab ntawm tus kheej los sis puas ncaj ncees thiab tsim nyog. Lawv thawj qhov kev teb rov qab tsis yog los nrhiav tej yam no—tiam sis, lawv thawj qhov kev teb rov qab yog los vam khom rau lawv tej kev tsim nyog, tej kev txom nyem uas tau tiv, thiab kev muab fij rau los tawm tsam kev ntuas. Thaum ua li ntawd, txhua yam uas tshwm sim hauv lawv lub siab yeej yuav tsum yog qhov tsis zoo, tsis muaj ib yam dab tsi zoo li. Yog li, thaum lawv sib qhia txog lawv tej kev xav thiab kev to taub tom qab raug ntuas lawm, lawv yeej tso tej kev xav tsis zoo tawm thiab tshaj tawm tej kev xav phem xwb. Qhov tso tej kev xav tsis zoo tawm thiab tshaj tawm tej kev xav phem yuav tsum raug cheem thiab txwv kom ncav sij hawm, tsis yog tso cai thiab tsis quav ntsej. Vim tej yam tsis zoo no yuav tab kaum, cuam tshuam, thiab ua kev puas tsuaj rau txhua tus neeg txoj kev nkag mus rau hauv lub neej txoj sia, thiab tej ntawd ua tsis tau ib qho hauj lwm uas zoo, thiab haj yam tsis tuaj yeem txhawb tib neeg txoj kev ua siab ncaj rau Vajtswv los sis lawv txoj kev ua lawv tej dej num yam ua siab ncaj. Yog li ntawd, thaum cov tib neeg zoo li no tso tej kev xav tsis zoo tawm, lawv tab tom cuam tshuam lub neej hauv pawg ntseeg thiab yuav tsum raug txwv.

3. Kev Tso Tej Kev Xav Tsis Zoo Tawm Thaum Lub Koob Npe, Lub Meej Mom, thiab Tej Txiaj Ntsim Raug Puas Tsuaj

Dhau ntawm qhov tso tej kev xav tsis zoo tawm tom qab raug rho tawm los sis raug ntuas lawm, nyob rau hauv lwm qhov xwm txheej twg ntxiv uas tib neeg tso tej kev xav tsis zoo tawm? (Thaum tib neeg tej txiaj ntsim raug puas tsuaj thiab lawv xav tias lawv poob peev.) (Ib txhia tib neeg ua lawv tej dej num tau ntau xyoo lawm, tiam sis thaum lawv muaj mob los sis muaj kev puas tsuaj los raug rau lawv tsev neeg, lawv hais tias, “Kuv tau txais dab tsi los ntawm kev ntseeg Vajtswv tau ntau xyoo no?”) Lo lus uas cov neeg xav tsis zoo nyiam hais ces yog “Kuv tau txais dab tsi?” Tseem muaj lwm qhov xwm txheej twg ntxiv? (Ib txhia tib neeg tsis yog ua lawv tej dej num tsis muaj txiaj ntsig xwb, tiam sis lawv pheej ua yuam kev, yog li ntawd lawv thiaj li hais tias, “Vim li cas Vajtswv thiaj li qhia lwm tus tiam sis tsis qhia kuv? Vim li cas Vajtswv thiaj li muab lub peev xwm zoo li ntawd rau lawv hos kuv lub peev xwm ho tsis zoo ua luaj?” Lawv tsis tig xav txog lawv tus kheej tej teeb meem, tiam sis lawv ho muab lub luag hauj lwm thawb rau Vajtswv, hais tias Vajtswv tsis tau qhia los sis coj lawv kev, thiab tom qab ntawd lawv pheej yws txog Vajtswv.) Lawv hais tias Vajtswv tsis ncaj ncees, nug hais tias vim li cas Nws thiaj li qhia thiab pub txoj hmoov hlub rau lwm tus tiam sis tsis pub rau lawv, yws txog qhov tias vim li cas lawv tej dej num thiaj li tsis tau txiaj ntsig—lawv tab tom yws. Cov piv txwv uas nej muab ntawd zoo kawg li. Puas tseem muaj ntxiv? (Ib txhia tib neeg muaj kev chim siab puv npo thaum lawv tes dej num raug hloov, nug hais tias vim li cas qhov no thiaj li tshwm sim, thiab xav tias cov thawj coj thiab cov neeg ua hauj lwm tab tom tsom ntsoov rau lawv thiab tab tom ua kom txhua yam nyuaj rau lawv.) Puas yog lawv xav tias Vajtswv lub tsev saib tsis taus lawv? (Yog.) Ib txhia tib neeg uas tsis ua tes hauj lwm tiag tiag raug rho tawm thiab raug tshem tawm, thiab lawv xav tias lawv lub koob npe thiab lub meej mom raug kev puas tsuaj lawm. Txhawm rau tso lawv txoj kev tsis txaus siab tawm, lawv pheej yws nyob rau tom qab: “Kuv ntseeg vajtswv tau ib lub sij hawm luv luv xwb, kuv lub peev xwm nkag siab tsis zoo, thiab kuv lub peev xwm tsis zoo. Kuv tsis zoo npaum li lwm tus. Yog lawv hais tias kuv tsis muaj peev xwm, kuv yeej tsis muaj peev xwm tiag!” Nyob sab nraud mas, lawv lees paub lawv tej kev tsis zoo, tiam sis qhov tseeb tiag, lawv tab tom ua kom tau tej txiaj ntsim uas lawv tau poob lawm ntawd rov qab los, pheej yws tas li, thiab hais tej yam kom tau txais tib neeg txoj kev khuv leej thiab ua rau lawv xav tias Vajtswv lub tsev tsis ncaj ncees. Thaum lawv tej txiaj ntsim raug puas tsuaj xwb, lawv tsis txaus siab li, thiab pheej cia siab tias yuav tau lawv tej kev poob peev rov qab thiab tau txais kev them rov qab. Yog lawv tsis tau, lawv poob lawv txoj kev ntseeg rau Vajtswv thiab tsis paub yuav ntseeg Nws li cas ntxiv lawm, hais tej yam xws li, “Yav dhau los kuv xav tias kev ntseeg vajtswv mas zoo kawg li, thiab tias qhov ua ib tug thawj coj los sis ib tug neeg ua hauj lwm hauv pawg ntseeg mas yeej yuav tau tej koob hmoov loj xwb. Kuv yeej xav tsis txog tias yuav raug rho tawm thiab raug tshem tawm, thiab raug lwm tus tsis lees txais. Xav tsis txog tias ib yam dab tsi zoo li no tuaj yeem tshwm sim hauv vajtswv lub tsev! Tsis yog txhua tus uas ntseeg vajtswv yeej yog ib tug neeg zoo, thiab tsis yog txhua yam uas vajtswv lub tsev ua ntawd sawv cev tau rau vajtswv los sis kev ncaj ncees.” Lub ntsiab xeeb txawm ntawm cov lus zoo li no yog dab tsi? Lawv cov lus, txawm yog hais tawm ncaj qha los sis zais ntshis, puav leej qhia txog ib qho kev tawm tsam. Cov lus ntawd qhia txog kev txiav txim thiab kev tsis lees txais. Nyob sab nraud mas, zoo li lawv tsom ntsoov rau ib tug thawj coj twg los sis pawg ntseeg, tiam sis qhov tseeb tiag nyob hauv lawv lub siab mas cov lus no tsom rau Vajtswv, Nws cov lus, thiab cov kev cai tswj fwm thiab cov kev cai tswj ntawm Nws lub tsev. Tag nrho yog lawv tso lawv txoj kev chim siab tawm. Vim li cas lawv thiaj li tso lawv txoj kev chim siab tawm? Lawv xav tias lawv poob peev lawm; nyob hauv lawv lub siab, lawv xav tias tsis ncaj ncees thiab tsis txaus siab, thiab lawv xav thov tej yam thiab tau txais kev them rov qab. Txawm hais tias tej kev xav tsis zoo uas cov tib neeg zoo li no tso tawm ntawd tsis ua ib qho kev hem thawj loj rau cov tib neeg feem coob los, cov lus qias no zoo li cov yoov los sis cov kab laum uas ua ib qho kev cuam tshuam tsis loj los me rau tib neeg lub siab. Tib neeg feem coob xav tias qias thiab tsis nyiam kiag li thaum lawv hnov cov lus no, tiam sis yeej muaj cov uas yog tib hom li cov tib neeg zoo li no, cov uas muaj tib cov moj yam, lub ntsiab tseeb, thiab kev nyiam, uas yog cov noog uas muaj tib cov plaub lwj li cov tib neeg ntawd, thiab cov uas raug lawv cuam tshuam. Qhov ntawd yog ib qho uas zam tsis dhau. Tsis tas li ntawd xwb, ib txhia tib neeg uas muaj lub siab ntseeg me uas tsis muaj kev paub cais tuaj yeem raug cuam tshuam los ntawm cov lus tsis zoo no, thiab lawv txoj kev ntseeg rau Vajtswv tuaj yeem raug cuam tshuam. Cov tib neeg no twb tsis paub tias kev ntseeg Vajtswv yog txhawm rau dab tsi tiag tiag, thiab lawv tsis paub meej txog tej qhov tseeb ntawm cov zeem muag, thiab lawv lub peev xwm nkag siab qhov tseeb kuj tsis zoo thiab. Thaum lawv hnov cov lus tsis zoo no, lawv yeej lees txais tej ntawd tau yooj yim yam tsis paub txog li, thiab yog li ntawd thiaj li raug cuam tshuam. Cov lus no yog tshuaj lom. Cov lus ntawd muab cog rau hauv tib neeg lub siab tau yooj yim. Thaum ib tug neeg lees txais cov lus tsis zoo no lawm, thaum Vajtswv lub tsev hais kom lawv ua ib teg dej num, lawv teb rov qab yam tsis quav ntsej. Thaum Vajtswv lub tsev hais kom lawv koom tes rau qee tes hauj lwm mas, lawv tsis kub tsis txias. Lawv xav ris ces ris; yog tsis xav ris ces lawv yuav tsis ris, lawv yeej ib txwm muaj tej laj thawj thiab hais ub hais no. Ua ntej lawv hnov cov lus tsis zoo ntawd, lawv muaj lub siab dawb paug me ntsis hauv lawv txoj kev ntseeg Vajtswv, thiab lawv muaj ib tug cwj pwm uas zoo, thiab nquag plias thaum ua lawv tej dej num. Tiam sis tom qab hnov cov lus tsis zoo ntawd lawm, lawv pib dhau los tsis quav ntsej, thiab lawv kuj txias rau cov kwv tij thiab cov muam thiab. Lawv ceev faj cov kwv tij thiab cov nkauj muam ntawd. Thaum pawg ntseeg npaj kom lawv ua ib teg dej num mas, lawv pheej zam thiab thawb qhov ntawd mus tas li, qhia tias lawv tsis muaj siab xav ua li. Yav dhau los, lawv tuaj koom kev sib txoos ua ke raws sij hawm, tiam sis tom qab hnov cov lus ntawd lawm, lawv thiaj li tsuas tuaj koom qee zaus lawm xwb—lawv tuaj thaum lawv muaj kev zoo siab, tiam sis tsis tuaj thaum lawv tsis muaj kev zoo siab. Yog muaj ib yam dab tsi tsis zoo tshwm sim hauv tsev, lawv txhawj tias tej zaum yuav muaj kev puas tsuaj tshwm sim, yog li ntawd lawv thiaj li tuaj koom kev sib txoos ua ke ntau ntxiv thiab nyeem Vajtswv cov lus ntau ntxiv. Yog lawv zoo siab heev, xyiv fab, thiab raug txhawb siab tom qab nyeem Vajtswv cov lus, lawv haj tseem yuav fij nyiaj me ntsis thiab. Tiam sis thaum txhua yam nyob hauv tsev nyab xeeb lawm, lawv rov qab tsis tuaj koom kev sib txoos ua ke ntxiv lawm. Thaum cov kwv tij thiab cov nkauj muam sim sib qhia nrog lawv hauv kev cia siab tias yuav txhawb pab lawv, lawv hais ub hais no tsis kam; thiab thaum cov kwv tij thiab cov nkauj muam mus rau ntawm lawv tsev, lawv yuav tsis qhib qhov rooj, tab txawm thaum lawv yeej nyob hauv tsev tiag tiag los xij. Qhov no yog ua li cas lawm? Lawv tau raug cuam tshuam los ntawm cov lus tsis zoo ntawd—lawv tau raug tshuaj lom thiab ntseeg hais tias cov ntseeg Vajtswv mas vam khom tsis tau. Thaum xub thawj, lawv tso siab rau cov tib neeg no kawg, thiab thaum lawv nyeem Vajtswv cov lus lawv xav tias, “Tej no yog Vajtswv cov lus, cov tib neeg no yog kuv cov kwv tij thiab cov nkauj muam, qhov no yog Vajtswv lub tsev—zoo tiag tiag li!” Tiam sis tom qab lawv hnov cov lus tsis zoo uas qee tus tib neeg tshaj tawm, lawv hloov lawm. Lawv tsis yog raug cuam tshuam lawm lod? Lawv txoj kev nkag mus rau hauv lub neej txoj sia tsis yog raug kev puas tsuaj lawm lod? (Yog.) Leej twg cuam tshuam lawv? Qhov ntawd yog cov tib neeg uas tso tej kev xav tsis zoo tawm, cov uas hais cov lus ntawd. Yog ib tug neeg twg tseem tsis tau cog ib lub hauv paus ruaj khov hauv txoj hau kev tseeb los sis tseem tsis tau noj thiab haus Vajtswv cov lus mus txog theem uas to taub qhov tseeb, lawv yooj yim raug cuam tshuam tau los ntawm tej yam tsis zoo. Thiab tshwj xeeb tshaj mas yog, cov uas tsis muaj peev xwm nkag siab qhov tseeb, tiam sis tsuas saib tej kev taug, ntsuam xyuas qhov xwm txheej, thiab saib tej kev tshwm sim nyob sab nraud ntawd—lawv haj yam raug cuam tshuam tau yooj yim los ntawm cov lus tsis zoo ntawd. Tshwj xeeb tshaj yog thaum lawv tau hnov tib neeg hais tej lus yuam kev xws li, “Vajtswv lub tsev kuj tsis yog yuav ncaj ncees tas li, thiab tsis yog txhua yam uas vajtswv lub tsev ua ntawd yog yam zoo,” lawv txoj kev ceev faj haj yam loj ntxiv tuaj. Ib kab lus uas mus raws li qhov tseeb tsis yog yeej ib txwm raug lees txais tau yooj yim, tiam sis ib kab lus tsis zoo, ib kab lus yuam kev, ib kab lus uas tawm tsam qhov tseeb—tej no tuaj yeem tuaj cag hauv tib neeg lub siab tau yooj yim heev, thiab qhov tshem tej ntawd tawm mas tsis yooj yim li. Tib neeg lees txais qhov tseeb mas nyuaj dhau thiab lawv lees txais tej lus yuam kev mas yooj yim dhau!

Ib txhia tib neeg uas muaj kev ua neeg tsis zoo muab lawv tus kheej lub meej mom, lub koob npe, kev xyiv fab ntawm sab cev nqaij daim tawv, thiab lawv tus kheej tej khoom muaj nqis thiab tej txiaj ntsim saib tseem ceeb tshwj xeeb. Thaum lawv lub koob npe, lub meej mom, thiab tej txiaj ntsim raug puas tsuaj ncaj qha, lawv tsis lees txais qhov no los ntawm Vajtswv los, los sis lees txais qhov xwm txheej uas Vajtswv tau tsim tsa rau lawv lawm, thiab lawv tsis muaj peev xwm tso tej yam no tseg es tsis quav ntsej txog lawv txoj kev tau txais thiab kev poob ntawm tus kheej. Tiam sis, lawv siv ntau lub cib fim los tso lawv txoj kev tsis txaus siab thiab txoj kev tsis mloog lus tawm, thiab tso lawv tej kev xav tsis zoo tawm, ua rau qee tus tib neeg raug ua phem loj heev vim qhov ntawd. Yog li ntawd, thaum cov tib neeg zoo li no tso tej kev xav tsis zoo tawm, cov thawj coj pawg ntseeg yuav tsum xub paub qhov xwm txheej kom ncav sij hawm, thiab cheem thiab txwv tsis pub cov tib neeg ntawd ua kom ncav sij hawm. Muaj tseeb tias, cov thawj coj pawg ntseeg kuj yuav tsum ua tus pib muab cov tib neeg ntawd nthuav tawm, thiab qhia rau cov kwv tij thiab cov nkauj muam txog qhov yuav ua li cas thiaj li paub cais lawv, thiab vim li cas lawv thiaj li hais cov lus tsis zoo thiab yuam kev no, nrog rau yuav coj rau thiab paub cais cov lus no li cas kom thiaj li tiv thaiv tus kheej kom tsis txhob raug coj mus yuam kev thiab raug ua phem loj heev los ntawm cov lus ntawd. Yuav tsum muaj peev xwm paub cais thiab soj ntsuam cov tib neeg zoo li no, kom thiaj li zam tau thiab tsis lees txais lawv, thiab tsis raug lawv coj mus yuam kev ntxiv lawm. Qhov no yog tes hauj lwm uas cov thawj coj pawg ntseeg yuav tsum ua. Muaj tseeb tias, yog cov kwv tij thiab cov nkauj muam dog dig pom cov tib neeg zoo li no thiab paub cais lawv txoj kev ua neeg lub ntsiab tseeb, lawv kuj yuav tsum nyob deb ntawm cov tib neeg ntawd thiab. Yog koj tsis muaj lub peev xwm txaus los thaiv, los sis lub siab ntseeg los txhawb, pab, thiab hloov lawv, thiab koj xav tias koj tiv tsis taus lawv cov lus tsis zoo thiab lawv cov lus tsis txaus siab thiab kev tsis mloog lus, ces txoj hau kev zoo tshaj plaws yog nyob kom deb. Yog koj xav tias koj muaj zog heev, muaj lub siab ntseeg me ntsis lawm, es txawm leej twg yuav hais dab tsi los, koj muaj peev xwm paub cais thiab tsis raug cuam tshuam, txawm tej kev xav tsis zoo uas lawv tso tawm ntawd yuav hnyav npaum li cas los xij, qhov ntawd yuav tsis hloov koj txoj kev ntseeg rau Vajtswv, tias koj muaj peev xwm paub cais cov tib neeg zoo li no, thiab koj kuj muaj peev xwm nthuav tawm thiab txwv lawv thaum lawv tso tej kev xav tsis zoo tawm—ces koj tsis tas yuav zam los sis ceev faj cov tib neeg zoo li no lawm. Tiam sis yog koj xav tias koj tsis muaj lub siab ntseeg zoo li ntawd, ces txoj kev thiab lub hauv paus ntsiab lus los coj rau cov tib neeg zoo li no yog nyob deb ntawm lawv. Qhov no puas yooj yim ua tau? (Yooj yim.) Ib txhia tib neeg hais tias, “Kuv ua puas tau siab ntev rau lawv, uv lawv, thiab zam txim rau lawv?” Qhov ntawd los kuj tsis ua li cas thiab, qhov ntawd tsis txhaum, tiam sis tsis yog qhov tseem ceeb tshaj plaws los sis txoj kev xyaum ua raws uas zoo tshaj plaws. Yog hais tias koj ua siab ntev, zam, thiab tso cai rau lawv, thiab thaum kawg, koj raug lawv coj mus yuam kev thiab raug rub los rau lawv sab. Thiab txawm Vajtswv lub tsev yuav yug thiab txhawb koj npaum li cas los xij, koj tsis hnov qhov ntawd; los sis thaum koj nyeem Vajtswv cov lus, koj pheej raug cuam tshuam los ntawm lawv tej kev xav thiab cov lus hais, thiab kiag thaum koj xav txog ib lo lus uas lawv hais xwb, koj txoj kev xav raug cuam tshuam, thiab koj tsis muaj peev xwm nyeem mus ntxiv. Thiab thaum cov kwv tij thiab cov nkauj muam sib qhia lawv txoj kev to taub txog qhov tseeb—tshwj xeeb tshaj yog thaum lawv sib qhia txog kev paub cais cov tib neeg zoo li no cov lus—koj rov raug lawv cov lus rub thiab raug cuam tshuam lawm, ua rau koj lub siab ntxhov quav niab. Yog muaj li no, ces koj yuav tsum nyob deb ntawm cov tib neeg zoo li no. Koj txoj kev ua siab ntev thiab kev uv taus yuav tsis muaj qab hau, thiab tsis yog txoj kev zoo tshaj plaws los thaiv cov tib neeg zoo li no. Yog hais tias koj txoj kev ua siab ntev thiab kev uv taus ntawd tsis yog ib txoj kev coj uas ua txuj nyob rau sab nraud, tiam sis qhov tseeb tiag koj yeej muaj lub siab ntseeg txaus los tim ntsej muag nrog cov tib neeg zoo li no. Txawm lawv yuav hais dab tsi los xij, txawm koj tsis hais tawm los, koj tseem tuaj yeem paub cais lawv hauv koj lub siab; tsuas yog koj muaj peev xwm ua siab ntev rau lawv thiab tsis quav ntsej lawv, tiam sis txhua lo lus tsis zoo los sis cov lus ntawm kev to taub yuam kev thiab kev yws txog Vajtswv uas lawv hais yuav tsis cuam tshuam koj txoj kev ntseeg rau Vajtswv hlo li, thiab yuav tsis cuam tshuam koj txoj kev ua siab ncaj hauv kev ua koj tes dej num los sis koj txoj kev zwm rau Vajtswv. Nyob rau hauv qhov xwm txheej ntawd, koj tuaj yeem zam thiab ua siab ntev rau lawv. Lub hauv paus ntsiab lus ntawm kev xyaum thev taus thiab ua siab ntev yog dab tsi? Tsis raug ua phem. Tsis quav ntsej lawv, cia lawv hais txhua yam uas lawv xav hais—qhov tseeb tiag, cov tib neeg zoo li no tsuas yog cov neeg tsim teeb meem uas tsis muaj laj thawj, thiab lawv tawv ncauj yam tsis paub txaj muag. Txawm koj yuav sib qhia qhov tseeb nrog lawv npaum li cas los xij, lawv yuav tsis lees txais qhov ntawd; lawv yog cov dab thiab Ntxwgnyoog hom, thiab qhov sib qhia nrog lawv mas tsis muaj qab hau. Yog li ntawd, ua ntej Vajtswv lub tsev ntsaig lawv tawm mus thiab daws lawv, yog koj muaj lub siab ntseeg los zam thiab ua siab ntev rau lawv yam tsis raug ua phem, qhov ntawd yog qhov zoo tshaj plaws. Puas yog feem ntau nej siv lub hauv paus ntsiab lus ntawm kev zam thiab kev ua siab ntev no? Nej tiv nrog txhua hom neeg, tiam sis muaj qee zaus nej tsis xyuam xim thiab raug coj mus yuam kev me ntsis; tom qab ntawd nej paub txog qhov ntawd, hnov tias tshuav Vajtswv nqi, thov Vajtswv ob peb hnub, thiab hloov nej tus yam ntxwv, thiab nej los nyob ze rau ntawm Vajtswv ntxiv. Feem ntau, nej pom tau meej meej tias cov tib neeg zoo li no tsis zoo, thiab tias lawv yog cov dab li. Txawm hais tias koj tuaj yeem nrog lawv sib cuag li ib txwm, tiam sis nyob hauv koj lub siab koj nyob deb thiab tsis nyiam lawv. Txawm lawv yuav hais dab tsi los sis cov lus tsis zoo thiab cov kev xam pom twg uas lawv hais tawm los xij, koj ua ntsej lag muag dig, tsis quav ntsej qhov ntawd, thiab xav tias, “Hais txhua yam uas koj xav hais. Kuv paub cais koj lawm. Kuv yeej tsis nrog cov tib neeg zoo li koj sib raug zoo li.” Qhov no puas yog lub hauv paus ntsiab lus uas nej ua raws feem ntau thaum daws cov teeb meem zoo li no? Qhov ua tau qhov no los kuj tsis phem thiab; kuj tsis yooj yim thiab cheem tsum kom to taub qee qhov tseeb thiab muaj lub siab ntseeg txog ib theem twg thiab. Yog koj twb tsis muaj lub siab ntseeg no, ces koj yuav tsis muaj peev xwm sawv khov kho, thiab koj yuav ua tsis tau koj tes dej num kom zoo.

4. Kev Tso Tej Kev Xav Tsis Zoo Tawm Thaum Txoj Kev Ntshaw Kom Tau Koob Hmoov Raug Rhuav Tshem

Qhov tso tej kev xav tsis zoo tawm ntawd mas muaj lwm qhov kev qhia tshwm uas pom tau meej. Ib txhia tib neeg hais tias, “Kuv tau ntseeg Vajtswv ntau xyoo los lawm, thiab kuv tau txais dab tsi?” Thaum cov tib neeg zoo li no tso tej kev xav tsis zoo tawm, qhov tseem ceeb uas lawv hais ces yog, “Kuv tau txais dab tsi?”—uas txhais tau hais tias lawv tsis tau txais ib yam dab tsi li. Lawv ntseeg hais tias qhov tau txais qee yam txiaj ntsim los sis koob hmoov los ntawm Vajtswv lub tsev los sis los ntawm Vajtswv thaum ntseeg Nws ntawd mas nyuaj tshwj xeeb, thiab tias tib neeg yuav tsum fij txoj kev hlub loj tshaj plaws thiab muaj txoj kev ua siab ntev loj tshaj plaws, thiab tsis txhob maj xav tau txiaj ntsig sai. Hais txog Vajtswv cov lus uas nthuav tib neeg tawm, ntuas tib neeg, kho tib neeg kom dawb huv, thiab ntxuav tib neeg txoj kev qias vuab tsuab kom dawb huv ntawd, lawv ntseeg hais tias qhov no tsuas yog cov lus zoo nyob sab nraud xwb uas ntseeg tsis tau tag nrho; lawv xav tias yog lawv xyaum ua raws li Vajtswv cov lus, lawv yeej yuav poob peev ntau heev. Lawv xav tias qhov tau txais txiaj ntsim thiab qhov zoo thiab ua tau raws li lawv tej kev ntshaw thiab tej kev xav tau ntawd yog qhov tseem ceeb tshaj plaws nyob rau txhua lub sij hawm, thiab seb lawv puas xyaum ua raws qhov tseeb los tsis xyaum ntawd mas yeej tsis tseem ceeb kiag li—lawv ntseeg hais tias tsuav lawv tsis ua kev phem xwb, ces txaus lawm, thiab pawg ntseeg yuav tsis tshem lawv tawm. Tib neeg feem coob xav li cas tom qab hnov cov lus xav tsis zoo no? Puas yog lawv lub siab yeej xav li ntawd thiab pom zoo rau cov lus no, los sis lawv puas hnov saib tsis taus cov lus no me ntsis, thiab xav hais tias cov tib neeg no twm xeeb, ntxim ntxub, lim hiam, thiab qias neeg, thiab muaj peev xwm paub cais, qhia tshwm, thiab txwv lawv, cheem tsis pub lawv tso tej kev xav tsis zoo thiab kev tuag tawm txuas ntxiv? Tib neeg feem coob puas hnov tsis nyiam kiag li thiab txiav txim rau cov lus xav tsis zoo zoo li no, los sis lawv puas raug tej lus no coj mus yuam kev thiab dhau los xav tsis zoo? Ib txhia tib neeg, tom qab hnov cov lus no thiab pom hais tias lawv ob txhais tes khoob lug, txawm xav hais tias, “Qhov ntawd yeej muaj tseeb tiag! Kuv los kuj tsis tau txais ib yam dab tsi thiab. Nyob hauv Vajtswv lub tsev, kuv tsuas tau noj ib hnub peb pluag mov xwb, kuv tsis khoom tas li, thiab kuv yeej tsis tau txais lwm yam ntxiv li.” Nej puas muaj tej kev xav zoo li no? Nej puas hnov ib yam nkaus li ntawd? Cov uas to taub qhov tseeb yuav hais tias, “Koj hais tias koj tsis tau txais dab tsi ntawd txhais li cas? Peb tau txais ntau heev los ntawm Vajtswv! Peb tau los to taub qhov tseeb ntau heev!” Tiam sis ib txhia tib neeg tej zaum yuav tsis pom zoo nrog lawv, hais tias, “Qhov hais tias peb tau txais ‘ntau heev’ ntawd zoo li tsis tshua muaj tiag. Peb tsuas tau txais hmoov hlub me ntsis, tau txais qee lub cib fim los ua peb tej dej num, to taub qee cov kev qhuab qhia txog kev coj peb tus kheej, tau ntsib thiab paub ntau tus kwv tij thiab nkauj muam uas tuaj ntawm ntau qhov chaw tuaj, thiab muaj kev paub kev pom ntau heev. Qhov no tsuas suav hais tias tau txais me ntsis xwb.” Nej yog hom twg ntawm cov no? Puas yog muaj nyob hauv txhua hom no? (Yog.) Peb yuav sib tham txog qhov no los ntawm ob kis. Ua ntej tshaj, cia peb tham txog qhov uas hom neeg no ntseeg Vajtswv pheej txhawm rau kom tau txais hmoov hlub ntawd yog ua li cas—lawv ntseeg Vajtswv puas yog los caum kom tau txais qhov tseeb kom lawv thiaj li tau txais kev cawm dim? (Tsis yog, lawv ntseeg kom tau koob hmoov xwb.) Yog li ntawd, Vajtswv muab hmoov hlub, kev saib xyuas, kev hlub tshua, kev qhia, thiab kev paub tseeb rau lawv puas tsawg? (Tsis tsawg.) Yeej hais tau tias txhua tus tib neeg uas ntseeg Vajtswv puav leej tau txais Vajtswv txoj kev tsom kwm. Vajtswv txoj kev tsom kwm ntawd puas ntxaws? Puas muaj qee qhov piv txwv hauv lub neej tiag tiag txog qhov no? Tib neeg tau txais hom kev tsom kwm twg? (Ib hom uas pom tseeb dua me ntsis yog tom qab ntseeg Vajtswv lawm, peb tsis raug tej kev lim hiam ntawm lub ntiaj teb cuam tshuam mus ntxiv lawm. Peb tsis poob mus rau hauv txoj kev qias vuab tsuab los sis caum tej yam lim hiam ntawd, xws li mus rau tej tsev seev cev hmo ntuj, haus luam yeeb, haus cawv, thiab lwm yam ntxiv. Qhov tsawg kawg nkaus, peb tsis koom nrog tej yam no thiab kuv ntseeg hais tias peb raug tsom kwm heev nyob rau hauv qhov no.) Qhov no yog ib kis uas muaj tiag heev uas tib neeg pom tau thiab lawv tus kheej paub tau. Qhov tsis raug tej kev lim hiam ntawm lub ntiaj teb cuam tshuam thiab coj mus yuam kev, ua neej nyob zoo li ib tug tib neeg, thiab ua neej nyob hauv kev ua neeg li ib txwm muaj, muaj qhov zoo nkaus li tib neeg—qhov no yog ib qho piv txwv uas muaj tiag thiab yog pov thawj ntawm Vajtswv txoj kev tsom kwm. Puas tseem muaj ntxiv? (Tsis raug cov ntsujplig phem cuam tshuam thiab muaj peev xwm ua neej nyob hauv Vajtswv txoj kev tsom kwm.) Qhov no kuj yog ib qho piv txwv uas muaj tiag thiab. Tib neeg feem coob puas muaj qhov kev paub no? Nej puas to taub tau lub ntsiab lus uas nyob hauv qhov no? Ib txhia tib neeg hais tias, “Cov tsis ntseeg los yeej tsis raug cov ntsujplig phem cuam tshuam thiab. Muaj pes tsawg tus tsis ntseeg uas raug cov ntsujplig phem cuam tshuam?” Cov lus no puas yog? Nej xav tias cov lus no puas mus raws li qhov muaj tseeb? (Kuv cov phooj ywg kawm ntawv ua ke muaj ob peb leeg uas raug cov ntsujplig phem cuam tshuam. Ib txhia raug dab tsuam, thiab lwm tus hnov suab. Lawv tsis ntseeg Vajtswv thiab tsis paub tias yog ua li cas. Lawv nrhiav kev kho txhua qhov chaw tiam sis kho tsis tau li, lawv ua neej nyob hauv kev ntshai thiab kev poob siab; txom nyem siab heev. Tiam sis, vim kuv ntseeg Vajtswv txij thaum tseem me los, kuv yeej tsis tau raug cuam tshuam los sis raug kev txom nyem zoo li no li. Feem ntau, kuv lub siab nyob ruaj khov thiab kaj lug.) Cov ntseeg Vajtswv tseeb tsis muaj qhov kev txhawj xeeb no. Peb tsis txhawj txog qhov raug tus kab mob vwm los sis tsam raug cov ntsujplig phem cuam tshuam los sis raug ntsujplig phem nkag; peb tsis ntshai vim peb muaj Vajtswv. Tsis tas li ntawd, nyob hauv lub neej tiag tiag, cov ib txwm tsis ntseeg niaj hnub tham txog kev saib lub ntsej muag, saib looj phaj, thiab saib hmoov—nyob rau sab Hnub Poob mas, haj tseem muaj kev saib hnub qub thiab. Ib txhia tib neeg pe hawm cov mlom Npuj Das uas muaj koob nrov npe, cov ntsujplig phem, thiab cov mlom, thiab ib txhia tsis pe, tiam sis txawm lawv pe los tsis pe los xij, lawv txhua tus puav leej raug tej yam no cuam tshuam thiab txwv tsis ntau los tsawg. Piv txwv li, ua ntej tawm hauv tsev mus, lawv yuav tsum tau saib hmoov me ntsis seb mus rau sab twg thiaj li zoo thiab mus rau sab twg tsis zoo. Thaum qhib ib lub khw, lawv txiav txim siab seb muab lub rooj sau nyiaj tso rau qhov twg thiaj li yuav tau nyiaj thiab tso rau qhov twg yuav tsis tau, yuav muab khoom dab tsi tso rau hauv lub khw thiab yuav pe hawm cov mlom twg thiaj li yuav tau nyiaj txiag, thiab yuav muab qee yam khoom tso rau qhov twg kom tsis txhob rhuav lub looj phaj. Thaum tsiv tsev, lawv yuav tsum txiav txim siab seb lub sij hawm twg yog lub sij hawm zoo tsiv kom paub tseeb tias tsev neeg yuav vam meej yav tom ntej thiab zam tau tej xwm txheej phem, thiab txiav txim siab seb lub sij hawm twg yog lub sij hawm tsis zoo. Tab txawm yog cov tub ntxhais kawm ntawv los kuj raug tej kev ntseeg no cuam tshuam thaum lawv mus sib tw kawm ntawv thiab. Nyob rau hnub sib tw ntawv mas, lawv zam qhov hais cov lus uas txhais tias poob, thiab yuav tsum hais cov lus xws li “ua tau zoo heev” thiab “ua tau tiav” xwb. Txhua yam hauv lub neej—txij li cov me nyuam mus kawm ntawv, mus txog niam thiab txiv ua lawv lub neej txhua hnub, khwv nyiaj, tsiv tsev, nrhiav hauj lwm, nrog rau cov me nyuam txoj kev sib yuav, thiab lwm yam—puav leej raug qhov uas hu ua looj phaj thiab hmoov, nrog rau lwm yam tswv yim cuam tshuam. Yog li, thaum tib neeg raug tej yam no cuam tshuam, lawv raug dab tsi txwv? Lawv raug cov ntsujplig phem txwv; tag nrho tej yam no puav leej raug cov ntsujplig phem tswj. Yog li ntawd vim li cas tib neeg thiaj li pe hawm cov ntsujplig phem ntawd? Vim li cas lawv thiaj li raug tej yam no cuam tshuam? Rau ib yam uas yooj yim xws li kev tsiv tsev, vim li cas tib neeg thiaj li yuav tsum tau ua tib zoo xav tas li seb lub sij hawm twg thiaj li zoo tsiv tsev thiab lub sij hawm twg tsis zoo, xub tsiv yam dab tsi thiaj li zoo, yam dab tsi tsis tsiv thiaj li zoo? Vim li cas lawv thiaj li yuav tsum tau xav txog tej yam no tas li? Lawv yuav tsum xav txog tej ntawd vim yog lawv tsis xav, cov ntsujplig phem yuav ua hauj lwm, tsim kev kub ntxhov thiab tsim txom lawv. Nej pom dab tsi los ntawm tej xwm txheej no? Tag nrho noob neej puav leej ua neej nyob hauv cov phem txoj kev tswj hwm. Cov phem ntawd yog leej twg? Cov phem uas loj dua yog Ntxwgnyoog thiab cov dab, thiab cov phem uas me dua yog cov ntsujplig phem uas nyob rau hauv ntau qhov chaw, cov uas tswj ntau haiv neeg. Txhua kis hauv tib neeg lub neej puav leej raug cov ntsujplig phem no txwv thiab tswj. Tab txawm yog thaum ua tsev, thaum tsa tus nqaj tse tseem ceeb los, tib neeg yeej dai daim ntaub liab thiab hlawv kej foob pob kom tau me ntsis hmoov zoo, thiab cov neeg ua tsev txhua tus puav leej hnav khaub ncaws liab kom thiaj li muaj txiag nplua nuj, thiab kom thiaj li tsis txhob muaj tej xwm txheej tsis zoo. Muaj qee qhov kev cheem tsum thiab tej lus hais tshwj xeeb txog tag nrho tej yam no, nrog rau tej kev caiv, thiab lawv yuav tsum zam tej kev txwv thiab ua raws li tej lus hais no. Piv txwv li, ib txhia tib neeg pheej ntsib kev nyuaj thiab tej yam tsis raws li siab xav tas li—lawv poob hauj lwm, lawv cov poj niam muab lawv tso tseg, thiab lawv tsis tshuav dab tsi nyob hauv tsev li lawm. Lawv twb them tsis taus cov nqi tsev, thiab tsis muaj ib yam dab tsi mus tau zoo li. Lawv tsis tau ua ib yam dab tsi phem, yog li ntawd vim li cas tej yam no thiaj li tshwm sim rau lawv? Thaum tsis muaj lwm txoj kev xaiv, lawv thiaj li mus pe hawm cov vajtswv cuav thiab cov ntsujplig phem, los sis maj nrawm nroos nrhiav neeg los saib lawv lub looj phaj kom hloov lawv txoj hmoo, thiab tom qab ua li ntawd lawm, txhua yam thiaj li maj mam mus zoo. Yav dhau los lawv tsis ntseeg tej yam no, tiam sis tam sim no thaum muaj teeb meem tshwm tuaj, lawv ua siab dawb paug pe hawm cov vajtswv cuav thiab cov ntsujplig phem, thiab ua ntej lawv yuav ua ib yam dab tsi lawv yuav tsum tau mus saib hmoov los sis saib yaig. Qhov ua neej nyob zoo li no puas sab? (Sab.) Qhov ntawd yeej sab tiag tiag! Txawm lawv xav nyob kom ywj pheej thiab kaj siab los, lawv yeej nyob tsis tau, thiab khiav tsis dim tej lus hais thiab tej kev cai tswj ntawd txoj kev txwv. Yog lawv ua txhaum tej kev cai tswj no, cov ntsujplig phem yuav ua hauj lwm thiab cuam tshuam lawv, thiab lawv raug cov ntsujplig phem ntawd yuam kom zwm rau, thiab yuav tsum pe hawm cov ntsujplig phem ntawd txhua hnub kom lawv lub neej thiaj li yuav mus tau zoo. Txawm li cas los xij, cov ntseeg Vajtswv tsis raug tej kev ntseeg qub no los sis cov ntsujplig phem tes hauj lwm txwv. Lawv tsiv tsev los tau los sis mus raws li lawv siab nyiam, yam tsis tas yuav zam ib qho kev caiv twg li. Nyob rau hauv Teb Chaws Suav Av Loj mas, Pab Tsoom Fwv Koom Tsham Suav yeej ib txwm tsuj nias thiab tsim txom txoj kev ntseeg ntawm sab kab lis kev cai ntseeg. Yog ib tug neeg ntseeg nyob tsis tau hauv ib qho chaw ntxiv lawm mas, lawv yuav tsum tau tsiv kom sai sai—lawv puas yuav tsum tau xaiv ib hnub los sis ib teev uas zoo rau qhov no los sis pe hawm ib yam dab tsi? Tsis tas li. Lawv thov Vajtswv, thiab Vajtswv tsom kwm lawv. Txhua yam puav leej nyob hauv Vajtswv ob txhais tes—lawv tsis raug tej yam no txwv. Thaum twg lawv xav noj ib yam dab tsi los sis tawm hauv tsev mus, lawv puas yuav tsum tau saib daim ntawv qhia hnub los sis saib seb puas ua txhaum kev txwv? Tsis tas li, lawv thov Vajtswv, thiab txhua yam puav leej nyob hauv Vajtswv ob txhais tes. Thaum tib neeg ua neej nyob hauv Vajtswv txoj kev tswj fwm thiab lub hwj chim kav, nrog rau Vajtswv txoj kev tsom kwm thiab kev coj, cov ntsujplig phem thiab cov ntsujplig tsis huv, txawm loj los me, puav leej raug thaiv tsis pub los ze; lawv tsis muaj cuab kav ua phem rau cov uas ntseeg Vajtswv. Cov tib neeg no tsis raug tsom kwm lod? Lawv tsis ua neej nyob ywj pheej thiab yooj yim lod? (Yog.) Nej hais qhov hmoov hlub no puas loj? (Loj.) Txawm koj tau txais qhov tseeb los sis tsis tau los xij, tsuav koj yog ib tug neeg uas ntseeg Vajtswv tiag tiag xwb, koj yog ib tug uas Vajtswv tau npaj tseg ua ntej thiab xaiv tseg lawm, thiab thaum koj los rau ntawm Vajtswv lub xub ntiag, Nws tsom kwm koj li no, cia koj xyiv fab rau qhov hmoov hlub zoo li no. Qhov no yog ib qho hmoov hlub uas loj heev! Koj txoj kev nyab xeeb thiab txhua qhov uas koj mus puav leej raug tsom kwm kom nyab xeeb thiab ruaj khov, Vajtswv ris lub luag hauj lwm rau tej no thiab tsom kwm tej no, yog li ntawd koj tsis tas yuav txhawj. Feem ntau, tib neeg yeej tsis thov Vajtswv los sis nco ntsoov hauv lawv lub siab hais tias, “Kuv yuav thov Vajtswv, thiab thov kom Vajtswv tsom kwm kuv. Kuv cia siab tias txhua yam yuav mus tau zoo thiab tsis muaj xwm txheej phem dab tsi tshwm sim.” Koj twb tsis tas yuav thov Vajtswv. Tsuav koj muaj txoj kev ntseeg ruaj khov uas yooj yim nyob hauv koj lub siab hais tias, “Kuv ntseeg Vajtswv; txhua yam puav leej nyob hauv Vajtswv ob txhais tes,” ces Vajtswv yuav ua. Tib neeg xyiv fab rau Vajtswv txoj hmoov hlub uas loj npaum li no—qhov no puas yog tau txais tsawg? (Tsis tsawg lawm.) Vajtswv yog tus Kav uas tsuas yog tib tug xwb nyob hauv lub ntiaj teb. Koj txoj sia thiab txhua yam uas koj muaj puav leej nyob hauv Vajtswv ob txhais tes, nyob hauv tus Kav no ob txhais tes, koj lub siab hnov kaj lug, ruaj khov, thiab nyab xeeb, thiab koj tsis tas yuav txhawj txog ib yam dab tsi li. Txawm koj muaj kev paub txog Vajtswv ntau npaum li cas los sis koj to taub qhov tseeb ntau npaum li cas los xij, koj yeej paub tseeb txog qhov no nyob hauv koj lub siab. Txhua yam puav leej nyob hauv Vajtswv ob txhais tes. Yog cov uas ntseeg Vajtswv muaj ib qho chaw rau Nws nyob hauv lawv lub siab thiab to taub qhov tseeb, cov ntsujplig phem yuav tsis muaj cuab kav cuam tshuam, ua phem, los sis los ze lawv. Yog li ntawd, cov ntseeg thiaj li tsis tas yuav ua cov txheej txheem uas tsis tim tsum ntawd. Qhov no yog ib qho hmoov hlub uas loj heev—ua li cas koj tseem hais tias koj tsis tau txais ib yam dab tsi los ntawm txoj kev ntseeg Vajtswv thiab? Tsis yog koj tsis muaj lub siab txawj xav lod? Tsis tas saib lwm yam, tsuas yog qhov uas hais tias tsis tau txais ib yam dab tsi xwb twb ua pov thawj qhia hais tias tib neeg tsis muaj lub siab txawj xav hlo li, thiab qhov ntawd ua pov thawj qhia hais tias tib neeg lub siab txawj xav ntawd phem tag nrho lawm; ces tsis tas yuav hais txog lwm yam ntxiv lawm.

Vajtswv pub qhov tseeb thiab txoj sia rau tib neeg dawb xwb, muab Nws cov lus rau tib neeg yam tsis thov kom pauj ib yam dab tsi rov qab li. Txawm hais tias tib neeg yuav xav hais tias lawv lub siab ntseeg tseem yau, tias lawv tseem tsis tau to taub qhov tseeb ntau, thiab tias lawv tsis muaj peev xwm hais tau meej txog qhov me me uas lawv to taub ntawd los xij, tsuas yog tej yam uas Vajtswv tau muab rau lawv no, txoj kev hlub thiab kev tshua no—qhov hmoov hlub no loj npaum li cas li! Vajtswv tau muab tej yam uas muaj nqis tshaj plaws rau tib neeg; tib neeg tau txais tej yam uas muaj nqis tshaj plaws hauv lub ntiaj teb los ntawm Vajtswv los. Txawm koj yuav tau hnov tau qhov ntawd los tsis tau los xij, Vajtswv twb tau muab tej no rau tib neeg lawm. Tib neeg tseem tshuav dab tsi los yws ntxiv? Lawv puas tsim nyog tau txais tej no? Cov uas Vajtswv xaiv tseg yog cov tib neeg uas muaj kev zoo siab tshaj plaws nyob hauv lub ntiaj teb no. Vajtswv tau xaiv koj thiab xaiv koj tseg; koj yog ib tug tib neeg uas muaj kev zoo siab tshaj plaws thiab muaj hmoo tshaj plaws nyob hauv lub ntiaj teb no. Koj tseem hais tias koj tsis tau txais dab tsi tau li cas? Koj tau dhau los ua ib tug tib neeg uas muaj kev zoo siab tshaj plaws thiab muaj hmoo tshaj plaws vim Vajtswv tau xaiv koj thiab xaiv koj tseg, thiab yog li ntawd, cov ntsujplig phem thiab cov ntsujplig tsis huv thiaj li tsis muaj cuab kav los ze koj. Ib txhia tib neeg nug hais tias, “Qhov ntawd puas txhais hais tias kuv lub meej mom thiab qhov kuv yog leej twg tiag tiag ntawd tau dhau los ua qhov uas ntxim hwm lawm lod?” Puas hais tau li no? Hais tsis tau li ntawd, vim qhov no puav leej yog los ntawm Vajtswv txoj kev hlub thiab Vajtswv tej kev ua. Tib neeg tau txais ntau heev lawm! Tsuas yog nyob hauv lub neej no xwb, tib neeg twb tau txais ntau npaum li no lawm; tib neeg tsim nyog tau txais tag nrho tej no tau li cas? Ib txhia uas ntseeg Vajtswv tsis caum qhov tseeb kiag li thiab tseem pheej hais tias, “Kuv tau txais dab tsi los ntawm ntau xyoo uas ntseeg Vajtswv no?” Koj xam tsis tau ntawm koj tus kheej lod? Koj paub hauv koj lub siab tias koj puas to taub qhov tseeb, koj tau ua phem tsawg npaum li cas, thiab haj yam tshaj ntawd, koj paub nyob hauv koj lub siab tias koj tau xyiv fab rau qhov hmoov hlub ntau npaum li cas lawm. Yog nyob hauv koj lub siab koj paub meej txog cov ntsiab lus no, ces koj yuav tsis hais tej lus uas tsis muaj lub siab txawj xav li no lawm. Ib txhia kuj hais tias, “Vajtswv lub tsev muab zaub mov, khaub ncaws, thiab chaw nyob rau kuv thiab.” Thaum muab piv rau Vajtswv txoj hmoov hlub thiab kev tsom kwm, qhov no puas yog me heev? Qhov no puas yog tsis tsim nyog hais txog? Txawm li cas los xij, cov uas muaj lub siab txawj xav mas yuav xav hais tias txawm qhov ntawd tsis tsim nyog hais txog los xij, yeej tseem yog ib feem ntawm Vajtswv txoj hmoov hlub. Vajtswv txoj hmoov hlub mas ntsuas tsis tau; Vajtswv tau muab rau tib neeg ntau dhau lawm! Hais txog tej khoom siv ntawd, los ntawm Vajtswv txoj kev xam pom mas, Nws twb tsis xam tej ntawd li.

Ib kis ntawm qhov uas Vajtswv ua yog tsom kwm tib neeg, thiab lwm kis yog coj lawv mus rau txoj kev ntawm kev cawm dim kom lawv thiaj li tau txais txoj kev cawm dim. Tib neeg tau xyiv fab rau Vajtswv txoj kev npaj siab no thiab Nws txoj kev hlub rau lawv, thiab Vajtswv tau muab hmoov hlub ntau heev rau lawv! Tsis tas li ntawd xwb, muaj ib yam uas tseem ceeb tshaj plaws: qhov tseeb uas Vajtswv tau pub rau tib neeg, uas yog, cov lus uas tsis muaj ib tug tib neeg twg hauv noob neej keeb kwm, nyob rau hauv ib tiam twg, tau hnov los sis tau txais dua li. Txawm Vajtswv tau tsim noob neej pes tsawg zaus los xij, Nws yeej tsis tau ua tes hauj lwm no los sis hais cov lus no dua li. Tag nrho tej kev zais tob uas muaj feem xyuam txog noob neej, yam uas tib neeg ris taus, to taub tau, thiab nkag siab tau—Vajtswv tau qhia tag nrho rau nej lawm. Tej kev zais tob no, tej qhov tseeb no, puas tuaj yeem muab ntsuas tau? Ntsuas tsis tau; tib neeg xyiv fab rau tej ntawd ntau tiam neej los yeej tsis tag li. Vim li cas Kuv thiaj li hais li no? Vim cov lus uas los ntawm Vajtswv los no yog lub hauv paus rau tib neeg txoj kev ua neej nyob, thiab cov lus no muaj nyob mus ib txhis. Yog koj muaj hmoo txaus uas tseem muaj txoj sia nyob thiab ua neej nyob mus ib txhis tiag tiag, ces cov lus thiab qhov tseeb uas los ntawm Vajtswv los no yuav yug tau koj mus ib txhis. Lub ntsiab lus ntawm qhov ib txhis ntawd yog dab tsi? Qhov ntawd txhais tias tsis raug lub sij hawm txwv, txhais tias tsis muaj chaw kawg. Yog peb txhais raws li lo lus ncaj ncaj, qhov ntawd txhais hais tias tsis muaj qhov kawg—ua neej nyob mus ib txhis, ib yam nkaus li Vajtswv Tus Kheej. Vajtswv cov lus thiab qhov tseeb no tuaj yeem muaj nyob mus txog rau lub sij hawm ntawd. “Lub sij hawm ntawd” yog ib lub tswv yim thiab lub ntsiab lus ntawm lub sij hawm uas hais tawm los ntawm tib neeg cov lus, tiam sis qhov muaj tseeb tiag qhov ntawd txhais hais tias tsis muaj chaw kawg. Qhia Kuv seb, qhov muaj nqis ntawm Vajtswv cov lus no puas loj los tsis loj? Loj heev! Yog koj tsis caum cov lus no, ces yog koj poob peev; yog koj ruam. Tiam sis yog koj caum cov lus no, cov lus no muaj nqis rau koj tsis yog mus deb tshaj li lub neej no xwb; qhov ntawd txuas mus txog ib txhis. Cov lus no yuav muaj txiaj ntsig thiab siv tau rau koj mus li, thiab cov lus no yuav muaj nqis thiab muaj qab hau mus ib txhis, yug tau koj mus ib txhis. Yog koj to taub cov lus no, tau txais cov lus no, thiab ua neej nyob raws li cov lus no, koj yuav muaj peev xwm ua neej nyob mus ib txhis. Muab hais kom yooj yim dua, koj yuav ua neej nyob mus ib txhis yam tsis tau saj txoj kev tuag. Qhov no tsis yog ib yam uas tib neeg ua npau suav txog lod? Ntau tiam uas suav tsis txheeb yuav dhau mus, ntau tus tib neeg uas suav tsis txheeb yuav tuag, tiam sis koj tseem muaj txoj sia nyob. Koj vam khom dab tsi thiaj li tseem muaj txoj sia nyob tau? Qhov ntawd yog los ntawm Vajtswv cov lus, los ntawm qhov tseeb, uas koj yuav tsim nyog los ua neej nyob zoo li no. Lub neej uas txuas ntxiv mus zoo li no koj yuav ua dab tsi? Koj muaj Vajtswv cov lus txib, Vajtswv txoj kev coj, thiab koj kuj muaj ib txoj num thiab. Koj txoj num yog dab tsi? Los ntawm qhov uas koj ua neej nyob raws li Nws cov lus, Vajtswv xav kom koj ua rau Nws tau yeeb koob thiab ua tim khawv rau Nws. Qhov no yog qhov muaj nqis ntawm Vajtswv cov lus. Qhov muaj nqis thiab qhov tseem ceeb ntawm qhov tseeb thiab cov lus uas tib neeg hnov, ntsib, thiab ntsib pom nyob rau tiam no yuav muaj nyob mus ib txhis. Vim li cas tej ntawd yuav muaj nyob mus ib txhis? Vajtswv cov lus no tsis yog ib qhov kawm txog vajtswv, kev xav, lus qw, los sis ib hom kev paub, tiam sis yog cov lus ntawm lub neej txoj sia. Tsuav koj tau txais cov lus no, ua neej nyob raws li cov lus no, thiab muaj txoj sia nyob raws li cov lus no xwb, Vajtswv yuav cia rau koj ua neej nyob mus ntxiv thiab tsis pub koj tuag. Qhov ntawd yog, Nws yuav tsis rhuav tshem koj los sis muab koj txoj sia tshem mus—Nws yuav cia koj ua neej nyob mus ntxiv. Qhov no tsis yog ib qho koob hmoov loj lod? (Yog.) Los ntawm cov lus no Vajtswv xav kom koj tau saj qhov koob hmoov no ua ntej nyob hauv lub neej no thiab tau txais nyob rau hauv lub ntiaj teb uas yuav los tom ntej no. Qhov no yog Vajtswv lo lus cog tseg. Thaum xav txog lo lus cog tseg loj heev uas Vajtswv tau muab rau noob neej, tib neeg puas yog tau txais ntau heev? (Yog.) Vajtswv tau muab ib lo lus cog tseg uas loj heev rau tib neeg, ua kom txhua tus paub. Nws tau qhia koj txog qhov ntawd, cia koj los thiab txais qhov ntawd dawb dawb xwb. Koj tsis tas yuav muab koj txoj sia fij los sis muab tag nrho koj tej cuab tam tawm los; koj tsuas yog yuav tsum mloog Vajtswv cov lus, thiab ua raws li Vajtswv tej kev cheem tsum thiab Nws lub siab nyiam xwb, ces koj tuaj yeem tau txais lo lus cog tseg no los ntawm Vajtswv los. Vajtswv tsis tau muab ntau heev rau tib neeg lod? Tam sim no koj tab tom nyob ntawm txoj kev kom tau txais lo lus cog tseg no: Txawm koj tseem tsis tau txais tag nrho los xij, koj tau txais puas tseem tsawg? Saib lo lus cog tseg uas Vajtswv tau muab rau tib neeg no, tib neeg tau txais ntau heev lawm. Lawv tau txais ib qho txiaj ntsig loj heev lawm; lawv tsis tau poob los sis poob peev dab tsi hlo li. Lawv tsuas siv sij hawm me ntsis xwb, thiab lawv lub cev nqaij daim tawv tej zaum tau tiv kev txom nyem me ntsis. Tej zaum lawv tau tso qee qhov kev zoo siab hauv tsev neeg, kev nyiam thiab kev ntshaw ntawm sab cev nqaij daim tawv, tso lawv tus kheej qee qhov kev npau suav, kev nyiam, thiab kev ntshaw tseg, thiab lwm yam ntxiv. Txawm li cas los xij, thaum muab piv rau qhov to taub qhov tseeb, tau txais kev cawm dim, thiab tau txais Vajtswv lo lus cog tseg, tag nrho cov kev cia siab, tej hom phiaj, thiab tej kev npau suav ntawm tus kheej ntawd tsis tsim nyog hais txog li, vim tej ntawd tsuas coj tau koj mus rau ntuj tawg xwb, thiab Vajtswv yuav tsis muab Nws lo lus cog tseg rau koj vim tej ntawd. Tiam sis, thaum tib neeg muab sij hawm me ntsis, them ib tug nqi uas lawv txaus siab hlo thiab muaj peev xwm them taus, thaum kawg lawv los to taub qhov tseeb, thiab to taub qee yam kev zais tob, tej hauv paus ntsiab lus rau kev coj tus kheej, qee lub ntsiab tseeb thiab lub hauv paus ntawm txhua yam xwm txheej thiab txhua yam, thiab lwm yam ntxiv, uas noob neej yeej tsis tau to taub txij thaum Vajtswv tsim lub ntiaj teb los. Qhov uas tseem ceeb dua ntawd yog, lawv tau txais qee qhov kev paub txog Vajtswv thiab muaj peev xwm hwm Nws. Qhov tau txais tag nrho tej no, qhov uas them tus nqi ntawd tsis tsim nyog lod? Tib neeg muaj kev tsis txaus siab dab tsi? Vim li cas lawv tseem hais tias lawv tsis tau txais ib yam dab tsi los ntawm txoj kev ntseeg Vajtswv? Lawv lub siab txawj xav tsis yog lwj tag nrho lawm lod? Koj tau txais ntau npaum li no lawm, thiab koj tseem tsis tau txaus siab. Koj tseem xav tau dab tsi ntxiv? Yog koj raug tsa ua ib tug thawj tswj hwm los sis ua ib tug neeg nplua nuj tsheej txhiab plhom nyiaj koj thiaj li txaus siab lod? Yog Vajtswv muab tej yam ntawd rau koj, ces koj yuav tsis yog ib tug uas Vajtswv tau xaiv tseg lawm. Vajtswv tsis xav tau cov tib neeg zoo li no.

Tib neeg pheej hais tias lawv tsis tau txais ib yam dab tsi los ntawm txoj kev ntseeg Vajtswv, qhov no qhia hais tias lawv tsis muaj lub siab txawj xav, tsis muaj lub peev xwm nkag siab qhov tseeb hlo li, tsis caum qhov tseeb, thiab lawv tus cwj pwm qis heev. Cov tib neeg zoo li no tsis muaj kev nkag siab yog txog qhov uas Vajtswv ua, qhov uas Vajtswv cheem tsum ntawm tib neeg, thiab qhov uas Vajtswv tau muab rau tib neeg, nrog rau lwm yam ntxiv. Thaum kawg, thaum muaj tej yam tshwm sim uas ua rau lawv tsis txaus siab me ntsis, lawv txoj kev npau taws uas tau khaws cia ntau heev ntawd cia li tawg tawm tam sid: “Kuv tau txais dab tsi los ntawm txoj kev ntseeg Vajtswv? Kuv lub cev nqaij daim tawv tau raug kev txom nyem ntau heev. Kuv tau ua txhua yam dej num uas pawg ntseeg tau muab rau kuv ua. Txawm yuav nyuaj los sis sab npaum li cas los, kuv yeej tsis tau yws li; txawm tej kev nyuaj yuav loj npaum li cas los, kuv yeej tsis tau hais ib yam dab tsi li. Kuv yeej tsis tau thov ib yam dab tsi ntawm Vajtswv lub tsev li. Kuv txoj kev hlub thiab kev ua siab ncaj loj npaum li ntawd, kuv tau txais dab tsi lawm? Yog kuv twb tsis tau txais ib yam dab tsi li, ces lwm tus haj yam tsis muaj kev cia siab tias yuav tau txais ib yam dab tsi li!” Lub ntsiab lus ces yog: “Nej tsis tau fij ntau npaum li kuv tau fij, nej tsis tau them tus nqi uas kuv tau them; yog hais tias kuv twb tsis tau txais ib yam dab tsi li, ces nej yuav tau txais dab tsi? Nej txhua tus yuav tsum tau ceev faj; tsis txhob ruam!” Cov tib neeg zoo li no puas yog tsis muaj lub siab txawj xav? Ib tug neeg uas tsis muaj lub siab txawj xav yeej ib txwm hais cov lus ruam thiab tawv ncauj. Lawv nkag siab tsis tau ib qho twg ntawm ntau qhov tseeb uas Vajtswv tau hais, los sis ntau yam thiab cov lus hais uas yog thiab zoo, tiam sis lawv tawv ncauj tuav rawv lawv tus kheej tej kev xam pom tias: “Kuv tiv kev txom nyem thiab them tus nqi rau Vajtswv, yog li ntawd Vajtswv yuav tsum foom koob hmoov rau kuv, thiab yuav tsum cia kuv tau txais ntau dua lwm tus. Yog tsis li ntawd, kuv yuav tso kev chim siab tawm, kuv yuav tawg, kuv yuav foom phem! Txawm kuv xav tau dab tsi los, Vajtswv yuav tsum muab rau kuv, thiab yog kuv tsis tau, ces Vajtswv tsis ncaj ncees, thiab kuv yuav hais tias kuv tsis tau txais ib yam dab tsi li—qhov no yog kev hais qhov muaj tseeb xwb!” Tsis yog lawv tsis muaj kev ua neeg lod? Ib tug neeg uas tsis muaj kev ua neeg cov lus yeej sawv tsis tau ruaj khov, tsis tas yuav hais txog qhov mus raws li qhov tseeb li; qhov tom qab no mas yog ib qho uas thov ntau dhau rau lawv lawm. Cov lus uas ib tug neeg hais yuav tsum yog cov kev thov uas tsim nyog, cov lus hais uas tsim nyog, tsis yog cov lus cav uas nkhaus; tsis hais leej twg mloog los sis leej twg ntsuas cov lus ntawd los xij li, cov lus ntawd yuav tsum sawv tau ruaj khov. Txawm li cas los xij, cov lus thiab tej kev ua ntawm cov tib neeg uas muaj kev ua neeg tsis zoo mas sawv tsis tau ruaj khov. Thaum lawv chim ntaug tes ntaug taw thiab tso lawv tej kev tsis txaus siab tawm ntawd, ib txhia tib neeg xav hais tias, “Vim li cas lawv thiaj li hais tias lawv tsis tau txais ib yam dab tsi li? Puas yog Vajtswv lub tsev ua qee yam tsis ncaj rau lawv? Puas yog qee yam uas Vajtswv lub tsev ua ntawd kuj tsis mus raws li tej hauv paus ntsiab lus thiab nthuav tsis tau tawm rau qhov pom kev? Tus tib neeg ntawd feem ntau saib zoo li muaj peev xwm tiv kev txom nyem thiab them tus nqi kawg li, tiam sis hnub no lawv npau taws loj npaum li ntawd, hais tias lawv tsis tau txais dab tsi li; saib mas zoo li lawv yeej tsis tau txais dab tsi tiag tiag li. Qhov no tsis yog ua rau ib tug neeg uas tsis txawj dag npau taws lod? Yog li ntawd kuv yuav tsum ceev faj me ntsis; thaum kuv ua kuv tej dej num, kuv yuav tsum tsis txhob tiv kev txom nyem los sis them tus nqi li kuv tau ua yav tas los lawm!” Qhov no ua rau ib txhia tib neeg ruam feeb tsis meej uas tsis muaj kev paub cais ntawd raug cuam tshuam.

Rau cov tib neeg uas pheej tso tej kev xav tsis zoo tawm tas li, yog lawv yeej muaj tej kev xam pom los sis tswv yim los hais tiag tiag, ces cia lawv xub hais thiab nthuav lawv tej kev xam pom ntawd tawm ua ntej. Tom qab lawv tau ua li ntawd lawm, txhua tus yuav to taub tias: “Lawv xav hais tias tus nqi uas lawv them ntawd tsis haum nrog qhov uas lawv tau txais. Lawv xav hais tias lawv tsis tau txais txiaj ntsim dab tsi thiab lawv tau poob peev lawm, yog li ntawd lawv thiaj li tsis txaus siab hlo li. Lawv tab tom yws Vajtswv, cia siab tias yuav sib cav nqi nrog Vajtswv, thov hmoov hlub thiab txiaj ntsim!” Thaum hnov lawv hais li ntawd, ib tug neeg li sawv daws puas muaj peev xwm paub cais me ntsis? Thaum txhua tus muaj peev xwm paub cais lawv lawm, hais rau lawv tias, “Koj puas tau hais tag lawm? Yog koj tsis muaj dab tsi hais ntxiv lawm, ces kaw qhov ncauj, yog tsis li ntawd koj yuav ua rau koj tus kheej txaj muag. Yog koj tus yam ntxwv xeeb txawm lim hiam raug nthuav tawm nyob rau ntawm txhua tus xub ntiag thiab tsis raug txwv tam sid, qhov ntawd yuav ua rau sawv daws npau taws. Thaum txhua tus qhia tshwm thiab tsis lees txais koj, qhov ntawd yuav lig dhau rau kev khuv xim lawm.” Koj ceeb toom li no rau lawv, thiab los ntawm qhov ua li no, koj yuav txwv tau lawv lawm. Los sis, koj kuj tuaj yeem hais tias: “Yog koj xav hais tias koj poob peev lawm, koj tsis tas yuav ntseeg Vajtswv. Koj xav hais tias koj tsis tau txais ib yam dab tsi li, yog li ntawd koj xav tau txais dab tsi tiag tiag? Yog xav kom tau nyiaj txiag thiab dhau los ua neeg nplua nuj, los sis kom tau txoj hauj lwm siab, ces thov txim, tej no tsis yog tej yam uas ib tug neeg tuaj yeem tau txais tsuas yog vim lawv xav tau xwb; tej no yog tej yam uas Vajtswv tau npaj tseg ua ntej lawm. Vajtswv qhov kev tshwm sim thiab Nws tes hauj lwm ntawm kev cawm tib neeg tsis yog hais txog qhov muab tej yam no rau tib neeg. Koj mus rau qhov chaw twg los xij uas koj tuaj yeem tau txais tej ntawd; Vajtswv lub tsev tsis yog lub ntiaj teb, ua tsis tau kom cov dab thiab Ntxwgnyoog txaus siab. Qhov zoo tshaj plaws koj tsis txhob thov tej yam zoo li no los ntawm Vajtswv lub tsev, los sis los ntawm cov kwv tij thiab cov muam; yog koj muaj cuab kav thov Vajtswv rau tej yam no, ces koj yuav ua txhaum rau Nws tus moj yam thiab ua rau Nws npau taws. Qhov no yog vim Vajtswv tau muab hmoov hlub ntau heev rau tib neeg, thiab Nws tau muab qhov tseeb ntau dua rau tib neeg los ua lawv txoj sia. Qhov uas koj tsis saib kev tau txais qhov tseeb tias muaj nqis ntawd yog koj txoj kev ruam thiab tsis paub dab tsi xwb.” Txhua tus thuam thiab ntuas lawv zoo li no. Nej xav li cas txog txoj kev xyaum ua raws no? Los sis, koj tuaj yeem hais tias: “Vajtswv lub tsev tsis tshuav koj nqi dab tsi. Qhov koj muab koj tus kheej fij rau Vajtswv thiab ua koj tej dej num ntawd puav leej yog koj yeem ua xwb. Koj puas paub hais tias koj tau xyiv fab rau Vajtswv txoj hmoov hlub ntau npaum li cas txij thaum koj pib ntseeg Nws thiab ua koj tej dej num? Yog koj muaj lub siab txawj xav me ntsis, koj yuav tsum tsis txhob hais rau Vajtswv tias koj tsis tau txais ib yam dab tsi li; koj yuav tsum los rau ntawm Vajtswv lub xub ntiag thiab paub koj tus kheej tej teeb meem. Yog koj ntseeg tiag tiag tias Vajtswv yog qhov tseeb, tias txhua yam uas Vajtswv ua yog qhov tseeb thiab Nws cov lus yog qhov tseeb, ces koj yuav tsum tsis txhob hais li ntawd; koj yuav tsum tsis txhob yws. Koj tus cwj pwm tam sim no tsis yog tus uas ib tug neeg ntseeg Vajtswv tsim nyog muaj, thiab tsis yog tus cwj pwm uas ib tug neeg nrhiav qhov tseeb tsim nyog muaj. Koj tab tom yuav ntxeev siab, muab koj tej teeb meem qub los cav nrog Vajtswv! Koj tab tom muab koj cais tawm ntawm Vajtswv mus, thiab xam qhov nuj nqis kawg! Tiam sis Vajtswv yeej tsis tshuav koj nqi dab tsi li, thiab Vajtswv lub tsev los kuj tsis tshuav koj nqi thiab. Yog koj yuav xam nqi nrog Vajtswv lub tsev, ces maj nroos tawm hauv Nws lub tsev mus. Tsis txhob thab Vajtswv lub tsev, yog tsis li ntawd ces koj yuav ua rau Nws npau taws thiab Nws yuav tua koj. Qhov ntawd yuav tsis yog ib qho kev tshwm sim los uas zoo. Yog koj muaj lub siab txawj xav los sis laj thawj me ntsis, koj yuav tsum ua siab txias txias los thov Vajtswv thiab nrhiav, los saib seb txoj kev xam pom ntawm koj txoj kev caum hauv koj txoj kev ntseeg Vajtswv ntawd puas muaj dab tsi yuam kev, thiab seb txoj kev uas koj tab tom taug ntawd puas yog txoj uas Vajtswv cheem tsum kom koj taug. Koj muaj ntau qhov kev thov uas tsis muaj laj thawj rau Vajtswv, muaj txoj kev tsis txaus siab uas loj npaum li ntawd; qhov no qhia hais tias koj txoj kev caum muaj qee yam tsis yog lawm. Koj txoj kev tsis txaus siab uas tob npaum li no, tsis yog nyuam qhuav sib sau tau hauv ib los ob hnub xwb; tiam sis qhov ntawd twb sib sau los tau ntev lawm. Los sis tej zaum txij thaum koj pib ntseeg Vajtswv los, koj los rau ntawm Vajtswv lub xub ntiag nrog ib txoj kev xam pom uas yuam kev nyob hauv koj lub siab, thiab txawm Nws tau hais dab tsi los xij, koj tau loog tag lawm, thiab vim li ntawd koj tsis hnov tu siab los sis tshuav nqi dab tsi kiag li. Tej zaum qhov ntawd yog qhov uas coj mus rau tej yam uas zoo li niaj hnub no. Koj kav tsij lees txhaum thiab lees txim hloov dua siab tshiab ntshe yuav zoo dua; tseem tshuav sij hawm los lees txim hloov dua siab tshiab. Yog koj tsis lees txim hloov dua siab tshiab, thiab tseem ua phem thiab tso tej kev xav tsis zoo tawm txuas ntxiv, ces koj yuav dhau los ua ib tug dab, ib tug tawm tsam khetos. Thaum Vajtswv lub tsev ntsaig koj tawm mus, koj yuav tsis muaj cib fim raug cawm dim ntxiv lawm—yam uas Vajtswv lub tsev teem txim ntawd Vajtswv los kuj teem txim thiab. Peb muab cov lus ceeb toom no rau koj vim xav txog qhov uas koj muaj peev xwm tiv kev txom nyem thiab them tus nqi nyob rau ntau xyoo uas koj tau ntseeg Vajtswv los. Peb tab tom muab ib lub cib fim rau koj. Yog koj tawv ncauj ua raws li koj txoj kev thiab tsis mloog lus ntuas, es Vajtswv lub tsev txiav txim siab ntsaig koj tawm mus, ces koj yuav tsis yog ib tug kwv tij los sis ib tug nkauj muam ntxiv lawm. Koj yuav tsis muaj kev cia siab tias yuav raug cawm dim li lawm. Thaum lub sij hawm ntawd los txog, koj yeej yuav tsis tau txais ib yam dab tsi tiag tiag li. Thaum ntawd ces tsis txhob khuv xim. Qhov tseem ceeb tshaj plaws rau koj tam sim no yog tig koj tej kev xav, tej kev xam pom, thiab txoj xub ke ntawm koj txoj kev caum ntawd rov qab. Tsis txhob pheej nrhiav kom tau txais qee yam dab tsi ntxiv lawm. Mloog Vajtswv cov lus; saib seb yam uas Vajtswv qhia tshwm txog tib neeg cov moj yam qias vuab tsuab ntawd koj tig xav txog thiab paub koj tus kheej ntau npaum li cas. Koj puas tau daws cov teeb meem uas koj paub tau hauv koj tus kheej, cov uas koj pom tau meej ntawd lawm? Koj puas tau paub txog koj txoj kev ntxeev siab rau Vajtswv? Koj puas tau daws qhov ntawd? Qhov teeb meem loj tshaj plaws uas koj ntsib tam sim no yog qhov pheej xav xam nqi nrog Vajtswv—qhov teeb meem no yog dab tsi? Qhov no tsis yog ib qho teeb meem uas yuav tsum tau daws lod? Koj ntseeg Vajtswv yeej ib txwm muaj qee qhov kev npaj siab, muaj kev sib pauv hauv nruab siab; koj yeej ib txwm kub siab lug xav tau koob hmoov, cia siab tias yuav muab kev siv zog, kev fij, thiab qhov tiv kev txom nyem ntawm sab cev nqaij daim tawv los pauv tej koob hmoov ntawm lub nceeg vaj saum ntuj ceeb tsheej—qhov no tsis yog laj thawj ntawm ib tug tub sab lod? Vim li cas koj thiaj li tsis saib seb Vajtswv foom koob hmoov rau hom neeg zoo li cas, Vajtswv tej kev cheem tsum rau tib neeg yog dab tsi, Vajtswv tau hais dab tsi rau tib neeg, thiab tib neeg yuav tsum ua dab tsi kom tiav thiaj li tau txais Vajtswv tej lus cog tseg? Yog koj ntseeg Vajtswv tiag tiag thiab xav raug cawm dim tiag tiag, ces tsis txhob pheej xav kom tau txais qee yam los ntawm Vajtswv. Koj yuav tsum saib seb koj tau muab Vajtswv cov lus coj los xyaum ua raws ntau npaum li cas, saib seb koj puas yog ib tug neeg uas ua raws li Vajtswv cov lus. Qhov ua raws li Vajtswv cov lus yog xyaum ua raws thiab ua neej nyob raws li Vajtswv tej kev cheem tsum thiab qhov tseeb tej hauv paus ntsiab lus, tsis yog tsuas tiv kev txom nyem ntawm sab cev nqaij daim tawv me ntsis thiab them ib tug nqi me ntsis xwb. Koj tus moj yam qias vuab tsuab tsis raug daws, ces txhua tus nqi uas koj them thiab txhua qhov kev txom nyem uas koj tiv ntawd muaj kev npaj siab zais nyob rau hauv. Vajtswv tsis pom zoo rau qhov no; Nws tsis xav tau tus nqi zoo li no. Yog koj tawv ncauj es xam nqi nrog Vajtswv, yog koj tawv ncauj es cav thiab tawm tsam nrog Vajtswv, ces koj tab tom ua txhaum rau Nws tus moj yam, thiab Nws yuav cia koj ua raws li koj txoj kev, nqis mus rau ntuj tawg kom raug rau txim. Qhov no yog qhov ua pauj rau kev ua phem. Koj tau xyiv fab rau ntau yam koob hmoov thiab txoj hmoov hlub los ntawm Vajtswv los, thiab Nws tau muab qee txoj kev saib xyuas tshwj xeeb ntawm sab khoom rau koj. Koj twb tau txais yam uas koj tsim nyog tau lawm—koj tseem xav tau dab tsi ntxiv los ntawm Vajtswv?” Yog koj qhia cov lus no, tus tib neeg uas muaj lub siab txawj xav thiab laj thawj me ntsis ntawd txoj kev xav yws puas yog yuav txo qis me ntsis thaum hnov cov lus no? Cov lus no puas yog cov lus uas muaj kev nkag siab yog uas mus raws li qhov tseeb? (Yog.) Yog ib tug tib neeg muaj kev ua neeg thiab laj thawj, lawv tuaj yeem to taub thiab lees txais cov lus ntawd. Tsuas yog cov uas tsis muaj kev ua neeg, cov uas tsis muaj lub siab txawj xav thiab laj thawj, thiaj li xav hais tias cov lus no yog tab tom dag lawv, tias cov lus ntawd yog cov lus zoo mloog sab nraud xwb, tsis tsim nyog ntseeg, thiab tias cov lus ntawd tsis muaj txiaj ntsim li qhov hmoov hlub uas pom tau los sis tej koob hmoov ntawm sab khoom. Yog li ntawd, thaum lawv tsis tau pom tej txiaj ntsim uas kov tau ntawd, txawm koj yuav hais dab tsi los yeej tsis muaj qab hau; lawv yuav tsis lees txais. Tej zaum lawv yuav tsis tawm tsam ntawm koj xub ntiag, tiam sis tom qab koj nraub qaum, lawv tseem pheej tawm tsam hauv lawv lub siab txuas ntxiv, tso tej kev xav tsis zoo tawm qee zaus, khav txog lawv tus kheej tej txiaj ntsig, suav tej kev txom nyem uas lawv tau tiv, nrog rau qhov uas Vajtswv lub tsev coj li cas rau lawv, lawv nyiaj Vajtswv lub tsev li cas—lawv yeej ib txwm khaws tej no cia rau hauv lawv lub siab. Txawm muaj dab tsi tshwm sim rau lawv los xij, tsuav lawv tsis tau txais yam uas lawv xav tau xwb, ces lawv tus yam ntxwv tsiaj qus yuav tawm los, lawv npau taws heev, nthuav lawv tus yam ntxwv uas ntxim txaj muag tawm, thiab lawv tso tej kev xav tsis zoo tawm. Koj puas tseem yuav sim ntuas ib tug tib neeg zoo li no? Yog tias, tom qab raug ntuas me ntsis lawm es lawv tseem qhia tus yam ntxwv qub tshwm, lawv tej teeb meem qub rov los, thiab lawv tus yam ntxwv xeeb txawm dab rov tshwm tuaj dua, yuav tsum ua li cas? Thaum ntawd yog lub sij hawm uas yuav tsum tau txwv lawm. Tsis txhob tseg ib lub cib fim rau lawv lees txim hloov dua siab tshiab lawm. Lawv zoo li yav ntoo lwj; lawv yog cov neeg phem uas ruam, tawv ncauj. Qhov uas lawv yog “cov neeg phem uas ruam, tawv ncauj” ntawd txhais li cas? Txhais hais tias lawv tsis lees txais txoj hau kev uas yog thiab tsis lees txais tej yam uas zoo. Tiam sis, lawv ho lees txais tej lus cav uas nkhaus, tej kev qhuab qhia uas yuam kev, thiab tej lus cuav, tuav rawv lawv tus kheej tej kev xam pom txog qhov tau txais cov txiaj ntsim uas pom tau, nrhiav kom tus kheej tau qhov zoo, thiab tsis poob peev. Txawm Vajtswv lub tsev yuav qhia qhov tseeb li cas los, lawv yeej ib txwm hais tias, “Cov ntawd puav leej yog cov lus zoo mloog xwb. Leej twg thiaj li hais tsis tau ob peb lo lus zoo mloog? Yog koj poob peev, koj yuav tsis hais li ntawd lawm.” Lawv tawv ncauj tuav rawv tej kev xam pom zoo li no, thiab thaum muaj tej yam uas ua rau tsis txaus siab tshwm sim los sis lawv poob peev, lawv xav hais tias lawv tsis tau txais ib yam dab tsi los ntawm kev ntseeg Vajtswv li, thiab lawv yuav tso tej kev xav tsis zoo tawm dua. Puas tseem yuav muab ib lub cib fim rau lawv lawm? Tsis muab lawm. Yog lawv tsis ua lawv tej dej num kom zoo, hos tseem cuam tshuam lwm tus xwb, cheem thiab txwv lawv tam sid. Tsis txhob cia lawv hais lus raws li siab nyiam. Yog lawv tseem pheej tshaj tawm tej kev xav tsis zoo thiab cuam tshuam lwm tus, ces tsis txhob ua siab mos siab muag rau lawv ntxiv lawm. Kav tsij tshem lawv tawm. Qhov no tsis suav tias tsis muaj kev hlub, puas yog? (Tsis suav.) Twb muab qhov tseeb qhia rau lawv yam ntxaws heev lawm, tiam sis txawm yuav qhia li cas los, lawv lees txais tsis tau—qhov no qhia txog dab tsi? Nyob sab nraud mas, tus neeg no zoo li yog ib tug tsis ntseeg, tiam sis nyob hauv lub ntsiab tseeb mas, lawv yog ib tug dab. Lawv los rau hauv Vajtswv lub tsev los thov hmoov hlub thiab koob hmoov ntawm Vajtswv, los kom tau txais txiaj ntsim, thiab lawv yuav tsis tso tseg kom txog thaum lawv tau txais tej ntawd. Yog lawv tsis tau txais txiaj ntsim dab tsi tom qab ntseeg tau ib ntus lawm, lawv tus moj yam ntxwgnyoog yuav tawm los; lawv yuav tso lawv txoj kev tsis txaus siab rau Vajtswv tawm, ua phem, thiab ua rau muaj kev cuam tshuam. Qhov no yog ib tug dab. Qhov kev txom nyem thiab kev fij me ntsis uas lawv tau ua ntawd yeej tsis yog txoj kev xyaum ua raws Vajtswv cov lus kiag li. Tej ntawd tsuas yog kev ua lag luam xwb, yog kom tau txais txiaj ntsim thiab koob hmoov rau lawv tus kheej xwb. Thaum tej yam tshwm sim rau cov uas ib txwm xav tau txais qee yam los ntawm lawv txoj kev ntseeg Vajtswv, thiab lawv xav tsis zoo thiab qaug zog, lawv pheej hais tias, “Kuv tsis tau txais ib yam dab tsi los ntawm kev ntseeg Vajtswv li.” Tom qab ntawd, lawv tso tseg thiab pib ua yam tsis raug kev tswj, nrhiav kev ua pauj rov qab, thiab pheej tso tej kev xav tsis zoo tawm los tso tawm lawv tej kev xav uas tsis txaus siab. Peb twb tau sib qhia txog qhov tias yuav coj li cas rau hom neeg zoo li no lawm: Yuav tsum daws lawv raws li tej hauv paus ntsiab lus. Yog lawv tuaj yeem lees txais qhov tseeb thiab cog lus tias yav tom ntej lawv yuav tsis ua rau muaj kev cuam tshuam ntxiv lawm, ces tuaj yeem muab dua lwm lub cib fim rau lawv nyob hauv pawg ntseeg. Yog lawv pheej cuam tshuam thiab ua kom puas tsuaj rau pawg ntseeg tes hauj lwm thiab lub neej hauv pawg ntseeg, ces tshem lawv tawm mus. Qhov no yog los tiv thaiv pawg ntseeg tes hauj lwm thiab ua kom paub tseeb tias cov neeg Vajtswv xaiv tseg tuaj yeem ua lub neej hauv pawg ntseeg yam tsis raug cuam tshuam. Qhov kev txiav txim siab thiab txoj hau kev no raug siv raws li lub hauv paus ntsiab lus no. Qhov ntawd tsim nyog lawm.

Nyob rau hauv lub neej hauv pawg ntseeg, tseem muaj cov twg ntxiv uas nyiam tso tej kev xav tsis zoo tawm? Ib txhia tib neeg ua lawv tes dej num yam tsis muaj txiaj ntsig, pheej ua yuam kev tas li; lawv tsis tig xav txog lawv tus kheej tiam sis pheej xav tias Vajtswv tsis ncaj ncees los sis tsis coj ncaj nruab nrab, tias Vajtswv ib txwm muab hmoov hlub rau lwm tus tiam sis tsis muab rau lawv, tias Vajtswv saib tsis taus lawv, thiab yeej tsis qhia kom lawv paub li, thiab qhov ntawd thiaj li ua rau lawv ua lawv tes dej num tsis muaj txiaj ntsig li, thiab lawv yeej tsis muaj peev xwm ua tau raws li lub hom phiaj uas xav ua tus zoo tshaj thiab kom lwm tus saib lawv rau qhov siab. Lawv pib muaj kev yws Vajtswv nyob rau hauv lawv lub siab, thiab tib lub sij hawm ntawd, lawv pib khib, tsis nyiam kiag li, thiab ntxub cov uas ua lawv tej dej num yam ua siab ncaj. Hom tib neeg no muaj txoj kev ua neeg zoo li cas? Lawv tsis yog cov uas siab nqaim lod? Thiab tsis tas li ntawd xwb, puas yog lawv tsis to taub tias yuav caum qhov tseeb li cas nyob rau hauv lawv txoj kev ntseeg Vajtswv? Lawv tsis to taub tias kev ntseeg Vajtswv yog dab tsi. Lawv xav tias kev ntseeg Vajtswv thiab qhov ua ib teg dej num ntawd mas zoo li ib tug tub ntxhais kawm ntawv xeem ntawv nkag mus hauv tsev kawm qib siab, pheej yuav tsum piv cov qhab nias thiab tias leej twg nyob ua ntej los sis ua qab. Yog li ntawd, lawv thiaj li saib tej no tseem ceeb heev. Qhov ntawd tsis yog lawv tus yam ntxwv lod? Ua ntej tshaj plaws, saib raws li txoj kev xam pom ntawm kev nkag siab qhov tseeb, cov tib neeg zoo li no puas muaj kev to taub ntawm sab ntsujplig? Lawv tsis muaj, thiab lawv tsis to taub tias kev ntseeg Vajtswv thiab kev caum qhov tseeb yog dab tsi. Ib qho yog, lawv saib qhov uas lawv nyob siab dua los sis qis dua lwm tus ntawd tseem ceeb heev; Lwm qhov yog, lawv pheej siv txoj kev muab qhab nias los ntsuas seb lwm tus ua lawv tej dej num zoo npaum li cas thiab lawv tus kheej ua tau zoo npaum li cas, zoo ib yam nkaus li lawv tab tom ntsuas cov tub ntxhais kawm hauv tsev kawm ntawv, siv txoj hau kev no ntsuas tib neeg txoj kev ntseeg Vajtswv thiab txoj kev ua lawv tej dej num. Qhov no tsis muaj teeb meem lod? Tsis tas li ntawd xwb, txoj kev uas lawv siv zog ua lawv tej dej num ntawd puas yog tsis yog lawm? Puas yog lawv siv lub zog ntawm kev kawm ntawv thiab kev xeem ntawv los ua lawv tes dej num? (Yog.) Vim li cas peb thiaj li hais li ntawd? Cov tib neeg zoo li no puas to taub tias yuav nrhiav tej hauv paus ntsiab lus li cas thaum ntseeg Vajtswv thiab ua lawv tej dej num? Lawv puas muaj peev xwm nrhiav tej hauv paus ntsiab lus? Nyob rau ib kis mas, lawv tsis paub tias yuav nrhiav tej hauv paus ntsiab lus li cas. Tib neeg yuav tsum nyeem Vajtswv cov lus li cas, yuav sib qhia qhov tseeb li cas, thiab yuav ua lawv tej dej num kom zoo li cas—lawv tsis to taub tej yam no, thiab lawv tsis quav ntsej txog tej ntawd li thiab. Lawv tsuas paub tias yuav tsum nrhiav tej hauv paus ntsiab lus thiab ua raws li tej hauv paus ntsiab lus ntawd, tiam sis rau qhov uas tej hauv paus ntsiab lus teem tseg, qhov uas Vajtswv cheem tsum, los sis lwm tus ua raws li tej hauv paus ntsiab lus li cas, lawv tsis muaj kev to taub. Lawv yeej tsis nkag siab hlo li. Thiab nyob rau lwm kis, lawv puas muaj peev xwm ntsuas qhov kev ua ib teg dej num raws li Vajtswv cov qauv uas ntsuas seb tib neeg qhov kev ua lawv tes dej num ntawd puas tau raws li tus qauv, thiab tej hauv paus ntsiab lus uas Nws cheem tsum ntawm tib neeg thaum ua lawv tes dej num? Lawv puas tuaj yeem to taub tej yam no los ntawm Vajtswv cov lus thiab kev sib qhia ntawm cov kwv tij thiab cov muam? Ua ntej tshaj plaws, lawv tsis to taub Vajtswv cov lus, thiab lawv tsis to taub tej yam ntawm qhov ua ib teg dej num. Tom qab lawv pib ntseeg Vajtswv thiab ua tej dej num, lawv ua tib zoo xav tias: “Thaum kuv tseem kawm ntawv, kuv nrhiav pom ib txoj cai: Tsuav koj yeem siv zog ua hauj lwm hnyav thiab kawm ntau ntxiv xwb, koj tuaj yeem tau txais cov qhab nias siab. Yog li ntawd, kuv yuav ua tib yam nkaus li ntawd nyob rau hauv kuv txoj kev ntseeg vajtswv. Kuv yuav nyeem vajtswv cov lus ntau ntxiv thiab thov vajtswv ntau ntxiv. Thaum lwm tus tab tom tham lus ua si los sis noj mov, kuv yuav kawm cov nkauj qhuas vajtswv thiab cim nco vajtswv cov lus. Nrog rau qhov kev siv zog no, vajtswv yeej yuav foom koob hmoov rau kuv xwb, raws li kuv txoj kev siv zog ua hauj lwm hnyav, kev rau siab, thiab kev nquag, thiab kuv qhov kev ua tes dej num yeej yuav muaj txiaj ntsig xwb. Kuv yeej yuav tau qhab nias siab nyob hauv cov neeg sawv daws, thiab kuv yuav raug saib muaj nqis thiab raug txhawb.” Tiam sis, txawm ua li ntawd los, lawv tseem ua tsis tau raws li lawv tej kev ntshaw: “Vim li cas kuv tseem ua kuv tes dej num tsis tau zoo npaum li lwm tus? Ua li thaum twg kuv thiaj li yuav raug txhawb los sis raug siv rau tej hauj lwm tseem ceeb? Qhov no tsis txhais hais tias tsis muaj kev cia siab lawm lod? Kuv yug los yeej nyiam kev sib tw, tsis txaus siab poob lwm tus qab. Thaum tseem kawm ntawv yeej zoo li ntawd, thiab tam sim no nyob hauv kuv txoj kev ntseeg vajtswv los yeej zoo li ntawd thiab. Leej twg uas ua tau zoo dua kuv, kuv txiav txim siab tias yuav tsum ua kom tau zoo dua lawv. Kuv yuav tsis so kom txog thaum kuv ua tau li ntawd!” Lawv ntseeg hais tias lawv siv tau txoj kev thiab txoj hau kev uas yog lawm—tsuas yog muab lub zog ntawm kev kawm hnyav los nyeem Vajtswv cov lus kom ntau ntxiv thiab kawm cov nkauj qhuas Vajtswv kom ntau ntxiv; tsis nrog lwm tus tham lus ua si; tsis tsom ntsoov rau qhov tu cev; pw kom tsawg dua thiab xyiv fab kom tsawg dua; kov kom yeej lawv lub cev; thiab tsis ntshaw kev tau zoo ntawm lub cev nqaij daim tawv—ces lawv yuav muaj peev xwm tau txais Vajtswv tej koob hmoov, thiab lawv yeej yuav ua tau txiaj ntsig nyob hauv qhov ua lawv tes dej num xwb. Txawm li cas los xij, txhua yam yeej ib txwm tshwm sim txawv ntawm qhov lawv xav: “Vim li cas kuv pheej tseem ua yuam kev thaum ua kuv tes dej num, thiab vim li cas kuv tseem ua tsis tau zoo npaum li lwm tus? Lwm tus ua tau ceev thiab zoo, thiab tus thawj coj pheej qhuas thiab saib lawv siab tas li. Kuv tau tiv kev txom nyem thiab kev nyuaj ntau heev lawm. Vim li cas kuv tseem ua tsis tau txiaj ntsig li?” Thaum lawv ua tib zoo xav txog qhov no, thaum kawg lawv thiaj li nrhiav tau ib qho tseem ceeb heev: “Qhov tseeb tiag yog vajtswv tsis ncaj ncees. Kuv ntseeg vajtswv ntev npaum li no kuv thiaj li nyuam qhuav paub xwb! Vajtswv muab hmoov hlub rau leej twg uas nws xav muab. Yog li, vim li cas nws thiaj li tsis xav muab hmoov hlub rau kuv? Puas yog vim kuv ruam, vim kuv tsis paub hais lus qab zib thiab hais lus npliag, vim kuv tsis ntse? Los sis puas yog vim kuv lub ntsej muag dog dig xwb, thiab kuv kev kawm qis? Qhov no yog vajtswv nthuav kuv tawm, tsis yog lod? Kuv tau nyeem vajtswv cov lus ntau heev lawm—vim li cas vajtswv thiaj li tsis muab hmoov hlub rau kuv, tiam sis ho muab kuv nthuav tawm?” Thaum lawv xav txog qhov ntawd, lawv txawm xav tsis zoo tias: “Kuv tsis xav ua kuv tes dej num ntxiv lawm. Vajtswv twb tsis foom koob hmoov rau kuv thaum kuv ua kuv tes dej num, thiab kuv tau nyeem vajtswv cov lus ntau ntxiv lawm, tiam sis nws twb tsis qhia kuv kom paub. Nyob hauv vajtswv cov lus tau hais tias vajtswv muab hmoov hlub rau leej twg uas nws xav muab thiab hlub tshua leej twg uas nws xav hlub tshua. Kuv tsis yog tus uas vajtswv hlub tshua los sis muab hmoov hlub rau. Vim li cas kuv thiaj li yuav tsum tiv txoj kev txom nyem no?” Lawv yim xav, lawv yim xav tsis zoo, thiab lawv yim tsis muaj txoj kev mus lawm. Lawv xav tias lawv tej kev tsis txaus siab ua rau lawv ua tsis taus pa, thiab lawv tsis xav ua lawv tes dej num ntxiv lawm; thiab thaum ua lawv tes dej num, lawv tsuas lam ua kom dhau xwb. Txawm lwm tus yuav sib qhia txog tej hauv paus ntsiab lus li cas los, lawv yeej mloog tsis nkag pob ntseg li. Tsis muaj kev teb rov qab nyob rau hauv lawv lub siab li. Thaum lawv nyob rau hauv hom xwm txheej no, lawv puas muaj kev nkag mus rau hauv lub neej txoj sia? Lawv puas muaj kev ua siab ncaj hauv qhov ua lawv tes dej num? Tsis muaj ntxiv lawm, thiab qhov kev siv zog me ntsis thiab kev nquag uas lawv tau muaj ntawd los kuj ploj mus lawm thiab. Yog li, tshuav dab tsi nyob hauv lawv lub siab? “Mus ib kauj ruam xam ib kauj ruam lawm xwb, thiab ua raws li tej yam uas tshwm sim xwb. Tej zaum tam sim no vajtswv yuav muab kuv nthuav tawm thiab tshem kuv tawm hnub twg los tau, thiab muab kuv tso tseg. Thaum txog hnub uas tsis cia kuv ua kuv tes dej num lawm, ces kuv yuav tsis ua lawm. Kuv paub tias kuv tsis zoo txaus. Tej zaum vajtswv tseem tsis tau tshem kuv tawm, tiam sis kuv paub tias nws tsis nyiam kuv. Tsuas yog tos lub sij hawm xwb, kuv yeej yuav raug muab tshem tawm.” Tej kev xav thiab kev xam pom no tshwm sim nyob hauv lawv lub siab, thiab thaum lawv nrog lwm tus sib txuas lus, tej lus zoo li no cia li tawm los qee zaus: “Nej txhua tus ua tib zoo ntseeg mus. Nej txoj kev ntseeg thiab qhov ua nej tej dej num ntawd yeej yuav raug vajtswv foom koob hmoov xwb. Kuv tsis muaj kev cia siab lawm. Kuv txoj kev ces twb taug los kawg lawm. Txawm kuv yuav nquag los sis siv zog npaum li cas los, qhov ntawd tsis muaj qab hau. Ib tug neeg twg uas vajtswv tsis nyiam, txawm lawv yuav siv zog npaum li cas los yeej tsis muaj qab hau. Kuv ua kuv tes dej num los ntawm qhov siv zog raws li kuv ua tau; yog tsis muaj chaw rau kuv lub zog mus, ces yeej ua tsis tau li cas lawm. Vajtswv puas yuav yuam kom tib neeg ua yam uas tshaj lawv lub peev xwm? Vajtswv yuam tsis tau kom ntses mus nyob rau saum nruab nqhuab!” Cov lus no yog hais txog dab tsi? Lub ntsiab lus ces yog: “Kuv yeej yog li no lawm xwb. Txawm vajtswv yuav coj li cas rau kuv los xij, kuv tus cwj pwm ces yeej yog li no xwb.” Qhia Kuv seb, vim li cas ib tug neeg uas muaj tus cwj pwm thiab kev npaj siab zoo li no tseem xav tau txais Vajtswv tej koob hmoov? Tus yam ntxwv thiab tus cwj pwm uas lawv tau tsim muaj no puas cuam tshuam tau rau lwm tus? Tej ntawd tuaj yeem muaj ib qho kev cuam tshuam uas phem thiab tsis zoo yam yooj yim, ua rau lwm tus poob rau txoj kev xav tsis zoo thiab kev qaug zog. Qhov no tsis yog kev coj lwm tus mus yuam kev thiab ua phem rau lwm tus lod? Cov neeg uas muaj kev xav tsis zoo txog qib no tsis yog cov dab lod? Cov dab yeej ib txwm tsis nyiam qhov tseeb li.

Ib txhia tib neeg tsis tso lawv tej kev xav tsis zoo tawm ua tej lus ntev ntev; lawv tsuas hais ob peb lo lus tias: “Nej txhua tus puav leej zoo dua kuv. Nej txhua tus puav leej tau txais koob hmoov loj heev. Kuv tsis muaj kev cia siab lawm. Txawm kuv yuav siv zog npaum li cas los, qhov ntawd tsis muaj qab hau. Kuv tsis muaj kev cia siab tias yuav tau txais Vajtswv tej koob hmoov lawm.” Txawm hais tias cov lus no yooj yim thiab zoo li tsis muaj teeb meem, mloog zoo li lawv tab tom tshuaj xyuas lawv tus kheej, soj ntsuam lawv tus kheej, thiab lees txais qhov muaj tseeb tias lawv tus kheej lub peev xwm tsis zoo thiab lawv tej qhov tsis zoo, tiam sis qhov tseeb tiag, lawv tab tom tso ib hom kev xav tsis zoo uas pom tsis tau tawm. Cov lus no muaj kev thuam thiab kev luag saib tsis taus, nrog rau kev tawm tsam, thiab muaj tseeb tias, haj yam muaj kev tsis txaus siab rau Vajtswv, nrog rau txoj kev xav tsis zoo thiab kev poob siab. Cov lus xav tsis zoo no tej zaum yuav tsawg, tiam sis txoj kev xav no, zoo li ib hom kab mob sib kis, tuaj yeem cuam tshuam rau lwm tus. Txawm hais tias lawv tsis hais meej meej tias, “Kuv tsis xav ua kuv tej dej num ntxiv lawm, kuv tsis muaj kev cia siab tias yuav tau txais kev cawm dim lawm, thiab nej txhua tus los kuj phom sij ib yam nkaus thiab,” tiam sis lawv tau xa ib lub cim uas ua rau tib neeg xav tias, ib tug neeg uas siv zog npaum li no twb tsis muaj kev cia siab tias yuav tau txais kev cawm dim lawm, ces cov uas tsis siv zog ntawd haj yam tsis muaj kev cia siab lawm. Los ntawm qhov xa lub cim no, lawv tab tom qhia rau txhua tus tias, “Kev cia siab mas tseem ceeb heev. Yog Vajtswv tsis muab kev cia siab rau koj, yog Vajtswv tsis foom koob hmoov rau koj, ces txawm koj yuav siv zog npaum li cas los, qhov ntawd yeej tsis muaj qab hau dab tsi li.” Tom qab tib neeg feem coob lees txais lub cim no lawm, lawv txoj kev ntseeg Vajtswv uas nyob tob tob hauv lawv lub siab yeej yuav ploj zuj zus mus xwb, thiab txoj kev ua siab ncaj thiab kev ua siab dawb paug uas lawv tsim nyog ua thaum ua lawv tej dej num ntawd yeej yuav txo qis heev. Txawm hais tias lawv tso tej kev xav tsis zoo no tawm yam tsis muaj ib qho kev npaj siab meej meej los coj tib neeg mus yuam kev los sis rub tib neeg los rau lawv sab, tiam sis txoj kev xav tsis zoo no yeej cuam tshuam rau lwm tus tau sai heev, ua rau lawv hnov tias muaj kev phom sij, hnov tias lawv txoj kev siv zog ntawd yeej nkim tau yooj yim heev; qhov ntawd ua rau tib neeg ua neej nyob hauv lawv tej kev xav, siv tej kev xav los kwv yees txog Vajtswv, thiab soj ntsuam thiab tshawb xyuas kom meej txog Vajtswv tus cwj pwm thiab txoj kev ua siab dawb paug rau noob neej raws li tej kev tshwm sim nyob sab nraud. Thaum txoj kev xav tsis zoo no raug xa mus rau lwm tus, lawv yeej yuav nyob deb ntawm Vajtswv thiab to taub yuam kev thiab ua xyem xyav txog yam uas Vajtswv tau hais yam tswj tsis tau, tsis ntseeg Nws cov lus ntxiv lawm. Nyob rau tib lub sij hawm ntawd, lawv tsis muaj kev ua siab dawb paug rau lawv tej dej num ntxiv lawm; lawv tsis txaus siab them tus nqi, thiab tsis txaus siab ua siab ncaj ntxiv lawm. Qhov no yog qhov cuam tshuam rau tib neeg ntawm cov lus hais tsis zoo no. Qhov tshwm sim los ntawm qhov kev cuam tshuam no yog dab tsi? Tom qab hnov cov lus no lawm, tib neeg tsis tau txais kev tsim kho, thiab haj yam tsis tau txais kev paub txog lawv tus kheej, nrhiav pom lawv tej qhov tsis zoo txaus, los sis muaj peev xwm xyaum ua raws qhov tseeb thiab ua lawv tej dej num raws li tej hauv paus ntsiab lus—lawv tsis tau txais ib qho txiaj ntsig zoo ntawm tej no li. Tiam sis, qhov kev cuam tshuam no ua rau tib neeg xav tsis zoo ntxiv, xav txog qhov tso txoj kev caum qhov tseeb tseg, thiab tsis muaj kev txiav txim siab nyob hauv lawv tej dej num ntxiv lawm. Vim li cas lawv thiaj li poob kev ntseeg lawm? (Lawv xav tias lawv tsis muaj kev cia siab tias yuav tau txais kev cawm dim lawm.) Yog lawm, koj lees txais cov lus no thiab xav tias koj tsis muaj kev cia siab tias yuav tau txais kev cawm dim lawm, yog li ntawd koj thiaj li tsis txaus siab siv zog los ua koj tes dej num lawm. Txoj kev coj no qhia tau hais tias koj tsis tau caum qhov tseeb tiag tiag tiam sis pheej txiav txim seb Vajtswv puas txaus siab rau koj, seb koj puas muaj kev cia siab tias yuav tau txais kev cawm dim, thiab seb Vajtswv puas pom zoo rau koj qhov kev ua koj tes dej num raws li koj tej kev xav, koj lub siab, thiab kev lam kwv yees. Thaum tib neeg txiav txim txog tej yam no raws li kev lam kwv yees, ces lawv tsis muaj zog ntau los xyaum ua raws qhov tseeb lawm. Vim li cas thiaj li zoo li no? Thaum tib neeg txiav txim rau Vajtswv raws li kev lam kwv yees ntawd, lawv puas txiav txim tau rau Nws kom raug? Tib neeg puas lam kwv yees tau txog txhua txoj kev xav thiab lub tswv yim uas Vajtswv muaj ntawd kom yog? (Tsis tau.) Tib neeg lub hlwb puv npo nrog txoj kev txawj dag, kev ua lag luam, tej tswv yim rau kev ua neej hauv ntiaj teb, Ntxwgnyoog lub laj thawj, thiab lwm yam ntxiv. Qhov tshwm sim los ntawm qhov uas tib neeg siv tej no los lam kwv yees Vajtswv ntawd yog dab tsi? Qhov ntawd ua rau muaj kev ua xyem xyav txog Vajtswv, nyob deb ntawm Vajtswv, thiab haj tseem poob kev ntseeg rau Vajtswv tag nrho lawm thiab. Thaum ib tug neeg poob kev ntseeg rau Vajtswv tag nrho lawm, yeej yuav muaj ib lub cim nug loj loj nyob rau hauv lawv lub siab txog qhov tias Vajtswv puas muaj nyob tiag tiag. Lub sij hawm ntawd, lawv lub sij hawm ua ib tug ntseeg Vajtswv yuav xaus—lawv raug puas tsuaj tag nrho. Tsis tas li ntawd xwb, qhov uas tib neeg lam kwv yees txog Vajtswv ntawd puas yog? Qhov no puas yog tus cwj pwm ntawm ib tug neeg uas raug tsim tawm los tsim nyog muaj rau tus Tswv Tsim? Pom tseeb tias tsis yog. Tib neeg yuav tsum tsis txhob lam kwv yees txog Vajtswv, thiab lawv kuj yuav tsum tsis txhob kwv yees Vajtswv txoj kev xav los sis Nws lub siab xav txog tib neeg thiab. Qhov no yeej yuam kev ntawm lub hauv paus lawm; vim tib neeg qhov kev xam pom thiab qhov chaw sawv yeej tsis yog li lawm.

Tib neeg yuav tsum tsis txhob coj rau Vajtswv nrog kev lam kwv yees, kev lam twv, kev ua xyem xyav, los sis kev thaiv thiab xav phem, thiab lawv kuj yuav tsum tsis txhob txiav txim txog Nws raws li tib neeg tej kev xav thiab tej kev xam pom, tej tswv yim rau kev ua neej hauv ntiaj teb, los sis kev paub ntawm kev kawm ntawv. Yog li, tib neeg yuav tsum coj rau Vajtswv li cas? Ua ntej tshaj plaws, tib neeg yuav tsum ntseeg tias Vajtswv yog qhov tseeb. Vajtswv tej kev cheem tsum rau tib neeg, Nws tej kev npaj siab rau lawv, Nws txoj kev hlub thiab kev ntxub rau tib neeg, thiab Nws tej kev npaj, tej kev xav, thiab tej tswv yim rau ntau hom neeg, thiab lwm yam ntxiv, tsis cheem tsum kom koj kwv yees; tej yam no muaj kev piav qhia meej meej thiab lub ntsiab lus meej meej nyob rau hauv Vajtswv cov lus. Koj tsuas yog yuav tsum ntseeg, nrhiav, thiab tom qab ntawd xyaum ua raws li Vajtswv cov lus xwb—yooj yim npaum li ntawd xwb. Vajtswv tsis tau kom koj siv koj tej kev xav los txiav txim seb Nws yuav ua li cas rau koj, los sis Nws saib koj li cas. Yog li ntawd, koj xav tias koj tsis muaj kev cia siab tias yuav tau txais kev cawm dim lawm—qhov no yog ib qho kev xav los sis yog ib qho muaj tseeb? Vajtswv cov lus puas tau hais li ntawd? (Tsis tau.) Yog li ntawd, Vajtswv cov lus hais li cas? Vajtswv qhia rau tib neeg tias yuav tsum nrhiav qhov tseeb los daws thiab nrhiav txoj kev los xyaum ua raws qhov tseeb li cas thaum tib neeg ntsib teeb meem los sis nthuav tawm cov moj yam qias vuab tsuab. Qhov no ua pov thawj rau ib yam: Qhov ntawd muaj tseeb tias Vajtswv xav cawm tib neeg thiab hloov lawv cov moj yam qias vuab tsuab; Vajtswv tsis dag koj, thiab qhov no tsis yog cov lus qhuav xwb. Koj xav tias koj tsis muaj kev cia siab tias yuav tau txais kev cawm dim lawm, tiam sis qhov ntawd tsuas yog ib qho kev xav ib lub sij hawm ntawd, yog ib qho kev hnov uas tshwm sim nyob rau hauv ib qho xwm txheej twg xwb. Koj tej kev xav tsis sawv cev rau Vajtswv lub siab nyiam los sis Nws tej kev npaj siab, haj yam tsis sawv cev rau Nws tej kev xav, thiab tej ntawd kuj tsis sawv cev rau qhov tseeb thiab. Yog li ntawd, yog koj ua neej nyob raws li qhov kev xav no, yog koj kwv yees txog Vajtswv raws li qhov kev xav no, siv koj qhov kev xav los hloov Vajtswv lub siab nyiam, ces koj ua yuam kev loj heev thiab poob rau hauv Ntxwgnyoog rooj ntxiab lawm. Yog li, ib tug neeg yuav tsum ua li cas nyob rau hauv qhov xwm txheej no? Tsis txhob vam khom rau tej kev xav. Ib txhia tib neeg hais tias, “Yog peb tsis vam khom rau tej kev xav no, peb yuav tsum vam khom rau dab tsi?” Qhov vam khom rau ib yam dab tsi uas yog koj li yeej tsis muaj qab hau; tib neeg tej kev xav tsis sawv cev rau qhov tseeb. Leej twg yuav paub tias koj txoj kev xav ntawd tshwm sim los li cas, qhov ntawd los qhov twg los tiag tiag—yog tias tshwm sim los ntawm qhov raug Ntxwgnyoog coj mus yuam kev, ces qhov ntawd yog teeb meem lawm. Txawm li cas los xij, txawm txoj kev xav ntawd tshwm sim los li cas los xij, qhov ntawd yeej tsis sawv cev rau qhov tseeb. Yim yog thaum ib tug neeg tej kev xav thiab tej kev ras txog muaj zog npaum li cas, lawv yim cheem tsum nrhiav qhov tseeb, los rau ntawm Vajtswv lub xub ntiag thiab tig xav txog lawv tus kheej. Tib neeg tej kev xav, thiab tej uas muaj tseeb thiab qhov tseeb, yog ob yam uas txawv. Tej kev xav puas tuaj yeem muab qhov tseeb rau koj? Tej ntawd puas tuaj yeem coj ib txoj kev xyaum ua raws rau koj? Tej ntawd yeej ua tsis tau. Tsuas yog Vajtswv cov lus, tsuas yog qhov tseeb, thiaj li coj tau ib txoj kev xyaum ua raws los rau koj, coj tau ib qho kev tig hloov los rau koj, thiab qhib ib txoj kev tawm rau koj. Yog li ntawd, yam uas koj yuav tsum tau xyaum ua tsis yog nrhiav koj tus kheej tej kev xav—koj tej kev xav tsis tseem ceeb. Yam uas koj yuav tsum ua yog los rau ntawm Vajtswv lub xub ntiag los nrhiav qhov tseeb, los to taub Vajtswv tej kev npaj siab los ntawm Nws cov lus. Koj yim vam khom rau tej kev xav, ces koj yim pom koj tus kheej tsis muaj txoj kev mus tom ntej, koj yim poob tob rau hauv txoj kev xav tsis zoo, thiab koj yim ntseeg tias Vajtswv tsis ncaj ncees, tias Vajtswv tsis foom koob hmoov rau koj. Ntawm qhov tsis sib xws, yog koj muab tej kev xav no tso tseg los nrhiav qhov tseeb tej hauv paus ntsiab lus, los saib seb tej kev ua twg hauv tus txheej txheem ntawm qhov ua koj tes dej num uas tau ua txhaum qhov tseeb tej hauv paus ntsiab lus, tej kev ua twg uas tau ua raws li koj tus kheej lub siab nyiam thiab tsis muaj feem xyuam nrog qhov tseeb tej hauv paus ntsiab lus kiag li, ces nyob rau hauv tus txheej txheem ntawm kev nrhiav ntawd, koj yuav pom tias koj muaj koj tus kheej lub siab nyiam ntau dhau lawm, muaj tej kev xav hauv nruab siab ntau dhau lawm. Tsuas yog los ntawm qhov siv qhov kev ua tiag tiag me ntsis no xwb, koj yuav pom ntau yam teeb meem: “Kuv tus neeg no ntxeev siab dhau lawm, yuav tus kheej lub siab dhau lawm, khav theeb dhau lawm! Tsis yog tias kuv tsis muaj kev cia siab tias yuav tau txais kev cawm dim; kuv tej kev xav tsis yog lawm. Qhov ntawd yog kuv tsis saib Vajtswv cov lus tseem ceeb, thiab kuv tsis xyaum ua raws li qhov tseeb tej hauv paus ntsiab lus. Kuv pheej yws tias Vajtswv tsis foom koob hmoov rau kuv, tsis coj kuv kev, thiab tsis coj ncaj nruab nrab, tiam sis qhov tseeb tiag kuv tsis paub tias kuv ua dog ua dig, ua raws li kuv lub siab nyiam, thiab tsis xyuam xim hauv kuv qhov kev ua tes dej num—qhov no yog kuv qhov txhaum. Tam sim no kuv paub lawm tias, Vajtswv tsis xaiv leej twg ntsej muag. Thaum tib neeg tsis nrhiav qhov tseeb los sis tsis los rau ntawm Vajtswv lub xub ntiag, Vajtswv twb ua zoo rau lawv lawm los ntawm qhov tsis tshem lawv txoj cai los ua ib teg dej num; Vajtswv twb ua siab dav heev rau qhov no lawm. Tiam sis, kuv tseem xav tias muaj puv npo tej kev chim siab tias raug ua tsis ncaj ncees rau, haj tseem sib tawm tsam thiab sib cav nrog Vajtswv. Ua ntej ntawd, kuv xav tias kuv zoo heev, tiam sis tam sim no kuv pom tias qhov ntawd tsis muaj tseeb hlo li. Txawm kuv ua dab tsi los xij yeej tsis tau ua raws li tej hauv paus ntsiab lus li; qhov uas Vajtswv tsis qhuab ntuas kuv ntawd yog Nws txoj hmoov hlub—Nws paub tias kuv lub siab ntseeg me me xwb!” Los ntawm txoj kev nrhiav zoo li no, koj yuav to taub qee qhov tseeb thiab muaj peev xwm pib xyaum ua raws qhov tseeb tej hauv paus ntsiab lus yam nquag plias. Maj mam, koj yuav xav tias koj muaj qee lub hauv paus ntsiab lus hauv qhov coj koj tus kheej thiab hauv qhov ua koj tes dej num lawm. Lub sij hawm no, koj yuav tsis xav tias muaj kev kaj siab ntau ntxiv nyob hauv koj lub siab txawj xav lod? “Ua ntej ntawd, kuv xav tias kuv tsis muaj kev cia siab tias yuav tau txais kev cawm dim, tiam sis tam sim no vim li cas txoj kev xav no, qhov kev paub no, thiaj li ploj zuj zus lawm? Yog ua li cas tus yam ntxwv no thiaj li hloov lawm? Ua ntej ntawd, kuv xav tias kuv tsis muaj kev cia siab; qhov ntawd tsis yog txoj kev xav tsis zoo thiab kev tsis lees txais, thiab kev sib tawm tsam nrog Vajtswv xwb lod? Kuv ntxeev siab dhau lawm!” Tom qab zwm rau lawm, yam tsis paub txog, nyob rau hauv tus txheej txheem ntawm qhov ua koj tes dej num, koj yuav pib to taub qee lub hauv paus ntsiab lus, thiab koj yuav tsis muab koj tus kheej piv nrog lwm tus ntxiv lawm; koj tsuas tsom ntsoov rau qhov yuav ua li cas thiaj li zam tau qhov ua dog ua dig thiab yuav ua koj tej dej num raws li tej hauv paus ntsiab lus li cas xwb. koj yuav ua koj tej dej num raws li tej hauv paus ntsiab lus, thiab xav tias koj txoj kev sib raug zoo nrog Vajtswv tau dhau los ua qhov ib txwm muaj lawm. Thaum koj muaj txoj kev xav no, koj yuav xav tias, “Vajtswv tsis tau tso kuv tseg; kuv tuaj yeem hnov tau Vajtswv txoj kev nyob nrog nraim, thiab kuv tuaj yeem hnov tau Vajtswv txoj kev coj thiab kev foom koob hmoov lub sij hawm kuv nrhiav Vajtswv thaum kuv ua kuv tej dej num. Thaum kawg kuv paub lawm tias Vajtswv foom koob hmoov rau lwm tus thiab kuj foom koob hmoov rau kuv thiab, thiab tias Vajtswv tsis xaiv leej twg ntsej muag; saib zoo li kuv tseem muaj kev cia siab tias yuav tau txais kev cawm dim. Qhov tiag yog txoj kev uas kuv taug ua ntej ntawd tsis yog lawm; kuv yeej ib txwm ua dog ua dig thiab ua tej yam phem yam tsis muaj kev tswj hauv qhov ua kuv tes dej num, thiab kuv haj tseem xav tias kuv zoo lawm, ua neej nyob hauv kuv tus kheej lub ntiaj teb me me thiab qhuas kuv tus kheej. Tam sim no kuv pom tias qhov ua li ntawd yog ib qho kev ua yuam kev loj heev! Qhov ua neej nyob tag nrho rau hauv ib tug yam ntxwv ntawm kev qw nthe thiab tawm tsam Vajtswv—yeej tsis txawv li uas kuv tsis tau txais Vajtswv txoj kev qhia kom paub. Kuv yuav tau txais Vajtswv txoj kev qhia kom paub tau li cas yog kuv tsis ua raws li tej hauv paus ntsiab lus?” Koj saib seb, ob txoj kev xyaum ua raws uas txawv tag nrho, ob txoj kev daws tus kheej tej tswv yim uas txawv tag nrho, thaum kawg coj mus rau tej qhov tshwm sim los uas sib txawv.

Tib neeg ntseeg Vajtswv tsis tuaj yeem ua neej nyob raws li lawv tej kev xav. Tib neeg tej kev xav tsuas yog lub siab xav ib lub sij hawm ntawd xwb—tej ntawd puas muaj feem xyuam rau lawv qhov kawg? Puas muaj feem xyuam rau qhov muaj tseeb? (Tsis muaj.) Thaum tib neeg nyob deb ntawm Vajtswv, thaum lawv ua neej nyob hauv ib qho xwm txheej ntawm lub siab uas lawv to taub Vajtswv yuam kev, los sis tsis lees txais, tawm tsam, thiab qw nthe Vajtswv, ces lawv tau txav deb ntawm Vajtswv txoj kev saib xyuas thiab kev tsom kwm tag nrho lawm, thiab tsis muaj ib qho chaw rau Vajtswv nyob hauv lawv lub siab ntxiv lawm. Thaum tib neeg ua neej nyob hauv ib tug yam ntxwv zoo li no, lawv yeej yuav ua neej nyob raws li lawv tus kheej tej kev xav yam tswj tsis tau. Ib qho kev xav me me tuaj yeem ua rau lawv ntxhov siab heev uas noj tsis qab pw tsis tsaug zog, ib lo lus uas tsis xyuam xim los ntawm ib tug neeg tuaj yeem ua rau lawv daig rau hauv kev kwv yees thiab ua yuj yees, thiab tab txawm tias ib qho npau suav phem xwb los tuaj yeem ua rau lawv xav tsis zoo thiab ua rau lawv to taub yuam kev txog Vajtswv. Thaum lub voj voos phem no tau tshwm sim lawm, tib neeg txiav txim tias lawv tag li ntawd lawm, tias lawv tau poob tag nrho txoj kev cia siab tias yuav tau txais kev cawm dim, tias Vajtswv tso lawv tseg lawm, thiab tias Vajtswv yuav tsis cawm lawv lawm. Lawv yim xav li no, thiab lawv yim muaj tej kev xav zoo li no, lawv yim poob tob mus rau hauv txoj kev xav tsis zoo. Qhov laj thawj tiag tiag uas tib neeg muaj tej kev xav no yog vim lawv tsis nrhiav qhov tseeb los sis tsis xyaum ua raws li qhov tseeb tej hauv paus ntsiab lus. Thaum muaj ib yam dab tsi tshwm sim rau lawv, tib neeg tsis nrhiav qhov tseeb, tsis xyaum ua raws qhov tseeb, thiab yeej ib txwm taug lawv tus kheej txoj kev, ua neej nyob hauv lawv tus kheej txoj kev ntse me me. Txhua hnub muab lawv tus kheej piv thiab sib tw nrog lwm tus, khib thiab ntxub leej twg uas lawv xav tias zoo dua lawv, thiab thuam thiab luag leej twg uas lawv xav tias qis dua lawv, ua neej nyob hauv Ntxwgnyoog tus moj yam, tsis ua tej yam raws li qhov tseeb tej hauv paus ntsiab lus, thiab leej twg ntuas los tsis lees txais li. Thaum kawg qhov no ua rau lawv tsim muaj ntau yam kev xav uas tsis muaj tseeb, kev kwv yees, thiab kev txiav txim, thiab lawv ua rau lawv tus kheej ntxhov siab nyob tsis tswm rau ib hnub twg li. Thiab lawv tsis tsim nyog tau qhov no lod? Lub txim iab no tsuas yog lawv tus kheej thiaj li ris tau xwb—thiab lawv yeej tsim nyog tau tiag tiag. Dab tsi ua rau txhua yam no tshwm sim? Qhov ntawd yog vim tib neeg tsis nrhiav qhov tseeb, khav theeb thiab qhuas tias lawv tus kheej coj ncaj dhau lawm, lawv pheej ua raws li lawv tus kheej tej tswv yim, lawv pheej khav lawv tus kheej thiab muab lawv tus kheej piv rau lwm tus, lawv pheej ua kom lawv tus kheej txawv lwm tus, lawv pheej thov tej yam tsis tsim nyog los ntawm Vajtswv, thiab lwm yam ntxiv—txhua yam no ua rau tib neeg maj mam nyob deb ntawm Vajtswv, tawm tsam Vajtswv thiab ua txhaum qhov tseeb zaum tag zaum tuaj. Thaum kawg, lawv poob rau hauv txoj kev tsaus ntuj thiab kev xav tsis zoo. Thiab nyob rau tej lub sij hawm zoo li no, tib neeg tsis muaj ib txoj kev to taub tiag tiag txog lawv tus kheej txoj kev ntxeev siab thiab kev tawm tsam, thiab haj yam tsis muaj peev xwm rau lawv los daws tej yam no nrog tus cwj pwm uas yog. Tiam sis, lawv yws txog Vajtswv, to taub Vajtswv yuam kev, thiab kwv yees txog Nws. Thaum qhov no tshwm sim, thaum kawg tib neeg paub tias lawv txoj kev qias vuab tsuab tob dhau thiab tias lawv muaj teeb meem dhau, yog li ntawd lawv txiav txim tias lawv yog cov uas tawm tsam Vajtswv, thiab lawv yeej tswj tsis tau tus kheej es cia li poob mus rau hauv txoj kev xav tsis zoo, tsis tuaj yeem rub lawv tus kheej tawm. Lawv ntseeg hais tias, “Vajtswv ntxub ntxaug kuv, Vajtswv tsis xav tau kuv lawm. Kuv ntxeev siab dhau lawm, kuv tsim nyog tau txais qhov ntawd, Vajtswv yeej yuav tsis cawm kuv ntxiv lawm.” Lawv ntseeg tias txhua yam no puav leej yog qhov muaj tseeb. Lawv txiav txim tias cov kev kwv yees hauv lawv lub siab ntawd yog qhov muaj tseeb. Txawm leej twg yuav sib qhia qhov tseeb nrog lawv los xij, qhov ntawd yeej tsis muaj qab hau, lawv tsis lees txais qhov ntawd. Lawv xav tias, “Vajtswv twb tsis foom koob hmoov rau kuv, Nws twb tsis cawm kuv, yog li ntawd qhov ntseeg Vajtswv muaj qab hau dab tsi?” Thaum txoj kev ntawm lawv txoj kev ntseeg Vajtswv tau mus txog theem no lawm, tib neeg puas tseem muaj peev xwm ntseeg tau mus ntxiv? Tsis tau lawm. Vim li cas lawv thiaj li tsis tuaj yeem mus ntxiv lawm? Muaj ib qho tseeb nyob ntawm no. Thaum tib neeg txoj kev xav tsis zoo mus txog ib theem uas lawv lub siab muaj kev tawm tsam thiab kev yws puv npo, thiab lawv xav txiav lawv txoj kev sib raug zoo nrog Vajtswv kom tu nrho mus, ces qhov ntawd tsis yog ib yam dab tsi uas yooj yim li qhov uas lawv tsis hwm Vajtswv, tsis zwm rau Vajtswv, tsis nyiam qhov tseeb, thiab tsis lees txais qhov tseeb ntxiv lawm. Tiam sis yog dab tsi? Nyob rau hauv lawv lub siab, lawv pib xaiv tso lawv txoj kev ntseeg Vajtswv tseg. Lawv xav tias qhov nyob tos kom raug tshem tawm ntawd mas yog ib yam uas txaj muag, thiab qhov pib xaiv tso tseg ntawd mas yog ib qho muaj ntsej muag dua, yog li ntawd lawv thiaj li pib tso lawv lub cib fim tseg, xaus txhua yam ntawm lawv tus kheej. Lawv teem txim tias txoj kev ntseeg Vajtswv yog ib yam uas phem, lawv teem txim tias qhov tseeb tsis tuaj yeem hloov tib neeg, thiab lawv teem txim tias Vajtswv tsis ncaj ncees, yws tias vim li cas Nws tsis cawm lawv: “Kuv nquag npaum li ntawd, kuv tiv kev txom nyem ntau dua lwm tus, thiab them tus nqi ntau dua lwm tus, kuv ua kuv tes dej num los ntawm lub siab dawb paug, thiab Vajtswv tsis tau foom koob hmoov rau kuv li. Tam sim no kuv pom meej tias Vajtswv tsis nyiam kuv, tias Vajtswv coj tsis ncaj nruab nrab rau tib neeg.” Lawv muaj lub siab tawv los hloov lawv txoj kev ua xyem xyav txog Vajtswv mus ua kev teem txim rau Vajtswv thiab kev tuam mom Vajtswv. Thaum qhov muaj tseeb no tau tsim tuaj lawm, lawv puas taug tau txoj kev ntseeg Vajtswv mus txuas ntxiv? Vim lawv ntxeev siab rau Vajtswv thiab tawm tsam Vajtswv, thiab tsis lees txais qhov tseeb los sis tsis tig xav txog lawv tus kheej kiag li, es raug puas tsuaj lawm. Ib tug neeg uas nqis tes tso Vajtswv tseg ntawm lawv tus kheej thiab tom qab ntawd yws tias Vajtswv tsis foom koob hmoov rau lawv los sis tias tsis muab hmoov hlub rau lawv, tsis yog ib tug neeg uas tsis muaj laj thawj lod? Txhua tus xaiv lawv tus kheej txoj kev thiab taug txoj kev ntawd ntawm lawv tus kheej; tsis muaj leej twg sawv cev lawv tau. Qhov ntawd yog koj uas xaiv txoj kev tws, koj uas tso Vajtswv tseg thiab tsis lees txais Nws. Txij thaum pib mus txog thaum kawg, Vajtswv yeej tsis tau hais tias Nws tsis xav tau koj, los sis tias Nws tau tso koj tseg, los sis tias Nws tsis cawm koj lawm; qhov ntawd yog koj uas tau txiav txim rau Vajtswv raws li koj tej kev kwv yees xwb. Yog koj ntseeg Vajtswv tiag tiag, thiab koj tseem yuav ntseeg Vajtswv txawm tias Nws tsis xav tau koj los xij, thiab koj tseem yuav ntseeg Vajtswv, thiab nyeem Nws cov lus txuas ntxiv, thiab tseem lees txais qhov tseeb thiab ua koj tej dej num li ib txwm ua, txawm tias Nws ntxub koj los xij, es leej twg ho yuav txwv tau los sis cheem tau koj? Qhov ntawd tsis yog nyob ntawm koj tus kheej tej kev xaiv thiab kev caum lod? Koj tus kheej tsis muaj kev ntseeg tiam sis tig rov qab los yws Vajtswv; qhov no yog ib qho tsis muaj laj thawj li. Koj tsis tiv thaiv koj txoj kev sib raug zoo nrog Vajtswv thiab pheej yuav rhuav tshem txoj kev sib raug zoo ntawd; thaum muaj ib qho tawg lawm, puas tuaj yeem kho tau lawm? Ib daim iav uas tawg lawm mas nyuaj muab los lo ua ke, thiab txawm yog muab lo ua ke dua los, qhov tawg ntawd yeej tseem yuav nyob ntawd. Tam sim no txoj kev sib raug zoo tau tawg lawm, qhov ntawd yeej tsis tuaj yeem raug kho kom zoo li qub ntxiv lawm. Yog li ntawd, tsis hais lawv ntsib xwm txheej zoo li cas nyob rau hauv txoj kev ntseeg Vajtswv, tib neeg yuav tsum kawm zwm rau thiab yuav tsum nrhiav qhov tseeb—tsuas yog ua li ntawd xwb lawv thiaj li sawv khov kho tau. Yog koj xav raws Vajtswv qab mus kom txog thaum kawg ntawm txoj kev, ces qhov uas yuav tsum caum qhov tseeb ntawd mas tseem ceeb heev; txawm nyob rau hauv kev ua koj tej dej num los sis ua ib yam dab tsi, kev to taub qhov tseeb tej hauv paus ntsiab lus thiab xyaum ua raws thiab muab tej ntawd coj los siv mas tseem ceeb heev, vim qhov ntawd yog los ntawm tus txheej txheem ntawm kev to taub qhov tseeb thiab xyaum ua raws li qhov tseeb tej hauv paus ntsiab lus uas koj los paub Vajtswv, to taub Vajtswv, nkag siab Vajtswv, thiab paub txog Vajtswv tej kev npaj siab, ua rau koj tuaj yeem haum nrog Nws thiab tau txais kev nkag siab thiab kev lees txais Nws lub ntsiab tseeb. Yog koj tsis muab qhov tseeb tej hauv paus ntsiab lus coj los xyaum ua raws thiab tsuas ua los sis ua koj tej dej num raws li koj tus kheej lub siab nyiam xwb, koj yuav tsis muaj hnub paub txog qhov tseeb li. Qhov tsis paub txog qhov tseeb ntawd txhais li cas? Qhov ntawd txhais hais tias koj yuav tsis muaj hnub paub txog Vajtswv tus cwj pwm uas muaj rau txhua yam, Nws tej kev cheem tsum, los sis Nws tej kev xav; thiab koj haj yam tsis paub txog Vajtswv tus moj yam thiab lub ntsiab tseeb raws li tau nthuav tawm hauv Nws tes hauj lwm. Yog koj tsis paub txog tej uas muaj tseeb ntawm Vajtswv tes hauj lwm no, koj txoj kev nkag siab txog Vajtswv yuav raug txwv nyob rau hauv tib neeg tej kev xav hauv nruab siab thiab tej kev xav phem mus ib txhis. Qhov ntawd yuav nyob rau hauv tus ciaj ciam ntawm tej kev xav hauv nruab siab thiab tej kev xav phem thiab yeej yuav tsis mus raws li lub ntsiab tseeb thiab tus moj yam tseeb ntawm Vajtswv li. Ua li no, koj yuav tsis tuaj yeem ua tiav ib qho kev nkag siab tiag tiag txog Vajtswv li.

Nyob rau hauv tus txheej txheem uas ua lawv tej dej num, tib neeg pheej ntsib pom tej yam ntxwv uas xav tsis zoo thiab ntxeev siab. Yog lawv tuaj yeem nrhiav qhov tseeb thiab siv qhov tseeb tej hauv paus ntsiab lus los saib xyuas thiab daws tej teeb meem no, lawv tej kev xav uas tsis zoo ntawd yuav tsis hloov mus ua kev yws, kev tsis lees txais, kev tawm tsam, kev qw nthe, los sis haj tseem yog kev tuam mom thiab. Txawm li cas los xij, yog tib neeg daws tej yam no los ntawm qhov tsuas vam khom rau lawv tus kheej txoj kev txawj ntse me me, tib neeg txoj kev tswj tus kheej, tib neeg txoj kev siv zog, kev nquag, kev qhuab qhia lawv lub cev, thiab lwm yam kev ua uas zoo li no, ces tsis ntev los luv, tib neeg tej kev xav hauv nruab siab, kev txiav txim, thiab kev lam kwv yees no yuav dhau los ua kev yws, kev tawm tsam, kev tsis lees txais, kev qw nthe, thiab haj tseem yog kev tuam mom Vajtswv thiab. Thaum tib neeg daig nyob rau hauv tej kev xav tsis zoo zoo li no, lawv yooj yim muaj txoj kev tsis mloog lus, kev tsis txaus siab, thiab kev yws Vajtswv, nrog rau lwm yam lub siab xav los sis tej kev xav zoo li no. Thaum tej kev xav no sib sau ntau zuj zus nyob rau hauv tib neeg lub siab tau ntev thiab lawv tseem tsis nrhiav qhov tseeb los sis siv qhov tseeb los daws tej ntawd, lawv txoj kev tsis mloog lus, kev tsis txaus siab, thiab kev yws yuav hloov mus ua kev tawm tsam; lawv yuav ua tej kev coj uas ntxeev siab, xws li ua lawv tej dej num ua dog ua dig los sis txhob txwm cuam tshuam thiab rhuav tshem pawg ntseeg tes hauj lwm, nrog rau lwm yam kev coj uas tsis zoo, los qhia tawm lawv txoj kev tsis mloog lus thiab kev tsis txaus siab thiab vim li ntawd thiaj li ua tau raws li lawv lub hom phiaj uas tawm tsam Vajtswv. Ib txhia tib neeg rhuav tshem thiab cuam tshuam lwm tus txoj kev ua tes dej num. Lub ntsiab uas nyob tom qab lawv tej kev ua yog: “Yog kuv ua tsis tau kuv tes dej num, los sis yog vajtswv tsis foom koob hmoov rau kuv hauv kuv tes dej num, kuv yuav ua kom nej tsis muaj ib tug ua tau nej tej dej num kom zoo li!” ces tom qab ntawd lawv pib ua kom muaj tej kev cuam tshuam. Ib txhia tib neeg ua qhov no los ntawm cov lus, hos lwm tus siv qee yam kev ua. Cov uas siv lawv tej kev ua los cuam tshuam lwm tus ntawd yuav ua tej yam dab tsi? Piv txwv li, tej zaum lawv yuav txhob txwm tshem cov ntaub ntawv hauv lwm tus lub khoos phis tawj kom cuam tshuam rau cov txiaj ntsig ntawm tus neeg ntawd tes dej num, los sis tej zaum lawv yuav txhob txwm cuam tshuam lwm tus kev sib txoos ua ke hauv os lais. Qhov no yog cov dab thiab cov Ntxwgnyoog cuam tshuam tib neeg. Tib neeg tsis to taub hais tias: “Ib tug neeg uas muaj hnub nyoog npaum li no yuav ua tau tej yam qias neeg zoo li no li cas? Lawv tsis yog cov me nyuam kaum tawm xyoo lawm, ua li cas lawv tseem ua tau tej kev tso dag phem zoo li no?” Qhov tseeb tiag, cov tib neeg uas muaj hnub nyoog peb caug, plaub caug, tsib caug, los sis rau caum xyoo los kuj ua tau tej yam no thiab. Ntau yam kev coj no mas ua rau tib neeg xav tsis txog li; tej no tsis yog kev ua ntawm ib tug neeg uas muaj lub siab txawj xav thiab laj thawj, tiam sis yog kev ua ntawm cov dab thiab Ntxwgnyoog. Thaum pom hais tias lwm tus tsis raug cuam tshuam thiab lawv tej hom phiaj tsis tau raws li xav, tus neeg zoo li ntawd yuav tso tej kev xav tsis zoo tawm thiab ua kom muaj kev cuam tshuam thaum lub sij hawm uas muaj neeg coob nyob ntawd los sis thaum sib txoos ua ke. Thaum lawv pib tso lawv txoj kev tsis txaus siab tawm los ntawm tej kev ua, qhov ntawd twb dhau los ua qhov nyuaj los tswj qhov xwm txheej ntawd lawm; thiab nyuaj heev los tswj lawv, thiab yog qhov xwm txheej tseem txuas ntxiv mus ces tsuas tuaj yeem loj zuj zus, dhau los ua qhov hnyav zuj zus nyob rau hauv lub ntsiab xeeb txawm xwb. Lawv tsis yog tsuas siv tej kev ua los ua kom muaj tej kev cuam tshuam xwb tiam sis kuj siv ntau yam tswv yim thiab hau kev, siv cov lus tawm tsam thiab txiav txim los cuam tshuam lwm tus thaum lwm tus ntawd ua lawv tes dej num. Txawm lawv puas ua tau raws li lawv tej hom phiaj los xij, tom qab ntawd lawv tawm tsam Vajtswv hauv lawv lub siab; lawv tsis nyeem Vajtswv cov lus los sis kawm cov nkauj qhuas Vajtswv, thiab lawv tsis yeem nyeem tej phau ntawv twg uas muaj feem xyuam txog Vajtswv cov lus los sis qhov tseeb. Lawv ua dab tsi nyob hauv tsev? Lawv nyeem cov ntawv dab neeg, saib cov yeeb yaj kiab hauv TV, kawm cov hau kev ua zaub mov, kawm txog kev pleev ntsej muag thiab ua plaub hau…. Thaum sib txoos ua ke, lawv tsis qhia lawv txoj kev to taub txog Vajtswv cov lus, thiab lawv tsis qhia tias yuav daws tej moj yam qias vuab tsuab thiab kev qhia tshwm txog txoj kev qias vuab tsuab li cas. Thaum lwm tus sib qhia, lawv txhob txwm txeeb hais lus, txiav tus uas tab tom hais lus, txhob txwm hloov lub ncauj lus, thiab lwm yam, pheej hais tej yam uas rhuav tshem thiab cuam tshuam. Vim li cas lawv thiaj li ua li no? Qhov laj thawj yog vim lawv ntseeg tias lawv tsis muaj kev cia siab tau txais kev cawm dim lawm, qhov no ua rau lawv tso tseg thiab pib ua yam tsis muaj kev tswj; lawv nrhiav ob peb tug phooj ywg koom ua ke ua ntej lawv raug ntsaig tawm mus los sis raug ntiab tawm ntawm pawg ntseeg mus—yog lawv tsis tau koob hmoov, lawv yuav ua kom lwm tus tsis tau thiab. Vim li cas lawv thiaj li xav li no? Lawv ntseeg hais tias tus Vajtswv uas lawv ntseeg ntawd tsis zoo li tus vajtswv uas lawv xav hauv nruab siab thaum xub thawj; Nws tsis hlub tib neeg npaum li lawv xav hauv nruab siab thiab tsis ncaj ncees npaum li ntawd thiab, thiab Nws yeej tsis muaj kev hlub yam siab dawb paug rau tib neeg npaum li lawv xav hauv nruab siab. Vajtswv hlub lwm tus tiam sis tsis hlub lawv; Vajtswv cawm lwm tus tiam sis tsis cawm lawv. Tam sim no uas lawv tsis pom kev cia siab rau lawv tus kheej thiab xav tias lawv tsis tuaj yeem raug cawm dim lawm, lawv tso tseg thiab pib ua yam tsis muaj kev tswj. Tsis tas li ntawd xwb; lawv kuj xav kom lwm tus pom hais tias vim lawv tsis muaj kev cia siab lawm, lwm tus los kuj tsis muaj kev cia siab lawm thiab, thiab tsuas yog thaum lawv ua kom txhua tus tso txoj kev ntseeg Vajtswv tseg thiab thim tawm ntawm txoj kev ntseeg mus mas lawv thiaj li txaus siab xwb. Lawv lub hom phiaj ntawm qhov ua li no yog: “Yog kuv tsis tau txais cov koob hmoov ntawm lub nceeg vaj saum ntuj ceeb tsheej, nej txhua tus tsis txhob ua npau suav tias yuav tau txais tej ntawd thiab!” Ib tug tib neeg zoo li no yog hom neeg phem dab tsi? Lawv tsis yog ib tug dab lod? Lawv yog ib tug dab uas yuav mus rau ntuj tawg, uas kuj txwv tsis pub lwm tus ntseeg Vajtswv thiab nkag mus rau hauv lub nceeg vaj saum ntuj ceeb tsheej; lawv tab tom taug kev ncaj qha mus rau txoj kev tws! Txhua tus uas muaj lub siab txawj xav me ntsis thiab muaj lub siab ntshai Vajtswv me ntsis tsis tsim nyog ua li no; yog lawv yeej ua kev phem loj tiag tiag thiab raug nthuav tawm, ua rau lawv xav tias lawv tsis muaj kev cia siab ntxiv lawm, lawv yeej tseem yuav xav pab lwm tus kom ua tiav, cia lwm tus ua tib zoo ntseeg Vajtswv thiab tsis txhob xyaum raws li lawv. Lawv yuav hais tias, “Kuv tus neeg no qaug zog dhau lawm, kuv tej kev ntshaw ntawm lub cev nqaij daim tawv muaj zog heev, thiab kuv qaug rau lub ntiaj teb no dhau lawm. Qhov no yog kuv tus kheej qhov txhaum; kuv tsim nyog tau txais qhov no! Nej txhua tus ua cov ntseeg tiag tiag mus ntxiv; tsis txhob raug cuam tshuam los ntawm kuv. Thaum sib txoos ua ke, kuv mam zov qhov rooj, thiab yog tus zaj loj liab ploog cov tub ceev xwm nkag los hauv zos, kuv yuav qhia rau nej.” Txhua tus uas muaj kev ua neeg me ntsis yam tsawg tshaj plaws yuav tsum ua tau li no, thiab lawv yuav tsum tsis txhob cuam tshuam lwm tus txoj kev caum qhov tseeb. Tiam sis cov uas tsis muaj kev ua neeg, thaum tej yam tsis mus raws li lawv lub siab xav los sis thaum lawv pom cov kwv tij thiab cov muam saib tsis taus lawv thiab txav deb ntawm lawv, lawv xav tias Vajtswv tau nthuav tawm thiab tshem lawv tawm lawm, tias lawv tsis muaj kev cia siab tau txais kev cawm dim lawm. Thaum lawv muaj tej tswv yim thiab tej kev xav zoo li no, lawv tso tseg thiab pib ua yam tsis muaj kev tswj, tso tej kev xav tsis zoo tawm thiab cuam tshuam lub neej hauv pawg ntseeg yam tsis quav ntsej dab tsi li. Hom neeg zoo li cas thiaj li ua li no? Lawv tsis yog cov dab lod? (Yog.) Puas tsim nyog ua siab mos siab muag rau cov tib neeg uas yog dab? (Tsis tsim nyog.) Yog li ntawd yuav tsum daws qhov no li cas? Koj hais tias, “Koj tuaj sib txoos ua ke tiam sis koj tsis nyeem Vajtswv cov lus thiab tsis lees txais qhov tseeb. Yog li ntawd koj tuaj ua dab tsi ntawm no? Tuaj ua kom muaj tej kev cuam tshuam xwb, puas yog? Koj xav hais tias koj tsis muaj kev cia siab tau txais kev cawm dim lawm; qhov tseeb tiag, peb los kuj tsis xav hais tias peb muaj kev cia siab ntau thiab, tiam sis peb siv zog. Peb ntseeg hais tias Vajtswv tsis xaiv leej twg ntsej muag, Nws vam khom tau, Nws lub siab uas cawm tib neeg ntawd yog lub siab dawb paug, thiab Nws lub siab tsis hloov li. Tsuav tseem tshuav kev cia siab me ntsis xwb, peb yeej yuav tsis tso tseg. Peb yuav tsis zoo ib yam li koj uas pheej xav tsis zoo thiab to taub Vajtswv yuam kev tas li. Koj tsis txhob ua npau suav tias koj yuav cuam tshuam tau peb los sis rub tau peb rov qab! Yog koj tseem tawv ncauj ua mus ntxiv, tseem ntseeg li no mus ntxiv, thiab tseem muaj lub siab phem xav los cuam tshuam peb, ces txhob cem peb tias peb tsis muaj lub siab mos siab muag rau koj. Suav txij hnub no mus, koj raug ntsaig tawm mus lawm; tsis muaj chaw rau koj nyob hauv pawg ntseeg ntxiv lawm. Tam sim no cia li tawm mus kiag!” Qhov ua li no, tsis yog daws tau qhov teeb meem lawm lod? Yooj yim xwb, tsuas hais ob peb lo lus ces muab tau lawv tshem tawm mus lawm. Qhov ntawd yog ib yam uas yooj yim ua heev! Vim li cas thiaj li daws li no? Vim cov tib neeg zoo li no tus yam ntxwv xeeb txawm lub ntsiab tseeb hloov tsis tau; lawv yuav tsis lees txais qhov tseeb. Lawv xav tias lawv tsis muaj kev cia siab tau txais kev cawm dim lawm; Vajtswv tsis tau hais li no, thiab cov kwv tij thiab cov muam los kuj tsis tau hais thiab, tiam sis lawv tseem ua phem thiab ua rau muaj tej kev cuam tshuam zoo li no. Yog muaj ib hnub lawv raug ntiab tawm tiag tiag vim qhov ua phem thiab cuam tshuam pawg ntseeg tes hauj lwm, los sis yog Vajtswv qhuab ntuas lawv vim lawv tsis caum qhov tseeb, lawv yuav ua li cas? Lawv puas yuav dhau los ua Vajtswv cov yeeb ncuab, lawv puas yuav nrhiav kev ua pauj rov qab? Yeej muaj feem ntau heev! Yog qhov zoo uas cov tib neeg zoo li no raug nthuav tawm ua ntej lawv ua tau tej yam tsis zoo los sis ua kev phem loj. Qhov no yog Vajtswv ua; Vajtswv muab lawv nthuav tawm lawm. Tam sim no, qhov tshem lawv tawm mus ntawd yog qhov tsim nyog lawm; lwm tus tib neeg tseem tsis tau poob ib yam dab tsi li. Qhov daws li no mas ncav sij hawm thiab tsim nyog; txhua tus muaj kev paub cais, thiab cov neeg phem raug muab daws lawm. Lawv lub luag hauj lwm uas ua tus neeg lwj liam ntawd tau ua tiav zoo lawm.

Feem ntau, tej no yog ntau hom yam ntxwv thiab kev qhia tshwm uas pom tau meej ntawm cov tib neeg uas tso tej kev xav tsis zoo tawm. Thaum lawv txoj kev ntshaw uas caum lub meej mom, koob meej, thiab kev tau txais txiaj ntsim tsis tau raws li siab xav, thaum Vajtswv ua tej yam tsis mus raws li lawv tej kev xav phem thiab tej kev xav hauv nruab siab, tej yam uas cuam tshuam rau lawv tej txiaj ntsim, lawv thiaj li daig rau hauv tej kev xav ntawm kev tsis mloog lus thiab kev tsis txaus siab. Thiab thaum lawv muaj tej kev xav no, lawv lub siab pib tsim muaj tej kev hais ub hais no, laj thawj, kev hais daws, kev tiv thaiv tus kheej, thiab lwm yam kev xav ntawm kev yws. Lub sij hawm no, lawv tsis qhuas Vajtswv los sis zwm rau Nws, thiab lawv haj yam tsis nrhiav qhov tseeb los paub lawv tus kheej; tiam sis, lawv tawm tsam Vajtswv los ntawm qhov siv lawv tej kev xav phem, tej kev xav hauv nruab siab, tej kev xav thiab tej kev xam pom, los sis kev siab kub. Lawv tawm tsam Vajtswv li cas? Lawv tshaj tawm lawv tej kev xav ntawm kev tsis mloog lus thiab kev tsis txaus siab, siv qhov no los ua kom lawv tej kev xav thiab tej kev xam pom meej rau Vajtswv, sim ua kom Vajtswv ua raws li lawv lub siab nyiam thiab lawv tej kev thov, kom thiaj li ua tau raws li lawv tej kev ntshaw; tsuas yog thaum ntawd xwb lawv tej kev xav thiaj li nqig. Tshwj xeeb tshaj yog, Vajtswv nthuav ntau qhov tseeb tawm los txiav txim thiab rau txim rau tib neeg, los ntxuav lawv cov moj yam qias vuab tsuab kom dawb huv, los cawm tib neeg dim ntawm Ntxwgnyoog lub zog, thiab leej twg yuav paub tias muaj pes tsawg tus tib neeg txoj kev npau suav uas yuav tau koob hmoov ntawd raug txiav tu los ntawm tej qhov tseeb no, rhuav tshem txoj kev xav hauv nruab siab txog qhov raug coj mus rau hauv lub nceeg vaj saum ntuj ceeb tsheej uas lawv cia siab nruab hnub hmo ntuj ntawd. Lawv xav ua txhua yam li lawv ua tau los hloov tej xwm txheej no—tiam sis lawv tsis muaj zog, lawv tsuas poob mus rau hauv kev puas tsuaj nrog rau kev xav tsis zoo thiab kev chim siab xwb. Lawv tsis mloog lus rau tag nrho tej uas Vajtswv tau npaj tseg no, vim yam uas Vajtswv ua ntawd tsis mus raws li lawv tej kev xav phem, txiaj ntsim, thiab kev xav. Tshwj xeeb tshaj yog, thaum pawg ntseeg ua tes hauj lwm tshem tawm thiab ntiab ntau tus tib neeg tawm, cov tib neeg no xav hais tias Vajtswv tsis cawm lawv lawm, tias Nws tau ntxub ntxaug lawv lawm, tias lawv raug ua tsis ncaj ncees rau, yog li ntawd lawv thiaj li yuav koom ua ke los tawm tsam Vajtswv; lawv yuav tsis lees paub hais tias Vajtswv yog qhov tseeb, tsis lees paub Vajtswv qhov yog leej twg tiag tiag thiab Vajtswv lub ntsiab tseeb, thiab tsis lees paub Vajtswv tus moj yam ncaj ncees. Muaj tseeb tias, lawv kuj yuav tsis lees paub qhov muaj tseeb ntawm Vajtswv lub hwj chim kav txhua yam thiab. Lawv siv txoj hau kev twg los tsis lees paub tag nrho tej no? Los ntawm txoj kev tawm tsam thiab kev tsis lees txais. Lub ntsiab yog “Yam uas vajtswv ua ntawd tsis mus raws li kuv tej kev xav phem, yog li ntawd kuv thiaj li tsis zwm rau, kuv tsis ntseeg hais tias koj yog qhov tseeb. Kuv yuav qw tawm tsam koj thiab yuav tshaj tawm tej no nyob hauv pawg ntseeg thiab nyob hauv cov tib neeg! Kuv yuav hais txhua yam uas kuv xav hais, thiab kuv tsis quav ntsej tias qhov tshwm sim los tom qab yuav yog dab tsi li. Kuv muaj cai hais lus ywj pheej; koj kaw tsis tau kuv lub qhov ncauj—kuv yuav hais yam kuv xav hais. Koj yuav ua tau li cas rau kuv?” Thaum cov tib neeg no pheej tawv ncauj tso lawv tej kev xav thiab tej kev xam pom uas yuam kev tawm, lawv puas yog tab tom tham txog lawv tus kheej txoj kev to taub? Lawv puas yog tab tom sib qhia txog qhov tseeb? Yeej tsis yog kiag li. Lawv tab tom tshaj tawm txoj kev xav tsis zoo; lawv tab tom tso tej kev qhuab qhia uas yuam kev thiab cuav tawm. Lawv tsis yog tab tom sim paub lawv tus kheej txoj kev qias vuab tsuab los sis qhia tshwm qhov ntawd; lawv tsis yog tab tom qhia tshwm tej yam uas lawv ua tsis mus raws li qhov tseeb, thiab lawv kuj tsis qhia tshwm tej kev ua yuam kev uas lawv tau ua ntawd thiab. Tiam sis, lawv tab tom ua txhua yam li lawv ua tau los hais daws thiab tiv thaiv lawv tej kev ua yuam kev los ua pov thawj hais tias lawv yog lawm, thiab nyob rau tib lub sij hawm ntawd lawv kuj tab tom muab ib qho lus xaus uas ruam tsis muaj qab hau, thiab tso tej kev xam pom uas xav tsis zoo thiab nkhaus tawm, nrog rau tej lus cav uas nkhaus thiab tej lus qhuab qhia cuav. Qhov tshwm sim los uas raug rau cov neeg Vajtswv xaiv tseg hauv pawg ntseeg mas yog qhov coj mus yuam kev thiab cuam tshuam lawv; qhov ntawd haj tseem ua tau rau qee tus tib neeg poob mus rau hauv ib qho xwm txheej ntawm kev xav tsis zoo thiab kev paub tsis meej. Tej no puav leej yog tej qhov tshwm sim los tsis zoo thiab tej kev cuam tshuam uas los ntawm cov tib neeg uas tso tej kev xav tsis zoo tawm. Yog li ntawd, cov uas tso tej kev xav tsis zoo tawm ntawd yuav tsum raug txwv, nrog rau lawv tej lus hais thiab txoj kev coj—yuav tsum tsis txhob tso cai los sis pom zoo rau lawv ua. Pawg ntseeg yuav tsum muaj tej txoj hau kev thiab tej hauv paus ntsiab lus uas tsim nyog los daws cov tib neeg no. Ib qho mas, cov kwv tij thiab cov muam yuav tsum paub cais cov tib neeg no thiab lawv tej lus hais uas xav tsis zoo. Lwm qhov mas, thaum cov neeg Vajtswv xaiv tseg muaj kev paub cais lawm, pawg ntseeg yuav tsum ntsaig los sis ntiab cov tib neeg no tawm mus kom ncav sij hawm raws li qhov tseeb tej hauv paus ntsiab lus, los tiv thaiv kom tsis txhob muaj tib neeg ntau ntxiv raug cuam tshuam. Peb txoj kev sib qhia txog ntau yam ntawm kev tso tej kev xav tsis zoo tawm ntawd los xaus rau qhov no xwb.

C. Tej Hauv Paus Ntsiab Lus thiab Tej Kev Daws Kev Xav Tsis Zoo

Tib neeg muaj ntxwgnyoog tus yam ntxwv xeeb txawm; ua neej nyob raws li ntxwgnyoog tus moj yam, qhov ntawd nyuaj heev los zam tej yam ntxwv ntawm kev xav tsis zoo. Tshwj xeeb tshaj yog thaum tib neeg tsis to taub qhov tseeb, txoj kev xav tsis zoo dhau los ua ib yam uas tshwm sim tas li. Txhua tus puav leej muaj tej lub sij hawm uas xav tsis zoo; qee tus muaj ntau dua, qee tus muaj tsawg dua, qee tus muaj ntev dua, thiab qee tus muaj luv dua. Tib neeg lub siab ntseeg txawv, thiab lawv tej yam ntxwv ntawm kev xav tsis zoo los kuj txawv thiab. Cov uas muaj lub siab ntseeg loj dua tsuas xav tsis zoo me ntsis thaum ntsib tej kev sim siab, hos cov uas muaj lub siab ntseeg me dua, uas tseem tsis to taub qhov tseeb, tsis muaj peev xwm paub cais thaum lwm tus tshaj tawm qee yam kev xav phem los sis hais tej lus tsis muaj qab hau; lawv tuaj yeem raug cuam tshuam, thiab dhau los xav tsis zoo. Txhua qhov teeb meem uas tshwm tuaj puav leej ua tau rau lawv muaj kev xav tsis zoo, tab txawm yog tej yam me me uas tsis tsim nyog hais txog xwb los xij. Ua li yuav tsum daws qhov teeb meem ntawm qhov pheej xav tsis zoo no li cas? Yog ib tug neeg tsis paub xyov yuav nrhiav qhov tseeb li cas, tsis paub xyov yuav noj thiab haus Vajtswv cov lus, los sis thov Vajtswv li cas, ces qhov ntawd yog teeb meem loj; lawv tsuas tuaj yeem vam khom rau txoj kev txhawb thiab kev pab ntawm cov kwv tij thiab cov muam xwb. Yog tsis muaj leej twg muaj peev xwm pab tau, los sis yog lawv tsis lees txais kev pab, ces tej zaum lawv yuav xav tsis zoo mus txog qhov uas lawv sawv tsis taus rov los thiab tej zaum yuav tso txoj kev ntseeg tseg. Saib seb, qhov ib tug neeg uas pheej muaj tej kev xav phem thiab yooj yim los xav tsis zoo mas phom sij heev. Txawm yuav sib qhia qhov tseeb rau cov tib neeg zoo li no li cas los xij, lawv tsis lees txais qhov ntawd, pheej tawv ncauj hais tias lawv tus kheej tej kev xav phem thiab tej kev xav hauv nruab siab mas yog lawm; lawv yog cov tib neeg uas muaj teeb meem heev. Txawm koj yuav xav tsis zoo npaum li cas los xij, koj yuav tsum to taub hauv koj lub siab hais tias qhov muaj tej kev xav phem ntawd tsis tau txhais hais tias tej ntawd mus raws li qhov tseeb; qhov ntawd txhais hais tias muaj ib qho teeb meem nyob hauv koj txoj kev nkag siab. Yog koj muaj laj thawj me ntsis, koj yuav tsum tsis txhob tshaj tawm tej kev xav phem no; qhov no yog qhov tsawg tshaj plaws uas tib neeg yuav tsum tuav kom ruaj. Yog koj muaj lub siab hwm Vajtswv me ntsis thiab tuaj yeem lees paub tias koj yog ib tug uas raws Vajtswv qab, koj yuav tsum nrhiav qhov tseeb los daws koj tej kev xav phem, zwm rau qhov tseeb, thiab zam qhov ua rau muaj tej kev tab kaum thiab kev cuam tshuam. Yog koj ua tsis tau qhov no thiab pheej tawv ncauj tshaj tawm tej kev xav phem, ces koj tau poob koj qhov laj thawj lawm; koj lub hlwb tsis zoo li ib txwm muaj, raug cov dab tswj, thiab tswj tsis tau koj tus kheej lawm. Raug cov dab tswj, txawm li cas los xij koj yeej yuav hais tawm thiab tshaj tawm tej kev xav phem no—yeej tsis muaj lwm txoj kev, qhov no yog cov ntsujplig phem tes hauj lwm. Yog koj muaj lub siab txawj xav thiab laj thawj me ntsis, koj yuav tsum ua tau qhov no: tsis txhob tshaj tawm tej kev xav phem, thiab tsis txhob cuam tshuam cov kwv tij thiab cov muam. Txawm hais tias koj muaj kev xav tsis zoo los, koj yuav tsum tsis txhob ua tej yam uas ua phem rau cov kwv tij thiab cov muam; koj yuav tsum ua koj tes dej num kom zoo xwb, ua yam uas koj tsim nyog ua kom zoo, thiab ua kom paub tseeb tias koj lub siab tsis liam koj—qhov no yog tus qauv qis tshaj plaws rau kev coj tus kheej. Txawm hais tias muaj qee zaus koj xav tsis zoo los xij, tiam sis tsis tau ua ib yam dab tsi uas hla dhau tus ciam, ces Vajtswv yuav tsis quav ntsej txog koj txoj kev xav uas tsis zoo. Tsuav koj muaj lub siab txawj xav thiab laj thawj, muaj peev xwm thov Vajtswv thiab vam khom rau Vajtswv, thiab nrhiav qhov tseeb, thaum kawg koj yuav to taub qhov tseeb thiab hloov tau koj tus kheej. Yog koj ntsib tej xwm txheej loj, xws li raug rho tawm thiab raug tshem tawm vim tsis ua tes hauj lwm tiag tiag tam li ib tug thawj coj, thiab koj xav hais tias tsis muaj kev cia siab tau txais kev cawm dim lawm, thiab dhau los xav tsis zoo—xav tsis zoo heev mus txog qhov uas koj sawv tsis taus rov los, mloog zoo li koj tau raug teem txim thiab raug foom phem lawm, thiab koj tsim muaj tej kev to taub yuam kev thiab kev yws Vajtswv—koj yuav tsum ua li cas? Qhov no yooj yim heev los daws: Nrhiav qee tus tib neeg uas to taub qhov tseeb los sib qhia thiab nrhiav ua ke, thiab hais tej lus hauv koj lub siab tawm nrog cov tib neeg no. Qhov tseem ceeb dua, los rau ntawm Vajtswv lub xub ntiag los thov Vajtswv tiag tiag txog koj txoj kev xav tsis zoo thiab kev qaug zog, nrog rau qee yam uas koj tsis to taub thiab kov tsis yeej, ib yam zuj zus—sib qhia nrog Vajtswv, tsis txhob zais ib yam dab tsi li. Yog muaj tej yam uas hais tsis tau tawm uas koj qhia tsis tau rau lwm tus, qhov ntawd haj yam tseem ceeb heev uas koj yuav tsum los rau ntawm Vajtswv lub xub ntiag los thov Vajtswv. Ib txhia tib neeg nug hais tias, “Qhov hais qhov ntawd rau Vajtswv yuav tsis ua rau raug teem txim lod?” Koj twb tau ua ntau yam uas tawm tsam Vajtswv thiab tsim nyog raug Nws teem txim lawm, tsis yog lod? Vim li cas thiaj li txhawj txog ib yam uas muaj ntxiv no? Koj xav tias yog koj tsis hais, ces Vajtswv yuav tsis paub lod? Vajtswv paub txhua yam uas koj xav. Koj yuav tsum qhib siab sib qhia nrog Vajtswv, hais tej lus hauv koj lub siab tawm, muab koj tej teeb meem thiab tej yam ntxwv qhia tseeb rau Nws. Koj txoj kev qaug zog, kev ntxeev siab, thiab txawm yog koj tej kev yws los puav leej hais tau rau Vajtswv; txawm yog koj xav tso tawm los, qhov ntawd tsis ua li cas—Vajtswv yuav tsis teem txim rau qhov no. Vim li cas Vajtswv thiaj li tsis teem txim rau qhov no? Vajtswv paub tib neeg lub siab ntseeg; txawm yog koj tsis hais rau Nws los, Nws yeej paub koj lub siab ntseeg. Los ntawm qhov hais rau Vajtswv, nyob rau ib kis mas, qhov no yog lub cib fim los nthuav koj tus kheej tawm thiab qhib siab rau Vajtswv. Nyob rau lwm kis mas, kuj qhia koj tus cwj pwm ntawm kev zwm rau Vajtswv thiab; yam tsawg tshaj plaws mas, koj tab tom cia Vajtswv pom hais tias koj lub siab tsis kaw rau Nws, koj tsuas qaug zog xwb, tsis muaj lub siab ntseeg txaus los kov yeej qhov teeb meem no, npaum li ntawd xwb. Koj tsis muaj txoj kev npaj siab yuav tawm tsam; koj tus cwj pwm yog xav zwm rau, tsuas yog hais tias koj lub siab ntseeg me dhau lawm, thiab koj tiv tsis tau qhov teeb meem no. Thaum koj qhib koj lub siab tag nrho rau Vajtswv thiab muaj peev xwm qhia koj tej kev xav tob tshaj plaws rau Nws, txawm yog yam uas koj hais ntawd yuav muaj kev qaug zog thiab tej kev yws—thiab tshwj xeeb tshaj yog muaj ntau yam uas xav tsis zoo—tiam sis muaj ib yam uas yog nyob hauv qhov no: Koj lees paub hais tias koj muaj ib tug moj yam qias vuab tsuab, koj lees paub hais tias koj yog ib tug neeg uas raug tsim tawm los, koj tsis tau tsis lees paub Vajtswv qhov yog leej twg tiag tiag uas yog tus Tswv Tsim, thiab koj kuj tsis tau tsis lees paub hais tias txoj kev sib raug zoo ntawm koj thiab Vajtswv yog txoj kev sib raug zoo ntawm ib tug neeg uas raug tsim tawm los thiab tus Tswv Tsim. Koj tso tej yam uas koj pom hais tias nyuaj tshaj plaws los kov yeej thiab tej yam uas ua rau koj qaug zog tshaj plaws ntawd rau Vajtswv, thiab koj qhia txhua yam kev xav tob tshaj plaws hauv koj lub siab rau Vajtswv—qhov no qhia koj tus cwj pwm lawm. Ib txhia tib neeg hais tias, “Kuv thov Vajtswv ib zaug lawm, thiab kuv txoj kev xav tsis zoo tsis tau raug daws. Kuv tseem kov tsis yeej qhov ntawd.” Qhov ntawd tsis ua li cas; koj tsuas yuav tsum nrhiav qhov tseeb tiag tiag xwb. Txawm hais tias koj to taub npaum li cas los xij, Vajtswv yuav maj mam ua kom koj muaj zog tuaj, thiab koj yuav tsis qaug zog li thaum pib ntxiv lawm. Txawm koj muaj kev qaug zog thiab kev xav tsis zoo npaum li cas, los sis koj muaj kev yws thiab kev xav hauv siab uas tsis zoo ntau npaum li cas los xij, koj hais rau Vajtswv; tsis txhob saib Vajtswv li ib tug neeg sab nraud. Txawm koj yuav zais tej ntawd ntawm leej twg los xij, tsis txhob zais ib yam dab tsi ntawm Vajtswv, vim Vajtswv yog koj tib txoj kev vam khom thiab kuj yog koj tib txoj kev cawm dim. Tsuas yog qhov los rau ntawm Vajtswv xub ntiag xwb mas tej teeb meem no thiaj li yuav daws tau; qhov vam khom rau tib neeg mas tsis muaj qab hau. Yog li ntawd, thaum ntsib kev xav tsis zoo thiab kev qaug zog, cov uas los rau ntawm Vajtswv lub xub ntiag thiab vam khom rau Nws yog cov uas ntse tshaj plaws. Tsuas yog cov tib neeg ruam thiab tawv ncauj, thaum ntsib tej xwm txheej loj thiab tseem ceeb thiab cheem tsum qhia tej lus hauv lawv lub siab tawm rau Vajtswv, es lawv haj yam khiav deb thiab nkaum Vajtswv, thiab xam nyob hauv lawv tus kheej lub siab. Thiab qhov tshwm sim los ntawm tag nrho txoj kev xam no yog dab tsi? Lawv txoj kev xav tsis zoo thiab tej kev yws hloov mus ua kev tawm tsam, thiab kev tawm tsam hloov mus ua kev tsis lees txais thiab kev qw tawm tsam Vajtswv; cov neeg no tsis muaj qhov yuav sib haum nrog Vajtswv li lawm, thiab lawv txoj kev sib raug zoo nrog Vajtswv tawg tag nrho lawm. Txawm li cas los xij, thaum koj ntsib tej kev xav tsis zoo thiab kev qaug zog zoo li no, yog koj tseem tuaj yeem xaiv los rau ntawm Vajtswv lub xub ntiag los nrhiav qhov tseeb, thiab xaiv los zwm rau Vajtswv tej kev tswj hwm thiab kev npaj, thiab koj muaj ib tug cwj pwm uas zwm rau tiag tiag, ces thaum Vajtswv pom tias koj tseem xav zwm rau Nws yam lub siab dawb paug txawm thaum koj xav tsis zoo thiab qaug zog los xij, Vajtswv paub tias yuav coj koj li cas, kom koj tawm tau ntawm txoj kev xav tsis zoo thiab kev qaug zog ntawd. Tom qab muaj tej kev ntsib kev pom no, koj yuav tsim muaj ib txoj kev ntseeg tiag tiag rau Vajtswv. Koj yuav xav hais tias tsis hais koj ntsib tej kev nyuaj dab tsi los xij, tsuav koj nrhiav Vajtswv thiab tos Nws, Nws yuav npaj ib txoj kev tawm rau koj yam uas koj tsis paub, cia koj pom hais tias, yam uas koj twb tsis tau paub txog, tej xwm txheej tau hloov lawm, ua rau koj tsis qaug zog lawm tiam sis muaj zog, thiab ua rau koj txoj kev ntseeg rau Vajtswv nce ntxiv tuaj. Thaum koj tig xav txog tej xwm txheej no, koj yuav xav hais tias koj txoj kev qaug zog thaum lub sij hawm ntawd mas zoo li me nyuam yaus ua luaj. Qhov tseeb tiag, tib neeg yeej zoo li me nyuam yaus npaum li ntawd ntag, yog tsis muaj Vajtswv txoj kev txhawb, lawv yuav tsis muaj hnub loj hlob los ntawm lawv txoj kev zoo li me nyuam yaus thiab kev tsis paub dab tsi ntawd los li. Tsuas yog los ntawm qhov maj mam lees txais thiab zwm rau Vajtswv lub hwj chim kav nyob rau hauv tus txheej txheem uas tau ntsib tau pom tej yam no, tim ntsej tim muag nrog tej xwm txheej no yam zoo thiab nquag plias, nrhiav tej hauv paus ntsiab lus, nrhiav Vajtswv tej kev npaj siab, tsis khiav nkaum los sis nyob deb ntawm Vajtswv ntxiv lawm, los sis tsis ntxeev siab rau Vajtswv ntxiv lawm, tiam sis dhau los muaj kev zwm rau ntau zuj zus, thiab kev ntxeev siab tsawg zuj zus, dhau los nyob ze Vajtswv ntau zuj zus, thiab muaj peev xwm zwm rau Vajtswv ntau zuj zus—tsuas yog los ntawm kev ntsib kev pom zoo li no xwb mas tib neeg lub neej txoj sia thiaj li maj mam loj hlob thiab paub tab, thiaj li loj hlob tag nrho mus rau lub siab ntseeg ntawm ib tug neeg loj.

Tsim nyog coj rau thiab daws tej yam ntxwv uas xav tsis zoo li cas? Kev xav tsis zoo tsis yog ib yam uas txaus ntshai; qhov tseem ceeb yog yuav tsum muaj laj thawj. Thaum ib tug neeg pheej xav tsis zoo, qhov ntawd tsis yooj yim rau lawv ua qee yam ruam ruam lod? Thaum ib tug neeg xav tsis zoo, lawv tsuas yws los sis tso lawv tus kheej tseg, hais lus thiab ua dab tsi yam tsis muaj laj thawj kiag li—qhov no tsis cuam tshuam lawv txoj kev ua lawv tes dej num lod? Yog ib tug neeg swb rau qhov tag kev cia siab thiab xav tsis zoo txog qhov tsis xav ua hauj lwm, qhov no tsis yog kev ntxeev siab rau Vajtswv lod? Kev xav tsis zoo hnyav mas zoo ib yam li puas hlwb, qhov ntawd me ntsis zoo li raug cov dab tswj; yog qhov tsis muaj laj thawj. Kev tsis nrhiav qhov tseeb los daws ntawd mas yeej phom sij tiag tiag. Thaum tib neeg xav tsis zoo, yog lawv tsis muaj lub siab hwm Vajtswv kiag li, lawv yuav tsis muaj lawv lub laj thawj yam yooj yim heev; lawv yuav tshaj tawm lawv txoj kev xav tsis zoo, kev tsis txaus siab, thiab tej kev xav phem rau txhua qhov chaw. Qhov no yog qhov txhob txwm tawm tsam Vajtswv thiab yooj yim tab kaum thiab cuam tshuam pawg ntseeg tes hauj lwm, yog ib qho tshwm sim los uas txaus ntshai heev uas xav tsis txog li, thiab tej zaum lawv yuav raug Vajtswv ntxub ntxaug. Txawm li cas los xij, yog ib tug neeg nyob rau hauv lawv txoj kev xav tsis zoo es muaj peev xwm nrhiav qhov tseeb, tuav ib lub siab uas hwm Vajtswv, tsis hais cov lus uas tsis zoo, thiab tsis tshaj tawm lawv tus kheej txoj kev xav tsis zoo thiab tej kev xav phem, thiab tuav lawv txoj kev ntseeg rau Vajtswv thiab muaj ib tug cwj pwm uas zwm rau Nws, ces tus tib neeg zoo li no yooj yim tawm tau ntawm txoj kev xav tsis zoo los. Txhua tus puav leej muaj tej lub sij hawm uas xav tsis zoo; tej ntawd tsuas txawv nyob rau theem, lub sij hawm, thiab qhov laj thawj xwb. Ib txhia tib neeg feem ntau tsis muaj qhov xav tsis zoo tiam sis muaj kev xav tsis zoo thaum lawv ntsib kev ua tsis tiav los sis ntog ntawm ib yam dab tsi; lwm tus tuaj yeem xav tsis zoo vim tej yam me me, txawm tias qhov ntawd tsuas yog lwm tus cov lus hais uas ua rau lawv poob ntsej muag xwb los xij. Thiab qee tus cia li xav tsis zoo vim tej xwm txheej uas tsis haum siab me ntsis xwb. Cov tib neeg zoo li no puas to taub tias yuav ua neej nyob li cas? Lawv puas muaj kev pom tshab? Lawv puas muaj lub siab dav thiab kev zam taus ntawm ib tug tib neeg uas ib txwm muaj? Tsis muaj. Tsis hais tej xwm txheej yuav zoo li cas los xij, tsuav ib tug neeg ua neej nyob hauv lawv cov moj yam qias vuab tsuab xwb, lawv yuav poob mus rau hauv qee tus yam ntxwv uas xav tsis zoo tas li. Muaj tseeb tias, yog ib tug neeg to taub qhov tseeb thiab tuaj yeem pom tshab tej yam, lawv tej yam ntxwv uas xav tsis zoo yuav tsawg zuj zus thiab lawv txoj kev xav tsis zoo yuav maj mam ploj mus thaum lawv lub siab ntseeg loj hlob tuaj, thaum kawg ploj mus tag nrho. Cov uas tsis nyiam qhov tseeb, cov uas tsis lees txais qhov tseeb kiag li, yuav muaj tej kev xav tsis zoo, tej yam ntxwv uas xav tsis zoo, thiab tej kev xav thiab cwj pwm uas xav tsis zoo ntau zuj zus tuaj, uas yuav hnyav zuj zus thaum tej ntawd sib sau ntau zuj zus tuaj, thiab thaum tej yam no ua rau lawv tiv tsis taus lawm, lawv yuav sawv tsis taus rov los, uas yog qhov phom sij heev. Yog li ntawd, qhov daws tej kev xav tsis zoo kom sai ntawd mas yog qhov tseem ceeb heev. Kev daws txoj kev xav tsis zoo, ib tug yuav tsum nquag nrhiav qhov tseeb; nyeem thiab ua tib zoo xav txog Vajtswv cov lus thaum nyob ntsiag to rau hauv Nws lub xub ntiag yuav ua rau tau txais kev qhia thiab kev qhia kom paub tseeb, ces yuav ua rau to taub qhov tseeb thiab pom tshab lub ntsiab tseeb ntawm txoj kev xav tsis zoo, yog li ntawd thiaj li daws tau qhov teeb meem ntawm kev xav tsis zoo. Yog koj tseem tuav rawv koj tus kheej tej kev xav phem thiab laj thawj, ces koj ruam tshaj plaws, thiab koj yuav tuag vim koj txoj kev ruam thiab kev tsis paub dab tsi. Txawm li cas los xij, qhov daws txoj kev xav tsis zoo ntawd yuav tsum nquag plias, tsis txhob tos. Ib txhia tib neeg xav tias thaum txoj kev xav tsis zoo tshwm tuaj, lawv tsuas yuav tsum tsis txhob quav ntsej nws xwb; thaum lawv hnov zoo siab rov qab los, lawv txoj kev xav tsis zoo ntawd yuav cia li hloov mus ua kev xyiv fab lawm. Qhov no yog ib qho kev xav hauv nruab siab xwb; yog tsis nrhiav los sis lees txais qhov tseeb, txoj kev xav tsis zoo yuav tsis lam cia li ploj mus. Tab txawm yog koj hnov qab thiab tsis hnov dab tsi hauv koj lub siab los xij, qhov ntawd tsis tau txhais hais tias lub hauv paus ntawm koj txoj kev xav tsis zoo ntawd raug daws lawm. Kiag thaum tej xwm txheej uas haum tshwm tuaj, ces nws yuav tshwm tuaj dua, qhov no yog ib yam uas tshwm sim tas li. Yog ib tug neeg ntse thiab muaj laj thawj, lawv tsim nyog nrhiav qhov tseeb tam sim ntawd thaum txoj kev xav tsis zoo tshwm tuaj thiab siv txoj hau kev uas lees txais qhov tseeb los daws, ua li ntawd thiaj li daws tau qhov teeb meem ntawm kev xav tsis zoo los ntawm lub hauv paus. Txhua tus uas pheej xav tsis zoo tas li yog vim lawv lees txais tsis tau qhov tseeb. Yog koj tsis lees txais qhov tseeb, txoj kev xav tsis zoo yuav lo rau koj zoo li ib tug dab, ua rau koj xav tsis zoo tas mus li, ua rau koj tsim muaj tej kev xav ntawm kev tsis mloog lus, kev tsis txaus siab, thiab kev yws Vajtswv, mus txog thaum koj pom tias koj tus kheej tsis lees txais, tawm tsam, thiab qw tawm tsam Vajtswv—qhov ntawd yog thaum koj tau mus txog qhov kawg lawm, thiab koj lub ntsej muag phem raug nthuav tawm los lawm. Tib neeg pib nthuav koj tawm, soj ntsuam koj, thiab txiav txim rau koj, thiab tsuas yog tam sim no, thaum pom dej dag lawm es thiaj li los kua muag; qhov no yog thaum koj vau thiab pib ntaus koj lub hauv siab hauv txoj kev tag kev cia siab—koj tsuas nyob tos lees txais Vajtswv txoj kev rau txim lawm xwb! Txoj kev xav tsis zoo tsis yog tsuas ua rau tib neeg qaug zog xwb, tiam sis nws kuj ua rau lawv yws Vajtswv, txiav txim rau Vajtswv, tsis lees paub Vajtswv, thiab haj tseem tawm tsam thiab qw tawm tsam Vajtswv ncaj qha thiab. Yog li ntawd, yog qhov daws ib tug neeg txoj kev xav tsis zoo raug ncua sij hawm, thaum lawv nthuav tej lus tuam mom Vajtswv tawm thiab ua txhaum rau Vajtswv tus moj yam, qhov tshwm sim los mas hnyav heev. Yog koj poob mus rau hauv txoj kev xav tsis zoo thiab muaj kev yws vim yog ib qho xwm txheej, ib lo lus, los sis ib qho kev xav los sis kev xam pom, qhov no qhia hais tias koj txoj kev to taub txog qhov ntawd nkhaus lawm, thiab koj muaj tej kev xav phem thiab tej kev xav hauv nruab siab txog qhov ntawd; koj tej kev xam pom txog qhov no yeej tsis mus raws li qhov tseeb. Nyob rau lub sij hawm no, koj yuav tsum nrhiav qhov tseeb thiab tim ntsej tim muag nrog kom yog, siv zog los kho tej kev xav phem thiab tej tswv yim uas yuam kev no kom ntxov thiab kom sai li sai tau, tsis txhob cia koj tus kheej raug khi thiab raug coj mus yuam kev los ntawm tej kev xav phem no es poob mus rau hauv ib tug yam ntxwv ntawm kev tsis mloog lus, kev tsis txaus siab, thiab kev yws Vajtswv. Qhov daws txoj kev xav tsis zoo kom sai yog qhov tseem ceeb heev, thiab qhov daws txoj kev xav tsis zoo ntawd kom tag nrho kuj tseem ceeb heev thiab. Muaj tseeb tias, txoj hau kev zoo tshaj plaws los daws kev xav tsis zoo yog los nrhiav qhov tseeb, nyeem Vajtswv cov lus kom ntau ntxiv, thiab los rau ntawm Vajtswv xub ntiag los nrhiav Nws txoj kev qhia. Qee zaus, tej zaum koj yuav hloov tsis tau koj tej kev xav thiab tej kev xam pom no rau ib lub sij hawm ntawd, tiam sis yam tsawg tshaj plaws, koj yuav tsum paub hais tias koj ua yuam kev lawm thiab tias koj tej kev xav no yog nkhaus lawm. Ua li no, qhov txiaj ntsig uas tsawg tshaj plaws yog tej kev xav thiab tej kev xam pom uas yuam kev no yuav tsis cuam tshuam rau koj txoj kev ua siab ncaj hauv qhov ua koj tes dej num, yuav tsis cuam tshuam rau koj txoj kev sib raug zoo nrog Vajtswv, thiab yuav tsis cuam tshuam rau koj qhov los rau ntawm Vajtswv lub xub ntiag los qhib koj lub siab thiab thov Vajtswv—yam tsawg tshaj plaws, qhov no yog qhov txiaj ntsig uas yuav tsum ua kom tau. Thaum koj daig nyob rau hauv txoj kev xav tsis zoo thiab tsis mloog lus thiab tsis txaus siab, thiab koj muaj tej kev yws Vajtswv tiam sis tsis xav nrhiav qhov tseeb los daws, tseem xav tias koj txoj kev sib raug zoo nrog Vajtswv yog ib txwm, qhov tseeb tiag koj lub siab nyob deb ntawm Vajtswv thiab koj tsis xav nyeem Nws cov lus los sis thov Vajtswv ntxiv lawm, qhov teeb meem no tsis yog dhau los ua qhov hnyav lawm lod? Koj hais tias, “Tsis hais kuv xav tsis zoo npaum li cas los xij, tsis cuam tshuam kuv ua kuv tes dej num thiab kuv tsis tau tso kuv tes hauj lwm tseg. Kuv muaj lub siab ncaj!” Cov lus no puas siv tau? Yog koj pheej xav tsis zoo, qhov ntawd tsis yog ib qho teeb meem ntawm ib tug moj yam qias vuab tsuab xwb; tseem muaj tej teeb meem uas hnyav dua ntawd: Koj muaj tej kev xav phem txog Vajtswv, to taub Nws yuam kev, thiab tau tsim muaj tej kev thaiv nyob nruab nrab ntawm koj tus kheej thiab Vajtswv. Yog koj tsis nrhiav qhov tseeb los daws qhov no, mas phom sij heev. Yog ib tug neeg pheej xav tsis zoo tas li, yuav ua li cas thiaj li paub tseeb tias lawv ua lawv tes dej num yam ua siab ncaj mus txog thaum kawg thiab tsis ua dog ua dig? Yog tsis daws, txoj kev xav tsis zoo yuav cia li ploj mus thiab yaj mus lod? Yog ib tug neeg tsis nrhiav qhov tseeb los daws kom sai, txoj kev xav tsis zoo yuav loj zuj zus mus thiab tsuas yuav hnyav zuj zus xwb. Qhov tshwm sim los uas nws ua rau muaj ntawd tsuas yuav phem zuj zus xwb. Tej ntawd yeej yuav tsis hloov zuj zus mus rau qhov zoo li, tsuas yuav hloov zuj zus mus rau qhov phem xwb. Yog li ntawd, thaum txoj kev xav tsis zoo tshwm tuaj, koj yuav tsum nrhiav qhov tseeb los daws kom sai li sai tau; tsuas yog qhov no xwb thiaj li paub tseeb tias koj muaj peev xwm ua tau koj tej dej num kom zoo. Qhov daws kev xav tsis zoo ntawd yog qhov tseem ceeb heev, thiab ncua tsis tau li!

Lub Rau Hli Hnub Tim 26, 2021