Yam Kaum Ob: Txheeb Ntau Hom Tib Neeg, Xwm Txheej, thiab Yam Khoom uas Tab Kaum thiab Cuam Tshuam Vajtswv Tes Hauj Lwm thiab Qhov Raws Qib Raws Duas uas Ib Txwm Muaj ntawm Pawg Ntseeg Kom Ncav Sij Hawm thiab Kom Yog; Cheem thiab Txwv, thiab Hloov Txhua Yam Kom Zoo Dua; Tsis Tas Li Ntawd Xwb, Qhia Qhov Tseeb Kom Cov Neeg Vajtswv Xaiv Tseg Thiaj Li Paub Cais Tej Yam Zoo Li No thiab Kawm Paub Los Ntawm Tej Yam Zoo Li No (Ntu Rau)

Ntau Hom Tib Neeg, Xwm Txheej, thiab Yam Khoom Uas Tab Kaum thiab Cuam Tshuam Lub Neej Hauv Pawg Ntseeg

X. Kev Tshaj Tawm Cov Lus Xaiv Uas Tsis Muaj Tseeb

Nyob rau qhov kev sib txoos ua ke zaum tas los ntawd, peb tau sib qhia txog cov thawj coj thiab cov neeg ua hauj lwm lub luag hauj lwm kaum ob: “Txheeb ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg kom ncav sij hawm thiab kom yog; cheem thiab txwv, thiab hloov txhua yam kom zoo dua; tsis tas li ntawd xwb, qhia qhov tseeb kom cov neeg Vajtswv xaiv tseg thiaj li paub cais tej yam zoo li no thiab kawm paub los ntawm tej yam zoo li no.” Hais txog ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg uas tshwm sim nyob rau hauv lub neej hauv pawg ntseeg, peb tau muab tej no faib ua kaum ib qho teeb meem. Nyeem tej ntawd dua ib lwm. (Qhov ib, thaum qhia qhov tseeb pheej tham dhau ntawm lub ncauj lus mus lawm tas li; qhov ob, hais cov lus thiab cov kev qhuab qhia los coj tib neeg mus yuam kev thiab ua rau lawv qhuas; qhov peb, tham txog tsev neeg tej xwm txheej, tsim kev sib raug zoo ntawm tus kheej, thiab saib xyuas tej hauj lwm ntiag tug; qhov plaub, kev tsim pab tsim pawg; qhov tsib, txeeb lub meej mom; qhov rau, ua kev sib raug zoo uas tsis tsim nyog; qhov xya, koom kev sib tawm tsam thiab kev sib cav sib ceg; qhov yim, tshaj tawm tej kev xav phem; qhov cuaj, tso tej kev xav tsis zoo tawm; qhov kaum, kev tshaj tawm cov lus xaiv uas tsis muaj tseeb; thiab qhov kaum ib, kev tswj thiab tab kaum tej kev xaiv tsa.) Zaum tas los ntawd, peb tau sib qhia txog qhov teeb meem cuaj lawm. Hnub no, peb yuav sib qhia txog qhov kaum—kev tshaj tawm cov lus xaiv uas tsis muaj tseeb.

A. Tej Kev Qhia Tshwm ntawm Kev Tshaj Tawm Cov Lus Xaiv Uas Tsis Muaj Tseeb

Tej xwm txheej ntawm qhov tshaj tawm tej lus xaiv uas tsis muaj hauv paus hauv ntsis tau tshwm sim nyob rau hauv pawg ntseeg. Ib txhia tib neeg tsis nyiam qhov tseeb thiab tsis tsom ntsoov ua raws li qhov tseeb nyob rau hauv kev ua lawv tes dej num; txawm yog nyob rau hauv tej xwm txheej uas muaj feem xyuam rau qhov tseeb tej hauv paus ntsiab lus los sis nyob rau hauv lawv tus kheej tej kev caum los xij, lawv tsis tsom ntsoov nrhiav qhov tseeb—tej no tsis muaj chaw nyob rau hauv lawv lub siab. Nyob rau hauv lawv txoj kev ntseeg Vajtswv, lawv tsuas nyiam nug txog tej lus paj lus cua thiab tej ntaub ntawv ntiag tug xwb, thiab sau tej dab neeg uas txawv txawv thiab tsis tshua pom muaj. Muaj tseeb tias, yam uas lawv kub siab tshaj plaws ces yog qhov soj xyuas tej yam uas muaj feem xyuam rau Vajtswv thiab Vajtswv tes hauj lwm, nrog rau tej yam uas muaj feem xyuam txog Vajtswv lub tsev thiab cov thawj coj thiab cov neeg ua hauj lwm hauv pawg ntseeg. Nyob rau tib lub sij hawm ntawd, lawv nyiam tshaj tawm cov lus xaiv uas tsis muaj tseeb, tshaj tawm tej yam uas lawv tau hnov los sis xav hauv nruab siab uas yeej tsis muaj tseeb kiag li. Cov tib neeg zoo li no tsis nyiam nyeem Vajtswv cov lus, lawv tsis tshua thov Vajtswv, thiab thaum sib txoos ua ke lawv tsis tshua sib qhia qhov tseeb thiab tsis tshua tham txog lawv tus kheej tus yam ntxwv, tus kheej tej kev caum thiab kev nkag mus, los sis lawv txoj kev to taub txog Vajtswv tes hauj lwm, thiab lwm yam ntxiv. Muaj tseeb tias, lawv tsis xav paub txog cov uas sib qhia qhov tseeb los sis sib qhia txog lawv cov lus tim khawv uas hais txog txoj kev ntsib kev pom, thiab tsis xav paub txog tej yam no thiab. Txawm li cas los xij, kiag thaum lawv hnov ib tug neeg tham txog tias Vajtswv tes hauj lwm tau mus txog theem twg lawm, los sis pom cov ntsiab lus nyob rau hauv Vajtswv cov lus uas hais txog tej kev puas tsuaj, tib neeg qhov chaw kawg, qhov uas Vajtswv hloov Nws tus yam ntxwv, thiab lwm yam, lawv ob lub qhov muag cia li ci tuaj, thiab lawv tsom ntsoov tshwj xeeb. Kiag thaum lawv nyeem los sis hnov cov lus no, lawv cia li xav paub kiag tam sim ntawd. Saib los ntawm tej kev qhia tshwm ntawm cov tib neeg no, qhov ntawd pom meej hais tias lawv tsis yog ntseeg Vajtswv kom los caum qhov tseeb, los sis los ua lawv tes dej num thiab raws Vajtswv qab, thiab haj yam tsis yog los zwm rau Vajtswv thiab pe hawm Vajtswv. Lawv los rau hauv Vajtswv lub tsev thiab yeej tsis xav txog qhov ua tej dej num kiag li. Lawv tsuas xav soj xyuas thiab sau qee cov lus paj lus cua los sis tshaj tawm qee cov lus xaiv xwb. Lawv xyiv fab rau tej kev ua no thiab yeej tsis nyiam cov lus tim khawv uas hais txog txoj kev ntsib kev pom, cov nkauj qhuas Vajtswv, los sis cov yeeb yaj kiab ntawm Vajtswv lub tsev ib qho me me li. Lawv tsuas nyiam mus rau hauv os lais mus sau cov lus hais thiab cov lus ntsuas uas lub hwj chim ntawm cov neeg tawm tsam khetos uas nyob hauv lub ntiaj teb ntawm sab kab lis kev cai ntseeg tau hais rau Vajtswv lub tsev, rau pawg ntseeg tes hauj lwm, thiab rau tus Vajtswv uas yug los ua cev nqaij daim tawv xwb. Tab txawm yog qee zaus lawv saib cov yeeb yaj kiab ntawm Vajtswv lub tsev los xij, qhov ntawd tsis yog los ntawm ib qho kev ntshaw hauv nruab siab los nrhiav qhov tseeb los daws lawv tus kheej tej teeb meem. Yog li, lawv saib dab tsi? Lawv saib cov lus tawm tswv yim nyob hauv qab cov yeeb yaj kiab, thiab lawv xaiv tej uas lawv xav nyeem. Lawv hla cov lus tawm tswv yim uas los ntawm cov kwv tij thiab cov nkauj muam hauv pawg ntseeg tiam sis nyiam tshwj xeeb txog cov lus tawm tswv yim los ntawm lub ntiaj teb ntawm sab kab lis kev cai ntseeg thiab cov ib txwm tsis ntseeg. Lawv haj tseem tsom ntsoov saib cov lus tawm tswv yim thiab cov lus hais los ntawm tus zaj loj liab ploog, xav nrhiav kom pom qee yam los ntawm tej ntawd. Thaum lawv pom cov lus tshaj tawm uas tsis zoo, cov lus hais, thiab cov lus xaiv uas tsim tawm no, lawv tsis nrhiav qhov tseeb thiab paub cais tej ntawd; tiam sis, lawv haj tseem tuaj yeem lees txais qee cov lus thiab cov lus hais uas tsis zoo no, thiab saib tej ntawd yam li yog qhov muaj tseeb. Txawm yuav muaj cov lus tawm tswv yim uas zoo ntau npaum li cas los xij, lawv tsis txaus siab nyeem tej ntawd thiab tsis ntseeg hais tias tej ntawd muaj tseeb; tsuas yog cov lus tawm tswv yim uas tsis zoo los sis cov lus xaiv ntawd xwb thiaj li rub tau lawv lub siab thiab ua rau lawv xav paub xwb. Txhua zaus uas lawv pom cov lus tawm tswv yim uas tsis zoo no, lawv hnov zoo siab thiab nplig siab heev nyob rau hauv lawv lub siab. Lawv nyiam tshwj xeeb txog cov lus xaiv thiab cov kev txiav txim uas yeej tsis muaj tseeb hlo li, thiab haj tseem yog cov kev tawm tsam thiab cov lus iab liam Vajtswv, uas tab tom kis mus thoob plaws nyob rau hauv lub ntiaj teb, nyob rau hauv lub ntiaj teb ntawm sab kab lis kev cai ntseeg, los sis nyob rau hauv os lais, thiab lawv pheej tshawb fawb thiab sau tej no yam mob siab. Tiam sis, lawv yeej tsis nyiam Vajtswv cov lus, cov lus qhuab qhia thiab kev sib qhia, cov lus tim khawv uas hais txog txoj kev ntsib kev pom ntawm cov kwv tij thiab cov nkauj muam, thiab lwm yam zoo li no ib qho me me li. Yog li ntawd, thaum lwm tus nyeem Vajtswv cov lus, sib qhia qhov tseeb, thiab qhia cov lus tim khawv uas hais txog txoj kev ntsib kev pom thaum sib txoos ua ke, lawv hnov tsis nyiam kiag li, thiab pom tias tej no mas meem txom thiab ntau dhau lawm. Nyob rau hauv lawv lub siab mas lawv tsis nyiam kiag li rau txoj kev sib qhia txog qhov tseeb thiab kev tham txog qhov paub tus kheej. Yog li, lawv xav mloog dab tsi? Lawv tsuas xav mloog tej yam uas txawv txawv thiab tsis tshua muaj xwb, tsis hais tej ntawd yog tej kev zais tob uas los ntawm sab ntsujplig los los sis cov lus xaiv thiab cov lus paj lus cua uas kis los ntawm lub ntiaj teb ntawm sab kab lis kev cai ntseeg—lawv tsuas txaus siab mloog tej yam no xwb. Lawv lub siab muaj tej yam uas tsis zoo no puv npo thiab raug tej no tswj, thiab tsis muaj leej twg tuaj yeem muab tej yam uas tsis zoo no tshem tawm ntawm lawv mus los sis txeeb tej yam uas tsis zoo no ntawm lawv mus. Vim li cas thiaj li zoo li no? Qhov ntawd yog vim lawv xav paub thiab nyiam tej ntawd dhau! Yog li ntawd, thaum lawv nyob nrog cov kwv tij thiab cov nkauj muam, tshwj xeeb tshaj yog thaum sib txoos ua ke, lawv nyiam tham txog qee cov lus paj lus cua uas tsis muaj tseeb, thiab haj tseem nthuav tawm qee cov lus tawm tswv yim uas tsis zoo txog Vajtswv lub tsev thiab pawg ntseeg uas lawv nrhiav tau hauv os lais. Cov tib neeg no nyiam tshwj xeeb rau cov lus xaiv no. Txawm lawv yeej paub meej tias qhov tshaj tawm tej yam no tsis muaj txiaj ntsim rau lwm tus los xij, lawv tswj tsis tau lawv tus kheej thiab pheej yuav tshaj tawm tej ntawd xwb. Tab txawm yog lawv yuav tsum tau nrhiav lub cib fim los tshaj tawm cov lus xaiv thiab cov lus tshaj tawm uas tsis zoo no, los sis lawv yuav tsum tau siv sij hawm los sau tej yam zoo li no, los sis siv lawv lub hlwb los tsim tej yam zoo li no los xij, lawv yeej tseem kub siab lug ua yam tsis paub nkees rau qhov no. Yog hais tias, nyob rau hauv ib pawg ntseeg, cov thawj coj pawg ntseeg lub peev xwm tsis zoo thiab ua tsis tau tes hauj lwm tiag tiag los sis tsis paub cais tib neeg, ces thaum muaj cov tib neeg tshaj tawm cov lus xaiv thiab tej lus cuav, lub neej hauv pawg ntseeg yuav raug cuam tshuam thiab coj tej yam tsis zoo los, thiab ib txhia tib neeg haj tseem yuav raug cov tib neeg no coj mus yuam kev thiab tswj. Vim li cas ntau tus tib neeg thiaj li pheej raug lwm tus cuam tshuam thiab coj mus yuam kev? Ib qho laj thawj yog vim tib neeg tsis to taub qhov tseeb thiab tsis muaj kev paub cais txog cov lus xaiv uas iab liam Vajtswv lub tsev. Lwm qhov yog vim ib txhia kwv tij thiab nkauj muam uas nyuam qhuav ntseeg tau tsis ntev es muaj theem ntawm sab ntsujplig tseem yau, lawv tsis to taub qhov tseeb ntawm cov zeem muag, thiab lawv paub tsis meej txog qhov Vajtswv yug los ua cev nqaij daim tawv, Vajtswv tes hauj lwm txiav txim nyob rau tiam kawg, thiab Vajtswv txoj kev npaj siab los cawm tib neeg, lawv tsis muaj peev xwm pom tej yam no kom meej, thiab lawv tsis paub tseeb hais tias theem hauj lwm no puas yog Vajtswv qhov kev tshwm sim thiab Vajtswv tes hauj lwm. Vim li ntawd, lawv thiaj li tsis muaj kev ntseeg tiag tiag thiab twb tsis paub tias lawv yuav muaj peev xwm raws Vajtswv qab tau ntev npaum li cas. Yeej muaj tseeb tias, lawv kuj yooj yim raug cov uas tshaj tawm cov lus xaiv ntawd coj mus yuam kev, cuam tshuam, thiab tswj heev.

B. Lub Ntsiab Tseeb ntawm Kev Tshaj Tawm Cov Lus Xaiv Uas Tsis Muaj Tseeb Yog Kev Ua Ntxwgnyoog ib Tug Tub Qhe

Cov tib neeg uas tshaj tawm cov lus xaiv uas tsis muaj tseeb no tsis yog tsuas tsis ntseeg qhov tseeb thiab Vajtswv cov lus xwb, tiam sis lawv kuj tsis paub cais qhov yog thiab qhov tsis yog thiab. Lawv pheej ua xyem xyav rau tej yam uas zoo thiab yooj yim ntseeg cov lus xaiv thiab tej lus dab. Cov tib neeg no hais tias lawv ntseeg Vajtswv thiab raws Vajtswv qab, tiam sis lawv tseem tshaj tawm cov lus xaiv uas iab liam Vajtswv thiab pawg ntseeg, thiab lawv tshaj tawm ntau yam lus xaiv uas lawv tau sau los ntawd rau cov kwv tij thiab cov nkauj muam, haj tseem tshaj tawm tej ntawd yam tsis ntshai dab tsi li thiab tshaj tawm ntau zaus thiab muab tej ntawd tshaj qhia rau txhua qhov chaw. Los ntawm qhov no mas qhia meej hais tias cov tib neeg no tsis nyiam qhov tseeb thiab tsuas ntseeg tej lus dab ntawm cov ib txwm tsis ntseeg xwb. Hais kom nruj mas, lawv yeej tsis yog cov neeg Vajtswv xaiv tseg kiag li thiab lawv tsis yog cov tswv cuab ntawm Vajtswv lub tsev. Yog li, lawv yog dab tsi? Muab hais kom meej tias, cov tib neeg no yog cov tsis ntseeg, lawv yog Ntxwgnyoog cov tub qhe. Ib txhia tib neeg hais tias, “Ntxwgnyoog cov tub qhe puas yog cov neeg soj xyuas uas tsoom fwv Koom Tsam Suav xa tuaj? Lawv puas yog cov neeg soj tshwj xeeb uas nkag los rau hauv Vajtswv lub tsev?” Tej zaum tsis yog tas li. Cov neeg soj tshwj xeeb thiab cov neeg soj xyuas ntawd mas yooj yim paub cais, tiam sis cov tib neeg uas tshaj tawm cov lus xaiv no saib sab nraud mas zoo li yog cov ntseeg tiag tiag. Txawm li cas los xij, lawv tsis caum qhov tseeb thiab pheej ua tus hais lus rau Ntxwgnyoog, thiab sawv cev rau Ntxwgnyoog los tshaj tawm cov lus uas iab liam Vajtswv thiab tawm tsam Vajtswv, thiab tshaj tawm cov lus xaiv uas nws tsim tawm los txog pawg ntseeg thiab Vajtswv lub tsev. Raws li saib qhov no, tsis hais leej twg xa lawv tuaj los xij, cov tib neeg no tsis yog Ntxwgnyoog cov tub qhe lod? (Yog.) Txawm yog lawv mus nrhiav sau cov lus xaiv no los los sis cia li hnov xwb los xij, cov tib neeg no tsis xav txog qhov nrhiav qhov tseeb thiab paub cais tej ntawd, tiam sis lawv ntseeg hais tias tej ntawd muaj tseeb. Lawv haj tseem tuaj yeem tshaj tawm thiab nthuav tawm tej ntawd rau hauv cov tib neeg yam tsis ntshai dab tsi hlo li thiab tsis muaj kev txwv kiag li, thiab tsis yog nyob rau ib qho chaw los sis ib lub hwv tsam xwb. Lawv lub hom phiaj ntawm qhov tshaj tawm cov lus xaiv no yog kom ntau tus tib neeg paub txog tej ntawd, ua kom cov uas qaug zog haj yam qaug zog ntxiv, thiab ua kom cov uas muaj zog thiab muaj kev ntseeg rau Vajtswv ua xyem xyav rau Nws thiab Nws tes hauj lwm vim yog cov lus xaiv ntawd—qhov ntawd yog los ua kom txhua tus tsis nyiam txog qhov tseeb, Vajtswv cov lus, Vajtswv tes hauj lwm, thiab kev cawm dim, tiam sis ua kom cov neeg ntawd nyiam txog ntau yam lus xaiv thiab cov lus tshaj tawm uas tsis zoo, ib yam nkaus li lawv tus kheej nyiam, kom tom qab ntawd, txhua zaus uas sawv daws sib txoos ua ke, lawv yuav tham txog tej yam uas tsis zoo no. Cov tib neeg zoo li sawv daws, cov tib neeg uas muaj kev ua neeg thiab laj thawj puas yuav ua tej yam zoo li no? Thaum tib neeg feem coob hnov cov lus xaiv los sis ntau yam lus tshaj tawm uas tsis zoo, tab txawm yog lawv tsis paub hais tias cov lus xaiv ntawd muaj tseeb los sis yog lus cuav los xij, vim lawv txoj kev ntseeg rau Vajtswv thiab lub siab hwm thiab ntshai Vajtswv me ntsis uas lawv muaj ntawd, lawv yuav los rau ntawm Vajtswv lub xub ntiag los thov Vajtswv thiab nrhiav qhov tseeb. Txawm yog lawv raug cuam tshuam los ntawm cov lus xaiv thiab hnov qaug zog thiab ua xyem xyav me ntsis los xij, qhov ntawd yuav tsis cuam tshuam rau txoj kev ua lawv tes dej num los sis lawv txoj kev raws Vajtswv qab. Lawv haj tseem yuav ceeb toom rau lawv tus kheej kom ceev faj lawv lub qhov ncauj thiab zam qhov ua tej yam uas tawm tsam los sis ua txhaum rau Vajtswv. Hom kev ua zoo li no yog ib yam uas cov kwv tij thiab cov nkauj muam feem coob tuaj yeem ua tau. Tsuav tib neeg muaj kev ua neeg me ntsis, muaj kev ntseeg tiag tiag me ntsis, thiab muaj lub siab hwm thiab ntshai Vajtswv me ntsis xwb, lawv yeej tuaj yeem ua tau qhov no. Vim tib neeg ntseeg hais tias Vajtswv muaj nyob tiag, lawv yuav tsum ntseeg hais tias txhua yam uas Vajtswv ua ntawd puav leej yog lawm. Vim qhov ntawd yog Vajtswv ua, tib neeg yuav tsum tsis txhob ua ib qho kev ntsuas twg txog qhov ntawd. Lawv yuav tsum paub tseeb hais tias: “Txawm cov lus xaiv uas los ntawm sab nraud los yuav hais li cas los xij, kuv ntseeg tsis tau tej ntawd, thiab kuv yeej tsis tuaj yeem tshaj tawm tej ntawd kiag li. Txawm yog kuv hnov qaug zog thiab tsis ruaj khov me ntsis nyob hauv kuv lub siab los xij, kuv yuav tsum tsis txhob tsis lees paub qhov uas Vajtswv muaj nyob tiag!” Yog ib tug ntseeg hais tias Vajtswv muaj nyob tiag, ces yuav tsum ntseeg hais tias txhua yam uas Vajtswv ua ntawd yog lawm; yog lawv ntseeg tias Vajtswv muaj nyob tiag, lawv yuav tsum muaj ib lub siab uas ntshai thiab hwm Vajtswv—qhov no yeej yog kiag lawm. Vim lawv muaj lub siab hwm thiab ntshai Vajtswv, txawm lawv yuav hnov cov lus xaiv dab tsi los xij, lawv yuav ceev faj lawv lub qhov ncauj, tsis dhau los ua cov neeg tshaj tawm cov lus xaiv, tsis raug Ntxwgnyoog tej kev dag ntxias, thiab tsis poob rau hauv Ntxwgnyoog tej tswv yim phem. Qhov no tsis yog ib yam uas tib neeg feem coob tuaj yeem ua tau yooj yim lod? (Yog.) Koj muaj kev xav thiab laj thawj uas ib txwm muaj, yog li thaum koj hnov cov lus xaiv, txawm koj yuav tshaj tawm tej ntawd los sis tsis tshaj tawm ntawd yog nyob ntawm koj txiav txim siab tag nrho xwb. Puas muaj lwm tus tswj koj? (Tsis muaj.) Yog li ntawd, tom qab hnov cov lus xaiv no lawm, puas yog tib neeg tsim nyog paub meej hais tias lawv yuav tsum daws tej ntawd li cas, thiab yuav tsum ua li cas rau tej ntawd thiab ua raws kom haum rau tej hauv paus ntsiab lus, thiab haum rau kev ua neeg thiab laj thawj lod? Txhua tus tsim nyog muaj qhov kev txiav txim me ntsis no thiab tsim nyog to taub txoj hau kev thiab txoj xub ke ntawm txoj kev ua raws no yam tsis cheem tsum kom lwm tus qhia. Tab txawm cov me nyuam yaus los yeej paub tias tsis txhob tshaj tawm tej lus taug xaiv, thiab tias qhov ntawd yog kev tsis hwm, tsis muaj kev coj ncaj ncees, thiab tsim kev sib cais, thiab tias ib tug yuav tsum tsis txhob ua hom tib neeg zoo li no; tej no yog tej kev xav thiab kev coj uas cov tib neeg muaj laj thawj li ib txwm tsim nyog muaj. Txawm li cas los xij, muaj ib hom tib neeg uas tsis muaj laj thawj zoo li no, thiab haj yam tsis muaj txoj kev ua neeg zoo li no. Qhov no ua rau lawv xav tshaj tawm cov lus xaiv thiab cov lus tshaj tawm uas tsis zoo rau cov neeg uas nyob ze lawv kom sai li sai tau tom qab hnov tej yam no, kom txhua tus tuaj yeem soj ntsuam, txiav txim, thiab ntxiv lus rau tej ntawd ua ke, thiab tom qab ntawd tshaj tawm cov lus xaiv no mus rau cov tib neeg coob dua. Lawv xav hais tias, “Qhov no tsis zoo heev lod? Qhov no tsis lom zem heev lod? Yog lub neej hauv pawg ntseeg muaj cov ntsiab lus no puv npo, mas ntshe yuav nplua mias npaum li cas! Tib neeg yuav tau txais kev paub ntau heev!” Tej kev xav thiab tej kev xam pom zoo li no yog hom dab tsi? Tej no tsis yog tej kev xav thiab tej kev xam pom ntawm ib tug neeg phem lod? Qhov no yog hom laj thawj dab tsi? Lawv tsis yog ib tug neeg uas xav kom muaj kev ntxhov quav niab heev lod? Tsis yog tias lawv ntsia tsis taus lwm tus ua tau zoo lod? Nyob rau hauv lawv lub siab, lawv haj tseem thuam cov kwv tij thiab cov nkauj muam hais tias: “Nej cov neeg ruam no, cov lus xaiv tab tom nthuav mus thoob plaws sab nraud ntawm pawg ntseeg; cov kev ntsuas uas tsis zoo, cov kev tawm tsam, thiab cov lus iab liam vajtswv lub tsev, tshwj xeeb tshaj yog khetos thiab vajtswv tes hauj lwm, yeej muaj nyob txhua qhov chaw. Nyob rau hauv cov tsev pe hawm ntawm lub ntiaj teb ntawm sab kab lis kev cai ntseeg, dai txhua hom ntaub ntawv tshaj tawm uas tsis zoo. Kiag thaum cov tib neeg nyob ntawd hnov tias ‘Qhov Xob Laim Sab Hnub Tuaj,’ lawv pib teem txim thiab nyob kom deb. Txhua tus tab tom thuam thiab teem txim rau nej, tiam sis nej cov neeg ruam no tseem nyob ntawm no ntseeg vajtswv thiab caum qhov tseeb!” Qhov pom cov tib neeg no raws Vajtswv qab nrog txoj kev ntseeg uas ruaj khov zoo li no ua rau lawv tsis xis nyob thiab kuj tsis nyiam kiag li thiab. Tshwj xeeb tshaj yog, thaum lawv pom tias ib tug neeg twg txoj kev sib qhia txog qhov tseeb muaj kev to taub tiag tiag thiab muaj ib qho kev hloov nyob rau hauv tus moj yam, thiab txhua tus ntshaw tus tib neeg ntawd, mas lawv ntxub tus tib neeg ntawd. Yog lawv pom ib tug neeg ua raws tej hauv paus ntsiab lus, tau txais txiaj ntsig, thiab muaj kev ua siab ncaj nyob rau hauv txoj kev ua tus neeg ntawd tes dej num hauv Vajtswv lub tsev, lawv npau taws thiab hais tias, “Vim li cas koj thiaj li tsis mloog cov lus xaiv los sis cov lus tshaj tawm uas los ntawm pawg ntseeg sab nraud? Vim li cas koj thiaj li ruam thiab ua siab dawb paug ua luaj? Saib seb kuv ntse npaum li cas—kuv tsuj ob lub nkoj. Kuv koom nrog lub neej hauv pawg ntseeg ntawm vajtswv lub tsev thiab kuv tsis hais tias kuv tsis ntseeg vajtswv, thiab yog tsis pub kuv ua ib teg dej num, kuv yuav tsis pom zoo rau qhov ntawd, tiam sis kuv kuj yuav tshawb xyuas cov xov xwm uas los ntawm pawg ntseeg sab nraud los thiab. Kuv yuav tsom ntsoov rau cov lus tshaj tawm tsis zoo thiab cov lus tawm tswv yim uas los ntawm lub ntiaj teb ntawm sab kab lis kev cai ntseeg, lub ntiaj teb uas ib txwm tsis ntseeg, thiab hauv is taws nem los ntawd.” Lawv pheej muaj ib qho kev xam pom uas tsis tsim nyog. Qhov pom cov kwv tij thiab cov nkauj muam caum qhov tseeb thiab ua tus kheej tej dej num ntawd ua rau lawv hnov tsis txaus siab nyob hauv nruab siab. Lawv pheej xav coj cov tib neeg no mus yuam kev thiab rub ib los sis ob tug ntawm cov tib neeg ntawd mus, thiab haj tseem pheej xav cuam tshuam qee tus ntawm cov tib neeg ntawd tas li. Lawv kuj xav “tsa” qee tus tib neeg tas li los ntawm qhov tshaj tawm cov lus xaiv, kom cov tib neeg ntawd thiaj li ntseeg cov lus xaiv thiab raug coj mus yuam kev. Qhia Kuv seb, lawv yog hom tib neeg dab tsi tiag? Qhov saib cov tib neeg zoo li no yam li yog ib feem ntawm Vajtswv lub tsev thiab yam li yog cov kwv tij thiab cov nkauj muam puas tsim nyog? (Tsis tsim nyog.) Yog li txoj kev uas tsim nyog tshaj plaws los saib lawv yog dab tsi? Qhov tsim nyog tshaj plaws yog saib lawv yam li cov tsis ntseeg, yam li Ntxwgnyoog cov tub qhe. Qhov no tsis yog kev teem txim uas tsis muaj hauv paus hauv ntsis los sis kev ua tsis ncaj ncees rau lawv; qhov no yog ib qho muaj tseeb.

Qhov ntxim ntxub ntawm cov tib neeg tshaj tawm cov lus xaiv uas tsis muaj tseeb no yog dab tsi? Txawm lawv yuav hnov cov lus tshaj tawm uas tsis zoo los ntawm txoj kev twg los los xij, tab txawm yog lawv yeej paub meej hais tias tej ntawd yog cov lus xaiv thiab tej lus dab uas tsis muaj tseeb kiag li los xij, lawv yeej tseem tshaj tawm tej ntawd rau lwm tus yam kub siab lug thiab tsis paub nkees. Lub ntsiab xeeb txawm ntawm qhov kev ua no yog dab tsi? Ib tug tib neeg uas muaj lub siab hwm thiab ntshai Vajtswv yuav hnov tsis nyiam kiag li thaum lawv hnov cov lus xaiv. Tshwj xeeb tshaj yog thaum hais txog cov lus uas tawm tsam thiab cem Vajtswv, lawv yuav tsis hais txog tej ntawd kiag li kom zam qhov ua rau lawv lub qhov ncauj qias neeg, uas ua pov thawj qhia hais tias lawv muaj ib lub siab hwm thiab ntshai Vajtswv. Lawv hais tias, “Lwm tus txiav txim thiab iab liam Vajtswv, tawm tsam thiab iab liam pawg ntseeg, qhov ntawd yog lawv li teeb meem. Kuv yuav tsum tsis txhob mus muaj feem nrog lawv tej kev txhaum. Lawv txoj kev iab liam Vajtswv twb yog ib qho kev ntxeev siab uas phem heev thiab yog ib qho kev txhaum uas loj heev lawm—kuv tsis tuaj yeem hais cov lus no tawm hauv kuv lub qhov ncauj tuaj. Kuv yuav tsum tsis txhob hais tej lus zoo ib yam li lawv. Kuv yeej yuav tsis ua qhov ntawd kiag li!” Txawm li cas los xij, cov uas yog Ntxwgnyoog cov tub qhe hais tau cov lus tshaj tawm uas tsis zoo thiab cov lus xaiv uas lawv hnov ntawd txhua lo tsis pub poob, thiab lawv ua li ntawd ntau lwm thiab tsis muaj kev txhawj xeeb kiag li, haj tseem tshaj tawm tej ntawd mus rau txhua qhov chaw. Cov tib neeg no puas muaj lub siab hwm thiab ntshai Vajtswv me me li? Lawv puas ntshai Vajtswv? Tsis ntshai, lawv yeej tsis ntshai li. Saib sab nraud mas, lawv kuj ntseeg hais tias Vajtswv muaj nyob tiag thiab, tiam sis qhov ntseeg ntawd tsis tau txhais hais tias lawv lees paub tias Vajtswv yog tus Tswv Tsim uas muaj hwj chim kav txhua yam. Ntxwgnyoog kuj ntseeg hais tias muaj ib tug Vajtswv nyob rau hauv lub ntiaj teb thiab nyob rau hauv lub qab ntuj khwb thiab nyob rau hauv txhua yam thiab, tiam sis nws coj li cas rau Vajtswv thaum Vajtswv hais lus rau nws? Nws nrog Vajtswv tham li cas? Nws puas muaj lub siab hwm thiab ntshai Vajtswv? Nws puas coj rau Vajtswv yam li yog Vajtswv? Tsis coj rau. Nws siv txoj hau kev twg los nrog Vajtswv tham? Nws sim, dag ntxias, thiab thuam Vajtswv, yam li tso dag xwb. Thaum Vajtswv nug hais tias, “Koj mus qhov twg los?” Ntxwgnyoog teb li cas? (“Mus ncig ntuj ncig teb los xwb, thiab mus nce toj nqis taug hauv lub ntiaj teb los xwb” (Yauj 1:7).) Cov no puas yog tib neeg cov lus? (Tsis yog.) Yog li, cov lus no txhais li cas? Vim li cas Ntxwgnyoog thiaj li hais lus li no? Hom cwj pwm twg thiaj li tsim tau cov lus zoo li no? Qhov ntawd tsis yog ib tug cwj pwm uas thuam lod? (Yog.) Qhov thuam ntawd txhais li cas? Qhov ntawd yog qhov tso dag nrog ib tug twg, puas yog? “Kuv yeej tsis qhia rau koj hais tias kuv los qhov twg los. Koj yuav ua tau li cas rau kuv?” Cov lus ntawd hais rau koj lawm, tiam sis tsis xav kom koj paub tias muaj dab tsi tshwm sim tiag tiag—tus uas hais ntawd tsis kam qhia qhov ntawd rau koj, thiab tsuas tso dag nrog koj xwb. Qhov no yog kev thuam. Tus cwj pwm no puas qhia txog qhov saib Vajtswv yam li yog Vajtswv? Puas muaj qhov hwm los sis ntshai thiab hwm Vajtswv nyob rau hauv qhov ntawd? Yeej tsis muaj kiag li—qhov no yog Ntxwgnyoog lub ntsej muag. Cov uas tshaj tawm cov lus xaiv tuaj yeem lam tau lam tshaj tawm tej ntawd rau cov kwv tij thiab cov nkauj muam. Lawv yeej paub meej hais tias cov lus xaiv no tsis muaj tseeb, tiam sis lawv tseem ua txhua yam li lawv ua tau los tshaj tawm tej ntawd, nrhiav txhua lub cib fim thiab txhua qhov chaw los ua qhov no. Qhov no tsis yog Ntxwgnyoog txoj kev coj thiab txoj kev ua lod? Qhov no yog qhov uas Ntxwgnyoog ua. Nws lees paub hais tias Vajtswv muaj nyob tiag thiab paub hais tias Vajtswv muaj hwj chim kav txhua yam, tiam sis nws tsis muaj kev hwm thiab ntshai Vajtswv me me li. Qhov no yog Ntxwgnyoog lub ntsej muag, yog Ntxwgnyoog tus yam ntxwv xeeb txawm lub ntsiab tseeb. Ib txhia kwv tij los sis nkauj muam yuav hais tias, “Txawm tus tib neeg no tsis caum qhov tseeb los xij, nws txoj kev ntseeg Vajtswv mas yog los ntawm lub siab dawb paug. Thaum nws hnov hais tias pawg ntseeg yuav cais nws tawm los sis ntsaig nws tawm mus, nws ntxhov siab txog qhov uas nws quaj thiab txhawj xeeb heev; nws lub qhov ncauj haj tseem ua hlwv thiab! Nws tsis xav tawm hauv Vajtswv lub tsev mus; nws ntseeg hais tias Vajtswv muaj nyob tiag. Yog li ntawd, txawm nws yuav ua dab tsi los xij, peb yuav tsum saib nws yam li ib tug kwv tij, thiab muab kev hlub thiab kev ua siab dav rau nws, thiab tab txawm thaum nws tshaj tawm cov lus xaiv los xij, peb yeej tseem coj rau nws nrog kev hlub los pab thiab txhawb nws.” Cov lus no puas yog? Cov lus no puas yog qhov tseeb? (Tsis yog.) Vajtswv tau hais cov lus ntau npaum li ntawd, tiam sis cov tib neeg no tsis ntseeg cov lus ntawd. Tiam sis, txawm cov dab thiab Ntxwgnyoog yuav hais cov lus xaiv ntau npaum li cas los xij, cov tib neeg no ntseeg tej ntawd tag nrho, thiab haj tseem tshaj tawm cov lus xaiv no yam tsis ntshai dab tsi li los tawm tsam thiab iab liam Vajtswv. Tsuas yog raws li qhov no xwb, lawv tsis tsim nyog raug hu ua cov kwv tij los sis cov nkauj muam. Qhov no puas yog? (Yog.) Vim lawv tuaj yeem tshaj tawm cov lus xaiv, iab liam Vajtswv, tawm tsam Vajtswv, thiab iab liam Vajtswv lub tsev thiab pawg ntseeg yam tsis ntshai dab tsi li, peb thiaj li muaj laj thawj zoo los saib lawv yam li Ntxwgnyoog cov tub qhe, yam li cov Ntxwgnyoog. Lawv yog Vajtswv cov yeeb ncuab thiab yog txhua tus neeg Vajtswv xaiv tseg cov yeeb ncuab. Yog li, peb yuav tsum ua li cas rau peb cov yeeb ncuab? (Tsis lees txais.) Yog lawm, peb yuav tsum tsis lees txais.

Ib txhia tib neeg tsis nyiam qhov tseeb. Tom qab hnov cov lus xaiv lawm, txawm lawv tsis tshaj tawm tej ntawd qhib lug nyob rau hauv pawg ntseeg los xij, lawv yeej tshaj tawm tej ntawd zais ntshis rau cov neeg uas nyob ze lawv. Thaum hnov cov lus xaiv no, ib txhia tib neeg uas tsis muaj kev paub cais thiaj li xav tsis zoo thiab qaug zog; qee tus tsis tuaj koom kev sib txoos ua ke lawm, thiab qee tus thim tawm hauv pawg ntseeg mus lawm—tiam sis tus uas tshaj tawm cov lus xaiv ntawd tseem tsis lees paub hais tias yog tim qhov kev tshaj tawm cov lus xaiv ntawd ua rau muaj qhov no. Txawm tau ceeb toom thiab sib qhia ntau zaus los xij, lawv tseem ua li no thaum ntsib tej yam zoo li no, tsuas yog zam qhov tshaj tawm cov lus xaiv qhib lug thiab yam tsis paub txaj muag thaum sib txoos ua ke los sis nyob rau hauv cov neeg coob vim ntshai tias tsam yog kev nthuav lawv tus kheej tawm, raug cov kwv tij thiab cov nkauj muam tsis lees txais, los sis raug pawg ntseeg ntsaig tawm mus, es xaiv los tshaj tawm qee cov lus xaiv zais ntshis los ntawm qhov xa ntawv rau lwm tus los sis los ntawm txoj kev sib txuas lus nrog tib neeg xwb. Yog li ntawd cov tib neeg zoo li no tsis yog cov tib neeg phem lod? Tseeb tiag, lawv haj tseem siab phem zais ntshis dua. Txawm lawv yuav ua zais ntshis npaum li cas los xij, lawv txoj kev npaj siab thiab lub ntsiab xeeb txawm ntawm lawv tej kev ua ntawd yeej zoo ib yam nkaus li Ntxwgnyoog cov tub qhe ntag. Lawv lub hom phiaj ntawm qhov tshaj tawm cov lus xaiv yog los cuam tshuam tib neeg txoj kev ua dej num, ua kom tib neeg xav tsis zoo thiab qaug zog, ua kom tib neeg tsis lees paub Vajtswv, nyob kom deb ntawm Vajtswv, thiab tso lawv tej dej num tseg. Puas muaj leej twg hais tias, “Kuv lub hom phiaj ntawm qhov tshaj tawm cov lus xaiv tsis yog los cuam tshuam tib neeg txoj kev ua dej num los sis rhuav tshem lawv lub siab nquag plias, tiam sis yog los pab lawv kom muaj kev paub cais thiab ua kom lawv muaj lub zog tiv thaiv tuaj ntxiv, kom thaum lawv hnov cov lus xaiv, lawv yuav tiv thaiv tau tej ntawd, yuav tsis ntseeg tej ntawd, tuaj yeem caum qhov tseeb tau zoo, thiab tuaj yeem ua lawv tej dej num tau kaj siab lug”? Puas muaj leej twg tshaj tawm cov lus xaiv nrog txoj kev npaj siab no? (Tsis muaj.) Qhov kev hais no puas sawv tau ruaj? Qhov tseeb tiag, nws sawv tsis tau ruaj li. Tsuav lawv tuaj yeem tshaj tawm cov lus xaiv, tshwj xeeb tshaj yog cov uas tawm tsam, iab liam, thiab tuam mom Vajtswv—lawv tuaj yeem lam tau lam hais tej no txhua zaus uas lawv qhib qhov ncauj thiab tshaj tawm tej ntawd mus rau txhua qhov chaw yam tsis muaj kev txhawj xeeb kiag li—txawm lawv yuav tshaj tawm cov lus xaiv ntau npaum li cas los xij, txawm cov lus xaiv ntawd raug tshaj tawm qhib lug los sis zais ntshis los xij, thiab txawm yuav muaj kev cuam tshuam li cas rau tib neeg los xij, muab hais luv luv tias, lawv lub hom phiaj ntawm qhov tshaj tawm cov lus xaiv tsis yog los pab tib neeg kom to taub qhov tseeb thiab muaj kev paub cais, tiam sis yog los cuam tshuam thiab coj tib neeg mus yuam kev, thiab ua kom lawv ua xyem xyav thiab nyob deb ntawm Vajtswv—yam uas lawv tab tom ua yog cuam tshuam thiab rhuav tshem pawg ntseeg tes hauj lwm. Los ntawm qhov kev xam pom no, txawm yog vim li cas los sis nyob rau hauv qhov xwm txheej twg uas tshaj tawm cov lus xaiv los, lub ntsiab tseeb ntawm cov tib neeg uas tshaj tawm cov lus xaiv ntawd yeej tsis tas ua xyem xyav hais tias lawv yog Ntxwgnyoog cov tub qhe. Txhua tus uas hais cov lus xaiv uas iab liam, tawm tsam, thiab tuam mom Vajtswv yog tawm tsam Vajtswv thiab yog Vajtswv ib tug yeeb ncuab. Qhov no puas yog? (Yog.) Txawm koj tsis yog tus tsim cov lus xaiv los xij, qhov uas koj tuaj yeem tshaj tawm tej ntawd ua pov thawj qhia hais tias koj ntseeg hais tias cov lus xaiv ntawd muaj tseeb los sis nyob rau hauv koj lub siab koj txaus siab hlo ntseeg tej ntawd. “Yog cov lus xaiv ntawd muaj tseeb, ces kuv yuav tsis tas ntseeg vajtswv, vajtswv yuav tsis yog vajtswv, thiab qhov muaj tseeb ntawm vajtswv qhov kev yug los ua cev nqaij daim tawv ntawd yuav tsis muaj nyob. Nws tsuas yog ib tug tib neeg xwb, thiab kuv tuaj yeem lam tau lam tsim cov lus xaiv txog nws, hais lus phem rau nws, thiab tawm tsam thiab iab liam nws.” Qhov ntawd tsis yog lub hom phiaj lod? Yog koj ntseeg Vajtswv tiam sis pheej xav hais lus thiab ua yam ywj siab, qhov no tsis yog xav tawm tsam Vajtswv lod? (Yog.) Ib txhia tib neeg hais tias, “Qhov no puas yog kev tig tawm tsam Vajtswv? Qhov no puas yog kev tsis muaj kev ntseeg rau Vajtswv?” Lub ntsiab xeeb txawm ntawm qhov no mas hnyav dua qhov ntawd lawm ntau. Qhov no yog kev tawm tsam Vajtswv thiab cov nyom nrog Vajtswv. Tsuas yog Vajtswv cov yeeb ncuab xwb thiaj li tawm tsam thiab cov nyom nrog Vajtswv li no. Cov tib neeg ntiaj teb uas qias vuab tsuab, vim muaj Ntxwgnyoog tus moj yam qias vuab tsuab thiab tsis muaj kev to taub txog qhov tseeb thiab kev paub txog Vajtswv, thiaj li tig tawm tsam tau rau Vajtswv. Txawm li cas los xij, Ntxwgnyoog ua ntau dua qhov tig tawm tsam Vajtswv; nws ntxeev siab, tawm tsam Vajtswv, thiab cov nyom nrog Vajtswv. Qhov no ua rau nws dhau los ua Vajtswv ib tug yeeb ncuab. Kev sib raug zoo ntawm Vajtswv cov yeeb ncuab thiab Vajtswv yog ib qho kev cov nyom. Kev cov nyom txhais li cas? Qhov ntawd txhais hais tias tsis sib haum xeeb. Txawm qhov xwm txheej los sis ib puag ncig yuav zoo li cas los xij, Ntxwgnyoog txoj kev cov nyom nrog Vajtswv yuav tsis hloov raws li lub sij hawm los sis qhov chaw. Ntxwgnyoog lub ntsiab tseeb yog cov nyom nrog Vajtswv, thiab qhov no tsis hloov li; Ntxwgnyoog yeej yog Vajtswv tus yeeb ncuab. Ntxwgnyoog txoj kev tawm tsam Vajtswv thiab nws txoj kev tsis sib haum xeeb nrog Vajtswv ntawd tsis yog nyob tau ib hnub los sis tsuas yog ob peb xyoos los sis kaum tawm xyoo xwb; nws pib cov nyom nrog Vajtswv txij thaum nws ntxeev siab rau Vajtswv los lawm. Yog li thaum twg txoj kev cov nyom no thiaj li yuav xaus? Ntxwgnyoog puas yuav raug Vajtswv tshoov nws lub siab thiab hloov? Nws txoj kev cov nyom nrog Vajtswv ntawd puas yuav maj mam txo qis raws li lub sij hawm? Tsis txo. Nws yuav txuas ntxiv cov nyom nrog Vajtswv mus li. Thaum twg txoj kev cov nyom no thiaj li yuav tsis muaj ntxiv lawm? Thaum Vajtswv tes hauj lwm xaus lawm, thiab Ntxwgnyoog tau ua nws tes dej num txhawb tiav lawm thiab tsis muaj txiaj ntsim ntxiv lawm, thiab Vajtswv tau rhuav tshem nws lawm—qhov ntawd yog thaum txoj kev cov nyom no xaus. Ua li cov uas yog Ntxwgnyoog cov tub qhe ne? Tsuav lawv tseem nyob hauv pawg ntseeg, lawv yuav cov nyom nrog pawg ntseeg, Vajtswv lub tsev, thiab Vajtswv mus txuas ntxiv. Ib txhia tib neeg hais tias, “Lawv ntseeg Vajtswv, qee zaus tseem muab khoom fij, muab khoom pub, thiab haj tseem txais tos cov kwv tij thiab cov nkauj muam. Lawv cov nyom nrog Vajtswv li cas? Lawv tsis cov nyom nrog Nws; lawv haj tseem ua qee yam kev ua zoo thiab.” Cov lus no puas yog? Qhov txais tos cov kwv tij thiab cov nkauj muam thiab muab nyiaj me ntsis rau cov kwv tij thiab cov nkauj muam uas pluag puas tshem tawm tau lawv txoj kev cov nyom nrog Vajtswv? Qhov ntawd puas ua pov thawj qhia tau hais tias lawv sib haum nrog Vajtswv? (Tsis tau.) Yog li, txoj kev cov nyom no tshwm sim los li cas? (Qhov ntawd txiav txim los ntawm lawv tus yam ntxwv xeeb txawm lub ntsiab tseeb.) Yog lawm, lawv tus yam ntxwv xeeb txawm lub ntsiab tseeb yog tawm tsam thiab cov nyom nrog Vajtswv. Rau cov tib neeg zoo li no, nej yuav tsum paub cais lawv raws li Vajtswv cov lus: Saib seb leej twg nyiam sau cov lus tshaj tawm uas tsis zoo los sis cov lus xaiv uas tawm tsam thiab iab liam Vajtswv lub tsev thiab pawg ntseeg los ntawm ntau txoj kev, thiab leej twg nyiam tej yam uas tsis zoo no thiab txaus siab hlo ntseeg cov lus xaiv thiab tej lus dab no. Qhov no yuav ua rau nej pom cov tsis ntseeg no lub ntsej muag tiag tiag. Cov tib neeg no feem ntau tsis nyeem Vajtswv cov lus, tsis muaj zog thaum mloog cov kwv tij thiab cov nkauj muam sib qhia qhov tseeb, thiab ua lawv tej dej num yam tsis kub tsis txias. Lawv yeej ib txwm xav hais tias kev ntseeg Vajtswv tsis muaj dab tsi txaus nyiam li. Lawv tsom ntsoov rau dab tsi thaum saib cov yeeb yaj kiab thiab cov kev ua yeeb yam ntawm Vajtswv lub tsev? Thaum lawv pom cov lus tawm tswv yim zoo uas cov tib neeg ntawm sab kab lis kev cai ntseeg sau, lawv hnov tsis xis nyob thiab hla tej ntawd mus. Tiam sis thaum lawv pom cov tib neeg ntawm sab kab lis kev cai ntseeg thiab cov ib txwm tsis ntseeg sawv rau ntawm tus zaj loj liab ploog sab, siv lawv tej lus dab cem pawg ntseeg, cem Vajtswv lub tsev, thiab cem cov kwv tij thiab cov nkauj muam, lawv hnov zoo siab thiab kub siab tshwj xeeb. Txhua zaus uas lawv hnov cov lus tshaj tawm uas tsis zoo thiab cov lus xaiv no, lawv kub siab cuag li lawv tau raug txhaj tshuaj muaj zog, taug kev yam dhia hlawv hlo thiab haj tseem pw tsim los ntawm txoj kev xyiv fab thiab. Qhov no tsis yog kev lim hiam lod? Soj ntsuam cov uas nyob ib puag ncig nej seb leej twg yog hom tib neeg no; saib seb lawv puas muaj tus moj yam uas ntxub qhov tseeb thiab ntxub Vajtswv. Yog nej pom ib tug tib neeg zoo li no tiag tiag, nej yuav tsum ceev faj tshwj xeeb thiab paub cais lawv; soj ntsuam lawv cov lus, tej kev ua, thiab txoj kev coj. Kiag thaum nej paub tseeb hais tias lawv yog ib tug neeg phem, yog Ntxwgnyoog ib tug tub qhe, nej yuav tsum tsis lees txais thiab tsis txhob saib lawv yam li ib tug kwv tij los sis ib tug nkauj muam. Yuav tsum muab cov tib neeg no ntsaig tawm ntawm pawg ntseeg mus kom sai li sai tau. Ib txhia tib neeg hais tias, “Vim li cas peb thiaj li yuav tsum ntsaig cov tib neeg no tawm mus? Nyob rau hauv Vajtswv lub tsev, qhov muaj ib tug tib neeg ntxiv txhais hais tias muaj ib lub zog ntxiv rau kev ua hauj lwm; qhov muaj ib tug tib neeg ntxiv ua rau nws lom zem me ntsis thiab. Lawv tau ntseeg Vajtswv ntau xyoo lawm, thiab txawm lawv tsis nyiam los sis tsis ua raws li qhov tseeb los xij, lawv tau ntseeg hais tias Vajtswv muaj nyob tiag txij thaum tseem me los lawm, ntseeg tus Yawm Saub nyob Saum Ntuj. Lawv kuj ntseeg hais tias muaj ib tug vajtswv nyob ze saum taub hau, thiab haj tseem ntseeg hais tias qhov zoo thiab qhov phem yeej muaj qhov kev ua pauj rov qab. Raws li ib txwm muaj mas lawv tsis muaj cuab kav ua tej kev ua phem uas pom tseeb tseeb thiab txaus siab hlo pab lwm tus. Tsuas yog hais tias lawv muaj qhov kev nyiam me me no xwb; lawv nyiam tshaj tawm cov lus xaiv thiab tej lus paj lus cua. Tshwj xeeb tshaj yog, lawv tshaj tawm cov lus xaiv uas tus zaj loj liab ploog iab liam Vajtswv, hais tej yam no ntau lwm yam tsis xav li, tej zaum vim lawv ruam thiab tsis muaj kev paub xwb.” Saib sab nraud mas, lawv tsis zoo li yog cov tib neeg phem thiab tsis tau tab kaum los sis cuam tshuam pawg ntseeg tes hauj lwm, tiam sis lawv nquag tshwj xeeb rau qhov tshaj tawm cov lus xaiv thiab pheej xav ua thawj tug uas tshaj tawm tej ntawd. Tib neeg tsis tsim nyog ceev faj txog cov tib neeg zoo li no lod? Lawv tsis yog Ntxwgnyoog cov tub qhe lod? Cov tib neeg zoo li no lub ntsiab tseeb mas yeej pom tseeb heev! Lawv yeej tsis nyiam txog Vajtswv cov lus los sis qhov tseeb kiag li, thiab lawv yeej tsis nrhiav qhov tseeb tej hauv paus ntsiab lus thaum ua lawv tes dej num li. Txhua yam uas lawv ua, lawv tsis ua tiag tiag, tsis muab siab rau ua, thiab tsis txaus siab hlo tiv kev txom nyem. Lawv tsuas ua dog ua dig thiab lam ua kom dhau xwb, pheej ua tso dag tso luag tas li. Nyob rau hauv lawv tej lus thiab tej kev ua mas lawv tsis ua rau leej twg chim thiab sib raug zoo tau nrog txhua tus, saib zoo li lawv nrog lwm tus nyob tau sib haum xeeb—tiam sis tsuas yog lawv nyiam sau thiab tshaj tawm cov lus xaiv xwb. Los ntawm tej kev ua no, peb puas txiav txim tau hais tias cov tib neeg no yog Ntxwgnyoog cov tub qhe? (Yog.) Vim li cas thiaj li tau? Qhov no puas yog kev ua kom tej xwm txheej loj tshaj qhov muaj tiag? (Tsis yog.) Lawv yeej tsis nyiam txog qhov caum qhov tseeb kiag li. Kiag thaum lawv mloog ib zaj lus qhuab qhia, lawv tsaug zog; kiag thaum sib qhia txog Vajtswv cov lus, ces lawv hnov tsis nyiam kiag li thiab nyob tsis tswm, pheej sawv mus haus dej los sis mus siv chav dej tas li, pheej hnov tsis xis nyob hauv nruab siab—qhov mloog kev sib qhia mas zoo li nyuaj tshwj xeeb rau lawv cuag li raug tsim txom. Txawm li cas los xij, kiag thaum lawv hnov Ntxwgnyoog cov lus xaiv los sis tej lus dab ntawm cov ib txwm tsis ntseeg, lawv cia li nyiam kiag, lawv muaj zog tuaj, thiab lawv pib tshaj tawm cov lus xaiv thiab tej lus dab no yam nquag tshwj xeeb. Cov tib neeg zoo li no puas yog cov kwv tij thiab cov nkauj muam? Tsis yog. Lawv tsis nyiam qhov tseeb kiag li thiab saib tsis taus qhov tseeb mus ti nkaus txha. Hais txog tej yam uas muaj feem xyuam rau Vajtswv thiab Nws tes hauj lwm, txawm yog Vajtswv qhov yog leej twg tiag tiag thiab lub ntsiab tseeb, Vajtswv lub meej mom, Vajtswv txoj kev muaj hwj chim, los sis lub cev nqaij daim tawv uas Vajtswv yug los ua neeg ntawd los, lawv saib tsis taus tej no nyob hauv lawv lub siab. Lawv yeej tsis muaj ib lub siab hwm thiab ntshai Vajtswv kiag li. Yog li ntawd, lawv yeej ib txwm muaj tej kev xav phem txog Vajtswv thiab Nws tes hauj lwm. Lawv tuaj yeem hais ntau lwm txog txhua hom lus xaiv thiab tej lus dab ntawm Ntxwgnyoog yam yooj yim heev, yog li ntawd thiaj li ua tau raws li lawv lub hom phiaj ntawm qhov tshaj tawm tej ntawd, yam tsis muaj kev liam ntawm lub siab txawj xav kiag li. Qhov no yog hom tib neeg phem dab tsi? Lawv puas yog cov ntseeg Vajtswv? (Tsis yog.) Tej no yog tej kev ua ntawm cov uas lees paub Vajtswv ntawm ncauj thiab hais tias raws Vajtswv qab, cov uas ntseeg hais tias muaj ib tug Yawm Saub nyob Saum Ntuj, ntseeg hais tias muaj ib tug vajtswv nyob ze saum taub hau, thiab ntseeg hais tias qhov zoo thiab qhov phem yeej muaj qhov kev ua pauj rov qab. Qhov no yog lawv tus cwj pwm uas muaj rau Vajtswv. Yog ib tug neeg cem lawv niam lawv txiv los sis tsim cov lus xaiv txog lawv niam lawv txiv tom qab lawv nraub qaum, lawv yeej yuav tawm tsam mus txog thaum tuag xwb. Txawm li cas los xij, thaum ib tug neeg cem Vajtswv, tawm tsam Vajtswv, los sis iab liam Vajtswv, lawv tsis yog tsuas tsis mob siab xwb, tiam sis lawv tseem tuaj yeem hais ntau lwm qhov ntawd cuag li yog ib qho kev tso dag thiab haj tseem tshaj tawm qhov ntawd mus rau txhua qhov chaw thiab. Qhov no puas yog ib yam uas ib tug neeg uas raws Vajtswv qab tsim nyog ua? (Tsis yog.) Yog li, qhov uas ntau tus tib neeg saib cov tsis ntseeg no yam li yog cov kwv tij thiab cov nkauj muam ntawd puas tsim nyog? (Tsis tsim nyog.) Yog li ntawd, thaum ua xyem xyav tias cov tib neeg zoo li no yog Ntxwgnyoog cov tub qhe, ces lwm tus yuav tsum ceev faj. Cov thawj coj thiab cov neeg ua hauj lwm yuav tsum qhia rau cov kwv tij thiab cov nkauj muam kom ceev faj txog cov tib neeg no kom ncav sij hawm, kom txhua tus tuaj yeem paub cais lawv. Kiag thaum paub tseeb hais tias lawv yog Ntxwgnyoog cov tub qhe, yog cov dab, ces txhua tus yuav tsum koom siab tsis lees txais lawv thiab tshem lawv tawm ntawm pawg ntseeg mus. Qhov no puas mus raws li tej hauv paus ntsiab lus? (Mus raws.) Ces yuav tsum ua li ntawd.

C. Yuav Coj Li Cas Rau Cov Lus Xaiv Uas Tsis Muaj Tseeb ntawm Tsoom Fwv Koom Tsham Suav thiab lub Ntiaj Teb ntawm Sab Kab Lis Kev Cai Ntseeg Uas Hais Phem thiab Tawm Tsam Vajtswv

Tsoom fwv Koom Tsham Suav thiab lub ntiaj teb ntawm sab kab lis kev cai ntseeg tau tsim ntau cov lus xaiv uas tsis muaj tseeb txog Vajtswv lub tsev, iab liam hais tias cov kwv tij thiab cov nkauj muam yuam tib neeg kom lees txais txoj moo zoo, thiab lwm yam ntxiv. Nej xav li cas tom qab hnov cov lus xaiv no? (Npau taws, chim siab.) Tej no yog cov lus xaiv uas ntsig txog nej, thiab nej hnov chim siab. Nej chim siab npaum li cas? Nej puas xav nrhiav cov tib neeg uas tsim cov lus xaiv ntawd thiab nrog lawv cav, haj tseem xav qhuab qhia lawv thiab? (Xav.) Cov lus xaiv no saib sab nraud mas yog tsom rau pawg ntseeg, tiam sis tseeb tiag, tej ntawd muaj feem cuam tshuam rau txhua tus tswv cuab hauv pawg ntseeg thiab txhua tus tswv cuab lub koob meej thiab kev coj ncaj ncees. Tom qab hnov tej ntawd nej hnov chim siab, hais tias, “Peb twb tsis tau ua li ntawd! Peb tshaj tawm txoj moo zoo raws li qhov tseeb tej hauv paus ntsiab lus. Rau cov uas tsis xav ntseeg Vajtswv, peb yeej tsis yuam lawv li. Kev ntseeg yog nyob ntawm yus lub siab yeem xwb. Peb yeej tsis yuam leej twg li, thiab haj yam tsis tau ua phem los sis ua pauj rau tib neeg li. Tiam sis, peb cov uas tshaj tawm txoj moo zoo raug cov tib neeg ntawm sab kab lis kev cai ntseeg ntaus phem heev thiab raug lawv qhia tawm rau tub ceev xwm, raug muab cob rau tus zaj loj liab ploog tsim txom; peb coob tus raug muab kaw rau hauv nkuaj, thiab haj tseem raug muab kaw rau hauv cov nkuaj ntiag tug uas cov tib neeg ntawm sab kab lis kev cai ntseeg tsim tsa ntawd tsis tsawg thiab. Peb thiaj li yog cov uas raug ua tsis ncaj ncees rau!” Tom qab hnov cov lus xaiv no, nej hnov chim siab thiab pheej xav nrog lawv cav. Nej muaj qhov kev teb rov qab li no vim cov lus xaiv no tawm tsam thiab iab liam pawg ntseeg thiab cov neeg Vajtswv xaiv tseg ncaj qha. Nej xav li cas thaum nej hnov cov lus xaiv uas iab liam thiab txiav txim rau Vajtswv? Tej no tsis muaj feem cuam tshuam rau nej tus kheej tej txiaj ntsim los sis nej txoj kev coj ncaj ncees thiab lub meej mom; tej no yog cov lus xaiv txog Vajtswv. Piv txwv li, yav tas los thaum koj ntseeg Yexus, qee tus tib neeg hais tias Yexus yog yug los ntawm ib tug nkauj xwb thiab tsis muaj txiv. Koj xav li cas thaum koj hnov li ntawd? Koj puas xav nrog lawv cav? “Tus uas peb ntseeg ntawd yog Vajtswv!” Ces koj ua tib zoo xav: “Maivliag yog ib tug nkauj xwb, thiab Yexus yug los ntawm ib tug nkauj xwb, xeeb tub los ntawm Vajntsujplig Dawb Huv. Qhov no yog qhov muaj tseeb, tiam sis cov ib txwm tsis ntseeg hais txog qhov no yam tsis zoo mloog, thiab kuv tsis nyiam hnov qhov ntawd!” Qhov ntau kawg tej zaum koj muaj tej kev xav zoo li no, tiam sis hauv koj lub siab, koj tseem xav tias qhov xeeb tub los ntawm Vajntsujplig Dawb Huv ntawd mas cov nyom nrog tib neeg tej kev xav phem dhau lawm. Koj ntseeg tsis tau qhov no vim koj ntseeg kev tshawb fawb; koj tsis ntseeg Vajtswv lub hwj chim uas loj kawg nkaus tawm hauv koj lub siab los, thiab koj tsis ntseeg tias txhua yam uas Vajtswv hais thiab ua yog qhov tseeb, ces koj yuav tsis mus cav tawm tsam cov tsis ntseeg tej lus dab ntawd. Vim koj tsis muaj qhov tseeb thiab tsis to taub qhov tseeb, qhov ntau kawg los, koj pom tias cov lus xaiv uas tib neeg tham txog ntawd tsis zoo mloog, thiab xav tias tib neeg tsis tsim nyog hais li ntawd vim cov lus xaiv no muaj feem cuam tshuam rau koj lub koob meej; koj xav tias, “Cov ib txwm tsis ntseeg mas qias thiab qias vuab tsuab dhau! Lawv muaj cuab kav siv txhua lo lus qias neeg; lawv yeej yog cov tsis ntseeg tiag tiag! Lawv yeej yog cov dab tiag tiag!” Npaum li ntawd xwb, twb zoo heev lawm. Vim li cas koj thiaj li hnov chim thiab pom tias cov ib txwm tsis ntseeg mas qias vuab tsuab thiab qias neeg tom qab hnov lawv hais cov lus xaiv zoo li no? Vim tej ntawd muaj feem cuam tshuam rau koj lub koob meej; cov lus xaiv no deeg rau koj lub siab, ua rau koj hnov poob ntsej muag, yog li ntawd tej ntawd thiaj li ua rau koj npau taws, thiab koj thiaj li sawv los hais qee cov lus uas zoo los cav tawm tsam. Qhov cav tawm tsam zoo li no puas yog sawv rau ntawm Vajtswv sab tag nrho? Qhov ntawd puas yog los tiv thaiv Vajtswv tej lus tim khawv? Tsis yog, qhov ntawd yog los tiv thaiv koj tus kheej lub ntsej muag thiab lub meej mom tag nrho xwb. Vim li cas thiaj li hais li no? Vim koj tsis tau pom tshab txog lub ntsiab tseeb ntawm qhov teeb meem no; haj yam tshaj ntawd, koj tsis to taub Vajtswv tej kev npaj siab los sis qhov uas Vajtswv cheem tsum ntawm koj. Qhov uas koj to taub thiab hnov ntawd tsis mus raws li Vajtswv tej kev npaj siab; qhov ntawd tsuas yog tib neeg txoj kev siab kub thiab tib neeg txoj kev coj zoo xwb. Tib neeg txoj kev coj zoo tsis sawv cev rau cov lus tim khawv uas koj ua rau Vajtswv. Koj tsis tau tuav koj tej lus tim khawv khov kho; koj tsuas yog tiv thaiv koj lub ntsej muag thiab lub meej mom xwb, koj cav tawm tsam cov lus xaiv txhawm rau ua kom koj lub siab txawj xav kaj me ntsis xwb—tiam sis koj tsis yog sawv rau ntawm Vajtswv sab los hais lus txhawm rau Vajtswv, thiab koj tsis tau siv qhov tseeb los sis qhov muaj tseeb los cav tawm tsam cov lus xaiv thiab ua tim khawv rau Vajtswv. Koj tsis tau hais lus sawv cev rau Vajtswv, thiab qhov uas koj hais yeej tsis mus raws li qhov tseeb; qhov ntawd tsuas mus raws li koj tej txiaj ntsim ntawm sab cev nqaij daim tawv xwb—Qhov ntawd tsuas yog ua kom koj lub siab tsis txhob nyuaj heev, thiab kom koj yuav tsis xav tias qhov ntseeg Tswv Yexus ntawd mas yog qhov txaj muag xwb. Npaum li ntawd xwb. Yog li ntawd, thaum nej hnov qee tus tawm tsam thiab teem txim rau Vajtswv, iab liam thiab txiav txim rau Vajtswv pawg ntseeg, los sis haj tseem teem txim rau nej, nej hnov chim siab tshwj xeeb thiab xav nrog lawv sib cav sib ceg, kom rov tau nej lub koob meej thiab ua kom tej no meej. Tiam sis qhov no puas txhais hais tias nej tau tuav nej tej lus tim khawv khov kho lawm? Tseem tsis tau txog qhov ntawd; yog tsis to taub qhov tseeb, ces tsis muaj lus tim khawv li!

Thaum nej hnov cov lus xaiv uas raug tshaj tawm nyob rau sab nraud uas iab liam thiab tawm tsam Vajtswv, txawm yog lawv tawm tsam tus Vajtswv uas nyob saum ntuj ceeb tsheej los sis tus Vajtswv uas yug los ua cev nqaij daim tawv nyob hauv ntiaj teb los xij, nej xav li cas? Nej puas tsis quav ntsej, los sis nej puas hnov mob siab me ntsis? Nej puas tiv tsis taus thiab tsis txaus siab rau qhov ntawd, los sis nej tsis muaj peev xwm ua tau li cas li? Ib txhia tib neeg, tom qab hnov cov lus xaiv no, xav tias, “Vajtswv tsis muaj txim; Vajtswv tsis tau ua tej no. Ua cas Nws thiaj raug lub ntiaj teb thiab lub ntiaj teb ntawm sab kab lis kev cai ntseeg tawm tsam thiab iab liam li no? Peb yuav tsum rau siab muab peb tus kheej fij thiab ua peb tej dej num, thiab tiv thaiv Vajtswv lub npe. Thaum Vajtswv tes hauj lwm loj ua tiav lawm, qhov muaj tseeb ntawm txhua yam yuav tshwm sim los kom pom meej, thiab txhua haiv neeg nyob hauv ntiaj teb yuav pom tias tus Vajtswv uas yug los ua cev nqaij daim tawv uas peb ntseeg ntawd yog tus tseem Vajtswv tiag uas tsuas muaj tib tug xwb, tus Vajtswv saum ntuj ceeb tsheej, thiab qhov no yeej tsis yuam kev kiag li!” Lwm tus xav tias, “Vajtswv tau nthuav ntau qhov tseeb tawm npaum li no, thiab cov ib txwm tsis ntseeg uas yog cov tib neeg phem thiab cov dab no yeej paub zoo tias Vajtswv cov lus yog qhov tseeb, tiam sis lawv tseem iab liam thiab tawm tsam Vajtswv. Vajtswv yuav tsum raug kev txom nyem ntev npaum li cas ntxiv?” Tseem muaj lwm tus hais tias, “Tib neeg xav hais li cas los tau; peb tsis quav ntsej txog tej ntawd. Vajtswv yeej tsis tau cav tawm tsam cov lus xaiv uas iab liam Nws li; Nws tsis teb rov qab rau tej ntawd. Yog li ntawd, peb uas yog cov tib neeg me me xwb, yuav ua tau dab tsi? Tsis yog Vajtswv yeej ib txwm raug tib neeg ntiaj teb to taub yuam kev, tawm tsam, tuam mom, thiab tsis lees txais zoo li no lod? Vajtswv tsis muaj lus yws ib qho li, thiab Nws tseem cawm tib neeg. Cia lub sij hawm nthuav txhua yam tawm; Vajtswv yuav ua tim khawv rau Nws tus kheej!” Nej txoj kev xam pom yog dab tsi? Nyuam qhuav no Kuv tau hais txog qhov tsis kam zwm rau, chim siab, tsis txaus siab rau qhov ntawd, tsis muaj peev xwm ua tau li cas li—nej hnov qhov twg ntawm tej ntawd? Qhov kev xav twg yog qhov yog tshaj plaws? Yuav tsum coj rau tej no li cas thiaj li mus raws li qhov tseeb tej hauv paus ntsiab lus? Nej xav li cas thaum nej hnov cov lus xaiv no? (Chim siab.) Chim siab, ces nej txawm xav sau ib tsab ntawv teem txim los tawm tsam cov neeg tsim lus xaiv no, cov neeg dag ntawm sab kab lis kev cai ntseeg thiab cov tib neeg phem ntawm sab kab lis kev cai ntseeg no. Nej puas muaj tej kev xav zoo li no? Nej yuav tsis xav tias tsuas yog nyem nrig npau taws xwb ces txaus lawm, puas yog? Nej puas hnov muaj lub siab kub xav ua ib yam dab tsi txog qhov ntawd? Los sis tsuas yog kev chim siab qhuav qhuav xwb? (Kuj muaj kev ntxub thiab kev tsis lees txais thiab.) Kev chim siab, kev ntxub, kev tsis lees txais—tej no yog tej kev xav uas tshwm sim los ntawm tib neeg tej kev xav hauv nruab siab, tsis muaj cov lus, txoj kev coj, los sis tej kev ua uas meej tseeb; tej ntawd tsuas yog kev xav xwb, thiab tseeb tiag tej ntawd kuj sawv cev rau qee tus cwj pwm thiab. (Dhau ntawm qhov chim siab lawm, qee zaus peb sau cov ntawv los sis tsim cov yeeb yaj kiab los ua kom cov xwm txheej meej thiab nthuav tawm tias lub ntsiab tseeb ntawm lawv tej kev ua ntawd yog kev ntxub qhov tseeb thiab ntxub Vajtswv, kom tib neeg thiaj li pom tau qhov muaj tseeb.) Cov tib neeg ntawd puas yuav lees txais tom qab pom qhov muaj tseeb lawm? Tab txawm yog lawv lees txais tias qhov nej hais ntawd yog lawm thiab tom qab ntawd tawm ib qho tswv yim ncaj ncees, hais tias, “Nej txoj kev ntseeg yog lawm; ntseeg mus ntxiv, peb txhawb nqa nej!” thiab cov neeg dag ntawm sab kab lis kev cai ntseeg hnov txaj muag thiab hais tias, “Thov txim, peb ua yuam kev lawm, qhov peb hais ntawd tsis muaj tseeb; txij no mus, nej ntseeg nej li, thiab peb yuav ntseeg peb li,” qhov ntawd puas yuav ua rau nej lub siab kaj? Qhov no puas yog tib lub hom phiaj uas nej xav kom tau xwb? (Peb kuj xav ua tim khawv rau Vajtswv kom cov uas tab tom tshawb xyuas txoj hau kev tseeb thiab cov uas tshaib nqhis qhov tseeb thiaj li paub cais qhov yog thiab qhov tsis yog kom meej thiab lees txais txoj hau kev tseeb.) Qhov no yog ib txoj kev; qhov no yog ib txoj kev ua uas zoo. Qhov tsuas npau taws thiab ntxub xwb puas muaj qab hau? Qhov laj thawj rau nej txoj kev npau taws thiab kev ntxub ntawd yog dab tsi? Vim li cas thiaj li npau taws thiab ntxub? (Vajtswv yug los ua cev nqaij daim tawv los cawm tib neeg, uas yog qhov ncaj ncees tshaj plaws, tiam sis lawv tshaj tawm cov lus xaiv los txiav txim thiab iab liam Vajtswv. Peb hnov chim siab heev, xav tias lawv yeej tig qhov yog ua qhov tsis yog thiab lam tau lam hais yam tsis muaj qab hau xwb.) Nej puas xav tias cov tib neeg ntiaj teb thiab lub ntiaj teb txoj kev tsis lees txais Vajtswv thiab lawv tus cwj pwm rau Vajtswv tsuas yog zoo li no nyob rau lub sij hawm uas Vajtswv yug los ua cev nqaij daim tawv zaum no xwb lod? Cov tib neeg ntiaj teb thiab lub ntiaj teb tus cwj pwm rau Vajtswv yeej ib txwm zoo ib yam txij thaum pib mus txog thaum kawg, yeej ib txwm teem txim, iab liam, tawm tsam, thiab tuam mom. Txij thaum Vajtswv pib Nws tes hauj lwm los txog tam sim no, tib neeg ntiaj teb tus cwj pwm rau txhua yam uas Vajtswv tau ua, thiab rau tus Vajtswv uas yug los ua cev nqaij daim tawv ntawd, yeej tsis tau hloov li. Tsis tsuas yog tom qab Vajtswv yug los ua cev nqaij daim tawv thawj zaug tib neeg ntiaj teb thiaj li pib tawm tsam thiab tuam mom Vajtswv thiab tsim ntau cov lus xaiv txog tus Vajtswv uas yug los ua cev nqaij daim tawv xwb—tag nrho tej no yeej tshwm sim txij thaum Vajtswv pib Nws tes hauj lwm thiab txij thaum tib neeg ntiaj teb sib cuag nrog Vajtswv thiab Nws tes hauj lwm thawj zaug los, thiab ib txwm muaj los txog tam sim no. Thiab cov uas raws Vajtswv qab yeej ib txwm tau tiv kev iab liam, kev tawm tsam, kev txiav txim, kev tuam mom, ntau yam lus xaiv, thiab ntau yam ntxiv los ntawm Ntxwgnyoog tej kev tswj hwm thiab cov tawm tsam khetos lub zog ntawm sab kab lis kev cai ntseeg uas tawm tsam Vajtswv thiab pawg ntseeg. Puas yog tias cov uas raws Vajtswv qab yuav tsum tau tiv tej no? Ib txhia hais tias, “Peb tsis nyiam cov lus xaiv no kiag li vim tej ntawd ntxeev qhov muaj tseeb thiab ntxeev qhov yog ua qhov tsis yog tag nrho. Peb hnov npau taws tshwj xeeb kiag thaum peb hnov tej ntawd, thiab nyob tob tob hauv peb lub siab peb ntxub cov uas tsim thiab tshaj tawm cov lus xaiv ntawd. Txawm cov lus xaiv no los ntawm lub ntiaj teb ntawm sab kab lis kev cai ntseeg los sis los ntawm tsoom fwv Koom Tsham Suav uas yog dab los los xij, peb tsuas muaj ib tug cwj pwm xwb, thiab qhov ntawd yog txoj kev ntxub thiab kev npau taws; ces tom qab ntawd peb xav cav tawm tsam lawv thiab ua kom txhua yam meej.” Ib txhia haj tseem hais tias, “Peb xav nrog cov dab phem, cov tawm tsam khetos no sib cav sib ceg, kom peb thiaj li ua rau Ntxwgnyoog txaj muag thiab ua kom nws poob ntsej muag!” Qhov no puas yog feem coob tib neeg txoj kev xam pom? Qhov kev xam pom no puas yog? Yog saib los ntawm txoj kev ua neeg li ib txwm, qhov ntawd yeej tsim nyog. Tib neeg yuav tsum muaj kev ncaj ncees me ntsis thiab muaj tej kev zoo siab thiab kev tu siab uas ib txwm muaj; lawv yuav tsum hlub thiab ntxub kom meej, hlub yam uas tsim nyog hlub thiab ntxub yam uas tsim nyog ntxub. Cov tib neeg uas muaj kev ua neeg li ib txwm yuav tsum muaj tej yam ntxwv no. Tiam sis, qhov tsuas sawv ntawm kev ua neeg li ib txwm xwb puas txaus los haum raws li qhov tseeb tej hauv paus ntsiab lus? Muab hais kom meej dua, txoj kev ua no puas mus raws li Vajtswv tej kev npaj siab? Los sis, qhov no puas yog ib tug cwj pwm thiab txoj kev ua uas Vajtswv txaus siab rau? Thaum Kuv hais li no, tib neeg feem coob tej zaum yuav to taub qee yam, xav tias, “Koj hais tias qhov no tsuas yog saib txhua yam los ntawm qhov kev xam pom ntawm txoj kev ua neeg li ib txwm xwb. Yog saib los ntawm lub ntsiab lus uas Koj hais ntawd, nws qhia meej tias txoj kev ua no yog kev siab kub, tsis mus raws li qhov tseeb tej hauv paus ntsiab lus, thiab tsis mus raws li Vajtswv tej kev npaj siab.” Qhov uas tsis mus raws li Vajtswv tej kev npaj siab lub ntsiab lus yog dab tsi? Qhov ntawd txhais hais tias Vajtswv tsis xav kom tib neeg ua li no; Vajtswv tej kev xav thiab Nws cov qauv uas cheem tsum rau tib neeg tsis yog li no. Yog koj ua li no, txawm Vajtswv tsis teem txim rau qhov ntawd los xij, los ntawm Nws txoj kev xam pom, qhov ntawd tsis tau txhais hais tias koj tab tom ua raws li Nws lub siab nyiam, thiab Nws tsis lees paub qhov ntawd. Saib sab nraud mas, zoo li koj ua tej no yam muaj laj thawj, muaj kev ntxub thiab kev hlub, xav ua kom cov xwm txheej no meej rau Vajtswv kom tag nrho lub ntiaj teb paub tias Vajtswv yog Vajtswv, tias Vajtswv yog tag nrho tib neeg ntiaj teb tus Vajtswv, thiab txhua tus tsim nyog pe hawm Vajtswv thiab lees txais Vajtswv txoj kev cawm dim. Saib sab nraud mas, zoo li qhov uas koj ua ntawd tsis muaj qhov thuam tau, tsim nyog, mus raws li txoj cai lij choj, raws li kev ua neeg, raws li kev coj ncaj ncees, thiab haj yam mus raws li txhua tus tib neeg txoj kev nyiam. Tiam sis koj puas tau nug Vajtswv txog qhov no? Koj puas tau nrhiav ntawm Vajtswv? Koj puas tau nrhiav pom tej hauv paus ntsiab lus ntawm txoj kev ua uas Vajtswv cheem tsum ntawm tib neeg los ntawm Nws cov lus? Vajtswv tej kev npaj siab yog dab tsi tiag tiag? Ib txhia tib neeg hais tias, “Vajtswv cov lus muaj ntau heev; tsis yooj yim nrhiav tau Vajtswv tej kev cheem tsum ntxaws ntxaws rau tib neeg nyob rau hauv txhua yam.” Vim koj nrhiav tsis tau Vajtswv cov lus uas qhia meej meej, ces koj tuaj yeem nrhiav tej yam cim qhia los ntawm Vajtswv tus cwj pwm uas muaj rau cov lus xaiv zoo li no. Los ntawm tus cwj pwm uas Vajtswv muaj rau qhov teeb meem no, ces puas yog koj yuav paub tseeb tau tias tib neeg tus cwj pwm uas muaj rau qhov teeb meem no yuav tsum yog dab tsi thiab tej hauv paus ntsiab lus uas lawv yuav tsum ua raws li ntawd yog dab tsi? (Yog.) Yog li ntawd, cia peb saib seb Vajtswv tus cwj pwm uas muaj rau qhov teeb meem no yog dab tsi tiag tiag.

Txij thaum tib neeg ntiaj teb pib sib cuag nrog Vajtswv tes hauj lwm los, tib neeg yws thiab tsis txaus siab rau Vajtswv, haj tseem hais ntau lo lus phem ntawm kev xav phem thiab thaiv, kev ua xyem xyav, thiab kev tsis lees txais, thiab lwm yam ntxiv rau Vajtswv yam zais ntshis. Kuj muaj ntau cov lus xaiv uas yeej tsis mus raws li qhov muaj tseeb thiab tsis mus raws li qhov tseeb kiag li, uas los ntawm tsoom fwv kav teb chaws thiab lub ntiaj teb ntawm sab kab lis kev cai ntseeg los. Rau Vajtswv mas, cov lus no yog dab tsi? Txawm tej ntawd yog tej kev xav phem thiab thaiv, kev to taub yuam kev, los sis kev yws los xij, tej ntawd puav leej muaj puv npo kev tawm tsam, kev iab liam, thiab kev tuam mom Vajtswv, thiab tej ntawd tsis qhia txog lub siab hwm thiab ntshai Vajtswv ib qho me me li; qhov ntawd yeej ib txwm zoo li no txij thaum pib los lawm. Yeej ib txwm muaj ib txhia nyob hauv pawg ntseeg uas tsis nyiam qhov tseeb. Cov no yog cov tsis ntseeg, uas ua xyem xyav rau Vajtswv cov lus thiab qhov tseeb, muaj tus cwj pwm zoo li no rau Vajtswv. Haj yam rau cov ib txwm tsis ntseeg thiab cov tsoom fwv uas kav teb chaws uas tsis ntseeg tias muaj Vajtswv, cov tib neeg uas tsis nyiam qhov tseeb kiag li ntawd—lawv tus cwj pwm uas muaj rau Vajtswv ces tsis tas yuav hais txog li lawm; lawv tawm tsam thiab txiav txim yam tsis ntshai dab tsi li, hais txhua yam uas lawv xav hais. Tshwj xeeb tshaj yog, cov Falixais uas nyob rau hauv lub ntiaj teb ntawm sab kab lis kev cai ntseeg ntawd haj yam tuav lub cib fim no los txiav txim thiab teem txim yam tsis muaj kev txwv li. Tag nrho cov lus tawm tswv yim no tsis yog yam zoo, thiab tej ntawd yeej tsis muaj tseeb thiab tsis raug kiag li. Yog li, lub ntsiab tseeb ntawm cov lus tawm tswv yim no yog dab tsi? Rau Vajtswv mas, cov lus no tsis yog cov lus hais los sis tej kev xam pom xwb, tiam sis yog kev hais lus phem, kev tawm tsam, kev iab liam, thiab tuam mom Nws. Vim li cas Kuv thiaj li hais tias “Rau Vajtswv” no? Vim Vajtswv ntsuas tag nrho tej no raug tshaj plaws lawm, ces peb tsuas ntxiv tau ib lo lus rau ntawd xwb. Raws li keeb kwm los, tib neeg ntiaj teb tus cwj pwm uas muaj rau Vajtswv yeej zoo li no; tib neeg cov lus uas tawm tsam thiab foom phem rau Vajtswv mas ntau heev, uas tsis muaj ib lo lus twg yog hais los ntawm lub siab zoo li. Txawm yog niaj hnub no, qhov uas nej lub pob ntseg hnov thiab nej lub qhov muag pom yeej zoo ib yam. Txij thaum pib los, tag nrho tib neeg ntiaj teb tus cwj pwm uas muaj rau Vajtswv yeej tsis tau hloov li. Ua li Vajtswv coj rau tej yam no li cas? Vajtswv puas muaj qhov yuav ua tau los sis lub peev xwm los hu ib lub rooj sib txoos ntawm sab kab lis kev cai ntseeg thoob ntiaj teb los tiv thaiv Nws tus kheej, los qhia kom meej txog qhov muaj tseeb ntawm Nws tes hauj lwm, los hais daws Nws tus kheej rau tib neeg ntiaj teb? Vajtswv puas tau ua qhov no? Tsis tau, Vajtswv nyob twj ywm, Nws tsis qhia tag nrho qhov xwm txheej kom meej, thiab Nws yeej tsis tiv thaiv los sis hais daws Nws tus kheej li. Txawm li cas los xij, rau cov uas tawm tsam Vajtswv yam lim hiam heev, Vajtswv tau rau txim rau lawv, cia qee qhov xwm txheej tiag tiag los raug rau lawv. Hais txog cov tib neeg feem coob txoj kev tawm tsam, kev iab liam, thiab kev tuam mom Nws, Vajtswv tus cwj pwm yog dab tsi? Vajtswv saib xyuas qhov no li cas? Nws tsis quav ntsej txog tej ntawd; Nws ua yam uas tsim nyog ua, Nws yuav ua li cas ces ua li ntawd, xaiv tus uas Nws tsim nyog xaiv, coj tus uas Nws tsim nyog coj. Tag nrho lub ntiaj teb nyob raws qib raws duas hauv Vajtswv ob txhais tes; Nws yeej tsis tau tab kaum los sis hloov Nws tej kev npaj vim tib neeg txoj kev tawm tsam, kev iab liam, los sis kev tuam mom Nws li. Thaum Ntxwgnyoog tej hwj chim phem tsuj nias thiab ntes cov neeg Vajtswv xaiv tseg, txawm lawv yuav vwm npaum li cas los xij, Vajtswv yeej tsis tau hloov Nws tej kev npaj los sis Nws lub siab li. Nws tej kev xav thiab tej tswv yim yeej tsis hloov ib qho kiag li; Nws tsuas ua Nws tes hauj lwm uas Nws xav ua mus tas li xwb, tswj hwm Nws cov tib neeg ntiaj teb. Rau Vajtswv mas, kev tawm tsam, kev iab liam, thiab kev tuam mom ntawd yeej tsis tau ua ib qho kev cuam tshuam rau Nws li; Vajtswv tsis quav ntsej txog tej ntawd. Vim li cas Vajtswv thiaj li tsis hais daws los sis tiv thaiv Nws tus kheej? Rau Vajtswv mas, tej no yog qhov ib txwm muaj xwb. Tib neeg ntiaj teb yeej yog tib neeg ntiaj teb, thiab Ntxwgnyoog yeej yog Ntxwgnyoog. Tib neeg ntiaj teb tsis to taub qhov tseeb los sis qhov muaj tseeb, qhov ntawd yog ib qho ib txwm muaj heev uas tib neeg ua tej yam no. Qhov no puas cuam tshuam rau theem ntawm Vajtswv tes hauj lwm? Qhov ntawd tsis cuam tshuam. Vajtswv muaj hwj chim loj kawg nkaus; Nws muaj hwj chim kav txhua yam. Ib puas tsav yam thiab txhua yam ua hauj lwm mus raws qib raws duas hauv Vajtswv cov lus, hauv Vajtswv tej kev xav, thiab nyob hauv Vajtswv txoj kev muaj hwj chim kav; txawm tib neeg ntiaj teb yuav hais los sis ua dab tsi los xij, qhov ntawd yeej cuam tshuam tsis tau Vajtswv tes hauj lwm ib qho li—qhov no yog qhov uas tus Vajtswv uas muaj lub hwj huaj lub ntsiab tseeb muaj peev xwm ua tau. Vajtswv ua hauj lwm thaum txog lub sij hawm, ua kom tiav Nws tej kev npaj yam tsis muaj qhov yuam kev me ntsis li, thiab tsis muaj leej twg hloov tau tej no. Tib neeg ntiaj teb cov lus hais thiab tib neeg ntiaj teb txoj kev tawm tsam los sis kev iab liam Vajtswv, txawm tej ntawd yog kev txhob txwm thaiv thiab rhuav tshem Vajtswv tes hauj lwm los sis yog kev cuam tshuam thiab rhuav Vajtswv tes hauj lwm yam tsis yog txhob txwm los xij, yeej ua tsis tau tiav lawv lub hom phiaj li. Vim li cas? Qhov no yog Vajtswv lub hwj chim; qhov no ua pov thawj tias Vajtswv lub hwj chim tsuas muaj ib xwb tsis muaj ob li, tsis muaj ib lub zog twg yuav hloov tau, thiab tsis muaj ib lub zog twg yuav hla tau. Qhov no yog qhov muaj tseeb. Vajtswv muaj lub hwj chim no thiab lub zog no, Vajtswv muaj Nws qhov uas yog leej twg tiag tiag, thiab tsis muaj ib lub zog twg yuav hloov tau ib yam dab tsi li, yog li ntawd vim li cas Vajtswv thiaj li yuav mus quav ntsej txog tib neeg txoj kev tawm tsam thiab kev iab liam me me ntawd? Rau Vajtswv mas, txawm yuav muaj pes tsawg tus tib neeg tseem ceeb los sis muaj zog npaum li cas nyob hauv tib neeg ntiaj teb los cuam tshuam, iab liam, tawm tsam, los sis tuam mom Nws los xij, qhov ntawd cuam tshuam tsis tau Vajtswv tes hauj lwm ib qho me me li. Rov qab qees, tej kev ua no tsuas yog ua kom pom Vajtswv tus moj yam ncaj ncees thiab lub hwj chim uas loj kawg nkaus xwb. Kev cuam tshuam los ntawm Ntxwgnyoog tej hwj chim phem tsuas yog ib qho xwm txheej me me hauv tib neeg ntiaj teb li keeb kwm xwb. Tiam sis qhov uas muaj hwj chim kav tau tag nrho tib neeg ntiaj teb, cuam tshuam tau tag nrho tib neeg ntiaj teb, thiab hloov tau tag nrho tib neeg ntiaj teb ntawd yog Vajtswv tes hauj lwm, Vajtswv txoj kev npaj, thiab Vajtswv lub hwj chim loj thiab txoj kev muaj cai. Qhov no yog qhov muaj tseeb. Muab tig los hais, Vajtswv puas yuav quav ntsej txog tib neeg txoj kev hais lus phem, kev tawm tsam, kev iab liam, thiab kev tuam mom Nws? Tsis quav ntsej. Vim Vajtswv muaj hwj chim, rau Vajtswv mas, Nws kab lus uas hais tias, “Kuv ua li Kuv hais, yam Kuv hais yuav tsum ua kom tiav, thiab yam Kuv ua yuav nyob mus ib txhis,” yuav muaj tseeb tas li; qhov ntawd tab tom muaj tseeb thiab ua tiav txhua hnub. Qhov no yog Vajtswv lub hwj chim. Ib txhia tib neeg nug tias, “Qhov no puas yog Vajtswv txoj kev ntseeg siab, Vajtswv txoj kev ntseeg?” Koj yuam kev lawm! Tib neeg muaj kev ntseeg siab, tib neeg tim tsum kev ntseeg, tiam sis Vajtswv tsis tim tsum. Vim li cas? Vim Vajtswv muaj hwj chim thiab lub zog, thiab txawm tib neeg ntiaj teb yuav iab liam los sis teem txim rau Nws li cas los xij, txawm lub zog yeeb ncuab ntawm Ntxwgnyoog yuav cuam tshuam thiab rhuav tshem li cas los xij, yeej hloov tsis tau dab tsi. Yog li ntawd, Vajtswv tsis tas yuav rhuav tshem lub zog yeeb ncuab hauv cov tib neeg ntiaj teb qias vuab tsuab uas tawm tsam, iab liam, thiab tuam mom Nws ua ntej es Nws mam li ua Nws tes hauj lwm. Vajtswv ua hauj lwm nyob rau hauv tej xwm txheej zoo li cas? Nws kov yeej nyob rau hauv tej xwm txheej zoo li cas? Nws ua Nws tes hauj lwm tiav nyob rau hauv tej xwm txheej zoo li cas? Nws tau ua tiav nyob rau hauv nruab nrab ntawm lub suab nrov ntawm kev tawm tsam, kev iab liam, thiab kev tuam mom ntawm tag nrho tib neeg ntiaj teb thiab tag nrho lub zog ua yeeb ncuab; qhov ntawd yog nyob rau hauv ib puag ncig thiab xwm txheej zoo li no ua Nws tes hauj lwm tiav. Qhov no tsis yog ib qho kev qhia txog Vajtswv lub hwj chim loj lod? Qhov no tsis yog Vajtswv txoj kev muaj cai lod? (Yog.) Leej twg thiaj li tsis lees paub tau qhov muaj tseeb no? Koj puas muaj cuab kav tsis lees paub tias qhov no yog qhov muaj tseeb?

Raws li keeb kwm los, tib neeg ntiaj teb pheej iab liam thiab tuam mom Vajtswv tas li, thiab nyob rau tiam kawg, cov zog hauv tag nrho tib neeg ntiaj teb uas tawm tsam Vajtswv haj yam loj muaj zog ntxiv, uas haj yam muaj ntau lub suab iab liam thiab teem txim rau Vajtswv. Tib neeg ntiaj teb siv ntau txoj hau kev, los ntawm cov ntawv xov xwm, this vis, is taws nem, thiab lwm yam chaw xov xwm, los iab liam thiab tawm tsam Vajtswv. Tiam sis peb puas tau txheeb xyuas cov lus xaiv no hauv tag nrho peb cov kev sib txoos ua ke? (Tsis tau.) Vim li cas tsis tau? Ib txhia tib neeg hais tias, “Puas yog vim cov tsis muaj txim yeej tsis muaj txim, thiab cov lus xaiv yeej yuav nres thaum mus txog cov neeg ntse pob ntseg?” Puas yog vim li ntawd? (Cov lus xaiv no yeej cuam tshuam tsis tau Vajtswv tes hauj lwm. Txawm Ntxwgnyoog yuav cuam tshuam li cas los xij, nws yeej rhuav tshem tsis tau los sis thaiv tsis tau qhov kev vam meej ntawm Vajtswv tes hauj lwm thiab txoj kev npaj.) Ntxwgnyoog yeej yog ib yam zoo li ntawd; tsuav Vajtswv ua ib yam dab tsi, tsuav Vajtswv ua hauj lwm, nws yeej yuav los cuam tshuam. Qhov no yeej yog lub luag hauj lwm uas nws ua. Koj txwv tsis pub nws ua ho puas yuav tau? Koj yuav tsum muab chaw txaus rau nws, muab sam thiaj txaus rau nws, muab cib fim txaus rau nws ua. Thaum nws ua txaus lawm, sab ntawm nws txoj kev tsim kev kub ntxhov lawm, thiab ua phem txaus lawm, nws hnub xaus yeej yuav los txog lawm. Peb tsis tas yuav nkim lub sij hawm uas muaj nuj nqis los txheeb xyuas thiab tshawb xyuas nws ntau yam lus xaiv thiab tej kev ua phem es los rhuav cov lus xaiv no; qhov ua li ntawd yeej tsis muaj qab hau thiab tsis muaj nuj nqis. Qhov txheeb xyuas tej ntawd muaj qab hau dab tsi? Qhov ntawd puas sawv cev tau rau tib neeg txoj kev to taub qhov tseeb? Muaj ntau qhov tseeb uas tib neeg tsim nyog to taub; lawv twb mloog tsis yeej rau tag nrho tej qhov tseeb no lawm, tsis tas hais txog qhov rhuav cov lus xaiv ntawd. Tib neeg puas muaj lub sij hawm khoom ntawd? Hais ncaj ncaj, Kuv yeej tsis muaj siab rau tej yam ntawd li, thiab Kuv yeej tsis xav hais txog los sis quav ntsej txog tej ntawd. Ib txhia tib neeg hais tias, “Nyob rau tej xyoo no, puas yog Koj tsis kam mus qhov twg li? Puas yog vim muaj cov lus xaiv ntau dhau ya mus puv ntuj, txawm Koj mus qhov twg los ua rau Koj txhawj thiab ntshai tas li?” Kuv hais tias Kuv yeej tsis hnov dab tsi kiag li. Ib txhia tib neeg hais tias, “Koj tsis xav tiv thaiv Koj tus kheej txog tej yam uas Koj tsis tau ua lod?” Muaj dab tsi uas yuav tsum tiv thaiv? Kuv twb ua Kuv tes hauj lwm tseem ceeb tsis yeej lawm! Kuv nrog tib neeg tham, nrog cov neeg uas raug tsim tawm los tham, Kuv tsis yog nrog cov dab tham. Ib txhia tib neeg nug tias, “Qhov hnov cov lus xaiv no puas ua rau Koj npau taws?” Kuv hais tias Kuv tsis hnov dab tsi rau tej ntawd, tej ntawd tsis ua rau Kuv hnov dab tsi li; Kuv tsis quav ntsej txog tej yam no. Ib txhia tib neeg nug tias, “Koj puas hnov raug ua tsis ncaj ncees?” Kuv hais tias Kuv tsis hnov raug ua tsis ncaj ncees li, muaj dab tsi uas yuav tsum hnov tias raug ua tsis ncaj ncees? Ua yam uas Kuv ua tau, ua yam uas Kuv tsim nyog ua, ua kom zoo yam uas Kuv ua tau thiab tsim nyog ua, ua Kuv tej luag hauj lwm kom tiav—qhov ntawd yog qhov zoo tshaj plaws, qhov ntawd muaj qab hau. Kuv tsis faib siab los sis siv sij hawm rau tej yam uas tsis muaj qab hau, tsis muaj nuj nqis ntawd. Kuv tsis muaj sij hawm mus quav ntsej txog tej yam ntawd. Ib txhia tib neeg hais tias, “Yog li thaum Koj muaj sij hawm lawm, Koj puas yuav quav ntsej txog tej ntawd?” Txawm thaum Kuv muaj sij hawm los Kuv yeej tsis quav ntsej. Kuv xum nrog Kuv tus dev tham zoo dua li nrog cov dab tham. Yog koj paub meej tias nws yog ib tug dab uas hais nws tej lus dab xwb, vim li cas thiaj li yuav mus quav ntsej txog nws? Koj yeej tsis tsim nyog quav ntsej kiag li; qhov cia tus dab raug txaj muag tag nrho yog qhov yog uas tsim nyog ua. Muab hais kom luv tias, Vajtswv tus cwj pwm rau cov lus xaiv yog li no: Nyob rau hauv kev ua txhua yam los sis hais txhua lo lus, Vajtswv tsis yog hais los daws Nws tus kheej, tsis yog los ua pov thawj qhia Nws tus kheej rau tib neeg ntiaj teb, thiab yeej tsis yog hais daws Nws tus kheej rau Ntxwgnyoog, Nws tus yeeb ncuab, hais tias Nws dawb huv thiab tsis muaj txim, thiab tsis muaj kev txhaum. Txhua yam uas Vajtswv ua yog txhawm rau Nws txoj kev tswj hwm, los cawm cov tib neeg uas Nws xav cawm. Nws ua raws li Nws txoj kev npaj tswj hwm ib kauj ruam zuj zus; Nws tsis ua kom qhia ib yam dab tsi rau leej twg, los sis kom ua pov thawj rau Nws qhov yog leej twg tiag tiag. Hais raws li tib neeg cov lus, txhua yam uas Vajtswv ua yog los ntawm Nws lub peev xwm xeeb txawm yam tsis muaj kev tsis ua siab dawb pawg los sis kev raug yuam li. Qhov uas Vajtswv ua tag nrho cov dej num no los ntawm Nws lub peev xwm xeeb txawm ua pov thawj txog qhov uas Nws yog leej twg tiag tiag thiab Nws lub ntsiab tseeb. Tib neeg ntiaj teb yeej hloov tsis tau Vajtswv txoj kev npaj, thiab lawv hla tsis tau Vajtswv lub hwj chim thiab lub zog; qhov no yog qhov muaj tseeb. Yog li ntawd, Vajtswv tsis quav ntsej cov lus xaiv thiab tej lus dab uas tawm tsam thiab iab liam Nws los ntawm txhua sab hauv tib neeg ntiaj teb. Qhia Kuv seb, puas yooj yim dhau rau Vajtswv los hais ib tshooj lus tawm los sis sau ib tsab ntawv teem txim tawm los tawm tsam tej kev tawm tsam thiab kev cov nyom rau Vajtswv ntawm cov tsoom fwv uas kav teb chaws uas tsis ntseeg tias muaj Vajtswv hauv lub ntiaj teb thiab lub ntiaj teb ntawm sab kab lis kev cai ntseeg? Tiam sis Vajtswv yuav tsis ua li no rau Ntxwgnyoog. Vajtswv ua hauj lwm raws li tej hauv paus ntsiab lus; thaum hais txog qhov Vajtswv rhuav tshem Ntxwgnyoog tej hwj chim phem, Nws muaj Nws lub sij hawm. Rau Vajtswv mas, kev nqis tes ua mas yooj yim dhau lawm. Vajtswv tuaj yeem ua qee yam txuj ci tseem ceeb nyob rau saum ntuj, thiab tam sid lub ntuj ceeb tsheej cia li qhib hlo nrog ib lub suab hais tias, “Kuv yog tus tseem Vajtswv tiag uas tsuas muaj tib tug xwb uas nej iab liam, tawm tsam, thiab tuam mom ntag; Kuv yog Tus Uas Muaj Hwj Chim Loj Kawg Nkaus uas nej tab tom iab liam thiab tuam mom ntag!” Thaum hnov li no, tib neeg ntiaj teb yuav xav tsis thoob kiag tam sid thiab tsis paub yuav ua li cas, tsuas ua tau qhov txhos caug pe ti nkaus hauv av, quaj tom hniav qawv. Ib kab lus no xwb twb daws tau txhua yam, ua pov thawj rau txhua yam lawm; puas tseem muaj leej twg muaj cuab kav cem Vajtswv? Cov dab hauv lub ntiaj teb ntawm sab kab lis kev cai ntseeg puas yog yuav ntshai txog qhov ploj mus yam tsis pom lw? Ntxwgnyoog tsim cov lus xaiv txog Vajtswv, nws iab liam thiab tawm tsam Vajtswv, ua rau cov uas ntseeg Vajtswv npau taws thiab ntxub, ua rau noj tsis qab los sis pw tsis tsaug zog, xav sau cov ntawv thiab tsim cov yeeb yaj kiab los cav tawm tsam nws, hos Vajtswv ua hauj lwm mas yooj yim—Nws tsuas yog hais ob peb lo lus xwb ces tag nrho tib neeg ntiaj teb yuav zwm rau tag nrho, tsis muaj cuab kav tawm tsam los sis tuam mom Nws ntxiv lawm. Povlauj raug ua kom mloog lus li cas? (Vajtswv tshwm sim rau nws ntawm txoj kev mus rau Damaxakas.) Vajtswv tshwm sim rau nws. Tseeb tiag nws tsis pom dab tsi li; tsuas muaj ib tug duab ci paug ua rau Povlauj ntshai heev es nws thiaj li ntog rau hauv av, thiab nws tsis kam tsim txom Yexus ntxiv lawm. Qhov daws Ntxwgnyoog mas yooj yim li ntawd xwb; tseeb tiag, qhov ntawd yooj yim dhau rau Vajtswv. Vajtswv daws tau los ntawm ib lo lus xwb. Qhov ua li no mas yooj yim dua qhov uas siv ntau caum xyoo nrog nej hais lus thiab siv tag nrho lub zog no rau hauv nej, tiam sis Vajtswv tsis ua li no. Vim li cas? Muaj ib qho kev zais uas Kuv yuav tsum qhia rau nej: Cov uas Vajtswv cawm yog tib neeg ntiaj teb, qhov ntawd yog, cov neeg Vajtswv xaiv tseg; cov uas seem ntawd, uas Vajtswv tsis tau xaiv, tsis raug suav tias yog tib neeg ntiaj teb tiam sis yog tsiaj, yog dab, tsis tsim nyog hnov Vajtswv lub suab, pom Vajtswv lub ntsej muag, los sis haj yam tsis tsim nyog paub ib yam dab tsi txog Vajtswv. Yog li ntawd, Vajtswv thiaj li tsis ua li no. Qhov uas Vajtswv yog leej twg tiag tiag ntawd mas muaj koob meej; tsis yog leej twg uas xav pom Nws los yeej pom tau, thiab Nws yuav tsis tshwm sim rau ib tug tib neeg twg vim lawv pheej tsom ntsoov, ntshaw, thiab ntsia ntsoov mus rau ib qho chaw twg saum ntuj ceeb tsheej yam kawg siab kawg ntsws. Koj puas xav tias leej twg uas xav pom Vajtswv los yeej pom tau Nws? Vajtswv muaj lub meej mom; Vajtswv tshwm sim rau cov uas hwm thiab ntshai Nws thiab zam kev phem, Nws tshwm sim rau tej chaw dawb huv thiab zais Nws tus kheej ntawm tej chaw qias neeg. Qhov tag nrho tib neeg ntiaj teb yog qias neeg los sis dawb huv ntawd ces tsis tas yuav tham lawm. Cov tib neeg ntiaj teb no tsis tsim nyog pom Vajtswv; lawv tsis lees paub tias muaj Vajtswv, yog li ntawd vim li cas Vajtswv thiaj li yuav tshwm sim rau lawv? Lawv tsis tsim nyog! Vajtswv muaj peev xwm ua tau txhua yam tiam sis Nws tsis ua; qhov no ua pov thawj txog Vajtswv txoj kev txo hwj chim thiab kev zais Nws tus kheej, thiab lub koob meej ntawm qhov uas Nws yog leej twg tiag tiag. Qhia Kuv seb, yog Ntxwgnyoog ua tau tej ntawd, ib hnub nws yuav ua pes tsawg zaus, nws yuav khav npaum li cas? Thaum cov tib neeg uas raug Ntxwgnyoog ua qias vuab tsuab tau ua ib tug nom me me thiab muaj hwj chim me ntsis xwb, leej twg yuav paub tias lawv yuav khav txog lub hwj chim no npaum li cas—tsis tas yuav hais txog Ntxwgnyoog, tus uas yuav ua phem thiab khav theeb txog txhua lub hwj chim uas nws muaj raws li txoj kev uas xav tsis txog li. Vajtswv tsis ua li no; tsis txhob ntsuas Vajtswv raws li Ntxwgnyoog txoj kev xav, qhov ntawd yuav yog ib qho kev ua yuam kev loj heev. Hais txog yam uas Vajtswv ua tau, qhov ntawd nyob ntawm seb Vajtswv puas xav ua xwb; yog Vajtswv xav ua, qhov ntawd yuav ua tau tiav nyob rau ib pliag ntshis xwb, thiab yog Nws tsis xav ua, tsis muaj leej twg yuav yuam tau Nws. Vajtswv tus cwj pwm uas muaj rau cov lus xaiv yog li no—Nws tsis quav ntsej txog tej ntawd. Vajtswv tseem ua yam uas Nws tsim nyog ua, yam uas Nws npaj siab yuav ua; tsis muaj ib tug neeg twg, tsis muaj ib lub zog twg uas yuav rhuav tau los sis hloov tau Nws txoj kev npaj li. Cov lus xaiv uas tawm tsam, iab liam, thiab thuam Vajtswv no yeej hloov tsis tau ib yam dab tsi li. Cov lus xaiv, thaum kawg, yeej yog cov lus xaiv xwb thiab yeej tsis muaj hnub dhau los ua qhov muaj tseeb. Tab txawm yog tej ntawd mus raws li tib neeg lub tswv yim, kev tshawb fawb, kev coj ncaj ncees, kev xav, thiab lwm yam ntxiv, tab txawm yog tag nrho tib neeg ntiaj teb sawv los tawm tsam Vajtswv los xij, qhov tseeb yeej yuav tsis sawv rau ntawm tib neeg ntiaj teb sab, thiab tib neeg ntiaj teb yeej yuav tsis dhau los ua tus tswv ntawm qhov tseeb li. Vajtswv yeej ib txwm yog Vajtswv mus ib txhis; qhov uas Nws yog leej twg tiag tiag thiab Nws lub meej mom yeej tsis hloov. Yog li ntawd, txawm Ntxwgnyoog yuav cuam tshuam li cas los xij, Vajtswv tes hauj lwm tseem mus raws qib raws duas, vim qhov no yog Vajtswv tes hauj lwm. Yog tias qhov ntawd yog tib neeg tes hauj lwm, Ces ntxwgnyoog txoj kev tswj hwm uas ua rau muaj tej kev cuam tshuam thiab ntau lub zog hauv lub zej zog uas tawm tsam thiab iab liam li no yeej yuav ua rau tes hauj lwm ntawd vau thiab ploj mus lawm. Tsuas yog thaum Vajtswv hais lus thiab ua hauj lwm, tsuas yog thaum Vajntsujplig Dawb Huv ua hauj lwm xwb, pawg ntseeg thiaj li vam meej zuj zus ntxiv. Qhov no tsis yog qhov muaj tseeb lod? Nej puas tau pom qhov muaj tseeb no? (Pom lawm.) Nej tau pom dab tsi? (Lub nceeg vaj txoj moo zoo twb tau nthuav dav mus rau ntau caum lub teb chaws lawm, thiab cov lus xaiv uas Ntxwgnyoog tsim thiab tshaj tawm ntawd yeej thaiv tsis tau cov uas nyiam qhov tseeb los cuag Vajtswv kiag li.) Qhov no yog Vajtswv txoj kev ua; Vajtswv tes hauj lwm muaj peev xwm ua tau qhov txiaj ntsig no, Vajtswv cov lus muaj peev xwm ua tau qhov txiaj ntsig no—qhov no mas dhau ntawm Ntxwgnyoog tej kev xav. Vajtswv cov lus muaj lub hwj chim loj npaum li no; txoj moo zoo tab tom nthuav dav mus rau txoj kev zoo thiab txhua yam tab tom mus raws qib raws duas raws li Vajtswv txoj kev npaj, yam tsis muaj qhov yuam kev me ntsis li. Vajtswv tes hauj lwm thiab Vajtswv cov lus tab tom nthuav dav nyob hauv cov neeg Vajtswv xaiv tseg, raws li tau npaj tseg ua ntej ntev los lawm. Tus zauv ntawm cov tib neeg uas tau txais los ntawm kev tshaj tawm txoj moo zoo thiab tus zauv ntawm cov tib neeg uas tab tom tshawb xyuas txoj hau kev tseeb tab tom nce ntxiv txhua lub hlis. Qhov no tsis qhia tias tes hauj lwm tshaj tawm txoj moo zoo twb nthuav dav lawm lod? Yog tias tsis yog Vajtswv tes hauj lwm, txawm yuav muaj pes tsawg tus tib neeg them tus nqi loj npaum li cas los xij, lawv yeej ua tsis tau qhov txiaj ntsig no. Qhov no yog Vajtswv lub hwj chim, qhov no yog qhov txiaj ntsig uas tau los ntawm lub hwj chim ntawm Vajtswv cov lus.

Cia peb rov qab los tham txog qhov uas tib neeg coj li cas rau ntau hom lus xaiv. Tib neeg coj tsis tau tus cwj pwm ib yam li Vajtswv coj rau ntau hom lus xaiv. Lawv tsis to taub Vajtswv tej kev npaj siab, thiab thaum hnov cov lus xaiv, lawv pheej xav tias: “Yog kuv tsis ua ib yam dab tsi li, ces kuv yuav ua txhaum rau kuv lub siab txawj xav. Yog cov tib neeg uas tsim cov lus xaiv ntawd yeej lawm, kuv yuav hnov tsis kaj siab, tsis txaus siab, thiab npau taws, xav tias tsis ncaj ncees, yog li ntawd kuv yuav tsum cav lawv cov lus. Kuv yuav tsum ua ib lub yeeb yaj kiab, los sis sau ib tsab ntawv los qhia kom meej txog cov lus xaiv ntawd.” Qhov ntawd tsim nyog xav txog seb qhov ua tej yam nyob rau hauv txoj kev xav zoo li no puas mus raws li Vajtswv tej kev npaj siab, seb qhov ntawd puas mus raws li qhov tseeb tej hauv paus ntsiab lus. Yog nej lub hom phiaj thiab txoj kev npaj siab nyob rau hauv qhov ua pawg ntseeg tes hauj lwm thiab ua nej tej dej num tsuas yog los qhia kom meej txog cov lus xaiv thiab los piav kom meej tias tus uas nej ntseeg ntawd yog tus tseem Vajtswv, tias nej tab tom taug txoj kev yog hauv lub neej, thiab tias txhua yam uas nej tau ua los tshaj tawm txoj moo zoo thiab ua tim khawv rau Vajtswv ntawd puav leej ncaj ncees—thiab tias tsuas yog vim neeg ntiaj teb tsis paub los sis tsis to taub qhov tseeb ntawm tag nrho tej uas muaj tseeb no lawv thiaj li iab liam nej nrog ntau yam kev txhaum uas tsis muaj tseeb—thiab yog li ntawd nej thiaj li cia siab tias thaum txhua yam raug qhia meej lawm, neeg ntiaj teb yuav lees paub tias nej tsis muaj txim, kom txhua sab hauv lub ntiaj teb yuav lees paub tias “tus uas nej ntseeg ntawd yog tus tseem Vajtswv, nej tab tom taug txoj kev yog hauv lub neej, thiab txhua yam uas Vajtswv tau kom nej ua ntawd puav leej yog thiab yog ib txoj hauj lwm uas ncaj ncees,” ces yuav ua li cas ntxiv? Nej puas yuav xav tias kaj siab thiab tsim nyog nyob rau hauv nej txoj kev ntseeg? Nej puas yuav taug tau txoj kev yog nyob rau hauv txoj kev ntseeg Vajtswv lawm? Nej puas yuav taug tau txoj kev mus rau txoj kev cawm dim yam tsis muaj ib qho kev cuam tshuam los ntawm sab nraud lawm? Nej puas yuav muaj lub siab hwm thiab ntshai Vajtswv lawm? Nej puas yuav ua tau kom zwm rau Vajtswv? Nej puas yuav tau txais Vajtswv txoj kev pom zoo? (Tsis tau.) Puas muaj tau tias tib neeg yuav tsis to taub yuam kev txog koj thiab tsuas qhuas thiab hwm koj, ces tom qab ntawd koj thiaj li ntseeg tau Vajtswv nrog lub siab txawj xav uas kaj lug? Yeej tsis muaj hnub li! Muaj tseeb tiag, tib neeg coj tsis tau tus cwj pwm ib yam li Vajtswv coj rau cov lus xaiv, tiam sis tib neeg yuav tsum muaj ib qho kev xam pom uas yog, ib tug cwj pwm thiab qhov chaw sawv uas raug, hais tias: “Cov lus xaiv no yeej ntxim ntxub thiab qias neeg tiag tiag. Los ntawm cov lus xaiv no, pom tau hais tias cov tib neeg ntiaj teb uas qias vuab tsuab no yeej yog Vajtswv cov yeeb ncuab tiag tiag; qhov no yeej yog kawg nkaus li! Kuv yuav tsum tsis txhob txiav txim hais tias Vajtswv tes hauj lwm yog tseeb los sis cuav raws li Ntxwgnyoog cov lus xaiv. Los ntawm kev nyeem Vajtswv cov lus thiab los ntawm tej kev ntsib kev pom nyob rau hauv kev ua kuv tes dej num, kuv paub tseeb hais tias tag nrho Vajtswv cov lus puav leej yog qhov tseeb, thiab txhua yam uas Nws ua ntawd ua kom tib neeg tau txais kev cawm dim. Hnub no uas tau los rau ntawm Vajtswv lub xub ntiag los lees txais Nws txoj kev cawm dim lawm, kuv tsim nyog ua kuv tes dej num, thiab ua kuv tej luag hauj lwm thiab tej num kom tiav los tshaj tawm Vajtswv cov lus, tshaj tawm Nws lub npe, thiab ua tim khawv rau Vajtswv tes hauj lwm thiab Nws tej kev npaj siab, kom cov neeg uas Vajtswv xaiv tseg thiaj li rov qab los rau hauv Vajtswv lub tsev, hnov Nws lub suab, thiab tau txais kev yug ntawm Nws cov lus thiab txoj sia los kom ntxov thiab sai li sai tau. Qhov no yog kuv lub luag hauj lwm, kuv teg num. Kuv tab tom koom tes nrog Vajtswv tes hauj lwm, tiam sis tsis yog los ua kom pom tias txoj kev uas kuv taug ntawd yog txoj kev yog los sis tias tes hauj lwm uas kuv ua ntawd yog tes hauj lwm ncaj ncees—tsis yog txhawm rau tej no. Kuv tsis yog ua kuv tes dej num los ua pauj rau Ntxwgnyoog tej kev tawm tsam thiab kev iab liam Vajtswv. Tiam sis, kuv tab tom ua kuv tus kheej tej luag hauj lwm thiab tej num kom tiav, thiab muaj tseeb tiag, muab kuv tus kheej txoj kev ua siab ncaj, los pauj Vajtswv txoj kev hlub, los lees txais Vajtswv cov lus txib, thiab koom tes nrog Vajtswv tes hauj lwm.” Qhov no puas yog qhov kev xam pom uas yog? Qhov no puas yog qhov kev xam pom uas tib neeg tsim nyog muaj? (Yog.) Los ntawm qhov kev xam pom no, thaum tsim ntau hom yeeb yam, txawm yog hu nkauj qhuas Vajtswv, seev cev, ua yeeb yaj kiab, los sis ua yeeb yam saum sam thiaj txog cov lus tim khawv uas hais txog txoj kev ntsib kev pom, tib neeg qhov chaw sawv, qhov kev xam pom uas lawv sawv, thiab qee cov lus hais ntxaws ntxaws uas lawv hais ntawd puas tsim nyog muaj qee qhov kev hloov? (Tsim nyog.) Txawm li cas los xij, tib neeg feem coob, thaum ua tag nrho tej num no, tau ua nrog kev siab kub thiab kev ntxub, thiab sib xyaw nrog tib neeg tej kev xav hauv siab. Yog li ntawd, lawv tau nthuav tawm ntau dhau txog tej kev ua thiab tej kev coj ntawm cov ib txwm tsis ntseeg, pab nom tswv uas tswj hwm, thiab lub ntiaj teb ntawm sab kab lis kev cai ntseeg, thiab lawv cov lus hnyav dhau lawm, ua rau muaj tej kev cuam tshuam tsis zoo rau lwm tus tom qab lawv saib cov yeeb yam zoo li no. Qhov laj thawj mas yooj yim xwb: Tib neeg ua tag nrho tej yam no nrog ib hom kev xav hauv siab, los ntawm ib qho kev xam pom uas tsis tshua yog. Thiab tib neeg tseem xav tias qhov no ncaj ncees kawg li, hais tias: “Lawv tawm tsam, iab liam, thiab tsim cov lus xaiv txog peb; qhov uas nthuav lawv tawm ntawd txhaum qhov twg? Qhov no yog kev tiv thaiv tus kheej uas tsim nyog! Kev tiv thaiv tus kheej uas tsim nyog tsis txhaum cai, thiab peb tsis tau tsim tej yam uas tsis muaj tiag; peb txhua tus tab tom txheeb xyuas tej yam raws li qhov muaj tseeb. Lawv tsim cov lus xaiv txog peb yam tsis muaj tseeb; qhov uas peb nthuav tawm thiab txheeb xyuas lawv ntawd txhaum lod? Peb pauj tsis tau lod?” Kev pauj muaj qab hau dab tsi? Cov dab mas puv nkaus tej lus dag thiab yeej tsis hais ib lo lus tseeb li; qhov pheej txheeb xyuas lawv cov lus dag kom lawv paub tias yam lawv hais ntawd yog lus dag thiab kom tom qab lawv lees paub tias lawv dag lawm lawv yuav tsis dag ntxiv lawm—qhov ntawd puas muaj nuj nqis dab tsi? Lawv puas yuav ua tau li no? (Ua tsis tau.) Txoj hau kev ntawd tsis yog ruam thiab tsis paub dab tsi lod? Kuv twb tau hais ntev los lawm tias peb tes hauj lwm tseem ceeb yog los ua tim khawv rau Vajtswv tes hauj lwm, ua tim khawv rau cov txiaj ntsig uas ua tau tiav los ntawm Nws tes hauj lwm, ua tim khawv rau Nws cov lus, thiab cov txiaj ntsig uas tau los ntawm Nws cov lus nyob rau hauv tib neeg, thiab hais txog txoj kev tsuj nias thiab kev tsim txom los ntawm pab nom tswv uas tswj hwm, thiab txoj kev tawm tsam thiab kev teem txim los ntawm lub ntiaj teb ntawm sab kab lis kev cai ntseeg, tsuas yog hais luv luv txog qee qhov xwm txheej uas muaj feem cuam tshuam ntawd xwb ces txaus lawm. Tiam sis tib neeg yeej to taub tsis tau txawm lawv yuav hnov qhov no ntau npaum li cas los xij. Lawv pheej coj rau cov teeb meem no nrog kev siab kub thiab xav cav. Thiab qhov tshwm sim los yog dab tsi? Qhov ntawd tsis muaj txiaj ntsig kiag li, vim Ntxwgnyoog lub hwj chim phem mas hais laj thawj tsis tau rau li. Qhov no tsis yog tib neeg txoj kev ruam thiab kev tsis paub dab tsi lod?

Ib txhia tib neeg tshaj tawm txoj moo zoo, kawm txog qee yam thev naus laus ntsis ntawm tes hauj lwm, los sis ua ib yam ntawm tes dej num, lawv txoj kev npaj siab tsuas yog los qhia kom meej txog cov lus xaiv thiab piav qhia qhov tseeb rau tib neeg xwb, tshaj tawm kev ua tsov rog rau lub ntiaj teb uas tsaus ntuj thiab cov tib neeg ntiaj teb phem uas tawm tsam Vajtswv. Qhov no puas yog ib qho kev ua uas ncaj ncees? Txawm qhov koj ua no yog los sis txhaum los xij, koj yuav tsum to taub hais tias: Vajtswv puas cawm cov tib neeg lim hiam uas ua yeeb ncuab rau Nws ntawd? Qhov uas koj ua li no puas muaj nuj nqis dab tsi? Yog koj tsis to taub tias Vajtswv cawm hom tib neeg ntiaj teb twg thiab pheej nthuav tawm qee qhov kev xam pom uas zoo li yog tiam sis tseeb tiag mas tsis yog, qhov no tsis yog tab kaum koj tus kheej txoj kev tau txais kev cawm dim lod? Ib txhia tib neeg ua lawv tes dej num tsuas yog los tawm tsam tej hwj chim phem uas tawm tsam Vajtswv thiab los tawm tsam tej kev ntawm sab ntiaj teb xwb. “Lawv hais tias peb tsis quav ntsej peb tsev neeg thiab tsis ua lub neej li ib txwm muaj lawm, yog li ntawd kuv thiaj li xav ua pov thawj txog kuv tus kheej los ntawm qhov ua kuv tej dej num kom zoo. Yav tom ntej, thaum kuv mus rau saum ntuj ceeb tsheej thiab nkag mus rau hauv lub nceeg vaj thiab lawv raug txiav txim, lawv yuav pom tias kuv yog!” Qhov ua pov thawj txog tus kheej zoo li ntawd muaj qab hau dab tsi? Txawm yog koj ua pov thawj txog tus kheej lawm los, qhov ntawd muaj txiaj ntsim dab tsi? Nws sawv cev rau dab tsi? Qhov ntawd muaj nuj nqis dab tsi? Yog qhov ntawd yeej ua tau rau koj nkag mus rau hauv lub nceeg vaj thiab tau txais Vajtswv txoj kev pom zoo tiag, ces qhov ntawd yeej tsim nyog, thiab txoj kev koj taug yeej yuav yog lawm. Tiam sis khuv xim, txoj kev no siv tsis tau. Qhov no tsis yog txoj kev uas Vajtswv tau npaj tseg ua ntej rau tib neeg, thiab Vajtswv tsis tau kom tib neeg ua li no. Tib neeg pheej ruam, xav tias vim lawv sawv ntawm qhov tseeb sab thiab muaj qhov tseeb, lawv yuav tsum ua tej hauj lwm uas ncaj ncees, tshaj tawm kev ua tsov rog rau lub ntiaj teb uas phem no thiab txhua tus uas tsim cov lus xaiv: “Peb ntseeg Vajtswv thiab raws Vajtswv qab, peb ua peb tes dej num—peb yuav ua kom nej pom tias leej twg thiaj li yog tus taug txoj kev yog!” Qhov no tsis yog kev siab kub lod? Qhov cav txog tej no puas muaj qab hau dab tsi? Qhov ntawd tsis muaj nuj nqis kiag li. Yog koj yeej muaj lub sij hawm thiab lub zog tiag, ces yuav zoo dua yog kawm ntxiv txog ib teg hauj lwm, kawm txog kev paub thiab kev paub kev pom uas muaj feem cuam tshuam txog tes hauj lwm ntawd ntxiv. Qhov no muaj txiaj ntsim thiab txhawb rau koj qhov kev ua koj tes dej num. Vim li cas koj pheej yuav tawm tsam lub ntiaj teb tej hwj chim phem? Vim li cas pheej yuav tawm tsam cov lus xaiv? Qhov no tsis yog nkim zog rau qhov chaw uas tsis tim tsum lod? Txawm lwm tus yuav tawm tsam koj li cas los xij, tsis tas yuav quav ntsej txog lawv. Lawv muaj tus yam ntxwv xeeb txawm dab, thiab yog tej tsiaj, lawv tsuas yog hom niag ntawd xwb; Vajtswv tsis cawm lawv, tsis hloov lawv, thiab tsis hais lus rau lawv. Vajtswv tsis quav ntsej txog lawv, yog li ntawd koj puas tim tsum quav ntsej txog lawv? Yog tib neeg tseem tawv ncauj ua yam uas Vajtswv tsis ua, qhov no tsis yog ruam me ntsis thiab tsis muaj kev txawj ntse lod? Qhov tsawg tshaj plaws, koj yog ib tug tib neeg uas tsis muaj lub siab zwm rau Vajtswv, thiab koj tsis hlub yam uas Vajtswv hlub, los sis ntxub yam uas Vajtswv ntxub. Koj tsis saib tias Vajtswv tus cwj pwm uas muaj rau tej no yog dab tsi—Vajtswv tsis quav ntsej txog tej ntawd; koj twb tsis paub tias qhov ntawd yog vim li cas. Nyob rau hauv txhua theem ntawm Vajtswv peb theem hauj lwm mas, Vajtswv tau hais ntau cov lus. Muaj ntau cov lus sib tham ntawm Vajtswv thiab tib neeg ntiaj teb, thiab los ntawm cov lus sib tham no, mas pom tau Vajtswv tej kev npaj siab, Vajtswv tus moj yam, thiab lub ntsiab tseeb. Txawm li cas los xij, Vajtswv yeej tsis tham txog tias Nws nrog Ntxwgnyoog sib tham li cas nyob rau qee yam dab tsi ntxaws ntxaws, thiab vim li ntawd los nthuav Ntxwgnyoog tawm, cia tib neeg ntiaj teb pom meej txog Ntxwgnyoog lub ntsej muag tiag, thiab pom meej tias Ntxwgnyoog coj rau Vajtswv li cas. Muaj ntau yam uas zoo li no, tiam sis Vajtswv tsis hais txog tej ntawd. Vim li cas Vajtswv thiaj li tsis hais txog tej ntawd? Vim qhov tham txog tej ntawd tsis muaj txiaj ntsim rau koj. Yam uas muaj txiaj ntsim tshaj plaws rau koj yog cov lus ntawm Vajtswv txoj sia; cov lus no ua tau rau koj los rau ntawm Vajtswv lub xub ntiag thiab dhau los ua ib tug tib neeg uas zwm rau Vajtswv, thiab tus uas hwm thiab ntshai Vajtswv thiab zam kev phem, yog yam uas muaj txiaj ntsim tshaj plaws rau koj. Vajtswv qhia koj tias yuav ua neej nyob li cas thiab yuav hais lus li cas, thiab yuav paub cais tib neeg thiab tej yam li cas thiab kawm paub ua raws li qhov tseeb thiab muaj kev txawj ntse nyob rau hauv ntau hom xwm txheej thiab tej yam ntxwv—tej no puav leej muaj txiaj ntsim rau koj. Vajtswv hais thiab ua txhua yam uas muaj txiaj ntsim rau koj. Vajtswv tsis hais ib lo lus uas tsis muaj txiaj ntsim rau koj li. Qhov uas Vajtswv yuav hais cov lus ntawd tsis yog yooj yim heev lod? Yog li ntawd vim li cas Nws thiaj li tsis hais cov lus ntawd? Vim cov tib neeg ntiaj teb uas qias vuab tsuab tsis tim tsum cov lus ntawd. Cov lus xaiv no yeej zoo ib yam li cov dab thiab Ntxwgnyoog cov lus, thiab Vajtswv tsis quav ntsej txog tej ntawd, yog li ntawd koj kuj tsis tsim nyog tawm tsam tej ntawd thiab. Puas to taub lawm? (To taub lawm.) Thaum koj to taub lawm, koj paub tias yuav tsum ua raws li cas lawm, puas yog? Tsis txhob siv zog los txheeb xyuas cov lus xaiv, tawm tsam cov lus xaiv, nrhiav cov hauv paus ntawm cov lus xaiv, thiab lwm yam ntxiv lawm. Yog koj yeej muaj lub siab los ua tim khawv rau Vajtswv tiag tiag thiab xav tuav koj tej lus tim khawv khov kho thiab tau txais Vajtswv txoj kev pom zoo, ces yeej muaj ntau cov lus uas koj hais tau thiab ntau yam uas koj ua tau. Cov lus thiab qhov tseeb uas Vajtswv muab rau tib neeg ntawd cheem tsum kom koj ua tib zoo xav thiab ntsib pom rau, kom tej ntawd thiaj li dhau los ua koj tus kheej tej hauv paus ntsiab lus thiab tej kev ua raws, thaum kawg dhau los ua koj tus kheej txoj sia. Qhov no cheem tsum kom koj siv sij hawm thiab lub zog los muab qhov no coj mus ua tiag. Yog koj ruam thiab tsis paub dab tsi, es pheej siv zog rau cov lus xaiv, pheej xav ntxuav koj lub npe thiab qhia kom meej txog koj tus kheej rau lub ntiaj teb, ces qhov ntawd yuav muaj teeb meem lawm; koj yuav tsis tau qhov tseeb, thiab koj yuav raug cov lus xaiv ntawm lub ntiaj teb no khi thiab ua rau koj sab heev. Thaum kawg, koj yuav piav tsis tau kom meej li. Vim li cas koj thiaj li piav tsis tau kom meej? Vim koj tab tom tim ntsej muag nrog dab, thiab nws hais lus dag yam tsis paub txaj muag li. Tam sim no tus dab hais dab tsi? Tus zaj loj liab ploog hais tias, “Teb Chaws Suav yog tus tiv thaiv lub ntiaj teb kom raws qib raws duas, yog tus tiv thaiv lub ntiaj teb txoj kev thaj yeeb nyab xeeb, thiab nws lub luag hauj lwm nyob rau hauv txoj kev tswj lub ntiaj teb txoj kev thaj yeeb nyab xeeb thiab kom raws qib raws duas ntawd mas tseem ceeb tshaj plaws.” Cov lus twg uas nws hais ntawd yog qhov muaj tseeb? Cov lus no puas muaj tseeb? Thaum koj hnov cov lus no, koj puas npau taws? Tom qab hnov qhov no, koj xav tias Ntxwgnyoog yeej tsis txaj muag kiag li es thiaj li hais tau tej lus zoo li no. Vim li cas koj thiaj li cav nrog nws? Koj tsis ruam lod? Nws tsuas yog hom niag ntawd xwb—Vajtswv tsuas siv nws los ua dej num txhawb xwb, Vajtswv yeej tsis npaj siab yuav cawm los sis hloov nws li. Qhov cav nrog nws ntawd tsis ruam lod? Tsis txhob ua tej yam ruam ruam li no. Cov neeg ntse tsis mloog cov lus xaiv no, thiab lawv tsis raug cov lus xaiv no txwv. Ib txhia tib neeg hais tias, “Tom qab hnov cov lus xaiv, kuv lub siab raug cuam tshuam!” Ces koj yuav tsum thov Vajtswv nyob hauv koj lub siab, siv qhov tseeb los paub cais, thiab tom qab ntawd foom phem rau cov dab thiab Ntxwgnyoog ntawd, ces cov lus xaiv no yuav tsis muaj kev cuam tshuam rau koj lub siab ntxiv lawm. Muaj lwm txoj hau kev: Koj yuav tsum pom tshab lub ntsiab tseeb. Koj hais tias, “Txawm Vajtswv tej kev ua tsis mus raws li kuv tej kev xav phem thiab raug cov tib neeg ntiaj teb uas qias vuab tsuab teem txim thiab tsis lees txais los xij, kuv pom tias Nws yog qhov tseeb, thiab cov dab thiab Ntxwgnyoog tsis muaj qhov tseeb. Kuv txiav txim siab ntseeg Vajtswv! Tsuas yog Vajtswv xwb thiaj li cawm tau kuv. Nws muaj Vajtswv lub ntsiab tseeb, Nws yog Vajtswv, thiab Nws lub ntsiab tseeb yeej ib txwm tsis hloov. Txawm cov dab thiab Ntxwgnyoog yuav tawm tsam Vajtswv npaum li cas los xij, lawv tsis muaj qhov tseeb, thiab kuv tsis ntseeg cov dab thiab Ntxwgnyoog cov lus!” Koj puas muaj txoj kev ntseeg no? (Muaj.) Yog koj muaj txoj kev ntseeg no, koj yuav tsum tsis txhob cia ib tug tib neeg, xwm txheej, los sis yam khoom twg los cuam tshuam, thiab haj yam tsis txhob cia Ntxwgnyoog coj koj mus yuam kev los sis tawm tsam koj. Yog li ntawd koj yuav tsum ua li cas? Tsis txhob quav ntsej txog nws; tsuas tsom ntsoov rau txoj kev caum qhov tseeb thiab tuav koj tej lus tim khawv khov kho xwb, ces Ntxwgnyoog yuav txaj muag lawm.

Nyuam qhuav no, peb tau sib qhia txog qee qhov teeb meem uas muaj feem cuam tshuam txog txoj kev tshaj tawm cov lus xaiv nyob rau hauv pawg ntseeg. Tib neeg feem coob tau hnov qee cov lus xaiv los ntawm tsoom fwv Koom Tsham Suav thiab lub ntiaj teb ntawm sab kab lis kev cai ntseeg; peb kuj nyuam qhuav sib qhia txog tias yuav coj li cas thiab daws cov lus xaiv no li cas thiab. Thaum tib neeg to taub qhov tseeb tej hauv paus ntsiab lus lawm, lawv yuav tsis raug cov lus xaiv no coj mus yuam kev los sis cuam tshuam ntxiv lawm. Thaum muaj ib tug tib neeg twg uas tshaj tawm cov lus xaiv tshwm sim nyob rau hauv pawg ntseeg, txawm lawv siv txoj hau kev los sis siv lub suab los tshaj tawm tej lus xaiv zoo li cas los xij, peb yuav tsum coj li cas rau qhov no? Peb puas yuav tsum cia qhov ntawd tshwm sim yam tsis txwv, los sis nthuav tawm, txheeb xyuas, thiab saib xyuas tus tib neeg ntawd? Txoj hau kev twg thiaj li mus raws li tej hauv paus ntsiab lus? Muaj ib txhia hais tias, “Tsis yog muaj kev ywj pheej ntawm kev hais lus lod? Vim li cas tsis cia tus tib neeg ntawd hais? Tsuas cia lawv hais xwb. Tom qab mloog cov lus xaiv lawm, thaum txhua tus paub cais tau tias cov lus ntawd yog lus xaiv, lawv yuav tsis ntseeg tej lus dab no ntxiv lawm, thiab cov lus xaiv yuav cia li ploj mus lawm.” Lwm cov hais tias, “Qhov uas lawv tshaj tawm cov lus xaiv thiab iab liam Vajtswv ntawd mas txais yuav tsis tau. Peb cia lawv ua tej yam uas iab liam Vajtswv tsis tau. Peb yuav tsum qhuab qhia lawv kom lawv tsim dheev los. Vajtswv tau tiv kev txom nyem ntau npaum li cas los hais lus thiab ua hauj lwm los cawm peb, tiam sis lawv tseem tshaj tawm cov lus xaiv. Lawv tsis muaj lub siab txawj xav li! Tsuas yog foom phem rau lawv xwb peb thiaj li daws tau peb txoj kev ntxub; yog peb tsis saib xyuas lawv, peb yuav ua rau Vajtswv tag kev cia siab.” Txoj hau kev twg thiaj li zoo? Cov hau kev ua no puav leej tsis zoo. Raws li peb tau sib qhia ua ntej lawm, cov uas tshaj tawm cov lus xaiv yeej tsis yog neeg zoo, thiab yuav tsum tau paub cais cov tib neeg zoo li no. Yog lawv tsuas tshaj tawm cov lus xaiv qee zaus xwb, ces yuav tsum tau ceeb toom rau lawv. Yog lawv ib txwm tshaj tawm cov lus xaiv, ces yuav tsum tau nthuav tawm, txheeb xyuas, thiab tom qab ntawd ntsaig lawv tawm ntawm pawg ntseeg mus, kom lawv thiaj li coj tsis tau tib neeg mus yuam kev los sis ua tsis tau phem rau tib neeg ntxiv lawm. Txoj kev daws qhov teeb meem no puas yooj yim? Nej puas paub daws li no, los sis nej yuav tos kom cov thawj coj pawg ntseeg muab lus txib tso? Kiag thaum pom tias muaj ib tug tib neeg twg ib txwm tshaj tawm cov lus xaiv, thiab tias txhua zaus lawv tuaj koom kev sib txoos ua ke mas lawv tham txog tej no, yeej tsis nyeem Vajtswv cov lus, yeej tsis thov Vajtswv, tsis kawm cov nkauj qhuas Vajtswv, thiab haj yam tsis sib qhia txog lawv txoj kev paub ntawm kev ntsib kev pom txog Vajtswv cov lus, thiab thaum twg muaj leej twg sib qhia txog Vajtswv cov lus thiab sib qhia txog cov lus tim khawv uas hais txog txoj kev ntsib kev pom, lawv dhuav thiab tsis nyiam kiag li, tiam sis tsis dhuav rau cov lus xaiv ntawm cov ib txwm tsis ntseeg, thiab muaj zog heev rau tej ntawd—thaum pom tag nrho tej no lawm, vim li cas thiaj li tseem ua siab mos siab muag rau tus tib neeg zoo li no? Qhov ntawd qhia meej tias lawv yog Ntxwgnyoog cov tub qhe uas tau nkag los rau hauv pawg ntseeg los cuam tshuam cov neeg Vajtswv xaiv tseg kom txhob raws Vajtswv qab. Koj puas pom zoo rau lawv cuam tshuam? (Tsis pom zoo.) Yog koj tsis pom zoo, ces sawv tsees thiab hais tias, “Tus neeg ntawd tuaj rau hauv pawg ntseeg thiab pheej tshaj tawm cov lus xaiv, tsis nyeem Vajtswv cov lus, thiab tsis sib qhia txog lawv txoj kev paub ntawm kev ntsib kev pom txog Vajtswv cov lus li. Lawv yog ib tug tsis ntseeg thiab yuav tsum muab ntsaig tawm ntawm pawg ntseeg mus. Puas muaj leej twg tsis pom zoo?” Yog txhua tus hais tias lawv pom zoo thiab tsa tes pom zoo, ces tus tib neeg ntawd yuav tsum raug muab tshem tawm. Qhov saib xyuas ib tug tshaj tawm cov lus xaiv li no tsis zoo siab lod? (Zoo siab.) Cov tib neeg uas zoo li no, tsim nyog coj li no rau.

D. Kev Paub Cais Ob Peb Hom Lus Xaiv Uas Tsis Muaj Tseeb Uas Txhais Vajtswv Cov Lus Yuam Kev thiab Txiav Txim rau Vajtswv Tes Hauj Lwm

Hom lus xaiv uas peb nyuam qhuav tham txog ntawd los qhov twg los? Cov lus xaiv ntawd los ntawm tus zaj loj liab ploog, los ntawm lub ntiaj teb ntawm sab kab lis kev cai ntseeg, thiab los ntawm cov ib txwm tsis ntseeg los. Dhau ntawm cov lus xaiv uas los ntawm sab nraud los lawm, kuj tseem muaj qee cov lus hais thiab tej lus paj lus cua ntsig txog sab hauv ntawm pawg ntseeg thiab. Haj tseem muaj tej kev hais uas tsis muaj tseeb kiag li txog Vajtswv, Vajtswv tes hauj lwm, Vajtswv hnub, thiab qee nqe Vajtswv cov lus, nrog rau qee yam kev zais tob uas muaj feem xyuam txog Vajtswv thiab Nws tes hauj lwm, uas tib neeg tsim tawm los raws li lawv tej kev xav hauv nruab siab thiab tej kev xav phem, los sis raws li qhov pheej muab tej lus yuam kev nthuav dav thiab kev kwv yees yam tsis muaj hauv paus hauv ntsis. Thiab vim tib neeg ntxiv ntsev ntxiv roj rau tej lus hais, tej lus paj lus cua, thiab tej kev hais ntawd, cov lus xaiv no thiaj li tshwm sim los. Thaum cov lus xaiv tshwm sim los lawm, ib txhia tib neeg uas nyiam cov lus xaiv cia li kub siab rau tes hauj lwm uas tshaj tawm cov lus xaiv ntawd, lawv saib cov lus xaiv ntawd yam li yog qhov muaj tseeb thiab tshaj tawm cov lus xaiv ntawd mus rau txhua qhov chaw, piav txog tej ntawd muaj paus muaj ntsis thiab ntxaws ntxaws ua rau ib txhia tib neeg uas tsis paub txog qhov muaj tseeb, thiab cov uas tsis to taub qhov tseeb, ruam thiab tsis paub dab tsi ntawd, raug cov lus xaiv no coj mus yuam kev lawm tiag tiag. Thaum raug coj mus yuam kev lawm, puas yog lawv raug kev cuam tshuam lawm? (Yog.) Tej no kuj yog tej teeb meem uas nquag tshwm sim nyob rau hauv pawg ntseeg thiab. Txawm cov lus xaiv no yuav me heev thaum muab piv rau cov lus xaiv uas iab liam Vajtswv thiab tawm tsam Vajtswv thiab Vajtswv lub tsev los xij—cov lus xaiv ntawd tsis yog iab liam kuj tsis tuam mom Vajtswv—thiab txawm cov lus xaiv ntawd tsis ua rau muaj kev cuam tshuam los sis kev puas tsuaj rau Vajtswv tes hauj lwm los, cov lus xaiv ntawd yeej tseem ua rau muaj kev cuam tshuam rau ib txhia tib neeg txoj kev nkag mus rau hauv lub neej txoj sia thiab tsim nyog raug muab txwv. Piv txwv li, thaum ib txhia tib neeg hnov qee cov lus uas mloog zoo li yog tiam sis ho tsis yog, lawv ntseeg cov lus ntawd nyob rau hauv lawv lub siab thiab maj nroos tshaj tawm cov lus ntawd rau cov neeg nyob ib puag ncig lawv uas sib raug zoo nrog lawv. Thaum cov lus xaiv ntawd raug muab tshaj tawm mus, tej ntsiab lus ntxaws haj yam ntau zuj zus thiab tiav zuj zus, thiab thaum kawg, cov lus xaiv ntawd pib mloog zoo li yog tej yam uas muaj tseeb lawm. Tej yam xws li lub sij hawm, qhov chaw, thiab cov tib neeg puav leej muaj txhij txhua—cov lus xaiv zoo li no ua tau raws li tej kev cheem tsum uas yuav raug muab tshaj tawm mus yam qhib lug lawm, tsis yog lod? Cov lus dab tsi uas tab tom raug muab tshaj tawm? Tus neeg tshaj tawm cov lus xaiv ntawd hais tias, “Hnub no muaj ib yam tseem ceeb uas kuv yuav tsum tau qhia rau nej. Yog kuv tsis qhia, kuv yuav hnov tsis kaj siab nyob hauv kuv lub siab li; kuv haj tseem yuav tsom ntsoov tsis tau rau kev nyeem Vajtswv cov lus thiab. Kuv zoo siab tshwj xeeb txog qhov xwm txheej no. Tam sim no peb cov uas ntseeg Vajtswv thaum kawg yeej muaj kev cia siab lawm!” Thaum txhua tus hnov hais tias muaj kev cia siab lawm, lawv cia li xav paub thiab muaj zog heev; lub ncauj lus no mas rub siab heev. Lawv hais tias, “Vajtswv tes hauj lwm twb yuav xaus sai sai no lawm. Ntau lub cim uas yav tas los Vajtswv tau qhia tseg txog qhov kawg ntawm Nws tes hauj lwm ntawd twb tshwm sim los lawm. Piv txwv li, lub hli thiab lub hnub qhov xwm txheej, qhov xwm txheej nyob rau sab Hnub Tuaj thiab sab Hnub Poob, cov neeg Vajtswv xaiv tseg nyob rau hauv txhua lub teb chaws muaj coob npaum li cas, muaj pes tsawg leej tib neeg uas muaj peev xwm ua tau lawv tej dej num, thiab lwm yam ntxiv—cov cim txog qhov kawg ntawm Vajtswv tes hauj lwm no tam sim no nyob rau ntawm peb xub ntiag lawm. Peb yuav tsum tau npaj kom sai!” Muaj neeg nug hais tias, “Peb yuav tsum npaj dab tsi?” Tus neeg tshaj tawm cov lus xaiv ntawd hais tias, “Peb yuav tsum npaj kev ua zoo thiab npaj zaub mov, thiab maj nroos muab tag nrho peb cov nyiaj khaws cia ntawd coj los fij rau Vajtswv, ces peb thiaj li yuav tau txais ib qhov chaw kawg uas zoo.” Lawv kuj hais tias, “Nyob rau lub xyoo thiab lub hlis twg, nyob rau lub hnub twg, thiab nyob rau lub sij hawm twg ntawd, peb yuav tsum tau mus sib sau ua ke nyob rau ib qho chaw uas Vajtswv nyob qhov ntawd tos peb es yuav coj peb mus. Vajtswv tau hais tias, ‘Yog nej tsis muab txhua yam tso tseg, nej tsis tsim nyog ua Kuv cov thwj tim, thiab tsis tsim nyog ua cov uas raws Kuv qab.’ Tam sim no Vajtswv hnub, thaum kawg yeej los txog lawm, thiab Vajtswv cov lus yeej muaj tiav lawm. Peb yuav tsum muab txhua yam hauv lub ntiaj teb no tso tseg, tsis yog peb lub neej tom ntej thiab tej hauj lwm xwb tiam sis kuj nrog rau peb tsev neeg, cov txheeb ze, thiab tej kev sib raug zoo ntawm sab cev nqaij daim tawv thiab. Peb yuav tsum muab txhua yam hauv ntiaj teb uas khi peb tso tseg; peb yuav mus ntsib Vajtswv!” Tib neeg feem coob nug hais tias, “Qhov no puas muaj tseeb?” Tus neeg tshaj tawm cov lus xaiv ntawd hais tias, “Muaj tseeb, kuv twb muag kuv lub tsev thiab lub tsheb thiab muab kuv cov nyiaj khaws cia ntawd rho tawm los lawm. Yog koj tsis ntseeg kuv, cia li saib Vajtswv cov lus. Nyob rau hauv ib tshooj, qhov txhais ib kab lus twg ntawd nthuav ib qhov chaw nyob tawm los, thiab nyob rau hauv lwm tshooj, qhov txhais ib nqe lus twg ntawd nthuav lub xyoo thiab lub hlis tawm los….” Thaum hnov li no, puas muaj leej twg uas tsis muaj siab? Puas muaj leej twg uas muaj peev xwm paub cais cov lus no? Tej no tsis yog tej yam uas tib neeg txhawj xeeb heev txog lod? Tej no tsis yog tej yam uas tib neeg tau cia siab los ntev lawm lod? Ib txhia tib neeg, tom qab hnov li no thiab tom qab ntawd saib Vajtswv cov lus thiab xav hais tias qhov ntawd yeej haum tiag tiag lawm, pib xav txog ib txoj kev tawm. Txawm hais tias ib txhia tib neeg ua xyem xyav nyob hauv lawv lub siab los, lawv tseem cia siab kom qhov ntawd muaj tseeb, xav hais tias, “Txawm lub xyoo thiab hnub uas tau teev tseg ntawd yuav nyob deb me ntsis los, yam tsawg tshaj plaws los yeej muaj ib hnub thiab lub sij hawm uas meej lawm, yog li ntawd peb thiaj li muaj kev cia siab lawm.” Txawm lawv tsis tshua ntseeg tiag tiag los, lawv tseem quav ntsej qhov ntawd txog ib theem twg. Qhov kev quav ntsej no qhia txog dab tsi? Qhov ntawd qhia hais tias tib neeg yooj yim raug tej yam no cuam tshuam. Thaum hom lus xaiv no pib raug muab tshaj tawm mus dav nyob rau hauv pawg ntseeg lawm, 80 mus rau 90 feem pua ntawm cov tib neeg yuav zoo siab tshwj xeeb, thiab muaj tej kev xav nphau ntws hauv siab, xav hais tias, “Hnub uas peb tau cia siab rau ntawd thaum kawg yeej los txog lawm! Vajtswv tau mloog peb cov lus thov lawm! Vajtswv hlub peb thiab tsis tau tso peb tseg!” Qhov tshwm sim los ntawm kev tshaj tawm cov ncauj lus zoo li no thaum sib txoos ua ke ntawd yog dab tsi? Qhov ntawd puas yuav cuam tshuam rau txhua tus lub siab? Tib neeg tsis kam lees txais los twb tsis tau; txhua lo lus ntawm cov lus xaiv ntawd yuav chob rau hauv lawv lub siab, ua rau lawv tsis ntseeg tsis tau li. Tib neeg yooj yim ntseeg cov lus no tshaj plaws; tab txawm lawv tsis paub tseeb ib puas feem pua los, lawv tseem xav kom qhov ntawd muaj tseeb, xav hais tias, “Thaum rov qab xav txog tej kev txom nyem uas peb tau tiv thaum raws Vajtswv qab—raug neeg ntiaj teb tsis lees yuav, raug tsoom fwv caum ntes, raug lub ntiaj teb ntawm sab kab lis kev cai ntseeg tsim txom, yuav luag ua tsis taus pa, ua neej nyob ntshai rwg tas li—thaum twg cov hnub no thiaj li yuav xaus? Tam sim no, Vajtswv hnub thaum kawg yeej los txog lawm!” Tej kev xav no ua rau koj lub siab kub lug: “Peb tau muab peb tus kheej fij rau Vajtswv ntau npaum li no lawm, peb txoj kev ntseeg uas raws Vajtswv qab ntawd mas khov kho heev; yam uas peb tab tom hnov no yeej yuav tsum muaj tseeb xwb. Peb tsis tsim nyog ntab yuj yees thiab raug kev txom nyem nyob rau hauv lub ntiaj teb no ntxiv lawm—peb tsis tsim nyog raug tej ntawd lawm!” Thaum koj muaj qhov kev xav no, thiab koj paub tseeb heev thiab kub siab heev txog cov lus xaiv no, koj puas tseem xav nyeem Vajtswv cov lus ntxiv lawm? Txog lub sij hawm no, qhov nyeem ib nqe twg ntawm Vajtswv cov lus ntawd tsis yog mloog zoo li tsis cheem tsum lawm lod? Koj xav hais tias: “Vim li cas qhov sib qhia txog kev to taub ntawm txoj kev ntsib kev pom txog Vajtswv cov lus ntawd cas yuav mloog zoo li tsis cheem tsum li lawm? Tsis tas yuav thov Vajtswv ntxiv lawm, puas yog? Vajtswv hnub tau los txog lawm, thiab peb twb yuav tau ntsib Vajtswv tim ntsej tim muag lawm, yog li ntawd qhov thov Vajtswv tam sim no tsis yog txhais hais tias peb tsis hwm Vajtswv lod? Thaum ua neej nyob rau hauv lub cev nqaij daim tawv, nyob deb ntawm Vajtswv, peb tim tsum nyeem Vajtswv cov lus los daws peb txoj kev nco Nws. Tam sim no, peb twb yuav hla dhau lub ntiaj teb no thiab twb yuav tau ntsib Vajtswv ntawm tus kheej sai sai no lawm, yog li ntawd tsis tas yuav nyeem Vajtswv cov lus lawm. Tsis muaj ib yam dab tsi uas peb ua tam sim no yuav tseem ceeb npaum li qhov mus ntsib Vajtswv nyob rau lub xyoo, lub hlis, hnub, thiab lub sij hawm ntawd li. Qhov ntawd yuav yog ib yam uas zoo heev! Thaum muab piv rau qhov mus ntsib Vajtswv nyob rau hnub ntawd thiab ntawm qhov chaw ntawd mas, qhov nyeem Vajtswv cov lus mas mloog zoo li tsis tseem ceeb dab tsi li.” Koj tsom ntsoov nyeem tsis tau Vajtswv cov lus ntxiv lawm. Koj lub siab ua ntxhov hnyo, ntshaw kom hnub ntawd los txog kiag tam sid! Lub siab xav zoo li no tsis yog qhia tawm nyuaj heev lod? Cov lus xaiv zoo li no mas haum rau sawv daws lub siab nyiam heev thiab yooj yim raug muab tshaj tawm nyob rau hauv pawg ntseeg heev. Ib tug tib neeg tshaj tawm rau ob tug, ob tug qhia rau kaum tus, thiab cov lus xaiv ntawd raug muab tshaj tawm mus ntau zuj zus, los ntawm ib pawg ntseeg mus rau ob pawg ntseeg, los ntawm ob pawg ntseeg mus rau tsib pawg ntseeg, tshaj tawm mus dav zuj zus. Qhov tshwm sim los yog dab tsi? Cov lus xaiv no ua rau tib neeg ua xyem xyav rau Vajtswv, txav deb ntawm Vajtswv, hnov qab Vajtswv txoj kev hlub tiag tiag uas cawm tib neeg ntiaj teb, hnov qab tes dej num uas lawv yuav tsum tau ua, thiab hnov qab txoj kev uas lawv yuav tsum tau ua raws. Tiam sis, lawv cia li tsom ntsoov caum kom pom Vajtswv hnub los txog thiab saib seb lawv puas yuav tau txais koob hmoov xwb. Thaum lub hnub ntawd los txog tiag tiag thiab tsis muaj ib yam dab tsi tshwm sim li, tsuas yog thaum ntawd xwb tib neeg thiaj li paub hais tias qhov ntseeg cov lus xaiv ntawd tau ua rau muaj kev puas tsuaj rau lawv lub neej txoj sia lawm. Thaum ntawd koj puas tseem yuav rov qab mus zoo li koj yav tas los, coj koj tus kheej kom zoo, tuav ruaj koj tes dej num, caum qhov tseeb yam ruaj ntseg, nrhiav qhov tseeb tej hauv paus ntsiab lus nyob rau hauv txhua yam, thiab coj koj tus kheej thiab ua koj tes dej num raws li Vajtswv cov lus? Lub sij hawm yuav dhau mus lawm thiab yuav thim rov qab tsis tau lawm. Qhov no yuav cem leej twg? Cem koj tus kheej uas yeej ib txwm tsis yog ib tug neeg uas caum qhov tseeb. Koj tau ua npau suav nruab hnub thiab, vim li ntawd, thiaj li ntseeg cov lus xaiv lawm.

Rau cov uas ntseeg Vajtswv tiam sis tsis to taub qhov tseeb, ib lo lus xaiv xwb yeej coj tau lawv mus rau hauv lub qhov ntuj tob tob thiab ua rau lawv puas tsuaj. Lub qhov ntuj tob tob ntawd txhais li cas? Thaum xub thawj, koj txoj kev ntseeg Vajtswv yeej zoo li ib txwm thiab muaj kev cia siab tias yuav tau txais kev cawm dim, tiam sis ib lo lus xaiv xwb coj tau koj mus yuam kev lawm. Nyob hauv qhov tsis paub txog, Ntxwgnyoog twb coj koj mus yuam kev lawm, koj tau ntseeg tej lus dab uas Ntxwgnyoog hais thiab koj tau raws nws qab lawm. Koj taug thiab caum raws li txoj kev uas Ntxwgnyoog tau taw rau koj, thiab koj yim taug mus, koj lub siab yim tsaus ntuj, thiab koj yim nyob deb ntawm Vajtswv. Thaum koj tau tso Vajtswv tseg thiab tsis lees paub Vajtswv tag nrho lawm, tsis yog koj tsuas ua xyem xyav rau Vajtswv nyob hauv koj lub siab xwb, tiam sis qhov uas hnyav dua ntawd yog, koj pib yws txog Vajtswv thiab tsis lees paub Vajtswv. Thaum koj mus txog theem no, tsis yog koj txoj kev xaus li no lawm lod? Qhov no tsis yog lub qhov ntuj tob tob lod? Qhov no puas yog yam uas koj xav pom? Thaum koj mus txog theem no, koj puas tseem yuav tau txais kev cawm dim? Tsis tau lawm, thiab nyuaj heev rau qhov yuav thim rov qab. Vim li cas? Vim Vajtswv tsis ua hauj lwm lawm, Vajntsujplig Dawb Huv tsis ua hauj lwm lawm, thiab muaj kev tsaus ntuj hauv koj puv npo lawm. Muaj ib sab phab ntsa siab siab tau los thaiv nruab nrab ntawm koj thiab Vajtswv lawm. Sab phab ntsa no yog dab tsi? Qhov ntawd yog tej kev xav phem, tej kev xav hauv nruab siab, thiab cov lus xaiv uas Ntxwgnyoog tau muab tso rau hauv koj, thiab tej kev ntshaw ntawm tus kheej. Koj txoj kev paub txog tej yam uas zoo, xws li qhov Vajtswv yog leej twg tiag tiag, lub ntsiab tseeb, Vajtswv lub meej mom thiab lwm yam, cia li paub tsis meej thiab haj tseem maj mam ploj mus lawm. Qhov no txaus ntshai heev. Qhov no tsis yog poob mus rau hauv lub qhov ntuj tob tob lawm lod? (Yog.) Thaum koj poob rau hauv qhov xwm txheej no, koj puas tseem yuav tiv taus kev txom nyem thiab them tus nqi los ua koj tes dej num lawm? Koj puas tseem yuav taug tau txoj kev caum qhov tseeb kom tau txais kev cawm dim? Kuv qhia rau koj tias, qhov ntawd nyuaj heev rau qhov yuav thim rov qab. Qhov no yog raug coj mus yuam kev lawm! Tsuas yog ib lo lus xaiv xwb, yog koj tsis xyuam xim ib pliag thiab raug coj mus yuam kev lawm, yeej yuav ua rau muaj qhov tshwm sim los uas xav tsis txog li. Yog li ntawd, thaum cov lus xaiv ntsig txog Vajtswv tes hauj lwm uas zoo li no tshwm sim nyob rau hauv pawg ntseeg mas, yuav tsum tau maj nroos cheem thiab txwv cov lus ntawd. Tib neeg yuav tsum tsis txhob tsim tej yam uas tsis muaj hauv paus hauv ntsis los, thiab yuav tsum tsis txhob tsim ntau hom lus dag uas tib neeg nyiam mloog, txhawm rau coj lawv mus yuam kev thiab haub ntxias lawv kom yuam kev ntawm txoj kev yog. Txawm tib neeg yuav nyiam cov ncauj lus no los xij, qhov uas tsom ntsoov rau tej ntawd hauv lub siab thiab tshaj tawm tej ntawd yuav muaj qab hau dab tsi? Yuav tau txais txiaj ntsim dab tsi? Ib txhia tib neeg hais tias, “Tus tib neeg ntawd xav hais dab tsi los yeej tau, vim qhov ncauj yog lawv lub. Yog li ntawd, cia lawv hais li lawv xav hais xwb.” Qhov ntawd yog nyob ntawm seb hais txog dab tsi. Yog qhov ntawd yog ib yam uas txhawb tau tib neeg, ces hais tau thiab tshaj tawm tau—tshaj tawm li cas los yeej tau. Tiam sis cov lus xaiv no tsis txhawb tau tib neeg ib qho me me li; cov lus no tsuas coj tib neeg mus yuam kev thiab ua rau lawv tig mus saib lwm yam, cuam tshuam lawv txoj kev caum thiab ua rau lawv yuam kev ntawm txoj kev yog, cuam tshuam lawv txoj kev sib raug zoo nrog Vajtswv, cuam tshuam qhov ua lawv tes dej num li ib txwm muaj, thiab cuam tshuam qhov raws qib raws duas ntawm pawg ntseeg tes hauj lwm. Thaum tib neeg lees txais cov lus xaiv no lawm, qhov ntawd zoo li daig nyob rau hauv ib qho chaw ntxhov uas khiav tsis dim li. Yog li ntawd, thaum koj hnov cov lus xaiv no, yog muaj neeg qhia rau koj ib leeg xwb, koj yuav tsum tsis kam lees txais cov lus ntawd. Yog lawv hais cov lus ntawd coob leej mloog, tsis yog koj tsuas tsis kam lees txais cov lus ntawd xwb tiam sis kuj yuav tsum nthuav tawm thiab txheeb xyuas cov lus ntawd thiab—tsis txhob cia tib neeg raug coj mus yuam kev ntau ntxiv. Tshwj xeeb tshaj yog cov uas nyuam qhuav ntseeg tau ib los sis ob xyoos, los sis ob los sis peb xyoos xwb, lawv tseem pom tsis tshab tej yam txog qhov chaw kawg, qhov mus ntsib Vajtswv, thiab qhov raug qaws mus, lawv tseem tsis tau muaj kev nyiam rau qhov tseeb, thiab tsis muaj txoj kev los caum qhov tseeb thiab caum txoj kev hloov tus moj yam nyob rau hauv lawv txoj kev ntseeg. Nyob rau hauv cov xwm txheej zoo li no, lawv yooj yim raug cov lus xaiv no coj mus yuam kev thiab cuam tshuam tshaj plaws, thiab thaum lawv raug coj mus yuam kev lawm, qhov tshwm sim los ntawd mas xav tsis txog li. Qhov ntawd zoo li qhov noj tshuaj lom; txawm yuav muaj tshuaj daws los xij, qhov ntawd puas yog tseem muaj kev puas tsuaj rau koj lub cev? Txawm tias koj yuav dim txoj sia los, puas yuav tsis quav ntsej tau txog txoj kev mob thiab qhov puas tsuaj rau koj lub cev? Yog li ntawd, thaum ntsib cov lus xaiv no, koj yuav tsum paub cais thiab tsis kam lees txais cov lus ntawd, tsis txhob saib cov lus ntawd yam li yog tej dab neeg los sis tej xwm txheej uas muaj tiag. Ib txhia tib neeg nyiam cov lus xaiv no heev thiab tshaj tawm thiab muab cov lus ntawd qhia tawm mus rau txhua qhov chaw, sib qhia cov lus ntawd nrog lwm tus yam li cov lus ntawd yog qhov tseeb. Lub ntsiab xeeb txawm ntawm qhov no yog dab tsi? Qhov no tsis yog ua Ntxwgnyoog cov tub qhe lod? Cov tib neeg zoo li no yuav tsum raug ntuas thiab ceeb toom. Yog lawv tsis lees txim hloov dua siab tshiab, yuav tsum ntsaig lawv tawm mus. Yog muaj ib hnub twg, lawv ras tau thiab hais tias, “Qhov tshaj tawm cov lus xaiv ntawd tsis yog lawm; kuv tau ua Ntxwgnyoog ib tug tub qhe, thiab kuv yuav tsis tshaj tawm cov lus xaiv ntawd ntxiv lawm,” ces muab lawv tso tau rau qhov soj ntsuam: Yog lawv lees txim hloov dua siab tshiab thiab qhia tau txoj kev coj zoo lawm, ces tuaj yeem txais lawv rov qab los rau hauv pawg ntseeg ib ntus. Yog lawv rov ua txhaum dua, ces yuav tsum muab lawv tshem tawm mus.

Cov lus xaiv txog Vajtswv tes hauj lwm tsis yog tsuas muaj npaum li no xwb. Tib neeg siv lawv tej kev xav hauv nruab siab thiab tej kev xav phem, nrog rau lawv lub hlwb, los txheeb xyuas thiab tshawb xyuas kom meej; lawv tshawb xyuas Vajtswv cov lus kom meej thiab ntau yam lus hais txog yav tom ntej, nrog rau ntau yam kev puas tsuaj, tej cim, thiab tej xwm txheej uas tshwm sim nyob rau hauv lub zej zog thiab lub ntiaj teb, haj tseem vam khom rau lawv tej kev npau suav es cia li lam tau lam tawm tswv yim txog Vajtswv tes hauj lwm—lawv tsim ntau cov lus xaiv tawm los. Ntau tus tib neeg tsis nquag nyeem Vajtswv cov lus, los sis tsis nquag siv zog rau qhov tseeb, thiab haj yam tsis nquag siv zog rau qhov nrhiav tej hauv paus ntsiab lus thaum ua lawv tej dej num. Tiam sis, lawv ua tib zoo xav txog cov lus nug xws li, “Vajtswv qhov kev tshwm sim thiab tes hauj lwm pib li cas? Leej twg yog tus pib txhua yam? Tib neeg tau ua lub luag hauj lwm dab tsi? Muaj xwm txheej dab tsi tshwm sim?” Lawv tshawb xyuas tej yam tshwm sim sab nraud, thiab pawg ntseeg cov txheej txheem kev tswj hwm, cov neeg ua hauj lwm, thiab lwm yam. Tom qab tshawb xyuas kom meej tag nrho tej no lawm, lawv muab tag nrho tej no los xaus lus thiab tsim tawm qee yam uas lawv hu ua tej kev cai los sis tej yam tshwm sim thiab tshaj tawm tej ntawd nyob rau hauv pawg ntseeg yam li tej ntawd yog qhov tseeb. Thaum tshaj tawm tej ntawd, lawv piav txog tej ntawd yam muaj paus muaj ntsis thiab ntxaws ntxaws, thiab cov uas tsis muaj kev paub cais tej zaum haj tseem yuav xav tias lawv tab tom tham txog Vajtswv tes hauj lwm. Txawm li cas los xij, cov uas muaj kev paub cais xav hais tias, “Koj tsis yog tab tom hais tej lus uas tsis muaj hauv paus hauv ntsis thiab tso tej lus qhuab qhia uas yuam kev thiab tej lus cuav tawm lod? Koj tsis yog tab tom txiav txim rau Vajtswv tes hauj lwm lod? Qhov no tsis yog qhov sib qhia txog kev to taub thiab tej kev ntsib kev pom—qhov ntawd tsis muaj feem cuam tshuam rau qhov tseeb li. Qhov no yog qhov tsim cov lus xaiv thiab yuav tsum tau muab txwv kiag tam sid; yog tsis li ntawd, qee leej tib neeg yuav raug coj mus yuam kev!” Cov lus cuav thiab tej lus qhuab qhia uas yuam kev no, uas yog cov lus xaiv, tsis mus raws li qhov tseeb thiab cuam tshuam tib neeg txoj kev to taub txog qhov tseeb. Thaum txoj kev tshaj tawm cov lus xaiv tshwm sim nyob rau hauv pawg ntseeg, yuav tsum tau maj nroos txwv.

Kuj tseem muaj qee cov lus xaiv uas yog tej lus dab uas txiav txim rau Vajtswv tes hauj lwm thiab. Piv txwv li, hais txog qhov Vajtswv hlub leej twg, Nws cawm leej twg, thiab Nws ua leej twg kom zoo tiav log, qee leej tib neeg, siv lawv tus kheej tej kev txawj ntse me me, soj ntsuam thiab xaus lus, hais tias, “Cov uas nyob hauv ntiaj teb uas muaj peev xwm, thiab cov uas tau ua nom ua tswv, thiab cov uas tau ua thawj saib xyuas los sis ua cov thawj tswj hwm nyob hauv tej tuam txhab, thaum lawv los rau hauv vajtswv lub tsev, cia li ua thawj coj kiag los sis cia li tswj hwm tej hauj lwm dav dav thiab nyiaj txiag kiag. Cov tib neeg no yog cov uas vajtswv ua kom zoo tiav log.” Qhov no tsis yog tsim cov lus xaiv lod? Qhov no yeej yog tsim cov lus xaiv tiag tiag. Lus xaiv yog dab tsi? Qhov ntawd yog qhov hais lus yam tsis muaj kev lav lub luag hauj lwm, txiav txim yam dig muag ntsuav, thiab txiav txim siab yam tsis muaj hauv paus hauv ntsis, uas tsis mus raws li qhov muaj tseeb; cov lus no puav leej yog cov lus xaiv. Lwm tus tib neeg hais tias, “Tus ntawd tau muab ntau caum txhiab nyiaj suav fij. Lawv txoj kev ntseeg loj heev, lawv nkag tau mus rau hauv lub nceeg vaj.” Qhov no ua rau cov uas tsis muaj nyiaj xav tsis zoo thiab hnov ntxhov siab; lawv hais tias, “Txawm kuv kuj tau muab ntau yam fij thiab los, qhov ntawd tsis ntau npaum li qhov uas lawv muab fij ib zaug xwb. Qhov no puas txhais hais tias kuv tsis tau txais kev cawm dim thiab tsis raug ua kom zoo tiav log lawm? Puas yog Vajtswv tsis xav tau tus neeg zoo li kuv lawm?” Lwm cov uas tsim cov lus xaiv ces hais tias, “Cov neeg nplua nuj nkag tsis tau mus rau hauv lub nceeg vaj; vajtswv xav tau cov neeg pluag.” Cov neeg pluag ntawd ces zoo siab: “Txawm kuv tsis tau muab nyiaj ntau fij los, kuv tseem nkag tau mus rau hauv lub nceeg vaj, hos cov neeg nplua nuj ces tsis muaj feem lawm.” Txawm cov uas tsim cov lus xaiv ntawd hais li no los sis hais li tod lawv puav leej raug cuam tshuam; lawv pom tsis tshab qhov tseeb uas hais tias tej ntawd yog cov lus xaiv thiab tej lus dab tag nrho. Qhov no yog vim li cas? Yog vim lawv tsis to taub qhov tseeb thiab tsis muaj kev paub cais, yog li ntawd lawv thiaj li raug coj mus yuam kev tas li. Cov uas tsim cov lus xaiv thiab cov uas tshaj tawm cov lus xaiv ntawd puav leej yog cov dab. Txawm lawv yuav hais ntau npaum li cas los xij, koj tsis paub tias cov lus twg yog qhov tseeb thiab cov twg yog qhov cuav, cov lus no los qhov twg los tiag tiag, lawv txoj kev npaj siab yog dab tsi tiag tiag qhov tshaj tawm cov lus no, thiab lawv cia siab tias yuav ua kom tiav lub hom phiaj dab tsi. Yog ib tug tib neeg twg pom tsis tshab tej no thiab cia li lees txais yam dig muag ntsuav thiab tshaj tawm cov lus xaiv ntawd, qhov ntawd tsis yog ib tug ruam lod? Ib tug neeg ruam tsis yog kuj hu ua ib tug neeg liam lod? Txawm lo lus no yuav tsis zoo mloog los, Kuv pom tias haum heev. Vim li cas thiaj li haum? Vim cov tib neeg zoo li no hais lus tsis muaj kev ris lub luag hauj lwm. Lawv lam tau lam tshaj tawm cov lus xaiv, lam tau lam xaus lus thiab tsim cov lus xaiv raws li qee yam tshwm sim, thiab tom qab ntawd lam tau lam tshaj cov lus xaiv no tawm thiab piav txog tej ntawd yam txaus ntseeg cuag nkaus li tej ntawd yog tej xwm txheej uas muaj tiag—vim li ntawd thiaj li coj qee yam tsis zoo los thiab ua rau cuam tshuam rau ib txhia tib neeg. Lawv tsis nyeem Vajtswv cov lus los sis tsis to taub qhov tseeb; lawv siv lawv lub sij hawm txhua hnub los tshaj tawm cov lus xaiv thiab hais lus tsis muaj hauv paus hauv ntsis nyob rau hauv pawg ntseeg. Hnub no, lawv pom ib tug tib neeg muab ntau yam fij thiab hais tias tus tib neeg ntawd tau txais kev cawm dim. Tag kis, lawv pom ib tug tib neeg uas raug kaw hauv nkuaj thiab tsis ua Yudas, thiab lawv hais tias, “Tus tib neeg ntawd muaj ib lub siab nrog vajtswv. Lawv nkag tau mus rau hauv lub nceeg vaj thiab muaj ib qho chaw kawg uas zoo. Yav tom ntej, lawv yuav tswj hwm nees nkaum lub nroog nyob hauv vajtswv lub tsev; peb cov uas yog tub rog dog dig no muab piv tsis tau rau lawv li.” Qhov no tsis yog tej lus dab lod? Cov no tsis yog cov lus xaiv lod? (Yog.) Txawm cov tib neeg uas hais cov lus no tej kev npaj siab thiab tej hom phiaj yuav yog dab tsi los xij, cov lus zoo li no tsis coj qee yam tsis zoo thiab cuam tshuam rau ib txhia tib neeg lod? Ib txhia tib neeg muaj kev ntseeg me me, thiab thaum lawv hnov cov lus xaiv thiab tej lus dab no, lawv pib ua tib zoo xav tias: “Kuv puas yuav tau txais kev cawm dim? Vajtswv puas txaus siab rau kuv?” Nyob rau hauv lawv lub siab lawv xav txog tej no tas hnub, ua ob siab thiab txhawj xeeb txog tej ntawd. Vim cov uas tsim cov lus xaiv ntawd tej lus tsis muaj hauv paus hauv ntsis ntawd, lawv xav tias lawv tsis muaj kev cia siab tias yuav tau txais kev cawm dim lawm, yog li ntawd lawv thiaj li los rau ntawm Vajtswv lub xub ntiag thiab thov Vajtswv tias: “Koj tsis hlub kuv lod, Vajtswv? Kuv tau muab ntau yam tso tseg txhawm rau Koj. Thaum twg kuv thiaj li yuav ua tau kom Koj txaus siab?” Lawv muaj kev tu siab puv nkaus. Tsis muaj ib yam dab tsi tshwm sim li, yog li ntawd tej kev tu siab no los qhov twg los? Tej ntawd tshwm sim los ntawm cov lus xaiv ntawd—cov tib neeg no tau raug tshuaj lom thiab tau ntog lawm. Lawv tsis hnov muaj kev tu siab los sis hnov txhaum rau tej moj yam qias vuab tsuab twg uas lawv nthuav tawm los sis tej kev ua txhaum twg uas lawv tau ua, yeej tsis quaj vim qhov no—tab txawm yog ib tee kua muag los twb tsis poob—tiam sis thaum lawv hnov cov uas tsim cov lus xaiv hais tias cov tib neeg zoo li lawv tsis muaj kev cia siab tias yuav tau txais kev cawm dim, lawv cia li hnov ntxhov siab kiag tam sid. Lawv tsis yog raug cuam tshuam lod? Lawv tau raug cuam tshuam lawm. Cov tib neeg no muaj theem ntawm sab ntsujplig me, tsis to taub qhov tseeb, thiab ruam heev. Cov uas tsim cov lus xaiv pom cov tib neeg zoo li no yooj yim thab yog li ntawd thiaj li tsim qee cov lus xaiv los dag lawv. Hnub no, lawv hais tias koj muaj kev cia siab tias yuav tau txais kev cawm dim, thiab koj zoo siab; tag kis, lawv hais tias koj tsis muaj kev cia siab tias yuav tau txais kev cawm dim, thiab koj quaj thiab hnov tu siab. Vim li cas koj thiaj li mloog lawv hais? Vim li cas koj thiaj li pheej raug lawv txwv? Lawv puas yog tus txiav txim siab? Ntau kawg los, lawv tsuas yog cov niag neeg txaus luag xwb. Tab txawm lawv txoj hmoo los yeej nyob rau hauv Vajtswv ob txhais tes thiab, yog li ntawd lawv muaj cai dab tsi los ntsuas lwm tus? Lawv muaj cai dab tsi los hais tias leej twg tau txais kev cawm dim los sis tsis tau, los sis hom tib neeg twg thiaj li raug ua kom zoo tiav log los sis tsis raug? Lawv puas to taub qhov tseeb? Lawv cov lus twg uas mus raws li Vajtswv tej kev npaj siab thiab Vajtswv cov lus? Tsis muaj ib lo ntawm lawv cov lus uas mus raws li Vajtswv cov lus li, yog li ntawd vim li cas koj thiaj li ntseeg lawv? Vim li cas koj thiaj li raug lawv cuam tshuam? Qhov no tsis yog tshwm sim los ntawm txoj kev ruam lod? (Yog.) Txawm qhov no yog vim txoj kev ruam thiab kev tsis paub dab tsi los sis vim koj theem ntawm sab ntsujplig me dhau thiab koj tsis to taub qhov tseeb los xij, muab hais luv luv tias, cov uas tshaj tawm cov lus xaiv nyob rau hauv pawg ntseeg yog cov uas ntxim ntxub tshaj plaws. Yuav tsum tau paub cais lawv, nthuav lawv tawm, thiab tom qab ntawd txwv lawv los sis ntsaig lawv tawm mus.

Ib txhia tib neeg hais tias, “Saib tus ntawd seb, nws lub ntsej muag zoo nkauj zoo nraug; nws raug xaiv los ua ib tug thawj coj pawg ntseeg lawm. Tus ntawd vam meej heev nyob hauv lub zej zog, txhua tus uas pom nws puav leej nyiam nws; tom qab nws los ntseeg vajtswv lawm, cov kwv tij thiab cov nkauj muam kuj nyiam nws thiab, thiab vajtswv kuj nyiam nws thiab.” Puas muaj ib lo lus nyob rau hauv cov lus no uas yog li? (Tsis muaj.) Vim li cas? (Cov lus ntawd tsis mus raws li qhov tseeb.) Yog lawm, cov lus no tsis mus raws li qhov tseeb, tej ntawd puav leej yog tej lus dab. Ib txhia hais tias, “Tus ntawd tsev neeg nplua nuj, muaj tej kev ua neej zoo, thiab lawv muaj kev paub kev pom. Yog li ntawd, nyob hauv vajtswv lub tsev, lawv tswj hwm tej nyiaj txiag thiab tej hauj lwm dav dav. Lawv muaj txiaj ntsim thiab tau ua tes dej num no. Qhov no yog vajtswv txoj kev npaj tseg ua ntej lawm.” Qhov ntxiv lo lus “vajtswv txoj kev npaj tseg ua ntej” ntawd puas ua rau cov lus no mus raws li qhov tseeb? Qhov no tsis yog tej lus dab lod? Tej lus dab zoo li no raug hu ua cov lus xaiv. Txhua lo lus uas hais yam tsis muaj kev ris lub luag hauj lwm uas tsis mus raws li qhov muaj tseeb, uas cov nyom rau tej uas muaj tseeb uas Vajtswv tau npaj tseg ua ntej ntawd, puav leej yog tej lus uas lam tau lam hais thiab tej kev lam tau lam xaus lus; cov lus zoo li no puav leej yog cov lus xaiv. Vim li cas thiaj li muab cov lus ntawd cais tias yog cov lus xaiv? Vim cov lus no, thaum tso tawm lawm, yuav cuam tshuam thiab ua rau ib txhia tib neeg txoj kev xav uas ib txwm muaj thiab lawv tej hom phiaj ntawm txoj kev caum ntawd puas tsuaj, yog li ntawd thiaj li muab cov lus ntawd cais tias yog cov lus xaiv. Raws li Vajtswv cov lus, Vajtswv tsuas hais tias tib neeg qhov chaw yug, keeb kwm ntawm tsev neeg, lub ntsej muag, qib kev kawm, thiab lwm yam yog Vajtswv npaj tseg ua ntej xwb; Nws yeej tsis tau qhia rau tib neeg hais tias lub ntsej muag, keeb kwm hauv lub zej zog, los sis tej yam uas ib txwm muaj ntawm ib hom tib neeg twg yog tej yam tsim nyog rau qhov tau txais koob hmoov li. Tib qho qauv uas Vajtswv cheem tsum ntawm tib neeg ces yog kom lawv muaj peev xwm caum qhov tseeb thiab ua tau kom muaj txoj kev zwm rau Vajtswv. Qhov no yog qhov tseem ceeb tshaj plaws. Yog Vajtswv cov lus tsis tau hais qhia meej meej txog ib yam dab tsi, tiam sis tsuas yog tej yam uas tsim tawm los ntawm tib neeg tej kev xav hauv nruab siab los sis lawv tej kev kwv yees xwb, ces cov lus zoo li no kuj raug suav tias yog cov lus xaiv thiab. Tib neeg pheej xav txiav txim seb puas muaj leej twg yuav tau txais koob hmoov los ntawm lawv txoj kev soj ntsuam thiab kev to taub, thiab tseem txiav txim raws li lawv tus kheej tej kev xav phem thiab tej kev xav hauv nruab siab. Tom qab ntawd, lawv tso cov lus cuav no tawm los cuam tshuam lwm tus txoj kev caum qhov tseeb, lam tau lam txiav txim tias leej twg tau txais kev cawm dim thiab leej twg tsis tau, leej twg yog Vajtswv cov neeg, thiab leej twg yog cov neeg siv zog ua hauj lwm txhawb. Cov no puav leej yog cov lus xaiv. Hais txog cov lus xaiv, peb kuj hu tau cov lus ntawd tias yog tej lus dab thiab. Txawm yuav muaj hom lus xaiv los sis tej lus dab twg tshwm sim los xij, cov thawj coj pawg ntseeg yuav tsum maj nroos tawm los cheem thiab txwv cov lus ntawd; muaj tseeb tiag, yog muaj cov kwv tij thiab cov nkauj muam twg uas muaj kev paub cais, lawv kuj yuav tsum tawm los soj ntsuam thiab paub cais seb cov lus xaiv ntawd los qhov twg los thiab lub ntsiab xeeb txawm yog dab tsi. Thaum cov kwv tij thiab cov nkauj muam no tau txais kev to taub txog tej no lawm, lawv tuaj yeem sawv los tawm tsam thiab cav nrog cov lus xaiv no, thiab kuj txwv cov uas tshaj tawm cov lus xaiv ntawd thiab, koom siab tawm tsam lawv. Lawv yuav tsum ua qhov no li cas? Los ntawm qhov qhib lug thuam cov tib neeg ntawd nyob rau ntawm sawv daws xub ntiag hais tias: “Yam uas koj tab tom hais ntawd puav leej yog cov lus xaiv thiab tej lus dab xwb, qhov ntawd tsis mus raws li Vajtswv cov lus, thiab tsis mus raws li peb tej kev tim tsum. Yog koj tseem tsis mloog cov lus ntuas es tshaj tawm cov lus xaiv mus ntxiv, ces peb yuav ntsaig koj tawm mus, tsis tseg ib lub cib fim rau koj tsim cov lus xaiv thiab ua rau muaj tej kev cuam tshuam nyob rau hauv pawg ntseeg ntxiv lawm!” Txoj kev xyaum ua raws no zoo li cas? (Zoo.) Qhov ua li no mus raws li qhov tseeb tej hauv paus ntsiab lus. Yog koj sib qhia txog koj tus kheej tej kev to taub ntawm txoj kev ntsib kev pom, hais tej yam uas txhawb tau tib neeg, ces txawm koj yuav hais li cas los yeej tau. Koj tuaj yeem siv cov lus twg los tau uas koj nyiam, txawm yog lus sau hauv ntawv los sis lus hais; puav leej tau tag nrho. Tib yam uas koj ua tsis tau ces yog tshaj tawm cov lus xaiv.

E. Qhov Kev Puas Tsuaj Uas Cov Lus Xaiv Uas Tsis Muaj Tseeb Tsim

Cov lus xaiv uas raug tshaj tawm nyob rau hauv pawg ntseeg tsis yog tsuas hais txog qhov tsis lees paub Vajtswv los sis txiav txim rau Vajtswv tes hauj lwm xwb; tseem muaj lwm hom lus xaiv thiab. Cov lus xaiv no tim tsum paub cais thiab soj ntsuam, thiab kuj yuav tsum tau cheem thiab txwv tej ntawd thiab. Muab hais luv luv tias, cov lus xaiv yeej tsis yog ib yam dab tsi zoo kiag li; tej ntawd tsis coj txiaj ntsim dab tsi los rau tib neeg. Ib txhia tib neeg hais tias, “Kuv xav mloog cov lus xaiv seb cov lus xaiv ntawd hais dab tsi tiag, kom tau txais kev paub cais thiab kev txawj ntse los ntawm tej ntawd.” Yog koj yeej muaj peev xwm paub cais me ntsis tiag tiag thiab tsis ntshai tsam raug cov lus xaiv cuam tshuam, koj mloog los tau, tiam sis qhov tshwm sim los yuav yog dab tsi? Yog koj paub tsis meej lawm thiab pib ua xyem xyav rau Vajtswv thiab Vajtswv tes hauj lwm, ces qhov ntawd phom sij lawm; qhov ntawd txhais hais tias koj raug coj mus yuam kev lawm. Yog koj tsis paub cais es ho raug coj mus yuam kev lawm, qhov ntawd tsis yog muaj teeb meem lod? Koj puas muaj lub siab ntseeg ntawd? Koj xav tias koj muaj kev ntseeg, tiam sis koj puas to taub qhov tseeb? Yog koj tsis to taub qhov tseeb, koj txoj kev ntseeg tsis yog qhov tseeb tiag, thiab koj yeej tseem yuav raug coj mus yuam kev xwb. Yog koj to taub qhov tseeb me ntsis, muaj kev paub Vajtswv tiag tiag me ntsis, thiab muaj lub peev xwm paub cais thiab tiv thaiv tau cov lus xaiv no, ces koj thiaj li tau txais kev txawj ntse los ntawm qhov mloog tej ntawd. Yog koj xav tias koj tsuas muaj kev ntseeg xwb, tiam sis qhov tseeb tiag, txoj kev ntseeg no tseem tsis tau yog lub siab ntseeg tiag tiag, thiab koj tseem tsis tau to taub qhov tseeb, ces Kuv hais tias qhov ntawd yuav nyuaj heev rau koj uas yuav tau txais kev paub cais thiab kev txawj ntse tiag tiag los ntawm cov lus xaiv ntawd. Cov lus xaiv los qhov twg los? Tej ntawd los ntawm Ntxwgnyoog los. Ntxwgnyoog nrhiav txhua qhov khoob thiab txeeb txhua lub cib fim los nrhiav qhov txhaum ntawm cov kab lus uas nyob rau hauv Vajtswv cov lus thiab los nrhiav qee yam uas nws siv tau los ua qhov tuav nyob rau hauv Vajtswv cov lus, muab Vajtswv cov lus txiav tawm ntawm lub ntsiab mus lawm. Qhov ntawd zoo li muaj ib lub hauv paus, tiam sis qhov tseeb tiag, qhov no yog muab txiav tawm ntawm lub ntsiab mus lawm kom coj tib neeg mus yuam kev xwb. Tom qab hnov cov lus xaiv no lawm, cov uas tsis to taub qhov tseeb xav hauv lawv nruab siab tias: “Yam uas lawv hais ntawd muaj lub hauv paus nyob rau hauv Vajtswv cov lus. Qhov ntawd yuav tsum yog lawm. Qhov ntawd tsis yog ib lo lus xaiv, puas yog?” Qhov tshwm sim los, lawv raug coj mus yuam kev lawm. Qee cov lus xaiv mas pom tseeb thiab yooj yim paub cais. Txawm li cas los xij, qee cov lus xaiv mas nyuaj paub cais; saib sab nraud mas, tej ntawd zoo li mus raws li qhov muaj tseeb, tiam sis lub ntsiab tseeb tsis yog li ntawd. Tsis txhob xav tias tsuas yog vim cov lus xaiv no saib sab nraud mus raws nraim li lub ntsiab ncaj ncaj ntawm Vajtswv cov lus xwb, ces tej ntawd yog lawm. Qhov tseeb tiag, ntau nqe lus ntawm tej no yog tej kev qhuab qhia uas tsis muaj ntsiab, tej ntawd yog ntxiab, thiab tej ntawd tsis muaj kev txhawb los sis txiaj ntsim dab tsi rau tib neeg li. Yuav tsum tsis txhob lees txais cov lus zoo li no. Vim theem uas tib neeg to taub Vajtswv cov lus mas tsis zoo ib yam, thiab qhov xwm txheej uas Vajtswv hais ntawd los kuj txawv thiab, qhov siv thiab txhais Vajtswv cov lus yam dig muag ntsuav ntawd mas yog qhov uas yooj yim ua rau muaj qhov yuam kev tshaj plaws. Ntxwgnyoog nquag coj tib neeg mus yuam kev los ntawm qhov muab Vajtswv cov lus txiav tawm ntawm lub ntsiab mus thiab txhais yuam kev. Txhua qhov kev teem txim rau Vajtswv tes hauj lwm uas raws li phau Vajluskub los sis Vajtswv cov lus puav leej yog Ntxwgnyoog txoj kev dag ntxias, yog nws lub tswv yim uas coj tib neeg mus yuam kev; tej ntawd yog ntxiab, thiab yuav tsum tsis txhob lees txais cov lus zoo li no. Saib sab nraud mas, cov lus xaiv tsuas yog ib los sis ob lo lus, los sis ob peb lo lus xwb; tej ntawd tsis txaus ntshai, thiab tsis muaj dab tsi yuav tsum ntshai li. Yam uas yuav tsum ntshai yog cov lus xaiv uas xaus lus raws li phau Vajluskub los sis qhov tseeb uas raug txiav tawm ntawm lub ntsiab mus lawm. Qhov no yog qhov uas coj tau tib neeg mus yuam kev tshaj plaws; yog qhov uas cuam tshuam tib neeg lub siab tshaj plaws. Yog tib neeg tsis muaj kev paub cais ces yuav ntog rau ntawm no lawm. Tsuas yog cov uas to taub qhov tseeb xwb thiaj li paub cais tej lus dab uas coj mus yuam kev zoo li no. Piv txwv li, ib txhia tib neeg nrhiav qee nqe Vajtswv cov lus los ua lub hauv paus los hais tias Vajtswv hlub hom tib neeg no thiab tsis hlub hom ntawd, tias Vajtswv cawm hom tib neeg no thiab tsis cawm hom ntawd, tias hom tib neeg no raug Vajtswv muab pov tseg lawm, thiab hom ntawd tsis tseem ceeb rau Vajtswv lawm, thiab lwm yam ntxiv. Cov lus no tsis yog cov lus txiav txim lod? Cov lus txiav txim no qhov tseeb tiag tsis mus raws li Vajtswv cov lus. Tej hauv paus uas lawv nrhiav tau ntawd qhov tseeb tiag yog raug txiav tawm ntawm lub ntsiab mus lawm; tej ntawd yog nyob rau qhov xwm txheej sib txawv thiab tej ntawd yog cov lus sib txawv. Qhov no yog kev txhais yuam kev tag nrho. Lawv pom tsis tshab mus txog lub ntsiab tseeb, thiab lawv lam tau lam siv tej kev cai tswj xwb. Tiam sis cov uas tsis muaj kev paub cais raug tshuaj lom thiab raug coj mus yuam kev tom qab hnov cov lus yuam kev no lawm, ua rau lawv lub siab xav tsis zoo, xav tias vim yam uas tau hais ntawd yog raws li Vajtswv cov lus, ces yuav tsum yog lawm. Tom qab ntawd lawv tsis ua tib zoo nyeem Vajtswv cov lus los nrhiav qhov yuam kev nyob rau hauv cov lus yuam kev no, ces cia li ntseeg tag nrho tias tej ntawd muaj tseeb. Lawv tsis yog raug coj mus yuam kev lawm lod? Yog tsis muaj tus uas to taub qhov tseeb los nrog lawv sib qhia, qhov ntawd phom sij dhau lawm. Qhov tsawg kawg nkaus, cov tib neeg no tuaj yeem xav tsis zoo li ntawm rau lub hli mus txog ib xyoos; qhov ntawd tsis yog tsuas ua rau lawv txoj kev nkag mus rau hauv lub neej txoj sia qeeb xwb, tiam sis yog lawv thim thiab tsis ntseeg lawm, lawv yuav raug rhuav tshem tag nrho thiab plam Vajtswv txoj kev cawm dim tag nrho lawm. Yog li ntawd, cov tib neeg uas muaj theem ntawm sab ntsujplig me uas tsis to taub qhov tseeb mas muaj kev phom sij loj heev uas yuav raug Ntxwgnyoog coj mus yuam kev! Tsuas yog cov uas to taub qhov tseeb xwb thiaj li nyab xeeb thiab ruaj khov. Yog muaj ib hnub koj yeej ntsib ib tug neeg tshaj tawm cov lus xaiv los coj tib neeg mus yuam kev tiag tiag, txoj hau kev uas muaj txiaj ntsig tshaj plaws yog maj nroos nrhiav ib tug twg uas to taub qhov tseeb los nrog sib qhia; tsuas yog thaum ntawd xwb koj thiaj li yuav raug cawm ntawm qhov xwm txheej no. Qhov nrhiav kev pab los ntawm cov uas tsis muaj kev to taub ntawm sab ntsujplig uas lam siv tej kev cai tswj ntawd yuav tsis yog tsuas daws tsis tau qhov teeb meem xwb tiam sis tseem yuav coj koj mus yuam kev ntxiv thiab. Yog li ntawd, qhov raug coj mus yuam kev ntawd tsis yog ib yam uas tsuas tshwm sim nyob rau hauv sab kab lis kev cai ntseeg xwb—tab txawm yog koj ntseeg Vajtswv thiab ua lub neej hauv pawg ntseeg los xij, yog koj tsis caum qhov tseeb, koj yeej tseem raug coj mus yuam kev tau yooj yim. Tab txawm yog koj twb ntseeg tau peb mus rau tsib xyoos, los sis xya mus rau yim xyoo lawm los xij, yog koj tsis tau qhov tseeb, ces koj yeej tseem muaj kev phom sij uas yuav raug coj mus yuam kev; tshwj xeeb tshaj yog, cov uas nquag muaj tej kev xav phem thiab nquag xav tsis zoo mas yooj yim raug coj mus yuam kev tshaj plaws thiab ntxeev siab rau Vajtswv tau txhua lub sij hawm. Rau qhov Ntxwgnyoog ncig lub ntiaj teb zoo li ib tug tsov ntxhuav uas nyooj laws, nrhiav tib neeg tom noj; qhov no yog qhov muaj tseeb. Tus Ntxwgnyoog no yog leej twg? Qhov ntawd yog txhua tus uas tsis nyiam qhov tseeb kiag li thiab ntxub qhov tseeb, nrog rau cov tawm tsam khetos, cov thawj coj cuav, cov tib neeg ruam tsis muaj qab hau ntawd, thiab cov uas coj lwm tus mus yuam kev—cov tib neeg no puav leej yog cov Ntxwgnyoog. Cov tib neeg no ncig txhua qhov chaw, coj cov neeg Vajtswv xaiv tseg mus yuam kev thiab cuam tshuam lawv rau txhua qhov chaw uas lawv mus, yog li ntawd cov tib neeg no puav leej yog cov dab uas tawm tsam Vajtswv. Cov neeg Vajtswv xaiv tseg yuav tsum tau ceev faj tshwj xeeb kom thiaj li paub tseeb tias lawv tsis raug coj mus yuam kev thiab sawv tau khov kho.

Yam uas tsis lees paub tsis tau yog nyob rau hauv pawg ntseeg muaj qee cov ntseeg tshiab los sis cov uas lub peev xwm tsis zoo kiag li, uas tsis muaj lub peev xwm nkag siab Vajtswv cov lus, nquag raug ntau yam lus xaiv coj mus yuam kev, thiab cuam tshuam. Cov uas tsim cov lus xaiv tuaj yeem ua rau ib pab neeg ntog tau yooj yim los ntawm ib lo lus txiav txim uas lam hais xwb. Cov lus thiab tej kev hais uas lawv lam hais tawm yam tsis xav ntawd tuaj yeem ua rau qee tus tib neeg xav tsis zoo, qaug zog, thiab tsis xav ua lawv tes dej num lawm. Thaum Vajtswv lub tsev hu, cov tib neeg no muaj kev ntshai puv npo, nrhiav ntau yam laj thawj thiab kev hais ub hais no los tsis kam thiab zam kom dhau. Pom tseeb tias, cov uas tsim cov lus xaiv ua lub luag hauj lwm dab tsi nyob rau hauv pawg ntseeg? Lawv ua Ntxwgnyoog cov tub qhe, yam tsis muaj kev ua xyem xyav kiag li. Piv txwv li, ib txhia tib neeg hais tias, “Koj yuav tsum muaj ib txoj kev tawm thaum ua koj tes dej num. Vajtswv lub tsev hu koj los ua ib teg dej num, thiab yog koj ua tsis tau zoo, vajtswv lub tsev yuav tsis siv koj thaum twg los tau. Lub sij hawm ntawd, yog koj mus tsev, koj yuav ua neej nyuaj heev. Yuav tsis muaj leej twg yug koj lub sij hawm ntawd!” Qhov no puas mloog zoo li “sov siab”? Qhov ntawd mus raws li tib neeg tej kev xav hauv siab thiab mloog zoo li muaj kev hlub thiab xav txog lwm tus heev, tiam sis koj puas hnov tias muaj kev ua tib zoo xav txog Vajtswv lub siab nyob rau hauv cov lus no? Tej ntawd puas muab kev txhawb, kev pub, kev pab, los sis kev txhawb zog rau tib neeg? (Tsis muab.) Qhov qhia kom tib neeg npaj ib txoj kev tawm—qhov no tsis yog rub lawv rov qab lod? Lawv hais qhov no yog txhais li cas? “Koj yuav tsum tau ceev faj; tej zaum vajtswv yuav tig los tawm tsam koj!” Qhov no yog cov tshuaj lom uas lawv cog rau hauv tib neeg. Tom qab hnov qhov no, tib neeg xav tias, “Yog lawm, ua cas kuv thiaj li ruam ua luaj? Kuv yuav luag muag kuv lub tsev—yog kuv ua kuv tes dej num tsis zoo thiab raug rho tawm, kuv twb yuav tsis muaj ib lub tsev rov qab mus lawm. Ua tsaug uas lawv ceeb toom kuv, yog tsis li ntawd kuv yeej yuav ua ib yam dab tsi ruam ruam lawm.” Yog ib qho kev ceeb toom uas “siab zoo” kawg, tiam sis muaj tshuaj lom ntau heev thiab tob heev nyob rau hauv! Nej puas tau hnov cov lus xaiv zoo li no? Tej ntawd mloog zoo li lawv ua zoo heev rau tib neeg, xav txog lwm tus heev, nrog rau txoj “kev hlub” uas loj heev. Cov tib neeg no tsis yog neeg txheeb ze los sis phooj ywg zoo nrog cov uas lawv nrog tham, tsis muaj kev sib txheeb ze ntawm roj ntsha kiag li—tsuas yog vim lawv txhua tus ntseeg Vajtswv es cov tib neeg no thiaj li muaj txoj “kev hlub” loj npaum li no rau cov uas lawv nrog tham xwb. Tib neeg xav tias, “Qhov no yog Vajtswv txoj kev tsom kwm tiag tiag! Yog li ntawd kuv yuav tsum tau xav kom zoo ua ntej. Yog kuv pheej ua dog ua dig thaum kuv mus ua kuv tes dej num, kuv yuav ua li cas yog kuv raug muab xa rov qab? Yog li ntawd, thaum kuv ua kuv tes dej num, kuv yuav tsum tau ceev faj; kuv yuav tsum ua hauj lwm uas pom kuv zoo kom ntau ntxiv, zam qhov ua yuam kev, thiab tab txawm yog kuv ua yuam kev los, kuv yuav tsum tsis txhob cia lwm tus pom. Ua li ntawd, kuv yuav tsis raug muab xa rov qab, tsis yog lod? Tab txawm yog kuv raug muab xa rov qab los, tsis ua li cas; kuv muaj ib txoj kev tawm, kuv muaj nyiaj khaws cia, thiab kuv lub tsev tseem nyob ntawd. Tsis yog hais tias Vajtswv tsis xav txog tib neeg tej kev xav hauv siab thiab tsis ua raws li tej kev xav hauv siab txog sab cev nqaij daim tawv xwb lod? Txawm li cas los xij, muaj dab tsi txaus ntshai? Tib neeg ua raws li lawv tej kev xav hauv siab, muaj kev hlub nyob txhua qhov chaw hauv tib neeg ntiaj teb!” Ib lo lus “sov siab” no tsim tau “kev ua phooj ywg zoo” nyob rau hauv tib neeg, tiam sis muab Vajtswv tso rau qhov twg lawm? Muab Vajtswv tso rau qhov tseem ceeb peb los sis plaub lawm, qhov ntawd ua rau Nws dhau los ua ib tug neeg sab nraud, cuag li Vajtswv tsis yog tus uas ntseeg siab tau thiab tsuas yog tib neeg xwb thiaj li tsim nyog ntseeg siab, tsuas yog tib neeg xwb thiaj li xav txog lwm tus. Ib lo lus no tsim tau ib qho txiaj ntsig uas loj npaum li no, qhov ntawd “ncav sij hawm” heev! Nej puas nyiam mloog cov lus zoo li no? Txawm koj paub tias muaj lub siab phem zais nyob rau hauv lawv cov lus los xij, koj yeej tseem cia siab kom muaj ib tug neeg twg tuaj yeem qhia me ntsis rau koj, tuaj yeem pab koj, tuaj yeem muab ib qho kev ceeb toom rau koj los ntawm ib tug neeg uas tau ntsib dhau los lawm thaum koj tsis paub tias yav tom ntej yuav muaj dab tsi, tuaj yeem hais ib lo lus tawm hauv siab tuaj rau koj. Lo lus no mas yog “tus yawm sij tseem ceeb” heev thiab, “tseem ceeb” kawg nkaus! Qhov no tsis yog kev ntseeg lawv cov lus tag nrho lod? Cov lus “tsis xav” ntawm tus neeg tsim cov lus xaiv no tau yuav tib neeg thiab muab Vajtswv muag lawm. Qhov kev ua no zoo li cas? Nws puas zoo? (Tsis zoo.) Nej hais tus no yog hom neeg zoo li cas? Nyob rau hauv tib neeg lub qhov muag saib mas, lawv yog ib tug neeg zoo, ib tug neeg siab zoo, tiam sis nyob rau hauv cov uas to taub qhov tseeb lub qhov muag saib mas, tus tib neeg no yog ib tug tib neeg ruam feeb tsis meej. Raws li saib lawv tej kev ua thiab txoj kev coj mas, lawv ua Ntxwgnyoog ib tug tub qhe tag nrho, lawv yog ib tug dab tseem tseem! Qhov hais li no puas yog? (Yog.) Qhov hais li no mas yog heev! Tsis yuam kev ib qho me me li. Lawv rub txhua tus los ceev faj rau Vajtswv, tawm tsam Vajtswv, thiab lawv tsis hais ib lo lus uas txhawb tau tib neeg li. Vim li cas lawv thiaj li tsis hais? Vim lawv lub siab muaj kev ua yeeb ncuab thiab kev ntxub rau Vajtswv puv npo, lawv tus yam ntxwv xeeb txawm lub ntsiab tseeb yog Ntxwgnyoog li, thiab lawv yeej ib txwm tawm tsam Vajtswv thiab sawv sib cov nyom nrog Nws. Ib txhia tib neeg hais tias, “Lawv yeej ib txwm sawv sib cov nyom nrog Vajtswv, yog li ntawd vim li cas lawv tseem raws Vajtswv qab?” Xav tau tej koob hmoov xwb! Lawv xav dag kom tau qhov kawg uas tau txais koob hmoov los ntawm Vajtswv lub tsev, tiam sis lawv tsis xav them ib tug nqi twg los sis tsis caum qhov tseeb. Lawv kuj xav rhuav tshem Vajtswv, cuam tshuam cov neeg Vajtswv xaiv tseg, thiab ua rau lawv nyob deb ntawm Vajtswv thiab ntxeev siab rau Vajtswv. Ib tug tib neeg zoo li no yeej yog ib tug dab tseem tseem yam tsis muaj kev ua xyem xyav hlo li. Tiam sis qee cov tib neeg ruam yeej ib txwm pom tsis tshab thiab tsis paub txog cov tib neeg no lub ntsej muag dab. Lawv lees txais tau txhua lo lus dab uas mus raws li tib neeg tej kev xav phem thiab tej kev tim tsum ntawm tej kev xav hauv siab txog sab cev nqaij daim tawv uas cov tib neeg no hais. Nyob rau hauv kev coj mus yuam kev ntawm cov tib neeg no, lawv tuaj yeem ntxeev siab thiab tsis kam lees txais Vajtswv tau txhua lub sij hawm—tab txawm yog lawv tsis xav ua li ntawd los xij, lawv yeej tswj tsis tau tus kheej li. Ntxwgnyoog, cov dab, thiab Ntxwgnyoog cov tub qhe mas siab phem zais ntshis thiab txawj dag npaum li no! Lawv tus kheej tawm tsam Vajtswv thiab sawv sib cov nyom nrog Nws, lawv ntxub qhov tseeb thiab tsis lees txais qhov tseeb, thiab lawv haj tseem xav txwv tsis pub tib neeg coob ntxiv raws Vajtswv qab thiab caum qhov tseeb. Nyob rau hauv Vajtswv lub tsev, cov tib neeg no ua lub luag hauj lwm uas ua ib txoj kev rau Ntxwgnyoog, hais lus thiab ua hauj lwm rau Ntxwgnyoog. Lawv ua cov neeg lwj liam, uas tshwj xeeb siv los rau tib neeg kom loj hlob nyob rau hauv kev paub cais. Yog li ntawd, ntau yam uas lawv hais saib sab nraud mas zoo li tsis muaj teeb meem loj. Lawv haj tseem nquag muab Vajtswv cov lus los hais, nrhiav qee cov pov thawj thiab cov lus hais nyob rau hauv Vajtswv cov lus, thiab tom qab ntawd ntxiv qee cov lus kom zoo mloog rau, ua rau kom zoo li yam uas lawv hais ntawd mus raws li Vajtswv cov lus heev. Tiam sis muaj ib yam uas paub tseeb: Yam uas lawv hais ntawd cov nyom rau qhov tseeb. Thaum koj mloog yam uas lawv hais, tej zaum zoo li yog lawm, tiam sis yog koj ua tib zoo muab piv nrog Vajtswv cov lus, koj yuav paub cais tau tias qhov ntawd yeej tsis mus raws li qhov tseeb kiag li. Txhua cov lus uas zoo li yog tiam sis ho tsis yog uas lawv hais ntawd puav leej los ntawm Ntxwgnyoog los. Lawv tab tom sim Vajtswv, sim nrhiav qhov txhaum los ntawm Vajtswv cov lus, txhais Vajtswv cov lus yuam kev los teem txim rau Vajtswv thiab coj cov neeg Vajtswv xaiv tseg mus yuam kev, ua rau lawv kwv yees, to taub yuam kev, ntxeev siab, thiab tsis kam lees txais Vajtswv, thiab lwm yam ntxiv. Yog li ntawd, dhau ntawm cov tawm tsam khetos thiab cov tib neeg phem lawm, cov uas tsim cov lus xaiv los coj lwm tus kom mus yuam kev kuj yog ib hom tib neeg nyob rau hauv pawg ntseeg uas yuav tsum tau paub cais, ceev faj, thiab ntsaig tawm mus.

F. Kev Paub Cais Cov Tib Neeg Uas Tshaj Tawm Cov Lus Xaiv Uas Tsis Muaj Tseeb thiab Tej Hauv Paus Ntsiab Lus Rau Kev Daws Lawv

Peb yuav tsum paub cais cov tib neeg nyob rau hauv pawg ntseeg uas tsim cov lus xaiv los coj lwm tus kom mus yuam kev ntawd li cas? Ua ntej tshaj, cov uas tsim cov lus xaiv ntawd yeej tsis caum qhov tseeb kiag li; lawv tsis nyiam qhov tseeb kiag li. Tsis tas li ntawd xwb, lawv pheej tsim ntau yam lus dab thiab tej lus tsis muaj qab hau thiab siv tej ntawd los coj qee cov kwv tij thiab cov nkauj muam kom mus yuam kev thiab rub qee cov kwv tij thiab cov nkauj muam uas muaj theem ntawm sab ntsujplig me, muaj lub hauv paus tsis tob, thiab tsis to taub qhov tseeb los rau lawv sab. Qhov tshwm sim uas lawv ua tau los yog qhov cuam tshuam thiab rhuav tshem qhov raws qib raws duas uas ib txwm muaj ntawm lub neej hauv pawg ntseeg, cuam tshuam tib neeg txoj kev caum uas ib txwm muaj thiab ua rau lawv taug kev yuam kev ntawm txoj kev yog, ua rau tib neeg xav tsis zoo thiab qaug zog, thiab haj tseem ua rau lawv tso lawv tej dej num tseg thiab tsis ntseeg Vajtswv lawm—qhov no haj yam ua rau lawv zoo siab ntxiv. Yog li ntawd, qhov hu cov uas tsim cov lus xaiv tias yog Ntxwgnyoog cov tub qhe mas yog ib qho kev piav uas raug nkaus li; qhov no yog lub ntsej muag tiag thiab lub ntsiab tseem ceeb ntawm cov tib neeg zoo li no, thiab qhov ntawd yooj yim paub cais. Ib txhia tib neeg muaj laj thawj me ntsis; txawm lawv tus kheej tsis nyiam qhov tseeb los, lawv tsis hais lawv tej tswv yim tawm los sis tsis cuam tshuam txog qhov uas lwm tus caum qhov tseeb li cas. Cov tib neeg no tsis tas quav ntsej. Tiam sis ib txhia tib neeg khib thiab ntxub cov uas caum qhov tseeb; lawv pheej muaj tej kev npaj siab los txiav txim thiab tawm tsam cov caum qhov tseeb ntawd, thiab haj tseem tuav tej qho yuam kev los teem txim rau lawv. Yuav tsum ceev faj rau cov tib neeg zoo li no. Txawm yam uas cov tib neeg no hais tej zaum mloog zoo li yog heev, muaj laj thawj, thiab mus raws nraim li lub ntsiab ncaj ncaj ntawm Vajtswv cov lus los xij, thaum ua tib zoo cais, feem ntau qhov ntawd yog cov lus dag thiab lus xaiv, yog lus tsis muaj qab hau tag nrho. Tib neeg yuav tsum paub cais cov lus xaiv thiab lus dag uas zoo li yog tiam sis ho tsis yog no. Ib txhia tib neeg hais tias, “Kuv nyuam qhuav ntseeg Vajtswv tau ib ntus luv luv xwb, nyeem Vajtswv cov lus tsawg heev, thiab tsis to taub qhov tseeb. Kuv yuav ua li cas paub cais cov lus xaiv thiab lus dag?” Tib txoj hau kev ces yog, txij hnub no mus, tsom ntsoov kom ntau ntxiv rau qhov nyeem Vajtswv cov lus thiab nrhiav qhov tseeb nyob rau hauv Vajtswv cov lus kom ntau ntxiv, cia Vajtswv cov lus tuaj cag rau hauv koj lub siab. Koj muaj txoj kev coj ntawm Vajtswv cov lus thiab kev saib txhua yam raws li qhov tseeb, ces koj yuav muaj kev paub cais lawm. Cov lus xaiv uas cov tib neeg no tshaj tawm yuav ua tsis tau dab tsi rau koj thiab yuav tsis cuam tshuam koj txoj kev caum uas ib txwm muaj lawm. Txawm lawv yuav tham txog cov lus xaiv twg los sis hais tej lus tsis muaj qab hau twg los xij, koj yuav tsis qaug siab tom qab hnov tej ntawd, thiab koj yuav tsis muaj qhov qaug zog thiab xav tsis zoo, los sis haj yam yuav tsis muaj kev to taub yuam kev txog Vajtswv li; koj tsuas tsom ntsoov rau qhov caum mus rau txoj kev yog xwb. Qhov no txhais hais tias koj muaj lub zog tiv thaiv lawm—Ntxwgnyoog cov tub qhe zoo li no yuav ua tsis tau dab tsi ntxiv nyob rau hauv pawg ntseeg. Yeej tsis muaj txoj kev luv los kawm paub cais cov lus xaiv li. Tib txoj hau kev ces yog mloog lus qhuab qhia kom ntau ntxiv, nyeem Vajtswv cov lus kom ntau ntxiv, thiab sib qhia qhov tseeb kom ntau ntxiv. Thaum koj to taub qhov tseeb lawm, koj yeej yuav cia li muaj kev paub cais lawm. Lub hom phiaj ntawm kev nyeem Vajtswv cov lus thiab kev sib qhia qhov tseeb yog dab tsi? Qhov ntawd yog kom to taub qhov tseeb thiab paub cais cov lus xaiv thiab cov lus yuam kev ntawd los ntawm kev nyeem Vajtswv cov lus. Yog koj pom hais tias cov lus xaiv ntawd cov nyom thiab tawm tsam Vajtswv cov lus, uas tsis mus raws li qhov tseeb kiag li, cov lus xaiv ntawd yeej yuav cia li ploj mus xwb. Muaj tseeb tiag, ib txhia tib neeg hais tias, “Kuv tsis tau siv zog los nyeem Vajtswv cov lus thiab tsis to taub tias qhov tseeb nyob rau hauv Vajtswv cov lus yog dab tsi tiag. Kuv tsuas nco tau ib yam xwb: Nyob hauv qhov kev coj tus kheej, kuv yuav tsum ua raws sawv daws qab. Cov tib neeg feem coob tsis kam lees txais dab tsi, ces kuv kuj tsis kam lees txais thiab; cov tib neeg feem coob lees txais dab tsi, ces kuv kuj lees txais thiab. Kuv tsuas raws sawv daws qab xwb.” Qhov no puas yog? (Tsis yog.) Qee zaus sawv daws kuj yuam kev thiab, thiab qhov ua raws sawv daws qab ntawd txhais hais tias ua yuam kev nrog lawv lawm. Koj yuav tsum kawm ua raws cov uas to taub qhov tseeb; tsuas yog qhov no xwb thiaj li yog ib txoj hau kev zoo.

Qhov kev tshaj tawm tej lus xaiv uas tsis muaj tseeb ntawd yog ib yam uas nquag tshwm sim nyob rau hauv pawg ntseeg. Txawm qhov teeb meem no tsis yog ib qho teeb meem loj los xij, nws qhov kev cuam tshuam thiab kev ua phem rau cov neeg Vajtswv xaiv tseg ntawd mas tsis yog me me li. Qhov tsawg kawg nkaus mas, qhov ntawd tuaj yeem ua rau tib neeg xav tsis zoo thiab qaug zog; qhov phem tshaj plaws mas, qhov ntawd tuaj yeem ua rau tib neeg nyob deb ntawm Vajtswv thiab haj tseem ntxeev siab rau Nws thiab. Yog li ntawd, qhov tshaj tawm cov lus xaiv ntawd yeej tsis quav ntsej tsis tau li. Kiag thaum qhov ntawd tshwm sim nyob rau hauv pawg ntseeg lawm, yuav tsum tau cheem thiab txwv kiag tam sid. Yog cov thawj coj pawg ntseeg loog thiab ruam, tsis muaj peev xwm ua tau tes hauj lwm tiag tiag, thiab tsis muaj peev xwm nrhiav pom qhov teeb meem no, tiam sis qee cov tib neeg uas lub peev xwm zoo uas caum thiab to taub qhov tseeb nrhiav pom, ces cov neeg no yuav tsum sawv los daws qhov teeb meem no. Los ntawm kev nrhiav thiab kev sib qhia nrog ntau tus tib neeg kom muaj kev pom zoo thiab tau txais kev ua pov thawj, thaum paub tseeb tias qhov ntawd yog kev tshaj tawm cov lus xaiv lawm, tib neeg yuav tsum nrhiav qhov tseeb los daws qhov teeb meem no. Yog tsis paub meej tias lo lus hais ntawd puas yog ib lo lus yuam kev, ces tsis txhob lam tau lam txiav txim rau qhov ntawd yam dig muag ntsuav thiab. Rau cov lus hais uas pom tseeb thiab tsis muaj kev ua xyem xyav, uas yooj yim paub cais tias yog cov lus xaiv thiab lus yuam kev, yuav tsum muab qhia tshwm thiab txheeb xyuas kiag tam sid kom txhua tus thiaj li paub cais tej ntawd. Yog koj cais tsis tau tias yam uas ib tug neeg hais ntawd puas yog ib lo lus xaiv los sis lus yuam kev tom qab hnov lawv hais ib los sis ob kab lus, ces koj yuav tsum daws qhov ntawd yam ceev faj thiab tsis txhob lam tau lam xaus lus yam dig muag ntsuav. Tos kom txog thaum lawv hais lus tag thiaj li paub cais tau meej. Kiag thaum paub tseeb tias yog ib lo lus xaiv los sis lus yuam kev lawm, ces yuav tsum cheem thiab txwv tus tib neeg no kiag tam sid. Yog qhov kev ntuas thiab kev txwv ntau zaus los txwv tsis tau lawv li, thiab lawv tseem pheej tshaj tawm cov lus xaiv tas li, ces lawv yuav tsum raug ntsaig tawm ntawm pawg ntseeg mus. Lub hauv paus ntsiab lus thiab txoj kev puas meej txog qhov tias yuav ua li cas thiab yuav ua raws li cas thaum pom ib tug neeg tshaj tawm cov lus xaiv nyob rau hauv pawg ntseeg lawm? (Meej lawm.)

Lub ntsiab lus ntawm cov lus xaiv tsis yog tsuas ntsig txog rau cov teeb meem loj uas Kuv tau hais ntawd xwb; tseem muaj qee cov lus xaiv uas yog tej yam me me thiab, xws li cov lus hais txog kev raug ntuas, los sis txog Vajtswv lub tsev siv cov neeg zoo li cas thiab muab cov neeg zoo li cas pov tseg, thiab lwm cov lus hais uas tsis muaj tseeb. Ua ntej pawg ntseeg raug yaug kom dawb huv tag nrho ntawd, muaj cov thawj coj cuav, cov tawm tsam khetos, ntau hom tib neeg phem, cov tib neeg feeb tsis meej, cov tib neeg ruam uas tsis muaj kev to taub ntawm sab ntsujplig—muaj txhua hom tib neeg nyob rau hauv. Cov neeg dag thiab cov neeg tsim cov lus xaiv yog ib qho uas nquag pom, thiab muaj txhua hom lus xaiv thiab tej lus dab nyob rau hauv cov tib neeg. Hais txog cov lus xaiv no, ib qho mas, tib neeg tim tsum muaj qhov laj thawj uas ib txwm muaj los txiav txim rau tej ntawd; lwm qhov mas, rau cov lus xaiv uas hnyav dua uas ntsig txog Vajtswv tes hauj lwm, Vajtswv txoj kev npaj tswj hwm, Vajtswv Tus Kheej, thiab haj tseem yog tej kev cai tswj fwm ntawm Vajtswv lub tsev thiab lwm yam teeb meem ntxiv, tib neeg tim tsum muaj qhov tseeb los paub cais tej no. Rau tej teeb meem sab nraud, tib neeg tim tsum muaj lub laj thawj ntawm kev ua neeg li ib txwm los txiav txim rau tej ntawd. Rau tej teeb meem uas ntsig txog Vajtswv tes hauj lwm thiab qhov tseeb, tib neeg yuav tsum muaj qhov tseeb qhov muaj tiag thiab theem ntawm sab ntsujplig los paub cais tej ntawd. Muab hais luv luv tias, txawm yog hom lus xaiv twg los xij, tib neeg yuav tsum paub cais thiab tsis kam lees txais tej ntawd, tsis txhob lees txais tej ntawd. Muaj tseeb tiag, ib txhia tib neeg tsis caum qhov tseeb thiab tsuas ua neej nyob raws li cov lus xaiv no xwb. Hnub no, muaj neeg tshaj tawm ib lo lus thiab qhov ntawd ua ib nthwv cua tshuab tuaj mus rau ib sab, ces cov tib neeg no txawm raws qhov ntawd qab mus lawm. Tag kis, lwm lo lus ua ib nthwv cua tshuab mus rau lwm sab, ces lawv kuj raws qhov ntawd qab mus lawm thiab. Piv txwv li, ib txhia thawj coj los sis neeg ua hauj lwm hais tias cov uas sau tau cov ntawv lus tim khawv tuaj yeem raug ua kom zoo tiav log, yog li ntawd lawv xyaum sau ntawv, kawm sau ntawv, thiab nrhiav tej ntaub ntawv. Hnub tom qab, lwm tus thawj coj los sis neeg ua hauj lwm hais tias cov uas ua lawv tes dej num tuaj yeem raug cawm dim, yog li ntawd lawv pib ua maj heev rau kev ua lawv tes dej num. Tiam sis txawm lawv yuav khwv npaum li cas los xij, lawv yeej tsis txhawj xeeb txog los sis tsis nyiam yam uas tseem ceeb tshaj plaws: txoj kev caum qhov tseeb thiab kev nkag mus rau hauv lub neej txoj sia. Ntau yam cua phem uas tsim los ntawm ntau pab pawg nyob rau hauv pawg ntseeg yeej ib txwm tshuab qee tus tib neeg mus. Ntau yam lus xaiv uas tsim los ntawm cov tswv cuab hauv pawg ntseeg yeej ib txwm coj qee tus tib neeg mus yuam kev thiab cuam tshuam qee tus tib neeg. Txawm li cas los xij, kuj muaj qee tus tib neeg uas tsis cuab pob ntseg thiab tsis quav ntsej rau cov lus xaiv uas lawv hnov no. Lawv tsis quav ntsej txog txhua yam hauj lwm uas Vajtswv lub tsev tab tom ua; lawv tsis nyiam txoj kev ntseeg Vajtswv thiab tsis yog cov ntseeg tiag tiag. Cov tib neeg no yog cov ntseeg lub npe xwb. Kuj muaj lwm pab neeg uas zoo dua me ntsis; lawv tuaj yeem nrhiav qhov tseeb thiab lees txais qhov tseeb, yog li ntawd lawv tsis raug cuam tshuam los ntawm tej yam uas tsis zoo thiab cov tib neeg uas tsis zoo no. Tsuas yog cov uas muaj theem ntawm sab ntsujplig me, tsis muaj lub hauv paus, thiab cov uas tsis caum qhov tseeb kiag li thiaj li pheej raug cuam tshuam los ntawm ntau yam lus hais thiab tej lus xwb. Vim cov tib neeg no pheej raws qab mus, es thiaj li pheej muaj ib txhia uas tsim ntau yam lus xaiv los tsim kev kub ntxhov. Lawv xav tias tsuas yog qhov no xwb thiaj li ua rau txoj kev ntseeg Vajtswv lom zem thiab zoo siab, thiab tsis dhuav neeg, thiab qhov ntawd thiaj li yog tib txoj hau kev rau lawv mloog zoo li tseem ceeb xwb. Tej no nquag tshwm sim nyob rau hauv cov ntseeg tshiab. Yog ib lub pawg ntseeg muaj puv nkaus kev tshaj tawm cov lus xaiv thiab tib neeg raug coj mus yuam kev, qhov ntawd txhais hais tias yeej muaj cov tib neeg uas to taub qhov tseeb tsawg heev nyob rau hauv lub pawg ntseeg ntawd. Nyob rau hauv pawg ntseeg mas, cov tib neeg uas tau hais los saum no ua raws li txhua cov lus xaiv thiab txhua yam kev yaum phem uas cov uas muaj kev npaj siab phem zais ntshis tsim los, uas muaj teeb meem heev. Qhov no ib feem yog vim lub peev xwm tsis zoo thiab kuj yog ib qho kev qhia tshwm tiag tiag ntawm qhov tsis to taub qhov tseeb. Feem ntau ntawm yam uas txhua tus uas tsis to taub qhov tseeb hais ntawd mas tsis muaj tiag thiab muaj kev sib xyaw nrog tej yam tsis huv; muab hais kom nruj mas, qhov ntawd puav leej yog cov lus dag. Yog qhov ntawd muaj tej kev npaj siab thiab tej hom phiaj, ces qhov ntawd tsis tsuas yog ib lo lus dag xwb tiam sis haj yam yog ib lub tswv yim phem ntawm Ntxwgnyoog thiab ib qho kev npaj zais ntshis ntawm cov tib neeg phem. Yog li ntawd, feem ntau ntawm yam uas cov tib neeg tsis muaj qhov tseeb hais ntawd yog tej lus dab thiab tsis txaus ntseeg.

Qhov kev sib qhia txog lub ncauj lus uas tshaj tawm tej lus xaiv uas tsis muaj tseeb ntawd los xaus li no. Qhov teeb meem ntawm kev tshaj tawm cov lus xaiv no yog qhov uas nthuav tawm tib neeg tshaj plaws, thiab qhov ntawd ua rau pom tau meej txog tej kev coj ntawm ntau hom neeg. Tam sim no nej tsim nyog to taub tias yuav muaj tus cwj pwm zoo li cas rau cov lus xaiv thiab cov uas tshaj tawm cov lus xaiv ntawd, thiab yuav siv txoj hau kev twg los daws tej ntawd, puas yog? (Yog.) Thaum nej to taub lawm, thaum nej ntsib tej teeb meem zoo li no dua, nej yuav tsum muab tej ntawd los piv nrog peb txoj kev sib qhia, thiab siv txoj hau kev uas yog tshaj plaws los daws cov teeb meem no. Qhov no mus raws li tej hauv paus ntsiab lus.

Lub Xya Hli Hnub Tim 17, Xyoo 2021