Cov Thawj Coj thiab Cov Neeg Ua Hauj Lwm Tej Luag Hauj Lwm (25)
Yam Kaum Plaub: Paub Cais Kom Ncav Sij Hawm, thiab Tom Qab Ntawd Muab Txhua Hom Tib Neeg Phem thiab Cov Tawm Tsam Khetos Ntsaig Tawm Mus los sis Ntiab Tawm Mus (Ntu Plaub)
Cov Qauv thiab Cov Hauv Paus Rau Kev Paub Cais Ntau Hom Tib Neeg Phem
Hnub no, peb sib qhia txuas ntxiv txog cov thawj coj thiab cov neeg ua hauj lwm lub luag hauj lwm kaum plaub: “Paub cais kom ncav sij hawm, thiab tom qab ntawd muab txhua hom tib neeg phem thiab cov tawm tsam khetos ntsaig tawm mus los sis ntiab tawm mus.” Ob peb zaug tas los ntawd, peb tau sib qhia txog ob peb lub ntsiab lus uas cov thawj coj thiab cov neeg ua hauj lwm yuav tsum paub cais, nrog rau tej qhov tseeb uas tseem ceeb uas lawv yuav tsum to taub, thaum ua tes hauj lwm no; qhov ntawd yog, peb tau sib qhia txog seb yuav paub cais txhua hom tib neeg phem li cas. Yuav tshab txhais txhua hom tib neeg phem li cas? Lawv yog cov uas nkag zais ntshis los rau hauv Vajtswv lub tsev los ntawm txoj kev ua txuj tias ntseeg Vajtswv, tiam sis lawv tsis lees txais qhov tseeb thiab haj tseem cuam tshuam pawg ntseeg tes hauj lwm thiab; txhua tus neeg zoo li no puav leej raug muab tso rau hauv pab pawg tib neeg phem. Lawv yog cov uas pawg ntseeg yuav tsum tau ntsaig tawm mus los sis ntiab tawm mus; uas hais tau tias, cov uas tsis pub kom muaj nyob rau hauv pawg ntseeg. Peb muab txhua hom tib neeg phem faib thiab txheeb xyuas los ntawm peb qho qauv tseem ceeb. Peb qho qauv no yog dab tsi? Qhov ib yog lub hom phiaj rau kev ntseeg Vajtswv. Qhov ob yog txoj kev ua neeg—los ntawm qhov txheeb xyuas txoj kev ua neeg los paub cais thiab pom kom meej seb lawv puas nyob rau hauv cov uas pawg ntseeg yuav tsum ntsaig tawm mus. Qhov qauv peb yog dab tsi? (Tus cwj pwm uas muaj rau tej dej num.) Tus cwj pwm uas muaj rau tej dej num yog qhov qauv peb. Qhov qauv ib twb tau sib qhia dhau los ntawd lawm. Hais txog qhov qauv ob—txoj kev ua neeg—tau sib qhia ob lub ntsiab lus lawm. Lub ntsiab lus ib yog dab tsi? (Nyiam ntxeev qhov tseeb thiab qhov cuav.) Thiab qhov ob ne? (Nyiam tau txiaj ntsim dawb.) Los ntawm cov ntsiab lus ntawm ob qho no mas, tej zaum zoo li tsis txaus yuav suav tias yog tej kev qhia tshwm ntawm cov tib neeg phem, tiam sis raws li tej kev qhia tshwm ntxaws ntxaws uas Kuv tau qhia dhau los ntawd, ob hom tib neeg no tau ntseeg Vajtswv ntau xyoo yam tsis muaj kev hloov dua siab tshiab tiag tiag li; lawv ntau yam kev qhia tshwm twb ua rau muaj kev cuam tshuam thiab kev rhuav tshem rau lub neej hauv pawg ntseeg, rau txoj kev nkag mus rau hauv lub neej txoj sia ntawm cov neeg Vajtswv xaiv tseg, thiab rau tej kev sib raug zoo nyob nruab nrab ntawm cov neeg Vajtswv xaiv tseg lawm. Raws li lawv tej kev qhia tshwm thiab raws li lawv tus yam ntxwv xeeb txawm lub ntsiab tseeb, ob hom tib neeg no yuav tsum muab tso rau hauv pab pawg tib neeg phem. Cov thawj coj pawg ntseeg thiab cov neeg Vajtswv xaiv tseg yuav tsum paub cais thiab txiav txim txog lawv, thiab ntsaig lawv tawm mus kom ncav sij hawm. Qhov no puas tsim nyog? (Tsim nyog.) Qhov no yeej tsim nyog kawg nkaus li lawm. Ob hom tib neeg no txoj kev coj nyob hauv pawg ntseeg mas muaj kev cuam tshuam phem heev; lawv tsis nyiam qhov tseeb ib qho me me li, thiab lawv kuj tsis zwm rau Vajtswv tes hauj lwm kiag li thiab. Nyob hauv cov kwv tij thiab cov nkauj muam mas, lawv qhov kev ua neej ntawd zoo ib yam cov neeg ib txwm tsis ntseeg; lawv nquag hais lus dag thiab dag lwm tus, ua lawv tej dej num ua dog ua dig thiab tsis muaj kev ris lub luag hauj lwm ib qho me me li, thiab tsis hloov txawm yog tau ntuas ntau zaus los xij. Lawv tsis yog cuam tshuam rau lub neej hauv pawg ntseeg xwb tiam sis haj tseem cuam tshuam pawg ntseeg tes hauj lwm hnyav heev thiab. Yeej tsis tas ua xyem xyav li, lawv nyob hauv cov uas pawg ntseeg yuav tsum ntsaig tawm mus los sis ntiab tawm mus, thiab yeej tsim nyog kawg nkaus uas txiav txim lawv ua cov tib neeg phem thiab muab lawv tso rau hauv pab pawg tib neeg zoo li no—qhov ua li no yeej tsis dhau kiag li. Hais txog hom ib, cov uas nyiam ntxeev qhov tseeb thiab qhov cuav, lawv qhov teeb meem tsis yog yooj yim xws li hais tej lus uas tsis tshua tsim nyog, los sis muaj teeb meem sib txuas lus nrog lwm tus, thiab lwm yam, tiam sis, yog ib qho teeb meem ntawm lawv tus moj yam. Nyob rau theem uas tob dua, qhov teeb meem ntawm lawv tus moj yam yog qhov teeb meem ntawm lawv tus yam ntxwv xeeb txawm lub ntsiab tseeb. Nyob rau theem uas ntiav, qhov ntawd yog qhov teeb meem ntawm lawv txoj kev ua neeg; uas hais tau tias, lawv txoj kev ua neeg mas lim hiam thiab qias heev, ua rau lawv tsis muaj peev xwm sib raug zoo nrog lwm tus li ib txwm. Lawv tsis yog tsis muaj tej kev qhia tshwm uas zoo xws li kev pub, kev pab, los sis lub siab hlub lwm tus xwb, tiam sis lawv tej kev ua thiab txoj kev coj puav leej yog ua los cuam tshuam, ua puas tsuaj, thiab rhuav tshem. Yog ib txhia tib neeg ib txwm nyiam ntxeev qhov tseeb thiab qhov cuav, thiab pheej ua li no txawm yog ua qhib lug los sis ua zais ntshis los xij, ua rau muaj kev cuam tshuam phem heev rau pawg ntseeg tes hauj lwm thiab rau cov kwv tij thiab cov nkauj muam, ces lawv nyob hauv cov uas pawg ntseeg yuav tsum muab ntsaig tawm mus. Lwm hom ces yog cov uas nyiam tau txiaj ntsim dawb. Txawm yog nyob rau qhov xwm txheej twg los xij, lawv pheej nrhiav kev kom tau txiaj ntsim dawb, lawv lub qhov muag pheej tsom ntsoov rau lawv tus kheej tej txiaj ntsim xwb. Lawv tsis tsom ntsoov rau txoj kev nkag mus rau hauv qhov tseeb qhov muaj tiag, los sis muab lawv tej dej num ua kom zoo los sis ua lawv tus kheej tej luag hauj lwm kom tiav. Tseem tshaj ntawd ntxiv, lawv tsis tsom ntsoov rau kev sib raug zoo nrog cov kwv tij thiab cov nkauj muam li ib txwm, muab lwm tus tej kev zoo los pab rau lawv tej kev ua tsis tau zoo thiab tsim tej kev sib raug zoo uas ib txwm muaj, los sis ua lub neej hauv pawg ntseeg li ib txwm muaj. Lawv tsis tsom ntsoov rau tej no li—lawv tsuas tuaj rau hauv pawg ntseeg thiab nyob hauv cov kwv tij thiab cov nkauj muam los nrhiav kom tau txiaj ntsim dawb xwb. Tsuav lawv tseem nyob hauv pawg ntseeg, thiab tsuav cov kwv tij thiab cov nkauj muam tseem sib cuag nrog lawv xwb, ces cov kwv tij thiab cov nkauj muam yeej yuav hnov tsis xis nyob hauv lub siab. Tsis yog cov kwv tij thiab cov nkauj muam hnov tsis nyiam lawv tej kev ua thiab txoj kev coj kiag li xwb, tiam sis qhov tseem ceeb, lawv nquag raug cuam tshuam thiab raug txwv nyob hauv lub siab mus txog rau ib theem loj heev. “Ib theem loj heev” no hais txog dab tsi? Qhov ntawd txhais hais tias nyob rau hauv tej xwm txheej hauv lub neej tiag tiag, thaum ntsib kev thab plaub los ntawm cov neeg tsis ntseeg los sis cov tib neeg phem, ib txhia tib neeg raug txwv los ntawm lawv tej kev xav hauv siab thiab tsis muaj peev xwm khiav dim, hos lwm tus, txawm tsis nyiam los xij, tsis kam hais tawm tiam sis pheej hnov raug txwv thiab tsis muaj kev thaj yeeb nyob hauv lub siab. Qhov no tsis yog ib qho kev cuam tshuam hnyav rau cov kwv tij thiab cov nkauj muam lod? (Yog.) Yog li ntawd, cov neeg Vajtswv xaiv tseg yuav tsum paub cais ob hom tib neeg no; txhua tus uas raug cais ua cov tib neeg phem puav leej nyob hauv cov uas pawg ntseeg yuav tsum muab ntsaig tawm mus. Tej hauv paus ntsiab lus ntxaws ntxaws rau kev saib xyuas cov tib neeg zoo li no twb tau sib qhia nyob rau qhov kev sib txoos ua ke zaum tas los lawm, yog li ntawd yuav tsis muaj kev sib qhia ntxaws ntxaws txog tej ntawd ntxiv rau tam sim no lawm. Muab hais luv luv hais tias, ob hom tib neeg uas tau sib qhia txog saum toj no tsis yog tau ua rau muaj kev cuam tshuam rau cov kwv tij thiab cov nkauj muam lub neej hauv pawg ntseeg xwb, tiam sis kuj yog rau qhov raws qib raws duas ntawm kev ua lawv tej dej num thiab; qee leej txoj kev coj ua haj tseem yooj yim ua rau ib txhia neeg uas nyuam qhuav ntseeg uas tsis muaj lub hauv paus vau thiab. Yog li ntawd, raws li tej kev thiab tej hau kev uas lawv ua, nrog rau ntau yam kev qhia tshwm ntawm lawv txoj kev ua neeg thiab tej qhov tshwm sim los phem uas tej kev qhia tshwm no ua rau muaj, ob hom tib neeg no nyob hauv cov uas yuav tsum tau muab ntsaig tawm mus, thiab qhov muab lawv tso rau hauv pab pawg tib neeg phem ntawd yeej tsis dhau kiag li. Txawm hais tias cov uas nyiam ntxeev qhov tseeb thiab qhov cuav, cov uas nyiam tau txiaj ntsim dawb ntawd tej kev coj tej zaum yuav tsis zoo li ntxhib los sis tsiv nyaum cuag li cov tib neeg phem uas tau tshab txhais nyob hauv tib neeg tej kev xav phem los xij—txawm hais tias lawv tsis muaj tej kev qhia tshwm uas pom tau meej zoo li ntawd los xij—tej qhov tshwm sim los phem ntawm lawv txoj kev coj thiab lawv txoj kev ua neeg cheem tsum kom muab lawv ntsaig tawm ntawm pawg ntseeg mus. Tej no yog tej kev qhia tshwm ntawm ob hom tib neeg, thiab yog cov hauv paus ntsiab lus rau kev daws lawv, uas tau sib qhia zaum tas los ntawd.
II. Raws Li Txoj Kev Ua Neeg
C. Ua Neej Ywj Siab thiab Tsis Muaj Kev Txwv
Hnub no, peb sib qhia txuas ntxiv txog tej kev qhia tshwm ntawm ob peb hom tib neeg ntxiv uas ntsig txog lawv txoj kev ua neeg, pib ntawm hom tib neeg thib peb. Ib tug yam ntxwv tseem ceeb ntawm cov tib neeg no txoj kev ua neeg yog dab tsi? Qhov ntawd yog qhov ua neej ywj siab thiab tsis muaj kev txwv. Qhov kev to taub txog kev ua neej ywj siab thiab tsis muaj kev txwv raws li cov lus no mas yooj yim heev; qhov ntawd txhais hais tias cov tib neeg no txoj kev coj, kev coj cwj pwm, thiab kev hais lus saib mas tsis paub cai—lawv tsis yog cov tib neeg uas tsim txiaj thiab tsim nyog. Qhov no yog ib qho kev to taub uas yog lub hauv paus txog tej kev qhia tshwm ntawm hom tib neeg no. Nyob hauv pawg ntseeg, yeej zam tsis tau tias ib txhia tib neeg tej kev xam pom txog txoj kev ntseeg Vajtswv thiab tej kev uas lawv caum ntawd yuav muaj tej qhov tsis tshua ncaj los sis tej kev yuam kev. Lawv tej kev hais lus thiab kev coj cwj pwm mas tsis muaj kev hwm ib qho li, lawv tej kev qhia tshwm hauv lub neej thiab tus cwj pwm ua neeg ntawm lawv txoj kev ua neeg yeej tsis tau raws li txoj kev coj tsim nyog ntawm cov neeg dawb huv kiag li, thiab lawv tsis muaj lub siab hwm thiab ntshai Vajtswv ib qho me me li. Muab hais tag nrho, lawv tej kev hais lus, txoj kev coj, thiab kev coj cwj pwm tsuas tuaj yeem muab piav tias yog ua neej ywj siab thiab tsis muaj kev txwv xwb. Muaj tseeb tiag, tej kev qhia tshwm ntxaws ntxaws mas muaj ntau heev, txhua tus yeej pom tau, thiab yooj yim paub cais. Cov tib neeg no zoo ib yam li cov tsis ntseeg thiab cov ib txwm tsis ntseeg; muab hais kom ntxaws mas, lawv qhia tawm txoj kev coj uas ua neej ywj siab tshwj xeeb. Thaum hais txog tej kev sib txoos ua ke, lawv tej khaub ncaws thiab kev tu cev mas lam tau lam ua heev. Ib txhia tsis tu lawv tus kheej ua ntej tawm hauv tsev, plaub hau los twb tsis ntsis ntsej muag los twb tsis ntxuav, tso plaub hau ntxhov hnyo cia li mus sib txoos ua ke. Ib txhia hnav khaub ncaws tsis zoo saib, rau nkawm khau khiab uas tu tu los sis haj tseem hnav cov khaub ncaws pw tuaj sib txoos ua ke. Lwm cov ua neej qias neeg, tsis quav ntsej txog kev tu cev kom huv, thiab hnav cov khaub ncaws qias neeg tuaj sib txoos ua ke los yeej tsis quav ntsej li. Cov tib neeg no coj rau tej kev sib txoos ua ke yam ua dog ua dig tshwj xeeb, zoo nkaus li mus cuav zos tom ib tug neeg ze tsev lub tsev, tsis muab saib ua qhov tseem ceeb. Thaum sib txoos ua ke, lawv tej kev hais lus thiab kev coj cwj pwm kuj tsis muaj kev txwv li thiab, thiab lawv hais lus nrov nrov yam tsis xav txog lwm tus, haj tseem zoo siab heev thiab ua tes ua taw vwm ntsuav thaum lawv zoo siab, thiab qhia tawm txoj kev ua neej ywj siab tshwj xeeb. Txawm yuav muaj pes tsawg tus neeg nyob ntawd los xij, lawv luag, tso dag, thiab piav tes piav taw, zaum qhaib ceg, thiab ua cuag nkaus li lawv nyob siab dua txhua tus; lawv khav theeb tshwj xeeb thiab haj tseem khav txiv thiab, yeej tsis ntsia leej twg lub qhov muag ncaj qha thaum hais lus rau lawv li, lawv lub qhov muag tsuas ntsia mus ntsia los xwb. Qhov no tsis yog ua neej ywj siab lod? (Yog.) Qhov ntawd yog ua neej ywj siab tshwj xeeb thiab tsis muaj kev txwv ib qho me me li. Muaj tseeb tiag, cov ib txwm tsis ntseeg tej zaum yuav muab cov tib neeg no tej kev hais lus thiab kev coj cwj pwm xam tias yog vim tsis tau txais kev qhia zoo, tiam sis peb to taub txawv; qhov no tsis yog ib qho teeb meem ntawm kev tsis tau txais kev qhia zoo xwb. Tam li yog cov neeg loj lawm, yus yuav tsum paub meej txog txoj kev uas yog thiab tsim nyog los hais lus, coj cwj pwm, thiab txuas lus nrog lwm tus—tshwj xeeb yog, yuav tsum paub tias yuav ua li cas thiaj li mus raws li txoj kev coj tsim nyog ntawm cov neeg dawb huv, uas txhawb tau cov kwv tij thiab cov nkauj muam, thiab yog txoj kev ua neeg li ib txwm—yam tsis tas kom lwm tus qhia. Tshwj xeeb yog thaum ua lub neej hauv pawg ntseeg, nyob rau ntawm cov kwv tij thiab cov nkauj muam lub xub ntiag, txawm hais tias tsis tas yuav ua txuj los, yuav tsum muaj kev txwv. Yog li ntawd, qhov ntsuas thiab tus qauv uas cheem tsum ntawm txoj kev txwv no yog dab tsi? Qhov ntawd yog kom mus raws li txoj kev coj tsim nyog ntawm cov neeg dawb huv. Yus tej khaub ncaws thiab kev hnav yuav tsum muaj qhov tsim txiaj thiab tsim nyog, zam kev hnav cov khaub ncaws txawv txawv. Nyob rau ntawm Vajtswv lub xub ntiag, ib tug neeg yuav tsum muaj kev hwm, thiab tsis txhob piav tes piav taw; muaj tseeb tiag, nyob rau ntawm lwm tus lub xub ntiag lawv los kuj yuav tsum muaj kev hwm thiab muaj qhov zoo nkaus li tib neeg, kom lwm tus pom tias tsim nyog, muaj txiaj ntsig, thiab txhawb lwm tus. Qhov no yog yam uas ua rau Vajtswv txaus siab. Cov uas ua neej ywj siab thiab tsis muaj kev txwv ntawd yeej tsis quav ntsej rau txoj kev ua neej uas yog lub hauv paus tshaj plaws ntawm txoj kev ua neeg me me li, thiab ib qho laj thawj meej meej rau lawv txoj kev tsis quav ntsej ntawd yog lawv yeej tsis paub kiag li tias seb yuav ua ib tug neeg muaj kev hwm li cas los sis ib tug neeg uas muaj kev coj ncaj ncees thiab muaj meej mom uas ua rau lwm tus hwm; lawv yeej tsis to taub tej no kiag li. Yog li ntawd, txawm hais tias pawg ntseeg tau teem thiab cheem tsum ntau zaus kom hnav khaub ncaws kom du dais, tsim txiaj, thiab tsim nyog thaum sib txoos ua ke, yam tsis hnav cov khaub ncaws txawv txawv, tiam sis lawv tseem tsis muab cov kev cai no saib ua qhov tseem ceeb, nquag tuaj txog yam rau khau khiab, tso plaub hau ntxhov hnyo, los sis haj tseem hnav cov khaub ncaws pw thiab. Qhov no yog ib qho kev qhia tshwm ntawm cov uas ua neej ywj siab thiab tsis muaj kev txwv ntawd.
Cov uas ua neej ywj siab thiab tsis muaj kev txwv ntawd qhia tawm lwm txoj kev coj, uas yog hnav khaub ncaws raws zam thiab pleev ntsej muag tuab tuab, ntxim ntxias siab heev thaum sib txoos ua ke. Ob hnub ua ntej txhua qhov kev sib txoos ua ke lawv twb pib tu cev thiab hnav khaub ncaws kom zoo nkauj lawm, ua tib zoo xav seb yuav pleev ntsej muag li cas, yuav coj tej saw tej nplaib twg, yuav ua plaub hau zoo li cas, yuav hnav cov khaub ncaws twg, yuav ev lub hnab twg, thiab yuav rau nkawm khau twg. Ib txhia poj niam mas haj tseem pleev di ncauj, pleev qhov muag, thiab pleev qhov ntswg kom ntxim ntxias siab thiab, thiab qhov uas hnyav dua ntawd, ib txhia hnav khaub ncaws thiab tu lawv tus kheej kom ntxim ntxias neeg heev, hnav khaub ncaws pom xwb pwg thiab nraub qaum, hnav cov khaub ncaws txawv txawv. Thaum sib txoos ua ke, lawv tsis ua tib zoo mloog cov kwv tij thiab cov nkauj muam txoj kev sib qhia, thiab lawv kuj tsis thov Vajtswv thiab; lawv haj yam tsis koom nrog txoj kev sib qhia los sis qhia txog lawv tus kheej txoj kev to taub thiab cov lus tim khawv uas hais txog txoj kev ntsib kev pom. Tiam sis, lawv muab lawv tus kheej piv nrog txhua tus, quav ntsej txog seb leej twg hnav khaub ncaws zoo dua los sis tsis zoo npaum lawv, leej twg hnav cov khaub ncaws muaj npe uas nrov tshwj xeeb, leej twg hnav cov khaub ncaws pheej yig uas muag tom ntug kev, leej twg lub kauj toog npab tus nqi pes tsawg, thiab lwm yam ntxiv; lawv tsuas tsom ntsoov rau tej yam no xwb, haj tseem nquag hais tej lus no tawm yam qhib lug thiab. Los ntawm tej uas cov tib neeg no coj thiab hnav, nrog rau txoj kev hais lus, txoj kev coj, thiab kev coj cwj pwm, yeej pom tseeb hais tias qhov lawv koom nrog lub neej hauv pawg ntseeg thiab qhov lawv sib cuag nrog cov kwv tij thiab cov nkauj muam ntawd tsis yog txhawm rau kom to taub qhov tseeb, thiab haj yam tsis yog txhawm rau txoj kev caum kev nkag mus rau hauv lub neej txoj sia kom ua tau kom muaj kev hloov nyob rau hauv tus moj yam; tiam sis, lawv siv lub sij hawm thaum sib txoos ua ke los khav txog lawv txoj kev xyiv fab rau nyiaj txiag thiab lub neej ntawm sab nqaij tawv. Ib txhia tib neeg tuaj rau tom cov chaw sib txoos ua ke hnav cov khaub ncaws muaj npe tuaj khav txog, ua raws nkaus li lawv tej kev ntshaw rau kev hnav khaub ncaws raws zam thiab tej kev nrov hauv lub zej zog nyob rau hauv cov kwv tij thiab cov nkauj muam, ntxias lwm tus kom caum tej kev nrov no thiab ua kom lwm tus ntshaw thiab saib lawv rau qhov siab. Txawm hais tias pom qee cov kwv tij thiab cov nkauj muam lub qhov muag thiab tus cwj pwm uas tsis nyiam lawv kiag li los xij, lawv tseem tsis quav ntsej li, ua tej yam raws li lawv tus kheej txoj kev txuas ntxiv, rau cov khau luj siab, thiab ev cov hnab uas muaj npe. Ib txhia haj tseem sim ua txuj ua cov neeg muaj nyiaj, tsuag cov tshuaj tsw qab uas tsis zoo tuaj sib txoos ua ke, ua rau tom qab lawv nkag los hauv tsev cov tshuaj tsw qab, tshuaj pleev plhu, thiab roj pleev plaub hau sib xyaws ua ke ua ib qho ntshawb qhov ntswg thiab tsw phem. Ntau tus neeg uas tuaj koom kev sib txoos ua ke mas npau taws tiam sis tsis kam hais tawm, hnov xeev siab thaum pom cov tib neeg no, thiab cov uas ntseeg Vajtswv tseeb tiag mas nyob deb ntawm lawv. Txawm tej lawv coj thiab hnav thiab kev tu cev yuav muaj tsim dua me ntsis los sis yooj yim dua me ntsis los xij, tus yam ntxwv tseem ceeb ntawm cov tib neeg zoo li no yog lawv txoj kev hais lus, txoj kev coj, kev coj cwj pwm, thiab kev ua neej uas ywj siab thiab tsis muaj kev txwv tshwj xeeb, tsis yog thaum sib txoos ua ke xwb tiam sis kuj nyob rau hauv lawv txoj kev sib cuag niaj hnub nrog cov kwv tij thiab cov nkauj muam los sis nyob rau hauv lawv lub neej txhua hnub thiab. Muab hais kom meej, lawv ua neej ywj siab tshwj xeeb, tsis muaj kev txwv ib qho me me li. Lawv lub neej txhua hnub tsis muaj txheej txheem li ib txwm muaj; lawv xav hais dab tsi los hais, lam tau lam ua thiab ua raws li lawv lub siab nyiam, yeej tsis tham txog lawv tus kheej tej kev ntsib kev pom, tsis tshua qhia txog lawv txoj kev to taub txog Vajtswv cov lus, thiab tsis tshua tham txog tej kev nyuaj uas ntsib thaum ua lawv tej dej num. Lawv tsuas tham txog cov ncauj lus twg xwb? Tsuas tham txog tej kev nrov hauv lub zej zog, kev hnav khaub ncaws raws zam, zaub mov qab, lub neej ntiag tug ntawm cov neeg muaj npe hauv lub zej zog thiab haj tseem yog cov nrov npe thiab, thiab tej dab neeg txawv txawv thiab tej xwm txheej hauv lub zej zog. Los ntawm lawv tej kev nthuav tawm uas cia li muaj no, yeej tsis nyuaj pom hais tias cov tib neeg zoo li no txoj kev ntseeg Vajtswv tsuas yog lam ua kom dhau hnub hauv lub neej xwb. Lawv lub neej tsom ntsoov tag nrho rau kev noj, kev haus, thiab kev lom zem, tsis yog rau tej yam xws li ua lub neej hauv pawg ntseeg, ua lawv tes dej num, los sis caum qhov tseeb. Lub ntsiab ntawm qhov “ua neej ywj siab thiab tsis muaj kev txwv” yog hais tias cov tib neeg no txoj kev ua neej, yam uas lawv ua neej nyob rau hauv txoj kev ua neeg, thiab kuj yog lawv tej kev saib xyuas rau txhua yam, kev coj rau lwm tus, thiab kev sib raug zoo nrog lwm tus puav leej yog ua neej ywj siab thiab tsis muaj kev txwv. Lawv nquag xyaum hais cov lus uas neeg nyiam hais hauv lub zej zog; tsis hais cov kwv tij thiab cov nkauj muam puas nyiam mloog los sis puas to taub tau li, cov tib neeg no tsuas pheej hais xwb. Lawv haj tseem nquag xyaum cov lus ntawm qee cov neeg muaj suab npe hauv lub zej zog thiab cov neeg hu nkauj thiab cov neeg ua yeeb yaj kiab uas muaj npe nrov. Hais txog cov lus zoo uas nquag siv hauv Vajtswv lub tsev thiab nyob hauv cov kwv tij thiab cov nkauj muam, lawv yeej tsis nyiam kiag li; lawv yeej tsis sib qhia txog qhov tseeb nyob rau hauv lawv lub neej txhua hnub li. Yam uas lawv pe hawm yog tej kev nrov hauv ntiaj teb; ntau hom neeg muaj suab npe thiab nrov npe yog cov uas lawv pe hawm thiab xyaum raws. Piv txwv li, lawv kawm tau cov nqe lus thiab cov lus hais uas neeg nyiam hais hauv os lais sai heev thiab muab coj los siv rau hauv lawv lub neej thiab hauv kev nrog cov kwv tij thiab cov nkauj muam sib tham. Muaj tseeb tiag, cov lus no yeej tsis yog tej yam uas zoo los sis txhawb lwm tus li; tej ntawd puav leej yog tej yam tsis zoo, tsis muaj nqis thiab haj yam tsis muaj qhov tseem ceeb dab tsi rau cov uas ntseeg Vajtswv. Tej ntawd yog cov lus uas neeg nyiam hais uas tsim los ntawm cov noob neej uas qias vuab tsuab thiab lim hiam, sawv cev tag nrho rau tej kev xav thiab tej kev xam pom ntawm lub zog lim hiam. Cov lus zoo li no nquag raug cov tsis ntseeg nyob hauv pawg ntseeg uas nyiam tej kev nrov uas phem ntawd quav ntsej txog, lees txais thiab siv. Lawv kaw lawv lub siab tag nrho rau cov lus ntawm sab ntsujplig thiab cov lus hauv Vajtswv lub tsev, tsis mloog los sis tsis kawm txog tej ntawd yam tiag tiag. Tiam sis, lawv kawm paub thiab muab coj los siv sai heev txog tej yam tsis zoo ntawm lub ntiaj teb uas ib txwm tsis ntseeg thiab tej yam uas cov neeg laib quav ntsej txog. Yog li ntawd, cov tib neeg no, txawm yuav saib los ntawm lawv tej khaub ncaws sab nraud, kev hais lus, thiab kev coj cwj pwm, los sis los ntawm ntau hom kev xav thiab kev xam pom thiab tej cwj pwm uas muaj rau tej yam uas lawv nthuav tawm los xij, lawv tshwm tawm ua cov uas txawv tshwj xeeb nyob hauv cov kwv tij thiab cov nkauj muam. Qhov txawv ntawd txhais li cas? Qhov ntawd txhais hais tias lawv txoj kev hais lus, txoj kev coj, thiab kev coj cwj pwm zoo ib yam li cov ib txwm tsis ntseeg, tsis muaj ib qho kev hloov dab tsi kiag li; lawv yeej yog cov tsis ntseeg ntag. Piv txwv li, ib txhia tib neeg hu ob zaj nkauj nyob saum lub sam thiaj hauv Vajtswv lub tsev thiab tau txais txhua tus txoj kev qhuas, ces lawv pib xav tias lawv tus kheej yog cov neeg muaj npe nrov los sis cov neeg loj, pheej cheem tsum kom pleev ntsej muag tuab tuab rau kev ua yeeb yam, tuav rawv yuav ua plaub hau li ib tug neeg muaj npe nrov twg li, thiab muab zas ua cov kob txawv txawv. Thaum lwm tus hais tias: “Cov ntseeg yuav tsum hnav khaub ncaws kom tsim txiaj thiab tsim nyog; koj ua li ko tsis mus raws li Vajtswv lub tsev tej kev cheem tsum,” lawv yws, hais tias, “Tej kev cai ntawm vajtswv lub tsev nruj dhau lawm; yeej nyuaj tiag tiag! Yuav ua ib tug neeg muaj npe nrov cas thiaj li nyuaj ua luaj?” Tom qab hu ob zaj nkauj qhuas Vajtswv xwb, lawv xav tias lawv yog cov neeg muaj npe nrov thiab xav tias lawv mas nim zoo heev li, thiab thaum twg lawv tsis muaj hauj lwm ua lawv pheej xav tias: “Cov neeg muaj npe nrov ntawm lub ntiaj teb uas ib txwm tsis ntseeg siv pes tsawg tus ntiv tes los tuav lub mais khau foos? Lawv rhais pes tsawg kauj ruam nce mus saum sam thiaj? Kuv hu nkauj tau zoo ua luaj vim li cas kuv thiaj li tsis tau txais paj? Cov neeg muaj npe nrov nyob hauv ntiaj teb muaj cov neeg sawv cev thiab cov pab; feem ntau lawv tsis tas yuav saib xyuas los sis daws tej yam ntawm lawv tus kheej, lawv cov pab ua txhua yam ntawd. Tiam sis ua ib tug neeg hu nkauj hauv vajtswv lub tsev, kuv yuav tsum saib xyuas tej hauj lwm me me xws li mus daus zaub mov, hnav khaub ncaws, thiab mus yuav khoom ntawm kuv tus kheej. Vajtswv lub tsev mas kev xav qub dhau lawm!” Nyob hauv lawv lub siab mas, lawv pheej tsis zoo siab nyob hauv Vajtswv lub tsev; lawv hnov tias raug ua tsis ncaj ncees rau tshwj xeeb, pheej tsis txaus siab thiab muaj tej kev yws puv npo. Ib tug neeg zoo li no puas tuaj yeem nyiam qhov tseeb? Lawv puas yuav ua raws li qhov tseeb? Vim li cas lawv tsis thim xav txog lawv tus kheej? Lawv tej kev xam pom txog qee yam mas nkhaus heev, zoo ib yam li cov ib txwm tsis ntseeg; ua li cas lawv thiaj li tsis paub txog qhov no? Vajtswv lub tsev tsis txwv lawv kom tsis txhob ua ib tug neeg muaj npe nrov, tiam sis lawv tej kev xam pom thiab tej kev ua no—uas yog cov tsis ntseeg li—puas tuaj yeem ua tau hauv Vajtswv lub tsev? Tej ntawd yeej sawv tsis khov kiag li. Lawv txoj kev hais lus thiab kev coj cwj pwm ib txwm mas ua rau tib neeg feem ntau saib tsis taus. Vim yog lawv “txoj kev xav qhib dav” thiab kev ua neej ywj siab tshwj xeeb, txawm cov tib neeg zoo li no hais los sis ua dab tsi los puav leej yog ua neej ywj siab thiab tsis muaj kev txwv, puav leej yog nthuav Ntxwgnyoog tus moj yam tawm.
Vajtswv lub tsev yeej hais tag hais dua tias cov kwv tij thiab cov nkauj muam yuav tsum paub cais kom meej txog qhov txwv ntawm txiv neej thiab poj niam, thiab tsis txhob mus ua ntxhov quav niab nrog lwm tus txiv neej los sis poj niam. Txawm li cas los xij, ib txhia tib neeg ua neej ywj siab thiab tsis muaj kev txwv, tsis mloog cov lus ntuas no ib qho me me li, thiab haj tseem mus haub ntxias los sis nrog lwm tus sib tham ua nkauj nraug yam zais ntshis, cuam tshuam lub neej hauv pawg ntseeg. Lawv nyiam sib cuag nrog lwm tus txiv neej los sis poj niam, haj tseem nrhiav laj thawj thiab hais ub hais no los sib cuag thiab sib thab ua si. Thaum pom ib tug txiv neej los sis ib tug poj niam twg uas zoo nkauj zoo nraug los sis uas lawv nrog sib haum, lawv pib muab lwm tus rub mus rub los, hais lus thab thiab tso dag, rub lwm tus tej khaub ncaws thiab muab lwm tus cov plaub hau rub, thiab haj tseem muab cov pob daus pov rau hauv lwm tus tej khaub ncaws thaum lub caij ntuj no thiab; lawv ib leeg thab ib leeg ua si zoo li tej tsiaj, yam tsis muaj kev txwv los sis tsis paub txog lub meej mom, tsis hnov txaj muag kiag li. Ib txhia tib neeg hais tias, “Ua li cas thiaj li suav tau tias qhov ntawd yog kev sib thab ua si? Lawv nthuav txoj kev sib hlub tawm; qhov ntawd hu ua kev sib hlub sib nyiam, kev sib hlub.” Yog koj nrhiav kev sib hlub, koj xaiv qhov chaw yuam kev lawm. Pawg ntseeg yog qhov chaw uas cov kwv tij thiab cov nkauj muam ua lawv tej dej num; yog ib qho chaw rau kev pe hawm Vajtswv, tsis yog rau kev hais lus sib thab. Qhov qhia tej kev coj zoo li no tawm qhib lug nyob rau ntawm txhua tus lub xub ntiag ua rau tib neeg feem ntau tsis nyiam kawg li thiab xeev siab. Qhov teeb meem tseem ceeb yog qhov ntawd tsis txhawb lwm tus, thiab koj kuj poob koj txoj kev coj ncaj ncees thiab meej mom thiab. Koj muaj pes tsawg xyoo lawm? Koj tsis paub cais koj sab tes xis thiab sab tes laug lod? Koj tsis to taub txog qhov txawv ntawm txiv neej thiab poj niam lod? Tiam sis koj tseem koom nrog kev hais lus sib thab thiab! Qhov ntawd yog ib qho uas ib txwm muaj rau cov me nyuam yaus uas muaj xya los sis yim xyoo sib thab ua si; tej kev coj thiab kev nyiam zoo li no mas ib txwm muaj rau lawv lub hnub nyoog ntawd. Txawm li cas los xij, yog cov neeg loj qhia tej kev coj no tawm, qhov ntawd tsis yog zoo li me nyuam yaus lod? Muab hais yooj yooj yim hais tias, qhov ntawd yeej yog li ntawd ntag. Hais txog lub ntsiab tseeb, qhov no yog dab tsi? (Kev ua raws li lub siab nyiam, kev ua neej ywj siab.) Qhov ntawd ua neej ywj siab dhau lawm! Koj ntseeg Vajtswv mas, yuav tsum paub muaj lub meej mom. Txawm nyob hauv cov ib txwm tsis ntseeg los xij, yeej muaj tsawg tus uas yuav ua neej ywj siab npaum li no. Cov tib neeg uas ua neej ywj siab zoo li no mas tsis muaj nqis thiab qis heev! Qhov pov pob daus rau hauv lwm tus txiv neej los sis poj niam tej khaub ncaws kom tau kev zoo siab, tsis yog tsuas caum lawv ua si xwb tiam sis haj tseem ncaws lawv lub pob tw thiab—thaum muaj neeg nthuav tawm qhov muaj tseeb tias txoj kev coj zoo li no ua neej ywj siab dhau lawm thiab ua rau qhov txwv ntawm txiv neej thiab poj niam ntawd tsis meej, lawv teb rov qab tias, “Peb tsuas sib thab ua si li no vim peb sib paub zoo heev; tib neeg yuav tsum to taub.” Lawv ua raws li lub siab nyiam mus txog rau theem ntawd, tsis yog tsuas cia lawv tus kheej ua raws li lub siab nyiam xwb tiam sis haj tseem haub ntxias lwm tus kom koom nrog lawv txoj kev ua raws li lub siab nyiam thiab. Tus no yog hom neeg phem dab tsi? Qhia Kuv seb, cov tib neeg zoo li no puas tsim nyog nyob hauv pawg ntseeg? (Tsis tsim nyog.) Qhov nyob ze hom tib neeg no pheej hnov tsis xis nyob thiab txawv txawv. Thaum lawv pom ib tug neeg twg, lawv tsis hais lus zoo li ib txwm; tiam sis, lawv muab lwm tus ntaus ib nrig, hais tias, “Tej xyoo no koj mus tuag qhov twg lawm? Kuv xav tias koj twb ploj ntawm lub ntiaj teb no mus lawm! Koj nyob li cas lawm?” Txawm yog lawv txoj kev sib ntsib sib hu los haj tseem nruj tsiv thiab khav theeb npaum li ntawd thiab; tsis yog lawv tsuas hais lus nruj tsiv xwb, tiam sis lawv haj tseem siv tes siv taw rau lwm tus thiab. Qhov no tsis zoo li txoj kev coj ntawm cov neeg laib thiab cov tub sab lod? Nej puas nyiam cov tib neeg zoo li no? (Tsis nyiam.) Qhov kev hnov uas raug thuam thiab raug lwm tus muab ua si ntawd puas xis nyob thiab? (Tsis xis nyob.) Qhov ntawd tsis xis nyob, thiab koj haj tseem hais tsis tau tawm thiab; koj tsuas tau thev xwb, thiab lwm zaus thaum koj pom lawv, koj zam lawv kom deb. Muab hais luv luv hais tias, qhov no qhia li cas txog tus cwj pwm ua neeg ntawm cov tib neeg zoo li no txoj kev ua neeg? (Qhov ntawd tsis zoo.) Txawm yuav saib los ntawm sab twg los xij—txawm yog lawv txoj kev hais lus thiab kev coj cwj pwm, lawv txoj kev coj tus kheej, txoj kev uas lawv lis xwm hauv ntiaj teb, thiab lawv txoj kev sib cuag nrog lwm tus, lawv txoj kev xam pom rau tej kev raws tiam ntawm lub ntiaj teb uas ib txwm tsis ntseeg, los sis lawv txoj kev ntseeg Vajtswv thiab lawv tus cwj pwm uas coj rau Vajtswv thiab Nws cov lus—yeej tsis nyuaj pom hais tias cov tib neeg no tsis muaj kev hwm los sis lub siab hwm thiab ntshai Vajtswv kiag li. Thiab kuj saib tsis pom nyob rau hauv lawv txoj kev ntseeg Vajtswv tias muaj ib qho kev ua siab dawb paug rau kev nrhiav los sis kev lees txais qhov tseeb. Yam uas pom tau yog lawv txoj kev ua neej ywj siab thiab tsis muaj kev txwv, lawv txoj kev pheej xyaum ua raws li cov neeg muaj npe nrov thiab cov mlom, thiab lawv txoj kev tsis muaj lub siab xav tig rov qab txawm yuav sib qhia qhov tseeb li cas los xij. Tej yam ntxwv ntawm lawv txoj kev ua neeg tuaj yeem muab xaus lus ua dab tsi? Kev ua neej ywj siab thiab tsis muaj kev txwv. Yog li ntawd, yeej tuaj yeem hais tau meej meej tias lawv yog cov ib txwm tsis ntseeg uas nkag zais ntshis los rau hauv Vajtswv lub tsev; lawv yog cov tsis ntseeg.
Cov tib neeg uas ua neej ywj siab thiab tsis muaj kev txwv siv cov lus zoo ib yam li cov tub sab thiab cov neeg laib ntawm lub ntiaj teb uas ib txwm tsis ntseeg; lawv tshwj xeeb nyiam xyaum txoj kev hais lus thiab tus qauv ntawm cov neeg muaj npe nrov thiab cov neeg tsis zoo hauv lub zej zog, feem ntau ntawm lawv hom lus uas muaj lub suab qias neeg es hnov zoo li yog cov lus uas ib tug neeg laib los sis ib tug neeg liam hais. Piv txwv li, thaum ib tug ib txwm tsis ntseeg tuaj txog, hais ob peb lo lus txawv txawv tom qab khob qhov rooj lawm, cov kwv tij thiab cov nkauj muam hais tias, “Muaj ib yam dab tsi tsis yog lawm; ua li cas tus neeg no zoo li ib tug neeg soj xyuas los sis ib tug neeg soj xov?” Txawm hais tias lawv tsis paub tseeb nyob rau lub sij hawm ntawd los xij, qhov ntawd ua rau tib neeg feem coob hnov tsis xis nyob. Tiam sis, tus neeg uas ua neej ywj siab thiab tsis muaj kev txwv ntawd hais lus tawv qhawv, haj tseem muaj ib lub suab khav txiv ntxhias thiab, hais tias, “Ib tug neeg soj xyuas lod? Kuv tsis ntshai kiag li! Vim li cas yuav ntshai lawv? Yog nej ntshai, nej tsis tas yuav tawm mus. Kuv yuav mus saib seb lawv ua dab tsi.” Saib seb lawv muaj siab tawv thiab tsis ntshai dab tsi npaum li cas. Nej puas yuav hais lus li no? (Tsis hais, cov neeg li ib txwm tsis hais lus zoo li no; qhov ntawd zoo ib yam li cov lus uas ib tug tub sab hais.) Cov tub sab hais lus mas txawv ntawm cov neeg dog dig; tshwj xeeb mas yog nruj tsiv heev. Tib neeg kawm cov lus ntawm lawv hom; cov neeg uas paub txog lub neej hauv ntiaj teb tshwj xeeb siv cov lus uas neeg nyiam hais hauv lub zej zog, hos cov tub sab thiab cov neeg laib nyiam hais lawv cov lus zais, thiab cov tsis ntseeg mas zoo ib yam nkaus li cov ib txwm tsis ntseeg, hais txhua yam uas cov ib txwm tsis ntseeg hais. Cov neeg zoo, tsim txiaj thiab tsim nyog mas xeev siab thiab ntxub thaum hnov cov ib txwm tsis ntseeg txoj kev hais lus; tsis muaj leej twg xyaum txoj kev hais lus ntawd li. Ib txhia tsis ntseeg, txawm yog tom qab ntseeg tau kaum los sis nees nkaum xyoo lawm los xij, tseem siv cov ib txwm tsis ntseeg cov lus, txhob txwm xaiv txoj kev hais lus ntawd, thiab thaum hais lus mas lawv haj tseem xyaum tus cwj pwm, ua lub ntsej muag, thiab piav tes piav taw li cov ib txwm tsis ntseeg, nrog rau txoj kev uas lawv ntsia lwm tus thiab. Cov kwv tij thiab cov nkauj muam hauv pawg ntseeg puas tuaj yeem saib cov tib neeg zoo li no khuab qhov muag? (Saib tsis khuab qhov muag.) Cov kwv tij thiab cov nkauj muam feem coob saib tsis khuab qhov muag thiab tsis xis nyob thaum saib lawv. Nej xav seb Vajtswv xav li cas txog lawv? (Ntxub.) Lo lus teb yeej meej heev: ntxub. Los ntawm yam uas lawv ua neej tawm los, lawv tej kev caum, thiab cov tib neeg, tej xwm txheej, thiab tej yam khoom uas lawv pe hawm nyob hauv lawv lub siab, yeej pom tseeb hais tias lawv txoj kev ua neeg tsis muaj kev tsim txiaj los sis kev tsim nyog thiab nyob deb heev ntawm kev hwm thiab kev haum raws li cov neeg dawb huv txoj kev coj tsim nyog. Yeej tsis tshua hnov los ntawm lawv lub qhov ncauj txog cov lus uas cov ntseeg los sis cov neeg dawb huv tsim nyog hais, thiab cov lus uas txhawb lwm tus thiab qhia tawm txoj kev coj ncaj ncees thiab meej mom; lawv tsis tshua hais tej no kiag li. Vim yam uas lawv pe hawm, ntshaw, thiab caum nyob hauv lawv lub siab mas yeej tsis haum nrog yam uas cov neeg dawb huv tsim nyog caum thiab ntshaw kiag li, ua rau nyuaj uas yuav txwv tau tej uas lawv ua neej tawm sab nraud, lawv cov lus hais, thiab lawv kev coj cwj pwm. Qhov kom lawv muaj kev txwv, tsis ua neej ywj siab los sis ua raws li lub siab nyiam, thiab tuav txoj kev tsim txiaj thiab kev tsim nyog yog ib qho uas nyuaj heev. Tsis tas yuav hais txog kev ua neej zoo li ib tug neeg uas muaj kev ua neeg thiab laj thawj uas to taub qhov tseeb thiab nkag mus rau hauv qhov tseeb qhov muaj tiag, lawv haj tseem twb ua tsis tau ib tug neeg li ib txwm uas muaj kev coj ncaj ncees thiab muaj meej mom uas haum raws li cov neeg dawb huv txoj kev coj tsim nyog, ua raws li cov kev cai, thiab saib zoo li tsim nyog nyob sab nraud. Yav tas los, muaj ib tug neeg uas mus rau pem cov zog toj siab mus tshaj tawm txoj moo zoo thiab pom tias qee cov kwv tij thiab cov nkauj muam tsev neeg pluag thiab nyob hauv cov tsev uas qub thiab puas lawm. Nws hais lus thuam thiab txob thuam tias, “Lub tsev no qub thiab puas zoo li no, tsis tsim nyog rau neeg nyob; muab ua nkauj npuas kuj lam siv. Nej yuav tsum tsiv tawm mus kom sai!” Cov kwv tij thiab cov nkauj muam teb tias, “Kev tsiv tawm mus mas yooj yim, tiam sis leej twg yuav muab lwm lub tsev rau peb nyob?” Nws lam tau lam hais lus thiab ua raws li lub siab nyiam, xav hais dab tsi los hais yam tsis xav txog qhov kev cuam tshuam uas muaj rau lwm tus. Qhov no yog qhov uas muaj tus yam ntxwv xeeb txawm qias neeg. Cov kwv tij thiab cov nkauj muam nug tias, “Yog peb tsiv tawm, leej twg yuav muab tsev rau peb nyob? Koj puas muaj tsev?” Nws yeej tsis muaj lus teb lawm. Thaum pom tias tib neeg tab tom ntsib kev nyuaj, nws yuav tsum muaj peev xwm daws lawv txoj kev nyuaj ua ntej hais lus. Tej qhov tshwm sim los ntawm nws txoj kev lam tau lam hais lus yam tsis muaj peev xwm daws lawv txoj kev nyuaj ntawd yog dab tsi? Qhov no puas yog ib qho teeb meem ntawm kev hais lus ncaj qha thiab qhib siab dhau lawm? Yeej tsis yog kiag li. Qhov teeb meem yog nws txoj kev qias neeg ntawd hnyav dhau lawm; nws ua neej ywj siab thiab tsis muaj kev txwv. Cov tib neeg zoo li no yeej tsis muaj kev to taub kiag li tias qhov kev coj ncaj ncees, meej mom, kev xav txog lwm tus, kev thev taus, kev hlub, kev hwm, kev to taub, kev khuv leej, kev hlub tshua, kev ua tib zoo xav txog, kev pab, thiab lwm yam ntxiv. Tej yam uas yuav tsum muaj rau txoj kev ua neeg li ib txwm no yog yam uas tib neeg tsim nyog muaj. Tsis yog lawv tsuas tsis muaj tej yam yuav tsum muaj no xwb, tiam sis nyob rau hauv lawv tej kev sib cuag nrog lwm tus ntawd, thaum pom tias ib tug neeg twg ntsib tej kev nyuaj, lawv haj tseem tuaj yeem thuam luag, hais txob thuam, hais lus chob, thuam, thiab hais lus rhuav rau luag thiab; tsis yog lawv tsuas tsis muaj peev xwm to taub los sis pab lwm tus ntawd xwb, tiam sis lawv haj tseem ua rau lwm tus ntawd tu siab, tag kev cia siab, mob siab, thiab haj tseem muaj teeb meem thiab. Rau cov uas muaj txoj kev qias neeg hnyav zoo li no, tib neeg feem coob yeej pom meej meej thiab thev lawv ntau zaus. Nej xav tias cov tib neeg zoo li no puas tuaj yeem muaj kev hloov dua siab tshiab tiag tiag? Kuv xav tias qhov ntawd yuav tsis tshua muaj tau. Raws li lawv tus yam ntxwv xeeb txawm lub ntsiab tseeb, lawv tsis yog cov uas nyiam qhov tseeb, yog li ntawd lawv yuav ua li cas thiaj li lees txais tau kev ntuas thiab kev qhuab ntuas? Thaum piav txog cov tib neeg zoo li no, cov ib txwm tsis ntseeg muaj cov lus xws li “ua raws li yus txoj kev” los sis “taug yus txoj kev txawm lwm tus yuav hais li cas los xij”—qhov no yog hom laj thawj ruam tsis muaj qab hau dab tsi? Cov lus uas hu ua cov lus nto moo thiab cov paj lug no nquag raug saib ua tej yam zoo nyob hauv lub zej zog no, uas ua rau qhov muaj tseeb nkhaus thiab ua rau qhov yog thiab qhov tsis yog sib xyaws. Hais txog tej kev qhia tshwm ntawm cov uas ua neej ywj siab thiab tsis muaj kev txwv ntawd txoj kev ua neeg, feem ntau ces yog tej no lawm xwb.
Txawm hais tias cov tib neeg uas ua neej ywj siab thiab tsis muaj kev txwv no cuam tshuam rau lub neej hauv pawg ntseeg, tej kev sib raug zoo uas ib txwm muaj nyob hauv cov kwv tij thiab cov nkauj muam, los sis qhov ua tes dej num li ib txwm muaj ntawm cov neeg Vajtswv xaiv tseg los xij, tsuav tej kev qhia tshwm thiab tej kev nthuav tawm ntawm lawv txoj kev ua neeg ua rau muaj tej kev cuam tshuam thiab tej qhov tshwm sim los phem, cuam tshuam cov kwv tij thiab cov nkauj muam xwb, ces yuav tsum daws cov teeb meem no, thiab yuav tsum ua qee yam uas tsim nyog los saib xyuas cov tib neeg zoo li no, tsis tsim nyog cia lawv lam tau lam ua yam tsis muaj kev txwv. Rau cov xwm txheej uas tsis tshua hnyav, tuaj yeem muab kev pab thiab kev txhawb, los sis tuaj yeem ntuas lawv thiab ceeb toom rau lawv. Rau cov xwm txheej uas hnyav, uas lawv txoj kev coj thiab kev coj cwj pwm ua neej ywj siab tshwj xeeb, zoo ib yam li cov ib txwm tsis ntseeg los sis cov tsis ntseeg, tsis muaj txoj kev coj tsim nyog ntawm cov neeg dawb huv ib qho me me li, ces cov thawj coj thiab cov neeg ua hauj lwm hauv pawg ntseeg yuav tsum nrhiav tej kev daws uas tsim nyog los saib xyuas cov tib neeg no. Yog cov kwv tij thiab cov nkauj muam feem coob pom zoo thiab tej xwm txheej tso cai, yuav tsum muab cov tib neeg no ntsaig tawm mus; yam tsawg kawg nkaus, tsis txhob pub lawv ua lawv tej dej num nyob hauv pawg ntseeg uas ua dej num puv sij hawm. “Rau cov xwm txheej uas tsis tshua hnyav” no txhais li cas? Qhov ntawd txhais hais tias ib txhia tib neeg yog cov nyuam qhuav ntseeg, uas yav tas los yog cov ib txwm tsis ntseeg, uas yeej tsis tau ntseeg Kev Ntseeg Vajtswv thiab tsis to taub tias txoj kev ntseeg Vajtswv yog dab tsi. Lawv txoj kev hais lus thiab kev coj cwj pwm nthuav tawm cov ib txwm tsis ntseeg tej kev coj. Txawm li cas los xij, los ntawm txoj kev nyeem Vajtswv txoj lus, sib qhia qhov tseeb, thiab ua lub neej hauv pawg ntseeg, lawv maj mam tig rov qab thiab hloov, dhau los zoo li cov ntseeg, thiab muaj qhov zoo nkaus li tib neeg me ntsis lawm. Ces tsis txhob muab cov tib neeg no teev rau hauv pab pawg tib neeg phem, tiam sis muab teev ua cov uas tuaj yeem pab tau. Lwm hom ces yog cov hluas uas muaj hnub nyoog thaj tsam nees nkaum xyoo uas, txawm hais tias ntseeg Vajtswv tau peb mus txog tsib xyoos lawm los xij, vim yog lawv lub hnub nyoog tseem hluas, tseem nyiam ua si, tsis tshua ruaj khov, qhia tawm tej cwj pwm zoo li me nyuam yaus nyob rau hauv lawv txoj kev hais lus thiab kev coj cwj pwm sab nraud—hais lus, coj, thiab ua tej yam zoo li me nyuam yaus—thiab lwm yam. Rau cov tib neeg no, yuav tsum muab kev pab thiab kev txhawb los ntawm lub siab hlub; yuav tsum muab sij hawm txaus rau lawv kom maj mam hloov yam tsis cheem tsum nruj dhau. Muaj tseeb tiag, rau cov neeg loj uas tau ntseeg Vajtswv ntau xyoo lawm tiam sis tseem qhia tawm txoj kev hais lus, kev coj cwj pwm, txoj kev coj, thiab kev ua uas ua neej ywj siab thiab tsis muaj kev txwv zoo ib yam li cov ib txwm tsis ntseeg, thiab cov uas tsis kam hloov txawm yog tau ntuas ntau zaus lawm los xij, yuav tsum muaj lwm txoj kev uas txawv; yuav tsum saib xyuas lawv raws li Vajtswv lub tsev tej kev cai. Yog cov tib neeg zoo li no txoj kev hais lus, kev coj cwj pwm, thiab tej kev nthuav tawm ntawm lawv txoj kev ua neeg cuam tshuam tib neeg feem coob thiab ua rau muaj ib qho kev cuam tshuam tsis zoo hauv pawg ntseeg, ua rau ntau tus xeev siab thaum pom lawv, tsis kam mloog lawv hais lus, tsis kam saib lawv lub ntsej muag thaum lawv hais lus, thiab tsis kam saib lawv tej kev hnav thiab tu cev, thiab tib neeg feem coob zoo siab dua thiab nyob rau hauv ib qho xwm txheej uas zoo dua thaum cov tib neeg zoo li no tsis tuaj koom kev sib txoos ua ke—tsuas yog lawv koom nrog lub neej hauv pawg ntseeg thiab tsuas yog lawv nyob hauv cov kwv tij thiab cov nkauj muam xwb, ces tib neeg feem coob yuav hnov tsis xis nyob thiab tsis nyiam kiag li, zoo nkaus li muaj ib tug kab tsw phem uas ua rau muaj tej kev cuam tshuam—ces cov tib neeg zoo li no yeej yog cov tib neeg phem tiag tiag yam tsis muaj qhov ua xyem xyav. Uas hais tau tias, thaum twg lawv ua lub neej hauv pawg ntseeg thiab ua lawv tes dej num nrog cov kwv tij thiab cov nkauj muam, tib neeg feem coob hnov raug cuam tshuam thiab tsis nyiam tshwj xeeb. Nyob rau hauv tej xwm txheej zoo li no, yuav tsum saib xyuas cov tib neeg no kom ntxov li ntxov tau, es tsis txhob cia lawv ua raws li lawv lub siab nyiam los sis soj ntsuam lawv mus ntxiv lawm. Yam tsawg kawg nkaus mas, yuav tsum muab lawv tshem tawm ntawm pawg ntseeg uas ua dej num puv sij hawm mus es muab xa mus rau ib pawg ntseeg dog dig kom hloov dua siab tshiab. Vim li cas thiaj li saib xyuas li no? (Lawv tau ua rau muaj kev cuam tshuam thiab tej qhov tshwm sim los tsis zoo rau tib neeg feem coob, cuam tshuam lub neej hauv pawg ntseeg.) Vim tias tej qhov tshwm sim los thiab tej kev cuam tshuam ntawm lawv tej kev qhia tshwm ntawd mas qias dhau lawm! Raws li qhov no, cov thawj coj thiab cov neeg ua hauj lwm, nrog rau cov neeg Vajtswv xaiv tseg, tsis txhob ua ntsej lag muag dig rau lawv thiab cia lawv ua lawv txoj kev coj ntawd yam dig muag ntsuav. Qhov cov thawj coj thiab cov neeg ua hauj lwm tsis ua dab tsi txawm yog thaum cov tib neeg zoo li no ua rau muaj tej kev cuam tshuam rau cov tib neeg feem coob lawm ntawd mas tsis tsim nyog li; yuav tsum muab cov tib neeg zoo li no tshem tawm ntawm pawg ntseeg mus raws li Vajtswv lub tsev tej kev cai—qhov no yog txoj kev xaiv uas ntse tshaj plaws.
Puas yog yav tas los pawg ntseeg tau saib xyuas cov tib neeg uas ua neej ywj siab thiab tsis muaj kev txwv ntawd dua? (Yog.) Thaum saib xyuas cov tib neeg zoo li no, ib txhia tau quaj, hais tias, “Qhov ntawd tsis yog txhob txwm ua. Qhov ntawd tsuas yog txoj kev coj uas qee zaus kuv ua xwb; kuv tsis yog hom neeg ntawd. Thov muab ib lub hwv tsam rau kuv ntxiv! Yog tsis pub kuv ua kuv tes dej num, thaum kuv rov qab mus txog tsev uas txhua tus yog cov ib txwm tsis ntseeg, kuv yuav ntseeg tsis tau vajtswv lawm.” Lawv hais tau zoo mloog heev thiab saib zoo li nyuaj siab tiag tiag, qhia tawm txoj kev tsis xav ncaim Vajtswv mus thiab thov Vajtswv lub tsev muab lwm lub hwv tsam rau los hloov dua siab tshiab. Qhov muab lwm lub hwv tsam rau lawv mas yeej ua tau, tiam sis qhov tseem ceeb yog seb lawv puas tuaj yeem hloov tau los sis tsis tau. Yog pom tshab tias tus neeg no tsis muaj txoj kev ua neeg ib qho me me li, tsis muaj lub siab txawj xav los sis laj thawj, yeej yog ib yam uas tsis muaj siab thiab tsis muaj ntsujplig, ces tsis txhob muab lwm lub hwv tsam rau lawv lawm; qhov ntawd yuav tsis muaj qab hau dab tsi. Txawm li cas los xij, yog tus neeg ntawd lub ntsiab tseem ceeb mas zoo, thiab tsuas yog tias lawv txoj kev ua neeg tseem tsis tau paub tab vim lawv lub hnub nyoog tseem hluas, thiab lawv yeej yuav hloov nyob rau ob peb xyoos tom ntej, ces yuav tsum muab hwv tsam rau lawv hloov dua siab tshiab. Lawv yeej tsis tsim nyog raug ntsaig tawm ntawm pawg ntseeg mus kiag li; yeej tsis pub muab ib tug neeg zoo rhuav tshem kiag li. Ib txhia tib neeg ib txwm yog cov tsis ntseeg; lawv ib txwm yog tej yam uas ua neej ywj siab, ruam, thiab tsis paub dab tsi, thiab nyob hauv lawv txoj kev ua neeg lawv ib txwm tsis muaj meej mom, tsis paub tias kev txaj muag yog dab tsi. Tom qab ua ib yam dab tsi uas tsis zoo saib tab meeg sawv daws lawm, cov tib neeg feem coob yuav hnov khuv xim thiab txaj muag ntsib lwm tus. Tseem tshaj ntawd ntxiv, thaum lawv xav ua tej yam zoo li no, lawv muaj peev xwm xav txog cov kwv tij thiab cov nkauj muam tej kev xav thiab kev xam pom, thiab xav txog lawv tus kheej txoj kev coj ncaj ncees thiab meej mom, thiab lawv yuav tsis coj zoo li ntawd; yam ntau kawg los tej zaum lawv tsuas ua ntxhov nyob hauv tsev nrog lawv cov me nyuam los sis cov kwv tij viv ncaus xwb. Thaum tawm mus sab nraud, sib cuag nrog cov neeg sab nraud, tib neeg yuav tsum to taub tias kev paub txaj muag, kev tsim nyog, cov kev cai, thiab kev muaj meej mom txhais li cas. Txawm tias yuav muaj koj txoj kev pab los, ib tug neeg uas tsis muaj kev to taub txog tej no puas yuav hloov tau? Txawm hais tias tam sim no lawv raug txwv los, lawv yuav thev taus ntev npaum li cas? Tsis ntev lawv yeej yuav rov qab ua lawv tej qub kev phem dua. Vim tias cov tib neeg zoo li no tsis muaj meej mom thiab kev txaj muag nyob hauv lawv txoj kev ua neeg, tsis paub tias cov kev cai, kev tsim nyog, los sis cov neeg dawb huv txoj kev coj tsim nyog txhais li cas, thiab lawv txoj kev ua neeg ib txwm tsis muaj tej yam yuav tsum muaj no, koj yeej pab tsis tau lawv li. Cov tib neeg uas pab tsis tau yog cov tib neeg uas hloov tsis tau, cov tib neeg uas qhia tsis tau los sis hloov tsis tau lawv lub siab. Cov tib neeg zoo li no yuav tsum raug muab tshem tawm mus kom sai thiab kom ntxov li ntxov tau, los tiv thaiv kom lawv tsis txhob ua rau muaj tej kev cuam tshuam nyob hauv cov kwv tij thiab cov nkauj muam, kom tsis txhob coj kev txaj muag los rau ntawm no. Vajtswv lub tsev tsis cheem tsum leej twg los ntxiv tus zauv xwb. Yog Vajtswv tsis cawm ib tug neeg twg, ces txawm yuav ntxiv tus zauv npaum li cas los yeej yuav tsis muaj qab hau dab tsi rau tus neeg ntawd li. Cov uas Vajtswv tsis lees paub yuav tsum raug ntsaig tawm mus—muab cov uas tsis tsim nyog nyob hauv Vajtswv lub tsev tshem tawm mus, tsam tus neeg no ib leeg yuav cuam tshuam tsis zoo rau ntau tus neeg, qhov no tsis ncaj ncees rau cov tib neeg feem coob. Yog nej pom tshab txog lub ntsiab tseeb ntawm cov uas ua neej ywj siab thiab tsis muaj kev txwv no, nej yuav tsum saib xyuas lawv thiab ntsaig lawv tawm mus kom sai li sai tau, tsis txhob thev lawv mus tas li. Ib txhia hais tias, “Qee zaus lawv yeej ua tau txiaj ntsig me ntsis thaum ua lawv tes dej num. Tseem cheem tsum lawv rau tes hauj lwm sab ntawd. Lawv kuj muaj ib lub siab hlub kawg li thiab tuaj yeem them tau tus nqi me ntsis thiab.” Cov uas tseem tshuav nyob hauv Vajtswv lub tsev leej twg thiaj li them tsis tau tus nqi me ntsis? Leej twg ua tsis tau qee yam txiaj ntsig thaum ua lawv tes dej num? Yog txhua tus tuaj yeem ua tau qee yam txiaj ntsig, vim li cas thiaj li tsis xaiv cov neeg zoo uas tsim txiaj thiab tsim nyog los ua tej dej num? Vim li cas thiaj li yuav tsum tseg cov hom tib neeg uas qias neeg, cov neeg phem, thiab cov neeg ruam qauj rau hauv pawg ntseeg uas ua dej num puv sij hawm los tsim kom muaj tej kev cuam tshuam? Vim li cas thiaj li yuav tsum tseg cov tsis ntseeg uas ua neej zoo li cov ib txwm tsis ntseeg los ua dej num txhawb hauv Vajtswv lub tsev? Vajtswv lub tsev tsis tsawg cov neeg ua dej num txhawb; Vajtswv lub tsev tsuas xav tau cov tib neeg coj ncaj uas nyiam qhov tseeb, cov tib neeg coj ncaj ncees, thiab cov uas tuaj yeem caum qhov tseeb, los muab lawv tus kheej fij rau Vajtswv.
Feem coob ntawm cov uas tab tom ua tej dej num tam sim no yog cov uas tau ntseeg Vajtswv ntau tshaj tsib los sis rau xyoo lawm, thiab ntau hom tib neeg tau raug nthuav tawm tag nrho nyob rau hauv txoj kev ua lawv tej dej num—cov uas yog cov tsis ntseeg, cov tib neeg ruam feeb tsis meej, cov thawj coj cuav, cov tib neeg phem, thiab cov tawm tsam khetos puav leej tau raug nthuav tawm lawm. Ntau tus neeg Vajtswv xaiv tseg tau pom tshab hais tias cov tib neeg no feem coob tsis kam hloov txawm yog tau qhuab ntuas ntau zaus los xij, uas twb ua rau muaj tej kev cuam tshuam thiab kev tab kaum hnyav rau Vajtswv lub tsev tes hauj lwm lawm. Lub sij hawm twb los txog lawm uas yuav tsum muab cov tsis ntseeg, cov tib neeg phem, thiab cov tawm tsam khetos no tshem tawm mus. Qhov tsis tshem lawv tawm mus ntawd yuav cuam tshuam rau txoj kev ua hauj lwm ntawm pawg ntseeg tes hauj lwm thiab txoj kev nthuav dav Vajtswv lub nceeg vaj txoj moo zoo mus. Qhov tsis tshem lawv tawm mus yuav cuam tshuam rau txoj kev nkag mus rau hauv lub neej txoj sia ntawm cov neeg Vajtswv xaiv tseg; lub neej hauv pawg ntseeg yuav raug cuam tshuam txuas ntxiv mus thiab yeej yuav tsis muaj kev thaj yeeb li. Yog li ntawd, cov thawj coj thiab cov neeg ua hauj lwm hauv pawg ntseeg nyob rau txhua theem yuav tsum pib yaug pawg ntseeg kom dawb huv raws li Vajtswv tej kev npaj siab thiab raws li Vajtswv cov lus. Kuv pom tias muaj ntau tus neeg tsis muaj txoj kev ua neeg kiag li. Thaum sib txoos ua ke, ib txhia qhia tawm txhua yam kev coj uas tsis tsim nyog, thiab tsis muaj ib tug yam ntxwv uas tsim nyog txawm yog zaum los sis sawv los xij, muaj dej tshuaj yej, xov tooj ntawm tes, tshuaj pleev ntsej muag, thiab tshuaj tsw qab npaj txhij nyob ntawm lawv ib sab. Ib txhia uas nyiam ua kom zoo nkauj mas pheej tsom iav thiab pleev ntsej muag ntxiv, thiab lwm cov mas pheej haus dej, kov xov tooj nyeem xov xwm los sis saib cov yeeb yaj kiab ntawm lub ntiaj teb uas ib txwm tsis ntseeg, zaum qhaib ceg thaum nrog lwm tus hais lus thiab sib tham, ntswj lawv lub cev ua ob ya, zoo li tus nab, yam tsis muaj ib tug yam ntxwv uas tsim nyog li. Kuv kuj hnov hais tias ib txhia tib neeg rov qab mus rau hauv lawv chav pw thaum hmo ntuj thiab pw saum txaj yam tsis hle khau, pw mus txog kaj ntug. Thaum sawv ntxov, lawv qhib qhov muag tsis yog los thov Vajtswv los sis ua kev pe hawm ntawm sab ntsujplig, tiam sis yog xub saib cov xov xwm hauv lawv lub xov tooj ntawm tes ua ntej. Thaum txog caij noj mov, thaum lawv pom zaub mov qab, los sis thaum lawv pom nqaij, lawv noj tsis paub tsum—tsis quav ntsej seb lwm tus puas tau noj, tsuav lawv tsau xwb—ces rov qab ncaj qha mus pw lawm. Lawv tsis muaj qhov zoo nkaus li tib neeg nyob rau hauv txhua yam uas lawv ua, ua neej ywj siab thiab tsis muaj kev txwv zoo ib yam li cov ib txwm tsis ntseeg, tsis ua raws li cov kev cai kiag li, tsis muaj kev mloog hais los sis kev zwm rau ib qho me me li, tsuas zoo li cov tsiaj nyaum. Qhia Kuv seb, hom tib neeg uas muaj tus yam ntxwv xeeb txawm qias neeg hnyav npaum li no puas tuaj yeem raug cawm dim? (Tsis tuaj yeem.) Yog li ntawd lawv txoj kev ntseeg Vajtswv puas muaj qab hau dab tsi? Lawv qib peev xwm qis dhau uas yeej ncav tsis cuag qhov tseeb kiag li, lawv puas tuaj yeem to taub Vajtswv cov lus thaum lawv nyeem? Yog tsis muaj cov kev cai nyob rau hauv lawv txoj kev ua neeg, lawv txoj kev ua dej num txhawb puas mus raws li tus qauv? Yog tsis muaj lub siab txawj xav los sis laj thawj, lawv puas tuaj yeem lees txais thaum mloog cov lus qhuab qhia thiab mloog txoj kev sib qhia txog qhov tseeb? (Tsis tuaj yeem.) Cov uas qhia tej kev coj no tawm yeej tsis muaj txoj kev ua neeg kiag li, yog li ntawd lawv yuav ua li cas thiaj li tau qhov tseeb? Cov uas tsis muaj txoj kev ua neeg yog cov tsiaj nyaum, cov dab, cov neeg tuag uas tsis muaj ntsujplig, uas to taub tsis tau qhov tseeb thaum lawv hnov thiab tsis tsim nyog hnov qhov tseeb. Qhov kom lawv to taub thiab tau qhov tseeb mas zoo ib yam li qhov yuam kom ntses mus nyob rau saum nruab nqhuab los sis yuam kom npua ya—yeej ua tsis tau! Yav tas los, thaum tham txog seb hom tib neeg twg yog cov tsiaj nyaum, lo lus “cov tsiaj nyaum” nquag ntxiv lo lus “dev” tso rau tom ntej, yog li ntawd lawv thiaj li raug hu ua “cov dev tsiaj nyaum.” Txawm li cas los xij, tom qab yug cov dev thiab sib cuag nrog cov dev ze ze, Kuv tau pom hais tias cov dev muaj tej yam zoo tshaj plaws uas tib neeg tsis muaj: Cov dev ua raws li cov kev cai, mloog hais, thiab paub txaj muag. Koj teem ib qho ciam rau cov dev ua si, thiab cov dev tsuas ua si nyob hauv qhov ntawd xwb, thiab cov dev yeej yuav tsis mus rau cov chaw uas koj txwv tsis pub cov dev mus. Yog cov dev tsis xyuam xim hla ciam, cov dev yuav maj nroos thim rov qab, co tw tas zog, thov kom zam txim thiab lees qhov txhaum. Tib neeg ua puas tau li no? (Ua tsis tau.) Tib neeg ua tsis tau. Txawm hais tias cov dev yuav tsis to taub ntau npaum li tib neeg los, cov dev to taub ib yam: “Qhov no yog tus tswv thaj chaw, yog tus tswv lub tsev. Tus tswv pub kuv mus qhov twg ces kuv mus qhov ntawd thiab tsis mus cov chaw uas txwv tsis pub kuv mus.” Txawm tsis raug ntaus los xij, cov dev yeej tsis mus rau qhov ntawd; cov dev paub txaj muag. Txawm yog cov dev los twb paub tias kev txaj muag yog dab tsi, ua li cas tib neeg thiaj li tsis paub? Qhov muab cov uas tsis paub txaj muag cais ua cov tsiaj nyaum ntawd puas tshaj dhau? (Tsis tshaj dhau.) Qhov ntawd yeej tsis dhau kiag li; cov tib neeg feem coob twb tsis muaj tej yam zoo uas ib tug dev muaj thiab. Yav tom ntej, thaum peb hais tias ib txhia tib neeg yog cov tsiaj nyaum, peb tsis tuaj yeem hu lawv ua “dev tsiaj nyaum” lawm; qhov ntawd yuav yog kev thuam cov dev, vim cov tib neeg no, cov tsiaj nyaum no, haj tseem piv tsis tau cov dev thiab. Yog li ntawd, thaum cov tib neeg zoo li no ua rau muaj tej kev cuam tshuam rau lub neej hauv pawg ntseeg los sis rau cov kwv tij thiab cov nkauj muam txoj kev ua lawv tej dej num, yuav tsum muab lawv ntsaig tawm mus kom ncav sij hawm—qhov no yeej tsim nyog, muaj laj thawj, thiab tsis tshaj dhau kiag li. Qhov no tsis yog qhov tsis muaj lub siab hlub; qhov no yog kev ua raws li lub hauv paus ntsiab lus. Txawm hais tias cov uas ua neej ywj siab thiab tsis muaj kev txwv ua tau qee yam txiaj ntsig nyob rau hauv lawv tej dej num los xij, lawv puas tuaj yeem raug cawm dim? Lawv puas yog cov tib neeg uas lees txais qhov tseeb? Lawv twb txwv tsis tau lawv tus kheej tej kev ua, yog li ntawd lawv yuav lees txais qhov tseeb tau lod? Lawv tuav tsis tau lawv tus kheej txoj kev coj ncaj ncees thiab meej mom, yog li ntawd lawv yuav nkag mus rau hauv qhov tseeb qhov muaj tiag tau lod? Qhov ntawd yeej ua tsis tau. Yog li ntawd, txoj kev saib xyuas cov tib neeg no zoo li no yeej tsis dhau kiag li; qhov ntawd yog ua raws li lub hauv paus ntsiab lus tag nrho, thiab yog los tiv thaiv cov neeg Vajtswv xaiv tseg kom tsis txhob raug Ntxwgnyoog tej kev cuam tshuam tag nrho. Muab hais luv luv hais tias, thaum pom cov tib neeg zoo li no, yuav tsum saib xyuas lawv raws li ob peb lub hauv paus ntsiab lus uas Kuv nyuam qhuav hais ntawd. Qhov muab cov hom tib neeg uas ua neej ywj siab thiab tsis muaj kev txwv tiag tiag, thiab cov uas ua raws li lub siab nyiam ntawm sab cev nqaij daim tawv tiag tiag yam tsis muaj txoj kev coj tsim nyog ntawm cov neeg dawb huv, cais ua cov ib txwm tsis ntseeg thiab cov tsis ntseeg ntawd puas tshaj dhau? (Tsis tshaj dhau.) Vim tias lawv raug cais ua cov ib txwm tsis ntseeg thiab cov tsis ntseeg lawm, qhov muab lawv teev rau hauv pab pawg ntawm ntau hom tib neeg phem uas pawg ntseeg yuav tsum ntsaig tawm mus ntawd yeej tsis tshaj dhau thiab. Cov tib neeg uas twb txwv tsis tau lawv tus kheej txoj kev coj thiab kev coj cwj pwm yeej lees txais tsis tau qhov tseeb. Cov uas lees txais tsis tau qhov tseeb tsis yog ua yeeb ncuab nrog qhov tseeb lod? (Yog.) Qhov muab cov uas ua yeeb ncuab nrog qhov tseeb teem ua cov tib neeg phem ntawd puas tshaj dhau? (Tsis tshaj dhau.) Qhov ntawd yeej tsis dhau kiag li. Yog li ntawd, cov hauv paus ntsiab lus rau kev saib xyuas lawv yeej tsim nyog kawg nkaus li lawm.
D. Nyiam Ua Pauj Rov Qab
Peb txoj kev sib qhia txog tej kev qhia tshwm ntawm hom tib neeg thib peb—cov uas ua neej ywj siab thiab tsis muaj kev txwv—twb xaus lawm. Dhau ntawm hom tib neeg no mus lawm, tseem muaj ntau tus neeg uas nyob rau hauv pab pawg tib neeg phem, thiab pawg ntseeg yuav tsum paub cais thiab muab txhua hom tib neeg phem no ntsaig tawm mus. Txuas ntxiv no, peb yuav tham txog hom plaub. Ntawm ntau hom tib neeg phem uas pawg ntseeg yuav tsum paub cais thiab ntsaig tawm mus ntawd, hom plaub no yog ib qho uas nyuaj heev thiab muaj teeb meem ntau. Yog hom tib neeg twg? Lawv yog cov uas nyiam ua pauj rov qab. Raws li cov lus hais tias “nyiam ua pauj rov qab,” yeej pom tseeb hais tias cov tib neeg no yeej tsis yog neeg zoo dab tsi li; hais raws li lus dog dig mas, lawv yog cov neeg ua phem rau pab pawg. Thaum saib raws li tej kev qhia tshwm thiab tej kev nthuav tawm ntawm lawv txoj kev ua neeg uas ib txwm muaj, nrog rau tej hauv paus ntsiab lus ntawm kev ua tej yam, lawv lub siab mas tsis zoo li. Raws li cov lus uas sawv daws nquag hais, lawv yog “cov neeg thab tsis tau.” Peb hais tias lawv tsis yog hom neeg siab zoo; muab hais kom ntxaws dua, cov tib neeg no tsis muaj lub siab zoo tiam sis lawv muaj kev phem, kev lim hiam, thiab kev tsiv nyaum. Thaum ib tug neeg twg hais los sis ua ib yam dab tsi uas raug rau cov tib neeg no tej txiaj ntsim, lawv lub ntsej muag, los sis lub meej mom, los sis ua rau lawv chim, thawj yam, lawv khaws kev ua yeeb ncuab rau hauv lawv lub siab. Yam ob, raws li lub hauv paus ntawm qhov kev ua yeeb ncuab no, lawv yuav nqis tes ua; lub hom phiaj thiab txoj xub ke uas lawv ua ntawd yog kom tso tau lawv txoj kev ntxub thiab txo lawv txoj kev chim, qhov no yog ib txoj kev coj uas hu ua nrhiav kev ua pauj rov qab. Yeej ib txwm muaj ib feem ntawm cov tib neeg uas zoo li no nyob hauv cov tib neeg. Txawm yog yam uas tib neeg piav tias yog kev siab nqaim, kev nyiam quab yuam lwm tus, los sis kev xav ntau dhau los xij, txawm yuav siv cov lus twg los piav los sis xaus lus txog lawv txoj kev ua neeg los xij, qhov kev qhia tshwm uas ib txwm muaj nyob rau hauv lawv txoj kev sib cuag mus los nrog lwm tus ces yog tsis hais leej twg uas tsis txhob txwm los sis txhob txwm ua rau lawv mob los sis ua rau lawv chim, ces yuav tsum raug kev txom nyem thiab ntsib tej qhov tshwm sim los phem uas tsim nyog raug. Qhov ntawd zoo li qee tus neeg hais tias: “Ua rau lawv chim, ces koj yuav tau ris lub txim hnyav. Yog koj ua rau lawv npau taws los sis ua rau lawv mob, tsis txhob xav tias yuav khiav dim tau yooj yim.” Puas muaj cov tib neeg zoo li no nyob hauv cov tib neeg? (Muaj.) Yeej muaj tiag li. Txawm muaj dab tsi tshwm sim los xij, txawm tias qhov ntawd puas tsim nyog npau taws los sis xav ntau txog los xij, cov uas nyiam ua pauj rov qab ntawd muab qhov ntawd tso rau hauv lawv cov txheej txheem yuav tsum ua txhua hnub, coj rau qhov ntawd yam li yog ib qho teeb meem uas tseem ceeb tshaj plaws. Txawm leej twg ua rau lawv chim los, lawv yeej lees txais tsis tau, thiab lawv yuav ua kom tus ntawd them tus nqi kom tsim nyog, qhov no yog lawv lub hauv paus ntsiab lus uas coj rau tib neeg, coj rau leej twg uas lawv xam tias yog ib tug yeeb ncuab. Piv txwv li, nyob hauv lub neej hauv pawg ntseeg, qee tus neeg sib qhia txog lawv tus yam ntxwv los sis sib qhia thiab faib lawv tej kev ntsib kev pom li ib txwm, tham txog lawv tej yam ntxwv thiab kev qias vuab tsuab. Thaum ua li ntawd, lawv cia li hais raug lwm tus tej yam ntxwv thiab kev qias vuab tsuab yam tsis txhob txwm. Tus hais tej zaum tsis txhob txwm hais, tiam sis tus mloog muab khaws cia rau hauv siab. Tom qab hnov lawm, tus neeg no tsis tuaj yeem nkag siab los sis coj rau qhov ntawd kom yog, thiab lawv thiaj li yooj yim muaj lub siab xav ua pauj rov qab. Yog lawv tsis tso qhov no tseg thiab tuav rawv tawm tsam thiab nrhiav kev ua pauj rov qab, qhov no yuav ua rau muaj teeb meem rau pawg ntseeg tes hauj lwm, yog li ntawd yuav tsum daws qhov teeb meem no kom ncav sij hawm. Tsuav tseem muaj cov tib neeg phem nyob hauv pawg ntseeg xwb, yeej yuav muaj tej kev cuam tshuam tshwm sim tuaj, yog li ntawd tej xwm txheej uas cov tib neeg phem cuam tshuam pawg ntseeg ntawd yuav tsum tsis txhob muab saib ua qhov me me. Txawm txhob txwm los sis tsis txhob txwm los xij, tsuav yog koj ua rau lawv npau taws los sis ua rau lawv mob xwb, lawv yeej yuav tsis tso tseg yooj yim li. Lawv xav hauv lawv lub siab tias: “Koj hais txog koj tus kheej txoj kev qias vuab tsuab, ua cas ho hais txog kuv? Koj tham txog kev paub koj tus kheej, ua cas ho muab kuv nthuav tawm? Qhov muab kuv txoj kev qias vuab tsuab nthuav tawm ntawd ua rau kuv poob ntsej muag thiab poob meej mom, ua rau kuv txaj muag nyob rau hauv cov kwv tij thiab cov nkauj muam, ua rau kuv poob hwj chim, thiab ua rau kuv lub suab npe puas. Yog li ntawd, kuv yuav nrhiav kev ua pauj rov qab rau koj; koj yuav tau ris lub txim hnyav! Tsis txhob xav tias kuv yog neeg yooj yim thab, tsis txhob xav tias koj yuav thab kuv tau raws li koj lub siab nyiam tsuas yog vim kuv tsev neeg pluag thiab kuv lub meej mom hauv zej zog tsis siab. Tsis txhob xav tias kuv yog ib tug neeg uas thab tau yooj yim; kuv yeej tsis yog ib tug uas leej twg yuav lam tau lam thab tau!” Xub tsis hais txog tias lawv ua pauj rov qab li cas; cia peb saib txog cov tib neeg no tus kheej xwb: Thaum lawv ntsib tej yam me me no—tej yam uas ib txwm muaj nyob hauv lub neej hauv pawg ntseeg—tsis yog lawv tsis tuaj yeem coj rau los sis nkag siab tej yam ntawd kom yog xwb, tiam sis lawv tseem muaj kev ntxub ntxaug thiab tos lub hwv tsam los ua pauj rov qab, haj tseem siv txhua yam tswv yim phem los ua pauj rov qab thiab. Cov tib neeg no txoj kev ua neeg zoo li cas? (Lim hiam.) Lawv puas yog hom tib neeg siab zoo? (Tsis yog.) Hom tib neeg uas zoo tshaj plaws yog cov uas lees txais tau qhov tseeb. Thaum hnov lwm tus sib qhia thiab faib lawv tej kev ntsib kev pom, cov neeg no ua tib zoo xav tias: “Kuv los kuj muaj txoj kev qias vuab tsuab no thiab. Yam uas lawv piav ntawd zoo nkaus li kuv tus yam ntxwv ntag. Txawm yog lawv txhob txwm muab kuv nthuav tawm los sis hais txog ib yam dab tsi uas ho zoo li kuv tus yam ntxwv yam tsis txhob txwm los xij, kuv yeej yuav nkag siab qhov ntawd kom yog—kuv yuav mloog seb lawv tau ntsib tau pom qhov ntawd li cas, lawv nrhiav qhov tseeb los daws tus yam ntxwv no li cas, thiab lawv ua raws thiab nkag mus rau hauv li cas.” Qhov no yog ib tug neeg uas lees txais qhov tseeb tiag tiag. Ib tug neeg uas tsis tshua zoo pes tsawg thaum hnov li no tej zaum yuav xav tias, “Ua cas tus moj yam qias vuab tsuab uas lawv paub txog ntawd ho zoo ib yam nkaus li kuv tus yam ntxwv thiab? Puas yog lawv tab tom hais txog kuv? Kav liam, cia lawv hais. Txawm li cas los xij, kuv twb tsis poob dab tsi, thiab tej zaum cov tib neeg feem coob yeej tsis paub thiab. Tej zaum lawv tsuas tab tom hais txog lawv tus kheej xwb, thiab qhov ntawd tsuas cia li sib xws nrog kuv tus yam ntxwv xwb; peb sawv daws yeej muaj tib tug yam ntxwv ntawd.” Lawv tsis muab qhov ntawd xam ua qhov loj, tsis khaws kev ntxub ntxaug rau hauv siab, thiab tsis muaj lub siab xav ua pauj rov qab. Txawm li cas los xij, qhov ntawd yeej txawv rau hom tib neeg phem uas tsis muaj lub siab zoo. Lwm tus yuav saib qhov xwm txheej no ua ib qho uas ib txwm muaj, daws thiab coj rau qhov ntawd raws li qhov tsim nyog. Muaj tseeb tiag, cov neeg zoo uas lees txais qhov tseeb yuav daws qhov ntawd yam kub siab lug thiab zoo. Cov tib neeg dog dig, txawm tias lawv tsis daws qhov ntawd yam zoo los xij, lawv yeej tsis khaws kev ntxub ntxaug, thiab haj yam tsis nrhiav kev ua pauj rov qab. Tiam sis rau cov tib neeg uas tsis muaj lub siab zoo ntawd, ib qho xwm txheej uas ib txwm muaj thiab dog dig tshaj plaws zoo li no tuaj yeem ua rau lawv lub siab ntxhov hnyo, ua rau lawv nyob tsis tus. Tej yam uas tshwm sim muaj los ntawm lawv ntawd tsis yog yam zoo los sis yam li ib txwm, tiam sis yog yam uas tsiv nyaum thiab lim hiam; lawv nrhiav kev ua pauj rov qab. Qhov laj thawj rau lawv txoj kev ua pauj rov qab yog dab tsi? Lawv ntseeg tias tib neeg txhob txwm hais lus phem los rhuav lawv, nthuav lawv tej xwm txheej tiag tiag tawm, nrog rau lawv sab uas phem thiab lawv txoj kev qias vuab tsuab. Lawv xam tias yam uas tib neeg hais ntawd yog qhov txhob txwm ua, yog li ntawd thiaj li xam tias cov neeg ntawd yog lawv cov yeeb ncuab. Tom qab ntawd, lawv xav tias lawv muaj laj thawj siv kev ua pauj rov qab los daws qhov teeb meem ntawd, siv ntau yam tswv yim los ua kom tiav lawv lub hom phiaj ntawm kev ua pauj rov qab. Qhov no tsis yog ib tug moj yam tsiv nyaum lod? (Yog.) Nyob hauv lub neej hauv pawg ntseeg, thaum cov kwv tij thiab cov nkauj muam tham txog lawv tej yam ntxwv, feem coob ntawm cov uas mloog yeej muaj kev xav ib yam thiab lees txais qhov ntawd los ntawm Vajtswv los. Tsuas yog cov uas tsis nyiam qhov tseeb kiag li thiab muaj ib tug moj yam lim hiam xwb thiaj li muaj kev ua yeeb ncuab thiab haj tseem muaj lub siab xav ua pauj rov qab thaum hnov qhov ntawd, qhov no nthuav lawv tus yam ntxwv xeeb txawm lub ntsiab tseeb tawm tag nrho. Thaum lub siab xav ua pauj rov qab tshwm sim tuaj lawm, ib co kev coj thiab kev nqis tes ua pauj rov qab yeej yuav tshwm sim raws qab los zuj zus. Thaum tej kev nqis tes nrhiav ua pauj rov qab tshwm sim tuaj, tib neeg tej kev sib raug zoo yuav zoo li cas? Tej kev sib raug zoo ntawd yeej yuav tsis tsim nyog mus ntxiv lawm. Ua li leej twg yog tus uas raug mob tiag tiag nyob rau hauv qhov no? (Tus neeg uas lawv nrhiav kev ua pauj rov qab rau ntawd.) Yog lawm. Cov uas raug mob tiag tiag yog cov uas sib qhia txog lawv cov lus tim khawv uas hais txog txoj kev ntsib kev pom ntawd. Cov uas nyiam ua pauj rov qab ntawd yuav siv cov lus los sis kev nqis tes ua nyob rau hauv ntau yam xwm txheej los txiav txim, tawm tsam, thiab haj tseem liam txhaum los sis hais lus phem rau cov uas lawv xam tias muab lawv nthuav tawm los sis muaj kev ua yeeb ncuab rau lawv. Cov uas nyiam ua pauj rov qab tsis yog tsuas khaws kev ntxub ntxaug ib ntus rau hauv lawv lub siab ces tag li ntawd xwb; lawv nrhiav thiab haj tseem tsim ntau lub cib fim los nrhiav kev ua pauj rov qab rau cov uas yog lub hom phiaj ntawm lawv txoj kev ua pauj rov qab, cov uas lawv muaj kev ua yeeb ncuab rau, thiab cov uas lawv xam tias tsis zoo rau lawv. Piv txwv li, thaum xaiv cov thawj coj, yog tus neeg uas lawv muaj kev ua yeeb ncuab rau ntawd mus raws li tej hauv paus ntsiab lus ntawm kev siv neeg nyob hauv Vajtswv lub tsev thiab tsim nyog raug xaiv los ua ib tug thawj coj, tiam sis vim txoj kev ua yeeb ncuab yuav ua rau lawv txiav txim, teem txim, thiab tawm tsam tus neeg ntawd. Tej zaum lawv haj tseem yuav ua tej yam tom qab nraub qaum, los sis ua tej yam tsis zoo rau tus neeg ntawd txhawm rau ua pauj rov qab. Muab hais luv luv hais tias, tej kev uas lawv siv los ua pauj rov qab ntawd mas muaj ntau yam. Piv txwv li, tej zaum lawv yuav nrhiav tej yam los ua chaw tuav tawm tsam ib tug neeg thiab hais lus phem txog tus neeg ntawd, tsim cov lus xaiv uas tsis muaj tseeb txog tus neeg ntawd los ntawm kev hais tshaj dhau thiab kev hais lus paj lus cua, los sis tsim kev sib cais ntawm tus neeg ntawd thiab lwm tus. Tej zaum lawv haj tseem yuav liam cuav txog tus neeg ntawd rau cov thawj coj, hais tias tus neeg ntawd tsis ua siab ncaj ncees thiab xav tsis zoo thiab tawm tsam thaum ua tus neeg ntawd tej dej num. Qhov tseeb tiag txhua yam no yog kev txhob txwm tsim tawm, muab yam tsis muaj los ua kom muaj xwb. Saib seb, los ntawm lawv tej txoj kev ua xyem xyav thiab tej kev to taub yuam kev txog tus neeg ntawd, es thiaj li muaj ntau yam kev coj thiab kev ua uas tsis tsim nyog tshwm sim tuaj; txhua txoj kev ua no puav leej tawm los ntawm lawv tus yam ntxwv xeeb txawm uas nyiam ua pauj rov qab no ntag. Qhov tseeb tiag, thaum tus neeg ntawd qhia nws cov lus tim khawv uas hais txog txoj kev ntsib kev pom, qhov ntawd yeej tsis yog tsom rau lawv kiag li; yeej tsis muaj kev npaj siab phem dab tsi rau lawv kiag li. Qhov ntawd tsuas yog vim lawv tsis nyiam qhov tseeb kiag li thiab muaj ib tug moj yam tsiv nyaum uas nyiam ua pauj rov qab es lawv thiaj li tsis pub lwm tus muab lawv nthuav tawm, thiab lawv kuj tsis pub kom muaj tej kev sib tham txog qhov paub yus tus kheej, tsis pub sib tham txog cov moj yam qias vuab tsuab, los sis tham txog tib neeg tus yam ntxwv xeeb txawm ntawm ntxwg nyoog. Thaum muaj kev sib tham txog cov ncauj lus zoo li no, lawv yuav npau taws heev, es xav tias yog tab tom tsom rau thiab nthuav lawv tawm, vim li ntawd thiaj li tsim tau thiab ua rau muaj lub siab xav ua pauj rov qab. Tej kev qhia tshwm ntawm hom tib neeg zoo li no txoj kev ua pauj rov qab ntawd yeej tsis yog tsuas muaj nyob rau hauv ib qho xwm txheej xwb. Vim li cas Kuv thiaj li hais li no? Qhov ntawd yog vim cov tib neeg zoo li no muaj ib tus yam ntxwv xeeb txawm tsiv nyaum; leej twg los chwv tsis tau, thab tsis tau lawv li. Lawv xeeb txawm muaj kev tawm tsam rau txhua tus thiab txhua yam, zoo ib yam li ib tug kab peb txiag yeeb los sis ib tug kab laum lij tshooj. Yog li ntawd, tsis hais lwm tus yuav txhob txwm los sis tsis txhob txwm hais lus raug lawv los sis ua rau lawv mob los xij, tsuav lawv hnov tias lawv poob ntsej muag los sis poob koob meej lawm xwb, lawv yeej yuav nrhiav hau kev los ua kom rov qab tau lawv lub ntsej muag thiab lub koob meej, uas ua rau muaj tej kev ua pauj rov qab ua ntu zus tuaj.
Txuas ntxiv no, Kuv yuav qhia txog lwm yam kev qhia tshwm ntawm cov uas nyiam ua pauj rov qab. Qee leej raug cov thawj coj ntuas vim lawv ua lawv tej dej num yam ua dog ua dig, ua rau lawv khaws kev tsis txaus siab cia. Qhia Kuv seb, qhov kev ntuas ntawd puas yog tsim nyog? (Yog.) Qhov ntawd yeej tsim nyog thiab yog ib yam uas ib txwm muaj tag nrho. Koj ua koj tes dej num yam ua dog ua dig, uas ua rau pawg ntseeg tes hauj lwm puas tsuaj, thiab koj tsis ua raws li tej hauv paus ntsiab lus, es muaj ib tug sawv los nthuav tawm thiab ntuas koj, qhov ntawd yeej tsim nyog, thiab koj yuav tsum lees txais qhov ntawd. Tiam sis, cov uas nyiam ua pauj rov qab ntawd tsis yog tsis kam lees txais qhov ntawd xwb tiam sis tseem tsis txaus siab thiab. Thaum cov thawj coj ntawd tawm mus lawm, lawv txawm pib foom phem hais tias: “Koj khav dab tsi? Tsis yog vim koj tsuas tau ua nom xwb lod? Yog kuv tau ua ib tug nom, kuv yeej yuav ua tau zoo tshaj koj! Koj ntuas kuv, koj xav tias koj yog leej twg? Kuv ntxub koj vim koj ntuas kuv. Kuv foom phem kom tsheb luam koj tuag, kom koj haus dej hnoos tuag, kom koj noj mov daig caj pas tuag. Kuv foom phem kom koj tuag txom nyem! Koj kam ntuas kuv? Yeej tsis muaj leej twg nyob hauv lub ntiaj teb no uas kam ntuas kuv li!” Thaum cov thawj coj ntawd raug cov thawj coj theem siab ntuas vim muaj qee yam xwm txheej, lawv txawm zoo siab heev thaum pom cov thawj coj ntawd raug xwm txheej, thiab zoo siab kawg nkaus li, seev nkauj yau yau, xav hauv lawv lub siab tias: “Zoo li cas xwb? Khav kawg li, tam sim no koj tau txais lub txim lawm! Leej twg uas ntuas kuv, kuv yeej yuav ua kom lawv tsis muaj lub neej zoo li!” Nej xav li cas txog cov tib neeg zoo li no? (Lawv lim hiam.) Txawm tias qhov uas lawv raug ntuas ntawd yuav tsim nyog npaum li cas los xij, lawv yeej lees txais tsis tau. Lawv pheej cav thiab tiv thaiv lawv tus kheej, thiab tom qab ntawd lawv tseem ua lawv tej dej num yam ua dog ua dig mus ntxiv, tsis kam hloov kiag li txawm yuav ntuas ntau zaus los xij. Yog koj pheej ua dog ua dig, nyob hauv Vajtswv lub tsev, koj tsuas raug ntuas xwb; yog koj ua hauj lwm hauv lub ntiaj teb es koj ua dog ua dig, ces tej zaum koj yuav raug ntiab tawm thiab poob koj txoj kev khwv noj khwv haus. Feem ntau nyob hauv Vajtswv lub tsev, lub hauv paus ntsiab lus yog kev sib qhia qhov tseeb thiab txhawb los ntawm lub siab hlub, cia rau tib neeg feem coob caum qhov tseeb thiab ua lawv tej dej num li ib txwm. Qhov tseeb tiag, nyob hauv cov thawj coj thiab cov neeg ua hauj lwm, tsuas muaj ib feem tsawg tsawg xwb uas tej zaum yuav raug kev ntuas loj. Tib neeg feem coob ua raws li txoj kev ntseeg, kev paub, lub siab txawj xav, thiab laj thawj, lees txais Vajtswv txoj kev tshawb xyuas kom meej, thiab tsis ua tej kev txhaum loj, yog li ntawd lawv thiaj li tsis raug kev ntuas uas loj. Txawm li cas los xij, qhov raug ntuas ntawd yog ib yam zoo; muaj pes tsawg tus neeg uas tau raug kev ntuas, tshwj xeeb yog raug ntuas los ntawm tus Nyob Saud? Qhov no yog ib lub cib fim zoo heev rau qhov kev paub txog tus kheej thiab loj hlob ntawm lub neej txoj sia. Yam tsawg kawg cov ntseeg yuav tsum to taub txog qhov tseem ceeb ntawm qhov kev raug ntuas, lees paub tias qhov ntawd yog ib yam zoo. Txawm tias kev ntuas los ntawm qee tus neeg yuav tsis mus raws li tej hauv paus ntsiab lus tag nrho, sib xyaw nrog tus kheej tej kev xav thiab kev siab kub los xij, koj tseem yuav tsum ntsuam xyuas koj tus kheej seb muaj qhov twg ntawm koj tej kev ua uas tsis mus raws li tej hauv paus ntsiab lus thiab lees txais qhov ntawd yam zoo; qhov ua li no yeej pab tau rau koj. Tiam sis, cov tib neeg phem no haj tseem lees txais tsis tau txawm yog qhov kev ntuas uas tsim nyog los xij. Txawm tias lawv tsis ua ib yam dab tsi los pauj rov qab los xij, lawv lub siab yeej muaj kev tsis txaus siab loj heev, lawv foom phem thiab cem lwm tus. Thaum cov uas tau ntuas lawv ntawd raug ntuas los sis ntsib xwm txheej phem, lawv haj tseem zoo siab tshaj ib tug me nyuam yaus uas noj tsiab peb caug. Qhov no yog qhov kev qhia tshwm ntawm cov tib neeg phem. Kuj tseem muaj qee tus neeg uas nyiam sib tw thaum ua lawv tes dej num; lawv nquag tsis ua raws li tej hauv paus ntsiab lus thiab ua dog ua dig, uas ua rau lawv ua lawv tej dej num tsis tawg paj txi txiv. Thaum cov thawj coj sib qhia txog lawv tej teeb meem thiab ntuas lawv, cov uas nyiam ua pauj rov qab ntawd tsis tuaj yeem coj rau qhov no kom yog. Txawm tias nyob hauv lawv lub siab lawv lees paub txog lawv txoj kev ua dog ua dig thiab tsis muaj hauv paus ntsiab lus thaum ua lawv tej dej num los, lawv tseem tshwm muaj tej kev xav thiab kev ua los nrhiav kev ua pauj rov qab rau qhov uas lawv raug ntuas ntawd. Tom qab ntawd, lawv sau ntawv liam cuav txog cov thawj coj, tuav cov thawj coj ntawd qee yam kev ua thiab kev nthuav tawm txog txoj kev qias vuab tsuab los hais tshaj qhov muaj tseeb thiab qhia tawm rau cov thawj coj theem siab, sim ua kom cov thawj coj ntawd raug rho tawm. Yog lawv ua tsis tau tiav lawv lub hom phiaj, lawv txawm rhuav thiab cuam tshuam nyob tom qab nraub qaum, tawv ncauj tawm tsam cov thawj coj tej kev npaj. Lawv tsis xav txog pawg ntseeg tes hauj lwm, tej hauv paus ntsiab lus uas Vajtswv lub tsev cheem tsum, los sis qhov txiaj ntsig ntawm kev ua lawv tes dej num; lawv tsuas xav txog kev tso lawv txoj kev npau taws tawm xwb. Lawv tsis kam mloog leej twg hais li, haj tseem tsis lees txais cov thawj coj thiab cov neeg ua hauj lwm tej kev qhuab ntuas thiab. Txawm tias lawv tsis cav los sis tawm tsam tim ntsej tim muag los xij, nyob tom qab nraub qaum mas, lawv tuaj yeem tso tej kev xav tsis zoo tawm, tso lawv tes hauj lwm tseg los tawm tsam, thiab nrhiav txhua yam chaw tuav los tawm tsam Vajtswv lub tsev tej kev npaj tes hauj lwm los sis tawm tsam cov thawj coj thiab cov neeg ua hauj lwm. Lawv haj tseem tshaj tawm tej kev xav phem thiab; lawv tus kheej xav tsis zoo thiab tsis xav ua lawv tes dej num, tiam sis lawv tseem yuav rub tib neeg ntau ntxiv kom xav tsis zoo thiab tub nkeeg es tsis ua lawv tej dej num thiab. Lawv lub hauv paus ntsiab lus yog dab tsi? “Kuv tsis ntshai tuag; kuv yuav tsum nrhiav ib tug neeg nrog kuv tuag ua ke. Cov thawj coj ntuas kuv, hais tias kuv ua kuv tes dej num tsis mus raws li tus qauv—ces kuv yuav ua kom txhua tus ua tsis tau lawv tes dej num kom zoo. Yog kuv ua tsis tau zoo, nej sawv daws los yeej yuav ua tsis tau zoo ib yam! Cov thawj coj ntuas kuv, thiab nej sawv daws luag kuv; kuv yuav ua kom nej sawv daws tsis tau neej zoo ua!” Thaum lawv ua lawv tes dej num yam ua dog ua dig los sis ua txhaum tej hauv paus ntsiab lus, thiab muaj ib tug neeg qhia qhov no rau cov thawj coj, lawv txawm tshawb xyuas qhov teeb meem no: “Leej twg qhia tawm txog kuv? Leej twg mus qhia txog kuv rau cov thawj coj? Leej twg muaj kev sib raug zoo ti ti nrog cov thawj coj? Yog kuv paub tias leej twg qhia tawm txog kuv rau cov thawj coj theem siab, kuv yeej yuav tsis tseg tus neeg ntawd li! Kuv yeej yuav tsis tso tseg li!” Lawv tsis yog tsuas hais tau cov lus phem lus tsiv xwb, tiam sis muaj tseeb tiag, lawv kuj ua tau raws li cov lus hem ntawd thiab. Cov tib neeg no muaj ntau yam tswv yim phem thiab qias neeg los nrhiav kev ua pauj rov qab, tsis yog tsuas nrhiav chaw tuav los txiav txim thiab teem txim rau lwm tus xwb; qee leej txhob txwm nyiag tus neeg uas lawv xav ua pauj rau ntawd lub pob sam hluav taws xob rau lub khoos phis tawj, ua kom cov neeg ntawd ntxiv tsis tau hluav taws xob rau hauv lawv lub khoos phis tawj thiab tab kaum lawv txoj kev ua tes dej num. Hos lwm cov txhob txwm muab ntsev ntau ntau tso rau hauv ib tug neeg twg cov zaub mov kom noj tsis tau. Tej hau kev qias uas siv los ua pauj rov qab no, yeej pom muaj ntau nyob hauv cov ib txwm tsis ntseeg, kuj raug cov tib neeg phem nyob hauv pawg ntseeg coj los siv thiab. Lawv tej hau kev los ua pauj rov qab ntawd yeej muaj ntau tshaj tej no, nrog rau qee yam kev ua uas qias neeg uas peb yeej tsis tau pom dua li; peb tsuas yog muab qee qhov piv txwv uas yooj yim los hais xwb. Nyob hauv cov neeg ntawd, qee tus neeg txhob txwm tsim teeb meem, tsim kev thaiv, thiab tsim tej kev nyuaj rau lwm tus; qhov no yog ib qho uas pom ntau heev. Nyob hauv txhua pab pawg, nyob hauv ntau yam xwm txheej thiab ntau qhov chaw ib puag ncig, tus moj yam tsiv nyaum ntawm cov uas nyiam ua pauj rov qab ntawd yeej nthuav tawm tas li. Tej kev qhia tshwm txog kev ua pauj rov qab ntawm cov tib neeg phem thiab cov tawm tsam khetos ntawd mas haj yam pom tau meej dua. Tsuav tseem muaj cov tib neeg phem thiab cov tawm tsam khetos nyob hauv pawg ntseeg xwb, cov neeg Vajtswv xaiv tseg, uas ntseeg Vajtswv thiab caum qhov tseeb tiag tiag ntawd, yeej yuav raug cuam tshuam. Tsuav hnub twg tseem muaj cov tib neeg phem thiab cov tawm tsam khetos nyob, hnub ntawd pawg ntseeg yeej yuav tsis muaj kev thaj yeeb li—cov tib neeg zoo yuav raug tawm tsam thiab raug cais tawm; tshwj xeeb yog cov uas caum qhov tseeb yuav raug txoj kev ua yeeb ncuab thiab kev ua pauj rov qab ntawm cov tib neeg phem thiab cov tawm tsam khetos. Cov tib neeg phem thiab cov tawm tsam khetos tsim txom thiab ua pauj lwm tus li cas? Ua ntej tshaj, lawv tsom mus rau cov uas caum qhov tseeb thiab ua raws li tej hauv paus ntsiab lus. Cov tib neeg phem no paub meej heev tias tsuas yog cov uas caum qhov tseeb xwb thiaj li yog cov uas ua kev puas tsuaj rau lawv tshaj plaws. Yam ib, cov tib neeg uas to taub qhov tseeb tuaj yeem paub cais lawv; tsuav lawv ua ib yam dab tsi phem xwb, cov uas to taub qhov tseeb yeej yuav pom tshab. Yam ob, thaum muaj cov neeg uas to taub qhov tseeb nyob ntawd, lawv tej kev ua phem yuav raug txwv me ntsis, ua rau lawv nyuaj ua kom tiav lawv tej hom phiaj. Thaum saib raws li qhov no, tsuas yog cov uas caum qhov tseeb xwb thiaj li yog cov tiv thaiv pawg ntseeg tes hauj lwm. Thaum muaj cov uas caum qhov tseeb nyob ntawd, cov tawm tsam khetos thiab cov tib neeg phem thiaj li tsis kam quab yuam lwm tus yam lim hiam thiab yuav tsum tau txwv lawv tus kheej me ntsis. Yog li ntawd, cov uas caum qhov tseeb thiaj li yog tus pos uas nkaug cov tawm tsam khetos thiab cov tib neeg phem lub qhov muag, thiab nkaug lawv cov nqaij, thiab yog vim li ntawd lawv thiaj li nrhiav hau kev los ua pauj rov qab.
Thaum cov tib neeg phem ua pauj rov qab ntawd, lawv nthuav ib tug moj yam tsiv nyaum tawm, tsis muaj laj thawj thiab tsis muaj kev paub tias dab tsi yog qhov tsim nyog. Cov uas tau nrog lawv sib raug zoo ib ntus thiab to taub txog lawv mas yeej ntshai lawv txog ib theem twg. Thaum nrog lawv tham, tib neeg yuav tsum tau ceev faj thiab ua tib zoo hais lus heev, thiab yuav tsum tau hwm lawv heev. Tib neeg yuav tsum tau ua kom haum lawv siab thiab ua raws li lawv lub siab nyiam tas li, thiab txawm lawv yuav muaj teeb meem los sis muaj qhov tsis zoo dab tsi los yeej taw qhia ncaj qha rau lawv tsis tau li. Tiam sis, tib neeg yuav tsum tau sib tham txog tej teeb meem no yam tsis ncaj nqa, thiab hais kom haum lawv siab, thiab tom qab hais tag, tseem yuav tsum tau qhuas lawv, hais tias, “Txawm tias koj muaj qhov tsis zoo los sis qhov tsis txaus no los xij, koj kawm tej txuj ci tau sai dua peb, koj tej peev xwm qib siab yeej zoo dua lwm tus, thiab koj ua hauj lwm tau sai thiab zoo dua peb. Kuv saib mas koj tej qhov muaj tsis txaus ntawd puav leej ua tej qhov zoo.” Tib neeg haj tseem yuav tsum tau qhuas lawv kom lawv zoo siab thiab. Vim li cas thiaj li ua li no? Qhov ntawd yog vim ntshai lawv txoj kev ua pauj rov qab. Ua li no, cov tib neeg phem no thiaj li zoo siab, thiab lawv lub siab thiaj li kaj lug. Txhawm rau zam lawv txoj kev ua pauj rov qab, tib neeg feem coob thiaj li ntshai hais txog tej teeb meem uas pom ntawd tim ntsej tim muag rau lawv, thiab kuj tsis kam qhia tawm txog tej teeb meem no thiab. Txawm pom tseeb tias lawv tab tom ua rau Vajtswv lub tsev tej txiaj ntsim puas tsuaj, thiab pawg ntseeg tes hauj lwm raug tab kaum vim lawv tawv ncauj thiab ua raws li lawv lub siab nyiam, los sis txawm tias pom qee qhov uas nkhaus nyob rau hauv lawv txoj xub ke thiab tej hauv paus ntsiab lus los xij, yeej tsis muaj leej twg kam tawm tsam los sis qhia lawv tawm rau cov thawj coj theem siab li. Vim lawv tus moj yam tsiv nyaum thiab lawv txoj kev ua neeg uas nyiam ua pauj rov qab ntawd, lwm tus thiaj li ntshai lawv mus txog ib theem twg, npau taws tiam sis ntshai heev tsis kam hais tawm. Qhov kev nrog lawv tham yuav tsum tau hais lus paub cai thiab hais lus mos lus muag txhwj xeeb, nrog rau coj ib tug cwj pwm uas zoo zoo, mos muag, thiab paub kev paub cai heev rau lawv. Thaum tib neeg hais lus hwm, paub cai, thiab ua raws li lawv, lawv thiaj li hnov xis nyob hauv lub siab. Txawm li cas los xij, yog muaj leej twg hais ncaj qha, nthuav lawv tej teeb meem tawm thiab muab tej tswv yim rau lawv, lawv txawm tsis nyiam kiag li, xam tias qhov ntawd yog kev tsis hwm, xam tias lwm tus muaj tej kev tsis txaus siab los sis muaj kev ua yeeb ncuab rau lawv. Qhov no ua rau lawv nrhiav kev ua pauj rov qab rau tus neeg ntawd thiab tsim txom tus neeg ntawd; lawv yuav tsum rhuav tshem thiab ua rau tus neeg ntawd lub npe puas. Yog tus neeg ntawd poob rau hauv lawv txhais tes, tus neeg ntawd yeej yuav tsis muaj qhov kawg uas zoo li. Cov tib neeg zoo li no puas txaus ntshai? (Txaus ntshai.) Yog koj tsis to taub lawv thiab koj ua rau lawv chim, lawv yeej yuav khaws kev ntxub ntxaug rau koj, txawm yog thaum noj mov los sis pw los lawv yeej xav txog kev ua pauj rov qab rau koj. Kiag thaum lawv tsom ntsoov rau koj lawm, yeej yuav zam tsis dhau uas yuav ntsib teeb meem, vim lawv tau txiav txim siab nrhiav kev ua pauj rov qab lawm. Txawm tias saib sab nraud mas tej zaum lawv yuav hais lus rau koj zoo li qub, tiam sis thaum lawv xav txog qhov nrhiav kev ua pauj rov qab ntawd, txhua yam uas koj tau ua los sis hais rau lawv yav tas los ntawd yuav dhau los ua chaw tuav rau lawv. Lawv yuav coj rau koj zoo li ib tug yeeb ncuab, ua pauj rov qab ib qho zuj zus mus txog thaum lawv hnov tias lawv tau ua pauj rov qab txaus lawm thiab txaus siab tag nrho. Qhov no yog qhov tshwm sim los ntawm kev nrog cov tib neeg phem sib raug zoo.
Cov tib neeg uas nyiam ua pauj rov qab, thaum saib raws li lawv ntau yam kev coj thiab tej hauv paus ntsiab lus thiab txoj kev uas lawv ua thiab coj tus kheej ntawd, lawv yog ib qho kev hem thawj rau yuav luag txhua tus neeg, tshwj tsuas yog cov neeg uas siab zoo, coj mos muag rau txhua leej txhua tus, thiab tsis muaj hauv paus ntsiab lus li thaum sib cuag nrog leej twg—cov tib neeg zoo li no thiaj li nyab xeeb thaum nrog cov neeg tsiv nyaum nyob ua ke. Txawm li cas los xij, cov uas muaj kev paub ntawm lub siab txawj xav los sis paub txog kev ncaj ncees me ntsis ntawd yeej yuav hnov raug hem thawj ntau los sis tsawg thaum nyob ua ke nrog cov neeg uas nyiam ua pauj rov qab ntawd. Nyob rau hauv tej xwm txheej uas hnyav, tej zaum lawv yuav raug mob ntawm lub cev los sis haj tseem raug hem txog lawv txoj sia thiab, hos nyob rau hauv tej xwm txheej uas tsis tshua hnyav, tej zaum lawv yuav raug tawm tsam los ntawm cov lus, raug hais lus phem, los sis raug liam cuav. Tej no yog ib txhia ntawm tag nrho tej kev nthuav tawm thiab kev qhia tshwm txog tus moj yam tsiv nyaum ntawm cov neeg uas nyiam ua pauj rov qab. Thaum saib raws li lawv tej kev qhia tshwm tag nrho, cov tib neeg zoo li no kuj ua rau muaj kev cuam tshuam nyob hauv cov kwv tij thiab cov nkauj muam thiab nyob hauv pawg ntseeg thiab. Yuav luag txhua tus neeg uas sib cuag nrog cov neeg nyiam ua pauj rov qab no dhau los ua tus uas lawv yuav ua pauj rov qab thiab, yuav luag txhua zaus, dhau los ua tus raug tsim txom. Cov uas nyiam ua pauj rov qab muaj ib tug moj yam tsiv nyaum, lawv yog cov foob pob uas teem sij hawm tawg uas tuaj yeem tawg tau txhua lub sij hawm. Txawm tias lawv tuaj yeem ua raws li lwm tus los ua lawv tej dej num thiab ua lub neej hauv pawg ntseeg li ib txwm los xij, thaum saib raws li lawv txoj kev ua neeg, lawv tuaj yeem nrhiav kev ua pauj rov qab thiab ua kev hem thawj rau lwm tus tau txhua lub sij hawm, thiab ua rau tib neeg ntshai thiab ceev faj tus kheej ntawm lawv. Qhov no tsis yog twb ua rau muaj kev cuam tshuam rau tib neeg feem coob lawm lod? (Yog.) Txhawm rau kom tsis txhob ua rau lawv chim, ua kom lawv zoo siab, thiab zam lawv txoj kev cim kev ntxub thiab kev ua pauj rov qab, tib neeg yuav tsum tau ua tib zoo saib lawv lub ntsej muag tas li thiab mloog cov ntsiab lus uas zais nyob hauv lawv cov lus, nrhiav kom to taub txog lawv txoj kev npaj siab, lub hom phiaj, thiab txoj xub ke thaum lawv hais lus. Thaum saib raws li qhov no, tib neeg feem coob tsis yog tsuas raug lawv cuam tshuam xwb tiam sis tseem raug lawv tswj lawm thiab? (Yog.) Yog li ntawd, thaum saib raws li lub ntsiab xeeb txawm ntawm qhov teeb meem no, cov tib neeg uas nyiam ua pauj rov qab zoo li no puas yog cov tib neeg phem? (Yog.) Yeej pom tseeb heev tias lawv tsim nyog raug cais ua cov tib neeg phem. Yog ib tug neeg yuav to taub txog tej xwm txheej ntawm cov tib neeg zoo li no, feem coob yeej ntshai tsis kam hais qhov tseeb txog lawv, thiab lam teb txhua lo lus nug txog lawv nrog cov lus teb uas tsis meej xws li “Kuj zoo thiab,” tsis kam qhia tawm txog lawv tej teeb meem, tham txog los sis ntsuas txog lawv. Qhov no tsis yog ib qho xwm txheej uas muaj teeb meem lod? Ib txhia hais tias, “Cov tib neeg phem zoo li no nrhiav kev ua pauj rov qab tau txhua lub sij hawm thiab txhua qhov chaw; leej twg yuav kam thab lawv? Tsis tas li ntawd xwb, lawv pheej khav tias lawv muaj kev sib raug zoo nrog cov neeg phem thiab cov nom tswv, hem tias yog leej twg ua rau lawv chim, tus neeg ntawd yuav tsis muaj qhov xaus zoo li, lawv yeej yuav qhia kom tus neeg ntawd paub xwb, thiab ua rau tus neeg ntawd tsev neeg tuag txom nyem. Yog li ntawd, tsis muaj leej twg kam thab lawv. Cia lawv ua li lawv nyiam, thiab thov kom peb muaj hmoo xwb.” Koj saib seb, ib qho xwm txheej zoo li no tau tsim muaj nyob hauv pawg ntseeg, uas txhais tau tias lawv twb tswj tau cov tib neeg no lawm. Vim pom lawv tus moj yam tsiv nyaum hauv kev nrhiav kev ua pauj rov qab, tib neeg thiaj li tsis muaj cuab kav cem los sis ntuas lawv, los sis tsis kam hais tej kev ntsuas tseeb tiag txog lawv. Kev sib tham yuav tsum tau zam lawv, vim ntshai tsam ua rau lawv chim, thiab txawm yog hais ntxaws ntxaws txog lawv tej kev qhia tshwm tseeb tiag nyob tom qab lawv nraub qaum los yeej txaus ntshai heev. Tib neeg ntshai dab tsi? Ntshai tsam cov lus ntawd yuav mus txog lawv lub pob ntseg, es raug lawv ua pauj rov qab. Tom qab hais tas, cov tib neeg ntawd npuaj tus kheej lub qhov ncauj thiab hais tias, “Au tsis, hnub no kuv hais lus yuam kev lawm. Tos saib mas, kuv yuav raug kev txom nyem vim qhov no. Ua cas kuv ho ceev tsis tau kuv lub qhov ncauj li?” Txij thaum ntawd los, cov tib neeg no ua neej nyob yam ntshai tshee hnyo txhua hnub, ceev faj tas li, pheej yuav tau ua tib zoo saib thaum nyob ze tus neeg ntawd, xav tias, “Nws puas paub yam kuv hais? Qhov ntawd puas tau mus txog nws lub pob ntseg lawm? Nws tus cwj pwm uas muaj rau kuv puas tseem zoo li qub?” Thaum cov tib neeg ntawd yim xav, cov tib neeg ntawd yim tsis kaj siab, thiab thaum lub sij hawm yim ntev mus, cov tib neeg ntawd txoj kev ntshai yim loj zuj zus, yog li ntawd cov tib neeg ntawd thiaj li txiav txim siab tias yuav zam nws yog qhov zoo dua, xav tias, “Kuv thab tsis tau nws, tiam sis kuv zam tau nws. Txawm nws paub yam kuv tau hais los sis tsis paub los xij, kuv tsuas nyob deb ntawm nws tsis tau lod?” Txoj kev ntshai no loj heev ua rau lawv tsis kam tuaj koom tej kev sib txoos ua ke, zam txhua qhov chaw uas tej zaum tus neeg tsiv nyaum no yuav nyob ntawd, txawm tias yog qhov chaw uas lawv yuav tsum ua lawv tes dej num los xij, hnov ntshai poob plig tag.
Yuav tsum saib xyuas cov tib neeg phem uas nyiam ua pauj rov qab ntawd li cas? (Muab lawv ntsaig tawm mus.) Qhov ntawd yeej yooj yim heev: Tsuas yog tsib lo lus xwb—muab lawv ntsaig tawm mus—ces tiav lawm. Yog lawv raug ntsaig tawm mus thiab feem coob muaj kev zoo siab, hnov txaus siab heev hauv lawv lub siab, ces qhov kev txiav txim siab ntsaig lawv tawm mus ntawd yeej yog lawm. Yav tas los, thaum sib txoos ua ke, qhov uas muaj cov tib neeg phem nyob ntawd ua rau tib neeg feem coob raug txwv thaum sib qhia; lawv ntshai tsam hais ib lo lus yuam kev yuav ua rau cov neeg phem ntawd chim, yog li ntawd lawv thiaj li ceev faj thiab zam cov neeg phem ntawd thaum hais lus. Thaum sib txoos ua ke, thiaj li muaj ib txoj cai uas tsis tau sau tseg tshwm sim tuaj: Yog muaj leej twg ua qhov muag qhia, ces lub ncauj lus yuav hloov tam sim ntawd. Qhov no yog qhov xwm txheej uas tau tshwm sim tuaj. Thaum cov tib neeg uas nyiam ua pauj rov qab ntawd raug ntsaig tawm mus lawm, pawg ntseeg thiaj li muaj kev thaj yeeb, lub neej hauv pawg ntseeg thiaj li zoo li ib txwm, thiab kev sib raug zoo ntawm tib neeg los kuj rov qab zoo li ib txwm lawm thiab. Thaum no cov kwv tij thiab cov nkauj muam thiaj li tuaj yeem qhia thiab nyeem thov Vajtswv cov lus tau yam ywj pheej, thiab qhia lawv cov lus tim khawv uas hais txog txoj kev ntsib kev pom tau yam ywj pheej, yam tsis raug leej twg tswj, yam tsis ntshai leej twg, thiab yam tsis tas yuav ua tib zoo saib leej twg lub ntsej muag. Thaum saib raws li qhov txiaj ntsig no, qhov ntsaig cov tib neeg phem zoo li no tawm mus puas yog lawm? (Yog lawm.) Yeej yog tshaj plaws. Lawv yuav tsum raug ntsaig tawm mus. Yog tsis muab lawv ntsaig tawm mus, txhua tus yuav tsis muaj lub neej zoo ua, thiab ntau tus neeg yuav ntshai heev tsis kam tuaj koom tej kev sib txoos ua ke. Qee tus neeg uas tais caus tej zaum haj tseem yuav ua npau suav phem, pheej ua npau suav tias raug cov dab phem zawm caj dab. Lawv yuav pheej ceev faj dhau thaum sib txoos ua ke, yeej tsis kam hais lus, hnov tsis tau txog kev ywj pheej thiab dim. Txij thaum cov tib neeg phem raug ntsaig tawm mus lawm, lawv tau hloov tag nrho: Tam sim no lawv kam hais lus thaum sib txoos ua ke, lawv kub siab lug dua thaum sib qhia, thiab hnov muaj kev ywj pheej thiab kev dim. Qhov no puas yog ib yam zoo? (Yog.) Qhov kev paub cais cov tib neeg uas nyiam ua pauj rov qab uas muaj ib tug moj yam tsiv nyaum no mas yooj yim. Feem ntau, tom qab sib cuag nrog ib tug neeg ntau dua rau lub hli, txhua tus tsim nyog hnov thiab pom tau meej tias lawv puas yog hom neeg ntawd; tom qab nrog lawv nyob tau ib ntus ces yuav pom tau meej lawm. Cov thawj coj thiab cov neeg ua hauj lwm hauv pawg ntseeg yuav tsum tsis txhob nyob twj ywm tos xwb thaum saib xyuas cov tib neeg phem zoo li no. Qhov tsis txhob nyob twj ywm tos xwb ntawd txhais li cas? Qhov ntawd txhais hais tias tsis txhob tos txog thaum lawv coj qee tus mus yuam kev thiab ua tej yam phem ua rau txhua tus npau taws lawm es mam li saib xyuas lawv—qhov ntawd yuav yog qhov nyob twj ywm tos dhau lawm. Yog li ntawd, lub sij hawm twg yog lub sij hawm zoo tshaj plaws los saib xyuas cov tib neeg phem? Qhov ntawd yog thaum muaj ib feem tib neeg tsawg tsawg twb raug ua phem thiab tsis nyiam kiag li thiab ceev faj tus kheej ntawm cov neeg ntawd heev, thiab thaum twb cais tau meej meej tias lawv yog cov tib neeg phem lawm. Thaum txog theem no lawm, yuav tsum saib xyuas thiab ntsaig lawv tawm mus tam sim ntawd kom tiv thaiv tsis txhob muaj tib neeg ntau ntxiv raug ua phem, thiab kom cov neeg tais caus tsis txhob raug ua rau ntshai poob plig los sis raug lawv ua rau dawm ntog. Qhov tseem ceeb tshaj plaws nyob ntawm no yog dab tsi? Yog cia cov tib neeg phem ua rau muaj kev cuam tshuam nyob hauv pawg ntseeg ntev dhau, qhov tshwm sim los thaum kawg yog lawv yuav tswj pawg ntseeg thiab cov neeg Vajtswv xaiv tseg. Yog mus txog theem no lawm, txhua tus yuav raug kev txom nyem. Txhawm rau zam kom txhua tus tsis txhob raug ua phem, thaum muaj ib feem ntawm tib neeg raug ua phem rau ntawd, los sis thaum ib txhia twb tsis nyiam cov tib neeg zoo li no kiag li lawm thiab pom tshab lawv, paub meej tias lawv yog cov tib neeg phem uas nyiam ua pauj rov qab, cov thawj coj pawg ntseeg yuav tsum maj nroos ntsaig lawv tawm mus. Cov thawj coj pawg ntseeg yuav tsum tsis txhob tos txog thaum cov tib neeg phem tau ua ntau yam kev phem thiab ua rau sawv daws npau taws lawm es mam li txiav txim siab ua—qhov ntawd yuav yog qhov nyob twj ywm tos dhau lawm; thiab cov thawj coj pawg ntseeg zoo li no tsis yog cov neeg siv tsis tau dhau lawm lod? (Yog.) Thaum ua tes hauj lwm zoo li no, cov thawj coj pawg ntseeg yuav tsum tau xyuam xim tshwj xeeb rau cov tib neeg zoo li no tej yam ntxwv, tej kev qhia tshwm, thiab tej kev nthuav tawm, maj nroos pom tshab txog lawv tej moj yam, thiab tom qab ntawd txiav txim tias lawv yog cov tib neeg phem uas yuav tsum raug ntsaig tawm mus, es saib xyuas lawv kom sai li sai tau. Yog tias tsis tuaj yeem txiav txim tau thaum pib, ces yuav tsum tau tsom ntsoov rau kev soj ntsuam, ua tib zoo saib lawv cov lus hais, lawv txoj kev coj, thiab lawv txoj kev coj cwj pwm, to taub lawv tej kev xav thiab tej yam uas lawv npaj yuav ua. Kiag thaum pom tias lawv xav ua pauj rov qab, ces yuav tsum tau maj nroos nrhiav kev los muab lawv ntsaig tawm mus, los tiv thaiv kom tsis txhob muaj tib neeg ntau ntxiv raug ua phem rau thiab raug kev txom nyem los ntawm tej kev ua pauj rov qab ntawd.
Ib txhia thawj coj pawg ntseeg hais tias, “Peb tsis ntshai cov tib neeg phem; dhau ntawm qhov ntshai Vajtswv lawm, peb yeej tsis ntshai leej twg li. Cov tib neeg phem yog dab tsi rau peb? Tab txawm yog Ntxwgnyoog los peb twb tsis ntshai, thiab peb kuj tsis ntshai txoj kev ntes thiab kev tsim txom los ntawm tus zaj loj liab ploog thiab, yog li ntawd vim li cas peb thiaj li yuav tsum ntshai cov tib neeg phem? Ib tug tib neeg phem tsuas yog ib tug dab me me xwb, vim li cas thiaj li yuav tsum ntshai lawv? Peb tsuas cia lawv nyob hauv pawg ntseeg thiab cia cov kwv tij thiab cov nkauj muam feem coob raug ua phem rau. Tom qab raug ua phem rau lawm, lawv yuav loj hlob nyob hauv kev paub cais, thiab thaum muaj kev paub cais lawm, lawv yuav tsis raug cov tib neeg phem zoo li no khi thiab txwv ntxiv lawm. Qhov ntawd mas zoo heev!” Cov tib neeg feem coob puas ua tau txog txoj kev loj hlob ntawm sab ntsujplig no? (Tsis tau.) Lawv ua tsis tau. Lawv txoj kev ntseeg me dhau, qhov tseeb uas lawv to taub tsawg dhau, thiab lawv txoj kev loj hlob ntawm sab ntsujplig me dhau. Lawv zam txhua zaus thaum pom cov tib neeg phem, tsis kam ua rau cov tib neeg phem ntawd chim. Dhau ntawm qhov ntshai tuag thiab hlub lawv txoj sia lawm, tib neeg feem coob kuj tiv thaiv ntau yam txiaj ntsim ntawm lawv sab cev nqaij daim tawv thiab; lawv tsis muaj peev xwm tau txais kev paub cais los sis kawm paub tej lus qhia los ntawm ntau yam uas cov tib neeg phem ua. Yog li ntawd, txoj kev xav no yeej tsis muaj qhov muaj tiag kiag li thiab yeej ua tsis tau txiaj ntsig dab tsi li. Yog muaj ib tug tib neeg phem tshwm sim nyob hauv ib pawg ntseeg, thaum cov tib neeg feem coob tau paub meej thiab txiav txim tias tus neeg ntawd yog tib neeg phem lawm, muaj pes tsawg tus neeg uas muaj kev paub txog kev ncaj ncees es sawv los, txiav kev sib raug zoo nrog tus tib neeg phem ntawd, tawm tsam nrog lawv, thiab tiv thaiv Vajtswv lub tsev tej txiaj ntsim? Qhov ntawd yog pes tsawg feem pua? Puas yog 10%? Yog tsis muaj 10%, ces puas muaj 5%? (Kuj yuav luag li ntawd.) Qhov ntawd txhais hais tias nyob hauv ib pab pawg uas muaj nees nkaum leej, tej zaum yuav muaj ib leeg uas sawv los tawm tsam ib tug tib neeg phem, tuaj yeem siv Vajtswv cov lus los muab tus tib neeg phem ntawd nthuav tawm thiab sib twv nrog nws, nrog nws sib cav, thiab muab nws ntsaig tawm ntawm pawg ntseeg mus. Cov tib neeg zoo li no yog cov neeg tshaj lij nyob hauv cov neeg Vajtswv xaiv tseg, yog cov neeg uas muaj txiaj ntsig loj ntawm pawg ntseeg. Ib txhia thawj coj thiab cov neeg ua hauj lwm ntshai saib xyuas cov tib neeg phem. Cov tib neeg zoo li no puas tsim nyog rau lawv tej luag hauj lwm? Lawv puas tsim nyog ua tim khawv rau Vajtswv? Thaum lawv hnov txog ib tug neeg phem uas yuav tsum raug ntsaig tawm ntawm pawg ntseeg mus, lawv hais tias, “Qhov muab lawv ntsaig tawm mus ntawd mas nyuaj me ntsis. Yav tas los kuv yeej swm lawv heev. Lawv paub tias kuv nyob qhov twg thiab kuv tsev neeg muaj leej twg ntseeg Vajtswv. Yog kuv ntiab lawv tawm mus, lawv yeej yuav nrhiav kev ua pauj rov qab rau kuv.” Nej xav li cas, cov tib neeg zoo li no puas tsim nyog ua cov thawj coj thiab cov neeg ua hauj lwm? (Tsis tsim nyog.) Tom qab nrhiav pom ib tug neeg phem uas tim tsum muab ntsaig tawm mus, thawj yam uas lawv xav txog yog lawv tus kheej tej txiaj ntsim, ntshai tus neeg phem ntawd txoj kev ua pauj rov qab. Lawv tsis xav txog tias tus tib neeg phem ntawd, paub qee qhov chaw sib txoos ua ke thiab cov ntaub ntawv sib hu ntawm cov kwv tij thiab cov nkauj muam, tom qab raug ntsaig tawm mus lawm tus neeg phem ntawd puas tuaj yeem muab pawg ntseeg los sis cov kwv tij thiab cov nkauj muam muag tawm, nrog rau seb yuav tsum tiv thaiv qhov no li cas. Qhov uas lawv txhawj xeeb tshaj plaws tsis yog Vajtswv lub tsev tej txiaj ntsim tiam sis yog qhov ntshai tias tus neeg phem ntawd paub lawv tsev neeg tej xwm txheej, tsam yuav muab lawv muag tawm thiab yuav cuam tshuam tsis zoo rau lawv tsev neeg. Cov thawj coj thiab cov neeg ua hauj lwm zoo li no puas muaj lus tim khawv? (Tsis muaj.) Ib txhia thawj coj thiab neeg ua hauj lwm pom cov tib neeg phem quab yuam lwm tus yam lim hiam thiab xav tswj pawg ntseeg, tiam sis lawv tsis kam hais tawm. Tiam sis, lawv yeem swb thiab zam, tsis kam saib xyuas cov tib neeg phem ntawd. Thaum lawv pom cov tib neeg phem, lawv ntshai cuag nkaus li pom ib tug dab phem uas muaj peb lub taub hau thiab rau sab caj npab, lawv tsis tiv thaiv Vajtswv lub tsev tej txiaj ntsim. Tib lub sij hawm ntawd, muaj qee tus kwv tij thiab nkauj muam dog dig haj tseem muaj kev paub txog kev ncaj ncees me ntsis, muaj lub siab tawv thiab kev ntseeg sawv los nthuav cov neeg phem tawm tom qab pom cov tib neeg phem ntawd, tsis ntshai tias cov neeg phem ntawd yuav nrhiav kev ua pauj rov qab rau lawv. Txawm li cas los xij, nyob hauv pawg ntseeg mas cov tib neeg zoo li no muaj tsawg dhau. Qhov 5% uas nej sawv daws nyuam qhuav hais ua ntej ntawd tej zaum yuav yog kev hais tshaj dhau lawm, tsis yog ib qho kev kwv yees uas ceev faj. Saib los ntawm qhov no, cov tib neeg feem coob tus cwj pwm uas muaj rau cov tib neeg uas muaj ib tug moj yam tsiv nyaum uas nyiam ua pauj rov qab ntawd yog dab tsi? (Cov tib neeg feem coob tiv thaiv lawv tus kheej.) Thawj yam uas lawv xav txog yog tiv thaiv lawv tus kheej, tsis xav txog seb yuav sawv los tawm tsam cov neeg phem li cas los tiv thaiv Vajtswv lub tsev tej txiaj ntsim thiab cov kwv tij thiab cov nkauj muam tej txiaj ntsim, tsuas tsom ntsoov rau kev tiv thaiv lawv tus kheej xwb. Ua li qhov kev tiv thaiv lawv tus kheej no qhia txog teeb meem dab tsi? (Cov tib neeg zoo li no twm xeeb heev.) Thawj yam mas, qhov ntawd qhia txog kev ua neeg uas twm xeeb dhau, thiab yam ob mas, qhov ntawd qhia tias cov tib neeg feem coob txoj kev ntseeg rau Vajtswv me dhau. Lawv lub qhov ncauj hais tias, “Vajtswv muaj hwj chim kav txhua yam; Vajtswv yog peb lub zog txhawb,” tiam sis thaum ntsib qhov muaj tseeb, lawv xav tias lawv vam khom tsis tau Vajtswv thiab yuav tsum vam khom lawv tus kheej xwb, xub tiv thaiv lawv tus kheej ua ntej, qhov no yog ib yam uas lawv xam tias yog txoj kev ntse tshaj plaws. Lub ntsiab yog: “Tsis muaj leej twg tiv thaiv tau kuv, txawm yog Vajtswv los yeej vam khom tsis tau. Vajtswv nyob qhov twg? Peb tsis pom Nws! Tsis tas li ntawd xwb, kuv tsis paub tias xyov Vajtswv puas yuav tiv thaiv kuv los sis tsis tiv thaiv. Yog Nws tsis tiv thaiv kuv ne yuav ua li cas?” Tib neeg txoj kev ntseeg mas txaus khuv leej dhau lawm. Lawv pheej nquag qw tias, “Vajtswv muaj hwj chim kav txhua yam; Vajtswv yog peb lub zog txhawb,” tiam sis thaum muaj xwm txheej tshwm sim tuaj, lawv tsuas nrhiav kev tiv thaiv lawv tus kheej xwb, tsis muaj peev xwm sawv los tawm tsam Ntxwgnyoog thiab tuav lawv tej lus tim khawv khov kho, txawm yog txoj kev ntseeg me me li no xwb los twb tsis muaj. Tib neeg txoj kev ntseeg mas txaus khuv leej dhau lawm; qhov teeb meem no kuj tau nthuav tawm tag nrho tib neeg txoj kev ntseeg. Lawv txoj kev loj hlob ntawm sab ntsujplig mas me npaum li ntawd xwb. Hais txog cov tib neeg phem uas nyiam ua pauj rov qab ntawd, yog muaj ob peb tug neeg uas xav muab lawv nthuav tawm tiam sis hnov tias nyob ib leeg thiab tsis muaj zog thiab ntshai tsam raug cov tib neeg phem ntawd tsuj nias, lawv yuav tsum koom tes nrog ob peb tug thawj coj thiab neeg ua hauj lwm los sis cov kwv tij thiab cov nkauj muam uas muaj kev paub cais. Tom qab lawv koom ua ib lub zog lawm, lawv yeej yuav muaj kev ntseeg siab tag nrho tias yuav yeej. Tom qab ntawd, lawv tuaj yeem nthuav tawm thiab txheeb xyuas tej kev ua thiab tej kev coj ntawm cov tib neeg phem zoo li no, cia kom cov tib neeg feem coob paub cais thiab pom tau meej txog cov tib neeg phem lub ntsej muag tiag tiag, kom txhua tus tuaj yeem koom ua ib lub siab ib lub ntsws thiab koom tes ua ke muab cov tib neeg phem ntawd ntsaig tawm mus. Ua ntej no, nej sawv daws tau hais tias thaum cov tib neeg phem tshwm sim tuaj, tej zaum yuav muaj ib leeg ntawm nees nkaum leej nyob hauv cov neeg Vajtswv xaiv tseg uas muaj kev paub txog kev ncaj ncees los hais lus ncaj ncees thiab kam sawv los muab cov tib neeg phem zoo li no ntsaig tawm mus. Ib leeg ntawm nees nkaum leej ntawd mas me ntsis tsawg lawm; yog ib pawg ntseeg tsuas muaj kaum tus neeg xwb, lawv yuav muab cov tib neeg phem tshem tawm mus li cas? Lawv yeej yuav ua tsis tau; kaum tus neeg ntawd yuav nyob hauv qab kev tswj ntawm cov neeg phem, thiab tiv kev ua tsis ncaj ncees los ntawm cov tib neeg phem ntawd, uas yog ib yam uas lees txais tsis tau kiag li. Yog tias siv zog kom tau ib leeg ntawm kaum leej los sis ib leeg ntawm tsib leeg uas muaj lub siab tawv sawv los tawm tsam cov tib neeg phem mas yuav zoo heev li! Qhov pheej nrhiav kev tiv thaiv tus kheej ntawd tsis yog tsuas ua rau poob cov lus tim khawv nyob rau ntawm Ntxwgnyoog lub xub ntiag xwb, tiam sis, qhov phem tshaj ntawd, yog poob lub cib fim tau txais qhov tseeb nyob rau ntawm Vajtswv lub xub ntiag. Nyob hauv ib pawg ntseeg uas muaj ib tug tib neeg phem, yam tsawg kawg yuav muaj ib txhia tib neeg raug ua phem rau; yog muaj ob tug tib neeg phem, cov tib neeg feem coob yuav raug ua phem rau; thiab yog ib tug tawm tsam khetos tuav hwj chim, nrog rau ob peb tug neeg pab ua phem thiab cov tub qhe nyob hauv qab lawv, ces tag nrho cov neeg Vajtswv xaiv tseg nyob hauv pawg ntseeg yeej yuav raug ua phem rau. Puas yog li no? (Yog.) Ib tug neeg uas sawv los tawm tsam cov tib neeg phem yog ib feem ntawm lub zog, hos kaum tus neeg uas sawv los tawm tsam cov tib neeg phem yog kaum feem ntawm lub zog. Yog li ntawd, nej xav tias cov tib neeg phem ntshai ib tug neeg los sis ntshai kaum tus neeg dua? (Kaum tus neeg.) Yog li, yog nees nkaum, peb caug, los sis tsib caug leej puav leej sawv los tawm tsam cov tib neeg phem, thaum kawg leej twg yuav yeej? (Cov kwv tij thiab cov nkauj muam.) Thaum kawg, cov kwv tij thiab cov nkauj muam yeej yog cov uas yuav yeej. Qhov ntawd tsis ua rau kev ntsaig cov tib neeg phem tawm mus yooj yim ntau dua lod? Tib neeg coob lub zog loj—lub tswv yim uas yooj yim no nej sawv daws tsim nyog puav leej to taub. Yog li ntawd, kev paub cais thiab ntsaig cov tib neeg phem tawm mus tsis yog ib tug thawj coj los sis ib tug neeg ua hauj lwm twg lub luag hauj lwm xwb tiam sis yog tag nrho cov neeg Vajtswv xaiv tseg nyob hauv pawg ntseeg lub luag hauj lwm ua ke. Los ntawm cov thawj coj thiab cov neeg ua hauj lwm txoj kev siv zog, nrog rau cov neeg Vajtswv xaiv tseg txoj kev koom tes los ntsaig cov tib neeg phem tawm mus, txhua tus thiaj li tuaj yeem xyiv fab rau lub neej uas zoo. Yog tsis muab cov tib neeg phem ntsaig tawm mus es cia nyob hauv pawg ntseeg tos kom cov tib neeg phem ntawd hloov dua siab tshiab, tiam sis tom qab rau lub hli los sis ib lub xyoos yeej tseem tsis pom muaj kev hloov zoo dab tsi, thiab lawv haj tseem ua rau cov neeg Vajtswv xaiv tseg raug kev cuam tshuam yam thev tsis taus, qhov no yog qhov tshwm sim los ntawm kev hlub tshua cov tib neeg phem. Qhov uas cia cov tib neeg phem quab yuam lwm tus yam lim hiam thiab tswj pawg ntseeg ntawd yeej zoo ib yam li muab tus kheej cob rau cov tib neeg phem ntawd txhais tes, nrog rau muab cov kwv tij thiab cov nkauj muam cob rau hauv cov tib neeg phem ntawd txhais tes, tso cai rau lawv tswj raws siab nyiam thiab rhuav tshem cov neeg Vajtswv xaiv tseg yam phem heev. Qhov to taub thiab tau txais qhov tseeb nyob hauv ib qho xwm txheej uas cov tib neeg phem thiab cov tawm tsam khetos tuav hwj chim ntawd puas yooj yim? (Tsis yooj yim.) Lub sij hawm muaj nqis heev. Los ntawm kev ntsaig cov tib neeg phem tawm mus kom sai li sai tau, koj thiaj li tuaj yeem rov qab muaj kev thaj yeeb thiab xyiv fab rau lub neej hauv pawg ntseeg uas tsim nyog kom sai li sai tau, thiab to taub qhov tseeb ntau ntxiv. Yog koj tsis ntsaig cov tib neeg phem tawm mus, lawv yuav ua rau muaj kev cuam tshuam thiab kev puas tsuaj nyob hauv cov tib neeg zoo ib yam li cov dev vwm, hais thiab ua txhua yam raws li lawv lub siab nyiam. Qhov no yuav txeeb koj lub sij hawm los tau txais qhov tseeb, uas txhais tau tias koj lub sij hawm thiab koj txoj kev ua tes dej num raug cov tib neeg phem tswj lawm. Qhov no yog ib yam zoo los sis ib yam phem? (Yog ib yam phem.) Raws li kev qhuab qhia, txhua tus yeej paub tias qhov ntawd yog ib yam phem, tiam sis thaum ntsib cov tib neeg phem cuam tshuam pawg ntseeg, lawv tsis xav li no lawm, tsuas tsom ntsoov rau qhov kom tsis txhob raug cov tib neeg phem ntawd npaj tswv yim phem rau los sis rhuav tshem yam phem heev xwb. Yog tag nrho cov neeg Vajtswv xaiv tseg nyob hauv ib pawg ntseeg ntshai cov tib neeg phem zoo li no, pawg ntseeg no yeej yuav poob rau hauv qab kev tswj ntawm cov tib neeg phem thiab cov tawm tsam khetos tau yooj yim, thiab cov neeg Vajtswv xaiv tseg los kuj yuav raug cov tib neeg phem thiab cov tawm tsam khetos tswj thiab. Ua li ntawd lawv puas tseem tuaj yeem tau txais Vajtswv txoj kev cawm dim? Qhov ntawd nyuaj hais heev. Yog ib pawg ntseeg tsis muaj ob los sis peb tug neeg uas to taub qhov tseeb thiab koom ua ib lub siab ib lub ntsws los ua tim khawv txog thiab ua dej num rau Vajtswv, qhov ntawd yog ib pawg ntseeg uas tsis muaj kev cia siab, thiab qhov ntawd yog ib yam uas txaus tu siab heev.
Qhov kev nyiam ua pauj rov qab yog ib qho kev qhia tshwm txog txoj kev ua phem, thiab yog ib qho ntawm tej kev coj thiab kev qhia tshwm uas tsim tawm los ntawm ib tug moj yam tsiv nyaum. Cov tib neeg zoo li no, thaum lawv qhia tawm txoj kev coj ntxaws ntxaws no, tsim nyog raug cais ua cov tib neeg phem. Muaj tseeb tiag, ib txhia tib neeg, vim lawv siab nqaim, tsis muaj kev paub dav, los sis yog cov nyuam qhuav ntseeg uas tsis to taub qhov tseeb, es thiaj li pheej xam txog tej yam me me nrog lwm tus, khaws kev ntxub ntxaug rau cov uas tsis zoo rau lawv los sis cov uas tau ua phem rau lawv, los sis keev tau siv qee yam hau kev los ua pauj rov qab rau qee tus neeg—tiam sis thaum hnov tias cov uas nyiam ua pauj rov qab ntawd yog cov tib neeg phem thiab yuav tsum raug muab ntsaig tawm ntawm pawg ntseeg mus, lawv txawm hloov lawv tej kev xav, tig rov qab nyob ntsiag to hauv lawv lub siab, thiab txwv thiab tswj lawv tus cwj pwm me ntsis. Qhia Kuv seb, cov tib neeg zoo li no puas raug suav tias nyob hauv pab pawg tib neeg phem? (Tsis suav.) Saib pom qhov no los ntawm qhov twg? (Lawv tuaj yeem tig tau rov qab.) Qhov lawv tuaj yeem tig tau rov qab ntawd qhia txog dab tsi? Qhov ntawd qhia tias lawv lees txais tau qhov tseeb; qhov no yog ib qho xwm uas zoo. Vim li cas peb thiaj li hais tias lawv lees txais tau qhov tseeb? Vim tias, tom qab hnov qhov tseeb txog qhov no thiab paub tias kev nrhiav kev ua pauj rov qab yog ib qho kev qhia tshwm ntawm cov tib neeg phem, lawv txawm thim xav txog lawv tus yam ntxwv qias vuab tsuab, lees paub lawv lub ntsiab tseeb qias vuab tsuab, thiab tom qab ntawd hloov dua siab tshiab rau ntawm Vajtswv, ua raws li Vajtswv cov lus, thiab txwv lawv tus kheej txoj kev coj. Qhov no yog ib qho kev qhia tshwm ntawm kev lees txais qhov tseeb. Cov tib neeg phem uas peb hais txog nyob ntawm no mas tsis lees txais qhov tseeb. Txawm koj yuav qhia qhov tseeb rau lawv kom meej npaum li cas los xij, lawv yeej tsis lees txais qhov tseeb ntawd; lawv tseem tawv ncauj thiab ua raws li lawv lub siab nyiam, tsis kam mloog leej twg hais li. Txawm tias koj yuav ceeb toom rau lawv tias, “Koj ua li no koj yuav raug ntsaig tawm mus,” lawv yeej tsis quav ntsej thiab tseem nias qees ua raws li lawv txoj kev, tsis muaj leej twg yuav hloov tau lawv li. Thaum koj muab lawv nthuav tawm, lawv tsis lees lawv qhov txhaum. Thaum koj hais rau lawv tias lawv yog ib tug neeg uas nyiam ua pauj rov qab, lawv yog tib neeg phem, thiab lawv yuav tsum raug ntsaig tawm mus, lawv yeej tseem yuav tsis tso lawv txoj kev ua phem tseg thiab yeej yuav tsis tig rov qab kiag li. Cov tib neeg no yog hom neeg zoo li cas? Lawv yog cov uas tsis nyiam qhov tseeb kiag li. Lawv tsis lees txais qhov tseeb kiag li—txawm tias yuav cais lawv tus moj yam lub ntsiab tseeb li cas, yuav nthuav tawm lawv tej kev ua phem li cas, los sis yuav saib xyuas lawv li cas los xij, lawv yeej tsis hloov kiag li, yeej yuav tsis nyo hau thiab lees lawv qhov txhaum, thiab yeej yuav tsis tso tseg kiag li. Qhov no yog qhov tsis muaj peev xwm tig tau rov qab. Lub ntsiab tseeb ntawm qhov tsis tig rov qab yog dab tsi? Qhov ntawd yog qhov tsis kam lees txais qhov tseeb. Yog lawv lees txais tau ib lo lus uas yog los sis ib qho qhov tseeb xwb, lawv yeej yuav tsis nias qees taug tib txoj kev yuam kev ntawd yam tsis tig rov qab. Lawv yuav tig rov qab, lees lawv qhov txhaum, thiab tso tej yam uas lawv tau nias qees tuav yav tas los ntawd tseg yam tsis ntau los tsawg. Vim lawv yog cov tib neeg phem, vim lawv yog cov tib neeg phem uas muaj ib tug moj yam tsiv nyaum, tom qab lawv tus cwj pwm nrhiav kev ua pauj rov qab tshwm sim los ntawm tus moj yam zoo li no, tsis yog lawv tsuas tsis kam lees txais yam uas Vajtswv cov lus nthuav tawm, kev raug ntuas, los sis hom kev cais zoo li no xwb, tiam sis lawv tseem nias qees ua raws li lawv txoj kev mus txog thaum kawg. Lawv tsis npaj siab yuav lees txais qhov raug cais los sis raug nthuav tawm, thiab lawv kuj tsis npaj siab yuav lees lawv txoj kev qias vuab tsuab thiab. Muaj tseeb tiag, yog tsis lees lawv txoj kev qias vuab tsuab, lawv kuj tsis npaj siab yuav tso lawv txoj kev coj thiab kev ua uas nrhiav kev ua pauj rov qab tseg, nrog rau lawv tej hauv paus ntsiab lus ntawm kev coj tus kheej thiab. Lawv yog cov tib neeg phem tag nrho thiab tiag tiag. Cov tib neeg phem zoo li no puas yog cov dab? (Yog.) Lawv yog cov dab uas muaj lub ntsiab tseeb ntawm Ntxwgnyoog tiag tiag. Koj hloov tsis tau lawv li. Vim li cas thiaj li hloov tsis tau lawv? Lub hauv paus yog lawv tsis kam lees txais qhov tseeb kiag li. Txawm yog qhov tseeb me me los lawv twb tsis lees txais li, ib lo lus uas yog, ib lo lus uas zoo, los sis tej yam uas zoo los twb tsis lees txais li. Txawm tias lawv lub qhov ncauj lees paub tias Vajtswv cov lus yog qhov tseeb thiab yog tej yam uas zoo los xij, lawv lub siab yeej tsis lees txais qhov tseeb kiag li, thiab lawv kuj tsis npaj siab yuav ua raws li thiab ntsib pom Vajtswv cov lus los hloov lawv txoj hau kev ua neeg thiab ua tej yam thiab. Qee zaum, tej zaum lawv yuav lees paub ntawm ncauj tias lawv tej kev ua yog tawm los ntawm Ntxwgnyoog lub tswv yim tag nrho, tiam sis lawv yeej tseem yuav tsis lees txais qhov tseeb kiag li. Txawm leej twg qhia qhov tseeb rau lawv los yeej yuav raug lawv tsis nyiam kiag li, thiab haj tseem raug lawv ntxub ntxaug thiab txiav txim, thiab txawm leej twg nthuav tawm thiab paub cais lawv los yeej yuav dhau los ua tus uas lawv yuav ntxub ntxaug thiab ua pauj rov qab, txawm tus neeg ntawd yog leej twg los xij—txawm yog lawv niam lawv txiv tiag tiag los yeej tsis tseg li. Lawv puas yog cov uas cawm tsis tau lawm? (Yog.) Lawv yog cov uas cawm tsis tau lawm. Ua li qhov muab lawv ntsaig tawm mus ntawd puas khuv xim? (Tsis khuv xim.) Cov tib neeg zoo li no yuav tsum raug ntsaig tawm mus los sis ntiab tawm mus. Feem ntau mas, tej no puav leej yog tej kev qhia tshwm ntawm cov uas nyiam ua pauj rov qab; tej no yog lawv tej yam ntxwv, lawv tej moj yam, lawv txoj kev thiab txoj hau kev ua tej yam thiab lawv txoj kev xav, nrog rau lawv tus cwj pwm uas coj rau qhov tseeb—feem ntau mas yeej yog li no. Qhov kev cuam tshuam uas lawv muaj rau pawg ntseeg thiab rau cov kwv tij thiab cov nkauj muam twb tau tham tas lawm, yog li ntawd thiaj li tsis tas yuav qhia txog qhov ntawd ntxiv lawm. Qhov kev sib qhia txog tej kev qhia tshwm ntawm hom tib neeg plaub—cov uas nyiam ua pauj rov qab ntawd los xaus rau ntawm no.
E. Tsis Muaj Peev Xwm Ceev Tau Tus Nplaig
Txuas ntxiv no, peb yuav sib qhia txog hom neeg tsib, uas yog cov neeg tsis muaj peev xwm ceev lawv tus nplaig. Qhov no puas yog ib qho teeb meem loj? Saib raws li cov lus no lub ntsiab ncaj ncaj, qhov tsis muaj peev xwm ceev tus nplaig ntawd zoo li tsis yog ib qho teeb meem loj. Qhov muab cov neeg no cais ua cov tib neeg phem ntawd mas tej zaum ib txhia yuav muaj qee yam kev xav tias: “Vim tib neeg muaj qhov ncauj, lawv yeej yuav tsum tau hais lus txhua lub sij hawm thiab txhua qhov chaw; lawv yeej yuav tham txog tej yam txhua lub sij hawm thiab txhua qhov chaw. Qhov muab cov neeg uas tsis muaj peev xwm ceev lawv tus nplaig tso rau hauv cov tib neeg phem uas yuav tsum raug ntsaig tawm mus ntawd puas yog ib qho uas tshaj me ntsis lawm?” Nej xav li cas txog qhov no? (Yog lawv tab kaum thiab cuam tshuam lub neej hauv pawg ntseeg los sis pawg ntseeg tes hauj lwm, uas ua rau muaj tej qhov tshwm sim los tsis zoo, ces lawv kuj yuav tsum raug ntsaig tawm mus thiab.) Qhov teeb meem ntawm cov neeg zoo li no tsis yog hais txog qhov tsis ceev lawv tus nplaig; qhov ntawd yog ib qho teeb meem txog lawv txoj kev ua neeg. Yog lawv ua rau muaj kev cuam tshuam rau cov kwv tij thiab cov nkauj muam, rau lub neej hauv pawg ntseeg, thiab rau pawg ntseeg tes hauj lwm, los sis lawv cov lus yog kev ntxeev siab thiab kev muab pawg ntseeg muag tawm, thiab haj tseem ua rau Vajtswv lub tsev thiab Vajtswv lub npe txaj muag, ces yuav tsum tau saib xyuas cov neeg zoo li no. Cia peb xub sib tham txog tej kev qhia tshwm ntawm cov neeg uas tsis muaj peev xwm ceev lawv tus nplaig tso, ces mam li tham seb yuav saib xyuas lawv li cas. Cov neeg uas tsis muaj peev xwm ceev lawv tus nplaig ntawd puas hu tau tias yog cov “qhov ncauj loj”? (Hu tau.) Puas yog li ntawd tiag? Qhov no puas yog ib tug yam ntxwv ntawm cov neeg zoo li no? Kev ua ib tug qhov ncauj loj ntawd puas txhais hais tias yog kev ruam thiab tsis paub tias yam twg tsim nyog hais los sis tsis tsim nyog hais, xav hais dab tsi los yeej hais yam tsis xav txog tej qhov tshwm sim los li? Qhov no puas yog lub ntsiab ntawm qhov tsis ceev tus nplaig? (Tsis yog.) Ib txhia tib neeg mas txawj hais lus thiab txawj sib txuas lus; lawv yog neeg hais ncaj qha, thiab kuj muaj siab dawb paug thiab coj ncaj dua me ntsis. Lawv nquag qhia lawv tus kheej tej lus hauv siab, lawv tej kev xav thiab lawv tej kev nthuav tawm txog txoj kev qias vuab tsuab, tej uas lawv tau ntsib tau pom, thiab haj tseem yog lawv tej kev ua yuam kev rau lwm tus. Txawm li cas los xij, cov tib neeg no tsis tau txhais tias yuav yog neeg ruam los sis cov uas tsis muaj peev xwm ceev lawv tus nplaig. Saib zoo li lawv tham txog txhua yam thiab muaj lub siab dawb paug thiab coj ncaj kawg li; tiam sis thaum hais txog tej teeb meem tseem ceeb, tej teeb meem uas tuaj yeem ua rau Vajtswv los sis Vajtswv lub tsev txaj muag, los sis tej teeb meem uas ntsig txog txoj kev ntxeev siab muag cov kwv tij thiab cov nkauj muam los sis pawg ntseeg, uas ua rau lawv dhau los ua cov Yudas, lawv yeej tsis hais ib lo li. Qhov no hu ua kev ceev tus nplaig. Yog li ntawd, tsis yog hais tias cov neeg hais ncaj qha, cov neeg qhov ncauj loj, los sis cov uas txawj hais lus ntawd ceev tsis tau lawv tus nplaig. Qhov tsis muaj peev xwm ceev tus nplaig nyob rau ntawm no txhais li cas? Qhov tsis muaj peev xwm ceev tus nplaig ntawd txhais hais tias hais lus tsis muaj hauv paus ntsiab lus, thiab lam tau lam hais yam tsis xav txog cov neeg mloog, lub sij hawm, los sis tej xwm txheej. Tsis tas li ntawd xwb, txhais hais tias tsis paub tiv thaiv pawg ntseeg tes hauj lwm thiab tej txiaj ntsim ntawm Vajtswv lub tsev ib qho me me li, los sis tsis quav ntsej kiag li seb qhov ntawd puas muaj txiaj ntsig rau cov kwv tij thiab cov nkauj muam los sis lub neej hauv pawg ntseeg, thiab cia li hais txhua yam. Qhov tshwm sim los ntawm qhov “cia li hais txhua yam” ntawd yog dab tsi? Qhov ntawd yog kev ntxeev siab muag tej txiaj ntsim ntawm Vajtswv lub tsev thiab tej txiaj ntsim ntawm cov kwv tij thiab cov nkauj muam yam tsis txhob txwm. Thaum tsis nco qab, vim yog lawv tej kev lam tau lam hais lus thiab qhov tsis muaj peev xwm ceev lawv tus nplaig, lawv thiaj li ua rau cov ib txwm tsis ntseeg tuav tau chaw tawm tsam Vajtswv lub tsev, ua rau cov ib txwm tsis ntseeg thuam qee cov kwv tij thiab cov nkauj muam, thiab cia cov ib txwm tsis ntseeg thiab cov tib neeg uas tsis ntseeg Vajtswv paub ntau yam uas lawv tsis tsim nyog paub. Vim li no, cov tib neeg no thiaj li xav hais li cas los hais thiab hais tej lus tsis hwm txog tej yam ntawm Vajtswv lub tsev thiab tej hauj lwm sab hauv ntawm pawg ntseeg yam raws siab nyiam, thiab hais tej lus uas thuam thiab tuam mom Vajtswv. Lawv haj tseem tuaj yeem tsim cov lus xaiv uas tsis muaj tseeb txog cov kwv tij thiab cov nkauj muam, pawg ntseeg, thiab Vajtswv lub tsev tes hauj lwm, uas ua rau muaj tej qhov tshwm sim los tsis zoo. Qhov no ua rau muaj ib qho kev cuam tshuam rau Vajtswv lub tsev tes hauj lwm thiab suav tias yog kev ua phem. Ib txhia tib neeg tshwj xeeb yog tsom ntsoov rau kev nrhiav paub thiab tshawb xyuas seb cov thawj coj thiab cov neeg ua hauj lwm hauv pawg ntseeg yog leej twg, lawv tsev neeg qhov chaw nyob, cov kwv tij thiab cov nkauj muam tej ntaub ntawv ntiag tug, pawg ntseeg tes hauj lwm txog nyiaj txiag thiab kev teev nyiaj, cov neeg ua hauj lwm teev nyiaj, thiab cov npe ntawm cov neeg uas raug muab ntsaig tawm mus los sis ntiab tawm ntawm pawg ntseeg mus. Lawv kuj tshwj xeeb yog tsom ntsoov rau kev nrhiav paub txog pawg ntseeg tej kev npaj tes hauj lwm thiab. Txoj kev coj zoo li no mas txaus ua xyem xyav heev li thiab tej zaum lawv yog cov neeg soj xyuas los sis cov neeg soj xov ntawm tus zaj loj liab ploog. Yog tej yam no raug xau tawm mus rau cov dab uas ib txwm tsis ntseeg, uas cia tus zaj loj liab ploog paub txog tej no, ces tej qhov tshwm sim los ntawd yuav xav tsis txog li. Ib txhia, vim yog txoj kev ruam thiab tsis paub dab tsi, tej zaum yuav muab cov ntaub ntawv no los sis ib feem ntawm cov ntaub ntawv no qhia tawm rau lawv tsev neeg cov uas ib txwm tsis ntseeg, uas tom qab ntawd lawv muab tshaj tawm mus los sis muab rau tus zaj loj liab ploog cov neeg soj xov. Tej zaum qhov no yuav ua rau muaj kev phom sij thiab ua rau muaj ntau yam teeb meem rau pawg ntseeg tes hauj lwm, nrog rau tej qhov tshwm sim los uas xav tsis txog li. Tej hauj lwm sab hauv ntawm pawg ntseeg no mas ib txhia tib neeg nquag muab qhia rau lawv tsev neeg cov uas ib txwm tsis ntseeg yam tsis txhob txwm, uas lawv qhia txhua yam tawm yam tsis npog ib qho li. Thiab lawv haj tseem muab qhia rau lawv cov txheeb ze thiab cov phooj ywg uas ib txwm tsis ntseeg thiab. Qhov no ua rau pawg ntseeg tej hauj lwm sab hauv pheej xau tawm mus rau sab nraud tas li los ntawm lawv cov lus. Tej qhov tshwm sim los ntawm tej kev xau tawm mus no yog dab tsi? Ntau tus ntawm lawv tsev neeg, cov txheeb ze, thiab cov phooj ywg uas ib txwm tsis ntseeg ntawd paub txog ntau yam hauj lwm sab hauv ntawm pawg ntseeg uas tab txawm yog cov kwv tij thiab cov nkauj muam los tej zaum twb tsis paub, los sis cov kwv tij thiab cov nkauj muam tsev neeg qhov chaw nyob, lawv lub npe thiab lub xeem tiag tiag, thiab tej yam ntiag tug txog kev sib yuav. Tej yam hauv pawg ntseeg no xau tawm mus li cas? Cov ib txwm tsis ntseeg paub txog tej no tau li cas? Muaj cov “neeg xa xov” nyob sab hauv pawg ntseeg! Cov neeg zoo li no hu ua li cas? (Cov uas tsis muaj peev xwm ceev lawv tus nplaig.) Yog lawm. Lawv muab txhua yam uas tshwm sim nyob rau hauv lub neej hauv pawg ntseeg txhua hnub los sis tej yam uas ntsig txog cov kwv tij thiab cov nkauj muam qhia rau lawv tsev neeg cov uas ib txwm tsis ntseeg, xws li ib tug nkauj muam twg sib nrauj lawm, lwm tus nkauj muam tus txiv ua lag luam poob nyiaj los sis nws muaj ib tug tub tsis mloog lus, los sis ib tug kwv tij los sis nkauj muam twg yuav tsev, thiab lwm yam ntxiv. Lawv kuj tham txog cov kwv tij thiab cov nkauj muam uas raug tus zaj loj liab ploog ntes thiab dhau los ua cov Yudas, los sis cov uas tuav lawv tej lus tim khawv khov kho, thiab haj tseem hais txog tias cov thawj coj pawg ntseeg tau ntuas lawv thiab. Lawv tej kev sib tham nyob hauv tsev ces tsuas yog ncig txog cov ncauj lus no xwb. Lawv tsev neeg haj tseem tawm tswv yim thiab qhia tswv yim los pab lawv tawm tsam cov thawj coj, cov kwv tij thiab cov nkauj muam, los sis leej twg nyob hauv pawg ntseeg uas tsis haum nrog lawv, tsim teeb meem rau lawv, los sis tau muab lawv nthuav tawm lawm. Thaum sib txoos ua ke nyob hauv cov kwv tij thiab cov nkauj muam, cov tib neeg zoo li no saib sab nraud mas zoo li mloog hais thiab coj zoo tshwj xeeb, hais lus tsawg, tsis txawj sib tham, yeej tsis tham txog lawv tus kheej cov moj yam qias vuab tsuab, yeej tsis sib qhia txog lawv qhov kev to taub txog txoj kev ntsib kev pom, thiab haj tseem tsis tshua thov Vajtswv thiab. Lawv coj rau cov kwv tij thiab cov nkauj muam nrog kev ceev faj, hos lawv coj rau lawv tsev neeg cov uas ib txwm tsis ntseeg ib yam li lawv yog cov neeg hauv Vajtswv lub tsev. Lawv qhia txhua yam xwm txheej txog pawg ntseeg rau lawv tsev neeg yam tsis zais ib qho li, qhia txhua yam rau cov neeg ntawd, nrog rau pawg ntseeg txoj kev luam cov phau ntawv ntawm Vajtswv cov lus, leej twg muaj peev xwm dab tsi hauv pawg ntseeg, thiab lwm yam ntxiv—tej no puav leej raug muab coj los tham nrog lawv tsev neeg thiab cov tib neeg uas tsis ntseeg Vajtswv. Txawm lawv lub hom phiaj ntawm qhov ua li no yog dab tsi los xij, qhov tshwm sim los ces yog lawv ntxeev siab muag pawg ntseeg tes hauj lwm thiab cov kwv tij thiab cov nkauj muam. Nyob hauv pawg ntseeg lawv paub meej txog txhua tus neeg tseem ceeb qhov xwm txheej. Muaj tseeb tiag, cov neeg no kuj yog cov uas lawv muab coj los tham thiab txiav txim nyob tom qab nraub qaum, thiab tej zaum haj tseem yuav dhau los ua cov uas lawv ntxeev siab muag yam zais ntshis thiab. Yog leej twg muaj kev sib raug zoo yam zoo nrog lawv, lawv yuav qhuas tus neeg ntawd tas li nyob rau ntawm lawv tsev neeg lub xub ntiag. Hos yog leej twg tsis muaj kev sib raug zoo nrog lawv, lawv yuav cem tus neeg ntawd tas li nyob rau ntawm lawv tsev neeg xub ntiag, haj tseem ua rau lawv tsev neeg koom nrog qhov kev cem ntawd thiab, cem cov kwv tij thiab cov nkauj muam tias yog neeg ruam los sis hais tias lawv tsis zoo dab tsi li. Cov tib neeg no siv cov lus cem uas cov ib txwm tsis ntseeg siv los cem cov kwv tij thiab cov nkauj muam. Lawv zoo ib yam li cov ib txwm tsis ntseeg; lawv yeej yog kiag cov tsis ntseeg ntag; lawv yeej tsis zoo dab tsi li, thiab cov tib neeg zoo li no yuav tsum raug muab ntsaig tawm mus kom ncav sij hawm.
Nyob rau hauv tus zaj loj liab ploog lub teb chaws mas txhua tus neeg uas ntseeg Vajtswv tej ntaub ntawv yuav tsum tau zais cia, thiab txawm yog thaum cov neeg Vajtswv xaiv tseg mus nyob txawv teb chaws los xij, lawv tej ntaub ntawv yuav tsum tau muab zais cia. Qhov no yog vim tias tus zaj loj liab ploog cov neeg soj xov nyob thoob plaws txhua lub teb chaws hauv lub ntiaj teb no, nkag mus txhua qhov chaw nrog lub hom phiaj tshwj xeeb los sau cov ntaub ntawv txog cov neeg uas ntseeg Vajtswv. Nyob rau hauv Teb Chaws Suav av loj, qhov xwm txheej ntawm cov kwv tij thiab cov nkauj muam uas raws Vajtswv qab ntawd mas nyuaj thiab phom sij heev. Tab txawm yog thaum lawv mus rau txawv teb chaws los xij, yeej tseem muaj kev phom sij txog rau ib theem twg. Yog tus zaj loj liab ploog cov neeg soj xov sau tau lawv tej ntaub ntawv, ib qho mas, muaj kev phom sij txog kev raug xa rov qab, thiab lwm qhov mas, yam tsawg kawg nkaus, lawv tsev neeg thiab cov txheeb ze nyob hauv Teb Chaws Suav av loj tej zaum yuav raug teeb meem nrog thiab. Vim yog kev nyab xeeb thiab kev hwm rau tib neeg, txhua tus yuav tsum npog cov kwv tij thiab cov nkauj muam tej ntaub ntawv ntiag tug thiab tsis tsim nyog muab qhia rau cov uas tsis ntseeg Vajtswv. Txawm yog nyob hauv cov uas ntseeg Vajtswv los xij, tej ntaub ntawv ntiag tug tsis tsim nyog lam tau lam muab qhia rau lwm tus yam tsis tau txais kev pom zoo los ntawm tus tswv. Yeej tsis pub muab cov kwv tij thiab cov nkauj muam tej ntaub ntawv, pawg ntseeg tes hauj lwm, tej dej num uas tus kheej ua, tej kev ntsib kev pom uas sib qhia, los sis lwm yam xwm txheej zoo li no coj los ua tej ncauj lus tham nrog cov ib txwm tsis ntseeg rau thaum so kiag li. Tej qhov tshwm sim los ntawm kev tham txog tej yam no nrog cov neeg ntawd yog dab tsi? Puas muaj ib qho txiaj ntsig zoo dab tsi li? (Tsis muaj.) Qhov tshwm sim los ntawm tej kev sib tham zoo li no yog ua rau cov dab uas ib txwm tsis ntseeg no nrhiav tau chaw tuav, thuam, txiav txim, thiab haj tseem foom phem thiab hais lus iab liam thiab. Qhov no puas zoo? (Tsis zoo.) Nej yuav tsum tshuaj xyuas seb puas muaj cov tib neeg nyob sab hauv pawg ntseeg uas muaj lwm lub hom phiaj zais ntshis, uas muab ntau yam ntxaws ntxaws xws li tej xwm txheej tiag tiag txog pawg ntseeg tes hauj lwm thiab lub neej hauv pawg ntseeg—nrog rau leej twg yog tus ntseeg Vajtswv tiag tiag, leej twg caum qhov tseeb, leej twg ua lawv tej dej num, leej twg tsis ua lawv tej dej num, leej twg nquag xav tsis zoo, leej twg muaj kev ntseeg yam feeb tsis meej, thiab haj tseem yog tej ntaub ntawv ntiag tug thiab tej xwm txheej txog cov kwv tij thiab cov nkauj muam—tham nrog cov ib txwm tsis ntseeg thiab tsev neeg cov uas tsis ntseeg, yam tsis npog ib qho li. Tshawb seb puas muaj cov tib neeg zoo li no. Muaj qee yam uas txawm yog cov neeg nyob hauv pawg ntseeg los tsis tim tsum yuav paub, tiam sis cov tib neeg no tsev neeg cov uas ib txwm tsis ntseeg ntawd paub txog tej yam no ntau dua li cov nyob hauv pawg ntseeg—thiab paub txog tej ntawd meej dua thiab. Qhov no tshwm sim tau li cas? Qhov no yog qhov “txiaj ntsig” ntawm ib tug neeg soj xov sab hauv. Tus neeg soj xov sab hauv no coj rau lawv tsev neeg ib yam li lawv yog pawg ntseeg cov thawj coj, qhia txhua yam uas lawv pom nyob hauv pawg ntseeg rov qab rau lawv cov “thawj coj” nyob tom tsev, kom ua rau lawv tsev neeg zoo siab thiab ua kom lawv txoj kev sib raug zoo nrog lawv tsev neeg zoo dua tuaj. Yeej pom tseeb tias txhua yam hauv pawg ntseeg no puav leej raug muag tawm los ntawm cov neeg soj xov uas tsis muaj peev xwm ceev lawv tus nplaig ntawd. Lawv tsis hwm cov kwv tij thiab cov nkauj muam, thiab lawv tsis tiv thaiv tes hauj lwm thiab tej txiaj ntsim ntawm Vajtswv lub tsev. Lawv coj rau Vajtswv lub tsev thiab pawg ntseeg ib yam li lub zej zog los sis ib qho chaw rau sawv daws, lam tau lam tawm tswv yim thiab txiav txim txog cov kwv tij thiab cov nkauj muam ib yam li yog cov ib txwm tsis ntseeg, haj tseem koom nrog cov tsis ntseeg thiab cov ib txwm tsis ntseeg los txiav txim txog cov kwv tij thiab cov nkauj muam raws siab nyiam thiab. Tsis tas li ntawd xwb, ib txhia tib neeg, tom qab raug cov thawj coj ntuas los sis tom qab muaj kev tsis sib haum xeeb, kev sib cav, thiab kev tsis sib zoo siab nrog cov kwv tij thiab cov nkauj muam, lawv mus tsev thiab ua ntxhov quav niab, ua kom paub tseeb tias lawv tsev neeg paub txog txhua yam ntawd. Qhov tshwm sim los ces yog lawv tsev neeg yuav nrhiav kev ua pauj rov qab rau cov thawj coj los sis cov kwv tij thiab cov nkauj muam, uas muaj hom phiaj yuav muag thiab rhuav tshem pawg ntseeg. Qhov no puas yog ib qho xwm zoo? (Tsis yog.) Qhov muab pawg ntseeg tej hauj lwm sab hauv, thiab tej yam xws li muaj pes tsawg tus kwv tij thiab nkauj muam ua lub neej hauv pawg ntseeg, thiab txhua tus ua dej num dab tsi qhia rau tsev neeg, cov txheeb ze, thiab cov phooj ywg yam tsis zais ib qho li—lawv yog hom tib neeg phem dab tsi? Lawv puas yog cov ntseeg tseeb tiag? (Tsis yog.) Lawv puas yog cov neeg hauv Vajtswv lub tsev? Puas hu tau lawv tias yog cov kwv tij los sis cov nkauj muam? (Hu tsis tau.) Qhov cia cov neeg soj xov sab hauv thiab cov neeg ntxeev siab uas zais ntshis zoo li no nyob hauv pawg ntseeg, txawm yog yav tas los, tam sim no, los sis yav tom ntej los xij, yeej yuav ua rau muaj teeb meem loj heev rau Vajtswv lub tsev thiab cov kwv tij thiab cov nkauj muam. Txawm yog saib zoo li lawv tsis ua ntau yam kev ua phem nyob hauv lub neej hauv pawg ntseeg los xij, tej qhov tshwm sim los thiab qhov kev cuam tshuam ntawm lawv txoj kev zais ntshis muab ntau yam xwm txheej txog Vajtswv lub tsev qhia rau cov ib txwm tsis ntseeg, cov Ntxwgnyoog, thiab cov dab ntawd yeej ua rau muaj kev puas tsuaj loj heev! Cov neeg qias neeg zoo li no puas tsim nyog cia nyob hauv pawg ntseeg? (Tsis tsim nyog.) Lawv puas tsim nyog hu ua cov neeg hauv Vajtswv lub tsev? Lawv puas tsim nyog raug coj rau ib yam li cov kwv tij thiab cov nkauj muam? (Tsis tsim nyog.) Ua li yuav tsum saib xyuas cov neeg zoo li no li cas? (Yuav tsum muab lawv ntsaig tawm mus kom sai li sai tau.) Yuav tsum muab lawv ntsaig tawm mus kom sai li sai tau! Ntiab lawv tawm mus! Qhov laj thawj ntawm kev muab lawv ntsaig tawm mus yog: “Koj tsis muaj peev xwm ceev koj tus nplaig, koj tsis paub tias yam twg zoo rau koj, koj tom txhais tes uas pub mov rau koj noj. Koj ntseeg Vajtswv thiab xyiv fab rau Nws txoj hmoov hlub, nrog rau kev pab, kev hlub, kev ua siab ntev, thiab kev saib xyuas los ntawm cov kwv tij thiab cov nkauj muam, tiam sis koj tseem ntxeev siab muag cov kwv tij thiab cov nkauj muam thiab pawg ntseeg zoo li no thiab. Koj yeej tsis zoo dab tsi li; khiav tawm mus!” Cov kwv tij thiab cov nkauj muam tej xwm txheej, pawg ntseeg tej xwm txheej, thiab tes hauj lwm twg ntawm Vajtswv lub tsev yeej tsis tsim nyog muab qhia tawm rau cov ib txwm tsis ntseeg, thiab tsis tsim nyog cia cov ib txwm tsis ntseeg muab coj los ua tej ncauj lus tham pem yam tsis muaj qab hau. Lawv tsis tsim nyog rau qhov ntawd! Leej twg uas tshaj tawm cov ntaub ntawv zoo li no yuav dhau los ua ib tug neeg raug foom phem, ib tug neeg uas pawg ntseeg yuav tsum tau ntsaig tawm mus, cov kwv tij thiab cov nkauj muam yuav tsum tso tus neeg ntawd tseg. Raws li lawv tej kev ua uas muag cov kwv tij thiab cov nkauj muam thiab pawg ntseeg, muab pawg ntseeg tej hauj lwm sab hauv qhia tawm rau cov ib txwm tsis ntseeg los ua kev tham pem ntawd, lawv yeej yog cov neeg ntxeev siab, cov neeg soj xov sab hauv, thiab cov tib neeg phem tiag tiag uas yuav tsum raug pawg ntseeg muab ntsaig tawm mus. Tsis hais ua tes hauj lwm dab tsi nyob sab hauv ntawm pawg ntseeg—xws li leej twg tsim nyog raug ntsaig tawm mus los sis muaj dab tsi tshwm sim—cov kwv tij thiab cov nkauj muam tuaj yeem sib qhia thiab sib cav tau yam ywj siab, tiam sis yeej tsis pub muab qhia rau cov ib txwm tsis ntseeg, thiab yeej tsis pub muab coj los tham nrog tsev neeg cov uas ib txwm tsis ntseeg. Tshwj xeeb yog, cov kwv tij thiab cov nkauj muam ntseeg tshiab uas muaj theem ntawm sab ntsujplig me ntawd lawv tej xwm txheej ntiag tug thiab tsev neeg yeej tsis pub muab qhia rau cov neeg sab nraud. Yog koj pom tias nyuaj heev uas yuav khaws cia rau koj tus kheej xwb, koj yuav tsum thov Vajtswv thiab vam khom rau Vajtswv kom kawm paub txoj kev tswj tus kheej, thiab mus ua qee yam uas muaj qab hau. Yog koj tswj tsis tau koj tus kheej tiag tiag, koj yuav tsum xub qhia rau pawg ntseeg txhawm rau nrhiav ib txoj kev daws, kom tiv thaiv tsis txhob muaj tej qhov tshwm sim los tsis zoo, vim tias kev tshaj tawm cov ntaub ntawv zoo li no yog qhov yooj yim uas yuav ua rau muaj teeb meem tshaj plaws. Piv txwv li, tus zauv xov tooj ntiag tug, tsev neeg qhov chaw nyob, ib tug neeg twg ntseeg Vajtswv tau pes tsawg xyoo lawm, tej xwm txheej ntawm tsev neeg thiab kev sib yuav ntiag tug, thiab lwm yam, puav leej yog tej ncauj lus uas yuav tsum tau ceev faj. Tej no tsis muaj dab tsi ntsig txog qhov tseeb los sis kev nkag mus rau hauv lub neej txoj sia li; tej no ntsig txog kev ntiag tug. Tsuas yog cov neeg soj xyuas thiab cov neeg soj xov sab hauv xwb thiaj li tshwj xeeb tshawb xyuas tej yam no. Yog koj nyiam nrhiav paub txog thiab tshaj tawm tej yam zoo li no, qhov ntawd yog tus moj yam dab tsi? Qhov ntawd me ntsis qias! Tsis caum qhov tseeb tiam sis tsom ntsoov rau kev ntxeev qhov tseeb thiab qhov cuav, ua ib tug neeg soj xov sab hauv los sis neeg soj xyuas thiab ua dej num txhawb rau tus zaj loj liab ploog—qhov ntawd tsis qias thiab lim hiam lod? Leej twg uas tshwj xeeb nug txog, tshawb xyuas, thiab lam tau lam tshaj tawm tej ncauj lus uas yuav tsum tau ceev faj thiab lwm tus tej xwm txheej ntiag tug ntawd yeej muaj lwm lub hom phiaj zais ntshis thiab yog ib tug tsis ntseeg. Cov neeg Vajtswv xaiv tseg yuav tsum tshwj xeeb ceev faj txog cov tib neeg zoo li no. Yog cov tib neeg zoo li no tsis hloov dua siab tshiab, yuav tsum tsis pub lawv muaj lub neej hauv pawg ntseeg, vim tias kev ntxeev siab muag cov kwv tij thiab cov nkauj muam yog qhov kev ua uas tsis muaj kev coj ncaj, qias neeg, thiab txaj muag tshaj plaws. Cov neeg Vajtswv xaiv tseg yuav tsum nyob kom deb ntawm cov tib neeg no. Nyob hauv lub neej hauv pawg ntseeg, tib neeg yuav tsum raug txwv tsis pub nug txog thiab tham txog tej yam no, vim tias tej no tsis muaj dab tsi ntsig txog txoj kev sib qhia qhov tseeb li, thiab kev tham txog tej no yeej tsis muaj txiaj ntsim dab tsi rau lwm tus kiag li.
Vajtswv lub tsev muaj ntau yam kev cai tswj fwm thiab kev cai tswj uas cov neeg Vajtswv xaiv tseg yuav tsum tau ua raws. Tej yam xws li pawg ntseeg tej hauj lwm sab hauv, kev hloov cov thawj coj thiab cov neeg ua hauj lwm, tes hauj lwm yaug pawg ntseeg kom dawb huv, thiab tej kev npaj los ntawm tus Nyob Saud, thiab lwm yam, yeej tsis pub lam tau lam muab tshaj tawm nyob hauv pawg ntseeg kom tiv thaiv tsis pub cov tsis ntseeg thiab cov tib neeg phem ntxeev siab muag tej no rau Ntxwgnyoog. Qhov laj thawj ntawm qhov no yog vim tias Vajtswv lub tsev tsis zoo ib yam li lub zej zog; Vajtswv cheem tsum kom tib neeg caum qhov tseeb, nyeem Vajtswv txoj lus kom ntau ntxiv, ua tib zoo xav thiab sib qhia kom ntau ntxiv. Tsuas yog kev tshaj tawm Vajtswv cov lus thiab kev ua tim khawv rau Vajtswv xwb thiaj li suav tau tias yog ib txoj kev coj uas tsim nyog; tsuas yog kev sib qhia txog tej lus tim khawv txog txoj kev ntsib kev pom kom ntau xwb thiaj li suav tau tias yog ib txoj kev coj uas tsim nyog. Tsis tas li ntawd xwb, muaj ntau tus neeg ntseeg tshiab nyob hauv Vajtswv lub tsev uas nyuam qhuav ntseeg Vajtswv tau ib lub sij hawm luv luv xwb. Yeej zam tsis tau tias ib txhia cov tsis ntseeg tseem tsis tau raug muab nthuav tawm. Tshwj xeeb yog, thawj tsib xyoos los sis kaum xyoo ntawm kev ntseeg yog lub sij hawm uas nthuav tawm tib neeg; nyob rau lub sij hawm no, yeej tsis paub tias leej twg tuaj yeem sawv tau khov kho thiab leej twg sawv tsis tau, los sis tseem muaj pes tsawg tus tib neeg phem uas muaj peev xwm cuam tshuam pawg ntseeg. Qhov pheej lam tau lam tshaj tawm tej ntaub ntawv ntiag tug thiab tej yam sab nraud zoo li no, nrog rau tej yam uas tsis ntsig txog txoj kev sib qhia qhov tseeb, tuaj yeem ua rau muaj ntau yam tshwm sim los uas tsis zoo. Piv txwv li, ib tug neeg twg tej zaum yuav nug tias, “Tus thawj coj ntawd tuaj qhov twg tuaj? Lawv nyob qhov twg?” Cov ntaub ntawv uas yuav tsum tau ceev faj no tsis yog yam uas cov neeg Vajtswv xaiv tseg tim tsum paub. Lwm tus tej zaum yuav nug tias, “Vajtswv lub tsev luam ib phau ntawv ntawm Vajtswv cov lus raug nyiaj li cas?” Qhov paub txog qhov no puas muaj qab hau? (Tsis muaj.) Tus nqi luam ntawv ntawd puas muaj feem xyuam txog koj? Puas tau kom koj them tus nqi ntawd? Zoo li qhov ntawd tsis ntsig txog koj, puas yog? Ib txhia tej zaum yuav nug tias, “Tam sim no leej twg yog cov thawj coj theem siab hauv Vajtswv lub tsev?” Yog lawv tsis yog cov uas coj koj kiag, qhov tsis paub txog qhov no puas cuam tshuam rau koj? (Tsis cuam tshuam.) Nyob hauv Teb Chaws Suav av loj, qhov paub txog tej no mas tej zaum yuav yog ib qho teeb meem. Yog raug tus zaj loj liab ploog ntes thiab raug tsim txom hnyav heev, yog koj tsis paub txog tej no, txawm lawv yuav ntaus koj li cas los xij, koj yeej qhia tsis tau ib yam dab tsi li, thiab yog li ntawd koj yeej yuav tsis dhau los ua ib tug Yudas. Tiam sis yog koj paub thiab thev tsis taus txoj kev ntaus uas hnyav heev uas lawv ntaus koj ntawd, tej zaum koj yuav qhia tawm, es dhau los ua ib tug Yudas. Thaum ntawd, tej zaum koj yuav xav tias, “Vim li cas thaum ntawd kuv thiaj li lam tau lam nug cov lus nug ntawd? Yog tsis paub mas twb yuav zoo dua ntau lawm. Txawm raug ntaus tuag los, kuv yeej tseem yuav tsis paub txog tej ntawd; txawm yog kuv xav tsim lus teb los, kuv yeej yuav xav tsis tawm ib yam dab tsi li. Yog li ntawd, kuv yeej yuav tsis dhau los ua ib tug Yudas. Tam sim no kuv kawm tau kev qhia lawm; qhov zoo tshaj plaws ces yog tsis txhob paub ntau dhau txog tej yam uas tsis ntsig txog qhov tseeb no. Qhov nug txog tej no yeej tsis muaj qab hau dab tsi li; qhov tsis paub mas tseem zoo dua.” Thiab tseem muaj qee leej uas tej zaum yuav nug tias, “Nyob hauv Vajtswv lub tsev muaj pes tsawg pab pawg uas ua tej hauj lwm tshwj xeeb?” Qhov ntawd ntsig txog koj dab tsi? Koj nyob hauv pab pawg twg ces koj ua tes hauj lwm hauv pab pawg ntawd xwb. Qhov tsis paub txog tej no tsis cuam tshuam koj txoj kev ua koj tes dej num li ib txwm, tsis cuam tshuam koj txoj kev caum qhov tseeb hauv koj txoj kev ntseeg, los sis kev ua lub neej hauv pawg ntseeg; qhov ntawd yeej tsis cuam tshuam dab tsi li. Qhov tsis paub txog tej no tsis txwv koj txoj kev caum qhov tseeb los sis kev tau txais kev cawm dim tam li ib tug ntseeg, yog li ntawd yuav nug ua dab tsi? “Cov kwv tij thiab cov nkauj muam feem coob yog neeg nyob hauv nroog los sis yog neeg nyob pem toj siab? Lawv puas muaj kev kawm los sis tsis muaj kev kawm?” Qhov paub txog tej no puas muaj qab hau? (Tsis muaj.) Yog lawv txhua tus yog neeg nyob pem toj siab no ho ua li cas? Thiab yog lawv txhua tus yog neeg nyob hauv nroog no ho ua li cas? Qhov no tsis muaj dab tsi ntsig txog qhov tseeb li. Ib txhia tej zaum yuav nug tias, “Tam sim no tes hauj lwm tshaj tawm txoj moo zoo nthuav dav mus li cas lawm?” Qhov nug me ntsis txog qhov no mas tsis ua cas, tiam sis ib txhia tib neeg, vim yog xav paub, thiaj li nug ntxaws ntxaws txog tias tes hauj lwm tshaj tawm txoj moo zoo tau nthuav dav mus rau pes tsawg lub teb chaws lawm, uas yog ib qho tsis tim tsum. Txawm yog lawv paub txog qhov no los, ho yuav cuam tshuam li cas rau lawv? Qhov paub txog tej ntsiab lus zoo li no yuav muaj txiaj ntsig dab tsi? Yog koj tsis muaj qhov tseeb qhov muaj tiag, koj yeej tseem yuav tsis muaj txawm yog koj paub los xij; txoj kev paub no yeej yuav tsis pab koj ua koj tej dej num kom zoo los sis muab kev pab rau koj txoj kev nkag mus rau hauv lub neej txoj sia kiag li. Qhov tsis nug txog qee yam hauj lwm dav dav mas tsis ua cas; qhov tiag tiag ces, qhov tsis paub mas tseem zoo dua. Qhov paub ntau dhau yog ib lub nra. Kiag thaum cov ntaub ntawv zoo li no xau tawm mus, qhov ntawd dhau los ua ib qho teeb meem thiab ib qho kev ua txhaum. Qhov paub txog tej no tsis yog ib yam zoo dab tsi: Koj yim paub ntau, yim ua rau muaj teeb meem ntau xwb. Cov uas to taub qhov tseeb paub tias yam twg tsim nyog hais thiab yam twg tsis tsim nyog hais. Cov uas feeb tsis meej, uas tsis muaj kev to taub ntawm sab ntsujplig, tsis paub cais cov neeg sab hauv thiab cov neeg sab nraud thaum lawv hais lus, pheej hais lus tsis muaj qab hau xwb. Yog li ntawd, tej yam no tsis tsim nyog muab qhia rau cov nyob hauv pawg ntseeg uas tsis to taub qhov tseeb. Qhov paub txog tej no yeej tsis muaj txiaj ntsig dab tsi li. Yam ib mas, cov neeg no pab daws tsis tau teeb meem. Yam ob mas, lawv tiv thaiv tsis tau pawg ntseeg tes hauj lwm. Thiab yam peb mas, yeej tsis tim tsum kom lawv hais lus zoo txog Vajtswv lub tsev li. Txhua yam ntawm Vajtswv cov lus puav leej yog qhov tseeb, thiab txhua yam ntawm Vajtswv tej kev ua puav leej ncaj ncees—puas tim tsum kom cov tsis ntseeg thiab cov ib txwm tsis ntseeg uas tsis muaj kev to taub ntawm sab ntsujplig ntawd los lam hais lus qab zib rau? Yeej tsis tim tsum. Txawm yog tsis muaj ib yam muaj sia twg hauv tag nrho lub ntiaj teb no caum Vajtswv qab los sis pe hawm Vajtswv los xij, Vajtswv lub meej mom thiab lub ntsiab tseeb yeej tseem yuav tsis hloov. Vajtswv yeej yog Vajtswv, yeej tsis hloov mus ib txhis, yeej tsis hloov mus raws li tej kev hloov nyob hauv tej xwm txheej twg li. Qhov Vajtswv yog leej twg tiag tiag thiab Nws lub meej mom yeej tsis hloov mus ib txhis. Tej no yog qhov tseeb uas cov uas ntseeg Vajtswv yuav tsum to taub. Cov tsis ntseeg thiab cov ib txwm tsis ntseeg ntawd hais lus thiab ua yam tsis paub cais cov neeg sab hauv thiab cov neeg sab nraud—qhov uas lawv paub ntau dhau ntawd puas muaj txiaj ntsim rau Vajtswv lub tsev tes hauj lwm? Puas tim tsum kom lawv paub txog tes hauj lwm ntawm Vajtswv lub tsev? Lawv tsis tsim nyog rau txoj kev paub no li! Ib txhia tej zaum yuav nug tias, “Puas yog tej yam no puav leej yog tej kev zais, yog li ntawd es thiaj li tsis pub lawv paub?” Nej tau ntseeg Vajtswv los txog txij no lawm, nej puas xav tias tej yam no muaj tej kev zais? (Tsis muaj.) Tiam sis cov neeg Vajtswv xaiv tseg muaj kev coj ncaj ncees thiab lub meej mom; lawv yuav tsum tsis txhob cia cov ib txwm tsis ntseeg muab coj los tham txog los sis thuam luag. Vajtswv lub tsev, pawg ntseeg, thiab cov kwv tij thiab cov nkauj muam, txawm yog ib pab pawg los sis ib tug neeg twg, puav leej muaj lub meej mom; lawv txhua tus puav leej yog tej yam uas zoo, thiab leej twg los tsis txhob xav yuav ua rau lawv qias. Leej twg uas ua ib yam dab tsi uas cia cov Ntxwgnyoog thiab cov dab ua rau qias neeg thiab lam tau lam hais lus phem los sis ua rau Vajtswv lub tsev lub suab npe puas, los sis ua rau cov kwv tij thiab cov nkauj muam lub suab npe puas yam ywj siab, cov neeg ntawd yeej raug foom phem! Yog li ntawd, pawg ntseeg yeej tsis tso cai rau cov uas tsis muaj peev xwm ceev lawv tus nplaig ntawd nyob kiag li. Kiag thaum txheeb tau lawm, yuav tsum muab lawv ntsaig tawm mus! Txoj kev ua li no puas mus raws li tej hauv paus ntsiab lus? (Mus raws.)
Ib txhia tib neeg thaum lawv hais lus, sib txuas lus, sib cuag nrog, los sis sib raug zoo nrog cov kwv tij thiab cov nkauj muam mas ceev faj tshwj xeeb, tiam sis kiag thaum lawv mus txog tsev mas, lawv dhau mus ua cov neeg qhov ncauj loj, qhia txhua yam tawm, txawm yog cov kwv tij thiab cov nkauj muam tej ntaub ntawv ntiag tug los yeej qhia tawm thiab, uas ua rau lawv tsev neeg, cov ib txwm tsis ntseeg uas tsis muaj kev ntseeg, thiab cov uas tsuas ntseeg lub npe xwb ntawd paub ntau yam txog pawg ntseeg tej xwm txheej. Ib tug neeg zoo li no yog ib tug neeg soj xov sab hauv, ib tug neeg ntxeev siab—ib tug Yudas—thiab yog hom neeg uas pawg ntseeg yuav tsum ntsaig tawm mus tiag tiag. Lawv yim nyob hauv pawg ntseeg ntev, lawv yim paub tej ntaub ntawv ntau ntxiv txog cov kwv tij thiab cov nkauj muam, lawv yim ntxeev siab muag ntau yam, thiab yim muaj ntau yam ntxiv uas cov ib txwm tsis ntseeg muab tau los ua chaw tuav thiab los hais lus thuam. Yog koj tsis ntshai tias lawv yuav ntxeev siab muag cov ntaub ntawv no rau cov ib txwm tsis ntseeg, ces koj cia lawv nyob; yog koj tsis xav kom koj tej ntaub ntawv ntiag tug thiab pawg ntseeg tej xwm txheej sab hauv xau tawm ntawm lawv lub qhov ncauj mus, ces koj yuav tsum ntsaig cov neeg soj xov sab hauv no tawm mus kom sai li sai tau. Qhov no puas yog tsim nyog? (Yog.) Yeej tsis tsim nyog ua siab mos siab muag rau cov tib neeg zoo li no; lawv tsis muaj txoj kev npaj siab zoo thiab lawv tus kheej yeej tsis yog yam zoo dab tsi li. Cov tib neeg zoo li no zoo li cas thaum muab piv rau ob hom neeg uas tau hais ua ntej ntawd, cov uas nyiam ua pauj rov qab thiab cov uas ua neej ywj siab thiab tsis muaj kev txwv? Lawv puas zoo dua los sis phem dua? (Phem dua.) Cov tib neeg no tej zaum kuj ua tau lawv tej dej num, siv tau zog me ntsis, thiab tiv kev txom nyem me ntsis thiab; tej zaum lawv yuav ua txhua yam uas Vajtswv lub tsev kom lawv ua thiab tsis muaj qhov tsis kam, tiam sis muaj ib qho teeb meem: Lawv qhia txhua yam uas ntsig txog Vajtswv lub tsev rau cov ib txwm tsis ntseeg. Txhua hnub lawv ua lub luag hauj lwm ntawm ib tug neeg ntxeev siab, ib tug neeg soj xov sab hauv. Tsuas yog vim qhov laj thawj no xwb, pawg ntseeg yeej thev tsis taus lawv thiab yuav tsum ntsaig lawv tawm mus. Nej puas to taub? (To taub.) Txawm lawv yuav zoo siab los sis tsis zoo siab nyob hauv pawg ntseeg, leej twg ua rau lawv chim, leej twg haum nrog lawv, txawm lawv raug xaiv los ua cov thawj coj pawg ntseeg los sis raug rho tawm—txawm muaj dab tsi tshwm sim los xij, lawv pheej yuav muab txhua yam ntxaws ntxaws qhia rau lawv tsev neeg cov uas ib txwm tsis ntseeg. Lawv ua kom paub tseeb tias lawv tsev neeg cov uas ib txwm tsis ntseeg thiab cov ib txwm tsis ntseeg ntawd paub kiag tam sim ntawd thiab paub meej pawg ntseeg qhov xwm txheej sab hauv kom ncav sij hawm. Rau cov tib neeg zoo li no, nej yuav tsum tsis txhob ua siab mos siab muag rau lawv los sis hlub tshua lawv kiag li; kiag thaum pom ib tug, ces ntsaig tus ntawd tawm mus. Txoj kev ua li no zoo li cas? (Tsim nyog.) Qhov ua li no puas yog qhov tsis muaj kev hlub tshua li? (Tsis yog.) Qhov ntawd tsis yog qhov tsis muaj kev hlub tshua. Koj coj rau lawv ib yam li cov kwv tij thiab cov nkauj muam, tiam sis lawv tsis tiv thaiv tej txiaj ntsim ntawm Vajtswv lub tsev los sis tej txiaj ntsim ntawm cov kwv tij thiab cov nkauj muam ib qho me me li. Tiam sis, lawv ntxeev siab muag tej txiaj ntsim ntawm Vajtswv lub tsev thiab cov kwv tij thiab cov nkauj muam txhua lub cib fim. Koj coj rau lawv ib yam li ib tsev neeg, tiam sis lawv puas xam tias koj yog tsev neeg? (Tsis xam.) Yog li ntawd tsis txhob ua siab mos siab muag rau lawv; yog tim tsum ntsaig ces ntsaig lawv tawm mus. Los txog rau tam sim no, nej puas tau ntsib cov tib neeg zoo li no? (Tau ntsib dua lawm. Lawv muab txhua yam ntsig txog cov kwv tij thiab cov nkauj muam qhia rau lawv tsev neeg, thiab qee zaus lawv kuj qhia qee yam thiab tej kev npaj ntxaws ntxaws hauv pawg ntseeg rau lawv tsev neeg thawj lub sij hawm. Lawv tsev neeg thiaj li muab tau chaw tuav los hais lus phem txog pawg ntseeg nyob tom qab nraub qaum.) Cov tib neeg no puas tau muab ntsaig tawm mus lawm? (Ntsaig tawm mus lawm.) Tom qab raug ntsaig tawm mus lawm, lawv puas yws? Tej zaum lawv yuav xav tias tsis ncaj ncees, xav tias, “Kuv tsis tau ua ib yam dab tsi li; qhov no tsis suav tias yog kev ua yuam cai rau tej kev cai tswj fwm, thiab kuv los kuj tsis tau ua rau muaj tej kev tab kaum los sis kev cuam tshuam thiab, yog li ntawd vim li cas thiaj li ntsaig kuv tawm?” Nej puas xav tias lub ntsiab xeeb txawm ntawm lawv tej kev ua ntawd hnyav dua li qhov ua rau muaj tej kev tab kaum thiab kev cuam tshuam? (Hnyav dua.) Cov neeg zoo li no puas tseem tuaj yeem raug cawm tau? Puas yooj yim rau lawv hloov? (Tsis yooj yim.) Vim li cas nej thiaj li hais tias yuav tsis yooj yim? Qhov twg qhia tau hais tias nyuaj rau lawv hloov? (Lawv tsis yog cov neeg hauv Vajtswv lub tsev, lawv tsis yog cov kwv tij los sis cov nkauj muam; lawv lub ntsiab tseeb yog cov tsis ntseeg thiab cov ib txwm tsis ntseeg.) Qhov no yog lawv lub ntsiab tseeb. Yog li, nej paub tau li cas tias lawv yog cov ib txwm tsis ntseeg thiab cov tsis ntseeg? (Txawm lawv muaj kev xav hauv siab li cas nyob hauv pawg ntseeg los xij, lawv yeej mus tso tawm rau lawv tsev neeg, qhia tau hais tias txawm muaj dab tsi tshwm sim los xij, lawv yeej tsis lees txais los ntawm Vajtswv los, thiab haj yam tsis kawm ua tej kev qhia li. Cov neeg zoo li no tsis ntsib pom Vajtswv tes hauj lwm thiab tsis lees txais qhov tseeb, yog li ntawd lawv lub ntsiab tseeb yog cov tsis ntseeg.) Lawv lub ntsiab tseeb no tau muab qhia meej lawm. Lawv tso lawv tej kev xav hauv siab tawm rau lawv tsev neeg thiab coj rau txhua yam raws li lawv tej kev xav hauv siab. Nej yuav paub tau li cas tias lawv tsis yog cov neeg hauv Vajtswv lub tsev, tiam sis yog cov ib txwm tsis ntseeg uas nkag zais ntshis los rau hauv Vajtswv lub tsev? (Vim tias lawv tuaj yeem ntxeev siab muag tej txiaj ntsim ntawm Vajtswv lub tsev, ua lub luag hauj lwm ntawm cov neeg ntxeev siab thiab cov neeg soj xov sab hauv, thiab vim tias lawv yeej tsis yog cov neeg uas tiv thaiv tes hauj lwm thiab tej txiaj ntsim ntawm Vajtswv lub tsev. Yog li ntawd, cov tib neeg no tsis koom ua ib lub siab nrog Vajtswv lub tsev.) Qhov kev piav qhia no tsis raug lub ntsiab. Cia Kuv piav rau nej. Txawm hais tias cov tib neeg no koom nrog lub neej hauv pawg ntseeg thiab ua lawv tej dej num los xij, lawv puas tau xam tias cov kwv tij thiab cov nkauj muam yog lawv tsev neeg? Hais yooj yooj yim tias, lawv puas tau xam tias cov kwv tij thiab cov nkauj muam yog lawv cov neeg? (Tsis xam.) Yog li ntawd lawv xam tias cov kwv tij thiab cov nkauj muam yog dab tsi? (Cov neeg sab nraud.) Yog lawm, xam tias yog cov neeg sab nraud, xam tias yog cov neeg tawm tsam. Yog li ntawd lawv xam tias Vajtswv lub tsev thiab pawg ntseeg yog dab tsi? Qhov ntawd tsis yog ib qho chaw ua hauj lwm rau lawv xwb lod? (Yog.) Lawv xam tias Vajtswv lub tsev thiab pawg ntseeg zoo ib yam li yog cov tuam txhab los sis cov koom haum ntawm lub ntiaj teb uas ib txwm tsis ntseeg, xam tias cov kwv tij thiab cov nkauj muam yog cov neeg sab nraud, yog cov uas yuav tsum tau ceev faj, thiab yog cov neeg tawm tsam. Yog li ntawd, lawv thiaj li yooj yim qhia ntau yam ntaub ntawv thiab ntau yam xwm txheej tiag tiag txog cov kwv tij thiab cov nkauj muam rau cov uas yeej ib txwm tsis ntseeg Vajtswv kiag li. Lawv paub hais tias cov neeg ib txwm tsis ntseeg no yuav tsis muaj cov lus hais uas zoo, thiab haj tseem tuaj yeem hais lus phem txog cov kwv tij thiab cov nkauj muam, thiab iab liam Vajtswv lub tsev—lawv paub txog txhua yam no, tiam sis lawv yeej tseem lam tau lam muab cov kwv tij thiab cov nkauj muam thiab pawg ntseeg tej xwm txheej qhia rau cov ib txwm tsis ntseeg no yam tsis tseg ib qho me me li. Yeej pom tseeb tias, lawv xam tias cov kwv tij thiab cov nkauj muam yog cov neeg sab nraud, yog cov neeg tawm tsam, thiab kiag thaum muaj ib qho kev tsis zoo siab tshwm tuaj, lawv yeej koom tes nrog cov ib txwm tsis ntseeg kiag tam sim ntawd los thuam luag, iab liam, thiab ua kev tawm tsam cov kwv tij thiab cov nkauj muam nyob tom qab nraub qaum, qhov no yog ua kom txaus siab rau lawv tus kheej tej kev ntshaw. Lawv xav tias qhov txiav txim txog ib tug kwv tij los sis nkauj muam twg yuav ua tsis tau nyob hauv pawg ntseeg vim tias yog lawv tham txog pawg ntseeg tej xwm txheej los sis cov kwv tij thiab cov nkauj muam nyob rau ntawm cov kwv tij thiab cov nkauj muam lub xub ntiag, lawv xav tias lawv yuav tsum tau ris lub txim uas tshwm sim los, uas yuav tsis zoo rau lawv. Tiam sis qhov tham txog tej yam no nrog lawv tsev neeg mas ua rau txaus siab rau lawv tus kheej tej kev siab kub, tej kev ntshaw, thiab tej kev xav hauv siab tag nrho, yam tsis tas ris ib lub txim tsis zoo twg, vim tias tsev neeg ces, txawm li cas los, yeej yog tsev neeg, uas yuav tsis ntxeev siab muag lawv. Txawm li cas los xij, cov kwv tij thiab cov nkauj muam mas yuav tsis zoo ib yam li ntawd, uas tuaj yeem qhia tawm txog lawv, nthuav lawv tawm, thiab ntuas lawv, thiab haj tseem ua rau lawv poob lawv tej dej num thiab tej hauj lwm, nyob rau txhua lub sij hawm los sis txhua qhov chaw. Yog li ntawd, yeej tsis yog lus dag kiag li uas hais tias lawv xam tias cov kwv tij thiab cov nkauj muam yog lawv cov neeg tawm tsam. Ib tug neeg tawm tsam yog ib tug neeg uas yuav tsum tau ceev faj. Vim li ntawd, lawv tsis hais rau cov kwv tij thiab cov nkauj muam, tsis sib qhia nrog los sis tsis nthuav ib yam dab tsi tawm rau cov kwv tij thiab cov nkauj muam li. Tiam sis, lawv “ua lub neej hauv pawg ntseeg” nrog lawv tsev neeg cov uas ib txwm tsis ntseeg nyob tom tsev, uas lawv qhia txhua yam thiab tso txhua yam hauv lawv lub siab tawm. Lawv qhia lawv tej kev xav, tej kev xam pom, tej yam tsis raws siab xav, tej kev tsis txaus siab, thiab tag nrho lawv tej kev xav uas nkhaus tawm yam tsis npog ib qho li thiab yam tsis muaj kev ua xyem xyav kiag li, uas ua rau lawv hnov tias tau tso tawm thiab zoo siab thaum ua li ntawd. Lawv tsev neeg tsis muaj qhov saib tsis taus lawv tiam sis pab thiab koom tes nrog lawv. Yog lawv hais lus zoo li no nyob hauv pawg ntseeg, lawv tus yam ntxwv xeeb txawm tseeb uas yog cov tsis ntseeg yeej yuav raug muab nthuav tawm tag nrho, thiab pawg ntseeg yeej yuav tsum ntsaig lawv tawm mus. Yog li ntawd, lawv tsis xam tias cov kwv tij thiab cov nkauj muam yog tsev neeg tiam sis xam tias yog cov neeg tawm tsam nrog. Qhov no yog ib kis. Lwm kis mas lawv yeej tsis xam tias lawv tus kheej yog ib feem ntawm pawg ntseeg, yog li ntawd txawm muaj dab tsi tshwm sim rau pawg ntseeg los xij, txawm yog kev hais lus phem thiab kev tuam mom los ntawm lub ntiaj teb ntawm sab kab lis kev cai ntseeg, cov lus xaiv uas tsis muaj tseeb thiab kev thuam luag los ntawm cov ib txwm tsis ntseeg, los sis kev iab liam thiab kev tsim txom los ntawm tsoom fwv ntawm lub teb chaws los xij, yeej tsis ntsig txog thiab tsis tseem ceeb rau lawv tus kheej li. Yog hais tias lawv xav tiag tiag tias: “Yog pawg ntseeg lub koob npe puas, thiab Vajtswv lub npe raug txaj muag, peb lub meej mom tam li ib tug ntseeg los yeej raug rhuav hnyav heev. Vim li no, kuv yeej yuav tsis tham txog pawg ntseeg tej xwm txheej los sis Vajtswv lub tsev tej xwm txheej nrog cov ib txwm tsis ntseeg, uas cia cov ib txwm tsis ntseeg ntawd hais lus phem thiab thuam luag. Txawm yog los tiv thaiv kuv tus kheej los kuv yeej yuav tsis lam tau lam tham txog Vajtswv lub tsev tej xwm txheej nrog kuv tsev neeg cov uas ib txwm tsis ntseeg”—yog lawv muaj txoj kev paub zoo li no, lawv puas yuav muaj peev xwm ceev lawv tus nplaig? Yog li vim li cas lawv ua tsis tau li no? Yeej pom tseeb tias lawv yeej tsis xam tias lawv tus kheej yog ib feem ntawm Vajtswv lub tsev kiag li, thiab lawv los kuj tsis xam tias lawv tus kheej yog cov ntseeg thiab. Ib txhia tib neeg hais tias, “Koj cov lus tsis yog. Yog lawv tsis xam tias lawv tus kheej yog ib feem ntawm Vajtswv lub tsev, vim li cas lawv tseem tuaj sib txoos ua ke?” Nyob hauv cov uas ntseeg Vajtswv, yeej muaj txhua hom tib neeg. Peb twb tau sib qhia txog qhov no yav tas los lawm tsis yog lod? Muaj ntau tus uas los ntseeg Vajtswv nrog ntau txoj kev npaj siab thiab lub hom phiaj uas tsis tsim nyog, thiab nov yog ib hom zoo li ntawd. Qhov ntseeg Vajtswv kom tau kev lom zem, kom daws kev dhuav, los sis kom nrhiav tau kev vam khom ntawm sab ntsujplig—cov tsis ntseeg zoo li no tsis yog pom tas li lod? Cov tib neeg zoo li no tsis yog muaj coob heev lod? (Yog.) Lawv twb tsis lees paub tias lawv tus kheej yog cov ntseeg Vajtswv. Muaj tseeb tiag, txhua yam hauj lwm hauv pawg ntseeg thiab cov neeg Vajtswv xaiv tseg ua tej dej num yeej tsis ntsig txog lawv, lawv yeej tsis quav ntsej txog tej ntawd li. Yog li ntawd, lawv thiaj li ywj siab thiab lam tau lam tham nrog cov ib txwm tsis ntseeg txog qhov xwm txheej ntawm pawg ntseeg tes hauj lwm, pawg ntseeg tej xwm txheej sab hauv, thiab haj tseem yog tej teeb meem twg uas tshwm sim nyob hauv cov kwv tij thiab cov nkauj muam. Tom qab lawv hais tag, cov ib txwm tsis ntseeg pib hais lus phem, thuam, thiab thuam luag, tiam sis qhov ntawd tsis ua rau lawv nyuaj siab ib qho me me li. Tej zaum lawv haj tseem yuav koom nrog cov ib txwm tsis ntseeg los cem cov kwv tij thiab cov nkauj muam, txiav txim txog Vajtswv lub tsev, thiab tawm tswv yim txog tes hauj lwm thiab tej kev npaj tes hauj lwm ntawm Vajtswv lub tsev thiab. Lawv puas yog cov ntseeg Vajtswv? (Tsis yog.) Ib tug neeg ntseeg tseeb tiag yeej yuav tsis ua zoo li no kiag li. Txawm yog los tiv thaiv lawv tus kheej lub meej mom thiab tej txiaj ntsim los xij, lawv yeej yuav tsis tom txhais tes uas pub mov rau lawv noj thiab koom nrog cov neeg sab nraud ntawm pawg ntseeg kiag li. Puas yog li ntawd? (Yog.) Yog li ntawd, cov tib neeg zoo li no yog cov tib neeg phem thiab cov tsis ntseeg, uas yuav tsum muab ntsaig tawm mus. Yog yim ntsaig lawv tawm mus ntxov, pawg ntseeg yim muaj kev thaj yeeb ntxov.
Cia peb tham txog nej tus kheej. Piv txwv li, yog koj niam koj txiv tsis ntseeg Vajtswv, los sis yog koj cov kwv tij viv ncaus los sis koj cov phooj ywg uas zoo tshaj plaws tsis ntseeg Vajtswv, tiam sis lawv tsis tawm tsam koj txoj kev ntseeg thiab yeej txhawb koj txoj kev ntseeg kawg li, koj puas yuav tham nrog lawv txog txhua yam uas tshwm sim nyob hauv pawg ntseeg? Piv txwv hais tias koj ib tug phooj ywg poj niam nug tias, “Puas muaj cov txiv neej nyob hauv nej pawg ntseeg uas tab tom nrhiav ib tug hlub? Puas muaj cov uas tsis txawj dag dua me ntsis, thiab siab, nplua nuj, thiab zoo nraug?” Ib txhia neeg coj zoo nyob hauv cov ib txwm tsis ntseeg kuj xav nrhiav ib tug txij nkawm uas coj zoo los nrog lawv ua neej thiab. Koj tus phooj ywg poj niam ntawd xav nrhiav ib tug neeg uas ntseeg Vajtswv, yog li ntawd koj puas yuav txaus siab qhia rau nws? (Tsis txaus siab.) Koj yuav tsum qhia rau nws tias, “Koj txoj kev nyiam cov ntseeg ntawd yeej tsis muaj qab hau dab tsi li. Koj yog ib tug ib txwm tsis ntseeg thiab yeej tsis haum nrog cov ntseeg kiag li. Nej tsis muaj cov lus zoo ib yam sib tham; nej taug txoj kev sib txawv! Saib koj seb, hnav khaub ncaws haib ua luaj—tus kwv tij twg hauv peb pawg ntseeg yuav nyiam koj?” Koj twb saib tsis taus nws, yog li ntawd koj puas yuav tham nrog nws txog pawg ntseeg tej xwm txheej? (Tsis tham.) Hais tsis tau pes tsawg lo lus ces qhov kev sib tham ntawd yeej yuav tawg, nrog rau tej kev xam pom uas sib txawv tag nrho. Txawm yog ib txhia ib txwm tsis ntseeg muaj kev xav zoo txog cov ntseeg los xij, thiab txawm yog lawv tseem ua phooj ywg nrog koj tom qab koj dhau los ua ib tug ntseeg lawm los xij, koj puas yuav txaus siab muab pawg ntseeg tej xwm txheej sab hauv los sis tej kev nyuaj uas koj ntsib thaum ua koj tej dej num qhia rau lawv? (Tsis txaus siab.) Txawm yog lawv txhawb koj txoj kev ntseeg Vajtswv los xij, qhov tham txog pawg ntseeg tej xwm txheej nrog lawv ntawd muaj qab hau dab tsi? Piv txwv li, ib txhia kwv tij thiab nkauj muam tau tiv txoj kev tsim txom thiab kev nug lus nug los ntawm tus zaj loj liab ploog yam tsis dhau los ua cov Yudas. Qhov no yog ib qho lus tim khawv uas txawm yog cov ib txwm tsis ntseeg los yeej qhuas—koj puas yuav txaus siab muab qhov no qhia rau lawv? (Tsis txaus siab.) Vim li cas koj thiaj li tsis txaus siab tham txog qhov ntawd? (Tej yam zoo li no tsis ntsig txog lawv, thiab lawv yeej to taub tsis tau tej lus tim khawv txog txoj kev ntsib kev pom no.) Lawv yeej yuav to taub tsis tau. Qhov tham txog tej yam no tuaj yeem ua rau muaj tej qhov tshwm sim los tsis zoo dab tsi? (Tej zaum lawv yuav tig los txiav txim txog pawg ntseeg.) Lawv yuav txiav txim tias: “Vim li cas nej thiaj li ua rau nej tus kheej raug txom nyem li no? Vim li cas thiaj li tawm tsam tsoom fwv ntawm lub teb chaws?” Saib seb, ib lo lus xwb tuaj yeem nthuav lawv tus yam ntxwv xeeb txawm tawm lawm. Qhov no yuav suav tau tias yog kev tawm tsam tsoom fwv ntawm lub teb chaws tau li cas? Yeej pom tseeb tias yog cov vaj ntxwv dab uas kav lub teb chaws tab tom rhuav tshem yam phem heev rau cov neeg Vajtswv xaiv tseg, uas ua rau cov neeg Vajtswv xaiv tseg tsis muaj txoj kev ua neej. Txawm yog thaum lawv pom qhov no los, lawv tseem ua txuj tsis paub. Yeej pom tseeb tias lawv hais lus nyob rau hauv txoj kev uas ntxeev qhov tseeb thiab ntxeev tej yam muaj tseeb. Koj tseem yuav tham dab tsi nrog lawv tau ntxiv? Koj yuav tsum tsis txhob hais ib yam dab tsi uas ntsig txog kev ntseeg Vajtswv rau lawv li; koj yuav tsum tsis pub lawv paub ib yam dab tsi txog qhov no li. Cov uas tsis muaj peev xwm ceev lawv tus nplaig tuaj yeem qhia txhua yam txog pawg ntseeg rau cov ib txwm tsis ntseeg. Yeej pom tseeb tias lawv yog cov tsis ntseeg; lawv yog cov dab uas los rau hauv Vajtswv lub tsev lam los nyob kom dhau hnub xwb, yog cov tsiaj nyaum uas tom txhais tes uas pub mov rau lawv noj yam tsis muaj lub siab txawj xav los sis laj thawj ib qho me me li. Rau lawv mas, txawm muaj kev puas tsuaj dab tsi rau tej txiaj ntsim los sis lub suab npe ntawm Vajtswv lub tsev los sis pawg ntseeg los yeej tsis muaj feem xyuam rau lawv kiag li, tsis ntsig txog lawv tus kheej tej txiaj ntsim ib qho li, thiab lawv yeej tsis hnov nyuaj siab ib qho me me li; yog li ntawd, lawv thiaj li lam tau lam tham txog pawg ntseeg tej xwm txheej sab hauv rau cov ib txwm tsis ntseeg thiab cov tib neeg uas tsis ntseeg Vajtswv, yam tsis muaj kev ua xyem xyav kiag li. Cov tib neeg zoo li no puas yog txaus ntxub? (Yog!) Ib tug tsis ntseeg, uas tsis xam tias cov kwv tij thiab cov nkauj muam yog ib tsev neeg tiam sis xam tias cov ib txwm tsis ntseeg yog lawv tsev neeg ntawd, puas lees txais tau qhov tseeb? (Lees txais tsis tau.) Lawv puas tuaj yeem lees paub tias Vajtswv yog qhov tseeb? (Tsis tuaj yeem.) Ib tug neeg uas tsis xam tias lawv tus kheej yog ib tug tswv cuab ntawm pawg ntseeg, thaum hnov Vajtswv cov lus cawm tib neeg ntawd, lawv puas tuaj yeem tso lawv tus kheej tej txiaj ntsim tseg los caum qhov tseeb thiab nkag mus rau hauv qhov tseeb qhov muaj tiag? (Tsis tuaj yeem.) Lawv tej hauj lwm txhua hnub ces tsuas yog ntxeev siab muag pawg ntseeg tej txiaj ntsim, koom nrog cov neeg sab nraud, thiab ua cov neeg soj xov sab hauv, cov Yudas, thiab cov neeg ntxeev siab, ib yam li qhov no yog lawv txoj num. Lawv tsis taug txoj kev uas tsim nyog tiam sis ua neej nyob los ua phem; lawv tsim nyog tuag thiab raug foom phem! Cov Yudas, cov neeg ntxeev siab, thiab Ntxwgnyoog cov tub qhe uas tom txhais tes uas pub mov rau lawv noj no yog cov niag neeg phem uas tsis zoo, lawv ua phem rau noob neej, thiab txhua tus yeej ntxub lawv. Yog li, qhov uas pawg ntseeg saib xyuas lawv thiab ntsaig lawv tawm mus ntawd tsis yog ib qho uas tsim nyog kawg nkaus lod? (Yog.) Qhov ntawd tsim nyog kawg nkaus li! Puas yog nej tsis nyiam qhov raug muag tawm? Yog pawg ntseeg los sis Vajtswv lub tsev raug muag, tej zaum feem coob yuav tsis hnov mob siab heev los sis nyuaj siab heev; lawv tsuas yog hnov tsis xis nyob me ntsis hauv siab xwb, vim tias, txawm li cas los xij, lawv yeej yog ib tug tswv cuab nyob hauv. Tiam sis yuav ua li cas yog koj raug ib tug neeg hauv pawg ntseeg muag rau cov ib txwm tsis ntseeg, thiab vim lawv muag koj, cov ib txwm tsis ntseeg thiaj li ntxeev tej yam muaj tseeb, hais lus phem, thuam luag, txiav txim, thiab teem txim rau koj? Thaum ntawd koj yuav hnov zoo li cas? Thaum ntawd puas yog koj yuav hnov txog txoj kev poob ntsej muag thiab kev txaj muag uas pawg ntseeg thiab Vajtswv lub tsev tau thev? (Yog.) Los ntawm qhov kev xam pom no, qhov ntsaig cov tib neeg zoo li no tawm mus puas tsim nyog? (Tsim nyog.) Tsim nyog ntsaig lawv tawm mus; yeej tsis tas ua siab mos siab muag rau lawv li. Hais txog cov uas tsis muaj peev xwm ceev lawv tus nplaig, raws li ntau yam kev qhia tshwm txog qhov lawv coj lawv tus kheej li cas thiab yam uas lawv ua neej ntawd, lawv yog cov tsis ntseeg nyob hauv pawg ntseeg, yog ib hom tib neeg phem uas yuav tsum muab ntsaig tawm mus. Txawm yog lawv tej kev ua yog ua yam zais ntshis los sis ua qhib lug los xij, thaum pom tau tias ib tug neeg twg tsis muaj peev xwm ceev lawv tus nplaig thiab lawv txoj kev ua neeg lub ntsiab tseeb yog ib tug tsis ntseeg tiag tiag, ces yuav tsum maj nroos qhia tawm txog lawv rau cov thawj coj thiab cov neeg ua hauj lwm, thiab qhia tawm rau cov kwv tij thiab cov nkauj muam. Yuav tsum muaj ib qho kev paub cais kom ncav sij hawm thiab kom yog txog cov tib neeg zoo li no, thiab tom qab ntawd yuav tsum ntsaig lawv tawm hauv pawg ntseeg mus kom sai li sai tau. Tsis txhob cia lawv muaj kev koom nrog pawg ntseeg, pawg ntseeg tes hauj lwm, los sis cov kwv tij thiab cov nkauj muam kiag li; qhov muab lawv ntsaig tawm mus kom tag nrho ntawd mas yog qhov kev ua uas yog lawm. Txoj kev sib qhia txog qhov kev qhia tshwm ntawm txoj kev ua neeg no—qhov tsis muaj peev xwm ceev tus nplaig ntawd los xaus rau ntawm no.
Peb hom tib neeg uas tau sib qhia txog hnub no puas yog hnyav dua ob hom uas tau sib qhia txog yav tas los ntawd? (Yog.) Lawv tej xwm txheej phem dua, lawv txoj kev ua neeg qias thiab ntxim ntxub dua, thiab lawv txoj kev ua puas tsuaj thiab kev cuam tshuam rau pawg ntseeg thiab txhua tus kwv tij thiab nkauj muam tej txiaj ntsim ntawd mas loj dua. Yog li ntawd, tsis txhob saib peb hom tib neeg no ua ib qho me me; yuav tsum ceev faj txog lawv kom nruj thiab tsis txhob tso cai rau lawv ua raws li lawv lub siab nyiam. Yog txheeb pom tias leej twg yog ib tug ntawm peb hom no, yuav tsum maj nroos nthuav lawv tawm thiab paub cais, thiab tom qab ntawd saib xyuas kom sai li sai tau. Yog lawv tab tom ua ib teg dej num tseem ceeb, ces maj nroos nrhiav ib tug neeg los ua lawv tes dej num, thiab tom qab ntawd muab lawv rho tawm ntawm tes dej num ntawd thiab ntsaig lawv tawm mus. Puas to taub lawm? (To taub lawm.) Ntau tus yam ntxwv ntawm cov kwv tij thiab cov nkauj muam hauv pawg ntseeg, lawv ntau yam kev qhia tshwm nyob rau ntau lub sij hawm, pawg ntseeg tes hauj lwm, thiab haj tseem yog qee yam xwm txheej sab hauv tsuas pub muab coj los tham thiab sib qhia nyob hauv cov kwv tij thiab cov nkauj muam xwb. Qhov no yog los pab kom cov neeg Vajtswv xaiv tseg muaj kev to taub thiab kev pom uas meej dua txog tej hauv paus ntsiab lus uas Vajtswv lub tsev cheem tsum, uas ua rau lawv muaj peev xwm ua tau raws li qhov tseeb tej hauv paus ntsiab lus. Txawm li cas los xij, muaj ib lub hauv paus ntsiab lus uas yuav tsum tau paub kom meej: Txawm yog qhov tseeb los sis tej hauv paus ntsiab lus uas ntsig txog cov neeg Vajtswv xaiv tseg txoj kev nkag mus rau hauv lub neej txoj sia, los sis txawm yog tej kev cai tswj txog tej xwm txheej dav dav los xij, yeej tsis pub muab qhia rau cov ib txwm tsis ntseeg kiag li, uas yuav ua rau cov ib txwm tsis ntseeg tawm tswv yim txog thiab taw tes. Qhov no yeej txwv tuag nthi. Tej zaum ib txhia yuav hais tias, “Yog txwv tuag nthi, qhov ntawd puas txhais hais tias yog ib txoj kev cai tswj fwm?” Yeej hais tau li no; leej twg uas muab xau tawm mus ces yuav tau ris lub txim uas tshwm sim los ntawd. Vim li cas lawv thiaj li yuav tsum tau ris lub txim uas tshwm sim los ntawd? Vim tias cov uas muab pawg ntseeg tej xwm txheej sab hauv xau tawm mus ntawd tsis tiv thaiv pawg ntseeg los sis cov kwv tij thiab cov nkauj muam, thiab tuaj yeem muag pawg ntseeg thiab cov kwv tij thiab cov nkauj muam tau yooj yim. Vim lawv ua cov neeg ntxeev siab thiab cov Yudas, lawv yeej tsis tsim nyog tau txais kev ua siab mos siab muag rau ntxiv lawm los sis raug xam tias yog cov kwv tij thiab cov nkauj muam los sis ib tsev neeg ntxiv lawm. Yuav tsum saib xyuas lawv ib yam li cov neeg ntxeev siab thiab cov Yudas thiab ntsaig lawv tawm ntawm pawg ntseeg mus kiag. Ib txhia tib neeg hais tias, “Yav tas los kuv muaj tus cwj pwm phem uas yog ib tug qhov ncauj loj, kuv pheej lam tau lam hais lus. Tam sim no uas kuv pom tej qhov tshwm sim los ntawm tej kev ua zoo li no lawm, kuv tsis kam lam tau lam hais lus ntxiv lawm.” Zoo lawm. Vim koj twb hais li no lawm, yuav soj ntsuam saib koj txoj kev coj. Yog koj hloov dua siab tshiab thiab tig rov qab tiag tiag, tsis lam tau lam tshaj tawm cov ntaub ntawv los sis muag cov kwv tij thiab cov nkauj muam tej txiaj ntsim ntxiv lawm, thiab muaj peev xwm ceev koj tus nplaig, ces Vajtswv lub tsev yuav muab ib lub cib fim rau koj. Yog pom dua tias koj ua li no, tias koj yog tus uas tshaj tawm qee cov ntaub ntawv, ces yeej yuav tsis muaj kev ua siab mos siab muag kiag li—cov kwv tij thiab cov nkauj muam hauv pawg ntseeg yuav koom tes ua kev muab koj ntsaig tawm mus. Thaum qhov ntawd tshwm sim, tsis txhob quaj los sis yws tias tsis tau ceeb toom rau koj ua ntej. Tam sim no uas tau piav qhia txhua yam kom meej lawm, yog qhov no tshwm sim dua, Vajtswv lub tsev yeej yuav tsis ua siab mos siab muag kiag li. Puas to taub lawm? (To taub lawm.) Yog nej pom tias leej twg tseem tsis to taub, ces piav qhia rau lawv; taw qhia rau lawv los ntawm kev siv tej ntsiab lus uas peb tau sib qhia hnub no. Yog nej pom leej twg qhia tshwm tej cim ntawm tus cwj pwm no los sis leej twg uas tau ua zoo li no yav tas los, ces nrog lawv tham, ceeb toom rau lawv, thiab qhia rau lawv txog lub ntsiab xeeb txawm thiab tej qhov tshwm sim los ntawm tej kev ua zoo li no, nrog rau Vajtswv lub tsev tus cwj pwm uas muaj rau cov xwm txheej thiab cov tib neeg no. Tom qab qhia txhua yam kom meej lawm, soj ntsuam saib seb lawv puas tuaj yeem hloov dua siab tshiab thiab yav tom ntej lawv yuav ua li cas. Yog lawv hloov thiab tsis ua zoo li ntawd ntxiv lawm, tuaj yeem lees txais lawv rov qab thiab coj rau lawv ib yam li cov kwv tij thiab cov nkauj muam. Tiam sis yog lawv tawv ncauj tsis kam hloov dua siab tshiab thiab tseem ua zoo li no ntxiv yam zais ntshis, ces ntsaig lawv tawm mus thaum twg nej pom ib tug neeg zoo li no. Yog nej pom ob leeg, ces ntsaig nkawd ob leeg tawm mus; yog nej pom ib pab, ces ntsaig tag nrho pab ntawd tawm mus, tsis txhob ua siab mos siab muag kiag li. Ib txhia tib neeg nug tias, “Kuv puas tham tau nrog cov neeg nyob hauv kuv tsev neeg uas yav tas los ntseeg dua tiam sis tom qab ntawd raug ntsaig tawm mus lawm?” Saib zoo li cov uas nyiam ncauj ntau thiab taug xaiv ntawd nyuaj uas yuav tswj lawv tus kheej, pheej tawv ncauj nug tias qhov ntawd puas pub ua. Nej xav li cas, puas pub ua? (Tsis pub.) Yeej tsis pub tham nrog leej twg kiag li, vim tias qhov ntawd yooj yim ua rau muaj tej qhov tshwm sim los tsis zoo. Cov tib neeg zoo li no tag nrho yuav tsum saib xyuas ib yam li cov Yudas. Cov uas yog cov ib txwm tsis ntseeg, cov uas tau raug ntsaig tawm mus lawm, cov uas nyob ze koj, cov uas ntseeg siab tau, cov uas txhawb koj txoj kev ntseeg Vajtswv, cov uas muaj kev xav zoo txog kev ntseeg Vajtswv, thiab cov uas tsuas ntseeg Vajtswv ntawm lub npe xwb, uas tsuas ua lub neej hauv pawg ntseeg thiab nyeem Vajtswv cov lus me ntsis tiam sis tsis ua lawv tes dej num kiag li, yeej tsis pub tham nrog lawv—yog leej twg tham, ces yuav raug saib xyuas ib yam li ib tug Yudas. Puas to taub lawm? (To taub lawm.) Nyob hauv cov uas tsis ua lawv tej dej num ntawd tseem muaj cov twg ntxiv? Puas suav nrog cov tswv cuab hauv pawg ntseeg dog dig thiab? (Suav nrog.) Tsis txhob hnov qab qhov no; tsis txhob ua neeg ruam. Nej yuav tsum tuav tej hauv paus ntsiab lus kom zoo. Tsis txhob ntseeg mus ntseeg los es thaum kawg dhau los ua ib tug Yudas thiab muag Vajtswv lub tsev, muag cov kwv tij thiab cov nkauj muam yam tsis paub txog kiag li, thiab haj tseem hnov txaus siab txog qhov ntawd thiab. Qhov tsis muaj peev xwm ceev tus nplaig thiab haj tseem muag pawg ntseeg tes hauj lwm thiab cov kwv tij thiab cov nkauj muam yog ib qho kev ua txhaum uas hnyav heev. Vajtswv sau txhua tus uas ua tej kev ua phem zoo li no tseg. Tam sim no uas tau piav qhia meej meej rau koj lawm, thiab koj twb to taub lawm, yog koj ua dua, qhov ntawd tsis yog ib qho kev ua txhaum dog dig ntxiv lawm; qhov ntawd yog kev yuam cai rau txoj kev cai tswj fwm, uas ua rau koj dhau los ua ib lub hom phiaj uas yuav raug ntsaig tawm mus, thiab koj yuav raug tshem txoj cai uas yuav tau txais kev cawm dim. Puas to taub lawm? (To taub lawm.)
Lub Kaum Ob Hlis Hnub Tim 11, Xyoo 2021