Cov Thawj Coj thiab Cov Neeg Ua Hauj Lwm Tej Luag Hauj Lwm (24)

Yam Kaum Plaub: Paub Cais Kom Ncav Sij Hawm, thiab Tom Qab Ntawd Muab Txhua Hom Tib Neeg Phem thiab Cov Tawm Tsam Khetos Ntsaig Tawm Mus los sis Ntiab Tawm Mus (Ntu Peb)

Cov Qauv thiab Cov Hauv Paus Rau Kev Paub Cais Ntau Hom Tib Neeg Phem

I. Raws Li Lub Hom Phiaj rau Kev Ntseeg Vajtswv

Nyob rau qhov kev sib txoos ua ke zaum tas los ntawd, peb tau sib qhia txog cov thawj coj thiab cov neeg ua hauj lwm lub luag hauj lwm kaum plaub: “Paub cais kom ncav sij hawm, thiab tom qab ntawd muab txhua hom tib neeg phem thiab cov tawm tsam khetos ntsaig tawm mus los sis ntiab tawm mus.” Saib raws li cov ntsiab lus ntawm lub luag hauj lwm no, peb tau muab ntau hom tib neeg tej kev qhia tshwm sib txawv nyob rau hauv tej xwm txheej sib txawv los xaus lus ua ke, thiab tom qab ntawd paub cais ntau hom tib neeg no raws li lawv tej kev qhia tshwm ntawd. Los ntawm txoj kev paub cais cov tib neeg no, peb lub hom phiaj yog xav txheeb kom meej cov uas yog tib neeg phem uas Vajtswv lub tsev yuav tsum paub cais thiab ntsaig tawm mus—uas yog, cov uas tsis pub nyob hauv Vajtswv lub tsev thiab cov uas yuav tsum muab ntsaig tawm mus. Ob zaug tas los ntawd, peb tau sib qhia txog txoj kev paub cais thiab kev faib ntau hom tib neeg phem los ntawm peb qho. Hnub no, peb yuav sib qhia txuas ntxiv ntau yam ntsiab lus ntxaws ntxaws txog txoj kev faib ntau hom tib neeg phem los ntawm peb qho no. Ua ntej tshaj, cia li nyeem lub luag hauj lwm kaum plaub thiab peb hom ntxaws ntxaws uas tau teev tseg nyob rau hauv. (Cov thawj coj thiab cov neeg ua hauj lwm lub luag hauj lwm kaum plaub: “Paub cais kom ncav sij hawm, thiab tom qab ntawd muab txhua hom tib neeg phem thiab cov tawm tsam khetos ntsaig tawm mus los sis ntiab tawm mus.” Qhov ib, lub hom phiaj rau kev ntseeg Vajtswv; qhov ob, txoj kev ua neeg; qhov peb, tus cwj pwm uas muaj thaum ua lawv tes dej num.) Tom qab nyeem tag lawm, puas yog nej nco qab qee cov ntsiab lus tseem ceeb ntawm ob zaug kev sib qhia yav tas los ntawd lawm? (Yog.) Ua ntej tshaj cia peb rov mus saib cov ntsiab lus ntawm peb qho kev sib qhia zaum tas los ntawd tso. (Zaum tas los ntawd, Vajtswv tau qhia txog lub hom phiaj rau kev ntseeg Vajtswv, uas hais txog lub ntsiab lus plaub mus txog lub ntsiab lus yim ntawm lub ncauj lus no: qhov plaub, koom kev nrhiav lub cib fim; qhov tsib, ua neej vam khom rau pawg ntseeg; qhov rau, nrhiav chaw nkaum; qhov xya, nrhiav ib tug txhawb pab; qhov yim, caum tej phiaj xwm ntawm sab kev nom kev tswv.) Zaum tas los ntawd tau sib qhia tsib qho no. Los ntawm txoj kev sib qhia txog tej kev qhia tshwm thiab lub ntsiab tseeb uas qias vuab tsuab uas tau nthuav tawm ntawm tsib hom tib neeg no, thaum saib los ntawm lawv tej kev coj thiab lawv tej kev npaj siab thiab lub hom phiaj hauv txoj kev ntseeg Vajtswv, nrog rau lawv tej kev pheej thov rau Vajtswv tas li ntawd, puas tsim nyog suav cov tib neeg no ua cov kwv tij thiab cov nkauj muam thiab cia lawv nyob hauv pawg ntseeg? (Tsis tsim nyog, cov tib neeg zoo li no yuav tsum raug muab tshem tawm, vim tias lawv txoj kev ntseeg Vajtswv tsis yog los nrhiav qhov tseeb los sis nrhiav kev cawm dim. Lawv txhua tus puav leej muaj lawv tus kheej tej kev npaj siab thiab tej phiaj xwm, vam tias yuav tau txais tej yam zoo rau lawv tus kheej thiab tau txais txiaj ntsim nyob hauv Vajtswv lub tsev. Lawv tsis yog cov tib neeg uas ua lub siab dawb paug ntseeg Vajtswv; lawv txhua tus puav leej yog cov tsis ntseeg.) Yog tsis muab cov tsis ntseeg ntsaig tawm ntawm pawg ntseeg mus, lawv yuav ua rau muaj kev puas tsuaj dab tsi rau pawg ntseeg tes hauj lwm thiab rau cov kwv tij thiab cov nkauj muam? (Lawv tsis noj thiab haus Vajtswv cov lus thiab tsis ntsib pom Vajtswv tes hauj lwm; lawv nyob hauv pawg ntseeg yam tsis lees txais qhov tseeb. Tsis tas li ntawd xwb, lawv tseem tuaj yeem tso tej kev xav tsis zoo tawm thiab tso tej kev xav phem tawm, ua rau muaj kev tab kaum thiab kev cuam tshuam, thiab ua ib qho kev cuam tshuam uas tsis zoo.) Tej kev qhia tshwm no feem ntau yeej pom tau meej rau tib neeg.

Thaum saib los ntawm tej kev qhia tshwm ntawm tsib hom tib neeg uas tau muab sib tham nyob rau hauv qhov kev sib qhia zaum tas los ntawd, cov tib neeg no puas yog muaj ib tug yam ntxwv uas zoo ib yam? (Yog.) Lawv tus yam ntxwv uas zoo ib yam ntawd yog dab tsi? (Cov tib neeg no puav leej yog cov tsis ntseeg.) (Lawv tsis ntseeg hais tias Vajtswv muaj nyob, tsis ntseeg qhov tseeb, thiab tsis nyiam qhov tseeb li.) Qhov no hais raug lawv lub ntsiab tseeb lawm. Vim tias lawv tsis ntseeg qhov tseeb, lawv thiaj li yuav tsis lees txais qhov tseeb. Lub ntsiab tseeb ntawm cov uas tsis lees txais qhov tseeb kiag li ntawd yog lub ntsiab tseeb ntawm ib tug tsis ntseeg. Tej yam ntxwv ntawm cov tsis ntseeg ntawd yog dab tsi? Lawv ntseeg Vajtswv los koom kev nrhiav lub cib fim, los ua neej vam khom rau pawg ntseeg, los zam kev puas tsuaj, los nrhiav kev txhawb pab thiab kev nrhiav noj nrhiav haus uas ruaj khov. Lawv ib txhia haj tseem caum tej phiaj xwm ntawm sab kev nom kev tswv, xav tsim kev sib raug zoo nrog tsoom fwv los ntawm qee yam xwm txheej kom tau txais kev pom zoo thiab kom tau txais ib txoj hauj lwm ua nom ua tswv. Cov tib neeg zoo li no puav leej yog cov tsis ntseeg tag nrho. Lawv nqa tej kev txhawb siab thiab tej kev npaj siab no nyob rau hauv lawv txoj kev ntseeg Vajtswv, thiab nyob hauv lawv lub siab lawv tsis ntseeg ib puas feem pua tias muaj ib tug Vajtswv. Txawm yog lawv lees paub Vajtswv los xij, lawv ua li ntawd yam ua xyem xyav, vim tias tej kev xam pom uas lawv tuav rawv ntawd yog kev tsis ntseeg tias muaj Vajtswv. Lawv tsuas ntseeg tej yam uas lawv pom tau nyob rau hauv lub ntiaj teb sab khoom no xwb. Vim li cas peb thiaj li hais tias lawv tsis ntseeg tias muaj ib tug Vajtswv? Vim tias lawv puav leej tsis ntseeg los sis tsis lees paub tej qhov muaj tseeb uas hais tias Vajtswv tsim saum ntuj thiab hauv ntiaj teb thiab tag nrho txhua yam, thiab hais tias tom qab tsim tib neeg lawm Vajtswv tau coj thiab kav lawv. Vim li ntawd, lawv thiaj li ntseeg tsis tau qhov muaj tseeb uas hais tias Vajtswv tuaj yeem yug los ua cev nqaij daim tawv. Yog lawv tsis ntseeg hais tias Vajtswv tuaj yeem yug los ua cev nqaij daim tawv, lawv puas tuaj yeem ntseeg thiab lees paub txhua qhov tseeb uas Vajtswv nthuav tawm? (Tsis tuaj yeem.) Yog lawv tsis ntseeg qhov tseeb uas Vajtswv nthuav tawm, ua li lawv puas ntseeg hais tias Vajtswv cawm tau tib neeg thiab puas ntseeg Vajtswv txoj kev npaj tswj hwm los cawm tib neeg? (Lawv tsis ntseeg.) Lawv yeej tsis ntseeg tej no ib qho li. Lub hauv paus ntawm qhov lawv tsis ntseeg ntawd yog dab tsi? Qhov ntawd yog qhov uas lawv tsis ntseeg hais tias Vajtswv muaj nyob. Lawv yog cov tsis ntseeg tias muaj Vajtswv thiab yog cov ntseeg tias tsuas muaj tej yam uas pom tau xwb. Lawv ntseeg hais tias tsuas yog tej yam uas lawv pom tau nyob rau hauv lub ntiaj teb sab khoom no thiaj li muaj tseeb tiag xwb. Lawv ntseeg hais tias lub koob npe, kev tau txais txiaj ntsim, thiab lub meej mom tsuas tuaj yeem tau txais los ntawm tej tswv yim phem thiab tej kev npaj phem xwb. Lawv ntseeg hais tias tib txoj kev uas yuav vam meej thiab ua tau ib lub neej zoo siab ces yog yuav tsum ua neej raws li Ntxwgnyoog tej tswv yim. Lawv ntseeg hais tias lawv txoj hmoo nyob hauv lawv tus kheej ob txhais tes xwb, thiab hais tias lawv yuav tsum vam khom lawv tus kheej los tsim thiab txeeb kom tau ib lub neej zoo siab. Lawv tsis ntseeg Vajtswv lub hwj chim kav los sis ntseeg Nws lub hwj chim uas loj kawg nkaus. Lawv xav hais tias yog lawv vam khom Vajtswv ces lawv yuav tsis muaj ib yam dab tsi li. Thaum kawg, lawv tsis ntseeg hais tias Vajtswv cov lus ua tau txhua yam tiav, thiab lawv tsis ntseeg Vajtswv lub hwj chim uas loj kawg nkaus. Qhov ntawd yog qhov laj thawj uas nyob rau hauv lawv txoj kev ntseeg Vajtswv thiaj li tshwm sim muaj tej kev npaj siab thiab lub hom phiaj, xws li koom kev nrhiav lub cib fim, ua neej vam khom rau pawg ntseeg, nrhiav chaw nkaum, nrhiav ib tug txhawb pab, ua phooj ywg nrog txiv neej los sis poj niam, thiab caum tej phiaj xwm ntawm sab kev nom kev tswv—kom tau txais ib txoj hauj lwm ua nom ua tswv thiab kev nrhiav noj nrhiav haus uas ruaj khov rau lawv tus kheej. Yog vim tias cov tib neeg no tsis ntseeg hais tias Vajtswv muaj hwj chim kav txhua yam es lawv thiaj li muaj peev xwm siab loj siab tawv thiab tsis quav ntsej dab tsi li lam nkag los rau hauv pawg ntseeg nrog lawv tus kheej tej kev npaj siab thiab lub phiaj xwm, xav muab lawv tej peev xwm coj los siv los sis ua kom lawv tej kev ntshaw muaj tiag nyob hauv pawg ntseeg. Qhov no txhais hais tias lawv lam nkag los rau hauv pawg ntseeg txhawm rau ua kom txaus lawv txoj kev npaj siab thiab kev ntshaw kom tau txais tej koob hmoov; lawv xav tau lub koob npe, kev tau txais txiaj ntsim, thiab lub meej mom nyob hauv pawg ntseeg, thiab los ntawm txoj kev ua li no lawv thiaj li yuav tau txais chaw noj chaw haus uas ruaj khov. Tib neeg tuaj yeem pom los ntawm lawv tej kev coj, nrog rau lawv tus yam ntxwv xeeb txawm lub ntsiab tseeb, hais tias lawv lub hom phiaj, kev txhawb siab, thiab kev npaj siab rau txoj kev ntseeg Vajtswv ntawd tsis yog yam ncaj ncees li, thiab hais tias tsis muaj ib tug ntawm lawv uas lees txais qhov tseeb los sis muaj lub siab dawb paug ntseeg Vajtswv—txawm yog lawv lam nkag los rau hauv pawg ntseeg los, lawv tsuas lam nyob ua kom puv chaw xwb, ua tsis tau ib qho txiaj ntsig uas zoo dab tsi kiag li. Yog li ntawd, pawg ntseeg tsis tsim nyog lees txais cov tib neeg zoo li no. Txawm hais tias cov tib neeg no lam nkag los rau hauv pawg ntseeg lawm los, lawv tsis yog cov neeg Vajtswv xaiv tseg, tiam sis yog lwm tus rub lawv los vim muaj lub siab zoo xwb. “Lawv tsis yog cov neeg Vajtswv xaiv tseg”—kab lus no yuav tsum muab txhais li cas? Qhov ntawd txhais hais tias Vajtswv yeej tsis teem tseg thiab xaiv lawv; Vajtswv tsis saib lawv tam li cov neeg uas Nws yuav ua hauj lwm rau; thiab Nws kuj tsis tau npaj lawv tseg ua cov tib neeg uas Nws yuav cawm thiab. Thaum cov tib neeg no lam nkag los rau hauv pawg ntseeg lawm, muaj tseeb tias peb yuav suav tsis tau lawv ua cov kwv tij thiab cov nkauj muam, vim tias lawv tsis yog cov uas ua lub siab dawb paug lees txais qhov tseeb los sis zwm rau Vajtswv tes hauj lwm. Tej zaum ib txhia yuav nug hais tias, “Vim tias lawv tsis yog cov kwv tij thiab cov nkauj muam uas ua lub siab dawb paug ntseeg Vajtswv, ua li cas pawg ntseeg thiaj li tsis muab lawv ntsaig tawm mus los sis ntiab tawm mus?” Vajtswv txoj kev npaj siab yog xav kom cov neeg Vajtswv xaiv tseg kawm paub txoj kev paub cais los ntawm cov tib neeg no thiab los ntawm qhov ntawd kom thiaj li pom tshab Ntxwgnyoog tej tswv yim phem thiab muab Ntxwgnyoog tso tseg. Thaum cov neeg Vajtswv xaiv tseg muaj kev paub cais lawm, cov tsis ntseeg no yuav tsum raug muab tshem tawm. Lub hom phiaj ntawm txoj kev paub cais yog txhawm rau nthuav cov tsis ntseeg uas lam nkag los rau hauv Vajtswv lub tsev nrog lawv tej kev xav ua heev thiab kev ntshaw heev no tawm thiab ntsaig lawv tawm ntawm pawg ntseeg mus, vim tias cov tib neeg no tsis yog cov uas ntseeg Vajtswv tiag tiag, thiab haj yam tsis yog cov uas lees txais thiab caum qhov tseeb. Tsis muaj ib qho txiaj ntsim dab tsi li yog lawv tseem nyob hauv pawg ntseeg—tiam sis yuav muaj kev puas tsuaj loj heev. Thawj qhov, tom qab nkag los rau hauv pawg ntseeg lawm, cov tsis ntseeg no yeej tsis noj los sis haus Vajtswv cov lus thiab tsis lees txais qhov tseeb ib qho me me li. Lawv pheej tham txog lwm yam uas tsis yog Vajtswv cov lus thiab qhov tseeb, los cuam tshuam lwm tus lub siab. Lawv tsuas yuav tab kaum thiab cuam tshuam pawg ntseeg tes hauj lwm xwb, uas ua rau muaj kev puas tsuaj rau cov neeg Vajtswv xaiv tseg txoj kev nkag mus rau hauv lub neej txoj sia. Qhov ob, yog lawv tseem nyob hauv pawg ntseeg, lawv yuav lam tau lam ua phem, ib yam li cov ib txwm tsis ntseeg, tab kaum thiab cuam tshuam pawg ntseeg tes hauj lwm, thiab ua rau pawg ntseeg ntsib ntau yam kev phom sij uas zais ntshis. Qhov peb, txawm yog lawv tseem nyob hauv pawg ntseeg los xij, lawv yuav tsis txaus siab hlo ua cov neeg ua dej num txhawb, thiab txawm yog lawv yuav ua dej num txhawb me ntsis los, qhov ntawd tsuas yog txhawm rau kom tau txais tej koob hmoov xwb. Yog muaj ib hnub twg lawv paub hais tias lawv yuav tsis tau txais koob hmoov lawm, lawv yuav npau taws heev, cuam tshuam thiab rhuav tshem pawg ntseeg tes hauj lwm. Yog yuav cia tej ntawd tshwm sim, mas yuav zoo dua yog muab lawv ntsaig tawm ntawm pawg ntseeg mus kom ntxov li ntxov tau. Qhov plaub, cov tsis ntseeg no yooj yim rau kev tsim pab tsim pawg, thiab txhawb nqa nrog rau raws cov tawm tsam khetos qab, tsim ib lub zog phem nyob hauv pawg ntseeg uas ua rau muaj kev phom sij loj heev rau pawg ntseeg tes hauj lwm. Raws li plaub qho uas hais los no, yeej tsim nyog yuav tsum paub cais thiab nthuav cov tsis ntseeg uas lam nkag los rau hauv Vajtswv lub tsev no tawm, thiab tom qab ntawd muab lawv ntsaig tawm mus. Qhov no yog tib txoj kev uas yuav tswj tau pawg ntseeg tes hauj lwm kom nce qib li ib txwm muaj, thiab tiv thaiv tau cov neeg Vajtswv xaiv tseg kom noj thiab haus Vajtswv cov lus thiab ua lub neej hauv pawg ntseeg li ib txwm muaj, thiab los ntawm qhov ntawd thiaj li nkag tau rau hauv txoj kev yog ntawm kev ntseeg Vajtswv yam muaj txiaj ntsig. Qhov no yog vim tias txoj kev uas cov tsis ntseeg no lam nkag los rau hauv pawg ntseeg ntawd ua rau muaj kev puas tsuaj loj heev rau cov neeg Vajtswv xaiv tseg txoj kev nkag mus rau hauv lub neej txoj sia. Muaj ntau tus neeg uas tsis paub cais lawv, tiam sis ho coj rau lawv tam li yog cov kwv tij thiab cov nkauj muam. Ib txhia tib neeg, thaum pom hais tias lawv muaj qee yam kev txawj los sis qhov ua tau zoo, es txawm xaiv lawv los ua cov thawj coj thiab cov neeg ua hauj lwm. Qhov no yog txoj kev uas cov thawj coj cuav thiab cov tawm tsam khetos tshwm sim los nyob hauv pawg ntseeg. Thaum saib rau lawv lub ntsiab tseeb, tuaj yeem pom tau hais tias tsis muaj ib tug ntawm lawv uas ntseeg hais tias Vajtswv muaj nyob, los sis ntseeg hais tias Vajtswv cov lus yog qhov tseeb, los sis ntseeg hais tias Vajtswv muaj hwj chim kav txhua yam. Nyob rau hauv Vajtswv lub qhov muag saib mas lawv yog cov ib txwm tsis ntseeg. Vajtswv tsis quav ntsej lawv, thiab Vajntsujplig yuav tsis ua hauj lwm rau lawv. Yog li ntawd, raws li lawv lub ntsiab tseeb mas, lawv tsis yog cov uas Vajtswv yuav cawm, thiab lawv yeej tsis yog cov uas Vajtswv tau teem tseg los sis xaiv tseg. Vajtswv yeej yuav tsis cawm lawv li. Txawm yuav saib rau sab twg los xij, tsis muaj ib tug ntawm cov tsis ntseeg no uas yog cov neeg Vajtswv xaiv tseg. Yuav tsum paub cais lawv kom ncav sij hawm thiab kom raug, thiab tom qab ntawd muab lawv ntsaig tawm mus. Yuav tsum tsis txhob cia lawv nkaum nyob hauv pawg ntseeg los cuam tshuam lwm tus. Cov tsis ntseeg no lam nkag los rau hauv pawg ntseeg nrog ntau lub hom phiaj thiab kev txhawb siab uas sib txawv, thiab tej zaum thaum xub thawj koj yuav pom tsis tshab los sis tsis paub cais. Txawm li cas los xij, thaum lub sij hawm dhau mus, thaum koj sib cuag nrog lawv ntau zuj zus thiab sib raug zoo nrog lawv ntau zuj zus, koj yuav to taub lawv ntau ntxiv, thiab koj yuav pom ntau yam kev qhia tshwm uas qhia tau hais tias lawv yog cov tsis ntseeg yam meej zuj zus ntxiv. Yog li ntawd, qhov uas paub cais lawv raws li Vajtswv cov lus tsis yog yooj yim dua lawm lod? (Yog.) Yog cov neeg Vajtswv xaiv tseg puav leej paub cais cov tsis ntseeg lawm, ces txog lub sij hawm uas yuav tsum nthuav cov tsis ntseeg ntawd tawm thiab ntsaig cov tsis ntseeg ntawd tawm mus lawm. Txawm lawv tus cwj pwm ua neeg yuav zoo li cas, lawv lub meej mom hauv lub zej zog yuav yog dab tsi, los sis lawv yuav nyob hauv pawg ntseeg ntev npaum li cas los xij, yog tias tom qab mloog cov lus qhuab qhia tau ob peb xyoos lawm lawv yeej lees txais tsis tau qhov tseeb thiab tseem muaj tej kev xav phem txog Vajtswv puv npo, ces lawv twb raug nthuav tawm hais tias yog cov tsis ntseeg lawm. Thaum xav txog lawv tej hom phiaj thiab tej kev qhia tshwm nyob rau hauv txoj kev ntseeg Vajtswv, ces yeej tsis ua xyem xyav li hais tias lawv yog cov uas tsim nyog muab ntsaig tawm mus los sis ntiab tawm mus. Qhov no yog tes hauj lwm tshem tawm uas ib pawg ntseeg yuav tsum tau ua nyob rau txhua lub sij hawm.

Lub ncauj lus txog lub hom phiaj rau kev ntseeg Vajtswv tau qhia tag nrho yog yim qhov, uas txhais hais tias muaj yim hom tib neeg uas lawv tej kev qhia tshwm txaus rau peb paub cais ntau hom tib neeg phem thiab tom qab ntawd muab lawv cais kom yog thiab saib xyuas lawv kom tsim nyog. Muab hais luv luv hais tias, yim hom tib neeg no tsis tuaj yeem nyob rau hauv pawg ntseeg. Tej zaum ib txhia yuav nug hais tias, “Puas yog yim hom tib neeg no txhua tus tsuas qhia tawm ib hom kev coj xwb?” Qhov ntawd yeej tsis tas yuav yog li ntawd; qee tus neeg lub hom phiaj rau kev ntseeg Vajtswv muaj plaub los sis tsib qho—lawv nrhiav chaw nkaum, ua neej vam khom rau pawg ntseeg, koom kev nrhiav lub cib fim, caum tej phiaj xwm ntawm sab kev nom kev tswv, thiab lam tau lam nrhiav txiv neej los sis poj niam, lam nkag los rau hauv pawg ntseeg los lam tau lam haub ntxias lwm tus. Ib txhia tib neeg lub hom phiaj rau kev ntseeg Vajtswv tej zaum yuav yog ob qho—ib qho yog nrhiav kev ua ib tug nom nyob hauv pawg ntseeg, thiab lwm qhov yog nrhiav kom tau tej koob hmoov los ntawm kev nrhiav lub cib fim, los sis ib txhia tej zaum yuav nrhiav txiv neej los sis poj niam nrog rau ua neej vam khom rau pawg ntseeg. Pom tau meej hais tias, cov tib neeg no tuaj rau hauv Vajtswv lub tsev los nrhiav kev tau txiaj ntsim dawb, npaj siab yuav siv Vajtswv lub tsev los sis cov kwv tij thiab cov nkauj muam los pab lawv saib xyuas tej yam, los siv dag zog rau lawv; txhawm rau ua kom tiav lawv tej hom phiaj thiab ua kom txaus lawv tej kev ntshaw, lawv siv txhua txoj kev uas ua tau los kom cov kwv tij thiab cov nkauj muam ua dej num txhawb rau lawv. Muab hais luv luv hais tias, lub hom phiaj uas pom tau meej ntawm cov tsis ntseeg thiab cov nrhiav lub cib fim uas lam nkag los rau hauv pawg ntseeg uas yuav tsum raug ntsaig tawm mus los sis ntiab tawm mus no thaum tuaj rau hauv Vajtswv lub tsev ces yog tuaj noj dawb haus dawb thiab nrhiav txiaj ntsim rau lawv tus kheej. Txawm yog nyob hauv lawv tej lus hais los sis tej kev ua los xij, lawv lub hom phiaj yeej pom tau plooj plooj tas li. Cov tib neeg no tsis lees txais qhov tseeb ib qho me me li thiab tsis nyiam qhov tseeb kiag li; qee zaum lawv haj tseem nthuav tawm tej kev xav hauv siab thiab tus cwj pwm uas qias los sis tsis kam lees txais thiab. Txawm pawg ntseeg yuav npaj tes dej num dab tsi rau lawv los xij, lawv tsuas koom tes yam tsis txaus siab yog tias qhov ntawd muaj txiaj ntsim rau lawv xwb. Yog tsis muaj txiaj ntsim rau lawv, lawv tsis kam lees txais nyob hauv siab thiab qhia tawm txoj kev xav tsis zoo thiab kev tos xwb, thiab haj tseem tsis nyiam kiag li los sis tsis kam ua thiab. Lawv tsuas ua hauj lwm me ntsis yog tias muaj txiaj ntsim xwb; yog tsis muaj, lawv yeej zam kom dhau los sis lam ua kom dhau xwb. Txhua zaus txog lub sij hawm tseem ceeb ntawm tes hauj lwm, lawv ua si nkaum pos muag thiab ploj mus, thiab tsis quav ntsej pawg ntseeg tes hauj lwm. Los ntawm tej kev qhia tshwm no, pom tau meej hais tias lawv txoj kev ntseeg Vajtswv tsuas yog tuaj noj dawb haus dawb xwb; txawm yog siv lawv los ua dej num txhawb los xij yeej ua rau muaj kev puas tsuaj ntau dua qhov txiaj ntsig uas tau los.

I. Soj Xyuas Pawg Ntseeg

Hnub no, peb yuav sib qhia txog lub ntsiab lus kawg ntawm lub ncauj lus txog lub hom phiaj rau kev ntseeg Vajtswv. Dhau li ntawm yim qhov uas tau hais los saum toj no mus lawm, tseem muaj lwm hom tib neeg uas lawv lub hom phiaj thiab kev npaj siab nyob rau hauv txoj kev ntseeg Vajtswv ntawd tsis yog yam ncaj ncees. Dab tsi ua rau lawv txawv ntawm cov uas tau hais los saum toj no uas tsuas muaj kev txhawb siab los ntawm tej txiaj ntsim, thiab ua txhua yam uas lawv ua tau los caum lub koob npe, kev tau txais txiaj ntsim, thiab lub meej mom? Hom tib neeg no nkag los rau hauv pawg ntseeg tsis yog los ua ib tug nom, kom tau lub meej mom los sis chaw noj chaw haus uas ruaj khov, los sis ua kom lawv lub neej yooj yim dua, thiab lwm yam; lawv muaj ib lub hom phiaj uas nyuaj heev rau cov tib neeg dog dig yuav pom tau. Lub hom phiaj no yog dab tsi? Qhov ntawd yog los soj xyuas thiab tuav tswj pawg ntseeg. Qhov soj xyuas pawg ntseeg yog lub ntsiab lus cuaj nyob rau hauv lub ncauj lus txog lub hom phiaj rau kev ntseeg Vajtswv. Cov tib neeg no nkag los rau hauv pawg ntseeg nrog ib teg num los soj xyuas pawg ntseeg, txhawm rau tuav tswj tau txoj kev mus los ntawm pawg ntseeg. Cov uas xa lawv tuaj, lawv cov thawj saib xyuas los sis cov tswv, tej zaum yuav sawv cev rau tsoom fwv, ib pab pawg ntawm sab kab lis kev cai ntseeg twg, los sis qee lub koom haum hauv zej zog. Vim tias lawv tsis paub txog pawg ntseeg, muaj kev xav paub xav pom ntau, thiab haj tseem siab tsis kaj txog pawg ntseeg txoj kev tshwm sim, kev tsim, thiab kev muaj nyob, lawv thiaj li xav nrhiav kom paub meej txog pawg ntseeg, kom paub txog pawg ntseeg cov qauv, pawg ntseeg tes hauj lwm, thiab ntau yam xwm txheej. Yog li ntawd, qee tus neeg thiaj li raug xa tuaj rau hauv pawg ntseeg los ua tes hauj lwm soj xyuas. Cov uas ua tes hauj lwm soj xyuas pawg ntseeg, txawm lawv yuav tuaj ntawm tsoom fwv, tej pab pawg ntawm sab kab lis kev cai ntseeg, los sis ib lub koom haum hauv zej zog twg tuaj los xij, lawv muaj ib lub hom phiaj nyob rau hauv txoj kev ntseeg Vajtswv uas txawv tag nrho ntawm cov kwv tij thiab cov nkauj muam uas ntseeg tiag tiag. Lawv tuaj ntawm no tsis yog tuaj lees txais Vajtswv txoj kev cawm dim; lawv tsis yog tuaj lees txais Vajtswv cov lus, qhov tseeb, thiab Vajtswv txoj kev cawm dim raws li lub hauv paus ntawm txoj kev ntseeg thiab lees paub Vajtswv. Lawv txoj kev ntseeg Vajtswv yog muaj tej hom phiaj ntawm sab kev nom kev tswv los sis ib teg num uas ib lub koom haum twg muab cob rau lawv. Yog li ntawd, qhov soj xyuas pawg ntseeg yog lawv lub hom phiaj uas nkag zais ntshis los rau hauv pawg ntseeg thiab ntseeg Vajtswv, thiab kuj yog ib teg num uas lawv cov thawj saib xyuas muab cob rau lawv ua; qhov ntawd yog ib txoj hauj lwm uas lawv ua kom tau nyiaj hli.

Rau cov uas nkag zais ntshis los rau hauv pawg ntseeg los soj xyuas ntawd, yam uas lawv soj xyuas yog dab tsi? Lawv soj xyuas ntau yam, xws li pawg ntseeg tej kev qhia, pawg ntseeg tej hom phiaj, yam uas pawg ntseeg txhawb nqa, tes hauj lwm uas pawg ntseeg ua, thiab tej kev xav thiab kev xam pom ntawm cov neeg hauv pawg ntseeg, ntsuam xyuas seb pawg ntseeg puas ua rau muaj kev piam sij rau tsoom fwv, cov kab lis kev cai ntseeg, los sis lub zej zog. Lawv ntsuam xyuas seb puas muaj tej lus hais uas tawm tsam lub zej zog, tawm tsam tsoom fwv, los sis tawm tsam teb chaws, qhov no yog nyob rau ntawm sab tej lus hais. Hais txog ntawm tej kev qhia, lawv soj xyuas seb cov tswv yim uas pawg ntseeg txhawb nqa ntawd yog dab tsi tiag tiag. Tej zaum yuav tsis yooj yim rau koj pom tau cov tib neeg no thaum lawv nkag zais ntshis los rau hauv pawg ntseeg vim tias tej zaum lawv yuav ua tib zoo mloog thiab ua tib zoo sau cia thaum sib txoos ua ke yam tsis tsaug zog li. Tej zaum lawv haj tseem yuav ua tib zoo xaus lus txog tej lus hais ntawm ntau tus tib neeg nyob rau txhua qhov kev sib txoos ua ke, thiab thaum kawg xaus lus txog thiab faib ntau hom kev xav thiab kev xam pom ntawm ntau tus tib neeg los saib seb cov twg mus raws li tsoom fwv teb chaws tej txiaj ntsim thiab kev cheem tsum, thiab cov twg ua rau muaj kev piam sij rau txoj kev tswj hwm ntawm lub teb chaws, tsis sib haum nrog tsoom fwv, thiab lwm yam ntxiv. Tej zaum lawv yuav ua tib zoo xaus lus txog thiab faib tej kev xam pom uas nyob tob tob ntawm cov neeg hauv pawg ntseeg no kom ntxaws, thiab muab sau tseg cia. Vim li cas lawv thiaj li ua li no? Vim tias qhov no yog lawv txoj hauj lwm, lawv teg num; lawv yuav tsum qhia tawm rau lawv cov thawj saib xyuas. Qhov no yog thawj qhov ntawm lawv txoj hauj lwm: txhawm rau tuav tau pawg ntseeg tej kev qhia thiab txhua tus neeg hauv pawg ntseeg tej kev xav seb qaij mus rau sab twg. Kiag thaum lawv ntseeg hais tias tej kev xav no muaj tej yam uas ua rau muaj kev piam sij rau lub zej zog los sis lub teb chaws, los sis yog lawv ntseeg hais tias muaj qee yam kev xav thiab kev xam pom uas hnyav heev tshwm sim tuaj, lawv yuav maj nroos muab qhia tawm thiab muab qhov no qhia rau lawv cov thawj saib xyuas kom thiaj li npaj tau tej kev daws uas tsim nyog. Thawj yam uas lawv xav to taub yog pawg ntseeg tej kev qhia—qhov no yog ib qho ntawm lawv cov hauj lwm tseem ceeb nyob rau hauv kev soj xyuas pawg ntseeg—ntxiv ntawd yog pawg ntseeg cov neeg ua hauj lwm tej xwm txheej. Piv txwv li, lawv nrhiav cov ntaub ntawv txog seb cov thawj coj theem siab ntawm pawg ntseeg yog leej twg, nrog rau cov thawj coj ntawd cov chaw nyob, hnub nyoog, lub ntsej muag, qib kev kawm ntawv, kev nyiam, kev noj qab haus huv, yam uas lawv tham txog hauv lub neej txhua hnub, qhov chaw uas lawv mus, tes hauj lwm uas lawv ua, nrog rau lawv cov sij hawm ua hauj lwm txhua hnub thiab cov ntsiab lus ntawm tes hauj lwm. Lawv saib seb cov thawj coj no puas hais tej lus los sis puas ua tej yam uas tawm tsam tsoom fwv, tawm tsam cov kab lis kev cai ntseeg, los sis tawm tsam tej kev nrov ntawm lub zej zog, nrog rau cov thawj coj no tej kev teb rov qab txog lub teb chaws txoj kev tswj hwm thiab tej xwm txheej ntawm sab kev nom kev tswv tam sim no, nrog rau lwm yam. Tej no puav leej yog tej yam uas cov soj xyuas pawg ntseeg yuav tsum tuav tau. Tsis tas li ntawd xwb, lawv kuj ua tib zoo saib ntsoov pawg ntseeg txoj kev teeb tsa thiab cov koom haum tswj fwm thiab. Piv txwv li, lawv taug qab seb cov thawj coj thiab cov neeg ua hauj lwm hauv pawg ntseeg yog leej twg, cov thawj coj qib twg uas raug rho tawm lawm, tau npaj li cas rau cov thawj coj ntawd tom qab uas raug rho tawm lawm, cov thawj coj twg uas raug ntes lawm, thiab leej twg yog cov los txuas cov thawj coj ntawd tes hauj lwm tom qab ntawd. Lawv nrhiav cov ntaub ntawv txog cov neeg los txuas tes hauj lwm ntawd lub hnub nyoog, yog txiv neej los sis poj niam, ntseeg Vajtswv pes tsawg xyoo lawm, cov neeg ntawd qib kev kawm ntawv, thiab—yog tias cov neeg ntawd yog cov tub ntxhais kawm ntawv qib siab uas muaj peev xwm—seb cov neeg ntawd puas muaj ib qho kev cuam tshuam tsis zoo rau lub teb chaws los sis lub zej zog, thiab seb puas tuaj yeem hu cov neeg no mus ua hauj lwm nyob rau hauv tsoom fwv tej chaw ua hauj lwm, nrog rau lwm cov ntaub ntawv ntxaws ntxaws. Lawv haj tseem xav nrhiav kom paub ntxaws txog cov thawj coj pawg ntseeg uas tau los tuav hauj lwm los sis raug rho tawm thiab. Qhov ntawd yog, xwm txheej ntawm cov neeg ua hauj lwm, tes hauj lwm tswj fwm ntxaws ntxaws, thiab pawg ntseeg cov kev teeb tsa puav leej yog tej yam uas lawv xav paub kom zoo. Ntxiv ntawd, lawv xav tuav tswj kom tag nrho cov ntaub ntawv txog seb muaj pes tsawg yam hauj lwm nyob hauv pawg ntseeg, muaj pes tsawg pab pawg, thiab cov xwm txheej ntxaws ntxaws txog cov neeg saib xyuas ntawm txhua pab pawg, nrog rau lwm yam ntxiv. Lawv mus ncig nug, soj ntsuam, thiab kawm rau txhua qhov chaw, ua lawv txoj hauj lwm yam ntxaws ntxaws heev. Txoj hauj lwm thiab teg num uas yuav tsum ua kom tiav ntawm hom tib neeg zoo li no uas nkag zais ntshis los rau hauv pawg ntseeg yog txhawm rau tuav kom tau txhua yam txog pawg ntseeg tej xwm txheej thiab ntau yam kev mus los kom ncav sij hawm txhawm rau ua kom tiav lub hom phiaj ntawm kev soj xyuas pawg ntseeg. Piv txwv li, pawg ntseeg huam vam mus li cas nyob rau txawv teb chaws, txoj moo zoo tau nthuav dav mus rau pes tsawg lub teb chaws lawm, thiab cov teb chaws twg uas tau tsim muaj pawg ntseeg lawm—lawv tim tsum tuav kom tau txhua yam xwm txheej ntxaws ntxaws no. Tej no yog tej hauj lwm tseem ceeb uas lawv ua nyob rau hauv kev soj xyuas pawg ntseeg: Qhov ib, tuav kom tau pawg ntseeg tej kev qhia; qhov ob, tuav kom tau xwm txheej ntawm pawg ntseeg cov neeg ua hauj lwm; thiab qhov peb, tuav kom tau xwm txheej ntawm pawg ntseeg tes hauj lwm thiab tej kev mus los tseem ceeb ntawm ib ntus no. Lawv ua tag nrho li cov neeg pab nrog ua phem thiab Ntxwgnyoog cov neeg nrog ua phem, uas yog tus zaj loj liab ploog; lawv yog Ntxwgnyoog cov tub qhe tiag tiag.

Hom tib neeg uas soj xyuas pawg ntseeg no nkag zais ntshis los rau hauv pawg ntseeg lub hom phiaj yog xav tuav kom tau cov ntaub ntawv uas muaj feem xyuam ntsig txog pawg ntseeg tej kev qhia, cov neeg ua hauj lwm, tej kev mus los ntawm tes hauj lwm, qhov loj me ntawm pawg ntseeg, thiab lwm yam ntxiv. Lawv lub hom phiaj yog xav tuav kom tau txhua yam ntawm tej no thiab tom qab ntawd qhia tawm rau lawv cov thawj saib xyuas, nyob rau txhua lub sij hawm, tej zaum yuav tsim tej kev npaj los sis cov kev nqis tes ua txog txoj cai uas haum raws li qhov xwm txheej ntawd los daws pawg ntseeg. Muab hais luv luv hais tias, lawv lub hom phiaj nyob rau hauv txoj kev soj xyuas pawg ntseeg ntawd yeej tsis muaj kev npaj siab zoo kiag li. Yog tsis li ntawd, vim li cas lawv tseem yuav soj xyuas pawg ntseeg, tab txawm tias qhov ntawd tsis ua rau lawv tau nyiaj txiag los sis tau txais txiaj ntsim? Tsis yog vim tias lawv tsis tso siab txog pawg ntseeg txoj kev muaj nyob lod? Lawv tsis ntseeg hais tias pawg ntseeg uas Vajtswv tsim thiab coj ntawd yog cov tib neeg uas ntseeg Vajtswv yam siab dawb paug, uas tsis muaj kev txuas nrog lub teb chaws, lub zej zog, los sis tej pab pawg thiab koom haum ntawm sab kev nom kev tswv. Tiam sis txawm lawv yuav tshawb xyuas pawg ntseeg li cas los xij, lawv yeej tseem tsis tso siab li. Vim li cas? Vim tias lawv yog cov tsis ntseeg tias muaj Vajtswv, tsis lees paub Vajtswv, thiab kuj ntxub qhov tseeb thiab. Vim li ntawd, lawv thiaj li muaj peev xwm ua tej yam ruam thiab tsis muaj qab hau xws li tsuj nias thiab ntes cov ntseeg, nrog rau soj xyuas pawg ntseeg. Vim li cas lawv thiaj li siv tej kev soj xyuas thiab kev tawm tsam rau pawg ntseeg? Vim tias qhov uas lawv txhawj xeeb tshaj plaws yog tsam pawg ntseeg loj hlob dhau thiab muaj cov tswv cuab coob dhau es yuav ua rau muaj kev cuam tshuam loj heev rau lub teb chaws, tsoom fwv, thiab lub zej zog, thiab haj tseem yuav ua rau muaj kev hem thawj thiab cuam tshuam rau cov kab lis kev cai qub thiab cov pab pawg ntawm sab kab lis kev cai ntseeg qub. Qhov no yog qhov laj thawj tiag tiag ntawm lawv txoj kev soj xyuas thiab kev tawm tsam pawg ntseeg. Yog li ntawd, lawv thiaj li saib txoj kev soj xyuas thiab tawm tsam pawg ntseeg ua ib teg num ntawm sab kev nom kev tswv uas yuav tsum tau ua tiag.

Hom tib neeg uas soj xyuas pawg ntseeg no tej zaum yuav tsis yooj yim rau kev paub cais nyob hauv pawg ntseeg vim tias lawv muaj tej hom phiaj zais thiab zais lawv tus kheej tob heev kom lwm tus thiaj li pom tsis tau lawv. Yog li ntawd, tej zaum lawv yuav ua raws li feem coob hauv pawg ntseeg, tsis ua ib yam dab tsi uas txawv, coj tau zoo li mloog lus tshwj xeeb, thiab yeej tsis nthuav tawm tej kev xam pom uas tsis sib haum txog tes hauj lwm uas pawg ntseeg ua li. Txawm li cas los xij, cov tib neeg no muaj ib tug yam ntxwv: Lawv tsis kub tsis txias rau txoj kev ntseeg Vajtswv, tsis kub siab heev los sis tsis nyob twj ywm heev. Lawv tuaj yeem ua tau tej dej num uas tau muab rau lawv ua me ntsis, tiam sis lawv yeej tsis qhia tawm txog lawv tus kheej tej ntaub ntawv ntxaws ntxaws, xws li lawv ua hauj lwm qhov twg, lawv tsev neeg xwm txheej zoo li cas, los sis yav tas los lawv puas tau ntseeg Vajtswv dua. Yog muaj leej twg hais txog kev ua hauj lwm nyob rau hauv tsoom fwv tej chaw ua hauj lwm mas, lawv yeej zam kom dhau kiag li, zam tsis hais ib qho kev xav twg txog tsoom fwv, kev nom kev tswv, tej cai, los sis kab lis kev cai ntseeg. Lawv tus cwj pwm yog muaj tus yam ntxwv ntawm qhov zam txhua lub ncauj lus uas ceev faj; lawv tsis thuam los sis tsis qhuas tsoom fwv li, los sis tsis tham txog tsoom fwv tej cai los sis txoj kev tswj fwm li. Thaum muaj leej twg taw qhia hais tias ib tug neeg twg yog ib tug neeg soj xyuas mas, lawv txawm poob siab tshee thiab tej zaum haj tseem yuav maj nroos sawv los hais lus tiv thaiv lawv tus kheej thiab. Dhau li ntawm qhov uas poob siab tshee ntawd mus lawm, tej zaum koj kuj yuav pom tau los ntawm lawv lub qhov muag tias lawv muaj ib txoj kev xav zam tej ncauj lus uas ceev faj zoo li no; lawv zam txhua tus uas tuaj yeem pom tshab lawv. Ntxiv ntawd, lawv nquag tau txais xov tooj los ntawm cov chaw uas tsis paub, los sis muaj cov neeg tsis paub uas tsis muaj feem xyuam nrog pawg ntseeg hu thiab sib cuag nrog lawv, thiab kiag thaum lawv teb ib tsab xov tooj mas, lawv txawm khiav deb ntawm lwm tus lawm. Yog muaj leej twg lam pom lawv thaum lub sij hawm no, lawv txawm poob siab ntxhov hnyo, ntsej muag liab ploog, thiab tus yam ntxwv zoo li tsis xis nyob tshwj xeeb, ntshai tsam lwm tus yuav paub tias lawv yog leej twg tiag. Dhau li ntawm qhov uas nrhiav cov ntaub ntawv txog pawg ntseeg yam zais ntshis lawm, lawv kuj nug txog xwm txheej ntawm cov kwv tij thiab cov nkauj muam qee zaum thiab, nug tej lus nug xws li, “Koj ntseeg Vajtswv tau pes tsawg xyoo lawm? Koj niam koj txiv puas ntseeg? Koj tsev neeg puas nyob hauv Teb Chaws Suav? Ntawm koj tsev neeg uas nyob hauv Teb Chaws Suav ntawd, leej twg ntseeg Vajtswv, thiab ntseeg tau pes tsawg xyoo lawm? Lawv muaj pes tsawg xyoo lawm? Nej pawg ntseeg hauv zos muaj pes tsawg tus neeg? Tam sim no lawv nyob li cas lawm?” Muaj tej thaum mas, lawv mus soj xyuas nug txog cov ntaub ntawv uas ceev faj thiab yog tus kheej li uas tib neeg tsis xav qhia tawm. Feem ntau thaum cov kwv tij thiab cov nkauj muam sib cuag, tsis muaj leej twg txhob txwm los sis ua tus pib nug txog cov ntaub ntawv ntiag tug uas ceev faj yog tias ib tug twg tsis kam qhia. Txawm li cas los xij, tus neeg no tsom ntsoov rau tej yam zoo li no tshwj xeeb, haj tseem taug qab txoj kev mus los ntawm qee cov thawj coj thiab cov neeg ua hauj lwm los sis cov neeg saib xyuas tes hauj lwm tseem ceeb thiab, yuav nrhiav kev kom paub txog cov ntaub ntawv nyob hauv cov tib neeg no lub khoos phis tawj thiab cov xov tooj ntawm tes los sis cov neeg ntawd cov chaw nyob, pheej yuav tshawb cov ntaub ntawv no kom meej meej. Yog lawv pom tias ib tug thawj coj twg tsis tuaj sib txoos ua ke mas, lawv yuav nug hais tias, “Hnub no tus no tus tod tsis tuaj sib txoos ua ke. Tus neeg ntawd mus ua dab tsi lawm?” Yog muaj leej twg hais tias tus neeg ntawd tsis khoom, lawv yuav nug mus ntxiv tias: “Tsis khoom ua dab tsi? Puas yog tus neeg ntawd mus ywg dej cov neeg ntseeg tshiab dua lawm? Cov neeg ntseeg tshiab ntawd yog leej twg? Lawv pib ntseeg thaum twg lawm? Ua li cas kuv ho tsis paub txog qhov no?” Lawv pheej nug mus kom tob ntxiv. Cov kwv tij thiab cov nkauj muam hais tias, “Yog peb tsis tsim nyog paub, ces peb tsis txhob nug. Vim li cas pheej nug tas li? Qhov no tsis yog hais txog kev nkag mus rau hauv lub neej txoj sia, qhov ntawd tsis muaj feem xyuam nrog qhov tseeb; tsis tas yuav paub.” Lawv teb hais tias, “Tiam sis tej no yog Vajtswv lub tsev tej xwm txheej, pawg ntseeg tes hauj lwm; vim li cas peb thiaj li paub tsis tau txog qhov ntawd? Peb txhua tus puav leej ntseeg Vajtswv, paub me ntsis los yeej tsis ua li cas. Yog nej tsis xav paub, qhov ntawd txhais hais tias nej tsis quav ntsej txog pawg ntseeg tes hauj lwm los sis pawg ntseeg cov thawj coj. Tus thawj coj ntawd mus ntsib leej twg tiag tiag? Muaj pes tsawg tus neeg nyuam qhuav ntseeg? Lawv nyob qhov twg? Kuv kuj xav ntsib lawv thiab.” Lawv pheej nug txog tej yam no.

Muaj lwm tes hauj lwm uas cov neeg soj xyuas pawg ntseeg tsom ntsoov rau tshaj plaws, uas yog to taub txog pawg ntseeg cov nyiaj txiag. Ib qho mas, lawv nrhiav kom to taub txog seb pawg ntseeg cov nyiaj txiag los qhov twg los. Lawv xav paub seb pawg ntseeg puas tsim tej chaw tsim khoom los sis tej tuam txhab lag luam, puas muaj tej chaw ua hauj lwm uas yuam neeg ua hauj lwm hnyav, puas siv me nyuam yaus ua hauj lwm, thiab seb pawg ntseeg ntau yam hauj lwm puas muaj tej hauj lwm uas tau nyiaj paj ntsig. Piv txwv li, seb pawg ntseeg txoj kev ua cov vis dis aus, yeeb yaj kiab, nkauj qhuas Vajtswv, thiab kev luam cov phau ntawv ntawm Vajtswv cov lus ntawd puas tau nyiaj paj ntsig los sis tau nyiaj paj ntsig ntau dhau; seb pawg ntseeg tej nyiaj txiag los qhov twg los; seb puas muaj ib tug neeg nplua nuj twg pub nyiaj dawb los txhawb pawg ntseeg; yog cov tib neeg no muaj cov nom tswv loj txheej saud los sis cov neeg nplua nuj uas muaj nyiaj ntau plhom thiab ntau pua plhom—tej no yog tej ntsiab lus uas lawv xav to taub. Dhau li ntawm qhov ua kom paub meej txog pawg ntseeg tej txheej txheem tswj fwm thiab seb tau nyiaj qhov twg los lawm, lawv kuj xav to taub txog qhov kev saib xyuas ntawm pawg ntseeg tej nyiaj txiag thiab, lawv lub hom phiaj yog xav taug qab seb cov nyiaj txiag no mus rau qhov twg. Seb pawg ntseeg siv cov nyiaj li cas, seb pawg ntseeg puas koom nrog tej hauj lwm uas txhaum cai, seb pawg ntseeg puas sib sau cov neeg muaj hwj chim hauv lub zej zog los sis koom tes nrog ntau lub koom haum thiab ntau pab pawg hauv lub zej zog los sib koom tawm tsam cov tsoom fwv uas tuav hwj chim ib leeg thiab tiv thaiv leej tib neeg txoj cai, thiab lwm yam ntxiv—tej no kuj yog qee yam xwm txheej tseem ceeb uas lawv xav to taub thiab. Ib txhia tib neeg nug hais tias: “Tes hauj lwm soj xyuas pawg ntseeg no puas yog lub teb chaws ntawm tus zaj loj liab ploog thiaj li ua xwb?” Cov lus no puas yog? Tseeb tiag, tag nrho lub ntiaj teb thiab tag nrho lub zej zog ntawm cov tib neeg no puav leej tawm tsam Vajtswv. Tsis yog cov teb chaws uas nyob hauv txoj kev tuav hwj chim ib leeg tswj xwb thiaj li tawm tsam Vajtswv; txawm nyob hauv cov teb chaws uas hu ua teb chaws Ntseeg Vajtswv los, feem coob ntawm cov uas kav puav leej yog cov tsis ntseeg tias muaj Vajtswv thiab cov ib txwm tsis ntseeg xwb, thiab txawm nyob hauv cov uas kav uas muaj kev ntseeg los sis cov uas lees tias Ntseeg Vajtswv los, cov uas lees txais tau qhov tseeb ntawd yeej muaj tsawg heev. Tib neeg feem coob yeej tsis lees paub qhov tseeb, haj yam tsis lees txais qhov tseeb thiab. Yog li ntawd, cov tib neeg no tsis yog cov uas ntseeg Vajtswv tiam sis tseem tawm tsam Nws lod? Piv txwv li, cov thawj coj theem siab nyob hauv sab kab lis kev cai ntseeg xws li Kev Ntseeg Vajtswv, Kev Ntseeg Kav Tos Liv, thiab Kev Ntseeg Yudais nyob rau hauv teb chaws Yixayee ntawd puas yog cov tib neeg uas lees txais qhov tseeb? Tsis yog kiag li. Yeej tsis muaj lawv ib tug twg los tshawb xyuas Vajtswv tes hauj lwm li; tsis muaj ib tug lees txais tau qhov tseeb li. Muab hais kom meej ces, lawv txhua tus puav leej yog cov tsis ntseeg; lawv txhua tus puav leej tawm tsam Vajtswv thiab yog cov tawm tsam khetos. Lawv cuam tshuam thiab rhuav tshem Vajtswv tes hauj lwm thiab caij tsuj thiab tsim txom cov uas raws Vajtswv qab yam phem heev, uas ua tau pov thawj qhia los ntawm lawv txoj kev coj rau Vajtswv tes hauj lwm nyob rau tiam kawg. Pab pawg ntseeg twg uas tso cai rau lawv cov ntseeg mus tshawb xyuas txoj hau kev tseeb yam ywj siab hlo, mloog cov lus qhuab qhia ntawm cov neeg uas nyob sab nraud, los sis txais tos cov neeg uas lawv tsis paub ntsej muag? Tsis muaj ib pab pawg twg ua tau li no li. Haiv neeg twg los sis lub teb chaws twg es ua phooj ywg zoo rau pawg ntseeg? (Tsis muaj li.) Qhov uas lawv pub koj muaj kev ywj pheej me ntsis ntawm sab kab lis kev cai ntseeg thiab muab chaw rau koj ua pa me ntsis ntawd twb yog ib qho zoo heev lawm. Koj tseem xav kom lawv txhawb koj ntxiv thiab lod? Thaum Vajtswv pawg ntseeg tshwm sim los sis thaum pawg ntseeg pib tshaj tawm txoj moo zoo, cov tib neeg uas tsis ntseeg kiag li tias muaj Vajtswv thiab cov uas tshwj xeeb tsis nyiam kiag li thiab ntxub qhov tseeb uas Vajtswv nthuav tawm ntawd thiaj li ua ib txoj hauj lwm tshwj xeeb, uas yog muab neeg xa tuaj soj xyuas pawg ntseeg kom ti ti. Lo lus “Soj xyuas” nyob ntawm no txhais hais tias soj, to taub thiab tswj; qhov ntawd yog, soj, to taub, thiab tswj txhua kis ntawm pawg ntseeg nruj nruj nyob rau txhua lub caij nyoog. Ib txhia tib neeg hais tias: “Lawv tsis tau tab meeg teem txim los sis tawm tsam Vajtswv tes hauj lwm, thiab peb los kuj tsis tau raug tsim txom los sis raug thab nyob hauv peb lub neej hauv qhov chaw no thiab. Peb xav tias kev ntseeg Vajtswv, kev sib txoos ua ke, kev ua peb tes dej num, thiab kev tshaj tawm txoj moo zoo nyob rau txawv teb chaws ntawd mas zoo dua thiab nyab xeeb dua li nyob hauv lub teb chaws ntawm tus zaj loj liab ploog. Peb tsis raug kev cuam tshuam dab tsi li.” Tsuas yog vim tsis muaj kev cuam tshuam thiab tau muab kev ywj pheej me ntsis rau koj lawm xwb, koj tsis tsim nyog tsis lees paub lawv tes hauj lwm soj xyuas pawg ntseeg. Qhov kev ywj pheej me ntsis ntawm sab kab lis kev cai ntseeg uas muab rau koj ntawd yog ib qho kev cai hauv lub zej zog uas yog lub hauv paus xwb; yam uas koj xyiv fab rau ntawd tsuas yog cov cai uas yog lub hauv paus ntawm txhua tus pej xeem uas nyob hauv lub teb chaws uas koj nyob ntawd xwb. Qhov xyiv fab rau cov cai uas yog lub hauv paus no tsis txhais hais tias tsoom fwv hauv lub teb chaws, cov pab pawg hauv lub zej zog, los sis lub ntiaj teb ntawm sab kab lis kev cai ntseeg tau lees txais thiab lees paub Vajtswv tes hauj lwm thiab pawg ntseeg tes hauj lwm, tau ua phooj ywg zoo, los sis tias tsis muaj kev ua yeeb ncuab thiab kev soj xyuas lawm. Puas yog li ntawd? (Yog.) Qhov no tsis yog ib yam uas tsis muaj tiag, puas yog? (Yog.)

Peb tsim nyog muaj tus cwj pwm li cas rau txoj kev ua yeeb ncuab thiab kev soj xyuas los ntawm cov tsoom fwv ntxwg nyoog? Peb tsim nyog tsis lees txais thiab zam kom dhau qhov ntawd, los sis cia li tsis quav ntsej txog qhov ntawd xwb? Ua ntej tshaj, xav txog qhov no: Pawg ntseeg puas ntshai lawv soj xyuas ib teg hauj lwm twg uas pawg ntseeg ua? (Tsis ntshai.) Peb puas muaj tej hauj lwm uas zais ntshis? Peb puas hais tej lus kev nom kev tswv uas tawm tsam teb chaws los sis tawm tsam tsoom fwv? (Tsis hais.) Qhov no yeej paub tseeb tau. Kev ntseeg Vajtswv yeej tsis muaj hnub koom nrog tej kev nom kev tswv li. Nej feem coob tau ntseeg Vajtswv los tau ntau tshaj peb xyoos lawm, ib txhia haj tseem ntseeg los tau nees nkaum los sis peb caug xyoo lawm thiab. Mloog cov lus qhuab qhia no los tau ntau lub xyoo no lawm, puas muaj ib tug twg pom tias pawg ntseeg hais tej lus uas tawm tsam teb chaws los sis tawm tsam lub zej zog? (Tsis muaj.) Tsis muaj ib qho me me li; Vajtswv lub tsev yeej tsis tham txog tej kev nom kev tswv li. Tsis tas li ntawd xwb, Pawg Ntseeg ntawm Vajtswv Tus Uas Muaj Hwj Chim Loj Kawg Nkaus yog Vajtswv tsim los, qhov ntawd yog ib qho uas tau saj ua ntej txog Vajtswv lub nceeg vaj hauv ntiaj teb, tsis yog ib lub koom haum tsim los ntawm ib tug neeg twg, tsis yog tsim los ntawm ib tug tib neeg twg. Yog li ntawd, tes hauj lwm uas Vajtswv tsim pawg ntseeg los ua ntawd yog dab tsi? Tes hauj lwm ntawd tsis yog los tawm tsam lub zej zog, tawm tsam sab kab lis kev cai ntseeg, los sis tawm tsam kev nom kev tswv. Yog li ntawd pawg ntseeg tes hauj lwm yog dab tsi? Qhov ib, tes hauj lwm tseem ceeb yog los tshaj tawm txoj moo zoo txog qhov uas Vajtswv los ua cev nqaij daim tawv los cawm tib neeg ntiaj teb nyob rau tiam kawg, kom tib neeg ntiaj teb lees txais txhua qhov tseeb uas Vajtswv nthuav tawm kom lawv thiaj li tig rov qab los rau ntawm Vajtswv los pe hawm Nws. Qhov ob, tes hauj lwm ntawd muaj feem xyuam txog qhov coj cov uas ntshaw qhov tseeb los rau ntawm Vajtswv lub xub ntiag los lees txais txoj kev txiav txim thiab kev rau txim ntawm Vajtswv cov lus es kom raug ntxuav kom dawb huv, es thaum kawg thiaj li tau txais kev cawm dim. Qhov no yog tes hauj lwm uas pawg ntseeg uas Vajtswv tsim ntawd ua, thiab tes hauj lwm ntawd yog lub ntsiab tseem ceeb thiab qhov muaj nqis ntawm qhov muaj pawg ntseeg. Qhov no tsis muaj feem xyuam nrog thiab tsis txuas nrog kev nom kev tswv, kev ua lag luam, kev tsim khoom, thev naus laus ntsis, los sis lwm yam hauj lwm hauv lub zej zog; qhov ntawd yeej tsis muaj feem xyuam ntsig txog rau tej yam no kiag li. Yog li ntawd lub ntsiab tseeb ntawm Vajtswv tes hauj lwm cawm dim nyob rau hauv pawg ntseeg ntawd yog dab tsi? Muab hais kom yooj yim thiab raug lub ntsiab lus tshaj plaws ces qhov ntawd yog kev tswj hwm tib neeg ntiaj teb. Lub ntsiab lus ntxaws ntxaws ntawm kev tswj hwm tib neeg ntiaj teb ntawd muaj feem xyuam txog kev coj tib neeg los rau ntawm Vajtswv lub xub ntiag, nkag mus rau hauv qhov muaj tiag ntawm Vajtswv cov lus, cia lawv lees txais Vajtswv txoj kev txiav txim thiab kev rau txim kom thiaj li raug ntxuav kom dawb huv thiab tau txais kev cawm dim. Qhov no yog tes hauj lwm ntxaws ntxaws ntawm txoj kev tswj hwm tib neeg ntiaj teb. Txhua tes hauj lwm uas pawg ntseeg ua puav leej muaj feem ntsig txog Vajtswv txoj kev tswj hwm, Vajtswv txoj kev npaj, thiab muaj tseeb tiag, yeej muaj feem xyuam txog cov lus uas Vajtswv nthuav tawm; qhov ntawd yeej tsis muaj feem xyuam dab tsi ntsig txog rau ntau txoj hauj lwm uas cov neeg ntiaj teb ua ntawd kiag li. Yog li ntawd, txhua yam ntaub ntawv uas hais txog pawg ntseeg ntawd, txawm yog hais txog pawg ntseeg tej kev qhia, cov neeg ua hauj lwm, tej txheej txheem tswj fwm, tej xwm txheej ntawm pawg ntseeg tes hauj lwm, los sis txawm yog pawg ntseeg tej nyiaj txiag los, yeej tsis muaj feem xyuam ntsig txog rau ib lub teb chaws twg, ib lub zej zog twg, ib haiv neeg twg, ib txoj kab lis kev cai ntseeg twg, los sis ib pab pawg neeg twg kiag li—twb tsis muaj ib qho kev txuas me me kiag li. Yog li ntawd, xav txog tej ntsiab lus no, txawm yog cov nom tswv uas kav teb chaws, cov pab pawg ntawm sab kab lis kev cai ntseeg, los sis cov pab pawg hauv lub zej zog, lawv qhov kev ua uas xa neeg tuaj soj xyuas pawg ntseeg ntawd yog dab tsi tiag? (Ib qho kev ua uas tsis tim tsum.) “Ib qho kev ua uas tsis tim tsum” yog ib lo lus hais raws kev raws cai. Lo lus uas sawv daws nquag hais yog dab tsi? Tsis muaj dab tsi zoo dua ua lawm xwb, puas yog? Nyob hauv Kuv qhov kev xam pom mas, qhov ntawd yeej yog kiag li ntawd ntag; lawv lub neej muaj kev tau zoo thiab kaj siab dhau hwv lawm xwb, yog li ntawd lawv thiaj li xa cov neeg uas tsis muaj hauj lwm ua ob peb tug no tuaj soj xyuas pawg ntseeg, haj tseem saib qhov no li yog ib teg hauj lwm ntawm sab kev nom kev tswv, li yog ib txoj hauj lwm tiag tiag—qhov ntawd mas ruam tsis muaj qab hau kawg li! Yog muaj lub zog ntawd no, mus qhib tej koom haum qhia ntawv los sis tej koom haum uas pab cuam cov neeg pluag mas ntshe yuav zoo dua lawm ntau. Qhov no tsuas yog ib qho uas muaj kev tau zoo ntawm sab cev nqaij daim tawv ntau dhau es thiaj li ua rau tub nkeeg, tsis tsom ntsoov rau tej hauj lwm uas tsim nyog! Yog tag nrho noob neej zoo ib yam li Vajtswv pawg ntseeg, uas muaj Vajtswv saib xyuas thiab coj kev kiag, ces lub ntiaj teb no, cov tib neeg ntiaj teb no yuav txo tau tej koom haum, tej kev siv nyiaj, thiab tej teeb meem uas tsis tsim nyog ntawd ntau heev. Yam tsawg kawg mas, tej koom haum xws li cov koom haum soj xyuas zais ntshis thiab cov koom haum tub ceev xwm, cov chaw tiv thaiv kev ruaj ntseg no, yuav tsis muaj qab hau dab tsi thiab yuav tsum raug muab tshem tawm es muab lwm yam hauj lwm rau lawv ua.

Cov tib neeg uas raug xa tuaj soj xyuas pawg ntseeg ntawd yeej muaj ib txoj num. Lawv tes hauj lwm tseem ceeb thaum nkag zais ntshis los rau hauv pawg ntseeg yog ob peb yam uas peb twb tau sib qhia no lawm; tom qab lawv to taub ob peb yam xwm txheej uas yog lub hauv paus thiab tseem ceeb nyob rau hauv pawg ntseeg lawm, lawv mam li qhia tawm rov qab mus rau lawv cov thawj saib xyuas. Txawm lawv tej kev xav, tej tswv yim, los sis lub hom phiaj ntawm lawv tes hauj lwm yuav yog dab tsi los xij, qhov uas cov neeg soj xyuas no tshwm sim nyob rau hauv pawg ntseeg ntawd cov kwv tij thiab cov nkauj muam yuav tsum ceev faj thiab siv kev txawj ntse los coj rau lawv. Ua li no puas yog? (Yog.) Yog li ntawd, puas tas yuav ntshai heev dhau lawm? (Tsis tas yuav ntshai.) Peb tsim nyog yuav ua li cas thaum cov tib neeg zoo li no tshwm tuaj? Muaj ob lub hauv paus ntsiab lus, uas yooj yim heev. Yog lawv mus rau txhua qhov chaw mus tshawb nug thiab tshawb nrhiav tej ntaub ntawv, ces qhov no qhia tau meej meej hais tias lawv yog cov neeg soj xyuas zais ntshis los sis cov neeg soj xov. Cov tib neeg zoo li no mas muaj kev ua neeg phem thiab khav theeb heev; lawv ua rau muaj kev cuam tshuam loj heev rau pawg ntseeg. Qhov muaj lawv nyob ntawd xwb twb ua rau tib neeg lub siab tsis kaj, ua rau tib neeg los tsis tau rau ntawm Vajtswv lub xub ntiag lawm. Tej kev sib txoos ua ke thiab kev ua dej num kuj raug cuam tshuam, thiab txoj kev nyab xeeb kuj muaj kev phom sij thiab. Yuav tsum daws ib tug tib neeg zoo li no li cas? (Muab lawv ntsaig tawm ntawm pawg ntseeg mus.) Yog lawm; yog lawv ua rau muaj kev cuam tshuam rau lub neej hauv pawg ntseeg los sis pawg ntseeg tes hauj lwm, yuav tsum muab lawv tshem tawm mus ncaj qha. Yog li ntawd, puas tas yuav khiav nkaum lawv los sis ntshai lawv? (Tsis tas li.) Ib txhia tib neeg, thaum lawv ntsib cov neeg soj xyuas zais ntshis nyob rau txawv teb chaws mas, ntshai heev thiab khiav nkaum rau txhua qhov, cuag nkaus li thaum lawv pom cov tub ceev xwm nyob rau hauv Teb Chaws Suav Av Loj ntag. Thaum ib txhia kwv tij thiab nkauj muam tawm mus ua hauj lwm es ntsib cov neeg soj xyuas zais ntshis uas nug ib co lus nug rau lawv, thiab lawv hnov lub suab nug ntawd txaus ntshai heev, ib yam li tub ceev xwm nug neeg txhaum, lawv ntshai heev es cia li khiav yam tsis tau ua lawv tej hauj lwm kom tiav li. Kuv hais tias, “Ua li cas koj thiaj li ua ib tug neeg tsis muaj peev xwm ua luaj li? Vim li cas koj thiaj li khiav? Muaj dab tsi ntshai? Nyob hauv lub teb chaws ntawm tus zaj loj liab ploog mas, muaj ntau tus kwv tij thiab nkauj muam raug ntes tiam sis lawv twb tsis ntshai li; lawv tsis ua cov Yudas, lawv tuav lawv tej lus tim khawv khov kho. Yog li ntawd, twb tuaj txog txawv teb chaws lawm, ua li cas koj tseem ntshai ua luaj li? Koj twb tsis tau ua txhaum ib txoj cai lij choj twg li; muaj dab tsi ntshai?” Ib txhia tib neeg hais tias: “Lawv pheej xav txav los ze kuv, thiab lawv pheej nug lus nruj nruj rau kuv.” Koj nug tsis tau lawv rov qab lod? Koj hais tau tias, “Koj muaj cai dab tsi los nug lus nruj nruj rau kuv? Kuv puas paub koj? Koj puas yog ib tug nom tswv ntawm tus zaj loj liab ploog uas tshuaj xyuas tias leej twg yog leej twg? Koj sawv cev rau leej twg? Yog koj tseem nug kuv ntxiv, kuv yuav foob koj!” Puas tas yuav ntshai lawv? (Tsis tas ntshai.) Ib txhia tib neeg mas, thaum ntsib cov neeg soj xyuas zais ntshis zoo li no, tsis kam hais ib lo lus li thiab maj nroos khiav lawm vim ntshai heev. Ib txhia tib neeg uas ruam feeb tsis meej mas tsis paub cais kiag li thiab haj tseem tshaj tawm txoj moo zoo rau ntxwg nyoog cov neeg soj xyuas zais ntshis thiab cov dev khiav kev no thiab. Tom qab tshaj tawm ob peb zaug lawm, lawv mam li paub tias, “Tus neeg no tsis yog ib tug uas ntseeg tias muaj Vajtswv. Ua li cas lawv thiaj li zoo li ib tug nom tswv ntawm tus zaj loj liab ploog?” Thaum xav tias muaj ib yam dab tsi tsis yog lawm, lawv thiaj li tso tseg. Tom qab ntawd, lawv ua tib zoo xav tias: “Vajtswv tiv thaiv kuv; hmoov zoo uas kuv tsis tau qhia kuv tej ntaub ntawv ntawm ntiag tug rau lawv. Lam poob siab xwb!” Lawv ntshai heev es lawv thiaj li tsis kam lam tau lam tshaj tawm txoj moo zoo rau txhua tus neeg uas lawv ntsib ntxiv lawm. Qhov tseeb tiag, yeej muaj cov neeg soj xyuas zais ntshis uas raug coj los rau hauv pawg ntseeg los ntawm txoj kev tshaj tawm. Lawv yog cov neeg soj xov uas tus zaj loj liab ploog txhob txwm muab tso nkag los rau hauv pawg ntseeg, lawv yog cov uas Ntxwgnyoog txhob txwm npaj tuaj. Lawv zoo li cov hma uas hnav tawv yaj, nkag zais ntshis los rau hauv pawg ntseeg yam tsis noj thiab tsis haus Vajtswv cov lus los sis tsis sib qhia qhov tseeb, pheej nrhiav kev soj xyuas tej ntaub ntawv txog pawg ntseeg thiab tshawb nrhiav lwm tus tej ntaub ntawv ntawm ntiag tug. Kiag thaum pom hais tias lawv txoj kev coj tsis txaus ntseeg los sis lawv twb ua rau muaj kev cuam tshuam nyob hauv pawg ntseeg lawm, ces yuav tsum maj nroos muab lawv tshem tawm mus tam sid—yeej yuav tsum tsis pub rau tus zaj loj liab ploog cov neeg soj xov, Ntxwgnyoog cov tub qhe los cuam tshuam pawg ntseeg kiag li. Nrhiav pom tus twg ces muab tus ntawd ntsaig tawm mus; tsis txhob hlub tshua lawv kiag li! Yog leej twg muaj kev sib raug zoo heev nrog ib tug neeg soj xyuas zais ntshis, pheej txaus siab hlo siv lub siab hlub los coj rau tus neeg soj xyuas zais ntshis ntawd, teb txhua lo lus uas tus neeg ntawd nug, ua ib tug dev khiav kev rau tus neeg soj xyuas zais ntshis ntawd, ces cov tib neeg qias neeg zoo li no yuav tsum muab ntiab tawm mus ncaj qha! Yuav tsum tau saib ntsoov thiab soj ntsuam cov neeg uas tsis txaus ntseeg ntawd kom ti ti; tsis pub qhia ib qho xwm txheej me me txog pawg ntseeg rau lawv kiag li, tshwj xeeb mas yog tsis pub qhia tias leej twg yog cov thawj coj thiab cov neeg ua hauj lwm. Yog cia ib tug neeg soj xyuas zais ntshis tau ib qho ntaub ntawv twg lawm, ces qhov ntawd ua tau rau muaj kev phom sij zais ntshis los sis kev puas tsuaj rau pawg ntseeg thiab rau cov kwv tij thiab cov nkauj muam txhua lub sij hawm. Yog li ntawd, thaum pom tias ib tug neeg twg tsis txaus ntseeg lawm, tsuav yog lawv yeej tsis noj thiab tsis haus Vajtswv cov lus los sis sib qhia qhov tseeb li, ces lawv yeej yog ib tug tsis ntseeg, thiab qhov uas maj nroos muab lawv ntsaig tawm mus ntawd yeej yog lawm. Txawm yog hais tias ib tug tib neeg zoo li no tsis yog ib tug neeg soj xyuas zais ntshis los xij, lawv yeej tsis yog ib tug neeg zoo, thiab qhov uas muab lawv ntsaig tawm mus ntawd yeej tsis yog ib qho uas tsis ncaj ncees kiag li. Yog pom leej twg muaj kev sib koom zoo heev nrog ib tug neeg soj xyuas zais ntshis thiab muaj peev xwm muab pawg ntseeg muag, ces txawm yog li cas los xij yuav tsum maj nroos muab lawv ntsaig tawm mus. Cov tib neeg ruam thiab qias neeg zoo li no tsuas yuav coj tau kev puas tsuaj los rau pawg ntseeg thiab rau cov kwv tij thiab cov nkauj muam xwb. Lawv haj tseem phem tshaj li cov dev zov tsev lawm thiab; txawm hais tias lawv tsis ua kev phem los xij, yeej tseem yuav tsum muab lawv ntsaig tawm mus. Tam sim no, tus zaj loj liab ploog twb yuav vau lawm, tiam sis lawv tsis txaus siab lees txais lawv txoj kev swb thiab kev puas tsuaj. Lawv ntes thiab tsim txom cov neeg Vajtswv xaiv tseg txuas ntxiv thiab ua tes hauj lwm soj xyuas zais ntshis es nkag zais ntshis mus rau hauv Vajtswv lub tsev. Lawv txoj kev cuam tshuam thiab kev rhuav tshem pawg ntseeg tes hauj lwm yeej tsis tau tsum li. Tam sim no, ib txhia tib neeg uas tsis txaus ntseeg twb raug muab nthuav tawm lawm. Lawv txoj kev sim tshawb tej ntaub ntawv tau ua rau muaj kev ntxhov quav niab, uas ua rau lwm tus pom tshab lawv yooj yim. Kiag thaum lawv tau muab lawv tus kheej nthuav tawm lawm, pawg ntseeg txawm muab lawv ntsaig tawm mus lawm. Tiam sis txhua tus neeg soj xyuas zais ntshis uas txawj dag puas raug muab nthuav tawm? Yeej tsis raug li. Yeej muaj tau tias cov pawg ntseeg nyob rau txhua qhov chaw yuav raug tus zaj loj liab ploog cov neeg nkag zais ntshis mus rau hauv. Ib txhia tib neeg, tom qab uas raug tus zaj loj liab ploog ntes lawm, Ntxwgnyoog siv kev hem, kev ntxias, thiab ntau yam tswv yim phem los yuam kom lawv ua hauj lwm rau nws thiab tom qab ntawd nkag zais ntshis mus rau hauv pawg ntseeg. Cov no yog cov neeg soj xyuas zais ntshis uas nyob nraim nkoos. Cov neeg soj xov zoo li no mas txawj dag thiab txawj ntxias heev, paub zais tswv yim tob thiab ntse me ntsis. Hais raws li cov ib txwm tsis ntseeg cov lus mas, lawv muaj qee qhov peev xwm. Thaum soj xyuas pawg ntseeg, lawv ua yam tsis pub leej twg pom, ua ntsiag to thiab zais ntshis, yeej tsis nthuav lawv tej kev npaj siab tseeb tawm thaum lawv nrog lwm tus sib cuag li. Tib neeg feem coob yeej tsis paub txog dab tsi li thaum nrog lawv sib cuag; tsis paub hais tias tus neeg soj xyuas zais ntshis ntawd tab tom tshawb tej ntaub ntawv, thiab kuj tsis hnov txog tus neeg soj xyuas zais ntshis ntawd txoj kev tsis nyiam kiag li rau txoj kev ntseeg Vajtswv thiab. Tej zaum tus neeg soj xyuas zais ntshis ntawd twb to taub pawg ntseeg qhov xwm txheej tseem ceeb lawm ua ntej tib neeg feem coob paub hais tias lawv nyob ntawd los soj xyuas pawg ntseeg. Nyob rau sab nraud mas, cov tib neeg zoo li no tsis ua rau muaj kev cuam tshuam rau pawg ntseeg los sis rau tib neeg feem coob li, yog li ntawd tsim nyog daws lawv li cas? Peb puas tsim nyog siv ib qho kev tiv thaiv los sis ib txoj kev daws los saib xyuas lawv txoj kev soj xyuas pawg ntseeg? Raws li tau hais ua ntej lawm ntawd tias, pawg ntseeg puas ntshai lawv txoj kev soj xyuas ib qho li? (Tsis ntshai.) Qhov muaj peb pawg ntseeg thiab ntau yam hauj lwm uas pawg ntseeg ua ntawd yeej qhib lug thiab qhia ncaj ncees; cov hauj lwm no yog tej hauj lwm uas ncaj ncees tshaj plaws nyob hauv tib neeg ntiaj teb. Yog ib lub koom haum twg xav to taub txog ib kis twg ntawm pawg ntseeg, pawg ntseeg cov lus tim khawv uas hais txog txoj kev ntsib kev pom ntawd yeej muab tso tawm qhib lug nyob hauv os lais lawm—txhua tus yeej saib tau raws li lawv lub siab nyiam. Tsis muaj dab tsi zais, tsis muaj kev ua txhaum cai, thiab yeej tsis muaj kev cuam tshuam rau kev thaj yeeb nyab xeeb hauv lub zej zog los sis tsis muaj kev hais lus los sis kev ua uas tawm tsam li. Yog li ntawd, yog lawv tshawb xyuas thiab soj xyuas pawg ntseeg qhov xwm txheej yam zais ntshis, ces cia lawv ua mus. Vim li cas Kuv thiaj li hais li no? Cov tib neeg uas ua hauj lwm li cov neeg soj xyuas no yeej muaj ib tug qauv qib siab, thiab cov tib neeg dog dig yeej nrhiav tsis tau tias tej hauj lwm uas lawv ua nyob rau tom qab ntawd yog dab tsi tiag. Yog li ntawd, tsuav yog lawv tsis ua rau muaj kev cuam tshuam xwb, ces tsis tas yuav quav ntsej txog lawv li; cia lawv ua mus. Tsis tas li ntawd, cov tsis ntseeg, cov tsis ntseeg tias muaj Vajtswv, thiab cov neeg uas koom nrog kev nom kev tswv no yeej tsis swm nrog thiab tsis nyiam txog lub neej hauv pawg ntseeg li. Nyob hauv pawg ntseeg, txhua hnub tib neeg nyeem Vajtswv cov lus, lees txais kev txiav txim thiab kev rau txim, thiab sib tham txog kev paub txog yus tus kheej, kev paub txog Vajtswv, thiab kev hloov tus moj yam, ua li cas lawv thiaj li yuav tsis hnov cuag nkaus li zaum saum ntsis koob los sis raug kev tsim txom? Nyob rau txhua qhov kev sib txoos ua ke mas, lawv yeej nyob tsis tswm ib yam li ntsaum nyob saum ib lub yias kub kub; lawv tsis kam quab yuam lawv tus kheej mus nyob hauv pawg ntseeg. Lawv to taub hauv lawv lub siab tias pawg ntseeg tsuas yog ib pawg ntseeg xwb, thiab yeej tsis yog ib lub koom haum uas koom nrog kev nom kev tswv kiag li. Los ntawm kev soj xyuas thiab nrhiav paub txog pawg ntseeg, thiab paub tias pawg ntseeg ua dab tsi tiag, lawv thiaj li tau txais kev cob qhia txog qhov muaj tseeb tias Vajtswv kav txhua yam thiab kav tib neeg ntiaj teb txoj hmoo, qhib lawv tej zeem muag kom lawv thiaj li tsis ua lub neej ruam feeb tsis meej npaum li ntawd. Lawv kuj yog cov uas raug tsim tawm los thiab, tiam sis lawv haj tseem tsis paub hais tias tib neeg yog Vajtswv tsim los, uas qhia tau hais tias lawv ruam thiab tsis muaj nqis npaum li cas! Qhov cia lawv nyob hauv pawg ntseeg ntawd puas muaj kev phom sij? Yog lawv tsis ua rau muaj kev phom sij los sis kev cuam tshuam rau pawg ntseeg los sis rau cov kwv tij thiab cov nkauj muam, ces cia lawv nyob mus. Kiag thaum twg lawv ua ib yam dab tsi uas ua rau muaj kev cuam tshuam, ces qhov ntawd yog lub sij hawm uas lawv muab lawv tus kheej nthuav tawm, thiab qhov ntawd yog lub sij hawm uas tsim nyog daws lawv lawm. Raws li qhov muaj tseeb thiab cov pov thawj, kav tsij maj nroos paub cais thiab txiav txim seb lawv yog hom twg—lawv txoj num ces xaus li ntawd lawm, thiab pawg ntseeg cia li muab lawv ntiab tawm mus. Txoj kev ua li no puas zoo? (Zoo.) Ib txhia tib neeg nug hais tias, “Pawg ntseeg tes hauj lwm tsis qhib lug thiab tsis qhia ncaj ncees lod? Vim li cas thiaj li txwv tib neeg txoj kev soj xyuas?” Tseem ceeb ces qhov no yog tsom mus rau tus zaj loj liab ploog, Ntxwgnyoog lub tsoom fwv. Nws txoj kev soj xyuas pawg ntseeg yog rau lub hom phiaj kom caij tsuj, ntes, thiab ua kom cov neeg Vajtswv xaiv tseg puas tsuaj; yog li ntawd, Vajtswv lub tsev thiaj li tsis tso cai rau nws txoj kev soj xyuas kom thiaj li tiv thaiv tau cov neeg Vajtswv xaiv tseg kom tsis txhob raug kev tsim txom thiab kev tua. Yog cov tib neeg uas tuaj ntawm cov teb chaws uas pej xeem yog tus tswj los sis cov pab pawg ntawm sab kab lis kev cai ntseeg tuaj tshawb xyuas txoj hau kev tseeb, lawv yeej tshawb xyuas tau nyob hauv os lais los sis sib txuas lus tau nrog pawg ntseeg. Pawg ntseeg txais tos txhua tus uas ua lub siab dawb paug nrhiav qhov tseeb. Tiam sis yog lwm tus muaj lub siab phem thiab xav ntxeev qhov yog thiab qhov tsis yog thiab hais lus phem rau pawg ntseeg, ua li cas Vajtswv lub tsev thiaj li ho yuav tso cai rau lawv txoj kev soj xyuas? Qhov uas tso cai rau lawv soj xyuas ntawd puas yog ib qho uas ruam dhau lawm? Qhov ntawd puas yog qhov uas ruam thiab tsis paub dab tsi li? (Yog.) Vajtswv lub tsev yeej ib txwm txais tos cov uas nrhiav qhov tseeb thiab txais tos lawv yam zoo siab hlo, qhov no mus raws nraim li Vajtswv tej kev npaj siab. Yog tib neeg tsis to taub qhov no thiab, ces qhov ntawd yog vim lawv txoj kev ruam thiab kev tsis paub dab tsi li xwb. Pawg ntseeg txoj cai rau sab nraud mas yeej qhib lug thiab qhia ncaj ncees, mus raws nraim li qhov tseeb tej hauv paus ntsiab lus, thiab muaj kev ntse thiab kev txawj ntse nyob rau hauv. Yog leej twg to taub tsis tau tej yam uas zoo no, ces lawv yog ib tug neeg ruam, ib tug neeg ruam feeb tsis meej. Ib txhia tib neeg hais tias, “Yog cov neeg soj xov los sis Ntxwgnyoog cov tub qhe tuaj nrhiav paub txog pawg ntseeg, peb puas tsim nyog ua cov tib neeg coj ncaj thiab teb lawv cov lus nug kom tseeb?” Qhov uas qhia qhov tseeb rau cov dab thiab Ntxwgnyoog ntawd yog txoj kev ruam; qhov no tsis ua rau yus yog ib tug tib neeg coj ncaj, tiam sis ua rau yus dhau los ua ib tug dev khiav kev rau Ntxwgnyoog. Thaum Ntxwgnyoog pab neeg xav nrhiav kom paub txog thiab to taub pawg ntseeg tej xwm txheej, cov neeg Vajtswv xaiv tseg tsis muaj lub luag hauj lwm yuav qhia rau lawv. Lawv lees txais tsis tau qhov tseeb thiab tsis muaj lub siab zoo, yog li ntawd peb tsis muaj dab tsi yuav qhia rau lawv li! Qhov uas ua li no tsis yog kev siab kub, tiam sis yog muaj kev txawj ntse xwb. Ib txhia tib neeg nug hais tias, “Yog lawv nug kuv hais tias, ‘Leej twg yog tus coj nej pawg ntseeg? Lawv ntseeg los tau pes tsawg xyoo lawm?’ kuv puas qhia tau rau lawv?” Koj yuav tsum nug lawv hais tias, “Koj lub hom phiaj uas xav paub txog peb tus thawj coj yog dab tsi? Qhia kuv ua ntej tso, es kuv mam li ua tib zoo xav ces mam li txiav txim siab seb puas yuav qhia rau koj los sis tsis qhia.” Lo lus teb no puas muaj kev txawj ntse? (Muaj.) Qhov no hu ua kev ua raws li tej hauv paus ntsiab lus. Koj puas to taub? Thaum tes hauj lwm tshaj tawm txoj moo zoo nthuav mus dav thiab cov neeg hauv pawg ntseeg maj mam coob zuj zus tuaj lawm, tej zaum cov neeg soj xov thiab cov neeg soj xyuas zais ntshis yuav muaj tshwm qee zaus nyob rau hauv tej pawg ntseeg nyob rau cov teb chaws thiab cheeb tsam uas sib txawv. Rau cov tib neeg zoo li no, tsuas yog qhia rau cov neeg Vajtswv xaiv tseg kom siv kev txawj ntse los coj rau lawv xwb ces yeej txaus lawm. Yog pom hais tias lawv ua rau muaj kev cuam tshuam los sis kev tab kaum, yuav tsum muab lawv ntsaig tawm mus tam sid. Tib neeg feem coob tsim nyog muaj kev to taub thiab kev paub cais me ntsis txog txoj kev uas cov neeg soj xyuas zais ntshis no hais lus thiab ua, los sis txog lawv tus yam ntxwv, thiab yeej yuav muaj qee qhov kev paub los sis kev xav me ntsis thaum sib cuag nrog lawv. Yog tsuas muaj ob peb tug kwv tij thiab nkauj muam hauv ib pawg ntseeg pom cov tib neeg zoo li no xwb tiam sis tsis paub tseeb tias lawv puas yog cov neeg soj xyuas zais ntshis los sis cov neeg soj xov, ces yuav tsum tau ceev faj thiab siv ib txoj kev uas muaj kev txawj ntse los coj rau lawv. Yog tib neeg feem coob tau pom lawm, lawv ib leeg tuaj yeem qhia rau ib leeg thiab siv tej kev tiv thaiv. Yog cov neeg uas xav tias yog neeg soj xyuas zais ntshis ntawd tsis ua zoo rau pawg ntseeg los sis rau cov kwv tij thiab cov nkauj muam, es pheej nrhiav kev los ntxias cov kwv tij thiab cov nkauj muam kom mag ntxiab thiab cuam tshuam pawg ntseeg, thiab pheej nrhiav pov thawj los ua kom pawg ntseeg puas npe, es haj tseem yees cov kwv tij thiab cov nkauj muam cov duab los sis kaw cov kwv tij thiab cov nkauj muam cov suab thiab, los sis siv kev haub ntxias thiab kev dag ntxias kom tau cov ntaub ntawv uas lawv xav paub, ces cov tib neeg zoo li no, thaum paub lawm, yeej tsis pub tso cai rau lawv ua mus ntxiv—yuav tsum muab lawv ntsaig tawm ntawm pawg ntseeg mus tam sid. Tej zaum nej yuav tsis tau ntsib cov xwm txheej no ua ntej li, yog li ntawd Kuv thiaj li qhia rau nej ua ntej. Qhov no yog hais txog kev qhib nej txoj kev to taub kom dav, txog kev paub txog tib neeg ntiaj teb, lub zej zog, kev nom kev tswv, thiab lub ntiaj teb—tias yeej tsaus ntuj thiab phem npaum li ntawd ntag.

Hais txog lub hom phiaj cuaj uas ib tug neeg muaj rau txoj kev ntseeg Vajtswv—uas yog soj xyuas pawg ntseeg—txoj kev sib qhia txog cov ntsiab lus hauv paus los xaus rau ntawm no lawm. Puas yog tau qhia txhua yam meej lawm? (Yog lawm.) Cov ntsiab lus uas cov neeg soj xyuas pawg ntseeg xav soj xyuas ntawd yog dab tsi? (Pawg ntseeg tej kev qhia, cov neeg ua hauj lwm tej xwm txheej, tej xwm txheej ntawm tes hauj lwm, thiab tej xwm txheej nyiaj txiag.) Feem ntau mas, plaub qho no yog yam uas lawv xav paub tshaj plaws. Plaub yam no muaj feem xyuam txog dab tsi? Tej no muaj feem xyuam txog yam uas lawv txhawj xeeb tshaj plaws: qhov kev cuam tshuam ntawm qhov muaj pawg ntseeg nyob rau lub zej zog, lub teb chaws, thiab lub ntiaj teb ntawm sab kab lis kev cai ntseeg. Lawv kuj txhawj xeeb tias tej zaum pawg ntseeg yuav siv sab kab lis kev cai ntseeg los ua ib daim phiaj thaiv kom tau koom nrog kev nom kev tswv thiab rhuav tshem tsoom fwv, xam tias qhov no yog qhov kev phom sij zais ntshis uas loj tshaj plaws. Yog li ntawd, lawv thiaj li caij tsuj, tsim txom, thiab txwv pawg ntseeg, thiab ntes cov ntseeg hauv pawg ntseeg. Lub teb chaws ntawm tus zaj loj liab ploog txwv txhua txoj kev ntseeg ntawm sab kab lis kev cai ntseeg, qee lub teb chaws txwv qee txoj kev ntseeg, thiab cov teb chaws feem ntau ntshai tsam qhov tseeb muaj hwj chim tswj hwm, thiab ntshai cov tib neeg lees txais qhov tseeb, uas ua rau muaj kev phom sij rau lawv txoj kev tswj hwm. Muab hais kom luv luv ces, ib qho chaw twg yim muaj Vajtswv ua hauj lwm thiab nthuav qhov tseeb tawm, thiab ib pawg ntseeg twg yim muaj Vajntsujplig tes hauj lwm, ces tej chaw ntawd yim muaj feem yuav raug soj xyuas thiab raug ntau lub tsoom fwv saib tam li yog cov yeeb ncuab. Yog li ntawd, cov tsoom fwv thiaj li nquag txib cov neeg soj xyuas zais ntshis uas ua txuj ua cov neeg tshawb xyuas txoj hau kev tseeb los nrhiav kom paub txog thiab to taub pawg ntseeg li xwm txheej, kom thiaj li soj xyuas tau txhua yam uas pawg ntseeg ua. Tshaj ntawd ntxiv, lawv nrhiav kev los ua kom to taub txog txoj hau kev mus ntawm pawg ntseeg tes hauj lwm, los saib seb pawg ntseeg puas koom nrog kev nom kev tswv, seb pawg ntseeg puas koom nrog qee yam hauj lwm ntawm sab kev nom kev tswv los ntawm txoj kev siv kev ua pawg ntseeg tes hauj lwm los ua ib daim phiaj thaiv, los sis seb pawg ntseeg puas muaj kev sib txuas lus nrog tej pab pawg ntseeg uas muaj hwj chim nyob rau txawv teb chaws, nrog rau lwm yam kev txhawj xeeb. Tej no yog yam uas lawv xav to taub txog thiab txhawj xeeb txog. Ntxiv ntawd, pawg ntseeg qhov xwm txheej nyiaj txiag kuj yog qee yam uas lawv xav to taub txog thiab. Lawv ua tib zoo xav tias: “Pawg ntseeg no muaj neeg coob zuj zus tuaj thiab huam vam sai heev—lawv cov nyiaj los qhov twg los? Cov koom haum twg los sis cov neeg nplua nuj twg pub nyiaj rau lawv?” Muab hais kom luv luv ces, tsuas muaj tej uas peb xav tsis txog hos tsis muaj tej uas lawv xav tsis txog li. Vim li cas? Vim tias lawv phem; lawv yog cov tib neeg phem. Lawv txoj kev sim kom to taub txog pawg ntseeg li xwm txheej yog pib los ntawm lawv txoj kev txhawj xeeb heev txog qhov muaj pawg ntseeg, ntshai tsam tej zaum pawg ntseeg yuav cuam tshuam tau neeg coob ntxiv, uas yuav ua rau muaj kev phom sij rau lawv txoj kev tswj hwm; qhov no yeej yog kiag yam uas lawv txhawj xeeb txog pawg ntseeg ntag. Txawm hais tias tes hauj lwm uas pawg ntseeg ua ntawd yuav ncaj ncees los sis tsim nyog npaum li cas los xij, lawv yeej tseem tsis ntseeg li. Vim li cas? Vim tias lawv yog cov tsis ntseeg, cov tsis ntseeg tias muaj Vajtswv, thiab cov uas ntseeg tias tsuas muaj tej khoom uas pom tau xwb—yam uas cov neeg ntseeg tias tsuas muaj tej khoom uas pom tau xwb ntawd ua ces yog li no. Tej no yog plaub qho xwm txheej uas lawv txhawj xeeb. Peb nyuam qhuav sib qhia txog ob lub hauv paus ntsiab lus uas hais txog txoj kev uas tsim nyog los daws cov tib neeg zoo li no tom qab uas tau to taub txog cov laj thawj thiab cov hom phiaj nyob tom qab lawv tej kev txhawj xeeb txog plaub qho xwm txheej no lawm. Muab cov hauv paus ntsiab lus no zuaj zog los hais kom yooj yim es hais txog cov hauv paus ntsiab lus no. (Yog lawv ua rau muaj tej kev cuam tshuam nyob hauv pawg ntseeg, ces muab lawv tshem tawm mus; yog lawv tsis ua rau muaj tej kev cuam tshuam, ces tsis tas quav ntsej txog lawv li.) Yog lawv ua rau muaj tej kev cuam tshuam, mus tshawb nrhiav rau txhua qhov chaw thiab ua rau tib neeg ntshai, ces muab lawv tshem tawm mus yam tsis muaj kev hlub tshua kiag li; yog lawv tsis ua rau muaj tej kev cuam tshuam thiab tib neeg feem coob tsis pom los sis tsis paub cais lawv, ces tsis txhob quav ntsej lawv. Thaum lawv pom meej meej tias qhov no yeej yog pawg ntseeg tes hauj lwm tiag, puav leej yog tej hauj lwm ntawm sab kab lis kev cai ntseeg, thiab tsis koom nrog kev nom kev tswv kiag li, tsuas yog paub tseeb txog qhov no xwb ces yuav ua rau lawv cia li mus lawm. Qhov no yog txoj kev uas cov teb chaws uas pej xeem yog tus tswj siv los kom to taub txog tej xwm txheej ntawm sab kab lis kev cai ntseeg. Kuj twb tau muab hais ua ntej los lawm hais tias cov tib neeg ntiaj teb no mas cov nyom heev. Vim li cas cov tib neeg ntiaj teb thiaj li cov nyom luaj li? Qhov ntawd tsis yog los ntawm tib neeg ntiaj teb txoj kev phem los lod? (Yog.) Tib neeg ntiaj teb txoj kev phem pib qhov twg los? Vim li cas thiaj li hais tias tib neeg ntiaj teb phem? Qhov ntawd yog vim Ntxwgnyoog tau ua rau tib neeg ntiaj teb qias vuab tsuab tob dhau lawm. Yuav muab hais ua lus kom yooj yim li cas? Qhov ntawd yog qhov uas Ntxwgnyoog tau hloov tib neeg mus ua cov dab lawm; tag nrho tib neeg ntiaj teb puav leej nyob hauv cov dab phem txoj kev tswj hwm, uas muaj cov dab phem loj thiab me ntau dhau lawm, yog li ntawd tej chaw uas tib neeg tuaj sib txoos ua ke ntawd thiaj li dhau los ua cov nroog ntawm cov dab lawm. Thaum muaj cov dab coob tuaj sib txoos ua ke, qhov ntawd thiaj li cov nyom heev; lawv muaj peev xwm ua tau txhua hom kev phem thiab koom nrog txhua yam uas qias neeg. Vim tias txhua cov dab phem puav leej phem, thiab yeej ib txwm muaj kev sib cav nyob hauv lawv, thiab lawv ib leeg yeej ib txwm sib haum tsis tau nrog ib leeg, qhov no thiaj li ua rau txhua yam cov nyom. Thaum cov tib neeg uas ua lub siab dawb paug ntseeg Vajtswv tuaj sib txoos ua ke, qhov ntawd yooj yim dua lawm ntau; lawv txhua tus puav leej txaus siab hlo nyeem Vajtswv cov lus thiab ua lub neej hauv pawg ntseeg, thiab lawv txhua tus puav leej nyiam rau txoj kev ua lawv tej dej num thiab koom nrog tej hauj lwm uas tsim nyog. Lawv tsis koom nrog tej hauj lwm uas nkhaus thiab qias neeg—yam ntau kawg los, tej zaum lawv yuav nthuav txoj kev qias vuab tsuab tawm me ntsis xwb. Tsuas yog cov tib neeg zoo li no xwb thiaj li tau txais kev cawm dim los ntawm txoj kev ntseeg Vajtswv. Cov dab phem yeej tsis muaj hnub dim los ntawm txoj kev ntseeg Vajtswv vim tias ib tug tsov txaij yeej hloov tsis tau nws tej tee txaij li. Txawm hais tias cov dab phem ntseeg Vajtswv los tau ntau caum xyoo los sis ntau pua xyoo lawm los xij, lawv yeej yuav tsis hloov, uas yog ib qho muaj tseeb uas txhua tus pom tau. Tam sim no, ntau pawg ntseeg twb muab cov uas yog dab ntawd tshem tawm mus lawm, uas yog ib qho zoo thiab mus raws nraim li Vajtswv tej kev npaj siab. Nyob hauv qee pawg ntseeg, ib nrab ntawm cov tib neeg yog cov dab, hos nyob hauv lwm pawg ntseeg, ib feem me me thiaj li yog cov dab xwb. Puas yooj yim los ua pawg ntseeg tes hauj lwm nyob hauv cov pawg ntseeg zoo li no? Yeej tsis yooj yim li. Yog muab cov dab tshem tawm mus lawm, tshuav cov tib neeg uas qias vuab tsuab xwb, ces pawg ntseeg tes hauj lwm yuav yooj yim ua dua lawm ntau. Qhov xwm txheej uas txaus khuv leej tshaj plaws yog thaum cov thawj coj cuav los sis cov tawm tsam khetos tuav hwj chim nyob hauv qee pawg ntseeg, uas muaj cov dab los ua cov thawj coj; ces cov neeg Vajtswv xaiv tseg uas nyob hauv cov pawg ntseeg ntawd yeej raug kev txom nyem tiag tiag. Qhia Kuv seb, cov thawj coj cuav los sis cov tawm tsam khetos uas tuav hwj chim ntawd coj puas tau kev thaj yeeb nyab xeeb thiab kev xyiv fab los rau cov neeg Vajtswv xaiv tseg? Cov thawj coj cuav thiab cov tawm tsam khetos tej kev xav thiab lub tswv yim puav leej phem tag nrho thiab tawm tsam qhov tseeb. Yog tias muaj kaum los sis nees nkaum tus dab uas muaj sia nyob txhawb nqa lawv, ces qhov uas nyob hauv ib pawg ntseeg zoo li no yeej zoo ib yam li nyob hauv ib qho chaw uas cov dab tuaj sib txoos ua ke, nyob hauv ib lub qhov tsua ntawm cov dab uas raug tswj los ntawm ib tug vaj ntxwv dab; qhov ntawd zoo ib yam li nyob hauv ib lub tshuab zom nqaij ntag, ua rau koj lub siab thiab tus ntsuj plig nyob tsis tus. Txhua hnub, yam uas nyob hauv koj tej kev xav ces yog tej yam xws li yuav tawm tsam los sis sib ntsuas zog nrog leej twg, yuav ua phooj ywg thiab txav ze rau leej twg, yuav zam thiab ceev faj leej twg, thiab lwm yam ntxiv; koj twb tsis muaj ib qho chaw uas muaj kev thaj yeeb nyab xeeb li, ua lub neej ntshai rwg tas li xwb, tsis muaj kev thaj yeeb nyab xeeb ib qho me me li. Qhov no tsis yog zoo li nyob hauv ib lub tshuab zom nqaij lod? (Yog.) Lub zej zog uas phem no, cov tib neeg ntiaj teb uas phem no, coj rau txhua tus thiab txhua pab pawg los sis txhua lub koom haum yam zoo ib yam xwb, siv tib co tswv yim thiab kev xam pom rau txhua tus. Ib yam nkaus li ntawd, lawv kuj haj tseem tsis tso siab rau pawg ntseeg, uas yog ib lub koom haum uas zoo, tsis tseg pawg ntseeg li thiab. Txawm li cas los xij, txoj kev uas peb coj rau lawv ntawd yeej muaj hauv paus ntsiab lus, puas yog?

Lub hom phiaj cuaj rau kev ntseeg Vajtswv—kev soj xyuas pawg ntseeg—tam sim no twb tau muab sib qhia tag lawm, thiab txhua cov ntsiab lus ntawm thawj yam ntawm cov thawj coj thiab cov neeg ua hauj lwm lub luag hauj lwm kaum plaub ntawd los kuj tau muab sib qhia yuav luag tag lawm thiab. Tej no yeej yog cov ntsiab lus uas yog lub hauv paus uas peb tau xaus lus thaum hais txog cov hom phiaj ntawm cov tsis ntseeg thiab cov tsis ntseeg tias muaj Vajtswv no nyob hauv lawv txoj kev ntseeg Vajtswv. Lub hom phiaj kawg uas tau sib qhia no txawv me ntsis ntawm cov yav tas los nyob rau hauv lub ntsiab lus. Thaum cov neeg soj xyuas pawg ntseeg nkag zais ntshis los rau hauv pawg ntseeg, lawv tsis yog caum kom tau noj tau haus, lub meej mom, los sis kev tau zoo nyob hauv lub neej thiab tes hauj lwm, tiam sis tuaj nrog cov hom phiaj ntawm sab kev nom kev tswv. Txawm lawv cov hom phiaj yuav yog dab tsi los xij, thaum peb pom tshab thiab paub cais lawv lawm, peb yuav tsum nqis tes ua kom tsim nyog tam sid, muab cov tib neeg no ntsaig tawm mus los sis ntiab tawm mus, yeej tsis cia lawv nyob nkaum hauv pawg ntseeg kom ntev kiag li. Qhov no yog ib teg hauj lwm tseem ceeb rau cov thawj coj thiab cov neeg ua hauj lwm. Raws li lawv lub hom phiaj ntawm kev ntseeg Vajtswv, paub cais thiab txiav txim siab seb leej twg yog cov kwv tij thiab cov nkauj muam tiag tiag—cov neeg Vajtswv xaiv tseg—thiab leej twg yog ntau hom tib neeg phem uas pawg ntseeg yuav tsum muab ntsaig tawm mus los sis ntiab tawm mus; txheeb cov tib neeg phem no tam sid thiab tom qab ntawd siv ib txoj kev daws uas tsim nyog los muab lawv ntsaig tawm mus los sis ntiab tawm mus tam sid. Qhov no yog thawj yam ntawm txoj kev paub cais thiab muab ntau hom tib neeg phem faib ua pab ua pawg: lub hom phiaj rau kev ntseeg Vajtswv. Peb twb sib qhia txog qhov ntawd tag lawm.

II. Raws Li Txoj Kev Ua Neeg

Tam sim no peb yuav sib qhia txog yam ob, uas yog txoj kev ua neeg. Los ntawm tej kev qhia tshwm ntawm ib tug neeg txoj kev ua neeg, peb paub cais thiab txiav txim tau tias tus neeg no puas ntseeg Vajtswv tiag tiag thiab seb puas tsim nyog cia lawv nyob hauv pawg ntseeg ntxiv. Yog hais tias, raws li lawv txoj kev ua neeg tej kev qhia tshwm thiab kev nthuav tawm nrog rau lawv txoj kev ua neeg lub ntsiab tseeb, lawv tsis yog cov kwv tij thiab cov nkauj muam tiag tiag, tsis tsim nyog cia nyob hauv pawg ntseeg, lawv qhov kev nyob ntawd cuam tshuam rau cov kwv tij thiab cov nkauj muam, thiab—raws li lawv txoj kev coj—lawv yog cov uas yuav tsum raug ntsaig tawm mus los sis ntiab tawm ntawm pawg ntseeg mus, ces pawg ntseeg yuav tsum maj nroos npaj tej phiaj xwm kom haum los ntsaig tawm mus los sis ntiab cov neeg no tawm mus. Qhov kev sib qhia txog cov thawj coj thiab cov neeg ua hauj lwm lub luag hauj lwm kaum plaub ntawd yog hais txog kev ntsaig tawm mus los sis ntiab txhua hom tib neeg phem tawm mus. Thaum saib los ntawm txoj kev ua neeg, cov tib neeg no txoj kev ua neeg yeej phem thiab lim hiam tiag; muab hais raws li cov lus ib txwm hais ces, lawv yeej tsis zoo kiag li. Raws li lawv txoj kev ua neeg tej kev qhia tshwm, lawv yuav tsum raug ntsaig tawm mus los sis ntiab tawm ntawm pawg ntseeg mus kom txwv tau qhov lawv txuas ntxiv ua rau muaj kev cuam tshuam nyob hauv pawg ntseeg thiab cuam tshuam rau qhov raws qib raws duas uas ib txwm muaj ntawm cov neeg Vajtswv xaiv tseg lub neej hauv pawg ntseeg thiab kev ua lawv tes dej num. Yog li ntawd, los ntawm tej kev qhia tshwm twg peb thiaj li txiav txim tau tias ib tug neeg txoj kev ua neeg ntawd zoo los sis phem es thiaj li txiav txim siab tau seb pawg ntseeg puas tsim nyog ntsaig lawv tawm mus los sis ntiab lawv tawm mus? Yam ob—txoj kev ua neeg—thaum muab xaus lus ua ke, kuj muaj ntau lub ntsiab lus thiab, tiam sis cia peb xub sib qhia txog lub ntsiab lus ib ua ntej.

A. Nyiam Ntxeev Qhov Tseeb thiab Qhov Cuav

Lub ntsiab lus ib yog hais txog cov uas nyiam ntxeev qhov tseeb thiab qhov cuav. Nej sawv daws yeej nquag pom hom neeg zoo li no. Qhov kev qhia tshwm tseem ceeb ntawm qhov nyiam ntxeev qhov tseeb thiab qhov cuav yog dab tsi? Qhov ntawd yog qhov hais lus tsis muaj tej hauv paus ntsiab lus, pheej muaj txoj kev npaj siab thiab lub hom phiaj ua kom muaj kev sib cav sib ceg, uas ua rau coj tej yam tsis zoo los. Pom tseeb hais tias, cov neeg zoo li no muaj teeb meem loj heev txog lawv txoj kev hais lus, uas lub hauv paus yog los ntawm tus moj yam phem thiab tsis muaj txoj kev ua neeg, uas ua rau lawv nyiam ntxeev qhov tseeb thiab qhov cuav. Thaum saib los ntawm lub ntsiab ntawm cov lus no, “ntxeev qhov tseeb thiab qhov cuav” txhais hais tias pheej muab qhov muaj tseeb hais tias yog qhov cuav, thiab muab qhov cuav hais tias yog qhov muaj tseeb; qhov ntawd yog qhov muab qhov dawb ntxeev ua qhov dub thiab haj tseem muab tej lus dag ntxiv rau qhov muaj tseeb, liam neeg yam tsis muaj hauv paus, lam tau lam txiav txim, thiab xav hais li cas los cia li hais li ntawd. Cov neeg zoo li no yeej tsis hais tej yam uas zoo hlo li; tej uas lawv hais tsis txhawb tib neeg, thiab tsis muaj txiaj ntsim los sis pab tsis tau tib neeg ib qho me me li. Thaum nrog lawv sib cuag, nrog lawv ua ke, thiab nrog lawv sib txuas lus, qhov uas mloog lawv hais lus ntawd mas pheej ua rau tib neeg lub siab poob mus rau hauv txoj kev tsaus ntuj thiab feeb tsis meej, haj tseem ua rau lawv plam lawv txoj kev ntseeg, es lawv cia li tsis xav ntseeg Vajtswv lawm, thiab ua rau lawv lub siab tus tsis tau thaum ua kev pe hawm ntawm sab ntsujplig thiab thaum muaj tej kev sib txoos ua ke. Lawv lub siab thiab lawv tus ntsujplig pheej ntxhov quav niab vim yog tej lus uas hais txog qhov yog thiab qhov tsis yog nrog rau tej lus xaiv uas cov neeg zoo li no tshaj tawm, thiab pib saib txhua tus tsis khuab qhov muag thiab tsuas pom lwm tus tej tsis zoo xwb. Ntau zaus, tom qab hnov tej lus uas ntxeev qhov tseeb thiab qhov cuav lawm, tib neeg txoj kev xav li ib txwm raug cuam tshuam, thiab haj tseem ua rau lawv tej kev xam pom uas yog txog tej yam raug cuam tshuam thiab, ua rau lawv nyuaj cais seb qhov twg yog qhov yog thiab qhov twg yog qhov tsis yog. Cov uas tsis muaj kev paub cais nquag raug ntxias thiab poob rau hauv kev ntxias, yam uas lawv twb tsis paub txog, vim yog qee yam uas cov neeg nyiam ntxeev qhov tseeb thiab qhov cuav ntawd hais. Lawv xav hais tias, “Cov neeg ntawd tsis tau ua phem rau leej twg, lawv tuaj koom kev sib txoos ua ke li ib txwm, qee zaus lawv haj tseem pub khoom thiab pab lwm tus, thiab tsis tau ua ib yam dab tsi phem li.” Txawm li cas los xij, qhov tshwm sim los ntawm kev nrog cov neeg zoo li no sib cuag mas feem ntau lawv poob rau hauv tej teeb meem txog qhov yog thiab qhov tsis yog thiab poob rau hauv kev ntxias, thiab lawv poob rau hauv nruab nrab ntawm kev ntxhov quav niab txog kev xav hauv siab ntawm tib neeg, thiab tej kev sib raug zoo uas tsis tsim nyog. Cov neeg uas ntxeev qhov tseeb thiab qhov cuav no mas tsom ntsoov cuam tshuam tej kev sib raug zoo uas tsim nyog ntawm tib neeg thiab tsom ntsoov rhuav tshem qee txoj kev to taub uas yog nyob hauv tib neeg lub siab. Nyob hauv lawv lub qhov muag, cov twg muaj kev sib raug zoo thiab tuaj yeem sib txhawb thiab sib pab tau, puav leej dhau los ua cov hom phiaj uas lawv tawm tsam thiab txiav txim rau tom qab nraub qaum. Ib yam li ntawd, leej twg uas ua lawv tes dej num yam muaj kev ua siab ncaj me ntsis thiab muab lawv tus kheej fij me ntsis los kuj yog cov hom phiaj uas lawv tawm tsam thiab. Txawm hais tias ib yam dab tsi yuav zoo los sis yog tej yam uas zoo npaum li cas los xij, lawv yeej nrhiav kev los hais phem rau yam ntawd. Lawv thuam zais ntshis txog txhua yam, tawm tswv yim txog txhua qhov xwm txheej, thiab muaj lawv tus kheej tej kev xam pom rau txhua qhov teeb meem. Tej kev xam pom no yeej tsis yog tej kev xam pom tiag tiag li; tiam sis, lawv hais lus tsis muaj qab hau, ua rau qhov muaj tseeb thiab qhov cuav ntxhov quav niab, thiab muab qhov dawb ntxeev ua qhov dub; kom ua tau raws li ib lub hom phiaj, los sis ua rau tib neeg tsis sib haum xeeb, los sis hais lus phem rau qee tus neeg, lawv haj tseem txhob txwm thiab lam tau lam muab tej yam tsis muaj tseeb ntxiv rau qhov muaj tseeb thiab liam neeg yam tsis muaj hauv paus hauv ntsis, tsim tej yam tsis muaj kom zoo li muaj. Cov uas tsis paub qhov muaj tseeb mloog lawv hais lus thiab xav hais tias lawv tej lus ntawd zoo li tsim nyog thiab tsis tuaj yeem yog lus cuav tau, ces thiaj li raug coj mus yuam kev lawm. Hom neeg uas nyiam ntxeev qhov tseeb thiab qhov cuav no thuam zais ntshis txog txhua yam uas zoo. Qhov no puas yog vim lawv paub txog kev ncaj ncees? (Tsis yog.) Lawv tsis kam zwm rau thiab saib tsis taus cov uas nquag ua lawv tes dej num, cov uas ua siab ncaj, cov uas kub siab lug muab lawv tus kheej fij, thiab cov uas muaj lub siab txawj xav thiab laj thawj. Yog li ntawd, yog vim li cas cov neeg no thiaj li lam tau lam hais lus? Lub hauv paus nyob qhov twg? Vim li cas lawv pheej nyiam ntxeev qhov tseeb thiab qhov cuav? (Vim lawv txoj kev ua neeg phem.) Yog lawm; qhov no yog vim txoj kev ua neeg phem. Yog lawv txoj kev ua neeg zoo, lawv yeej yuav tsis ntxeev qhov tseeb thiab qhov cuav. Kev hais lus yuav tsum hais los ntawm lub siab txawj xav thiab kev paub tias dab tsi yog qhov tsim nyog; tsis tuaj yeem pheej lam tau lam hais tej laj thawj uas nkhaus thiab tej lus cuav. Lub hauv paus ntawm kev ntxeev qhov tseeb thiab qhov cuav yog txoj kev ua neeg phem. Txawm cov neeg zoo li no yuav hais dab tsi los xij yeej tsis zoo mloog li; muab hais kom tsis txhob hnyav heev ces, lawv tab tom txiav txim lwm tus, tiam sis tseeb tiag, lawv cov lus muaj kev npaj siab phem los teem txim thiab foom phem, thiab muaj kev ua ntsiag to kom neeg tsis sib haum xeeb, kev khib, kev tsis kam zwm rau, kev ntxub, thiab haj tseem muaj kev tsuj tib neeg ntxiv thaum tib neeg ntog thiab. Muab hais luv luv hais tias, tej no yog cov yam ntxwv tseem ceeb ntawm lawv txoj kev ntxeev qhov tseeb thiab qhov cuav. Dhau li ntawm cov yam ntxwv no lawm, cov neeg zoo li no tseem muaj ib yam uas zoo ib yam nkaus: Lawv ntxub cov neeg uas muaj tej yam uas lawv tsis muaj, thiab luag thuam cov neeg uas tsis muaj tej yam uas lawv muaj. Lawv txoj kev ua neeg puas zoo? (Tsis zoo.) Hom neeg zoo li no, uas ntxub cov neeg uas muaj tej yam uas lawv tsis muaj, thiab luag thuam cov neeg uas tsis muaj tej yam uas lawv muaj, khib leej twg uas zoo dua lawv thiab hais lus phem txog tus ntawd nyob rau tom qab nraub qaum, txiav txim thiab teem txim rau cov neeg ntawd; tiam sis, yog leej twg qis dua lawv, lawv yuav luag thuam, npaj txhij los thuam, hais lus nkaug, thiab saib tsis taus tus neeg ntawd. Lawv tsis tuaj yeem nkag siab ib yam twg kom yog, los sis coj rau qhov ntawd raws li txoj kev ua neeg lub hauv paus kev coj ncaj ncees uas tsawg tshaj plaws. Tsis tas lawv yuav foom koob hmoov rau leej twg, tsis tas lawv yuav xav kom leej twg tau zoo los sis xav kom txhua yam mus raws li lub siab xav, los sis xav kom cov neeg ntawd taug txoj kev yog; tiam sis, yam tsawg kawg, lawv yuav tsum ntsuas lwm tus kom yog yam tsis muaj kev phem nyob hauv siab—lawv haj tseem twb ua tsis tau qhov no thiab. Lub hauv paus laj thawj rau lawv txoj kev ntxeev qhov tseeb thiab qhov cuav yog dab tsi? Pom tseeb hais tias, los ntawm lawv txoj kev hais lus, thiab los ntawm lawv tus cwj pwm uas coj rau lwm tus, thiab los ntawm yam uas lawv xav thiab txoj kev uas lawv coj rau lwm tus nyob tob tob hauv lawv lub siab, yeej pom tau meej tias hom neeg zoo li no txoj kev ua neeg mas lim hiam heev. Txawm hais tias hom neeg zoo li no tsuas siv lawv lub qhov ncauj los ntxeev qhov tseeb thiab qhov cuav xwb los xij, nyob rau tom qab nraub qaum ntawm tej kev ua no mas muaj tej yam uas lawv xav ua kom tiav thiab tej hom phiaj uas lawv xav kom tau, nrog rau lawv tej kev xam pom thiab tej cwj pwm tiag tiag uas coj rau tib neeg thiab tej yam, uas nyob tob tob hauv lawv lub siab. Tam sim no xub muab qhov seb cov uas nyiam ntxeev qhov tseeb thiab qhov cuav ntawd nkag siab qhov tseeb zoo li cas, thiab seb lawv puas yog cov neeg uas nyiam qhov tseeb ntawd tso rau ib sab ua ntej, raws li tus yam ntxwv ntawm lawv txoj kev ua neeg no—qhov nyiam ntxeev qhov tseeb thiab qhov cuav—lawv puas tuaj yeem coj tau tej yam uas zoo los sis muaj txiaj ntsim los rau cov kwv tij thiab cov nkauj muam nyob hauv pawg ntseeg? (Tsis muaj.) Yeej tsis muaj kiag li!

Cia peb saib qee yam piv txwv ntxaws ntxaws los saib seb cov uas ntxeev qhov tseeb thiab qhov cuav ntawd muaj tej kev qhia tshwm dab tsi. Piv txwv hais tias, muaj ib tug nkauj muam uas nws tsev neeg muaj nyiaj heev, tiam sis vim yog xav tshaj tawm txoj moo zoo thiab ua tim khawv rau Vajtswv, nws thiaj li tso tej kev tau zoo ntawm sab cev nqaij daim tawv tseg thiab tawm hauv tsev mus ua nws tes dej num. Qhia Kuv seb, cov neeg li ib txwm yuav saib qhov no li cas? Lawv tsis qhuas thiab ntshaw nws lod? Yam tsawg kawg, lawv yuav xav hais tias tus nkauj muam ntawd tsim nyog qhuas thiab tsim nyog xyaum raws vim nws tuaj yeem tso tej kev tau zoo ntawm sab cev nqaij daim tawv tseg los ua nws tes dej num. Tiam sis cov uas nyiam ntxeev qhov tseeb thiab qhov cuav ntawd hais txog nws li cas? Lawv hais tias, “Nws tso lub neej ntawm ib tug neeg muaj nyiaj tseg es tawm mus tshaj tawm txoj moo zoo tas hnub; yog nws tseem ua li no mus ntxiv, tsis ntev los luv nws tus txiv yeej yuav ntiab nws tawm! Kev ntseeg vajtswv tsis yog tsuas txhawm rau kom tau txais tej koob hmoov thiab kev xyiv fab rau tus kheej xwb lod? Saib nws seb, muaj tej koob hmoov tiam sis tsis paub xyiv fab rau, tso nws tsev neeg thiab tes hauj lwm tseg los ua nws tes dej num kawg siab kawg ntsws; qhov ntawd tsis ruam lod? Yog kuv tsev neeg muaj nyiaj npaum li ntawd, kuv yuav nyob xyiv fab hauv tsev xwb.” Qhia Kuv seb, nyob hauv cov lus ntawd puas muaj ib kab lus twg uas mus raws li txoj kev ua neeg, uas txhawb lwm tus? (Tsis muaj.) Cov uas muaj kev paub cais me ntsis, thaum hnov li no, yuav xav hais tias, “Qhov no tsis yog kev ntxeev qhov tseeb lod? Qhov uas ib tug neeg ntseeg tso txhua yam tseg los muab lawv tus kheej fij rau Vajtswv, thiab tsis caum tej kev tau zoo ntawm sab khoom siv ntawd mas yeej ib txwm yog ib yam uas zoo, tiam sis lawv haj tseem teem txim rau qhov ntawd thiab.” Yog ib tug neeg uas tsis muaj kev paub cais hnov li no, lawv yuav raug coj mus yuam kev thiab raug cuam tshuam; lawv lub zog rau kev ntseeg Vajtswv, thiab lawv lub zog rau kev tso tej yam tseg thiab muab lawv tus kheej fij los ua lawv tes dej num yuav raug txo qis heev kiag tam sim ntawd. Txawm hais tias cov uas nyiam ntxeev qhov tseeb thiab qhov cuav ntawd cov lus yuav tsawg los xij, qhov kev cuam tshuam tsis zoo uas lawv ua rau lwm tus ntawd mas loj heev, txaus ua rau ib tug neeg xav tsis zoo tau ib ntus thiab zoo tsis tau rov qab los. Qhov no puas yog li ntawd tiag? (Yog.) Tsuas yog ob peb lo lus uas mloog zoo li muaj tseeb xwb twb tuaj yeem lom tau qee tus neeg thaum lawv hnov lawm. Qhov no qhia li cas txog txoj kev ua neeg ntawm cov uas tuaj yeem hais tau tej lus lom zoo li no? (Muaj txoj kev ua neeg phem.) Nyob hauv lawv cov lus ntawd puas muaj ib kab lus twg uas tuaj yeem ua rau ib tug neeg txoj kev ntseeg loj hlob ntxiv tom qab hnov lawm? (Tsis muaj.) Txhua lo lus no yog dab tsi? Muab hais dav dav ces, tag nrho tej no puav leej yog cov tsis ntseeg cov lus; tsis muaj ib kab lus twg uas tsim nyog hais tawm los ntawm cov uas raws Vajtswv qab. Muab hais kom ntxaws dua ces, tsis muaj ib kab lus twg uas cov neeg no hais uas qhia tau txog txoj kev ua neeg kiag li. Qhov tsis muaj txoj kev ua neeg txhais li cas? Qhov ntawd txhais hais tias tab txawm yog kev coj ncaj ncees los twb tsis muaj thiab. Qhov tsis muaj tej kev coj ncaj ncees txhais li cas? Tus nkauj muam ntawd muaj kev ua neej nyob zoo thiab muaj ib tsev neeg muaj nyiaj, es cov neeg no tus cwj pwm yog dab tsi? Qhov ntawd puas yog tsuas ntshaw es tom qab ntawd foom koob hmoov rau ces tag li ntawd xwb? (Tsis yog.) Yog li ntawd, lawv tus cwj pwm yog dab tsi? Kev khib, kev npau taws, kev ntxub ntxaug, thiab khaws kev yws nyob hauv lawv lub siab: “Nws puas tsim nyog muaj nyiaj ntau npaum li ntawd? Vim li cas kuv tsis muaj nyiaj ntau npaum li ntawd? Vim li cas vajtswv foom koob hmoov rau nws es tsis foom koob hmoov rau kuv?” Tus nkauj muam ntawd muaj nyiaj thiab muaj txhua yam, yog li ntawd lawv thiaj li khib thiab ntxub, yam tsis muaj ib lo lus qhuas los sis foom koob hmoov tiag tiag li. Qhov no qhia tau tias txawm yog txoj kev coj ncaj ncees uas tsawg tshaj plaws los lawv yeej tsis muaj kiag li. Tus nkauj muam ntawd nplua nuj, yog li ntawd lawv thiaj li khaws kev ntxub, yuav luag txog theem uas yuav txeeb los sis dag nws tej khoom. Tsis tas li ntawd xwb, tus nkauj muam no nyob hauv ib tsev neeg nplua nuj, tiam sis nws tuaj yeem tso tej kev ua neej nyob zoo thiab tej kev tau zoo ntawm sab khoom siv tseg es tawm mus ua nws tes dej num; rau ib tug ntseeg Vajtswv mas, qhov no yog ib yam uas tsim nyog tau txais kev zoo siab nrog, tsim nyog tau txais kev qhuas thiab kev ntshaw. Tib neeg yuav tsum foom koob hmoov rau nws, thiab nrhiav kev los txav ze nws thiab xyaum raws li nws. Tiam sis cov neeg uas nyiam ntxeev qhov tseeb thiab qhov cuav no puas muaj ib lo lus zoo li no hais? (Tsis muaj.) Lawv hais lus li cas? Txhua kab lus puav leej muaj tej lus heev thiab muaj kev ntxub nyob hauv. Vim li cas lawv thiaj li tuaj yeem hais lus li no? Qhov ntawd yog vim lawv tsis txaus siab thiab tsis haum siab rau lawv tus kheej qhov xwm txheej, es khaws kev ntxub rau hauv siab, thiab yog li ntawd lawv thiaj li tso lawv txoj kev npau taws rau tus nkauj muam uas muaj nyiaj no. Ua ib tug ntseeg Vajtswv, tshwj xeeb yuav tsum saib taus, qhuas, xyaum raws, thiab kawm los ntawm cov uas tuaj yeem nquag plias ua lawv tes dej num thiab caum qhov tseeb. Tiam sis lawv tsis yog tsis paub kawm los ntawm tus nkauj muam ntawd tej qhov zoo los pab ntxiv rau lawv tus kheej tej qhov tsis zoo xwb, cov neeg no haj tseem luag thuam tus nkauj muam ntawd tias ruam thiab haj tseem cia siab tias nws tus txiv yuav nrauj nws; lawv tab tom tos saib nws qhov kev txom nyem. Yog tus nkauj muam ntawd raug nws tus txiv nrauj tiag tiag, tsis yog lawv yuav zoo siab lod? Lawv lub siab xav tsis tau tiav lawm lod? Qhov no yog lawv tej kev xav tiag tiag, nrog rau lawv txoj kev npaj siab thiab lub hom phiaj. Lawv tsis xav kom lwm tus zoo; qhov uas pom leej twg uas zoo los sis leej twg uas ua tau zoo dua lawv ntawd ua rau lawv muaj kev khib thiab kev ntxub puv npo. Txawm hais tias lwm tus txoj kev ntseeg Vajtswv yuav loj npaum li cas los xij, yog tus neeg ntawd zoo dua lawv ces yeej tsis tau kiag li. Lawv yeej tsis muaj txoj kev ua neeg kiag li, thiab hais tsis tau ib lo lus foom koob hmoov los sis txhawb lwm tus kiag li. Vim li cas lawv thiaj li hais tsis tau tej lus zoo li no? Vim lawv txoj kev ua neeg phem dhau lawm! Tsis yog tias lawv tsis xav hais, los sis tias lawv tsis muaj cov lus uas yog; tiam sis, qhov ntawd yog vim lawv lub siab muaj kev khib, kev ntxub ntxaug, thiab kev npau taws puv npo, es ua rau lawv yeej hais tsis tau tej lus foom koob hmoov li. Yog li ntawd, qhov uas lawv lub siab muaj tej yam qias vuab tsuab zoo li no puv npo puas qhia tau tias lawv txoj kev ua neeg ntawd lim hiam? (Qhia tau.) Qhov ntawd qhia tau. Vim lawv nthuav cov moj yam qias vuab tsuab zoo li no tawm, qhov ntawd thiaj li yooj yim rau lwm tus paub cais, thiab lwm tus tuaj yeem pom tshab lawv lub ntsiab tseeb uas qias vuab tsuab.

Cia peb muab lwm qhov piv txwv. Muaj ib tug nkauj muam uas, ua ntej nws ntseeg Vajtswv, nws ib txwm muaj kev tsis sib haum xeeb nrog nws tus niam tij los sis niam ntxawm. Tom qab no, nkawd ob leeg txawm pib ntseeg Vajtswv thiab, los ntawm kev noj thiab haus Vajtswv cov lus, nkawd thiaj li to taub qee yam qhov tseeb. Nkawd paub tias yuav coj tus kheej li cas thiab yuav nrog lwm tus sib raug zoo li cas, thiab thaum nkawd nthuav tawm txoj kev qias vuab tsuab ntawd nkawd tuaj yeem ib leeg qhib siab rau ib leeg thiab paub nkawd tus kheej, uas ua rau nkawd txoj kev sib raug zoo yim sib haum xeeb zuj zus tuaj. Ib txhia tib neeg thiaj li ntshaw nkawd thiab hais tias, “Saib nkawd seb, tag nrho ib tsev neeg puav leej ntseeg Vajtswv thiab ob tug niam tij niam ntxawm ntawd zoo ib yam li ob tug viv ncaus tiag tiag. Qhov ntawd tsis yog vim nkawd txoj kev ntseeg Vajtswv lod? Cov tsev neeg ntawm cov ib txwm tsis ntseeg yeej sib haum tsis tau kiag li, pheej sib cav thiab sib txeeb, txawm yog cov kwv tij viv ncaus uas ib leej niam yug los xij. Cov ntseeg mas zoo dua lawm ntau; txawm ob tug niam tij niam ntxawm ntawd tsis yog viv ncaus tiag tiag los xij, tsuav nkawd ntseeg Vajtswv, muaj lub hom phiaj zoo ib yam los caum, taug tib txoj kev, thiab muaj cov lus zoo ib yam hais, nkawd yeej sib haum nyob rau hauv tus ntsujplig, uas yog ib yam uas zoo heev!” Qhov no qhia tau hais tias cov uas ntseeg Vajtswv tiag tiag yeej txawv ntawm cov ib txwm tsis ntseeg. Cov tib neeg uas tuaj ntawm ntau tsev neeg uas sib txawv tuaj sib sau ua ke nrog rau tej hom phiaj thiab tej kev caum uas zoo ib yam, sib haum tau nyob hauv Vajtswv lub tsev thiab nyob ntawm Vajtswv lub xub ntiag. Lub hom phiaj ntawm qhov kev hais li no yog kom tib neeg paub tias qhov no yog qhov txiaj ntsig ntawm Vajtswv cov lus thiab tes hauj lwm, uas yog ib txoj hmoov hlub uas Vajtswv muab rau tib neeg. Qhov no yog ib yam uas cov tsis ntseeg tsis muaj thiab tsis tuaj yeem xyiv fab rau tau. Yam tsawg kawg nkaus, tom qab hnov li no lawm, ib tug neeg yeej yuav xav tias qhov uas ntseeg Vajtswv ntawd mas zoo thiab muaj kev xav zoo txog txoj kev ntseeg Vajtswv. Tiam sis mloog seb tus neeg uas nyiam ntxeev qhov tseeb thiab qhov cuav ntawd hais li cas txog qhov no: “Hwj! Koj pom ob tug niam tij niam ntxawm ntawd sab nraud zoo li sib haum xeeb, txhua yam zoo nyob rau thaum muaj kev sib txoos ua ke—tiam sis qee zaus nkawd tsis sib cav thiab lod? Koj tsis paub xwb, yav tas los mas nkawd sib cav hnyav npaum li cas!” Lwm tus hais tias, “Nkawd tej kev sib cav thiab kev sib ceg yav tas los yog vim nkawd tsis ntseeg Vajtswv thiab tsis to taub qhov tseeb. Tam sim no nkawd sib haum xeeb heev lawm! Qhov no yog vim nkawd ob leeg ntseeg Vajtswv lawm, to taub qee yam qhov tseeb, thiab tuaj yeem ib leeg qhib siab rau ib leeg nyob rau hauv txoj kev sib qhia thiab paub nkawd tus kheej tej kev qias vuab tsuab, thiab nquag ua nkawd tej dej num ua ke. Txawm hais tias tseem muaj kev sib txhuam me ntsis nyob hauv nkawd los xij, feem ntau nkawd tuaj yeem ib leeg lees tej kev txhaum rau ib leeg, thiab sib tham txog txhua yam uas nkawd ua. Qhov no yog ib yam uas tsis muaj ib tug ib txwm tsis ntseeg twg yuav ua tau, txawm yog nrog lawv cov kwv tij viv ncaus tiag tiag los xij.” Tiam sis, tus neeg uas ntxeev qhov tseeb thiab qhov cuav ntawd hais tias, “Tsev neeg twg tsis muaj tej kev sib cav? Tsis tas hais txog ob tug niam tij niam ntxawm, tab txawm yog ob tug viv ncaus tiag tiag los kuj sib cav thiab, tsis yog lod? Qhov kev sib haum xeeb uas nkawd muaj tam sim no tsuas yog ua txuj rau lwm tus saib xwb. Thaum nkawd tus txiv yawg tuag lawm, kuv yeej tsis ntseeg tias nkawd yuav tsis sib txeeb qub txeeg qub teg li! Txoj kev ntseeg vajtswv tsis yog tias tsuas yog ib qho kev cia siab, ib hom kev nplig siab ntawm sab ntsujplig xwb lod? Nkawd puas tuaj yeem tso nyiaj txiag ntau npaum ntawd tseg vim qhov ntseeg vajtswv ntawd tiag? Yeej tsis tau kiag li!” Nyob hauv cov lus no puas muaj ib kab lus twg uas mus raws li qhov muaj tseeb? Puas muaj ib qho kev xav kom tib neeg tau zoo, puas muaj ib qho kev foom koob hmoov? (Tsis muaj.) Puas muaj ib lo lus twg uas qhia txog tus kheej txoj kev xav tias kev ntseeg Vajtswv yeej zoo tiag tiag, thaum pom lwm tus tau xyiv fab rau Vajtswv txoj hmoov hlub zoo ib yam li lawv tus kheej thiab? (Tsis muaj.) Nyob hauv cov uas ntxeev qhov tseeb thiab qhov cuav ntawd lub qhov muag mas, tej kev hloov ntawm cov kwv tij thiab cov nkauj muam no puav leej yog kev dag; qhov kev tau txais qhov tseeb thiab tej kev hloov nyob hauv tus moj yam uas los ntawm kev ntseeg Vajtswv mas puav leej yog qhov cuav; lawv tsis ntseeg tias Vajtswv ntxuav tau tib neeg kom dawb huv, tias Vajtswv hloov tau tib neeg. Los ntawm lawv cov lus, ib tug neeg tsis yog tsuas pom lawv txoj kev lam tau lam txiav txim, kev ntxub, thiab kev foom phem rau tib neeg xwb, tiam sis kuj pom lawv txoj kev tsis ntseeg thiab kev tsis lees paub txog qhov txiaj ntsig uas tau los ntawm Vajtswv tes hauj lwm thiab cov lus uas ua rau tib neeg ntawd. Ob tug niam tij niam ntxawm ntawd muaj ib txoj kev sib raug zoo uas zoo, thiab ib leeg thev taus thiab ua siab ntev rau ib leeg thaum nkawd nyob ua ke, vim nkawd txoj kev ntseeg Vajtswv. Tus neeg uas nyiam ntxeev qhov tseeb thiab qhov cuav no hnov tsis xis nyob thiab tsis txaus siab nyob hauv lawv lub siab, yog li ntawd lawv thiaj li sim txhua txoj kev los ua kom ob tug niam tij niam ntxawm ntawd tsis sib haum xeeb, thiab lawv yuav zoo siab yog lawv tuaj yeem ua rau ob tug niam tij niam ntxawm ntawd sib cav thiab sib ntaus thaum sib ntsib. Qhov no yog hom cwj pwm dab tsi? Qhov no yog hom kev xav dab tsi? Thaum saib los ntawm lawv txoj kev xav, qhov no tsis yog qhov txawv txav me ntsis lod? (Yog.) Hais txog lawv tus cwj pwm, qhov ntawd tsis yog ib lub ntsej muag phem lod? (Yog.) Tiam sis, hom neeg zoo li no tseem tuaj koom lub neej hauv pawg ntseeg, thiab nyob hauv cov uas ua lawv tej dej num, yeej muaj cov neeg zoo li lawv ntau heev. Cov neeg no feem ntau raug hu ua cov uas muaj “lub qhov ncauj phem.” Qhov tseeb tiag, tsis yog tias lawv lub qhov ncauj phem xwb; lawv lub ntiaj teb nyob sab hauv nruab siab mas tsaus ntuj nti thiab muaj tshuaj lom heev! Txawm cov kwv tij thiab cov nkauj muam yuav sib qhia cov lus tim khawv uas hais txog txoj kev ntsib kev pom uas zoo npaum li cas los xij, nyob hauv lawv lub qhov muag mas, tej no puav leej yog tib neeg ua thiab xav xwb, thiab tsis muaj ib yam dab tsi uas tshwj xeeb txog tej ntawd li. Txawm Vajtswv yuav ua tes hauj lwm txiav txim thiab rau txim rau leej twg, uas ua rau tau txais txiaj ntsig loj heev, es lawv tuaj yeem sawv los thiab qhia lawv txoj kev ntsib kev pom thiab ua tim khawv rau Vajtswv—nyob tob tob hauv lawv lub siab, cov neeg no saib tsis taus qhov ntawd, xav hais tias, “Qhov ntawd muaj dab tsi zoo ua luaj li? Tom qab mloog ntau zaj lus qhuab qhia lawm, leej twg yuav tsis muaj kev to taub me ntsis? Koj tsuas sau ib tsab ntawv txog cov lus tim khawv uas hais txog txoj kev ntsib kev pom ces koj txawm siv txaus siab lawm, xam tias koj tus kheej yog ib tug kov yeej lawm? Kuv xav saib seb koj puas tseem yuav yws txog vajtswv thaum tej yam tsis mus raws li kev npaj rau yav tom ntej. Yog vajtswv muab koj tus me nyuam txeeb mus lawm, kuv xav saib seb koj puas quaj, thiab seb koj puas tseem ntseeg vajtswv tau ntxiv thaum ntawd!” Nej xav tias muaj dab tsi nyob puv nkaus hauv lawv lub siab? Qhov ntawd tsis yog ib qho kev xav kom tag nrho lub ntiaj teb ntxhov quav niab, ib qho kev ntshai tsam tib neeg taug txoj kev yog lod? Muab hais luv luv hais tias, txawm muaj dab tsi tshwm sim nyob hauv leej twg tsev neeg los xij, lawv yeej yuav tawm tswv yim txog qhov ntawd, tiam sis txawm lawv yuav hais li cas los xij, cov neeg no puav leej muaj ib tug yam ntxwv, uas yog lawv cia siab tias yuav tsis muaj leej twg tau zoo—lawv hais txog txhua tus cuag nkaus li txhua tus yeej tsis muaj nqis kiag li; ua rau lawv zoo siab thaum hais txog lwm tus zoo li yog cov khoom siv tsis tau, thiab lawv ib txwm zoo siab thaum lwm tus raug xwm txheej phem. Yog leej twg muaj ib tse neeg muaj nyiaj, lawv yuav khib, npau taws, thiab ntxub, pheej yws nyob hauv lawv lub siab, thiab xav kom Vajtswv txeeb tus neeg ntawd cov nyiaj txiag thiab txoj hmoov hlub uas tus neeg ntawd xyiv fab rau ntawd, thiab muab rau lawv tus kheej. Cov lus yws uas cov neeg no hais nyob tom qab lwm tus nraub qaum ntawd mas mloog tsis taus kiag li. Lawv puas zoo li cov ntseeg Vajtswv ib qho me me li? Muaj tseeb tiag, hom neeg zoo li no kuj txawj ua txuj thiab. Txawm lawv lub siab yuav lim hiam los sis tsaus ntuj npaum li cas los xij, thaum nyob ntawm cov kwv tij thiab cov nkauj muam xub ntiag thaum muaj kev sib txoos ua ke, lawv kuj yuav qhia txog lawv txoj kev to taub thiab kev xam pom thiab, hais tej kev qhuab qhia loj loj los ua txuj, tsim ib tug yam ntxwv “ci ntsa iab” thiab zoo rau lawv tus kheej. Tiam sis nyob tom qab nraub qaum, lawv tsis hais lus los sis ua yam li tib neeg. Cov tib neeg feem coob, yog tsis tau nrog cov neeg no sib cuag thiab tsis paub cov neeg no tej kev qhia tshwm tiag tiag los sis tej uas nyob hauv lawv lub siab tob tob, tsuas yog hnov lawv hais lus uas yog thaum muaj tej kev sib txoos ua ke xwb, yuav tsis pom tias lawv txoj kev ua neeg ntawd qias neeg los sis tsiv nyaum npaum li cas, los sis lawv tus cwj pwm ua neeg ntawd qis npaum li cas, tiam sis haj tseem yuav xav tias lawv zoo thiab. Tsuas yog tom qab sib cuag nrog lawv sij hawm ntev lawm thiab to taub txog lawv tej kev ua thiab txoj kev coj hauv lub neej nyob tom qab nraub qaum xwb, tib neeg thiaj li maj mam paub cais lawv thiab hnov qias. Yog li ntawd, kev paub cais ib tug neeg yuav tsum tsis txhob tsuas saib raws li cov lus zoo uas lawv hais thaum muaj tej kev sib txoos ua ke xwb; yuav tsum tau saib lawv tej kev ua thiab cov lus hauv lub neej nyob tom qab nraub qaum kom thiaj li pom tshab lawv lub ntsiab tseeb thiab lub ntsej muag tiag tiag.

Dhau li ntawm qhov uas tsis hais lus li tib neeg lawm, hom neeg uas nyiam ntxeev qhov tseeb thiab qhov cuav no tseem muaj lwm tus yam ntxwv: Lawv xav tawm tswv yim txog txhua tus thiab txhua yam, tab txawm yog cov uas lawv tsis paub los sis tsis tau sib cuag nrog, thiab txawm yog tej yam me me nyob hauv lwm tus lub neej xwb los lawv yeej tsis tso tseg li. Qhov ua tau los ntawm lawv txoj kev tawm tswv yim ntawd mas, txawm hais tias ib yam dab tsi yuav zoo npaum li cas los xij, lawv txoj kev tawm tswv yim yeej muab ntxeev ua qhov tsis zoo; txawm hais tias ib yam dab tsi yuav tsim nyog npaum li cas los xij, qhov ntawd yeej raug ntxeev ua ib yam uas tsis zoo thaum tawm ntawm lawv lub qhov ncauj qias neeg los. Qhov no ua rau lawv zoo siab, ua rau lawv noj qab thiab pw tsaug zog. Qhia Kuv seb, qhov no yog hom niag dab tsi? Piv txwv li, yog xyoo no qee cov kwv tij thiab cov nkauj muam tau nyiaj ntau thiab muaj nyiaj txiag zoo dua—es muab fij ntau dua me ntsis, ntau dua li ib feem kaum—lawv yuav khib thiab hais tias, “Vim li cas xyoo no koj thiaj li muab khoom fij ntau ua luaj? Qhov uas vajtswv txiav txim seb ib tug neeg ntawd zoo los sis phem tsis yog raws li qhov koj muab khoom fij ntau npaum li cas. Koj kub siab ua luaj ntawd muaj qab hau dab tsi? Vajtswv lub tsev tsis txom nyem nyiaj txiag.” Cov lus phem ntawd rov tawm los dua lawm, tsis yog lod? Txawm leej twg ua ib yam dab tsi uas tsim nyog, los sis ua ib yam dab tsi uas mus raws li qhov tseeb los xij, lawv yeej saib tsis khuab qhov muag, thiab hnov tsis nyiam kiag li nyob hauv siab. Lawv nrhiav txhua txoj kev kom tuav tau koj qhov tsis zoo, nrhiav kev hais ub hais no los tawm tsam, liam, thiab teem txim rau koj, mus txog thaum lawv ntaus koj kom vau thiab ua rau koj xav tsis zoo, ua rau koj paub tsis meej tag nrho, thiab tsis paub cais seb qhov twg yog qhov yog thiab qhov twg yog qhov tsis yog. Tom qab ntawd lawv luag nrov nrov, nyob hauv siab mas lawv luag thuam koj thiab hais tias, “Koj tsuas muaj npaum li no xwb, tiam sis koj tseem tham cov lus tim khawv uas hais txog txoj kev ntsib kev pom thiab!” Qhov no tsis yog ib tug dab nthuav nws lub ntsej muag tiag tiag tawm lod? Tej no tsis yog cov lus hais ntawm Ntxwgnyoog ib tug tub qhe, ib tug tawm tsam khetos lod? (Yog.) Thaum Kuv yim hais txog hom neeg zoo li no, Kuv yim hnov npau taws thiab xeev siab. Nej puas tau ntsib cov neeg zoo li no dua? Txawm lawv qhov tsos sab nraud los sis lawv lub ntsej muag zoo li cas los xij, thaum twg lawv yuav ntxeev qhov tseeb thiab qhov cuav mas, lawv tus yam ntxwv ntawm lub ntsej muag yuav txawv heev: daim di ncauj zij, lub ntsiab muag lem, tsis ntsia lwm tus ncaj ncaj lawm, thiab qee tus neeg lub ntsej muag haj tseem zoo li txav chaw lawm thiab. Qhov no yog ib qho cim qhia uas xa tuaj rau koj, qhia rau koj tias lawv tab tom yuav hais lus tsis zoo li tib neeg. Yog li ntawd koj yuav ua li cas? Koj yuav txais lub cim qhia no los sis kaw lub cim qhia ntawd? (Kaw lub cim ntawd.) Koj yuav tsum nyob kom deb, qhia rau lawv tias: “Tsis txhob hais; kuv tsis xav hnov. Koj hais lus xaiv ntau dhau lawm. Yog koj tsis hais lus li tib neeg, ces nyob kom deb ntawm kuv. Kuv tsis xav raug koj cuam tshuam; kuv tsis xav poob rau hauv tej kev sib raug zoo uas tsis tsim nyog no, kuv yuav tsis quav ntsej tus neeg zoo li koj.” Ua tib zoo soj ntsuam thiab saib seb leej twg nyob hauv nej nyiam ntxeev qhov tseeb thiab qhov cuav, leej twg muaj tus cwj pwm zoo li no, ces maj nroos nyob kom deb ntawm lawv. Tus yam ntxwv ntawm cov neeg no txoj kev ua neeg yog dab tsi? Qhov ntawd yog qhov hais lus lim hiam, los sis muab hais raws li lus dog dig ces, muaj “lub qhov ncauj phem.” Los ntawm kev nthuav lawv cov lus phem tawm, koj tuaj yeem pom ntau yam lus uas lawv tso tawm; los ntawm lawv cov lus, koj tuaj yeem pom lawv lub ntiaj teb nyob sab hauv, thiab txiav txim seb lawv txoj kev ua neeg lub ntsiab tseeb yog dab tsi, thiab seb lawv puas yog tib neeg phem. Hom neeg uas nyiam ntxeev qhov tseeb thiab qhov cuav no, los ntawm ntau yam cim qhia thiab cov lus uas lawv tso tawm, ua rau lwm tus tuaj yeem txiav txim tau meej meej tias lawv yog tib neeg phem. Hom neeg zoo li no yeej mus raws nraim li tus qauv rau kev ntsaig tawm mus los sis ntiab tawm mus; yuav tsum txhob muaj kev hlub tshua rau lawv kiag li. Yuav tsum ntsaig lawv tawm mus, thiab tsis pub lawv ua rau muaj kev cuam tshuam nyob hauv pawg ntseeg.

Peb nyuam qhuav sib qhia txog cov yam ntxwv ntawm hom neeg uas nyiam ntxeev qhov tseeb thiab qhov cuav, thiab tsim nyog saib tawm los ntawm qhov xwm txheej ntawm lawv txoj kev ntseeg Vajtswv thiab los ntawm lawv txoj kev ua neeg tej kev qhia tshwm tias lawv yog hom neeg uas tsis nyiam qhov tseeb kiag li, thiab yog cov uas tsis nyiam qhov tseeb. Lawv txoj kev ua neeg ntawd phem mus txog theem uas tsis pom qab hais li, thiab txawm yog txoj kev ua neeg lub hauv paus kev coj ncaj ncees uas tsawg tshaj plaws xwb los twb tsis muaj; qhov ntawd tsuas yog tias nyob hauv lawv qhov xwm txheej tshwj xeeb no, tus yam ntxwv ntawm lawv txoj kev ua neeg uas tsis zoo yog qhov lawv nyiam ntxeev qhov tseeb thiab qhov cuav tshwj xeeb. Los ntawm cov lus uas lawv hais tawm, ib tug neeg tuaj yeem pom tus yam ntxwv ntawm lawv txoj kev ua neeg, thiab lawv txoj kev ua neeg lub ntsiab tseeb; pom tseeb hais tias, hom neeg zoo li no yog cov neeg uas muaj txoj kev ua neeg tsis zoo. Lawv txoj kev ua neeg ntawd tsis zoo txog theem twg? Txoj kev ua neeg ntawd tsis zoo txog theem uas phem, yog li ntawd thiaj li muab tso rau hauv pawg tib neeg phem. Qhov no yog vim cov lus uas lawv ib txwm hais ntawd tsis yog qhov uas qee zaus yws yws, thiab nthuav kev khib me ntsis tawm, los sis qee zaus qhia txog txoj kev ua neeg qaug zog me ntsis xwb; lawv tej kev qhia tshwm tsis yog tej uas ib txwm muaj ntawm tus moj yam qias vuab tsuab dog dig, tiam sis txaus los ua pov thawj tias lawv tuaj yeem raug muab cais tias yog cov tib neeg phem. Qhov no yog thawj hom neeg: cov uas nyiam ntxeev qhov tseeb thiab qhov cuav.

B. Nyiam Tau Txiaj Ntsim Dawb

Hom tib neeg ob yog cov uas nyiam tau txiaj ntsim dawb. Ib txhia tib neeg yeej yuav muaj tej kev xav phem thaum hais txog kev sib qhia txog qhov nyiam tau txiaj ntsim dawb, lawv xav tias, “Tus noob neej qias vuab tsuab twg thiaj li tsis nyiam tau txiaj ntsim dawb? Qhov no yog tib neeg tus yam ntxwv xeeb txawm; tsuav yog tsis ua phem xwb, qhov tau txiaj ntsim dawb me ntsis ntawd ho ua cas?” Qhov kev nyiam tau txiaj ntsim dawb uas peb tab tom sib qhia nyob ntawm no mas hla dhau cov tib neeg li ib txwm txoj kev nyiam tau txiaj ntsim dawb lawm—qhov ntawd mus txog theem uas yog kev phem lawm. Yeej yuav tsum muaj ntau tus tib neeg zoo li no nyob hauv pawg ntseeg, los sis yam tsawg kawg nkaus los yeej muaj ib feem. Lawv siv lub npe tias “peb puav leej yog cov kwv tij thiab cov nkauj muam” los ua kev tau txiaj ntsim dawb rau txhua qhov chaw, nrhiav kom tau txiaj ntsim dawb nyob nruab nrab ntawm cov kwv tij thiab cov nkauj muam, nyob hauv Vajtswv lub tsev, thiab nyob hauv pawg ntseeg. Lawv nrhiav kom tau txiaj ntsim dawb txog dab tsi? Piv txwv li, yog lawv tsev neeg xav yuav ib lub tsev tiam sis lawv tsis muaj nyiaj txaus, lawv tsis mus qiv ntawm cov txheeb ze los sis cov phooj ywg, thiab lawv tsis mus qiv nyiaj hauv tuam txhab nyiaj; lawv mus qiv ntawm cov kwv tij thiab cov nkauj muam, yam uas tsis hais txog cov paj nyiaj txais, los sis seb thaum twg lawv mam li them rov qab—lawv tsuas qiv xwb. Qhov hais tias lawv “qiv” ntawd tsuas yog hais kom zoo mloog xwb; qhov tseeb tiag ces lawv tsuas yog thov dawb xwb, vim lawv yeej tsis npaj siab them cov nyiaj ntawd rov qab los sis them cov paj nyiaj txais li. Vim li cas lawv thiaj li mus thov ntawm cov kwv tij thiab cov nkauj muam? Lawv xav tias vim sawv daws puav leej yog cov kwv tij thiab cov nkauj muam, ces yuav tsum sib pab thaum ntsib kev nyuaj, thiab yog leej twg tsis pab, ces tus ntawd tsis yog ib tug kwv tij los sis ib tug nkauj muam. Yog li ntawd, lawv thiaj li mus qiv nyiaj ntawm cov kwv tij thiab cov nkauj muam, nrhiav ntau qhov laj thawj los ua kom cov kwv tij thiab cov nkauj muam xav tias qhov muab nyiaj qiv rau lawv ntawd yog ib yam uas tsim nyog ua. Tseem muaj ib txhia tib neeg pom tias ib tug kwv tij los sis ib tug nkauj muam tsev neeg muaj ib lub tsheb ces lawv pheej xav txog lub tsheb ntawd, thiab ob peb hnub ces pheej mus qiv. Lawv qiv lub tsheb ntawd lawm tiam sis tsis xa rov qab li, thiab tsis sam roj rau, thiab qee zaus mas haj tseem ua rau lub tsheb ntawd hmlos los sis tsoo puas lawm thiab. Thaum lawv pom tej zaub mov qab, tej khoom siv zoo, los sis tej khoom muaj nqis nyob hauv lwm tus tsev, lawv yeej ntshaw thiab nrhiav tswv yim, xav tau tej ntawd los ua lawv tug. Txawm lawv mus rau hauv leej twg lub tsev los xij, lawv ob lub qhov muag yeej ntsia ntsoov nrog lub siab ntshaw zoo li tub sab, lawv tshawb thiab nrhiav rau txhua qhov chaw, nrhiav seb puas muaj dab tsi kom tau txiaj ntsim dawb los sis seb puas muaj khoom dab tsi uas lawv nqa mus tau—tab txawm yog ib lub hub paj me me los lawv yeej tsis tso tseg li. Thaum mus sab nraud los sis nrog lwm tus noj mov ua ke, lawv yeej tsis them nqi tsheb los sis nqi mov li. Thaum twg lawv pom tej khoom zoo lawv yeej xav yuav, tiam sis thaum txog lub sij hawm them nyiaj, lawv kom lwm tus them rau lawv thiab tom qab ntawd lawv yeej tsis hais txog qhov yuav them nyiaj rov qab rau lwm tus li; lawv tsuas xav nrhiav kom tau txiaj ntsim dawb xwb, txawm yog tau ib npib los sis ib xus xwb los xij. Yog koj xav tau tej khoom zoo, koj tuaj yeem siv koj tus kheej cov nyiaj mus yuav; yog koj tsis xav siv koj cov nyiaj, ces tsis txhob nrhiav kev kom tau txiaj ntsim dawb los ntawm lwm tus, thiab tsis txhob ntshaw ntshaw; koj yuav tsum muaj kev coj ncaj ncees kom lwm tus thiaj li hwm koj. Tiam sis hom tib neeg no tsis muaj kev coj ncaj ncees, tsuas xav nrhiav kom tau txiaj ntsim dawb xwb, thiab lawv yim tau txiaj ntsim dawb ntau ces lawv yim zoo siab xwb. Qhov uas muaj cov tib neeg zoo li no tshwm sim nyob hauv pawg ntseeg ntawd yog ib qho txaj muag los sis yog ib qho yeeb koob? (Yog ib qho txaj muag.) Qhov ntawd yog ib qho txaj muag. Nej hais seb qhov uas lawv nrhiav kom tau txiaj ntsim dawb li no puas yog ib yam uas tsim nyog ua? Qhov no puas yog vim lawv tsis muaj nyiaj yuav mov noj los sis tsis muaj mov rau lawv tsev neeg noj? Yeej tsis yog li ntawd kiag li. Qhov tseeb tiag, lawv muaj nyiaj txaus siv thiab muaj mov txaus noj; tsuas yog lawv lub siab ntshaw loj dhau lawm xwb, mus txog theem uas lawv tsis muaj kev coj ncaj ncees li lawm, thiab mus txog theem uas ua rau lwm tus ntxub thiab xeev siab rau lawv. Ib tug neeg zoo li no puas zoo? (Tsis zoo.) Ib txhia tib neeg pheej nrhiav kom tus kheej tau txiaj ntsim dawb thaum ua lawv tej dej num, lawv hnov tsis txaus siab yog lawv poob peev me me xwb, thiab xav tias yuav tsum tau hais tawm txog qhov ntawd. Thaum muab ib yam dab tsi rau lawv ua, lawv pheej hais txog nyiaj txiag tias: “Nqi tsheb mus ib lwm kev yog npaum li no, nqi tsev so yog npaum li no, nqi mov noj yog npaum li no, thiab lwm yam ntxiv.” Lwm tus hais rau lawv tias, “Tsis txhob txhawj txog cov nyiaj txiag, pawg ntseeg yuav muab rau.” Tiam sis tom qab tau txais cov nyiaj lawm, lawv ua tib zoo xav txog qhov ntawd, thiab hais tias: “Qhov no tsis txaus. 200 nyiaj suav xwb nyob sab nraud yuav ua tau dab tsi? Muaj ib lo lus hais tias, ‘Yuav tsum txuag nyiaj thaum nyob hauv tsev tiam sis yuav tsum nqa nyiaj kom ntau thaum tawm mus.’ Kuv yuav tsum nqa nyiaj ntau me ntsis ntxiv los npaj faj seeb; yog kuv siv tsis tas, kuv mam li muab cov nyiaj seem ntawd xa rov qab rau pawg ntseeg.” Thaum lawv rov qab los, lawv yeej tsis hais ib lo txog cov nyiaj seem ntawd li, thiab lawv tsis qhia txog cov nyiaj uas lawv tau siv ntawd thiab. Lawv haj tseem kam nrhiav kom tau txiaj ntsim dawb ntawm pawg ntseeg thiab; lawv puas kam khaws Vajtswv tej khoom fij los ua lawv tug? (Kam.) Lawv yog hom niag dab tsi? Lawv tsis muaj kev coj ncaj ncees, thiab tsis muaj lub siab txawj xav thiab laj thawj. Vajtswv puas yuav pom zoo rau cov tib neeg zoo li no? Ib txhia haj tseem mus rau tom cov chaw sib txoos ua ke los sis cov tsev txais tos txhawm rau mus da dej, zawv taub hau, thiab ntxhua khaub ncaws, siv pawg ntseeg lub tshuab ntxhua khaub ncaws, tshuab rhaub dej kub, tshuaj zawv taub hau, tshuaj ntxhua khaub ncaws, thiab lwm yam ntxiv; lawv haj tseem ua kom tau txiaj ntsim dawb ntawm tej khoom no thiab, siv pawg ntseeg tej khoom kom txuag tau lawv li. Lawv xav tias vim lawv ntseeg Vajtswv, lawv yog ib feem hauv Vajtswv lub tsev, thiab yog li ntawd txhua yam khoom uas yog Vajtswv lub tsev li ces lawv yeej siv ywj siab, xav tias yog tsis siv ces nkim xwb, los sis yog tsis nqa mus ces nkim xwb, los sis yog tsis tau txais txiaj ntsim ntawm Vajtswv lub tsev ces nkim xwb; thiab txawm yog lawv siv puas lawm los, lawv yeej tsis xav them rov qab li. Thaum hais txog lawv tus kheej tej khoom, lawv paub txuag thiab ua tib zoo saib xyuas, tiam sis lawv siv Vajtswv lub tsev tej cuab yeej thiab tej khoom siv raws li lawv lub siab nyiam, yam tsis them rov qab yog lawv ua puas. Cov no puas yog tib neeg zoo? Lawv yeej tsis yog ib yam dab tsi zoo kiag li. Tshwj xeeb yog nyob rau qee lub sij hawm uas pawg ntseeg tim tsum yuav qee yam khoom siv, lawv yeej muab npe mus kiag yam kub siab lug, txaus siab tshwj xeeb los ua tej hauj lwm ntawd. Vim li cas lawv thiaj li kub siab ua luaj li? Lawv xav tias muaj txiaj ntsim uas yuav tau, thiab muaj cib fim tau txiaj ntsim dawb; tom qab yuav tej khoom ntawd lawm, lawv muab cov nyiaj seem ntawd ntim rau hauv lawv tus kheej lub hnab lawm. Lawv xav tau txiaj ntsim dawb hauv txhua yam uas lawv ua tau, xav tias yog tsis siv ces nkim xwb; qhov no yog qhov laj thawj uas lawv ua raws. Yog lawv nrhiav tsis tau txiaj ntsim dawb, ces lawv cem cov kwv tij thiab cov nkauj muam thiab cem Vajtswv lub tsev—lawv cem txhua tus; lawv yog kiag cov niag dab phem, cov neeg thov khawv uas qias neeg, cov neeg thov khawv tseem tseem, nqa lawv lub tais mus thov rau txhua qhov chaw kom tau txiaj ntsig thiab nrhiav kom tau txiaj ntsim dawb. Tib neeg hais tias, “Koj pheej thov khoom; koj tsis yog ib tug neeg thov khawv uas qias neeg lod?” Lawv teb tias, “Tsis ua cas, hu kuv ua dab tsi los tau—ib tug neeg siab nqaim, ib tug neeg qia dub, ib tug neeg thov khawv uas qias neeg, ib niag neeg thov khawv, ib niag neeg pluag—tsuav yog kuv tuaj yeem tau txiaj ntsim dawb xwb, ces tsis ua cas.” Hom tib neeg zoo li no puas muaj kev coj ncaj ncees? (Tsis muaj.) Cov tib neeg zoo li no puas yog ua rau muaj kev cuam tshuam rau cov kwv tij thiab cov nkauj muam txog rau ib theem twg? Tshwj xeeb yog rau cov tsev neeg uas lub neej txom nyem, uas tsis muaj nyiaj txiag, lawv yuav tsis ua rau muaj kev cuam tshuam thiab kev puas tsuaj rau cov tsev neeg ntawd txog ib theem twg lod? (Ua.) Lawv puas tuaj yeem ua rau muaj kev cuam tshuam tsis zoo rau cov uas muaj theem ntawm sab ntsujplig me thiab cov uas tsis muaj zog tshwj xeeb ntawd? (Tuaj yeem ua tau.) Tib neeg tsis nyiam kiag li thaum pom lawv; txhua tus uas pom lawv yeej dhuav siab, tiam sis lawv txhua tus txaj muag uas yuav tsis kam, yog li ntawd thiaj li cia lawv tus kheej raug quab yuam txeeb yam tab meeg li no. Txhua tus paub tias lawv muaj txoj kev ua neeg tsis zoo thiab muaj tus cwj pwm ua neeg qis, tiam sis, thaum xav tias sawv daws puav leej yog cov kwv tij thiab cov nkauj muam, thiab pom tias qee zaus lawv kuj ua tau qee yam dej num, thiab muaj kev ntseeg me ntsis, thiab qee zaus kuj siv zog me ntsis los txais tos hauv lawv tsev—vim tej no, tib neeg feem coob thiaj li ua ntsej lag muag dig rau lawv txoj kev coj uas nrhiav kom tau txiaj ntsim dawb rau txhua qhov chaw uas lawv mus ntawd, thiab tsis xav tias qhov ntawd yog ib qho teeb meem loj. Txawm li cas los xij, tej kev cuam tshuam uas lawv ua nyob hauv pawg ntseeg ntawd loj zuj zus tuaj, txaus ua rau tib neeg feem coob tsis kaj siab; qhov no tsis yog ib qho teeb meem lod? (Yog.) Cov tib neeg no, txawm lawv tsis yog cov dev vwm uas tom tib neeg rau txhua qhov chaw thiab tom tau tib neeg kom tuag los xij, lawv zoo li cov yoov mos ntsuab uas cuam tshuam ua rau tib neeg lub siab tsis kaj. Yog tsis muab lawv ntsaig tawm mus, lawv yuav ua rau muaj kev cuam tshuam tsis tu ncua. Qhov uas lawv tseem nyob hauv pawg ntseeg yuav ua rau muaj kev puas tsuaj tas li, ua rau tib neeg tsis muaj kev thaj yeeb. Tom qab raug cuam tshuam lawm, tib neeg hnov chim siab heev, nquag muaj lub siab tsis nyiam lawv kiag li; tiam sis vim tsis muaj lwm txoj hau kev, tib neeg tsuas uv xwb, uv tas los uv dua. Lawv yog hom tib neeg zoo li cas? Haj tseem muaj cov neeg tsis paub txaj muag uas qias neeg zoo li no nyob hauv cov tib neeg thiab; vim li cas cov tib neeg zoo li no thiaj li tseem ntseeg Vajtswv? Lawv yeej tsis tsim nyog ua neeg nyob kiag li! Nrhiav kom tau txiaj ntsim dawb rau txhua yam uas lawv ua tau—txaj muag dhau lawm! Tsuas xyiv fab rau tej khoom ntau npaum li koj lub peev xwm ua tau xwb; yog koj tsis muaj peev xwm, ces tsis txhob xyiv fab, los sis tsis txhob muab lwm tus li los ua koj tug. Yog koj ua kom tus kheej tau txiaj ntsim dawb me ntsis, uas tsis muaj nqis dab tsi vim lwm tus muab dawb rau koj qee zaus, los sis vim koj nyiam ib yam dab tsi tshwj xeeb, los sis nyiam ib yam dab tsi heev, txhua tus yeej zam txim tau rau qhov ntawd. Raws li qhov paj lug hais tias, kev pluag txwv lub hom phiaj; qhov ntawd tsis yog ib qho teeb meem loj. Tiam sis yog koj pheej nrhiav kom tau txiaj ntsim dawb li no, mus txog theem uas tsis paub txaj muag thiab ua ntsej muag tuab txog qhov ntawd, thiab dhau los ua ib tug neeg thov khawv uas qias neeg, los sis dhau los ua ib tug dev vwm los sis ib tug yoov mos ntsuab nyob hauv txhua tus lub qhov muag, ces tsim nyog maj nroos muab koj ntsaig tawm mus kiag. Cov tib neeg zoo li no yuav tsum saib xyuas kom tag nrho, kom xaus txhua qhov teeb meem no.

Rau cov uas nyiam tau txiaj ntsim dawb ntawd, nej thev taus lawv npaum li cas? Yog nej thev tsis taus lawv tiag tiag, tom qab lawv tau siv nej kom lawv tau txiaj ntsim dawb lawm, nej yuav hnov zoo li nej tau noj ib tug yoov mos ntsuab tuag lawm—uas feem coob ntawm nej npau taws heev yam tswj tsis taus thiab pheej yws txog lawv thaum nej nyob ua ke—ces thaum txog theem no, tsis yog tsim nyog muab lawv ntsaig tawm mus ntxov lawm lod? (Yog.) Thaum thev tsis taus lawm, thaum mus txog qhov kawg lawm, txhua tus tsim nyog koom tes muab lawv ntsaig tawm mus. Qhov no yog kev tshem tawm ib qho kev puas tsuaj hauv Vajtswv lub tsev mus, qhov ntawd yog ib yam uas ua rau tib neeg zoo siab heev. Ib tug neeg zoo li no tsuas yog ib tug neeg tsis muaj nqis, ua rau tib neeg feem coob tsis muaj kev thaj yeeb. Qhov no ua rau muaj ib qho xwm txheej phem uas tab kaum thiab cuam tshuam lub neej hauv pawg ntseeg, yuam kom tib neeg tuaj sib txoos ua ke los sib qhia thiab daws qhov teeb meem uas ntsig txog tus neeg no. Txoj kev xyaum ua raws no yog qhov tsim nyog, vim qhov kev cuam tshuam uas tus tib neeg phem ua ntawd twb ua rau qee tus neeg raug mob lawm. Txhawm rau tiv thaiv kom tus tib neeg phem tsis txhob ua phem ntxiv, txhawm rau tiv thaiv qhov raws qib raws duas uas ib txwm muaj ntawm lub neej hauv pawg ntseeg, thiab txhawm rau tiv thaiv kom cov neeg Vajtswv xaiv tseg tsis txhob raug mob ntxiv, yuav tsum maj nroos saib xyuas thiab muab tus tib neeg phem ntawd tshem tawm mus. Yog lawv tuaj yeem mus foob txog pawg ntseeg tom qab raug ntsaig tawm mus lawm, ces yuav tsum siv kev txawj ntse qhia rau lawv tias: “Koj tsis yog raug ntsaig tawm mus los sis raug ntiab tawm. Cia li rov qab mus tsev mus nyob ib leeg thiab tig xav txog koj tus kheej. Thaum koj tig xav tau zoo lawm, sau ib daim ntawv lees txim, ces peb mam li tos txais koj rov qab los rau hauv pawg ntseeg. Rau tam sim no, koj tsim nyog siv zog khwv nyiaj kom tau ntau ntxiv thiab xyiv fab rau lub neej; ntxiv ntawd, ua tib zoo xav txog qhov xwm txheej ntawm kev ntseeg Vajtswv. Ua li no, koj thiaj li tau ob yam tib si.” Qhov hais li ntawd zoo li cas? (Zoo.) Peb yuav tsis hais tias lawv raug ntsaig tawm mus los sis raug ntiab tawm mus lawm; tsuas yog txij hnub no mus, tus neeg no yuav tsis nyob hauv pawg ntseeg lawm xwb. Qhov saib xyuas li no zoo li cas? (Qhov ntawd zoo.) Qhov ntawd zoo heev! Tsis tas yuav sib cav los sis xam, tsuas yog ib txoj kev daws uas yooj yim thiab meej, cia lawv rov qab mus rau hauv lub ntiaj teb mus ua hauj lwm, khwv nyiaj, thiab ua lawv tus kheej lub neej. Muab hais luv luv hais tias, txoj kev ua neeg ntawm cov uas nyiam tau txiaj ntsim dawb mas tsis tshua zoo npaum li cas. Txawm hais tsis tau tias yog kev phem los xij, lawv tus cwj pwm ua neeg uas nyiam tau txiaj ntsim dawb ntawd ua rau tib neeg dhuav thiab tsis nyiam heev li. Lawv nrhiav kom tau txiaj ntsim dawb rau txhua lub cib fim uas lawv ua tau! Txawm yog cov tib neeg zoo li no tsis ua tej yam uas txhaum cai los sis ua phem los, tej kev tab kaum thiab kev cuam tshuam sij hawm ntev uas lawv tej kev ua thiab lawv txoj kev coj coj los rau lub neej hauv pawg ntseeg—tej qhov tshwm sim los phem no—mas hnyav dua txhua yam kev ua phem; tej no txaus los muab lawv cais ua cov tsis ntseeg los sis cov tib neeg phem uas yuav tsum raug ntsaig tawm hauv pawg ntseeg mus. Qhov ua li no thiaj li txwv tau tag nrho tej kev cuam tshuam rau pawg ntseeg thiab qhov uas cov tsis ntseeg thab cov kwv tij thiab cov nkauj muam.

Peb nyuam qhuav sib qhia txog ib txoj kev daws tshwj xeeb rau cov uas nyiam tau txiaj ntsim dawb, ib txoj kev uas tau tsim los raws li tej xwm txheej uas raug tsim txom tshwj xeeb nyob rau Teb Chaws Suav av loj. Nyob rau hauv cov pawg ntseeg txawv teb chaws, cia li muab lawv ntsaig tawm mus kiag xwb ces tau lawm. Txawm li cas los xij, txawm yog txoj hau kev daws ntawd yuav siv rau hom tib neeg twg los xij, qhov tseem ceeb yuav tsum paub tseeb tias qhov ntawd muaj lub hauv paus ntsiab lus thiab muaj kev txawj ntse thiab. Pawg ntseeg muaj kev cai tswj fwm thiab tej kev cai, uas txhua yam ntawd yog tsom ntsoov los tiv thaiv lub neej hauv pawg ntseeg uas ib txwm muaj rau cov kwv tij thiab cov nkauj muam thiab qhov raws qib raws duas uas ib txwm muaj ntawm kev ua dej num. Yog leej twg cuam tshuam cov kwv tij thiab cov nkauj muam lub neej hauv pawg ntseeg los sis kev ua lawv tes dej num, qhov no yeej tsis tso cai li; tus neeg ntawd yuav raug Vajtswv ntxub thiab tso tseg. Yeej muaj tseeb tias, txhua yam kev thab plaub los sis kev cuam tshuam rau cov kwv tij thiab cov nkauj muam lub neej txhua hnub los yeej tsis tso cai li thiab. Qhov no yog ib qho teeb meem uas cov thawj coj thiab cov neeg ua hauj lwm yuav tsum muaj lub luag hauj lwm daws. Tej zaum yuav muaj cov tib neeg uas yog cov kwv tij thiab cov nkauj muam cov txheeb ze, cov phooj ywg, los sis cov neeg paub, uas siv lub npe tias “cov kwv tij thiab cov nkauj muam,” los nrhiav kev rub thiab coj cov kwv tij thiab cov nkauj muam mus yuam kev, txwv tsis pub lawv ua lawv tej dej num. Cov thawj coj thiab cov neeg ua hauj lwm, los sis cov kwv tij thiab cov nkauj muam, muaj lub luag hauj lwm thiab tes num los daws cov tib neeg zoo li no. Lawv txoj kev coj thiab lawv tej kev ua ntawd txwv tsis pub lwm tus ua lawv tej dej num thiab raws Vajtswv qab, thiab kuj ua rau muaj tej kev cuam tshuam rau pawg ntseeg tes hauj lwm thiab, yog li ntawd cov thawj coj thiab cov neeg ua hauj lwm yuav tsum tawm los daws qhov xwm txheej ntawd thiab txwv. Yeej muaj tseeb tias, peb muaj tej kev saib xyuas thiab daws cov tib neeg zoo li no uas tsim nyog. Tsis tas yuav ntaus los sis cem li; Peb tsuas qhia kom meej rau lawv txog lub ntsiab tseeb ntawm lawv qhov teeb meem, thiab tej lus liam nrog rau tej lus foob los ntawm feem coob ntawm cov neeg Vajtswv xaiv tseg uas tawm tsam lawv, thiab thaum kawg qhia rau lawv tias: “Qhov ntsaig koj tawm mus no yog ib qho kev txiav txim siab thiab tau kos npe pom zoo los ntawm feem coob. Txawm koj yuav pom zoo los sis tsis pom zoo los xij, pawg ntseeg muaj cai ua qhov kev txiav txim siab no thiab daws koj raws li ntawd. Koj yuav tsum mloog lus.” Qhov teeb meem no thiaj li raug daws lawm, thiab qhov kev saib xyuas li no yeej mus raws li lub hauv paus ntsiab lus tag nrho. Rau cov uas nyiam tau txiaj ntsim dawb ntawd, yuav tsum coj rau lawv thiab saib xyuas lawv raws li tej hauv paus ntsiab lus. Yog lawv xav qiv ib yam dab tsi los nrhiav kom tau txiaj ntsim dawb ntawm koj, koj tuaj yeem muab qiv rau lawv yog koj xav muab, los sis tsis qiv rau yog koj tsis xav muab; qhov kev txiav txim siab yog nyob ntawm koj. Qhov muab qiv rau lawv yog ib qho kev muaj dej siab; qhov tsis qiv rau yog koj txoj cai. Yog lawv hais tias, “Peb tsis yog cov kwv tij thiab cov nkauj muam lod? Cas qia dub ua luaj, twb tsis kam muab khoom qiv kiag li!” koj teb tau tias: “Qhov no yog kuv li khoom, thiab kuv muaj cai tsis muab qiv. Qhov no mus raws li tej hauv paus ntsiab lus. Tsis txhob muab lo lus ‘peb puav leej yog cov kwv tij thiab cov nkauj muam’ los quab yuam kuv; yam uas koj hais ntawd tsis yog qhov tseeb. Tshwj tsis yog thaum Vajtswv hais tias, ‘Koj yuav tsum muab qiv rau lawv,’ thaum ntawd xwb kuv thiaj li yuav muab qiv rau koj.” Tsis muaj leej twg muaj cai quab yuam los sis qiv lwm tus li khoom ntiag tug los ntawm kev siv lub npe pawg ntseeg los sis lub tswv yim tias “Peb puav leej yog cov ntseeg thiab puav leej yog cov kwv tij thiab cov nkauj muam.” Qhov no puas yog qhov tseeb? (Yog.) Qhov no yog qhov tseeb. Tsuas yog ua raws li qhov tseeb no xwb thiaj li paub tseeb tias muaj kev ncaj ncees rau txhua tus, thiab txhua tus thiaj li xyiv fab tau rau lawv tej cai tiag tiag. Tiam sis yog muaj leej twg siv cov lus tias “Vajtswv lub tsev tes hauj lwm cheem tsum,” “pawg ntseeg tes hauj lwm cheem tsum,” los sis “cov kwv tij thiab cov nkauj muam cheem tsum” los quab yuam los sis qiv tej khoom ntiag tug, qhov no puas mus raws li qhov tseeb? (Qhov ntawd tsis mus raws li qhov tseeb.) Koj puas muaj cai tsis kam ua raws li tej kev thov uas tsis mus raws li qhov tseeb ntawd? (Muaj.) Ua li yog muaj leej twg liam tias koj qia dub los sis siab me vim koj tsis kam muab qiv, koj puas yuav ntshai? (Tsis ntshai.) Yog muaj leej twg muab qhov no los ua ib qho teeb meem loj, liam tias koj tsis tiv thaiv pawg ntseeg tes hauj lwm los sis tias koj tsis muaj kev hlub rau cov kwv tij thiab cov nkauj muam, ua rau cov kwv tij thiab cov nkauj muam tsis txais yuav thiab cais koj tawm, koj puas yuav ntshai? Koj yuav thim rov qab. Thaum lub sij hawm ntawd, koj yuav xav tias, “Qhov muab ib lub tsheb qiv ntawd puas yog ib qho teeb meem loj? Txawm yog pawg ntseeg, Vajtswv lub tsev, los sis cov kwv tij thiab cov nkauj muam qiv los yeej tau. Qhov zoo tshaj ces tsis txhob ua rau cov kwv tij thiab cov nkauj muam chim. Qhov ua rau ib tug neeg chim tsis txaus ntshai, tiam sis yog ua rau tag nrho cov kwv tij thiab cov nkauj muam chim, thiab lawv lub siab txias rau kuv, tso kuv nyob ib leeg, kuv yuav ua li cas?” Vim koj ntseeg Vajtswv, muaj dab tsi uas yuav tsum ntshai? Qhov uas lawv cais koj tawm ntawd tsis tau txhais tias lawv muaj qhov tseeb los sis tias lawv tej kev ua mus raws li qhov tseeb. Qhov tseeb yeej yog qhov tseeb mus li. Qhov ntawd yog qhov tseeb txawm yog ib feem tsawg tsawg los sis feem coob ntawm tib neeg pom zoo rau qhov ntawd los xij. Yog tsis muaj qhov tseeb, txawm yog ib feem tsawg tsawg zwm rau feem coob los xij, qhov ntawd yeej tsis yog qhov tseeb. Qhov no yog ib qho muaj tseeb uas tsis muaj leej twg tsis lees paub tau. Seb ib tug neeg puas muaj qhov tseeb qhov muaj tiag los sis tsis muaj ntawd tsis yog nyob ntawm seb lawv hais lus zoo mloog npaum li cas, tiam sis yog nyob ntawm seb lawv puas tuaj yeem muab qhov tseeb coj los xyaum ua raws thiab ua raws li tej hauv paus ntsiab lus. Piv txwv li, koj yuav ib lub khoos phis tawj tshiab txhawm rau los ua koj tes dej num, thiab muaj ib tug neeg xav qiv, es hais tias yog coj mus ua pawg ntseeg tes hauj lwm. Koj tsis kam muab qiv rau lawv, thiab lawv hais tias: “Koj tsis muaj kev hlub, koj tsis hlub Vajtswv, koj tso tsis tau koj tus kheej tseg li. Txawm yog qhov tso tseg me me no xwb los koj twb ua tsis tau.” Cov lus no puas yog? Puas mus raws li qhov tseeb? (Tsis mus.) Koj tsim nyog teb tias: “Lub khoos phis tawj no yog siv los ua kuv tes dej num. Tam sim no kuv tab tom ua kuv tes dej num, yog li ntawd kuv tsis muaj khoos phis tawj tsis tau li. Yog koj qiv kuv lub khoos phis tawj, qhov ntawd tsis cuam tshuam rau txoj kev ua kuv tes dej num lod? Qhov ntawd puas yuav mus raws li qhov tseeb? Koj xav qiv lub khoos phis tawj no mus ua dab tsi tiag? Koj hais tias yog mus ua pawg ntseeg tes hauj lwm; yog tias yog li ntawd tiag, ces koj yuav tsum mus nrhiav ib tug neeg los ua pov thawj rau qhov ntawd. Ntxiv ntawd, tab txawm yog mus ua pawg ntseeg tes hauj lwm los xij, koj yeej tsis tsim nyog tuaj qiv ntawm kuv. Kuv yuav siv dab tsi los ua kuv tes dej num yog koj qiv kuv lub khoos phis tawj mus lawm? Koj twm xeeb dhau lawm! Tsis txhob siv pawg los ua ib qho laj thawj los nrhiav kom tau txiaj ntsim dawb, kuv yeej yuav tsis poob rau koj rooj ntxiab ntawd li. Tsis txhob xav tias kuv yog ib tug neeg ruam feeb tsis meej uas tsis muaj kev paub cais; koj xav nrhiav kev siv kom tau txiaj ntsim dawb, yeej yuav tsis tau li!” Yuav tsum tau hais lus zoo li no rau cov tib neeg zoo li no, kom thiaj li tsis txhob poob rau hauv Ntxwgnyoog rooj ntxiab. Qhov teeb meem no puas yooj yim daws? Thaum koj to taub qhov tseeb thiab ua raws li tej hauv paus ntsiab lus, leej twg hais dab tsi los koj tsis tas ntshai. Tsis txhob quav ntsej txog lawv txoj kev liam cuav rau koj ntawd; qhov kev qhuab qhia me me uas lawv hais ntawd yeej yuav ua tsis tau kom leej twg ntseeg kiag li. Cov kev qhia tawm txog txoj kev ua neeg ntawm cov uas nyiam tau txiaj ntsim dawb thiab tej hauv paus ntsiab lus rau kev daws lawv ces twb tau muab sib qhia yooj yim li no lawm.

Hais txog cov uas nyiam tau txiaj ntsim dawb uas nyob hauv pawg ntseeg ntawd, ib qho mas, tib neeg yuav tsum paub cais lawv kom raug thiab muaj tiag dua, thiab lwm qhov mas, tib neeg yuav tsum to taub qhov tseeb; lawv yuav tsum paub meej nyob hauv lawv lub siab txog qhov chaw sawv uas lawv yuav tsum muaj rau txoj kev ntseeg Vajtswv, tes hauj lwm uas lawv yuav tsum ua, tej hauv paus ntsiab lus uas lawv yuav tsum tuav rawv, thiab tus cwj pwm uas lawv yuav tsum muaj rau tib neeg, xwm txheej, thiab yam khoom. Tsis txhob raws feem coob qab, los sis ntshai ua rau tib neeg chim, thiab tshwj xeeb yog tsis txhob tso tej hauv paus ntsiab lus thiab qhov chaw sawv uas koj tsim nyog muaj tseg txhawm rau ua kom qee tus neeg zoo siab, uas thaum kawg ua rau tib neeg zoo siab tiam sis ua rau Vajtswv lub siab mob, ua rau Vajtswv ntxub koj. Yog qhov ntawd yog ib qho kev ua uas mus raws li tej hauv paus ntsiab lus, ces txawm yog qhov uas koj ua ntawd ua rau tib neeg chim los sis ua rau lwm tus cem koj tom qab nraub qaum los xij, qhov ntawd yeej tsis tseem ceeb; txawm li cas los xij, yog qhov ntawd yog ib qho kev ua uas tsis mus raws li tej hauv paus ntsiab lus, ces txawm yog qhov uas koj ua ntawd ua rau koj tau txais kev pom zoo thiab kev txhawb los ntawm txhua tus, thiab sib haum nrog txhua tus los xij—tiam sis tsuas muaj ib yam yog koj teb tsis tau rau ntawm Vajtswv lub xub ntiag—ces koj twb raug kev poob peev lawm. Yog koj tiv thaiv kev sib raug zoo nrog feem coob, ua rau lawv zoo siab thiab txaus siab thiab tau txais lawv cov lus qhuas, tiam sis koj ua txhaum rau Vajtswv, tus Tswv Tsim, ces koj yog ib tug neeg ruam tshaj plaws. Yog li ntawd, txawm koj yuav ua dab tsi los xij, koj yuav tsum to taub kom meej seb qhov ntawd puas mus raws li tej hauv paus ntsiab lus, seb qhov ntawd puas ua rau Vajtswv txaus siab, Vajtswv tus cwj pwm rau qhov ntawd yog dab tsi, qhov chaw sawv uas tib neeg yuav tsum muaj yog dab tsi, tej hauv paus ntsiab lus uas tib neeg yuav tsum tuav rawv yog dab tsi, Vajtswv tau qhia li cas, koj yuav tsum ua li ntawd—koj yuav tsum paub meej txog qhov no ua ntej. Koj txoj kev sib cuag nrog lwm tus thiab koj txoj kev sib pauv khoom thiab kev sib txuas lus nrog lwm tus—tej no puas tau tsim los rau saum lub hauv paus ntawm kev mus raws li tej hauv paus ntsiab lus? Tej no puas tau tsim los rau saum lub hauv paus ntawm kev ua rau Vajtswv txaus siab? Yog tias tsis yog, ces txhua yam uas koj ua, txawm koj yuav tiv thaiv tau zoo npaum li cas, koj ua tau zoo tiav log npaum li cas, los sis koj tau txais lus qhuas ntau npaum li cas los ntawm lwm tus los xij, Vajtswv yeej yuav tsis nco cia li. Yog li ntawd, tej hauv paus ntsiab lus ntawm koj txoj kev sib raug zoo thiab kev sib cuag nrog leej twg los xij yeej tsis tsim nyog nyob rau ntawm seb lawv puas siv tau txiaj ntsim dawb los ntawm koj los sis seb koj puas siv tau txiaj ntsim dawb los ntawm lawv—yeej tsis tsim nyog tsim los rau saum lub hauv paus no. Tiam sis, tej hauv paus ntsiab lus no yuav tsum nyob rau ntawm seb yam uas nej ua ntawd puas mus raws li qhov tseeb tej hauv paus ntsiab lus. Tsuas yog ua li ntawd xwb thiaj li suav tau tiag tiag tias “raws li peb txoj kev ntseeg Vajtswv”; tsuas yog ua li ntawd xwb thiaj li hais tau tias, “Peb puav leej yog cov ntseeg, puav leej yog cov kwv tij thiab cov nkauj muam”; tsuas yog ua li ntawd xwb koj thiaj li muab tau qhov no los ua lub hauv paus. Dhau li ntawm tej yam uas ntsig txog kev nkag mus rau hauv lub neej txoj sia, tes dej num, thiab pawg ntseeg tes hauj lwm mus lawm, ces lwm yam kev sib cuag yeej tsis tsim nyog tsim rau saum lub hauv paus ntawm “cov kwv tij thiab cov nkauj muam.” Yog qhov ntawd tsis ntsig txog tes dej num, kev nkag mus rau hauv lub neej txoj sia, los sis kev sib cuag li ib txwm nyob hauv tib neeg, tiam sis muaj ib tug twg pheej siv lub npe “cov kwv tij thiab cov nkauj muam” los ua ib qho laj thawj kom ua tau raws li ib lub hom phiaj twg, ces lawv yeej nrhiav kev los siv cov lus, cov hau kev, thiab cov xwm txheej uas muaj txiaj ntsig zoo li no los ua ib qho laj thawj los ua kom tus kheej tau txiaj ntsim dawb thiab nrhiav tus kheej tej txiaj ntsig xwb. Cov neeg Vajtswv xaiv tseg yuav tsum ceev faj txog qhov no, daws cov teeb meem zoo li no nrog kev txawj ntse kom thiaj li tsis txhob raug dag. Qhov no yog vim tib neeg feem coob hauv pawg ntseeg tsis to taub qhov tseeb, thiab ib txhia haj tseem yog cov tsis ntseeg, ua dab tsi yam tsis muaj tej hauv paus ntsiab lus thiab lam tau lam ua phem yam tsis xav. Qhov uas lawv ua tej yam los ntawm kev siv lub npe “cov kwv tij thiab cov nkauj muam” yog qhov uas yooj yim los cuam tshuam pawg ntseeg tes hauj lwm tshaj plaws. Lub hom phiaj ntawm kev hais txhua yam no hnub no yog dab tsi? Qhov ntawd yog txhawm rau qhia kom meej tias txawm yog nyob hauv kev sib txuas lus los sis tej kev sib raug zoo nrog lwm tus, lub hauv paus yuav tsum tau tsim nyob rau saum qhov tseeb tej hauv paus ntsiab lus. Qhov no tiv thaiv tau kev sib raug zoo uas tsis tsim nyog nyob hauv tib neeg; yeej muaj tseeb tias, qhov ntawd kuj tiv thaiv tau cov uas nyiam tau txiaj ntsim dawb ntawd, kom tsis txhob nrhiav tau qhov khoob los siv, thiab tib lub sij hawm ntawd kuj tiv thaiv tau cov uas hlub lawv lub ntsej muag heev los sis muaj kev ua neeg qaug zog kom tsis txhob pheej raug siv dawb, pheej raug dag, thiab pheej poob peev. Ib txhia tib neeg mas—txawm yog pom tseeb tias lawv tsev neeg ua neej txom nyem los xij—thaum kawg “ua txuj ua siab loj” yam uas ua rau lawv tus kheej poob nyiaj, muab lawv cov nyiaj uas khwv tau nyuaj nyuaj ntawd qiv vim muaj ib tug neeg nyiam ua kom tus kheej tau txiaj ntsim dawb thov qiv, hais tias xaiv cov neeg no vim saib taus lawv heev. Muaj dab tsi tshwm sim los tom qab muab cov nyiaj qiv tawm lawm? Tus neeg qiv ntawd ploj lawm. Tom qab ntawd, tus neeg muab qiv yws txog Vajtswv tias tsis tsom kwm lawv. Qhov no puas yog muaj laj thawj? Koj xav tias kev ntseeg Vajtswv txhais tias koj tsis tas yuav xav thaum ua ib yam dab tsi, tias Vajtswv yuav saib xyuas txhua yam lod? Qhov ntawd tsis ua rau koj dhau los ua ib tug neeg tsis muaj qab hau lod? Vajtswv cheem tsum kom tib neeg coj ncaj, ntse, thiab ua raws li qhov tseeb tej hauv paus ntsiab lus. Koj to taub tsis tau qhov no lod? Yog koj tsis ua raws li qhov tseeb tej hauv paus ntsiab lus no, ces qhov koj pheej poob peev thiab raug dag ntawd yeej tsim nyog lawm. Thaum kawg, thaum tsis muaj kev tawm nyob hauv koj lub neej lawm, koj yuav yws tau leej twg? Koj ua koj raug xwb. Koj tej kev ua ntawd tsis yog muaj lub siab hlub; tej ntawd ruam heev! Koj muab nyiaj qiv rau ib tug neeg dag txhawm rau ua kom lawv zoo siab, tiam sis thaum koj xav tau nyiaj, koj puas thov tau ntawm Vajtswv lub tsev? Vajtswv lub tsev tsim nyog ris lub luag hauj lwm no rau koj lod? Los ntawm kev xav kom Vajtswv lub tsev them cov nqi no, tsis yog koj tab tom tshuav Vajtswv nqi lod? Yog tsis muaj kev tawm nyob hauv lub neej lawm, koj yuav ua koj tes dej num tau li cas? Yog koj thov Vajtswv, tej zaum Vajtswv kuj yuav tsis ua rau koj txaus siab; qhov no yuav yog ib qho uas koj ua koj raug, thiab yeej tsim nyog lawm. Leej twg kom koj ruam npaum li no! Vajtswv puas tau qhia koj kom ntseeg tus neeg ntawd? Vajtswv puas tau qhia koj kom muab nyiaj qiv rau lawv? Vajtswv tsis tau qhia; qhov ntawd ces yog koj tus kheej txoj kev ua, tsis yog sawv cev rau Vajtswv txoj kev npaj siab. Yog koj tus kheej tej kev ua yuam kev thiab ua rau muaj tej qhov tshwm sim los phem, ces koj tsuas tau ris lub luag hauj lwm ntawm koj tus kheej xwb. Vim li cas koj thiaj li yuav kom Vajtswv lub tsev ris lub luag hauj lwm, los sis kom Vajtswv ris lub luag hauj lwm rau koj? Vim li cas thiaj li yws txog Vajtswv tias tsis tsom kwm koj? Koj yog ib tug neeg loj lawm; vim li cas thiaj li tsis muaj kev txiav txim siab uas ib tug neeg loj tsim nyog muaj? Nyob hauv lub zej zog, koj puas yuav muab nyiaj qiv rau leej twg los xij uas thov qiv? Koj yuav tsum xav txog qhov ntawd, tsis yog lod? Vim li cas koj thiaj li muab nyiaj qiv rau ib tug neeg uas tsuas yog vim lawv ntxiv lub npe tias “cov kwv tij thiab cov nkauj muam” rau hauv lawv qhov kev thov xwb? Qhov no tsis qhia tias koj tsis paub dab tsi li lod? Koj tsis yog tsis paub dab tsi li xwb, koj ruam; ruam tshaj plaws li! Koj xav tias txhua tus kwv tij thiab nkauj muam puav leej ntseeg Vajtswv tseeb tiag, tias lawv txhua tus to taub qhov tseeb lod? Yam tsawg kawg nkaus ib feem peb ntawm lawv tsis nyiam qhov tseeb, thiab yog cov tsis ntseeg. Koj tsis paub cais qhov no lod? Koj xav tias txhua tus kwv tij thiab nkauj muam puav leej yog cov uas Vajtswv yuav cawm, uas yog Vajtswv cov neeg tiag tiag lawm lod? Koj tsis paub tias “Muaj coob leej raug hu, tiam sis muaj tsawg leej thiaj li raug xaiv xwb” lod? Cov kwv tij thiab cov nkauj muam sawv cev rau leej twg? Lawv sawv cev rau noob neej uas qias vuab tsuab! Yog koj ntseeg lawv, tsis yog koj ruam lod? Txawm yog koj tus kheej tej kev ua yuav ua rau muaj tej qhov tshwm sim los phem dab tsi los xij, tsis txhob mus nrhiav Vajtswv lub tsev los sis nrhiav cov kwv tij thiab cov nkauj muam; tsis muaj leej twg tuaj yeem them rau koj, thiab tsis muaj leej twg muaj tes num los ris lub luag hauj lwm ntawd rau koj. Koj ua koj ris; lub luag hauj lwm yog nyob ntawm koj. Ntxiv ntawd, tsis txhob muab tej yam no coj los rau hauv lub neej hauv pawg ntseeg los sib qhia thiab sib tham; tsis muaj leej twg xav mloog, thiab lwm tus tsis muaj lub luag hauj lwm los daws koj tej teeb meem ntxhov quav niab. Yog muaj leej twg xav pab koj tiag tiag, neb ob leeg tuaj yeem daws qhov ntawd ntawm neb ntiag tug. To taub lawm puas yog?

Qhov uas qhia txog tej yam no yog los ua ib qho kev ceeb toom rau tib neeg, pab kom lawv paub ntau ntxiv, thiab ntaus tswb ceeb toom rau lawv, ua kom pom meej tias nyob hauv cov uas ntseeg Vajtswv ntawd, yeej muaj txhua hom tib neeg. Muaj ib lo lus tseem ceeb uas nej yuav tsum nco ntsoov, uas Kuv twb tau hais ob peb zaug lawm: Cov uas ntseeg Vajtswv yog raug xaiv los ntawm cov noob neej uas qias vuab tsuab. Qhov no txhais li cas? Qhov ntawd txhais tias txhua tus neeg puav leej raug Ntxwgnyoog ua rau qias vuab tsuab lawm, txhua tus puav leej muaj cov moj yam qias vuab tsuab thiab ua phem tau rau ntau theem uas sib txawv, thiab, nyob rau hauv ib qho xwm txheej uas haum, yeej tuaj yeem ua tej yam uas tawm tsam Vajtswv. Qhov ntxeev qhov tseeb thiab qhov cuav, qhov nyiam tau txiaj ntsim dawb, uas peb nyuam qhuav sib qhia tas ntawd, puav leej yog cov neeg ntseeg ua; cov ib txwm tsis ntseeg tsis muaj feem xyuam nrog peb, yog li ntawd peb yuav tsis hais txog lawv nyob ntawm no. Cov kev qhia tshwm txog kev ua neeg uas peb tau sib qhia no yeej yog cov kev qhia tshwm ntawm cov uas ntseeg Vajtswv ntag. Yog li ntawd, tsis txhob saib lub npe “cov kwv tij thiab cov nkauj muam” ua ib yam dab tsi uas loj, muaj nuj nqis, los sis dawb huv thiab tsis pub leej twg yuam cai rau. Yog koj saib li ntawd, qhov ntawd yog koj txoj kev ruam. Vajtswv yeej tsis tau hais tias, “Cov kwv tij thiab cov nkauj muam muaj nqis heev. Kiag thaum lawv dhau los ua cov kwv tij thiab cov nkauj muam lawm, lawv raug ua kom dawb huv, lawv dhau los ua Vajtswv cov neeg paub siab, uas tsim nyog ntseeg siab tau tag nrho; koj tuaj yeem ntseeg siab rau lawv tag nrho, thiab txawm lawv yuav hais los sis ua dab tsi los xij yeej yog qhov tseeb.” Qhov no yeej tsis tau muaj dua li; tej no yog koj tej kev xav phem thiab kev xav hauv nruab siab xwb. Yog tias los txog tam sim no koj tseem pom tsis meej lub ntsiab tseeb tiag nyob tom qab lub npe “cov kwv tij thiab cov nkauj muam,” ces koj ruam tiag tiag li; koj tau mloog cov lus qhuab qhia ntau xyoo no yam tsis muaj qab hau xwb. Koj twb tsis paub meej tias koj yog hom tib neeg zoo li cas, tiam sis koj haj tseem ntseeg lwm tus, saib lawv—cov kwv tij thiab cov nkauj muam—ua cov uas dawb huv thiab loj heev, pheej hais tias “cov kwv tij thiab cov nkauj muam tsis nyiam qhov no,” “cov kwv tij thiab cov nkauj muam npau taws lawm,” “cov kwv tij thiab cov nkauj muam tab tom raug txom nyem,” “cov kwv tij thiab cov nkauj muam li ub li no,” hais txog cov kwv tij thiab cov nkauj muam nrog txoj kev hlub zoo li ntawd. Koj puas tau pom nyob qhov twg hauv Vajtswv cov lus uas hais tias cov kwv tij thiab cov nkauj muam muaj nuj nqis thiab dawb huv npaum li ntawd, tsim nyog ntseeg siab npaum li ntawd? Yeej tsis muaj ib kab lus li, tsis yog lod? Yog li ntawd vim li cas koj thiaj li saib lawv zoo li ntawd? Qhov ntawd yeej qhia tias koj yog ib tug neeg ruam tiag tiag. Yog li ntawd, txawm koj yuav poob peev los sis raug piam sij ntau npaum li cas los ntawm cov kwv tij thiab cov nkauj muam los xij, qhov ntawd yeej yog koj tus kheej qhov txhaum tag nrho. Thaum kawg, xam tias tej kev piam sij thiab kev poob peev uas koj raug ntawd yog cov nqi kawm xwb. Qhov no yog ib qho kev kawm rau koj kom nco ntsoov. Nej yuav tsum nco ntsoov mus li tias: Cov kwv tij thiab cov nkauj muam tsis sawv cev rau qhov tseeb, thiab haj yam tsis sawv cev rau Vajtswv; kuj tsis txhais hais tias lawv yog Vajtswv cov neeg paub siab, Vajtswv cov tim khawv, los sis Vajtswv cov me nyuam uas Nws hlub. Cov kwv tij thiab cov nkauj muam yog leej twg? Lawv yog noob neej uas qias vuab tsuab, ib yam li koj; lawv muaj tej kev xav phem txog Vajtswv, tsis nyiam qhov tseeb, tsis nyiam qhov tseeb kiag li, muaj ib tug moj yam khav theeb, muaj cov moj yam tsiv nyaum thiab lim hiam, tuaj yeem tsa lawv tus kheej ua Vajtswv cov yeeb ncuab nyob rau txhua yam, ua lawv tej dej num ua dog ua dig, thiab haj tseem nrhiav kom tau txiaj ntsim dawb ntawm lwm cov kwv tij thiab nkauj muam los ntawm kev siv lub npe ntseeg Vajtswv thiab. Lub hom phiaj ntawm kev hais txhua yam no yog dab tsi? Qhov ntawd tsis yog los tsim kev tsis sib haum xeeb nyob nruab nrab ntawm koj thiab cov kwv tij thiab cov nkauj muam tiam sis yog los pab koj kom pom txhua tus lub ntsej muag tiag tiag kom meej, coj rau lub npe “cov kwv tij thiab cov nkauj muam” kom raug, coj rau cov tib neeg nyob ib puag ncig koj kom raug, thiab tsim tej kev sib raug zoo uas tsim nyog nrog txhua tus. Tsis txhob tsim los sis tiv thaiv tej kev sib raug zoo uas zoo nrog lwm tus los ntawm kev ua txiaj ntsim rau tus kheej, kev sib pauv khoom, kev hais lus qhuas, kev ua kom lwm tus zoo siab, kev thev kom haum lwm tus, los sis lwm yam kev zoo li no, nrog lub hom phiaj kom koj tus kheej haum rau hauv cov kwv tij thiab cov nkauj muam. Qhov no tsis tim tsum, thiab txhua yam uas koj ua ntsig txog qhov no yeej qias neeg thiab ua rau Vajtswv ntxub. Yog li ntawd, txoj kev ua neej nyob uas zoo tshaj plaws, tus cwj pwm thiab lub hauv paus ntsiab lus uas zoo tshaj plaws rau kev ua neej nyob nruab nrab ntawm tib neeg yog dab tsi? Qhov ntawd yog Vajtswv txoj lus. Vajtswv cov lus hais li cas? Hais kom tsim tej kev sib raug zoo uas tsim nyog thiab ib txwm muaj nyob hauv tib neeg. Cov kev sib raug zoo no yuav tsim los li cas? Sib cuag, hais lus, thiab sib raug zoo nrog lwm tus raws li Vajtswv cov lus. Piv txwv li, yog muaj leej twg tab tom tsiv tsev thiab nug seb koj puas muaj sij hawm mus pab, yog koj txaus siab, koj mus tau; yog koj tsis txaus siab vim koj ntshai tsam qhov ntawd yuav cuam tshuam rau koj tes dej num, koj tsis mus los tau. Qhov no yog koj txoj cai, thiab yeej muaj tseeb tias, kuj yog lub hauv paus ntsiab lus uas koj tsim nyog ua raws thiab. Koj tsis tas yuav thev kom haum lwm tus, pom zoo yam tsis txaus siab thiab sib nyom hauv lub siab vim ntshai tsam ua rau lawv chim los sis rhuav txoj kev sib haum xeeb nyob nruab nrab ntawm cov kwv tij thiab cov nkauj muam, tom qab ntawd hnov tsis txaus siab nyob hauv koj lub siab, thiab tseem ua rau cuam tshuam rau txoj kev ua koj tej dej num. Koj paub zoo tias qhov ua li ntawd tsis haum raws li tej hauv paus ntsiab lus, tiam sis koj tseem cia lwm tus quab yuam koj thiab txib koj zoo li ib tug qhev txhawm rau ua kom lawv txaus siab thiab tiv thaiv kev sib raug zoo. Qhov uas koj ua kom lwm tus txaus siab ntawd tsis yog ib qho kev ua zoo, thiab Vajtswv yuav tsis nco cia. Yam uas koj ua tsuas yog los tiv thaiv tej kev sib raug zoo hauv tib neeg xwb; koj tsis yog ua rau pawg ntseeg tes hauj lwm los sis los ua koj tes dej num, thiab haj yam tsis yog koj lub luag hauj lwm los sis tes num uas yuav tsum ua. Vajtswv yeej yuav tsis nco tej kev ua zoo li no cia li, thiab txawm yog koj ua tej ntawd los xij, koj tsuas ua yam tsis muaj qab hau xwb. Yog li ntawd, thaum ntsib tej yam zoo li no, koj tsis tsim nyog ua tib zoo thiab xyuam xim xav seb yuav xaiv li cas lod? Ib txhia tib neeg raug thov kom pab, tiam sis lawv tej dej num yeej ua rau lawv tsis khoom heev, thiab lawv nyuam qhuav nrhiav tau sij hawm los koom ib qho kev sib txoos ua ke los sis ua qee yam kev pe hawm ntawm sab ntsujplig. Yeej pom tseeb tias lawv tsis xav mus, thiab raws li tej hauv paus ntsiab lus, lawv kuj tsis tsim nyog mus thiab. Tiam sis, vim lawv hlub lawv lub ntsej muag heev, lawv thiaj li tsis kam hais tias tsis mus. Thaum kawg, muaj dab tsi tshwm sim? Lawv cia cov tib neeg qis, cov tib neeg nrhiav kom tau txiaj ntsim dawb ntawd siv lawv, nkim lub sij hawm uas tsim nyog muab tsom ntsoov rau lawv txoj kev nkag mus rau hauv lub neej txoj sia. Qhov ntawd tsis yog ib qho kev poob peev lod? Qhov ntawd yeej tsim nyog lawm! Qhov raug txoj kev poob peev zoo li no yeej tsis tsim nyog tau txais kev hlub tshua los sis kev khuv leej los ntawm lwm tus kiag li. Vim li cas thiaj li hais tias qhov ntawd yog ib qho kev poob peev uas tsim nyog lawm? Leej twg kom koj tsis quav ntsej Vajtswv cov lus? Leej twg kom koj ntshai ua rau tib neeg chim? Yog koj xum tsis ua rau tib neeg chim zoo dua li mloog Vajtswv cov lus, ces koj yeej tsim nyog raug txoj kev poob peev no lawm! Ib txhia hais tias, “Tib neeg tsis yog ua neej nyob hauv ib qho chaw uas tsis muaj neeg; yeej yuav tsum muaj kev sib cuag nyob rau ntawm tib neeg.” Qhov tseem ceeb yog koj sib cuag li cas. Qhov twg yog mus raws li qhov tseeb tej hauv paus ntsiab lus, mus raws li Vajtswv txoj kev npaj siab, thiab muaj txiaj ntsim rau koj txoj kev nkag mus rau hauv lub neej txoj sia dua: kev sib cuag raws li tej hauv paus ntsiab lus, los sis kev sib cuag yam tsis muaj tej hauv paus ntsiab lus, ua ib tug neeg uas ua kom lwm tus zoo siab uas sim ua kom txhua yam zoo xwb lod? Koj paub tias yuav xaiv qhov twg, tsis yog lod? Yog koj paub tias yuav xaiv li cas tiam sis koj tseem poob rau hauv lub qhov av nkos, ces qhov tshwm sim los thaum kawg yeej yuav yog koj tus kheej ris ib leeg xwb. Qhov no tsis pom tseeb lod? (Yog.)

Yeej tseem muaj ntau qhov kev qhia tshwm txog kev ua neeg ntawm cov tib neeg phem, thiab hnub no txoj kev sib qhia tsis ntau, tsuas tsom rau ob qho uas nyiam ntxeev qhov tseeb thiab qhov cuav, nyiam tau txiaj ntsim dawb xwb. Tsuas yog tom qab hnov txog ob qho no xwb tib neeg feem coob thiaj li pib muaj kev xav thiab kev paub cais me ntsis, hais tias, “Qhov kev ua neeg tsis zoo yog zoo li no ntag!” Tiam sis cov tib neeg zoo li no yeej muaj nyob hauv pawg ntseeg tiag, yog li ntawd yuav tsum ua li cas? Qhov uas lawv nyob ntawd tsis yog ib qho teeb meem loj, vim pawg ntseeg muaj tej hauv paus ntsiab lus thiab tej kev cai; tuaj yeem siv tej kev uas tsim nyog los daws cov tib neeg zoo li no. Lub hom phiaj ntawm hnub no txoj kev sib qhia txog tej yam no yog los pab kom tib neeg feem coob muaj ib qho kev to taub thiab kev paub cais kom meej txog ob hom tib neeg phem no, thiab tom qab ntawd koom tes ua hauj lwm ua ke los muab lawv ntsaig tawm mus.

Lub Kaum Ib Hlis Hnub Tim 20, Xyoo 2021

Qhov Dhau Los: Cov Thawj Coj thiab Cov Neeg Ua Hauj Lwm Tej Luag Hauj Lwm (23)

Ntxiv Mus: Cov Thawj Coj thiab Cov Neeg Ua Hauj Lwm Tej Luag Hauj Lwm (25)

Tej kev puas tsuaj tab tom tshwm sim ib yam zuj zus tuaj. Tus Tswv twb los rau hauv qhov kev zais npog ua ntej txoj kev txom nyem loj tshaj plaws lawm. Koj puas paub tias yuav tos txais Nws li cas? Txhob me siab hu rau peb los nrhiav qhov kev tos txais no.

Cov Ntsiab Lus Uas Zoo Sib Thooj

Qhov Kho Kev Teeb Txhua Yam

  • Cov ntawv
  • Cov Ntsiab Lus Tom Qab

Ib Xim Nkaus Xwb

Cov Ntsiab Lus Tom Qab

Tus Ntawv

Tus Ntawv Luaj Li Cas

Kev Sib Nrug Ntawm Tej Kab Ntawv

Kev Sib Nrug Ntawm Tej Kab Ntawv

Nplooj Ntawv Qhov Dav

Cov Ntsiab Lus

Tshawb Nrhiav

  • Tshawb Nrhiav Lo Lus No
  • Tshawb Nrhiav Phau Ntawv No