Yam Peb: Qhia Qhov Tseeb Tej Hauv Paus Ntsiab Lus uas Tsim Nyog To Taub Kom Ua Tau Txhua Tes Dej Num Kom Yog (Ntu Ob)

Nyob rau qhov kev sib txoos zaum tag los ntawd, peb tau sib qhia ntxiv txog cov thawj coj thiab cov neeg ua hauj lwm lub luag hauj lwm ob, hais txog tias muaj tej kev nyuaj dab tsi nyob rau hauv kev nkag mus rau hauv lub neej txoj sia, thiab qhia tshwm qee yam kev coj ua thiab kev qhia tshwm uas pom tau meej ntawm cov thawj coj cuav. Tom qab ntawd, peb tau tham txog ob peb yam uas ntsig txog cov thawj coj thiab cov neeg ua hauj lwm lub luag hauj lwm peb—qhia qhov tseeb tej hauv paus ntsiab lus uas tsim nyog to taub kom ua tau txhua tes dej num kom yog—thiab tau qhia tshwm thiab soj ntsuam cov thawj coj cuav “qhov cuav” ntawd tshwm tawm qhov twg ntawm cov thawj coj cuav tej cwj pwm, tej kev coj ua, thiab tej kev qhia tshwm uas pom tau meej rau tej teeb meem no, muab hais ua lwm lo lus ces yog, tej kev qhia tshwm uas pom tau meej ntawm qhov uas cov thawj coj cuav ua tsis tau lawv tej luag hauj lwm li cov thawj coj. Nej hais seb muaj pes tsawg yam teeb meem. (Muaj ib qho yog hais txog qhov luam Vajtswv cov lus ua cov phau ntawv. Tus thawj coj cuav ntawd tsis ua hauj lwm tiag tiag, nws tsuas hais cov lus qhuab qhia yam tsis muaj ntsiab xwb. Nws kuj tsis qhia txog qhov tseeb tej hauv paus ntsiab lus kom meej los sis tsis ua ib qho hauj lwm tiag tiag li.) Nyob rau hauv qhov teeb meem no, tus thawj coj cuav ntawd tsis ua hauj lwm tiag tiag, nws ua tsis tau ib tug thawj coj thiab ib tug neeg ua hauj lwm tej luag hauj lwm li, thiab nws tsis tau qhia kom meej txog tej kev cheem tsum ntawm sab qib siab, tej hauv paus ntsiab lus meej meej, thiab tej yam uas yuav tsum ceev faj uas muaj nyob rau hauv txoj hauj lwm ntawd. Nws tsuas qw tej lus qw thiab hais tej lus tsis muaj ntsiab me ntsis xwb, ces xav tias nws twb ua hauj lwm zoo lawm. Peb tseem tham txog dab tsi ntxiv thiab? (Tseem muaj qhov uas yuav ib lub tsho tiv no rau Vajtswv.) Qhov no tau qhia tshwm txog cov thawj coj cuav qhov teeb meem dab tsi? (Qhov ntawd nthuav tawm tias cov thawj coj cuav tsis ua hauj lwm tiag tiag, thiab lawv tsis muaj kev ua neeg thiab laj thawj hlo li.) Thaum muaj ib tug neeg yuav ib lub tsho rau Kuv, cov thawj coj ntawd tau pab tshuaj xyuas—qhov no puas yog ib feem ntawm cov thawj coj thiab cov neeg ua hauj lwm tes hauj lwm uas tsim nyog ua? (Tsis yog.) Lawv tau ua tes hauj lwm uas lawv tsis tsim nyog ua—qhov no yog teeb meem dab tsi? (Lawv tsis ua txoj hauj lwm uas tsim nyog ua.) Qhov no yog ib qho kev qhia tshwm uas pom tau meej ntawm cov thawj coj cuav. Ua ntej, tau qhia tshwm tias cov thawj coj cuav tsis ua txoj hauj lwm uas tsim nyog ua, thiab qhov zeeg ob, tau qhia tshwm tias lawv tsis muaj laj thawj thiab tsuas ua tej yam qias uas tsis muaj laj thawj thiab kev ua neeg. Nej tsuas nco tau cov piv txwv xwb, tiam sis nej pom tsis tshab txog tej teeb meem uas cov piv txwv no xav qhia, los sis lub ntsiab tseeb ntawm tej teeb meem no uas xav soj ntsuam. Kuv tseem muab lwm cov piv txwv dab tsi ntxiv txog qhov uas cov thawj coj cuav tsis ua txoj hauj lwm uas tsim nyog ua? (Muaj tus kws ua ncuav uas pheej ua ncuav rau Vajtswv. Vajtswv hais kom nws txhob ua lawm, tiam sis cov thawj coj thiab cov neeg ua hauj lwm tseem cia nws ua, thiab haj tseem mus saj cov ncuav ntawd ntawm lawv tus kheej kiag thiab.) Lub piv txwv no tau qhia tshwm cov thawj coj cuav tej teeb meem dab tsi? (Hais tias lawv tsis ua txoj hauj lwm uas tsim nyog ua, los sis tsis ua tes hauj lwm uas lawv yuav tsum ua, thiab pheej yuav ua txoj hauj lwm uas lawv tsis tsim nyog ua.) Qhov tseem ceeb, tau qhia tshwm tias cov thawj coj cuav tsis ua txoj hauj lwm uas tsim nyog ua thiab tuav tsis tau lub ntsiab thiab qhov tseem ceeb ntawm lawv tes hauj lwm. Tsis tas li ntawd, cov thawj coj cuav muaj ib qho teeb meem hnyav. Yog teeb meem dab tsi? (Lawv tsis mloog Vajtswv cov lus los sis ua hauj lwm raws li Vajtswv tej kev cheem tsum.) Puas muaj lwm tus xav ntxiv dab tsi? (Lawv ua txuj muaj sab ntsujplig thiab ua txuj ua tib zoo xav txog Vajtswv lub nra, tiam sis qhov tseeb tiag, lawv tsuas lam tau lam ua yam tsis quav ntsej tej cai xwb.) Qhov ko yog lwm qho ntawm lawv tej teeb meem. Puas muaj lwm tus hais ntxiv? (Ua ntej lawv ua, lawv tsis to taub Vajtswv tej kev cheem tsum; tiam sis, lawv siv lawv tus kheej tej kev xav los hloov Vajtswv lub tswv yim.) Qhov no poob rau hauv hom uas tsis muaj laj thawj. Puas muaj lwm tus hais ntxiv? (Txoj kev uas cov thawj coj cuav ua li cas rau qhov teeb meem uas ib tug neeg yuav ib lub tsho rau Vajtswv ntawd tau qhia tshwm tias lawv tsis muaj kev ua neeg li ib txwm.) Lawv tsis muaj kev ua neeg li ib txwm ntawm kis twg? Lawv tsis to taub cov kev cai txog qhov yuav coj li cas thiab lawv tsis muaj tej xeeb ceem zoo. Puas yog li ntawd? (Yog.) Qhov tseeb tiag, tej yam uas nej hais no yog qhov zeeg ob xwb; qhov teeb meem tseem ceeb yog dab tsi? Thaum cov neeg no los ua thawj coj, lawv xav xyiv fab rau tej txiaj ntsim ntawm lub meej mom thiab kev saib xyuas tshwj xeeb, thiab ntshaw kev tau zoo. Piv txwv li, lawv xav noj me ntsis ncuav, thiab thaum lawv pom tias muaj ib tug neeg ua zaub mov qab, lawv xav saj cov zaub mov ntawd kom txaus lawv txoj kev ntshaw. Lawv tsis ua txoj hauj lwm uas tsim nyog ua los sis ua tes hauj lwm tiag tiag ntawd twb txaus qias heev lawm, tiam sis tshaj qhov ntawd, lawv ntshaw kev tau zoo thiab kev txaus siab ntawm kev ntshaw noj qab. Lawv siv lub npe hais tias pab saj thiab tshuaj xyuas rau Vajtswv los ua kom txaus lawv tej kev ntshaw noj qab, txaus siab rau tej txiaj ntsim ntawm lub meej mom. Tej no puav leej yog kev qhia tshwm uas pom tau meej ntawm cov thawj coj cuav. Thaum muab tsis tau tej kev qhia tshwm uas pom tau meej no hu tias phem los sis lim hiam thaum muab piv rau tus yam ntxwv lub ntsiab tseeb ntawm cov tawm tsam khetos lawm, ces txoj kev ua neeg ntawm cov thawj coj cuav yeej qias tib neeg txaus lawm. Thaum hais txog lawv tus yam ntxwv, lawv tsis muaj lub siab txawj xav thiab laj thawj li; lawv txoj kev ua neeg mas phem thiab qias heev, thiab lawv muaj txoj kev ua siab ncaj qis. Los ntawm cov piv txwv no, tuaj yeem pom tias cov thawj coj cuav ua tsis tau tes hauj lwm tiag tiag. Qhov no yog qhov tseeb tiag.

Cov Thawj Coj Cuav Qhia Tsis Tau Txog Tej Hauv Paus Ntsiab Lus ntawm Kev Ua Hauj Lwm

Hnub no, peb yuav qhia tshwm ntxiv txog ntau yam kev qhia tshwm uas pom tau meej ntawm cov thawj coj cuav raws li cov thawj coj thiab cov neeg ua hauj lwm tej luag hauj lwm. Cov thawj coj cuav yeej ua tsis tau pawg ntseeg tes hauj lwm uas tsim nyog thiab tseem ceeb li. Lawv tsuas ua tau tej yam hauj lwm dav dav uas yooj yim xwb; lawv tes hauj lwm tsis muaj feem tseem ceeb los sis tsis muaj feem txiav txim rau pawg ntseeg tes hauj lwm tag nrho, thiab tsis muaj txiaj ntsig tiag tiag li. Tej uas lawv qhia ntawd tsuas yog tej ncauj lus qub qub uas ib txwm hais, tsuas yog cov lus thiab cov kev qhuab qhia uas pheej hais tas li thiab tsis muaj ntsiab, hais dav dav thiab tsis ntxaws. Tej uas lawv qhia ntawd tsuas yog tej yam uas tib neeg nyeem raws li cov lus sau cia ces twb to taub lawm. Cov thawj coj cuav no yeej daws tsis tau cov teeb meem tiag tiag ntawm cov neeg Vajtswv xaiv tseg txoj kev nkag mus rau hauv lub neej txoj sia li; tshwj xeeb tshaj yog, lawv haj yam daws tsis tau tib neeg tej kev xav phem, tej kev xav hauv nruab siab, thiab tej moj yam qias vuab tsuab uas lawv nthuav tawm. Qhov tseem ceeb tshaj plaws yog cov thawj coj cuav yeej ris tsis tau tej hauj lwm tseem ceeb uas Vajtswv lub tsev tau npaj, xws li tes hauj lwm tshaj tawm txoj moo zoo, tes hauj lwm ua yeeb yaj kiab, los sis tes hauj lwm ntaub ntawv. Tshwj xeeb tshaj mas, thaum hais txog tes hauj lwm uas yuav tsum muaj kev paub qib siab, thaum cov thawj coj cuav paub meej meej tias lawv yog ib tug tsis paub rau tej hauj lwm no, los lawv tsis kawm, thiab lawv tsis tshawb nrhiav, thiab lawv haj yam tsis muaj peev xwm qhia meej rau lwm tus los sis daws tej teeb meem uas ntsig txog tej ntawd li. Tiam sis lawv tseem tsis paub txaj muag coj cov kev sib txoos, hais tej tswv yim uas tsis muaj ntsiab, thiab hais cov lus thiab cov kev qhuab qhia yam tsis paub tsum li. Cov thawj coj cuav paub zoo tias lawv ua tsis tau hom hauj lwm no, tiam sis lawv tseem ua txuj li lawv paub zoo, coj tus cwj pwm khav txiv, thiab pheej siv cov kev qhuab qhia dav dav los cem lwm tus. Lawv teb tsis tau leej twg cov lus nug li, tiam sis lawv tseem nrhiav lus daws thiab laj thawj los cem lwm tus, nug tias vim li cas lawv tsis kawm kev txawj qib siab, vim li cas lawv tsis nrhiav qhov tseeb, thiab vim li cas lawv daws tsis tau lawv tus kheej tej teeb meem. Cov thawj coj cuav no, uas yog cov tsis paub txog tej hauj lwm no thiab daws tsis tau teeb meem li, tseem sawv qhov chaw siab los qhuab ntuas lwm tus. Nyob sab nraud mas, lwm tus pom tias lawv tsis khoom li, zoo li lawv ua tau hauj lwm ntau thiab muaj peev xwm heev, tiam sis qhov tseeb tiag, lawv tsis yog dab tsi li. Pom tseeb tias cov thawj coj cuav yeej ua tsis tau tes hauj lwm tiag tiag, tiam sis lawv tseem khwv rau cov hauj lwm yam kub siab, thiab pheej hais cov lus qub qub hauv cov kev sib txoos, hais tag hais dua, yam daws tsis tau ib qho teeb meem tiag tiag li. Tib neeg dhuav heev rau qhov no, thiab tsis tau txais txiaj ntsig dab tsi los ntawm qhov no li. Hom kev ua hauj lwm no qeeb dhau, thiab tsis muaj txiaj ntsig dab tsi li. Qhov no yog qhov uas cov thawj coj cuav ua hauj lwm, thiab pawg ntseeg tes hauj lwm raug ncua vim qhov no. Tiam sis cov thawj coj cuav tseem xav tias lawv ua hauj lwm zoo heev thiab lawv muaj peev xwm heev, hos qhov tseeb tiag ces lawv ua tsis tau ib qho ntawm pawg ntseeg tes hauj lwm kom zoo li. Lawv tsis paub tias cov thawj coj thiab cov neeg ua hauj lwm uas nyob hauv thaj tsam uas lawv saib xyuas ntawd puas mus raws li tus qauv, thiab lawv tsis paub tias cov coj thiab cov saib xyuas ntawm ntau pab pawg puas muaj peev xwm ris tau lawv tes hauj lwm, thiab lawv tsis quav ntsej los sis nug seb cov kwv tij thiab cov muam kev ua lawv tej dej num puas muaj teeb meem dab tsi. Muab hais luv luv, cov thawj coj cuav daws tsis tau teeb meem dab tsi nyob hauv lawv tes hauj lwm li, tiam sis lawv tseem kub siab ua cov hauj lwm heev. Raws li lwm tus pom mas, cov thawj coj cuav tuaj yeem tiv kev txom nyem, txaus siab them tus nqi, thiab lawv khiav hauj lwm txhua hnub. Thaum txog sij hawm noj mov, yuav tsum muaj neeg hu lawv los noj, thiab lawv mas pw lig heev. Tiam sis lawv tes hauj lwm yeej tsis muaj txiaj ntsig zoo li. Yog koj tsis saib zoo zoo, nyob sab nraud mas zoo li tab tom ua txhua tes hauj lwm, thiab txhua tus tsis khoom vim ua lawv tej dej num, tiam sis yog koj saib kom zoo zoo thiab ua tib zoo tshuaj xyuas tes hauj lwm, qhov tseeb yuav tshwm los. Txhua tes hauj lwm uas nyob hauv tus ciaj ciam ntawm lawv lub luag hauj lwm ntawd mas ntxhov quav niab, tsis muaj qauv los sis tsis muaj paus muaj ntsis hlo li. Muaj teeb meem—los sis haj tseem muaj tej qhov tsis txaus—nyob hauv txhua tes hauj lwm. Tej teeb meem uas tshwm no ntsig txog qhov uas cov thawj coj cuav tsis to taub qhov tseeb tej hauv paus ntsiab lus, thiab ua raws li lawv tej kev xav phem, tej kev xav hauv nruab siab, thiab kev kub siab. Cov thawj coj cuav yeej tsis qhia txog qhov tseeb tej hauv paus ntsiab lus li, thiab lawv yeej tsis nrhiav qhov tseeb los daws tej teeb meem li. Lawv yeej tsis muaj kev to taub ntawm sab ntsujplig thiab ua tsis tau tes hauj lwm thawj coj li, thiab lawv tsuas hais tau cov lus thiab cov kev qhuab qhia thiab tsis to taub qhov tseeb hlo li, tiam sis lawv ua txuj paub tej yam uas lawv twb tsis paub thiab ua txuj tias lawv yog cov kws txawj. Tes hauj lwm uas lawv ua tsuas yog ua kom dhau tes xwb. Thaum muaj teeb meem tshwm los, lawv siv cov kev cai tswj yam dig muag ntsuav los daws. Lawv tsuas yog ua hauj lwm khiav mus los yam dig muag ntsuav thiab tsis muaj txiaj ntsig tiag tiag li. Vim cov thawj coj cuav no tsis to taub qhov tseeb tej hauv paus ntsiab lus, thiab tsuas hais cov lus thiab cov kev qhuab qhia thiab ntuas lwm tus kom ua raws li cov kev cai tswj, ua rau cov kev nce qib ntawm txhua tes hauj lwm hauv pawg ntseeg qeeb thiab tsis muaj txiaj ntsig kom meej meej. Qhov tshwm sim los uas pom meej tshaj plaws ntawm qhov uas ib tug thawj coj cuav ua hauj lwm tau ib ntus ntawd ces yog tib neeg feem coob tsis tuaj yeem to taub qhov tseeb, lawv tsis paub cais thaum leej twg nthuav txoj kev qias vuab tsuab tawm los sis muaj tej kev xav phem, thiab lawv yeej tsis to taub qhov tseeb tej hauv paus ntsiab lus uas yuav tsum ua raws thaum ua lawv tej dej num li. Cov uas ua lawv tej dej num thiab cov uas tsis ua puav leej tub nkeeg, tswj tsis tau thiab qhuab qhia tsis tau, thiab ntxhov quav niab zoo li cov xuab zeb uas tawg ua sab ua sua tag. Lawv feem coob hais tau ib co lus thiab cov kev qhuab qhia, tiam sis thaum ua lawv tej dej num, lawv tsuas ua raws li cov kev cai tswj xwb; lawv tsis paub nrhiav qhov tseeb los daws teeb meem li. Vim cov thawj coj cuav tus kheej tsis paub nrhiav qhov tseeb los daws tej teeb meem li cas, lawv yuav coj tau lwm tus ua li ntawd tau li cas? Tsis hais muaj dab tsi los raug rau lwm tus, cov thawj coj cuav tsuas paub qhuab ntuas lawv hais tias, “Peb yuav tsum ua tib zoo xav txog Vajtswv tej kev npaj siab!” “Peb yuav tsum ua siab ncaj ua peb tej dej num!” “Thaum muaj tej yam dab tsi los raug peb, peb yuav tsum paub thov Vajtswv, thiab yuav tsum nrhiav qhov tseeb tej hauv paus ntsiab lus!” Cov thawj coj cuav pheej qw cov lus qw no thiab cov kev qhuab qhia no, los qhov ntawd tsis muaj txiaj ntsig dab tsi hlo li. Tom qab tib neeg mloog lawv hais tag, lawv tseem tsis to taub tias qhov tseeb tej hauv paus ntsiab lus yog dab tsi, thiab lawv tsis muaj txoj hau kev xyaum ua raws. Nyob rau sab nraud mas, tib neeg thov Vajtswv thaum muaj tej yam los raug rau lawv, thiab lawv xav ua siab ncaj ua lawv tej dej num—tiam sis lawv txhua tus tsis to taub txog tej teeb meem xws li lawv yuav tsum ua li cas thiaj li ua tau lub siab ncaj, lawv yuav tsum thov Vajtswv li cas thiaj li to taub Vajtswv txoj kev npaj siab, thiab thaum ntsib teeb meem lawv yuav tsum nrhiav li cas kom thiaj li to taub qhov tseeb tej hauv paus ntsiab lus. Thaum tib neeg nug cov thawj coj cuav, lawv hais tias, “Thaum muaj ib yam dab tsi los raug rau koj, nyeem Vajtswv cov lus kom ntau, thov Vajtswv kom ntau, thiab sib qhia txog qhov tseeb kom ntau.” Tib neeg nug lawv hais tias, “Tes hauj lwm no ntsig txog tej hauv paus ntsiab lus twg?” ces lawv hais tias, “Vajtswv cov lus tsis hais txog tes hauj lwm qib siab, thiab kuv los tsis to taub txog feem hauj lwm ntawd thiab. Yog nej xav to taub ces nej tus kheej mus tshawb nrhiav—tsis txhob nug kuv. Kuv coj nej kom to taub qhov tseeb, tsis yog hais txog tes hauj lwm qib siab.” Cov thawj coj cuav siv cov lus zoo li no los zam cov lus nug. Thiab qhov tshwm sim los, txawm hais tias tib neeg feem coob muaj lub siab kub lug ua lawv tej dej num los xij, lawv tsis paub yuav ua raws li qhov tseeb tej hauv paus ntsiab lus li cas, thiab tsis paub yuav tuav tej hauv paus ntsiab lus li cas thaum ua lawv tej dej num. Thaum saib cov txiaj ntsig ntawm txhua tes hauj lwm hauv thaj tsam uas cov thawj coj cuav saib xyuas ntawd, tib neeg feem coob tsuas vam khom lawv txoj kev paub, kev kawm, thiab tej peev xwm los ua lawv tes hauj lwm xwb, thiab lawv tsis paub dab tsi txog tej yam xws li Vajtswv tej kev cheem tsum meej meej yog dab tsi, tej hauv paus ntsiab lus ntawm kev ua dej num yog dab tsi, thiab yuav ua li cas thiaj li ua tau tiav txoj kev ua tim khawv rau Vajtswv thiab yuav tshaj tawm txoj moo zoo li cas kom muaj txiaj ntsig ntau dua kom txhua tus uas ntshaw Vajtswv qhov kev tshwm sim hnov Nws lub suab, tshawb xyuas txoj hau kev tseeb, thiab rov qab los cuag Vajtswv sai li sai tau. Vim li cas lawv thiaj li tsis paub txog tej no li? Qhov no muaj feem xyuam ncaj qha rau qhov uas cov thawj coj cuav tsis ua tes hauj lwm tiag tiag. Qhov laj thawj tseem ceeb ntawm qhov no yog cov thawj coj cuav tus kheej twb tsis paub tias qhov tseeb tej hauv paus ntsiab lus yog dab tsi, los sis tej hauv paus ntsiab lus twg uas tib neeg yuav tsum to taub thiab ua raws. Lawv ua hauj lwm tsis muaj tej hauv paus ntsiab lus, thiab lawv yeej tsis coj tib neeg mus nrhiav tej hauv paus ntsiab lus ntawm kev xyaum ua raws thiab tej txoj hau kev nyob rau hauv lawv tej dej num. Thaum ib tug thawj coj cuav pom ib qho teeb meem, nws daws tsis tau ntawm nws tus kheej, thiab nws tsis sib qhia thiab nrhiav nrog lwm tus, es ua rau ntau yam hauj lwm pheej yuav tsum tau rov qab ua dua ntau zaus. Qhov no tsis yog tsuas nkim nyiaj txiag thiab khoom siv xwb, tiam sis kuj nkim tib neeg lub zog thiab lub sij hawm thiab. Tej kev tshwm sim los uas zoo li no mas muaj feem xyuam ncaj qha rau qhov cov thawj coj cuav lub peev xwm tsis zoo hlo li thiab tsis muaj kev ris lub luag hauj lwm. Txawm qhov ntawd hais tsis tau tias yog cov thawj coj cuav txob txwm ua phem thiab tsim kev cuam tshuam los xij, yeej hais tau tias lawv tsis nrhiav qhov tseeb tej hauv paus ntsiab lus nyob hauv lawv tes hauj lwm hlo li, tias lawv pheej ua raws li lawv tus kheej lub siab nyiam. Qhov no yeej paub tseeb li ntawd. Cov thawj coj cuav tsis to taub qhov tseeb tej hauv paus ntsiab lus, thiab lawv qhia tsis tau tej ntawd kom meej rau lwm tus; tiam sis, lawv tsuas cia tib neeg ua raws li siab nyiam xwb. Qhov no ua rau qee tus neeg uas saib xyuas qee yam hauj lwm ua raws li siab nyiam thiab txhob txwm ua, ua li uas lawv xav thiab ua txhua yam uas lawv nyiam. Qhov tshwm sim los, tsis yog tsis tshua muaj txiaj ntsig tiag tiag xwb, tiam sis ua rau pawg ntseeg tes hauj lwm kuj ntxhov quav niab thiab. Thaum ib tug thawj coj cuav raug rho tawm lawm, tsis yog nws tsis tig xav txog los sis tsis paub nws tus kheej xwb, nws kuj tseem ntxeev lus thiab sib cav los tiv thaiv nws tus kheej, thiab nws tsis lees txais qhov tseeb ib qho me me li, thiab tsis npaj siab los lees txim hloov dua siab kiag li. Nws haj tseem thov kom Vajtswv lub tsev pub lwm lub cib fim rau nws, es hais tias nws yeej ua tau tes hauj lwm zoo xwb. Nej puas ntseeg cov lus ntawd? Nws tsis paub nws tus kheej hlo li, thiab nws tsis lees txais qhov tseeb. Yog li ntawd nws puas hloov tau nws tej kev coj ua? Nws tsis muaj qhov tseeb qhov muaj tiag, yog li ntawd nws puas ua tau tes hauj lwm kom zoo? Qhov ntawd puas ua tau? Zaum no nws twb ua tes hauj lwm tsis tau zoo—nws puas yuav ua tau zoo yog muab lwm lub cib fim rau nws? Qhov ntawd yeej ua tsis tau. Hais tau yam paub tseeb tias cov thawj coj cuav tsis muaj lub peev xwm ua hauj lwm; qee zaus, lawv siv zog ntau thiab tsis khoom heev, tiam sis qhov ntawd yog tsis khoom yam dig muag ntsuav, thiab tsis muaj txiaj ntsig hlo li. Qhov no txaus los qhia tias cov thawj coj cuav lub peev xwm tsis zoo hlo li, lawv tsis to taub qhov tseeb hlo li, thiab lawv ua tsis tau tes hauj lwm tiag tiag. Qhov no ua rau muaj teeb meem ntau tshwm rau hauv tes hauj lwm, tiam sis lawv tsis muaj peev xwm sib qhia qhov tseeb es los daws tej teeb meem ntawd, thiab tsuas siv cov kev qhuab qhia uas tsis muaj ntsiab me ntsis ntawd los qhuab ntuas tib neeg kom ua raws li cov kev cai tswj, thiab vim li ntawd lawv thiaj li ua rau tes hauj lwm ntxhov quav niab thiab puas tag. Qhov no yog txoj hau kev uas cov thawj coj cuav ua hauj lwm thiab qhov tshwm sim uas ua tau los. Txhua tus thawj coj thiab cov neeg ua hauj lwm yuav tsum muab qhov no ua ib qho kev ceeb toom.

Ntau yam teeb meem tsis raws siab xav uas tshwm rau hauv pawg ntseeg mas muaj feem xyuam ncaj qha rau cov thawj coj cuav—qhov no yog ib qho teeb meem uas zam tsis tau li. Cov thawj coj cuav no tsis muaj lub peev xwm to taub qhov tseeb, tiam sis lawv xav tias lawv to taub thiab paub txhua yam, thiab tom qab ntawd lawv ua raws li lawv tus kheej tej kev xav hauv nruab siab thiab tej kev xav phem. Lawv yeej tsis nrhiav qhov tseeb los daws qhov uas lawv tsis to taub qhov tseeb tej hauv paus ntsiab lus los sis cov qauv uas Vajtswv cheem tsum. Kuv tau nrog ntau tus thawj coj thiab cov neeg ua hauj lwm sib tham, thiab Kuv ntsib lawv tas li. Thaum peb sib ntsib, Kuv nug lawv hais tias, “Nej puas muaj teeb meem dab tsi? Nej puas tau sau cia txog cov teeb meem uas muaj nyob hauv tes hauj lwm? Puas muaj tej teeb meem dab tsi uas nej tus kheej daws tsis tau?” Tom qab Kuv hais tas, lawv ntsia yam yoob tag, thiab lawv ua xyem xyav hauv siab tias: “Peb yog thawj coj; peb yuav muaj teeb meem tau li cas? Yog tias peb muaj, pawg ntseeg tes hauj lwm tsis yog yuav vau ntev lawm lod? Lo lus nug no yog hom lus nug dab tsi? Peb mloog tej lus qhuab qhia thiab kev qhia, thiab tuav Vajtswv cov lus hauv peb txhais tes. Pawg ntseeg muaj peb coob npaum li no coj, Koj tseem txhawj dab tsi? Qhov Koj nug lo lus nug no qhia meej tias Koj saib tsis taus peb. Peb yuav muaj teeb meem tau li cas? Yog peb muaj teeb meem, ces peb yuav tsis yog thawj coj lawm. Koj lo lus nug mas tsis tsim nyog hlo li!” Txhua zaus Kuv nug lawv tias lawv puas muaj teeb meem dab tsi, ces qhov no yog hom xwm txheej uas lawv muaj—lawv txhua tus coj tus yam ntxwv loog thiab ruam. Muaj teeb meem ntau heev hauv ntau yam ntawm pawg ntseeg tes hauj lwm, tiam sis cov neeg no tsis pom los sis nrhiav tsis tau tej ntawd li. Lawv tsis muaj peev xwm hais cov teeb meem uas ntsig txog kev nkag mus rau hauv lub neej txoj sia ntawm tus kheej, los sis cov teeb meem uas ntsig txog qhov tseeb tej hauv paus ntsiab lus uas muaj nyob hauv tes hauj lwm ntawd tawm tuaj. Vim lawv hais tsis tau cov teeb meem no tawm tuaj, Kuv thiaj li nug lawv hais tias, “Tes hauj lwm txhais Vajtswv cov lus mus txog qib twg lawm? Nej puas paub tias tam sim no yuav tsum txhais pes tsawg hom lus? Hom lus twg yuav tsum txhais ua ntej, thiab hom lus twg txhais tom qab? Ib hom lus twg yuav tsum luam pes tsawg phau Vajtswv cov lus?” Lawv teb tias, “Au, tab tom txhais.” Kuv nug lawv tias, “Qhov kev txhais ntawd mus txog qib twg lawm? Puas muaj teeb meem dab tsi?” Lawv teb tias, “Kuv tsis paub; kuv yuav tsum tau mus nug.” Kuv yuav tsum nug lawv txog tej yam no, thiab lawv tseem tsis paub cov lus teb li. Yog li ntawd lawv ua hauj lwm dab tsi hauv tag nrho lub sij hawm dhau los no? Kuv nug lawv tias, “Koj puas tau daws cov teeb meem uas cov kwv tij thiab cov muam nug zaum tag los ntawd?” Lawv teb tias, “Kuv tau nrog lawv sib txoos lawm—qhov kev sib txoos ntawd ib hnub nkaus.” Kuv nug lawv tias, “Cov teeb meem puas tau daws tom qab kev sib txoos?” Lawv teb tias, “Puas yog Koj txhais hais tias yog tseem muaj teeb meem, ces peb yuav tsum tau npaj kev sib txoos dua?” Kuv hais tias, “Kuv tsis yog nug tias koj puas tau coj kev sib txoos los sis tsis tau. Kuv nug tias cov teeb meem sab qib siab puas tau daws lawm. Cov neeg no puas to taub tej hauv paus ntsiab lus? Lawv puas ua txhaum tej hauv paus ntsiab lus hauv kev ua lawv tej dej num? Koj puas tau pom teeb meem dab tsi?” Lawv teb tias, “Au, cov teeb meem? Kuv daws tau lawm. Kuv twb nrog cov kwv tij thiab cov muam sib txoos lawm.” Qhov kev sib tham no puas mus tau ntxiv? (Mus tsis tau lawm.) Mloog qhov kev sib tham no tsis ua rau nej npau taws lod? (Npau taws.) Cov thawj coj no zoo li cas? Lawv tsis yog cov neeg ruam uas ua txuj paub sab ntsujplig xwb lod? Lawv tsis muaj lub peev xwm ntawm cov thawj coj thiab cov neeg ua hauj lwm; lawv dig muag, lawv tsis to taub yuav ua hauj lwm li cas, thiab lawv teb tias “Kuv tsis paub” rau txhua lo lus nug, thiab thaum koj pheej nug cov lus nug rau lawv, lawv teb tias, “Txawm li cas los xij, kuv tau nrog lawv sib txoos lawm; Koj yuav xav li cas los xij!” Cov thawj coj no puas tau ua hauj lwm tiag tiag? Lawv puas mus raws li tus qauv ua thawj coj? (Tsis raws tus qauv.) Cov no yog cov thawj coj cuav. Nej puas nyiam hom thawj coj zoo li no? Yog nej ntsib cov thawj coj zoo li no, nej yuav tsum ua li cas? Thaum qee tus thawj coj ntsib cov kwv tij thiab cov muam, lawv hais tias, “Hnub no txawm nej muaj teeb meem dab tsi los xij, cia peb sib qhia txog tias yuav ua peb tej dej num kom zoo li cas ua ntej.” Qee tus neeg thiaj li hais tias, “Peb tau ntsib ib qho teeb meem txog cov tswv yim qib siab hauv peb tej dej num: Peb puas tsim nyog siv cov tswv yim qib siab uas nrov nyob rau hauv cov tsis ntseeg?” Qhov no tsis yog ib qho teeb meem uas cov thawj coj yuav tsum daws lod? Yog cov kwv tij thiab cov muam sib qhia los tseem daws tsis tau qhov teeb meem, ces cov thawj coj yuav tsum los daws—qhov no ntsig txog cov thawj coj cov luag hauj lwm. Thaum cov thawj coj cuav ntsib cov teeb meem no lawv ua li cas? Lawv hais tias, “Qhov no yog ib qho teeb meem sab qib siab lawm; nws yog nej qhov teeb meem, qhov ntawd ho muaj feem xyuam dab tsi rau kuv? Nej mam li sib qhia txog qhov teeb meem no ntawm nej tus kheej, tiam sis ua ntej no, kuv yuav coj ib qho kev sib txoos ua ke nrog nej tso. Nyob hauv qhov kev sib txoos hnub no, peb yuav sib qhia txog kev sib koom tes uas sib haum xeeb. Lo lus nug uas nej nyuam qhuav nug ntawd muaj feem xyuam rau kev sib koom tes uas sib haum xeeb. Nej yuav tsum muaj peev xwm sib tham thiab sib qhia ua ke, thiab tshawb nrhiav kom ntau ntxiv; leej twg los tsis txhob qhuas tias yus tus kheej coj ncaj, thiab txhua tus yuav tsum lees txais txhua qhov kev txiav txim siab uas muaj neeg coob txhawb nqa—qhov no tsis yog ib qho teeb meem txog kev sib koom tes uas sib haum xeeb lod? Saib mas zoo li nej tsis paub yuav sib koom tes kom sib haum xeeb li cas, los sis yuav sib tham txog tej teeb meem thaum tshwm tuaj li. Nej nug kuv txog txhua qhov teeb meem li. Nej nug kuv ua dab tsi? Kuv puas to taub tej yam no ma? Yog kuv to taub, ces nej yuav tsis muaj dab tsi ua lawm tsis yog lod? Nej nug kuv txog txhua yam. Qhov no puas yog ib qho teeb meem uas kuv tsim nyog daws? Kuv tsuas saib xyuas kev qhia txog qhov tseeb xwb; nej mam li daws cov teeb meem sab qib siab ntawm nej tus kheej. Qhov ntawd muaj feem xyuam dab tsi rau kuv? Txawm li cas los xij, kuv twb sib qhia nrog nej thiab hais kom nej sib koom tes kom sib haum xeeb lawm—yog nej ua tsis tau li ntawd, ces txhob ua tes dej num no lawm. Kuv qhia tas lawm; nej daws qhov teeb meem ntawd ntawm nej tus kheej.” Cov thawj coj no puas paub daws teeb meem? (Tsis paub.) Txawm lawv tsis paub ua qhov no los, lawv xav tias lawv muaj laj thawj heev, thiab lawv txawj zam kev ris lub luag hauj lwm heev. Thaum saib sab nraud mas, lawv tau ua lawv tes hauj lwm, lawv tau mus txog qhov chaw es tshuaj xyuas, thiab lawv tsis tub nkeeg. Tiam sis, lawv ua tsis tau tes hauj lwm tiag tiag los sis daws tsis tau teeb meem tiag tiag, uas txhais tau hais tias lawv yog cov thawj coj cuav. Nej puas paub cais hom thawj coj cuav no? Thaum ntsib teeb meem dab tsi, lawv qhia tsis tau qhov tseeb uas muaj feem xyuam: lawv tsuas hais qee cov lus qhuab qhia thiab cov tswv yim uas tsis muaj ntsiab uas lawv ua kom mloog zoo li siab thiab tob heev, thiab tom qab tib neeg mloog lawv hais tag, tsis yog lawv tsis to taub qhov tseeb xwb, lawv tseem hnov zoo li feeb tsis meej thiab tsis paub mus qhov twg thiab. Qhov no yog tes hauj lwm uas cov thawj coj cuav ua.

Nyob rau hauv tes hauj lwm qhia qhov tseeb tej hauv paus ntsiab lus uas tsim nyog to taub kom ua tau txhua tes dej num kom yog, cov thawj coj cuav raug nthuav tawm tag nrho. Lawv tsis muaj peev xwm qhia qhov tseeb tej hauv paus ntsiab lus, los sis coj tib neeg kom ua raws thiab xyaum ua raws li qhov tseeb tej hauv paus ntsiab lus nyob hauv kev ua lawv tej dej num, los sis coj kom lawv to taub thiab nkag mus rau hauv qhov tseeb qhov muaj tiag—lawv ua tsis tau raws li cov thawj coj cov luag hauj lwm uas yuav tsum ua. Thiab tsis tas li ntawd xwb, lawv kuj tsis muaj peev xwm paub tej xwm txheej ntawm cov saib xyuas tes hauj lwm uas sib txawv thiab cov neeg ua hauj lwm uas saib xyuas ntau txoj hauj lwm tseem ceeb, thiab txawm hais tias lawv paub me ntsis qhov no los xij, qhov ntawd tsis raug. Qhov no ua rau muaj kev cuam tshuam thiab kev puas tsuaj loj heev rau ntau yam hauj lwm. Cov no yog ntau yam kev tshwm uas pom tau meej ntawm cov thawj coj cuav uas peb yuav qhia tshwm hnub no txog cov thawj coj thiab cov neeg ua hauj lwm lub luag hauj lwm plaub.

Yam Plaub: Paub Tej Xwm Txheej ntawm Cov Saib Xyuas Tes Hauj Lwm Uas Sib Txawv thiab Cov Neeg Ua Hauj Lwm Uas Saib Xyuas Ntau Txoj Hauj Lwm Tseem Ceeb, thiab Hloov Tej Dej Num Uas Muab Rau Lawv Ua Ntawd Kom Ncav Sij Hawm los sis Muab Lawv Rho Tawm Mus Yog Tias Tim Tsum, Kom Thiaj Li Tiv Thaiv Tau los sis Txo Tau Cov Kev Puas Tsuaj Uas Tsim los ntawm Qhov Siv Cov Tib Neeg Uas Tsis Tsim Nyog Ntawd, thiab Kom Paub Tseeb Hais Tias Tes Hauj Lwm Mus Tau Zoo thiab Nce Qib Zoo

Cov Thawj Coj thiab Cov Neeg Ua Hauj Lwm Yuav Tsum Paub Tej Xwm Txheej Ntawm Cov Saib Xyuas Tes Hauj Lwm Uas Sib Txawv

Cov thawj coj thiab cov neeg ua hauj lwm tej luag hauj lwm plaub yog dab tsi? (“Paub tej xwm txheej ntawm cov saib xyuas tes hauj lwm uas sib txawv thiab cov neeg ua hauj lwm uas saib xyuas ntau txoj hauj lwm tseem ceeb, thiab hloov tej dej num uas muab rau lawv ua ntawd kom ncav sij hawm los sis muab lawv rho tawm mus yog tias tim tsum, kom thiaj li tiv thaiv tau los sis txo tau cov kev puas tsuaj uas tsim los ntawm qhov siv cov tib neeg uas tsis tsim nyog ntawd, thiab kom paub tseeb hais tias tes hauj lwm mus tau zoo thiab nce qib zoo.”) Hais yog lawm, qhov no yog tus qauv tsawg kawg nkaus uas cov thawj coj thiab cov neeg ua hauj lwm yuav tsum ua tau thaum ua hauj lwm. Nej txhua tus puas paub meej txog cov thawj coj thiab cov neeg ua hauj lwm cov luag hauj lwm tseem ceeb yam plaub no lawm? Cov thawj coj thiab cov neeg ua hauj lwm yuav tsum muaj kev to taub meej txog cov saib xyuas tes hauj lwm uas sib txawv thiab cov neeg ua hauj lwm uas saib xyuas ntau txoj hauj lwm tseem ceeb. Kom paub tej xwm txheej ntawm cov saib xyuas tes hauj lwm uas sib txawv thiab cov neeg ua hauj lwm uas saib xyuas ntau txoj hauj lwm tseem ceeb qhov ntawd nyob hauv ciaj ciam ntawm cov thawj coj thiab cov neeg ua hauj lwm tej luag hauj lwm. Yog li, cov neeg ua hauj lwm no yog leej twg? Qhov tseem ceeb, muaj cov thawj coj pawg ntseeg, tom qab ntawd yog cov saib xyuas pab pawg thiab cov coj ntawm ntau pab pawg. Nws tsis yog ib qho tseem ceeb heev kom nkag siab thiab to taub tej xwm txheej xws li seb cov saib xyuas tes hauj lwm uas sib txawv thiab cov neeg ua hauj lwm uas saib xyuas ntau txoj hauj lwm tseem ceeb puas muaj qhov tseeb qhov muaj tiag, puas muaj hauv paus ntsiab lus hauv lawv tej kev ua, thiab puas ua tau pawg ntseeg tes hauj lwm kom zoo? Yog cov thawj coj thiab cov neeg ua hauj lwm paub meej txog tej xwm txheej ntawm cov saib xyuas tseem ceeb ntawm tes hauj lwm uas sib txawv, thiab hloov cov neeg ua hauj lwm kom tsim nyog, qhov ntawd zoo ib yam li lawv ua qhov kev tshuaj xyuas kom zoo rau txhua yam hauj lwm, thiab zoo ib yam li lawv ua tiav lawv cov luag hauj lwm thiab tej dej num. Yog tsis hloov cov neeg ua hauj lwm no kom yog thiab muaj teeb meem tshwm tuaj, ces pawg ntseeg tes hauj lwm yuav raug cuam tshuam loj heev. Yog cov neeg ua hauj lwm no muaj kev ua neeg zoo, muaj lub hauv paus hauv lawv txoj kev ntseeg Vajtswv, muaj kev ris lub luag hauj lwm hauv kev saib xyuas tej yam, thiab tuaj yeem nrhiav qhov tseeb los daws teeb meem, ces qhov muab hauj lwm rau lawv saib xyuas ntawd yuav zam tau teeb meem ntau yam, thiab qhov tseem ceeb tshaj plaws yuav ua rau tes hauj lwm mus tau zoo. Tiam sis yog cov saib xyuas ntawm ntau pab pawg ntseeg siab tsis tau, muaj kev ua neeg tsis zoo, tsis coj zoo, thiab tsis muab qhov tseeb coj los xyaum ua raws, tsis tas li ntawd, tseem ua tau qee qhov kev tab kaum thiab kev cuam tshuam, ces qhov no yuav cuam tshuam rau tes hauj lwm uas lawv saib xyuas thiab kev nkag mus rau hauv lub neej txoj sia ntawm cov kwv tij thiab cov muam uas lawv coj. Muaj tseeb tiag, qhov cuam tshuam ntawd tej zaum yuav loj los sis me. Yog cov saib xyuas tsuas yog tsis quav ntsej hauv lawv tej dej num thiab tsis ua tes hauj lwm uas tsim nyog ua xwb, ces qhov no tej zaum tsuas yuav ua rau tes hauj lwm qeeb me ntsis; txoj kev nce qib yuav qeeb me ntsis, thiab tes hauj lwm yuav tsis tshua muaj txiaj ntsig me ntsis xwb. Txawm li cas los xij, yog tias lawv yog cov tawm tsam khetos, ces qhov teeb meem yuav loj: Qhov no yuav tsis yog ib qho teeb meem ntawm tes hauj lwm mus qeeb los sis tsis muaj txiaj ntsig xwb—lawv yuav cuam tshuam thiab ua kom puas tsuaj rau pawg ntseeg tes hauj lwm uas lawv saib xyuas ntawd, ua rau muaj kev puas tsuaj loj. Thiab yog li ntawd, qhov paub tej xwm txheej ntawm cov saib xyuas tes hauj lwm uas sib txawv thiab cov neeg ua hauj lwm uas saib xyuas ntau txoj hauj lwm tseem ceeb, thiab hloov los sis rho tawm kom ncav sij hawm thaum pom tias muaj neeg tsis ua hauj lwm tiag tiag ntawd tsis yog ib lub luag hauj lwm uas cov thawj coj thiab cov neeg ua hauj lwm tuaj yeem zam tau—qhov ntawd yog ib tes hauj lwm uas hnyav thiab tseem ceeb heev. Yog cov thawj coj thiab cov neeg ua hauj lwm tuaj yeem paub cov saib xyuas tes hauj lwm uas sib txawv thiab cov neeg ua hauj lwm uas saib xyuas ntau txoj hauj lwm tseem ceeb tus yam ntxwv kom ncav sij hawm, thiab lawv tus cwj pwm coj rau qhov tseeb thiab lawv tej dej num, nrog rau lawv tej yam ntxwv thiab kev ua hauj lwm hauv txhua ntu sij hawm thiab txhua theem, thiab hloov thiab daws cov neeg ntawd raws li tej xwm txheej kom ncav sij hawm, ces tes hauj lwm tuaj yeem mus tau yam ruaj khov. Qhov txawv, yog cov neeg ntawd nyob hauv pawg ntseeg lam tau lam ua yam tsis quav ntsej tej cai thiab tsis ua hauj lwm tiag tiag, thiab cov thawj coj thiab cov neeg ua hauj lwm tsis tuaj yeem pom qhov no kom sai thiab hloov kom ncav sij hawm, tiam sis tos kom txog thaum muaj teeb meem loj ntawm txhua yam tshwm tuaj lawm, es ua rau muaj kev puas tsuaj loj rau pawg ntseeg tes hauj lwm lawm, mam li maj mam yuav mus daws cov teeb meem ntawd, hloov, thiab kho thiab pab qhov xwm txheej, ces cov thawj coj thiab cov neeg ua hauj lwm ntawd yog cov khoom seem txheej xwb. Lawv yog cov thawj coj cuav tiag tiag uas yuav tsum raug rho tawm thiab tshem tawm.

Nyuam qhuav no, peb tau qhia dav dav txog qhov tseem ceeb ntawm qhov to taub thiab paub tej yam ntxwv tiag tiag ntawm cov saib xyuas tes hauj lwm uas sib txawv thiab cov txiaj ntsig ntawm lawv tes hauj lwm, uas siv tej xwm txheej tiag tiag no los ntsuas seb cov thawj coj thiab cov neeg ua hauj lwm puas tau ua tiav lawv tej luag hauj lwm, thiab qhia tshwm lawv muaj tej kev qhia tshwm uas pom tau meej twg uas ua pov thawj tias lawv yog cov thawj coj cuav, thiab los ntawm qhov ntawd es los soj ntsuam lub ntsiab tseeb ntawm cov thawj coj cuav. Thaum muaj teeb meem loj tshwm hauv pawg ntseeg tes hauj lwm, cov thawj coj cuav ua tsis tau lawv tej luag hauj lwm kom tiav. Lawv tsis tuaj yeem pom cov teeb meem no kom sai, haj yam tsis tuaj yeem saib xyuas thiab daws tej teeb meem ntawd kom ncav sij hawm li. Qhov no ua rau cov teeb meem raug ncua ntev, uas ua rau pawg ntseeg tes hauj lwm qeeb thiab raug puas tsuaj, thiab haj tseem yuav ua rau pawg ntseeg tes hauj lwm vau los sis nyob hauv qhov xwm txheej uas ua sab ua sua. Tsuas yog thaum qhov no tshwm tuaj lawm xwb cov thawj coj cuav thiaj li lam mus saib ntawm qhov chaw ua hauj lwm, tiam sis lawv kuj nrhiav tsis tau tej hau kev daws teeb meem uas raug los sis tsim nyog los daws cov teeb meem ntawd, thiab thaum kawg lawv cia li cia cov teeb meem nyob twj ywm tsis raug daws. Qhov no yog qhov kev qhia tshwm uas pom tau meej tseem ceeb tshaj plaws ntawm cov thawj coj cuav.

Cov Qauv Xaiv Cov Saib Xyuas Tes Hauj Lwm uas Sib Txawv

Feem coob puas yog muaj kev nkag siab tsis ntau los tsawg txog cov qauv xaiv cov saib xyuas tes hauj lwm uas sib txawv thiab cov neeg ua hauj lwm uas saib xyuas ntau txoj hauj lwm tseem ceeb? Piv txwv li, tus neeg saib xyuas tes hauj lwm kos duab yuav tsum muaj dab tsi ua ntej hlo? (Lawv yuav tsum muaj kev txawj qib siab txog qhov no thiab muaj peev xwm ris tes hauj lwm no.) Qhov muaj kev txawj qib siab yog ib kis ntawm lub tswv yim. Yog li ntawd, cov kev txawj qib siab no yog hais txog dab tsi kiag? Cia peb piav txog qhov no. Yog ib tug neeg xyiv fab rau kev kos duab thiab nyiam kev kos duab, tiam sis qhov ntawd tsis yog nws tes hauj lwm, thiab nws tsis muaj kev paub txog qhov no, thiab tsuas lam nyiam xwb, qhov ntawd puas tsim nyog xaiv tus neeg zoo li no los ua tus saib xyuas ntawm ib pab pawg kos duab? (Tsis tsim nyog.) Ib txhia hais tias, “Yog nws nyiam kos duab, nws ua tau tes hauj lwm ntawd thiab maj mam kawm xwb.” Lo lus no puas yog? (Tsis yog.) Tshwj tsis yog muaj ib qho xwm txheej, uas yog txhua tus nyob hauv pab pawg kos duab ntawd tsis paub sab kev qib siab no, thiab tus neeg no paub ntau me ntsis thiab kawm tau sai dua lwm tus. Yog li ntawd qhov xaiv nws puas yog tsim nyog dua? (Yog.) Dhau ntawm qhov xwm txheej no lawm, yog hais tias nyob hauv tag nrho cov neeg ua hauj lwm kos duab ntawd, tsuas yog tus neeg no tsis paub kev qib siab, tiam sis raug xaiv vim nws to taub qhov tseeb thiab nyiam kos duab—qhov ntawd puas tsim nyog? (Tsis tsim nyog.) Vim li cas thiaj li tsis tsim nyog? Vim nws tsis yog thawj tug los sis tib tug uas xaiv tau xwb. Yog li ntawd yuav xaiv hom neeg saib xyuas no li cas? Yuav tsum xaiv los ntawm cov neeg uas paub zoo tshaj thiab muaj kev paub dhau los ntau tshaj txog tes hauj lwm no; qhov ntawd yog, nws yuav tsum yog tus kws paub, muaj qhov kev txawj qib siab thiab muaj lub peev xwm ua hauj lwm—tsis txhob xaiv tus neeg uas tsis paub. Qhov no yog ib kis. Ntxiv rau qhov ntawd, nws yuav tsum ris lub nra, muaj kev to taub ntawm sab ntsujplig, thiab tuaj yeem to taub qhov tseeb. Nws kuj yuav tsum muaj tsawg kawg ib lub hauv paus nyob hauv lawv txoj kev ntseeg Vajtswv. Cov hauv paus ntsiab lus tseem ceeb yog: Qhov ib, nws yuav tsum muaj lub peev xwm ua hauj lwm; qhov ob, nws yuav tsum to taub kev qib siab; thiab qhov peb, nws yuav tsum muaj kev to taub ntawm sab ntsujplig thiab tuaj yeem to taub qhov tseeb. Siv peb qhov no los xaiv cov saib xyuas tes hauj lwm uas sib txawv.

Tej Kev Qhia Tshwm Uas Pom Tau Meej ntawm Cov Thawj Coj Cuav Txog Cov Saib Xyuas Tes Hauj Lwm uas Sib Txawv

Tom qab xaiv cov saib xyuas tes hauj lwm meej meej uas sib txawv lawm, cov thawj coj thiab cov neeg ua hauj lwm yuav tsum tsis txhob cia li tso tes es tsis quav ntsej lawm; lawv yuav tsum cob qhia thiab coj cov saib xyuas no xyaum ib ntus, es saib seb cov tib neeg uas lawv xaiv ntawd puas tuaj yeem ris tau tes hauj lwm thiab coj tes hauj lwm mus rau txoj kev uas yog tiag tiag. Qhov ntawd thiaj li yog lub ntsiab ntawm qhov ua lawv tej luag hauj lwm kom tiav. Muab xam hais tias, thaum lub sij hawm xaiv ntawd, koj pom tias cov uas koj xaiv ntawd to taub txog cov kev paub txog tes hauj lwm, muaj lub peev xwm ua hauj lwm, ris lub nra me ntsis, thiab muaj kev to taub ntawm sab ntsujplig thiab tuaj yeem to taub qhov tseeb, es koj xav hais tias txhua yam yuav tau lawm vim tej no ntawm lawv twb tsim nyog lawm, thiab hais tias, “Nej pib ua hauj lwm tau lawm; kuv twb qhia tag nrho tej hauv paus ntsiab lus rau nej lawm. Txij no mus, cia li ua raws li Vajtswv lub tsev qhia nej kom ua xwb.” Qhov no puas yog txoj kev ua hauj lwm uas txais yuav tau? Thaum koj npaj tiav cov saib xyuas lawm, qhov no puas txhais hais tias koj tuaj yeem cia li tsis quav ntsej lawm? (Tsis tuaj yeem.) Yog li ntawd yuav tsum ua li cas? Yog tias ib tug thawj coj sib txoos nrog cov saib xyuas ntawd ob zaug hauv ib lub lim tiam, sib qhia qhov tseeb nrog lawv, thiab tas li ntawd xwb, es ntseeg hais tias vim cov saib xyuas ntawd puav leej nquag, tso siab tau, thiab tuaj yeem to taub tau yam uas lwm tus hais, yog li ntawd lawv yeej xyaum ua tau raws li qhov tseeb. Tus thawj coj no xav hais tias nws tsis tas yuav tshuaj xyuas los sis taug qab seb cov saib xyuas no ua lawv tes hauj lwm meej meej li cas, seb lawv puas sib koom tes nrog lwm tus kom sib haum xeeb, seb lawv puas tau paub cov kev txawj qib siab nyob rau ntu sij hawm no, los sis lawv ua tes hauj lwm uas Vajtswv lub tsev muab rau lawv ntawd tiav npaum li cas lawm. Qhov no puas yog txoj hau kev uas ib tug thawj coj thiab ib tug neeg ua hauj lwm tsim nyog ua tes hauj lwm? (Tsis yog.) Qhov no yog txoj kev uas cov thawj coj cuav ua lawv tes hauj lwm. Lawv yuav ua kom tag nrho tes hauj lwm tiav ib zaug nkaus xwb, lawv npaj cov saib xyuas thiab tsim tau ib pab pawg uas muaj ob peb tug tswv cuab, thiab tom qab ntawd hais tias, “Pib ua hauj lwm lau. Yog nej tim tsum tej cuab yeej khoom siv dab tsi, qhia rau kuv paub, thiab Vajtswv lub tsev mam li yuav rau nej. Yog nej ntsib tej kev nyuaj nyob hauv nej lub neej txhua hnub los sis tej teeb meem dab tsi, cia li hais tawm los, thiab Vajtswv lub tsev yuav daws rau nej txhua lub sij hawm. Yog nej tsis muaj ib qho kev nyuaj li, ces tsom ntsoov rau nej tes hauj lwm xwb. Tsis txhob ua kom muaj kev tab kaum los sis kev cuam tshuam, thiab tsis txhob hais tej lus zoo uas tsis muaj qab hau dab tsi.” Cov thawj coj cuav npaj cov tib neeg no los ua hauj lwm ua ke, thiab xav hais tias tsuav yog lawv muaj noj, muaj haus, thiab muaj chaw nyob xwb, ces txaus lawm, thiab tsis tas yuav quav ntsej lawv li. Thaum tus Nyob Saud nug hais tias, “Ntev npaum li cas lawm txij thaum xaiv cov saib xyuas rau tes hauj lwm no? Tes hauj lwm nce qib mus li cas lawm?” lawv teb hais tias, “Tau rau lub hli lawm. Peb twb sib txoos nrog lawv li 10 zaus lawm, thiab saib zoo li lawv nquag plias, thiab tab tom ua tes hauj lwm lawm.” Thaum tus Nyob Saud nug hais tias, “Yog li ntawd cov saib xyuas lub peev xwm ua hauj lwm zoo li cas?” lawv hais tias, “Kuj tau thiab; thaum peb xaiv ntawd, lawv yog cov zoo tshaj plaws.” Tus Nyob Saud nug lawv hais tias, “Tam sim no lawv zoo li cas? Lawv puas ua tau hauj lwm tiag tiag?” Lawv teb hais tias, “Kuv twb sib txoos nrog lawv lawm.” Tus Nyob Saud teb hais tias, “kuv tsis tau nug hais tias koj puas tau sib txoos nrog lawv; kuv nug hais tias lawv tes hauj lwm ua tau zoo li cas.” Lawv hais tias, “Tej zaum zoo xwb; tsis muaj leej twg qhia dab tsi tsis zoo txog lawv li.” Tus Nyob Saud teb hais tias, “Qhov tsis muaj leej twg qhia dab tsi tsis zoo txog lawv ntawd tsis yog ib qho qauv. Koj yuav tsum saib seb lawv lub peev xwm ua hauj lwm thiab cov kev txawj qib siab zoo li cas, thiab saib seb lawv puas muaj kev to taub ntawm sab ntsujplig, thiab seb lawv puas ua hauj lwm tiag tiag.” Lawv teb hais tias, “Thaum lub sij hawm xaiv ntawd, saib mas zoo li lawv kuj tau thiab. Ib ntus no kuv tsis tau nug txog tej ntxaws ntxaws no lawm. Yog koj xav paub, kuv mam li nug dua.” Qhov no yog txoj kev uas cov thawj coj cuav ua hauj lwm. Lawv pheej sib txoos thiab sib qhia tsis tu ncua nrog cov uas nyob hauv qab lawv, tiam sis thaum hais txog tus Nyob Saud, lawv hais lus tsis meej thiab lam teb kom dhau xwb. Lawv cov lus teb lam ua kom dhau uas zoo tshaj plaws ces yog hais tias, “Kuv twb sib txoos nrog lawv lawm. Zaum tas los, kuv nug txog tes hauj lwm, nug ntxaws heev.” Qhov no yog qhov lawv teb rau tus Nyob Saud. Cov thawj coj cuav no puas ua hauj lwm tiag tiag? Lawv puas pom cov teeb meem tiag tiag? Lawv puas tau daws cov teeb meem ntawd? Tom qab npaj cov saib xyuas lawm, cov thawj coj cuav tsis paub kiag li hais tias cov saib xyuas ntawd puas ua lawv tej luag hauj lwm kom tiav los sis puas muaj lub siab ncaj, tes hauj lwm ua mus zoo li cas, cov txiaj ntsig zoo los tsis zoo, cov kwv tij thiab cov muam qhia txog lawv li cas, los sis seb puas muaj cov tib neeg uas tsim nyog dua rau tes hauj lwm ntawd. Vim li cas lawv thiaj li tsis paub txog tej no? Vim lawv tsis ua tes hauj lwm tiag tiag no; lawv tsuas tsis khoom rau tej yam uas tsis muaj qab hau xwb. Lawv xav hais tias tsis tas yuav saib xyuas thiab tshuaj xyuas tes hauj lwm tas li zoo li no, tias qhov ntawd txhais tau hais tias lawv tsis tso siab rau cov saib xyuas ntawd. Nyob hauv lawv txoj kev xav, qhov sib txoos ua ke yog qhov uas ua lawv tej luag hauj lwm kom tiav thiab qhia txog kev ua siab ncaj. Qhov no yog qhov kev qhia tshwm uas pom tau meej tseem ceeb ntawm cov thawj coj cuav uas tsis ua hauj lwm tiag tiag.

I. Cov Thawj Coj Cuav Coj Li Cas Rau Cov Saib Xyuas Uas Tsis Ua Hauj Lwm Tiag Tiag

Cov thawj coj cuav ua ntsej lag muag dig rau ntau yam xwm txheej ntawm cov saib xyuas tes hauj lwm uas sib txawv hauv pawg ntseeg; lawv tsis paub txog, tsis tshawb xyuas, tsis daws, thiab tsis kho cov xwm txheej no li. Yog li ntawd, cov saib xyuas muaj cov xwm txheej meej meej dab tsi? Thawj qhov yog thaum cov saib xyuas tsis ris lub nra, thiab tsuas noj, haus, thiab nrhiav kev lom zem, yam tsis saib xyuas lawv tes hauj lwm uas tsim nyog ua los sis tsis ua hauj lwm tiag tiag. Qhov no tsis yog ib qho teeb meem loj lod? (Yog.) Muaj ib txhia tib neeg mas muaj lub peev xwm ua hauj lwm, paub zoo txog kev qib siab, thiab lawv yog cov zoo tshaj plaws; lawv txawj hais lus thiab ntse, thiab yog hais kom lawv rov hais dua cov lus qhia mas lawv hais tau tsis poob ib lo li, lawv ntse txaus; lawv tau txais kev ntsuas zoo los ntawm sawv daws, thiab lawv ntseeg Vajtswv tau ntev tsawv lawm. Yog li ntawd, lawv thiaj li raug xaiv los ua cov saib xyuas. Txawm li cas los xij, tsis muaj leej twg paub hais tias cov tib neeg no puas ua tiag tiag, puas tuaj yeem them tus nqi, los sis puas tuaj yeem ua hauj lwm tiag tiag. Vim tib neeg xaiv lawv lawm, thaum pib lawv thiaj li raug txhawb los cob qhia thiab sim siv saib. Txawm li cas los xij, tom qab ua hauj lwm tau ib ntus, thiaj li pom tias txawm lawv muaj cov kev paub txog tes hauj lwm thiab muaj kev paub dhau los los xij, lawv ntshaw noj ntshaw haus thiab tub nkeeg, thiab tsis kam them tus nqi. Lawv tsis ua hauj lwm kiag thaum nkees me ntsis xwb, thiab lawv tsis xav quav ntsej leej twg uas muaj teeb meem los sis kev nyuaj uas tim tsum lawv coj qhia. Thaum sawv ntxov, thaum lawv qhib qhov muag xwb lawv twb xav hais tias, “Hnub no kuv yuav noj dab tsi? Tau ntau hnub lawm uas chav ua mov tsis tau ua nqaij npuas hau kom liab lawm.” Feem ntau, lawv pheej hais rau lwm tus tias, “Cov khoom noj ua si hauv peb lub zos mas qab heev; thaum muaj tej koob tsheej peb yeej tawm mus noj. Thaum kuv tseem kawm ntawv ntawd, thaum txog hnub so mas kuv yeej pw kom txog thaum kuv cia li tsim kuv xwb, thiab tom qab ntawd kuv yuav mus noj mov yam tsis ntxuav muag los sis ntsis plaub hau li. Thaum tav su dua, kuv yuav hnav cev khaub ncaws pw tua vis dis aus kees hauv chav, qee zaus tua kees txog 5 teev sawv ntxov hnub tom qab. Tam sim no, tes hauj lwm hauv Vajtswv lub tsev yuam kuv txog qhov no, thiab kuv yog ib tug saib xyuas, kuv yuav tsum tau ua qee yam. Saib seb nej sawv daws zoo npaum li cas; nej tsis tas them tus nqi no. Vim kuv yog ib tug saib xyuas, kuv yuav tsum tiv taus kev txom nyem.” Lawv hais li no, tiam sis lawv puas ntxeev siab tawm tsam lub cev nqaij daim tawv? Lawv puas them tus nqi? Lawv muaj kev yws puv npo, thiab lawv tsis kam ua ib qho hauj lwm tiag tiag li. Yuav tsum thawb ib zaug mam li txav ib ruam xwb, thiab yog tsis muaj neeg saib xyuas, ces lawv yuav ua hauj lwm ua dog ua dig. Nyob hauv qhov kev ua lawv tes dej num, lawv ua ywj siab thiab tsis raug qhuab qhia li, lawv pheej ua dog ua dig thiab tub nkeeg, thiab lawv tsis muaj kev ris lub luag hauj lwm ib qho me me li. Thaum hais txog cov teeb meem sab qib siab uas lawv pom, lawv tsis kho rau lwm tus, thiab lawv zoo siab thaum lwm tus ua dog ua dig zoo ib yam li lawv. Lawv tsis xav kom leej twg ua tiag tiag rau tes hauj lwm ntawd. Qee tus neeg saib xyuas ua cov hauj lwm me ntsis uas muaj hauv lawv tes yam yooj yooj yim thiab ua dog ua dig kom tiav, ces tom qab ntawd lawv pib mus saib yeeb yaj kiab tsis tsum li. Lawv qhov laj thawj ntawm kev saib yeeb yaj kiab yog dab tsi? “Kuv ua kuv cov hauj lwm tiav lawm; kuv tsis yog noj dawb hauv Vajtswv lub tsev. Kuv tsuas so kuv lub hlwb xwb. Yog tsis li ntawd ces kuv yuav sab dhau lawm, thiab kuv txoj kev ua hauj lwm yuav tsis zoo. Cia kuv so ib pliag, txhawm rau txhim kho kuv kev ua hauj lwm kom ceev dua.” Lawv pheej saib yeeb yaj kiab mus txog 2 los sis 3 teev sawv ntxov. Hnub tom qab thaum 8 teev sawv ntxov uas sawv daws twb noj tshais tag thiab pib ua lawv tej dej num lawm, cov saib xyuas no tseem pw tsaug zog, thiab lawv tsis sawv hauv txaj los txawm tias lub hnub twb tawm siab lawm. Tom qab ntawd, lawv lam sawv los, rub lawv lub cev uas tub nkeeg ntawd mus, ncab cev thiab rua lo, thiab thaum lawv pom tias lwm tus pib ua hauj lwm lawm, lawv ntshai tsam lwm tus pom lawv txoj kev tub nkeeg, thiab pib nrhiav cov laj thawj, “Nag hmo kuv pw lig dhau lawm, kuv muaj hauj lwm ntau dhau, tes hauj lwm hnyav dhau. Kuv me ntsis sab. Nag hmo kuv haj tseem ua npau suav tias muaj teeb meem rau qee tes hauj lwm. Tag kis no thaum sawv, kuv txhais tes tseem nyob hauv tus yam ntxwv ntaus ntawv hauv khoosphitawj. Kuv lub hlwb feeb tsis meej tiag tiag li, thiab kuv yuav tsum tau pw ib pliag thaum tav su dua no.” Lawv sawv lig npaum li ntawd tav su tseem yuav pw ntxiv thiab—lawv tsis yog rais mus ua npua lawm lod? Pom meej meej tias yog lawv tub nkeeg, tiam sis lawv tseem nrhiav laj thawj los hais daws lawv tus kheej, hais tias lawv sab vim lawv ua lawv tes dej num mus txog lig lig. Pom meej meej tias yog lawv saib yeeb yaj kiab, txaus siab rau kev tau zoo ntawm lub cev nqaij daim tawv, thiab ua neej nyob yam tsis meej pem, tiam sis thaum kawg lawv haj tseem nrhiav ib qho laj thawj uas zoo mloog los dag lwm tus. Qhov no tsis yog kev tsis saib xyuas lawv tes hauj lwm uas tsim nyog ua lod? (Yog lawm.) Cov tib neeg zoo li no muaj lub peev xwm ua hauj lwm thiab cov kev txawj qib siab, tiam sis lawv puas mus raws li tus qauv ua cov neeg saib xyuas? Yeej pom meej tias tsis mus raws. Lawv tsis haum los ua cov saib xyuas vim lawv tub nkeeg dhau, lawv ntshaw kev tau zoo ntawm lub cev nqaij daim tawv, lawv ntshaw noj, ntshaw pw, thiab ntshaw kev lom zem, thiab lawv ris tsis taus los sis ua tsis tau ib tug saib xyuas tej luag hauj lwm kom tiav.

Qee tus poj niam pheej saib khaub ncaws, khau, tshuaj pleev kom zoo nkauj, thiab khoom noj hauv os lais, thiab tom qab lawv saib tag, lawv pib saib yeeb yaj kiab. Tib neeg hais tias, “Ua cas koj pheej saib yeeb yaj kiab thaum koj ua koj tes hauj lwm tsis tau tiav? Tsis tas li ntawd, lwm tus tseem muaj teeb meem ntau heev. Koj yog ib tug saib xyuas, koj yuav tsum coj qhia lawv. Vim li cas koj tsis ua koj lub luag hauj lwm kom tiav?” Cov poj niam no hais tias, “Qhov saib yeeb yaj kiab los kuj yog ib feem ntawm kuv tes hauj lwm thiab. Cov vis dis aus thiab cov yeeb yaj kiab ntawm Vajtswv lub tsev yuav tsum muaj kev txhim kho, thiab kuv yuav tsum nrhiav kev tshoov siab hauv cov yeeb yaj kiab no!” Qhov ntawd tsis yog lus dag lod? Yog koj ua tes hauj lwm no, qhov saib yeeb yaj kiab qee zaus los nrhiav kev tshoov siab mas yeej tau, tiam sis qhov saib tas hnub tas hmo ntawd puas yog nrhiav kev tshoov siab? Qhov ntawd tsis yog dag lod? (Yog lawm.) Sawv daws yeej paub tias yog dab tsi, yog li qhov hais li ntawd yog muab koj lub meej mom thiab kev coj ncaj muag lawm. Ib txhia tib neeg twb muaj tus cwj pwm tua vis dis aus kees lawm, thiab qhov ntawd dhau los ua ib feem hauv lawv lub neej txhua hnub lawm. Txawm li cas los xij, tom qab raug xaiv los ua cov saib xyuas lawm, puas yog lawv tsim nyog hloov cov cwj pwm phem thiab qee yam phem no? (Yog.) Yog koj ntxeev siab tawm tsam tsis tau tej no, thaum xaiv koj los ua ib tug saib xyuas ntawd, koj yuav tsum hais tias, “Kuv ris tsis taus tes hauj lwm no. Kuv tua vis dis aus kees heev. Thaum kuv tua kees, kuv tua mus txog rau theem uas tsis nco qab dab tsi li, thiab leej twg txwv los tsis tau los sis hais tsis tau kuv li. Yog nej xaiv kuv, qhov ntawd yeej yuav ua rau tes hauj lwm qeeb xwb. Yog li ntawd, thaum tseem ntxov ces tsis txhob cia kuv ua ib tug saib xyuas.” Yog koj tsis tshaj qhov no tawm kom meej ua ntej thiab txaus siab thiab zoo siab thaum koj raug xaiv, thiab saib lub meej mom no tseem ceeb, tiam sis tom qab koj yog ib tug saib xyuas lawm koj pheej tua vis dis aus kees raws siab nyiam ib yam li yav dhau los, qhov no tsis tsim nyog, thiab qhov ntawd yeej yuav ua rau tes hauj lwm qeeb xwb.

Qee tus neeg saib xyuas muaj qee yam cwj pwm phem. Thaum cov kwv tij thiab cov muam xaiv lawv, ib txhia tsis to taub txog lawv qhov xwm txheej, hos lwm tus ntseeg hais tias cov tib neeg no tuaj yeem muab lawv tus kheej fij rau Vajtswv puv sij hawm, thiab xav hais tias cov tub ntxhais hluas cov cwj pwm phem thiab qee yam phem ntawd tej zaum yuav maj mam hloov mus raws li lawv lub hnub nyoog thiab kev to taub qhov tseeb tsis tu ncua ntawd. Ntau tus tib neeg muaj tus cwj pwm thiab kev xam pom zoo li no thaum lawv xaiv cov tib neeg no los ua cov saib xyuas. Tom qab cov tib neeg no raug xaiv lawm, lawv kuj ua hauj lwm me ntsis thiab, tiam sis lawv ua tsis tau ntev ces pib xav phem thiab xav hais tias, “Qhov ua ib tug saib xyuas mas tsis yooj yim li. Kuv yuav tsum sawv ntxov thiab pw lig, thiab kuv yuav tsum ua ntau dua thiab saib ntau dua lwm tus hauv txhua yam. Kuv kuj yuav tsum txhawj ntau dua, thiab siv lub sij hawm thiab lub zog ntau dua. Tes hauj lwm no nyuaj; sab dhau lawm!” Vim li ntawd, lawv thiaj li xav tso tseg. Yog koj tsis ris lub nra, koj ua tsis tau ib tug saib xyuas tes hauj lwm. Yog koj muaj ib lub nra hauv koj lub siab, koj yuav txaus siab txhawj txog tes hauj lwm, thiab txawm koj sab dua lwm tus me ntsis los xij, koj yuav tsis xav tias koj tab tom raug kev txom nyem. Tab txawm txog lub sij hawm so los xij, koj tseem yuav xav hais tias, “Hnub no tes hauj lwm ua tau zoo li cas?” Yog koj cia li nco dheev ib qho teeb meem uas tseem tsis tau daws, koj yuav pw tsis tsaug zog. Yog koj ris ib lub nra hauv koj lub siab, ces koj yuav xav txog tes hauj lwm tas li, thiab koj yuav tsis quav ntsej hais tias koj noj los sis so zoo li cas li. Yog tib neeg ris lub nra me dhau thaum ua cov saib xyuas, lawv qhov kev kub siab me ntsis ntawd tsuas nyob tau ob peb hnub xwb, thiab thaum sij hawm dhau mus, ib txhia yuav tiv tsis taus ntxiv lawm. Lawv xav hais tias, “Tes hauj lwm no sab dhau lawm. Muaj txoj kev twg rau kuv lom zem thiab so ib pliag? Kuv yuav tua vis dis aus kees.” Lawv ua tau zoo ib ntus luv luv, tiam sis tos nco xwb lawv khaus tes xav tua vis dis aus kees lawm. Thaum lawv pib, ces tsum tsis tau li lawm; lub nra me me uas lawv muaj yav tas los, lawv lub zog kub siab uas muab lawv tus kheej fij, lawv txoj kev txiav txim siab, thiab lawv tus cwj pwm zoo hauv kev ua lawv tej dej num ntawd tau ploj mus thaum lawv tua kees lawm. Thaum muaj neeg nug lawv txog dab tsi, lawv ua siab luv. Lawv ntuas tib neeg, los sis cem tib neeg thiab hais lus ntsw lawv, los sis ua dog ua dig thiab tso lawv tes hauj lwm tseg. Cov saib xyuas no tsis yog muaj teeb meem lawm lod? (Yog.) Thaum nruab hnub, lawv lam ua lawv tes hauj lwm kom dhau yam feeb tsis meej, thiab thaum hmo ntuj, lawv nyiag tua vis dis aus kees thaum tsis muaj leej twg pom, ib hmos tsis pw li. Thaum pib, lawv lub siab kaj lug txog qhov no, thiab xav hais tias, “Kuv tsis tau ua rau tes hauj lwm qeeb thaum nruab hnub. Kuv twb ua tag nrho cov hauj lwm uas kuv tsim nyog ua lawm. Kuv twb daws tag nrho cov teeb meem uas lwm tus nug kuv lawm. Txawm kuv tsis pw thaum hmo ntuj kom muaj sij hawm tua vis dis aus kees los xij, qhov no tsis suav hais tias kuv ua tau siab ncaj lawm lod?” Qhov tshwm sim los, thaum lawv pib tua vis dis aus kees lawm, lawv tsum tsis tau, thiab lawv tsis mloog leej twg li. Txawm hais tias qhov ntawd tsis cuam tshuam lwm tus so los sis qhov chaw ua hauj lwm los xij, cov saib xyuas zoo li no puas ris tau lawv tes hauj lwm? Lawv puas ua tau zoo? (Tsis tau.) Vim li cas tsis tau? Lawv pheej tua vis dis aus kees tas hmo tsis pw thiab yuav tsum ua hauj lwm yav nruab hnub—ib tug neeg yuav muaj lub zog npaum li cas? Lawv txoj kev ua hauj lwm puas yuav zoo yog lawv pheej lo rau kev tua vis dis kees li no? Yeej tsis zoo li. Yog li ntawd, cov saib xyuas uas zoo li no ua tsis tau lawv tej dej num kom tiav los sis ris tsis tau lawv tes hauj lwm kiag li. Txawm lawv muaj cov kev txawj qib siab thiab muaj lub peev xwm me ntsis los xij, lawv nyiam ua si thiab tsis ua lawv tes hauj lwm uas tsim nyog ua li. Cov saib xyuas no puas yog tsim nyog raug rho tawm lawm? Yog tseem tsis rho tawm, ces yuav tab kaum tes hauj lwm lawm. Muaj ib txhia tib neeg hais tias, “Yog rho lawv tawm, peb yuav nrhiav tsis tau lwm tus uas muaj cov kev txawj qib siab zoo li lawv. Peb yuav tsum cia lawv ua tes hauj lwm no—lawv tseem ris tau tes hauj lwm txawm lawv tua vis dis aus kees los xij.” Cov lus no puas yog? (Tsis yog.) Ib tug neeg tsis tuaj yeem tsom ntsoov rau ob yam tib txhij; tib neeg lub zog muaj qhov txwv. Yog koj siv koj lub zog feem ntau rau kev ua si, ces koj txoj kev muaj siab rau kev ua koj tej dej num yuav raug cuam tshuam, thiab koj txoj kev ua tau zoo hauv kev ua koj tej dej num ntawd yuav raug cuam tshuam loj heev. Qhov no yog ib tug cwj pwm uas tsis muaj kev ris rau kev ua ib teg dej num. Txawm hais tias ib tug neeg muab tag nrho lawv lub siab thiab tag nrho lawv lub zog tso rau hauv lawv tej dej num los xij, cov txiaj ntsig yuav tsis zoo raws li tus qauv ib puas feem pua. Qhov ntawd haj yam yuav phem tshaj yog koj muab koj lub siab thiab koj lub zog tseem ceeb tso rau txoj kev ua si—koj yuav tsis tshuav lub zog thiab kev xav ntau los siv rau hauv kev ua koj tej dej num, thiab cov txiaj ntsig hauv kev ua koj tej dej num los yuav raug cuam tshuam. Qhov hais tias yuav raug cuam tshuam ntawd tsuas yog hais kom sib xwb; qhov tseeb tiag, cov txiaj ntsig hauv kev ua koj tej dej num yuav raug puas tsuaj loj heev. Yog pom cov saib xyuas zoo li no, yuav tsum hloov lawv tes dej num, thiab yuav tsum rho lawv tawm tam sim ntawd, vim lawv twb siv tsis tau lawm. Tsis yog tias lawv kev ua lawv tej dej num tsis tau raws li tus qauv xwb—lawv twb tsis tuaj yeem ris tes hauj lwm thiab tsis muaj txiaj ntsig zoo rau lawv tes hauj lwm lawm. Yog li ntawd, qhov nrhiav ib tug neeg uas mob siab thiab muaj kev ris lub luag hauj lwm los ua lawv tes hauj lwm txawm tias nws muaj cov kev txawj qib siab tsawg dua me ntsis los yuav yog ib qho kev xaiv uas zoo dua lawv.

Nyuam qhuav no, Kuv tau qhia txog ntau hom tib neeg uas ntshaw noj, ntshaw pw, thiab ntshaw kev lom zem. Tseem muaj lwm hom tib neeg thiab. Thaum pib, thaum uas xaiv cov saib xyuas ntawd, pom tias hom neeg no tsim nyog txhua yam rau txoj hauj lwm no, thiab cov kwv tij thiab cov muam puav leej txaus siab xaiv lawv. Lawv xav hais tias tus neeg no muaj kev ua neeg zoo, muaj kev kub siab, thiab paub cov kev txawj txog kev qib siab, thiab yog tus zoo tshaj thiab khov tshaj ntawm txhua yam nyob rau hauv pab pawg, ua rau lawv yog tus uas tsim nyog xaiv los ua tus saib xyuas. Txawm li cas los xij, ib ntus tom qab raug xaiv lawm, tus neeg no pib tsaug zog tas li, txawm yog thaum sib txoos ua ke los xij. Thaum lwm tus hais lus rau lawv, lawv pheej feeb tsis meej thiab teb cov lus tsis raws li cov lus nug. Yav tas los lawv tsis zoo li no, es yog vim li cas lawv cia li hloov los ua lwm tus neeg lawm? Tom qab ntawd, muaj ib tug pom yam tsis yog txhob txwm hais tias tus saib xyuas no nrog ib tug neeg sib tham lus zoo li nkawd ob leeg tab tom sib tham ua nkauj nraug, thiab thiaj li muaj kev xav tias puas yog nkawd sib tham tiag. Thaum qhov teeb meem no tshwm meej zuj zus, tus saib xyuas no haj yam feeb tsis meej zuj zus. Thaum twg nug cov lus nug rau lawv los sis tham nrog lawv txog qee yam dab tsi, lawv cov lus teb tsis sai li yav tas los, thiab lawv hais lus tsis meej thiab tsis yooj yim to taub li yav tas los lawm. Lawv pib ua tes hauj lwm uas ib tug saib xyuas yuav tsum ua ntawd tsawg zuj zus, thiab lawv txoj kev kub siab tsawg zuj zus hauv kev ua lawv tes dej num. Zoo nkaus li lawv hloov los ua lwm tus neeg lawm; lawv tsom rau tej khaub ncaws thiab kev tu lawv tus kheej ntau dua li yav dhau los. Qhov no muaj teeb meem lawm. Yav tas los, thaum ua hauj lwm ntau, lawv tsis tshua da dej, tiam sis tam sim no lawv ntxuav muag ib hnub ob zaug, thiab ntsis plaub hau thiab saib iav txhua zaus thaum xyeej, thiab pheej nug lwm tus tias, “Koj xav tias nyob rau ib ntus no kuv li tawv nqaij dawb dua los sis dub dua lawm? Vim li cas zoo li kuv dub dua lawm ne?” Tib neeg teb hais tias, “Koj uas yog ib tug saib xyuas, los tham txog tej yam uas zoo li no, tsis muaj qab hau li—qhov dawb dua los sis dub dua ntawd muaj qab hau dab tsi?” Lawv pheej tham txog cov ntsiab lus uas tsis muaj qab hau no, thiab tsis muaj siab ua lawv tes hauj lwm lawm. Thaum twg lawv xyeej, lawv tham txog khaub ncaws, poj niam, txiv neej, kev hlub, thiab hom txij nkawm twg uas tib neeg yuav xaiv, tiam sis lawv yeej tsis tham txog tias muaj teeb meem dab tsi nyob hauv kev ua lawv tej dej num los sis yuav daws tej ntawd li cas. Qhov no tsis yog muaj teeb meem lawm lod? Lawv puas tseem ua tau hauj lwm lawm? (Ua tsis tau lawm.) Lawv lub siab hloov lawm, thiab tej yam txog kev ua ib teg dej num ntawd tsis nyob hauv lawv tej kev xav lawm. Tiam sis, lawv lub hlwb tsuas xav tas hnub txog qhov yuav sib tham ua nkauj nraug li cas, nkawd tus kheej yuav hnav khaub ncaws li cas, thiab yuav ua li cas es poj niam los sis txiv neej thiaj li nyiam. Muaj ib kab lus ntawm cov tsis ntseeg hais tias: “poob rau hauv kev hlub.” Qhov no puas yog kev hlub? Tsis yog, qhov ntawd yog ib lub qhov tob tob! Thaum koj nkag mus lawm, koj yuav tawm tsis tau rov los lawm. Puas muaj cov tib neeg zoo li no nyob hauv cov tswv cuab uas tab tom ua lawv tej dej num? (Muaj.) Txawm hais tias Vajtswv lub tsev tsis txwv tib neeg nrhiav txij nkawm los xij, yog lawv cuam tshuam lub neej hauv pawg ntseeg thiab ua rau cuam tshuam pawg ntseeg tes hauj lwm, ces cov tib neeg ntawd yuav tsum raug tshem tawm mus. Neb ob leeg tawm mus sib tham ntawm neb puag sab nraud thiab tsis txhob cuam tshuam lwm tus. Yog koj yog ib tug neeg uas muab koj tus kheej fij los siv tag nrho koj lub neej rau Vajtswv, thiab koj txiav txim siab tsis sib tham ua nkauj nraug, ces kav tsij tsom ntsoov rau qhov muab koj tus kheej fij rau Vajtswv. Yog koj muaj kev sib tham ua nkauj nraug thiab tsis xav ua koj tes hauj lwm ntxiv lawm, ces koj yuav tsum tsis txhob ua tes dej num ntawm ib tug saib xyuas, thiab Vajtswv lub tsev yuav xaiv lwm tus rau tes hauj lwm ntawd. Vajtswv lub tsev tes hauj lwm yuav tsum tsis raug ncua los sis raug cuam tshuam los ntawm koj txoj kev sib tham ua nkauj nraug. Tes hauj lwm yuav tsum tau ua mus ntxiv. Yuav ua mus ntxiv li cas? Los ntawm qhov xaiv lwm tus saib xyuas uas tsis sib tham ua nkauj nraug, uas muaj cov kev txawj qib siab zoo thiab ris tau tes hauj lwm, los txais koj tes hauj lwm. Vajtswv lub tsev ib txwm ua li no, thiab lub hauv paus ntsiab lus no tsis hloov. Muaj ib txhia saib xyuas hais tias, “Kuv txoj kev sib tham ua nkauj nraug tsis cuam tshuam kuv tes hauj lwm; cia kuv ua tus saib xyuas ntxiv.” Peb puas ntseeg tau cov lus no? (Ntseeg tsis tau.) Vim li cas peb ntseeg tsis tau? Vim qhov tseeb yeej nyob ntawd rau sawv daws pom! Thaum ib tug neeg muaj kev sib tham ua nkauj nraug, txhua yam uas lawv xav txog yog tus uas lawv tham ua nkauj nraug ntawd, thiab lawv lub siab tsuas xav txog tej no xwb, thiab yog li ntawd lawv thiaj li pheej tsaug zog thaum sib txoos thiab ua tsis tau lawv tej dej num. Yog li ntawd, txoj hau kev uas Vajtswv lub tsev daws cov tib neeg zoo li no yog qhov tsim nyog thiab mus raws li cov hauv paus ntsiab lus. Vajtswv lub tsev tsis txwv koj txoj kev sib tham ua nkauj nraug, thiab tsis tshem koj txoj kev ywj pheej uas sib tham ua nkauj nraug. Koj sib tham ua nkauj nraug raws li koj lub siab nyiam tau: qhov ntawd yog koj qhov kev txiav txim siab, tsuav yog koj tsis khuv xim, thiab tsis txhob quaj tom qab ces tau lawm. Muaj qee tus saib xyuas raug rho tawm vim yog kev sib tham ua nkauj nraug. Ib txhia tib neeg nug hais tias, “Puas yog thaum ib tug neeg muaj kev sib tham ua nkauj nraug ces tsis pub ntseeg Vajtswv lawm?” Vajtswv lub tsev yeej tsis tau hais li ntawd. Puas yog Vajtswv lub tsev tsis yuav los sis ntiab txhua tus uas sib tham ua nkauj nraug tawm? (Tsis yog.) Yog koj sib tham ua nkauj nraug, ces koj ua tsis tau ib tug saib xyuas los sis ua tsis tau ib tug thawj coj los sis neeg ua hauj lwm, thiab yog koj tsis mob siab ua koj tej dej num, ces koj yuav tsum tawm hauv pawg ntseeg uas ua dej num puv sij hawm mus. Puas muaj leej twg hais tias tsis pub koj ntseeg Vajtswv lawm, los sis hais tias koj yuav raug ntiab tawm? Puas muaj leej twg txiav txim hais tias koj yuav tsis tau txais kev cawm dim, los sis hais tias koj yuav raug foom phem? (Tsis muaj.) Vajtswv lub tsev yeej tsis tau hais tej lus zoo li no. Vajtswv lub tsev tsis cuam tshuam koj tus kheej tej kev xaiv thiab kev ywj pheej li; yeej tsis tshem ib qho kev ywj pheej ntawm koj mus li—muab kev ywj pheej rau koj. Txawm li cas los xij, thaum hais txog hom neeg saib xyuas no, Vajtswv lub tsev lub hauv paus ntsiab lus rau txoj kev daws lawv yog rho lawv tawm thiab nrhiav ib tug neeg tsim nyog los hloov lawv chaw. Yog lawv tsim nyog ua ib teg dej num mus ntxiv, ces tuaj yeem cia lawv nyob ua mus. Yog tsis tsim nyog, ces lawv yuav raug xa tawm mus. Yuav tsis muaj kev ntaus los sis kev cem los sis kev ua kom poob ntsej muag. Qhov ntawd tsis yog ib qho uas txaj muag; nws yog ib qho uas ib txwm muaj xwb. Yog li ntawd thaum ib txhia tib neeg raug rho tawm ntawm lawv tes hauj lwm los sis raug xa mus rau cov pawg ntseeg dog dig vim lawv txoj kev sib tham ua nkauj nraug, qhov no puas poob ntsej muag? Qhov ntawd tsuas qhia tau hais tias lawv tsis muaj kev ua siab ncaj rau kev ua lawv tej dej num, lawv tsis nyiam qhov tseeb, thiab tsis ris lub nra rau lawv tus kheej qhov kev nkag mus rau hauv lub neej txoj sia hlo li xwb. Hom neeg saib xyuas no tsis ua lawv tes hauj lwm uas tsim nyog ua—lawv tsuas tsom rau kev sib tham ua nkauj nraug, uas ua rau pawg ntseeg tes hauj lwm qeeb, thiab twb cuam tshuam rau qhov kev nce qib ntawm pawg ntseeg tes hauj lwm lawm—qhov no tsis yog ib qho teeb meem loj lod? (Yog.) Yog li ntawd, hom neeg saib xyuas no tsis tsim nyog cia nyob ua hauj lwm thiab yuav tsum raug rho tawm ntawm lawv tes hauj lwm. Muaj ib txhia hais tias, “Qhov rho lawv tawm puas yog maj dhau lawm?” Yog hais tias, txij thaum pib ntawm lawv txoj kev sib tham ua nkauj nraug mus txog rau lub sij hawm lawv raug rho tawm ntawd, tsuas yog dhau mus li ib los sis ob hnub xwb, ces qhov ntawd suav tau tias maj lawm. Tiam sis yog dhau mus tau peb mus txog tsib lub hlis lawm, qhov ntawd puas tseem suav tau tias maj thiab? (Tsis suav lawm.) Qhov kev ua ntawd qeeb txaus lawm, tes hauj lwm twb qeeb npaum li ntawd lawm—ua cas koj tsis txhawj txog qhov ntawd? Qhov no tsis yog ib qho teeb meem lod? (Yog lawm.)

Cov thawj coj cuav yeej tsis nug txog cov saib xyuas uas tsis ua tes hauj lwm tiag tiag, los sis cov uas tsis ua lawv tes hauj lwm uas tsim nyog ua. Lawv xav hais tias tsuas yog xaiv tau tus saib xyuas lawm xwb ces tag li ntawd lawm, thiab tom qab ntawd ces tus saib xyuas tuaj yeem daws txhua yam hauj lwm ntawm nws tus kheej. Yog li ntawd cov thawj coj cuav tsuas tuaj sib txoos ua ke qee zaus xwb, thiab tsis saib xyuas tes hauj lwm los sis nug tias tes hauj lwm mus li cas lawm, thiab ua zoo li cov thawj uas tsis quav ntsej tes hauj lwm li. Yog muaj ib tug neeg qhia hais tias tus saib xyuas muaj teeb meem, tus thawj coj cuav yuav hais tias, “Qhov ntawd tsuas yog ib qho teeb meem me me xwb, tsis ua li cas. Nej daws nej xwb, txhob nug kuv.” Tus neeg uas qhia qhov teeb meem ntawd hais tias, “Tus saib xyuas ntawd tub nkeeg thiab tsuas ntshaw noj xwb. Nws tsuas tsom rau qhov noj haus thiab ua si, thiab tub nkeeg dhau lawm. Nyob hauv nws tes dej num nws tsis xav tiv kev txom nyem me ntsis li, thiab nws ib txwm ua dog ua dig thiab nrhiav txhua yam kev zam los tso tes hauj lwm tseg thiab zam nws lub luag hauj lwm. Nws tsis tsim nyog ua tus saib xyuas.” Tus thawj coj cuav yuav teb hais tias, “Thaum xaiv nws los ua tus saib xyuas ntawd nws zoo heev. Qhov koj hais ntawd tsis muaj tseeb, los sis txawm yog muaj tseeb los, qhov ntawd tsuas yog qhov kev qhia tshwm uas pom tau meej ib ntus xwb.” Tus thawj coj cuav yuav tsis mus tshawb xyuas ntxiv txog tus saib xyuas ntawd qhov xwm txheej, tiam sis nws yuav txiav txim thiab muab lus xaus ruaj txog qhov teeb meem ntawd raws li nws qhov kev pom yav dhau los txog tus saib xyuas ntawd. Tsis hais leej twg qhia txog tej teeb meem ntawm tus saib xyuas ntawd, los tus thawj coj cuav yuav tsis quav ntsej li. Tus saib xyuas tsis ua tes hauj lwm tiag tiag, thiab pawg ntseeg tes hauj lwm yuav luag nres tag li lawm, tiam sis tus thawj coj cuav tsis quav ntsej, cuag li nws tsis muaj feem xyuam li. Qhov uas thaum muaj neeg qhia txog tus saib xyuas tej teeb meem es nws ua ntsej lag muag dig ntawd twb qias txaus lawm. Tiam sis qhov uas ntxim ntxub tshaj plaws yog dab tsi? Thaum tib neeg muab tej teeb meem loj heev ntawm tus saib xyuas qhia tawm rau nws, nws tsis mus daws tej no, thiab nws haj tseem yuav nrhiav txhua yam laj thawj tias: “Kuv paub tus saib xyuas no, nws ntseeg Vajtswv tiag tiag, nws yuav tsis muaj teeb meem dab tsi li. Txawm yog nws muaj teeb meem me ntsis los, Vajtswv yuav tiv thaiv nws thiab qhuab ntuas nws. Yog nws ua yuam kev dab tsi, qhov ntawd yog nyob ntawm nws thiab Vajtswv—peb tsis tas yuav quav ntsej qhov ntawd.” Cov thawj coj cuav ua hauj lwm raws li lawv tus kheej tej kev xav phem thiab tej kev xav hauv nruab siab zoo li no ntag. Lawv ua txuj to taub qhov tseeb thiab muaj kev ntseeg, tiam sis lawv tsuas ua rau pawg ntseeg tes hauj lwm ntxhov quav niab xwb—tab txawm pawg ntseeg tes hauj lwm twb nres tag los lawv tseem ua txuj tsis paub txog qhov no. Cov thawj coj cuav tsis yog ua nom ua tswv dhau lawm lod? Lawv tus kheej ua tsis tau tes hauj lwm tiag tiag, thiab lawv kuj tsis ua tib zoo rau cov coj pab pawg thiab cov saib xyuas tes hauj lwm thiab—lawv tsis taug qab los sis nug txog qhov ntawd li. Lawv txoj kev xam pom txog tib neeg mas tsuas yog saib raws li lawv tus kheej tej kev pom thiab tej kev xav hauv nruab siab xwb. Thaum lawv pom ib tug neeg twg ua tau zoo rau ib lub sij hawm mas, lawv txawm xav hais tias tus neeg no yuav zoo mus ib txhis, tias nws yuav tsis hloov li; lawv tsis ntseeg leej twg uas hais tias tus neeg no muaj teeb meem, thiab lawv tsis quav ntsej thaum muaj neeg ceeb toom txog tus neeg ntawd rau lawv. Nej puas xav hais tias cov thawj coj cuav ruam? Lawv ruam thiab tawv ncauj. Qhov ua rau lawv ruam ntawd yog dab tsi? Lawv cia li lam tau lam tso siab rau ib tug neeg, uas ntseeg hais tias vim thaum tus neeg no raug xaiv ntawd, nws tau cog lus, thiab txiav txim siab, thiab quaj los kua muag thov Vajtswv, qhov ntawd txhais tau hais tias nws vam khom tau, thiab yuav tsis muaj teeb meem dab tsi rau nws qhov kev saib xyuas tes hauj lwm. Cov thawj coj cuav tsis muaj kev to taub txog tib neeg tus yam ntxwv xeeb txawm; lawv tsis paub txog qhov xwm txheej tiag tiag ntawm cov tib neeg ntiaj teb uas qias vuab tsuab. Lawv hais tias, “Ib tug neeg yuav hloov mus ua phem tau li cas thaum nws twb raug xaiv los ua tus saib xyuas lawm? Ib tug neeg uas zoo li mob siab thiab tso siab tau ntawd yuav tso nws tes hauj lwm tseg tau li cas? Nws yuav tsis ua li ntawd, puas yog? Nws muaj kev coj ncaj heev.” Vim cov thawj coj cuav ntseeg lawv tus kheej tej kev xav hauv nruab siab thiab tej kev xav ntau dhau lawm, qhov no thiaj li ua rau lawv tsis tuaj yeem daws tau ntau yam teeb meem uas tshwm tuaj nyob hauv pawg ntseeg tes hauj lwm kom ncav sij hawm, thiab tsis rho tus saib xyuas uas muaj feem xyuam ntawd tawm thiab hloov nws tes dej num tam sid. Lawv yog cov thawj coj cuav tiag tiag. Thiab qhov teeb meem nyob ntawm no yog dab tsi tiag? Cov thawj coj cuav qhov kev ua hauj lwm puas muaj feem xyuam rau qhov ua dog ua dig? Nyob rau ib kis, lawv pom tus zaj loj liab ploog ntes cov neeg Vajtswv xaiv tseg yam vwm heev, yog li ntawd kom lawv tus kheej muaj kev nyab xeeb, lawv cia li lam tau lam npaj ib tug neeg los saib xyuas tes hauj lwm, ntseeg hais tias qhov no yuav daws tau qhov teeb meem, thiab tias lawv tsis tas yuav quav ntsej txog qhov ntawd ntxiv lawm. Lawv xav li cas hauv lawv lub siab? “Qhov no yog xwm txheej phem heev, kuv yuav tsum nkaum ib ntus.” Qhov no tsis yog qhov ntshaw kev tau zoo ntawm sab cev nqaij daim tawv lod? Nyob rau lwm kis mas, cov thawj coj cuav muaj ib qho tsis zoo loj heev: Lawv maj ntseeg tib neeg raws li lawv tus kheej tej kev xav hauv nruab siab xwb. Thiab qhov no yog los ntawm qhov tsis to taub qhov tseeb, tsis yog lod? Vajtswv txoj lus qhia tshwm lub ntsiab tseeb ntawm noob neej txoj kev qias vuab tsuab li cas? Vim li cas lawv thiaj li ntseeg tib neeg thaum uas Vajtswv twb tsis ntseeg? Cov thawj coj cuav khav theeb thiab qhuas tias lawv tus kheej coj ncaj dhau lawm, puas yog? Yam uas lawv xav ces yog, “Kuv yeej saib tsis yuam kev tus neeg no, tus neeg no uas kuv tau txiav txim hais tias tsim nyog yuav tsum tsis muaj teeb meem dab tsi; nws yeej tsis yog ib tug neeg uas tsuas ntshaw kev noj, kev haus thiab kev ua si, los sis nyiam kev tau zoo thiab ntxub txoj kev ua hauj lwm hnyav. Nws yeej vam khom tau thiab tso siab tau. Nws yuav tsis hloov; yog tias nws hloov, ces txhais tau hais tias kuv saib nws yuam kev lawm, puas yog?” Qhov no yog hom laj thawj dab tsi? Koj yog hom neeg txawj ntse dab tsi? Koj lub qhov muag puas pom tshab? Koj puas muaj qhov kev txawj ntse tshwj xeeb ntawd? Koj nrog ib tug neeg nyob tau ib los sis ob xyoos, tiam sis koj puas yuav pom hais tias nws yog leej twg tiag tiag yog tsis muaj xwm txheej tsim nyog los muab nws tus yam ntxwv xeeb txawm lub ntsiab tseeb nthuav tawm kom tag nrho? Yog Vajtswv tsis muab nws nthuav tawm, koj nrog nws nyob ua ke tau peb los sis tsib xyoos, los tseem yuav nyuaj rau koj uas pom hais tias nws muaj hom yam ntxwv xeeb txawm lub ntsiab tseeb zoo li cas. Es qhov ntawd haj yam yog qhov tseeb dua thaum koj tsis tshua pom nws, thiab tsis tshua nrog nws nyob ua ke? Cov thawj coj cuav lam tau lam ntseeg ib tug neeg raws li qhov pom ib ntus los sis raws li lwm tus cov lus ntsuas zoo txog nws, thiab muaj cuab kav muab pawg ntseeg tes hauj lwm tso rau tus neeg zoo li ntawd ua. Qhov ua li no, tsis yog lawv dig muag dhau lawm lod? Tsis yog lawv lam tau lam ua yam tsis quav ntsej tej cai dhau lawm lod? Thiab thaum cov thawj coj cuav ua hauj lwm li no, lawv tsis yog tsis muaj kev ris lub luag hauj lwm dhau lawm lod? Cov thawj coj thiab cov neeg ua hauj lwm sab saud nug lawv hais tias, “Koj puas tau tshuaj xyuas tus saib xyuas ntawd tes hauj lwm? Nws tus yam ntxwv thiab peev xwm zoo li cas? Nws puas muaj kev ris hauv nws tes hauj lwm? Nws puas ris tau tes hauj lwm ntawd?” Cov thawj coj cuav teb hais tias, “Nws yeej ua tau! Thaum xaiv nws ntawd, nws tau cog lus thiab txiav txim siab lawm. Kuv tseem muaj nws daim ntawv cog lus. Nws yuav tsum ris tau tes hauj lwm ntawd xwb.” Nej xav li cas txog cov thawj coj cuav cov lus? Lawv ntseeg hais tias vim tus neeg no tau cog lus los qhia nws txoj kev txiav txim siab, ces nws yeej yuav ua tau raws li ntawd. Cov lus no puas muaj tseeb? Niaj hnub no muaj pes tsawg tus neeg uas ua tau raws li lawv cov lus cog tseg? Muaj pes tsawg tus neeg coj ncaj uas ua tej yam raws li lawv txoj kev txiav txim siab? Tsuas yog ib tug neeg cog lus xwb tsis tau txhais hais tias nws yuav ua tau raws li ntawd tiag tiag. Yog koj nug lawv hais tias, “Koj puas hais tau tseeb tias tus saib xyuas ntawd yuav tsis hloov? Koj puas hais tau tseeb tias nws yuav ua siab ncaj mus tag ib sim neej? Thaum Vajtswv xav muab tib neeg nthuav tawm Nws yuav tsum tau npaj ntau yam xwm txheej los sim lawv. Koj muab dab tsi los hais tias nws vam khom tau? Koj puas tau tshawb xyuas txog nws lawm?” Cov thawj coj cuav teb hais tias, “Tsis tas yuav mus tshawb xyuas. Cov kwv tij thiab cov muam puav leej qhia hais tias nws vam khom tau.” Cov lus no los kuj tsis yog thiab. Ib tug neeg puas zoo tiag tiag tsuas yog vim cov kwv tij thiab cov muam qhia hais tias nws zoo? Cov kwv tij thiab cov muam puav leej muaj qhov tseeb lod? Lawv puas pom tshab tej teeb meem? Cov kwv tij thiab cov muam puas paub tus neeg no zoo? Cov lus no haj yam qias! Qhov tseeb tiag, tus neeg ntawd twb raug nthuav tawm ntev los lawm. Nws tsis muaj Vajntsujplig tes hauj lwm lawm, thiab nws tus cwj pwm qias uas nyiam kev tau zoo thiab ntxub txoj kev ua hauj lwm hnyav, qhov ntshaw noj thiab tub nkeeg, thiab qhov tsis ua nws tes hauj lwm uas tsim nyog ua, twb raug nthuav tawm tag lawm. Tsuas yog tshuav cov thawj coj cuav uas tseem tsis tau paub dab tsi li, hos sawv daws twb pom nws tshab ntev los lawm—tsuas yog cov thawj coj cuav thiaj li tseem tso siab rau nws npaum li no xwb. Cov thawj coj cuav no muaj txiaj ntsig dab tsi? Lawv tsis yog khoom seem txheej xwb lod? Haj tseem muaj qee qhov xwm txheej uas tus Nyob Saud paub txog ntau yam kev qhia tshwm uas pom tau meej ntawm qee cov saib xyuas los ntawm qhov mus tshuaj xyuas thiab nug txog lawv ntawm qhov chaw ntawd, tiam sis cov thawj coj tseem tsis paub dab tsi li. Qhov no tsis yog teeb meem lod? Cov thawj coj no yog cov thawj coj cuav tiag tiag. Lawv tsis ua tes hauj lwm tiag tiag li, lawv tsuas ua nom ua tswv xwb, thiab zoo li cov thawj uas tsis quav ntsej tes hauj lwm, lawv ua hauj lwm me ntsis xwb ces cia li tso tseg li ntawd lawm xwb thiab xav hais tias lawv muaj cai los xyiv fab rau lawv tus kheej, tsis tas quav ntsej thaum muaj teeb meem tshwm tuaj. Koj muaj cai dab tsi los xyiv fab rau tej ntxiaj ntsim ntawm lub meej mom? Yeej tsis paub txaj muag tiag tiag li! Thaum cov thawj coj cuav ua hauj lwm, lawv yeej tsis tshuaj xyuas tes hauj lwm li, lawv tsis nug hais tias tes hauj lwm mus zoo li cas, thiab lawv yeej tsis tshawb xyuas txog ntau pab pawg cov saib xyuas tej xwm txheej li. Lawv tsuas muab hauj lwm faib thiab npaj cov saib xyuas, ces lawv xav hais tias lawv ua tiav lawm, tias lawv tes hauj lwm tag thiab ua ib zaug kav ib txhis lawm. Lawv ntseeg hais tias, “Muaj neeg saib xyuas tes hauj lwm no lawm, yog li ntawd tsis yog kuv li teeb meem ntxiv lawm. Kuv tuaj yeem xyiv fab lawm.” Qhov no puas yog kev ua hauj lwm? Tsis muaj qhov ua xyem xyav li, leej twg uas ua hauj lwm zoo li no yog ib tug thawj coj cuav—ib tug thawj coj cuav uas ua rau pawg ntseeg tes hauj lwm qeeb thiab ua phem rau cov neeg Vajtswv xaiv tseg.

Cov thawj coj cuav yeej tsis nug txog los sis taug qab txog tej xwm txheej ntawm ntau pab pawg cov saib xyuas tes hauj lwm li. Lawv kuj tsis nug txog, tsis taug qab, los sis paub txog kev nkag mus rau hauv lub neej txoj sia ntawm ntau pab pawg cov saib xyuas thiab cov neeg ua hauj lwm uas saib xyuas ntau yam hauj lwm tseem ceeb, nrog rau lawv tus cwj pwm rau pawg ntseeg tes hauj lwm thiab lawv tej dej num, thiab rau txoj kev ntseeg Vajtswv, qhov tseeb, thiab Vajtswv Tus Kheej. Lawv tsis paub tias cov tib neeg no puas muaj kev hloov los sis kev loj hlob dab tsi, thiab lawv tsis paub txog ntau yam teeb meem uas muaj nyob hauv lawv tes hauj lwm li; tshwj xeeb tshaj yog, lawv tsis paub txog qhov cuam tshuam ntawm tej kev ua yuam kev thiab kev mus yuam kev uas tshwm hauv ntau theem ntawm tes hauj lwm rau pawg ntseeg tes hauj lwm thiab cov neeg Vajtswv xaiv tseg txoj kev nkag mus rau hauv lub neej txoj sia, nrog rau qhov hais tias tej kev ua yuam kev thiab kev mus yuam kev no puas tau raug kho lawm. Lawv tsis paub dab tsi txog txhua yam no li. Yog lawv tsis paub dab tsi txog tej xwm txheej uas ntxaws ntxaws no li, thaum uas muaj teeb meem tshwm tuaj ces lawv yuav tos xwb. Txawm li cas los xij, thaum ua lawv txoj hauj lwm cov thawj coj cuav yeej tsis quav ntsej txog tej teeb meem uas ntxaws ntxaws no hlo li. Lawv ntseeg hais tias tom qab npaj cov saib xyuas rau ntau pab pawg thiab muab hauj lwm faib tag lawm, ces lawv tes hauj lwm tiav lawm—suav tau hais tias ua hauj lwm zoo lawm, thiab yog muaj lwm yam teeb meem tshwm tuaj los qhov ntawd tsis muaj feem xyuam txog lawv lawm. Vim cov thawj coj cuav tsis saib xyuas, coj qhia, thiab taug qab txog ntau pab pawg cov saib xyuas, thiab lawv tsis ua lawv tej luag hauj lwm hauv tej thaj tsam no kom tiav, qhov no thiaj li ua rau pawg ntseeg tes hauj lwm ntxhov quav niab. Qhov no yog cov thawj coj thiab cov neeg ua hauj lwm tsis ua lawv tej luag hauj lwm. Vajtswv tuaj yeem tshawb xyuas qhov tob tshaj plaws ntawm tib neeg lub siab kom meej; qhov no yog ib qho peev xwm uas tib neeg tsis muaj. Yog li ntawd, thaum ua hauj lwm, tib neeg yuav tsum nquag thiab rau siab ntau ntxiv, pheej mus rau qhov chaw ua hauj lwm mus taug qab, saib xyuas, thiab coj qhia tes hauj lwm kom paub tseeb tias pawg ntseeg tes hauj lwm mus tau zoo li ib txwm. Pom tseeb tias, cov thawj coj cuav tsis muaj kev ris rau hauv lawv tes hauj lwm hlo li, thiab lawv yeej tsis saib xyuas, tsis taug qab, los sis tsis coj qhia rau ntau yam hauj lwm. Qhov tshwm sim los yog, qee cov saib xyuas tsis paub yuav daws ntau yam teeb meem uas tshwm hauv tes hauj lwm li cas, thiab tseem nyob hauv lawv tes hauj lwm ua cov saib xyuas txawm hais tias lawv tsis muaj peev xwm txaus los ua tes hauj lwm ntawd. Thaum kawg, tes hauj lwm raug ncua zaum tag zaum thiab lawv ua rau tes hauj lwm ntxhov quav niab. Qhov no yog qhov tshwm sim tag nrho los ntawm qhov uas cov thawj coj cuav tsis nug txog, tsis saib xyuas, los sis tsis taug qab txog tej xwm txheej ntawm cov saib xyuas, ib qho ua tau los uas tshwm los ntawm tag nrho cov thawj coj cuav qhov kev tsis ua lawv lub luag hauj lwm xwb. Vim cov thawj coj cuav tsis tshuaj xyuas, tsis taug qab, los sis tsis nug txog tes hauj lwm, thiab tsis tuaj yeem paub qhov xwm txheej tam sid, lawv tsis paub txog tej yam xws li cov saib xyuas puas ua hauj lwm tiag tiag, tes hauj lwm mus tau zoo li cas, thiab seb puas muaj cov txiaj ntsig tiag tiag. Thaum nug lawv hais tias cov saib xyuas tab tom tsis khoom rau dab tsi los sis lawv tab tom ua tej hauj lwm meej meej twg, cov thawj coj cuav teb hais tias, “Kuv tsis paub, tiam sis lawv tuaj koom kev sib txoos ua ke txhua zaus, thiab txhua zaus kuv nrog lawv tham txog tes hauj lwm, lawv yeej tsis hais txog tej teeb meem los sis kev nyuaj dab tsi li.” Cov thawj coj cuav ntseeg hais tias tsuav cov saib xyuas tsis tso lawv tes hauj lwm tseg thiab yeej ib txwm nyob ntawd thaum lawv nrhiav, ces tsis muaj teeb meem dab tsi rau cov saib xyuas li. Qhov no yog qhov uas cov thawj coj cuav ua hauj lwm. Qhov no tsis yog ib qho kev qhia tshwm uas pom tau meej ntawm “kev cuav” lod? Qhov ntawd tsis yog ib qho kev ua tsis tiav lawv tej luag hauj lwm lod? Qhov no yog ib qho kev tsis ua lub luag hauj lwm yam hnyav heev! Nyob hauv lawv tes hauj lwm, cov thawj coj cuav tsom ntsoov rau qhov ua kom dhau xwb, thiab tsis nrhiav cov txiaj ntsig tiag tiag. Nyob sab nraud mas, lawv pheej coj sib txoos ua ke, cuag li tsis khoom dua cov tib neeg li sawv daws. Txawm li cas los xij, qhov ntawd tseem tsis paub hais tias lawv tau daws teeb meem dab tsi lawm tiag tiag, tej hauj lwm meej meej twg uas lawv tau ua kom zoo, thiab lawv tau ua tiav cov txiaj ntsig dab tsi. Tsis muaj leej twg tuaj yeem muab tau ib lo lus teb meej txog tej no, suav nrog cov thawj coj cuav tus kheej tib si. Tiam sis ib yam uas paub tseeb ces yog: Tsis hais tib neeg muaj tej teeb meem dab tsi ntawm qhov chaw ua hauj lwm, yeej nrhiav tsis pom cov thawj coj cuav no li; tsis muaj leej twg txeev pom lawv nyob ntawm qhov chaw ua hauj lwm daws tib neeg tej teeb meem li. Yog li, cov thawj coj cuav ua hauj lwm dab tsi ib hnub mus txog tsaus ntuj? Lawv tej kev sib txoos daws tau teeb meem dab tsi tiag? Tsis muaj leej twg paub tseeb, thiab thaum kawg thaum lawv tes hauj lwm raug tshuaj xyuas ntawd mam li pom ib pawg teeb meem uas sib sau cia tsis tau daws xwb. Nyob sab nraud mas, yeej zoo li cov thawj coj cuav tsis khoom tiag—cuag nkaus li lawv “ua ntau yam hauj lwm heev.” Txawm li cas los xij, thaum ib tug tshuaj xyuas cov txiaj ntsig ntawm lawv tes hauj lwm, qhov ntawd ntxhov quav niab; ntxhov hnyo, tsis muaj nqis dab tsi li, thiab pom tseeb hais tias cov thawj coj cuav no tsis ua ib qho hauj lwm tiag tiag hlo li. Txawm tias muaj ntau yam teeb meem tiag tiag uas lawv tau tso tseg tsis daws los, zoo li cov thawj coj cuav tsis muaj lub siab txawj xav thiab tsis hnov tias tim tus kheej li. Tsis tas li ntawd xwb, lawv txaus siab rau lawv tus kheej heev thiab xav hais tias lawv zoo heev; lawv yeej tsis muaj laj thawj tiag tiag li. Cov tib neeg zoo li no tsis tsim nyog ua cov thawj coj los sis cov neeg ua hauj lwm hauv pawg ntseeg.

Hom neeg saib xyuas uas peb nyuam qhuav sib qhia txog ntawd paub tes hauj lwm qib siab thiab muaj lub peev xwm ua hauj lwm, tiam sis tsuas yog tsis ris lub nra, thiab tsuas paub noj, haus, thiab ua si tsheej hnub yam tsis saib xyuas lawv tes hauj lwm uas tsim nyog ua los sis tsis ua tes hauj lwm tiag tiag li. Cov thawj coj cuav tsis hloov hom neeg saib xyuas no tes hauj lwm los sis rho lawv tawm kom ncav sij hawm, thiab qhov no tab kaum thiab cuam tshuam tes hauj lwm, ua rau tes hauj lwm mus tsis tau zoo. Qhov no tsis yog los ntawm cov thawj coj cuav lod? Txawm hais tias cov thawj coj cuav tsis muaj kev ris lub luag hauj lwm no ncaj qha los xij, lawv qhov kev tsis ua lawv lub luag hauj lwm, qhov lawv tsis ua lawv tes hauj lwm saib xyuas, ua rau lawv muaj kev ris tsis ncaj qha rau tej kev puas tsuaj rau tes hauj lwm. Cov thawj coj cuav no tsis ua lawv lub luag hauj lwm li cov saib xyuas kom tiav, lawv tsis ua lawv tej luag hauj lwm, uas thaum kawg ua rau pawg ntseeg tes hauj lwm raug kev puas tsuaj. Qee yam hauj lwm haj tseem nres thiab ntxhov quav niab vim tsis muaj ib tug saib xyuas uas tsim nyog los ris, tsis muaj kev tshuaj xyuas, thiab saib xyuas thiab txhawb tes hauj lwm kom mus tom ntej. Kev siv tib neeg tsis tsim nyog yuav ua rau muaj hom kev puas tsuaj zoo li no rau tes hauj lwm. Txawm hais tias hom neeg saib xyuas no muaj lub peev xwm me ntsis thiab to taub kev qib siab ntawm tes hauj lwm me ntsis los xij, lawv tsis saib xyuas lawv tes hauj lwm uas tsim nyog ua, pheej mus raws li lawv tus kheej txoj kev, thiab tsis taug txoj kev yog. Txawm tias cov thawj coj cuav hnov tias muaj neeg qhia txog teeb meem ntawm hom saib xyuas no los xij, lawv tsis tshawb xyuas los sis daws qhov ntawd kom ncav sij hawm, thiab thaum kawg qhov no ua rau pawg ntseeg tes hauj lwm nres tag lawm. Qhov no tsis yog los ntawm cov thawj coj cuav qhov kev tsis muaj kev ris lub luag hauj lwm lod? Lawv haj tseem zam kev ris lub luag hauj lwm, hais tias lawv tsis to taub tus saib xyuas ntawd qhov xwm txheej, lawv ruam thiab tsis paub dab tsi, es xav hais tias qhov hais li no yuav ua rau qhov teeb meem tag, tias lawv yuav tsis tas ris lub luag hauj lwm lawm. Nyob hauv lawv tes hauj lwm, cov thawj coj cuav yeej ib txwm ua dog ua dig. Txawm thaum muaj tib neeg qhia txog teeb meem los xij, lawv tsis nug txog thiab tsis daws tej ntawd, thiab thaum muaj teeb meem tshwm tuaj, lawv tseem zam kev ris lub luag hauj lwm thiab. Qhov no yog ib qho kev qhia tshwm uas pom tau meej ntawm cov thawj coj cuav.

II. Cov Thawj Coj Cuav Coj Li Cas Rau Cov Saib Xyuas Uas Peev Xwm Tsis Zoo thiab Tsis Muaj Lub Peev Xwm Ua Hauj Lwm

Thaum cov thawj coj cuav ua hauj lwm, cov teeb meem uas lawv ntsib tsis yog tsuas muaj qhov xwm txheej no xwb—tseem muaj lwm yam uas yog cov saib xyuas peev xwm tsis zoo thiab tsis muaj lub peev xwm ua hauj lwm thiab ris tsis taus tes hauj lwm. Nyob hauv cov xwm txheej zoo li no, cov thawj coj cuav kuj tsis nug txog thiab daws qhov teeb meem ntawd kom ncav sij hawm thiab. Vim li cas? Cov thawj coj cuav tsis muaj lub peev xwm ua hauj lwm, lawv peev xwm tsis zoo, thiab lawv tsis muaj kev to taub ntawm sab ntsujplig. Lawv yeej tsis quav ntsej los sis ua tus pib nug txog ntau pab pawg cov saib xyuas lub peev xwm, lawv lub peev xwm ris tes hauj lwm, los sis tej xwm txheej ntawm lawv tes hauj lwm. Lawv pom tsis tshab cov saib xyuas uas peev xwm tsis zoo thiab ris tsis taus lawv tes hauj lwm, thiab lawv tsis paub txog tej yam no li. Nyob hauv lawv txoj kev xav mas, thaum ib tug neeg twg tau ua tus saib xyuas lawm, ces tus neeg ntawd yuav nyob hauv txoj hauj lwm ntawd mus ntev, tshwj tsis yog nws ua kev phem ntau dhau, ua rau sawv daws npau taws, thiab raug cov kwv tij thiab cov muam tshem tawm, los sis tshwj tsis yog muaj neeg qhia txog nws tej teeb meem rau tus Nyob Saud thiab tus Nyob Saud rho tus neeg ntawd tawm ncaj qha. Yog tsis li ntawd, cov thawj coj cuav yuav tsis muaj hnub muab tus neeg ntawd rho tawm li. Lawv ntseeg hais tias vim cov kwv tij thiab cov muam hais tias tus neeg ntawd zoo thiab xaiv nws lawm, tus neeg ntawd yuav tsum yog tus uas zoo tshaj plaws. Cov thawj coj cuav yeej ib txwm vam khom rau tej kev xav hauv nruab siab thiab kev txiav txim los teem seb ib tug neeg puas ua tau hauj lwm thiab seb nws puas tsim nyog ua tus saib xyuas. Piv txwv li, muaj ib tug saib xyuas ntawm pab pawg seev cev uas tsis paub seev cev, thiab nws tsis to taub tej hauv paus ntsiab lus ntawm kev xaiv seev cev. Thaum kho seev cev, nws tsis paub tias yuav xaiv hom niaj hnub nim no los sis hom thaum ub. Hais kom meej mas, nws yeej tsis muaj kev paub txog kev seev cev li. Txawm li cas los xij, tus thawj coj cuav tsis pom qhov no. Nws xaiv tus neeg ntawd los ua tus saib xyuas vim nws kub siab thiab nyiam tshwm ntsej muag, xav hais tias nws to taub txhua yam thiab cia nws coj qhia cov kwv tij thiab cov muam. Tom qab ntawd, tus thawj coj cuav tsis taug qab, tsis ntsuam xyuas nws tes hauj lwm, los sis saib seb nws coj qhia cov kwv tij thiab cov muam zoo li cas, seb nws puas yog tus kws txawj los sis tus uas tsis txawj, seb yam uas nws qhia puas tsim nyog, los sis seb qhov ntawd puas mus raws li Vajtswv lub tsev tej kev cheem tsum. Nws pom tsis tau tej no, thiab nws tsis mus nug txog tej no li. Qhov tshwm sim los, txhua tus ua hauj lwm tau ntev heev yam tsis muaj txiaj ntsig dab tsi li, thiab thaum kawg thiaj li pom hais tias tus saib xyuas uas tus thawj coj cuav xaiv ntawd tsis paub seev cev hlo li, thiab nws tseem ua txuj ua tus txawj thiab coj lwm tus. Qhov no tsis ua rau tes hauj lwm qeeb lod? Tiam sis tus thawj coj cuav tsis paub qhov teeb meem no thiab tseem ntseeg hais tias nws ua hauj lwm zoo. Nyob hauv cov thawj coj cuav txoj kev xav, txawm tias yog leej twg los xij, tsuav yog nws muaj siab tawv thiab muaj cuab kav hais, muaj cuab kav ua, thiab muaj cuab kav ris tes hauj lwm, ces qhov no ua pov thawj tau hais tias lawv muaj peev xwm thiab ris taus tes hauj lwm, hos yog nws tsis muaj cuab kav ua tej ntawd, qhov ntawd ua pov thawj hais tias nws lub peev xwm tsis txaus los ris tes hauj lwm ntawd. Ib txhia tib neeg yog cov neeg ruam los sis cov neeg siab kub uas siab tawv muaj cuab kav ua txhua yam. Cov tib neeg no tsis paub tias tus kheej puas muaj lub peev xwm uas tsim nyog los sis seb puas ris taus tes hauj lwm tiam sis tseem muaj cuab kav ua cov saib xyuas. Thiab qhov tshwm sim los yog tom qab lawv ua txoj hauj lwm ntawd, tsis muaj ib qho hauj lwm twg nce qib li, thiab tsis hais lawv ua hauj lwm dab tsi, lawv tsis muaj txoj hau kev meej meej, los sis tsis muaj cov kauj ruam, los sis tsis muaj cov tswv yim uas yog li. Leej twg muab tswv yim dab tsi los lawv tsis paub tias qhov ntawd yog los sis tsis yog. Yog ib tug hais kom ua ib yam, lawv hais tias ua li ntawd los tau, hos yog lwm tus hais kom ua lwm yam, lawv hais tias ua li ntawd los tau thiab. Thiab thaum txog qhov tias yuav ua li cas tiag tiag, lawv cia txhua tus hais, thiab leej twg hais nrov tshaj ces ua raws li tus ntawd cov tswv yim. Cov tib neeg zoo li no tsis muaj peev xwm hlo li, pom tsis tshab ib yam dab tsi li, thiab tsuas ua rau lawv tes hauj lwm ntxhov quav niab xwb, tiam sis cov thawj coj cuav tseem pom tsis tshab cov saib xyuas zoo li no thiab. Muaj ib txhia hais tias, “Tus saib xyuas ntawd lub peev xwm tsis zoo dhau lawm; yuav tsum rho nws tawm tam sid!” Tiam sis cov thawj coj cuav teb hais tias, “Kuv twb nrog nws tham lawm, thiab nws hais tias nws yeem koom tes. Cia muab dua ib lub cib fim rau nws.” Nej xav li cas txog cov lus no? Qhov ntawd tsis yog cov lus uas ib tug neeg ruam hais lod? Cov lus no yuam kev qhov twg? (Qhov ntawd tsis yog nyob ntawm qhov nws puas yeem koom tes los tsis yeem; nws tsis muaj peev xwm thiab yeej ris tsis taus tes hauj lwm ntawd hlo li.) Yog lawm, qhov ntawd tsis yog teeb meem ntawm qhov nws puas yeem koom tes; qhov ntawd yog hais txog qhov nws peev xwm tsis zoo dhau lawm thiab tsis paub yuav koom tes li cas—qhov no thiaj li yog qhov tseem ceeb ntawm qhov teeb meem. Vim li ntawd cov thawj coj thiaj li yuav tsum muaj lub tswv yim thiab txawj saib tib neeg, kom pom tias cov saib xyuas no puas muaj lub peev xwm uas tsim nyog. Cov thawj coj no yuav tsum ntsuas lawv kom thoob plaws raws li lawv txoj kev hais lus thiab kev qhia, raws li qhov saib seb feem ntau lawv puas ua raws li tus qauv uas tsim nyog thiab puas muaj qib muaj duas thiab cov kauj ruam uas muaj cai, thiab raws li cov lus qhia los ntawm cov kwv tij thiab cov muam. Yog lawv peev xwm tsis zoo dhau lawm thiab lawv tsis muaj lub peev xwm ua hauj lwm uas tim tsum, yog lawv ua txhua yam ntxhov quav niab, thiab lawv yog cov niag khoom seem txheej, ces yuav tsum rho cov saib xyuas no tawm tam sid.

Muaj ib tug saib xyuas teb uas ua rau tes hauj lwm ua teb ntxhov quav niab. Nws tsis paub tias yuav tsum cog qoob loo dab tsi rau hauv thaj av twg, los sis thaj av twg haum rau kev cog zaub, thiab nws kuj tsis nrhiav thiab sib qhia nrog sawv daws thiab—nws tsis paub yuav sib qhia txog tej no li cas, yog li ntawd nws thiaj li tsis sib qhia. Nws cog qoob loo raws li siab nyiam xwb, thiab tsis quav ntsej Vajtswv lub tsev tej hauv paus ntsiab lus li. Qhov tshwm sim los, nws cog qoob loo rau txhua thaj av yam ntxhov quav niab, cov qoob loo uas tsim nyog cog tsawg nws ho cog ntau, thiab cov qoob loo uas tsim nyog cog ntau nws ho cog tsawg. Thaum tus Nyob Saud ntuas nws, nws tseem tawv ncauj, thiab xav hais tias qhov nws cog qoob loo zoo li no tsis yuam kev dab tsi. Qhia Kuv seb, hom neeg saib xyuas zoo li no tsis nyuaj heev lod? Nws tsis paub yuav saib xyuas tej yam raws li tej hauv paus ntsiab lus uas Vajtswv lub tsev tau tsim tsa, los sis nws yuav tsum txiav txim siab seb yuav tsum cog nplej rau hauv pes tsawg daim teb thiab cog zaub rau hauv pes tsawg daim teb kom raws li cov neeg uas ua pawg ntseeg tes dej num uas ua puv sij hawm. Tiam sis, nws txiav txim siab cog qee yam qoob loo ntau thiab tsawg raws li qhov nws tus kheej nyiam xwb, thiab nws ntseeg hais tias qhov ua li no mas tsim nyog kawg nkaus. Thaum kawg, nws cog cov qoob loo yam tsis meej pem. Tom qab ntawd, cov noob nthaw kaus tuaj. Qee cov twb daj thiab tim tsum kom rau chiv rau, tiam sis nws tsis paub tias yuav rau chiv ntau npaum li cas rau los sis thaum twg mam rau chiv rau. Qee cov qoob loo muaj kab noj, thiab nws tsis paub tias yuav tsum tsuag tshuaj tua kab rau los tsis tsuag. Ib txhia hais tias kom tsuag rau, thiab ib txhia hais tias kom tsis txhob tsuag rau, ces nws thiaj li tsis paub tseeb lawm, thiab tsis paub tias xyov yuav ua li cas rau cov tshuaj tua kab ntawd. Ua li no, nws ua ua dog ua dig mus txog rau thaum lub caij sau qoob. Nws kuj tsis paub hais tias txhua yam qoob loo siv sij hawm ntev npaum li cas thiaj loj hlob los sis thaum twg txhua yam qoob loo thiaj li siav. Qhov tshwm sim los, cov nplej uas sau ntxov tseem nyoos, hos cov uas sau lig poob rau hauv av tag. Thaum kawg, txawm yuav zoo li cas los xij, cov qoob loo sau tag lawm, thaum kawg cov nplej tau coj los rau hauv txhab lawm, thiab tes hauj lwm ua teb rau xyoo ntawd twb yuav luag xaus lawm. Tus saib xyuas teb ua nws tes hauj lwm zoo li cas? (Nws ua rau ntxhov quav niab.) Vim li cas thiaj li ntxhov quav niab ua luaj? Nej nrhiav qhov teeb meem no lub hauv paus seb. (Nws lub peev xwm tsis zoo dhau lawm.) Tus saib xyuas no lub peev xwm tsis zoo dhau lawm! Thaum ntsib tej xwm txheej, nws tsis txiav txim kom yog, nrhiav tsis tau tej hauv paus ntsiab lus, thiab tsis muaj txoj kev los sis txoj hau kev los daws tej yam. Qhov no twb ua rau nws saib xyuas tes hauj lwm uas yooj yooj yim li cog qoob loo ntawd tsis muaj paus muaj ntsis lawm, thiab ua rau tes hauj lwm no ntxhov quav niab. Cov kev qhia tshwm uas pom tau meej tseem ceeb ntawm lub peev xwm tsis zoo yog dab tsi? (Tsis muaj kev txiav txim uas yog thiab nrhiav tsis tau tej hauv paus ntsiab lus.) Cov lus no puas tseem ceeb? Nej puas yuav nco tau? Thaum ib tug neeg ntsib tej xwm txheej, qhov tsis muaj kev txiav txim uas yog thiab nrhiav tsis tau tej hauv paus ntsiab lus ntawd qhia hais tias muaj lub peev xwm tsis zoo dhau lawm. Lwm tus yim muab cov tswv yim thiab qhia ntau, tus saib xyuas no yim tsis paub tseeb, nws xav hais tias yuav zoo heev yog tsuas muaj ib lub tswv yim xwb, ces nws thiaj li muab ua ib txoj kev cai tswj thiab tuav raws li qhov ntawd, uas yuav ua rau txhua yam yooj yim thiab txhais tau hais tias nws tsis tas yuav xav los sis siv kev txiav txim. Nws ntshai tsam muaj ntau tus neeg muab cov tswv yim vim thaum nws hnov tej ntawd, nws tsis paub yuav ua li cas. Qhov tseeb tiag, cov tib neeg uas muaj hlwb thiab muaj peev xwm zoo tsis ntshai lwm tus muab cov tswv yim. Lawv xav hais tias lawv qhov kev txiav txim yuav yog dua thiab qhov yuav ua yuam kev yuav tsawg dua thaum muaj neeg muab cov tswv yim ntau. Cov tib neeg uas tsis muaj hlwb los sis tsis muaj peev xwm ntshai ntau yam kev xam pom thiab cov tswv yim los ntawm ntau tus neeg; lawv yoob thaum ntsib cov lus qhia kev xam pom los ntawm ntau qhov chaw. Tus saib xyuas teb uas Kuv nyuam qhuav hais txog ntawd puas yog nws lub peev xwm tsis zoo dhau lawm—puas yog nws zoo tsis txaus los ris tes hauj lwm no? (Yog.) Ib txhia hais tias, “Tej zaum nws tsis tau ua teb dua. Koj yuam kom nws ua teb—qhov no tsis yog yuam kom ntses mus nyob rau saum nruab nqhuab lod?” Qhov uas tsis tau ua teb dua puas txhais tau hais tias ib tug neeg ua tsis tau teb? Leej twg yug los es yeej paub ua teb? Puas yog cov neeg ua liaj ua teb yug los es yeej muaj qhov peev xwm no? (Tsis yog.) Puas tau muaj cov neeg ua liaj ua teb uas tsis muaj kev paub dhau los thiab tsis paub ua teb, es tsis tau sau qoob loo thiab tsis muaj nplej noj thawj zaug uas lawv cog qoob loo, es ua rau tshaib plab ib xyoos? Puas muaj tej yam zoo li no tshwm sim? (Tsis muaj.) Yog muaj li ntawd tiag, ces yog los ntawm kev puas tsuaj raws ntuj tsim, tsis yog ua los ntawm tib neeg. Tej xwm txheej zoo li no muaj tsawg heev! Cov neeg ua liaj ua teb khwv noj khwv haus los ntawm kev ua teb, thiab txawm yog cov uas ua teb tau ib los sis ob xyoos los yeej kawm paub. Cov tib neeg uas muaj peev xwm zoo tuaj yeem sau tau ntau dua me ntsis los ntawm kev ua teb, hos cov uas muaj peev xwm tsis zoo tej zaum yuav sau tau tsawg dua. Tsis tas li ntawd, nrog rau txoj kev vam meej thiab muaj tej ntaub ntawv ntau niaj hnub nim no, yog ib tug neeg muaj peev xwm, cov ntaub ntawv no yeej txaus los ua qhov siv los txiav txim thiab txiav txim siab kom yog lawm. Tej ntaub ntawv yim ntau thiab yim yog, ces lawv tej kev txiav txim thiab kev txiav txim siab yim yog, thiab lawv yim ua yuam kev tsawg. Txawm li cas los xij, cov tib neeg uas peev xwm tsis zoo mas txawv ntawd lawm; yim muaj ntaub ntawv ntau, ces lawv yim tsis paub meej. Thaum kawg, txhua kauj ruam thiaj li rais los ua ib qho kev nyuaj ces thiaj li nyuaj heev rau lawv. Kev ua teb yog kev sib tw nrog lub sij hawm; ua ntxov dhau los tsis tau, lig dhau los tsis tau. Yog koj ua lig thiab dhau lub sij hawm uas yog lawm, qhov kev sau qoob loo thaum kawg yuav raug cuam tshuam. Nyob rau ntawm lub sij hawm ua teb ntawd, tus saib xyuas no mas maj ntau yam heev, maj vim lub sij hawm dhau mus zuj zus, thiab raug yuam kom ua txhua kauj ruam. Txawm hais tias nws tseem ua tau txhua kauj ruam los xij, qhov ntawd nyuaj heev rau nws, thiab thaum kawg, qhov ntawd ua rau nws ua tes hauj lwm ntxhov quav niab. Cov tib neeg zoo li no peev xwm tsis zoo dhau lawm!

Cov tib neeg uas peev xwm tsis zoo dhau mas ua tsis tau ib teg hauj lwm kom zoo kiag li; txawm lawv ua hauj lwm dab tsi los xij, lawv puav leej ua rau ntxhov quav niab. Yog cov thawj coj ntawm cov saib xyuas ntawd peev xwm zoo thiab tuaj yeem ua lawv tej luag hauj lwm kom tiav, lawv yuav tsum tuaj yeem pom tej no. Lawv yuav tsum pab cov saib xyuas uas peev xwm tsis zoo ntawd los ntawm kev coj qhia, kev ua kom raws cai, thiab kev tshuaj xyuas. Txawm li cas los xij, cov thawj coj cuav ua tsis tau qhov no; lawv kuj ua tsis tau tej yam uas cov saib xyuas ua tsis tau ntawd thiab, thiab thaum cov saib xyuas pom tias lawv tes hauj lwm nyuaj los sis tsis paub meej thiab ua xyem xyav nyob hauv lawv tes hauj lwm, ces cov thawj coj cuav los kuj ua xyem xyav nrog lawv thiab. Lawv haj tseem tsis paub tias cov neeg saib xyuas ua hauj lwm zoo li cas, ua mus txog qhov twg lawm, muaj teeb meem dab tsi tshwm tuaj, los sis lawv muaj kev ntxhov siab dab tsi. Thaum muaj neeg nug tus thawj coj ntawd txog kev ua teb, nws hais tias, “Kuv yog ib tug thawj coj, kuv tsis yog tus saib xyuas kev ua teb.” Lawv teb hais tias, “Koj yog ib tug thawj coj, yog li ntawd qhov nug koj txog kev ua teb es txhaum qhov twg? Tes hauj lwm no nyob hauv ciaj ciam ntawm koj tej luag hauj lwm.” Nws hais tias, “Cia kuv nug rau koj.” Tom qab nug tag, nws teb hais tias, “Peb tab tom cog qos yaj ywm.” Lawv nug hais tias, “Nej cog qos yaj ywm ntau npaum li cas?” Nws teb hais tias, “Kuv tsis tau nug qhov ntawd, cia kuv mus nug rau koj.” Tom qab rov nug dua, nws thiaj li teb hais tias, “Peb cog ob ekawj.” Lawv nug hais tias: “Nej cog hom twg? Thaj av ntawd puas haum cog qos yaj ywm? Thaum nej cog nej puas rau quav chiv? Cov noob qos yaj ywm cog tob npaum li cas?” Nws tsis paub tej no li. Koj tsis paub tej no, tiam sis koj tsis nug thiab nrhiav neeg nug txog tej no—qhov no tsis yog ua rau tej hauj lwm qeeb lod? Koj puas yog ib tug thawj coj? Koj ua hauj lwm dab tsi tam li ib tug thawj coj? Yog koj coj tsis tau tib neeg ua tes hauj lwm sab nraud me ntsis no, koj ua ib tug thawj coj muaj qab hau dab tsi? Txawm tus saib xyuas lub peev xwm tsis zoo npaum li no los, tus thawj coj cuav no tseem tsis pom, thiab thaum nug nws hais tias tus saib xyuas ntawd lub peev xwm zoo li cas, cov qoob loo zoo li cas, thiab puas paub tseeb tias yuav tau sau, nws ntseeg hais tias: “Koj tsis tas yuav nug txog tej no; kev ua teb yog ib yam hauj lwm uas yooj yim heev! Peb twb cog qoob loo rau hauv teb lawm, tsis yog lod? Ua cas thiaj li yuav tsis tau sau?” Nws tsis xav txog dab tsi li, tsis nug txog dab tsi li, thiab nws tsis muaj hlwb kiag li. Tus thawj coj no yog hom thawj coj dab tsi? (Ib tug thawj coj cuav.) Thaum twg nws ntsib ib yam dab tsi mas, tus neeg saib xyuas ntawd tsis paub dab tsi li zoo ib yam li ib tug qaib uas muab lub taub hau txiav lawm xwb. Nws tsis paub tias yuav nug leej twg, los sis yuav tshawb nrhiav li cas, los sis yuav xaiv sab twg thaum muaj ntau qhov chaw qhia ntau lub tswv yim sib txawv. Tus thawj coj no tsis tshawb xyuas txog tej xwm txheej no. Nws xav hais tias tes hauj lwm twb muab rau tus neeg no lawm, yog li ntawd nws thiaj li tsis quav ntsej txog qhov ntawd kiag li. Nej puas xav hais tias ib tug saib xyuas uas lub peev xwm tsis zoo npaum li no yuav muaj kev cuam tshuam rau cov txiaj ntsig ntawm tes hauj lwm? (Muaj.) Yog li ntawd tus thawj coj yuav tsum ua dab tsi los daws qhov teeb meem no? Los ntawm qhov tshawb xyuas thiab nug lwm tus, los ntawm tej xwm txheej uas tshwm sim nyob ib puag ncig nws, thiab los ntawm kev cog qoob loo rau lub caij ntawd, nws yuav tsum pom hais tias tus saib xyuas ntawd lub peev xwm tsis zoo dhau, tias nws ua tsis tau ib yam dab tsi li. Nws muab tsis tau txoj kev ntsib kev pom zuaj zog los hais li txawm tias twb ua teb los tau ntau xyoo lawm—txog thaum ntawd nws haj tseem twb tsis paub meej tias yuav cog qoob loo li cas li thiab—qhov ntawd tsim nyog pom tseeb hais tias tus neeg ntawd lub peev xwm tsis zoo dhau thiab tsis tsim nyog rau tes hauj lwm ntawd, thiab tus neeg zoo li ntawd yuav tsum raug muab rho tawm! Nws yuav tsum nug seb leej twg haum ua tus saib xyuas, leej twg ris taus txoj hauj lwm no thiab muab ua kom zoo, kom tsis txhob ua rau tes hauj lwm hauv Vajtswv lub tsev raug puas tsuaj. Tus thawj coj cuav puas muaj lub siab zoo li no? Nws puas pom tej teeb meem no? (Tsis pom.) Nws lub siab thiab qhov muag dig tag; nws dig muag tag nrho li. Qhov no yog ib qho kev qhia tshwm uas pom tau meej ntawm cov thawj coj cuav. Thaum hais txog cov neeg uas lub peev xwm tsis zoo, lawv tsis paub yuav coj qhia cov neeg ntawd ua hauj lwm li cas, lawv tsis paub yuav pab cov neeg ntawd los ntawm kev tshuaj xyuas li cas los sis yuav daws lawv tej teeb meem tam sim ntawd li cas, thiab lawv yeej tsis paub hais tias ib tug neeg uas lub peev xwm tsis zoo ris tsis taus tes hauj lwm thiab yuav tsum tau rho tawm es nrhiav ib tug neeg uas tsim nyog los hloov kom sai. Cov thawj coj cuav tsis ua tej hauj lwm no hlo li; lawv tsis tsim nyog rau tes hauj lwm, thiab lawv tsis pom tej no li. Cov no tsis yog cov neeg dig muag lod? Ib txhia hais tias, “Tej zaum lawv ua lwm yam hauj lwm. Vim li cas Koj pheej hais kom lawv saib xyuas tej hauj lwm dog dig uas tsis tseem ceeb no?” Tej no yog tej hauj lwm uas cov thawj coj yuav tsum ua, yuav suav hais tias yog hauj lwm dog dig tau li cas? Tej hauj lwm no yog nyob hauv cov thawj coj tej luag hauj lwm—yog lawv tsis quav ntsej tej luag hauj lwm no puas tau? Yog lawv tsis ua, ces yog ib qho kev tso lub luag hauj lwm tseg. Tej kev nyuaj thiab tej teeb meem hauv lawv tes hauj lwm tshwm sim txhua hnub ntawm cov thawj coj lub xub ntiag, thiab tib neeg hais tej ntawd tawm txhua hnub. Txawm li cas los xij, cov thawj coj cuav lub qhov muag thiab lub siab puav leej dig tag. Lawv tsis pom, tsis hnov, los sis tsis paub hais tias tej no yog teeb meem, yog li ntawd, lawv yeej daws tsis tau tej ntawd li. Tus thawj coj cuav ntawd tsis pom hais tias tus saib xyuas ntawd lub peev xwm tsis zoo dhau. Nws kuj tsis pom ntau yam teeb meem uas tshwm hauv tus saib xyuas ntawd tes hauj lwm thiab. Tus saib xyuas no daws tsis tau teeb meem thiab thaum muaj qee yam tshwm tuaj, nws ua yam ntxhov hnyo ib yam li cov ntsaum nyob hauv yias kub, tsis muaj hauv paus ntsiab lus, thiab ua rau tes hauj lwm ntxhov quav niab, thiab tus thawj coj cuav ntawd tsis pom los sis tsis paub tej no li. Muaj ib lub hauv paus ntsiab lus ntawm qhov cov thawj coj cuav ua lawv tes hauj lwm: Tsuav yog lawv tau npaj ib tug los saib xyuas txhua tes hauj lwm lawm, lawv suav hais tias tiav lawm, thiab txawm tus saib xyuas ntawd lub peev xwm zoo los sis tsis zoo, seb nws puas ua tau hauj lwm zoo, los sis muaj teeb meem ntau npaum li cas tshwm nyob hauv nws tes hauj lwm los xij, lawv xav hais tias tsis muaj dab tsi cuam tshuam rau lawv li. Ib tug thawj coj zoo li no puas tseem ua tau hauj lwm kom tiav? Lawv puas to taub yuav ua hauj lwm li cas? (Tsis to taub.) Yog koj tsis paub yuav ua hauj lwm li cas, es vim li cas koj thiaj li ua ib tug thawj coj? Yog koj ua ib tug thawj coj uas zoo li no xwb, ces koj yog ib tug thawj coj cuav. Cov thawj coj cuav tsis pom los sis tsis paub ntau yam kev qhia tshwm uas pom tau meej ntawm cov neeg uas lub peev xwm tsis zoo los sis ntau yam teeb meem uas tshwm sim thaum lawv ua lawv tej dej num. Lawv lub siab loog tshaj plaws. Lawv qhov lub muag thiab lub siab tsis yog dig tag lawm lod? Ib txhia hais tias, “Lawv tsis dig muag. Koj pheej iab liam thiab thuam lawv tas li.” Cov teeb meem txog tus saib xyuas kev ua teb no mas hnyav heev; tus thawj coj cuav ntawd nrog nws nyob ua ke txhua hnub, thiab nws hnov thiab pom txhua yam uas tshwm sim. Ua cas nws thiaj li tsis pom los sis tsis paub hais tias tej no yog teeb meem? Vim li cas nws tsis saib xyuas los sis daws tej teeb meem no? Nws qhov muag thiab lub siab tsis yog dig tag lawm lod? Qhov teeb meem no puas hnyav? (Hnyav.) Qhov no yog lwm qhov kev qhia tshwm uas pom tau meej ntawm cov thawj coj cuav—qhov uas lub siab thiab lub qhov muag dig lawm.

Thaum koj muab ib teg hauj lwm faib rau ib tug neeg uas lub peev xwm tsis zoo ua, koj yeej paub tau los ntawm qhov lawv ib txwm hais lus, lawv tus cwj pwm thiab tej kev xam pom thaum sib tham txog tes hauj lwm, thiab txoj kev uas lawv saib xyuas tej hauj lwm, tias lawv lub peev xwm tsis zoo kiag li, tias lawv txoj kev xav mas ntxhov quav niab xwb, thiab tias lawv ua txhua yam yam dig muag ntsuav thiab tsis xyuam xim ib qho me me li, thiab tsis muaj ib lub hom phiaj li. Los ntawm qhov saib lawv txoj kev ua hauj lwm xwb, koj yeej txiav txim tau hais tias tus tib neeg no lub peev xwm tsis zoo kiag li, yog li ntawd koj puas tseem yuav tsum tau soj ntsuam lawv ntev npaum li ntawd? Tsis tas soj ntsuam, koj tsis tas yuav soj ntsuam li. Txawm li cas los xij, cov thawj coj cuav muaj ib qho teeb meem uas loj heev; qhov ntawd yog lawv ntseeg hais tias vim ib tug neeg ib txwm ua hauj lwm yam tsis tso tseg, thiab lawv tsis tau hnov leej twg qhia tawm hais tias tus neeg no ua ib yam dab tsi phem, los sis ua rau muaj kev cuam tshuam los sis kev tab kaum, los sis xav phem los sis tub nkeeg, ces qhov no txhais tau hais tias tus neeg no tseem ua tau hauj lwm. Lawv tsis paub tias txiav txim li cas rau ib tug neeg lub peev xwm los sis lawv qhov kev ua tau hauj lwm zoo raws li lawv txoj kev hais lus, lawv tus cwj pwm thiab kev xam pom txog tej teeb meem, los sis txoj kev uas lawv ua tej yam. Lawv tsis muaj qhov kev paub no; lawv loog thiab tsis muaj kev hnov txog qhov teeb meem no. Lawv muaj ib qho kev xam pom: Tsuav yog ib tug neeg tsis nyob dawb, txhua yam zoo thiab tes hauj lwm ua tau mus ntxiv. Nej xav hais tias ib tug thawj coj uas muaj qhov kev xam pom zoo li no puas yuav ua tau hauj lwm zoo? Lawv puas tsim nyog rau tes hauj lwm ntawd? (Tsis tsim nyog.) Qhov cia tus neeg zoo li no ua ib tug thawj coj yuav ua rau tes hauj lwm ntxhov quav niab, tsis yog lod? Thaum ib tug neeg nyiam kev noj, kev haus, thiab kev lom zem, thiab tsis saib xyuas lawv tej dej num, cov thawj coj cuav tsis quav ntsej mus tshawb xyuas los sis daws qhov no, thiab lawv tsis tuaj yeem pom hais tias ib tug neeg lub peev xwm los sis tus yam ntxwv zoo los sis phem, txawm lawv tau nrog nws nyob ntev npaum li cas los xij. Cov thawj coj no puas muaj lub peev xwm ua hauj lwm li ib tug thawj coj? (Tsis muaj.) Cov no yog cov thawj coj cuav. Cov thawj coj cuav cais tsis tau hais tias ib tug neeg lub peev xwm zoo los sis tsis zoo, thiab lawv ua tsis tau tej hauj lwm tiag tiag no. Lawv xav hais tias qhov no tsis yog ib feem ntawm lawv lub luag hauj lwm. Qhov no tsis yog kev tsis ua lub luag hauj lwm lod? Nej xav li cas, ib tug neeg uas lub peev xwm tsis zoo puas ris taus tes hauj lwm, los sis ib tug neeg uas muaj peev xwm me ntsis ris taus? (Ib tug neeg uas muaj peev xwm me ntsis.) Yog li ntawd, qhov ntsuas ib tug neeg lub peev xwm thiab lawv puas tsim nyog rau tes hauj lwm yog ib qho teeb meem uas cov thawj coj thiab cov neeg ua hauj lwm yuav tsum muab tso rau hauv siab thiab paub txog, thiab qhov ntawd kuj yog ib teg hauj lwm uas cov thawj coj thiab cov neeg ua hauj lwm yuav tsum ua. Tiam sis cov thawj coj cuav tsis to taub hais tias qhov no yog ib feem ntawm lawv tes hauj lwm, lawv tsis muaj qhov kev paub no, thiab lawv ua tsis tau feem ntawm lawv tej luag hauj lwm no kom tiav. Qhov no yog qhov uas cov thawj coj cuav tsis ua lawv lub luag hauj lwm, thiab nws kuj yog ib qho kev qhia tshwm uas pom tau meej ntawm cov thawj coj cuav uas tsis tsim nyog rau tes hauj lwm. Qhov no yog qhov xwm txheej ob: cov saib xyuas lub peev xwm tsis zoo, tsis muaj lub peev xwm ua hauj lwm, thiab ris tsis taus lawv tes hauj lwm, uas yog ib qho teeb meem hais txog lawv lub peev xwm. Hauv qhov xwm txheej no, cov thawj coj cuav kuj ua tsis tau txoj hauj lwm ntawm ib tug thawj coj thiab tsis tuaj yeem rho cov saib xyuas uas lub peev xwm tsis zoo ntawd tawm tam sid.

III. Cov Thawj Coj Cuav Coj Li Cas Rau Cov Saib Xyuas Uas Tsim Txom Lwm Tus thiab Cuam Tshuam Pawg Ntseeg Tes Hauj Lwm

Qhov xwm txheej peb yog hais txog cov saib xyuas uas tsim txom thiab txwv lwm tus, cuam tshuam tes hauj lwm ntawm pawg ntseeg. Thawj qhov xwm txheej uas peb tau tham txog ua ntej ntawd yog qhov uas qee tus neeg saib xyuas, txawm muaj peev xwm zoo me ntsis thiab tuaj yeem ris lawv tes hauj lwm los xij, lawv tsis muab tes hauj lwm ntawd ua tiag, thiab tsuas ua dog ua dig xwb, hos cov thawj coj cuav tsis paub txog qhov no thiab tsis rho lawv tawm tam sid. Qhov xwm txheej ob yog hais txog qee tus neeg saib xyuas uas lub peev xwm tsis zoo thiab tsis tuaj yeem ris tes hauj lwm, tiam sis cov thawj coj cuav tsis pom qhov no los sis tsis hloov lawv tam sid. Qhov xwm txheej peb no yog hais txog cov saib xyuas uas tsis hais lawv tus kheej lub peev xwm zoo los sis tsis zoo, lawv tsis saib xyuas tes hauj lwm uas tsim nyog ua, thiab tsuas tsim txom thiab txwv lwm tus, cuam tshuam tes hauj lwm ntawm pawg ntseeg. Txij thaum lawv raug xaiv los ua cov saib xyuas, lawv tsis kawm los sis nrhiav kev paub txog kev txawj qib siab, thiab lawv tsis nrhiav qhov tseeb tej hauv paus ntsiab lus, thiab lawv yeej tsis coj qhia lwm tus ua lawv tej dej num kom zoo li. Tiam sis, txhua lub cib fim uas lawv muaj mas, lawv thab tib neeg, thiab thuam thiab luag lwm tus; tsuav yog lawv muaj lub sij hawm xwb, ces lawv tus kheej muaj plhus lawm, thiab txawm lawv ua dab tsi los xij li, lawv yeej tsis muaj lub hauv paus ruaj khov. Ib hnub mas lawv hais kom tib neeg ua tej yam lawm ib yam, thiab hnub tom ntej ntawd mas lawv ho hais kom cov tib neeg ntawd ua tej yam lwm yam lawm; lawv tsuas tsim tej tswv yim tshiab, ib txwm xav ua kom txawv lwm tus. Qhov no thiaj li ua rau tib neeg ntxhov siab. Thaum twg lawv hais lus, ib txhia tib neeg hnov lawv lub siab tshee. Thaum lawv kov yeej txhua tus, thiab ua rau txhua tus ntshai thiab mloog lawv lus, lawv yuav zoo siab heev. Tsis hais lawv yog cov thawj coj cuav los sis cov tawm tsam khetos, thiab tsis hais lawv muaj hwj chim los sis tsis muaj, hom neeg zoo li no ua rau pawg ntseeg tsis muaj kev thaj yeeb. Tsis yog lawv tsuas tsis ua hauj lwm tiag tiag los sis tsis ua lawv tes dej num li ib txwm ua xwb, lawv tseem tseb kom muaj kev sib cais thiab ua rau muaj kev sib tawm tsam ntawm tib neeg, cuam tshuam lub neej hauv pawg ntseeg thiab. Tsis yog lawv pab tsis tau lwm tus kom to taub qhov tseeb xwb, lawv tseem pheej txiav txim thiab teem txim rau tib neeg, thiab yuam kom tib neeg mloog lawv lus hauv txhua yam, txwv lawv txog qhov lawv tsis paub yuav ua li cas kom tsim nyog. Tshwj xeeb yog hais txog txoj kev ua neej, tib neeg pw ntxov me ntsis los sis lig me ntsis los tsis tau li. Txawm lawv ua dab tsi, los lawv yuav tsum saib cov neeg no lub ntsej muag, uas ua rau lub neej sab heev. Yog cov neeg zoo li no los ua cov saib xyuas, lwm tus yuav muaj lub neej uas nyuaj heev. Yog koj hais ncaj rau lawv thiab nthuav lawv tej teeb meem tawm, lawv yuav hais tias koj txhob txwm tsom rau lawv thiab nthuav lawv tawm. Yog koj tsis hais lawv txog lawv tej teeb meem, ces lawv yuav hais tias koj saib tsis taus lawv. Yog koj mob siab tiag tiag thiab muaj kev ris txog tes hauj lwm thiab muab tswv yim rau lawv mas, lawv yuav tawm tsam, thiab lawv yuav hais tias koj tawm tsam lawv thiab muab koj hu ua niag khav theeb. Txawm li cas los xij, txawm koj ua dab tsi los xij li, lawv yeej yuav tsis txaus siab. Lawv pheej xav txog qhov tsim txom tib neeg, thiab lawv txwv tib neeg kom raug khi tes khi taw thiab xav hais tias tsis muaj ib yam dab tsi ua es yog li. Cov saib xyuas zoo li no cuam tshuam tes hauj lwm ntawm pawg ntseeg.

Cov thawj coj cuav txawj ua hauj lwm sab nraud xwb, tiam sis lawv yeej tsis ua hauj lwm tiag tiag li. Lawv tsis mus tshuaj xyuas, saib xyuas, los sis coj qhia ntau yam hauj lwm qib siab, los sis nrhiav kom paub tias muaj dab tsi tshwm sim hauv ntau pab pawg kom raws sij hawm, tshuaj xyuas seb tes hauj lwm mus txog qhov twg lawm, muaj teeb meem dab tsi, seb cov saib xyuas pab pawg puas muaj peev xwm ua lawv tes hauj lwm, thiab seb cov kwv tij thiab cov muam qhia tawm los sis ntsuas cov saib xyuas li cas. Lawv tsis tshuaj xyuas seb puas muaj leej twg raug cov coj pab pawg los sis cov saib xyuas txwv, seb puas muab cov tswv yim zoo uas tib neeg hais los ntawd coj los siv, seb puas muaj leej twg uas muaj peev xwm los sis caum qhov tseeb raug tsuj nias los sis raug cais tawm, seb puas muaj ib tug tib neeg twg uas tsis txawj dag es raug thab, seb puas muaj cov tib neeg uas qhia tshwm thiab qhia tawm txog cov thawj coj cuav ntawd es raug tawm tsam, raug ua pauj rov qab rau, raug ntsaig tawm, los sis raug ntiab tawm, seb cov coj pab pawg los sis cov neeg saib xyuas puas yog cov neeg phem, thiab seb puas muaj leej twg raug tsim txom. Yog cov thawj coj cuav tsis ua tej hauj lwm meej meej no ib qho li, ces lawv yuav tsum raug muab rho tawm. Piv txwv li, muaj neeg qhia tawm rau ib tug thawj coj cuav hais tias muaj ib tug saib xyuas uas pheej txwv thiab tsuj nias tib neeg. Tus saib xyuas ntawd tau ua qee yam tsis yog tiam sis nws tsis pub cov kwv tij thiab cov muam muab tswv yim li, thiab nws haj tseem nrhiav laj thawj los hais daws thiab tiv thaiv nws tus kheej, yeej tsis lees qhov txhaum li. Tus saib xyuas zoo li no tsis tsim nyog raug rho tawm tam sid lod? Tej teeb meem no yog tej uas cov thawj coj yuav tsum daws kom ncav sij hawm. Qee cov thawj coj cuav tsis pub leej twg nthuav cov saib xyuas uas lawv xaiv los ntawd tawm, txawm muaj teeb meem dab tsi tshwm sim hauv lawv tes hauj lwm los xij, thiab lawv yeej tsis pub leej twg qhia tawm rau txheej saum toj—lawv haj tseem hais kom tib neeg kawm paub txoj kev zwm rau. Yog muaj ib tug twg nthuav txog tus saib xyuas ntawd tej teeb meem tawm, cov thawj coj cuav no yuav tiv thaiv nws los sis npog qhov tseeb, hais tias, “Qhov no yog ib qho teeb meem ntawm tus saib xyuas txoj kev nkag mus rau hauv lub neej txoj sia xwb. Qhov ntawd yog ib qho ib txwm muaj uas nws muaj tus moj yam khav theeb—txhua tus uas muaj peev xwm me ntsis yeej khav theeb. Tsis yog teeb meem loj, kuv tsuas nrog nws sib qhia me ntsis xwb ces tau lawm.” Los ntawm qhov kev sib qhia, tus saib xyuas nthuav nws lub siab tawm, hais tias, “Kuv lees tias kuv khav theeb. Kuv lees tias muaj tej lub sij hawm thaum kuv txhawj txog kuv tus kheej lub ntsej muag, kev khav theeb, thiab lub meej mom, thiab tsis lees txais lwm tus tej tswv yim. Tiam sis lwm tus tsis txawj txog txoj hauj lwm no, lawv pheej muab tej tswv yim uas tsis muaj nqis, yog li ntawd muaj ib qho laj thawj uas kuv tsis mloog lawv.” Cov thawj coj cuav tsis mus to taub qhov xwm txheej kom meej meej, lawv tsis saib tus saib xyuas tes hauj lwm cov txiaj ntsig, haj yam tsis saib tias nws txoj kev ua neeg, tus moj yam, thiab txoj kev caum zoo li cas. Txhua yam lawv ua yog hais kom qhov teeb meem mloog zoo li me me xwb, hais tias, “Qhov no raug muab qhia tawm rau kuv yog li ntawd kuv tab tom soj ntsuam txog koj. Kuv muab dua ib lub hwv tsam rau koj.” Tom qab tham tag, tus saib xyuas hais tias nws txaus siab hlo lees txim hloov dua siab tshiab, tiam sis hais txog tom qab ntawd nws puas lees txim hloov dua siab tshiab tiag, los sis tsuas dag thiab ntxias xwb, cov thawj coj cuav tsis quav ntsej txog qhov no li. Yog muaj ib tug twg nug txog qhov teeb meem no, cov thawj coj cuav hais tias, “Kuv twb nrog nws tham lawm thiab twb muab ntau nqe ntawm Vajtswv cov lus coj los qhia rau nws lawm. Nws txaus siab hlo lees txim hloov dua siab tshiab, thiab qhov teeb meem twb raug daws lawm.” Thaum tus neeg ntawd nug hais tias, “Tus saib xyuas ntawd txoj kev ua neeg zoo li cas? Nws puas yog ib tug neeg lees txais qhov tseeb? Koj muab ib lub cib fim rau nws, tiam sis nws puas tuaj yeem lees txim hloov dua siab tshiab thiab hloov tiag tiag?” Cov thawj coj cuav uas pom tsis tshab qhov no, teb hais tias, “Kuv tseem tab tom soj ntsuam nws.” Tus neeg ntawd teb hais tias: “Koj soj ntsuam nws tau ntev npaum li cas lawm? Koj puas tau txiav txim siab li cas?” Cov thawj coj cuav hais tias: “Tau rau hli ntau lawm, thiab kuv tseem tsis tau txiav txim siab li cas li.” Yog tom qab lawv soj ntsuam tau rau lub hlis ntau lawm tseem tsis tau txais cov txiaj ntsig dab tsi li, ces qhov ntawd yog hom kev ua hauj lwm zoo li cas? Cov thawj coj cuav ntseeg hais tias qhov nrog tus saib xyuas tham ib zaug ntawd muaj txiaj ntsig thiab daws tau teeb meem lawm. Qhov kev xav no puas siv tau? Lawv xav hais tias thaum lawv nrog ib tug twg tham tag lawm, tus neeg ntawd yuav tuaj yeem hloov, thiab yog ib tug twg qhia lawv qhov kev txiav txim siab tias yuav tsis ua li ntawd ntxiv lawm, lawv cia li ntseeg tus neeg ntawd tag nrho yam tsis nug ntxiv los sis tshawb xyuas qhov xwm txheej ntawd ntxiv lawm. Yog tsis muaj leej twg taug qhov teeb meem ntawd, lawv haj tseem tsis quav ntsej mus tshawb xyuas los sis taug qab tes hauj lwm ntawd li ib nrab xyoo. Cov thawj coj cuav tseem tsis paub txog xwm txheej tab txawm yog thaum tus saib xyuas ntawd ua rau tes hauj lwm ntxhov quav niab los xij. Lawv cais tsis tau tias tus saib xyuas ntawd tab tom dag thiab ua si nrog lawv li cas. Qhov uas haj yam ntxim ntxub tshaj yog thaum muaj ib tug twg qhia tawm tus saib xyuas ntawd tej teeb meem, cov thawj coj cuav tsis quav ntsej lawv thiab tsis tshawb xyuas tiag tiag seb tej teeb meem ntawd puas muaj los sis seb tej teeb meem uas lawv qhia tawm ntawd puas muaj tseeb. Lawv tsis xav txog tej teeb meem no—lawv ntseeg lawv tus kheej dhau lawm tiag tiag! Tsis hais muaj xwm txheej dab tsi tshwm sim hauv pawg ntseeg tes hauj lwm, cov thawj coj cuav tsis maj daws tej ntawd; lawv xav hais tias qhov ntawd tsis yog lawv qhov teeb meem. Cov thawj coj cuav qhov kev teb rov qab rau tej teeb meem no qeeb tshaj plaws, lawv nqis tes ua thiab txav mus los mas qeeb tshaj plaws, lawv pheej ua ywj fab ywj fwj, thiab pheej muab lwm lub cib fim rau tib neeg lees txim hloov dua siab tshiab, cuag nkaus li cov cib fim uas lawv muab rau tib neeg ntawd mas muaj nqis thiab tseem ceeb heev, cuag nkaus li tej ntawd hloov tau tib neeg txoj hmoo. Cov thawj coj cuav tsis paub saib ib tug neeg tus yam ntxwv xeeb txawm lub ntsiab tseeb los ntawm qhov uas nws qhia tshwm uas pom tau meej, los sis txiav txim tias tus neeg ntawd taug txoj kev twg raws li nws tus yam ntxwv xeeb txawm lub ntsiab tseeb, los sis saib seb tus neeg ntawd puas haum ua tus saib xyuas los sis ua tes hauj lwm thawj coj raws li txoj kev uas nws taug. Lawv tsis paub saib tej yam zoo li ntawd. Cov thawj coj cuav tsuas ua tau ob yam hauv lawv tes hauj lwm xwb: ib, nrhiav tib neeg los tham thiab lam ua kom dhau xwb; ob, muab cib fim rau tib neeg, ua kom lwm tus nyiam, thiab tsis ua rau leej twg chim. Puas yog lawv tab tom ua hauj lwm tiag tiag? Pom tseeb tias tsis yog. Tiam sis cov thawj coj cuav ntseeg hais tias qhov nrhiav ib tug twg los tham ntawd yog kev ua hauj lwm tiag tiag. Lawv saib cov kev sib tham no muaj nqis thiab tseem ceeb heev, thiab saib cov lus qhuav thiab cov kev qhuab qhia uas lawv hais tawm ntawd tias tseem ceeb kawg nkaus. Lawv xav hais tias lawv twb daws tau tej teeb meem loj heev los ntawm cov kev sib tham no thiab tau ua hauj lwm tiag tiag lawm. Lawv tsis paub hais tias vim li cas Vajtswv thiaj li txiav txim thiab rau txim, ntuas, los sis sim thiab kho tib neeg kom dawb huv. Lawv tsis paub hais tias tsuas yog Vajtswv cov lus thiab qhov tseeb xwb thiaj li kho tau tib neeg cov moj yam qias vuab tsuab. Lawv muab Vajtswv tes hauj lwm thiab Vajtswv txoj kev cawm tib neeg ntiaj teb ntawd saib yooj yim dhau lawm! Lawv ntseeg hais tias qhov hais ob peb lo lus thiab cov kev qhuab qhia ntawd mas yog qhov hloov tau Vajtswv tes hauj lwm, tias qhov ntawd daws tau qhov teeb meem ntawm tib neeg txoj kev qias vuab tsuab. Qhov no tsis yog txoj kev ruam thiab kev tsis paub dab tsi ntawm cov thawj coj cuav lod? Cov thawj coj cuav tsis muaj qhov tseeb qhov muaj tiag me ntsis hlo li, yog li ua cas lawv thiaj li ntseeg tus kheej ua luaj? Qhov hais ob peb lo lus qhuab qhia puas yuav ua rau tib neeg paub lawv tus kheej? Qhov ntawd puas yuav ua rau lawv muab tau lawv tej moj yam qias vuab tsuab tso tseg? Ua li cas cov thawj coj cuav no tsis paub dab tsi thiab tsis paub tab ua luaj li? Qhov kho ib tug neeg tej kev ua uas yuam kev thiab kev coj uas qias vuab tsuab puas yooj yim npaum li ntawd tiag? Qhov teeb meem ntawm tib neeg tej moj yam qias vuab tsuab puas daws tau yooj yim ua luaj li? Cov thawj coj cuav ruam thiab ntiav dhau lawm! Vajtswv tsis yog siv ib txoj hau kev los daws qhov teeb meem ntawm tib neeg txoj kev qias vuab tsuab xwb. Nws siv ntau txoj hau kev thiab npaj ntau yam xwm txheej txhawm rau nthuav tawm, ntxuav kom dawb huv, thiab ua kom tib neeg zoo tiav log. Hos cov thawj coj cuav mas ua hauj lwm ib yam tas li thiab ntiav heev: Lawv nrhiav tib neeg los tham, ua hauj lwm me ntsis los qhuab ntuas tib neeg txog lawv txoj kev xav, ntuas tib neeg me ntsis, thiab ntseeg hais tias qhov no yog kev ua hauj lwm tiag tiag lawm. Qhov no mas ntiav, tsis yog lod? Thiab qhov teeb meem dab tsi zais tom qab qhov kev ntiav no? Qhov ntawd tsis yog kev tsis paub tab lod? Cov thawj coj cuav tsis paub tab tshaj plaws, thiab lawv kuj saib tib neeg thiab tej xwm txheej yam tsis paub tab tshaj plaws thiab. Tib neeg tej moj yam qias vuab tsuab mas yog tej uas nyuaj daws tshaj plaws—tsov txaij hloov tsis tau nws cov txaij. Cov thawj coj cuav pom tsis tshab txog qhov teeb meem no li. Yog li ntawd, thaum hais txog cov saib xyuas pawg ntseeg uas pheej cuam tshuam, pheej txwv thiab tsim txom tib neeg ntawd, cov thawj coj cuav tsis ua dab tsi tsuas yog nrog lawv tham, thiab ntuas lawv ob peb lo lus xwb, ces tas li ntawd lawm. Lawv tsis hloov lawv tes dej num los sis rho lawv tawm tam sim ntawd. Cov thawj coj cuav txoj kev ua no ua rau muaj kev puas tsuaj loj heev rau pawg ntseeg tes hauj lwm, thiab pheej ua rau pawg ntseeg tes hauj lwm raug ncua, qeeb, puas tsuaj, thiab tab kaum tsis pub kom nce qib li ib txwm, kom zoo, thiab kom muaj txiaj ntsig vim yog kev cuam tshuam ntawm qee tus neeg phem—uas puav leej yog qhov ua tau los uas phem heev ntawm qhov cov thawj coj cuav ua raws li lawv tej kev xav hauv siab, ua txhaum qhov tseeb tej hauv paus ntsiab lus, thiab siv tib neeg tsis tsim nyog. Raws li qhov pom sab nraud mas, cov thawj coj cuav tsis yog txhob txwm ua ntau yam kev phem, los sis ua tej yam raws li lawv siab nyiam, thiab tsim tsa lawv lub nceeg vaj ywj pheej, ib yam li cov tawm tsam khetos ua. Tiam sis cov thawj coj cuav tsis tuaj yeem daws tau ntau yam teeb meem uas tshwm hauv pawg ntseeg tes hauj lwm tam sid, thiab thaum cov saib xyuas ntawm ntau pab pawg muaj teeb meem tshwm tuaj, thiab thaum cov saib xyuas ntawd ris tsis tau lawv tes hauj lwm, cov thawj coj cuav tsis tuaj yeem hloov lawv tes dej num los sis rho lawv tawm tam sim ntawd, uas coj kev puas tsuaj loj heev los rau pawg ntseeg tes hauj lwm. Thiab qhov no puav leej yog tshwm los ntawm cov thawj coj cuav txoj kev tsis saib xyuas lub luag hauj lwm. Cov thawj coj cuav tsis ntxim ntxub heev lod? (Ntxim ntxub.)

IV. Cov Thawj Coj Cuav Coj Li Cas Rau Cov Saib Xyuas Uas Tsis Ua Raws Li Tej Kev Npaj Hauj Lwm Thiab Ua Raws Li Lawv Txoj Hau Kev Xwb

Cov thawj coj cuav tsis tuaj yeem daws tej kev ua phem uas tshwm nyob hauv pawg ntseeg ntawd tam sid xws li cov saib xyuas tsim txom lwm tus, txwv lwm tus, thiab cuam tshuam pawg ntseeg tes hauj lwm. Ib yam nkaus li ntawd, thaum qee tus saib xyuas tsis ua raws li Vajtswv lub tsev tej kev npaj hauj lwm thiab ua raws li lawv txoj hau kev xwb, los cov thawj coj cuav nrhiav tsis tau cov hau kev uas tsim nyog los daws cov teeb meem no tam sim ntawd. Qhov no ua rau pawg ntseeg tes hauj lwm thiab Vajtswv lub tsev tej nyiaj txiag thiab tej khoom raug puas tsuaj. Cov thawj coj cuav mas tsis paub tab thiab ntiav heev, to taub tsis tau qhov tseeb tej hauv paus ntsiab lus, thiab tshwj xeeb tshaj yog pom tsis tshab txog tib neeg tus yam ntxwv xeeb txawm lub ntsiab tseeb. Vim li ntawd, lawv pheej ua hauj lwm yam ntiav ntiav sab nraud, lawv lam ua kom dhau, ua raws li tej kev cai tswj, thiab qw cov lus qw xwb, tiam sis tsis mus rau ntawm qhov chaw ntawd mus tshuaj xyuas tes hauj lwm, mus soj ntsuam thiab mus nug txog txhua tus neeg saib xyuas, los sis nug kom ncav sij hawm txog yam uas cov saib xyuas no tau ua, tej hauv paus ntsiab lus uas coj lawv tej kev ua ntawd yog dab tsi, thiab tej ua tau los tom qab ntawd zoo li cas. Qhov tshwm sim los ces, lawv tsis paub kiag li hais tias cov neeg uas lawv siv ntawd yog neeg zoo li cas thiab lawv tau ua dab tsi lawm. Yog li ntawd, thaum cov saib xyuas no tsis ua raws li Vajtswv lub tsev tej kev npaj hauj lwm yam zais ntshis thiab ua raws li lawv txoj hau kev xwb, tsis yog cov thawj coj cuav tsis paub txog qhov no xwb, lawv haj tseem tiv thaiv cov saib xyuas ntawd thiab. Tab txawm lawv hnov txog qhov ntawd lawm los xij, lawv tsis tshawb xyuas thiab daws tam sim ntawd. Cov thawj coj cuav mas ib kis ces yog lawv tsis muaj peev xwm ua lawv tes hauj lwm, thiab lwm kis ces yog, lawv tsis saib xyuas lawv tej dej num. Cia peb muab ib qho piv txwv. Muaj ib tug thawj coj tau xaiv ib tug neeg uas raug lwm pab pawg muab tshem tawm los ua ib tug kws cog qoob loo. Nws tsis tau tshawb xyuas seb tus neeg no puas muaj kev paub dhau los thiab kev txawj, seb nws puas ua tau tes hauj lwm ntawd zoo, los sis seb nws puas muaj tus cwj pwm mob siab thiab ris lub luag hauj lwm, thiab tom qab nws npaj tus neeg ntawd rau txoj hauj lwm ntawd lawm, nws tso pluav yam tsis saib xyuas li lawm, thiab hais tias, “Koj mus cog zaub. Koj xaiv cov noob tau, thiab kuv yuav pom zoo rau txhua cov nyiaj uas koj siv. Cia li ua tes hauj lwm no raws li qhov koj pom tias tsim nyog!” Tus thawj coj hais li no, ces yog li ntawd tus saib xyuas no thiaj li pib ua tes hauj lwm raws li nws pom tias tsim nyog. Nws thawj txoj hauj lwm yog xaiv cov noob. Thaum nws tshawb hauv os lais, nws pom hais tias, “Zaub mas muaj ntau hom tiag tiag—lub ntiaj teb uas loj dav no mas muaj ntau yam zoo kawg nkaus! Qhov xaiv cov noob mas lom zem kawg li. Kuv yeej tsis tau ua txoj hauj lwm no dua li, thiab kuv tsis paub tias kuv yuav nyiam nws npaum li no. Vim kuv nyiam npaum li no, kuv yuav ua kom kawg nkaus!” Nws qhib qhov chaw uas muaj noob txiv lws suav ua ntej, ces nws xav tsis thoob li. Muaj ntau hom sib txawv thiab ntau hom loj me sib txawv, thiab hais txog cov kob mas muaj cov liab, cov daj, thiab cov ntsuab. Muaj ib hom haj tseem muaj ntau yam kob—nws yeej tsis tau pom dua tej yam zoo li no, thiab qhov no qhib nws lub zeem muag tiag tiag! Tiam sis nws yuav ua cas xaiv tau cov noob uas yog? Nws txiav txim siab cog txhua hom ib hom twg cog ib qho me ntsis, tshwj xeeb tshaj yog hom uas muaj ntau yam kob uas zoo txawv tshwj xeeb ntawd. Tus saib xyuas no xaiv tau ntau tshaj 10 hom txiv lws suav uas muaj hom loj hom me, ntau hom kob, thiab yam ntxwv sib txawv. Tom qab xaiv noob txiv lws suav tag, txog sij hawm los xaiv noob lws. Feem ntau mas, cov lws uas tib neeg noj yog cov lws ntev uas liab doog los sis lws dawb, tiam sis nws xav hais tias, “Cov lws mas tsis tsim nyog muaj ob hom no xwb. Muaj cov ntsuab, cov txaij, cov ntev, cov kheej, thiab cov pob taub. Kuv yuav xaiv txhua hom ib hom twg ib qho me ntsis, kom txhua tus thiaj li qhib lawv lub qhov muag thiab tau noj ntau hom lws uas sib txawv. Ua ib tug saib xyuas, saib seb kuv txawj thiab siab tawv xaiv cov noob ntawd npaum li cas, kuv ua tib zoo xav txog cov kwv tij thiab cov muam, ua kom haum txhua tus lub ncauj npaum li cas.” Tom qab ntawd, nws xaiv noob dos. Muaj tag nrho 14 hom dos nyob ntawm qhov chaw ntawd, thiab nws xaiv tag nrho, thiab thaum nws xaiv tag, nws txaus siab heev. Tus saib xyuas no puas “siab tawv”? Leej twg muaj cuab kav xaiv ntau hom npaum li no? Tom qab ntawd, Kuv pheej soj ntsuam qhov teeb meem no, thiab muaj ib tug haj tseem hais tias, “Tsis yog tsuas muaj 14 hom nyob ntawm qhov chaw ntawd xwb; tseem tshuav ob peb hom uas nws tsis tau xaiv thiab!” Nws txhais tau hais tias 14 hom ntawd tsis ntau, thiab tias tseem tshuav lwm yam uas tus saib xyuas ntawd tsis tau xaiv, yog li ntawd nws tsis tau ua txhaum dab tsi li. Tus neeg uas hais li no tsis yog tsis muaj hlwb lod? Qhov no yog qhov tsis muaj hlwb, tsis to taub tib neeg cov lus, thiab tsis paub tias vim li cas Kuv thiaj li soj ntsuam qhov teeb meem ntawd. Tom qab xaiv noob dos tag, tus saib xyuas kuj tau xaiv qos yaj ywm yam tsawg kawg yim hom thiab. Nws lub hom phiaj ntawm qhov xaiv ntau hom npaum li ntawd yog dab tsi? Txhawm rau qhib txhua tus lub zeem muag thiab cia lawv tau saj ntau yam uas qab sib txawv. Tus saib xyuas ntseeg hais tias qhov xaiv noob yuav tsum ua raws li lub hauv paus ntsiab lus uas ua kom muaj txiaj ntsim rau cov kwv tij thiab cov muam. Koj xav li cas txog nws txoj kev npaj siab? Qhov ua raws li tus cwj pwm uas xav txog txhua tus thiab ua hauj lwm rau txhua tus ntawd puas yog lub hauv paus ntsiab lus uas Vajtswv lub tsev cheem tsum? (Tsis yog.) Yog li ntawd, Vajtswv lub tsev lub hauv paus ntsiab lus rau kev xaiv noob yog dab tsi? Tsis txhob cog tej yam txawv txawv thiab tsis tshua muaj uas peb tsis tshua tau noj. Hais txog cov hom uas ib txwm noj ntawd, yog peb tsis tau cog dua thiab tsis paub tias cov hom noob ntawd puas haum rau thaj av thiab huab cua ntawm qhov chaw ntawd, ces xaiv li ib los sis ob hom, ntau tshaj ces peb los sis plaub hom xwb. Thawj qhov, cov hom noob ntawd yuav tsum haum rau thaj av thiab huab cua ntawm qhov chaw ntawd; qhov ob, cov hom noob ntawd yuav tsum yooj yim cog thiab tsis yooj yim raug kab mob thiab kab noj; qhov peb, cov hom noob ntawd yuav tsum tseg noob tau rau xyoo tom ntej; qhov kawg, cov hom noob ntawd yuav tsum sau tau qoob loo zoo. Yog cov ntawd qab tiam sis sau tsis tau cov qoob loo zoo, ces cov ntawd tsis haum. Raws li qhov kev xaiv noob, tus saib xyuas no puas tau ua raws li tej hauv paus ntsiab lus? Nws puas tau nrhiav? Nws puas tau zwm rau? Nws puas tau xav txog Vajtswv lub tsev? Nws puas tau ua raws li tus cwj pwm uas nws yuav tsum muaj nyob rau hauv kev ua ib teg dej num? (Tsis tau.) Pom meej meej tias, nws tau ua tej yam phem yam tsis muaj kev tswj hlo li, tab meeg tsis ua raws li Vajtswv lub tsev tej kev npaj hauj lwm thiab ua raws li nws tus kheej lub siab nyiam xwb! Nws tau nkim Vajtswv tej khoom fij li no los ua kom txaus nws tus kheej txoj kev xav paub thiab kev ntshaw ua si, thiab saib ib txoj hauj lwm tseem ceeb npaum li no yam li yog ib qho kev ua si, tiam sis nws tus thawj coj cuav cia nws ua raws li nws nyiam yam tsis nug los sis tsis txwv li. Thaum muaj neeg nug nws tias, “Tus saib xyuas uas koj xaiv ntawd puas tau ua hauj lwm tiag? Cov txiaj ntsig zoo li cas? Koj puas tau pab nws tshuaj xyuas thaum xaiv noob?” Nws tsis quav ntsej txog tej yam no li, thiab tsuas hais tias, “Cov noob twb cog lawm; peb twb mus saib ntawm qhov chaw thaum cog lawm.” Nws tsis quav ntsej txog lwm yam teeb meem li. Thaum kawg tus saib xyuas no qhov teeb meem raug tshawb pom li cas? Nws cog ib txhia txiv pos nphuab, thiab raws li cov kev txawj ntse uas muaj feem xyuam txog sab thev naus laus ntsis mas, yuav tsum tsis txhob muab cov txiv pos nphuab npog los sis cia txi txiv rau thawj xyoo, thiab yuav tsum muab txhua lub paj de pov tseg; yog tsis li ntawd, yuav tsis txi txiv nyob rau xyoo ob, thiab txawm tias txi txiv nyob rau thawj xyoo los, cov txiv yuav me me xwb. Txawm tias cov kws paub tau qhia qhov no rau tus saib xyuas lawm los xij, nws tsis mloog li. Nws qhov laj thawj yog raws li cov ntaub ntawv hauv os lais uas hais tias qhov muab daim ntaub yas npog cov txiv pos nphuab ntawd nyob rau thawj xyoo thiab cia cov txiv pos nphuab ntawd txi txiv yeej tsis ua li cas. Qhov tshwm sim los ntawm qhov no yog cov txiv pos nphuab ntawd txi ntau yam txiv me me uas tsis puv zoo uas muaj noob puv npo—qee lub mas qaub, qee lub mas qab zib, thiab qee lub mas tsis hnov qab dab tsi li—muaj txhua hom li. Qhov teeb meem loj npaum li ntawd lawm, tiam sis cov thawj coj cuav nyob ntawd tsis quav ntsej kiag li. Vim li cas? Vim lawv xav hais tias li cas los lawv yeej yuav tsis tau noj cov txiv pos nphuab ntawd, yog li ntawd lawv thiaj li xaiv tsis quav ntsej qhov teeb meem ntawd. Qhov tsis tau noj qee yam txhais tau hais tias lawv tsis tsim nyog quav ntsej txog qhov ntawd lod? Hais txog cov qos yaj ywm thiab dos uas lawv yuav tau noj ntawd—lawv puas quav ntsej txog tej ntawd? Tsis muaj ib tug ntawm cov thawj coj cuav no quav ntsej li; lawv tsuas saib thaum tus saib xyuas ua raws li nws siab nyiam xwb. Muaj ib hnub, Kuv mus saib lawv, thiab muaj ib tug qhia tawm hais tias cov zaub xav lav twb laus lawm, thiab yog lawv tsis de sai sai no, ces yuav tsis muaj leej twg noj taus thiab yuav nkim pov tseg xwb. Txawm li cas los xij, tus saib xyuas hais ruaj kom tseg nyob, thiab hais tias yog lawv de lawm ces lawv yuav tsum tau cog lwm yam zaub, uas nws pom tias meem txom. Txawm paub txog qhov no los, cov thawj coj cuav tsis ua dab tsi li. Thaum kawg, tus Nyob Saud thiaj li txib kom lawv maj nroos de cov zaub xav lav thiab saib xyuas qhov xwm txheej ntawd; yog tsis li ntawd, cov zaub xav lav yuav nyob hauv cov av thiab ua rau cog tsis tau cov zaub caij ntuj sov. Txawm muaj teeb meem loj npaum li no tshwm hauv tes hauj lwm los xij, tsis muaj ib tug ntawm cov thawj coj cuav ua dab tsi txog qhov ntawd li, lawv ntshai tsam ua rau tib neeg chim dhau lawm. Vim tus saib xyuas no raug txhawb los ntawm ib tug thawj coj cuav, thiab tus thawj coj no yeej tsis tshuaj xyuas nws tes hauj lwm tom qab txhawb nws li, cia nws ua ywj siab, thiab muab kev txhawb nqa rau nws thiab tiv thaiv nws, thiab lwm tus thawj coj tsis muaj cuab kav txwv, thiab ua hauj lwm koom tes nrog lawv, yog li ntawd thaum kawg thiaj li muaj teeb meem ntau yam tshwm tuaj. Qhov no yog txoj hauj lwm uas cov thawj coj tau ua. Lawv puas tseem hu tau tias yog thawj coj? Txawm muaj teeb meem loj npaum li no tshwm ntawm lawv xub ntiag los xij, lawv tsis pom tias qhov ntawd yog ib qho teeb meem, tsis tas yuav hais txog qhov daws hlo li. Cov no tsis yog cov thawj coj cuav lod? (Yog lawm.) Nyob hauv ib kis mas, lawv yog cov neeg ua kom lwm tus zoo siab thiab ntshai tsam ua rau lwm tus chim. Nyob hauv lwm kis mas, lawv tsis paub tias qhov teeb meem loj npaum li cas, lawv tsis muaj kev txiav txim uas yog, tsis paub tias qhov ntawd yog ib qho teeb meem, thiab tsis paub tias txoj hauj lwm no nyob hauv ciaj ciam ntawm lawv tej luag hauj lwm. Lawv tsis yog cov niag khoom seem txheej thiab cov neeg nkim mov xwb lod? Qhov no tsis yog ib qho kev tsis ua lawv lub luag hauj lwm lod? (Yog.) Qhov no yog qhov xwm txheej plaub: cov saib xyuas tsis ua raws li Vajtswv lub tsev tej kev npaj hauj lwm thiab ua raws li lawv txoj hau kev xwb. Peb tau qhia ib qho piv txwv, uas nthuav tawm qhov kev qhia tshwm uas pom tau meej ntawm cov thawj coj cuav uas tsis ua lawv tej luag hauj lwm hauv tej yam no thiab qhia tshwm cov thawj coj cuav tus yam ntxwv xeeb txawm lub ntsiab tseeb.

V. Cov Thawj Coj Cuav Coj Li Cas Rau Cov Saib Xyuas Uas Yog Cov Tawm Tsam Khetos Thiab Tsim Tsa Cov Nceeg Vaj Ywj Pheej

Muaj lwm qhov xwm txheej uas yog thaum cov saib xyuas ntxeev siab tawm tsam rau lawv cov nyob saud thiab tsim tsa cov nceeg vaj ywj pheej—cov saib xyuas no yog cov tawm tsam khetos. Cov thawj coj cuav ua tsis tau txoj hauj lwm saib xyuas thaum hais txog tej teeb meem xws li ua cov saib xyuas uas muaj lub peev xwm tsis zoo, muaj kev ua neeg tsis zoo, los sis ua tej yam phem yam tsis muaj kev tswj hlo li. Lawv kuj tsis tshuaj xyuas thiab nug tam sim ntawd txog tes hauj lwm uas hom neeg saib xyuas no tab tom ua thiab lawv tej teeb meem kom thiaj li txiav txim tau tias lawv puas tsim nyog. Ib yam nkaus li ntawd, cov thawj coj cuav haj yam tsis muaj peev xwm pom tshab txog cov tawm tsam khetos tus yam ntxwv xeeb txawm lub ntsiab tseeb, uas yog cov tib neeg siab phem thiab lim hiam. Tsis yog lawv tsis muaj peev xwm pom tshab qhov no xwb, tib lub sij hawm ntawd lawv kuj ntshai cov tib neeg no me ntsis, thiab tsis paub yuav ua li cas thiab tsis muaj zog me ntsis, mus txog rau qhov uas, feem ntau, lawv raug cov tawm tsam khetos chaws qhov ntswg cab mus. Qhov no hnyav npaum li cas lawm? Tej zaum cov tawm tsam khetos yuav sib koom ua pab ua pawg nyob hauv cov thawj coj cuav qhov chaw ua hauj lwm, rub lawv tus kheej lub zog los thiab tsim tsa cov nceeg vaj uas ywj pheej, thiab thaum kawg, lawv txeeb tau hwj chim, pib txiav txim txhua yam, thiab ua rau cov thawj coj cuav dhau los ua cov thawj coj uas muaj npe xwb. Cov thawj coj cuav no tseem tsis paub tej yam uas cov tawm tsam khetos txiav txim siab thiab paub, thiab tsis paub dab tsi txog tej ntawd li. Lawv tsuas paub tej no tom qab muaj qee yam tshwm tuaj thiab muaj neeg qhia tawm rau lawv xwb, tiam sis thaum ntawd ces twb lig dhau lawm. Cov thawj coj cuav haj tseem nug cov tawm tsam khetos tias vim li cas tsis qhia rau lawv paub, thiab lawv teb tias, “Qhia rau koj muaj qab hau dab tsi? Koj txiav txim tsis tau dab tsi li, yog li ntawd tsis tas yuav tham qhov no nrog koj, peb txiav txim siab ntawm peb tus kheej xwb. Txawm peb qhia rau koj los, koj yeej yuav pom zoo xwb. Koj yuav muaj tau tswv yim dab tsi?” Cov thawj coj cuav tsis muaj peev xwm dab tsi nyob hauv tej xwm txheej zoo li no. Yog koj cais tsis tau, daws tsis tau, los sis saib xyuas tsis tau cov tawm tsam khetos no, koj yuav tsum qhia tawm rau tus Nyob Saud, tiam sis koj twb tsis muaj cuab kav ua li ntawd—koj tsis yog ib niag qho khoom seem txheej xwb lod? (Yog.) Thaum ntsib tej teeb meem zoo li no, cov niag khoom seem txheej no tsuas los quaj rau Kuv thiab yws hais tias, “Nws tsis yog kuv qhov txhaum; kuv tsis tau txiav txim siab li ntawd. Qhov lawv txiav txim siab ntawd yog los sis tsis yog ntawd tsis muaj dab tsi cuam tshuam txog kuv, vim lawv tsis qhia rau kuv paub los sis hais rau kuv thaum lawv ua qhov ntawd.” Lawv cov lus no txhais li cas? (Lawv tab tom zam kev ris lub txim.) Ua ib tug thawj coj, koj yuav tsum paub thiab nkag siab tau cov teeb meem no; yog cov tawm tsam khetos tsis qhia tej yam rau koj, vim li cas koj tus kheej tsis mus nug? Ua ib tug thawj coj, koj yuav tsum ua tus npaj, coj, thiab txiav txim siab txog txhua yam; yog lawv tsis qhia koj txog ib yam dab tsi thiab txiav txim siab ntawm lawv tus kheej xwb, es tom qab ntawd mam li xa cov ntawv them nqi rau koj kos npe, lawv tsis yog tab tom txeeb koj lub hwj chim lod? Thaum cov thawj coj cuav ntsib cov tawm tsam khetos cuam tshuam pawg ntseeg tes hauj lwm, lawv ruam tag; lawv tsis paub yuav ua li cas zoo li cov neeg ruam ntsib hma, thiab sawv ntsia yam tsis muaj zog thaum lawv raug hloov los ua cov thawj coj uas muaj npe xwb thiab raug txeeb lawv lub hwj chim. Lawv ua tsis tau ib yam dab tsi hlo li—yeej yog ib pawg niag khoom seem txheej xwb tiag tiag! Lawv daws tsis tau teeb meem, lawv cais tsis tau los sis nthuav tsis tau cov tawm tsam khetos tawm, thiab lawv yeej txwv tsis tau cov tawm tsam khetos kom txhob ua tej yam kev phem li. Tib lub sij hawm ntawd, lawv tsis qhia cov teeb meem no tawm rau tus Nyob Saud. Cov no tsis yog cov niag khoom seem txheej lod? Qhov xaiv koj los ua ib tug thawj coj muaj qab hau dab tsi? Cov tawm tsam khetos ua tej yam phem yam tsis muaj kev tswj hlo li, tab meeg nkim tej khoom fij, thiab lawv tsim lub zog uas lawv coj thiab tsim cov nceeg vaj ywj pheej nyob hauv pawg ntseeg; hos koj tsis saib xyuas, qhia tshwm, txwv, los sis daws lawv hlo li, tiam sis koj los yws rau Kuv. Koj yog hom thawj coj dab tsi? Koj yeej yog ib niag qho khoom seem txheej tiag tiag li! Txawm lawv ua dab tsi los xij, cov pab pawg uas cov tawm tsam khetos coj no lawv ob peb leeg sib tham zais ntshis thiab txiav txim siab yam tsis tau kev tso cai. Lawv twb tsis muab txoj cai rau cov thawj coj paub tias muaj dab tsi tshwm sim, tsis tas yuav hais txog txoj cai txiav txim siab li. Lawv tsis lees paub cov thawj coj hlo li, lawv tuav tag nrho lub hwj chim thiab txiav txim txhua yam. Cov thawj coj uas muaj lub luag hauj lwm los tswj hwm lawv ntawd tab tom ua dab tsi nyob rau hauv nruab nrab ntawm txhua yam no? Lawv yeej ua tsis tau qhov tshuaj xyuas, saib xyuas, tswj hwm, los sis txiav txim siab txog tes hauj lwm no hlo li. Thaum kawg, lawv cia cov tawm tsam khetos txeeb tau hwj chim thiab nyob sab saud los tswj hwm lawv. Qhov teeb meem no tsis yog tshwm los ntawm cov thawj coj cuav tes hauj lwm lod? Lub ntsiab tseeb ntawm qhov teeb meem no yog dab tsi? Nws lub hauv paus los qhov twg los? Nws lub hauv paus los ntawm qhov uas cov thawj coj cuav peev xwm tsis zoo, tsis muaj lub peev xwm ua hauj lwm, thiab cov tawm tsam khetos saib lawv tsis khuab qhov muag hlo li. Cov tawm tsam khetos xav tias, “Koj ua ib tug thawj coj ho ua tau dab tsi? Kuv yeej tseem yuav tsis mloog koj hais, thiab kuv yuav hla dhau koj mus ua tej yam. Yog koj qhia qhov no tawm rau tus Nyob Saud, ces peb yuav tsim txom koj!” Cov thawj coj cuav tsis muaj cuab kav qhia tej teeb meem no tawm. Tsis yog cov thawj coj cuav tsis muaj lub peev xwm ua hauj lwm xwb, lawv kuj tsis muaj lub siab tawv los tuav tej hauv paus ntsiab lus kom khov kho, lawv ntshai tsam ua rau tib neeg chim, thiab tsis muaj kev ua siab ncaj hlo li—qhov no tsis yog ib qho teeb meem loj lod? Yog lawv muaj peev xwm me ntsis thiab to taub qhov tseeb tiag, ces thaum pom tias cov neeg no phem, lawv yuav hais tias, “Kuv ib leeg tsis muaj cuab kav nthuav lawv tawm, yog li ntawd kuv yuav nrog ob peb tug kwv tij thiab muam uas caum thiab to taub qhov tseeb ntau dua sib qhia los daws cov teeb meem no. Yog tias tom qab nrog lawv sib qhia lawm, peb tseem saib xyuas tsis tau cov tawm tsam khetos thiab, kuv yuav qhia qhov teeb meem tawm rau tus Nyob Saud thiab cia lawv daws. Kuv ua tsis tau lwm yam, tiam sis kuv yuav tsum xub tiv thaiv Vajtswv lub tsev tej txiaj ntsim; cov teeb meem uas kuv pom tshab thiab cov teeb meem uas kuv tshawb pom kuv yuav tsum tsis cia nthuav mus ntxiv li.” Qhov no tsis yog ib txoj hau kev daws qhov teeb meem lod? Qhov no tsis suav tias yog ua tiav yus lub luag hauj lwm lawm lod? Yog koj ua tau li no, ces tus Nyob Saud yuav tsis hais tias koj peev xwm tsis zoo thiab tsis muaj lub peev xwm ua hauj lwm lawm. Txawm li cas los xij, koj twb tsis muaj peev xwm qhia cov teeb meem tawm rau tus Nyob Saud, yog li ntawd thiaj li suav tias koj yog ib niag qho khoom seem txheej thiab yog ib tug thawj coj cuav. Tsis yog koj peev xwm tsis zoo thiab tsis muaj lub peev xwm ua hauj lwm xwb, koj twb tsis muaj kev ntseeg thiab lub siab tawv los vam khom Vajtswv los nthuav tawm thiab tawm tsam nrog cov tawm tsam khetos. Koj tsis yog ib niag qho khoom seem txheej lod? Cov uas raug cov tawm tsam khetos txeeb hwj chim ntawd puas txaus khuv leej? Tej zaum mloog zoo li txaus khuv leej; lawv tsis tau ua ib yam dab tsi phem li, thiab nyob hauv lawv tes hauj lwm mas lawv xyuam xim heev, ntshai heev tsam ua yuam kev, tsam raug ntuas, thiab tsam cov kwv tij thiab cov muam saib tsis taus. Tiam sis thaum kawg lawv raug cov tawm tsam khetos txeeb hwj chim tag nrho ntawm lawv xub ntiag, txhua yam lawv hais tsis muaj qab hau, thiab tsis tseem ceeb tias lawv nyob ntawd los sis tsis nyob ntawd hlo li. Saib sab nraud mas zoo li txaus khuv leej, tiam sis qhov tseeb tiag mas lawv ntxim ntxub heev. Qhia Kuv seb, Vajtswv lub tsev puas daws tau cov teeb meem uas tib neeg daws tsis tau? Tib neeg puas tsim nyog qhia cov teeb meem ntawd tawm rau tus Nyob Saud? (Tsim nyog.) Nyob hauv Vajtswv lub tsev, tsis muaj tej teeb meem uas daws tsis tau, thiab Vajtswv cov lus daws tau txhua yam teeb meem. Koj puas muaj kev ntseeg tiag tiag rau Vajtswv? Yog koj tsis muaj kev ntseeg me me no li, koj tsim nyog ua ib tug thawj coj tau li cas? Koj tsis yog ib niag qho khoom seem txheej xwb lod? Qhov no tsis yog qhov ua ib tug thawj coj cuav xwb; koj tsis muaj txoj kev ntseeg uas yog lub hauv paus tshaj plaws rau Vajtswv li. Koj yog ib tug tsis ntseeg thiab koj tsis tsim nyog ua ib tug thawj coj!

Hais txog cov thawj coj thiab cov neeg ua hauj lwm lub luag hauj lwm plaub, peb tau teev tsib qhov xwm txheej los qhia tshwm tias cov thawj coj cuav ua li cas rau ntau yam hauj lwm thiab cov neeg saib xyuas. Raws li tsib qhov xwm txheej no, peb tau soj ntsuam ntau yam kev qhia tshwm uas pom tau meej ntawm cov thawj coj cuav qhov uas peev xwm tsis zoo dhau lawm, tsis muaj lub peev xwm ua hauj lwm, thiab ua tsis tau hauj lwm tiag tiag. Los ntawm kev qhia li no, puas yog nej paub meej ntxiv txog qhov cais cov thawj coj cuav li cas lawm? (Yog.) Tau lawm, hnub no cia peb xaus peb txoj kev sib qhia ntawm no. Sib ntsib dua!

Lub Ib Hlis Hnub Tim 23, Xyoo 2021