Nyob rau txoj kev sib txoos ua ke zaum tas los ntawd, peb tau sib qhia txog cov thawj coj thiab cov neeg ua hauj lwm tej luag hauj lwm tsib. Nyob rau hauv txoj kev sib qhia txog yam tsib ntawd, peb tau soj ntsuam qee cov kev qhia tshwm uas pom tau meej thiab tej kev ua ntawm cov thawj coj cuav, thiab peb tau sib qhia txog yam no tag lawm. Tam sim no peb yuav sib qhia txog cov thawj coj thiab cov neeg ua hauj lwm tej luag hauj lwm rau thiab xya. Cov ntsiab lus tiag tiag ntawm ob yam no yog dab tsi? (Yam rau: Txhawb thiab cob qhia txhua hom neeg uas muaj peev xwm uas tsim nyog kom txhua tus uas caum qhov tseeb ntawd thiaj li muaj lub cib fim los xyaum thiab nkag mus rau hauv qhov tseeb qhov muaj tiag kom sai li sai tau. Yam xya: Muab tib neeg faib thiab siv txhua hom tib neeg uas sib txawv kom tsim nyog raws li lawv txoj kev ua neeg thiab qhov lawv ua tau zoo kom thiaj li muab lawv tso tau rau qhov uas lawv ua tau zoo.) Cia peb soj ntsuam ntau yam kev ua thiab kev qhia tshwm uas pom tau meej ntawm cov thawj coj cuav uas tsom rau ob yam no. Ob yam no nyob rau hauv tib hom, uas ntsig txog pawg ntseeg txoj kev txhawb, kev cob qhia, thiab kev siv txhua hom tib neeg. Cia peb xub sib qhia txog Vajtswv lub tsev tej hauv paus ntsiab lus ntawm kev txhawb thiab kev cob qhia txhua hom neeg muaj peev xwm uas tsim nyog. Ua li ntawd, puas yog feem ntau nej yuav to taub qee cov hauv paus ntsiab lus uas cov thawj coj thiab cov neeg ua hauj lwm yuav tsum ua raws thaum ua tes hauj lwm no lawm? Tej zaum nej yuav xav hais tias, “Ua cov thawj coj thiab cov neeg ua hauj lwm mas, peb niaj hnub ntsib tej xwm txheej no, peb twb paub tes hauj lwm no zoo thiab muaj kev ntsib kev pom txog tes hauj lwm no lawm, yog li ntawd txawm Koj tsis hais dab tsi ntxiv los peb yeej paub meej lawm, thiab Koj tsis tas yuav qhia ntxaws ntxaws txog tes hauj lwm ntawd ntxiv lawm.” Yog li ntawd, puas yog tsis tas yuav qhia txog qhov ntawd lawm? (Peb tim tsum Koj txoj kev qhia txog qhov ntawd. Peb tseem tsis tau to taub tej hauv paus ntsiab lus txog qhov no, thiab muaj qee cov neeg muaj peev xwm uas peb tseem tsis tau paub cais.) Cov thawj coj thiab cov neeg ua hauj lwm feem coob tseem tsis paub meej heev txog tias yuav ua txoj hauj lwm no li cas, thiab lawv tseem tab tom nrhiav kev los ua txoj hauj lwm ntawd, thiab nkag siab tsis tau kiag tej hauv paus ntsiab lus, yog li ntawd peb tseem yuav tsum tau sib qhia txog qhov no kom ntxaws ntxaws.

Yam Rau: Txhawb thiab Cob Qhia Txhua Hom Neeg Uas Muaj Peev Xwm Uas Tsim Nyog Kom Txhua Tus Uas Caum Qhov Tseeb Ntawd Thiaj Li Muaj Lub Cib Fim Los Xyaum thiab Nkag Mus Rau Hauv Qhov Tseeb Qhov Muaj Tiag Kom Sai Li Sai Tau

Lub Ntsiab ntawm Qhov Vajtswv Lub Tsev Txhawb thiab Cob Qhia Txhua Hom Neeg Uas Muaj Peev Xwm

Vim li cas Vajtswv lub tsev thiaj li txhawb thiab cob qhia txhua hom neeg uas muaj peev xwm? Qhov txhawb thiab cob qhia txhua hom neeg uas muaj peev xwm ntawd puas yog txhawm rau txoj kev tshawb fawb, kev kawm, thiab yeeb yam lus? Cov uas Vajtswv xaiv tseg yuav tsum paub tag nrho lawm hais tias thaum Vajtswv lub tsev txhawb thiab cob qhia ntau hom neeg uas muaj peev xwm ntawd, qhov no tsis yog ua kom tsim tau ib hom khoom siv thev naus laus ntsis qib siab thiab tsim ib qho txuj ci tseem ceeb los sis los tshawb fawb txog qhov keeb kwm ntawm noob neej txoj kev vam meej, thiab haj yam tsis yog los npaj qee yam dab tsi rau tib neeg ntiaj teb lub neej yav tom ntej. Yog li ntawd, vim li cas Vajtswv lub tsev thiaj li txhawb thiab cob qhia txhua hom neeg uas muaj peev xwm? Nej puas to taub qhov no? (Txhawm rau nthuav dav lub nceeg vaj txoj moo zoo mus.) Txhawm rau nthuav dav lub nceeg vaj txoj moo zoo mus—qhov no yog ib yam. Tseem muaj dab tsi ntxiv? (Txhawm rau kom txhua tus uas caum qhov tseeb thiaj li muaj lub cib fim tau xyaum.) Yog lawm, lo lus teb no tsim nyog heev thiab raug nkaus. Qhov ntawd yog kom tib neeg ntau ntxiv uas caum qhov tseeb thiaj li muaj lub cib fim tau xyaum, thiab nkag mus rau hauv qhov tseeb qhov muaj tiag sai li sai tau. Ob lo lus teb uas nej nyuam qhuav teb ntawd puav leej yog thiab raug lawm. Qhov Vajtswv lub tsev txhawb thiab cob qhia txhua hom neeg uas muaj peev xwm ntawd, nyob rau ib kis mas ntsig txog qhov nthuav dav lub nceeg vaj txoj moo zoo mus thiab ntsig txog Vajtswv tes hauj lwm, thiab nyob rau lwm kis mas, nws ntsig txog tib neeg tus kheej txoj kev caum thiab kev nkag mus rau hauv. Qhov no yog ob qho ntsiab lus loj. Hais kom meej mas, lub ntsiab ntawm qhov uas Vajtswv lub tsev txhawb thiab cob qhia txhua hom neeg uas muaj peev xwm ntawd yog dab tsi? Cov neeg uas raug txhawb thiab cob qhia no ua tes hauj lwm tiag tiag dab tsi hauv pawg ntseeg? Thaum Vajtswv lub tsev txhawb thiab cob qhia ib tug neeg los ua ib tug coj pab pawg, ib tug saib xyuas, los sis ib tug thawj coj pawg ntseeg los sis neeg ua hauj lwm, puas yog muab lawv tsa ua nom? (Tsis yog.) Vajtswv lub tsev txhawb thiab cob qhia tib neeg kom lawv thiaj li muaj peev xwm ris tau tej dej num los sis tej hauj lwm tiag tiag hauv pawg ntseeg ntau yam hauj lwm, xws li tes hauj lwm tshaj tawm txoj moo zoo, tes hauj lwm ntaub ntawv, tes hauj lwm ua yeeb yaj kiab, tes hauj lwm ywg dej, nrog rau qee yam hauj lwm dav dav, thiab lwm yam. Yog li ntawd, lawv ua tej hauj lwm tiag tiag no li cas? Los ntawm qhov ris ntau yam hauj lwm hauv pawg ntseeg raws li Vajtswv tej kev cheem tsum, qhov tseeb tej hauv paus ntsiab lus ntawm Vajtswv cov lus, thiab Vajtswv lub tsev tej kev npaj hauj lwm, thiab ua li no kom thiaj li ua tau lawv tes dej num raws li Vajtswv tej kev cheem tsum thiab ua raws li qhov tseeb tej hauv paus ntsiab lus. Thaum saib rau qhov tseeb uas cov tib neeg no raug txhawb thiab cob qhia los ris tes hauj lwm, tsis yog qhov muaj lub npe nom los sis meej mom es txawm ua rau lawv ua tau lawv tes hauj lwm zoo. Tiam sis, lawv yuav tsum muaj peev xwm txaus kom thiaj li ris tau ib txoj hauj lwm tiag tiag, uas yog ris yam uas Vajtswv tau tso rau lawv ua, los sis hais ua lwm yam, yog ib teg dej num thiab lub luag hauj lwm uas muaj kev ris lub luag hauj lwm. Qhov no yog qhov tseem ceeb thiab lub ntsiab lus ntxaws ntxaws ntawm qhov txhawb thiab cob qhia ntau hom neeg uas muaj peev xwm raws li tau hais nyob hauv yam rau ntawm cov thawj coj thiab cov neeg ua hauj lwm tej luag hauj lwm. Yog li ntawd, nyob rau hauv qhov txhawb thiab cob qhia tib neeg, Vajtswv lub tsev lub hom phiaj yog los cob qhia txhua hom neeg uas muaj peev xwm kom ua tau ntau yam hauj lwm ntawm pawg ntseeg kom zoo raws li Vajtswv tej kev cheem tsum thiab Vajtswv lub tsev tej kev npaj hauj lwm; qhov ntawd yog kom cov tib neeg no tuaj yeem ris tau ntau yam hauj lwm tiag tiag ntawm pawg ntseeg. Nyob rau tib lub sij hawm ntawd, Vajtswv lub tsev cob qhia thiab qhia cov tib neeg no kom lawv kawm paub ua tib zoo xav txog Vajtswv cov lus, sib qhia txog qhov tseeb, thiab ua tej yam raws li tej hauv paus ntsiab lus, coj lawv xyaum ua raws qhov tseeb thiab ua neej raws li Vajtswv cov lus, thiab nkag mus rau hauv qhov tseeb qhov muaj tiag, thiab ua rau lawv muaj tej kev ntsib kev pom thiab tej lus tim khawv tiag tiag, tom qab ntawd kom lawv thiaj li coj, ywg dej, thiab yug tau lwm tus, thiab ua ntau yam hauj lwm ntawm pawg ntseeg kom zoo, thiab nyob rau tib lub sij hawm ntawd, cov uas Vajtswv xaiv tseg tuaj yeem zwm rau Vajtswv, ua tim khawv rau Vajtswv, thiab ua tes dej num tshaj tawm txoj moo zoo kom tiav. Txoj kev xyaum ua raws ntawm qhov txhawb thiab cob qhia txhua hom neeg uas muaj peev xwm ntawd mas, nyob rau ib kis, yog coj tib neeg xyaum ua raws thiab muaj kev ntsib kev pom Vajtswv cov lus, los paub lawv tus kheej, muab lawv tej moj yam qias vuab tsuab tso tseg, thiab nkag mus rau hauv qhov tseeb qhov muaj tiag; nyob rau lwm kis, yog kom cov thawj coj thiab cov neeg ua hauj lwm siv lawv tus kheej tej kev ntsib kev pom tiag tiag ntawm kev ua siab ncaj thiab kev mloog lus los coj thiab cob qhia tib neeg ua lawv tej dej num kom tiav thiab hais cov lus tim khawv uas muaj zog rau Vajtswv. Ob qho no yog ob txoj kev xyaum ua raws tseem ceeb rau kev cob qhia ntau hom neeg uas muaj peev xwm. Qhov no yog tes hauj lwm tiag tiag uas ntsig txog qhov txhawb thiab cob qhia ntau hom neeg uas muaj peev xwm, thiab kuj yog lub ntsiab tiag tiag ntawm qhov txhawb thiab cob qhia lawv.

Tus Qauv Uas Cheem Tsum rau Ntau Hom Neeg Muaj Peev Xwm Uas Vajtswv Lub Tsev Txhawb thiab Cob Qhia

I. Tus Qauv Uas Cheem Tsum rau Cov Thawj Coj thiab Cov Neeg Ua Hauj Lwm thiab Cov Saib Xyuas Ntau Yam Hauj Lwm

“Txhua hom neeg uas muaj peev xwm uas pawg ntseeg txhawb thiab cob qhia” ntawd yog hais txog cov twg? Suav nrog cov ciaj ciam twg? Ua ntej tshaj plaws yog hom tib neeg uas tuaj yeem ua cov saib xyuas ntau yam hauj lwm. Cov qauv uas yuav tsum muaj rau cov saib xyuas ntau yam hauj lwm yog dab tsi? Muaj peb qho tseem ceeb. Qhov ib, lawv yuav tsum muaj lub peev xwm nkag siab qhov tseeb. Tsuas yog cov uas nkag siab qhov tseeb yam yog uas tsis muaj qhov tsis tseeb thiab txawj xav xwb thiaj li yog cov neeg muaj peev xwm zoo. Cov neeg uas muaj peev xwm zoo mas yam tsawg kawg yuav tsum muaj kev to taub ntawm sab ntsujplig thiab muaj peev xwm noj thiab haus Vajtswv cov lus ntawm lawv tus kheej. Nyob rau hauv txheej txheem kev noj thiab haus Vajtswv cov lus, lawv tus kheej yuav tsum lees txais tau txoj kev txiav txim, kev rau txim, thiab kev ntuas ntawm Vajtswv cov lus, thiab nrhiav qhov tseeb los daws lawv tus kheej tej kev xav phem thiab tej kev xav hauv nruab siab thiab qhov dub tsuas ntawm lawv tus kheej lub siab nyiam, nrog rau lawv tej moj yam qias vuab tsuab—yog lawv ua tau raws li tus qauv no ces txhais tau hais tias lawv paub ntsib pom Vajtswv tes hauj lwm li cas lawm, thiab qhov no yog ib qho kev qhia tshwm uas pom tau meej ntawm lub peev xwm zoo. Qhov ob, lawv yuav tsum muaj lub nra rau pawg ntseeg tes hauj lwm. Cov neeg uas muaj lub nra tiag tiag tsis yog tsuas muaj kev kub siab xwb, lawv muaj kev ntsib kev pom hauv lub neej txoj sia tiag tiag, to taub qee qhov tseeb, thiab lawv tuaj yeem pom tshab qee qhov teeb meem. Lawv pom tias nyob rau hauv pawg ntseeg tes hauj lwm thiab cov neeg uas Vajtswv xaiv tseg ntawd mas muaj ntau yam kev nyuaj thiab teeb meem uas yuav tsum tau daws. Lawv ob lub qhov muag pom qhov no thiab txhawj hauv lawv lub siab—qhov no yog qhov uas txhais hais tias muaj lub nra rau pawg ntseeg tes hauj lwm. Yog ib tug neeg tsuas muaj peev xwm zoo thiab muaj lub peev xwm nkag siab qhov tseeb xwb, tiam sis nws tub nkeeg, ntshaw kev tau zoo ntawm cev nqaij daim tawv, tsis kam ua hauj lwm tiag tiag, thiab tsuas ua hauj lwm me ntsis thaum tus Nyob Saud muab sij hawm rau lawv ua kom tiav, thaum lawv tsis ua tsis tau xwb, ces tus no yog ib tug neeg uas tsis muaj lub nra. Cov uas tsis muaj lub nra yog cov neeg uas tsis caum qhov tseeb, cov neeg uas tsis muaj kev paub txog kev ncaj ncees, thiab yog cov neeg tsis muaj nqis uas noj haus tas hnub, yam tsis xav txog dab tsi tiag tiag. Qhov peb, lawv yuav tsum muaj lub peev xwm ua hauj lwm. “Lub peev xwm ua hauj lwm” txhais tau li cas? Muab hais yooj yim, qhov ntawd txhais tau hais tias tsis yog lawv tsuas tuaj yeem muab hauj lwm thiab muab cov lus qhia rau tib neeg xwb, tiam sis lawv kuj pom thiab daws tau teeb meem—qhov no yog qhov uas txhais hais tias muaj lub peev xwm ua hauj lwm. Tsis tas li ntawd, lawv kuj yuav tsum tau muaj kev txawj teeb tsa thiab. Cov neeg uas muaj kev txawj teeb tsa ntawd mas tshwj xeeb tshaj yog txawj coj tib neeg los ua ke, teeb tsa thiab npaj hauj lwm, thiab daws teeb meem, thiab thaum npaj hauj lwm thiab daws teeb meem ntawd, lawv tuaj yeem ua kom tib neeg ntseeg thiab ua rau lawv mloog lus—qhov no yog qhov uas txhais tau hais tias muaj kev txawj teeb tsa. Cov uas muaj peev xwm ua hauj lwm tiag tiag ntawd yeej ua tau tej hauj lwm ntxaws ntxaws uas Vajtswv lub tsev npaj, thiab ua tau sai thiab txiav txim siab yam tsis ua dog dig, thiab ntxiv ntawd lawv ua tau ntau yam hauj lwm zoo. Cov no yog peb tug qauv rau kev cob qhia cov thawj coj thiab cov neeg ua hauj lwm ntawm Vajtswv lub tsev. Yog ib tug neeg tau raws li peb tug qauv no lawm, ces nws yog ib tug neeg muaj peev xwm uas nyuaj nrhiav tau thiab yuav tsum raug txhawb, cob qhia, thiab qhia tam sim ntawd, thiab tom qab xyaum tau ib ntus lawm, nws yuav ris tau tes hauj lwm lawm. Cov neeg muaj peev xwm, muaj lub nra, thiab muaj lub peev xwm ua hauj lwm tsis tas yuav kom tib neeg txhawj txog, saib xyuas thiab txhawb lawv hauv lawv tes hauj lwm tas li. Lawv muaj qhov kev nquag plias, lawv paub tias thaum twg yuav tsum ua cov hauj lwm twg, cov hauj lwm twg yuav tsum tshuaj xyuas thiab saib xyuas, thiab cov hauj lwm twg yuav tsum tau tshawb xyuas los sis saib kom zoo. Lawv paub zoo txog tej no. Cov neeg zoo li no mas tso siab tau thiab ntseeg siab tau nyob hauv lawv tes hauj lwm dua me ntsis, thiab yuav tsis muaj teeb meem loj tshwm tuaj. Txawm tias muaj teeb meem tshwm tuaj los, tej ntawd yuav yog cov teeb meem me me uas tsis cuam tshuam rau tes hauj lwm tag nrho, thiab Vajtswv tsis tas yuav txhawj txog tes hauj lwm uas cov neeg no ua. Tsuas yog cov uas lawv tus kheej ris taus lawv tes hauj lwm tiag tiag xwb mas thiaj li muaj peev xwm ua hauj lwm tiag tiag. Cov uas lawv tus kheej ris tsis taus thiab pheej tim tsum kom lwm tus txhawj txog lawv, saib xyuas lawv, tswj lawv, thiab haj tseem tuav lawv txhais tes qhia lawv tias yuav ua dab tsi ntawd yog hom neeg uas muaj lub peev xwm tsis zoo kiag li. Qhov txiaj ntsig ntawm tes hauj lwm uas cov neeg muaj peev xwm dog dig ua mas yeej dog dig xwb, thiab cov neeg no tim tsum kom lwm tus saib xyuas thiab tswj lawv ua ntej lawv yuav ua tau ib yam dab tsi. Qhov txawv mas, cov neeg uas muaj peev xwm zoo yeej ris taus hauj lwm tom qab raug cob qhia tau ib ntus lawm, thiab txhua zaus tus Nyob Saud muab cov lus qhia txog ib teg hauj lwm thiab qhia qee cov hauv paus ntsiab lus rau lawv, lawv tuaj yeem tuav tau tej hauv paus ntsiab lus, ua hauj lwm raws li tej hauv paus ntsiab lus ntawd, thiab feem ntau ua raws li qhov uas yog yam tsis muaj qhov yuam kev los sis qhov tsis zoo ntau heev, thiab ua tiav cov txiaj ntsig uas tsim nyog muaj—qhov no yog qhov uas txhais tau hais tias muaj lub peev xwm ua hauj lwm. Piv txwv li, Vajtswv lub tsev cheem tsum kom ntxuav pawg ntseeg, thiab kom cais thiab ntiab cov tawm tsam khetos thiab cov neeg phem tawm ntawm pawg ntseeg mus, ces hom neeg uas muaj lub peev xwm ua hauj lwm ntawd mas feem ntau tsis yuam kev thaum ua tes hauj lwm no. Thaum ib tug tawm tsam khetos tshwm sim, yam tsawg kawg yuav siv sij hawm li ib nrab xyoo txog thaum nws raug nthuav tawm thiab tshem tawm. Nyob rau lub sij hawm no, cov uas muaj lub peev xwm ua hauj lwm ntawd tuaj yeem cais tau nws, es sib qhia txog qhov tseeb los soj ntsuam tus tawm tsam khetos ntawd tej kev qhia tshwm uas pom tau meej, thiab pab cov kwv tij thiab cov muam kom muaj kev paub cais thiab tsis raug dag, thiab vim li no thiaj li ua rau lawv sawv los nthuav tawm thiab ntiab tus tawm tsam khetos ntawd tawm ua ke. Thaum cov tawm tsam khetos los sis cov neeg phem tshwm sim hauv thaj tsam ntawm cov neeg uas muaj lub peev xwm ua hauj lwm ntawd tes hauj lwm, feem ntau cov kwv tij thiab cov muam tsis raug dag los sis tsis raug cuam tshuam. Tsuas yog ob peb tug neeg ruam feeb tsis meej thiab cov uas peev xwm tsis zoo kiag li xwb thiaj li raug dag, thiab qhov no yog ib qho tshwm sim uas ib txwm muaj. Cov neeg uas muaj peev xwm zoo thiab muaj lub peev xwm ua hauj lwm tuaj yeem ua tiav cov txiaj ntsig zoo li no hauv lawv tes hauj lwm, thiab cov neeg zoo li no muaj qhov tseeb qhov muaj tiag thiab mus raws li tus qauv ua cov thawj coj thiab cov neeg ua hauj lwm.

Ntawm ntau hom neeg uas muaj peev xwm uas Kuv nyuam qhuav hais txog ntawd, hom ib yog cov uas ua tau cov saib xyuas hauv ntau yam ntawm tes hauj lwm. Qhov ib uas lawv yuav tsum muaj yog muaj peev xwm thiab muaj lub peev xwm nkag siab qhov tseeb. Qhov no yog qhov uas tsawg kawg nkaus yuav tsum muaj. Qhov ob uas lawv yuav tsum muaj yog muaj lub nra—qhov no tsis muaj tsis tau. Ib txhia tib neeg nkag siab qhov tseeb sai dua cov tib neeg sawv daws, lawv muaj kev to taub ntawm sab ntsujplig, muaj peev xwm zoo, muaj lub peev xwm ua hauj lwm, thiab tom qab xyaum ua mus ib ntus, lawv tus kheej yeej ris taus hauj lwm lawm. Tiam sis cov tib neeg no muaj ib qho teeb meem loj—lawv tsis muaj lub nra. Lawv nyiam noj, haus, ua si, thiab mus ncig ua si txhua qhov. Lawv nyiam tej no heev, tiam sis yog cheem tsum kom lawv ua ib teg hauj lwm tiag tiag uas yuav tsum tau tiv kev txom nyem thiab them tus nqi me ntsis, thiab tswj lawv tus kheej me ntsis, lawv cia li tsis muaj zog, thiab hais tias lawv mob qhov no khaus qhov tod, thiab hais tias tag nrho ib cev tsis xis nyob. Lawv ywj siab thiab tsis muaj kev qhuab qhia, yuav tus kheej siab, tawv ncauj, thiab ua neej tsis muaj kev txwv. Lawv noj, pw, thiab ua si thaum lawv xav ua, thiab tsuas ua hauj lwm me ntsis thaum lawv xav ua xwb. Yog tes hauj lwm nyuaj me ntsis los sis sab me ntsis, lawv yuav tag kev muaj siab thiab tsis xav ua lawv tes dej num ntxiv lawm. Qhov no puas yog muaj lub nra? (Tsis yog.) Cov tib neeg uas tub nkeeg thiab ntshaw kev tau zoo ntawm lub cev nqaij daim tawv tsis yog cov uas tsim nyog txhawb thiab cob qhia. Kuj tseem muaj cov tib neeg uas lawv lub peev xwm yeej txaus rau ib teg hauj lwm, tiam sis tu siab uas lawv tsis muaj lub nra, lawv tsis nyiam ris lub luag hauj lwm, lawv tsis nyiam kev nyuaj, thiab lawv tsis nyiam txhawj. Lawv tsis pom tes hauj lwm uas yuav tsum tau ua, thiab txawm lawv pom los, lawv tsis xav ua. Cov tib neeg zoo li no puas yog cov uas tsim nyog rau kev txhawb thiab kev cob qhia? Yeej tsis yog li; yuav tsum yog tus neeg muaj lub nra thiaj li tuaj yeem txhawb thiab cob qhia tau. Qhov muaj lub nra kuj hais tau tias yog muaj lub siab ris lub luag hauj lwm. Qhov muaj lub siab ris lub luag hauj lwm ntawd mas ntsig txog kev ua neeg ntau dua; qhov muaj lub nra mas ntsig txog ib qho ntawm cov qauv uas Vajtswv lub tsev siv los ntsuas tib neeg. Cov uas muaj lub nra thiab muaj ob yam ntxiv—muaj peev xwm thiab muaj lub peev xwm nkag siab qhov tseeb, thiab muaj lub peev xwm ua hauj lwm—yog hom tib neeg uas tuaj yeem txhawb thiab cob qhia, thiab hom tib neeg no tuaj yeem ua cov saib xyuas hauv ntau yam ntawm tes hauj lwm. Cov no yog cov qauv uas yuav tsum muaj rau kev txhawb thiab cob qhia tib neeg los ua ntau hom neeg saib xyuas, thiab cov tib neeg uas ua tau raws li cov qauv no yog cov uas tsim nyog raug txhawb thiab cob qhia.

II. Tus Qauv Uas Cheem Tsum rau Cov Neeg Muaj Peev Xwm hauv Ntau Yam Hauj Lwm Uas Muaj Tej Peev Xwm los sis Tej Khoom Pub Tshwj Xeeb

Dhau li ntawm hom tib neeg uas tuaj yeem ua cov saib xyuas ntau yam hauj lwm lawm, lwm hom tib neeg uas tuaj yeem txhawb thiab cob qhia yog cov uas muaj tej peev xwm tshwj xeeb los sis tej khoom pub tshwj xeeb los sis paub qee yam kev txawj qib siab zoo. Tus qauv uas Vajtswv lub tsev cheem tsum rau kev cob qhia cov tib neeg zoo li no los ua cov coj pab pawg yog dab tsi? Ua ntej tshaj plaws saib rau lawv txoj kev ua neeg—tsuav lawv nyiam tej yam uas zoo dua me ntsis thiab tsis yog cov tib neeg phem xwb ces txaus lawm. Ib txhia tib neeg yuav nug hais tias, “Vim li cas thiaj li tsis cheem tsum kom lawv yog ib tug neeg uas caum qhov tseeb?” Vim cov coj pab pawg tsis yog cov thawj coj pawg ntseeg los sis cov neeg ua hauj lwm, thiab haj yam tsis yog cov ywg dej, ces qhov cheem tsum kom lawv tau raws li tus qauv ntawm kev caum qhov tseeb ntawd mas yuav yog qhov cheem tsum ntau dhau lawm, thiab feem ntau ntawm lawv yuav ua tsis tau. Qhov no tsis yog qhov cheem tsum rau cov tib neeg uas ua hauj lwm dav dav los sis ua qee yam hauj lwm qib siab tshwj xeeb; yog cheem tsum li ntawd, ces tsuas yog ob peb tug xwb thiaj li yuav ua tau, yog li ntawd yuav tsum tau txo cov qauv kom qis zog. Tsuav tib neeg to taub tes hauj lwm ntawd thiab ris tau tes hauj lwm, thiab tsis ua kev phem los sis tsis ua rau muaj kev cuam tshuam dab tsi xwb, ces txaus lawm. Rau cov tib neeg no, cov uas muaj kev paub hauv qee yam kev txawj ntse thiab qee yam hauj lwm thiab muaj qee yam peev xwm, yog lawv yuav ua tes hauj lwm uas cheem tsum kom paub txog kev txawj ntse thiab muaj feem ntsig txog lawv tej hauj lwm hauv Vajtswv lub tsev, tsuav yog hais txog lawv tus yam ntxwv yog tus neeg tsis txawj dag thiab coj ncaj ncees dua me ntsis, tsis phem, nkag siab tsis nkhaus, tuaj yeem tiv kev txom nyem, thiab txaus siab hlo them tus nqi, ces txaus lawm. Yog li ntawd, qhov ib uas cheem tsum rau kev cob qhia cov tib neeg zoo li no los ua cov coj pab pawg mas lawv yuav tsum nyiam tej yam zoo dua me ntsis, thiab tsis tas li ntawd xwb, lawv yuav tsum tiv taus kev txom nyem thiab them tus nqi. Tseem muaj dab tsi ntxiv? (Lawv yuav tsum muaj tus yam ntxwv ncaj ncees, tsis phem, thiab nkag siab tsis nkhaus.) Lawv tus yam ntxwv yuav tsum ncaj ncees dua me ntsis, lawv yuav tsum tsis txhob yog cov tib neeg phem, thiab lawv yuav tsum nkag siab tsis nkhaus. Ib txhia tib neeg yuav nug hais tias, “Yog li ntawd lawv lub peev xwm nkag siab qhov tseeb puas suav tau tias siab? Tom qab hnov qhov tseeb lawm, lawv puas tuaj yeem ras tau qhov tseeb qhov muaj tiag, thiab nkag mus rau hauv qhov tseeb qhov muaj tiag?” Tsis tas cheem tsum tag nrho tej no; tsuas cheem tsum kom cov tib neeg no nkag siab tsis nkhaus xwb ces txaus lawm. Thaum cov tib neeg uas nkag siab tsis nkhaus ua lawv tes hauj lwm, muaj ib qho txiaj ntsig uas yog lawv yuav tsis ua rau muaj kev tab kaum los sis ua qee yam uas tsis tsim nyog. Piv txwv li, Vajtswv lub tsev tau qhia tej hauv paus ntsiab lus ntau zaus txog cov kob khaub ncaws ntawm cov neeg ua yeeb yam, uas yuav tsum zoo thiab tsim nyog, thiab muaj ntau yam kob tsis txhob nphob. Tiam sis tseem muaj cov uas tsis nkag siab yam uas tau hais rau lawv, tsis to taub yam uas lawv tau hnov, tsis tuaj yeem nkag siab, thiab tsis tuaj yeem nrhiav tau tej hauv paus ntsiab lus ntawm Vajtswv lub tsev tej kev cheem tsum no, thiab thaum kawg lawv xaiv cov khaub ncaws uas yog kob hmoov tshauv tag nrho—qhov no tsis yog ib qho kev nkag siab nkhaus lod? (Yog.) Qhov no yog qhov uas txhais tau hais tias nkag siab nkhaus. Qhov tseem ceeb uas nyiam tej yam zoo dua me ntsis ntawd txhais tau li cas tiag? (Lees txais tau qhov tseeb.) Yog lawm. Qhov ntawd txhais tau hais tias lees txais tau cov lus thiab tej yam uas mus raws li qhov tseeb, thiab tuaj yeem lees txais thiab zwm rau Vajtswv cov lus thiab txhua yam ntawm qhov tseeb. Txawm cov tib neeg zoo li no puas muab tau tej no coj los xyaum ua raws los xij, yam tsawg kawg mas, nyob hauv lawv lub siab lawv tsis tawm tsam los sis ntxub tej no. Cov tib neeg zoo li no yog cov tib neeg zoo, thiab hais raws li cov lus hais mas hais tau tias lawv yog cov tib neeg coj zoo. Cov tib neeg coj zoo muaj cov yam ntxwv dab tsi? Lawv tsis nyiam, qias, thiab tsis nyiam tej kev ua phem uas cov tsis ntseeg nyiam ua kiag li, thiab tsis nyiam tej kev lim hiam uas cov tsis ntseeg ua. Piv txwv li, tej kev tsis ntseeg ntawm lub ntiaj teb mas txhawb nqa tej hwj chim phem, thiab ntau tus poj niam caum yuav ib tug txiv nplua nuj los sis ua luag tus niam yau. Qhov no tsis yog kev lim hiam lod? Cov tib neeg uas nyiam qhov tseeb pom hais tias tsis nyiam tej no kiag li thiab ib txhia hais tias, “Txawm kuv nrhiav tsis tau ib tug los yuav, txawm kuv yuav tuag vim kev txom nyem los xij, kuv yeej yuav tsis ua li ib tug zoo li cov tib neeg ntawd,” muab ua lwm lo lus hais mas, lawv saib tsis taus thiab ntxub cov tib neeg zoo li ntawd. Ib qho yam ntxwv ntawm cov tib neeg coj zoo mas yog qhov hais tias lawv pom hais tias tej kev phem mas yuav tsis taus thiab qias neeg, thiab saib tsis taus cov uas tau raug khi los ntawm tej kev zoo li no. Cov tib neeg no mas ncaj ncees; thaum hais txog qhov ntseeg Vajtswv thiab qhov ua ib tug neeg zoo, qhov taug txoj kev yog, qhov pe hawm Vajtswv thiab qhov zam kev phem, qhov zam tej kev lim hiam, thiab qhov zam tag nrho tej kev ua phem nyob hauv ntiaj teb ntawd mas, nyob hauv lawv lub siab lawv xav tias qhov no yog ib yam zoo. Tsis hais lawv puas ua tau tag nrho tej no los xij, thiab tsis hais lawv txoj kev txiav txim siab ntseeg Vajtswv thiab taug txoj kev yog ntawd loj npaum li cas los xij, thaum kawg, nyob hauv lawv lub siab lawv ntshaw ua neej nyob hauv qhov kaj thiab ntshaw nyob hauv ib qho chaw uas yog kev ncaj ncees muaj hwj chim. Cov tib neeg ncaj ncees zoo li no yog hom neeg uas nyiam tej yam zoo. Cov uas Vajtswv lub tsev yuav txhawb thiab cob qhia ntawd mas yam tsawg kawg yuav tsum muaj tus yam ntxwv ntawm kev ua neeg ncaj ncees thiab kev nyiam tej yam zoo. Qhov no kuj yog thawj tus qauv uas cheem tsum rau kev txhawb hom neeg uas muaj peev xwm uas muaj kev txawj qib siab thiab muaj lub peev xwm. Tus qauv ob cov tib neeg uas zoo li no yuav tsum tiv taus kev txom nyem thiab them tus nqi. Qhov ntawd yog, thaum hais txog tej hauj lwm los sis tes hauj lwm uas lawv nyiam ntawd mas, lawv muaj peev xwm muab lawv tus kheej tej kev ntshaw tso tseg, tso tej kev lom zem ntawm cev nqaij daim tawv los sis lub neej uas tau zoo tseg, thiab haj tseem tso tau lawv tus kheej lub neej yav tom ntej tseg thiab. Tsis tas li ntawd, qhov txom nyem me ntsis los sis qhov sab me ntsis ntawd tsis yog ib qho loj rau lawv; tsuav lawv ua qee yam uas muaj qab hau thiab lawv ntseeg hais tias yog xwb, ces lawv zoo siab hlo tso tej kev lom zem thiab tej txiaj ntsim ntawm lub cev nqaij daim tawv tseg—los sis yam tsawg kawg mas, lawv muaj kev txiav txim siab thiab muaj kev ntshaw zoo li ntawd. Ib txhia tib neeg hais tias, “Qee zaus tus tib neeg ntawd tseem ntshaw kev tau zoo ntawm cev nqaij daim tawv: Qee zaus lawv xav pw ntev, los sis noj zaub mov zoo, thiab qee zaus lawv xav tawm mus ncig los sis ua si—tiam sis feem ntau lawv tiv taus kev txom nyem thiab them tus nqi; tsuas yog qee zaus lawv lub siab coj lawv mus rau tej kev xav zoo li no xwb. Qhov no puas suav tau tias yog ib qho teeb meem?” Qhov ntawd yuav tsis suav. Qhov cheem tsum kom lawv tso tej kev xyiv fab ntawm cev nqaij daim tawv tseg huv si ntawd mas yuav nruj dhau lawm, tsis suav cov xwm txheej tshwj xeeb ntawd. Feem ntau mas, thaum koj muab ib txoj hauj lwm rau lawv ua, tsis hais txoj hauj lwm ntawd loj los sis me li, thiab tsis hais lawv nyiam ua los sis tsis nyiam, thiab tsis hais txoj hauj lwm ntawd nyuaj npaum li cas, los sis yuav tsum tau tiv kev txom nyem npaum li cas los sis them tus nqi npaum li cas los xij, tsuav koj muab rau lawv ua xwb, lawv yeej yuav ua kom tag nrho lawv lub peev xwm uas tsis tas koj saib ntsoov los sis saib xyuas lawv li. Cov tib neeg zoo li no tiv taus kev txom nyem thiab them tus nqi, thiab qhov no yog lwm qhov kev qhia tshwm uas pom tau meej ntawm cov tib neeg coj zoo. Qhov tiv taus kev txom nyem thiab them tus nqi ntawd txhais tau li cas? Qhov ntawd txhais tau hais tias ua tib zoo ua, mob siab thiab ua ntxaws ntxaws, thiab txaus siab tiv txhua yam kev txom nyem thiab them txhua tus nqi kom ua tau tej yam kom zoo. Cov tib neeg zoo li no, thaum ua hauj lwm ntawd, lawv ua raws li lawv cov lus cog thiab tso siab tau rau lawv, tsis zoo li cov tib neeg uas noj loj heev thiab tub nkeeg, nyiam kev tau zoo dua kev ua hauj lwm hnyav, thiab tsuas saib hlob txiaj ntsim ua ntej txhua yam. Cov tib neeg ntawd hais lus tsis muaj tseeb, pheej hais lus cuav los dag thiab ntxias lwm tus, thiab tsis yig hais lus dag thiab cog lus cuav kom ua tau raws li lawv tej hom phiaj—Vajtswv yuav tsis cawm cov tib neeg ntawd. Vajtswv nyiam cov tib neeg coj ncaj. Tsuas yog cov tib neeg coj ncaj xwb thiaj li ua tau raws li lawv cov lus cog thiab ua siab ncaj rau lawv tej dej num, thiab tsuas yog cov uas tuaj yeem tiv kev txom nyem thiab them tus nqi los ua kom tiav Vajtswv cov lus txib xwb thiaj li tau txais Vajtswv txoj kev cawm dim. Qhov tuaj yeem tiv kev txom nyem thiab them tus nqi ntawd yog tus yam ntxwv thiab kev qhia tshwm uas pom tau meej ob uas ib tug neeg yuav tsum muaj kom thiaj li raug txhawb thiab cob qhia los ntawm Vajtswv lub tsev. Tus qauv peb yog nkag siab tsis nkhaus. Qhov ntawd yog, tom qab mloog Vajtswv cov lus lawm, yam tsawg kawg mas lawv paub tau hais tias cov lus ntawd hais txog dab tsi, lawv tuaj yeem to taub yam uas Vajtswv hais, thiab lawv txoj kev nkag siab tsis nkhaus los sis tsis muaj qhov tsis tseeb. Piv txwv li, yog koj hais txog kob xiav, lawv yuav tsis nkag siab yuam kev tias yog kob dub, thiab yog koj hais txog kob txho, lawv yuav tsis nkag siab yuam kev tias yog kob liab doog. Qhov no yog qhov uas tsawg kawg nkaus. Txawm hais tias qee zaus lawv nkag siab nkhaus los xij, thaum lwm tus taw qhia qhov no rau lawv, lawv lees txais tau, thiab yog lawv pom lwm tus muaj kev nkag siab uas yog dua lawv, lawv zoo siab hlo lees txais—hom tib neeg no muaj kev nkag siab uas yog. Qhov plaub, lawv yuav tsum tsis txhob yog cov tib neeg phem. Qhov no puas yog yooj yim to taub? Qhov tsis yog ib tug tib neeg phem ntawd txhais tau hais tias yam tsawg kawg mas yuav tsum ua ib yam, uas yog tom qab ua tsis tiav raws li qhov uas Vajtswv lub tsev cheem tsum kom ua, los sis tau ua txhaum tej hauv paus ntsiab lus thiab ua qee yam tsis yog lawm, cov tib neeg no yuav tsum lees txais thiab zwm tau rau thaum raug ntuas, yam tsis tawm tsam thiab tsis tshaj tawm kev xav tsis zoo los sis tej kev xav phem. Tsis tas li ntawd, txawm lawv nyob hauv pab pawg twg los xij, lawv tuaj yeem sib haum nrog tib neeg feem coob thiab nrog lawv sib raug zoo tau. Txawm thaum muaj ib tug neeg hais tej lus tsis zoo mloog ua rau mob lawv los xij, lawv ua siab ntev tau yam tsis khaws cia rau hauv siab, thiab yog muaj leej twg thab lawv, lawv tsis siv kev phem pauj kev phem, tiam sis lawv tsuas siv kev txawj ntse los nyob kom deb thiab zam kom dhau xwb. Txawm hais tias cov tib neeg zoo li no tseem tsis tau yog cov tib neeg coj ncaj los xij, yam tsawg kawg mas lawv kuj tsis txawj dag thiab tsis ua phem, thiab yog muaj leej twg ua rau lawv chim lawv tsis ua pauj los sis tsis tsim txom tus neeg ntawd, thiab tsis tsuj nias lawv. Tsis tas li ntawd, cov tib neeg zoo li no yuav tsis tsim lawv tus kheej lub nceeg vaj ywj pheej, tsis ua ntxeev rau Vajtswv lub tsev, tsis tshaj tawm tej kev xav phem txog Vajtswv, tsis txiav txim rau Nws, los sis ua dab tsi uas tab kaum los sis ua rau muaj kev cuam tshuam. Plaub yam saum toj no yog lub hauv paus qauv rau kev txhawb thiab cob qhia cov neeg muaj peev xwm uas muaj lub peev xwm thiab cov uas to taub qee yam kev txawj qib siab. Tsuav yog lawv ua tau raws li plaub tug qauv no xwb, lawv yeej tuaj yeem ris tau qee yam dej num thiab ua tau qee yam hauj lwm kom tsim nyog.

Tej zaum ib txhia tib neeg yuav nug hais tias: “Ua cas cov qauv uas cov neeg muaj peev xwm yuav tsum muaj kom thiaj li raug txhawb thiab cob qhia ntawd ho tsis muaj qhov uas to taub qhov tseeb, muaj qhov tseeb qhov muaj tiag, thiab tuaj yeem hwm Vajtswv thiab zam kev phem? Ua cas ho tsis muaj qhov tuaj yeem paub Vajtswv, tuaj yeem zwm rau Vajtswv, ua siab ncaj rau Vajtswv, thiab yog ib tug neeg uas raug tsim tawm los uas mus raws li tus qauv? Puas yog ua cov no poob lawm?” Qhia Kuv seb, yog ib tug neeg to taub qhov tseeb thiab nkag mus rau hauv qhov tseeb qhov muaj tiag lawm, thiab zwm tau rau Vajtswv, thiab ua siab ncaj rau Vajtswv, thiab muaj lub siab hwm Vajtswv, tsis tas li ntawd xwb, kuj paub Vajtswv, yuav tsis tawm tsam Nws, thiab yog ib tug neeg uas raug tsim tawm los uas mus raws li tus qauv lawm, puas tseem tim tsum cob qhia thiab? Yog lawv ua tau tag nrho tej no tiag tiag lawm, qhov txiaj ntsig ntawm kev cob qhia ntawd tsis yog twb ua tiav lawm lod? (Yog.) Yog li ntawd, cov kev cheem tsum rau cov neeg uas muaj peev xwm uas yuav raug txhawb thiab cob qhia ntawd thiaj li tsis muaj cov qauv no. Vim cov uas yuav raug txhawb thiab cob qhia ntawd yog xaiv los ntawm cov tib neeg uas tsis to taub qhov tseeb thiab muaj cov moj yam qias vuab tsuab puv npo, yog li ntawd yeej ua tsis tau uas cov raug txhawb thiab cob qhia no yuav muaj qhov tseeb qhov muaj tiag, los sis yuav zwm rau Vajtswv tag nrho, tsis tas yuav hais txog qhov ua siab ncaj rau Vajtswv kiag li, thiab muaj tseeb uas lawv haj yam nyob deb ntawm qhov paub Vajtswv thiab muaj lub siab hwm Vajtswv. Cov qauv uas txhua hom neeg uas muaj peev xwm yuav tsum muaj ua ntej lwm yam kom thiaj li raug txhawb thiab cob qhia ntawd yog cov uas peb nyuam qhuav hais ntawd—cov no thiaj li yog cov uas muaj tiag thiab meej tshaj plaws. Ib txhia thawj coj cuav hais tias, “Peb tsis muaj cov neeg uas muaj peev xwm nyob ntawm no uas txhawb thiab cob qhia tau li. Tus no tsis to taub qhov tseeb, tus tod ua tej yam tsis muaj lub siab hwm Vajtswv, tus ntawd lees txais tsis tau kev ntuas, lwm tus tsis muaj kev ua siab ncaj …” thiab lwm yam, tshawb tau ib pawg qhov tsis zoo tawm los. Cov thawj coj cuav hais tej lus no yog xav hais txog dab tsi? Qhov ntawd cuag nkaus li cov neeg ntawd txhawb thiab cob qhia tsis tau vim lawv tsis to taub qhov tseeb, thiab tsis ntsib pom Vajtswv tes hauj lwm, thiab tseem tsis muaj qhov tseeb qhov muaj tiag, thiab lwm yam, hos cov thawj coj ntawd tus kheej uas ua tau thawj coj vim lawv twb muaj qee qhov kev ntsib kev pom tiag tiag thiab muaj qhov tseeb qhov muaj tiag lawm. Tsis yog txhais li ntawd lod qhov uas cov thawj coj cuav hais ntawd? Nyob hauv lawv lub qhov muag mas, tsis muaj leej twg zoo npaum li lawv, thiab tsis muaj leej twg tsim nyog ua thawj coj tsuas yog lawv xwb. Qhov no yog tus moj yam khav theeb ntawm cov thawj coj cuav; thaum hais txog qhov Vajtswv lub tsev txhawb thiab cob qhia tib neeg, lawv muaj tej kev xav phem thiab tej kev xav hauv nruab siab puv npo.

III. Cov Qauv Uas Tim Tsum rau Cov Neeg Ua Hauj Lwm Dav Dav

Kuv nyuam qhuav hais txog ob hom neeg uas Vajtswv lub tsev tsom ntsoov cob qhia. Ib hom yog cov neeg uas ua tau thawj coj thiab cov neeg ua hauj lwm, thiab lwm hom yog cov neeg uas muaj peev xwm ua ntau yam hauj lwm qib siab. Tseem muaj lwm hom thiab. Hais tsis tau tias lawv muaj tej ua tau zoo los sis tej kev txawj qib siab; lawv tes hauj lwm tsis muaj feem xyuam txog tej cuab yeej thev naus laus ntsis siab, uas yog hais tau tias, cov neeg no ua qee yam hauj lwm dav dav hauv pawg ntseeg, lawv saib xyuas qee yam hauj lwm uas nyob sab nraud ntawm pawg ntseeg tes hauj lwm lub ntsiab tseeb. Lawv yog hom neeg uas ua cov hauj lwm dav dav. Vajtswv lub tsev tej kev cheem tsum tseem ceeb rau hom neeg no yog dab tsi? Qhov kev cheem tsum tseem ceeb tshaj plaws yog lawv tuaj yeem tiv thaiv Vajtswv lub tsev tej txiaj ntsim, tsis txhob pab cov neeg sab nraud los ntawm qhov ua rau Vajtswv lub tsev tej txiaj ntsim puas tsuaj, thiab tsis txhob muag Vajtswv lub tsev tej txiaj ntsim txhawm rau ua kom Ntxwgnyoog zoo siab. Npaum li ntawd xwb. Tsis hais lawv yog ib tug neeg txawj hais lus, yog cov neeg tseem ceeb hauv cov zej zog, los sis yog cov neeg muaj peev xwm tshwj xeeb los xij, lawv yuav tsum tiv thaiv Vajtswv lub tsev tej txiaj ntsim thaum saib xyuas tej hauj lwm sab nraud rau Vajtswv lub tsev. Vajtswv lub tsev tej txiaj ntsim suav nrog dab tsi? Nyiaj txiag, khoom siv, Vajtswv lub tsev thiab pawg ntseeg lub koob npe, thiab cov kwv tij thiab cov muam txoj kev nyab xeeb—txhua yam ntawm tej no mas tseem ceeb heev. Leej twg muaj peev xwm tiv thaiv Vajtswv lub tsev tej txiaj ntsim ces yog tus uas muaj kev ua neeg, thiab ncaj ncees txaus, thiab yog ib tug neeg uas txaus siab hlo xyaum ua raws qhov tseeb. Ib txhia tib neeg tsis muaj kev paub cais, es hais tias, “Muaj ib tug tib neeg uas muaj kev ua neeg phem, tiam sis nws tiv thaiv Vajtswv lub tsev tes hauj lwm.” Puas muaj tau li ntawd? (Tsis muaj.) Cov tib neeg phem yuav tiv thaiv Vajtswv lub tsev tes hauj lwm tau li cas? Lawv tsuas tiv thaiv lawv tus kheej tej txiaj ntsim xwb. Yog li ntawd, yog ib tug neeg tuaj yeem tiv thaiv Vajtswv lub tsev tej txiaj ntsim tiag tiag, lawv yeej muaj kev coj ncaj thiab kev ua neeg zoo; qhov no yeej tsis yuam kev li. Yog ib tug neeg pab cov neeg sab nraud los ntawm qhov ua rau Vajtswv lub tsev tej txiaj ntsim puas tsuaj thaum ua tej yam rau Vajtswv lub tsev, thiab muag Vajtswv lub tsev tej txiaj ntsim, thiab tsis yog tsuas ua rau Vajtswv lub tsev tej nyiaj txiag thiab khoom puas tsuaj loj heev xwb, tiam sis tseem ua rau Vajtswv lub tsev thiab pawg ntseeg lub koob npe puas tsuaj loj heev thiab, nws puas yog neeg zoo? Cov neeg zoo li no yeej tsis yog tib neeg zoo li. Lawv tsis quav ntsej tias Vajtswv lub tsev tej khoom thiab nyiaj txiag puas tsuaj ntau npaum li cas; qhov tseem ceeb tshaj plaws rau lawv yog ua kom lawv tus kheej tau txiaj ntsim thiab ua kom cov tsis ntseeg zoo siab rau lawv; lawv tsis yog muab khoom plig rau cov tsis ntseeg xwb, tiam sis haj tseem pheej zam rau lawv tas li thaum sib tham—lawv yeej tsis xav txog qhov siv zog txhawm rau Vajtswv lub tsev tej txiaj ntsim li. Tiam sis, lawv dag Vajtswv lub tsev, hais tias lawv ua tes hauj lwm tiav li cas, thiab tiv thaiv Vajtswv lub tsev tej txiaj ntsim li cas—thaum qhov tseeb tiag, pawg ntseeg tes hauj lwm twb raug puas tsuaj, thiab cov tsis ntseeg twb tau txiaj ntsim ntawm Vajtswv lub tsev ntau heev lawm. Yog hais tias, nyob rau hauv txhua yam, ib tug neeg tuaj yeem tiv thaiv Vajtswv lub tsev tej txiaj ntsim thaum saib xyuas tej yam sab nraud, tus neeg no puas yog ib tug neeg zoo? (Yog.) Yog li ntawd yog hom neeg no tsis muaj peev xwm ua lwm yam hauj lwm hauv Vajtswv lub tsev, thiab tsuas haum rau hom hauj lwm dav dav no xwb, ces Vajtswv lub tsev puas tsim nyog txhawb lawv? (Tsim nyog.) Dhau ntawm qhov muaj lub peev xwm ua hauj lwm, thiab muaj peev xwm ua lawv tes hauj lwm raws li tej hauv paus ntsiab lus uas Vajtswv lub tsev cheem tsum lawm, lawv tseem tuaj yeem tiv thaiv Vajtswv lub tsev tej txiaj ntsim, yog li ntawd lawv thiaj li mus raws li tus qauv, thiab cov neeg zoo li no tsim nyog txhawb. Hais txog lwm kis, cov uas pheej ua rau Vajtswv lub tsev tej txiaj ntsig puas tsuaj, cov uas pheej ua rau cov kwv tij thiab cov muam txoj kev nyab xeeb muaj kev phom sij, thiab cov uas pheej ua rau muaj qhov tsis zoo thiab muaj teeb meem rau Vajtswv lub tsev thiab pawg ntseeg lub koob npe—cov neeg zoo li no tsis yog cov uas yuav raug txhawb los sis cob qhia; yog lawv raug txhawb thiab siv lawm, ces yuav tsum muab lawv rho tawm sai li sai tau. Kuj muaj ib txhia tib neeg uas pheej tsim teeb meem tas li thaum ua lawv tej hauj lwm, xws li ua tsheb sib nraus thaum tsav tsheb, ua rau tej hauj lwm uas lawv saib xyuas ntawd ntxhov quav niab, los sis ua rau muaj kev tsis sib haum uas ua rau muaj kev yws tas li, thiab yog muaj ib yam dab tsi tsis zoo ces lawv tsis paub kho tej ntawd li. Cov neeg zoo li no yog cov neeg feeb tsis meej, thiab kuj yog cov neeg uas coj hmoov phem los, thiab cov neeg uas nkim ub nkim no. Yog hom neeg no ua tus coj pab pawg, tus saib xyuas, tus thawj coj los sis tus neeg ua hauj lwm, tsis yog yuav tsum rho lawv tawm kom sai sai xwb, tiam sis tseem yuav tsum ntsaig lawv tawm ntawm pawg ntseeg mus thiab. Qhov no yog vim hais tias hom neeg no yog lub hauv paus ntawm kev puas tsuaj thiab yog tus coj hmoov phem los. Tsuav yog muaj ib los sis ob tug neeg zoo li no nyob hauv pawg ntseeg xwb, pawg ntseeg yeej yuav tsis muaj kev thaj yeeb li. Cov neeg zoo li no cuag li muaj ntsujplig phem nyob hauv lawv, los sis muaj kab mob sib kis. Leej twg sib cuag nrog lawv ces yuav raug kev phem, yog li ntawd hom neeg no yuav tsum raug muab tshem tawm kiag yam tsis tos sij hawm li. Txawm cov neeg no lub ntsej muag los yeej tsis zoo, muaj qhov txawj dag los sis zoo li dab los sis dab tuag heev, thiab leej twg los txuas lus nrog lawv los yeej yuav xav tias yuav muaj yam tsis zoo tab tom yuav tshwm sim. Cov neeg zoo li no yuav tsum raug rho tawm thiab ntsaig tawm mus, thiab tsuas yog thaum ntawd xwb tej yam hauv pawg ntseeg thiaj li yuav mus tau zoo. Qhov txhawb thiab cob qhia ntau hom neeg hauv pawg ntseeg yuav tsum ua raws li tej hauv paus ntsiab lus thiab siv kev paub cais, kom thiaj li ua tau raws li tej hauv paus ntsiab lus. Nyob rau hauv ntau hom neeg uas raug txhawb thiab cob qhia ntawd, muaj cov ua cov thawj coj thiab cov neeg ua hauj lwm ntawm pawg ntseeg, cov saib xyuas ntau yam kev qib siab hauv pawg ntseeg, thiab cov ua hauj lwm dav dav rau pawg ntseeg. Ntau yam qauv uas cov neeg muaj peev xwm no yuav tsum muaj ntawd twb tau qhia meej lawm. Thaum nej paub meej txog tej hauv paus ntsiab lus ntawm kev xaiv cov thawj coj thiab cov neeg ua hauj lwm thiab kev txhawb thiab cob qhia tib neeg li cas lawm, ces pawg ntseeg tes hauj lwm tag nrho yuav nkag mus rau hauv txoj kev uas yog lawm.

Tej zaum ib txhia tib neeg yuav nug hais tias, “Vim li cas cov neeg uas Vajtswv lub tsev txhawb thiab cob qhia no thiaj li hu ua cov neeg uas muaj peev xwm?” Cov neeg muaj peev xwm uas peb hais txog no yog hais txog cov uas yuav raug txhawb thiab cob qhia. Muaj ntau yam kev cheem tsum rau cov neeg uas ua ntau yam hauj lwm, thiab vim lawv tab tom nyob rau hauv txoj kev raug txhawb thiab cob qhia, yog li ntawd qhov uas cov neeg uas muaj peev xwm no ua tau raws li cov qauv uas peb nyuam qhuav hais ntawd xwb ces twb zoo heev lawm. Yuav kom cov neeg no twb muaj qhov tseeb qhov muaj tiag, mloog lus thiab ua siab ncaj, thiab hwm Vajtswv lawm, qhov ntawd tsis mus raws li qhov muaj tiag. Yog li ntawd, cov neeg muaj peev xwm uas peb hais txog no tsuas yog cov uas muaj qee tus yam ntxwv thiab kev coj ncaj uas cov neeg muaj kev ua neeg li ib txwm tsim nyog muaj, thiab muaj peev xwm to taub qhov tseeb—li no ces suav tau tias lawv mus raws li tus qauv lawm. Qhov ntawd tsis tau txhais hais tias lawv twb to taub qhov tseeb thiab nkag mus rau hauv qhov tseeb qhov muaj tiag lawm, thiab tsis tau txhais hais tias lawv twb ua tau qhov zwm rau Vajtswv tag nrho tom qab lees txais Nws txoj kev txiav txim thiab kev rau txim, thiab tej yam zoo li no lawm. Muaj tseeb, lo lus “cov neeg muaj peev xwm” tsis yog hais txog cov uas tau kawm ntawv qib siab los sis kawm Ph.D., los sis cov neeg uas muaj tsev neeg muaj meej mom los sis muaj meej mom siab hauv zej zog, los sis cov neeg uas muaj peev xwm tshwj xeeb los sis muaj khoom pub tshwj xeeb—qhov ntawd tsis yog hais txog cov neeg no. Vim lawv yuav raug txhawb thiab cob qhia, ib txhia tib neeg uas yuav ua tes hauj lwm qib siab tej zaum yav tas los tsis tau ua los sis kawm txog tes hauj lwm qib siab ntawd li, tiam sis tsuav lawv ua tau raws li ntau yam qauv rau kev txhawb thiab cob qhia ntawd xwb, thiab txaus siab hlo kawm thiab kawm ib yam hauj lwm qib siab tau zoo, ces Vajtswv lub tsev tuaj yeem txhawb thiab cob qhia lawv. Kuv hais li no yog txhais li cas? Kuv tsis tau txhais hais tias ib tug neeg tsuas raug txhawb thiab cob qhia tau yog tias lawv cia li txawj ua ib txoj hauj lwm twg xwb. Tiam sis, qhov ntawd yog hais tias, yog lawv muaj lub siab xav kawm thiab muaj tej yam uas tsim nyog, los sis txawm tias lawv tsuas muaj qee yam hauv paus hauv txoj hauj lwm no xwb, los lawv yeej tuaj yeem raug txhawb thiab cob qhia tau—qhov no yog lub hauv paus ntsiab lus. Peb txoj kev sib qhia txog cov qauv uas yuav tsum ua kom tau los ntawm ntau hom neeg muaj peev xwm uas Vajtswv lub tsev xav txhawb thiab cob qhia ntawd los xaus li no xwb.

Lub Hom Phiaj ntawm Vajtswv Lub Tsev nyob hauv Txoj Kev Txhawb thiab Cob Qhia Txhua Hom Neeg uas Muaj Peev Xwm

Ntxiv no peb yuav sib qhia txog tias vim li cas Vajtswv lub tsev thiaj li txhawb thiab cob qhia txhua hom neeg uas muaj peev xwm. Ib txhia tib neeg tsis tshua to taub qhov no, es xav hais tias, “Vajtswv lub tsev cia li txhawb thiab siv ntau hom neeg uas muaj peev xwm ntawd xwb tsis yog tau lawm lod? Vim li cas thiaj li yuav tsum tau cob qhia thiab qhia lawv ib ntus thiab?” Nej puas to taub qhov no? Cia peb xub hais txog hom neeg uas ua thawj coj thiab cov neeg ua hauj lwm. Vim li cas Vajtswv lub tsev thiaj li txhawb thiab cob qhia cov uas muaj peev xwm nkag siab, cov uas muaj lub nra rau pawg ntseeg, thiab cov uas muaj lub peev xwm ua hauj lwm? Qhov ntawd yog vim hais tias txawm lawv tsim nyog raws li lawv lub peev xwm thiab ua tau raws li cov qauv los xij, lawv tseem tsis tau muaj qhov kev ntsib kev pom tiag tiag thiab tsis to taub qhov tseeb, lawv haj yam tsis paub xyaum ua raws li qhov tseeb thiab ua txhua yam raws li tej hauv paus ntsiab lus. Lawv yuav tsum raug cob qhia li ib ntus thiab tau txais kev coj qhia, thiab tsuas yog thaum lawv paub meej txog tej hauv paus ntsiab lus ntawm kev ua lawv tes dej num thiab muaj kev ntsib kev pom tiag tiag lawm xwb mas lawv thiaj li yuav siv tau tiag tiag. Yog cia lawv nyob hauv pawg ntseeg zoo li cov kwv tij thiab cov muam, noj thiab haus Vajtswv cov lus, mloog tej lus qhuab qhia, ua lub neej hauv pawg ntseeg, thiab xyaum ua tes dej num, thiab thaum lawv lub neej txoj sia loj hlob lawm mam li txhawb thiab cob qhia xwb, ces lawv txoj kev nce qib yuav qeeb dhau lawm. Yog li ntawd, yuav siv sij hawm pes tsawg xyoo lawv thiaj li yuav haum rau Vajtswv siv? Qhov no yuav tsis cuam tshuam rau pawg ntseeg tes hauj lwm lod? Yog li ntawd, tsuav ib tug neeg muaj lub peev xwm nkag siab qhov tseeb, muaj lub peev xwm ua hauj lwm, thiab muaj lub nra, ces lawv yuav tsum raug txhawb thiab cob qhia thiab kom lawv xyaum ua tes dej num ntawm ib tug thawj coj los sis ib tug neeg ua hauj lwm, thiab muab ib lub nra rau lawv ris. Nyob rau ib kis mas, kom lawv siv tau tej yam uas lawv ua tau zoo ntawd kom zoo tshaj plaws. Nyob rau lwm kis, thaum lawv ntsib tej xwm txheej tshwj xeeb, yuav tsum tau qhia qhov tseeb nrog lawv txhawm rau daws lawv tej kev nyuaj. Qee zaus lawv kuj yuav tsum raug ntuas, thiab yog tim tsum, lawv kuj yuav tsum raug qhuab ntuas thiab yuav tsum tau ntsib kev sim siab thiab kev kho kom dawb huv ntau yam, thiab tiv kev txom nyem ntau heev. Tsuas yog los ntawm qhov kev xyaum tiag tiag li no xwb mas lawv thiaj li yuav muaj kev nce qib tiag tiag, thiab to taub qhov tseeb thiab paub meej txog tej hauv paus ntsiab lus ntawd ib theem zuj zus, thiab tom qab ntawd thiaj li ris tau tes hauj lwm ntawm cov thawj coj thiab cov neeg ua hauj lwm kom sai li sai tau. Kev cob qhia thiab qhia cov thawj coj thiab cov neeg ua hauj lwm li no yuav tau txais txiaj ntsig zoo dua thiab yuav sai dua, uas muaj txiaj ntsim rau Vajtswv lub tsev tes hauj lwm thiab muaj txiaj ntsim ntau dua rau cov neeg Vajtswv xaiv tseg txoj kev nkag mus rau hauv lub neej txoj sia, vim cov thawj coj thiab cov neeg ua hauj lwm uas muaj kev ntsib kev pom tiag tiag tuaj yeem ywg dej thiab yug ncaj qha rau cov neeg Vajtswv xaiv tseg. Thaum Vajtswv lub tsev txhawb thiab cob qhia ib tug neeg los ua thawj coj, qhov ntawd yog muab lub nra ntau dua rau nws es cob qhia nws, ua kom nws vam khom Vajtswv, thiab siv zog mus rau qhov tseeb; tsuas yog thaum ntawd xwb mas nws lub siab ntseeg thiaj li yuav loj hlob tau sai. Qhov yim muab lub nra ntau rau nws ntawd, yim ua rau nws raug kev nias qees ntau npaum li ntawd, thiab yim yuam kom nws nrhiav qhov tseeb thiab vam khom Vajtswv. Thaum kawg, nws tuaj yeem ua nws tes hauj lwm kom zoo thiab ua tau raws li Vajtswv lub siab nyiam, thiab yog li ntawd yuav taug tau txoj kev uas yog ntawm qhov tau txais kev cawm dim thiab raug ua kom zoo tiav log—qhov no yog qhov txiaj ntsig uas ua tau thaum Vajtswv lub tsev txhawb thiab cob qhia tib neeg. Yog tsis ua cov hauj lwm meej meej no, nws yuav tsis paub tias nws tu ncua dab tsi, tsis paub tias yuav ua tej yam raws li tej hauv paus ntsiab lus li cas, thiab tsis paub tias kev muaj qhov tseeb qhov muaj tiag ntawd txhais tau li cas. Yog li ntawd qhov ua hauj lwm meej meej ntawd pab tau nws pom tej qhov uas nws tu ncua thiab pom hais tias, dhau ntawm tej khoom pub lawm, nws tsis muaj qhov tseeb qhov muaj tiag li; qhov ntawd pab nws hnov tias nws txom nyem thiab txaus khuv leej npaum li cas, ua rau nws paub tias yog nws tsis vam khom Vajtswv thiab nrhiav qhov tseeb, ces nws yuav ua tsis tau ib teg hauj lwm twg li; qhov ntawd ua rau nws paub nws tus kheej tiag tiag thiab pom meej tias yog nws tsis caum qhov tseeb thiab hloov tus moj yam, ces yuav tsis muaj hnub uas nws haum rau Vajtswv siv li. Tej no puav leej yog tej txiaj ntsig uas yuav tsum ua kom tiav thaum cob qhia thiab qhia cov thawj coj thiab cov neeg ua hauj lwm. Tsuas yog to taub txog tej yam no xwb mas tib neeg thiaj li yuav caum qhov tseeb yam ruaj khov, coj lawv tus kheej yam txo hwj chim, thaum ua lawv tes hauj lwm thiaj li paub tseeb tias yuav tsis khav lawv tus kheej ntxiv, thaum ua lawv tes dej num es tuav rawv qhuas Vajtswv thiab ua tim khawv rau Vajtswv, thiab nkag mus rau hauv qhov tseeb qhov muaj tiag ib theem zuj zus. Thaum txhawb thiab cob qhia ib tug neeg los ua thawj coj, yog kom nws kawm paub cais ntau yam neeg tej yam ntxwv, xyaum nrhiav qhov tseeb los daws ntau yam neeg tej kev nyuaj, thiab txhawb thiab yug ntau hom neeg, thiab coj tib neeg nkag mus rau hauv qhov tseeb qhov muaj tiag. Nyob rau tib lub sij hawm ntawd, nws kuj yuav tsum tau xyaum daws ntau yam teeb meem thiab kev nyuaj uas ntsib thaum ua hauj lwm, thiab kawm paub cais thiab saib xyuas ntau hom cov tawm tsam khetos, cov neeg phem, thiab cov tsis ntseeg, thiab ua tes hauj lwm ntxuav pawg ntseeg kom dawb huv. Ua li no, thaum muab piv rau lwm tus, nws tau ntsib tau pom tej tib neeg, tej xwm txheej, thiab tej yam khoom ntau dua, thiab cov xwm txheej ib puag ncig uas Vajtswv npaj los yuav ntau dua, ces qhov noj thiab haus Vajtswv cov lus yuav ntau zuj zus, thiab yuav nkag mus rau hauv qhov tseeb qhov muaj tiag ntau zuj zus. Qhov no puas yog ib lub cib fim rau nws tus kheej xyaum? Qhov muaj cib fim rau kev xyaum yim ntau, tib neeg tej kev ntsib kev pom yim ntau, lawv tej kev paub kev pom yim dav, thiab lawv yuav loj hlob sai dua. Txawm li cas los xij, yog tib neeg tsis ua tes hauj lwm coj, yam uas lawv ntsib thiab paub tsuas yog lawv tus kheej lub neej thiab lawv tus kheej tej kev ntsib kev pom xwb, thiab yam uas lawv paub tsuas yog lawv tus kheej tej moj yam qias vuab tsuab thiab ntau tus yam ntxwv ntawm tus kheej xwb—txhua yam tsuas muaj feem xyuam rau lawv tus kheej xwb. Thaum lawv los ua cov thawj coj lawm, lawv ntsib tib neeg ntau dua, tej xwm txheej ntau dua, thiab tej xwm ib puag ncig ntau dua, uas txhawb kom lawv los rau ntawm Vajtswv xub ntiag tas li los nrhiav qhov tseeb tej hauv paus ntsiab lus. Rau lawv mas, cov tib neeg, tej xwm txheej, thiab tej yam khoom no yuav dhau los ua lub nra rau lawv yam tsis paub, thiab muaj tseeb tias tej ntawd tsim tej yam uas zoo heev rau lawv txoj kev nkag mus rau hauv qhov tseeb qhov muaj tiag, uas yog ib qho zoo. Yog li ntawd, ib tug neeg uas muaj peev xwm, muaj lub nra, thiab muaj lub peev xwm ua hauj lwm yuav nkag mus tau qeeb yog ua ib tug ntseeg dog dig xwb, thiab yog ua ib tug thawj coj los sis neeg ua hauj lwm mas yuav nkag mus tau sai dua. Rau ntawm tib neeg, qhov nkag mus rau hauv qhov tseeb qhov muaj tiag ntawd sai zoo los sis qeeb zoo? (Sai zoo.) Yog li ntawd, thaum hais txog cov neeg uas muaj peev xwm, muaj lub nra, thiab muaj lub peev xwm ua hauj lwm, ces Vajtswv lub tsev thiaj li txhawb cov tib neeg zoo li no ua qhov tshwj xeeb, tshwj qhov lawv tsis yog cov neeg uas caum qhov tseeb thiab lawv tsis siv zog mus rau qhov tseeb, yog zoo li ntawd, Vajtswv lub tsev yuav tsis yuam lawv. Tsuav ib tug neeg muaj lub hauv paus ntawm kev ntseeg Vajtswv, muaj raws li cov qauv rau kev ua ib tug thawj coj los sis neeg ua hauj lwm, thiab txaus siab hlo caum qhov tseeb thiab raug Vajtswv siv xwb, ces Vajtswv lub tsev yeej yuav raug txhawb thiab cob qhia, muab cib fim rau nws xyaum ua ib tug thawj coj los sis ib tug neeg ua hauj lwm, thiab cia nws kawm paub ua pawg ntseeg tes hauj lwm, thiab kawm paub cais tib neeg, thiab kawm paub daws txhua yam teeb meem hauv pawg ntseeg, thiab kawm paub ua ntau yam hauj lwm raws li tej kev npaj hauj lwm. Nyob rau thaum raug cob qhia ntawd, yog tib neeg tuaj yeem lees txais qhov tseeb thiab lees txais kev ntuas, zwm tau rau Vajtswv txoj kev tswj hwm thiab kev npaj, tuaj yeem nrhiav qhov tseeb los daws ntau yam teeb meem, thiab kawm paub coj rau txhua hom neeg thiab paub cais thiab saib xyuas txhua hom neeg raws li Vajtswv cov lus, ces lawv tuaj yeem paub meej txog qhov tseeb tej hauv paus ntsiab lus uas muaj feem xyuam txog, thiab to taub qhov tseeb thiab nkag mus rau hauv qhov muaj tiag—tej no yog tej yam uas cov ntseeg dog dig tsis tau ntsib tsis tau pom thiab tsis tau txais. Yog li ntawd los ntawm qhov kev xam pom no, qhov Vajtswv lub tsev txhawb thiab cob qhia ib tug neeg ntawd yog qhov zoo los sis qhov phem? Qhov ntawd puas muaj txiaj ntsig rau tib neeg, los sis yog ib qho kev txom nyem uas yuam rau tib neeg? Qhov ntawd muaj txiaj ntsig rau tib neeg. Muaj tseeb tias, thaum qee tus neeg nyuam qhuav raug txhawb, lawv tsis paub tias yuav tsum ua hauj lwm dab tsi los sis yuav ua li cas, thiab tsis paub meej me ntsis. Qhov no yog qhov ib txwm muaj xwb; leej twg yug los es txawj ua txhua yam? Yog koj ua tau txhua yam, ces koj yeej yuav yog tus neeg khav theeb thiab khav txiv tshaj plaws, thiab yuav tsis zwm rau leej twg li—yog zoo li ntawd, koj puas tseem yuav lees txais tau qhov tseeb? Yog koj ua tau txhua yam lawm, koj puas tseem yuav vam khom Vajtswv thiab saib ntsoov Nws? Koj puas tseem yuav nrhiav qhov tseeb los daws cov teeb meem ntawm koj tus kheej txoj kev qias vuab tsuab? Koj yeej yuav tsis ua li. Qhov txawv, koj yuav khav theeb thiab khav txiv thiab taug cov tawm tsam khetos txoj kev, koj yuav txeeb hwj chim thiab meej mom es tsis zwm rau leej twg li, thiab koj yuav dag thiab ntxias tib neeg, tab kaum thiab cuam tshuam pawg ntseeg tes hauj lwm—yog zoo li ntawd, Vajtswv lub tsev puas tseem yuav siv koj? Yog koj paub tias muaj ntau yam uas koj tu ncua, ces koj yuav tsum kawm paub mloog hais thiab zwm rau, thiab ua ntau yam hauj lwm kom zoo mus raws li Vajtswv lub tsev tej kev cheem tsum; qhov no koj thiaj li mus txog qhov ua tau koj tes dej num mus raws li tus qauv ib theej zuj zus. Tiam sis tib neeg feem coob qhov mloog hais thiab zwm rau uas yooj yim no xwb twb ua tsis tau, yog li ntawd yuav tsum tsis txhob hais tias tim Vajtswv lub tsev qhov tsis txhawb thiab cob qhia. Vim koj tsis tuaj yeem mloog hais, vim tab txawm qhov mloog hais xwb koj twb ua tsis tau, es Vajtswv lub tsev puas yuav muaj cuab kav txhawb thiab cob qhia koj? (Tsis muaj cuab kav.) Vim li cas tsis muaj cuab kav? Qhov siv koj mas yuav muaj kev pheej hmoo dhau, muaj teeb meem dhau, txhawj xeeb dhau! Vim kiag thaum Vajtswv lub tsev siv koj, ces tej zaum koj yuav tswj tib neeg, thiab coj lawv mus rau txoj kev lim hiam—qhov ntawd yog qhov tias vim li cas thiaj li muaj kev pheej hmoo npaum li ntawd. Yog siv koj, ces tej zaum koj yuav ua tej kev phem yam tsis xyuam xim thiab ua rau tes hauj lwm ntxhov quav niab, ces Vajtswv lub tsev yuav tsum tau muab koj rho tawm thiab kho tag nrho tej uas ntxhov quav niab rau koj—vim li ntawd thiaj li muaj teeb meem ntau heev. Thiab yog siv koj, koj yuav tsis paub ua ib teg hauj lwm twg li, thiab koj yuav tsis muaj txiaj ntsig dab tsi rau koj tes hauj lwm li; nyob hauv txhua tes hauj lwm uas koj ua ntawd, yuav tsum yog tus Nyob Saud, uas yog tus nkag mus koom txhua yam, hais kom ua, saib xyuas, thiab taug qab xwb—yog li ntawd vim li cas thiaj li yuav tsum siv koj? Koj ua rau muaj kev txhawj xeeb dhau! Hom neeg no yeej siv tsis tau kiag li. Txawm yog cob qhia lawv los, yuav tsis muaj qab hau dab tsi, thiab haj tseem yuav ua rau muaj teeb meem ntau thiab cuam tshuam rau kev cob qhia lwm tus thiab; qhov tau txais yuav tsis npaum li qhov poob, puas yog? (Yog.)

Ib txhia tib neeg muaj kev xav hauv siab, vim lawv yeej tsis tau raug Vajtswv lub tsev txhawb los sis siv li, es hais tias, “Vim li cas tus Nyob Saud yeej tsis pom kuv li? Vim li cas Vajtswv lub tsev yeej tsis txhawb thiab cob qhia kuv li? Qhov no mas tsis ncaj ncees li!” Ces koj yuav tsum xub ntsuas saib seb koj puas mloog hais tau, thiab koj puas zwm tau rau Vajtswv lub tsev tej kev npaj. Qhov ob, koj yuav tsum ntsuas saib seb koj puas muaj raws li peb yam qauv uas Vajtswv lub tsev cheem tsum rau kev txhawb thiab cob qhia tib neeg los ua cov thawj coj thiab cov neeg ua hauj lwm—uas yog muaj peev xwm nkag siab qhov tseeb, muaj lub nra, thiab muaj lub peev xwm ua hauj lwm. Yog tias koj muaj raws li cov qauv no, ces tsis ntev los luv koj yuav muaj cib fim raug txhawb, cob qhia, thiab siv. Qhov kom Vajtswv lub tsev txhawb koj ntawd, ces yuav muaj tej yam uas cheem tsum ntawm koj. Thiab tej yam ntawd yog dab tsi? Koj yuav tsum ua raws li tej hauv paus ntsiab lus thiab tej kev cheem tsum ntawm Vajtswv lub tsev; koj yuav tsum ua yam uas cheem tsum kom koj ua, thiab ua raws li txoj kev uas cheem tsum kom ua ntawd, ua li no thiaj li cob qhia kom koj xub kawm ua tej yam raws li tej hauv paus ntsiab lus, thiab kawm nrhiav qhov tseeb thiab zwm rau qhov tseeb, thiab kawm koom tes kom sib haum xeeb. Nyob rau lub sij hawm uas cob qhia koj ntawd, qee zaus Vajtswv lub tsev yuav ntuas koj; qee zaus yuav cem koj hnyav heev; qee zaus yuav nug txog koj tes hauj lwm mus txog qhov twg lawm; qee zaus yuav nug koj tias tes hauj lwm mus li cas tiag, thiab yuav tshuaj xyuas koj tes hauj lwm; thiab qee zaus mas, yuav sim saib seb koj qhov kev xam pom rau qee yam zoo li cas. Lub hom phiaj ntawm tej kev sim no mas tsis yog ua kom nyuaj rau koj, tiam sis yog ua kom koj to taub, nyob hauv tej yam no, Vajtswv tej kev npaj siab yog dab tsi, thiab koj yuav tsum muaj tus cwj pwm thiab tej hauv paus ntsiab lus dab tsi. Vajtswv lub tsev ua li no kom cob qhia tau koj thiab kom koj tau xyaum. Thiab lub hom phiaj thiab txoj kev npaj ntawm kev cob qhia tib neeg yog dab tsi? Qhov ntawd yog ua kom lawv tuaj yeem to taub qhov tseeb. Lub hom phiaj ntawm kev to taub qhov tseeb yog kom tib neeg zwm tau rau qhov tseeb thiab ua tau raws li tej hauv paus ntsiab lus, kom tuav ruaj lawv qhov chaw thiab ua lawv tes dej num yam ua siab ncaj, thiab nyob rau txheej txheem ntawm kev ua lawv tes dej num ntawd, es nkag mus rau hauv ntau yam qhov tseeb qhov muaj tiag thiab ua tiav kev hloov hauv lawv tus moj yam. Vajtswv lub tsev cob qhia cov thawj coj thiab cov neeg ua hauj lwm li no. Tsuav cov thawj coj thiab cov neeg ua hauj lwm to taub qhov tseeb lawm, ces yeej muaj kev cia siab tias lawv yuav coj tau cov neeg Vajtswv xaiv tseg kom to taub qhov tseeb. Cov thawj coj thiab cov neeg ua hauj lwm to taub qhov tseeb ntau npaum li cas, ces cov neeg uas lawv coj ntawd muaj kev cia siab tias yuav to taub qhov tseeb ntau npaum li ntawd thiab. Thaum cov thawj coj thiab cov neeg ua hauj lwm paub meej txog qhov tseeb tej hauv paus ntsiab lus hauv lawv tes hauj lwm lawm, ces cov neeg uas lawv coj ntawd los kuj tuaj yeem paub meej txog tej hauv paus ntsiab lus thiab nkag mus rau hauv qhov tseeb qhov muaj tiag hauv lawv tes hauj lwm thiab. Yog li ntawd, cov thawj coj thiab cov neeg ua hauj lwm uas raug cob qhia ntawd yuav tsum muaj peev xwm zoo dua lwm tus. Cia kom lawv to taub qhov tseeb tej hauv paus ntsiab lus ua ntej thiab nkag mus rau hauv qhov tseeb qhov muaj tiag ua ntej, thiab tom qab ntawd lawv coj tib neeg ntau ntxiv nkag mus rau hauv qhov tseeb qhov muaj tiag thiab to taub qhov tseeb tej hauv paus ntsiab lus. Nej xav li cas txog txoj kev ua li no? (Qhov ntawd zoo.) Cov neeg zoo li no tej zaum tsis tau kawm ntawv siab los sis hais lus tsis npliag, los sis tsis to taub ntau txog thev naus laus ntsis los sis tej xwm txheej tam sim no thiab kev nom kev tswv. Tej zaum lawv haj tseem tsis txawj ua qee yam hauj lwm li thiab. Tiam sis lawv muaj peev xwm to taub qhov tseeb, thiab tom qab hnov Vajtswv cov lus lawm, lawv muaj peev xwm xyaum ua raws li cov lus ntawd thiab ntsib pom cov lus ntawd, thiab muaj peev xwm nrhiav tau qhov tseeb tej hauv paus ntsiab lus, thiab muaj peev xwm coj tib neeg ntau ntxiv nkag mus rau hauv qhov muaj tiag ntawm Vajtswv cov lus thiab tuav ruaj qhov tseeb tej hauv paus ntsiab lus. Cov neeg no yog cov uas peb hais tias yog hom neeg muaj peev xwm uas raug txhawb thiab cob qhia los ua thawj coj. Qhov no puas txawv dhau? (Tsis txawv.) Ib txhia tib neeg tej zaum yuav nug hais tias: “Koj hais txog cov neeg muaj peev xwm, yog li ntawd lawv puas yog neeg tseem ceeb hauv cov zej zog? Lawv puas tau ua lag luam, los sis ua qee hom thawj coj los sis tub lag luam nyob hauv lub zej zog? Lawv puas yog cov nom tswv uas muaj ib qho keeb kwm ntawm sab kev nom kev tswv, los sis cov neeg muaj peev xwm ua lag luam, los sis cov neeg muaj peev xwm hauv kev kos duab thiab sau ntawv? Lawv puas yog cov neeg uas muaj khoom pub tshwj xeeb?” Cov neeg muaj peev xwm uas Vajtswv lub tsev hais txog ntawd txawv cov neeg muaj peev xwm hauv ntiaj teb. Lo lus “cov neeg muaj peev xwm” uas peb hais txog no txhais tau li cas? Qhov ntawd txhais tau hais tias to taub tau qhov tseeb, thiab coj tau tib neeg nkag mus rau hauv qhov tseeb qhov muaj tiag, thiab paub cais ntau hom neeg, thiab paub daws ntau tus yam ntxwv thiab kev nyuaj uas tib neeg ntsib, thiab muaj kev xam pom thiab tus cwj pwm uas yog thaum ntsib tej yam, thiab muaj kev xam pom thiab tus cwj pwm uas cov neeg ntseeg Vajtswv thiab raws Nws qab tsim nyog muaj. Qhov ntawd tsis yog hais txog cov neeg uas tsis muaj kev to taub ntawm sab ntsujplig, los sis cov neeg ntsej muag ncaj siab nkhaus, los sis cov neeg uas hais lus nrov nrov thiab hais cov kev qhuab qhia loj loj. Tiam sis, qhov ntawd hais txog cov neeg uas muaj qhov tseeb qhov muaj tiag. Qhov no yog qhov uas txhais hais tias “cov neeg muaj peev xwm.” Qhov no puas yog tsis muaj tiag? (Tsis yog.) Cov qauv uas Vajtswv lub tsev cheem tsum ntawm hom neeg muaj peev xwm no uas Vajtswv lub tsev txhawb thiab cob qhia los ua thawj coj thiab cov neeg ua hauj lwm ntawd puas muaj tiag heev? (Muaj tiag.) Muaj tiag heev li! Cov uas yuav raug txhawb zoo li no tsis tim tsum kom muaj kev kawm siab, tiam sis yam tsawg kawg mas lawv yuav tsum muaj peev xwm nkag siab qhov tseeb. Tej zaum ib txhia tib neeg yuav hais tias: “Yog tsis tim tsum kom lawv muaj kev kawm siab, ces lawv tsis paub ntawv los kuj tau thiab?” Kev nyeem Vajtswv cov lus yuav ua tsis tau yog tsis muaj kev kawm me ntsis. Lawv yuav tsum paub cov ntawv, tiam sis tsis tim tsum kom muaj kev kawm siab. Cov uas raug txhawb hauv Vajtswv lub tsev ntawd muaj cov uas kawm tiav tsev kawm ntawv theem nrab, tsev kawm ntawv qib siab, thiab kawm tiav Ph.D., yog li ntawd tsis muaj kev txwv dab tsi txog qib kev kawm li. Tsis tas li ntawd, tsis muaj kev txwv dab tsi txog tib neeg lub meej mom hauv lub zej zog li thiab. Txij li ntawm cov neeg ua liaj ua teb thiab cov neeg txawj ntse, mus txog rau cov neeg ua lag luam thiab cov niam tsev—yeej txais tos txhua hom tib neeg. Dhau ntawm qhov tsis muaj kev txwv txog qib kev kawm thiab lub meej mom hauv zej zog lawm, ces cov qauv uas cheem tsum yog ob peb yam uas Kuv tau hais los ntawd. Qhov ntawd puas tsim nyog? (Tsim nyog.) Tsim nyog heev! Tam sim no nej puas to taub me ntsis ntxiv txog lub ntsiab ntawm “cov neeg muaj peev xwm uas Vajtswv lub tsev txhawb thiab cob qhia” uas Kuv hais txog ntawd? (To taub lawm.) Cov neeg uas muaj raws li cov qauv ntawm qhov muaj peev xwm nkag siab qhov tseeb, muaj lub nra, thiab muaj lub peev xwm ua hauj lwm no ces yog cov uas Vajtswv lub tsev yuav txhawb thiab cob qhia. Yog lawv ua tau raws li cov qauv no, ces lawv mus raws li tus qauv lawm. Hais txog lwm yam xws li kev kawm, keeb kwm ntawm tsev neeg, lub meej mom hauv lub zej zog, tib neeg lub ntsej muag, thiab lwm yam ntawd, cov kev cheem tsum tsis siab npaum li cas. Qhov no yog hais txog kev txhawb thiab cob qhia tib neeg los ua cov thawj coj thiab cov neeg ua hauj lwm.

Peb nyuam qhuav sib qhia txog tus qauv uas cov neeg muaj peev xwm uas muaj kev txawj los sis muaj kev paub kev qib siab yuav tsum muaj kom thiaj li raug txhawb thiab cob qhia, uas yog lawv yuav tsum nyiam tej yam uas zoo thiab lees txais tau qhov tseeb, kev nkag siab tsis muaj qhov tsis tseeb, tuaj yeem ua lawv tes dej num yam ua siab ncaj, tiv taus kev txom nyem thiab them tus nqi yam tsis yws, thiab yam tsawg kawg mas tsis ua phem—ob peb tug qauv no yog qhov tim tsum rau cov neeg no. Yog li ntawd lub hom phiaj ntawm qhov txhawb thiab cob qhia cov neeg no yog dab tsi? Ib yam nkaus li ntawd, qhov ntawd yog kom thaum twg cov neeg no ntsib teeb meem thaum ua lawv tes dej num thiab ua tes hauj lwm tiag tiag, es lawv tuaj yeem nrhiav qhov tseeb los daws cov teeb meem ntawd, thiab ua tau tej yam raws li tej hauv paus ntsiab lus. Nyob hauv tus txheej txheem ntawm txoj kev xyaum nkag mus ntawd, lawv raug cob qhia thiab raug tswj yam tsis paub txog, thiab xyaum tso lawv tus kheej tej kev npaj siab tseg, kho lawv tej kev xam pom uas yuam kev thiab tsis tseeb ntawm cov neeg ntiaj teb, tso qee qhov kev xav tsis paub tab tseg, thiab qhov tso tej kev ntxub ntxaug, tej kev xav phem, thiab tej kev xav hauv nruab siab txog txoj kev ntseeg Vajtswv, thiab tej yam zoo li ntawd tseg. Muaj tseeb tias, txawm li cas los xij, txheej txheem ntawm kev xyaum no yog txhawm rau kom tib neeg to taub qhov tseeb, kawm mloog lus, thiab kawm nkag mus rau hauv ntau yam qhov tseeb qhov muaj tiag zuj zus. Nyob rau hauv txheej txheem ntawm kev kawm ntawd, lawv maj mam paub meej txog qhov tseeb tej hauv paus ntsiab lus, los paub tias txoj kev ntseeg Vajtswv txhais tau li cas, thiab txoj kev xyaum ua raws qhov tseeb txhais tau li cas, thiab txoj kev ua yus tes dej num txhais tau li cas, thiab thaum kawg, lawv maj mam to taub tias lawv tsim nyog ua li cas thiaj li ua tau lawv tes dej num kom mus raws li tus qauv, lawv tsim nyog coj lawv tus kheej li cas tam li ib tug ntseeg, thiab lwm yam—tej no puav leej yog yam uas tib neeg maj mam nkag mus rau hauv tom qab lawv raug txhawb thiab cob qhia. Txheej txheem uas tib neeg nkag mus zuj zus ntawd yog txheej txheem ntawm kev raug cob qhia, thiab txheej txheem ntawm kev raug cob qhia ntawd qhov tseeb tiag yog txheej txheem ntawm qhov tib neeg xyaum nkag mus rau hauv qhov tseeb qhov muaj tiag. Tiam sis yog koj tsis raug txhawb thiab cob qhia, es koj tsuas ua ib tug ntseeg li sawv daws uas koom kev sib txoos ua ke, nyeem Vajtswv cov lus, sib qhia txog qhov tseeb, los sis kawm cov nkauj qhuas Vajtswv xwb, txoj kev ntseeg Vajtswv li no mas koj tsis tau ua koj tes dej num li ib tug neeg uas raug tsim tawm los kom tiav tiag tiag, yog li ntawd ces koj nyob deb ntawm qhov ua koj tes dej num kom mus raws li tus qauv ntawd heev. Koj twb tsis paub meej tias thaum ua koj tes dej num koj yuav tsum nkag siab tej hauv paus ntsiab lus twg, es tsuas hais tau qee cov kev qhuab qhia thiab cov lus qw xwb; yog li ntawd, koj tseem tsis tau nkag mus rau hauv qhov tseeb qhov muaj tiag, thiab koj txoj kev nkag mus rau hauv lub neej txoj sia mas qeeb heev. Ib yam nkaus li ntawd, lub hom phiaj thiab txoj kev npaj ntawm qhov txhawb thiab cob qhia cov neeg uas ua cov hauj lwm qib siab no kuj yog kom lawv nkag mus rau hauv qhov tseeb qhov muaj tiag sai dua thiab kom nkag siab qhov tseeb tej hauv paus ntsiab lus zoo dua thiab raug dua. Cov uas tuaj yeem nkag siab qhov tseeb tej hauv paus ntsiab lus thiab nkag mus rau hauv qhov tseeb qhov muaj tiag—cov no yog cov neeg muaj peev xwm uas Vajtswv lub tsev txhawb thiab cob qhia. Hom neeg uas muaj peev xwm no yog hais txog dab tsi? Qhov ntawd txhais tau tias cov uas—ntawm qhov hauv paus uas nyiam tej yam uas zoo, thiab tuaj yeem tiv kev txom nyem thiab them tus nqi, kev nkag siab tsis nkhaus, thiab tsis yog neeg phem—tau ua tiav qhov to taub qhov tseeb tej hauv paus ntsiab lus thiab nkag mus rau hauv qhov tseeb qhov muaj tiag, thiab tuaj yeem zwm rau Vajtswv thiab Vajtswv lub tsev tej kev npaj, thiab muaj lub siab hwm Vajtswv me ntsis. Qhov no yog hom neeg muaj peev xwm ob uas Kuv hais txog ntawd. Tej kev cheem tsum rau lawv mas kuj siv tau tiag, meej txaus, thiab tsis yog tsis muaj tiag. Yog li ntawd hom neeg muaj peev xwm no puas cheem tsum kom yog cov neeg tseem ceeb hauv lub zej zog, thiab muaj kev ntsib kev pom txog kev ua neej, thiab muaj cov ntawv pov thawj qib kev kawm, thiab muaj lub meej mom hauv lub zej zog? (Tsis tim tsum.) Vajtswv lub tsev yeej tsis cheem tsum kom tib neeg muaj lub meej mom hauv lub zej zog, muaj npe nrov, muaj cov ntawv pov thawj qib kev kawm los sis muaj kev paub qib siab—tej no yeej tsis cheem tsum kom muaj li. Thaum txhawb thiab cob qhia tib neeg ntawd, Vajtswv lub tsev tsis saib lawv lub ntsej muag, uas yog hais tias, lawv dab tuag los sis zoo nkauj zoo nraug npaum li cas. Tshwj qhov tsis txhawb hom neeg uas zoo li cov tsis ntseeg, los sis cov uas muaj lub ntsej muag phem los sis lim hiam, lwm yam qauv ces yog raws li qhov Kuv nyuam qhuav hais ntawd—tej no yog tej uas siv tau tshaj plaws. Thaum cov tsis ntseeg txhawb ib tug neeg mas, lawv xub saib tus neeg ntawd lub ntsej muag; txiv neej mas yuav tsum zoo nraug, cuag li cov nom tswv, hos poj niam mas yuav tsum zoo nkauj, cuag li cov ntxhais qaum ntuj. Tsis tas li ntawd, lawv muab tib neeg muaj cov ntawv pov thawj qib kev kawm, lub meej mom hauv lub zej zog, keeb kwm ntawm tsev neeg, thiab tej tswv yim ntxias los sib piv thiab. Yog koj muaj cov ntawv pov thawj qib kev kawm uas zoo tiam sis tsis muaj tswv yim ntxias, qhov ntawd los yeej tsis tau li thiab, koj yuav tsis muaj hnub raug txhawb thiab tsis muaj leej twg yuav saib taus koj li. Yog koj muaj cov ntawv pov thawj qib kev kawm uas zoo thiab muaj peev xwm tiag, tiam sis tsis tshua zoo nkauj zoo nraug, thiab qig taub, thiab tsis paub txav ze los sis ua kom koj cov thawj coj theem siab nyiam, ces koj yuav tsis muaj hnub raug txhawb los sis cob qhia tag koj sim neej, thiab tsis muaj leej twg yuav pom koj li. Yog li ntawd, cov tsis ntseeg thiaj li muaj lo paj lug no uas hais tias, “Nees zoo mas muaj ntau, tiam sis muaj ob peb tug thiaj li paub cov nees ntawd xwb.” Qhov no puas muaj tseeb nyob hauv Vajtswv lub tsev? (Tsis muaj tseeb.) Yog li ntawd kab lus hais tias “Kub tiag yeej yuav ci xwb xwb li” puas muaj tseeb? Nws puas muaj qab hau? (Tsis muaj.) Cov neeg uas thuam lub ntiaj teb thiab tsis zwm rau leej twg ntawd mas pheej hais lo paj lug no. Pheej xav ci—qhov no yog tib neeg txoj kev ntshaw. Ntau hom neeg muaj peev xwm uas Vajtswv lub tsev txhawb thiab cob qhia ntawd mas tsis yog kub, lawv tsuas yog tib neeg dog dig xwb. Qhov kev txhawb thiab cob qhia uas peb hais txog ntawd mas tsuas yog ib lo lus hais xwb; qhov tseeb tiag, qhov no yog hais txog Vajtswv txoj kev txhawb tsa. Koj uas yog ib tug neeg uas raug tsim tawm los, nyob rau ntawm tus Tswv Tsim lub xub ntiag koj puas yog kub? Koj tsuas yog plua plav xwb, koj twb tsis yog tooj los sis hlau li. Vim li cas Kuv thiaj li hais tias koj yog plua plav es tsis yog kub? Tib neeg tsis muaj dab tsi tsim nyog qhuas hlo li. Tej zaum ib txhia yuav nug hais tias: “Yam uas Koj hais ntawd tsis yog tsis sib haum lod? Tsis yog Koj nyuam qhuav hais tias ib tug neeg tuaj yeem raug txhawb yog nws muaj tus qauv uas nyiam tej yam uas zoo no lod?” Ua ib tug tib neeg, es koj tsis tsim nyog nyiam tej yam uas zoo lod? Yog koj nyiam tej yam uas zoo me ntsis, ces qhov ntawd ua rau koj yog kub lawm lod? Qhov ntawd ua rau koj ci lawm lod? Yog koj nyiam tej yam uas zoo me ntsis, es puas txhais tau hais tias koj muaj qhov tseeb? Tsuas yog muaj qhov tseeb xwb mas ib tug neeg thiaj li ci. Yog koj tsis muaj qhov tseeb, es yuav hais tau li cas tias koj ci? Qhov tseeb tiag ces ib tug neeg uas raug tsim tawm los yeej tsis to taub qhov tseeb dab tsi li. Qhov uas muaj kev ua neeg me ntsis, thiab muaj peev xwm thiab lub peev xwm nkag siab qhov tseeb me ntsis ntawd mas tsis tau txhais tias yug los es yeej muaj qhov tseeb lawm. Tib neeg tsis muaj qhov tseeb, tab txawm lawv txoj kev ua neeg ncaj ncees los sis siab zoo los xij, tej no tsis yog qhov tseeb, tej no tsuas yog tej yam ntxwv uas qhov kev ua neeg li ib txwm tsim nyog muaj xwb. Yog li ntawd, tsis txhob hais txog qhov ci ntawd hlo li. Ua li, thaum twg ib tug neeg thiaj li ci tau me ntsis? Thaum lawv hais tau Yauj cov lus uas hais tias, “Yehauvas pub, thiab Yehauvas tau muab coj mus lawm; thov qhuas Yehauvas lub npe” (Yauj 1:21), lub sij hawm ntawd thiaj li hais tau tias lawv ci me ntsis thiab ua neej nyob hauv qhov kaj lawm. Thaum koj tuaj yeem siv qhov tseeb qhov muaj tiag uas koj muaj thiab qhov tseeb uas koj to taub ntawd los yug, txhawb, thiab coj lwm tus, uas ua rau coj tau lawv los rau ntawm Vajtswv xub ntiag thiab nkag mus rau hauv qhov tseeb qhov muaj tiag, zwm rau Vajtswv thiab pe hawm Vajtswv, thaum ntawd xwb koj thiaj li ci tau me ntsis lawm.

Ntau hom neeg muaj peev xwm uas Vajtswv lub tsev cob qhia ntawd mas tsis yog cov uas muaj kev txawj tshaj ntuj tsim, lawv tsuas yog cov tib neeg dog dig uas qias vuab tsuab xwb. Tsuav lawv lees txais tau qhov tseeb, mloog hais thiab zwm rau, thiab muaj lub peev xwm txaus xwb, ces Vajtswv lub tsev yuav txhawb thiab cob qhia lawv yam tshwj xeeb. Thaum Kuv hais txog qhov txhawb thiab cob qhia tib neeg yam tshwj xeeb ntawd mas, yog hais txog qhov uas Vajtswv txhawb tsa, yog hais txog qhov uas muab lub cib fim rau koj los rau ntawm Vajtswv lub xub ntiag, lees txais Vajtswv txoj kev coj, thiab lees txais Vajtswv txoj kev cob qhia thiab qhia koj, kom nyob rau lub sij hawm no koj thiaj li nkag mus rau hauv qhov tseeb qhov muaj tiag sai li sai tau thiab tuaj yeem nkag siab qhov tseeb tej hauv paus ntsiab lus kom raug, es kom ua tau koj tes dej num mus raws li tus qauv, thiab ua neej nyob kom muaj qhov zoo nkaus li tib neeg. Qhov no yog lub ntsiab lus ntawm lo lus “cov neeg muaj peev xwm” nyob hauv Vajtswv lub tsev. Cov tib neeg zoo li no tsis loj thiab tsis muaj meej mom kiag li, lawv tsuas to taub qhov tseeb thiab muaj qhov tseeb qhov muaj tiag, thiab ua tau lawv tes dej num yam mob siab thiab muaj kev ris lub luag hauj lwm, muaj lub siab dawb paug me ntsis thiab tuaj yeem them tus nqi me ntsis xwb, es tsis lam tau lam ua raws li lawv tej kev xav phem thiab tej kev xav hauv nruab siab. Nyob hauv qhov txhawb thiab cob qhia cov neeg uas mus raws li cov qauv no yam tshwj xeeb, thiab xyaum lawv, qhov Vajtswv lub tsev ua li no puas tsim nyog? Puas muaj txiaj ntsim rau tib neeg? Qhov ntawd muaj txiaj ntsim rau tib neeg heev! Cov uas raug txhawb thiab cob qhia ntawd kuj ntseeg Vajtswv, nyeem Vajtswv cov lus, mloog tej lus qhuab qhia, thiab ua lawv tes dej num zoo ib yam li lwm cov ntseeg thiab, tiam sis yog muab piv rau lwm cov ntseeg mas, lawv yuav loj hlob sai dua thiab tau txais ntau dua. Nej puas xav tau txais ntau, los sis tau txais me ntsis xwb? (Xav tau txais ntau.) Tib neeg feem coob muaj qhov kev ntshaw no, uas txhais tau tias lawv nyiam tej yam uas zoo. Qee zaus Kuv sib qhia nrog qee pab pawg txog kev nkag mus rau hauv lub neej txoj sia, thiab muaj neeg coob uas raws qab mus mloog, qhov no qhia tau hais tias tib neeg feem coob muaj lub siab ntshaw qhov tseeb, thiab txaus siab to taub qhov tseeb ntau dua, kuj txaus siab nkag mus rau hauv qhov tseeb qhov muaj tiag thiab. Thaum pib, Kuv sib qhia nrog qee tus neeg mas lawv loog heev. Kuv hais lus ntev heev tiam sis lawv tsis teb rov qab, los sis tsis muaj tus yeeb yam luag me me li. Tom qab kuv tau nrog lawv sib txuas lus los tau ib los sis ob xyoos lawm, feem coob ntawm lawv thiaj li muaj lub ntsej muag tus thiab teb rov qab lawm, thiab lawv thiaj li teb rov qab sai dua lawm. Qhov ntawd yog, lawv hloov ntawm cov neeg tuag los ua cov neeg ciaj, thiab lawv tus ntsujplig xeev los lawm. Qhov no ua tiav tau li cas? Yog tib neeg tsis to taub qhov tseeb, ces txawm lawv nyiam tej yam uas zoo npaum li cas, los sis lawv ntse thiab muaj tswv yim npaum li cas los xij, lawv yeej tseem yog cov neeg tuag xwb. Ib txhia tib neeg thaum pib mas ruam thiab hlwb qeeb, tsis muaj leej twg hauv ntiaj teb saib taus lawv li, thiab lawv tsis muaj kev kawm siab thiab lawv txoj kev paub mas tsis dav li. Tiam sis tom qab lawv los ntseeg Vajtswv, lawv tuaj yeem to taub ntau qhov tseeb thiab pom tshab ntau yam, thiab tom qab ntawd ua neej nyob muaj qhov zoo nkaus li tib neeg lawm, thiab dhau los ua cov neeg ciaj lawm. Lo lus “cov neeg ciaj” txhais tau li cas? Qhov ntawd tsis yog hais txog koj lub cev nqaij daim tawv ciaj los sis tuag, los sis koj lub cev puas txav tau los sis ua taus pa, tiam sis yog hais txog koj tus ntsujplig puas ras txog thiab hnov sai rau Vajtswv cov lus thiab qhov tseeb. Cov neeg ciaj muaj kev teb rov qab rau qhov tseeb thiab Vajtswv cov lus. Tom qab mloog Vajtswv cov lus lawm, lawv muaj kev ras, muaj txoj hau kev, muaj kev npaj, thiab muaj lub hom phiaj. Cov neeg tuag tsis muaj tej kev qhia tshwm uas pom tau meej no. Yog li ntawd, yog Vajtswv lub tsev txhawb thiab cob qhia ib tug neeg twg, tus neeg no yuav tau txais ntau dua. Yog li ntawd cov neeg uas tsis tau raws li cov qauv no thiab tsis raug txhawb los sis cob qhia ntawd yuav ua li cas thiaj li tau txais kom txaus? Lawv yuav ua li cas thiaj li nkag mus rau hauv qhov tseeb qhov muaj tiag kom sai li sai tau? Lawv yuav tsum kawm xyaum ua raws thiab ntsib pom Vajtswv cov lus, ua kom tau qhov uas to taub ntau qhov tseeb, thiab kuj tuaj yeem siv qhov tseeb los cais tib neeg thiab daws teeb meem—ces lawv thiaj li nkag mus tau rau hauv qhov tseeb qhov muaj tiag lawm.

Ib txhia tib neeg hais tias: “Vim Vajtswv lub tsev txhawb thiab cob qhia ntau hom neeg uas muaj peev xwm thiab cia lawv nkag mus rau hauv qhov tseeb qhov muaj tiag kom sai li sai tau, qhov ntawd tsis tau txhais hais tias cov neeg uas tsis muaj peev xwm ces nkag tsis tau mus rau hauv qhov tseeb qhov muaj tiag lod?” Qhov hais li ntawd puas yog? (Tsis yog, qhov ntawd yuam kev lawm.) Yog li ntawd, tom qab qhia txog lub ncauj lus no lawm, qhov ntawd puas ua rau ib txhia tib neeg zoo siab heev hos ua rau lwm tus poob siab thiab tag kev cia siab? Yuav tsum saib qhov no li no: Cov uas raug txhawb thiab cob qhia yuav tsum tsis txhob khav theeb. Koj tsis muaj dab tsi tsim nyog khav, qhov no yog Vajtswv txoj hmoov hlub thiab koob hmoov. Thaum Vajtswv muab rau koj ntau, Nws kuj cheem tsum kom koj siv zog ntau dua thiab. Yog Vajtswv lub tsev muaj qhov txhawb thiab cob qhia koj yam tshwj xeeb, ces txhais tau hais tias koj yuav tsum them tus nqi ntau dua thiab. Yog koj tiv taus txoj kev txom nyem no, ces yeej muaj tseeb tias koj yuav tau txais ntau dua. Yog koj hais tias, “Kuv tsis yeem tiv txoj kev txom nyem no,” ces koj yuav tsis tau txais qhov tseeb, thiab tsis tau txais Vajtswv tej koob hmoov. Ib txhia tib neeg hais tias, “Kuv xav tau tej ntawd tiam sis ntshe kuv ua tsis tau, vim Vajtswv lub tsev tsis muaj qhov txhawb thiab cob qhia kuv yam tshwj xeeb. Kuv ua tsis tau raws li cov qauv ntawd.” Tsis ua li cas yog koj ua tsis tau raws li cov qauv no. Tsuav koj caum qhov tseeb thiab siv zog mus rau hauv qhov tseeb xwb, Vajtswv yuav tsis muaj qhov ua tsis ncaj rau koj. Cov neeg uas raug txhawb thiab cob qhia no tsuas nkag tau mus rau hauv qhov tseeb qhov muaj tiag ntxov dua vim lawv lub peev xwm thiab vim lawv muaj ntau yam uas tsim nyog xwb. Txawm li cas los xij, qhov nkag mus ntxov no tsis tau txhais hais tias lawv yog tib co neeg uas nkag mus tau rau hauv qhov tseeb qhov muaj tiag xwb. Qhov ntawd tsuas txhais tau tias lawv xub tau txais ntau dua me ntsis xwb, thiab nkag mus rau hauv qhov tseeb qhov muaj tiag ntxov zog me ntsis xwb. Cov uas tsis raug txhawb yuav poob qab lawv me ntsis, tiam sis qhov no tsis tau txhais hais tias lawv nkag tsis tau mus rau hauv qhov tseeb qhov muaj tiag. Qhov ib tug neeg twg nkag tau mus rau hauv qhov tseeb qhov muaj tiag los sis tsis tau ntawd mas yog nyob ntawm nws tej kev caum xwb. Cov neeg uas raug txhawb thiab cob qhia no tuaj yeem nkag siab tau qhov tseeb tej hauv paus ntsiab lus sai dua thiab nkag mus rau hauv qhov tseeb qhov muaj tiag sai dua nyob rau hauv txheej txheem uas raug cob qhia, uas muaj txiaj ntsim rau Vajtswv lub tsev tes hauj lwm. Yog li ntawd, qhov txhawb thiab cob qhia cov neeg uas pom tias muaj peev xwm zoo thiab nyiam qhov tseeb ntawd yeej yog lawm. Yog ib tug neeg twg tuaj yeem pom cov neeg no es txhawb thiab cob qhia lawv yam tsis khib lawv los sis tsis tsuj nias lawv, tiam sis hlub thiab saib xyuas lawv, ces tus neeg ntawd tab tom ua tib zoo xav txog Vajtswv tej kev npaj siab. Qhov txawv, yog qee tus neeg khib thiab txhawj tias cov neeg no zoo dua thiab hla dhau lawv lawm, yog li ntawd lawv thiaj li cais thiab tsuj nias cov neeg no, qhov no yog ib qho kev ua phem thiab yog yam uas cov tawm tsam khetos pheej ua tas li. Tsuas yog cov neeg phem thiab cov tawm tsam khetos xwb thiaj li tawm tsam thiab cais cov kwv tij thiab cov muam.

Txoj Kev Paub thiab Tus Cwj Pwm Uas Ib Tug Neeg Tsim Nyog Muaj Rau Qhov Uas Vajtswv Lub Tsev Txhawb thiab Cob Qhia Tib Neeg

Qhov uas peb nyuam qhuav sib qhia ntawd yog tej hom phiaj ntawm Vajtswv lub tsev qhov txhawb thiab cob qhia ntau hom neeg uas muaj peev xwm. Tsis hais cov uas raug xaiv los txhawb thiab cob qhia ntawd ua hom hauj lwm twg—txawm yog tes hauj lwm thev naus laus ntsis, tes hauj lwm dog dig, los sis tej hauj lwm dav dav hauv pawg ntseeg—muab zuaj zog los hais, puav leej yog txhawm rau kom lawv to taub qhov tseeb tej hauv paus ntsiab lus thiab nkag mus rau hauv qhov tseeb qhov muaj tiag, thiab kom lawv thiaj li ua tau lawv tes dej num kom tiav mus raws li tus qauv sai li sai tau kom ua tau raws li Vajtswv tej kev npaj siab—qhov no yog Vajtswv txoj kev cheem tsum rau tib neeg, thiab muaj tseeb tias, qhov no kuj yog pawg ntseeg tes hauj lwm txoj kev tim tsum thiab. Tam sim no nej puas to taub qhov tseem ceeb ntawm qhov uas Vajtswv lub tsev txhawb thiab cob qhia ntau hom neeg uas muaj peev xwm lawm? Puas tseem muaj qhov to taub yuam kev lawm? (Tsis muaj lawm.) Ib txhia tib neeg hais tias, “Tam sim no tus neeg no raug txhawb los ua ib tug thawj coj lawm, muaj meej mom lawm, nws tsis yog ib tug tib neeg dog dig lawm.” Qhov hais li no puas yog? (Tsis yog lawm.) Tej zaum lwm tus yuav hais tias: “Cov uas los ua thawj coj muaj meej mom, tiam sis nyob saum ncov mas kho siab. Koj yim nce siab, ces koj yim poob sab xwb!” Qhov hais li no puas yog? Pom meej tias tsis yog lawm. Lo lus uas hais tias “Koj yim nce siab, ces koj yim poob sab xwb” ntawd yog hais txog cov neeg twg? Qhov ntawd yog hais txog cov neeg uas muaj tej kev xav ua thiab tej kev ntshaw, thiab cov tawm tsam khetos. Thaum cov uas caum qhov tseeb los ua thawj coj, qhov ntawd tsis yog nce siab—qhov ntawd yog Vajtswv txhawb tsa lawv yam tshwj xeeb xwb, thiab yog Vajtswv txoj koob hmoov uas muab lub nra no tso rau lawv thiab cia lawv ua tes hauj lwm thawj coj. “Koj yim nce siab, ces koj yim poob sab xwb” yog ib qho xaus lus los ntawm cov tsis ntseeg, thiab piav txog qhov tshwm sim los ntawm cov tsis ntseeg uas caum ib txoj hauj lwm ua nom ua tswv. Cov tsis ntseeg ntawd tsis muaj kev paub cais thiab muab lo lus no siv rau cov neeg uas zoo, uas yog ib qho kev ua yuam kev loj heev. Tej zaum lwm tus yuav hais tias: “Nws yug nyob rau pem toj siab, thiab tam sim no nws tau los ua ib tug thawj coj pawg ntseeg lawm—ib tug noog uas ya siab los ntawm qhov chaw qis.” Qhov hais li no puas yog? Tej no yog cov tsis ntseeg tej lus dab thiab siv tsis tau rau ntawm cov neeg Vajtswv xaiv tseg. Nyob hauv Vajtswv lub tsev, Vajtswv foom koob hmoov rau cov uas caum qhov tseeb, cov uas coj ncaj, cov uas muaj lub siab zoo, thiab cov uas tiv thaiv Vajtswv lub tsev tes hauj lwm. Thaum cov neeg no to taub qhov tseeb thiab muaj lub siab ntseeg me ntsis lawm, tsis ntxov los lig lawv yuav raug txhawb los cob qhia thiab xyaum ua, los hloov cov thawj coj cuav thiab cov tawm tsam khetos chaw. Nyob hauv Vajtswv lub tsev, cov neeg zoo uas tau dhau ntau yam kev sim siab thiab kev ntsuam xyuas uas ib txwm tiv thaiv Vajtswv lub tsev tes hauj lwm ntawd puav leej yog cov neeg uas tau txais Vajtswv txoj kev pom zoo, thiab qhov uas siv cov tsis ntseeg tej lus dab ntawd los piav txog cov neeg no mas yuav tsis tsim nyog li. Yog li ntawd, cov uas pheej siv cov tsis ntseeg tej lus dab los piav txog tej yam hauv Vajtswv lub tsev thiab los qhia tawm lawv tus kheej tej kev xam pom ntawd yog cov neeg uas tsis to taub qhov tseeb thiab muaj tej kev xam pom uas nkhaus txog tej yam. Lawv tej kev xam pom txog tej yam yeej tsis tau hloov hlo li, thiab tseem yog cov tsis ntseeg tej kev xam pom xwb, lawv ntseeg Vajtswv los tau ntau xyoo es tseem tsis tau ib qho qhov tseeb hlo li, thiab tseem tsis tuaj yeem saib tej yam raws li Vajtswv cov lus—yog li ntawd, cov neeg no yog cov tsis ntseeg thiab cov neeg tsis muaj kev ntseeg. Thaum ib tug neeg raug txhawb los ua ib tug thawj coj los sis ib tug neeg ua hauj lwm, los sis nws raug cob qhia los ua tus saib xyuas ntawm qee hom hauj lwm thev naus laus ntsis, qhov no tsuas yog qhov uas Vajtswv lub tsev muab ib lub nra rau nws xwb. Qhov no yog ib qho lus txib, yog ib lub luag hauj lwm, thiab muaj tseeb tias, kuj yog ib teg dej num tshwj xeeb, ib lub cib fim tshwj xeeb, thiab yog ib qho kev txhawb tsa uas tshwj xeeb—nws tsis muaj dab tsi tsim nyog qhuas li. Thaum Vajtswv lub tsev txhawb thiab cob qhia ib tug neeg ntawd mas, tsis tau txhais hais tias nws muaj lub chaw tshwj xeeb los sis lub meej mom tshwj xeeb hauv Vajtswv lub tsev, kom nws thiaj li tau txais kev saib xyuas tshwj xeeb thiab kev hlub tshwj xeeb. Tiam sis, tom qab Vajtswv lub tsev txhawb nqa nws yam tshwj xeeb heev lawm, nws tau txais tej yam zoo heev los txais kev cob qhia los ntawm Vajtswv lub tsev, los xyaum ua qee yam hauj lwm tseem ceeb hauv pawg ntseeg, thiab tib lub sij hawm ntawd Vajtswv lub tsev yuav muaj cov qauv siab dua rau tus neeg no, qhov ntawd muaj txiaj ntsim rau nws txoj kev nkag mus rau hauv lub neej txoj sia heev. Thaum ib tug neeg raug txhawb thiab cob qhia hauv Vajtswv lub tsev, qhov ntawd txhais tau hais tias nws yuav nyob hauv qab tej kev cheem tsum nruj thiab raug saib xyuas nruj. Vajtswv lub tsev yuav tshuaj xyuas, saib xyuas, thiab pheej hais kom ua tes hauj lwm uas nws ua ntawd yam nruj heev, thiab yuav to taub thiab mob siab rau nws txoj kev nkag mus rau hauv lub neej txoj sia. Los ntawm ob peb yam no, cov neeg uas Vajtswv lub tsev txhawb thiab cob qhia ntawd puas tau xyiv fab rau kev saib xyuas tshwj xeeb, lub meej mom tshwj xeeb, thiab lub chaw tshwj xeeb? Yeej tsis tau kiag li, thiab haj yam tsis tau xyiv fab rau ib lub meej mom tshwj xeeb li. Rau cov neeg uas raug txhawb thiab cob qhia ntawd, yog lawv xav tias lawv muaj peev los ntawm qhov ua lawv tes dej num tau txiaj ntsig me ntsis, thiab yog li ntawd txawm nres twj ywm thiab tsis caum qhov tseeb lawm, ces lawv yuav poob rau hauv kev phom sij thaum lawv ntsib kev sim siab thiab kev ceeb laj txom nyem. Yog tib neeg lub siab ntseeg me dhau, lawv yuav sawv tsis tau ruaj khov kho. Ib txhia hais tias, “Yog ib tug neeg raug txhawb thiab cob qhia los ua ib tug thawj coj, ces nws muaj meej mom lawm. Txawm nws tsis yog ib tug ntawm cov tub hlob los, yam tsawg kawg mas nws muaj kev cia siab los ua ib tug ntawm Vajtswv cov neeg lawm. Kuv yeej tsis tau raug txhawb los sis raug cob qhia li, yog li ntawd puas yog kuv tsis muaj kev cia siab los ua ib tug ntawm Vajtswv cov neeg lawm?” Qhov uas xav li no ces yuam kev lawm. Qhov kom ua tau ib tug ntawm Vajtswv cov neeg mas, koj yuav tsum muaj kev ntsib kev pom hauv lub neej txoj sia, thiab koj yuav tsum yog ib tug neeg uas zwm rau Vajtswv. Txawm tias koj yog ib tug thawj coj, ib tug neeg ua hauj lwm, los sis ib tug neeg raws qab dog dig los xij, leej twg uas muaj qhov tseeb qhov muaj tiag ces yog ib tug ntawm Vajtswv cov neeg. Tab txawm koj yog ib tug thawj coj los sis ib tug neeg ua hauj lwm los xij, yog koj tsis muaj qhov tseeb qhov muaj tiag, ces koj tseem yog ib tug neeg ua dej num txhawb xwb. Qhov tseeb tiag, tsis muaj dab tsi tshwj xeeb txog cov neeg uas raug txhawb thiab cob qhia ntawd li. Qhov uas txawv ntawm lwm tus tsuas yog hais tias lawv muaj tej xwm txheej uas zoo dua, muaj tej cib fim uas zoo dua, thiab muaj qhov uas zoo dua los ua tes hauj lwm ntxaws ntxaws uas muaj feem xyuam rau qhov tseeb tej hauv paus ntsiab lus xwb. Txawm yog hais tias feem ntau ntawm tes hauj lwm uas koj ua ntawd muaj feem rau ib txoj hauj lwm twg los xij, yog tsis muaj qhov tseeb tej hauv paus ntsiab lus los tswj thiab tshuaj xyuas txoj hauj lwm ntawd, ces tes dej num uas koj ua ntawd yuav tsis mus raws li tej hauv paus ntsiab lus, thiab koj tsuas yog siv zog ua hauj lwm xwb, thiab koj yeej yuav tsis tau txais Vajtswv txoj kev pom zoo li. Vajtswv lub tsev muaj kev cheem tsum rau ntau hom neeg muaj peev xwm uas raug txhawb thiab cob qhia ntawd yog dab tsi? Kom Vajtswv lub tsev txhawb thiab cob qhia mas, yam tsawg kawg mas lawv yuav tsum yog cov uas muaj lub siab txawj xav thiab muaj laj thawj, yog cov uas lees txais tau qhov tseeb, ua lawv tes dej num yam ua siab ncaj, thiab tuaj yeem zwm rau Vajtswv txoj kev tswj hwm thiab kev npaj, thiab yam tsawg kawg mas lawv yuav tsum lees txais thiab zwm tau rau thaum ntsib kev raug ntuas. Qhov txiaj ntsig uas ua tiav los ntawm cov neeg uas Vajtswv lub tsev cob qhia thiab qhia ntawd tsis yog qhov hais tias lawv dhau los ua cov nom tswv los sis ua cov thawj, los sis coj ib pab, thiab tsis yog qhov hais tias lawv tuaj yeem qhuab ntuas tib neeg txoj kev xav, thiab tseeb tiag, haj yam tsis yog qhov hais tias lawv muaj tej kev kev paub qib siab uas zoo dua los sis muaj kev kawm ntawv qib siab dua, los sis muaj koob muaj npe nrov dua, los sis hais tias muab lawv piv tau nrog cov uas muaj npe nrov nyob hauv ntiaj teb vim lawv tej kev paub qib siab los sis tej hauj lwm kev nom kev tswv. Tiam sis, qhov txiaj ntsig uas xav kom ua tiav yog kom lawv to taub qhov tseeb thiab ua neej raws li Vajtswv cov lus, thiab kom lawv yog cov neeg uas hwm Vajtswv thiab zam kev phem. Thaum lawv xyaum ua ntawd, lawv tuaj yeem to taub qhov tseeb thiab nkag siab qhov tseeb tej hauv paus ntsiab lus, thiab haj yam paub tias kev ntseeg Vajtswv yog dab tsi tiag thiab yuav raws Vajtswv qab li cas—qhov no muaj txiaj ntsim rau cov uas caum qhov tseeb kom raug ua tau zoo tiav log ntawd heev. Qhov no yog qhov txiaj ntsig thiab tus qauv uas Vajtswv lub tsev xav kom ua tiav hauv qhov kev txhawb thiab cob qhia ntau hom neeg uas muaj peev xwm, thiab kuj yog qhov uas cov raug txhawb thiab raug siv tau txais loj tshaj plaws.

Ib txhia tib neeg ua lawv tes dej num muaj kev ris lub luag hauj lwm dua me ntsis thiab tau txais kev pom zoo los ntawm cov neeg Vajtswv xaiv tseg, yog li ntawd pawg ntseeg thiaj li cob qhia lawv ua cov thawj coj los sis cov neeg ua hauj lwm. Tom qab muaj meej mom lawm, lawv pib xav tias lawv txawv ntawm sawv daws thiab xav tias, “Vim li cas Vajtswv lub tsev thiaj li xaiv kuv? Tsis yog vim kuv zoo dua nej txhua tus lod?” Qhov no tsis zoo li cov lus uas me nyuam yaus hais lod? Qhov ntawd tsis paub tab, txaus luag, thiab zoo li me nyuam yaus. Qhov tseeb tiag, koj zoo tsis tshaj lwm tus ib qho me me li. Qhov ntawd tsuas yog tias koj ua tau raws li cov qauv uas Vajtswv lub tsev cob qhia xwb. Seb koj puas ris tau lub luag hauj lwm no, puas ua tau tes dej num no kom zoo los sis puas ua tau cov lus txib no kom tiav ntawd mas yog lwm yam lawm. Thaum ib tug neeg raug cov kwv tij thiab cov muam xaiv los ua ib tug thawj coj, los sis raug Vajtswv lub tsev txhawb los ua ib qho hauj lwm twg los sis ua ib teg dej num twg, qhov no tsis tau txhais hais tias nws muaj ib lub meej mom los sis muaj ib qho chaw tshwj xeeb, los sis tias qhov tseeb uas nws to taub ntawd tob dua thiab ntau dua li lwm tus lawm—thiab haj yam tsis tau txhais hais tias tus neeg no zwm tau rau Vajtswv, thiab yuav tsis ntxeev siab rau Nws lawm. Muaj tseeb tias, qhov ntawd kuj tsis tau txhais hais tias, nws paub Vajtswv, thiab yog ib tug neeg uas hwm Vajtswv lawm. Qhov tseeb tiag, nws tsis tau ua tiav tej no ib qho li. Qhov kev txhawb thiab cob qhia ntawd tsuas yog kev txhawb thiab cob qhia nyob rau hauv lub ntsiab lus yooj yim xwb, thiab tsis zoo ib yam li qhov nws raug Vajtswv teem tseg ua ntej thiab pom zoo lawm. Nws qhov kev txhawb thiab cob qhia ntawd tsuas txhais hais tias nws raug txhawb lawm, thiab tos ntsoov txoj kev cob qhia xwb. Thiab qhov tshwm sim los thaum kawg ntawm txoj kev cob qhia no yog nyob ntawm qhov seb tus neeg no puas caum qhov tseeb, thiab nyob ntawm qhov seb nws puas muaj peev xwm xaiv txoj kev caum qhov tseeb xwb. Yog li ntawd, thaum ib tug neeg hauv pawg ntseeg raug txhawb thiab cob qhia los ua ib tug thawj coj, nws tsuas yog raug txhawb thiab raug cob qhia raws li lub ntsiab lus yooj yooj yim xwb; qhov ntawd tsis txhais hais tias nws twb mus raws li tus qauv thiab ua tau ib tug thawj coj lawm, tias nws twb muaj peev xwm ua tes hauj lwm ua thawj coj lawm, thiab ua tau hauj lwm tiag tiag—tsis yog li ntawd li. Tib neeg feem coob pom tsis tshab txog tej no, thiab saib cov uas raug txhawb ntawd siab raws li lawv tej kev xav hauv nruab siab xwb. Qhov no yog ua yuam kev lawm. Tsis hais cov neeg uas raug txhawb ntawd ntseeg Vajtswv tau pes tsawg xyoo, lawv puas muaj qhov tseeb qhov muaj tiag tiag? Tsis paub tseeb. Lawv puas ua tau raws li Vajtswv lub tsev tej kev npaj hauj lwm? Tsis paub tseeb. Lawv puas muaj lub siab ris lub luag hauj lwm? Lawv puas muaj lub siab ncaj? Lawv puas tuaj yeem mloog lus? Thaum ntsib teeb meem, lawv puas tuaj yeem nrhiav qhov tseeb? Tag nrho tej no yeej tsis paub li. Cov tib neeg no puas muaj lub siab hwm Vajtswv? Thiab lawv lub siab hwm Vajtswv loj npaum li cas? Thaum lawv ua tej yam lawv puas tuaj yeem tsis ua raws li lawv tus kheej lub siab nyiam? Lawv puas tuaj yeem nrhiav Vajtswv? Nyob rau lub sij hawm uas lawv ua tes hauj lwm thawj coj, lawv puas tuaj yeem los cuag Vajtswv nrhiav Vajtswv tej kev npaj siab tas li? Lawv puas coj tau tib neeg nkag mus rau hauv qhov tseeb qhov muaj tiag? Lawv yeej ua tsis tau tej no li. Lawv tsis tau txais kev cob qhia thiab lawv tsis tau muaj kev ntsib kev pom txaus, yog li ntawd lawv ua tsis tau tej no. Vim li no qhov txhawb thiab cob qhia ib tug neeg tsis tau txhais hais tias nws twb to taub qhov tseeb lawm, thiab haj yam hais tsis tau tias nws twb ua tau tes dej num mus raws li tus qauv lawm. Yog li ntawd lub hom phiaj thiab qhov tseem ceeb ntawm kev txhawb thiab cob qhia ib tug neeg ntawd yog dab tsi? Qhov ntawd yog qhov hais tias tus neeg no raug txhawb, li ib tug tib neeg, kom nws thiaj li xyaum ua, thiab kom nws thiaj li raug ywg dej thiab cob qhia yam tshwj xeeb, ua kom nws to taub qhov tseeb tej hauv paus ntsiab lus, thiab tej hauv paus ntsiab lus, tej hau kev, thiab tej txoj kev ntawm qhov ua ntau yam uas sib txawv thiab daws ntau yam teeb meem, nrog rau qhov yuav saib xyuas thiab daws ntau yam xwm txheej thiab ntau hom neeg uas nws ntsib ntawd kom mus raws li Vajtswv tej kev npaj siab li cas, thiab kom nyob hauv txoj kev uas tiv thaiv Vajtswv lub tsev tej txiaj ntsim. Saib los ntawm tej no, cov neeg muaj peev xwm uas Vajtswv lub tsev txhawb thiab cob qhia ntawd puas muaj peev xwm txaus los ua lawv tes hauj lwm thiab ua lawv tes dej num kom zoo nyob rau thaum raug txhawb thiab raug cob qhia los sis ua ntej raug txhawb thiab raug cob qhia ntawd? Yeej tsis muaj. Yog li ntawd, yeej zam tsis dhau uas nyob rau lub sij hawm cob qhia ntawd, cov neeg no yuav ntsib kev raug ntuas, kev txiav txim thiab kev rau txim, kev qhia tshwm thiab haj tseem yog raug rho tawm; qhov no yog ib txwm xwb, qhov no yog kev cob qhia thiab kev qhia. Tib neeg yuav tsum tsis txhob muaj tej kev cia siab uas siab los sis tej kev cheem tsum uas tsis muaj tiag rau cov uas raug txhawb thiab cob qhia no; qhov ntawd yuav tsis tsim nyog, thiab tsis ncaj ncees rau lawv. Nej saib xyuas tau lawv tes hauj lwm. Yog nej pom teeb meem los sis tej yam uas ua txhaum tej hauv paus ntsiab lus hauv lawv tes hauj lwm, nej tuaj yeem qhia qhov teeb meem ntawd tawm thiab nrhiav qhov tseeb los daws tej teeb meem no. Nej tsis tsim nyog txiav txim, teem txim, tawm tsam, los sis cais lawv, vim lawv tsuas nyob hauv lub sij hawm raug cob qhia xwb, thiab tsis tsim nyog saib lawv li yog cov uas raug ua zoo tiav log, thiab haj yam tsis tsim nyog saib lawv li yog cov uas tsis muaj qhov phem li, los sis li cov uas muaj qhov tseeb qhov muaj tiag lawm. Lawv tsuas nyob rau hauv ib lub sij hawm raug cob qhia zoo ib yam li nej xwb. Qhov txawv ces yog lawv ris tes hauj lwm thiab tej luag hauj lwm ntau dua li cov tib neeg sawv daws xwb. Lawv muaj lub luag hauj lwm thiab txoj num los ua tes hauj lwm ntau dua; lawv yuav tsum them tus nqi ntau dua, tiv kev txom nyem ntau dua, txhawj xeeb ntau dua, daws teeb meem ntau dua, tiv kev cem los ntawm tib neeg ntau dua, thiab muaj tseeb tias lawv kuj yuav tsum siv zog ntau dua thiab—thaum muab piv rau cov tib neeg sawv daws uas ua tes dej num mas—lawv yuav tsum pw tsawg dua me ntsis, xyiv fab rau tej yam zoo tsawg dua me ntsis, thiab tsis hais cov lus tsis muaj qab hau ntau. Qhov no yog qhov tshwj xeeb txog lawv; dhau ntawm qhov no mus, lawv zoo ib yam li lwm tus xwb. Lub ntsiab ntawm qhov Kuv hais li no yog dab tsi? Qhov ntawd yog kom sawv daws paub tias yuav tsum coj kom yog rau ntau hom neeg muaj peev xwm uas Vajtswv lub tsev txhawb thiab cob qhia ntawd, lawv yuav tsum tsis txhob muaj tej kev cheem tsum nruj rau cov neeg no dhau, thiab muaj tseeb tias, lawv yuav tsum tsis txhob muaj qhov kev xam pom uas tsis muaj tiag rau cov neeg no thiab. Qhov uas saib siab thiab qhuas lawv dhau ntawd yog kev ruam xwb; qhov uas muab tej kev cheem tsum nruj dhau rau lawv ntawd mas yog tsis muaj kev hlub thiab tsis muaj tiag. Yog li ntawd txoj kev coj rau lawv uas tsim nyog tshaj plaws yog dab tsi? Yog qhov saib lawv li ib tug tib neeg dog dig, thaum koj muaj ib qho teeb meem uas tim tsum nrhiav, koj sib qhia nrog lawv thiab pab txhawb tus uas ua tsis tau zoo los ntawm qhov lwm tus ua tau zoo. Tsis tas li ntawd, txhua tus muaj lub luag hauj lwm los saib xyuas cov thawj coj thiab cov neeg ua hauj lwm kom pom tias lawv puas ua tes hauj lwm tiag tiag, seb lawv puas muaj peev xwm siv qhov tseeb los daws teeb meem; tej no yog cov qauv thiab tej hauv paus ntsiab lus los ntsuas seb ib tug thawj coj los sis ib tug neeg ua hauj lwm puas mus raws li tus qauv. Yog ib tug thawj coj los sis ib tug neeg ua hauj lwm tuaj yeem saib xyuas thiab daws cov teeb meem dog dig, ces nws tsim nyog rau lub luag hauj lwm lawm. Tiam sis yog nws saib xyuas thiab daws tsis tau cov teeb meem dog dig, ces nws tsis tsim nyog ua ib tug thawj coj los sis ib tug neeg ua hauj lwm, thiab yuav tsum muab nws rho tawm sai li sai tau. Es yuav tsum xaiv lwm tus, thiab tsis txhob ua rau Vajtswv lub tsev tes hauj lwm qeeb. Qhov ua rau Vajtswv lub tsev tes hauj lwm qeeb ntawd yog ua phem rau yus tus kheej thiab lwm tus, qhov ntawd yeej tsis zoo rau leej twg li.

Ib txhia tib neeg raug pawg ntseeg txhawb thiab cob qhia, es tau txais ib lub cib fim zoo los xyaum. Qhov no yog ib yam zoo. Hais tau tias lawv tau txais Vajtswv txoj kev txhawb nqa thiab txoj hmoov hlub. Yog li ntawd, lawv yuav tsum ua lawv tes dej num li cas? Thawj lub hauv paus ntsiab lus uas lawv yuav tsum ua raws mas yog to taub qhov tseeb—thaum lawv tsis tau to taub qhov tseeb ntawd, lawv yuav tsum nrhiav qhov tseeb, thiab yog tom qab lawv tus kheej nrhiav lawm los tseem tsis to taub, ces tuaj yeem nrhiav tus neeg uas to taub qhov tseeb nrog sib qhia thiab nrhiav, qhov no yuav ua rau kev daws teeb meem ntawd sai dua thiab raws sij hawm dua. Yog koj tsuas tsom ntsoov rau qhov siv sij hawm ntau los nyeem Vajtswv cov lus ntawm koj tus kheej, thiab siv sij hawm ntau los ua tib zoo xav txog cov lus no, txhawm rau kom to taub qhov tseeb thiab daws qhov teeb meem, ces qhov no qeeb dhau lawm; raws li lo lus uas hais tias, “Dej nyob deb daws tsis tau kev nqhis ceev.” Thaum hais txog qhov tseeb, yog tias koj xav nce qib sai, ces koj yuav tsum kawm paub sib koom tes kom sib haum xeeb nrog lwm tus, thiab nug cov lus nug ntau ntxiv thiab nrhiav ntau ntxiv. Tsuas yog thaum ntawd xwb mas koj lub neej txoj sia thiaj li yuav loj hlob sai, thiab koj yuav muaj peev xwm daws tau tej teeb meem tam sim ntawd, yam tsis muaj kev ncua rau ob qho no li. Vim koj nyuam qhuav raug txhawb thiab tseem nyob hauv lub sij hawm raug soj ntsuam, thiab tsis to taub qhov tseeb tiag tiag los sis tsis muaj qhov tseeb qhov muaj tiag li—vim koj tseem tsis tau muaj lub siab ntseeg no—tsis txhob xav tias qhov koj raug txhawb ntawd txhais tau hais tias koj muaj qhov tseeb qhov muaj tiag lawm; nws tsis yog li ntawd. Qhov ntawd tsuas yog vim koj muaj lub nra rau tes hauj lwm thiab muaj lub peev xwm ntawm ib tug thawj coj es koj thiaj li raug xaiv los txhawb thiab cob qhia xwb. Koj yuav tsum muaj qhov laj thawj no. Yog hais tias tom qab raug txhawb es los ua ib tug thawj coj los sis ib tug neeg ua hauj lwm lawm, koj pib khav txog koj lub meej mom, thiab ntseeg tias koj yog ib tug neeg uas caum qhov tseeb thiab tias koj muaj qhov tseeb qhov muaj tiag lawm—thiab yog hais tias, txawm cov kwv tij thiab cov muam muaj teeb meem dab tsi los xij, koj ua txuj tias koj to taub, thiab tias koj yog neeg ntawm sab ntsujplig—ces qhov no yog ib txoj kev ruam, thiab nws zoo ib yam li cov Falixais uas ntsej muag ncaj siab nkhaus. Koj yuav tsum hais lus thiab ua tej yam raws li qhov tseeb tiag thiab coj ncaj. Thaum koj tsis to taub, koj nug tau lwm tus los sis nrhiav kev qhia los ntawm tus Nyob Saud—tej no tsis muaj kev poob ntsej muag dab tsi li. Tab txawm koj tsis nug los, tus Nyob Saud yeej paub koj lub siab ntseeg tseeb tiag, thiab paub tias koj tsis muaj qhov tseeb qhov muaj tiag. Kev nrhiav thiab kev sib qhia ntawd yog yam uas koj tsim nyog ua; qhov no yog qhov laj thawj uas tsim nyog muaj hauv kev ua neeg ib txwm, thiab yog lub hauv paus ntsiab lus uas cov thawj coj thiab cov neeg ua hauj lwm yuav tsum ua raws. Qhov ntawd tsis yog ib yam uas poob ntsej muag. Yog koj xav tias thaum koj ua ib tug thawj coj lawm es tseem tsis to taub tej hauv paus ntsiab lus, los sis pheej nug lwm tus los sis pheej nug tus Nyob Saud tas li ntawd yog ib yam uas poob ntsej muag, es koj ntshai tsam lwm tus saib tsis taus koj, ces koj txawm ua txuj, ua txuj tias koj to taub txhua yam, paub txhua yam, muaj lub peev xwm ua hauj lwm, ua tau txhua yam hauj lwm hauv pawg ntseeg, thiab tsis tim tsum leej twg ceeb toom los sis nrog koj sib qhia, los sis tsis tim tsum leej twg pub los sis txhawb koj, ces qhov no phom sij heev, thiab koj khav theeb thiab qhuas tias yus tus kheej coj ncaj dhau lawm, tsis muaj laj thawj dhau lawm. Koj twb tsis paub tias koj tus kheej zoo li cas—qhov no tsis ua rau koj yog ib tug neeg ruam feeb tsis meej lod? Cov tib neeg zoo li no yeej tsis mus raws li cov qauv uas Vajtswv lub tsev txhawb thiab cob qhia, thiab tsis ntxov los lig lawv yuav raug rho tawm thiab tshem tawm mus. Ces yog li ntawd, txhua tus thawj coj los sis neeg ua hauj lwm uas nyuam qhuav raug txhawb mas yuav tsum paub meej tias lawv tus kheej tsis muaj qhov tseeb qhov muaj tiag, lawv yuav tsum muaj qhov kev paub txog tus kheej li no. Tam sim no koj ua ib tug thawj coj los sis ib tug neeg ua hauj lwm tsis yog Vajtswv teeb tsa koj, tiam sis yog lwm cov thawj coj thiab cov neeg ua hauj lwm txhawb koj, los sis cov neeg Vajtswv xaiv tseg ntawd xaiv koj xwb; qhov no txhais tsis tau hais tias koj muaj qhov tseeb qhov muaj tiag thiab lub siab ntseeg tiag tiag lawm. Thaum koj to taub qhov no lawm, koj yuav muaj laj thawj me ntsis, uas yog qhov laj thawj uas cov thawj coj thiab cov neeg ua hauj lwm yuav tsum muaj. Tam sim no nej puas to taub lawm? (To taub lawm.) Yog li ntawd, nej yuav tsum ua tes hauj lwm li cas tiag? Nej yuav tsum muab kev sib koom tes kom sib haum xeeb ntawd coj los xyaum ua li cas? Thaum nej ntsib tej teeb meem nej yuav tsum nrhiav qhov tseeb los daws tej teeb meem ntawd li cas? Yuav tsum tau to taub tej no. Yog nthuav tej moj yam qias vuab tsuab tawm, ces nrhiav qhov tseeb thiab daws kom sai li sai tau. Yog tsis daws kom raws sij hawm thiab cuam tshuam rau tes hauj lwm, ces qhov no yog ib qho teeb meem. Yog koj tsis paub zoo txog ib qho kev txawj qib siab, ces koj yuav tsum kawm yam tsis ncua sij hawm. Vim qee cov dej num muaj feem xyuam txog kev paub qib siab, yog koj tsuas to taub qhov tseeb yam tsis nkag siab kev paub qib siab li, ces qhov ntawd yuav cuam tshuam rau koj tes hauj lwm cov txiaj ntsig thiab. Yam tsawg kawg mas, koj yuav tsum nkag siab thiab to taub qee qhov kev paub qib siab uas yog hauv paus, kom koj thiaj li ua tau muaj txiaj ntsig hauv kev taug qab thiab coj qhia tib neeg tes hauj lwm. Yog koj tsuas paub zoo txog ib qho kev ua hauj lwm xwb tiam sis tsis to taub qhov tseeb, ces yeej yuav muaj qhov tu ncua nyob hauv koj tes hauj lwm ib yam nkaus thiab, yog li ntawd koj yuav tsum caum qhov tseeb thiab sib koom tes nrog cov tib neeg uas to taub qhov tseeb kom thiaj li ua tau koj tes dej num zoo. Tsuas yog vim koj muaj kev paub zoo txog tej kev txawj qib siab los sis ib qho kev paub twg, qhov ntawd tsis tau txhais hais tias koj tuaj yeem ua tej yam raws li tej hauv paus ntsiab lus, yog li ntawd thiaj li tseem ceeb heev uas yuav tsum nrhiav kev sib qhia nrog cov tib neeg uas to taub qhov tseeb—qhov no yog ib lub hauv paus ntsiab lus uas nej yuav tsum ua raws. Txawm nej ua dab tsi los xij, nej yuav tsum tsis txhob ua txuj. Koj nyob hauv lub sij hawm xyaum thiab cob qhia, thiab koj muaj tus moj yam qias vuab tsuab, thiab koj tsis to taub qhov tseeb ib qho li. Qhia Kuv seb, Vajtswv puas paub txog tej no? (Paub.) Yog li ntawd yog koj ua txuj puas yog koj zoo li neeg ruam? Nej puas xav ua cov neeg ruam? (Peb tsis xav.) Yog nej tsis xav ua cov neeg ruam, nej yuav tsum ua cov neeg zoo li cas? Ua cov neeg uas muaj laj thawj, cov neeg uas tuaj yeem txo hwj chim nrhiav qhov tseeb thiab tuaj yeem lees txais qhov tseeb. Tsis txhob ua txuj, tsis txhob ua cov Falixais uas ntsej muag ncaj siab nkhaus. Yam uas koj paub tsuas yog qee qhov kev paub qib siab xwb, qhov ntawd tsis yog qhov tseeb tej hauv paus ntsiab lus. Koj yuav tsum nrhiav ib txoj kev los siv tej uas koj ua tau zoo qib siab ntawd kom tsim nyog thiab muab koj txoj kev paub thiab txoj kev kawm uas tau txais los siv kom raws li qhov to taub qhov tseeb tej hauv paus ntsiab lus. Qhov no tsis yog ib lub hauv paus ntsiab lus lod? Qhov no tsis yog ib txoj kev xyaum ua raws lod? Thaum koj kawm paub ua li no lawm, ces koj yuav muaj ib txoj kev ua raws thiab koj yuav nkag tau mus rau hauv qhov tseeb qhov muaj tiag lawm. Txawm koj ua dab tsi los xij, tsis txhob tawv ncauj, thiab tsis txhob ua txuj. Qhov tawv ncauj thiab ua txuj ntawd tsis yog ib txoj kev ua tej yam uas tsim nyog. Tiam sis qhov ntawd yog txoj kev ua tej yam uas ruam tshaj plaws. Cov tib neeg uas ua neej raws li lawv tej moj yam qias vuab tsuab ntawd mas puav leej yog cov tib neeg uas ruam tshaj plaws. Tsuas yog cov uas nrhiav qhov tseeb thiab saib xyuas tej yam raws li qhov tseeb tej hauv paus ntsiab lus xwb mas thiaj li yog cov tib neeg uas ntse tshaj plaws.

Los ntawm qhov kev qhia no, nej puas muaj txoj kev to taub thiab kev xam pom uas yog txog qhov Vajtswv lub tsev txhawb thiab cob qhia ntau hom neeg uas muaj peev xwm lawm? (Muaj lawm.) Tam sim no nej muaj qhov kev xam pom uas yog txog qhov no lawm, nej puas tuaj yeem coj kom yog rau cov tib neeg no? Nej yuav tsum coj kom yog rau lawv tej qhov zoo, thiab rau tej qhov tu ncua thiab tej qhov muaj tsis txaus uas lawv muaj nyob hauv lawv txoj kev ua neeg, tes hauj lwm, kev txawj qib siab, thiab lwm yam ntxiv—tag nrho tej no yuav tsum coj kom yog rau. Tsis tas li ntawd, tsis hais nej raug txhawb thiab cob qhia los ua cov thawj coj los sis cov neeg ua hauj lwm, los sis yog cov tib neeg uas muaj peev xwm nyob hauv ntau yam kev txawj qib siab los xij, nej puav leej yog tib neeg dog dig, puav leej raug Ntxwgnyoog muab ua qias vuab tsuab lawm, thiab tsis muaj ib tug ntawm nej uas to taub qhov tseeb li. Yog li ntawd, nej leej twg los yuav tsum tsis txhob ua txuj los sis zais nej tus kheej; tiam sis nej yuav tsum kawm qhib nej lub siab hauv kev sib qhia. Yog koj tsis to taub, ces lees hais tias koj tsis to taub. Yog koj tsis paub ua ib yam dab tsi, ces lees hais tias koj tsis paub ua. Txawm muaj teeb meem los sis kev nyuaj dab tsi tshwm tuaj los xij, txhua tus yuav tsum sib qhia thiab nrhiav qhov tseeb ua ke kom nrhiav tau txoj hau kev daws. Nyob ntawm qhov tseeb hauv ntej mas txhua tus tib neeg zoo li ib tug me nyuam mos, txhua tus tib neeg txom nyem thiab txaus khuv leej thiab tu ncua tag nrho li. Yam uas tib neeg yuav tsum ua yog zwm rau qhov tseeb, muaj lub siab txo hwj chim, ntshaw, nrhiav thiab lees txais qhov tseeb, es tom qab ntawd xyaum ua raws qhov tseeb thiab ua kom tiav qhov zwm rau Vajtswv. Los ntawm kev ua li no, tib neeg thiaj li nkag tau mus rau hauv qhov tseeb qhov muaj tiag ntawm Vajtswv cov lus thaum lawv ua lawv tej dej num thiab nyob hauv lawv lub neej tiag tiag. Nyob ntawm qhov tseeb hauv ntej mas sawv daws puav leej sib txig sib luag. Cov uas raug txhawb thiab cob qhia ntawd yeej tsis zoo tshaj lwm tus npaum cas. Txhua tus tau ntsib tau pom Vajtswv tes hauj lwm ntev yuav luag ib yam. Cov uas tsis raug txhawb los sis cob qhia los kuj yuav tsum caum qhov tseeb thaum ua lawv tej dej num thiab. Tsis muaj leej twg tshem tau lwm tus txoj cai uas caum qhov tseeb. Ib txhia tib neeg nquag hauv txoj kev caum qhov tseeb dua thiab muaj peev xwm me ntsis, yog li ntawd lawv thiaj li raug txhawb thiab cob qhia. Qhov no yog kev tim tsum ntawm Vajtswv lub tsev tes hauj lwm. Yog li ntawd vim li cas Vajtswv lub tsev thiaj li muaj tej hauv paus ntsiab lus zoo li no rau qhov kev txhawb thiab siv tib neeg? Vim muaj qhov sib txawv ntawm tib neeg lub peev xwm thiab tus yam ntxwv, thiab txhua tus xaiv txoj kev taug uas sib txawv, qhov no ua rau muaj qhov ua tau los uas sib txawv nyob rau hauv tib neeg txoj kev ntseeg Vajtswv. Cov uas caum qhov tseeb ces raug cawm thiab dhau los ua cov neeg ntawm lub nceeg vaj, hos cov uas tsis lees txais qhov tseeb kiag li, uas tsis ua siab ncaj hauv kev ua lawv tes dej num ntawd, ces raug muab tshem tawm mus. Vajtswv lub tsev cob qhia thiab siv tib neeg raws li seb lawv puas caum qhov tseeb, thiab seb lawv puas ua siab ncaj hauv kev ua lawv tes dej num. Puas muaj qhov sib txawv ntawm qib siab los sis qib qis ntawm ntau hom tib neeg nyob hauv Vajtswv lub tsev? Rau lub sij hawm tam sim no, tsis muaj qib siab los sis qib qis thaum hais txog ntau hom tib neeg tej hauj lwm, qhov muaj nqis, lub meej mom, los sis qhov chaw sawv. Yam tsawg kawg nyob rau lub sij hawm thaum Vajtswv ua hauj lwm los cawm thiab coj tib neeg kev no, tsis muaj qhov sib txawv ntawm ntau hom tib neeg tej qib, tej hauj lwm, qhov muaj nqis, los sis lub meej mom li. Tej yam uas txawv tsuas yog nyob hauv txoj kev faib hauj lwm thiab hom dej num uas ua xwb. Tseeb tiag, nyob rau lub sij hawm no, tshwj xeeb mas muaj ib txhia tib neeg raug txhawb thiab cob qhia los ua qee txoj hauj lwm tshwj xeeb, hos ib txhia tib neeg mas tsis tau txais cov cib fim zoo li no vim ntau qhov laj thawj xws li teeb meem ntawm lawv lub peev xwm los sis qhov xwm txheej ntawm tsev neeg. Tiam sis puas yog Vajtswv tsis cawm cov uas tsis tau txais tej cib fim zoo li no? Tsis yog li ntawd. Puas yog qhov muaj nqis thiab txoj hauj lwm ntawm lawv ntawd qis dua lwm tus li? Tsis yog. Nyob ntawm qhov tseeb hauv ntej mas txhua tus yeej sib txig sib luag, txhua tus muaj lub cib fim caum qhov tseeb thiab tau qhov tseeb, thiab Vajtswv coj ncaj ncees thiab tsim nyog rau txhua tus. Thaum twg thiaj li muaj qhov sib txawv uas pom tseeb hauv tib neeg tej hauj lwm, qhov muaj nqis, thiab lub meej mom? Qhov ntawd yog thaum tib neeg mus txog qhov kawg ntawm lawv txoj kev, thiab Vajtswv tes hauj lwm xaus lawm, thiab thaum kawg muaj ib qho kev txiav txim rau cov cwj pwm thiab cov kev xam pom uas txhua tus tau qhia tawm hauv txheej txheem uas caum txoj kev cawm dim thiab thaum ua lawv tes dej num, nrog rau lawv ntau yam kev qhia tshwm uas pom tau meej thiab tej cwj pwm uas muaj rau Vajtswv—qhov ntawd yog, thaum muaj ib qho ntaub ntawv teev tseg tag nrho nyob rau hauv Vajtswv phau ntawv—nyob rau lub sij hawm ntawd, vim tib neeg qhov kawg thiab tej hau kev kawg ntawd yuav sib txawv, ces kuj yuav muaj qhov sib txawv nyob rau hauv lawv qhov muaj nqis, tej hauj lwm, thiab lub meej mom. Tsuas yog thaum ntawd xwb mas thiaj li pom tau thiab kwv yees paub tseeb tau txog tej no, hos tam sim no mas txhua tus zoo ib yam xwb. Nej puas to taub lawm? Nej puas tos ntsoov hnub ntawd? Puas yog nej tos ntsoov thiab hos ntshai nrog thiab? Yam uas nej tos ntsoov yog nyob rau hnub ntawd thaum kawg yuav muaj ib qho tshwm sim tau los, thiab txawm muaj txhua yam kev nyuaj los xij thaum kawg nej yuav mus txog hnub ntawd lawm; thiab yam uas nej ntshai yog tsam nej yuav taug tsis tau txoj kev kom zoo, thiab nej yuav ntog thiab ua tsis tiav rau tog kev, thiab qhov ua tau los thaum kawg ntawd yuav tsis ua rau txaus siab, es phem tshaj li qhov nej xav thiab cia siab—qhov ntawd yuav tu siab, mob siab, thiab tag kev cia siab npaum li cas! Tsis txhob xav mus deb dhau, qhov xav mus deb dhau ntawd tsis mus raws li qhov muaj tiag. Xub saib yam uas nyob ntawm koj xub ntiag, taug txoj kev hauv koj qab xib taw ntawd mus kom zoo, ua tes hauj lwm hauv txhais tes kom zoo, thiab muab tej dej num thiab tej luag hauj lwm uas Vajtswv tau tso rau koj ntawd ua kom tiav. Qhov no yog qhov uas tsim nyog tshaj plaws thiab tseem ceeb tshaj plaws. To taub qhov tseeb thiab tej hauv paus ntsiab lus rau txoj kev ua nej tes dej num uas tsim nyog to taub tam sim no, thiab sib qhia txog tej ntawd kom txog ntua rau thaum pom tej ntawd tseeb tseeb lawm—kom nej thiaj li paub meej meej hauv nej lub hlwb, thiab nej thiaj li paub kom meej thiab kom yog hais tias tej hauv paus ntsiab lus yog dab tsi nyob rau hauv txhua yam uas nej ua—thiab paub tseeb tias nej tsis txhob ua txhaum tej hauv paus ntsiab lus, los sis mus yuam kev ntawm tej ntawd, los sis ua rau muaj kev tab kaum los sis kev cuam tshuam, los sis ua tej yam uas ua rau Vajtswv lub tsev tej txiaj ntsim puas tsuaj—tag nrho tej no yog yam uas nej yuav tsum nkag mus rau hauv tam sim no. Peb tsis tas yuav tham txog yam dab tsi uas nyob deb tom ntej, thiab nej los tsis tas yuav nug los sis xav txog thiab. Qhov xav deb dhau ntawd tsis muaj txiaj ntsig—qhov ntawd tsis yog yam uas nej tsim nyog xav txog. Tej zaum ib txhia yuav nug hais tias: “Vim li cas peb tsis tsim nyog xav txog qhov ntawd? Tam sim no xwm txheej ntawm kev puas tsuaj loj npaum li no, puas yog lub sij hawm uas peb tsim nyog xav txog tej yam zoo li no lawm?” Puas yog lub sij hawm? Qhov uas kev puas tsuaj loj ntawd puas cuam tshuam koj txoj kev nkag mus rau hauv qhov tseeb? (Tsis cuam tshuam.) Qhov xwm txheej ntawm kev puas tsuaj loj npaum li no, tiam sis thaum twg Kuv tau tuav kev sib txoos ua ke los sis tham tej lus qhuab qhia uas tsom ntsoov txog kev puas tsuaj? Kuv yeej tsis tau tsom ntsoov rau qhov teeb meem ntawm kev puas tsuaj, Kuv tsuas pheej tham qhov tseeb, kom nej thiaj li to taub qhov tseeb thiab to taub Vajtswv tej kev npaj siab, thiab kom nej to taub tias yuav ua nej tes dej num kom zoo li cas thiab yuav nkag mus rau hauv qhov tseeb qhov muaj tiag li cas. Niaj hnub no, qee leej tseem tsis to taub tias qhov tseeb qhov muaj tiag yog dab tsi thiab cov kev qhuab qhia yog dab tsi. Lawv tsuas hais me ntsis cov lus thiab cov kev qhuab qhia qub qub thiab tej lus qhuav txhua hnub es tseem xav tias lawv tau nkag mus rau hauv qhov tseeb qhov muaj tiag lawm. Kuv pab lawv txhawj, tiam sis lawv tsis txhawj txog lawv tus kheej li. Lawv tseem xav txog tej yam uas nyob deb yav tom ntej—qhov xav txog tej yam ntawd tsis mus raws li qhov muaj tiag li.

Lub hom phiaj ntawm qhov txhawb thiab cob qhia ntau hom neeg uas muaj peev xwm ntawd tsis yog hloov lawv los ua cov neeg uas nquag, thiab tsis yog npaj rau lawv kom dhau los ua ib tug neeg tseem ceeb nyob rau yav tom ntej, tiam sis yog kom ib txhia uas thaum muab sib piv es yog cov uas caum qhov tseeb dua thiab muaj raws li cov qauv ntawm kev txhawb thiab cob qhia kom lawv muaj lub cib fim los xyaum nyob hauv tej xwm txheej uas tsim nyog thiab hauv qhov uas zoo dua. Qhov tseem ceeb tshaj plaws yog kom lawv to taub tau Vajtswv cov lus, to taub qhov tseeb thiab nkag mus rau hauv qhov tseeb qhov muaj tiag. Qhov no tsis yog yam uas tib neeg yuav tsum ua kom tiav los ntawm kev ntseeg Vajtswv lod? Qhov no tsis yog yam uas tib neeg yuav tsum tau los ntawm kev ntseeg Vajtswv lod? Txhawm rau kom nkag mus rau hauv qhov tseeb qhov muaj tiag, yam tseem ceeb tshaj plaws uas nej yuav tsum caum tam sim no yog dab tsi? Nej puas muaj tej kev npaj los sis tej kauj ruam rau kev ua qhov no? Kuv yuav qhia nej txog ib txoj hau kev zoo, uas yooj yim, tsis nyuaj thiab sai. Muab hais yooj yim tias, qhov nkag mus rau hauv qhov tseeb qhov muaj tiag ntawd mas yog qhov xyaum ua raws li qhov tseeb tiag tiag. Kom xyaum ua tau raws li qhov tseeb mas, ua ntej tshaj plaws yuav tsum daws yus tej moj yam qias vuab tsuab. Qhov pib daws tej moj yam qias vuab tsuab uas sai tshaj plaws yog dab tsi? Txoj kev uas yooj yim tshaj plaws, sai tshaj plaws thiab tsis nyuaj tshaj plaws rau nej yog xub daws qhov teeb meem ntawm qhov kev ua nej tes dej num uas ua dog ua dig, daws nej tej moj yam qias vuab tsuab ib kauj ruam zuj zus. Nej yuav siv sij hawm ntev npaum li cas rau kev daws qhov teeb meem no? Nej puas muaj ib qho kev npaj? Tib neeg feem coob tsis muaj kev npaj, lawv tsuas pheej xav hauv lawv lub hlwb xwb, yam tsis paub tias thaum twg thiaj li pib ua tiag tiag. Txawm lawv paub tias lawv ua dog ua dig los xij, lawv yeej tsis pib daws qhov ntawd thiab tsis muaj ib txoj kev daws meej meej li. Nyob hauv kev ua yus tes dej num es tub nkeeg, tsis ua tib zoo ua, tsis ris lub luag hauj lwm, thiab tsis mob siab ua—tej no puav leej yog tej kev qhia tshwm uas pom tau meej ntawm kev ua dog ua dig. Thawj kauj ruam yog daws qhov teeb meem ntawm kev ua dog ua dig. Kauj ruam ob yog daws qhov teeb meem ntawm kev ua raws li tus kheej lub siab nyiam. Hais txog lwm yam xws li qee zaus hais lus tsis ncaj, los sis nthuav tawm tej moj yam uas txawj dag los sis tej moj yam khav theeb ntawd, ces tsis txhob maj mus quav ntsej txog tej ntawd lub sij hawm no. Qhov daws kev ua dog ua dig thiab kev ua raws li tus kheej lub siab nyiam ua ntej tsis yog muaj tiag dua thiab muaj txiaj ntsig dua lod? Ob qho teeb meem no puas yog yooj yim pom tau dua? Tej ntawd tsis yog yooj yim daws lod? (Yog.) Koj puas paub thaum koj ua dog ua dig? Koj puas paub thaum koj tab tom xav tub nkeeg? Koj puas paub thaum koj tab tom xav txog qhov ua tej yam dag ntxias los sis npaj tswv yim phem thiab ua rau koj tus kheej tau txiaj ntsim los ntawm txoj kev dag ntxias ntawd? (Paub.) Yog koj paub, ces qhov ntawd yooj yim daws. Pib los ntawm kev daws tej teeb meem uas koj pom tau yooj yim thiab koj paub hauv koj lub siab. Qhov ua yus tes dej num ua dog ua dig ntawd mas yog ib qho teeb meem uas pom tseeb heev thiab pom tas li, tiam sis nws kuj yog ib qho tawv heev uas nyuaj daws tiag tiag li. Thaum ua ib teg dej num, yus yuav tsum kawm kom paub mob siab, ua nruj, ua tib zoo ua thiab ris lub luag hauj lwm, thiab ua kom ruaj khov, qhov ntawd yog, ua ib kauj ruam zuj zus. Yus yuav tsum siv tag nrho yus lub zog los ua tes dej num ntawd kom zoo, mus txog ntua thaum yus txaus siab rau qhov yus tau ua lawm ntawd. Yog yus tsis to taub qhov tseeb, ces yuav tsum nrhiav tej hauv paus ntsiab lus, es ua raws li tej hauv paus ntsiab lus ntawd thiab ua raws li Vajtswv tej kev cheem tsum; yuav tsum txaus siab siv zog ntau ntxiv los ua yus tes dej num kom zoo, thiab tsis txhob ua yam ua dog ua dig li. Tsuas yog xyaum ua raws li no xwb mas yus thiaj li hnov muaj kev kaj siab hauv yus lub siab, yam tsis muaj lub siab txawj xav tias tim yus tus kheej. Qhov ua dog ua dig ntawd puas yooj yim daws? Tsuav koj muaj lub siab txawj xav thiab laj thawj xwb, ces koj tuaj yeem daws tau. Ua ntej, koj yuav tsum thov Vajtswv tias: “Vajtswv, kuv tab tom pib ua kuv tes dej num. Yog kuv ua dog ua dig, ces thov kom Koj qhuab ntuas kuv thiab cem kuv nyob hauv kuv lub siab. Thov kom Koj coj kuv ua kuv tes dej num kom zoo thiab tsis txhob ua dog ua dig.” Xyaum ua li no txhua hnub thiab saib seb yuav siv sij hawm ntev npaum li cas thiaj li daws tau qhov teeb meem ntawm koj kev ua dog ua dig, kom koj tej yam ntxwv uas ua dog ua dig thiaj li tsawg zuj zus, kom tej yam dub tsuas hauv kev ua koj tes dej num thiaj li tsawg zuj zus, thiab nyob hauv kev ua koj tes dej num es cov txiaj ntsig tiag tiag thiaj li zoo tuaj thiab kev ua tau zoo ntawd thiaj li nce siab tuaj ntxiv. Qhov ua koj tes dej num yam tsis ua dog ua dig—qhov no puas ua tau tiav los ntawm kev vam khom koj tus kheej xwb? Thaum koj ua dog ua dig, koj puas tswj tau qhov ntawd? (Tsis yooj yim tswj.) Ces qhov ntawd nyuaj lawm. Yog nej tswj qhov no nyuaj tiag tiag, ces nej muaj teeb meem loj lawm! Yog li ntawd, tej yam twg uas nej ua tau yam tsis ua dog ua dig? Ib txhia tib neeg mas xaiv noj xaiv haus heev; yog ib pluag zaub mov twg tsis raug ncauj xwb mas, lawv yuav tsis zoo siab tag nrho hnub ntawd. Ib txhia poj niam nyiam tu cev thiab pleev ntsej muag; tab txawm ib txoj plaub hau me me xwb los twb tsis cia dhau li. Ib txhia tib neeg mas txawj ua lag luam; lawv ua tib zoo xam txog txhua lub nyiaj xees. Yog nej muaj hom cwj pwm uas mob siab li no, ces nej zam tau qhov ua dog ua dig. Xub daws qhov teeb meem ntawm kev ua dog ua dig ua ntej, tom qab ntawd mam li daws qhov teeb meem ntawm kev ua raws li nej lub siab nyiam. Qhov ua raws li yus lub siab nyiam ntawd mas yog ib qho teeb meem uas pom muaj tas li, thiab kuj yog ib qho uas tib neeg pom tau yooj yim nyob hauv lawv tus kheej thiab. Yog muaj ib qho thim xav txog tus kheej me ntsis no, yus tuaj yeem paub tias yus ua raws li yus lub siab nyiam xwb, uas tsis mus raws li qhov tseeb tej hauv paus ntsiab lus lawm. Tej teeb meem uas tib neeg paub tau ntawd mas yooj yim daws. Nej xub daws ob qho teeb meem no ua ntej, ib qho yog qhov teeb meem ntawm kev ua dog ua dig thiab lwm qhov yog kev ua raws li nej lub siab nyiam. Siv zog kom tau txiaj ntsig hauv ib los sis ob xyoos, kom tsis txhob ua dog ua dig, los sis tsis txhob ua raws li nej lub siab nyiam los sis tsis muaj tej yam dub tsuas ntawm nej lub siab nyiam nyob hauv tej yam uas nej ua. Thaum daws tau ob qho teeb meem no lawm, ces nej yuav nyob tsis deb ntawm qhov ua tau nej tes dej num mus raws li tus qauv lawm. Thiab yog nej daws tsis tau tej teeb meem ntawd, ces nej tseem nyob deb ntawm qhov zwm rau Vajtswv los sis ua tib zoo xav txog Nws tej kev npaj siab—nej yeej tseem tsis tau pib paub txog qhov no hlo li.

Peb nyuam qhuav sib qhia txog cov qauv thiab cov hom phiaj ntawm kev txhawb thiab cob qhia ntau hom neeg uas muaj peev xwm uas mus raws li tus qauv, nrog rau txoj kev to taub thiab kev xam pom uas tsim nyog muaj uas hais txog qhov Vajtswv lub tsev txhawb thiab cob qhia ntau hom neeg uas muaj peev xwm. Tseem muaj lwm kis uas yog tus cwj pwm thiab txoj kev coj uas tsim nyog muaj rau ntau hom neeg muaj peev xwm uas raug txhawb thiab cob qhia ntawd. Tej no yog qee qhov teeb meem uas tsim nyog qhia hauv yam rau. Yog li ntawd, ntxiv no, tsom ntsoov rau yam rau, cia peb qhia tshwm thiab soj ntsuam seb cov thawj coj cuav ua tes hauj lwm txhawb thiab cob qhia ntau hom neeg uas muaj peev xwm ntawd li cas. Qhov no yog lub ntsiab lus tseem ceeb uas peb yuav sib qhia.

Tej Cwj Pwm thiab Tej Kev Qhia Tshwm Uas Pom Tau Meej ntawm Cov Thawj Coj Cuav Hais Txog Kev Txhawb thiab Cob Qhia Ntau Hom Neeg Uas Muaj Peev Xwm

Cov thawj coj cuav tsis to taub qhov tseeb thiab tsis nrhiav qhov tseeb. Yog li ntawd, hais txog tes hauj lwm tseem ceeb ntawm kev txhawb thiab cob qhia ntau hom neeg uas muaj peev xwm uas mus raws tus qauv hauv Vajtswv lub tsev ntawd, lawv kuj ua ntxhov quav niab, ua rau puas tag, thiab ua tsis tau raws li tej kev cheem tsum ntawm Vajtswv lub tsev li. Vim lawv tsis to taub cov qauv, haj yam tsis to taub Vajtswv tej kev npaj siab uas hais txog qhov txhawb thiab cob qhia ntau hom neeg uas muaj peev xwm uas mus raws li tus qauv, thiab lawv tsis to taub qhov tseem ceeb ntawm kev txhawb thiab cob qhia ntau hom neeg uas muaj peev xwm uas mus raws li tus qauv, ces qhov ntawd nyuaj heev rau lawv ua tes hauj lwm no kom mus raws li tus qauv thiab muaj hauv paus ntsiab lus. Ntau hom neeg “uas muaj peev xwm” uas cov thawj coj cuav cob qhia thaum ua lawv tes hauj lwm ntawd mas sib xyaws pes ntxaws ua ke. Tsis yog txhawb thiab cob qhia cov neeg uas muaj peev xwm uas mus raws li tus qauv, tiam sis cov thawj coj cuav txhawb cov neeg uas yeej tsis tsim nyog raug txhawb thiab cob qhia ntawd los ua cov thawj coj los sis cov neeg ua hauj lwm, thiab cia cov tib neeg no noj nyob hauv pawg ntseeg thiab nkim Vajtswv cov khoom fij. Cov thawj coj cuav puav leej ua tej yam zoo li no, ua rau ib txhia tib neeg uas caum qhov tseeb thiab paub txog kev ncaj ncees raug tsuj rau hauv qab xib taws es tsis raug txhawb thiab siv. Tiam sis, cov uas tsis muaj qab hau ntawd dhau los ua cov uas hu ua neeg muaj peev xwm hauv cov thawj coj cuav no ob lub qhov muag, thiab raug txhawb thiab cob qhia. Yog li ntawd tej kev qhia tshwm uas pom tau meej ntawm cov thawj coj cuav thaum ua tes hauj lwm no yog dab tsi? Piv txwv hais tias, vim qhov kev tim tsum ntawm tes hauj lwm, Vajtswv lub tsev yuav tsum nrhiav qee leej los leg cov hauj lwm sab nraud. Yog li ntawd, yuav tsum nrhiav cov neeg zoo li cas? Kuv nyuam qhuav teev ob peb yam qauv, uas yog muaj lub peev xwm ua hauj lwm, ua tau tej dej num raws li tej hauv paus ntsiab lus uas Vajtswv lub tsev cheem tsum, thiab tuaj yeem tiv thaiv Vajtswv lub tsev tej txiaj ntsim. Cov thawj coj cuav puas paub tej hauv paus ntsiab lus no? Pom tseeb tias lawv tsis paub, yog li ntawd lawv nrhiav tib neeg los leg cov hauj lwm sab nraud li cas? Lawv xav hauv lawv tus kheej lub siab tias: “Leej twg thiaj li leg tau cov hauj lwm sab nraud? Muaj ib tug muam uas ntse thiab teb rov qab sai, txawj hais lus thiab paub tias yuav saib xyuas tib neeg li cas. Nws ob lub qhov muag xam mus xam los thaum nws hais lus, thiab cov tib neeg dog dig yeej paub tsis tshab nws li. Nws yuav tsis tshua haum los ua ib tug thawj coj pawg ntseeg, tiam sis nws yuav ntse heev rau qhov kev saib xyuas tej hauj lwm sab nraud, yog li ntawd kuv yuav xaiv nws. Tsuas yog tias nws qib ntawm txoj kev kawm ntawv ntawd qis me ntsis xwb, kuv thiaj li txhawj tsam cov uas yeej ib txwm tsis ntseeg ntawd yuav saib tsis taus nws, yog li ntawd kuv yuav nrhiav ib tug uas kawm tiav qib siab los—uas yog tus thawj tswj hwm ntawm cov tub kawm ntawv lub koom haum—los koom tes nrog nws. Tus neeg no ntse dua tiam sis muaj kev ntsib kev pom hauv lub zej zog tsawg thiab tau pom lub ntiaj teb tsawg, yog li ntawd nws thiaj li kawm tau los ntawm tus koom tes nrog nws. Ntawm ob tug neeg no, ib tug muaj ib qib ntawm txoj kev kawm ntawv qis hos lwm tus kawm ntawv siab, ib tug muaj kev ntsib kev pom hauv lub zej zog hos lwm tus tsis muaj—nkawd ob leeg haum los koom tes ua ke, puas yog?” Ib tug hais lus npliag thiab meej, ntse, thiab yog ib tug neeg paub hais lus nrog lwm tus heev; thaum twg nws nrog cov uas yeej ib txwm tsis ntseeg sib tham, lawv yeej qhia tsis tau tias nws yog ib tug ntseeg li. Lwm tus mas kawm ntawv siab thiab muaj meej mom hauv zej zog; thaum twg nws nrog cov uas yeej ib txwm tsis ntseeg sib tham, lawv tsis saib tsis taus nws. Nej xav li cas txog ob lub hauv paus ntsiab lus no uas cov thawj coj cuav siv xaiv tib neeg? Cov thawj coj cuav ntseeg tias tsuav yog ib tug neeg txawj hais lus, ntse, thiab teb rov qab sai, ces nws saib xyuas tau cov hauj lwm dav dav rau Vajtswv lub tsev. Qhov no puas yog ib txoj kev xaiv tib neeg uas tsim nyog? (Tsis yog.) Qhov ntawd tsis tsim nyog li cas? (Cov neeg zoo li no feem ntau txawj xam heev; txawm lawv siv tau lub tswv yim rau kev ua neej hauv ntiaj teb nrog lwm tus, thiab paub tias yuav saib xyuas tib neeg li cas los xij, tej zaum lawv yuav tiv thaiv tsis tau Vajtswv lub tsev tej txiaj ntsim.) Yog lawm. Qhov tseem ceeb tshaj plaws ces yog txawm ib tug neeg twg saib xyuas cov hauj lwm dab tsi rau Vajtswv lub tsev, yam tsawg kawg mas nws yuav tsum ncaj ncees thiab tuaj yeem tiv thaiv Vajtswv lub tsev tej txiaj ntsim. Qhov hais lus qab zib thiab tuaj yeem hais tau kom neeg tuag sawv rov qab los puas txhais tau tias nws tuaj yeem tiv thaiv Vajtswv lub tsev cov txiaj ntsim? Qhov ntse, hais lus npliag thiab meej puas txhais tau tias nws tuaj yeem tiv thaiv Vajtswv lub tsev cov txiaj ntsim? (Tsis tuaj yeem.) Tab txawm nws cog lus los, qhov ntawd tsis muaj qab hau, thiab yog koj hais kom nws ua los yeej tsis muaj qab hau—nws yuav tsum muaj tus yam ntxwv ntawd mas thiaj li tau. Tiam sis cov thawj coj cuav tsis tshuaj xyuas tej no, lawv tsuas saib seb leej twg muaj kev ntsib kev pom hauv lub zej zog, leej twg txawj xam, teb rov qab sai, hais lus npliag thiab meej, leej twg paub yoog raws qhov xwm txheej, thiab leej twg zoo li tus neeg txawj hloov kob, thiab yog ib tug neeg paub hais lus nrog lwm tus xwb. Lawv xav tias cov neeg zoo li no thiaj li saib xyuas tau cov hauj lwm dav dav nyob hauv Vajtswv lub tsev. Qhov no tsis yog ib qho yuam kev lod? Qhov no yog ib qho yuam kev hais txog tej hauv paus ntsiab lus thiab cov qauv rau kev xaiv tib neeg. Qhov tseeb tiag ces yog hom neeg no hais lus qab zib kawg nkaus li: Tsis hais lawv nrog leej twg tham, txhua yam uas lawv hais yog lus dag, thiab txawm lawv cog lus ntau npaum li cas los xij lawv hloov tsis tau li. Thaum ua tej yam, lawv tsuas tiv thaiv lawv tus kheej tej txiaj ntsim, thiab tshwj xeeb tshaj yog thaum ntsib kev phom sij, lawv tiv thaiv lawv tus kheej ua ntej tshaj plaws, thiab yeej tsis xav txog Vajtswv lub tsev tej txiaj ntsim ib zaug li. Tsuav yog lawv muaj kev sib raug zoo nrog cov tsis ntseeg xwb, ces qhov ntawd txaus rau lawv lawm; hais txog qhov seb Vajtswv lub tsev tej txiaj ntsim puas raug puas tsuaj los tsis raug ntawd, lawv tsis quav ntsej li. Cov kwv tij thiab cov muam txoj kev nyab xeeb los tsis yog yam uas lawv xav txog li, thiab lawv tsis quav ntsej tias Vajtswv lub npe puas raug thuam; lawv tsuas tiv thaiv lawv tus kheej xwb. Cov thawj coj cuav pom tsis tshab hom neeg no thiab xav tias lawv haum rau qhov saib xyuas cov hauj lwm sab nraud rau Vajtswv lub tsev tshaj plaws. Qhov no tsis ruam lod? Lawv muag Vajtswv lub tsev tej txiaj ntsim tiam sis cov thawj coj cuav twb tsis paub txog qhov ntawd thiab haj tseem muab tej hauj lwm tseem ceeb rau lawv ua, thiab vam khom lawv rau txhua yam. Qhov no tsis yog qhov ruam tshaj plaws lod? Cov neeg uas hais lus npliag, meej, thiab hlwb ceev puas yog cov neeg uas muaj lub siab ncaj? Yog koj tsis tau sib cuag nrog lawv los sis soj ntsuam lawv ntxaws ntxaws, ces koj yuav tsis paub. Thaum koj sib cuag thiab saib xyuas cov hauj lwm dav dav nrog lawv, tsuas saib seb yam uas lawv hais puas mus raws li yam uas lawv ua. Los ntawm ib qho xwm txheej ces tuaj yeem sim tau qhov no tawm los lawm. Piv txwv li, koj tab tom tsaws khoom. Thaum lawv pom qhov no, lawv yuav tsis pab koj. Tos thaum koj ua hauj lwm tiav lawm lawv mam li los es hais tias, “Ua cas koj ib leeg ua tes hauj lwm hnyav npaum li no? Yog koj hais xwb kuv yeej yuav pab koj, tsis hais kuv tsis khoom npaum li cas los xij. Zoo li koj sab heev lawm. Tos me ntsis kuv mam li ua zaub mov rau koj noj, hnub no koj tsis tas ua lawm.” Tom qab hais li ntawd, lawv ploj mus lawm. Koj sab heev lawm thiab tseem yuav tsum tau mus ua zaub mov noj. Tos thaum koj ua zaub mov tiav lawm, lawv los noj thiab haj tseem hais tias, “Thaum koj yuav pib ua zaub mov ntawd vim li cas koj tsis hu kuv? Koj sab heev lawm thiab tseem ua zaub mov rau kuv noj thiab—qhov ntawd yuav yog tau li cas? Vim koj twb ua tiav lawm, kuv kuj yuav cia li noj lawm xwb. Kuv mam li ua pluag tom ntej, thiab yav tom ntej thaum twg koj muaj hauj lwm uas tim tsum ua no hu kuv thiab.” Ib qho xwm txheej no xwb txaus pom tshab lawv lawm. Lawv hais lus npliag, hlwb ceev, thiab paub tias yuav hais dab tsi. Lawv paub ua yeeb yam raws qhov xwm txheej, thiab txhua yam uas lawv ua tsuas yog hais tej lus zoo mloog, yam tsis ua ib tes hauj lwm tiag tiag li. Cov neeg zoo li no puas tso siab tau? Yog koj hais kom lawv saib xyuas cov hauj lwm dav dav ntawm Vajtswv lub tsev, lawv puas tuaj yeem tiv thaiv Vajtswv lub tsev tej txiaj ntsim? Lawv puas tuaj yeem tiv thaiv pawg ntseeg lub koob npe thiab tiv thaiv cov kwv tij thiab cov muam txoj kev nyab xeeb? (Tsis tuaj yeem.) Vajtswv lub tsev tej nyiaj txiag thiab tag nrho Vajtswv lub tsev tej txiaj ntsim puas yog qhov tseem ceeb tshaj plaws rau lawv? Yeej tsis yog li ntawd kiag li. Cov thawj coj cuav ob lub qhov muag thiab lub siab dig rau tej teeb meem uas pom tau yooj yim zoo li no, lawv saib tsis pom tej ntawd li. Qhov txawv, lawv tsuas hais tau cov lus thiab cov kev qhuab qhia xwb. Vajtswv hlub cov neeg twg thiab Vajtswv tsis hlub cov neeg twg, cov neeg twg nyiam qhov tseeb thiab cov neeg twg tsis nyiam qhov tseeb, hom neeg twg muaj lub hauv paus hauv lawv txoj kev ntseeg Vajtswv thiab hom neeg twg tsis muaj lub hauv paus, hom neeg twg ua siab ncaj hauv kev ua lawv tes dej num thiab hom neeg twg tsis ua siab ncaj hauv kev ua lawv tes dej num—lawv hais txog tej no yam muaj laj thawj thiab muaj qab hau, thiab zoo li lawv to taub tej ntawd tiag tiag, tiam sis qhov ntawd puav leej yog lus qhuav thiab cov kev qhuab qhia xwb. Thaum twg hais kom lawv cais tib neeg, ces lawv ob lub qhov muag thiab lub siab dig; lawv yeej tsis paub saib tib neeg li cas li. Tsis hais lawv nrog hom neeg no sib cuag ntev npaum li cas los xij, lawv yeej tseem pom tsis tshab hom neeg no, thiab haj tseem muab tej hauj lwm tseem ceeb rau hom neeg ntawd ua thiab.

Qhov uas cov thawj coj cuav siv cov neeg yuam kev ntawd twb yog ib qho uas ntxim ntxub lawm, tiam sis lawv haj yam ua txhaum ntxiv los ntawm qhov ua tej yam uas ntxim ntxub tshaj ntawd. Piv txwv li, hais tias ib tug thawj coj cuav siv ib tug neeg yuam kev. Tus neeg no yeej tsis haum los ua ib tug saib xyuas li thiab tsis haum raws li tus qauv ntawm Vajtswv lub tsev qhov kev txhawb thiab cob qhia. Tiam sis tus thawj coj cuav ntawd tseem siv lawv thiab yeej tsis tshuaj xyuas tus neeg no tes hauj lwm li, ntseeg hais tias, “Yus yuav tsum tsis txhob tsis tso siab rau cov uas yus siv, thiab tsis siv cov uas yus tsis tso siab rau. Vim kuv twb xaiv koj thiab txhawb koj lawm, koj yeej yuav ua tau tes hauj lwm no zoo, yog li ntawd cia li nqis tes ua tes hauj lwm ntawd raws li qhov koj pom tias tsim nyog xwb. Txawm koj ua dab tsi los xij, kuv yuav txhawb nqa koj, thiab leej twg tawm tsam qhov no los yeej tsis muaj qab hau li!” Lawv siv tus neeg yuam kev lawm, los lawv tseem cia qhov ua yuam kev ntawd mus kom txog thaum kawg thiab—qhov no qhia pom tias lawv ntseeg lawv tus kheej npaum li cas. Cov thawj coj cuav puav leej dig muag. Lawv saib tsis pom tej teeb meem li, lawv tsis paub cais tias cov neeg twg yog cov tib neeg phem los sis cov tsis ntseeg, thiab txawm leej twg tab kaum thiab cuam tshuam pawg ntseeg tes hauj lwm los xij, lawv yeej tsis paub txog, thiab lawv haj tseem muab tej hauj lwm tseem ceeb rau cov tib neeg ruam feeb tsis meej ua thiab. Cov thawj coj cuav tso siab heev rau leej twg los xij uas lawv txhawb, thiab cia li muab cov hauj lwm tseem ceeb tso rau lawv yam tsis xav li. Qhov ua tau los, ces cov tib neeg ntawd ua rau pawg ntseeg tes hauj lwm ntxhov quav niab, ua rau cuam tshuam loj rau kev tshaj tawm txoj moo zoo thiab ua rau Vajtswv lub tsev tej txiaj ntsim raug puas tsuaj. Cov thawj coj cuav haj tseem ua txuj tias lawv tsis paub dab tsi txog qhov no li. Tus Nyob Saud nug lawv hais tias, “Tus neeg uas koj txhawb ntawd ua tes hauj lwm zoo li cas? Lawv puas haum ua tes hauj lwm no? Lawv puas tiv thaiv pawg ntseeg tes hauj lwm thiab Vajtswv lub tsev tej txiaj ntsim? Nyob rau lub sij hawm tseem ceeb, lawv tiv thaiv lawv tus kheej, los sis yog tiv thaiv pawg ntseeg tes hauj lwm?” Cov thawj coj cuav no teb hais tias: “Lawv twb cog lus tias yuav tiv thaiv pawg ntseeg tes hauj lwm lawm. Tsis tas li ntawd, lawv twb ntseeg Vajtswv tau 20 xyoo lawm. Lawv yuav tiv thaiv lawv tus kheej thiab muag Vajtswv lub tsev tej txiaj ntsim tau li cas? Tej zaum lawv yuav tiv thaiv Vajtswv lub tsev tej txiaj ntsim.” Tus Nyob Saud teb hais tias: “Qhov koj hais ntawd puas yog? Koj puas tau tshuaj xyuas lawv tes hauj lwm?” Cov thawj coj cuav no teb hais tias, “Kuv tsis tau tshuaj xyuas lawv tes hauj lwm, tiam sis kuv twb qhia lawv kom txhob tiv thaiv lawv tus kheej tej txiaj ntsim, thiab hais tias kom lawv yuav tsum tiv thaiv pawg ntseeg tes hauj lwm, thiab lawv twb hais ruaj rau kuv tias lawv yuav ua li ntawd.” Qhov lawv hais ruaj rau koj ntawd muaj qab hau dab tsi? Lawv twb ua tsis tau raws li cov lus cog uas lawv cog rau ntawm Vajtswv xub ntiag. Koj xav tias tsuas yog vim lawv hais ruaj rau koj xwb, ces txawm tso siab tau lawm no lod? Lawv ua tau raws li qhov lawv cog lus ntawd tiag lod? Vim koj twb tsis tau tshuaj xyuas lawv tes hauj lwm li, koj yuav paub tias lawv yog ib tug neeg uas tiv thaiv Vajtswv lub tsev tej txiaj ntsim tau li cas? Ua cas koj yuav ntseeg koj tus kheej ua luaj li? Cov thawj coj cuav zoo li no tsis yog cov neeg phem lod? Nyob rau qhov lawv siv tus neeg yuam kev ntawd, twb ua yuam kev loj heev lawm, thiab tom qab ntawd lawv haj yam ua rau qhov kev yuam kev ntawd loj tuaj los ntawm qhov tsis nug txog, tsis tshawb xyuas, los sis tsis tshuaj xyuas tus neeg no tes hauj lwm li, thiab los ntawm qhov tsis saib xyuas los sis tsis soj ntsuam tus neeg ntawd tes hauj lwm li. Txhua yam uas lawv ua tsuas yog cia tus neeg no ua raws siab thiab ua tej yam phem mus ntxiv xwb. Qhov no yog qhov uas cov thawj coj cuav ua hauj lwm. Thaum ib teg hauj lwm twg muaj neeg tsis txaus, cov thawj coj cuav cia li lam tau lam npaj ib tug neeg mus ris tes hauj lwm ntawd xwb ces tag li ntawd lawm; lawv yeej tsis mus tshuaj xyuas tes hauj lwm, los sis mus rau ntawm qhov chaw tiag tiag mus sib cuag nrog tus neeg ntawd, soj ntsuam lawv, thiab nrhiav kom paub txog lawv ntxiv. Nyob rau qee qhov chaw xwm txheej tsis haum rau qhov sib ntsib thiab siv sij hawm nrog tus neeg ntawd, tiam sis koj yuav tsum nug txog lawv tes hauj lwm, thiab nug ntawm txoj kev tsis ncaj qha txog qhov lawv tau ua, thiab seb lawv ua li cas—koj tuaj yeem nug cov kwv tij thiab cov muam, los sis ib tug neeg twg uas nyob ze lawv. Qhov no ua tsis tau lod? Tiam sis cov thawj coj cuav ib lo lus los twb tsis nug li, qhov no qhia pom tias lawv ntseeg lawv tus kheej npaum li cas. Nyob hauv lawv tes hauj lwm mas, lawv tsuas tuaj sib txoos ua ke thiab tham cov kev qhuab qhia xwb, thaum sib txoos ua ke tag thiab npaj tes hauj lwm tag lawm, ces lawv tsis ua lwm yam li lawm; lawv tsis mus taug qab los sis nrhiav kom paub tias tus neeg uas lawv xaiv ntawd puas tuaj yeem ua tau tes hauj lwm tiag tiag. Thaum pib, koj tsis to taub tus neeg ntawd, tiam sis saib raws li lawv lub peev xwm thiab lawv tej kev qhia tshwm uas pom tau meej sab nraud thiab kev kub siab, koj xav tias lawv haum rau tes hauj lwm no thiab yog li ntawd koj thiaj li siv lawv—qhov no tsis txhaum dab tsi, vim tsis muaj leej twg paub tias yav tom ntej tib neeg yuav zoo li cas. Tiam sis tom qab txhawb lawv lawm, tsis tsim nyog koj taug qab thiab saib seb lawv puas ua hauj lwm tiag tiag, seb lawv ua hauj lwm zoo li cas, thiab seb lawv puas ua dog ua dig, puas ua neeg tsis ncaj, los sis puas ua neeg tub nkeeg? Qhov no yog tes hauj lwm uas koj tsim nyog ua ntag, tiam sis koj tsis ua ib qho li, koj tsis ris lub luag hauj lwm ib qho li. Koj yog ib tug thawj coj cuav, thiab koj yuav tsum raug rho tawm thiab raug tshem tawm.

Cov thawj coj cuav ua ib qho uas yuam kev loj, uas yog tom qab lawv txhawb tib neeg lawm, lawv piav qhia tes hauj lwm rau cov neeg ntawd, ces hais me ntsis kev qhuab qhia, hais ob peb kab lus txhawb zog thiab tso tseg li ntawd xwb, yam tsis taug qab los sis koom nrog rau hauv tej hauj lwm tiag tiag li. Yog koj hais tias koj lub peev xwm tsis zoo thiab pom tsis tshab tib neeg, ces koj tuaj yeem taug qab thiab nrhiav kom paub tias tej hauj lwm tiag tiag ntawd mus zoo li cas, thiab koj tuaj yeem paub meej txog qhov xwm txheej ntawd. Txawm li cas los xij, cov thawj coj cuav tsis taug qab thiab tsis nrhiav kom paub tias tes hauj lwm mus zoo li cas li. Piv txwv li, kev luam ntawv yog ib teg hauj lwm ntxaws ntxaws. Ib tug thawj coj cuav tau muab tes hauj lwm no rau ib tug neeg ris, tiam sis nyob hauv ib nrab xyoo yeej tsis tau tshuaj xyuas ib zaug li. Qhov tshwm sim los, ces yog tom qab rau lub hli, cov phau ntawv uas luam tau tawm los ntawd puav leej tsis zoo—yog ib qho uas ntxhov quav niab! Cov thawj coj cuav yeej zoo li no—lawv yeej tsis ua ib qho hauj lwm tiag tiag li. Yog koj tab tom npaj luam ib phau ntawv, koj yuav tsum ua li cas? Koj yuav tsum xub nrhiav ib tug saib xyuas uas tsim nyog, thiab tom qab ntawd saib xyuas thiab tshuaj xyuas seb lawv ua tes hauj lwm ntawd zoo li cas, thiab seb lawv puas yuav ua rau tes hauj lwm ntawd ntxhov quav niab. Koj yuav tsum saib xyuas thiab taug qab tes hauj lwm, thiab daws teeb meem ncaj qha yog koj pom muaj teeb meem—tsuas yog ua li no xwb thiaj li paub tseeb tias tsis muaj teeb meem tshwm sim tuaj. Tiam sis cov thawj coj cuav tsis ua li no. Lawv xav hais tias lawv tej luag hauj lwm tsuas yog tham cov kev qhuab qhia rau tib neeg, thiab ua kom lawv to taub cov kev qhuab qhia, thiab tias tsuav tib neeg to taub cov kev qhuab qhia xwb, ces yeej daws tau teeb meem lawm. Yog li ntawd, lawv tsuas tsom ntsoov rau qhov tham cov kev qhuab qhia thiab qw cov lus tsis muaj ntsiab xwb, es tsis koom nrog hauv tej hauj lwm tiag tiag. Rau cov thawj coj cuav mas, lawv xav hais tias tsis yog lawv li hauj lwm los cuam tshuam rau tej hauj lwm twg li, thiab tias qhov no yog cov tib neeg uas nyob hauv qab lawv ntawd li hauj lwm xwb. Yog li ntawd, lawv tus kheej ua dab tsi xwb? Lawv tswj tag nrho qhov xwm txheej los ntawm qhov chaw siab thiab dhau los ua ib tug nom tswv uas ua tsis tau dab tsi li. Txawm yog tes hauj lwm dab tsi los xij, lawv tsis nyob ntawd los sis koom nrog hauv li. Tom qab qhia tej hauv paus ntsiab lus rau tib neeg lawm, yog muaj neeg nug txog tej teeb meem ntxaws ntxaws los sis tej hau kev tiag tiag, lawv yuav hais tias, “Tes hauj lwm tiag tiag ntawd nej mam li ua, kuv tsis to taub tej no.” Yog li ntawd, lawv tsis paub tias cov uas nyob hauv qab lawv ua hauj lwm zoo li cas li. Hais txog qhov tias tus saib xyuas puas muaj peev xwm thiab puas ris tau tes hauj lwm ntawd, los sis lawv txoj kev ua neeg zoo li cas, los sis seb lawv puas yog ib tug neeg uas caum qhov tseeb, los sis seb lawv puas ris lub luag hauj lwm hauv kev ua lawv tes dej num, los sis seb lawv puas ua dog ua dig los sis ua tej yam phem yam tsis muaj kev tswj hlo li, los sis seb tes hauj lwm puas qeeb, thiab lwm yam—cov thawj coj cuav yeej tsis paub txog tej no hlo li, lawv tsuas taug kev ua si zoo li cov nom tswv uas tsuas sau ntawv hauv cov tsis ntseeg lub ntiaj teb xwb, es tsis ua ib qho hauj lwm tiag tiag li. Nyob hauv cov pawg ntseeg uas lawv ua hauj lwm ntawd mas, cov thawj coj cuav tsis paub tias qee tus neeg saib xyuas ua rau tes hauj lwm nres mus tsis taus los sis thaum qee tus neeg saib xyuas tab tom tsim lawv lub nceeg vaj ywj pheej, los sis tias qee tus neeg saib xyuas tsis ua lawv tej dej num uas tsim nyog ua tiam sis siv sij hawm rau kev noj, haus thiab ua si zom zem tas hnub, thiab lawv haj tseem ua ntsej lag muag dig thaum qee tus saib xyuas lub peev xwm tsis zoo kiag li, muaj kev to taub uas tsis tseeb, thiab ua tsis tau tes hauj lwm kiag li. Cov thawj coj cuav zoo li no tsuas yog lub plhaub khoob lug xwb, lawv tsuas yog thawj coj ntawm lub npe xwb, thiab lawv tsis ua ib qho hauj lwm tseem ceeb ntawm ib tug thawj coj hlo li. Raws li qhov pom sab nraud mas, zoo li cov thawj coj cuav no coj zoo. Lawv npaj cov saib xyuas rau txhua yam hauj lwm, es ib ntus hu cov neeg no tuaj sib txoos ua ke ib zaug, thiab lawv siv lub sij hawm uas tshuav ntawd nyob rau ib qho chaw los ua kev pe hawm ntawm sab ntsujplig, thov Vajtswv, nyeem Vajtswv cov lus, mloog lus qhuab qhia, kawm nkauj, thiab sau lawv tus kheej cov lus qhuab qhia. Muaj qee tus thawj coj cuav uas ib lub lim tiam tsis tawm hauv lawv chav los li. Kuj tseem muaj cov thawj coj cuav uas tsuas yog tuav cov kev sib txoos ua ke hauv os lais xwb, yam tsis mus rau ntawm qhov chaw ua hauj lwm kom to taub qhov xwm txheej li. Cov kwv tij thiab cov muam tsis pom lawv tau ntev, thiab tsis paub tias cov thawj coj cuav ntawd tej kev ntsib kev pom hauv lub neej txoj sia los sis lub siab ntseeg zoo li cas li. Thaum sib txoos ua ke, ces cov thawj coj cuav tsuas saib xyuas qee yam hauj lwm dav dav xwb, tiam sis hais txog qhov ntxaws ntxaws tias txhua tus neeg saib xyuas tab tom ua dab tsi, thiab seb cov neeg uas lawv txhawb thiab cob qhia ntawd puas tsim nyog rau tes hauj lwm uas muab rau lawv ntawd, los sis cov neeg no tus cwj pwm rau qhov ua lawv tes dej num zoo li cas, los sis seb lawv puas mob siab thiab puas ua tib zoo ua lawv tes hauj lwm, los sis seb lawv puas xav phem thiab ua dog ua dig, los sis seb cov neeg no puas taug txoj kev yog, los sis seb lawv puas yog cov neeg uas yog, cov thawj coj cuav tsis quav ntsej los sis tsis nug txog tej yam no li, thiab tsis xav paub txog tej no li thiab. Qhov teeb meem no lub ntsiab xeeb txawm tsis loj lod? (Loj.)

Vajtswv lub tsev tim tsum qee cov neeg muaj peev xwm uas to taub txog qee yam hauj lwm thiab muaj qee yam kev txawj ntse, thiab yuav cob qhia cov neeg no kom kawm txog cov hauj lwm ntawd kom lawv thiaj li ua tau ib teg dej num hauv Vajtswv lub tsev. Nej xav hais tias cov thawj coj cuav nrhiav hom neeg zoo li cas? Lawv sau tag nrho cov hluas uas tau mus kawm ntawv qib siab thiab cov uas raws lawv niam lawv txiv los ntseeg Vajtswv ntawd tuaj ua ke, thiab lawv saib seb leej twg thiaj li hais lus npliag thiab leej twg nyiam ua kom lwm tus pom, ces hais rau lawv tias, “Vajtswv lub tsev xav cob qhia nej; nej yog pab tub rog uas npaj tseg thiab yog cov zog tshiab.” Ces lawv txawm faib ib teg dej num rau cov neeg no ua. Tseeb tiag, cov neeg no yeej tsis tau ua ib teg dej num dua li, lawv tsis muaj kev ntsib kev pom ntau yam, thiab lawv yeej tsis to taub qhov tseeb ib qho hlo li. Tiam sis cov thawj coj cuav nyiam lawv, yog li ntawd lawv thiaj li pib cob qhia lawv. Lawv muab tej dej num los rau cov tib neeg no ua raws li qhov lawv txawj uas haum rau lawv kawm; ib txhia raug muab faib mus ua hauj lwm sau ntaub ntawv, ib txhia raug muab faib mus ua yeeb yaj kiab, ib txhia raug muab faib mus ua vis dis aus, thiab ib txhia raug muab faib mus ua cov neeg ua yeeb yam. Rau cov thawj coj cuav mas, tsuav cov neeg no muaj ib teg dej num ua xwb ces txaus lawm. Cov thawj coj cuav tsis tshuaj xyuas seb cov neeg no puas nyiam qhov tseeb los sis seb lawv puas lees txais tau qhov tseeb, thiab lawv tsis saib seb cov neeg no tab tom caum dab tsi los sis lawv tej hom phiaj yog dab tsi. Thaum kawg zoo li cas? Ib txhia ntawm cov neeg ntawd raug tshem tawm lawm. Qhov no yog vim lawv ua ywj siab thiab tsis raug txwv li, thiab lawv caum tej kev ntawm sab ntiaj teb, thiab lawv tus kheej tu cev tas hnub thiab sib thab sib zes nrog lwm tus xwb, thiab lawv tsis to taub ib txoj kev cai twg li los sis tsis muaj kev coj zoo kiag li—thiaj li pom tseeb tias lawv yog cov tsis ntseeg thiab cov uas yeej ib txwm tsis ntseeg. Thaum ua lawv tej dej num lawv tsis ua tes hauj lwm uas lawv tsim nyog ua, thiab lawv ua dog ua dig hauv txhua yam, tiam sis cov thawj coj cuav tsis pom qhov no kiag li. Tsis yog cov thawj coj cuav ob lub qhov muag dig lawm lod? (Yog.) Qhov laj thawj uas ua rau lub qhov muag dig yog dab tsi? Tsis yog vim cov thawj coj cuav lub siab dig lod? Lub qhov muag dig thiab lub siab dig yog ob qho yam ntxwv ntawm cov thawj coj cuav. Txawm lawv ob lub qhov muag rua rawv los xij, cov thawj coj cuav tsis to taub ib yam dab tsi los sis pom tsis tshab txog leej twg li—qhov ntawd yog lawv ob lub qhov muag dig lawm. Nyob hauv lawv lub siab mas, lawv tsis muaj kev paub cais los sis tej kev xam pom txog leej twg los sis ib yam dab tsi li, thiab txawm lawv pom dab tsi los xij, lawv tsis muaj peev xwm cais qhov yog los ntawm qhov tsis yog, thiab lawv tsis muaj tej cwj pwm, tsis muaj tej tswv yim, thiab tsis muaj tej lus tshab txhais li—qhov no yog ib qho teeb meem loj ntawm qhov uas lub siab dig. Cov thawj coj cuav puav leej yog cov uas twb ntseeg Vajtswv los tau ntau xyoo thiab pheej mloog lus qhuab qhia tas li, yog li ntawd vim li cas lawv thiaj li cais tsis tau cov tsis ntseeg ntawd? Qhov no haj yam ua pov thawj tias cov thawj coj cuav lub peev xwm tsis zoo kiag li, tias lawv tsis muaj lub peev xwm nkag siab qhov tseeb, thiab txawm lawv mloog qhov tseeb ntau npaum li cas los xij, yeej tsis muaj qab hau, thiab lawv tsis to taub tej ntawd. Lawv ob lub qhov muag thiab lub siab dig, thiab lawv yeej tsis paub cais tib neeg kiag li. Lawv yuav ua li cas thiaj li tsim nyog ua cov thawj coj los sis cov neeg ua hauj lwm hauv pawg ntseeg tau? Lawv ntseeg tias cov neeg uas txawj hais lus yog cov neeg uas muaj peev xwm, thiab cov neeg uas txawj hu nkauj thiab seev cev kuj yog cov neeg uas muaj peev xwm thiab; thaum lawv pom cov neeg uas coj tsom iav los sis cov neeg uas tau mus kawm ntawv qib siab, ces lawv xav tias cov ntawd yog cov neeg uas muaj peev xwm, thiab thaum lawv pom cov neeg uas muaj meej mom hauv lub zej zog, cov neeg uas nplua nuj, cov neeg uas txawj ua lag luam thiab ua tej kev dag ntxias, thiab cov neeg uas ua qee yam hauj lwm tseem ceeb hauv lub zej zog, cov thawj coj cuav xav tias lawv yog cov neeg uas muaj peev xwm. Lawv ntseeg tias Vajtswv lub tsev tsim nyog cob qhia hom neeg zoo li no. Lawv tsis saib cov neeg no tus yam ntxwv los sis seb lawv txoj kev ntseeg Vajtswv puas muaj ib lub hauv paus, thiab lawv haj yam tsis saib tus cwj pwm uas cov neeg no coj rau Vajtswv thiab qhov tseeb li thiab. Lawv tsuas saib rau ntawm tib neeg lub meej mom hauv lub zej zog thiab qhov keeb kwm xwb. Qhov uas cov thawj coj cuav saib tib neeg thiab tej yam zoo li no tsis yog ruam heev lod? Cov thawj coj cuav saib tib neeg thiab tej xwm txheej zoo ib yam li cov tsis ntseeg—lawv txoj kev xam pom rau tej yam zoo ib yam li cov tsis ntseeg. Qhov no txaus los ua pov thawj tias cov thawj coj cuav tsis yog cov neeg uas nyiam thiab to taub qhov tseeb, thiab tias lawv tsis muaj lub peev xwm paub cais hlo li. Tsis yog lawv ntiav dhau lawm lod? Lawv dig muag tiag tiag—dig muag dhau lawm!

Yav tas los, Kuv tau ntsib ib tug thawj coj cuav uas hais lus thiab luag thaum Kuv nrog nws tham, tiam sis kiag thaum Kuv nug nws txog tes hauj lwm mas, nws ntsia ntsoov rau saum nruab ntug yam li loog tag thiab ruam ruam, thiab yeej tsis teb ib yam dab tsi uas Kuv hais rau nws li. Tus neeg no lub peev xwm tsis zoo kiag li, siv tsis tau nws li. Tos li uas Kuv hais dab tsi los nws tsis to taub thiab ua tsis tau raws li. Txawm Kuv nrog nws tham txog dab tsi los xij, nws pheej hais tias, “Kuv twb tuav kev sib txoos ua ke lawm thiab kuv twb tshuaj xyuas tes hauj lwm ob peb hnub tas los no lawm.” Kuv hais tias, “Koj tsis muaj lwm yam hauj lwm ua dhau ntawm qhov tuav kev sib txoos ua ke lawm lod? Nyob hauv pawg ntseeg muaj hauj lwm ntau heev uas yuav tsum ua, vim li cas koj tsis nrhiav lwm yam ua?” Nws hais tias: “Qhov ua ib tug thawj coj los sis ib tug neeg ua hauj lwm ntawd tsis yog tsuas tuav kev sib txoos ua ke xwb lod? Tsis muaj lwm yam ua dhau ntawm qhov tuav kev sib txoos ua ke lawm, kuv tsis paub ua lwm yam li cas li!” Qhov no qhia hais tias nws raug tsa los ua ib tug thawj coj cuav thaum nws los ua tes hauj lwm ntawd, thiab tias nws ua tsis tau ib qho hauj lwm tiag tiag li, vim nws lub peev xwm tsis zoo kiag li! Lub peev xwm uas tsis zoo kiag li ntawd ua rau nws ob lub qhov muag dig thiab lub siab dig lawm. Ob lub qhov muag dig txhais tau li cas? Qhov ntawd txhais tau hais tias txawm ib tug neeg pom dab tsi los xij, lawv tsis muaj peev xwm pom tej teeb meem uas ntxaws ntxaws, ces yog li ntawd lawv ob lub qhov muag muaj los zoo li tsis muaj xwb. Lub siab dig txhais tau li cas? Qhov ntawd txhais tau hais tias txawm muaj dab tsi tshwm sim los xij, ib tug neeg tsis paub txog thiab tsis to taub qhov teeb meem uas muaj nyob ntawd, thiab lawv tsis pom hais tias lub ntsiab tseeb ntawm qhov teeb meem nyob qhov twg—qhov no yog lub ntsiab ntawm qhov lub siab dig. Yog ib tug neeg lub siab dig, ces lawv tag kiag li lawm. Cov thawj coj cuav ob lub qhov muag thiab lub siab dig zoo li no. Nej puas yuav hais tias cov thawj coj cuav tsis txaus siab thaum lawv hnov cov lus no? Lawv xav hais tias, “Kuv ob lub qhov muag mas loj heev, tiam sis Nws hais tias kuv ob lub qhov muag dig; thiab kuv muaj tej kev npaj siab zoo nyob hauv nruab siab, tiam sis Nws hais tias kuv lub siab dig—Nws qhov kev tshab txhais ntawd tsis yog kiag li, puas yog? Vim li cas tsis cia li hu kuv ua ib tug thawj coj cuav xwb? Vim li cas tseem ntxiv hais tias kuv ob lub qhov muag thiab lub siab dig thiab?” Yog Kuv tsis hais li ntawd, raws li cov thawj coj cuav lub peev xwm, lawv puas paub tias lawv lub peev xwm tsis zoo? (Lawv tsis paub.) Qhov hais tias cov thawj coj cuav no lub qhov muag thiab lub siab dig lawm tsis piav qhia qhov teeb meem meej heev lod? Piv txwv li, ib tug tawm tsam khetos tab tom tsim lawv lub nceeg vaj ywj pheej hauv pawg ntseeg. Tiam sis cov thawj coj cuav hais tias, “Tus neeg no muaj peev xwm heev. Yav tas los lawv yog ib tug xib fwb qhia ntawv hauv tsev kawm ntawv qib siab, thiab lawv hais lus meej, muaj txheej txheem, thiab npliag heev. Tsis tas li ntawd, lawv tsis ntshai, txawm cov neeg mloog coob npaum li cas los xij.” Pom tseeb tias tus neeg uas lawv hais txog ntawd yog ib tug Falixais uas tab tom tsim lawv lub nceeg vaj ywj pheej, tiam sis cov thawj coj cuav tseem qhuas lawv. Qhov ntawd tsis yog ob lub qhov muag dig lod? (Yog.) Yog ib tug neeg hu nkauj tsis raws lub suab thiab koj mloog tsis tawm, qhov ntawd puas suav tau tias yog ob lub qhov muag dig? (Tsis yog.) Qhov ntawd yog ib qho teeb meem ntawm kev txawj qib siab, tsis yog ib qho teeb meem ntawm lub peev xwm. Tiam sis tom qab lawv mloog ntau qhov tseeb lawm, cov thawj coj cuav tseem cais tsis tau cov tawm tsam khetos, thiab lawv tsis paub cais tias ib tug neeg txoj kev ua neeg zoo los sis phem, los sis seb ib tug neeg twg puas yog tus uas Vajtswv lub tsev yuav txhawb thiab cob qhia, los sis seb ib tug neeg twg puas yog ib tug tsis ntseeg los sis seb tus neeg ntawd puas ntseeg Vajtswv tiag, thiab lawv tsis paub cais seb ib tug neeg twg puas ua siab ncaj hauv kev ua lawv tes dej num—yog li ntawd, lawv tau txais dab tsi los ntawm kev mloog lus qhuab qhia tau ntau xyoo no? Lawv tsis tau txais qhov tseeb ib qho li, uas txhais tau hais tias lawv yog cov neeg ruam uas dig muag; qhov no qhia pom tias cov thawj coj cuav dig muag npaum li cas. Lawv ntseeg tias txoj hauj lwm tseem ceeb ntawm ib tug thawj coj ces yog tuaj yeem hais lus qhuab qhia, thiab hais tau ob los sis peb teev, thiab tsuav lawv hais tau cov lus thiab cov kev qhuab qhia, qw cov lus tsis muaj ntsiab, thiab txhawb tib neeg zog xwb, ces lawv mus raws li tus qauv ntawm ib tug thawj coj, lawv tuaj yeem ris taus tes hauj lwm, lawv muaj qhov tseeb qhov muaj tiag, thiab Vajtswv txaus siab rau lawv lawm. Qhov no yog hom laj thawj dab tsi? Vim cov thawj coj cuav tsis to taub qhov tseeb thiab lub peev xwm tsis zoo kiag li, thiab ob lub qhov muag thiab lub siab dig, lawv yeej tsis muaj lub peev xwm paub cais ntau hom tib neeg hlo li, thiab tsis tuaj yeem pom tshab txog ntau hom tib neeg. Yog li ntawd, lawv puas siv tau ntau hom tib neeg mus raws li txoj kev uas tsim nyog? (Tsis tau.) Lawv tsuas muaj ib txoj hau kev xwb: Cov uas yav tas los ua xib fwb qhia ntawv raug muab faib mus tham lus qhuab qhia, cov uas yav tas los tau koom kev ua lag luam txawv teb chaws raug muab faib mus saib xyuas tej hauj lwm dav dav, cov uas hais tau lus Askiv raug muab faib mus ua cov txhais lus, thiab leej twg uas hais lus npliag thiab ntsej muag tuab ces raug muab faib mus tshaj tawm txoj moo zoo; cov uas ntshai ntshai raug muab faib mus sau cov lus tim khawv uas hais txog txoj kev ntsib kev pom nyob hauv tsev, cov uas siab tawv thiab nyiam ua yeeb yam raug teeb tsa mus ua cov neeg ua yeeb yam, thiab cov uas xav ua nom ua tswv raug muab faib mus ua cov thawj coj los sis cov coj ua yeeb yaj kiab. Qhov no qhia pom tias cov thawj coj cuav siv tib neeg zoo li cas, yam tsis muaj tej hauv paus ntsiab lus hlo li.

Nyob hauv ciaj ciam tes hauj lwm uas cov thawj coj cuav saib xyuas ntawd mas, pheej muaj qee tus neeg uas caum qhov tseeb tiag tiag thiab haum raws li tus qauv rau kev txhawb thiab cob qhia uas raug muab ncua tseg. Ib txhia ntawm cov tib neeg no mus tshaj tawm txoj moo zoo, thiab ib txhia raug muab faib mus ua tej dej num txais tos. Qhov tseeb tiag ces yog qhov hais tias lawv txhua tus puav leej muaj peev xwm, thiab to taub qee qhov tseeb, thiab tsim nyog raug cob qhia los ua cov thawj coj thiab cov neeg ua hauj lwm, tsuas yog hais tias lawv tsis nyiam ua kom lwm tus pom lawv tus kheej los sis tsis ua kom lwm tus saib lawv xwb. Tiam sis, cov thawj coj cuav tsis quav ntsej txog cov neeg no hlo li. Lawv tsis nrog cov neeg no tham los sis nug txog lawv, thiab lawv yeej tsis cob qhia cov neeg uas muaj peev xwm rau Vajtswv lub tsev li. Lawv tsuas tsom ntsoov rau qhov haub ntxias cov uas qhuas lawv xwb, kom tau raws li lawv tus kheej txoj kev ntshaw uas twm xeeb xwb. Vim li ntawd, cov neeg uas caum qhov tseeb tiag tiag ntawd thiaj li tsis raug txhawb thiab cob qhia, hos cov uas nyiam ua kom lwm tus pom lawv, cov uas hais lus npliag, cov uas txawj hais lus kom lwm tus zoo siab, thiab cov uas nyiam lub koob meej, kev tau txais txiaj ntsim, thiab lub meej mom ntawd—lawv puav leej raug txhawb lawm, thiab haj tseem yog cov uas yav tas los ua nom ua tswv, ua cov thawj coj hauv cov tuam txhab, los sis cov uas tau kawm txog kev tswj lag luam hauv lub zej zog raug muab faib mus ua cov hauj lwm tseem ceeb lawm thiab. Tsis hais cov neeg ntawd puas yog cov ntseeg tiag tiag, los sis seb lawv puas yog cov neeg uas caum qhov tseeb, txawm li cas los xij, cov ntawd yog cov neeg uas raug txhawb thiab raug siv nyob hauv ciaj ciam ntawm tes hauj lwm uas cov thawj coj cuav saib xyuas. Qhov no puas yog siv tib neeg raws li tej hauv paus ntsiab lus? Qhov uas cov thawj coj cuav tsuas txhawb cov neeg zoo li no ntawd tsis yog zoo ib yam nkaus li cov tsis ntseeg lub zej zog xwb lod? Nyob rau lub sij hawm uas cov thawj coj cuav ua hauj lwm ntawd mas, cov neeg uas thaum ua lawv tes dej num tuaj yeem ua hauj lwm tiag tiag, cov uas paub txog kev ncaj ncees, thiab cov uas nyiam qhov tseeb thiab tej yam zoo—lawv tsis raug txhawb los sis cob qhia, thiab nyuaj heev rau lawv uas yuav tau txais lub cib fim los xyaum. Tiam sis, yog cov uas hais lus npliag, cov uas nyiam ua kom lwm tus pom lawv thiab txawj hais lus kom lwm tus zoo siab, thiab cov uas nyiam lub koob meej, kev tau txais txiaj ntsim, thiab lub meej mom ntawd, thiaj li raug muab faib mus ua cov hauj lwm tseem ceeb. Cov neeg ntawd zoo li ntse heev, tiam sis qhov tseeb tiag mas lawv tsis muaj lub peev xwm nkag siab, lub peev xwm tsis zoo thiab kev ua neeg tsis zoo, lawv tsis muaj lub nra tiag tiag rau lawv tej dej num, thiab lawv tsis tsim nyog raug cob qhia kiag li. Txawm li cas los xij, lawv yog cov uas tuav tej hauj lwm ua cov thawj coj thiab cov neeg ua hauj lwm nyob hauv pawg ntseeg. Qhov tshwm sim tau los ces yog qhov hais tias pawg ntseeg tes hauj lwm ntau yam tsis tuaj yeem nce qib mus zoo kom sai, los sis nce qib qeeb, thiab Vajtswv lub tsev tej kev npaj hauj lwm ntawd siv sij hawm ntev dhau los ua. Tej no yog tej kev cuam tshuam thiab tej qhov tshwm sim tau los rau pawg ntseeg tes hauj lwm los ntawm qhov uas cov thawj coj cuav siv tib neeg tsis yog.

Cov thawj coj cuav feem coob lub peev xwm tsis zoo. Txawm zoo li lawv hais lus npliag los xij, lawv tsis muaj peev xwm nkag siab qhov tseeb hlo li, mus txog qib uas lawv tsis muaj kev to taub ntawm sab ntsujplig. Lawv ob lub qhov muag thiab lub siab dig, lawv pom tsis tshab txog ib yam dab tsi li thiab tsis to taub qhov tseeb hlo li, uas qhov no yog ib qho teeb meem uas loj heev. Lawv tseem muaj lwm qhov teeb meem uas loj dua, uas yog thaum lawv to taub thiab paub zoo qee cov lus thiab cov kev qhuab qhia thiab qw tau qee cov lus tsis muaj ntsiab, ces lawv txawm xav tias lawv muaj qhov tseeb qhov muaj tiag lawm. Yog li ntawd txawm lawv ua hauj lwm dab tsi thiab xaiv leej twg los siv los xij, lawv tsis nrhiav qhov tseeb tej hauv paus ntsiab lus, thiab lawv tsis nrog lwm tus sib qhia, thiab haj yam tsis ua raws li Vajtswv lub tsev tej kev npaj hauj lwm thiab tej hauv paus ntsiab lus. Lawv ntseeg lawv tus kheej heev, lawv ib txwm ntseeg tias lawv tej kev xav mas yog thiab lawv ua txhua yam raws li lawv xav ua. Qhov tshwm sim los, ces thaum lawv ntsib qee qhov kev nyuaj los sis qhov xwm txheej tshwj xeeb, lawv tsis paub tias yuav ua li cas. Tsis tas li ntawd, lawv pheej ntseeg yuam kev hais tias, vim lawv tau ua hauj lwm ntau xyoo hauv Vajtswv lub tsev thiab muaj kev ntsib kev pom txaus los ua ib tug thawj coj, lawv paub tias yuav ua li cas kom pawg ntseeg tes hauj lwm mus taus thiab nce qib. Cuag nkaus li lawv twb to taub tej no lawm, tiam sis qhov tseeb tiag, lawv yeej tsis paub ua ib qho hauj lwm li. Lawv ua pawg ntseeg tes hauj lwm raws li lawv siab nyiam, ua raws li lawv tus kheej tej kev xav phem thiab tej kev xav hauv nruab siab, ua raws li lawv tej kev ntsib kev pom thiab tej kev ua qub, thiab ua raws li lawv tej kev cai tswj xwb. Qhov no thiaj li ua rau ntau yam hauj lwm hauv pawg ntseeg ntxhov quav niab thiab tsis zoo, thiab ua rau lawv ua tsis muaj txiaj ntsig tiag tiag. Yog muaj ob peb tug neeg hauv ib lub pab pawg uas to taub qhov tseeb thiab ua tau tes hauj lwm tiag tiag me ntsis, lawv tuaj yeem ua tau pab pawg ntawd tes hauj lwm kom mus tau ib txwm. Txawm li cas los xij, qhov no tsis muaj dab tsi ntsig txog rau lawv tus thawj coj cuav li. Qhov laj thawj uas tes hauj lwm ua tau zoo yog vim muaj ob peb tug neeg zoo nyob hauv pab pawg ntawd ua tau hauj lwm tiag tiag me ntsis thiab ua tes hauj lwm kom mus raws txoj kev yog; qhov ntawd tsis tau txhais hais tias yog lawv tus thawj coj cuav ua hauj lwm tiag tiag li. Tsis muaj ib qho hauj lwm twg uas yuav ua tau yog tsis muaj ob peb tug neeg zoo li no los saib xyuas. Cov thawj coj cuav yeej ua tsis tau lawv txoj hauj lwm li, thiab lawv tsis muaj txiaj ntsig dab tsi li. Vim li cas cov thawj coj cuav thiaj li ua rau pawg ntseeg tes hauj lwm ntxhov quav niab? Thawj qhov yog vim cov thawj coj cuav tsis to taub qhov tseeb, lawv qhia tsis tau txog qhov tseeb los daws teeb meem, thiab lawv tsis nrhiav seb yuav daws teeb meem li cas, ua rau teeb meem sib sau ntau tuaj thiab ua rau pawg ntseeg tes hauj lwm nres mus tsis taus. Qhov laj thawj ob ces yog cov thawj coj cuav dig muag, lawv tsis muaj peev xwm paub cov neeg uas muaj peev xwm. Lawv hloov kho tsis tau cov neeg saib xyuas hauv pab pawg kom tsim nyog, uas ua rau qee tes hauj lwm tsis muaj cov neeg tsim nyog los saib xyuas, ces ua rau tes hauj lwm ntawd nres mus tsis taus. Qhov laj thawj peb ces yog cov thawj coj cuav ua zoo li cov nom tswv dhau lawm. Lawv tsis saib xyuas los sis coj qhia tes hauj lwm, thiab qhov twg muaj ib qho chaw tsis khov nyob hauv tes hauj lwm, lawv tsis kub siab hlo koom los sis muab kev coj qhia txog tes hauj lwm tiag tiag ntawd. Piv txwv li, nyob rau hauv ib teg hauj lwm, muaj ob peb tug neeg ua hauj lwm uas yog cov ntseeg tshiab uas tsis tshua muaj lub hauv paus, lawv tsis to taub qhov tseeb, tsis paub zoo txog tes hauj lwm, thiab tsis tau nkag siab tej hauv paus ntsiab lus ntawm tes hauj lwm. Es ib tug thawj coj cuav uas dig muag, saib tsis pom tej teeb meem no li. Nws ntseeg hais tias tsuav muaj neeg ua hauj lwm xwb ces tau lawm; tsis tseem ceeb tias ua tau zoo los sis phem li. Lawv tsis paub hais tias qhov twg muaj ib qho chaw tsis khov nyob hauv pawg ntseeg tes hauj lwm, ces lawv yuav tsum taug qab txog qhov ntawd, tshuaj xyuas, thiab muab kev coj qhia, tias lawv yuav tsum koom kiag nyob rau hauv qhov kev daws teeb meem thiab txhawb cov neeg uas ua lawv tej dej num ntawd kom txog ntua thaum lawv to taub qhov tseeb, ua tau raws li tej hauv paus ntsiab lus, thiab nkag mus rau hauv txoj kev yog lawm. Tsuas yog thaum ntawd xwb mas lawv thiaj li tsis tas yuav txhawj heev dhau lawm. Cov thawj coj cuav tsis ua hauj lwm li no. Thaum lawv pom muaj neeg ua hauj lwm, ces lawv tsis quav ntsej ntxiv lawm. Txawm tes hauj lwm mus zoo li cas los xij, lawv tsis nug txog li. Qhov twg uas muaj ib qho chaw tsis khov nyob hauv tes hauj lwm, los sis ib tug neeg saib xyuas uas lub peev xwm tsis zoo, lawv tsis muab kev coj qhia kiag txog tes hauj lwm, thiab lawv tus kheej tsis koom rau hauv tes hauj lwm li. Thiab thaum ib tug neeg saib xyuas muaj peev xwm ris taus txoj hauj lwm, ces cov thawj coj cuav haj yam tsis tshuaj xyuas kiag los sis tsis muab kev coj qhia; lawv tsuas ua yooj yim xwb, thiab txawm yog muaj neeg qhia txog ib qho teeb meem tawm los, lawv tsis nug txog qhov teeb meem ntawd li—lawv xav tias tsis tas nug. Cov thawj coj cuav tsis ua ib qho hauj lwm ntxaws ntxaws no li. Muab hais kom luv luv ces, cov thawj coj cuav yog cov neeg qias vuab tsuab uas tsis ua ib qho hauj lwm tiag tiag li. Lawv ntseeg hais tias tsis hais tes hauj lwm twg los xij, tsuav muaj neeg saib xyuas thiab txhua tus muaj feem xyuam nrog tes hauj lwm lawm xwb, ces tag li ntawd lawm xwb. Lawv xav hais tias txhua yam uas lawv yuav tsum ua ces yog ib ntus tuav kom muaj kev sib txoos ua ke ib zaug, thiab nug thaum muaj teeb meem tshwm tuaj xwb. Thaum ua hauj lwm zoo li no, los cov thawj coj cuav tseem ntseeg tias lawv ua hauj lwm zoo thiab txaus siab rau lawv tus kheej heev. Lawv xav hais tias, “Txhua yam hauj lwm tsis muaj teeb meem li. Twb npaj txhij cov neeg ua hauj lwm tag lawm, thiab twb muaj cov saib xyuas lawm. Kuv ua hauj lwm tau zoo heev, cas yuav muaj peev xwm ua luaj li!” Qhov no tsis yog tsis paub txaj muag lod? Lawv ob lub qhov muag thiab lub siab dig npaum li no uas lawv tsis pom tej hauj lwm uas yuav tsum ua thiab nrhiav tsis tau tej teeb meem li. Nyob rau qee qhov chaw, tes hauj lwm twb nres mus tsis taus lawm, tiam sis lawv tseem nyob ntawd txaus siab, xav hais tias, “Cov kwv tij thiab cov muam puav leej yog cov hluas, lawv puav leej yog cov zog tshiab. Lawv ua lawv tej dej num cuag li ib lub cub tawg cig; lawv yeej ua tau tes hauj lwm zoo xwb xwb li.” Qhov tseeb tiag, cov hluas no yog kws tshiab, uas tsis to taub txog tej kev txawj qib siab li. Lawv yuav tsum kawm thaum lawv ua. Hais tau hais tias lawv tseem tsis tau paub ua tes hauj lwm li: Tej zaum qee leej to taub me ntsis, tiam sis lawv tsis yog cov kws txawj, thiab lawv tsis nkag siab tej hauv paus ntsiab lus, thiab thaum lawv ua ib qho hauj lwm tag, yuav tsum tau kho ntau zaus los sis haj yam yuav tsum tau ua dua ntau zaus. Kuj tseem muaj ib txhia neeg hluas uas tsis tau raug cob qhia thiab tsis tau raug ntuas li. Lawv tsis tsim txiaj heev thiab tub nkeeg, thiab ntshaw kev tau zoo tshwj xeeb; lawv yeej tsis lees txais qhov tseeb ib qho me me li, thiab thaum lawv raug kev txom nyem me ntsis, lawv yws tsis tseg. Feem ntau ntawm lawv cov ntawd yog cov neeg qias vuab tsuab uas ua dog ua dig thiab ntshaw kev tau zoo. Rau cov hluas zoo li no koj yuav tsum qhia qhov tseeb rau lawv tas li, thiab haj yam yuav tsum ntuas lawv thiab. Cov hluas no yuav tsum muaj ib tug neeg ris thiab saib xyuas lawv. Yuav tsum muaj ib tug thawj coj los sis ib tug neeg ua hauj lwm nyob ntawd los ris rau lawv tes hauj lwm thiab saib xyuas thiab coj qhia lawv. Tsuas yog thaum ntawd xwb mas lawv tes hauj lwm thiaj li yuav tawg paj txi txiv me ntsis. Yog tus thawj coj los sis tus neeg ua hauj lwm tawm hauv qhov chaw ua hauj lwm mus thiab tsis quav ntsej los sis tsis nug txog tes hauj lwm li, ces cov neeg no yuav zoo li cov xuab zeb tawg ua sab ua sua, thiab qhov ua lawv tes dej num yuav tsis tawg paj txi txiv hlo li. Tiam sis cov thawj coj cuav tsis nkag siab txog qhov no. Lawv pom txhua tus yog cov kwv tij thiab cov muam, yog cov neeg uas mloog hais thiab zwm rau, ces yog li ntawd cov thawj coj cuav thiaj li tso siab rau lawv heev, thiab muab tej hauj lwm rau lawv ua ces tsis quav ntsej ntxiv lawm—qhov no yog cov pov thawj zoo tshaj plaws ntawm qhov cov thawj coj cuav ob lub qhov muag thiab lub siab dig. Cov thawj coj cuav tsis to taub qhov tseeb hlo li, pom tsis tshab txog tej yam, thiab tsis muaj peev xwm nrhiav pom tej teeb meem twg li, tiam sis lawv tseem xav tias lawv ua tau zoo lawm. Lawv siv sij hawm tas hnub xav txog dab tsi? Lawv xav txog seb yuav ua li cas ua zoo li ib tug nom tswv thiab xyiv fab rau tej txiaj ntsim ntawm lub meej mom. Cov thawj coj cuav, zoo ib yam li cov neeg uas tsis muaj siab tsis muaj ntsws, yeej tsis ua tib zoo xav txog Vajtswv tej kev npaj siab me me li. Lawv tsis ua hauj lwm tiag tiag, tiam sis lawv tos kom Vajtswv lub tsev qhuas thiab txhawb lawv. Tseeb tiag, lawv tsis paub txaj muag li!

Cov thawj coj cuav mas ua lawv txoj hauj lwm tsis muaj ib qho zoo li, thiab tsis muaj ib yam dab tsi uas tsim nyog qhuas lawv li. Lawv tsis to taub tej hauv paus ntsiab lus txog qhov loj, ces tsis tas hais txog tej hauv paus ntsiab lus uas ntsig txog tej hauj lwm me me uas ntxaws ntxaws li. Piv txwv li, ib txhia tib neeg muaj lub peev xwm ua hauj lwm zoo heev tiam sis lawv txoj kev ua neeg tsis zoo kiag li, hos lwm tus tsis muaj teeb meem txog lawv txoj kev ua neeg, tiam sis lub peev xwm tsis zoo thiab lub peev xwm ua hauj lwm tsis zoo. Thaum hais txog qhov yuav siv thiab faib cov tib neeg no rau qhov twg kom tsim nyog ntawd mas, cov thawj coj cuav haj yam tsis paub txog tej yam uas me me thiab ntxaws ntxaws no. Yog li ntawd thaum twg nug cov thawj coj cuav seb lawv nrhiav puas tau tau leej twg uas muaj peev xwm zoo uas tuaj yeem cob qhia, lawv hais tias lawv tseem nrhiav tsis tau tau leej twg li. Cov thawj coj cuav dig muag npaum li ntawd—lawv yuav ua li cas nrhiav tau leej twg? Yog koj nug lawv hais tias Tus Nkauj Muam no zoo li cas, lawv yuav hais tias nws ntshaw kev tau zoo ntawm cev nqaij daim tawv; nug lawv hais tias Tus Kwv Tij ntawd zoo li cas, ces lawv yuav hais tias nws pheej xav phem tas li; nug lawv hais tias lwm tus zoo li cas, ces lawv yuav qhia koj tias tus tib neeg ntawd ntseeg Vajtswv sij hawm luv thiab nws tsis muaj lub hauv paus. Nyob hauv lawv lub qhov muag mas, tsis muaj ib tug twg siv tau li. Lawv tsuas saib lwm tus tej teeb meem, tej qhov tu ncua, thiab tej kev txhaum xwb; lawv tsis paub saib seb ib tug twg puas mus raws li Vajtswv lub tsev tej hauv paus ntsiab lus rau kev txhawb thiab kev cob qhia, los sis seb lawv puas yog ib tug uas tsim nyog txhawb thiab cob qhia. Lawv paub tsis tau tias leej twg tsim nyog rau kev txhawb thiab kev cob qhia tiag tiag, tiam sis lawv txhawb cov uas tsis mus raws li Vajtswv lub tsev tej kev cheem tsum thiab tej hauv paus ntsiab lus yam kub siab thiab ceev heev. Lawv txhawb tag nrho cov poj niam nplua nuj, cov txiv neej muaj nyiaj, thiab cov tub cov ntxhais ntawm cov tsev neeg nplua nuj uas nyob hauv pawg ntseeg, thiab cov uas tau ua nom ua tswv nyob hauv lub ntiaj teb, cov uas hais lus npliag, thiab cov uas paub dag thiab paub ntxias—txawm li cas los xij, lawv txhawb leej twg los xij uas muaj suab nrov npe thiab muaj meej mom nyob hauv lub ntiaj teb thiab leej twg los xij uas nyiam kom lwm tus pom lawv. Lawv ntseeg hais tias cov tib neeg no thiaj li yog cov uas muaj peev xwm, thiab lawv tsis pom los sis tsis txhawb cov uas muaj peev xwm nkag siab thiab lees txais tau qhov tseeb tiag tiag ntawd ib tug hlo li. Rau ib tug thawj coj cuav mas qhov nrhiav ib tug neeg uas muaj peev xwm uas tsim nyog tiag tiag rau Vajtswv lub tsev ntawd yuav nyuaj tshaj li qhov mus nqa cov hnub qub saum ntuj. Piv txwv li, muab hais tias tam sim no Vajtswv lub tsev tim tsum cov tib neeg muaj peev xwm rau tes hauj lwm sau ntaub ntawv—muaj ib tug tib neeg zoo li no nyob hauv ib lub pawg ntseeg uas ib tug thawj coj cuav saib xyuas, tiam sis tus thawj coj cuav ntawd tsis muab tus tib neeg no lub npe xa mus. Thaum nug tus thawj coj cuav hais tias vim li cas tsis txhawb los sis cob qhia tus tib neeg ntawd, lawv hais tias: “Tus tib neeg ntawd tau ua plees ua yig ob zaug thaum kawm hauv tsev kawm qib siab, tiam sis txij thaum sib yuav ces tsis ua ntxiv lawm. Kuv tsis paub tias puas tsim nyog txhawb los sis tsis tsim nyog.” Cov lus no yog hom lus dab tsi? Koj puas paub tseeb tias cov tib neeg nplua nuj thiab muaj hwj chim uas koj txhawb ntawd yeej tsis tau ua plees ua yig dua li? Tsis yog cov tib neeg ntawd haj yam ua ntau dua lod? Ua cas koj thiaj li tsis pom qhov ntawd? Cov thawj coj cuav ua txuj paub sab ntsujplig, cuag nkaus li lawv paub qee cov hauv paus ntsiab lus, thiab nrhiav laj thawj los hais ub hais no es tsis txhawb cov uas tsim nyog txhawb thiab cob qhia. Nyob hauv lawv lub qhov muag mas, txhua tus qis dua lawv. Thaum kawg muaj dab tsi tshwm sim? Cov “neeg tseem ceeb” thiab “cov neeg muaj peev xwm” uas cov thawj coj cuav txhawb ntawd puas sawv ruaj khov kho? Peb tsis yog hais tias cov tib neeg no yeej tsis yog neeg zoo li. Qhov tseem ceeb uas peb qhia tshwm yog hais tias cov thawj coj cuav lub hauv paus ntsiab lus uas coj rau tib neeg ntawd yog siv tib neeg tej kev xav phem los ntsuas, es tsis yog qhov tseeb, thiab lawv lub hauv paus ntsiab lus rau kev txhawb thiab kev cob qhia tib neeg mas yog ua raws li lawv tus kheej tej kev xav phem, tej kev xav hauv nruab siab, thiab tej lawv nyiam, thiab yog cov tsis ntseeg tej kev xam pom tag nrho, es tsis yog siv Vajtswv lub tsev tej qauv uas cheem tsum los ntsuas li. Vim li cas cov thawj coj cuav thiaj li ua tau li no? Vim lawv tsis to taub qhov tseeb los sis tsis to taub Vajtswv tej kev npaj siab, lawv thiaj li txhawb cov uas yeej tsis haum raws li Vajtswv lub tsev tej kev cheem tsum, tsom ntsoov rau kev cob qhia lawv, thiab cia lawv ris cov hauj lwm tseem ceeb hauv Vajtswv lub tsev. Qhov no yog tes hauj lwm uas cov thawj coj cuav ua. Cia li saib cov thawj coj cuav uas nyob ib puag ncig nej; qhov no tsis yog txoj kev uas lawv ua hauj lwm thiab txoj kev uas lawv coj rau tib neeg lod?

Cov thawj coj cuav pheej nthuav tawm ib qho kev xam pom: Lawv xav tias cov uas muaj kev paub, cov uas muaj meej mom, thiab cov uas yav tas los ua nom ua tswv hauv lub ntiaj teb ntawd puav leej yog cov neeg muaj peev xwm, thiab cov neeg no Vajtswv lub tsev yuav tsum cob qhia thiab siv tom qab lawv pib ntseeg Vajtswv. Lawv saib cov neeg ntawd siab thiab pe hawm cov neeg ntawd tiag tiag—lawv haj tseem saib cov neeg ntawd zoo li lawv cov txheeb ze thiab tsev neeg. Thaum lawv qhia cov tib neeg no rau lwm tus, lawv pheej hais txog tias nyob hauv lub ntiaj teb mas, cov neeg ntawd yog tus thawj ntawm lub tuam txhab, los sis tus thawj coj ntawm tsoom fwv qee ces hauj lwm, los sis tus kho ntawv xov xwm, los sis tus thawj coj ntawm ces hauj lwm saib xyuas kev ruaj ntseg rau pej xeem, los sis tham txog tias lawv nplua nuj npaum li cas. Cov thawj coj cuav saib cov neeg zoo li no siab tshwj xeeb. Nej hais seb, cov thawj coj cuav puas muaj peev xwm? Tsis yog qhov hais tias lawv ua txuj paub sab ntsujplig, thiab pom tsis tshab tej yam li lod? Cov thawj coj cuav xav tias vim cov neeg no yog cov neeg muaj peev xwm hauv lub zej zog, ces Vajtswv lub tsev yuav tsum cob qhia thiab muab ib txoj hauj lwm tseem ceeb rau lawv ua thaum lawv los ntawm no. Qhov kev xam pom no puas yog? Qhov kev xam pom ntawd puas mus raws li qhov tseeb tej hauv paus ntsiab lus? Yog cov neeg no tsis nyiam qhov tseeb kiag li, thiab tsis muaj lub siab txawj xav thiab laj thawj li, Vajtswv lub tsev puas tuaj yeem cob qhia thiab muab ib txoj hauj lwm tseem ceeb rau lawv? Lawv tsis tsim nyog raug cob qhia. Qhov uas lawv yog cov neeg muaj peev xwm hauv cov tsis ntseeg ntawd tsis tau txhais hais tias lawv yog cov neeg muaj peev xwm hauv Vajtswv lub tsev, tiam sis cov thawj coj cuav no nyiam ua nom ua tswv, thiab tshwj xeeb lawv pe hawm lwm tus uas tau ua nom ua tswv los lawm. Thaum twg lawv pom cov neeg uas tau ua nom ua tswv los sis muaj meej mom sab nraum lub ntiaj teb mas, lawv nyo hau thiab txhos caug thiab ua tus cwj pwm qhuas qhuas thiab ua qhev rau lawv, zoo li cov qhev nyob ntawm lawv tus tswv lub xub ntiag; lawv xav xav hu cov neeg ntawd ua niam los sis ua txiv, los sis niam laus los sis tij laug, thiab lawv kuj xav kom cov neeg no raug txhawb los ua cov thawj coj los sis cov neeg ua hauj lwm nyob rau hauv pawg ntseeg. Qhia Kuv seb, cov neeg no puas yog cov uas caum qhov tseeb? Qhov uas lawv muaj meej mom thiab muaj suab npe me ntsis hauv lub ntiaj teb ntawd puas txhais tau hais tias lawv tsim nyog ua ib tug thawj coj los sis ib tug neeg ua hauj lwm hauv Vajtswv lub tsev? Yog lawv tsis to taub qhov tseeb thiab muaj tus moj yam khav theeb thiab khav txiv puv npo, lawv puas tsim nyog ua ib tug thawj coj los sis ib tug neeg ua hauj lwm hauv Vajtswv lub tsev? Kev txhawb tib neeg uas tsom ntsoov rau lawv lub meej mom thiab lub suab npe xwb, es tsis quav ntsej txog lawv tus yam ntxwv li ntawd puas mus raws li tej hauv paus ntsiab lus? Cov thawj coj cuav puas paub tias Vajtswv nyiam hom neeg zoo li cas, Nws txhawb thiab siv hom neeg zoo li cas? Vajtswv lub tsev tej kev npaj hauj lwm tau hais tag hais dua tias yuav tsum txhawb thiab cob qhia tib neeg raws li peb tug qauv: Qhov ib, lawv yuav tsum muaj kev ua neeg, muaj lub siab txawj xav, thiab muaj laj thawj; qhov ob, lawv yuav tsum yog cov neeg uas nyiam qhov tseeb thiab lees txais tau qhov tseeb; thiab qhov peb, lawv yuav tsum muaj peev xwm txaus thiab muaj lub peev xwm ua hauj lwm. Tsuas yog cov uas haum raws li peb tug qauv no xwb mas thiaj li tuaj yeem raug txhawb thiab cob qhia, thiab tsim nyog ua cov neeg raug xaiv thiab ua cov thawj coj los sis cov neeg ua hauj lwm. Qhov muaj lub peev xwm thiab kev txawj ntse ntawd xwb mas yeej tsis txaus li. Tus yam ntxwv los ua ntej hlo, thiab qhov ob, yuav tsum yog lees txais tau qhov tseeb—ob qho no yog cov qauv uas tseem ceeb tshaj plaws. Yog cov neeg phem uas tsis nyiam qhov tseeb raug txhawb, qhov tshwm sim los yuav phem heev, yog li ntawd cov uas tsis muaj kev ua neeg mas yeej tsis pub txhawb kiag li. Tiam sis cov thawj coj cuav tsis quav ntsej txog Vajtswv lub tsev tej kev cheem tsum li. Thaum xaiv thiab siv tib neeg mas, lawv pheej tsom ntsoov rau qhov seb tus neeg ntawd puas muaj meej mom nyob hauv lub zej zog, lawv qhov keeb kwm dhau los thiab txoj hauj lwm yog dab tsi, seb lawv puas tau kawm ntawv qib siab, thiab seb lawv lub suab npe nrov npaum li cas nyob hauv lub zej zog—thaum lawv txhawb thiab cob qhia tib neeg lawv tsom ntsoov rau tej kis no. Qhov no puas mus raws li tej hauv paus ntsiab lus uas Vajtswv lub tsev tau teev tseg? Qhov no puas mus raws li qhov tseeb ntawm Vajtswv cov lus? Cov neeg uas muaj meej mom hauv lub zej zog ntawd yog neeg zoo li cas? Hais tau tias lawv puav leej yog cov neeg uas siv txhua txoj hau kev los sib txeeb kom tau hwj chim thiab meej mom, thiab lawv yog Ntxwgnyoog cov. Yog lawv tuav hwj chim hauv Vajtswv lub tsev, Vajtswv lub tsev puas tseem yog Vajtswv lub pawg ntseeg lawm? Cov thawj coj cuav txhawb cov neeg uas yog Ntxwgnyoog cov ntawd los ua thawj coj lawv lub hom phiaj yog dab tsi? Qhov ua li no puas mus raws li Vajtswv lub tsev tej hauv paus ntsiab lus rau kev cob qhia thiab siv tib neeg? Qhov no tsis yog kev cuam tshuam thiab ua kom pawg ntseeg tes hauj lwm puas tsuaj yam tab meeg rua muag plias lod? Qhov uas cov thawj coj cuav txhawb thiab cob qhia tib neeg yam tsis muaj hauv paus ntsiab lus ntawd mas yog qhov ua rau muaj kev tab kaum thiab kev cuam tshuam loj tshaj plaws rau pawg ntseeg tes hauj lwm, thiab yog ib txoj kev tawm tsam Vajtswv.

Cov thawj coj cuav lub peev xwm tsis zoo kiag li thiab tsis muaj lub peev xwm nkag siab qhov tseeb. Txawm lawv mloog lus qhuab qhia ntau npaum li cas los sis nyeem Vajtswv cov lus ntau npaum li cas los xij, lawv tseem nkag siab tsis yog, los sis tsis to taub qhov tseeb li, thiab txawm lawv tham tej kev qhuab qhia ntau xyoo npaum li cas los xij, lawv tsis to taub yam uas lawv hais ntawd, qhov ntawd tsuas yog cov lus tsis muaj qab hau xwb, thiab yeej tsis paub hais tias qhov ntawd yog dab tsi li! Lawv nco tau thiab tham tau cov kev qhuab qhia me ntsis, ces lawv txawm xav tias lawv muaj qhov tseeb qhov muaj tiag lawm, tiam sis txawm lawv ua dab tsi los yeej tsis muaj feem xyuam txog qhov tseeb li—cov no yog cov Falixais tseem tseem. Sab nraud mas zoo li lawv pheej qhuab qhia rau tib neeg mloog tas li, thiab hais tau cov lus uas zoo mloog, cuag nkaus li lawv to taub qhov tseeb, tiam sis yam uas lawv ua ntawd tawm tsam qhov tseeb thiab tsis mus raws li qhov tseeb. Lawv kuj hais zoo mloog tias lawv tab tom ua dej num rau Vajtswv thiab ua pawg ntseeg tes hauj lwm, tiam sis qhov tseeb tiag txhua yam uas lawv ua ntawd yog ua yeeb ncuab rau Vajtswv tag nrho. Cov thawj coj cuav yeej tsis txhawb cov neeg muaj peev xwm uas siv tau rau Vajtswv lub tsev li, thiab lawv tsis quav ntsej thiab ua txuj tsis pom cov tib neeg coj ncaj uas caum qhov tseeb tiag tiag. Tiam sis, lawv txhawb thiab cob qhia cov uas txawj hais lus qhuas, cov uas txawj ntxias thiab txawj dag, thiab cov uas muaj tej kev xav ua thiab tej kev ntshaw los tuav tes hauj lwm hauv pawg ntseeg. Qhov tshwm sim los ntawm tag nrho tej no ces yog, thaum cov neeg ntawd ua hauj lwm tau ib ntus lawm, ntau yam ntawm pawg ntseeg tes hauj lwm nres thiab mus tsis taus lawm, thiab yog li ntawd pawg ntseeg tes hauj lwm raug rhuav tshem ntawm cov thawj coj cuav no ob txhais tes. Cov thawj coj cuav no tsis yog hom neeg uas ntxim ntxub lod? Puas tsim nyog muab lawv rho tawm? Yuav tsum muab lawv rho tawm! Qhov qeeb ib hnub ces yuav cuam tshuam rau pawg ntseeg tes hauj lwm ib hnub. Ib txhia thawj coj cuav, txawm lawv paub tias lawv tsis muaj peev xwm ua hauj lwm tiag tiag los xij, tsis kam tawm yam txaus siab hlo, thiab pheej xav txaus siab rau tej txiaj ntsim ntawm lub meej mom tas li, thiab haj tseem ua kom pawg ntseeg tes hauj lwm puas tsuaj thiab. Cov neeg no puas muaj ib qho laj thawj me me li? Cov thawj coj cuav tsis muaj lub peev xwm nkag siab, los sis tsis muaj peev xwm tiag tiag thiab kev paub tiag tiag, thiab tsis yog cov neeg uas caum qhov tseeb, thiab lawv kuj ntshaw tej txiaj ntsim ntawm lub meej mom—lawv yog cov neeg uas tsis paub txaj muag; yog li ntawd yuav tsum tsis txhob txhawb thiab cob qhia lawv kiag li. Yog koj xav tias koj lub peev xwm tsis zoo kiag li, thiab koj tsis muaj peev xwm cais qhov yog thiab qhov tsis yog, thiab koj tsis muaj peev xwm nkag siab qhov tseeb, ces txawm li cas los xij, tsis txhob ua raws li koj tej kev xav ua thiab tej kev ntshaw, thiab tsis txhob xav tias yuav ua li cas thiaj li tau ua nom hauv pawg ntseeg—kom tau ua ib tug thawj coj hauv pawg ntseeg—qhov ua ib tug thawj coj mas tsis yooj yim npaum li ntawd. Yog koj tsis yog ib tug neeg coj ncaj thiab tsis nyiam qhov tseeb, ces thaum koj tau ua ib tug thawj coj ntawd, koj yuav yog ib tug tawm tsam khetos los sis ib tug thawj coj cuav. Cov tawm tsam khetos thiab cov thawj coj cuav puav leej yog cov neeg uas tsis muaj lub siab txawj xav thiab laj thawj, thiab yog cov neeg uas tuaj yeem ua phem thiab cuam tshuam pawg ntseeg tes hauj lwm. Yeej muaj tiag uas hais tias cov tawm tsam khetos yog cov dab phem thiab Ntxwgnyoog, tiam sis cov thawj coj cuav los kuj tsis yog neeg zoo thiab; yam tsawg kawg mas, lawv yog cov neeg tsis paub txaj muag uas tsis muaj lub siab txawj xav thiab laj thawj. Qhov ua ib tug thawj coj cuav thiab raug muab rho tawm ntawd puas muaj koob meej dab tsi? Qhov ntawd yog ib qho poob ntsej muag, yog ib qho tsuas dub, thiab yeej tsis muaj koob meej dab tsi hlo li. Yog koj muaj lub nra rau pawg ntseeg tes hauj lwm, thiab xav koom nrog, qhov no yog qhov zoo; tiam sis koj yuav tsum tig xav txog seb koj puas to taub qhov tseeb, seb koj puas tuaj yeem qhia qhov tseeb los daws teeb meem, seb koj puas tuaj yeem zwm rau Vajtswv tes hauj lwm tiag tiag, thiab seb koj puas tuaj yeem ua pawg ntseeg tes hauj lwm kom zoo raws li tej kev npaj hauj lwm. Yog koj ua tau raws li cov qauv no, ces koj tuaj yeem sib tw ua ib tug thawj coj los sis ib tug neeg ua hauj lwm. Qhov Kuv hais no txhais tau hais tias yam tsawg kawg mas, tib neeg yuav tsum paub lawv tus kheej. Ua ntej saib seb koj puas paub cais tib neeg, seb koj puas to taub qhov tseeb thiab puas ua tej yam mus raws li lub hauv paus ntsiab lus. Yog koj ua tau raws li tej kev cheem tsum no, ces koj tsim nyog ua ib tug thawj coj los sis ib tug neeg ua hauj lwm. Yog koj ntsuas tsis tau koj tus kheej, ces koj tuaj yeem nug cov neeg nyob ib puag ncig koj uas paub koj zoo los sis nyob ze koj. Yog lawv txhua tus hais tias koj lub peev xwm tsis txaus ua ib tug thawj coj, thiab tsuas ua koj txoj hauj lwm tam sim no kom zoo xwb ces txaus lawm, ces koj yuav tsum kav tsij los paub koj tus kheej. Vim koj lub peev xwm tsis zoo, ces tsis txhob pheej xav ua ib tug thawj coj—tsuas ua yam uas koj ua tau xwb, ua koj tes dej num kom zoo yam ruaj khov, kom koj thiaj li muaj kev kaj siab. Qhov no los kuj zoo thiab. Thiab yog koj tuaj yeem ua ib tug thawj coj, yog koj muaj lub peev xwm thiab qhov kev txawj ntse ntawd tiag tiag, yog koj muaj peev xwm ua hauj lwm, thiab muaj lub nra, ces koj yog hom neeg muaj peev xwm uas Vajtswv lub tsev tu ncua, ces koj yeej yuav raug txhawb thiab cob qhia xwb; tiam sis txhua yam yeej muaj Vajtswv lub sij hawm. Qhov kev xav no—qhov kev xav kom raug txhawb ntawd—tsis yog kev ntshaw, tiam sis koj yuav tsum muaj lub peev xwm thiab muaj raws li tus qauv uas los ua ib tug thawj coj. Yog koj lub peev xwm tsis zoo tiam sis tseem pheej xav los ua ib tug thawj coj, los sis los tuav ib txoj hauj lwm tseem ceeb, los sis los saib xyuas tes hauj lwm tag nrho, los sis ua qee yam kom lwm tus pom koj, ces Kuv qhia koj tias: Qhov no yog kev ntshaw. Kev ntshaw coj tau kev puas ntsoog los, yog li ntawd koj yuav tsum ceev faj txog qhov kev ntshaw ntawd. Txhua tus tib neeg muaj lub siab xav nce qib thiab txhua tus txaus siab siv zog mus rau qhov tseeb, qhov no tsis yog teeb meem. Ib txhia tib neeg muaj lub peev xwm, muaj raws li tus qauv rau kev ua cov thawj coj, thiab tuaj yeem siv zog mus rau qhov tseeb, qhov no yog ib qho zoo. Ib txhia tsis muaj lub peev xwm, vim li ntawd lawv tsim nyog tuav lawv tus kheej tes dej num kom ruaj, ua tes dej num uas nyob ntawm lawv xub ntiag kom zoo thiab ua raws li lub hauv paus ntsiab lus, thiab raws li Vajtswv lub tsev tej kev cheem tsum; qhov ntawd mas zoo dua, muaj kev nyab xeeb dua, thiab muaj tiag dua rau lawv.

Cov uas raug xaiv los ua cov thawj coj thiab cov neeg ua hauj lwm los sis raug txhawb thiab cob qhia ntawd los yuav tsum tsis txhob muaj kev xav hauv nruab siab, es xav hais tias, “Nyob hauv cov tib neeg uas coob npaum li no cov kwv tij thiab cov muam xaiv kuv, Vajtswv lub tsev txhawb kuv, yog li ntawd kuv yeej muaj peev xwm tiag, thiab kuv zoo dua cov neeg sawv daws; kub tiag yeej yuav ci xwb xwb li.” Qhov xav li no puas zoo? Qhov no tsis yog kev nthuav tus moj yam qias vuab tsuab tawm lod? (Yog.) Qhov raug txhawb thiab cob qhia ntawd yog ib qho zoo thiab yog ib lub cib fim zoo, tiam sis koj puas taug tau txoj kev no zoo ntawd mas yog nyob ntawm qhov seb koj coj li cas rau lub cib fim no thiab seb koj puas tuaj yeem saib lub cib fim no muaj nqis. Vajtswv muab lub cib fim zoo li no rau koj, tiam sis qhov ntawd tsis tau txhais hais tias koj zoo dua lwm tus; tej zaum koj lub peev xwm zoo dua lwm tus me ntsis los sis koj muaj qee yam khoom pub, tiam sis nyuaj hais qhov koj txoj kev nkag mus rau hauv lub neej txoj sia zoo li cas thiab seb koj puas muaj qhov tseeb qhov muaj tiag—vim txhua tus tib neeg tej moj yam qias vuab tsuab zoo ib yam nkaus, thiab koj kuj yog ib tug tswv cuab ntawm cov noob neej uas qias vuab tsuab thiab. Yog koj paub qhov no, ces koj yuav coj tau yog rau qhov Vajtswv lub tsev txhawb thiab cob qhia koj. Koj yuav tsum tsis txhob saib koj tus kheej tias yog ib tug neeg muaj peev xwm, thiab tsis txhob xav tias koj muaj qhov tseeb qhov muaj tiag. Qhov ntawd tsuas yog tias koj muaj lub peev xwm me ntsis thiab tuaj yeem siv zog mus rau qhov tseeb, yog li ntawd thiaj li cia koj xyaum tus kheej. Qhov no tsuas yog lub sij hawm sim siv xwb, thiab tseem tsis tau paub tseeb tias koj puas yog ib tug neeg uas caum qhov tseeb tiag, los sis seb koj puas tsim nyog rau kev cob qhia. Tom qab raug sim nyob rau lub sij hawm no xyov koj puas yuav sawv tau ruaj khov kho los twb tsis zoo hais. Tej zaum koj yuav raug cia nyob kom raug cob qhia ntxiv, los sis tej zaum koj yuav raug tshem tawm mus—tag nrho qhov no yog nyob ntawm qhov seb koj siv zog npaum li cas. Qhov no yog lub ntsiab ntawm kev txhawb tib neeg los ua cov thawj coj thiab cov neeg ua hauj lwm, thiab koj yuav tsum to taub qhov ntawd. Qhov koj xav tias koj yog ib tug neeg muaj peev xwm ntawd tsis muaj qab hau dab tsi li. Yog Vajtswv lub tsev tsis txhawb thiab cob qhia koj, ces koj tsis yog dab tsi li. Yog koj tsis caum qhov tseeb thiab tsis txaus siab raug Vajtswv lub tsev siv, ces koj ua tsis tau ib yam dab tsi tiav li. Yog koj hais tias, “Vajtswv lub tsev tsis siv kuv, ces kuv yuav tawm mus rau hauv lub zej zog,” yog li ces cia li tawm mus rau hauv lub zej zog mus sim seb leej twg txhawb koj, thiab saib seb koj muaj peev xwm ua tau dab tsi tiav. Qhov Kuv hais no lub ntsiab yog qhia rau nej hais tias nej yuav tsum muaj txoj kev to taub thiab txoj kev coj kom yog rau qhov Vajtswv lub tsev txhawb thiab cob qhia nej. Rau cov uas lub peev xwm tsis zoo los sis nruab nrab thiab cov uas ua tsis tau raws li tus qauv uas Vajtswv lub tsev cheem tsum rau kev txhawb thiab kev cob qhia ntawd tsuas yog yuav tsum ua lawv tes dej num yam mloog lus thiab ruaj khov xwb ces tau lawm. Tsuav koj ua koj tes dej num kawg koj lub siab xwb, ces Vajtswv yuav ua ncaj ncees rau koj. Yog li ntawd, tsis txhob sib txeeb txog tej yam ntawm txoj kev txhawb thiab kev cob qhia, tiam sis tsis txhob tsis kam lees txais tej ntawd thiab, cia txhua yam mus raws li ib txwm muaj xwb; nyob rau ib kis, koj yuav tsum ua raws li Vajtswv lub tsev tej kev npaj, thiab nyob rau lwm kis, koj yuav tsum muaj lub siab zwm rau Vajtswv—qhov no yog txoj hau kev uas yog. Qhov ua li no puas yooj yim? (Yooj yim.) Ib tug neeg uas lub peev xwm tsis zoo ua ib tug thawj coj puas muaj txiaj ntsim dab tsi? Thaum kawg, thaum raug teem tias yog ib tug thawj coj cuav thiab raug tshem tawm lawm, nws yuav hnov zoo li cas txog qhov no? Qhov ntawd puas yog qhov uas nej xav tau? (Tsis yog.) Koj yuav ris rawv lub npe “thawj coj cuav” rau saum koj lub taub hau, thiab txhua qhov uas koj mus, tib neeg yuav hais tias, “Yav tas los tus neeg no tau ua ib tug thawj coj cuav.” Qhov ntawd yog ib qho zoo los sis phem? Qhov ntawd tsis yog ib qho zoo, thiab tsis yog ib yam uas muaj koob meej. Tib neeg yuav tsum muaj txoj kev to taub thiab tus cwj pwm uas yog rau kev txhawb thiab cob qhia; nyob hauv tej yam no, lawv yuav tsum nrhiav qhov tseeb, thiab tsis txhob ua raws li lawv tus kheej lub siab nyiam, los sis muaj tej kev xav ua thiab tej kev ntshaw. Yog koj xav tias koj lub peev xwm zoo tiam sis Vajtswv lub tsev tsis tau txhawb koj, thiab ib txwm tsis muaj kev npaj cob qhia koj li, los tsis txhob chim los sis tsis txhob pib yws li, tsuas tsom ntsoov rau kev caum qhov tseeb thiab siv zog mus rau tom ntej xwb. Thaum koj muaj lub siab ntseeg thiab tuaj yeem ua hauj lwm tiag tiag, ces cov neeg Vajtswv xaiv tseg yuav cia li xaiv koj los ua tus thawj coj lawm. Thiab yog koj xav tias koj lub peev xwm tsis zoo, thiab koj tsis muaj cib fim raug txhawb los sis cob qhia, thiab tias ua tsis tau kom koj tej kev ntshaw tiav lawm, qhov no tsis yog ib qho zoo lod? Qhov no yuav tiv thaiv koj! Vim koj lub peev xwm tsis zoo, yog koj ntsib ib pab neeg dig muag feeb tsis meej uas muab koj xaiv los ua lawv tus thawj coj, qhov no tsis yog koj raug ci saum cov hluav taws kub lod? Koj ua tsis tau tes hauj lwm dab tsi li thiab koj ob lub qhov muag thiab lub siab dig. Txhua yam koj ua yog ib qho kev tab kaum; txhua kauj ruam koj mus yog kev ua phem. Tseem tsis zoo npaum li qhov muab koj lub luag hauj lwm tam sim no ua kom zoo; yam tsawg kawg mas yuav tsis ua rau koj tus kheej poob ntsej muag, thiab zoo dua qhov ua ib tug thawj coj cuav thiab raug thuam tom qab nraub qaum. Tam li yog ib tug tib neeg, koj yuav tsum paub ntsuas koj tus kheej, koj yuav tsum muaj kev paub txog tus kheej me ntsis; yog koj muaj, ces koj yuav muaj peev xwm zam dhau qhov taug txoj kev yuam kev thiab ua tej yam yuam kev loj.

Nej xav ua ib tug thawj coj cuav, los sis ib tug neeg raws qab uas dog dig? (Ua ib tug neeg raws qab dog dig.) Yog cov kwv tij thiab cov muam xaiv koj, ces koj tuaj yeem sim ua; tej zaum lawv qhov kev xam pom txog koj yuav yog dua li koj tej kev xav txog koj tus kheej. Yog cov kwv tij thiab cov muam xav tias koj ua tau, ces koj yuav tsum ua tag nrho koj lub zog. Yog koj siv tag nrho zog lawm tiam sis tseem ua tsis tau hauj lwm, thiab koj lub siab kub thiab ntxhov heev ua rau koj noj tsis qab pw tsis tsaug zog, thiab koj yeej tsis paub yuav ua li cas thiaj li ua tau zoo, ces tsum tsis txhob ua tus thawj coj los sis tus neeg ua hauj lwm lawm—qhov ntawd nyuaj rau koj dhau lawm. Yog koj ua ntxiv mus, ces koj yuav dhau los ua ib tug thawj coj cuav, yog li ntawd koj yuav tsum sau ntawv thov tawm tam sim ntawd, hais meej tias: “Vim kuv lub peev xwm tsis zoo thiab tsis muaj peev xwm ua hauj lwm tiag tiag, yog kuv ua thawj coj ntxiv mus, tsis ntev kuv yeej yuav dhau los ua ib tug thawj coj cuav xwb, yog li ntawd kuv thov tawm, thiab txaus siab hlo tso txoj hauj lwm no tseg.” Qhov no yog txoj kev ua uas txawj ntse tshaj plaws, thiab yog qhov haum tshaj plaws! Qhov ntawd tsim nyog, thiab zoo dua qhov uas tuav meej mom thiab ua ib tug thawj coj cuav. Yog koj paub tseeb tias koj lub peev xwm tsis zoo thiab tsis muaj peev xwm ua ib tug thawj coj tiam sis koj tso tsis tau lub meej mom tseg, thiab hais rau koj tus kheej tias, “Vim li cas kuv thiaj li ua tsis tau qhov no? Leej twg pab tau kuv? Leej twg los npaj thiab tawm tswv yim rau kuv tag nrho kom kuv tuav tau lub meej mom ua thawj coj no ntshe yuav zoo heev li! Tam sim no tsis muaj leej twg tsim nyog los hloov kuv qhov chaw, yog li ntawd kuv tsuas tau ua thawj coj mus ntxiv thiab xyiv fab rau tej txiaj ntsim ntawm qhov ntawd txhua hnub uas kuv ua txoj hauj lwm; txawm kuv ua tsis tau tes hauj lwm los, kuv tseem yog tus thawj coj, ces qhov ua ib tug thawj coj ntawd yeej zoo dua qhov ua ib tug kwv tij los sis ib tug nkauj muam dog dig. Yog Vajtswv lub tsev tsis rho kuv tawm thiab cov kwv tij thiab cov muam tsis tshem kuv tawm, ces kuv yuav tsis tawm li.” Qhov no puas tsim nyog? (Tsis tsim nyog.) Vim li cas tsis tsim nyog? (Qhov ntawd tsis muaj laj thawj; yog kuv ua tsis tau tes hauj lwm tiag tiag es tseem tsis tawm thiab, qhov no tsuas ua rau pawg ntseeg tes hauj lwm qeeb xwb.) Qhov ua li no ua rau pawg ntseeg tes hauj lwm qeeb—ua phem rau lwm tus, thiab ua phem rau tus kheej. Koj puas paub tias qhov ua ib tug thawj coj ntawd txhais tau li cas? Qhov ntawd txhais tau hais tias koj muaj feem xyuam ncaj qha nrog ntau tus neeg txoj kev nkag mus rau hauv lub neej txoj sia, thiab lawv taug txoj kev tom ntej li cas ntawd muaj feem xyuam ncaj qha nrog koj txoj kev coj. Yog koj coj tau zoo thiab coj lawv mus rau txoj kev uas yog, ces lawv yuav taug tau txoj kev uas yog. Yog koj coj tsis tau zoo thiab coj lawv mus rau hauv kwj deg, thiab lawv dhau los ua ib tug Falixais zoo li koj, ces koj txoj kev txhaum loj heev lawm! Thiab tom qab koj ua qhov kev txhaum loj no lawm, puas yog tag li ntawd lawm xwb? Vajtswv yuav sau cia! Koj paub tseeb tias koj lub peev xwm tsis zoo, tias koj yog ib tug thawj coj cuav, thiab ua tsis tau tes hauj lwm tiag tiag, tiam sis koj tsis lees koj tej kev ua yuam kev thiab tsis tawm, thiab tseem tuav lub meej mom tsis tso yam tsis paub txaj muag li, thiab tsis muab rau lwm tus. Qhov no yog ib qho kev txhaum, thiab Vajtswv yuav muab sau cia. Thiab qhov Nws sau cia ntawd zoo los sis phem rau koj yav tom ntej? Koj yeej yuav muaj teeb meem! Kuv qhia qhov tseeb tiag rau koj tias: Vajtswv sau tej yam zoo li no cia rau txhua tus tib neeg, thiab txhua yam raug sau cia yam meej meej. Yog muaj ib yam hnyav npaum li no tshwm sim rau ntawm txoj kev uas koj mus rau kev cawm dim, ces qhov cuam tshuam rau koj yuav loj heev! Txawm koj ua dab tsi los xij, tsis txhob taug txoj kev no, thiab tsis txhob ua hom neeg zoo li no.

Peb tau sib qhia me ntsis txog qee yam kev xyaum ua thiab kev qhia tshwm uas pom tau meej ntawm cov thawj coj cuav txog kev txhawb thiab cob qhia ntau hom neeg uas muaj peev xwm lawm. Muab hais luv luv, hom neeg uas yog ib tug thawj coj cuav ntawd mas tsis ua tes hauj lwm tiag tiag, thiab ua tsis tau tes hauj lwm tiag tiag. Lawv lub peev xwm tsis zoo, lawv ob lub qhov muag thiab lub siab dig, lawv tsis tuaj yeem pom tau teeb meem, thiab pom tsis tshab ntau hom neeg, yog li ntawd lawv tsis tuaj yeem ris tes hauj lwm tseem ceeb ntawm kev txhawb thiab cob qhia ntau hom neeg uas muaj peev xwm no. Vim li ntawd, lawv thiaj li ua tsis tau tes hauj lwm ntawm pawg ntseeg kom zoo, thiab yuav ua rau muaj kev nyuaj ntau yam rau cov neeg Vajtswv xaiv tseg hauv lawv txoj kev nkag mus rau hauv lub neej txoj sia. Thaum xav txog tej yam no, pom tseeb tias cov thawj coj cuav tsis tsim nyog ua cov thawj coj pawg ntseeg. Tseem muaj lwm cov thawj coj cuav uas tsis ua tes hauj lwm tiag tiag hauv pawg ntseeg thiab tsis nrog cov saib xyuas ntawm tes hauj lwm tiag tiag sib cuag, yog li ntawd lawv tsis paub tias cov neeg uas muaj peev xwm twg ua tau tes hauj lwm dab tsi, los sis leej twg haum rau tes hauj lwm dab tsi, los sis seb lawv txoj kev ua hauj lwm puas mus raws li tej hauv paus ntsiab lus. Vim li ntawd lawv thiaj li tsis tuaj yeem txhawb thiab cob qhia cov neeg uas muaj peev xwm. Es cov neeg zoo li no yuav ua tes hauj lwm ntawm pawg ntseeg kom zoo tau li cas? Qhov laj thawj tseem ceeb uas cov thawj coj cuav ua tsis tau tes hauj lwm tiag tiag yog vim lawv lub peev xwm tsis zoo; lawv pom tsis tshab rau ib yam dab tsi li thiab tsis paub tias tes hauj lwm tiag tiag yog dab tsi. Qhov no ua rau pawg ntseeg tes hauj lwm pheej nres los sis mus tsis taus. Tej no muaj feem xyuam ncaj qha rau qhov uas cov thawj coj cuav tsis ua tes hauj lwm tiag tiag. Tau ntau xyoo los no, Vajtswv lub tsev tau hais qhia tag qhia dua tias, cov neeg phem thiab cov tsis ntseeg yuav tsum raug tshem tawm mus thiab rho cov thawj coj cuav thiab cov neeg ua hauj lwm cuav tawm. Vim li cas ntau hom neeg phem thiab cov tsis ntseeg yuav tsum raug tshem tawm mus? Vim tom qab ntseeg Vajtswv tau ntau xyoo, cov neeg no yeej tsis lees txais qhov tseeb kiag li, thiab mus txog qib uas lawv tsis muaj kev cia siab yuav tau txais kev cawm dim lawm. Thiab vim li cas cov thawj coj cuav thiab cov neeg ua hauj lwm cuav txhua tus yuav tsum raug muab rho tawm? Vim lawv tsis ua hauj lwm tiag tiag, thiab yeej tsis txhawb los sis cob qhia cov neeg uas caum qhov tseeb; tiam sis, lawv tsuas ua tej yam uas tsis muaj qab hau xwb. Qhov no ua rau tes hauj lwm ntawm pawg ntseeg ntxhov quav niab thiab nres mus tsis taus, cia cov teeb meem uas muaj nyob ntawd tsis raug daws, thiab kuj ua rau cov neeg Vajtswv xaiv tseg txoj kev nkag mus rau hauv lub neej txoj sia ntawd qeeb thiab. Yog tag nrho cov thawj coj cuav thiab cov neeg ua hauj lwm cuav no raug rho tawm, thiab yog tag nrho cov neeg phem thiab cov tsis ntseeg uas cuam tshuam pawg ntseeg no raug ntsaig tawm mus lawm, ces pawg ntseeg tes hauj lwm yuav cia li mus tau zoo, lub neej hauv pawg ntseeg yuav cia li zoo tuaj, thiab cov neeg Vajtswv xaiv tseg yuav tuaj yeem noj thiab haus Vajtswv cov lus thiab ua lawv tej dej num li ib txwm, thiab nkag mus rau hauv txoj kev ntseeg Vajtswv uas yog. Qhov no yog qhov uas Vajtswv xav pom.

Lub Ob Hlis Ntuj Hnub Tim 27, Xyoo 2021