Hnub no peb yuav sib qhia ntxiv txog cov thawj coj thiab cov neeg ua hauj lwm tej luag hauj lwm thiab ntau yam kev qhia tshwm uas pom tau meej ntawm cov thawj coj cuav. Nyob rau qhov kev sib txoos zaum tag los ntawd, peb tau sib qhia txog cov thawj coj thiab cov neeg ua hauj lwm tej luag hauj lwm yam rau. Lub ntsiab lus tseem ceeb ntawm yam no yog dab tsi? (Yam rau yog “Txhawb thiab cob qhia txhua hom neeg uas muaj peev xwm uas tsim nyog kom txhua tus uas caum qhov tseeb ntawd thiaj li muaj lub cib fim los xyaum thiab nkag mus rau hauv qhov tseeb qhov muaj tiag kom sai li sai tau.”) Zaum tas los ntawd, qhov tseem ceeb peb sib qhia txog Vajtswv lub tsev tej hauv paus ntsiab lus rau kev txhawb thiab cob qhia tib neeg, thiab vim li cas Vajtswv lub tsev thiaj li txhawb thiab cob qhia tib neeg. Peb kuj tau soj ntsuam txog cov teeb meem uas muaj nyob hauv cov thawj coj cuav thaum hais txog qhov txhawb thiab cob qhia ntau hom neeg uas muaj peev xwm. Yog li ntawd cov thawj coj cuav tej kev qhia tshwm uas pom tau meej tseem ceeb hauv ob yam no yog dab tsi? Vim li cas peb thiaj li hais tias lawv yog cov thawj coj cuav? Tseem ceeb mas muaj ob kis. Ib kis yog cov thawj coj cuav tsis to taub tej hauv paus ntsiab lus rau kev txhawb, cob qhia, thiab siv ntau hom neeg, thiab lawv tsis nrhiav tej hauv paus ntsiab lus no. Lawv tsis paub tias ua tau ib tug thawj coj los sis ib tug neeg ua hauj lwm ntawd tib neeg yuav tsum muaj peev xwm sab twg thiaj li tseem ceeb los sis yuav tsum muaj tus qauv twg thiaj li tseem ceeb. Vim li ntawd, lawv thiaj li lam tau lam siv tib neeg raws li lawv tus kheej tej kev xav phem thiab tej kev xav hauv nruab siab. Lwm kis teeb meem loj yog tom qab txhawb, cob qhia, thiab siv cov tib neeg no lawm, lawv tsis taug qab los sis tsis tshuaj xyuas lawv tes hauj lwm, thiab tsis paub tias lawv ua tau zoo npaum li cas, los sis seb lawv puas ua hauj lwm tiag tiag, los sis seb lawv puas ua tau lawv tej luag hauj lwm kom tiav, los sis lawv tus yam ntxwv zoo li cas, los sis seb tej dej num uas cov tib neeg no ua puas haum rau lawv, thiab lawv tsis quav ntsej tias cov tib neeg uas lawv txhawb, cob qhia, thiab siv ntawd puas mus raws li tus qauv thiab puas mus raws li tej hauv paus ntsiab lus—lawv yeej tsis tshuaj xyuas tej no li. Cov thawj coj cuav xav hais tias tsuas yog txhawb tib neeg, npaj hauj lwm rau lawv xwb, ces tag li ntawd lawm, thiab tias lawv tej luag hauj lwm twb ua tiav lawm. Qhov no yog txoj kev uas cov thawj coj cuav ua lawv tes hauj lwm, thiab kuj yog lawv tus cwj pwm thiab kev xam pom thaum lawv ua hauj lwm. Yog li ntawd ob qho kev qhia tshwm uas pom tau meej tseem ceeb ntawm cov thawj coj cuav no puas ua pov thawj tau hais tias lawv tsis ua thiab ua tsis tau lawv tej luag hauj lwm kom tiav thaum hais txog qhov txhawb, cob qhia, thiab siv tib neeg? (Ua pov thawj tau.) Cov thawj coj cuav tsis tshuaj xyuas hauj lwm los sis tsis soj ntsuam ntau hom neeg, thiab haj yam tsis ua tib zoo thaum hais txog qhov tseeb thiab tej hauv paus ntsiab lus, thiab tsis muab ntau hom neeg tej kev qhia tshwm uas pom tau meej thiab tus yam ntxwv los piv rau qhov tseeb uas lawv to taub thiab tej hauv paus ntsiab lus uas Vajtswv lub tsev cheem tsum; lawv kuj cais tsis tau tias ntau hom neeg txoj kev ua neeg thiab qhov uas lawv ua tau zoo ntawd puas mus raws li Vajtswv lub tsev tej hauv paus ntsiab lus uas cheem tsum rau kev siv tib neeg. Vim li no, lawv thiaj li feeb tsis meej thiab ua dog ua dig heev thaum hais txog qhov txhawb thiab siv tib neeg thiab npaj tes hauj lwm rau cov neeg ntawd, thiab txhua yam uas lawv ua tsuas yog lam ua kom dhau thiab ua hauj lwm saum npoo raws li lawv tej kev xav phem thiab tej kev xav hauv nruab siab xwb. Thaum zoo li no, yog cheem tsum kom cov thawj coj cuav siv ntau hom neeg yam tsim nyog thiab haum raws li lawv txoj kev ua neeg thiab qhov uas lawv ua tau zoo ntawd, cov thawj coj cuav puas ua tau? (Ua tsis tau.) Tam sim no cia peb txhob maj hais txog tias cov thawj coj cuav lub peev xwm zoo li cas. Tsuas saib lawv tus cwj pwm rau tes hauj lwm thiab lawv tej kev thiab tej hau kev rau qhov ua tes hauj lwm, thiab qhov uas lawv tsis ua ib teg hauj lwm tiag tiag li, tiam sis tsuas ua tej hauj lwm dav dav thiab ua me ntsis hauj lwm saum npoo uas ua kom lwm tus pom lawv xwb, thiab qhov uas lawv tsis ua tes hauj lwm uas yug qhov tseeb rau tib neeg kiag li, thiab tsis paub siv qhov tseeb los daws teeb meem—tej no puav leej txaus los ua pov thawj tias cov thawj coj cuav ua tsis tau pawg ntseeg tes hauj lwm tiag tiag. Tsuas yog raws li qhov uas cov thawj coj cuav tsis ua hauj lwm tiag tiag, los sis tsis nkag mus tob rau hauv cov kwv tij thiab cov muam los daws cov teeb meem tiag tiag, tiam sis lawv ua tus nyob siab siab thiab muab lus txib xwb, ces yeej paub tseeb lawm hais tias lawv tsis muaj peev xwm ua txhua kis ntawm pawg ntseeg tes hauj lwm kom zoo kom txhawb thiab cob qhia tib neeg rau Vajtswv lub tsev.

Yam Xya: Muab Tib Neeg Faib thiab Siv Txhua Hom Tib Neeg Uas Sib Txawv Kom Tsim Nyog Raws Li Lawv Txoj Kev Ua Neeg thiab Qhov Lawv Ua Tau Zoo Kom Thiaj Li Muab Lawv Tso Tau Rau Qhov uas Lawv Ua Tau Zoo. (Ntu Ib)

Siv Txhua Hom Tib Neeg Kom Tsim Nyog Raws Li Lawv Txoj Kev Ua Neeg

Nej to taub li cas txog qhov npaj thiab siv txhua hom tib neeg? (Vajtswv lub tsev muaj tej qauv uas cheem tsum sib txawv rau txhua hom tib neeg uas raug txhawb thiab cob qhia, thiab tib neeg yuav tsum raug txhawb thiab siv raws li Vajtswv lub tsev tej hauv paus ntsiab lus thiab cov qauv rau kev txhawb tib neeg. Yog qee tus tib neeg tsim nyog ua cov thawj coj thiab cov neeg ua hauj lwm, ces yuav tsum cob qhia lawv los ua cov thawj coj, cov neeg ua hauj lwm, thiab cov saib xyuas; yog qee tus tib neeg muaj qhov ua tau zoo qib siab hauv ib qho hauj lwm twg, ces yuav tsum npaj tes dej num rau lawv raws li qhov lawv ua tau zoo qib siab ntawd, kom lawv thiaj li raug faib thiab siv tau yam tsim nyog.) Puas muaj leej twg xav ntxiv dab tsi? (Lwm yam yog ntsuas tib neeg raws li lawv txoj kev ua neeg. Yog ib tug twg txoj kev ua neeg zoo, nyiam qhov tseeb, muaj lub peev xwm nkag siab, ces lawv yog ib tug uas tsim nyog txhawb thiab cob qhia. Yog lawv txoj kev ua neeg tsuas yog zoo li sawv daws xwb, tiam sis lawv muaj qhov lawv ua tau zoo thiab ua tau ib teg dej num hauv Vajtswv lub tsev thiab ua dej num txhawb, ces hom neeg no kuj tuaj yeem muab ib teg dej num uas haum raws li qhov lawv ua tau zoo rau lawv, kom thiaj li siv tau lawv kom zoo tshaj plaws. Yog lawv yog ib tug neeg uas muaj txoj kev ua neeg phem thiab tej zaum yuav ua rau muaj kev tab kaum thiab kev cuam tshuam, ces qhov kom lawv ua ib teg dej num ntawd qhov tau txais yuav tsis npaum li qhov poob, yog li ntawd tsis tsim nyog npaj kom lawv ua ib teg dej num.) Yog muab tib neeg cais raws li lawv txoj kev ua neeg, ces tsuav lawv tsis yog cov neeg phem, tsis ua rau muaj kev tab kaum los sis kev cuam tshuam, thiab ua tau ib teg dej num xwb, ces lawv mus raws li Vajtswv lub tsev tej hauv paus ntsiab lus rau kev siv tib neeg. Lwm hom uas siv tsis tau, dhau ntawm cov neeg phem thiab cov ntsujplig phem lawm, ces yog cov uas muaj kev txawj ntse tsis txaus, qhov ntawd yog, cov uas ua tsis tau ib yam dab tsi tiav li, cov uas tsis muaj peev xwm ua kom ib yam dab tsi tiav, tsis muaj peev xwm kawm kom paub ib txoj hauj lwm, tsis muaj peev xwm saib xyuas tej hauj lwm dav dav uas yooj yim, cov uas ua hauj lwm siv zog los haj tseem ua tsis tau li—cov tib neeg uas muaj kev txawj ntse thiab kev ua neeg tsis txaus ntawd mas siv tsis tau. Cov tib neeg twg thiaj li poob mus rau hauv hom uas muaj kev txawj ntse tsis txaus no? Cov uas tsis to taub tib neeg hom lus, cov uas tsis muaj kev nkag siab kom yog, cov uas pheej to taub yuam kev, ua txhua yam yuam kev, thiab teb cov lus nug tsis raug lub ntsiab, thiab cov uas zoo ib yam li cov neeg ruam los sis cov neeg puas hlwb—cov no puav leej yog cov tib neeg uas muaj kev txawj ntse tsis txaus. Tseem muaj cov tib neeg tsis muaj qab hau uas nkag siab txhua yam txawv ntawm cov tib neeg li ib txwm lawm thiab—lawv kuj muaj ib qho teeb meem txog kev txawj ntse thiab. Kev txawj ntse tsis txaus puas suav nrog qhov tsis muaj peev xwm kawm ib yam dab tsi li? (Yog, qhov ntawd suav nrog.) Yog li ntawd qhov tsis muaj peev xwm kawm kom paub sau tsab ntawv puas suav tias yog muaj kev txawj ntse tsis txaus? (Qhov ntawd tsis suav.) Hom tib neeg zoo li no tsis suav. Muab qhov kawm hu nkauj thiab seev cev, kawm siv khoos phis tawj, los sis kawm lwm hom lus los ua piv txwv; qhov tsis muaj peev xwm kawm tej no tsis suav tias yog muaj kev txawj ntse tsis txaus. Yog li ntawd, qhov tsis muaj peev xwm kawm tej hom twg thiaj li qhia tias muaj kev txawj ntse tsis txaus? Piv txwv li, ib txhia tib neeg muaj kev paub me ntsis, tiam sis tsis muaj peev xwm kawm kom paub tias yuav npaj lawv hom lus li cas thaum sib tham nrog lwm tus. Yog li ntawd thaum lawv ntseeg Vajtswv cov tib neeg zoo li no puas muaj peev xwm sib qhia txog qhov tseeb, thov Vajtswv, thiab sib txuas lus nrog lwm tus neeg li ib txwm? (Lawv ua tsis tau.) Thaum lawv muaj ib qho kev xav hauv lawv lub siab los sis thaum lawv nyob hauv ib tug yam ntxwv, es lawv xav qhib siab thiab tham nrog tib neeg txog qhov ntawd thiab nrhiav txoj hau kev los daws, tiam sis lawv xav tau ntau hnub, thiab tsis paub tias yuav pib qhov twg los sis yuav piav qhia lawv tus kheej qhov kev xav li cas. Kiag thaum lawv hais lus, lawv tsis paub tseeb thiab hais lus ntxhov, lawv lub qhov ncauj zoo li tsis mloog hais li thiab lawv tej kev xav ntxhov hnyo. Piv txwv li, koj hais rau lawv tias, “Hnub no huab cua zoo thiab lub hnub ci ntsa iab,” thiab lawv yuav teb tias, “Nag hmo los nag thiab muaj tsheb sib tsoo ntawm txoj kev ntawd.” Lawv hais lus tsis sib haum nrog cov uas lawv tham nrog ntawd. Hom neeg no puas yog muaj kev txawj ntse tsis txaus? (Yog, lawv muaj tsis txaus.) Piv txwv li, yog lawv mob taub hau thiab koj nug lawv tias muaj teeb meem dab tsi, lawv yuav hais tias lawv lub plawv tsis tshua xis nyob. Cov lus teb no tsis raug raws lo lus nug, puas yog? (Yog.) Qhov no yog qhov tsis muaj kev txawj ntse dhau lawm. Cov tib neeg zoo li no mas muaj coob dhau. Nej puas tuaj yeem muab ib lub piv txwv? (Qee tus tib neeg thaum teb cov lus nug mas pheej hais tawm ntawm lub ntsiab sab nraud, lawv yeej tsis to taub tias lwm tus neeg tab tom nug lawv dab tsi kiag li.) Thaum tham lus mas pheej tham dhau ntawm lub ncauj lus mus lawm—qhov no yog kev txawj ntse tsis txaus. Tseem muaj cov tib neeg uas cais tsis tau cov neeg sab hauv thiab cov neeg sab nraud thaum lawv tham lus, thiab qee zaum thaum lawv hais lus lawv muag lawv tus kheej, yam tsis paub txog li—qhov no kuj yog kev txawj ntse tsis txaus thiab. Piv txwv li, qee cov kwv tij thiab cov muam nyob nrog cov neeg hauv tsev neeg uas tsis ntseeg, es nug lawv tias, “Nej tus vajtswv hais kom nej ua dab tsi?” Lawv teb tias: “Tus Vajtswv uas peb ntseeg zoo heev. Nws qhia peb kom ua neeg coj ncaj, thiab tsis pub peb dag leej twg li, thiab yuav tsum hais lus ncaj rau txhua tus.” Saib sab nraud mas, zoo li lawv tab tom ua tim khawv txog tes hauj lwm uas Vajtswv ua, muab lub yeeb koob rau Vajtswv, thiab ua rau cov neeg mloog muaj kev xav zoo txog cov ntseeg thiab tso siab rau lawv, tiam sis qhov no puas yog qhov tseeb tiag? Cov tsis ntseeg yuav hais li cas thaum lawv hnov li no? Lawv yuav hais tias, “Vim nej tus vajtswv hais kom nej ua neeg coj ncaj, ces qhia qhov tseeb rau peb: Nej lub pawg ntseeg muaj nyiaj ntau npaum li cas? Leej twg fij nyiaj ntau tshaj? Leej twg yog tus thawj coj ntawm nej lub pawg ntseeg? Nej muaj pes tsawg qhov chaw sib txoos ua ke?” Koj yuav tsis ceeb txog qhov ntawd lod? Cov tib neeg zoo li no tsis yog ruam lod? Vim li cas koj thiaj li tham nrog cov dab phem thiab cov tsis ntseeg txog qhov ua neeg coj ncaj? Qhov tseeb tiag tsis pom tias koj yuav coj ncaj npaum li ntawd ntawm Vajtswv xub ntiag. Yog li ntawd tsis yog koj muag koj tus kheej los ntawm qhov ua tiag tiag nrog cov tsis ntseeg lod? Qhov no tsis yog khawb qhov thiab cuab ntxiab rau koj tus kheej lod? Koj tsis yog ib tug neeg ruam lod? Thaum qhib koj lub siab los sis hais lus ncaj rau ib tug twg, koj yuav tsum xav txog tias koj tab tom tham nrog leej twg—yog lawv yog ib tug dab phem los sis ib tug Ntxwgnyoog, koj puas tuaj yeem qhia qhov tseeb tiag rau lawv? Yog li ntawd thaum hais txog cov tib neeg zoo li no, yuav tsum tau xyaum ua raws qhov “ntse yam li tus nab, thiab ua zoo yam li tus nquab”—qhov no yog Vajtswv txoj kev qhia rau noob neej. Cov neeg ruam tsis paub ua li no. Lawv tsuas paub ua raws li tej kev cai tswj xwb, thiab hais tej yam xws li, “Peb cov ntseeg coj ncaj heev, peb tsis dag leej twg li. Saib nej cov tsis ntseeg seb, nej hais lus dag puv npo, hos peb mas puav leej hais lus ncaj.” Thiab tom qab lawv hais lus ncaj lawm, tib neeg nrhiav tau hau kev los siv tawm tsam lawv. Qhov no tsis yog lawv cais tsis tau cov neeg sab hauv thiab cov neeg sab nraud lod? Qhov ntawd tsis yog ruam me ntsis lod? Lawv to taub qee qhov kev qhuab qhia tiam sis tsis paub siv. Lawv qw qee cov lus tsis muaj ntsiab ces lawv txawm xav tias lawv yog cov neeg sab ntsujplig heev, thiab xav tias lawv to taub qhov tseeb thiab muaj qhov tseeb qhov muaj tiag lawm, thiab lawv khav rau txhua qhov chaw, tiam sis thaum kawg, cov Ntxwgnyoog thiab cov dab phem siv qhov no thiab siv qhov ntawd los tawm tsam lawv. Qhov no yog kev txawj ntse tsis txaus.

Peb nyuam qhuav tham txog ob peb hom tib neeg uas muaj kev txawj ntse tsis txaus. Ib hom yog cov uas tsis to taub tib neeg cov lus, tsis to taub thiab tuav tsis tau lub ntsiab thiab cov ntsiab lus tseem ceeb ntawm lwm tus cov lus; lwm hom yog cov neeg ruam, uas ua tsis tau ib yam dab tsi tiav, thiab tuav tsis tau tej hauv paus ntsiab lus los sis cov ntsiab lus tseem ceeb txawm lawv yuav ua li cas los xij; ib hom ntxiv yog cov uas muaj tej kev xam pom uas tawv ncauj thiab tsis muaj qab hau tshwj xeeb txog txhua yam. Tseem muaj lwm hom yog cov uas tsis muaj peev xwm kawm ib yam dab tsi li, thiab tab txawm kawm hais lus los sis sib tham xwb los kawm tsis tau, los sis qhia lawv tej kev xav thiab tej kev xam pom kom meej kom lwm tus thiaj li to taub los yeej kawm tsis tau; txawm hais tias lawv paub ntawv me ntsis los, lawv npaj tsis tau lawv hom lus rau hauv lawv lub taub hau, los sis hais lus kom meej, thiab lawv nthuav tawm tsis tau tej kev xam pom uas yog, los sis ua tsis tau ib yam dab tsi tiav li. Cov no puav leej yog cov tib neeg uas muaj kev txawj ntse tsis txaus. Txawm lawv kawm tej txuj ci los sis kev txawj ntse dab tsi los xij, lawv pheej tsis muaj peev xwm nkag siab tej hauv paus ntsiab lus thiab tej kev cai li. Txawm yog lawv ua ib yam txuj ci los sis kev txawj ntse zoo qee zaus los xij, qhov ntawd tsuas yog lam tau xwb; lawv tsis paub tias xyov lawv ua li cas thiaj li ua tau zoo. Lwm zaus uas lawv ua tsis tau zoo, lawv kuj tsis paub tias vim li cas thiaj li zoo li no thiab. Lawv kawm tsis tau ib yam dab tsi los sis ua tsis tau kom txawj yam ntawd li. Yog hais kom lawv kawm ib yam txuj ci los sis ib qho kev txawj ntse thev naus laus ntsis, txawm lawv kawm ntev npaum li cas los xij, lawv tsuas tuav tau lub tswv yim xwb. Lawv twb mloog tej lus qhuab qhia tau ntau xyoo lawm tiam sis tsis to taub qhov tseeb. Yog hais kom lawv muab cov lus no thiab cov lus hais ntxaws ntxaws uas Vajtswv lub tsev pheej sib qhia tas li no, muab hloov los ua ib lub hauv paus ntsiab lus thiab ib txoj hau kev xyaum ua raws, ces txawm yog lawv siv kawg nkaus zog los lawv yeej ua tsis tau, thiab txawm qhia lawv li cas los yeej ua tsis tau. Qhov no ces paub tseeb lawm tias cov tib neeg no muaj kev txawj ntse tsis txaus. Qee tus tib neeg thaum muaj hnub nyoog 50 los sis 60 xyoo es ua ib yam dab tsi ntawd tau txiaj ntsig zoo ib yam li thaum lawv muaj 30 xyoo xwb, yam tsis muaj ib qho kev nce qib hlo li. Lawv kawm tsis tau ib yam dab tsi tiav hauv lawv ib sim neej li. Lawv tsis tau nkim lawv lub sij hawm, lawv mob siab thiab siv zog heev, tiam sis lawv kawm tsis tau ib yam dab tsi tiav li; qhov no qhia tias lawv muaj kev txawj ntse tsis txaus. Raws li qhov uas peb tau sib qhia los ntawd, qhov ciaj ciam ntawm qhov uas suav tias yog kev txawj ntse tsis txaus ntawd tau dav dua lawm, puas yog? Nej tus kheej puas suav tias yog muaj kev txawj ntse tsis txaus? (Suav.) Muaj me ntsis, tsis ntau los tsawg. Vim li cas Kuv thiaj li hais li ntawd? Tib neeg feem coob mloog tej lus qhuab qhia tau tsib xyoos, tiam sis tseem tsis to taub tias qhov tseeb yog dab tsi, los sis tsis to taub Vajtswv tej kev npaj siab yog dab tsi; thiab qee tus tib neeg mloog tej lus qhuab qhia tau 10 xyoo, los sis haj tseem yog 20 los sis 30 xyoo lawm los tseem tsis to taub tias qhov tseeb qhov muaj tiag yog dab tsi thiab cov lus thiab cov kev qhuab qhia yog dab tsi, lawv lub qhov ncauj puv npo tej kev qhuab qhia, thiab lawv hais tej ntawd npliag—qhov no yog ib qho teeb meem ntawm lawv txoj kev txawj ntse. Tam sim no muab qhov kev nkag siab txog qhov tseeb tso rau ib sab, es cia peb tsuas hais tias tib neeg nthuav tej kev qhia tshwm uas pom tau meej hauv qab no tawm rau qee yam sab nraud thiab tej yam uas sawv daws paub hauv tib neeg lub neej xwb: Txawm lawv tau ua ib yam dab tsi los tau pes tsawg xyoo lawm los xij, lawv qhov xwm txheej, tus yam ntxwv, thiab kev xam pom tseem zoo ib yam li thaum lawv pib kawm xwb, thiab tsis hais lawv raug coj, qhia, los sis lawv xyaum ua li cas los xij, lawv tseem tsis muaj kev nce qib hlo li. Qhov no yog kev txawj ntse tsis txaus.

Qhov xaiv thiab siv tib neeg raws li qhov tias lawv puas muaj txoj kev ua neeg los tsis muaj ntawd mas yog mus raws li tej hauv paus ntsiab lus; yog li ntawd qhia Kuv seb, peb puas tsim nyog cob qhia thiab siv cov tib neeg uas muaj kev ua neeg phem, kev txawj ntse tsis txaus, los sis cov uas muaj cov ntsujplig phem ua hauj lwm? Qhov ntawd yeej ua tsis tau kiag li. Tshwj tsis yog ob peb hom tib neeg no uas tsis mus raws li Vajtswv lub tsev tej hauv paus ntsiab lus rau qhov siv tib neeg, lwm cov tib neeg feem coob tuaj yeem siv kom tsim nyog raws li lawv txoj kev ua neeg. Rau cov uas muaj kev ua neeg zoo li sawv daws xwb, uas hais tsis tau tias phem los sis zoo, lawv tsuas ua tau cov tswv cuab dog dig hauv pab pawg xwb. Rau cov uas muaj kev ua neeg zoo me ntsis, cov uas muaj qhov tsim nyog thiab muaj lub siab txawj xav me ntsis, cov uas nyiam tej yam zoo, cov uas ncaj ncees heev, muaj ib qho kev paub txog kev ncaj ncees, thiab muaj peev xwm tiv thaiv Vajtswv lub tsev tej txiaj ntsim ntawd, tuaj yeem muab qhov tseem ceeb tso rau qhov kev cob qhia thiab kev siv cov tib neeg no. Hais txog qhov seb cob qhia thiab siv lawv ua cov thawj coj los sis cov coj pab pawg, los sis ua qee yam hauj lwm tseem ceeb, qhov no yog nyob ntawm lawv lub peev xwm thiab qhov lawv ua tau zoo. Qhov no yog qhov ntsuas tias yuav siv txhua hom tib neeg li cas raws li lawv txoj kev ua neeg.

Siv Txhua Hom Tib Neeg Kom Tsim Nyog Raws Li Qhov Lawv Ua Tau Zoo

Cia peb tham ntxiv txog qhov yuav siv txhua hom tib neeg raws li qhov lawv ua tau zoo li cas. Dhau ntawm lub peev xwm lawm, qee tus tib neeg kuj muaj qee yam kev txawj qib siab uas lawv ua tau zoo heev thiab. Kab lus “qhov uas ua tau zoo” ntawd txhais li cas? (Muaj ib yam kev txawj ntse rau hauv ib qho hauj lwm tshwj xeeb twg, xws li muaj peev xwm sau nkauj, ntaus suab paj nruag, los sis kos duab.) To taub txog suab paj nruag, kos duab, thiab seev cev thiab sau ntaub ntawv—tej no puav leej yog qhov uas ua tau zoo. Ua yeeb yam thiab qhia ua yeeb yam yog qhov ua tau zoo uas ntsig txog kev ua yeeb yaj kiab, txhais lus yog ib qho ua tau zoo txog sab lus, thiab ua vis dis aus thiab tej uas ua kom duab zoo tshwj xeeb ntawd los kuj yog qhov ua tau zoo nyob rau hauv tej hauj lwm tshwj xeeb thiab. Thaum peb hais txog qhov ua tau zoo, peb tab tom hais txog cov kev txawj qib siab uas muaj feem xyuam rau pawg ntseeg tes hauj lwm tseem ceeb. Qee tus tib neeg twb muaj lub hauv paus lawm, thiab qee tus tib neeg kawm tej no tom qab los rau hauv Vajtswv lub tsev. Yog ib tug neeg muaj lub hauv paus tiam sis lawv txoj kev ua neeg tsis mus raws li tus qauv, thiab lawv yog ib tug ntawm cov uas muaj kev txawj ntse tsis txaus, ib tug neeg phem, los sis ib tug ntsujplig phem, ces tsis tuaj yeem siv lawv. Yog tus neeg ntawd txoj kev ua neeg mus raws li tus qauv thiab lawv muaj ib qho uas ua tau zoo uas Vajtswv lub tsev cheem tsum, ces tuaj yeem txhawb, cob qhia, thiab siv lawv, muab lawv faib mus rau ib pab pawg uas haum rau qhov uas lawv ua tau zoo, los sis muaj feem xyuam rau cov kev txawj qib siab uas lawv muaj, thiab pib ua hauj lwm tam sim ntawd. Qee tus tib neeg tseem tsis tau muaj ib qho kev txawj qib siab uas lawv ua tau zoo, tiam sis lawv txaus siab kawm, thiab kawm tau sai heev. Yog lawv txoj kev ua neeg mus raws li tus qauv, ces Vajtswv lub tsev yeej tuaj yeem cob qhia lawv thiab tsim tej xwm txheej rau lawv kawm, thiab kuj siv tau cov tib neeg zoo li no thiab. Muab hais luv luv, qhov npaj tej dej num yog saib raws li tib neeg lub peev xwm thiab qhov ua tau zoo, thiab kom ntau li ntau tau, cov tib neeg uas muaj qhov ua tau zoo uas sib txawv ntawd yuav tsum npaj los ua hauj lwm nyob rau hauv qhov lawv tus kheej ua tau zoo, kom lawv thiaj li siv tau tej uas ua tau zoo ntawd. Yog Vajtswv lub tsev tsis cheem tsum qhov lawv ua tau zoo ntawd lawm, ces tuaj yeem npaj kom lawv ua yam twg los tau uas lawv tuaj yeem ua tau, saib raws li lawv lub peev xwm thiab txoj kev ua neeg; qhov no hu ua siv tib neeg kom tsim nyog. Yog Vajtswv lub tsev tseem cheem tsum qhov uas lawv ua tau zoo ntawd, ces yuav tsum cia lawv ua tes dej num hauv sab no mus ntxiv, thiab tsis pub hloov lawv mus ua lwm yam raws li siab nyiam, tshwj tsis yog muaj tib neeg coob dhau ua hauj lwm hauv txoj hauj lwm no lawm, yog zoo li ntawd yuav tsum txo cov tib neeg kom tsawg raws li qhov xwm txheej los ntawm qhov muab cov uas tsis tshua txawj hauv lawv txoj hauj lwm ntawd hloov mus ua lwm yam dej num; qhov no yog siv tib neeg kom tsim nyog.

Muaj ib hom tib neeg uas tsis muaj tej kev txawj ntse tshwj xeeb—lawv sau tau tsab ntawv me ntsis, lawv hu nkauj kuj raug lub suab, thiab kawm ua yam twg los kuj tau, tiam sis tej ntawd tsis yog tej uas lawv ua tau zoo tshaj plaws. Lawv ua dab tsi tau zoo tshaj plaws? Lawv muaj peev xwm me ntsis, lawv muaj ib qho kev paub me ntsis txog kev ncaj ncees, thiab lawv paub ntsia me ntsis tias yuav txiav txim thiab siv tib neeg li cas. Ntxiv rau qhov ntawd, qhov tseem ceeb tshaj yog muaj kev txawj teeb tsa. Yog koj muab ib teg num los sis ib txoj hauj lwm rau hom neeg no, lawv tuaj yeem teeb tsa cov tib neeg los ua. Nyob rau tib lub sij hawm ntawd, lawv muaj lub peev xwm ua hauj lwm; uas yog, yog koj muab ib txoj hauj lwm rau lawv, lawv muaj peev xwm ua tau zoo thiab ua kom tiav. Lawv muaj ib qho kev npaj hauv nruab siab, muaj cov kauj ruam thiab muaj txheej txheem. Lawv paub tias yuav siv tib neeg li cas, yuav faib sij hawm li cas, thiab yuav siv leej twg rau txoj hauj lwm no. Yog muaj teeb meem tshwm tuaj, lawv paub tias yuav nrog sawv daws sib tham txog txoj hau kev daws li cas. Lawv paub tias yuav ua kom sib npaug thiab daws tag nrho tej no li cas. Cov tib neeg zoo li no tsis yog tsuas muaj peev xwm ua hauj lwm xwb, lawv kuj hais lus tau zoo me ntsis thiab. Lawv cov lus meej thiab muaj txheej txheem, thiab lawv tsis ua rau tib neeg ntxhov. Thaum lawv faib hauj lwm tag, sawv daws to taub meej thiab paub tias txhua tus yuav tsum ua dab tsi; tsis muaj leej twg nyob dawb thiab tsis muaj qhov tseg khoob cia hauv tes hauj lwm. Lawv qhov kev piav qhia txog tej ntxaws ntxaws ntawm tes hauj lwm kuj meej thiab muaj txheej txheem dua me ntsis, thiab rau cov teeb meem uas nyuaj heev, lawv soj ntsuam, sib qhia, thiab teev tej ntxaws ntxaws kom sawv daws to taub cov teeb meem ntawd, paub tias yuav ua tes hauj lwm li cas, thiab paub tias yuav ua mus ntxiv li cas lawm. Ntxiv rau qhov ntawd, lawv kuj tuaj yeem sib qhia txog tias txoj kev ua twg yuav muaj qhov tsis zoo, txoj kev ua hauj lwm twg yuav cuam tshuam rau qhov ua tau zoo, thaum tab tom ua hauj lwm cov tib neeg yuav tsum xyuam xim dab tsi, thiab lwm yam. Qhov ntawd yog, lawv xav ntau dua lwm tus ua ntej lawv pib ua tes hauj lwm—lawv xav txog tej ntxaws ntxaws ntau dua, muaj tiag dua, thiab txhij txhua dua lwm tus. Nyob rau ib kis mas, yog lawv muaj tswv yim, thiab nyob rau lwm kis mas, yog lawv muaj peev xwm hais lus. Muaj tswv yim txhais tau tias lawv ua tej yam muaj txheej txheem, muaj cov kauj ruam thiab ua raws li ib qho kev npaj, thiab meej heev. Muaj peev xwm hais lus txhais tau tias lawv tuaj yeem siv lus los qhia tawm txog tej kev xav, tej phiaj xwm, thiab tej kev npaj hauv lawv lub siab kom meej thiab to taub, thiab lawv paub hais lus yooj yim thiab luv luv, kom cov neeg mloog thiaj li tsis ntxhov. Lawv qhia tawm lawv tus kheej hauv cov lus uas meej, raug, muaj tseeb, thiab tsim nyog heev. Qhov no yog qhov uas txhais tias muaj peev xwm hais lus. Cov tib neeg zoo li no muaj peev xwm hais lus, lawv muaj peev xwm ua hauj lwm, txawj teeb tsa, thiab ntxiv rau qhov ntawd, lawv muaj lub siab ris lub luag hauj lwm, thiab paub txog kev ncaj ncees dua me ntsis. Lawv tsis yog cov tib neeg uas ua kom lwm tus zoo siab los sis cov neeg ua kom haum xeeb. Thaum lawv pom cov neeg phem ua rau muaj kev tab kaum thiab kev cuam tshuam rau pawg ntseeg tes hauj lwm, los sis cov neeg ruam thiab cov neeg phem uas tsis ua lawv tes hauj lwm thiab ua tswv yim dag, lawv npau taws, tsis txaus siab, thiab lawv daws tau thiab saib xyuas tau cov teeb meem no tam sim ntawd, thiab tiv thaiv Vajtswv lub tsev tes hauj lwm thiab tej txiaj ntsim. Muaj lub siab ris lub luag hauj lwm thiab paub txog kev ncaj ncees—tej kev qhia tshwm uas pom tau meej no tsis yog cov yam ntxwv uas pom tseeb ntawm hom neeg no txoj kev ua neeg lod? (Yog.) Cov tib neeg zoo li no tej zaum yuav tsis txawj nrog lwm tus sib raug zoo, los sis tej zaum yuav tsis tshua paub zoo txog ib qho kev txawj qib siab twg, tiam sis yog lawv muaj cov yam ntxwv uas Kuv nyuam qhuav piav qhia ntawd, ces tuaj yeem cob qhia lawv los ua cov thawj coj thiab cov neeg ua hauj lwm. Cov yam ntxwv no kuj yog qhov uas lawv ua tau zoo, uas yog lawv muaj peev xwm hais lus, muaj peev xwm ua hauj lwm, muaj peev xwm teeb tsa, thiab paub txog kev ncaj ncees dua me ntsis. Qhov paub txog kev ncaj ncees ntawd mas tseem ceeb heev. Cov neeg phem thiab cov tawm tsam khetos puas muaj qhov paub txog kev ncaj ncees? (Lawv tsis muaj.) Cov tawm tsam khetos muaj tus yam ntxwv xeeb txawm lim hiam; yeej tsis muaj hnub uas lawv yuav muaj qhov paub txog kev ncaj ncees. Lwm yam uas tseem ceeb yog hom neeg no muaj kev to taub ntawm sab ntsujplig thiab nkag siab tau qhov tseeb; qhov no muaj feem xyuam rau lawv lub peev xwm. Qhov uas hom neeg no ua tau zoo ces yog hais txog cov yam ntxwv ntawm kev ua neeg thiab tej peev xwm uas Kuv nyuam qhuav hais txog ntawd, ntxiv rau peb tug qauv ntawm qhov nkag siab tau qhov tseeb, muaj lub nra rau pawg ntseeg, thiab muaj peev xwm ua hauj lwm. Cov tib neeg zoo li no tuaj yeem raug cob qhia ua cov thawj coj; qhov ntawd tsis muaj teeb meem. Dhau ntawm qhov muaj tswv yim thiab muaj peev xwm lawm, ib tug thawj coj yuav tsum nkag siab tau qhov tseeb, thiab txawj teeb tsa thiab muaj peev xwm ua hauj lwm nyob rau hauv lawv txoj hauj lwm, nrog rau qhov muaj peev xwm hais lus. Ib txhia tib neeg mas muaj peev xwm zoo heev, lawv muaj kev to taub ntawm sab ntsujplig, tiam sis thaum hais txog qhov sib qhia nyob hauv tej kev sib txoos ua ke mas, lawv hais ntxhov quav niab, lawv tsis muaj peev xwm npaj lawv hom lus hlo li, thiab yam uas lawv hais ntawd tsis muaj laj thawj hlo li. Cov tib neeg zoo li no puas cob qhia tau los ua cov thawj coj? (Tsis tau.) Qee tus tib neeg tsuas muaj peev xwm tham nrog cov tib neeg tsawg tsawg xwb; lawv muaj peev xwm sib qhia txog qee tus yam ntxwv, kev xam pom, thiab kev nkag siab qhov tseeb, thiab lawv tuaj yeem txhawb, yug, thiab pab tau lwm tus, tiam sis thaum nyob nrog tib neeg coob lawv tsis kam hais lus, thiab ntshai, thiab tej zaum haj tseem ntshai txog qib uas quaj. Cov tib neeg zoo li no puas tuaj yeem cob qhia? Rau hom neeg uas muaj kev ua neeg qaug zog dua me ntsis thiab ntshai dua me ntsis, thiab cov uas ntshai yooj yim thaum nyob ntawm sawv daws xub ntiag, yog lawv muaj txoj kev ua neeg, qhov uas ua tau zoo, thiab muaj lub peev xwm nkag siab los ua ib tug thawj coj, ces cob qhia tau lawv los ua ib tug coj pab pawg los sis ib tug thawj coj pawg ntseeg. Xub cob qhia thiab qhia lawv ua ntej; tom qab lawv tau ntsib tau pom ib ntus lawm, lawv yuav muaj kev paub kev pom thiab ua rau muaj siab tawv me ntsis ntxiv, thiab yuav tsis ntshai hais lus los sis ntshai thaum nyob ntawm sawv daws xub ntiag lawm. Muab hais luv luv, thaum hais txog cov uas muaj cov yam ntxwv ntawm kev ua neeg thiab qhov uas ua tau zoo uas peb nyuam qhuav sib qhia txog ntawd, tsuav yog lawv txoj kev ua neeg mus raws li tus qauv xwb ces lawv tuaj yeem raug cob qhia los ua cov thawj coj. Zoo ib yam li peb tau hais zaum tas los ntawd, qhov ib tug neeg raug cob qhia los ua ib tug thawj coj ntawd, tsis tas lawv yuav tsum to taub txhua qhov tseeb, zwm tau rau Vajtswv, muaj lub siab hwm Vajtswv, thiab lwm yam. Muaj tseeb uas tsis tas yuav tsum muaj raws li cov qauv no kiag li. Yog ib tug twg muaj qee lub peev xwm, muaj kev to taub ntawm sab ntsujplig, thiab lees txais tau qhov tseeb, ces lawv tuaj yeem raug txhawb thiab cob qhia. Qhov no tsis yog siv tib neeg kom tsim nyog lod? (Yog.) Tus qauv tseem ceeb tshaj plaws yog seb ib tug neeg txoj kev ua neeg puas mus raws li tus qauv los tsis mus raws.

Ib txhia tib neeg, tom qab mloog qhov uas Kuv hais tag lawm, ces xav tias lawv twb muaj raws li tus qauv ua ib tug thawj coj lawm thiab tsim nyog raug txhawb. Qhov no tsis yog lawv to taub yuam kev lawm lod? Qhov ua ib tug thawj coj puas yog ib yam uas yooj yim npaum li ntawd? Lawv xav tias, “Kuv ua tej yam kuj muaj tus qauv kawg, txawj teeb tsa, thiab kuv hais lus npliag, kuv piav tau tej yam uas nyuaj tshaj plaws kom meej meej, yog li ntawd vim li cas Vajtswv lub tsev thiaj li tsis txhawb kuv? Vim li cas cov kwv tij thiab cov muam thiaj li tsis xaiv kuv ua ib tug thawj coj? Ua cas cov thawj coj txheej saud thiaj li tsis pom tias kuv yog ib tug neeg uas muaj peev xwm?” Tsis txhob txhawj. Yog koj yeej muaj raws li tus qauv uas ua ib tug thawj coj los sis ib tug neeg ua hauj lwm tiag, ces tsis ntxov los lig, koj yuav raug txhawb thiab muab cib fim kom koj xyaum koj tus kheej. Qhov tseem ceeb tam sim no yog koj yuav tsum xyaum kom ntau hauv kev xyaum ua raws qhov tseeb thiab ua hauj lwm raws li tej hauv paus ntsiab lus, thiab nquag pab lwm tus, thiab daws cov teeb meem tiag tiag rau cov neeg Vajtswv xaiv tseg. Thaum cov neeg Vajtswv xaiv tseg pom tias koj lub peev xwm zoo thiab daws tau cov teeb meem tiag tiag, ces lawv yuav qhia koj npe thiab xaiv koj. Yog koj tsis nquag ua hauj lwm tiag tiag me ntsis, thiab tsuas tos hnub uas koj cia li raug xaiv ua ib tug thawj coj los sis raug tus Nyob Saud txhawb tshwj xeeb xwb, qhov ntawd yeej yuav tsis muaj hnub tshwm sim li. Koj yuav tsum ua qee yam hauj lwm tiag tiag kom txhua tus tau pom; thaum txhua tus pom tej qhov uas koj ua tau zoo lawm thiab xav tias koj yog ib tug neeg uas tsim nyog raug txhawb, raug cob qhia, thiab raug siv, lawv yuav cia li qhia koj npe thiab xaiv koj lawm. Yog tam sim no koj xav tias koj haum ua ib tug thawj coj, tiam sis tsis muaj leej twg xaiv koj, thiab Vajtswv lub tsev tsis txhawb koj, qhov ntawd yog vim li cas? Muaj ib yam uas paub tseeb: Koj tseem tsis tau raug lees paub nyob hauv cov kwv tij thiab cov muam lub qhov muag. Tej zaum yog koj txoj kev ua neeg, tej zaum yog koj txoj kev caum, los sis tej zaum yog tej qhov uas koj ua tau zoo los sis koj lub peev xwm. Yog cov kwv tij thiab cov muam tsis lees paub los sis tsis pom zoo rau ib qho ntawm tej no, ces lawv yuav tsis xaiv koj los sis qhia koj npe. Yog li ntawd koj yuav tsum siv zog ua hauj lwm ntxiv, caum thiab xyaum ua txuas ntxiv, thiab thaum koj to taub qhov tseeb tiag tiag thiab ua tau tej yam mus raws li tej hauv paus ntsiab lus lawm, ces tib neeg yuav cia li qhia koj npe thiab xaiv koj lawm; qhov no yog ib qho uas cia li tshwm sim thaum muaj txhua yam yog lawm. Tsis tim tsum pheej tos ntsoov ua ib tug thawj coj los sis xav txog qhov ntawd tas li; qhov no yog ib qho kev ntshaw uas loj dhau. Koj yuav tsum muaj lub siab tus, ua ib tug neeg uas caum qhov tseeb, ua tib zoo xav txog Vajtswv tej kev npaj siab, thiab kawm paub mloog lus thiab ua siab ntev. Koj caum qhov ua thawj coj yam dig muag ntsuav tsis tau; qhov ntawd yog ib qho kev xav ua loj, thiab qhov ntawd tsis yog txoj kev uas yog. Koj yuav tsum tsis txhob muaj qhov kev xav ua thiab kev ntshaw no tas li. Tab txawm koj yeej muaj lub peev xwm tiag tiag los xij, koj yuav tsum tos kom txog thaum koj nkag mus rau hauv qhov tseeb qhov muaj tiag tso koj thiaj li yuav ua tau ib tug thawj coj los sis ib tug neeg ua hauj lwm yam tsim nyog. Yog koj tsis to taub qhov tseeb thiab tsis paub tias yuav xyaum ua raws qhov tseeb li cas, ces txawm koj raug xaiv los ua ib tug thawj coj los sis ib tug neeg ua hauj lwm lawm los xij, koj yuav ua tsis tau tes hauj lwm tiag tiag thiab yuav tsum raug rho tawm thiab raug tshem tawm, qhov no yog ib yam uas tshwm sim tas li. Yog koj xav tias koj tus kheej haum los ua ib tug thawj coj, muaj kev txawj, muaj peev xwm, thiab muaj kev ua neeg rau txoj kev ua thawj coj, tiam sis Vajtswv lub tsev tsis tau txhawb koj thiab cov kwv tij thiab cov muam tsis xaiv koj, es koj yuav coj li cas rau qhov no? Qhov no muaj ib txoj hau kev xyaum ua raws uas koj tuaj yeem taug. Koj yuav tsum paub koj tus kheej kom tag nrho. Saib seb qhov teeb meem puas yog qhov tias koj muaj ib qho teeb meem ntawm koj txoj kev ua neeg, los sis yog qhov tias qhov kev nthuav tawm qee kis ntawm koj tus moj yam qias vuab tsuab ntawd ua rau tib neeg tsis nyiam kiag li; los sis seb puas yog qhov tias koj tsis muaj qhov tseeb qhov muaj tiag es ua rau lwm tus tsis txaus siab lees paub, los sis yog qhov tias qhov ua koj tes dej num ntawd tsis tau raws li tus qauv. Koj yuav tsum tig xav txog txhua yam no thiab saib seb koj tu ncua nyob qhov twg tiag. Tom qab koj tig xav txog ib ntus thiab pom tias koj qhov teeb meem nyob qhov twg, koj yuav tsum maj nroos nrhiav qhov tseeb los daws, thiab nkag mus rau hauv qhov tseeb qhov muaj tiag, thiab siv zog kom hloov thiab loj hlob, kom thaum cov neeg nyob ib puag ncig koj pom, lawv yuav hais tias, “Niaj hnub no, nws zoo dua yav tas los lawm. Nws ua hauj lwm ruaj khov thiab muab nws txoj hauj lwm saib tseem ceeb, thiab nws tsom ntsoov tshwj xeeb rau qhov tseeb tej hauv paus ntsiab lus lawm. Nws tsis ua tej yam li neeg siab kub los sis ua dog ua dig, thiab nws ua tib zoo thiab muaj lub luag hauj lwm ntau dua rau nws tes hauj lwm lawm. Yav tas los mas nws nyiam hais lus loj thiab pheej nthuav tus kheej tawm tas li, tiam sis tam sim no nws txo hwj chim ntau lawm thiab tsis khav theeb lawm. Txawm nws muaj peev xwm ua tau tej yam me ntsis los xij, nws tsis khav txog qhov ntawd, thiab thaum nws ua ib yam dab tsi tag, nws rov qab tig xav txog ntau zaus, vim ntshai tsam ua yuam kev. Nws ua tib zoo xyuam xim dua yav tas los, thiab muaj lub siab hwm Vajtswv—thiab qhov tseem ceeb tshaj mas, nws tuaj yeem qhia qhov tseeb los daws qee cov teeb meem lawm. Tseeb tiag, nws loj hlob lawm.” Cov neeg nyob ib puag ncig koj uas tau nrog koj sib cuag li ib ntus ntawd pom tias koj muaj kev hloov thiab loj hlob uas pom tau tseeb; nyob hauv koj txoj kev ua neeg, kev coj tus kheej thiab kev saib xyuas rau tej yam, thiab nyob hauv koj tus cwj pwm rau koj tes hauj lwm, thiab nyob hauv koj txoj kev coj rau qhov tseeb tej hauv paus ntsiab lus, koj siv zog ntau dua yav tas los, thiab xyuam xim heev hauv koj cov lus thiab tej kev ua lawm. Cov kwv tij thiab cov muam pom tag nrho tej no thiab muab khaws cia rau hauv siab. Thaum ntawd tej zaum koj yuav muaj peev xwm ua ib tug neeg los mus sib tw nyob rau hauv qhov kev xaiv tsa tom ntej, thiab koj yuav muaj ib qho kev cia siab tias yuav raug xaiv los ua ib tug thawj coj. Yog koj muaj peev xwm ua tau qee yam dej num tseem ceeb tiag, ces koj yuav tau txais Vajtswv cov koob hmoov. Yog koj yeej muaj lub nra thiab muaj lub siab ris lub luag hauj lwm zoo li no tiag, thiab xav ris lub nra, ces maj nroos xyaum koj tus kheej. Tsom ntsoov rau kev xyaum ua raws qhov tseeb thiab ua tej yam kom muaj hauv paus ntsiab lus. Thaum koj muaj kev ntsib kev pom hauv lub neej txoj sia thiab sau tau cov ntawv lus tim khawv lawm, koj yuav loj hlob tiag tiag. Thiab yog koj muaj peev xwm ua tim khawv rau Vajtswv, ces koj yeej yuav tau txais Vajntsujplig tes hauj lwm. Yog Vajntsujplig ua hauj lwm rau koj, qhov ntawd txhais tias Vajtswv nyiam koj, thiab muaj Vajntsujplig coj koj kev, ces koj lub cib fim yuav tshwm sim los sai sai. Tej zaum tam sim no koj muaj lub nra, tiam sis koj lub siab ntseeg tsis txaus thiab koj txoj kev ntsib kev pom hauv lub neej txoj sia ntiav dhau, yog li ntawd txawm koj los ua ib tug thawj coj los, koj yuav yooj yim ntog. Koj yuav tsum caum txoj kev nkag mus rau hauv lub neej txoj sia, daws koj tej kev ntshaw uas ntau dhau ntawd ua ntej, txaus siab hlo ua ib tug raws qab, thiab los zwm rau Vajtswv tiag tiag, tsis muaj lus yws rau txhua yam uas Nws tswj hwm los sis npaj lawm. Thaum koj muaj lub siab ntseeg no lawm, ces koj lub cib fim yuav los txog. Qhov uas koj xav ris lub nra hnyav, qhov uas koj muaj lub nra no, yog ib yam zoo. Qhov ntawd qhia tau tias koj muaj lub siab nquag plias uas nrhiav kev nce qib thiab tias koj xav ua tib zoo xav txog Vajtswv tej kev npaj siab thiab ua raws li Vajtswv lub siab nyiam. Qhov no tsis yog ib qho kev ntshaw, tiam sis yog ib lub nra tseeb tiag; qhov ntawd yog lub luag hauj lwm ntawm cov uas caum qhov tseeb thiab yog lub hom phiaj ntawm lawv txoj kev caum. Koj tsis muaj lub siab twm xeeb thiab tsis yog ua txhawm rau koj tus kheej, tiam sis yog txhawm rau ua tim khawv rau Vajtswv thiab ua kom Nws txaus siab—qhov no yog qhov uas Vajtswv foom koob hmoov rau tshaj plaws, thiab Nws yuav npaj qhov tsim nyog rau koj. Tam sim no, koj tsuas tsom rau kev caum txoj kev nkag mus rau hauv lub neej txoj sia, ua koj tes dej num kom zoo ua ntej tso, thiab tom qab ntawd sau ob peb co ntawv txog cov lus tim khawv uas hais txog txoj kev ntsib kev pom los ua tim khawv rau Vajtswv. Yog koj cov lus tim khawv muaj tseeb thiab muaj tiag, ces cov neeg uas pom cov lus tim khawv ntawd yuav hwm koj thiab nyiam koj, thiab yuav txaus siab hlo los koom nrog koj thiab qhia koj npe, ces yog li ntawd koj lub cib fim yuav los txog. Yog li ntawd, koj yuav tsum npaj qhov tseeb rau koj tus kheej ua ntej lub cib fim los txog. Xub muaj kev ntsib kev pom uas muaj tiag tso, ces tom qab ntawd koj yuav cia li muaj lus tim khawv tseeb; cov txiaj ntsig ntawm koj tes dej num yuav zoo zuj zus tuaj, txog lub sij hawm ntawd, txawm koj xav nkaum los nkaum tsis tau lawm, thiab cov kwv tij thiab cov muam nyob ib puag ncig koj yuav qhia koj npe. Vim hais tias cov neeg uas muaj qhov tseeb qhov muaj tiag tsis yog Vajtswv lub tsev cheem tsum xwb, tiam sis cov neeg Vajtswv xaiv tseg los kuj cheem tsum thiab; leej twg los yeej nyiam sib cuag nrog cov neeg uas muaj qhov tseeb qhov muaj tiag, thiab leej twg los yeej nyiam ua phooj ywg nrog cov uas muaj qhov tseeb qhov muaj tiag. Yog koj tau ntsib tau pom mus txog qib no, thiab txhua tus pom tias koj muaj lus tim khawv tseeb tiag thiab lees paub tias koj muaj qhov tseeb qhov muaj tiag lawm, ces koj yuav zam tsis tau kev ua ib tug thawj coj txawm koj xav zam los xij, cov kwv tij thiab cov muam yuav tsum xaiv koj xwb xwb li. Tsis yog li ntawd lod? Thaum tus tub loj leeb tig rov qab thiab rov qab los cuag Vajtswv lawm, Vajtswv txaus siab, zoo siab, thiab tau kev nplig siab hauv Nws lub siab. Yog ib tug neeg uas muaj qhov tseeb qhov muaj tiag, koj yuav tsis raug Vajtswv siv tau li cas? Qhov ntawd yeej ua tsis tau li. Vajtswv txoj kev npaj siab yog kom tau txais neeg ntau ntxiv uas muaj peev xwm ua tim khawv rau Nws; yog txhawm rau ua kom txhua tus uas hlub Nws zoo tiav log, thiab ua ib pab pawg neeg kom tau txhua yam puv npo uas tuaj yeem nrog Nws muaj ib lub siab ib lub ntsws kom sai li sai tau. Yog li ntawd, nyob hauv Vajtswv lub tsev, txhua tus uas caum qhov tseeb mas muaj yav tom ntej zoo heev, thiab yav tom ntej ntawm cov neeg uas hlub Vajtswv tiag tiag mas tsis muaj qhov kawg li. Sawv daws yuav tsum to taub Vajtswv txoj kev npaj siab. Qhov uas muaj lub nra no yeej yog ib yam uas zoo, thiab yog ib yam uas cov muaj lub siab txawj xav thiab laj thawj tsim nyog muaj, tiam sis tsis yog txhua tus yuav tuaj yeem ris tau lub nra hnyav. Qhov sib txawv no los qhov twg los? Txawm koj muaj tej qhov koj ua tau zoo los sis muaj peev xwm dab tsi, thiab txawm koj qhov kev txawj ntse siab npaum li cas los xij, qhov tseem ceeb yog koj txoj kev caum thiab txoj kev uas koj taug. Yog koj txoj kev ua neeg tau raws li tus qauv thiab koj muaj lub peev xwm, tiam sis koj tsis yog ib tug neeg uas caum qhov tseeb, thiab koj tsuas muaj kev ua neeg zoo thiab muaj lub nra me ntsis xwb, koj puas ua tau tes hauj lwm thawj coj hauv pawg ntseeg kom zoo? Koj puas paub tseeb tias koj tuaj yeem siv qhov tseeb los daws tau teeb meem? Yog koj tsis tuaj yeem paub tseeb, ces koj tseem tsis tuaj yeem ua koj tes hauj lwm. Txawm koj raug xaiv los sis raug npaj los ua ib tug thawj coj los xij, koj yeej tseem yuav tsis muaj peev xwm ua tau hauj lwm, yog li ntawd qhov ntawd yuav muaj txiaj ntsig dab tsi? Txawm hais tias qhov ntawd yuav ua rau koj txaus siab rau koj txoj kev ntshaw koob meej los xij, qhov ntawd yuav ua phem rau cov kwv tij thiab cov muam thiab ua rau pawg ntseeg tes hauj lwm qeeb. Yog koj muaj raws li cov qauv uas ua ib tug thawj coj los sis ib tug neeg ua hauj lwm, thiab koj yog ib tug neeg uas caum qhov tseeb, thiab koj kuj muaj qee cov lus tim khawv uas hais txog txoj kev ntsib kev pom, ces koj yeej yuav muaj peev xwm ua tau tes hauj lwm thawj coj zoo xwb, vim koj muaj cov lus tim khawv uas hais txog txoj kev ntsib kev pom, koj yog ib tug neeg uas to taub qhov tseeb, thiab ris tau lub nra hnyav ntawm qhov ua ib tug thawj coj pawg ntseeg. Qhov koj txoj kev ua neeg tau raws li tus qauv thiab koj kuj muaj qee qhov uas koj ua tau zoo thiab qhov ntawd tsuas yog cov qauv hauv paus rau Vajtswv lub tsev txhawb, cob qhia, thiab siv xwb, tiam sis qhov seb koj puas ua tau tes hauj lwm thawj coj zoo ntawd mas yog nyob ntawm seb koj puas muaj txoj kev ntsib kev pom tiag thiab qhov tseeb qhov muaj tiag—qhov no yog qhov tseem ceeb tshaj plaws. Ib txhia tib neeg yog cov neeg uas yog thiab caum qhov tseeb, tiam sis lawv nyuam qhuav ntseeg tau peb mus rau tsib xyoos xwb thiab tsis muaj kev ntsib kev pom uas muaj tiag. Cov tib neeg zoo li no puas ua tau tes hauj lwm thawj coj hauv pawg ntseeg zoo? Kuv ntshai tsam lawv yuav tsis muaj peev xwm ua tau tes hauj lwm ntawd. Lawv tu ncua nyob rau qhov twg? Lawv tsis muaj txoj kev ntsib kev pom uas muaj tiag thiab tseem tsis tau to taub qhov tseeb. Txawm lawv hais tau ntau cov lus thiab cov kev qhuab qhia los xij, lawv tseem siv qhov tseeb los daws cov teeb meem tsis tau. Vim li ntawd, lawv tseem tsis muaj peev xwm ua tau tes hauj lwm thawj coj thiab yuav tsum xyaum lawv tus kheej mus ntxiv kom thiaj li to taub qhov tseeb thiab nkag mus rau hauv qhov tseeb qhov muaj tiag. Piv txwv li, ib tug neeg uas lawv txoj kev ua neeg tau raws li tus qauv thiab kuj coj ncaj, thiab tsis tshua dag thiab ntxias, thiab ua lawv tes dej num yam tsis tab kaum los sis cuam tshuam, tiam sis lawv txoj kev caum qhov tseeb tsis tshua zoo; tus neeg zoo li no puas tuaj yeem raug cob qhia los ua ib tug thawj coj los sis ib tug neeg ua hauj lwm? Qhov no yuav nyuaj heev. Ib tug neeg uas muaj raws li cov qauv kom raug txhawb, raug cob qhia, thiab raug siv, tiam sis tsis caum qhov tseeb, lawv yuav dhau los ua ib tug neeg uas caum qhov tseeb tau yog tias lawv raug txhawb los ua ib tug thawj coj los sis ib tug neeg ua hauj lwm lod? Lawv yuav pib caum qhov tseeb lod? Lawv yuav nkag tau mus rau hauv qhov tseeb qhov muaj tiag tom qab ua hauj lwm tam li ib tug thawj coj los sis ib tug neeg ua hauj lwm tau ib ntus lod? Qhov ntawd yeej ua tsis tau li. Txawm ib tug neeg muaj raws li cov qauv dab tsi los xij, tsuav lawv tsis yog ib tug neeg uas caum qhov tseeb xwb, ces lawv yeej tsis tuaj yeem raug xaiv los sis raug txhawb los ua ib tug thawj coj los sis ib tug neeg ua hauj lwm kiag li. Yog ib tug neeg muaj kev ua neeg thiab lub peev xwm uas tau raws li tus qauv, thiab kuj tuaj yeem lees txais qhov tseeb thiab muaj qee qhov kev hloov, ces lawv tuaj yeem raug txhawb, raug cob qhia, thiab raug siv, thiab qhov ua tau los ces yog, lawv yuav tau txais lub cib fim los xyaum tus kheej, nkag mus rau hauv qhov tseeb qhov muaj tiag, thiab taug tau txoj kev raug cawm dim thiab txoj kev ua kom zoo tiav log. Vim li ntawd, txawm Vajtswv lub tsev txhawb leej twg los ua ib tug thawj coj, neeg ua hauj lwm, los sis tus saib xyuas los xij, lub hom phiaj tsis yog ua kom txaus koj tus kheej tej kev ntshaw thiab tej kev xav ua, thiab tsis yog ua kom tiav koj tej kev cia siab, tiam sis yog kom koj taug tau txoj kev raug cawm dim thiab dhau los ua ib tug neeg uas raug ua kom zoo tiav log.

Rau cov uas tsis tshua muaj kev txawj ntse txaus, lawv kuj muaj lub siab xav ua lawv tes dej num kom zoo thiab xav tiv thaiv Vajtswv lub tsev tej txiaj ntsim thiab, tiam sis lawv tu ncua kev txawj ntse, tsis paub tias yuav ua raws li tej hauv paus ntsiab lus li cas, thiab tsis pom tshab txog ib qho dab tsi li. Nyob rau qee lub sij hawm twg, lawv ntsib kev dag ntxias thiab poob rau hauv qhov kev dag ntxias ntawd, thiab qhov tshwm sim tau los, ces lawv ntxeev siab rau pawg ntseeg tej txiaj ntsim, ntxeev siab rau cov kwv tij thiab cov muam, thiab coj kev puas tsuaj los rau Vajtswv lub tsev tes hauj lwm. Peb yuav tsum ua li cas thiab coj li cas rau hom neeg uas ruam thiab tsis muaj kev txawj ntse txaus no? Thaum hais txog cov neeg ruam uas tsis muaj kev to taub ntawm sab ntsujplig thiab tsis muaj kev txawj ntse txaus no, txhua tus ntawm lawv yuav tsum raug rho tawm thiab hloov lawv tes dej num, thiab tsis muaj ib tug uas siv tau li. Yog siv cov neeg zoo li no, lawv yuav coj teeb meem los rau Vajtswv lub tsev tes hauj lwm tau txhua lub sij hawm—muaj ntau zaj kev qhia zoo li no lawm. Niaj hnub no, muaj ntau tus tib neeg uas saib sab nraud mas zoo li muaj qhov zoo nkaus li tib neeg, tiam sis lawv qhia tsis tau ib qho qhov tseeb qhov muaj tiag li. Lawv twb ntseeg Vajtswv tau ntau xyoo lawm tiam sis lawv tseem nyob rau hauv tus yam ntxwv no. Lub hauv paus ntawm qhov teeb meem no yuav tsum tau pom kom meej; qhov no yog ib qho teeb meem ntawm lub peev xwm tsis zoo kiag li thiab qhov tsis muaj kev to taub ntawm sab ntsujplig. Cov tib neeg zoo li no txawm lawv ntseeg Vajtswv tau pes tsawg xyoo los xij lawv yuav hloov tsis tau li, thiab txawm lawv mloog tej lus qhuab qhia ntau npaum li cas los xij lawv yeej tsis muaj kev nce qib li. Lawv tsuas raug muab tso rau ib sab, kom ua dej num txhawb me me li uas lawv ua tau xwb. Txoj kev saib xyuas lawv zoo li no puas zoo? (Zoo.) Ib txhia tib neeg uas tsis muaj kev txawj ntse txaus thiab tsis muaj qhov uas lawv ua tau zoo, txawm tom qab nyeem Vajtswv cov lus tau ntau xyoo lawm los xij yeej tsis to taub cov lus ntawd kiag li, thiab txawm mloog tej lus qhuab qhia tau ntau xyoo lawm los xij yeej tsis to taub li. Qhov muab cov phau ntawv Vajtswv cov lus rau cov tib neeg zoo li no puas muaj txiaj ntsig dab tsi? (Tsis muaj.) Cov phau ntawv Vajtswv cov lus yuav tsum tsis txhob xa rau cov tib neeg uas tsis muaj kev txawj ntse txaus no, vim qhov ua li ntawd tsis muaj qab hau thiab zoo li nkim xwb, thiab txhua phau uas tau xa rau lawv lawm ntawd yuav tsum tau muab nqa rov qab los tam sid. Qhov no tsis yog txeeb lawv txoj cai nyeem Vajtswv cov lus, tiam sis vim lawv txoj kev txawj ntse tsis txaus. Tab txawm cov tib neeg zoo li no ua lub neej hauv pawg ntseeg los xij, lawv tsis muaj peev xwm to taub qhov tseeb, tsis tas hais txog qhov ua ib teg dej num li. Cov tib neeg zoo li no yog khoom seem txheej xwb, tsis yog lod? Nej yuav tsum paub tias yuav saib xyuas khoom seem txheej li cas. Ib txhia tib neeg saib sab nraud mas zoo li tsis txawj dag, tiam sis lawv txoj kev txawj ntse tsis zoo kiag li tab txawm yog tej hauj lwm siv dag zog xwb los twb ua tsis tau zoo, thiab lawv ua txhua yam mas ntxhov quav niab. Yog hais kom lawv ua ib teg hauj lwm, lawv yeej yuav ua kom ib yam dab tsi puas, yog li ntawd cov tib neeg zoo li no siv tsis tau. Yog koj hais kom lawv nqa ib thoob dej, lawv yuav tsoo ib hwj roj vau. Yog koj hais kom lawv ntxuav ib lub tais, lawv yuav ua rau ib lub phaj tawg. Yog koj hais kom lawv ua zaub mov, lawv yuav ua ntau dhau los sis tsawg dhau, los sis cov zaub mov yuav daw ntsev los sis tsis qab ntsev. Lawv yeej muab siab rau qhov ntawd lawm, tiam sis txawm lawv ua li cas los xij, lawv ua tsis tau zoo li, thiab txoj hauj lwm siv dag zog xwb lawv twb ua tsis tau kom zoo li. Cov tib neeg zoo li no puas siv tau? (Siv tsis tau.) Yog li ntawd yog lawv siv tsis tau, yuav tsum hais kom lawv ua dab tsi? Puas txhais tau hais tias tsis pub lawv ntseeg Vajtswv thiab Vajtswv lub tsev tsis yuav lawv lawm? Tsis yog. Tsuas yog tsis txhob cia lawv ua ib teg dej num lawm xwb. Yog lawv ua tej yam uas nyob hauv tus ciaj ciam ntawm tib neeg lub neej li ib txwm tsis zoo—nrog rau tej yam uas sawv daws paub txhua hnub thiab tej hauj lwm hauv lub neej txhua hnub—los sis lawv tsis muaj peev xwm ua tej yam no, ces lawv tsis haum los ua ib teg dej num hauv Vajtswv lub tsev.

Txawm hais tias ib txhia tib neeg tsis muaj kev ua neeg uas zoo los sis tej txuj ci tshwj xeeb, tsis tas hais txog qhov raug cob qhia los ua thawj coj los, lawv tseem ua tau qee yam hauj lwm siv dag zog. Piv txwv li, pub qaib pub os, pub npua, thiab zov yaj yog cov hauj lwm uas lawv ua tau zoo. Yog koj muab ib txoj hauj lwm yooj yim rau lawv, tsuav lawv muab siab ua xwb lawv muaj peev xwm ua tau zoo, thiab yog li ntawd cov tib neeg zoo li no muaj peev xwm ua tau ib teg dej num hauv Vajtswv lub tsev. Txawm hais tias qhov ntawd yog ib yam hauj lwm yooj yim xwb los xij, lawv muab tau lawv lub siab tso rau thiab ua kom tiav ib lub luag hauj lwm, thiab lawv kuj tuaj yeem cheem tsum lawv tus kheej kom ua raws li Vajtswv cov lus thiab qhov tseeb tej hauv paus ntsiab lus. Tsis hais txawm qhov hauj lwm ntawd loj los sis me li, los sis tes hauj lwm ntawd tseem ceeb los sis tsis tseem ceeb li, thaum kawg, lawv yeej ua tau tib txoj hauj lwm uas muab faib rau lawv ntawd kom zoo. Tsis yog lawv tsuas pub qaib tau zoo kom cov qaib thiaj li nteg qe li ib txwm xwb, tiam sis lawv kuj muaj peev xwm tiv thaiv cov qaib kom tsis txhob raug hma tom mus thiab. Yog lawv hnov hma quaj, lawv yuav qhia rau lawv tus saib xyuas tam sim ntawd, siv zog kom tsis txhob muaj teeb meem nyob rau hauv txoj kev ua hauj lwm thiab tes dej num uas Vajtswv lub tsev muab rau lawv. Yog lawv ua tes hauj lwm zoo li no ces lawv kuj mob siab rau me ntsis lawm thiab, thiab qhov no suav tau hais tias muaj peev xwm ua tiav lawv lub luag hauj lwm thiab ua ib teg hauj lwm zoo. Nrog rau yam uas tshuav—lawv tus kheej lub neej ntiag tug, thiab lawv coj lawv tus kheej li cas thiab saib xyuas rau tej yam li cas—kis no tsis tshua zoo; piv txwv li, lawv tsis paub tias yuav sib cuag nrog lwm tus thiab sib tham li cas, los sis yuav qhia txog lawv tus yam ntxwv nrog lwm tus li cas, thiab qee zaus chim. Qhov no puas suav tias yog ib qho teeb meem? Puas yog tias tsis siv lawv vim tej teeb meem no? (Tsis yog.) Ib txhia tib neeg tsis tshua tu lawv tus kheej; lawv tsis zawv lawv cov plaub hau tsawg kawg kaum hnub thiab lawv pheej muaj ntxhiab tsw phem. Lwm tus ua suab nrov thaum noj thiab haus thaum cov neeg nyob ib puag ncig lawv tab tom so, thiab kuj ua suab nrov rau lwm lub sij hawm thiab, xws li thaum mus kev, kaw qhov rooj, thiab tham lus—lawv tsis muaj kev coj zoo thiab tsis paub cai. Yuav tsum coj rau cov tib neeg zoo li no li cas? Sawv daws yuav tsum to taub, pab thiab txhawb lawv nrog lub siab hlub, sib qhia nrog lawv tias kev ua neeg li ib txwm yog dab tsi, thiab cia lawv hloov zuj zus. Vim nej sawv daws nyob ua ke, nej yuav tsum kawm paub sib zam. Cov tib neeg zoo li no siv tau tsuav lawv tuaj yeem ua lawv txoj hauj lwm kom zoo, thiab ris tau txoj hauj lwm, thiab tsis ua yam dab tsi uas ua rau muaj kev tab kaum thiab kev cuam tshuam. Ib txhia tib neeg ntse, muaj peev xwm zoo, thiab nquag ua hauj lwm, thiab lawv muaj peev xwm ua lawv tej luag hauj lwm kom tiav thiab ua cov hauj lwm uas muab rau lawv ntawd tau zoo, yog li ntawd lawv tuaj yeem raug cob qhia thiab siv. Tiam sis ib txhia tib neeg lub peev xwm tsis zoo kiag li tab txawm tej hauj lwm uas yog ib yam xwb los twb ua tsis tau zoo; lawv tsuas muaj peev xwm pub qaib xwb, tiam sis yog lawv yuav tsum pub os thiab os nab ntxiv, ces lawv yuav ua tsis yeej lawm thiab tsis paub tias yuav ua li cas. Tsis yog tias lawv tsis xav ua kom zoo, tiam sis lawv lub peev xwm tsis zoo kiag li. Lawv lub hlwb muaj qhov txwv, lawv tsuas paub ua ib txoj hauj lwm xwb, thiab yog muab ib txoj hauj lwm ntxiv rau lawv ua, ces lawv ua tsis taus. Lawv tsis paub tias yuav npaj li cas, yog li ntawd lawv thiaj li ua rau txhua yam ntxhov quav niab. Cov tib neeg zoo li no tsuas haum ib zaug es ua ib txoj hauj lwm xwb. Tsis txhob muab ntau txoj hauj lwm rau lawv, vim lawv yuav tsis tuaj yeem ris taus tej ntawd. Tsis txhob xav tias yog lawv ua tau ib teg hauj lwm zoo, ces lawv yeej yuav ua tau ob los sis peb teg hauj lwm; qhov no tsis yog ib txwm muaj tseeb, thiab qhov ntawd nyob ntawm lawv lub peev xwm. Cia lawv sim ua ob teg hauj lwm ua ntej tso. Yog lawv lub peev xwm zoo thiab ris tau, ces koj tuaj yeem npaj rau lawv li no. Yog lawv ua tsis tau ob teg hauj lwm ua ke kom zoo, thiab ua rau ntxhov quav niab, txhais tau hais tias qhov ntawd siab tshaj lawv lub peev xwm lawm, yog li ntawd koj yuav tsum tshem lawv tes hauj lwm ob ntawd tawm tam sim ntawd. Qhov no yog vim los ntawm kev soj ntsuam thiab kev sim, koj pom tias lawv tsuas haum rau ib zaug es ua ib txoj hauj lwm xwb, tsis yog ua ntau txoj hauj lwm nyuaj, thiab tias lawv tsis muaj lub peev xwm rau qhov no. Ib txhia tib neeg ntse dua me ntsis thiab muaj peev xwm zoo dua me ntsis, thiab yog koj muab ob peb txoj hauj lwm rau lawv ua, lawv ua tau zoo. Piv txwv li, yog koj hais kom lawv ua zaub mov, pub qaib, thiab saib xyuas lub vaj zaub, lawv muaj peev xwm ua zaub mov raws sij hawm txhua hnub, thiab tib lub sij hawm ntawd saib xyuas lub vaj zaub hauv lawv lub sij hawm so, ywg dej thiab dob nyom hauv lub vaj raws sij hawm, thiab pub qaib raws sij hawm. Tej zaum ib txhia tib neeg yuav hais tias, “Vim lawv muaj lub peev xwm no, cia lawv ris pawg ntseeg tes hauj lwm thiab ua ib tug thawj coj hauv pawg ntseeg thiab.” Qhov ntawd puas tau? Txawm hais tias lawv muaj peev xwm ris tau qee yam hauj lwm siv dag zog thiab tej hauj lwm dog dig, thaum hais txog kev ua ib tug thawj coj pawg ntseeg, qhov ntawd yuav tsum tau ntsuas dua lwm yam; qhov ntawd tsis yog ib yam uas ntsuas tau raws li qhov lawv ua cov hauj lwm yooj yim sab nraud no. Vim hais tias kev ua ib tug thawj coj pawg ntseeg tsis yog ib txoj hauj lwm siv dag zog, qhov no yuav tsum tau ntsuas raws li tej hauv paus ntsiab lus ntawm kev ua thawj coj. Txawm li cas los xij, yog tus neeg no muaj lub peev xwm thiab txuj ci los ua ib tug thawj coj pawg ntseeg, thiab lawv txoj kev ua neeg zoo dua me ntsis, yog koj muab lawv ua cov hauj lwm sab nraud ces yuav tsis tsim nyog lawm; qhov ntawd hu ua kev siv tib neeg tsis tsim nyog. Ntau kawg los, cov thawj coj pawg ntseeg tuaj yeem ua ib teg hauj lwm ib nrab sij hawm ntxiv uas ntsig txog rau lub neej txhua hnub, thiab muab siab rau tes hauj lwm ntawd me ntsis ntxiv thaum twg lawv khoom—qhov no yuav tsis ua rau sab heev. Thaum hais txog tej yam me me, dog dig thiab cov hauj lwm siv dag zog no, tib neeg tuaj yeem ua npaum li lawv tuaj yeem ua tau xwb. Puas muaj leej twg uas ris tau tag nrho tej no? Puas muaj leej twg uas muaj lub peev xwm zoo li no? (Tsis muaj.) Tej zaum yuav yog qhov tias lawv lub peev xwm thiab kev txawj ntse txaus, tiam sis muaj ib yam uas lawv yuav tsis muaj txaus, qhov ntawd yog lub zog. Tib neeg yog cev nqaij daim tawv uas txawj tuag, lawv lub zog muaj qhov txwv, thiab cov hauj lwm uas lawv ua tau los kuj muaj qhov txwv thiab. Cov neeg uas muaj zog ntau tej zaum yuav muaj peev xwm ua hauj lwm li 12 teev rau ib hnub, hos cov neeg uas muaj zog nruab nrab ces tuaj yeem ua hauj lwm li yim teev, thiab cov neeg uas muaj zog tsawg ces tuaj yeem ua hauj lwm li plaub los sis tsib teev xwb. Yog li ntawd, txawm koj siv ib tug neeg los ua cov hauj lwm siv dag zog, tes hauj lwm thawj coj hauv pawg ntseeg, los sis tes hauj lwm uas muaj feem xyuam txog kev txawj qib siab, koj yuav tsum xav txog qhov seb lawv haum rau dab tsi tshaj plaws, thiab tom qab muab tes hauj lwm uas haum tshaj plaws faib rau lawv, yog lawv ua tsis tau, ces mam li muab lwm yam rau lawv ua. Yog koj tsis muab tes hauj lwm faib rau lawv raws li qhov haum lawv ua tshaj plaws, ces qhov no yog ib qho yuam kev hauv txoj kev koj siv tib neeg. Rau cov tib neeg uas tsis tuaj yeem muab tso ua qhov tseem ceeb rau kev txhawb, kev cob qhia, thiab kev siv, txawm tias hais kom lawv ua cov hauj lwm siv dag zog los xij, yuav tsum faib cov hauj lwm no raws li lawv lub peev xwm thiab kev txawj. Yog hais tias tib lub sij hawm uas lawv ua ib txoj hauj lwm uas muab faib rau lawv ntawd zoo, lawv tseem tuaj yeem ua lwm cov hauj lwm thiab, ces tuaj yeem hais kom lawv ua ob peb yam hauj lwm uas siv dag zog ib nrab sij hawm ntxiv, tsuav qhov ntawd tsis cuam tshuam rau lawv txoj hauj lwm tseem ceeb xwb ces tau lawm. Ib txhia tib neeg muaj zog thiab tuaj yeem ua peb teg hauj lwm sib law liag; tom qab ua tiav ib teg hauj lwm lawm, lawv tseem muaj zog seem, thiab feem ntau mas lawv nyob dawb xwb. Tiam sis cov thawj coj cuav dig muag thiab tsis paub faib hauj lwm, thiab tsis paub tias qhov no yog ib qho teeb meem, yog li ntawd lawv tsuas faib ib teg hauj lwm rau cov tib neeg ntawd ua xwb, qhov no yog ib qho yuam kev.

Kuv nyuam qhuav hais txog cov neeg uas tsis muaj kev txawj ntse txaus uas tsis muaj peev xwm tshwj xeeb thiab tsuas ua tau hauj lwm siv dag zog xwb. Tseem muaj cov neeg uas muaj mob thiab ua tsis tau hauj lwm siv dag zog, thiab cov uas mob taub hau, mob plab, los sis mob duav thaum lawv ua ib yam dab tsi uas siv dag zog me ntsis xwb. Yog lawv haum rau kev ua ib teg dej num no, yuav tsum muab tes dej num faib rau cov tib neeg zoo li no li cas? Yus yuav tsum saib ntau yam, xws li xwm txheej ntawm lawv lub cev thiab lawv txoj kev ua neeg thiab lub peev xwm, kom paub tseeb tias lawv haum rau kev ua tes dej num dab tsi hauv Vajtswv lub tsev. Yog lawv txoj kev noj qab nyob zoo phem heev uas lawv ua tsis tau ib teg hauj lwm li, thiab ua hauj lwm ib pliag yuav tsum tau so ib pliag, thiab kuj tim tsum ib tug neeg twg los saib xyuas lawv thiab, yog lawv ua tsis tau ib teg dej num kom zoo ntawm lawv tus kheej thiab yuav tsum muab ib tug neeg los saib xyuas lawv, ces qhov ntawd tsis tsim nyog kiag li. Cov tib neeg zoo li no tsis haum rau kev ua ib teg dej num, yog li ntawd cia lawv mus tsev thiab so kom zoo. Txawm koj ua dab tsi los xij, tsis txhob siv leej twg uas mob hnyav heev uas cua tshuab xwb los yuav ntog. Yog lawv txoj kev noj qab nyob zoo tsis phem heev thiab tsuas yog lawv mob plab yog lawv noj yam tsis haum, los sis lawv mob taub hau yog lawv siv hlwb ntau dhau, yog li ntawd lawv tsuas ua tau hauj lwm tsawg dua ib tug neeg li sawv daws li peb los sis plaub teev, los sis ua tau ib nrab ntawm ib tug neeg li sawv daws tes hauj lwm, ces cov tib neeg zoo li no tseem siv tau tsuav lawv muaj raws li lwm yam qauv. Tshwj tsis yog lawv tus kheej hais tawm hais tias, “Kuv txoj kev noj qab nyob zoo phem dhau, kuv tiv tsis taus qhov kev txom nyem no. Kuv xav mus tsev so kom zoo. Thaum kuv zoo lawm, kuv mam li rov qab tuaj thiab ua kuv tes dej num,” ces kav tsij pom zoo rau qhov ntawd thiab tsis txhob sim ntuas lawv txog lawv txoj kev xav; vim txawm koj ua li ntawd los yuav tsis muaj txiaj ntsig. Muaj ib lo lus hais tias, “Yam uas ua los ntawm qhov tsis txaus siab yuav tsis muaj txiaj ntsig zoo”; txhua tus txoj kev ntseeg, kev txiav txim siab, thiab kev caum tsis zoo ib yam. Tej zaum ib txhia tib neeg yuav hais tias: “Qhov ntawd tsis yog tias qee zaus lawv tsis xis nyob thiab tsis tshua muaj zog xwb lod? Tej zaum tib neeg yuav tsis xis nyob yog lawv noj yam tsis zoo, tiam sis tom qab ob peb hnub lawv yuav zoo lawm; puas tim tsum rau lawv mus tsev thiab so kom zoo? Lawv qhov mob taub hau thiab kiv taub hau ntawd tsis yog yuav ploj mus tom qab pw tsaug zog zoo ib hmos xwb lod? Tsis yog lawv yuav ua tau hauj lwm li ib txwm thaum ntawd lawm lod? Puas yog ib qho teeb meem loj?” Tej zaum qhov ntawd tsis yog ib qho teeb meem loj rau koj, tiam sis ib txhia tib neeg txawv ntawm lwm tus raws li qib uas lawv hlub lawv lub cev nqaij daim tawv, thiab ib txhia tib neeg yeej muaj kev nyuaj rau kev noj qab nyob zoo tiag. Nyob hauv cov xwm txheej zoo li no, yog lawv thov mus tsev so thiab so kom zoo, pawg ntseeg yuav tsum maj nroos pom zoo, tsis txhob yuam lawv, tsis txhob ua kom nyuaj rau lawv, thiab tshwj xeeb tsis txhob sim ntuas lawv txog lawv txoj kev xav. Ib txhia thawj coj cuav pheej ua hauj lwm rau cov tib neeg zoo li no txoj kev xav tas li, los ntawm qhov hais tias: “Saib seb tam sim no Vajtswv tes hauj lwm mus txog qhov twg lawm. Tej kev puas tsuaj loj zuj zus tuaj, plaub lub hli ntshav tau tshwm sim lawm, thiab tam sim no tus kab mob sib kis tau kis mus thoob plaws txog ntua qhov cov tsis ntseeg tsis muaj txoj hau kev ciaj sia lawm! Koj nyob hauv Vajtswv lub tsev, ua koj tes dej num thiab xyiv fab rau Vajtswv txoj hmoov hlub—koj yuav tsis ntsib kev phom sij thiab koj kuj tuaj yeem tau txais qhov tseeb thiab txoj sia—qhov ntawd yog ib qho koob hmoov loj npaum li cas! Qhov teeb meem me me uas koj muaj no tsis yog dab tsi. Koj yuav tsum kov yeej qhov teeb meem ntawd thiab thov Vajtswv. Vajtswv yeej yuav kho koj. Tsuas nyeem Vajtswv cov lus, kawm ob peb zaj nkauj ntxiv, thiab koj qhov mob yuav cia li zoo yog koj tsis xav txog qhov mob ntawd. Vajtswv cov lus hais tias, ‘Mus nyob rau hauv kev mob nkeeg ces yog mus kom muaj mob’ tsis yog lod? Tam sim no koj tab tom nyob hauv kev mob nkeeg. Yog koj pheej xav txog qhov mob, ces qhov mob yuav hnyav tuaj. Yog koj tsis xav txog, ces koj qhov mob yuav ploj mus, tsis yog lod? Ua li ntawd, ces koj txoj kev ntseeg yuav loj hlob tuaj thiab koj yuav tsis xav mus tsev mus so lawm. Qhov koj mus tsev mus so ntawd mas hu ua kev ntshaw kev tau zoo ntawm lub cev nqaij daim tawv.” Tsis txhob sim ntuas lawv txog lawv txoj kev xav, qhov ua li ntawd yog ruam xwb. Lawv tiv tsis taus txawm yog qhov tsis xis nyob me ntsis ib lub sij hawm thiab tsuas xav mus tsev mus so, thiab tsis tuaj yeem hla dhau qhov kev nyuaj me me li, qhov no ua pov thawj tias lawv tsis muaj siab ua lawv tes dej num tiag tiag. Qhov tseeb tiag, hom neeg no tsis muaj lub siab xav ua lawv tes dej num mus ntev, lawv tsis muaj lub siab dawb paug ua, tsis txaus siab hlo them tus nqi, thiab tam sim no thaum kawg lawv nrhiav tau lub cib fim thiab laj thawj kom khiav dim tag nrho. Hauv lawv lub siab, lawv zoo siab tias lawv ntse heev thiab tias qhov mob no los yog sij hawm kawg nkaus. Yog li ntawd txawm koj ua dab tsi los xij, tsis txhob cheem kom lawv nyob. Lawv yuav ntxub leej twg los xij uas cheem kom lawv nyob, thiab lawv yuav foom tsis zoo rau leej twg los xij uas sim ntuas lawv txog lawv txoj kev xav. Koj tsis to taub qhov no lod? Muaj tseeb tias, ib txhia tib neeg mob tiag tiag, thiab tau mob ntev lawm, thiab ntshai tsam tias yog lawv tseem ua mus ntxiv, yuav muaj kev phom sij rau lawv txoj sia. Lawv tsis xav coj teeb meem los rau Vajtswv lub tsev, los sis cuam tshuam rau lwm tus txoj kev ua tes dej num. Lawv xav tias thaum lawv txoj kev noj qab nyob zoo tsis zoo lawm, lawv yuav tsum vam khom cov kwv tij thiab cov muam los saib xyuas lawv, thiab lawv hnov tsis kaj siab txog qhov ua rau Vajtswv lub tsev saib xyuas lawv, yog li ntawd lawv thiaj li thov so yam ntse. Qhov xwm txheej no yuav daws li cas? Ib yam nkaus li ntawd, los ntawm qhov maj nroos cia lawv mus tsev thiab mus so. Vajtswv lub tsev tsis yog ntshai teeb meem, tsuas yog tsis xav yuam tib neeg rau tej yam uas tawm tsam lawv lub siab nyiam xwb. Tsis tas li ntawd, tib neeg txhua tus yeej muaj qee yam kev nyuaj ntawm tus kheej thiab kev nyuaj tiag tiag. Tib neeg uas nyob hauv lub cev nqaij daim tawv puav leej muaj mob, thiab kev mob nkeeg ntawm lub cev nqaij daim tawv ntawd yog ib qho teeb meem uas muaj tiag—peb hwm tej uas muaj tseeb. Ib txhia tib neeg yeej ua tsis tau lawv tes dej num vim kev mob hnyav, thiab yog lawv tim tsum Vajtswv lub tsev muab kev yooj yim rau lawv, los sis tim tsum cov kwv tij thiab cov muam muab tshuaj los sis muab qee qhov tswv yim kho mob, Vajtswv lub tsev yuav zoo siab hlo muab tej no. Yog lawv tsis xav tab kaum Vajtswv lub tsev thiab lawv muaj nyiaj, muaj txoj hau kev, thiab muaj peev xwm mus kho lawv qhov mob, qhov ntawd los tau thiab. Muab hais luv luv, yog tias vim lawv txoj kev noj qab nyob zoo tsis tso cai rau lawv ua lawv tes dej num hauv Vajtswv lub tsev ntxiv los sis raug cob qhia los ntawm Vajtswv lub tsev ntxiv, ces lawv muaj cai thov tau yam ncaj ncees, thiab Vajtswv lub tsev yuav pom zoo tam sim ntawd. Leej twg los yuav tsum tsis txhob ntuas lawv txog lawv txoj kev xav, los sis yuam, vim qhov ntawd yuav tsis haum thiab tsis tsim nyog. Cov no yog cov kev npaj uas ua rau hom neeg no.

Yuav Coj Li Cas rau Ob Peb Hom Tib Neeg Uas Tshwj Xeeb

I. Yuav Coj Li Cas rau Cov Tib Neeg Uas Tsis Ua Lawv Tes Hauj Lwm uas Tsim Nyog

Ib txhia tib neeg muaj kev ua neeg tsis phem, lawv muaj qhov lawv ua tau zoo thiab muaj lub hlwb uas ntse, lawv hais lus zoo li sawv daws, feem ntau muaj kev kaj siab lug heev, thiab lawv nquag heev thaum ua lawv tes dej num, tiam sis lawv muaj ib qho tsis zoo, uas yog lawv muaj kev xav hauv siab ntau dhau. Thaum raws Vajtswv qab thiab ua lawv tes dej num nyob hauv pawg ntseeg, lawv pheej nco lawv tsev neeg thiab nco cov txheeb ze tas li, los sis lawv pheej xav txog qhov noj zaub mov qab nyob tom lawv lub zos, thiab qhov tsis tau noj ntawd ua rau lawv mob siab, uas cuam tshuam rau lawv txoj kev ua lawv tes dej num. Tseem muaj lwm hom neeg uas nyiam nyob ib leeg rau ib qho chaw, muaj lawv tus kheej qhov chaw ntiag tug. Thaum lawv nrog cov kwv tij thiab cov muam nyob ua ke, lawv hnov tias tes hauj lwm nrawm dhau thiab tias lawv tsis muaj qhov chaw ntiag tug rau kev ua neej nyob. Lawv pheej hnov muaj kev nias qees, thiab pheej hnov tias raug txwv thiab tsis xis nyob thaum nrog cov kwv tij thiab cov muam nyob ua ke. Lawv pheej xav ua txhua yam uas lawv nyiam thiab muaj kev ywj pheej ua raws li lawv lub siab. Lawv tsis xav ua lawv tes dej num nrog txhua tus, thiab lawv pheej xav txog qhov rov qab mus tsev. Lawv pheej pom tias qhov ua lawv tes dej num nyob hauv Vajtswv lub tsev ntawd mas ua rau lawv tsis zoo siab li. Txawm hais tias cov kwv tij thiab cov muam sib cuag tau nrog yooj yim thiab nyob hauv Vajtswv lub tsev tsis muaj leej twg thab lawv, tiam sis lawv muaj kev nyuaj me ntsis los ua raws li lub sij hawm ua hauj lwm thiab so—thaum sawv ntxov tom qab txhua tus sawv lawm, lawv tseem xav pw ntxiv, tiam sis lawv txaj muag yog ua li ntawd, thiab thaum hmo ntuj thaum txhua tus so lawm, lawv tsis xav mus pw thiab pheej xav ua qee yam uas lawv nyiam. Qee zaus muaj qee yam uas lawv xav noj tshwj xeeb, tiam sis tsis muaj nyob hauv qhov chaw noj mov, thiab lawv txaj muag thov. Qee zaus lawv xav mus taug kev ua si, tiam sis tsis muaj leej twg hais txog qhov no li, yog li ntawd lawv tsis kam ua raws li lawv lub siab nyiam. Lawv pheej xyuam xim thiab ceev faj, thiab ntshai tsam raug lwm tus luag, raug saib tsis taus, los sis raug hu ua me nyuam yaus. Yog lawv tsis ua lawv tes dej num zoo, qee zaus haj tseem raug ntuas thiab. Lawv hnov tias txhua hnub mas siab nyob tsis tus, zoo li lawv taug kev saum cov dej khov nyias nyias, thiab tsis muaj kev zoo siab. Lawv xav tias, “Kuv nco tau tias thaum kuv nyob hauv tsev mas, kuv yog tsev neeg tus me nyuam mos, kuv muaj kev ywj pheej thiab tsis muaj kev txwv, zoo li ib tug me nyuam tim tswv. Kuv mas muaj kev zoo siab tshaj plaws! Tam sim no kuv ua kuv tes dej num hauv Vajtswv lub tsev, ua cas kuv tus kheej qub thiaj li ploj mus lawm? Kuv ua tsis tau txhua yam uas kuv xav ua, zoo li kuv ua yav tas los lawm,” yog li ntawd lawv thiaj li tsis xav ua lub neej zoo li no. Tiam sis lawv tsis kam hais qhov no rau tus thawj coj, thiab lawv pheej nthuav tej kev xav no tawm rau cov neeg nyob ib puag ncig lawv, lawv nco tsev tas li, thiab nyiag quaj twj ywm hauv txaj thaum hmo ntuj. Yuav tsum ua li cas rau hom neeg no? Leej twg uas paub qhov xwm txheej no yuav tsum qhia tawm tam sim ntawd, tus thawj coj yuav tsum tshawb xyuas tam sim ntawd seb qhov qhia tawm ntawd puas muaj tseeb, thiab yog muaj tseeb tiag, ces tuaj yeem tso cai rau tus neeg ntawd rov qab mus tsev. Lawv xyiv fab rau cov zaub mov, dej haus, thiab kev tos txais ntawm Vajtswv lub tsev, tiam sis lawv tseem tsis txaus siab hlo ua lawv tes dej num thiab pheej muaj kev xav nyob hauv siab uas tsis zoo, chim siab thiab tsis zoo siab, yog li ntawd xa lawv tawm mus kom sai li sai tau. Cov neeg zoo li no tsis yog muaj cov kev xav hauv siab no ib lub sij hawm xwb, thiab tom qab ntawd xav txog ces daws tau ntawm lawv tus kheej—lawv tsis yog qhov xwm txheej zoo li no. Qee tus neeg lub siab nyiam yog ua lawv tes dej num kom ruaj khov, thiab txawm hais tias lawv nco tsev, lawv paub tias qhov no yog hom teeb meem dab tsi, thiab lawv muaj peev xwm nrhiav qhov tseeb thiab daws. Rau cov neeg zoo li no, tsis tas kom lawv mus los sis tsis tas txhawj txog lawv. Qhov xwm txheej uas peb tab tom tham txog ntawd yog thaum cov tib neeg uas muaj hnub nyoog 30 tawm xyoo lawm es tseem coj zoo li cov me nyuam yaus, tsis loj hlob li, thiab pheej tsis ruaj khov li. Lawv tsuas ua yam uas hais kom lawv ua xwb, thiab thaum lawv tsis muaj dab tsi ua lawm, lawv xav txog kev ua si thiab sib tham txog cov ncauj lus uas tsis muaj qab hau, thiab tsis xav ua tes hauj lwm uas tsim nyog ua li. Cov tsis ntseeg hais txog kev tsim tau lub neej ruaj khov thaum muaj hnub nyoog 30 xyoo. Kev muaj chaw sawv txhais tau hais tias ua tes hauj lwm uas tsim nyog, muaj peev xwm ris ib txoj hauj lwm thiab yug tau tus kheej, paub ua tes hauj lwm tsim nyog, siv sij hawm tsawg dua rau kev ua si, thiab tsis ncua tej hauj lwm tsim nyog lawm. “Ua zoo li cov me nyuam yaus” txhais tau li cas? Qhov ntawd txhais hais tias tsis muaj peev xwm ris ib teg hauj lwm uas tsim nyog li, pheej xav cia lawv lub siab ntws mus, thiab pheej xav mus taug kev ua si, taug kev mus, ua si, noj khoom txom ncauj, saib tej yeeb yaj kiab, sib tham txog tej yam tsis muaj qab hau, tua kees, thiab nrhiav tej xwm txheej txawv txawv thiab tej dab neeg uas tsis tshua pom hauv is taws nem. Qhov ntawd txhais tias tsis xav mus koom tej kev sib txoos ua ke li, pheej xav tsaug zog thaum twg muaj kev sib txoos ua ke, xav pw kiag thaum twg tsaug zog, thiab xav noj kiag thaum lawv hnov tshaib plab, ua raws li lub siab nyiam thiab tsis ua lawv tes hauj lwm uas tsim nyog ua li. Cov neeg zoo li no hais tsis tau tias muaj kev ua neeg tsis zoo, tsuas yog hais tias lawv pheej tsis loj hlob thiab tsis paub tab. Lawv zoo li no thaum muaj hnub nyoog 30 xyoo, thiab lawv tseem zoo li no thaum muaj hnub nyoog 40 xyoo; lawv hloov tsis tau. Yog lawv thov tawm mus thiab tsis xav ua lawv tes dej num ntxiv lawm, yuav tsum saib xyuas li cas? Vajtswv lub tsev tsis cheem kom lawv nyob. Koj yuav tsum teb rau lawv tam sim ntawd—cia lawv tawm mus tam sim ntawd thiab rov qab mus rau hauv cov tsis ntseeg, thiab qhia lawv tias tsis txhob hais tias lawv ntseeg Vajtswv kiag li. Cov neeg uas tsis ua tes hauj lwm tsim nyog puas tau txais qhov tseeb? Yog koj cia siab tias lawv yuav paub tab ntawm kev ua neeg thiab los ua tes hauj lwm tsim nyog los ntawm kev ua ib teg dej num hauv Vajtswv lub tsev, es ris tau ib qho hauj lwm tseem ceeb, thiab tom qab ntawd to taub thiab xyaum ua raws qhov tseeb thiab ua neej muaj qhov zoo nkaus li tib neeg, ces koj tsis txhob cia siab rau qhov ntawd kiag li. Koj yuav pom cov neeg zoo li no nyob rau hauv txhua pab pawg. Cov ib txwm tsis ntseeg yeej muaj ib lub npe ua si rau hom neeg no: “cov me nyuam loj.” Cov neeg zoo li no muaj hnub nyoog txog 60 xyoo los tsis ua tes hauj lwm tsim nyog li. Lawv hais lus thiab saib xyuas tej yam yam tsis tsim nyog, lawv pheej luag, tso dag, thiab dhia mus dhia los, lawv tsis ua ib yam dab tsi tiag tiag li, thiab lawv xav ua si tshwj xeeb. Vajtswv lub tsev tsis tuaj yeem siv cov neeg zoo li no.

Nej xav tias “cov me nyuam loj” no puas phem? Lawv puas yog cov tib neeg phem? (Tsis yog.) Ib txhia tsis yog cov tib neeg phem, lawv kuj coj yooj yim, thiab tsis phem. Ib txhia kuj muaj lub siab zoo thiab txaus siab hlo pab lwm tus. Tiam sis lawv txhua tus muaj ib qho tsis zoo—lawv ua raws li tus kheej lub siab, nyiam kev lom zem, thiab tsis ua tes hauj lwm tsim nyog. Piv txwv li, tom qab ib tug poj niam yuav txiv lawm, nws tsis kawm ua hauj lwm hauv tsev li. Nws tsuas ua zaub mov thaum nws zoo siab xwb, tiam sis tsis ua thaum nws tsis zoo siab—yuav tsum tau ntxias nws tas li. Yog leej twg xav kom nws ua ib yam dab tsi, lawv yuav tsum tau sib tham nrog nws, thiab yuav tsum tau saib rawv nws. Nws pheej nyiam hnav khaub ncaws kom zoo nkauj es thiaj li tau tawm mus kav khw, yuav khaub ncaws thiab tshuaj pleev kom zoo nkauj, thiab mus ua kom zoo nkauj tuaj. Thaum nws rov qab los tsev, nws tsis ua ib qho hauj lwm hauv tsev li, thiab tsuas xav ntaus phaib thiab twv txiaj xwb. Yog koj nug nws tias zaub qhwv ib phaus raug nqi pes tsawg, nws tsis paub; yog koj nug nws tias tag kis nws yuav noj dab tsi, los nws kuj tsis paub qhov ntawd li thiab; thiab yog koj hais kom nws ua zaub mov, los nws ua tsis tau raws li siab xav. Yog li ntawd, nws txawj dab tsi tshaj plaws? Nws txawj tshaj plaws txog tej yam xws li paub tias lub tsev noj mov twg muaj zaub mov qab tshaj plaws, lub khw twg muaj khaub ncaws raws li qauv tshiab tshaj plaws, thiab lub khw twg muag tshuaj pleev kom zoo nkauj uas pheej yig thiab siv tau zoo, tiam sis lwm yam xws li yuav ua neej nyob txhua hnub li cas, los sis cov kev txawj uas yuav tsum muaj hauv tib neeg lub neej li ib txwm muaj ntawd mas nws tsis to taub los tsis kawm li. Nws tsis kawm tej no puas yog vim nws tsis muaj peev xwm txaus? Tsis yog li ntawd. Saib raws li tej yam uas nws txawj ntawd mas, nws muaj lub peev xwm, tiam sis yog nws tsis ua tes hauj lwm uas tsim nyog xwb. Tsuav nws muaj nyiaj ntawm tes xwb, nws yuav tawm mus noj mov hauv khw thiab yuav tshuaj pleev kom zoo nkauj thiab yuav khaub ncaws. Yog tsis muaj lauj kaub thiab yias hauv tsev thiab hais kom nws yuav, nws yuav hais tias, “Muaj zaub mov qab muag nyob sab nraud, es kom kuv yuav tej khoom ntawd los ua dab tsi?” Yog lub tshuab nqus plua plav hauv tsev puas lawm, thiab hais kom nws yuav khaub ncaws tsawg zog ib ce kom txuag tau nyiaj mus yuav ib lub tshuab tshiab, nws yuav hais tias, “Yav tom ntej thaum kuv khwv tau nyiaj lawm, kuv mam li ntiav ib tug neeg los tu lub tsev xwb, yog li ntawd tsis tas yuav lub tshuab nqus plua plav.” Feem ntau, yog nws tsis tua kees los sis twv txiaj, ces nws mus yuav khaub ncaws uas raws li qauv tshiab, thiab nws tsis tu vaj tu tsev li. Qhov no puas yog tsis ua tes hauj lwm uas tsim nyog? Hos tseem muaj qee tus txiv neej, thaum lawv khwv tau nyiaj kiag los, ces yuav ib lub tsheb los sis twv txiaj. Yog muaj ib yam dab tsi hauv tsev puas lawm, lawv tsis kho li. Lawv tsis ua lub neej kom tsim nyog. Nyob hauv lawv lub tsev mas, lawv lub tub txias tsis ua hauj lwm, thiab lawv lub tshuab ntxhua khaub ncaws los tsis ua hauj lwm thiab, cov kav dej txhaws, thiab lub ru tsev los xau nag thaum twg los nag, thiab lawv tsis kho tej no los tau ntev heev lawm. Nej xav li cas txog cov txiv neej zoo li no? Lawv tsis ua tes hauj lwm uas tsim nyog. Tsis hais txiv neej los sis poj niam, Vajtswv lub tsev tsis tuaj yeem siv cov neeg uas ua raws li lawv lub siab dhau thiab tsis ua tes hauj lwm uas tsim nyog.

Ib txhia tib neeg tsis ua tes hauj lwm tsim nyog tam li niam thiab txiv, thiab lawv tsis saib xyuas lawv cov me nyuam kom zoo. Vim li ntawd, lawv cov me nyuam thiaj li raug dej kub hlab los sis raug tsoo; ib txhia me nyuam raug tsoo qhov ntswg lov, lwm tus raug qhov cub kub pob tw, thiab lwm tus haus dej kub ua rau hlab caj pas. Cov neeg zoo li no tsis mob siab rau txhua yam uas lawv ua, thiab lawv ua tsis tau ib yam dab tsi kom zoo li. Lawv tsis ua tes hauj lwm uas tsim nyog, lawv ua dog ua dig, lawv ua raws li lawv lub siab thiab nyiam kev lom zem, thiab lawv ris tsis tau tej luag hauj lwm uas ib tug tib neeg tsim nyog ris. Tam li niam thiab txiv, lawv tsis tuaj yeem ua lawv tej luag hauj lwm kom tiav thiab lawv tsis muaj siab tsis muaj ntsws. Yog li ntawd, cov neeg zoo li no thaum ua ib teg dej num hauv Vajtswv lub tsev lawv puas tuaj yeem ris tej luag hauj lwm uas cov tib neeg li sawv daws tsim nyog ris? Yeej ua tsis tau kiag li. Cov neeg uas tsis ua tes hauj lwm tsim nyog tsis tuaj yeem siv. Yog lawv hais tias lawv tsis xav ua lawv tes dej num ntxiv lawm thiab thov rov qab mus tsev, ces kav tsij cia lawv mus. Leej twg los tsis txhob yuam los sis cheem kom lawv nyob, vim qhov no yog ib qho teeb meem los ntawm lawv tus yam ntxwv xeeb txawm, qhov ntawd tsis yog ib qho kev qhia tshwm uas pom tau meej ib lub sij hawm xwb. Cov neeg no muaj kev npau suav puv npo thaum lawv tuaj hauv Vajtswv lub tsev ua lawv tes dej num; lawv xav tias qhov ua ib teg dej num thiab raws Vajtswv qab ntawd mas yuav zoo li mus rau hauv lub Vaj Edees, zoo li nyob hauv lub teb chaws Khana-as uas zoo. Lub neej uas lawv xav hauv nruab siab ntawd mas zoo heev, muaj tej yam zoo zoo rau noj thiab haus tas hnub, muaj kev ywj pheej thiab tsis muaj kev txwv, thiab tsis muaj hauj lwm dab tsi ua kiag li. Lawv xav ua lub neej muaj kev kaj siab lug yam tsis muaj kev txhawj xeeb, tiam sis qhov ntawd txawv kiag ntawm qhov lawv xav hauv nruab siab. Cov neeg no tau saj txaus lawm, thiab lawv xav tias nyob ntawm no dhuav thiab tsis muaj qab hau, thiab xav tawm mus, yog li ntawd cia lawv kav tsij mus, Vajtswv lub tsev tsis cheem kom cov neeg no nyob. Vajtswv lub tsev tsis yuam tib neeg, thiab nej los yuav tsum tsis txhob yuam tib neeg thiab; qhov no yog xyaum ua raws qhov tseeb thiab ua raws li tej hauv paus ntsiab lus. Nej yuav tsum ua tej yam kom mus raws li qhov tseeb tej hauv paus ntsiab lus, nej yuav tsum ua ib tug neeg uas to taub Vajtswv tej kev npaj siab, ua ib tug neeg ntse—tsis txhob ua ib tug neeg ruam feeb tsis meej, los sis tsis txhob ua ib tug neeg uas ua kom lwm tus zoo siab yam tsis paub cais. Saib xyuas cov neeg uas tsis ua tes hauj lwm tsim nyog zoo li no—qhov no puas suav tau tias tsis muaj kev hlub los sis tsis muab cib fim rau tib neeg lees txim hloov dua siab tshiab? (Suav tsis tau li ntawd.) Vajtswv coj ncaj ncees rau txhua tus, thiab Vajtswv lub tsev muaj cai txhawb, cob qhia, thiab siv koj. Yog koj tsis yeem ua koj tes dej num, thiab koj thov tawm hauv pawg ntseeg mus, qhov ntawd yog koj txoj kev xaiv uas ywj pheej, yog li ntawd pawg ntseeg yuav tsum pom zoo rau koj qhov kev thov, pawg ntseeg yeej yuav tsis yuam koj. Qhov no mus raws li kev coj ncaj, mus raws li kev ua neeg, thiab muaj tseeb tias qhov ntawd mus raws li qhov tseeb tej hauv paus ntsiab lus yam tshwj xeeb. Qhov no yog ib txoj hau kev ua uas tsim nyog heev! Yog leej twg ua lawv tes dej num tau ib ntus, thiab pom tias sab thiab nyuaj, thiab tsis txaus siab ua ntxiv lawm, thiab vim li ntawd xav tso lawv tes dej num tseg thiab tsis xav ntseeg Vajtswv ntxiv lawm, hnub no Kuv yuav muab ib lo lus teb tseeb tseeb rau koj txog qhov no, Vajtswv lub tsev yuav pom zoo rau qhov no, thiab yuav tsis yuam koj nyob, los sis tsis ua kom nyuaj rau koj. Tsis muaj kev nyuaj dab tsi rau qhov no, thiab koj los tsis tas yuav poob rau hauv qhov kev nyuaj thiab, los sis tias koj poob ntsej muag. Haj yam tsis yog ib qho teeb meem rau Vajtswv lub tsev, thiab Vajtswv lub tsev tsis muaj tej kev cheem tsum dab tsi rau koj thiab. Tsis tas li ntawd, yog koj xav tawm mus, los Vajtswv lub tsev yuav tsis teem txim rau koj los sis thaiv koj txoj kev, vim qhov no yog txoj kev uas koj xaiv, thiab Vajtswv lub tsev tsuas ua tau raws li koj tej kev cheem tsum xwb. Qhov no puas yog ib txoj hau kev ua uas tsim nyog? (Yog.)

Ob peb qho xwm txheej ntawm cov tib neeg tsis ua tes hauj lwm tsim nyog uas Kuv nyuam qhuav teev ntawd. Vajtswv lub tsev yuav tsis yuam cov neeg no; yog lawv tsis yeem ua lawv tes dej num los sis muaj qee qhov kev nyuaj ntawm tus kheej thiab thov tsis ua ib teg dej num ntxiv lawm, ces Vajtswv lub tsev yuav pom zoo. Es yuav tsis siv lawv ntxiv lawm, thiab yuav tsis cia lawv ua ib teg dej num lawm. Qhov no yog txoj kev saib xyuas cov neeg zoo li no, thiab qhov ntawd yog ib txoj hau kev ua uas tsim nyog tag nrho.

II. Yuav Coj Li Cas rau Cov Neeg Uas Zoo Li Yudas

Muaj ib txhia tib neeg uas siab yau tshaj plaws, thiab txhua zaus lawv hnov tias muaj ib tug kwv tij los sis ib tug nkauj muam raug ntes, lawv ntshai tsam lawv tus kheej raug ntes tshaj plaws. Qhov ntawd pom tseeb tias yog lawv raug ntes mas, muaj kev phom sij tias lawv yuav muag pawg ntseeg. Cov neeg zoo li no yuav tsum saib xyuas li cas? Cov neeg no puas haum ua tej dej num tseem ceeb? (Lawv tsis haum.) Tej zaum ib txhia tib neeg yuav hais tias, “Leej twg thiaj li paub tseeb tias lawv tus kheej yuav tsis ua ib tug Yudas?” Leej twg los yeej tsis tuaj yeem paub tseeb tias lawv tus kheej yuav tsis ua ib tug Yudas yog lawv raug tsim txom. Yog li ntawd, vim li cas Vajtswv lub tsev thiaj li tsis siv cov neeg siab yau uas yuav ua tau Yudas? Vim cov tib neeg uas pom tias siab yau ntawd yuav tuaj yeem ntxeev siab tau txhua lub sij hawm thaum raug ntes; yog siv cov neeg zoo li no los ua ib teg dej num tseem ceeb mas, qhov ntawd pom tau tias txhua yam yeej yuav mus tsis zoo kiag li. Qhov no yog ib lub hauv paus ntsiab lus uas yuav tsum to taub thaum xaiv thiab siv tib neeg nyob rau hauv qhov xwm txheej uas muaj kev phom sij ntawm Teb Chaws Suav av loj. Ntawm no muaj ib qho xwm txheej tshwj xeeb, uas yog ib txhia tib neeg raug kev tsim txom hnyav, ntev uas ua rau lawv txoj sia nyob hauv kev phom sij, thiab thaum kawg, lawv tiv tsis taus ntxiv lawm, vim li ntawd lawv thiaj li ua Yudas vim kev qaug zog thiab muag qee yam uas tsis tseem ceeb. Tsis muaj leej twg pom tshab cov neeg zoo li no, thiab cov neeg no tseem siv tau. Tiam sis tseem muaj cov neeg uas twb npaj txoj kev tawm rau lawv tus kheej ua ntej raug ntes lawm. Lawv tau xav ntev thiab xav tob txog qhov yuav ua li cas thiaj li tawm tau tam sim ntawd tom qab raug ntes yam tsis tas yuav raug kev tsim txom—thawj qhov, tsis raug kev tsim txom, qhov ob, tsis raug txiav txim, thiab qhov peb, tsis raug kaw hauv tsev loj cuj. Qhov no yog qhov lawv xav. Lawv tsis muaj txoj kev txiav txim siab tias xum raug kev txom nyem los sis raug kaw hauv tsev loj cuj zoo dua li ua ib tug Yudas. Tej zaum lawv yuav ntxeev siab tau yam tsis tau raug kev tsim txom, yog li ntawd puas hais tau tias lawv twb yog Yudas ua ntej lawv raug ntes thiab raug kaw hauv tsev loj cuj lawm? (Yog.) Cov no yog cov Yudas tiag tiag. Pawg ntseeg puas kam siv hom neeg no? (Tsis kam siv.) Yog tuaj yeem pom tshab lawv, ces yuav tsum tsis txhob cob qhia thiab siv lawv kiag li. Feem ntau cov neeg no qhia lawv tus kheej tshwm li cas? Lawv siab yau heev. Kiag thaum muaj ib yam dab tsi tsis zoo, lawv tsis ris tej luag hauj lwm kiag thaum lub cib fim thawj, thiab thaum twg lawv ntsib kev pheej hmoo me ntsis, lawv tso lawv tes dej num tseg thiab khiav mus. Txhua zaus lawv hnov tias qhov xwm txheej pib phom sij, ces lawv nrhiav ib qho chaw nyab xeeb nkaum; tsis muaj leej twg nrhiav tau lawv, thiab lawv tsis sau ntawv los sis hu rau leej twg li. Kev nkaum yog ib yam uas lawv ua tau zoo tshwj xeeb. Lawv tsis quav ntsej tias pawg ntseeg tes hauj lwm ntsib kev nyuaj dab tsi, thiab lawv tuaj yeem tso txhua yam hauj lwm tseem ceeb tseg; lawv saib tus kheej txoj kev nyab xeeb tseem ceeb tshaj lwm yam. Tsis tas li ntawd, thaum ntsib kev phom sij, thaum twg muaj ib yam dab tsi tshwm tuaj lawv yuav kom lwm tus tawm mus thiab tiv kev pheej hmoo, hos lawv tiv thaiv lawv tus kheej. Tsis hais lawv ua rau lwm tus raug kev phom sij ntau npaum li cas, lawv xav tias qhov ntawd tsim nyog thiab yog qhov yuav tsum ua li no txhawm rau lawv tus kheej txoj kev nyab xeeb. Tsis tas li ntawd, thaum ntsib kev phom sij, lawv tsis maj nroos los rau ntawm Vajtswv lub xub ntiag los thov Vajtswv, thiab tsis maj nroos npaj rau kev hloov chaw rau cov kwv tij thiab cov muam los sis pawg ntseeg tej khoom uas tej zaum yuav nyob hauv kev phom sij. Tiam sis, lawv xub xav txog tias yuav khiav kom dim li cas, yuav nkaum li cas, thiab yuav tshem lawv tus kheej tawm ntawm kev phom sij li cas. Lawv haj tseem muaj txoj kev npaj rau kev tawm yam zoo lawm—yog raug ntes yuav xub muag leej twg ua ntej, yuav ua li cas thiaj li tsis raug kev tsim txom, yuav ua li cas thiaj li tsis raug txiav txim mus kaw hauv tsev loj cuj, thiab yuav ua li cas thiaj li tsis raug kev ceeb laj txom nyem. Thaum twg ntsib qee yam kev ceeb laj txom nyem, lawv ntshai poob plig tag thiab tsis muaj kev ntseeg ib qho me me li. Cov neeg zoo li no tsis yog cov neeg phom sij lod? Yog hais kom lawv ua tes hauj lwm uas muaj kev phom sij, ces lawv pheej yws txog qhov ntawd tas li, lawv ntshai thiab pheej xav txog qhov khiav, thiab tsis txaus siab ua. Cov neeg zoo li no twb qhia tshwm cov cim ntawm kev ua Yudas ua ntej lawv raug ntes lawm. Thaum lawv raug ntes, ces muaj tseeb ib puas feem pua tias lawv yuav muag pawg ntseeg. Thaum ua lawv tes dej num hauv Vajtswv lub tsev mas, lawv nquag heev hauv txhua yam uas ua rau lawv muaj ntsej muag yam tsis ua rau raug kev pheej hmoo; tiam sis thaum hais txog tiv kev pheej hmoo, lawv thim rov qab, thiab yog koj hais kom lawv ua ib yam dab tsi uas muaj kev pheej hmoo mas, lawv yuav tsis ua, lawv yeej tsis ris lub luag hauj lwm li. Thaum lawv hnov txog kev phom sij nyob qhov twg, piv txwv li, tus zaj loj liab ploog tab tom ua kev ntes tib neeg, los sis qee tus ntseeg raug ntes lawm, ces lawv tsum tsis mus koom kev sib txoos ua ke, lawv tsis hu los sis sau ntawv rau cov kwv tij thiab cov muam lawm, thiab tsis muaj leej twg nrhiav tau lawv. Tos thaum tsis hnov xov ntes neeg thiab txhua yam zoo lawm lawv mam li rov qab tshwm tuaj. Cov neeg zoo li no puas ntseeg siab tau? Lawv ua puas tau ib teg dej num hauv Vajtswv lub tsev? (Ua tsis tau.) Vim li cas lawv ua tsis tau? Tab txawm txoj kev txiav txim siab los sis kev cia siab kom tsis txhob ua Yudas xwb los lawv twb tsis muaj; lawv ces yog cov neeg siab yau, cov neeg tais caus, thiab cov neeg tsis muaj nqis. Cov neeg zoo li no muaj ib qho yam ntxwv uas pom tau tseeb, uas yog tsis hais lawv muaj qhov ua tau zoo thiab muaj peev xwm dab tsi los xij, yog Vajtswv lub tsev siv lawv, lawv yuav tsis muab lawv tus kheej tag nrho los tiv thaiv Vajtswv lub tsev tej txiaj ntsim kiag li. Lawv tsis tiv thaiv Vajtswv lub tsev tej txiaj ntsim puas yog vim lawv tsis muaj peev xwm ua li ntawd? Tsis yog li ntawd; tab txawm lawv muaj lub peev xwm no los, lawv yuav tsis tiv thaiv Vajtswv lub tsev tej txiaj ntsim thiab. Lawv yog cov Yudas tseem tseem. Thaum twg lawv yuav tsum tau sib cuag nrog cov tsis ntseeg nyob hauv txoj kev ua lawv tes dej num, lawv tiv thaiv kev sib raug zoo nrog cov tsis ntseeg thiab saib xyuas cov tsis ntseeg txoj kev saib siab, kev hwm thiab kev qhuas rau lawv. Yog li ntawd, tus nqi uas tau them kom lawv tau txais tag nrho cov no yog dab tsi? Qhov ntawd yog muag Vajtswv lub tsev tej txiaj ntsim los pauv lawv tus kheej lub koob meej thiab tej txiaj ntsim. Hom neeg no siab yau tshwj xeeb tab txawm tsis tau raug ntes, thiab yog tom qab raug ntes ces yeej muaj tseeb ib puas feem pua tias lawv yuav ntxeev siab. Vajtswv lub tsev yeej tsis tuaj yeem siv cov neeg zoo li no kiag li—cov Yudas no—thiab yuav tsum tshem lawv tawm kom sai li sai tau.

Hais txog hom neeg uas zoo li Yudas ntawd, txawm hais tias saib sab nraud mas lawv tsis zoo li cov tib neeg phem, tiam sis qhov tseeb tiag lawv yog cov neeg uas muaj kev coj ncaj qis tshaj plaws thiab muaj tus yam ntxwv phem li dab. Txawm lawv mloog lus qhuab qhia ntau npaum li cas los sis nyeem Vajtswv cov lus ntau npaum li cas los xij, lawv yeej to taub tsis tau qhov tseeb li, thiab lawv tsis xav hais tias qhov ua rau Vajtswv lub tsev tej txiaj ntsim puas tsuaj ntawd yog ib yam uas txaj muag tshaj plaws, phem tshaj plaws, thiab lim hiam tshaj plaws. Lawv txaus siab hlo tawm los ua tej yam uas ua rau lawv tau ntsej muag, tiam sis thaum hais txog tej yam uas muaj kev pheej hmoo, los sis nyuaj saib xyuas, ces lawv kom lwm tus ris thiab saib xyuas tej ntawd. Lawv yog hom neeg dab tsi? Lawv tsis yog cov neeg uas muaj kev coj ncaj qis tshaj plaws lod? Ib txhia tib neeg yuav khoom rau Vajtswv lub tsev, thiab thaum ua li ntawd, lawv yuav tsum xav txog Vajtswv lub tsev tej txiaj ntsim, thiab ua ncaj ncees thiab tsim nyog. Tiam sis, hom neeg uas zoo li Yudas ntawd tsis yog tsis tiv thaiv Vajtswv lub tsev tej txiaj ntsim xwb, tiam sis lawv ho pab cov tsis ntseeg es ua rau Vajtswv lub tsev poob peev, thiab ua kom tau raws li cov tsis ntseeg tej kev cheem tsum txhua lub cib fim, thiab xum cia Vajtswv lub tsev tej txiaj ntsim raug puas tsuaj yog hais tias qhov ntawd pab kom lawv ua rau cov tsis ntseeg zoo siab. Qhov no hu ua tom txhais tes uas pub mov rau koj noj, thiab tsis muaj kev coj zoo li! Qhov no tsis yog muaj kev ua neeg uas ntxim ntxub lod? Qhov no yeej tsis zoo dua Yudas qhov uas muag tus Tswv thiab nws cov phooj ywg npaum cas. Txawm Vajtswv lub tsev muab hauj lwm dab tsi rau lawv ua los xij, lawv tsis xav txog Vajtswv lub tsev tej txiaj ntsim li. Thaum hais kom mus yuav ib yam dab tsi mas, lawv yeej tsis mus nrhiav ntau qhov chaw thiab muab cov nqi, qhov zoo thiab qhov tsis zoo, thiab kev pab tom qab muag khoom ntawm ntau lub chaw muag khoom los sib piv li, thiab tom qab ntawd ua tib zoo xav txog cov kev xaiv thiab ua kev tshuaj xyuas kom zoo, kom lawv tsis txhob raug dag, txuag Vajtswv lub tsev cov nyiaj me ntsis, thiab tiv thaiv Vajtswv lub tsev tej txiaj ntsim kom tsis txhob raug puas tsuaj—lawv yeej tsis ua li ntawd li. Yog ib tug kwv tij los sis ib tug nkauj muam tawm tswv yim hais tias zoo tshaj mas yuav tsum saib thiab piv ntau lub khw ua ntej, lawv hais tias, “Tsis tas yuav saib thiab piv ntau lub khw lawm; tus muag khoom hais tias cov no yog cov khoom zoo tshaj plaws lawm.” Thaum tus kwv tij los sis tus nkauj muam nug lawv hais tias, “Yog li ntawd koj puas tuaj yeem nrog lawv tham kom txo nqi?” lawv teb hais tias, “Yuav hais kom txo nqi ua dab tsi? Lawv twb qhia kuv tias tus nqi yog li cas lawm, thiab yog kuv nrog lawv tham kom txo nqi, qhov ntawd mas txaj muag, thiab yuav zoo li peb tsis muaj nyiaj li. Vajtswv lub tsev muaj nyiaj, tsis yog lod?” Tsis hais yam khoom ntawd tus nqi li cas los sis qhov zoo thiab tsis zoo ntawd zoo li cas los xij li, tsuav yog lawv pom tias haum xwb, ces lawv yuav kom lwm tus mus yuav yam ntawd tam sim ntawd, thiab leej twg mus yuav qeeb lawm mas, lawv yuav thuam, cem thiab haj tseem teem txim thiab. Tsis muaj leej twg kam hais tias “tsis tau” rau ntawm lawv xub ntiag, thiab tsis muaj leej twg kam tawm tswv yim dab tsi li. Txawm lawv ua ib yam dab tsi loj los sis me rau Vajtswv lub tsev los xij, lawv tej hauv paus ntsiab lus yog dab tsi? “Vajtswv lub tsev tsuas yog yuav tsum tau them nyiaj xwb, thiab qhov hais tias vajtswv lub tsev tej txiaj ntsim puas raug puas tsuaj ntawd tsis muaj dab tsi cuam tshuam txog kuv li. Kuv yeej ua tej yam li no xwb; kuv yuav tsum tsim kev sib raug zoo kom zoo nrog cov tsis ntseeg. Txawm cov tsis ntseeg hais dab tsi los yeej yog, thiab kuv yuav ua raws li ntawd. Kuv yuav tsis saib xyuas tej yam raws li vajtswv lub tsev tej kev cheem tsum. Yog koj xav siv kuv, ces siv; yog koj tsis xav siv, ces tsis txhob siv—nyob ntawm koj xwb. Kuv yeej zoo li no!” Qhov no tsis yog ib tug yam ntxwv xeeb txawm dab lod? Hom neeg zoo li no yog cov ib txwm tsis ntseeg thiab yog cov tsis ntseeg. Puas tuaj yeem siv lawv los saib xyuas hauj lwm rau Vajtswv lub tsev? Hom neeg no muaj kev kawm, muaj qhov lawv ua tau zoo, thiab muaj peev xwm sab nraud me ntsis, thiab txawj hais lus, thiab saib xyuas tau qee yam hauj lwm. Tiam sis tsis hais lawv saib xyuas hauj lwm dab tsi rau Vajtswv lub tsev los xij, lawv yeej ua dog ua dig thiab ua raws li lawv lub siab nyiam, ua rau Vajtswv lub tsev tej txiaj ntsim raug puas tsuaj. Lawv tseem pheej dag Vajtswv lub tsev thiab zais qhov tseeb ntawm tej xwm txheej, thiab thaum lawv ua rau txhua yam ntxhov quav niab lawm, Vajtswv lub tsev yuav tsum tau npaj neeg los kho yam uas lawv ua rau ntxhov quav niab ntawd. Qhov no yog ib qho qauv piv txwv tseeb ntawm qhov koom nrog cov neeg sab nraud los muag Vajtswv lub tsev tej txiaj ntsim. Qhov no txawv dab tsi ntawm Yudas qhov uas muag tus Tswv thiab nws cov phooj ywg? Thaum siv cov neeg zoo li no ua ib teg dej num, tsis yog lawv ua tsis tau dej num txhawb rau Vajtswv lub tsev xwb, tiam sis lawv dhau los ua cov neeg uas nkim ub nkim no thiab cov neeg coj hmoov phem los. Lawv twb tsis tsim nyog txawm yog ua cov neeg ua dej num txhawb xwb los xij; lawv yog cov neeg phem uas tsis muaj nqis hlo li xwb! Cov neeg zoo li no yog Ntxwgnyoog cov tub qhe thiab tus zaj loj liab ploog cov xeeb leej xeeb ntxwv ntag, thiab thaum lawv raug nthuav tawm lawm, ces yuav tsum muab lawv ntsaig tawm mus thiab tshem tawm tam sim ntawd. Tam li ib tug neeg ntseeg Vajtswv thiab tam li ib tug tswv cuab ntawm Vajtswv lub tsev, lawv twb ua tsis tau lawv lub luag hauj lwm los tiv thaiv Vajtswv lub tsev tej txiaj ntsim, lawv puas tseem muaj lub siab txawj xav thiab laj thawj? Lawv haj tseem phem tshaj ib tug dev zov tsev lawm thiab!

Hom neeg uas zoo li Yudas ntawd tsis muaj lo lus “Yudas” lo rau ntawm lawv lub hauv pliaj, tiam sis lawv tej kev ua thiab kev coj mas muaj ib lub ntsiab xeeb txawm zoo ib yam nkaus li Yudas, thiab nej yuav tsum tsis txhob siv hom neeg no kiag li. Kuv lub ntsiab lus rau lo lus “tsis txhob siv” ntawd yog dab tsi? Qhov ntawd txhais tau hais tias yuav tsum tsis txhob tso tes hauj lwm tseem ceeb rau lawv ua kiag li. Yog hais tias yog ib yam me me uas tsis muaj dab tsi ntsig txog Vajtswv lub tsev tej txiaj ntsim, ces siv lawv ib lub sij hawm ntawd los kuj tau, tiam sis hom neeg no yeej tsis haum nrog Vajtswv lub tsev tej hauv paus ntsiab lus ntawm kev siv tib neeg kiag li, vim lawv yug los ces yeej yog Yudas, thiab lawv yeej phem thaum xeeb txawm lawm. Muab hais luv luv tias, cov neeg no yog cov neeg phom sij thiab yuav tsum tsis txhob siv kiag li. Koj yim siv hom neeg no ntev, koj yim yuav tsis kaj siab, thiab yim yuav muaj teeb meem ntau nyob rau yav tom ntej. Yog li ntawd, yog koj twb pom tshab hais tias lawv yog hom neeg uas zoo li Yudas lawm, ces koj yuav tsum tsis txhob siv lawv kiag li—tag nrho tej no muaj tseeb. Kev coj li no rau lawv puas tsim nyog? Tej zaum ib txhia tib neeg yuav hais tias: “Qhov coj li no rau lawv mas tsis muaj kev hlub. Lawv tsis tau muag leej twg li; lawv yuav yog Yudas tau li cas?” Koj tseem yuav tos kom lawv muag ib tug twg tso lod? Yudas qhia nws tus kheej tshwm li cas? Puas muaj tej yam cim uas qhia hais tias nws yuav muag tus Tswv? (Muaj, nws nyiag nyiaj hauv Tswv Yexus lub hnab nyiaj.) Cov neeg uas pheej muag Vajtswv lub tsev tej txiaj ntsim tas li ntawd muaj lub ntsiab xeeb txawm zoo ib yam li Yudas, uas nyiag nyiaj hauv lub hnab nyiaj. Thaum cov neeg zoo li no raug ntes lawm, lawv yuav ntxeev siab, thiab muab txhua yam uas lawv paub qhia rau Ntxwgnyoog, yam tsis zais ib yam dab tsi hlo li. Hom neeg no muaj lub ntsiab tseeb ntawm Yudas. Lawv lub ntsiab tseeb twb raug nthuav tawm thiab qhia tshwm meej meej lawm; yog koj tseem siv lawv thiab, qhov ntawd tsis yog koj tab tom nrhiav teeb meem rau koj tus kheej lod? Qhov no tsis yog txhob txwm ua rau Vajtswv lub tsev puas tsuaj lod? Ib txhia tib neeg hais tab meeg tias, “Yog leej twg ntuas kuv, los sis yog leej twg ua rau kuv tej txiaj ntsim puas tsuaj los sis ua rau yam zoo uas kuv muaj ntawm no puas tsuaj, ces lawv yuav tau txais lub txim uas lawv tsim nyog tau txais!” Tshwj xeeb tshaj yog hom neeg no muaj Yudas lub ntsiab tseeb; qhov ntawd pom tseeb dhau lawm. Lawv tus kheej qhia rau lwm tus hais tias lawv yog Yudas, yog li ntawd hom neeg no haj yam siv tsis tau kiag li.

III. Yuav Coj Li Cas Rau Pawg Ntseeg Cov Phooj Ywg

Tseem muaj lwm hom neeg uas suav tsis tau tias yog neeg zoo los sis neeg phem, uas yog cov ntseeg ntawm lub npe xwb. Qee zaus yog koj hais kom lawv ua ib yam dab tsi, lawv ua tau, tiam sis yog koj tsis npaj rau lawv ces lawv tsis xav nrhiav kev ua lawv tes dej num li. Thaum twg lawv khoom lawv tuaj koom kev sib txoos ua ke, tiam sis hauv lawv lub sij hawm ntiag tug, tsis paub tias xyov lawv puas noj thiab haus Vajtswv cov lus, kawm nkauj, los sis thov Vajtswv. Txawm li cas los xij, lawv kuj ua zoo rau Vajtswv lub tsev thiab pawg ntseeg me ntsis. Lo lus ua zoo me ntsis ntawd txhais tau li cas? Qhov ntawd txhais tau hais tias yog cov kwv tij thiab cov muam hais kom lawv ua ib yam dab tsi, lawv yuav pom zoo ua; vim yog cov ntseeg ib yam nkaus, lawv tuaj yeem pab ua qee yam kom tiav, raws li qhov lawv muaj peev xwm ua tau. Tiam sis, yog hais kom lawv siv zog ntau los sis them qee tus nqi twg, lawv yeej yuav tsis ua kiag li. Yog ib tug kwv tij los sis ib tug nkauj muam muaj teeb meem thiab xav kom lawv pab, xws li qee zaus pab saib tsev, ua zaub mov noj, los sis qee zaus pab ua ob peb yam hauj lwm me me hauv tsev—los sis tus neeg ntawd paub lwm hom lus thiab tuaj yeem pab cov kwv tij thiab cov muam nyeem ntawv—lawv muaj peev xwm pab tau tej yam zoo li no thiab kuj ua zoo me ntsis thiab. Feem ntau mas lawv nrog lwm tus sib raug zoo thiab tsis suav tej lwm tus ua, tiam sis lawv tu ncua qhov tuaj koom kev sib txoos ua ke thiab tsis thov ua ib teg dej num, tsis tas yuav hais txog qhov ua tes hauj lwm tseem ceeb los sis haj yam tsis hais txog yog tes hauj lwm uas muaj kev pheej hmoo. Yog koj hais kom lawv ua ib teg hauj lwm uas muaj kev pheej hmoo, lawv yeej yuav tsis lees txais kiag li, thiab hais tias, “Kuv ntseeg vajtswv kom nrhiav tau kev thaj yeeb, yog li ntawd kuv yuav ua tej hauj lwm uas muaj kev pheej hmoo tau li cas? Qhov ntawd tsis yog nrhiav teeb meem rau kuv tus kheej lod? Kuv yeej ua tsis tau kiag li!” Tiam sis yog cov kwv tij thiab cov muam los sis pawg ntseeg hais kom lawv ua ib yam dab tsi me me, lawv tuaj yeem pab thiab ua me ntsis, tam li ib tug phooj ywg. Hom kev siv zog thiab kev pab no hu tsis tau tias yog ua ib teg dej num, thiab hu tsis tau tias yog ua raws li qhov tseeb tej hauv paus ntsiab lus, thiab haj yam hu tsis tau tias yog xyaum ua raws qhov tseeb; qhov ntawd tsuas yog qhov uas lawv muaj kev hnov zoo rau cov ntseeg Vajtswv thiab ua phooj ywg rau lawv me ntsis xwb, thiab yog muaj leej twg xav tau kev pab lawv kuj cev tau tes pab thiab. Yuav hu hom neeg no li cas? Vajtswv lub tsev hu lawv ua pawg ntseeg cov phooj ywg. Yuav tsum coj li cas rau hom neeg uas yog pawg ntseeg cov phooj ywg? Yog lawv muaj lub peev xwm thiab muaj qee qhov lawv ua tau zoo thiab tuaj yeem pab pawg ntseeg saib xyuas qee yam hauj lwm sab nraud, ces lawv kuj yog cov neeg ua dej num txhawb thiab yog pawg ntseeg cov phooj ywg. Vim hais tias cov neeg zoo li no tsis suav tias yog cov ntseeg Vajtswv, thiab Vajtswv lub tsev tsis lees paub lawv. Thiab yog Vajtswv lub tsev tsis lees paub lawv, Vajtswv puas lees paub tias lawv yog cov ntseeg? (Tsis lees paub.) Yog li ntawd, tsis txhob hais kom hom neeg no koom nrog cov pab pawg ua dej num puv sij hawm kiag li. Muaj cov uas hais tias: “Qee tus neeg, thaum lawv nyuam qhuav pib ntseeg, lawv muaj kev ntseeg me thiab tsuas xav ua pawg ntseeg cov phooj ywg xwb. Lawv tsis to taub ntau yam txog kev ntseeg Vajtswv, yog li ntawd lawv yuav txaus siab hlo ua ib teg dej num tau li cas? Lawv yuav txaus siab hlo muab lawv tus kheej fij tag nrho tau li cas?” Peb tsis yog hais txog cov neeg uas ntseeg Vajtswv tau peb mus rau tsib lub hlis los sis txog ib xyoos, tiam sis yog hais txog cov neeg uas muaj npe ntseeg Vajtswv tau ntev tshaj peb xyoos, los sis haj tseem yog tsib los sis kaum xyoo lawm. Txawm cov neeg zoo li no lees paub ntawm lawv lub qhov ncauj hais tias Vajtswv yog tus Vajtswv tiag uas tsuas muaj tib tug xwb thiab hais tias Pawg Ntseeg ntawm Vajtswv Tus Uas Muaj Hwj Chim Loj Kawg Nkaus yog pawg ntseeg tseeb npaum li cas los xij, qhov ntawd ua tsis tau pov thawj qhia tias lawv yog cov ntseeg tseeb. Raws li ntau yam kev qhia tshwm uas pom tau meej ntawm hom neeg no thiab lawv hom kev ntseeg, peb hu lawv ua pawg ntseeg cov phooj ywg. Tsis txhob saib lawv tam li cov kwv tij los sis cov muam—lawv tsis yog cov kwv tij los sis cov muam. Hom neeg zoo li no tsis txhob cia lawv koom nrog pawg ntseeg uas ua dej num puv sij hawm, thiab tsis txhob cia lawv koom nrog cov pab pawg uas ua dej num puv sij hawm; Vajtswv lub tsev tsis siv cov neeg zoo li no. Tej zaum ib txhia yuav hais tias: “Koj puas muaj kev xav tsis zoo rau hom neeg no? Txawm hais tias sab nraud mas zoo li lawv tsis kub tsis txias los xij, qhov tseeb tiag lawv kub siab heev rau sab hauv.” Cov ntseeg tiag tiag yeej ua tsis tau tias twb ntseeg Vajtswv tau tsib los sis kaum xyoo lawm es tseem tsis kub tsis txias; Hom neeg no txoj kev coj twb nthuav tawm tag nrho hais tias lawv yog cov tsis ntseeg, yog cov neeg nyob ntawm Vajtswv cov lus sab nraud, thiab yog cov ib txwm tsis ntseeg. Yog koj tseem hu lawv ua cov kwv tij thiab cov muam, thiab tseem hais tias coj tsis ncaj ncees rau lawv, ces qhov ntawd yog koj qhov kev xav phem thiab koj tej kev xav hauv siab xwb.

Peb yuav tsum coj li cas rau hom neeg uas yog pawg ntseeg cov phooj ywg ntawd? Lawv muaj lub siab zoo thiab txaus siab hlo pab saib xyuas qee yam hauj lwm me me. Yog hais tias muaj kev tim tsum rau lawv, koj tuaj yeem muab ib lub cib fim rau lawv los saib xyuas qee yam hauj lwm me me. Yog lawv ua tau ib yam dab tsi, ces cia lawv ua. Hais txog tej yam uas lawv ua tsis tau zoo, thiab haj tseem yuav ua rau puas tsuaj thiab, ces yuav tsum tsis txhob muab tej hauj lwm zoo li no rau lawv ua, kom zam dhau kev tsim teeb meem—koj yuav tsum tsis txhob raug txwv los ntawm lawv txoj kev ua siab zoo ntawd. Lawv tsis to taub qhov tseeb, thiab kuj tsis to taub tej hauv paus ntsiab lus thiab. Yog muaj tej hauj lwm sab nraud uas lawv saib xyuas tau, ces cia lawv ua. Tiam sis tsis txhob cia lawv saib xyuas tes hauj lwm tseem ceeb uas cuam tshuam rau pawg ntseeg tes hauj lwm—nyob hauv ib qho xwm txheej zoo li no, yuav tsum tsis txhob txais yuav lawv txoj kev ua siab zoo thiab kev pab uas kub siab ntawd. Thaum koj ntsib hom neeg no, tsuas sib cuag nrog lawv nyob rau sab nraud xwb ces tau lawm; tsis txhob ua tiag rau lawv. Vim li cas koj thiaj li yuav tsum tsis ua tiag rau lawv? Vim lawv tsuas yog pawg ntseeg cov phooj ywg xwb, thiab lawv tsis yog cov kwv tij los sis cov muam hlo li. Cov neeg zoo li no puas haum nrog Vajtswv lub tsev tej hauv paus ntsiab lus ntawm kev siv tib neeg? (Tsis haum.) Yog li ntawd, yog hom neeg no tsis tuaj koom kev sib txoos ua ke, tsis mloog lus qhuab qhia, los sis tsis ua ib teg dej num, tsis tas yuav mus caw lawv. Yog lawv tsis noj thiab haus Vajtswv cov lus los sis tsis thov Vajtswv, thaum muaj tej yam tshwm tuaj rau lawv los lawv tsis nrhiav qhov tseeb tej hauv paus ntsiab lus, thiab yog lawv tsis txaus siab koom nrog cov kwv tij thiab cov muam, los tsis tas yuav txhawb los sis pab lawv. Tsib lo lus—txhob quav ntsej txog lawv. Tsis txhob ua tiag thiab tsis txhob quav ntsej txog cov neeg uas yog pawg ntseeg cov phooj ywg thiab cov tsis ntseeg ntawd. Tsis tas txhawj txog lawv, thiab tsis tas nug txog lawv moo. Vim li cas thiaj li tsis nug txog lawv moo? Qhov nug txog cov neeg uas tsis muaj dab tsi cuam tshuam txog peb ntawd muaj qab hau dab tsi? Qhov ntawd tsis yog tsis tim tsum lod? Nej puas xav quav ntsej txog hom neeg no? Tej zaum nej nyiam xav paub txog lwm tus tej xwm txheej thiab xav txhawj txog, thiab xav paub hais tias, “Tam sim no lawv nyob li cas lawm? Lawv puas tau muaj txij nkawm los tsis tau? Lawv puas nyob zoo? Tam sim no lawv ua hauj lwm dab tsi?” Txawm lawv nyob li cas los xij, qhov ntawd tsis muaj dab tsi cuam tshuam txog koj li. Qhov txhawj txog qhov ntawd muaj qab hau dab tsi? Tsis txhob quav ntsej txog lawv, thiab tsis txhob tawm tswv yim txog lawv thiab. Ib txhia tib neeg mas nyiam tawm tswv yim, xws li: “Koj puas pom? Lawv tsis ntseeg Vajtswv kom zoo zoo, lawv ua neej nyob yam qaug zog thiab tsis muaj zog txhua hnub, thiab saib mas lawv sab thiab qaug zog txhua lub sij hawm li,” los sis “Koj puas pom? Lawv tsis ntseeg Vajtswv kom zoo zoo, yog li ntawd lawv tsis muaj kev thaj yeeb, thiab muaj tej yam tsis zoo tshwm sim hauv lawv tsev neeg dua lawm.” Tag nrho tej no yog lus tsis muaj qab hau, thiab tsis tim tsum. Lawv ua neej li cas thiab lawv taug lawv txoj kev li cas tsis yog koj li teeb meem. Tsis txhob hais txog lawv; koj thiab lawv tsis taug tib txoj kev. Koj muab koj tus kheej fij rau Vajtswv tiag tiag thiab ua koj tes dej num puv sij hawm, koj yeej xav caum kom tau qhov tseeb thiab tau txais kev cawm dim, thiab txawm Vajtswv hais dab tsi los xij, koj xav ua txhua yam li koj ua tau kom Nws txaus siab; tiam sis cov neeg ntawd tsis muaj tej no nyob hauv lawv lub siab. Thaum koj pom tej kev phem, koj ntxub tej ntawd thiab tej ntawd ua rau koj xeev siab, thiab koj xav tias tsis muaj kev zoo siab nyob rau hauv lub ntiaj teb no, thiab koj tsuas nrhiav tau kev zoo siab los ntawm qhov ntseeg Vajtswv xwb; hos lawv mas txawv ntawm koj kiag: Qhov no ua pov thawj qhia hais tias lawv thiab koj tsis taug tib txoj kev. Lub hauv paus ntsiab lus ntawm Vajtswv lub tsev rau kev saib xyuas hom neeg no ces yog tias yog lawv txaus siab hlo pab, Vajtswv lub tsev tuaj yeem muab ib lub cib fim rau lawv tsuav yog tsis muaj teeb meem tshwm los nyob rau tom qab. Yog Vajtswv lub tsev tsis muaj qhov tim tsum siv lawv kiag li thiab lawv tseem txaus siab pab, ces zoo tshaj plaws yuav tsum tsis lees txais yam ua zoo hais—tsis txhob tsim teeb meem rau koj tus kheej. Cov ntseeg sib qhia txog qhov tseeb txhua hnub thiab lees txais kev ntuas, tiam sis tseem ua tej yam ua dog ua dig, yog li ntawd pawg ntseeg cov phooj ywg yuav tuaj yeem saib xyuas tej hauj lwm kom zoo yam tsis muaj nqi zog tau lod? (Tsis tau.) Qhia Kuv seb, qhov no puas yog xav tsis zoo txog tib neeg? Qhov no puas yog saib tib neeg tsis zoo dhau lawm? (Tsis yog.) Qhov no yog hais raws li qhov tseeb, hais raws li tib neeg lub ntsiab tseeb. Tsis txhob tsis paub dab tsi, tsis txhob ruam, thiab tsis txhob ua ib yam dab tsi yam ruam ruam. Cov ntseeg tseem yuav tsum tau ntsib tau pom kev ntuas, kev txiav txim thiab kev rau txim, kev qhuab ntuas hnyav, kev nplawm, thiab kev qhia tshwm ua ntej, qhov kev ua lawv tes dej num thiaj li yuav maj mam haum nrog Vajtswv txoj kev npaj siab. Ib tug phooj ywg ntawm pawg ntseeg los sis ib tug tsis ntseeg, tsis lees txais qhov tseeb ib qho li, thiab txhua yam uas lawv xav txog yog lawv tus kheej tej txiaj ntsim xwb, yog li ntawd qhov uas lawv saib xyuas tej hauj lwm rau Vajtswv lub tsev los sis rau cov kwv tij thiab cov muam ntawd yuav muaj txiaj ntsig zoo dab tsi? Qhov ntawd yeej ua tsis tau kiag li. Qhov tsis quav ntsej txog hom neeg no puas yog tsim nyog lawm? (Yog.) Lo lus “tsis quav ntsej txog lawv” ntawd txhais tau li cas? Txhais tau hais tias Vajtswv lub tsev tsis saib lawv li cov ntseeg. Lawv ntseeg Vajtswv li cas los tau, tiam sis Vajtswv lub tsev tes hauj lwm thiab tej dej num tsis muaj dab tsi cuam tshuam txog lawv hlo li. Lawv txaus siab hlo pab, tiam sis peb yuav tsum ntsuas txhua yam thiab ua zoo saib seb lawv puas haum rau ua qhov ntawd, thiab yog lawv tsis haum, ces peb muab tsis tau lub cib fim no rau lawv. Qhia Kuv seb, qhov coj li no puas mus raws li tej hauv paus ntsiab lus? Peb puas muaj cai coj li no rau hom neeg zoo li no? Muaj tshaj plaws!

IV. Yuav Coj Li Cas Rau Cov Neeg Uas Yav Tas Los Raug Rho Tawm

Tseem muaj lwm hom neeg uas yog cov yav tas los raug rho tawm. Peb yuav tsum coj li cas rau lawv? Txawm cov neeg no raug rho tawm vim lawv ua tsis tau tes hauj lwm tiag tiag thiab raug cais tias yog cov thawj coj cuav, los sis vim lawv taug cov tawm tsam khetos txoj kev thiab raug cais tias yog hom neeg uas yog cov tawm tsam khetos, los yuav tsum tau faib thiab npaj rau cov neeg no mus ua lwm yam hauj lwm kom tsim nyog. Yog lawv yog cov tawm tsam khetos uas tau ua ntau yam phem, ces yeej tsim nyog muab lawv ntiab tawm; yog lawv tsis tau ua ntau yam phem, tiam sis lawv muaj lub ntsiab tseeb ntawm tus tawm tsam khetos thiab raug txiav txim rau tias yog ib tug tawm tsam khetos, ces tsuav yog lawv tseem ua tau dej num txhawb me ntsis yam tsis tab kaum los sis tsis cuam tshuam, ces tsis tas ntiab lawv tawm—cia lawv ua dej num txhawb txuas ntxiv thiab muab ib lub cib fim rau lawv lees txim hloov dua siab tshiab. Hais txog cov thawj coj cuav uas raug rho tawm ntawd, ces npaj kom lawv ua lwm yam hauj lwm raws li tej uas lawv ua tau zoo thiab tej dej num uas haum rau lawv, tiam sis tsis pub lawv ua thawj coj pawg ntseeg ntxiv lawm; hos hais txog cov thawj coj thiab cov neeg ua hauj lwm uas raug rho tawm vim lawv lub peev xwm tsis zoo kiag li thiab lawv ua tsis tau ib yam hauj lwm dab tsi li, kuj npaj kom lawv ua lwm yam hauj lwm raws li tej uas lawv ua tau zoo thiab tej dej num uas haum rau lawv ua, tiam sis tsis tuaj yeem txhawb lawv los ua ib tug thawj coj los sis ib tug neeg ua hauj lwm ntxiv lawm. Vim li cas thiaj li tsis tuaj yeem? Lawv twb raug sim lawm. Lawv raug nthuav tawm, thiab twb pom tshab lawm hais tias hom neeg zoo li no lub peev xwm thiab peev xwm ua hauj lwm tsis haum los ua cov thawj coj. Yog lawv tsis haum ua thawj coj, lawv puas ua tsis tau lwm yam dej num? Tsis yog li ntawd tas li. Lawv lub peev xwm tsis zoo tsis haum ua thawj coj, tiam sis lawv ua tau lwm yam dej num. Tom qab cov neeg zoo li no raug rho tawm lawm, lawv ua tau tej yam uas haum rau lawv. Es yuav tsum tsis txhob tshem lawv txoj cai ua ib teg dej num; yav tom ntej thaum lawv lub siab ntseeg loj hlob lawm tseem siv tau lawv dua. Ib txhia raug rho tawm vim lawv tseem hluas thiab tsis muaj kev ntsib kev pom txog lub neej, thiab kuj tsis muaj kev ntsib kev pom txog kev ua hauj lwm, yog li ntawd lawv thiaj li ris tsis taus tes hauj lwm thiab thaum kawg thiaj li raug rho tawm. Nyob hauv qhov kev rho hom neeg no tawm mas, tseem muaj chaw zam. Yog lawv txoj kev ua neeg tau raws li tus qauv thiab lawv lub peev xwm txaus, tuaj yeem muab lawv txo qib es siv, los sis muab lawv mus ua lwm yam hauj lwm uas haum rau lawv. Thaum lawv to taub qhov tseeb meej lawm, thiab lawv tau paub thiab muaj kev ntsib kev pom txog pawg ntseeg tes hauj lwm me ntsis lawm, tseem tuaj yeem txhawb thiab cob qhia cov neeg zoo li no dua raws li lawv lub peev xwm. Yog lawv txoj kev ua neeg tau raws li tus qauv tiam sis lawv lub peev xwm tsis zoo kiag li, ces qhov uas cob qhia lawv ntawd yeej tsis muaj nqis dab tsi li, thiab yeej cob qhia los sis cia lawv nyob tsis tau kiag li.

Nyob hauv cov uas raug rho tawm, muaj ob hom neeg uas yav tom ntej tsis tuaj yeem txhawb thiab cob qhia ntxiv hlo li lawm. Ib hom yog cov tawm tsam khetos, thiab hom ob yog cov uas lub peev xwm tsis zoo kiag li. Tseem muaj ib txhia uas suav tsis tau tias yog cov tawm tsam khetos, tiam sis tsuas yog muaj kev ua neeg tsis zoo, twm xeeb thiab txawj dag, thiab ib txhia ntawm cov neeg no tub nkeeg, ntshaw kev tau zoo ntawm lub cev nqaij daim tawv thiab tiv tsis taus kev txom nyem. Txawm cov neeg zoo li no yuav muaj peev xwm zoo npaum li cas los xij, tsis tuaj yeem txhawb lawv ntxiv lawm. Yog lawv muaj peev xwm me ntsis, ces cia lawv ua yam uas lawv ua tau, tsuas yog npaj kom haum rau qhov ntawd xwb ces tau lawm; muab hais luv luv tias, tsis txhob txhawb lawv los ua ib tug thawj coj los sis ib tug neeg ua hauj lwm lawm. Dhau ntawm qhov uas muaj peev xwm thiab muaj lub peev xwm ua hauj lwm lawm, cov thawj coj thiab cov neeg ua hauj lwm yuav tsum to taub qhov tseeb, muaj lub nra rau pawg ntseeg, muaj peev xwm siv zog ua hauj lwm thiab tiv kev txom nyem, thiab lawv yuav tsum nquag thiab tsis tub nkeeg. Tsis tas li ntawd, lawv yuav tsum yog cov neeg uas coj ncaj thiab ncaj ncees dua me ntsis. Nej tsis tuaj yeem xaiv cov neeg uas txawj dag kiag li. Cov uas nkhaus thiab txawj dag dhau lawm ntawd mas pheej siv tswv yim phem tawm tsam cov kwv tij thiab cov muam, tawm tsam lawv cov thawj coj siab saud, thiab tawm tsam Vajtswv lub tsev. Lawv siv txhua hnub los xav txog tej tswv yim nkhaus xwb. Thaum sib cuag nrog ib tug neeg zoo li no mas, koj yuav tsum tau twv tas li seb lawv xav li cas tiag, koj yuav tsum nug tas li tias tsis ntev los no lawv ua dab tsi tiag, thiab yuav tsum tau saib ntsoov lawv tas li. Qhov siv lawv mas ua rau yus sab dhau thiab txhawj dhau. Yog hom neeg no raug txhawb los ua dej num, txawm lawv to taub kev qhuab qhia me ntsis los xij, lawv yuav tsis muab coj los xyaum ua raws, thiab lawv yuav xav tau txiaj ntsim thiab qhov zoo ntawm txhua yam hauj lwm uas lawv ua. Qhov siv cov neeg zoo li no mas txhawj dhau thiab muaj teeb meem ntau dhau, yog li ntawd cov neeg zoo li no tsis tuaj yeem txhawb. Yog li ntawd, hais txog cov tawm tsam khetos, cov uas lub peev xwm tsis zoo kiag li, cov uas muaj kev ua neeg tsis zoo, cov uas tub nkeeg, ntshaw kev tau zoo ntawm lub cev nqaij daim tawv thiab tiv tsis taus kev txom nyem, thiab cov uas nkhaus thiab txawj dag tshaj plaws—thaum hom neeg zoo li no raug nthuav tawm thiab raug rho tawm tom qab raug siv lawm ntawd, ces tsis txhob txhawb lawv zaum ob ntxiv lawm; tom qab pom lawv tshab lawm ces tsis txhob siv yuam kev ntxiv. Tej zaum ib txhia yuav hais tias, “Tus neeg no yav tas los raug txiav txim rau tias yog ib tug tawm tsam khetos. Peb pom tias ib ntus no lawv coj tau zoo lawm, lawv tuaj yeem sib cuag nrog cov kwv tij thiab cov muam tau li ib txwm thiab tsis txwv lwm tus ntxiv lawm. Puas txhawb tau lawv?” Tsis txhob maj—thaum lawv raug txhawb thiab tau meej mom lawm, lawv tus yam ntxwv xeeb txawm uas tawm tsam khetos ntawd yuav raug nthuav tawm. Tej zaum lwm tus yuav hais tias: “Yav tas los tus neeg no lub peev xwm tsis zoo kiag li; thaum kom lawv saib xyuas ob tug neeg tes hauj lwm xwb, lawv twb tsis paub tias yuav faib hauj lwm li cas, thiab yog muaj ob yam tshwm tuaj tib lub sij hawm, ces lawv tsis paub tias yuav npaj li cas kom tsim nyog. Tam sim no lawv laus me ntsis lawm, puas yog lawv yuav ua tau tej yam no zoo dua lawm?” Qhov lus hais no puas siv tau? (Siv tsis tau.) Thaum ob yam tshwm tuaj tib lub sij hawm, tus neeg ntawd paub tsis tseeb thiab tsis paub tias yuav daws li cas. Lawv pom tsis tshab ib tug twg los sis ib yam dab tsi li. Lawv lub peev xwm tsis zoo mus txog qhov uas lawv tsis muaj lub peev xwm ua hauj lwm los sis lub peev xwm nkag siab. Ib tug neeg zoo li no tsis tuaj yeem txhawb los ua ib tug thawj coj ntxiv kiag li lawm. Qhov no tsis yog teeb meem ntawm lub hnub nyoog. Cov neeg uas lub peev xwm tsis zoo ces txawm muaj yim caum xyoo los lub peev xwm yeej tseem tsis zoo. Qhov ntawd tsis zoo li tib neeg xav, tias thaum ib tug neeg laus tuaj thiab muaj kev ntsib kev pom ntau ntxiv, ces lawv yuav to taub txhua yam—tsis yog li ntawd. Lawv tsuas yog muaj kev ntsib kev pom txog lub neej me ntsis xwb, tiam sis kev ntsib kev pom txog lub neej ntawd sawv cev tsis tau rau lub peev xwm. Txawm ib tug neeg tau ntsib tau pom ntau yam npaum li cas los sis kawm tau ntau zaj kev qhia npaum li cas los xij, qhov ntawd tsis tau txhais hais tias lawv lub peev xwm yuav zoo tuaj.

Yog hais tias ib tug neeg twg qhov kev ua neeg twm xeeb dhau lawm, txawj dag dhau lawm, thiab lim hiam dhau lawm, thiab lawv muaj tswv yim phem puv npo, thiab tsuas xav txog lawv tus kheej xwb, hom neeg zoo li no puas hloov tau? Lawv raug rho tawm vim tej laj thawj no; tam sim no kaum xyoo dhau mus lawm thiab lawv tau mloog ntau zaj lus qhuab qhia lawm—puas yog lawv txoj kev ua neeg tsis twm xeeb, tsis nkhaus thiab tsis txawj dag lawm? Cia Kuv qhia rau koj tias: Tus neeg zoo li no yuav tsis hloov, lawv tseem yuav zoo li qub nyob rau 20 xyoo tom ntej. Yog li ntawd, yog koj ntsib lawv dua nyob rau 20 xyoo tom ntej thiab nug lawv tias lawv puas tseem twm xeeb thiab txawj dag li qub, lawv tus kheej yeej yuav lees. Vim li cas cov neeg uas muaj txoj kev ua neeg tsis zoo thiaj li tsis hloov? Lawv puas hloov tau? Yog kom lawv hloov tau, lawv yuav tsum muaj lub hauv paus thiab tej yam zoo li cas thiaj li ua rau muaj qhov ntawd tshwm sim? Lawv yuav tsum lees txais tau qhov tseeb. Cov neeg uas muaj kev ua neeg tsis zoo tsis lees txais qhov tseeb, thiab nyob hauv lawv nruab siab lawv saib tsis taus, ntxub, thuam, thiab ua yeeb ncuab rau tej yam uas zoo—lawv yeej hloov tsis tau li. Yog li ntawd txawm yuav dhau mus pes tsawg xyoo los xij, tsis txhob txhawb lawv, vim lawv tsis tuaj yeem hloov tau. Tej zaum nyob rau 20 xyoo tom ntej ntawd, lawv yuav kawm paub ua neeg txawj ntxias dua thiab, thiab haj yam txawj hais cov lus uas zoo mloog thiab tej uas dag lwm tus. Tiam sis yog koj sib cuag nrog cov neeg no thiab soj ntsuam lawv tej kev ua, koj yuav pom ib qho tseeb uas yog lawv tsis tau hloov hlo li. Koj xav tias tom qab ntau xyoo dhau mus lawm thiab lawv tau mloog ntau zaj lus qhuab qhia thiab ua dej num hauv Vajtswv lub tsev ntev npaum li no lawm, lawv tsim nyog hloov lawm—koj yuam kev lawm! Lawv yuav tsis hloov. Vim li cas? Lawv tau mloog ntau zaj lus qhuab qhia thiab nyeem Vajtswv cov lus ntau heev, tiam sis lawv tsis lees txais los sis tsis muab coj los xyaum ua raws ib kab hlo li, yog li ntawd lawv tsis tau hloov ib qho me me li, yeej tsis muaj hnub uas lawv yuav hloov tau li. Thaum hom neeg zoo li no raug nthuav tawm thiab raug rho tawm lawm, ces tsis tuaj yeem siv ntxiv li lawm, thiab yog koj siv lawv, ces cuag nkaus li koj tab tom ua phem rau Vajtswv lub tsev thiab cov kwv tij thiab cov muam. Yog koj tsis paub tseeb, ces cia li soj ntsuam seb lawv ua zoo li cas, thiab saib seb lawv tiv thaiv leej twg tej txiaj ntsim thaum ntsib tej yam uas ua rau lawv tus kheej tej txiaj ntsim tsis haum nrog Vajtswv lub tsev tej txiaj ntsim; lawv yeej yuav tsis muab lawv tus kheej tej txiaj ntsim tso tseg thiab siv zog tiv thaiv Vajtswv lub tsev tej txiaj ntsim hlo li. Saib los ntawm qhov no, tsis tsim nyog ntseeg lawv siab, thiab tsis tsim nyog raug Vajtswv lub tsev txhawb thiab siv. Qhov ntawd yog qhov laj thawj uas cov neeg zoo li no thiaj li raug teem tseg tias siv tsis tau. Cov neeg uas tsis lees txais qhov tseeb puas tseem hloov tau? Yeej tsis tau li, qhov ntawd yog ib qho ntawm tus neeg ruam hais lus dab ntub xwb!

Hais txog cov neeg uas tub nkeeg, ntshaw kev tau zoo ntawm lub cev nqaij daim tawv, thiab tiv tsis taus ib qho kev txom nyem me me li, ces lawv haj yam hloov tsis tau. Nyob rau lub sij hawm uas lawv ua thawj coj, lawv tsis tiv kev txom nyem dab tsi li, txawm yog tej kev txom nyem uas cov kwv tij thiab cov muam dog dig tuaj yeem tiv taus ntawd los lawv twb tsis tiv hlo li. Nyob hauv kev ua lawv tes dej num mas lawv tsuas ua kom dhau xwb—tuav kev sib txoos ua ke thiab tham qee cov kev qhuab qhia xwb, ces mus pw kom saib xyuas tau lawv tus kheej zoo. Yog tias thaum hmo ntuj, lawv pw lig me ntsis xwb, ces thaum sawv ntxov thaum cov kwv tij thiab cov muam twb sawv lawm lawv tseem pw. Txawm yog sab me ntsis los sis khwv me ntsis los sis tiv kev txom nyem me ntsis xwb los lawv yeej tsis txaus siab hlo li. Lawv tsis them tus nqi dab tsi thiab tsis ua hauj lwm tiag tiag dab tsi hlo li. Tsis hais lawv mus rau qhov twg, kiag thaum lawv pom muaj zoo noj zoo haus, ces lawv zoo siab heev ua rau lawv hnov qab txog txhua yam, thiab lawv tsis mus qhov twg li lawm, tiam sis tsuas nyob ntawd noj, haus thiab lom zem, thiab tsis ua hauj lwm dab tsi li. Lawv tsis mloog thaum lawv raug tus Nyob Saud ntuas, thiab lawv tsis lees txais kev ceeb toom thiab kev qhia tshwm los ntawm cov kwv tij thiab cov muam. Lawv xaiv ua neej nyob raws li txoj kev uas tau zoo tshaj plaws, yam tsis them tus nqi dab tsi li, thiab yam tsis ua lawv tej luag hauj lwm los sis tsis ua lawv tes dej num li, thiab yog li ntawd lawv thiaj li yog cov neeg uas tsis muaj qab hau. Cov neeg zoo li no puas tuaj yeem hloov tau? Cov neeg zoo li no tub nkeeg dhau, ntshaw kev tau zoo ntawm lub cev nqaij daim tawv; lawv hloov tsis tau. Lawv zoo li cas tam sim no ces lawv yuav zoo li ntawd nyob rau yav tom ntej. Tej zaum ib txhia yuav hais tias: “Tus neeg ntawd hloov lawm, ib ntus no lawv siv zog ntau rau hauv lawv tes hauj lwm lawm.” Tsis txhob maj. Yog koj txhawb lawv los ua thawj coj, ces lawv yuav rov qab mus rau txoj kev qub—qhov ntawd yog lawv tus kheej ntag. Lawv zoo ib yam li ib tus neeg twv txiaj, uas thaum nyiaj tag lawm, txawm yog lawv yuav tsum qiv nyiaj, muag vaj tse, los sis muag lawv tus poj niam thiab cov me nyuam los lawv yuav twv txiaj mus ntxiv. Yog ntu no lawv tsis twv txiaj, tej zaum yog vim lub tsev twv txiaj kaw lawm thiab tsis muaj chaw twv txiaj, los sis vim tag nrho lawv cov phooj ywg twv txiaj raug ntes lawm thiab tsis muaj leej twg nrog lawv twv txiaj ntxiv lawm, los sis vim lawv muag tag nrho cov khoom uas tuaj yeem muag tau ntawd thiab tsis muaj nyiaj mus twv txiaj lawm. Thaum lawv muaj kiag nyiaj hauv lawv txhais tes, ces lawv yuav pib twv txiaj dua thiab yuav tsis muaj peev xwm tso tseg—qhov ntawd yog lawv tus kheej ntag. Ib yam li ntawd, cov uas tub nkeeg thiab ntshaw kev tau zoo ntawm lub cev nqaij daim tawv kuj tsis tuaj yeem hloov tau thiab. Thaum lawv tau txais lub meej mom lawm, ces lawv yuav rov qab mus rau lawv tus yam ntxwv qub tam sim ntawd, thiab lawv tus yam ntxwv tiag tiag yuav raug nthuav tawm tuaj. Thaum lawv tsis muaj lub meej mom, tsis muaj leej twg saib lawv siab thiab tsis muaj leej twg ua hauj lwm rau lawv, thiab yog lawv tsis ua dab tsi li, ces lawv yuav tsum raug ntsaig tawm mus, vim pawg ntseeg tsis yug cov neeg nyob dawb, yog li ntawd lawv tsis muaj kev xaiv tiam sis yuav tsum tau lam ua qee yam hauj lwm yam tsis txaus siab li. Lawv ua tej yam txawv ntawm lwm tus. Lwm tus ua tej yam yam nquag plias, hos lawv ua yam raug yuam ua. Txawm hais tias sab nraud mas tsis muaj qhov txawv, tiam sis hauv lub ntsiab tseeb mas sib txawv. Thaum lwm tus muaj meej mom, lawv ua yam uas lawv tsim nyog ua thiab tuaj yeem ua lawv tej luag hauj lwm; thaum cov neeg no muaj meej mom mas, lawv tuav lub cib fim ntawd los txaus siab rau tej txiaj ntsim ntawm lub meej mom thiab tsis ua hauj lwm dab tsi li, thiab lawv tus yam ntxwv xeeb txawm lub ntsiab tseeb ntawm kev tub nkeeg thiab kev ntshaw kev tau zoo ntawd thiaj li raug nthuav tawm lawm. Vim li ntawd, nyob rau hauv tej xwm txheej twg los hom neeg zoo li no yuav tsis hloov, thiab thaum lawv raug nthuav tawm thiab raug rho tawm lawm, ces yuav tsum tsis txhob txhawb thiab siv cov neeg zoo li no dua ntxiv li lawm—qhov no yog lub hauv paus ntsiab lus.

Thaum hais txog cov tib neeg uas muaj tej xwm txheej sib txawv mas, cov no yog tej hauv paus ntsiab lus rau kev txhawb thiab siv lawv. Tus qauv uas qis tshaj plaws yog lawv tuaj yeem siv zog thiab ua dej num txhawb nyob rau hauv Vajtswv lub tsev yam tsis ua rau muaj kev cuam tshuam; yog zoo li ntawd, lawv tuaj yeem ua ib teg dej num nyob rau hauv Vajtswv lub tsev. Yog lawv ua tsis tau raws li tus qauv uas qis tshaj plaws no, ces txawm lawv txoj kev ua neeg thiab tej uas lawv ua tau zoo ntawd yuav zoo li cas los xij, lawv tsis tsim nyog ua ib teg dej num, thiab cov neeg zoo li no yuav tsum raug tshem tawm ntawm cov uas ua dej num mus. Yog ib tug neeg twg txoj kev ua neeg lim hiam thiab sib npaug nrog ib tug tawm tsam khetos, ces thaum paub tseeb tias lawv yog ib tug tawm tsam khetos lawm, Vajtswv lub tsev yuav tsum tsis siv lawv kiag li, thiab yuav tsis txhawb los sis cob qhia lawv li. Tej zaum ib txhia yuav hais tias: “Cia lawv ua dej num txhawb puas tau?” Qhov ntawd nyob ntawm qhov xwm txheej. Yog qhov lawv ua dej num txhawb ntawd yuav muaj tej yam tsis zoo cuam tshuam thiab coj tau qhov tshwm sim tsis zoo los rau Vajtswv lub tsev, ces Vajtswv lub tsev yuav tsis muab lub cib fim ua dej num txhawb rau lawv hlo li. Yog lawv paub tias lawv tus kheej yog ib tug tib neeg phem los sis ib tug tawm tsam khetos uas raug ntiab tawm lawm, tiam sis lawv txaus siab hlo ua dej num txhawb, thiab yuav ua tej yam li pawg ntseeg npaj rau lawv ua, thiab muaj tus xeeb ceem zoo ua tau dej num txhawb yam tsis muaj kev puas tsuaj rau ib qho txiaj ntsim ntawm Vajtswv lub tsev li, ces yog vim li ntawd thiaj li cia lawv nyob. Yog tab txawm qhov ua dej num txhawb xwb lawv twb ua tsis tau zoo, thiab lawv qhov kev ua dej num txhawb ntawd ua phem ntau dua ua zoo, ces lawv yuav tsis muaj lub cib fim ua dej num txhawb li, thiab txawm yog lawv ua dej num txhawb xwb los, Vajtswv lub tsev yeej yuav tsis siv lawv, vim lawv tsis tsim nyog los sis tsis muaj tej yam uas tsim nyog rau qhov kev ua dej num txhawb. Yog li ntawd cov neeg zoo li no yuav tsum tsis txhob rov qab los—cia lawv mus qhov twg los tau raws li lawv nyiam. Tej zaum ib txhia yuav hais tias, “Yog vajtswv lub tsev tsis siv kuv, ces kuv tus kheej mam li mus tshaj tawm txoj moo zoo, thiab kuv yuav muab cov neeg uas kuv tau los ntawm kev tshaj tawm txoj moo zoo ntawd rau vajtswv lub tsev.” Ua li ntawd puas tau? (Tau.) Tej zaum ib txhia yuav hais tias, “Txawm yog tus neeg ntawd ua dej num txhawb xwb los Koj yuav tsis siv, yog li ntawd muaj laj thawj dab tsi es lawv thiaj li yuav tsum muab cov neeg uas lawv tau los ntawm kev tshaj tawm txoj moo zoo ntawd rau Koj? Muaj laj thawj dab tsi es lawv thiaj li yuav tsum tshaj tawm txoj moo zoo rau Koj?” Vajtswv lub tsev tsis siv lawv vim ntau yam xwm txheej. Ib kis yog lawv tsis haum rau Vajtswv lub tsev tej hauv paus ntsiab lus rau kev siv tib neeg. Lwm kis yog Vajtswv lub tsev tsis kam siv cov neeg zoo li no, vim thaum lawv raug siv lawm, yuav muaj teeb meem tsis paub kawg li. Yog li ntawd peb yuav piav qhia qhov uas lawv txaus siab hlo tshaj tawm txoj moo zoo no li cas? Yam uas lawv ua tim khawv hauv kev tshaj tawm txoj moo zoo ntawd yog Vajtswv, thiab yog vim Vajtswv cov lus thiab Vajtswv tes hauj lwm lawv thiaj li muaj peev xwm tau tib neeg. Txawm hais tias twb muab tau cov neeg no los ntawm tus neeg ntawd txoj kev tshaj tawm txoj moo zoo lawm los xij, qhov no yeej tsis suav tias yog qhov lawv ua tau zoo li. Qhov ntau tshaj plaws, qhov ntawd tsuas yog ua lawv tej luag hauj lwm li ib tug tib neeg xwb. Txawm koj puas yog ib tug tawm tsam khetos los sis puas yog ib tug tib neeg phem, los sis koj puas raug ntsaig tawm mus los sis raug ntiab tawm mus, qhov ua koj tej luag hauj lwm li ib tug tib neeg ntawd mas yog ib yam uas koj tsim nyog ua. Vim li cas Kuv thiaj li hais tias qhov ntawd yog ib yam uas koj tsim nyog ua? Koj tau txais ib qho kev pub loj heev ntawm qhov tseeb los ntawm Vajtswv los lawm, thiab qhov no kuj yog Vajtswv tus nqi ntshav thiab. Vajtswv lub tsev ywg dej rau koj thiab pub rau koj tau ntau xyoo lawm, tiam sis Vajtswv puas tau thov dab tsi ntawm koj? Tsis tau. Tag nrho cov phau ntawv uas Vajtswv lub tsev faib ntawd yog pub dawb xwb, tsis muaj leej twg tau them ib npib nyiaj li. Ib yam li ntawd, txoj hau kev tseeb ntawm txoj sia ntev dhawv mus ib txhis thiab cov lus ntawm txoj sia uas Vajtswv muab rau tib neeg ntawd yog pub dawb xwb, thiab Vajtswv lub tsev tej lus qhuab qhia thiab kev sib qhia puav leej yog pub dawb rau tib neeg mloog xwb. Yog li ntawd, txawm koj yog ib tug neeg dog dig los sis ib tug tswv cuab ntawm ib pab pawg tshwj xeeb, koj tau txais ntau qhov tseeb los ntawm Vajtswv dawb dawb xwb, ces yeej yog qhov tsim nyog uas koj yuav tsum tshaj tawm Vajtswv cov lus thiab Vajtswv txoj moo zoo rau tib neeg thiab coj tib neeg los rau ntawm Vajtswv lub xub ntiag, tsis yog lod? Vajtswv tau muab tag nrho qhov tseeb rau tib neeg ntiaj teb; leej twg thiaj li muaj peev xwm them taus txoj kev hlub loj npaum li no? Vajtswv txoj hmoov hlub, Vajtswv cov lus, thiab Vajtswv txoj sia yog yam uas muab nqi ntsuas tsis taus, thiab tsis muaj ib tug tib neeg twg muaj peev xwm them taus li! Tib neeg txoj sia puas muaj nqis npaum li ntawd? Nws puas muaj nqis npaum li qhov tseeb? Yog li ntawd, tsis muaj leej twg yuav them taus Vajtswv txoj kev hlub thiab txoj hmoov hlub, thiab qhov ntawd suav nrog cov uas tau raug pawg ntseeg ntsaig tawm, ntiab tawm, thiab tshem tawm lawm—lawv los kuj zam tsis tau thiab. Tsuav koj muaj lub siab txawj xav, muaj laj thawj, thiab kev ua neeg me ntsis xwb, ces tsis hais Vajtswv lub tsev coj rau koj li cas los xij, koj yuav tsum ua koj lub luag hauj lwm tshaj tawm Vajtswv cov lus thiab ua tim khawv txog Nws tes hauj lwm. Qhov no yog tib neeg lub luag hauj lwm uas tsis tsim nyog tso tseg. Yog li ntawd, tsis hais koj tshaj tawm Vajtswv cov lus thiab Nws txoj moo zoo rau pes tsawg tus neeg, los sis koj tau pes tsawg tus neeg, qhov no tsis yog ib yam dab tsi uas yuav qhuas koj. Vajtswv nthuav tawm qhov tseeb ntau heev tiam sis koj tsis mloog los sis tsis lees txais. Es qhov kom ua dej num txhawb me ntsis thiab tshaj tawm txoj moo zoo rau lwm tus ntawd tsis yog yam uas koj tsim nyog ua lod? Raws li qhov uas hnub no koj los txog rau theem no, koj tsis tsim nyog lees txim hloov dua siab tshiab lod? Koj tsis tsim nyog nrhiav lub cib fim los pauj Vajtswv txoj kev hlub lod? Yeej tsim nyog tshaj plaws li! Vajtswv lub tsev muaj cov kev cai tswj fwm, thiab qhov ntsaig tib neeg tawm mus, ntiab lawv tawm, thiab tshem lawv tawm ntawd yog ua raws li cov kev cai tswj fwm thiab ua raws li Vajtswv tej kev cheem tsum—qhov ua tej no tsis yuam kev. Tej zaum ib txhia yuav hais tias, “Qhov lees txais cov neeg uas tau los ntawm cov uas raug ntsaig tawm mus los sis raug ntiab tawm txoj kev tshaj tawm txoj moo zoo ntawd los rau hauv pawg ntseeg mas me ntsis txaj muag.” Qhov tseeb tiag, qhov no yog tes dej num uas tib neeg tsim nyog ua, thiab tsis muaj dab tsi uas yuav txaj muag. Tib neeg puav leej yog cov neeg uas raug tsim tawm los. Txawm koj raug ntsaig tawm mus los sis raug ntiab tawm, raug teem txim tias yog ib tug tib neeg phem los sis ib tug tawm tsam khetos, los sis koj yog ib tug uas yuav raug tshem tawm los xij, koj tsis yog ib tug neeg uas raug tsim tawm los lod? Thaum koj raug ntsaig tawm mus lawm, Vajtswv tsis yog koj tus Vajtswv lawm lod? Cov lus uas Vajtswv tau hais rau koj thiab tej yam uas Vajtswv tau pub rau koj ntawd cia li raug tshem tawm mus hauv ib pliag xwb lod? Tej ntawd tsis muaj lawm lod? Tej ntawd tseem muaj, tsuas yog koj tsis saib tej ntawd muaj nqis xwb. Txhua tus neeg uas los ntseeg, tsis hais leej twg coj lawv los li, puav leej yog cov neeg uas raug tsim tawm los thiab yuav tsum zwm rau ntawm tus Tswv Tsim lub xub ntiag. Yog li ntawd, yog cov neeg uas raug ntsaig tawm mus los sis raug ntiab tawm no txaus siab hlo tshaj tawm txoj moo zoo, peb yuav tsis txwv lawv; tiam sis txawm lawv tshaj tawm li cas los xij, Vajtswv lub tsev tej hauv paus ntsiab lus rau kev siv tib neeg thiab Vajtswv lub tsev cov kev cai tswj fwm yeej hloov tsis tau, thiab qhov no yuav tsis muaj hnub hloov hlo li.

Nyob hauv ntau hom neeg uas raug rho tawm no, feem coob yuav tsis lees txim hloov dua siab tshiab tiag tiag thiab yuav tsum tsis txhob siv lawv ntxiv li lawm. Tsuas muaj chaw rau kev txhawb thiab siv cov uas raug rho tawm los sis hloov lawv tes hauj lwm vim lawv tsis muaj kev ntsib kev pom txog tes hauj lwm thiab yog li ntawd thiaj li ua tsis tau lawv tes hauj lwm ib ntus xwb. Cov neeg zoo li no muaj lub peev xwm txaus thiab lawv txoj kev ua neeg tsis muaj teeb meem loj, lawv tsuas muaj qee qhov tsis zoo me ntsis, tej qho phem, los sis tej cwj pwm tsis zoo uas tau los ntawm lawv tsev neeg—tej no tsis yog teeb meem loj. Yog Vajtswv lub tsev cheem tsum lawv, lawv tuaj yeem raug txhawb thiab siv dua nyob rau lub sij hawm tsim nyog; qhov no tsim nyog, vim lawv tsis yog cov tib neeg phem thiab lawv yuav tsis dhau mus ua cov tawm tsam khetos. Lawv lub peev xwm txaus, tsuas yog hais tias lawv tsis tau ua hauj lwm ntev thiab tsis muaj kev ntsib kev pom xwb, yog li ntawd lawv thiaj li ua tsis tau tes hauj lwm, qhov ntawd tsis yog teeb meem loj. Yog lawv raug rho tawm vim tej laj thawj no, ces muaj chaw rau lawv txoj kev loj hlob nyob rau yav tom ntej thiab lawv hloov tau. Tsuav ib tug neeg twg muaj lub peev xwm ua hauj lwm, muaj peev xwm, thiab lawv txoj kev ua neeg tau raws li tus qauv xwb, ces nyob rau lub sij hawm uas lawv ntsib pom Vajtswv tes hauj lwm thiab ua lawv tes dej num, ces cov neeg zoo li no yuav maj mam hloov, lawv txoj kev ua neeg yuav hloov, lawv yuav loj hlob rau hauv lawv txoj kev nkag mus rau hauv lub neej txoj sia, yuav muaj qee qhov kev hloov raws nyob hauv lawv tus moj yam, thiab yuav muaj qee qhov kev nce qib nyob hauv lawv txoj kev to taub qhov tseeb. Raws li qhov xwm txheej, tej dej num uas lawv ua, thiab lawv tus kheej txoj kev txiav txim siab, lawv yuav hloov thiab loj hlob mus rau ntau qib uas sib txawv, yog li ntawd yeej hais tau tias hom tib neeg zoo li no yeej txhawb thiab siv tau. Cov no yog tej hauv paus ntsiab lus dav dav rau qhov rov qab txhawb thiab siv ntau hom neeg uas yav tas los raug rho tawm.

Cov thawj coj thiab cov neeg ua hauj lwm tej luag hauj lwm yam xya yog “Muab tib neeg faib thiab siv txhua hom tib neeg uas sib txawv kom tsim nyog raws li lawv txoj kev ua neeg thiab qhov lawv ua tau zoo kom thiaj li muab lawv tso tau rau qhov uas lawv ua tau zoo.” Nyob hauv peb txoj kev sib qhia nyuam qhuav no, lub ntsiab lus ntawm qhov siv tib neeg kom muaj txiaj ntsig tshaj plaws twb piav qhia meej lawm. Tsuav yog ib tug neeg twg muaj qhov tsim nyog me ntsis hauv kev cob qhia, thiab tsuav lawv txoj kev ua neeg tau raws li tus qauv, ces Vajtswv lub tsev yuav muab cib fim rau lawv. Tsuav yog ib tug neeg twg caum qhov tseeb thiab nyiam tej yam uas zoo, ces Vajtswv lub tsev yuav tsis tso lawv tseg los sis tshem lawv tawm yam yooj yim li ntawd. Tsuav koj txoj kev ua neeg thiab lub peev xwm tau raws li cov qauv uas Kuv nyuam qhuav qhia ntawd, Vajtswv lub tsev yeej yuav muaj ib qho chaw rau koj ua ib teg dej num, thiab yeej yuav siv koj kom tsim nyog, thiab muab chaw txaus rau koj siv koj lub peev xwm. Muab hais luv luv tias, yog koj muaj tej uas koj ua tau zoo thiab muaj kev paub zoo hauv ib txoj hauj lwm uas pawg ntseeg tes hauj lwm cheem tsum, ces Vajtswv lub tsev yeej yuav cia koj ua ib teg dej num uas haum rau koj. Txawm li cas los xij, yog koj tsis muaj kev txiav txim siab los sis lub siab thiab tsis xav siv zog mus lawm tom ntej, ces cia li ua yam uas koj ua tau, ua ib teg dej num uas nyob hauv koj lub peev xwm ua tau xwb ces tau lawm. Yog koj muaj kev txiav txim siab, thiab koj hais tias, “Kuv xav to taub thiab tau qhov tseeb ntau dua, thiab taug txoj kev mus rau hauv txoj kev cawm dim kom sai li sai tau, thiab nkag mus rau hauv qhov tseeb qhov muaj tiag. Kuv txaus siab hlo ua tib zoo xav txog Vajtswv lub nra, txaus siab hlo ris lub nra hnyav hauv Vajtswv lub tsev, tiv kev txom nyem ntau dua lwm tus, fij kuv tus kheej ntau dua thiab tso tseg ntau dua lwm tus,” thiab yog koj tsim nyog nyob rau txhua yam, tiam sis tseem tsis muaj leej twg qhia koj npe tawm, los koj tuaj yeem qhia tias koj tus kheej ua tau. Qhov ntawd tsis yog qhov tsim nyog lod? Muab xaus lus tias, cov no puav leej yog Vajtswv lub tsev tej hauv paus ntsiab lus rau kev siv txhua hom neeg, lub hom phiaj tsis muaj dab tsi ntau tshaj qhov ua kom tib neeg nkag tau mus rau hauv qhov tseeb qhov muaj tiag. Tej kev qhia tshwm uas pom tau meej ntawm kev nkag mus rau hauv qhov tseeb qhov muaj tiag yog dab tsi? Yog qhov to taub qhov tseeb, to taub qhov tseeb tej hauv paus ntsiab lus thaum ua txhua yam hauj lwm, thiab muaj peev xwm xyaum ua raws qhov tseeb uas haum rau qhov ntawd thaum sib cuag nrog txhua hom neeg, xwm txheej, thiab yam khoom nyob hauv lub neej txhua hnub, tsis yog qhov paub tsis meej thiab tsis paub ua li cas thaum muaj ib yam dab tsi tshwm sim rau koj—qhov no yog lub hom phiaj. Thaum lub hom phiaj raug muab teem tseg lawm, nej yuav tsum caum mus rau lub hom phiaj ntawd!

Peb txoj kev sib qhia txog cov thawj coj thiab cov neeg ua hauj lwm tej luag hauj lwm yam xya los xaus ntawm no xwb. Tej zaum ib txhia yuav hais tias, “Koj tseem qhia tsis tau tag, Koj tseem tsis tau qhia tshwm cov thawj coj cuav hais txog yam no.” Kuv hais tias tsis tas yuav qhia tshwm lawv lawm. Ib kis mas, cov thawj coj cuav lub peev xwm tsis zoo thiab ua tsis tau tes hauj lwm tiag tiag; lwm kis mas, lawv tsis muaj lub siab txawj xav thiab laj thawj, tsis ris lub nra kiag li, tsis siv siab rau lawv tes hauj lwm hlo li, thiab txawm yog qee yam yooj yim xwb los twb ua tsis tau zoo. Thaum twg lawv ntsib ib qho teeb meem nyuaj, los sis ib qho teeb meem uas muaj feem xyuam txog qhov tseeb tej hauv paus ntsiab lus, lawv cais tsis tau hlo li, thiab haj yam tsis muaj peev xwm pom tshab txog lub ntsiab tseeb ntawm qhov teeb meem. Yog li ntawd, tsis tas yuav qhia tshwm lawv lawm. Txawm yog lawv raug qhia tshwm los, lawv yuav tsis lees txais, thiab qhov ntawd yuav nkim lus xwb. Tsis tas li ntawd, qhov hais txog tej yam uas lawv ua ntawd mas yuav ua rau xeev siab thiab ua rau tib neeg npau taws hauv siab. Qhov muab tes hauj lwm tseem ceeb npaum li no rau cov thawj coj cuav no ua yog ib qho kev siv tib neeg yuam kev. Qhov uas tsis muaj peev xwm ua lawv tes hauj lwm twb ua rau lawv xav tias lawv tsis muaj nqis txaus lawm, thiab yog lawv raug qhia tshwm thiab soj ntsuam, ces lawv yuav haj yam nyuaj siab ntxiv. Yog li ntawd cia cov thawj coj cuav no muab lawv tus kheej ntsuas rau thiab saib kom meej txog lawv tus kheej tej teeb meem li qhov lawv ua tau xwb. Yog koj nrhiav tau koj tej teeb meem, saib seb koj puas muaj peev xwm kho kom zoo dua nyob rau yav tom ntej; yog koj nrhiav tsis tau, ces koj yuav tsum tshawb xyuas tas li mus ntxiv, thiab koj tuaj yeem hais kom cov neeg nyob ib puag ncig koj pab koj soj ntsuam thiab txheeb xyuas. Yog lwm tus tau sib qhia nrog koj thiab koj tau muab siab rau lawm tiam sis tseem nrhiav tsis tau koj tus kheej tej teeb meem, thiab tseem tsis paub tias yuav paub tej ntawd li cas los sis daws tej ntawd li cas, ces koj yeej yog ib tug thawj coj cuav tiag tiag thiab tsim nyog raug tshem tawm lawm.

Lub Peb Hlis hnub tim 6, xyoo 2021