Nqe Lus Uas Xaiv Tawm Los 18

Coob tus neeg tau hais txog qhov teeb meem hauv qab no: Tom qab qhov kev sib koom saum toj no, lawv pom meej heev, muaj zog dua tuaj lawm, thiab tsis muaj kev xav rau sab phem li—tab sis tej yam ntxwv zoo li no mas tsuas muaj ntev li kaum hnub xwb, tom qab qhov uas lawv tsis muaj peev xwm tuav tau tej yam ntxwv li ib txwm muaj lawm. Qhov teeb meem yog dab tsi? Nej puas tau xav txog hais tias dab tsi ua rau muaj qhov zoo li no? Vim li cas koj tus yam ntxwv ho yuav zoo ua luaj rau thawj thawj kaum tawm hnub ntawd? Ib txhia hais tias qhov no yog qhov tswm sim los ntawm kev tsis xav ntsoov txog qhov tseeb. Tab sis yog li ntawd ces nej ho los txog rau theem no ntawm tus yam ntxwv uas ib txwm muaj tau li cas tom qab hnov tej lus sib qhia tag lawm? Vim li cas nej ho yuav zoo siab ua luaj tom qab hnov qhov tseeb tag lawm? Ib txhia hais tias vim yog tes hauj lwm ntawm Vajntsujplig. Yog li ntawd es vim li cas tes hauj lwm ntawm Vajntsujplig ho cia li tsum tom qab kaum tawm hnub ntawd lawm mas? Ib txhia hais tias vim yog lawv cia li nyob twj ywm thiab tsum tsis nias qees lawm tom ntej thiab nce lawm saud. Vim li cas Vajtsujplig thiaj tsis ua hauj lwm txawm yog thaum tib neeg twb rau siab ntso yuav ua kom muaj kev nce qib ntxiv los xij? Tsis yog nej yeej nias qees lawm tom ntej thiab nce lawm saud lod? Yog li ces vim li cas Vajntsujplig ho tsis ua hauj lwm mas? Tej laj thawj uas tib neeg muab ntawd tsis yog raws li qhov muaj tiag lawm. Nyob ntawm no, peb yuav tsum tham txog qhov ntsiab lus hauv qab no: Tsis hais Vajntsujplig yuav ua hauj lwm los tsis ua li, cia li yuav tsis xam tib neeg tus kheej qhov kev koom tes kiag tsis tau. Cov tib neeg uas to taub meej txog qhov tseeb thiab nyiam qhov tseeb mas yeej yuav muaj peev xwm nyob tag mus li rau haiv tus yam ntxwv li ib txwm muaj, tsis hais Vajntsujplig yuav ua hauj lwm thiab tsis ua los xij li. Rau cov uas tsis nyiam qhov tseeb ces—txawm hais tias qhov tseeb yeej pom tau meej meej rau lawv thiab txhawm hais tias Vajntsujplig yeej ua hauj lwm zoo npaum li cas li—nws yeej muaj ib qho chaw kawg rau qhov tseeb uas lawv yuav muab xyaum ua tau thiab lub sij hawm ntau npaum li cas nyob rau thaum lawv xyaum ua ntawd. Dhau ntawm lub sij hawm ntawd lawm, lawv yeej tsis ua dab tsi tshaj qhov uas ua kom tshwm sim raws li lawv tus kheej tus yeeb yam thiab tej uas lawv tus kheej nyiam nkaus xwb. Raws li ntawd, tsis hais ib tug neeg twg qhov yam ntxwv yuav mus txog ib theem twg ntawm qhov uas ib txwm muaj los tsis txog li thiab tsis hais lawv yuav muaj peev xwm muab qhov tseeb coj los xyaum ua raws los tsis muaj ntawd mas tsis yog txiav txim siab los ntawm qhov uas seb Vajntsujplig puas ua hauj lwm los tsis ua nkaus xwb, los sis tsis yog txiav txim siab los ntawm qhov uas seb lawv puas to taub meej txog qhov tseeb los tsis to taub, tab sis tsuas yog txiav txim siab los ntawm qhov uas seb lawmv puas kam muab qhov tseeb coj los xyaum ua thiab seb lawm puas nyiam qhov tseeb xwb.

Lub hom phiaj ntawm qhov kev sib qhia meej meej ces yog yuav pab kom tib neeg muaj cuab kav xyaum ua raws qhov tseeb thiab hloov lawv tus moj yam; tsis yog lam ua kom lawv to taub nws xwb. Yog koj to taub qhov tseeb tab sis tsis muaj nws coj los xyaum ua, ces sib qhia txog nws thiab koj qhov kev to taub txog nws ces yuav tsis muaj qab hau dab tsi ntxiv li lawm. Yog hais tias koj to taub qhov tseeb tab sis tsis muaj qhov tseeb coj los xyaum ua, ces koj yuav plam lub cib fim rov muab kom tau nws, nrog rau ib lub cib fim kom raug cawm tau. Yog koj tau muab qhov tseeb uas koj to taub ntawd coj los xyaum ua, ces koj tseem yuav tau tej qhov tseeb uas ntau tshaj thiab tob tshaj ntxiv; koj yuav tau Vajtswv txoj kev cawm dim, nrog rau kev tig ras to taub, kev paub qhov tseeb, thiab kev coj qhia los ntawm Vajntsujplig. Muaj coob tus ces tsuas yws hais tias Vajntsujplig yeej tsis qhia kom lawv paub li, yam tsis ras hais tias qhov tseem ceeb ces yog lawv tsis muab qhov tseeb coj los xyaum ua xwb. Yog li ntawd, lawv tus yav ntxwv yuav tsis muaj hnub tau qhov uas zoo li ib txwm muaj, los sis lawv yuav tsis muaj hnub to taub txog Vajtswv txoj kev xav li.

Raws li ib txwm mas, ib tug neeg hnov qhov tseeb thiab, rau ib lub sij hawm, lawv qhov xwm txheej yeej nyob li qhov uas ib txwm muaj. Nyob rau lub sij hawm ntawm qhov ua ib txwm muaj ntawd, qhov tseeb rub koj tus yam ntxwv los mus rau qhov uas ib txwm muaj. Nws ua rau koj paub txog koj tus yam ntxwv qias vuab tsuab; koj lub siab mas zoo siab kawg thiab rau tso dim plaws thiab koj tus yam ntxwv cia li tig kiag mus rau qhov zoo lawm. Tab sis tom qab ib nyuag ntu lawm, muaj qee yam yuav ua rau koj feeb tsis meej; qhov tseeb hauv koj cia lis pom tsis tseeb lawm thiab koj cia li muab qhov tseeb tso kiag puas tom qab hauv koj lub siab yam tsis yog txhob txwm ua li; koj cia li tsis nrhiav Vajtswv hauv koj tej kev ua lawm, koj ua txhua yam raws koj lub siab nyiam thiab tsis npaj siab yuav muab qhov tseeb coj los xyaum ua raws li lawm. Thaum lub sij hawm dhau mus, koj plam qhov tseeb uas koj muaj lawm. Koj tsuas tas zog ua kom koj tus yeeb yam qub tshwm sim tuaj xwb, tsis muab lub cib fim rau Vajntsujplig ua hauj lwm rau hauv koj li; koj yeej tsis nrhiav Vajtswv tej kev npaj siab li; txawm yog kiag thaum uas koj txav tib Vajtswv, los koj tsuas lam ua raws li sawv daws ua xwb. Thaum uas koj paub tseeb tseeb txoj qhov tseeb ntawm koj tus mob, ces koj lub siab twb nyob deb ntawm Vajtswv lawm; koj tau tawm tsam Vajtswv nyob rau ntau yam thiab tau hais ntau yam lus thuam lawm. Yeej tseem yuav muaj kev txhiv dim rau cov uas tsis tau taug txoj kev no mus deb heev, tab sis cov uas twb mus deb txog qhov thuam Vajtswv thiab npaj lawv tus kheej tawm tsam Vajtswv, txeeb tes hauj lwm, thiab zaub mov thiab ris tsho, ces tsis muaj kev txhiv dim rau lawm. Lub hom phiaj ntawm txoj kev qhia qhov tseeb kom meej meej ntawd yog los pab kom tib neeg to taub thiab xyaum ua raws qhov tseeb thiab hloov pauv tau lawv tus moj yam xwb. Nws tsis yog coj qhov kaj thiab kev zoo siab me ntsis los rau hauv lawv lub siab thaum lawv to taub qhov tseeb lawm xwb. Yog koj to taub qhov tseeb tiam sis tsis xyaum ua raws qhov tseeb ntawd li, ces qhov qhia qhov tseeb thiab to taub qhov tseeb ntawd tsis muaj qab hau dab tsi li. Qhov teeb meem yog dab tsi thaum tib neeg to taub qhov tseeb tiam sis tsis muab qhov tseeb ntawd coj los xyaum ua raws nas? Qhov no ua pov thawj qhia tias lawv tsis nyiam qhov tseeb, tias hauv lawv lub siab, lawv tsis lees txais qhov tseeb, txawm yog qhov twg los lawv yuav tsis tau txais Vajtswv tej koob hmoov thiab lub hwv tsam uas los tau txoj kev cawm dim li. Qhov tib neeg yuav tau txais txoj kev cawm dim los sis tsis tau ntawd, qhov tseem ceeb ces yog qhov seb lawv puas muaj peev xwm lees txais thiab xyaum ua raws qhov tseeb xwb. Yog koj tau muab txhua qhov tseeb uas koj to taub ntawd coj los xyaum ua raws, ces koj yuav tau txais Vajntsujplig txoj kev qhuab qhia, kev to taub zoo thiab kev coj qhia, thiab yuav muaj peev xwm to taub txog qhov muaj tiag ntawm qhov tseeb, thiab yuav to taub txog qhov tseeb tob dua, thiab yuav tau txais qhov tseeb thiab Vajtswv txoj kev cawm dim. Ib txhia tib neeg mas tsis muaj peev xwm xyaum ua raws qhov tseeb li, lawv pheej yws hais tias Vajntsujplig mas nim tsis qhia lawv li los sis tsis qhia kom lawv paub qhov tseeb li, tias Vajtswv mas nim tsis muab lub zog rau lawv li. Qhov no tsis yog lawm; qhov no yog kev to taub Vajtswv yuam kev lawm. Vajntsujplig txoj kev qhuab qhia thiab kev to taub zoo ntawd yog tsim los ntawm lub hauv paus ntawm tib neeg txoj kev koom tes. Tib neeg yuav tsum ua siab dawb paug, thiab txaus siab hlo los xyaum ua raws qhov tseeb, thiab txawm lawv txoj kev to taub yuav tob los sis ntiav los xij, lawv yuav tsum muaj peev xwm muab qhov tseeb ntawd coj los xyaum ua raws. Tsuas yog thaum ntawd xwb Vajntsujplig thiaj li qhia tau lawv thiab qhia kom lawv paub qhov tseeb. Yog tib neeg to taub qhov tseeb tiam sis tsis muab qhov tseeb ntawd coj los xyaum ua raws li—yog lawv tsuas tos kom Vajntsujplig ua thiab yuam kom lawv muab qhov tseeb ntawd coj los xyaum ua raws xwb—ces tsis yog lawv tsis ua hauj lwm kiag li lod? Vajtswv yeej tsis muaj hnub yuam tib neeg ua ib yam dab tsi li. Yog tib neeg to taub qhov tseeb tiam sis tsis txaus siab hlo muab qhov tseeb ntawd coj los xyaum ua raws li, ces qhov no qhia tau hais tias lawv tsis nyiam qhov tseeb, los sis tias lawv tus yam ntxwv tsis zoo thiab muaj qee yam txhaws lawm. Tiam sis yog tib neeg muaj peev xwm thov Vajtswv no, Vajtswv kuj yuav ua thiab; tsuas yog lawv tsis txaus siab hlo xyaum ua raws qhov tseeb thiab kuj ho tsis thov Vajtswv li thiab xwb ces Vajntsujplig thiaj li yuav tsis ua hauj lwm nyob rau hauv lawv. Tseeb tiag, txawm tib neeg yuav muaj hom kev nyuaj dab tsi los xij, yeej yuav tsum daws tau xwb; qhov tseem ceeb ces yog seb lawv puas muaj peev xwm xyaum ua raws li qhov tseeb los sis tsis muaj xwb. Niaj hnub no, tej teeb meem ntawm txoj kev qias vuab tsuab uas nyob rau hauv nej ntawd tsis yog ib tug kab khees xaws, tej teeb meem ntawd tsis yog ib yam kab mob uas kho tsis tau. Yog nej txiav txim siab los xyaum ua raws qhov tseeb tau, ces nej yeej yuav tau txais Vajntsujplig tes hauj lwm, thiab yeej yuav hloov pauv tau tus moj yam qias vuab tsuab no xwb. Txhua yam yog nyob ntawm qhov seb koj txiav txim siab puas tau los xyaum ua raws qhov tseeb xwb, qhov no yog qhov tseem ceeb. Yog koj xyaum ua raws qhov tseeb, yog koj taug txoj kev uas caum qhov tseeb, ces koj yuav muaj peev xwm los txais Vajntsujplig tes hauj lwm, thiab yeej yuav raug cawm dim xwb xwb li. Yog txoj kev koj taug ntawd yog txoj tsis yog lawm, ces koj yuav plam Vajntsujplig tes hauj lwm ntag, ib kauj ruam tsis yog xwb yuav ua rau yuam kev mus rau lwm txoj lawm, thiab koj yuav tag li ntawd lawm xwb, thiab txawm koj yuav ntseeg mus pes tsawg xyoo ntxiv los xij, koj yuav tsis tau txais txoj kev cawm dim li lawm. Piv txwv li, thaum lawv ua hauj lwm, ib txhia tib neeg yeej tsis xav txog qhov yuav ua tes hauj lwm ntawd li cas kom muaj txiaj ntsim rau Vajtswv lub tsev thiab mus raws li Vajtswv lub siab nyiam li—vim li ntawd qhov lawv ua ntau tshaj ces yog ua siab twm xeeb thiab ua phem xwb, qhov ntawd Vajtswv tsis nyiam thiab Vajtswv ntxub heev; thiab qhov ua li ntawd, lawv twb raug muab nthuav tawm thiab muab ntiab tawm mus lawm. Yog tib neeg muaj peev xwm nrhiav qhov tseeb thiab xyaum ua raws li qhov tseeb nyob rau hauv txhua yam lawm, ces lawv twb taug tau txoj kev yog ntawm txoj kev ntseeg Vajtswv lawm, yog li ntawd thiaj li muaj kev cia siab txog qhov yuav dhau los ua ib tug neeg uas ua tau raws li Vajtswv lub siab nyiam. Ib txhia tib neeg mas to taub qhov tseeb tiam sis tsis muab qhov tseeb ntawd coj los xyaum ua raws li. Tiam sis, lawv ho ntseeg tias qhov tseeb tsis muaj dab tsi tshaj qhov no li, thiab tsis muaj peev xwm daws tau lawv tus kheej tej kev xav thiab tus moj yam qias vuab tsuab. Cov tib neeg zoo li no tsis txaus luag lod? Tsis yog lawv ua tshaj dhau lawm lod? Tsis yog lawv xav tias lawv ntse tshaj txhua tus lawm lod? Yog tib neeg muaj peev xwm ua raws li qhov tseeb, ces yeej hloov pauv tau lawv tus moj yam qias vuab tsuab xwb. Yog lawv txoj kev ntseeg thiab kev ua dej num rau Vajtswv ntawd mus raws li lawv tus kheej tus cwj pwm xwb, ces lawv yeej yuav tsis muaj ib tug muaj peev xwm hloov pauv tau lawv tus moj yam li. Muaj ib txhia tib neeg mas txhawj txog lawv tus kheej tej kev xaiv yuam kev tag hnub li. Txawm yog qhia ib qho tseeb xwb los, lawv yeej tsis xav txog qhov tseeb ntawd ib qho los sis sim muab qhov tseeb ntawd coj los xyaum ua raws li, tiam sis ho pheej xaiv lawv tus kheej txoj kev xwb. Qhov coj tus cwj pwm zoo li no cas yuav yog ib txoj kev uas ruam ua luaj li; tseeb tiag, lawv yeej tsis paub ib yam zoo thaum lawv pom yam zoo ntawd li, thiab yeej npaj mus muaj lub neej tsis zoo lawm. Kev xyaum ua raws qhov tseeb yooj yim npaum li ntawd; txawm koj yuav xyaum ua raws los sis tsis xyaum los xij nws tseem ceeb npaum li ntawd. Yog tias koj yog ib tug neeg uas twb txiav txim siab los xyaum ua raws qhov tseeb lawm, ces koj txoj kev xav phem, txoj kev tsis muaj peev xwm thiab tus moj yam qias vuab tsuab yuav maj mam daws tau thiab hloov pauv mus; qhov no yog nyob ntawm seb koj lub siab puas nyiam qhov tseeb los sis tsis nyiam, seb koj puas muaj peev xwm los lees txais qhov tseeb los sis tsis muaj, seb koj puas tuaj yeem raug kev txom nyem thiab tiv ib txoj kev txom nyem kom tau txais qhov tseeb los sis tsis tuaj yeem xwb. Yog koj yeej nyiam qhov tseeb tiag tiag, ces koj yuav muaj peev xwm tiv txhua hom kev mob siab kom tau txais qhov tseeb ntawd xwb, txawm tib neeg yuav thuam, txiav txim, los sis tso tseg los xij. Koj yuav tsum ua siab ntev thiab ua tiag tiv qhov no; mas Vajtswv thiaj li yuav foom koob hmoov thiab tiv thaiv koj, Nws yuav tsis tso koj tseg los sis tsis quav ntsej koj li—qhov no yeej muaj tseeb. Yog koj thov Vajtswv los ntawm ib lub siab uas ntshai Nws, vam khom rau Vajtswv thiab hwm Vajtswv, ces yeej yuav tsis muaj ib yam dab tsi uas koj yuav mus tsis dhau li. Tej zaum koj yuav muaj ib tug moj yam qias vuab tsuab, thiab tej zaum koj yuav ua txhaum, tiam sis yog koj muaj ib lub siab uas ntshai Vajtswv, thiab yog koj ua tib zoo taug txoj kev uas caum qhov tseeb, ces koj yeej yuav muaj peev xwm sawv khov kho, thiab Vajtswv yeej yuav coj thiab tiv thaiv koj xwb xwb li.

Ib txhia neeg mas tsuas npaj kom lawv tus kheej muaj qeeb qhov tseeb siv rau lub sij hawm muaj xwm txheej ceev xwb los sis muab lawv tus kheej tso tseg thiab pab lwm tus, thiab tsis daws lawv tus kheej tej teeb meem; peb hu lawv ua “cov neeg siab zoo.” Lawv muab lwm tus xam ua cov moj zeej ntawm qhov tseeb thiab lawv tus kheej ua nws tus xib fwb, qhia lwm tus kom tus qhov tseeb ruaj ruaj thiab kom tsis txhob cia li nyob twj ywm xwb, thaum uas lawv tus kheej ua cov neeg uas nyob ib cag saib xwb. Hom neeg no yog hom neeg twg? Lawv yeej npaj kom lawv tus kheej muaj ib co lus ntawm qhov tseeb tab sis tsuas siv tej ntawd coj los qhia lwm tus xwb, hos lawv yeej tsis ua ib qho dab tsi hlo li kom lawv tsis txhob ntsib lawv tus kheej txoj kev raug rhuav tshem li. Cas yuav txaus tu siab ua luaj li lau! Yog lawv tej lus pab tau lwm tus, ces vim li cas ho pab tsis tau lawv tus kheej mas? Peb yuav tsum muab lawv hu ua cov neeg hais ib yam ua ib yam uas tsis muaj qhov tseeb tiag li. Lawv muab cov lus ntawm qhov tseeb rau lwm tus thiab hais kom lwm tus muab coj mus xyaum ua, hos lawv tus kheej ces yeej tsis siv zog ib qho los xyaum ua li. Lawv tseem tsis txaus ntxub thiab lod? Lawv tus kheej ces yeej ua tsis tau li, tab sis lawv yuam kom lwm tus muab cov lus ntawm qhov tseeb coj mus xyaum ua—cas qhov no yuav yog ib qho siab phem ua luaj li! Lawv tsis siv qhov muaj tiag pab lwm tus; lawv tsis yog siv txoj kev hlub los pab cuam rau lwm tus. Lawv tsuas yog dag ntxias thiab tsim kev phom sij rau tib neeg xwb. Yog qho no tseem pheej muaj ntxiv mus, ib tug neeg twg pheej cev cov lus ntawm qhov tseeb rau tus tom ntej xwb, ces qhov no tseem tsis xaus rau qhov uas txhua tus tsuas lam hais tej lus ntawm qhov tseeb xwb thaum uas lawv tus kheej kiag yeej tsis muaj peev xwm muab coj los xyaum ua li lod? Cov neeg zoo li ntawd yuav hloov tau li cas? Lawv yeej tsis lees paub lawv tus kheej tej teeb meem hlo li; ua li cas thiaj yuav muaj ib txoj kev mus lawm tom ntej rau lawv mas?

Txhua qhov teeb meem yeej muaj ib txoj kev daws tau; vim ib qho teeb meem twg yeej ib txwm muaj ib qho tseeb txog qhov ntawd los sab laj thiab muaj ib txoj hau kev lawm tom ntej rau koj thiab pab kom koj hloov tau. Txawm hais tias kev hloov pauv tsis tshwm sim tam sim ntawd, los tam sim no koj yeej lees paub koj qhov xwm txheej lawm. Yog tej qhov tseeb no tseem pab daws tsis tau tib neeg tej teeb meem, ces Vajtswv tsis yog lam hais lus pov tseg xwb lod? Yog li ntawd, yog koj kam muab qhov tseeb coj los xyaum ua, koj yuav muaj ib txoj kev taug tas mus li.