Nqe Lus Uas Xaiv Tawm Los 19

Tib neeg feem coob tsis to taub Vajtswv tes hauj lwm, yog li ntawd lawv txoj kev ntseeg thiaj li tsawg heev. Qhov paub Vajtswv tes hauj lwm mas tsis yooj yim; yus yuav tsum xub paub tias muaj ib txoj kev npaj rau Vajtswv txhua tes hauj lwm thiab puav leej yog ua raws li Vajtswv lub sij hawm xwb. Tib neeg yeej tsis nkag siab tshab tias Vajtswv ua dab tsi thiab ua thaum twg; Vajtswv ua qee tes hauj lwm nyob rau qee lub sij hawm, thiab Nws yeej tsis ncua li; tsis muaj leej twg rhuav tshem tau Nws tes hauj lwm. Qhov ua hauj lwm raws li Nws txoj kev npaj thiab raws li Nws tej kev npaj siab ntawd yog lub hauv paus ntsiab lus uas Nws ua Nws tes hauj lwm, thiab tsis muaj ib tug tib neeg twg hloov tau qhov no. Nyob rau hauv qhov no, koj yuav pom Vajtswv tus moj yam. Vajtswv tes hauj lwm tsis tos leej twg, thiab thaum txog sij hawm ua qee yam hauj lwm lawm, ces yuav tsum tau ua kom tiav. Ob peb xyoos dhau los no nej txhua tus puav leej tau ntsib tau pom Vajtswv tes hauj lwm lawm. Leej twg thiaj li rhuav tshem tau txoj kev uas Nws pub rau tib neeg, txwv tau Nws kom tsis txhob hais Nws cov lus thaum Nws yuav tsum tau hais cov lus ntawd thiab ua hauj lwm thaum yuav tsum tau ua kom tiav? Thaum lawv xub pib tshaj tawm txoj moo zoo, mas tib neeg feem coob muab cov phau ntawv uas hais txog Vajtswv cov lus rau cov uas nyob rau hauv pawg ntseeg thiab cov tib neeg ntawm sab kev lis kev cai ntseeg. Qhov tshwm sim los ntawm qhov ua li no yog dab tsi? Cov tib neeg no muaj tsawg tus heev thiaj li tshawb xyuas Vajtswv cov lus xwb; lawv feem coob hais lus phem, txiav txim, thiab ua yeeb ncuab nkaus xwb. Qee tus hlawv cov phau ntawv ntawd, qee tus txeeb cov phau ntawv ntawd, qee tus ntaus cov uas tshaj tawm txoj moo zoo thiab yuam kom lawv lees txhaum, thiab qee tus haj tseem hu tub ceev xwm kom ntes lawv thiab tsim txom lawv thiab. Lub sij hawm ntawd, txhua pab ntseeg tawm tsam yam tswj tsis tau li, tiam sis thaum kawg, lub nceeg vaj txoj moo zoo yeej tseem raug muab tshaj tawm mus thoob plaws lub teb chaws Suav. Leej twg thiaj li tab kaum tau txoj kev ua raws li Vajtswv lub siab nyiam? Leej twg thiaj li txwv tau txoj kev tshaj tawm Vajtswv lub nceeg vaj txoj moo zoo? Vajtswv cov yaj mloog Vajtswv lub suab, thiab cov uas tsim nyog Vajtswv muab ntawd yuav muab tau tsis ntxov los lig. Qhov no yog ib yam uas tsis muaj leej twg rhuav tshem tau. Nws zoo li nqe lus hauv phau Paj Lug uas hais tias, “Tus vajntxwv lub siab nyob hauv Yehauvas txhais tes; Nws tig tus vajntxwv lub siab mus rau txhua qhov chaw raws li Nws lub siab nyiam, ib yam li cov dej hauv kwj deg” (Paj Lug 21:1). Qhov no haj yam muaj tseeb rau cov tib neeg tsis tseem ceeb ntawd, puas yog? Vajtswv muaj Nws tej kev npaj thiab tej kev npaj tseg txog thaum twg Nws mam li ua tes hauj lwm dab tsi. Ib txhia tib neeg pheej txiav txim hais tias Vajtswv ua tsis tau qhov no los sis qhov tod, tiam sis tej tswv yim zoo li ntawd tsuas yog tib neeg tej kev xav hauv nruab siab xwb. Txawm tib neeg yuav ua rau puas tsuaj ntau npaum li cas thiab Ntxwgnyoog yuav cuam tshuam ntau npaum li cas los xij, yuav tsis muaj qab hau dab tsi li, thiab lawv yuav txwv tsis tau Vajtswv tes hauj lwm. Vajntsujplig Dawb Huv tes hauj lwm txiav txim rau txhua yam, thiab tib neeg ua tsis tau ib yam dab tsi tiav li yog tsis muaj Vajntsujplig Dawb Huv tes hauj lwm. Tib neeg yuav tsum muaj laj thawj dab tsi hais txog qhov no? Thaum tib neeg paub tias Vajntsujplig Dawb Huv tsis ua hauj lwm lawm, lawv yuav tsum tso lawv tus kheej tej kev xav phem tseg thiab ua tib zoo tsis txhob ua ib yam dab tsi uas dig muag ntsuav lawm. Txoj kev xaiv uas ntse ces yog nrhiav Vajtswv tej kev npaj siab thiab tos Vajtswv lub sij hawm xwb. Ib txhia tib neeg pheej vam khom rau lawv tus kheej tej kev xav phem thiab tej kev xav hauv nruab siab thiab ua ua ntej Vajtswv, ces qhov tshwm sim los yog qhov hais tias Vajntsujplig Dawb Huv tsis ua hauj lwm thiab lawv tej kev siv zog tsis muaj qab hau dab tsi li. Txawm li cas los xij, tib neeg yuav tsum ua yam uas lawv yuav tsum tau ua, thiab lawv yuav tsum ua lawv tes dej num kom tiav. Koj nyob twj ywm tos vim ntshai tsam ua qee yam yuam kev xwb tsis tau, thiab koj yeej hais tsis tau tias, “Vajtswv tseem tsis tau ua, thiab Vajtswv tseem tsis tau hais yam uas Nws xav kom kuv ua, yog li ntawd tam sim no kuv yuav tsis ua ib yam dab tsi li.” Qhov no tsis yog qhov tsis ua koj tes dej num lod? Koj yuav tsum xav txog qhov no kom nkag siab meej, vim nws tsis yog ib qho teeb meem me, thiab ib qho kev xav uas yuam kev xwb yuav ua rau koj tej kev yav tom ntej puas tsuaj los sis rhuav tshem koj.

Nyob rau hauv Vajtswv txoj kev npaj tswj hwm mas, txawm Vajtswv yuav ua tes hauj lwm dab tsi los xij, Vajtswv ua raws li lub sij hawm teem tseg, ua kom yog sij hawm, ua kom zoo tshaj plaws, thiab yeej tsis ua raws li tib neeg txoj kev xav hauv nruab siab uas hais tias, “Ua li no tsis tau, ua li tod tsis tau, ua li no yuav tsis mus txog qhov twg li!” Vajtswv yog tus uas muaj hwj chim loj kawg nkaus, thiab tsis muaj ib yam dab tsi nyuaj rau Vajtswv li. Txij Tiam Muaj Kev Cai los txog rau Tiam Hmoov Hlub mus txog rau Tiam Lub Nceeg Vaj, txhua kauj ruam ntawm Vajtswv tes hauj lwm puav leej yog ua tsis raws li tib neeg tej kev xav phem, uas yog cov xav hais tias tej ntawd mas ua tsis tau kiag li. Txawm li ntawd los, thaum kawg txhua yam yeej ua tau tiav, thiab Ntxwgnyoog txaj muag thiab swb tag nrho, thiab tib neeg npog lawv lub qhov ncauj lawm. Tib neeg ua tau dab tsi? Lawv twb xyaum ua raws tsis tau qhov tseeb li, tiam sis lawv tseem khav theeb khav txiv thiab xav hais tias lawv ua tau txhua yam, thiab lawv lub siab puv npo tej kev ntshaw xwb, thiab lawv tsis ua tim khawv tseeb kiag li. Haj tseem muaj cov tib neeg uas xav hais tias, “Vajtswv hnub yuav los sai sai no lawm, peb yuav tsis tau raug kev txom nyem ntxiv lawm, peb yuav muaj lub neej zoo, thiab qhov kawg twb los ze lawm.” Cia Kuv qhia rau nej hais tias, cov tib neeg zoo li no tsuas lam nrog luag tej ua thiab lam taus lam ua xwb, thiab thaum kawg lawv kawg raug rau txim xwb thiab tsis tau ib yam dab tsi li! Qhov ntseeg Vajtswv kom pom Vajtswv hnub thiab khiav dim txoj kev puas tsuaj loj ntawd puas pab tau yus kom tau txais qhov tseeb thiab txoj sia? Tus uas ntseeg Vajtswv kom khiav dim txoj kev puas tsuaj thiab kom pom Vajtswv hnub ntawd yuav raug kev puas tsuaj. Tiam sis, cov uas ntseeg los caum qhov tseeb, thiab kom dim los ntawm txoj kev hloov tus moj yam ntawd yuav dim. Cov no yog cov ntseeg Vajtswv tiag tiag. Cov ntseeg uas ntseeg yam feeb tsis meej ntawd thaum kawg yuav tsis tau ib yam dab tsi li, tsuas yog ua hauj lwm yam tsis muaj qab hau xwb, thiab yuav raug rau txim hnyav dua. Txhua tus tib neeg puav leej tsis muaj kev paub tob. Cov uas ntseeg Vajtswv tiam sis tsis quav ntsej lawv tes hauj lwm thiab pheej xav txog tej yam phem xwb ces yog cov neeg ua phem, lawv yog cov tsis ntseeg thiab tsuas ua rau lawv tus kheej puas tsuaj xwb. Cov ntseeg thiab cov tsis ntseeg tsis yog puav leej nyob rau hauv Vajtswv ob txhais tes lod? Leej twg thiaj li khiav dim ntawm Vajtswv ob txhais tes? Tsis muaj leej twg khiav dim li! Cov uas khiav ntawd thaum kawg yuav tsum rov los rau ntawm Vajtswv thiab raug rau txim. Qhov no yeej muaj tseeb, vim li cas tib neeg thiaj li tsis pom qhov no tseeb tseeb?

Ib txhia tib neeg tsis muaj kev paub txog Vajtswv lub hwj chim uas loj kawg nkaus ib qho me me li, txawm lawv ntseeg Vajtswv Tus Uas Muaj Hwj Chim Loj Kawg Nkaus los xij. Lawv pheej paub tsis meej txog cov lus nug nram qab no uas hais tias: “Yog Vajtswv twb muaj hwj chim loj kawg nkaus, muaj txoj cai kav, thiab muaj hwj chim kav tag nrho ib puas tsav yam, vim li cas Nws thiaj li tseem tsim Ntxwgnyoog, cia Ntxwgnyoog ua rau tib neeg qias vuab tsuab tau 6,000 xyoo thiab ua rau lub ntiaj teb muaj kev kub ntxhov? Vim li cas Vajtswv thiaj li tsis rhuav tshem Ntxwgnyoog? Yog muab Ntxwgnyoog rhuav tshem lawm, tib neeg yuav tsis muaj lub neej zoo lod?” Qhov no yog txoj kev uas tib neeg feem coob xav. Tam sim no nej piav qhia puas tau qhov teeb meem no? Qhov no muaj feem xyuam rau qhov tseeb uas hais txog tej zeem muag. Ntau tus tib neeg tau xav txog lo lus nug no lawm, tiam sis tam sim no uas nej twb muaj lub hauv paus me ntsis lawm, nej yuav tsis ua xyem xyav rau Vajtswv vim lo lus nug no. Txawm li ntawd los xij, yuav tsum tau daws qhov kev paub tsis meej txog lo lus nug no kom meej. Muaj ib txhia tib neeg nug hais tias, “Vim li cas Vajtswv thiaj li cia tus thawj tub txib saum ntuj ntxeev siab rau Nws? Puas yog Vajtswv tsis paub tias tus thawj tub txib saum ntuj ntawd muaj peev xwm ntxeev siab rau Nws? Puas yog Vajtswv tswj tsis tau nws, puas yog Vajtswv tso cai rau nws, los sis puas yog Vajtswv muaj qee lub hom phiaj?” Qhov tib neeg nug lo lus nug no mas yog ib qho uas yeej ib txwm muaj, thiab lawv yuav tsum paub tias lo lus nug no muaj feem rau Vajtswv txoj kev npaj tswj hwm tag nrho. Vajtswv npaj kom muaj ib tug thawj tub txib saum ntuj thiab qhov tus thawj tub txib saum ntuj no ntxeev siab rau Vajtswv ntawd yog Vajtswv tso cai thiab Nws npaj tseg lawm—qhov no yeej nyob rau hauv Vajtswv txoj kev npaj tswj hwm lawm. Vajtswv tso cai rau tus thawj tub txib saum ntuj ua rau cov tib neeg ntiaj teb uas Nws tau tsim ntawd qias vuab tsuab, tom qab nws ntxeev siab rau Vajtswv lawm. Tsis yog hais tias Vajtswv tswj tsis tau Ntxwgnyoog, es tib neeg ntiaj teb thiaj li raug tus nab ntxias thiab raug Ntxwgnyoog muab ua qias vuab tsuab, tiam sis Vajtswv yog tus tso cai rau Ntxwgnyoog ua li no. Tsuas yog tom qab Nws tso cai rau qhov no tshwm sim lawm xwb Vajtswv mam li pib Nws txoj kev npaj tswj hwm thiab Nws tes hauj lwm cawm tib neeg ntiaj teb. Tib neeg puas tuaj yeem tshawb nrhiav tau qhov kev zais ntawm no? Thaum tib neeg ntiaj teb raug Ntxwgnyoog muab ua qias vuab tsuab lawm, Vajtswv mam li pib Nws tes hauj lwm cawm tib neeg ntiaj teb. Ua ntej tshaj plaws, Nws ua tes hauj lwm uas nyob rau Tiam Muaj Kev Cai nyob rau hauv lub Teb Chaws Ixayees. Tom qab ob txhiab xyoo dhau mus lawm, Nws ua tes hauj lwm uas raug ntsia rau saum tus ntoo khaub lig nyob rau Tiam Hmoov Hlub, ces txhiv tau txhua tus tib neeg ntiaj teb lawm. Nyob rau lub sij hawm kawg, Nws rov los yug ua neeg los txeeb thiab cawm ib pab tib neeg nyob rau tiam kawg. Cov tib neeg uas yug los rau tiam kawg ntawd yog hom tib neeg zoo li cas? Lawv yog cov uas tau raug Ntxwgnyoog muab ua qias vuab tsuab tau ntau txhiab xyoo lawm, yog cov uas raug muab ua qias vuab tsuab dhau uas lawv tsis muaj qhov zoo nkaus li tib neeg li lawm. Tom qab raug txoj kev txiav txim, kev rau txim, thiab kev muab qhia tshwm ntawm Vajtswv cov lus, thiab tom qab raug txeeb tau lawm, lawv tau txais qhov tseeb los ntawm Vajtswv cov lus thiab ntseeg Vajtswv tag nrho lawm; lawv muaj kev to taub txog Vajtswv, thiab lawv tuaj yeem zwm rau Vajtswv tiag tiag thiab ua tau raws li Nws tej kev npaj siab lawm. Thaum kawg, pab tib neeg uas muab tau los ntawm Vajtswv txoj kev npaj tswj hwm ntawd yuav yog cov tib neeg zoo li no. Nej puas xav hais tias cov uas tsis tau raug Ntxwgnyoog muab ua qias vuab tsuab ntawd yuav ua tau raws li Vajtswv tej kev npaj siab, los sis thaum kawg puas yuav yog tias cov uas raug Ntxwgnyoog muab ua qias vuab tsuab ntawd dim? Cov tib neeg uas yuav muab tau los ntawm txoj kev npaj tswj hwm ntawd ces yog pab uas tuaj yeem to taub Vajtswv tej kev npaj siab, cov uas tau txais qhov tseeb los ntawm Vajtswv, thiab cov uas muaj hom lub neej txoj sia thiab zoo nkaus li tib neeg uas Vajtswv cheem tsum ntawd xwb. Thaum Vajtswv nyuam qhuav tsim tib neeg ntawd, lawv tsuas muaj tib neeg tus yam ntxwv thiab tib neeg txoj sia xwb. Tiam sis, lawv tsis muaj qhov tseeb uas Vajtswv cheem tsum kom tib neeg muaj ntawd thiab lawv ua tsis tau neej kom zoo nkaus li tib neeg uas Vajtswv ib txwm cia siab tias tib neeg yuav muaj ntawd. Pab tib neeg uas thaum kawg yuav muab tau ces yog cov uas yuav nyob mus kom txog thaum kawg, thiab cov no yog cov uas Vajtswv muab tau, cov uas Nws txaus siab rau, thiab cov uas ua tau rau Nws txaus siab. Thoob plaws ntau txhiab xyoo ntawm tes hauj lwm tswj hwm ntawd, cov tib neeg uas thaum kawg Nws tau cawm no yog cov uas tau txais ntau tshaj plaws; qhov tseeb uas cov tib neeg no tau txais ntawd yog kiag qhov ywg dej thiab qhov kev pab uas Vajtswv pub rau lawv los ntawm Nws txoj kev nrog Ntxwgnyoog ua rog ntag. Cov tib neeg uas nyob rau hauv pab no mas zoo dua cov uas Vajtswv tsim thaum chiv keeb; txawm lawv raug muab ua qias vuab tsuab los, nws yog ib qho uas nyob rau hauv Vajtswv txoj kev npaj tswj hwm lawm, qhov no yeej zam tsis dhau. Qhov no qhia tau meej txog Nws lub hwj chim uas loj kawg nkaus thiab txoj kev txawj ntse, nrog rau qhov tseeb uas txhua yam uas Vajtswv tau npaj tseg, npaj ua, thiab ua tiav lawm ntawd mas yog qhov zoo tshaj plaws. Yog tom qab no muaj neeg rov nug koj hais tias: “Yog Vajtswv muaj hwj chim loj kawg nkaus no, ua li cas tus thawj tub txib saum ntuj ho tseem ntxeev siab tau rau Nws thiab? Tom qab ntawd Vajtswv muab nws pov los rau hauv ntiaj teb qhov chaw uas Vajtswv tso cai rau nws ua rau tib neeg ntiaj teb qias vuab tsuab. Qhov tseem ceeb ntawm qhov no yog dab tsi?” koj tuaj yeem hais li no hais tias: “Qhov teeb meem no Vajtswv twb npaj tseg ua ntej lawm thiab nws tseem ceeb heev. Tib neeg tsis nkag siab txog qhov teeb meem no tag nrho, tiam sis txij li qib uas tib neeg tuaj yeem nkag siab thiab mus txog ntawd, pom tau hais tias yam uas Vajtswv ua mas muaj qab hau heev. Qhov no tsis yog hais tias Vajtswv muaj qhov ua yuam kev li ib ntus, los sis tias Nws tswj tsis tau txhua yam thiab tsis muaj hauv kev los tswj txhua yam, es Nws thiaj li muab Ntxwgnyoog tej tswv yim dag tig los tawm tsam Ntxwgnyoog, hais tias ‘Tus thawj tub txib saum ntuj twb ntxeev siab lawm yog li ntawd Kuv cia li ua mus xwb, thiab Kuv mam li cawm tib neeg ntiaj teb tom qab nws ua rau lawv qias vuab tsuab tag nrho lawm.’ Yeej tsis yog li no kiag li.” Yam tsawg kawg tib neeg yuav tsum paub hais tias qhov no nyob rau hauv Vajtswv txoj kev npaj tswj hwm lawm. Txoj kev npaj dab tsi? Nyob rau theem ib, mas muaj ib tug thawj tub txib saum ntuj; nyob rau theem ob, tus thawj tub txib saum ntuj ntxeev siab; nyob rau theem peb, tom qab tus thawj tub txib saum ntuj ntxeev siab lawm, nws los rau hauv tib neeg ntiaj teb los ua rau lawv qias vuab tsuab, ces Vajtswv mam li pib Nws tes hauj lwm tswj hwm tib neeg ntiaj teb. Thaum tib neeg ntseeg Vajtswv lawv yuav tsum to taub txog lub zeem muag ntawm Vajtswv txoj kev npaj tswj hwm. Ib txhia yeej tsis to taub txog qhov tseeb ntawm sab no li, lawv pheej xav tias muaj ntau yam kev tsis sib haum xeeb uas daws tsis tau li xwb. Yog tsis muaj kev to taub ces lawv tsis ruaj siab, thiab yog lawv tsis ruaj siab, ces lawv tsis muaj zog mus rau tom ntej. Yog tsis muaj qhov tseeb ces yuav nce qib nyuaj, yog li ntawd thiaj li nyuaj heev rau cov uas tsis nrhiav qhov tseeb thaum lawv ntsib ib qho teeb meem. Qhov kev qhia no pab puas tau nej kom to taub? Tsuas yog tom qab tus thawj tub txib saum ntuj ntxeev siab lawm xwb mas Vajtswv thiaj li mam muaj txoj kev npaj tswj hwm los cawm tib neeg ntiaj teb. Thaum twg tus thawj tub txib saum ntuj pib nws txoj kev ntxeev siab? Yeej muaj qee yam uas qhia txog nws txoj kev ntxeev siab, qhov tus thawj tub txib saum ntuj ntxeev siab ntawd yeej muaj ib qho txheej txheem, nws tsis yooj yim npaum li hauv ntawv hais. Nws zoo li qhov Yudas ntxeev siab rau Yexus—yeej muaj ib qho txheej txheem. Tsis yog nws cia li ntxeev siab rau Yexus tom qab raws Yexus qab tsis ntev xwb. Yudas tsis nyiam qhov tseeb, nws ntshaw nyiaj, thiab pheej nyiag nyiaj. Vajtswv muab nws rau Ntxwgnyoog, Ntxwgnyoog muab tswv yim rau nws, ces nws thiaj li pib ntxeev siab rau Yexus. Yudas maj mam phem zuj zus thiab nyob rau qee qhov xwm txheej, ces thaum txog sij hawm lawm, nws mam li ntxeev siab rau Yexus. Tib neeg txoj kev ua phem ntawd yeej muaj ib tug qauv, thiab nws tsis yooj yim npaum li tib neeg xav hauv nruab siab. Nyob rau lub sij hawm no, tib neeg tsuas to taub yam uas nyob rau hauv Vajtswv txoj kev npaj cawm tib neeg mus txog rau theem no xwb, tiam sis lawv yuav muaj peev xwm nkag siab txog qhov tseem ceeb ntawm txoj kev npaj tswj hwm ntawd tob dua thaum lawv loj hlob hauv lub siab ntseeg lawm.

Nqe Lus Uas Xaiv Tawm Los 27

“Cov lus tuam mom thiab lus cem uas tawm tsam Vajtswv yog ib qho kev txhaum uas yuav zam txim tsis tau nyob rau tiam neej no los sis hauv lub ntiaj teb yuav los tom ntej no, thiab cov uas ua qhov kev txhaum no yuav tsis muaj hnub rov los yug ua neeg dua tshiab lawm.” Qhov no txhais tias Vajtswv tus moj yam tsis zam rau qhov uas tib neeg ua txhaum. Yeej paub meej tseeb lawm tias yuav tsis zam cov lus tuam mom thiab lus cem uas tawm tsam Vajtswv ntawd nyob rau tiam neej no los sis hauv lub ntiaj teb yuav los tom ntej no. Cov lus tuam mom uas tawm tsam Vajtswv ntawd, txawm yog txhob txwm hais los sis tsis yog txhob txwm hais los xij, yog ib yam uas txhaum rau Vajtswv tus moj yam, thiab kev hais tej lus tuam mom uas tawm tsam Vajtswv ntawd, tab txawm yog vim li cas los xij, yeej yuav raug teem txim xwb xwb li. Txawm li cas los xij, qee cov neeg hais tej lus uas tsim nyog raug teem txim, tej lus tuam mom rau tej xwm txheej uas lawv tsis to taub qhov no, los sis nyob rau qhov uas lawv raug lwm tus dag, tswj, thiab caij tsuj lawm. Tom qab lawv hais cov lus no lawm, lawv siab tsis kaj, lawv hnov tias lawv raug iab liam lawm, ces lawv thiaj li tu siab heev. Tom qab qhov no lawm, lawv thiaj li npaj tej kev ua zoo kom txaus thaum lawv tau txais kev paub thiab kev hloov rau qhov no lawm, yog li ntawd ces Vajtswv thiaj li tsis nco qab txog lawv tej kev ua txhaum nyob yav dhau los ntxiv lawm. Nej yuav tsum paub Vajtswv tej lus kom meej thiab txhob lam siv tej lus ntawd mus raws li nej tej kev xav phem thiab tej kev xav hauv nruab siab. Nej yuav tsum to taub tias Nws tej lus yog tsom rau leej twg, thiab Nws hais txog lub ntsiab dab tsi. Nej yuav tsum txhob lam siv los sis lam txhais Vajtswv tej lus. Cov neeg uas tsis paub tias yuav ntsib yuav pom li cas ces yeej tsis tig xav rau lawv tus kheej txog ib yam dab tsi li, thiab lawv tsis muab lawv tus kheej saib hlob es tawm tsam Vajtswv tej lus, hos cov uas muaj qee yam kev ntsib kev pom thiab kev thoob tsib lawm ces pheej xav heev dhau lawm, lam muab lawv tus kheej saib hlob es tawm tsam Vajtswv tej lus thaum lawv nyeem Nws tej lus foom phem los sis Nws txoj kev ntxub thiab kev tshem tib neeg tawm. Cov neeg no tsis to taub Vajtswv tej lus, thiab nkag siab Nws yuam kev tas li. Qee cov neeg tsis nyeem Vajtswv tej lus tam sim no los sis tsis tshawb xyuas Nws tes hauj lwm tam sim no, ces haj yam tsis tau txais Vajntsujplig txoj kev qhuab qhia. Lawv hais raws li Vajtswv txoj kev txiav txim, ces tom qab ntawd txawm muaj ib tug neeg tshaj tawm txoj moo zoo rau lawv, uas yog qhov lawv lees txais lawm. Tom qab qhov no lawm, lawv tu siab rau qhov lawv tau ua thiab txaus siab hlo lees txim hloov dua siab tshiab lawm, txawm nyob rau qhov xwm txheej twg los peb yeej yuav pom seb lawv tus cwj pwm thiab lawv tej kev qhia tshwm meej zoo li cas mus rau tom ntej. Tshwj xeeb mas yog lawv tus cwj pwm phem ces tom qab lawv pib ntseeg lawm, es lawv tseem muaj kev xav phem hais tias, “Ua li, kuv twb hais tej lus tuam mom, tej lus cem thiab tej lus txiav txim rau Vajtswv lawm, thiab yog Vajtswv teem txim rau hom neeg zoo li no, ces kuv tej kev caum ntawd yuav tsis muaj qab hau li,” ces lawv tag li ntawd lawm xwb. Lawv tso lawv tus kheej tseg mus rau txoj kev tag kev cia siab thiab tsim kev puas tsuaj rau lawv tus kheej lawm.

Cov neeg feem coob tau ua txhaum thiab ua rau lawv tus kheej puas suab npe rau qee txoj kev lawm. Piv txwv li, qee cov neeg tau tawm tsam Vajtswv thiab hais tej lus tuam mom; qee cov neeg tau tsis lees txais yuav Vajtswv cov lus txib thiab tsis ua lawv tes dej num, es thiaj li raug Vajtswv ntxub ntxaug; qee cov neeg tau ntxeev siab rau Vajtswv thaum lawv raug kev dag ntxias; qee cov neeg tau ntxeev siab rau Vajtswv vim kos npe rau “Peb Sob Lus” thaum lawv raug ntes lawm; qee tus tau nyiag tej khoom fij lawm; qee tus tau siv tej khoom fij lawm; qee tus nquag cuam tshuam lub neej hauv pawg ntseeg thiab ua phem rau cov neeg Vajtswv xaiv; qee tus tau tsim tej pab pawg ua ke thiab ua phem rau lwm tus, ua rau pawg ntseeg ntxhov hnyo; qee tus nquag nthuav tej kev xav phem thiab txoj kev tuag tawm, ua puas rau cov kwv tij thiab cov muam; thiab qee tus tau ua kev nkauj kev nraug thiab kev plees kev yi, thiab tau ua ib qho kev phem loj heev. Yeej txaus los hais tias lawv txhua tus nyias muaj nyias tej kev ua txhaum thiab tej kev dub tsuas. Tiam sis qee cov neeg muaj peev xwm lees txais qhov tseeb thiab lees txim hloov dua siab tshiab, hos lwm cov lees txais tsis tau thiab yeem tuag ua ntej yuav lees txim hloov dua siab tshiab lawm. Yog li ntawd yuav tsum saib tib neeg raws li lawv tus yeeb yam lub ntsiab tseeb thiab kom haum raws li lawv tus cwj pwm. Cov uas muaj peev xwm lees txim hloov dua siab tshiab yog cov uas ntseeg Vajtswv tiag tiag; tab sis cov uas tsis lees txim hloov dua siab tshiab tiag tiag, cov uas yuav tsum raug tshem tawm thiab raug ntiab tawm ntawd mas yeej yuav raug tshem tawm thiab raug ntiab tawm. Qee cov neeg mas phem, qee cov mas tsis paub qab hau, qee cov mas ruam, thiab qee cov mas tsiv nyaum. Nyias txawv nyias. Qee cov neeg phem mas muaj lub siab phem, hos lwm cov mas yog Ntxwgnyoog thiab cov dab phem cov tub qhev. Tshwj xeeb mas qee tus yeej cia li muaj tus yeeb yam phem, hos tshwj xeeb mas qee tus yeej txawj dag, tshwj xeeb mas qee tus yeej ntshaw luag tug thaum hais txog nyiaj txiag, thiab lwm cov ces xyiv fab rau kev sib daj sib deev. Txhua tus neeg tus cwj pwm mas sib txawv, yog li ntawd yuav tsum tau ua tib zoo tshuaj xyuas tag nrho kom mus raws li lawv tus kheej tus yeeb yam thiab haum raws li tus cwj pwm. Raws li tej uas yeej muaj thaum nruab thiab los lawm ntawm tib neeg cev nqaij daim tawv uas txawj tuag ntawd mas, txhua tus tib neeg yeej muaj qhov ua ywj siab txawm tias lawv yog leej twg los xij. Lawv tuaj yeem xav txog txhua yam raws li tib neeg tej kev xav phem, thiab tsis muaj kev paub kom pom tshab ncaj qha mus rau sab ntsuj plig los sis tsis muaj hnub yuav paub txog qhov tseeb ntawm qhov ntawd li. Piv txwv li, thaum koj ntseeg tus Vajtswv tseeb thiab xav lees txais Nws tes hauj lwm tshiab ntawm theem no, tiam sis tsis muaj leej twg los tshaj tawm txoj moo zoo rau koj thiab tsuas yog Vajntsujplig tes hauj lwm qhia koj thiab coj koj kev rau ub rau no xwb, koj thiaj li tsis paub qhov uas koj paub ntawd. Koj yuav tsis muaj hnub paub tias Vajtswv tab tom uas tes hauj lwm dab tsi tam sim no thiab qhov Nws yuav ua dab tsi kom tiav rau yav tom ntej. Tib neeg yuav piav tsis tau txog Vajtswv; lawv tsis paub yuav ua tau li ntawd, thiab lawv tsis muaj kev paub pom tshab ncaj qha rau sab ntsuj plig los sis tsis to taub Vajtswv tes hauj lwm kom zoo, haj yam tsis ua dej num rau Nws yam txaus siab hlob kom zoo li ib tug tub txib saum qaum ntuj thiab. Tshwj yog Vajtswv xub kov yeej, cawm, thiab hloov kho tib neeg los ntawm Nws tej lus, los sis txhawb lawv thiab muab qhov tseeb uas Nws nthuav tawm ntawd pab lawv, ces tib neeg tsis muaj peev xwm lees txais tes hauj lwm tshiab, tsis muaj peev xwm txais qhov tseeb thiab txoj sia, los sis tsis muaj peev xwm los paub Vajtswv. Yog Vajtswv tsis ua tes hauj lwm no, ces lawv yuav tsis muaj tej no nyob rau hauv lawv; qhov no raug txiav txim los ntawm qhov uas lawv yeej muaj thaum nruab thiab los lawm. Yog li ntawd, qee cov neeg thiaj li tawm tsam los sis ntxeev siab, ua rau Vajtswv npau taws thiab ntxub, tab sis Vajtswv saib txhua kis txawv thiab saib xyuas lawv txhua tus mus raws li qhov uas tib neeg muaj thaum nruab thiab los lawm. Ib teg hauj lwm twg uas Vajtswv ua mas yeej tsim nyog lawm. Nws paub tias yuav ua dab tsi thiab yuav ua li cas, thiab Nws yeej yuav tsis yuam kom tib neeg ua ib yam dab tsi uas lawv ua tsis tau raws li qhov uas muaj thaum nruab thiab los lawm. Vajtswv txoj kev coj rau txhua tus neeg mas yog saib raws li tej xwm txheej tiag ntawm tus neeg ntawd tej xwm txheej thiab keeb kwm yav dhau los rau thaum lub sij hawm ntawd, nrog rau tus neeg ntawd tej kev ua thiab tus cwj pwm thiab lawv tus yeeb yam lub ntsiab tseeb. Vajtswv yeej tsis ua txhaum rau ib tug twg li. Qhov no yog ib sab ntawm Vajtswv txoj kev ncaj ncees. Piv txwv li, Evas raug tus nab ntxias kom noj lub txiv los ntawm tsob ntoo uas paub qhov zoo qhov phem, tab sis Yehauvas tsis tau cem nws tsuas hais tias, “Kuv twb hais rau koj kom txhob noj lub txiv ntoo ntawd lawm, yog li ntawd vim li cas koj ho tseem noj thiab? Koj yuav tsum muaj kev thoob tsib to nrog; koj yuav tsum paub tias tus nab tsuas hais lus los ntxias koj xwb.” Yehauvas tsis tau cem Evas li ntawd. Vim tib neeg yog tej uas Vajtswv tsim tawm los, Nws paub tias lawv tej uas muaj thaum nruab thiab los lawm ntawd yog dab tsi thiab tej uas muaj thaum nruab thiab los lawm ntawd muaj peev xwm ua tau dab tsi, tib neeg muaj peev xwm tswj lawv tus kheej mus txog theem twg, thiab tib neeg mus tau deb npaum li cas xwb. Vajtswv paub tag nrho tej no meej heev. Vajtswv txoj kev coj rau ib tug neeg mas tsis yooj yim npaum li tib neeg xav. Thaum Nws tus cwj pwm coj rau ib tug neeg yog ib qho kev ntxub los sis kev tsis nyiam, los sis thaum hais txog qhov tus neeg no hais rau ib qho xwm txheej twg, Nws muaj kev to taub zoo txog lawv tus yam ntxwv. Qhov no vim yog Vajtswv tshawb xyuas tib neeg lub siab thiab lub ntsiab tseeb kom meej. Tib neeg ib txwm xav tias, “Vajtswv tsuas muaj Nws lub hwj huaj qaum ntuj xwb. Nws ncaj ncees thiab Nws yeej tsis pub tib neeg ua txhaum tau li. Nws tsis xav txog tib neeg tej kev nyuaj los sis muab Nws tus kheej tso rau hauv tib neeg qhov chaw. Yog ib tug neeg tawm tsam Vajtswv, Nws yuav rau txim rau lawv.” Tsis yog li ntawd kiag li. Yog tias qhov ntawd yog qhov uas ib tug neeg twg to taub Nws txoj kev ncaj ncees, Nws tes hauj lwm, thiab Nws txoj kev saib tib neeg, ces lawv ua yuam kev loj heev lawm. Vajtswv txoj kev txiav txim siab rau txhua tus neeg qhov tshwm sim los mas tsis saib raws li tib neeg tej kev xav phem thiab tej kev xav hauv nruab siab, tab sis yog raws li Vajtswv tus moj yam ncaj ncees. Nws yuav pauj rau txhua tus neeg raws li tej uas lawv tau ua lawm. Vajtswv ncaj ncees, thiab tsis ntev xwb, Nws yeej yuav ua kom txhua tus tib neeg ntseeg tag nrho xwb xwb li.