Cov ntseeg tus Tswv txhua tus puav leej ntseeg Tswv Yexus cov lus cog tseg tias: “Kuv mus npaj ib qho chaw rau nej. Thiab yog Kuv mus npaj ib qho chaw rau nej, Kuv yuav rov qab los dua, thiab los coj nej los rau Kuv Tus Kheej; kom kuv nyob qhov twg los nej kuj yuav tau nyob qhov ntawd thiab” (Yauhas 14:2–3). Ntau tus neeg, saib raws li tus Tswv cov lus, tos tus Tswv los thiab qaws lawv mus rau lub nceeg vaj saum ntuj ceeb tsheej. Lawv ntseeg tias tus Tswv cov lus cog tseg yuav tsis poob li, thiab thaum Nws los, Nws yeej yuav qaws tib neeg ncaj qha mus rau saum ntuj. Yog tib neeg tseem nyob hauv ntiaj teb thiab tsis tau raug qaws mus, lawv xav tias qhov no ua pov thawj tias tus Tswv tseem tsis tau rov qab los. Qhov kev xam pom no puas yog?

Tom qab Tswv Yexus sawv hauv qhov tuag rov qab los thiab nce mus saum ntuj, Nws yeej tau mus npaj ib qho chaw rau peb. Tiam sis koj puas paub tias Nws npaj qhov chaw no li cas? Nej puas paub tias thaum npaj qhov no yuav tsum ua hauj lwm dab tsi? Nej puas tuaj yeem paub tseeb tias qhov chaw uas tus Tswv npaj yog cia peb nkag mus saum ntuj ceeb tsheej thaum peb tseem ciaj sia? Los sis yog cia peb nkag mus rau lub ntiaj teb sab ntsujplig tom qab tuag lawm? Nyob hauv lub ntiaj teb ntawm sab kab lis kev cai ntseeg, ntau tus neeg tos tus Tswv los thiab coj lawv mus rau lub nceeg vaj saum ntuj ceeb tsheej, tiam sis lawv puas tau xav dua tias lub nceeg vaj saum ntuj ceeb tsheej nyob qhov twg tiag? Cov uas tos txais tau tus Tswv raug qaws mus rau qhov twg? Ib txhia hais tias, yeej yog, lawv raug qaws mus rau saum ib nta ntuj mus ntsib tus Tswv lawm. Tiam sis puas yog li ntawd tiag mas? Tib neeg yuav ua neej nyob saum ib nta ntuj tau li cas? Ib tug neeg uas muaj cev nqaij daim tawv puas ua neej nyob tau tom qab raug qaws mus rau saum ib nta ntuj? Lwm cov hais tias, “Lawv raug qaws mus rau saum ntuj ceeb tsheej lawm!” Ntuj ceeb tsheej thiab lub ntiaj teb ntawm sab ntsujplig yog dab tsi? Qhov ntawd yog qhov chaw uas tib neeg mus tom qab lawv tuag. Peb lub cev nqaij daim tawv nkag tsis tau ncaj qha rau lub ntiaj teb ntawm sab ntsujplig; tsuas yog tom qab tuag lawm xwb mas thiaj li nkag tau rau lub ntiaj teb ntawm sab ntsujplig. Tus Tswv hais lus faj lem txog qhov Nws rov qab los kom peb thiaj li tos txais Nws thaum peb tseem ciaj sia. Tuag lawm thiab rov qab mus rau lub ntiaj teb ntawm sab ntsujplig ces hu tsis tau tias yog kev tos txais tus Tswv lawm. Yog li ntawd, qhov uas ntseeg tias kev nkag mus rau lub nceeg vaj saum ntuj ceeb tsheej txhais tau tias raug qaws mus rau saum ib nta ntuj ntawd tsis yog tib neeg txoj kev xav phem thiab kev xav hauv nruab siab xwb lod? Qhov ntawd tsuas yog qhov tsis muaj tiag xwb. Yog tias peb nkag siab tus Tswv tej lus faj lem tsis tseeb lawm, qhov tos tus Tswv txoj kev rov qab los ntawd tej zaum yuav yog kev nkim zog dawb—tsuas yog tos dawb xwb.

Yog li ntawd, qhov chaw uas tus Tswv npaj rau peb nyob saum ntuj ceeb tsheej los sis nyob hauv ntiaj teb? Cia peb saib seb tus Tswv Cov Lus Thov Vajtswv hais li cas: “Cia Koj lub nceeg vaj los, cia kom Koj lub siab nyiam muaj tiav rau hauv ntiaj teb, ib yam li nws muaj nyob saum ntuj ceeb tsheej” (Mathai 6:10). Tsis tas li ntawd, phau Qhia Tshwm hais lus faj lem tias: “Thiab kuv Yauhas pom lub nroog dawb huv, lub Yeluxalee tshiab, nqis kiag ntawm Vajtswv saum ntuj ceeb tsheej los … Saib nawb, Vajtswv lub tsev ntaub tau nyob nrog tib neeg lawm, thiab nws yuav nrog lawv nyob, thiab lawv yuav yog nws cov neeg, thiab Vajtswv tus kheej kiag yuav nrog lawv nyob, thiab ua lawv tus Vajtswv” (Qhia Tshwm 21:2–3). “Tej nceeg vaj hauv lub ntiaj teb no tau rais los ua lub nceeg vaj ntawm peb tus Tswv, thiab ntawm Nws tus Khetos lawm; thiab Nws yuav kav mus ib txhiab ib txhis” (Qhia Tshwm 11:15). Tej lus faj lem no hais tias “Tej nceeg vaj hauv lub ntiaj teb no tau rais los ua lub nceeg vaj ntawm peb tus Tswv, thiab ntawm Nws tus Khetos lawm,” “lub nroog dawb huv, lub Yeluxalee tshiab, nqis kiag ntawm Vajtswv saum ntuj ceeb tsheej los,” thiab “Vajtswv lub tsev ntaub tau nyob nrog tib neeg lawm.” Qhov no yog hais txog Khetos lub nceeg vaj tshwm sim muaj tiag nyob hauv ntiaj teb. Vajtswv yuav tsim Nws lub nceeg vaj rau hauv ntiaj teb. Tswv Yexus hais kom peb thov kom Vajtswv lub nceeg vaj nqis los rau hauv ntiaj teb, kom Nws lub siab nyiam raug ua tiav nyob hauv ntiaj teb. Nws yeej tsis tau hais tias Vajtswv lub nceeg vaj yuav raug tsim rau saum ntuj ceeb tsheej, thiab Nws yeej tsis tau kom peb cia siab tias ib hnub twg yuav raug qaws mus rau saum ib nta ntuj li. Sawv daws, xav seb—puas yog li ntawd? Yog li ntawd, yog peb pheej cia siab kom raug qaws mus rau saum ib nta ntuj es nkag mus rau Vajtswv lub nceeg vaj, qhov no puas yog tias tsis mus raws li tus Tswv cov lus thiab Nws txoj kev npaj siab? Tej nceeg vaj hauv ntiaj teb yuav rais los ua Vajtswv lub nceeg vaj. Tus Tswv los ua Nws tes hauj lwm hauv ntiaj teb nyob rau tiam kawg, yog li ntawd ces lub nceeg vaj saum ntuj ceeb tsheej nyob hauv ntiaj teb. Tus Tswv nyob qhov twg, lub nceeg vaj saum ntuj ceeb tsheej nyob qhov ntawd. Thaum kawg lub nceeg vaj saum ntuj ceeb tsheej yuav tshwm sim muaj tiag nyob rau hauv ntiaj teb.

Yog li ntawd, qhov uas tus Tswv mus npaj ib qho chaw rau peb ntawd txhais li cas? Qhov tseem ceeb ces yog, Nws npaj cov tsev neeg yug los rau cov neeg Vajtswv xaiv tseg, tej xwm txheej uas tsim nyog, thiab lub cib fim rau lawv tos txais tus Tswv thiab koom rooj mov nyob rau hauv ntiaj teb no. Yog li ntawd, qhov chaw uas cov neeg Vajtswv xaiv tseg yug los, thiab tej xwm txheej uas lawv lees txais Vajtswv tes hauj lwm ntawd, puav leej yog Vajtswv teem tseg zoo lawm. Yog li ntawd lo lus uas tus Tswv hais tias “kom kuv nyob qhov twg los nej kuj yuav tau nyob qhov ntawd thiab” yog txhais li cas? Tam sim no, Vajtswv los ua Neeg Leej Tub thiab los rau hauv ntiaj teb. Yog li ntawd, ua cov neeg Vajtswv xaiv tseg, peb kuj tau yug los rau tiam kawg thiab los rau hauv ntiaj teb lees txais Vajtswv tes hauj lwm thiab kev cawm dim. Qhov no yog lub ntsiab ntawm qhov npaj ib qho chaw rau peb! Tus Tswv rov qab los rau tiam kawg, tiam sis tsuas muaj tib neeg feem tsawg hauv lub ntiaj teb ntawm sab kab lis kev cai ntseeg thiaj li hnov Vajtswv lub suab thiab rov qab los rau ntawm Nws, lees txais Vajtswv Tus Uas Muaj Hwj Chim Loj Kawg Nkaus xwb. Cov neeg no twb raug qaws lawm.

Tam sim no Vajtswv tau los ua cev nqaij daim tawv ua Neeg Leej Tub, nthuav tawm qhov tseeb los ua tes hauj lwm txiav txim. Thaum peb hnov Vajtswv lub suab, tos txais tus Tswv, thiab raug qaws mus rau ntawm Vajtswv lub zwm txwv hauv ntej, qhov no thiaj li yog “raug qaws mus” tiag tiag. Thaum pawg ntseeg raug qaws mus, qhov no txhais tsis tau tias txhua tus ntseeg puav leej raug qaws, tiam sis yog cov nkauj xwb ntse uas hnov Vajtswv lub suab thiab tos txais tau tus Tswv thiaj li raug qaws mus xwb. Yog li ntawd, Vajtswv ua hauj lwm dab tsi tom qab tib neeg raug qaws mus lawm? Qhov ntawd yog qhov uas phau Vajluskub tau hais lus faj lem tias: “Rau qhov lub sij hawm tab tom los lawm uas txoj kev txiav txim yuav tsum pib ntawm Vajtswv lub tsev mus” (1 Petus 4:17). Qhov ntawd yog Vajtswv Tus Uas Muaj Hwj Chim Loj Kawg Nkaus nthuav tawm qhov tseeb los ua tes hauj lwm txiav txim. Qhov no ua tiav Tswv Yexus cov lus faj lem tias: “Kuv tseem muaj ntau yam hais rau nej, tab sis nej ris tsis taus tej ntawd tam sim no. Txawm li cas los xij, thaum Nws, tus Ntsujplig ntawm qhov tseeb, los, Nws yuav coj nej mus rau txhua qhov tseeb” (Yauhas 16:12–13). Tes hauj lwm txiav txim ntawm tiam kawg uas Vajtswv Tus Uas Muaj Hwj Chim Loj Kawg Nkaus ua yog los tsim Khetos lub nceeg vaj rau hauv ntiaj teb. Ua ntej tej kev puas ntsoog loj pib, Vajtswv yuav ua kom tiav ib pab neeg kov yeej. Pab neeg kov yeej no yuav yog cov ncej hauv Vajtswv lub nceeg vaj; lawv yog cov uas yuav nrog Vajtswv ua vajntxwv kav ua ke nyob rau hauv Khetos lub nceeg vaj ntawd. Cov uas raug Vajtswv ua kom zoo tiav log thaum muaj tej kev puas ntsoog ntawd yuav yog Nws cov neeg nyob rau hauv Nws lub nceeg vaj. Tag nrho cov uas pheej tsis lees txais Vajtswv Tus Uas Muaj Hwj Chim Loj Kawg Nkaus tes hauj lwm ntawm tiam kawg yuav raug Vajtswv nthuav tawm thiab tshem tawm thiab yuav tsis muaj feem hauv Khetos lub nceeg vaj li. Niaj hnub no, Vajtswv Tus Uas Muaj Hwj Chim Loj Kawg Nkaus twb ua tiav ib pab kov yeej nyob hauv Teb Chaws Suav lawm. Cov kov yeej no tab tom ua tim khawv rau Vajtswv thoob plaws lub ntiaj teb, tshaj tawm thiab nthuav dav Vajtswv lub nceeg vaj txoj moo zoo. Tam sim no yog lub sij hawm tseem ceeb uas Vajtswv tab tom ua kom Nws cov neeg hauv txhua haiv neeg zoo tiav log thaum muaj tej kev puas ntsoog. Tag nrho cov uas lees txais Vajtswv tes hauj lwm ntawm tiam kawg yog cov raws cuag Tus Me Nyuam Yaj tej hneev taw thiab raug qaws mus rau ntawm Vajtswv lub xub ntiag. Cov neeg Vajtswv xaiv tseg noj thiab haus Nws cov lus, tau ntsib tau pom Nws txoj kev txiav txim thiab kev rau txim, thiab lawv tej moj yam qias vuab tsuab raug ntxuav kom dawb huv thiab hloov pauv lawm. Lawv txhua tus tau ua tej lus tim khawv uas tseeb tiag. Vajtswv twb muab tau ib pab kov yeej lawm. Thaum Vajtswv tes hauj lwm xaus thiab tej kev puas ntsoog loj ntawm peb xyoos thiab ib nrab xyoo kawg ntawd los txog, lub nceeg vaj uas yog Ntxwgnyoog li no yuav raug rhuav tshem tag nrho mus. Tag nrho tej hwj chim lim hiam uas tawm tsam Vajtswv los kuj yuav raug rhuav tshem mus tib si thiab, ces Khetos lub nceeg vaj yuav tshwm sim muaj tseeb nyob rau hauv ntiaj teb lawm. Thaum ntawd, cov uas tau txais kev cawm dim lawm yuav nkag mus rau hauv lub nceeg vaj nrog Vajtswv thiab tau so ua ke. Qhov no yuav ua tiav Vajtswv Tus Uas Muaj Hwj Chim Loj Kawg Nkaus cov lus tias: “Thaum Kuv cov lus tiav lawm, lub nceeg vaj maj mam tsim tsa nyob rau hauv lub ntiaj teb thiab tib neeg yuav maj mam tig rov qab los nyob li ib txwm muaj, thiab yog li ntawd tau tsim tsa lub nceeg vaj hauv Kuv lub siab nyob rau hauv ntiaj teb. Nyob rau hauv lub nceeg vaj, tag nrho Vajtswv cov neeg rov qab tau lub neej ntawm tib neeg li ib txwm muaj lawm. Lub caij ntuj no uas no khov tau ploj mus lawm, tau raug hloov los ntawm ib lub ntiaj teb ntawm tej nroog uas muaj lub caij nplooj ntoos hlav, qhov chaw uas lub caij nplooj ntoos hlav kav thawm xyoo. Tib neeg yuav tsis raug kev nyuaj siab ntsuav hauv tib neeg lub ntiaj teb ntxiv lawm, thiab lawv yuav tsis tiv txoj kev txias ntawm tib neeg lub ntiaj teb ntxiv lawm. Tib neeg ib leeg tsis tawm tsam ib leeg, ib lub teb chaws tsis ua tsov rog rau ib lub teb chaws, tsis muaj txoj kev sib tua nruj tsiv thiab ntshav ntws los ntawm txoj kev sib tua nruj tsiv ntxiv lawm; txhua daim av muaj txoj kev xyiv fab puv npo, thiab txhua txhia qhov chaw puv npo txoj kev sov siab nyob rau hauv tib neeg. Kuv mus thoob plaws lub ntiaj teb, Kuv xyiv fab txij puag saum Kuv lub zwm txwv los, thiab Kuv nyob rau hauv tej hnub qub. Cov tim tswv fij cov nkauj tshiab thiab cov kev seev cev tshiab rau Kuv. Lawv tus kheej lub siab muag yuav tsis ua rau kua muag ntws tawm los ntawm lawv tej ntsej muag ntxiv li lawm. Kuv yuav tsis hnov, ntawm Kuv xub ntiag, lub suab quaj nyiav ntawm cov tim tswv ntxiv li lawm, thiab yuav tsis muaj leej twg qhia lawv tej kev nyuaj siab rau Kuv ntxiv li lawm. Hnub no, nej txhua tus nyob rau ntawm Kuv xub ntiag; tag kis, nej txhua tus yuav nyob rau hauv Kuv lub nceeg vaj. Qhov no tsis yog txoj koob hmoov uas loj tshaj plaws uas Kuv muab rau tib neeg lod?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus mus rau Tag Nrho lub Qab Ntuj Khwb, Tshooj 20).